\id 1JN - Gayil New Testament
\ide UTF-8
\h 1 ዮሀንስ
\toc1 ኦይትምስባብ ዮሀንሰታ እርንዳ ክቴና
\toc2 1 ዮሀንስ
\toc3 1 ዮሀ.
\mt1 ኦይትምስባብ ዮሀንሰታ እርንዳ ክቴና
\imt1 አርድንታ
\ip ኦይትምስባብ ዮሀንሰታ እሪንዳ ክቴና ቃስቴን አፍ ማቻን ኬዘንከስም የጃንዴ። ኬተረ ናበብድባብከስ ሳብካ ክክንኬ ክታ ይንችን የሱስ ክርስቶሰካ ክክን ዋልቃትች ኬታ ዶቅተርንግንዳ ዛብስካንተኬ ኮትኮም ዋልቃትቼን ካይስካንታ ማድን ካርካ ኤስስንዘንካ ከት ጎተርተርንግንዳ ኤግዝምስካንቴ። ኮታይካ አምሳንዳ ካርካ ኤስስንንታ ዳቀልስና ዉድንዳ ዳልግ ማቻን ኮፍጫ ሙደንካ ክክን ይይምድን ዋልቃትቼንጎካ ማቻንካንታ ሳብታ ይንችን የሱስይ ቦድሶ ኤድ ማትካንታ አነረ ኤተንግንዳ እዛ ክታ ዶቅካንታ ማታዬ ጋይድንዳ Ꮊቄ። ኬታኬና ኤስስንባብከስ “አቅንታ ጋይንተና ፍጫሙደንዘን ገች Ꮊቅንጎካ ዉችኩን ማጠርክሳ ዶቅ ጋይንትዬ” ጋይድ Ꮊቀኬ፥ ኮትኮከረ ክክን “ኡርማ እዘካ ዶቅንተረ ማታ አብ ኤድካንተረ ሶልማ ሰችና አቅንተንካ ክክን Ꮊረነረ ዋልቃትች” ካዬ ጋይድ Ꮊቀኬ።
\ip ኖ ጻፍንባበረ ኮትኮ ኤስስን ግርንተካ የሱስ ክርስቶስ ቦድማ ኤዴ፥ የሱሰካ ኣመንድባብከስኬ ሳብም ሶልምድባብ ሙደና ክክ ክከረ ሶልማ ከትም ዝግዝዴ ጋይንተካ ኡርስት ከትካንታ ኬዝቴ።
\iot ማጻፍን ኮትኮታ ሙዳ የድንተና
\io1 አርድንታ \ior (1፡1-4) \ior*
\io1 ሳክመኬ ኡምንካ \ior (1፡5—2፡29) \ior*
\io1 ሳብታ ይንችንከስኬ ዳብሎስታ ይንችንከስ \ior (3፡2-24)\ior*
\io1 ዶፈንንኬ ካርከንካ \ior (4፡1-6) \ior*
\io1 ነግምዳክንዳ ሶልማ \ior (4፡7-21) \ior*
\io1 ሙደንም ጋምድን አሜንና \ior (5፡1-21) \ior*
\c 1
\s1 ዶቅንት ቃላ
\p
\v 1 እሪንደትዘንካ የድሶ Ꮊቃን ዶቅንት ቃለንጎካ የካንታ ጻብዶቴ፥ ኮና ዶቅንት ቃለና ዎ ኤሰርሳንደትምኬ ዎንታ አፍንካ ዎ ሰዳንደትም፥ ዎ ማለካ ሰዳንደትምኬ ዎንታ አንንከስካ ዎ Ꮊጫንደትሜ።\x - \xo 1፡1 \xo*\xt ዮሀ. 1፡1። \xt*\x* 
\v 2 ናኮና ዶቅንትና መያ ማቴ፥ ዎተረ ሰቶቴ፥ የካንታ ማርከርዶቴ። ሳብ ባበንደር Ꮊቃንደትምኬ ዎካንተረ መያ ማቻን ስለንካ ዶቅንትን የካንታ ኬዝዶቴ።\x - \xo 1፡2 \xo*\xt ዮሀ. 1፡14። \xt*\x* 
\v 3 ዎንካ ክክን ዋልቃትች የንታ ዶቅተርንግንዳ ዎ ሰዳንደትምኬ ዎ ኤሰርሳንደትም የካንተረ ኬዝዶቴ። ዎንታ ዋልቃትችነረ ሳብ ባቤንደርኬ ክታ ይንችን የሱስ ክርስቶስካ ክክኔ። 
\v 4 ዎንታ ጉርምና ቦድማ ማድንግንዳ ኮም የካንታ ጻብዶቴ።\f + \fr 1፡4 \fr*\ft ዎንታ ጉርምና፤ ዋልቃ ዋልቃ ኤና ጻፍምሳንዳ የንታ ጉርምና ጋይደኬ። \ft*\f*
\s1 ሳብ ሳክማ ማትንቴና
\p
\v 5 ክታዘንካ ዎ ኤሰርሳንደትኬ የካንተረ ዎ ኬዝድንዳ ክቴና “ሳብ ሳክሜ፥ ኡምነረ ክደር ቦድሶ ካዬ” ጋይድንዴ። 
\v 6 ኮካንታ “ሳብካ ክክን ዋልቃትች ዎንታ ዶቅዴ” ጋየሮቶ ኡማር ዎ ዶቅድንዳ ማቼ ማልትባቦቴ፥ ዎንታ ኬዘከረ ማታ ዎንታ ፍክስንከረ ዶፈንና ካዬ ጋይንትዬ። 
\v 7 ኬዛርንካ ማቼ ሳብ ይንታ ማተናርንካ ሳክማር ዶቅድንግንዳ ዎተረ ሳክመናር ዎ ዶቅሴ ክክ ክክታ ዋልቃትች ዎንታ ዶቅተሬ። ጉጅሰረ ክታ ይንችን የሱሰታ ማቀስና ጎማ ሙደናርንካ ዎም ጭልዝዴ።\x - \xo 1፡7 \xo*\xt ዮሀ. 13፡34። \xt*\x*
\p
\v 8 ጎማ ዎንዘን ካዬ ዎ ጋይዴ ዎንታ ማተንም ገስዝዶቴ። ዶፈነረ ዎንታ ዋር ካዬ። 
\v 9 ዎንታ ጎመንም ሳብደር ዎ ፋጭዴ ኖ ኣመንምስባብኬ ጭል ማቻንካንታ ዎንታ ጎመንም ሙዳ ነጋ ጋይዴ፥ ዎንታ ዳቀልስን ሙደናርንካ ጭልዝዴ። 
\v 10 ጎማ ፍክሳኮተ ዎ ጋይዴ ሳብም ካርካባብ ማዝዶቴ፥ ሳብታ ቃለነረ ዎንታ ዋሪ ካዬ።
\c 2
\s1 ክርስቶስ ዎንታ ቡካታ ማትንቴና
\p
\v 1 እስታ ይንችንከሶ! ኮም የካንታ እ ጻብድንዳ ጎማ የ ፍግዝዳክንግንዳ ጋይስቴ። ኬዛርንካ ማቼ Ꮊየነረ ኤድ ጎማ ፍግዝዴ ሳብ ባቤንደር ዎንታ ቡካታ ዶቅዴ፥ ኖየረ ጭልና የሱስ ክርስቶሴ።\x - \xo 2፡1 \xo*\xt ዮሀ. 1፡12። \xt*\x* 
\v 2 ኖየረ ዎንታ ጎመን ነጋ ጋይምድንግንዳ ይዴ፥ ዎንታ ጎመንም Ꮊክ ማታክናና ፍጫሙደንታ ጎመና ነጋ ጋይምድንዳ ክትኬ።
\p
\v 3 ሳብታ ክተንከስም ቦድባብ ዎ ማቼ ክትም ኤዝድባብ ዎንታ ማትንተን ኮካ ኤዝዶቴ። 
\v 4 “ሳብም ኤዝድቴ” ጋየሮ ክታ ክተንከስም ቦዳክባብ ዶቅሴ ካርከንባቤ፥ ዶፈንነረ ክታር ካዬ። 
\v 5 ኬዛርንካ ማቼ ሳብታ ቃለንካንታ ክትምድባብ ሙደና ሳብካንታ ዶቅድን ሶልመና ቦድሜ፥ ዶፈን ክትካ ዎ ዶቅድንዳ ማትንተነረ ኤስምድንዳ ኮትኮኬ፥ 
\v 6 ሳብካ ዶቅድቴ ጋይድባብ ኤድ ክርስቶስ ዶቅሳንግንዳ ዶቅ ክትም ዝግዝዴ።
\s1 ክላ ክቴና
\p
\v 7 ገረነንከሶ! ኮና የካንታ እ ጻብድን ክቴና እሪንደትዘንካ የድሶ Ꮊቃንደትኬ ኤና እሪ ክቴና ዳት ክላ ካዬ፥ ኮነረ ኤና እሪ ክቴና የ ኤሰርሳን ቃሌ። 
\v 8 ማታጋካ ዳት ክርስቶሳርኬ የንታ ዶቅንተናር ዶፈን ማትሶ Ꮊፈርሳንደትም ክላ ክተንም የካንታ ጻብድቴ፥ ኡምና Ꮊልእሶ ዶፈን ሳክመና ታየረ ሳክሳዶቅዴ።
\p
\v 9 ሳክመናር ዶቅድቴ ጋየሮ ይንታ እስመንምኬ ምችነንም ግርድባብ ታ የለልታ ኡምናር ዶቅዴ። 
\v 10 ይንታ እስመንምኬ ምችነንም ሶልምድባብ ሙደና ሳክማር ዶቅዴ፥ ክትከረ ኤድም ጎሄርዝድን ሪ ዶቃዬ። 
\v 11 ይንታ እስመንምኬ ምችነንም ግርድባብ ማቼ ኡማር ዶቅዴ፥ ኡምናረረ ኦንግዴ፥ ኡምነረ ክታ አፍን ዝልሳንካንታ ይ አይድንደትመረ ኖ ኤሳዬ።
\p
\v 12 የታ ይንችንከሶ፥ የንታ ጎመና የሱሰታ ላምንካ ነጋ ጋይምሳንካንታ የካንታ ጻብድቴ። 
\v 13 የታ ባቤንከሶ፥ ኤና እሪንደትዘንካ ዶቅድንደትም የ ኤሳንካንታ የካንታ ጻብድቴ። ማርንድንከስኬ አንጀንከሶ፥ ሰጣንም የ ጋምሳንካንታ የካንታ ጻብድቴ። 
\v 14 የታ ይንችንከሶ፥ ሳብ ባቤንም የ ኤሳንኦል የካንታ ጻብድቴ። የታ ባቤንከሶ፥ እሪንደትዘንካ ዶቅድንደትም የ ኤሳንካንታ የካንታ ጻብድቴ። የታ ማርንድንከሶ፥ ዳቅማ የ ማቻንካንተኬ ሳብታ ቃለና የንታ ቡደናር ዶቅድንካንታ፥ ሰጣንም የ ጋምሳንጎካ የካንታ ጻብድቴ።
\p
\v 15 ኮ ፍጨዘንደትም አነረ ኮ ፍጫሙደንታ ሪን Ꮊይሶልመቴ። ኮ ፍጨዘንደትም ሶልምድባብ ሳብ ባቤንም ሶልማዬ። 
\v 16 ኮ ፍጨዘን ዶቅድሪ ሙደና ጎመትንደትም አንግር፥ አፍካንታ ኡርድ ሪ፥ ገችንተተኬ Ꮊቅንተታ ጬቅና ኮ ፍጨዘንካ ዳት ሳብ ባቤንዘንካ ካዬ። 
\v 17 ኮፍጫ ሙደንኬ አንግርነረ ስገዴ። ሳብታ ጋይተንም ቦድባብ ማቼ ስለንካ ዶቅተሬ።
\s1 ክርስቶስም ግርድባብዘንካ ካርስም
\p
\v 18 ይንችንከሶ! ኮና በእንታ ሳዓቴ፥ “ክርስቶሰም ግርድባብ Ꮊዴ” ጋይምድንካ የታ ኤሰርተቴ፥ ይና፥ ታ ዎራ በድ ክርስቶሰም ግርድባብከስ አምተኬ፥ ኮጎካ በእንታ ሳዓት ማትንተንም ዎታ ኤዝዶቴ። 
\v 19 ኬት ዉተዳንዳ ዎንታ ዎክያርንኬ፥ ማታጋካ ዳት ኤና እረረ ዎንታ ኮችናርንካ ካየኬ። ዎንታ ኮችናርንካ ከት ማቼስናና ዎንካ ክክን ዳቅሶ ዶቅተረክዶቆ። ኬዛርካ ማቼ ሙደና ዎንታ ኮችናርንካ ከት ማታክንደና ኤስምተርንግንዳ ዎንታ ዎክያርንካ ፋስምሰኮ ዉተኬ።
\p
\v 20 የም ማቼ ክርስቶስ አያን ጭልንካ ሳይቴ። ኮካንታ የታ ሙደነረ ሙዳ ሪም ኤዝደቴ። 
\v 21 የካንታ እ ጻብድንዳ ዶፈንን የ ኤዝዳክንካንታ ካዬ፥ የተረ ዶፈንንም ኤዝደቴ፥ ዶፈናረረ ካርካ Ꮊፈርዳክንደትም ኤዝደቴ።
\p
\v 22 ይና የሱስ ሳይምስባብ ክታ ማትንተን ካድባብዘንካ አብ ካርከንባብ Ꮊይራ? ኖ ክርስቶሰም ግርድባቤ፥ ሳብ ባቤንምኬ ሳብ ይንችንመረ ካዴ። 
\v 23 ሳብ ይንችንም ካድባብ ሳብ ባቤንመረ ኤዝዳክዬ፥ ሳብ ይንችንካ ኣመንድባብ ሳብ ባቤንከረ ኣመንዴ።
\p
\v 24 እሪንደትዘንካ የድሶ የ ኤሰርሳንዳ የንታ ቡዳር ዳቅሶ ዶቃ፥ የታ ማቼ እሪንደትዘንካ የ ኤሰርሳን ቃለና የንታ ቡዳር ዳቅሶ ኮት ዶቅሴ ሳብ ይንችናርኬ ሳብ ባቤንካ ክክን ዋልቃትች የንታ ዶቅተሬ። 
\v 25 ኮነረ ክርስቶስ ዎካንታ እምሳንዳ Ꮊድን ጉርምና ስለንክንደታ ዶቅንትዬ።
\p
\v 26 የም ገስዝድን ኤድንከስጎካ ኮም የካንታ ጻፍሳቴ፥ 
\v 27 ክርስቶሰዘንካ የ ተያንዳ አያንና የንታዋር ዶቅድንካንታ አብ ኤስስንባብ የካንታ ዝክሳዬ፥ ኖ የም ሙዳ ሪን ኤስስተሬ፥ የም ኤስዝድንደረ ዶፈንን ዳት ካርከንም ካዬ። ኮካንታ አያን ጭልና የም ኤስሳንደትግንዳ ክርስቶሳር ዶእከቴ።
\p
\v 28 ይና እስታ ይንችንከሶ! ክት መያ ማድንᎺይካ ጳሳኮትዶቆ ሙቅምካ ዎ ሰድንግንደኬ ክት Ꮊድን ሰጨንᎺይካ ክታ እሪ ዎ ኦስንተራክንግንዳ ክትካ ዶእከቴ። 
\v 29 ክት ጭል ማቻን የ ኤሴ ጭለትችን ይድባብ ሙደና ሳብዘንካ አጥምስባብ ማትንተን ኤስከቴ።
\c 3
\s1 ሳብታ ይንችንከስ
\p
\v 1 ሳብታ ይንች ጋይምሶቶ ዎ ኤልምድንግንዳ ሳብ ባቤና Ꮊስግንዳ ይንታ ዶቅድን ሶልመን ዎካንታ እምሳናከረ ሰድከቴ! ገተረ ሳብታ ይንቾቴ፥ ፍጫ ሙደና ሳብም ኤሳክንካንታ ዎመረ ኤዝዳክዬ። 
\v 2 እስታ ገርነንከሶ፥ ታ ሳብታ ይንቾቴ፥ ኦስ እሪ Ꮊራ ዎ ማዳናንከረ አክ ኤስማክዬ፥ ኬዛርንካ ማቼ ክርስቶስ መያ ማድንᎺይካ ዶፈን ክታ ካምስን ዎ ሰድንካንታ ክትም ዎ ካምድንደትም ኤዝዶቴ። 
\v 3 ኮነረ ማድንደትም ክርስቶሰካ Ꮊድን ጉርም ይድባብ ሙደና ክርስቶስ ጭል ማቻንደትግንዳ ኖየረ ይንታ ማተን ጭል ማዝዴ።
\p
\v 4 ጎማ ጋይንትና ሳብታ ህግንም ዉል ማቻንካንታ ጎመን ፍግዝድባብ ሙደና ሳብታ ህግንም ዉልእዴ። 
\v 5 ክርስቶስ ኤድንከስታ ጎመንም Ꮊልእስካንታ መያ ማቻንግንደኬ ኖየረ ጎማ ክታዘን ካየንደትም የታ ኤዝደቴ።\x - \xo 3፡5 \xo*\xt ዮሀ. 1፡29። \xt*\x* 
\v 6 ኮካንታ ክርስቶሳር ዶቅድባብ ኤድ ሙደና ጎማ ፍክሰሮ ዶቃዬ። ጎመን ፍግዝድባብ ኤደረ ክርስቶሰም ሰዳክየ አነረ ኤሳክዬ።
\p
\v 7 ይንችንከሶ! Ꮊየሰነረ የም Ꮊይገስሳ፥ ክርስቶስ ጭል ማቻንግንዳ ጭለትቼንም ይድባብ ሙደና ጭልዬ። 
\v 8 ዳብሎስ እሪንደትዘንካ የድሶ ጎማ ፍግዝድንካንታ ጎመንም ፍግዝድባብ ሙደና ዳብሎስታ ኮችዬ። ሳብታ ይንችና መያ ክት ማቻንደረ ዳብሎሰታ ፍክስንም ዉልእካንቴ።
\p
\v 9 ሳብታ እዘና ክታ ዋር ዶቅድንካንተኬ ሳብዘንከረ ክት አጥምሳንካንታ ሳብታ ይንች ማችባብ ጎማ ፍክሰሮ ዶቃዬ፥ ጎመን ፍክስካንተረ ማታዬ። 
\v 10 ሳብታ ይንችንኬ ዳብሎሰታ ይንችንካ ፋስምሶ ከት ኤስምድንዳ ኮኬ፥ ጭልንም ይዳክባብኬ ይንታ እስመንምኬ ምችነንም ሶልምዳክባብ ሙደና ሳብታ ይንች ካዬ።
\s1 ክክ ክክ ሶልማጎካ
\p
\v 11 እሪንደትዘንካ የድሶ የ ኤሰርሳን ክቴና “ክክ ክክ ዎ ሶልማ” ጋይድንዴ\x - \xo 3፡11 \xo*\xt ዮሀ. 13፡34። \xt*\x* 
\v 12 ሰጣንታ ኮች ማቻንግንደኬ ይንታ እስመንም ደይስባብ ቃኤልግንዳ ማት ዎም ዝክሳዬ፥ ኖይንታ እስመንም Ꮊራካንትክ ደይሳራ? ክታ ፍክስና ዳቅል ማቻንካንተኬ ክታ እስመንታ ፍክስና ማቼ ዶፈን ማቻንካንቴ።\x - \xo 3፡12 \xo*\xt ፍዝ. 4፡8። \xt*\x*
\p
\v 13 እስመንከስኬ ምችነንከሶ! ፍጫ ሙደና የም ቦሰረ Ꮊይበርኤቴ። 
\v 14 ዎታ ዎንታ እስመንንከስምኬ ምችነንከስም ዎ ሶልምድንካንታ ደእናርንካ ዶቅንተናር ዎንታ ቃልንተንም ኤዝዶቴ። ሶልማ ካየንባብ ኤድ ደእታ ስፍያር ዶቅዴ።\x - \xo 3፡14 \xo*\xt ዮሀ. 5፡24። \xt*\x* 
\v 15 ይንታ እስመንምኬ ምችነንከስም ግርድባብ ሙደና ሰንፓ ደይዝድባቤ፥ ሰንፓ ደይዝድባብተረ ስለንክንደታ ዶቅንት ክታ ካየንደትም የታ ኤዝደቴ። 
\v 16 ሶልማ Ꮊራ ማቼረ ዎ ኤዝድንዳ የሱስ ክርስቶስ ይንታ ሰንፔንም ዎካንታ ስክስት እምሳንካንቴ፥ ዎተረ ዎንታ ሰንፔንም ዎንታ እስመንከስካንተኬ ምችነንከስካንታ ስክስት እም ዎም ዝግዝዴ። 
\v 17 ኤድ ኮ ፍጫሙደንዘን ቆልማ ክታ ዶቅድንካ ማጠርስባብም ሰድሶ ክት አጨራክንዳ ማቼ “ሳብም እታ ሶልምድቴ” Ꮊስግንድክ ጋይካንታ ማዳ? 
\v 18 እስታ ይንችኖ! ዎንታ ሶልመና ዶፈንኬ ፍክስካ መያ ማድንዳ ማታጋካ ዳት አፈታ ኬዘካ Ꮊክ Ꮊይማታ።
\s1 ሳብታ እሪ ዎንታ ዶቅድን ኣመንምና
\p
\v 19 ኮከረ ዶፈንንከስ ዎንታ ማትንተኬ ሳብታ እሪ ኦይምካይሳ ኣመንምካ የልካንታ ማድባብ ዎንታ ማትንተን ኤዝዶቴ። 
\v 20 ኮትኮጎከረ ዎንታ ቡደና ዎንዘን ፋረጀረ ሳብ ዎንታ ቡደንዘንካ ስግዬ፥ ኖየረ ሙዳ ሪን ኤዝዴ። 
\v 21 ገርነንከሶ፥ ዎንታ ቡደና ዎንዘን ፋረዳክንዳ ማቼ ሳብታ እሪ ቦድማ ኣመንም ዎንታ ዶቅዴ። 
\v 22 ሳብታ ክትንከስም ዎታ ቦድባብኬ ክትም ጉርምዝድንደትመረ ይድባብከስ ዎ ማቻንካንታ ዎ ምግዝድንደትም ሙዳ ክደርካ Ꮊብዶቴ። 
\v 23 ሳብታ ክቴና ክታ ይንችን የሱስ ክርስቶሰታ ላምካ ዎ ኣመንድንግንደኬ ክርስቶስ ዎም ክትሳንደትግንደረ ክክ ክክ ዎ ሶልምተርንግንዴ።\x - \xo 3፡23 \xo*\xt ዮሀ. 13፡34፤ 15፡12፥17። \xt*\x* 
\v 24 ሳብታ ክቴንም ቦድባብከስ ሙደና ሳብካ ዶቅደኬ፥ ሳበረ ክትካ ዶቅዴ። ሳብ ዎንካ ዶቅድንደትም ዎ ኤዝድንዳ ክት ዎካንታ እምሳን አያንኬ።
\c 4
\s1 ዶፈን አያንንኬ ካርካ አያንካ
\p
\v 1 ገረንንከሶ! ፍጫሙደንዘን በድ ካርከንባብ ሳብዘንካ ኤሰራክዶቆ ኬዝድባብከስ አምሳንካንታ አያንን ሙዳ Ꮊይ ኣመነቴ፥ ስግስሰረ አያንከስ ሳብዘንካ ኬታ ማትንተንምኬ ማታክንደትም ፋስት ኤስከቴ። 
\v 2 ሳብታ አያንንም ፋስትዮ የ ኤዝድንዳ ኮኬ፥ የሱስ ክርስቶስ ኤድ ማትሶ ኤድግንዳ ክታ መያማትንተን ኣመንድን አያን ሙደና ሳብታ አያኔ፥ 
\v 3 የሱስ ኤድ ማትሶ ኤድግንዳ ክታ መያ ማትን ኣመንዳክን አያን ሙደና ሳብታ አያን ካዬ፥ ኮነረ አያንና Ꮊዴ ጋይድንካ የ ኤሰርሳንዳ ክርስቶሰም ግርድን አያኔ፥ ኖ ታ ዎራ ፍጫሙደንዘን ዶቅዴ።
\p
\v 4 ይንችኖ! የታ ሳብተቴ፥ የንካ ዶቅድን አያንና ፍጫሙደንዘን ዶቅድን አያንንዘንካ ስገዴ። ሳብዘንካ ኤሰራክዶቆ ኬዝድባብ ካርከንባብከስም ጋምተቴ። 
\v 5 ሳብዘንካ ኤሰራክዶቆ ኬዝድባብ ካርከንባብከስ ኮ ፍጫሙደንዘንኬ፥ ከት ኬዝድንደረ ኮ ፍጫሙደንታ ሪንመ። ፍጫ ሙደነረ ከትም ኤሰርዴ። 
\v 6 ዎታ ሳብቶቴ፥ ሳብም ኤዝድባብ ሙደና ዎም ኤሰርዴ፥ ሳብታ ማታክባብ ማቼ ዎም ኤሰራዬ። ዶፈን አያንንኬ ካርካ አያንንም ፋስትዮ ዎ ኤዝድንዳ ኮኬ።
\s1 ሳብ ሶልሜ
\p
\v 7 ገርነንከሶ! ሶልማ ሳብዘንካ ማቻንካንታ ክክ ክክ ዎ ሶልማ፥ ሶልምድባብ ሙደና ሳብታ ይንችዬ፥ ሳብመረ ኤዝዴ። 
\v 8 ሳብ ሶልማ ማቻንካንታ ኤድም ሶልምዳክባብ ሙደና ሳብም ኤዝዳክዬ። 
\v 9 ክታ ይንቺንጎግካ ዶቅንት ዎ Ꮊብድንግንዳ ሳብ ይንታ ዋልቃ ይንቺን ፍጫሙደንዘን ክትም ኦይቴ፥ ኮከረ ሳብታ ሶልመና ዎንታ ዎክያር መያ ማቴ። 
\v 10 ሶልማ ጋይንት ኩኔ፥ ዎታ ሳብም ሶልምሳንካንታ ማታክናና ክት ዎም ሶልምሳንካንተኬ ዎንታ ጎመን ክት Ꮊልእዝድንግንዳ ይንታ ይንቺን ዎካንታ ክት ኦይቻንካንቴ።
\p
\v 11 ገርነንከሶ! ሳብ ዎም ኮከካ ሶልምሴ ዎተረ ክክ ክክ ሶልማ ዎም ዝግዝዴ። 
\v 12 ሳብም ሰጅባብ Ꮊየነረ ኤድ ካዬ። ዎታ ክክ ክክ ዎ ሶልምሰ ሳብ ዎንካ ዶቅዴ፥ ክታ ሶልመነረ ዎንካ ቦድማ ማዴ።\x - \xo 4፡12 \xo*\xt ዮሀ. 1፡18። \xt*\x*
\p
\v 13 ሳብ ይንታ አያንን እምሳንካንታ ክትካ ዎ ዶቅድንግንደኬ ኖየረ ዎንካ ዶቅድንደትም ኤዝዶቴ። 
\v 14 ሳብ ባቤና ፍጫሙደንታ አቅስንባብ ማስሶ ሳብ ይንታ ይንቺን ኦይቻንደትም ዎታ ሰቶቴ፥ ክትጎካ ማርከርዶቴ። 
\v 15 የሱስ ሳብ ይንች ማቻንደትም ኣመንድባብ ኤዳር ሳብ ዶቅዴ፥ ኖየረ ሳብካ ዶቅተሬ። 
\v 16 ኮካንታ ሳብታ ሶልመና ዎካንታ ዶቅድንደትም ዎታ ኤዝዶቴ፥ ኣመንዶቴ። ሳብ ሶልሜ፥ ሶልመካ ዶቅድባብ ሳብካ ዶቅተሬ፥ ሳበረ ክትካ ዶቅተሬ። 
\v 17 ኮ ፍጫሙደንዘን ዎ ዶቅድንዳ ገታ ክርስቶስ ዶቅድንደትግንዳ ዎንታ ሶልመንካ ቦድማ ማቼ፥ ፍርዳ ሰጨንካ ጳስካይሳ ክታ እሪ ዎእካንታ አንድር ኣመንም ዎንታ ዶቅተሬ። 
\v 18 ቦድማ ሶልመና ጳስንም ዉችትዮ ዛቅዳ ዳት ሶልማር ጳስካዬ፥ ጳስ ዋጭካ ክክን የድምሳንዳ ማቻንካንታ ጳዝድባብ ኤችንታ ሶልመና ቦድማ ካዬ።
\p
\v 19 ሳብ እሪምሶ ዎም ሶልምሳንካንታ ዎተረ ሶልምዶቴ። 
\v 20 ሳብም ሶልምድተ ጋየሮ ይንታ እስመንምኬ ምችነንም ግርድባብ ካርካባቤ፥ ይ ሰድባብ ይንታ እስመንምኬ ምችነንም ሶልምዳክባብ ማቼ ይ ሰዳክባብ ሳብም ሶልማካንታ ማታዬ። 
\v 21 ኮካንታ ክርስቶስ ዎካንታ እምሳን ክቴና “ሳብም ሶልምድባብ ይንታ እስመንምኬ ምችነንም ክት ሶልማ” ጋይድንዴ።
\c 5
\s1 ፍጫ ሙደን ጋምንታጎካ
\p
\v 1 የሱስ ሳይምስባብ ማትንተን አሜንድባብ ሙደና ሳብታ ይንችዬ፥ ሳብ ባቤንም ሶልምድባብ ሙደና ሳብ ይንችንመረ ሶልምዴ። 
\v 2 ሳብታ ይንችንከስም ሶልምድባብ ዎንታ ማትንተን ዎ ኤዝድንዳ ሳብም ዎ ሶልምሰኬ ክታ ክተንከስም ዎ ቦድንኬ። 
\v 3 ሳብም ሶልማ ጋይንትና ክታ ክተንከስመረ ቦዴ፥ ክተንከሰረ ደጭማ ካየኬ።\x - \xo 5፡3 \xo*\xt ዮሀ. 14፡15። \xt*\x* 
\v 4 Ꮊረታ ጋይሴ ሳብታ ይንች ማችባብ ሙደና ፍጫ ሙደንም ጋምዴ፥ ፍጫ ሙደንመረ ዎ ጋምድንደና ዎንታ ኣመንኬ። 
\v 5 የሱስ ሳብታ ይንች ማትንተን ኣመንድባብ ኤድዘንካ አብ ፍጫ ሙደንም ጋምድባብ Ꮊይራ?
\s1 ክርስቶስጎካ እምምሳንዳ ማርካትች
\p
\v 6 ክታ ስእርንም ሰችዝድን ሎቀንኬ ክታ ደእንም ሰችዝድን ማቀስንካ Ꮊድባብ የሱስ ክርስቶስዬ። ኖየረ Ꮊዳንዳ ሎቀኬ ማቀስኬ። ኮነረ ዶፈን ማቻንካንታ ኮና ሪና ዶፈን ማትንተን አያን ጭልና ማርከርዴ፥ 
\v 7 ማኬን ማርከንከስ ዶቅደኬ። 
\v 8 ከተረ አያን፥ ሎቀኬ ማቀስኬ፥ ከታኬና ማኬንና ማርካትቼንካ ኤእደኬ። 
\v 9 ኤድንከስ እምድንደትም ማርካትቼን ዎታ ተይዶቴ፥ ኬዛር ማቼ ሳብታ ማርካትቼና ሙደንዘንካ ስገዴ። ሳብ ይንታ ይንችንካንታ ክት እምሳንዳ ማርካትቼና ኮኔ። 
\v 10 ሳብ ይንቺንካ ኣመንድባብታ ኮና ማርካትቼና ክታ ቡዳር ዶቅዴ፥ ሳብም ኣመንዳክባብ ማቼ ሳብ ይንታ ይንችንጎካ ክት እምሳን ማርካትቼን ይንታ ኣመንክሳ ነግንካ ካርከንባብ ከትም ማስስቴ። 
\v 11 ክታ ማርካትቼነረ ሳብ ስለንካ ዶቅንተን ክት ዎካንታ እምሳንግንደኬ ኮነረ ዶቅንትና ክታ ይንቺንካ ዶቅድንደትም ማርከርድንዴ።\x - \xo 5፡11 \xo*\xt ዮሀ. 3፡36። \xt*\x* 
\v 12 ሳብታ ይንችና ዶቅድባብካንታ ዶቅንት ዶቅዴ። ሳብታ ይንችና ካየንባብካንታ ማቼ ዶቅንት ክታ ካዬ።
\s1 ስለንክንደታ ዶቅንትንጎካ ኤስስ
\p
\v 13 የታ ሳብታ ይንችንታ ላምንካ ኣመንድባብከስ ሙደና ስለንክንደታ ዶቅንት የንታ ዶቅድንዳ ማትንተን የ ኤስተርንግንዳ ኮም ሙዳ የካንታ ጻፍትቴ። 
\v 14 Ꮊምንመረ ሪ ክታ ጋይተንግንዳ ዎ ምግዝደ ዎንደር ክት ኤሰርድንደትም ኣመንምዶቴ። 
\v 15 ዎ ምግዝድንደትም ሙዳ ክት ዎንደር ኤሰርድንደትም ዎ ኤሴ ክታዘንካ ዎ ምግዝድንደትም ሙዳ ታኩን ዎ ተይድንደትም ኤዝዶቴ።
\p
\v 16 Ꮊየነረ ኤድ ይንታ እስመንም ደእካንታ የልስዝዳክን ጎማ ክት ፍግዝድንካ ይ ሰጄ ክትካንታ ምክሳ፥ ኤችንታ ጎመና ደእካንታ የልስዝዳክንዳ ማቼ ሳብ ክትም ዶቅንት እምዴ። ኬዛርንካ ማቼ ደእካንታ የልስዝድን ጎማ ዶቅዴ። ኮግንዳ ጎመንጎካ ክት ምክሳ ጋያይቴ። 
\v 17 ዳቅል ፍክስና ሙዳ ጎሜ። ማታጋካ ዳት ደእካንታ የልዝዳክንዳ ጎማ ዶቅዴ።
\p
\v 18 ሳብታ ይንችና የሱስ ክርስቶስ ክትም ካርዝድንካንታ ሳብታ ይንቺ ማችባብከስ ሙደና ጎማ ከት ፍግዝዳክንደትም ዎታ ኤዝዶቴ። ዳቅልነረ ክትም ዎልዳክዬ።
\p
\v 19 ዎታ ሳብታ ዎንታ ማትንተንም ኤዝዶቴ። ፍጫ ሙደና ማቼ ሙደንካ ዳቅልንካንታ ቆልምድንዳ ማቴ።
\p
\v 20 ሳብታ ይንችና ክት Ꮊዳንግንደኬ ዶፈን ሳብን ዎ ኤዝድንግንዳ ገቀርድን ቡዳ ዎካንታ እምሳንደትም ኤዝዶቴ፥ ክታ ይንችን የሱስ ክርስቶስጎካ ክት ዶፈን ሳብንካ ክክን ዋልቃትች ዎንታ ዶቅዴ። የሱስ ክርስቶስ ዶፈን ጮይስኬ ስለንክንደታ ዶቅንትዬ። 
\v 21 ይንችንከሶ! ጮይስ ማዳክን ሪን ጎይንዘንካ የንታ ማተንም ካርስከቴ።