\id REV - Golin NT [gvf] -Papua New Guinea 1980 (web version -2013) 
\h Rebelesen 
\toc1 Kirisito main di maribe ere Yon tongure yalini bile tongwa 
\toc2 Rebelesen 
\toc3 Reb 
\mt1 Kirisito main di maribe ere Yon tongure yalini bile tongwa  
\c 1  
\p
\v 1 Ena goma main taw aal kule dungwa paangwa, God i maribe ere Yesu Kirisito tongure, yalini ainere di Yon tenama dire, angel ta nusi eremue. Ka ta aal kule paangwa di tongwa iwe, kalkan taw gin taran u pilau dinangwa, God nil konagi ibal pirama dire, di tomue.  
\v 2 Di tongure na Yon milia, ena kalkan para kaniga mere, di gawa diwe. God ka dungwa, te ka main kawen dungwa, Yesu Kirisito di gawa dungwa, na para muru di gawa diwe.  
\v 3 Eme kalkan u maribe nangwa malia ka di tega i, ibal kerangwa, te ibal pire wiina erangwa, ibalin kobi miriin painamue. Miriin painangwa main iwe, u maribe nangwa kaun u maala omue.   
\s1 Yon ka minin ganin bile ka main ibal taminin anan kole muru kole sutan tongwa  
\p
\v 4-5 Na Yon milere Esia gariba gul ka main ibal taminin anan kole muru kole sutan milinga iray, pire na ka minin ganin bile i ibal kobe i teiwe.  
\p God kwi milungwal milungwa, te mile painangwal painangwa, te yalini eme unangwa iru milungure, te God Iban anan kole muru kole sutan yalini kenin ere ke milungwa bol guman mina milungure, te Yesu Kirisito God ka dungwa pire wiina ere ka di gawa dire ibal gulere alungwa, yalini goma kawn kule ale mile, mile painangwal painangwa gariba gul yal bil kobe yalini yalin kobi yal singaba milungure, yal sutakobe iray kal wai ere kenin wai ere i tere, te den miriin yaa ime si i tenamue.  
\p Yalini den miriin na ibal kobe na tere, te na kal digan ere taalime erebinga pirin gule ere na terala dire, yalini inin mayan inin garu di na ibal kobe na tomue.  
\v 6 Na tere, te yalini Nen God gawliman milabina dire, te God ka main kenin erungwa ibal milabina dire, kal main iru ere na tomia, ena deminin si yalini te milabingal milabingire, te kenin ere na ke mile milangwal milamue. I kawen.   
\p
\v 7 I kano. Yalini kamin kawa mina ime unamue. Unangure ibal para omilin kanamue. Yal kobe yalini el sungwa, yalin kobi yalini para kanamue. Yalini ka kol ere gariba ibal para tenangwa, ena ibalin kobi kay mun bile yaare miinamue. Main iru u maribe nangwa, i kawen.   
\p
\v 8 God Singaba ka iru dungwa paangwa, “Kalkan para muru main na milere, te milungwal milungwa yal na milere, te mile painangwal painangwa yal na para milere, te yal ta eme unangwa na yal i para milere, te kalkan kobe para kenin ere ke mile yobilaan kirara wen bile miliwa.”   
\s1 Kirisito u maribe pi Yon tongwa  
\p
\v 9 Ena i ibal kobe ka main enin ta, na Yon miliwe. I na bole Yesu Kirisito gawliman milebilga, gain giil bole para pire milere, te yalini kenin ere ke milungwa suna bole milere, te ka main aa gi di pire milabingal milabinga bole milere, na ibal kobe iru milebilwe. God ka dungwa na kere di maribe erere, Yesu ka main kawen dungwa di gawa diga, ena ibal na nusi mena erere, “Pi pirin nil suna gariba ai mege kaan Patmos milo,” di na tongure, na u miliwe.  
\v 10 Sare bil ta God Iban na denan miranan suna paire niminin mile na tongure, na munan kol gala bil dungwa, ibal bu dungwa mere dungwa, piriwe.  
\v 11 Dungwa iray ka iru di na tongwa, “Kalkan para kananga meri ka minin ganin piapa mina bilere, Esia gariba gul ka main ibal taminin anan kole muru kole sutan nusi ere ibalin kobi to. Ibalin kobi milungwa ain iwe, Epesas milungure, te Simena milungure, te Pegamam milungure, te Tayataira milungure, te Sadis milungure, te Piladelpia milungure, te Eleodisia milungure, ain iru milemua.”   
\p
\v 12 Ka iru di na tongure pirere, ka di na tongwa yal kanala dire, na kiruul sire enderin derin anan kole muru kole sutan kaniwe. Enderin derin iray kobile gol ere yongwa kanere,  
\v 13 kalin kobi baan suna i u ibal ongwa yal milungwa mere, yal ta iru milungwa, para kaniwe. Yalini galsuna arawai sigi dungwa pi kawn mawan ongure, kin dongwa kobile gol kin dongwa kaniwe.  
\v 14 Bolima siipe siipe igin suna ali pege wen dungwa mere, yalini gibiliigin iru pege wen dimue. Enderin bawl sungwa mere, yalini omilin iru naabile aw di dimue.  
\v 15 Ain yobilagi gale naabile aw dungwa mere, yalini kawn mina iru naabilemue. Nil yaare teli bilkaw dungwa mere, yalini ka dungwa naan iru piriwe.  
\v 16 Yalini aan wen kol kulmama anan kole muru kole sutan aa tongure, te di kuba pera kole kole para algane nongwa, yalini giran ali ere mena u dimue. Are bil dere naabile aw dungwa mere, yalini guman mina iru aw di dimue.   
\p
\v 17 Ena na yalini kaniga kaun, na yalini kawn mina yaa paire, ibal gulungwa mere kirara yaa paiwe. Yaa paiba yalini aan wen kol duru dire aa taw si na tere, ka iru di na tongwa, “I kuril ta pirekio. Kamin kaya wen kalkan para muru na kawn kule ere yere, te eme kalkan para muru wei sinangwa, kobaan na miliwa.  
\v 18 Kwi imo mile painangwa yal, na miliwa. Goma na guliiba malia na kwi miliga, kwi imo mile pairalgal pairalwa. Ibal gulungwa te ibal gulungwa ain kana giran ki milin na kenin ere ke miliwa.  
\v 19 Main iru paamia, ena kalkan maliaga kaninga, te eme kalkan u maribe nangure kananga, para ka minin ganin bilo.  
\v 20 Kulmama anan kole muru kole sutan na anan wen kol aa tega, te enderin derin kobile gol ere yongwa anan kole muru kole sutan de dungwa, kalin sui iray main aal kule paamba, main di maribe ere i terala piro. Kulmama anan kole muru kole sutan iwe, ka main ibal taminin anan kole muru kole sutan milungwa, angel kobe anan kole muru kole sutan ibal taminin taran taran kobi, kenin ere milamua. Te enderin derin kan diga iwe, ka main ibal taminin anan kole muru kole sutan milemua.”   
\c 2  
\s1 Ka di Epesas ai ka main ibal taminin tongwa  
\p
\v 1 Ka dire ainere iru dungwa, “Ka ta dirala i ka minin ganin bile Epesas ka main ibal taminin to.  
\p “Malia ka diga yal iwe, na kulmama anan kole muru kole sutan anan wen kol aa tere, te enderin derin anan kole muru kole sutan ka main ibal taminin milungwa suna ware mile miliwa.  
\v 2 I mile pai eringa main, na i kane piseriwa. I konagi nega di erere, te gaynin giil pire i tongwa, niminin mile ale milinga, para kaniwa. Yal kobe kal ki ere milungwa, i ibal kobe yalin kobi nigi de kaninga, i na para piriwa. Yal taw kobe mile, ‘God nusi erungwa ongwa yal, Aposel, na miliwa,’ dire i ibal kobe yalin kobi suan i kanere yal iru ta milekungwa kanere, kakiibi dungwa pirinwa.  
\v 3 Gaynin giil pire i tongwa, i ale niminin mile milere, te ibal kobe taalime ere i tomba, na guunan kanan pire yobilaan bile ka main pire gogo ere tekinwa.  
\v 4 Kal iru ere milinba, i goma pire gi di na tenga kaun, i denin miriin na tenga mere, malia ama iru na tekinwa.  
\v 5 Goma mile pai wai ere milinga iray pisere, malia u digan enga, i nomanin si piro. Si piranga kal digan i pisere nomanin suna si kiruul sire goma mile pai wai eringa mere, kwi ainere ero. I iru ta erekinanga, ena i enderin derin ai i ta dekenana dire, kal iru ere i teralwa.  
\v 6 I kal ta ama eringa wai paangwa main i piro. Nikolas gawliman kobe kal ki erungwa, na den ki ye ibalin kobe tega mere, i para den ki ye tenwa.   
\p
\v 7 “God Iban ka di ka main ibal taminin ta ta para tongure, i kiranin kulina, ena ere gule piro.  
\p “Gariba kal pirungwa maangure manaa di tere ka main pire gi di milangwa, ena kwi milungwa eri ta God kamin ai wai suna dungwa, ibalin kobi milin i nere mile painangwal painangwa nenama dire, na ‘Para no,’ di teralwa.”   
\s1 Ka di Simena ai ka main ibal taminin tongwa  
\p
\v 8 “Ena ka ta dirala, i ka minin ganin bile Simena ka main ibal taminin to.  
\p “Ka pore di i tega i, yal ta kamin kaya wen kalkan para muru kawn kule ere yere, te eme kalkan para muru wei sinama di erere, te gulere alungwa yal i, na mile ka pore di i teiwa.  
\v 9 Taalime obin dongwa aw si waringa kanere, te i kalkan aa te nekinga para kaniiba, God kal wai ere i tongure i kalkan binanbile aa te nongwa ibal mere milinwa. Ibal taw, ‘Na Yuda ibal miliwa,’ dimba, kakiibi dire iru ta milekire, gain ka si i tongwa kaniwa. Ibalin kobi Satan ka main ibal taminin milemua.  
\v 10 Kaun tawle mile pare, gaynin giil piranga, i kuril ta pirekio. I ibal taw ka main pire gi di milan mo, milekenan mo, sua i kanala dire, Satan i kanin sinamua. Sirere are kaun anan kole kole muru tawle gaynin giil piranwa. Na ka main aa gi di pire na te mile gulanga, ena i mile painangal painana dire, na kal iru ere i teralwa.   
\p
\v 11 “God Iban ka di ka main ibal taminin ta ta para tongure, i kiranin kulina, ena ere gule piro.  
\p “Gariba kal piringa maangure manaa di tere ka main pire gi di milanga, ena ibal kirara gule wei sire enderin gaul ai ta pekenanwa.”   
\s1 Ka di Pegamam ai ka main ibal taminin tongwa  
\p
\v 12 “Ena na ka ta dirala, i ka minin ganin bile Pegamam ka main ibal taminin to.  
\p “Ka pore di i tega i di kuba pera kole kole para algane nongwa aa tongwa yal i, na mile ka pore di i teiwa.  
\v 13 Satan kenin ere ke milungwa ain baan suna iray, i ibal kobe ki pai milinga kaniwa. Na ka main i aa gi di pire milere, te na ka main di gawa di milungwa yal, kaan Antipas, Satan ki pai milungwa ain ibal kobe yalini si gulungwa kaun, i ibal kobe pire gi di na tenga piserekire, mun kal waa na tekinwa.  
\v 14 Kal iru ere milinba, i kalkan taw eringa na nigi de pire i tega, kalin eringai main piro. Kabe si gale galbale kobile tongwa, Isirel ibal kabe iray nenama dire, te Isirel ibal gi abal kane daan gule kunibe inama dire, Beleke kal iru bawle Isirel ibal tongwa, Belam main iru nil si Beleke tomua. Nil si tongwa mere iray, ibal taw i milinga suna ka main iray duulin bile piremua.  
\v 15 Aa gi di pirungwa mere ibal taw i milinga suna mile, Nikolas gawliman kobe main ki erungwa nil si ibal tongwa, aa gi di piremua.  
\v 16 Kal iru ere milinga, ena kal digan i pisere nomanin suna si kiruul so. Si kiruul ta sekenanga, ena na gin taran i milinga gul ure di kuba pera na giranan ali ere mena ungwa, di iray aa tere ibalin kobi bole kura bilalwa.   
\p
\v 17 “God Iban ka di ka main ibal taminin ta ta para tongure, i kiranin kulina, ena ere gule piro.  
\p “Gariba kal pirungwa maangure manaa di tere ka main pire gi di milangwa, ena ibalin kobi kamin ai komina aal kule dungwa, i maribe ere nenamua. Nenangure te kobile pege ta ibalin kobi para teralwa. Kobile iray bolimina kaan ta kwi bile teralgire, ibal taw ama kaan i main ta pirekenamba, inangwa yal i tawle piramua.”   
\s1 Ka di Tayataira ai ka main ibal taminin tongwa  
\p
\v 18 “Ena na ka ta dirala i ka minin ganin bile Tayataira ka main ibal taminin to.  
\p “Na God Wan mile ka pore di tega i, enderin bawl sungwa mere, yal ta iru omilin naabile aw dungure milere, te ain yobilagi gale naabile aw dungwa mere, yal i kawn mina iru naabile aw dungwa, yal iray na mile ka pore di i teiwa.  
\v 19 I denin miriin ibal tere, te ka main aa gi di pire milere, te ka main konagi ere milere, te gaynin giil piringa pire unin si milere, kal iru ere milinga na kaniwa. Te goma kal wai erinba, malia i kal wai maa kora kule eringa para na i kaniwa.  
\v 20 Kaniiba i kal ta eringa na nigi de pire i tega, kal i eringa i, i piro. Abal ta kaan Yesebel mile, ‘God ka kebe abal miliwa,’ dire kakiibi dimba, i abalini kane gogo ere tenwa. Na ka main nil konagi yal kobe gi abal kane daan gule kunibe inama dire, te kabe si gale galbale kobile tongwa, na nil konagi ibal kabe iray nenama dire, abalini ibalin kobi ka nil iru si tere kiraan sire kela kule di tomua.  
\v 21 Abalini kal digan i erungwa, kwi nomanin suna si kiruul sinama dire, na kamin kaun taw kane gogo ere miliiba, abal i kal digan erungwa i main main piserala pirekire nomanin si kiruul si pirekemua.  
\v 22 Ta pirekemia, ena nibil bil na pilau di abalini terere, te yal kobe abalini bole kal digan erungwa meri erungwa, nomanin si kiruul ta sekenangwa, ena gain giil bil pire yalin kobi teralwa.  
\v 23 Abalini gawl kule yongwa kobe, na ibalin kobi si gulalwa. Si gulalga ena ibal den miriin suna te nomanin suna si pirungwa mere na piria, ka main ibal taminin ta ta, para iru kanamua. Te i ibal kobe mile pai eringa mere, na tobe maan iru ere i teralwa.   
\p
\v 24 “Dimba i Tayataira ibal taw milinga, ka digan nil si ibal tongwa main, i aa gi di ta pire warekinwa. ‘Satan mile pai erungwa main i ta pirekinwa,’ dire kal ki erungwa ibal ka iru di i tomua. Na ka di i terala piro. Ka obin dongwa di i tega pire milinga, na taw ama ta ere i tekeralwa.  
\v 25 Dimba na ka main aa gi di piringa pire mili nanga nanga, na i milinga gul u maribe pi milalga kaun para pire gi di milo.  
\v 26 Gariba kal pirungwa maangure manaa di tere ka main pire gi di mile, te na ka diga mere pire wiina ere milangwa, ena ibalin kobe gariba bilin ta ta para kenin ere ke milama dire, yobilaan pai ibalin kobi teralwa.  
\v 27 Na Abe yobilaan pai na tongwa mere yobilaan pai ibalin kobi teralgire, gariba muine kuba aa tere si bugu dungwa mere, ibalin kobi iru ain yobilagi kuba aa tere gariba bilin ta ta para kenin ere ke milamua.  
\v 28 Te kulmama ta kaan Mebil, kwimile imo de dungwa, na kulmama iray ibalin kobi teralgire aw di tenamua.   
\p
\v 29 “God Iban ka di ka main ibal taminin ta ta para tongure, i kiranin kulina, ena ere gule piro.”   
\c 3  
\s1 Ka di Sadis ai ka main ibal taminin tongwa  
\p
\v 1 “Ena na ka ta dirala i ka minin ganin bile Sadis ka main ibal taminin to.  
\p “Ka pore di i tega i, yal ta God Iban anan kole muru kole sutan bole milere, te kulmama anan kole muru kole sutan aa tongwa yal, yal iray na mile ka pore di i teiwa. I ibal kobe kal eringa na kanere, te ibal kobe mile, ‘Sadis ka main ibal taminin sigare kule wai milemua,’ dimba ibal gule daalin sungwa mere, i ibal kobe nomanin suna iru gule daalin simua.  
\v 2 Iru mile pai eringa pisere, i ka main pire gi dinga main iru tawle imo dimia, pi nima nama dire, konagi nega di ero. Ta erekinanga, main piringa iray kaya wei sinamua. God maabin mina kalkan eringa, kirara muru ta ere gawa dikinga na i kaniwa.  
\v 3 Ka main nil si i tongure piringa aa gi di pire, kal ki eringa pisere kwi nomanin suna si kiruul so. Si kiruul ta sekenanga, ena komina kunibe nongwa yal ungwa mere, na i milinga gul iru uralga kaun i ta pire pol sekenanwa.  
\v 4 Dimba galsuna debigi yongwa mere, i Sadis ibal taw nomanin suna debigi iru ta yekinwa. Yekinga wai paimia, ena i gal pege sigi dingire, na uralga bole pena gale warabilwa.  
\v 5 Gariba kal pirungwa maangure manaa di tere ka main pire gi di milangwa, ena gal pege wai kan diga i sigi di teralwa. Ibal na bole mile painangwal painangwa, ibalin kobi kaan buku mina biliga ta se erekiralwa. Na Abe te yalini angel kobe guman mina, ‘Ibalin kobi na gawlimanan milemua,’ dire di gawa di teralwa.   
\p
\v 6 “God Iban ka di ka main ibal taminin ta ta para tongure, i kiranin kulina, ena ere gule piro.”   
\s1 Ka di Piladelpia ai ka main ibal taminin tongwa  
\p
\v 7 “Ena na ka ta dirala i ka minin ganin bile Piladelpia ka main ibal taminin to.  
\p “Ka pore di i tega i, yal ta kal dime di ere dorimil mile, kirara kawen dungwa yal iray, na miliwa. Debiti ain, God kenin ere ke milungwa ain, kana giran ki na aa teiwa. Ibal ta ala nama dire, na kol yawle teiwa. Te yal ta kwi si pere dinangwa ta milekemua. Te ibal ta ala pekenama dire, na kol yaaliwa. Te yal ta ibal i yawle tenangwa ta milekemua.  
\v 8 I mile pai eringa na i kaniwa. I ka main pire gi dinga, i niminin ta milekinba, na ka diga pire wiina erere, te na guunan kanan ka di kile di mena ere na tekinwa. I kol wai ta pire ka main konagi erana dire, kol ta bala di i tegire, yal ta kol i si pere ta di i tekenangwa paamua.  
\v 9 Ka di i terala ere gule piro. Ibal taw i milinga suna Satan gawliman mile, ‘Yuda ibal miliwa,’ dimba kakiibi dungwa, ena ibalin kobi iwe. Ibalin kobi ure i kawnin mina yaa i kwi bile deminin si i tenama dire, na bale nusi ibalin kobi teralwa. Teralgire na denan miranan i tega, ibalin kobi kanamua.  
\v 10 Ka main aa gi di piringa, ‘Yobilaan bile niminin milo,’ di tega mere eringa, ena gariba gul ibal muru gain giil pirungwa kaun u maribe nangure, na i ibal kobe kenin ere i te milalga wai milanwa. Ibal para muru sua i kanama dire, kamin kaun iray kawen u maribe namua.  
\v 11 Na gin taran ere ime uralwa. I ainin kamin ai, yal ta pi ta ikinama dire, ka main pire gi dinga, aa gi di pire milo.  
\v 12 Gariba kal pirungwa maangure manaa di tere ka main pire gi di milangwa, ena na Abe God ka main ogu kawligi dungwa mere, ibalin kobi iru mile, God bole si dawle milangwal milamua. Ibalin kobi God gawliman milema di ibal iru pirama dire, na Abe God kaan ibalin kobi gain mina bilalwa. Te Yerusalem ain ta kwi, kamin ai pisere ere ime unangwa, na Abe God ogu ain iray kaan para gain mina bilalwa. Te na kaanan ta kwi ye na tenangure, kaanan iray para ibalin kobi gain mina bilalwa.   
\p
\v 13 “God Iban ka di ka main ibal taminin ta ta para tongure, i kiranin kulina, ena ere gule piro.”   
\s1 Ka di Eleodisia ai ka main ibal taminin tongwa  
\p
\v 14 “Ena na ka ta dirala i ka minin ganin bile Eleodisia ka main ibal taminin to.  
\p “Ka pore di i tega i, yal ta kirara kawen di milere, te God ka dungwa pire wiina ere ka i di gawa direre, te God kalkan ere yongwa komin kanin milere, iru milungwa yal iray na miliwa.  
\v 15 I mile pai eringa, main na kane piseriwa. I konagi nega di erekire, te kirara si nege para ta erekinga kaniwa. Konagi nega di eran mo, kirara si nege eran mo, main ta iru ere milana di piriwa.  
\v 16 I konagi nega di erekire, te kirara si nege para ta erekire nega tawliga di ere milingiraba, na denan suna i milinga mebil suule i mena eralwa.  
\v 17 I ibal kobe mile na kulgal bona te kobile moni binanbile dungure, te kalkan aa te nongwa yal milere, te ‘Kulgal bona taw ama ta waa duukiwa,’ dinba i ibal digan milere, te miriin pire i tongwa paingure milere, te kulgal bona aa te nekungwa mere milere, te omilin gi dungwa mere milere, te yorawan bole milungwa mere milere, i ibal kobe nomanin kama sire iru milinwa.  
\v 18 Iru milina, ena na kile kaman ka di i terala piro. I kalkan aa te nongwa ibal milana dire, na ain yobilagi gol wai dungwa aa te nega i, i gibilin si inana wo. Te i yorawan bole milinga gay ta gulekenana dire, na gal pege aa te nega gibilin si inana wo. Te omilin gi dinga pilaa di kanana dire, na omilin kabe aa te nega gibilin si inana wo.  
\v 19 Na denan miranan ibal tega, ena na ibalin kobi para kan tere na giranan wiina erama dire, kile kaman ka di teiwa. Iru eriga paamia, ena si nege eringa pisere, te kal digan eringa mun kal waa tere, nomanin suna si kiruul so.  
\v 20 Ka di i terala ere gule piro. Kana giran ta si pere dungwa, na mena ale mile si gule di miliwa. Di miliga yal ta na naanan pire kol yawle na tenamia, ena na ere ala pire na yal sui ye nerabilwa.  
\v 21 Gariba kal pirungwa maangure inin manaa di tere ka main pire gi di milangwa, ena na para iru manaa di tere ka main pire gi di milinga, na Abe kenin ere ke milungwa ain binan amin di miliga mere, ibalin kobi, ‘Na kenin ere ke miliga ain binan amin di milo,’ di teralwa.   
\p
\v 22 “God Iban ka di ka main ibal taminin ta ta para tongure, i kiranin kulina, ena ere gule piro.”   
\c 4  
\s1 Kamin mina ana dire deminin si God tongwa  
\p
\v 1 Iru di na tongure pare, na kwi kane yebe ere kamin ai kaana kol yawle erungwa dungwa kaniwe. Goma ka di na tongwa, ibal bu dungwa mere di na tongwa, malia ka kwi iru di na tongwa, “Yon ye, i ere yebe wo. Unangire kalkan eme u maribe nangwa kalin i, i maribe ere i teralwa.”  
\v 2 Dungure gin taran God Iban na denan miranan suna paire niminin mile na tongure, ena kamin ai suna kenin ere ke milungwa bol kanere, te ibal ta bol iray amin di milungwa, na para kaniwe.  
\v 3 Ibal ta i amin di milungwa, kobile sui kaan yasipa te konilian, naabile aw dungwa mere, ibalini iru naabile aw dimue. Ibalini kenin ere ke milungwa bol kole kole wenabe di dungwa iwe, kobile ta kaan emeral, more yere aw dungwa mere, bol iray kamin kaabinin gi dire wenabe di dimue.  
\v 4 God kenin ere ke milungwa bol iray suna dungure, bol dungwa mere yal ta aan kawn muru te yal ta aan milin sui sui wenabe di dimue. Dungure yal singaba yal ta aan kawn muru te yal ta aan milin sui sui bol mina amin di milere, gal pege sigi dire yal bil gibilin gal kobile gol ere yongwa, yalin kobi kaure milemue.  
\v 5 Kenin ere ke milungwa bol suna dire kamin nege erungwa, te teli bilkaw dungwa, te kamin guru dungwa, i maribe eremue. Bol iray guman mina kewa anan kole muru kole sutan de dimue. Kewa dongwa iwe, God Iban anan kole muru kole sutan milemue.  
\v 6 Te bol iray guman mina nil benge ta milungwa mere milemue. Nilniminin gilasi ta kaan kirisital, dungwa mere, nil benge iray iru mere milungure, nil benge main ali aw dungwa kaniwe.  
\p Bol iray kole kole wenabe di dungure, kalkan sui sui milemue. Milungwa mere iwe, omilin binanbile kulere taw guman kol kulere, te taw mun kol kulemue.  
\v 7 Milungwa kalkan kobe ta awi pus bilkaw ele paangwa mere milungure, te ta bolimakau milungwa mere milungure, te ta ibal guman mere kulungwa milungure, te ta sibayaa puru di warungwa mere milemue.  
\v 8 Te kalkan sui sui milungwa, inin inin kain anan kole muru kole taran kulere, te omilin gain mena kol te gain suna ali kirara kulere, te girungwa taangwa para geril di milungwal milemue. Di mile geril iru dungwa,  
\q1 “Yobilaan bilkaw bilungwa yal, Yobilaan Kobaan, God Singaba yalini taran dime dire dorimil milemio. Yalini taran dime dire dorimil milemio. Yalini taran dime dire dorimil milemio. Yalini milungwal milungwa milere, te milangwal milangwa milere, te eme unangwa yal milemio.”   
\m
\v 9 Kalkan sui sui milungwa kobi geril dire deminin si tere, kaan gale yebe ere maki ye tere, bol iray amin di milungwa yal mile painangwal painangwa kal iru ere yalini tomue.  
\v 10 Tongwa kaun iray yal singaba yal ta aan kawn muru te yal ta aan milin sui sui God kawn mina yaa gobin bile mile ana dire deminin si mile painangwal painangwa yal tomue. Yal bil gibilin gal pusi kenin ere ke milungwa bol iray, guman mina ere, ka iru di tongwa,   
\q1
\v 11 “Na Singaba te na Abe God i kalkan para muru ere yengire, te kal iray u maribe nama di piringire, u maribe pi milemua. Iru milemia, ena ibal para muru deminin si i tere, i kaanin gale yebe ere yobilaan pai i tenangwa i para kuunin erinwa.”   
\c 5  
\s1 Buku ta kan paalin si yongwa Yon kanungwa  
\p
\v 1 Na Yon mile kal iru kanere pare, yal ta kenin ere ke milungwa bol amin di milungwa, yalini buku ta aan wen kol aa tongwa kaniwe. Buku iray ka minin ganin ala kol bile, te miina kol para bile yomue. Ibal ta kanekinama dire, kan paalin ginin anan kole muru kole sutan si yomue.  
\v 2 Angel ta niminin wen milungwa, gala bil dungwa kaniwe. Kaniga ka iru dungwa, “Buku ta i, kan paalin si yongwa, ibena kan i pu ere buku pilaa di kanangwa kuunin painame?”  
\v 3 Dimba ibal gariba gul milungwa, te kamin mina milungwa, te gariba gul main ali milungwa, ibal para wen buku iray pilaa di kanangwa, kuunin ta erekinamue.  
\v 4 Ibal ta iru pilaa di kanama dire, waa duumba, ibal ta milekemia, ena na kay mun bile yaare miiwe.  
\v 5 Miiga yal singaba ta ka iru di na tongwa, “I kay ta miikio. I kano. Yuda gawlima kobe gawlima yal ta yobilaan bile niminin wen milungwa, Debiti gawliman ta, singaba bil milungwa, yalini kamin ibal i sutaw eremia, ena kan paalin ginin anan kole muru kole sutan si yongwa kan i, pu ere buku pilaa di kanangwa paamua,” dimue.   
\s1 Yon Bolima Siipe Siipe Gawlin kanungwa  
\p
\v 6 Te Bolima Siipe Siipe Gawlin ta si gulungwa iray ale milungwa na kanigire, kenin ere ke milungwa bol iray kole milungure, te kalkan sui sui milungwa kole milungure, te yal singaba kobe wenabe di milemue. Bolima Siipe Siipe Gawlin iray niminin wen mile gibilin sigin yaan anan kole muru kole sutan kulungure, te omilin anan kole muru kole sutan para kulemue. Te omilin iwe, God Iban anan kole muru kole sutan nusi gariba ulin kole kole para erungwa milemue.  
\v 7 God inin kenin ere ke milungwa bol amin di mile, aan wen kol buku aa te milungure, Bolima Siipe Siipe Gawlin iray pire imue.  
\v 8 Ingwa kaun i, kalkan sui sui milungwa ire, te yal singaba yal ta aan kawn muru te na anan milin sui sui ire, te yalin kobi bole, Bolima Siipe Siipe Gawlin iray kawn yaa gobin bilemue. Yalin kobi inin inin tabale bil ta gita mere dungwa aa tere, te pele bala ain yobilagi gol ere yongwa, ulgu minanin wai sungwa ali yongwa, para aa tomue. Ulgu minanin wai sungwa main iwe, God ibalin gawliman kobe ana di God tongwa mere, ulgu minanin iray di bilemue.  
\v 9 Yalin kobi iru erere geril ta kwi dire ka iru di Bolima Siipe Siipe Gawlin tongwa,  
\q1 “Kan paalin si yongwa buku i ire kan i pu eranga, i para kuunin eranwa. I kuunin eranga main iwe, ibal i si gulungure, ibal kobe gibilin sire God terala dire, inin mayan garu di ibal tenwa. Ibal gibilin singa iwe, gawliman ta ta para muru ibal ta ta gibilin sirere, te ka kowa kowa, more more paangwa para muru ibal ta ta gibilin sirere, te gariba bilin ibal ta ta para muru ibal ta ta gibilin sirere, te kuru kama ibal ta ta para muru ibal ta ta i gibilin sinwa.  
\v 10 Ka main kenin ere milungwa ibal nil konagi ere God tenama dire, i kal iru ere ibalin kobi tenwa. Tengire ibalin kobi gariba gul kenin ere ke milamua.”   
\s1 Kamin ai ibal deminin si Bolima Siipe Siipe Gawlin tongwa  
\p
\v 11 Na kwi kane yebe erere, ena angel kobe tausen binanbile te tausen anan kole kole muru binanwenbile ka dungwa piriwe. Kenin ere ke milungwa bol ire, te kalkan sui sui kwi milungwa kobe ire, te yal singaba kobe ire, te yalin kobi suna milungure, angel kobi iray binan wenabe di suna ere milemue.  
\v 12 Angel kobi iru mile geril bil dire iru dungwa,  
\q1 “Bolima Siipe Siipe Gawlin si gulungwa iwe, yobilaan pai yalini tere, te kalkan para muru tere, te nomanin pai tere, te yobilaan bil bile tere, te kaan gale yebe ere te maki yere deminin si tere, te kal iru ere yalini tenangwa kuunin paimua.”   
\m
\v 13 Kalkan kobe para kamin ai milungwa, te gariba gul milungwa, te gariba main ali ime milungwa, te pirin nil ali milungwa, te kamin te gariba ain kalkan para muru geril bale yere dungwa piriwe. Geril dire ka iru dungwa,  
\q1 “Kenin ere ke milungwa bol amin di milungwa yal te Bolima Siipe Siipe Gawlin yal sui milinga maki yere deminin si tere, kaan ai yebe dire deminin si tere, yobilaan pai tere, kal main iru ere i yal sui te milabingal milabinwa.”   
\m
\v 14 Kalkan sui sui kwi milungwa kobe, ka maan di tere iru dungwa, “I kawen dinwa,” dungure yal singaba kobe yaa gobin bile mile ana dire deminin si yal sui iray tomue.   
\c 6  
\s1 Bolima Siipe Siipe Gawlin, kan paalin anan kole muru kole taran pu erungwa  
\p
\v 1 Iru kanere pare, Bolima Siipe Siipe Gawlin kan paalin si yongwa, ta pu erungwa kaniwe. Kanigire, te kalkan sui sui kwi milungwa ta kamin guru dungwa mere, gala dire, “Wo,” dimue.  
\v 2 Dungure bolima ausi pege ta milungwa kaniwe. Yal ta aw si milere simil ta aa tere, te kaymin i sutaw erungwa yal gibilin gal, gal iru yalini tongure, yalini kaure pire kaymin i sutaw erungwa yal mere pirere, te kaymin ibal i sutaw ere terala dire omue.   
\p
\v 3 Kanigire Bolima Siipe Siipe Gawlin goma kan paalin ta pu erungwa, malia ta ama pu erungwa kaniwe. Kanere kalkan sui sui kwi milungwa ta goma ka dungure, ta ama mile gala dire, “Wo,” dungwa piriwe.  
\v 4 Ka dungure bolima ausi baa ta umue. Ibal bole kura bile inin inin si gulama dire, kamin wai taangwa kaun wei sinangwa, bolima ausi aw si milungwa yal, “Iru erana po,” di tomue. Di tere di kuba pera tomue.   
\p
\v 5 Kanigire Bolima Siipe Siipe Gawlin goma kan paalin sui pu erungwa, malia ta ama pu erungwa kaniwe. Kanigire kalkan sui sui kwi milungwa sui goma dungure, ta ama mile gala dire, “Wo,” dimue. Dungure kanere bolima ausi kama ta milungwa kaniwe. Bolima ausi iray aw si milungwa yal, kal obin dongwa main kanungwa kal, kaan sikel, aa tomue.  
\v 6 Kalkan sui sui kwi milungwa kobe milungwa suna ka ta uma di pire, ka iru dungwa, “Keba taranta twenti kina bilungure, te dodal sutakobe ama twenti kina bilemua. Iru inanga paamba, eri niriin te nil wain tobe di mine ere ikio.”   
\p
\v 7 Iru kanigire Bolima Siipe Siipe Gawlin goma kan paalin sutakobe pu erungwa, malia ta ama pu erungwa kaniwe. Kanigire kalkan sui sui kwi milungwa, sutakobe goma ka dungure, malia ta ama mile gala dire, “Wo,” dimue.  
\v 8 Dungure na kwi kanere, bolima ausi ta gain komiligi gi kulungwa milungwa kaniwe. Yal ta bolima ausi mun boliminai aw sungwa yal i, kaan Gulungwa, dungwa milemue. Yal ta mun kol duulin bile ungwa iwe, yalini kaan “Kel dimua,” dire (kaan Golin ka paangwa, “Ibal Gulungwa Ain yalini kaan dimua,”) dimue. Gariba ibal para muru taminin sui sui obin si milangwa, taminin ta mere yal sui iray si gulama dire, yobilaan bile yal sui iray tomue. Si gulangwa mere iwe, di kuba pera aa tere sirere, te kenan bil gulungwa kaun u maribe pi terere, te nibil main main pilau di ere terere, te kabe biin ele paangwa para si nenamue.   
\p
\v 9 Iru kanigire, Bolima Siipe Siipe Gawlin goma kan paalin sui sui pu erungwa malia ta ama pu eremue. Goma ibal taw God ka main kere di maribe ere ka iray di gawa di ongwa ongwa omia, ena ibal kobe ibalin kobi si gulemue. Ibalin kobi iban, kabe si gale God tongwa bol main ali mile paangwa, kaniwe.  
\v 10 Ibal gulungwa iban i gala bil dire ka iru dungwa, “Kenin ere ke milinga yal, Yobilaan Kobaan Singabo, i kal dime di ere dorimil milere, te i main paangwa main i kirara kawen main paamua. Ibal kobe gariba gul mile na si gulungwa genawna i ibalin kobi maan sinane? Taw mile sinan mo, malia sinane?”  
\v 11 Dungure yalini galsuna pege araway inin inin obin si tomue. Tere, “I baan tawle imore mile suul milo. I gulinga mere i ka main enin gawliman taw para iru gulangure, para kuunin biinangwa, ena maan sirabinwa,” dire ka iru di ibalin kobi tomue.   
\p
\v 12 Te Bolima Siipe Siipe Gawlin goma kan paalin anan kole muru pu erungwa, malia ta ama pu erungwa kaniwe. Kanigire ememe bilkaw pilau dungure, te waiba gal kama dungwa mere are iru kama sungure, te mayan baa dungwa mere ba baa iru dongure,  
\v 13 te gwi bil maangure akola milin de sire ule di yaa main sungwa mere, kulmama iru kamin mina pisere ule di yaa gariba gul simue.  
\v 14 Ibal kaal yaale kaal gumilin i ku bile kole sungwa mere, kamin mina kalkan kobe iru u baan ta omue. Te kamin kuul para muru te gariba mege mege pirin nil wenabe gerungwa suna dungwa kobi para u baan ta omue.  
\v 15 Iru erungure, ena gariba gul yal bil kobe te gabman yal singaba kobe te simil nen yal singaba kobe te kalkan binanbile aa te nere yobilaan bil bilungwa yal kobe te nil konagi ere milungwa ibal te nil konagi ta ere milekungwa ibal, ibal kobe para aal kule milama dire, pi kobile giran ali te kamin kuul kobile dungwa gul ali omue.  
\v 16 Pirere ka iru di kamin kuul te kobile di tongwa, “Yal ta kenin ere ke milungwa bol amin di milungwa yal na ta kanekinama dire, te Bolima Siipe Siipe Gawlin den ki ye na tekenama dire, kiray yaare na si biro.  
\v 17 Ka iru dibinga main iwe, yal sui iray den gule ibal tongwa kaun u bawa dimia, ibena niminin mile ale milame?” dire ka iru dimue.   
\c 7  
\s1 Isirel ibal wan kandret poti po tausen, maabin mina gain bile erungwa  
\p
\v 1 Ena kal iru kanigire pare, angel sui sui gariba gul ulin sui sui dungwa gul mile geril bomai te kobil kuman kamin gwi ta maakinama dire, si pere di milemue. Gwi maare gariba gul te pirin nil te eri si ku tekenama dire, si pere di milemue. Iru ere milungwa kaniwe.  
\v 2 Kanere te kobil kamin angel ta mile ungwa kaniwe. God kwi milungwal milungwa ibal kobe yalini gawliman milama di ibal iru pirama dire, angel iray ibalin kobi gain mina kal ta bile terala dire, kal ta aa tomue. Angel sui sui gariba te pirin nil i sutaw erama dire, God yobilaan iru pai angel kobi tongwa, angel ta gala dire ka iru di angel sui sui iray tomue.  
\v 3 Di tere ka iru dungwa, “Goma God nil konagi ibal maabin mina gain bilabingire pare, eme gariba gul te pirin nil te eri i sutaw eranwa. Eranba malia taw suul mile kane milo.”  
\v 4 Ibal maabin mina gain bile erangwa mere, ka dungwa piriwe. Isirel nen kobe gawliman anan kole kole muru kawnan milin sutan milungwa suna ibal binanwenbile, wan kandret poti po tausen, gain mina kal ta bile tenamue.  
\v 5 Yuda gawliman kobe tausen anan kole kole muru kawnan milin sutan gain mina bile terere, te Uruben gawliman kobe tausen anan kole kole muru kawnan milin sutan gain mina bile terere, te Gat gawliman kobe tausen anan kole kole muru kawnan milin sutan gain mina bile terere,  
\v 6 te Asa gawliman kobe tausen anan kole kole muru kawnan milin sutan gain mina bile terere, te Napalai gawliman kobe tausen anan kole kole muru kawnan milin sutan gain mina bile terere, te Manasa gawliman kobe tausen anan kole kole muru kawnan milin sutan gain mina bile terere,  
\v 7 te Simion gawliman kobe tausen anan kole kole muru kawnan milin sutan gain mina bile terere, te Ilibai gawliman kobe tausen anan kole kole muru kawnan milin sutan gain mina bile terere, te Isaka gawliman kobe tausen anan kole kole muru kawnan milin sutan gain mina bile terere,  
\v 8 te Sebulan gawliman kobe tausen anan kole kole muru kawnan milin sutan gain mina bile terere, te Yosepe gawliman kobe tausen anan kole kole muru kawnan milin sutan gain mina bile terere, te Bensamin gawliman kobe tausen anan kole kole muru kawnan milin sutan gain mina bile terere, te angel iray Isirel ibal iru gain mina bile tomue.   
\s1 Ibal binanwenbile ana dire deminin si God tongwa  
\p
\v 9 Ena kal iru kanigire pare, na kwi kanere ibal binanwenbile kaniwe. Kaniga mere ibal keramba, kere kuunin ta erekinamue. Te ibal kan diga iwe, gariba gul kuru kama ta ta para ibal taw u milungure, te gawlima ta ta para ibal taw u milungure, te gariba bilin ta ta para ibal taw u milungure, te ka kowa more more paangwa para muru ibal taw u milungure, te ibalin kobi mile kenin ere ke milungwa bol te Bolima Siipe Siipe Gawlin guman mina ale milere, galsuna pege sigi dire simil nima arin bale aa te milemue.  
\v 10 Milere gala bil dire ka iru dungwa,  
\q1 “Ibal kobe sigare kule u wai ongwa main iwe, na ibal kobe God yalini kenin ere ke milungwa bol amin di milungure, te Bolima Siipe Siipe Gawlin milungure yal sui i tawle kal iru ere na ibal kobe na tomua.”   
\m
\v 11 Kenin ere ke milungwa bol te yal singaba kobe te kalkan sui sui kwi milungwa kobe suna milungure, angel kobe wenabe di dire kenin ere ke milungwa bol guman mina yaa i kwi bilere, ana dire deminin si God tere  
\v 12 iru dungwa, “Kirara kawen dimua. Maki yere deminin si tere, te nomanin pai tere, te maki ye tere, te kaan ai yebe dire, te yobilaan pai tere yobilaan bil bile tere, te kal main iru ere God te milabingal milabinwa. I kawen.”   
\s1 Ibalin kobi gain giil pirungwa wei sungwa  
\p
\v 13 Ena yal singaba milungwa kobi yal ta ka iru sirin bile na tongwa, “Galsuna pege sigi dungwa ibal kobi ibena mileme? Alde ibal u mileme?  
\v 14 Dungure na mile, “Singabo, i inin pirinwa,” digire yalini ka iru di na tongwa, “Ibal taalime gain giil bilkaw pire ibalin kobi tongure, ibalin kobi u milemua. Bolima Siipe Siipe Gawlin mayan ali ibalin kobi galsuna bigin sungwa, galsuna iray u pege wen ongure ibalin kobi sigare kule u wai omua.  
\v 15 Iru ere milemia, ena ibalin kobe God kenin ere ke milungwa bol guman kol mile, girungwa taangwa God milungwa ain nil konagi ere te milemua. Kenin ere ke milungwa bol amin di milungwa yal, ibalin kobi i mun waare milemua.  
\v 16 Ibalin kobi kwi komina kenan ta gulekire, te nil kwi ta gulekinamua. Te are dongwa ibalin kobi kwi ta dekenangure, te kalkan nega wen dungwa ibalin kobi gain kwi ta dekenamua.  
\v 17 Ibalin kobi iru ere milangwa main iwe. Kenin ere ke milungwa ain suna Bolima Siipe Siipe Gawlin, Yesu Kirisito, milere ibalin kobi kenin ere terere nil gibilin bilungwa gul awli namua. Nil iray nenangwa, nil gulungwa kwi ta gulekire mile painangwal painamua. Ibalin kobi kay miingwa God miriin pire omilin duul kire di ere tenangwa, kay miingwa kwi ta miikinamua.”   
\c 8  
\s1 Kan paalin anan kole muru kole taran goma pu erungwa, ta ama pu erungwa  
\p
\v 1 Ena Bolima Siipe Siipe Gawlin goma kan paalin anan kole muru kole taran pu erungwa, malia ta ama pu erungwa kaun kamin mina ai ka ta dikire, tele wele ta dikungwa iru ta pirekiwe. Iru ere milungwa kap awa milema di piriwe.  
\v 2 Sime taw mili pire angel kobe anan kole muru kole sutan God guman mina milungure, bu mugu anan kole muru kole sutan yalin kobi tongwa kaniwe.   
\p
\v 3 Angel ta ure, kobile gol pele bala ali ulgu kaana minanin wai sungwa dungwa aa tere, ibal God kalkan tongwa bol mina ale milemue. God ibalin kobe ana di God tongwa, angel iray pirere, “Ibal kalkan God tongwa bol mina ana dungwa i piro,” dirala di eremue. Erungwa ulgu kaana minanin wai sungwa taw binanbile para bol iray gale tenama dire tomue. Kalkan tongwa bol iray, kenin ere ke milungwa bol dungwa, guman mina iray dimue.  
\v 4 Angel iray God guman mina mile ulgu kaana galere, minanin wai sungwa, te God ibalin kobe ana di God tongwa, kalin sui God tongure, minanin te muubilin piremue.  
\v 5 Pirungure angel iray kalkan God tongwa bol enderin irere pele bala i ali yere, pu si gariba gul main eremue. Erungure kamin guru dungure, te teli bilkaw dungure, te kamin nega erungure, te ememe bil pilau dimue.   
\s1 Angel sui sui bu mugu aa tere bu dungwa  
\p
\v 6 Ena angel anan kole muru kole sutan bu mugu inin inin ire bu dala di aa non eremue.   
\p
\v 7 Angel ta bu mugu bu dungure pare, nimin niremil te enderin te mayan bole imu dire gian ere nil kol ongwa, yaa gariba gul main simue. Gariba gul te eri obin si taminin sutakobe yenangwa, kalkan kobi taminin ta iru mere enderin si gale de taa omue, kulkan para de wei simue.   
\p
\v 8-9 Angel ta goma bu mugu bu dungure, malia ta ama bu dungure pare, ena kamin kuul ta enderin dongwa mere, pusi pirin nil ali erungwa kaniwe. Iru erungwa, ena pirin nil si keli si i sutakobe erangwa, ta i u mayan mere omue. Omia ena nil kabe ali milungwa gulungure, te sipe nil iray bolimina warungwa para si gulemue.   
\p
\v 10 Angel sutan goma bu mugu bu dungure, malia ta ama bu dungure, kulmama bil ta maale kewa bil dongwa mere dere, kamin ai pisere yaa main simue. Nil nuule te nil gibilin si keli si taminin sutakobe erangwa, taminin ta i kulmama iray ere suna ali omue.  
\v 11 Kulmama iray kaan, Gi Kiingwa dungwa. Nil kulmama suna ali ongwa iray gi kiingwa kol omia, ena ibal binanbile nere gulemue.   
\p
\v 12 Ena angel sutakobe goma bu mugu bu dungure, malia ta bu dungure pare, are te ba te kulmama kalin kobi obin si taminin sutakobe milangwa, taminin ta iru mere simue. Simia ena kalin kobe goma aw dungwa mere tamama. Are sungure baan taw kama sungure, te ba te kulmama para iru kama sire domue.   
\p
\v 13 Iru kanere na kwi kane yebe erere pare, sibayaa ta kamin mina wen puru di ware milungwa kaniwe. Kanigire gala bil dire ka iru dungwa, “Eke, miriin pirie, eke, miriin go pirie. Angel sutakobe imo milungwa bu mugu bu dinamia, ena gariba gul ki pai milungwa ibal kobe gain giil bilkaw pirangwa, eke, na miriin go piriwa,” dimue.   
\c 9  
\s1 Angel sui sui goma bu mugu bu dungure ta ama bu dungwa  
\p
\v 1 Ena angel sui sui goma bu mugu bu dungure, malia angel ta bu dungure pare, kulmama ta kamin mina pisere yaa gariba gul sungwa kaniwe. Enderin gaul ai ki milin tongure, kulmama iray ire umue.  
\v 2 Irere enderin gaul ai kol yawlungure, enderin enigi binanbile u mena omue. Enegi bil maare are aw dungwa si bilere, te kamin aw dungwa para kama simue.  
\v 3 Enegi maangwa ali gomare ta suna ali u mena pire ere gariba gul omue. Ongure kume kame bil ibal sungwa mere, gomare iru ibal sinama dire, yobilaan pai tomue.  
\v 4 Yobilaan pai gomare tere kaman iru tongwa, “Kulkan te eri te kal maangwa para muru nekio. God ibal maabin mina gain bilungwa ibalin kobi ta sekenanba, ibal gain maabin mina bilekungwa, ibalin kobi gain giil pire to.”  
\v 5 Di tongure gomare iray ba anan kole muru gain giil pire ibalin kobi tenamba, ta si gulekinangwa paamue. Kume kame bil ibal si nongure, gain giil pirungwa mere, gomare iray iru gain giil pire ibal tenamue.  
\v 6 Kal iru ere tenangwa, kamin kaun iray ibal kobe gulabina di piramba, ta gulekenamue. Te inin bile gulala di piramba, ta pi bile gulekinamue.   
\p
\v 7 Ena gomare milungwa mere iwe. Bolima ausi kura bilala dire, gal sigi dungwa mere, iru mere sigi dire, te yal bil gibilin gal kobile gol dungwa mere, gibilin gal iru si paale ire kaumue. Ibal guman mere, guman iru si paale ire kulemue.  
\v 8 Abal gibiliigin araway paingwa mere paire, te awi pus bil ele paangwa, kaan layon, sigin kulungwa mere, gomare i sigin para iru kulemue.  
\v 9 Kapa dungwa mere, gomare diinin miina kol iru dimue. Kura bilungwa kaun, wiile wiile ta kaan seriot, bolima ausi gure pala di ongure, teli dungwa mere, gomare kain kole kole puru di warungwa teli iru dimue.  
\v 10 Gomare iray yuin kulere ibal sinama dire, kay milgin yuin mina kule tomue. Ba anan kole muru gain giil pire ibal tenangwa paamue.  
\v 11 Yal bil ta gomare iray kenin ere ke milungwa yal iray gaul ai yal singaba milemue. Yalini kaan Kibiru ka paangwa, Abadon dungure, te Giriki ka paangwa, Apolion dungure, te kaan sutan i main iru paangwa, “Kalkan i sutaw erangwa yal milemua,” dire yomue.   
\p
\v 12 Ena taalime ta bilkaw goma u maribe ongwa wei simba, sutan imo dungwa eme u maribe namue.   
\s1 Angel anan kole muru goma bu mugu bu dungure ta ama bu dungwa  
\p
\v 13 Angel anan kole muru goma bu mugu bu dungure, malia ta ama bu dungure pare, God guman mina ibal kalkan God tongwa bol, kobile gol ere yongwa bol iray, ulin kole kole sui sui ka ta di ungwa na piriwe.  
\v 14 Ka di ungwa ka i, iru di bu mugu aa tongwa angel iray tongwa, “Nil nuule bil, kaan Yupiretis, angel sui sui ain iray goma kan kule paalungwa, kanin paangwa gule ere to.”  
\v 15 Angel sui sui iray kamin kaun maliawengira gariba gul ibal kobe ta si gulama dire, paale suna ere imue. Gariba ibal para muru obin si i taminin sutakobe ere milangwa, taminin ta iru si gulamue. Si gulama dire, angel sui sui kanin paangwa gule ere tomue.  
\v 16 Angel sui sui iray yalin kobi simil nen binanwenbile bolima ausi aw si milungwa mere, di na tomue. Tere, “Ibal milion yal anan kole kole muru aan kawn muru milemua,” dimue.  
\v 17 Ul kiibi kaniga, bolima ausi te aw sungwa yal kobe milungwa mere, iru kaniwe. Ain yobilagi galsuna sigi dungwa taw baa erungure, taw more yongure, taw komiligi eremue. Awi pus bilkaw ele paangwa, kaan layon, guman kulungwa mere, bolima ausi guman iru si paale ire kulemue. Enderin te enegi te kobile ta kaan salpa, enderin gale paalungwa, kalkan i giran ali u mena omue.  
\v 18 Kalkan sutakobe iray bolima ausi giran ali u mena omia, ena gariba gul ibal kobe si gulemue. Gariba ibal para muru obin si taminin sutakobe ere milangwa, taminin ta iru kalkan ki erungwa sutakobe iray si gulemue.  
\v 19 Bolima ausi yobilaan niminin milungwa main iwe, giran ali niminin milere, te yuin mina para niminin mile dimue. Yuin iwe, oniba guman mere dimia, ena ibal sungure gain giil piremue.   
\p
\v 20 Ena gariba ibal imo milungwa, kalkan ki erungwa iray ibalin kobi ta si gulekungwa milere, inin pire kal ki erungwa pisere erekire, te sia digan te galbale kobile gol te galbale ain yobilagi te galbale kobile te galbale eri balungwa, kalkan kobi ana dire deminin si tere mun kal waa tekemue. Ta tekimba galbale kobi kal ta kanekire, te ka ta dikire, te kol ta warekimue.  
\v 21 Te ibal si gulungwa, te kankiray ere milungwa, te gi abal kunibe ingwa, te kalkan kunibe nongwa, te kal iru erungwa main i para mun kal waa tekemue.   
\c 10  
\s1 Angel ta buku mege Yon tongure nongwa  
\p
\v 1 Ena kal main iru wei sungure pare, angel ta naanin paangwa kamin ai pisere ere ime ungwa kaniwe. Kamin kawa yalini yobile i suna erungure, kamin kaabinin yalini gibilin mina gi dimue. Te are sungwa mere, yalini guman naabile aw dungure, kawligi enderin dongwa mere, yalini kawn iru gi di dimue.  
\v 2 Buku mege ta ka minin ganin bile pilaa di yongwa aa tomue. Yalini kawn wen kol pirin nil bolimina egilere, te kawn kora kol gariba gul egilemue.  
\v 3 Yalini iru mile awi pus ele paangwa, kaan layon, kole dungwa mere gala iru dimue. Dungure pare kamin guru dungwa, anan kole muru kole sutan gala bil dire ka maan di tomue.  
\v 4 Gala iru dungwa kaun i, na ka minin ganin bilala di eriiba, kamin mina ka ta iru di na tongwa, “Kamin guru dungwa anan kole muru kole sutan gala dire ka di i tongwa piringa, pire aal kule paale di ibal tekire, te ka minin ganin para ta bilekio.”   
\p
\v 5 Dungure pare, ena angel naanin paangwa i, pirin nil te gariba gul egile milungwa, yalini aan wen kol aan kule kamin mina ere milere  
\v 6 God milungwa mina maabin mina aa taw sire ka iru dungwa, “God milangwal milangwa, yalini kamin mina te kalkan para muru ali dungwa ere yere, te gariba gul te kalkan para muru dungwa ere yere, te pirin nil te kalkan para muru ali milungwa para ere yomua. Yalini yobilaan iru bile milungwa, na kirara kawen di i teralga, maabinan mina aa taw siwa. Kamin kaun ta ama suul ta milekerabinwa.  
\v 7 Dimba angel anan kole muru kole taran goma bu mugu bu dungwa, angel ta ama kwi bu dinangwa kaun, God aal kule kal ta erala di pirungwa goma yalini ka kebe yal, ‘Main iru u maribe namua,’ di tongwa kal main iray i maribe eramua,” dimue.   
\p
\v 8 Ena goma kamin mina ka ta ime ungwa piriga, ka iray kwi ka iru di na tongwa, “I pire, angel ta kawn kole pirin nil egile, te kawn kole gariba gul egile milungwa yal iray buku ta pilaa dire aa te milemia, i inana po.”  
\v 9 Di na tongure na pi bawa dire, “Buku mege i aa tenga na to,” dire sirin bile tegire, yalini ka iru di na tongwa, “I ka minin ganin buku i, ire no. Nenangire pare, i denin ali gi eramba, nenanga kaun deboma niriin daan kiingwa mere, i giranin ali daan iru kiinamua.”  
\v 10 Dungure pare, buku mege angel aa tongwa i, irere na neiwe. Nega deboma niriin daan kiingwa mere giranan mina iru ne piriiba, ne dugu digire pare, denan ali gi eremue.   
\p
\v 11 Kal iru erigire pare, yalini ka iru di na tongwa, “Gariba bilin ibal te kuru kama ibal te ka kowa more more paangwa ibal te gariba gul yal bil kobe ibalin kobe milungwa mere God ka main eme u maribe nangwa main di maribe ere ibalin kobi tenanwa,” di na tomue.   
\c 11  
\s1 God main di gawa di ibal tenangwa yal sui u maribe ongwa  
\p
\v 1 Ena bili ta na tere ka iru di na tongwa, “I ale, God ka main ogu bil te ibal kalkan God tongwa bol, di bi kano. Te ibal kobe ogu iray mile ana dire deminin si God tongwa kero.  
\v 2 Keranba ogu iray duwi mena kol bili ta di bi kanekio. Ta kanekinanga main iwe, Yuda ta milekungwa ibal ba yal sui aan kawn muru te na anan milin sui Yerusalem ai si u sutaw erama dire, God, ‘I ero,’ di tomua.  
\v 3 Na guunan kanan di gawa di ibal tenangwa, na yal sui nusi eralwa. Eralgire waiba gal werain bile paale weray sungwa, God ka main di maribe eramua. Are kaun wan tausen tu kandret sikisti, kaun iru di maribe ere ibal tenamua.”   
\p
\v 4 Ena eri ta kaan olibe gariba gul kobaan, God, guman mina dungwa mere, yal sui iray iru milemue. Te enderin derin gariba gul kobaan, God, guman mina de dungwa mere, yal sui iray iru milemue.  
\v 5 Ibal ta yal sui iray sirala di erangwa, ena yal sui giran mina enderin dere kaymin ibal kirara si wei sinamue. Iru erangwa mere, ibal kobe yal sui sirala di erangure, iru mere si gulamue.  
\v 6 Yal sui iwe. Yal sui God ka main di milungwa kaun nimin kirara ta sekenama dire, yobilaan bil pai yal sui iray tomue. Te nil gibilin u mayan kol nama dire, yobilaan bil bile yal sui tomue. Te kalkan ki ere gariba gul ibal tenangwa kal i, i sutaw ere gariba ibal tenama dire, yal sui para erangwa paamue.   
\p
\v 7 Yal sui kaya ka main i di gawa di piserangure pare, kabe biin ele paire naanin paangwa, enderin gaul ai pisere ere yebe ure, yal sui bole kura bilere yal sui si gulamue.  
\v 8 Si gulangure yal sui yobilagi ogu ai bil ta kombil bine bane suna i dinamue. Ibal kobe yal sui iray inin Singaba eri pera mina si gulungwa ai, ai iray kaan kiibi Sodom mo, Isipi dimue.  
\v 9 Gariba bilin ibal ta ta para ibal taw unangure, te gawlima ta ta para ibal taw unangure, te ka kowa more more paangwa para muru ibal taw unangure, te kuru kama ibal ta ta para taw unangure, ibal kobe iru ure are kaun sutakobe te ta kole yal sui gulungwa, yobilagi kanere, “Maul ta si yekinanwa,” dinamue.  
\v 10 Yal sui iray gulungwa i pire, ibal wai wen piramue. Pirere egin gale wela si erere, te yal ta komina bil yal ta tenangure, yal iray maan tenamue. Iru erangwa main iwe. God ka kebe yal sui iray gain giil bilkaw pire gariba ibal tongwa yal sui iray gulemia, ena gariba gul ibal para wai wen piramue.  
\v 11 Are kaun sutakobe te ta kole wei sungure, God giran miin pu di yal sui den miriin suna erangure, yal sui alamia, ena ibal kobe kane kuril wen piramue.  
\v 12 Kamin mina ure ka iru di yal sui tongwa, “I ereya wo.” Yal sui kawa bole kamin mina ibe ongwa, kaymin ibal kane milemue.  
\v 13 Ongwa kaun wen i, ememe bilkaw pilau dungure, ogu ai bil iray kole si suule eremue. Erungwa ai mege mege anan kole muru kole sui sui imo dungwa, kole taran si suule eremue. Ememe bilkaw iray pilau dimia, ena ibal tausen anan kole muru kole sutan gulemue. Ibal imo milungwa kuril pire kalgane ire, kamin ai God yobilaan bile niminin milungwa, deminin si yalini tomue.   
\p
\v 14 Ena goma kal ki erungure, malia ta ere wei sungure, maliagira ta u maribe nala di eremue.   
\s1 Angel anan kole muru kole taran goma bu mugu bu dungure malia ta ama bu dungwa  
\p
\v 15 Angel anan kole muru kole taran goma bu mugu bu dungure, malia ta ama bu dungure pare, kamin ai gala bil dire ka iru dungwa, “Na God Singaba te yalini konagi erungwa yal, Kirisito, gariba gul kenin ere ke milungwa paamua. Paangwa main iwe, kenin ere ke mile milangwal milamua.”  
\v 16 Dungure pare yal singaba kobe yal ta aan kawn muru na anan milin sui sui inin kenin ere ke milungwa bol, God guman mina amin di milere, ale yaa main sire ana dire deminin si God tere  
\v 17 iru dungwa,  
\q1 “Niminin milungwa yal, Yobilaan Kobaan, God Singaba i milingal milinga te milangal milanwa. I yobilaan bil bile niminin mile milinga, i maribe ere maliaga kawn kule kenin ere ke milinga na maki ye i tobinwa.  
\v 18 Gariba bilin ibal ta ta den gule milimba, i inin denin miriin ki yenga kaun, kaya u maribe omua. Te ibal kobe gulungwa, i ka kol ere ibalin kobi tenanga kaun, u maribe omua. Ongwa iwe, i nil konagi yal, ka kebe yal kobe, kal wai ere terere, te i gawliman kobe maangwa yaangwa i kuril pire tongwa para kal wai ere tenanwa. Te gariba gul i sutaw erungwa ibal, i ibalin kobi si gule wei sinanwa.”   
\m
\v 19 Ka iru dungure pare, God ogu kamin ai dungwa kol yawlungure, God ibal bole kwi guman kane ire u taran pi milungwa main buku bile paalungwa, buku iray bokisi ali dungwa kaniwe. Kanigire kamin nege erungure, te tele bilkaw dungure, te kamin guru dungure, te ememe pilau dungure, te nimin nirimil binanbile simue.   
\c 12  
\s1 Abal te oniba bilkaw wen milungwa ka dungwa  
\p
\v 1 Ena kamin ai kal main bil ta u maribe omue. Ibal kobe main pirama dire, kal u maribe ongwa, i kal ta di bilemue. Kalkan u maribe ongwa iwe, abal ta u maribe pi milere, are sungwa mere iru kaul pirere, te ba egilere, te kulmama anan kole kole muru kawnan milin sutan gibilin gal mere kaumue.  
\v 2 Abal iray digan sire gaan kule nerala di erere, gain giil pire gala bil dimue.   
\p
\v 3 Te ibal kobe main ta pirama dire, kamin ai kal ta ama u maribe ongwa i, kal ta di bilemue. Di bilungwa kal iwe, oniba baa ta bilkaw wen u maribe pi milere, gibilin anan kole muru kole sutan kulere, sigin gibilin mina ungwa, anan kole kole muru umue. Te yal bil gibilin gal oniba iray gibilin anan kole muru kole sutan kulere, gal i gibilin mina inin inin kaumue.  
\v 4 Te oniba yuin iwe, pera sire kulmama kole taminin ta waa kire di gariba gul eremue. Kulmama para taminin sutakobe obin sinangwa taminin ta iru mere waa kire di gariba gul eremue. Abal i gaan kule nerala di erungwa, oniba i pi abalini milungwa gul suul mile kane milemue. Gaan kulangwa i, gin taran si nerala dire, suul milemue.  
\v 5 Milungure abal i wan ta kule nere gin taran awli God te yalini kenin ere ke milungwa bol omue. Wan iray gariba gul bilin ibal ta ta para niminin mile kenin ere ke milamue.  
\v 6 God gaan i awli ongure pare, man i si ere ai sime yongwa gul omue. Ain iray pire are kaun wan tausen tu kandret sikisti wai milama dire, ain iray God aa tekun ere ye tomue.   
\p
\v 7 Ena kamin ai kura bil ta pilau dimue. Angel Maikol te yalin gawliman angel kobe bole yongure, te oniba iray te gawliman angel kobe bole yongure, kura bilemue.  
\v 8 Kura bilimba, oniba niminin ta milekungure, Maikol pi sire i sutaw erungure, oniba te gawliman kobe kamin ai imo ta milekenama dire, manaa di tomue.  
\v 9 God angel kobe niminin milere oniba bilkaw iray te gawliman angel kobe para sire pusi gariba gul eremue. Oniba bilkaw iwe. Goma wen oniba milungwa kaan Satan dimue. Yalini gariba ibal para muru kakiibi di tere kela kule dire bawle tomue.   
\p
\v 10 Iru erungure pare, kamin mina gala bil ta dungure na piriga, ka iru dungwa, “God yal ta nusi erungure, ibal aa ki di tenangure, sigare kule u wai nangwa, maliagira yal iray u maribe pi milemua. Te maliagira God yobilaan bile kenin ere ke milungwa main i maribe eremua. Te God konagi erungwa yal, Kirisito, yobilaan bilungwa para i maribe eremua. Iru erungwa main iwe, Satan God guman mina mile, ka main enan kobe girungwa taangwa kakiibi dire ka digwane waa tongwa, God yalini sire pusi gariba gul ime eremua.  
\v 11 Ka main enan kobe mile, Bolima Siipe Siipe Gawlin mayan garu di ibalin kobi tongwa i pire, te God guun kan di gawa di ibal tomia, ena ibalin kobi kaymin Satan si i sutaw eremua. Ibalin kobi kwi imo milabina di pirekire, ‘Gulabinga para wai paimua,’ dimua.  
\v 12 Kal iru eremia, ena kamin ai ibal milinga wai wen pire miriin paiyo. Dimba gariba gul milinga ibal te pirin nil ali milungwa para, ayo, miriin pirie. Satan i milinga gul pire kamin kaun tawle imo milala di pire, den bilkaw gulemua.”   
\p
\v 13 Ena God oniba bil iray pusi gariba gul erungwa, oniba bil i pirere, wan kule nongwa abal iray sirala dire, duulin bile omue.  
\v 14 Abal i gariba simi yongwa gul me erin sutakobe te ta kole wai milangwa, oniba abal i ta sekenangwa, abalini ain iray si pi milama dire, sibayaa kain kule tere puru dinama dire, kule tomue.  
\v 15 Kule tongure puru di ongure, abalini nil nuule bil sire nil i nama dire, oniba giran ali mebil suule nil kol eremue.  
\v 16 Oniba giran ali mebil suule nil kol erimba, gariba abalini aa ki di tomue. Tongwa mere iwe, mebil sungwa nil bil iray gariba ali bi wei simue.  
\v 17-18 Iru erungwa ena oniba bil i den gule abal i tomue. Tere pi abalini kule yongwa kobe bole kura bilala dire, omue. Abalini kule yongwa kobe iwe, God kile kaman ka pire wiina erere, Yesu guun kan di gawa di ibal tomue. Te oniba bil i pi pirin nil binan makalua dungwa gul ale milemue.   
\c 13  
\s1 Kabe biin sutan ele paangwa, u maribe ongwa  
\p
\v 1 Ena iru kanere pare, kabe ta biin ele paangwa pirin nil pisere u mena pi milungwa kaniwe. Kabe iray milungwa main iwe. Gibilin yaan anan kole kole muru sirere, te gibilin mere anan kole muru kole sutan kulemue. Gibilin yaan dungwa mina yal singaba gibilin gal inin inin kaungure, te gibilin anan kole muru kole sutan mina kaan ka minin ganin digan wen bile paalungwa, kaan i gain ka si God tongwa dimue.  
\v 2 Kabe biin ele paangwa i, awi pus bil ele paangwa, kaan lepad, milungwa mere, si paale ire milere, te awi bolima ta, kaan bea, kawn kulungwa mere, kule milere, te awi pus bil ele paangwa, kaan layon, giran kulungwa mere kulere, te kabe i milungwa iru wen milema di kaniwe. Oniba bil yobilaan bilungwa main te kenin ere ke milungwa main te niminin wen milungwa main, main sutakobe ere kabe biin ele paangwa i tomue.  
\v 3 Kabe biin i gibilin ta nimbona bilin bil ta dimue. Dungwa goma sungure, gulala di erimba, nimbona kiima di kaniwe. Kiimia, ena gariba ibal para muru kane buul kune duulin bile waremue.  
\v 4 Oniba bil i yobilaan bil pai kabe biin i tomia, ena ibal para ana dire deminin si oniba bil tomue. Tere, para iru deminin si kabe biin i tere iru dungwa, “Kabe biin milungwa mere i, ibena di bilabine? Ibal kuunin ta milekemua, te ibena kabe biin i bole kura bile i sutaw ere tename? Ibal iru bole kura bilangwa ta milekemua.”   
\p
\v 5 Ena kabe biin ele paangwa i, ka su dinama dire, oniba bil i, “Para owa,” di yalini tere, te ba yal sui aan kawn muru te na anan milin sutan kamin kaun iru ibal kobe ke milama dire, oniba bil i, “Para owa,” dimue.  
\v 6 God inin milungwa te God kaan te God ain te ibal kamin ain i milungwa, kabe biin i gain ka si kal i tomue.  
\v 7 Kabe biin i God ibalin gawliman kobe bole kura bile sire si u sutaw nama dire, te gawlima ibal ta ta para te gariba bilin ibal ta ta para, te ka kowa more more paangwa ta ta para, te kuru kama ibal ta ta para, kabe biin i, ibalin kobi ke milama dire, oniba bil i yobilaan pai yalini tomue.  
\v 8 Bolima Siipe Siipe Gawlin si gulungwa, yalini buku ta ibal mile painangwal painangwa kaan bile paalemue. Gariba gul main ole ere yekungwa kaun, kaan i goma bile paalemue. Ibalin kobi taman, gariba ibal imo milungwa para muru, ana dire deminin si kabe biin i tenamue.   
\p
\v 9 Ibal kobe kiranin kulina, ena ere gule piro.  
\v 10 “Yal ta kanin paima di ibal iru pirangwa, ena yalini kanin pai milamua. Te yal ta di kuba pera aa tere ibal ta si gulangwa, ena ibal kobe di kuba pera aa tere yal i maan si gulangwa paamua.” Main iru paimia, ena God ibalin kobe niminin mile ka main pire gi dungwa, aa gi di pire milangwa paamue.   
\p
\v 11 Ena kal iru kanere pare, kabe biin ele paangwa ta ama gariba gul ali pisere u maribe ongwa kaniwe. Kabe ta i milungwa mere iwe, bolima siipe siipe gibilin yaan sui kulungwa mere kulere, te oniba bil iray ka dungwa mere, olin ire dimue.  
\v 12 Kabe biin ta goma milere, yobilaan bile niminin milungwa mere, kabe biin ta eme ungwa, si paale irere niminin milemue. Kabe biin ta goma mile ibal sungure gulala di erimba, nimbona bil kaya kiingwa, ena gariba ibal deminin si kabe ta i tenama dire, konagi iru eremue.  
\v 13 Kabe biin ta eme milere, kal guman kwi dungwa main bilkaw i maribe ere eremue. Erere, te kamin mina enderin bil dere ime ungwa, kal guman kwi dungwa iru ibal guman mina i maribe eremue.  
\v 14 God yalini kane unin si milungure pare, kabe biin ta eme u maribe ongwa i, kal guman kwi dungwa main main kabe biin ta goma u maribe ongwa i guman mina eremia, ena gariba gul ki pai milungwa ibal, yalini ibalin kobi bawle tomue. Kabe biin ta goma milungure, di kuba pera si gulimba, kwi imo milungure, te kabe biin ta eme ungwa i, gariba ibal kobe ka di tere iru dungwa, “Kobile bale kabe biin i giran guman si paale ire ere yeyo,” dire di ibalin kobi tomue.  
\v 15 Bale ere yongwa kobile i ka dinama dire, te ibal ana dire deminin si kobile iray tekungwa ibal si gulama dire, kabe biin ta goma milungwa giran miin pu dungure, kobile bale ere yongwa i, si kwi yere milemue. Iru erama dire, “Para owa,” di tomue.  
\v 16 Ibal maangwa yaangwa ire, te aa te nongwa ibal te aa te nekungwa ibal ire, te nil konagi erungwa ibal te nil konagi erekungwa ibal ire, te ibalin kobi para aan wen kol mo maabinin mina gain mina kultabane sinama dire, kabe biin ta eme milungwa i, iru ere ibalin kobi tomue.  
\v 17 Ibal kobe gain mina kultabane ta sekemia, ena kalkan aibe tobe ta erekinangwa paamba, kultabane sungwa ibal aibe tobe erangwa paamue. Gain bilungwa mere iwe, kabe biin i kaan mo minin ganin taw yalini kaan di bile bilemue.   
\p
\v 18 Ka di i tega i, ibal inin nomanin paangwa pire main piramue. Ibal nomanin painangwa ibalin kobe kabe biin i minin ganin taw yalini kaan di bilungwa main piramue. Minin ganin i, yal ta kaan di bile bilemue. Minin ganin bilungwa dungwa, i kere piro. Sikis kandret sikisti sikis dimue.   
\c 14  
\s1 Ibal kandret poti po tausen geril ta kwi dungwa  
\p
\v 1 Ena na kwi kane Bolima Siipe Siipe Gawlin kamin kuul ta kaan Sayon, Yerusalem ogu bil maala dungwa, ale milungwa kaniwe. Milungure ibal binanwenbile, wan kandret poti po tausen, yalini bole milere, Bolima Siipe Siipe Gawlin kaan te Abe God kaan, ibalin kobi maabin mina bile paalemue.  
\v 2 Nil kuun sungwa tele dungwa mere te kamin guru dungwa mere, kamin mina ka ta iru ime ungwa piriwe. Iru piriiba ibal tabale sungwa muubilin mu dungwa mere, ka iru dima di piriwe.  
\v 3 God kenin ere ke milungwa bol ire, te kalkan sui sui kwi milungwa kobe ire, te yal singaba yal ta aan kawn muru na anan milin sui sui ire, te ibalin kobi guman mina ka dungwa piriga i, geril ta kwi di milemue. Ibal kobe geril ta kwi iray nil si ta pirekenamba, ibal binanwenbile kandret poti po tausen, geril iray nil si piramue. God yalin kobi gibilin sirala dire, yalini tobe bil tomue. Gariba kal pirungwa maangwa, yalin kobi manaa di tenama dire, tobe tomue.  
\v 4 Yalin kobe milungwa mere iwe. Yalin kobe abal ta ikimia, ena abal bole ta pai milekire dorimil mile paimue. Bolima Siipe Siipe Gawlin kol egilungwa mere, yalin kobi duulin bile pire kol iru egilemue. God te Bolima Siipe Siipe Gawlin yalin kobi kawn kule, paale suna ere irabila dire, tobe tomue. Yalin kobi gariba ibal main ki ta erekinama dire, tobe tomue.  
\v 5 Yalin kobi kakiibi ta dikire, te ibal kobe mile, “I kal digan erinwa,” dire ka iru di yalin kobi ta tekenangwa paamue.   
\s1 Angel sutakobe ure ka dungwa  
\p
\v 6 Kanere pare, angel ta kamin mina wen puru di warungwa kaniwe. Ka main di painangwal painangwa, gariba gul ki pai milungwa kobe pirama dire, angel iray di terala di omue. Kuru kama ibal ta ta para te gawlima ibal ta ta para, te ka kowa more more paangwa ta ta para, te gariba bilin ibal ta ta para, te ibalin kobi main iru pirama dire, omue.  
\v 7 Pirere gala bil dire ka iru dungwa, “God ka kol ere gariba ibal tenangwa kaun malia u maribe omia, ena kuril pire yalini tere, te kaan gale yebe ere deminin si to. God kamin te gariba te pirin nil te nil gibilin ere yongwa, yalini milemia, ena God guman mina yaa gobin bile ana dire deminin si yalini to.”   
\p
\v 8 Ena angel ta goma ungwa, ta mun kol ure ka iru dungwa, “Bebilon ogu ai bilkaw iray si suule i sutaw eremua. Kawen kirara si suule i sutaw eremua. Ogu ain iray ibal kal piril sungwa erungwa, u bil pire gariba ulin kole kole para omia, ena ogu ai iray si suule i sutaw eremua.”   
\p
\v 9 Ena angel sui goma ungwa, ta ama mun kol ure gala dire ka iru dungwa, “Kabe biin iray te kabe biin giran guman kobile bale ere yongwa, ibal kobe ana dire deminin si kal sui iray tere, te maabin mina mo aan wen kol kultabane sire gain bile erangwa,  
\v 10 ena God den gule ibalin kobi tenangure piramua. Den gule tenangwa iwe, den tawle ta gule tekenangwi, kawen kirara den gule ibalin kobi tenamua. Ibal kobe ana dire deminin si kal sui iray tenangwa, enderin galungwa te kobile ta kaan salpa, gale paalungwa, ibalin kobi dere God angel wai wen milungwa kobe te Bolima Siipe Siipe Gawlin guman mina gain giil pire milamua.  
\v 11 Enderin dere giil pire ibalin kobi tongwa, enegi maa dinangwal dinamua. Kabe biin iray te kabe biin giran guman kobile bale ere yongwa, ibal kobe ana dire deminin si kal sui iray tere, te kabe biin i kaan minin ganin gain mina bile paalungwa, ena ibalin kobe girungwa taangwa para gain giil pire milamua.” Dire angel ta iru dimue.   
\p
\v 12 God ibalin gawliman kobe God kile kaman ka pire wiina erere, te Yesu guun kan aa gi di pire, pire gi dungwa kal main iru u pilau dinangwa kaun i, ibalin kobi niminin mile ka main aa gi di pire milangwa paamue.   
\p
\v 13 Ena iru kanere pare, kamin ai ka ta ime ungwa pirigire, ka iru di na tongwa, “Ka ta di i terala pire ka minin ganin bilo. Ibal malia mile God Singaba ka main pire gi di mile gulangwa, ena ibalin kobi wai pire miriin painamua.” Dungure God Iban mile, “Ka dingai i kawen dinwa,” dimue. Dire, “Ibalin kobi konagi nega di erungwa pisere imore mile, te mile pai erungwa mere, God pire milamia, ena wai pire miriin painamua,” dimue.   
\s1 Gariba gul komina awan denangure bulangwa  
\p
\v 14 Ena na kwi kanere ibal ta yal giran guman kulungwa mere kule mile, kamin kawa pege bolimina amin di milungwa kaniwe. Yal bil gibilin gal kobile gol ere yongwa gal iru kaurere, te komina bulangwa di kuba pera ta algane nongwa, aa te milemue.  
\v 15 Milungure angel ta God ka main ogu bil ala milere ere mena ure gala bil dire ka iru di kawa bolimina amin di milungwa yal tongwa, “Gariba gul komina awan dongwa kaun kaya u bawa dimia, ena di kuba pera aa tenga, ire pire komina bulana po.”  
\v 16 Dimia ena kawa bolimina amin di milungwa yal, di kuba pera ire ure gariba gul komina bulemue.   
\p
\v 17 Ena iru kanigire pare, angel ta ama God ka main ogu kamin ai dungwa ali mile ere mena ungwa kaniwe. Yalini para komina bulangwa, di kuba pera algane nongwa ta aa te milemue.  
\v 18 Milungure angel ta kabe si gale God tongwa bol milungwa pisere umue. Angel iray enderin galungwa kenin erungwa yal milemue. Milere gala bil dire ka iru di di kuba pera algane nongwa aa tongwa angel tongwa, “Di kuba pera aa tenga ire gariba gul kan milin girepe kaya bol yomia, i bulana po.”  
\v 19 Dimia ena angel di kuba pera aa tere gariba gul girepe milin bulere, niriin duunama dire, pusi kobile maul ali yere si darawal dimue. Kal iru erungwa main iwe, ibal ki ere milungwa, God den ki ye ibalin kobi tere gain giil pire tomue.  
\v 20 Ogu ai mena kol girepe milin i si darawal dungure, niriin u mena ungwa iwe, ayo, milin si darawal dungwa, kobile maul giran mayan ere mena umue. Ungwa mere iwe, nuule ta araway wen, tiri kandret kilomita dire, muruwai yere ibal baungwa, kirara naan ale kuunin eremue.   
\c 15  
\s1 Angel anan kole muru kole sutan inin inin kal ki ere ibal terala di milungwa  
\p
\v 1 Ena iru kanere pare kamin ai kal bil ta u maribe ongwa kaniwe. Ibal kobe main ta pirama dire, kalkan i kal ta di bilemue. Kal kaniga iwe. Angel anan kole muru kole sutan inin inin kal ki ere ibal terala di milemue. God den ki ye ibal tongwa, ena kal ki ere ibal tenangwa i ere tenangure pare, God den gulungwa wei sinamue.   
\p
\v 2 Ena iru kanere pare, nil benge ta milungwa mere kaniwe. Botol te enderin bole nuungure, u nil kol pire dima di kaniwe. Kabe biin iray te kabe biin giran guman kobile bale ere yongwa te kabe biin i kaan minin ganin bilungwa, ibal kobe kalin sutakobe yaa ime si tere milungwa para kaniwe. Ibalin kobe nil benge kan diga i binan kole ale milere, God ibalin kobe gita dungwa mere, kaan kaap, tongwa aa tere milemue.  
\v 3 Milere God nil konagi yal Mose te Bolima Siipe Siipe Gawlin yal sui konagi erungwa pire geril ta iru bale yere dire di God tongwa,  
\q1 “Niminin milungwa yal, Yobilaan Kobaan, God Singaba i konagi eringa naanin pai eringa, na ibal kobe kane kul yobinwa. Gariba bilin ibal ta ta para, i ibalin kobi kenin ere ke milinga, i mile pai eringa main, kal dime di ere kawen kirara wai paangure milinwa.  
\v 4 I yal taran kal dime di ere dorimil pai milinga, ena ibena kuril pire i ta tekiname? Te ibena i kaanin gale yebe ta erekiname? Iru erangwa, ibal ta milekemua. I inin tawle kabin sire kal wai morin ere milinga, ibal para kanemia, ena gariba bilin ibal ta ta para i milinga gul ure ana dire deminin si i tenamua.”   
\p
\v 5 Dungure pare God ka main ogu kamin mina dungwa, God di ibal tongwa ain kiile kol iray yawlungwa kaniwe.  
\v 6 Yawlungure angel anan kole muru kole sutan inin inin kalkan ki ere ibal terala di ere mile umue. Angel kobi gal pege wen sigi dire, te kobile gol kin mere ere suna werain bile i diinin mina ere domue.  
\v 7 Kalkan sui sui kwi milungwa kobe milungwa suna i, yal ta milere, kobile gol pele bala, angel anan kole muru kole sutan inin inin tomue. Pele bala ali kal ta dungwa iwe, God milangwal milangwa milere, yalini den gule tongwa main, kal iray, pele bala iray ali dimue.  
\v 8 God naabile aw dungwa, te yobilaan bil bilungwa, ena God ogin iray enegi ala maa muulemue. Angel anan kole muru kole sutan kal ki ere ibal te milungwa kaun, ogu iray ibal ala ta ole pekenangwa paamue. Kal ki ere ibal te piserangwa kaun, ibal ere ala nangwa paamue.   
\c 16  
\s1 God den gule ibal tongwa main pele bala anan kole muru kole sutan ali dungwa  
\p
\v 1 Ena God ogin iray ali ka ta di angel anan kole muru kole sutan tere iru dungwa, “God den gule ibal tongwa main, pele bala anan kole muru kole sutan ali dungwa, i pi garu di gariba gul ero.”  
\v 2 Dungure angel ta goma pire, pele bala garu di gariba gul eremue. Eremia ena kabe biin minin ganin ibal gain mina bile paalungwa ibal milere, te kabe biin i giran guman kobile bale ere yongwa, ibalin kobi ana dire deminin si kobile galbale iray tongwa ibal milungure, nimbona bilkaw gain mina u maribe pi ere terere, giil bilkaw pire tomue.   
\p
\v 3 Angel ta goma pele bala garu dungure, angel ta ama pele bala garu di pirin nil ali eremue. Eremia ena pirin nil u ibal gulungwa mayan mere ongure pare, nil kabe pirin nil ali milungwa para de gulemue.   
\p
\v 4 Angel sui goma pele bala garu dungure pare, angel ta ama pele bala garu di nil nuule te nil gibilin ali eremue. Erungure pare nil i u mayan kol omue.  
\v 5 Angel ta nil kenin ere ke milungwa angel i, ka dungwa pirigire, ka iru dungwa, “Kabin sire wai wen ere milinga yale, i milangal milanga, te goma milingal milinga, i ka kol ere ibal tenga, kabin sire kal wai wen ere ibal tenwa.  
\v 6 Gariba gul kal ki erungwa ibal kobe milere, God ibalin gawliman kobe te ka kebe yal kobe para si gulemia, ena ibalin kobi mayan nere gulama dire, i iru ere tenwa. Mile pai erungwa mere, kal maan ere tenga paamua.”  
\v 7 Dungure pare kabe si gale God tongwa bol ka ta di kole ere iru dungwa, “Niminin milungwa yal, Yobilaan Kobaan, God Singaba i ka kol ere tenga, kawen kirara paangure, kal dime di ere te milinwa.”   
\p
\v 8 Angel sutakobe goma pele bala garu dungure pare, angel ta ama pele bala garu di are dungwa gul eremue. Eremia ena are bil dere nega dire ibal kobe gain dongure, God kane gogo ere tomue.  
\v 9 Are bil dere nega dire ibal gain domia, ena ibalin kobe God kaan gale gain ka si tomue. Kal ki ere ibal tongwa main iray, ere ibal tenam mo, ta tekinam mo, God inin kobaan milimba, ibalin kobe kal digan ere taalime erungwa, nomanin suna si kiruul ta sikire, te yalini kaan gale yebe ta erekire, te deminin ta si yalini tekemue.   
\p
\v 10 Angel sui sui goma pele bala garu dungure pare, angel ta ama pele bala garu di kabe biin kenin ere ke milungwa bol mina eremue. Eremia ena kabe biin i kenin ere ke milungwa ai, i kamin si bile kama sungure, te ibal kobe gain giil pire milungwa, ibalin kobe inin girabilin giil kuure giil piremue.  
\v 11 Giil pirere, te nimbona ere giil sungwa pirere kamin ai kobaan, God gain ka si tomue. Si tere ibalin kobe kal digan ere taalime erungwa, mun kal waa tekire, nomanin suna si kiruul ta sekemue.   
\p
\v 12 Angel anan kole muru goma pele bala garu dungure pare, angel ta ama pele bala garu di nuule bil kaan Yupiretis eremue. Eremia ena nil i dainungure, kobil kamin yal bil kobe unama dire, kol bala dungwa mere, nil iray dainemue.  
\v 13 Kanere pare, kabe du milungwa mere, sia digan sutakobe iru milungwa kaniwe. U maribe ongwa mere iwe, oniba te kabe biin te kakiibi ka kebe yal, ibalin kobi iru giran ali u maribe ongwa kaniwe.  
\v 14 Sia kobe iray, sia digan kobe iray, kal guman kwi dungwa main main eremue. Yobilaan bil bilungwa yal, Yobilaan Kobaan, God kamin kaun bil wen, gariba gul yal bil kobe kaun i bole kura bilama dire, sia sutakobe iray gariba gul u kole kole para pire awli i ku bilamue.   
\p
\v 15 Ena Bolima Siipe Siipe Gawlin ka iru dungwa, “Ka di i terala piro. Kunibe nerala dungwa yal ungwa mere, na iru uralwa. Yal ta kanekun ere te gal sigi dungwa mere, nomanin suna naabile kabin sire wai wen milangwa, ena yal iray gay ta gulekire wai wen pire miriin painamua,” dimue.   
\p
\v 16 Ena sia sutakobe gariba gul yal bil kobe kan diga iray, kura bilama dire, awli i ku bilangwa ai ta, kaan Kibiru ka paangwa Amagedon, dungwa gul iray awli i ku bilamue.   
\p
\v 17 Angel anan kole muru kole taran pele bala garu dungure pare, angel ta ama pele bala garu di gwi minin eremue. Kenin ere ke milungwa bol God ogin ali dungwa, gala bil dire ka iru di ungwa, “Kal ere i tega para wei simua.”  
\v 18 Dungure pare kamin nege erungure, te tele bilkaw dungure, te kamin guru dungure, te ememe bilkaw wen pilau dimue. Pilau dimba, goma ememe bil iru gariba gul u maribe ta pekemue.  
\v 19 Ememe ungure, ogu ai bil si suulungure, u baan sutakobe pirere kirara u sutaw omue. Te gariba gul para muru ogu ai bil ta ta para si suulungure, u sutaw omue. Bebilon ibal kal ki erungwa, God nomanin si pirere, den gule ibalin kobi tomue. Ibalin kobi gain giil bilkaw pirama dire, den gule tomue.  
\v 20 Gariba mege mege pirin nil wenabe di suna erungwa para, te kamin kuul para u sutaw pire para wei simue.  
\v 21 Nimin nirimil boi di yaa main sungwa, milin taran taran kobile obin dongwa mere dere yaa main simue. Sungure ibal kobe bilemia, ena ibalin kobe gain ka si God tomue.   
\c 17  
\s1 Yal maale ingwa abal singaba, God gain giil bil abalini tongure ingwa  
\p
\v 1 Ena angel anan kole muru kole sutan pele bala inin inin aa tongwa, angel ta i milungwa suna ure ka iru di na tongwa, “Bebilon ogu ai bil iray nil binanbile maala milungwa, ibal kobe ali ki paangwa yal maale ingwa abal mere, ibalin kobi iru milemua. Milungwa God gain giil pire tenangwa, di maribe ere i teralgire, kanana wo.  
\v 2 Yal maale ingwa abal bil iray milungure, gariba gul yal bil kobe pi abal i kulere bole kunibe imua. Ibal nil wain nere omilin maalungwa mere, gariba gul ibal pi abalini bole paire kal ki ere omilin maalemua.”   
\p
\v 3 God Iban na denan miranan suna paire niminin mile na tongure, angel iray na awli gariba simi yongwa gul omue. Na awli ongure milere, kabe biin baa ta ele paangwa mun bolimina abal ta aw si milungwa kaniwe. Kabe biin i ka minin ganin binanbile gain mina bilungwa, gain ka si God tongure, te gibilin anan kole muru kole sutan kulere, te gibilin sigin anan kole kole muru kulemue.  
\v 4 Te aw si milungwa abal iwe. Abalini gal nobe mere dungwa, te gal baa sigi dire, te kobile gol te kobile tobe bil bilungwa, te siine yuin wai wen abalini egin iru gale milemue. Abalini yal maale ingwa abal mile kal ki iru ere milungwa, kobile gol sin kabe aa tongwa ali kal ki erungwa main pi ali muulemue.  
\v 5 Abalini maabin mina kaan ta main aal kule paangwa, minin ganin bile paalungwa ka iru dungwa, “Na Bebilon abal bil milere yal maale ingwa abal kobe, na abalin kobi man milere, te kal ki iru erungwa ibal, na ibalin kobi man para miliwa.”  
\v 6 God ibalin gawliman kobe si gulungwa mayan dungwa, te pire gi di Yesu tongwa gulungwa mayan para dungwa, abal i mayan iru nere omilin maalungwa kaniwe.  
\p Ena na abalini kaniga, na pire buul kuniwe.  
\v 7 Kunigire angel iray ka iru di na tongwa, “Tameran i pire buul kunine? Abal i te kabe biin abal i awli ongwa, main aal kule paangwa di maribe ere i terala piro. Kabe biin kan diga i, gibilin anan kole muru kole sutan kulere, te gibilin sigin anan kole kole muru kulemua.  
\v 8 Goma kabe biin i kwi milimba, malia ta milekemua. Ta milekimba, enderin gaul ai pisere ere yebe urala di eremua. Unangure pare, eme kirara wei sinamua. Ibal mile painangwal painangwa, ibalin kobe kaan gariba gul kaya ole ere yekungwa kaun, buku ta ali bile paalemua. Paalimba ibal kobe gariba gul mile kaan iru bile paalekungwa, ena ibalin kobi gariba gul milungwa kabe biin i kane buul kunamua. Goma kwi milimba, malia ta milekire eme u maribe namia, ena ibalin kobi kane buul kunamua.   
\p
\v 9 “Ka ta diga nomanin paangwa ibal pirekun erangwa, main piramua. Kabe biin i gibilin anan kole muru kole sutan kulungwa iwe, kamin kuul iru mere di bilemua. Abal i kamin kuul mina iray amin di milemua. Te gibilin anan kole muru kole sutan kulungwa, main ta ama dungwa iwe, yal bil anan kole muru kole sutan milungwa di bilemua.  
\v 10 Yal bil kobe iwe, anan kole muru goma u sutaw ongure, ta malia kenin ere ke milungure, te ta ole u maribe ta pekemua. Ta eme u maribe nangwa iwe, unangwa kaun tawliga milamua.  
\v 11 Te kabe biin i goma kwi milimba, malia kwi ta milekungwa iwe. Yalini yal bil ta ama eme milamua. Yal bil anan kole muru kole sutan milungwa mere, kabe biin yal bil i para iru milamua. Milere eme kirara wei sinamua.   
\p
\v 12 “Te gibilin sigin anan kole kole muru dungwa main iwe. Yal bil anan kole kole muru gariba gul ole ta kenin ere ke mile milekungwa di bilemua. Ole ta kenin ere ke mile milekimba, yalin kobe kabe biin bole kamin kaun tawle kenin ere ke milamua.  
\v 13 Yal bil kobi nomanin taran paire inin yobilaan bile kenin ere ke milungwa main, yobilaan pai kabe biin i tomua.  
\v 14 Tere Bolima Siipe Siipe Gawlin bole kura bilamba, Bolima Siipe Siipe Gawlin te yalini gawliman paale suna ere ingwa ibal, ka main pire gi dire aa gi di pirungwa ibal para, yalin kobi si kiranin bile erangure, u sutaw namua. Bolima Siipe Siipe Gawlin iru ere ibalin kobi tenangwa main iwe, yal singaba kobe milungwa, yalini yalin kobe kenin ere ke milere, te gariba gul yal bil kobe milungwa, yalini yalin kobe goma yere pire yaa ime si te milemua.”   
\p
\v 15 Dire ena angel iray kwi ainere ka iru di na tongwa, “Yal maale ingwa abal milungwa gul, nil binanbile maala milungwa kaninga iwe, nil iray gariba bilin ibal te u taminin bil milungwa ibal, te kuru kama ibal te ka kowa more more paangwa ibal, ibalin kobi nil iray iru mere di bilemua.  
\v 16 Kabe biin gibilin sigin anan kole kole muru yal bil kan diga i, te kabe biin iray kaninga, ibalin kobi den gule tere kaymin paale yal maale ingwa abal tenamua. Abalini kalkan para aa te nongwa, ibalin kobi girin di inangure, abalini yorowan bole milamua. Ibalin kobi abalini miin bale nere gain enderin galangure, de taa namua.  
\v 17 Yal bil kobi nomanin taran paire inin kenin ere ke milungwa main yobilaan pai kabe biin tongwa mere, God pirungwa, yalin kobi pire wiina erama dire, God iru ere yalin kobi tomua. Tomba God ka dungwa pi nima nangwa kaun, yobilaan pai kabe biin tongwa main wei sinamua.   
\p
\v 18 “Abal ta iray i kaninga iwe, Bebilon ogu ai bilkaw ta ibal kobe, gariba gul yal bil kobe kenin ere ke milungwa, ‘Abal i iru mere milemua,’ dire di bilemua,” dire angel iray iru dimue.   
\c 18  
\s1 Bebilon ogu ai si suule i sutaw erungwa  
\p
\v 1 Ena iru kanere pare, angel ta kamin ai pisere ere gariba gul ungwa kaniwe. Angel i yobilaan bil pai milere, inin naabile aw dungwa gariba gul para naabile tomue.  
\v 2 Tere ure gala bil dire ka iru dungwa, “Bebilon ogu ai bilkaw iray si suule i sutaw eremua. Kirara suule i sutaw erungwa kaniwa. Malia sia te sia digan ogu ai bil iray pire ki pai milemua. Kauba dua kabe nongwa kauba iray, te kauba kal ki erungwa para, ain iray pi aan ye pai milemua.  
\v 3 Ogu ain iray ibal kal piril sungwa erungwa, u sinaa di u gariba kole kole para omua. Gariba gul yal bil kobe pi abalini bole paire kunibe ingure, te abalini kalkan para kane daan gule irala dimia, ena aibe tobe erungwa yal kobe kobile moni te bona gana binanbile gure ire aa te nomua.”   
\p
\v 4 Ena iru dungure, kamin ai ka ta ime ure iru dungwa,  
\q1 “Na gawlimanan kobe, i ogu ai bil iray pisere ere mena wo. Gin taran wei di ere mena wo. Ibalin kobi kal digan ere taalime erungwa, i bole para ta erekinanga paamua. Te ibalin kobi gain giil pire milangure, i bole para ta pire milekenanga paamua.  
\v 5 Gariba mina kalkan aa taminin si yongwa, maa pi kamin mina ongwa mere, abalini kal digan ere taalime erungwa binanbile iru wen maa yebe omua. Kal ki iru erungwa, God kane gain giil pire tomua.  
\v 6 Ibalin kobe kal digan ere i tongwa mere, maan iru ere ibalin kobi to. Ere tenanga, maa kora kule to. Gain giil pire i tongwa, i maan maa kora kule pire to.  
\v 7 Ibalin kobi inin egin wai gale komina depil nongwa mere, i giil iru pire ibalin kobi to. Pire tenanga main iwe, ibalin kobi ka iru di milungwa, ‘Na ibal singaba bil milebinwa. Ibal binanbile u na kule milungwa, na inan ta milekebinwa. Te na kay mun bile yaare ta miikirabinwa.’  
\v 8 Ibalin kobi ka iru dimia, ena God kal ki ta ta ere ibalin kobi tenangwa, are kaun ta gin taran giil pire tenamua. Pire tenangwa iwe. Nibil ere terere, te inin kay mun bile yaare miinama dire, ere terere, te kenan bil gule ibalin kobi tenamua. Enderin bil denangure, ibalin kobi de taa namua. Ka kol ere ibalin kobi tongwa yal, God Singaba ere tenangwa main iwe, yalini naanin paire inin niminin wen milemua.”   
\p
\v 9 Ena gariba gul yal bil kobe pi Bebilon ibal kobe bole paire irere, te kal piril sungwa iru erere, ogu ai iray enderin dere de taa ongwa kanere, kay mun bile yaare miinamue.  
\v 10 Ogu ai iray ibal giil bilkaw piremia, ena yalin kobi tayan mile kanere ka iru dungwa, “Eke, miriin pirie. Ogu ai bil Bebilon, God kaun tawle, gin taran ibalin kobe sire i sutaw ere giil pire tomua.”   
\p
\v 11 Ena aibe tobe erungwa yal kobe bona gana kwi yekinangwa paamia, ena yalin kobi ogu ai iray pire kay mun bile yaare miimue.  
\v 12 Bona gana goma yongwa kal iwe, kobile gol yerere, te ain yobilagi ta kaan siliba yerere, te kobile tobe bil bilungwa yerere, te nil kabe ta milin ta tobe bil bilungwa kaan pel yerere, te gal wai wen dungwa yerere, te gal pilaan paire naanin paangwa yerere, te gal baa ta wai wen dungwa yerere, te eri palan balungwa wai dungwa yerere, te bolima kabe bil kaan elapant sigin bale ere yongwa yerere, te eri palan balungwa tobe bil bilungwa yerere, te ain yobilagi te kobile wai dungwa kalkan ere yongwa yerere,  
\v 13 te kal minanin wai sungwa kalkan kaan sinamon te kaa te ulgu paula te wel niriin, tobe bil bilungwa te paula ta yerere, te nil wain te eri niriin ta ibal nenangwa yerere, te komina birete palua te eri milin yerere, te bolimakau te bolima siipe siipe yerere, te bolima ausi te bolima ausi gure pala dungwa kal ain yobilagi yerere, te nil konagi yal abal para yerere, aibe tobe erungwa yal kobe goma kalkan iru yomba, malia kwi ta yekinangwa paamue.  
\v 14 Ta yekire aibe tobe erungwa yal kobe iru dinangwa, “I Bebilon ibal kalkan mun bile irala dinga, kal i kirara wei simua. I kulgal bona te kobile moni aa te nenga, te egin galinga kal para wei simua. Goma aa te nenga kal iray i kwi ta kanekinanwa.”  
\v 15 Dungure aibe tobe erungwa yal kobe ogu ai iray kalkan yere, te kalkan gibilin sire kobile moni binanbile gure ingwa, ogu ai ibal gain giil piremia, ena yalin kobi tayan ale mile kay mun bile yaare miire,  
\v 16 ka iru dinangwa, “Eke, miriin pirie. Ogu ai bil Bebilon, u sutaw ongwa kanebinga miriin pirie. Ogu ai iray ibalin kobi gal pege wai te gal nobe gi kulungwa te gal baa goma wai wen egin galere, te kobile gol te kobile tobe bil bilungwa, te nil kabe ta milin tobe bil bilungwa kaan pel, para egin wai galungwa, kal ali dungwa ire warimba malia i kano.  
\v 17 Kaun tawle gin taran ibalin kobe kulgal bona te kobile moni aa te nongwa, kirara wei simua.”  
\p Ena sipe nen kobe para te sipe ongwa ibal te sipe konagi erungwa ibal, ibal para nil minimina ware konagi erungwa, ibalin kobi tayan ale mile,  
\v 18 ogu ai iray enderin dere enegi bil maangwa kanere, gala dire ka iru dungwa, “Ogu ai bil iray dungwa, ogin ai bil ta kuunin ta dimo? Wen ta dikimua.”  
\v 19 Dire gariba mai kaure simil kay miire, te kay mun bile yaare miire iru dungwa, “Eke, miriin pirie. Ogu ai bil, Bebilon u sutaw ongwa kanebinga miriin pirie. Sipe kobaan pirin nil minimina ware konagi erungwa, ogu ai iray pire kobile moni binanbile ire ire eremua. Erungwa ai iray kaun tawle gin taran kalkan para muru wei simua,” dire kay miimue.   
\p
\v 20 Ena ogu ai iray si suule u sutaw omia, ena kamin ai ibal milinga, wai pire miriin payo. Ai taran i kal ki ere i tongwa, God ka kol ere tere giil pire tomia, ena God ibalin gawliman te nusi erungwa ongwa ibal, Aposel, te ka kebe ibal, i ibal kobe wai wen pire miriin payo.   
\p
\v 21 Ena kal main iru wei sungure, angel ta naanin wen paangwa, kobile milin bilkaw wen aa tere pusi pirin nil ali erere ka iru dungwa, “Na kobile iray pusi eriga mere, ogu ai bil Bebilon iru si suule u sutaw nangure, ibal ain iray kwi ta kanekinamua.  
\v 22 Ogu ai iray ali gita dungwa mere kaan kaap ta sekenangure, te pu mugu ama ta sekenangure, te bu mugu dungwa ama bu ta dikinamua. Kal miremil erungwa yal ta ta para ogu ai i ala konagi ta erekinangure, te dodal milin si darawal dungwa ama ta dikinamua.  
\v 23 Enderin derin ogu ai iray para ta dekenangure, te yal abal gibilin si ire wai pire miinin maangwa mere, iru ta erekinamua. Aibe tobe erungwa yal kobe ogu ai iray milungwa, yalin kobi yobilaan bile niminin mile milungure, te ogu ain iray ibal kankiray erere gariba gul ibal para bawle tomua.” Dire angel iru dimue.   
\p
\v 24 God ka kebe yal kobe te yalini ibalin gawliman kobe ogu ai iray ala si gulemia, ena God giil pire Bebilon ibal kobe tomue. Iru si gulungwa tawle tamama, ibal para ogu ai iray ala si gulemue.   
\c 19  
\s1 Bebilon ogu ai si suule i sutaw erungwa kamin ibal kane deminin si God tongwa  
\p
\v 1 Ena kal iru erungure pare, ibal binanwenbile kamin ai mile gala bil dungwa mere dungwa piriwe. Dungwa ka iru dungwa, “God deminin si tobinwa. Ibal kobe sigare kule u wai ongwa main te deminin sire kaan gale yebe erungwa main te yobilaan bile niminin milungwa main, main sutakobi God kobaan taran milemua.  
\v 2 Yalini ka kol ere ibal tongwa, kawen kirara dimia, kuunin paimua. Paingwa main iwe, yal maale ingwa abal kal ki erungwa sinaa di u bil ongure, gariba ibal para iru eremia, ena God ka kol ere abalini tere pirin pai tomua. Abalini God nil konagi ibal kal ki ere tere si gulungwa, ena God maan sire giil pire abalini tomua.”  
\v 3 Dire ka ta gala kwi dire di tere iru dungwa, “God deminin si tobinwa. Ogu bil enderin dere enegi maare pi kamin ai pi milangwal milamua.”  
\v 4 Dungure pare yal singaba yal ta aan kawn muru na anan milin sui sui ire, te kalkan sui sui kwi milungwa kobe ire, te ibalin kobi bole para kenin ere ke milungwa bol amin di milungwa yal, God kawn mina yaa gobin bile ana dire deminin si yalini tere iru dungwa, “I ka dinga, i kawen dinwa. Deminin si i tobinwa.”   
\p
\v 5 Dungure pare God kenin ere ke milungwa bol maala ka ta ure iru dungwa, “God nil konagi ibal, te ibal maangwa yaangwa para kuril pire yalini tenga, i ibal kobe deminin si God to.”   
\s1 Bolima Siipe Siipe Gawlin abal ingwa yalini komina bil nongwa  
\p
\v 6 Ka iru dungure pare, ibal binanwenbile u ku bile ka dungwa tele dungwa mere dungwa piriwe. Piriga mere iwe, nil kuun bilkaw sungwa, te kamin guru dungwa, kal sui iray tele dungwa mere dungwa piriwe. Ka iray dire iru dungwa, “God deminin si tobinwa. Tobinga main iwe, na ibal kobe yal Singaba, yal naanin wen paangwa Yobilaan Kobaan, God malia yalini kenin ere ke mile milangwal milamua.  
\v 7 Bolima Siipe Siipe Gawlin abal ingwa kaun u bawa dungure, te abal i kalkan aa tekun eremia, ena na ibal kobe wai pire miinin maare yalini kaan gale yebe ere deminin si terabinwa.  
\v 8 Abalini gal pege wai wen sigi dungwa, God ‘Para owa,’ dimua.” Dungure gal pege wai wen sigi dungwa main iwe, “God ka main ibal taminin abal mere milemua,” di bilungure, te ibalin kobi kabin sire wai wen mile pai erungwa mere, gal pege iray di bilemue.   
\p
\v 9 Ena angel ta ka iru di na tongwa, “Ka di i terala, pire ka minin ganin bilo. Bolima Siipe Siipe Gawlin abal ingwa, ibal kobe komina bil nenama dire, ‘Wo,’ di tongwa ibalin kobi, wai pire miriin painamua.” Dire ainere ka iru di na tongwa, “Ka di i tega i, God kawen dungwa paamua.”  
\v 10 Dungure angel iray singaba bil milema di pire, kawn mina yaa gobin bile ana dire deminin si yalini terala di eriiba, yalini ka iru di na tongwa, “I kal iru ere na tekio. I te i ka main enin kobe na para nil konagi ere Yesu tere, te Yesu ka main pire gi dire ka di gawa di tenga mere, na para iru milia, ena ana dire deminin si God to.”  
\p Ka iru di na tongwa piriga main iwe, Yesu ka main yalini inin di maribe ere ibal tongwa main, main i yobilaan bile ka kebe yal kobe tomue.   
\s1 Bolima ausi pege yal ta aw sungwa  
\p
\v 11 Iru kanigire pare, kamin ai kol yawle dungure, bolima ausi pege ta kaniwe. Bolima ausi aw si milungwa yal kaan sui iru paangwa, “Kal iru eralwa,” dungwa mere iru erungwa yal milere, te yalini kawen kirara di milemue. Yalini ka kol ere ibal tere, te kura bile tongwa mere, kuunin ere milemue.  
\v 12 Enderin bawl sungwa mere, yalini omilin iru kulere, te kenin ere ke milungwa yal gibilin gal binanbile gibilin mina kaumue. Yalini kaan ta gain mina bile paalimba, yalini inin tawle kaan main iray pirungure, ibal wen ta kaan main iray ta pirekemue.  
\v 13 Yalini galsuna araway sigi dungwa, mayan gal iray mina bilemue. Ibal yalini kaan gale tere ka iru dungwa, “God ka main dungwa yal, Kirisito, milemua.”  
\v 14 Kamin ai simil nen kobe bolima ausi aw sirere, te gal pege wai wen dungwa sigi dire, yalini ongwa duulin bile omue.  
\v 15 Di kuba pera algane nongwa yalini giran ali ere mena u dimia, ena yalini gariba gul ibal bilin ta ta para sinangure, u sutaw namue. Yalini niminin mile ibalin kobi kenin ere ke milere, te naanin wen paangwa yal, Yobilaan Kobaan God den gule ibalin kobi tongwa, ibal girepe milin egilungure niriin ungwa mere, yalini ibal egilangure mayan iru u mena namue.  
\v 16 Yalini galsuna mina te kawn mina kaan ta iru bile paalungwa, “Gariba gul yal bil kobe milungwa, yalini yalin kobi goma yere pire yaa ime si te milere, te yal singaba kobe milungwa, yalini yalin kobi kenin ere ke milemua.”   
\p
\v 17 Ena iru kanere pare, angel ta are dongwa suna ale milungwa kaniwe. Kauba taw kamin mina puru di ware milungwa, angel iray gala bil dire ka iru di kauba iray tongwa, “God komina bil nerala dire, i kauba kobe para u ku bile wo.  
\v 18 Gariba gul yal bil kobe te simil nen yal singaba kobe, te simil nen kobe, te bolima ausi te bolima ausi aw sungwa yal kobe, te nil konagi erungwa ibal, te nil konagi ta erekungwa ibal, te ibal maangwa yaangwa para muru ibalin kobi miin nenana wo.”   
\p
\v 19 Dungure pare kabe biin ele paangwa, te gariba gul yal bil kobe te yalin kobi simil nen kobe bole yere, bolima ausi aw si milungwa yal iray te yalini simil nen kobe bole yere kura bile terabina dire, u ku bilemue.  
\v 20 Kura bilungure, kabe biin iray, te ka kebe yal kakiibi dire kabe biin guman mina kal guman kwi dungwa erungwa yal iray, yal sui iray kanin sire i pi kanin pai tomue. Kabe biin i kaan minin ganin gain mina bile paalungwa ibal, te kabe biin giran guman kobile bale yongwa, ibal kobe ana dire deminin si kobile galbale iray tongwa, ka kebe yal kakiibi dungwa yal i, kal guman kwi dungwa erere bawle ibalin kobi tomue. Kabe biin i te ka kebe yal kakiibi dungwa yal i, yal sutan i kwi milungwa, God yal sui iray pusi enderin gaul ai eremue. Enderin gaul ai iray ain yobilagi ta kaan sulpa de dimue.  
\v 21 Yal ta bolima ausi aw sungwa, di kuba pera yalini giran ali ere mena u dimia, ena kabe biin te yalini ka kebe yal, yalsui simil nen kobe si gulemue. Si gulungure kauba ure ibalin kobe miin ne kubin maamue.   
\c 20  
\s1 Satan me erin wan tausen kanin pai milungwa  
\p
\v 1 Ena iru kanere pare, angel ta kamin ai pisere ere ime ungwa, na kaniwe. Angel iray iwe, yalini mile kol gaul ai kana giran ki milin aa tere, te ain yobilagi kan sen bilkaw para aa tomue.  
\v 2 Iru aa te ire urere, oniba bil iray aa gi dire me erin binanwenbile, wan tausen, kan iray kule paalemue. Oniba bil milungwa iwe, goma oniba ta milere yalini Satan milemue.  
\v 3 Angel iray Satan pusi kol gaul ai ali erere, kana giran mama yaale gariba kana giran du ere yomue. Satan me erin wan tausen gariba gul bilkaw ibal ta ta para milungwa bawle tekenama dire, kana giran iru kol yaalemue. Kamin kaun baan araway iray mili nangwa, wei sinangure pare, kamin kaun baan tawle kanin gule ere Satan tenamue.   
\p
\v 4 Ena iru kanere pare, yal bil kenin ere ke milungwa bol te ibal kobe bol iray amin di milungwa para na kaniwe. Kaniga ibalin kobi ka kol ere ibal tenama dire, God yobilaan iru pai tomue. Yesu ka main di maribe erungwa, te God ka dungwa, ibal kobe ka sutan i di gawa dimia, ena yal ton ibalin kobe si gulungure, ibalin kobi iban para milungwa na kaniwe. Ibalin kobi ana dire deminin si kabe biin te kabe biin i kobile galbale ta tekere, te kabe biin ibal maabin mina te aan mina minin ganin bile paalimba, ibalin kobi minin ganin i ole bilekemue. Ibalin kobi sigare kule si kwi yere, Kirisito bole me erin wan tausen kenin ere ke mile milemue.  
\v 5 Te gulungwa ibal malia kwi ta alekungwa iwe, kaun iray sigare kule si kwi ta yekire, me erin wan tausen wei sinangwa kaun, sigare kule si kwi yenamue. Goma ibal kobe sigare kule si kwi yongwa iwe, gulere alungwa ta goma iru erungwa paamue.  
\v 6 Ibal kobe kaun iray goma gulere alangwa, ena ibalin kobe wai pire miriin painamue. Enderin gaul ai mile painangwal painangwa main ibalin kobi iru ta mile paikinamue. God te Kirisito ka main kenin erungwa ibal milungwa mere, ibalin kobi iru milere, me erin wan tausen Kirisito bole kenin ere ke mile milamue.   
\s1 Satan kirara u sutaw nangwa  
\p
\v 7 Ena me erin wan tausen wei sinangure pare, Satan kanin paangwa, gule ere tenamue.  
\v 8 Gule ere tenangure gariba gul bilin ibal ta ta para kobil kuman te geril bomai kole kole milungwa, yalini ibalin kobi bawle terala dire, u kole kole namue. Ibalin kobi ibal digan milere, kaan Gogo te Megogo. Pirin nil makalua wanin mege mege dungwa mere, ibalin kobi iru binanwenbile kura bilama dire, Satan ibalin kobi i ku bilamue.  
\v 9 U ku bilere gariba kole kole para maale si suulu di warere, God ibalin gawliman kobe te God ogin ain ta yalini wai kanungwa wenabe dire i suna erimba, kamin ai enderin bil ere ime ure ibalin kobi dere de taa namue.  
\v 10 Ibalin kobi kiraan sire bawle tongwa yal Satan milungure, God yalini pusi enderin de paangwal paangwa ai eramue. Ain iray ain yobilagi kaan sulpa enderin de paingwa, nega wen dungure, God kabe biin te yalini ka kebe yal para ai iray kaya yal sui pusi ali eramue. Ibalin kobi para ali milungwa, girungwa taangwa para gain giil pire milangwal milamue.   
\s1 God ka kol bil ere ibal tenangwa  
\p
\v 11 Ena iru kanere pare, yal bil kenin ere ke milangwa bol bil ta pege kanere, te yal ta bol iray bolimina amin di milungwa para na kaniwe. Yalini milungwa ain kamin te gariba pisere kirara ere wei sungure, ibal kamin te gariba kwi ta kanekimue.  
\v 12 Te gulungwa ibal maangwa te yaangwa para, kenin ere ke milungwa bol guman mina ale milungwa kaniwe. Ibal kobe mile pai erungwa mere, ka minin ganin iru buku mina bile paalungwa, buku iray polaa dungure, te ibal mile painangwal painangwa, ibalin kobi kaan buku ta mina bile paalungwa, para polaa dimue. Gulungwa ibal goma mile pai erungwa, buku iray ka minin ganin bilungwa mere, God ka kol ere gulungwa ibal tere pirin pai tomue.  
\v 13 Pirin nil ali gulungwa alungure, te gulungwa ain te ibanin milungwa ain para alungure, ibalin kobi goma mile pai erungwa mere, God ka kol ere tere pirin pai ibalin kobi tomue.  
\v 14 Tomia ena gulungwa main te gulungwa ibal ibanin baan ta milungwa main pusi enderin de paangwal paangwa ai eremue. Ibal enderin de paangwal paangwa ai nangwa kirara kawen gulemue.  
\v 15 Ibal mile painangwal painangwa ibalin kobi kaan buku ta mina bile paalimba, ibal taw kobe kaan buku iray mina ta bile paalekenangwa, ena God ibalin kobi pusi enderin de painangwal painangwa ai eremue.   
\c 21  
\s1 Kamin te gariba kwi ta u maribe nangwa  
\p
\v 1 Ena na iru kanigire pare, kamin te gariba te pirin nil wei sungure, kamin te gariba ta kwi u maribe ongwa kaniwe.  
\v 2 God ogin ain, Yerusalem ogin ain ta, kwi God milungwa gul kamin ai pisere ere ime ungwa kaniwe. Ibalin kobi mile ungwa mere iwe, abal yal terabina dire, egin wai gale tobinga mere, iru mere ere umue.  
\v 3 God kenin ere ke milungwa bol maala ta gala bil dire ka iru dungwa, “Malia God ki pai milungwa ain, ibal suna u maribe omua. Yalini ibal bole ki pai milangure, ibalin kobi yalini gawliman milamua. God ibal bole pena gale milere ibalin kobi Nen God yalini iru milamua.  
\v 4 Ibal kobe kay miingwa, kwi ta miikinama dire, yalini iru ere ibalin kobi tenamua. Ibal gulungwa main wei sinangure, kwi ta gulekinangure, te ibal kay mun bile yaare miingwa, kwi ta miikinangure, te simil kay miingwa, kwi ta miikinangure, te gain giil pirungwa, kwi ta pirekenamua. Goma main iru paangwa, kirara malia wei sinamua.”   
\p
\v 5 Ka iru dungure pare, yal ta kenin ere ke milungwa bol amin di milere yalini ka iru dungwa, “Eno, malia kalkan para muru na kwi ere yeiwa.” Dire ka iru dungwa, “Na kawen di i teralga, ibal ka iray pire pi tegi yenangwa paamia, ena i ka iray bilo.”  
\v 6 Dire ka iru di na tongwa, “Na kalkan eriga wei simua. Kalkan para muru main na miliwa. Kalkan kawn kule erungwa, na kalkan i para eriga, te kalkan kirara wei sungwa, na kalkan i para eriwa. Nil gibilin ta i ibal nenangwa, ena mile painangwal painamua. Ibal ta nil gule nil iray nerala di pirangwa, ena na nil iray imore kule ibal i teralwa.  
\v 7 Ibal ta gariba kal pirungwa maangwa manaa di tere ka main pire gi di milangwa, ena na ibalini Nen God na milalgire, te yalini na wanan milamua.  
\v 8 Dimba ibal yobilaan ta bilekire na ka di kile di mena erungwa ibal, te ka main aa gi di pirekungwa ibal, te kal piril sungwa erungwa ibal, te ibal si gulungwa ibal, te yal abal kunibe ingwa ibal, te kankiray erungwa ibal, te kobile galbale deminin si tongwa ibal, te kakiibi kobaan, ibal para iru kobile kaan salpa enderin de painangwal painangwa ain milangwa paimua. Ain iray milangwal milangwa kawen kirara gulamua.”   
\s1 Yerusalem ta kwi u maribe nangwa  
\p
\v 9 Ena angel anan kole muru kole sutan kal ki ere ibal tongwa, pele bala ali ye maa muulungwa inin inin aa tongwa, angel ta i aa tere milungwa suna ure ka iru di na tongwa, “Abal yal ingwa, Bolima Siipe Siipe Gawlin abal ingwa, abalini i maribe ere i terala kanana wo.”  
\v 10 God Iban na denan miranan suna paire niminin mile na tongure, angel iray kamin kuul bilkaw wen na awli omue. God milungwa gul, Yerusalem ogu ai kamin ai pisere ere ime ungwa, i maribe ere na tomue.  
\v 11 God naabile aw dungwa mere, ogu ain iray iru naabilemue. Kobile ta tobe bil bilungwa, kaan yasipa, naabilungwa mere iru naabilemue. Te nilniminin are sungure alabe sungwa mere, para iru naabile alabe simue.  
\v 12 Ogu ai iray gul bobe si minin mina omue. Si pirere kana giran anan kole kole muru kawnan milin sutan bere yomue. Kana giran iray angel kobe anan kole kole muru kawnan milin sutan el kwi nuu milemue. Te kana giran mina Isirel sanamoi gawliman anan kole kole muru kawnan milin sutan kaan bile paalungwa dimue.  
\v 13 Ogu ain iray kana giran dungwa iwe, kobil kol kana giran sutakobe dungure, te kuman kol kana giran sutakobe dungure, te geril kol kana giran sutakobe dungure, te bomai kol kana giran sutakobe dungure, kana giran iru dimue.  
\v 14 Ogu ain kobile gul bobe bilkaw main sungwa iwe, kobile milin bilkaw anan kole kole muru kawnan milin sutan main i dungure, te Bolima Siipe Siipe Gawlin nusi erungwa ongwa yal kobe, Aposel, anan kole kole muru kawnan milin sutan kaan kobile iray, bolimina bile paalungwa dimue.   
\p
\v 15 Ena angel ta ka di na tongwa iwe, ogu ai iray kana giran te gul bobe bilkaw di bi kanama dire, bili ta aa tomue. Bili iray kobile gol ere yomue.  
\v 16 Gul bobe kole kole para kuunin wen dimue. Angel iray bili aa tere ogu ulin egile daangwa baan araway wen, tu tausen po kandret kilomita, dungwa kanemue. Pera te tan te araway dungwa, sutakobe kuunin wen dimue.  
\v 17 Angel bili aa tere gul bobe si mine ongwa kanala dire, araway tawle wan kandret poti po mita dungwa, kanemue. Ibal di bi kanungwa mere, angel iru di bi kanemue.  
\v 18 Gul bobe iray kobile ta tobe bil bilungwa, kaan yasipa, taminin yere kiimue. Te ogu ain iray kobile gol wai wen irere, kiingure nilniminin naabile aw dungwa mere, ogu iray iru naabile aw dimue.  
\v 19 Ogu ain iray main kobile anan kole kole muru kawnan milin sutan kobile tobe bil bilungwa ire egin gale tere inin inin yomue. Ogu main kobile ta, kobile ta kaan yasipa dungwa yomue. Ogu main kobile ta, kobile ta kaan sapaya dungwa yomue. Ogu main kobile ta, kobile ta kaan agete dungwa yomue. Ogu main kobile ta, kobile ta kaan emeral dungwa yomue.  
\v 20 Ogu main kobile ta, kobile ta kaan sadonikis dungwa yomue. Ogu main kobile ta, kobile ta kaan konilian dungwa yomue. Ogu main kobile ta, kobile ta kaan kirisolait dungwa yomue. Ogu main kobile ta, kobile ta kaan beril dungwa yomue. Ogu main kobile ta, kobile ta kaan topas dungwa yomue. Ogu main kobile ta, kobile ta kaan kirisopires dungwa yomue. Ogu main kobile ta, kobile ta kaan kayasin dungwa yomue. Ogu main kobile ta, kobile ta kaan ametis dungwa yomue.  
\v 21 Kana giran anan kole kole muru kawnan milin sutan nil kabe ta milin kaan pel dungwa ere yomue. Kana giran inin inin pel taran taran bilkaw ere yomue. Te kombil kobile gol wai wen ere yongure, nilniminin naabile aw dungwa mere, kombil iru napa ere dimue.   
\p
\v 22 Ogu ai iray ka main ogu wen ta dekungwa kaniwe. Iru kaniga main iwe, naanin wen paangwa yal, Yobilaan Kobaan, God Singaba te Bolima Siipe Siipe Gawlin milungwa, ka main ogu dungwa mere, yal sui iray iru milemue.  
\v 23 Ogu ain iray God naabile aw dungwa u maribe ongure, te Bolima Siipe Siipe Gawlin enderin derin mere milemia, ena are ta sekere te ba ta dekungwa paamue.  
\v 24 Te ibal para muru, naabile aw dungwa gul i kol waramue. Te gariba gul yal bil kobe egin galungwa kal aa te nongwa, ogu ai iray kalkan kobi kire di yuu yenamue.  
\v 25 Kamin si bilungwa ogu ai iray u maribe ta pekenamia, ena kana giran girungwa taangwa para yawle erangure, ta yaalekinamue.  
\v 26 Gariba bilin ibal ta ta para egin galungwa kal aa te nongwa para, kire di i ogu iray ala unamue.  
\v 27 Dimba kalkan si kunal sungwa, te ibal kal piril sungwa erungwa, te ibal kakiibi dungwa, kalkan te ibal iru ogu iray ala ta pekenamue. Ibal mile painangwal painama dire, Bolima Siipe Siipe Gawlin ibalin kobi kaan buku ta mina bile paalungwa, ibalin kobi iru tawle ogu ain iray ere ala nangwa paamue.   
\c 22  
\s1 Nil ta te eri ta nere mile painangwal painangwa main dungwa  
\p
\v 1 Ena angel ta ogu ai iray i maribe ere na tongwa milere nil nuule ta ibal nil iray nenangwa, mile painangwal painangwa yalini para i maribe ere na tomue. Nil nuule yaangwa iwe, nilniminin naabile aw dungwa mere, nil iray iru naabile aw dungure, te nuule iray nil gibilin God te Bolima Siipe Siipe Gawlin kenin ere ke milungwa bol suna nil iray umue.  
\v 2 Urere ogu ai kombil suna umue. Nil nuule binan kole ibe te kolia kwi milungwa eri ta maare dimue. Eri iray me erin taran milin ginin anan kole kole muru kawnan milin sutan morin morin kulemue. Ba gire yongwa yongwa mere kule omue. Gariba gul bilin ibal ta ta para u wai pi milama dire, eri iray arin kabe madasin mere dimue.  
\v 3 God kalkan nigi de kanungwa kalkan i, ogu ain iray ala ta dekenamue.  
\p God te Bolima Siipe Siipe Gawlin kenin ere ke milungwa bol ogu ain iray ala dinamia, ena God nil konagi ibal ana dire deminin si yalini tenamue.  
\v 4 Ibalin kobe yalini guman kanangure, te yalini inin kaan ibalin kobi maabin mina bile paalamue.  
\v 5 Te kamin kwi ta gire si bilekenangure, te kewa ta galekinangure, te are ta sekenamue. Main iru u maribe nangwa iwe, God Singaba aw di ibalin kobi tenangure, yal bil kenin ere ke mile milungwa mere, ibalin kobi inin yal bil mere mile, milangwal milamue.   
\s1 Yesu gin taran unangwa  
\p
\v 6 Ena angel iray ka iru di na tongwa, “Na kawen di i teralga, ibal ka iray pire pi tegi yenangwa paamua. Te God Singaba yalini inin Iban ka kebe yal tongwa kalkan taw gin taran u pilau dinangwa, God nil konagi ibal pirama dire, yalini inin angel ta nusi eremua.”   
\p
\v 7 Te Yesu ka iru dungwa paangwa, “I piro, na uralga kaun u maala omua. ‘Kalkan u maribe namua,’ dire Yon buku ta iru bile ka di maribe erungwa, ibal kobe ka iray pire wiina erangwa, ena ibalin kobi wai pire miriin painamua.”   
\p
\v 8 Ena na Yon mile kal para kan diga i, kaya pi kaniwe. Na kane wei sirere pare, angel kal iray di maribe ere na tongwa, na yalini kawn mina yaa gobin bile ana dire deminin si yalini terala di eriiba,  
\v 9 yalini ka iru di na tongwa, “I kal iru ere na tekio. I te ka kebe yal kobe ka main enin kobe nil konagi ere Yesu tere, te ka minin ganin buku iray bile paalungwa, pire wiina eringa mere, na para iru milia, ena ana dire deminin si God to.”  
\v 10 Dire ka ta iru di na tongwa, “‘Kalkan u maribe namua,’ dire buku ta i, i di maribe erana dire i tongwa, i aal kulekio. Kalkan i u maribe nangwa kaun u maala omia, ena i aal ta kulekire di maribe ere to.  
\v 11 Kalkan i u maribe nangwa u maala omia, ena ibal kobe kal ki ere milungwa, ibalin kobi iru ere milangwa paangure, te ibal kobe kal piril sungwa ere milungwa, ibalin kobi iru ere milangwa paamba, ibal kobe kal wai ere milungwa, ibalin kobi iru ere milangwa paangure, te ibal kobe kabin sire kal wai ere milungwa, ibalin kobe iru ere milangwa paamua.”   
\p
\v 12 Ena Yesu ka iru dungwa, “Ka dirala piro. Na kwi uralga kaun u maala omua. Ibal kobe mile pai erungwa mere, na kanere tobe kuunin maan terala dire uralwa.  
\v 13 Kalkan para muru main na miliga, te kalkan kawn kule erungwa, na kalkan i para eriga, te kalkan kirara wei sungwa, na kalkan i para eriga yal na miliwa.”   
\p
\v 14 Kwi milungwa eri milin nerala dire, te ogu ain iray kana giran pi ala nala dire, ibal kobe galsuna bigin sungwa mere, God ka dungwa pire wiina eremue. Iru ere milungwa ibal, wai pire miriin painamue.  
\v 15 Dimba ogu ain iray mena kol milungwa ibal iwe, awi biin ele paangwa mere milungure, te kankiray erungwa ibal milungure, te yal abal kunibe ingwa ibal milungure, te yal abal si gulungwa ibal milungure, te galbale kobile ana dire deminin si tongwa ibal milungure, te kakiibi di wai pirungwa ibal milungure, ibal iru ogu ain mena kol milamue.   
\p
\v 16 “Ena na Yesu mile ka main ibal taminin ta ta para ka dungwa i, pirama dire, na inan angel ta nusi ime eriwa. I sanamoi Debiti yalini komin kanin na milere, te yalini gawlin na para miliwa. Te kulmama kwimile taanima de dungwa, Mebil iray de dungwa mere, na mile aw di i te miliwa.”   
\p
\v 17 God Iban te ka main ibal taminin Yesu Kirisito pire gi di tongwa ibal para, “Pire gi di Yesu tenana wo,” dimue. Te ibal para ka dungwa i pirangwa, ibalin kobi para, “Pire gi di Yesu tenana wo,” dimue. Nil ta ibal nil iray nenangwa, mile painangwal painamue. Ibal ta nil iray gule te nil iray nerala dinangwa, ena yalini nil iray imore nenana wo. Nenangwa sigare kule u wai namue.   
\p
\v 18 Ena na Yon mile i kiranin aa tere ka niminin mile di i terala piro. “Kalkan ta eme u maribe namua,” di i tega i piringa, ena yal ta mile, “Yon ka dungwa paimba, na main taw ama di maribe ere i teralwa,” dire yalini kal main gogo ta iru eramia, ena, “God giil obin dongwa tenamua,” diga mere, God kal iru ere yal iray tenamue.  
\v 19 Te “Kalkan u maribe namua,” dire buku ta i di maribe eriga, yal ta mile, “Yon ka dungwa i paikimua,” dinangwa, ena yal iray kwi milungwa eri milin ta nekire, te God ogin ain iray pi ala ta pekenama dire, God kal main iru ere yalini tenamue. Iru ere tenangwa mere iwe, ka minin ganin bile i tega, ka iray bile i teiwe.   
\p
\v 20 Ena ka di i ibal kobe tega, kobaan yal i ka iru dungwa, “Owa, na gin taran ere ime uralwa.” Dungure Yesu Singaba i kawen dinga, ena para, i kwi ere ime wo.   
\p
\v 21 Yesu Singaba kenin wai ere God ibalin gawliman para tenama di piriwe.