\id ZEC - GOOFA FULL BIBLE
\ide UTF-8
\h ዛካርያሳ ማፃፋ
\toc1 ዛካርያሳ ማፃፋ
\toc3 ዛካ
\toc2 ዛካርያሳ
\mt ዛካርያሳ ማፃፋ
\imt ጋ ቆፋ
\ip ዛካርያሳ ማፃፋ ኮይሮ ፅቅሰይ፥ ናበይ ዛካርያስ፥ ባራካ ናአ፥ አዶ ናአ ናአ ግድዳይሳ ኦዴስ። ዛካርያስ ሌወ ኮቸ፤ እስራኤለ አሳይ ድኦፐ ስምን፥ ካህነነ ናበ ግድድ የሩሳላመን ፆሳስ ሀጋዝዳ አሰ።
\ip ዛካርያስ ባ ማፃፋ ፃፋና መላ ጋሶ ግድዳ ናምኡ ቆፋት ደኦሶና። ኮይሮ ቆፋይ፥ ድኦፐ ስሚድ ይሁዳን ደእያ፥ አሳይ ፆሳ ኬ ኬፆ ዶማና መላነ ዉርሰ ጋካናዉ ምንድ ኤቃና መላ ምንናሳ። ናምአን ቆፋይ፥ ሀ ነበይ ስንፈ ያና ክርስቶሳ ፕርዳባነ እ ያ ዋንድ ቆንጫናዉ ደእያኮ ኤንታ አኬክሳናሳ።
\ip ዛካርያሳ ማፃፋይ ናምኡ ግታ ክፍለታን ሻከቴስ።
\ipi 1. ሸምፖ 1—8 ጋካናዉ ደእያ ክፍለይ፥ ክ.የ.ስ. 500 ፄታነ ላታሙ ላይፈ ብድ እቻሹ ፄታነ ታማነ እቻሹ ላይ ጋካናዉ ደእያ ላይታ ግዶን፥ ዱማ ዱማ ዎደታን ናበይ ዛካርያስ ኦድዳ ትንብተ ቃላ ኦይክስ። ሀ ናበይ ኦድዳ ቃላት ቆንጨ ማራን ሺቅዶሶና. ሄስካ የሩሳላመይ ኦራፃናባ፥ ፆሳ ኬ ስሚድ ኬፀታናባ፥ ፆሳ አሳይ ጌያናባነ ያና ክርስቶሳ ላይባ ኦዴስ።
\ipi 2. ሸምፖ 9—14 ጋካናዉ ደእያ ክፍለይ ባ ሁጰን ናምአን ሻከቴስ። ሀ ክፍለት “ኪታ ዎይኮ ቃላ” ግያ ኦዳን ቆንጭዶሶና (\xt 9:1፤ 12:1\xt*)። ኮይሮ ቃላይ፥ ያና ጌተትዳ ክርስቶሳ ባጋራ እስራኤለስ አቶተ ኡፋይስ ደኤይሳ ኦዴስ። ሀ ናበይ ኦድዳ ቃላት ስንፈ ያና ክርስቶሳ ዉርሰ ፕርዳባ ኦዴስ (\xt 9:1—11:17\xt*)። ናምአን ቃላይ፥ እስራኤለ ጎዳኮ ዛሪድ ስሞነ ኦራ ደረ ግድድ ጎዳ ስንን ዱሳባ ኦዴስ (\xt 12:1—14:21\xt*)። ሄ ዎደ፥ ዳዊታ ሶ አሳስ፥ “ናጋራፐነ ቱናተፈ ጌሽያ ፑልቶይ ቃና” (\xt 13:1\xt*)። እስራኤለይ፥ “ፆሳይ፥ ኑ ጎዳ” ያጋና (\xt 13:9\xt*)። ክርስቶስ ካዎ ግድድ የሩሳላመ ሃራና (ሸም 14)።
\ip ዉርሰን፥ ሀገይ፥ ድኦፐ ስምዳ አሳይ ፆሳ ኬ ኬፃና መላ ደንያ ዎደ፥ ዛካርያስ ፆሳፈ ኤክዳ ቆንጨንነ ቃላን የሩሳላመይነ ፆሳ ኬይ ዛሪድ ኦራፃናይሳ ኦዴስ።
\iot ማፃፋ አይፈ ቆፋታ
\io1 ቆንጨታነ ቃላታ (\ior 1:1—8:23\ior*)
\io2 ታኮ ስምተ ታ ህንተኮ ስማና (\ior 1:1-6\ior*)
\io2 ሆስፑን ቃማ ቆንጨታነ ማላታ (\ior 1:7—6:15\ior*)
\io2 ፆማ፥ ኪተተነ አንጀተ (\ior 7:1—8:23\ior*)
\io1 ካዎይ ስማና (\ior 9:1—14:21\ior*)
\io2 ኮይሮ ቃላ፦ አይሰይሳታነ ኤንቲ አይስያ አሳ (\ior 9:1—11:17\ior*)
\io2 ናምአን፦ አሳነ ኤንታ አይሰይሳታ (\ior 12:1—14:21\ior*)
\c 1
\s1 ጎዳይ ባ አሳ ፄጌስ
\p
\v 1 ዳርዮስ ካዎትዳ ናምአን ላይን፥ ሆስፑን አጌናን፥ ጎዳ ቃላይ እዶ ናኣ፥ ባራካ ናኣ፥ ናብያ ዛካርያሳኮ ይስ።
\p
\v 2 “ጎዳይ ህንተ ማይዛታ ቦላ ዳሮ ሀንቀትስ። 
\v 3 ሽን ሀእ አሳስ ሀይሳዳ ያጋዳ ኦዳ፦ ‘ታኮ ስምተ፤ ታኒ ህንተኮ ስማና’ ያጌስ ኡባፈ ዎልቃማ ጎዳይ። 
\v 4 ካሰ ናበት፥ ህንተ አዋታኮ፥ ‘ህንተ ኢታ ኦግያፐነ ኢታ ኦሱዋፐ ስምተ’ ያግድ ኦድን፥ ስኦና እፅድ፥ ባንታ ኢታ ኦግያፐነ ኦሱዋፐ ስሞና እፅዳ፥ ህንተ ማይዛታዳ ሀኖፕተ” ያጌስ ኡባፈ ዎልቃማ ጎዳይ። 
\v 5 ህንተ ማይዛት ሀእ አዉን ደኦና? ሄ ናበት መርናዉ ፓፃ ደኦና? 
\v 6 ግዶሽን፥ ናበታ፥ ታ አይለታ ባጋራ ታኒ ኦድዳ ኪታትነ ህገት ኡባይ ህንተ ማይዛታ ቦላ ጋክቤኔ? ያትን፥ ኤንቲ ባንታ ናጋራ ፓፅድ፥ “ኡባፈ ዎልቃማ ጎዳይ ኑ ኦግያዳነ ኑ ኦሱዋዳ ኑስ እማና ግዳይሳዳ ባ ኦሱዋ ኦስ” ያግዶሶና።
\s1 ፓራታ ቆንጨ
\p
\v 7 ዳርዮስ ካዎትዳ ናምአን ላይን፥ ሻባፃ ጌተትያ ታማነ እስን አጌናን፥ ላታማነ ኦይዳን ጋላሳን፥ ጎዳ ቃላይ እዶ ናኣ፥ ባራካ ናኣ፥ ናብያ ዛካርያሳኮ ይስ። 
\v 8 ታኒ ቃማ ቆንጨን፥ ዞኦ ፓራ ቶግዳ እስ አስ በአስ። እ ዛንጋራን ደእያ ባርሰኔተ ጌተትያ ምታ ጋርሳን ኤቅስ፤ እያፐ ጉየ ባጋራ ዞኦ፥ ዳማነ ቦ ፓራት ደኦሶና። 
\v 9 ያትን ታኒ፥ “ታ ጎዳዉ፥ ሀይሳቲ አይቤ?” ያጋዳ ኦይቻስ።
\p ታራ ሃሳያ ኪታንቾይ፥ “ሀይሳቲ አይበኮ ታኒ ነና በሳና” ያግስ።
\p
\v 10 ባርሰኔተ ም ጋርሳን ኤቅዳ ኡራይ፥ “ሀይሳቲ ሳኣ ኡባ ዩይድ ዎቻና መላ ጎዳይ ኪትዳይሳታ” ያግስ።
\p
\v 11 ኤንቲ ባርሰኔተ ም ጋርሳን ኤቅዳ ጎዳ ኪታንቹዋኮ፥ “ኑኒ ሳአ ኡባ ዩይድ ዎችዳ፤ ሳእ ዎፑ ግድ ሳሮ ደኤስ” ያግዶሶና።
\p
\v 12 ሄሳፈ ጉየ፥ ጎዳ ኪታንቾይ፥ “አቤት ኡባፈ ዎልቃማ ጎዳዉ፥ ኔኒ ሀንቀትን ሀእ ላፑን ታሙ ላይ ኩምስ፤ ያትን፥ ኔኒ የሩሳላመነ ይሁዳ ካታማታ ማሮና አዉደ ጋካናዉ ጋምአኔ?” ያግስ። 
\v 13 ጎዳይ ታራ ሃሳያ ኪታንቻዋስ ሎኦነ ምንያ ቃላን ዛሮ እሚስ።
\p
\v 14 ታራ ሃሳያ ኪታንቾይ ታኮ፥ “ሀ ቃላ አዋጃ! ኡባፈ ዎልቃማ ጎዳይ፥ ‘ታኒ የሩሳላመስነ ፅዮነስ ዳሮ ምሸታይስ። 
\v 15 ኑኒ ሳሮ ደኦስ ግድ ቆፕያ ሀራ ካዎተታ ቦላ ታኒ ዳሮ ሀንቀታስ። ታኒ ታ አሳ ቦላ ጉራ ሀንቀታስ፥ ሽን ኤንቲ አድ ታ ደርያ ቆህዶሶና።’ 
\v 16 ሄሳ ግሾ፥ ታኒ የሩሳላመኮ ማሮታን ስማና፤ ታ ኬይ ዛሪድ ያን ኬፀታና፤ የሩሳላመ ካታማ ቦላ ዋ ዎዶሮ የጋና” ያጌስ ኡባፈ ዎልቃማ ጎዳይ።
\p
\v 17 ጉጃዳ ሀይሳዳ ያጋዳ አዋጃ፦ “ታ ካታማታ ዱረተይ ኩምድ ፓላሀና፤ ታኒ ጎዳይ ፅዮነ ዛራ ምንና፤ የሩሳላመ ዛራ ዶራና” ያጌስ ኡባፈ ዎልቃማ ጎዳይ።
\s1 ኦይዱ ካጨታ ቆንጨ
\p
\v 18 ታኒ ቆንጨን ኦይዱ ካጨታ በአስ። 
\v 19 ታራ ሃሳያ ኪታንቹዋ፥ “ሀይሳቲ አይቤ?” ያጋዳ ኦይቻስ።
\p እ ዛሪድ፥ “ሀ ካጨት ይሁዳ፥ እስራኤለነ የሩሳላመ ላልዳ ካዎተታ” ያግስ።
\p
\v 20 ሄሳፈ ጉየ፥ ጎዳይ ታና ብራታ ቆፅያ ኦይዱ ሂላንቾታ በስስ። 
\v 21 ታኒ፥ “ሀይሳቲ አይ ኦናዉ ይዶና?” ያጋዳ ኦይቻስ።
\p እ ዛሪድ፥ “ሀይሳቲ ኦንካ ዛር ደንና መላ ይሁዳ ቢታ ላልዳ ካጨታ ካዉሻናዉነ ይሳናዉ ይዶሶና። ኤንቲ ይሁዳ ቢታ ላላናዉ ባንታ ካጭያ ደንዳ ሀራ ካዎተታ ካጭያ ሾጭድ ሳአን የጋናዉ ይዶሶና” ያግስ።
\c 2
\s1 የገ ዎዶሮ ኦይክዳ ኡራ
\p
\v 1 ሀራ ቆንጨን ባ ኩሸን ዋ ዎዶሮ ኦይክዳ እስ አስ በአስ። 
\v 2 ታኒ፥ “ኔኒ አዉ ባይ?” ያጋዳ ኦይቻስ።
\p እ ዛሪድ፥ “ታኒ የሩሳላመ ዳልጋተይነ አዱሳተይ አይ መለኮ ዋናዉ ባይስ” ያግስ።
\p
\v 3 ሄሳፈ ጉየ፥ ታራ ሃሳያ ኪታንቾይ ከይድ ብስ፤ እያራ ጋሄታናዉ ሀራ ኪታንቾይ ይስ። 
\v 4 ይዳ ኪታንቾይ፥ “ዎፃ ባዳ፥ ናአተ አድያኮ፥ ‘የሩሳላመን ዳሮ አስነ ዳሮ መሄይ ዳና ግሾ፥ ካታማ ዩሾን ግምበ ድርስ ኮሸና። 
\v 5 ታኒ እያ ዩሹዋን ታማ ድርስ ግዳና፤ ታኒ እያዉ ቦንቾ ግዳና’ ያጌስ ጎዳይ።
\p
\v 6 “ታኒ ህንተና ቢታ ኦይዱ ባጋ ላልዳ ግሾ፥ ያፐ ከይተ፤ ኤለ ከይተ፤ ፑደሀ ባጋ ቢታፈ ባቃትተ” ያጌስ ጎዳይ።
\p
\v 7 “ነኖ፥ ፅዮነ ከያ፤ ባብሎነ ማጫ ናይታ ግዶን ደእያረ፥ ኤንታ ግዶፈ ባቃታ” ያጌስ ጎዳይ።
\p
\v 8 ኡባፈ ዎልቃማ ጎዳይ እያ ቦንቹዋ ቆንጭሳና መላ፥ ባ አሳ ቦንቅዳ ካዎተታኮ ታና ኪትድ፥ “ህንተና ቦችያ ኡራይ እያ አይፍያ ቡሉዋ ቦቼስ። 
\v 9 ታኒ ታ ኩሽያ ኤንታ ቦላ ደንና፤ ኤንታ አይለት ኤንታ ዛሪድ ቦንቃና። ሄ ዎደ ህንተ ኡባፈ ዎልቃማ ጎዳይ ታና ኪትዳይሳ ኤራና።”
\p
\v 10 “ታኒ ያዳ ህንተ ግዶን ዳና ግሾ፥ ፅዮነ አሳዉ፥ ዛማርተ፤ ኡፋይትተ!” ያጌስ ጎዳይ።
\p
\v 11 ሄ ዎደ ዳሮ ካዎተት ጎዳራ ጋሄትድ እያ አሰ ግዳና። እ ህንተ ግዶን ዳና፤ ኡባፈ ዎልቃማ ጎዳይ ታና ህንተኮ ኪትዳይሳ ሄ ዎደ ህንተ ኤራና። 
\v 12 ጌሻ ቢታን ይሁዳ፥ ባና ጋክዳ ግሾ ኦድ ላታና፤ የሩሳላመ ዛሪድ ዶራና። 
\v 13 ጎዳይ ባ ደእያ ጌሻ በሳን ደንድዳ ግሾ፥ አሾ ማእዳ ኡባይ እያ ስንን ስእ ጎ!
\c 3
\s1 ካህነ ሀላቃ ማኡዋ
\p
\v 1 ሄሳፈ ጉየ፥ ካህነ ሀላቃይ እያሱይ ጎዳ ኪታንቹዋ ስንን ኤቅዳይሳነ ፃላሄይ እያሱ ሞታናዉ እያፐ ኡሻቻ ባጋራ ኤቅዳይሳ ታና ቆንጨን በስስ። 
\v 2 ጎዳይ፥ “ፃላህያዉ፥ ጎዳይ ነና ሴሮ፤ የሩሳላመ ዶርዳ ጎዳይ ነና ሴሮ! ሀ አደይ ታማፐ አትዳ ዱንቻ መላ ግደኔ?” ያግስ።
\p
\v 3 እያሱይ ቅታትዳ ማኦ ማእድ ኪታንቹዋ ስንን ኤቅስ። 
\v 4 ኪታንቾይ ባ ስንን ኤቅዳይሳታ፥ “እያ ቦላፈ ሀ ቅታ ማኡዋ ቃርተ” ያግስ። ቃስ እያሱኮ፥ “ሄኮ፥ ታኒ ነ ናጋራ ኔፐ ድጋስ፤ ቦንቾ ማኡዋ ነና ማይዛና።” 
\v 5 ታኒ፥ “ጌሻ ፃ ቃጭያ እያ ሁጰን ፃፅተ” ያግስ። ኤንቲ ኪትዳይሳዳ ኦዶሶና፤ ማኦ ማይዝዶሶና። ጎዳ ኪታንቾይ ሄ ዎደ እያ ምየን ኤቅስ።
\p
\v 6 ሄሳፈ ጉየ፥ ጎዳ ኪታንቾይ እያሱኮ፥ 
\v 7 ኡባፈ ዎልቃማ ጎዳይ ሀይሳዳ ያጌስ፤ “ኔኒ ታ ኦግያን ሄመትኮነ ታ ኪታ ናግኮ፥ ኔኒ ታ ኬ አይሳና፤ ታ ዳባባን አዋታና። ቃስ ሀይሳን ኤቅዳይሳታራ እስፈ ገልያነ ከይያ ማታ ነዉ እማና። 
\v 8 ካህነ ሀላቃ እያሱ፥ ሀይሳ ስአ! ስንራ ያና ሎኦባስ ማላታ ግድዳይሳትነ ኔራ ኦይሳት ሀይሳ ስኦ! ታኒ፥ ‘ታሸ’ ጌተትያ ታ አይልያ ኤሀና። 
\v 9 ሄኮ፥ ታኒ እያሱ ስንን ሹቹ ዎና፤ ሄ ሹቻ ቦላ ላፑን አይፈት ደኦሶና። ታኒ ሄ ሹቻ ዎጫዳ እያ ቦላ ፁፈ ፃፋና፤ ሀ ቢታ ናጋራ እስ ጋላስ ድጋና” ያጌስ ኡባፈ ዎልቃማ ጎዳይ።
\p
\v 10 “ሄ ጋላስ ህንተ ኡባይ ህንተ ዎይነነ ህንተ ባላሰ ጋርሳን ኡትድ ህንተ ሾሩዋ ፄጋና” ያጌስ ኡባፈ ዎልቃማ ጎዳይ።
\c 4
\s1 ፆምፐ ዎያ ኮጫ ቆንጨ
\p
\v 1 ሄሳፈ ጉየ፥ ታራ ሃሳያ ኪታንቾይ ስሚድ ይድ፥ ስክዳ አስ ባርክያ መላ ታና ባርክስስ። 
\v 2 እ ታኮ፥ “ኔኒ አይ በአይ?” ያግስ።
\p ታኒ ዛራዳ፥ “ታኒ ዎርቃ ፃላላፐ ኦሰትዳ ፆምፐ ዎያ ኮጫ በአይስ፤ እያ ፄራን ዛይተ ፃሮይ ደኤስ። ቃስ እያ ቦላ ላፑን ፆምፐት ደኦሶና፤ ሄ ላፑን ፆምፐታስ ላፑን ላፑን ፒቀት ደኦሶና። 
\v 3 ሄ ፆምፕያ ዎያ ኮጫ ማታን ናምኡ ሻማሆ ምት ደኦሶና። ኤንቲ ዛይተ ፃሩዋፐ ኡሻቻ ባጋራነ ሀድርሳ ባጋራ ደኦሶና” ያጋስ።
\p
\v 4 ታራ ሃሳያ ኪታንቹዋ፥ “ታ ጎዳዉ፥ ሀይስ አይቤ?” ያጋዳ ኦይቻስ።
\p
\v 5 ኪታንቾይ ዛሪድ፥ “ሀይሳቲ አይበኮ ኤርኪ?” ያግስ።
\p ታኒ ዛራዳ፥ “ታ ጎዳዉ፥ ታኒ ኤርከ” ያጋስ።
\p
\v 6 እ ታኮ፥ “ዛሩባበላስ ጎዳይ ኦድዳ ቃላይ ሀይሳ፤ ‘ታ አያናናፐ አትሽን፥ ዎልቃን ዎይኮ ምኖተን ግደና’ ያጌስ ኡባፈ ዎልቃማ ጎዳይ። 
\v 7 ግታ ዙማዉ፥ ኔኒ አይቤ? ኔኒ ዛሩባበላ ስንን ልች ግዳ ደምባ ግዳና። ዛሩባበል ፆሳ ኬ ኬፅ ፖልድ፥ ዉርሰ ሹቻ ከስያ ዎደ አሳይ፥ ‘ሀሹ! ሀሹ ፖለትስ’ ” ያጋና።
\p
\v 8 ቃስካ ጎዳ ቃላይ ታኮ ሀይሳዳ ያግድ ይስ። 
\v 9 “ፆሳ ኬ ባሱዋ ዛሩባበላ ኩሸት ባስዶሶና፤ እያ ኩሸት ኬፅድ ፖላና። ሄሳፈ ጉየ፥ ኡባፈ ዎልቃማ ጎዳይ ታና ህንተኮ ኪትዳይሳ ህንተ ኤራና። 
\v 10 ሀ ጉ ዶመ ካያ ኦንካ ጉየፐ ኡፋይታና፤ ኤንቲ ዛሩባበላ ኩሸን ቱምብያ በአና። ሀይሳቲ ላፑን ፆምፐት ቢታ ኡባ ዩይድ ፄልያ ጎዳ አይፈታ” ያግስ።
\p
\v 11 ታኒ ኪታንቹዋ ዛራዳ፥ “ሀ ፆምፐ ዎያ ኮጫፐ ኡሻቻ ባጋራነ ሀድርሳ ባጋራ ደእያ ሀ ናምኡ ሻማሆት አይቤ?” ያጋዳ ኦይቻስ። 
\v 12 ጉጃዳካ፥ “ዛይተይ ኤንታፈ ጎግያ ናምኡ ዎርቃ ፒቀታ ማታን ደእያ ናምኡ ሻማሆ ም ታሸት አይቤ?” ያጋዳ ኦይቻስ።
\p
\v 13 እ ዛሪድ፥ “ሀይሳቲ አይበኮ ኔኒ ኤርኪ?” ያግስ።
\p ታኒ ዛራዳ፥ “ታ ጎዳዉ፥ ታኒ ኤርከ” ያጋስ።
\p
\v 14 እ ዛሪድ፥ “ሀይሳቲ ሳአ ኡባ ጎዳስ ኦያ ናምኡ ትየትዳ አሳታ” ያግስ።
\c 5
\s1 ፃ ማፃፋ ቆንጨ
\p
\v 1 ቃስ ታኒ ቁ ጋዳ ፄልያ ዎደ ቦላራ ፕራያ እስ ፃ ማፃፋ በአስ።
\p
\v 2 ኪታንቾይ ታና፥ “ኔኒ አይ በአይ?” ያግድ ኦይችስ።
\p ታኒ ዛራዳ፥ “ታኒ ቦላራ ፕራያ እስ ፃ ማፃፋ በአይስ፤ ሄ ማፃፋ አዱሳተይ ላታሙ ዋ ቃስ ጎምፓይ ታሙ ዋ” ያጋስ።
\p
\v 3 እ ታኮ፥ “ሀ ፃ ማፃፋ ግዶን ቢታ ኡባ ቦላ ያና ባደይ ፃፈትስ። ሄ ማፃፋን እስ ባጋራ፥ ‘ካይሶ ኡባይ ቢታፈ ያና’፤ ቃስ ሀንኮ ባጋራ፥ ‘ዎርዶን ጫቅያ ኡባይ ያና’ ግያ ፁፈይ ፃፈትስ። 
\v 4 ‘ታኒ ሀ ባደ ኪታና፤ ሄ ባደይ ብድ፥ ካይሱዋ ሶነ ታ ሱንን ዎርዶ ጫቀይሳ ሶ ገላና። ሄ ኬ ገልድ ምነ ሹቻ ይሳና’ ” ያገስ ኡባፈ ዎልቃማ ጎዳይ።
\s1 ዳቾን ኡትዳ ማጫሰ ቆንጨ
\p
\v 5 ሄሳፈ ጉየ፥ ታራ ሃሳያ ኪታንቾይ ታኮ ይድ፥ “አነ ቁ ጋዳ፥ ያባይ አይበኮ በአ” ያግስ።
\p
\v 6 ታኒ፥ “እ አይቤ?” ያጋዳ ኦይቻስ።
\p እ ዛሪድ፥ “ሀይስ ማክያ ዳቾ” ያግስ። ቃስ ጉጅድ፥ “ሀይስ አሳይ ሀ ቢታ ኡባን ኦዳ ናቁዋ ማላታ” ያግስ።
\p
\v 7 እርሳሰ ጌተትያ ብራታፐ ኦሰትዳ ዳቹዋ ካማ ደንያ ዎደ እስ ማጫስ ዳቹዋን ኡታሱ። 
\v 8 ኪታንቾይ፥ “ሀና ኢታተ ሌምሶ” ያግስ። እዮ ጉየ ዳቹዋን የግድ እርሳሰ ካማ ዛሪድ ካምስ።
\p
\v 9 ሄሳፈ ጉየ፥ ታኒ ቁ ጋዳ ፄልያ ዎደ ኤንታ ቀፍያን ጫርኮይ ደእያ፥ ፕራያ ናምኡ ማጫሳታ በአስ። ኤንታ ቀፈይ ጎሎ ቀፈ መላ ምኖ፤ ኤንቲ ዳቹዋ ሳአፐ ድንድ ኤክድ ፕራዶሶና።
\p
\v 10 ታኒ ኪታንቹዋኮ፥ “ሀይሳቲ ዳቹዋ አዉ ኤፎና?” ያጋዳ ኦይቻስ።
\p
\v 11 እ ዛሪድ፥ “ኤንቲ እያዉ ኬ ኬፃናዉ ሳናኦራ ቢታ ኤፎሶና። ኬይ ኬፀት ስምኮ ኤንቲ ሄ ዳቹዋ እያዉ ጊግዳ በሳን ዎና” ያግስ።
\c 6
\s1 ኦይዱ ፓራ ጋረታ ቆንጨ
\p
\v 1 ቃስ ታኒ ቁ ጋዳ ፄልያ ዎደ ኦይዱ ፓራ ጋረት ናምኡ ናሰ ብራታ ደረታፐ ግዶራ የይሳታ በአስ። 
\v 2 ኮይሮ ጋርያ ዞኦ ፓራት ጎቾሶና፤ ናምአን ጋርያ ካሬ ፓራት ጎቾሶና። 
\v 3 ሄን ጋርያ ቦ ፓራት ጎቾሶና፤ ኦይዳን ጋርያ ዋንጮ ፓራት ጎቾሶና። 
\v 4 ታኒ ኪታንቹዋኮ፥ “ታ ጎዳዉ፥ ሀይሳቲ አይቤ?” ያጋዳ ኦይቻስ።
\p
\v 5 ኪታንቾይ ዛሪድ፥ “ሀይሳቲ ቢታ ኡባ ጎዳ ስንን ኤቅድ ኦያ ኦይዱ ሳሎ ጫርኮታ። 
\v 6 ካሬ ፓራት ጎችያ ጋረይ ፑደሀ ባጋ ቢታ ቤስ፤ ቦ ፓራት ጎችያ ጋረይ ዉሎሀ ባጋ ቤስ፤ ዋንጮ ፓራት ጎችያ ጋረይ ዱገሀ ባጋ ቤስ” ያግስ።
\p
\v 7 ሄ ፓራት ቢታ ዎቻናዉ ከይዳ ዎደ ገደ ሃ ፓችፓሮሶና። ኪታንቾይ ኤንታኮ፥ “ብድ ቢታ ኡባ ዩይድ ዎችተ” ያግስ። ኤንቲ ብድ ቢታ ኡባ ዩይድ ዎችዶሶና። 
\v 8 ሄሳፈ ጉየ፥ ኪታንቾይ ባ ቃላ ቁ ኦድ፥ “ሄኮ፥ ፑደሀ ባጋ ቢታ ብዳ ፓራት ታ አያና ሄ ቢታን ሸምፕስዶሶና” ያግስ።
\s1 እያሱስ ጊግዳ ካላቻ
\p
\v 9 ጎዳ ቃላይ ታኮ ሀይሳዳ ያግሸ ይስ፦ 
\v 10 “ባብሎነ ድኤተፈ ስምዳ ሄልዳይ፥ ፆበይነ ያዳይ እምያ ብራነ ዎርቃ እሞታ ኤካዳ ሄ ጋላስ ሶፎንያሳ ናኣ እዮስያሳ ሶ ባ። 
\v 11 ኤንታፈ ኤክዳ ብራፐነ ዎርቃፈ ካላቻ መዳ እዮሳደቃ ናኣ፥ ካህነ ሀላቃ እያሱ ሁጰን ዎ። 
\v 12 ኡባፈ ዎልቃማ ጎዳይ ሀይሳዳ ያጌስ ጋዳ እያዉ ኦዳ፦ ሄኮ፥ ታሸይ ባ በሳን ዳያ ግሾነ እ ፆሳ ኬ ኬፅያ ግሾ፥ እያ ሱንይ ‘ታሸ ጌተትዳ አደይ ሀይሳ። 
\v 13 ጎዳ ኬ ኬፃናይ እያ፤ እ ካዎተ ማኡዋ ማእድ፥ አራታን ኡትድ ሃራና። ቃስ እያ አራታ ማታን እስ ካህነይ ኤቃና፤ ኤንታ ናምኣ ግዶን እስፈተ ዳና።’ 
\v 14 ሄ ካላቻይ ሄልዳያ፥ ፆቢያ፥ ያዳያነ ሶፎንያሳ ናኣ እዮስያሳ ቆፍሶ ግድድ፥ ጎዳ ፆሳ ኬን ዳና” ያግስ።
\p
\v 15 ሄ ዎደ ሃሆ በሳን ደእያ አሳት ጎዳ ኬ ኬፅድ ማዳናዉ ያና። ኡባፈ ዎልቃማ ጎዳይ ታና ህንተኮ ኪትዳይሳ ህንተ ሄሳን ኤራና። ጎዳስ፥ ህንተ ፆሳስ ህንተ ፖሎ ኪተትኮ ሄስ ሀናና።
\c 7
\s1 ሱረ ፕርዳነ ማሮተ
\p
\v 1 ዳርዮስ ካዎትዳ ኦይዳን ላይን፥ ክሲላ ጌተትያ ኡዱፉን አጌናን፥ ኦይዳን ጋላሳን፥ ዛካርያሳኮ ይዳ ጎዳ ቃላይ ሀይሳ። 
\v 2 ቤተለ ካታማ አሳይ ሳረዜራ፥ ረገም-መለካነ ኤንታራ እስፈ ደእያ አሳታ ጎዳ አንጆይ ያና መላ ዎሳናዉ ኪትዶሶና። 
\v 3 ቃስ ኡባፈ ዎልቃማ ጎዳ ኬን ኦያ ካህነታነ ናበታ፥ “ዳሮ ላይ ኦሸ ጋምእዳይሳዳ ኑኒ ሀእካ እቻሻን አጌናን ዬካናዉነ ፆማናዉ በሲ?” ያግድ ኦይቻና መላ ኪትዶሶና።
\p
\v 4 ሄሳፈ ጉየ፥ ኡባፈ ዎልቃማ ጎዳ ቃላይ ሀይሳዳ ያግድ ታኮ ይስ፦ 
\v 5 “ቢታን ደእያ አሳ ኡባስነ ካህነታስ ሀይሳዳ ያጋዳ ኦዳ፦ ‘ህንተ ሀ አዳ ላፑን ታሙ ላይን እቻሻን አጌናንነ ላፑን አጌናን ፆምዳይነ ዬክዳይ ታና ቦንቻናሴ? 
\v 6 ህንተ ምያ ዎደነ ኡያ ዎደ ህንተዉ ሜታነ ኡዬታ። 
\v 7 የሩሳላመ ካታማይነ እያ ዩሹዋን ደእያ ካታማታን ደእያ አሳይ ሸምፖንነ እንጀን ደእዳ ዎደነ ነገባንነ ጋን አሳይ ዎፑ ግድ ደእዳ ዎደ ጎዳይ ባ ናበታ ባጋራ ኦድዳ ቃላይ ሀይሳ ግደኔ?’ ያጋ” ያግስ።
\p
\v 8 ጎዳ ቃላይ ዛካርያሳኮ ሀይሳዳ ያግድ ይስ፦ 
\v 9 “ኡባፈ ዎልቃማ ጎዳይ ካሰ እምዳ ኪታይ፥ ‘ሱረ ፕርዳ ፕርድተ፤ ህንተ እሶይ እሱዋስ ኬሀተነ ማሮተ ኦተ። 
\v 10 አምኤታ፥ ይኦታ፥ በተ አሳነ ማንቆታ ናቆፍተ። ቃስ ህንተፈ ኦንካ ባ እሻ ቦላ ኢታባ ኦናዉ ባ ዎዛናን ቆፖፎ።’
\p
\v 11 “ሽን ኤንቲ ስኦና እፅዶሶና፤ ዞኮ ዛሪድ ባንታ ሀይ ቱጭዶሶና። 
\v 12 ኡባፈ ዎልቃማ ጎዳይ ባ አያናን ካሰ ባ ናበታ ባጋራ ኪትዳ ህግያነ ቃላ ስኦና እፅድ ባንታ ዎዛና ዛላዳ ምንዶሶና። ሄሳ ግሾ፥ ኡባፈ ዎልቃማ ጎዳ ማታፐ ግታ ሀንቆይ ኤንታ ቦላ ይስ። 
\v 13 ታኒ ፄግያ ዎደ ኤንቲ ስኦና እፅዳይሳዳ ኤንቲ ፄግያ ዎደ ታኒ ስእከ” ያጌስ ኡባፈ ዎልቃማ ጎዳይ።
\p
\v 14 “ታኒ ጎተ ኤሀዳ ኤንቲ ኤሮና ካዎተታ ግዶን ላላስ። ቢታይ አስ ያነ ሃነ ስመረቶና ካይሳ ቢታ ግድስ፤ ሀ ሎኦ ቢታይ ባይሳ ግድስ” ያጌስ ኡባፈ ዎልቃማ ጎዳይ።
\c 8
\s1 የሩሳላመይ ኦራፃና
\p
\v 1 ኡባፈ ዎልቃማ ጎዳ ቃላይ ቃስካ ታኮ ሀይሳዳ ያግድ ይስ፦ 
\v 2 ኡባፈ ዎልቃማ ጎዳይ፥ “ታኒ ፅዮነስ ዳሮ ቃታይስ፤ እ ምሻይ ታና ፁጌስ። 
\v 3 ታኒ ፅዮነ ስማዳ የሩሳላመን ዳና። ቃስ የሩሳላመይ አማንያ ካታማ ጌተታዳ ኤረታና። ኡባፈ ዎልቃማ ጎዳ ዙማይ ጌሻ ዙማ ጌተትድ ፄገታና” ያጌስ።
\p
\v 4 ኡባፈ ዎልቃማ ጎዳይ፥ “ጭምድ ጉፈራ ብያ አደይነ ማጫሳይ ካሰይሳዳ የሩሳላመ ዳባባን ኡታና። 
\v 5 የሩሳላመ ካታማ ኦገት ካእያ አደነ ማጫ ናይታን ኩማና” ያጌስ።
\p
\v 6 “አትዳ አሳስ ሄስ ማላልስያባ ግድኮካ፥ ታና ሄስ ማላልስያባዬ? ያጌስ ኡባፈ ዎልቃማ ጎዳይ። 
\v 7 ሄኮ ታኒ ታ አሳ ዶሎሀፐነ ዉሎሀፐ ሺሻና። 
\v 8 ኤንቲ የሩሳላመን ዳና መላ ኦና። ኤንቲ ታ አሰ ግዳና፤ ታኒ ፅሎነ አማንያ ኤንታ ፆሳ ግዳና” ያጌስ ኡባፈ ዎልቃማ ጎዳይ።
\p
\v 9 ኡባፈ ዎልቃማ ጎዳይ ሀይሳዳ ያጌስ፦ “ህንተኖ፥ ኡባፈ ዎልቃማ ጎዳ ኬ ባሶይ የገትዳ ጋላሳፐ ዶምድ ናበት ኦድዳ ቃላ ስእዳይሳቶ፥ ህንተ ኩሽያ ምንተ፤ ኦሱዋ ምንድ ፖልተ። 
\v 10 ሄ ዎድያፐ ካሰ አሳስ ዳሞዘይ፥ መህያስ ቃንፀትያ ከር ባዋ። ታኒ አሳ ኡባ እሱዋ እሱዋ ቦላ ሞርከተን ደንዳ ግሾ፥ ገለይሳስነ ከየይሳስ ሳሮይ ባዋ። 
\v 11 ሽን ሀእ ታኒ ሀ አትዳ አሳ ቦላ ካሰ ኦዳይሳዳ ኦከ” ያጌስ ኡባፈ ዎልቃማ ጎዳይ።
\p
\v 12 “ኤንቲ ዘርዳ ኡባይ ዶላና፤ ዎይነይ ባ አይፍያ እማና፤ ጎሻይ ካን ኩማና፤ ሳሎት ባንታ እራ እማና። ሀይሳ ኡባ አትዳ አሳስ ላታ ኦዳ እማና። 
\v 13 ህንተኖ፥ ይሁዳ አሳዉ፥ እስራኤለ አሳዉ፥ ካዎተታ ግዶን ህንተ ባደትዳይሳታ ግድደታ፥ ሽን ሀእ ታኒ ህንተና አሻና፤ ህንተ አንጀትዳይሳታ ግዳና። ያዮፍተ! ህንተ ኩሽያ ምንተ!” ያጌስ።
\p
\v 14 “ህንተ ማይዛት ታና ይሎይዳ ዎደ ኤንታ ቃይ ባይና ሴራናዉ ቆፋ ቃቻስ። 
\v 15 ሀእ ታኒ የሩሳላመስነ ይሁዳስ ሎኦባ ኦናዉ ቆፋ ቃቻስ። ህዛ ያዮፍተ! 
\v 16 ህንተ ኦናዉ ኮሽያባይ ሀይሳ፦ እሶይ እሱዋራ ቱማ ኦደትተ፤ ፕርዳ ዳባባን ቱማነ ሳሩዋ ኤህያ ፕርዳ ፕርድተ። 
\v 17 እሶይ እሱዋ ቆሀናዉ ኢታባ ህንተ ዎዛናን ማቀቶፍተ፤ ዎርዶን ጫቆፍተ። ሀይሳታ ኡባ ታኒ እፃይስ” ያጌስ ኡባፈ ዎልቃማ ጎዳይ።
\p
\v 18 ኡባፈ ዎልቃማ ጎዳ ቃላይ ቃስካ ታኮ ሀይሳዳ ያግድ ይስ፦ 
\v 19 “ኦይዳን፥ እቻሻን፥ ላፑንነ ታማን አጌናን ህንተ ፆምዳ ፆማይ ይሁዳ አሳስ ኡፋይስነ እንጀ ዎደ ግዳና። ሄሳ ግሾ፥ ህንተ ቱማተነ ሳሮተ ዶስተ” ያጌስ።
\p
\v 20 “ዳሮ አሳይነ ዳሮ ካታማታን ደእያ አሳይ የሩሳላመ ያና። 
\v 21 እስ ካታማን ደእያ አሳይ ሀራ ካታማን ደእያ አሳኮ ብድ፥ ‘ጎዳ አንጆይ ያና መላ ዎሳናዉነ ኡባፈ ዎልቃማ ጎዳ ኮያናዉ አነ ቦስ፤ ታንካ ባይስ’ ያጋና። 
\v 22 ቃስ ዳሮ አሳይነ ዎልቃማ ካዎተት ኡባፈ ዎልቃማ ጎዳ ኮያናዉነ ዎሳናዉ የሩሳላመ ያና። 
\v 23 ሄ ጋላሳታን ዱማ ዱማ ቃላን ሃሳያ ካዎተታ ኡባፈ ታሙ አሳት ይድ፥ እስ አይሁደ አድያ ማኡዋ ማጫራ ኦይክድ፥ ‘ፆሳይ ህንተራ ደኤይሳ ኑኒ ስእዳ ግሾ፥ ኑኒ ህንተራ ባና’ ያጋና” ያጌስ ኡባፈ ዎልቃማ ጎዳይ።
\c 9
\s1 እስራኤለ ሞርከት ፕርደታና ፕርዳ
\p
\v 1 አሳ አይፈይነ እስራኤለ አሳ ኡባ አይፈይ ጎዳ ፄልያ ግሾ፥ ሳድራካ ቢታይነ ዳማስቆ ካታማይ ያናይሳ፥ ጎዳይ ኦድዳ ፕርዳ ቃላይ ሀይሳ። 
\v 2 ቃስ ሀ ፕርዳይ ሀድራካ ዛዋ ግድዳ ሀማታ ካታማነ ቃራ ግድዳ ፅሮሳነ ስዶና ካታማታ ቦላ ሀ ፕርዳይ ጋካና። 
\v 3 ፅሮሳ ካታማይ ባዉ ምኖ ሚፃ ግምብስ። ቃስ ብራነ ዎርቃ ቢታዳ ዶርስ። 
\v 4 ሽን እ ሺሽዳባ ኡባ ጎዳይ ኤካና፤ እያ ሻሉዋ አባን ሆላና፤ ካታማይ ታማን ሜተታና።
\p
\v 5 አስቃሎና ካታማይ ሄሳ በእድ ያያና፤ ጋዛ ካታማይ ኡንኤታና፤ ኤቅሮና ካታማይ ኡፋይስ ያና። ጋዛ ካዎይ ያና፤ አስቃሎና ካታማይ ካይሳ ግዳና። 
\v 6 አሽዶዳ ካታማን ዋላሀ አሳይ ዳና።
\p ጎዳይ ሀይሳዳ ያጌስ፦ “ፍልስፄመታ ኦቶሩዋ ታኒ ዉርሳና። 
\v 7 ታኒ ኤንታ ዶናፐ ሱ፥ ኤንታ አቻፈ ቱናባ ድጋና። ኤንታፈ አትዳይሳት ኑ ፆሳ አስ ግዳና፤ ቃስ ይሁዳ ያራፐ እሱዋ ግዳና። ኤቅሮና አሳይ ያቡሰ አሳዳ ታ አሰ ግዳና። 
\v 8 ሄሳፈ ጉየ፥ ኦላንቾት ኦይኮናዳ፥ ታኒ ታ ኬ ናጋና። ታኒ ታ ሁጰን ናግያ ግሾ፥ ዛሪድ ኦንካ ታ አሳ ኡንኤና” ያጌስ።
\s1 ፅዮነ ካዋ ዩሳ
\p
\v 9 ነኖ፥ ፅዮነ ካታመ፥ ኡፋይታ! ነኖ፥ የሩሳላመ ካታመ፥ እልላ! ሄኮ፥ ፆንዳ ነ ፅሎ ካዎይ ኔኮ ዬስ። ነ ካዎይ አሽከ ግድድ፥ ሀረ ቦላ፥ አድ ሀረ ማራ ቦላ ኡትድ ኔኮ ዬስ።
\p
\v 10 ታኒ ፓራ ጋረታ እስራኤለፐ፥ ኦላ ፓራታ የሩሳላመፐ ይሳና፤ ኦላ ዶንግያ መንረና። ነ ካዎይ ካዎተታስ ሳሮ አዋጃና፤ እ አባስ ጋፃፐ ህን ጋፃ ጋካናዉ ኤፍራፂሳ ሻፋፐ ዶምድ ሳኣ ጋፃ ጋካናዉ ሃራና።
\p
\v 11 ታኒ ኔራ ሱ ጫቁዋ ግሾ፥ ቃሸትዳ ነ አሳታ ሃ ባይና ኦላፈ ከሳና። 
\v 12 ህንተኖ፥ ስንን ኡፋይስ ደእያ ቃሾ አሳቶ፥ ህንተ ሚፃ ስምተ። ካሰይሳ ግሾ ዳኮ ሻሎ ህንተዉ እማናይሳ ሀች ታኒ ህንተዉ አዋጃይስ። 
\v 13 ታኒ ይሁዳ ዶንገዳ፥ እስራኤለ ዶንገ ቶራዳ ጎኤታና። ፅዮነ፥ ታኒ ነ ናይታ ግርከ ናይታ ቦላ ደንና፤ ነና ዎልቃማ ኦላንቹዋ ማሻ መላ ኦና።
\p
\v 14 ሄ ዎደ ጎዳይ ኤንታ ቦላ ቆንጫና፤ እያ ዶንገ ቶራይ ዎልአንዳ ዎልአማና። ኡባ ሃርያ ጎዳይ ሞይዘ ፑናና፤ ዱገሀ ባጋ ጎተዳ ደንዳና። 
\v 15 ኡባፈ ዎልቃማ ጎዳይ ኤንታ ግሾ ኦለታና። ኤንቲ ባንታ ሞርከታ ዉርሳና፤ ያምባርሻን ኦለይሳታ የና። ኤንቲ ባንታ ሞርከታ ሱ ዎይነ ኡሻዳ ኡያና፤ ሱ ከረን ኩምያዳ ኩማና፤ ኤንቲ ያርሾ በሳን ጉክያ ሱዳ ጉካና።
\p
\v 16 ሄ ጋላስ ሄንንቾይ ባ ዶርሳታ አሸይሳዳ ጎዳይ ኤንታ ፆሳይ ኤንታ አሻና። ካላቻ ቦላ ደእያ አሌቆዳ ኤንቲ ጎዳ ቢታን ጶላና። 
\v 17 ኤንቲ ዋንድ ሎኦነ ፑላንቾ ግዳንደሻ! ናአተ ናይታ ካይ፥ ጌላኦ ናይታ ዎይነ ኡሻይ አጭሳና።
\c 10
\s1 ፆሳይ ይሁዳ አንጃና
\p
\v 1 ባልጎይ ጋክያ ዎደ ጎዳይ እራ እማና መላ ዎስተ። ጎዳይ እራ ቶክዳ ሻራ ኪቴስ፤ አሳስ እራ እሜስ፤ ጎሻን አታክልተ ዶልስስ። 
\v 2 ኤቃት ሀዳባ ኦዶሶና፤ ማሮት ዎርዶ ቆንጨ በኦሶና፤ አሙሄይሳት ዎርዶ አሙሆ ኦዶሶና፤ ሀዳ ምን ምንሶና። ሄሳ ግሾ፥ አሳይ ይዳ ዶርሳዳ ቶይላቶሶና፤ ኤንታ ሄምያ አስ ባይና ግሾ፥ ኤንቲ ቆሄትዶሶና።
\p
\v 3 ጎዳይ ሀይሳዳ ያጌስ፦ “ታ ሀንቆይ ሄንንቾታ ቦላ ኤፅ ከይስ፤ ሄ ካለይሳታ ታኒ ሴራና። ኡባፈ ዎልቃማ ጎዳይ ባ ዉድያ ይሁዳ ሄሜስ። እ ኤንታ ኦላስ ጊግዳ ዎልቃማ ፓራ መላ ኦና። 
\v 4 ይሁዳ አሳ ግዶፈ ቁስተ ሹቻ መላ፥ ዱንካነ ሸ መላነ ኦላ ቶራ መላ ሀንዳ ካለይሳት ከያና። 
\v 5 ባንታ ሞርከታ ኦግያ ኡርቃዳ የያ ምኖ ኦላንቾታ መላ ግዳና። ጎዳይ ኤንታራ ደእያ ግሾ፥ ኤንቲ ኦለትድ ፆናና።
\p
\v 6 “ታኒ ይሁዳ አሳ ምንና፤ ዮሰፋ አሳ አሻና። ታኒ ኤንታዉ ቃትያ ግሾ፥ ኤንታ ዛራዳ ኤሀና። ኤንቲ ታኒ ካሰካ ኤንታ የጋቦና አሳ መላ ግዳና። ታኒ ጎዳ ኤንታ ፆሳ ግድያ ግሾ፥ ኤንታ ዎሳ ስአና። 
\v 7 እስራኤለ አሳይ ምኖ ኦላንቾ መላ ግዳና፤ ዎይነ ኡይዳ አሳዳ ኤንታ ዎዛናይ ኡፋይታና። ኤንታ ናይት ሄሳ በእድ፥ ሀሹ ጋና፤ ኤንታ ዎዛናይ ጎዳን ኡፋይታና።
\p
\v 8 “ታኒ ታ አሳ ሱይቃዳ ፄጋና፤ ኤንታ እስፈ ሺሻና። ታኒ ኤንታ ዎዛና፤ ኤንቲ ካሰይሳዳ ዳራና። 
\v 9 ታኒ ኤንታ ካዎተታ ግዶን ላልኮካ ኤንቲ ባንታ ደእያ ሃሆ ቢታን ግድድ ታና ሀሳያና። ቃስ ኤንትነ ኤንታ ናይቲ ደኦን ዳናነ ባንታ ቢታ ስማና።
\q1
\v 10 “ታኒ ኤንታ ግብፀ ቢታፈ ዛራና፤
\q2 አሶረ ቢታፈ ኤንታ ሺሻና።
\q1 ኤንታዉ ኡትያ በሲ ያና ጋካናዉ
\q2 ታኒ ኤንታ ጋላዳ ቢታንነ
\q2 ልባኖሰ ቢታን ኩንና።
\q1
\v 11 ኤንቲ መቶ አባ ግዶራ አያ ዎደ
\q2 ታኒ ጎዳይ አባ ሴራና።
\q1 ጪሞ ግድዳ ናይለ ሻፋይ መላና።
\q2 አሶረ ቢታ ኦቶሮይ ካዉያና፤
\q2 ግብፀ ካዎተ ፃምአይ መቃና።
\q1
\v 12 ታኒ፥ ኤንታ ጎዳይ ኤንታ ምንና፤
\q2 ኤንቲ እያ ሱንን ሄመታና።
\q2 ታኒ ጎዳይ ሀይሳ ኦዳይስ” ያጌስ።
\c 11
\q1
\v 1 ነኖ፥ ልባኖሰ፥
\q2 ታም ነ ዝጋታ ማና መላ፥
\q2 ነ ፐንገታ ዶያ!
\q1
\v 2 ነኖ ፂዳዉ፥ ዝጋይ ኩንድዳ ግሾ፥
\q2 ቦንቾ ምት ይዳ ግሾ፥ ዪ ጋዳ ዬካ!
\q1 ህንተኖ ባሳና ዎላቶ፥
\q2 ሄ ስከትዳ ዎራይ ማንኤትዳ ግሾ፥ ዪ ግድ ዬክተ።
\q1
\v 3 ኤንታ ሎኦ ሄን በሳይ ይዳ ግሾ፥
\q2 ሄንንቾታ ዘለልሳ ስእተ፤
\q1 ዮርዳኖሰ ዎራይ ይዳ ግሾ፥
\q2 ጋሞት ጉደይሳ ስእተ።
\s1 ናምኡ ሄንንቾታ
\p
\v 4 ጎዳይ ታ ፆሳይ ታኮ ሀይሳዳ ያግስ፦ “ሹከታናዉ ደእያ ዶርሳ ዉድያ ሄማ። 
\v 5 ኤንታ ሻመይሳት ሹኮሶና፤ ሽን ሴረቶኮና። ባይዘይሳት፥ ‘ኑኒ ዱረትዳ፤ ጎዳይ ጋላተቶ’ ያጎሶና፤ ሀር አቶሽን፥ ኤንታ ሄንንቾት ኤንታዉ ቃቶኮና” ያግስ።
\p
\v 6 ጎዳይ ሀይሳዳ ያጌስ፦ “ታኒ ህዛፐ ጉየ ሀ ቢታን ደእያ አሳስ ቃትከ። ታኒ እስ እስ አሰ እያ ሾሩዋስነ እያ ካዋስ አዳ እማና። ኤንቲ ቢታ ይሳና፤ ታኒ እስ አስካ ኤንታ ኩሽያፐ አሽከ” ያጌስ።
\p
\v 7 ሄሳ ግሾ፥ ታኒ ሹከታናዉ ደእያ ዶርሳታ፥ አዳ ቃስ ዉድያ ግዶን ኡንኤትዳይሳታ ሄመይሳ ግዳስ። ያታዳ ዶርሳታ ሄማናዉ ናምኡ ፃምአታ ኤካዳ፥ እሱዋ “ዶሰትዳይሳ” ጋዳ ፄጋስ፤ ናምአንዋ “እስፈተ” ጋዳ ፄጋስ። 
\v 8 ታኒ እስ አጌናን ሄ ሄንንቾታ ይሳስ። ኤንታ ሀኖተይ ታዉ ዳንዳኤተና፤ ኤንትካ ታና እፅዶሶና። 
\v 9 ያታ ስማዳ ታ ዶርሳታኮ፥ “ታኒ ህንተና ናምአን ሄምከ፤ ሀይቀይስ ሀይቆ፤ የይስ ዮ፤ አትዳይሳት እሶይ እሱዋ ሞ” ያጋስ።
\p
\v 10 ሄሳፈ ጉየ ታኒ “ዶሰትዳይሳ” ጌተትያ ፃምአ ኤካዳ መንስ። ሄሳ ታ ኦዳይ ካዎተታራ ገልዳ ጫቆይ ዱፅዳይሳ በሳናሳ። 
\v 11 ሄ ጋላስ ጫቆይ መእስ፤ ሄ ዎደ ዶርሰ ሻመይሳትነ ባይዛይሳት ታና በእድ፥ ሄስ ጎዳ ቃላ ግደይሳ ኤርዶሶና። 
\v 12 ታኒ፥ “ህንተ ዶስኮ ታ ዳሞዝያ እምተ፤ እፃስ ጊኮ አጋግተ” ያጋስ። ያትን ኤንቲ ታዉ ሀስታሙ ብራ ሳንትመ እምዶሶና።
\p
\v 13 ጎዳይ ታኮ፥ “ኤንቲ እምዳ ቦንቾ ሚሽያ ኤፋዳ ፆሳ ኬን ደእያ ኦቱዋን የጋ” ያግስ። ታኒ ሄ ሚሽያ ኤፋዳ ፆሳ ኬን ደእያ ኦቱዋን የጋስ። 
\v 14 ሄሳፈ ጉየ፥ ታኒ ይሁዳስነ እስራኤለስ ግዶን ደእያ እሻተይ ይዳይሳ በሳናዉ “እስፈተ” ጌተትያ ታ ናምአን ፃምኣ መንስ።
\p
\v 15 ቃስካ ጎዳይ ታና፥ “ናምአን ባዳ ፓና ሄንንቾታ ሚሽያ ኤካ። 
\v 16 ታኒ ሀ ቢታን እስ ሄንንቾ ደንና። እ ቆሄትዳ ዶርሳታ ማደና፤ ላለትዳ ዶርሳታ ሺሸና፤ መቅዳ ዶርሳታ ኮለና፤ ፓፃ ደኤይሳታ ሄመና። ሽን እ ሄሳ አግድ፥ ሞታ ሹክድ ሜስ፤ ኤንታ ኮልዝያ ጌስ። 
\v 17 ዶርሳ ዉድያ የግ ይዳ ሄ ፓና ሄንንቾታ አየ! እያ ቀስያነ እያ ኡሻቻ አይፍያ ቦላ ማሽ ዎ። እያ ኡሻቻ ኩሸይ ስሎ፤ እያ ኡሻቻ አይፈይ ቆቆ” ያግስ።
\c 12
\s1 የሩሳላመ ሞርከት ያና
\p
\v 1 ሳሎታ ምጭዳይ፥ ሳኣ መዳይ፥ አሳስ ደኦ አያና እምዳ ጎዳይ እስራኤለባ ኦድዳ ጎዳ ቃላይ ሀይሳ፦ 
\v 2 “ሄኮ፥ ታኒ የሩሳላመ ካታማ፥ እያ ዩሹዋን ደእያ አሳ ኡባይ ኡይን ጋንድጋርስያ ዎይነ ኡሽ ትግያ ዋንጫ ኦና። የሩሳላመይ ኦይከትያ ዎደ ይሁዳ ካታማት ኦይከታና። 
\v 3 ሄ ዎደ ታኒ የሩሳላመ ካታማ አሳ ኡባስ ዴፆ ሹቹ ኦና፤ እያ ደንያ ኡባይ ባዉ ደሸታና። ሳኣ ካዎተት ኡባይ እያ ኦላናዉ እስፈ ሺቃና። 
\v 4 ሄ ዎደ ታኒ ፓራ ኡባ ዳጋንና፤ ፓራ አሳታ ጎሻና።” ታኒ ጎዳይ ሀይሳ ኦዳይስ። ይሁዳ አሳ ታኒ ታ ኬሀ አይፈን ፄላና፤ ሽን ሞርከታ ፓራታ ኡባ ቆቅሳና። 
\v 5 ሄ ዎደ ይሁዳ ሀላቃት ባንታ ዎዛናን፥ “የሩሳላመ አሳይ ኡባፈ ዎልቃማ ጎዳን፥ ባንታ ፆሳን፥ ምኖተ ደምዶሶና” ያጋና።
\p
\v 6 “ሄ ዎደ ታኒ ይሁዳ ኮቻታ ም ዶርያ ግዶን ደእያ ፂፋነ ምርቄታ ግዶን ላፅያ ፆምፐ ኦና። ኤንቲ ባንታ ኡሻቻን፥ ባንታ ሀድርሳንነ ባንታ ዩሹዋን ደእያ አሳ ኡባ ማና፤ ሽን የሩሳላመ ካታማይ፥ አሳይ ሳሮ ደእያ በሲ ግዳና።
\p
\v 7 “ዳዊታ ኮቻታ ቦንቾይነ የሩሳላመን ደኤይሳታ ቦንቾይ ይሁዳ አሳ ቦንቹዋፈ አና መላ ታኒ ጎዳይ ካሰታዳ ይሁዳ አሳስ ፆኖ እማና። 
\v 8 ሄ ዎደ ኤንታ ግዶን ዳሮ ላፋ ጌተትያ አስ ዳዊታ መላ ምኖ ግዳና። ታኒ ጎዳይ የሩሳላመን ደኤይሳታስ ጎንዳለ ግዳና። ዳዊታ ኮቻት ፆሳ መላ፥ ጎዳ ኪታንቾ መላ ግድድ ኤንታ ካለና። 
\v 9 ሄ ዎደ ታኒ የሩሳላመ ኦላናዉ ደንድያ ካዎተታ ኡባ ይሳናዉ ደንዳና።
\p
\v 10 “ሄ ዎደ ታኒ ዳዊታ ኮቻታ ቦላነ የሩሳላመን ደእያ አሳ ቦላ ቃነ ዎሳ አያና ጉሳና። ሄሳ ግሾ፥ ኤንቲ ባንታ ጫድዳይሳ በእያ ዎደ አስ ባ እስ ናአስ ዬከይሳዳ ዬካና። ቃስ ባ ባይራ ናአስ ካዮተይሳዳ ካዮታና። 
\v 11 ሄ ዎደ የሩሳላመን ዬከትያ ዬሆይ ማግዶ ደንባን ሀዳድ-ርሞናስ ዬከትዳ ዬሁዋ መላ ዎልቃማ ግዳና። 
\v 12 ቢታን ደእያ እስ እስ ኮቻይ ባዉ ባዉ ዬካና፤ ዳዊታ ኮቻት ባንታ ማቸታራ፥ ናታና ኮቻት ባንታ ማቸታራ ባንታዉ፥ 
\v 13 ሌወ ኮቻት ባንታ ማቸታራ ባንታዉ፥ ሳመአ ኮቻት ባንታ ማቸታራ ባንታዉ፥ ዬካና። 
\v 14 አትዳ ኮቻ ኡባይ ባዉ ባዉ ዬካና፤ ኤንታ ማቸት ባንታዉ ባንታዉ ዬካና” ያጌስ።
\c 13
\s1 ናጋራፐ ጌየ
\p
\v 1 ኡባፈ ዎልቃማ ጎዳይ ሀይሳዳ ያጌስ፦ “ሄ ዎደ ዳዊታ ኮቻታነ የሩሳላመን ደኤይሳታ ናጋራፐነ ቱናተፈ ጌሽያ ፑልቶይ ቃና። 
\v 2 ሄ ዎደ ታኒ ኤንቲ ናምአን ቆፈቶና መላ ኤቃታ ሱን ቢታፈ ይሳና። ቃስ ናበታነ ቱና አያናታ ቢታፈ ይሳና። ታኒ ኡባፈ ዎልቃማ ጎዳይ ሀይሳ ኦዳይስ። 
\v 3 ቃስ ኦንካ፥ ታኒ ናበ ጊኮ፥ እያ አዋነ አይያ እያ፥ ‘ኔኒ ጎዳ ሱንን ዎርዶ ኦድያ ግሾ፥ ሀይቃናዉ በሴስ’ ያጋና። እ ትንብተ ኦድያ ዎደ እያ አዋይነ አይያ እያ ጫድድ ዎና። 
\v 4 ሄ ዎደ ታኒ ናበ ግያ ኦንካ ባ በእዳ ቆንጨን ዬላታና። ቃስ አሰ ጭማናዉ እክሰይ ደእያ ማኦ ማኤና። 
\v 5 ሽን እ፥ ‘ታኒ ናበ ግድከ፤ ናአተፈ ዶማዳ ቢታ ኦያ አስ’ ያጋና። 
\v 6 እስ አስ፥ ‘ያትን፥ ሀ ነ ቦላ ደእያ ማዱንይ አይቤ?’ ያግድ ኦይችኮ፥ እ፥ ‘ሀይስ ታኒ ታ ላገታ ሶን ማዱንፅዳይሳ’ ያጋና” ያጌስ።
\s1 ሄንንቾይ ሾጨትን ዶርሳት ላለትዶሶና
\p
\v 7 “ማሻዉ ደንዳ፥ ታዉ ማታ ግድዳ ታ ዶርሳታ ሄንንቹዋ ቦላ ባርካ! ዶርሳት ላለታና መላ ሄንንቹዋ ዎ። ታኒ ጉ ዶርሳታ ቦላ ታ ኩሽያ ደንና” ያጌስ ኡባፈ ዎልቃማ ጎዳይ።
\p
\v 8 “ቢታ ኡባን ደእያ ሄ ኩሸ አሳፐ ናምኡ ኩሸይ ሾጨትድ ሀይቅን፥ እስ ኩሸ ፃላል አታና። ታኒ ጎዳይ ሀይሳ ኦዳይስ። 
\v 9 ሀ አትዳ ስኮ አሳ ታኒ ታማን የጋና፤ ብር ታማን ጌያዳ ኤንታ ጌሻና፤ ዎርቀይ ፓጨትያዳ ፓጫና። ሄሳፈ ጉየ፥ ኤንቲ ታ ሱንን ዎሳና፤ ታኒ ኤንታ ስአና። ታኒ ኤንታ፥ ‘ታ አሰ’ ጋና፤ ኤንቲ፥ ጎዳይ፥ ‘ኑ ፆሰ’ ያጋና” ያጌስ።
\c 14
\s1 ፆሳይ ያና፥ ካዎታና
\p
\v 1 ሄኮ፥ ጎዳ ፕርዳ ጋላሳይ ዬስ፤ ሄ ዎደ ህንተ ፄልሽን፥ ህንተፈ ቦንቅዳባ ህንተ ስንን ሻከታና። 
\v 2 ካዎተታ ኡባ ጎዳይ የሩሳላመ ቦላ ኦላስ ሺሻና። ካታማይ ኦይከታና፤ ኬይ ቦንቀታና፤ ማጫ አሳ ዎልቃን ኢሳና። ካታማ አሳፐ ባጋይ ድኤትድ ባና፤ ሽን አትዳ አሳይ ካታማፐ ከየና። 
\v 3 ሄሳፈ ጉየ ጎዳይ ከይድ፥ ካሰ ኦላ ጋላስ ኦለተይሳዳ ካዎተታ ኦላና። 
\v 4 ሄ ጋላስ እያ ቶሆት የሩሳላመፐ ዶሎሀ ባጋራ ደእያ ሻማሆ ዙማ ቦላ ኤቃና። ሻማሆ ደረይ ዶሎሀፐ ዉሎሀ ጋካናዉ ናምኡ ከይድ ጳልቀትን፥ ዳሮ ግታ ዛንጋራይ መታና። ዙማፐ ባጋይ ፑደሀ ባጋ፥ ቃስ ባጋይ ዱገሀ ባጋ ሸርእ ጋና። 
\v 5 ሄ ዛንጋራይ ብድ አፄላ ጋካና፤ ህንተ ሄ ዛንጋራራ ባቃት አድ አታና። በን ይሁዳ ካዋ ኦዝያነ ላይ ቢታይ ቃፅን፥ ህንተ ማይዛት ባቃትድ አትዳይሳዳ ህንተ ባቃታና። ሄሳፈ ጉየ፥ ጎዳይ ታ ፆሳይ ባ ጌሻታ ኡባራ እስፈ ያና።
\p
\v 6 ሄ ዎደ ሜጎይ፥ ሻችነ ም ዴና። 
\v 7 ሄ ዎደ ቃምነ ጋላስ ባዋ፥ ጎዳይ ፃላል ኤርያ ዱማ ጋላስ ግዳና፤ ሄ ጋላስ ቃማይ ፖኦ ግዳና።
\p
\v 8 ሄ ዎደ ደኦ ሃይ የሩሳላመፐ ጎጋና፤ እያፐ ባጋይ ማፅነ አባን ገላና፤ ቃስ ባጋይ መደትራነ አባን ገላና። ሄ ሃይ ባልጎነ ቦነ ጎግሸ ዳና። 
\v 9 ጎዳይ ቢታ ኡባ ቦላ ካዎታና፤ ሄ ዎደ እስ ጎዳ ፃላል ዳና፤ እያ ሱን ፃላላ ፄጋና።
\p
\v 10 ግብአፐ ዶምድ የሩሳላመ ዱገሀ ባጋራ አድ እርሞና ካታማ ጋካናዉ ደእያ ቢታ ኡባይ ደምባታና። ሽን የሩሳላመይ ብንያመ ፐንግያፈ ብድ፥ በን ፐንግያ ግናራ ዞዘ ፐንግያ ጋካናዉ፥ ቃስ ሀናንኤላ አዱሳ ግምብያፈ ብድ፥ ካዎ ዎይነ ጉምእያ በሳ ጋካናዉ ባ በሳን ቁ ግድ ዳና። 
\v 11 የሩሳላመይ አስ ደእያ በሲ ግዳና፤ ህዛፐ ጉየ የና፤ እያን ደእያ አሳይ ህርግ ባይና ሳሮ ዳና።
\p
\v 12 ጎዳይ የሩሳላመ ኦላናዉ ደንድዳ አሳ ኡባ ቦላ ጋዶ ኤሀና። ኤንቲ ኤቆን ደእሽን፥ ኤንታ አሾይ ዎቃና፤ ኤንታ አይፈይ ባ ኦላን፥ ኤንታ እንፃርሳይ ባ ኮቶኑዋን ዎቃና። 
\v 13 ሄ ዎደ ጎዳይ ኤንታ ዎልቃማ ዳጋማ ዳጋንና። አሳ ኡባይ እሶይ እሱዋ ኩሽያ ኦይክድ ኦለታና። 
\v 14 ይሁዳ አሳይ የሩሳላመ ባጋ ግድድ ኦለታና። ዩሹዋን ደእያ ካዎተታ፥ ታይቦይ ባይና ሻሉዋ፥ ዎርቃ፥ ብራነ ማኡዋ ድእድ ሺሻና። 
\v 15 ሀ ጋዱዋ ዳንያ ጋዶይ ፓራታ ቦላ፥ ባቁሎታ ቦላ፥ ግማለታ ቦላ፥ ሀረታ ቦላነ ሞርከት ዱንካንዳ በሳን ደእያ መሄ ኡባ ቦላ ያና።
\p
\v 16 ሄሳፈ ጉየ፥ የሩሳላመ ኦልዳ ካዎተታፐ አትዳ ኡባይ ካዋ፥ ኡባፈ ዎልቃማ ጎዳ ጎይናናዉነ ሻቃራ ባኣለ ቦንቻናዉ ላይን ላይን የሩሳላመ ባና። 
\v 17 ሳአን ደእያ አሳፐ ኦንካ ካዋ፥ ኡባፈ ዎልቃማ ጎዳ ጎይናናዉ የሩሳላመ ቦና እፅኮ፥ ኤንታዉ እር ቡከና። 
\v 18 ግብፀ አሳይ ብድ ጎይኖና እፅኮ፥ ሻቃራ ባኣለ ቦንቻናዉ ቦና እፅዳ አሳ ቦላ ጋክዳ ጋዶይ ኤንታ ቦላ ያና። 
\v 19 ሻቃራ ባኣለ ቦንቻናዉ ቦና እፅዳ ግብፀይነ ሀራ ካዎተት ኡባይ ሴረታና ሴራይ ሀይሳ።
\p
\v 20 ሄ ዎደ ፓራታ ቆን ደእያ ሻሾትያ ቦላ፥ “ጎዳስ ጌይዳይሳ” ጌተትያ ማላ ፁፈይ ፃፈታና። ፆሳ ኬን ደእያ ካያ ኦቶይ ያርሾ በሳ ማታን ደእያ ሳንያ መላ ጌሽ ግዳና። 
\v 21 የሩሳላመንነ ይሁዳን ደእያ ኦቶ ኡባይ ኡባፈ ዎልቃማ ጎዳስ ጌሽ ግዳና። ያርሾ ያርሽያ አሳ ኡባይ ሄ ኦቶታ ኤክድ፥ ያርሾ አሹዋ ኤንታን ካና። ሄ ዎደ ኡባፈ ዎልቃማ ጎዳ ኬን አይ ዛልአንቾይ ዴና።