\id 2CH 2 CHRONICLES, Hiri Motu Bible, PNG, 1989 1/93 
\h 2 SIVARAI 
\toc1 ISRAELA BONA IUDA TAUDIA EDIA SIVARAI BUKA IHARUANA 
\toc2 2 SIVARAI 
\mt1 ISRAELA BONA IUDA TAUDIA EDIA SIVARAI BUKA IHARUANA  
\c 1  
\s1 King Solomona ese aonega totona Dirava ia noia  
\p
\v 1 Solomona, king Davida ena natuna tau, ese sibona ena siahu ia haginia auka, Israela basileia ena lalonai. Lohiabada, iena Dirava, be Solomona danu ia noho, bona ia ese Solomona ena siahu ia habadaia momokani.   
\p
\v 2 King Solomona ese Israela taudia ibounai dekenai hereva ia gwauraia, tuari taudia 1000, bona tuari taudia 100 edia biagudia, kota biagudia, Israela lohia taudia bona iduhu kwarana taudia.  
\v 3 Solomona ese ia oda henidia, ia danu Gibeona ena ataiai gabuna dekenai do idia lao, badina Dirava ena Palai Dubu be unuseni. Mose, Lohiabada ena hesiai tauna ese tano kaukau dekenai ia karaia Dubu be unai.  
\v 4 To Taravatu Maua be Ierusalema dekenai ia noho, Davida ese Kiriata Iearimi dekena amo ia mailaia neganai unuseni ia atoa, Palai Dubu ta lalonai.  
\v 5 Auri laboralabora boubou patana, Besalele, Uri Huru ena natuna ese ia karaia gauna, be Gibeona dekenai, Lohiabada ena Palai Dubu ena vairana dekenai ia noho. King Solomona bona unai hebou taudia ibounai ese unuseni Lohiabada idia tomadiho henia.  
\v 6 Solomona be unai auri laboralabora boubou patana dekenai ia gini, bona Lohiabada ena vairanai, gabua bouboudia ibounai 1000 unai pata ena latanai ia henia, Palai Dubu ena vairanai.   
\p
\v 7 Vadaeni unai hanuaboi dekenai Dirava ese Solomona dekenai ia hedinaraia. Dirava ese Solomona ia nanadaia, ia gwau, “Oiemu ura be dahaka oi dekenai do lau henia?”   
\p
\v 8 Solomona ia haere, ia gwau, “Egu tamana Davida be nega ibounai oi lalokau henia bada, bona hari oi ese iena gabuna dekenai king dagi lau dekenai oi henia vadaeni.   
\p
\v 9 “Lohiabada Dirava e, oiemu gwauhamata, egu tamana Davida dekenai oi henia, be harihari do oi hamomokania, badina be bese badana ta, taunimanima momo, duahia diba lasi, edia king be oi ese lau oi halaoa vadaeni.  
\v 10 Unai dainai mani emu kara, aonega bona diba lau dekenai do oi henia, oiemu bese taudia do lau biagua mai maoromaoro danu totona. Bema lau oi durua lasi neganai, edena bamona inai oiemu orea bada herea, do lau gunalaia diba?”   
\p
\v 11 Vadaeni Dirava ese Solomona ia haere henia, ia gwau, “Oiemu ura bona oiemu laloa be maoro momokani. Oi ese kohu, o taunimanima edia mataurai, o oi idia hadikaia gwauraia taudia edia mase, o mauri daudau oi noia lasi. Lasi, to oi ese aonega bona diba oi noia vadaeni, egu orea taudia do oi biagua namonamo totona. Edia king oi lau halaoa oreana be unai.  
\v 12 Unai dainai aonega bona diba bada be oi dekenai do lau henia. Ma danu lau ese kohu momo, bona taunimanima edia mataurai be oi dekenai do lau henia. Momokani lau gwau, king ta lasi, oi do vara lasi negana king ta, o oiemu murinai do ia vara king ta, ese do oi abia kohu bona mataurai hegeregerena do ia davaria diba lasi.”   
\s1 King Solomona ena siahu bona iena kohu momo  
\p
\v 13 Unai murinai Solomona be ataiai gabuna, Gibeona, Lohiabada ena Palai Dubu ia noho gabuna ia rakatania, Ierusalema dekenai ia lao. Unuseni ia ese Israela taudia ia lohia karaia.   
\p
\v 14 Solomona ese kariota bona hosi guia taudia ia haboua. Iena kariota be 1400, bona iena hosi guia taudia be 12,000. Idia haida be Ierusalema dekenai idia noho, to oredia be hanua ta ta dekenai ia siaia lao, idia noho.  
\v 15 Solomona be king neganai, ia ese siliva bona golo be gau anina lasi bamona ia halaoa Ierusalema dekenai, tano ena nadi bamona. Bona sida audia danu be momo herea, sikamoa audia bamona.   
\p
\v 16 Solomona ena hosi be Aigupito bona Kue dekena amo ia abia, king ena hoihoi taudia ese Kue dekena amo idia abidia, mai edia davana.   
\p
\v 17 Solomona ena hoihoi taudia ese Aigupito dekena amo kariota idia abia, kariota ta ena davana be siliva moni 600, bona hosi ta ena davana be siliva moni 150. King ena hoihoi taudia ese ma inai hosi bona kariota be Hiti taudia edia king bona Suria taudia edia king dekenai idia hoihoilaia lou.   
\c 2  
\s1 Dubu Helaga haginia totona kohu ma idia haboua mai  
\p
\v 1 King Solomona ena ura be Dubu Helaga ta do ia haginia Lohiabada ena Ladana hanamoa totona. Solomona ese ia sibona ena ruma danu do ia haginia gwauraia.  
\v 2 Vadaeni Solomona ese tau ibounai 70,000 dekenai gaukara ia henia, idia ese kohu do idia huaia. Bona ia ese ma tau ibounai 80,000 dekenai gaukara ia henia, idia ese ororo kahadia dekenai nadi idia geia. Bona tau ibounai 3600 ese inai gaukara taudia edia gaukara idia naria bona biagua.   
\p
\v 3 Solomona ese king Hirama, Turo ena king, dekenai hereva ia siaia, ia gwau, “Sida audia be guna egu tamana Davida dekenai oi siaia, iena noho ruma do ia haginia totona. Mani emui kara, tamagu dekenai oi karaia hegeregerena, lau dekenai danu do oi karaia.  
\v 4 Lau ese egu Dirava, Lohiabada, ena Ladana do lau hanamoa totona Dubu Helaga ta do lau haginia. Inai Dubu be helaga gabuna, bona unuseni egu basileia taudia, bona lau ese Lohiabada do ai tomadiho henia. Ai ese bonana namo muramura inai Dubu lalonai do ai gabua, paraoa helagana be nega ibounai do ai henia noho, bona gabua bouboudia be daba bona adorahi ibounai bona Sabati Dinadia, Hua Matamata ariadia bona dina helagadia haida danu do ai henia noho, Lohiabada, aiemai Dirava do ai hanamoa totona. Badina be ia ese Israela taudia ia oda henia vadaeni, inai bamona bouboudia do idia henia ela bona hanaihanai.   
\p
\v 5 “Lau ese do lau haginia Dubu Helaga be do ia bada, badina be aiemai Dirava ese dirava ibounai ia hereaia noho.  
\v 6 To daika ese Dirava ena Dubu Helaga do ia haginia diba? Badina be guba, io, guba ataiai momokani, be ia hegeregere lasi Dirava ena noho gabuna do ia lao. Be edena bamona iena Dubu Helaga do lau haginia diba? Sedira Lohiabada dekenai bonana namo muramura gabua gabuna sibona do lau karaia?   
\p
\v 7 “Unai dainai, mani emu kara tau ta do oi siaia mai, golo bona siliva bona auri laboralabora, bona auri, bona dabua kakakaka sisina, bona kakakaka, bona bulu, bona gau ia koroa diba tauna. Vadaeni ia ese Iuda dekenai bona Ierusalema dekenai egu gaukara diba momo taudia danu do idia gaukara hebou. Egu tamana Davida ese inai egu taudia ia abia hidi vadaeni.   
\p
\v 8 “Sida bona kasuarina bona iunipa audia danu Lebanona dekena amo mani do oi siaia mai, badina lau diba oiemu hesiai taudia be Lebanona audia idia utua diba. Egu gaukara taudia be oiemu gaukara taudia danu do idia gaukara hebou.  
\v 9 Au momo herea lau dekenai do idia abia hegaegae, badina be lau ese do lau haginia Dubu Helaga be do ia bada, bona hoa bada gauna.  
\v 10 Oiemu gaukara taudia, au utua taudia, be edia gaukara davana do lau henia inai bamona: Uiti ena metau 2000 toni, bali ena metau 2000 ton, uaina 400,000 lita, bona olive dehoro 400,000 lita.”   
\p
\v 11 Vadaeni Hirama, Turo ena king, ese revareva dekena amo iena haere Solomona dekenai ia siaia lao, ia gwau, “Lohiabada ese iena bese taudia ia lalokau henia dainai, ia ese edia king be oi ia halaoa vadaeni.”   
\p
\v 12 Hirama ma ia gwau, “Lohiabada, Israela ena Dirava, guba bona tanobada ia karaia ena Dirava be lau hanamoa inai, badina ia ese king Davida dekenai natuna tau ia henia vadaeni, aonega tauna, mai ena diba maoro, bona mai ena lalona kehoa danu. Ia ese Dubu Helaga do ia haginia, Lohiabada ena, bona king ena ruma danu, ia sibona ena.   
\p
\v 13 “Unai dainai lau ese gaukara diba momo bona aonega bada tauna ta oi dekenai lau siaia vadaeni. Iena ladana be Hurama Abi.  
\v 14 Ia be Dano iduhu hahine ta ena natuna, to iena tamana be Turo tauna. Golo bona siliva bona auri laboralabora, bona auri bona nadi bona au, bona dabua kakakaka sisina, bona bulu, bona kakakaka, bona dabua namo herea gaukaralaia dekenai ia manada momokani. Ia ese danu koroa gaukara ia diba momo, bona do oi henia gaukara idauidau ibounai do ia karaia diba. Ia be oiemu gaukara taudia, bona oiemu tamana Davida ena gaukara taudia danu do idia gaukara hebou.   
\p
\v 15 “Unai dainai, inai uiti bona bali bona uaina bona olive dehoro, oi ese oi gwauhamata vadaeni gaudia do oi siaia mai.  
\v 16 Bona ai ese Lebanona ena audia, oi ura gaudia be do ai utua, tupe dekenai do ai atodia, bona davara dekena amo do ai huredia lao ela bona Iopa. Iopa dekena amo oi ese Ierusalema dekenai do oi huaia lao.”   
\p
\v 17 Vadaeni Solomona ese idau bese taudia, Israela tano dekenai idia noho taudia edia namba ia duahia, iena tamana Davida ese ia karaia duahia gaukara bamona. Ia davaria, idau bese taudia Israela dekenai be 153,600.  
\v 18 Solomona ese idia 70,000 be kohu huaia gaukara ia henidia, bona idia 80,000 be ororo dekenai nadi utua gaukara ia henidia. Bona tau ibounai 3600 ese inai gaukara taudia edia gaukara idia naria bona biagua.   
\c 3  
\s1 Solomona ese Dubu Helaga ia haginia hamatamaia  
\p
\v 1 King Davida, Solomona ena tamana ese Dubu Helaga haginia gabuna ia abia hegaegae vadaeni. Gabuna be Ierusalema dekenai, Moraia Ororo ena latanai, Lohiabada ese Davida dekenai ia hedinaraia gabuna. Unai gabu be Iebusu tauna, Arauna, ena uiti kwadia gabuna.  
\v 2 Solomona ese Dubu Helaga ia haginia hamatamaia dinana be iena lohia lagani namba 4 hua iharuana lalonai.   
\p
\v 3 Solomona ese Dirava totona ia karaia Dubu Helaga ena bada be inai: Ena lata be 27 mita, bona ena lababa be 9 mita.  
\v 4 Dubu ena vairana kahana dehe ena lata be 9 mita, Dubu ena lababa hegeregerena, bona dehe ena ataiai be 54 mita.  
\p Dehe ena lalonai be golo namo herea dekena amo idia koua.  
\v 5 Dubu ena daiutu badana ena lalona habadia be sida au reireidia dekena amo idia koua, bona reireidia be golo namo herea, dekena amo idia koua. Unai golo ena latanai herahera idia koroa, pama audia bona golo seini.  
\v 6 Solomona ese Dubu Helaga be mai hairaina totona, davana bada nadi namodia herahera gaudia haba bona gabu ta ta dekenai ia haginia vareai, golo herahera gaudia danu. Unai golo be tano ladana Paravaimi dekena amo.  
\v 7 Iena gaukara taudia ese danu Dubu ena guhi ena au latadia, raka vareai audia, iduara dogoatao gaudia, haba bona iduara ibounai be golo dekena amo idia koua, bona kerubi aneru edia laulau be haba dekenai ia noho golo ena latanai idia koroa.   
\p
\v 8 Lalona momokani daiutuna, ena ladana be Helaga Herea Gabuna ena lata be 9 mita, ena lababa danu be 9 mita, Dubu Helaga ena lababa be unai. Unai Helaga Herea Gabuna ena haba ibounai be golo namo herea dekena amo idia koua, unai golo ena metau be 20 toni mai kahana.  
\v 9 Ikoko danu be golo dekena amo idia karaia, bona ataiai daiutudia danu be golo dekena amo idia koua.   
\p
\v 10 King ese danu iena gaukara taudia ia oda henia, kerubi aneru rua do idia koroa, bona golo dekena amo do idia koua. Helaga Herea Gabuna ena lalonai idia atodia.  
\v 11 Kerubi ruaosi edia hanidia idia toia roro neganai edia lata ibounai be 9 mita. Kerubi ta ena hanina ta ena lata be 2 mita 20 sentamita, bona unai hanina ese Dubu ena haba dekenai ia kamokau. Iena hanina ta be kerubi ta ena hanina dekenai ia kamokau.  
\v 12 Unai bamona danu kerubi iharuana ena hanina ta ena lata be 2 mita 20 sentamita, bona Dubu ena haba ma ta dekenai ia kamokau, bona iena hanina ta be kerubi ginigunana ena hanina dekenai ia kamokau.  
\v 13 Inai kerubi aneru ruaosi edia hanina idia toia roro neganai edia lata be 9 mita. Inai kerubi be aedia dekenai idia gini, bona Dubu ena daiutu badana dekenai edia vairana idia henia.   
\p
\v 14 Solomona ese Helaga Herea Gabuna ena koua dabua be dabua bulu, kakakaka sisina, bona kakakaka momokani, bona dabua aukana dekena amo ia karaia.   
\s1 Auri laboralabora du rua  
\p
\v 15 King ese du rua ia karaia, edia lata be 16 mita, bona Dubu Helaga ena vairana dekenai ia haginidia. Idia be mai edia kwaradia, bona edia lata be 2 mita 20 sentamita.  
\v 16 Du edia ataiai dekenai be reke bamona herahera idia koroa, bona auri laboralabora apolo ibounai 100 danu du ta ta edia ataiai idia koroa.   
\p
\v 17 Du ruaosi be Dubu Helaga ena raka vareai gabunai idia atodia, ta be diho kahanai, ena ladana be Iakina, bona ta be mirigini kahanai, ena ladana be Boasi.   
\c 4  
\s1 Dubu Helaga ena kohu namodia  
\p
\v 1 King Solomona ese ia oda, vadaeni boubou patana, auri laboralabora gauna idia karaia. Boubou patana ena lata be 9 mita, ena lababa danu be 9 mita, bona ena ataiai lata be 4 mita 50 sentamita.  
\v 2 Ma tanika kuboruna, auri laboralabora dekena amo idia karaia. Ena dobu be 2 mita 20 sentamita, ena lababa be 4 mita 40 sentamita, bona ena kuboru be 13 mita 20 sentamita.  
\v 3 Tanika ena kuboru isena dekenai be herahera laini rua idia koroa, laini ta isena kahirakahira, ma laini ta be henunai. Herahera edia toana be boromakau tau edia laulau. Tanika idia karaia neganai, herahera be tanika danu nega tamona idia karaia.  
\v 4 Inai tanika be boromakau tau 12 edia laulau, auri laboralabora gaudia edia dorudia latanai ia helai. Boromakau toi ese mirigini kahanai edia vairadia idia henia, ma toi be dina ia diho kahanai, bona ma toi diho kahanai, ma toi ese dina daekau kahana dekenai edia vairadia idia henia.  
\v 5 Tanika ena kopina ena bada be tau ena ima palapala ena lababa hegeregerena. Tanika ena isena be kapusi ena isena bamona, lili heraherana ena toana bamona. Tanika ena anina be ranu 60,000 lita bamona.   
\p
\v 6 Huria totona ranu tanika maragidia ibounai 10 danu idia karaia, idia 5 be Dubu Helaga ena diho kahanai idia atoa, ma idia 5 be mirigini kahanai idia atoa. Inai tanika maragidia lalonai be do idia gabua boubou gaudia idia huria, to unai tanika badana be hahelagaia taudia edia huria gabuna.   
\p
\v 7 Idia ese danu lamepa dogoatao gaudia ibounai 10, golo gaudia, Dirava ese guna ia gwauraia dala dekenai idia karaia, bona Dubu Helaga lalonai idia atoa, 5 be diho kahanai, bona 5 be mirigini kahanai.  
\v 8 Bona pata ibounai 10 danu idia karaia, Dubu Helaga lalonai idia atoa, 5 be diho kahanai, bona 5 be mirigini kahanai. Idia ese danu uro ibounai 100 golo dekena amo idia karaia.   
\p
\v 9 Hahelagaia taudia edia ariara gabu mai maguna, bona murimurinai noho ariara gabu mai maguna danu idia karaia. Inai magu edia iduaradia edia audia be auri laboralabora dekena amo idia koua.  
\v 10 Tanika badana be Dubu Helaga ena laurabada kahana kona dekenai idia haginia.   
\p
\v 11 Hurama ese danu uro bona sipeidi bona disi ia karaia. Vadaeni king Solomona ese ia henia gaukara be Hurama ese ia haorea, Dirava ena Dubu Helaga lalonai, gaudia be inai:   
\q1
\v 12 du ruaosi.  
\q1 du edia ataiai kwaradia, edia toana be uro bamona.  
\q1 unai du edia kwaradia edia latanai idia koroa reke bamona herahera.   
\q1
\v 13 auri laboralabora apolo ibounai 400 (laini rua ese du kwarana ta ta idia hagegea).   
\q1
\v 14 treila ibounai 10  
\q1 tanika maragidia ibounai 10.   
\q1
\v 15 tanika badana  
\q1 boromakau laulaudia ibounai 12, tanika badana be idia edia dorudia latanai ia helai.   
\q1
\v 16 uro, sipeidi, foka bona vamu taua dae edia kimai.  
\p Inai diba momo gaukara tauna Hurama Abi ese inai gaudia ibounai be auri laboralabora, diaridiari gauna dekena amo ia karaia. Idia be Solomona ese ia oda hegeregerena, bona Lohiabada ena Dubu Helaga lalonai do idia gaukaralaia gaudia.   
\p
\v 17 King ese ia oda dainai, unai gaudia be raro tano gabunai idia karaia Ioridane Koura lalonai, Sukoto hanua bona Sereda hanua edia huanai.  
\v 18 Inai gau ibounai, Solomona ese ia karaia gaudia be momo herea. Unai dainai edia auri laboralabora ena metau be tau ta ese ia duahia diba lasi.   
\p
\v 19 King Solomona ese danu Dubu Helaga ena helaga gaudia ma haida ia karaia, gaudia be inai:  
\q1 Pata helagana, golo gauna.  
\q1 Paraoa helagana edia patana.   
\q1
\v 20 Lamepa dogoatao gaudia, golo gaudia, mai edia golo lamepa danu. Inai be Helaga Herea Gabuna ena vairanai do idia gabua gaudia, Dirava ena taravatu hegeregerena.   
\q1
\v 21 Herahera, bona lamepa, bona gida dogoatao gaudia. Idia be golo goevagoeva gaudia.   
\q1
\v 22 Lamepa hagoevaia gaudia, bona disi, bonana namo muramura totona gaudia, bona auri palakadia, gida huaia lao totona gaudia. Inai gaudia ibounai be golo goevagoeva sibona dekena amo idia karaia. Dubu Helaga ena daiutu badana ena iduara, bona Helaga Herea Gabuna ena iduara ruaosi danu be golo dekena amo idia karaia.   
\c 5  
\p
\v 1 Vadaeni, Lohiabada ena Dubu Helaga ena gaukara ibounai be Solomona ese ia karaia ore. Unai neganai iena tamana Davida ese ia hahelagaia gaudia be Solomona ese Dubu lalonai ia abia vareai, siliva bona golo, bona gau idauidau ibounai, be Dirava ena Dubu ena kohu haboua daiutu lalonai ia atodia.   
\s1 Taravatu Maua be Dubu Helaga dekenai idia mailaia  
\p
\v 2 Vadaeni king Solomona ese Israela ena tau badadia bona iduhu lohia taudia ibounai ia boiria, idia mai Ierusalema dekenai, ia dekenai idia haboua. Hebou ena badina korikori be Lohiabada ena Taravatu Maua be Davida ena Hanua, Siona, dekena amo Dubu Helaga dekenai do idia abia lao totona.  
\v 3 Inai hebou be hua namba 7, ena ladana Etanimi, Au Raurau Ruma Maragidia ena aria badana neganai idia abia.   
\p
\v 4 Israela tau badadia be unai neganai Solomona dekenai idia ginidae, vadaeni hahelagaia taudia ese Taravatu Maua idia abia isi,  
\v 5 Dubu Helaga dekenai idia huaia lao. Levi taudia bona hahelagaia taudia ese danu Lohiabada ena Palai Dubu mai ena kohu ibounai be Dubu Helaga dekenai idia abia lao.  
\v 6 Vadaeni king Solomona bona Israela taudia ibounai be Taravatu Maua ena vairanai idia hebou, bona mamoe bona boromakau momo herea, duahia diba lasi, be boubou totona idia henia.   
\p
\v 7 Unai neganai hahelagaia taudia ese Lohiabada ena Taravatu Maua idia mailaia, ena gabu momokani dekenai idia atoa, Helaga Herea Gabunai, kerubi aneru edia hanidia henunai.  
\v 8 Kerubi aneru edia hanidia ese Taravatu Maua bona iena huaia audia danu idia koua.  
\v 9 Unai huaia audia be lata herea dainai, edia duduna be tau ta ia itaia diba, bema Helaga Herea Gabuna ena vairana kahana dekenai ia gini neganai, to Helaga Herea Gabuna ena murina kahana dekena amo ia itaia diba lasi. Unai audia be unuseni idia noho ia mai bona hari.  
\v 10 Taravatu Maua lalonai be gau rua sibona idia noho, unai nadi palaka rua, Sinai Ororo dekenai Mose ese ia udaia gaudia sibona. Unai be Lohiabada ese Israela taudia dekenai Taravatu ia henidia, Aigupito tano dekena amo idia raka mai neganai.   
\s1 Lohiabada ena hairaina  
\p
\v 11 Unai neganai hahelagaia taudia be Helaga Gabuna dekena amo murimurina dekenai idia raka. Unuseni idia noho hahelagaia taudia ibounai ese idia sibodia idia hahelagaia vadaeni guna, edia orea o dagi idia laloa lasi.  
\v 12 Vadaeni ane abia taudia, Levi iduhu taudia Asapa, Hemana bona Iedutunu, mai edia natudia bona edia varavara taudia danu, be dabua aukadia idia karaia, bona boubou patana ena dina daekau kahanai idia gini. Inai Levi taudia be mai edia botaia auridia, bona mai edia gita badadia bona maragidia danu, bona idia danu unuseni be hahelagaia taudia 120, kibi idia hiriria taudia, idia gini noho.   
\p
\v 13 Inai kibi hiriria taudia bona ane abia taudia ese Lohiabada idia hanamoa hebou mai regena namona, gado tamona bamona. Mai kibi bona botaia auridia bona gita gaudia danu edia ane idia abia inai bamona:  
\q1 “Lohiabada do ita hanamoa bada,  
\q1 badina iena kara be namo herea ita dekenai,  
\q1 bona iena lalokau be ia noho hanaihanai.”  
\p Unai neganai Lohiabada ena Dubu Helaga be ori ta ese ia hahonua.  
\v 14 Vadaeni hahelagaia taudia be hesiai gaukara karaia totona idia gini diba lasi, ori dainai, badina be Lohiabada ena hairaina ese Dirava ena Dubu Helaga ia hahonua.   
\c 6  
\s1 Solomona ese taunimanima dekenai hereva ia gwauraia  
\p
\v 1 Vadaeni king Solomona ia guriguri, ia gwau,  
\q1 “Lohiabada e, oi gwau oi be ori bona dibura lalonai do oi noho.   
\q1
\v 2 To lau ese ruma namo herea momokani oi totona lau haginia vadaeni.  
\q1 Ia be, oi ese do oi noho gabuna, ela bona hanaihanai.”   
\p
\v 3 Iena guriguri ia ore, vadaeni king Solomona ia giroa, unai Israela taudia, unai idia gini hebou taudia ibounai ia hanamodia.  
\v 4 Ia gwau, “Lohiabada, Israela ena Dirava do ita hanamoa. Ia ese lauegu tamana Davida dekenai ia henia gwauhamata ia badinaia vadaeni.  
\v 5 Lohiabada ia gwau, ‘Lauegu bese Israela be Aigupito dekena amo lau hakaua mai dinana ia mai bona hari, Israela iduhu ibounai edia huanai, hanua ta lau abia hidi lasi, lau ese do lau noholaia Dubu unuseni do ia gini totona. Bona lau ese tau ta lau abia hidi lasi, ia ese lauegu bese do ia gunalaia totona.  
\v 6 To hari lau ese Ierusalema lau abia hidi vadaeni, egu Ladana be unuseni do ia noho totona, bona Davida lau abia hidi vadaeni, ia ese egu bese Israela do ia gunalaia.’ ”   
\p
\v 7 Bona Solomona ia hereva noho, ia gwau, “Lauegu tamana Davida ese ia laloa, Lohiabada, Israela ena Dirava, ena Dubu do ia haginia gwauraia.  
\v 8 To Lohiabada ese Davida ia hamaoroa, ia gwau, ‘Oiemu laloa be Dubu ta, lauegu Ladana do ia noho lalonai Dubuna do oi haginia, unai laloa be maoro.  
\v 9 To oi ese Dubu do oi haginia lasi. Oiemu natuna, dohore ia vara merona, ese lauegu Dubu do ia haginia.’   
\p
\v 10 “Harihari Lohiabada ese iena gwauhamata ia hamomokania vadaeni, badina be lau ese lau toreisi, tamagu Davida ena gabuna dekenai, Israela ena king lau helai noho, Lohiabada ena gwauhamata hegeregere. Bona lau ese Dubu lau haginia vadaeni, Lohiabada, Israela ena Dirava, be ia lalonai do idia tomadiho henia totona.  
\v 11 Unai Dubu lalonai danu lau ese Taravatu Maua lau atoa vadaeni. Inai Maua Helaga lalonai be Lohiabada ena Taravatu, Israela taudia danu ia karaia gwauhamata taravatuna gauna, nadi palaka gaudia idia noho.”   
\s1 Solomona ena guriguri  
\p
\v 12 Vadaeni Solomona be Lohiabada ena boubou patana ena vairanai ia gini, Israela taudia ibounai edia vairanai. Iena imana ruaosi ia abia isi, ia guriguri.  
\v 13 Solomona ese pata ta auri laboralabora dekena amo ia karaia vadaeni, Dubu ena gabu ta mai ena maguna ena lalonai ia atoa. Inai pata ena lata be 2 mita 20 sentamita, ena lababa danu be 2 mita 20 sentamita, bona ena ataiai be 1 mita 30 sentamita. Inai pata ena latanai Solomona ia gini, vadaeni Israela hebou taudia ibounai idia itaia, ia tui diho, bona iena imana ruaosi guba dekenai ia abia isi.   
\p
\v 14 Unai neganai Solomona ia guriguri, ia gwau, “Lohiabada e, Israela ena Dirava, dirava ta oi hegeregerena be lasi, guba ataiai o tanobada henunai, oiemu gwauhamata oi badinaia noho, bona oiemu bogahisihisi oi hedinaraia noho, oiemu bese taudia dekenai, idia ese mai edia kudoudia ibounai oi dekenai idia kamonai henia neganai.  
\v 15 Oiemu gwauhamata lauegu tamana Davida dekenai be oi ese oi badinaia vadaeni. Hari dina inai gwauhamata oi hamomokania vadaeni.   
\p
\v 16 “Bona hari, Lohiabada e, Israela ena Dirava, lau noinoi, oi ese oiemu gwauhamata ma ta, tamagu Davida dekenai oi henia gauna be do oi hamomokania. Unai gwauhamata be inai: Oi gwau, bema Davida ena natuna bona tubuna taudia ese edia kara ibounai dekenai oiemu Taravatu idia kamonai henia, Davida ia karaia hegeregerena, idia ta be nega ibounai Israela gunalaia dagi do ia dogoatao, unai dagi dekena amo do idia moru diba lasi.  
\v 17 Unai dainai, Israela ena Dirava e, oiemu gwauhamata tamagu Davida dekenai, mani emu kara hari do oi hamomokania.   
\p
\v 18 “To Dirava e, oi be momokani tanobada dekenai, taunimanima edia huana dekenai oi noho diba, a? Guba, bona guba ena ataiai momokani be hegeregere lasi oiemu noho gabuna. Unai dainai inai dubu, lau ese lau haginia gauna be maragi, edena bamona do oi noholaia diba?  
\v 19 To Lohiabada, egu Dirava e, lau be oiemu hesiai tauna, lauegu guriguri mani do oi kamonai, bona hari dina lau noinoi gaudia do oi henia.  
\v 20 Dina bona hanuaboi inai Dubu Helaga do oi naria. Inai Dubu oi herevalaia vadaeni, oi gwau, ‘Lauegu Ladana be unuseni do ia noho.’ Unai dainai bema lau ese inai Dubu Helaga dekenai lauegu vairana lau henia, lau guriguri totona neganai, mani lauegu guriguri do oi kamonai.  
\v 21 Lauegu guriguri, bona oiemu bese taudia edia guriguri, inai gabu dekenai aiemai vairana ai henia neganai, do oi kamonai. Oiemu noho gabuna, guba, dekena amo do oi kamonai, bona aiemai dika do oi gwauatao.   
\p
\v 22 “Bema haida ese tau ta idia samania, idia gwau ia ese iena badibadinai tauna dekenai ia kara dika, sedira oiemu Dubu Helaga ena pata helagana dekenai do idia hakaua mai, ia be kerere lasi do ia gwauhamata totona.  
\v 23 Unai neganai Lohiabada e, mani guba dekena amo do oi kamonai, bona oiemu hesiai taudia do oi kota henia. Kerere tauna ena davana do oi henia, iena dika hegeregerena. Bona kerere lasi tauna be maoro do oi gwauraia, iena maoromaoro do oi hedinaraia totona.   
\p
\v 24 “Oiemu bese Israela taudia be oi dekenai do idia kara dika, bona unai dainai tuari dekenai idia lusi neganai, sedira oi dekenai edia lalona do idia giroa, bona inai Dubu Helaga dekenai do idia mai. Bona unai neganai, sedira oi dekenai do idia matauraia, bona oi dekenai do idia guriguri, edia dika do oi gwauatao totona.  
\v 25 Mani emu kara guba dekena amo do oi kamonai, bona oiemu bese Israela taudia edia dika do oi gwauatao, bona edia sene taudia edia tano dekenai ma do oi hakaudia lou.   
\p
\v 26 “Bona bema idia ese oi dekenai idia kara dika dainai medu ia diho lasi neganai, sedira edia lalona do idia giroa, bona inai Dubu Helaga dekenai oi dekenai do idia guriguri, mai manau danu.  
\v 27 Unai neganai Lohiabada e, mani guba dekena amo do oi kamonai. King bona Israela taudia edia kara dika do oi gwauatao. Kara maoromaoro dalana idia dekenai do oi hadibaia. Bona unai neganai oiemu tano, oiemu bese taudia dekenai oi henia do idia biagua tano dekenai, medu do oi hadihoa.   
\p
\v 28 “Sedira tano dekenai hitolo o gorere dikana ia ginidae, o bema uma ena anina be lai dikana o kwadi momo ese idia hadikaia. O sedira oiemu bese be tuari taudia ese do idia tuari henidia, o gorere dikana do idia davaria.  
\v 29 Unai neganai edia guriguri do oi kamonai. Bema oiemu Israela taudia ese, mai lalohisihisi momokani danu be Dubu Helaga dekenai edia imana idia duduia neganai,  
\v 30 edia guriguri do oi kamonai. Guba dekena amo do oi kamonai, edia kara dika do oi gwauatao, bona idia be oi ese do oi durua. Badina be oi sibona ese taunimanima ibounai edia laloa oi diba noho. Idia ta ta dekenai edia kara, edia kara hegeregerena durua do oi henia.  
\v 31 Unai dekena amo, oiemu bese taudia ese oi do idia gari henia, edia sene taudia dekenai oi henia tano dekenai idia noho dinadia ibounai lalonai.   
\p
\v 32 “Unai bamona danu, idau tauna ta, oiemu bese Israela tauna ta lasi, bema oiemu ladana namo herea sivarai ia kamonai dainai, bona oiemu siahu dainai tano daudau dekena amo do ia mai, bona bema inai Dubu Helaga lalonai do ia guriguri,  
\v 33 unai neganai oiemu noho gabuna, guba dekena amo iena guriguri do oi kamonai, bona ia noinoi gauna do oi henia. Unai dekena amo tanobada bese ibounai ese oiemu Ladana do idia diba, bona oi dekenai do idia gari, oiemu bese Israela taudia ese idia karaia hegeregerena. Bona unai neganai danu bese ibounai do idia diba, inai lau ese lau haginia Dubu Helaga, be oi do idia tomadiho henia gabuna.   
\p
\v 34 “Sedira oiemu bese be oi ese do oi hamaoroa, idia dekenai tuari taudia do idia tuari henia. Bema oiemu bese ese inai hanua, bona inai lau haginia Dubu Helaga dekenai edia vairana idia henia, bona oi dekenai idia guriguri neganai,  
\v 35 edia noinoi do oi kamonai, bona guba dekena amo edia guriguri ena anina, kwalimu, idia dekenai do oi henia.   
\p
\v 36 “Sedira oi dekenai oiemu bese taudia do idia kara dika, badina be dika ia karaia lasi tauna ta be lasi, vadaeni oi ese edia dika dainai do oi badu. Bona unai dainai idia dekenai tuari taudia oi koua lasi, vadaeni oiemu bese be tuari do idia lusi. Unai neganai unai kwalimu taudia ese oiemu bese taudia do idia guia, tano ta, kahirakahira, o daudau dekenai do idia hakaua lao.  
\v 37 To unuseni, bema oiemu bese taudia ese mai edia lalona giroa danu oi dekenai do idia noinoi neganai, Lohiabada e, edia guriguri mani do oi kamonai.  
\v 38 Io, sedira oiemu bese taudia ese edia lalona do idia giroa momokani, bona aiemai sene taudia oi henia tano dekenai, bona inai hanua, bona inai, lau haginia Dubu Helaga dekenai edia vairadia do idia henia, oi dekenai do idia guriguri.  
\v 39 Unai neganai oiemu bese taudia edia noinoi do oi kamonai. Oiemu noho gabuna, guba lalonai edia guriguri do oi kamonai, do oi bogahisihisi henidia, bona edia kara dika do oi gwauatao.   
\p
\v 40 “Egu Dirava e, mani emu kara, ai do oi itaia, bona aiemai guriguri inai gabu dekenai do oi kamonai:   
\q1
\v 41 Lohiabada Dirava e, mani emu kara harihari do oi toreisi,  
\q1 oiemu laga-ani gabuna do oi vareai lao,  
\q1 oi bona oiemu Taravatu Maua, oiemu siahu ena toana.  
\q1 Lohiabada Dirava e, mani emu kara,  
\q1 oiemu hahelagaia taudia do oi hanamoa,  
\q1 vadaeni idia ese oiemu mauri do idia atoa,  
\q1 dabua idia atoa bamona,  
\q1 bona oiemu helaga taudia ese oiemu kara namo do idia maolelaia.   
\q1
\v 42 Lohiabada Dirava e, oi ese oi abia hidi king,  
\q1 be do oi rakatania lasi.  
\q1 Oiemu bogahisihisi, oi gwauhamata oiemu hesiai tauna Davida dekenai do oi henia gauna,  
\q1 unai bogahisihisi ena gwauhamata, mani do oi laloa noho.”   
\c 7  
\s1 Dubu Helaga idia hahelagaia  
\p
\v 1 Solomona ese iena guriguri ia haorea, vadaeni lahi be guba dekena amo ia diho, gabua bouboudia bona boubou gaudia idauidau ia gabua ore, bona Lohiabada ena hairaina ese Dubu Helaga ia hahonua.  
\v 2 Vadaeni hahelagaia taudia be dala lasi Lohiabada ena Dubu do idia raka vareai, badina be Lohiabada ena hairaina ese Dubu ia hahonua vadaeni.   
\p
\v 3 Israela taudia ese lahi ia diho mai, bona Lohiabada ena hairaina ese Dubu Helaga ia hahonua idia itaia neganai, idia ese idia tui diho, edia vairadia be ariara tano dekenai idia atoa. Bona idia ese Lohiabada idia tomadiho henia, bona idia hanamoa, idia gwau,  
\q1 “Ita ese Lohiabada do ita hanamoa,  
\q1 badina iena kara ita dekenai be namo herea,  
\q1 bona iena bogahisihisi be do ia noho hanaihanai.”   
\p
\v 4 Unai neganai king Solomona, bona Israela taudia ia danu idia noho ese boubou gaudia Lohiabada dekenai idia henia.  
\v 5 Solomona ese maino karaia boubouna totona boromakau 22,000 bona mamoe 120,000 ia henia. Unai dekena amo king bona Israela taudia ibounai ese Lohiabada ena Dubu Helaga idia hahelagaia.   
\p
\v 6 Hahelagaia taudia be edia gaukara gabudia dekenai idia gini, bona Levi taudia danu, mai edia miusiki gadaralaia gaudia, Lohiabada ena, Davida sibona ese ia karaia gaudia. Vadaeni mai inai miusiki gaudia edia regena danu, bona mai ane danu idia ese Lohiabada idia hanamoa, idia gwau, “Iena lalokau do ia noho hanaihanai.” Inai ane be Davida ese ia hadibadia hegeregerena idia abia. Hahelagaia taudia ese edia kibi idia hiriria, bona Israela taudia ibounai idia gini noho.   
\p
\v 7 Unai dina dekenai Solomona ese danu Dubu ena magu ese ia hagegea ariara gabuna, Dubu Helaga ena vairanai ia noho gabuna be ia hahelagaia. Unuseni king ese boubou vamuna ia gabua, bona paraoa ena boubou bona digara, maino karaia boubou gaudia danu ia henia. Inai bamona ia karaia, badina be auri laboralabora boubou patana, Lohiabada ena vairanai gauna, be bada lasi, hegeregere lasi unai boubou gaudia momo herea ia latanai do idia atoa dainai.   
\p
\v 8 Unai neganai Solomona ese dina 7 lalonai Au Raurau Ruma Maragidia Aria ia karaia, bona Israela taudia ibounai ia danu, hebou bada herea, Hamata idia raka vareai gabuna dekena amo ela bona Aigupito tano ena hetoa gabuna dekena amo Israela taudia be unai aria totona idia haboua mai.  
\v 9 Dina 7 lalonai hebou taudia ese boubou patana hahelagaia totona gaukara idia itaia, bona ma dina 7 lalonai Au Raurau Ruma Maragidia Aria idia karaia. Vadaeni unai aria ena dina namba 8 dekenai hebou helagana idia karaia, aria haorea totona.   
\p
\v 10 Vadaeni hua namba 7 ena dina namba 23 dekenai Solomona ese taunimanima ia siaia, ta ta edia ruma, edia ruma dekenai idia lao. Idia be mai edia moale bona mai edia lalona namo danu, badina be Lohiabada ese iena hanamoa be Davida bona Solomona bona iena bese Israela dekenai ia henia vadaeni.   
\s1 Dirava ese Solomona dekenai ma ia hedinaraia lou  
\p
\v 11 Solomona ese Lohiabada ena Dubu Helaga, bona king ena ruma ia haginia ore, bona ia ese ia palani gaudia ibounai danu ia karaia haorea namonamo neganai,  
\v 12 Lohiabada ese hanuaboi lalonai ia dekenai ia hedinarai, ia gwau, “Solomona e, oiemu guriguri lau kamonai vadaeni, bona inai Dubu Helaga lau abia hidi vadaeni, egu, ma ia be egu boubou do idia henia Dubuna do ia lao.”  
\v 13 Ma Lohiabada ia gwau, “Bema lau ese medu do lau siaia lasi, o uma edia anina ania totona kwadi lau siaia, o bema egu bese dekenai hanaia gorere lau siaia neganai,  
\v 14 bema mai manau danu lau dekenai idia guriguri, bona edia kara dika dekena amo bema edia lalona idia giroa, bona unai kara dika idia rakatania momokani neganai, lau ese guba dekena amo do lau kamonai, bona edia dika do lau gwauatao. Edia tano danu do lau hanamoa lou.   
\p
\v 15 “Harihari inai Dubu Helaga do lau itaia noho, bona iniseni idia gwauraia guriguri do lau kamonai.  
\v 16 Badina inai Dubu Helaga be lau ese lau abia hidi, bona lau hahelagaia vadaeni, egu Ladana be iniseni do ia noho hanaihanai totona. Egu matana bona egu kudouna be iniseni do idia noho nega ibounai.   
\p
\v 17 “Bona oi, Solomona, bema egu vairana dekenai oiemu tamana Davida hegeregerena do oi raka neganai, bona egu Taravatu bona egu oda ibounai oi badinaia neganai,  
\v 18 lau ese oiemu tamana Davida dekenai lau henia gwauhamata do lau badinaia. Gwauhamata be inai: Israela be nega ibounai doko lasi Davida ena tubuna taudia ese do idia gunalaia.   
\p
\v 19 “To bema oi o oiemu bese taudia ese egu Taravatu bona egu oda, oi dekenai lau henia vadaeni gaudia, umui kamonai henia lasi, bona dirava idaudia do umui tomadiho henia neganai,  
\v 20 lau ese lauegu bese taudia inai lau henidia tano dekena amo do lau luludia lao. Inai Dubu Helaga, lau dekenai do idia tomadiho gabuna, lau hahelagaia vadaeni Dubuna danu do lau rakatania. Idau bese taudia ibounai ese unai neganai Israela do idia kirikirilaia, bona do idia hahemaraia momokani.   
\p
\v 21 “Inai Dubu Helaga, harihari idia matauraia noho gauna, be unai neganai, do idia raka hanaia taudia be do idia hoa bada, do idia gwau, ‘Badina dahaka Lohiabada ese inai tano bona inai Dubu Helaga dekenai inai bamona ia karaia?’   
\p
\v 22 “Taunimanima haida do idia haere, do idia gwau, ‘Badina be inai: Israela taudia ese edia Dirava, Lohiabada, idia rakatania. Ia ese Aigupito dekena amo edia sene taudia ia hakaua mai, to idia rakatania. Bona danu, idia ese dirava idaudia idia badinaia, bona idia dekenai idia tomadiho. Unai bamona Israela taudia idia karaia dainai, Lohiabada ese inai dika ibounai idia dekenai ia karaia vadaeni.’ ”   
\c 8  
\s1 Solomona ena gaukara badadia haida  
\p
\v 1 Solomona bona iena gaukara taudia ese Lohiabada ena Dubu Helaga bona Solomona ena ruma idia haginia haorea. Inai gaukara ibounai be lagani 20 lalonai idia karaia haorea.  
\v 2 Vadaeni king Hirama ese ia henia hanuadia be Solomona ese ia haginia lou, bona unai hanua lalonai Israela taudia ia atodia idia noho.   
\p
\v 3 Unai neganai Solomona be Hamata Soba hanua dekenai ia lao, bona ia abia.  
\v 4 Ia ese Tadamoro hanua, tano kaukau lalonai, ia hagoadaia, bona Hamata dekenai idia noho kohu haboua hanuadia ia haginia lou.  
\v 5 Solomona ese danu inai hanua badadia ia haginia lou: Bete Horono ataiai bona henunai hanua ruaosi, idia be hanua aukadia, mai edia magu bona mai magu iduara, auri gaudia.  
\v 6 Bona Balata hanua badana, bona Solomona ena kohu haboua hanuadia ibounai, bona iena kariota hanuadia ibounai, bona iena hosi guia taudia edia hanua, bona Solomona ia ura karaia rumadia ibounai, Ierusalema dekenai bona Lebanona dekenai, bona ia biagua tano ibounai lalonai danu be Solomona ese ia haginia.   
\p
\v 7 Israela tano dekenai idau bese taudia haida idia noho. Idia be Amoro taudia, bona Hiti taudia, bona Perisi taudia, bona Hivi taudia, bona Iebusu taudia.  
\v 8 Guna, inai bese edia taudia momo herea be Israela taudia ese idia alaia ore, to haida sibona idia alaia lasi, idia do noho. Vadaeni Solomona ese inai do noho idau bese taudia ia abia, bona ia fosia, hesiai gaukara mai guia danu idia karaia. Inai bamona gaukara idia karaia noho ia mai bona hari.   
\p
\v 9 To Solomona ese Israela taudia ta ia guia lasi, idia be iena tuari taudia, iena opesa, iena tuari biagudia, bona tuari gunalaia taudia, iena kariota guia taudia, bona iena hosi guia taudia.  
\v 10 Solomona ena gaukara taudia mai guia danu edia gaukara idia naria taudia be ibounai 250.   
\p
\v 11 Solomona ese iena adavana, Aigupito king ena natuna hahine be Davida ena Hanua dekena amo ia hakaua lao, iena ruma, ia haginia gauna lalonai ia atoa, ia noho. Badina Solomona ia gwau, “Egu adavana be Davida, Israela ena king, ena ruma do ia noho lasi, badina be Lohiabada ena Taravatu Maua ia noho guna vadaeni gabudia be helaga.”   
\p
\v 12 Solomona ese gabua bouboudia be Lohiabada dekenai ia henia, ia gabudia gabuna be Dubu Helaga ena vairana dekenai ia haginia boubou patana, Lohiabada ena, ena latanai.  
\v 13 Dina ta ta edia taravatu hegeregerena be Solomona ese unai bouboudia ia henia, Mose ena taravatu hegeregerena, Sabati Dinadia edia, hua matamatadia edia, bona Aria toiosi, lagani ta ta dekena amo idia karaia gaudia, Hatubua Lasi Paraoa Aria, Pura Aria, bona Au Raurau Ruma Maragidia Aria.   
\p
\v 14 Iena tamana Davida ena kara bona oda hegeregerena, Solomona ese hahelagaia taudia edia orea ta ta ia abia hidi, dina ta ta edia gaukara ta ta do idia karaia totona. Bona Levi taudia danu edia gaukara dina ta ta ia gwauraia, ane abia gaukara, bona hahelagaia taudia durua gaukara. Solomona ese danu magu iduara gimaia taudia edia orea ta ta, bona edena iduara be edena orea do idia gimaia daladia be ia gwauraia, Davida ena oda ibounai hegeregerena, badina Davida be Dirava ena tau.  
\v 15 Bona king Solomona ese Davida ena oda ibounai, hahelagaia taudia totona, bona Levi taudia totona, o edia gau haida totona, o edia gaukara kohu haboua rumadia totona, ia badinaia momokani.   
\p
\v 16 Solomona ese iena gaukara ibounai be unai bamona ia karaia namonamo, Dubu ena badina nadi idia atoa, ela bona Dubu idia haginia haorea. Unai dainai Lohiabada ena Dubu Helaga be idia karaia haorea momokani.   
\p
\v 17 Unai neganai Solomona be Esiono Gebere bona Elata dekenai ia lao. Unai gabudia be Davara Kakakaka ena kone dekenai, Edoma ena tano lalonai.  
\v 18 Vadaeni king Hirama ese lagatoi be Solomona dekenai ia siaia, inai lagatoi be Hirama ena lagatoi diba momo taudia ese idia haheaua. Solomona ena lagatoi diba taudia danu ese inai lagatoi idia guia, bona Opiri tano dekenai idia lao, golo momo herea idia mailaia lou, Solomona dekenai idia henia. Inai golo ena metau be 16 toni mai kahana.   
\c 9  
\s1 Sieba ena kwini ese Israela ia vadivadi henia  
\p
\v 1 Sieba tano ena kwini hahine ese Solomona ena kara, bona Lohiabada ese Solomona ia durua sivarai namona ia kamonai, vadaeni Ierusalema dekenai ia mai, henanadai aukadia dekenai Solomona ena laloa do ia tahua totona. Ierusalema dekenai ia ginidae, mai iena hesiai taudia momo, bona mai iena kamelo, kohu momo, aniani ena mamina hanamoa muramura, golo bona davana bada nadidia idia huaia mai. Solomona dekenai ia ginidae neganai, kwini ese iena henanadai ibounai ia nanadaia.  
\v 2 Solomona ese henanadai ibounai dekenai ia haere henia, idia ta be auka lasi ia dekenai.  
\v 3 Sieba ena kwini ese Solomona ena aonega ia kamonai, bona iena ruma badana, Solomona ese ia haginia gauna ia itaia.  
\v 4 Kwini ese Solomona ena aniani patana danu ia itaia, iena gaukara badana naria taudia edia noho ruma, iena hesiai taudia edia kara, bona edia dabua namodia, Solomona ena kapusi bona aniani mailaia taudia, bona iena boubou karadia Dubu Helaga lalonai danu. Inai gau ibounai ia itaia neganai, kwini ese ia hoa bada.   
\p
\v 5 Kwini ese Solomona ia hamaoroa, ia gwau, “Lauegu tano dekenai oiemu kara bona oiemu aonega ena sivarai lau kamonai, be harihari lau itaia, idia be momokani vadaeni.  
\v 6 To unai sivarai lau hamomokania lasi ia mai bona hari lau mai, lau sibona egu matana dekenai lau itaia. Bona momokani, lau idia hamaoroa gauna be kahana sibona! Oiemu aonega bona oiemu kohu momo ese lau kamonai sivarai idia hereaia momokani.  
\v 7 Oiemu hesiai taudia be dahaka moale! Oiemu opesa taudia, dina ibounai oiemu vairanai idia gini, bona oiemu aonega hereva idia kamonai noho, be idia laki bada, ani?  
\v 8 Lohiabada, oiemu Dirava ita hanamoa be namo! Oi dekenai ia laloa dainai, ia ese Israela ena king oi ia halaoa vadaeni. Lohiabada ese Israela taudia ia ura henia, bona ia ura idia noho hanaihanai dainai, ia ese edia king oi ia halaoa vadaeni, oi ese iena Ladana dainai taravatu bona kota maoromaoro do oi haginia goada totona.”   
\p
\v 9 Vadaeni kwini ese king Solomona dekenai harihari gaudia ia henia, golo ibounai 4000 kilogaram bona aniani ena mamina hanamoa muramura, bona davana bada nadi momo herea. Unai aniani hanamoa muramura edia namo hegeregerena be nega ta Iuda lalonai idia davaria lou lasi.   
\p
\v 10 Inai danu, king Hirama bona Solomona ena lagatoi taudia Opiri dekena amo golo idia mailaia gaudia, be Opiri dekena amo danu au namodia, ladana iunipa bona davana bada nadidia idia mailaia.  
\v 11 Unai iunipa audia dekena amo king ese Dubu Helaga ena vadavada, bona iena ruma ena vadavada ia karaia. Unai iunipa au dekena amo danu ane abia taudia edia gita bona unai bamona miusiki gadaralaia gaudia idia karaia. Iunipa audia unai bamona haida be Iuda dekenai idia vareai lou lasi, bona unai bamona audia idia itaia lou lasi ia mai bona hari dina.   
\p
\v 12 Vadaeni king Solomona ese Sieba ena kwini ia ura gaudia ibounai ia henia. King Solomona ena harihari gaudia ese kwini ena noinoi gaudia idia hereaia momokani. Vadaeni hahine be ia toreisi, iena hesiai taudia danu, bona edia tano korikori dekenai idia giroa lou.   
\s1 King Solomona ena kohu momo  
\p
\v 13 Lagani ta ta ibounai king Solomona dekenai idia mailaia golo ena metau be 23,000 kilogaram.  
\v 14 Bona moni haida danu be laolao taudia bona hoihoi taudia bona Arabia king taudia ibounai, bona Israela bona Iuda tano edia biagudia taudia dekena amo Solomona ese ia abia.   
\p
\v 15 King Solomona ese golo kesi badadia 200, hama dekenai idia botaia palaka gaudia ia karaia, kesi ta ta dekenai golo ena metau be 7 kilogaram.  
\v 16 Ma Solomona ese kesi maragidia 300 ia karaia, idia danu be hama dekenai idia botaia palaka gaudia. Idia ta ta dekenai golo ena metau be 3 kilogaram. King Solomona ese unai kesi be ruma ta ena ladana “Lebanona ena Uda Rumana” lalonai ia atoa.   
\p
\v 17 King Solomona ese danu terona badana be elefante edia doana dekena amo ia karaia, bona terona ena kahana be golo namona dekenai ia koua.  
\v 18 Inai terona ena vadavada moia audia ibounai 6, bona king ena aena atoa gauna danu, golo dekenai karaia gauna, be terona danu idia karaia tamona. Terona ena imana atoa gabudia ruaosi edia badibadinai be laiona, koroa gaudia, idia gini.  
\v 19 Laiona koroa gaudia ibounai 12 be unai vadavada moia audia 6 edia duduna ta ta dekenai idia haginia. Terona ta unai bamona be lasi momokani, basileia idauidau ibounai lalonai.   
\p
\v 20 King Solomona ena inua kapusi ibounai be golo. Lebanona ena Uda Rumana lalonai noho mereki, sipunu gaudia ibounai be golo goeva momokani dekenai idia karaia. Solomona ena nega lalonai siliva be davana maragi gauna sibona.  
\v 21 Solomona be mai ena lagatoi momo, davara badana dekenai idia laolao gaudia. Idia be Hirama ena lagatoi danu idia heau lao. Lagani toi toi dekena amo idia giroa mai, golo, siliva, elefante edia doana, maniki badadia bona maniki maragidia idia mailaia.   
\p
\v 22 King Solomona ese kohu momo dekenai bona aonega dekenai king ibounai ia hereaia momokani.  
\v 23 Tanobada ibounai edia king taudia ese Solomona ena aonega, Dirava ese ia henia gauna, idia tahua. Idia ura Solomona dekenai idia mai, iena hereva idia kamonai.  
\v 24 Idia ta ta idia mai neganai, edia harihari gaudia idia mailaia, siliva gaudia bona golo gaudia, bona dabua, bona tuari gaudia, aniani ena mamina hanamoa muramura, hosi bona doniki. Unai bamona gaudia be lagani ta ta ibounai idia mailaia.   
\p
\v 25 Solomona ese danu kariota bona hosi guia taudia ia haboua. Iena hosi bona kariota rumadia ibounai be 4000, bona iena hosi guia taudia ibounai be 12,000. Idia be kariota edia hanua ta ta dekenai idia noho, bona haida be king danu Ierusalema dekenai idia noho.  
\v 26 Solomona ese king ibounai ia biagua, Euperate Sinavai dekena amo ia lao bona Pilistia taudia edia tano, bona ela bona Aigupito ena tano hetoana dekenai.   
\p
\v 27 Solomona be king neganai ia ese siliva be gau anina lasi bamona ia halaoa Ierusalema dekenai, tano ena nadi bamona. Bona sida audia danu be momo herea, sikamoa fig audia bamona.  
\v 28 Solomona ena hosi be Aigupito dekena amo, bona tano ibounai dekena amo ia hoia.   
\s1 Solomona ia mase  
\p
\v 29 Solomona ena kara oredia, matamaia ela bona dokona, be peroveta tauna Natana ena sivarai, Ahaisa, Silono tauna ena peroveta hereva, bona peroveta tauna Ido ena mata hanai hereva Ieroboama Nebata totona, edia Sivarai Buka lalonai idia torea vadaeni.  
\v 30 Solomona be Israela ena kahana ibounai ia gunalaia lagani 40, Ierusalema dekenai.  
\v 31 Vadaeni Solomona ia mase bona Davida ena Hanua dekenai idia guria, bona iena natuna Rehoboama ese iena gabuna dekenai king dagi ia abia.   
\c 10  
\s1 Israela taudia ese Rehoboama idia dagedage henia  
\p
\v 1 Rehoboama ese Sekema dekenai ia lao, badina be Israela taudia ibounai be Sekema dekenai idia lao, edia king do idia halaoa totona.  
\v 2 Ieroboama Nebata be Aigupito dekenai ia noho, Solomona dekena amo ia heau neganai ia lao gabuna. Ieroboama ese Rehoboama ia lao Sekema herevana ia kamonai, vadaeni Ieroboama be Aigupito dekena amo ia giroa mai.  
\v 3 Israela ena mirigini iduhu taudia ese Ieroboama idia boiria, vadaeni Ieroboama bona Israela hebou taudia ibounai idia mai, Rehoboama dekenai idia hereva, idia gwau,  
\v 4 “Oiemu tamana ese aiemai gaukara ia hametaua auka herea. Unai dainai harihari oiemu tamana ena hesiai gaukara auka bona metauna ai dekena amo do oi kokia sisina, vadaeni unai neganai ai ese oiemu hesiai gaukara do ai karaia.”   
\p
\v 5 Rehoboama ia haere, ia gwau, “Do umui raka lao, dina toi hegeregere, ma do umui giroa mai lau dekenai.” Vadaeni, unai mirigini iduhu Israela taudia idia raka lao.   
\p
\v 6 King Rehoboama be tau badadia, iena tamana Solomona ena sisiba taudia dekenai ia lao, idia ia nanadaia, ia gwau, “Umui emui laloa lau dekenai do umui gwauraia, vadaeni inai Israela iduhu taudia dekenai do lau haere.”   
\p
\v 7 Tau badadia ese idia haere henia, idia gwau, “Bema inai taunimanima dekenai oi bogahisihisi henia, bona bema hereva namodia dekena amo oi ese idia oi hamoalea neganai, idia ese oiemu hesiai taudia do idia lao hanaihanai.”   
\p
\v 8 To Rehoboama ese inai tau badadia edia sisiba ia kamonai henia lasi. Ia be eregabe taudia, iena mero dinadia ia mai bona ia bada, ia danu idia noho taudia, bona hari idia be iena sisiba taudia, dekenai ia lao.  
\v 9 Ia ese idia ia nanadaia, ia gwau, “Umui emui laloa be dahaka? Israela iduhu taudia idia ura edia gaukara ena metau do lau hamaragia. Edena bamona idia dekenai do lau haere?”   
\p
\v 10 Eregabe taudia ese Rehoboama dekenai idia haere, idia gwau, “Inai bamona idia dekenai do oi haere, oi gwau, ‘Lauegu ima kwakikwakina maragina ena bada ese egu tamana ena mamuna ena bada do ia hanaia.  
\v 11 Lauegu tamana ese gaukara metau umui dekenai ia atoa, to lau ese emui gaukara be ma do lau habadaia. Tamagu ese varo maragina dekenai umui ia kwadia, to lau ese hosi idia kwadia varo badana dekenai umui do lau kwadia!’ ”   
\p
\v 12 Vadaeni dina toi idia ore, Ieroboama bona Israela ena mirigini iduhu taudia ibounai be Rehoboama dekenai idia mai, king ena hereva hegeregerena.  
\v 13 Vadaeni king ese tau badadia edia sisiba ia kamonai henia lasi. Ia ese Israela ena mirigini iduhu taudia dekenai ia hereva dagedage.  
\v 14 Io, king Rehoboama ese eregabe taudia edia sisiba hegeregerena ia hereva, ia gwau, “Lauegu tamana ese gaukara metau umui dekenai ia atoa, to lau ese iena metau do lau habadaia. Bona egu tamana ese kwadi varo dekena amo umui ia kwadia, to lau ese hosi idia kwadia gauna dekenai umui do lau kwadia.”   
\p
\v 15 Unai dala dekenai king Rehoboama ese Israela ena mirigini iduhu taudia edia ura ia abia dae lasi. To inai bamona kara be Lohiabada ese ia havaraia. Badina inai be Lohiabada ese Ieroboama Nebata ia herevalaia gauna hegeregere. Lohiabada ena hereva be peroveta tauna Ahaisa, Silono tauna ena uduna dekena amo Ieroboama dekenai ia mai vadaeni.   
\p
\v 16 Israela ena mirigini iduhu taudia ibounai idia itaia, king Rehoboama ese edia hereva ia kamonai lasi, vadaeni idia ese king dekenai idia haere, idia gwau, “Davida bona iena bese be ai ura lasi! Dahaka namo ai dekenai idia havaraia? Israela taudia e, iseda ruma dekenai ita giroa lou namo! Rehoboama do ia lao, bona ia ese sibona ia naria be namo!”  
\p Vadaeni unai bamona Israela ena mirigini kahana taudia be Rehoboama dekena amo idia raka siri.   
\p
\v 17 Bona unai dainai Rehoboama ese Iuda tano idia noho taudia sibona edia king ia lao.   
\s1 Israela bona Iuda idia parara  
\p
\v 18 Vadaeni king Rehoboama ese gaukara taudia edia biaguna Adonirama be Israela taudia dekenai ia siaia. To Adonirama be idia dekenai ia ginidae neganai, Israela taudia ese nadi dekenai idia hodoa mase. Unai dainai Rehoboama be karaharaga iena kariota dekenai ia guia, ia heau mauri lou Ierusalema dekenai.  
\v 19 Bona unai negana ia mai bona hari, Israela taudia ese Davida ena tubuna taudia dekena amo idia parara.   
\c 11  
\s1 Semaia ena peroveta hereva  
\p
\v 1 Rehoboama be Ierusalema dekenai ia ginidae neganai, ia ese Iuda iduhu bona Beniamina iduhu taudia ibounai ia haboua, tuari taudia ibounai 180,000. Ia ura tuari dekena amo Israela iduhu taudia do ia halusia, bona do ia gunalaidia lou.   
\p
\v 2 To Dirava ese peroveta tauna ladana Semaia dekenai ia hereva, ia gwau,  
\v 3 “Rehoboama, Solomona ena natuna do oi hamaoroa, Iuda taudia ibounai bona Beniamina taudia ibounai danu do oi hamaoroa, oi gwau,  
\v 4 ‘Lohiabada be inai bamona ia gwau: Do umui lao lasi tuari totona, umui emui varavara, Israela taudia do umui tuari henia lasi. Umui ta ta emui ruma dekenai do umui giroa lao, badina be idia vara gaudia be lauegu ura dekena amo.’ ”  
\p Vadaeni idia ese Lohiabada ena hereva idia kamonai henia, bona Ieroboama tuari henia totona idia lao lasi.   
\s1 Rehoboama ese iena hanua haida ia hagoadaia  
\p
\v 5 Rehoboama be Ierusalema dekenai ia noho. Ia ese tuari koua totona hanua haida Iuda dekenai ia hagoadaia.  
\v 6 Hanua be inai: Betelehema, Etama, Tekoa,  
\v 7 Betesuru, Soko, Adulama,  
\v 8 Gata, Maresa, Sipi,  
\v 9 Adoraimi, Lakisi, Aseko,  
\v 10 Sora, Aialono, Heberona. Idia ibounai be hanua mai edia magudia, Iuda dekenai, bona Beniamina dekenai.  
\v 11 Edia gabu aukadia ia hagoadaia, bona biagudia ia abia hidi, inai gabu ta ta ibounai dekenai ia atodia. Ma inai gabudia ibounai dekenai aniani bona olive dehoro bona uaina ia haboua.  
\v 12 Hanua ibounai lalonai kesi bona io ia atodia, bona idia ibounai ia hagoadaia momokani. Unai dala dekenai Rehoboama ese Iuda bona Beniamina ia dogoatao, iena basileia.   
\s1 Hahelagaia taudia tona Levi taudia be Iuda dekenai idia mai  
\p
\v 13 Hahelagaia taudia bona Levi taudia be edia noho gabudia ibounai Israela dekena amo idia mai, Rehoboama dekenai idia haboua.  
\v 14 Levi taudia ese edia rei gabudia bona edia tano idia rakatania, Iuda bona Ierusalema dekenai idia lao, badina be Ieroboama bona iena bese taudia ese Lohiabada ena helaga gaukara dekena amo idia hadokodia vadaeni.  
\v 15 Bona Ieroboama ese sibona ena hahelagaia taudia ia abia hidi, ataiai idia noho tomadiho gabudia dekenai do idia gaukara totona. Inai hahelagaia taudia ese danu lauma dikadia bona kaivakuku, boromakau tau edia laulau gaudia, idia tomadiho henia.   
\p
\v 16 Vadaeni Israela iduhu ibounai dekena amo, idia ura Lohiabada, Israela ena Dirava do idia tomadiho henia momokani taudia be Levi taudia edia murinai idia raka, Ierusalema dekenai idia lao. Unai bamona idia karaia, edia sene taudia edia Dirava, Lohiabada dekenai bouboudia do idia henia totona.  
\v 17 Inai kara ese Iuda basileia ia hagoadaia, bona lagani toi lalonai unai Israela taudia ese Rehoboama, Solomona ena natuna idia durua noho. Badina be unai lagani toi lalonai Rehoboama ese Davida bona Solomona edia kara ia badinaia.   
\s1 Rehoboama ena bese taudia  
\p
\v 18 Rehoboama ese Mahalata ia adavaia. Unai hahine be Ierimoto, Davida ena natuna bona Abihaili edia natuna. Abihaili be Eliaba Iese ena natuna hahine.  
\v 19 Unai hahine Mahalata ese Rehoboama dekenai natuna tau toi ia havaraia, Ieusu, Semaraia bona Sahama.   
\p
\v 20 Gabeai Rehoboama ese Maka, Abesaloma ena tubuna hahine ia adavaia, bona Maka ese Rehoboama dekenai natuna tau 4 ia havaraia, Abaisa, Atai, Sisa, bona Selomiti.  
\v 21 Rehoboama ese Abesaloma ena tubuna hahine Maka ia lalokau henia bada, iena adavana oredia bona iena adavana maragidia, hesiai hahine, ia lalokau henidia maragi. Inai Rehoboama ena adavana korikoridia be ibounai 18, bona iena adavana maragidia be ibounai 60. Iena natuna tau be 28, bona iena natuna hahine be 60.   
\p
\v 22 Rehoboama ese Maka ena natuna tau Abaisa ia abia hidi, Abaisa ese iena tadikakana ibounai edia lohia do ia lao totona. Bona Rehoboama ese danu Abaisa ia abia hidi, iena gabu dekenai king dagi do ia abia totona.  
\v 23 Rehoboama ese mai aonega danu iena natuna tau ta ta dekenai gaukara badadia ia henia. Iuda bona Beniamina edia hanua mai magu aukadia dekenai ia siaidia, idia ese unai hanua do idia biagua totona. Kohu momo ia henidia, bona adavana momo ia henidia.   
\c 12  
\s1 Aigupito taudia ese Iuda taudia idia tuari henia  
\p
\v 1 Rehoboama ese iena king siahuna ia haginia auka murinai, ia bona iena basileia taudia ese Lohiabada ena Taravatu idia rakatania.  
\v 2 Lohiabada idia badinaia lasi dainai, king Rehoboama ena lohia lagani namba 5 lalonai Sisaka, Aigupito ena king ese Ierusalema ia tuari henia.   
\p
\v 3 Sisaka ena kariota be 1200, iena hosi guia taudia be 60,000, bona iena tuari taudia be duahia diba lasi. Sisaka danu Aigupito dekena amo idia mai tuari taudia momo be Libia taudia, Suki taudia, bona Etiopia taudia.  
\v 4 Vadaeni Sisaka ese Iuda hanuadia mai edia magu ia abia, bona Ierusalema dekenai ia raka mai.   
\p
\v 5 Peroveta tauna Semaia be Rehoboama bona Iuda lohia taudia, Sisaka dainai Ierusalema dekenai idia haboua taudia dekenai ia lao. Idia ia hamaoroa, ia gwau, “Lohiabada ese inai bamona umui ia hamaoroa: Umui ese lau umui rakatania vadaeni, unai dainai lau ese umui lau rakatania, Sisaka ese umui do ia hadikaia totona.”   
\p
\v 6 King Rehoboama bona iena lohia taudia be mai manau danu edia kara dika idia gwauraia, bona idia gwau, “Lohiabada be maoromaoro.”   
\p
\v 7 Lohiabada ese edia manau kara ia itaia neganai, ia ese Semaia dekenai ia hereva lou, ia gwau, “Mai manau danu edia dika idia gwauraia dainai, lau ese idia do lau hadikaia ore lasi, to idia do lau hamauria. Egu badu be Ierusalema ena latanai do lau bubua lasi Sisaka dekena amo.  
\v 8 To gau tamona, idia ese Sisaka ena hesiai gaukara do idia karaia, vadaeni idau bese edia hesiai gaukara ena mamina, bona egu hesiai gaukara ena idau ena mamina do idia diba.”   
\p
\v 9 Sisaka, Aigupito ena king ese Ierusalema ia tuari henia neganai ia ese Lohiabada ena Dubu Helaga ena kohu namo herea, bona king ena ruma ena kohu namodia ia abia lao. Gau ibounai ia abia, golo kesi namodia danu, Solomona ese ia karaia gaudia ibounai ia abia lao.   
\p
\v 10 Vadaeni king Rehoboama ese unai kesi edia gabu dekenai auri laboralabora kesi ia karaia, bona king ena ruma gimaia taudia dekenai inai kesi ia henidia, do idia naridia totona.  
\v 11 King ese Lohiabada ena Dubu Helaga dekenai ia raka vareai negadia ibounai, unai gima taudia ese unai kesi idia abia lao, king danu idia lao, bona gabeai gima taudia ese gima ruma dekenai ma idia atodia lou.   
\p
\v 12 Rehoboama ese Lohiabada ena vairanai ia sibona ia manau karaia dainai, Lohiabada ese iena badu ia dekena amo ia kokia, bona ia hadikaia momokani lasi. Unai dainai taunimanima edia noho be namo Iuda dekenai.   
\p
\v 13 Unai dainai king Rehoboama be Ierusalema dekenai ia lohia karaia noho, bona iena king siahuna ia habadaia noho. King dagi ia abia hamatamaia neganai iena mauri lagani be 41, bona iena lohia lagani ibounai be 17, Ierusalema dekenai. Lohiabada ese Israela iduhu ibounai edia huanai dekena amo Ierusalema ia abia hidi, unuseni iena bese do idia tomadiho henia totona.  
\p Rehoboama ena sinana be Namaha, Amono bese hahine ta.  
\v 14 Rehoboama ese kara dika ia karaia, badina ia ese mai ena kudouna ibounai danu Lohiabada ia tahua lasi.   
\p
\v 15 King Rehoboama ena kara, matamaia ela bona dokona, be peroveta taudia Semaia bona Ido edia Sivarai Bukadia lalonai idia torea vadaeni. Rehoboama bona Ieroboama be nega ibounai idia ta ta dekenai idia tuari henia.   
\p
\v 16 Vadaeni Rehoboama ia mase, bona Davida ena Hanua lalonai idia guria, iena tubuna bona tamana edia guria gabuna dekenai. Rehoboama ena gabu dekenai iena natuna Abaisa ese king dagi ia abia.   
\c 13  
\s1 Abaisa bona Ieroboama idia tuari  
\p
\v 1 Israela ena king, Ieroboama, Nebata ena natuna, be lagani 18 ia king neganai, Abaisa ese Iuda ena king dagi ia abia hamatamaia.  
\v 2 Abaisa be lagani toi lalonai Ierusalema dekenai ia lohia. Iena sinana be Maka, Gibea tauna, Uriele ena natuna hahine ta.  
\p Abaisa bona Ieroboama be idia ta ta dekenai idia tuari henia hamatamaia.  
\v 3 Abaisa ese tuari taudia 400,000 ia abia hegaegae, bona Ieroboama ena tuari taudia be 800,000.   
\p
\v 4 Unai tuari orea ruaosi be Eparaima ororo tano dekenai idia haboua. King Abaisa be Semaraima Ororo ena latanai ia gini, bona Ieroboama bona Israela taudia dekenai ia boiboi, ia gwau, “Egu hereva umui kamonai!  
\v 5 Umui diba lasi a, Lohiabada, Israela ena Dirava, ese Israela basileia be Davida bona iena bese taudia dekenai ia henia ela bona hanaihanai, damena dekena amo ia hamomokania gwauhamata dekenai?  
\v 6 To Ieroboama Nebata, Solomona Davida ena hesiai tauna be ia toreisi, iena king ia dagedage henia.  
\v 7 Bona ia ese kara dika taudia haida be ia dekenai ia haboua, Rehoboama Solomona idia dagedage henia. Unai neganai Rehoboama be eregabe bona laloa manoka tauna, bona ia ese ia koudia diba lasi.   
\p
\v 8 “Harihari umui haboua mai, Lohiabada ese Davida ena bese dekenai ia henia king siahuna do umui tuari henia gwauraia. Umui emui tuari orea be momo herea, bona umui ese golo boromakau tau, emui dirava totona Ieroboama ese ia karaia gaudia umui abia mai danu.  
\v 9 To umui ese Lohiabada ena hahelagaia taudia, Arona ena bese taudia bona Levi taudia umui lulua lao. Edia gabudia dekenai umui sibona emui ura taudia, be emui hahelagaia taudia umui halaoa, idau bese taudia idia karaia hegeregerena, a? Bema tau ta do ia mai, boromakau tau o mamoe tau 7 do ia mailaia, sibona do ia hahelagaia totona, ia ese hahelagaia tauna ena dagi ia abia diba, a? Lasi, unai tau be dirava ta lasi ena hahelagaia tauna.   
\p
\v 10 “To aiemai Dirava be Lohiabada, ai ese ai rakatania lasi. Ai be mai aiemai hahelagaia taudia, bona idia ese Lohiabada ena hesiai gaukara idia karaia noho. Idia be Arona ena bese taudia, bona Levi taudia ese idia durudia noho.  
\v 11 Daba ibounai bona adorahi ibounai idia ese gabua bouboudia, bona mai bonana namo muramura, Lohiabada dekenai idia henia noho. Paraoa helagana be pata helagana ena latanai idia atoa, bona adorahi ibounai idia ese lamepa idia gabua noho, lamepa namona, golo gauna, ena latanai. Ai ese Lohiabada, aiemai Dirava ena hereva ai badinaia noho, to umui ese Lohiabada umui rakatania vadaeni.  
\v 12 Kamonai, Dirava be ai dekenai ia noho, ia ese ai ia gunalaia noho. Iena hahelagaia taudia ese edia kibi do idia hiriria, umui dekenai do ai tuari henia totona. Israela besena e, Lohiabada, emui sene taudia edia Dirava do umui tuari henia lasi, badina do umui kwalimu diba lasi.”   
\s1 Iuda ese Israela ia halusia  
\p
\v 13 To Ieroboama ese iena tuari taudia orea ta hunia dekenai ia siaia, Iuda taudia edia murina kahana do idia lao, vadaeni Iuda taudia edia vairana kahanai be tuari orea ia noho, bona edia murina kahana danu be unai tuari orea hunia taudia idia noho.  
\v 14 Iuda taudia ese edia matana idia negea, idia itaia tuari be edia vairanai bona edia murinai danu, vadaeni idia ese Lohiabada dekenai durua totona idia boiboi henia, bona hahelagaia taudia ese kibi idia hiriria.  
\v 15 Vadaeni Iuda taudia ese tuari ena boiboi badana ena regena idia karaia hamatamaia. Iuda taudia idia boiboi noho neganai, Dirava ese Ieroboama bona Israela taudia ibounai ia halusia, Abaisa bona Iuda taudia edia vairanai.  
\v 16 Israela taudia ese Iuda taudia edia vairanai idia heau, bona Dirava ese Iuda taudia edia siahu henunai ia atodia.  
\v 17 Abaisa bona iena tuari taudia ese idia aladia mase, ala-ala bada herea. Israela ena tuari taudia goadadia ibounai 500,000 idia mase.  
\v 18 Unai neganai Israela taudia idia lusi bona Iuda taudia idia kwalimu, badina be Iuda taudia ese Lohiabada, edia sene taudia edia Dirava idia abidadama henia dainai.   
\p
\v 19 Vadaeni Abaisa ese Ieroboama ia lulua, bona hanua haida Ieroboama dekena amo ia abia, Betele, mai ena hanua maragidia danu, bona Iesana, mai ena hanua maragidia danu, bona Eparona, mai ena hanua maragidia danu.  
\v 20 King Ieroboama ese iena siahu ia abia lou lasi Abaisa ena nega lalonai. Lohiabada ese Ieroboama ia botaia diho, vadaeni ia mase.   
\p
\v 21 To Abaisa be ia goada noho. Ia ese hahine 14 ia adavaia, bona iena natuna tau be 22, iena natuna hahine be 16.  
\v 22 Abaisa ena sivarai orena, iena kara bona iena hereva, be peroveta tauna Ido ena Sivarai Buka lalonai idia torea vadaeni.   
\c 14  
\p
\v 1 Vadaeni Abaisa ia mase, bona Davida ena Hanua lalonai idia guria, iena tubuna bona tamana edia guria gabuna dekenai. Abaisa ena gabu dekenai iena natuna Asa ese king dagi ia abia. Asa iena lohia nega lalonai tano be ia maino noho, lagani 10 lalonai.   
\s1 King Asa, Iuda ena king  
\p
\v 2 Asa ese kara namodia bona kara maoromaoro, Lohiabada, iena Dirava, ena vairana dekenai ia karaia.  
\v 3 Ia ese idau dirava edia boubou patadia bona ataiai idia noho tomadiho gabudia ia kokia ore, bona nadi dekenai idia karaia du helagadia ia hamakohia, bona kaivakuku ia utua bona hadikaia.  
\v 4 Asa ese danu Iuda taudia ia oda henia, Lohiabada, edia sene taudia edia Dirava do idia tahua, bona iena Taravatu bona oda do idia badinaia.  
\v 5 Iuda hanua ibounai edia lalonai Asa ese ataiai idia noho tomadiho gabudia, bona bonana namo muramura patadia ia kokia ore dainai, iena basileia be mai maino danu ia noho.  
\v 6 Asa ese danu hanua mai edia magu danu Iuda tano dekenai ia haginidia, badina tano be mai maino danu. Lagani momo lalonai tuari ia vara lasi, badina be Lohiabada ese Asa dekenai maino ia henia.   
\p
\v 7 Asa ese Iuda taudia ia hamaoroa, ia gwau, “Iseda hanua badadia do ita hagoadaia namo, magu bona kohoro bona magu iduara, auri ba bona auri loka dekenai ita koua diba gaudia do ita haginia. Tano be ita dekenai ia do noho, badina be Lohiabada, iseda Dirava ita tahua vadaeni. Iena ura ita tahua dainai ia ese tano kahana ibounai dekenai maino ita dekenai ia henia.” Unai dainai, idia ese hanua idia haginidia goada, bona edia noho be namo.   
\p
\v 8 Asa ena tuari orea be inai: Iuda taudia ibounai 300,000, mai edia kesi badadia bona io, bona Beniamina taudia ibounai 280,000, mai edia kesi maragidia bona peva. Inai ibounai be goada momokani taudia.   
\s1 Asa ese Etiopia taudia ia halusia  
\p
\v 9 Sera, Etiopia tauna, be tuari henia totona ia mai. Iena tuari taudia be 1,000,000, bona iena kariota be 300. Idia raka mai ela bona Maresa dekenai idia ginidae.  
\v 10 Asa be idia do ia tuari henia totona ia raka lao, vadaeni tuari orea ruaosi be Maresa kahirakahira, Sepata Koura dekenai, tuari totona idia gini hegaegae.  
\v 11 Vadaeni Asa ese Lohiabada, iena Dirava, dekenai ia noinoi, ia gwau, “Lohiabada e, oi tamona sibona ese manoka taudia oi durua noho, vadaeni idia ese goada taudia idia halusia diba. Lohiabada, aiemai Dirava e, mani ai do oi durua, badina oi dekenai ai abidadama henia noho inai, bona oiemu ladana dekenai inai tuari orea badana do ai tuari henia. Lohiabada e, oi be aiemai Dirava, inai orea do oi halusia, badina taunimanima be idia gini diba lasi oiemu vairana dekenai.”   
\p
\v 12 Vadaeni, Asa bona Iuda taudia idia tuari henidia, bona Lohiabada ese Etiopia taudia ia halusia. Etiopia taudia be idia heau.  
\v 13 Asa bona iena tuari taudia ese idia luludia lao ela bona Gerara. Idia ese Etiopia taudia momo herea idia alaia mase dainai, tuari totona idia gini lou diba lasi. Lohiabada bona iena tuari taudia ese idia kwalimu momokani, bona Iuda taudia ese kohu momo herea idia abia.  
\v 14 Unai neganai Iuda taudia ese Gerara kahana hanua ibounai idia hadikaia ore, badina be unai gabudia noho taudia ese Lohiabada dekenai idia gari bada herea. Iuda taudia ese hanua ibounai dekena amo kohu idia abia, davana bada kohudia.  
\v 15 Idia ese danu boromakau bona mamoe idia naria noho taudia edia palai rumadia idia hadikaia ore, bona mamoe bona kamelo momo idia abia lao. Unai neganai Iuda taudia be Ierusalema dekenai idia giroa lou.   
\c 15  
\s1 King Asa ena kara namodia  
\p
\v 1 Dirava ena Lauma ese Asaraia Odede ena latanai ia mai,  
\v 2 vadaeni Asa hedavari totona ia raka lao. Ia hereva henia, ia gwau, “Asa e, bona Iuda bona Beniamina taudia ibounai e, lau dekenai do umui kamonai! Umui be Lohiabada dekenai umui noho neganai, ia ese umui dekenai danu ia noho. Bema Lohiabada umui tahua, umui ese do umui davaria. To bema umui rakatania, ia ese umui do ia rakatania.  
\v 3 Nega daudau Israela taudia ese Dirava Momokani dekenai idia tomadiho henia lasi, bona edia hahelagaia tauna momokani, hadibaia tauna unai, be lasi. Idia dekenai danu taravatu be lasi.  
\v 4 To hisihisi idia davaria neganai, idia ese Lohiabada, Israela ena Dirava dekenai idia giroa, bona idia tahua, vadaeni idia davaria.  
\v 5 Unai dinadia neganai, laolao taudia edia dala be mai gari bada danu, tano ibounai dekenai maino be lasi dainai.  
\v 6 Bese ta ta ese bese ta ta dekenai idia tuari henia, bona hanua ta ta taudia ese hanua ta ta taudia dekenai idia heatu henia, badina be Dirava ese hisihisi idauidau, be idia edia latanai ia atoa.  
\v 7 To umui Iuda taudia ese gaukara namona do umui karaia noho. Do umui gini goada, bona do umui laloa manoka lasi, badina davana namona do umui davaria Dirava dekena amo.”   
\p
\v 8 Asa ese Asaraia Odede ena peroveta hereva ia kamonai neganai, iena lalona ia goada, bona ia ese Iuda bona Beniamina dekenai noho kaivakuku ia kokia ore. Ma kaivakuku haida, Eparaima ena ororo tano dekenai, tuari dekenai ia abia hanua dekenai noho kaivakuku, danu ia kokia ore. Ma Lohiabada ena Dubu Helaga ena dehena ena vairana dekenai ia noho boubou patana danu, be Asa ese ia hanamoa lou.   
\p
\v 9 Israela taudia momo herea be Asa dekenai idia hanaia mai vadaeni, badina idia itaia Lohiabada be Asa dekenai ia noho. Inai Israela taudia be Iuda kahana taudia edia huanai idia noho, vadaeni Asa ese Eparaima bona Manase, bona Simeona iduhu taudia bona Iuda bona Beniamina taudia ia boiria hebou.   
\p
\v 10 Inai taudia be Asa ena lohia lagani namba 15, hua ihatoina lalonai Ierusalema dekenai idia haboua.  
\v 11 Unai dina dekenai idia ese boubou gaudia, tuari dekenai idia abia gaudia, boromakau tau 700 bona mamoe 7000, be Lohiabada dekenai idia henia.  
\v 12 Unai hebou taudia ese gwauhamata taravatuna idia gwauraia, Lohiabada, edia sene taudia edia Dirava do idia tahua momokani, mai edia kudoudia bona mai edia laumadia ibounai danu.  
\v 13 Bona daika ese Lohiabada, Israela ena Dirava do ia tahua lasi, ia be do idia alaia mase, eregabe, o buruka, tau o hahine.   
\p
\v 14 Hebou taudia ese inai gwauhamata Lohiabada ena ladana dekenai idia henia, mai gadodia badadia bona mai boiboi badadia danu. Mai auri kibidia dekenai, bona doa kibidia edia regena danu inai gwauhamata idia karaia.  
\v 15 Vadaeni Iuda tano dekenai noho taudia ibounai ese unai gwauhamata dekenai idia moale, badina be mai edia kudoudia ibounai danu idia gwauhamata, bona mai edia ura ibounai danu Lohiabada idia tahua vadaeni, bona idia ese ia idia davaria. Bona Lohiabada ese idia dekenai maino ia henia, edia tano kahana ibounai dekenai.   
\p
\v 16 King Asa ese danu iena tubuna hahine, Maka, ena kwini dagi ia kokia ore, badina be ia ese kaivakuku dikana ta ia karaia, Asera hahine dirava ena. Asa ese unai kaivakuku ia utua diho, ia utua maragimaragi, bona Kiderona Sinavai ena badibadinai ia gabua ore.  
\v 17 To Asa ese ataiai idia noho tomadiho gabudia Israela dekenai ia kokia ore lasi. Momokani inai bamona ia karaia lasi, to Asa be iena mauri dinadia ibounai lalonai, ia ese Lohiabada ia badinaia mai momokani danu.  
\v 18 Asa ese danu iena tamana Abaisa ena harihari gaudia, bona ia sibona ena harihari gaudia Lohiabada dekenai ia henia siliva bona golo gaudia idauidau, be Lohiabada ena Dubu Helaga lalonai ia atodia vareai.   
\p
\v 19 Tuari be ia vara lou lasi, ela bona Asa ena lohia lagani namba 35.   
\c 16  
\s1 Asa ese Suria ena durua abia totona moni ia henia  
\p
\v 1 Asa ena lohia lagani namba 36 lalonai, Basa, Israela ena king, be ia daekau lao, Iuda do ia tuari henia totona. Ia ese Rama hanua ia hagoadaia, Asa ena basileia dekenai lao bona mai taudia eda dala koua totona.   
\p
\v 2 Unai dainai king Asa ese Lohiabada ena Dubu Helaga, bona king ena ruma dekena amo siliva bona golo ia abia, bona iena hesiai taudia haida edia imana dekenai ia atoa. Asa ese Damaseko dekenai ia siaidia, Suria ena king, Benehadada dekenai, bona idia dekena amo inai hereva ia gwauraia:  
\v 3 “Ita ruaosi do ita maino karaia, lauegu tamana bona oiemu tamana hegeregerena. Mani oi itaia, inai siliva bona golo be oi dekenai lau siaia, idia be harihari gauna, oiemu. Mani emu kara, Israela ena king Basa danu emui maino karaia, be do oi makohia, vadaeni ia ese iena tuari taudia egu tano dekena amo do ia abidia lou.”   
\p
\v 4 King Benehadada ese king Asa ia kamonai henia, bona iena tuari biagudia mai edia tuari taudia danu ia siaia, Israela hanua haida idia tuari henia. Benehadada ese Iono, Dano, Abele Betemaka, bona Napatali ena kohu haboua hanuadia ibounai ia halusia, bona ia abia.   
\p
\v 5 King Basa be inai sivarai ia kamonai, vadaeni Rama hagoadaia gaukara ia hadokoa, bona unai gabu ia rakatania.   
\p
\v 6 Unai neganai king Asa ese Iuda taudia ibounai ia haboua, bona ia oda henidia idia ese Rama dekenai idia noho nadi bona au, Basa ese ia haginia gaudia, do idia huaia lao siri. Vadaeni unai nadi bona au dekena amo idia ese Geba hanua, bona Misipa hanua idia hagoadaia.   
\s1 Peroveta tauna Hanani  
\p
\v 7 Unai neganai peroveta tauna, Hanani, be Asa, Iuda ena king dekenai ia lao, ia gwau, “Oi ese Suria ena king oi abidadama henia, to Lohiabada, oiemu Dirava, oi abidadama henia lasi. Bona unai dainai Israela king ena tuari orea be oiemu imana dekena amo idia heau mauri vadaeni.  
\v 8 Etiopia taudia bona Libia taudia be orea bada herea lasi, a? Edia kariota bona hosi guia taudia be momo herea lasi, a? To oi ese Lohiabada oi abidadama henia dainai, ia ese kwalimu idia dekena amo oi dekenai ia henia.  
\v 9 Badina be Lohiabada ena matana ese tanobada ena kahana ibounai idia itaia noho, ia ese ia dekenai idia badinaia momokani taudia do ia hagoadaia totona. Oi ese kara kavakavana oi karaia vadaeni, bona unai dainai hari ia lao, tuari be nega ibounai do idia vara oi dekenai.”   
\p
\v 10 Unai hereva dainai Asa ese inai peroveta tauna dekenai ia badu henia, vadaeni dibura ruma ena lalonai ia atoa. Asa ese danu unai neganai taunimanima haida ia dagedage henia.   
\s1 King Asa ia mase  
\p
\v 11 Asa ena kara, matamaia ela bona dokona, be Iuda bona Israela King Taudia Edia Sivarai Buka lalonai idia torea vadaeni.  
\v 12 Iena lohia lagani namba 39 lalonai, Asa ese iena aena dekenai hisihisi ia davaria, bona ena hisihisi ia bada lao noho. To iena hisihisi lalonai danu Asa ese Lohiabada ia tahua lasi, to muramura taudia edia durua sibona ia tahua.  
\v 13 Vadaeni Asa be iena lohia lagani 41 lalonai ia mase, bona iena tubuna bona tamana danu ia laga-ani.  
\v 14 Davida ena Hanua dekenai idia guria, ia sibona ese ia geia nadi kohua lalonai. Pata ta ena latanai Asa ena tauanina idia atoa, ia hekure. Unai pata be muramura mai bonana namona idauidau momo dekena amo idia hahonua. Bona ia do idia matauraia bona laloa noho totona, idia ese lahi badana momokani idia karaia.   
\c 17  
\s1 King Iehosapata, Iuda ena king  
\p
\v 1 Asa ena gabu dekenai iena natuna tau Iehosapata ese king dagi ia abia. Iehosapata ese iena goada ia habadaia, Israela do ia tuari henia totona.  
\v 2 Ia ese tuari taudia ia atodia, Iuda ena hanua mai magudia ibounai lalonai idia noho hegaegae totona. Iuda tano dekenai bona Eparaima tano dekenai, iena tamana Asa ese ia abia hanuadia danu dekenai Iehosapata ese gima taudia edia orea ia atoa.   
\p
\v 3 Lohiabada be Iehosapata dekenai ia noho, badina ia be iena tamana ena dala gunadia dekenai ia raka, bona ia ese Bala dirava ia tahua lasi.  
\v 4 Iehosapata ese iena tamana ena Dirava ia tahua, bona Dirava ena oda hereva ia kamonai henia. Ia ese Israela king taudia edia kara ia karaia lasi.   
\p
\v 5 Lohiabada ese Iehosapata ia durua dainai, iena basileia Iuda be ia ese ia biagua mai goada danu, bona iena taunimanima ibounai ese harihari gaudia ia dekenai idia mailaia. Unai dainai ia be mai ena kohu momo, bona taunimanima ese ia idia matauraia bada.  
\v 6 Iehosapata ese mai ena kudouna ibounai danu Lohiabada ena dala ia badinaia, bona ia ese ataiai idia noho tomadiho gabudia, bona hahine dirava Asera ena kaivakuku ibounai ia kokia Iuda dekena amo.   
\s1 Taunimanima idia hadibaia  
\p
\v 7 Ena lohia lagani namba 3 lalonai Iehosapata ese iena lohia taudia haida ia siaia lao, Iuda hanua dekenai taunimanima do idia hadibaia totona. Inai lohia taudia edia ladadia be inai: Benehaili, Obadaia, Sekaraia, Netanele, bona Mikaia.  
\v 8 Idia danu be Levi taudia 9 bona hahelagaia taudia rua. Levi taudia be inai: Semaia, Netanaia, Sebadaia, Asahele, Semiramoto, Iehonatana, Adonaisa, Tobaisa, bona Tobadonaisa. Hahelagaia taudia be inai: Elisama bona Iehorama.  
\v 9 Inai taudia ese Lohiabada ena Taravatu Buka idia abia lao, bona Iuda ena hanua ibounai lalonai taunimanima dekenai inai taravatu ena anina idia hadibaia.   
\s1 Iehosapata ena siahu ia bada lao  
\p
\v 10 Iuda idia hagegea basileia ibounai ese Lohiabada dekenai idia gari bada herea, vadaeni idia ta ese Iehosapata dekenai idia tuari henia lasi.  
\v 11 Pilistia taudia haida ese harihari gaudia bona siliva momo be Iehosapata dekenai idia mailaia. Arabia taudia ese danu mamoe tau 7700 bona nanigosi 7700 Iehosapata dekenai idia mailaia.   
\p
\v 12 Vadaeni Iehosapata ena siahu ia bada lao. Ia ese Iuda tano dekenai kohoro bona kohu haboua hanuadia ia haginia.  
\v 13 Iuda hanua edia lalonai Iehosapata ena kohu be momo herea, bona Ierusalema dekenai tuari diba momo taudia ia atodia hegaegae.  
\v 14 Inai tuari taudia, edia iduhu ta ta dekena amo be inai:  
\q1 Iuda dekena amo: Tuari biaguna badana, Adina. Iena tuari taudia be 300,000.   
\q1
\v 15 Tuari biaguna iharuana, Iehohanana.  
\q1 Iena tuari taudia be 280,000.   
\q1
\v 16 Tuari biaguna ihatoina, Amasaia Sikiri.  
\q1 Iena tuari taudia be 200,000. Amasaia ia ura bada Lohiabada ena hesiai gaukara do ia karaia.   
\q1
\v 17 Beniamina dekena amo: Eliada, goada herea tauna ta. Iena tuari taudia be 200,000, mai edia peva bona edia kesi danu.   
\q1
\v 18 Ia murinai be Iehosabada. Iena tuari taudia be 180,000, mai edia tuari gaudia danu.   
\p
\v 19 Inai be king Iehosapata ena hesiai taudia. Ma haida danu be unai hanua mai edia magu aukadia dekenai idia noho, Iuda tano ena kahana ibounai edia lalonai.   
\c 18  
\s1 Mikaia ena peroveta hereva  
\p
\v 1 Iehosapata be mai ena kohu momo, bona iena ladana be bada. Ia ese dala ia karaia, vadaeni iena natuna ta ese Ahaba, Israela ena king, ena natuna ta ia adavaia.  
\v 2 Lagani haida idia lao, vadaeni Iehosapata ese Samaria hanua dekenai ia lao, Ahaba do ia vadivadi henia totona. Vadaeni Ahaba ese mamoe bona boromakau momo herea ia alaia mase, Iehosapata bona ia danu idia mai taudia edia aria namona ia karaia. Unai neganai Ahaba ese Iehosapata ena lalona ia ania, ia ese do ia durua, idia ruaosi Ramoto Gileada do idia tuari henia totona.  
\v 3 Ahaba, Israela ena king ese Iehosapata, Iuda ena king, ia nanadaia, ia gwau, “Oi be lau danu ita lao, Ramoto Gileada do ita tuari henia, ani?”  
\p Iehosapata ese ia haere henia, ia gwau, “Lau ese oi do lau durua, oi bona lau be tamona, oiemu tuari taudia bona lauegu tuari taudia be tamona.”   
\p
\v 4 To Iehosapata be ma Ahaba dekenai ia hereva, ia gwau, “Lohiabada ena hereva do ita tahua guna.”   
\p
\v 5 Unai dainai Ahaba ese peroveta taudia ia haboua, idia be tau 400 bamona. Idia ia nanadaia, ia gwau, “Ramoto Gileada do lau tuari henia, o do lau tuari henia lasi?”  
\p Peroveta taudia idia haere, idia gwau, “Oi lao, oi tuari henia, badina Lohiabada ese kwalimu oi dekenai do ia henia.”   
\p
\v 6 To Iehosapata ia gwau, “Lohiabada ena peroveta tauna ma ta iniseni ia noho lasi, a, vadaeni do ita nanadaia diba, a?”   
\p
\v 7 Ahaba ia haere, ia gwau, “Tau ta do noho, ia dekena amo Lohiabada ena hereva ita tahua diba, iena ladana be Mikaia, Imila ena natuna. To lau ese ia lau badu henia noho, badina ia be nega ta gau namona lau dekenai ia peroveta lasi, to gau dikadia sibona.”  
\p To Iehosapata ia gwau, “Oi ese unai bamona oi hereva be namo lasi.”   
\p
\v 8 Vadaeni Israela ena king ese iena hesiai tauna ta ia boiria, ia gwau, “Mikaia Imila do oi hakaua mai haraga.”   
\p
\v 9 Unai neganai unai king ruaosi, Ahaba bona Iehosapata, be edia terona dekenai idia helai, mai edia king dabua danu. Uiti kwadia gabuna dekenai idia helai, Samaria hanua magu iduara edia badibadinai, bona peroveta taudia ibounai ese idia edia vairana dekenai idia peroveta noho.  
\v 10 Vadaeni Sedekaia Kenana ese auri doadia ia karaia, bona hereva ia gwauraia, ia gwau, “Lohiabada be ia gwau, inai gaudia dekena amo oi ese Suria taudia do oi gwadaia, ela bona idia hadikadia ore.”   
\p
\v 11 Peroveta taudia ibounai danu ese unai bamona idia peroveta. Idia gwau, “Ramoto Gileada do oi tuari henia, bona do oi kwalimu, badina be Lohiabada ese oiemu siahu henunai do ia atoa.”   
\p
\v 12 Hesiai tauna be Mikaia boiria totona ia lao, vadaeni hesiai tauna ese ia hamaoroa, ia gwau, “Oi kamonai, peroveta taudia edia hereva be tamona vadaeni, idia gwau Ahaba be do ia kwalimu. Namo oi ese edia hereva do oi durua.”   
\p
\v 13 To Mikaia ia gwau, “Mauri Lohiabada ena ladana dainai lau gwauhamata inai, lau ese Lohiabada ena hereva lau dekenai sibona do lau hamaoroa.”   
\p
\v 14 Mikaia be king ena vairana dekenai ia ginidae, vadaeni Ahaba ese ia nanadaia, ia gwau, “Mikaia, ai ese Ramoto Gileada be do ai tuari henia o lasi?”  
\p Mikaia ia haere, ia gwau, “Oi lao, kwalimu do oi davaria, badina be Lohiabada ese oi do ia durua.”   
\p
\v 15 To king Ahaba ma Mikaia dekenai ia hereva, ia gwau, “Lau dekenai oi hereva, Lohiabada ena ladanai neganai, hereva momokani sibona do oi gwauraia. Nega hida unai bamona oi dekenai do lau oda henia?”   
\p
\v 16 Mikaia ia haere, ia gwau, “Lau ese Israela tuari taudia ibounai lau itaia, ororo dekenai idia heau lao, heau mai, edia mamoe naria tauna be lasi bamona. Vadaeni Lohiabada ia gwau, ‘Inai be biaguna lasi taudia, idia ta ta edia ruma dekenai do idia lao be namo, mai maino danu.’ ”   
\p
\v 17 Ahaba ese Iehosapata ia hamaoroa, ia gwau, “Oi lau hamaoroa, ani, ia be hereva namona ta lau dekenai ia gwauraia lasi, to hereva dikadia sibona?”   
\p
\v 18 Mikaia ma ia gwau, “Harihari Lohiabada ena hereva umui kamonai: Lohiabada be iena terona dekenai ia helai, lau itaia, bona guba ena aneru ibounai iena badibadinai idia gini noho, idiba kahanai, bona lauri kahanai danu.  
\v 19 Lohiabada ese aneru ia nanadaia, ia gwau, ‘Daika ese Ahaba do ia koia, vadaeni do ia lao, Ramoto Gileada dekenai do ia mase?’   
\p
\v 20 “Vadaeni lauma ta ia raka vaira, Lohiabada ena vairana dekenai ia gini, ia gwau, ‘Lau ese do lau koia.’  
\v 21 Lohiabada ese ia nanadaia, ia gwau, ‘Edena dala dekenai do oi koia?’  
\p “Lauma ese ia haere, ia gwau, ‘Lau be koikoi laumana do lau lao, Ahaba ena peroveta taudia edia uduna dekenai koikoi do lau atoa.’  
\p “Lohiabada ia gwau, ‘Do oi koia, bona oiemu koikoi dekenai do oi kwalimu. Oi lao, unai bamona do oi karaia.’ ”   
\p
\v 22 Bona Mikaia ese iena hereva ia hadokoa, ia gwau, “Inai bamona ia vara vadaeni. Lohiabada ese koikoi laumana oiemu peroveta taudia ibounai edia uduna dekenai ia atoa. Lohiabada ese hereva dikana oiemu latanai ia gwauraia vadaeni.”   
\p
\v 23 Unai neganai peroveta tauna Sedekaia Kenana ia raka vaira, ia ese Mikaia ena vairana ia botaia, ia nanadaia, ia gwau, “Lohiabada ena Lauma be edena bamona lau ia rakatania, bona oi dekenai ia hereva, a?”   
\p
\v 24 Mikaia ia haere, ia gwau, “Ruma ena lalona daiutu ta lalonai do oi raka vareai, do oi hunia totona. Unai neganai anina do oi diba.”   
\p
\v 25 Vadaeni Israela ena king ese oda ia gwauraia, ia gwau, “Mikaia do umui dogoatao, Amono, hanua lohiana bona Ioasa, king ena natuna dekenai do umui abia lao.  
\v 26 Do umui gwau, ‘King Ahaba ia gwau: Inai tau be dibura ruma dekenai do umui koua, beredi bona ranu sibona do umui henia, ela bona mai mauri danu do lau giroa mai.’ ”   
\p
\v 27 Mikaia ia gwau, “Bema mai mauri danu oi giroa mai, vadaeni Lohiabada be lau dekena amo ia hereva lasi.” Ma Mikaia ia hereva, ia gwau, “Taunimanima ibounai e, lauegu hereva do umui kamonai namonamo inai!”   
\s1 Ahaba be tuari dekenai ia mase  
\p
\v 28 Vadaeni Israela ena king, Ahaba, bona Iuda ena king, Iehosapata, be Ramoto Gileada dekenai idia lao.  
\v 29 Ahaba ese Iehosapata ia hamaoroa, ia gwau, “Lau ese egu toana do lau haidaua, vadaeni tuari lalonai do lau vareai, to oi ese oiemu king dabua do oi karaia.” Unai dainai Israela ena king ese iena toana ia haidaua, bona tuari lalonai ia vareai lao.   
\p
\v 30 Suria ena king ese iena kariota biaguna taudia ia oda henia, ia gwau, “Taunimanima ta, maragina o badana, do umui tuari henia lasi, to Ahaba, Israela ena king sibona.”  
\v 31 Unai dainai kariota biaguna taudia ese king Iehosapata idia itaia neganai idia laloa ia be Israela ena king, vadaeni idia giroa, ia dekenai idia heau, tuari henia totona. To Iehosapata be ia boiboi bada, vadaeni Lohiabada ese ia hamauria. Dirava ese Iehosapata dekena amo, unai tuari taudia ia abidia siri lao.  
\v 32 Badina unai kariota biaguna taudia idia itaia, ia be Israela ena king lasi, vadaeni ia dekenai idia tuari lou lasi.   
\p
\v 33 To Suria tuari tauna ta ese diba ta ia pidia kava, Israela ena king ena tuari dabua ena matuna maragina ta lalonai ia vareai, Ahaba ia gwadaia. Unai dainai Ahaba ese kariota ia haheaua tauna dekenai ia boiboi, ia gwau, “Bero lau davaria, kariota do oi hagiroa lou, tuari dekena amo lau do oi abia siri.”   
\p
\v 34 Unai dina dekenai tuari be auka herea, bona king Ahaba be mai bero danu kariota lalonai ia helai noho. Iena kwarana ia atoa diho lasi, to iena vairana be Suria taudia dekenai ia henia ela bona adorahi ia ore. Unai neganai ia mase.   
\c 19  
\s1 Peroveta tauna ta ese Iehosapata ia gwau henia  
\p
\v 1 Iehosapata, Iuda ena king, be iena ruma Ierusalema dekenai ia giroa lou, mai mauri danu.  
\v 2 To Iehu Hanani, peroveta tauna, be Iehosapata hedavari totona ia raka mai, bona ia ese king Iehosapata ia gwau henia, ia gwau, “Kara dika taudia oi durua noho, bona Lohiabada idia badu henia taudia oi ura henia noho, be maoro, a? Inai dainai Lohiabada ena badu be oi dekenai ia ginidae vadaeni.  
\v 3 To namo sisina be oi dekenai ia noho, badina be Asera kaivakuku be oi ese tano ena kahana ibounai dekenai oi hadikaia ore, bona oi ese mai emu kudouna ibounai danu Lohiabada oi tahua noho.”   
\s1 Iehosapata ese kota biagudia ia haginia  
\p
\v 4 Iehosapata be Ierusalema dekenai ia noho. Vadaeni ia ese ma ia raka lao, iena taunimanima edia huanai ia lao lou, Bere Sieba dekena amo ela bona Eparaima ororo ena tano. Ia ese Lohiabada, edia sene taudia edia Dirava dekenai edia lalodia ia hagiroa lou.  
\v 5 Iehosapata ese danu kota biagudia ia abia hidi, tano kahana ibounai dekenai ia atodia, Iuda hanua mai edia magudia ibounai lalonai.   
\p
\v 6 Unai kota biagudia ia hamaoroa, ia gwau, “Emui kota gaukara do umui karaia namonamo, badina be emui kota be taunimanima hamoalea totona umui karaia noho lasi, to ia be Lohiabada hamoalea totona. Bona inai kota gaukara umui karaia noho neganai, Lohiabada be umui danu ia noho.  
\v 7 Unai dainai Lohiabada do umui gari henia, bona emui gaukara do umui karaia namonamo, badina be Lohiabada, iseda Dirava ese iena kota ia hagagevaia lasi, bona taunimanima ibounai be maka tamona dekenai ia kota henidia noho, bona kota hagagevaia totona davana ia abia lasi.”   
\p
\v 8 Ierusalema dekenai danu Iehosapata ese Levi taudia bona hahelagaia taudia, bona Israela iduhu kwaradia taudia haida danu ia haginia, Lohiabada ena kota biaguna gaukara do idia karaia totona. Idia ese Lohiabada ena Taravatu utua ena kota do idia naria, bona taunimanima edia hepapahuahu do idia hamaoromaoroa. Idia be Ierusalema dekenai idia noho.  
\v 9 Bona Iehosapata ese ia oda henidia, ia gwau, “Umui ese kota biaguna gaukara do umui karaia namonamo, mai emui laloa maoromaoro danu. Ma unai gaukara lalonai Lohiabada do umui gari henia, bona Lohiabada do umui abidadama henia noho.   
\p
\v 10 “Bema emui basileia tamona taudia ese edia hanua ta ta dekena amo, umui hamaoromaoroa totona hepapahuahu ta, taunimanima alaia gauna, o taravatu ta utua gauna idia mailaia neganai, umui ese idia do umui sisiba henia goada, Lohiabada ena kota vairanai do idia kerere lasi totona. Bema unai bamona umui karaia lasi neganai, umui bona emui basileia tamona taudia ese Lohiabada ena badu ena mamina do umui abia. To bema emui gaukara umui karaia namonamo neganai, umui be kerere lasi.  
\v 11 Amaraia, Hahelagaia Tauna Badana, ese Lohiabada ena gaukara ibounai ia naria noho. Vadaeni Lohiabada ena gaukara totona hepapahuahu ibounai edia kota umui karaia neganai, Amaraia ese emui gaukara do ia biagua noho. Ma king ena gaukara ibounai totona, Sebadaia Isamaela, Iuda iduhu ena lohia tauna ese emui kota gaukara do ia biagua noho. Levi taudia ese emui hesiai gaukara do idia karaia. Idia ese do idia itaia namonamo, emui kota hereva be taunimanima ese do idia karaia momokani. Mai laloa goada danu inai gaukara do umui karaia, badina Lohiabada be kara maoromaoro taudia danu ia noho.”   
\c 20  
\s1 Iehosapata ese Moaba bona Amono taudia ia halusia  
\p
\v 1 Unai murinai, Moaba taudia bona Amono taudia, bona Meunimi taudia haida be Iehosapata tuari henia totona idia mai.  
\v 2 Vadaeni hereva gwauraia taudia haida idia mai, Iehosapata idia hamaoroa, idia gwau, “Edoma dekena amo tuari taudia momo oi dekenai tuari henia totona idia mai noho, Davara Mase unai kahana dekena amo. Harihari idia be Hasasono Tamara dekenai.” Unai gabu ena ladana ta be Ene Gedi.   
\p
\v 3 Vadaeni Iehosapata ia gari, bona ia be Lohiabada ese do ia hakaua totona, Dirava dekenai ia guriguri henia. Unai neganai danu Iehosapata ese oda ia gwauraia, Iuda ena kahana ibounai dekenai taunimanima ibounai ese aniani ania lasi taravatu do idia karaia.  
\v 4 Iuda ena kahana ibounai dekena amo, taunimanima be Ierusalema dekenai idia haboua mai, Lohiabada ena durua do idia tahua totona.   
\p
\v 5 Vadaeni inai Iuda taudia bona Ierusalema taudia be Dubu Helaga dekenai idia haboua, ariara magu matamata ena vairanai, bona Iehosapata ese idia edia vairanai ia gini,  
\v 6 ia guriguri, ia gwau, “Lohiabada e, aiemai sene taudia edia Dirava, oi be guba ena Dirava, bona oi ese bese idauidau edia basileia ibounai oi biagua noho. Oiemu siahu bona goada be bada herea dainai, tau ta ese oi ia koua diba lasi.  
\v 7 Oi be aiemai Dirava. Oiemu bese Israela ese inai tano dekenai idia raka vareai neganai, oi ese inai tano noho taudia be Israela taudia edia vairana dekenai oi luludia ore, bona oiemu turana Aberahamo ena bese taudia dekenai inai tano oi henia, edia tano do ia noho, ela bona hanaihanai.  
\v 8 Idia ese iniseni idia noho, bona oi matauraia totona oiemu Dubu Helaga ta idia haginia vadaeni, bona idia gwau,  
\v 9 ‘Bema nega dika, hegeregere tuari, hanaia gorere dikana, o hitolo ese ai dekenai idia hadikaia neganai, ai ese oiemu vairanai, bona inai Dubu Helaga, oiemu Ladana ia noho gabuna ena vairanai ai gini diba. Bona aiemai hisihisi dainai oi dekenai do ai tai henia, bona oi ese ai dekenai do oi kamonai, bona ai do oi hamauria.’   
\p
\v 10 “To harihari Amono bona Moaba bona Edoma taudia ese ai idia tuari henia gwauraia noho. To Lohiabada e, Israela taudia be Aigupito dekena amo idia raka mai neganai, oi ese oi taravatudia, unai bese taudia do idia tuari henidia lasi. Unai dainai Israela taudia ese unai Amono, Moaba bona Edoma taudia edia tano idia raka hanaia, bona idia hadikadia ore lasi.  
\v 11 To oi itaia, aiemai kara namona idia dekenai ena davana ai dekenai be dika do idia karaia, a? Badina idia ese ai dekenai oi henia tano dekena amo ai do idia lulua ore totona idia mai.  
\v 12 Oi be aiemai Dirava! Mani edia kerere davana do oi henia. Badina inai tuari orea bada herea, ese ai idia tuari henia noho, bona ai be goada lasi idia do ai koua. Edena bamona do ai karaia be ai diba lasi, to oi dekenai aiemai matana ai negea noho, oi ese ai do oi durua totona.”   
\s1 Lohiabada ena Lauma ese Iuda ena kwalimu ia gwauraia  
\p
\v 13 Iuda taudia ibounai be unuseni, Lohiabada ena vairanai idia gini, mai edia natudia maragidia, bona edia adavadia bona natudia danu.  
\v 14 Unai neganai Lohiabada ena Lauma ese Levi tauna Iahasiele ia abia, hebou taudia edia huanai. Unai Iahasiele be Sekaraia ena natuna. Sekaraia ena tamana be Benaia. Benaia ena tamana be Ieiele. Ieiele ena Tamana be Matanaia, Levi tauna, Asapa ena iduhu dekena amo.   
\p
\v 15 Iahasiele ia gwau, “King Iehosapata bona Iuda bona Ierusalema taudia ibounai e, Lohiabada ese inai bamona ia hereva: ‘Do umui gari lasi, bona emui kudoudia do idia manoka lasi inai tuari orea taudia momo herea dainai, badina tuari be emui tuari lasi, to Dirava ena.  
\v 16 Kerukeru, idia do umui tuari henia totona do umui raka lao, idia be Sisi Raka Vareai Gabuna dekena amo do idia mai, bona koura ena dokona dekenai do umui davaridia, Ieruele tano kaukau ena dina daekau kahanai.  
\v 17 Iuda bona Ierusalema taudia e, inai tuari dekenai be do umui tuari lasi. To emui gabu dekenai do umui gini, bona naria noho sibona, vadaeni Lohiabada ena kwalimu umui dainai do umui itaia. Do umui gari lasi, bona do umui laloa manoka lasi, kerukeru be idia tuari henia totona do umui lao, bona Lohiabada be umui danu do ia noho.”   
\p
\v 18 Vadaeni Iehosapata ese ia tui diho, bona iena vairana be tano dekenai ia atoa diho. Bona Iuda bona Ierusalema taudia ibounai danu Lohiabada ena vairanai edia vairadia be tano dekenai idia atoa, idia tomadiho henia.  
\v 19 Vadaeni Levi taudia haida, Kohata taudia bona Kora taudia, be idia toreisi, Lohiabada, Israela ena Dirava, idia hanamoa bada, mai boiboi bada danu.   
\s1 Lohiabada ese tuari orea toiosi ia koidia  
\p
\v 20 Daba maragi neganai idia toreisi, idia raka lao, Tekoa ena tano kaukau dekenai idia lao. Idia lao noho neganai Iehosapata ia gini, ia gwau, “Iuda bona Ierusalema taudia e, lau dekenai umui kamonai. Lohiabada emui Dirava do umui abidadama henia, vadaeni do umui gini goada. Lohiabada ena peroveta taudia do umui kamonai henia, vadaeni do umui kwalimu.”  
\v 21 Iehosapata be unai taunimanima danu idia herevahereva, vadaeni ia ese Lohiabada hanamoa ane do idia abia taudia ia abia hidi. Vadaeni idia ese dabua helagadia idia atoa, bona idia be Iuda tuari orea ena vairanai idia raka lao, idia gwau,  
\q1 “Lohiabada do ita hanamoa,  
\q1 badina iena bogahisihisi kara do ia noho hanaihanai.”   
\p
\v 22 Idia ese Lohiabada hanamoa ane idia abia hamatamaia neganai, Lohiabada ese Amono bona Moaba bona Edoma taudia, Iuda dekenai idia tuari henia noho taudia, ia hagaridia dikadika, vadaeni ia halusidia.  
\v 23 Badina be Amono bona Moaba taudia ese Edoma taudia idia tuari henia, bona idia hadikadia ore momokani. Bona Edoma taudia idia aladia ore murinai, Amono bona Moaba taudia ese idia ta ta dekenai idia tuari henia.   
\p
\v 24 Unai dainai Iuda taudia be tano kaukau ena kohoro dekenai idia ginidae, bona kohoro ena ataiai dekena amo edia matana idia negea, unai tuari orea badana do idia itaia totona neganai, mase taudia sibona idia itaia. Unai tuari orea badana dekena amo ta ese ia heau mauri lasi.   
\p
\v 25 Iehosapata mai iena orea taudia danu be unai mase taudia edia kohu abia totona idia lao neganai, idia ese boromakau momo, bona kohu bona dabua, bona davana bada gaudia idia davaria. Dina toi lalonai unai kohu idia haboua noho, do idia abia lao totona, to gau ibounai idia abia diba lasi, kohu be momo herea dainai.  
\v 26 Dina namba 4 dekenai, idia ese Beraka Koura dekenai idia haboua, bona unuseni Lohiabada idia hanamoa bada. Unai dainai, unai gabu ena ladana idia atoa noho, Beraka Koura, ia mai bona hari dina.   
\p
\v 27 Vadaeni Iuda bona Ierusalema taudia ibounai be idia giroa lou, bona Iehosapata ese ia gunalaidia. Ierusalema dekenai idia giroa lou, mai edia moale bada danu, badina be Lohiabada ese, idia dekenai idia tuari henia taudia ia halusidia momokani dainai.  
\v 28 Idia be Ierusalema dekenai idia daekau lao, bona Dubu Helaga dekenai idia raka lao, mai miusiki ena regena namona danu, gita badadia bona maragidia bona kibi danu.   
\p
\v 29 Unai neganai, tano idauidau edia basileia ibounai ese, Israela dekenai idia tuari henia taudia Lohiabada ese ia halusidia sivarai idia kamonai neganai, idia be idia gari bada herea.  
\v 30 Unai dainai, Iehosapata ese iena basileia be mai maino danu ia biagua, badina be Dirava ese tano ena kahana ibounai dekenai laga-ani ia henia.   
\s1 Iehosapata ena kara oredia  
\p
\v 31 Iehosapata ia lohia hamatamaia neganai, iena mauri lagani be 35, bona lagani 25 lalonai Ierusalema dekenai ia lohia. Iena sinana ena ladana be Asuba, Silihi ena natuna hahine.  
\v 32 Iehosapata ena kara be iena tamana ena kara hegeregerena dainai, ia ese Lohiabada ena vairana dekenai kara maoromaoro ia karaia.  
\v 33 To ataiai idia noho tomadiho gabudia ibounai be ia ese ia kokia lasi, bona taunimanima ese, edia sene taudia edia Dirava idia tomadiho henia lasi mai edia kudouna ibounai danu.   
\p
\v 34 Iehosapata ena kara oredia, edia matamaia ela bona dokona, be Iehu Hanani Ena Sivarai Buka lalonai idia torea vadaeni. Unai be Israela Ena King Taudia Edia Sivarai Buka lalonai.   
\p
\v 35 Nega ta Iehosapata, Iuda ena king, be Ahasaia, Israela ena king, kara dika bada tauna, danu idia turana karaia.  
\v 36 Idia gaukara hebou, bona Esiono Gebere dekenai lagatoi haida idia karaia, Tarasisi dekenai do idia lao totona gaudia.   
\p
\v 37 Vadaeni Eliesere Dodavahu, Maresa hanua tauna ese Iehosapata dekenai peroveta hereva ia gwauraia, ia sisiba henia, ia gwau, “Oi ese Ahasaia danu oi turana karaia dainai, Lohiabada ese umui karaia gaudia do ia hadikaia ore.”  
\p Vadaeni unai lagatoi be nadi dikadia dekenai idia kamokau, idia dika, bona nega ta idia heau lao lasi.   
\c 21  
\p
\v 1 Vadaeni Iehosapata be ia mase, bona Davida Ena Hanua lalonai idia guria, iena tubuna bona tamana edia guria gabuna dekenai. Iehosapata ena gabu dekenai iena natuna tau Iehorama ese king dagi ia abia.   
\s1 King Iehorama, Iuda ena king  
\p
\v 2 Iehorama, king Iehosapata ena natuna tau, ena tadina ibounai be 6. Asaraia, Iehiele, Sekaraia, Asariahu, Mikaela bona Sepataia. Inai ibounai be Iehosapata, Iuda ena king, ena natuna tau.  
\v 3 Edia tamana ese harihari gaudia badadia ia henidia, siliva, golo, bona davana bada kohudia, bona hanua mai edia magudia Iuda lalonai danu. To basileia be Iehorama dekenai ia henia, badina ia be iena vara guna natuna.   
\p
\v 4 Iehorama ese iena tamana ena king siahuna ia abia, bona ia gini auka neganai, ia ese ia oda henia, vadaeni iena tadina ibounai, bona Israela lohia taudia haida idia alaia mase.   
\p
\v 5 Iehorama ese ia lohia hamatamaia neganai iena mauri lagani be 32, bona ia be lagani 8 lalonai Ierusalema dekenai ia lohia.  
\v 6 Ia ese Ahaba ena kara bamona, bona Israela king edia kara bamona ia karaia, badina be ia ese Ahaba ena natuna hahine ia adavaia. Iehorama ese Lohiabada ena vairana dekenai ia kara dika.   
\p
\v 7 To Lohiabada ese Iuda ia hadikaia ore lasi, iena hesiai tauna Davida dainai. Badina be Lohiabada ese ia gwauhamata vadaeni, Davida ena tubuna taudia be lamepa bamona do idia diari noho, bona edia king siahuna be do ia doko lasi.   
\p
\v 8 Iehorama be Iuda ena king neganai Edoma taudia ese Iuda dekenai idia dagedage, bona idia ura lasi Iuda ena king henunai do idia noho. Edoma taudia ese idia sibona edia king ta idia haginia.   
\p
\v 9 Unai dainai Iehorama ese mai ena kariota ibounai danu idia toreisi, Edoma kahana dekenai idia lao. Unuseni be Edoma taudia ese Iehorama mai ena kariota taudia idia koua hagegea.  
\p Hanuaboi neganai Iehorama, mai ena tuari orea ese Edoma tuari taudia edia tuari laini idia hamakohia, bona idia heau mauri.   
\p
\v 10 Vadaeni Edoma taudia ese Iuda ena king dekena amo idia siri, bona sibona idia naria, unai negana dekena amo ia mai bona hari. Libina hanua danu ese, unai nega tamona dekenai Iuda dekena amo ia siri, badina be Iehorama ese Lohiabada, iena sene taudia edia Dirava ia rakatania vadaeni dainai.   
\p
\v 11 Iehorama ese danu ataiai idia noho tomadiho gabudia ia haginia, Iuda ena ororo gabudia dekenai. Ia ese Iuda bona Ierusalema taudia ia hakaua kerere, vadaeni Lohiabada dekenai idia kara dika.   
\p
\v 12 Vadaeni peroveta tauna Elia ese Iehorama dekenai revareva ia siaia, ia gwau: “Lohiabada, oiemu sene tauna Davida ena Dirava, be inai bamona ia hereva: ‘Oiemu tamana Iehosapata bona Asa, Iuda ena king, edia kara bamona oi karaia lasi.  
\v 13 To oi be Israela ena king taudia edia kara bamona oi karaia, bona oi ese Iuda bona Ierusalema taudia oi hakaudia kerere, vadaeni dirava koikoidia idia badinaia noho, Ahaba bona iena bese taudia ese Israela taudia idia hakaua kerere hegeregerena. Bona oi ese oiemu tadina, oiemu tamana ena bese taudia oi alaia mase. Unai oiemu tadina edia kara, ese oiemu kara idia hereaia danu.  
\v 14 Unai dainai Lohiabada ese hanaia gorere dikana ta be oiemu bese taudia edia latanai do ia havaraia. Inai gorere be oiemu natuna, oiemu adavana, bona oi ese oi biagua gaudia ibounai do ia hadikaia.  
\v 15 Bona oi danu ese gorere badana do oi davaria, oiemu bogarauna be dina ta ta dekenai do ia dika lao, ela bona oiemu bogana ena anina do ia bodaga dika momokani.’ ”   
\p
\v 16 Vadaeni Lohiabada ese Pilistia taudia bona Arabia taudia, Etiopia taudia edia badibadinai idia noho taudia edia badu ia havaraia, bona idia ese Iehorama idia badu henia.  
\v 17 Vadaeni idia be Iuda do idia tuari henia totona idia mai, idia halusia, king ena ruma ena kohu idia abia, king ena adavana ibounai idia abia lao, bona king ena natuna tau ibounai danu. To king ena natuna dokona, Ahasaia sibona idia abia lasi.   
\s1 King Iehorama ia mase  
\p
\v 18 Unai kara ibounai edia murinai Lohiabada ese gorere dika herea dekena amo Iehorama ena bogarauna ia hisihisi henia.  
\v 19 Lagani rua lalonai inai gorere ia dika lao ela bona Iehorama ena bogana ena anina be murimurina dekenai ia mai, bona mai hisihisi bada danu ia mase. Iena basileia taudia ese lahi ta idia karaia lasi ia dainai, iena sene taudia dainai idia karaia bamona.   
\p
\v 20 Iehorama ese ia lohia hamatamaia neganai iena mauri lagani be 32, bona lagani 8 lalonai Ierusalema dekenai ia lohia. Ia mase neganai tau ta ese ia totona ia lalohisihisi lasi. Idia ese Davida Ena Hanua lalonai idia guria, to king edia guria gabuna dekenai lasi.   
\c 22  
\s1 King Ahasaia, Iuda ena king  
\p
\v 1 Ierusalema taudia ese Iehorama ena natuna tau, ia vara gabeai tauna, Ahasaia, be Iehorama ena gabu dekenai king dagi totona idia abia hidi. Badina be Arabia tuari taudia ese Iehorama ena natuna gunadia ibounai idia alaia ore vadaeni. Unai dainai Ahasaia, Iehorama ena natuna tau ese ia king hamatamaia.   
\p
\v 2 King dagi ia abia neganai Ahasaia ena mauri lagani be 22. Ia be Ierusalema dekenai ia king lagani tamona sibona. Iena sinana ena ladana be Atalaia. Unai hahine be Omeri, Israela ena king ena tubuna hahine.   
\p
\v 3 Ahasaia danu ese king Ahaba ena bese edia kara bamona ia karaia, badina be iena sinana ese sisiba dikana iena natuna dekenai ia henia, bona unai sisiba ese kara dika daladia dekenai Ahasaia idia hakaua.  
\v 4 Vadaeni Ahasaia ese Lohiabada ena vairanai ia kara kerere, Ahaba ena bese taudia idia karaia hegeregerena, badina be iena tamana ia mase murinai, Ahaba bese taudia ese idia sisiba henia, bona idia hakererea.  
\v 5 Edia sisiba ia abia dae dainai, king Ahasaia ese Israela ena king, Iorama Ahaba ia durua, vadaeni idia ruaosi idia lao, Hasaele, Suria ena king idia tuari henia, Ramoto Gileada dekenai. Unuseni Suria taudia ese Iorama idia haberoa.  
\v 6 Vadaeni king Iorama be ia giroa lou, Ieserele hanua dekenai, iena bero do ia namo lou totona. Unai neganai Ahasaia Iehorama, Iuda ena king ese Ieserele dekenai ia lao, Iorama Ahaba do ia vadivadi henia totona, badina ia be ia gorere.   
\s1 Iehu ese Ahasaia ia alaia mase  
\p
\v 7 Inai vadivadi, Ahasaia ese Iorama dekenai ia henia vadivadi dekena amo, Dirava ese Ahasaia ena moru dalana ia karaia hegaegae. Badina Ahasaia be unai gabu dekenai ia ginidae, vadaeni ia bona Iorama danu idia raka lao, Iehu Nimisi danu do idia hedavari totona. Unai Iehu be Lohiabada ese ia abia hidi vadaeni, Ahaba ena bese do ia alaia ore totona.  
\v 8 Iehu ese inai Dirava ena kota hereva, Ahaba ena bese edia kerere davana, ia karaia noho neganai, ia ese Iuda lohia taudia, bona Ahasaia ena kakana ena natuna haida, Ahasaia danu idia mai taudia, ia davaridia. Vadaeni Iehu ese idia ibounai ia alaia mase.   
\p
\v 9 Unai neganai Iehu ese danu Ahasaia ia tahua, bona ia be Samaria dekenai ia hunia noho neganai, Iehu ena tatau ese idia davaria. Idia ese Ahasaia idia abia, Iehu dekenai idia abia lao, vadaeni ia ese Ahasaia ia alaia mase. To idia guria namonamo, badina be idia gwau, “Ia be Iehosapata ena natuna, bona Iehosapata ese mai ena kudouna ibounai danu Lohiabada ia tahua.”  
\p To Ahasaia ena bese lalonai, tau ta ia noho lasi, basileia do ia gunalaia totona.   
\s1 Kwini Atalaia, Iuda ena kwini  
\p
\v 10 Atalaia, king Ahasaia ena sinana, ese ia itaia, iena natuna ia mase. Vadaeni ia ese oda ia gwauraia, Iuda ena king ena varavara taudia ibounai do idia alaia mase.  
\v 11 To Iehoseba, king Iehorama ena natuna hahine, ese Ahasaia ena natuna Ioasa ia abia, king ena natuna tau, do idia alaia taudia, edia huanai dekena amo. Iehoseba ese mero maragina, Ioasa, be hunia dekenai ia hakaua lao, bona mai ena naria hahine danu, mahuta daiutu ta lalonai ia hunidia. Inai Iehoseba, king Iehorama ena natuna hahine, bona ia be hahelagaia tauna Iehoiada ena adavana, ese unai bamona ia karaia, badina ia be Ahasaia ena taihuna. Vadaeni ia ese Atalaia dekena amo mero ia hunia, unai dainai unai mero Ioasa idia alaia lasi.   
\p
\v 12 Inai mero Ioasa be lagani 6 lalonai Iehoseba, bona iena naria hahine ese Dubu Helaga ena lalonai, hunia dekenai idia naria noho, Atalaia ese Iuda tano ena kwini dagi ia dogoatao noho neganai.   
\c 23  
\s1 Ioasa dekenai king dagi idia henia  
\p
\v 1 Atalaia ia kwini lohia ena lagani namba 7 lalonai hahelagaia tauna Iehoiada ese iena goada ia hedinaraia. Ia ese tuari taudia 100 edia biagudia Asaraia Ierohama, Isamaela Iehohanana, Asaraia Obeda, Maseaia Adaia bona Elisapata Sikiri danu ia haboua tamona, bona idia ibounai idia laloa tamona.  
\v 2 Vadaeni idia be Iuda ena tano ibounai dekenai idia lao, Levi taudia bona Israela iduhu edia lohia taudia, Iuda hanua ibounai dekena amo idia haboua, bona Ierusalema dekenai idia hakaudia mai.   
\p
\v 3 Idia ibounai be Dubu Helaga ena lalonai idia haboua, bona unuseni king ena natuna Ioasa danu gwauhamata taravatuna idia karaia. Iehoiada ese idia ia hamaoroa, ia gwau, “Umui itaia, king ena natuna be inai. Ia ese king dagi do ia abia be namo, Lohiabada ese Davida ia gwauhamata henia hegeregerena, ia gwau, ‘Oiemu tubuna taudia edia tubudia ese king siahuna do idia dogoatao noho, doko lasi.’  
\v 4 Inai bamona do ita karaia: Hahelagaia taudia bona Levi taudia be Sabati gaukara totona idia mai neganai, idia ese orea toi do idia karaia, bona emui orea ginigunana ese Dubu Helaga ena iduara ibounai do idia gimaia.  
\v 5 Ma emui orea iharuana ese king ena ruma do idia gimaia, bona orea ihatoina ese Dubu Helaga ena Badina Iduara do idia gimaia. Taunimanima ibounai be Lohiabada ena Dubu Helaga ena ariara magu edia lalonai do idia noho.  
\v 6 Idia ta ese Lohiabada ena Dubu Helaga do ia raka vareai lasi. Hahelagaia taudia bona Levi taudia sibona do idia vareai diba, edia gaukara dainai. Idia raka vareai diba, badina idia be helaga, to taunimanima ibounai ese Lohiabada ena oda do idia badinaia, murimurinai do idia noho.  
\v 7 Levi taudia ese king Ioasa do idia gini hagegea noho, idia ta ta mai edia tuari kaia edia imana dekenai, bona king ena lao gabudia ibounai dekenai ia do idia naria bona gimaia. Bema tau ta ese Dubu Helaga ia vareai kava toho neganai, Levi taudia ese do idia alaia mase.”   
\p
\v 8 Levi taudia bona Iuda taudia ibounai ese hahelagaia tauna Iehoiada ena oda ibounai idia karaia. Levi gima taudia edia biagudia ta ta ese edia orea, edia orea, Sabati Dina dekenai do idia gaukara, bona Sabati Dina dekenai do idia laga-ani taudia ibounai be idia haboua mai, badina be Iehoiada ia ura idia ibounai do idia gaukara noho.   
\p
\v 9 Vadaeni Iehoiada ese io bona kesi, badadia bona maragidia, gunaguna idia be Davida ena, Dirava ena Dubu Helaga lalonai noho gaudia ia abia, gima orea toiosi edia biagudia dekenai ia henia.  
\v 10 Bona Iehoiada ese inai gima taudia edia gabu ta ta dekenai ia haginidia, edia imadia dekenai be edia tuari kaia. Laini dekenai idia gini, Lohiabada ena Dubu Helaga ena vairana dekenai, diho kahanai ela bona mirigini kahanai, boubou patana badinai, king do idia hagegea, bona gimaia totona.   
\p
\v 11 Gima taudia idia gini hegaegae, vadaeni Iehoiada ese Ioasa ia hakaua mai, edia vairana dekenai, bona kwara gauna, korona, be Ioasa ena kwarana dekenai ia atoa, Taravatu Buka ena kopi ta danu ia henia. Vadaeni Iehoiada ese Ioasa be king ia gwauraia, bona ia bona iena natuna tau ese Ioasa ena kwarana dekenai olive dehoro ia bubua. Unai neganai danu taunimanima ese idia boiboi, idia gwau, “King be nega daudau do ia mauri noho!”   
\p
\v 12 Kwini Atalaia ese gima taudia bona taunimanima ibounai edia gadona regena ia kamonai, vadaeni Dubu Helaga dekenai ia raka vareai. Taunimanima momo idia haboua vadaeni unuseni.  
\v 13 Atalaia ese king matamata Ioasa ia itaia, nadi du badana ena badinai ia gini, king matamata edia kara hegeregerena. Tuari biagudia bona kibi hiriria taudia danu be king ena badibadinai idia gini noho, bona taunimanima ese mai moale danu idia boiboi, bona kibi idia hiriria noho. Vadaeni Atalaia ese mai gari bada danu iena dabua ia darea, ia boiboi bada, ia gwau, “Kwini hadikaia kara, kwini hadikaia kara!”   
\p
\v 14 Iehoiada ia ura lasi Dubu lalonai Atalaia do idia alaia mase. Vadaeni ia ese tuari biagudia ia oda henia, ia gwau, “Dubu ena murimurinai Atalaia do umui abia lao, bona bema tau ta ese Atalaia ia hamauria toho neganai, unai tau do umui alaia mase.”   
\p
\v 15 Tuari biagudia ese Atalaia idia dogoatao, bona hosi edia raka vareai iduara dalana dekena amo king ena ruma dekenai idia hakaua lao. Unuseni idia ese Atalaia idia alaia mase.   
\s1 Iehoiada ese dirava koikoi tomadiho henia kara ia koua  
\p
\v 16 Iehoiada ese king Ioasa bona taunimanima dekenai ia hereva goada dainai, idia ese ia danu Lohiabada danu gwauhamata taravatuna idia karaia. Idia gwauhamata idia be Lohiabada ena bese taudia do idia lao momokani.  
\v 17 Vadaeni taunimanima be Bala ena dubu dekenai idia lao, Bala idia veria diho, iena boubou patadia bona iena kaivakuku danu idia hamakohia, bona Matana, Bala ena hahelagaia tauna, be boubou patadia edia vairana dekenai idia alaia mase.   
\p
\v 18 Unai neganai danu Iehoiada ese Lohiabada ena Dubu Helaga gaukara ibounai naria taudia ia gwauraia, bona ia atodia. Inai Dubu naria taudia be hahelagaia taudia bona Levi taudia. Idia ese guna king Davida ese ia gwauraia Dubu Helaga gaukara do idia karaia, bona Lohiabada dekenai henia bouboudia be do idia gabua ore, Mose ena taravatu hegeregerena, bona mai edia moale, bona mai ane abia danu, Davida ena oda hegeregerena.   
\p
\v 19 Iehoiada ese danu gima taudia be Dubu Helaga ena iduara ibounai dekenai ia atodia, goeva lasi tauna ta do ia raka vareai diba lasi totona.   
\p
\v 20 Unai neganai danu Iehoiada, bona tuari biagudia, bona hanua lohia taudia, taunimanima idia gunalaia taudia, bona taunimanima oredia ibounai ese Dubu Helaga dekena amo king Ioasa idia hakaua lao, ela bona king ena ruma dekenai. Idia be Ataiai Magu Iduara dekena amo king ena ruma dekenai idia raka vareai, bona unai neganai king Ioasa be iena terona dekenai ia helai.  
\v 21 Unai kara dainai, taunimanima ibounai idia moale bada, bona unai neganai, Ierusalema hanua be mai maino danu ia noho, Atalaia idia alaia mase vadaeni dainai.   
\c 24  
\s1 King Ioasa, Iuda ena king  
\p
\v 1 Ioasa ese ia king hamatamaia neganai iena mauri lagani be 7 sibona, bona ia be lagani 40 lalonai Ierusalema dekenai ia king. Iena sinana ena ladana be Sibaia, ia be Bere Sieba hahine.  
\v 2 Ioasa be Lohiabada ena vairana dekenai kara maoromaoro ia karaia, hahelagaia tauna Iehoiada ena mauri lagani ibounai lalonai.  
\v 3 Iehoiada ese adavana rua Ioasa totona ia abia hidi, bona idia ese Ioasa ena natuna tau bona natuna hahine ia dekenai idia havaraia.   
\p
\v 4 Gabeai, Ioasa ia laloa, Lohiabada ena Dubu Helaga do ia hanamoa lou be namo.  
\v 5 Vadaeni ia ese hahelagaia taudia bona Levi taudia ia haboua, idia dekenai ia hereva, ia gwau, “Iuda hanuadia dekenai do umui lao, Israela taudia ibounai dekena amo moni do umui haboua, inai be lagani ta ta emui Dirava ena Dubu hanamoa lou totona idia henia noho moni. Bona inai moni haboua gaukara do umui karaia haraga.”  
\p To Levi taudia ese unai gaukara idia karaia haraga lasi.  
\v 6 Unai dainai king Ioasa ese Hahelagaia Tauna Badana Iehoiada ia boiria, ia nanadaia, ia gwau, “Badina dahaka Levi taudia oi oda henidia goada lasi, vadaeni idia ese Iuda bona Ierusalema dekena amo takisi moni idia mailaia lasi? Unai takisi moni be Lohiabada ena hesiai tauna Mose ese Israela taudia edia latanai ia gwauraia gauna, Taravatu Maua ena Palai Dubu hanamoa lou totona gauna, ani?”   
\p
\v 7 Badina be unai hahine dikana Atalaia ena natuna tau ese Dirava ena Dubu Helaga idia vareai kava, idia hadikaia, bona gau helagadia ibounai be Bala dirava tomadiho henia totona idia gaukaralaia vadaeni.   
\p
\v 8 Unai dainai king ese idia ia oda henia, vadaeni idia ese maua ta idia karaia, Lohiabada ena Dubu Helaga ena iduara badana ena murimurinai idia atoa.  
\v 9 Vadaeni Iuda bona Ierusalema ena kahana ibounai dekenai hereva idia siaia, takisi moni be Lohiabada dekenai do idia mailaia. Unai takisi be Dirava ena hesiai tauna Mose ese tano kaukau dekenai Israela taudia edia latanai ia gwauraia gauna.   
\p
\v 10 Vadaeni lohia taudia ibounai bona taunimanima ibounai ese mai edia moale danu edia takisi moni idia mailaia, maua lalonai idia udaia, ela bona ia honu.  
\v 11 Dina ibounai Levi taudia ese maua be king ena opesa taudia dekenai idia abia lao. Bema idia itaia, moni momo be maua lalonai ia noho neganai, king ena toretore tauna bona Hahelagaia Tauna Badana ena hesiai tauna idia mai, bona idia ruaosi ese maua ena anina idia bubua. Vadaeni maua ma idia abia lao, iena gabuna dekenai idia atoa lou. Inai bamona idia karaia nega momo, ela bona moni momo idia haboua vadaeni.   
\p
\v 12 King Ioasa bona Iehoiada ese, unai moni be Lohiabada ena Dubu Helaga hanamoa lou gaukara idia naria taudia dekenai idia henia. Vadaeni inai gaukara biagudia ese nadi gaukaralaia taudia bona kamuta taudia bona auri bona auri laboralabora gaukaralaia taudia danu edia gaukara davana idia henia, Dubu hanamoa lou gaukara do idia karaia totona.   
\p
\v 13 Gaukara lalonai idia vareai taudia be idia gaukara goadagoada, bona Dubu Helaga hanamoa lou gaukara idia karaia namonamo. Idia ese Dirava ena Dubu idia hanamoa lou, iena toana gunana korikori dekenai, bona ma idia ha-aukaia danu.  
\v 14 Gaukara idia haorea neganai, moni orena, idia do gaukaralaia lasi gaudia, be king bona Iehoiada dekenai idia henia. Unai moni dekena amo Lohiabada ena Dubu Helaga ena kohu idauidau idia karaia, tomadiho totona gaudia, hegeregere sipunu, mereki, kapusi, bona uro, golo bona siliva gaudia, ma gabua bouboudia, bona mai bonana namo muramura gabua totona gaudia.  
\s1 Iehoiada ia mase  
\p Iehoiada ena mauri dinadia ibounai lalonai, idia gabua bouboudia be Lohiabada dekenai idia henia noho, henia noho, Dubu Helaga lalonai.   
\p
\v 15 To Iehoiada be ia buruka, iena mauri lagani be momo herea, vadaeni ia mase. Iena mase neganai iena mauri lagani be 130.  
\v 16 Vadaeni Davida Ena Hanua lalonai idia guria, king taudia edia guria gabuna dekenai, badina ia ese kara namodia Israela taudia totona, Dirava totona, bona Dubu Helaga totona ia karaia vadaeni.   
\s1 Ioasa ese ia oda, vadaeni Sekaraia idia hodoa mase  
\p
\v 17 Iehoiada ia mase murinai, Iuda lohia taudia idia mai, king Ioasa dekenai idia tomadiho henia. Vadaeni king ese edia hereva ia kamonai henia,  
\v 18 bona idia ese Lohiabada, edia sene taudia edia Dirava ena Dubu Helaga idia rakatania, Asera kaivakuku bona kaivakuku haida idia tomadiho henia. Idia edia kerere dainai, Dirava ena badu be Iuda bona Ierusalema edia latanai ia vara.  
\v 19 Lohiabada ese peroveta taudia idia dekenai ia siaidia, edia sisiba do idia kamonai, bona ia dekenai do idia giroa lou totona. To taunimanima ese peroveta taudia edia sisiba hereva idia kamonai henia lasi.   
\p
\v 20 Vadaeni Dirava ena Lauma ese Sekaraia, hahelagaia tauna Iehoiada ena natuna tau ia abia, bona ia ese taunimanima edia vairanai ia gini, ia gwau, “Dirava be inai bamona ia hereva, ia gwau: ‘Badina dahaka umui ese Lohiabada ena oda umui kamonai henia lasi? Umui ese namo ta do umui davaria lasi, to dika momokani. Umui ese Lohiabada umui rakatania vadaeni dainai, ia ese umui danu ia rakatania vadaeni.’ ”   
\p
\v 21 To idia ese Sekaraia hadikaia dalana idia tahua hebou, bona king ese ia oda henidia dainai, idia ese nadi dekena amo Sekaraia idia hodoa mase, Lohiabada ena Dubu Helaga ena ariara magu lalonai.  
\v 22 Unai kara dekena amo, king Ioasa ese Iehoiada, Sekaraia ena tamana, ena bogahisihisi ia dekenai ia laloa lasi, to iena natuna ia alaia mase. Sekaraia ia mase lao noho neganai, ia ese Ioasa dekenai ia boiboi, ia gwau, “Lohiabada ese inai kara do ia itaia, bona inai oiemu kerere ena davana do ia henia!”   
\s1 Ioasa ia mase  
\p
\v 23 Lagani ena dokona neganai, Suria tuari orea ta be Ioasa tuari henia totona ia mai. Iuda dekenai bona Ierusalema dekenai idia ginidae. Suria taudia ese Iuda lohia taudia ibounai idia alaia mase. Tuari dekenai idia abia kohu be Damaseko dekenai idia abia lao.  
\v 24 Inai Suria tuari orea be bada lasi, bona Iuda tuari orea be bada, to Lohiabada ese Suria taudia ia durua dainai, idia ese Iuda taudia idia halusia, Iuda taudia ese edia sene taudia edia Dirava, Lohiabada, idia rakatania dainai. Inai dekena amo Dirava ese Ioasa dekenai iena kerere davana ia henia.   
\p
\v 25 Suria taudia ese Ioasa idia haberoa dikadika, bona Suria dekenai idia giroa lou neganai, Ioasa ena hesiai taudia rua ese Ioasa ena mase dalana idia tahua, ia ese hahelagaia tauna Iehoiada ena natuna tau ia alaia dainai. Vadaeni idia ruaosi ese iena mahuta patana ena latanai Ioasa idia alaia mase.  
\p Vadaeni Ioasa be ia mase, bona Davida ena Hanua lalonai idia guria. To king taudia edia guria gabuna dekenai idia guria lasi.   
\p
\v 26 Ioasa ena mase dala idia tahua taudia be Sabada, Amono hahine ladana Simeata ena natuna, bona Iehosabada, Moaba hahine ladana Simiriti ena natuna.   
\p
\v 27 Ioasa ena natuna tau edia sivarai, bona peroveta hereva momo, Ioasa totona idia gwauraia gaudia, bona Dirava ena Dubu Helaga be Ioasa ese ia hanamoa lou ena sivarai, be King Taudia edia Buka, ena anina idia hedinaraia hereva lalonai idia torea vadaeni. Ioasa ena gabuna dekenai iena natuna tau Amasaia ese king dagi ia abia.   
\c 25  
\s1 King Amasaia, Iuda ena king  
\p
\v 1 Amasaia ese king dagi ia hamatamaia neganai iena mauri lagani be 25, bona ia be lagani 29 lalonai Ierusalema dekenai ia king. Iena sinana be Iehoadini, ia be Ierusalema hahine.   
\p
\v 2 Amasaia ese Lohiabada ena vairanai ia kara maoromaoro, to mai ena kudouna ibounai danu lasi.  
\v 3 Amasaia ia diba king ena siahu be momokani ia dogoatao neganai, ia ese iena tamana idia alaia taudia ia aladia mase.  
\v 4 To unai taudia edia natudia danu be Amasaia ia aladia lasi, badina be Mose ena Taravatu Buka ia matauraia. Mose ena Taravatu lalonai Lohiabada ese oda ia gwauraia, ia gwau, “Tamana be do umui alaia lasi, edia natudia edia dika dainai, bona memero do umui alaia lasi, edia tamadia edia dika dainai, to tau ta ta ena kara dika, ena kara dika, dainai do ia mase.”   
\s1 Amasaia ese Edoma taudia ia halusia  
\p
\v 5 Vadaeni king Amasaia ese Iuda bona Beniamina iduhu taudia ibounai ia haboua, bona iduhu ta ta hegeregerena, tuari taudia 1000 idia biagua taudia bona tuari taudia 100 idia biagua taudia ia abidia hidi. Inai tuari orea ibounai be tuari totona ia abidia hegaegae. Edia mauri lagani 20, bona 20 idia hanaia taudia ibounai ia haboua, bona idia ia duahia, idia be ibounai 300,000. Idia be tuari totona idia hegaegae momokani taudia, io bona kesi gaukaralaia dekenai idia manada taudia.   
\p
\v 6 Amasaia ese danu Israela dekena amo tuari taudia 100,000 ia hoia, edia davana be siliva ena metau 3400 kilogaram bamona.  
\v 7 To Dirava ena peroveta tauna ta ese Amasaia ia hamaoroa, ia gwau, “King e, inai Israela tuari taudia be oi danu do oi abidia lasi, badina Lohiabada be Israela taudia bona Eparaima taudia ibounai danu ia noho lasi.  
\v 8 Bona bema oi laloa unai taudia edia durua dekena amo do oi goada, Lohiabada ese umui do ia halusia, badina ia ese umui dekenai idia tuari henia taudia do ia durudia.”   
\p
\v 9 To Amasaia ese Dirava ena peroveta tauna ia nanadaia, ia gwau, “Lau ese siliva ena metau 3400 kilogaram lau henia vadaeni, unai tuari taudia hoia totona. Unai moni be edena bamona?”  
\p Peroveta tauna ia haere, ia gwau, “Lohiabada ese oi dekenai ia henia diba moni ese unai moni ena bada do ia hanaia momokani.”   
\p
\v 10 Unai dainai Amasaia ese unai Israela tuari taudia, Eparaima dekena amo taudia, ia siaidia lou, edia hanua dekenai do idia lao. Vadaeni idia lao, to idia badu momokani Iuda taudia dekenai.   
\p
\v 11 Unai neganai Amasaia be ia boga auka, iena tuari orea ia hakaua lao, Damena Koura dekenai idia lao. Unuseni Edoma taudia danu idia tuari, bona Amasaia ena tuari taudia ese Edoma taudia 10,000 idia alaia mase.  
\v 12 Iuda taudia ese danu Edoma taudia ma 10,000 idia abia mauri. Inai abia mauri taudia be Sela hanua ororo, ena nadi hagahaga dekenai idia abidia daekau. Bona unai ataiai nadi gabuna dekena amo Iuda taudia ese Edoma taudia idia negea diho, ibounai idia mase.   
\p
\v 13 To Amasaia ese ia siaia lou Israela taudia, ia danu do idia tuari gwauraia, to edia dala be Amasaia ese ia koua taudia, ese Iuda hanua haida idia tuari henia. Unai hanua be Samaria bona Bete Horono edia huanai idia noho. Unai Israela taudia ese tau ibounai 3000 idia alaia, bona kohu momo idia abia, edia gabu dekenai idia abia lao.   
\p
\v 14 Amasaia be Edoma taudia ia aladia mase dekena amo ia giroa mai neganai ia ese Seiri taudia edia dirava laulaudia ia mailaia, bona ia haginidia, iena dirava. Vadaeni ia ese ia tomadiho henidia, bona boubou gaudia idia dekenai ia henia.  
\v 15 Unai dainai Lohiabada ese Amasaia ia badu henia, bona ia ese peroveta tauna ta Amasaia dekenai ia siaia. Unai peroveta tauna ese ia hereva henia, ia gwau, “Badina dahaka oi ese inai idau bese taudia edia dirava oi tomadiho henia noho? Unai dirava ese edia taunimanima be oiemu siahu dekena amo idia hamauria diba lasi, to oi ese unai dirava dekenai oi lao, a?”   
\p
\v 16 To Amasaia ese peroveta tauna ena hereva ia utua, ia gwau, “Ai ese king ena sisiba henia tauna oi ai halaoa vadaeni, a? Hereva hadokoa, lau ese oi do lau alaia mase garina!”  
\p Vadaeni peroveta tauna ese iena hereva ia hadokoa, to ia gwau, “Lau diba Dirava ese iena lalona ia ha-aukaia vadaeni, oi do ia hadikaia ore, badina be inai kara be oi karaia vadaeni, bona egu sisiba hereva oi kamonai henia lasi dainai.”   
\s1 Israela taudia ese Iuda taudia idia tuari henia  
\p
\v 17 Gabeai Amasaia, Iuda ena king be iena sisiba henia taudia danu idia hereva hebou. Vadaeni Amasaia ese Iehoasa, Iehoahasa ena natuna, bona Iehu ena tubuna, Israela ena king, dekenai hereva ia siaia, ia gwau, “Emui tuari taudia do umui abia hegaegae, bona do ita tuari.”   
\p
\v 18 To Iehoasa, Israela ena king ese Amasaia, Iuda ena king dekenai hereva ia siaia lao, ia gwau, “Lebanona ava ginigini ta ese Lebanona sida auna ta dekenai hereva ia siaia lao, ia gwau, ‘Oiemu natuna kekeni be lauegu natuna tau dekenai do oi henia, do idia headava,’ to Lebanona ena uda boroma ta ese ia raka hanaia, bona ia ese unai ava ginigini ia moia diho momokani.  
\v 19 Momokani, oi ese Edoma oi halusia, vadaeni unai dainai oi hekokoroku noho. Namona be oiemu hanua dekenai oi noho, oiemu kwalimu do oi moalelaia noho. Anina be dahaka tuari do oi havaraia, bona do oi moru, oi bona Iuda besena ibounai danu?”   
\p
\v 20 To Amasaia be unai hereva ia kamonai lasi. Badina be Dirava ena ura be Amasaia be do idia halusia, ia ese Edoma taudia edia dirava laulaudia ia tomadiho henidia dainai.  
\v 21 Unai dainai Iehoasa, Israela ena king be iena tuari taudia danu idia raka lao, bona Bete Semese dekenai ia ese Amasaia mai ena tuari taudia ia tuari henia. Bete Semese be Iuda ena tano dekenai.   
\p
\v 22 Vadaeni Iuda tuari taudia be Israela tuari taudia ese idia halusia, bona Iuda taudia idia heau, ta ta edia ruma, edia ruma dekenai idia lao.  
\v 23 Unai neganai Iehoasa, Israela ena king ese Amasaia, Iuda ena king, ia abia mauri, Bete Semese dekenai. Vadaeni Iehoasa be Ierusalema dekenai ia lao, Ierusalema ena magu ia hadikaia. Magu be Eparaima Iduara ela bona Kona Iduara kahana ibounai Iehoasa ese ia hamakohia, ena lata be 200 mita bamona.   
\p
\v 24 Iehoasa ese danu Lohiabada ena Dubu Helaga dekenai idia noho golo bona siliva, kapusi, uro bamona gaudia, Obeda Edoma ese ia gimaia gaudia, bona king ena ruma ena davana bada gaudia danu be Samaria dekenai ia abia lao. Iuda abia mauri taudia danu unuseni ia abidia lao.   
\s1 Amasaia, Iuda ena king ia mase  
\p
\v 25 King Iehoasa, Israela ena king ia mase murinai, Amasaia, Iuda ena king be ma lagani 15 ia mauri noho, vadaeni ia danu ia mase.  
\v 26 Amasaia ena kara orena be Iuda bona Israela Edia King Edia Sivarai Buka lalonai idia torea vadaeni.  
\v 27 Lohiabada dekena amo Amasaia ia raka siri negana dekena amo, Ierusalema taudia haida ese ia do idia alaia dalana idia tahua. Unai dainai ia ese Lakisi hanua dekenai ia heau. To idia ese tau haida Amasaia ena murinai idia siaia lao ela bona Lakisi, bona unuseni idia ese Amasaia idia alaia mase.   
\p
\v 28 Vadaeni hosi ena latanai idia atoa, Ierusalema dekenai idia abia lou, bona unuseni, king ena guria gabunai, Davida Ena Hanua lalonai, idia guria.   
\c 26  
\s1 King Usaia, Iuda ena king  
\p
\v 1 Vadaeni Iuda taudia ibounai ese Usaia, Amasaia ena natuna tau idia abia hidi, iena tamana ena gabu dekenai king dagi do ia abia. Usaia ena mauri lagani be 16.  
\v 2 Iena tamana ia mase murinai Usaia ese Elata hanua be tuari dekenai ia abia lou, bona ia haginia lou, Iuda ena hanua ta.   
\p
\v 3 Usaia ese Iuda ena king dagi ia hamatamaia neganai iena mauri lagani be 16, bona lagani 52 lalonai Ierusalema dekenai ia king. Usaia ena sinana ena ladana be Iekolaia, ia be Ierusalema hahine.  
\v 4 Usaia ese Lohiabada ena vairanai ia kara maoromaoro, iena tamana Amasaia ena kara ibounai hegeregerena ia karaia.  
\v 5 Usaia ese Sekaraia ena nega lalonai Lohiabada ia tahua hamatamaia. Sekaraia ese Dirava gari henia dalana be Usaia dekenai ia hadibaia. Bona Usaia ese Lohiabada ia tahua negadia ibounai lalonai, Dirava ese ia durua, bona iena mauri ia hanamoa.   
\s1 Usaia ena goada tuari dekenai  
\p
\v 6 Usaia ese Pilistia taudia ia tuari henia. Ia ese Gata, bona Iabine, bona Asadoda hanua ia halusidia, ma edia magu ia veridia diho. Bona ia ese Asadoda hanua kahirakahira, Pilistia tano dekenai hanua haida ia haginidia lou.  
\v 7 Dirava ese Usaia ia durua dainai, ia ese Pilistia taudia bona Arabia taudia, Guru Bala dekenai idia noho, bona Meunimi taudia ia halusia.  
\v 8 Amono taudia ese takisi moni Usaia dekenai idia henia, bona iena sivarai be idia gwauraia loaloa ela bona Aigupito tano dekenai, badina iena goada ia bada daekau lao.   
\p
\v 9 Inai danu, Usaia ese Ierusalema ena magu dekenai, kohoro bona gabu aukadia ia haginia, magu ena Kona Iduara bona Koura Iduara edia badibadinai, bona magu ena kona gabudia ibounai dekenai, tuari do ia vara neganai, do idia goada totona.  
\v 10 Ma ia ese kohoro haida be tano kaukau dekenai ia haginia, bona ranu guri momo ia geia, badina be iena boromakau bona mamoe be momo, Sepala dekenai, bona tano palaka dekenai danu. Ia ese biru gaukara ia ura henia dainai, ia be mai ena biru taudia, bona vain uma naria taudia, ororo dekenai, bona tano namona gabudia dekenai danu.   
\p
\v 11 Usaia danu be mai ena tuari orea, tuari totona idia hegeregere momokani taudia. Edia orea ta ta dekenai idia haboua, Ieiele toretore tauna, bona iena durua tauna Maseaia, ese lisi dekenai idia torea hegeregerena. Inai opesa ruaosi be Hananaia, king ena tuari lohia ta, ese ia biagua.  
\v 12 Iduhu kwarana taudia, goada herea taudia, ibounai be 2600.  
\v 13 Inai iduhu kwarana taudia ese king ena tuari orea, tuari taudia ibounai 307,500, idia gunalaia. Inai tuari orea taudia be goada herea, tuari dekenai manada taudia, bona idia ese king idia durua diba, bema haida ese ia dekenai idia tuari henia neganai.   
\p
\v 14 Usaia ese kesi, bona io, bona tuari kwara gaudia, bona auri dabua gaudia, bona peva, bona varo dekena amo negea nadi namodia, ia abia hegaegae, tuari taudia ibounai edia.  
\v 15 Bona Usaia ese Ierusalema dekenai tuari gau namodia ia karaia, aonega taudia ese inai gau karaia dalana idia hadibaia hegeregerena. Unai tuari gaudia be inai: Kohoro dekena amo, bona magu ena kona dekena amo, nadi badadia negea masini, bona diba pidia masini. Usaia ena sivarai be gabu ibounai dekenai idia kamonai, bona ia goada herea lao, badina be Dirava ese ia durua.   
\s1 Usaia ia hekokoroku dainai Dirava ese ia panisia  
\p
\v 16 To ia goada neganai, iena hekokoroku ia vara, bona unai dainai ia dika. Badina be Lohiabada, iena Dirava dekenai ia koikoi, ia be Lohiabada ena Dubu lalonai ia vareai kava, muramura patana ena latanai muramura mai bonana do ia gabua totona.   
\p
\v 17 To hahelagaia tauna Asaraia be Usaia ena murinai Dubu Helaga ia raka vareai, Lohiabada ena hahelagaia taudia 80 danu, boga auka taudia.  
\v 18 Vadaeni idia ese king Usaia idia koua, idia gwau, “Usaia e, muramura mai bonana Lohiabada dekenai gabua kara be oiemu gaukara lasi, to Arona ena bese taudia sibona ese unai gaukara idia karaia diba. Dubu Helaga dekena amo do oi raka murimurinai, badina oi ese Dirava ena vairanai oi kerere, bona inai kara dekena amo Lohiabada ena hanamoa do oi abia lasi.”   
\p
\v 19 Vadaeni Usaia be ia badu. Unai neganai gida ena auri kapusi be iena imana dekenai ia noho, muramura gabua gauna. Ia ese hahelagaia taudia edia vairanai ia badu henidia, muramura patana ena badibadinai neganai, lepera ena toana be Usaia ena baguna dekenai ia hedinarai.  
\v 20 Hahelagaia Tauna Badana Asaraia bona hahelagaia taudia ibounai ese idia itaia noho, idia itaia Usaia ena baguna dekenai lepera ia noho. Vadaeni idia ese Dubu dekena amo idia doria lao haraga, bona ia sibona danu ia raka lao haraga, badina be Lohiabada ese ia hisihisi henia vadaeni.   
\p
\v 21 Unai dina dekena amo ela bona iena mase dinana dekenai, Usaia be lepera tauna. Ia be lepera tauna dainai, sibona ena ruma dekenai ia noho, badina be ia idia taravatua, Lohiabada ena Dubu Helaga do ia raka vareai lasi. Vadaeni iena natuna tau Iotama ese king ena ruma ia biagua, bona ia ese danu Iuda tano dekenai ia king.   
\p
\v 22 Usaia ena kara oredia, edia matamaia ela bona dokona, be peroveta tauna Isaia Amoso ese edia sivarai ia torea vadaeni.  
\v 23 Vadaeni Usaia ia mase, bona iena tamana bona tubuna danu ia laga-ani, bona king edia guria tano dekenai idia guria. To king edia guria gabuna korikori lalonai idia guria lasi, badina idia gwau, “Ia be lepera tauna.”  
\p Iena natuna tau, Iotama, ese Usaia ena gabuna dekenai king dagi ia abia.   
\c 27  
\s1 King Iotama, Iuda ena king  
\p
\v 1 Iotama ese king dagi ia hamatamaia neganai, iena mauri lagani be 25, bona ia ese lagani 16 lalonai Ierusalema dekenai ia king. Iotama ena sinana be Ierusa, ia be Sadoka ena natuna hahine.  
\v 2 Iotama be Lohiabada ena vairana dekenai ia kara maoromaoro, iena tamana Usaia ena kara ibounai hegeregerena ia karaia. To gau tamona, Iotama ese Dubu Helaga lalonai ia raka vareai kava lasi, iena tamana ia karaia bamona. To taunimanima ese kara kerere idia do karaia noho.   
\p
\v 3 Iotama ese Lohiabada ena Dubu Helaga ena Ataiai Iduara ia haginia lou, bona Ierusalema ena magu, Opele ena kahana dekenai, gaukara bada ia karaia, magu hagoadaia totona. ruma momo ia haginia.  
\v 4 Iotama ese danu Iuda ororo gabudia dekenai hanua haida ia haginia, bona uda gabudia dekenai kohoro bona gabu aukadia ia haginia.   
\p
\v 5 Iotama ese Amono tuari taudia bona edia king ia tuari henidia, bona ia ese ia halusidia. Vadaeni unai lagani lalonai Amono taudia ese siliva ena metau 3400 kilogaram, uiti ena metau 1000 toni, bona bali ena metau danu 1000 toni, Iotama dekenai idia henia. Amono taudia ese danu unai gaudia hegeregerena ma idia henia lou, lagani iharuana dekenai, bona lagani ihatoina dekenai danu.   
\p
\v 6 Unai dainai, Iotama ena goada ia bada daekau, badina be mai maoromaoro bona momokani danu, Lohiabada, iena Dirava ia kamonai henia.   
\p
\v 7 Iotama ena kara oredia, bona iena tuari ibounai, bona iena gaukara daladia, edia sivarai be Israela bona Iuda King Edia Sivarai Buka lalonai idia torea vadaeni.  
\v 8 Iotama ia king hamatamaia neganai, iena mauri lagani be 25, bona lagani 16 lalonai Ierusalema dekenai ia king.   
\p
\v 9 Vadaeni Iotama be ia mase, iena tubuna bona tamana danu ia mahuta, bona Davida ena Hanua dekenai idia guria. Iena natuna tau Ahasa ese Iotama ena gabuna dekenai king dagi ia abia.   
\c 28  
\s1 King Ahasa, Iuda ena king  
\p
\v 1 Ahasa ese king dagi ia hamatamaia neganai iena mauri lagani be 20, bona ia be lagani 16 lalonai Ierusalema dekenai ia king. Ia be Lohiabada ena vairanai ia kara maoromaoro lasi, iena sene tauna Davida ena kara hegeregerena ia karaia lasi.  
\v 2 To Israela ena king edia kara bamona ia karaia. Ia ese ia oda, vadaeni idia ese kaivakuku gaudia, havevea auri dekena amo idia karaia, idia be Bala dirava ena.  
\v 3 Ahasa ese danu muramura mai bonana namo Hinoma Koura dekenai ia gabua, bona ia ese iena natuna tau be gabua bouboudia totona ia aladia, bona ia gabudia. Inai kara be Lohiabada ese Israela taudia edia vairanai ia lulua lao bese taudia edia kara hegeregerena.  
\v 4 Ahasa ese danu boubou karadia, bona muramura mai bonana ia gabua, ataiai idia noho gabudia dekenai, bona au badadia namodia ibounai edia henunai danu.   
\s1 Tuari ia vara, Suria taudia danu, bona Israela taudia danu  
\p
\v 5 Unai dainai Lohiabada, iena Dirava, ese Suria ena king ena siahu henunai Ahasa ia atoa. Suria king ese Ahasa ia halusia, bona Iuda taudia momo herea ia abia mauri, Damaseko dekenai ia abidia lao. Lohiabada ese danu Israela ena king Peka Remalaia ia koua lasi dainai, ia danu ese Ahasa ia halusia, bona Iuda taudia momo herea idia mase.  
\v 6 Dina tamona lalonai Peka Remalaia ese Iuda tuari taudia goadadia 120,000 ia alaia mase. Inai hisihisi idia vara, badina be Iuda taudia ese Lohiabada, edia sene taudia edia Dirava, idia rakatania vadaeni.  
\v 7 Ma Sikiri, goada herea tuari tauna Eparaima dekena amo, ese Maseaia, king Ahasa ena natuna tau, bona Asarikama, king ena ruma biaguna, bona Elikana, king ena sisiba henia tauna badana, ia aladia mase.  
\v 8 Israela tuari taudia ese danu edia varavara Iuda taudia dekena amo hahine, memero, bona kekeni ibounai 200,000 idia abia mauri, bona Samaria dekenai idia abidia lao. Kohu momo danu unuseni idia abia lao.   
\s1 Peroveta tauna Odede  
\p
\v 9 To Lohiabada ena peroveta tauna ta, ena ladana be Odede be unai gabu, Samaria dekenai ia noho. Vadaeni ia raka lao, Israela tuari taudia, Samaria dekenai idia giroa mai taudia danu do ia hedavari totona. Samaria kahirakahira idia raka vareai neganai, Odede ese idia ia hamaoroa, ia gwau, “Kamonai, Dirava ese Iuda taudia ia badu henia dainai, ia ese emui siahu henunai ia atodia, to umui ese idia momo herea umui alaia mase, bogahisihisi lasi. Inai emui badu be guba dekenai ia daekau lao.  
\v 10 Bona hari umui laloa be Iuda bona Ierusalema taudia, tau bona hahine, be do umui guia, bona emui hesiai taudia do umui halaoa, a? To umui danu ese Lohiabada, emui Dirava dekenai umui kara dika lasi, a?  
\v 11 Harihari lau dekenai do umui kamonai, emui varavara Iuda taudia do umui siaia lou, badina be Lohiabada ena badu mai siahu bada danu be umui emui latanai ia noho.”   
\p
\v 12 Lohia taudia haida danu Eparaima iduhu dekena amo, Asaraia Iohanana, Berekaia Mesilemoto, Iehisikaia Salumu bona Amasa Hadalai, ese tuari dekena amo idia mai taudia edia dala koua totona idia gini.  
\v 13 Idia hamaorodia, idia gwau, “Abia mauri taudia do umui mailaia lasi iniseni! Ita ese kara dika Lohiabada dekenai ita karaia vadaeni, bona Lohiabada ena vairanai ita kerere vadaeni. To unai iseda varavara dekenai unai kara do umui karaia, bona iseda kerere do umui habadaia, a?”   
\p
\v 14 Unai dainai Israela tuari taudia ese guia taudia idia ruhaia, bona idia abia kohudia be lohia taudia bona hebou taudia ibounai edia vairanai idia rakatania.  
\v 15 Vadaeni unai tau 4, edia ladana gwauraia vadaeni taudia be idia toreisi, bona idia ese unai abia mauri taudia idia naria. Edena abia mauri taudia be mai dabua lasi, be unai hari taudia ese idia abia kohu dekena amo dabua idia abia, idia henidia. Tamaka danu idia henidia, bona aniani bona ranu danu. Bona mai edia bero taudia be muramura dekena amo edia bero idia dahua. Bona edia manoka taudia ibounai be doniki edia latanai idia atodia, idia helai, vadaeni unai abia mauri taudia be edia varavara taudia dekenai idia hakaudia lou, Ieriko, pama audia edia hanua, dekenai. Unai neganai unai Israela taudia be Samaria dekenai idia giroa lou.   
\s1 Ahasa ese Asuria taudia edia durua totona ia noinoi  
\p
\v 16 Unai neganai king Ahasa ese hereva be Asuria king dekenai ia siaia lao, unai king ese do ia durua totona.  
\v 17 Badina be Edoma taudia ese Iuda idia tuari henia lou, bona idia ese Iuda taudia idia abia mauri, idia abidia lao, mai guia danu.  
\v 18 Ma Pilistia taudia ese Sepela kahana bona Iuda ena Negebe kahana hanuadia idia tuari henia vadaeni, Bete Semese, bona Aialono, bona Gederoto hanuadia idia abia vadaeni. Idia ese danu Soko, bona Timuna, bona Gimiso, mai edia hanua maragidia danu idia abia vadaeni, bona unai hanua lalonai idia noho.  
\v 19 Lohiabada ese Iuda ia hamanokaia vadaeni, badina be Ahasa, Iuda ena king ese kara dika ia havaraia Iuda dekenai, bona ia ese Lohiabada ena kara ia negea momokani dainai.  
\v 20 Vadaeni Asuria ena king, Tigilata Pilesere, ese Ahasa ia durua lasi, to Ahasa tuari henia totona ia mai.  
\v 21 Unai dainai Ahasa ese Dubu Helaga, king ena ruma, bona lohia taudia edia rumadia dekenai ia noho golo ia abia, Asuria ena king dekenai ia henia, to unai kara ese Ahasa ia durua lasi.   
\s1 Ahasa ena kara dika  
\p
\v 22 Ahasa ena hisihisi be idia bada lao neganai, iena kara dika Lohiabada dekenai idia bada lao danu.  
\v 23 Badina ia ese Damaseko dirava koikoi dekenai boubou gaudia ia henia. Unai be Suria taudia, idia ese Ahasa idia halusia vadaeni taudia edia dirava. Ahasa ia gwau, “Suria diravadia ese Suria taudia idia durua, vadaeni bema inai dirava dekenai boubou lau henia neganai, idia ese lau do idia durua danu.” Inai bamona kara ese Ahasa sibona, bona iena basileia ibounai danu ia hadikaia momokani.   
\p
\v 24 Vadaeni Ahasa ese Dubu Helaga ena kohu ibounai ia haboua, bona ia utua maragimaragi, bona Lohiabada ena Dubu Helaga ena iduara ibounai ia koua momokani. Ia ese danu Ierusalema ena kahana ibounai dekenai boubou patadia ia haginia.  
\v 25 Bona Iuda ena hanua ibounai dekenai ataiai idia noho tomadiho gabudia ia karaia, unuseni muramura mai bonana do idia gabua, dirava idaudia do idia hanamoa totona. Inai kara dekena amo ia ese Lohiabada, iena sene taudia edia Dirava, ia habadua.   
\p
\v 26 Ahasa ena kara orena, bona iena dala ibounai, edia matamaia ela bona dokona, be Iuda bona Israela King Edia Sivarai Buka lalonai idia torea vadaeni.  
\v 27 Vadaeni Ahasa be iena tubuna bona tamana danu ia laga-ani, ia mase, bona Ierusalema dekenai idia guria, to king edia guria gabuna lalonai lasi.  
\p Iena natuna tau, Hesekaia, ese Ahasa ena gabuna dekenai king dagi ia abia.   
\c 29  
\s1 King Hesekaia, Iuda ena king  
\p
\v 1 Hesekaia ese king dagi ia hamatamaia neganai, iena mauri lagani be 25, bona ia be lagani 29 lalonai Ierusalema dekenai ia king. Iena sinana ena ladana be Abaisa, Sekaraia ena natuna hahine.  
\v 2 Hesekaia ese Lohiabada ena vairana dekenai ia kara maoromaoro, iena sene tauna Davida ena kara ibounai hegeregerena ia karaia.   
\s1 Hesekaia ese Dubu Helaga ia kehoa lou  
\p
\v 3 Iena king lagani ginigunana ena hua ginigunana lalonai, Hesekaia ese Lohiabada ena Dubu Helaga ena iduaradia ia kehoa lou, bona ia hanamodia lou.  
\v 4 Ia ese hahelagaia taudia bona Levi taudia ia boiridia, Dubu Helaga dekenai do idia mai, vadaeni magu idia hagegea ariara dekenai idia ia haboua, Dubu ena dina ia daekau kahanai.  
\v 5 Vadaeni Hesekaia ese idia dekenai ia hamaoroa, ia gwau, “Levi taudia e, lau dekenai umui kamonai! Umui ese sibona do umui hahelagaia, bona Lohiabada, emui sene taudia edia Dirava ena Dubu Helaga do umui hahelagaia. Gabu helagana idia hamiroa gaudia ibounai do umui abia lao murimurina dekenai.  
\v 6 Badina be iseda tamadia ese Lohiabada kamonai henia kara idia negea. Idia ese Lohiabada, iseda Dirava, ena vairanai idia kara dika, idia ese Lohiabada idia rakatania, bona edia vairadia be Lohiabada ena noho gabuna dekena amo idia giroa siri, Dubu Helaga matauraia kara idia rakatania unai.   
\p
\v 7 “Dubu ena dehe iduaradia danu idia koua, bona lamepa ibounai idia habodoa, muramura mai bonana idia gabua lasi, bona gabua bouboudia idia henia lasi, Israela ena Dirava ena Dubu Helaga lalonai.  
\v 8 Unai dainai, Lohiabada ena badu be Iuda bona Ierusalema edia latanai ia ginidae. Bona Lohiabada ese idia ia hadikaia dainai, Iuda bona Ierusalema be taunimanima edia vairanai gari bona hoa bona hemarai gauna idia halaoa vadaeni, umui sibona emui matana dekenai umui itaia noho inai.  
\v 9 Iseda tamadia be tuari dekenai idia mase vadaeni. Iseda adavadia bona natudia be mai guia danu tuari taudia ese idia abidia lao vadaeni.   
\p
\v 10 “Harihari lau ura ita ese Lohiabada, Israela ena Dirava danu do ita maino karaia, iena badu mai siahu bada danu, ita dekena amo do ia kokia totona.  
\v 11 Egu natuna e, do umui noho kava lasi, badina be Lohiabada ese umui ia abia hidi, iena hesiai gaukara do umui karaia, ia dekenai do umui tomadiho, bona ia dekenai muramura mai bonana namo do umui gabua totona.”   
\s1 Dubu Helaga dekenai tomadiho gaukara idia haginia lou  
\p
\v 12 Vadaeni Levi taudia ese gaukara totona idia toreisi, edia ladadia be inai:  
\q1 Kohata iduhu dekena amo:  
\q2 Mahata Amasai, bona Ioela Asaraia.  
\q1 Merari iduhu dekena amo:  
\q2 Kisa Abidi, bona Asaraia Iehalelele.  
\q1 Geresone iduhu dekena amo:  
\q2 Ioa Sima, bona Edena Ioa.   
\q1
\v 13 Elisapana iduhu dekena amo:  
\q2 Simiri bona Ieule.  
\q1 Asapa iduhu dekena amo:  
\q2 Sekaraia bona Matanaia.   
\q1
\v 14 Hemana iduhu dekena amo:  
\q2 Iehuele bona Simei.  
\q1 Iedutunu iduhu dekena amo:  
\q2 Semaia bona Usiele.   
\p
\v 15 Idia ese edia tadikakadia idia haboua, bona idia sibona idia hahelagaia. Vadaeni king ese ia hamaorodia hegeregerena, Dubu Helaga idia hagoevaia hamatamaia, Lohiabada ena hereva hegeregerena.  
\v 16 Hahelagaia taudia be Lohiabada ena Dubu Helaga ena lalonai momokani idia raka vareai, do idia hagoevaia totona, bona miro ibounai Lohiabada ena gabu helagana lalonai idia davaria be idia abia lao, Lohiabada ena Dubu ena magu ia hagegea ariara gabuna lalonai idia atoa. Vadaeni Levi taudia ese inai miro gaudia ibounai idia abia, hanua ena murimurinai idia abidia lao, Kiderona Sinavai dekenai idia atoa.   
\p
\v 17 Inai Dubu Helaga hahelagaia gaukara be hua ginigunana ena dina ginigunana dekenai idia hamatamaia, bona unai hua ena dina namba 8 dekenai idia be Lohiabada ena Dubu ena dehe dekenai idia ginidae. Vadaeni dina ma 8 idia gaukara noho, ela bona Lohiabada ena Dubu ena kahana ibounai be ia goeva bona helaga.   
\p
\v 18 Levi taudia be king Hesekaia dekenai idia raka vareai, idia gwau, “Ai ese Lohiabada ena Dubu Helaga ai hagoevaia vadaeni, bona gabua bouboudia ena patana, mai ena kohu ibounai danu, bona paraoa helagana ena patana, mai ena kohu ibounai danu.  
\v 19 Kohu ibounai, King Ahasa ese ia king neganai, bona ia kara dika neganai ia negea gaudia, be ai ese ai abidia hegaegae, bona ai hahelagaia vadaeni. Idia ibounai be edia gabudia dekenai idia noho, Lohiabada ena boubou patana ena vairanai.”   
\p
\v 20 Vadaeni king Hesekaia ese daba maragi neganai ia toreisi, hanua ena tau badadia ibounai ia haboua, bona Lohiabada ena Dubu Helaga dekenai idia daekau lao.  
\v 21 Idia ese boromakau tau 7, bona mamoe tau 7, bona mamoe natudia 7, bona nanigosi tau 7 idia abia vareai, boubou gaudia do idia lao, kara dika dainai, basileia totona, Dubu Helaga totona, bona Iuda taudia totona. Hesekaia ese hahelagaia taudia, Arona ena bese taudia ia oda henia, idia ese unai boubou gaudia be Lohiabada ena boubou patana ena latanai do idia henia.  
\v 22 Vadaeni idia ese boromakau tau idia alaia mase, bona hahelagaia taudia ese boromakau edia rarana haida idia abia, boubou patana ena latanai idia negea. Bona mamoe tau idia alaia mase, bona mamoe edia rarana haida be boubou patana ena latanai idia negea. Mamoe natudia danu idia alaia mase bona edia rarana haida be boubou patana ena latanai idia negea.  
\v 23 Unai neganai nanigosi tau, kara dika boubou totona gaudia, be king bona hebou taudia dekenai idia mailaia, bona idia ese edia imadia be nanigosi edia latanai idia atoa.  
\v 24 Vadaeni hahelagaia taudia ese nanigosi idia alaia mase, bona edia rarana be taunimanima edia kara dika davana karaia totona boubou gauna idia halaoa, boubou patana latanai. Badina be king ese ia oda vadaeni, unai gabua bouboudia, bona kara dika totona bouboudia, be Israela taudia ibounai dainai.   
\p
\v 25 Vadaeni Hesekaia ese Levi taudia be Lohiabada ena Dubu dekenai ia atodia, mai edia botaia auridia, bona gita badadia bona maragidia danu, Davida, bona king ena peroveta tauna Gadi, bona peroveta tauna Natana edia oda hegeregerena. Badina guna unai oda hereva be Lohiabada dekena amo ia mai, iena peroveta taudia ese idia gwauraia.  
\v 26 Levi taudia be idia gini, edia imadia dekenai be Davida ena botaia auridia, bona gita danu. Hahelagaia taudia ese danu idia gini, mai edia kibi danu.   
\p
\v 27 Vadaeni Hesekaia ese idia ia oda henia, gabua bouboudia be boubou patana dekenai do idia henia. Boubou henia kara idia hamatamaia neganai, Lohiabada hanamoa ane idia abia, bona kibi idia hiriria, bona Davida, Israela ena king, ena gaudia idia botaia bona gadaralaia.  
\v 28 Hebou taudia ibounai idia tomadiho, ane abia taudia ese ane idia abia, bona kibi hiriria taudia ese edia kibi idia hiriria. Unai bamona sibona idia karaia noho, ela bona gabua boubou gaudia idia gabua ore momokani vadaeni.   
\p
\v 29 Boubou karadia idia ore, vadaeni king Hesekaia bona hebou taudia ibounai idia tui diho, bona idia tomadiho.  
\v 30 Unai neganai king Hesekaia, bona lohia taudia ese Levi taudia idia oda henia, Davida bona peroveta tauna Asapa ena Lohiabada hanamoa ane do idia abia. Vadaeni idia ibounai ese mai moale bada danu Lohiabada hanamoa ane idia abia, bona idia tui diho, Dirava idia tomadiho henia.   
\s1 Taunimanima ese edia boubou gaudia Lohiabada dekenai idia henia  
\p
\v 31 Hesekaia ese hebou taudia ia hamaoroa, ia gwau, “Umui sibona umui hahelagaia vadaeni, Lohiabada ena taudia korikori do umui lao totona. Vadaeni do umui mai, emui boubou gaudia, Lohiabada do umui tanikiu henia totona do umui mailaia.” Idia ese Hesekaia ena hereva idia kamonai henia, boubou gaudia, bona tanikiu henia harihari gaudia idia mailaia. Bona lalona namo taudia ese danu gabua ore bouboudia idia mailaia.   
\p
\v 32 Gabua ore boubou gaudia, hebou taudia ese idia mailaia, be boromakau tau 70, mamoe tau 100, bona mamoe natudia 200, unai ibounai idia gabua ore, Lohiabada ena.  
\v 33 Tanikiu henia harihari gaudia, idia hahelagaia gaudia be boromakau tau ibounai 600 bona mamoe 3000.  
\v 34 To hahelagaia taudia be momo lasi unai gabua ore boubou gaudia edia kopina do idia kokia, vadaeni Levi taudia ese idia durua, bona unai gaukara idia haorea. Gabeai hahelagaia taudia haida ma ese sibodia idia hahelagaia unai gaukara totona. Levi taudia edia laloa maoromaoro ese hahelagaia taudia edia laloa maoromaoro ia hereaia, unai sibodia idia hahelagaia kara dekenai.   
\p
\v 35 Hahelagaia taudia ese gabua ore bouboudia idia karaia sibona lasi, to maino karaia boubou gaudia, taunimanima idia ania gaudia edia digara danu idia gabua ore. Bona gabua ore bouboudia edia atoa kau uaina bouboudia danu idia bubua ore lao, boubou patana dekenai.  
\p Lohiabada ena Dubu Helaga ena tomadiho gaukara be unai bamona idia hamatamaia lou.  
\v 36 Hesekaia bona taunimanima ibounai be idia moale, badina Dirava ese iena bese taudia ia durudia dainai, idia ese unai kara ibounai idia karaia haorea haraga.   
\c 30  
\s1 Pasova Aria  
\p
\v 1 Hesekaia ese hereva ia siaia lao Israela bona Iuda kahadia ibounai dekenai, bona revareva ia torea Eparaima bona Manase taudia dekenai, idia be Lohiabada ena Dubu Ierusalema dekenai do idia mai, Lohiabada, Israela ena Dirava, ena Pasova Aria do idia karaia totona.  
\v 2 King, bona king ena lohia taudia, bona Ierusalema ena hebou taudia ibounai idia laloa tamona, Pasova Aria be hua iharuana lalonai do idia karaia.  
\v 3 Idia be dala lasi Aria ena nega korikori dekenai do idia karaia, badina hahelagaia taudia be hegeregere lasi, haida ese sibodia idia hahelagaia lasi dainai, bona taunimanima danu Ierusalema dekenai do idia haboua lasi dainai.  
\v 4 Aria do idia karaia unai bamona, be king bona hebou taudia ibounai idia laloa be namo.  
\v 5 Vadaeni idia ese Israela taudia ibounai, Bere Sieba dekena amo ela bona Dano, idia boiria mai, idia ese Ierusalema dekenai do idia haboua mai, Lohiabada, Israela ena Dirava ena Pasova Aria do idia karaia totona, taravatu ia gwauraia dalana hegeregerena. Idia ura Israela taudia momo do idia haboua mai, badina guna taunimanima momo lasi ese Pasova idia karaia.   
\p
\v 6 Unai dainai hereva siaia taudia be Israela bona Iuda tano ibounai idia raka hanaia, king bona iena lohia taudia edia revareva idia abia lao. Revareva ena hereva be inai: “Israela taudia e, umui ese Asuria ena king ena siahu dekena amo umui heau mauri vadaeni. Harihari Lohiabada, Aberahamo bona Isako bona Iakobo edia Dirava dekenai do umui giroa mai lou. Bema unai bamona umui karaia neganai, Lohiabada ese umui dekenai do ia giroa mai lou.  
\v 7 Umui emui tamadia bona tadikakadia edia kara bamona do umui karaia lasi. Idia ese Lohiabada, edia sene taudia edia Dirava idia negea. Unai dainai ia ese edia kerere davana ia henia momokani, umui itaia noho momokani.  
\v 8 Emui lalona do umui ha-aukaia lasi, emui tamadia bamona, to Lohiabada do umui kamonai henia. Iena Dubu Helaga Ierusalema dekenai do umui mai. Inai gabu be Lohiabada emui Dirava ia hahelagaia hanaihanai vadaeni. Inai gabu dekenai Lohiabada do umui tomadiho henia, iena badu siahu bada be umui dekena amo do ia abia siri totona.  
\v 9 Bema Lohiabada dekenai umui giroa lou neganai, emui tadikakadia bona emui natudia be idia guidia vadaeni taudia ese do idia bogahisihisi henia, bona idia be inai tano dekenai do idia giroa mai. Badina be Lohiabada, emui Dirava, be mai ena bogahisihisi. Bema ia dekenai umui giroa lou neganai, ia ese umui do ia abia dae.”   
\p
\v 10 Unai dainai, hereva siaia taudia be hanua ta ta dekenai idia lao, Eparaima bona Manase kahana idia raka hanaia ela bona Sebuluno. To unai taudia ese idia dekenai idia kiri bona idia hevaseha henidia.  
\v 11 Gau tamona, Asere bona Manase bona Sebuluno taudia haida sibona be idia ura Ierusalema dekenai idia lao.  
\v 12 Dirava ese danu Iuda dekenai ia gaukara noho, ia ese taunimanima edia lalodia ia hatamonaia, king bona iena lohia taudia edia hereva do idia kamonai henia totona. Unai dekena amo idia ese Dirava ena ura idia karaia.   
\s1 Pasova idia karaia  
\p
\v 13 Unai dainai taunimanima momo be Ierusalema dekenai idia haboua, hua iharuana lalonai Hatubua Lasi Paraoa ena Aria do idia karaia totona. Hebou be bada herea.  
\v 14 Idia ese Ierusalema dekenai idia noho boubou patadia dikadia idia kokia, mai bonana muramura gabua patadia dikadia danu, vadaeni idia be Kiderona Sinavai dekenai idia negedia ore.   
\p
\v 15 Vadaeni hua iharuana ena dina namba 14 dekenai idia ese Pasova ena mamoe ibounai idia alaia. Idia goeva lasia hahelagaia taudia bona Levi taudia be idia hemarai, unai dainai idia ese sibodia idia hahelagaia. Unai neganai idia ese gabua boubou gaudia be Lohiabada ena Dubu Helaga dekenai idia mailaia.  
\v 16 Edia gini gabudia korikori dekenai idia gini, Mose, Dirava ena tau, ena taravatu hegeregerena. Levi taudia ese boubou gaudia edia rarana be hahelagaia taudia dekenai idia henia, bona hahelagaia taudia ese unai rara be boubou patana ena latanai idia negea.  
\v 17 Taunimanima momo be taravatu hegeregerena idia goeva lasi dainai, idia ese Pasova mamoe gaudia Lohiabada ena vairanai idia alaia diba lasi. Unai dainai Levi taudia ese inai bamona taudia totona Pasova mamoe idia alaia.   
\p
\v 18 Momokani taunimanima momo, Eparaima, bona Manase, bona Isakara bona Sebuluno dekena amo ese sibodia idia hahelagaia lasi, to Pasova Aria idia ania kava, taravatu ia gwauraia hegeregerena lasi. To inai taudia totona Hesekaia ia guriguri, ia gwau,  
\v 19 “Lohiabada, aiemai sene taudia edia Dirava e, oiemu kara be namo bona maoromaoro. Mani oi itaia noho, inai miro taudia ese oi dekenai idia tomadiho henia mai edia kudoudia ibounai danu, mani emu kara edia miro bona edia dika do oi gwauatao.”  
\v 20 Lohiabada ese Hesekaia ena guriguri ia kamonai, bona unai taunimanima ia hanamodia.   
\p
\v 21 Israela taudia, Ierusalema dekenai idia haboua mai, ese Hatubua Lasi Paraoa Aria dina 7 lalonai idia karaia, mai edia moale bada danu. Bona Levi taudia bona hahelagaia taudia ese dina ta ta lalonai, ane dekena amo Lohiabada idia hanamoa, mai edia goada ibounai danu.   
\p
\v 22 Vadaeni Hesekaia ese Levi taudia ia hanamodia, badina idia ese Lohiabada tomadiho henia gaukara idia karaia namonamo. Dina 7 lalonai hebou taudia ese aria ena aniani idia ania, bona maino karaia bouboudia Lohiabada dekenai idia henia, bona Lohiabada, edia sene taudia edia Dirava idia hanamoa.   
\s1 Aria ma idia karaia lou  
\p
\v 23 Unai neganai hebou taudia ibounai ese mai ura tamona danu idia gwau, aria be ma do idia karaia lou dina 7. Vadaeni idia ese ma idia karaia lou, dina 7 lalonai, mai edia moale bada danu.  
\v 24 Badina be Hesekaia, Iuda ena king ese boromakau tau 1000 bona mamoe 7000 be hebou taudia dekenai ia henia, edia boubou gaudia totona. Hesekaia ena lohia taudia ese danu boromakau tau ma 1000 bona mamoe 10,000 hebou taudia dekenai idia henia. Hahelagaia taudia momo ese sibodia idia hahelagaia.   
\p
\v 25 Iuda taudia ibounai, bona hahelagaia taudia, bona Levi taudia, bona Israela dekena amo idia mai taudia, bona Iuda dekenai idia noho idau bese taudia danu, ibounai idia moale bada.  
\v 26 Unai dainai Ierusalema hanua lalonai moale be bada herea, badina be king Solomona, Davida ena natuna, ena nega dekena amo ia mai, kara unai bamona be Ierusalema dekenai ia hedinaraia lasi.   
\p
\v 27 Vadaeni hahelagaia taudia bona Levi taudia be idia toreisi, Lohiabada idia noia, ia ese taunimanima do ia hanamoa. Unai neganai, iena gabu guba dekena amo, Dirava ese edia noinoi ia kamonai, bona ia abidia dae.   
\c 31  
\s1 Taunimanima ese mai lalona namo harihari gaudia idia henia  
\p
\v 1 Aria ena kara ibounai ia ore, vadaeni Israela taudia ibounai be Iuda ena hanua ibounai dekenai idia lao, dirava koikoi edia nadi du idia hamakohia maragimaragi, Asera ena hahine dirava ena kaivakuku idia utua diho, bona ataiai idia noho tomadiho gabudia bona boubou patadia idia hadikaia ore. Unai bamona idia karaia danu Iuda tano orena, bona Beniamina tano ibounai dekenai, bona Eparaima tano dekenai, bona Manase tano dekenai danu. Unai murinai Israela taudia ibounai be edia hanua dekenai idia giroa lou, ta ta edia gabu, edia gabu dekenai idia lao.   
\p
\v 2 King Hesekaia ese hahelagaia taudia bona Levi taudia edia gaukara ia haginia lou, orea ta ta mai edia gaukara, bona tau ta ta danu mai edia gaukara ta ta. Gabua bouboudia bona maino karaia bouboudia do idia karaia, Dubu Helaga lalonai tomadiho gaukara do idia karaia, bona Lohiabada ena Dubu ena iduara gabudia ibounai dekenai, Dirava hanamoa bona tanikiu henia ane do idia abia.   
\p
\v 3 King Hesekaia ese ia henia gaudia be ia sibona ena boromakau bona mamoe dekena amo, bona idia be daba bona adorahi edia gabua bouboudia, Sabati Dinadia, bona Hua Matamata, bona Lohiabada ena Taravatu ia gwauraia aria gabua bouboudia totona.   
\p
\v 4 Bona king Hesekaia ese Ierusalema dekenai noho taudia ia oda henia, idia ese hahelagaia taudia bona Levi taudia edia gaukara davana korikori do idia henia, idia ese Lohiabada ena Taravatu do idia tahua bona badinaia, mai maoromaoro bona mai momokani totona.  
\v 5 Unai oda be Hesekaia ia gwauraia neganai, Israela taudia ese mai edia lalona namo danu gau momo herea idia henia, uiti bona bali edia vara guna anina gaudia, bona uaina, bona olive dehoro, bona hani, bona uma ena anina gaudia ibounai. Gau ibounai idia karoa, karoa 10 , vadaeni karoa ta idia mailaia. Idia mailaia gaudia be momo herea.  
\v 6 Israela taudia bona Iuda taudia, Iuda hanua idauidau dekenai idia noho, ese danu edia boromakau bona edia mamoe idia karoa, karoa 10, bona edia karoa ta idia mailaia. Edia uma anina danu, edia karoa 10 dekena amo karoa ta, idia hahelagaia gaudia, be idia mailaia, Lohiabada, edia Dirava dekenai idia henia. Bona unai uma anina be tano dekenai idia haboua.  
\v 7 Unai edia harihari gaudia be hua ihatoina lalonai idia haboua hamatamaia, ela bona hua namba 7 lalonai idia hadokoa.   
\p
\v 8 Hesekaia bona iena lohia taudia ibounai idia mai, bona inai harihari gaudia idia haboua vadaeni gaudia idia itaia neganai, idia ese Lohiabada bona iena bese Israela idia hanamoa.   
\p
\v 9 Vadaeni Hesekaia ese inai harihari gaudia totona hahelagaia taudia bona Levi taudia ia nanadaia.  
\v 10 Asaraia, Hahelagaia Tauna Badana, Sadoka ena bese tauna ta ese Hesekaia dekenai ia haere, ia gwau, “Taunimanima ese edia harihari gaudia be Lohiabada ena Dubu Helaga totona idia mailaia hamatamaia negana ia mai bona harihari, ai be ai aniani, bona aiemai bogadia idia kunu, bona ai ania lasi gaudia momo idia do noho. Badina be Lohiabada ese iena bese ia hanamoa vadaeni, unai dainai inai gau momo herea idia do noho.”   
\s1 Levi taudia edia gaukara davana  
\p
\v 11 Hesekaia ese ia oda henia, Lohiabada ena Dubu lalonai daiutu haida do idia abia hegaegae. Vadaeni idia ese daiutu haida idia abia hegaegae.  
\v 12 Unai neganai taunimanima ese mai maoromaoro bona momokani danu edia harihari gaudia, bona edia karoa 10 dekena amo karoa ta, idia hahelagaia gaudia, idia mailaia. Inai gau ia naria bona gimaia tauna badana be Konanaia, Levi tauna, iena iharuana be iena tadina Simei.  
\v 13 Levi taudia ibounai 10 ese Konanaia bona Simei edia gaukara idia durua. Edia ladadia be inai: Iehiele, Asasaia, Nahata, Asahele, Ierimoto, Iosabada, Eliele, Isimakaia, Mahata, bona Benaia. King Hesekaia bona Asaraia, Hahelagaia Tauna Badana, ese unai taudia idia abia hidi.   
\p
\v 14 Harihari gaudia, taunimanima edia lalona namo dainai Dirava dekenai idia henia gaudia, be Kore, Levi tauna Imina ena natuna tau, Dina Daekau Kahana Iduara gimaia tauna, ese ia naria noho. Kore ese Lohiabada dekenai idia henia harihari gaudia bona idia hahelagaia harihari gaudia ia abia, bona ia ese hahelagaia taudia dekenai ia haria henidia.  
\v 15 Kore ena durua taudia be Edena, Miniamini, Iesua, Semaia, Amaraia bona Sekanaia, Levi taudia. Inai taudia ese mai maoromaoro danu Kore idia durua, edia varavara, hahelagaia taudia totona. Edia hanua ta ta ibounai dekenai, dagi bada bona dagi maragi taudia dekenai aniani hegeregere idia henia, edia orea ta ta hegeregerena.   
\p
\v 16 Inai aniani danu, be Levi taudia edia mauri lagani toi o toi idia hanaia memero bona tau dekenai idia henia, bema edia ladadia be buka dekenai idia torea vadaeni, Lohiabada ena Dubu lalonai dina ta ta dohore idia gaukara, edia orea edia gaukara hegeregerena.  
\v 17 Hahelagaia taudia be edia tamadia edia iduhu hegeregerena edia ladadia idia torea. To Levi taudia, lagani 20 idia hanaia taudia, be edia gaukara hegeregerena edia orea ta ta edia ladadia idia torea.  
\v 18 Hahelagaia taudia be mai edia natudia maragidia, edia adavadia, bona edia natudia tau bona hahine danu, idia ibounai edia ladadia be idia torea. Badina be nega ibounai idia sibodia idia hahelagaia kara idia karaia momokani.   
\p
\v 19 Arona ena bese taudia, hahelagaia taudia momo, be edia hanua ta ta dekenai, bona hanua murimurinai biru tanodia dekenai idia noho. Inai taudia ese edia huanai tau haida idia abia hidi, edia gaukara be hahelagaia taudia edia tatau bona memero dekenai aniani do idia haria henia. Inai aniani danu be Levi taudia ibounai, edia ladadia be Levi iduhu edia buka dekenai idia torea vadaeni taudia dekenai idia haria henia.   
\p
\v 20 Hesekaia ese Iuda ena kahana ibounai dekenai unai bamona ia karaia. Kara namodia bona maoromaorodia, bona momokanidia danu Lohiabada, iena Dirava, ena vairana dekenai ia karaia.  
\v 21 Iena gaukara ibounai, Dirava ena Dubu lalonai, bona Taravatu bona Lohiabada ena oda badinaia kara, Hesekaia ese Dirava ia tahua, mai ena kudouna ibounai danu. Unai dainai iena gaukara ibounai dekenai anina ia havaraia.   
\c 32  
\s1 Asuria taudia ese Iuda idia tuari henia  
\p
\v 1 Unai kara murinai, bona unai king Hesekaia ena kara namodia, Lohiabada ia badinaia mai abidadama danu karadia edia murinai, Senakeriba, Asuria ena king ese Iuda ia tuari henia. Ia ese hanua mai edia magudia ia koua hagegea, bona iena tuari taudia ia oda henidia unai hanuadia do idia hadikaia ore.  
\v 2 Hesekaia ia diba Senakeriba ese Ierusalema danu do ia tuari henia gwauraia.  
\v 3 Vadaeni Hesekaia be iena lohia taudia bona iena tuari biagudia danu idia hereva hebou, Ierusalema ena murimurinai ranu guridia be do idia koua gwauraia, bona idia ese Hesekaia ena laloa idia abia dae.  
\v 4 Taunimanima momo herea idia haboua, bona ranu gabudia ibounai, bona sinavai maragina, unai tano ia heau hanaia gaudia, be idia koua. Idia gwau, “Asuria ena king taudia be iniseni idia mai neganai, anina be dahaka ranu momo do idia davaria?”  
\v 5 Hesekaia ese mai goada danu Ierusalema ena magu, idia makohia gabudia, ia haginia lou, bona kohoro haida be magu ena latanai ia haginia. Magu ena murimurinai danu be Hesekaia ese magu ta ma ia haginia, bona Milo ena kohoro ia ha-aukaia, Davida ena Hanua lalonai. Hesekaia ese danu tuari gaudia bona kesi momo herea ia karaia.   
\p
\v 6 Hesekaia ese tuari biagudia ia abia hidi, idia ese taunimanima do idia biagua. Bona Hesekaia ese hanua ena magu iduara badana ena ariara dekenai taunimanima ia haboua. Ia hereva goada idia dekenai ia gwau,  
\v 7 “Do umui goada, do umui boga auka. Asuria king bona iena tuari taudia totona do umui gari lasi, bona idia dainai emui kudoudia do idia manoka lasi. Badina ita dekenai ia noho siahu ese idia edia siahu ia hereaia noho momokani.  
\v 8 Asuria taudia edia siahu be taunimanima edia siahu sibona, to iseda siahu be Lohiabada iseda Dirava. Ia ese iseda tuari lalonai ita ia durua noho.” Vadaeni taunimanima edia lalodia idia goada, Hesekaia ena hereva dainai.   
\s1 Senakeriba ese ia oda henia, Iuda taudia be iena siahu henunai do idia lao  
\p
\v 9 Senakeriba, Asuria ena king, mai ena tuari taudia ibounai danu, ese Lakisi hanua idia koua hagegea neganai, ia ese iena hereva gwauraia taudia Ierusalema dekenai ia siaia lao, Hesekaia, Iuda ena king, bona ia danu idia noho Iuda taudia ibounai dekenai, idia gwau,  
\v 10 “Senakeriba, Asuria ena king, be inai bamona ia hereva: ‘Dahaka dekenai umui abidadama henia noho, vadaeni umui ese Ierusalema umui ha-aukaia noho?  
\v 11 Hesekaia ese umui ia hamaoroa Lohiabada emui Dirava ese aiemai siahu dekena amo umui do ia hamauria, to Hesekaia ese umui ia koia noho. Umui be hitolo bona ranu mase dekena amo do umui mase ore.  
\v 12 Inai Hesekaia ese Lohiabada ena ataiai idia noho tomadiho gabudia bona ena boubou patadia ia hadikaia ore, bona ia ese Iuda bona Ierusalema taudia ibounai ia oda henia, boubou patana tamona sibona ena vairana dekenai do idia tomadiho, bona iena latanai sibona, edia boubou do idia gabua ore.   
\p
\v 13 “ ‘Umui diba lasi, a, lau bona egu sene taudia ese idau tanodia edia taudia ibounai edena bamona ai hadikadia ore momokani?  
\v 14 Unai edia dirava ta ese Asuria ena king dekena amo ia hamauridia diba, a? Vadaeni, umui emui Dirava ese egu siahu dekena amo umui do ia hamauria diba, a?  
\v 15 Unai dainai, harihari Hesekaia ese umui dekenai ia gwauraia gaudia do umui abia dae lasi. Iena hereva do umui hamomokania lasi, badina be bese ta o basileia ta edia dirava ta ese edia taudia be egu siahu, o egu sene taudia edia siahu dekena amo idia hamauria diba lasi. Unai dainai, emui Dirava ese egu siahu dekena amo umui do ia hamauria diba, a? Lasi momokani!’ ”   
\p
\v 16 Unai Asuria hereva gwauraia taudia ese Lohiabada Dirava hadikaia hereva haida ma idia gwauraia. Idia ese Hesekaia, Lohiabada ena hesiai tauna danu, ma idia hereva dika henia.  
\v 17 King Senakeriba ia torea revareva haida danu ese Lohiabada, Israela ena Dirava idia hereva dika henia, idia gwau, “Tano haida edia dirava ese edia basileia taudia be egu siahu dekena amo idia hamauria diba lasi, unai dainai Hesekaia ena Dirava ese iena taudia be egu siahu dekena amo ia hamauria diba lasi.”   
\p
\v 18 Unai hereva be Senakeriba ena hereva gwauraia taudia ese mai boiboi bada danu Heberu gado dekenai idia gwauraia, Ierusalema taudia, magu dekenai idia gini taudia, do idia kamonai diba totona. Idia ura do idia hagaridia, bona edia lalodia do idia hamanokaia, hanua do idia abia haraga totona.  
\v 19 Idia ese Ierusalema ena Dirava idia herevalaia, tanobada besedia edia dirava, taunimanima edia imadia ese idia karaia gaudia, idia herevalaia hegeregerena.   
\s1 Lohiabada ese Hesekaia mai ena basileia danu ia hamauria  
\p
\v 20 Unai neganai king Hesekaia bona peroveta tauna Isaia, Amoso ena natuna, ese Dirava dekenai idia guriguri, bona durua totona guba dekenai idia tai henia.  
\v 21 Unai dainai Lohiabada ese aneru ta ia siaia, vadaeni ia ese Asuria tuari taudia bona edia tuari biagudia danu edia kamepa lalonai ia alaia ore. Unai murinai Asuria ena king be mai hemarai bada danu, Asuria dekenai ia giroa lou. Dina ta Senakeriba ese iena dirava ena dubu lalonai ia tomadiho neganai, iena natuna haida ese unuseni tuari kaia dekena amo idia alaia mase.   
\p
\v 22 Unai dala dekenai Lohiabada ese Hesekaia bona Ierusalema dekenai noho taudia be Senakeriba, Asuria ena king, ena siahu dekena amo, bona tuari taudia orea haida dekena amo, ia hamauridia. Lohiabada ese Ierusalema taudia dekenai maino ia henia, edia kahana ibounai dekenai.  
\v 23 Vadaeni taunimanima momo ese Ierusalema dekenai idia mai, Lohiabada dekenai bona Hesekaia dekenai harihari gaudia idia mailaia. Bona unai neganai ia lao, bese ibounai taudia ese Hesekaia idia matauraia.   
\s1 Hesekaia ese gorere ia davaria  
\p
\v 24 Unai dinadia lalonai Hesekaia be ia gorere, bona kahirakahira ia mase. Vadaeni ia ese Lohiabada dekenai ia guriguri henia, bona Lohiabada ese ia haere henia, bona toa ta ia henia, do ia namo lou totona.  
\v 25 To Hesekaia be mai ena hekokoroku dainai, ia ese Lohiabada ena bogahisihisi totona ia tanikiu henia lasi. Unai dainai Lohiabada ena badu be Hesekaia ena latanai, Iuda bona Ierusalema edia latanai danu.  
\v 26 To gabeai, Hesekaia ese iena hekokoroku ia negea, bona ia manau lou, ia bona Ierusalema taudia danu. Unai dainai Hesekaia ena dinadia lalonai, Lohiabada ena badu be idia edia latanai ia ginidae lasi.   
\s1 Hesekaia ena kohu momo bona mataurai  
\p
\v 27 Hesekaia ena kohu be momo, bona taunimanima ibounai ese ia idia matauraia. Ia ese kohu haboua rumadia ia haginia. Idia edia lalonai Hesekaia ese iena siliva bona golo bona davana bada nadidia, bona aniani hanamoa muramura, bona kesi, bona davana bada kohu idauidau ia udaia.  
\v 28 Aniani haboua rumadia danu ia haginia, iena uiti bona bali bona uaina bona olive dehoro ia haboua totona. Boromakau rumadia danu ia haginia, ubua gaudia idauidau totona, mamoe koua magudia danu.  
\v 29 Hesekaia ese danu hanua haida ia haginia, bona mamoe bona boromakau momo herea ia abidia, badina be Dirava ese iena kohu ia habadaia momokani.   
\p
\v 30 Hesekaia ese danu Gihona ena Ranu Lohilohi Gabuna ia koua, bona ranu ena heau be ia ese ia haidaua, vadaeni ranu be Davida Ena Hanua ena dina diho kahanai ia heau diho lao. Hesekaia ese iena kara ibounai lalonai kwalimu ia davaria.   
\p
\v 31 To Babulonia lohia taudia ese edia hereva gwauraia taudia idia siaia lao, Hesekaia ena tano dekenai ia vara toa kara ena anina do idia nanadaia totona. Unai neganai Dirava ese Hesekaia ia rakatania, ia tohoa, badina ia ura diba Hesekaia ena lalona be edena bamona.   
\s1 King Hesekaia ia mase  
\p
\v 32 Hesekaia ena kara oredia, bona iena kara namodia edia sivarai be Isaia Amoso, peroveta tauna, ena mata hanai hereva lalonai, bona Iuda bona Israela edia King Edia Sivarai Buka lalonai idia torea vadaeni.  
\v 33 Vadaeni Hesekaia ia mase, bona idia ese Davida ena bese taudia edia guria gabuna, ororo maragina badinai gabuna dekenai idia guria. Hesekaia ia mase neganai, Iuda bona Ierusalema taudia ibounai ese idia hanamoa bada. Iena natuna tau Manase, ese Hesekaia ena gabuna dekenai king dagi ia abia.   
\c 33  
\s1 King Manase, Iuda ena king  
\p
\v 1 Manase ese Iuda ena king dagi ia abia neganai iena mauri lagani be 12, bona lagani 55 lalonai Ierusalema dekenai ia lohia.  
\v 2 Manase ese Lohiabada ena vairana dekenai ia kara dika, Lohiabada ese Israela taudia edia vairanai ia lulua lao besedia edia kara dika herea hegeregerena.   
\p
\v 3 Badina be Manase ese ataiai tomadiho gabudia, iena tamana Hesekaia ese ia hamakohia ore gaudia, ma ia haginia lou. Manase ese danu Bala dirava totona boubou patadia ia haginia, bona Asera ena kaivakuku ta ia karaia. Ia ese danu guba ena hisiu ibounai dekenai ia tomadiho henia.   
\p
\v 4 Manase ese danu Lohiabada ena Dubu Helaga lalonai dirava koikoi haida edia boubou patadia ia haginia. To Lohiabada ese Dubu Helaga ia herevalaia vadaeni guna, ia gwau, “Ierusalema lalonai egu Ladana do lau atoa.”   
\p
\v 5 Lohiabada ena Dubu Helaga ena ariara gabudia ruaosi edia lalonai Manase ese guba hisiu ibounai edia boubou patadia ia haginia.  
\v 6 Manase ese danu iena natuna tau be boubou totona ia gabua ore, bona ia ese babalau, meamea, bona mase taudia edia lauma bona edia laulau dekenai hereva henia kara ia karaia. Manase ese Lohiabada ena vairanai ia kara dika bada, bona ia ese Lohiabada ia habadua.   
\p
\v 7 Ia ese ia karaia vadaeni kaivakuku be Dubu Helaga ena lalonai ia haginia. Dubu be unai, Lohiabada ese Davida bona Davida ena natuna Solomona dekenai ia herevalaia, ia gwau, “Inai Dubu lalonai, bona Ierusalema, Israela iduhu ibounai edia huanai dekena amo lau abia hidi vadaeni hanua, ena lalonai lau ese egu Ladana do lau atoa, ela bona hanaihanai.  
\v 8 Bona bema Israela taudia ese egu oda idia kamonai henia, bona egu hesiai tauna Mose ese idia dekenai ia henia Taravatu ibounai idia badinaia neganai, edia sene taudia dekenai lau henia tano dekena amo loaloa kava totona do lau siaidia lou lasi.”   
\p
\v 9 To Manase ese ia hakaudia kerere dainai, Iuda taudia ese dika bada idia karaia. Bona Lohiabada ese Israela taudia edia vairanai ia lulua besedia edia dika be Iuda taudia edia dika ese idia hanaia, Manase dainai.   
\s1 Manase ese iena lalona ia giroa  
\p
\v 10 Lohiabada ese Manase bona iena basileia taudia ia sisiba henidia, to idia kamonai lasi.  
\v 11 Unai dainai Lohiabada ese Asuria ena tuari taudia edia biagudia Iuda tuari henia totona ia siaia lao. Idia ese Manase idia abia mauri, kimai bona auri seini dekena amo idia guia, bona Babulonia dekenai idia abia lao.  
\v 12 Iena hisihisi dainai Manase be ia manau lao, bona ia ese Lohiabada, iena Dirava ia tahua, bona durua totona ia noinoi henia.  
\v 13 Dirava ese Manase ena guriguri ia kamonai henia, bona iena basileia Ierusalema dekenai ia hakaua lao lou. Vadaeni Manase ia diba vadaeni Lohiabada be Dirava.   
\p
\v 14 Unai murinai Manase ese Davida ena Hanua ena magu, murimuri kahana gauna, ia haginia lou, Gihona ena Ranu Lohilohi Gabuna ena dina diho kahanai, koura lalonai, ela bona Gwarume ena Iduara. Bona Ierusalema ena kahana ladana Opele ia hagegea magu danu ia hagoadaia. Unai magu edia ataiai lata ia habadaia momokani. Manase ese danu tuari biagudia, be Iuda hanua mai edia magu ta ta ibounai dekenai ia atodia, tuari taudia ese unai hanuadia do idia gimaia totona.   
\p
\v 15 Manase ese danu idau bese edia dirava bona kaivakuku be Lohiabada ena Dubu dekena amo ia kokia lao, bona boubou patadia ibounai ia ese guna Lohiabada ena Dubu ena ororo dekenai bona Ierusalema dekenai ia haginia gaudia be ma ia kokia lao, bona hanua ena murimurinai ia negedia ore.  
\v 16 Unai neganai Manase ese Lohiabada ena boubou patana ma ia haginia lou, bona unai pata ena latanai maino karaia bouboudia bona Lohiabada tanikiu henia bouboudia ia henia. Ia ese danu Iuda taudia ia oda henia, idia ese Lohiabada, Israela ena Dirava, do idia tomadiho henia.  
\v 17 To taunimanima ese ataiai idia noho tomadiho gabudia dekenai boubou karadia idia karaia noho, to gau tamona, Lohiabada, edia Dirava, sibona dekenai unai boubou idia henia.   
\s1 Manase ia mase  
\p
\v 18 Manase ena kara oredia, bona iena guriguri Dirava dekenai, bona peroveta taudia ese Lohiabada, Israela ena Dirava, ena ladana dekenai idia gwauraia hereva, be Israela ena King Edia Sivarai Buka lalonai idia torea vadaeni.  
\v 19 Manase ena guriguri, bona Dirava ese ena noinoi ia abia dae, bona Manase ena kara dika bona kerere bada, bona edeseni ia ese ataiai tomadiho gabudia ia karaia, bona Asera ena au badadia bona kaivakuku, ia ese ia haginia gaudia, ia do manau lasi neganai, edia sivarai be Peroveta Taudia Edia Sivarai Buka lalonai idia torea vadaeni.  
\v 20 Vadaeni Manase ia mase, bona idia ese iena ruma dekenai idia guria. Iena natuna tau, Amona, ese Manase ena gabuna dekenai king dagi ia abia.   
\s1 King Amona, Iuda ena king  
\p
\v 21 Amona ese Iuda ena king dagi ia abia neganai iena mauri lagani be 22, bona lagani rua sibona Ierusalema dekenai ia king karaia.  
\v 22 Amona ese Lohiabada ena vairana dekenai ia kara dika, iena tamana Manase ia kara dika hegeregerena. Iena tamana Manase ese ia karaia vadaeni kaivakuku ibounai dekenai ia tomadiho henia, bona idia dekenai boubou ia henia.  
\v 23 To Amona ese Lohiabada ena vairanai, sibona ia manau karaia lasi, iena tamana Manase ia manau karaia bamona. Lasi momokani, to ia ese iena kerere ia habadaia daekau.   
\p
\v 24 Amona ena hesiai taudia ese ia do idia alaia mase dalana idia laloa hebou, vadaeni idia ese king ena ruma dekenai idia alaia mase.  
\v 25 To unai Amona idia alaia taudia be Iuda taudia ese idia alaia mase. Vadaeni Iuda taudia ese Amona ena natuna tau Iosaia idia abia, edia king idia halaoa.   
\c 34  
\s1 King Iosaia, Iuda ena king  
\p
\v 1 Iosaia ese king dagi ia abia hamatamaia neganai iena mauri lagani be 8. Ia be Ierusalema dekenai ia king lagani 31 lalonai.  
\v 2 Iosaia ese Lohiabada ena vairanai kara maoromaoro ia karaia. Iena sene tauna Davida ena dala dekenai ia raka, bona Dirava ena taravatu ibounai ia kamonai henia.   
\s1 Iosaia ese Dirava koikoi tomadiho kara ia koua gwauraia  
\p
\v 3 Iosaia ena king lagani namba 8 lalonai, ia be do mero neganai, ia ese iena sene tauna king Davida ena Dirava ia tahua hamatamaia. Iena lohia lagani namba 12 lalonai Iosaia ese Iuda bona Ierusalema dekenai idia noho ataiai tomadiho gabudia, Asera ena au badadia bona kaivakuku, bona auri dekenai idia karaia dirava edia laulaudia ibounai ia hadikaia hamatamaia.  
\v 4 Iosaia ia oda henidia, vadaeni iena taudia ese Bala ena boubou patadia, bona idia kahirakahira idia noho muramura mai bonana patadia idia hadikaia ore. Idia ese Asera ena kaivakuku, bona kaivakuku idauidau ibounai idia hamakohia maragimaragi, kahu idia halaoa. Bona inai kahu be unai kaivakuku idia tomadiho henia taudia edia guria gabudia edia latanai idia negea lao.   
\p
\v 5 Iosaia ese danu unai dirava koikoidia edia hahelagaia taudia edia turiadia,be edia boubou patadia latanai ia gabua ore. Unai kara dekena amo Iosaia ese Iuda bona Ierusalema ia hagoevaia lou.  
\v 6 Iosaia ese unai bamona ia karaia danu Manase, bona Eparaima bona Simeona edia hanua ibounai dekenai, ma ela bona Napatali tano ena hanua ibounai danu.  
\v 7 Unai mirigini kahana hanua ibounai dekenai Iosaia ese boubou patadia ia hamakohia, bona Asera au badadia bona kaivakuku be ia utua maragimaragi, kahu ia halaodia. Muramura mai bonana patadia danu ia hadikaia ore Israela tano ibounai dekenai. Unai murinai Ierusalema dekenai ia giroa lou.   
\s1 Taravatu Buka idia davaria  
\p
\v 8 Iena king lagani namba 18 lalonai, tano bona Dubu Helaga ia hagoevaia murinai, king Iosaia ese tau toi ia siaia lao Lohiabada Dirava ena Dubu Helaga do idia hanamoa lou totona. Edia ladana be inai: Sapana, Asalaia ena natuna, Maseaia, Ierusalema ena lohia tauna badana, bona Ioa Ioahasa, toretore tauna badana.  
\v 9 Idia be Hilekaia, Hahelagaia Tauna Badana dekenai idia ginidae, vadaeni taunimanima ese Dirava ena Dubu Helaga lalonai idia atoa vareai moni idia henia. Unai moni be Levi taudia, Dubu iduara idia naridia taudia, ese Manase bona Eparaima taudia, bona Israela kahanai do noho taudia, bona Iuda bona Beniamina taudia ibounai, bona Ierusalema taudia dekena amo idia abia monina.   
\p
\v 10 Vadaeni inai moni be Lohiabada ena Dubu Helaga hanamoa lou ena gaukara naria taudia badadia dekenai idia henia. Inai taudia ese inai moni dekena amo Dubu hanamoa lou gaukara taudia edia gaukara davana idia henia.  
\v 11 Inai moni haida danu be kamuta taudia bona ruma haginia taudia dekenai idia henia, nadi namodia bona au namodia do idia hoia totona. Unai dekena amo idia ese Iuda ena king taudia idia naria lasi dainai idia dika rumadia, do idia hanamoa lou.   
\p
\v 12 Unai gaukara taudia ese Dubu Helaga idia hanamoa lou, mai maoromaoro bona momokani danu. Levi taudia 4 ese unai gaukara idia naria, edia ladana be Iahata bona Obadaia, Merari besena taudia, bona Sekaraia bona Mesulama, Kohata besena taudia. Levi taudia ibounai be miusiki gadaralaia diba taudia.  
\v 13 Bona idia ese kohu huaia taudia edia gaukara idia itaia noho, bona hesiai gaukara idauidau idia karaia taudia ibounai idia biagua. Levi taudia haida be kohu duahia bona torea taudia, bona Dubu iduara naria taudia.   
\p
\v 14 Unai moni, Lohiabada ena Dubu dekenai idia atoa vareai moni be kohu haboua daiutu dekena amo idia abia neganai, hahelagaia tauna Hilekaia ese Lohiabada ena Taravatu Buka, Dirava ese Mose dekenai ia henia gauna, ia davaria.  
\v 15 Vadaeni Hilekaia ese toretore tauna Sapana ia hamaoroa, ia gwau, “Lau ese Taravatu Buka lau davaria, Lohiabada ena Dubu lalonai.” Bona Hilekaia ese Buka be Sapana dekenai ia henia.   
\p
\v 16 Vadaeni Sapana ese Buka be king Iosaia dekenai ia abia lao. Ia ese king ia hamaoroa, ia gwau, “Oiemu hesiai taudia ese oi henidia gaukara ibounai idia karaia noho.  
\v 17 Lohiabada ena Dubu lalonai idia davaria moni be gaukara naria taudia bona gaukara taudia dekenai idia henia.”  
\v 18 Vadaeni toretore tauna Sapana ese king ma ia hamaoroa, ia gwau, “Hahelagaia tauna Hilekaia ese Buka ta lau dekenai ia henia.” Vadaeni Sapana ese king ena vairana dekenai Buka ia duahia hedinarai.   
\p
\v 19 King Iosaia ese Taravatu Buka ena hereva ia kamonai neganai, ia ese gari dainai iena dabua ia darea.  
\v 20 Vadaeni king ese hahelagaia tauna Hilekaia, bona Ahikama Sapana, bona Abidona Mikaia, bona toretore tauna Sapana, bona Asaia, king ena hesiai tauna ta dekenai ia oda henia, ia gwau,  
\v 21 “Umui lao, Lohiabada dekenai umui nanadaia, lau dainai, bona do noho Israela bona Iuda taudia dainai, inai idia davaria Buka ena hadibaia hereva do ita laloa namonamo totona. Badina Lohiabada be ita dekenai ia badu, iseda sene taudia ese iena hereva idia kamonai henia lasi, bona inai Buka ia torea hereva idia badinaia lasi dainai.”   
\p
\v 22 King ena oda dainai, Hilekaia bona king ia siaia vadaeni taudia be peroveta hahine Hulida, Salumu Tikava ena adavana dekenai idia lao. Unai Salumu be Harahasa ena tubuna. Ia be king ena dabua naria tauna. Inai peroveta hahine be Ierusalema ena kahana matamata dekenai ia noho. Idia be ia danu idia herevahereva.   
\p
\v 23 Vadaeni hahine ese idia ia hamaoroa, “Do umui giroa lou, bona king dekenai Dirava ena hereva do umui hamaoroa, Dirava ia gwau:  
\v 24 ‘Lau, Lohiabada, Israela ena Dirava, ese Ierusalema bona iena taudia do lau panisia momokani, Iuda ena king ia duahia Buka ia torea hadikaia gaudia hegeregerena.  
\v 25 Badina be idia ese lau idia rakatania, bona idau dirava edia vairanai muramura mai bonana idia gabua, bona edia kara ibounai dekena amo lauegu badu idia havaraia. Egu badu ia toreisi vadaeni Ierusalema dekenai, bona ia keru diba lasi.’   
\p
\v 26 “Iuda ena king do umui hamaoroa, umui gwau: ‘Lau, Lohiabada, Israela ena Dirava be inai bamona lau hereva, lau gwau: Oi ese inai Buka ena hereva, oi kamonai,  
\v 27 bona oiemu lalona oi giroa, bona egu vairana dekenai oi manau, oiemu dabua danu oi darea, bona oi taitai. Unai bamona oi karaia vadaeni, badina be oi kamonai lau ese Ierusalema bona iena taudia do lau panisia. To lau Lohiabada ese oiemu guriguri lau kamonai vadaeni, oiemu lalona oi giroa dainai.  
\v 28 Unai dainai unai dika Ierusalema ena latanai do lau atoa, be do ia vara lasi, ela bona oi mase murinai. Mai maino danu do oi mase.’ ”  
\p Vadaeni unai tatau ese king Iosaia dekenai idia giroa lou, unai hahine ena hereva idia hamaoroa.   
\s1 Iosaia ese ia gwauhamata, Lohiabada do ia kamonai henia  
\p
\v 29 King Iosaia ese oda ia gwauraia, vadaeni Iuda bona Ierusalema dekenai idia noho tau badadia be ia dekenai idia haboua.  
\v 30 Vadaeni king Iosaia ese idia ia hakaua lao Lohiabada ena Dubu Helaga dekenai. Hahelagaia taudia bona Levi taudia ese king idia bamoa, Iuda taudia ibounai danu, kohu momo taudia bona ogogami taudia. Vadaeni Iosaia ese Taravatu Buka, Lohiabada ena Dubu Helaga lalonai idia davaria gauna, ena hereva ibounai idia dekenai ia duahia hedinarai.   
\p
\v 31 Iosaia be Dubu ena du badana ena badibadinai ia gini, bona Lohiabada ena vairana dekenai ia gwauhamata, Lohiabada ena gwauhamata taravatuna do ia kamonai henia, bona Lohiabada ena oda bona iena hadibaia hereva, bona iena taravatu do ia badinaia, mai ena lalona ibounai, bona mai ena kudouna ibounai danu. Ia gwauhamata danu unai Buka lalonai taravatu hereva gaudia ibounai do ia karaia.  
\v 32 Bona Iosaia ese Ierusalema bona Beniamina taudia ia oda henidia idia danu unai bamona do idia gwauhamata. Vadaeni Ierusalema dekenai noho taudia ese Dirava, edia sene taudia edia Dirava, ena gwauhamata taravatuna hegeregerena, inai gwauhamata idia karaia.   
\p
\v 33 King Iosaia ese kaivakuku ibounai bona dirava koikoi edia laulau gaudia ibounai, dika rohoroho gaudia, Israela taudia edia tano dekenai idia noho gaudia, ia hadikaia ore. Iosaia ese danu ia oda henia, Israela dekenai idia noho taudia ibounai ese Lohiabada, edia Dirava ena hesiai gaukara do idia karaia. Bona Iosaia ena mauri dinadia lalonai, idia be Lohiabada, edia sene taudia edia Dirava, ena dala dekena amo idia raka siri lasi.   
\c 35  
\s1 Iosaia ese Pasova Aria ia karaia  
\p
\v 1 Iosaia ese Pasova Aria ta Ierusalema dekenai ia karaia, Lohiabada hanamoa totona. Hua ginigunana ena dina namba 14 dekenai idia ese Pasova mamoe idia alaia mase.  
\v 2 Iosaia ese hahelagaia taudia ta ta dekenai edia gaukara, edia gaukara ia henidia, bona Lohiabada ena Dubu Helaga dekenai idia karaia gaukara lalonai ia hagoadadia.  
\v 3 Levi taudia be Lohiabada dekenai idia helaga noho, bona idia ese Israela taudia ibounai idia hadibaia noho. Vadaeni Iosaia ese Levi taudia ia hamaoroa, ia gwau, “Taravatu Maua be Solomona, Davida ena natuna, Israela ena king, ese ia haginia Dubu Helagana lalonai do umui atoa, bona inai murinai emui pagadia dekenai do umui huaia loaloa lou lasi. Harihari ia lao, Lohiabada, emui Dirava, bona iena bese Israela edia hesiai gaukara do umui karaia.  
\v 4 Umui sibona ese Dubu Helaga lalonai emui gaukara gabudia do umui abia, emui iduhu ta ta hegeregerena, king Davida bona iena natuna Solomona ese idia torea vadaeni dalana hegeregerena. Edia oda ibounai do umui badinaia.   
\p
\v 5 “Bona Helaga Gabuna dekenai do umui gini, emui varavara Israela taudia edia iduhu ta ta ibounai do umui durua totona. Levi orea ta ese iduhu ta do ia durua, ma Levi orea ta ese iduhu ma ta do ia durua.  
\v 6 Bona Pasova ena mamoe do umui alaia diba totona umui sibona do umui hahelagaia noho. Unai dekena amo emui varavara Israela taudia ese, Lohiabada ena hereva Mose ena uduna dekena amo ia henia hegeregerena do idia karaia momokani.”   
\p
\v 7 Unai neganai Iosaia ese hanua taudia dekenai harihari gaudia ia henia. Ia ese hebou taudia dekenai edia Pasova boubou gaudia ia henia, mamoe natudia bona nanigosi natudia 30,000, bona boromakau tau 3000. Unai be king Iosaia sibona ena ubua gaudia edia orea dekena amo.  
\v 8 Iosaia ena lohia taudia ese danu hanua taudia bona hahelagaia taudia bona Levi taudia dekenai harihari gaudia idia henia, boubou totona gaudia. Bona Hilekaia, Sekaraia bona Iehiele, Lohiabada ena Dubu Helaga naria taudia badadia ese mamoe natudia bona nanigosi natudia 2600, bona boromakau tau 300 be hahelagaia taudia dekenai idia henia, Pasova Aria totona boubou gaudia.   
\p
\v 9 Levi taudia edia lohia taudia, Konanaia, mai ena tadina Semaia bona Netanele, bona Hasabaia, Ieiele bona Iosabada, ese mamoe natudia bona nanigosi natudia 5000 bona boromakau tau 500 be Levi taudia dekenai idia henia, Pasova Aria totona boubou gaudia.   
\p
\v 10 Pasova Aria totona gau ibounai idia abia hegaegae vadaeni neganai, hahelagaia taudia be edia gabu dekenai idia gini, bona Levi taudia edia orea ta ta dekenai idia gini, king ena oda hegeregerena.  
\v 11 Vadaeni Pasova mamoe idia alaia mase, bona hahelagaia taudia ese mamoe edia rarana haida idia abia, boubou patana ena latanai idia negea lao. Levi taudia ese mase gaudia edia kopina idia kokia.  
\v 12 Unai neganai, Levi taudia do idia gabua ore gaudia edia vamu idia utua, bona hanua taudia edia iduhu orea ta ta dekenai idia haria henidia, idia ese Lohiabada dekenai do idia henia totona, Mose ena Buka dekenai ia torea hegeregerena. Boromakau tau dekenai danu unai bamona idia karaia.  
\v 13 Vadaeni taravatu ia gwauraia hegeregerena Pasova mamoe ibounai be lahi dekenai idia gabua, bona harihari gaudia helagadia be uro maragidia bona uro badadia, bona paraipani lalonai idia nadua. Unai neganai unai vamu be hanua taudia ibounai dekenai idia henia haraga.   
\p
\v 14 Unai murinai Levi taudia ese idia sibona edia vamu, bona hahelagaia taudia edia vamu idia nadua, badina hahelagaia taudia, Arona ena bese taudia ese gabua bouboudia bona digara idia gabua noho mai hekwarahi danu, ela bona hanuaboi ia ginidae. Unai dainai Levi taudia ese sibodia edia vamu, bona hahelagaia taudia, Arona ena bese taudia edia vamu, idia nadua.   
\p
\v 15 Ane abia taudia be Asapa ena bese taudia, bona idia be edia gabu dekenai idia noho, Davida bona Hemana bona Iedutunu, king ena peroveta tauna, edia oda hegeregerena. Bona Dubu ena iduara gimaia taudia ese edia gabudia idia rakatania lasi, badina be edia tadikakadia, Levi taudia ese edia Pasova vamuna idia nadua bona mailaia.   
\p
\v 16 Unai dainai unai dina dekenai Lohiabada tomadiho henia gaukara ibounai idia karaia, Pasova Aria do idia karaia totona, bona gabua bouboudia be boubou patana dekenai idia gabua danu, king Iosaia ia oda hegeregerena.  
\v 17 Dina 7 lalonai unuseni idia hebou Israela taudia ese Pasova Aria bona Hatubua Lasi Paraoa Aria idia ania.   
\p
\v 18 Peroveta tauna Samuela ena nega dekena amo, Pasova Aria inai bamona ta idia karaia lasi. Bona Israela ena king ta ese Pasova Aria ta ia karaia lasi, Iosaia ese ia karaia bamona. Ia ese hahelagaia taudia, Levi taudia, Iuda taudia, bona unuseni Ierusalema taudia danu idia noho Israela taudia danu, unai Aria idia karaia.  
\v 19 Unai Pasova Aria be Iosaia ena king lagani 18 lalonai idia karaia.   
\s1 King Iosaia ia mase  
\p
\v 20 Unai murinai, Iosaia ese Dubu Helaga ena gaukara ia hagoevaia momokani murinai, Neko, Aigupito ena king be tuari totona Karakemisi, Euperate Sinavai ena badibadinai ia lao. Vadaeni Iosaia ese, Neko tuari henia totona ia toreisi, ia lao.   
\p
\v 21 To Neko ese Iosaia dekenai hereva gwauraia taudia ia siaia, ia gwau, “Iuda ena king e, dahaka totona lau oi tuari henia totona oi mai? Lau ese oi tuari totona lau mai lasi, to lau tuari henia taudia sibona hadikaia totona lau mai, bona Dirava ese lau ia hamaoroa karaharaga do lau mai. Dirava ese lau ia durua noho dainai, lau do oi koua toho lasi, Dirava ese oi do ia hadikaia garina.”   
\p
\v 22 To Iosaia ia ura lasi Neko dekena amo do ia raka siri. Iosaia ese iena king dabua ia kokia, bona iena toana ia haidaua, tuari dekenai do ia vareai totona. Ia ese Dirava ena hereva, king Neko dekena amo gauna ia kamonai henia lasi, to Megido tano palaka dekenai tuari lalonai ia vareai.   
\p
\v 23 To Aigupito edia peva taudia ese king Iosaia be diba dekenai idia gwadaia. Vadaeni king ese iena hesiai taudia ia hamaoroa, ia gwau, “Tuari dekena amo lau umui abia siri, badina bero dikana lau davaria!”  
\v 24 Iena hesiai taudia ese kariota dekena amo idia abia diho, ma iena kariota iharuana dekena amo Ierusalema dekenai idia abia lao. Vadaeni unuseni ia mase, bona idia ese Iuda king taudia edia guria gabuna dekenai idia guria. Iuda bona Ierusalema taudia ibounai ese Iosaia totona idia taitai.   
\p
\v 25 Peroveta tauna Ieremia ese Iosaia totona lalohisihisi ane ia karaia. Bona ane abia tau bona hahine taudia ese Iosaia ena mase totona lalohisihisi ane idia abia noho ia mai bona hari. Inai bamona be edia kara ta idia halaoa Israela dekenai. Bona unai ane ena hereva be Lalohisihisi Ane Buka ena lalonai idia torea vadaeni.   
\p
\v 26 Iosaia ena kara oredia, bona iena lalokau Lohiabada dekenai, bona ia ese Taravatu ia kamonai henia karadia,  
\v 27 bona iena kara ibounai, hamatamaia ela bona dokona, be Israela bona Iuda King Edia Sivarai Buka lalonai idia torea vadaeni.   
\c 36  
\s1 King Iehoahasa, Iuda ena king  
\p
\v 1 Vadaeni Iuda taudia ese Iehoahasa, Iosaia ena natuna idia abia, iena kwarana dekenai olive dehoro idia bubua, king idia halaoa, iena tamana ena gabu dekenai.  
\v 2 Iehoahasa ese Iuda ena king dagi ia hamatamaia neganai iena mauri lagani be 23, bona ia be hua toi sibona Ierusalema dekenai ia king.   
\p
\v 3 Neko, Aigupito ena king ese king Iehoahasa ia abia mauri. Bona takisi moni siliva 3400 kilogaram, bona golo 34 kilogaram be Neko ese Iuda dekena amo ia abia.  
\v 4 Neko ese danu Iehoahasa ena tadina Eliakimi be Ierusalema ena king ia halaoa, bona iena ladana ia haidaua, Iehoiakimi ia atoa. Neko ese Iehoahasa be Aigupito dekenai ia abia lao.   
\s1 King Iehoiakimi, Iuda ena king  
\p
\v 5 Iehoiakimi ese Iuda ena king dagi ia abia neganai iena mauri lagani be 25, bona lagani 11 lalonai Ierusalema dekenai ia king. Ia ese Lohiabada, iena Dirava, ena vairanai kara dika ia karaia.   
\p
\v 6 Nebukanesa, Babulonia ena king ese Iuda ia tuari henia, bona Iehoiakimi ia abia, seini dekenai ia guia, bona Babulonia dekenai ia abia lao.  
\v 7 Nebukanesa ese danu Lohiabada ena Dubu Helaga ena kohu namodia haida be Babulonia dekenai ia abia lao, iena ruma badana lalonai ia atodia.   
\p
\v 8 Iehoiakimi ena kara ibounai, kara dika bada ia ese ia karaia, bona iena kerere karadia momo, be Israela bona Iuda Edia King Edia Sivarai Buka lalonai idia torea vadaeni. Vadaeni iena gabuna dekenai, Iehoiakimi ena natuna tau, Iehoiakini, ese Iuda ena king dagi ia abia.   
\s1 King Iehoiakini be Babulonia dekenai idia abia lao  
\p
\v 9 Iehoiakini ena mauri lagani be 18 neganai ia ese Iuda ena king dagi ia hamatamaia. Iehoiakini be hua toi sibona Ierusalema dekenai ia king. Iehoiakini danu ese Lohiabada ena vairanai ia kara dika.  
\v 10 Keru negana ia ore neganai king Nebukanesa ese Iehoiakini ia abia, ia guia, bona Babulonia dekenai ia abia lao. Lohiabada ena Dubu Helaga ena kohu namo herea danu ia abia lao. Vadaeni Nebukanesa ese Iehoiakini ena tamana maragi Sedekaia be Iuda bona Ierusalema ena king ia halaoa.   
\s1 King Sedekaia, Iuda ena king  
\p
\v 11 Sedekaia ena mauri lagani be 21 neganai ia ese Iuda ena king dagi ia hamatamaia. Sedekaia be lagani 11 lalonai Ierusalema dekenai ia king.  
\v 12 Sedekaia ese Lohiabada, iena Dirava, ena vairanai ia kara dika. Bona Sedekaia ese peroveta tauna Ieremia, Lohiabada ena hereva gwauraia tauna, ia kamonai henia lasi, ma ia ese Ieremia ena vairanai ia manau lasi.   
\s1 Nebukanesa ese Ierusalema ia halusia  
\p
\v 13 King Nebukanesa ese ia oda henia dainai, Sedekaia ese Dirava ena ladanai ia gwauhamata Nebukanesa ena henunai do ia noho momokani. To Sedekaia ese unai gwauhamata ia negea, bona ia ese Nebukanesa ia dagedage henia. Sedekaia ese danu mai ena lalona auka danu Lohiabada, Israela ena Dirava dekenai iena lalona ia giroa lasi.  
\v 14 Ma danu, hahelagaia taudia badadia, Iuda taudia edia lohia taudia ese danu, Lohiabada dekenai idia momokani lasi. Idia ese idau bese taudia edia kara dika bada karadia idia karaia, bona unai dainai, idia ese Lohiabada ena Dubu, ia ese ia hahelagaia Ierusalema dekenai gauna, idia hamiroa vadaeni.   
\p
\v 15 Lohiabada, edia sene taudia edia Dirava ese iena hereva gwauraia taudia, peroveta taudia ia siaia lao, ma ia siaia lao, iena bese taudia do ia sisiba henia totona, badina ia ese iena bese bona iena noho gabuna ia bogahisihisi henia.  
\v 16 To idia ese Dirava ena hesiai taudia idia kirikirilaia, bona edia hereva idia negea. Iena peroveta taudia danu be idia ese idia hevaseha henia, ela bona Lohiabada ena badu iena bese taudia dekenai ia toreisi, bona inai badu hakerua dalana be lasi.   
\p
\v 17 Unai dainai Lohiabada ese Babulonia ena king ia hakaua mai, idia do ia hadikaia totona. Babulonia taudia ese Iuda ena eregabe taudia be tuari kaia dekena amo idia alaia mase, Dubu Helaga lalonai noho taudia danu. Babulonia ena king ese tau ta ia bogahisihisi henia lasi, to uhau taudia, buruka taudia, tau bona hahine, gorere taudia o mai goadadia taudia, ibounai be Dirava ese Nebukanesa ena siahu henunai ia atodia.   
\p
\v 18 Nebukanesa ese danu Dirava ena Dubu Helaga ena kohu ibounai, badadia bona maragidia, bona Lohiabada ena Dubu gaudia namo herea, bona king bona iena lohia taudia edia gau namodia momokani, ibounai be Babulonia dekenai ia abia lao.  
\v 19 Nebukanesa ena taudia ese Dirava ena Dubu Helaga idia gabua, bona Ierusalema ena magu idia hamakohia. Ierusalema ena ruma badadia ibounai danu idia gabua ore, bona kohu namodia ibounai idia hadikaia ore.   
\p
\v 20 Tuari dekena amo idia do mauri Iuda taudia be Nebukanesa ese ia abia mauri, bona Babulonia dekenai ia abidia lao. Unuseni idia ese Nebukanesa ena hesiai gaukara, bona iena bese edia natudia edia hesiai gaukara idia karaia, ela bona Parasa ena basileia ia toreisi, bona ia gini goada.  
\v 21 Unai dainai Lohiabada ena hereva Ieremia dekena amo be momokani, ia gwau, “Tano be lagani 70 lalonai do ia noho kava. Unai bamona do ia vara, badina taunimanima ese tano ena Sabati laga-ani, be taravatu ia gwauraia hegeregerena idia badinaia lasi.”   
\s1 Sairasi ese Iuda taudia ia oda henia Iuda dekenai do idia giroa lou  
\p
\v 22 Sairasi, Parasa ena king, ena king lagani ginigunana lalonai, Lohiabada ena hereva, Ieremia ese ia gwauraia gauna, be ia vara momokani. Lohiabada ese Sairasi ena lalona ia veria, vadaeni Sairasi ese oda ta iena basileia ena kahana ibounai dekenai ia gwauraia, bona ia torea danu.  
\v 23 Iena oda be inai: Lau, Sairasi, Parasa ena king ese oda lau gwauraia inai:  
\p “Lohiabada, guba ena Dirava, ese tanobada ena basileia ibounai lau dekenai ia henia vadaeni, bona ia ese lau dekenai ia oda henia vadaeni, iena Dubu ta, Ierusalema dekenai do lau haginia, Iuda ena tano dekenai. Umui emui huanai idia noho, Lohiabada ena bese taudia ibounai, be edia tano korikori dekenai do idia giroa lou, bona Lohiabada, edia Dirava, be idia danu do ia noho.”