\id 2TH 2 THESSALONIANS, Hiri Motu Bible, PNG, 1993 
\h 2 TESALONIKA 
\toc1 PAULO ENA REVAREVA IHARUANA TESALONIKA TAUDIA DEKENAI 
\toc2 2 TESALONIKA 
\mt2 PAULO ENA REVAREVA  
\mt1 IHARUANA TESALONIKA  
\mt2 TAUDIA DEKENAI  
\c 1  
\p
\v 1 Ai tau toiosi, Paulo bona Sila bona Timoteo, ese iseda Tamana Dirava bona Lohiabada Iesu Keriso edia ekalesia orea Tesalonika dekenai, umui dekenai revareva ai torea inai.   
\p
\v 2 Iseda Tamana Dirava bona Lohiabada Iesu Keriso dekenai ai noia hariharibada bona maino umui dekenai do idia henia.   
\s1 Keriso ia giroa mai neganai Dirava ese taunimanima do ia kota henia  
\p
\v 3 Aiemai varavara taudia e, nega ibounai umui totona Dirava ai hanamoa. Unai be ia maoro, badina be umui emui abidadama ia bada lao noho, bona emui lalokau umui ta ta dekenai danu ia bada lao noho.  
\v 4 Unai dainai ai ese Dirava ena ekalesia oreadia edia vairanai umui ai herevalaia mai heagi danu. Ai moalelaia gauna be, dagedage bona hisihisi bada umui abia noho, to umui goada noho, bona Dirava dekenai umui abidadama henia noho.   
\p
\v 5 Oibe, inai umui karaia noho kara namodia ese idia hedinaraia, Dirava ena kota be maoromaoro momokani. Bona iena Basileia totona inai hisihisi umui abia noho dainai, Dirava ese davana namona umui dekenai do ia henia iena Basileia lalonai.  
\v 6 Dirava ese kara maoromaoro do ia karaia. Hisihisi umui dekenai idia henia taudia dekenai, be ia ese hisihisi do ia henidia.  
\v 7 Dirava ese umui bona ai, hisihisi ita abia noho taudia dekenai iena mauri namona do ia henia. Inai be do ia vara, Lohiabada Iesu bona iena aneru mai siahu bada danu guba dekena amo do idia mai neganai.  
\v 8 Mai lahi siahu bada danu, Dirava ese ia idia ura lasi taudia, bona Lohiabada Iesu ena Sivarai Namona idia abia dae lasi taudia dekenai davana metau do ia henidia.  
\v 9 Edia davana be inai: Idia be Lohiabada ena vairana, bona iena hairai siahuna dekena amo daudau do idia noho. Inai anina be, Dirava ese idia do ia hadikaia ore momokani, bona inai bamona do idia noho hanaihanai.  
\v 10 Oibe, Keriso do ia mai Dinana dekenai, inai taudia madi do idia dika. Unai Dina neganai Dirava ena abidadama taudia ibounai ese Keriso do idia hanamoa, bona hairai bada do idia henia. Umui danu idia edia huanai do umui gini, badina be aiemai haroro umui abia dae dainai.   
\p
\v 11 Unai dainai nega ibounai umui totona ai guriguri noho. Iseda Dirava ai noia, ia ese umui do ia durua, vadaeni umui ese iena boiboi ena dala do umui badinaia namonamo, iena ura hegeregerena momokani. Bona Dirava ai noia danu, ia ese iena siahu dekena amo umui do ia hagoadaia, vadaeni umui ese umui ura karaia kara namodia ibounai do umui karaia, bona emui abidadama ese umui dekenai ia havaraia gaukara ibounai, be do umui karaia haorea momokani.  
\v 12 Inai dala dekena amo, Lohiabada Iesu ena ladana be taunimanima ese do idia hanamoa umui dainai. Bona umui danu Lohiabada ese do ia hanamoa, iseda Dirava, bona Lohiabada Iesu Keriso edia hariharibada dainai.   
\c 2  
\s1 Tau dika rohorohona  
\p
\v 1 Egu varavara taudia e, iseda Lohiabada Iesu Keriso ma do ia giroa mai, bona ia danu do ita haboua lao. Unai dainai umui dekenai lau noinoi, do umui laloa daradara lasi.  
\v 2 Tau haida idia gwau, Lohiabada ena Dina ia ginidae vadaeni. Sedira haida idia laloa unai bamona ai peroveta, o unai bamona ai haroro. O sedira haida idia gwau unai bamona revareva ta ai siaia. To inai bamona hereva dekenai do umui laloa daradara lasi, bona do umui laloa kerere lasi.  
\v 3 Tau ta ese dala inai bamona dekenai do ia koikoi lasi umui dekenai. Badina Lohiabada ena Dina be do ia ginidae lasi, ela bona unai Tau Dika Rohorohona do ia hedinaraia guna. Unai tau be Dirava ese do ia hadikaia momokani mase gabuna dekenai.  
\v 4 Unai tau ese taunimanima idia guriguri henia gaudia, dirava toana gaudia, do ia dagedage henia. Bona ia ese sibona do ia abia isi, unai tomadiho kara ibounai be ia henunai do ia atoa gwauraia. Ma danu unai Tau Dikana ese Dirava ena Dubu Helaga dekenai do ia helai diho, bona do ia gwau, “Lau sibona be Dirava.”   
\p
\v 5 Guna umui dekenai lau noho neganai, inai hereva ibounai lau hadibaia. Sedira umui laloaboio, a?  
\v 6 Ma umui diba, ani, hari inai neganai unai Tau Dikana ena dala be gau ta ese ia koua noho. To iena nega korikori ia ginidae neganai, unai Tau Dikana do ia hedinarai.  
\v 7 Badina be harihari inai taravatu utua kara dika rohorohona be hunia dala dekenai ia gaukara noho, bona inai bamona hunia dekenai do gaukara noho, ela bona Dirava ese inai kara dika ia koua noho tauna do ia kokia lao.  
\v 8 Unai neganai unai Tau Dika Rohorohona do ia hedinarai. To Lohiabada Iesu mai diaridiari bona mai hairai bada danu do ia mai neganai, ia ese unai Tau Dikana do ia alaia mase.  
\v 9 Satani ena siahu dekena amo unai Tau Dikana be do ia mai, vadaeni hoa bona toa karadia idauidau momo dekena amo ia ese taunimanima momo do ia hakaua kerere.  
\v 10 Ia ese kara kerere idauidau ibounai dekena amo, mase dala dekenai idia raka noho taudia do ia koidia. Inai taudia bema hereva momokani idia abia dae, bona lalokau henia neganai, Dirava do ia hamauridia, to idia ura lasi.  
\v 11 Unai dainai Dirava ese laloa kerere bada ia havaraia edia lalona dekenai, hereva koikoi do idia hamomokania totona.  
\v 12 Inai anina be, hereva momokani do idia abia dae lasi, bona kara dika karaia totona idia moale bada. Inai taudia ibounai, be Dirava ena Kota Badana lalonai, edia kerere momokani ena davana do idia davaria.   
\s1 Mauri abia totona Dirava ese umui ia abia hidi  
\p
\v 13 Aiemai varavara taudia e, ai be umui dainai nega ibounai Dirava ai hanamoa. Badina be Dirava ese umui ia abia hidi guna, mauri umui abia totona. Bona hereva momokani umui abidadama henia dainai, Lauma Helaga ena siahu dekena amo, Dirava ese iena helaga taudia umui ia halaoa vadaeni.  
\v 14 Sivarai Namona umui dekenai ai harorolaia dekena amo, Dirava ese umui dekenai ia boiboi vadaeni. Umui dekenai ia boiboi, iseda Lohiabada Iesu Keriso ena hairaina, be umui danu do umui abia totona.  
\v 15 Unai dainai, aiemai varavara taudia e, do umui gini goada, aiemai haroro bona aiemai revareva dekena amo ai hadibaia hereva do umui dogoatao momokani.   
\p
\v 16 Iseda Lohiabada Iesu Keriso bona iseda Tamana Dirava ese ita idia lalokau henia noho. Edia hariharibada ese ita ta ta iseda lalona idia hagoadaia noho, bona unai dainai Dirava ena gau namodia ita naria noho, mai haheauka danu.  
\v 17 Bona idia ese umui do idia haginia auka, mai goada danu. Vadaeni nega ibounai kara namodia do umui karaia, bona hereva namodia do umui gwauraia.   
\c 3  
\s1 Ai totona do umui guriguri  
\p
\v 1 Aiemai varavara taudia e, aiemai hereva dokona be inai: Ai totona do umui guriguri, vadaeni Lohiabada ena hereva do ia tubu haraga noho. Umui noinoi, taunimanima momo ese mai mataurai danu, Lohiabada ena hereva do idia abia dae, umui ese umui abia dae hegeregerena.  
\v 2 Umui guriguri danu, Dirava ese kara dika bona kara kerere taudia dekena amo ai do ia hamauria. Badina be taunimanima haida sibona be mai edia abidadama Dirava dekenai.   
\p
\v 3 To Lohiabada be momokani. Ia ese umui do ia haginia goada, bona Satani dekena amo umui do ia hamauria.  
\v 4 Ai be Lohiabada ai abidadama henia dainai, ai ese umui danu ai abidadama henia. Ai diba momokani, umui dekenai ai hadibaia hereva be umui karaia noho, bona do umui karaia noho.   
\p
\v 5 Lohiabada ese umui emui lalona do ia hakaudia, vadaeni Dirava ena lalokau, bona Keriso ese ia henia haheauka, do umui diba momokani.   
\s1 Gaukara be gau badana  
\p
\v 6 Aiemai varavara taudia e, Lohiabada Iesu Keriso ena ladana dainai, umui dekenai ai hereva mai goada danu, inai bamona: Mai lahedo danu idia noho, bona aiemai hereva idia kamonai lasi Keristani taudia, idia dekena amo do umui raka siri.  
\v 7 Umui diba danu aiemai kara bamona umui karaia be namo. Umui dekenai ai noho neganai be ai lahedo lasi.  
\v 8 Badina be ai ese tau ta ena aniani ai ania kava lasi. To dina bona hanuaboi ai gaukara mai hekwarahi danu, ai dainai umui ta ese moni do ia halusia kava garina.  
\v 9 Ai be siahu taudia dainai, umui ese aniani ai dekenai umui henia be maoro. To ai ura lasi, badina be ai ura aiemai manau kara bamona do umui karaia.  
\v 10 Ai be umui dekenai ita noho neganai, aiemai hadibaia hereva ta be inai bamona, “Bema tau ta ese gaukara ia karaia lasi neganai, aniani ta umui henia lasi.”   
\p
\v 11 Inai bamona ai hereva, badina ai kamonai umui haida be umui gaukara lasi, to haida edia gau bona edia kara umui herevalaia kava momo sibona.  
\v 12 Lohiabada Iesu Keriso ena ladana dainai, inai bamona idia karaia noho taudia dekenai ai hereva mai goada danu, bona ai sisiba henidia, ai gwau, “Mai manau danu do umui gaukara, umui noho namonamo, bona umui sibona emui aniani do umui davaria.”   
\p
\v 13 Aiemai varavara taudia e, kara namona karaia totona do umui hesiku lasi.  
\v 14 Bema tau ta ese inai revareva, ai torea gauna, ia abia dae lasi neganai, inai tauna be do umui itaia namonamo, vadaeni do umui atoa siri, do ia hemarai totona.  
\v 15 Do umui dagedage henia lasi umui tuari henia tauna bamona, to ia be emui tadina bamona do umui sisiba henia sibona.   
\s1 Paulo ena hereva dokona  
\p
\v 16 Lohiabada, iseda maino ena badina korikori, ese nega ibounai emui mauri ta ta lalonai, lalo namo do ia henia. Lohiabada be umui ibounai dekenai do ia noho.   
\p
\v 17 Inai hanamoa hereva be lau, Paulo, egu imana dekenai lau torea noho. Lauegu revareva ibounai edia dokona kahana dekenai egu ladana lau sainia inai bamona. Inai bamona sibona lau torea.   
\p
\v 18 Iseda Lohiabada Iesu Keriso ena hariharibada be umui ibounai dekenai do ia noho.