\id 1TI 1 TIMOTHY, Hiri Motu Bible, PNG, 1993 
\h 1 TIMOTEO 
\toc1 PAULO ENA REVAREVA GINIGUNANA TIMOTEO DEKENAI 
\toc2 1 TIMOTEO 
\mt2 PAULO ENA REVAREVA  
\mt1 GINIGUNANA TIMOTEO  
\mt2 DEKENAI  
\c 1  
\p
\v 1 Lau inai Paulo, Keriso Iesu ena aposetolo tauna. Inai dagi lau karaia noho iseda Hamauria Diravana bona Keriso Iesu edia oda dainai. Keriso be iseda guba mauri do ita abia, ita naria noho ena laloa namona dalana.  
\v 2 Timoteo e, oi be lauegu natuna korikori, Iesu oi badinaia dainai.  
\p Inai revareva lau torea oi dekenai, bona lau ura iseda Tamana Dirava bona Keriso Iesu, iseda Lohiabada dekena amo hariharibada bona bogahisihisi, bona maino do oi abia.   
\s1 Hadibaia koikoi taudia do oi naria namonamo  
\p
\v 3 Makedonia dekenai lau lao dainai, oi lau noia, Efeso dekenai do oi lao, bona unuseni do oi noho. Tau haida unuseni ese hadibaia hereva koikoi idia gwauraia noho. Oi ese edia gaukara do oi hadokoa.  
\v 4 Oi ese idia do oi hamaoroa, hadibaia koikoi, gori bona sene taudia edia ladana tahua herevadia do idia hadokoa. Badina laloa inai bamona ese hepapahuahu sibona idia havaraia. To Dirava ena gaukara be abidadama dekena amo ia tubu noho.  
\v 5 Lauegu oda ena anina korikori be, lau ura lalokau do ia vara, laloa goevagoeva, laloa maoromaoro bona abidadama korikori dekena amo.  
\v 6 Haida ese inai bamona kara namodia idia rakatania vadaeni. Unai dainai hereva kavakava idia gwauraia noho.  
\v 7 Idia ura Dirava ena taravatu hadibaia gaukara idia karaia, to edia hereva edia anina, bona idia hereva goadagoada gaudia edia anina, idia diba lasi.   
\p
\v 8 Ita diba Taravatu be namo, bema tau ta ese do ia gaukaralaia maoromaoro neganai.  
\v 9 To inai danu ita diba be namo: Taravatu be kara maoromaoro taudia totona lasi. Lasi, Taravatu be inai bamona taudia totona: Taravatu negea taudia, kerere taudia, Dirava gari henia lasi taudia, kara dika taudia, guriguri kara ura lasi taudia, mai edia lauma lasi taudia, tamadia o sinadia idia alaia taudia, ala-ala taudia.  
\v 10 Sihari kava taudia, tatau ese tatau danu sihari karaia taudia, taunimanima idia henaoa taudia, koikoi taudia, kota lalonai hereva koikoi taudia. Oibe, Taravatu be inai bamona taudia totona, bona ekalesia ena hadibaia hereva momokani idia negea taudia danu.  
\v 11 Unai hadibaia hereva momokani, be Namo Herea Momokani bona Hairai Diravana ena Sivarai Namona. Bona unai Dirava ese iena Sivarai Namona gwauraia tauna lau ia halaoa vadaeni.   
\s1 Paulo ese Keriso ia tanikiu henia  
\p
\v 12 Iseda Lohiabada Keriso Iesu ese lau dekenai siahu ia henia, badina ia laloa lau be hegeregere iena gaukara do lau karaia. Vadaeni ia ese lau ia abia hidi, iena hesiai tauna ta. Unai dainai lau tanikiu henia.  
\v 13 Momokani, gunaguna lau ese Keriso lau hereva dika henia, lau dagedage henia, bona iena ladana lau hadikaia. To Dirava ese lau ia bogahisihisi henia, badina be abidadama lau do diba lasi, bona egu kara ena dika lau do diba lasi dainai.  
\v 14 Oibe, iseda Lohiabada ese iena hariharibada bada herea lau dekenai ia henia. Vadaeni abidadama bona lalokau lau davaria, Keriso Iesu lalonai ita noho neganai ita davaria gaudia be unai.   
\p
\v 15 Inai lau gwauraia hereva be momokani herea, bona taunimanima ese idia dae bona hamomokania be namo: Keriso Iesu be tanobada dekenai ia mai, be kara dika taudia hamauria totona. Bona kara dika tau dikana momokani be lau inai.  
\v 16 To Dirava ese lau ia bogahisihisi henia ena badina be inai: Keriso ia ura iena haheauka, be lau dekena amo do ia hedinaraia namonamo, taunimanima ibounai edia vairana dekenai. Vadaeni egu kara dika bada Keriso ese ia gwauatao, be idia itaia neganai, idia danu ia do idia abidadama henia, bona iena mauri hanaihanai do idia davaria.  
\v 17 Dirava be Noho Hanaihanai King, ia mase diba lasi, matana dekenai ita itaia diba lasi, ia sibona mo be Dirava. Ia do ita matauraia, bona ia do ita hanamoa bada, harihari ia lao bona hanaihanai. Amen.   
\s1 Timoteo ese Lohiabada ena tuari do ia goadalaia  
\p
\v 18 Lauegu natuna Timoteo e, oda oi dekenai lau henia be inai: Dirava ena tuari lalonai do oi tuari namonamo, peroveta hereva gunana ese oi ia herevalaia hegeregerena.  
\v 19 Inai tuari lalonai, abidadama bona laloa maoromaoro do oi dogoatao auka. Haida be laloa maoromaoro dekena amo idia raka siri vadaeni. Unai dainai edia abidadama ia dika, vanagi be davara nadi dekenai ia kamokau, bona ia dika bamona.  
\v 20 Inai bamona idia karaia vadaeni taudia rua be inai: Humenaio bona Alesana. Idia ruaosi be Satani ena imana dekenai lau henia, panisi do idia abia totona. Dirava ena ladana do idia hadikaia lou lasi.   
\c 2  
\s1 Emui guriguri hebou edia tomadiho dalana  
\p
\v 1 Lauegu sisiba ginigunana be, lau ura emui guriguri gaukara lalonai, taunimanima ibounai dainai do umui noinoi karaia. Umui guriguri, bona umui noinoi neganai, Dirava do umui tanikiu henia.  
\v 2 King taudia totona, bona lohia taudia ibounai totona danu, Dirava dekenai do umui noinoi. Unai dekena amo, Dirava ita badinaia bona matauraia dainai, mai maino danu do ita noho namonamo.  
\v 3 Inai bamona kara be namo, badina be inai dekena amo iseda Hamauria Diravana ita hamoalea noho.  
\v 4 Dirava ia ura taunimanima ibounai ese mauri do idia davaria, bona hereva momokani do idia diba.  
\v 5 Badina be Dirava be tamona, Dirava bona taunimanima ia hakapudia tauna danu be tamona. Unai tauna be Keriso Iesu.  
\v 6 Keriso sibona ese iena mauri ia henia, taunimanima ibounai hamauria totona. Dirava ese nega korikori dekenai inai kara ia havaraia. Bona unai dekena amo ita diba momokani, Dirava ia ura taunimanima ibounai ese mauri do idia davaria.  
\v 7 Unai dainai Dirava ese iena haroro tauna bona aposetolo tauna lau ia abia hidi vadaeni. Iuda lasi bese taudia dekenai lau ia siaia, abidadama bona hereva momokani ena sivarai idia dekenai do lau harorolaia totona. Lau koikoi lasi, lau hereva momokani inai.   
\p
\v 8 Lau ura tatau ibounai, gabu ibounai dekenai do idia guriguri. Lau ura mai helaga danu, edia imana Dirava dekenai idia abia isi. Lau ura inai idia karaia neganai, idia be badu ta lasi, bona hepapahuahu ta lasi.   
\s1 Paulo ena sisiba hahine taudia dekenai  
\p
\v 9 Lau ura danu hahine taudia ese mai manau bona mai mataurai danu edia dabua do idia kwatua. Edia huina danu sitaelo sitaelo bamona do idia karaia lasi, bona golo o kavabukavabu herahera gaudia do idia atoa lasi. Davana bada dabua danu do idia abia lasi.  
\v 10 To kara namodia ibounai, be herahera bamona do idia karaia. Unai be maoro, bona Dirava idia matauraia hahine edia kara korikori.  
\v 11 Hahine ese diba do idia tahua, mai edia hereva momo lasi, bona mai edia manau danu.  
\v 12 Hahine lau taravatua inai, idia ese tatau do idia hadibaia lasi, o gunalaia lasi. Hereva momo lasi danu do idia noho.  
\v 13 Badina be Dirava ese Adamu ia karaia guna, Heva be gabeai.  
\v 14 Bona Satani ese Adamu ia koia lasi, to ia ese hahine sibona ia koia. Vadaeni hahine ese Dirava ena taravatu ia utua.  
\v 15 To natuna do idia havaraia dekena amo, hahine taudia ese mauri do idia davaria. Oibe, bema Keriso idia abidadama henia, Keriso lalonai idia noho helaga, bona mai lalokau danu kara namodia idia karaia neganai, hamauria do idia davaria.   
\c 3  
\s1 Ekalesia gunalaia taudia  
\p
\v 1 Inai hereva be momokani: Bema tau ta ia ura be ekalesia ena gunalaia tauna ena dagi do ia tahua, ia be dagi namona ia ura henia inai.  
\v 2 Ekalesia gunalaia tauna be kara maoromaoro tauna, kerere ta lasi. Tau ta ese iena kerere ta ia gwauraia diba lasi. Ia be hahine tamona ena adavana, inua momo lasi tauna, mai ena aonega, bona lalo namo, bona mai ena bogahisihisi kara. Ia ese idau taudia be iena ruma dekenai do ia abidia dae, bona ia be hadibaia gaukara namona do ia karaia diba tauna.  
\v 3 Ia be kekero tauna lasi, heatu tauna lasi, to mai ena manau bona maino. Ia ese moni do ia mataganigani henia lasi.  
\v 4 Iena ruma taudia, adavana bona iena natuna do ia biagua namonamo. Iena natuna ese ia do idia kamonai henia bona matauraia.  
\v 5 Badina be bema tau ta ese iena ruma korikori taudia ia biagua diba lasi neganai, Dirava ena ekalesia edena bamona do ia gunalaia diba?  
\v 6 Keristani matamata tauna ese inai dagi do ia abia lasi, do ia hekokoroku, vadaeni Satani ena dibagani ese do ia hakererea garina.  
\v 7 Ekalesia gunalaia tauna ena ladana be do ia namo, ekalesia lasi taudia edia vairana dekenai. Vadaeni inai murimuri taudia ese unai ekalesia gunalaia tauna do idia matauraia, haida ese ia do idia samania, bona Satani ena koikoi gabuna lalonai do ia moru garina.   
\s1 Diakono taudia  
\p
\v 8 Diakono taudia danu be do idia kara maoromaoro taudia, bona tau namodia momokani. Idia be inuinu momo taudia lasi, bona moni do idia mataganigani henia lasi.  
\v 9 Iesu Keriso abidadama henia ena sivarai momokani do idia badinaia, mai edia laloa maoromaoro danu.  
\v 10 Diakono dagi do idia abia kava lasi, to edia kara do umui tahua guna be namo. Bema ta ese edia kerere ia gwauraia diba lasi, vadaeni dagi idia abia diba.  
\v 11 Edia adavana danu, be do idia kara maoromaoro hahine taudia. Do idia hereva dika lasi, do idia inuinu momo lasi, bona mai edia laloa maoromaoro danu do idia noho, edia kara ibounai lalonai.  
\v 12 Diakono tauna be hahine tamona ena adavana, bona iena natuna bona ruma taudia do ia biagua namonamo.  
\v 13 Badina be diakono gaukara idia karaia namonamo taudia, be taunimanima ese do idia matauraia. Vadaeni edia ladana be namo dainai, edia abidadama Iesu Keriso dekenai, be do idia herevalaia goadagoada diba.   
\s1 Hunia hereva badana  
\p
\v 14 Inai hereva oi dekena lau torea noho, to lau ura be nega daudau lasi lalonai oi dekenai do lau mai.  
\v 15 To bema lau mai haraga lasi neganai, inai revareva ese oi do ia hadibaia, edena kara do ita karaia Dirava ena ekalesia lalonai. Ita be Dirava ena orea taudia, bona inai orea be mauri Diravana ena ekalesia. Ekalesia be hereva momokani ena du, bona hereva momokani ia gimaia maguna.   
\p
\v 16 Momokani, Dirava ena dala ita badinaia, be hunia gauna badana, ani? Bona Dirava ese inai hereva ena anina be ita dekenai ia hedinaraia, inai bamona:  
\q1 Taunimanima edia tauanina dekenai Keriso ia hedinarai,  
\q1 Lauma Helaga ese iena kara maoromaoro momokani ia gwauraia.  
\q1 Aneru ese ia idia itaia.  
\q1 Bese ibounai edia huanai ia idia harorolaia.  
\q1 Tanobada taudia ese ia idia hamomokania,  
\q1 bona idia ese ia idia abidadama henia.  
\q1 Guba dekenai Dirava ese ia abia daekau,  
\q1 bona ia ese ladana bada momokani ia abia.   
\c 4  
\s1 Hadibaia hereva koikoi taudia  
\p
\v 1 Lauma Helaga ese ia gwauraia hedinarai vadaeni, nega gabeai tau haida ese Iesu badinaia kara do idia rakatania, lauma koikoidia do idia kamonai henia, bona lauma dikadia edia hadibaia hereva do idia abia dae.  
\v 2 Inai hadibaia hereva be koikoi taudia ese do idia gwauraia. Edia laloa maoromaoro dalana idia hamasea vadaeni, auri siahu herea ese edia lalona ia gabua dikadika bamona.  
\v 3 Idia ese taunimanima do idia taravatua, idia gwau do idia headava lasi, bona aniani haida do idia ania lasi. To unai aniani be Dirava ese ia karaia, do ita ania totona. Abidadama taudia bona hereva momokani idia diba taudia ese Dirava do idia tanikiu henia murinai, inai aniani idia ania diba.  
\v 4 Dirava ese ia karaia gaudia ibounai be namo, bona mai taravatu lasi. Taunimanima ese Dirava do idia tanikiu henia murinai, aniani ibounai do idia ania diba.  
\v 5 Badina be Dirava ena hereva, bona taunimanima edia guriguri ese ia hahelagaia vadaeni.   
\s1 Keriso Iesu ena hesiai tauna namona  
\p
\v 6 Inai bamona hereva bema Keristani varavara taudia dekenai oi hadibaia neganai, oi be Keriso Iesu ena hesiai tauna namona ta. Bona Iesu oi abidadama henia, bona iena hadibaia hereva oi badinaia noho dainai, oiemu lauma danu do oi ubua noho.  
\v 7 To gori kavakavadia do oi negea momokani, idia be anina lasi gaudia. Dirava ena ura kara do oi tahua, bona do oi badinaia noho.  
\v 8 Tauanina hagoadaia totona treinini bema ita karaia, inai kara ese ita do ia durua sisina. To bema Dirava totona ita treinini noho, ia ese iseda lauma do ia hagoadaia, bona inai kara ese ita do ia durua bada herea. Io, bema iseda lauma idia namo neganai, durua do ita abia inai tanobada ena mauri dekenai, bona gabeai do ita abia mauri dekenai danu.  
\v 9 Inai be hereva momokani, bona ita abia dae bona hamomokania be namo.  
\v 10 Oibe, inai hereva be momokani dainai, ita hekwarahi bona ita hisihisi noho. Badina be Mauri Diravana ita abidadama henia noho. Ia be taunimanima ibounai edia Hamauria Tauna, to ia be abidadama taudia edia Hamauria Tauna momokani.   
\s1 Ekalesia orea naria dalana  
\p
\v 11 Inai bamona hereva do oi hadibaia goadagoada.  
\v 12 Ibounai do idia itaia oi be tau matamata, to do oi naria, ta ese oi be anina lasi gauna do ia gwauraia garina. Lasi, to oiemu noho mauri dekenai, Keriso ena kara do oi hedinaraia. Vadaeni oiemu hereva namona, kara namona, lalokau, abidadama bona laloa goevagoeva idia itaia neganai, oiemu kara bamona do idia karaia.  
\v 13 Buka Helaga taunimanima dekenai do oi duahia, sisiba goada do oi henidia, bona hadibaia gaukara do oi goadalaia noho, ela bona lau ginidae.  
\v 14 Dirava ese oi dekenai ia henia harihari gauna, oiemu lauma ena diari do oi gaukaralaia goadagoada, do oi hesiku lasi. Inai siahu oi ese oi abia, peroveta hereva dainai, bona ekalesia tau badadia ese edia imana oiemu kwarana dekenai idia atoa neganai.   
\p
\v 15 Oiemu diba bona goada do oi gaukaralaia, mai oiemu lalona ibounai. Vadaeni taunimanima ibounai ese oiemu goada do idia itaia, ia bada lao noho.  
\v 16 Oi sibona oiemu kara do oi naria namonamo, oiemu hadibaia hereva danu. Inai kara namodia do oi karaia noho, badina unai dekena amo, oi sibona ese mauri do oi davaria, bona oi dekenai idia kamonai taudia danu ese mauri do idia davaria.   
\c 5  
\s1 Abidadama taudia durudia dalana  
\p
\v 1 Tau badana do oi gwau henia lasi. To mai manau danu do oi hereva henia, ia be oiemu tamana bamona. Eregabe taudia do oi hereva henia, idia be oiemu tadikaka bamona.  
\v 2 Hahine badadia do oi hereva henia, idia be oiemu sinana bamona. Kekeni taudia do oi hereva henia, oiemu taihuna do oi hereva henia bamona, mai oiemu laloa goevagoeva danu.   
\p
\v 3 Vabu taudia do oi durua, bema idia be vabu korikori.  
\v 4 To vabu ta, bema ia be mai ena natuna o mai ena tubuna, idia ese edia sinana bona tubuna idia durua be namo. Badina be Dirava do ita hamaolea karana ta be, iseda ruma taudia do ita laloa bona durua.  
\v 5 To vabu korikori be varavara ta lasi. Ia ese Dirava ia abidadama henia noho, ia guriguri henia noho, bona Dirava ena durua ia noia noho, dina bona hanuaboi ibounai.  
\v 6 To tauanina ena moale ia tahua noho vabuna, ia be hegeregere ia mase vadaeni.  
\v 7 Unai dainai vabu do oi hamaoroa, Dirava dekenai do idia guriguri nega ibounai. Inai bamona sisiba goada idia dekenai do oi henia, vadaeni do idia noho namonamo, bona taunimanima ese edia kerere ta do idia gwauraia diba lasi.  
\v 8 Ma, oi kamonai. Bema tau ta ese iena varavara ia naria lasi, o iena ruma taudia ia ubua lasi neganai, ia ese iena abidadama Keriso dekenai ia negea vadaeni. Iena dika ese abidadama lasi murimuri tauna ena dika ia hanaia vadaeni.   
\p
\v 9 Vabu edia ladana torea pepa dekenai, be inai bamona vabu sibona edia ladana do oi torea: Vabu iena mauri lagani be 60 vadaeni, bona tau tamona ia adavaia,  
\v 10 iena kara namodia dainai be taunimanima ese idia hanamoa. Ia ese iena natuna ia naridia namonamo. Ia ese idau taudia dekenai aniani ia henia. Ia ese Dirava ena taudia edia aena ia huria. Ia ese hisihisi taudia ia durua, bona kara namodia ibounai ia goadalaia. Unai bamona vabu sibona edia ladana unai pepa dekenai do oi torea.   
\p
\v 11 To vabu hahine matamata edia ladana be inai vabu edia torea pepa dekenai do oi torea lasi, badina be edia ura dikadia dainai idia ura headava lou neganai, idia ese Keriso do idia rakatania.  
\v 12 Vadaeni panisi do idia davaria, badina be edia gwauhamata gunana Keriso dekenai idia negea dainai.  
\v 13 Bona lahedo karadia dekenai do idia manada, idau ruma idau ruma dekenai edia nega do idia haorea kava. Bona lahedo sibona lasi, to do idia kiki kava, udu mauri, bona idia herevalaia be maoro lasi gaudia do idia herevalaia.  
\v 14 Unai dainai lau ura vabu hahine matamata taudia be do idia headava lou, natuna do idia havaraia, bona edia ruma taudia do idia naria. Bema unai bamona neganai, iseda orea idia dagedage henia taudia be dala lasi iseda latanai hereva dikadia do idia gwauraia.  
\v 15 Badina be vabu haida ese Iesu ena dala idia rakatania vadaeni, Satani ena murinai idia raka.  
\v 16 To bema Keristani hahine ta ena varavara haida be vabu neganai, ia ese unai vabu do ia naridia. Vadaeni ekalesia orea do ia hametaua lasi. Unai dekena amo ekalesia orea ese vabu korikori do ia naridia diba.   
\p
\v 17 Ekalesia gunalaia taudia, gaukara namona idia karaia taudia edia gaukara davana do umui habadaia be namo. Bona ekalesia gunalaia taudia, haroro bona hadibaia gaukara idia karaia taudia edia davana umui habadaia herea, be namo.  
\v 18 Badina be Buka Helaga lalonai inai bamona ia torea, ia gwau:  
\q1 “Boromakau ese uiti ia moia neganai,  
\q1 iena uduna do umui koua lasi.”  
\m Ma ia gwau:  
\q1 “Gaukara tauna ese iena gaukara davana do ia abia,  
\q1 unai be maoro.”   
\p
\v 19 Bema tau ta ese ekalesia gunalaia tauna ia samania neganai, iena samania hereva do oi abia dae lasi. To bema rua o toi ese inai samania hereva idia gwauraia neganai do oi kamonai henia.  
\v 20 Kara dika taudia ibounai be ekalesia taudia ibounai edia vairanai do oi gwau henia, vadaeni ekalesia taudia oredia be do idia gari.   
\p
\v 21 Dirava, bona Keriso Iesu, bona aneru helagadia ibounai edia vairanai, oi lau hamaoroa, inai lauegu hadibaia hereva do oi badinaia. Idia samania tauna ena kara do oi tahua neganai, iena toana o iena bese o iena siahu do oi laloa lasi, bona oiemu kota hereva do oi gwauraia maoromaoro, do oi hagagevaia lasi. Tau haida oi habadua, bona ma haida oi hereva namo henidia, idia be oiemu turana, o varavara dainai, a? Inai bamona do oi karaia lasi, to ibounai maka tamona dekenai do oi kara henidia.  
\v 22 Lohiabada ena gaukara totona, gunalaia tauna ta do oi abia hidi haraga lasi. Haida edia kara dika do oi durua lasi. Oi sibona oi naria namonamo, do oi goevagoeva.   
\p
\v 23 Ranu kavakava sibona do oi inua lasi, to uaina sisina danu do oi inua, oiemu bogana hanamoa totona. Badina be oi gorere nega momo dainai.   
\p
\v 24 Tau haida edia dika idia hedinarai namonamo, ia gunalaidia bamona, ia lao bona kota gabunai. To haida edia dika ita itaia diba lasi ela bona dina ta.  
\v 25 Unai bamona danu, kara namodia haida be idia hedinarai namonamo. Ma kara namodia haida idia hedinarai haraga lasi, gabeai sibona, badina be kara namodia idia hunia ela bona hanaihanai diba lasi.   
\c 6  
\s1 Hesiai taudia edia durua hereva  
\p
\v 1 Hesiai mai guia danu taudia ese inai bamona idia laloa be namo, “Lauegu biaguna be tau namona.” Unai dekena amo idia ese edia biaguna do idia matauraia. Bona inai bamona idia karaia neganai, tau ta ese Dirava ena ladana bona iseda Keristani hadibaia hereva do ia hadikaia diba lasi.  
\v 2 Hesiai mai guia danu taudia haida edia biaguna be Keristani taudia. Vadaeni hesiai tauna inai bamona do idia laloa lasi, “Lauegu biaguna be Keristani varavara tauna sibona, unai dainai do lau matauraia lasi.” Lasi, to inai bamona ia laloa be namo, “Lauegu biaguna be Keristani tauna, vadaeni do lau lalokau henia. Do lau gaukara goada ia dekenai, ia do lau durua totona.” Inai bamona do ia laloa be namo, bona iena biaguna totona do ia gaukara namonamo momokani. Inai hereva do oi harorolaia, bona hadibaia goada danu.   
\s1 Kohu momokani, bona kohu momokani lasi  
\p
\v 3 Iseda Lohiabada Iesu Keriso ena hereva momokani ese Dirava ena kara ita dekenai ia hadibaia diba. To bema tau ta ese inai hereva momokani ia rakatania, bona hereva idauna, Iesu ena hereva hegeregere lasi do ia hadibaia neganai,  
\v 4 do ita diba unai tau be hekokoroku tauna. Ia be gau ta ia diba lasi. Ia ese hepapahuahu bona heai sibona ia ura henia kava. To unai dekena amo idia vara gaudia be inai: Mama, heai, hereva dika, laloa dikadia.  
\v 5 Unai bamona idia karaia taudia be nega ibounai idia hepapahuahu kava, bona edia laloa be anina lasi. Idia ese hereva momokani idia rakatania vadaeni. Idia laloa Dirava badinaia kara be moni davaria dalana ta.   
\p
\v 6 To momokani, Dirava ia badinaia tauna ese kohu momokani do ia davaria. Oibe, ia davaria, badina unai tau be mai ena kohu namona, gauna be, iena lalona be namo.  
\v 7 Badina be gau ta tanobada dekenai ita abia mai lasi, bona gau ta danu do ita abia lao lasi.  
\v 8 Unai dainai bema ita be mai iseda aniani bona dabua neganai, moni dekenai ita laloa momo lasi be namo.  
\v 9 To kohu momo idia ura henia taudia be dibagani dekenai idia moru diba. Bona boroma be tarapu dekenai ia moru bamona, ura dikadia bona ura kavakava ese unai kohu ura henia taudia do idia koia, bona hadikaia.  
\v 10 Badina be moni ura henia kara ese dika idauidau ibounai ia havaraia noho. Bona moni idia ura bada taudia haida ese Iesu abidadama henia kara idia rakatania vadaeni, bona mai lalohisihisi momo danu, edia mauri idia hadikaia ore vadaeni.   
\s1 Paulo ena hadibaia hereva Timoteo dekenai  
\p
\v 11 To oi be Dirava ena tauna, oi ese inai bamona kerere dekena amo do oi raka siri. Kara maoromaoro, Dirava badinaia kara, abidadama, lalokau, haheauka, laloa manau, inai gaudia do oi tahua be namo.  
\v 12 Keriso ia abidadama henia tauna be heau helulu lalonai ia heau tauna bamona. Vadaeni, mai oiemu goada ibounai danu abidadama ena heau helulu do oi heaulaia, bona kwalimu ahuna, mauri hanaihanai do oi davaria. Badina be inai bamona mauri totona Dirava ese oi ia boiria. Bona inai boiboi oi hamomokania vadaeni, taunimanima momo edia vairanai oiemu abidadama oi gwauraia hedinarai neganai.  
\v 13 Dirava ese gau ibounai dekenai mauri ia henia, bona Keriso Iesu ese uitnesi hereva momokani Pontio Pilato ena vairanai ia gwauraia. Inai Dirava bona Keriso Iesu ruaosi edia vairanai, oi lau oda henia.  
\v 14 Oi ese inai lauegu hereva ibounai do oi badinaia, bona oiemu dagi do oi karaia mai maoromaoro danu, kerere ta lasi, goevagoeva momokani, ela bona iseda Lohiabada Iesu do ia giroa mai.  
\v 15 Dirava ena nega korikori ia ginidae neganai, ia ese Keriso do ia hedinaraia. Dirava sibona mo be Bada Herea Momokani, ia be king ibounai edia King, bona lohia ibounai edia Lohia.  
\v 16 Ia sibona ia mase diba lasi, ia sibona diaridiari bada dekenai ia noho, bona ia kahirakahira ita lao diba lasi. Tau ta lasi ese Dirava ia itaia vadaeni, bona ta ese vaira neganai do ia itaia diba lasi. Iena ladana badana do ita matauraia, badina iena siahu do ia noho, ela bona hanaihanai. Amen.   
\s1 Kohu momo taudia sisiba herevadia  
\p
\v 17 Inai tanobada mauri ena kohu momo taudia do oi hamaoroa, do idia hekokoroku lasi. Bona idia do oi hamaoroa danu inai tanobada ena kohu do idia abidadama henia lasi, to Dirava sibona do idia abidadama henia. Badina inai tanobada ena kohu do ia dika haraga, to Dirava ese ita hamoalea totona, gau momo ita dekenai ia henia davana lasi.  
\v 18 Inai kohu momo taudia do oi oda henidia danu kara namodia do idia karaia, edia kohu do idia haria karaia, haida durua totona, bona harihari gaudia do idia henia, mai moale danu.  
\v 19 Inai dala dekenai, idia ese edia kohu korikori do idia haboua hegaegae, edia mauri gabeai do ia durua totona.   
\s1 Timoteo do ia gaukara namonamo  
\p
\v 20 Timoteo e, Dirava ese oi dekenai ia henia dagi do oi naria namonamo. Hereva kavakava, Dirava ena laloa idia badinaia lasi taudia edia hepapahuahu dekena amo do oi raka siri. Inai bamona taudia edia diba be aonega koikoi sibona.  
\v 21 Inai aonega koikoi ese haida ia koia vadaeni. Idia gwau, “Ai ese aonega ai davaria vadaeni.” Unai dainai idia moru, badina edia abidadama Iesu dekenai idia rakatania dainai.  
\p Dirava ena hariharibada be umui ibounai dekenai do ia noho.