\id 2TI - Gumawana Translation Project [C. Olson Draft #12 12-Jul-2018 - translator: Siyokira - consultant checked Nov 2013. Final read through Dec 2017] 
\h 2 TIMOTI 
\toc3 2Ti 
\toc2 2 Timoti 
\toc1 Timoti ana leta aiyuwoina 
\mt1 2 Timoti  
\mt2 Timoti ana leta aiyuwoina  
\is1 Livala Aba Vaita  
\ip Leta ame Timoti ana leta aiyuwoina Paulo igini. Pauloyana deri sinaena Roma goi ikaaiyaka tutayana leta ame igini. Go kina Timotiyana Epeso goi ikaaiyaka, Yeisu ana totugugunayao ivatuulukoidi. Moe nakona tala 65 ina tala 66 go, nauyayanaidi goi letayana igini. Ame nakona ina leta vaamliyaina igini.  
\ip Boi Paulo ivaníbita Vala Dedevina itaalavaite ina asa Lustira goi, e Timoti ivalobode Valayana ivatuluko inumise. Amo tetalayana buki Guinuwa 16:1-3 goi ikaaiyaka.  
\ip Leta ame goi Paulo latuwona Timoti ina numisa ikitogage. Aiyuwoina ilatuwoko tovatulukwana polapola manudi bego isanabodedi. Aitonina Timoti itoboine gedageda goi imeesayágana go, Yaubada ina yabobona goi iitáoya.  
\iot Leta Luluna  
\io1 1. Leta ana togínina be ana tokatuyaivayao \ior 1:1-2 \ior*  
\io1 2. Paulo ina kauyagu Timoti manuna \ior 1:3-14 \ior*  
\io1 3. Timoti itoboine itogaga be tomota aba numisa ivatulukoidi \ior 1:15—2:2 \ior*  
\io1 4. Timoti itoboine gedageda goi itogaga \ior 2:3-13 \ior*  
\io1 5. Timoti itoboine senao yaidi ivilivili Paulo ina vatulúkwana manuna \ior 2:14-26 \ior*  
\io1 6. Tomota idi sinapu tuta ana kaba lukavava goi \ior 3:1-9 \ior*  
\io1 7. Timoti Paulo ina vatulúkwana ikaisakiyedi \ior 3:10-17 \ior*  
\io1 8. Timoti itoboine Yaubada ina vala italavaite \ior 4:1-8 \ior*  
\io1 9. Paulo latuwona Timoti woilina ina tauyana yaina \ior 4:9-15 \ior*  
\io1 10. Tomoya ina vaita Paulo ina kotu goi \ior 4:16-18 \ior*  
\io1 11. Paulo ina vaduduwo \ior 4:19-22 \ior*  
\c 1  
\s1 Leta ana togínina be ana tokatuyaivayao  
\m
\v 1-2 Timoti,\x † \xo 1:1-2 \xt Gui 16:1,3, 17:14-15, 18:5, 18:22, 20:4; Rom 16:21; 1Ko 4:17, 16:10; Pil 2:19; 1Tk 3:2,6; Ibe 13:23.\x*  
\p Yau Paulo \w Guyau\w* \w Yeisu\w* ina \w vamoléyana\w* tayamo Yaubada ina nuwonúwana goi. Moe bego Yaubada ina katótula yawoida vau manuna atalavaite, yawoidayadi moe ida \w spwagógana\w* Guyau Yeisu taiyao pasina tababane. Leta ame agini iwo kom natugu guna kalo nakae yaim.  
\p Yaubada Tamada be ida Tomoya \w Guyau\w* Yeisu idi kanuwóiya be idi nuwokapisi nakae idi tuboina bei sivinim.   
\s1 Paulo ina kauyagu Timoti manuna  
\p
\v 3 Nuwogu geya isabutukoeta tutayana ataaimámina Yaubada yaina nakae boi nimatu tubugowo sitaaimámina. Ame Yaubadayana yaina akaauyagu tutayana sabamgo be maliyalina guna kawanoi goi anuwokaavatem.  
\v 4 Im táiya boi tutayana akalavem anuwookavate, tauna akatukuuwonem agitemneim bego uyáwana ivakayaodeigu.  
\v 5 Guna kauyaguyana unana im numisa mooitamoina anuwokavate. Numisayana moe nakae boi mainao tubum Loisi sowona, niga sinam Yunisi nakae sowona.\x † \xo 1:5 \xt Gui 16:1.\x* Ayagoi bego numisayana kom nakae sowom.   
\p
\v 6 Im numisayana pasina akavilevilem am kaiguyau manuna. Boi dabam abisikone namliyeta Yaubada ina kaiguyau ivinim. Aiguyauyana kuepaaisēwe nakae yeu neta kukiyamoi, e inínima ivaiteda.  
\v 7 Moe itoboine. Yaubada Balomaina ivinida go, Balomayana geya matoita unana geya, go sem Baloma ina kaiguyau pasina itoboineda tatogaga, tamatakoi be toinida takabikunuida.   
\p
\v 8 E tauna taabu om imaayamāya ida Tomoya Yeisu valena kutaalavaite. Aiyuwoina ida Tomoyayana valena ana talavaita pasina yau deri ana tokaiyaka go, tuwo taabu kuomaeemāegu, go sem Yaubada ina togaga goi guna mou \w Vala Dedevina\w* ana talavaita manuna kusīuko.  
\v 9 Yaubadayana iyaveda be nakae ivayokoida kita kimaasabaida Tauyana umana. Go geya kada ida guinuwa pasidi geya, go sem toinina ina nuwonúwana pasina be ina kanuwóiya pasina. Anuwoiyayana ivinida ida spwagógana \w Guyau\w* Yeisu taiyao pasina nakae boi nimatu tuta ana kaba vatowo goi bogina igimilosinapuye.  
\v 10 E ame tuta bogina ivagitakoe kita yaida ada Toyava Guyau Yeisu ina sowóduwo goi. Guyauyana ámasa ana togaga itauwe go, Vala Dedevina ana talavaita goi yawana vata toina ikaiwoduwe yaida.  
\v 11 Valayana manuna Yaubada ikawoigu bego yau valayana ana totalavaita, Yeisu ina vamoléyana be nakae valayana ana tovatulúkwana.\x † \xo 1:11 \xt Gui 9:1; 1Ti 2:7.\x*  
\v 12 Guna paisewayana pasina tauna ame guna mou ababanedi go, mouyadi pasidi ogu geya imaemaeta. Moitamo. Guyau Yeisu aanumise; Tauyana bogina aayagoi. Go ayagoidoko Tauyana itoboine Vala Dedevina boi inuumisegu bego aruugwausi bei iiyause ana kadókana maliyalina gagaina ima.   
\p
\v 13 Vatulúkwana mooitamoidi bogina yau yaigu goi kuunovedi mam numisa be mam matakoi kuyoisikaavatēdi. Go imi yoitakavatayana goi mam numisa be mam matakoi ida spwagógana \w Guyau\w* Yeisu taiyao pasina.  
\v 14 Vatulukwanayadi dedevidi boi Yaubada iivinida, e \w Baloma Kimaasabaina\w* yaida ikaaiyaka ina togaga goi kuyaausēdi tosobala yaidi goi.   
\s1 Timoti itoboine itogaga  //  be tomota aba numisa ivatulukoidi  
\p
\v 15 Bogina kuyagoi bego tonumisa badabadaidi Esiya goi situgavilegu nakae sikalavegu. Yaidi goi adi taiyuwo moe Pugelo be Eramogene.  
\v 16 Ago Onesiporo geya iomaemaeta yau guna kaiyaka deri goi pasina, go sem tuta liliuna yawoigu ilisilisi. Tauna guna kawanoi ida Tomoya yaina bego Onesiporoyana mana bodayauwo inuwokapisiyedi.  
\v 17 Moitamo ona geya imaemaeta, go sem tutayana \w Roma\w* goi ikaaiyaka, mana poisógana iluusalegu, e ibabanegu.  
\v 18 Ina vaita gagaina yaigu Epeso goi bogina kuyagoidoko. Guna kawanoi ida Tomoya yaina bego itagona takínona ana maliyalina goi Onesiporoyana nuwokapisi ibabane \w Yauwe\w* yaina.   
\c 2  
\p
\v 1 E natugu, kutaagonēm bei im \w spwagógana\w* \w Guyau\w* \w Yeisu\w* taiyao pasina Yaubada ina kanuwóiya ikitogagem.  
\v 2 Boi vatulúkwana tomota badabadaidi matadi goi avatuulukoim, e moe vatulukwanayadi goi tomota \w aba numisa\w* kuvatuulukōidi bei itoboinedi ituli ta tomota sivatulukoidi.   
\s1 Timoti itoboine gedageda goi itogaga  
\p
\v 3 Guna mou goi kusiukōigu nakae kom \w Guyau\w* Yeisu ina tovayaviya dedevim itoboinem.  
\v 4 Geya tayaamo tovayaviya bei asa sinapuna itagone isuveyali, go sem yaviya ina paisewa iguinuwedoko bego ana tolovina ivauyaone. Kom nakae geya tayaamo kaga kuutagōne Guyau Yeisu ina paisewa goi isuveeyalim.   
\p
\v 5 E tovavalákuna nakae, neta vavalákuna ana lovina geya ikabikaonedita, ana vaiwówana geya ibabaneyeta. Kom nakae kaga liliuna goi Guyau Yeisu kukabiikaōne bego am vaiwówana kubabane.  
\v 6 Ava tobágula neta ipoisógana, itoboine keuwokumgo igimikabi. Kom nakae kupoisōgana bei am vaiwówana kubabane.  
\v 7 Ame guna livalayadi manudi kunuwolelēu. Neta nakae kuguuinuwe, ida Tomoya nanamsa kaga liliuna manuna bei ivinim.   
\p
\v 8 Devida tubuna Yeisu \w Guyau\w* kunuwookavāte. Tauyana boi tokámasa yaidi goi itaoyamna. Moe nakae \w Vala Dedevina\w* yau ataalavaite.  
\v 9 Valayana pasina guna mou abaabanedi, e seni goi siyowóigu nakae neta yau tokapipilova tayamo go, geya vatau tayaamo itoboine Yaubada ina livala ana talavaita seni goi iyowo.  
\v 10 Moe pasina mouyadi liliudi yaidi goi amesayágana Yaubada ina kinavayao manudi bego kidi nakae adi yava sibabane. Adi yavayana moe idi spwagógana Guyau Yeisu taiyao pasina Yaubada ana \w káeyana\w* tomoeeyalina vata goi bei sikaaiyaka.  
\v 11 Livala ame livala aba numisa:\x † \xo 2:11 \xt 1Ti 1:15, 3:1, 4:9; Tai 3:8.\x*   
\b  
\qc Neta bogina Guyau taiyao takámasa,  
\qc e nava bei taiyao maa yawoida.  
\qc
\v 12 Neta ida mou goi tamesayágana,   
\qc e nava bei Guyauyana taiyao takalibúbuna.  
\qc Neta Tauyana talawoiwoiye,  
\qc e nava bei ilawoiwoiyeda.\x † \xo 2:12 \xt Mad 10:33; Luk 12:9.\x*  
\qc
\v 13 Neta kita geya aba numisa,   
\qc e Tauyana nava aba numisa.  
\qc Moitamo. Tauyana geya itoboineyeta  
\qc toinina ina sinapu ilawoiwoiye.  
\s1 Timoti itoboine senao yaidi  //  ivilivili Paulo ina vatulúkwana manuna  
\p
\v 14 Moe dogoiyadi tuta liliuna im tomotao yaidi kukavilevilēdi go, Yaubada matana goi kukatuliiwolēdi taabu sikaumaakimāki livala adi yagoina manudi. Livalayadi geya basabasaidimo be nakae totaiyakeka sigoyainedi.  
\v 15 Kupooisōgana bei kuvagitakōim Yaubada yaina nakae kom ina toguinuwa tayamo moitamo. Nakae Yaubada ana \w Nanamsa Mooitamoina\w* kuvatulukwana dōkana, e im guinuwa pasina Tauyana matana goi om bei geya imaemaeta.  
\v 16 E da poyapoya idi vatulúkwana kuvakiilisīdi. Vatulukwanayadi bobwara besobeso baailidi nakae, tauna geya basabasaidimo Yaubada manuna. Neta bobwarayadi tasabokuuliyedi, e Yaubada nuwona takaolilive  
\v 17 be nakae idi bobwarayadi sitagayagaya tomota sigoyainedi nakae potu neta iwokani iwodedede. Koroto adi taiyuwo amo nakae moe Aimeniyo be Pileto.  
\v 18 Tauyadi tonumisa maniyedi idi numisa sikaigoyaidi unana Yaubada ana Nanamsa Mooitamoina goi bogina sisuláiga go, idi sulaigayana goi kadi,  
\pm ‘Tokámasa idi taoyamna ana tuta bogina isowóduwo.’   
\m
\v 19 Ago Yaubada ina bodao dako kasakasaina nakae bogina sitaoyaakavata. Dakoyana goi gínina ame nakae ikaaiyaka kana,  
\pm ‘\w Yauwe\w* toinina ina bodao bogina iyaagoidi.’\x †a \xo 2:19 \xt Yoy 16:5.\x*  
\m Aiyuwoina kana,  
\pm ‘Avatauwa neta Yauwe yaina sisaakululu goyo situgavīle.’\x †b \xo 2:19 \xt Yoy 16:26; Ais 26:13.\x*   
\p
\v 20 E toesaesa ina vada goi noko \w goura\w* be noko \w siriba\w* maniyedi sikaaiyaka go, noko maniyedi alova be vaega nakae sikaaiyaka. Nokoyadi goura be siriba moe aba wowoina ogaoga adi noko. Ago nokoyadi alova be vaega moe aba omayamaya nakae noko besobeso.  
\v 21 Tauna avatauwa kita neta noko besobeso nakae takimaavadeda, e kita noko dedevida nakae, kimaasabaida be ma basabasaida ida Tomoya yaina be nakae bogina katubaayasida guinuwa dedevidi liliudi manudi.   
\p
\v 22 E tubuwau idi yalagau kusiiyaēdi go, kibóbwata, numisa, \w matakoi\w* be tuboina kusokikiinakōidi tomota maa katedi maavadaidi ida Tomoya yaina sisaakululu taiyao.  
\v 23 E aumakimaki besobeso be aumakimaki kudukudupatudi kuvakiilisīdi unana kuyagoi aumakimakiyadi moe vakaleya idi kaba sowóduwo.  
\v 24 E kita ida Tomoya ina \w pakonayao|lemma="Paakonina"\w* aumakimaki geya itoboinedeta, go sem itoboine takubunuwa, yoiyada tavatulúkwana, tomota idi goyo yaidi goi tamesayágana,  
\v 25 be nakae manukaida ida kaleyayao takitototoidi. Nakona Yaubada bei ivaitedi situgavila, e Yaubada ana Nanamsa Mooitamoina siyagoi  
\v 26 be nakae ma nukotodi itoboinedi \w Totagíwaya\w* ina síkwana goi sisiya. Tauyadi boi bogina iyowóidi bego ina nuwonúwana siguuinuwe.   
\c 3  
\s1 Tomota idi sinapu tuta ana kaba lukavava goi  
\p
\v 1 E ame kunuwookavāte: Tuta ana kaba lukavava goi tuta moumoudi bei sisowóduwo.  
\v 2 Moitamo. Amo tutayana tomota idi sinapu bei ame nakae: Toinidi simatakooiyedi, esaesa silokonako, gaagasidi, nuwaatuedi, digopopooisidi, tamadiyao be sinadiyao sikapipilavedi, geya idi kauyagumo, kaga liliuna kimaasabaina Yaubada yaina sikibaibailidi,  
\v 3 geya idi matakoimo, geya idi nuwotawanamo, tagiiwoidi, goyo goi geya sitototo geya, sasasaidi woiwoi nakae, sinapu dedevina siikatae,  
\v 4 tonuwotulu, toguinuwa owáowana, toinidi sikilaagasidi, toinidi idi uyáwana manuna nukotodi iyoi go, Yaubada geya.  
\v 5 Adi kaigigita yábana sinapuna ana toguinuwao go, Yaubada ina togaga atedi adi kaigavila manuna sikatae. Tauna nakae tomotayadi idi sinapu tuta ana kaba lukavava goi. Amo tauyadi kuvakiilisīdi.  
\v 6 Moitamo. Amo tomotayadi yaidi goi koroto maniyedi idi katunuwanuwa goi vada maniyedi sisiu itoboinedi bei tokaiyaka vevina adi polayoomanaidi sikatutaoidi. Vevinayadi idi goyo gagaina itomatedi go, idi yalagau ibiudi.  
\v 7 Tuta liliuna vatulúkwana ituli ituli sikabikabi go, geya itoboinedita bei Yaubada ana \w Nanamsa Mooitamoina\w* sibabane.  
\v 8 E amo korotoyadi Yaubada ana Nanamsa Mooitamoina sivaakaleye nakae boi Yanisi be Yambaresi Mosese sivakaleye.\x † \xo 3:8 \xt Tat 7:10-12,20-22, 8:6-7,17-19.\x* Amo korotoyadi nakae, nuwodi viviyuwoidi nakae kidi tonumisa polapola geya basabasaidimo.  
\v 9 Ana kaigigita ame tuta Nanamsa Moitamoinayana itoboinedi sivaakaleye go, geya itoboinedita idi pola goi tomota badabadaidi bei sisobaledi. Moitamo. Idi nuwopatu tomota liliudi bei sikinane nakae tomota boi nimatu Yanisi be Yambaresi idi nuwopatu sikinanedi.   
\s1 Timoti Paulo ina vatulúkwana ikaisakiyedi  
\p
\v 10 E kom sem yawoigu bogina kugite. Guna vatulúkwana, guna sinapu, guna nuwonúwana, guna numisa, guna mesayágana, guna \w matakoi\w*, guna togaga bogina kukaisakiyedi.  
\v 11 Guna mou be guna gedageda Antiyoki goi\x †a \xo 3:11 \xt Gui 13:14-52.\x* be Ikoniyam goi\x †b \xo 3:11 \xt Gui 1:1-7.\x* be Lustira goi\x †c \xo 3:11 \xt Gui 14:8-20.\x* abaabanedi nakae bogina kuyaagoidi. Mouyadi giyaidi kaeda go, atogaga. Ago mouyadi liliudi goi ida Tomoya iiyavegu.  
\v 12 E avatauwa kita neta latuwoda ida \w spwagógana\w* \w Guyau\w* \w Yeisu\w* taiyao goi taaketoiya nakae Yaubada iuuyaone, e tomota goi mou bei tababane.  
\v 13 E kidi go toogoyoidi o tadigo kada, ‘Tonumisa polapola’ goyo siguuinuwedi go, idi goyoyadi tuwaina sivaituwedi ame nakae: Enao dedevina goi tomota sivasulaigidi go, togoyoidiyadi nakae ituli ta tomota sivasulaigidi.   
\p
\v 14 E kom sem vatulúkwana boi sivatuulukoim be nakae kunumisedi, e vatulukwanayadi goi kukaaiyāka unana am tovatulukwanayao bogina kuyaagoidi  
\v 15 be nakae am tuta gómana goi go, ima ame tuta Gínina Kimaasabaidi bogina kuyagoidi. Gininayadi goi itoboinem nanamsa am yava manuna kubabane. Ada yavayana moe ida numisa \w Guyau\w* Yeisu goi pasina.  
\v 16 \w Gínina Kimaasabaidi|lemma="Gínina Kimaasabaina"\w* liliudi unadi moe Yaubada Balomaina. Tuwo Gininayadi ma basabasaidi. Nakae sivatulukoida, ida goyo sikamamaetalidi, sikitototoida be nakae kibóbwata manuna sikatubayasida  
\v 17 bego kita Yaubada ina tomotao bogina yoiyada unana bogina sikatubayasida guinuwa dedevidi liliudi manudi.   
\c 4  
\s1 Timoti itoboine Yaubada ina vala italavaite  
\p
\v 1 Yaubada matana goi be nakae \w Guyau\w* \w Yeisu\w*, Tauyana kidi tokámasa nakae kita maa yawoida ada totakínona, matana goi nakae ina sowóduwo ana tuta pasina be nakae ina kalibúbuna pasina akatuliwolem  
\v 2 Yaubada ina livala kutaalavāite mam katubayasi tuta ana toboine goi o nakona tuta geya ana toboinemo goi. Aiyuwoina mam mesayágana gagaina be mam vatulúkwana tomota idi goyo kukamamaetalīdi be tomota kubowōidi be kukipaiwolēdi.  
\v 3 Moitamo. Tuta tayamo imamaima bei tomota odi ikai vatulúkwana mooitamoina sitaaiyakeke, go sem unana latuwodi toina vatulúkwana toinidi idi yalagau nakae, e ituli ta tovatulukwanayao siluusaledi bei sitaiyaakekedi unana vatulukwana vau liliudi nuwodi ikabidi siyagoidi.  
\v 4 Yaubada ana \w Nanamsa Mooitamoina\w* bei sivasulaigi go, siketoiya besobeso bei vatulúkwana vatuta nakae sitaiyakekedi.   
\p
\v 5 E kom sem kaga liliuna goi toinim kukabikuunuīm. Mou kubaabanedi im paisewa \w Vala Dedevina\w* pasina goi kuutogāga. Vala Dedevinayana ana totalavaita ana paisewa kuguuinūwe. Kom Yaubada ina topaisewa, tuwo paisewayana boi bogina ivinim kuguuinūwe.   
\p
\v 6 Moitamo yau bogina nakae. Yawoigu akasale Yaubada yaina nakae neta yau vininabeso \w oinena|lemma="Oine"\w* tomota sikaliuulagigu yoguyogu goi sigabu bei mainigu dedevina ituko ina Yaubada inove iuyaone. Tuwo guna talígava bogina ikaponapona.  
\v 7 Guna talavaitayana kotu goi vavalákuna nakae go, vavalakunayana avavalakunedoko nakae bogina alukavave go, madabokina goi yau \w aba numisa\w*.  
\v 8 Tuwaina, guna vaiwówana bogina ikaaiyaka, ida Tomoya, Tauyana Totakínona kiboobosina, bei ivinigu. Vaiwowanayana moe yau kiboobosigu Yaubada matana goi. Ago yau aguta geya iviniguta, go sem avatauwa neta ina sowoduwoyana siyaledoko, e adi vaiwówana bei ivinidi.   
\s1 Paulo latuwona Timoti  //  woilina ina tauyana yaina  
\p
\v 9 Kukokōila bei woilīm kūma.  
\v 10 Geya guna tovaitamo geya. Demasi\x †a \xo 4:10 \xt Kol 4:14; Plm 1:24.\x* kina poyapoya sinapuna nuwona ikobale,\x †b \xo 4:10 \xt 1Iy 2:15.\x* tauna ikalavegu ina Tesalonáika.\x †c \xo 4:10 \xt Gui 17:1,11,13; Pil 4:16.\x* Kina go Keresikesi ina Galetiya.\x †d \xo 4:10 \xt Gui 16:6, 18:23; 1Ko 6:1; Gal 1:2; 1Pi 1:1.\x* Kina go Taito\x †e \xo 4:10 \xt 2Ko 2:13, 7:6,13-14, 8:6,16,23, 12:18; Gal 2:1,3; Tai 1:4.\x* ina Dalimetiya.  
\v 11 Go Luke\x †a \xo 4:11 \xt Kol 4:14; Plm 1:24.\x* kina aneta ikaaiyaka ameko yau taiyao. Tutayana bei kuma, mainao kūna Maki\x †b \xo 4:11 \xt Gui 12:12,25, 13:13, 15:37-39; Kol 4:10; Plm 1:24.\x* kwābi taiyao kōma. Tauyana ma basabasaina yau yaigu paisewa manuna.   
\p
\v 12 E kina go Tukiko\x †a \xo 4:12 \xt Gui 20:4; Epe 6:21-22; Kol 4:7-8; Tai 3:12.\x* bogina aetune ina Epeso.\x †b \xo 4:12 \xt Gui 18:19-21, 18:24—19:41, 20:1,17; 1Ko 16:8; 1Ti 1:3; Nuw 1:11, 2:1.\x* Tauna yau geya guna tovaitamo geya.   
\p
\v 13 Guna tanigo be nakae guna buki boi Tarowasi goi\x † \xo 4:13 \xt Gui 16:8,11, 20:5-6; 2Ko 2:12.\x* Karaposi yaina akalavedi, tuwo tutayana kuma, amo konaguyadi kukabīdi kumēdi. Ego guna bukiyadi yaidi goi latuwogu toina guna buki moe sowogu kumedi.\f ‡ \fr 4:13 \fk Buki moe sowogu\ft : Ame bukiyadi yoguyogu sakavaidi goi siwodugudi, tauna adi maisa gagaina be nakae bukiyadi goi tomota idi nuwonúwana gagaidi siginidi unana be sikaaiyaka tala maanawena.\f*\fig Paulo deri sinaena go, ina buki bilibilidi Timoti imedi bei Paulo ivini|src="cn02087B.tif" size="col" ref="4:13" \fig*   
\p
\v 14 Kina go kainum ana topaisewa Alekisanda\x †a \xo 4:14 \xt 1Ti 1:20.\x* ina goyo yaigu moe gagaina. Go nakonakae tauyana ina guinuwa, e nava bei ida Tomoya ikatumapu.\x †b \xo 4:14 \xt Sam 28:4, 62:12, 109:20; Rom 2:6, 12:19.\x*  
\v 15 Kom nakae tauyana kuvakilīsi. Tauyana kai ima vatulúkwana ivakaleyemakimakiye.   
\s1 Tomoya ina vaita Paulo ina kotu goi  
\p
\v 16 Boi guna tasígina vakuumgoina kotu goi geya vatau tayaamo ima ivapisiyegu, go sem madabokidikova sikalavegu. Guna kawanoi Yaubada yaina bego tauyadi idi kalovayana geya inuwokavateyeta.  
\v 17 E kina go ida Tomoyayana iitáoya yau taiyao, ikitogagegu bego Vala Dedevina atalavaitesave, e \w Totuyoyowo\w* madabokidi bogina siinove. Tuwo Tomoyayana vailai goi iyavegu nakae neta \w laiyoni\w* tobuna goi iyavegu.  
\v 18 Ida Tomoyayana guinuwa goyogoyoidi tamo tamo yaidi goi bei italigeigu be iyavegu imegu \w ina kalibúbuna|lemma="Yaubada ina kalibúbuna"\w* yábana goi iyatoigu. Tauyana aba taimámina ame tuta be nakae tuta simamaima!  
\pr E nakae!   
\s1 Paulo ina vaduduwo  
\p
\v 19 Pirisika be Akuila\x †a \xo 4:19 \xt Gui 18:2,18,26; Rom 16:3; 1Ko 16:19.\x* be Onesiporo\x †b \xo 4:19 \xt 2Ti 1:16-17.\x* mana bodayauwo kulatuwokōidi guna yabobona yaidi.  
\v 20 Kina go Erasto\x †a \xo 4:20 \xt Gui 19:22; Rom 16:23.\x* Korinta goi\x †b \xo 4:20 \xt Gui 18:1, 19:1.\x* ikaaiyaka. E kina go Taropimo\x †c \xo 4:20 \xt Gui 20:4, 21:29.\x* ikatówana, tauna Mileto goi\x †d \xo 4:20 \xt Gui 20:15,17.\x* akalave ikaaiyaka.  
\v 21 Kukokōila bego tula ana tuta nava geya isowoduwoita, e kūma.  
\p Ebulosi, Pudesi, Linosi, Kilaudiya be sedao liliudi ameko goi idi yabobona yaim.   
\p
\v 22 Ida Tomoya kom balomaim taiyao! Anuwóiya bei ivinim!  
\b  
\cls \sig Yau Paulo \sig*