\id DEU Deuteronomy, HIRI MOTU BIBLE, PNG, [1986], 4/92 rl 
\h DEUTERONOMI 
\toc1 TARAVATU HENIA LOU (DEUTERONOMI) 
\toc2 DEUTERONOMI 
\mt1 TARAVATU HENIA LOU  
\mt2 (DEUTERONOMI)  
\c 1  
\s1 Mose ese Sinai idia rakatania ena sivarai ia harorolaia  
\p
\v 1 Inai buka lalonai Mose ese Israela taudia ibounai ia haroro henidia. Ia haroro gabuna be taunimanima noho lasi tano, Ioridane Sinavai ena dina daekau kahana dekenai. Unai gabu be Araba, Supu kahirakahira. Kahana ta dekenai be Parana, ma kahana ta dekenai be Topele, Labana, Haseroto bona Disahaba.  
\v 2 Sinai Ororo dekena amo bema tau ta ia raka lao ela bona Kadesi Baranea, raka loaloa dinadia be 11 bamona, bema Edoma ena ororo dalana dekena amo ia lao.   
\p
\v 3 To Israela taudia Aigupito idia rakatania murinai, lagani 40 idia lao ore vadaeni. Bona unai lagani 40 ena hua 11 ena dina ginigunana neganai, Mose ese Israela taudia dekenai ia haroro, Lohiabada ese ia henia oda ibounai idia dekenai ia hadibaia.  
\v 4 Unai be Sihona, Amoro ena king, Hesebona dekenai ia noho tauna, bona Oga, Basana ena king, Asataroto dekenai bona Ederei dekenai ia noho tauna Lohiabada ese ia halusia murinai.   
\p
\v 5 Israela taudia be Moaba tano dekenai, Ioridane Sinavai dina daekau kahanai neganai, Mose ese Dirava ena taravatu ia hadibaia hamatamaia.   
\p
\v 6 Mose ia gwau, “Lohiabada, iseda Dirava, Sinai Ororo dekenai ita dekenai ia hamaoroa, ia gwau: Umui be nega daudau inai ororo dekenai umui noho kava.  
\v 7 Harihari umui toreisi, umui laolao, Amoro taudia edia ororo kahadia dekenai umui lao, bona Amoro ia hagegea tanona ibounai. Ioridane Sinavai tanona ena tano palaka, ororo gabudia bona henuna gabudia, diho kahana ela bona kone kahana dekenai do umui lao. Kanana tanona dekenai do umui lao, bona Lebanona tanona do umui hanaia lao ela bona Euperate Sinavai.  
\v 8 Unai tano ibounai be umui dekenai lau henia vadaeni. Umui lao, unai tano do umui abia, badina lau Lohiabada ese emui sene taudia Aberahamo, Isako bona Iakobo dekenai lau gwauhamata henidia, unai tano do idia abia, edia tubudia danu.”   
\s1 Mose ese gunalaia taudia ia abia hidi  
\p
\v 9 Mose ese Israela taudia ia hamaoroa, ia gwau, “Ita be Sinai Ororo do noho neganai, lau ese umui lau hamaoroa, lau gwau: Umui lau hakaua noho ena gaukara be metau herea. Lau sibona lau karaia diba lasi.  
\v 10 Lohiabada, emui Dirava ese umui ia hanamoa dainai umui be momo herea, emui bese taudia be guba ena hisiu edia momo bamona.   
\p
\v 11 “Lauegu guriguri be inai: Lohiabada, emui sene taudia edia Dirava ese nega 1000 dekena amo umui emui bese do ia habadaia, bona umui do ia hanamoa noho, ia ese umui dekenai ia gwauhamata hegeregerena.   
\p
\v 12 “To lau sibona ese edena bamona umui do lau naria noho? Emui hekwarahi bona emui hepapahuahu be edena bamona do lau hamaoromaoroa?  
\v 13 Namona be ladana namo taudia haida iduhu ta ta dekena amo do umui abia hidi, aonega bona diba momo taudia, bona lau ese umui emui gunalaia taudia idia do lau halaoa.   
\p
\v 14 “Vadaeni umui ese lau dekenai umui haere, umui gwau, ‘Mose e, oiemu hereva be namo, unai bamona do oi karaia.’   
\p
\v 15 “Unai dainai lau ese emui iduhu edia lohia taudia lau abia, mai edia aonega bona mai edia diba taudia, bona umui emui gunalaia taudia idia lau halaoa. Idia haida ese taunimanima 1000 idia gunalaia, haida ese 100 idia gunalaia, haida ese 50, ma haida ese 10, bona iduhu naria taudia danu lau ese lau abia hidi.   
\p
\v 16 “Unai neganai danu emui kota biagudia lau hamaoroa, lau gwau, ‘Umui emui varavara edia hepapahuahu umui tahua neganai, mai laloa maoromaoro bona momokani danu do umui kota henia. Bema emui tadikakana bona idau tauna edia hepapahuahu umui tahua neganai, maka tamona dekenai do umui kota henia.   
\p
\v 17 “ ‘Do umui kota henidia neganai, emui kota hereva do umui hagagevaia lasi, to dagi bada tauna bona dagi maragi tauna ruaosi be do idia hegeregere sibona emui vairana dekenai. Tau ta do umui gari henia lasi, badina be Kota Biaguna korikori be Dirava sibona. Bema hepapahuahu ta be umui dekenai ia auka, o bema kota ta totona umui daradara neganai, lau dekenai do umui mailaia, bona lau ese do lau tahua.’  
\v 18 Unai neganai danu, do umui karaia karadia ibounai umui dekenai do lau hadibaia.”   
\s1 Hasinadoa taudia Mose ese ia abia hidi, Kadesi Baranea dekena amo ia siaidia  
\p
\v 19 Ma Mose ia gwau, “Vadaeni, Lohiabada, iseda Dirava ita ia oda hegeregerena, Sinai Ororo dekena amo ita raka mai, bona taunimanima idia noho lasi tano dikana bona mai garina danu ita hanaia, ela bona Amoro taudia edia tano, ororo kahana dekenai ita ginidae, gabu ena ladana Kadesi Baranea.  
\v 20 Vadaeni lau ese umui lau hamaoroa, lau gwau, ‘Umui be Amoro taudia edia ororo tano umui ginidae vadaeni, Lohiabada ese umui ia henia noho tano be inai.  
\v 21 Umui itaia, Lohiabada, emui Dirava, ese umui ia henia tano be unai. Do umui toreisi, unai tano do umui abia, badina Lohiabada, emui sene taudia edia Dirava ese inai bamona umui ia oda henia vadaeni. Do umui gari lasi, do umui daradara lasi.’   
\p
\v 22 “Unai neganai umui ibounai be lau dekenai umui mai, umui gwau, ‘Hasinadoa taudia do ita siaia guna, idia ese tano be do idia itaia, bona sivarai do idia mailaia, edena dala dekenai do ita raka, bona edena hanua do ita davaria.’   
\p
\v 23 “Emui hereva lau abia dae, bona lau ese tatau 12 emui huanai dekena amo lau abia hidi, iduhu ta ta dekena amo tatau ta ta lau abia.   
\p
\v 24 “Vadaeni idia be ororo dekena amo idia raka lao, ela bona Esakola Koura dekenai idia ginidae, unuseni hasinadoa gaukara idia karaia.  
\v 25 Unai tano ena au huahua haida edia imana dekenai idia abia, bona idia giroa mai, sivarai ita dekenai idia mailaia, idia gwau, ‘Lohiabada iseda Dirava ese ita dekenai ia henia noho tano be namo herea.’   
\s1 Israela taudia ese Lohiabada ena oda hereva idia negea  
\p
\v 26 “To umui ura lasi umui toreisi, bona umui ese Lohiabada emui Dirava ena hereva umui utua.  
\v 27 Emui palai rumadia lalonai umui maumau noho, umui gwau, ‘Lohiabada ese ita ia badu henia noho. Ia ese Aigupito dekena amo ita ia hakaua mai, Amoro taudia edia imana dekenai ita do ia henia, idia ese ita do idia alaia totona.  
\v 28 Edeseni do ita lao? Ita be ita gari noho. Ita siaia hasinadoa taudia ese ita idia hamaoroa unai tano idia noho taudia be bada herea bona lata herea, to ita be maragi bona kwadogi. Hasinadoa taudia danu idia gwau unai tano ena hanua be idia bada, edia magu danu be idia lata, edia ataiai be guba dekenai idia daekau. Ma iseda hasinadoa taudia ese Anakima tau badadia unai tano dekenai idia itaia!’   
\p
\v 29 “To lau ese lau hereva, lau gwau, ‘Unai taudia dekenai do umui gari lasi.  
\v 30 Lohiabada, emui Dirava, umui emui vairana dekenai ia raka noho Diravana ese umui dainai do ia tuari, Aigupito dekenai ia karaia hegeregerena.  
\v 31 Tano kaukau lalonai danu oi itaia vadaeni, Lohiabada, emui Dirava ese mai mauri danu umui ia hakaua mai inai gabu dekenai, tau ta ese iena natuna ia huaia bamona.’   
\p
\v 32 “To umui ese Lohiabada, emui Dirava, umui abidadama henia lasi.  
\v 33 Lohiabada ese nega ibounai umui ia gunalaia, emui kamepa gabudia ia tahua, emui dala danu ia hedinaraia, lahi dekena amo hanuaboi neganai, bona ori dekena amo dina dekenai, to umui abidadama henia lasi.   
\p
\v 34 “Lohiabada ese emui hereva ia kamonai, vadaeni ia badu, bona gwauhamata metauna ia gwauraia, ia gwau,  
\v 35 ‘Momokani inai uru ena tau dikadia ta ese inai tano namona, lau ese emui sene taudia dekenai lau gwauhamata do lau henidia tano, do ia itaia lasi.  
\v 36 To Kaleba Iepune sibona ese do ia itaia, bona iena aena dekenai ia moia tanona lau ese do lau henia, iena natuna do lau henidia danu, badina be ia ese Lohiabada ia abidadama henia mai ena kudouna ibounai danu.’ ”   
\p
\v 37 Ma Mose ia gwau, “Umui Israela taudia dainai Lohiabada ese lau dekenai danu ia badu, bona ia gwau, ‘Mose e, oi danu be unai tano do oi raka vareai lasi.  
\v 38 To Iosua Nunu, oiemu hesiai tauna, be unai tano do ia raka vareai. Do oi hamaoroa, do ia goada, badina be ia ese Israela taudia unai tano dekenai do ia hakaua vareai.’   
\p
\v 39 “Unai neganai Lohiabada ese ita ibounai ia hamaoroa, ia gwau, ‘Emui natudia, tuari taudia haida ese do idia abia mauri umui gwau, bona emui natuna maragidia, kara namo bona kara dika do idia diba lasi, idia be do idia raka vareai. Unai tano do lau henidia, edia tano.  
\v 40 To umui be do umui giroa lou, tano kaukau dekenai ma do umui raka loaloa, Davara Kakakaka ena kahana dekenai.’   
\p
\v 41 “Vadaeni umui ese lau Mose dekenai umui haere, umui gwau, ‘Ai be ai kara dika vadaeni Lohiabada dekenai. Ai be do ai lao, do ai tuari, Lohiabada ese ia oda henia hegeregerena.’  
\p “Vadaeni emui tuari gaudia umui abia hegaegae, umui laloa ororo kahana dekenai do umui tuari haraga diba.  
\v 42 To Lohiabada ese lau dekenai ia hereva, ia gwau, ‘Idia do oi hamaoroa, inai bamona: Tuari dekenai do umui lao lasi, badina be lau Lohiabada be umui dekenai lau noho lasi. Do umui lao lasi, umui idia tuari henia taudia ese umui do idia halusia garina.’   
\p
\v 43 “Lohiabada ena sisiba be umui dekenai lau hamaoroa, to umui kamonai lasi. Lohiabada ena hereva umui negea, bona umui hekokoroku, vadaeni ororo dekenai umui daekau.   
\p
\v 44 “Vadaeni Amoro taudia be unai ororo dekena amo idia diho mai, umui idia lulua, nanigo ese umui bema idia lulua bamona. Vadaeni idia ese Seiri dekenai umui idia halusia, bona umui idia lulua lao ela bona Horoma.   
\p
\v 45 “Vadaeni umui giroa mai, bona Lohiabada ena vairana dekenai umui taitai, to Lohiabada ese emui taitai ia kamonai lasi, bona emui hereva ia abia dae lasi.   
\p
\v 46 “Unai dainai umui be nega daudau Kadesi dekenai umui noho.”   
\c 2  
\s1 Lagani 40 lalonai Israela taudia be taunimanima noho lasi tano dekenai idia noho  
\p
\v 1 Mose ma ia gwau, “Unai murinai ita giroa lao, tano kaukau dekenai ita loaloa, Davara Kakakaka ena kahana dekenai, Lohiabada ese lau ia oda henia hegeregerena. Ita be nega daudau Seiri ena ororo gabudia dekenai ita raka loaloa.   
\p
\v 2 “Vadaeni Lohiabada ese lau ia hamaoroa, ia gwau:  
\v 3 Inai ororo dekenai umui loaloa daudau vadaeni, harihari mirigini kahana dekenai do umui lao.  
\v 4 Bona Israela taudia do oi hamaoroa, oi gwau, ‘Harihari umui be emui varavara, Esau ena tubuna taudia edia tano dekenai do umui raka hanaia, idia be Seiri dekenai idia noho. Idia ese umui dekenai do idia gari. Unai dainai do umui naria namonamo,  
\v 5 tuari idia dekenai do umui hamatamaia lasi, badina be idia edia tano sisinasisina umui dekenai do lau henia lasi, emui aena palapala tamona umui moia ena tano ena bada danu do lau henia lasi, badina Seiri Ororo be Esau dekenai lau henia, iena tano.   
\p
\v 6 “ ‘Esau besena taudia dekena amo do umui ania aniani do umui hoia, siliva moni davana, bona idia dekena amo danu do umui inua ranu do umui hoia, siliva moni davana.’   
\p
\v 7 “Badina be Lohiabada emui Dirava ese umui ia hanamoa vadaeni. Unai dainai emui gaukara ibounai ena anina ia vara namonamo. Bona Lohiabada ese inai taunimanima noho lasi tanona umui loaloa lalonai ia ese umui ia naria namonamo vadaeni. Io, inai lagani 40 lalonai Lohiabada emui Dirava ese umui ia naria vadaeni, emui aniani bona gau ibounai ia henia.   
\p
\v 8 “Unai dainai ita raka lao, iseda varavara taudia, Esau ena bese taudia, Seiri dekenai idia noho, ita rakatania. Elata bona Esiono Gebere dekena amo ia mai dala ladana Araba danu ita rakatania, bona mirigini kahana dekenai ita giroa lao, Moaba ena tano kaukau dalana dekenai.   
\p
\v 9 “Vadaeni Lohiabada ese lau dekenai ia oda, ia gwau, ‘Moaba taudia, Lota ena bese, do umui dagedage henia lasi, bona do umui tuari henidia lasi, badina be edia tano sisina umui dekenai do lau henia lasi. Lau ese Ara hanua badana, mai ena tano ibounai, Lota ena bese taudia dekenai lau henia, edia tano.’ ”   
\p
\v 10 Gunaguna Emima bese goadana be Ara hanua dekenai idia noho, idia be taunimanima latadia, Anakima taudia bamona, bona idia be momo herea.  
\v 11 Haida ese Emima taudia edia ladana idia atoa Repaima, Anakima taudia edia ladana idia atoa hegeregerena, to Moaba taudia ese edia ladana idia atoa, Emima.  
\v 12 Hori taudia danu gunaguna Seiri dekenai idia noho, to Esau ena bese taudia ese Hori taudia idia lulua, bona idia hadikaia ore, bona edia tano idia abia, Israela taudia be Lohiabada ese ia henidia tano idia abia dalana hegeregerena.   
\p
\v 13 Mose ma ia haroro, ia gwau, “Ma Lohiabada ese ita ia hamaoroa Serede Sinavai do ita hanaia. Unai dainai ita ese Serede Sinavai ita hanaia.  
\v 14 Kadesi Baranea ita rakatania ela bona Serede Sinavai ita hanaia, be lagani ibounai 38. Unai lagani 38 edia lalonai unai uru ena Israela tuari taudia ibounai idia mase ore, Lohiabada ese ia hereva hegeregerena.  
\v 15 Badina be Lohiabada ese ia dagedage henidia noho, idia ia hadikaia noho, ela bona idia mase ore.   
\p
\v 16 “Inai Israela tuari taudia ibounai idia mase ore murinai,  
\v 17 Lohiabada ese lau dekenai ia hereva, ia gwau:  
\v 18 Hari dina Moaba ena tano hetoana do umui hanaia, Ara dekenai.  
\v 19 Bona Amono besena edia tano hetoana do umui raka kahirakahira neganai do umui dagedage henidia lasi, bona tuari henidia lasi. Amono besena edia tano sisina umui dekenai do lau henia lasi, badina unai tano be Lota ena besena taudia dekenai lau henia, edia tano.”   
\p
\v 20 Unai tano ena ladana ta be Repaima, badina gunaguna Repaima taudia be unuseni idia noho. To Amono taudia ese edia ladana idia atoa, Samusumima.  
\v 21 Inai Samusumima taudia be taunimanima badadia, bona momo herea, edia lata be Anakima taudia edia lata hegeregerena. To Lohiabada ese idia ia hadikaia ore, vadaeni Amono taudia ese edia noho gabudia idia abia, bona edia tano idia abia.   
\p
\v 22 Lohiabada ese unai bamona danu ia karaia Seiri dekenai Esau bese taudia totona. Ia ese Hori taudia ia hadikaia ore, vadaeni Esau bese taudia ese edia tano idia abia, bona unuseni idia noho ia mai bona hari.   
\p
\v 23 Avima besena danu be unai bamona. Idia be kone kahana hanua maragidia dekenai idia noho ela bona Gasa. To Kerete taudia be Kerete motumotu dekena amo idia mai, Avima taudia idia alaia ore, bona edia tano idia abia.   
\p
\v 24 “Ma Lohiabada ese ita ia hamaoroa, ia gwau: Umui toreisi, do umui raka lao, Aranona Koura do umui hanaia, Sihona, Amoro tauna, Hesebona ena king, bona iena tano be emui siahu henunai lau atoa vadaeni. Do umui tuari henia, bona iena tano do umui raka vareai, do umui abia.  
\v 25 Hari dina dekenai lau ese guba henunai idia noho bese ibounai dekenai gari bada do lau havaraia. Vadaeni idia ese emui sivarai do idia kamonai, bona gari dainai umui emui vairana dekenai do idia manokamanoka.”   
\s1 Israela taudia ese king Sihona idia halusia  
\p
\v 26 Ma Mose ia gwau, “Unai neganai Kedemoto tano kaukau dekena amo hesiai taudia lau siaia, king Sihona dekenai maino hereva idia gwauraia, idia gwau,  
\v 27 ‘Mani emu kara, oiemu tano do ai raka hanaia. Dala sibona dekenai do ai raka, dala dekena amo do ai raka siri lasi, idiba kahanai o lauri kahanai.  
\v 28 Bona aniani be umui dekena amo do ai hoia, moni davana, ranu danu umui dekena amo do ai abia, moni davana. To mani ai do umui koua lasi, aena dekenai emui tano do ai raka hanaia,  
\v 29 ela bona Ioridane Sinavai do ai hanaia, bona Lohiabada ese ai ia henia tano dekenai do ai ginidae. Esau ena bese taudia, Seiri dekenai idia noho, bona Moaba taudia, Ara dekenai idia noho, ese ai idia koua lasi, bona edia tano ai raka hanaia.’   
\p
\v 30 “To king Sihona, Hesebona ena king ese iseda dala ia koua, iena tano do ita hanaia lasi ia gwau. Badina be Lohiabada emui Dirava ese Sihona ena lauma ia ha-aukaia bona iena lalona ia habadua. Unai dainai ita ese ita tuari henia, bona ita halusia diba, bona iena tano, ita do noho tanona ita abia diba totona.   
\p
\v 31 “Vadaeni Lohiabada ese lau Mose dekenai ia hereva, ia gwau, ‘Oi itaia, king Sihona bona ena tano lau hamanokaia vadaeni emui vairana dekenai. Unai tano do umui abia, bona unuseni do umui noho.’   
\p
\v 32 “Sihona, mai ena tuari taudia danu be Iahasa hanua kahirakahira ita ia tuari henia.  
\v 33 To Lohiabada iseda Dirava ese iseda siahu henunai Sihona ia atoa, vadaeni Sihona bona iena natuna tau, bona iena tuari taudia ibounai ita alaia mase.   
\p
\v 34 “Unai neganai danu Sihona ena hanua ibounai ita abia, ita hadikaia ore, bona edia tatau bona hahine, memero bona kekeni, ita alaia ore, ta ia heau mauri lasi.  
\v 35 To ita ese tuari dekenai ita abia kohu, bona boromakau ita abia lao.   
\p
\v 36 “Aroere, Aranona Koura ena isena dekenai, bona koura ena huanai ia noho hanua dekena amo ela bona Gileada, hanua ta ia auka lasi, ibounai ita abia, badina be Lohiabada iseda Dirava ese ita ia durua dainai.   
\p
\v 37 “To ita ese Amono taudia edia tano, Iaboka Sinavai ena isena dekenai, bona ororo hanua ta kahirakahira ita lao lasi. Badina be Lohiabada iseda Dirava ese ita dekenai ia taravatua, ia gwau do ita raka vareai kava lasi.”   
\c 3  
\s1 Israela taudia ese king Oga idia halusia  
\p
\v 1 Ma Mose ia hereva, ia gwau, “Unai gabu dekena amo ita be Basana dekenai ia lao dalana dekenai ita raka lao, bona king Oga, mai ena tuari taudia ibounai ita tuari henia totona ia mai, Ederei hanua kahirakahira.  
\v 2 To Lohiabada ese lau ia hamaoroa, ia gwau, ‘Oga dekenai do umui gari lasi. Lau ese ia bona iena tuari taudia ibounai emui siahu henunai do lau atoa. Sihona, Amoro edia king, Hesebona dekenai ia noho tauna dekenai umui karaia hegeregerena, be Oga dekenai danu do umui karaia.’   
\p
\v 3 “Vadaeni, Lohiabada ese king Oga bona iena orea taudia iseda siahu henunai ia atoa, bona ita ese idia ibounai ita alaia mase. Idia ta ia heau mauri lasi.   
\p
\v 4 “Unai neganai danu Oga ena hanua ibounai ita abia, hanua ta ita dekena amo ia kwalimu lasi. Hanua ibounai 66 ita abia, Aragobo tano ibounai. Oga, Basana ena king ena basileia be unai.  
\v 5 Inai hanua ibounai be mai edia magu latadia, bona mai edia magu iduara, bona mai auri latadia, iduara loka totona gaudia. Hanua maragidia momo, mai edia magu lasi gaudia danu ita abia.   
\p
\v 6 “Vadaeni ita ese unai hanua ibounai ita hadikaia ore, bona hanua ta ta ibounai lalonai tatau bona hahine, memero bona kekeni ita alaia mase, Sihona, Hesebona ena king ena hanua dekenai ita karaia hegeregerena.  
\v 7 Idia edia boromakau bona edia kohu ibounai danu ita abia, iseda.   
\p
\v 8 “Unai neganai danu unai Amoro king ruaosi edia tano ita abia Ioridane Sinavai ena dina daekau kahanai, Aranona Sinavai ela bona Heremona Ororo tanona.  
\v 9 Heremona Ororo be Sidono taudia ese ena ladana idia atoa, Siriona, to Amoro taudia ese ena ladana idia atoa, Seniri.   
\p
\v 10 “King Oga, Basana tauna ena tano ibounai ita abia, ororo edia ataiai idia noho hanua ibounai, Gileada tano ibounai, Basana tano ibounai, ela bona Saleka hanua bona Ederei hanua.”   
\p
\v 11 Unai Oga, Basana ena king be Repaima tauna. Repaima taudia ibounai idia mase ore, Oga sibona ia noho. Iena mahuta patana be auri dekena amo idia karaia, bona inai pata be do noho Raba hanua dekenai, Amono taudia edia tano dekenai. Unai pata ena lata be 4 mita bona iena lababa be 2 mita.   
\s1 Ioridane Sinavai ena dina daekau kahanai idia noho iduhu  
\p
\v 12 Ma Mose ia hereva, ia gwau, “Unai tano ita abia neganai, lau ese Rubena bona Gado iduhu taudia dekenai, Aroere, Aranona Sinavai ena isena dekenai ia noho hanua, bona Gileada Ororo kahana, mai ena hanua danu, lau henia.   
\p
\v 13 “To Gileada kahana bona Basana ibounai, Oga ena basileia ibounai, Aragobo tanona ibounai, be lau ese Manase iduhu kahana taudia dekenai lau henia. Unai Basana tano ena ladana idia atoa, ‘Repaima taudia edia tano.’   
\p
\v 14 “Iairi Manase ese Basana tano, Aragobo tano ibounai ia lao bona Gesuru taudia edia tano, bona Makata taudia edia tano, ia abia. Unai tano ena hanua edia ladana idia atoa, Havoto Iairi, bona unai ladana idia gwauraia noho ia mai bona hari.   
\p
\v 15 “Gileada tano be Makiri dekenai lau henia.  
\v 16 Rubena bona Gado iduhu taudia dekenai Gileada tano ela bona Aranona Sinavai lau henia. Edia diho kahana tano hetoana be unai sinavai ena huana dekenai, bona edia mirigini kahana tano hetoana be Iaboka Sinavai, Amono taudia edia tano hetoana.  
\v 17 Edia dina diho kahana tano hetoana be Ioridane Sinavai, Kinerete Gohu, mirigini kahana dekena amo, ela bona Davara Mase, ma ela bona Pisiga Ororo, dina daekau kahana dekenai.”   
\p
\v 18 Ma Mose ia gwau, “Unai neganai lau ese idia lau hamaoroa, lau gwau: Lohiabada emui Dirava ese inai tano umui dekenai ia henia vadaeni, emui tano. To hari emui goada taudia ibounai ese edia tuari gaudia do idia abia, bona Ioridane Sinavai do umui hanaia, emui varavara Israela taudia edia vairana dekenai.  
\v 19 To emui adavana bona natuna bona emui boromakau, (lau diba emui boromakau be momo), be umui dekenai lau henia vadaeni hanua dekenai do idia noho.  
\v 20 Do umui tuari noho, ela bona Lohiabada ese do ia henidia tano, Ioridane Sinavai ena dina diho kahanai be emui varavara taudia ese do idia noholaia, mai edia maino bona laga-ani danu, umui ese noho namo gabuna umui abia vadaeni bamona. Unai murinai umui giroa mai diba, bona inai umui dekenai lau henia vadaeni tano dekenai do umui noho.   
\p
\v 21 “Unai neganai lau ese Iosua lau hadibaia, lau gwau: Lohiabada oiemu Dirava ese unai king ruaosi, Sihona bona Oga dekenai ia karaia kara be oi itaia vadaeni. Do umui hanaia lao basileia ibounai dekenai danu Lohiabada ese unai bamona do ia karaia.  
\v 22 Unai dainai idia dekenai do oi gari lasi, badina be Lohiabada oiemu Dirava ese oi totona do ia tuari.”   
\s1 Lohiabada ese Mose ia koua, vadaeni Kanana dekenai ia vareai lasi  
\p
\v 23 “Unai neganai lau ese Lohiabada lau noia goada, lau gwau,  
\v 24 ‘Lohiabada, egu King e, lau dekenai oi hedinaraia dainai, lau diba oi ese do oi karaia kara badadia be oi hamatamaia vadaeni inai. To gabeai kara badadia momokani ma do oi karaia. Edena dirava, guba dekenai o tanobada dekenai ese gaukara badadia bona siahu hoa karadia do ia karaia diba, oi ese oi karaia vadaeni hegeregerena?  
\v 25 Lohiabada e, mani emu kara lau ura Ioridane Sinavai do lau hanaia, tano palaka namona, ororo gabudia namodia ela bona Lebanona do lau itaia.’   
\p
\v 26 “To Lohiabada ese lau dekenai ia badu henia, umui dainai, bona lauegu noinoi ia kamonai lasi. Ia ese lau dekenai ia haere, ia gwau, ‘Vadaeni, unai hereva do oi gwauraia lou lasi.  
\v 27 Pisiga Ororo dekenai do oi daekau lao, ena ataiai do oi gini, oiemu matana do oi negea, tano be oiemu matana dekenai do oi itaia, mirigini kahana, diho kahana, dina daekau kahana, dina diho kahana. Inai ibounai do oi itaia namonamo, badina be inai Ioridane Sinavai be do oi hanaia lasi.   
\p
\v 28 “ ‘To Iosua do oi hadibaia, bona do oi hagoadaia, bona iena lalona do oi ha-aukaia, badina be ia ese inai bese taudia Ioridane Sinavai unai kahana, oi itaia tano, dekenai do ia hakaudia hanai.’   
\p
\v 29 “Unai dainai, ita be koura dekenai ita kamepa, Bete Peoro hanua kahirakahira.”   
\c 4  
\s1 Mose ese Israela taudia ia hamaoroa, Dirava do idia kamonai henia  
\p
\v 1 Mose ese Israela taudia ia hamaoroa, ia gwau, “Lau ese umui lau hadibaia taravatu ibounai do umui kamonai henia bona badinaia. Unai bamona neganai Lohiabada, emui sene taudia edia Dirava umui dekenai do ia henia tanona, be do umui raka vareai bona abia.  
\v 2 Umui dekenai lau henia vadaeni taravatu dekenai hereva ma ta do umui atoa lasi, bona unai taravatu dekena amo hereva ta do umui kokia lasi. To Lohiabada, emui Dirava ena oda, lau ese umui dekenai lau henia gaudia do umui badinaia.   
\p
\v 3 “Bala Peoro dekenai Lohiabada ena kara umui sibona matana dekenai umui itaia vadaeni. Lohiabada emui Dirava ese umui emui huanai Bala idia tomadiho henia taudia ibounai ia aladia mase.  
\v 4 To umui ese Lohiabada, emui Dirava umui abidadama henia taudia ibounai, be umui mauri noho ia mai bona harihari.   
\p
\v 5 “Umui laloa, Lohiabada, lauegu Dirava ese lau dekenai ia henia oda bona taravatu be umui dekenai lau hadibaia vadaeni. Do umui raka vareai bona abia tano dekenai, unai oda bona taravatu do umui badinaia.  
\v 6 Idia do umui badinaia namonamo, badina be emui aonega, bona emui laloa goada, be bese idauidau dekenai do ia hedinarai. Bona inai taravatu ibounai do idia kamonai neganai do idia gwau, ‘Momokani inai bese badana be aonega bona laloa goada besena!’   
\p
\v 7 “Badina be edena bese badana edia dirava ese iena bese dekenai ia noho kahirakahira, Lohiabada iseda Dirava ita kahirakahira ia noho bamona? Ita ese durua totona Dirava dekenai ita boiboi henia neganai, noinoi ibounai ia ese ia kamonai.  
\v 8 Bona edena bese badana edia taravatu be maoromaoro, lau ese hari dina umui dekenai lau henia taravatu ibounai bamona?   
\p
\v 9 “Do umui naria namonamo! Emui mauri do umui naria, Lohiabada ena hoa kara do umui laloaboio garina. To emui mauri dinadia ibounai lalonai, emui matana idia itaia vadaeni hoa gaudia do umui laloatao. Umui emui natudia bona tubudia dekenai inai gaudia do umui hadibaia namonamo.  
\v 10 Sinai Ororo dekenai, Lohiabada emui Dirava ena vairanai umui gini dinana do umui laloa. Unai neganai Lohiabada ese lau dekenai ia hereva, ia gwau, ‘Israela taudia do oi haboua lauegu vairana dekenai, lauegu hereva do idia kamonai, vadaeni tanobada dekenai idia noho dinadia ibounai, lau dekenai do idia matauraia bona kamonai henia. Bona lauegu hereva be edia natudia dekenai do idia hadibaia danu, lau dekenai do idia gari henia totona.’   
\p
\v 11 “Emui natudia inai bamona do umui hadibaia: Umui raka lao, ororo badibadinai umui gini. Unai neganai lahi hururuhururu be ororo dekena amo ia daekau guba dekenai, bona ori koremana ese dibura dekena amo unai gabu ia koua.  
\v 12 Vadaeni Lohiabada ese lahi lalona dekena amo umui dekenai ia hereva, iena hereva umui kamonai, to iena toana umui itaia lasi, iena gadona sibona umui kamonai.  
\v 13 Vadaeni iena taravatu umui dekenai ia hadibaia, taravatu 10. Ia gwau inai taravatu 10 do umui badinaia. Nadi palaka rua dekenai inai taravatu ia torea.  
\v 14 Unai neganai Lohiabada ese lau ia hamaoroa, iena taravatu, bona iena oda umui dekenai do lau hadibaia. Vadaeni Ioridane Sinavai do umui hanaia murinai, do umui abia tanona lalonai inai taravatu bona oda do umui badinaia.   
\s1 Kaivakuku dekenai do idia tomadiho henia lasi  
\p
\v 15 “Lohiabada ese Sinai Ororo ena lahi dekena amo umui dekenai ia hereva dinana dekenai iena toana umui itaia lasi. Unai dainai do umui naria namonamo,  
\v 16 umui kerere, laulau ta umui karaia garina, tau ena laulauna o hahine ena laulauna,  
\v 17 o tanobada ena mauri gauna ta ena laulauna, o ataiai dekenai ia roho manuna ta ena laulauna,  
\v 18 o tano dekenai ia rau gauna ta ena laulauna, o davara dekenai ia noho gwarume ta ena laulauna.  
\v 19 Do umui naria namonamo danu, guba dekenai umui itaia gaudia, dina bona hua bona hisiu be do umui lalodia kerere, bona do umui tomadiho henidia garina. Lohiabada emui Dirava ese inai gaudia idau bese taudia dekenai ia henia, do idia tomadiho henidia totona.  
\v 20 To Lohiabada ese Aigupito dekena amo umui ia hamauria, amu ena lahi dekena amo umui ia hamauria bamona. Umui ia veria mauri vadaeni, iena bese korikori do umui lao totona. Hari dina dekenai umui be iena bese.   
\p
\v 21 “Lohiabada ese lau dekenai ia badu umui dainai, vadaeni ia gwauhamata, lau ese Ioridane Sinavai do lau hanaia lasi. Bona ia gwau Lohiabada emui Dirava ese umui dekenai do ia henia tano namona do lau raka vareai lasi.  
\v 22 Lau be inai kahana tano dekenai do lau mase, Ioridane Sinavai unai kahana be do lau hanaia lasi. To umui be do umui hanaia, bona unai tano namona do umui abia.  
\v 23 Do umui naria namonamo, Lohiabada emui Dirava ese umui ia henia taravatu be do umui laloaboio lasi. Bona laulau ta do umui karaia lasi, badina be Lohiabada emui Dirava ese unai bamona kara ia taravatua momokani.  
\v 24 Badina be Lohiabada emui Dirava be lahi badana momokani bamona. Ia ese gau ibounai ia araia haorea noho. Ia ura lasi momokani idau dirava do umui abia.   
\p
\v 25 “Umui be unai tano dekenai nega daudau do umui noho neganai, bona emui natudia bona tubudia idia vara, do umui naria namonamo noho, kara dika do umui karaia garina, bona gau ta ena laulauna do umui karaia garina. Badina be Lohiabada ena vairana dekenai inai kara be dika momokani, bona ia be do ia badu.  
\v 26 Lau ese hari dina dekenai guba ena ladana dekenai bona tanobada ena ladana dekenai umui lau hamaoroa, bema lau dekenai umui kamonai henia lasi, unai tano dekenai do umui noho daudau lasi. Oibe, Ioridane Sinavai do umui hanaia murinai umui abia tanona dekenai do umui mauri daudau lasi, to do umui mase ore.  
\v 27 Lohiabada ese bese idauidau edia huanai umui do ia lulua. Bona unai idau bese edia huanai umui noho gabudia dekenai, do umui be momo lasi.  
\v 28 Unai gabudia dekenai au dirava bona nadi dirava, taunimanima edia imadia dekenai karaia gaudia do umui tomadiho henia. Unai dirava be gau idia itaia diba lasi, idia kamonai diba lasi, idia aniani diba lasi, bona idia bonaia diba lasi.  
\v 29 To unai gabudia dekenai, umui ese Lohiabada emui Dirava do umui tahua. Bona bema Dirava umui tahua mai emui lauma ibounai neganai, do umui davaria.  
\v 30 Gabeai dinadia, inai hisihisi ibounai umui dekenai idia vara neganai, Lohiabada emui Dirava dekenai do umui giroa lou, bona do umui kamonai henia.  
\v 31 Badina be Lohiabada emui Dirava be bogahisihisi Diravana, ia ese umui do ia rakatania lasi, umui do ia hadikaia ore lasi. Bona iena gwauhamata, emui sene taudia dekenai ia henia gauna do ia laloaboio lasi.   
\p
\v 32 “Nega gunadia edia sivarai do umui laloa, Dirava ese taunimanima ia karaia hamatamaia tanobada dekenai ia mai bona harihari. Tanobada kahana kahana ibounai do umui tahua. Kara badana ta inai bamona be nega ta ia vara, a? Inai bamona sivaraina ta be nega ta tau ta ese ia kamonai, a?  
\v 33 Nega ta bese ta taudia ese Dirava ena gadona lahi dekena amo ia hereva idia kamonai, umui ese umui kamonaia bamona? Unai bese be ia mauri noho diba, a?  
\v 34 O nega ta Dirava ese bese ta dekenai ia lao, idau bese dekena amo ia abidia, iena bese, a? Inai bamona be Lohiabada emui Dirava ese umui dekenai Aigupito dekenai ia karaia, ani? Umui emui vairana dekenai Lohiabada ese iena siahu bona goada ia hedinaraia, gorere bona hisihisi dekena amo, toa bona hoa karadia dekena amo, tuari dekena amo, bona gari bada gaudia ia havaraia dekena amo.   
\p
\v 35 “Lohiabada ese inai gaudia umui dekenai ia hedinaraia, be do umui diba momokani ia sibona be Dirava, dirava ma ta be lasi.  
\v 36 Guba dekena amo umui dekenai ia hereva, umui do ia hadibaia totona. Tanobada dekenai iena lahi badana ia hedinaraia, vadaeni iena hereva be lahi dekena amo umui kamonai.  
\v 37 Lohiabada ese emui sene taudia ia ura henidia dainai, ia ese umui ia abia hidi. Bona mai ena siahu badana danu, ia sibona ese Aigupito dekena amo umui ia hakaua mai.  
\v 38 Bese badadia bona bese goadadia, emui goada idia hanaia besedia, be umui emui vairana dekenai Lohiabada ese ia luludia. Inai bamona ia karaia, edia tano dekenai umui do ia hakaua vareai totona, bona edia tano do umui abia totona. Hari dina inai tano be umui emui.   
\p
\v 39 “Unai dainai hari dina umui diba momokani, bona do umui laloaboio lasi, Lohiabada be Dirava, guba dekenai bona tanobada dekenai. Ia sibona be Dirava, ta ma be lasi.  
\v 40 Unai dainai, iena taravatu bona iena oda hereva, hari dina umui dekenai lau henia noho gaudia, do umui badinaia. Inai bamona neganai, umui be namo, emui natudia bona tubudia danu do idia namo. Bona emui mauri dinadia do idia momo, Lohiabada emui Dirava, ese umui dekenai ia henia hanaihanai tanona dekenai.”   
\s1 Heau mauri hanua, Ioridane Sinavai ena dina daekau kahanai  
\p
\v 41 Vadaeni Mose ese hanua toi ia abia hidi Ioridane Sinavai ena dina daekau kahana dekenai.  
\v 42 Inai hanua toi be heau mauri totona gabudia. Bema tau ta ese ma tau ta ia alaia kava, ia marere kerere dainai, o ia itaia kerere dainai, unai bamona ia kerere kava tauna ese unai hanua ta dekenai ia heau diba, do ia mauri totona.   
\p
\v 43 Inai hanua toi be inai: Besere, tano kaukau ororo gabuna dekenai. Ia be Rubena iduhu taudia edia. Ma hanua ta be Ramoto, Gileada tano dekenai. Ia be Gado iduhu taudia edia. Ma hanua ta be Golana, Basana tano dekenai. Ia be Manase iduhu taudia edia.   
\s1 Mose ese iena haroro ia hadokoa, bona Dirava ena Taravatu ia henia  
\p
\v 44 Mose ese Dirava ena Taravatu Israela taudia dekenai ia henia.  
\v 45 Oda bona kota hereva maoromaoro bona taravatu be inai, Mose ese Israela taudia dekenai ia gwauraia, Aigupito dekena amo idia raka mai murinai.  
\v 46 Inai hereva ia gwauraia gabuna be Ioridane Sinavai ena dina daekau kahanai Bete Peoro hanua kahirakahira, Sihona, Amoro edia king, Hesebona dekenai noho tauna, ena tano dekenai. Inai Sihona be Mose bona Israela taudia ese idia halusia, Aigupito idia rakatania murinai.  
\v 47 Bona Sihona ena tano idia abia, Oga, Basana ena king ena tano danu idia abia. Unai king ruaosi be Amoro taudia edia king, bona edia gabu be Ioridane Sinavai ena dina daekau kahanai.   
\p
\v 48 Inai tano be Aroere hanua, Aranona Sinavai ena isena dekena amo mirigini kahanai ela bona Siriona Ororo, unai be Heremona Ororo ena ladana ta.  
\v 49 Ma inai tano danu be Araba ena tano palaka ibounai, Ioridane Sinavai ena dina daekau kahanai, ela bona Davara Mase dekenai, bona dina daekau kahanai Pisiga Ororo dekenai.   
\c 5  
\s1 Mose ese ma ia haroro lou  
\p
\v 1 Mose ese Israela taudia ibounai ia boiria hebou, ia haroro henia, ia gwau, “Israela taudia e, umui kamonai! Inai taravatu bona oda, hari dina do lau gwauraia, be do umui kamonai namonamo. Taravatu ta ta ibounai do umui laloa namonamo, bona idia do umui badinaia momokani.   
\p
\v 2 “Lohiabada iseda Dirava ese Sinai Ororo dekenai gwauhamata taravatuna ita dekenai ia karaia.   
\p
\v 3 “Iseda tamadia sibona totona inai gwauhamata taravatuna ia henia lasi, to ita do noho taudia totona ia henia.  
\v 4 Unuseni ororo dekenai Lohiabada ese iena vairana umui dekenai ia henia, lahi ena huanai dekena amo, bona umui dekenai ia hereva henia.   
\p
\v 5 “Unai neganai lau be Lohiabada bona umui emui huanai lau gini, bona Lohiabada ena hereva umui dekenai lau gwauraia. Badina be umui ese lahi dekenai umui gari dainai ororo dekenai umui daekau lasi.  
\s1 Dirava ena Taravatu 10  
\p “Lohiabada ese ia gwau,  
\v 6 ‘Lau be Lohiabada, emui Dirava. Aigupito, hesiai mai guia danu umui karaia gabuna, dekena amo umui lau hamauria.   
\p
\v 7 “ ‘Idau dirava ta do umui abia lasi lauegu vairana dekenai.   
\p
\v 8 “ ‘Laulau ta do umui karaia lasi, guriguri henia totona kaivakuku gauna ta, o gau ta ena laulau, guba gauna ta, o tanobada gauna ta, o ranu lalonai gauna ta.   
\p
\v 9 “ ‘Laulau o kaivakuku ta dekenai do umui tomadiho henia lasi, bona do umui guriguri henia lasi. Badina be lau Lohiabada, emui Dirava be lau ura umui be lau sibona egu. Idia ura henia lasi lau dekenai taudia edia kara dika ena davana be do lau henia edia natuna bona tubuna dekenai, ia lao bona uru toi o hani.  
\v 10 To lau dekenai idia lalokau henia taudia bona egu taravatu idia badinaia taudia do lau lalokau henia. Bona edia tubuna taudia momo herea danu do lau lalokau henia.   
\p
\v 11 “ ‘Lohiabada emui Dirava ena ladana be do umui gwauraia kava, gwauraia kava lasi, badina be egu ladana do ia gwauraia kava tauna ena davana do lau henia.   
\p
\v 12 “ ‘Sabati Dina do umui laloatao, bona do umui hahelagaia, Lohiabada emui Dirava ese umui ia oda henia vadaeni hegeregerena.  
\v 13 Dina 6 edia lalonai emui gaukara ibounai do umui karaia.  
\v 14 To dina namba 7 be Sabati Dina helagana, Lohiabada emui Dirava ena. Unai dina dekenai do umui gaukara lasi, umui o emui natuna, o emui hesiai tauna, o emui hesiai hahine, o emui boromakau, o emui doniki, o emui ubua gauna ta, o idau tauna emui hanua dekenai ia noho. Badina emui hesiai tauna bona emui hesiai hahine be do idia laga-ani danu, umui ese umui laga-ani hegeregerena.  
\v 15 Do umui laloaboio lasi, umui be hesiai taudia mai guia danu Aigupito tano dekenai, bona Lohiabada emui Dirava, ese mai ena siahu bada bona goada danu umui ia hamauria. Unai dainai Lohiabada emui Dirava ese umui ia oda henia, Sabati Dina do umui badinaia.   
\p
\v 16 “ ‘Emui tamana bona sinana dekenai do umui matauraia, Lohiabada emui Dirava ese umui ia oda henia vadaeni hegeregerena. Unai dekena amo emui mauri nega do ia daudau, bona emui noho be do ia namo, Lohiabada, oiemu Dirava, ese umui dekenai ia henia tano dekenai.   
\p
\v 17 “ ‘Taunimanima do umui alaia lasi.   
\p
\v 18 “ ‘Umui heudahanai lasi.   
\p
\v 19 “ ‘Umui henaoa lasi.   
\p
\v 20 “ ‘Taunimanima ta dekenai umui samania koikoi lasi.   
\p
\v 21 “ ‘Tau ta ena adavana totona do umui mama henia lasi. Iena ruma o iena tano totona do umui mama henia lasi, o iena hesiai tauna, o iena hesiai hahine, o iena boromakau, o iena doniki, o iena kohu ta dainai do umui mama henia lasi.’   
\p
\v 22 “Inai Taravatu be Lohiabada ese umui ibounai dekenai ia henia, ororo dekenai umui haboua neganai. Lahi ena huanai dekena amo, bona ori bona dibura dekena amo Lohiabada ese mai boiboi bada danu umui dekenai inai Taravatu ia gwauraia. Taravatu haida ma ia henia lasi. Unai neganai unai Taravatu be nadi palaka rua dekenai Lohiabada ese ia torea, vadaeni lau dekenai ia henia.   
\s1 Israela taudia idia gari  
\p
\v 23 “Umui ese dibura ena huanai dekena amo unai boiboi bada umui kamonai, bona ororo umui itaia, lahi ese ia gabua, unai neganai lau dekenai umui raka kahirakahira, emui iduhu lohia taudia bona tau badadia ibounai.  
\v 24 Bona idia gwau, ‘Lohiabada iseda Dirava ese iena hairaina bona iena siahu be ita dekenai ia hedinaraia, iena gadona danu lahi ena huanai dekena amo ita kamonai vadaeni! Hari dina ita diba vadaeni, Dirava ese taunimanima dekenai ia hereva vadaeni, bona unai taunimanima be do mauri noho.  
\v 25 To edena bamona ita mauri diba? Bema Lohiabada iseda Dirava ese ita dekenai ia hereva lou, ita be do ita mase momokani. Lahi badana ese ita do ia gabua mase.   
\p
\v 26 “ ‘Badina be taunimanima ta ese mauri Dirava ena gadona lahi dekena amo ia kamonai vadaeni, ita kamonai hegeregerena, bona ia be do mauri noho, a?  
\v 27 Mose e, do oi raka lao kahirakahira, bona Lohiabada iseda Dirava ena hereva ibounai do oi kamonai. Unai murinai do oi giroa mai, bona ia ese oi dekenai ia hadibaia hereva be ai dekenai do oi hamaoroa. Ai be do ai kamonai, bona ai ese ia ura kara do ai karaia.’   
\p
\v 28 “Lohiabada ese emui hereva lau dekenai ia kamonai. Vadaeni Lohiabada ese lau ia hamaoroa, ia gwau, ‘Lau ese inai taudia edia hereva lau kamonai, bona edia hereva ibounai be maoro.  
\v 29 Nega ibounai unai bamona bema idia laloa be namo, bona bema lau dekenai idia matauraia, bona egu Taravatu bema idia kamonai henia, edia noho be do ia namo, bona edia natudia bona tubudia danu edia noho be do namo ela bona hanaihanai.   
\p
\v 30 “ ‘Do oi lao, idia do oi oda henia, edia palai rumadia dekenai do idia lao lou.  
\v 31 To oi, Mose e, lauegu badibadinai do oi gini, bona egu Taravatu bona oda ibounai be oi dekenai do lau henia. Inai hereva ibounai Israela taudia dekenai do oi hadibaia, vadaeni idia ese do idia kamonai henidia, lau ese do lau henidia tano dekenai idia noho neganai.’   
\p
\v 32 “Unai dainai Israela taudia e, do umui naria namonamo, Lohiabada emui Dirava ena Taravatu ibounai do umui badinaia. Idia dekena amo do umui raka siri lasi, idiba kahana dekenai o lauri kahana dekenai.  
\v 33 Lohiabada emui Dirava ese umui dekenai ia oda dalana dekenai do umui raka, vadaeni do umui mauri, bona emui noho be do ia namo, bona emui mauri dinadia be do idia momo, do umui abia bona noho tano dekenai.”   
\c 6  
\s1 Taravatu badana momokani  
\p
\v 1 Ma Mose ia gwau, “Inai Taravatu ibounai be Lohiabada emui Dirava ese lau dekenai ia henia. Inai Taravatu be umui dekenai lau hadibaia, unai do umui raka vareai bona abia tano lalonai, idia do umui badinaia totona.  
\v 2 Vadaeni Lohiabada emui Dirava do umui gari henia, iena Taravatu, umui dekenai lau henia gaudia, do umui badinaia, umui bona emui natudia bona emui tubudia, emui mauri dinadia ibounai lalonai. Unai bamona neganai, emui mauri dinadia be do idia momo.  
\v 3 Israela taudia e, inai Taravatu do umui kamonai henidia namonamo. Unai bamona neganai do umui namo, bona do umui goada bona momo herea, rata bona hani dekenai ia honu tanona lalonai. Lohiabada, emui sene taudia edia Dirava, ese inai bamona ia gwauhamata henia vadaeni.   
\p
\v 4 “Israela taudia e, umui kamonai! Lohiabada be iseda Dirava, Lohiabada sibona mo.  
\v 5 Lohiabada oiemu Dirava do oi lalokau henia, mai oiemu kudouna ibounai, mai oiemu lauma ibounai, bona mai oiemu goada ibounai danu.   
\p
\v 6 “Inai Taravatu, hari dina umui dekenai lau henia gaudia do umui laloaboio lasi.  
\v 7 Umui emui natudia dekenai inai Taravatu do umui hadibaia goada, ruma dekenai umui noho neganai, bona dala dekenai umui raka neganai. Bona umui hekure noho, o umui gaukara noho neganai, inai Taravatudia do umui herevalaia.  
\v 8 Inai Taravatu be toa dekenai do umui halaoa, vadaeni emui imana dekenai do umui kwatua, bona emui baguna dekenai do umui kumia.  
\v 9 Emui iduara dogoatao audia edia latanai, bona iduara ena ataiai audia dekenai inai Taravatu do umui toredia, bona emui ikoukou dekenai danu do umui toredia.   
\s1 Dirava kamonai lasi kara ena davana garina do umui gari  
\p
\v 10 “Lohiabada, emui Dirava, ese umui emui sene taudia Aberahamo, Isako bona Iakobo dekenai ia gwauhamata. Ia gwau, ‘Tano ta mai ena hanua badadia bona namodia, umui haginidia lasi gaudia, be umui dekenai do lau henia.  
\v 11 Unai ruma be mai edia kohu namodia, umui haboua lasi gaudia, bona ranu guridia, umui geia lasi gaudia. Unai ruma danu be mai edia vain umadia bona olive umadia, umui hadoa lasi gaudia. Unai neganai do umui ania boga kunu.’  
\v 12 To unai neganai do umui naria namonamo, Lohiabada do umui laloaboio garina. Badina ia ese Aigupito taudia edia tano bona edia dagedage dekena amo umui ia hamauria.   
\p
\v 13 “Lohiabada emui Dirava dekenai do umui gari, iena gaukara do umui karaia, bona iena ladana dekenai emui gwauhamata do umui karaia.  
\v 14 Idau dirava, umui kahirakahira idia noho besedia edia dirava dekenai do umui tomadiho henia lasi.  
\v 15 Badina be Lohiabada, emui Dirava, umui dekenai ia noho Diravana, ia ura lasi idau dirava umui laloa. Unai bamona umui karaia neganai, iena badu be lahi bamona umui do ia gabua ore, tanobada ena kopina dekena amo.   
\p
\v 16 “Lohiabada emui Dirava do umui dibagania lasi, Masa ranu gabuna dekenai umui dibagania bamona.  
\v 17 Lohiabada, emui Dirava ese iena Taravatu bona iena oda umui dekenai ia henia gaudia do umui badinaia.  
\v 18 Kara maoromaoro bona kara namodia Lohiabada ena vairanai do umui karaia. Vadaeni do umui namo, bona unai tano namona do umui raka vareai. Unai tano be emui sene taudia dekenai Lohiabada ese ia gwauhamata do ia henidia.  
\v 19 Bona umui dekenai idia tuari taudia be umui ese emui vairana dekenai do umui lulua ore momokani, Lohiabada ena gwauhamata hegeregerena.   
\p
\v 20 “Nega gabeai emui natudia ese umui do idia nanadaia, do idia gwau, ‘Inai Taravatu bona oda, Lohiabada iseda Dirava ese ita dekenai ia henia edia anina be dahaka?’  
\v 21 Unai neganai emui natudia dekenai do umui haere, umui gwau, ‘Ai be Aigupito ena king Farao ena hesiai taudia mai guia danu. To Lohiabada ese Farao ena imana dekena amo ai ia hamauria, mai siahu bada danu.  
\v 22 Unai neganai Lohiabada ese toa bona hoa karadia, badadia bona mai garidia, aiemai vairana dekenai ia karaia, Aigupito taudia dekenai, edia king Farao dekenai, bona iena ruma taudia dekenai.  
\v 23 Aigupito dekena amo Lohiabada ese ai ia hakaua, iseda sene taudia dekenai ia gwauhamata henidia tanona lalonai, ai ia hakaua vareai, bona ai dekenai ia henia.  
\v 24 Bona Lohiabada ese ai ia hamaoroa, inai Taravatu ibounai do ai badinaia, bona Lohiabada, iseda Dirava do ai gari henia. Bema unai bamona ai karaia neganai, Lohiabada ese aiemai bese do ia naria noho, bona do ia hanamoa noho hanaihanai, hari dina ai dekenai ia naria bamona.  
\v 25 Iseda kara maoromaoro korikori dalana bona noho namo dalana be inai: Lohiabada iseda Dirava ena Taravatu ibounai do ita badinaia namonamo, ia ese ita ia oda henia vadaeni hegeregerena.’ ”   
\c 7  
\s1 Lohiabada ese bese korikori  
\p
\v 1 Ma Mose ia hereva, ia gwau, “Lohiabada, emui Dirava, ese do umui noholaia tano dekenai umui do ia hakaua vareai neganai, umui emui vairana dekenai bese ibounai 7 do ia lulua. Inai bese be: Hiti taudia, Girigasa taudia, Amoro taudia, Kanana taudia, Perisi taudia, Hivi taudia, Iebusu taudia.  
\v 2 Lohiabada, emui Dirava, ese umui emui siahu henunai unai bese do ia atodia neganai, bona umui halusidia neganai, do umui aladia ore momokani. Idia danu do umui maino lasi, bona umui bogahisihisi henidia lasi.  
\v 3 Unai bese taudia ta do umui adavaia lasi, umui emui natudia kekeni be edia uhau taudia dekenai do umui henidia lasi, bona edia natudia kekeni do umui abidia lasi emui uhau totona.  
\v 4 Badina unai bamona neganai, idia ese emui natudia Lohiabada dekena amo do idia hakaua siri, idau dirava tomadiho henia totona. Unai bamona ia vara neganai, Lohiabada ese umui do ia hadikaia ore haraga.  
\v 5 To inai bamona do umui karaia: Edia boubou patadia do umui makohia maragimaragi, edia dubu au tubua do umui botaia maragimaragi, edia hahine dirava Asera ena toana gauna do umui utua maragimaragi, bona edia kaivakuku do umui gabua ore.   
\p
\v 6 “Badina umui be bese helagana, Lohiabada emui Dirava, ena. Lohiabada, emui Dirava ese tanobada bese ibounai dekena amo umui ia abia hidi vadaeni, iena bese korikori do umui lao totona.   
\p
\v 7 “Lohiabada ese umui ia lalokau henia, bona umui ia abia hidi, umui be bese badana dainai, a? Lasi, bese ibounai edia huanai umui be maragi herea.  
\v 8 To Lohiabada ese umui ia lalokau henia, bona iena gwauhamata emui sene taudia dekenai ia ura hamomokania. Unai dainai mai ena siahu bada, ia ese Aigupito ena king Farao ena hesiai mai guia danu dekena amo umui ia hamauria.  
\v 9 Unai dainai do umui laloatao, Lohiabada emui Dirava, ia sibona be Dirava korikori, ia be abidadama kara Diravana. Ia ese iena gwauhamata do ia hamomokania, bona iena noho hanaihanai lalokauna do ia henia noho, ela bona uru 1,000, ia dekenai idia lalokau henia, bona iena Taravatu idia badinaia taudia dekenai.  
\v 10 To ia dekenai idia badu henia taudia do ia bogahisihisi henia lasi, edia dika davana do ia henia haraga.  
\v 11 Unai dainai hari dina umui dekenai lau henia noho Taravatu bona oda ibounai do umui badinaia namonamo.   
\s1 Kamonai henia taudia ese hanamoa do idia abia  
\p
\v 12 “Bema inai Taravatu umui kamonai henia, bona edia kara do umui karaia momokani neganai, Lohiabada, emui Dirava ese iena gwauhamata umui dekenai do ia badinaia noho. Bona ia ese iena noho hanaihanai lalokauna umui dekenai do ia henia noho, emui sene taudia dekenai ia gwauhamata henia hegeregerena.  
\v 13 Ia ese umui do ia lalokau henia, bona umui do ia hanamoa, emui bese do ia habadaia, emui natudia danu do idia momo herea. Emui tano danu do ia hanamoa, vadaeni emui koni, emui uaina, emui olive dehoro, emui boromakau natudia bona mamoe natudia danu do idia momo herea. Inai gau namodia ibounai be unai tano, emui sene taudia dekenai ia gwauhamata do ia henia tano dekenai, Lohiabada ese umui dekenai do ia henia.  
\v 14 Bese ibounai edia huanai umui do ia hanamoa bada. Emui taunimanima bona emui ubua gaudia ibounai ese natudia do idia havaraia, Dirava ese ta ena rogorogo do ia koua lasi.  
\v 15 Lohiabada ese gorere ibounai be umui dekena amo do ia kokia ore. Bona Aigupito dekenai umui abia gorere, be ma umui dekenai do ia atoa lasi. To umui idia dagedage henia taudia dekenai Lohiabada ese inai gorere do ia atoa.  
\v 16 To Lohiabada, emui Dirava, ese emui siahu henunai ia atoa bese ibounai, be do umui alaia ore. Do umui bogahisihisi henidia lasi, bona edia dirava do umui tomadiho henidia lasi. Badina be unai bamona umui karaia neganai kerere do umui davaria.   
\p
\v 17 “Sedira do umui laloa inai bamona, bona do umui gwau, ‘Inai besedia be badadia momokani, edena bamona ita luludia diba?’  
\v 18 To idia dekenai do umui gari lasi. Lohiabada, emui Dirava, ese Farao bona Aigupito taudia ibounai dekenai ia karaia gaudia do umui laloatao.  
\v 19 Hisihisi bona toa bona hoa karadia be emui matana ese idia itaia, bona Lohiabada, emui Dirava, ese mai goada bona siahu bada danu umui ia hamauria. Inai karadia do umui laloatao noho. Badina Lohiabada, emui Dirava, ese hari umui gari henia besedia ibounai dekenai unai bamona idia dekenai do ia karaia.  
\v 20 Ma danu, Lohiabada emui Dirava ese nanigo be edia huana dekenai do ia siaia, ela bona idia heau mauri taudia bona idia hunia noho taudia danu be idia mase ore.  
\v 21 Do umui gari henidia lasi, badina be Lohiabada, emui Dirava, be umui dekenai ia noho. Ia be Dirava badana, taunimanima ibounai ese ia dekenai idia gari bada.  
\v 22 Lohiabada emui Dirava ese inai bese metairametaira umui emui vairanai do ia luludia. Do umui aladia mase haraga lasi, uda boromadia do idia momo herea emui tano dekenai garina.  
\v 23 To Lohiabada, emui Dirava ese umui emui siahu henunai do ia atodia, do idia daradara bada herea, ela bona idia ore momokani.  
\v 24 Edia king be umui emui siahu henunai do ia atodia. Do umui aladia, bona edia ladana be do idia boio momokani. Tau ta ese umui emui kara do ia koua diba lasi, to ibounai be do umui alaia ore.  
\v 25 Edia dirava laulau gaudia be lahi dekenai do umui gabua ore. Idia dekenai ia noho siliva bona golo do umui ura dikadika lasi, bona umui abia lasi, do umui kerere garina. Lohiabada, emui Dirava ese dirava laulau gaudia dekenai ia badu henia momokani.  
\v 26 Inai dirava laulau gaudia emui ruma dekenai do umui abia vareai lasi, edia dika ese umui do ia hadikaia ore garina. Unai bamona dirava laulau gaudia do umui negea momokani, badina idia be Lohiabada ese ia badu henidia momokani.”   
\c 8  
\s1 Tano namona dekenai do umui raka vareai bona abia  
\p
\v 1 Ma Mose ia hereva, ia gwau, “Do umui naria namonamo, hari dina umui dekenai lau henia Taravatu do umui badinaia. Unai bamona umui karaia neganai do umui mauri, bona emui bese do idia momo herea, bona Lohiabada ese umui emui sene taudia ia gwauhamata henidia tano dekenai do umui raka vareai bona abia.  
\v 2 Lohiabada, emui Dirava, ese lagani 40 lalonai taunimanima noho lasi tano dekenai umui ia hakaua, do umui laloa. Unai bamona ia karaia, be do umui manau totona, bona umui emui lalona ia tohoa, do ia diba, umui ese iena Taravatu do umui badinaia diba o lasi.  
\v 3 Ia ese umui ia hamanaua, bona hitolo ia siaia, vadaeni mana aniani umui dekenai ia siaia. Unai be aniani matamata, umui bona emui sene taudia idia diba lasi gauna. Unai kara dekena amo, Lohiabada ese umui ia hadibaia, taunimanima be aniani sibona dekena amo do idia mauri lasi. Lasi momokani,to Dirava ena hereva ibounai do idia badinaia danu, vadaeni mauri idia abia.  
\v 4 Unai lagani 40 ibounai lalonai umui emui dabua idia dika lasi, bona emui aena idia gudu lasi.  
\v 5 Umui laloa danu, tau ta ese iena natuna dekenai matakani ia henia bamona, Lohiabada, emui Dirava, ese unai bamona umui dekenai matakani ia henia noho.   
\p
\v 6 “Unai dainai, Lohiabada, emui Dirava, ena Taravatu do umui badinaia, iena dala dekenai do umui raka, bona do umui gari henia.  
\v 7 Badina be Lohiabada, emui Dirava, ese tano namona dekenai umui do ia hakaua vareai, mai ena sinavai, mai ena ranu gabudia, bona mai ena ranu guridia tanona. Koura bona ororo gabudia dekenai inai ranu gabudia idia noho.  
\v 8 Unai tano danu be mai ena uiti bona bali, vain bona fig audia, apolo audia, olive audia bona hani.  
\v 9 Unai tano dekenai paraoa do umui ania boga kunu, bona gau ta totona do umui ogogami lasi. Unai tano ena nadi be auri, bona iena ororo dekenai danu kapa auri umui geia diba.  
\v 10 Do umui aniani, emui bogana do idia kunu, vadaeni Lohiabada emui Dirava do umui tanikiu henia, tano namona ia ese umui dekenai ia henia dainai.   
\s1 Lohiabada do umui laloaboio lasi  
\p
\v 11 “Do umui naria namonamo, Lohiabada, emui Dirava do umui laloaboio garina, o iena Taravatu o iena oda, hari dina umui dekenai lau henia gaudia do umui badinaia lasi garina.  
\v 12 Do umui aniani, emui bogana do idia kunu. Ruma namodia do umui haginia, do umui noholaia.  
\v 13 Umui emui boromakau oreadia bona emui mamoe oreadia do idia momo herea, emui siliva bona emui golo do idia bada, emui gau ibounai be momo.  
\v 14 Unai neganai do umui naria namonamo, do umui hekokoroku garina, bona Lohiabada, emui Dirava, Aigupito dekena amo, bona hesiai mai guia dekena amo, umui ia hamauria Diravana do umui laloaboio garina.  
\v 15 Ia ese taunimanima noho lasi tano badana bona dikana umui ia hakaua hanai, gaigai bona doadoa edia koria dekena amo umui ia hamauria. Bona nadi hagahaga dekena amo ranu ia mailaia, umui inua.  
\v 16 Taunimanima idia noho lasi tanona dekenai ia ese mana dekenai umui ia ubua. Inai mana aniani be emui sene idia diba lasi gauna. Metau bona hisihisi dekena amo Lohiabada ese umui ia tohoa, manau bona goada do umui davaria totona, vadaeni dokona neganai, ia ese umui ia hanamoa diba.  
\v 17 Unai dainai, emui lalona dekenai inai bamona do umui laloa lasi, do umui gwau lasi, ‘Iseda goada bona iseda siahu dekena amo kohu momo ita davaria.’  
\v 18 To Lohiabada, emui Dirava do umui laloa, badina be ia ese siahu umui dekenai ia henia, kohu momo do umui abia totona. Lohiabada ese hari dina inai bamona ia karaia, be iena gwauhamata emui sene taudia dekenai ia henia gauna do ia hamomokania totona.   
\p
\v 19 “To Lohiabada, emui Dirava do umui laloaboio lasi, bona idau dirava murinai do umui raka lasi, edia hesiai gaukara umui karaia lasi, bona idia dekenai do umui tomadiho henia lasi. Bema inai bamona umui karaia, hari dina umui dekenai lau sisiba, do umui mase momokani.  
\v 20 Lohiabada ese bese haida umui emui vairana dekenai ia hadikaia ore bamona, umui danu do ia hadikaia ore, bema iena hereva umui kamonai henia lasi neganai.”   
\c 9  
\s1 Israela taudia ese Lohiabada idia kamonai henia lasi  
\p
\v 1 Mose ia hereva, ia gwau, “Israela taudia e, umui kamonai! Hari dina Ioridane Sinavai do umui hanaia, bese badadia, goada dekenai umui idia hanaia besedia, edia tano be do umui abia. Hanua badadia danu, edia magu be guba dekenai idia daekau hanuadia be do umui abia.  
\v 2 Unai bese taudia be badadia bona latadia. Idia be Anakima taudia. Edia sivarai umui kamonai vadaeni, idia gwau, ‘Anaki taudia edia vairana dekenai daika do ia gini diba?’  
\v 3 To hari dina do umui diba Lohiabada emui Dirava be umui vairana dekenai do ia hanaia, lahi bada bamona. Ia ese Anaki taudia do ia hadikaia bona hamanokaia. Vadaeni umui ese idia do umui lulua bona alaia ore haraga, Lohiabada ese umui dekenai ia gwauhamata hegeregerena.   
\p
\v 4 “Lohiabada emui Dirava ese umui emui vairana dekenai idia ia lulua murinai, inai bamona do umui laloa lasi, umui gwau lasi, ‘Iseda kara maoromaoro dainai Lohiabada ese inai tano ita dekenai ia henia.’ Lasi, Lohiabada ese inai taudia do ia lulua, edia kara dika dainai.  
\v 5 Edia tano do umui abia, be emui kara maoromaoro o kara namona dainai lasi. Lasi, to unai bese edia kara dika dainai, Lohiabada emui Dirava ese umui emui vairana dekenai idia do ia lulua, emui sene taudia Aberahamo, Isako bona Iakobo dekenai ia henia gwauhamata do ia hamomokania totona.   
\p
\v 6 “Unai dainai, umui diba namonamo, Lohiabada emui Dirava ese inai tano namona umui dekenai ia henia, be emui kara maoromaoro dainai lasi, badina umui be hereva dagedage taudia.   
\s1 Boromakau natuna, golo gauna  
\p
\v 7 “Do umui laloaboio lasi, umui ese taunimanima noho lasi tano dekenai Lohiabada emui Dirava umui habadua. Bona Aigupito dekena amo umui raka hamatamaia dinana ia mai bona inai gabu dekenai umui ginidae, umui ese Lohiabada umui kamonai henia namonamo lasi.  
\v 8 Sinai Ororo dekenai danu Lohiabada emui Dirava ena badu umui havaraia, bona ia ese iena badu dekena amo umui ia hadikaia ore gwauraia.  
\v 9 Ororo dekenai lau daekau, nadi palaka rua, Lohiabada ese umui dekenai ia henia Taravatudia idia dekenai ia torea gaudia lau abia. Unai neganai, dina 40 bona hanuaboi 40 lau be ororo dekenai lau noho, aniani lau ania lasi, ranu lau inua lasi.  
\v 10 Vadaeni Lohiabada ese nadi palaka ruaosi lau dekenai ia henia, Dirava ena imana kwakikwakina ia torea gaudia. Inai nadi edia latanai Lohiabada ena hereva ibounai idia torea vadaeni. Inai hereva be ororo dekenai umui hebou neganai, Lohiabada ese lahi dekena amo umui dekenai ia hadibaia.   
\p
\v 11 “Oibe, unai dina 40 hanuaboi 40 idia ore neganai, Lohiabada ese unai nadi, Taravatu nadidia lau dekenai ia henia.  
\v 12 Unai neganai Lohiabada ese lau ia hamaoroa, ia gwau, ‘Oi toreisi, inai gabu dekena amo oi diho haraga, badina be Aigupito dekena amo oi hakaua taudia ese kara dika idia karaia vadaeni. Lau ese lau oda henidia dalana dekena amo idia raka siri haraga vadaeni, kaivakuku ta idia karaia vadaeni.’   
\p
\v 13 “Bona Lohiabada ese lau ia hamaoroa, ia gwau, ‘Inai bese taudia lau itaia, idia be kamonai ura lasi taudia.  
\v 14 Oi siri, do lau hadikadia ore, vadaeni tau ta lasi ese edia ladana do ia laloa lou. Unai murinai oi dekena amo bese badana ta, idia do ia hanaia besena, do lau havaraia.’   
\p
\v 15 “Vadaeni lau raka siri, bona ororo dekena amo lau diho lao. Ororo be lahi ese ia araia. Taravatu nadi ruaosi be lauegu imana dekenai.  
\v 16 Bona lauegu matana lau negea, umui lau itaia, Lohiabada emui Dirava ena vairana dekenai umui kara dika, boromakau natuna ena laulau umui karaia. Oibe, Lohiabada ese umui ia hadibaia dalana dekena amo umui raka siri haragaharaga vadaeni.  
\v 17 Unai dainai nadi palaka ruaosi lau abidia, lauegu imana dekena amo lau negea diho, idia be umui emui vairana dekenai idia makohia maragimaragi.   
\p
\v 18 “Vadaeni Lohiabada ena vairana dekenai lau tui diho, bona lauegu vairana tano dekenai lau atoa dina 40 bona hanuaboi 40, bona guna lau karaia bamona, aniani lau ania lasi, bona ranu lau inua lasi. Unai bamona lau karaia emui kara dika dainai, badina be Lohiabada ena vairana dekenai umui kerere bada, bona iena badu umui havaraia momokani.  
\v 19 Lohiabada be umui dekenai ia badu dikadika, bona ia ura umui do ia hadikaia ore momokani. Unai dainai lau gari dikadika. To ia dekenai lau noinoi lou, bona ia ese lauegu noinoi ma ia kamonai.  
\v 20 Lohiabada ese Arona danu ia badu henia, bona do ia alaia mase gwauraia. Ia dainai danu lau guriguri.  
\v 21 Vadaeni emui kara dika gauna, unai boromakau natuna ena laulau, lau abia, lahi dekenai lau gabua. Bona lau makohia maragimaragi, kahu bamona. Vadaeni unai kahu be ororo dekena amo ia heau sinavai maragi dekenai lau negea ia lao.   
\p
\v 22 “Tabera dekenai danu, bona Masa dekenai, bona Kiberoto Hatava dekenai, umui ese Lohiabada umui habadua.  
\v 23 Bona Lohiabada ese Kadesi Baranea dekena amo ma umui ia siaia, ia gwau, ‘Umui lao, umui dekenai lau henia vadaeni tanona umui abia.’ Unai neganai umui ese Lohiabada, emui Dirava umui kamonai henia lasi, umui abidadama henia lasi, bona iena Taravatu umui badinaia lasi.  
\v 24 Israela orea dekenai lau ginidae dinana ia mai bona harihari, umui ese Lohiabada dekenai umui maumau noho.   
\p
\v 25 “Unai dainai lau be dina 40 bona hanuaboi 40 Lohiabada ena vairana dekenai lau tui diho, lauegu kwarana tano dekenai lau atoa, badina be Lohiabada ia gwau, umui do ia alaia ore.  
\v 26 Lohiabada dekenai lau noinoi, lau gwau: Lohiabada badana e, oiemu bese do oi hadikaia lasi, oiemu bese korikori do oi alaia ore lasi. Oiemu siahu dekena amo oi hamauridia, oiemu goada bada dekena amo Aigupito dekena amo oi hakaudia mai.  
\v 27 Oiemu hesiai taudia Aberahamo, Isako bona Iakobo do oi laloa, bona inai bese edia kamonai lasi, edia kara dika, bona edia kerere bada, mani do oi laloa lasi.  
\v 28 Aigupito taudia ese oi do idia kirikirilaia garina, do idia gwau, ‘Lohiabada ena goada be hegeregere lasi, ia ese ia gwauhamata henidia tano do ia hakaudia vareai lasi.’ Bona do idia gwau, ‘Lohiabada ese iena bese ia badu henidia dainai, taunimanima noho lasi tano dekenai ia hakaudia, do ia aladia mase totona.’  
\v 29 To idia be oiemu bese korikori, oi abidia hidi, bona oi ese Aigupito dekena amo oi hakaudia mai, mai oiemu siahu bona goada badana.”   
\c 10  
\s1 Mose ese Taravatu nadi rua ia abia lou  
\p
\v 1 Ma Mose ia haroro, ia gwau, “Unai neganai Lohiabada ese lau ia hamaoroa, ia gwau, ‘Nadi rua ma do oi utua palaka, gunadia hegeregere, bona ororo dekenai do oi daekau mai lou lau dekenai. Maua ta danu do oi karaia, reirei dekena amo.  
\v 2 Vadaeni revareva do lau torea unai nadi ruaosi dekenai, oi makohia nadi gunadia dekenai lau torea hegeregerena. Bona Maua lalonai inai nadi ruaosi do oi udaia.’   
\p
\v 3 “Vadaeni au namona ta ena reirei dekena amo Maua ta lau karaia, bona nadi rua lau utua palaka. Vadaeni ororo ataiai dekenai lau abidia daekau.  
\v 4 Unai neganai Lohiabada ese unai nadi dekenai Taravatu 10 ia torea, nadi gunadia dekenai ia torea bamona. Unai Taravatu be guna Lohiabada ese ororo ena lahi dekena amo umui dekenai ia henia, ororo dekenai umui haboua dinana dekenai. Vadaeni Lohiabada ese unai nadi ruaosi lau dekenai ia henia.  
\v 5 Bona ororo dekena amo lau diho mai. Unai neganai lau karaia hegaegae Mauana dekenai unai nadi ruaosi lau udaia. Idia be unuseni do noho, Lohiabada ese iena oda lau dekenai ia henia bamona.   
\p
\v 6 “Israela taudia be Iakana taudia edia ranu guri idia rakatania, idia laolao, ela bona Mosera dekenai idia ginidae. Unuseni Arona ia mase, vadaeni idia guria. Iena natuna Eleasara ese Arona ena gabu ia abia, hahelagaia tauna ena dagi dekenai.  
\v 7 Unai gabu dekena amo ma idia laolao, Gudugoda dekenai idia lao. Gudugoda dekena amo ma idia laolao, Iotobata, sinavai momo tano dekenai idia lao.  
\v 8 Unai neganai Lohiabada ese Levi iduhuna ia abia hidi. Levi taudia ese Lohiabada ena Taravatu Maua do idia huaia, bona Lohiabada ena vairana dekenai do idia gini, iena gaukara do idia karaia, bona Lohiabada ena ladana do idia hanamoa, ia mai bona hari dina.  
\v 9 Unai dainai Levi taudia ese tano idia abia lasi, iduhu haida idia abia bamona. To Levi taudia idia abia gauna be, Lohiabada ena hahelagaia dagina idia abia, Lohiabada emui Dirava ena gwauhamata hegeregerena.   
\p
\v 10 “Lau be dina 40 bona hanuaboi 40 ororo dekenai ma lau noho, nega gunana bamona. Vadaeni Lohiabada ese lauegu noinoi iharuana ia kamonai, bona umui ia alaia ore lasi.  
\v 11 Gabeai Lohiabada ese lau ia hamaoroa, ia gwau, ‘Oi toreisi, oiemu orea taudia do oi hakaua, vadaeni emui sene taudia dekenai lau gwauhamata henidia tano dekenai do idia raka vareai, bona do idia abia.’ ”   
\s1 Dirava do umui gari henia  
\p
\v 12 Ma Mose ia hereva, ia gwau, “Israela taudia e, kamonai namonamo! Lohiabada, iseda Dirava ena oda hereva umui dekenai, do umui kamonai henia. Gauna be inai: Lohiabada emui Dirava do umui gari henia, bona iena dala ibounai do umui raka. Lohiabada emui Dirava do umui lalokau henia, bona iena hesiai gaukara do umui karaia, mai emui lalona ibounai, bona mai emui lauma ibounai.  
\v 13 Ma Lohiabada ena oda bona ena Taravatu ibounai, lau ese umui hanamoa totona hari dina lau gwauraia gaudia, do umui badinaia.   
\p
\v 14 “Lohiabada emui Dirava be guba ena biaguna, bona ia be guba ena ataiai gubudia ena lohiana danu. Tanobada be iena, bona tanobada ena anina ibounai danu be iena.  
\v 15 To Lohiabada ese emui sene taudia ia lalokau henidia bada dainai umui ia abia hidi, iena bese, umui sibona, idau besedia lasi. Bona hari dina danu, umui be do iena bese, iena abia hidi taudia.  
\v 16 Unai dainai, harihari ia lao, Lohiabada do umui kamonai henia, bona do umui maumau lasi.  
\v 17 Badina be Lohiabada emui Dirava, ese dirava ibounai ia hereaia, siahu taudia ibounai danu ia ese ia hereaia. Ia be Dirava badana, ia be mai ena siahu bada, bona ia be taunimanima ese idia gari henia Diravana. Iena vairana dekenai taunimanima ibounai be hegeregere. Tau ta ese Dirava ena lalona ia veria diba lasi.  
\v 18 Ia ese vabu bona ogogami taudia ia durudia bona hanamodia, bona idau tano dekena amo, Israela taudia danu idia noho taudia, ia lalokau henidia, aniani bona dabua ia henidia.  
\v 19 Unai dainai inai idau taudia do umui lalokau henidia, badina umui danu be Aigupito umui noho neganai, umui be idau taudia.   
\p
\v 20 “Lohiabada, emui Dirava, do umui gari henia. Iena hesiai gaukara do umui karaia, bona ia dekenai do umui badinaia. Emui gwauhamata be Lohiabada ena ladana sibona dekenai do umui karaia.  
\v 21 Iena ladana do umui hanamoa, ia be emui Dirava, bona emui matana ese, iena siahu bona gari karadia ibounai idia itaia vadaeni. Unai karadia be umui dainai ia karaia.  
\v 22 Emui sene taudia be Aigupito dekenai idia lao neganai, idia be taunimanima 70 sibona. To harihari Lohiabada emui Dirava ese emui bese ia habadaia herea, guba ena hisiu edia momo bamona.”   
\c 11  
\s1 Lohiabada ena siahu badana  
\p
\v 1 Mose ma ia hereva, ia gwau, “Unai dainai Lohiabada emui Dirava do umui ura henia, bona iena Taravatu bona oda ibounai do umui kamonai henia nega ibounai.  
\v 2 Hari dina Lohiabada ese umui dekenai ia hedinaraia gaudia do umui laloa noho. Lohiabada ese umui sibona dekenai inai kara badadia ia hedinaraia, emui natudia dekenai be lasi. Lohiabada emui Dirava ena matakani, iena kara badadia, bona iena siahu badana umui itaia vadaeni.   
\p
\v 3 “Lohiabada ena hoa karadia danu umui itaia, Aigupito dekenai ia karaia gaudia Farao, Aigupito ena king dekenai, bona Aigupito ena tano ibounai dekenai.  
\v 4 Umui laloa danu, Aigupito ena tuari taudia, mai edia hosi bona mai edia kariota, ese umui idia lulua neganai, Davara Kakakaka ena abata dekenai Lohiabada ese idia ia maloa, idia mase ore momokani.  
\v 5 Lohiabada ena kara, tano kaukau dekenai umui ia durua karadia, ela bona inai gabu dekenai umui ginidae, be emui natudia idia itaia lasi.   
\p
\v 6 “Ma do umui laloa, Datana bona iena tadina Abirama, Eliaba Rubena ena natuna, edena bamona Lohiabada ese idia dekenai ia karaia. Taunimanima ibounai edia vairana dekenai tano dekenai guri badana ia kehoa, vadaeni idia, bona edia bese taudia, bona edia palai ruma, bona edia hesiai taudia, bona edia ubua gaudia be tano ese idia ia ania ore.   
\p
\v 7 “Io, umui ese, emui matana dekena amo, Lohiabada ese inai kara badadia ibounai ia karaia neganai umui itaia.”   
\s1 Lohiabada ese ia gwauhamata henia tano ena namo  
\p
\v 8 Ma Mose ia gwau, “Unai dainai hari dina umui dekenai lau henia noho Taravatu ibounai do umui kamonai henia. Unai neganai goada do umui davaria, Ioridane Sinavai do umui hanaia totona, bona do umui noholaia tano do umui abia totona.  
\v 9 Ma emui mauri lagani do idia momo danu, Lohiabada ese emui sene taudia ia gwauhamata henia tano dekenai. Unai tano be idia bona edia tubudia do idia abia gwauraia, be tano namona, rata bona hani dekenai ia honu.   
\p
\v 10 “Inai do umui raka vareai bona abia tano be Aigupito, guna umui noho gabuna, bamona lasi. Aigupito dekenai uhe umui hadoa neganai, emui aena dekenai uma hapariparia totona umui lao, aniani ava dekenai ranu umui atoa bamona.  
\v 11 To do umui abia totona Ioridane Sinavai do umui raka hanaia tano be ororo bona koura tanona, guba ena medu ese ia hapariparia tano.  
\v 12 Lohiabada, emui Dirava ese inai tano ia naria noho. Lohiabada, emui Dirava ese inai tano ia itaia noho nega ibounai, lagani ia hamatamaia negana ela bona lagani ena dokona.   
\p
\v 13 “Unai dainai, hari dina umui dekenai lau henia vadaeni Taravatu do umui kamonai henia. Lohiabada emui Dirava do umui ura henia, bona iena hesiai gaukara do umui karaia, mai emui kudouna ibounai.  
\v 14 Bema inai bamona umui karaia neganai, Lohiabada ese emui tano dekenai medu do ia siaia, medu ena nega korikori neganai, lahara neganai bona laurabada neganai danu. Unai dekena amo umui ese emui uiti, bona uaina, bona olive dehoro do umui haboua.  
\v 15 Rei matamata danu umui dekenai do ia henia, emui boromakau bona mamoe edia. Aniani hegeregere momokani do umui davaria, bona do umui boga kunu.   
\p
\v 16 “To do umui naria namonamo, haida ese umui do idia hakaua kerere, idau dirava dekenai do umui tomadiho henia garina, bona idau dirava edia hesiai gaukara do umui karaia garina.  
\v 17 Bema unai bamona umui karaia neganai, Lohiabada ena badu umui dekenai do ia vara. Ia ese unai gabu ena medu do ia koua. Medu do ia diho lasi, bona tano ena anina do idia vara lasi. Inai Lohiabada ese umui ia henia noho tano be namo momokani, to medu bema ia siaia lasi neganai, umui be do umui mase haraga.   
\p
\v 18 “Unai dainai inai lauegu oda hereva do umui laloatao, bona emui kudouna dekenai do umui dogoatao. Inai Taravatu be do umui torea, bona toa bamona, emui imana bona baguna dekenai do umui kwatua kau.  
\v 19 Emui natudia dekenai inai Taravatu do umui hadibaia. Lohiabada ena Taravatu do umui herevalaia noho, emui ruma dekenai umui noho neganai, dala dekenai umui raka neganai, umui laga-ani neganai, bona umui gaukara neganai danu.  
\v 20 Emui ruma edia iduara dogoatao audia dekenai inai Taravatu do umui torea, bona emui magu iduara dekenai danu do umui torea hedinarai.  
\v 21 Unai neganai emui mauri lagani bona emui natudia edia mauri lagani be do idia momo, unai tano ena lalonai. Emui sene taudia dekenai Lohiabada ese ia gwauhamata henidia tano be unai. Umui be unuseni do umui noho, ela bona guba be tanobada ena ataiai ia noho negana ibounai.   
\p
\v 22 “Lau ese umui dekenai lau henia vadaeni Taravatu ibounai do umui kamonai henia namonamo. Lohiabada emui Dirava do umui lalokau henia, iena dala ibounai lalonai do umui raka, bona Lohiabada do umui badinaia, mai momokani danu.  
\v 23 Unai neganai Lohiabada ese inai bese taudia emui vairana dekenai do ia lulua lao. Bona umui ese, bese badadia, emui goada idia hereaia besedia, edia tano do umui abia.   
\p
\v 24 “Umui emui aena idia raka hanaia gabudia ibounai do umui abia, emui tano. Emui tano be inai: Tano kaukau gabuna, diho kahana dekena amo ela bona Lebanona Ororo, mirigini kahana dekenai, bona Euperate Sinavai, dina daekau kahana dekenai ela bona Davara Badana, dina diho kahana dekenai.   
\p
\v 25 “Umui lao gabudia ibounai, unai tano dekenai, Lohiabada emui Dirava ese iena gwauhamata hegeregerena, gari do ia havaraia. Vadaeni unuseni idia noho taudia ese umui dekenai do idia gari bada, bona tau ta ese umui do ia hadokoa diba lasi.   
\p
\v 26 “Hari dina umui emui vairana dekenai hanamoa dalana bona hadikaia dalana lau atoa, edena do umui abia hidi?  
\v 27 Bema Lohiabada emui Dirava ena Taravatu, hari dina umui dekenai lau henia gaudia umui kamonai henia neganai, hanamoa do umui davaria.  
\v 28 To bema inai Taravatu umui kamonai henia lasi, bona idau dirava, umui diba lasi dirava, dekenai umui tomadiho henia neganai, hadikaia do umui davaria.   
\p
\v 29 “Bona Lohiabada, emui Dirava ese do umui noho tano dekenai umui do ia hakaua vareai neganai, Gerisima Ororo dekenai Dirava ena hanamoa hereva do umui gwauraia, bona Ebala Ororo dekenai Dirava ena hadikaia hereva do umui gwauraia.  
\v 30 Inai ororo ruaosi be Ioridane Sinavai ena dina diho kahanai, Kanana taudia, Araba dekenai idia noho, edia tano dekenai. Unai tano be Gilegala hanua kahirakahira, More ena ouki au badadia idia noho gabuna.   
\p
\v 31 “Umui ese Ioridane Sinavai do umui hanaia, Lohiabada emui Dirava ese umui ia henia noho tano do umui abia, emui tano. To unai tano do umui abia, bona ia dekenai umui noho neganai,  
\v 32 do umui naria namonamo, taravatu bona oda ibounai, hari dina dekenai umui dekenai lau henia gaudia, do umui kamonai henia.”   
\c 12  
\s1 Tomadiho gabuna be tamona  
\p
\v 1 Ma Mose ia haroro, ia gwau, “Taravatu bona oda hereva be inai, bona Lohiabada, emui sene taudia edia Dirava umui dekenai ia henia tano dekenai inai Taravatu do umui badinaia namonamo. Oibe, tanobada dekenai emui mauri noho dinadia ibounai lalonai inai Taravatu do umui badinaia.  
\v 2 Edia gabu umui abia besedia edia dirava idia tomadiho henia gabudia ibounai do umui hadikaia ore, ororo badadia dekenai, ororo maragidia dekenai, bona kasiri audia edia henunai.  
\v 3 Edia boubou patadia do umui veria diho, edia nadi dirava laulau gaudia do umui makohia, edia hahine dirava, Asera ena au helagadia do umui gabua ore, edia kaivakuku ibounai do umui hamakohia ore, vadaeni taunimanima ese unai koikoi diravadia dekenai do idia tomadiho lou lasi, unai gabudia dekenai.   
\p
\v 4 “Lohiabada emui Dirava do umui tomadiho henia, to unai idau taudia ese edia dirava idia tomadiho henia dalana bamona lasi.  
\v 5 Lohiabada, emui Dirava, ese gabu ta do ia abia hidi, emui iduhu ibounai edia huanai dekena amo, bona unai gabu dekenai Dirava ena Ladana do ia noho. Unai gabu dekenai do umui lao, tomadiho henia totona.  
\v 6 Unai gabu dekenai do umui lao, emui boubou, gabua gaudia, bona emui boubou gaudia idauidau, bona emui kohu haria kahana 10 dekena amo kahana ta Lohiabada henia gaudia, harihari gaudia idaudia, emui gwauhamata gaudia, bona emui henia kava monina, ma boromakau bona mamoe edia vara guna natudia, inai ibounai do umui abia lao.  
\v 7 Unai gabu dekenai danu Lohiabada, emui Dirava, ena vairana dekenai do umui mai, mai emui famili danu do umui aniani, bona do umui moale hebou, emui gaukara ibounai lalonai, badina be Lohiabada, emui Dirava ese umui ia hanamoa vadaeni.   
\p
\v 8 “Harihari iniseni ita karaia noho kara be unai gabu dekenai do ita karaia lasi. Iniseni be ita ta ta ita ura dalana dekenai sibona ita tomadiho noho,  
\v 9 badina be emui laga-ani gabuna, bona emui tano korikori, Lohiabada emui Dirava ese umui do ia henia gabuna dekenai umui do ginidae lasi dainai.  
\v 10 To Ioridane Sinavai unai kahanai do umui hanaia, Lohiabada, emui Dirava, ese umui dekenai do ia henia tano, emui tano korikori dekenai do umui noho. Bona Lohiabada ese umui idia dagedage henia taudia dekena amo umui do ia hamauria, ela bona mai maino danu do umui noho.  
\v 11 Unai neganai Lohiabada ese gabu ta do ia abia hidi, iena Ladana do ia noho totona. Unai gabu dekenai Lohiabada do umui tomadiho henia, bona unuseni be umui dekenai lau oda gaudia ibounai do umui mailaia, emui gabua bouboudia, emui boubou idauidau, bona emui kohu haria kahana 10 dekena amo kahana ta Lohiabada henia gaudia, harihari gaudia idaudia, bona emui gwauhamata gaudia, Lohiabada ena.  
\v 12 Unai gabu dekenai umui be Lohiabada emui Dirava ena vairana dekenai do umui moale hebou, umui bona emui natudia memero bona emui natudia kekeni, bona emui hesiai taudia, tatau bona hahine, bona Levi taudia, emui hanua dekenai idia noho danu. Badina do umui laloa noho, Levi taudia be tano ta idia biagua diba lasi.  
\v 13 Do umui naria namonamo, boubou umui gabua neganai, gabu kavakava dekenai do umui karaia lasi.  
\v 14 To Lohiabada ese umui emui iduhu edia huanai do ia abia hidi gabuna dekenai sibona, unai gabu dekenai emui gabua bouboudia do umui henia, bona unuseni lau oda karadia ibounai do umui karaia.   
\p
\v 15 “To umui emui hanua idauidau ibounai lalonai, mauri gaudia haida, uda nani bona dia bamona gaudia, umui alaia diba, bona edia vamu umui ania diba, emui ura hegeregerena. Oibe, Lohiabada, emui Dirava ese unai bamona umui dekenai ia henia vamu ibounai umui ania diba. Goeva bona goeva lasi taudia danu idia ania diba.  
\v 16 To vamu mai rarana danu umui ania diba lasi, edia rara be tano dekenai do umui bubua, ranu bamona.  
\v 17 Inai gaudia be emui noho gabudia lalonai umui ania diba lasi momokani: Lohiabada dekenai umui henia gaudia ibounai, hegeregere emui uiti, o emui uaina, o emui olive dehoro, umui haria kahana 10 ena kahana ta gaudia, o emui boromakau o emui mamoe natuna vara guna, o emui gwauhamata gaudia, o emui harihari gaudia, o lalo namo dainai, Lohiabada dekenai umui henia gaudia.  
\v 18 To inai gaudia umui ania diba, Lohiabada, emui Dirava, ena vairanai, Lohiabada emui Dirava ese ia abia hidi gabuna dekenai. Oibe, oi bona oiemu natuna, bona oiemu hesiai taudia, bona Levi taudia oiemu hanua dekenai idia noho ese Lohiabada ena gabu dekenai unai gaudia umui ania diba. Bona Lohiabada, emui Dirava ena vairanai, emui gaukara ibounai dainai do umui moale.  
\v 19 Do umui naria namonamo, Levi taudia do umui laloaboio lasi, emui tano dekenai umui noho dinadia ibounai.   
\p
\v 20 “Lohiabada, emui Dirava ese emui tano do ia habadaia, umui dekenai ia gwauhamata bamona. Unai neganai vamu umui ania diba nega ibounai, emui ura hegeregerena.  
\v 21 Bema Lohiabada ia abia hidi tomadiho gabuna be daudau, emui boromakau o emui mamoe, Lohiabada ese umui dekenai ia henia gaudia umui alaia diba, umui lau hamaoroa bamona. Bona emui hanua dekenai unai vamu umui ania diba, emui ura hegeregerena.  
\v 22 Unai vamu do umui ania, uda nani o dia do umui ania hegeregerena. Goeva bona goeva lasi taudia idia ania diba.  
\v 23 To do umui naria namonamo, mai rarana danu do umui ania lasi, badina mauri be rara ena lalona dekenai ia noho, bona mauri be vamu danu do umui ania lasi.  
\v 24 Do umui ania lasi, to tano dekenai do umui bubua, ranu bamona.  
\v 25 Do umui ania lasi, vadaeni do umui namo, umui bona emui natudia bona tubudia ibounai, Lohiabada ena vairana dekenai umui be maoromaoro dainai.   
\p
\v 26 “To umui emui gau helagadia bona emui gwauhamata gaudia do umui abia lao, Lohiabada ese ia abia hidi gabuna dekenai.  
\v 27 Unai gabu dekenai emui gabua bouboudia edia vamu, bona edia rara, Lohiabada emui Dirava ena boubou patana dekenai do umui hahelagaia. Unai neganai emui boubou gaudia edia rara be Lohiabada emui Dirava ena boubou patana dekenai do umui bubua, to iena vamu do umui ania.  
\v 28 Do umui naria namonamo, inai lau ese umui lau hamaoroa hereva ibounai do umui badinaia momokani. Unai neganai do umui be namo, umui bona emui natudia bona tubudia, ela bona hanaihanai, badina be Lohiabada ena vairana dekenai umui be maoromaoro dainai.   
\s1 Dirava koikoidia do umui tomadiho henidia lasi  
\p
\v 29 “Lohiabada, emui Dirava, ese edia gabudia do umui abia besedia do ia hadikaia ore. Vadaeni umui ese edia tano do umui abia, bona unai gabudia dekenai do umui noho.  
\v 30 Unai neganai do umui naria namonamo, edia hanua be Lohiabada ese ia hadikaia murinai, edia dala dekenai do umui raka garina. Bona edia dirava do umui herevalaia garina, do umui gwau, ‘Inai bese be edia dirava edena bamona idia tomadiho henia? Lau danu unai bamona do lau tomadiho.’ Unai bamona do umui laloa lasi, do umui dika garina.  
\v 31 Lohiabada emui Dirava do umui tomadiho henia neganai, be unai taudia ese edia dirava idia tomadiho henia dalana bamona do umui karaia lasi. Badina be idia ese lebulebu karadia ibounai, Lohiabada ese ia badu henidia karadia idia karaia noho, edia dirava hanamoa totona. Oibe, edia natudia, memero bona kekeni be lahi dekenai idia gabua, edia dirava hanamoa totona.   
\p
\v 32 “Lauegu oda hereva ibounai do umui badinaia namonamo. Idia dekenai hereva ta ma do umui atoa lasi, bona idia dekena amo hereva ta do umui kokia lasi.   
\c 13  
\p
\v 1 “Sedira umui emui huanai, peroveta tauna o nihi tauna ta ia toreisi, bona toa ta o hoa karana,  
\v 2 ia gwauraia gauna do ia vara momokani. Vadaeni sedira do ia gwau, ‘Dirava idau, umui do diba lasi diravadia, do ita tahua, bona edia hesiai gaukara do ita karaia.’  
\v 3 Unai bamona peroveta tauna o nihi tauna ena hereva do umui abia dae lasi. Badina be Lohiabada, emui Dirava ese umui ia tohoa noho, do ia diba totona, umui ese Lohiabada umui lalokau henia mai emui kudouna ibounai dekenai o lasi.  
\v 4 Lohiabada, emui Dirava ena murinai do umui raka, bona ia do umui gari henia. Lohiabada ena hereva do umui kamonai henia, iena hesiai gaukara do umui karaia, bona ia do umui badinaia.  
\v 5 To unai peroveta tauna o nihi tauna be do umui alaia mase, badina ia ese Lohiabada kamonai henia lasi kara ia hadibaia noho. Ia gwau Lohiabada emui Dirava, Aigupito dekena amo umui ia hakaua, bona hesiai mai guia dekena amo umui ia hamauria Diravana do umui kamonai henia lasi. Bona ia gwau Lohiabada ese umui ia oda henia dalana dekena amo do umui raka siri. Unai tau do umui alaia mase, unai bamona kara dika emui huanai dekena amo do umui kokia totona.   
\p
\v 6 “Sedira emui tadikakana, o emui natuna mero, o natuna kekeni, o emui adavana lalokauna, o emui turana lalokauna ese emui lalona do idia veria, idia gwau, ‘Dirava idau gaudia do ita tomadiho henidia.’ Unai dirava be sedira umui diba lasi, bona emui sene taudia idia diba lasi diravadia.  
\v 7 To idia be sedira umui emui huanai idia noho bese edia dirava, gabu kahirakahira, o gabu daudau dekenai idia noho bese edia dirava.  
\v 8 To unai tau ese umui emui lalona do ia veria hereva do umui abia dae lasi, bona do umui kamonai henia lasi. Bona ia do umui bogahisihisi henia lasi, bona do umui hamauria lasi, bona hunia lasi.  
\v 9 Do umui alaia mase. Emui imana do idia guna ia alaia totona, gabeai taunimanima ibounai ese edia imadia dekena amo do idia alaia.  
\v 10 Nadi dekenai do umui hodoa mase, badina be ia ese Lohiabada, emui Dirava, Aigupito tano dekena amo, bona hesiai mai guia dekena amo, umui ia hamauria Dirava ia hadikaia gwauraia.  
\p “Oibe, unai tau ia ura Lohiabada dekena amo umui do ia hakaua siri dainai, do umui hodoa mase.  
\v 11 Vadaeni, Israela taudia ibounai do idia kamonai, bona do idia gari. Bona gabeai kara dika unai bamona nega ta do idia karaia lou lasi, ela bona hanaihanai.”   
\p
\v 12 “Sedira, Lohiabada, emui Dirava ese umui dekenai ia henia hanua ta dekenai sivarai umui kamonai,  
\v 13 kara dika taudia haida, emui huanai dekena amo idia toreisi, edia hanua taudia idia hakaua kerere vadaeni, idia gwau, ‘Inai idau dirava, umui do diba lasi gaudia, do ita tomadiho henia.’   
\p
\v 14 “Bema inai bamona sivarai umui kamonai neganai, do umui tahua namonamo, bona bema inai kara dika bada be momokani ia vara vadaeni neganai,  
\v 15 unai hanua ena taunimanima ibounai do umui alaia mase, bona edia boromakau bona mamoe ibounai danu do umui hamasea ore. Hanua danu do umui hadikaia ore.  
\v 16 Unai hanua taudia edia kohu be hanua ena ariara dekenai do umui haboua, bona unai gabu dekenai kohu ibounai do umui gabua ore. Hanua mai ena gau ibounai danu do umui gabua ore, ia be gabua ore boubouna, Lohiabada, emui Dirava, ena. Unai hanua umui gabua ore gabuna be do umui rakatania, do umui haginia lou lasi.   
\p
\v 17 “Inai hanua, mai ena gaudia, Lohiabada dekenai umui gabua gaudia ta do umui abia lasi, emui. Unai neganai Lohiabada ena badu ena siahu be do ia keruma, bona umui dekenai do ia bogahisihisi. Ia ese mai bogahisihisi danu umui do ia hanamoa, natuna momo umui dekenai do ia henia, emui sene taudia dekenai ia gwauhamata hegeregerena.  
\v 18 Lohiabada ese inai bamona do ia karaia, bema umui ese iena oda ibounai, hari dina lau henia gaudia umui kamonai henia, bona kara maoromaoro be Lohiabada, emui Dirava, ena vairana dekenai bema umui karaia neganai.”   
\c 14  
\s1 Mase taudia totona taitai ena taravatu  
\p
\v 1 Ma Mose ia hereva, ia gwau, “Umui be Lohiabada emui Dirava ena bese taudia. Unai dainai mase taudia totona umui taitai neganai, emui kopina do umui utua lasi, bona emui baguna dekenai huina be mase taitai totona do umui kakasia lasi.  
\v 2 Badina umui be Lohiabada emui Dirava ena bese helagana. Lohiabada ese tanobada dekenai idia noho taudia ibounai dekena amo umui ia abia hidi, iena bese korikori do umui lao totona.   
\p
\v 3 “Lohiabada ese ia gwauraia miro gaudia ta do umui ania lasi.  
\v 4 Do umui ania diba gaudia be inai: Boromakau, mamoe, nanigosi,  
\v 5 dia badana, dia maragina, bona uda dekenai noho dia, uda ena nanigosi, ororo ena dia, tano palaka ena dia, bona ororo ena mamoe.  
\v 6 Edia imana bona aena palapala be auka bona parara, bona aniani idia hadonoa, ma gabeai idia mumuta murimuri dekenai, ma idia ania lou gaudia ibounai umui ania diba.  
\v 7 Mauri gaudia, bema edia aniani idia mumuta, ma idia ania lou, to edia imana bona aena palapala idia parara lasi gaudia, be do umui ania lasi. Gaudia be inai: Kamelo, hea, bona nadi dekenai idia noho rabito. Idia be miro umui dekenai, badina be, edia aniani idia ania lou, to edia imana bona aena palapala be idia parara lasi.   
\p
\v 8 “Boroma danu do umui ania lasi. Idia be miro umui dekenai. Edia imana bona aena palapala idia parara, to edia aniani idia ania lou lasi. Edia vamu do umui ania lasi, bona edia mase gaudia do umui dogoatao lasi.   
\p
\v 9 “Gwarume gaudia mai edia taiana bona mai edia unana do umui ania diba.  
\v 10 To mai taiana lasi bona unana lasi gaudia do umui ania lasi, idia be miro umui dekenai.   
\p
\v 11 “Manu goevadia ibounai do umui ania diba.  
\v 12 To inai manu do umui ania lasi: Ugava badana, davara ugava, bona ugava maragina.  
\v 13 Bona bogibada kakakakana, bona bogibada koremana, bona bogibada bamona manudia.  
\v 14 Bona galo idauidau ibounai,  
\v 15 bona kokokoko, bona hanuaboi bogibada, bona davara bogibada, bona bogibada idauidau ibounai.  
\v 16 Bona baimumu maragina, davara galo, bona baimumu badana.  
\v 17 Bona kanage, bona taunimanima noho lasi tano ena baimumu, bona baimumu kurokurona.  
\v 18 Bona noko, bona noko bamona manudia, bona mariboi bamona manudia.   
\p
\v 19 “Manumanu ibounai, mai edia hanina, bona tano dekenai momo herea idia rau hebou gaudia be do umui ania lasi.  
\v 20 To manumanu mai edia hanina, goeva gaudia, do umui ania diba.   
\p
\v 21 “Sibona ia mase kava mauri gauna ta do umui ania lasi. Idau bese taudia, emui huanai idia noho taudia dekenai umui henia diba, idia ese unai mase kava gauna idia ania diba. O idau bese taudia dekenai unai mase kava gauna umui hoia lao diba. To umui be Lohiabada, emui Dirava ena, umui be iena bese helagana.  
\p “Nanigosi ena natuna ena vamu be iena sinana ena rata lalonai do umui nadua lasi.”   
\s1 Uma ena anina haria kahana 10, bona kahana ta Lohiabada dekenai henia  
\p
\v 22 “Lagani ta ta ibounai dekenai emui uma ena anina do umui haria karoa 10, vadaeni karoa ta be do umui hahelagaia.  
\v 23 Unai neganai Lohiabada emui Dirava ese ia abia hidi do umui tomadiho henia gabuna dekenai do umui lao. Unuseni, Lohiabada ena vairanai, umui hahelagaia karoa ta gauna, uiti, uaina, bona olive dehoro, bona emui boromakau vara guna, bona emui mamoe vara guna danu do umui ania. Inai bamona do umui karaia nega ibounai, umui ese Lohiabada emui Dirava do umui matauraia totona.   
\p
\v 24 “Sedira oiemu ruma dekena amo Lohiabada tomadiho gabuna be daudau herea dainai oi ese unai karoa namba 10, karoa helagana, Lohiabada ese oi ia hanamoa gauna, oi abia lao diba lasi.  
\v 25 Unai neganai unai karoa helagana do oi hoia, moni davana. Vadaeni unai moni be oiemu imana dekenai do oi abia, Lohiabada, oiemu Dirava ese ia abia hidi tomadiho gabuna dekenai do oi lao.  
\v 26 Unai gabu dekenai unai moni dekenai oi ura gaudia do oi hoia: Boromakau, mamoe, uaina o inua gauna aukana ta. Bona unuseni, Lohiabada oiemu Dirava ia abia hidi tomadiho gabuna dekenai, oi bona oiemu ruma taudia ibounai ese do umui aniani, mai moale danu.   
\p
\v 27 “Levi taudia danu emui hanua dekenai idia noho, be do umui durua noho, badina idia be kohu lasi bona tano lasi.   
\p
\v 28 “Lagani toi toi dekena amo, emui uma anina ena karoa namba 10, karoa helagana be do umui mailaia, emui hanua ena aniani sitoa lalonai do umui haboua.  
\v 29 Inai aniani be Levi taudia totona, badina idia be kohu bona tano lasi. Ma inai aniani danu be idau bese taudia totona, tamana bona sinana lasi maragidia totona, bona vabu totona. Idia be do idia mai, inai aniani do idia ania, bona do idia boga kunu. Unai bamona umui karaia neganai, Lohiabada, emui Dirava ese umui do ia hanamoa, emui kara ibounai lalonai.”   
\c 15  
\s1 Lagani namba 7  
\p
\v 1 Ma Mose ia hereva, ia gwau, “Lagani 7 idia ore neganai, abiatorehai ibounai be do umui gwauatao.  
\v 2 Inai bamona do umui karaia: Moni heniatorehai taudia ta ta ese edia varavara Israela taudia dekenai idia heniatorehai gauna do idia gwauatao, edia moni abia lou totona do idia laloa o do idia tahua lasi. Badina be Lohiabada ese abiatorehai ena davana ia gwauatao vadaeni.  
\v 3 Umui ese idau bese tauna dekenai umui heniatorehai gauna umui abia lou diba, to emui varavara taudia edia abiatorehai gaudia do umui tahua lasi.   
\p
\v 4 “Lohiabada emui Dirava ese umui dekenai ia henia noho tano dekenai umui do ia hanamoa bada. Unai dainai tau ta be do ia ogogami lasi emui huana dekenai,  
\v 5 bema Lohiabada do umui kamonai henia, bona hari dina umui dekenai lau henia oda do umui badinaia neganai.   
\p
\v 6 “Lohiabada ese umui do ia hanamoa, umui dekenai ia gwauhamata hegeregerena. Bese idauidau momo dekenai moni do umui heniatorehai, to umui ese idia dekena amo do umui abiatorehai lasi. Bona umui ese bese momo do umui biagua, to idia ese umui do idia biagua lasi.   
\p
\v 7 “Bema Lohiabada emui Dirava ese umui ia henia tano dekenai, emui varavara Israela tauna ta ia ogogami neganai, emui lalona do umui ha-aukaia lasi, bona unai ogogami tauna dekena amo do umui raka siri lasi.  
\v 8 To ia dekenai do umui bogahisihisi, unai ogogami tauna do umui durua, iena ogogami hegeregerena.   
\p
\v 9 “Bema abiatorehai gwauatao lagani be kahirakahira neganai, ogogami tauna ese abiatorehai ia noia neganai, do umui koua lasi. Unai bamona do umui laloa dika lasi. Bema umui heniatorehai lasi neganai, unai tau ese Lohiabada dekenai do ia tai henia, umui do ia samania totona, bona kerere do umui davaria.  
\v 10 Mai emui kudouna ibounai do umui henia, bona mai lalohisihisi lasi ia dekenai do umui henia. Badina be unai bamona umui karaia neganai, Lohiabada emui Dirava ese umui do ia hanamoa, emui gaukara bona emui kara ibounai lalonai.   
\p
\v 11 “Badina be ogogami taudia be nega ibounai tano dekenai do idia noho. Unai dainai umui lau oda henia inai, emui varavara taudia bona ogogami taudia dekenai do umui bogahisihisi henia, gau lasi taudia do umui durua emui tano lalonai.   
\p
\v 12 “Bema emui varavara, Heberu tauna ta o Heberu hahine ta umui hoia, bona ia be lagani 6 lalonai emui hesiai gaukara do ia karaia neganai, lagani 7 lalonai do umui ruhaia.  
\v 13 Do umui ruhaia neganai, ima kavakava dekenai do umui siaia lao lasi.  
\v 14 To emui mamoe orea dekena amo, emui uiti anina dekena amo, bona emui uaina dekena amo, harihari gaudia do umui henia. Lohiabada emui Dirava ese uma anina, harihari gaudia umui dekenai ia henia hegeregerena, umui ese umui ruhaia hesiai tauna do umui henia.   
\p
\v 15 “Do umui laloa, umui danu hesiai mai guia danu gaukara umui karaia Aigupito tano dekenai, bona Lohiabada, emui Dirava, ese umui ia ruhaia. Unai dainai inai oda be hari dina umui dekenai lau henia noho.   
\p
\v 16 “To sedira emui hesiai tauna mai guia danu ese umui bona emui bese taudia ia lalokau henia, bona ia ura be umui dekenai do ia noho.  
\v 17 Unai neganai auri mai matana ta do umui abia, bona iduara dekenai unai hesiai tauna ena taiana do umui gwadaia, matuna do umui karaia. Vadaeni unai tau ese emui hesiai gaukara do ia karaia noho, ela bona do ia mase. Emui hesiai hahine dekenai danu unai bamona do umui karaia.   
\p
\v 18 “Emui hesiai tauna mai guia danu umui ruhaia neganai, do umui laloa dika o hesikulaia lasi. Badina be ia ese lagani 6 lalonai umui totona ia gaukara davana maragina dekenai. Iena gaukara davana be hesiai mai guia lasi tauna ena davana kahana sibona. Unai dainai mai laloa namo do umui ruhaia, bona Lohiabada emui Dirava ese umui do ia hanamoa, emui kara ibounai lalonai.   
\s1 Boromakau bona mamoe edia vara guna be Lohiabada ena  
\p
\v 19 “Emui boromakau bona mamoe orea lalonai edia vara guna tau gaudia do umui atoa siri, idia helaga, Lohiabada, emui Dirava ena. Boromakau edia natudia vara guna tau dekenai gaukara do umui henia lasi. Bona mamoe edia natudia vara guna tau edia huina do umui utua lasi.  
\v 20 Lagani ta ta ibounai unai vara guna gaudia be umui bona emui bese taudia do umui ania, Lohiabada emui Dirava ena vairanai, ia abia hidi tomadiho gabuna dekenai.   
\p
\v 21 “Bema boromakau ta o mamoe ta be mai ena toto o bero, o iena aena ia dika, o iena matana ia kepulu, o mai ena dika ta neganai, umui ese Lohiabada emui Dirava ena boubou totona do umui henia lasi.  
\v 22 To emui hanua dekenai, umui ibounai ese unai bamona boromakau bona mamoe umui ania diba, miro taudia bona miro lasi taudia danu, uda nanigosi o dia umui ania hegeregerena.   
\p
\v 23 “To mai rara danu unai mauri gaudia do umui ania lasi. Edia rarana be tano dekenai do umui bubua, ranu bamona.”   
\c 16  
\s1 Pasova aria  
\p
\v 1 Ma Mose ia hereva, ia gwau, “Hua ladana Abiba do umui laloa, bona Pasova aria do umui karaia, Lohiabada emui Dirava do umui hanamoa totona. Badina be Abiba hua lalonai Lohiabada emui Dirava ese hanuaboi neganai Aigupito tano dekena amo umui ia hakaua mai.  
\v 2 Pasova ena boubou gauna be emui mamoe orea dekena amo do umui abia, bona do umui alaia mase, Lohiabada, emui Dirava ena, ia ese ia abia hidi tomadiho gabuna dekenai.   
\p
\v 3 “Idia hatubua paraoa do umui ania lasi unai aria dekenai. Dina 7 lalonai mai hatubua gauna lasi paraoa sibona, hisihisi ena toana gauna, do umui ania, badina be Aigupito umui rakatania haragaharaga. Unai aria dekena amo, emui mauri dinadia ibounai lalonai, be Aigupito tano umui rakatania dinana do umui laloa noho.   
\p
\v 4 “Dina 7 lalonai paraoa hatubua muramura do ia hedinaraia lasi emui tano ibounai dekenai. Bona umui alaia mamoena ena vamu be do umui ania haraga, dina tamona lalonai, vamu taina be do ia noho lasi ela bona dabai.   
\p
\v 5 “Pasova boubouna be Lohiabada, emui Dirava ese umui dekenai do ia henia hanua edia lalonai do umui alaia lasi.  
\v 6 Lohiabada, emui Dirava be gabu ta do ia abia hidi, iena ladana unuseni do ia noho totona, unai gabu sibona dekenai Pasova boubou do umui alaia. Adorahi neganai, dina do ia diho neganai do umui alaia, Aigupito dekena amo umui raka siri dinana hegeregerena.   
\p
\v 7 “Boubou mamoena do umui nadua, bona do umui ania, Lohiabada emui Dirava, ese do ia abia hidi gabuna dekenai. Bona kerukeru dabai emui palai ruma dekenai do umui giroa lou.  
\v 8 Dina 6 edia lalonai mai hatubua gauna lasi paraoa do umui ania. Bona dina namba 7 dekenai do umui haboua, Lohiabada emui Dirava do umui tomadiho henia. Unai dina dekenai gaukara ta do umui karaia lasi.   
\s1 Uma Anina Utua ena aria  
\p
\v 9 “Emui uiti umui utua hamatamaia murinai, pura 7 do umui duahia.  
\v 10 Unai pura 7 idia ore, vadaeni Uma Anina Utua ena aria do umui karaia, Lohiabada emui Dirava do umui hanamoa totona. Emui harihari gaudia do umui henia, Lohiabada, emui Dirava ese iena harihari gaudia umui dekenai ia henia hegeregerena.   
\p
\v 11 “Lohiabada ena vairana dekenai do umui moale, umui, bona emui natudia, emui hesiai taudia, bona emui hanua dekenai idia noho Levi taudia, idau bese taudia, tamana bona sinana lasi maragidia, bona vabu danu. Umui ibounai be Lohiabada ese ia abia hidi tomadiho gabuna dekenai do umui moale hebou.   
\p
\v 12 “Inai taravatu ibounai be do umui kamonai henia momokani, bona do umui laloaboio lasi, guna umui be hesiai mai guia danu taudia, Aigupito dekenai umui noho neganai.   
\s1 Au Raurau Ruma Maragidia ena aria  
\p
\v 13 “Umui ese uiti ibounai umui kwadia haorea, bona emui vain edia huahua umui moia haorea murinai, Au Raurau Ruma Maragidia ena aria do umui karaia dina 7 lalonai.  
\v 14 Inai aria dekenai do umui moale hebou, umui bona emui natudia, emui hesiai taudia, bona emui hanua dekenai idia noho Levi taudia, idau bese taudia, tamana bona sinana lasi taudia, bona vabu danu.   
\p
\v 15 “Dina 7 lalonai inai aria do umui karaia, Lohiabada, emui Dirava do umui hanamoa, ia ese ia abia hidi tomadiho gabuna dekenai. Mai moale bada danu do umui karaia, badina be Lohiabada, emui Dirava ese umui do ia hanamoa, emui uma ena anina bona emui gaukara ibounai lalonai.   
\p
\v 16 “Lagani ta lalonai emui tatau ibounai be nega toi Lohiabada, emui Dirava ena vairanai do idia haboua, ia dekenai do idia tomadiho henia, ia ese ia abia hidi tomadiho gabuna dekenai. Hebou toiosi be inai: Pasova aria, Uma Anina Utua ena aria, bona Au Raurau Ruma Maragidia ena aria danu.  
\v 17 Tau ta ta ibounai ese harihari gauna ta Lohiabada dekenai do idia henia, edia goada, edia goada hegeregerena, Lohiabada emui Dirava ese idia dekenai ia henia hegeregerena.   
\s1 Kota biaguna taudia  
\p
\v 18 “Lohiabada emui Dirava ese umui dekenai do ia henia hanua ibounai dekenai kota biaguna bona opesa taudia do umui abia hidi. Inai kota biagudia ese taunimanima do idia kota henia, mai laloa maoromaoro danu.  
\v 19 Edia kota hereva do idia hagagevaia lasi, tau ta do idia durua totona, to maka tamona dekenai do idia kota henia. Kota hagagevaia totona davana do idia abia lasi. Badina be kota hagagevaia davana ese aonega taudia edia matana ia hakepulua, bona kara maoromaoro taudia edia laloa ia hakererea.   
\p
\v 20 “Kara maoromaoro momokani sibona do umui karaia noho, vadaeni do umui mauri noho, bona Lohiabada emui Dirava ese umui dekenai do ia henia tano be emui tano korikori do ia halaoa.   
\s1 Dirava koikoi dekenai do umui tomadiho henia lasi  
\p
\v 21 “Lohiabada emui Dirava ena boubou patana umui karaia neganai, ia badinai au helagana ta do umui haginia lasi.  
\v 22 Bona nadi bada helagana ta do umui haginia lasi, badina be Lohiabada, iseda Dirava ese inai bamona gaudia ia badu henia noho.   
\c 17  
\p
\v 1 “Boromakau ta o mamoe ta mai ena bero o toto, o mai ena dika ta do umui alaia lasi, Lohiabada emui Dirava ena boubou gauna totona, badina inai kara dekenai Lohiabada ia badu henia noho.   
\p
\v 2 “Bema Lohiabada emui Dirava ese umui ia henia hanua ta lalonai tau ta o hahine ta umui davaria, ia ese Lohiabada dekenai ia kara dika,  
\v 3 bona iena Taravatu ia utua vadaeni, ia ese idau dirava ia tomadiho henia, bona edia hesiai gaukara ia karaia, o bema dina, hua o hisiu dekenai ia tomadiho.  
\v 4 Inai bamona sivarai umui kamonai neganai, do umui tahua namonamo. Bema umui davaria unai kara ia vara momokani vadaeni Israela dekenai,  
\v 5 unai tau o hahine be hanua ena murimurinai do umui hakaua lao, bona nadi dekenai do umui hodoa mase.   
\p
\v 6 “Do umui alaia mase diba bema tau rua o tau haida ese idia samania. To bema tau tamona sibona ese ia samania neganai, unai tau o hahine do umui alaia lasi.  
\v 7 Samania taudia ese nadi ginigunadia do idia negea. Unai murinai taunimanima ibounai ese do idia hodoa. Inai bamona dala dekenai inai bamona kara dika do umui haorea momokani.   
\p
\v 8 “Sedira hepapahuahu haida be auka herea, bona hanua kota biagudia ese kota hereva idia gwauraia diba lasi, hegeregere daika ese tau ta ia alaia, o daika ena samani be momokani, o daika ese heatu ia hamatamaia. Inai bamona daradara ia vara neganai, Lohiabada emui Dirava ia abia hidi tomadiho gabuna dekenai do umui lao.  
\v 9 Bona emui hepapahuahu totona, Levi hahelagaia taudia edia vairanai, bona tomadiho gabuna ena kota biaguna ena vairanai do umui gini, idia ese emui hepapahuahu do idia hamaoromaoroa.  
\v 10 Idia ese kota hereva do idia gwauraia, bona edia hereva ibounai hegeregerena do umui karaia.  
\v 11 Edia kota hereva do umui abia dae momokani, bona edia hadibaia hereva ta ta ibounai do umui badinaia namonamo.   
\p
\v 12 “Bema tau ta ese Dirava ena tomadiho gabuna ena kota biaguna, o ena hahelagaia tauna ia kamonai henia lasi neganai, unai tau be do umui alaia mase. Inai dala dekena amo unai bamona dika be Israela dekena amo do umui haorea momokani.  
\v 13 Bona taunimanima ibounai be inai sivarai do idia kamonai, vadaeni do idia gari, bona gabeai unai bamona kara be tau ta ese do idia karaia lou lasi.   
\s1 Israela taudia be gabeai do idia ura king ta ese idia do ia gunalaia  
\p
\v 14 “Lohiabada, emui Dirava, ese umui dekenai do ia henia tano lalonai do umui ginidae, bona do umui abia, emui tano korikori, bona unuseni do umui noho. Unai neganai do umui ura emui king ta do umui haginia, umui emui tano kahirakahira idia noho besedia be mai edia king bamona.  
\v 15 Lohiabada, emui Dirava ese ia abia hidi tauna sibona be emui king do umui halaoa. Emui bese Israela tauna ta do umui abia, emui king do umui halaoa, idau bese tauna lasi.  
\v 16 Emui king ese hosi momo do ia abia lasi, bona ia ese taunimanima Aigupito dekenai do ia siaia lasi, hosi ma haida do idia hoia totona. Badina be Lohiabada ese ia hereva vadaeni, iena bese taudia be Aigupito dekenai do idia giroa lou lasi.   
\p
\v 17 “King danu ese adavana momo do ia abia lasi, idia ese Lohiabada dekena amo iena lalona do idia veria garina. King ese danu siliva bona golo momo do ia haboua lasi.   
\p
\v 18 “Iena basileia dekenai king dagi ia abia neganai, king ese Dirava ena Taravatu bona hadibaia hereva ena buka ta, hahelagaia taudia, Levi taudia dekena amo ia abia gauna, be ia sibona do ia torea hanai, buka ta dekenai.  
\v 19 Inai buka be ia dekenai do ia noho, bona ia ese iena mauri dinadia ibounai lalonai do ia duahia. Unai dekena amo, king be Lohiabada matauraia kara dekenai do ia manada, bona buka ena taravatu bona oda ibounai do ia kamonai henia, bona karaia momokani.  
\v 20 Unai bamona ia karaia neganai, king be do ia hekokoroku lasi, do ia laloa lasi, ia ese iena varavara Israela taudia ia hereaia. Bona ia ese danu Taravatu dekena amo do ia raka siri lasi, idiba kahanai o lauri kahanai. Unai bamona ia karaia neganai, ia ese king dagi do ia dogoatao lagani momo, bona iena tubudia ese Israela do idia gunalaia uru momo lalonai.”   
\c 18  
\s1 Hahelagaia taudia bona Levi taudia dekenai harihari gaudia  
\p
\v 1 Mose ma ia hereva, ia gwau, “Hahelagaia taudia, Levi taudia, bona Levi iduhu taudia ibounai ese Israela ena tano ta do idia biagua lasi. Edia gaukara davana be tamona, lahi dekenai idia gabua bouboudia, bona boubou idauidau, taunimanima ese Lohiabada dekenai idia mailaia gaudia.  
\v 2 Levi taudia ese tano do idia biagua lasi, iduhu haida ese idia biagua bamona. To edia davana be inai: Lohiabada be edia ahuna, ia ese ia gwauhamata vadaeni hegeregerena.   
\p
\v 3 “Hahelagaia taudia edia davana, taunimanima edia boubou gaudia dekena amo, be boromakau o mamoe edia pagana, edia aukina, bona edia bogana ibounai.  
\v 4 Umui ese emui uiti ena anina ginigunana, emui uaina matamata, emui olive dehoro, bona emui mamoe ena huina matamata be hahelagaia taudia dekenai do umui henia.  
\v 5 Badina be Lohiabada, emui Dirava, ese idia ia abia hidi vadaeni, emui iduhu ibounai edia huanai dekena amo. Io, Levi iduhu taudia, bona edia natudia, tubudia ese Lohiabada ena hahelagaia gaukara do idia karaia ela bona hanaihanai.   
\p
\v 6 “Bema Levi tauna ta ia ura bada helaga gaukara do ia karaia, vadaeni iena noho hanua Israela lalonai do ia rakatania, bona Lohiabada ese ia abia hidi tomadiho gabuna dekenai ia vareai diba.  
\v 7 Unuseni ia ese Lohiabada, iena Dirava, ena ladana dekenai helaga gaukara do ia karaia diba, Lohiabada ena vairanai, iena varavara Levi taudia ese unuseni idia karaia noho hegeregerena.  
\v 8 Bona ia ese idia danu edia aniani hegeregerena do ia ania. Ma bema iena hanua taudia ese moni o kohu idia siaia, ia ese do ia dogoatao diba, iena.   
\s1 Dirava diba lasi taudia edia kara do umui karaia lasi  
\p
\v 9 “Lohiabada, emui Dirava, umui dekenai do ia henia tano dekenai do umui raka vareai neganai, unuseni idia noho bese taudia edia kara bodaga do umui karaia lasi.  
\v 10 Umui ese emui natudia be lahi dekenai do umui gabua lasi. Meamea kara do umui karaia lasi, puripuri bona vada danu do umui karaia lasi.  
\v 11 Puripuri gaudia danu do umui gaukaralaia lasi, bona mase taudia edia laumadia dekenai do umui nanadaia lasi, bona idia danu do umui herevahereva lasi.   
\p
\v 12 “Lohiabada, emui Dirava ese unai bamona kara bodaga idia karaia taudia ia badu henia noho. Bona unai tano hari idia noho bese taudia ese bodaga karadia unai bamona idia karaia noho dainai, Lohiabada ese umui emui vairana dekena amo ia luludia noho.  
\v 13 Do umui noho namonamo, kerere ta lasi, Lohiabada, emui Dirava ena vairanai.”   
\s1 Dirava ia gwauhamata, peroveta taudia do ia siaia  
\p
\v 14 Mose ia gwau, “Unai tano, do umui noholaia tanona dekenai noho bese taudia ese meamea taudia bona lauma dika abia taudia idia kamonai henidia noho. To Lohiabada emui Dirava ese umui ia taravatua vadaeni, ia gwau unai bamona do umui karaia lasi.  
\v 15 To Lohiabada, emui Dirava ese peroveta tauna, lau hegeregere, umui dekenai do ia siaia. Ia be umui emui bese tauna ta, bona umui ese do umui kamonai henia.   
\p
\v 16 “Sinai Ororo dekenai umui hebou dinana dekenai, umui ese Lohiabada, emui Dirava umui noia, umui gwau, ‘Mani emu kara, Lohiabada aiemai Dirava, ena gadona do ai kamonai lou lasi, bona iena lahi do ai itaia lou lasi, do ai mase garina.’   
\p
\v 17 “Vadaeni Lohiabada ese lau dekenai ia hereva, ia gwau, ‘Edia noinoi be maoromaoro,  
\v 18 lau ese edia bese huanai dekena amo peroveta tauna ta do lau abia hidi, oi hegeregere, bona lauegu hereva be iena uduna dekenai do lau gwauraia. Bona lauegu oda hereva ibounai be ia ese taunimanima dekenai do ia hamaoroa.  
\v 19 Inai peroveta tauna be lauegu ladana dekenai do ia hereva, bona daika ese unai hereva ia abia dae lasi, lau ese davana do lau henia.  
\v 20 To bema peroveta tauna ta ese lau gwauraia lasi herevana ta lauegu ladana dekenai ia gwauraia, unai peroveta tauna be do umui hamasea. Bona bema peroveta tauna ta be idau dirava edia ladana dekenai hereva ia gwauraia neganai, unai peroveta tauna danu do umui alaia.’   
\p
\v 21 “Sedira do umui laloa daradara, umui gwau, ‘Edena bamona do ai diba peroveta tauna ta ese Lohiabada dekena amo ia mai lasi herevana ia gwauraia noho?’  
\v 22 Bema peroveta tauna ta ese hereva ta Lohiabada ena ladana dekenai ia gwauraia, to unai hereva be momokani lasi, bona iena anina ia vara lasi neganai, unai be Lohiabada ena hereva lasi. Unai bamona peroveta tauna be sibona ena siahu dekenai ia hereva, unai dainai do umui gari henia lasi.   
\c 19  
\s1 Mose ese heau mauri hanua badadia ia gwauraia  
\p
\v 1 “Lohiabada, emui Dirava ese umui dekenai do ia henia tano lalonai idia noho bese do ia hadikaia, bona umui ese idia do umui lulua ore. Unai murinai edia hanua do umui abia, bona edia ruma lalonai do umui noho.  
\v 2 Unai neganai hanua toi do umui abia hidi, tano ena kahana toi dekenai do idia noho, Lohiabada emui Dirava ese umui do ia henia tano lalonai.  
\v 3 Dala danu do umui karaia, inai kahana toi dekenai idia noho hanua dekenai do idia lao. Vadaeni bema tau ta ese ma tau ta ia alaia neganai, unai hanua ta dekenai do ia heau haraga diba. Lohiabada emui Dirava ese umui do ia henia tano dekenai unai bamona do umui karaia.   
\p
\v 4 “Vadaeni bema tau ta ese ma tau ta, ia badu henia lasi tauna, ia alaia kava neganai, unai tau ese unai hanua ta dekenai do ia heau mauri diba.  
\v 5 Sedira tau ta iena turana danu uda dekenai idia lao, au idia utua totona, to ira ena auri be ira ena auna dekena amo do ia roho, iena turana dekenai do ia tubu, vadaeni ia alaia mase. Unai neganai unai ira ia davea tauna ese unai hanua toiosi ta dekenai do ia heau henia diba, do ia mauri totona.  
\v 6 Bema hanua be tamona sibona neganai, mase tauna ena varavara, davana henia tauna, ese unai alaia tauna do ia lulua, bona dala be ia daudau dainai, do ia davaria haraga, bona mai badu, kerere lasi tauna do ia alaia mase. To unai ia alaia kava tauna ese mase karana momokani ia karaia lasi, badina ia ese iena turana ia badu henia lasi.   
\p
\v 7 “Unai dainai umui lau oda henia inai: Hanua toi do umui abia hidi, vadaeni taunimanima be idia dekenai do idia heau mauri haraga diba.”   
\p
\v 8 Ma Mose ia hereva, ia gwau, “Lohiabada emui Dirava ese emui tano do ia habadaia, emui sene taudia dekenai ia gwauhamata hegeregerena. Unai bamona ia karaia neganai,  
\v 9 hanua toi ma do umui abia hidi. Badina Lohiabada ese inai tano umui dekenai do ia henia, bema hari dina lau gwauraia oda ibounai do umui karaia, bona bema Lohiabada emui Dirava umui lalokau henia, bona iena hadibaia hereva hegeregerena do umui noho namonamo neganai.   
\p
\v 10 “Inai heau mauri hanuadia do umui karaia, kerere lasi taudia be do idia mase garina. Unai dekena amo umui ese kerere lasi tauna ena rarana do umui bubua lasi, Lohiabada emui Dirava ese umui dekenai do ia henia tano ena lalonai.   
\p
\v 11 “To bema tau ta ese ma tau ta ia badu henia noho, vadaeni hunia gubuna dekenai ia naria, bona unai gabu dekena amo ia heatu henia, ia alaia mase. Unai murinai unai tau ese unai heau mauri hanua ta dekenai ia heau neganai,  
\v 12 iena hanua tau badadia ese tau haida do idia siaia, unai tau do idia mailaia lou, bona mase tauna ena varavara tauna dekenai do idia henia, ia ese unai alaia tauna do ia hamasea totona.  
\v 13 Unai alaia tauna do umui bogahisihisi henia lasi. Alaia taudia korikori be Israela dekena amo do umui kokia momokani, vadaeni emui noho be do ia namo.   
\s1 Hetoa gabudia gunadia  
\p
\v 14 “Emui badibadinai ia noho tauna ena tano hetoana nadi, emui sene taudia idia atoa gauna do umui kokia lasi, Lohiabada emui Dirava ese umui dekenai ia henia noho tano dekenai.”   
\s1 Uitnesi taudia edia taravatu  
\p
\v 15 Ma Mose ia gwau, “Uitnesi tauna tamona ena hereva be hegeregere lasi, kerere tauna ta ena kara dika o iena kerere hamomokania totona. To uitnesi taudia rua o toi edia hereva ese samani hereva ta do idia hamomokania.  
\v 16 Bema koikoi tauna ta ese tau ta ia samania, ia gwau, ‘Unai tau ia kerere,’  
\v 17 unai tatau ruaosi be Lohiabada tomadiho gabuna tamona dekenai do idia lao. Unuseni dubu ena hahelagaia taudia bona kota biagudia, dagi taudia ese unai kerere do idia tahua.  
\v 18 Unai kota biagudia ese unai kerere do idia tahua namonamo, bona bema idia davaria unai uitnesi ese iena varavara ia samania koikoi,  
\v 19 vadaeni do umui dogoatao, ia ese iena varavara do idia henia kerere davana hegeregerena, be ia ese do ia abia.  
\v 20 Vadaeni Israela taudia oredia be inai kara do idia kamonai, bona do idia gari, bona kara dika unai bamona do idia karaia lou lasi umui emui huanai.  
\v 21 Do umui bogahisihisi henia lasi, to kerere davana inai bamona do umui karaia: Mauri ena davana be mauri, matana ena davana be matana, isena ena davana be isena, imana ena davana be imana, aena ena davana be aena.”   
\c 20  
\s1 Tuari totona hereva  
\p
\v 1 Ma Mose ia hereva, ia gwau, “Umui dekenai idia tuari henia taudia do umui tuari henidia neganai, sedira hosi bona kariota momo bona tuari taudia momo herea, emui goada idia hereaia, do umui itaia. To idia dekenai do umui gari henia lasi. Lohiabada emui Dirava, Aigupito dekena amo umui ia hamauria Diravana be umui dekenai do ia noho.   
\p
\v 2 “Tuari be kahirakahira do umui hamatamaia neganai, emui hahelagaia tauna be do ia raka vaira, emui tuari taudia dekenai do ia haroro,  
\v 3 do ia gwau, ‘Israela taudia e, hari dina umui be do umui tuari momokani. Umui dekenai idia tuari henia taudia dekenai do umui gari lasi, do umui boga auka bona do umui daradara sisina lasi.  
\v 4 Lohiabada emui Dirava ese kwalimu umui dekenai do ia henia.’   
\p
\v 5 “Unai neganai tuari biagudia ese tuari taudia do idia hereva henia, do idia gwau, ‘Bema umui ta ese ruma matamata ta ia haginia vadaeni, to do ia kehoa lasi, ia be iena ruma dekenai do ia giroa lou, tuari dekenai do ia mase garina, bona idau tauna ta ese iena ruma do ia kehoa garina.   
\p
\v 6 “ ‘Bema umui ta ese vain uma ta ia hadoa vadaeni, to vain huahua do ia utua lasi, ia be iena ruma dekenai do ia giroa lou, tuari dekenai do ia mase garina, bona idau tauna ta ese iena vain anina do ia utua garina.  
\v 7 Sedira umui ta ese kekeni ta dekenai ia maoheni, to ia be do headava lasi. Ia be iena ruma dekenai do ia giroa lou, tuari dekenai do ia mase garina, bona idau tauna ta ese iena kekeni do ia adavaia garina.’   
\p
\v 8 “Ma tuari biagudia ese edia tuari taudia do idia hereva henia do idia gwau, ‘Bema tau ta be tuari totona ia gari bada neganai, ia ese iena ruma dekenai do ia giroa lou, ia ese iena bamona tuari taudia edia lalona do ia hamanokaia garina.’   
\p
\v 9 “Tuari biagudia ese edia hereva idia haorea murinai, idia ese tuari taudia edia orea ta ta edia kapena bona gunalaia taudia do idia abia hidi.”   
\p
\v 10 Ma Mose ia gwau, “Bema umui ese hanua ta do umui tuari henia gwauraia neganai, unai gabu taudia dekenai maino hereva do umui gwauraia guna.  
\v 11 Bema hanua taudia ese emui maino hereva idia abia dae, bona edia magu iduara idia kehoa neganai, hanua taudia ibounai be emui hesiai taudia do idia lao, bona emui hesiai gaukara do idia karaia.   
\p
\v 12 “To bema emui maino hereva idia abia dae lasi, bona bema idia ura tuari, umui ese edia hanua do umui koua hagegea,  
\v 13 ela bona Lohiabada emui Dirava ese unai hanua umui dekenai do ia henia. Vadaeni edia tatau ibounai do umui alaia mase.  
\v 14 To hahine, mai edia natudia do umui abia mauri, bona boromakau bona hanua rumadia mai edia kohu danu do umui abia, emui. Umui idia tuari henia taudia edia kohu, Lohiabada emui Dirava ese umui dekenai ia henia gaudia do umui abia, mai moale danu.   
\p
\v 15 “Unai bamona do umui karaia, unai do umui noho tano ena murimurinai hanuadia dekenai. Idia be emui tano dekena amo daudau idia noho.   
\p
\v 16 “To Lohiabada emui Dirava ese umui dekenai do ia henia tano lalonai idia noho hanua umui tuari henia neganai, taunimanima ibounai bona mauri gaudia ibounai do umui alaia mase.  
\v 17 Lohiabada ese ia oda hegeregerena, inai bese taudia do umui alaia ore momokani: Hiti taudia, Amoro taudia, Kanana taudia, Perisi taudia, Hivi taudia, bona Iebusu taudia.  
\v 18 Inai taudia do umui alaia ore, vadaeni idia ese edia dirava idia tomadiho henia neganai, edia kara bodagadia be umui dekenai do idia hadibaia lasi. Bona unai dainai umui ese Lohiabada emui Dirava dekenai do umui kara dika lasi.   
\p
\v 19 “Bema hanua ta umui tuari henia, bona bema umui koua hagegea nega daudau neganai, inai gabu ena huahua audia ira dekenai do umui utua lasi. Unai au edia huahua do umui ania, bona au do umui hadikaia lasi, badina unai au be taunimanima lasi, idia ese umui idia tuari henia lasi.  
\v 20 To mai edia huahua lasi audia do umui utua diba, vadaeni hanua magu hamakohia audia dekenai do umui gaukaralaia, ela bona unai hanua, umui ia tuari henia hanua do umui halusia.”   
\c 21  
\s1 Bema ala-ala tauna idia davaria lasi neganai  
\p
\v 1 Ma Mose ia hereva, ia gwau, “Bema Lohiabada emui Dirava ese umui do ia henia tano dekenai, hanua ena murimurina dekenai, mase tauna ta umui davaria, bona bema umui diba lasi daika ese ia alaia,  
\v 2 unai neganai emui lohia taudia bona emui kota biagudia be do idia raka lao, mase tauna idia davaria gabuna, bona kahirakahira idia noho hanua edia padana, be do idia diba totona,  
\v 3 edena hanua be kahirakahira momokani. Vadaeni unai kahirakahira hanua ena tau badadia ese boromakau ena natuna hahine ta, idia do gaukaralaia lasi bona aiona dekenai maduna huaia auna idia do atoa lasi gauna, do idia abia hidi.   
\p
\v 4 “Inai hanua tau badadia ese unai boromakau hahine be koura ta mai ena sinavai dekenai do idia hakaua lao. Unai gabu dekenai idia ese boromakau hahine ena aiona do idia hamakohia.   
\p
\v 5 “Unai neganai hahelagaia taudia, Levi taudia, be do idia raka mai. Lohiabada, emui Dirava ese Levi taudia ia abia hidi vadaeni, idia ese heai bona heatu ibounai do idia tahua bona hamaoromaoroa. Idia ese danu Lohiabada ena hesiai gaukara do idia karaia, bona Lohiabada ena ladana dainai hanamoa hereva do idia gwauraia.   
\p
\v 6 “Vadaeni unai mase tauna dekenai ia kahirakahira hanua ena tau badadia ese unai boromakau natuna hahine, koura dekenai iena aiona idia makohia gauna, ena ataiai, edia imana do idia huria.  
\v 7 Do idia gwau, ‘Aiemai imana ese inai tau ena rarana idia habubua lasi, bona aiemai matana dekenai inai alaia karana ai itaia lasi.  
\v 8 Lohiabada e, oiemu bese Israela, oi ese Aigupito dekena amo oi hamauria besena do oi bogahisihisi henia. Ai ura lasi inai kerere lasi tauna ena rarana be oiemu bese Israela edia latanai do ia noho. Mani emu kara aiemai dika do oi gwauatao, bona inai rara ena kerere davana ai dekenai do oi henia lasi.’   
\p
\v 9 “Unai neganai unai kerere ena davana do umui abia lasi. Unai kerere lasi tauna ena rarana be umui emui huanai dekena amo Lohiabada ese do ia kokia, Lohiabada ena vairana dekenai kara maoromaoro umui karaia dainai.   
\s1 Tuari dekenai umui abia mauri hahine taudia  
\p
\v 10 “Umui dekenai idia tuari henia taudia umui tuari henidia neganai, Lohiabada, emui Dirava, ese kwalimu umui dekenai do ia henia, bona taunimanima do umui abia mauri.  
\v 11 Unai neganai, bema hahine namona ta be edia huanai oi itaia, bona bema oi ura henia, do oi abia diba oiemu adavana.  
\v 12 Oiemu ruma dekenai do oi abia lao. Unuseni ia ese iena huina do ia kakasia ore, bona iena ima koukouna do ia utua.  
\v 13 Umui abia mauri neganai ia karaia dabua do ia kokia, dabua idauna do ia atoa. Bona ia ese oiemu ruma dekenai do ia noho, iena tamana bona sinana totona do ia taitai, ela bona hua ta do ia ore. Unai murinai oi ese ia dekenai do oi lao diba, bona do oi adavaia, ia be oiemu adavana do ia lao.  
\v 14 To gabeai, bema oi ura henia lasi neganai, do oi ruhaia, iena ura gabuna dekenai do ia lao. Bona hesiai mai guia danu hahine bamona, moni abia totona, do oi hoia lao lasi, badina be oiemu ura dainai oi sihari henia.   
\s1 Vara guna natuna ese iena tamana ena kohu ena kahana bada do ia abia  
\p
\v 15 “Sedira tau ta ena adavana be rua, bona sedira unai tau ese hahine ta ia ura henia, to ta ia ura henia lasi. Sedira unai hahine ruaosi ese natuna tau idia havaraia. To vara guna natuna be tau ia ura henia lasi hahine ese ia havaraia.  
\v 16 Vadaeni unai tau ese iena kohu be iena natuna edia huanai ia haria neganai, ia ese ia ura henia hahine ena natuna dekenai vara guna ena ahuna do ia henia lasi.   
\p
\v 17 “To vara guna natuna korikori, ia ura henia lasi hahine dekena amo ia havaraia natuna, dekenai be iena kohu ibounai dekena amo ahuna rua do ia henia. Unai vara guna natuna be iena tamana ena goada toana ginigunana, bona ia ese vara guna ena ahuna bada do ia abia.   
\s1 Tamana bona sinana ia kamonai henia lasi uhau tauna  
\p
\v 18 “Sedira tau ta ena natuna be dagedage, bona ia ese iena tamana bona sinana edia hereva ia negea. Idia matakani henia, to idia dekenai ia kamonai henia lasi.  
\v 19 Unai neganai iena tamana bona sinana ese edia natuna be iena hanua ena tau badadia dekenai do idia hakaua lao, hanua ena magu iduara dekenai.   
\p
\v 20 “Idia ese tau badadia do idia hamaoroa, do idia gwau, ‘Aiemai natuna be inai, ia be ia dagedage noho, aiemai sisiba ia negea noho, bona aiemai hereva ia kamonai lasi momokani. Ia ese moni ia negea kava noho, bona muramura ia inua momo noho.’  
\v 21 Unai neganai unai hanua taudia ibounai ese unai tauna nadi dekenai do idia hodoa mase. Unai kara umui karaia neganai, unai bamona dika do umui haorea momokani. Israela taudia ibounai ese unai sivarai do idia kamonai, bona do idia gari.   
\s1 Taravatu idauidau  
\p
\v 22 “Sedira tau ta ese kara dika ta ia karaia, bona unai kara ena davana be mase. Vadaeni au dekenai do idia taua dae ela bona ia mase.  
\v 23 To ia be unuseni do ia noho lasi ela bona dabai. Unai mase tauna be idia taua dae dinana dekenai do idia guria. Badina be tau ta be au dekenai idia taua dae neganai, Dirava ese unai tau ia hadikaia noho. Lohiabada, emui Dirava ese umui dekenai do ia henia tano, be do umui hamiroa lasi.   
\c 22  
\p
\v 1 “Bema emui varavara Israela tauna ena boromakau o mamoe ia boio, bona bema umui ese umui itaia, do umui rakatania lasi, to do umui hakaua lao, emui varavara tauna dekenai do umui henia lou.  
\v 2 To bema unai ubua gauna ena biaguna ena ruma be daudau herea, o bema umui daradara biaguna be daika, boromakau o mamoe be emui ruma dekenai do umui hakaua, unuseni do umui naria ela bona biaguna ese do ia tahua, vadaeni do umui henia lou.   
\p
\v 3 “O bema iena doniki, o iena dabua, o iena gau ta bema ia boio, bona umui ese umui davaria neganai, do umui henia lou, do umui rakatania lasi.  
\v 4 Bema emui varavara Israela tauna ena doniki o boromakau be dala dekenai ia moru, bona bema umui itaia, do umui rakatania lasi, to do umui durua, do umui haginia lou.   
\p
\v 5 “Tau ta ese hahine ena dabua do ia karaia lasi, hahine ta danu ese tau ena dabua do ia karaia lasi. Unai bamona idia karaia taudia be Lohiabada emui Dirava ese ia badu henidia noho.   
\p
\v 6 “Bema manu ena ruma ta umui davaria, au dekenai, o tano dekenai, bona ia lalonai be manu hahine, bona iena natuna, o iena gatoi idia noho, manu hahine be do umui abia lasi.  
\v 7 Manu natudia do umui abia diba, to edia sinana do umui harohoa mauri. Unai bamona do umui karaia neganai, emui noho do ia namo, bona emui mauri dinadia do idia momo.   
\p
\v 8 “Ruma matamata do umui haginia neganai, guhi ena isena dekenai magu maragina do umui haginia, emui ruma guhi dekena amo tau ta do ia moru garina, bona iena mase be emui kerere garina.   
\p
\v 9 “Uhe idauidau be emui vain uma ena tano dekenai do umui hadoa lasi. Bema unai bamona umui karaia neganai, emui vain huahua bona unai uhe idauidau edia anina danu be helaga, do umui ania diba lasi.  
\v 10 Emui tano geia totona, boromakau bona doniki ruaosi ese tano geia aurina do idia veria hebou lasi.   
\p
\v 11 “Mamoe huina bona uda varona idia hatua nega tamona dabua do umui kwatua lasi.   
\p
\v 12 “Emui dabua ena kona 4 edia isena dekenai varo do umui hatua namonamo, herahera edia toana bamona.”   
\s1 Headava bona maoheni taravatu  
\p
\v 13 Ma Mose ia gwau, “Sedira tau ta ese kekeni ta ia adavaia, bona ia danu idia mahuta hebou murinai ia ura henia lasi.  
\v 14 Vadaeni unai tau ese sedira hahine ena ladana hadikaia totona samania koikoi hereva do ia gwauraia, do ia gwau, ‘Inai hahine lau abia, bona ai mahuta hebou neganai lau davaria ia be rami hebou kekeni lasi.’   
\p
\v 15 “Vadaeni unai hahine ena tamana bona sinana ese iena rami hebou toana do idia abia, hanua tau badadia edia vairana dekenai do idia hedinaraia, hanua ena magu iduara dekenai.   
\p
\v 16 “Vadaeni hahine ena tamana ese hanua tau badadia do ia hereva henia, do ia gwau, ‘Lauegu natuna be inai tau dekenai lau henia, do ia adavaia, to ia ura henia lasi dainai,  
\v 17 ia ese ia hahemaraia, ia gwau ia be rami hebou kekeni lasi. To kekeni ena rami hebou rara ena toana be inai.’ Vadaeni unai tamana bona sinana ese unai dabua do idia kehoa, hanua tau badadia edia vairanai.   
\p
\v 18 “Vadaeni unai tau badadia ese unai tau do idia abia, bona do idia dadabaia.  
\v 19 Bona iena kerere davana, siliva moni ibounai 100 be ia dekena amo do idia abia, hahine ena tamana dekenai do idia henia. Badina be unai tau ese Israela ena rami hebou kekeni ta ena ladana ia hadikaia vadaeni. Bona unai tau ese unai hahine do ia abia noho, iena adavana. Ia ese unai hahine ia negea diba lasi, iena mauri dinadia ibounai lalonai.   
\p
\v 20 “To bema unai tau ena samania hereva be momokani, bona bema unai hahine ena rami hebou rara toana be lasi neganai,  
\v 21 idia ese unai hahine be iena tamana ena ruma iduara dekenai do idia hakaua lao, bona hanua taudia ese nadi dekenai do idia hodoa mase, badina be Israela dekenai ia kara dika. Ia be tamana ena ruma ia noho vadaeni, ariara hahine bamona. Unai dala dekena amo inai bamona kara dika be do umui haorea momokani.   
\p
\v 22 “Bema tau ta ese ma tau ta ena adavana danu ia heudahanai, bona idia mahuta hebou neganai, taunimanima ese idia davaria neganai, idia ruaosi be do umui alaia mase. Unai dala dekenai inai bamona kara dika do umui haorea momokani.   
\p
\v 23 “Bema rami hebou kekeni ta ia maoheni, bona bema tau ta ese hanua lalonai ia davaria, bona ia ese unai kekeni ia sihari henia,  
\v 24 umui ese hanua ena murimurinai idia do umui hakaua lao, bona unuseni umui ese idia ruaosi nadi dekenai do umui hodoa mase. Kekeni be do umui hodoa mase, badina ia be hanua lalonai, to ia boiboi lasi. Bona tau be do umui hodoa mase, badina ia ese tau ta ena maoheni kekeni ia sihari henia dainai. Inai dala dekenai inai bamona kara dika do umui haorea momokani.   
\p
\v 25 “To sedira tau ta ese rami hebou kekeni, tau ta dekenai ia maoheni vadaeni kekeni be hanua ena murimurinai tano dekenai ia davaria, bona ia ese ia fosia, bona ia sihari henia kava. Unai neganai unai tau sibona do umui alaia mase.  
\v 26 Unai kekeni dekenai panisia kara do umui karaia lasi, badina ia ese, ena davana mase kerere ta ia karaia lasi. Unai tau ena kara dika, be tau ta ia toreisi, iena badibadinai tauna ia alaia mase bamona.  
\v 27 Badina be hanua ena murimurinai tano dekenai unai tau ese unai kekeni ia davaria, bona unai kekeni madi ia boiboi bada, to tau ta ese ia durua lasi.   
\p
\v 28 “Ma sedira tau ta ese maoheni lasi kekeni ta ia davaria, vadaeni ia fosia, ia sihari henia kava, ma taunimanima ese idia davaria.  
\v 29 Unai tau ese unai kekeni ena tamana dekenai headava davana siliva moni 50 do ia henia, bona ia ese unai kekeni do ia adavaia, badina be ia ese ia fosia, bona ia sihari henia. Unai tau ese unai kekeni do ia negea diba lasi, iena mauri dinadia ibounai lalonai.   
\p
\v 30 “Tau ta ese iena tamana ena adavana ta do ia sihari henia lasi. Ia ese iena tamana do ia hahemaraia lasi.”   
\c 23  
\s1 Lohiabada ena bese dekena amo atoa siri taudia  
\p
\v 1 Mose ma ia hereva, ia gwau, “Iena abona ena nadinadi idia utua o hadikaia, o iena usina idia utua oho tauna be Lohiabada ena bese lalonai do ia noho diba lasi.   
\p
\v 2 “Ariara natuna be Lohiabada ena bese lalonai do ia noho diba lasi. Iena natuna bona iena tubuna taudia danu be Lohiabada ena bese lalonai do idia noho lasi, ela bona uru ibounai 10.   
\p
\v 3 “Amono tauna ta o Moaba tauna ta be Lohiabada ena bese lalonai do ia noho lasi, ela bona uru ibounai 10.  
\v 4 Badina be Aigupito dekena amo umui mai, bona edia tano dekenai umui raka neganai, idia ese aniani bona ranu umui dekenai idia henia lasi. Bona idia ese Balama Beoro, Petoro hanua tauna, Mesopotamia tano dekena amo, idia boiria, umui do ia hadikaia totona.  
\v 5 Lohiabada, emui Dirava, ese Balama ena hadikaia hereva ia kamonai lasi, to unai hadikaia hereva be hanamoa hereva ia halaoa, badina be Lohiabada, emui Dirava ese umui ia ura henia.  
\v 6 Emui mauri dinadia ibounai lalonai unai Amono bona Moaba taudia do umui durua lasi, bona edia namo do umui tahua lasi.   
\p
\v 7 “Edoma taudia do umui badu henia lasi, badina idia be emui varavara taudia. Aigupito taudia danu do umui badu henia lasi, badina be guna edia tano dekenai idau taudia bamona umui noho.  
\v 8 Uru toi murinai, edia natudia be Lohiabada ena bese lalonai idia vareai diba.”   
\s1 Tuari kamepa hagoevaia taravatu  
\p
\v 9 Ma Mose ia gwau, “Tuari dekenai do umui lao, bona kamepa dekenai umui noho neganai, do umui naria namonamo, gau ta ese umui do ia hamiroa garina.  
\v 10 Bema tau ta be hanuaboi neganai iena vesi ia mai murimurinai, ia ese kamepa do ia rakatania, murimuri dekenai do ia noho.  
\v 11 Vadaeni adorahi neganai do ia digu, bona dina do ia diho neganai, ia be kamepa lalonai ma do ia raka vareai.   
\p
\v 12 “Kamepa ena murimurina dekenai emui kukuri gabuna ta do umui gwauraia.  
\v 13 Bona au ta emui tuari gaudia danu do umui abia lao, vadaeni umui ura kukuri neganai, guri ta do umui geia, bona umui kukuri murinai, tano dekena amo unai guri do umui hahonua.   
\p
\v 14 “Badina be Lohiabada, emui Dirava be emui kamepa dekenai ia loaloa noho, umui do ia naria totona, bona umui dekenai idia tuari taudia dekena amo kwalimu umui dekenai do ia henia totona. Unai dainai emui kamepa be do ia helaga noho, Lohiabada ese gau mirona ta umui huanai do ia itaia, bona umui dekena amo do ia raka siri garina.   
\s1 Taravatu idauidau  
\p
\v 15 “Bema hesiai tauna mai guia danu ese iena biaguna dekena amo ia heau, bona oi dekenai mauri totona ia heau mai neganai, iena biaguna dekenai do oi henia lou lasi.  
\v 16 Ia ese iena ura gabuna, emui hanua edia lalonai do ia noho. Do oi dagedage henia lasi.   
\p
\v 17 “Israela hahine ta ese sibona ariara hahine do ia halaoa lasi, dirava ta hanamoa totona, bona Israela tauna ta be ma tau ta danu do idia sihari karaia lasi, dirava ta hanamoa totona.  
\v 18 Ariara hahine ena davana, o tau ta, ma tau ta danu idia sihari, ena davana be Lohiabada, emui Dirava ena ruma dekenai do umui mailaia lasi, emui gwauhamata davana karaia totona. Unai kara ruaosi be Lohiabada, emui Dirava ese ia badu henia noho.   
\p
\v 19 “Bema moni, o aniani, o gau ta oiemu varavara Israela tauna dekenai oi heniatorehai neganai, atoa kau moni do oi abia lasi.  
\v 20 Idau bese dekenai oi heniatorehai neganai, atoa kau moni do oi abia diba. To oiemu varavara Israela tauna dekena amo atoa kau moni do oi abia lasi. Unai dekena amo Lohiabada, oiemu Dirava ese oi do ia hanamoa gau ibounai do oi karaia lalonai, do umui noholaia tano dekenai.   
\p
\v 21 “Lohiabada oiemu Dirava dekenai gwauhamata ta do oi gwauraia neganai, inai gwauhamata do oi hamomokania haraga. Badina be Lohiabada, oiemu Dirava ese oiemu gwauhamata ena anina be oi dekena amo do ia tahua, bona bema lasi neganai, oi be mai oiemu kara dika Lohiabada ena vairanai.  
\v 22 Bema oi gwauhamata lasi, oi be mai emu kara dika lasi.  
\v 23 To bema oiemu uduna bibina dekena amo gwauhamata oi gwauraia, do oi hamomokania. Oiemu lalona ena ura dainai, unai hereva Lohiabada ena vairanai oi gwauraia, unai dainai karana do oi karaia.   
\p
\v 24 “Oiemu badibadinai tauna ena vain uma ena badinai oi raka neganai, vain ena anina do oi ania diba, oiemu hitolo hegeregerena, to haida be oiemu puse lalonai do oi udaia lasi.   
\p
\v 25 “Oiemu badibadinai tauna ena uiti uma ena dala ta dekenai oi raka vareai neganai, uiti ena anina be emu imana dekenai do oi veria oho diba, to uiti haida be kaia dekenai do oi utua lasi.”   
\c 24  
\s1 Headava koua bona headava lou  
\p
\v 1 Ma Mose ia gwau, “Sedira tau ta do ia headava, gabeai ia ese iena adavana ia ura henia lasi, hahine ena kara mirona ta dainai. Unai neganai unai tau ese hadihoa pepa do ia torea, hahine dekenai do ia henia, vadaeni iena ruma dekena amo do ia siaia, ia raka siri.  
\v 2 Hahine be unai ruma ia rakatania murinai, sedira ia ese tau ta ma do ia adavaia.  
\v 3 To unai tau iharuana danu ese be sedira unai hahine do ia ura henia lasi, bona hadihoa pepa do ia torea, ia henia, bona iena ruma dekena amo unai hahine ia siaia. O sedira unai tau iharuana ia mase.  
\v 4 Unai bamona neganai unai tau ginigunana, ia hadihoa guna tauna ese unai hahine ia abia lou diba lasi, badina ia miro vadaeni ia dekenai. Unai bamona kara be Lohiabada ena vairana dekenai ia miro. Lohiabada emui Dirava ese umui dekenai do ia henia tano dekenai unai bamona kara dika do umui karaia lasi.”   
\s1 Taravatu idauidau  
\p
\v 5 “Headava matamata tauna be tuari dekenai do umui siaia lasi, bona gaukara ta do umui henia lasi. Iena ruma dekenai do ia noho, iena adavana do ia hamoalea, ela bona lagani ta do ia ore.   
\p
\v 6 “Bema tau ta dekenai gau ta oi heniatorehai neganai, unai tau ena uiti moia nadi rua, henunai nadi o ataiai nadi do oi abia lasi, oi heniatorehai ena davana. Badina be unai be unai tau ena famili edia mauri badina aniani do umui kokia garina.   
\p
\v 7 “Bema tau ta ese iena Israela varavarana ta ia dogoatao, iena hesiai tauna do ia halaoa, o do ia hoia totona, inai bamona henaoa tauna be do umui alaia mase. Unai dala dekenai kara dika unai bamona umui huanai dekena amo do umui kokia ore.   
\p
\v 8 “Do umui naria namonamo, lepera gorere garina. Levi ena helaga taudia ese umui idia hadibaia karadia ibounai do umui karaia, Levi taudia dekenai lau henia lepera taravatudia do umui badinaia.  
\v 9 Aigupito dekena amo umui raka mai neganai, Lohiabada, emui Dirava, ese dala dekenai Miriama dekenai ia karaia gauna do umui laloatao.   
\p
\v 10 “Bema tau ta dekenai oi heniatorehai neganai, iena ruma dekenai do oi daekau lasi, iena dabua, abiatorehai toana abia totona.  
\v 11 Ruma ena murimuri dekenai do oi gini, ela bona abiatorehai tauna do ia raka mai, iena abiatorehai toana oi dekenai do ia henia.  
\v 12 Bema ia be ogogami tauna, iena dabua, abiatorehai toana, be hanuaboi lalonai do umui dogoatao lasi.  
\v 13 Dina ia diho neganai, unai dabua do oi henia lou, vadaeni unai dabua lalonai do ia mahuta, bona oi do ia hanamoa. Unai be kara maoromaoro, Lohiabada, emui Dirava ena vairana dekenai.   
\p
\v 14 “Oiemu hesiai tauna mai davana, Israela tauna ogogamina o idau bese tauna, oiemu hanua dekenai ia noho, be do oi kara auka henia lasi.  
\v 15 Dina ta ta ibounai davana do oi henia, dina ia do diho lasi neganai, davana do oi henia. Badina ia be ogogami, bona ia ura davana ia abia haraga. Ia ese Lohiabada dekenai do ia tai, oi do ia samania, vadaeni oi be kerere garina.   
\p
\v 16 “Tamana taudia be do idia alaia lasi edia natudia edia kerere dainai, bona memero do idia alaia lasi, edia tamana edia kerere dainai. To tau ta ta ena kara dika davana dainai do idia alaia mase.   
\p
\v 17 “Idau taudia bona ogogami taudia do umui kota henidia mai maoromaoro danu, idia do umui hadikaia lasi. Vabu ena dabua do umui abia lasi, abiatorehai ena davana totona.  
\v 18 Do umui laloa, Aigupito dekenai umui be hesiai taudia mai guia danu umui noho. Vadaeni Lohiabada emui Dirava ese umui ia hamauria. Unai dainai inai bamona oda umui dekenai lau henia.   
\p
\v 19 “Oiemu uma anina oi utua bona gogoa neganai, bema koni haida oi laloaboio, do oi giroa lou lasi, do oi abia lasi. Idau tauna o ogogami tauna o vabu ese do ia abia. Unai bamona oi karaia neganai, Lohiabada oiemu Dirava ese oi do ia hanamoa, oiemu gaukara ibounai lalonai.   
\p
\v 20 “Oiemu olive audia edia huahua oi hamorudia neganai, au rigidia do oi botaia nega rua lasi. Idia moru lasi gaudia be idau tauna bona ogogami tauna bona vabu ese do idia abia.   
\p
\v 21 “Oiemu vain uma ena anina do oi gogoa neganai, tano dekenai idia moru gaudia totona do oi giroa lou lasi. Idia be idau taudia, bona ogogami taudia, bona vabu ese do idia gogoa.  
\v 22 Do umui laloa, Aigupito dekenai umui be hesiai taudia mai guia danu. Unai dainai inai bamona oda umui dekenai lau henia.   
\c 25  
\p
\v 1 “Sedira Israela taudia rua idia heai, vadaeni kota dekenai idia lao, kerere lasi tauna idia ruhaia, bona kerere tauna be iena dika davana idia henia.  
\v 2 Bema kerere tauna ena davana be do idia dadabaia, kota biaguna ese do ia oda henia, vadaeni iena vairana dekenai kerere tauna do idia hahekurea diho, bona do idia kwadia nega haida, iena kerere ena metau hegeregere.  
\v 3 Do idia kwadia diba ela bona nega 40, to nega 40 do idia hanaia diba lasi, emui varavara tauna be umui emui vairana dekenai ia hemarai dika garina.   
\p
\v 4 “Boromakau ese uiti ia moia neganai, iena uduna do umui guia lasi.”   
\s1 Tadikaka ena vabu do umui durua  
\p
\v 5 “Bema tadikaka taudia idia noho hebou, vadaeni ta ia mase natuna lasi, iena vabu be idau tauna ta do ia adavaia lasi. Lasi, to unai mase tauna ena tadikakana ese unai vabu do ia adavaia. Unai be, vabu ena nakimi ena kara korikori do ia karaia.  
\v 6 Vadaeni edia natuna vara guna ese mase tauna ena ladana do ia abia. Unai dekena amo iena ladana be Israela dekenai do ia boio lasi.   
\p
\v 7 “To bema tau ta ia ura lasi iena tadikakana ena vabu do ia adavaia neganai, unai vabu be hanua ena tau badadia dekenai do ia lao, do ia gwau, ‘Lauegu adavana ena tadikakana ia ura lasi nakimi ena kara korikori do ia karaia. Ia ura lasi iena tadikakana ena ladana do ia atoa Israela dekenai.’  
\v 8 Unai neganai hanua tau badadia ese unai tau do idia boiria, do idia hereva henia. Vadaeni, bema unai tau ese iena hereva do ia ha-aukaia, bona bema ia gwau, ‘Lau ura lasi lauegu nakimi lau adavaia,’  
\v 9 unai neganai vabu be do ia raka kahirakahira, hanua tau badadia edia vairana dekenai iena nakimi ena tamaka do ia kokia, bona iena vairana do ia kanudia, do ia gwau, ‘Tadikakana ena bese do ia havaraia lasi tauna dekenai be unai bamona do idia karaia.’  
\v 10 Vadaeni unai tau ena ruma be Israela dekenai iena ladana do idia atoa, ‘Tamaka kokia tauna ena ruma.’   
\s1 Mose ese taravatu ma haida ia gwauraia  
\p
\v 11 “Sedira tau rua idia heatu, vadaeni idia ta ena adavana ese iena tau durua totona unai idau tauna ena abona do ia dogoatao.  
\v 12 Unai hahine dekenai do umui bogahisihisi lasi, iena imana do umui utua oho.   
\p
\v 13 “Oiemu puse lalonai metau hahetoho gaudia rua, momokani gauna bona koikoi gauna ruaosi do oi udaia lasi.  
\v 14 Oiemu ruma dekenai danu paraoa o bali ena bada tohoa gaudia rua, momokani gauna bona koikoi gauna do idia noho lasi.  
\v 15 To oiemu metau hahetoho gauna be do ia maoromaoro, bona oiemu paraoa ena bada tohoa gauna danu be maoromaoro, vadaeni oiemu mauri dinadia do idia momo, Lohiabada, emu Dirava ese oi do ia henia tano dekenai.  
\v 16 Badina be unai bamona kara koikoi idia karaia taudia be Lohiabada oiemu Dirava ia badu henia noho.   
\s1 Mose ese ia oda henidia Amaleka taudia do idia alaia  
\p
\v 17 “Aigupito dekena amo umui raka mai neganai, Amaleka taudia ese umui dekenai idia karaia kara do umui laloatao.  
\v 18 Dala dekenai umui idia davaria, umui be manori bona manoka neganai, bona murina dekenai madi idia raka metairametaira Israela taudia ibounai idia alaia mase. Io, inai Amaleka taudia ese Dirava dekenai idia gari henia lasi.  
\v 19 Unai dainai, Lohiabada emui Dirava, umui ia henia do umui noho tano dekenai, dagedage taudia dekena amo laga-ani umui dekenai ia henia neganai, unai Amaleka taudia ibounai do umui alaia mase. Do umui aladia ore momokani, vadaeni tau ta ese idia do ia laloa lou lasi. Inai kara do umui karaia, laloaboio lasi!”   
\c 26  
\s1 Uma ena anina Lohiabada dekenai henia  
\p
\v 1 Mose ma ia gwau, “Lohiabada emui Dirava ese umui do ia henia tanona do umui abia, bona do umui noholaia neganai,  
\v 2 tano ena anina vara guna, Lohiabada emui Dirava ese umui dekenai ia henia gauna, be bosea dekenai do umui udaia, Lohiabada ese ia abia hidi tomadiho gabu tamona dekenai do umui abia lao.  
\v 3 Vadaeni unai dina dekenai ia gaukara noho hahelagaia tauna dekenai do umui lao, umui gwau, ‘Hari dina lau gwauraia hedinarai, lau be Lohiabada ese iseda sene taudia ia gwauhamata henidia tano dekenai lau ginidae vadaeni.’  
\v 4 Hahelagaia tauna ese bosea oiemu imana dekena amo do ia abia, Lohiabada, oiemu Dirava ena boubou patana ena vairana dekenai do ia atoa diho.  
\v 5 Vadaeni Lohiabada oiemu Dirava ena vairana dekenai do oi hereva, do oi gwau, ‘Lauegu sene tauna be Arama tauna, laolao tauna, ia bona ena famili danu be Aigupito dekenai idia lao, iena hanua be lasi dainai. Aigupito dekenai idia ginidae neganai idia be momo lasi, to unuseni lauegu sene tauna ese bese badana bona goadana ia havaraia.  
\v 6 Aigupito taudia ese ai idia dagedage henia, ai idia hahisia, bona gaukara metau herea ai dekenai idia atoa.  
\v 7 Unai neganai Lohiabada, aiemai sene taudia edia Dirava ai tai henia, bona ia ese aiemai taitai ia kamonai. Ia ese aiemai hisihisi, aiemai hekwarahi, bona aiemai maduna metau ia itaia.  
\v 8 Vadaeni Lohiabada ese iena imana goada, bona iena siahu bada dekena amo, Aigupito dekena amo ai ia hakaua, mai gari karadia, bona mai toa bona hoa karadia danu.  
\v 9 Lohiabada ese ai ia hakaua mai, ia mai bona inai gabu dekenai, bona inai tano be ai dekenai ia henia vadaeni, rata bona hani dekenai ia honu tanona.  
\v 10 Unai dainai lau be lau mai vadaeni, oi Lohiabada ese lau dekenai oi henia tanona ena anina vara guna lau mailaia inai.’   
\p
\v 11 “Unai neganai bosea be Lohiabada, oiemu Dirava, ena vairana dekenai do oi atoa diho. Bona Lohiabada, oiemu Dirava dekenai do oi tomadiho. Bona Lohiabada, oiemu Dirava ese oi bona oiemu famili taudia dekenai ia hanamoa gaudia dainai do umui moale. Levi taudia bona umui dekenai idia noho idau bese taudia be umui danu do idia moale hebou.   
\p
\v 12 “Lagani toi toi ibounai emui uma ena anina do umui haria kahana 10 neganai, kahana ta be inai taudia dekenai do umui henia: Levi taudia, idau taudia, ogogami taudia, bona vabu taudia. Inai bamona neganai, emui hanua taunimanima ibounai be aniani hegeregere do idia ania. Unai bamona umui karaia vadaeni neganai,  
\v 13 umui ese Lohiabada, emui Dirava dekenai do umui gwau, ‘Gau helagadia ibounai lauegu ruma dekena amo lau abia mai vadaeni, Levi taudia, idau taudia, ogogami taudia, bona vabu taudia dekenai lau henia vadaeni, oiemu oda hegeregere. Oiemu oda ta lau utua lasi, bona ta lau laloaboio lasi.  
\v 14 Inai lauegu aniani helagana ena kahana sisina lau ania lasi, mase tauna totona lau tai neganai, bona lau goeva lasi neganai unai aniani helagana ena kahana sisina lauegu ruma dekena amo lau abia lasi. Bona mase tauna hahelagaia totona unai aniani helagana ena kahana sisina lau henia lasi. Lohiabada, lauegu Dirava e, oiemu hereva lau kamonai henia vadaeni, bona oiemu oda ibounai lau karaia vadaeni.  
\v 15 Guba, oiemu noho gabu helagana dekena amo, oiemu matana ese lau idia itaia, mani emu kara oiemu bese Israela do oi hanamoa. Bona inai ai dekenai oi henia vadaeni tano, aiemai sene oi gwauhamata henidia tano, rata bona hani dekenai ia honu noho tano danu do oi hanamoa.’ ”   
\s1 Lohiabada ena bese korikori  
\p
\v 16 Ma Mose ia hereva, ia gwau, “Hari dina dekenai Lohiabada ese umui ia oda henia, inai taravatu bona oda hereva ibounai do umui badinaia. Unai dainai do umui badinaia namonamo, mai emui lalona, bona mai emui kudouna ibounai.  
\v 17 Hari dina dekenai umui gwauhamata noho, umui gwau, Lohiabada be emui Dirava, iena dala dekenai do umui raka, iena taravatu bona iena oda ibounai do umui badinaia, bona iena hereva do umui kamonai.  
\v 18 Hari dina dekenai danu Lohiabada ia gwauhamata vadaeni, ia gwau, umui be iena bese korikori, iena gwauhamata gunana hegeregerena. Ma ia gwau, iena taravatu ibounai do umui badinaia.  
\v 19 Vadaeni ia ese umui do ia abia isi, ia karadia bese ibounai, be emui bese ese idia do ia hereaia. Bona umui ese Lohiabada ena ladana do umui hanamoa bona habadaia. Umui be Lohiabada, emui Dirava, ena bese korikori do umui lao, iena gwauhamata hegeregerena.”   
\c 27  
\s1 Dirava ena Taravatu bona oda be nadi badadia dekenai idia torea  
\p
\v 1 Vadaeni Mose, bona Israela gunalaia taudia ese Israela taudia idia oda henia, idia gwau, “Hari dina lau ese umui dekenai lau henia oda ibounai do umui kamonai henia.  
\v 2 Ioridane Sinavai do umui hanaia, bona Lohiabada, emui Dirava umui do ia henia tano do umui raka vareai dinana dekenai, nadi badadia haida do umui haginia, bona semenisi pilasta dekena amo idia do umui koua.   
\p
\v 3 “Sinavai umui hanaia neganai, inai taravatu bona hadibaia hereva ibounai be unai nadi dekenai do umui torea. Unai neganai Lohiabada, emui Dirava ese umui ia henia tano dekenai, be do umui noho. Inai tano be namo herea, rata bona hani dekenai ia honu, Lohiabada, emui Dirava ese emui sene taudia dekenai ia gwauhamata hegeregerena.  
\v 4 Ioridane Sinavai do umui hanaia, bona hari lau gwauraia nadi be Ebala Ororo ena latanai do umui haginia, bona semenisi pilasta dekenai idia do umui koua.   
\p
\v 5 “Bona unuseni Lohiabada emui Dirava ena boubou patana ta, nadi dekena amo do umui karaia. Unai nadi be auri gauna ta ese ia utua lasi gaudia.  
\v 6 Idia utua lasi nadi be do umui haboua, Lohiabada, emui Dirava ena boubou patana do umui karaia, bona unai pata ena latanai gabua bouboudia do umui henia, Lohiabada, emui Dirava ena.  
\v 7 Maino karaia bouboudia danu do umui alaia mase, bona unuseni do umui ania. Bona do umui moale hebou, Lohiabada, emui Dirava ena vairanai.  
\v 8 Inai taravatu ibounai be unai nadi badadia edia latanai do umui torea hedinarai namonamo.”   
\s1 Mose ese kamonai henia lasi kara ia gwauraia dika  
\p
\v 9 Vadaeni Mose bona hahelagaia taudia, Levi taudia, ese Israela taudia ibounai idia hamaoroa, idia gwau, “Israela taudia e, umui kamonai namonamo! Hari dina dekenai umui be Lohiabada, emui Dirava, ena bese korikori umui lao vadaeni.  
\v 10 Unai dainai, Lohiabada, emui Dirava ena oda bona taravatu ibounai, hari dina umui dekenai lau henia gaudia do umui kamonai henia.”   
\s1 Dirava ese iena Taravatu bona oda kamonai lasi taudia do ia hadikaia  
\p
\v 11 Unai dina dekenai danu Mose ia gwau,  
\v 12 “Ioridane Sinavai do umui hanaia murinai, inai iduhu taudia be Gerisima Ororo ena latanai do idia gini, taunimanima hanamoa totona: Simeona, Levi, Iuda, Isakara, Iosepa, bona Beniamina.  
\v 13 Bona Ebala Ororo ena latanai do idia gini, taunimanima do idia gwauraia dika totona, iduhu taudia be inai: Rubena, Gado, Asere, Sebuluno, Dano, bona Napatali.   
\p
\v 14 “Levi taudia be do idia boiboi bada, Israela taudia ibounai do idia hamaoroa, do idia gwau,   
\p
\v 15 “ ‘Laulau ta au dekena amo, o nadi dekena amo, o auri dekena amo ia koroa tauna be Dirava ese do ia hadikaia momokani. Ia ese iena imana dekenai unai Lohiabada ia badu henia gauna ia karaia, bona hunia gabuna dekenai ia tomadiho henia.’  
\p “Vadaeni taunimanima ibounai do idia haere, do idia gwau, ‘Amen.’   
\p
\v 16 “ ‘Iena tamana bona sinana ia matauraia lasi tauna be Dirava ese do ia hadikaia momokani.’  
\p “Vadaeni taunimanima ibounai do idia haere, do idia gwau, ‘Amen.’   
\p
\v 17 “ ‘Iena badibadinai ia noho tauna ena tano hetoana maka ia kokia tauna be Dirava ese do ia hadikaia momokani.’  
\p “Vadaeni taunimanima ibounai do idia haere, do idia gwau, ‘Amen.’   
\p
\v 18 “ ‘Matakepulu tauna ia koia, dala dekena amo ia hakaua siri, tauna be Dirava ese do ia hadikaia momokani.’  
\p “Vadaeni taunimanima ibounai do idia haere, do idia gwau, ‘Amen.’   
\p
\v 19 “ ‘Idau bese tauna dekenai, o tamana bona sinana lasi maragina, o vabu edia kota ia hagagevaia tauna be Dirava ese do ia hadikaia momokani.’  
\p “Vadaeni taunimanima ibounai do idia haere, do idia gwau, ‘Amen.’   
\p
\v 20 “ ‘Iena tamana ena adavana ta ia sihari henia tauna be Dirava ese do ia hadikaia momokani. Badina unai tau ese iena tamana ia hahemaraia noho.’  
\p “Vadaeni taunimanima ibounai do idia haere, do idia gwau, ‘Amen.’   
\p
\v 21 “ ‘Ubua gauna o mauri gauna ta dekenai ia sihari henia tauna be Dirava ese do ia hadikaia momokani.’  
\p “Vadaeni taunimanima ibounai do idia haere, do idia gwau, ‘Amen.’   
\p
\v 22 “ ‘Iena taihuna, iena tamana ena natuna, o iena sinana ena natuna ia sihari henia tauna be Dirava ese do ia hadikaia momokani.’  
\p “Vadaeni taunimanima ibounai do idia haere, do idia gwau, ‘Amen.’   
\p
\v 23 “ ‘Iena hahine ena sinana ia sihari henia tauna be Dirava ese do ia hadikaia momokani.’  
\p “Vadaeni taunimanima ibounai do idia haere, do idia gwau, ‘Amen.’   
\p
\v 24 “ ‘Iena badibadinai noho tauna be hunia dekenai ia alaia mase tauna, be Dirava ese do ia hadikaia momokani.’  
\p “Vadaeni taunimanima ibounai do idia haere, do idia gwau, ‘Amen.’   
\p
\v 25 “ ‘Ia ese davana ia abia, kerere lasi tauna ta do ia alaia mase totona tauna be Dirava ese do ia hadikaia momokani.’  
\p “Vadaeni taunimanima ibounai do idia haere, do idia gwau, ‘Amen.’   
\p
\v 26 “ ‘Inai taravatu hereva ia abia dae lasi, bona ia kamonai henia lasi tauna be Dirava ese do ia hadikaia momokani.’ ”  
\p “Vadaeni taunimanima ibounai do idia haere, do idia gwau, ‘Amen.’   
\c 28  
\s1 Dirava ese iena Taravatu bona oda kamonai henia taudia do ia hanamoa  
\p
\v 1 “Vadaeni, bema Lohiabada, emui Dirava umui kamonai henia, bona bema iena oda ibounai, hari dina umui dekenai lau henia gaudia do umui badinaia namonamo, bona edia kara do umui karaia, Lohiabada, emui Dirava ese umui do ia abia isi, tanobada bese edia ataiai.  
\v 2 Io, bema Lohiabada, emui Dirava umui kamonai henia neganai, inai hanamoa ibounai do umui davaria, gaudia be inai:   
\p
\v 3 “Lohiabada ese emui hanua bona emui uma gabudia do ia hanamoa.   
\p
\v 4 “Lohiabada ese natuna momo umui dekenai do ia henia. Emui uma ese edia anina momo do idia havaraia, bona emui boromakau bona mamoe danu be do idia momo herea, Lohiabada ese ia hanamodia dainai.   
\p
\v 5 “Lohiabada ese emui uiti anina do ia hanamoa, bona uiti dekena amo umui gabua aniani danu, do ia hanamoa.   
\p
\v 6 “Lohiabada ese emui kara ibounai do ia hanamoa.   
\p
\v 7 “Lohiabada ese umui dekenai idia tuari henia taudia do ia halusia. Dala tamona dekena amo umui dekenai do idia mai, to dala 7 dekena amo, umui emui vairana dekena amo do idia heau.   
\p
\v 8 “Lohiabada ese emui gaukara ibounai do ia hanamoa, bona emui aniani sitoa ibounai be uiti dekena amo do ia hahonua. Umui dekenai do ia henia tano lalonai, Lohiabada, emui Dirava ese umui do ia hanamoa.   
\p
\v 9 “Lohiabada, emui Dirava bema umui kamonai henia, bona iena oda ibounai do umui karaia neganai, ia ese iena bese helagana umui do ia halaoa, umui dekenai ia gwauhamata vadaeni hegeregerena.  
\v 10 Unai neganai tanobada taudia ibounai ese do idia itaia, Lohiabada ese umui ia abia hidi vadaeni, iena bese korikori do umui lao, vadaeni umui dekenai do idia gari.   
\p
\v 11 “Lohiabada ese umui dekenai natuna momo do ia henia, boromakau momo danu, bona uma ena anina momo danu, ia ese emui sene taudia ia gwauhamata umui do ia henia tano dekenai.   
\p
\v 12 “Lohiabada ese iena guba kohu momo gabuna do ia kehoa, bona medu be emui tano dekenai do ia siaia, ena nega korikori dekenai, bona emui gaukara ibounai do ia hanamoa. Bese momo dekenai do umui heniatorehai, to idia dekena amo do umui abiatorehai lasi.   
\p
\v 13 “Lohiabada, emui Dirava ese bese idauidau edia huanai umui do ia abia isi, umui be edia gunalaia besena do umui lao. Umui be idia edia murinai do umui raka lasi. Bema Lohiabada ena oda, hari dina umui dekenai lau henia gaudia umui kamonai henia namonamo neganai, umui be do umui kwalimu, do umui moru lasi.  
\v 14 To inai hari dina umui dekenai lau henia oda dekena amo do umui raka siri lasi, idiba kahana dekenai, o lauri kahana dekenai. Bona dirava idaudia do umui tomadiho henia lasi, bona edia hesiai gaukara do umui karaia lasi.   
\s1 Kamonai henia lasi kara ena davana dikana  
\p
\v 15 “To bema Lohiabada, emui Dirava umui kamonai henia lasi, bona iena oda bona iena Taravatu, hari dina lau henia gaudia umui badinaia namonamo lasi neganai, inai dika gaudia be umui dekenai do idia vara:   
\p
\v 16 “Lohiabada ese emui hanua bona emui uma gabudia do ia hadikaia.   
\p
\v 17 “Lohiabada ese emui uiti ena anina do ia hadikaia, bona uiti dekena amo umui gabua aniani do ia hadikaia.   
\p
\v 18 “Lohiabada ese umui do ia hadikaia, vadaeni natuna momo lasi umui dekenai do ia henia, emui uma anina danu be momo lasi, emui boromakau bona mamoe danu do idia momo lasi.   
\p
\v 19 “Lohiabada ese emui kara ibounai do ia hadikaia.   
\p
\v 20 “Bema umui kara dika bona umui ese Lohiabada umui rakatania, ia ese dika bada, laloa daradara, bona kerere umui dekenai do ia siaia, emui gaukara ibounai lalonai, ela bona umui dika momokani, bona do umui mase haraga.  
\v 21 Lohiabada ese umui dekenai gorere dikadia dekena amo umui do ia hisihisi henia, ela bona do umui vareai lao tanona dekenai do umui mase ore.  
\v 22 Lohiabada ese tauanina hamaragia gorere, keru gorere, bona kopina ia gudu gorere, umui dekenai do ia henia. Medu do ia siaia lasi, to dina siahu herea, lai siahu bada danu do ia siaia, vadaeni emui uma anina do idia dika. Inai dikadia ese umui do idia hisihisi henia, ela bona do umui mase.  
\v 23 Umui emui ataiai, guba, do umui itaia, iena toana be auri laboralabora bamona. Emui tano, emui aena henunai, be auri bamona do ia lao.  
\v 24 Medu be lasi, to Lohiabada ese miri, medu bamona, do ia siaia diho, kahu danu lai bada dekena amo do ia siaia, ela bona umui be do umui mase momokani.   
\p
\v 25 “Lohiabada ese umui dekenai idia tuari taudia do ia durua, vadaeni idia ese umui do idia halusia. Dala tamona dekenai do umui raka lao, bona umui ese idia do umui tuari henidia, to dala 7 dekenai, idia dekena amo do umui heau. Tanobada taudia ibounai ese umui dekenai idia vara gaudia idia itaia neganai, do idia gari bada herea.  
\v 26 Do umui mase neganai, manu bona uda boroma idauidau ese emui tauanina do idia ania, bona tau ta lasi ese idia do ia lulua.   
\p
\v 27 “Lohiabada ese Aigupito taudia edia iohururu bona toto dikadia umui emui latanai do ia atoa. Emui kopina dekenai sipoma, bona kopina hemaihemai gorere danu do umui davaria. Do umui namo lou diba lasi.   
\p
\v 28 “Lohiabada ese emui lalona do ia hakavakavaia, bona emui matana do ia hakepulua, bona do umui laloa daradara.  
\v 29 Dina tubua neganai, do umui raka daradara, matakepulu tauna bamona. Emui dala do umui davaria diba lasi. Emui gaukara ibounai lalonai ena anina do ia vara lasi. Taunimanima ese dina ibounai umui do idia dagedage henia, bona emui kohu do idia henaoa, bona tau ta ese umui do idia durua lasi.   
\p
\v 30 “Kekeni ta do oi maohenia, to idau tauna ta ese do ia sihari henia. Ruma ta do oi haginia, to ia dekenai do oi noho lasi. Vain uma do oi hadoa, to iena anina do oi ania lasi.  
\v 31 Oiemu boromakau be oiemu vairana dekenai haida ese do idia alaia mase, to oi ese iena vamu sisina do oi ania lasi. Oiemu doniki namodia, be haida ese oiemu vairana dekenai do idia henaoa, oi dekenai do idia henia lou lasi. Oiemu mamoe orea be oi dekenai ia tuari tauna dekenai do idia henia, bona tau ta ese oi do ia durua lasi.   
\p
\v 32 “Oiemu natuna tau bona natuna hahine be oiemu vairana dekenai idau taudia dekenai do idia henia. Dina ibounai oiemu matana do oi negea, idia giroa mai do oi itaia totona, to oiemu matana do oi negea kava.  
\v 33 Idau bese taudia ese oiemu tano ena anina ibounai, oiemu imana ena gaukara, do idia abia. Bona idia ese dina ibounai oi do idia hisihisi henia, bona dagedage henia.  
\v 34 Oi ese inai gau dikadia oi itaia dainai, oiemu lalona do ia kavakava momokani.  
\v 35 Lohiabada ese oiemu aena bona oiemu tuina, iohururu dekena amo, oi do ia hisihisi henia momokani, bona inai toto be do ia habadaia, ela bona oiemu tauanina bona kwarana ibounai do idia koua. Muramura ta ese ia hanamoa lou diba lasi.   
\p
\v 36 “Lohiabada ese umui bona emui king do ia abia lao, umui bona emui sene taudia idia diba lasi bese taudia edia tano dekenai do umui noho. Unuseni dirava idau, au bona nadi dekenai idia karaia gaudia edia hesiai gaukara do umui karaia.  
\v 37 Lohiabada ese idia dekenai umui do ia siaia, tano idauidau dekenai, unuseni noho taudia ese umui dekenai idia vara gaudia idia itaia neganai, do idia hoa bada, bona umui do idia kirikirilaia.   
\p
\v 38 “Uhe momo do umui hadoa, to edia anina be maragi sibona do umui haboua, badina be kwadi ese emui uiti do idia ania.   
\p
\v 39 “Vain audia do umui hadoa bona naria, to vain edia huahua do umui haboua lasi, bona uaina do umui inua lasi, badina gaigai maragidia ese huahua do idia ania ore.   
\p
\v 40 “Olive audia be emui tano ena kahana ibounai dekenai do idia vara, to olive ena dehoro do umui davaria lasi, badina olive huahua do idia moru kava.   
\p
\v 41 “Emui natuna memero, bona natuna kekeni do idia vara, to umui dekenai do idia noho lasi, hesiai gaukara, mai guia danu do idia karaia, tuari taudia ese do idia abia lao dainai.   
\p
\v 42 “Emui au ibounai bona emui uma ena anina be kwadi ese do idia ania ore.   
\p
\v 43 “Emui tano dekenai idia noho idau bese taudia ese goada do idia davaria, to umui be do umui manoka lao.  
\v 44 Idia ese umui dekenai moni do idia heniatorehai, to umui ese idia dekenai do umui heniatorehai lasi. Idia ese umui do idia gunalaia, bona umui be edia siahu henunai do umui lao.   
\p
\v 45 “Inai gau dikadia be umui dekenai do idia vara. Idia ese umui dekenai do idia noho, ela bona do umui mase, badina be Lohiabada emui Dirava umui kamonai henia lasi, bona umui dekenai ia henia Taravatu umui badinaia lasi.  
\v 46 Inai gau dikadia be toa bona hoa gaudia do idia lao, umui bona emui tubudia dekenai ela bona hanaihanai.  
\v 47 Badina be Lohiabada emui Dirava ese emui noho ia hanamoa bada herea, to umui moalelaia lasi, bona umui ese iena hesiai gaukara mai moale danu umui karaia lasi.   
\p
\v 48 “Unai dainai Lohiabada ese tuari taudia umui dekenai do ia siaia, umui do idia tuari henia totona. Idia edia hesiai gaukara do umui karaia, mai emui hitolo bona ranu mase danu. Mai emui dabua lasi, bona mai ogogami momokani danu, idia dekenai do umui gaukara auka. Idia ese umui do idia dagedage henia dikadika ela bona do umui mase ore.   
\p
\v 49 “Lohiabada ese bese ta daudau dekena amo do ia mailaia, tanobada ena dokona gabuna dekena amo. Inai bese taudia edia gado be umui diba lasi, bona idia ese ugava manu ia roho bamona do idia diho mai, umui do idia tuari henia.  
\v 50 Idia be do idia dagedage momokani, buruka taudia do idia matauraia lasi, bona maragidia do idia bogahisihisi henia lasi.   
\p
\v 51 “Idia ese emui boromakau natudia bona emui tano ena anina do idia ania ore, ela bona umui be do umui mase. Emui uiti bona emui uaina bona olive dehoro sisina do idia rakatania lasi. Emui boromakau natudia bona mamoe natudia danu do idia rakatania lasi, ela bona hitolo dainai umui be do umui mase ore.   
\p
\v 52 “Emui hanua ibounai, Lohiabada emui Dirava ese umui dekenai ia henia tano lalonai, be unai tuari taudia ese do idia koua hagegea, bona unai umui abidadama henia magu badadia be do idia moru.   
\p
\v 53 “Unai tuari taudia ese emui hanua idia koua hagegea neganai, umui be hitolo dikadika dainai emui natudia, Lohiabada emui Dirava ese umui dekenai ia henia natudia, do umui ania ore.  
\v 54 Unai neganai umui emui huanai ia manada bona ia manau tauna ese iena tadikakana, iena adavana lalokau, bona iena natuna, do mauri noho taudia, do ia dagedage henidia.  
\v 55 Iena hanua idia koua hagegea ena hitolo dainai, unai manada tauna ese ia ania noho gauna be iena lalokau dekenai do ia haria lasi, to sibona do ia ania noho. Inai ia ania noho gauna be sibona ena natuna.   
\p
\v 56 “Unai neganai danu umui huanai ia manada bona ia manau hahine ia noho. Ia be mai ena moni bona kohu momo dainai nega ta tano ena kahu dekenai ia raka lasi. To ia danu ese iena adavana lalokau bona iena natuna dekenai do ia dagedage.  
\v 57 Vadaeni ia ese natuna matamata ia havaraia neganai, iena vara momoru bona iena natuna danu be iena lalokau taudia dekena amo do ia hunia, bona ia sibona ese hunia dekenai do ia anidia ore. Unai bamona do ia karaia, badina be iena hanua idia koua dainai, hitolo be bada herea momokani.   
\p
\v 58 “Bema inai buka lalonai idia torea taravatu ibounai do umui kamonai henia lasi, bona edia kara umui karaia lasi, bona bema Lohiabada, emui Dirava ena ladana mai hairaina, bona mai garina umui matauraia lasi neganai,  
\v 59 ia ese gorere dikadia momokani bona mai garidia umui emui latanai do ia atoa. Inai gorere ese umui bona emui tubudia do idia hisihisi henia nega daudau. Dika idauidau, auka herea, danu do ia siaia umui dekenai, nega daudau do idia noho gaudia.   
\p
\v 60 “Lohiabada ese danu Aigupito ena gorere ibounai, idia dekenai umui gari gaudia, be umui dekenai do ia siaia, idia ese umui do idia dogoatao momokani.  
\v 61 Bona Lohiabada ese gorere bona dika idauidau ibounai inai Taravatu Buka lalonai idia torea lasi gaudia do ia siaia, ela bona umui be do umui mase ore.   
\p
\v 62 “Guna umui be momo herea, guba ena hisiu bamona, to umui tamona tamona sibona do umui mauri, badina be Lohiabada, emui Dirava umui kamonai henia lasi.  
\v 63 Momokani, guna mai moale danu Lohiabada ese umui ia hanamoa, bona natuna momo umui dekenai ia henia, to hari ia ese mai moale danu umui do ia hadikaia, bona hamasea ore. Inai do umui raka vareai, bona emui tano do umui halaoa tano dekena amo, Lohiabada ese umui do ia kokia.   
\p
\v 64 “Lohiabada ese bese idauidau taudia ibounai edia huanai umui do ia lulua, tanobada ena dokona, ela bona tanobada ena dokona. Unai gabudia dekenai au dirava bona nadi dirava, taunimanima edia imana dekenai idia karaia gaudia do umui tomadiho henia. Unai dirava idaudia be nega ta umui diba lasi gaudia, emui sene taudia danu be nega ta idia diba lasi gaudia.  
\v 65 Unai bese idauidau edia huanai do umui noho namonamo lasi, bona unuseni do umui laga-ani diba lasi. Lohiabada ese laloa hekwarahi, bona abidadama lasi, bona lalohisihisi bada herea umui dekenai do ia havaraia.  
\v 66 Emui mauri totona do umui daradara, dina bona hanuaboi do umui gari bada herea, bona kerukeru be do umui mauri, o mauri lasi, do umui diba lasi.   
\p
\v 67 “Umui itaia gaudia ibounai dainai do umui gari bada, bona inai gari ese emui kudouna do ia hadikaia. Daba ibounai neganai do umui gwau, ‘Adorahi do ia ginidae namo,’ bona adorahi ibounai do umui gwau, ‘Daba do ia ginidae namo.’   
\p
\v 68 “Bona Lohiabada ese lagatoi dekena amo Aigupito dekenai umui do ia abia lao lou. Oibe, guna lau ese umui lau hamaoroa, lau gwau, ‘Aigupito dekenai do umui giroa lou lasi.’ Bona unuseni umui idia dagedage henia taudia dekenai umui sibona do umui hoia gwauraia, hesiai taudia bona hesiai hahine mai guia danu do umui lao totona, to tau ta ese umui do idia hoia lasi.”   
\c 29  
\s1 Lohiabada ena gwauhamata taravatuna, Israela danu ia karaia gauna be Mose ese ia gwauraia lou  
\p
\v 1 Lohiabada ena gwauhamata taravatuna herevadia be inai, Lohiabada ese Mose ia oda henia, ia ese Israela taudia danu do idia karaia gwauhamata, Moaba ena tano dekenai. Guna be Sinai Ororo dekenai gwauhamata taravatuna ta idia karaia. Hari be Moaba dekenai gwauhamata taravatuna ma ta do idia karaia, Lohiabada danu.   
\p
\v 2 Mose ese Israela taudia ibounai ia boiria hebou, idia ia hamaoroa, ia gwau, “Lohiabada ese Aigupito tano dekenai ia karaia gaudia umui itaia. Ia ese Farao, bona iena hesiai taudia ibounai danu, bona iena tano ibounai dekenai ia karaia gaudia umui itaia vadaeni.  
\v 3 Umui ese unai gorere hisihisi badadia, unai hoa bona toa karadia, Lohiabada ese ia karaia gaudia, be emui matana dekenai umui itaia.  
\v 4 To Lohiabada ese lalona kehoa, matana itaia, bona taiana kamonai umui dekenai ia henia lasi, ia mai bona hari dina.  
\v 5 Lagani 40 lalonai, lau ese taunimanima lasi tano dekenai umui lau hakaua, bona emui dabua be dika lasi, idia namo noho, bona emui tamaka danu idia dika lasi noho.  
\v 6 Paraoa umui ania lasi, uaina o kekero muramura ta umui inua lasi, to Lohiabada ese emui aniani hegeregerena ia henia, do umui tahua, bona do umui diba ia be emui Dirava totona.   
\p
\v 7 “Bona inai gabu dekenai umui mai neganai, Sihona, Hesebona ena king, bona Oga, Basana ena king, idia raka mai, ita dekenai idia tuari henia. Vadaeni ita ese idia ita halusia.  
\v 8 Edia tano ita abia, bona Rubena iduhu taudia, Gado iduhu taudia, bona Manase iduhu kahana taudia dekenai inai tano ita henia, edia tano korikori totona.  
\v 9 Unai dainai inai gwauhamata taravatuna ena hereva do umui kamonai henia, bona edia kara do umui karaia momokani. Unai neganai emui gaukara ibounai edia anina do idia vara.   
\p
\v 10 “Hari dina umui ibounai be Lohiabada emui Dirava ena vairana dekenai umui gini noho, iduhu gunalaia taudia, iduhu tau badadia, lohia taudia, bona Israela taudia ibounai.  
\v 11 Bona emui natudia, emui adavadia, bona idau bese taudia, emui kamepa dekenai idia noho, bona emui au utua, bona ranu huaia taudia danu.   
\p
\v 12 “Hari dina umui gini iniseni, Lohiabada emui Dirava danu, iena gwauhamata taravatu matamatana do umui karaia totona. Umui ese do umui gwauhamata, inai gwauhamata taravatuna do umui badinaia.   
\p
\v 13 “Inai gwauhamata dekena amo Lohiabada ese iena bese taudia umui do ia halaoa, bona ia be emui Dirava do ia lao, umui bona emui sene taudia Aberahamo, Isako, bona Iakobo dekenai ia gwauhamata hegeregerena.   
\p
\v 14 “Inai gwauhamata taravatuna, mai ena hereva helagana, be Lohiabada ese umui sibona danu ia karaia lasi.  
\v 15 Lasi, to ia ese inai gwauhamata taravatuna be ita ibounai, iena vairanai hari dina ita gini noho taudia, bona iseda tubudia, do idia vara lasi taudia danu, dekenai ia karaia.   
\p
\v 16 “Umui diba, ani, Aigupito tano dekenai edena bamona ita noho, bona bese idauidau edia tano dekenai edena bamona ita raka hanaia.  
\v 17 Unai bese taudia edia kara bodaga umui itaia, edia kaivakuku danu, au bona nadi, bona siliva bona golo dekena amo idia karaia gaudia, umui itaia.   
\p
\v 18 “Do umui naria namonamo, hari dina umui emui huanai tau ta, o hahine ta, o bese ta, o iduhu ta ese Lohiabada, iseda Dirava do idia rakatania, bona unai idau bese edia dirava do idia tomadiho henia garina. Inai kara be mase huahuana ta ena ramu, huahua mai ena poisini dekenai ia tubu bamona.   
\p
\v 19 “Do umui naria namonamo, hari dina umui emui huanai tau ta ese inai gwauhamata taravatuna mai hereva helagana danu ia kamonai, to sibona dekenai do ia hekokoroku, do ia gwau, ‘Lau ese egu dala sibona dekenai do lau raka, vadaeni do lau mauri.’ To inai bamona laloa ese umui ibounai do ia hadikaia ore, namodia bona dikadia danu.   
\p
\v 20 “Badina be Lohiabada ese unai tau do ia bogahisihisi henia lasi, bona iena dika do ia gwauatao lasi momokani. Lohiabada ese unai tau do ia badu henia mai siahu danu, bona inai Buka lalonai idia torea hadikaia gaudia be unai tau dekenai do idia vara, ela bona Lohiabada ese unai tau ena ladana do ia haorea momokani, guba henunai.  
\v 21 Lohiabada ese Israela iduhu ibounai edia huanai dekena amo unai tau do ia abia siri, bona do ia hadikaia ore, inai gwauhamata taravatuna ena hadikaia hereva ibounai hegeregerena, inai Buka lalonai idia torea gaudia hegeregerena.   
\p
\v 22 “Nega gabeai, uru haida murinai, emui tubudia bona idau bese taudia, daudau dekena amo idia mai taudia ese emui tano do idia itaia. Do idia itaia Lohiabada ese dika bada bona gorere mai hisihisi bada dekena amo emui tano ia hadikaia vadaeni.  
\v 23 Do idia itaia danu tano ibounai be salipa bona damena ese idia hadikaia, tano kaukau ia lao vadaeni, gau ta idia hadoa lasi, gau ta ia tubu lasi, rei danu ia vara lasi. Tano be do ia dika momokani, Sodoma bona Gomora, bona Adima bona Seboimi bamona. Inai hanua be Lohiabada ese ia hadikaia ore, ia badu henidia dikadika dainai.   
\p
\v 24 “Unai neganai tanobada taudia ibounai be do idia henanadai, do idia gwau, ‘Badina dahaka Lohiabada ese edia tano dekenai inai bamona ia karaia? Idia dekenai ia badu dikadika ena badina be dahaka?’   
\p
\v 25 “Bona taunimanima haida do idia haere, do idia gwau, ‘Badina be iena bese taudia ese Lohiabada, edia sene taudia edia Dirava, ena taravatu, Aigupito dekena amo ia hakaudia mai neganai ia henidia taravatu, idia negea.  
\v 26 Idia ese idau dirava, idia diba lasi, bona Lohiabada ese ia henidia lasi dirava edia vairanai idia tomadiho, bona idia guriguri henidia.  
\v 27 Unai dainai Lohiabada ena badu ia siahu inai tano dekenai, bona hadikaia hereva ibounai, inai Buka lalonai idia torea vadaeni gaudia, edia anina be idia dekenai idia vara.  
\v 28 Iena badu ena siahu dekena amo Lohiabada ese inai bese taudia edia tano dekena amo ia kokia, bona idia ia lulua lao, idau tano dekenai do idia noho, hari inai dina dekenai idia noho gabuna.’   
\p
\v 29 “Gau haida be Lohiabada, iseda Dirava ese ia hunia noho, ia sibona ia diba. To ia ese ia hedinaraia gaudia be iseda bona iseda natudia edia, ela bona hanaihanai. Lohiabada ese iena Taravatu, ita dekenai ia hedinaraia gauna, be namo ita bona iseda tubudia do ita badinaia namonamo, ela bona hanaihanai.”   
\c 30  
\s1 Lohiabada dekenai umui giroa lou neganai, umui do ia hamauria bona hanamoa  
\p
\v 1 Mose ma ia gwau, “Inai hanamoa bona hadikaia herevadia be umui emui vairana dekenai lau gwauraia inai: Vadaeni hanamoa do umui abia hidi, o hadikaia do umui abia hidi? Lohiabada emui Dirava ese bese idauidau momo edia huanai umui do ia lulua neganai, inai hanamoa kara bona hadikaia kara umui dekenai do idia vara. Unai neganai inai abia hidi kara be do umui laloatao.  
\v 2 Bona bema Lohiabada, emui Dirava dekenai umui bona emui natudia ese do umui giroa lou, bona iena hereva, hari dina umui dekenai lau henia gauna do umui kamonai henia, mai emui lalona ibounai bona kudouna ibounai neganai,  
\v 3 Lohiabada emui Dirava ese umui do ia bogahisihisi henia. Ia ese bese idauidau dekena amo umui do ia hagiroa mai, bona umui do ia haboua lou, bona hanamoa lou.  
\v 4 Sedira umui haida be tanobada ena daudau herea momokani gabudia do umui noho, to Lohiabada ese umui do ia haboua lou, bona unai gabudia dekena amo umui do ia hakaua mai.  
\v 5 Lohiabada emui Dirava ese emui sene taudia edia tano dekenai umui do ia hakaua vareai lou, do umui abia, emui tano. Ia ese umui do ia hanamoa, bona emui bese do ia habadaia bada herea, ela bona emui sene taudia edia momo herea do umui hanaia.   
\p
\v 6 “Lohiabada, emui Dirava ese umui emui lalona bona kudouna do ia hahelagaia, vadaeni ia do umui lalokau henia, mai emui lalona ibounai, bona mai emui kudouna ibounai. Vadaeni do umui mauri noho unai tano dekenai.  
\v 7 Vadaeni Lohiabada, emui Dirava, ese inai hadikaia herevadia ibounai, be umui dekenai idia dagedage taudia edia latanai do ia atodia. Unai umui idia badu henia taudia ese unai hadikaia herevadia do idia davaria.  
\v 8 To umui be Lohiabada ena hereva do umui kamonai henia, bona iena oda, hari dina lau henia gaudia, do umui badinaia.  
\v 9 Lohiabada, emui Dirava ese umui do ia hanamoa, emui gaukara ena anina do ia habadaia, bona natudia momo do umui havaraia. Emui boromakau bona mamoe orea danu do ia habadaia, emui uma ena anina do ia habadaia danu. Bona Lohiabada ese mai moale danu, kohu momo umui dekenai do ia henia, emui sene taudia dekenai kohu momo ia henia bamona.  
\v 10 To Lohiabada, emui Dirava ena hereva do umui kamonai, bona iena taravatu, inai Taravatu Buka lalonai idia torea vadaeni gaudia do umui badinaia, bona Lohiabada, emui Dirava dekenai do umui giroa lou, mai emui lalona ibounai, bona mai emui kudouna ibounai danu.   
\p
\v 11 “Badina be hari dina dekenai umui lau oda henia herevadia be auka momokani lasi, bona idia ese emui goada idia hanaia lasi.  
\v 12 Inai taravatu be guba dekenai ia noho lasi. Vadaeni, inai bamona do umui henanadai lasi, ‘Daika be ita dainai do ia daekau guba dekenai, inai taravatu do ia abia mai, bona ita dekenai do ia gwauraia? Unai neganai do ita kamonai henia, bona iena kara do ita karaia.’  
\v 13 Bona inai taravatu be davara unai kahana dekenai lasi. Vadaeni, inai bamona do umui henanadai lasi, ‘Daika be ita dainai davara unai kahana dekenai do ia lao, ita dekenai do ia mailaia, vadaeni do ita kamonai bona karana do ita karaia?’  
\v 14 To unai taravatu be oiemu badibadinai ia noho, oiemu uduna lalonai, bona oiemu kudouna dekenai, ena kara do oi karaia totona.   
\p
\v 15 “Hari dina dekenai, namo bona dika, mauri bona mase, be umui emui vairana dekenai lau atoa. Idia huanai dekena amo, edena do umui abia hidi?  
\v 16 Lohiabada emui Dirava ena oda, hari dina umui dekenai lau henia gaudia do umui kamonai henia. Bema unai bamona umui karaia, bona bema Lohiabada umui lalokau henia, iena dala do umui raka, bona iena taravatu ibounai do umui badinaia, umui be do umui mauri. Bona Lohiabada ese umui do ia hagoadaia, vadaeni emui bese do ia habadaia. Oibe, Lohiabada ese umui do ia hanamoa, do umui raka vareai bona abia tanona lalonai.   
\p
\v 17 “To bema emui lalona idia auka, bona Lohiabada dekenai umui kamonai henia lasi, bona bema dirava idaudia umui tomadiho henia, bona edia hesiai gaukara umui karaia neganai,  
\v 18 lau ese hari dina umui lau hamaoroa, umui be do umui mase ore. Ioridane Sinavai do umui hanaia, to unai tano, do umui abia bona noholaia tanona dekenai do umui mauri daudau lasi.   
\p
\v 19 “Hari dina, guba bona tanobada dekenai lau boiboi noho, idia ese umui do idia uitnesi henia. Badina lau be mauri bona mase, hanamoa kara bona hadikaia kara, umui emui vairana dekenai lau atoa, do umui abia hidi totona. Unai dainai mauri do umui abia hidi, vadaeni umui bona emui natudia do umui mauri noho.  
\v 20 Lohiabada emui Dirava do umui lalokau henia, bona iena hereva do umui kamonai henia, bona Lohiabada do umui badinaia namonamo. Unai neganai ia be emui mauri ena badina, bona ia ese mauri lagani momo herea umui dekenai do ia henia. Bona emui sene taudia Aberahamo bona Isako bona Iakobo dekenai Lohiabada ese ia gwauhamata henidia tano lalonai do umui noho daudau herea.”   
\c 31  
\s1 Iosua ese Mose ena gabu ia abia  
\p
\v 1 Mose ese inai hereva ibounai Israela taudia dekenai ia hamaoroa.  
\v 2 Bona ia ese ma idia dekenai ia gwau, “Hari dina dekenai lauegu mauri dinadia be 120. Lauegu goada be hegeregere lasi umui do lau hakaua noho. Bona Lohiabada ese lau ia hamaoroa vadaeni, ia gwau, ‘Oi be inai Ioridane Sinavai do oi hanaia lasi.’  
\v 3 Lohiabada, emui Dirava be umui emui vairana dekenai unai sinavai do ia hanaia. Ia ese unuseni idia noho bese taudia umui emui vairana dekenai do ia hadikaia ore. Edia tano be do umui abia, bona do umui noholaia.  
\v 4 Lohiabada ese idia do ia hadikaia ore, Sihona bona Oga, Amoro taudia edia king ia alaia mase, bona edia tano ia hadikaia ore bamona.  
\v 5 Lohiabada ese umui do ia durua, vadaeni umui ese idia do umui halusia. Vadaeni umui dekenai lau hamaoroa vadaeni hegeregerena, idia do umui hadikaia ore.  
\v 6 Do umui goada, emui lalona do umui ha-aukaia, bona idia dekenai do umui gari henia lasi. Badina be Lohiabada, emui Dirava ese umui dekenai do ia noho. Ia ese umui do ia negea lasi, ia ese umui do ia rakatania lasi.”   
\p
\v 7 Unai neganai Mose ese Iosua ia boiria, Israela taudia ibounai edia vairana dekenai ia hereva henia, ia gwau, “Iosua e, do oi goada, oiemu lalona do oi ha-aukaia, badina inai orea taudia danu do oi raka vareai, Lohiabada ese iseda sene taudia dekenai ia gwauhamata henidia tano dekenai. Oi ese unai tano idia edia huana dekenai do oi haria, edia tano korikori do ia lao.  
\v 8 Lohiabada be oiemu vairana dekenai do ia lao, bona ia ese oi do ia bamoa. Ia ese oi do ia negea lasi, bona oi do ia rakatania lasi. Oiemu kudouna do ia manoka lasi, do oi gari lasi.”   
\s1 Taravatu be lagani 7, 7 ibounai do idia duahia  
\p
\v 9 Mose ese Lohiabada ena Taravatu ia torea, vadaeni Levi helaga taudia bona Israela tau badadia dekenai ia henia. Unai Levi taudia ese Lohiabada ena Taravatu Maua idia naria noho.  
\v 10 Mose ese idia ia oda henia, ia gwau, “Lagani 7 idia ore nega ibounai, abiatorehai dekena amo ruhaia lagani neganai, inai Taravatu be Israela taudia edia vairana dekenai do umui duahia. Duahia negana be Au Raurau Ruma Maragidia aria ena nega.  
\v 11 Israela taudia ese Lohiabada emui Dirava ena vairanai, bona iena abia hidi gabuna dekenai idia haboua mai neganai, inai Taravatu do umui duahia hedinarai, idia ibounai do idia kamonai.  
\v 12 Taunimanima ibounai do umui haboua, tau bona hahine, memero bona kekeni, bona idau taudia, emui hanua dekenai idia noho danu. Vadaeni do idia kamonai, edia lalona be do idia kehoa, bona Lohiabada emui Dirava do idia gari henia. Bona inai Taravatu ena hereva ibounai do idia badinaia, bona edia kara do idia karaia.  
\v 13 Edia natudia be inai Taravatu idia do diba lasi. Vadaeni do idia kamonai, bona do idia diba. Unai neganai Lohiabada, emui Dirava do idia gari henia, bona ia do idia kamonai henia, Ioridane Sinavai do umui hanaia, bona do umui abia tano dekenai do idia noho dinadia ibounai.”   
\s1 Lohiabada ena hereva dokona Mose dekenai  
\p
\v 14 Lohiabada ese Mose dekenai ia hereva, ia gwau, “Oi kamonai, oi be kahirakahira do oi mase. Iosua do oi boiria, umui ruaosi be Palai Dubu dekenai do umui raka vareai. Unuseni lau ese oda do lau henia.” Vadaeni Mose bona Iosua idia lao, Palai Dubu lalonai idia raka vareai.  
\v 15 Bona Lohiabada be Palai Dubu lalonai idia dekenai ia hedinarai, ori ta lalonai. Inai ori be Palai Dubu ena iduara badinai ia hedinarai.  
\v 16 Lohiabada ese Mose dekenai ia hereva, ia gwau, “Oi kamonai, oi be kahirakahira do oi mase. Bona oi mase murinai, inai bese taudia do idia toreisi, dirava idaudia, do idia lao tanodia edia dirava dekenai do idia tomadiho henia, lau do idia rakatania, bona lauegu Taravatu do idia utua.  
\v 17 Unai dina dekenai lau be idia dekenai do lau badu, bona idia do lau rakatania, bona lauegu vairana be idia dekena amo do lau hunia, vadaeni do idia dika momokani. Hisihisi bona hekwarahi momo do idia davaria. Vadaeni unai neganai do idia gwau, ‘Inai dika be ita dekenai idia ginidae badina be iseda Dirava be ita dekenai ia noho lasi, ani?’  
\v 18 Momokani, unai dina dekenai lau ese lauegu vairana do lau hunia, edia kara dika dainai, bona dirava idaudia dekenai idia lao dainai.   
\p
\v 19 “Unai dainai inai ane do oi torea. Israela taudia dekenai do oi hadibaia, vadaeni inai ane do idia abia. Bona inai ane ese Israela taudia do ia samania, lauegu vairana dekenai.  
\v 20 Badina be edia sene taudia dekenai lau gwauhamata henidia tano dekenai idia do lau hakaua vareai, rata bona hani dekenai ia honu noho tano dekenai. Unuseni do idia aniani, idia boga kunu, bona edia tauanina do idia bada. Vadaeni idia ese dirava idaudia do idia tahua, edia hesiai gaukara do idia karaia, lau do idia negea, bona lauegu taravatu do idia utua.   
\p
\v 21 “Vadaeni dika momo, bona hekwarahi momo idia dekenai do idia ginidae neganai, inai ane ese idia do ia samania. Badina be idia edia natudia taudia ese inai ane do idia laloaboio lasi. Inai bese be unai tano dekenai lau ese do lau hakaua vareai lasi neganai, lau diba dahaka bona dahaka idia laloa noho, bona edena kara do idia karaia.”   
\p
\v 22 Unai dainai unai dina dekenai Mose ese inai ane ia torea, bona ia ese Israela taudia dekenai ia hadibaia.   
\p
\v 23 Lohiabada ese Iosua Nunu ia hamaoroa, ia gwau, “Do oi goada, oiemu lalona do oi ha-aukaia, Israela taudia do oi hakaua, vadaeni idia dekenai lau gwauhamata henidia tano dekenai do idia vareai. Lau danu ese oi do lau bamoa noho.”   
\p
\v 24 Mose ese inai Taravatu ena hereva ibounai Buka dekenai ia torea haorea.  
\v 25 Vadaeni Mose ese Levi taudia, Lohiabada ena Taravatu Maua idia naria taudia ia oda henidia, ia gwau,  
\v 26 “Inai Taravatu Buka do umui abia, Lohiabada, emui Dirava ena Taravatu Maua ena badibadinai do umui atoa. Inai Buka unuseni ia noho ese, Lohiabada ena bese taudia do ia samania noho.  
\v 27 Badina be umui emui kamonai lasi bona dagedage be lau diba. Lau mauri noho dinadia lalonai umui ese Lohiabada umui kamonai henia lasi. Be, lau mase murinai edena bamona do umui karaia?   
\p
\v 28 “Emui iduhu gunalaia taudia ibounai bona emui tau badadia ibounai be lauegu vairana dekenai do umui haboua, vadaeni lau ese inai hereva do lau gwauraia: Guba bona tanobada do lau boiridia, unai emui gunalaia taudia edia kara do idia uitnesi henia totona.  
\v 29 Badina be lau diba, lau mase murinai umui be do umui kara dika, bona umui dekenai lau hadibaia hereva do umui negea. Bona dina gabeai dika be umui dekenai do ia ginidae, badina be Lohiabada ena vairana dekenai do umui kara dika, bona iena badu do umui havaraia, ia taravatua karadia umui karaia dainai.”   
\s1 Mose ena ane  
\p
\v 30 Vadaeni Mose ese Israela taudia ibounai dekenai inai ane ena hereva ia gwauraia, ela bona ia ore. Ane ena anina be inai:   
\c 32  
\q1
\v 1 Guba e, oi kamonai, do lau hereva,  
\q1 tanobada e, lauegu hereva do oi kamonai.   
\q1
\v 2 Lauegu hereva be medu bamona do ia diho.  
\q1 Lauegu hadibaia hereva,  
\q1 be hanuaboi ena paripari bamona do ia hedinarai,  
\q1 medu maragina rei matamata ena latanai bamona,  
\q1 medu bada aniani avadia edia latanai bamona.   
\b  
\q1
\v 3 Lohiabada ena ladana do lau habadaia.  
\q1 Iseda Dirava do lau hanamoa.   
\q1
\v 4 Ia be Nadi Badana,  
\q1 iena gaukara be namo momokani.  
\q1 Iena dala ibounai be maoro,  
\q1 bona iena kota be momokani.  
\q1 Ia be abidadama ena Diravana,  
\q1 ia kara dika lasi.  
\q1 Ia be momokani bona maoromaoro.   
\b  
\q1
\v 5 To umui be iena vairana dekenai umui kara dika noho.  
\q1 Umui be iena natuna taudia lasi,  
\q1 badina umui be mai emui miro.  
\q1 Umui be dagedage bona gagevagageva besena.   
\q1
\v 6 Kavakava bona laloa metau taudia e,  
\q1 Lohiabada dekenai unai bamona umui karaia, a?  
\q1 Ia be umui emui tamana lasi, a?  
\q1 Mauri be umui dekenai ia henia lasi, a?  
\q1 Ia ese umui ia karaia, bona umui ia haginia.   
\b  
\q1
\v 7 Nega gunadia do umui laloa,  
\q1 idaunegai momokani idia vara gaudia do umui laloa.  
\q1 Emui tamana taudia do umui nanadaia,  
\q1 idia ese unai kara gunadia do idia hadibaia.  
\q1 Tau badadia do umui nanadaia,  
\q1 idia ese dahaka idia vara vadaeni gaudia,  
\q1 be do idia hamaoroa umui dekenai.   
\q1
\v 8 Ataiai Herea Diravana ese,  
\q1 bese ta ta dekenai tano ia haria henidia neganai,  
\q1 taunimanima ibounai edia noho gabudia ia gwauraia neganai,  
\q1 ia ese bese ta ta edia tano hetoadia ia henidia.  
\q1 Ia ese bese ta ta ibounai dekenai,  
\q1 edia dirava ta ta ia henia.   
\q1
\v 9 To Lohiabada ese iena bese korikori,  
\q1 be Iakobo dekena amo ia abia hidi.   
\b  
\q1
\v 10 Ia ese taunimanima noho lasi tano dekenai,  
\q1 idia ia davaria.  
\q1 Rei lasi tano dekenai idia ia davaria.  
\q1 Lohiabada ese idia ia naria bona ia ubua.  
\q1 Ia ese idia ia gimaia,  
\q1 sibona ena lalokau tauna ia gimaia bamona,   
\q1
\v 11 ugava manu bamona,  
\q1 iena natuna be roho dalana ia hadibaia neganai.  
\q1 Ia be iena natuna ugava danu ia roho noho,  
\q1 bona iena natuna idia moru, o roho hegeregere lasi neganai,  
\q1 ugava ese iena hanina ia atoa maoromaoro,  
\q1 hanina dekena amo iena natuna ia gobea,  
\q1 bona natuna be iena sinana ena hanina dekenai do idia helai,  
\q1 do idia moru garina.   
\q1
\v 12 Lohiabada sibona ese Israela ia hakaua,  
\q1 dirava idauna ta ese idia ia durudia lasi.   
\b  
\q1
\v 13 Lohiabada ese iena bese,  
\q1 be ororo gabudia dekenai ia siaia lao.  
\q1 Idia ese uda dekenai idia vara aniani idia ania.  
\q1 Dirava ese nadi dekena amo,  
\q1 hani idia dekenai ia henia.  
\q1 Nadi aukana dekena amo,  
\q1 olive dehoro idia dekenai ia henia.   
\q1
\v 14 Edia boromakau edia bata, edia mamoe edia rata,  
\q1 bona edia mamoe natudia tau edia digara idia ania,  
\q1 Basana dekenai noho boromakau, bona nani danu.  
\q1 Uiti namo herea umui ania,  
\q1 bona uaina namona umui inua.   
\b  
\q1
\v 15 To Lohiabada ena bese edia tauanina idia bada lao,  
\q1 vadaeni idia dagedage.  
\q1 Aniani dekenai idia honu,  
\q1 vadaeni idia metau.  
\q1 Vadaeni idia ese ia karadia Diravana idia rakatania.  
\q1 Idia ia hamauria Nadi Badana,  
\q1 be idia ese idia negea momokani.   
\q1
\v 16 Idia ese dirava idaudia idia tomadiho henidia,  
\q1 unai dainai Lohiabada ia badu.  
\q1 Idia edia kara dika dekena amo Lohiabada idia habadua.   
\q1
\v 17 Lauma dikadia dekenai boubou idia henia.  
\q1 Idia ese Dirava lasi laumadia,  
\q1 bona idia diba lasi dirava dekenai, boubou idia henia.  
\q1 Dirava matamatadia, vanegai sibona idia davaria gaudia,  
\q1 dekenai boubou idia henia.  
\q1 Emui tamadia idia diba lasi diravadia be unai.   
\q1
\v 18 Edia Dirava, edia Hamauria Tauna badana,  
\q1 be idia laloaboio.  
\q1 Idia ia karaia Diravana idia laloa lasi.   
\b  
\q1
\v 19 Lohiabada ese inai bamona kara ia itaia,  
\q1 vadaeni ia rakatanidia,  
\q1 badina be iena natuna, tau bona hahine,  
\q1 edia kerere ese ia idia habadua dainai.   
\q1
\v 20 Ia gwau, “Lauegu vairana be idia dekena amo do lau hunia,  
\q1 bona edia dokona be do lau itaia,  
\q1 badina idia be dagedage taudia.  
\q1 Idia be mai edia abidadama lasi taudia.   
\q1
\v 21 Edia dirava, anina lasi gaudia,  
\q1 dekena amo idia ese lau idia habadua.  
\q1 Edia kaivakuku dekena amo,  
\q1 lauegu dagedage idia havaraia.  
\q1 Vadaeni bese kavakavana ta dekena amo,  
\q1 lau ese idia do lau habadua,  
\q1 bona anina lasi oreana dekena amo,  
\q1 edia mama do lau havaraia.   
\q1
\v 22 Badina be lauegu badu ese,  
\q1 lahi ia havaraia vadaeni.  
\q1 Tanobada ena gau ibounai do ia gabua ore,  
\q1 bona mase taudia edia dobu herea gabudia do ia araia,  
\q1 ororo badinai ia noho tanona danu do ia gabua ore.   
\b  
\q1
\v 23 “Dika idauidau be idia edia latanai do lau siaia,  
\q1 bona lauegu diba ibounai,  
\q1 be idia dekenai do lau pidia haorea,   
\q1
\v 24 Hitolo ese edia tauanina do ia hamaragia.  
\q1 Lahi ena siahu ese idia do ia alaia mase.  
\q1 Mase gorere ese idia do ia hamasea.  
\q1 Uda ena dagedage gaudia do lau siaia,  
\q1 idia ese idia do idia darea mase,  
\q1 bona gaigai, mase gaudia, do lau siaia,  
\q1 idia do idia koria totona.   
\q1
\v 25 Ariara gabuna dekenai,  
\q1 tuari kaia ese idia do ia alaia,  
\q1 bona ruma lalonai danu,  
\q1 gari bada ese idia do ia hadikaia.  
\q1 Uhau taudia bona kekeni do idia mase,  
\q1 natuna maragidia bona tau burukadia danu do idia mase.   
\q1
\v 26 Lau gwau, ‘Idia do lau hadikaia ore momokani,  
\q1 taunimanima ibounai ese idia do idia laloaboio totona.’   
\q1
\v 27 To idia dekenai idia dagedage taudia,  
\q1 edia hevaseha hereva dekenai lau laloa momo,  
\q1 do idia laloa kerere garina,  
\q1 do idia gwau, ‘Ai ese Lohiabada ena bese ai halusia, to  
\q1 to Lohiabada ese gau ta ia karaia lasi.’ ”   
\b  
\q1
\v 28 Badina Israela be aonega lasi besena.  
\q1 Idia edia lalona be idia kehoa lasi.   
\q1
\v 29 Idia kwalimu lasi ena badina, idia diba lasi,  
\q1 bona dahaka ia vara ena anina, be idia laloa lasi.   
\q1
\v 30 Badina dahaka tau tamona sibona ese,  
\q1 Israela ena tatau 1000 ia lulua diba?  
\q1 Bona tau rua sibona ese Israela tatau 10,000,  
\q1 edena bamona idia halusia diba?  
\q1 Badina be inai:  
\q1 Edia Dirava ese idia ia rakatania vadaeni.  
\q1 Edia Siahu Ibounai Dirava ese idia ia negea vadaeni.   
\q1
\v 31 Badina be Israela dekenai idia dagedage henia taudia,  
\q1 be idia diba vadaeni, edia dirava be idia manoka,  
\q1 bona mai edia siahu lasi.  
\q1 Idia diba edia dirava be Israela ena Siahu Diravana bamona lasi.   
\q1
\v 32 Israela idia dagedage henia taudia be miro bona kerere,  
\q1 Sodoma bona Gomora idia miro bamona.  
\q1 Idia edia vain ese huahua dikadia,  
\q1 mase gaudia idia havaraia vadaeni.   
\q1
\v 33 Edia uaina be gaigai ena mase muramura bamona,  
\q1 gaigai ena koria mase poisini bamona.   
\b  
\q1
\v 34 To Lohiabada ese Israela dekenai idia dagedage taudia,  
\q1 edia kara ia laloatao noho.  
\q1 Nega korikori dekenai edia dika davana do ia henia.   
\q1
\v 35 Lohiabada ese dika ena davana do ia henia,  
\q1 bona namo ena davana danu.  
\q1 Unai dagedage taudia edia aena be do idia dedi.  
\q1 Idia edia moru dinana be kahirakahira.  
\q1 Lohiabada ese idia do ia hadikaia ore haraga.   
\b  
\q1
\v 36 Lohiabada ese ita ia itaia noho,  
\q1 bona iena bese edia goada ia ore neganai,  
\q1 ia ese idia do ia hamauria.  
\q1 Ia ese ia itaia noho,  
\q1 vadaeni iena hesiai gaukara idia karaia noho taudia,  
\q1 be durua ta lasi neganai,  
\q1 ia ese idia do ia bogahisihisi henia.   
\q1
\v 37 Unai neganai Lohiabada ese iena bese do ia nanadaia,  
\q1 do ia gwau,  
\q1 “Unai dirava goadadia,  
\q1 umui abidadama henidia gaudia, be edeseni?   
\q1
\v 38 Emui boubou edia digara dekena amo umui ubudia,  
\q1 bona emui inua boubou uaina idia inua, ani?  
\q1 Namo, idia be do idia toreisi,  
\q1 bona umui do idia durua, a?  
\q1 Harihari idia ese umui do idia hamauria, a?   
\b  
\q1
\v 39 “Harihari umui itaia, lau Dirava inai.  
\q1 Dirava ta be lasi, lau sibona.  
\q1 Lau ese taunimanima lau alaia noho,  
\q1 bona taunimanima lau hamauria noho.  
\q1 Lau ese lau haberoa noho,  
\q1 bona lau ese bero lau hanamoa noho.  
\q1 Bona lauegu kara be tau ta ese ia koua diba lasi.   
\q1
\v 40 Badina be lauegu imana be guba dekenai lau duduia,  
\q1 lau gwau, lau be lau noho hanaihanai hegeregerena,   
\q1
\v 41 lauegu tuari kaia do lau segea,  
\q1 bona kota maoromaoro be ia dekena amo do lau karaia.  
\q1 Lau dekenai idia tuari henia taudia,  
\q1 edia kerere davana do lau henia,  
\q1 lau dekenai idia dagedage taudia danu,  
\q1 edia dika davana do lau henia.   
\q1
\v 42 Lauegu diba bona peva dekena amo,  
\q1 rara momo do ia diho.  
\q1 Lauegu tuari kaia ese,  
\q1 lau idia koua gwauraia taudia do ia alaia mase ore.  
\q1 Lau dekenai idia tuari henia taudia ibounai,  
\q1 be do lau alaia mase.  
\q1 Bero taudia bona abia mauri dibura taudia danu,  
\q1 be do idia mase ore.”   
\b  
\q1
\v 43 Bese idauidau e,  
\q1 Lohiabada ena bese do umui hanamoa,  
\q1 badina be, Israela taudia idia alaia taudia ibounai,  
\q1 be Lohiabada ese ia panisia noho.  
\q1 Ia idia dagedage henia taudia dekenai,  
\q1 be ia ese edia dika davana ia henia noho.  
\q1 To iena bese taudia edia kara dika,  
\q1 be ia ese ia gwauatao noho.   
\b  
\p
\v 44 Mose bona Iosua Nunu ese inai ane ena hereva ibounai idia gwauraia, Israela taudia do idia kamonaia totona.   
\s1 Mose ena hadibaia hereva dokona  
\p
\v 45 Mose ese Lohiabada ena hadibaia hereva Israela taudia ibounai dekenai ia hamaoroa vadaeni.  
\v 46 Vadaeni ia hereva lou, ia gwau, “Hari dina dekenai umui lau hamaoroa herevadia ibounai do umui laloatao, emui natudia dekenai danu do umui hadibaia. Inai lau hadibaia taravatu ena hereva ibounai do idia badinaia bona edia kara do idia karaia.  
\v 47 Badina be inai herevadia be gau maragina lasi umui dekenai. Lasi, idia be emui mauri. Idia do umui kamonai henia, vadaeni Ioridane Sinavai unai kahana dekenai do umui noholaia tano dekenai emui mauri dinadia do idia momo.”   
\p
\v 48 Unai dina dekenai Lohiabada ese Mose ia hereva henia, ia gwau,  
\v 49 “Abarima Ororo dekenai do oi daekau lao. Unai be Nebo Ororo, Moaba tanona dekenai, Ieriko unai kahana dekenai. Unai gabu dekena amo oiemu matana do oi negea, Kanana tano, Israela taudia dekenai do lau henia tano, do oi itaia.  
\v 50 Vadaeni unai oi daekau lao ororona dekenai do oi mase, oiemu kakana Arona be Horo Ororo dekenai ia mase hegeregerena.  
\v 51 Badina be Israela taudia edia vairana dekenai umui ruaosi ese lau dekenai umui kamonai henia lasi, Meribata Kadesi ena ranu gabuna badibadinai, Sini ena tano, taunimanima noho lasi gabuna dekenai, lau umui matauraia lasi, Israela taudia edia vairana dekenai.  
\v 52 Unai dainai unai tano be daudau dekena amo sibona do oi itaia. To Israela taudia dekenai lau henia tano be do oi ginidae lasi, bona unai tano lalonai do oi raka vareai lasi.”   
\c 33  
\s1 Mose ese Israela ena iduhu ta ta ia hanamoa  
\p
\v 1 Vadaeni Dirava ena hesiai tauna Mose ese Israela taudia ia hanamoa, ia do mase lasi neganai. Iena hanamoa hereva be inai:   
\q1
\v 2 Lohiabada be Sinai dekena amo ia mai.  
\q1 Edoma ena ataiai dekena amo, dina bamona ia toreisi.  
\q1 Parana Ororo dekena amo ia diaridiari.  
\q1 Mai ena aneru momo momo herea danu ia mai.  
\q1 Taravatu be lahi bamona,  
\q1 iena imana idibana dekenai.   
\q1
\v 3 Momokani, Lohiabada ese iena bese ia lalokau henia noho.  
\q1 Iena helaga taudia ia hanamodia noho.  
\q1 Unai dainai ita ese Lohiabada ena aena dekenai,  
\q1 ita tomadiho henia noho,  
\q1 iena Taravatu ita kamonai henia.   
\q1
\v 4 Inai Taravatu, Mose ese ita dekenai ia henia gauna,  
\q1 ita badinaia noho,  
\q1 iseda bese ena gau namo hereana momokani be unai.   
\q1
\v 5 Israela bese gunalaia taudia idia helai neganai,  
\q1 bona Israela iduhu ibounai idia hebou neganai.  
\q1 Lohiabada be Israela besena ena King momokani ia lao.   
\b  
\p
\v 6 Mose ese Rubena ena iduhu ia herevalaia, ia gwau,  
\q1 “Rubena do ia mauri, do ia mase lasi,  
\q1 to iena orea taudia be momo herea lasi.”   
\b  
\p
\v 7 Iuda ena iduhu dekenai inai bamona ia herevalaia, ia gwau,  
\q1 “Lohiabada e, Iuda taudia edia taitai durua totona do oi kamonai,  
\q1 Israela taudia danu do oi haboua lou.  
\q1 Lohiabada e, idia totona do oi tuari.  
\q1 Idia dekenai idia dagedage taudia,  
\q1 dekena amo idia do oi hamauria.”   
\b  
\p
\v 8 Mose ese Levi iduhu ia herevalaia, ia gwau,  
\q1 “Lohiabada e, oiemu ura gauna be,  
\q1 Tumima bona Urima dekena amo do oi hedinaraia noho,  
\q1 oiemu helaga taudia, Levi ena iduhu taudia,  
\q1 edia gaukara dekena amo.  
\q1 Masa dekenai edia goada oi tohoa,  
\q1 bona Meriba ranu gabudia dekenai edia goada oi hamomokania.   
\q1
\v 9 Levi taudia ese oi Lohiabada idia laloa bada,  
\q1 to edia tamadia bona sinadia idia laloa sisina.  
\q1 Edia tadikakadia idia negea,  
\q1 bona edia natudia idia atoa siri.  
\q1 Badina be oiemu hereva idia kamonai,  
\q1 bona oiemu Taravatu idia badinaia.   
\q1
\v 10 Idia ese oiemu natuna taudia dekenai,  
\q1 oiemu Taravatu kamonai henia dalana do idia hadibaia.  
\q1 Idia ese boubou helagadia,  
\q1 be oiemu boubou patana dekenai do idia gabua.   
\q1
\v 11 Lohiabada e, Levi ena iduhu do oi durua,  
\q1 do ia goada lao noho.  
\q1 Edia imana gaukara do oi abia dae.  
\q1 Idia dekenai idia tuari taudia do oi gwadaia mase,  
\q1 vadaeni do idia toreisi lou lasi.”   
\b  
\p
\v 12 Beniamina iduhu be Mose ese ia herevalaia, ia gwau,  
\q1 “Inai iduhu be Lohiabada ese ia lalokau henia noho,  
\q1 ia naria noho,  
\q1 dina ibounai ia ese ia gimaia noho,  
\q1 bona edia huana dekenai ia noho.”   
\b  
\p
\v 13 Iosepa ena iduhu be Mose ese ia herevalaia, ia gwau,  
\q1 “Lohiabada ese edia tano,  
\q1 be medu dekenai do ia hanamoa,  
\q1 bona tano ena henunai dekena amo,  
\q1 ia daekau mai ranuna dekena amo danu.   
\q1
\v 14 Lohiabada ese dina ena siahu dekenai idia mage huahua,  
\q1 dekena amo edia tano do ia hanamoa.  
\q1 Inai huahua be namodia momokani gaudia,  
\q1 edia nega korikori dekenai do idia vara namonamo.   
\q1
\v 15 Edia ororo gunadia danu ese,  
\q1 huahua namodia momokani momo herea do idia havaraia.   
\q1
\v 16 Lohiabada ese edia tano,  
\q1 be gau namodia dekenai do ia hahonua.  
\q1 Lohiabada ena kara namodia ese,  
\q1 edia tano do idia hanamoa,  
\q1 badina ia ese au ginigini ia araia noho,  
\q1 dekena amo ia hereva.  
\q1 Inai hanamoa be Iosepa ena iduhu dekenai do ia ginidae,  
\q1 badina ia be iena tadikakana taudia edia lohia tauna.   
\q1
\v 17 Iosepa ena goada be boromakau ena goada hegeregerena.  
\q1 Iena doana be uda boromakau ena doana bamona.  
\q1 Iena doana be Manase ena taunimanima momo,  
\q1 bona Eparaima ena taunimanima momo herea.  
\q1 Inai orea ruaosi dekena amo,  
\q1 Iosepa ese tanobada besedia ia hadikadia noho.  
\q1 Ia doridia ela bona tanobada ena dokona gabudia.”   
\b  
\p
\v 18 Sebuluno bona Isakara edia iduhu be Mose ese ia herevalaia, ia gwau,  
\q1 “Lohiabada ese Sebuluno edia hoihoi gaukara,  
\q1 davara hanaia gabudia dekenai, do ia durua bada,  
\q1 bona Lohiabada ese Isakara edia kohu do ia habadaia,  
\q1 edia ruma noho gaukara dekena amo.   
\q1
\v 19 Inai bese ruaosi ese idau bese taudia do idia boiria,  
\q1 edia ororo dekenai do idia lao.  
\q1 Unuseni kara maoromaoro bouboudia do idia hahelagaia.  
\q1 Badina be davara dekena amo edia kohu idia abia,  
\q1 bona kone ena miri lalonai gaudia dekena amo danu.”   
\b  
\p
\v 20 Gado ena iduhu be Mose ese ia herevalaia, ia gwau,  
\q1 “Dirava do umui hanamoa,  
\q1 ia ese emui tano ia habadaia noho.  
\q1 Gado taudia be laiona bamona idia hekure noho,  
\q1 imana o kwarana do idia darea totona.   
\q1
\v 21 Tano namo herea be Gado iduhu ese idia abia hidi.  
\q1 Idia ese lohia ena tano kahana idia abia.  
\q1 Badina be Lohiabada ena taravatu bona oda,  
\q1 be idia ese idia kamonai henia,  
\q1 Israela gunalaia taudia idia hebou neganai.”   
\b  
\p
\v 22 Dano ena iduhu be Mose ese ia herevalaia, ia gwau,  
\q1 “Dano be laiona natuna,  
\q1 Basana dekena amo ia roho daekau mai.”   
\b  
\p
\v 23 Napatali ena iduhu be Mose ese ia herevalaia, ia gwau,  
\q1 “Napatali taudia e, Lohiabada ese umui ia ura henia,  
\q1 Lohiabada ena hanamoa umui abia vadaeni.  
\q1 Emui tano be Galilea gohuna,  
\q1 dekena amo diho kahana dekenai ia lao.”   
\b  
\p
\v 24 Asere ena iduhu be Mose ese ia herevalaia, ia gwau,  
\q1 “Asere taudia be Lohiabada ese do ia hanamodia bada,  
\q1 haida bamona lasi.  
\q1 Edia tadikakadia ese do idia hanamoa henidia.  
\q1 Edia tano be do mai ena olive audia momo.   
\q1
\v 25 Edia hanua be auri ikoukoudia ese do idia gimaia,  
\q1 bona hanua taudia do idia noho namonamo, gari lasi.”   
\b  
\p
\v 26 Ma Mose ia hereva, ia gwau,  
\q1 “Israela taudia e,  
\q1 dirava ta be emui Dirava hegeregerena lasi.  
\q1 Ia be guba ori dekenai ia guia,  
\q1 mai iena hairaina bada.  
\q1 Ia be guba dekena amo ia mai noho,  
\q1 umui do ia durua totona.   
\q1
\v 27 Dirava ese nega ibounai umui ia gimaia noho.  
\q1 Iena noho hanaihanai imadia ese umui idia hagoadaia noho.  
\q1 Umui idia tuari henia taudia,  
\q1 be ia ese umui emui vairana dekenai ia luludia,  
\q1 bona umui ia hamaoroa,  
\q1 ia gwau, ‘Do umui aladia ore.’   
\q1
\v 28 Unai dainai Israela ena tubuna taudia,  
\q1 be maino dekenai do idia noho namonamo,  
\q1 Iakobo iduhu taudia be sibodia do idia noho, tuari ta lasi.  
\q1 Iakobo ena tano be koni bona uaina matamata dekenai ia honu,  
\q1 bona unai tano dekenai hanuaboi ena paripari,  
\q1 be guba dekena amo medu bamona ia diho.   
\q1
\v 29 Israela taudia e, umui emui noho be namo.  
\q1 Edena taudia ese umui idia hereaia?  
\q1 Lohiabada ese umui emui bese ia hamauria vadaeni.  
\q1 Lohiabada be emui kesi, bona emui durua Tauna,  
\q1 bona ia be emui kwalimu tuari kaia.  
\q1 Umui dekenai idia tuari henia taudia,  
\q1 be umui emui vairana dekenai do idia tui diho.  
\q1 Edia ataiai gabudia helagadia do umui moia diho.”   
\c 34  
\s1 Mose ia mase  
\p
\v 1 Mose be Moaba ena tano palaka dekena amo Nebo Ororo dekenai ia lao. Ia daekau lao Pisiga Ororo atai dekenai, Ieriko ena dina daekau kahana dekenai. Unuseni Lohiabada ese tano ibounai Mose dekenai ia hedinaraia, Gileada tanona ela bona Dano.  
\v 2 Bona Napatali ena tano ibounai, bona Eparaima bona Manase tanodia, bona Iuda ena tano ibounai ela bona Davara Badana, lahara kahana dekenai.  
\v 3  Bona diho kahana, bona Ieriko Kourana, pama audia gabuna be unai, ela bona Soara.  
\v 4 Vadaeni Lohiabada ese Mose ia hereva henia, ia gwau, “Unai tano be Aberahamo bona Isako bona Iakobo dekenai lau gwauhamata henidia, lau gwau, ‘Umui emui tubudia dekenai do lau henia.’ Harihari oi dekenai lau hedinaraia. Oiemu matana dekenai oi itaia vadaeni, to ia dekenai do oi ginidae lasi.”   
\p
\v 5 Unai dainai Mose, Lohiabada ena hesiai tauna be Moaba tano dekenai ia mase, Lohiabada ena hereva hegeregerena.  
\v 6 Vadaeni Lohiabada ese Mose ia guria, Moaba ena kourana ta dekenai, Bete Peoro hanua unai kahana dekenai. To ia guria gabuna korikori be tau ta ia diba lasi, ia mai bona hari.  
\v 7 Mose ia mase neganai, iena mauri lagani be 120, to iena matana be dika sisina lasi, bona iena tauanina be manoka lasi.  
\v 8 Dina 30 lalonai Israela taudia ese Mose dainai idia taitai, Moaba tano dekenai, ela bona edia lalohisihisi dinadia be idia ore vadaeni.   
\p
\v 9 Iosua Nunu be aonega ena lauma ese ia hahonua, badina be Mose ese Iosua ia abia hidi vadaeni, iena gabu do ia abia. Unai dainai, Israela taudia ese Iosua idia kamonai henia, bona Lohiabada ese Mose dekenai ia oda henia herevadia be idia badinaia.   
\p
\v 10 Unai neganai ia mai bona harihari, peroveta tauna ta ia hedinarai lasi Israela dekenai, Mose hegeregerena. Mose be Lohiabada danu idia herevahereva ta ta edia uduna, edia uduna dekenai.  
\v 11 Toa bona hoa karadia, Mose ese ia karaia hegeregerena, be nega ta peroveta tauna ta ia karaia lasi, ia mai bona harihari. Lohiabada ese Mose ia siaia, unai karadia do ia karaia totona, Aigupito ena king Farao dekenai, bona iena lohia taudia dekenai, bona Aigupito tano ibounai dekenai.  
\v 12 Bona siahu karadia, bona gari bada karadia, Mose ese Israela taudia ibounai edia vairana dekenai ia karaia gaudia, be nega ta peroveta tauna ta ia karaia lasi, ia mai bona harihari.