\id RUT - GOOFA FULL BIBLE
\ide UTF-8
\h ኡሩት ማፃፋ
\toc1 ኡሩት ማፃፋ
\toc3 ኡሩ
\toc2 ኡሩቶ
\mt ኡሩት ማፃፋ
\imt ጋ ቆፋ
\ip መቶይ፥ ሀይቆይ፥ ኮሽነ ሳሞይ ኩምዳ ኡሩት ታርከይ፥ ኢታተነ ጌላተ ኩምዳ አይሰይሳታ ዎደን ሀንዳ ታርከ። ባ የለተን ሞአበ ቢታ አስ ግድዳ ኡሩታ እስ እስራኤለ አድያ ማቾ። እ አዝናይ ሀይቅዳ ዎደ ኡሩታ ባ አዝና አየስ አማነትዳ ማጫስ። ሄሳዳካ፥ እስራኤለ ፆሳስ ዎልቃማ ሲቆይ አቅዳ ማጫስ ግዳሱ። እስራኤለ ታርከን አላጋ ቢታፈ ካዋ ዳዊታ ሼሻን፥ ጉየፐ የሱሳ የለታ ሱሳን፥ ገልዳ ማጫሳፐ እስንያ ኡሩቶ።
\ip ሀ ቃን ማፃፋን፥ በሰ ኤክዳ ጫቆይ ኡሩታ ኑሃምራ ጫቅዳ ጫቁዋ። ሄስካ፥ ኡሩታ፥ “ታኒ ኔፐ ሻከታና መላነ ነና አጋዳ ጉየ ስማና መላ ታና ዋይሶፓ። ኔኒ ብያ ሶ አዉ ግድኮካ ታኒ ባና፤ ኔኒ ደእያ ሶ አዉንካ ታኒ ዳና። ነ ደረይ ታ ደረ ግዳና፥ ነ ፆሳይ ታ ፆሰ ግዳና። ነ ሀይቅያ ሶን ታ ሀይቃና፥ ያን ሞገታና። ሀይቆፐ አትሽን፥ ሀራባይ ታና ኔፐ ሻክኮ፥ ጎዳይ ታና ፕርዶ” (\xt 1:16-17\xt*) ያጋዳ ጫቅዳ ጫቁዋ።
\ip ዉርሰን፥ ባ ኮይሮ አዝናስ ዳቦ ግድዳ ሀራ አስ ገላሱ። ሄ ኤኮ ገሎ ታርክያን፥ እስራኤለ ኮይሮ ካዎ ግድዳ ዳዊታስ ዎጋ አዋ እሰየ የላሱ።
\iot ማፃፋ አይፈ ቆፋታ
\io1 ኑሃማ ኡሩትራ ቤተለመ ስሞ (\ior 1:1-22\ior*)
\io1 ኡሩታ ቦኤዘራ ጋሄተ (\ior 2:1-23\ior*)
\io1 ኑሃማ ኡሩትስ ቆፕዳ ቆፋ (\ior 3:1-18\ior*)
\io1 ቦኤዝ ኡሩቶ ማችስ (\ior 4:1-22\ior*)
\c 1
\s1 ኑሃሞነ ኡሩቶ
\p
\v 1 እስራኤለ ቢታ ዳይናት አይስያ ዎደ ሄ ቢታን ኮሽ ከይስ። እስ አደይ ባ ማቸራነ ባ ናምኡ አደ ናይታራ ይሁዳ ቢታን ቤተለመ ካታማፐ ደንድድ ሞአበ ቢታ ጉ ዎደ ያን ዳናዉ በትስ። 
\v 2 ሄ አድያ ሱንይ አበመለከ፥ እያ ማቸ ሱንይ ኑሃሞ፥ እያ ናምኡ አደ ናይታ ሱንይ ማሀሎናነ ከለዎና። ኤንቲ ይሁዳ ቤተለመን ደእያ ኤፍራታ ያራ። ኤንቲ ሞአበ ብድ ያን ደእዶሶና።
\p
\v 3 ኤንቲ ያን ደእሽን ኑሃም አዝናይ አበመለከይ ሀይቅን፥ እያ ባ ናምኡ ናይታራ አታሱ። 
\v 4 ሄ ናይት ሞአበ ቢታ ማጫ ናይታፐ ኦርፋነ ኡሩቶ ጌተተይሳታ ማችድ፥ ታሙ ላይ ደኣፐ ጉየ፥ 
\v 5 ማሀሎንነ ከለዎን ናምአይካ ሀይቅዶሶና። ኑሃማ እ አዝናይነ ናምኡ ናይት ሀይቅን ባርካ አታሱ።
\p
\v 6 እያ ሞአበን ደእሽን፥ ጎዳይ ባ አሳ እስራኤለስ ኬህድ ካ ኤንታዉ እምዳይሳ ስአዳ ባ ናምኡ ናይታ ማቸታራ ሞአበ ቢታፈ ጉየ ስማናዉ ደንዳሱ። 
\v 7 እያ ባ ደእያ በሳፈ ናምኡ ባ ናይታ ማቸታራ ጉየ ይሁዳ ኤፍያ ኦገ ቦላ ከይዶሶና።
\p
\v 8 ኑሃማ ባ ናይታ ማቸታኮ፥ “ህንተ ኡባትካ ህንተ አየ ሶ፥ አየ ሶ ስምተ። ህንተ ሀይቅዳይሳታስነ ታዉ ኬህዳይሳዳ ጎዳይ ህንተዉ ኬሆ። 
\v 9 ህንተ ገላና አዝናታ ሶን ጎዳይ ህንተዉ ሸምፖ እሞ” ያጋዳ ዬራዳ ኤንታና አንጃሱ።
\p ኤንትካ ባንታ ቃላ ቁ ኦድ ዬክድ፥ 
\v 10 “ኑካ ኔራ ነ አሳኮ ባና” ያግዶሶና።
\p
\v 11 ሽን ኑሃማ ኤንታኮ፥ “ታ ናይቶ ህንተ ሶ ስምተ። ህንተ ታራ አይስ ቤቲ? ህንተዉ አዝና ግዳና አደ ናይታ ህዛፐ ጉየ የላና ዳኒ? 
\v 12 ታ ናይቶ ስምተ፥ ታኒ አዝና ገሎናዳ ጭማስ። እ ዎና ታኒ የላና ግያኮ ኡባ ሀች ቃማ አዝና ገላዳ አደ ናአ የልያኮካ፥ 
\v 13 ሄሳት ድጭድ ጋካና ጋሶ ኤንታና ናጋነዬ? ኤንታ ግሾ ግድ አዝና ገሎና አታናዬ? ታ ናይቶ፥ ሄስ ሀኖናባ ግደይሳ ህንተ ኤሬታ። ጎዳይ ታና ኡንኤዳ ግሾ ህንተፈ ታ አ ጫመታስ” ያጋሱ።
\p
\v 14 ሄሳን ኤንቲ ባንታ ቃላ ቁ ኦድ ዳርስ ዬክዶሶና። ኦርፍ ባ አዝና አይዉ ዬራዳ ጉየ ስማሱ። ሽን ኡሩታ ኢፐ ሻከትከ ጋዳ ጋንታ ካና ሻሾ ግዳሱ።
\p
\v 15 ኑሃማ ዛራዳ፥ “በአ፥ ነ አዝና እሻ ማችያ ባ አሳኮነ ባ ፆሳታኮ ስማሱ፥ ነካ ኢራ ስማዳ ባ” ያጋሱ።
\p
\v 16 ሽን ኡሩታ ዛራዳ፥ “ታኒ ኔፐ ሻከታና መላነ ነና አጋዳ ጉየ ስማና መላ ታና ዋይሶፓ። ኔኒ ብያ ሶ አዉ ግድኮነ ታ ባና፥ ኔኒ ደእያ ሶ አዉንካ ታኒ ዳና። ነ ደረይ ታ ደረ ግዳና፥ ነ ፆሳይ ታ ፆሳ ግዳና። 
\v 17 ነ ሀይቅያ ሶን ታ ሀይቃና፥ ያን ሞገታና። ሀይቆፐ አትሽን፥ ሀራባይ ታና ኔፐ ሻክኮ፥ ጎዳይ ታና ፕርዶ።” 
\v 18 ኡሩታ ኢራ ባናዉ ቃንፅዳይሳ ኑሃማ ኤራዳ ስእ ጋሱ።
\p
\v 19 ያፐ ናምኡ ማጫሳት ቤተለመ ጋካናዉ ብዶሶና። ብድ ኤንቲ ቤተለመ ጋክዳ ዎደ ሄ ካታማ አሳ ኡባይ ኤንታባን ማላለትዶሶና። ቃስ ማጫሳይ፥ “ሀና ኑሃሞ?” ያግዶሶና።
\p
\v 20 እያ ዛራዳ ኡባ ዳንዳእያ ፆሳይ ታ ደኡዋ ዳሮ ጫመዳ ግሾ፥ “ታና ኑሃሞ ጎፕተ፤ ‘ማራ’ ጊተ። 
\v 21 ታኒ ኩመ ከያዳ ባስ፥ ሽን ጎዳይ ታና መላ ኩሸ ዛርስ። ጎዳይ ታና ካዉሽስ፤ ኡባ ዳንዳእያ ፆሳይ ታና ኡንኤስ። ታና አይስ ኑሃመ ግድ ፄገቲ?” ያጋሱ።
\p
\v 22 ሄሳዳ ሀናዳ ኑሃማ ባ ናኣ ማቸ ሞአበ ኡሩትራ ስማሱ። ኤንቲ ቤተለመ ጋክዳይ ባንግ ቡሮ ጫካ ዶመትያ ዎደና።
\c 2
\s1 ኡሩታ ቦኤዛ ጋደን
\p
\v 1 ኑሃምስ እ አዝና አበመለከ ባጋራ ዳቦያ፥ ቦኤዛ ጌተትያ እስ ኤረትዳ ዱረ አደይ ደኤስ። 
\v 2 እስ ጋላስ ሞአበ ኡሩታ ኑሃሞ፥ “ታዉ ቃትያ አስ ካላዳ ቡ ቆራናዉ ካ ጫክያ በሲ ቦሻ?” ያጋሱ።
\p እያካ፥ “ኤ ታ ናተ ባ” ያጋሱ።
\p
\v 3 ሄሳ ግሾ፥ ኡሩታ ባዳ ካ ጫክያ አሳ ጌዱዋፐ ቡ ቆሮ ዶማሱ። ፕኮ መላ ቡያ ቆርያ ጋደይ አበመለከ ዳቡዋ ቦኤዛ ጋደ ግድስ። 
\v 4 ሄኮ፥ ጉ ዎደፐ ቦኤዝ ቤተለመፐ ጋደ ብድ፥ ካ ጫክያ አሳ፥ “ጎድ ዎልቃ እሞ” ግድ ሳሮስ።
\p ኤንቲ ዛሪድ፥ “ጎድ አንጆ” ያግዶሶና።
\p
\v 5 ያትን፥ ቦኤዝ ካ ጫከይሳታ ካፑዋ፥ “ሀና ናአተ ማጫስያ ኦኔ?” ያግድ ኦይችስ።
\p
\v 6 ካ ጫከይሳታ ካፖይ ዛሪድ፥ “ሀና የገልስያ ኑሃምራ ሞአበ ቢታፈ ይዳ ሞአበ ማጫስ። 
\v 7 እያ ታና፥ ‘ካ ጫከይሳታ ጌዱዋ ካላዳ ምርቅያ ግዶፈ ቡ ቆሮ?’ ጋዳ ኦይቻሱ። ሀእ ቡሮ ሸምፓናዉ ኡታውስ፤ ዎንታ ጉራ ዮደፐ ሀኖ ጋካናዉ ሀይሳን ቆራሸ ጋምአሱ” ያግስ።
\p
\v 8 ቦኤዝ ኡሩቶ፥ “ታ ናተ ስአ፤ ህዛፐ ቡ ቆራናዉ ሀራ ጋደ ቦፓ። ቃስ ሀይሳፈ አዉካ ቃፆፋ። ታ ማጫ አይለታራ ሀይሳን ፔአ። 
\v 9 አሳይ ካ ጫክያ በሳ ፄላ ፄላዳ ማጫ አይለታራ ግዳዳ ኤንታ ጌዶ ካላዳ ቆራ። አደ አይለት ነና ቦቾናዳ ታኒ ኤንታዉ ኦዳስ። ቃስ ነና ሳምኮ፥ አደ አይለት ትክድ ዎዳ ሃፈ ፓቃዳ ኡያ” ያግስ።
\p
\v 10 ኡሩታ ሾጫ ዝጋዳ፥ “ታኒ አላጋ ግድክና? ኔኒ ሀይሳ መላ ታዉ ቃትዳይ አይባሰ?” ያጋሱ።
\p
\v 11 ቦኤዝ ዛሪድ፥ “ነ አዝናይ ሀይቆሳፐ ዶምን፥ ኔኒ ነ አዝና አየስ ኦዳባ ኡባ፥ ኔኒ ነ አይዉ፥ ነ አዋነ ነ የለትዳ ቢታ አጋዳ፥ ነ ኤሮና ደርያራ ዳናዉ ይዳይሳ ታኒ ጌሻዳ ስአስ። 
\v 12 ኔኒ ኦዳባስ ጎድ ነዉ ኩሸ ዛሮ። ኔኒ እያ ቀፍያ ጋርሳን አታና ጋዳ ይዳ፥ እስራኤለ ጎዳይ ፆሳይ ነዉ ኩመባ እሞ” ያግስ።
\p
\v 13 ኡሩታ፥ “ታ ጎዳዉ፥ ኔኒ ታዉ ዳሮ ቃታዳሳ፤ ታኒ ነ አይለታፐ እስንዉካ ጋክከ፥ ሽን ታዉ ኬሀባ ሀሳያዳ፥ ታና ምንዳሳ” ያጋሱ።
\p
\v 14 ቁማ ምያ ዎደ ቦኤዝ፥ “ሃ ሺቃ፤ ኡይ ኤካዳ ዎይንያን ቱሻዳ ማ” ያግስ። እያካ ካ ጫክያ አሳ ማታን ኡታሱ። ቦኤዝ እዉ ባንጋ ሻሽ እሚስ፤ እያ ማዳ ካልን ካይ ግድድ ፓላህስ።
\p
\v 15 እያ ቡ ቆራናዉ ደንድያ ዎደ፥ ቦኤዝ ባ አይለታ፥ “ምርቅያ ግዶፈካ እያ ቆርኮ እዮ ዬላዮፕተ። 
\v 16 ኡባካ ምርቅያፈ ሾድድ እዉ የግተ እያ ኤኮ፤ እዮ ካጮፍተ” ያግስ።
\p
\v 17 ሄሳን ኡሩታ ኦማርስ ጋካናዉ ቆራሱ። እያ ቆራ ፐእዳይሳ ቆፅን፥ ታሙ ክሎ ግራመ ባንጋ ግደይሳ ኤካሱ። 
\v 18 እያ ሄ ካ ባአ ኤካዳ ካታማ ስማሱ፤ እያ አይ መላ ቆርዳኮ ኤሀዳ ባ አዝና አይዉ በሳሱ። ቃስ እያ ምሽን አትዳ ካ ኤህዳይሳ ከሳዳ እዉ እማሱ።
\p
\v 19 እ አዝና አይያ፥ “ሀች ሀይሳ አዉፐ ቆራዲ? አዉን ኦ ፔአዲ? ነዉ ሀይሳዳ ኬህዳ ኡራይ አንጀቶ” ያጋሱ።
\p ያግን ኡሩታ እያ ባ ኦ ፔእዳ ጋድያ ጎዳባ ባ አዝና አየስ ኦዳሱ። “ታኒ ሀች ኦዳ ፔእዳ ጋድያ ጎዳ ሱንይ ቦኤዛ ጌተቴስ” ያጋሱ።
\p
\v 20 ኑሃማ ዛራዳ፥ “ሀይቅዳይሳታስነ ደኦን ደኤይሳታስ ባ ኬሀተ አግቦና ጎዳይ እያ አንጆ” ያጋሱ። ጉጃዳካ፥ “ሀ አደይ ኑስ ማታ ዳቦ፤ ኑና ኡባ ዎዛናዉ ጋያ አሳታፐ እሶይ እያ” ያጋሱ።
\p
\v 21 ሞአበ ኡሩታ፥ “እ ታና፥ ‘ታ ካይ ጫከትድ ዉራና ጋካናዉ፥ ታ ኦሳንቾታፐ ሻከቶናሽን ያዳ ቡ ቆራ’ ያግስ” ያጋሱ።
\p
\v 22 ኑሃማ ባ ናአ ማቸ ኡሩትኮ፥ “ታ ናተ፥ ቱማካ ቦኤዛ ጋድያን ኦያ ማጫሳታራ ቢኮ ነዉ ሎኦ። ሀራ አሳ ጋደ ቢኮ ነና መቶና” ያጋሱ።
\p
\v 23 ሄሳ ግሾ፥ ባንጋይነ ግስትያ ጫካይ ዉራና ጋካናዉ ኡሩታ ቦኤዛ ማጫ አይለታኮ ሺቃዳ፥ ቡያ ቆራሸ ጋምአሱ። ቃስ ባ አዝና አየራ እስፈ ደአሱ።
\c 3
\s1 ኡሩታ ካ ቡክያ ዉዱማን
\p
\v 1 እስ ጋላስ ኑሃማ ባ ናአ ማችዉ፥ “ታ ናተ፥ ኔኒ ጊግን ዳና መላ ታኒ ነዉ ዉላ ኮያኮ ዋናኔ? 
\v 2 ኔኒ ኤንታራ ጋምእዳ ማጫ አይለታ ጎዳይ፥ ቦኤዝ፥ ኑስ ማታ ዳቦ ግደነዬ? እ ሀች ቃማ ዉዱማን ባንጋ ፑናና። 
\v 3 ኔኒ ሜጨታዳ ሽቶ ትየታ፤ ነ ሎኦ ማኡዋ ማአዳ፥ ዱገ ዉዱማን ባ፤ ባዳ ቦኤዝ ምድ ኡይድ ስማና ጋካናዉ እያ አይፈን ከዮፓ። 
\v 4 እ ሂፃ አያ ዎደ እ አዉን ስክያኮ በአዳ፥ እያ አፍላ ቃራዳ እያ ቶሆሶን ዝንአ አጋ። ኔኒ ሀናናባ እ ነዉ ኦዳና” ያጋሱ።
\p
\v 5 ኡሩታ፥ “ኔኒ ግዳባ ኡባ ታ ኦና” ያጋሱ። 
\v 6 ሄሳ ግሾ፥ ኡሩታ ደንዳዳ ዱገ ሞ ባዳ፥ እ አዝና አይያ እዉ ኦድዳባ ኡባ ኦሱ።
\p
\v 7 ቦኤዝ ምድ ኡይድ ባ ቦላ ፓሽክስዳፐ ጉየ፥ ካ ጫቻ ማታን አድ ዝንእስ። ኡሩታ ለፓራ ሺቃዳ፥ እያ ቶሁዋ ቃራዳ ዝንአሱ። 
\v 8 ግድ ብላሄ ግድያደ እ ዳጋም ደንድድ ሽረትያ ዎደ፥ እስ ማጫስ እያ ቶሆሶን ዝንእዳሮ ደምስ።
\p
\v 9 እካ፥ “ኔኒ ኦኔ?” ያግድ ኦይችስ።
\p እያ፥ “ታኒ ነ አይልዉ ኡሩቶ፤ ኔኒ ታ አዝናስ ማታ ዳቦነ ታና ዎዛናዉ ዳንዳኤይ ነና ግድያ ግሾ ታ ቦላ ነ አፍላ የጋ” ያጋሱ።
\p
\v 10 ቦኤዝ ዛሪድ፥ “ታ ናተ፥ ጎዳይ ነና አንጆ! ሀ ኬሀተይ ካሰ ነ ኦዳይሳፈ አስ። ኔኒ ማንቆ ዎይኮ ዱረ ግድዳ ናአተ አደ ኮያባካ። 
\v 11 ሀእ ታ ናተ ባቦፋ። ኔኒ ኦይችዳባ ኡባ ነዉ ታኒ ኦና። ታ ካታማን ደእያ አሳ ኡባይ ኔኒ ሎኦ ማጫስ ግደይሳ ኤሬስ። 
\v 12 ታኒ ማታ ዳቦ ግደይስ ቱማ፤ ሽን ታፐ ዳሮ ማተይ ደኤስ። 
\v 13 ሀች ቃማ ሀይሳን አቃ። ዎንቶ እ ነና ዎዛናዉ ኮይኮ ሎኦ፥ ዎዞ። ሽን እ ዎዛናዉ ኮዮና እፅኮ፥ ደኦ ጎዳይ ኤርያ መላ፥ ታኒ ነና ዎዛና። ሳእ ዎንታና ጋካናዉ ሀይሳን ዝንአ” ያግስ።
\p
\v 14 ሄሳ ግሾ፥ እያ ቦኤዛ ቶሆሶን ሳእ ዎንታና ጋካናዉ ዝንአዳ አቃሱ። ቦኤዝ፥ “ማጫስ ካ ሞ ይዳይሳ ኦንካ ኤሮፖ” ግዳ ግሾ ኡሩታ አስ አሰ ሻክድ ኤሮና ዎደ ዎንታ፥ ዳሮ ጉራ ደንዳሱ።
\p
\v 15 ቦኤዝ እዮ፥ “ነ ማእዳ ይዳ ላፃና ሀ በሳ” ያግስ። እያ በስን ላታሙ ክሎ ግራመ ባንጋ ማክ ቆልድ እዮ ባእስስ። እካ ባአዳ ጉየ ካታማ ባሱ።
\p
\v 16 ኡሩታ ባ አዝና አየኮ ስማዳ ይን፥ ኑሃማ፥ “ታ ናተ፥ ነ ብዳ አላለይ ዋንዴ?” ያጋዳ ኦይቻሱ።
\p ኡሩታካ ቦኤዝ ኦዳባ ኡባ ኦዳሱ፤ 
\v 17 ጉጃዳካ፥ “ ‘ነ አዝና አየኮ መላ ኩሸ ቦፓ’ ግድ ሀይሳ ላታሙ ክሎ ግራመ ባንጋ እሚስ” ያጋሱ።
\p
\v 18 ያግን ኑሃማ፥ “ታ ናተ፥ አይብ ሀናኔኮ ኤረታና ጋካናዉ ናጋ። አደይ ሀች ሀ አላለይ ኦገ ኦይኮና ሸምፐና” ያጋሱ።
\c 4
\s1 ቦኤዝ ኡሩቶ ዎዝስ
\p
\v 1 ቦኤዝ ፑደ ካታማ ፐንግያ ማታን ደእያ ዳባባን ከይድ ኡትስ። እ ያን ኡትዳሽን ካሰ እ ኦድዳ ማታ ዳቦይ ሄ በሳ ይን፥ ቦኤዝ እያኮ፥ “ላ፥ ሀ ሺቃዳ ሀይሳን ኡታ” ያግስ። እካ፥ ሺቅድ ኡትስ።
\p
\v 2 ቦኤዝ ሄ ካታማ ጭማታፐ ታሙ አሳታ ዶርድ፥ “ሀይሳን ኡትተ” ያግስ። ኤንትካ ኡትዶሶና። 
\v 3 ቦኤዝ ባ ማታ ዳቡዋኮ “ሞአበ ቢታፈ ስማዳ ይዳ ኑሃማ፥ ኑ እሻ አበመለከ ጋድያ ባይዛና ጋዉሱ። 
\v 4 ሄሳ ግሾ፥ ሀይሳን ኡትዳ አሳ ስንንነ ታ ካታማ ጭማታ ስንን፥ ዎዛ ጋዳ ታ ነዉ ኦዳናዉ ቆፓስ። ኔፐ ሀር ማት ባይና ግሾ ኔኒ ዎዛናዉ ኮይኮ ዎዛ፤ እፅኮ፥ ኔፐ ካልያ ማታ ዳቦይ ታና ግድያ ግሾ ታና ኤርሳ” ያግስ።
\p እ “ታኒ ዎዛና” ያግስ።
\p
\v 5 ቦኤዝ፥ “ኑሃምፐነ ሞአበ ኡሩትፐ ጋድያ ነ ሻምያ ጋላስ አምእዉ ኡሩቶካ ዎዛ፤ ያትኮ ሀይቅዳይሳ ሱንይ እያ ላታ ጋድያን ፄገታና” ያግስ።
\p
\v 6 ሀ ማታ ዳቦይ፥ “ሄሳ ግድኮ፥ ታኒ ዎዛናዉ ዳንዳእከ፤ አይስ ጊኮ፥ ሄስ ታ ቡዞ ላታ ቆሄስ። ሄሳ ግሾ፥ ኔኒ ዎዛ፥ ታኒ ዳንዳእከ” ያግስ።
\p
\v 7 በን ዎደ እስራኤለ ቢታን ዎዙዋነ ላታ ዱናዉ ባይዝያ ዎይኮ ላትስያ ባጋይ ባ ጫማ ቶሁዋፐ ከስድ፥ ሀንኮ ሻምያ ዎይኮ ላትያ ባጋስ እሜስ። እስራኤለ ቢታን ዛልኤስነ ላታስ ማራይ ሀይሳ።
\p
\v 8 ሄሳ ግሾ፥ ሄ ማታ ዳቦይ ቦኤዛኮ፥ “ኔኒ ዎዛ” ግድ፥ ባ ጫማ ቶሁዋፐ ከስድ እሚስ።
\p
\v 9 ያትን፥ ቦኤዝ ጭማታነ አሳ ኡባ፥ “ታኒ አበመለከስ፥ ከልዎናስነ ማህሎናስ ደእያባ ኡባ ኑሃምፐ ሻምዳይሳስ ሀች ህንተ ማርካ። 
\v 10 ቃስ ሀይቅዳይሳ ሱንይ ኤንታ ሶ አሳ ሱን ግዶፈ ዎይኮ ካታማ አሳ ታይቡዋፐ ዮናዳ እያ ሱን እያ ላታ ጋድያን ፄግሳናዉ ካሰ ማህሎና ማችዉ ኡሩቶካ ታኒ ዎዘይሳስ ሀች ህንተ ኡባይ ማርካ” ያግስ።
\p
\v 11 ካታማ ፐንግያ ዳባባን ደእያ ጭማትነ አሳ ኡባይ፥ “ኤ፥ ሀይሳስ ኑኒ ማርካ! ጎዳይ ሀኖ ነ ኤክያ ማጫስዉ፥ እስራኤለ አሳ ማይዛ አየታ ግድዳ ራሄልዳነ ልያዳ ኦ። ኔንካ ኤፍራታን ዱረ ግዳ፥ ነ ሱንይ ቤተለመን ኤረቶ። 
\v 12 ነ ኬይ፥ ጎዳይ፥ ሀ ናአተ ማጫሴፐ ነዉ እምያ ዘረን ትማራ ይሁዳስ የልዳ ፋረሳ ኬዳ ኦ” ያግስ።
\s1 ቦኤዛ ሼሻ
\p
\v 13 ሄሳዳካ ኦድ፥ ቦኤዝ ኡሩቶ ኤክስ እያካ እያዉ ማቾ ግዳሱ። ጎዳይ እዮ ቃንታና መላ ኦን አደ ናአ የላሱ። 
\v 14 ማጫሳት ኑሃሞ፥ “ሀች ነና ሄማና አስ ይስቦና ጎዳይ ጋላተቶ! እያ ሱንይ እስራኤለን ቁ ጎ! 
\v 15 እያን ነዉ ሳኢ ስማና፥ ነ ጭምያ ዎደ እ ነና ሄማና። አይስ ጊኮ፥ ላፑን አደ ናይታፐካ አዳ ነና ሲቅያራነ ነዉ ኬህያራ፥ ነ ናአ ማችያ ነዉ ናአ የላሱ” ያግዶሶና።
\p
\v 16 ኑሃማ ናኣ እድማሱ፤ ሎይ ድቻሱ። 
\v 17 እ ሾሮ ማጫሳት፥ “ኑሃምስ አደ ናእ የለትስ” ያግድ እያ ሱንካ ዮበዳ ግዶሶና። ዮበድ ዳዊታ አዋ እሰየ የልዳይሳ።
\p
\v 18 ፋረሳ የለተይ ሀይሳፈ ካልድ ፃፈትዳይሳ፤
\q1 ፋረስ ሄስሮና የልስ፤
\q1
\v 19 ሄስሮን ራመ የልስ፤
\q2 ራመይ አምናዳበ የልስ፤
\q1
\v 20 አምናዳበይ ናአሶና የልስ፤
\q2 ናአሶን ሳልሞና የልስ፤
\q1
\v 21 ሳልሞን ቦኤዛ የልስ፤
\q2 ቦኤዝ ዮበዳ የልስ፤
\q1
\v 22 ዮበድ እሰየ የልስ፤
\q2 እሰየይ ዳዊታ የልስ።