\id NAM - GOOFA FULL BIBLE
\ide UTF-8
\h ናሆመ ማፃፋ
\toc1 ናሆመ ማፃፋ
\toc3 ናሆ
\toc2 ናሆመ
\mt ናሆመ ማፃፋ
\imt ጋ ቆፋ
\ip ናበይ ዮናስ ናናወስ ትንብተ ኦድድ ስምን፥ ፄቱ ላይፈ ጉየ፥ ናሆመይ ዛሪድ ናናወ ቦላ ትንብተ ኦዳና መላ ፆሳይ እያ ፄግስ። ግዶሽን፥ ዮናሳ ዎደ አሳይ ባንታ ናጋራ ፓፅድ ስምዳይሳዳ ሀእ ስምቦኮና። ሀ ናምኡ ናበታፐ ግዶን፥ አሶረይ እስራኤለ ኦላዳ ይሳሱ።
\ip ማፃፋይ፥ አሶረ ዋና ካታማ ግድዳ ናናወባ ሄ ትንብተ ኦይክስ።
\ipi 1. ሸምፖ 1፥ ናጋራንቾ ኡባ ቦላ ፆሳይ ባ ፕርዳ ኤሀናዉ ደኤይሳ፥ ኡባፈ አድ ናናወይ ፕርደቶና አቶናይሳ ኦዴስ።
\ipi 2. ሸምፖ 2፥ ማታ ዎደን ናናወይ ፕርደታናይሳነ ሄ ፕርዳይ አይ ዳንያኮ ኦዴስ።
\ipi 3. ሸምፖ 3፥ ናናወ ናጋራ ፓድድ በስዳፐ ጉየ፥ ፆሳይ ባ ፕርዳን ፅሎ ግደይሳ ኦዴስ።
\ip ናሆመ ማፃፋይ እስራኤለ ካጫማ ሞርከ ግድዳ ናናወ ዋና ካታማ ኩንደ ማላልስያ ግንፆን ቆንጭስስ።
\iot ማፃፋ አይፈ ቆፋታ
\io1 ፆሳ ኦናተነ እያ ፕርዳ (\ior 1:1-15\ior*)
\io1 ናናወ ኩንደይ አተና (\ior 2:1-13\ior*)
\io1 ናናወ ኩንደስ ጋሶታ (\ior 3:1-19\ior*)
\c 1
\s1 ጎዳ ሀንቆይ ናናወ ቦላ
\p
\v 1 ኤልቆሻ ካታማን ደእያ ናሆም ናናወባ ኦድዳ ቃላይነ በእዳ ቆንጨይ ሀይሳ። 
\v 2 ጎዳይ ቃናተይሳነ ሀሎ ከይያ ፆሲ፤ ጎዳይ ሀሎ ከየይሳነ ሀንቆን ኩምዳይሳ። ጎዳይ ባራ ኤቀተይሳታ ሀሎ ከዬስ፤ ባ ሞርከታ ሴራናዉ ጊገት ኡትስ። 
\v 3 ጎዳይ ሀንቀታናዉ ኤለሰና፤ እያ ዎልቃይ ግታ፤ እ ቆህዳይሳ ሴሮና አገና።
\p ጎዳስ ጎትያነ ሆቢያ ግዶራ ኦገይ ደኤስ፤ ሻራይ እያ ቶሆይ የን ደንድያ ባና። 
\v 4 እ አባነ ሻፋ ሀንቅድ መልሴስ፤ ባሳነነ ቃርመሎስ ሹሎሶና። ልባኖሰ ጪሻይ ቆቆፈቴስ። 
\v 5 እያ ስንን ደረት ቃፆሶና፤ ዙማት ትልኦሶና። እ ቆንጭያ ዎደ ቢት ቃፃና፤ ሳአን ደእያ ኡባይ ኮኮራና። 
\v 6 እያ ሀንቁዋ ስንን ኤቃናይ ኦኔ? እያ ሀንቁዋ ሱሏ ዳንዳአናይ ኦኔ? እያ ሀንቆይ ታማዳ ቡክያ ዎደ ዛላት ዛእድ ጳልቀቶሶና።
\p
\v 7 ጎዳይ ሎኦ፤ መቶ ጋላስ ቆሰትድ አትያ በሰ፤ እ ባናን አማነተይሳታ ኤሬስ። 
\v 8 ሽን እ ባ ሞርከታ ድኦን ሙክድ ይሳና፤ ባራ ኤቀተይሳታ ማን ገልሳና።
\p
\v 9 ህንተ ጎዳ ቦላ ማቀተይ አይብሴ? እ ህንተና ኩም ይሳና፤ መቶይ ዛር ደንደና። 
\v 10 ህንተ ማትድ ጋንድጋረይሳት፥ ዎልራ ኦይከትዳ አጉንነ ቡረይ ታማን ፁገትያ መላ ህንተ ታማን ፁገትድ ያና። 
\v 11 ናናወ፥ ጎዳ ቦላ ኢታባ ማቀተይነ ኢታ ዞረ ዞረይ ነ ግዶፈ ከይስ።
\p
\v 12 ጎዳይ፥ “ናናወት ምኖነ ዳሮ ግድኮካ፥ ሾደትድ ያና። ታኒ ካሰ ይሁዳ አሳ ኡንኤስ፥ ሽን ህዛፐ ጉየ ኡንኤከ። 
\v 13 ታኒ ሀእ አሶረታ ቃምባራ ህንተ ጋናፈ መንና፤ ህንተ ቃሸትዳ ሳንላታ ዱሰረና” ያጌስ።
\p
\v 14 ናናወ፥ ጎዳይ ነ ቦላ ፕርድዳ ፕርዳይ ሀይሳ: “ህዛፐ ጉየ ነ ሱን ፄግስያ ኮቸ ነዉ ዴና። ነ ፆሳታ ኬን ደእያ ምስለታነ ኤቃታ ታኒ ይሳና። ኔኒ ፓናባ ግድያ ግሾ፥ ታኒ ነ ዱፉዋ ቦካና” ያጌስ።
\p
\v 15 ሄኮ፥ ሎኦ ዎረ ኦድሸነ ሳሮተ አዋጅሸ ኪተትድ የይሳ ቶሆይ ደርያ ቦላራ ጋክስ። ይሁዳ አሳዉ፥ ህንተ ሞርከት ኩም ይዶሶና፤ ኤንቲ ዛሪድ ህንተ ቢታ ኦልድ ኦይኮኮና። ሄሳ ግሾ፥ ህንተ ባለታ ቦንችተ፤ ህንተ ቃንገ ጋተ።
\c 2
\s1 ናናወ ኩንደ
\p
\v 1 ነኖ፥ ናናወ፥ መንረይስ ከይስ! ሄሳ ግሾ፥ ነ ሚፃ ናጋ፤ ነ ኦግያ ዎቻ፤ ነ ዳንጩዋ ምን፤ ነና ጊግሳ።
\p
\v 2 ቦንቀይሳት ቦንቅድ፥ ኤንታ ዎይንያ ይስኮካ፥ ጎዳይ እስራኤለ ቦንቹዋ ዛርዳይሳዳ ያይቆባ ቦንቹዋ ዛራና።
\p
\v 3 ኦላንቾት ዞኦ ጎንዳለ ኦይክዶሶና፤ ዞኦ ማኦ ማእዶሶና። ኤንቲ ኦላስ ጊግያ ዎደ ፓራ ጋረት ቅንኣሮሶና፤ ኤንቲ ባንታ ቶራ ሉፆሶና። 
\v 4 ፓራ ጋረት ኦግያን አዳርሶሶና፤ ኤንቲ ያነ ሃነ ሄመትሸ ካታማ ኦግያን ዩዮሶና። ቃስ ኤንቲ ላጮይ ሎጩ ግያ ፆምፐ ዳኖሶና፤ ዎልአንዳ ኤለሶሶና። 
\v 5 ናናወይ ባ ሀላቃታ ፄግድ ሺሻና፥ ሽን ኤንቲ ይሸ ኦገ ቦላ በታና። ኤንቲ ካታማ ግምበ ድርሳኮ ኤለሳና፥ ሞርከታ ቆሁዋፐ ኤንታ ናግያ ጎንዳለይ ጊግስ። 
\v 6 ሻፋ ባጋራ ደእያ ካታማ ድርሳ ፐንገት ዶየትዶሶና፤ ካዎ ጋይ ዳጋምስ። 
\v 7 ካውያ ድኤታዳ ባሱ፤ እ ማጫ አይለት አዛንድ ሆለዳ ጉጉማና፤ ባንታ ትራ ባቅሸ ዬካና። 
\v 8 ተቀትዳ ሃ ዶይ በስን ጎገይሳዳ ናናወ አሳይ ካታማፐ ባቃታና። አስ ኤንታ ባ ቃላ ቁ ኦድ፥ “ኤቅተ! ኤቅተ!” ያግድ ፄጋና፥ ሽን ኦንካ ጉየ ፄለና። 
\v 9 ሄ ካታማ ሻሉዋስነ፥ እያን ምንጀትዳ ቦንቾ ሚሽያስ ታይቦይ ባዋ። ሄሳ ግሾ፥ ሄ ብራነ ዎርቃ ቦንቅተ!
\p
\v 10 ናናወይ ባይሳ ግድስ፤ ካይሳትድ፥ ባዞ ግድስ! አሳ ዎዛናይ ያሻን ትልእስ፤ ጋደይ ኮኮርስ፤ ፄሳይ ፃፀትስ፤ ሶምኦይ ቡላትስ! 
\v 11 ጋሞት አቅያ በሳይ፥ ዎዳላ ጋሞት ደእያ በሳይ፥ አደይነ ማጫ ጋሞት ባንታ ማራታራ ያሽ ባይና ጉፕያ በሲ ዳንያ ናናወ ካታማይ ሀእ አዉን ደኢ? 
\v 12 ጋሞይ ባ ማራታስ ግድያባ ኦይክስ፤ ባራ ደእያ ማጫ ጋመስ መንረድ እሚስ። ባ ጎንጎሉዋ ዎን፥ ባ ኦላ አሾን ኩንስ።
\p
\v 13 ኡባፈ ዎልቃማ ጎዳይ፥ “ሄኮ፥ ታኒ ነ ቦላ ደንዳስ! ታኒ ነ ፓራ ጋረታ ታማን ፁጋና፤ ነ ዎዳላ ጋሞታ ማሽ ማና። ኔኒ ሀራታፐ ኤክዳባ ታኒ ኔፐ ዎስሳና፤ ነ ኪታንቾታ ቃላይ ህዛፐ ስኤተና” ያጌስ።
\c 3
\s1 ናናወ አየ!
\p
\v 1 ዳሮ አሳ ሱ ጉስዳ ናናወ ካታማ አየ! ዎርዶይ ኩምስ፤ ቦንቅ ኤክዳ ሻሉዋስ ታይቦይ ባዋ። 
\v 2 ናናወ ካታመን ልሶ ግርሳይ፥ ገርቶ ጎንዶርሳይ፥ ፓራታ አዳርሶይነ ፓራ ጋረታ ጉፋይ ስኤቴስ። 
\v 3 ፓራ አሳት ፒርፆሶና፤ ማሻይ ሎጬስ፤ ቶራይ ጶሌስ። ዳሮ አስ ሀይቅስ! አህ አሀ ቦላ ዶረትስ፤ ሀይቅዳባስ ታይቦይ ባዋ! ያራ ካንድ ብያ አስ አሀን በቴስ። 
\v 4 ሄስ ኡባይ ሀንዳይ ማር ባይና ናናወ ላይማተ ጋሱዋና። እ ዳሮ ሙሩኖ ኦሱ፤ ካዎተታ ባ ላይማተን፥ አሳ ባ ሙሩኑዋን አይለያሱ።
\p
\v 5 ኡባፈ ዎልቃማ ጎዳይ፥ “ሄኮ፥ ታኒ ነ ቦላ ደንዳስ! ታኒ ነ ማኡዋ ኔፐ ቃራና፤ ነ ካሉዋ አሳ፥ ነ ፖኩዋ ካዎተታ በሳና። 
\v 6 ታኒ ነና ፕቶ የግያ በሲ ከሳና፤ ነና ካና፤ አስ ኡባይ ነና ሚጫናዳ ኦና። 
\v 7 ነና በእያ ኡባይ ኔፐ ሃክድ፥ ‘ሄኮ፥ ናናወ ካታማይ ባይሳትስ፤ እያዉ አዛናናይ ኦኔ? እያ ምንያ አስ አዉፐ በንታንደሻ?’ ያጋና” ያጌስ።
\p
\v 8 ነኖ፥ ናናወ፥ ኔኒ ግብፀን ደእያ ተብሶ ካታማፐ አይ? እያ ናይለ ሻፋ ማታን ደአዉሱ፤ ሃ እ ዩሹዋ ተቅስ፤ ሻፋይ እዉ ሚፃ ግድስ፤ ቃስ ሃይካ እዉ ድርስ። 
\v 9 ቶጰይነ ግብፀይ እዉ ዛው ባይና ዎልቃ፤ ፑፅነ ሊበይ እዮ ማደይሳታ። 
\v 10 ግዶሽን፥ እያ ድኤታሱ፤ እ ጉ ናይት ደሸትድ፥ ኦገ ጋፃ ኡባን ኩንድዶሶና። እ ቦንቸትዳ አሳታ ቦላ ሳም የገትስ፤ እ ግታ አሳት ኡባይ ሳንላታን ቃሸትዶሶና።
\p
\v 11 ነኖ፥ ናናወ፥ ኔኒ ማትድ ጋንድጋርያ አሳዳ ሀናና። ነ ሞርከታ ስንፈ ባቃታዳ አትያ በሲ ኮያና። 
\v 12 ነ ሚፃት ኡባይ ኮይሮ ቴርዳ አይፈይ ደእያ ባላሰ ም መላ። ባላሰ ም ቃያ ዎደ ቴራይ መይሳ ዶናን ዎስ። 
\v 13 ሄኮ፥ ነ ኦላንቾት ኡባይ ማጫሳ መላ። ነ ዛዋ ፐንገት ነ ሞርከታስ ዳልግድ ዶየትዶሶና፤ ኮበ ም ታም ምስ። 
\v 14 ነ ሞርከት ነ ዩሹዋ ኡንኤያ ዎደ ኡያና ሃ ሀእ ትካ። ነ ሚፃ ምን፤ ኡርቃ የዳ ፁበ መ፤ ኦቶ ጊግሳ። 
\v 15 ነና ያን ታም ማና፤ ቦለይ ካ መይሳዳ ነና ማሽ ማና። ኔኒ ቦለዳ ዳራ ጎንዶዳ የለታ። 
\v 16 ኔኒ ነ ዛልአንቾታ ሳሎ ፆልንቶታፐ አዳ ዳርሳዳሳ። ሽን ኤንቲ ቦለዳ ኡባ ም ድግድ ፓልድ ያና። 
\v 17 ነ ቶራ ሞጮናትነ ነ ሞርናት ሜጎ ዎደ ድርሳ ቦላ ኡትዳ ቦለ መላ። ኤንቲ አው ከይያ ዎደ ፓልድ ዮሶና፤ ኤንቲ ደእያ በሳ ኤረይ ባዋ።
\p
\v 18 ነኖ አሶረ ካዋዉ፥ ነ ሀላቃት ስክዶሶና፤ ነ ቦንቸትዳ አሳት ኩንድዶሶና። ነ አሳይ ደረታ ቦላ ላለትስ፤ ኤንታ ሺሽያ አስካ ባዋ። 
\v 19 ኔኒ ዛው ባይና ኢታተፈ ከስ ኤክዳ አስ ባይና ግሾ፥ ነ መኦይ ኮለተና፤ ነ ማዱንይ ፓፀና። ነባ ስእዳ ኡባይ ነ ቦላ ኩሸ ባቃና።