\id 3JN - Gayil New Testament
\ide UTF-8
\h 3 ዮሀንስ
\toc1 ኦይትምስባብ ዮሀንሰታ ማክምስ ክቴና
\toc2 3 ዮሀንስ
\toc3 3 ዮሀ.
\mt1 ኦይትምስባብ ዮሀንሰታ ማክምስ ክቴና
\imt1 አርድንታ
\ip ኦይትምስባብ ዮሀንሰታ ማክምስ ክቴና ጻፍምሳንዳ “ዶንጃ ማችባብ ኦይትምስባብ ዮሀንስጎካ” ማድንካ፥ ጻፍምሳንደረ ጋይዮስ ጋይምስባብ ምክስ ኤሄናር ኤድንከስም ጎርዝድባብካንቴ፥ ኖ ጻፍነረ ዋልቃጎካ ክርስቶሳር ማችባብ አብንከስም ክታ አሌንጎካ ጋይዮሰም አንጅዴ፥ አና አብ ጎግከረ ጩበንባብ ኤችን ድዮትሬፍስዘንካ ክት ካርስምድንግንዳ ክትም ገቀርስዝዴ።
\iot ማጻፍን ኮትኮታ ሙዳ የድንተና
\io1 አርድንታ \ior (1-4) \ior*
\io1 ጋይዮስታ አንጅምና \ior (5-8) \ior*
\io1 ድያትሬፍስታ ዎቀስምና \ior (9-10) \ior*
\io1 ድመጥሮስታ አንጅምና \ior (11-12) \ior*
\io1 በእንታ \ior (13-15) \ior*
\c 1
\p
\v 1 ዶፈንካ እ ሶልምድባብ ጋይዮስካንታ፥ እ ጋልተንዘንካ ኦይትምሳን ክታ\x - \xo 1፡1 \xo*\xt ኦይት. ፍ. 19፡29፤ ሮማ 16፡23፤ 1 ቆሮ. 1፡14። \xt*\x* 
\v 2 እስታ ገርነኖ! የስታ ዋርጎካ ኤደትቼና ኡርማ ማቻንደትከካ ኡርማ ዘና የስታ ዶቅተርንግንደኬ ሪሙደና የስካንታ ቦድምድንግንዳ ምግዝድቴ። 
\v 3 ዶፈንንካንታ የስታ ኣመንንምኬ ዶፈንከረ የስታ ዶቅንተን ዋልቃ ዋልቃ ኣመንድን እስመንንከስ Ꮊድሰኮ እካንታ ከት ኬዛንደትካ አንድር ጉርምሳቴ። 
\v 4 ይንችንከሶ ዶፈንካ አየረኮ ከት ዶቅድንደትም ኤስርንዘንካ ስገዳንዳ እም ጉርምዝድ ሪ ካዬ።
\s1 ጋይዮሰታ ጎፍስምና
\p
\v 5 እስታ ገርነኖ! የስካንታ ሶችንከስ ማችንከረ ዎራ የስታ እስመንከስካንታ ኣመንምሳን ፍክስን ፍግዝደዬ። 
\v 6 ኬተረ ሶልማ ፍክስን ከትካንታ የስ ይሳንኦል ኣመንድባብከስታ እሪ ማርከርተኬ፥ ታየረ ሳብም ጉርምዝድንጎካ ከት ጎግን አይድንካ የስ አልሰረ ኡርሜ። 
\v 7 ኬታ ክርስቶስታ ፍክስንካንታ ዉደኮ አይሁድ ማታክባብከዘንካ Ꮊረነረ አላ ተያከኬ። 
\v 8 ዶፈን ፍክስንም ካስምድባብ ዎማድንግንዳ ከትኬና ዶቅድን ኤድንከስም አላ ዎም ዝግዝዴ።
\s1 ድዮትሬፍስኬ ድመጥሮስካ
\p
\v 9 ኮታ ኤና እሪ ምክስ ኤሄንካንታ ጻፍትቴ፥ ኬዛርንካ ማቼ ምክስ ኤሄንታ ጎርስባብ ማት ዝግድባብ ድዮትሬፍስ እስታ ገቅርንም ተያክዬ። 
\v 10 ኮካንታ የንደር እ Ꮊድንካ ኖ ዎም የከርንደትኬ ዎም ቶቼሮ ክት ይሳን ዳቅል ፍክስን ሙዳ የ ሙደንካንተረ ኬዝድቴ፥ ኮነረ ክትካንታ ማትክሳ ነግድንካ፥ ኖይንታ ማታርንካ ይንታ እስመንከስም ሞግዳክዬ። አብንከሰረ ከትም ሞግዳክንግንዳ ማርዴ። ምክስ ኤሄናርንከረ ከትም ዉጅዴ።
\p
\v 11 እስታ ገርነኖ! ኡርመንም ካምካ ዳት ዳቅልን Ꮊይካሜ። ኡርማ ፍክስንም ፍግዝድባብ ሙደና ሳብዘንኬ። ዳቅል ፍክስንም ፍግዝድባብ ማቼ ሳብም ሰዳክዬ።
\p
\v 12 ድመጥሮስካንታ ኤድ ሙደና ኡርመካ ክትካንታ ማርከርደኬ። ዶፈነረ ይንታ ማታርንካ ክትካንታ ማርከርዴ። ዎተረ ክትካንታ ማርከርዶቴ፥ ዎንተረ ማርከርና ዶፈን ማትንተን የና ኤዝደዬ።
\s1 በእንታ ሳራትቼና
\p
\v 13 እ የስካንታ ጻፍታ ዝግዛንዳ በድ ሪ ዶቅዳዶቆ፥ ኬዛርካ ማቼ ጻፍት እ ኦይድን ክቴን ኤስምስካንታ ዝጋይቴ። 
\v 14 ቅንች የስም ሰድካንታ ጉርም ይድቴ፥ ዎ Ꮊፈርሳን ኮትሰጨናይካ ክክን የካ ኬዝምተሮቴ።
\p
\v 15 ሳራትቼና የስካንታ ማታ።
\p ገርነንከስ አቦ የስም ጋይደኬ። የነረ ዎንታ ገርነንከስ ዋልቃ ዋልቀንም አቦ አቦ ጋይካ።