\id PHP - Goofa
\ide UTF-8
\h Filphisiyuusa
\toc3 Fil
\toc2 Filphisiyuusa
\toc1 Phawuloosi Filphisiyuusa Asaas Xaafida Kiitaa
\mt1 Phawuloosi Filphisiyuusa Asaas
\mt2 Xaafida Kiitaa
\imt Gaatha Qofaa
\ip Phawuloosi Filphisiyuusa asaas xaafida kiitay xaafettiday, Roome biittan Maqedooniya awurajjan, Filphisiyuusa biittan de7iya woosa keethaassa. He woosa keethay Phawuloosi Awuroppa biittan koyro essida woosa keethi. Ha kiitay xaafettiday, Phawuloosi qasho keethan de7iya wode hara ammaniyaa oosanchchoti iya ixxida wodenne Filphisiyuusa woosa keethan denddida worddo timirttiya gaason iya wozanay daro azzanida wode. Gidoshin, Phawuloosi Yesuus Kiristtoosa minthidi ammaniyaa gisho ha kiitan qonccidi benttey, ufayssinne kumetha ammanetethi. Filphisiyuusan de7iya daro asay Roomeppe di7ettidi yida asi. Entti Roome biittaas mishettoosonanne loythi naagoosona. Enttafe issoti issoti ammanidi bantta biitta asan goodettidosona. He gooday entta bolla metonne manqotethi ehis (Ha@O 16:20-21).
\ip Phawuloosi ha kiitaa xaafida koyro gaasoy iya metuwa wode iya maaddanaw Filphisiyuusa ammaniyaa asay imota iyaw yeddida gisho, entta galatanaassa. Iya bollanne entta bolla dumma dumma metoy gakkidabaa gidikkoka entti minettana melanne kumethi ammanettidi daana mela ha demmida injjiyan entta minthethees. Ceeqonne otoro aggidi, Yesuus Kiristtoosa ashkketethan entti kumana mela minthidi entta akeekisees. Yesuus Kiristtoosara issife gidon entti demmida de7oy Xoossaa aadho keehatethaafe pulttidayssanne ammanon entti ekkidayssafe attin Ayhudeta wogaa polon benttidabaa gidonnayssa entta akeekisees. Yesuus Kiristtoosara issife de7iya ubbaas Xoossay immiya saruwanne ufayssaa enttaw xaafees.
\ip Ha kiitay erettey ufayssi, ammanetethi, issifetethinne ammanon minnidi de7o qonccisidi besseyssana. Hessa bolla gujjidi, Phawuloosi Filphisiyuusa woosa keethaa siiqiya gita siiquwa qonccisees.
\iot Filphisiyuusa kiitaa ayfe qofata
\io1 Gelo qofaa 1:1-11
\io1 Phawuloosi hanidi de7iya duussaa 1:12-26
\io1 Ammanon leemiso de7o 1:27-2:18
\io1 Ximotiyoosasinne Ephphaafiraditus de7iya qofaa 2:19-30
\io1 Morkketappenne iitatappe naagetethi 3:1-4:9
\io1 Phawuloosanne Filphisiyuusa ammaniyaa asaa 4:10-20
\io1 Sarothonne anjjo 4:21-23
\ie
\c 1
\p
\v 1 Kiristtoos Yesuusara issifida gisho, Xoossabaa gidida, Filphisiyuusa kataman de7iya woosa keethaa cimatasinne daaqoneta ubbaas. Yesuus Kiristtoosa aylle gidida, Phawuloosappenne Ximotiyoosappe kiitettida kiitaa.\x - \xo 1:1 \xo*\xt Ha@O 16:12\xt*\x*
\p
\v 2 Nu Aawa Xoossaafenne Godaa Yesuus Kiristtoosappe aadho keehatethaynne sarotethay hinttew gido.
\s Phawuloosa galata woosaa
\p
\v 3 Taani hinttena qoppiya wode ubban, ta Xoossaa galatays. 
\v 4 Taani hintte ubbaas Xoossaa woossiya wode ufayssan woossays. 
\v 5 Hintte koyro gallasappe ha77i gakkanaw, Wonggelaa markkatteyssan taara issife gididi, tana maaddida gisho, Xoossaa galatays. 
\v 6 Hintte giddon lo77o ooso doomida Xoossay, Kiristtoos Yesuusi simmiya gallasay gakkanaw, polanayssa erays.
\p
\v 7 Hintte ubba wode ta wozanan de7eeta. Taani ubba wodekka hessada qoppanaw bessees. Ha77i taani qashon de7ashenne qashettanaappe sinthe Wonggelaa naagoninne Wonggelaa mintha eson Xoossay taw qaadida qaadaa hintteka taara shaakettideta. 
\v 8 Taani hinttena ubbaa Kiristtoos Yesuusa siiquwan ay mela laamotiyakko Xoossay taw markka.
\p
\v 9 Hintte siiqoy tuma eratetharanne akeekara issife gujji gujji diccana mela Xoossaa woossays. 
\v 10 Hessan hintte lo77obaa shaakkidi, dooreyssata, Kiristtoosi simmiya gallasan geeshshatanne borettonnayssata gidana. 
\v 11 Hintte de7oy Xoossaa bonchchuwasinne galatas Yesuus Kiristtoosa baggara benttiya xillotethaa ayfiyaan kumidi ayfana.
\s Phawuloosa qashetethay Wonggelay dalggana mela maaddis
\p
\v 12 Ta ishato, tana gakkida ubbay Wonggelay dalggana mela tuma maaddidayssa hintte erana mela koyays. 
\v 13 Taani Kiristtoosa gisho qashettidayssa, kawo keethaa naageyssatinne hayssan de7iya harati ubbay eroosona.\x - \xo 1:13 \xo*\xt Ha@O 28:30\xt*\x* 
\v 14 Ta qashuwa gaason nu ishatappe daroti Godan keehi ammanettidosona. Hessa gisho, Xoossaa qaala yashshi baynna kaseyssafe aadhdhi minnidi odana mela minotethi demmidosona.
\p
\v 15 Gidoshin, issoti issoti qanaateninne palaman Kiristtoosabaa odoosona, shin harati suure wozanappe odoosona. 
\v 16 Suure wozanappe odeyssati, Xoossay taw Wonggelaa naago ooso immidayssa eriya gisho, siiqon odoosona. 
\v 17 Shin tana qanaateyssati ta qashuwa bolla hara meto ehanabaa enttaw daanin banttana dosidi Kiristtoosabaa odoosonappe attin tuma wozanappe odokkona.
\p
\v 18 Hessi aykkoka metenna. Tuma ogen gidin woykko worddo ogen gidin he ubban Kiristtoosi sabbakettees. Tana hessi ufayssees. Qassi harabay tana ufayssiyabay, 
\v 19 taani hintte woosaninne Yesuus Kiristtoosa Ayyaana maaduwan attanayssa eriya gisho tana ufayssees. 
\v 20 Ta gita amoynne ufayssan naagiya naagoy ta yeellatonna attanayssa. Shin ubba wode ootheyssada, ha77ika taani paxa de7in woykko hayqqin yayyonna ta kumetha asatethan Kiristtoosi bonchchettana gada minotethan odays. 
\v 21 Ta de7ikkoka Kiristtoosa xalaalas de7ays; qassi ta hayqqikokka taw aadhdhida wodhe. 
\v 22 Shin ta paxa de7ikko ayfey de7iya ooso oothana. Shin paxa de7eyssafenne hayqoppe awussa dooranekko taw erettenna. 
\v 23 Taani ha nam77atappe awussa dooranekko un77ettas. Ha de7uwappe shaakettada Kiristtoosara issife daanaw amottays; Kiristtoosara issife de7eyssi ubbaafe aadhdhida lo77o. 
\v 24 Shin taani hintte gisho paxa de7eyssi hinttew daro koshshiyabaa.
\p
\v 25 Hessa taani geeshshada erays; taani, hintte ammanon diccanaadanne ufayttanaada hinttera paxa daana. 
\v 26 Hessa gisho, taani hintteko simmada yaa wode, Kiristtoos Yesuusara hintte de7iya de7uwan tanan de7iya ceeqetethay hinttew darana.
\p
\v 27 Ubbaafe aathidi, hintte Kiristtoosa Wonggelaas bonchcho ehiya de7o de7ite. Ta hinttena be7in woykko be7onna ixxin hintte issi qofan minnidi eqqidi, harati Wonggelaan ammana mela issi wozanan gididi issife baaxeteyssa si7ana. 
\v 28 Hintte morkketas yayyofite. Entti hinttera eqettiyaba gidikko hessi hinttew atotethaas, enttaw dhayos Xoossaafe gidida malla. 
\v 29 Kiristtoosas oothiya qaaday hinttew imettiday, hintte iya ammanana mela xalaala gidonnashin hintte iya gisho meto ekkana melassa. 
\v 30 Hessa gisho, hintte ta waayiya kase be7ideta; ha77ika ta waayetteyssa si7eeta. Hintteka ta waayiya mela waayetteta.\x - \xo 1:30: \xo*\xt Ha@O 16:19-40\xt*\x*
\c 2
\s Tuma ashkketethi
\p
\v 1 Kiristtoosan hintte de7iya de7oy hinttena minthees; qassi iya siiqoykka hinttena minthethees. Geeshsha Ayyaanaara hinttew issifetethi de7ees; hintte haratas keehetanne qadhetteeta. 
\v 2 Hiza, hintte issi qofan, siiqon, issi wozananinne ayyaanan issino gididi tana polo ufayssite. 
\v 3 Hinttena doson woykko ceeqettiya hada amon issibaakka oothofite. Shin hintte issoy issuwafe gitatays yaagidi qopponna hinttena kawushshite. 
\v 4 Hintte issoy issoy, hara asi maaddiyabaa koyiteppe attin hinttena maaddiyabaa xalaala koyoppite.
\p
\v 5 Kiristtoos Yesuusan de7iya qofay hinttenan daanaw bessees.
\q1
\v 6 Iyaw ubba wode Xoossaa hanotethi de7ees.
\q2 Yaaniya gisho, iya Xoossaara issino oothiya hanotaa,
\q2 wolqqan ekkanaw koyibeenna.
\q1
\v 7 Gidoshin, I baw de7iya bonchchuwa ubbaa aggidi,
\q2 aylle medheta ekkis;
\q2 ase daanidi qonccis.
\q1
\v 8 I bana kawushshis;
\q2 hayqqana gakkanaw,
\q2 hari attoshin masqaliya bolla
\q2 hayqqanaw kiitettis.
\q1
\v 9 Hessa gisho, Xoossay iya daro dhoqqu dhoqqu oothis;
\q2 qassi suntha ubbaafekka aadhdhiya dhoqqa sunthaa immis.
\q1
\v 10 Saloninne sa7an,
\q2 sa7appe garssan de7iya ubbay,
\q2 Yesuusa sunthaa bonchchuwas gulbbatana.\x - \xo 2:10-11 \xo*\xt Isa 45:23\xt*\x*
\q1
\v 11 Asa ubbay bantta inxarssan,
\q2 Yesuus Kiristtoosa Goda yaagidi,
\q2 Xoossaa Aawa bonchchuwas markkattana.
\s Ha alamiyas poo7o gido
\p
\v 12 Ta ishato, taani hinttera de7iya wode ubban hintte kiitettidayssada, ha77i taani hintte matappe haakkinkka, kaseyssafe aathidi, kiitettanaw bessees. Xoossaas yashshaninne kokkorssan hintte atotethaa polanaw oothite. 
\v 13 Xoossay, hintte iyaw ero gidi kiitettana mela ubba wode hintte giddon oothees.
\p
\v 14 Ay ooso oothishekka zuuzummonna woykko palamonna oothite. 
\v 15 Geellanne nagaranchcho asaa giddon borettonnayssata, geeshshatanne pokkoy baynna Xoossaa naytada gidite. Hintte entta giddon salo xoolinttoda poo7ishe,\x - \xo 2:15 \xo*\xt Zaare 32:5\xt*\x* 
\v 16 de7o immiya kiitaa enttaw odite. He wode ta daaburissaynne ta oosoy mela attiboonna gisho, Kiristtoosa yaa gallas ta hinttenan ceeqettana.
\p
\v 17 Hintte Xoossaas immiya ammano imotaa bolla ta suuthay ushsha yarshshoda \f + \fr 2:17 \fr*\fq Ta suuthay ushsha yarshshoda: \fq*\ft Issi issi wode yarshsho bessan yarshshettiya mehe yarshshuwa bolla haathe woykko woyne ushshay gukkees.\ft*\f* gukkikokka tana ufayssees. Hintteka taara ufayttana. 
\v 18 Hessada hintteka ufayttidi tanakka ufayssanaw bessees.
\s Ximotiyoosanne Ephphaafiraditusa
\p
\v 19 Taani hintte de7uwabaa si7ada ufayttanaw Ximotiyoosa hintteko ellesada yeddana mela Godaa Yesuusi tana maaddanayssa ammanettays. 
\v 20 Hintte de7uwas wozanappe qoppiya iya mela asi hari oonikka baawa. 
\v 21 Harati banttana go77iyabaa koyoosonappe attin Yesuus Kiristtoosi koyabaa oothokona. 
\v 22 I taara issife gididi na7i ba aawas ootheyssada Wonggelaa ooso oothidayssanne ammanettiya asi gideyssa hintte ereeta. 
\v 23 Hessa gisho, tabay haniyabaa be7ada ellesada iya hintteko yeddana gada qoppays. 
\v 24 Taani, ta huu7en mata woden hintteko baanayssa Godan ammanettays.
\p
\v 25 Hessadakka, taani, ta ishaa Ephphaafiroditusa, taara issife ta bagga gididi oothidayssa, olettidayssanne, tana maaddanaw hinttew kiitettidayssa, hintteko kiittanaw qoppas. 
\v 26 I hinttena ubbaa be7anaw daro laamotees. Qassi I harggettidayssa hintte si7ida gisho, ba wozanan daro un77ettis. 
\v 27 I tuma harggettidi, hayqqi kichchidi attis. Shin Xoossay iyaw qadhettis. Iya xalaalas gidonnashin, azzanaoy azzano bolla guzhettonnaada, tawukka qadhettis.
\p
\v 28 Hiza, hintte iya zaari be7idi ufayttanaada tawukka ta wozanaa seelay irxxanaada taani iya ellesada hintteko yeddanaw amottays. 
\v 29 Godaas haggaaziya asada iya kumetha ufayssan mokkite. Qassi iya mela asa ubbaaka bonchchite. 
\v 30 Hintte ta matan gididi oothanaw dandda7onna maaddiya maaddidi Kiristtoosa oosuwa gisho, ba shemppuwas mishettonna ixxidi hayqqi kichchidi attis.
\c 3
\s Tuma xillotethaa
\p
\v 1 Wurssethan, ta ishato, hintte Godaaba gidiya gisho, ufayttite. Taani kase xaafidayssa zaarada xaafanayssi tana waaysenna, shin hinttena balappe naagana.
\p
\v 2 Iitabaa oothiya kanatappe, qassi qaxxarettanaw koshshees giya iita asatappe naagettite. 
\v 3 Nuuni Xoossaa Geeshsha Ayyaanan Xoossaas goynniya gishonne nu de7uwan Kiristtoos Yesuusan ceeqettiya gisho, tuma qaxxaro qaxxarettidayssata. Nuuni kare asatethaa bolla oosettiyaban ceeqettoko.
\p
\v 4 Ta kare asatethan ceeqettanaw koshshiko ta daroban ceeqettanaw dandda7ays. Ay asikka ba kare asatethan ceeqettiyabay baw de7ees gidi qoppiko, taani iyappe daro aadhdhada ceeqettiyabay de7ees. 
\v 5 Taani yelettida saaminttara qaxxarettas. Taani yeletan Isra7eele; taani Biniyame zare; taani walaki baynna Ayhude ase. Ayhude higge naagon gidikko taani Farisaawe.\x - \xo 3:5 \xo*\xt Ha@O 23:6; 26:5; Roome 11:1\xt*\x* 
\v 6 Ayhude ammanuwas mishetethan gidikko taani woosa keethaa yedethas. Issi asi higge naagidi xilliyaba gidikko, tanan borey benttibeenna.\x - \xo 3:6 \xo*\xt Ha@O 8:3; 22:4; 26:9-11\xt*\x*
\p
\v 7 Shin kase tana maaddees gada qoppidabaa ubbaa, Kiristtoosa gisho gada maaddonnabaa oothada taybas. 
\v 8 Hessa xalaala gidonnashin, taani ta Godaa Kiristtoos Yesuusa ereyssi haraba ubbaafe daro aadhdhiya gisho, he ubbaa wodhey baynnabaada taybas. Taani iya gisho ubbabaa dhayas. Kiristtoosa demmanaw ubbabaa wora holettida buureda taybays. Taani Yesuusara issino gidas. 
\v 9 Taani higges kiitettada demmiya ta huu7e xillotethi taw baawa. Kiristtoosa ammanin benttiya xillotethay, Xoossaa matappe yaa xillotethay ha77i taw de7ees. 
\v 10 Taani Kiristtoosanne iya denddo wolqqaa eranaw koyays. Taani iya metuwa iyara shaakettanawunne iya hayquwan iya daananaw amottays. 
\v 11 Hessadakka, hayqoppe denddada merinaw de7on daanayssa ufayssi oothays.
\s Gaxa gakkanaw woxxite
\p
\v 12 Taani ha77i gaxa gakkas woykko tanan bali baawa giikke. Shin Kiristtoos Yesuusi tana oykkida gisho taani ta sinthan de7iya woytuwa oykkanaw woxxaysinne butetays. 
\v 13 Ta ishato, taani hessa demmas gada qoppike, shin taani issibaa oothays. Taappe guyera de7eyssa dogada sinthan de7eyssa oykkanaw zaaturays. 
\v 14 Hessa gisho, taani gaxa gakkanaw woxxays. Xoossay Kiristtoos Yesuusa baggara salo de7uwas xeegida woytuwa ekkanaw daaburays.
\p
\v 15 Hiza, nuuni Ayyaanan gashttida ubbay hessa qoppanaw bessees. Hinttefe baggatas dummattiya qofi de7ikko, hessaka Xoossay hinttew qonccisana. 
\v 16 Gidikkoka, nuuni hanno gakkanaw de7ida de7uwan, ane sinthe boos.
\p
\v 17 Ta ishato, tana daanite; hessadakka, nu leemisuwa kaalliya asata akeekidi be7ite.\x - \xo 3:17 \xo*\xt 1Qoro 4:16; 11:1\xt*\x* 
\v 18 Taani hessa hinttew kase daro toho odas, shin ha77ika zaarada afuthan odays. Kiristtoosi masqaliya bolla hayqqidayssas banttana morkke oothida daro asati de7oosona. 
\v 19 Entta wurssethay dhayo; entta uloy enttaw xoosse. Yeellatanaw bessiyaban entti ceeqettoosona; qassi ha sa7abaa xalaala qoppoosona. 
\v 20 Nu biittay saluwana. Saloppe yidi nuna ashshiya Godaa Yesuus Kiristtoosa naagoos. 
\v 21 Kiristtoosi ubbabaa ba maatappe garssan oothanaw dandda7iya ba wolqqan nu daaburanchcho asatethaa laammidi ba bonchcho asatethaa daanisana.
\c 4
\s Wurssetha zore
\p
\v 1 Ta ishato, ta doseyssato, ta laamoteyssato, tana ufaysseyssato, tana gitayeyssato hiza Godan minnidi eqqite.
\p
\v 2 Ewoodinne Sinxiika, hintte nam77ay, issi qofan michchida Godan daanada taani hinttena zorays. 
\v 3 Taara oothiya ammantheysso, neeni ha maccasata maaddana mela ta nena woossays. Ha maccasati taara, Qeleminxoosaranne entta sunthay Xoossaa de7o maxaafan xaafettida haratara issife Wonggelaa ubba bessaa gathanaw daaburidosona.
\p
\v 4 Godaara hintte de7iya de7uwan ubba wode ufayttite. Taani hessa gujjadakka odays; ufayttite.
\p
\v 5 Asa ubbay hintte ashkketethaa ero; Goday matan yaana. 
\v 6 Xoossaa hintte woossiya wode ubban iya galatishe, hinttena koshshiyaba ubbaas woossiteppe attin aybibaaskka hirggofite. 
\v 7 Asa eratetha ubbaafe aadhdhiya Xoossaa sarotethay, hintte wozanaanne hintte qofaa Godaa Yesuus Kiristtoosa baggara naagana.
\p
\v 8 Wurssethan, ta ishato, hintte wozanan lo77obaanne galatisiyabaa qoppite. Tuma gidiyabaa ubbaa, bonchchoba ubbaa, qoho gidonnaba ubbaa, geeshshaba ubbaa, siiqobaa ubbaanne ufayssiyaba ubbaa qoppite. 
\v 9 Hintte taappe tamaaridabaa, ekkidabaa, si7idabaanne be7idabaa ubbaa oothite. Sarotethaa immiya Xoossay hinttera issife gidana.
\s Phawuloosi imettida imotaas galatis
\p
\v 10 Daro wodeppe guye, hintte tabaa zaaridi qoppanaw doomida gisho taani Godan daro ufayttays. Hessa guussay, taw qoppanaw hinttew injjetonna ixxidayssafe attin taw qofaa aggibeeketa. 
\v 11 Taani hessa tana metida gisho giikke; taw de7iyabay gidana guussu tamaaras. 
\v 12 Taani metootettidi de7iya duussi erays; qassi durettidi de7iya duussika erays. Awun gidin qassi ay wodekka taani kalonne kosha, pacenne palaha tamaaras. 
\v 13 Kiristtoosi taw immiya wolqqan ubbabaa oothanaw dandda7ays.
\p
\v 14 Gidikkoka, hintte ta metuwa taara ekkidayssan lo77o oothideta. 
\v 15 Filphisiyuusa asato, Wonggelaa koyro odanaw taani Maqedooniyappe keyaa wode immiyabankka ekkiyabankka hintte woosa keethaafe attin hari tana maaddiboonayssa hintte ereeta.\x - \xo 4:15-16 \xo*\xt 2Qoro 11:9\xt*\x* 
\v 16 Tana Teselonqen metoy gakkida wodekka tana zaari zaaridi maaddideta.\x - \xo 4:16 \xo*\xt Ha@O 17:1\xt*\x* 
\v 17 Taani, hinttefe imota ekkanaw koyada gidonnashin, imoppe yaa anjjuwaa hintte ekkana melassa.
\p
\v 18 Taani, hintte immida ubbaanne gididi palaheyssa ekkas. Hintte yeddida ubbaa Ephphaafiraditusappe ekkas; koshshiyaba ubbay taw de7ees. Hintte taw yeddida imoy Xoossaas sawo tonggu giya, I dosiya, I ufayttiya yarshsho mela.\x - \xo 4:18 \xo*\xt Kessa 29:18\xt*\x* 
\v 19 Ta Xoossay ba bonchcho duretethaafe, Kiristtoos Yesuusa baggara hinttew koshshiyaba ubbaa immana. 
\v 20 Nu Aawa Xoossaas merinaappe merinaa gakkanaw bonchchoy gido. Amin7i.
\s Wurssetha sarotaa
\p
\v 21 Kiristtoos Yesuusa baggara Xoossabaa gidida ubbaa saro giite. Taara de7iya ishati hinttena saro goosona. 
\v 22 Xoossabaa gidida asa ubbay, ubbaafe aathidi Kawuwa Qeesare keethan de7eyssati hinttena saro goosona.
\p
\v 23 Godaa Yesuus Kiristtoosa aadho keehatethay hinttera gido.