\id 1JN 1 JOHN, Hiri Motu Bible, PNG, 3/93 
\h 1 IOANE 
\toc1 IOANE ENA REVAREVA GINIGUNANA 
\toc2 1 IOANE 
\mt1 IOANE ENA REVAREVA GINIGUNANA  
\c 1  
\s1 Mauri ena Hereva  
\p
\v 1 Mauri ena Hereva, hamatamaia nega dekena amo ia noho gauna, be umui dekenai ai ura hamaorolaia. Ai be aiemai taiana dekena amo ai kamonaia, bona aiemai matana dekena amo ai itaia. Oibe, ai itaia vadaeni, bona aiemai imana dekena amo ai dogoatao vadaeni.  
\v 2 Unai mauri be taunimanima dekenai ia hedinarai neganai ai itaia, bona hari ai gwauraia hedinarai noho. Umui dekenai ai hereva momokani, inai mauri be mauri hanaihanai. Gunaguna ia be Tamana danu idia noho, to hari inai neganai ai dekenai ia hedinarai.  
\v 3 Ai ese ai itaia bona ai kamonai gaudia umui dekenai ai hamaorolaia noho, umui ese aiemai orea tamona lalonai do umui vareai totona. Badina be ai ura Tamana bona iena Natuna Iesu Keriso danu orea tamona taudia do ita lao.  
\v 4 Ai ese inai revareva umui dekenai ai torea, iseda moale do ia momokani totona.   
\s1 Dirava be diari  
\p
\v 5 Inai hereva be Dirava ena Natuna dekena amo ai kamonai, bona umui dekenai ai hamaoroa: Dirava be diari, bona dibura sisina sibona ia dekenai ia noho lasi.  
\v 6 Bema ita gwau ita be Dirava ena orea taudia, to dibura lalonai ita raka noho, ita koikoi noho, hereva momokani ita badinaia lasi.  
\v 7 To bema diari lalonai ita raka noho, Dirava hegeregerena, ita be orea tamona taudia, bona iena Natuna Iesu ena rarana ese kara dika ibounai dekena amo ita ia huria noho, vadaeni ita goeva.   
\p
\v 8 Bema ita gwau ita kara dika lasi, ita sibona ita koia noho, bona hereva momokani be ita lalonai ia noho lasi.  
\v 9 To bema iseda kara dika Dirava dekenai ita gwauraia hedinarai, ia ese ita do ia negea lasi. Lasi momokani. Ia be kara maoromaoro dainai, iena gwauhamata do ia badinaia, bona iseda dika do ia gwauatao. Bona iseda kerere ibounai be do ia huria ore momokani.  
\v 10 To bema ita gwau ita be kara dika lasi, inai be ita gwau Dirava be koikoi tauna, bona unai dainai iena hereva be iseda kudouna dekenai ia noho lasi.   
\c 2  
\s1 Keriso be iseda durua Tauna  
\p
\v 1 Lauegu natuna e, inai hereva umui dekenai lau torea noho, be umui ese do umui kara dika lasi totona. To tau ta bema ia kara dika, ita be mai iseda durua tauna, iseda Tamana ena vairanai. Ia be Iesu Keriso, kara maoromaoro tauna.  
\v 2 Bona Keriso sibona be iseda kara dika gwauatao dalana. Bona iseda dika sibona lasi, to Keriso be taunimanima ibounai edia dika gwauatao dalana.   
\s1 Dirava do ita diba dalana  
\p
\v 3 Bema Dirava ena taravatu herevadia ita kamonai henia neganai, unai anina be Dirava ita diba momokani.  
\v 4 Bema tau ta ia gwau, “Dirava lau diba,” to Dirava ena hereva ia kamonai henia lasi, vadaeni ia be koikoi tauna, bona hereva momokani ia lalona dekenai ia noho lasi.  
\v 5-6 To Dirava ena hereva ia badinaia tauna ese Dirava ia lalokau henia noho, mai maoromaoro bona momokani danu. Bema tau ta ia hereva, ia gwau, “Lau be Dirava ena lalona dekenai lau noho,” vadaeni unai tau ese Keriso ena mauri dalana hegeregerena do ia noho be namo. Unai dala dekena amo do ita diba namonamo ita be Keriso ena lalona dekenai ita noho.   
\s1 Dibura bona diari  
\p
\v 7 Lauegu lalokau taudia e, inai umui dekenai lau torea noho taravatuna be matamata lasi. To ia be gunana, guna momokani umui abia gauna. Taravatu gunana be umui ese umui kamonai vadaeni.  
\v 8 Oibe, ia be gunana, to inai taravatu, hari umui dekenai lau torea noho gauna be ma matamata danu. Ia be matamata, badina dibura ena goada be ia ore noho, bona diari korikori be harihari ia hedinarai noho.   
\p
\v 9 Bema tau ta ia gwau, “Lau be diari lalonai lau noho,” to ia ese iena tadikakana ia badu henia noho, unai tau be do dibura lalonai ia noho.  
\v 10 Tau ta bema iena tadikakana ia lalokau henia neganai, unai tau be diari lalonai ia noho. Ia be diari lalonai dainai, gau ta ese ia do ia hakaua kerere lasi.  
\v 11 To tau ta bema iena tadikakana ia badu henia neganai, unai tau be dibura lalonai ia noho. Bona dibura lalonai ia raka noho dainai, ia lao noho gabuna ia diba lasi, badina be dibura ese iena matana ia hakepulua dainai.   
\s1 Maragidia, tamana taudia, eregabe taudia  
\p
\v 12 Lauegu natuna e, umui dekenai lau torea noho, badina be emui kara dika be Keriso ena ladana dainai idia gwauatao vadaeni.  
\v 13 Tamana taudia e, umui dekenai lau torea inai, badina umui be Keriso umui diba momokani. Umui diba ia be hamatamaia nega dekena amo ia noho, bona harihari danu ia noho. Eregabe taudia e, umui dekenai lau torea noho, badina be Satani dekena amo umui kwalimu vadaeni. Maragidia e, umui dekenai lau torea, badina be Tamana Dirava umui diba dainai.   
\p
\v 14 Tamana taudia e, umui dekenai lau torea inai, badina umui be Keriso umui diba momokani. Umui diba ia be hamatamaia nega dekena amo ia noho, bona harihari danu ia noho. Eregabe taudia e, umui dekenai lau torea noho, badina umui be goada noho, bona Dirava ena hereva umui emui lalona dekenai ia noho. Umui ese Satani dekena amo umui kwalimu vadaeni.   
\s1 Tanobada do umui ura henia lasi  
\p
\v 15 Tanobada do umui ura henia lasi, bona tanobada ena gaudia danu do umui ura henia lasi. Bema tanobada umui ura henia noho neganai, Tamana Dirava umui ura henia lasi inai.  
\v 16 Badina be tanobada gaudia ibounai, tauanina ena ura dikadia, matabodaga ena ura dikadia, bona hekokoroku, inai gaudia be Tamana Dirava dekena amo idia mai lasi. Idia be tanobada dekena amo idia mai noho.  
\v 17 Tanobada, mai ena gau dikadia, taunimanima idia ura dikadika gaudia, be kahirakahira do idia ore. To Dirava ena ura ia karaia noho tauna be do ia noho ela bona hanaihanai.   
\s1 Keriso ia tuari henia tauna ia ginidae vadaeni  
\p
\v 18 Lauegu natuna e, nega ena dokona be kahirakahira inai. Umui kamonai vadaeni, Keriso dekenai Tuari Henia Tauna be do ia mai. To Keriso idia tuari henia taudia momo idia mai guna vadaeni. Unai dainai ita diba inai nega ena dokona be kahirakahira.  
\v 19 Inai taudia ese iseda orea idia rakatania. To guna idia be iseda taudia korikori lasi, unai dainai ita dekena amo idia raka siri. Bema idia be iseda orea taudia korikori neganai, idia be ita danu do idia noho hebou. To idia ese ita idia rakatania, vadaeni unai dekena amo idia hedinaraia, idia be iseda orea lasi taudia.   
\p
\v 20 To umui ese Lauma Helaga umui abia vadaeni. Keriso ese umui dekenai ia henia. Unai dainai umui ibounai be hereva momokani umui diba vadaeni.  
\v 21 Hereva momokani umui diba lasi dainai inai revareva umui dekenai lau torea, a? Lasi momokani. To hereva momokani umui diba dainai lau torea. Bona inai danu umui diba: Koikoi be hereva momokani dekena amo ia mai diba lasi.   
\p
\v 22 Koikoi tauna be daika? Tau ta, bema ia gwau Iesu be Keriso lasi, unai tau be koikoi tauna, ani? Unai tau be Keriso ia tuari henia noho. Ia ese Tamana bona Natuna danu ia negea noho.  
\v 23 Natuna ia negea noho tauna ese Tamana danu ia negea noho. Bona Natuna ia abia dae tauna ese Tamana danu ia abia dae.   
\s1 Lauma Helaga ese hereva momokani ita dekenai ia hadibaia noho  
\p
\v 24 Guna umui kamonai hadibaia hereva, be emui lalona dekenai do umui dogoatao noho. Bema inai hereva umui dogoatao, umui be Natuna lalonai bona Tamana lalonai danu do umui noho nega ibounai.  
\v 25 Bona inai be Keriso sibona ese ita dekenai ia gwauhamata henia gauna, mauri hanaihanai.   
\p
\v 26 Inai revareva be umui dekenai lau torea, umui idia koia gwauraia taudia edia dika do lau hedinaraia totona.  
\v 27 To Keriso ese iena Lauma Helaga umui dekenai ia henia vadaeni. Unai dainai umui emui diba be hegeregere, badina be Lauma Helaga ena hereva be momokani, ia koikoi lasi. Iena hadibaia hereva do umui badinaia, bona Keriso lalonai do umui noho.   
\s1 Dirava ena natuna taudia  
\p
\v 28 Unai dainai, lauegu natuna e, Keriso ena lalona dekenai do umui noho. Vadaeni do ia giroa mai neganai, ita be do ita gini goada, do ita daradara lasi, bona iena vairana dekenai do ita hemarai lasi.  
\v 29 Umui diba Keriso be maoromaoro momokani. Unai dainai umui diba danu, kara maoromaoro taudia ibounai be Dirava ena natuna taudia.   
\c 3  
\s1 Iena lalokau dainai, Dirava ese iena natuna ita ia halaoa  
\p
\v 1 Mani do umui laloa, iseda Tamana ese lalokau bada ita dekenai ia henia vadaeni, badina ia ese iena natuna ita ia gwauraia noho. Momokani ita be iena natuna. Unai dainai tanobada taudia be ita idia diba lasi, badina be idia diba lasi Dirava.  
\v 2 Lauegu lalokau taudia e, harihari ita be Dirava ena natuna, to gabeai ita be edena bamona, be ita do diba namonamo lasi. To inai gauna ita diba namonamo: Keriso do ia hedinarai neganai, ita be iena toana bamona do ita lao, badina be iena toana korikori do ita itaia.  
\v 3 Keriso idia naria noho mai abidadama danu taudia ibounai ese idia sibodia edia lalona idia hagoevaia noho, Keriso ia goeva hegeregerena.   
\p
\v 4 Kara dika tauna ese Dirava ena taravatu ia utua noho, badina kara dika be taravatu utua gauna.  
\v 5 To umui diba, Keriso ia mai, kara dika do ia kokia totona. Bona ia lalonai be kara dika ia noho lasi.  
\v 6 Keriso ena lalona dekenai ia noho tauna ese kara dika ia karaia noho lasi. To kara dika ia karaia noho tauna ese Keriso nega ta ia itaia lasi, bona Keriso nega ta ia diba lasi.   
\s1 Mauri dala be rua, ta Dirava ena, ta Satani ena  
\p
\v 7 Lauegu natuna e, do umui naria, tau ta ese umui do ia koia garina. Kara maoromaoro ia karaia tauna be kara maoromaoro tauna, Keriso be maoromaoro bamona.  
\v 8 Satani ese hamatamaia nega dekena amo ia kara dika, unai dainai kara dika ia karaia noho tauna be Satani ena tauna. Dirava ena Natuna ia hedinarai ena badina korikori be inai: Satani ena kara dika do ia haorea momokani totona.   
\p
\v 9 Dirava ena natuna taudia ese kara dika do idia karaia noho lasi, badina be Dirava ena mauri be idia edia lalona dekenai ia noho. Bona unai taudia idia kara dika noho diba lasi, badina Dirava be edia Tamana dainai.  
\v 10 Dirava ena natuna taudia be idau, bona Satani ena natuna taudia be ma idau. Edia idau be inai: Kara maoromaoro ia karaia noho lasi tauna be Dirava ena natuna lasi, bona iena tadikakana ia lalokau henia lasi tauna be Dirava ena natuna lasi.   
\s1 Ibounai ta ta dekenai do ita lalokau henia  
\p
\v 11 Hamatamaia nega dekena amo ia mai bona harihari umui kamonai hadibaia hereva be inai: Ibounai ta ta dekenai do ita lalokau henia.  
\v 12 Kaino ena kara bamona do ita karaia lasi, ia be Satani ena tau, bona ia ese iena tadina Abela ia alaia mase. Badina dahaka ia alaia? Badina be Kaino sibona ena kara be kerere, to iena tadina ena kara be maoromaoro.   
\p
\v 13 Unai dainai, lauegu varavara taudia e, tanobada taudia ese umui do idia badu henia, be do umui hoa lasi.  
\v 14 Iseda tadikakana ita lalokau henidia dainai, ita diba mase ita rakatania, bona mauri dekenai ita hanaia vadaeni. Tau ta bema ia ese iena tadikakana ia lalokau henia lasi, unai tau be mase lalonai ia do noho.  
\v 15 Bona iena tadikakana ia badu henia noho tauna be ala-ala tauna. Umui diba mauri hanaihanai be ala-ala tauna lalonai ia noho lasi.  
\v 16 Lalokau ena toana, be inai kara dekena amo do ita diba: Keriso ese ita dainai iena mauri ia atoa diho. Unai dainai ita ese iseda tadikakana dainai, iseda mauri ita atoa diho danu be namo.  
\v 17 To, bema tau ta be mai ena kohu momo, bona iena tadikakana ia itaia mai ena ogogami, to ia bogahisihisi henia lasi, edena bamona ia hereva, “Lau ese Dirava lau lalokau henia?”   
\p
\v 18 Lauegu natuna e, iseda lalokau be hereva gauna sibona lasi. Namo ita lalokau henia, hereva sibona dekena amo lasi, to mai kara, bona mai momokani danu.   
\s1 Keristani taudia edia lalokau kara dainai, Dirava ena vairanai idia gini diba  
\p
\v 19 Inai iseda lalokau kara dekena amo, be do ita diba ita be momokani taudia. Vadaeni unai dainai, iseda kudouna be mai maino danu, Dirava ena vairana dekenai.  
\v 20 Bona bema iseda kudouna ese ita idia kota henia noho neganai, Dirava ena vairanai do ita laloa hekwarahi lasi. Badina Dirava ese gau ibounai ia diba, bona iena diba ese iseda kudouna ena diba ia hereaia momokani.   
\p
\v 21 Lauegu lalokau taudia e, bema iseda lalona ese ita idia kota henia lasi neganai, ita be Dirava ena vairanai do ita raka kahirakahira lao, gari ta lasi.  
\v 22 Vadaeni do ita noia gaudia ibounai be ia ese ita dekenai do ia henia. Badina be iena taravatu ita badinaia noho, bona ia do ita hamoalea karadia ita karaia noho dainai.  
\v 23 Dirava ena taravatu ita dekenai be inai: Iena Natuna Iesu Keriso do ita abidadama henia, bona ita ta ta ibounai dekenai do ita lalokau henia. Unai taravatu be ita dekenai Keriso ese ia henia vadaeni.  
\v 24 Iena taravatu ia badinaia noho tauna be Dirava ena lalona dekenai ia noho, bona Dirava danu be unai tau ena lalona dekenai ia noho. Dirava ese iena Lauma ita dekenai ia henia vadaeni, bona inai Lauma ese ita ia hadibaia noho, Dirava be iseda lalona dekenai ia noho.   
\c 4  
\s1 Dirava ena Lauma bona lauma dikana  
\p
\v 1 Lauegu lalokau taudia e, peroveta koikoi taudia momo be tanobada kahana ibounai dekenai idia lao noho. Unai dainai, bema taunimanima idia gwau, “Lau be Lauma Helaga lau abia vadaeni,” do umui naria namonamo. Idia ibounai do umui hamomokania lasi. To unai tau do umui tohoa guna, do umui davaria, Dirava ena Lauma ia abia momokani, o lasi.  
\v 2 Inai toana dekena amo Dirava ena Lauma do umui diba: Tau ta bema inai bamona ia hereva, ia gwau, “Iesu Keriso be taunimanima ena tauanina dekena amo ia mai,” vadaeni unai tau ese Dirava ena Lauma ia abia vadaeni.  
\v 3 To tau ta bema ia gwau Iesu be tauanina dekenai ia mai lasi neganai, unai tau ese Dirava ena Lauma ia abia lasi. Lasi momokani. To ia ese ia abia laumana be Keriso dekenai ia Tuari Henia Tauna ena. Umui kamonai vadaeni ia be do ia mai. Bona ia be harihari tanobada dekenai ia noho.   
\p
\v 4 Lauegu natuna taudia e, umui be Dirava ena bese taudia, bona umui ese peroveta koikoi taudia umui halusia vadaeni. Badina be umui emui lalona dekenai ia noho Laumana ena siahu be bada herea. Ia ese tanobada taudia edia lalona dekenai ia noho laumana ia hereaia vadaeni.  
\v 5 Inai peroveta koikoi taudia ese tanobada gaudia idia herevalaia, bona tanobada taudia ese edia hereva idia kamonai henia, badina idia be tanobada ena.  
\v 6 To ita be Dirava ena, bona Dirava ia diba tauna ese ita ia kamonai henia noho. To Dirava diba lasi tauna ese ita ia kamonai henia lasi. Unai dekena amo hereva momokani Laumana ena toana, bona kerere laumana ena toana ita diba.   
\s1 Dirava be lalokau  
\p
\v 7 Lauegu lalokau taudia e, ita ta ta dekenai ita lalokau henia be namo. Badina lalokau be Dirava dekena amo. Mai ena lalokau tauna be Dirava ena natuna ta, bona ia diba Dirava.  
\v 8 To mai ena lalokau lasi tauna ese Dirava ia diba lasi, badina Dirava be lalokau.  
\v 9 Dirava ese iena lalokau ita dekenai, be inai bamona ia hedinaraia: Ia ese iena Natuna tamona tanobada dekenai ia siaia, ia dekena amo mauri do ita abia totona.  
\v 10 Lalokau ena anina be inai: Ita ese Dirava ita lalokau henia lasi, to Dirava ese ita ia lalokau henia. Bona ia ese iena Natuna ia siaia, ia sibona be iseda dika gwauatao dalana totona.   
\p
\v 11 Lauegu lalokau taudia e, Dirava ese unai bamona ita ia lalokau henia dainai, namona be ita ta ta dekenai do ita lalokau henia, ani?  
\v 12 Taunimanima ta ese Dirava ia itaia lasi. To bema ita ta ta ita lalokau henia neganai, Dirava sibona ese iseda lalona dekenai do ia noho, bona iena lalokau iseda lalona dekenai be lalokau namo herea momokani.   
\p
\v 13 Inai bamona toana dekena amo, do ita diba ita be Dirava ena lalona dekenai ita noho, bona Dirava be iseda lalona dekenai ia noho: Ia ese iena Lauma ita dekenai ia henia vadaeni.  
\v 14 Ai ese ai itaia vadaeni, bona ai diba, Tamana ese iena Natuna ia siaia mai, tanobada taudia edia Hamauria Tauna do ia lao totona.  
\v 15 Bema tau ta ia gwauraia Iesu be Dirava ena Natuna, Dirava be unai tau ena lalona dekenai ia noho. Unai tau danu be Dirava ena lalona dekenai ia noho.  
\v 16 Bona ita diba momokani, Dirava ese ita ia lalokau henia. Bona Dirava ena lalokau ita abidadama henia noho.  
\s1 Lalokau momokani  
\p Dirava be lalokau. Tau ta bema lalokau ena dala dekenai ia noho, ia be Dirava ena lalona dekenai ia noho. Dirava danu be unai tau ena lalona dekenai ia noho.  
\v 17 Lalokau momokani do ia vara momokani iseda mauri lalonai inai dala dekenai: Iseda noho bona iseda kara tanobada lalonai, be Keriso ena noho bona iena kara hegeregerena. Bona unai dala dekena amo, ita be Dirava ena Kota Badana Dinana dekenai do ita gari lasi, to do ita gini, mai laloa goada danu.  
\v 18 Lalokau tauna be gari lasi tauna, badina be lalokau momokani ese gari ia lulua siri momokani. Gari ena anina be inai: Tau ta ena kara dika ena davana ia laloa momo noho. Bema tau ta ia gari neganai, ita diba lalokau be iena lalonai ia do vara momokani lasi.   
\p
\v 19 Ita be mai iseda lalokau, bona ena badina korikori be inai: Dirava ese ita ia lalokau henia guna.  
\v 20 Tau ta bema ia gwau, “Lau ese Dirava lau lalokau henia,” to ia ese iena tadikakana ia badu henia, unai tau be koikoi tauna. Badina be iena tadikakana, ia itaia diba tauna, bema ia ura henia lasi, edena bamona ia itaia diba lasi Diravana do ia ura henia diba?  
\v 21 Keriso ese ita dekenai ia henia taravatu be inai: Dirava ia lalokau henia tauna ese iena tadikakana danu do ia lalokau henia.   
\c 5  
\s1 Tanobada dekena amo do ita kwalimu  
\p
\v 1 Tau ta, bema ia hamomokania Iesu be Keriso, unai tau be Dirava ena natuna ta. Bema tau ta ese tamana ta ia lalokau henia, ia ese unai tamana ena natuna do ia lalokau henia danu.  
\v 2 Vadaeni, bema Dirava ita lalokau henia, bona iena taravatu ita badinaia neganai, ita diba momokani ita ese Dirava ena natuna taudia ita lalokau henia noho danu.  
\v 3 Badina be Dirava ita lalokau henia ena anina be inai: Dirava ena taravatu do ita badinaia. Iena taravatu be metau lasi.   
\p
\v 4 Badina be Dirava ena natuna ibounai ese tanobada dekena amo idia kwalimu diba. Ita ese Dirava ita abidadama henia noho, bona inai abidadama dekena amo tanobada ena kara ita halusia noho.  
\v 5 Daika ese tanobada ena kara dekena amo do ia kwalimu diba? Tau ta ia hamomokania, Iesu be Dirava ena Natuna, unai tau sibona ese.   
\s1 Dirava ese iena Natuna ia gwauraia hedinarai  
\p
\v 6 Iesu Keriso be iena bapatiso ena ranu dekena amo, bona iena rarana dekena amo ia mai, unai be iena mase satauro dekenai ena rarana. Ia mai be, ranu sibona dekena amo lasi, to ranu bona rara danu dekena amo ia hedinarai mai. Lauma Helaga ese ia gwauraia hedinarai inai be momokani, bona Lauma Helaga be momokani vadaeni.  
\v 7 Hereva momokani ena uitnesi be toi:  
\v 8 Lauma Helaga, ranu, bona rara danu. Inai toi edia uitnesi hereva be tamona.  
\v 9 Taunimanima edia uitnesi hereva ita hamomokania noho. To Dirava ena uitnesi hereva ese taunimanima edia uitnesi hereva ia hereaia momokani. Bona Dirava ese iena Natuna ia gwauraia hedinarai vadaeni.  
\v 10 Unai dainai Dirava ena Natuna ia hamomokania noho tauna ese unai Dirava ena uitnesi hereva ia dogoatao noho, iena kudouna lalonai. To Dirava ena hereva ia hamomokania lasi tauna ese Dirava ia gwauraia be koikoi tauna. Badina be inai: Dirava ena hereva momokani iena Natuna totona be unai tau ese ia hamomokania lasi dainai.  
\v 11 Unai hereva momokani be inai: Dirava ese mauri hanaihanai ita dekenai ia henia vadaeni, bona inai mauri be iena Natuna dekena amo ita davaria diba.   
\p
\v 12 Dirava ena Natuna ia abia vadaeni tauna ese mauri ia abia. To Dirava ena Natuna ia abia lasi tauna ese mauri ia abia lasi.   
\s1 Mauri hanaihanai  
\p
\v 13 Inai revareva umui dekenai lau torea badina be inai: Do umui diba mauri hanaihanai umui abia vadaeni, Dirava ena Natuna umui abidadama henia dainai.   
\p
\v 14 Dirava ita abidadama henia dainai, ita diba momokani, bema gau ta iena ura hegeregerena ita noia neganai, ia ese ita dekenai do ia kamonai.  
\v 15 Bona ita diba iseda noinoi ibounai ia kamonai dainai, ita diba danu ita noia gaudia do ita abia.   
\p
\v 16 Bema tau ta ese iena Keristani varavara ta ia itaia, kara dika ia karaia noho, to lauma hamasea gauna lasi, bona ia totona Dirava ia noia, vadaeni Dirava ese unai varavara do ia hamauria. Lau herevalaia gauna be inai: Unai tau ese iena lauma do ia hamasea lasi kara dikana ta ia karaia. Badina lauma ia hamasea kara dikana ta be ia noho momokani, bona lau hereva lasi, unai bamona kara dikana totona do umui noinoi.  
\v 17 Kara kerere ibounai be kara dika, to kara dika haida ese lauma idia hamasea lasi.   
\p
\v 18 Ita diba Dirava ena natuna taudia ibounai ese kara dika idia karaia noho lasi. Badina be Dirava ena Natuna ese idia ia naria namonamo noho, vadaeni Satani ese idia ia hadikaia diba lasi.   
\p
\v 19 Ita diba danu, ita be Dirava ena natuna taudia, bona Satani ese tanobada taudia ibounai ia gunalaia noho.   
\p
\v 20 Ita diba danu, Dirava ena Natuna ia mai vadaeni, bona ia ese iseda lalona ia hadiaria, vadaeni ita ese Dirava Momokani ita diba. Ita be Dirava ena lalona dekenai ita noho, badina be iena Natuna Iesu Keriso danu ena lalona dekenai ita noho. Iesu Keriso be Dirava Momokani, bona ia be mauri hanaihanai.   
\p
\v 21 Lauegu natuna e, do umui naria namonamo, dirava koikoidia garina.