\id 1PE 1 PETER, Hiri Motu Bible, PNG, 3/93 
\h 1 PETERO 
\toc1 PETERO ENA REVAREVA GINIGUNANA 
\toc2 1 PETERO 
\mt1 PETERO ENA REVAREVA GINIGUNANA  
\c 1  
\p
\v 1 Lau Petero inai. Lau be Iesu Keriso ena aposetolo tauna. Inai revareva umui Dirava ena taudia dekenai lau torea. Emui gabu korikori umui rakatania, bona hari umui noho gabudia be Ponto, Galatia, Kapadokia, Asia bona Bitunia.  
\v 2 Tamana Dirava ese idaunegai umui ia abia hidi, iena Lauma Helaga ese umui ia hahelagaia vadaeni, Iesu Keriso ena rarana ese umui do ia huria totona. Vadaeni Iesu Keriso do umui kamonai henia, bona do umui goevagoeva momokani.  
\p Hariharibada bona maino umui ese do umui abia badabada be namo.   
\s1 Mauri namona momokani guba dekenai do ita abia  
\p
\v 3 Dirava, iseda Lohiabada Iesu Keriso ena Tamana do ita hanamoa bada. Iena bogahisihisi ia bada herea. Ia ese Iesu Keriso mase dekena amo ia hatorea isi lou. Bona unai dainai ita be matamata vadaeni, ita vara lou. Vadaeni mauri korikori ena ura namona laloa ese iseda lalona ia hahonua.  
\v 4 Dirava ese ita ia abia hidi, guba dekenai mauri do ita abia. Inai mauri ia noho hanaihanai, ia be goevagoeva, ia bodaga diba lasi. Inai mauri be guba dekenai umui totona ia noho hegaegae.  
\v 5 Umui ese Dirava umui abidadama henia dainai, iena siahu ese umui do ia naria noho ela bona hamauria dinana ia ginidae. Inai hamauria ia noho hegaegae, bona nega dokona dekenai do ia hedinarai momokani.   
\p
\v 6 Inai mauri do umui abia dainai umui moale bada noho, to inai nega sisina lalonai be sedira dibagani idauidau ese umui do idia hisihisi henia.  
\v 7 Inai dibagani edia badina be inai: Dirava ese emui abidadama ena goada do ia tohoa. Umui diba, golo be ia dika lao diba, to lahi lalonai idia atoa, be iena goada tohoa bona hanamoa totona. Abidadama be golo hegeregerena lasi. Lasi, ia ese golo ia hereaia. Vadaeni emui abidadama ena goada idia tohoa gaudia, hegeregere hisihisi o dibagani, be namo. Badina idia ese iseda abidadama idia hanamoa bona hagoadaia noho. Bona Iesu Keriso ia hedinarai dinana dekenai mataurai bona hairai bona hanamoa do umui davaria.  
\v 8 Umui ese Iesu umui itaia lasi, to umui lalokau henia. Umui ese umui itaia noho lasi, to umui abidadama henia noho. Unai dainai do umui moale bada, bona emui moale ese tanobada ena moale do ia hanaia momokani. Inai emui moale be ia bada herea dainai, emui uduna dekenai do umui herevalaia diba lasi.  
\v 9 Inai moale ena badina korikori be inai: Emui lauma ese hamauria idia davaria. Bona inai hamauria ena badina korikori be emui abidadama.   
\p
\v 10 Peroveta taudia ese Dirava ena hariharibada, umui dekenai do ia ginidae gauna idia herevalaia. Idia ese inai hamauria ena anina idia tahua goadagoada, bona ia totona idia henanadai momo.   
\p
\v 11 Keriso ena Lauma be unai peroveta taudia edia lalona dekenai ia noho. Lauma ese idia ia hadibaia, Keriso ese hisihisi do ia abia, gabeai hairai bada do ia abia. Bona idia ese inai henanadai idia nanadaia, idia gwau, “Keriso edena negai do ia mai?” Ma idia henanadai, idia gwau, “Keriso ena mai neganai dahaka do ia vara?”  
\v 12 Dirava ese idia dekenai ia hedinaraia, edia gaukara be idia edia namo totona idia karaia lasi. Lasi, to umui emui namo totona unai gaukara idia karaia. Oibe, idia edia hereva, be harihari Sivarai Namona ena haroro taudia ese umui dekenai idia haroro henia vadaeni. Lauma Helaga guba dekena amo Dirava ese ia siaia diho dainai, unai Sivarai Namona idia harorolaia noho. Inai kara bona Sivarai Namona, be aneru danu idia ura dikadika do idia itaia bona diba.   
\s1 Dirava ese umui ia boiria, do umui noho helaga  
\p
\v 13 Unai dainai do umui laloa namonamo, bona do umui naria namonamo. Do umui noho hegaegae, bona Iesu Keriso do ia hedinarai neganai do umui abia hanamoa, be do umui naria noho.  
\v 14 Dirava do umui kamonai henia. Guna, umui be do diari umui diba lasi neganai, emui tauanina ena ura dikadia ese umui idia biagua. Unai bamona do umui karaia lou lasi.  
\v 15 To emui kara ibounai lalonai do umui helaga, umui ia boiria Diravana ese ia helaga hegeregerena.  
\v 16 Badina be Buka Helaga lalonai Dirava sibona ia gwau, “Do umui helaga, badina lau be lau helaga noho.”   
\s1 Mai davana bada Dirava ese ita ia hamauria  
\p
\v 17 Dirava dekenai umui guriguri henia neganai, ia be emui Tamana umui gwauraia, ani? Ia ese taunimanima edia toana ia laloa lasi, ibounai be hegeregere ia vairanai. Ia ese ita ta ta iseda kara do ia tahua. Unai dainai namona be inai tanobada dekenai umui noho neganai, Dirava ena vairanai mai gari danu do umui noho.  
\v 18 Bona namona be umui diba namonamo, guna umui ese emui sene taudia edia anina lasi karadia umui karaia. To Dirava ese inai karadia dekena amo umui ia hamauria. Umui ia hamauria ena davana be do idia dika ore gaudia, hegeregere siliva o golo, a? Lasi momokani.  
\v 19 Umui ia hamauria gauna be Keriso ena rarana. Inai rara be davana bada herea gauna. Keriso be mamoe natuna goevagoeva momokani hegeregerena, ia be maka dikana ta lasi, bona toto ta lasi.  
\v 20 Dirava ese tanobada ia do karaia lasi neganai, ia ese Keriso ia abia hidi, inai hamauria gaukara totona. Bona inai nega dokona lalonai, ia be umui durua totona, Dirava ese Keriso ia hedinaraia.  
\v 21 Keriso dainai umui ese Dirava umui abidadama henia. Dirava sibona ese Keriso mase dekena amo ia hatorea isi, bona hairai bada ia henia. Unai dainai Dirava do umui abidadama henia noho, bona mai emui laloa daradara lasi, Dirava ena hanamoa do umui naria noho.   
\s1 Emui Keristani varavara taudia do umui lalokau henidia  
\p
\v 22 Umui ese hereva momokani umui badinaia dainai, umui ese sibona emui laumadia umui hagoevaia vadaeni, bona emui Keristani varavara umui lalokau henidia noho. Umui ta ta do umui lalokau henia, mai emui lalona ibounai.  
\v 23 Umui be matamata vadaeni, umui vara lou vadaeni. Bona umui be mase diba tauna ena natuna lasi, lasi momokani. Umui emui Tamana be ia mase diba lasi. Inai emui mauri matamata, be Dirava ena hereva ese ia havaraia. Inai hereva be ia mauri noho, bona ia noho hanaihanai.  
\v 24 Buka Helaga ena hereva ia gwau:  
\q1 “Taunimanima ibounai be rei bamona.  
\q1 Idia edia hairai be rei ena huahua bamona.  
\q1 Rei do ia kaukau,  
\q1 vadaeni iena huahua do ia moru diho.   
\q1
\v 25 To Dirava ena hereva do ia noho ela bona hanaihanai.”  
\m Dirava ena hereva be inai Sivarai Namona, umui dekenai idia harorolaia vadaeni gauna.   
\c 2  
\s1 Lohiabada be Nadi namo herea, mauri gauna  
\p
\v 1 Unai dainai, laloa badu ibounai, bona koikoi idauidau ibounai, dika ibounai, mama ibounai, bona taunimanima hereva dika henia kara ibounai do umui atoa siri.  
\v 2 Beibi matamata ese rata ia ura dikadika bamona, umui ese lauma ena rata goevagoeva do umui ura henia. Badina be unai rata umui inua neganai, emui lauma do idia tubu daekau, bona Dirava ena hamauria do umui davaria.  
\v 3 Buka Helaga ia hereva bamona, ia gwau, “Umui sibona ese Lohiabada ena bogahisihisi ena mamina umui abia vadaeni.”   
\p
\v 4 Lohiabada dekenai do umui mai. Ia be Nadi mai mauri danu, taunimanima idia ura lasi, to Dirava ena vairanai ia be mai davana bada herea.  
\v 5 Umui danu be mauri nadidia bamona, bona Dirava ia ura umui do ia gaukaralaia, vadaeni Lauma Helaga ena ruma do umui lao. Vadaeni Dirava ena hesiai gaukara do umui karaia, hahelagaia taudia edia gaukara do umui karaia. Umui ese boubou gaudia bona harihari gaudia helagadia, Dirava do ia abia dae gaudia, ia dekenai do umui henia, Iesu Keriso ena ladana dainai.  
\v 6 Badina be Buka Helaga lalonai Dirava ena hereva ia torea, ia gwau:  
\q1 “Kamonai, ruma ena kona, ena Nadi namo herea,  
\q1 be lau abia hidi vadaeni,  
\q1 Siona dekenai lau atoa vadaeni.  
\q1 Ia dekenai do ia abidadama henia tauna,  
\q1 be do ia hemarai lasi.”   
\m
\v 7 Umui abidadama taudia dekenai, inai Nadi be namo bada herea. To abidadama henia lasi taudia dekenai, Buka Helaga ena hereva inai bamona ia torea vadaeni:  
\q1 “Ruma haginia taudia ese idia negea Nadina be,  
\q1 kona ena Nadi namo herea ia halaoa vadaeni.”   
\m
\v 8  Ma ia gwau:  
\q1 “Inai Nadi be taunimanima dekenai do ia bamepa,  
\q1 bona do idia hekwakwanai.  
\q1 Inai Nadi badana ese taunimanima do ia hamorudia.”  
\p Idia ese Dirava ena hereva idia kamonai henia lasi dainai, idia hekwakwanai, bona idia moru. Gunaguna Dirava ia hereva unai bamona do idia karaia.   
\s1 Umui be Dirava ena orea taudia  
\p
\v 9 To Dirava ese umui ia abia hidi vadaeni, umui be iena bese, umui be King ena hahelagaia taudia, bese helagana, bona Dirava ena orea korikori taudia. Dirava ese umui ia abia hidi, iena hoa kara badadia do umui gwauraia hedinarai. Badina be ia ese dibura dekena amo umui ia boiria, vadaeni iena diari namo bada herea lalonai do umui noho.  
\v 10 Gunaguna umui be bese lasi taudia, to harihari umui be Dirava ena bese. Gunaguna be ta ese umui ia bogahisihisi henia lasi, to harihari Dirava ena bogahisihisi umui davaria vadaeni.   
\s1 Ita be Dirava ena hesiai taudia, mai guia danu  
\p
\v 11 Lauegu lalokau taudia e, umui be inai tanobada dekenai umui noho, idau taudia bona hanua lasi taudia bamona. Unai dainai, umui lau noia, tauanina ena ura dikadia do umui karaia lasi. Inai ura dikadia ese emui lauma idia tuari henia noho.  
\v 12 To Dirava idia diba lasi taudia edia vairanai, kara namodia do umui karaia. Momokani, hari idia ese umui idia gwauraia kerere noho. To bema emui kara namodia idia itaia neganai, idia ese Dirava do idia hanamoa, Keriso do ia giroa mai dinana dekenai.   
\p
\v 13 Taunimanima edia taravatu ibounai do umui badinaia, Lohiabada dainai. King do umui kamonai henia, badina ia be siahu bada herea tauna.  
\v 14 Gavana taudia danu edia hereva do umui badinaia. Badina be king ese idia ia abia hidi, kara dika taudia do idia panisia, to kara namo taudia do idia hanamoa totona.  
\v 15 Badina be Dirava ia ura be, emui kara namo dekena amo, kavakava taudia edia hereva kava do umui koua.  
\v 16 Umui be ura kwalimu taudia, to inai ura kwalimu do umui gaukaralaia kerere lasi. Unai ura kwalimu lalonai umui noho neganai, hunia dekenai kara dika do umui karaia lasi, to Dirava ena hesiai taudia mai guia danu do umui noho.  
\v 17 Taunimanima ibounai do umui matauraia. Keristani taudia ibounai do umui lalokau henia. Dirava do umui gari henia. King do umui matauraia.   
\s1 Keriso ena haheauka bamona, umui danu hisihisi lalonai do umui haheauka  
\p
\v 18 Hesiai taudia e, emui biaguna do umui kamonai henia, bona do umui matauraia. Biaguna namodia, bona mai edia gado namo taudia sibona lasi, to biaguna dagedagedia danu do umui matauraia.  
\v 19 Badina bema kerere lasi tauna ta ese Dirava ia badinaia dainai hisihisi ia abia, Dirava ese unai tau do ia hanamoa.  
\v 20 Bema umui kara dika, vadaeni umui idia dadabaia neganai umui haheauka, emui namo be dahaka? To bema umui kara namo, vadaeni hisihisi umui abia neganai, Dirava ena vairanai umui be namo.  
\v 21 Dirava ese umui ia boiria, unai bamona do umui hisihisi totona. Badina be Keriso ese umui dainai hisihisi ia abia. Vadaeni iena kara toana umui dekenai ia hedinaraia, iena murinai do umui raka totona. Iena aena gabudia dekenai do umui raka.  
\v 22 Ia ese kara dika ta ia karaia lasi. Bona iena uduna dekena amo hereva koikoi ta ia gwauraia lasi.  
\v 23 Idia hereva dika henia, to ia hereva dika henia lou lasi. Hisihisi ia abia neganai, ia dagedage lasi. To mai abidadama danu, sibona ena mauri be Dirava ena imana dekenai ia henia. Badina Keriso ia diba Dirava be Kota Biaguna maoromaorona.  
\v 24 Keriso ese sibona ena tauanina dekenai, iseda kara dika ia huaia, satauro ena latanai. Unai bamona ia karaia, kara dika dekenai do ita mase totona, bona kara maoromaoro dekenai do ita mauri totona. Keriso ena bero ese ita idia hamauria vadaeni.  
\v 25 Badina be gunaguna umui be mamoe idia boio bamona, emui dala umui diba lasi. To harihari, emui lauma ia dogoatao Tauna, inai Mamoe Naria Tauna dekenai, umui giroa lou vadaeni.   
\c 3  
\s1 Headava tau bona hahine dekenai sisiba hereva  
\p
\v 1 Hahine taudia e, emui adavana do umui kamonai henia. Badina be idia haida ese Dirava ena hereva idia badinaia lasi, to bema kara namodia umui karaia, bona umui emui hereva be momo lasi neganai, sedira do idia laloa namonamo. Vadaeni sedira edia lalona do idia giroa, bona Dirava do idia abidadama henia.  
\v 2 Unai bamona do idia karaia, badina be emui kara goevagoeva, bona emui mataurai kara do idia itaia dainai.  
\v 3 Umui ese kopina dekenai herahera gaudia, hegeregere kavabukavabu do umui atoa lasi. Emui huina danu sitaelo sitaelo bamona do umui karaia lasi. Bona dabua, edia toana namo herea momokani do umui atoa lasi. Inai gaudia be emui kopina edia murimuri kahanai sibona.  
\v 4 To namona be emui hairai korikori be emui lalona dekenai ia noho. Herahera namodia, do idia dika diba lasi gaudia, hegeregere laloa manau, bona dagedage lasi, emui lalona dekenai do umui atoa. Idia edia hairai do ia noho hanaihanai, bona idia be namo bada herea Dirava ena vairanai.  
\v 5 Gunaguna, sene hahine helagadia, Dirava idia abidadama henia hahine, ese unai bamona hairai idia atoa. Vadaeni, unai dainai idia ese edia adavana idia kamonai henia.  
\v 6 Sara be unai bamona ia karaia. Ia ese Aberahamo ena hereva ia kamonai henia, bona “lohia” ia gwauraia. Bema umui ese kara namo umui karaia, bona gau ta dekenai umui gari henia lasi neganai, umui be Sara ena natuna.   
\p
\v 7 Tatau e, umui danu, emui adavana danu umui noho hebou ena dala do umui laloa namonamo. Hahine ena tauanina be goada herea lasi, unai dainai do umui naria namonamo, bona matauraia. Umui laloaboio lasi, umui, mai emui adavana danu, ese Dirava ena hariharibada umui abia hebou dainai, mauri hanaihanai umui davaria. Unai bamona do umui karaia neganai, emui guriguri haere dalana be gau ta ese do ia koua lasi.   
\s1 Do umui laloa tamona  
\p
\v 8 Egu hereva ena anina be inai: Umui ibounai mai lalona tamona danu do umui noho, umui ta ta dekenai durua do umui henia. Umui ta ta dekenai do umui lalokau henia, tadikaka bamona. Umui ta ta dekenai do umui bogahisihisi henia, do umui manau.  
\v 9 Tau ta bema umui dekenai ia kara dika neganai, davana do umui henia lasi. Bema umui dekenai idia hereva dika neganai, umui ese hereva dika do umui henia lou lasi. Lasi, to hanamoa hereva do umui henia lou, bona umui ese Dirava do umui noia, ia ese idia do ia hanamoa. Dirava ese umui ia boiria, inai bamona do umui karaia, iena hanamoa do umui abia totona.  
\v 10 Inai be Buka Helaga ena hereva bamona, ia gwau:  
\q1 “Bema tau ta ese mauri ia ura henia,  
\q1 bona nega namodia ia ura itaia neganai,  
\q1 ia ese iena uduna do ia naria,  
\q1 hereva dika do ia gwauraia lasi.  
\q1 Bona hereva koikoi do ia gwauraia lasi,   
\q1
\v 11 dika do ia rakatania,  
\q1 bona kara namo do ia karaia.  
\q1 Maino do ia tahua,  
\q1 bona maino ena dala do ia badinaia noho.   
\q1
\v 12 Badina be Lohiabada ese,  
\q1 kara maoromaoro taudia ia naridia noho,  
\q1 bona edia guriguri ia kamonai henia noho.  
\q1 To Lohiabada ese,  
\q1 kara dika taudia edia dala ia koua noho.”   
\s1 Kara namodia umui karaia dainai, hisihisi do umui abia diba  
\p
\v 13 Bema kara namodia umui karaia noho mai goada danu, daika ese umui do ia hadikaia diba? Ta lasi, ani?  
\v 14 To, bema kara maoromaoro umui karaia, bona unai dainai hisihisi umui abia neganai, vadaeni do umui moale, badina Dirava ena hanamoa do umui abia. Tau ta do umui gari henia lasi, bona do umui laloa hekwarahi lasi.  
\v 15 To emui kudouna dekenai Keriso do umui abia dae, do umui matauraia, bona ia tamona emui Lohiabada do umui halaoa. Bema haida ese emui abidadama bona lalona namo totona umui idia nanadaia neganai, nega ibounai do umui naria hegaegae noho, idia do umui haere henia totona. To mai mataurai bona manau danu do umui haere.  
\v 16 Mai emui laloa maoromaoro do umui noho. Vadaeni umui dekenai idia hereva dika henia, Keriso umui badinaia dainai, unai taudia ese do idia hemarai. Edia hemarai ena badina be, emui kara namodia idia itaia dainai.  
\v 17 Bema Dirava ia ura hisihisi do umui abia, vadaeni kara namodia dainai do umui hisihisi, unai be namo do umui davaria. To bema kara dika dainai do umui hisihisi, unai neganai namo ta do umui davaria lasi.   
\s1 Keriso ia mase iseda dika kokia totona  
\p
\v 18 Badina be Keriso nega tamona ia mase, kara dika kokia totona. Ia be kara maoromaoro momokani. To ita kara gagevagageva taudia dainai ia ese ia hisihisi bada, Dirava dekenai ita do ia hakaua totona. Iena tauanina idia alaia, to Lauma dekena amo ia toreisi lou, bona ia mauri noho.  
\v 19 Bona iena Lauma dekena amo Keriso ese, dibura ruma lalonai idia noho laumadia dekenai ia lao, ia haroro henidia.  
\v 20 Idia be gunaguna, Noa ena nega lalonai, Dirava ena hereva idia negea. To Dirava ese davana ia henidia haraga lasi. Lasi, to mai haheauka danu idia ia naria noho, Noa ese lagatoi ia karaia neganai. Lagatoi lalonai idia noho taudia, ibounai 8 sibona be ranu dekena amo idia mauri.  
\v 21 Unai ranu be bapatiso ena toana bamona, bona bapatiso ese harihari umui ia hamauria noho. Iseda tauanina ena miro be bapatiso ese ia huria lasi. Lasi, to bapatiso ena anina be, Dirava dekenai gwauhamata ita henia, mai laloa maoromaoro danu, do ita noho goeva. Dirava ese umui dekenai mauri ia henia, Iesu Keriso ese mase dekena amo ia toreisi lou dainai.  
\v 22 Bona Keriso ese guba dekenai ia vareai vadaeni, Dirava ena idiba kahanai ia helai noho. Aneru bona lohia bona siahu taudia ibounai be Keriso henunai idia noho.   
\c 4  
\s1 Tauanina ena ura dikadia do umui rakatania, bona Dirava ena ura do umui karaia  
\p
\v 1 Keriso ese iena tauanina dekenai hisihisi ia abia dainai, umui ese iena laloa hegeregerena do umui laloa be namo. Inai bamona umui laloa neganai, goada do umui davaria. Badina be iena tauanina ia hisihisi noho tauna ese kara dika ia rakatania vadaeni.  
\v 2 Unai dainai harihari ia lao bona emui mauri dokona, inai tanobada dekenai do umui noho namonamo. Emui tauanina ena ura dikadia do umui karaia lasi, to Dirava ena ura sibona do umui badinaia.  
\v 3 Badina be gunaguna umui be Dirava diba lasi taudia hegeregerena umui noho. Emui kara gunadia be inai: Matabodaga, sihari kava, kekero, lebulebu, uaina umui inua momo, bona kaivakuku dikadia umui tomadiho henia.  
\v 4 Harihari inai Dirava diba lasi taudia be idia hoa, badina umui ese unai bamona lebulebu karadia umui karaia lou lasi. Oibe, idia edia kara dekena amo umui raka siri vadaeni, unai dainai unai Dirava diba lasi taudia ese umui idia hereva dika henia noho.  
\v 5 To idia be mauri taudia bona mase taudia do ia kota henia Diravana ena vairanai dohore idia gini. Idia ese edia kara dika dainai, Dirava dekenai do idia haere henia.  
\v 6 Unai dainai idia mase vadaeni taudia ese idia do mase lasi neganai Sivarai Namona idia kamonai. Momokani edia tauanina idia mase, kara dika idia karaia taudia ibounai idia mase bamona. To hari idia ese mauri idia davaria diba, bona idia be lauma, Dirava bamona.   
\s1 Dirava ena lalokau do umui hedinaraia  
\p
\v 7 Gau ibounai edia dokona ena nega be kahirakahira. Unai dainai do umui noho namonamo, mai laloa maoromaoro danu, bona do umui guriguri noho, nega ibounai.  
\v 8 To gau badana momokani be inai: Umui ta ta dekenai do umui lalokau henia, mai emui lalona ibounai. Badina be lalokau tauna be Dirava ese iena kara dika momo do ia gwauatao.  
\v 9 Umui ta ta ese emui ruma dekenai emui Keristani varavara taudia do umui abia dae, do umui maumau lasi.  
\v 10 Iena hariharibada dekena amo, Dirava ese umui ta ta ibounai dekenai harihari gaudia idauidau ia henia vadaeni. Unai dainai, umui ese inai harihari gaudia do umui gaukaralaia, emui Keristani varavara taudia do umui durua totona. Unai dekena amo umui be Dirava ena hesiai taudia namodia, bona iena hariharibada idauidau umui hedinaraia noho.  
\v 11 Bema tau ta ena diba be haroro, Dirava ena sivarai do ia gwauraia. Bema tau ta ena diba be taunimanima durua, vadaeni inai diba, Dirava ese ia henia gauna do ia gaukaralaia mai ena goada ibounai, taunimanima durua totona. Unai dala dekenai, emui kara ibounai dainai, taunimanima ese Dirava do idia hanamoa henia, Iesu Keriso dainai. Hairai bona siahu be iena, ela bona hanaihanai. Amen.   
\s1 Keristani taudia do idia hisihisi  
\p
\v 12 Lauegu lalokau taudia e, inai hisihisi bada, umui ia hisihisi henia noho gauna, be umui tohoa totona ia vara noho. Unai dainai do umui hoa lasi, do umui laloa lasi idau gauna ta be umui dekenai ia ginidae vadaeni.  
\v 13 Lasi, to Keriso danu umui hisihisi hebou dainai do umui moale. Badina be gabeai, Keriso ena hairai ia hedinaraia neganai, do umui moale bada herea.  
\v 14 Umui be Keriso ena taudia dainai, do umui moale bema haida ese umui idia hereva dika henia. Badina inai anina be, Dirava ena Lauma, hairai Laumana, be umui dekenai ia noho vadaeni.  
\v 15 To ia namo lasi bema umui ta ia hisihisi, sibona ena kerere dainai. Tau ta sedira ia ala-ala, o ia henaoa, o ia kara dika, o haida edia kara ia herevalaia kerere, bona unai kara dainai ia hisihisi. Unai bamona hisihisi be mai ena hanamoa ta lasi.  
\v 16 To tau ta, bema ia be Keristani tauna dainai ia hisihisi, unai tau be do ia hemarai lasi. Lasi momokani, to ia ese Dirava do ia tanikiu henia, Keriso ena ladana ia abia dainai.   
\p
\v 17 Dirava ena Kota Badana ena nega be ia ginidae vadaeni, bona Dirava ese iena orea taudia do ia kota henidia guna. To bema ita do ia kota henia guna, Dirava ena Sivarai Namona idia abidadama henia lasi taudia edia dokona be edena bamona?  
\v 18 Bona Buka Helaga ena hereva ia gwau:  
\q1 “Kara maoromaoro taudia ese mauri idia abia dalana be auka.  
\q1 Unai dainai Dirava diba lasi kara dika taudia,  
\q1 edena bamona do idia mauri diba?”   
\m
\v 19 Unai dainai, Dirava ena ura dainai hisihisi idia abia taudia ese kara namodia sibona do idia karaia be namo. Ma danu, edia lauma be Dirava ena imana dekenai do idia atoa. Badina be ia ese ita ia karaia, bona ita abidadama henia diba, iena gwauhamata do ia badinaia momokani.   
\c 5  
\s1 Gunalaia taudia ese Dirava ena orea do idia naria namonamo, be gau badana  
\p
\v 1 Harihari lau ura umui ekalesia gunalaia taudia dekenai lau hereva henia. Lau danu be ekalesia gunalaia tauna ta. Lauegu matana dekena amo, Keriso ena hisihisi lau itaia, bona iena hairai do ia hedinaraia neganai, lau danu be mai lauegu davana namona. Umui lau noia,  
\v 2 Dirava ese umui ia henia mamoe orea do umui naridia namonamo. Do umui gunalaia, Dirava ena ura hegeregerena. Do umui maumau lasi, to mai emui ura namona inai dagi do umui karaia. Ta ese umui ia oda dainai do umui karaia lasi, to sibona emui ura dainai. Kohu do umui davaria totona do umui karaia lasi.  
\v 3 Lohia mai hekokoroku danu bamona emui orea do umui gunalaia lasi, to emui kara namodia do umui hedinaraia, vadaeni emui kara bamona do idia karaia.  
\v 4 Vadaeni, Mamoe Naria Tauna Badana do ia hedinarai neganai, hairai ena kwara gauna, do ia dika diba lasi gauna, do umui abia.   
\s1 Do umui manau, bona do umui laloa maoromaoro  
\p
\v 5 Eregabe taudia e, umui ese gunalaia taudia do umui kamonai henia. Umui ibounai do umui laloa manau, vadaeni umui ta ta dekenai durua do umui henia. Badina be Buka Helaga ia gwau: “Dirava ese hekokoroku taudia edia dala ia koua, to manau taudia dekenai iena hariharibada ia henia.”  
\v 6 Unai dainai Dirava ena imana goadana henunai do umui manau, vadaeni iena nega namona lalonai ia ese umui do ia abia isi.  
\v 7 Ia ese umui ia naria noho. Unai dainai emui laloa hekwarahi gaudia ibounai be iena imana dekenai do umui atoa.   
\p
\v 8 Do umui laloa maoromaoro, bona naria namonamo. Umui dekenai ia tuari henia tauna, Satani, be laiona mai ena boiboi bada bamona. Ia ese hunia dekenai ia raka loaloa noho, do ia ania ore taudia ia tahua noho.  
\v 9 Emui abidadama dekenai do umui gini goada, vadaeni umui ese Satani do umui koua. Namo umui diba, emui Keristani varavara taudia tanobada kahana ibounai dekenai, be hisihisi inai bamona idia abia noho.  
\v 10 Umui be nega sisina do umui hisihisi, vadaeni gabeai, hariharibada ibounai Diravana ese umui do ia hanamoa lou momokani, umui do ia haginia goada, bona emui abidadama do ia hagoadaia. Oibe, inai Dirava ese umui ia boiria vadaeni, iena noho hanaihanai hairaina Keriso Iesu danu do umui abia hebou totona.  
\v 11 Ia dekenai siahu ibounai do ia noho ela bona hanaihanai. Amen.   
\s1 Hanamoa hereva dokona  
\p
\v 12 Inai revareva kwadogina be Sila ena imana dekena amo umui dekenai lau torea inai. Lau diba Sila be iseda Keristani varavara tauna korikori. Lau ura inai leta dekena amo umui do lau hagoadaia, bona lau gwauraia hedinarai inai: Dirava ena hariharibada korikori ena dala be inai egu hereva lalonai. Inai hariharibada lalonai do umui gini goada.   
\p
\v 13 Ekalesia orea Babulonia dekenai, inai taudia danu be Dirava ese ia abia hidi. Idia ese edia hanamoa hereva umui dekenai idia siaia inai. Lauegu natuna Mareko danu ese umui ia hanamoa noho.  
\v 14 Umui ta ta dekenai do umui hanamoa, umui ta ta dekenai ekalesia ena lalokau kisi do umui henia.  
\p Keriso lalonai umui noho taudia ibounai, maino be umui dekenai do ia noho.