\id ZEP - GOOFA FULL BIBLE
\ide UTF-8
\h ሶፎናሳ ማፃፋ
\toc1 ሶፎናሳ ማፃፋ
\toc3 ሶፎ
\toc2 ሶፎናሳ
\mt ሶፎናሳ ማፃፋ
\imt ጋ ቆፋ
\ip ሶፎናሳ ማፃፋይ ፃፈትዳይ፥ ይሁድነ የሩሳላመይ ጎዳ ጋላሳን ያናዉ ደእያ ዳጋንያ ፕርዳባ ኦዳናሳ። ማፃፋይ፥ አሳ ኮቸ ኡባ ቦላ ፆሳ ፕርድ ያናይስ አቶናባ ግድኮካ (\xt 1:2፤ 3:8\xt*)፥ ኡባፈ አድ እ ናጋራ ጋሶን ይሁዳ ቦላ ያናዉ ደእያ ፕርዳ ኦዴስ (\xt 1:4-18፤ 3:1-7\xt*)። ሄሳ ግሾ፥ ፆሳ ፕርዳ ጋላሳይ ጋካናፐ ስን አሳይ ባንታ ናጋራ ፓፅድ፥ ፆሰ ኮያና መላ አሳ ደንስ (\xt 2:1-3\xt*)።
\ip ሶፎናስ፥ እቻሹ አላጋ ቢታታ ቦላ ፆሳይ ፕርዳናይሳ ኦዴስ። ኤንትካ፥ ፍልስፄመ፥ አሞነ፥ ሞአበ፥ ቶጰነ አሶረ (\xt 2:4-15 \xt*)። ናበይ የሩሳላመ ናጋራ ኦድዳፐ ጉየ፥ ፆሳይ ባ አሳ ሺሻናይሳ፥ ዎዛናይሳነ ዛሪድ ኦራናይሳ ኦዴስ (3:9-20)። “ህንተኖ፥ ቢታን ደእያ አሽከቶ፥ እያ ኪታ ናግያ ኡባቶ፥ ጎዳ ኮይተ፤ ፅሎተ ኮይተ፤ አሽከተ ኮይተ። ኦን ኤር ጎዳ ሀንቆ ጋላስ ህንተ አቶና አገከታ” ያግስ።
\iot ማፃፋ አይፈ ቆፋታ
\io1 ጎዳ ጋላሳን ይሁድነ እስራኤለይ ፕርደታና (\ior 1:1-18\ior*)
\io1 ፆሳኮ ስሞ (\ior 2:1-3\ior*)
\io1 ሀራ ካዎተታ ቦላ ያና ፕርዳ (\ior 2:4-15\ior*)
\io1 ይሁድነ ሀራ ካዎተት ጎዳኮ ስማና (\ior 3:1-20\ior*)
\c 1
\s1 ጎዳ ፕርዳ ጋላሳ
\p
\v 1 አሞነ ናአይ እዮስያስ ይሁዳን ካዎትዳ ዎደ ሶፎንያሳኮ ይዳ ጎዳ ቃላይ ሀይሳ። ሶፎንያስ ኩሻ ናኣ፤ ኩሽ ጋዳላ ናአ፤ ጋዳል አማረ ናአ፤ አማረይ ህዝቅያሳ ናኣ። 
\v 2 “ታኒ ቢታ ቦላ ደእያባ ኡባ ይሳና። 
\v 3 አሰነ መሄ፥ ሳሎ ካፎታነ አባ ሞሎታ ይሳና። ኢታ አሳታ ሽራ የጋና፤ አሳ ዛረ ቢታ ቦላፈ ይሳና” ያጌስ ጎዳይ።
\s1 ይሁዳ ቦላ ያና ፕርዳ
\p
\v 4 “ይሁዳንነ የሩሳላመን ደእያ ኡባ ሴራናዉ ታ ኩሽያ ደንና። ባኣለ ኤቃ ጎይነይሳታነ እያ ሀጋዝያ ካህነታ ሄ በሳፈ ይሳና። 
\v 5 ኬ ቦላ ከይድ አዋስ፥ አጌናስነ ፆልንቶታስ ጎይነይሳታ ታኒ ይሳና። ጎዳ ጎይንሸነ እያ ሱንን ጫቅሸ ሞሎካ ጌተትያ ኤቃ ሱንን ጫቀይሳታ ታኒ ይሳና። 
\v 6 ታና ካሎ አግድ ጉየ ስምዳይሳታ፥ ታና ኮይቦናይሳታነ ታና ኦይችቦናይሳታ ታኒ ይሳና” ያጌስ ጎዳይ።
\p
\v 7 ጎዳ ጋላሳይ ማትዳ ግሾ፥ ኡባ ሃርያ ጎዳ ስንን ስእ ጊተ! ጎዳይ ያርሹዋ ጊግስስ፤ ቃስ ባ ፄግዳ እማታ ጌሽስ።
\p
\v 8 “ጎዳ ያርሹዋ ጋላስ ሀላቃታ፥ ካዋ ናይታነ አላጋ ቢታ ማኦ ማእዳ ኡባ ታኒ ሴራና። 
\v 9 ሄ ጋላስ አላጋ ቢታ አሳታዳ፥ ኤቃ ጎይነይሳታነ ባንታ ጎዳ ኬ ጌላተንነ ጭሞን ኩንይሳታ ታኒ ሴራና” ያጌስ ጎዳይ።
\p
\v 10 “ሄ ጋላስ ሞሎ ፐንግያ ባጋራ ዋሶይ፥ ካታማስ ናምአን ሻሁዋን ዬሆነ ዙማታ ቦላ ግታ ዶምኤ ግርስ ስኤታና። 
\v 11 ህንተኖ፥ ካታማስ ጋርሳ ባጋን ደኤይሳቶ፥ ዬክተ። ያን ዛልእያ ኡባይ ይዶሶና፤ ብራ ኦይክዳይሳት ሀይቅ ዉርዶሶና። 
\v 12 ሄ ጋላስ ታኒ ፆምፐ ኦይዳ የሩሳላመ ግዱዋ ኮያና። ህርግ ባይና ዎ ኡትድ ባንታ ዎዛናን፥ ‘ጎዳይ ሎኦካ ኢታካ’ ገይሳታ ታኒ ሴራና። 
\v 13 ኤንታ ሻሎይ ቦንቀታና፤ ኤንታ ኬይ ላለታና። ኤንቲ ኬ ኬፃና፥ ሽን ሄ ኬን ዶኮና፤ ዎይነ ቶካና፥ ሽን ሄ ዎይንያ ኡዮኮና” ያጌስ ጎዳይ።
\s1 ጎዳ ግታ ጋላሳ
\q1
\v 14 “ጎዳ ግታ ጋላሳይ ማትስ፤
\q2 ኤለስድ ጋክስ።
\q1 ጎዳ ጋላሳይ ጫሞ ጋላስ፤
\q2 ሄ ጋላስ ምኖ ኦላንቾትካ ዋሶ ጎቻና።
\q1
\v 15 ሄ ጋላሳይ ሀንቆ ጋላስ፥
\q2 ሄ ጋላሳይ መቶነ ኡንአ ጋላስ፥
\q2 ዮነ ላለተ ጋላስ፥
\q2 ማነ ጫጋና ጋላስ፥
\q2 ሻራነ ሳካና ማ ጋላስ ግዳና።
\q1
\v 16 ሄ ጋላሳይ ድረትዳ ካታማታ ቦላ፥
\q2 አዱሳ ግምበታ ቦላ ኦላ ሞይዘይ ፑነታና፤
\q2 ጊገታ ግያ ዋሶይ ስኤታና።
\q1
\v 17 ኤንቲ ታና ቆህዳ ግሾ፥
\q2 ቆቀዳ ታታፋና ጋካናዉ፥ ኤንታ ቦላ መቶ ኤሀና።
\q1 ኤንታ ሱይ ድኦዳ ጎጋና፤
\q2 ኤንታ አሀይ ፕቶዳ የገታና።
\q1
\v 18 ጎዳ ሀንቆ ጋላስ
\q2 ኤንታ ብራይነ ኤንታ ዎርቃይ ኤንታ አሸና።
\q1 እ ሳአን ደእያ ኡባ ቆፖና ይሳና፤
\q2 ቢታ ኡባይ እያ ሀንቁዋ ታማን ሜተታና” ያጌስ ጎዳይ።
\c 2
\p
\v 1 ህንተኖ፥ ዬል ባይና አሳዉ፥ አነ እስፈ ሺቅተ! 
\v 2 ጫርኮይ ፑንድ ኤፍያ ባናዳ ሀኖና ደእሽን፥ ያሽያ ጎዳ ሀንቆይ ህንተ ቦላ ዎና ደእሽን፥ ጎዳ ሀንቆ ሱላ ጋላሳይ ህንተ ቦላ ዮና ደእሽን ጎዳኮ ስምተ። 
\v 3 ህንተኖ፥ ቢታን ደእያ አሽከቶ፥ እያ ኪታ ናግያ ኡባቶ፥ ጎዳ ኮይተ፤ ፅሎተ ኮይተ፤ አሽከተ ኮይተ። ኦን ኤር ጎዳ ሀንቆ ጋላስ ህንተ አቶና አገከታ።
\s1 ፍልስፄመ ቦላ ያና ፕርዳ
\p
\v 4 ጋዛ ካታማይ ኦና ግዳና፤ አስቃሎና ካታማይ ባይሳ ግዳና። አሽዶዳ ካታማ አሳይ ሴታ ጋላስ ጎደታና፤ ኤቅሮና ካታማይ ሾደታና። 
\v 5 ህንተኖ፥ አባ ጋፃን ደእያ ከልታወቶ፥ ህንተና አየ! ነኖ፥ ፍልስፄመት ደእያ ካናነ ቢታዉ፥ ጎዳ ፕርዳይ ነ ቦላ ዬስ። ታኒ ነና ይሳና፤ እስ አስካ አተና። 
\v 6 አባ ጋፃን ደእያ ህንተ ቢታይ መሄ ሄመትያ በሲ፥ ሄንንቾት ደእያ በስነ መሄ ዳራ ግዳና። 
\v 7 ይሁዳ አሳፐ አትዳይሳት አባ ጋፃን ደእያ በሳ ላታና፤ ኤንቲ ያን ሄማና። ሳአይ ቃምያ ዎደ ኤንቲ አስቃሎና ካታማን ደእያ ኬታን አቃና። ጎዳይ ኤንታ ፆሳይ ኤንታባ ቆፓና፤ እ ኤንታ ዛሪድ ናንሳና።
\s1 ሞአበነ አሞነ ፕርደተ
\p
\v 8 ኡባፈ ዎልቃማ ጎዳይ፥ እስራኤለ ፆሳይ፥ “ታኒ ሞአበ ቶሽያነ አሞነ ጫሻ ስአስ። ኤንቲ ታ አሳ ዋትድ ቶችዳኮነ ኤንታ ቢታ ኤካናዉ ዋትድ ማንድዳኮ ታ ኤራይስ። 
\v 9 ሄሳ ግሾ፥ ታ ደኦ ሱንን ጫቃይስ፤ ሞአበይ ሶዶመዳ ሀናና፤ አሞነይ ጋሞራዳ ሀናና። ኤንቲ መርናዉ ማፅነ ኦላነ አጉን ማእዳ ባዞ ግዳና። ታ አሳፐ አትዳይሳት ኤንታ ሻሉዋ ቦንቃና፤ ኤንታ ቢታ ላታና” ያጌስ።
\p
\v 10 ኤንቲ ኡባፈ ዎልቃማ ጎዳ አሳ ቶችዳ ግሾነ ጫይዳ ግሾ፥ ኤንታ ቦላ መቶይ ጋካና። 
\v 11 ኤንታ ቢታን ደእያ ፆሳታ እ ይስያ ዎደ ጎዳይ ኤንታና ያሽሳና። ሳአን ደእያ ካዎተታን ደእያ አሳ ኡባይ ባ ደእያ በሳን እያ ጎይናና።
\p
\v 12 ህንተኖ፥ ቶጰ አሳዉ፥ ህንተ ታ ማሻን ሀይቃና።
\s1 ሶረ ቦላ ያና ፕርዳ
\p
\v 13 እ ባ ኩሽያ ፑደሀ ባጋ የድድ አሶረ ቢታ ይሳና። ቃስ ናናወ ካታማ መላ ባዞዳ ባይሳ በሲ ኦና። 
\v 14 መሄ ዉደይነ ቢታን ደእያ ዶአት ኡባይ ያን ሄመታና፤ ጉቶይነ ቁፃረይ ላለትዳ ግምብያ ግዶን ዳና። ኤንታ ቃላይ ማስኮተራነ ፐንግያራ ስኤታና፤ ዝጋ ቱቀት ካሎታና። 
\v 15 “ታፐ አትሽን፥ ሀር ባዋ” ያግድ ኦቶርትድ ደእዳ ካታማይ ሀእ ዋንድ ዶአት አቅያ በሲ ግድዴ? እያ ማታራ አያ ኡባይ ባንታ ኩሽያ ባቅሸ፥ “ፖራ!” ጋና።
\c 3
\s1 የሩሳላመ ዎዘተ
\p
\v 1 ማካላንቹዋስ፥ ቱንዳይሳስነ ባ ደርያ ኡንኤዳ የሩሳላመ ካታማ አየ! 
\v 2 እ ኦናካ ኪተተና፤ ሴርን ስመና፤ ጎዳን አማነተና፤ ባ ፆሳኮ ሺቀና። 
\v 3 እያ ሀላቃት ጉድያ ጋሞ መላ፤ እያ ዳይናት ደምዳባ ዎንቶስ አሾና ኡባ ምድ ኦንግያ ኦማርሳ ሱመ መላ። 
\v 4 እያ ናበት ኦቶራንቾነ ገናንቾ፤ እያ ካህነት ጌሻ ቱንሰይሳታ፤ ኤንቲ ጎዳ ህግያ ምርቆሶና። 
\v 5 ሽን እያ ግዶን ደእያ ጎዳይ ፅሎ፤ እ ባላ ኦና። ዎንታ ዎንታ እ ፅሎ ፕርዴስ፤ ጋላስ ጋላስ ሄሳ አገና። ግዶሽን፥ ያን ደእያ ጌላይ ዬላ ኤረና።
\p
\v 6 “ታኒ ካዎተታ ይሳስ፤ ኤንታ ግምበታ ላላስ። ኤንታ ካታማታ እስ ዶና ባይሳ ቢታ ኦስ፤ ኤንታ ኦገታ አስ ካንና ባዞ ኦስ። 
\v 7 ታኒ ሀይሳ ኡባ ኦዳ፥ ‘ታ አሳይ ታና ቦንቻና፤ ታ ሴራ ኤካና፤ ታ ኪትዳባ ዶገና’ ያጋስ። ሽን ኤንቲ ካሰፐ አድ ኢትዶሶና፤ ባንታ ኦሱዋን ቱንዶሶና” ያጌስ ጎዳይ።
\p
\v 8 “አነ ታኒ ፕርድያ ጋላሳይ ጋካናዉ ጉ ናግተ። ታኒ ደረታነ ካዎተታ ሺሻናዉ ቆፋ ቃቻስ፤ ታ ሀንቁዋ ሱላ ኤንታ ቦላ ጉሳና፤ ቢታይ ኩመ ታ ሀንቁዋ ታማን ፁገታና።
\p
\v 9 “ሄ ዎደ አሳ ኡባይ ጌሻ ኦዳ ኦደታና መላ ኦና። ኤንቲ ኡባይ ጎዳ ሱን ፄጋና፤ እስፈ እያዉ ጎይናና። 
\v 10 ላለትዳ አሳይ፥ ታና ቱማ ጎይነይሳት፥ ቶጰ ሻፋታፐ ሄፍንን ደኤይሳት ታዉ እሞታ ኤሀና። 
\v 11 ኦቶረይሳታነ ጬቀተይሳታ ታ ህንተ ግዶፈ ይስያ ግሾ፥ ሄ ዎደ ህንተ ታ ቦላ ኦዳ ኦሱዋ ጋሶን ዬላተከታ። ህዛፐ ጉየ ህንተ ታ ጌሻ ዙማ ቦላ ኦቶርተከታ። 
\v 12 ታኒ ህንተ ግዶፈ ባንታና ካዉሸይሳታነ አዳታ አሻና፤ ኤንቲ ጎዳ ሱንን አማነታና። 
\v 13 እስራኤለ አሳፐ አትዳይሳት ኢታባ ኦኮና፤ ዎርዶ ኦደቶኮና፤ ኤንታ እንፃርሳን ጭሞይ በንተና። ሄሳ ግሾ፥ ኤንቲ ምድ ካልድ ሳሮን ዳና፤ ኤንታ ያሽስያባይ ባዋ” ያጌስ።
\q1
\v 14 ፅዮነ ናኤ፥ ማዝሙርያ የፃ!
\q2 እስራኤለ አሳዉ፥ እልልተ!
\q1 የሩሳላመ ናኤ፥ ነ ፖሎ ዎዛናፐ ኡፋይታ፤
\q2 ሀሹ ጋ!
\q1
\v 15 ጎዳይ ህንተ ቦላ ፕርድዳ ፕርዳ አግስ፤
\q2 ህንተ ሞርከታ ድግስ።
\q1 ጎዳይ፥ እስራኤለ ካዎይ ህንተ ግዶን ደኤስ፤
\q2 ህዛፐ ጉየ ህንተና ያሽስያባይ ባዋ።
\q1
\v 16 ሄ ጋላስ ኤንቲ የሩሳላመ ሀይሳዳ ያጋና፦
\q2 “ፅዮነ፥ ያዮፋ! ነ ኩሸይ አርጋጮፖ።
\q1
\v 17 ጎዳይ፥ ነ ፆሳይ ነ ግዶን ደኤስ፤
\q2 እ ነዉ ፆኖ እምያ ኦላንቹዋ።
\q1 እ ነናን ኡፋይታና፤
\q2 ባ ሲቁዋን ነና ኦራና።
\q1 አሳይ ባኣለ ጋላስ ማዝሙረ የፀይሳዳ፥
\q2 እ ነናን ኡፋይተይሳ ማዝሙረ የፅድ በሳና” ያጋና።
\q1
\v 18 ጎዳይ ሀይሳዳ ያጌስ፦
\q2 “ህዛፐ ጉየ ነ ቦላ ዮይ ጋኮናዳ ኦና፤
\q2 ነ ዬላ ድጋና።
\q1
\v 19 ሄ ዎደ ታኒ ነና ኡንኤዳይሳታ ኡባ ሴራና፤
\q2 ዎበታ አሻና፤ ላለትዳይሳታ ሺሻና።
\q1 ኤንቲ ዬላትዳ በሳን ዛራዳ ቦንቻና፤
\q2 ኤንታ ዬላ ቦንቾንነ ሳባን ላማና።
\q1
\v 20 ሄ ዎደ ታኒ ህንተና ሺሻና፤
\q2 ህንተና እስፈ ዛራዳ ሺሻና።
\q1 ታኒ ህንተና ናንስያ ዎደ፥
\q2 ህንተ ሀ ሳአን ደእያ አሳ ኡባ ማታን፥
\q2 ቦንቸትዳይሳታነ ኤረትዳይሳታ ግዳና” ያጌስ ጎዳይ።