\id 2CO 2 CORINTHIANS, Hiri Motu Bible, PNG, 1993 
\h 2 KORINTO 
\toc1 PAULO ENA REVAREVA IHARUANA KORINTO TAUDIA DEKENAI 
\toc2 2 KORINTO 
\mt2 PAULO ENA REVAREVA  
\mt1 IHARUANA KORINTO  
\mt2 TAUDIA DEKENAI  
\c 1  
\p
\v 1 Lau inai Paulo, lau be Keriso Iesu ena aposetolo tauna Dirava ena ura dainai. Lau bona iseda varavara tauna Timoteo ruaosi ese inai revareva ai torea inai, Dirava ena ekalesia Korinto dekenai, bona Akaia tano ibounai lalonai Keristani taudia, umui emui.   
\p
\v 2 Lau ura Dirava iseda Tamana bona Lohiabada Iesu Keriso ese bogahisihisi bona maino umui dekenai do idia henia.   
\s1 Paulo ese Dirava ia hanamoa  
\p
\v 3 Dirava, iseda Lohiabada Iesu Keriso ena Tamana ita hanamoa. Ia be iseda Tamana, bona bogahisihisi bona durua ibounai ia henia Diravana.  
\v 4 Aiemai hisihisi ibounai lalonai ia ese ai ia durua noho. Unai dainai hisihisi idia abia noho taudia be ai ese ai durua diba. Dirava ese ai dekenai ia henia durua, be ai ese ma ai henia noho idia dekenai.  
\v 5 Badina be Keriso danu hisihisi ita abia ena bada hegeregerena, Dirava ena durua ita abia danu ia bada, Keriso dainai.  
\v 6 Bema hisihisi ai davaria neganai, inai be umui do ai durua, bona mauri do umui abia totona. Bona bema Dirava ese ai ia durua neganai, inai be ai ese umui do ai durua totona. Bema metau bona hisihisi lalonai umui gini goada, ai ese ai gini goada hegeregerena, Dirava ese umui do ia durua.  
\v 7 Unai dainai ai daradara lasi, to ai diba momokani aiemai hisihisi hegeregerena umui abia bamona, Dirava dekena amo ai abia durua, be umui danu do umui abia.   
\p
\v 8 Aiemai varavara taudia e, ai ura Asia dekenai ai abia hisihisi toana do umui diba. Metau bona hisihisi ai dekenai idia henia be bada herea. Aiemai goada ia ore, bona ai laloa do ai mase.  
\v 9 Oibe, aiemai laloa be kota biaguna ta ese aiemai mase ia gwauraia vadaeni bamona. To inai ia vara, be do ai diba aiemai goada be ia hegeregere lasi totona. Vadaeni inai bamona ai diba neganai, mase taudia ia hatorea isi Diravana sibona ai abidadama henia.  
\v 10 Bona ia ese mase dika momokani dekena amo ai ia hamauria vadaeni, bona ai do ia hamauria noho. Ai abidadama henia noho danu, vaira neganai ia ese ai do ia hamauria lou.  
\v 11 To gau badana be, umui ese ai do umui durua noho emui guriguri dekena amo. Vadaeni emui guriguri momo be Dirava ese do ia kamonai, bona ia ese ai do ia hanamoa. Unai neganai taunimanima momo ese ai do idia laloa, bona ai dainai Dirava do idia hanamoa bada.   
\s1 Aiemai heagi ena badina  
\p
\v 12 Ai be gau ta totona ai heagi noho, gauna be inai: Mai laloa namo danu ai diba momokani, aiemai kara, tanobada lalonai, bona umui emui vairanai danu, be mai momokani bona mai laloa maoromaoro danu. Tanobada taunimanima edia aonega dekena amo inai kara ai karaia lasi. To Dirava ena hariharibada ena siahu ese ai ia biagua dainai ai karaia.  
\v 13 Badina be aiemai revareva lalonai be hunia hereva ta lasi. To umui duahia diba, bona edia anina ibounai do umui diba namonamo gaudia sibona ai torea noho.  
\v 14 Hari be ai umui diba sisina sibona. To lau daradara lasi, gabeai ai do umui diba momokani. Vadaeni Lohiabada Iesu ena Dina neganai, umui ese ai do umui heagilaia, ai ese umui do ai heagilaia hegeregerena.   
\p
\v 15 Umui emui abidadama lau hamomokania dainai, lauegu palani gunana be umui dekenai do lau mai, umui do lau hanamoa nega rua totona.  
\v 16 Badina be lau laloa Makedonia do lau lao neganai, umui do lau vadivadi henia, bona Makedonia dekena amo do lau giroa mai neganai danu, umui do lau vadivadi henia lou. Vadaeni lauegu lao dalana Iudea dekenai be umui ese lau do umui durua, lau laloa.  
\v 17 Unai bamona lau laloa dainai lau be daradara tauna bamona, a? O sedira lauegu laloa be tanobada tauna ena laloa bamona, lau be “oibe” bona “lasi” nega tamona lau gwauraia, a?  
\v 18 Dirava ia diba lauegu gwauhamata umui dekenai be “oibe” bona “lasi” lasi.  
\v 19 Badina be lau bona Sila bona Timoteo ese Iesu Keriso, Dirava ena Natuna umui dekenai ai harorolaia, be “oibe” bona “lasi” lasi, to ia be “oibe” sibona.  
\v 20 Badina Keriso be Dirava ena gwauhamata ibounai edia “oibe.” Bona inai anina be, Dirava ita hanamoa neganai, “Amen” ita gwauraia, inai be Iesu Keriso dainai.  
\v 21 Dirava ese ai bona umui ia hakapua tamona Keriso lalonai, bona ia ese ita ia haginia goada, daradara ta lasi. Bona Dirava sibona ese ita ia abia siri vadaeni, iena taudia ita lao.  
\v 22 Iena maka danu iseda latanai ia atoa vadaeni, bona iena Lauma Helaga danu iseda kudouna edia lalonai ia atoa vadaeni. Inai bamona Dirava ia karaia dainai, ita diba momokani iena gwauhamata gaudia ibounai be dohore ita abia.   
\s1 Paulo ia lao lasi Korinto dekenai  
\p
\v 23 Dirava be lauegu lalona ia diba, bona ia diba lau hereva momokani inai: Lau be Korinto dekenai lau mai lasi badina korikori be umui lau bogahisihisi henia dainai.  
\v 24 Ai ese umui emui abidadama ai biagua lasi. Ai diba umui emui abidadama lalonai umui gini goada noho. Unai dainai ai be umui danu ita gaukara hebou, emui moale do ai havaraia totona.   
\c 2  
\p
\v 1 Unai dainai inai bamona lau laloa: Lau be umui dekenai do lau mai lou lasi, emui lalohisihisi ma do lau havaraia garina.  
\v 2 Badina bema umui do lau hisihisi henia neganai, daika ese lau do idia hamoalea? Lau hisihisi henia taudia, umui sibona, ani?  
\v 3 Umui emui kara be, lau umui ura hamoalea, unai dainai lau ura lasi umui dekenai lau mai, lalohisihisi do umui davaria garina. Unai lau laloa dainai, unai egu revareva gunana umui dekenai lau torea. Badina be lau diba momokani, bema gau ta totona lau moale neganai, umui danu inai gau totona do umui moale.  
\v 4 Badina be umui dekenai unai revareva lau torea neganai, egu lalona ia hisihisi bona metau danu. Mai tai danu unai revareva lau torea, hisihisi do umui abia totona lasi, to lauegu lalokau badana umui dekenai do umui diba totona.   
\s1 Kerere tauna ena dika umui gwauatao  
\p
\v 5 Unai hisihisi ia havaraia tauna ese lau ia hisihisi henia lasi, to ia ese umui ibounai ia hisihisi henia sisina. “Sisina” lau gwau, badina lau ura lasi unai tau lau samania auka.  
\v 6 Unai tau ena kara dika davana be umui momo ese umui henia, vadaeni ia hegeregere.  
\v 7 Harihari iena dika do umui gwauatao, bona iena lalona do umui hagoadaia be namo, iena lalohisihisi ese iena abidadama do ia haorea garina.  
\v 8 Unai dainai umui lau noia, emui lalokau ia dekenai do umui hedinarai henia lou, vadaeni do ia diba umui lalokau henia momokani.  
\v 9 Unai revareva umui dekenai lau torea, be umui emui kara ena toana do lau diba totona. Badina lau ura diba, egu hadibaia hereva be nega ibounai umui badinaia noho, o lasi.  
\v 10 Umui ese tau ta ena dika umui gwauatao neganai, lau danu ese iena dika do lau gwauatao. Badina be bema tau ta ena dika lau gwauatao umui dainai neganai, iena dika lau gwauatao Keriso ena vairana dekenai,  
\v 11 Satani ese ita dekena amo kwalimu do ia abia garina, badina be iena koikoi ita diba vadaeni.   
\s1 Troa dekenai Paulo ena laloa ia metau  
\p
\v 12 Lau be Troa dekenai lau lao, Sivarai Namona do lau harorolaia totona. Unuseni lau davaria, Lohiabada ese iena haroro gaukara dala namona ia kehoa lauegu.  
\v 13 To egu lalona ia hisihisi bada, badina be egu tadina Tito lau davaria lasi dainai. Unai dainai Troa taudia lau bamahuta henia, vadaeni Makedonia dekenai lau lao.   
\s1 Keriso ena goada dainai aposetolo idia kwalimu  
\p
\v 14 To Dirava lau tanikiu henia, ia ese nega ibounai ai ia hakaua, vadaeni Keriso lalonai ai noho dainai ia ese ai dekenai kwalimu ia henia. Aiemai haroro gaukara dekena amo Dirava ese iena hereva ia hedinaraia, vadaeni taunimanima ibounai be Keriso ena sivarai idia diba. Inai bamona diba be bonana namona bamona gabu ibounai dekenai ia lao noho.  
\v 15 Momokani, ai be Keriso ena bonana namona, Dirava ena vairana dekenai. Inai bonana namona be mauri dala idia raka taudia, bona mase dala idia raka taudia danu idia kamonai noho.  
\v 16 Mase dala idia raka noho taudia dekenai inai bonana be mase ia havaraia gauna. To mauri dala idia raka noho taudia dekenai inai bonana be mauri ia havaraia gauna. Inai gaukara karaia totona daika ia hegeregere?  
\v 17 Umui diba vadaeni, ai be haida bamona lasi, Dirava ena hereva ai hoihoilaia lasi. Lasi momokani. Ai be lalona momokani taudia bona inai dagi Dirava dekena amo ai abia. Ai be Keriso ena hesiai taudia dainai, Dirava ena vairana dekenai ai hereva noho, mai laloa maoromaoro danu.   
\c 3  
\s1 Taravatu matamata ena hesiai taudia  
\p
\v 1 Ai sibona aiemai ladana ai hanamoa lou gwauraia, a? O sedira ai be haida bamona, ai ura umui dekenai revareva ai torea, umui emui hanamoa do ai abia totona. O sedira, haida ese ai idia hanamoa ena revareva umui dekenai do ai henia, a? Lasi momokani.  
\v 2 Aiemai ladana ia hanamoa ena revareva be umui sibona. Bona inai revareva ena toretore be aiemai kudouna dekenai ia torea. Ibounai ese inai revareva ena anina idia diba, bona idia duahia diba danu.  
\v 3 Taunimanima ibounai idia itaia diba, umui be revareva ta Keriso dekena amo. Aiemai gaukara dekena amo, Keriso ese inai revareva ia torea. Ia be ink dekenai ia torea lasi, to Mauri Diravana ena Lauma ese ia torea. Nadi latanai ia torea lasi, to taunimanima edia kudouna dekenai ia torea.   
\p
\v 4 Inai bamona ai hereva diba, badina be Dirava ai abidadama henia momokani, Keriso ese ai ia hakaua noho dainai.  
\v 5 Ai sibona inai gaukara ai karaia be ai hegeregere lasi. Unai dainai ai sibona be aonega taudia ai gwauraia diba lasi. Dirava sibona ese aonega ai dekenai ia henia, vadaeni inai gaukara ai karaia diba.  
\v 6 Ia sibona ese ai dekenai diba ia henia, vadaeni, taravatu matamata do ai gwauraia hedinarai. Inai taravatu matamata be buka dekenai torea gauna lasi, to ia be Lauma Helaga ese ia hadibaia gauna. Badina be taravatu ena toretore be mase ia havaraia, to Lauma Helaga ese mauri ia havaraia.   
\p
\v 7 Taravatu be Dirava ese nadi palakana dekenai ia torea, bona unai ia henia neganai Dirava ena hairai diarina ia hedinarai. Inai Taravatu ena kara taunimanima edia latanai be mase ia havaraia. To Taravatu ia vara neganai, Dirava ena hairai diarina danu ia vara nega tamona. Unai neganai Mose ena vairana ia diaridiari bada herea dainai, Israela taudia ese ia idia itaia noho hegeregere lasi. To unai diaridiari ia noho daudau lasi.  
\v 8 Taravatu ena diaridiari be unai bamona neganai, Lauma ena diaridiari ese do ia hereaia, ani?  
\v 9 Badina be bema unai taravatu dala gunana, taunimanima edia mase ia gwauraia dalana be mai ena diaridiari, Dirava ena vairanai ita maoromaoro dalana ena diaridiari be namo bada herea, ani?  
\v 10 Oibe, inai taravatu dala gunana be guna neganai mai ena diaridiari, to harihari iena diaridiari be lasi bamona. Badina be inai: Inai dala matamata ena diaridiari be namo bada herea momokani!  
\v 11 Badina be, bema unai dala gunana, ia noho daudau lasi gauna, be mai ena diaridiari neganai, inai dala matamata, do ia noho hanaihanai gauna, ena diaridiari be namo bada herea momokani, ani?   
\p
\v 12 Ai diba momokani inai diaridiari matamata be ia bada lao noho, bona ia noho hanaihanai dainai, ai be gari lasi, ai hereva goada noho.  
\v 13 Ai be Mose ia karaia bamona ai karaia lasi. Ia ese iena vairana be muko dekenai ia koua, Israela taudia ese do ia doko diaridiari idia itaia garina.  
\v 14 To edia laloa be idia koua noho. Unai dainai Taravatu gunana idia duahia negadia ibounai, inai muko be ia do noho, ia mai bona hari. Idia kokia diba lasi. Badina be Keriso tamona sibona dekena amo Dirava ese unai muko taunimanima dekena amo ia kokia diba.  
\v 15 Oibe, Mose ena Taravatu idia duahia negadia ibounai, muko ese edia lalona ia koua noho, ia mai bona harihari.  
\v 16 To tau ta bema Lohiabada dekenai iena lalona ia giroa neganai, Dirava ese unai muko do ia kokia.  
\v 17 Lohiabada be Lauma Helaga. Bona bema Lohiabada ena Lauma be tau ta dekenai ia noho neganai, gau ta ese unai tau ia koua diba lasi. Lasi momokani, badina ia dekenai ura kwalimu ia noho.  
\v 18 Ita Keristani taudia ibounai, iseda vairana be muko ese idia koua lasi. Unai dainai Lohiabada ena diaridiari be ita ese ita hedinaraia, hevarivari bamona, taunimanima ibounai dekenai. Nega ibounai inai diaridiari ita dekenai ia bada lao noho, bona ia ese ita ia senisia noho, vadaeni iseda toana be, Lohiabada ena toana bamona do ita lao. Lohiabada be Lauma, bona ia ese inai kara do ia karaia.   
\c 4  
\s1 Sivarai Namona be hunia gauna lasi  
\p
\v 1 Dirava ena bogahisihisi dainai inai haroro gaukara ai dekenai ia henia, unai dainai ai be hesiku lasi.  
\v 2 Ai be hemarai karadia, taunimanima idia hunia gaudia, ai negea vadaeni, bona koikoi karadia be ai karaia lasi. Dirava ena hereva danu ai senisia lasi. Ai be hereva momokani ai gwauraia hedinarai noho, Dirava ena vairana dekenai. Unai dekena amo taunimanima idia diba, ai be mai momokani danu Dirava ena gaukara ai karaia noho.  
\v 3 Bema ai ese ai harorolaia Sivarai Namona be hunia gauna, unai be mase dala idia raka noho taudia sibona dekenai ia be hunia gauna.  
\v 4 Oibe, idia abidadama henia diba lasi, badina be inai tanobada ena dirava ese edia lalona ia koua, dibura dekena amo. Vadaeni Keriso ena hairaina bona iena Sivarai Namona ena diari idia itaia diba lasi. Keriso be Dirava ena toana momokani Tauna.  
\v 5 Badina be aiemai haroro ena badina be ai sibona lasi. Aiemai haroro ena badina be Keriso Iesu, ia be Lohiabada. Ai ese Iesu ena hereva ai badinaia noho, unai dainai ai be umui emui hesiai taudia.  
\v 6 Guna neganai Dirava ia hereva, ia gwau, “Dibura dekena amo diari do ia hedinarai.” Unai Dirava danu ese aiemai lalona dekenai iena diari ia atoa, ai do ia hadiaria totona. Inai diari be inai bamona: Ai diba momokani Dirava ena hairai diarina be Keriso ena vairana dekenai ia hedinarai noho.   
\p
\v 7 To ai, inai diari ai abia vadaeni taudia, be hodu, manoka gaudia sibona bamona do ai noho. Inai anina be taunimanima ibounai do idia diba inai siahu badana be Dirava sibona dekena amo, ai dekena amo ia mai lasi.  
\v 8 Kahana ibounai dekena amo, hisihisi bona metau ai dekenai idia henia noho, to ai idia hadikaia momokani lasi. Nega haida ai laloa daradara, to gaukara dekena amo ai doko lasi.  
\v 9 Taunimanima momo ese ai idia dagedage henia, to Dirava ese ai ia rakatania lasi. Ai idia botaia, ai moru, to ai mase lasi.  
\v 10 Nega ibounai aiemai tauanina dekenai Iesu ena mase ai abia loaloa noho, Iesu ena mauri danu aiemai tauanina dekenai taunimanima do idia itaia totona.  
\v 11 Aiemai mauri dinadia ibounai, Iesu ena gaukara ai karaia noho dainai, haida ese ai idia alaia gwauraia. Inai ai karaia, be Iesu ena mauri aiemai tauanina dekenai taunimanima do idia itaia totona.  
\v 12 Unai kara dainai mase be aiemai lalona dekenai ia gaukara noho, to umui emui lalona dekenai mauri ia gaukara noho.   
\p
\v 13 Buka Helaga ia torea, ia gwau: “Lau be Dirava lau abidadama henia, vadaeni hereva lau gwauraia.” Aiemai abidadama be unai ia torea hereva bamona, ai danu be ai abidadama noho, unai dainai ai danu ai hereva noho.  
\v 14 Ai diba vadaeni Lohiabada Iesu ia hatorea isi Dirava ese ai danu do ia hatorea isi, Iesu danu. Vadaeni unai neganai, ai bona umui be Dirava ena vairana dekenai do ita gini.  
\v 15 Inai kara ibounai be umui durua totona idia vara noho, bona Dirava ena hariharibada be taunimanima momo herea ese do idia davaria totona. Unai dekena amo unai taunimanima momo herea ese Dirava do idia hanamoa bada herea momokani.   
\s1 Abidadama dekena amo ita mauri noho  
\p
\v 16 Unai dainai ai be hesiku diba lasi. Aiemai tauanina be idia bodaga lao noho, to aiemai lauma be dina ibounai idia matamata lao noho.  
\v 17 Badina be hari ai abia noho hisihisi be metau lasi gaudia, bona do idia noho nega daudau lasi. Oibe, inai hisihisi maragi idia ore murinai, Dirava ese ai do ia hanamoa bada herea momokani guba dekenai, ela bona hanaihanai.  
\v 18 Unai dainai matana dekenai ita itaia gaudia be do ita laloa lasi, to matana dekenai ita itaia lasi gaudia do ita laloa. Matana dekenai ita itaia gaudia be idia noho nega daudau lasi, to matana dekenai ita itaia lasi gaudia be nega hanaihanai do idia noho.   
\c 5  
\s1 Tanobada gaudia bona guba gaudia  
\p
\v 1 Ita be inai bamona ita diba: Inai tanobada dekenai ita noho palai ruma, iseda tauanina, bema ia dika neganai, Dirava ese iena ruma ta guba dekenai be ita dekenai do ia henia. Inai ruma be taunimanima ese idia karaia lasi, to ia be noho hanaihanai gauna.  
\v 2 Momokani, iniseni ia noho ruma dekenai ita noho neganai be ita tai noho, ita ura bada iseda guba ruma dekenai ita noho.  
\v 3 Vadaeni guba ruma dekenai ita noho neganai, ita be mai iseda guba tauanina.  
\v 4 Inai tanobada palai ruma dekenai ita noho neganai, iseda maduna metau dainai ita tai noho. Ita ura momokani lasi iseda tanobada tauanina ita kokia, to ita ura iseda guba tauanina do ita atoa, vadaeni mauri ese mase ena gabu do ia abia.   
\s1 Mase be gari gauna lasi, badina Dirava danu do ita noho  
\p
\v 5 Iseda mauri dekenai inai senisi do ia vara totona, Dirava ese iseda dala ia karaia hegaegae vadaeni. Bona ia ese iena Lauma Helaga ita dekenai ia henia vadaeni, momokani ena toana bamona. Inai bamona karaia ia karaia dainai, ita diba momokani iena gwauhamata gaudia ibounai dohore ita abia.   
\p
\v 6 Unai dainai iseda lalona bona iseda kudouna idia goada noho nega ibounai. Io, dahaka dahaka ia vara, ita be gari ta lasi, badina ita diba Lohiabada bona iena guba dekenai ita noho diba lasi, bema inai tauanina dekenai ita do noho neganai.  
\v 7 Iseda abidadama dekena amo ita diba inai gaudia be momokani. Badina iseda mauri be abidadama kara dekena amo, itaia kara dekena amo lasi.  
\v 8 Io, iseda lalona bona kudouna idia goada noho, bona ita ura bada iseda tanobada tauanina ita rakatania, vadaeni Lohiabada dekenai do ita noho.  
\v 9 To iseda ura badana momokani be inai: Dirava ia ura henia karadia sibona do ita karaia, do ia moale totona. Inai bamona do ita karaia, iniseni ita noho neganai, o unuseni, guba dekenai ita noho neganai.  
\v 10 Badina ita ibounai be Keriso ena Kota gabuna dekenai dohore ita gini. Vadaeni iseda tauanina dekenai ita karaia karadia edia davana do ita abia, namo o dika.   
\s1 Keriso dainai Dirava danu ita turana karaia  
\p
\v 11 Vadaeni, Lohiabada ai gari henia dainai, ai ese taunimanima ai sisiba henia goada, do idia abidadama henia totona. Aiemai laloa ibounai be Dirava ia diba, ia diba aiemai laloa be maoromaoro momokani. Lau ura bada umui danu umui diba aiemai laloa be maoromaoro momokani.  
\v 12 Inai hereva dekenai ai ura aiemai ladana ai hanamoa lou gwauraia, a? Lasi, to badina korikori be, ai ura umui ese ai do umui heagilaia diba, taunimanima haida edia vairanai. Badina be taunimanima haida ese tau ta ena toana idia laloa momo, to iena lalona bona kara idia laloa lasi. Bona ai ura inai bamona laloa kerere taudia do umui haere henia diba.  
\v 13 Bema ai be kava, unai be Dirava ena gaukara ai karaia dainai. Bema ai laloa maoromaoro, unai be umui durua totona.  
\v 14 Keriso ena lalokau ese ai ia biagua noho, badina be hari ai diba momokani Tau tamona ese taunimanima ibounai dainai ia mase. Inai anina be ita ibounai Keriso danu ita mase hebou vadaeni.  
\v 15 Oibe, Keriso ese taunimanima ibounai dainai ia mase. Unai dainai ia dekena amo mauri ita davaria taudia, be ita sibona iseda mauri bona iseda ura do ita laloa lasi, to ita dainai ia mase, ma ia toreisi lou tauna, ena mauri bona iena ura gaudia do ita laloa bona karaia.   
\p
\v 16 Unai dainai, hari ia lao, tau ta, iena toana sibona dekena amo do ita laloa lasi. Guna be Keriso ita laloa iena tauanina toana dekena amo, to harihari be unai dala dekena amo do ita laloa lasi.  
\v 17 Bema tau ta Keriso danu ia hakapua tamona neganai, unai tau be tau matamatana. Iena kara gunadia be idia ore, mauri matamata ia abia vadaeni inai.  
\v 18 Inai kara ibounai be Dirava ese ia karaia. Guna ita be Dirava danu ita turana lasi, to Keriso ena kara dekena amo, Dirava ese iena turana ita ia halaoa vadaeni. Bona ia ese gaukara ta ai dekenai ia henia, gauna inai: Taunimanima do ai veria, do ai haroro henia, ela bona idia danu Dirava ena turana idia lao.  
\v 19 Aiemai haroro hereva be inai: Dirava be Keriso lalonai ia noho, bona ia ese Keriso dekena amo, tanobada taudia danu ia turana karaia noho. Keriso lalonai, Dirava ese edia kara dika ia laloatao lasi. Inai bamona haroro gaukara Dirava ese ai dekenai ia henia vadaeni, taunimanima be ia danu do idia turana karaia totona.   
\p
\v 20 Unai dainai ai be Keriso ena hereva gwauraia hedinarai taudia, Dirava ese aiemai uduna dekena amo umui dekenai ia noia noho. Vadaeni Keriso ena ladana dainai umui ai noia, Dirava do umui dagedage henia lou lasi, to ia danu do umui turana karaia.  
\v 21 Keriso be kara dika lasi momokani, to Dirava ese dika ia karaia Tauna dekenai ia halaoa vadaeni ita dainai. Vadaeni bema Keriso lalonai ita noho neganai, Dirava ena kara maoromaoro do ita abia.   
\c 6  
\p
\v 1 Ai be Dirava danu ai gaukara hebou dainai, umui ai noia goada inai bamona, “Umui ese Dirava ena hariharibada umui abia vadaeni, be umui negea kava lasi.”  
\v 2 Badina Dirava be inai bamona ia hereva, ia gwau:  
\q1 “Lauegu hariharibada henia ena dina ia ginidae neganai,  
\q1 umui emui taitai lau kamonai.  
\q1 Lau ese mauri umui do lau henia dinana ia ginidae neganai,  
\q1 umui dekenai durua do lau henia.”  
\m Umui kamonai! Dirava ena hariharibada ita abia ena nega namona be harihari! Hari dina hamauria ita abia dae be namo!   
\p
\v 3 Ai ura lasi taunimanima idia gwau aiemai gaukara ia dika. Unai dainai ai ese taunimanima hadikaia kara ta ai karaia lasi, lasi momokani!  
\v 4 To aiemai kara ibounai dekena amo ai hedinaraia ai be Dirava ena hesiai taudia. Inai bamona kara ai karaia: Metau ibounai neganai ai haheauka, hisihisi neganai ai gini goada, hekwarahi bada neganai ai gaukara noho.  
\v 5 Ai idia botaia vadaeni, dibura ruma lalonai ai idia atoa, taunimanima momo ese ai idia dagedage henia, gaukara bada ese kahirakahira ai ia hamasea, nega momo ai be mahuta dala lasi, nega momo ai hitolo.  
\v 6 Ai be laloa goevagoeva karadia dekena amo, aonega karadia dekena amo, haheauka dekena amo, bogahisihisi karadia dekena amo, ai hedinaraia ai be Dirava ena hesiai taudia. Lauma Helaga ese ai ia hagoadaia noho, bona lalokau momokani ai hedinaraia noho danu.  
\v 7 Ai be hereva momokani ai harorolaia noho. Aiemai gaukara be Dirava ena siahu dekena amo ai karaia noho. Aiemai kara maoromaoro be tuari gauna emai imana ruaosi dekenai bamona, vadaeni inai bamona ai tuari auka noho, Dirava ena gaukara karaia totona.  
\v 8 Haida ese ai idia hanamoa, haida ese ai idia hahemaraia. Haida idia gwau aiemai kara be dika, haida idia gwau ai be kara namo taudia. Haida idia gwau ai be koikoi taudia, to hereva momokani ai gwauraia.  
\v 9 Idia gwau tau ta ia diba lasi ai, to taunimanima momo ai idia diba. Idia laloa ai mase vadaeni, to lasi, ai mauri noho. Ai idia dadabaia, to ai idia alaia lasi.  
\v 10 Aiemai lalona idia hisihisi, to ai laloa lasi, nega ibounai ai moale noho. Ai be ogogami taudia, to ai laloa lasi, taunimanima momo dekenai Dirava ena kohu momo ai henia. Ai be gau ta lasi taudia bamona, to ai laloa lasi, badina gau ibounai be aiemai.   
\p
\v 11 Lauegu turana lalokau taudia Korinto dekenai! Hereva momo ai gwauraia hedinarai umui dekenai, ai hunia lasi. Aiemai kudouna ai kehoa vadaeni, umui ai lalokau henia dainai.  
\v 12 Aiemai lalokau umui dekenai be ia bada, to emui lalokau ai dekenai be ia maragi.  
\v 13 Umui dekenai lau hereva henia, tamana ese iena natuna ia hereva henidia bamona. Lau gwau, aiemai lalokau davana ai dekenai do umui henia, emui lalokau ai dekenai mani do umui habadaia!   
\s1 Dirava diba lasi taudia edia dala dekenai do ita raka lasi  
\p
\v 14 Dirava idia abidadama henia lasi taudia danu do umui hakapua tamona lasi. Badina be edena bamona kara maoromaoro bona kara kerere idia turana diba? Edena bamona diari bona dibura idia noho hebou diba?  
\v 15 Keriso bona Satani be edena bamona idia laloa tamona diba? Abidadama tauna bona abidadama lasi tauna ruaosi be idia hegeregere diba, a?  
\v 16 Dirava ena dubu helaga bona kaivakuku be edena bamona idia hakapua tamona diba? Badina ita be Mauri Dirava ena dubu helaga! Dirava ese inai bamona ia hereva, ia gwau:  
\q1 “Lau be lauegu bese taudia danu do lau noho,  
\q1 bona idia edia huanai do lau raka.  
\q1 Bona lau be edia Dirava do lau lao,  
\q1 bona idia be lauegu bese taudia do lau halaodia.”   
\m
\v 17 Unai dainai Lohiabada ma ia hereva, ia gwau:  
\q1 “Umui ese idia do umui rakatania,  
\q1 bona idia dekena amo do umui parara.  
\q1 Miro gaudia ibounai dekena amo do umui raka siri,  
\q1 vadaeni umui do lau abia dae.   
\q1
\v 18 Lau be umui emui Tamana do lau noho,  
\q1 bona lauegu natuna, tau bona hahine, umui do lau halaoa.  
\q1 Siahu Ibounai Lohiabada ese inai bamona ia hereva.”   
\c 7  
\p
\v 1 Lauegu turana lalokau e, inai gwauhamata hereva ibounai be ita totona Dirava ese ia gwauraia. Unai dainai tauanina bona lauma hamiroa karadia ibounai do ita hadokoa, bona iseda mauri ita hagoevaia be namo. Vadaeni Dirava ena vairanai do ita noho namonamo, mai goeva bona mai gari danu.   
\s1 Paulo ia moale, Korinto taudia edia lalona idia giroa dainai  
\p
\v 2 Umui ese ai umui lalokau henia be namo. Ai be tau ta ai hadikaia lasi, ta ai hakererea lasi, ta ena kohu ai abia koikoi lasi.  
\v 3 Umui lau gwau henia lasi. Guna lau hereva bamona, umui ai lalokau henia, vadaeni ita mauri neganai do ita noho hebou, o ita mase neganai do ita noho hebou.  
\v 4 Lau diba momokani umui gini goada dainai, umui totona lau heagi noho. Bona unai dainai, aiemai hisihisi ibounai lalonai lau goada noho. Lauegu moale be bada momokani.   
\p
\v 5 Makedonia dekenai ai ginidae neganai, laga-ani ai abia diba lasi. Hekwarahi ese ai ia hagegea, haida ese ai idia heatu henia gwauraia, bona gari ese ai ia abia.  
\v 6 To Dirava, hisihisi idia abia noho taudia ia durua Diravana ese ai ia durua, badina be ai dekenai Tito ia siaia mai.  
\v 7 Oibe, Tito ia ginidae dainai ai moale. To inai sibona lasi dainai, ai moale bada ena badina ta danu be, Tito ia gwau umui ese ia umui abia dae namo herea. Bona Tito ese ai ia hamaoroa, umui ura bada lau do umui itaia. Lau dainai umui tai, bona lau umui lalokau noho, bona lau umui badinaia noho, inai hereva ia gwauraia neganai, lauegu moale be ia bada momokani.   
\p
\v 8 Lauegu revareva gunana dainai umui emui lalona idia hisihisi, vadaeni lau daradara. To harihari lau daradara lasi, badina be lau diba unai revareva ese nega sisina sibona umui ia hisihisi henia.  
\v 9 Harihari lau moale noho, emui lalona idia hisihisi dainai lasi, to umui emui lalohisihisi ese lalona giroa ia havaraia dainai. Badina be emui lalohisihisi be Dirava dekena amo, unai dainai ai dekena amo dika umui davaria lasi.  
\v 10 Badina be Dirava dekena amo ia mai lalohisihisi ese lalona giroa ia havaraia, bona lalona giroa ese hamauria ia havaraia. Io, lalona giroa ia havaraia ena lalohisihisi be gau namona, ani? To tanobada dekena amo ia mai lalohisihisi ese mase ia havaraia.  
\v 11 Mani umui laloa: Inai Dirava dekena amo lalohisihisi be dahaka namo umui dekenai ia havaraia? Umui laloa namonamo, bona umui emui lalona umui hamaoromaoroa, ani? Umui laloa hekwarahi bona umui gari, ani? Lau umui laloa, bona lau umui ura henia, ani? Bona emui orea taudia edia dika davana umui henia, ani? Umui emui kara ibounai dekena amo, umui hedinaraia momokani, unai kerere be umui ese umui hamaoromaoroa vadaeni.   
\p
\v 12 Unai revareva gunana umui dekenai lau torea, be unai kerere tauna dainai lasi, bona ia hakererea tauna dainai lasi. Lau torea ena badina korikori be, emui lalokau ai dekenai, be Dirava ena vairanai, bona umui dekenai, do lau hedinaraia totona.  
\v 13 Umui emui kara ese aiemai lalona ia hagoadaia vadaeni.  
\p Lalona goada sibona ai abia lasi, to moale bada ai davaria danu, Tito ena moale dainai. Badina be umui ese Tito ena lalona umui hamoalea bona hanamoa.  
\v 14 Oibe, guna Tito ena vairanai umui emui kara lau heagilaia, bona umui ese emui kara dekena amo lau umui hahemaraia lasi. Aiemai hereva ibounai umui dekenai be momokani vadaeni, bona Tito dekenai emui kara ai heagilaia hereva danu be momokani vadaeni.  
\v 15 Tito ese umui ia lalokau henia bada, bona iena lalokau ia bada lao noho. Badina be ia laloatao noho, umui ese iena hereva umui kamonai henia momokani. Bona umui ese ia umui abia dae, mai emui gari bona mataurai danu.  
\v 16 Lau moale bada noho, badina lau diba momokani, lau daradara sisina lasi, umui be gau ibounai umui karaia maoromaoro noho.   
\c 8  
\s1 Keristani taudia ese Iudea Keristani taudia idia durua  
\p
\v 1 Lauegu varavara taudia e, ai ura Dirava ese iena hariharibada ia henia Makedonia ekalesia oreadia dekenai, ena sivarai do umui diba.  
\v 2 Hisihisi bada idia davaria gaudia ese edia haheauka idia tohoa, to edia moale be ia bada herea noho. Momokani edia ogogami be ia bada, to edia durua idia henia bada herea.  
\v 3 Lau gwauraia hedinarai momokani, idia edia goada hegeregerena idia henia, ma edia goada ia hanaia gauna danu.  
\v 4 Bona idia sibona edia ura dainai, ai dekenai idia noinoi, edia moni haida do ai abia lao, Dirava ena taudia Iudea dekenai durua totona.  
\v 5 Guna ai laloa bona ai hereva inai bamona: “Makedonia Keristani taudia ese moni sisina do idia henia.” To inai bamona sibona idia karaia lasi, lasi momokani. Edia kara ginigunana be idia sibona edia kudouna Lohiabada dekenai idia henia. Unai murinai idia sibona ai dekenai idia henia, Dirava ena ura hegeregerena.  
\v 6 Unai dainai Tito ai noia, unai harihari gaudia moni gogoa gaukara do ia karaia haorea. Badina guna ia ese unai gaukara ia hamatamaia.  
\v 7 Umui Korinto taudia be emui dala ibounai dekenai kara namodia momokani umui karaia noho. Emui abidadama, bona hereva, bona diba, bona haheauka, bona lalokau be mai sivarai danu. Lau ura inai harihari gaudia henia kara danu dekena amo umui be mai sivaraina.   
\p
\v 8 Lau ura lasi umui lau oda henia. To haida edia lalokau dekena amo harihari gaudia idia mailaia sivaraina umui dekenai lau hadibaia. Unai dekena amo umui emui lalokau do lau tohoa, ia momokani o lasi.  
\v 9 Badina be iseda Lohiabada Iesu Keriso ena hariharibada umui diba vadaeni. Ia be kohu momo tauna, to umui durua totona ogogami tauna bamona ia lao, iena ogogami dekena amo umui ese kohu momo do umui abia totona.   
\p
\v 10 Lauegu laloa be inai bamona: Inai durua gaukara, lagani gunana umui hamatamaia gaukara, umui karaia haorea be namo. Umui be inai gaukara hamatamaia taudia ginigunadia,bona umui ura bada do umui karaia.  
\v 11 Vadaeni harihari umui karaia haorea be namo. Inai gaukara umui hamatamaia neganai, mai laloa haraga danu umui karaia. Vadaeni harihari mai laloa haraga danu umui karaia haorea be namo. Emui moni ena bada hegeregerena do umui henia.  
\v 12 Bema tau ta ia ura dikadika harihari gauna do ia henia, Dirava ese inai kara do ia ura henia. Dirava ia diba unai tau ena kohu be hida, bona ia laloa karaia, unai tau ena harihari gauna be iena kohu hegeregerena o lasi. Bema tau ta madi be kohu lasi neganai, Dirava ese unai tau ena henia kara do ia laloa momo lasi.   
\p
\v 13 Lau ura lasi umui be hekwarahi bada do umui abia, to idia dekenai umui henia taudia be do idia laga-ani kava sibona.  
\v 14 Lasi, to umui ibounai hegeregere umui noho be namo. Harihari umui be mai emui gau, to idia be ogogami, unai dainai idia umui durua be namo. Badina be sedira kerukeru vanegai umui be ogogami, vadaeni unai neganai idia ese umui do idia durua. Inai dala dekenai ibounai ta ta be hegeregere do idia noho.  
\v 15 Buka Helaga lalonai ia torea bamona, ia gwau:  
\q1 “Mana aniani ia haboua bada tauna ena aniani,  
\q1 be bada lasi ia noho,  
\q1 to sisina ia haboua tauna ena aniani be hegeregere.”   
\s1 Tito mai ena bamona taudia Korinto do idia lao  
\p
\v 16 Dirava lau hanamoa, badina be ia ese Tito ena kudouna dekenai ia gaukara, vadaeni Tito ena laloa umui dekenai be lauegu laloa hegeregerena. Ia danu ese umui ia lalokau henia.  
\v 17 Vadaeni aiemai noinoi ia abia dae, bona sibona ena ura dainai umui dekenai ia lao. Ia ura bada umui do ia durua.  
\v 18 Iseda varavara tauna ta ia danu umui dekenai do ai siaia. Ia be ekalesia orea ibounai ese iena kara namona idia herevalaia. Sivarai Namona ia harorolaia goadagoada danu.  
\v 19 Unai sibona lasi, to ekalesia oreadia ese ia idia abia hidi vadaeni, ai danu do ia loaloa hebou, inai harihari gaudia gaukara durua totona. Ai ese inai gaukara ai karaia Lohiabada ena ladana hanamoa bada totona, bona aiemai durua bona lalokau do ai hedinaraia totona.   
\p
\v 20 Badina be ai ura lasi tau ta ese ai do ia samania, do ia gwau inai harihari gaudia gaukara ai karaia namonamo lasi. Unai dainai ai ura inai tau ese ai do ia bamoa.  
\v 21 Aiemai ura tamona be do ai gaukara maoromaoro, Dirava ena vairanai bona taunimanima edia vairanai danu.   
\p
\v 22 Ma iseda varavara ta idia ruaosi danu umui dekenai ai siaia inai. Iena goada be nega momo ai tohoa vadaeni. Bona harihari ia ura umui do ia durua, mai ena goada ibounai, badina iena abidadama umui dekenai be ia bada dainai.  
\v 23 Ma Tito lau gwauraia, ia be lau bamona tauna ta, umui totona ai ruaosi ai gaukara hebou. Ma unai iseda varavara taudia ruaosi lau gwauraia, idia be ekalesia ese idia abia hidi taudia, bona Keriso ena ladana idia hanamoa noho taudia.  
\v 24 Unai dainai, emui lalokau idia dekenai do umui hedinaraia, bona kara namodia idia dekenai mani do umui karaia. Vadaeni ekalesia orea ibounai be emui kara namodia do idia diba, bona do idia diba danu umui ai heagilaia kava lasi.   
\c 9  
\s1 Keristani taudia ibounai ta ta dekenai durua idia henia  
\p
\v 1 Umui diba vadaeni ai ese moni ai haboua noho, Dirava ena taudia Iudea dekenai durua totona. Unai dainai inai gau totona hereva momo do lau torea lasi.  
\v 2 Lau diba emui kara, umui ura bada idia do umui durua, bona lau ese Makedonia taudia edia vairanai umui lau heagilaia. Lau gwau, “Akaia varavara taudia be guna lagani ia mai bona harihari edia durua henia totona idia hegaegae vadaeni.” Emui goada sivaraina idia kamonai, vadaeni Makedonia taudia momo ese idia ura durua henia danu.  
\v 3 To inai Keristani varavara taudia umui dekenai lau siaia noho, umui emui kara lau heagilaia be hereva kava garina. Inai anina be, lau ura umui emui durua moni do umui abia hegaegae, idia lau hamaoroa bamona.  
\v 4 To bema Makedonia taudia haida ese lau do idia bamoa, bona bema ai davaria umui be hegaegae lasi neganai, aiemai hemarai do ia bada herea, ani? Umui danu do umui hemarai, umui ai heagilaia kava dainai.  
\v 5 Unai dainai lau laloa iseda varavara taudia lau noia be namo, umui dekenai do idia ginidae guna. Vadaeni umui emui gwauhamata harihari gauna do idia haboua hegaegae. Bona lau ginidae neganai moni do ia noho hegaegae, bona inai kara dekena amo do umui hedinaraia, lalokau dainai umui henia, bona lauegu oda dainai lasi.   
\p
\v 6 Inai hereva mani do umui laloa namonamo: Uhe momo lasi ia hadoa tauna be anina momo lasi do ia geia, to uhe momo do ia hadoa tauna be anina momo do ia geia.  
\v 7 Umui ta ta, sibona emui laloa, emui laloa hegeregerena do umui henia, mai maumau danu henia lasi, bona oda dainai lasi. Badina be mai moale danu ia henia tauna be Dirava ese ia lalokau henia noho.  
\v 8 Dirava be mai ena siahu emui kohu do ia habadaia, vadaeni emui ura gaudia, ma gau haida, ia dekena amo do umui abia. Unai dainai nega ibounai gau momo umui abia dainai, durua kara namodia do umui karaia diba.  
\v 9 Buka Helaga lalonai ia torea hegeregerena, ia gwau:  
\q1 “Ogogami taudia dekenai ia henia badabada tauna,  
\q1 be iena bogahisihisi kara do ia noho hanaihanai.”   
\p
\v 10 Dirava ese taunimanima dekenai uhe ia henia, do idia hadoa totona, bona aniani ia henia, do idia ania totona. Ia ese uhe umui dekenai do ia henia, bona do ia hatubua bada. Bona ia ese emui bogahisihisi kara namodia dekena amo huahua momo do ia havaraia.  
\v 11 Oibe, Dirava ese nega ibounai emui kohu do ia habadaia, vadaeni bogahisihisi kara momo do umui karaia diba. Unai dekena amo taunimanima momo ese Dirava do idia hanamoa, umui emui harihari gaudia dainai, ai ese idia dekenai ai abia lao gaudia be unai.  
\v 12 Badina be emui harihari gaudia ese Dirava ena taudia idia durua bada, idia dekenai hegeregere lasi gaudia ibounai idia davaria vadaeni. To inai sibona lasi, emui harihari gaudia ese Dirava hanamoa henia kara ia habadaia noho danu.  
\v 13 Inai umui ese umui karaia durua gaukara ese emui abidadama kara ia hedinaraia. Iseda Keristani varavara taudia ibounai do idia diba umui ese Dirava ena hereva umui badinaia, bona Keriso ena Sivarai Namona umui gwauraia hedinarai. Bona emui harihari gaudia idia dekenai bona haida dekenai danu idia itaia neganai, Dirava do idia hanamoa bada.  
\v 14 Idia ese umui do idia lalokau henia, bona Dirava do idia noia, ia ese umui do ia hanamoa. Badina korikori be, Dirava ena hariharibada be umui dekenai ia noho momokani dainai.  
\v 15 Namona be Dirava ita hanamoa bada, iena hariharibada namo herea momokani dainai. Inai hariharibada ia bada herea dainai, iena anina be, tau ta ia gwauraia namonamo diba lasi.   
\c 10  
\s1 Paulo dekenai haida idia maumau  
\p
\v 1 Lau Paulo lau ura Keriso ena kara do umui laloa. Keriso ena manau bona iena manada dainai umui dekenai noinoi ta do lau gwauraia. Umui haida idia hereva, idia gwau, “Paulo be ita dekenai neganai, ia be mai manau bona mai manoka danu, to daudau ia noho neganai ai ia gwau henia.”  
\v 2 Io, lauegu noinoi be inai: Lau be umui dekenai do lau mai neganai, do umui noho namonamo. Lau ura lasi umui do lau gwau henia. To lau laloa haida idia gwau ai be tanobada taudia edia kara sibona ai karaia. Unai bamona idia gwau taudia do lau gwau henia.  
\v 3 Momokani ai be tanobada dekenai ai noho, to aiemai tuari be tanobada taudia edia tuari bamona lasi.  
\v 4 Badina be aiemai tuari gaudia be tanobada ena tuari gaudia bamona lasi. Lasi, to Dirava dekena amo ia mai siahuna ai ese ai gaukaralaia, ia ese tanobada ena siahu ia haorea diba.  
\v 5 Hepapahuahu hereva koikoi ai koua noho. Bona Dirava ena diari idia tahua taudia edia dala koua gwauraia taudia danu ai koua noho. Ma inai danu, ai ese taunimanima edia laloa ai guia noho, Keriso do idia kamonai henia totona.  
\v 6 Ai be ai noho hegaegae bona ai naria noho. Vadaeni bema ai itaia emui kamonai ai dekenai be momokani neganai, ai ese kamonai lasi taudia ibounai edia kerere davana do ai henia.   
\p
\v 7 Umui be tau ena toana sibona umui laloa, ani? Umui ta ia laloa ia be Keriso ena? Namona be ia laloa lou, bona do ia diba, ai danu be Keriso ena, ia hegeregerena.  
\v 8 Lohiabada ese ai dekenai siahu ia henia, umui emui abidadama do ai hagoadaia totona. Inai siahu be umui hadikaia totona lasi. Bema lau ese inai aiemai gaukara totona lau heagi neganai, lau be lau hemarai lasi.  
\v 9 Lau ura lasi umui laloa, umui hagaria totona inai revareva lau torea inai.  
\v 10 Momokani, haida be inai bamona idia hereva, idia gwau, “Paulo ena revareva be mai metau bona mai siahu danu, to ia sibona ita dekenai ia ginidae, bona iena tauanina ita itaia neganai, ia be manoka bona iena hereva be mamina lasi.”  
\v 11 Unai hereva ia gwauraia noho tauna be namo ia laloa namonamo bona diba inai bamona: Daudau ai noho neganai hereva ai torea umui dekenai. Bona umui dekenai do ai ginidae neganai, aiemai kara be do aiemai torea gauna hegeregerena, idau sisina lasi.   
\p
\v 12 Ai laloa lasi, ai be unai tau haida hegeregere, idia sibona idia hanamoa noho. Bona ai ura lasi idia edia kara bona aiemai kara be tamona. Lasi momokani. Inai taudia be idia sibona edia kara, bona idia edia huanai idia noho taudia edia kara danu idia makaia, bona idia hahegeregerea. Madi, idia be aonega lasi.  
\v 13 To Dirava ese ai dekenai ia henia siahu be mai ena maka, bona aiemai heagi ese inai maka do ia hanaia lasi. Oibe, Dirava ese ai dekenai ia henia gaukara sibona do ai karaia. Umui be aiemai gaukara ena maka lalonai.  
\v 14 Umui emui huanai ai gaukara bona ai hadibaia be maoro, bona ai ese aiemai siahu ena maka ai hanaia lasi. Badina be inai: Ai be tau ginigunadia Keriso ena Sivarai Namona umui dekenai ai harorolaia.  
\v 15 Haida ese umui emui huanai idia gaukara, bona unai gaukara be aiemai maka ena murimurinai. Edia gaukara dainai hanamoa hereva ai tahua lasi. To aiemai ura korikori be inai: Umui emui abidadama do ia tubu badabada. Vadaeni emui huanai aiemai gaukara do ai habadaia diba, to Dirava ia atoa maka do ai hanaia lasi.  
\v 16 Unai murinai umui emui gabu ena murinai kahana tanodia dekenai Sivarai Namona do ai harorolaia. Badina ai ura lasi idau tauna ia karaia vadaeni gaukara, be ai ese do ai hekokorokulaia.   
\p
\v 17 To Buka Helaga ese inai bamona ia torea, ia gwau:  
\q1 “Tau ta bema ia ura do ia heagi,  
\q1 ia ese Lohiabada sibona do ia heagilaia.”   
\m
\v 18 Badina be bema tau ta sibona ia hanamoa neganai, inai be anina lasi Dirava ena vairanai. To bema tau ta Dirava ese ia hanamoa neganai, inai be hanamoa momokani.   
\c 11  
\s1 Aposetolo koikoidia be Paulo ese edia kara ia hedinaraia  
\p
\v 1 Mani emui kara lauegu hereva kavakava sisina do umui kamonai. Mani lauegu hereva dekenai umui hesiku lasi, umui haheauka noho.  
\v 2 Badina be Dirava ena mama namona hegeregerena, lau ese umui totona lau mama henia. Umui be kekeni namona, tau ia diba lasi kekenina bamona. Lau ese emui maoheni lau karaia vadaeni tau tamona dekenai, Keriso sibona.  
\v 3 To gaigai ese Heva ia koia hegeregerena, lau gari inai, namo lasi laloa idauidau ese umui do idia hakaua kerere, vadaeni emui lalokau goevagoeva Keriso dekenai do umui rakatania.  
\v 4 Badina be tau haida ese umui dekenai Iesu idauna idia harorolaia, ai ese ai harorolaia hegeregerena lasi, be edia hereva umui kamonai henia noho, bona umui abia dae. Ma umui ese lauma idauna bona sivarai idauna umui abia dae, ai ese Lauma bona Sivarai Namona ai harorolaia hegeregerena lasi.   
\p
\v 5 Kamonai! Lau laloa inai emui “aposetolo taudia namo herea” ese lau idia hereaia lasi!  
\v 6 Sedira lauegu hereva be mamina lasi, to egu diba be maragi lasi. Inai be diba momokani, bona nega ibounai inai diba umui dekenai ai hedinaraia vadaeni.   
\p
\v 7 Umui diba vadaeni, lau ese Sivarai Namona umui dekenai lau harorolaia, bona davana lau abia lasi. Lauegu kara be manau, umui do lau matauraia totona. Unai dainai lau kerere, a?  
\v 8 Umui emui huanai lau gaukara neganai, ekalesia orea idaudia ese lauegu davana idia henia. Idia edia kohu lau henaoa bamona, umui lau durua totona.  
\v 9 Bona umui dekenai lau noho neganai nega haida lau be moni hegeregere lasi, to umui dekenai lau noia lasi. Badina be lau dekenai idia hegeregere lasi gaudia be Makedonia Keristani taudia ese lau dekenai idia siaia mai. Hekwarahi o metau umui dekenai lau henia lasi, bona vaira neganai danu do lau henia lasi.  
\v 10 Keriso ena hereva momokani lauegu lalona dekenai ia noho. Inai be momokani dainai, Akaia kahana ibounai dekenai egu kara do lau heagilaia noho, doko lasi.  
\v 11 Inai bamona lau hereva, be umui lau lalokau henia lasi dainai, a? Lasi momokani. Dirava ia diba vadaeni, umui lau lalokau henia.   
\p
\v 12 To unai tau haida idia ura sibodia edia ladana idia abia isi, vadaeni taunimanima do idia laloa unai taudia edia kara be ai aposetolo emai kara hegeregerena. Inai taudia edia dala koua totona lau gaukara noho. Bona unai dainai egu gaukara be ma do lau karaia noho.  
\v 13 Unai taudia be aposetolo koikoidia, gaukara koikoi taudia, Keriso ena aposetolo momokani lasi.  
\v 14 To unai be hoa gauna lasi. Badina be Satani sibona ese iena kara ia senisia diba, bona ia ese diari aneruna ena kopina ia atoa diba.  
\v 15 Unai dainai Satani ena hesiai taudia, bema edia kara idia senisia, bona taunimanima edia vairanai idia be kara maoromaoro taudia bamona, inai be hoa gauna, a? To dokona neganai, edia kara hegeregerena davana do idia abia.   
\s1 Iena aposetolo dagi dainai Paulo ia hisihisi  
\p
\v 16 Guna lau hereva bamona, ma lau hereva lou. Tau ta do ia laloa lasi lau be kavakava. To bema unai bamona umui laloa neganai, lau do umui haheauka henia, kavakava tauna umui haheauka henia bamona, vadaeni sisina do lau heagi diba.  
\v 17 Harihari umui lau hamaoroa hereva be Lohiabada dekena amo lasi. Lau be sibona lau hereva kava noho, bona lau heagi kava noho.  
\v 18 To taunimanima momo ese tanobada edia kara bamona, edia tauanina kara idia heagilaia. Vadaeni lau danu unai bamona do lau karaia.  
\v 19 Umui be aonega taudia, to kavakava taudia edia hereva umui abia dae, mai moale danu.  
\v 20 Oibe, bema tau ta ese umui ia guia, iena gaukara do umui karaia totona, o bema emui aniani ia haorea, o bema umui ia koia, o bema umui dekenai ia hereva dagedage, o bema emui vairana ia botaia, inai kara ibounai umui haheauka diba.  
\v 21 Ai hemarai noho, ai be manoka dainai unai bamona ai karaia lasi, a?  
\p To bema tau ta ia heagi, lau danu lau heagi diba. Kavakava tauna bamona lau hereva noho.  
\v 22 Idia be Heberu taudia, a? Lau danu. Idia be Israela besena, a? Lau danu. Idia be Aberahamo ena tubuna, a? Lau danu.  
\v 23 Idia be Keriso ena hesiai taudia, a? Lau ese idia lau hereaia noho. Lau hereva kava noho, a? Lau hekwarahi bada, idia be sisina, badina dibura ruma lalonai nega momo lau idia koua, lau idia kwadia nega momo, bona nega momo kahirakahira lau mase.  
\v 24 Nega 5 Iuda taudia ese kwadi 39 dekenai lau idia kwadia.  
\v 25 Nega toi au dekenai lau idia dadabaia. Nega ta nadi dekenai lau idia hodoa. Nega toi lagatoi be davara dekenai ia dika, vadaeni davara lalonai kahirakahira lau boio. Hanuaboi ta bona dina ta davara dekenai lau hure.  
\v 26 Lauegu laolao be momo, ma sinavai abata edia lalonai kahirakahira lau mase. Henaoa taudia ese lau idia hadikaia. Lauegu bese taudia ese lau idia hadikaia. Idau bese taudia danu lau idia hadikaia. Hanua lalonai lau be dika, bona taunimanima idia noho lasi gabudia dekenai lau be dika. Davara bada dekenai lau dika. Bona varavara koikoi taudia ese lau idia hadikaia.  
\v 27 Gaukara bada bona hekwarahi bada lau karaia vadaeni. Nega momo lau be mahuta dala lasi. Nega momo lau hitolo bona ranu mase, bona aniani ania lasi taravatu lau karaia. Nega momo keru ena mamina lau abia momokani, bona lauegu dabua be hegeregere lasi.  
\v 28 Inai tauanina gaudia sibona lasi, to lauegu lalona danu dina ibounai ia hekwarahi, ekalesia orea ibounai lau naria dainai.  
\v 29 Bema Keristani tauna ta ia manoka neganai, lau danu iena manoka ena mamina lau abia. Bema Keristani tauna ta idia hakaua kerere, vadaeni ia moru neganai, ia dainai egu lalona ia hekwarahi, mai siahu bada.   
\p
\v 30 Bema lau heagi neganai, lauegu manoka do lau heagilaia.  
\v 31 Dirava, iseda Lohiabada Iesu Keriso ena Tamana, do idia hanamoa hanaihanai Diravana, ia be ia diba lau koikoi lasi.  
\v 32 Damaseko dekenai lau noho neganai, King Areta ena gavana tauna ese Damaseko magu ena iduara dekenai gima taudia ia atoa, lau idia guia totona.  
\v 33 To varavara taudia haida ese bosea lalonai lau idia udaia, magu ena uindo dekena amo lau idia atoa diho. Vadaeni unai gavana ena imana dekena amo lau heau mauri.   
\c 12  
\s1 Mata hanai dekena amo Dirava ese Paulo ia hereva henia  
\p
\v 1 Heagi be namo lasi. To ma do lau heagi lou. Lau ura Lohiabada ese lau ia henia mata hanai bona lau dekenai ia hedinaraia herevadia do lau herevalaia.  
\v 2 Keriso ena tauna ta lau diba, lagani 14 idia lao vadaeni, ia idia abia daekau guba ena atai dekenai momokani. Lau diba lasi inai be ia vara momokani, o bema mata hanai sibona lalonai ia vara. Dirava sibona ia diba.  
\v 3 Inai tau be lau diba, Dirava ese ia abia daekau Paradaiso dekenai.  
\v 4 Sedira ia vara momokani o mata hanai lalonai ia itaia, lau diba lasi, Dirava sibona ia diba. Paradaiso dekenai inai tau be hunia hereva ia kamonai, taunimanima idia gwauraia diba lasi herevadia.  
\v 5 Unai tau lau heagilaia diba, to lau sibona do lau heagilaia lasi. Lauegu manokamanoka sibona do lau heagilaia diba.  
\v 6 Bema lau ura heagi neganai, lau be heagi kava lasi, badina be hereva momokani lau gwauraia noho. To lau be do lau heagi lasi, badina lau ura lasi tau ta ia laloa lau be namo herea momokani. Lau ura umui ese egu kara do umui itaia, bona egu hereva do umui kamonai, bona unai dekena amo, lau totona do umui laloa maoromaoro.   
\s1 Ginigini ese Paulo ia hahisia  
\p
\v 7 Inai hereva, Dirava ese lau dekenai ia hedinaraia, be gau bada herea momokani. Inai lau itaia gaudia dainai do lau hekokoroku garina, Dirava ese ginigini ta, Satani ena hesiai tauna bamona, lau dekenai ia henia. Inai ginigini ia henia be lauegu kopina do ia gwadaia totona, do lau hekokoroku garina.  
\v 8 Nega toi Lohiabada dekenai lau guriguri, lau noia ia ese inai hisihisi do ia kokia.  
\v 9 To ia ese lau ia hamaoroa, ia gwau, “Lauegu hariharibada be oi dekenai ia hegeregere momokani vadaeni. Badina be lauegu siahu be manokamanoka tauna lalonai ia hedinarai momokani.” Unai dainai, lauegu manoka do lau heagilaia mai moale danu, vadaeni Keriso ena siahu lau dekenai do ia noho.  
\v 10 Unai dainai Keriso dainai lau gaukara lalonai, bema lau manoka, o haida ese lau idia hadikaia, o metau, o hisihisi, o dagedage, o hekwarahi lau davaria neganai do lau moalelaia. Badina be lau manoka neganai, unai be Dirava ena goada lau abia.   
\s1 Paulo ese Korinto taudia ia laloa momo  
\p
\v 11 Lau be kava bamona lau karaia, to umui ese inai dala dekenai lau umui doria vadaeni. Badina be umui ese lau umui hanamoa be maoro. To inai bamona umui karaia lasi. Momokani, lau be gau ta lasi. To unai emui “aposetolo taudia namo herea” ese lau idia hereaia lasi.  
\v 12 Umui dekenai lau noho neganai, toa bona hoa karadia lau karaia gaudia ese egu aposetolo dagi idia hamomokania. Mai siahu bona mai haheauka danu umui emui huanai unai kara lau karaia.  
\v 13 Edena gau ekalesia orea ibounai lau henia, to umui dekenai lau henia lasi, a? Inai gau tamona sibona, ani, lauegu gaukara davana lau noia lasi. Mani emui kara, inai lauegu dika tamona do umui gwauatao, a?   
\p
\v 14 Hari be nega ihatoina, lau hegaegae vadaeni, umui do lau vadivadi henia lou. Bona hekwarahi umui dekenai do lau henia lasi. Umui emui moni do lau tahua lasi, lasi momokani. Umui sibona do lau ura henia. Badina be memero maragi ese moni idia haboua lasi tamadia sinadia totona. To tamadia sinadia ese moni idia haboua edia natudia totona.  
\v 15 Lau be mai moale danu egu kohu do lau haorea, egu tauanina danu do lau haorea, umui emui laumadia do lau ubua totona. Lau ese umui lau lalokau henia bada, unai dainai umui ese lau umui lalokau henia sisina, a?   
\p
\v 16 To umui haida ese egu kara umui herevalaia, inai bamona: “Momokani, Paulo ese hekwarahi ita dekenai ia henia lasi. To ia be koikoi tauna, bona ita ia abia, hereva koikoi dekenai.”  
\v 17 Edena bamona? Umui dekenai lau siaia taudia dekena amo umui emui kohu haida lau abia, a?  
\v 18 Tito lau noia, vadaeni iseda varavara ta ia danu umui dekenai lau siaia lao. Be, Tito ese emui kohu ia abia, a? Tito bona lau be mai aiemai Lauma Helaga tamona. Ia ese ai ia hakaua noho, bona aiemai kara be tamona, aiemai dala danu tamona.   
\p
\v 19 Sedira umui laloa inai revareva ai torea noho be aiemai kara do ai hamaoromaoroa totona, umui emui vairanai. Lasi, inai totona lasi! Ai be Keriso ena taudia, bona ai ese Dirava ena vairana dekenai ai hereva noho. Egu lalokau taudia e, aiemai ura tamona be umui do ai hagoadaia sibona.  
\v 20 Lau be lau gari, do lau ginidae neganai, umui do lau davaria, lauegu ura hegeregerena lasi. Umui ese danu lau do umui davaria, umui emui ura hegeregerena lasi. Vadaeni heai, mama, badu, dagedage, samania koikoi, maumau, hekokoroku bona laloa tamona hadikaia kara, inai kara ibounai do idia vara garina.  
\v 21 Lau gari danu, lau ginidae neganai egu Dirava ese lau do ia hahemaraia umui emui vairanai. Bona kara dika taudia momo totona do lau tai, badina be edia matabodaga, edia heudahanai, edia lebulebu kara dekena amo edia lalona idia giroa lasi dainai.   
\c 13  
\s1 Sisiba hereva bona hanamoa hereva  
\p
\v 1 Nega ihatoina be inai, umui dekenai do lau mai. Buka Helaga ese inai bamona ia hereva, ia gwau, “Samania hereva be tau rua o toi ese do idia hamomokania.”  
\v 2 Kara dika umui karaia guna taudia e, bona umui ibounai danu, lauegu sisiba umui kamonai! Nega iharuana umui dekenai lau mai neganai, umui lau sisiba henia, bona hari danu daudau dekena amo ma lau sisiba henia lou inai bamona: Do lau giroa mai neganai, dika taudia do lau panisia momokani, do lau bogahisihisi lasi.  
\v 3 Do umui diba momokani, Keriso be lau dekena amo ia hereva noho. Keriso be umui dekenai do ia manoka lasi. Ia ese iena siahu do ia hedinaraia, vadaeni mamina do umui abia.  
\v 4 Momokani, ia be manoka dainai satauro dekenai ia mase, to Dirava ena siahu dainai hari ia mauri noho. Ai be ia danu ai hakapua dainai ai be manoka, to Dirava ena siahu dainai ai mauri noho Keriso danu. Bona inai siahu be umui emui huanai do ai gaukaralaia.   
\p
\v 5 Umui sibona emui kara do umui tahua, bona emui mauri do umui tohoa, umui be abidadama korikori taudia o lasi. Umui diba momokani, Iesu Keriso be umui emui kudouna dekenai ia noho? Bema lasi neganai, umui be ia umui negea vadaeni taudia.  
\v 6 Lau ura umui diba ai be Keriso ai negea lasi taudia.  
\v 7 Dirava ai noia noho, ia ese umui do ia durua, vadaeni do umui kara dika lasi. Inai bamona ai ura, haida ese aiemai gaukara idia hanamoa totona, a? Lasi momokani. Badina be aiemai ura korikori be inai: Umui be kara maoromaoro taudia momokani. Bona umui be inai bamona neganai, haida ese bema ai idia gwauraia kerere, be do ai laloa lasi.  
\v 8 Badina ita be hegeregere lasi hereva momokani do ita hadikaia. Lasi momokani. Hereva momokani ita durua diba sibona.  
\v 9 Ai be manoka, bona umui be goada neganai ai be ai moale noho. Aiemai noinoi tamona be inai, do umui namo momokani.  
\v 10 Unai dainai daudau dekena amo umui lau torea henia, vadaeni do lau ginidae neganai, umui do lau badu henia lasi. Lohiabada ese siahu lau dekenai ia henia, to lau ura lasi inai siahu ena mamina umui abia. Inai siahu lau dekenai ia henia be umui haginia totona, hadikaia totona lasi.   
\s1 Bamahuta herevana  
\p
\v 11 Lauegu varavara e, hereva dokona be inai: Do umui moale, do umui namo momokani, do umui goada, do umui laloa tamona, maino lalonai do umui noho. Bona lalokau bona maino ena Dirava ese umui danu do ia noho.   
\p
\v 12 Umui ta ta dekenai ekalesia ena lalokau kisi do umui henia.   
\p
\v 13 Dirava ena taudia ibounai ese edia hanamoa idia siaia inai.   
\p
\v 14 Lohiabada Iesu Keriso ena hariharibada, Dirava ena lalokau, bona Lauma Helaga ena turana kara be umui ibounai dekenai do idia noho.