\id 1TI - Hixkaryana NT -Brazil 2012 (DBL -2013) 
\h 1 Txemohtyo 
\toc1 Txemohtyo Hyaka Pawru Nmenhotho Wahorono On Ha 
\toc2 1 Txemohtyo 
\toc3 1 Tm 
\mt1 TXEMOHTYO HYAKA PAWRU NMENHOTHO WAHORONO ON HA. 
\c 1  
\s1 Txemohtyo y ohyaka àmenhehe katxhàrà on ha. 
\p  
\v 1 Pawru uro ha. Kryestu Txesusu nànyaketxho uro. Ànyahxah me wehxaha, Khoryenkom yano me, konyhoryeny kom yano me, Kryestu Txesusu yano me xarha. Omoknàr hona ro kehtxoho komo ryhe noro ha. 
\p  
\v 2 Txemohtyo y, ohyaka àmenhehe. Rohokru me xaxa manaha, omoro. Àsok tawro hana, Kryestu hona xeny me rowya oynyàr ke hamà. Onà wyaro àkehe, Khoryenkomo wya, ohoko. Towahke exko, Txemohtyo hoko, àkehe. Àhnàn yawo rma haxa exko, ohxe txeryko, àkehe, àwya, Kryestu Txesusu wya xarha. Kyàmkom me rma naha, Khoryenkomo. Kohkom me rma naha, Kryestu Txesusu. 
\s1 Àton kukuru komo ryhe anar me hananàhno yeryatxow hatà katxhàrà on ha. 
\p  
\v 3 Onà wyaro àkekonà, owya, Maseknonya yamtar hona rotontoko. Ehfesu ho rma exko, àkekonà, owya. Àro wyaro rma rha àkehe, owya, amnye rma xarha. Ehfesu ho rma exko, àkehe. Àton kukuru komo ryhe, anar me hananàhno yeryatxow hatà. Àro ke, àto rma exko, owya nyamoro hananàhtoho me. Anar me hananàhno yhera harha ehtxok hampànà, kasko, àwyanye.  
\v 4 Yaworonohnà hokohra harha ehtxok hampànà, kasko. Ohoryen heno komo yosotà yotaknyàr hokohra xarha ehtxok hampànà, kasko, àwyanye. Àro hoko rma tehtokony haxa, àtohnawo ro mak nosonytxetxhe ha. Khoryenkomo mryenon komo hananàhtoho mehra ro mak naha, ànekarymanàr komo. Kryestu hona xenye ro me txeryheranye ro mak naha. 
\p  
\v 5 Onà wyaro esnàr kom horà haxa ryhe, Khoryenkomo mryenon komo thananàhyatxhe, kàwyamo, osoxe rma haxa esnàr kom horà. Àsok kehtokony hana, osox tehxatxow ha, kàhnawonye anhà hoko ehutwahnà ro me kehtokony hamà, kàhnawonye yaworon me xaxa kehutwantokony hamà, kanhàn kom hokonohnà me xaxa kehutwantokony hamà, Kryestu hona xenye ro me xaxa kehutwantokony hamà. Àro wyaro ohxe kehutwantokonye, osoxe rma haxa tehxatxow hamà. 
\p  
\v 6 Àro wyaro ehutwahra ro mak natxhe, àton kukuru komo. Anar me rha nehutwetxhe. Àro ke, àtohnawo rma haxa nosonytxetxhe.  
\v 7 Àyweronàhyamano ynye ro me tesnàr komo xe rma natxhe haryhe. Onà wyaro ryhe nkehe, kàyweronàhyamatxho komo, Moyses heno nmenhotho, ketxhe rma haryhe. Tànekarymanàr komo ywenyek mak natxhe. Àywenyeke rma haxa tesnàr kom yoho ro, yaworo xaxa àkehe, owyanye, ketxhe rma haryhe, nyamoro ha. 
\s1 Àsok hana nay ha kàyweronàhyamatxho kom ha katxhàrà on ha. 
\p  
\v 8 Àsok hana nay ha, kàyweronàhyamatxho kom ha, Moyses heno nmenhotho. Ohxe rma haxa nay hamà. Àro hoko rma, onà wyaro tkahoryehra mak naha. Konyhoryetxehketxow hamà tkahoryehra ro mak naha ha, àhoko. Anhà komo hananàhyatxow hamà tkahorye haxa ryhe naha, àhoko, kàyweronàhyamatxho kom hoko. 
\p  
\v 9 Àsok tawro hana. Onà wyaro ryhe thutwetxow hamà. Enyhoru komo hananàhrà horàhnà ryhe, kàyweronàhyamatxownà, Moyses heno. Anhà komo hananàhrà horà haxa ryhe kàyweronàhyamatxownà hamà, tweromnà komo hananàhrà horà rma, Khoryenkomo yoyuknyehnà komo hananàhrà horà rma, noro hokonohnà komo hananàhrà horà rma, tanhàn hokon komo hananàhrà horà rma, enyhoruhnu ro komo hananàhrà horà rma, enyhoru wàràhyakany komo hananàhrà horà rma, tàyàm yotahany komo hananàhrà horà rma, tàyon yotahany komo hananàhrà horà rma, toto wayehkany komo hananàhrà horà rma,  
\v 10 anaro rha wos hoko tehxem komo hananàhrà horà rma, anaro rha kàrà hoko tehxem komo hananàhrà horà rma, kàrà rye rma othokon komo hananàhrà horà rma, toto yany komo hananàhrà horà rma, tàtemarontaxem komo hananàhrà horà rma, yaworohra yaworo xaxa àkehe, Khoryenkomo nenytxanàr me, kany komo hananàhrà horà rma. Àro wyaro atxke tehxem komo hananàhrà horà ryhe kàyweronàhyamatxownà hamà, Moyses heno. 
\p Anar komo xarha, anatoko khananàhtoho kom yawo rohra natxow hana. Yaworon xaxa yawo rohra natxow hana.  
\v 11 Àrwo yonyhorunu rma àro ha, yaworon xaxa, Khoryenkomo nhutwamohsotho rma. Ehonomnà me xaxa naha, noro ha, Khoryenkomo. Teryehoryemà ro me xaxa naha. Noro rma, tànhutwamohsotho yokarymanye ro me ryeryeye. Àro rma yawo ronohnà komo xarha hananàhrà horà, kàyweronàhyamatxownà, Moyses heno. 
\s1 Rohnàn yawo rma haxa nehxakonà Kohkomo katxhàrà on ha. 
\p  
\v 12 Tanoto me ryhe rowahanonkaye, Kryestu Txesusu, Kohkomo. Àsok tawro hana. Onà wyaro htxero nkekon hamà, rohoko. Mosonà ryhe, rorwon yawo ro mpànà naha ha kekon hamà, rohoko. Àro wyaro kanyenhàrà rma, rowahanonkaye. Rakoronomanye ro me xarha naha, tàhyaka ohxe ratamohtxoho me. Àro ke, onà wyaro àkehe, àwya. Ohxe xaxa manay hamà, rohoko, àkehe, àwya. 
\p  
\v 13 Amnyehra rma haxa haka, noro àwàràhyakekonà htxer hakahpa. Weryewhamnohyakon xarha, rowya àmryenon komo yeryewhamnohrà ke. Noro hoko, atxke rma haxa kàrwonakon xarha. Noro haxa ryhe, rohnàn yawo rma haxa nehxakonà. Àsok tawro hana, noro hutwahra rma hak ryesnàr ke hamà, noro hona xenyhera rma hak ryesnàr ke hamà.  
\v 14 Àro ke, towahke rma haxa nehxakon hamà, rohoko. Thenyehra rma haxa towahke nehxakonà, rohoko. Àro ke, noro hona harha wenyakonà, noro yano me mak ha. Toto komo xe harha wehxakonà. Àro wyaro tehxatxow hamà, noro yoh me harha kehtokonye. 
\p  
\v 15 Onà wyaro katxho ryhe yaworo xaxa naha. Yukryeka hona nomokye, Kryestu Txesusu, tanhàn hokonotho komo yonyhoryexe nomokye, katxho rma, yaworo xaxa naha. Àro hoko rma, àro wyaro hamà tkahorye rma haxa naha. 
\p  
\v 16 Atxke tehxem komo yoho rma haxa, anhà uro. Rohnàn yawo rma haxa mak nehxakonà, Txesusu Kryestu. Àsok tawro hana. Tàxehra ryehtxoho hoko ryhe, ohsànàhpànà ro me nosonyhekon hamà. Anar komo yoho rma haxa atxke tehxem hoko ryhe, ohsànàhpànà ro me nosonyhekon hamà, toto komo wya, rowyaro rma rha esnàr kom horà, tànàhnàn kom me rma rha esnàr kom horà. Amnye noro hona harha xeny komo rma nyamoro ha, karyhe roro harha texem komo rma. 
\p  
\v 17 Kàkayaryet kom me xaxa naha, Khoryenkomo. Amnyehra, amnye rma xarha, amnye xarha, kàkayaryet kom me xaxa naha. Àwayehpànà ro me xaxa naha. Osonyhenà ro me xaxa naha. Noro marma naha, Khoryenkomo. Anaro ehxera ro mak naha. Onà wyaro katxho roro me hak nahko, noro ha. Toyuhsomà ro me naha, ehonomnà me xaxa naha, katxho roro me hak nahko. Àro wyaro hamà, tkatxe. 
\s1 Khananàhtoho kom yawo ro rma haxa exko katxhàrà on ha. 
\p  
\v 18 Txemohtyo y, kàrà y, onà wyaro ryhe khananàhyaha, rorwon yawo ro oyehtxoho me. Amnyehra oyokarymatxownà, horykomo komo. Amnye oyehtxoho yokarymatxownà, Khoryenkomo nhutwamohsotho yano me mak ha. Àwyanye oyokarymatxhàr yawo ro rma exko. Anhà yarymanàr hoko rma haxa exko. Àsok tawro hana. Anhà yarymanàr hoko kehtokonye, enyhoru hoko rma tehxatxow hamà. Àro hoko rma haxa exko.  
\v 19 Khananàhtoho kom yawo ro rma haxa exko. Àsok kom oyehtxoho hok hana, àro hok ryehtoko, atxke wehxan hamà, màketxow hana. Àro hokohra ro mak ehtxoko, ohxe roro oyehtxoho menye. 
\p Anar kom haxa ryhe, àro wyarohra mak nehxatxkonà. Tàwyanye àro hok ryehtoko, atxke wehxan hamà, katxhe rma, àhoko rma nehxatxkonà. Àro ke, khananàhtoho kom yawo rohra harha natxhe, nyamoro ha.  
\v 20 Nyamoro wyaro rma rha natxhe, Emenew komo, Aryesantàrye xarha. Àro ke, uro ryhe àhanatanàhtxownà. Onà wyaro ryhe àkekonà, àwyanye. Amna yakoro ohsamnohpàra harha ehtxok hampànà, àkekonà, àwyanye. Satanasà hyaka haxa àtotxok hampànà, àkekonà. Àro wyaro àhanatanàhtxownà, anar me harha ehutwanàr kom horà, Khoryenkomo wàràhyakahra harha esnàr kom horà. 
\c 2  
\s1 Khoryenkom yakoro kàrwonàmtoho kom hoko hananàhno yeryetxhàrà on ha. 
\p  
\v 1 Wahoro htxero onà wyaro àkehe, àton kom hoko. Khoryenkom yakoro hak nàrwonàmtxowà, anar kom hoko, omeroron kom hoko. Apa y, noro hoko ryhe kàrwonaha, ayakoro, katxow haka. Apa y, noro akoronomako nyhe, katxow haka. Apa y, noro txko ryhe mewakryeko. Ohxe xaxa manaha, katxow haka. Àro wyaro hak nàrwonàmtxowà, àton komo, anaro rha toto kom hoko,  
\v 2 anaro rha owto yoh kom hoko xarha, anaro rha ehonomnà kom hoko xarha. Nyamoro hoko tàrwonàmporye tehxatxhe, Khoryenkom yakoro, wahahnà ro me toto komo yesnàr horà, teryehorye roro kesnàr kom horà, Khoryenkom hokono ro me kesnàr kom horà, takàhsomà ro me rma haxa kesnàr kom horà. 
\p  
\v 3 Àro wyaro Khoryenkom yakoro kàrwonàmtoho komo ryhe, ohxe naha, noro wya, konyhoryeny komo wya. Kàrwonàmrà komo rma yonytxehe, noro ha.  
\v 4 Toto komo yonyhoryenàr xe rma haxa naha. Omeroron komo yonyhoryenàr xe rma haxa naha. Àwyanye yaworon xaxa hutwanàr xe rma haxa naha, noro ha. 
\p  
\v 5 Àsok tawro hana. Towenyxa ryhe nay hamà, Khoryenkomo. Towenyxa rma rha naha, konyhoryeny komo, Khoryenkomo nàhnàn me harha keny komo. Kryestu Txesusu ryhe noro ha. Noro ryhe, toto me naha, kàwyaronye rma rha.  
\v 6 Tano me ro rma wayehye, konyhoryenàr kom horà, omeroron komo yonyhoryenàr horà. Kanhàn komo hyaye kowtoho komo yehemaye, twayehrà ke. 
\p Àro wyaro noro wya konyhoryetxho komo ryhe, ekarymahnà me rma hak nehxakonà, amnyehra. Amnye rma haxa ryhe, ekarymaxah me harha naha, ekarymanàr xe harha Khoryenkom yesnàr ke mak ha.  
\v 7 Ekarymanye ro me ronyakye. Kryestu nànyaketxho ryhe uro ha. Xuknewyanahnà komo hananàhnye ro me ronyakye. Yaworon xaxa enytxatxoko kanye ro me ronyakye, àwyanye. Kryestu hona harha xenytxoko kanye ro me ronyakye, àwyanye. Àro wyaro roskarymantoko, yaworo xaxa àkehe. Àtemarontahra ro mak wehxaha. 
\p  
\v 8 Àro ke, onà wyaro toto komo yesnàr xe wehxaha. Kàrkomo kom hak nàrwonàmtxowà, Khoryenkom yakoro. Henta kom tehtokony hana, àto rma hak nàrwonàmtxowà, anaro rha tohsamnohtoho kom yawo rma tehtokony hamà. Enyhoru ro me hak nahtxoko, tàrwonyem komo, tatahoyotkaxem komo. Ewakàhkahpànà ro me rma haxa hak nahtxoko. Osoyhenà ro me rma haxa hak nahtxoko, nyamoro ha, Khoryenkom yakoro tàrwonyem komo. 
\s1 Woràskomo komo yohtahoryetxho hoko hananàhno yeryetxhàrà on ha. 
\p  
\v 9 Woràskomo komo xarha, tohtahoryetxho kom hoko, ohxe rma haxa hak nahtxoko. Takàhsom me rma hak nahtxoko. Enyhoru yawo rma hak nahtxoko. Onà wyaro kahra hak nahtxoko. Anar komo yoho rma haxa kohtahoryen hamà, ohxe rma haxa rosonyhonàr horà, kahra hak nahtxoko. Àro ke, ehetàhpenyen ke ewomumtohra hak nahtxoko. Ohxe hak notexkatxowà. Onà wyaro kahra hak nahtxoko. Anar komo yoho rma haxa kotexken hamà, ohxe tonyxem me rma haxa ryesnàr horà, kahra hak nahtxoko. Uru ryhe wehekahtyan hamà, ryemeknarà, kahra hak nahtxoko. Anaro rha tohu txko wehekahtyan hamà, rowarà, kahra hak nahtxoko.  
\v 10 Owakryeno ytxoho hok haxa hak nahtxoko, tohtahoryetxho komo yoho rma haxa mak ha. Àsok tawro hana. Owakryeno ynye ro me rma haxa tehxorye natxow hamà, woràskomo komo, Khoryenkom hokon uro ha kany komo. 
\p  
\v 11 Thananàhsom me hak nahtxoko, woràskomo komo. Thananàhnàtokonye rma, tatàknye hak nahtxoko. Thananàhnye komo yoyuknye ro me rma haxa hak nahtxoko.  
\v 12 Onà wyaro kanye ro me wehxaha, uro, woràskomo kom hoko. Hananàhno yhera hak nahtxoko, kàrkomo komo yohon mehra hak nahtxoko, kanye ro me wehxaha, àhokonye. Àro ke, tatàknye roro rma hak nahtxoko. 
\p  
\v 13 Àsok tawro hana, kàrà htxero yakàhtonàr ke, noro hona wos yakàhtonàr ke. Àro wyaro rma nehxatxkon hatà, Aknaw heno komo, Efa heno xarha.  
\v 14 Kàràhnà ryhe, wos haxa ryhe, Satanasà ymo nenkuhtonàr me nehxakon hatà. Noro htxero rma, Khoryenkomo yanweknye me harha nexey hatà. 
\p  
\v 15 Ohxe mak natxhe hampànà, woràskomo komo. Thokru komo yonunutoko ryhe, tukrunhosom me rma haxa natxhe hampànà. Khoryenkom hona haxa xenye ro me tehtokonye, tukrunhosom me nenuryatxhe hampànà. Toto komo xe tehtokony xarha, enyhoru ro me tehtokony xarha, takàhso tehtokony xarha, tukrunhosom me nenuryatxhe hampànà, woràskomo komo. 
\c 3  
\s1 Onà wyaro ryhe tehxorye natxhe Kryestu mryenon yonye ro komo katxhàrà on ha. 
\p  
\v 1 Onà wyaro katxho ryhe yaworo xaxa naha. Kryestu mryenon komo yonye ro me kesnàr xe kehtoko, enyhoru hokono ro me kesnàr xe tehxaha, katxho, yaworo xaxa naha. 
\p  
\v 2 Onà wyaro ryhe tehxorye natxhe, Kryestu mryenon yonye ro komo. Atxke naha, mosonà, katxho mehra ro mak tehxorye natxhe. Towenyxa tehxorye naha, àhetx komo. Tweromra naha, mosonà, katxho mehra ro mak tehxorye natxhe. Ohxe tehutwaxemà ro me tehxorye natxhe. Takàhso rma haxa tehxorye natxhe. Ohxe hawana komo yenye ro me tehxorye natxhe. Khoryenkomo rwon hoko, ohxe enytxamohsony me tehxorye natxhe. 
\p  
\v 3 Tànyerhontahoryehra ro mak natxhe. Towakàhkahporyehra ro mak natxhe. Towahke roro rma haxa tehxorye natxhe. Tosoyhoryehra ro mak natxhe, toto kom yakoro. Tàtxenyerunke rma haxa tehtxoho kom hoko tehxoryehra ro mak natxhe, Kryestu mryenon yonye ro komo. 
\p  
\v 4 Bàn yawon komo yonye ro me tehxorye natxhe. Thokyamo hananàhnye ro me tehxorye natxhe, toyuknye ro kom me esnàr kom horà, tweromra esnàr kom hona.  
\v 5 Àsok tawro hana. Bàn yawon kom yonyhera tehtokonye, Khoryenkomo mryenon komo yonyhera rma rha natxow hamà. 
\p  
\v 6 Mexe rma haxa tehxorye natxhe, ataymomsah me. Mexehra haxa tehtokonye, anatoko onà wyaro nketxow hana. Ehonomnà ryhe uro ketxow hana. Àro wyaro rma rha nkekon hatà, worokyamo yohà ymo. Ehonomnà ryhe uro kekonà ymo hatà. Àro hoye ro ryhe, tanàhnohsom me harha nehxakon hatà. Àro ke, ataymomsah me mexe rma haxa hak nahtxoko, Kryestu mryenon yonye ro komo, tàwyanye ehonomnà ryhe uro tawro hona, noro ymo wyaro rma rha tanàhnohsom me tesnàr kom hona. 
\p  
\v 7 Ohxe xaxa naha, mosonà, katxho me tehxorye natxhe, omeroron komo wya, Kryestu mryenonàhnà komo wya xarha. Àsok tawro hana. Àro wyaro ohxe tonyxemà ro me tehtokonye, tanhàn hok nahko katxho mehra natxow hamà. Worokyamo yohà ymo narymahtor me natxow hamà. Àro wyaro ohxe tehxorye natxhe, Kryestu mryenon yonye ro komo. 
\p  
\v 8 Nyamoro yakoronomanye ro komo xarha, ohxe rma rha tehxorye natxhe. Takàhso rma rha tehxorye natxhe. Yaworon me rma haxa tehxorye natxhe. Tànyerhontahoryehra ro mak natxhe. Tkatxhonke rma haxa tehtxoho kom hoko tehxoryehra ro mak natxhe.  
\v 9 Khananàhtoho kom yawo ro rma haxa tehxorye natxhe. Àsok hana nay ha, khananàhtoho kom ha. Enytxahnà rotho me nay hamà. Enytxahnà rotho rma, tonytxaxem me harha nay hamà. Àro yawo ro rma haxa tehxorye natxhe. Àro yawo rono rma, yaworon me xaxa tehutwahorye natxhe, tàhnawonye. 
\p  
\v 10 Kryestu mryenon yonye ro komo yakoronomanyehnà me rma hak tehtokonye, totkukmahorye natxhe. Àwahanonkahnà me rma hak tehtokonye, totkukmahorye natxhe, ohxe roro tosonyhonàr kom horà. Ohxe roro tosonyhotxhenye, ohxe xaxa nay hamà, mosonà, katxho me tehtokonye ryhe, twahanonkaxem me haxa hak nahtxoko, Kryestu mryenon yonye ro komo yakoronomanye ro me tehtxoho menye. 
\p  
\v 11 Notxwakomo komo xarha, xenye ro komo yakoronomanye ro me rma rha natxow hamà. Ohxe rma rha tehxorye natxhe, nyamoro xarha. Takàhso rma rha tehxorye natxhe. Wàràhyakano ynye me tehxoryehra ro mak natxhe. Tweromra naha, mosonà, katxho me tehxoryehra ro mak natxhe. Yaworon me roro rma haxa tehxorye natxhe, notxwakomo komo. 
\p  
\v 12 Onà wyaro xarha tehxorye natxhe, Kryestu mryenon yonye ro komo yakoronomanye ro komo, kàrkomo komo. Towenyxa tehxorye naha, àhetx komo. Thokyamo neyuknuru ro me tehxorye natxhe. Bàn yawon komo yonye ro me tehxorye natxhe. 
\p  
\v 13 Àsok tawro hana. Ohxe tatamoknyetokonye, ehonomnà me rma haxa tonyxem me natxow hamà, Kryestu mryenon komo yakoronomanàr hoko ohxe tatamoknyàr kom ke mak ha. Towankaryhe rma haxa noskarymetxow xarha hamà. Tàwyanye Kryestu Txesus hona xenytxoho hoko toskarymantokonye, towankaryhe rma haxa noskarymetxow hamà, ohxe tatamohxemà ro me tesnàr kom ke mak ha, Kryestu mryenon komo yakoronomanàr hoko ohxe tesnàr kom ke mak ha. 
\s1 Ohxe rma haxa nay hamà uhutwahnà rotho katxhàrà on ha. 
\p  
\v 14 Romohtoho hona ro rma haxa wehxaha, ohyaka. Mexehra nyhe rma romoknàr xe wehxaha.  
\v 15 Mexe nyhe txko hana wehxan ha. Àro ke àmenhehe, rowya ahananàhtoho. 
\p On hoko ryhe khananàhyaha, Khoryenkom màn yawo ohxe kehtxoho kom hok mak ha. Àsoke ryhe ohxe tehxatxowà, Khoryenkom hoko, àmàn yawo kehtokonye. Àro rma hutwanàr xe wehxaha, owya. Àro rma hutwamohsonàr horà ryhe àmenhehe, ohyaka. Onok kom kuknon me hana nay ha, Khoryenkom màn ha. Àmryenon komo kuknon me nay hamà. Tehxemà ro xaxa mryenon komo kuknon me naha. Nàmno yetxehà wyaro, yaworon xaxa yetxehtony me natxhe, Khoryenkomo mryenon komo. 
\p  
\v 16 Ohxe rma haxa nay hamà, uhutwahnà rotho, Txesusu Kryestu yehtxoho rma, kàwyanye noro hutwatxho rma. Toto me ryhe nosonyhoye. Toto rma, yaworon me xaxa naha katxho me rma nehxakonà, Khoryenkom yokato wya. Kahe yawon komo nenyàr me xarha nehxakonà. Ekarymaxah me naha, anaro rha yana komo wya. Toto komo nahosàtho me naha, yukryeka hon komo nahosàtho me mak ha. Ehonomnà me xaxa anàmsah me naha, kahe yaka. 
\c 4  
\s1 Khananàhtoho kom yawo rohra harha natxhe hampànà kukukuthàyamo katxhàrà on ha. 
\p  
\v 1 Onà wyaro ryhe hutwamohsehe, Khoryenkom yokato, kàwyanye. Amnye, Kohkomo yomohtoho hahnoke rma haxa ehtoko, notowyatxhe hampànà, kukukuthàyamo. Khananàhtoho kom yawo rohra harha natxhe hampànà. Anar komo yonytxetxhe hampànà. Anar me hananàhyatxhe hampànà, anar komo, worokyamo kom yano me mak ha. Nenkuhtetxhe hampànà, yaworon xaxa hokohra harha ehtxoho menye. 
\p  
\v 2 Àsok hana natxow ha, nyamoro ha, anar me àhananàhnye kom ha. Ohxe rma nosonyhetxhe haryhe. Yaworonohnà ro me mak natxhe ha. Tàtemarontaxemà ro me natxhe. Ohxe tehtxoho kom hoko ehutwahra harha natxhe. Atxke tehtxoho kom hoko xarha ehutwahra rma rha natxhe. Weheto naknyohàtho wayehsaho wyaro natxhe, tàhnawonye. Àro ke, onà wyaro ehutwahra harha natxow hamà. Àro hoko ryehtoko, atxke wehxan hamà, àro hoko tehxoryehra mak wehxaha, kahra harha mak natxhe ha, atxke tehtxoho komo hutwahra harha tesnàr kom ke, ohxe tehtxoho komo xarha hutwahra tesnàr kom ke. 
\p  
\v 3 Onà wyaro ryhe hananàhno yeryatxhe hampànà, nyamoro ha. Àhehtahnà ro me ehtxoko, ketxhe hampànà. Moson yononyehnà ro me ehtxoko, ketxhe xarha hampànà, woto hoko, Khoryenkomo nakàhtotho hoko, Khoryenkomo nàmàtho hoko. Tonosom me rma naha, noro. Apa y, ohxe onàmàthàrà mosonà, katxho me rma naha, kàwyanye, Kryestu hona xeny komo wya, yaworon xaxa hutwany komo wya.  
\v 4 Àsok tawro hana. Khoryenkomo nakàhtotho ryhe, ohxe rma haxa nay hamà, omeroro mak ha. Kàwyanye, apa y, ohxe onàmàthàrà mosonà katxhe rma, ohxe naha, omeroro. Noro hoko rma, wotohnà mosonà tkahoryehra ro mak naha.  
\v 5 Woto yonyhoryenye me xaxa naha, Khoryenkomo, tàrwon ke, kàrwonàmrà kom ke xarha. 
\s1 Ohxe osonyhoko àwyanye ohoko ehohkanàr kom horà katxhàrà on ha. 
\p  
\v 6 Àro wyaro katxho kom hoko ryhe kowtà komo àhananàhtxoko. Owya àhananàhnàtokonye rma, Kryestu Txesus yanoto me xaxa ohxe manaha. Tànyahmaxem me xaxa manaha, khananàhtoho kom yawo ro oyesnàr ke, yaworon xaxa yawo ro oyesnàr ke. 
\p  
\v 7 Anar komo ryhe, yaworonohnà yokarymetxow hamà. Khoryenkom yano menohnà rma yokarymetxow hamà. Tonytxahoryehra rma haxa naha. Àro yonytxahra ro mak exko. Khoryenkom hoko oyehtxoho hoko ryhe, otkukmako.  
\v 8 Khun kom hoko xarha totkukmetxow hamà, karyhe kehtxoho kom hoko rma. Khun kom hoko kotkukmatxho komo xarha, ohxe rma rha naha. Àro yoho nyhe, ohxe rma haxa naha, Khoryenkom hoko kotkukmatxho komo. Àsok tawro hana. Àro hoye ro ryhe, towakryexem me rma tehxatxow hamà, amnye rma, tano rma hak kehtokonye. Àro hoye ro rma rha, towakryexem me xarha tehxatxhe, amnye xarha, kahe yaw harha kehtokonye. 
\p  
\v 9 Àro wyaro katxho ryhe, yaworo xaxa naha. Àro wyaro hamà tkahorye rma haxa naha. 
\p  
\v 10 Àro ke, thokaxe ro rma haxa tatamokyatxow hamà, tamotohso ro mak ha. Àsok tawro hana, Khoryenkom hona ro kesnàr kom ke hamà, tehxemà ro xaxa hona ro kesnàr kom ke hamà. Noro ryhe, omeroron komo yonyhoryeny me naha. Thona xeny kom haxa yonyhoryeny me naha. 
\p  
\v 11 Àro wyaro katxho kom hoko ryhe, hananàhno txeryko. Àro wyaro ryhe ehtxok hampànà, kasko, àton komo wya.  
\v 12 Ohxe roro exko, omoro, àna yake ryhe mpe, bàryekomo me rma haxa manaha, katxho mehra oyehtxoho me. Ohxe roro haxa ryhe osonyhoko, àwyanye, Kryestu mryenon komo wya, ohoko ehohkanàr kom horà. Ohxe roro orwonàmko. Toto komo xe rma haxa exko. Kryestu hona roro rma haxa xenyko. Anhà hokonohnà ro me mak exko. Àro wyaro rma ohxe osonyhoko, àwyanye, ohoko ehohkanàr kom horà. 
\p  
\v 13 Khoryenkom karyehtanà rwonàhyamanàr hoko rma haxa exko, toto komo nenytxanàr me. Ekarymanàr hoko rma haxa exko. Hananàhno ynyàr hoko rma haxa exko. Àro wyaro ryhe àhoko roro exko, romokhàra ro rma haka. 
\p  
\v 14 Tàyweron me harha oryeye, Khoryenkomo, tanoto ro me oyesnàr horà. Horykomo komo wya oyokarymantoko, Khoryenkomo nhutwamohsotho yano me àwyanye oyokarymantoko, tàyweron me harha oryeye, ohona tamor komo yenyetok mak ha, Khoryenkom yanoto ro me oyokarymantok mak ha. Noro yano me tàyweron me oyehtxoho hoye ro ryhe, atamoxko roro rma haxa, noro hyaka. 
\p  
\v 15 Àro wyaro katxho kom hoko roro rma haxa exko. Àro yawo ro rma haxa exko. Àro yawo ro oyehtoko, meya nyhe ohxe rma haxa oyehtxoho yonyatxhe, toto komo, omeroron komo.  
\v 16 Ohxe oyehtxoho hona haxa mpàn xenyko. Owya hananàhno ytxoho hona mpàn xenyko xarha. Àhoko roro rma haxa exko. Àhoko roro oyehtxoho hoye ro, tonyhoryexem me manaha, omoro. Oyonytxany komo xarha, tonyhoryexem me rma rha natxhe, àhoko roro oyehtxoho hoye ro mak ha. 
\c 5  
\s1 Enyonkaxah me wos yehtoko towakryexemà ro me noro xenyko katxhàrà on ha. 
\p  
\v 1 Horykomo komo yoyhera exko. Àhananàhtxok haxa xa, oyàm hananàhrà wyaro. Bàryekomo komo xarha àhananàhko, oyowtà hananàhrà wyaro.  
\v 2 Notxwakomo komo xarha àhananàhko, oyon hananàhrà wyaro. Omaso komo xarha àhananàhko, owosàn hananàhrà wyaro. Owya omaso komo hananàhnàtoko rma, anhà hokonohnà ro me rma exko. 
\p  
\v 3 Enyonkaxah me wos yehtoko, towakryexemà ro me noro xenyko. Ewakryehnà ro me ehtoko, towakryexem me rma xenyko.  
\v 4 Anar kom haxa ryhe, enyonkaxemo komo rma, towakryexem me rma natxow hamà. Àsok tawro hana, thohke tesnàr kom ke hamà, thake tesnàr kom ke hamà. Tànotxwan komo yowakryeny me ryhe tehxorye natxhe, àhokyamo, àhar komo xarha. Khoryenkom hokon me tehtokonye, tànotxwan komo yowakryeny me htxer hak nahtxoko, tàwyanye anar komo yowakryehra ro rma haka. Thorymamnohàtxhet yàmnye me rma hak nahtxoko, tàyon komo wya, tànotxwan komo wya. Àro wyaro ehtxoho komo ryhe, ohxe naha, Khoryenkomo wya. 
\p  
\v 5 Anar komo ryhe, enyonkaxemo komo rma, ewakryehnà ro me natxow hamà. Àyanamra mak natxow hamà. Àro ke, Khoryenkom hona ro rma haxa wehxaha, kanye ro me xaxa natxhe, nyamoro ha. Khoryenkom yakoro tàrwonyemà ro me xaxa natxow hamà. Kohsaya xarha, awasnaw xarha, tàrwonyemà ro me natxow hamà. Apa y, uro nyhe txko ewakryeko, kanye ro me natxow hamà, àwya. 
\p  
\v 6 Anar kom haxa ryhe, enyonkaxemo komo rma, teryehotanàr kom hoko natxhe, tano me rony mak ha. Twayehso rma natxhe, nyamoro ha, tàhnawonye, Khoryenkom hokohra tesnàr kom ke. Tehtokonye rma haka, twayehso rma natxhe, tàhnawonye. 
\p  
\v 7 Àro wyaro rma àhananàhtxoko, àton komo, atxke naha, mosonà, katxho mehra ro mak esnàr kom horà.  
\v 8 Tàyanan komo yowakryehra haxa tehtokonye ryhe, thananàhtohotho komo xanomkahnohyatxow hamà. Tàyon komo yowakryehra tehtokonye ryhe, thananàhtohotho komo xanomkahnohyatxow hamà. Kryestu yahosnyehnà komo yoho nyhe, atxke rma haxa natxhe, nyamoro ha. 
\p  
\v 9 Enyonkaxemo yosot komo ryhe, benhosom me natxow hamà, towakryexem me esnàr kom horà, uhutwahkahpàn me esnàr kom horà. 60 mehra rma hak txemnyehà enuruthuyamo yehtoko, àmenhohnà me hak nahtxoko. Onà wyaro haxa hak nahtxoko, benhosom komo. Towenyxa ro ànyontaxah me hak nahtxoko.  
\v 10 Toto komo yakoronomanyenhàrà ryhe mosonà katxho me hak nahtxoko. Thokyamo horymamnohnyenhàràtho me hak nahtxoko. Ohxe hawana komo yenyenhàrà me hak nahtxoko. Kryestu mryenon komo hrorà korokanyenhàrà me hak nahtxoko. Teryewhamnohsom komo yakoronomanyenhàrà me hak nahtxoko. Meya roro rma haxa owakryeno ynyenhàrà me hak nahtxoko. Àro wyaro hak nahtxoko, enyonkaxemo komo, benhosom komo, towakryexem komo. 
\p  
\v 11 Omaso me nyhe rma ehtokonye, àmenhohnà me hak nahtxoko. Àsok tawro hana. Omaso me rma hak tehtokonye, amnye tànyontanàr komo xe xarha natxow hamà. Kryestu hyaye notowyatxow hamà.  
\v 12 Kryestu yanoto ryhe uro kanyenhàrà rma, notowyatxhe harha, noro hyaye, tànyontanàr komo xe xarha tesnàr kom ke mak ha. Àro ke, atxke tonyxem me harha natxow hamà.  
\v 13 Onà wyaro xarha natxhe, omaso me rma tehtokonye. Anaro rha toto kom màn yaka tàtosomà ro me natxhe. Tomyawon kom hokohra mak natxhe. Newenyehyametxhe harha. Àsok make tàrwonyemà ro me natxhe. Anar komo yokarymanye ro me natxhe. Osonytxakenyehnà ryhe yokarymetxhe, nyamoro ha. 
\p  
\v 14 Àro ke, omaso me rma hak tehtokonye, àmenhohnà me hak nahtxoko, enyonkaxemo komo. Nànyontatxow xarha haka. Hohtatxow haka. Ohxe hak bàn yawon komo yetxowà. Àro wyaro ohxe omaso komo yehtoko, kwàràhyakahrany harha natxow hamà, kxanhàn komo.  
\v 15 Àsok tawro hana. Enyonkaxemo kukuru komo ryhe, otowsah me rma natxow hamà, kàhyayenye. Satanasà mryenon me harha natxow hamà. 
\p  
\v 16 Onà wyaro hak nahtxoko, woràskomo komo. Kryestu mryenon me tehtokonye, onà wyaro hak nahtxoko. Enyonkaxah yanan me tehtokonye, newakryetxow haka. Nyamoro yowakryehra hak nahtxoko, Kryestu mryenon komo, tohsamnohsomà ro komo. Ewakryehnà ro kom haxa hak yowakryetxowà. 
\s1 Anaro rha hoko hananàhno yeryetxhàrà on ha. 
\p  
\v 17 Tonye ro kom hak yowakryetxowà, Kryestu mryenon komo. Àwyanye xenytxoho komo ryhe, tehemaxem me nay hamà. Ohxe rma haxa xenyàr kom hoko tehtokonye, thenyehra nyhe towakryehorye natxhe. Khoryenkomo rwonà yokarymanàr hoko rma haxa tehtokonye, àmryenon komo hananàhrà hoko rma haxa tehtokonye, thenyehra rma haxa towakryehorye natxhe.  
\v 18 Àsok tawro hana, Khoryenkom karyehtanà wya onà wyaro tawro ke. 
\q1 Faka hotmompera ehtxoko. Ayanoto kom me ehtoko, nasànasà yakmeknyàr hoko ehtoko, àhotmompera ehtxoko. Nasànasà hoy haxa hak nenahno. 
\m Àro wyaro rma nkehe, Khoryenkom karyehtanà, àmenhosahonhàrà. Towakryexem me nay hamà, faka. Àro wyaro rma rha, towakryexem me rma rha natxhe, Kryestu mryenon yonye ro komo. Onà wyaro nkehe xarha, Khoryenkom karyehtanà. 
\q1 Tàmporye naha, ehethàrà, toto komo wya, atamohxemo komo wya. 
\m Àro wyaro rma nkehe, Khoryenkom karyehtanà, àmenhosahonhàrà. Àro ke, Kryestu mryenon komo yonytxoho xarha, tehemahorye rma rha naha. 
\p  
\v 19 Xenye ro kom hoko, atxke nehxako, mosonà, kanye yonytxahra exko. 2 me noro yanhànà yokarymany kom yehtok haxa, 3 me haxa ehtokonye, àme rye rma haxa ekarymantoko rma, nyamoro rma eyuhko. Àro wyaro àwyanye noro yanhànà yokarymatxhe rma, àro wyaro hamà, kasko.  
\v 20 Tanhànàthàrà hnànkahra ehtokonye, eytxoko, omeroron komo nenytxanàr me, anar komo yoseryehtoho me. 
\p  
\v 21 Àro wyaro katxho kom yawo ro ryhe exko hampànà. Owya eytxoho kom hoko, àme rye rma haxa exko hampànà, omeroron kom hoko. Àro wyaro ryhe khananàhyaha hampànà, Khoryenkomo nenyàr me, Kryestu Txesusu nenyàr me xarha, kahe yawon komo nenyàr me xarha. Khoryenkomo nanotomanàrà ro komo rma nyamoro ha, kahe yawon komo. 
\p  
\v 22 Ayamorà meryan hamà, àton kukuru kom hona, Khoryenkom yanoto me haxa xenyhonàr kom horà. Owya ayamorà yeryhera ro rma haka, ohxe tonyxemà ro me hak nahtxoko, mexe nyhe mak ha. Àsok tawro hana. Mexehra àhonanye ayamorà yeryetxhe, anatoko thutwaxem me harha nay hana, atxke exetxhàyamotho. Àro wyaro ehtokonye, nyamoro wyaro rma rha atxke xak manaha katxho me rma rha manaha hampànà, omoro xarha, owya àhonanye ayamorà yenyàr ke mak ha. Omoro haxa ryhe, anhà hokonohnà ro me exko. 
\p  
\v 23 Tuna marma yonhàra exko. Ufa xkunu txko xa enko, atxke txko mak ha. Àsok tawro hana. Emahona ro ekeh me manay hatà. Àro ke, ufa xkunu txko enko, oyowan yohtxe. 
\p  
\v 24 Anar komo yanhànàtho ryhe, thutwaxem me rma nay hamà, amnye rma. Àro ke, tanàhnohsom me nay hamà, mosonà, tketxow hamà, nyamoro hoko, thutwaxem me rma haxa anhànàthàyamo yesnàr ke. Anar komo yanhànàtho haxa ryhe, uhutwahnà me rma hak nay hamà, amnye rma. Amnye haxa, thutwaxem me harha mpànà naha ha.  
\v 25 Àro wyaro rma rha, ohxe anar komo yehtxoho thutwaxem me rma nay hamà, amnye rma. Anatoko uhutwahnà me rma hak nay hana. Amnye rma uhutwahnà me rma hak ehtoko, amnye haxa thutwaxem me harha mpànà naha ha. Uhutwahnà rotho ryhe, ohxe toto yehtxoho ryhe, thutwaxem me xaxa mpànà naha ha, amnye ha. 
\c 6  
\s1 Tanotomaxemà ro komo hananàhàthàrà on ha. 
\p  
\v 1 Onà wyaro hak nahtxoko, tanotomaxemà ro komo, ehematxhohnà ro komo, thokaxe ro rma haxa tatamohxemà ro komo. Toyuhsomà ro me hak tanotomany komo yonytxowà. Onà wyaro kanye ro me hak nahtxoko. Ohxe rma haxa hak weyuhsu kanye ro me hak nahtxoko, tanotomany kom hoko. Àro wyaro ohxe ehtokonye, Khoryenkomo wàràhyakahra harha natxow hamà, anar komo. Khananàhtoho komo wàràhyakahra xarha natxow hamà.  
\v 2 Kryestu hona xenye ro me tanotomany komo yehtoko, eyuknye ro kom me rma haxa hak nahtxoko. Tamotohso ro atamokhera wehxan hamà, noro hyaka, rowtà me esnàr ke, kahra hak nahtxoko. Thenyehra rma haxa hak natamohtxowà, àhyakanye, Kryestu hona xenye ro me rma rha esnàr kom ke mak ha, noro nàhnàn me rma rha esnàr kom ke mak ha. 
\p Àro wyaro katxho kom hoko ryhe, uhutwamohsoko, àwyanye. Àro yawo ro rma haxa àhananàhtxoko nyhe. 
\s1 Àsok hana natxow ha anar me hananàhno ynye kom ha katxhàrà on ha. 
\p  
\v 3 Anatoko àro yawo rohra mak hana hananàhno yeryatxow ha, anar komo. Yaworon xaxa yawo rohra hana hananàhno yeryatxow ha. Txesusu Kryestu rwon yawo rohra hana, Kohkomo rwon yawo rohra hana, khananàhtoho kom yawo rohra hana, Khoryenkom hokon me keny komo rma yawo rohra hana hananàhno yeryatxow ha. Àsok hana natxow ha, nyamoro ha, anar me hananàhno ynye kom ha. 
\p  
\v 4 Onà wyaro natxow hamà. Ehonomnà me rma haxa nehutwetxhe haryhe. Uhutwanyehnà ro me natxhe. Àtohnawo rma haxa tosonytxanàr komo xe roro natxhe. Tosoynyàr komo xe roro natxhe, tàrwonàmtoho kom hoko tehutwatxho kom hoye ro. Àro ke natakuyatxhe. Natameryeketxhe xarha. Notwàràhyaketxhe xarha. Teryesawonyehranye nosonyatxhe xarha.  
\v 5 Othokonye rma haxa nàrwonatxhe xarha. Atxke rma haxa tehutwaxemà ro kom kax mak natxhe ha. Yaworon xaxa hutwanyehnà ro kom kaxe ryhe natxhe xarha. Onà wyaro nehutwetxhe rma haryhe. Khoryenkom hoko kesnàr kom ke ryhe, kàkatxho kom ke towakryexem me rma haxa tehxatxhe, ketxhe rma haryhe, nyamoro ha. 
\s1 Tàtxenyeruntxahke kehtxoho kom hoko hananàhno yeryetxhàrà on ha. 
\p  
\v 6 Khoryenkom hokono ro me kehtokonye ryhe, towakryexem me rma haxa tehxatxow hamà. Kàkatxho kom hoko oseryehokahra kehtokony haxa ryhe, towakryexem me rma haxa tehxatxow hamà.  
\v 7 Àsok tawro hana. Konunutokonye, àkatxhomra tonutxownà hamà. Kwayehnàtokony xarha, àkatxhomra rma rha twayehyatxow hamà.  
\v 8 Àro ke, oseryehokahra ro mak tehtxe, kàkatxho kom hoko. Tkatxhonke rma haxa kesnàr komo xehra ro mak tehtxe. Tànyahke marma kehtokonye, teryehorye rma tehtxe. Twomunke marma kehtokonye, teryehorye rma tehtxe. 
\p  
\v 9 Tkatxhonke rma haxa kesnàr komo xe kehtokony haxa ryhe, tatarymahetxhe, kanhàn komo wya. Tatahohsetxhe, kanhàn komo wya. Thenyehra rma haxa tehohketxhe, anaro rha kanhàn kom hoko. Àro hoko rma kehohkatxho komo ryhe, kakàhpokany kom me naha. Keryewhamnohnye kom me naha. Kanàhnohnye kom me naha. Komtatkatxehkany kom me naha.  
\v 10 Àsok tawro hana. Tàtxenyeruntxahke rma haxa kehtxoho kom hoye ro ryhe, kanhàn kom hoko rma haxa tehxatxow hamà, anaro rha hoko, àsok maken kom hoko. 
\p Kukukuthàyamo ryhe, txenyeru hoko rma haxa nehohketxkonà. Àro hoye ro ryhe, khananàhtoho kom yawo rohra harha natxhe. Àro ke, thenyehra rma haxa nekhokatxehketxhe harha, tàhnawonye. 
\s1 Anhà hokonohnà ro me exko katxhàrà on ha. 
\p  
\v 11 Omoro haxa ryhe, nyamoro wyarohra anhà hokonohnà ro me exko. Khoryenkomo mryenon me ryhe manaha, omoro. On hok haxa ryhe exko, ohxe roro oyehtxoho hoko, Khoryenkom hokono ro me oyehtxoho hoko xarha, Kryestu hona xenye ro me oyehtxoho hoko xarha, toto kom xe rma haxa oyehtxoho hoko xarha, oyeryewhamnohtoho yonàmnye ro me oyehtxoho hoko xarha, toto kom hoko towahke rma haxa oyehtxoho hoko xarha. Àro wyaro ohxe oyehtxoho hoko ryhe exko. 
\p  
\v 12 Khananàhtoho kom yawo ro kehtokonye, anhà yarymanàr hoko rma haxa tehxatxow hamà. Àro hoko ryhe exko. Karyhe roro oyehtxoho hona ro rma haxa exko. Àsok tawro hana. Karyhe roro oyehtxoho me ryhe awahanonkaye, Khoryenkomo. Tàmryenon me ànwahanonkatxhàrà rma, moskarymaye, toto komo nenytxanàr me, thenyenohnà komo nenytxanàr me. Oyoskarymanàrà ryhe, ohxe rma haxa nehxakonà. Oyoskarymantoko rma, karyhe roro texem me awahanonkaye, Khoryenkomo. Àro ke, karyhe roro oyehtxoho hona ro rma haxa exko. 
\p  
\v 13 Khananàhyaha, Khoryenkomo nenyàr me. Omeroron hoko, tonyxerye txenye ro me naha, noro ha. Noro rma nenyàr me khananàhyaha, Kryestu Txesusu nenyàr me xarha. Noro ryhe, noskarymaye, Ponseyu Peratusu wya. Noro yoskarymanàrà ryhe, ohxe rma haxa nehxakonà. Noro rma nenyàr me xarha khananàhyaha. 
\p  
\v 14 Khananàhtoho kom yawo ro xaxa exko. Àro yawo rono rma, ayanhàn hokohra ro mak exko. Atxke naha, mosonà, katxho mehra ro mak exko, ohxe tonyxem me khananàhtoho komo yehtxoho me. Àro yawo ro rma haxa exko, Txesusu Kryestu yomokhàra ro rma haka, Kohkomo yomokhàra ro rma haka. 
\p  
\v 15 Noro yomoknàr xe Khoryenkom yehtoko ryhe, tonyxem me xaxa mpànà naha ha, Khoryenkom yano me mak ha. Teryehoryemà ro xaxa noro ha, Khoryenkomo. Ehonomnà xaxa ymo noro ha. Noro wyarono, anaro ehxera ro mak naha. Anaro rha kayaryet komo kayaryetà ro xaxa noro ha. Anaro rha yoh komo yohà ro xaxa noro ha.  
\v 16 Tano me ro rma, àwayehpànà ro me naha, noro marma xaxa mak ha. Awasànà ymo hono ro me xaxa naha. Awasànà ymo ryhe, àhahnohpànà ro me xaxa naha, tawasnye rma haxa esnàr ke. Toto komo nenyehtorà ro me ryhe naha, Khoryenkomo. Osonyhenà ro kaxe ryhe naha. Toyuhsomà ro me xaxa naha, katxho roro me hak nahko, noro ha. Ehonomnà me xaxa naha, katxho roro me hak nahko, meya roro rma haxa mak ha. Àro wyaro hamà, tkatxe. 
\s1 Tkatxhonkemà ro komo hananàhàthàrà on ha. 
\p  
\v 17 Tkatxhonkemà ro komo ryhe àhananàhtxoko. Ehonomnà ro me osonyhera ro mak ehtxok hampànà, kasko, àwyanye. Onà wyaro kahra ehtxok hampànà, kasko, àwyanye. Amnye ohxe roro rma wehxaha, tkatxhonke rma haxa ryesnàr ke, kahra ro mak ehtxok hampànà. Àsok tawro hana, tosomtkaxem me akatxhothàyamo yesnàr ke, kasko, àwyanye. Khoryenkomo wya haxa ryhe oyowakryetxho kom hona ro ehtxoko, kasko, àwyanye. Àsok tawro hana. Kowakryenye ro kom me rma haxa nay hamà, noro, thenyehra rma haxa mak ha, keryehotanàr kom horà.  
\v 18 Owakryeno ytxoho hokono ro me haxa ryhe ehtxoko, kasko xarha, àwyanye. Akoronomano ytxoho hokono ro me haxa ryhe ehtxoko. Akatxho kom hoye tàmtxoko, anar komo wya, thenyehra mak ha, amemnà ro me mak ha, kasko, àwyanye. 
\p  
\v 19 Àro wyaro haxa hak nahtxoko, tkatxhonkemà ro komo, amnye Khoryenkomo newakryenàr me rma haxa tehtxoho menye, karyhe roro xaxa tehtxoho kom hona ro tehtxoho menye. 
\p  
\v 20 Txemohtyo y, yaworon xaxa hutwamohsoye, Khoryenkomo, owya, àro yawo ron me oyesnàr horà. Àro ke, àro yawo ro rma haxa exko, anar me oyehutwanàr hona. 
\p Anar kom haxa ryhe, àsok make rma haxa nàrwonatxhe, Khoryenkom yano mehra mak ha. Enytxahranye ro mak exko. Anaro rha hoko rma nosonytxetxhe haryhe, nyamoro ha. Yaworo xaxa amna nhutwehe, kany me rma natxhe haryhe. Yaworohra kany me mak natxhe ha.  
\v 21 Kukukuthàyamo ryhe nawexenàmtxownà hamà, yaworo xaxa amna nhutwehe, kanyenhàr me tesnàr kom ke, yaworonohnà hoko rma àro wyaro kanyenhàr me tesnàr kom ke. Àro ke ryhe, khananàhtoho kom yawo rohra harha natxhe, nyamoro ha. 
\p Towahke xaxa nay hamà, Txesusu Kryestu, khokonye. Àro wyaro towahke noro yehtxoho hutwanàr xe roro wehxaha, owyanye.