\id 1TH - Gayil New Testament
\ide UTF-8
\h 1 ተስሎንቄ
\toc1 ኦይትምስባብ ጳውሎስታ ክታ እርንዳ ተስሎንቄ ኤድንከስካንታ
\toc2 1 ተስሎንቄ
\toc3 1 ተሰ.
\mt2 ኦይትምስባብ ጳውሎስታ ክታ እርንዳ
\mt1 ተስሎንቄ ኤድንከስካንታ
\imt1 አርድንታ
\ip ተሰሎንቀ ካተመና መቄዶንያ ጋይምድን ሮማ ባንችን ገችዝድን ፍጨንታ ኤስምሳን ካተማ Ꮊቄ፥ ጳውሎስ ተስሎቀ ካተመናር ምክስ ኤሄንም ክት ዎጃንዳ ፍልጵስዮስ ካተመን ዛቅሶ ይ አይሳንደታ ቡርዬ፥ ማታጋካ ዳት አይሁድንከስታ አሜንን አሜንካንታ ግግምሶ Ꮊቅባብከስ አይሁድ ማታክባብከስ ጳውሎስ ኬዝድን አሜንንታ ኬዘንካ ክት ኤእሳንካንታ አይሁድንከስ ቀምስምሰኮ ጳውሎስዘን ግርንተን አምስሰኬ፥ ኮካንተረ ጳውሎስ ተሰሎንቄ ካተመን ዛቅሶ ኦስ ቤርያ ካተመናር አይካንታ ዝግዜ፥ መራ ይ ጋምእሳንደታ ቡሪ ቆርንቶስ ካተመናር ይ የልሳንግንዳ ክትም ቅንችካ አሌሮ Ꮊቅባብ ጢማቶስ ተሴሎንቃ ካተመናር አይሶ ይ ማቻንደትምኬ ምክስ ኤሄናር ይይማዶቅድንደትም ሙዳ ክትካንታ ኬዜ።
\ip ጳውሎስ እሪ ክቴንም ተሰሎንቄ ኤድንከስካንታ ክት ጻፍሳንዳ አሜንድባብከስም ዛብስካንተኬ ዳቅስካንታ Ꮊቄ፥ ኬታ አሜንንጎከኬ ኬታ ሶልመንጎካ ኡርማ ኬዘን ይ ኤሰርሳንጎካ ሳብም ኖ ጋለቼ፥ ጳውሎሰረ ኬታ ዎክያር ይ Ꮊፈርሳንደትካ Ꮊስግንዳ ዶቅንት ይ ዶቃᎺቃናንከረ ከትካንታ ገቀርስዝዴ፥ ኮታዘንከረ ክርስቶስታ ቃስትምስ Ꮊድንተንጎካ አምሳን ኦይስንጎካ ኬዘንታ ማስንም ማዝዴ፥ ከትኬና ኦይስንከሳርንከረ ቶክምንከስ፥
\ip “ክርስቶስ ማት Ꮊተርንደታ እሪ አሜንሶ ደእስባብ ክርስቶሰታ ማት Ꮊድንካ Ꮊፍስዝድን ስለንክንደታ ዶቅንተን ተይድባብ ማዶ? ክርስቶስ ማቲ ክት Ꮊድንዳ Ꮊንተረ?” ኩን ጋይድባብከሰኬ፥ ጳውሎሰረ ኮትኮ ኬታ ኦይስንከዘንካ አምሳንዳ ማዝድዮ “ክርስቶሰታ ቃስትምስ Ꮊድንተንታ ኤስስን ጉርምካ የታ ካርሰረቶ ኮትኮ ክታ Ꮊድንተንታ ሰጨን የለልታ ዳብን ጋይሰቶ የንታ ፍክስንም ፍክስከቴ” ጋይንተካ ከትም ኖ ዞርሴ።
\iot ኮትኮ ማጻፍንታ ሙዳ የድንተና
\io1 አርድንታ \ior (1፡1)\ior*
\io1 ጳውሎስታ ጉርምኬ ጋለትንካ \ior (1፡2—3፡13)\ior*
\io1 አሜንድባብከስታ ዶቅንትታ ዎገና \ior (4፡12)\ior*
\io1 ክርስቶሰታ ቃስትምስ Ꮊድንተታ ኤስስና \ior (4፡13—5፡11)\ior*
\io1 ዞራ \ior (5፡12-22) \ior*
\io1 በእንታ \ior (5፡23-28)\ior*
\c 1
\p
\v 1 ሳብ ባቤንተኬ ጮይስ የሱስ ክርስቶስታ ኮች ማችባብ ተሰሎንቄ ካተመናር ዶቅድን ምክስ ኤሄንካንታ፥ ጳውሎስዘንካ፥ ስላስዘንኬ ጢማቶሰዘንካ ኦይትምሳንዳ ክቴ፥ ዉች እምንተንኬ ሳራትችና የካንታ ማታ።\x - \xo 1፡1 \xo*\xt ኦይት. ፍ. 17፡1። \xt*\x*
\s1 ተሰሎንቄ ፍጨናር ኤድንከስታ ዶቅንተንኬ አሜንካ
\p
\v 2 ዎታ ሙዳᎺይካ የም ዎንታ ምክስንካ ገቅረሮቶ ሳብም ጋለዶቴ። 
\v 3 ዎንታ ጮይስንተኬ ዎንታ ባቤንታ እሪ የንታ አሜንና ፍግዝድንደትም፥ ሶልማካንታ የ ይድንደትምኬ ዎንታ ጮይስ የሱስ ክርስቶሳር የንታ ዶቅድን Ꮊድን ጉርምን ዳንዳእካ የንታ ካርስን ባቀራኮትዶቆ ገቀርዶቴ። 
\v 4 ሳብካ ሶልምምስባብ እስታ እስመንከስኬ ምችነንከሶ፥ ሳብ የም እጃንደትም ኤዝዶቴ። 
\v 5 ዎንታ ክላ ኬዘንም የካንታ ዎ ኤስምሳንዳ ኬዘካ Ꮊክ ማታክናና ዎልቀኬ አያን ጭልንካ፥ ኮ ክላ ኬዘንታ ዶፈንንጎካ ዎተረ ዶፈን ማትንተኬ፥ የንካ ክክን ዎ ᎺቃንደትᎺይካ የካንታ ጋይሶቶ Ꮊስግንዳ ዎ ዶቅሳናንከረ የታ ኤዝደቴ። 
\v 6 በድ ማጣ የንዘን የልስንከረ ዎራ አያን ጭልንዘንካ Ꮊፈርሳን ጉርምንጎካ ቃለንም ተይሰቶ ዎንተኬ ጮይስ የሱሰታ ካምስንም ጎርስምድባብከስ ማተቴ።\x - \xo 1፡6 \xo*\xt ኦይት. ፍ. 17፡5-9። \xt*\x* 
\v 7 ኮካንታ መቅዶንያርኬ አካያ አዉራጀናር ዶቅድን አሜንድባብከስ ሙደንካንታ ኡርማ ካምስ ማተቴ። 
\v 8 ጮይስታ ቃለና የንዘንካ ዉትሶ ኤስምሳንዳ መቀዶንያርኬ አካያ አዉራጀናር Ꮊክ ማታክናና ሳብካ የንታ ዶቅድን አሜንና ሙዳ ካርያር ኤስምቴ፥ ኮትኮጎካ Ꮊረሰነረ ኬዛ ዎም ዝክሳዬ። 
\v 9 የንደር ዎ Ꮊዳንደትካ Ꮊስግንዳ ዎም የ ሞክሳናንከረ ስለንካ ዶቅድባብምኬ ዶፈን ጮይስንታ ፍክስካንታ ጮይስ ማታክባብከዘንካ ፋስምሰቶ ሳብደር Ꮊስግንዳ የ ማቻናንከረ ከታ ኤድንከስ ይንታ ማታርንካ ማርከርደኬ። 
\v 10 ኮትኮግንደረ ሳብ ደእያርንካ አምስስባብምኬ፥ Ꮊድን ዋጭንዘንካ ዎም አቅዝድባብ፥ ክታ ይንችን የሱሰታ ጭላርንካ Ꮊድንተን Ꮊስግንዳ የ ካርዝዳናንከረ የካንታ ማርከርደኬ።
\c 2
\s1 ጳውሎስ ኦይትምስባብ ማትሶ ተሰሎንቃር ክታ ፍክስና
\p
\v 1 እስመንከስኬ ምችነንከሶ! ዎንታ የንደር Ꮊድንተና አፍካይሳ ማታክንደትም የታ የንታ ማታርንካ ኤዝደቴ። 
\v 2 የ ኤዝድንደትግንዳ ኮታ እሪ ፍልጵስዮስ ካተመናር ዎ Ꮊቃንደትካ ማጠኬ የክካ ዎንዘን የልቴ፥ ኬዛር ማቼ አንድር ግርና ዎንዘን የልስንከረ ዎራ ክላ ኬዛንም የካንታ ዎ ኤስዝድንግንዳ ዎንታ ሳብና ዎካንታ ዎልቃ እምቴ።\x - \xo 2፡2 \xo*\xt ኦይት. ፍ. 16፡19-24። \xt*\x* 
\v 3 ዎታ የም ዎ ዞርሳንዳ ኮትርካ አነረ ዳቅል ገቅርካ ጎርስምሶቶ ካዬ፥ የም ገስካንታ ዎ ይሳንዳ Ꮊረሰነረ ሪ ካዬ። 
\v 4 ስግስሶ ሳብ ክላ ኬዘን ዎካንታ ዋደካ ክት እምሳንዳ ዎንካ አሜንምሶ ማቻንኦል ዎታ ኬዝዶቴ፥ ኮመረ ዎ ይድንዳ ዎንታ ቡደን ፋስት ኤዝድባብ ሳብም ጉርምስካንታ ጋይሶ ዳት ኤድም ጉርምስካንታ ጋይሶቶ ካዬ። 
\v 5 ዋልቃዱተረ ኬዘም ኡርስካ አነረ ብረታ አንግር ዎንታ ዶቅስንካ ቦድሶ ዎ ኬዛክንደትም የታ የንታ ማታርንካ ኤዝደቴ፥ ሳበረ ዎንታ ማርኬ። 
\v 6 የንዘንከረ ማታ አብ Ꮊይ ኤድንዘንከረ ቦንቼንም ዝጋኮቴ። 
\v 7 ክርስቶሰታ ኦይትምስባብ ዎንታ ማትንተንካ ዎም ዝግዝድንደትም የንዘንካ ኦይስካንታ ማዶት ዶቆ፥ ኬዛር ማቼ እንደና ይንታ ይንቺንካንታ ገቀርድንደትግንዳ ቡዳርንካ አትርካ የንታ ዎክያር ኦንግዞቴ። 
\v 8 ኮትኮግንደረ አንድር የም ዎ ሶልምድንካንታ ሳብታ ክላ ኬዘን የካንታ ኤስምስ Ꮊክ ማታክናና ዎንታ ሰንፔንም ዎራ የካንታ እማካንታ ግግምስባብ Ꮊቆቴ። 
\v 9 እስመንከስኬ ምችነንከሶ! Ꮊስግንዳ ዎ ፍክሳናንኬ ዎ ጋፍሳናንካ የታ ኤዝደቴ፥ ሳብታ ክላ ኬዘን የካንታ ዎ ኤስምዝድንᎺይካ የ ዋልቃባብዘነረ ባላ ዎ ማተራክንግንዳ Ꮊየከኬ ሶይትካ ፍክስካ ጋፈሮ Ꮊቆቴ።
\p
\v 10 የ አሜንድባብከስታ ዎክያር ዎ ᎺቃንደትᎺይካ Ꮊስግንዳ ሳብካንታ ፋስምኬ ጭልምካ ይንኤርዝድን ሪካይሳ ዶቅንተካ ዎ ዶቅሳንደትም የታ ዎንታ ማርከቴ፥ ሳበረ ዎንታ ማርኬ፥ 
\v 11 ባቤና ይንታ ይንችንከስካንታ ይድንደትግንዳ ዎተረ የካንታ የ ዋልቃ ዋልቀንከስካንታ ዎ ይሳንደትም የታ ኤዝደቴ፥ 
\v 12 ሙዳᎺይካ የም ዞረርንደትኬ የም ዛብሰሮቶ ክታ ባንችምንኬ ክታ ቦንቼንም የ ካስምተርንግንዳ የም ኤልስባብ ጮይስና ክት ጉርምድንጎግካ የ ዶቅተርንግንዳ ዋደ የም ዎ ጋይሳንደትም ኤዝደቴ።
\p
\v 13 ጉጅሰረ የጎካ ዛቃክዶቅሶቶ ሳብም ዎ ጋለድንዳ ዶቅዴ፥ ኮነረ ዎንዘንካ የ ኤሰርሳንደትም ሳብታ ቃለን የ ተያንደትካ የ አሜንድባብከስካ ፍግዝድንደትም ኮትኮም ቃለን የ ተያንዳ ኤታ ቃላግንዳ ማታክናና ገታ ሳብታ ቃላ ማስሴ፥ ገተረ ና ሳብታ ቃሌ። 
\v 14 እስመንከስኬ ምችነንከሶ፥ የተረ ይሁዳ ሞረናር Ꮊፈርድባብከስም የሱስ ክርስቶስካ ሳብታ Ꮊክ Ꮊክ ምክስ ኤሀ ማችባብከስታ ካምስንም ጎርስምተቴ፥ ኬታ አይሁድንከዘንካ ማጠን ከት ተያንደትግንዳ ሙዳ የተረ የንታ ገታ ኮችንዘንካ ማጣ የንዘን የልቴ።\x - \xo 2፡14 \xo*\xt ኦይት. ፍ. 17፡5። \xt*\x* 
\v 15 አይሁድና ጮይስ የሱሰምኬ ሳብዘንካ ኤሰርሶ ኬዛቅባብከስም ደይስባብኬ ዎመረ ዎ ዶቅድን ፍጨናርንካ ዳይት ዉችስባብከሰኬ፥ ከታ ሳብም ጉርምዝዳክባብከስኬ ኤድንከስም ሙዳ ግርድባብከሰኬ፥\x - \xo 2፡15 \xo*\xt ኦይት. ፍ. 9፡23-29፤ 13፡45፤ 14፡2፥5፥19፤ 17፡5፥13፤ 18፡12። \xt*\x* 
\v 16 አይሁድ ማታክባብከስም አቅዝድን ቃላ ዎ ኬዝዳክንግንዳ ዎራ ዎም ማርደኬ፥ ኮግንደካ ጎመንም ጎመዘን ጉጀረኮ አይደኬ፥ ኮካንታ ሳብታ ዋጭና ቦድሶ ከታዘን የልቴ።
\s1 ጳውሎስ ተሰሎንቄ ኤድንከስም አናካርንካ ሰድንካንታ አንግርና
\p
\v 17 ኬዛር ማቼ እስመንከስኬ ምችነንከሶ! አያንካ ማታክናና ዋሄካ ቶክም ሰጫካንታ የንዘንካ ዎንታ ፋስምንካ የካንታ ዎንታ ዶቅድን ሱንርና በድ ማቻንኦል ዎንታ አፍይካ የም ሰድንካንታ በድ ዝግዞቴ። 
\v 18 የንደር Ꮊድካንታ ዝግቶትዶቆ፥ አብንከዘንከረ እታ ጳውሎስ የንደር Ꮊድካንታ በድ ገቀርትትዶቆ፥ ኬዛር ማቼ ሰጣን ዎም ማርሴ። 
\v 19 ይና፥ ዎንታ Ꮊድን ጉርምና አነረ ታ ዎንታ ጉርምና አነረ ዎንታ ጮይስን የሱስ ᎺድንᎺይካ ክታ እሪ ዎ ጋይርድንዳ ጋምንተንታ ዛዉደና የታ ካዮ? 
\v 20 ገታ ዎንታ ቦንቼንኬ ጉርምንካ የተቴ።
\c 3
\p
\v 1 ኮካንታ ይና ኮዘንካ ዳንዳእክሳ ዎንታ ነግንተንካ አቴና ካተመናር ዎንት ዎንታ ነግንተና ኡርመም ካምሶ ዎካንታ Ꮊፈርሴ።\x - \xo 3፡1 \xo*\xt ኦይት. ፍ. 17፡15። \xt*\x* 
\v 2 ዎንታ እስመንኬ ሳብታ ፍግዝድባብ፥ ክርስቶሰታ ክላ ኬዘን ኤስምስካ ዎንታ ፍክስንታ ላኮይት ማችባብ ጢማቶሰም የካንታ ኦይቶቴ፥ የካንታ ክትም ዎ ኦይቻንደረ የም ዛብዝድንግንደኬ አሜንካ የ ዳቅድንግንዳ የም ዞርድንግንዴ፥ 
\v 3 ኮነረ የንዘን የልሳን ማጠንካ የ ጭጭዳክንግንዳ የም ይዴ፥ ኮና ማጠና ዎካንታ ጋይምሳንዳ እጫ ማቻንደትም የታ የንታ ማታርንካ ኤዝደቴ። 
\v 4 ኮትኮግንደረ የንካ ክክን ዎ Ꮊቃንደትካ ማጣ ዎንዘን የልድንደትም እሪምሶቶ የካንታ ኬዝድ Ꮊቆቴ፥ የ ኤዝድንግንደረ ማጠና ዎም የልቴ፥ 
\v 5 ኮጎካ ይና ኮዘንካ ኦስ ዳንዳእካ ካርስካንታ እ ማታክንካንታ የንታ አሜንንጎካ ኤስካንታ ዝግስቶ ጢማቶሰም የንደር ኦይቻቴ፥ ክትም እ ኦይቻንደረ Ꮊረንግርካ ጰጨንባብ ዋልቃጎግካ የም ጰጭቶ Ꮊረንዳት ጋይንተኬ፥ ዎንታ ፍክስነረ ዉችኩን ማትሶ ነግቴ ጋይስቶ ጳስኬ።
\p
\v 6 ታ ማቼ ጢማቶስ የንደርንካ ዎንደረ Ꮊድሶ የንታ አሜንካንተኬ የንታ ሶልመንካንታ ጉርምዝድን ኬዘንም ዎካንታ ኬዜ፥ ኮትኮግንደረ የታ ሙዳᎺይካ ኡርመካ ዎም የ ገቀርድንደትምኬ ዎታ የም ሰድንካንታ ዎ ሱነርድንደትከካ የተረ ዎም ሰድንካንታ የ ሱነርድንደትም ዎም ኬዜ።\x - \xo 3፡6 \xo*\xt ኦይት. ፍ. 18፡5። \xt*\x* 
\v 7 ኮካንታ እስመንከስኬ ምችነንከሶ፥ ዎ ዶቅድንዳ ዘረተኬ ማጠታ ዋሪ ዎ ማችንከረ ዎራ የንታ አሜንንጎካ የንካ ዳቅቶቴ። 
\v 8 የንታ ጮይስ የሱሳር ዛብሶ ዶቅና ዎካንተረ ዶቅንቴ። 
\v 9 ይና ታ የካንታ ሳብም ጋለዶቴ፥ የጎከረ ሳብታ እሪ ዎንታ ዶቅድን ጉርምንታ ክቲም ጋለዶቴ። 
\v 10 ሶይትከ Ꮊየካ ዳቅሶ ዎ ምግዝድንዳ ዎንታ አፍይካ የም ዎ ሰተርንግንዳ የንታ አሜንንታ ዞግርን ጮችካንታ ዎ ማተርንግንዴ።
\p
\v 11 ታየረ ዎንታ ጮይስንኬ ዎንታባቤና ኖይንታ ማታርንካ ዎንታ ጮይስ የሱሰረ የንደር ዎ Ꮊድንግንዳ ዎንታ ጎግንም ክት ሉልሳ። 
\v 12 ዎታ የም ዎ ሶልምድንግንዳ ክክ ክክኬ አብንከስካንተረ ሙዳ የንታ ዶቅድን ሶልመና ጋጵድንግንደኬ በድንግንዳ ጮይስ የካንታ ማሳ። 
\v 13 ኮግንደካ ዎንታ ጮይስ የሱስ ጭልንባብከስ ሙደንካ ክክን ክት ᎺድንᎺይካ ዎንታ ጮይስንተኬ ዎንታ ባቤንታ እሪ የንታ ቡደና ይንኤርዝድ ሪ ካየንደትኬ ሳብካንታ ፋስምሳንዳ ማተርንግንዳ የም ዛብዝዴ።
\c 4
\s1 ሳብም ጉርምዝድን ዶቅንት
\p
\v 1 ይና ኮዘንከረ እስመንከስኬ ምችነንከሶ! ሳብም ጉርምስካንታ Ꮊስግንዳ ዶቅንት የም ዝግዝድንዳማቼረ ዎንዘንካ ኤስተቴ፥ ታየረ የ ዶቅድንዳ ኮትኮግንዴ፥ ጮይስ የሱሰታ ላምንካ ዎ የም ምግዝድንደትኬ ዎ የም ዞርድንደረ ኮታ ኤና እሪ የ ይሳንደትዘንካ ስግስሶ የ ይተርንግንዴ። 
\v 2 ጮይስ የሱሰታ ላምካ Ꮊስግንደን ክታ ዎ የካንታ እምሳናንከረ የታ ኤዝደቴ። 
\v 3 ሳብታ ጋይተና የ ሳብካንታ ፋስምስባብ ማተርንግንደኬ ቤልምዘንካ የ ጎተርተርንግንዴ። 
\v 4 የንታርንካ ዋልቃ ዋልቀና ይንታ ገታ ዘነንም ሳብካንታ ፋስምሳንዳ ማስስንደትኬ ቦንቼካ ካርስሶ የድንም ክት ኤሳ። 
\v 5 ሳብም ኤዝዳክን አይሁድ ማታክባብከስግንዳ ቤልምታ አንግር ክታዘን Ꮊይዶቃ። 
\v 6 ኮ ሪንካ Ꮊየነረ ኤድ Ꮊይኮተራ፥ አብ ይንታ እስመን አሜንድባብም Ꮊይገስሳ፥ ኮታ ኤና እሪ ዎ የካንታ ኬዛንግንደኬ ዎ የም ኤግዝምሳንግንዳ ከትኬና ሪንከስም ይድባብከስም ጮይስ ይንታ ይምኤንም ከታዘን ቡልዴ። 
\v 7 ሳብ ዎም ኤልሳንዳ ሳብካንታ ፋስምሶ ዎ ዶቅድንግንዳ ዳት ቱነካ ዎ ዶቅድንግንዳ ካዬ። 
\v 8 ኮካንታ ኮም ዞረን ግርድባብ፥ ክት ግርድንዳ ጭል ይንታ አያንን የም እምድባብ ሳብም ዳት ኤድም ካዬ።
\p
\v 9 ክክ ክክ ሶልማጎካ የታ የንታ ማታርንካ ሳብዘንካ የ ኤሳንጎካ ኮርንካንታ Ꮊየነረ የካንታ ጻብድንግንዳ ዝክሳዬ። 
\v 10 መቄዶንያ አዉራጀናር ሙዳ ዶቅድባብ እስመንከስምኬ ምችነንከስም ሙዳ ሶልምደቴ፥ ማችንከረ እስመንከስኬ ምችነንከሶ፥ ታ የም ዎ ዞርድንዳ ስግስሶ የ ሶልምተርንግንዴ፥ 
\v 11 ስምንጋይሰረ ዶቅካንታ የ ጉርተርንግንደኬ የንታ ሪነረ የ ገቀርተርንግንዳ ኮታ ኤና እሪ ዎ የም ክትሳንደትግንደረ የንታ ገታ አንካ የ ፍግዝድንግንዴ። 
\v 12 ኮግንደካ አሜንዳክን ኤድንከስታ ላማር ቦንችምስባብከስ ማተረቴ፥ Ꮊየንዘነረ ገክንስባብ ማተራከቴ።
\s1 ቃስትምስ ጮይስታ Ꮊድንታ
\p
\v 13 እስመንከስኬ ምችነንከሶ! Ꮊድን ጉርም ካየንባብ ኤድንከስግንዳ የ ሞርእተራክንግንዳ ደእስባብ ኤድንከስጎካ ዶፈንን የ ኤዝድንግንዳ ሶልምዶቴ። 
\v 14 የሱስ ደእሳንደትምኬ ደእናርንከረ አምሳንደትም ዎታ አሜንዶቴ፥ ኮካንታ የሱሰካ አሜንሰኮ ደእስባብከስም ሳብ የሱሰካ ክክን ከትም ተይᎺተሬ። 
\v 15 ጮይስዘንካ ዎ ተያን ቃለንግንዳ ዎ ኬዝድንዳ ኮኔ፥ ጮይስ ክት Ꮊተርን የለልታ ሰንፔካ ዎታ ማትሶ ዶቅድባብከስ ደእስባብከዘንካ እሪማዮቴ። 
\v 16 ክቴንም፥ ክታይንችን ክድባብታ ኡፍስካ፥ ሳብታ Ꮊድንተንታ ፉገርድን ጩርንበነረ ኤስምተሬ፥ ጮይስ ይንታ ማታርከረ ከት ኬነታ ዎክያር ማትሶ ጭላርንካ Ꮊዴ፥ ክርስቶስካ አሜንሶ ደእስባብከሰረ እሪምሶ አምተረኬ። 
\v 17 ኮታ ቡሪ ዎታ ሰንፔካ ዶቅድባብከስ ጮይስካ ዞገዘን Ꮊፈርካንታ ከትካ ክክን ኡፔካ አምዶቴ፥ ስለንክንደተረ ጮይስካ ክክን ማተሮቴ።\x - \xo 4፡17 \xo*\xt 1 ቆሮ. 15፡51-52። \xt*\x* 
\v 18 ኮካንታ ኮ ቃለንካ ክክ ክክ ዳቅስከቴ።
\c 5
\s1 ጮይስታ Ꮊድንተን ግግምሶ ካርስ
\p
\v 1 እስመንከስኬ ምችነንከሶ! ኮና ሪና ማድንደታ ስለንከስተኬ ለእንከስታ Ꮊረነረ የካንታ ጻፍ ዝክሳዬ። 
\v 2 ጮይስ Ꮊድን ሰጨና፥ ድቢይ ሶይት Ꮊድንደትግንዳ ማትንተን የታ የንታ ማታርንካ ኡርስት ኤዝደቴ።\x - \xo 5፡2 \xo*\xt ማቶ. 24፡43፤ ሉቃ. 12፡39፤ 1 ጴጥ. 3፡10። \xt*\x* 
\v 3 ኤድንከስ “ሙዳ ሪና ሳራትቼካ ዳብን ጋይሴ” ኬት ጋይድንካ ኤተን ስርመንደትም እችረት ኮትም የድንደትግንዳ ካይዝድንዳ ፉትን ኬታዘን ጋይተሬ፥ Ꮊምንጎግከረ ሱርታየኬ።
\p
\v 4 የታ ማቼ እስመንከስኬ ምችነንከሶ፥ ሰጨና የንዘን ድቢይግንዳ Ꮊዳባብ ይና የታ ኡማር ካየቴ። 
\v 5 የታ ሙደነረ ሳክማ ኤድንከስ፥ Ꮊየክንባብ ኤደቴ፥ ዎታ ሶይትታ አነረ ኡምንታ ኤድንከስ ካዮቴ። 
\v 6 ኮካንታ ዎ ንጋ፥ ዎንታ ማተንም ቆለሮቶ ዎንታ እምንተንከካ ዎ ዶቃጋካ ዳት አብንከስግንዳ ዎ Ꮊይግንአ። 
\v 7 ግንእድባብ ኤድንከስ ሶይት ግንእደኬ፥ ጎዝድባብከሰረ ሶይትካ ጎዝደኬ። 
\v 8 ዎታ ማቼ ሳክመንታ ኤድንከስ ዎ ማቻንካንታ ዎንታ ማተንም ቆሎሮቶ ዎካንታ እምምሳንከካ ዎ ዶቃ፥ አሜንንምኬ ሶልመንም ስብልግንዳ ዎ ቆበራ፥ አቅንተንታ Ꮊድን ጉርምንም ቆጵግንዳ ዎ ዎዳ፥\x - \xo 5፡8 \xo*\xt ኢሳ. 59፡17፤ ኤፈ. 6፡13-17። \xt*\x* 
\v 9 ሳብ ዎም ኤልሳንዳ ዋጭካንታ ማታክናና ዎንታ ጮይስን የሱስ ክርስቶስጎካ አቅንተንም ዎ Ꮊብድንግንዴ። 
\v 10 ክርስቶስ ዎካንታ ክት ደእሳንዳ ሰንፔካ ዎ ዶቅሰረ አነረ ዎ ደእሰረ ክትካ ክክን ዎ ዶቅድንግንዴ። 
\v 11 ኮካንታ ታ የ ይድንደትግንዳ ዋልቀና አብንም አሌሮ ክቲም ዛብሳ።
\s1 በእንታ ዞረኬ ሳራትች
\p
\v 12 እስታ እስመንከስኬ ምችነንከሶ! የንታ ዎክያር ፍክስካ ጋብድባብከስም፥ ጮይስ የሱሳር የም ክድባብከስምኬ የም ዞራካንታ ማችባብከስም የ ቦንችተርንግንዳ የም ምግዝዶቴ፥ 
\v 13 ኬታ ፍክስንጎከረ ከትካንታ አንድር ቦንቼከ ሶልማ የንታ ዶቃ፥ የተረ ክክ ክክ ሳራትቼካ ዶእከቴ።
\p
\v 14 እስታ እስመንከስኬ ምችነንከሶ! “ቦዘንከስም ዋጭከቴ፥ ጳዝድባብከስም ዛብስከቴ፥ ጋፍስባብከስም አላ አልከቴ፥ ኤድ ሙደንም ዳንዳእከቴ” ጋይሶቶ የም ዞርዶቴ። 
\v 15 Ꮊየነረ ኤድ ዳቅልንታ ካርያር ዳቅልን ማዝዳክንግንዳ ካርስማ፥ ስግስሰረ ሙዳᎺይካ የታ ክክ ክክተረ ማታ ኮትኮግንደረ አብን ኤድንከስካንታ ሙዳ ኡርመንም ይይካንታ ዳእከቴ።
\p
\v 16 ሙዳᎺይካ የም ጉርምሳ፥ 
\v 17 ሙዳᎺይካ ዛቃከትዶቆ ምክስከቴ፥ 
\v 18 ሙዳ ሪካ ሳብም ጋለትከቴ፥ የሱስ ክርስቶስካ የንታ ዶቅድን ዶቅንተናር ሳብታ ጋይተና ኮኔ።
\p
\v 19 አያን ጭልንታ ፍክስንም Ꮊይካይሰቴ፥ 
\v 20 ቤርካ ኬዘርድንደታ እምንተን Ꮊይቶቸቴ፥ 
\v 21 ሙዳ ሪን ጰጭከቴ፥ ኡርማ ማቻንደትም የድከቴ። 
\v 22 Ꮊምነረ ዳቅልርዘንካ ጎተርከቴ።
\p
\v 23 ሳራትቼንታ ጮይስና ኖይንታ ማታርንካ ሙዳ ሪንካ ይንታ ፋስምስባብ የም ክት ማሳ፥ የንታ አያንና፥ የንታ ሰንፔና፥ የንታ ዘነና ሙዳ ዎንታ ጮይስን የሱስ ክርስቶስ Ꮊድን ሰጨንካ ይንኤርዝድን ሪካይሳ ካርስምሶ ዶቃ። 
\v 24 ኖ የም ኤልድባብና አሜንምስባብ ይ ማቻንካንታ ኮም ይዴ።
\p
\v 25 እስታ እስመንከስኬ ምችነንከሶ! ዎካንታ ምክስከቴ።
\p
\v 26 እስመንከስምኬ ምችነንከስም ሙዳ ቡዳርንካ ሶንቀሮ አቦ ከትም ጋይካ። 
\v 27 ኮና ክቴና አሜንድባብ ሙደንካንታ ናበብምድንግንዳ ጮይስታ ላምካ ዋደ የም ጋይድቴ።
\p
\v 28 ዎንታ ጮይስን የሱስ ክርስቶስታ ዉች እምንተና የንካ ክክን ማታ፥ አምንኤ።