\id 1TI - Gawli Marathi 1
\ide UTF-8
\h ತಿಮೊತ್ಯಾಲಾ
\toc3 1 ತಿಮೊಥಿ
\toc2 1 ತಿಮೊತಿ
\toc1 ಪೌಲಾನಿ ತಿಮೊತ್ಯಾಲಾ ಲಿವ್‌ಲ್ಯಾಲ ಪೈಲ ಪತ್ರ
\mt2 ಪೌಲನು ತಿಮೊತಿಯವರಿಗೆ ಬರೆದ ಮೊದಲನೆಯ ಪತ್ರಿಕೆ
\mt1 ಪೌಲಾನಿ ತಿಮೊತ್ಯಾಲಾ ಲಿವ್‌ಲ್ಯಾಲ ಪೈಲ ಪತ್ರ
\imt ವಳಕ್
\ip ಅಪೊಸ್ತಲ್ ಜಾ಼ಲ್ಯಾಲಾ ಪೌಲ್ ತ್ಯಚ಼ ಶಿಶಾ ಜಾ಼ಲ್ಯಾಲ್ಯಾ ತಿಮೊತ್ಯಾಲಾ ಲಿವ್‌ಲ್ಯಾ ಪತ್ರ ವ್ಹಯ್. ಯೇಸು ಕ್ರಿಸ್ತ್ ಜ಼ಲಾಮ್‌ಲ್ಯಾ ನಂತರ್ 62-64 ವರ್ಸ ಜಾ಼ಲ್ಯಾನಂತರ್ ಹ್ಯ ಪತ್ರ ಲಿವ್ಲ ಆಸಲ್, ಹ್ಯ ಪೌಲಾನಿ ಸರ್ತ್ಯಾ ಯಳಾತ್ ಲಿವ್‌ಲ್ಯಾ. ಪೌಲಾಚೆ ಆನಿ ತಿಮೊಥಿಚೆ ಮದ್ದಿ ಚಾ಼ಂಗ್ಲ ಸಮನ್ ಹುತ್ತ ಮನ್ಹುನ್ ಪೌಲಾ ತಿಮೊತ್ಯಾಲಾ ಕವಾಬಿ ಲೆಕಾ ಮನ್ಹಿತಾ. \xt ಪಿಲಿಪ್ಪಿ 2:22,\xt*\xt 1 ತಿಮೊಥಿ 1:2-18\xt* ಹ್ಯ ಚಾರಿತ್ಲ ಯಾಕ್ ಪತ್ರ ಜಾ಼ಲ್ಯಾ.
\ip ಪೌಲಾನಿ ಸಬೆಲಾ ಲಿವಾಚೆ ಆಂದಿ ಯಕಾ ಮಾನ್ಸಾಲಾ ಲಿವ್‌ಲ್ಯಾ. ದುಸ್ರಿ ತೀನ್ ಪತ್ರಿ ಕಚಿ ಮಂಜೆ ದೊನ್ವ ತಿಮೊತಿ ತೀತ್ ಆನಿ ಪಿಲೊಮೊನ್ ಸಬೆಚೆ ಆರಾಧನೆಸಾಟಿ ಯಕ್‌ವ್ಯಾ ತಿಮೊತಿತ್ ಖುಬ್ ಪಾರ್ಕಿ ಹಾತ್ತಾ\xt 2:1-15\xt* ಸಬೆಚಾ ಜಾಂತ್ಯಾನಾ ವ್ಹಯಿ ಆಸ್‌ಲ್ಯಾಲ ಗುನ್ \xt 3:1-13 \xt*ಆನಿ ಲಬ್‌ಡ್ಯಾ ಸಿಕಿವ್‌ನ್ಯಾತ್ನಿ ಹುಶಾರ್ಕಿ ಸಾಂಗ್\xt 1:3-11,\xt* \xt 4:1-5,\xt* \xt 6:2-5\xt* ಹ್ಯ ಸಗ್ಳ ಪೌಲ್ ಕಚೆ ತರನಿ ಸಬೆಂಚೆ ಮದ್ದಿ ತಿಮೊತಿ ಯಕಾ ಫುಡಾರಿಚೆಗತ್ ಕಸಿ ತರಬೆತಿ ದಿಯಿತಾ ಮನ್ಹಾಚ಼ ದ್ಯಾವ್ತ. ತಿಮೊಥಿಚಾ ಯಕವ್ಯಾ ಪತ್‌ರ‍್ಯಾತ್ ಖುಬ್ ನೆಮ್ ಹಾತ್ತ ಹ್ಯಾ ಯಳಾತ್ ಆಜು಼ಬಾಜು಼ಚೆ ಸೆಬೆಚಾ ಜಾಂತ್ಯಾನಾ ಕಸಿ ಸೆವಾ ಕರಾಯಾ ವ್ಹಯಿ ಮನ್ಹುನ್ ಮಜ಼ತ್ ಜಾ಼ಲೆ.
\iot ಭಾಗ್
\io1 1. ಪೌಲ್ ತಿಮೊತ್ಯಾಲಾ ನಮಸ್ಕಾರ್ ಸಾಂಗಿತ್ ಸುರ್ವಾತ್ ಕರ್ತೊ. \ior 1:1-2 \ior*
\io1 2. ನಂತರ್ ಲಬಾಡ್ ಸಿಕಿವ್‌ನ್ಯಾತ್ನಿ ಜಾ಼ಗೃತ್ ದೆತೊ \ior 1:3-11 \ior*
\io1 3. ಯೇಸು ಕ್ರಿಸ್ತ್ ಆಪ್ನು ಕ್ಯವ್ಡಾ ಉಪ್ಕಾರಿ ಜಾ಼ಲ್ಯಾ ಮನ್ಹುನ್ ಫುಡುನ್ ಸಾಂಗಿತ್ ಪತ್ರ ಮೊರ‍್ಹ ಸುರು ಕರ್ತೊ\ior 1:12-19 \ior*
\io1 4. ಮಂಗ್ ಆರಾಧನೆ ಆನಿ ಸಬೆಚಾ ಜಾಂತ್ಯಾಂಚೆ ಗುಶ್ಟಿತ್ ತಿಮೊತ್ಯಾಲಾ ಪಾರಕ್ ದೇತೊ. \ior 2—3 \ior*
\io1 5. ತಿಮೊತ್ಯಾಲಾ ಪೌಲಾಚಿ ಸರ್ತಿ ಪಾರಕ್ ದೀಯಿತ್ ಹ್ಯ ಪತ್ರ ಸಪಿವ್ತೊ \ior 4—6 \ior*
\c 1
\p
\v 1 ಪೌಲಾಪ್ನಿ ಆಮಚಾ಼ ರಾಖನ್ದಾರ್ ಜಾ಼ಲ್ಯಾಲಾ ದೇವ್ ಆನಿ ಯೇಸು ಕ್ರಿಸ್ತ್ ಆಮ್ಚಾ ಆಶಾ ಜಾ಼ಲ್ಯಾಲಾ ಮೀ ತ್ಯಚಾ಼ ಅಪೋಸ್ತಲ್ ಜಾ಼ಲ್ಯೊ.
\p
\v 2 ತು ಇಸ್ವಾಸಾಚ಼ಾ ಮನ್ಹುನ್ ಮನಾ ಖರ‍್ಯಾ ಲೇಕಾಚೆಗತ್ ರಾಸಿಲ್.
\p ಬಾ ಪರಮೇಶ್ವರಾಪ್ನಿ ಆನಿ ಆಮ್‌ಚಾ಼ ದೇವ್ ಕ್ರಿಸ್ತ ಯೇಸುಪ್ನಿ ದಯಾ ಕರ್ನಾ ಶಾಂತಿ ತುಲಾ ಗಾಹುನಿ.
\s ಬುರ್ಶಾ ಶಿಕ್ಶನಾನಾ ಹುಶಾರ್
\p
\v 3 ಮೀ ಮಕೆದೊನ್ಯಾತ್ ಜಾ಼ತಾನಾ ತು ಯೆಫೇಸಾತುಸ್ ರ‍್ಹಾ ಮನ್ಹುನ್ ಇನಂತಿ ಕಿಲಿ. ಥುಡಿ ಜ಼ನ ತಿಥ ಲೊಕಾನಾ ಲಬಾಡ್ ಸಿಕ್ವಿತಿತ. ತು ತ್ಯನಾ ಆಜ್ಞಾದಿವುನ್ ಥಾಂಬಿವ್. 
\v 4 ಕಾಲ್ಪನಿಕ್ ಕ್ಯಾಯ್‌ನ್ಯಾ ಆನಿ ತುಮ್ಚಾ ವಡ್ಲಾಂಚಿ ಮುಟಿ ಪಟ್ಟಿ ಸುಡುನ್ ದೇವಾ ನಕೊತಸ್ಲಾ ವಾದ್ ವಿವಾದ್ ಉಠಿವ್ತ ದೇವಾಚಾ ಕಾಮಾಲಾ ಉಪ್ಯೋಗ್ನಾಹಿ ದೇವಾಚ಼ ಕಾಮ್ ಇಸ್ವಾಸಾನಿಸ್ ವ್ಹತ ದೇವಾಚೆ ಯೊಜ಼ನೆಚೆಗತ್ ಕರಿತ್ನಾಹಿತ ಮನ್ಹುನ್ ಸಾಂಗತೊ. 
\v 5 ಹೆ ಆಜ್ಞೆಚಾ಼ ಉದ್ದೆಶ್ ಮಾಯಾ ಜಾ಼ಲೆ, ಹ್ಯ ಚಾ಼ಂಗ್ಲ ಮನ್ ಆನಿ ಚಾ಼ಂಗ್ಲಿ ಯವಜ್ನಾ಼ ಆನಿ ಇಸ್ವಾಸಾನಿ ಯತ 
\v 6 ಥುಡಿ ಲೊಕ ಹೆ ಗುಶ್ಟಿನಿ ವಾಟ್ ಚು಼ಕುನ್ ಗೆಲ್ಯಾತ ಆನಿ ಮುರ್ಕ ಫನಾಚಾ ವಾಗ್ವಾದಾತ್ ಜಾ಼ವುನ್ ಗಾಹುನ್ ಪಡ್‌ಲ್ಯಾತ. 
\v 7 ತ್ಯನಾ ದೇವಾಚಾ ನೇಮಾಂಚಾ಼ ಮಾಸ್ತರ್ ವ್ಹಯಾಚಿ ಆಶಾ ಹಾ, ಫನ್ ತೇ ಆಪ್‌ಲ್ಯಾ ಸ್ವತಾಚಾ ಬೊಲ್ಯಾಸ್ ಸಮಜು಼ನ್ ಗಿಹಿತ್ ನಾಹಿತ ಕಚೆ ಗುಶ್ಟಿಲಾ ತೇ ಆಪ್‌ಲ್ಯಾ ಆತ್ಮ ಇಸ್ವಾಸಾನಿ ಸಾಂಗ್‌ತ್ಯಾತ ತ್ಯಬಿ ತೇ ಸಮಜು಼ನ್ ಗಿಹಿತ್ನಾಹಿತ.
\p
\v 8 ಧರ್ಮಶಾಸ್ತಾರಾಚಾ ಆಜ್ಞಾ ಚ಼ಾಂಗ್ಲ ಫನ್ ತ್ಯ ಶಾರ್ಕ್ಯಾ ಚಾ಼ಲ್ವಾಯಾ ಪಾಯ್ಜೆತಾ. 
\v 9 ಹ್ಯ ಯಾದ್ ಥೆವಾಯಾ ವ್ಹಯಿ ಖರ‍್ಯಾನಿ ಚಾ಼ಂಗಲ್ಯಾ ಲೊಕಾನಾ ಧರ್ಮಶಾಸ್ತಾರ್ ರಚಿವಲ್ ನಾಹಿ ಫನ್ ನೆಮ್ ಪಾಳಿತ್ ನಸ್‌ಲ್ಯಾಲ್ಯಾ ಲೊಕಾನಾ ಚು಼ಕಿಚಾನಾ ಭಕ್ತಿ ಸನ್‌ಲ್ಯಾನಾ ಆನಿ ಪಾಪಿನಾ ಪರಿಶುದ್ದ ನಸ್‌ಲ್ಯಾಲ್ಯಾನಾ ಆನಿ ಆತ್ಮಿಕತೆ ನಸ್‌ಲ್ಯಾಲ್ಯಾನಾ ಆನಿ ಆಯಿಬಾಚಾ಼ ಖುನ್ ಕರ್ತ್ಯಾಲ್ಯಾನಾ ಆನಿ ಖುನ್‌ಶಾನಾ. 
\v 10 ವ್ಯಬಿಚಾರಿನಾ ಆನಿ ಅನೈತಿಕ್ ಕರ್ತ್ಯಾಲ್ಯಾನಾ ಸಲಿಂಗಾಮಿನಿ ಆನಿ ಗುಲಾಮ್ ವ್ಹತ್ಯಾಲ್ಯಾನಾ ಲಬಾಡ್ಯಾನಾ ಆನಿ ಲಬಾಡ್ ಸಾಕ್ಷಿ ಸಾಂಗ್‌ತ್ಯಾಲ್ಯಾನಾ ಆನಿ ಚಾ಼ಂಗಲ್ಯಾ ಸಿದ್ದಾಂತನಾ ಇರೋದ್ ಕರ್ತ್ಯಾಲ್ಯಾಂಚೆ ಸಾಟಿ ಹಾ. 
\v 11 ಬರೆ ಖಬರಿತ್ ಗಾವಲ್ಯಾಲ ತ್ಯ ಚಾಂಗ್ಲ ಶಿಕ್ಶನ್ ಸಾಂಗಾಯಾಸಾಟಿ ಮನಾ ದಿಲ್ಯಾ ಹಿ ಬರಿ ಖಬರ್ ಮೈಮೆನಿ ಆನಿ ಆಶಿರ್ವಾದಾಚಾ ದೇವಾನಿ ಬರ್‌ಲ್ಯಾ.
\s ದೇವಾಚೆ ದಯೆಸಾಟಿ ಪ್ರತಿ ಉಪ್ಕಾರ್
\p
\v 12 ಮಿ ಮಾಜಾ ಪ್ರಭು ಜಾ಼ಲ್ಯಾಲ್ಯಾ ಯೇಸು ಕ್ರಿಸ್ತಾಲಾ ಕ್ರತಜ್ಞತಾ ಸ್ತುತಿ ಕರ್ತೊ. ತ್ಯನಿ ಮನಾ ಮಾಜಾ ಕಾಮಾತ್ ಬಳ್ ದಿಲ್ಯಾ ಕಾ ಮಂಜೆ ತ್ಯನಿ ಮನಾ ಇಸ್ವಾಸಾಚಾ಼ ಮನ್ಹುನ್ ಆಪ್ಲೆ ಸೇವೆಲಾ ನಿವಡ್ಲಾ. 
\v 13 ಆಂದಿ, ಮೀ ಕ್ರಿಸ್ತಾಲಾ ಆಡ್ವಾ ಬೊಲ್ಯಾಲೊ ತರಾಸ್ ದಿಲ್ಯಾಲಾ ತ್ಯಲಾ ದುಖ್ ವ್ಹಯಿಜೊ಼ಗ ಕಾಮ ಕೆಲ್ಯಾಲಾ ಫನ್ ಮೀ ಕ್ಯಾ ಕರ್ತ್ಯೊ ಮನ್ಹುನ್ ಮನಾ ಸಮಾಜ಼್ಲ ನವ್ಥ ಮನ್ಹುನ್ ದೇವಾನಿ ಮನಾ ಕರ್ನಾ ದ್ಯಾವ್ಲಿ. ಇಸ್ವಾಸ್ ಥೆವಾಚೆ ಆಂದಿ ಮೀ ತ್ಯ ಸಗ್ಳ ಕರಿತೊ 
\v 14 ಆನಿ ಪ್ರಭುನಿ ಆಪ್‌ಲ್ಯಾ ಅನುಗ್ರಹಾನಿ ಮಾಜಿವ ಖುಬ್ ವತ್ಲ ಆನಿ ಇಸ್ವಾಸ್ ಆನಿ ಮಾಯಾ ದಿಲಿ ತೀ ಆಮ್ಚಾ ಯೇಸು ಕ್ರಿಸ್ತಾಚೆ ಯಕಿತ್ ಹಾ.
\p
\v 15 ಮೀ ಸಾಂಗ್‌ತ್ಯಾಲ್ಯಾ ಹ್ಯಾ ಗುಶ್ಟಿ ಖರ‍್ಯಾ ತ್ಯ ಕ್ಯಾ ಮಂಝೆ ಪಾಪಿನಾ ರಾಖಾಯಾ ಯೇಸು ಕ್ರಿಸ್ತ್ ಹ್ಯಾ ಲೊಕಾತ್ ಜ಼ಲಾಮ್ಲಾ. ತ್ಯಾ ಪಾಪಿತ್ನಿ ಮೀಚ್ ಆಂದಿಚಾ಼. 
\v 16 ಫನ್ ದೇವಾನಿ ಮಾಜಿವ ದಯಾ ದ್ಯಾವ್ಲಿ. ಹ್ಯಚಿಸ್ ಲಾಗುನ್ ಕ್ರಿಸ್ತ ಯೇಸು ಯಕಾ ಮೊಟ್ಯಾ ಪಾಪಿಚೆಗತ್ ಮನಾ ಉಪೇಗ್ ಕರುನ್ ಮೊರ‍್ಹ ಜಾ಼ಯಿತ್ ಲೊಕ ಕೊನ್ ತ್ಯಚಿವ ಇಸ್ವಾಸ್ ಥೆವ್‌ತ್ಯಾತ ತ್ಯಂಚಿಸಾಟಿ ಶಾಶ್ವತ್ ಜೀವ್ ಗಾವಾಯಾಸಾಟಿ ಯಕ ಉದಾರನೆಚಾ ರುಪಾತ್ ಮನಾ ರಚು಼ನ್ ಆಪ್ಲಾ ಪುರಾ ಸಮಾದಾನ್ ಮನಾ ದ್ಯಾವ್ಲಾ. 
\v 17 ಆತಾ ತ್ಯಾ ಅನಂತ್ ರಾಜಾಲಾ, ನಾಸ್ ವ್ಹಯಿತ್ ನಸ್‌ಲ್ಯಾಲಾ ಆನಿ ಅದ್ರಶ, ಯೊಕುಸ್ ಯೊಕ್ ದೇವ್ ತ್ಯಚಿ ಮೈಮಾ ಆನಿ ಸನ್ಮಾನ್ ಕವಾಕವಾಬಿ ರಾಹುನಿ. ತಸಸ್ ವ್ಹವುನಿ.
\p
\v 18 ತಿಮೊಥ್ಯಾ, ಮಾಜಾ ಲೇಕಾ ಮೀ ತುಲಾ ಹುಕುಮ್ ದೇತೊ ಪ್ರವಾದಿಂಚಾ ವಚ಼ನಾಂಚೆಗತ್ ಪೈಲ್ಯಾನಿಸ್ ತುಜೆ ಗುಶ್ಟಿತ್ ಪ್ರವಾದನೆ ಕಿಲ್ತಿ ತ್ಯಾ ಸಬ್ದಾನಾ ತುಜಿ ಹತ್ಯಾರಿ ಕರ್ ಹ್ಯಚಿಸ್ ಲಾಗುನ್ ತು ಮುಟಿ ಲಡಾಯಿ ಕರಾಯಾ ವ್ಹಯಿ. 
\v 19 ತುಜಾ಼ ಇಸ್ವಾಸ್ ಆನಿ ಚಾಂಗ್ಲಿ ಮನಾಚಿ ವಳಕ್ ಘಟ್ ದರ‍್ಹುನ್ ರ‍್ಹಾ ಥೊಡ್ಯಾಂಚಾನಿ ಆತ್ಲಿ ಮನಾಚಿ ವಳಕ್ ಆನಿ ಇಸ್ವಾಸ್ ನಾಸ್ ಕರುನ್ ಗೆತಲ್ಯಾ. 
\v 20 ಹುಮೆನಾಯಾ ಆನಿ ಅಲೆಗ್ಸಾಂಡರ್ ತ್ಯಂಚಾನಿ ತಸಸ್ ಕೆಲ. ದೇವಾಚೆ ಆಡ್ವ ಬೊಲಾಚ಼ ನವ್ಹ ಮನ್ಹುನ್ ಹ್ಯನಾ ಅಕ್ಕಲ್ ಯಯಾ ತ್ಯನಾ ಸೈತಾನಾಚಾ ಹಾತಾತ್ ದಿಲ.
\c 2
\s ಸಬೆಚ಼ ವವ್ಯಾಳ್ನ
\p
\v 1 ಸಗ್‌ಳ್ಯಾಂಚೆ ಆಂದಿ ಮಿ ತುಮಾನಾ ಸಾಂಗಾಚ಼ ಕ್ಯಾ ಮಂಜೆ ಸಗ್‌ಳ್ಯಾ ಲೊಕಾಂಚಿಸಾಟಿ ದೇವಾಪ ಮಾಗ್ನ ಕರಾ ವಿನಂತಿಕರಾ ತ್ಯನಾ ಉಪ್ಕಾರಾಚಾ಼ ಧನ್ಯಾವಾದ್ ಸಾಂಗಾ. 
\v 2 ಆಮಾನಾ ಸುಕ ಸಮಾದಾನ ಗಾಹುನ್ ಆಮಿ ಪುರಾ ಬಖ್ತಿನಿ, ಮರೆದಿನಿ ಜಿವ್ನಾ ಕರಾಯಾ, ರಾಜಾಂಚೆಸಾಟಿ ಸಗಳ್ಯಾ ಅಧಿಕಾರಿಂಚೆಸಾಟಿ ಮಾಗ್ನ ಕರಾಯಾ ವ್ಹಯಿ. 
\v 3 ಹ್ಯ ಚಾ಼ಂಗ್ಲ ಹಾ ಆನಿ ಆಮ್ಚಾ ರಾಖಂದಾರ್ ಜಾ಼ಲ್ಯಾಲ್ಯಾ ದೇವಾಲಾ ಆವಾಡತ್ಯಾಲ ಜಾ಼ಲ್ಯಾ.
\p
\v 4 ಸಗ್‌ಳ್ಯಾಂಚ಼ ರಕ್ಷನ್ ವ್ಹಯಾವ್ಹಯಿ ಆನಿ ಸಗಳ್ಯಾಂಚಾನಿ ಖರ ಗಿನ್ಯಾನ್ ಸಮಜು಼ನ್ ಗಿಹ್ಯಾ ವ್ಹಯಿ ಮನ್ಹುನ್ ತ್ಯಚ಼ ಮನ್. 
\v 5 ದೇವ್ ಯೊಕುಸ್, ದೇವಾಚೆ ಆನಿ ಮಾನ್ಸಾಚೆ ಮದ್ಲಾ ಯೊಕುಸ್. ತ್ಯೊಸ್ ಮಾನುಸ್ ಜಾ಼ಲ್ಯಾಲಾ ಕ್ರಿಸ್ತ ಯೇಸುಸ್. 
\v 6 ತ್ಯನಿ ಸಗ್‌ಳ್ಯಾ ಲೊಕಾಂಚೆ ಜಾ಼ತಿಲಾ ರಾಖಾಯಾ ಆಪ್‌ಲ್ಯಾಲಾ ಆಪ್ನುಸ್ ಜಾ಼ಮಿನ್ ದಿಲಾ. ದೇವ್ ಸಗ್‌ಳ್ಯಾನಾ ರಾಖಾಯಾ ಮನ್ ಕರ್ತೊ ಹ್ಯ ಶಾರ್ಕ್ಯಾ ಯಳಾಲಾ ಸಾಬಿತ್ ಜಾ಼ಲ್ಹ.
\p
\v 7 ಆನಿ ಹೆಸ್ ಸಾಬಿತ್ ಜಾ಼ಲ್ಯಾಲೆ ಗುಶ್ಟಿತ್ ಸಾಂಗಾಯಾ ಮನಾ ಯೊಕ್ ಸಾಂಗ್ನಾರಾ ಆನಿ ಅಪೊಸ್ತಲ್ ಕರುನ್ ನಿವಡ್ಲಾ ಮಿ ಹ್ಯ ಖರ ಸಾಂಗ್ತೊ ಲಬಾಡ್ ಸಾಂಗಿತ್ನಾಹಿ. ಮನಾ ಯೆಹುದ್ಯ ನಸ್‌ಲ್ಯಾಲ್ಯಾ ಲೊಕಾಂಚೆಸಾಟಿ ಇಸ್ವಾಸಾನಿ ಆನಿ ಖರ‍್ಯಾನಿ ಸಿಕವಾಯಾ ಥರಿವ್‌ಲ್ಯಾ.
\p
\v 8 ಹ್ಯಚಿಸಾಟಿ ಮಾಜಿ ಆಶಾ ಜಾ಼ಲೆ ಸಗ್‍ಳ್ಯಾ ಜಾ಼ಗ್ಯಾವ್ನಿ ಗಡ್ಯಾಂಚಾನಿ ಮಾಗ್ನ ಕರಾಯಾ ವ್ಹಯಿ ಆನಿ ದೇವಾಪ್ನಿ ನಿವಡ್‌ಲ್ಯಾಲ ಆಪ್ಲ ಪವಿತ್ರ ಹಾತ್ ಉಚ್ಲು಼ನ್ ರಾಗ್ ನಸ್ಥಾನಾ ಆನಿ ವಾದ್ ನಸ್ಥಾನಾ ಮಾಗ್ನ ಕರಾಯಾ ವ್ಹಯಿ.
\p
\v 9 ತಸಸ್ ಬ್ಯಾಯ್ಕಾ ಮಾನ್ಸಾಪ್ನಿ ಮೀ ಮನ್ ಕರ್ತೊ ತೀ ಸಾಜ಼ಸೊಬಸಾರ ಆನಿ ಚಾ಼ಂಗ್ಲ ಮರೆದಿಚ಼ ಕಪ್ಡ ಗಾಲ್ಹಾಯಾ ವ್ಹಯಿತ ಆನಿ ಕೆಸ ಶಾದ್ರಿ ಕರಾಯಾ ಸಾಟಿ ಖುಬ್ ಅಲಂಕಾರ್ ಕರುನ್ಗಿಹುನಾಹಿ ಸೊನ ಆನಿ ಮುತ್ತು ಆನಿ ಖುಬ್ ಕಿಮ್ತಿಚ಼ ಕಪ್ಡ ಗಾಲ್ಹುನಾಹಿತ. 
\v 10 ಫನ್ ಆಸ್‌ಲ್ಯಾ ಬ್ಯಾಯ್ಕಾಮಾನ್ಸಾನಾ ಆಪ್‌ಲ್ಯಾಲಾಸ್ ಆಪ್ನು ದೇವಾಚಿ ಭಕ್ತಿನ್ ಮನ್ಹುನ್ ಗೆಥಿ ಮನ್ಹುನ್ ತ್ಯಚಿಸಾಟಿ ಹ್ಯ ಚಾ಼ಂಗ್ಲ ಹಾ. ತೀ ಆಪ್‌ಲ್ಯಾಲಾ ಸಗ್‌ಳ್ಯಾ ಕಾಮಾನಾ ಚಾ಼ಂಗ್ಲಿ ದಿಸತ್ಯಾತ. 
\v 11 ಬ್ಯಾಯ್ಕಾಮಾನ್ಸ ಶಾಂತ್ಫನಾನಿ ಸಿಕಾಯಾ ವ್ಹಯಿ ಆನಿ ಸಗ್ಳೆ ತರನಿ ಆಪ್‌ಲ್ಯಾಲಾ ಆಪ್ನುಸ್ ವಪ್ಸುನ್ ದಿಯಾವ್ಹಯಿ. 
\v 12 ತ್ಯಂಚಾನಿ ಗಡ್ಯಾನಾ ಸಿಕ್ವಾಯಾ ತ್ಯಂಚಿವ ಹಾಕ್ ಚಾ಼ಲ್ವಾಯಾ ಮೀ ವಪ್ಕಿ ದಿಯಿತ್ ನಾಹಿ ತ್ಯಂಚಾನಿ ಗಪ್ ರಾಹ್ಯಾವ್ಹಯಿ. 
\v 13 ಕಾ ಮಂಜೆ ಆಂದಿ ಜಾ಼ಲ್ಯಾಲಾ ಆದಾಮ್. ನಂತರ್ ಹವ್ವಾ ಜಾ಼ಲಿ. 
\v 14 ಆನಿ ಸೈತಾನಾಪ್ನಿ ಫಸ್‌ಲ್ಯಾಲಾ ಆದಾಮ್ ನವ್ಹ. ಬ್ಯಾಯ್ಕಾಮಾನುಸ್ ಫಸುನ್ ಆನಿ ತಿನಿ ದೇವಾಚಾ಼ ನೆಮ್ ಮುಡುನ್ ಪಾಪಿ ಜಾ಼ಲಿ. 
\v 15 ಫನ್ ಬ್ಯಾಯ್ಕಾಮಾನ್ಸ ಇಸ್ವಾಸಾನಿ ಮಾಯೆನಿ ಪವಿತ್ರಾನಿ ಆನಿ ನಮ್ರತೆತ್ ರಾಯ್‌ಲ್ಯಾವ ಪ್ಯೋರ್ಗ್ಯಾನಾ ಜ಼ಲ್ಮ ದೇತಾನಾ ತ್ಯನಾ ರ‍್ಯಾಕ್ನಾರ್.
\c 3
\s ಸಬೆಚ಼ ಜಾಂತ
\p
\v 1 ಮೀ ಸಾಂಗ್‌ಲ್ಯಾಲ್ಯಾ ಹ್ಯಾ ಗುಶ್ಟಿ ಖರ‍್ಯಾ ಜಾ಼ಲ್ಯಾತಾ ತ್ಯಾ ಕ್ಯಾ ಮಂಜೆ ಮೆಳ್ಯಾತ್ಲಾ ಜಾಂತಾ ವ್ಹಯಾ ಖುಬ್ ಯತ್ನ ಕರ್ತ್ಯಾಲಾ ಚಾ಼ಂಗ್ಲಿ ಕಾಮ ಕರಾಯಾ ಮನ್ ಕರ್ತ್ಯಾಲಾ ಜಾ಼ಲ್ಯಾ. 
\v 2 ಆಮಿ ಆನಿ ಆಮ್‍ಚ಼ ಬಾಹು ದೆವಾಸಾಟಿ ಕ್ರಿಸ್ತಾಚಿ ಬರಿ ಖಬರ್ ಸಾಂಗಾಚಾತ್ ಮಾಜೆ ಸಂಗಚಾ಼ ಕಾಮ್ಗಾರಿ ಜಾ಼ಲ್ಯಾಲ್ಯಾ ತಿಮೊತ್ಯಲಾ ತುಮಾನಾ ಘಟ್ ಕರಾಯಾ ಆನಿ ಇಸ್ವಾಸಾತ್ ಉಮೆದ್ ದಿಯಾ ತುಮಚಿಪ ಆಂದಿ ಲಾವುನ್ ದಿಲ. 
\v 3 ತರಾಸ್ ದೆತ್ಯಾಲಾ ರಾಹು ನಾಹಿ ತ್ಯೊ ಚಾ಼ಂಗ್ಲಾ ಮಾನುಸ್ ಆನಿ ಥಂಡ್ ಮನಾಚಾ಼ ರಾಹ್ಯಾ ವ್ಹಯಿ ಪೈಶಾಂಚಿ ಆಸೆ ಕರ್ತ್ಯಾಲಾ ರಾಹು ನಾಹಿ. ಆಮಿ ತರಾಸ್ ಸುಸ್ವುನ್ ಗಿಹ್ಯಾಚಾ಼ ದೇವಾಚಾ ಮನಾಚೆಗತ್ ಮನ್ಹುನ್ ಆಮಾನಾ ಠಾವ ಹಾ. 
\v 4 ಆಪ್ನು ಆಪ್‍ಲ್ಯಾ ಸ್ವತಾಚಾ ಕುಟ್ಮಾಲಾ ಚಾ಼ಂಗ್ಲಾ ಧನ್ಹಿ ವ್ಹವುನ್ ರಾಹ್ಯಾ ವ್ಹಯಿ. ತ್ಯಚಿ ಪ್ಯುರ್ಗಿ ತ್ಯನಿ ಸಾಂಗ್‌ಲ್ಯಾ ಶಾರ್ಕ ಚಾ಼ಲತ್ಯಾಲಿ ಸಗ್ಳಿ ಮರ‍್ಯಾದ್ ದಿವುನ್ ರಾಹ್ಯಾ ವ್ಹಯಿತ ಮನ್ಹುನ್ ಹ್ಯಚಾ಼ ಆರ್ಥ. 
\v 5 ಯಕ ಯಳಿ ಆಪ್ಲಾ ಸ್ವತಾಚಾ಼ ಕುಟುಮ್ ಸಂಬಾಳಾಯಾ ಸಮಜ಼ತ್ ನಸ್ನಾರಾ ದೇವಾಚಿ ಸಬೆ ಕಸಿ ಸಂಬ್ಯಾಳ್ನಾರ್?
\p
\v 6 ತ್ಯೊ ನವಾ ಇಸ್ವಾಸಿ ರಾಹುನಾಹಿ. ನವ್ಯಾ ಇಸ್ವಾಸಿಲಾ ಸಬೆಚಾ಼ ಜಾಂತಾ ಕೆಲ್ಯಾವ ತ್ಯಲಾ ದಿಮಾಕ್ ಯನಾರ್ ಸೈತಾನ್ ತ್ಯಚಾ ದಿಮಾಕಾಸ್ ಲಾಗುನ್ ಚು಼ಕಿತ್ ಗಾಹುನಾಹಿ ಮನ್ಹುನ್ ಹ್ಯೊ ಚು಼ಕಿತ್ ಗಾವ್ನಾರ್. 
\v 7 ಸಬೆಚಾ಼ ಜಾಂತಾ ಸಭೆತ್ ನಸ್‍ಲ್ಯಾಲ್ಯಾ ಲೊಕಾಂಚೆ ಮರ‍್ಯಾದಿಚಾ಼ ವ್ಹವುನ್ ರಾಹ್ಯಾ ವ್ಹಯಿ ತವಾ ತ್ಯೊ ಆನಿ ದುಸ್‌ರ‍್ಯಾಂಚಿಪ್ನಿ ಹಿರಮಟ್ನಾ ಕರುನ್ ಗಿಹಿತ್ ನಾಹಿ, ಸೈತಾನಾಚಾ ಜಾ಼ಚಾ಼ತ್ ಗಾಹುನ್ ಪಡತ್ ನಾಹಿ.
\s ಸಬೆಚ಼ ಸೇವಕ್
\p
\v 8 ಆಸ ಸಭೆತ್ ಸಬೆಚ಼ ಸೇವಕ್ ಸಾಹಿತ್ ಮರ‍್ಯಾದ್ ಗೆತ್ಯಾಲಾ ರಾಹ್ಯಾ ವ್ಹಯಿತ. ಆನಿ ತ್ಯಂಚಿ ಬುಲಿ ದೊನ್ತರಚಿ ರಾಹುನಾಹಿ ಇಸ್ವಾಸಾಚಿ ರಾಹ್ಯಾ ವ್ಹಯಿ. ದಾರು ಪಿನಾರಾ ರಾಹುನಾಹಿ. ಪೈಶಾಚಿ ಆಶಾ ರಾಹುನಾಹಿ. 
\v 9 ಇಸ್ವಾಸಾಚ಼ ಖರ ಶಾರ್ಕೆ ಬುದ್ದಿನಿ ಚಾ಼ಂಗಲ್ಯಾ ಮನಾನಿ ದರ‍್ಹುನ್ ರಾಹ್ಯಾ ವ್ಹಯಿ. 
\v 10 ತ್ಯಂಚಿ ತು ಆಂದಿ ಪಾರಕ್ ಕರ್. ತ್ಯಂಚಿಪ ಕಾಯೆಕ್ ಬುರ್ಸ ನಸ್ಲತ. ಸೇವಕ್ ವ್ಹವುನ್ ಸೇವೆ ಕರುಂತ. 
\v 11 ಆಸ್ಹಸ್ ಸಭಾಸೇವಕಿ ಜಾ಼ಲ್ಯಾಲ್ಯಾ ಬ್ಯಾಯ್ಕಾಮಾನ್ಸ ಲೊಕಾಂಚಿಪ್ನಿ ಮರ‍್ಯಾದಿ ಗೆಥ್ಯಾಲ್ಯಾ ವ್ಹವುನ್ ರಾಹ್ಯಾ ವ್ಹಯಿತಾ. ತ್ಯಾ ದುಸರ‍್ಯಾ ಲೊಕಾಂಚಾ ಚಾ಼ಡ್ಯಾ ಸಾಂಗ್‍ತ್ಯಾಲ್ಯಾ ರಾಹು ನಾಹಿತಾ. ತ್ಯಾ ಥಂಡ್ಫನ್ ವ್ಹವುನ್ ರಾಹ್ಯಾ ವ್ಹಯಿತಾ; ಸಗ್‌ಳ್ಯಾ ಗುಶ್ಟಿತ್ ಇಸ್ವಾಸಾನಿ ರಾಹ್ಯಾ ವ್ಹಯಿತಾ. 
\v 12 ಸಭೆತ್‌ಲ್ಯಾ ಸೇವಕಾಲಾ ಯೇಕುಸ್ ದನ್ಗರ್ ರಾಹ್ಯಾ ವ್ಹಯಿ ತ್ಯಂಚಾನಿ ಆಪ್‌ಲ್ಯಾ ಮುಲಾನಾ ಆನಿ ಕುಟ್ಮಾನಾ ಚಾ಼ಂಗ್ಲಿ ವ್ಹವುನ್ ರಾಹ್ಯಾ ವ್ಹಯಿತ. 
\v 13 ಚಾ಼ಂಗಲ್ಯಾ ಮಾರ್ಗಾನಿ ಸೇವೆ ಕರ್ತ್ಯಾಲ್ಯಾ ಲೊಕಾನಾ ಕುಠಬಿ ಮರೆದಿಚಾ಼ ಜಾ಼ಗಾ ಗಾವ್ತೊ. ಕ್ರಿಸ್ತ ಯೇಸುವ ಆಪ್‌ಲ್ಯಾಲಾ ಆಸ್‌ಲ್ಯಾಲಾ ಇಸ್ವಾಸಾಸೆ ಗುಶ್ಟಿತ್ ತೇ ಘಟ್ ರಾಥ್ಯಾತ.
\s ಮುಟಿ ಗುಟ್
\p
\v 14 ಮಿ ಆಶೆನಿ ಹ್ಯ ಪತ್ರ ಇಸ್ವಾಸಾನಿ ತುಮಾನಾ ಲಿವ್‌ತ್ಯೊ ಮಿ ಬಿಗಿನಿ ತುಜಿಪ ಯನಾರ್. 
\v 15 ಫನ್ ಯಕ್ ವೆಳಿ ಮೀ ಯಯಾ ಯೊಳ್ ಜಾ಼ಲ್ಹಾತರಿ ದೇವಾಚಾ ಕುಟ್ಮಾತ್ ತ್ಯ ಜೀವ್ ಆಸ್ನಾರೆ ದೇವಾಚೆ ಸಬೆತ್ ಚಾ಼ಲಾಚಿ ರಿತ್ ತುಲಾ ಸಮಜಾ಼ಯಾ ಹ್ಯ ಪತ್ರ ಲಿವಲ್ಯಾ. ಕಾ ಮಂಜೆ ಸಭೆಸ್ ಖರ‍್ಯಾಲಾ ದಾರ‍್ಯೊನ್ ಆನಿ ಆಧಾರ್ ಜಾ಼ಲ್ಯಾ. 
\v 16 ಆಮ್ಚಾ ದೇವಾಪ ಭಕ್ತಿಚಾ ಜೀವ್ನಾಚಿ ಖರಿ ಗುಟ್ ಗಂಬಿರ್ ಜಾ಼ಲ್ಯಾಲಿ ಮನ್ಹುನ್ ಆಮಿ ಸಗ್ಳಿ ಮ್ಯಾನ್ತಾವ್, ತ್ಯ ಕ್ಯಾ ಮಂಜೆ-
\q1 ಕ್ರಿಸ್ತ ಮಾನ್ಸಾಚಾ ರುಪಾತ್ ದಿಸ್ಲಾ
\q ಆನಿ ಆತ್‍ಮ್ಯಾನಿ ತ್ಯಲಾ ಖರ ದಾವುನ್ ದಿಲ
\q1 ದೇವ್ ದುತಾಸ್ ಲಾಗುನ್ ದಿಸ್ಲಾ
\q1 ಲೊಕಾಂಚೆ ಮದ್ದಿ ಸಾಂಗ್ಲ.
\q1 ದುನೆನಿ ತ್ಯಚಿವ ಇಸ್ವಾಸ್ ಥೆವ್ಲಾ
\q1 ಆನಿ ಮೈಮೆನಿ ತ್ಯಲಾ ಸ್ವರ್ಗಾತ್ ಉಚ಼ಲ್ಲಾ.
\c 4
\s ಲಬಾಡ್ ಸಿಕಿವ್ನಾರ
\p
\v 1 ಆತ್ಮ ಶಾರ್ಕ ಸಾಂಗ್ತ, ಮೊರ‍್ಹ ಯತ್ಯಾಲ್ಯಾ ದಿಸಾತ್ ಥುಡಿ ಲೊಕ ಇಸ್ವಾಸಾತ್ನಿ ದುರ್ ವ್ಹನಾರ್ ತೀ ಲಬಾಡ್ ಆತ್‌ಮ್ಯಾಚೆಗತ್ ಪ್ಯಾಳ್ನಾರ್ ಆನಿ ಸೈತಾನ್ ಸಿಕಿವ್‌ತ್ಯಾಚೆಗತ್ ಚಾ಼ಲ್ನಾರ್. 
\v 2 ಹಿ ಸಿಕ್ಷಾ ಉಗಸ್ ಸಾಂಗ್‍ತ್ಯಾಲ್ಯಾನಾ ಆನಿ ಮೋಸ್ ಕರ್ತ್ಯಾಲ್ಯಾ ಲೊಕಾಂಚಿಪ ಪಗಾಳ್ತಿ. ತಾಪ್‍ಲ್ಯಾಲ್ಯಾ ಲೊಖಾಂಡಾನಿ ಜ಼ಳುನ್ ರಾಕ್ ವ್ಹತ್ಯಾಚೆಗತ್ ತ್ಯಂಚ಼ ಗಿನ್ಯಾನ್ ಹಾಳ್ ಜಾ಼ಲ್ಯಾ. 
\v 3 ಆಸ್ಲಿ ಲೊಕ ಲಗಿನ್ ಕರುನ್ ಗಿಹ್ಯಾಚ಼ ಆನಿ ಥೊಡ ಜೆ಼ವ್ನಾಚ಼ ಜಿನೊಸ್ ಖಾವುನಾಹಿ ಮನ್ಹುನ್ ತೇ ಸಾಂಗ್‌ತ್ಯಾತ. ಫನ್ ಇಸ್ವಾಸ್ ಅಸ್‍ಲ್ಯಾಲಿ ಆನಿ ಖರ ಸಮಜು಼ನ್ ಗೆತಲ್ಯಾಲಿ ದೇವಾಲಾ ದನ್ಯವಾದಾಚ಼ ಮಾಗ್ನ ಕರುನ್ ತ್ಯ ಜೇವಾನ್ ಖಾವುಂತ ಕಾ ಮಂಜೆ ತ್ಯ ಸಗ್ಳ ಕೆಲ್ಯಾಲ ತ್ಯನಿಸ್. 
\v 4 ಕಾ ಮಂಜೆ ತ್ಯನಿ ಕೆಲ್ಯಾಲ ಪರತೇಕ್ ಯಾಕ್ ಚಾ಼ಂಗ್ಲ ಹಾ. ಕಚ಼ಸ್ ಸಾಮಾನ್ ನಕ್ವಾಟ್ ಕರಾಚ಼ ನಾಹಿ ಸಗ್ಳಿ ಸಾಮ್ನ ದನ್ಯವಾದಾಚ಼ ಮಾಗ್ನ ಕರುನ್ ಗಿಹ್ಯಾ ವ್ಹಯಿತ. 
\v 5 ಕಾ ಮಂಜೆ ದೇವಾಚಾ ವಚನಾನಿ ಆನಿ ಮಾಗ್‍ನ್ಯಾನಿ ತ್ಯ ದೇವಾಲಾ ಮಾನ್ಯಾ ಜಾ಼ಲ್ಯಾ.
\s ಕ್ರಿಸ್ತ ಯೇಸುಚಾ಼ ಚಾ಼ಂಗ್ಲಾ ಸೇವಕ್
\p
\v 6 ತಿಥ ಆಸ್‍ಲ್ಯಾಲ್ಯಾ ಇಸ್ವಾಸಿ ಭನ್ ಬಾವ್ಹಾಂಡಾನಾ ಹ್ಯಾ ಗುಶ್ಟಿ ಸಾಂಗ್‌ಲ್ಯಾವ. ತು ಕ್ರಿಸ್ತ ಯೇಸುಚಾ಼ ಚಾ಼ಂಗ್ಲಾ ಸೇವಕ್ ವ್ಹಸಿಲ್. ತ್ಯಚ಼ ಬಾಳಗ್ನ ಇಸ್ವಾಸಾಚ಼ ಆನಿ ಖರ‍್ಯಾ ಸಿಕ್ಷನಾಚೆಗತ್ ವ್ಹತ್ತ. ತ್ಯ ತು ಗೆತಲ್ಯಾಸ್. 
\v 7 ಫನ್ ಮಾಥಾರಿಂಚಾ ಭಕ್ತಿ ನಸ್‌ಲ್ಯಾಲ್ಯಾ ಲಬಾಡ್ ಕಾಯನ್ಯಾತ್ನಿ ದುರ್ ರ‍್ಹಾ. ಭಕ್ತಿಚಾ಼ ಜೀವ್ನಾ ಚಾ಼ಲ್ವಾಯಾಸಾಟಿ ತುಲಾ ತುಸ್ ತರಬೇತಿ ಘೆ. 
\v 8 ತುಜಾ ಶರಿರಾಚಾ ವಾಯಾಮಾನಿ ಥೊಡಾ ಫಾಯ್ದಾ ವ್ಹನಾರ್ ಫನ್ ಭಕ್ತಿಚಾ ಜೀವ್ನಾಚಾ಼ ಸಗ್ಳೆ ತರನಿ ಫ್ಯಾಯ್ದಾ ಹಾ ಕಾ ಮಂಜೆ ಹ್ಯಾತ್ ಆತಾಚಾ ಕಾಲ್ ಆನಿ ಮೊರ‍್ಹ ಯತ್ಯಾಲ್ಯಾ ಜೀವ್ನಾಲಾ ದಿಲ್ಯಾಲಾ ವಾಗ್ದಾನ್ ಮಿಳಾಲ್ಯಾ. 
\v 9 ಹ್ಯ ಸಾಂಗ್ನ ಖರ ಜಾ಼ಲ್ಯಾ ಆನಿ ಹಿ ಬುಲಿ ಪುರೆ ತರನಿ ಸ್ವಿಕಾರ್ ಕರಾಯಾ ಆನಿ ಇಸ್ವಾಸ್ ಥೆವಾಯಾ ಲಾಯಕ್ ಹಾ. 
\v 10 ಆನಿ ಆಮಿ ಕಠಿನ್ ತರಾಸ್ ಕಾಡುನ್ ಆಮಿ ಆಮ್ಚಿ ಆಶಾ ಜೀವ್ ಆಸ್‌ಲ್ಯಾಲ್ಯಾ ದೇವಾವ ಥೆವ್‌ಲ್ಯಾ ಆನಿ ಖುಬ್ ತರನಿ ಇಸ್ವಾಸಾತ್ ಆಸ್‌ಲ್ಯಾಲ್ಯಾನಾ ರಾಖನ್ದಾರ್ ಜಾ಼ಲ್ಯಾ.
\p
\v 11 ಹ್ಯಾ ಗುಸ್ಟಿ ತ್ಯನಾ ಸಾಂಗ್ ಆನಿ ಸಿಕಿವ್. 
\v 12 ತು ಪ್ಯೊರ್ಗಾ ಹಾಸ್ ಕುನಿ ತುಜಾ಼ ಗಾಳ್ ಕರುನ್ ಬಗುನಾಹಿ ಫನ್ ಇಸ್ವಾಸಿನಾ ತುಜಾ ಬೊಲ್‌ನ್ಯಾ ಚಾ಼ಲನ್ಯಾನಿ ಮಾಯೆನಿ ತುಜಾ಼ ಇಸ್ವಾಸ್ ಆನಿ ಪವಿತ್ರ ಜೀವ್ನಾನಿ ಸಗ್‌ಳ್ಯಾನಾ ಉದಾಹರನ್ ವ್ಹವುನ್ ರ‍್ಹಾ. 
\v 13 ದೇವಾಚಿ ವಚ಼ನ ಲೊಕಾನಾ ವಾಚ಼ವುನ್ ಸಾಂಗುನ್ ತ್ಯನಾ ಸಾಂಗ್ ಆನಿ ಸಿಕಿವ್ ಮೀ ಯಯಿ ಪರತ್ ಹಿ ಕಾಮ ಕರಿತ್ ರ‍್ಹಾ. 
\v 14 ತುಜಿಪ ಆಸ್‍ಲ್ಯಾಲ ವರದಾನ್ ನಕಾರ್ ಕರುನಕೊ ತುಲಾ ಪ್ರವಾದನೆಚಾ ರುಪಾತ್ ಆನಿ ಜಾಂತ್ಯಾಂಚಾನಿ ಆಪ್ಲ ಹಾತ್ ತುಜಿವ ಥೆವ್ಲ ತವಾ ತ್ಯ ವರದಾನ್ ತುಲಾ ದಿಲ್ಯಾ. 
\v 15 ಹಿ ಕಾಮ ಕರೀತ್ ತ್ಯಂಚೆಸ್ ಗುಂಗಿತ್ ರ‍್ಹಾ ಕಾ ಮಂಜೆ ತುಜಿ ಪ್ರಗತಿ ಸಗ್‌ಳ್ಯಾ ಲೊಕಾಂಚೆ ಮೊರ‍್ಹ ದಿಸುನ್ ಯವುನಿ 
\v 16 ತುಜೆ ಗುಸ್ಟಿತ್ ಆನಿ ತುಜಾ ಶಿಕ್ಷೆನಾಚೆ ಗುಸ್ಟಿತ್ ಹುಶಾರ್ ರ‍್ಹಾ. ತು ಹಿ ಕಾಮ ಕರೀತುಸ್ ರ‍್ಹಾ, ತವಾ ತು ತುಲಾಬಿ ಆನಿ ತುಜ಼ ಶಿಕ್ಷೆನ್ ಐಕ್‌ತ್ಯಾಲ್ಯಾನಾಬಿ ರ‍್ಯಾಕ್ನಾರ್.
\c 5
\s ಇಸ್ವಾಸಿಂಚೆ ಗುಶ್ಟಿತ್ ಜವಾಬ್ದಾರಿ
\p
\v 1 ಮಾಥಾರ‍್ಯಾನಾ ಜೊ಼ರ್ ಕರುನೊಕೊ ತ್ಯನಾ ತುಜ಼ ಬಾಸ ಮನ್ಹುನ್ ಸಮಜು಼ನ್ ತ್ಯಂಚಿ ಸಂಗ ಬೊಲ್. ತುಜಿವ್ನಿ ಬಾರಿಕ್ ಆಸ್‌ಲ್ಯಾಲ್ಯಾ ತರ್‌ನ್ಯಾ ಪ್ಯೊರ್‌ಗ್ಯಾನಾ ಬಾವ್ಹಾಚೆಗತ್ 
\v 2 ಮಾಥಾರ‍್ಯಾ ಬ್ಯಾಯ್ಕಾನಾ ಆಯಿಂಚೆಗತ್ ತರ್ನ್ಯಾ ಬ್ಯಾಯ್ಕಾನಾ ಭನ್ಹಿಂಚೆಗತ್ ಸಮಜು಼ನ್ ತ್ಯನಾ ವ್ಹಯಿತಿ ಬುದಿ ಸಾಂಗ.
\p
\v 3 ವಿದ್ವೆನಾ ಖುಬ್ ಮರ‍್ಯಾದ್ ದೇ ಕಾ ಮಂಜೆ ತ್ಯನಾ ತ್ಯ ಅವಶಾ ಹಾ. 
\v 4 ಫನ್ ಕಚೆ ವಿದ್ವೆಲಾ ಪೊರ ಕಿವಾ, ನಾತ್ರ ಆಸ್‌ಲ್ಯಾವ, ತ್ಯಂಚಾನಿಸ್ ಆಂದಿ ಆಪಲ್ಯಾ ಗರ‍್ಹಾತಲ್ಯಾನಾ ಬಕ್ತಿ ದಾವಾಯಾ ಆಪ್ಲೆ ಆಯಿ ಬಾಲಾ ಉಪ್ಕಾರ್ ಶಿಕುಂತ. ಹ್ಯ ದೇವಾಲಾ ಆವಾಡ್ತ. 
\v 5 ಯೇಕ ವಿದ್ವೆಲಾ ಖರ‍್ಯಾನಿ ಮಜ಼ತ್ ಕರ್ತ್ಯಾಲ ನಸ್ಥಾನಾ ಯಕ್ಲಿಸ್ ಆಸ್ಲಿತ, ತೀ ಆಪ್‌ಲ್ಯಾಲಾ ಮಜ಼ತ್ ರಾಕಾಯಾ ದೇವಾವ ಇಸ್ವಾಸ್ ಥೆವ್ನಾರ್. ತೀ ಆಪ್ಲಿ ಆಶಾ ದೇವಾವ ಥಿವ್ತಿ ಆನಿ ಕವಾಬಿ ಮಾಗ್ನ ಕರೀತ್ ರ‍್ಯಾತ್ ದಿಸ್ ಮಜ಼ತ್ ಮಾಗ್ತಿ. 
\v 6 ಫನ್ ವಿದವೆ ಜಾ಼ಲ್ಯಾಲಿನಿ ಆಪ್ಲಿ ಶಾರಿರಿಕ್ ಹಾವುಸ್‌ ಫಾರಿಕ್ ಕರಾಯಾ ಸಾಟಿ ಆಪ್ಲಾ ಜೀವ್ನಾ ಉಪೇಗ್ ಕರುನ್ ಗೆತ್ಲಾತ ತೀ ಜಿತ್ತಿ ಆಸುನ್ಬೀ ಮೇಲ್ಯಾಚೆಗತ್. 
\v 7 ವಿದವೆ ನಿಮದತ್ ಗಾವ್ಹುನಾಹಿ ಆಶಾ ಹ್ಯಾ ಗುಸ್ಟಿ ಸಾಂಗ್. 
\v 8 ಕಚಾನಿ ತರಿ ಆಪ್‌ಲ್ಯಾ ಸ್ವತಾಚಾ ಲೊಕಾನಾ ಮಜ಼ತ್ ಕೆಲ್ಯಾ ನಸ್‌ಲ್ಯಾವ ತ್ಯನಿ ಕ್ರಿಸ್ತಾವ್ಲಾ ಆಪ್ಲಾ ಇಸ್ವಾಸ್ ಸುಡುನ್ ದಿಲ್ಯಾಲಾ ಆನಿ ಇಸ್ವಾಸ್ ನಸ್‌ಲ್ಯಾಲ್ಯಾವ್ನಿಬೀ ಕಾಲಚಾ಼ ಜಾ಼ಲ್ಯಾ.
\p
\v 9 ವಿದ್ವೆಂಚೆ ಪಟ್ಟಿತ್ ಮಿಸಳ್ಯಾಲ್ಯಾ ವಿದ್‌ವ್ಯಾ ವಯೆತ್ ಸಾಟ್ ವರ್ಸಾಚೆ ವರ್ ರಾಹ್ಯಾ ವ್ಹಯಿತಾ. ತಸ್ಲಿ ಯಕಾಸ್ ಘ್ವಾಚಿ ದನ್ಗರ್ ವ್ಹವುನ್, 
\v 10 ಚಾ಼ಂಗ್ಲ ಕರಾಚಾ಼ ತಿಚಾ಼ ಸ್ವಬಾವ್ ರಾಹ್ಯಾ ವ್ಹಯಿ ಆನಿ ಪೋರಾನಾ ಚಾ಼ಂಗ್ಲ ಸಿಕ್ವಾಯಾ ವ್ಹಯಿ ಅತೀತಿ ಸತ್ಕಾರಿ ಕರ್ತ್ಯಾಲಿ ರಾಹ್ಯಾ ವ್ಹಯಿ ದುಸ್‍ರ‍್ಯಾ ಇಸ್ವಾಸಿಂಚೆ ಸಂಗ ಥಂಡ್ಫನಾನಿ ರಾಥ್ಯಾಲಿ ವ್ಹಯಾವ್ಹಯಿ ತರಾಸಾತ್ ಆಸ್‌ಲ್ಯಾಲ್ಯಾನಾ ಮಜ಼ತ್ ಕರ್ತ್ಯಾಲಿ ರಾಹ್ಯಾ ಚಾ಼ಂಗಲ್ಯಾ ಕಾಮಾತ್ ಆಪ್‌ಲ್ಯಾಲಾ ವಪ್ಸುನ್ ದಿಲ್ಯಾಲಿ ರಾಹ್ಯಾ ವ್ಹಯಿ
\p
\v 11 ಆಪ್ಲೆ ಆಶೆನಿ ಕ್ರಿಸ್ತಾಪ ಆಸ್‌ಲ್ಯಾಲಾ ಆಪ್ಲಾ ಸಬ್ದ ಸುಡುನ್ ದಿತಿ 
\v 12 ಕ್ರಿಸ್ತಾಲಾ ದಿಲ್ಯಾಲಾ ಸಬ್ದ ಇಸ್ರುನ್ ಜಾ಼ತ್ಯಾತಾ ಆನಿ ತ್ಯಚಾ಼ ತೀರ್ಮಾನ್ ತ್ಯನಾ ವ್ಹನಾರ್. 
\v 13 ಯವ್ಡಸ್ ನವ್ಹ ತ್ಯಾ ಗರ‍್ಹಾ ಗರ‍್ಹಾತ್ನಿ ಫಿರತ್ ಆಪ್ಲ ದೀಸ್ ಗಾಲಿವತ್ಯಾತಾ ನಕೊತಸ್‌ಲ್ಯಾ ಬೊಲ್ಯಾ ಬೊಲತ್ ದುಸ್‌ರ‍್ಯಾಚಾ ಜಿವ್ನಾತ್ ಡುಯಿ ಗಾಲ್ಹುನ್ ಯೋಳ್ ಗಾಲಿತ್ ರಾಥ್ಯಾತಾ. ನಕೊ ತಸ್‌ಲ್ಯಾ ಗುಶ್ಟಿ ಸಾಂಗಿತ್ ಆಸ್‌ತ್ಯಾತಾ. 
\v 14 ಮನ್ಹುನ್ ದ್ಯಾನ್‌ಗ್ಯಾ ವಿದ್ವೆನಾ ಲಗಿನ್ ಕರುನ್ ಗಿಹುನ್ ಪೊರ ವ್ಹವುಂತ ಆನಿ ಆಪ್ಲಿ ಗರ‍್ಹ ಕರುನ್ ರಾಹುಂತಾ ತವಾ ತ್ಯನಾ ಹಿರ್ಮಟಾಯಾ ಆಮ್ಚಾ ವಾದಿನಾ ಕಸ್ಲಾಸ್ ನೇವಾ ರಾಹಿತ್ನಾಹಿ. 
\v 15 ಫನ್ ಥೊಡ್ಯಾ ವಿದ್ವೆಂಚಾನಿ ಆಪ್‌ಲ್ಯಾ ವಾಟಾ ಸುಡುನ್ ಸೈತಾನಾಚೆ ಮಾಗ್ನಿ ಲಾಗ್‌ಲ್ಯಾತಾ
\p
\v 16 ಫನ್ ಇಸ್ವಾಸಿ ಜಾ಼ಲ್ಯಾಲ್ಯಾ ಬ್ಯಾಯ್ಕಾಮಾನ್ಸಾಂಚಾ ಕುಟ್ಮಾತ್ ವಿದ್ವೆ ಆಸಲ್ಯಾತ, ತ್ಯಂಚಾನಿ ಬಾಳ್ಗಾಚ಼ ವಜ಼ ಸಭೆವ ದಿವುನಾಹಿ. ತವಾ ಖರ‍್ಯಾನಿ ಗರಜ಼್ ಆಸ್‍ಲ್ಯಾಲ್ಯಾ ವಿದ್ವೆನಾ ಮಜ಼ತ್ ಕರಾಯಾ ಸಬೆಲಾ ವ್ಹನಾರ್.
\p
\v 17 ಚಾ಼ಂಗಲಾ ಆದಿಕಾರ್ ಚಾ಼ಲಿವತ್ಯಾಲ್ಯಾ ಸಬೆಚಾ ಜಾಂತ್ಯಾನಾ, ತ್ಯಂಚಾತ್ ವಿಶೆಸ್ ಕರುನ್ ದೆವಾಚ಼ ವಾಕ್ಯಾ ಸಾಂಗಾಚಾತ್ ತರಾಸ್ ಖಾತ್ಯಾಲ್ಯಾನಾ ದೊನ್ಪಟ್ ಮರ‍್ಯಾದಿಲಾ ಯೊಗ್ಯ ಮನ್ಹುನ್ ಯವಜಾ಼ಯಾ ವ್ಹಯಿ. 
\v 18 ಕಾ ಮಂಜೆ ಮಳ್ನಿತ್‌ಲ್ಯಾ ಬೈಲಾಂಚ಼ ತೊಂಡಾಲಾ ಮುಸ್ಕ ಗಾಲ್ಹು ನಾಹಿ ರಾಬ್‌ತ್ಯಾಲ್ಯಾ ಆಳಾಚಿ ಶಾರ್ಕಿ ಕುಲ್ ಗಾವ್ಹಾಯಾ ವ್ಹಯಿ ಮನ್ಹುನ್ ಪವಿತ್ರ ಗ್ರಂಥಾತ್ ಸಾಂಗ್ತ.
\p
\v 19 ಸಭೆಚಾ ಜಾಂತ್ಯಾಂಚಿ ಕುನಿತರಿ ಚ಼ುಕ್ ಸಾಂಗ್ಲಿತ ದೋಗ ನಾಹಿತ ತೀಗ ಸಾಕ್ಷಿ ನಸ್ಥಾನಾ ತ್ಯಚೆ ಬುಲಿಲಾ ಕಾನ್ ದಿವು ನಕೊಸ್. 
\v 20 ಪಾಪ್ ಕರ್ತ್ಯಾಲ್ಯಾ ಲೊಕಾನಾ ಸಭೆತ್ ಸಗ್‍ಳ್ಯಾಂಚೆ ಮೊರ‍್ಹಸ್ ದಪ್‌ಕ್ಯಾವ್ ತವಾ ಸಗ್‌ಳ್ಯಾನಾ ತಾಕಿತ್ ದಿಲ್ಯಾಚೆಗತ್ ವ್ಹನಾರ್.
\p
\v 21 ದೇವ್ ಆನಿ ಕ್ರಿಸ್ತ ಯೇಸು ಪರಿಶುದ್ದ ದೇವ್ ದುತಾಂಚೆ ಮೊರ‍್ಹ ಮೀ ಖರ‍್ಯಾನಿ ಆದೇಶ್ ಕರ್ತೊ ಕಸ್ಲಾ ಬೇದ್ಭಾವ್ ನಸ್ಥಾನಾ ಆನಿ ಕುನಾಚಿ ಪರವಾನ್ಗಿ ನಸ್ಥಾನಾ ಹ್ಯಾ ಬೊಲ್ಯಾ ಚಾ಼ಲಿವ್. 
\v 22 ಪ್ರಭುಚಾ ಕಾಮಾಸಾಟಿ ತು ತುಜಾ಼ ಹಾತ್ ಕುನಾವ ತರಿ ಥಿವುನ್ ತ್ಯಲಾ ಸಬೆಚಾ಼ ಜಾಂತಾ ಕರುನ್ ನಿವ್ಡಾಚೆ ಆಂದಿ ಧ್ಯಾನ್ ಥಿವುನ್ ಇಚಾರ್ ಘೆ ದುಸ್‌ರ‍್ಯಾ ಲೊಕಾಂಚಾ ಪಾಪಾತ್ ಮಿಳುನಾಹಿ ಆಸಾ ನಿರ್ಮಳ್ ವ್ಹವುನ್ ರ‍್ಹಾ.
\p
\v 23 ನಿಸ್ಥ ಪಾನಿ ತ್ಯವ್ಡಸ್ ಪಿವುನಕೊ ತುಲಾ ಶಾರ್ಕ ಜಿರವ್ನಿ ವ್ಹಯಾ ಥೊಡಾ ಥೊಡಾ ದರಾಕ್ಶಿಚಾ಼ ರಸ್ ಪಿ. ತು ಖುಬ್ ಖೆಪಾ ಸೀಕ್ ಪಡ್ತೊಸ್.
\p
\v 24 ಥೊಡ್ಯಾ ಲೊಕಾಂಚಿ ಪಾಪ ವರುಸ್ ದಿಸತ್ಯಾತ. ತ್ಯಂಚಾ಼ ನ್ಯಾಯಿತಿರ‍್ಮಾನ್ ವ್ಹನಾರ್ ಮನ್ಹುನ್ ತ್ಯಂಚಿಸ್ ಪಾಪ ದಾವುನ್ ದೇತ್ಯಾತ. ಫನ್ ಕಾಯ್‌ ಥೊಡ್ಯಾ ಲೊಕಾಂಚಿ ಪಾಪ ಥೊಡ್ಯಾ ಯಳಾನಿ ಸಮಾಸ್‌ತ್ಯಾತ. 
\v 25 ತಸಸ್ ಥುಡಿ ಚಾ಼ಂಗ್ಲಿ ಕಾಮ ದಿಸತ್ಯಾತ. ದುಸ್ರಿ ಥುಡಿ ಕಾಮ ದಿಸಲಿ ನಾಹಿತ ತರಿ ದಡತ್ ನಾಹಿತ.
\c 6
\p
\v 1 ಚಾ಼ಕ್ರಾಂಚಾನಿ ಆಪ್‌ಲ್ಯಾ ದನ್ಯಾನಾ ಸಗ್ಳಿ ಮರ‍್ಯಾದ್ ದಿಯಾ ವ್ಹಯಿ ನಾಹಿತ ದೇವಾಚಾ ನಾವಾಲಾಬಿ ಆಮಿ ಆಯಿಕಲ್ಯಾಲ್ಯಾ ಶಿಕ್ಷನಾಲಾಬಿ ನಿಂದಾ ವ್ಹಯಿಲ್. 
\v 2 ಆನಿ ಕುನಾಲಾತರಿ ಕ್ರಿಸ್ತಾವ ಇಸ್ವಾಸ್ ಆಸಲ್ಯಾಲಾ ದನ್ಹಿ ಆಸ್ಲಾತ. ತ್ಯಂಚಾನಿ ತ್ಯಾ ದನ್ಯಾಲಾ ಬಾಹು ಮನ್ಹುನ್, ಆಪ್ಲೆ ಸೆವೆಚ಼ ಫಳ್ ಗೆನ್ಹಾರಾ, ಇಸ್ವಾಸಾಚಾ಼ ಮಾಯೆಚ಼ ಜಾ಼ಲ್ಯಾತ ಮನ್ಹುನ್ ಸಮಜು಼ನ್ ತ್ಯನಾ ಖುಬ್ ಸಂತೊಶಾನಿ ಸೆವಾ ಕರಾಯಾ ವ್ಹಯಿ. ಆಸ ತ್ಯನಾ ಸಿಕಿವ್.
\s ಲಬಾಡ್ ಸಿಕಿವ್ನ ಆನಿ ಖರಿ ಸಾವ್ಕರ್ಕಿ
\p
\v 3 ಯಕ ಯಳಿ ಕೊನ್ತರಿ ದುಸ್ರೆ ತರನಿ ನಿಯಮ್ ಸಿಕಿವ್‌ತ್ಯಾತ ಆನಿ ಆಮಚಾ಼ ಪ್ರಭು ಯೇಸು ಕ್ರಿಸ್ತಾಚಿ ಖರಿ ವಚನ ಆನಿ ಭಕ್ತಿನಿ ಮಿಳಾಲ್ಯಾಲಿ ಪುರ್ನ ಸಿಕ್ಷನ್ ಗಿಹಿತ್ನಾಹಿತ. 
\v 4 ತ್ಯೊ ದಿಮಾಕಾನಿ ಬರ್‌ಲ್ಯಾಲಾ ಹಾ. ಆನಿ ತ್ಯಲಾ ಕಾಯೆಕ್ ಠಾವನಾಹಿ. ತ್ಯಚೆ ನಕೊಜಾ಼ಲ್ಯಾಲೆ ಆಶೆನಿ ವಾದ್ ಗಾಲ್ಹಿತ್ ರಾಥೊ ಆನಿ ಸಬ್ದ ಉಪೇಗ್ ಕರುನ್ ಕಳ್ ಕರ್ತೊ. ದುಬಾವ್, ಖೊಟ ಫನ್, ನಿಂದಾ ಕರಾಚಿ, ಆನಿ ಬುರ್ಶಾ ಸಿವ್ಯಾ ಯತ್ಯಾತಾ. 
\v 5 ಯವ್ಡಸ್ ನವ್ಹ ಬುಧಿ ಖರ‍್ಯಾಲಾ ದುರ್ ರಾಹುನ್ ದೆವಾಚಿ ಬಕ್ತಿ ಲಾಬಾಚ಼ ವಸ್ತು ಮನ್ಹುನ್ ಸಮಜ಼ತ್ಯಾಲ್ಯಾಹ್ಯಾ ಮಾನ್ಸಾತ್ನಿ ಖಾಯಿಮ್ ಕಳ್ ವ್ಹನಾರ್.
\p
\v 6 ಖರ‍್ಯಾನಿಸ್ ದೇವಾಚಿ ಸೇವೆ ಕರ್ತ್ಯಾಲಾಸ್ನಿ ಮಾನುಸ್ ಸಾವ್ಕೊರ್ ವ್ಹತ್ತೊ. ಆನಿ ಆಪ್ಲಿಪ ಕ್ಯಾ ಹಾ ತ್ಯಾತುಸ್ ತ್ಯೊ ಸಂತೊಶ್ ವ್ಹತ್ತೊ. 
\v 7 ಆಮಿ ದುನೆತ್ ಆಲಾವ್ ತವಾ ಕ್ಯಾ ಗಿಹುನ್ ಆಲಾವ್? ಕಾಯ್ ನಾಹಿ. ಆಮಿ ಮರ್ತಾನಾ ಕಾಯೇಕ್ ಗಿಹುನ್ ಜಾ಼ನಾರ್ ನಾಹಿ. 
\v 8 ಮನ್ಹುನ್ ಜೆವಾನ್ ಕಪ್ಡ ಆಸ್‌ಲ್ಯಾವ ಪುರೊ. ತ್ಯಾತುಸ್ ಆಮಿ ಸಮಾದಾನಾನಿ ರಾಥಾವ್. 
\v 9 ಫನ್ ಸಾವ್ಕೊರ್ ವ್ಹಯಾ ಪಾಯ್ಜೆ ಮಂಥ್ಯಾಲಾ ಆಪ್‌ಲ್ಯಾಲಾ ಆಪ್ನುಸ್ ಪರೀಕ್ಷೆತ್ ಗಾಲ್ಹುನ್ ಗೇನ್ಹಾರ್. ತೇ ಖುಬ್ ಮುರ್ಖಾತ್ ಆನಿ ಹಾಳ್ ಕರ್ತ್ಯಾಲೆ ಆಶೆತ್ ಗಾವಲ್ಯಾತ ತ್ಯ ತ್ಯನಾ ಹಾಳಾತ್ ಆನಿ ಗೈಪಾತ್ ಗ್ಯಾಲ್ತ. 
\v 10 ಪೈಶಾಂಚಿ ಆಶಾ ಸಗಳೆ ತರಚಾ ಬುರ್ಶಾ ಫನಾಲಾ ಮುಳ್ ಜಾ಼ಲ್ಯಾ. ಥೊಡ್ಯಾಂಚಾನಿ ತ್ಯಚಿಸಾಟಿ ಗಾಹಿ ಕರುನ್, ತ್ಯನಿ ಕ್ರಿಸ್ತಾಚಾ಼ ಇಸ್ವಾಸ್ ಸುಡುನ್, ಫಿರತ್ ಖುಬ್ ತರಾಸಾನಿ ಆಪಲ್ಯಾಲಾ ಬುಚು಼ವುನ್ ಗೆತ್ಯಾತ.
\s ಸ್ವತಾಚಿ ಪಾರಕ್
\p
\v 11 ಫನ್ ತು ದೇವಾಚಾ಼ ಮಾನುಸ್ ಜಾ಼ಲ್ಯಾಸ್ ತ್ಯಚಿಸಾಟಿ ಹ್ಯಾ ಸಗ್‌ಳ್ಯಾ ಪಾಪಾತ್ನಿ ದುರ್ ರ‍್ಹಾ ಆನಿ ನಿಯೆತಿನಿ ಬಕ್ತಿಚಿ ಸೆವಾ ಇಸ್ವಾಸ್, ಮಾಯಾ, ಧೀರ್, ಸಾತ್ವಿಕತೆತ್ ಮಿಳುನ್ ರ‍್ಹಾ. 
\v 12 ಇಸ್ವಾಸಾಚಾ ಪಳನ್ಯಾತ್ ತುಜಾ ಪುರ‍್ಯಾ ಚಾಂಗಲ್ಯಾಸಾಟಿ ಪಳ್‍. ಆನಿ ತುಜಿಸಾಟಿ ಶಾಸ್ವತ್ ಜೀವ್ ಜಿತ್. ತುಲಾ ಹ್ಯಚಿಸಾಟಿಸ್ ಹಾಕಟ್‌ಲ್ಯಾ ತು ಖುಬ್ ಸಾಕ್ಷಿಚೆ ಮೊರ್ಹ ತ್ಯ ಖುಬ್ ಚಾ಼ಂಗಲ್ಯಾನಿ ಗೆತಲ್ಯಾಸ್. 
\v 13 ದೇವಾಚೆ ಮೊರ್ಹ ತ್ಯೊ ಸಗ್‌ಳ್ಯಾನಾ ಜೀವ್ ದೆತೊ. ಆನಿ ಕ್ರಿಸ್ತ ಯೇಸುಚೆ ಮೊರ‍್ಹ ತ್ಯೊ ಪೊಂತಿ ಪಿಲಾತಾಚೆ ಮೊರ್ಹ ಖುಬ್ ಚಾ಼ಂಗ್ಲಿ ವಳಕ್ ದಿಲ್ತಿ. ಮಿ ತುಲಾ ಆಜ್ಞಾ ದೆತೊ. 
\v 14 ಆಮಚಾ಼ ಪ್ರಭು ಕ್ರಿಸ್ತ ಯೇಸು ದಿಸಪರ‍್ಯಾತ್ ತುಲಾ ದಿಲ್ಯಾಲಿ ಆಜ್ಞಾ ಪಾಳಿತ್ ಇಸ್ವಾಸಾನಿ ಚಾ಼ಲಿವ್. 
\v 15 ಆಪ್ನಿ ಥರಿವಲ್ಯಾಲ್ಯಾ ಶಾರ್ಕ್ಯಾ ಯಳಾಲಾ ತ್ಯಲಾ ದ್ಯಾವ್ನಾರ್. ತ್ಯೊ ಭಾಗ್ಯ ಆಸ್ನಾರಾ ಆನಿ ಯಕ್ಲಾಸ್ ರಾಜ್ಬಾರ್ ಕರ್ನಾರಾ ರಾಜಾಚಾ಼ ರಾಜಾ಼ ಪ್ರಭುಚಾ಼ ಪ್ರಭು ಜಾ಼ಲ್ಯಾ. 
\v 16 ಮರಾನ್ ನಸ್ನಾರಾ ತ್ಯೊ ಯಕ್ಲಾಸ್ ತ್ಯೊ ರಾಥ್ಯಾಲ್ಯಾ ಉಜಿಡಾಚೆ ಜ಼ವಳ್ ಲೊಕಾನಾ ಜಾ಼ಯಾಲಾ ವ್ಹನಾರ್ ನಾಹಿ ತ್ಯಚಿ ಮರ‍್ಯಾದ್ ಆನಿ ಶಾಸ್ವತ್ ಬಳ್ ಖಾಯಿಮ್ ರಾಹುನಿ. ತಸ ವ್ಹವುನಿ.
\p
\v 17 ಹ್ಯಾ ಲೊಕಾತ್ ಕೊನ್ ಸಾವ್ಕೊರ್ ಹಾ ತ್ಯಲಾ ಆಜ್ಞಾ ದೆ. ಗರ್ವಿಶ್ಟ ರಾಹುನಕೊಸಾ, ನಾಸ್ ವ್ಹತ್ಯಾಲೆ ಸಾವ್ಕರ್ಕಿವ ಆಸೆ ಥಿವು ನಕೊಸಾ. ತ್ಯ ಖರ ನವ್ಹ ಚಾ಼ಂಗಲ್ಯಾ ದೇವಾವ ಇಸ್ವಾಸ್ ಥೆವಾ. ತ್ಯೊ ಆಮಚಾ ಆನಂದಾಸಾಟಿ ಸಗಳ್ಯಾ ಗುಸ್ಟಿ ಸಗಳ್ಯಾ ಪುರ್ನ ಕರ್ನಾರ್.
\p
\v 18 ತ್ಯನಾ ಆಜ್ಞಾ ದೆ ತೇ ಚಾಂಗಲ್ಯಾ ಕಾಮ ಕರಾಯಾ ಆಜ್ಞಾ ಆನಿ ಚಾ಼ಂಗಲ್ಯಾ ಕಾಮಾನಿ ಸಾವ್ಕೊರ್ ವ್ಹವುಂತ ಉದಾರಾನಿ ಆನಿ ಯಕಾ ಸಂಗ ಆಪ್ಲಿ ಸಾಮ್ನ ದಿವುಂತ. 
\v 19 ತವಾ ಪರಲೋಕಾತ್ ಯೇಕ್ ಠೆವ್ ತ್ಯಂಚಾನಿ ರಾಖುನ್ ಥೆವ್‌ಲ್ಯಾಚೆಗತ್ ವ್ಹತ್ತೆ. ಹ್ಯಚಿಸ್ ಲಾಗುನ್ ತೇ ಜೀವ್ನಾಲಾ ದರ‍್ಹುನ್ ರಾನ್ಹಾರ್ ತ್ಯೊ ಖರಾ ಜೀವ್ನಾ ಜಾ಼ಲ್ಯಾ
\p
\v 20 ತಿಮೊಥ್ಯಾ, ತುಲಾ ದಿಲ್ಯಾಲ ತು ರ‍್ಯಾಕ್. ಭಕ್ತಿ ನಸ್‌ಲ್ಯಾಲ್ಯಾ ಬೊಲ್ಯಾಸ್ನಿ ಆನಿ ವಾದಿಂಚಾ ಲಬಾಡ್ ಬೊಲ್ಯಾಸ್ನಿ ತ್ಯಲಾ ಚು಼ಕುನ್ ದುರ್ ರ‍್ಹಾ. 
\v 21 ಥೊಡ್ಯಾಂಚಾನಿ ತ್ಯ ಲಬಾಡ್ ಶಿಕ್ಷೆನ್ ಐಕುನ್ ಕ್ರಿಸ್ತಾಚಾ ಇಸ್ವಾಸಾತ್ನಿ ದುರ್ ಜಾ಼ಲಿತ.ಕ್ರುಪಾ ತುಮಚಿ ಸಂಗ ರಾಹುನಿ.