\id COL - Gayil New Testament
\ide UTF-8
\h ቆለስያስ
\toc1 ኦይትምስባብ ጳውሎስታ ክታ ቆለስያስ ኤድንከስካንታ
\toc2 ቆለስያስ
\toc3 ቆለ.
\mt2 ኦይትምስባብ ጳውሎስታ ክታ
\mt1 ቆለስያስ ኤድንከስካንታ
\imt1 አርድንታ
\ip ኮና ክቴና ጻፍምሳንዳ መራ እስያ ፍጨናር ዶቅድን ኤፈሶን ካተመንታ Ꮊይንታ ዉትንታጎካ Ꮊፈርድን ቆልስያስ ካተመናር ምክስ ኤሄንካንቴ፥ ናኮና ምክስ ኤሄና ኮት ዎድምሳንዳ ጳውሎስካ ማታክንዳ ማችንከረ ሮማ ፍጨንታ ባንችንታ ጎያር ቆልምድንዳ እስያ ፍጨንታ ካተማ ማቻንደት ኤፈሶናርንካ ክላ ኬዘንም ኬዝድባብከስም ኦይተሮ Ꮊቃንካንታ ቆልስያስ ካተመነረ ኮም ቦድንግንዳ እምምሳን ፍክስ Ꮊቄ፥ ቆላስያስ ካተመናር ምክስ ኤሄንካንታ “ሳብም ኤስካንተኬ ቦድማ አቅንተንም Ꮊፍካንታ ዋልቃ ዋልቃ ኤድና አያናር ቆልድባብከስካንተኬ ገችታ ኤራ ዶቅድባብከስካንታ ጎስት ዝግዝዴ” ጋይድባብ ካርካ ኤስስንባብከስ ከት ዶቅድንደትም ጳውሎስ ኤሰርታ Ꮊቄ፥ ከታኬና ካርካ ኤስስንባብከስ ከት ጋይድንዳ አብ ሪና “ዋልቃ ዋልቃ ኤድንከስ ሶለንም ተችርታ ዶቅድን ዎገንከስካንታ ቆልም፥ እችምተኬ አብንከስተረ መጠንከስም ካርስ ዝግዝዴ” ጋይድንዳ Ꮊቄ።
\ip ጳውሎስ ኮም ክተንም ክት ጻፍሳንዳ ዶፈን ማቻን ክርስቶሳር ማትንተታ ክቴን ኬዘሮ ኬታ ካርካ ኤስስን ዎይስካንቴ፥ ክት ኬዛᎺቃን ማስንከሳርንካ አፍ ማድንዳ “የሱስ ክርስቶስ ቦድማ አቅንተንም እምዴ፥ ከታኬና አብ አሜንንከስኬ ፍክስንከስ ማቼ ክታዘንካ ጎተርዝደኬ” ጋይድንዴ፥ ሳብ ክርስቶሰካ ፍጫ ሙደንም ፍዜ፥ ክትጎከረ ይንደር ማስሶ ተይᎺዴ፥ ፍጫሙደንታ አቅንተታ Ꮊድን ጉርም ዶቅተርንዳ ክርስቶሰም ቡዳርንካ አሜንካ Ꮊክዬ፥ ኮግንደካ ጳውሎስ ኮና አንድር ኤስስና አሜንድባብከስታ ዶቅንተናር Ꮊስግንዳ ፍክስዘን Ꮊቅስ ዝግዝዳናንከረ ኬዝዴ።
\ip ኮም ክቴን ጳውሎስዘንካ ተይሶ ቆላስያስ ካተመናር የልስካንታ ኦይትምስባብ ትክቆሰካ ክክን የካ Ꮊቅባብ አናስሞስ Ꮊቃንደትም የ ሰደስናና መይድንዴ፥ ጳውሎስ ኮካንታ ኦነስሞስ ጋይምስባብ አይለንታ አምስሶ ፍልሞናካንታ አብ ክቴን ጻፍቴ።
\iot ማጻፍን ኮትኮታ ሙዳ የድንተና
\io1 አርድንታ \ior (1፡1-8) \ior*
\io1 ክርስቶሰታ እዘንኬ ፍክስንካ \ior (1፡9—2፡19) \ior*
\io1 ክርስቶሳር ክላ ዶቅንት \ior (2፡20—4፡6) \ior*
\io1 በእንታ \ior (4፡7-18) \ior*
\c 1
\p
\v 1 ሳብታ ጋይተካ የሱስ ክርስቶስታ ኦይትምስባብ ጳውሎስዘንከ ዎንታ እስመን ጢማቶስዘንካ፥
\p
\v 2 ቆላስያሳር ዶቅድባብከስ ክርስቶሳር ፋስምስባብከስኬ አሜንምስባብ እስመንከስ፥
\q1 ሳብ ዎንታ ባቤንዘንካ ዉች እምንተንኬ ሳራትቼንካ የካንታ ማታጋካ።
\s1 ጳውሎስ ቆላስያስ ኤድንከስጎካ ሳብም ጋለትንኬ ምክስንካ
\p
\v 3 የካንታ ዎ ምግዝድንደትካ ዎንታ ባቤን የሱስ ክርስቶስታ ባቤን ሳብም ሙዳᎺይካ ዎታ ጋለዶቴ። 
\v 4 Ꮊራካንታ ጋይሴ የሱስ ክርስቶሳር የንታ ዶቅድን አሜንንከኬ አሜንድባብከስጎካ ሙዳ የንታ ዶቅድን ሶልመንም ኤሰርቶቴ። 
\v 5 ዶፈንንታ ቃላ ማቻንዳ ክላ ኬዘና እሪናና የንደር የልሳንደትካ ክትካ ዶቅድንደትም Ꮊድን ጉርምንም ኤሰርተቴ፥ ኮካንታ የንታ አሜንንከኬ ሶልመና የድምሳንዳ ጭላር ግግምሶ የም ካርዝድን ኮትኮ Ꮊድን ጉርምንዘኔ። 
\v 6 የታ ክላ ኬዘን የ ኤሰርሳንደትዘንኬ ሳብተረ ዉች እምንተንታ ዶፈንን ቡደካ የ ኤሳን ሰጨንዘንካ የድሶ ኮና ክላ ኬዘና የንታ ዎክያር ማቻንግንዳ ፍጫሙደንዘን አፍይ ኡስዘንኬ ጋጵዘን ዶቅዴ። 
\v 7 ኮመረ ዎንታ ካርያር ክርስቶስታ አሜንምስን ፍክስንባብ ማችባብኬ ዎንከረ ክክን የካ ፍግዝድባብ ሶልምምስባብ ኤጳፍራ የካንታ ኤስንም ኤስስቴ።\x - \xo 1፡7 \xo*\xt ቆለ. 4፡12፤ የቺ 23። \xt*\x* 
\v 8 ኮግንደረ ኖ ሳብታ አያንካ ክክ ክክ የንታ ሶልመንም ዎካንታ ኬዝቴ።
\p
\v 9 ኮካንታ ኮም ዎ ኤሰርሳንደትዘንካ የድሶ የታ አያናር ዶቅድን ኤጨኬ ገቅርካ ሙዳ ሳብታ ጋይተንም ገቀርት የ ተይድን ጮጭ ኤስ የካንታ ዶቅተርንግንዳ የካንታ ምክስንምኬ ሳብም ኦይስን ዎይሳኮቴ። 
\v 10 ኮትኮግንደረ ጮይስካንታ ዝግዝድንጎግካ ዶቅንትካ ክትም ቦድመካ የ ጉርምስተርንግንዳ Ꮊምንመረ ኡርማ ፍክስን ፍክስካ አፍይ የ ኡስተርንግንደኬ ሳብም ኤስንተካ የ ጋጵተርንግንዳ ምግዝዶቴ። 
\v 11 ጮይስ ይንታ ኤስምሳን ዎልቀንካ ይንታ ዳቅንተንም ሙዳ የካንታ እማ፥ ዳንዳእንከረ ሙዳ ሪን ጋምካንታ ጉርምካ ግግምስባብ የ ማታባብ የም ማሳ 
\v 12 ጉጅሰረ ሳክማ ባንችምናር ጭልንባብከስካ ክክን ባእንም ካስምተርንግንዳ የም ማስስባብ ሳብ ባቤንም ጉርምካ ጋለትከቴ። 
\v 13 ኖ ኡምንታ ዎልቀንዘንካ አቅስሶ ሶልምምሳን ይንታ ይንቺንታ ባንችምናር ዎ አርድንግንዳ ይሴ። 
\v 14 ክትካ ቆት ተይምሶቶ ዎንታ ጎመንታ ነገትቼን Ꮊፍቶቴ።
\s1 ክርስቶስ ሙደንዘንካ ስግ ማትና\x - \xo 1፡14 \xo*\xt ኤፈ. 1፡7። \xt*\x*
\p
\v 15 ክርስቶስ Ꮊፈርዳክን ሳብታ ዶፈን ካምስዬ። ኖ ፍዝር ሙደንዘንካ አንድርከኬ ጬክን ጋይስባብ ዳነዜ። 
\v 16 ጭለዘንኬ ፍጨዘን ዶቅድባብ፥ ሰድምድባብኬ ሰድምዳክባብ፥ ጭለዘን ዎልቀንከስኬ ቆልድባብከስ፥ ገችንባብከስኬ ገችታ ኤረንባብከስ ሙደና ፍዝምሳንዳ ክትኬ። ሳብ ሙዳ ሪን ክርስቶሰካ ፍዝሶ ክትካንታ ማስሴ። 
\v 17 ኖ ሙዳ ሪዘንካ እሪናና ዶቅዴ፥ ሙዳ ሪነረ የድምሶ ዎእሳንዳ ክትኬ። 
\v 18 ኖየረ ክታ ዘና ማቻን ምክስ ኤሄንታ ዱሬ፥ ሙዳ ሪካ እሪ ማድንግንዳ ደእያርንካ አምንተከረ እርንባብኬ አነረ ዳነዜ።\x - \xo 1፡18 \xo*\xt ኤፈ. 1፡23። \xt*\x* 
\v 19 ኮነረ ማቻንዳ ሳብታ ጮጭ ገቅርና ክታ ይንቺንካ ዶቅተርንግንዳ ሳብ ባቤንታ ጋይታ ማቻንኦሌ። 
\v 20 ክትጎከረ ጭለዘነረ ማታ ፍጨዘን ዶቅድን ሪንከስም ሙዳ ይንካ ክክን ኤድምሴ፥ ማዝቀልንዘን ዉልእምሳን ይንታ ይንቺንታ ማቀስንከረ ሳራትቼን እምሴ።\x - \xo 1፡20 \xo*\xt ኤፈ. 2፡16። \xt*\x*
\p
\v 21 ኤና ሳብዘንካ ጎተርሰቶ ዶቅድᎺቀቴ፥ የንታ ገቅርንኬ የንታ ዳቅል ፍክስንጎካ ክትካ ይምኤርስባብ Ꮊቀቴ። 
\v 22 ታ ማቼ ሳብካንታ ፋስምስባብኬ ይልችን ጋይስባብ፥ ይንኤርዝድ ሪየረ የንዘን ካየንባብከስ ማስሶ ይንታ እሪ የልስካንታ፥ ክታ ይንቺና ዋሄካ ክት ደእሳንጎካ ሳብ ይንካ ክክን የም ኤድምሴ። 
\v 23 ኮነረ ማድንዳ የንታ የድንዘን የድምሳንደትኬ ሶግዳክባብ ማትሶ ክላ ኬዘንካ Ꮊፈርሳን Ꮊድን ጉርምንካ ዙብማከትዶቆ አሜንካ ዳቅሰቶ የ ዶቅድንካ Ꮊክዬ፥ ኮና ክላ ኬዘነረ የ ኤሰርሳንደትኬ ፍጫሙደንዘን ዶቅድን ኤድንከስካንታ ሙዳ ሳባክምሳንዴ፥ እታ ጳውሎሰረ ፍክስንባብ እ ማቻንዳ ኮትኮ ክላ ኬዘንካንቴ።
\s1 ጳውሎስ ኦይትምስባብ ማትሶ ፍክስና
\p
\v 24 ታ የካንታ እ ተይድን ማጠንካ እም ጉርምዝዴ፥ ክርስቶስታ ዘና ማቻን ምክስ ኤሄናሪ ኤድንከስጎከረ ክርስቶስ ማጥርምሳንደትም ካስምና እዘንካ ዞገርሳን እስታ ዋሄንካ ጮችዝድቴ። 
\v 25 ሳብታ ቃለን የካንታ ሙደንም እ መያ ማዝድንግንዳ ሳብዘንካ እካንታ ዋደካ እምምሳን ፍክስንባብግንዳ ምክስ ኤሄናር ኤድንከስካንታ ፍክስባብ ማቻቴ። 
\v 26 ኮነረ ሳብታ ቃለና ስግዳን ስለንከሳር ኤድ ይንችንኬዘንካ አጥምሶ Ꮊቃንደትኬ ታ ማቼ ሳብ አሜንድባብከስካንታ ሙዳ ክት መያ ማስሳንዳ አችምሳንደትሜ። 
\v 27 ሳበረ ፋስምስባብከስካንታ መያማስካንታ ክት ጋይሳንዳ ዶቅድንደትም ኮ አችምሳን ቦንቼታ ቆልመንኬ የ አይሁድ ማታክባብከስታ ዎክያር Ꮊራከካ ክታ አንድር ማትንተኔ። ኮነረ አችምሳን Ꮊድን ጉርምካ ዎ ካርዝድንዳ ቦንቻ Ꮊፈርድንዳ ክርስቶስ የንታ ዎክያር ማትንተኔ። 
\v 28 ዋልቃ ዋልቃ ኤድ ክርስቶስካ ማድን ኤድ ማድንግንዳ ይይሶቶ ግግስካንታ ኤድ ሙደን ኤጨንም ሙዳ ኤስስኬ ዞረካ ክርስቶስጎካ ሳባክዶቴ። 
\v 29 ሳብ ይንታ አንድር ዎልቀንካ እስታ ዋሪ ክት ፍግዝድንኦል ኮትኮ ዎልቀንጎካ ኮና ገቅርና ቦድምድንግንዳ ዛብስቶ ጉረርቶ ጋብድቴ።
\c 2
\p
\v 1 የካንተኬ ሎዶቅያ ፍጨናር ዶቅድን ኤድንከስካንታ ኮትኮግንደረ እስታ ባለንም ዎራ ሰድሰኮ ኤዝዳክን ኤድን ሙደንካንታ Ꮊራከካ ዛብሶ እ ጉርዳናንከረ የ ኤዝድንግንዳ ሶልምድቴ። 
\v 2 እ ጉርድንደረ ኬታ ቡደና ዳቅስንደትኬ ሶልመካ ዞክምሶ፥ ቦድማ ገቀርት ተይንም ሙዳ በችካ ሳብታ አችምሳን ማችባብ ክርስቶሰም ከት ኤዝድንግንዴ። 
\v 3 ኤጨተኬ ኤሰታ ቆልማ አችምሶ Ꮊፈርድንዳ ክርስቶሰደርንኬ።
\p
\v 4 ኮመረ እ የም ጋይድንዳ Ꮊየነረ ገስ ቃለካ የም ገስሳይንደትግንዳ ጋይስቴ፥ 
\v 5 ዋሄካ የንዘንካ እ ጎተርሰረ አያንካ የንካ ክክንቴ፥ ኡርማ ዎገካ የንታ ዶቅንተንምኬ ክርስቶስዘን የንታ ዶቅድን ዳቅማ አሜንን እታ ሰደርቶ ጉርምድቴ።
\s1 ክርስቶሳር Ꮊፈርድንዳ ጮጭ ዶቅንት
\p
\v 6 ጮይስ የሱስ ክርስቶሰም የ አሜንሳንደትግንዳ ክትካ ዶእከቴ፥ 
\v 7 ክትካ የድምሳን የድንዘን ኤሀግንዳ ዎድምሰቶ የም ኤስሳንግንዳ የንታ አሜንካ ዳቅሰቶ ዶእከቴ፥ ጮጭሶ ስጥንደትም ጋለትን እምከቴ።
\p
\v 8 ክርስቶስዘን የድምሳንዳ ማታክናና ኤድ ፍክሳን ዎገኬ ፍጫሙደንዘን ፋይዳር አርዳክን ዎገንዘን የድምሳንዳ ይንዘንካ ዉችሰኮ ዉች ገስካ Ꮊየነረ ይንተናሪ የዳክንግንዳ ካርስምከቴ። 
\v 9 ጮይስትቼንታ ቦድማ ጮጭንተና መያ ማትሶ ዶቅድንዳ ኤዳትቼና ክርስቶሰኬ። 
\v 10 የተረ ሙዳ ዶቅንትን የ Ꮊፍሳንደና ክታ ፍዛ ሙደንዘን ቆልድንደተኬ ገችታ ኤራ ሙደንታ ዱራ ማችባብ ክርስቶሰኬ።
\p
\v 11 ክትከረ የንታ አሜንምንካ የንታ ሶለንም ተቼርተቴ፥ ኮነረ የንታ ሶለንም ተችርና ጎመክን ዋሄንታ ይተንም የንዘንካ Ꮊልእስካንታ ክርስቶስካ ይምሳንዳ ዳት ኤታ አንካ ይምሳንዳ ካዬ። 
\v 12 የ አሜንድባብከስታ ስእርን ስኤርሳንደትካ ክርስቶሰካ ክክን ዱከርሰቴ፥ ክትከረ ክክን ደእያርንካ አምተቴ፥ ደእናርንካ የ አምሳንደረ ክርስቶሰም ደእያርንካ አምሳን ሳብታ ዎልቀንካ የንታ አሜንምንኬ።\x - \xo 2፡12 \xo*\xt ሮማ 6፡4። \xt*\x* 
\v 13 ጎማ የንታ ፍክስንተኬ የንታ ጎማ ዋሄን ክርስቶስካ አሜንምካ ሶለንም ተቼርክሳ ነግንተካ ደእስባብ Ꮊቀቴ፥ ታ ማቼ ሳብ ክርስቶሰካ ክክን ስለንካ የ ዶቃባብ ማስቴ፥ የንታ ጎመንመረ ሙዳ ነጋ የካንታ ጋይቴ።\x - \xo 2፡13 \xo*\xt ኤፈ. 2፡1-5። \xt*\x* 
\v 14 ኖ ኤና ኮትኮ ዎም ካሰሰሮ ግረሮ Ꮊቃን ህግናር ክትምሶ ዶቅድንደትም ባዘታ ጻፍምሳንደትም Ꮊልእሴ፥ ማዝቀልንታዘን ምስማርካ እከርሶ ዎንዘንካ Ꮊልእሴ። 
\v 15 ዎልቀንከስምኬ ገችታ ኤረንከስም ይንታ ማዝቀልንካ ጋምሶ ከታ ሶቅርንም ቡልሳንደታ ቡሪ ዎእስት ተይምስባብ ማትሶ መያ ከት Ꮊፈርድንግንዳ ከትም ማስሴ።
\p
\v 16 ይና እችምካ ናነረ ዎጭምካ ባዓልንከስም ናንከረ አርፍንካ ቦንቼርድንደትም ናንከረ ዎገንም ቦንቸርድንደትጎካ Ꮊየነረ የንዘን Ꮊይፋረዳ።\x - \xo 2፡16 \xo*\xt ሮማ 14፡1-6። \xt*\x* 
\v 17 ኬና ሙዳ ኦስ እሪ Ꮊድን ሪንከስካንታ ስፍግንደኬ፥ ዶፈንና Ꮊፈርድንዳ ማቼ ክርስቶስኬ። 
\v 18 እንድንካ ይንታ ማተንም ይርክሳ ይይንተካ ክታይንችም ጎይንካ ጬቅድባብ Ꮊየሰነረ ኤድ ናክካይሳ የም ነግዝዳክንግንዳ ካርስምከቴ፥ ኮግንዳ ኤድና ለምለም ጋይድንካ ይ ሰዳን ሪንካ ይንታ ማተን ጬቀሮ ዉች ኩንኬ ዋሄታ ማቻን ገቅርካ ኦተርደኬ። 
\v 19 ኮግንዳ ኤድና ሪ ሙደንታ ዱራ ማችባብ ክርስቶሰካ ክክን ክትም Ꮊረነረ የልስዝድር ካዬ፥ ዘነንም ሙዳ ክክ ሱግድንደትኬ ዝንካ የችሶ እችዝድባብ ሪ ሙደንታ ዱረኔ። ሳብ ዘና ሙደንታ ጋጵንተን ክት እምድንደረ ኮግንደኬ።\x - \xo 2፡19 \xo*\xt ኤፈ. 4፡16። \xt*\x*
\s1 ኮተርሳን ኤስስንዘንካ ካርስም
\p
\v 20 ክርስቶስካ ክክን ደእሰቶ ኮ ፍጫሙደንታ ዝግዝድን ዎገንከዘንካ ቦድሰቶ ፋስምስባብከስ የ ማቻንዳ ማቼ ታ ፍጫሙደንዘንካ ፋስማክባብግንዳ ማትሰቶ Ꮊራካንተት ኮግንዳ ዶቅድን ክተንከስካንታ ቆልምዳ፥ 
\v 21 ክታ ክተንከሰረ “Ꮊይየዴ፥ Ꮊይአፍሴ፥ Ꮊይዎሌ” ጋይምድባብከሰኬ። 
\v 22 ከናከስ ሙዳ ኤታ አንታ ፍክስታ ክቴኬ ኤስስታዘን የድምስባብከስ ከት ማቻንኦል ፍክስዘን ከታ ይ Ꮊቃንደታ ቡር ካይንታካንታ ጋይምስባብከሰኬ። 
\v 23 ከታኬና ክተንከስ ገታ ኤታዘንካ ዉተዳንዳ ጎይንኬ ዝግዝዳክን ማተም ይርክሳ ይይንተኬ ዘነመረ ላቅስስዘን ማለካ ኬታ ይ ሰድንኦል ኤጫ ኬታ ዶቅድባብከስም ካምድባብ ማተረኬ፥ ኬዛርንካ ማቼ ዋሄታ አግርን ገችስካ ሪካንታ ማዳክባብከሰኬ።
\c 3
\s1 ክርስቶሳር Ꮊፈርድን ክላ ዶቅንት
\p
\v 1 ይና ክርስቶሰካ ክክን ደእያርንካ የ አምሳንካ ክርስቶስ ሳብታ ምዝዘን ዶቅሶ ዶቅድን ፈ ጭላር ዶቅድን ርንከስም ዝከቴ።\x - \xo 3፡1 \xo*\xt የቺ 110፡1። \xt*\x* 
\v 2 ሙዳᎺይካ ፈ ጭላር ዶቅድን ሪንከስካንታ ገቀርከት ዳት ፍጨዘን ዶቅድን ሪንከስካንታ Ꮊይገቀረቴ። 
\v 3 የታ ደእተቴ፥ የንታ ሰንፔነረ ክርስቶሰካ ክክን ሳብታ ዋሪ አችምቴ። 
\v 4 የንታ ሰንፓ ማችባብ ክርስቶስ መያማድንᎺይካ የተረ ክትካ ክክን ቦንቼካ መያማደቴ።
\s1 ጌሰኬ ክላ ዶቅንት
\p
\v 5 ኮካንታ የንዘን Ꮊፈርድን ፍጨዘን ዶቅንትታ አግርን ሙዳ ደይስከቴ፥ ከተረ በልም፥ ቱና፥ ቤልምካንታ አንግር፥ ዳቅል አንግር፥ ጭጭ ና ኮነረ ሳብዘንካ አብን ጎይንንከሰኬ። 
\v 6 ከትኬና ሪንከስጎካ ክትምዳክን ኤድንከዘን ሳብታ ዋጭና Ꮊተሬ። 
\v 7 የተረ የንታ ማታርንካ ኮታ ኤና እሪ ክትምዳክን ኤድንከስታ ዎክያር ዶቅደቶ ከትግንዳ ዶቅድ Ꮊቀቴ።
\p
\v 8 ታ ማቼ ዋጭም፥ ስነርንም፥ ጩበም፥ ኤታ ላም ካይስንም የንታ ዎክያርንካ ዎይስከቴ፥ ኦስንዝድን ኬዘረ የንታ አፋርንካ Ꮊይዉታ። 
\v 9 ኤና እሪ የንታ መጤንም ፍክስንካ የካ ዉችተቶ የ ዛቅሳንኦል ክክ ክክ የታ ማልትንም Ꮊይኬዘቴ።\x - \xo 3፡9 \xo*\xt ኤፈ. 4፡22። \xt*\x* 
\v 10 ፍዝባብታ ካምስካ ክልምሳን ኤሰንካ ኦክምሳን ክላ ኤደትቼን ቆበርከቴ\x - \xo 3፡10 \xo*\xt ፍዝ. 1፡26፤ ኤፈ. 4፡24። \xt*\x* 
\v 11 ኮግንደካ ግርክ ኤድንተኬ አይሁድ ኤድንታ፥ ሶለን ተቸርስባብተኬ ተቼራክንባብታ፥ ኤሳ ክታ ዶቅድንካ ሳብም ኤዝዳክንባብተኬ ኤሳ ክታ ካየንባብ ሳብም ኤዝዳክንባብተኬ፥ አይለተኬ ቦንችምስባብተካ ዎክያር ፋስም ካዬ፥ ክርስቶስ ሙደንቴ፥ ጉጅሰረ ሙደናሬ።
\p
\v 12 ይና ሳብታ እድምስባብኬ ሳብካንታ ፋስምስባብ፥ ሶልምምስባብከሰረ የ ማቻንካ አጭርን፥ Ꮊልስምን፥ ማታ ቆልን፥ ኤድካንታ ቡዳርንካ አትርን፥ ዳንዳእንም ቆበርከቴ።\x - \xo 3፡12 \xo*\xt ኤፈ. 4፡2። \xt*\x* 
\v 13 ክክ ክክ ዳንዳእከቴ፥ የንታ ዋርንካ ዋልቀና አብንዘን ይምኤርሳን ሪ ዶቅሴ ነጋ ክክ ጋይከቴ፥ ክርስቶስ ነጋ የም ጋይሳንግንዳ የተረ ክክ ክክ ነጋ ጋይከቴ።\x - \xo 3፡13 \xo*\xt ኤፈ. 4፡32። \xt*\x* 
\v 14 ከትኬ ሙደንታ ዘርመካ ማቻን ቦድማ ዋልቃትቼካ ዞክምካንታ ሶልመንም ቆበርከቴ። 
\v 15 ዋልቃ ዘነታ ሱከንከስ ማትሰቶ ገታ ኤልምስባብከስ ኮ ሳራትቼንጎካ ማቻንኦል ክርስቶሰታ ሳራትችና የንታ ቡዳሪ ባንችማ፥ ጋለድባብ ማትከቴ። 
\v 16 ክርስቶስታ ቃለና ጮጭ የንታ ቡዳር ዶቃ፥ ኤጫ ሙደንካ ክክ ክክ ኤስስከቴ፥ ዞርምከቴ፥ የቺከኬ ዴእስካ፥ አያናር የቺንም የቼሮ ሳብም ቡዳርንካ ጋለተረቶ የቺከቴ። 
\v 17 የሱስጎካ ሳብ ባቤንም ጋለተረቶ ኬዘከረ ማታ ፍክስካ የ ይድንደትም ሙዳ ጮይስ የሱስ ክርስቶሰታ ላምንካ ይከቴ፥ ክትከረ ሳብ ባቤንም ጋለትከቴ።\x - \xo 3፡17 \xo*\xt ኤፈ. 5፡19-20። \xt*\x*
\s1 አሜንድን ኤሀ ኤታ ገችንተታ ዎጋ
\p
\v 18 የታ ኬነንከሶ! ጮይስታ እሪ ዝግዝድንዳ ማቻንኦል የንታ ክእስንከስካንታ ክትምከቴ።\x - \xo 3፡18 \xo*\xt ኤፈ. 5፡22፤ 1 ጴጥ. 3፡1። \xt*\x*
\p
\v 19 የታ ክእስንከሶ! የንታ ኬነንከስም ሶልምከቴ፥ ከታዘን ጋርዝድባብ Ꮊይማተቴ።\x - \xo 3፡19 \xo*\xt ኤፈ. 5፡25፤ 1 ጴጥ. 3፡7። \xt*\x*
\p
\v 20 የታ ይንችንከሶ! ኮና ጮይስም ጉርምዝድንዳ ማቻንካንታ ሙዳ ሪካ የም አጭባብከስካንታ ክትምከቴ።\x - \xo 3፡20 \xo*\xt ኤፈ. 6፡1። \xt*\x*
\p
\v 21 የታ አጭባብከሶ! ጉርምካይሳ ከት ማዳክንግንዳ የንታ ይንችንም ዋጭካ Ꮊይሰነርሰቴ።\x - \xo 3፡21 \xo*\xt ኤፈ. 6፡4። \xt*\x*
\p
\v 22 አይላትች ዎገናር ዶቅድባብ! ፍጨዘን የንታ ማታቆልስባብከስካንታ ሙዳ ሪካ ክትምከቴ፥ የክትምድንደረ ከታ የም ሰድንኦላርኬ ኤድም የ ጉርምዝድንኦል ሰድምካንታ ማታክዶቆ ጮይስም ጳስኬ ላቅም ቡዳርንካ ማታ።\x - \xo 3፡22 \xo*\xt ኤፈ. 6፡5-8። \xt*\x* 
\v 23 የ ይድንደትም ሙዳ ኤድካንታ ማታክናና ጮይስ የሱስካንታ የ ይድንግንዳ ቦድማ ቡዳርንካ ይከቴ። 
\v 24 ኮካንተረ ጮይስና ጭላር ባእንም ናክ ማስሶ የም እምድንደትም የታ ኤዝደቴ፥ የ ፍግዝድንደረ ጮይስ ክርስቶስካንቴ፥ 
\v 25 ሳብ Ꮊየንተረ ባላካንታ ኦስናይንኦል ዳቅል ፍግዝድባበረ ይንታ ዳቅል ፍክስንጎካ ዋጭንም ተይዴ።\x - \xo 3፡25 \xo*\xt ካሪ. 10፡17፤ ኤፈ. 6፡9። \xt*\x*
\c 4
\p
\v 1 የታ ማተን ቆልስባብከሶ! የተረ ጭላር የንታ ማታቆልስባብ ዶቅድንደትም ኤስሰቶ የንታ ፍክስንባብከስም ሉለከኬ ሙደን የካ ሰድሶ ገችስከቴ።\x - \xo 4፡1 \xo*\xt ኤፈ. 6፡9። \xt*\x*
\s1 አናካርንካ ዞራ
\p
\v 2 ሳብም ጋለትካ ዛብሰቶ ዛቃክዶቆ ምክስከቴ፥ 
\v 3 ኮትኮከረ ክክን ሳብ ይንታ ቃለንካንታ ፍልታ ዎካንታ ፎችተርንግንደኬ እታ ክትጎካ ዞከርስቶ Ꮊፈርድንደትም ክርስቶስታ አችምሳንደትም ኤስምስካንታ እ ማተርንግንዳ ዎካንታ ምክስከቴ። 
\v 4 እተረ እም ዝግዝድንግንዳ ቃለንም መየካ እ ኬዝድንግንዳ እካንተረ ምክስከቴ።
\p
\v 5 Ꮊምን ሰጨከረ ማታ የም ኮት መይድንግንዳ አሜንዳክባብከስታ ባንግር ኤጫ ማትሶ ዶእከቴ።\x - \xo 4፡5 \xo*\xt ኤፈ. 5፡16። \xt*\x* 
\v 6 ዋልቃ ዋልቃ ኤድንካንታ ዝግዝድንደትም ማስንም ማስካንታ የ ኤስተርንግንዳ ሙዳᎺይካ የንታ ኬዘና ኤድካንታ ሎቅድን ሶቅግንደኬ ሳብታ ዉች እምንተንካ ማታ።
\s1 ጳውሎስታ በእንታ ሳራትች
\p
\v 7 ቲኪቆስ እጎካ ሙዳ ሪም የካንታ ኬዝተሬ፥ ኖ ሶልምምስባብ እስመና፥ አሜንምስባብ ፍክስንባብከ ጮይስታ ፍክስንም እ ፍግዝድንካ ኖ እስታ ላኮይት Ꮊቄ።\x - \xo 4፡7 \xo*\xt ኦይት. ፍ. 20፡4፤ 2 ጢማ. 4፡12። \xt*\x* 
\v 8 ክትም የንደር እ ኦይቻንደና ዎጎካ የም ኬዝድንግንደኬ የንታ ቡደንመረ ዳቅዝድንግንዴ።\x - \xo 4፡8 \xo*\xt ኤፈ. 6፡21-22። \xt*\x* 
\v 9 ክትከረ ክክን የንታ ኮች ማችባብ አሜንምስባብኬ ሶልምምስባብ እስመን ኦነስሞስ የንደር Ꮊዴ፥ ከታ ኮካርንዘን ዶቅድን ሪን ሙደንካንታ የካንታ ኤስምስተሬ።\x - \xo 4፡9 \xo*\xt ፍልሞ. 10-12። \xt*\x*
\p
\v 10 እንካ ክክን ዞከርስባብ አርስጥሮኮሰረ አቦ የም ጋይዴ፥ ዋልቃዱት፥ “የንደር እ ᎺድንደትᎺይካ ክትም የ ሞክተርንግንዳ” ጋይስቶ የም እ ገቀርስሳንዳ ባርናባሰታ እርክስታ ይንች ማርቆሰረ አቦ የም ጋይዴ።\x - \xo 4፡10 \xo*\xt ኦይት. ፍ. 12፡12፥25፤ 13፡13፤ 15፡37-39፤ 19፡29፤ 27፡2፤ ፍልሞ. 24። \xt*\x* 
\v 11 ኢዮስጦስ ጋይምሶ ኤልምድባብ ኢያሱ አቦ የም ጋይዴ። ሳብታ ባንችምንጎካ እንካ ክክን የካ ፍግዝድባብከስታ ዎክያርንካ አይሁድንከስታ ኮች ማችባብከስ ከታኬና Ꮊከኬ፥ እመረ ዳቅስተኬ።
\p
\v 12 የንታ ኮች ማችባብ የሱስ ክርስቶስታ ፍክስባብ ኤጳፍረረ አቦ የም ጋይዴ፥ አያናር ዶቅንትካ ጋጰረቶ ዳቅሶ የ ዎእተርንግንደኬ ሳብተረ ጋይተን ሙዳ የ ቦተርንግንዳ ኖ የጎካ ሙዳᎺይካ ምግዝዴ።\x - \xo 4፡12 \xo*\xt ቆለ. 1፡7፤ ፍልሞ. 23። \xt*\x* 
\v 13 የጎካ ሎዶቅያ ፍጨናርንኬ ሂራፖሊስ ካተመንከሳር ዶቅድባብ ኤድንከስካንተረ አንድር ክት ጋፋዶቅድንደትም እታ እስታ ማታርንካ ክትካንታ ማርከርድቴ። 
\v 14 ሶልምምስባብ አክምና ሉቃስኬ ደማሰረ አቦ የም ጋይዴ።\x - \xo 4፡14 \xo*\xt 2 ጢማ. 4፡10-11፤ ፍልሞ. 24። \xt*\x*
\p
\v 15 ሎዶቅያር ዶቅድባብ እስመንከስካንታ ንምፉካንተኬ ኮታ ኤሄናር ዶቅድን ምክስ ኤሄንካንታ እስታ አቦ ጋይንተንም የልስከቴ።\f + \fr 4፡15 \fr*\ft ንሙፉና ካንታ ኮት ይንታ ኤር ዶቅድንካ ጋይድንዳ አብ ንከስ “ንምፉስ ካንተከ ኮታ ኤረረ ዶቅድን” ካንታ ጋይደኬ። \ft*\f* 
\v 16 ኮትኮም ክቴን የ ናበብዛንደታ ቡር ሎዶቅያ ኤድንከዝደር ዶቅድን ምክስ ኤሄናሪ ናበብምድንግንዳ ይከቴ፥ የተረ ሎዶቅያርንካ የካንታ ኦይትምድንደትም ክቴን ናበብከቴ።
\p
\v 17 አርክጳስካንተረ “ጮይስታ ፍክስ የስካንታ እምምሳን ፍክስንም ካርስምሶ የስ ቦተርንግንዳ” ጋይሰቶ ክትም ኬዝከቴ።\x - \xo 4፡17 \xo*\xt ፍል. 2። \xt*\x*
\p
\v 18 ኮ ሳራትቼን እስታ ገታ አንካ ጻፍስባብ እታ ጳውሎስቴ፥ እስታ ዞክርንመረ ገቀርከቴ።
\p ሳብታ ዉች እምንተና የንካ ክክን ማታ።