\id JER - GOOFA FULL BIBLE
\ide UTF-8
\h ኤርምያሳ ማፃፋ
\toc1 ኤርምያሳ ማፃፋ
\toc3 ኤርም
\toc2 ኤርምያሳ
\mt ኤርምያሳ ማፃፋ
\imt ጋ ቆፋ
\ip ኤርምያስ ክ.የ.ስ. 600 ላይ ሄራን ደእዳ ናበ። ኤርምያሳ ማፃፋን ቆንጭድ ኦደትዳይ፦ የሩሳላመ ዮ፥ ፆሳ ኬ ዮነ አይስያ ዳሮ አሳይ ድኤትድ ባብሎነ ባናይሳ (ሸም 39፥ 52)። ባብሎነ ካዎይ የሩሳላመ ካታማነ ፆሳ ኬ ዉርሰ ይሳናፐ ስን፥ ኤርምያስ የሩሳላመን ደእስ።
\ip ኤርምያስ፥ ዳሮ ዎደ ኤቃ ጎይኖነ ኤንታ ናጋራ ጋሶን ፆሳ አሳ ቦላ ዮይ ያናይሳ ኦዴስ። እ ኦድዳ ትንብተታፐ ባጋት ፖለትን፥ ኤርምያስ ባ አይፈን በእስ። ሌምሶስ፥ ባብሎነ ካዎይ ናቡካዳናፆር የሩሳላመ ኦይክድ፥ ካታማነ ፆሳ ኬ ላሌስ፤ ይሁዳ ካዎይ ዳሮ አሳራ ድኤትድ ባብሎነ ብዳይሳ በእስ። ጉጅድካ፥ አሳይ ድኦፐ ስማናይሳነ እስራኤለ ካዎተይ ስሚድ ኤቃናይሳ ኤርምያስ ስንትድ ኦድስ።
\ip ኤርምያስ ድኤትድ ባብሎነ ብቤና (ሸም 40)፥ ሽን ጎዶልያ ሀይቅዳፐ ጉየ (ሸም 40—41)፥ እስ እስ ይሁዳ አሳይ እያ ዎልቃን ግብፀ ኤፍን (ሸም 42—43)፥ ያን ጉ ዎደ ደእስ።
\ip ኤርምያስካ ህዝቄላዳ ፆሳፈ ኤክዳ ባ ኪታ ማላንነ ሌምሶን ኦዴስ። ዳንጮ ሻሞ፥ ሄ ዳንጩዋ ሞጎ፥ ቃስ ቦክድ ከሶ (\xt 13:1-11\xt*)፤ ማቾ ኤኮና መላ ድገተ፥ አሳራ ዬሆ ዬኮና መላ ድገተ (\xt 16:1-9\xt*)፥ ፁጋ ሻሞነ እስራኤለ ጭማታ ስንን መን (19:1-13)፤ ቃምባራ ጋናን አድ ቶሆ (ሸም 27—28)፤ ኦላ ዎደ ጋደ ሻሞ (\xt 32:6-15\xt*)፤ ራካባ ያራት ዎይነ ኡሹ ኡዮና አጎ (\xt 35:1-19\xt*)።
\ip ኤርምያሳ ማፃፋ ኦይዱ ክፍለን ሻክድ በአናዉ ዳንዳኤቴስ።
\ipi 1. እዮስያሳ፥ እዮኣቀመ፥ ዮአክናነ ሰደቅያሳ ካዎተ ላይን ይሁዳ አሳስነ ኤንታ ካለያ አሳስ ፆሳፈ እመትዳ ቃላ (ሸም 2—25)።
\ipi 2. ዱማ ዱማ ትንብተ ቃላታ፥ ኤርምያሳ ደኡዋን ፖለትዳ ግታ ግታ ቆፋታ፥ ኤርምያሳ ፃፈይ ባሮክ ፃፍድ ኦይክዳ ጉ ፁፈታ (ሸም 26—45)።
\ipi 3. ዱማ ዱማ አላጋ ቢታ አሳስ ፆሳፈ ኪተትዳ ትንብተታ (ሸም 46—51)።
\ipi 4. የሩሳላመ ኦይከተነ አሳይ ድኤትድ ባብሎነ ባናይሳ ኦድያ ታርከታ (ሸም 52)።
\ip ኤርምያስ አሳ ቦላነ ቢታ ቦላ ዮይ ያናይሳ ኦድዳ ዎደ ካዎይነ ካህነት እያ ቦርዶሶናነ ዎግ ባይና ጎድዶሶና (\xt 11:18-23፤ 18:18፤ 20:1-3፤ 26:1-19፤ 37:13—38:6\xt*)። ኤርምያስ፥ አሳይ ፆሳራ ገልዳ ጫቁዋ ምንድ ናጋና መላ ኦዴስ (ሸም 30-33)። ህዝቄላ መላ ኤርምያስካ ካህነነ ናበ።
\ip ኤርምያስ ባ አሳ ዳሮ ዶስያነ ኤንታ ቦላ ኢታ ፕርድ ያና መላ ኮዮና አስ። ፆሳይ፥ እ ናበ ግድድ ሀጋዛና መላ ፄግዳ ዎደ እ ኡንኤትዳይሳ በሲያ ፁፈት ማፃፋ ግዶን ዳሮ በሳን ቆንጭስ። ፆሳ ቃላይ እያ ዎዛና ግዶን ታማዳ ኤፅያ ግሾ፥ እ ካምድ አሻናዉ ዳንዳእቤና።
\ip ሀ ማፃፋን ፃፈትዳ ግታ ግታ ትንብተታፐ እሶት እሶት መቶይ ኩምዳ ኤርምያሳ ዎድያፐ አድ፥ ፆሳይ እምያ ኦራ ጫቆይ ፖለትያ ዎድያ ስን ፄሎሶና። ሄ ዎደ ኦራ ጫቆይ አሳ ዎዛናን ፃፈትያ ግሾ፥ አኬክስያነ ናግስያ አስታማረ ኮሸና። (\xt 31:31-34\xt*)።
\iot ማፃፋ አይፈ ቆፋታ
\io1 ኤርምያሳ ፄገተነ ዶረተ (\ior 1:1-19\ior*)
\io1 ይሁዳነ እስራኤለ ቦላ ኦደትዳ ፕርዳ (\ior 2:1—25:38\ior*)
\io1 ዎርዶ ናበታነ ኤርምያሳ (\ior 26:1—29:32\ior*)
\io1 ኦራ ጫቁዋን አሳይ ባንታ ቢታ ስማና (\ior 30:1—33:26\ior*)
\io1 ኤርምያሳ ዱማ ዱማ ሀጋዞታ (\ior 34:1—38:28\ior*)
\io1 የሩሳላመነ ሃርያ ጎዶልያ ኩንደ (\ior 39:1—42:22\ior*)
\io1 ኤርምያስ ግብፀ ቢታን (\ior 43:1—44:30\ior*)
\io1 ኤርምያስ ባሮካስ ኡፋይሳ ቃላ እሚስ (\ior 45:1-5\ior*)
\io1 ይሁዳ ዩሾን ደእያ ካዎተታ (\ior 46:1—51:64\ior*)
\io1 የሩሳላመ ኩንደባ ኦደትዳ ሀራ ኪታ (\ior 52:1-34\ior*)
\c 1
\p
\v 1 ብንያመ ቢታን፥ አናቶታ ካታማን ደእያ ካህነታፐ እሱዋ ግድዳ ካልቀ ናኣ ኤርምያሳ ቃላይ ሀይሳ። 
\v 2 አሞነ ናአይ፥ ይሁዳ ካዎይ እዮስያስ ካዎትዳ ታማነ ሄን ላይን ጎዳ ቃላይ ኤርምያሳኮ ይስ። 
\v 3 እዮስያሳ ናአይ፥ ይሁዳ ካዎይ እዮአቄም ካዎትዳ ላይታን ጎዳ ቃላይ ኤርምያሳኮ ይስ። ቃስ እዮስያሳ ናአይ፥ ሰደቅያስ ካዎትን፥ ታማነ እስ ላይ ጋካናዉነ፥ እቻሻን አጌናን የሩሳላመ አሳይ ድኤትድ ብዳ ዎድያ ጋካናዉ ጎዳ ቃላይ እያኮ ይስ።
\s1 ኤርምያሳ ፄገተ
\p
\v 4 ጎዳ ቃላይ ታኮ ሀይሳዳ ያግሸ ይስ፦ 
\v 5 “ኔኒ ነ አየ ኡሎን መታናፐ ስን ታ ነና ኤራይስ። ነ የለታናፐ ስን ታ ነና ዱማያዳ ዎስ፤ ካዎተታስ ነና ናበ ኦዳ ሹማስ” ያግስ።
\p
\v 6 ታኒ፥ “ኡባ ሃርያ ጎዳዉ፥ ታኒ ናአ ግድያ ግሾ ዋታዳ ኦደታነኮ ኤርከ” ያጋስ።
\p
\v 7 ሽን ጎዳይ፥ “ ‘ታኒ ናአ ጎፓ’፤ ታኒ ነና ኪትያ በሳ ባዳ ታ ኪታ ኡባ አሳስ ኦዳ። 
\v 8 ታኒ ነና አሻናዉ ኔራ ደእያ ግሾ ኤንታዉ ያዮፋ። ሀይሳ ኦደይ ጎዳ” ያግስ።
\p
\v 9 ጎዳይ ባ ኩሽያ የድድ፥ ታ ዶና ቦችድ፥ “ሄኮ፤ ታኒ ታ ቃላ ነ ዶናን ዎስ። 
\v 10 ሾዳናዉነ ላላናዉ፥ ይሳናዉነ ሽራ የጋናዉ፥ ኬፃናዉነ ቶካናዉ፥ አሳ ቦላነ ካዎተታ ቦላ ታ ነና ሀች ሹማስ” ያግስ።
\p
\v 11 ጎዳ ቃላይ ታኮ፥ “ኤርምያሳ፥ ኔኒ አይ በአይ?” ያግስ።
\p ታኒ ዛራዳ፥ “ላዉዘ ም ፃምአ በአይስ” ያጋስ። 
\v 12 ጎዳይ፥ “ኔኒ ልከ በአዳሳ። ታካ ታ ቃላ ፖላናዉ ሀይሳዳ በአይስ” ያግስ። 
\v 13 ዛሪድ ጎዳይ፥ “ሀራ አይ በአይ” ያግስ።
\p ታኒ ዛራዳ፥ “እስ ፐንትያ ፃሮይ ፑደሀ ባጋፈ እስ ባጋ ገድ ግድ ኡትዳይሳ በአይስ” ያጋስ።
\p
\v 14 ጎዳይ፥ “ፑደሀ ባጋፈ ዮይ ፖድ፥ ቢታን ደእያ አሳ ኡባ ቦላ ጉካና። 
\v 15 ታኒ ፑደሀ ባጋ ካዎተታን ደእያ አሳ ኡባ ፄጋና ሀናይስ። ኤንታ ካዎት ይድ፥ የሩሳላመ ገልያ ፐንገታን፥ ድርሳ ዩሹዋንነ ይሁዳ ካታማታ ኡባን ባንታ አራታ ዎና። 
\v 16 ይሁዳ አሳይ ታና አግድ፥ ኢታ ኦዳ ግሾ፥ ሀራ ፆሳታስ እፃነ ጩይስዳ ግሾነ ባንታ ኩሸን ኦዳ ፆሳታ ጎይንዳ ግሾ ታ ፕርዳ ኤንታ ቦላ ኤሀስ።
\p
\v 17 “ሽን ኔኒ ጊገታ! ደንዳዳ ታኒ ነና ኪትያባ ኡባ ኤንታዉ ኦዳ። ኤንታዉ ያዮፋ፤ ነ ኤንታዉ ያይኮ፥ ታ ነና ኤንታ ስንን ጉጃዳ ያሽሳና። 
\v 18 ሀች ታ ነና ሀ ቢታ ቦላ፥ ይሁዳ ካዎታ ቦላ፥ ሀላቃታ ቦላ፥ ካህነታ ቦላነ ሀ አሳ ቦላ ግምበትዳ ካታማዳ፥ ብራታ ቱሳዳነ ናሰ ብራታን ድርዳ ድርሳዳ ኦዳ ምንስ። 
\v 19 ኤንቲ ኔራ ኦለታና፤ ሽን ታ አሻናዉ ኔራ ደእያ ግሾ ነና ፆኖኮና። ሀይሳ ኦደይ ጎዳ” ያግስ።
\c 2
\s1 እስራኤለይ ፆሳ አግስ
\p
\v 1 ጎዳ ቃላይ ታኮ ሀይሳዳ ያግሸ ይስ፦ 
\v 2 “ባዳ የሩሳላመ አሳ ሀይን ሀይሳዳ ያጋዳ አዋጃ። ነ ናአተን ታዉ አይ መላ አማነትዳኮ፥ ነ ቡሮ መዳን ደእያ ዎደ ታና አይ መላ ሲቅዳኮ፥ ታ አኬካይስ። ኔኒ መላ ቢታን ዘረ ዘረት ኤሮና ቢታን ታና ካላዳሳ። 
\v 3 ሄ ዎደ እስራኤለይ ጎዳስ ጌሽ፤ እያዉ ባይራ ካ መላ። እያፐ ምዳ ኡባይ ባላ ግዶሶና፤ ኤንታ ቦላ ዮይ ይስ። ሄሳ ኦደይ ጎዳ” ያጌስ።
\p
\v 4 ህንተኖ፥ ያይቆባ ናይቶ፥ እስራኤለ ዛረ፥ ኡባይ ጎዳ ቃላ ስእተ! 
\v 5 ጎዳይ ያጌስ፤ ካሰ ህንተ አዋት ታፐ አይ ባላ ደምድ ታፐ ሃክድ ብዶና? ኤንቲ ፓና ኤቃታ ጎይንድ ፓናባ ግድዶሶና። 
\v 6 ኤንቲ፥ “ኑና ግብፀፈ ከስዳ፥ መላ ቢታን ካለዳ፥ አፎራነ መላ ቢታራ አዳ፥ ኮሽነ ሳካና ም ደእያ ቢታራ ፕንዳ፥ ኦንካ አናነ ደኦና በሳራ ካለዳ ጎዳይ አዉን ደኢ?” ያግድ ኦይችቦኮና። 
\v 7 ህንተ ሄ ቢታ አይፍያፐ ሎኡዋ ማና መላ ታ ህንተና አራዳ ቢታ ኤሀስ። ሽን ህንተ ይድ፥ ታ ቢታ ቱንስደታ፤ ታ ላታ ኢስደታ። 
\v 8 ካህነት፥ “ጎዳይ አዉኔ?” ያግድ ኦይችቦኮና። ታ ህገይ ኤንታ ኩሸን ደእያ አሳት ታና ኤርቦኮና። ደርያ አይሰይሳት ታ ቦላ ማካልዶሶና። ናበት ባኣለ ኤቃ ሱንን ትንብተ ኦድድ ፓና ኤቃታ ጎይንዶሶና።
\p
\v 9 “ሄሳ ግሾ፥ ታ ህንተራ ቡሮ ሞተታና፤ ህንተ ናይታ ናይታራ ሞተታና። 
\v 10 አነ ዉሎሀ ባጋ ብድ፥ ዩሾይ አባን ተቀትዳ ቢታ ቆጵሮሳ ፄልተ፤ ዶሎሀ ባጋ ብድ ቀዳረ ቢታ አሰ ኪትድ ፆሞስተ። ሀይሳ መላባይ ሀይሳፈ ካሰ ሀንዳኮ በእተ። 
\v 11 ኤንቲ ቱማ ፆሳታ ግዶና እፅኮካ ባ ፆሳታ ላምዳ ደረይ ኦኔ? ሽን ታ አሳይ ኤንታዉ ቦንቾ ግድዳ ታና ፓና ኤቃታራ ላምስ።”
\q1
\v 12 “ሳሎቶ፥ ሀይሳን ማላለትተ፤
\q2 ዳጋምድ ኮኮርተ” ያጌስ ጎዳይ
\q1
\v 13 ታ አሳይ ናምኡ ናጋራ ኦዶሶና፤
\q2 ሄስካ፥ ደኦ ፑልቶ ግድዳ ታና አግስ።
\q1 ሃ ኦይካናዉ ዳንዳኦና፥
\q2 ፆኤ ኦላታ ባንታዉ ቦክዶሶና።
\p
\v 14 “እስራኤለይ ሻመትዳ አይለዬ? ዎይኮ ሶን የለትዳ አይለዬ? ያትን፥ ሞርከት አይስ ዶኦዳ ሻንካቶና? 
\v 15 እያ ሞርከት ጋሞዳ እያ ቦላ ጉዶሶና። ኤንቲ ባንታ ቃላ ቁ ኦድ ዳሮሶና። ኤንቲ እያ ቢታ ካይስ ከስዶሶና፤ እያ ካታማት ላለትድ አስ ባይና ሶ ግድዶሶና። 
\v 16 ሄሳ ቦላካ መምፕሳነ ፃፍናሳ አሳት እያ ሁጵያ ሜድዶሶና። 
\v 17 ነኖ እስራኤለ፥ ኦገ ኡባን ነና ካለያ፥ ጎዳ ነ ፆሳ አጋዳ ሀይሳ ነ ቦላ ኤህዳይ ነና ግድኪ? 
\v 18 ናይለ ሻፋፐ ሃ ኡያናዉ ግብፀ ቡስ ነና አይ ማዳኔ? ኤፍራፂሳ ሻፋፐ ሃ ኡያናዉ አሶረ ቡስ ነና አይ ማዳኔ? 
\v 19 ህዛ ነ ኢታተይ ነና ሴራና፤ ነ ታና ካድዳይስ ነ ቦላ ፕርዳና። ነ ታና ጎዳ ነ ፆሳ አግዳይስ አይ መላ ኢታነ ጫሞ ግድያኮ አኬካ በአ። ነ ታዉ ያይያ ያሻይ ባዋ” ያጌስ ጎዳይ፥ ኡባፈ ዎልቃማ ፆሳይ።
\p
\v 20 “ታ ነ ቃምባራ ዳሮ ዎደፐ ካሰ መንስ፤ ነ ቃሹዋ ዱስ። ኔኒ፥ ‘ታ ነና ጎይንከ’ ያጋዳሳ። ደረ ቦላነ ዳሻ ም ጋርሳን ላይማታናዉ ዝንአዳሳ። 
\v 21 ታ ነና ዶረትዳ ዘረፈ ኤካዳ፥ ሎኦ ዎይነ ጋደን ቶካስ። ያትን፥ ዋናዳ፥ ጉየ ስማዳ፥ ዎራን ዶልዳ፥ ኢታ ዎይነ ግዳዲ?” ያጌስ ጎዳይ።
\p
\v 22 “ነ ሳንጌኖራ ሜጨትያኮካ፥ ሳሙናን ጎርፐትያኮካ ነ ቅታይ ታ ስንና። 
\v 23 ኔኒ ዋናዳ፥ ‘ታ ቱናብከ፤ ባኣለ ኤቃ ጎይናብከ’ ጋይ? ኔኒ ዛንጋራን ሀንዳባ ፄላ፤ ነ ኦዳባ አኬካ። ኔኒ ያነ ሃነ ዎፅያ ዚታ ከይዳ ግማለ መላ። 
\v 24 ኔኒ ባዞ ሜዘትዳ፥ ዚታ ዎደ ጫርኮ ስንገያ ሀረ መላ። እ አሞይ ደንድን፥ ኦን እዮ ተቃናዉ ዳንዳኢ? እያ ባዉ ኮያዳ ጋክያ ግሾ አይ አደ ሀረይካ እዮ ደማናዉ ዳቡረና። 
\v 25 ነኖ፥ እስራኤለ፥ ነ ጫማይ ዉራና ጋካናዉ ነ ኮቶኖይ መላና ጋካናዉ ሀራ ፆሳታ ጌዶ ዎፆፋ። ሽን ኔኒ፥ ‘አቶ፥ ሄስ ታና ማደና። ታኒ እማ ፆሳታ ዶሳስ፤ ታኒ ኤንታ ጎይናና’ ያጋዳሳ።
\p
\v 26 “ካይሶይ ኦይከትዳ ዎደ ዬላተይሳዳ እስራኤለ አሳይ ዬላትዶሶና፤ ኤንቲ፥ ኤንታ ካዎት፥ ኤንታ ሀላቃት፥ ኤንታ ካህነትነ ኤንታ ናበት ኡባይ ዬላታና። 
\v 27 ኤንቲ ምኮ፥ ‘ነ ታ አዋ’ ያጎሶና፤ ሹቻ፥ ‘ታና ነ የላዳሳ ያጎሶና። ኤንቲ ባንታ ሶምኡዋ አግድ፥ ባንታ ዞኩዋ ዛርዶሶና። ሽን ኤንቲ መቶ ዎደ ኑና አሻ!’ ያጎሶና። 
\v 28 ሽን ህንተ፥ ህንተዉ መዳ ፆሳት አዉን ደኦና? ህንተ መቶን ገልያ ዎደ ህንተና አሻናዉ ዳንዳእኮ ደንድድ ህንተና አሾ። ህንተኖ፥ ይሁዳ አሳዉ፥ ህንተ ፆሳት ህንተ ካታማታ መላ ዳሮ” ያጌስ ጎዳይ።
\p
\v 29 “ህንተ ታራ አይስ ሞተተቲ? ህንተ ኡባይ ታዉ ማካልደታ። 
\v 30 ታ ህንተና ጮ ሴራስ፤ ህንተ ህንተ ኦሱዋፐ ስምያባ ግደከታ። ኮሻትዳ ጋሞዳ ህንተ ማሻይ ህንተ ናበታ ምስ” ያጌስ ጎዳይ።
\p
\v 31 ህንተኖ፥ ሀ ዎድያ የለታዉ፥ ጎዳ ቃላ ስእተ። ታ እስራኤለታስ ባዞ ዎይኮ ሳካና ማን ደእያ ቢታ ግዳድናዬ? ያትን፥ አይስ ታ አሳይ፥ “ኑኒ ኑ ሸነዳ ባና፤ ኔኮ ስሞኮ” ያግዶና? 
\v 32 ጌላእያ ባ አሌቁዋ፥ ሙሹርያ ባ ማኡዋ ዶጋይ? ሽን ታ አሳይ ታና ታይቦይ ባይና ጋላስ ዶግዶሶና። 
\v 33 ኔኒ ነ ላገታ ጌዶ ዎ ዋናዳ ሜዘታዲ? ዳሮ ኢታ ማጫሳት ነ ኦግያ ታማሮሶና። 
\v 34 መንድ ገልሽን ኦይክዳ አሳ ሱን ግዶናሽን ፅሎ ማንቆታ ሱን ነ ማኦይ ኢትስ። ኔኒ ሄሳ ኡባ ኦዳካ፥ 
\v 35 ኔኒ፥ “ ‘ታኒ ፅሎ፤ ቱማ ጎዳይ ታ ቦላ ሀንቀተና፤ ታኒ ናጋራ ኦብከ’ ግያ ግሾ ታ ነ ቦላ ፕርዳና። 
\v 36 ኔኒ ነ ኦግያ ላማሸ አይስ ዎፃይ? ነና አሶረይ ዬላይዳይሳዳ ግብፀይ ዬላያና። 
\v 37 ጎዳይ ነ አማነተይሳታ ካዉሽዳ ግሾነ ነ ኤንታፈ ማደ ደሞና ግሾ ነ ሁጵያ ኦይካዳ ያፐ ከያና” ያጌስ ጎዳይ።
\c 3
\p
\v 1 “እስ አስ ባ ማችዉ የድን፥ እያ ባዳ ሀራ አዝና ገልኮ፥ ሄ አደይ እዮ ዛሪ? ዛርኮ ሄ ቢታይ ቱና ግደኔ? ሽን ነ ላይማታናዉ ኮያዳ ዳሮ ላገታራ ደአዳሳ፤ ሀእ ኔኒ ታኮ ስማኔ? ያጌስ ጎዳይ 
\v 2 ቁ ጋዳ አይኮይ ባይና ደረታ ፄላ። ላይማታናዉ ነ ዝንአቦና በሲ ደኢ? አራበ አስ መላ ቢታን ኡተይሳዳ፥ ኔኒ ላገታ ናጋዳ ኦገ ዶናን ኡታዳሳ። ነ ላይማተንነ ነ ኢታተን ቢታ ቱንሳዳሳ። 
\v 3 ሄሳ ግሾ፥ ቶርቸ እራይ ተቀትስ፤ ስላ እራይካ ቡኮና እፅስ። ሄስ ሀንንካ፥ ነዉ ላይማተ መይ ደኤስ፤ ነ ዬላቶና እፃዳሳ። 
\v 4 ሀእ ኔኒ፥ ‘ታ አዋዉ፥ ታ ናአተ ላግያዉ ነ ታና ሲቃሳ። 
\v 5 ነ ኡባ ዎደ ይሎታይ? ነ ሀንቆይ መርናዉ አገኔ?’ ያጋሳ። ሽን ነ ኦናዉ ዳንዳእያ ኢታ ኡባ ኦሳ” ያጌስ ጎዳይ።
\s1 አማነቶና እስራኤለ
\p
\v 6 ካዋ እዮስያሳ ዎደ ጎዳይ ታኮ ሀይሳዳ ያግስ፦ “አማኖይ ባይና እስራኤለይ ኦዳባ ነ በአዲ? እያ ደረ ቦላነ ዳሻ ም ኡባ ጋርስ ባዳ ያን ላይማታሱ። 
\v 7 እያ ሀይሳ ኡባ ኦንካ ታኮ ስማንደ ጋዳ ቆፓስ፥ ሽን ስማቡኩ። እ ምችያ፥ አማነቶና ይሁድካ ሄሳ በአሱ። 
\v 8 አማኖይ ባይና እስራኤለይ ዳሮ ዎደ ላይማትዳ ግሾ ፕርማ እማዳ እዮ የዳስ። ሄስ ሀንንካ እስራኤለ ምችያ፥ አማነቶና ይሁድ፥ ያዮናይሳ ታ በአስ፤ እያካ ከያዳ ላይማታሱ። 
\v 9 ላይማተይ እዉ ላፋባ ግድያ ግሾ፥ ምራነ ሹቻራ ላይማታዳ ቢታ ቱንሳሱ። 
\v 10 ሄ ኡባን እ ምችያ፥ አማነቶና ይሁድ ስምዳባ ዳናዉሱፐ አትሽን፥ ኩመ ዎዛናፐ ታኮ ስማቡኩ” ያጌስ ጎዳይ።
\p
\v 11 “አማነቶና ይሁዳፐ አማኖይ ባይና እስራኤለይ ፅሎ። 
\v 12 ባዳ ፑደሀ ባጋን ደእያ አሳስ ሀይሳዳ ያጋዳ አዋጃ፦ ‘አማኖይ ባይና እስራኤለ፥ ስማ! ታኒ ማሮት ኩምዳ ጎዳ ግድያ ግሾ ነና ኢታ አይፈን ፄልከ። መርናዉ ሀንቀትከ’። 
\v 13 ግዶሽን፥ ‘ታኒ ጎዳ፥ ታ ፆሳ ቦላ ማካላስ። አላጋ ፆሳታራ ዳሻ ም ጋርሳን ላይማታስ። ነ ቃላ ኪተታብከ’ ጋዳ ነ ቆሁዋ አማና” ያጌስ ጎዳይ።
\p
\v 14 “ህንተኖ፥ አማነቶና አሳዉ፥ ታ ህንተዉ አዝና ግድያ ግሾ ስምተ። ታኒ እስ ካታማፐ እስኖ፥ እስ ያራፐ ናምአ ዶራ ኤካዳ ፅዮነ ኤሀና። 
\v 15 ታ ዎዛናዳ ህንተና ሄምያ ሄንንቾታ ህንተዉ እማና። ኤንቲ ህንተና ኤራተንነ አኬካን ሄማና” ያጌስ ጎዳይ።
\p
\v 16 “ሄ ጋላሳታን ህንተ ሄ ቢታን ዳርያ ዎደ አሳይ፥ ‘ጎዳ ጫቆ ታቦትያ’ ግድ ኦደቶኮና። እ ኤንታዉ ቆፈተና፤ ሀሳየተና፤ ባይናይስ ኤንታዉ ኤረተና፤ ሀርካ ኦሰተና። 
\v 17 ሄ ዎደ ኤንቲ የሩሳላመ፥ ‘ጎዳ አራታ’ ግድ ፄጋና። ካዎተ ኡባፈ አሳይ ጎዳ ሱን ቦንቻናዉ የሩሳላመ ሺቃና። ሄሳፈ ጉየ፥ ኤንቲ ባንታ ዎዛና ኢታተ ካሎኮና። 
\v 18 ሄ ዎደ ይሁዳ አሳይነ እስራኤለ አሳይ ጋሄትድ ፑደሀ ባጋ ቢታፈ ታ ህንተ አዋታ ላትስዳ ቢታ እስፈ ያና” ያጌስ ጎዳይ።
\p
\v 19 “ታ ህንተና ናአ ኤካዳ፥ ቢታ ኡባፈ ሎእያነ አራዳ ቢታ ህንተዉ እማናዉ ኮያስ። ‘ታ አዋዉ’ ግድ ፄጋናነ ታና ካላና ጋዳ ቆፓስ። 
\v 20 ሽን እስራኤለ አሳዉ፥ ህንተ ባ አዝናስ አማነቶና ማችዳ ታዉ አማነትበከታ” ያጌስ ጎዳይ።
\p
\v 21 ኤንቲ ባንታ ኦግያ ጌላይዳ ግሾነ ባንታ ፆሳ አግዳ ግሾ ማንቆ ዙማታፐ እስራኤለ አሳ ዋሶይነ ዬሆይ ስኤቴስ። 
\v 22 “ህንተኖ፥ አማኖይ ባይና አሳዉ፥ ታኮ ስምተ። ህንተ አማነታና መላ ታ ህንተና ፓና” ያጌስ ጎዳይ።
\p ህንተ፥ “ኔኒ፥ ኑ ጎዳ ፆሳ ግድያ ግሾ ኔኮ ስማና። 
\v 23 ደረታ ቦላነ ዙማታ ቦላ ኤቃ ጎይኖይ ቱማ ጭሞ። ቱማ እስራኤለ አቶተይ ጎዳ፥ ኑ ፆሳ። 
\v 24 ኑ ናአተፈ ዶምን፥ ኑ አዋት ዳቡርድ ደምዳ፥ ኤንታ ዶርሳነ መህያ፥ ኤንታ ማጫነ አደ ናይታ ዬላይያ ኤቃት ምድ ይስዶሶና። 
\v 25 ናአተፈ ሀች ጋካናዉ፥ ኑነ ኑ አዋት ጎዳ ኑ ፆሳ ቦላ ናጋራ ኦዳ። ጎዳ ኑ ፆሳ ቃላ ኪተትቦኮ። ሄሳ ግሾ፥ ኑኒ ዬላን ጉፋናናዉ ቃስ ካዉሻተ አፍላዳ ኑና ካሞ” ያጎሶና።
\c 4
\p
\v 1 ጎዳይ ያጌስ፥ “እስራኤለ አሳዉ፥ ስምኮ፥ ታኮ ስምተ። ህንተ ታና ሻትያ ህንተ ኤቃታ ታ ስንፈ ድግኮ፥ ታ ኦግያፐ ካረ ከዮና እፅኮ፥ 
\v 2 ቱማን፥ ሱረተንነ ፅሎተን፥ ‘ደኦ ፆሳይ ኤርያ መላ’ ግድ ጫቅኮ፥ ሄ ዎደ ካዎተት እያን አንጀታናነ እያን ጬቃና።”
\p
\v 3 ጎዳይ ይሁዳነ የሩሳላመ አሳኮ ሀይሳዳ ያጌስ፦ “ህንተ ኦ ቢታ ጎይተ፤ አጉን ቦላ ዘሮፕተ። 
\v 4 ህንተኖ፥ ይሁዳነ የሩሳላመ አሳዉ፥ ህንተ ፆሳስ ቃፃረትተ፤ ህንተ ዎዛና ሾሁዋ ድግተ። ሄስ ሀኖና እፅኮ ህንተ ኢታተ ግሾ፥ ታ ሀንቆይ ታማዳ ኤፃና፤ እያ ኦንካ ቶይሳናዉ ዳንዳኤና” ያጌስ ጎዳይ።
\s1 ፑደሀ ባጋፈ ዮ ያና
\p
\v 5 ይሁዳን አዋጅተ፤ የሩሳላመን ሞይዘ ፑንተ! ህንተ ቃላ ቁ ኦድ ሀይሳዳ ግድ ዋስተ! እስፈ ሺቅድ ግምበትዳ ካታማታኮ የተ። 
\v 6 አሳይ ፅዮነ ባና መላ ማልተ! ህንተ ሸምፑዋ አሻናዉ ጋምኦና ባቃትተ! ጋምኦፍተ! ታ ፑደሀ ባጋፈ ጋዶነ ዮ ቢታ ቦላ ኤሀና ሀናይስ። 
\v 7 ጋሞይ ዎራፐ ከየይሳዳ ካዎተታ ይሰይስ ባ በሳፈ ደንድድ ህንተ ቢታ ይሳናዉ ይስ። ህንተ ካታማት ላለትድ ባይሳ ግዳና። 
\v 8 ሄሳ ግሾ፥ ካዮ ማኦ ማእድ፥ “ዎ! ዎ!” ግድ ዘሌልተነ ዬክተ። ጎዳ ሱልያ ሀንቆይ ኑ ቦላፈ ክችቤና።
\p
\v 9 “ሄ ዎደ ካዋነ ሀላቃታ ዎዛናይ ትልአና፤ ካህነት ዳጋማና፤ ናበት ህርጋና” ያጌስ ጎዳይ።
\p
\v 10 ታኒ፥ “ኡባ ሃርያ ጎዳዉ፥ ማሽ ኤንታ ቆን ዎያ ዎደ ‘ህንተዉ ሳእ ሳሮ ግዳና’ ያጋዳ ሀ አሳነ የሩሳላመ አይስ ጭማይ” ያጋስ።
\p
\v 11 ሄ ዎደ ሀ አሳስነ የሩሳላመስ ሀይሳዳ ያግድ ኦደታና፦ “መላ ቢታን ደእያ አይኮይ ባይና ቃ ደረታፐ ምችያ ጫርኮይ ታ አሳ ቦላ ጫርካና፤ ሄስ ካ ጌሻናሳ ግደና። 
\v 12 ታ ኪታን ዎልቃማ ጫርኮይ ጫርካና፤ ታ ኤንታ ፕርዳና” ጌስ።
\p
\v 13 ሄኮ፥ ሞርከይ ሻራዳ ከዬስ። እያ ፓራ ጋረት ጎተ መላ፤ እያ ፓራት አርጋንፈ አድ ኤሶቶሶና። ኑና አየ! ኑ ይዳ!
\p
\v 14 “ነኖ የሩሳላመ፥ አታና መላ ነ ዎዛና ሜጫዳ ኢታተፈ ጌያ። ኢታ ቆፋይ ነ ዎዛናን አዉደ ጋካናዉ ጋምአኔ? 
\v 15 ዳነ ካታማፐነ ኤፍሬማ ዙማፐ ይዳይሳት ኢታባ አዋጆሶና። 
\v 16 ይሁዳ ካታማታ ቦላ ኦላ አዋጅያ ኦላንቾት ሃሆ ቢታፈ ዩሳ ቦላ ደኦሶና ግድ ካዎተታስ ኦድተ፤ የሩሳላመስካ አዋጅተ። 
\v 17 እ ታ ቦላ ማካልዳ ግሾ፥ ጋደን ደእያ ካ ናገይሳዳ ኦላንቾት ይሁዳ ዩሹዋ ተቃና” ያጌስ ጎዳይ።
\p
\v 18 ይሁዳ አሳዉ፥ ህንተ ሀኖይነ ህንተ ኦሶይ ሀይሳ ኡባ ህንተ ቦላ ኤህስ። ሀይስ ህንተዉ ሴራ። እ አይ መላ ጫም! ህንተ ዎዛና አይ መላ ጫድ!
\p
\v 19 ታና አየ! ታ ሀይሳ ዋታ ዳንዳአነ! አየ ታ ዎዛና! ታ ዎዛናይ ኮኮሬስ፤ ታ ስእ ጋናዉ ዳንዳእከ። ታኒ ሞይዘ ፑኖነ ኦላ ግርስ ስእዳ ግሾ ስእ ጋናዉ ዳንዳእከ። 
\v 20 ዮይ ዮ ቦላ ዬስ፤ ቢታይ ኩመ ይስ። ታ ዱንካነይ ኩንድስ፤ ታ ሻቃራይካ ላለትስ። 
\v 21 ታኒ አዉደ ጋካናዉ ኦላ ማላ በአኔ? አዉደ ጋካናዉ ሞይዘ ፑኖ ስአኔ?
\p
\v 22 “ታ አሳይ ኤያ፤ ኤንቲ ታና ኤሮኮና። ኤንቲ ቆፍ ባይና ናይታ መላ፤ ኤንታዉ አኬክ ባዋ። ኤንቲ ኢታባ ኦናዉ ጭንጫ፤ ሽን ሎኦባ ኦድ ኤሮኮና” ያጌስ ጎዳይ።
\p
\v 23 “ታኒ ሳኣ በእያ ዎደ፥ ሳእ አይኮይካ ባይና ባይሳ ግድዳይሳ በአስ። ቃስ ሳሎታ ፄልያ ዎደ፥ ፖኦይ ባይናይሳ ፄላስ። 
\v 24 ታ ደረታ ፄልያ ዎደ ኤንቲ ቃፆሶና፤ ታኒ ዙማታ በእያ ዎደ ያ ሃ ዎፆሶና። 
\v 25 ታ ፄልያ ዎደ አስ ባዋ፤ ሳሎ ካፎት ኡባይ ፓልድ ባቃትዶሶና። 
\v 26 ታ ፄልያ ዎደ አራዳ ቢታይ ቃኤ ግድዳይሳ በአስ። ጎዳ ስንንነ እያ ሱልያ ሀንቁዋ ስንን ሄ ቢታ ካታማት ላለትዶሶና።
\p
\v 27 “ቢታይ ያና፤ ሽን ታ እያ ኩመ ይስከ። 
\v 28 ሳአይ ዬካና፤ ሳሎይ ማና። ታ ኦዳስ፤ ማርስከ። ታ ቆፋ ቃቻስ፤ አግከ” ያጌስ ጎዳይ።
\p
\v 29 ፓራ አሳታነ ዶንገ አሳታ ዋሱዋን፥ አሳይ ካታማ ኡባፈ ባቃታና። ባጋት ዎፅድ ዎራ ገላና፥ ባጋት ዛላ ቦላ ከያና። ካታማ ኡባይ ባይስ ግድን ደእያ አስ ያና።
\p
\v 30 ነኖ፥ ዮስ አትዳረ ነ ዋናይ? ነ ዞኦ ማኡዋ አይስ ማአዲ? ዎርቃ አሌቆ አይስ ዎዲ? ነ አይፍያ ስጵን አይስ ትያይ? ኔኒ ጮ ነና ሎይሳ፤ ነ ላገት ነና ካዶሶና፤ ኤንቲ ነና ዎናዉ ኮዮሶና። 
\v 31 ታኒ እቀ ኦይክዳ ማጫስ ዋስያ ዋሱዋ መላ ስአስ። እ ዋሶይ ኮይሮ ናአ የልያ ማጫሳ ዋሶ መላ። ሄ ዋሶይ፥ የሩሳላመይ ሸምፖ ያዳ፥ ባ ኩሽያ ምጫዳ፥ “ታና አየ! ታ ያስ! ታና ዎናዉ ሀኖሶና!” ያጋዳ ዋስያ ዋሱዋ።
\c 5
\s1 ሱረ አስ ባዋ
\p
\v 1 “አነ የሩሳላመ ኦግያ ቦላ ከይተ፤ ፑደነ ዱገ ሄመትተ፤ እያ ዩሹዋ ፄልተነ አኬክተ፤ እያ ጉታራንካ ኮይተ። ፅሎ ፕርድያነ ቱማ ኮያ እስ አስ ህንተ ደምኮ፥ ታ የሩሳላመ ማራና። 
\v 2 ኤንቲ፥ ‘ደኦ ጎዳይ ኤርያ መላ’ ግድ ጫቅኮካ፥ ዎርዶ ጫቆሶና” ያጌስ ጎዳይ።
\p
\v 3 አቤት ጎዳዉ፥ ነ አይፈት ቱማ ፄሎኮናዬ? ነ ኤንታ ሾጫዳሳ ሽን ኤንታ ሳክቤና። ነ ኤንታ መንረዳሳ ሽን ኤንቲ ስሞና እፅዶሶና። ኤንቲ ባንታ ሶምኡዋ ዛላፈ አድ ምንድ ባንታ ናጋራፐ ስሞና እፅዶሶና።
\p
\v 4 ሄሳፈ ጉየ፥ ታኒ፥ “ሀይሳቲ ጎዳ ኦግያነ ባንታ ፆሳ ህግያ ኤሮና ግሾ፥ ማንቆነ ኤያ” ያጋዳ ቆፓስ። 
\v 5 ህዛ፥ ታ ግታ አሳታኮ ባዳ ኤንታዉ ኦዳና። ጎዳ ኦግያነ ባንታ ፆሳ ህግያ ኤሮሶና። ሽን ኤንቲ ኡባይ እያ ቃምባራ መንዶሶና፤ እያ ቃሹዋካ ዱዶሶና። 
\v 6 ኤንታ ማካላይነ ኤንታ ኩንደይ ዳሮ ግድያ ግሾ፥ ጋሞይ ዎራፐ ከይድ፥ ኤንታ ዎና። ሱመይ ባዞፈ ከይድ፥ ኤንታ ማና። ማሄይ ኤንታ ካታማታ ሆክድ ናጋና። ሄ ካታማታፐ ከይያ ኡባይ ፑዘታና።
\p
\v 7 “ታኒ ህንተ ናጋራ አይስ አቶ ጎ? ህንተ ናይት ታና አግድ፥ ዎርዶ ፆሳታን ጫቅዶሶና። ታኒ ኤንታ ሙዛዳ ካልሳስ፥ ሽን ኤንቲ ላይማትዶሶና፤ ኤንታ ኬን አቅዶሶና። 
\v 8 ኤንቲ ከትዳ ኮርማ ፓራዳ፥ ሀራ አሳ ማቾ ላገናዉ ስንገሶና። 
\v 9 ቱማ ታ ሀ ኦሶታ ግሾ፥ ኤንታ ሴራናዉ በስክና? ሀይሳ መላ ካዎተ ቦላ ታ ሃሉዋ ከይክና?” ያጌስ ጎዳይ።
\p
\v 10 “እ ዎይነ ጋድያ ግዶ ገልድ ኢስተ፥ ሽን ኩመ ይሶፍተ። ኤንቲ ጎዳባ ግዶና ግሾ እ ታሸታ ካርድ የግተ። 
\v 11 እስራኤለ አሳይነ ይሁዳ አሳይ ኩመ ካድዶሶና” ያጌስ ጎዳይ።
\p
\v 12 ኤንቲ ሀይሳዳ ግድ ጎዳ ቦላ ዎርዶ ኦደትዶሶና፦ “እ አይኮካ ኦና፤ ቆህያባይ አይብካ ኑ ቦላ ዬና። ሞርከ ማሻይ ዎይኮ ኮሽ ኑና ፖሎ ደመና። 
\v 13 ናበት ጫርኮ መላ፤ ኤንታን ፆሳ ቃላይ ባዋ። ሄሳ ግሾ፥ ኤንቲ ግያባ ኡባይ ኤንታ ጋኮ” ያጎሶና።
\p
\v 14 ሄሳ ግሾ፥ እስራኤለ አሳኮ፥ “ኤንቲ ሀ ቃላ ኦድዳ ግሾ ታኒ ታ ቃላ ነ ዶናን ታማ ኦና፤ ሀ አሳይ ም ግዳና፤ ታማይካ ኤንታ ማና” ያጌስ ጎዳይ፥ ኡባፈ ዎልቃማ ፆሳይ።
\p
\v 15 ጎዳይ እስራኤለ አሳኮ፥ “ህንተኖ፥ እስራኤለ አሳዉ፥ ታ ህንተ ቦላ ሃሆ ቢታፈ እስ ካዎተ ኤሀና። ኤንታ ቃላ ህንተ ኤሮና፥ ኤንታ ኦዳይ ህንተዉ ገሎና ዎልቃማነ በን ካዎተ። 
\v 16 ኤንታ ዶንገ ፓልኤ ሾሆይ ዶያ ዱፎ መላ፤ ኤንታ ኦላንቾት ዎልቃማ። 
\v 17 ኤንቲ ህንተ ካነ ህንተ ጎሻ አይፍያ ማና፤ ህንተ አደ ናይታነ ማጫ ናይታ ዎና፤ ህንተ ዶርሳነ መህያ ቦንቃና፤ ህንተ ዎይንያነ ባላሰ ም ይሳና። ህንተ አማነትያ፥ ግምበትዳ ካታማታ ባንታ ማሻን ኦልድ ይሳና” ያጌስ።
\p
\v 18 “ግዶሽን፥ ሄ ጋላሳታን ግድኮካ፥ ታኒ ታ አሳ ኩመ ይስከ” ያጌስ ጎዳይ 
\v 19 አሳይ ነና፥ “ ‘ጎዳይ ኑ ፆሳይ ኑ ቦላ ሀይሳ ኡባ አይስ ኦዴ?’ ግድ ኦይችኮ፥ ነ ኤንታኮ፥ ‘ህንተ ታና አግድ፥ ህንተ ቢታን እማ ፆሳታ ጎይንዳይሳዳ፥ ህንተካ አሳ ቢታን ሀራታስ ሀጋዛና’ ያጋ” ያግስ።
\p
\v 20 “ሀይሳ ያይቆባ አሳስ ኦዳ፤ ይሁዳ ቢታን አዋጃ። 
\v 21 ህንተኖ፥ አይፈይ ደእሽን በኦናይሳቶ፥ ሀይ ደእሽን ስኦናይሳቶ፥ ኤያነ አኬኮና አሳዉ ሀይሳ ስእተ! 
\v 22 ህንተ ታዉ ያያናዉ በሰኔ? ህንተ ታ ስንን ኮኮራናዉ ኮሸኔ? ያጌስ ጎዳይ። አባይ አድ ቦና መላ ሻፈ እያዉ ዛዋ ኦዳይ ታና? ዙለይ ሱግኮካ እያፐ አናዉ ዳንዳኤና፤ ሆበይ ደንድኮካ ካንድ አና። 
\v 23 ሽን ሀ አሳስ ሙመነ ማካላ ዎዛን ደኤስ። ኤንቲ ሀራ ሶ ስሚድ ዎራ ብዶሶና። 
\v 24 ኤንቲ ባንታ ዎዛናን፥ ‘ኑስ ስላ እራነ ቶርቸ እራ ዎደን ዎደን እምያ፥ ካ ሺሽያ ዎደ ኑስ እምያ ጎዳ አነ ያዮስ’ ያግቦኮና። 
\v 25 ህንተ ባላይ ሄሳ ተቅስ፤ ህንተ ናጋራይ ህንተና ሎኦባፐ አሽስ” ያጌስ።
\p
\v 26 “ታ አሳ ግዶን ኢታ አሳት ደኦሶና። ካፎ ኦይካናዉ ናግያ አሳዳ ሆክድ ናጎሶና። ኤንቲ ግተ የግድ አሳ ኦይኮሶና። 
\v 27 ካፎ ኬን ካፎይ ኩምዳዳ፥ ኤንታ ኬይ ጭሞን ኩምስ፤ ኤንቲ ዎልቃማነ ዱረ። 
\v 28 ኤንቲ ኦርደነ ሞ ግድዶሶና፤ ኤንታ ኢታ ኦሱዋስ ዛው ባዋ። ኤንቲ ይኦ ናይታ ግሾ ሞተቶኮና፤ ማንቆታስ ሱረ ፕርድቦኮና። 
\v 29 ያትን፥ ታኒ ሄሳ ግሾ ኤንታ ሴራናዉ በሰኔ? ሀይሳ መላ ካዎተ ቦላ ታ ሃሉዋ ከያናዉ በሰኔ?” ያጌስ ጎዳይ።
\p
\v 30 “ዳሮ ኢታባይነ ዳጋንያባይ ቢታ ቦላ ሀንስ። 
\v 31 ናበት ዎርዶ ኦዶሶና፤ ካህነት ኤንታ ዞርያን አይሶሶና። ታ አሳይካ ሄሳ መላባ ዶሴስ። ሽን ዉርሰን ህንተ ዋናኔ?” ያጌስ ጎዳይ።
\c 6
\s1 የሩሳላመይ ሞርከን ተቀትስ
\p
\v 1 ህንተኖ፥ ብንያመ አሳዉ፥ ህንተ ሸምፑዋ አሻናዉ ባቃትተ! የሩሳላመፐ ከይተ! ታቁሄ ካታማን ሞይዘ ፑንተ! ቤት-ሀካሬማን ማላ በስተ! ፑደሀ ባጋፈ ኢታባይነ ግታ ዮይ ያና ሀኔስ። 
\v 2 ታኒ ሎእያነ ኡፋይስያ ፅዮነ ካታማታ ይሳና። 
\v 3 ሄንንቾት ባንታ ዉድያ ኤክድ ያ ያና። እያ ዩሹዋን ባንታ ዱንካንያ ቶካና፤ እሶይ እሶይ ባ ዉድያ ሄማና። 
\v 4 “የሩሳላመ ኦላናዉ ጊገትተ! ደንድተ! እያ ሴታ ጋላስ ኦሎስ። ሽን አየ! ሳእ ቃሜስ፤ ኦማርሳ ኩያይ አዱቅ አዱቅ ቤስ። 
\v 5 ሄሳ ግሾ፥ ደንድተ! ቃማ ኦልድ እያ ሚፃ ላሎስ” ያግድ ማቀቶሶና።
\p
\v 6 ኡባፈ ዎልቃማ ጎዳይ ሀይሳዳ ያጌስ፦ “ምታ ቃንፅተ። የሩሳላመ ግምብያ ምየን ቢታ ዶርተ። ሄ ካታማን ናቆይ ኩምዳ ግሾ እ ሴረታናዉ በሴስ። 
\v 7 ሃ ኦል ሃ ፑልተይሳዳ እካ ባ ኢታተ ፑልቴስ። ማካልነ ዮይ እያ ግዶን ስኤቴስ፤ እያ ሀርገይነ ማዱንይ ታ ስንና። 
\v 8 ነኖ የሩሳላመ፥ ታ ሴራ ኤካ። አካይ፥ ጊኮ፥ ታ ኔፐ ሻከታናነ ነ ቢታ አስ ባይና ባይሳ ከሳና” ያጌስ።
\p
\v 9 “ዎይነ ፖሽልያዳ፥ እስራኤለ አሳ ግዶፈ አትዳይሳታ ሎይድ ፖሽልተ። ዎይነ ቆርያ አሳዳ፥ ህንተ ኩሽያ ዳሻታ ግዶ ዛሪድ የድተ” ያጌስ ኡባፈ ዎልቃማ ጎዳይ።
\p
\v 10 “ታ ኦደስ ኦዶ? ኦና ሴሮ? ኦን ስአኔ? ኤንቲ ስኦና መላ ኤንታ ሀይይ ቱልስ። ጎዳ ቃላይ ኤንታዉ ሚቻስ አትስ፤ ኤንቲ እያን ኡፋይቶኮና። 
\v 11 ጎዳ ሀንቆይ ታናን ኩምስ። ታ ሀ ሸንያ ተቃናዉ ዳንዳእከ። ኦገ ቦላ ደእያ ዮጋ ናይታ ቦላነ ሺቅዳ ናአተታ ቦላ ታ ሀንቁዋ ትጋ። ማችያ፥ አዝናይነ ጭምዳ አሳ ኡባይ አቶኮና። 
\v 12 ታኒ ሄ ቢታን ደኤይሳታ ቦላ ታ ኩሽያ የድያ ዎደ ኤንታ ኬይ፥ ኤንታ ጎሻይነ ኤንታ ማቸት ኡባይ ሀራታስ እመታና” ያጌስ።
\p
\v 13 “ጉፈ ግታ ጋካናዉ ኡባይ ባና ጎእያባ ኮዬስ። ናበትነ ካህነት ኡባይ ጭሞሶና። 
\v 14 ታ አሳ ማዱን ፓናባ ኦድ ጉ ለ ዎሶና። ሳሮይ ባይናሽን፥ ‘ሳሮ፤ ሳሮ!’ ያጎሶና። 
\v 15 ኤንቲ ሀ ሻትያ ኦሱዋ ኦድ ዬላትዶና? አካይ፥ ኤንቲ ኩመ ዬላትቦኮና፤ ኤንቲ ዬል አይበኮ ኤሮኮና። ሄሳ ግሾ፥ ኤንትካ ኩንድዳይሳታ ግዶን ኩንዳና። ታኒ ኤንታ ሴርያ ዎደ ኤንታ ካዉሻና” ያጌስ ጎዳይ።
\p
\v 16 ጎዳይ ሀይሳዳ ያጌስ፦ “ኦግያን ኤቅድ ፄልተ፤ በን ኦገይ ደእያ በሳ ኦይችተ። ሎኦ ኦገይ አዉን ደእያኮ ኦይችድ እያን ሄመትተ፤ ህንተ ሸምፖ ደማና። ሽን ህንተ፥ ኑኒ ሄ ኦግያን ሄመቶኮ!” ያግደታ። 
\v 17 ታኒ ናገይሳታ ህንተ ቦላ ሹማዳ፥ “ሞይዘ ግርሳ ስእተ” ያጋስ። ሽን ህንተ፥ “ኑ ስኦኮ” ያግደታ።
\p
\v 18 “ሄሳ ግሾ፥ ካዎተቶ፥ ስእተ! ታኒ ታ አሳ ቦላ ኦናባ አኬክተ። 
\v 19 ሳአን ደእያ አሳዉ፥ ሀይሳ ስእተ! ኤንቲ ታ ቃላ ስኦና እፅዳ ግሾነ ታ ህግያ ካዳ ግሾ ታ ኤንታ ቦላ ዮ ኤሀና። 
\v 20 ሳባ ቢታፈ እፃነ ዎይኮ ሃሆ ቢታፈ ይዳ ሳዎይነ ቅማመይ ታዉ አይሴ? ህንተ ፁሳ ያርሾይካ ኤከተና። ህንተ ያርሾይ ታና ኡፋይሰና” ያጌስ።
\p
\v 21 ሄሳ ግሾ፥ ጎዳይ፥ “ታኒ ሀ አሳ ስንን በ ዎና፤ አዋትነ ናይት ኤንታን በታና፤ ሾሮትነ ላገት ያና” ያጌስ።
\p
\v 22 ጎዳይ፥ “ፑደሀ ባጋ ቢታፈ ኦላንቾት ዮሶና፤ እስ ግታ ካዎተይ ሳኣ ጋፃፐ ደንድስ። 
\v 23 ኤንቲ ዶንገነ ቶራ ዳንጭዶሶና፤ ኤንቲ ቃይ ባይና ዎዛና ምኖታነ ማሮተ ኤሮናይሳታ። ኤንቲ ፓራን ጋላብያ ዎደ አባዳ ጉሞሶና። ህንተኖ፥ ፅዮነ ካታማ አሳዉ፥ ኤንቲ ህንተና ኦላናዉ ሳልፕዶሶና” ያጌስ።
\p
\v 24 ኑኒ ሄ ኦዳ ስእን፥ ኑ ኩሸይ አርጋጭስ፤ ማጫስ እቀ ኦይከይሳዳ ኑና መቶይነ ኡንእ ኦይክስ። 
\v 25 ሞርከይ ማሻ ኦይክዳ ግሾነ ያን ሀን ዳጋም ደእያ ግሾ ሶፐ ከዮፕተ፤ ኦገ ቦላካ በንቶፍተ። 
\v 26 ይሰይስ ቆፖና ኑ ቦላ ያና ግሾ፥ ካዮ ማኦ ማእድ፥ ብዶ ቦላ ጎንዶረትድ፥ አስ ባ እስ ናአስ ዬክያ መላ ታ አሳስ ዬክተ።
\p
\v 27 ጎዳይ ኤርምያሳኮ፥ “ኔኒ ኤንታ ኦግያ ፆሞሳና መላነ ፓጫና መላ ብራታ ፓጭያ አሳዳ ታ ነና ኦስ። 
\v 28 ኤንቲ ኡባይ ዝግራናዉ ዩዮሶና፤ ኦድን ስኦና ማካላንቾታ። ኤንቲ ናሰ ብራታዳነ ብራታዳ ምኖ፤ ኤንቲ ኡባይ ናጋራ ኦሶና። 
\v 29 ብራታ ቦላ ደእያ ሽአ ፁግድ ጌሻናዉ ግልፐይ ፑኔስ። ሽን ጌሻናዉ ዋይዳ ዋየይ ጮ ግድስ፤ ታ አሳ ግዶን ደእያ ኢታት ክችቦኮና። 
\v 30 ጎዳይ ኤንታ የግድ አግዳ ግሾ፥ ኤንቲ የገትዳ ብራ ጌተታና” ያጌስ።
\c 7
\s1 ቢታን ደእያ ኢታተ
\p
\v 1 ጎዳፐ ኤርምያሳኮ ይዳ ቃላይ ሀይሳ፦ 
\v 2 “ፆሳ ኬ ፐንግያን ኤቃዳ፥ ሀይሳዳ ያጋዳ አዋጃ። ህንተኖ፥ ጎዳ ጎይናናዉ ሀ ፐንገታራ ገልያ ይሁዳ አሳዉ፥ ኡባይ ጎዳ ቃላ ስእተ! 
\v 3 ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦ ህንተ ኦግያነ ህንተ ኦሱዋ ላምተ፤ ታ ህንተና ሀ በሳን ዎና። 
\v 4 ‘ሀይስ ፆሳ ኬ! ሀይስ ፆሳ ኬ! ሀይስ ፆሳ ኬ’ ያግድ ጭሞ ቃላን አማነቶፍተ። 
\v 5 ህንተ፥ ህንተ ኦግያነ ኦሱዋ ቱማ ላምኮ፥ እሶይ እሱዋስ ፅሎ ፕርድኮ፥ 
\v 6 በተ አሳ፥ ይኦ ናይታነ አምኤታ ናቆና አግኮ፥ ሀ በሳን ፅሎ አሳ ሱ ጉሶና አግኮነ፥ ህንተ ቆሄቶናዳ ሀራ ፆሳታ ጎይኖና አግኮ፥ 
\v 7 ታ ህንተ ማይዛታስ መርናዉ እምዳ ቢታን ህንተና ዎና። 
\v 8 ሽን ህንተ ማዶና ጭሞ ቃላን አማነተታ” ያጌስ።
\p
\v 9 “ህንተ ካይሶቴታ፥ ዎታ፥ ላይማተታ፥ ዎርዶ ጫቅድ ማርካቴታ፥ ባኣለ ኤቃስ ያርሾ ያርሼታ፥ ሀይሳፈ ካሰ ህንተ ኤሮና ሀራ ፆሳታ ጎይነታ። 
\v 10 ያትድ፥ ታ ሱንን ፄገትዳ ፆሳ ኬ ይድ፥ ታ ስንን ኤቅድ፥ ‘ኑኒ ሳሮ’ ያጌታ። ሽን ሀ ሻትያ ኦሱዋ ኡባ ኦታ 
\v 11 ታ ሱንን ፄገትዳ ሀ ፆሳ ኬይ ህንተዉ ፓንጋት ቆሰትያ ጎንጎሎ ግደትዬ? ህንተ ኦያባ ኡባ ታኒ ታ አይፈን በአስ” ያጌስ።
\p
\v 12 “ታኒ ታ ሱንይ ደእያ በሲ ኦዳ ኮይሮ ዶርዳ፥ ሴሎ ቢተ። ታ አሳ እስራኤለ ኢታተ ግሾ፥ ታኒ ሄ በሳ ዋትዳኮ በእተ። 
\v 13 ህንተ ሀ ኡባ ኦያ ዎደ ታ ህንተዉ ዛራ ዛራ ኦዳስ፤ ሽን ስኦና እፅደታ። ታ ህንተና ፄጋስ፤ ሽን ታዉ ኮይበከታ። 
\v 14 ሄሳ ግሾ፥ ታ ሴሎ ቦላ ኦዳይሳዳ ሀይሳን ህንተ አማነትያ፥ ታ ሱንን ፄገትዳ ሀ ፆሳ ኬ ቦላ፥ ህንተዉነ ህንተ ማይዛታስ እምዳ ሀ በሳ ቦላ ሄሳዳ ኦና። 
\v 15 ህንተ ዳቦታ፥ ኤፍሬማ ኮቻ ታ ድግዳይሳዳ ታ ስንፈ ህንተናካ ድጋና” ያጌስ።
\p
\v 16 “ኤርምያሳ፥ ታ ስኦና ግሾ፥ ሀ አሳስ ዎሶፋ፤ ኤንታ ግሾ ታና ኦይቾፋ ዎይኮ ዋሶፋ፤ ኤንታዉ ጋናቶፓ። 
\v 17 ኤንቲ ይሁዳ ካታማታንነ የሩሳላመ ኦገታን ኦያባይ አይበኮ በእክዬ? 
\v 18 ናይት ም ምፆሶና፤ አዋት ታማ ኤሶና፤ ማጫሳት፥ ‘ሳሎ ካዊዉ’ ጌተትያ ኤቄስ ኡይ ኡካናዉ ለ ሙኑቆሶና። ኤንቲ ታና ይሎያናዉ ኡሻ ያርሾ ሀራ ፆሳታስ ጉሶሶና። 
\v 19 ኤንቲ ሀይሳ ኦይ ቱማ ታና ቆሀናሰዬ? ሀይሳን ቆሄትድ ዬላታናይ ኤንታ ግዶኮናዬ?” ያጌስ ጎዳይ።
\p
\v 20 ሄሳ ግሾ፥ ኡባ ሃርያ ጎዳይ ሀይሳዳ ያጌስ፦ “ታ ሀንቆይ ሀ በሳ ቦላ፥ አሳ ቦላነ መህያ ቦላ፥ ጋደን ደእያ ም ቦላነ ቢታን ደእያ ካ ቦላ ጉካና፤ እ ኤፃና፥ ቶአናዉ ዳንዳኤና።”
\p
\v 21 ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦ “ህንተ ፁሳ ያርሹዋ ሀራ ያርሾታ ቦላ ጉጅድ፥ አሹዋ ህንተዉ ሚተ። 
\v 22 ታ ህንተ ማይዛታ ግብፀ ቢታፈ ከስያ ዎደ፥ ፁሳ ያርሾባነ ሀራ ያርሾታባ ኦዳብከ ዎይኮ ኪታብከ። 
\v 23 ሽን ታ ኤንታኮ፥ ታዉ ኪተትተ፤ ታ ህንተ ፆሳ ግዳና፤ ህንተካ ታ አሰ ግዳና። ህንተዉ እንጀታና መላ ታ ህንተና ኪትያ ኦገ ኡባን ሄመትተ። 
\v 24 ሽን ኤንቲ ታና ስኦና ዎይኮ ታዉ በሰ እሞና እፅዶሶና። ኤንቲ ባንታ ኢታ ዎዛና ቆፋ ካልድ ብዶሶና፤ ስን ባናይሳ አግድ ጉየ ብዶሶና። 
\v 25 ህንተ ማይዛት ግብፀፈ ከይዳ ዎደፐ ዶምድ ሀች ጋካናዉ ታ አይለታ፥ ናበታ ዎንታ ዎንታ ህንተዉ ኪታስ። 
\v 26 ሽን ህንተ ታና ስኦና ዎይኮ ታዉ በሰ እሞና እፅደታ። ህንተ ሞርግያ ምንደታ፤ ህንተ አዋታፐ አድ ኢታባ ኦደታ።
\p
\v 27 “ሀ ኡባ ነ ኤንታዉ ኦዳ፤ ሽን ኤንቲ ነ ግያባ ስኦኮና። ነ ኤንታ ፄጋና፤ ሽን ኤንቲ ኮዮኮና። 
\v 28 ሄሳ ግሾ፥ ኤርምያሳ፥ ነ ኤንታኮ ሀይሳዳ ያጋ፦ ሀ ካዎተይ ባ ጎዳ ፆሳ ኪተቶና ዎይኮ እያ ዞርያ ስኦና ካዎተ። ቱም ይስ፤ ቱም ኤንታ እንፃርሳን ዴና። 
\v 29 ህንተ ሁጵያ ሜድድ ዎራ ሆልተ። ጎዳይ ባና ይሎይዳ የለታ እፅዳ ግሾነ የግድ አግዳ ግሾ አይብካ ባይና ቃ ዙማ ቦላ ከይድ ዘሌልተ” ያግስ።
\p
\v 30 “ይሁዳ አሳይ ታ ስንን ኢታባ ኦዶሶና። ኤንቲ ታ ሱንን ፄገትዳ ፆሳ ኬ ቱንሳናዉ ታኒ እፅያ ኤቃታ ኤህድ እያ ግዶን ዎዶሶና። 
\v 31 ኤንቲ ባንታ አደ ናይታነ ማጫ ናይታ ታማን ፁግድ ያርሻናዉ፥ ህኖማ ዛንጋራን ቶፈታ ጌተትያ ያርሾ በሳ ግምብዶሶና። ሽን ሄስ ታ ኤንታ ኪታቦናባነ ታ ቆፋን ባይናባ። 
\v 32 ሄሳ ግሾ፥ ሄ በሳይ ህኖማ ዛንጋራ ዎይኮ ቶፈታ ጌተትድ ፄገተይስ አትድ፥ ሹካ ዛንጋራ ያገትድ ፄገታና ዎደይ ያና። ሞግያ በሲ ባይና ግሾ፥ ቶፈት ኤንቲ ባንታ አሀ ሞግያ በሲ ግዳና። 
\v 33 ሄ ዎደ ሄ አሳ አሀይ ሳሎ ካፎታስነ ሳአ ዶአታስ ካ ግዳና፤ ኤንታ ጎዳና አስካ ባዋ። 
\v 34 ታኒ የ፥ ኡፋይስነ ያጋኖ ግርስ ይሁዳ ካታማታንነ የሩሳላመ ኦገታን ስኤቶናዳ ኦና፤ ቢታይ ባይሳ ግዳና” ያጌስ ጎዳይ።
\c 8
\p
\v 1 “ሄ ዎደ ይሁዳ ካዎታ መቀይ፥ ሀላቃታ መቀይ፥ ካህነታ መቀይ፥ ናበታ መቀይነ የሩሳላመን ደእያ አሳ መቀ ኡባይ ዱፎፐ ማፀትድ ከያና። 
\v 2 ኤንቲ ሲቅዳ፥ ኪተትዳ፥ ካልዳ፥ ዞረ ኦይችዳነ ጎይንዳ አዋ፥ አጌናነ ሳሎ ፆልንቶታ ኡባ ስንን ምጨታና። ኤንታ መቀይ ሺቀና ዎይኮ ሞገተና፤ ሽን ቢታ ቦላ ፕቶ መላ የገታና። 
\v 3 ታ ላልዳ በሳታን ደእያ፥ ሀ ኢታ ካዎተፈ አትዳ አሳ ኡባይ ደኦፐ ሀይቆ አሞታና” ያጌስ ኡባፈ ዎልቃማ ጎዳይ።
\s1 ናጋራነ ፕርዳ
\p
\v 4 ጎዳይ ሀይሳዳ ያጌስ ጋዳ ኦዳ፦ “እስ አስ ኩንድኮ፥ ስሚድ ደንደነዬ? ዎይኮ እስ አስ ኦገ ባለትኮ ጉየ ስመነዬ? 
\v 5 ያትን፥ ሀ አሳይ አይስ ጉየ ስምዴ? የሩሳላመይ አይስ ኡባ ዎደ ኦገ ባሌቲ? ኤንቲ ጭሞ ባቅድ ኦይክዶሶና፤ ስሞና እፅዶሶና። 
\v 6 ታ ምንዳ ሀይዛስ፤ ሽን ኤንቲ ቱማ ሃሳዮኮና። ‘ታ አይ ኦድና?’ ግድ ባ ኢታ ናጋራ ፓፀይ እሶይካ ባዋ። ኡባይ ኦላስ ጋላብያ ፓራዳ ባዉ ባዉ ዎፄስ። 
\v 7 ሀር አቶሽን፥ ሃ ካፎት ባንታ ዎድያ ኤሮሶና፤ ሆለት፥ ካሮትነ ማስቃላ ካፎት ባንታ ስምያ ዎድያ ናጎሶና፤ ሽን ታ አሳይ ጎዳ ዎጋ ኤሮኮና።
\p
\v 8 “ያትን ዋንድ፥ ‘ጎዳ ህገይ ኑራ ደእያ ግሾ ኑ ጭንጫ’ ጋናዉ ዳንዳኤቲ? ዎርዳንቾ ፃፈት ታ ህግያ ዎርዶ ከስዳይሳ በኤከቲ? 
\v 9 ጭንጫት ዬላታና፤ ኤንቲ ካዉያናነ ኦይከታና። ኤንቲ ጎዳ ቃላ እፅን፥ ኤንታዉ አይ ጭንጫተ ደኢ? 
\v 10 ሄሳ ግሾ፥ ታ ኤንታ ማቸታ ሀራታስ፥ ኤንታ ጎሻ አላጋ አሳስ እማና። ጉፈ ግታ ጋካናዉ በሶና ጎአስ ዪቀቶሶና። ናበትነ ካህነት ኡባይ አሳ ጭሞሶና። 
\v 11 ኤንቲ ታ አሳ ማዱን ላፋ ግድ፥ ጉ ለ ዎሶና። ሳሮይ ባይናሽን ‘ሳሮ፥ ሳሮ!’ ያጎሶና። 
\v 12 ሀ ሻትያ ኦሱዋ ኦሸ፥ ኤንቲ ዬላትዶና? አካይ፥ ኤንቲ አይኮካ ዬላትቦኮና። ኤንቲ ዬል አይበኮ ኤሮኮና። ሄሳ ግሾ፥ ኤንቲ ኩንድዳይሳታ ግዶን ኩንዳና፤ ኤንቲ ሴረትያ ዎደ ካዉያና። 
\v 13 ኤንታ ጎሻ አይፍያ ታ ኤንታፈ ኤካና። ኤንታ ዎይነ አይፈይ ያና፤ ባላሰ ም አይፈይ በንተና። እያ ቦንጮይ ሹላና፤ ታ ኤንታዉ እምዳባ ኤንታፈ ኤካና” ያጌስ ጎዳይ።
\p
\v 14 አሳይ ዛሪድ ሀይሳዳ ያጎሶና፦ “ኑ ስእ ግድ አይስ ኡታኔ? አነ ሺቅተ፤ ግምበትዳ ካታማታ ገልድ ያን ሀይቃና። ጎዳይ ኑ ፆሳይ ኑና ሀይቆስ አድ እሚስ። ኑ እያ ቦላ ናጋራ ኦዳ ግሾ፥ ኑ ዎያ ሃ ኡያና መላ ኦስ። 
\v 15 ሳሮተ ኡፋይሳን ናግዳ፤ ሽን ሎኦባይ ይቤና። ኑ ፓፆ አሞትዳ፤ ሽን ዳጋማ ግድስ። 
\v 16 ሞርከ ፓራ ጋርማሞይ ዳነ ካታማን ስኤቴስ፤ ኤንታ ኮርማ ፓራታ ጫገን ቢት ቃፄስ። ኤንቲ ቢታነ ቢታን ደእያባ ኡባ፥ ካታማነ ካታማን ደእያ አሰ ኡባ ምድ ይሳናዉ ይዶሶና። 
\v 17 ታኒ ሾሻታ ህንተ ግዶ የዳና። ብት ተቃናዉ ዳንዳኦና ሀሶ ሾሻታ ህንተ ግዶ የዳና፤ ኤንቲ ህንተና ዱካና” ያጌስ ጎዳይ።
\p
\v 18 ታ አዛኑዋስ ምንይ ባዋ፤ ታ ዎዛናይ ትልእስ። 
\v 19 ታ አሳይ ሃሆ ቢታን ዋስያ ዋሱዋ ስእተ። ኤንቲ፥ “ጎዳይ ፅዮነን ባዌ? ሀ ፅዮነ ካዎይ ዛሪድ ያን ዴኔ?” ያግድ ዋሶሶና።
\p ጎዳይ ኤንታ ካዎይ፥ “ኤንቲ ባንታ መዳ ምስለታን፥ ባንታ ፓና አላጋ ኤቃታን ታና አይስ ይሎይዶና?” ያግስ።
\p
\v 20 አሳይ ዛሪድ፥ “ሄኮ ጫካ ዎደይ አስ፤ ቦነይ ዉርስ፤ ኑኒ አትቦኮ” ያግድ ዋሶሶና።
\p
\v 21 ታ አሳይ ማዱንፅዳ ግሾ፥ ታ ዎዛናይካ ማዱንፅስ። ታ ካዮታስ፤ ያሽ ታና ኦይክስ። 
\v 22 ጋላዳን ትየትያ ለይ ባዌ? ያን አክመይ ዴኔ? ያትን፥ ታ አሳ መቆይ አይስ ፓፀኔ?
\c 9
\p
\v 1 ሀይቅዳ ታ አሳስ ቃማነ ጋላስ ዬካና መላ ታ ሁጰይ ሃ ኦላ፥ ታ አይፈይ ፑልቶ ሃ ግዴረነ። 
\v 2 ኤንቲ ኡባይ ማካላነ ላይማትያ አስ ግድያ ግሾ፥ ታኒ ታ አሳፐ ሻከታዳ ባና መላ፥ ኦገ አስ አቅያ በሲ፥ ታዉ መላ ቢታን ደኤረነሽን።
\p
\v 3 “ኤንቲ ባንታ እንፃርሳን ዎርዶ ኦደታናዉ ኡባ ዎደ ጊግድ ደኦሶና። ኤንታ ቢታን ቱማ ግዶናሽን ዎርዶይ ካዎትስ። ኤንቲ እስ ናጋራፐ ሀራ ናጋራን ፕንዶሶና፤ ታና ኤሮኮና” ያጌስ ጎዳይ።
\p
\v 4 “እሽ ጭመይሳ፥ ሾሮይ ዝግረይሳ ግድያ ግሾ ሾሩዋፐ ናገቶ፤ እሻይ እሻ አማነቶፎ። 
\v 5 ሾሮይ ሾሩዋ ጭሜስ፤ ቱማ ኦደተይ ዴና። ዎርዶ ኦደታና መላ ባንታ እንፃርሳ ታማርስዶሶና፤ ናጋራ ኦሶን ባንታና ዳቡርስዶሶና። 
\v 6 ነ ጭሞ ግዶን ደኣሳ፤ ኤንቲ ባንታ ጭሙዋን ታና ኤሮና እፅዶሶና” ያጌስ ጎዳይ።
\p
\v 7 “ሄሳ ግሾ፥ ታ ኤንታ ብራታዳ ሴርሳና፤ ኤንታ ፓጫና። ታ አሳ ግሾ፥ ታ ሀራባ አይ ኦናዉ ዳንዳእያና? 
\v 8 ኤንታ እንፃርሳይ ዎያ ዶንገ ቶራ መላ፤ ኤንቲ ጭሞን ሃሳዮሶና። ባንታ ዶናን እሶይ እሱዋራ ሳሮ ቃላ ሃሳዮሶና፤ ሽን ባንታ ዎዛናን ፅሄ ዎሶና። 
\v 9 ያትን፥ ታ ሀ ሀኖታስ ኤንታ ሴራናዉ በሰኔ? ታኒ ሀይሳ መላ ካዎተ ቦላ ሀሎ ከያናዉ በሰኔ?” ያጌስ ኡባፈ ዎልቃማ ጎዳይ።
\p
\v 10 ታኒ ቃ ደረታስ ዬካና፤ ኤንታ ግሾ ዋሳና፤ ባዞን ደእያ ሄን ጋደታስ ዘሌላና። ኤንቲ ይዶሶና፤ ያራ እስ አስካ አና። መሄ ዋሶይ ስኤተና፤ ሳሎ ካፎትነ ዶአት ባቃትዶሶና።
\p
\v 11 “የሩሳላመ ካታማ ላለትዳ ኬላነ ዎርካናት ጉፕያ በሲ ኦና። ይሁዳ ካታማታ ኦንካ ዶና ባይሳ ከሳና” ያጌስ ጎዳይ።
\p
\v 12 ሀይሳ አኬካናዉ ዳንዳእያ ጭንጫ አስ ኦኔ? ሀራ አሳስ ኦዳና መላ ጎዳይ ኦደስ ቆንጭስዴ? እስ አስካ እያ ግዶራ አና መላ ቢታይ ኢትድ ባዞዳ ኦንዳይ አይብሴ?
\p
\v 13 “ሀይስ ሀንዳይ፥ ኤንታዉ ታ እምዳ ህግያ ኤንቲ አግዳ ግሾሳ። ኤንቲ ታዉ ኪተቶናነ ሀ ህግያ ካሎና እፅዳ ግሾሳ። 
\v 14 ሄሳ አግድ፥ ኤንቲ ባንታ ዎዛና ሙመተ ካልዶሶና፤ ኤንታ አዋት ታማርስዳ ባኣለ ጌተትያ ኤቃ ጎይንዶሶና” ያጌስ ጎዳይ።
\p
\v 15 ሄሳ ግሾ፥ ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦ “ታኒ ሀ አሳ ጫምያ ካ ሙዛና፤ ዎያ ሃ ኡሻና። 
\v 16 ኤንቲ ዎይኮ ኤንታ አዋት ኤሮና ካዎተታ ግዶን ታ ኤንታ ላላና። ኤንታ ይሳና ጋካናዉ ማሻን የደና” ያጌስ።
\p
\v 17 ኡባፈ ዎልቃማ ጎዳይ ሀይሳዳ ያጌስ፦ “አነ ቆፕተ። ዬሆ ዬክያ ማጫሳታ ፄግተ፤ ዘለልስ ኤርያ አሳታ ኤህተ። 
\v 18 ኤንቲ ኤለስድ ይድ፥ ኑ አይፈይ አፉ ሆል ኦና ጋካናዉነ ኑ አይፍያ ጭሮይ ሃ ፑልታና ጋካናዉ ዘለልስ ከሶ። 
\v 19 ፅዮነን ዘለልሳ ግርስ ስኤቴስ፤ ‘ኑ ይዳ! ኑ ካዉይዳ! ኑ ኬይ ላለትዳ ግሾ፥ ኑ ቢታ አግድ ባናዉ ኮሼስ’ ” ያጎሶና።
\p
\v 20 ህንተኖ፥ ማጫሳቶ፥ ጎዳ ቃላ ስእተ! ህንተ ሀይይ እያ ዶናፐ ከይያ ቃላ ሀይዞ። ህንተ ማጫ ናይታ ዘለልስ ታማርስተ፤ እሶይ እሱዋ ዬሆ ታማርሶ። 
\v 21 ሀይቆይ ዮጋ ናይታ ኦገን፥ ናአተታ ዳባባን ቄፅሸ ይድ፥ ኑ ማስኮተታ ጋክስ፤ ኑ ሚፃ ገልስ።
\p
\v 22 “አሳ አህ ቡረዳ ደንባን የገታና፤ ጫከይሳት ጫክድ ጉየ የግዳ ካ መላ ኤንታ ኦንካ ሺሸና” ያጌስ ጎዳይ።
\p
\v 23 “ጭንጭ ባ ጭንጫተን ጬቆፎ፤ ዎልቃም ባ ዎልቃን ጬቆፎ፤ ዱረይ ባ ዱረተን ጬቆፎ። 
\v 24 ሽን ጬቅያ ኦንካ ታና ኤሮንነ አኬኮን ጬቆ። ማሮተ፥ ሱረ ፕርዳነ ፅሎተ ሳአ ቦላ ኦያ ጎዳ፥ ታና ኤርድ ጬቆ፤ ሄስ ታና ኡፋይሴስ” ያጌስ ጎዳይ።
\p
\v 25 “ባንታ አሾ ፃላላ ቃፃረትዳ አሳ ታ ሴራና ዎደይ ያና። 
\v 26 ሄሳትካ ግብፀ፥ ይሁዳ፥ ኤዶመ፥ አሞነነ ሞአበ አሳነ ባንታ ሁጵያ ዩሹዋ ሜድድ፥ መላ ቢታን ደእያ አሳ ኡባ። ሀ ካዎተት ኡባይ ቱማ ቃፃረትቦኮና፤ እስራኤለ አሳ ኡባይካ ባንታ ዎዛናን ቃፃረትቦኮና” ያጌስ ጎዳይ።
\c 10
\s1 ቱማ ፆስነ ኤቃታ
\p
\v 1 ህንተኖ፥ እስራኤለ አሳዉ፥ ጎዳይ ኦድያ ቃላ ስእተ! 
\v 2 ጎዳይ ሀይሳዳ ያጌስ፦ “ሀራ ካዎተታ ኦግያ ታማሮፕተ። ኤንቲ ሳሎ ቦላ ማላታ በእድ ዳጋምኮካ፥ ህንተ ዳጋሞፕተ። 
\v 3 ኤንታ ዎጋይ ሀዳ፤ ኤንቲ ዎራፐ ም ቃንፆሶና፤ ማሰይስ ካልታን ማሴስ። 
\v 4 ኤንቲ ብራንነ ዎርቃን አሌቅሶሶና፤ ቃፆናዳ ምስማረን ሽድ ኦይሶና። 
\v 5 ኤንታ ኤቃት ሌሄ ግዶን ካፎ ዳጋንናዉ ኤስያ ማላ መላ። ኤንቲ ኦደቶኮና፤ ኤንቲ ሄመታናዉ ዳንዳኦና ግሾ አሳይ ኤንታ ቶኮሶና። ኤንታስ ኩም ያዮፍተ። ኤንቲ ቆሀናዉካ ማዳናዉካ ዳንዳኦና ግሾ ኤንታዉ ያዮፍተ” ያጌስ ጎዳይ።
\p
\v 6 አቤት ጎዳዉ፥ ነ ማል ኦንካ ባዋ። ኔኒ ግታ፤ ነ ሱንይካ ግታነ ዎልቃማ። 
\v 7 አቤት ካዎተታ ካዋዉ፥ ነና ቦንቾናይ ኦኔ? ጭንጫ አሳ ግዶንነ ኤንታ ካዎተ ግዶን ነ መል ባይና ግሾ ነዉ ቦንቾ በሴስ። 
\v 8 ኤንቲ ኤያነ ኤር ይዳይሳታ፤ ኤንቲ ምፈ ማስዳ፥ ፓና ኤቃታፐ አይ ታማሮና? 
\v 9 ሄ ኤቃት ታርሰሳ ብራንነ አፌዛ ዎርቃን አሌቀትዶሶና። ኤንቲ ኡባይ ኩሸ ሂላንቾታን ኦሰትዳ ዎይነነ ካሎሰ ዳንያ ማኡዋን ካመትዶሶና። 
\v 10 ሽን ጎዳይ ቱማ ፆሳ፤ እ ደኦ ፆሳነ መርና ካዋ። እያ ሀንቁዋን ቢታይ ቃፄስ፤ ካዎተት እያ ይሉዋ ዳንዳኦኮና።
\p
\v 11 “ሀይሳቲ ሳሎነ ሳአ መቦና ፆሳት ሳአፐነ ሳሎፐ ያና” ያጋዳ ኔኒ ኤንታዉ ኦዳ።
\q1
\v 12 ባ ዎልቃን ሳኣ መዳይ፥
\q2 ባ ጭንጫተን ሳኣ ኤስዳይ፥
\q2 ባ አኬካን ሳሎታ ምጭዳይ፥ ፆሳ።
\q1
\v 13 እ፥ ባ ኮሽንቻ ስስያ ዎደ፥
\q2 ሳሎን ደእያ ሃት ጉሞሶና።
\q1 እ ሻራ ሳአ ጋፃፐ ፑደ ደንስ፤
\q2 ዎልአን እራራ የዴስ፤
\q2 ጫርኩዋ ባ ምንጃ ኬፈ ከሴስ።
\q1
\v 14 አስ ኡባይ ኤራ ይድ ኤይስ፤
\q2 ዎርቃ ሼሽያ ኡባይ ባ ኤቃን ዬላትስ።
\q1 ኤንቲ መዳ ኤቃት ዎርዶ፤
\q2 ኤንታዉ ሸምፖይ ባዋ።
\q1
\v 15 ኤንቲ ፓናባነ ሀዳ፤
\q2 ኤንቲ ሴረትያ ዎደ ያና።
\q1
\v 16 ሽን እ ኡባ መዳ ግሾ፥
\q2 ያይቆባ ሳማ ግድዳ ፆሳይ
\q2 ሄሳ መላ ግደና፤
\q2 እስራኤለይ፥ እ ባዉ ዶርዳ ካዎተ፤
\q2 እያ ሱንይ ኡባፈ ዎልቃማ ጎዳ።
\s1 ያና ዮ
\p
\v 17 ህንተኖ፥ ሞርከይ ተቅዳይሳቶ፥ ቢታፈ ከያናዉ ህንተዉ ደእያባ ሺሽተ። 
\v 18 “ታኒ፥ ሀ ዎድያን፥ ሀ ቢታን ደእያ አሳ ከሳዳ ያምባራና። ኤንታ ቆሆይ ኤረታና ጋካናዉ ኤንታ ቦላ ኢታባ ኤሀና” ያጌስ ጎዳይ።
\p
\v 19 ታ ማዱንፃስ! ታ ማዱንይ ፓፀና። ሽን ታኒ፥ “ሀይስ ታ ሀርገ፤ ታ ዳንዳአናዉ በሴስ” ያጋስ።
\p
\v 20 ታ ዱንካነይ ላለትስ፤ እያ ዎዶሮ ኡባይ ዱፀረትስ። ታ ናይት ኡባይ ታፐ ሻከትድ ብዶሶና፤ ኤንቲ ባዋ። ታ ዱንካንያ ዛሪድ ቶካናዉ ዎይኮ ታ ማጋራጁዋ ካቃናዉ እስ አስካ አትቤና።
\p
\v 21 ሄንንቾት ኤይዶሶና፤ ኤንቲ ጎዳ ኦይችቦኮና። ሄሳ ግሾ፥ ኤንታዉ እንጀቶና እፅስ፤ ኤንታ ዉደ ኡባይ ላለትስ። 
\v 22 ኦራ ኦድ ይስ፤ ስእተ። ፑደሀ ባጋን ደእያ ካዎተን ግታ ድርጎይ መትስ። እያ ኦላንቾት ይድ፥ ይሁዳ ካታማታ ባይሳነ ዎርካናት ጉፕያ በሲ ከሳና።
\p
\v 23 አቤት ጎዳዉ፥ አሳ ደኦይ እያዉ ቡዞ ግዶናይሳነ ባ ኦግያ ሱርሳናዉ እያ ሸነ ግዶናይሳ ታ ኤራይስ። 
\v 24 አቤት ጎዳዉ፥ ታና ሴራ፤ ሽን ልከራ ግዶ። ታ ዮና መላ ነ ሀንቁዋን ታ ቦላ ዮፓ። 
\v 25 ነ ሸንያ፥ ነና ኤሮና ካዎተታ ቦላነ ነ ሱን ፄጎና አሳ ቦላ ጉሳ። ኤንቲ ያይቆባ አሳ ምዶሶና፤ ኤንታ ምትዶሶና፤ ኤንታ ቢታ ይስዶሶና።
\c 11
\s1 ናገትቦና ጫቁዋ
\p
\v 1 ጎዳፐ ኤርምያሳኮ ይዳ ቃላይ ሀይሳ፦ 
\v 2 “ሀ ጫቆ ቃላ ስአዳ ይሁዳ አሳስነ የሩሳላመ ካታማን ደእያ አሳስ ኦዳ። 
\v 3 ጎዳይ እስራኤለ ፆሳይ ሀይሳዳ ያጌስ ጋዳ ኦዳ። ‘ሀ ጫቁዋ ናጎና አስ ኦንካ ባደትዳይሳ ግዶ’። 
\v 4 ታኒ ካሰ ህንተ አዋታ ግብፀ ቢታፈ፥ ብራታ ሴርስያ ጮጭያፐ ከስያ ዎደ፥ ‘ታዉ ኪተትተ፤ ታ ህንተና ኪትያባ ኡባ ኦተ። ህንተ ታ አሰ ግዳና፤ ታካ ህንተ ፆሰ ግዳና’ ያጋዳ ኦዳስ። 
\v 5 ሄሳዳካ፥ ማነ ኤስ ጎግያ ቢታ ካሰ ህንተ አዋታስ እማናዉ፥ ታኒ ጫቅዳ ጫቁዋ ፖላና።”
\p ታኒ፥ “ኤሮ፥ ጎዳዉ፥ አምንእ” ያጋስ።
\p
\v 6 ጎዳይ ታኮ፥ “ሀ ቃላታ ኡባ ይሁዳ ካታማታንነ የሩሳላመ ኦገታን ሀይሳዳ ያጋዳ አዋጃ፦ ‘ሀ ጫቆ ቃላ ስእተ፤ እያ ካልተ። 
\v 7 ካሰ ህንተ አዋታ ታ ግብፀ ቢታፈ ከስዳ ዎድያፐ ሀች ጋካናዉ፥ ዛራ ዛራዳ፥ “ታዉ ኪተትተ” ጋዳ ሴራስ። 
\v 8 ሽን ኤንቲ ታ ቃላ ስእቦኮና ዎይኮ ታዉ ኪተትቦኮና። ኤንቲ ባንታ ኢታ ዎዛና ካልዶሶና። ታ ጫቆ ቃላ ኤንቲ ናጋና መላ ኪታስ፤ ሽን ኤንቲ እፅዶሶና። ሄሳ ግሾ፥ ሄ ጫቁዋ ባደ ኡባ ኤንታ ቦላ ኤሀስ’ ” ያግስ።
\p
\v 9 ዛርድካ ጎዳይ ታኮ ሀይሳዳ ያግስ፦ “ይሁዳ አሳይነ የሩሳላመን ደእያ አሳይ ታ ቦላ ማቀትዶሶና። 
\v 10 ኤንቲ ካሰ ታ ቃላ ስኦና እፅዳ ባንታ ማይዛታ ናጋራኮ ጉየ ስምዶሶና። ኤንቲ ሀራ ፆሳታ ጎይንዶሶና፤ ኤንታዉ ኦዶሶና። እስራኤለ አሳይነ ይሁዳ አሳይ ታ ካሰ ኤንታ ማይዛታራ ጫቅዳ ጫቁዋ መንዶሶና። 
\v 11 ሄሳ ግሾ፥ ‘ኤንቲ ባቃትድ አታናዉ ዳንዳኦና መቱዋ ኤንታ ቦላ ኤሀና። ኤንቲ ታኮ ዋስንካ ታ ኤንታ ስእከ። 
\v 12 ሄ ዎደ ይሁዳ አሳይነ የሩሳላመ አሳይ፥ እፃነ ጩይስያ ባንታ ፆሳታኮ ዋሳና። ሽን መቶ ዎደ ሄ ፆሳት ኤንታ ማዶኮና። 
\v 13 ህንተኖ፥ ይሁዳ አሳዉ፥ ህንተ ፆሳት ህንተ ካታማታ መላ ዳሮ። ቃስ ባኣለ ጌተትያ ዬላያ ፆሳስ እፃነ ጩይሳናዉ ህንተ ጊግስያ ያርሾ በሳት የሩሳላመ ኦገታ መላ ዳሮ’ ያጌስ ጎዳይ።
\p
\v 14 “ኤርምያሳ፥ ሀ አሳስ ታና አይኮካ ዎሶፋ፤ ኤንታ ግሾ ጋናቶፓ ዎይኮ ኦይቾፋ። ኤንቲ ባንታ መቱዋ ጋላስ ታና ፄግያ ዎደ ታ ኤንታ ስእከ።
\p
\v 15 “ዳሮ አሳራ ባ ኢታ ማቁዋ ማቀታሸ፥ ታ ዶስያ ታ አሳይ፥ ታ ኬን በንታናዉ በሲ? ህንተ ህንተ ኢታ ኦሱዋ ኦሽን፥ ያርሸትዳ መህያ አሾይ ህንተና ሴራፐ አሻኔ? ሄሳ ግድያኮ ህንተ ኡፋይታናሽን” ያግስ።
\p
\v 16 ጎዳይ ነና፥ ድጭያ፥ ሎኦ አይፈ አይፍያ ሻማሆ ያግድ ሱንስ። ሽን፥ እ ሄ ሻማሁዋ ዎልቃማ ዳዳ ጉንን፥ ታማን ፁጋና፤ እያ ታሸይካ መቃና።
\p
\v 17 ታኒ፥ ህንተና ቶክዳ ኡባፈ ዎልቃማ ጎዳይ፥ ህንተ ቦላ ኢታባ ኤሀናዉ አዋጃስ። እስራኤለ አሳይነ ይሁዳ አሳይ ባኣለስ እፃነ ጩይስድ ታና ይሎይዶሶና።
\s1 ኤርምያሳ ቦላ ማቀትዳ ማቁዋ
\p
\v 18 ጎዳይ ኤንታ ማቁዋ ታዉ ቆንጭስዳ ግሾ ታ ኤራስ። ሄ ዎደ ኤንቲ ኦያ ኢታ ኦሱዋ ታና በስስ። 
\v 19 ታኒ ሹካስ ጊግዳ ዶርሳዳ ሀናስ። ኤንቲ፥ “አነ ምነ እያ አይፍያ ይሶስ። እያ ሱንይ ሀሳየቶና መላ እያ ፓፃ ደኤይሳታ ግዶፈ ሾድድ ድጎስ” ያግድ ማቀትዳይሳ ታ ኤራብከ። 
\v 20 ሽን አቤት ኡባፈ ዎልቃማ ጎዳዉ፥ ፅሎ ፕርደይሶ፥ አሳ ዎዛናነ ቆፋ ሻካዳ ኤረይሶ፥ ነ ኤንታ ቦላ ነ ሃሉዋ ከያዳ ታና በሳ። ታኒ ታ ቆሁዋ ነና በሳስ።
\p
\v 21 ሄሳ ግሾ፥ “ጎዳ ሱንን ትንብተ ኦዶፓ ኢኮ ነ ኑ ኮሸን ሃይቃና” ያግድ፥ ነና ዎናው ኮይያ አናቶታ አሳባ ጎዳይ ሀይሳዳ ያጌስ። 
\v 22 ኡባፈ ዎልቃማ ጎዳይ ሀይሳዳ ያጌስ፦ “ታ ኤንታ ሴራና፤ ኤንታ ፓንት ማሻን ሀይቃና፤ ኤንታ ማጫ ናይትነ አደ ናይት ኮሻን ሀይቃና፤ 
\v 23 ኤንታፈ እሶይነ አተና። አይስ ጊኮ፥ ታኒ ሴርያ ላይ አናቶታ አሳ ቦላ ኢታባ ኤሀና” ያጌስ።
\c 12
\s1 ኤርምያሳ ኦይሻ
\p
\v 1 አቤት ጎዳዉ፥ ታ ኔራ ሞተትያ ዎደ ኡባንካ ነ ፅሎ። ግዶሽን፥ ነ ፅሎ ፕርዳባ ኔራ ኦደታናዉ ኮያይስ። ኢታ አሳት ኦያባይ ኤንታዉ አይስ እንጀቲ? ገነ አሳት አይስ ዱረትድ ደኦና? 
\v 2 ኔኒ ኤንታ ቶካዳሳ፤ ኤንቲ ፃጶ የድዶሶና፤ ድጭድ አይፈ አይፍዶሶና። ኤንቲ ነና ዶናፐ የጎኮና፤ ሽን ኤንታ ዎዛናፐ ነ ሃሆን ደኣሳ። 
\v 3 ሽን አቤት ጎዳዉ፥ ነ ታና ኤራሳ፤ ታና በኣሳ፤ ታ ነባ አይ ቆፕያኮ ፓጫሳ። ሹካ ዶርሳዳ፥ ሄ ኢታ አሳታ ጎቻዳ ከሳ፤ ሹካ ጋላሳስ ኤንታ ዱማያዳ ዎ። 
\v 4 ቢታይ እራ ይድ ቆሄታናይ፥ ደንባን ደእያ ማታይ መላናይ አዉደ ጋካናሴ? አሳ ኢታተ ጋሶን፥ ዶእነ ካፎይ ዉርስ። አሳይ ቃስ፥ “ጎዳይ ኑ ኦያባ ደመና” ያጎሶና።
\s1 ጎዳ ዛሩዋ
\p
\v 5 ጎዳይ ኤርምያሳኮ፥ “ኔኒ ቶሆን ዎፅያ አሳታራ ጋደታዳ ዳቡርኮ፥ ፓራራ ዋናዳ ጋደታኔ? ነ ሳሮ ቢታን በትኮ፥ ዮርዳኖሰ ዎራ ግዶራ ዋናዳ ሄመታኔ? 
\v 6 ነ እሻት፥ ህንተ ሶ አሳት ነና አድ እምዶሶና፤ ነ ቦላ ደንድዶሶና። ሄሳ ግሾ፥ ሎኦባ ኦድኮካ ኤንታ አማኖፓ።
\p
\v 7 “ታ እስራኤለ አጋስ፤ ታ ዶረትዳ ካዎተ የጋስ፤ ታ ሲቅያ አሳ እያ ሞርከታ ኩሸን አዳ እማስ። 
\v 8 ታ ዶርዳ አሳይ ታዉ ዎራን ደእያ ጋሞ መላ ግድስ። እ ታ ቦላ ጉድስ፤ ሄሳ ግሾ ታ እያ እፃስ። 
\v 9 ታ ዶርዳ አሳይ ኡባ ባጋራ ጵርጮይ ተቅዳ ካፎ መላ ግድዶሶና። ብድ ዶአታ ኡባ ሺሽድ እያ ማና መላ ኤህተ።
\p
\v 10 “ዳሮ አላጋ ካዎት ታ ዎይነ ጋድያ ኢስዶሶና፤ ታ ጋድያ የዶሶና፤ ታ ሎኦ ጎሻ ባይሳ ከስዶሶና። 
\v 11 ሄ ቢታይ ኢትድ ኦፅስ፤ ታ ስንን መላነ ባይሳ ግድስ። ቃተይ ባይና ግሾ ቢታይ ኩመ ኢትስ። 
\v 12 መላ ቢታን ደእያ አይኮካ ባይና ደረ ካንድ፥ ቦንቀይሳት ይዶሶና። ጎዳ ማሻይ ቢታ ሀ ጋፃፐ ያ ጋፃ ጋካናዉ ምስ። ሄሳ ግሾ፥ ኦንካ ሳሮ አታናዉ ዳንዳኤና። 
\v 13 ኤንቲ ግስተ ዘርድ፥ አጉን ጫክዶሶና፤ ኤንቲ ዳሮ ዳቡርዶሶና፤ ሽን አይኮካ ደምቦኮና። ጎዳ ዎልቃማ ሸንያ ጋሶን ኤንታ ካይ ይስ” ያግስ።
\p
\v 14 “ታኒ ታ አሳ፥ እስራኤለስ፥ እምዳ ቢታ ኦይክዳ፥ ኢታ ሾሮ ካዎተታ ኤንታ ቢታፈ ሾዳና። ቃስ ይሁዳ አሳ ኤንታ ግዶፈ ከሳና። 
\v 15 ሽን ኤንታ ቢታፈ ሾድዳፐ ጉየ፥ ዛራዳ ኤንታዉ ቃታና። ኤንታ እሱዋ ኤንታ ላታ ቢታነ ኤንታ ካዎተ ዛራዳ ኤሀና። 
\v 16 ካሰ ታ አሳ ባኣለ ሱንን ጫቃና መላ ታማርስዳይሳዳ ኤንቲ ታ አሳ ኦግያ ታማርኮነ ታ ሱንን ጫቅኮ ኤንቲ ታ አሳ ግዶን ምንድ ዳና። 
\v 17 ሽን ኪተቶና እፅዳ ካዎተታ ታኒ ፖሎ ሾዳዳ ይ-ሳና” ያጌስ ጎዳይ።
\c 13
\s1 ሊኖ ዳንጮ
\p
\v 1 ጎዳይ ታኮ፥ “ባዳ ሊኖ ቃጭናፐ ዳደትዳ ዳንጮ ሻማዳ፥ ነ ፄሳን ዳንጫ፤ ሽን ሃን ቦሽሶፓ” ያግስ። 
\v 2 ሄሳ ግሾ፥ ታኒ ጎዳይ ኪትዳይሳዳ ዳንጩዋ ሻማዳ ታ ፄሳን ዳንጫስ።
\p
\v 3 ጎዳይ ናምአን ታኮ ሀይሳዳ ያግስ፦ 
\v 4 “ነ ሻማዳ ዳንጭዳ ዳንጩዋ ኤካዳ፥ ኤፍራፂሳ ሻፋ ባዳ ሹቻ ቆጶን ቆሳ” ያግስ። 
\v 5 ጎዳይ ታዉ ኦድዳይሳዳ ኤፋዳ፥ ኤፍራፂሳ ሻፋ ላንቀን ቆሳስ።
\p
\v 6 ዳሮ ጋላሳፐ ጉየ ጎዳይ፥ “ኤፍራፂሳ ሻፋ ባዳ፥ ታ ነና፥ ‘ያን ቆሳ’ ግዳ ዳንጩዋ ኤካ” ያግስ። 
\v 7 ታኒ ኤፍራፂሳ ሻፋ ባዳ፥ ዳንጩዋ ሞግዳ በሳፈ ኤካስ። ሽን ሄ ዳንጮይ ኢትድ አይኮካ ማዶናባ ግድስ።
\p
\v 8 ሄሳፈ ጉየ፥ ጎዳ ቃላይ ታኮ፥ 
\v 9 “ታኒ ይሁዳ ጬቀተነ የሩሳላመ ኦቶሩዋ ሀይሳዳ ኦዳ ይሳና። 
\v 10 ታ ቃላ ስኦና እፅድ፥ ባንታ ዎዛና ሙምስድ፥ ሀራ ፆሳታ ጎይናናዉነ ኤንታዉ ኦናዉ ብያ ሀ ኢታ አሳት፥ ሀ ዳንጩዋዳ ማዶናባ ግዳና። 
\v 11 ዳንጮይ አሳ ፄስ ባቅድ ኦይከይሳዳ ይሁድነ እስራኤለይ ታራ ኦይከትድ፥ ታ ሱንስ ጋላታነ ቦንቾ ግዳና መላነ ታ አሰ ግዳና መላ ኦስ፤ ሽን ኤንቲ ስኦና እፅዶሶና” ያጌስ ጎዳይ።
\s1 ዎይነ ፁጋ
\p
\v 12 ጎዳይ ታኮ፥ “ጎዳይ እስራኤለ ፆሳይ፥ ሀይሳዳ ያጌስ ጋዳ ኦዳ ያግስ፦ ‘እስ እስ ፁጋይ ዎይነ ኡሻን ኩማና’ ያጋ። ኤንቲ ኔኮ፥ ‘ኑኒ እስ እስ ፁጋይ ዎይነን ኩማናይሳ ኤሮኮዬ?’ ያግኮ፥ 
\v 13 ነ ኤንታኮ፥ ‘ታኒ ሀ ቢታን ደእያ አሳ ኡባ፥ ሀር አቶሽን፥ ዳዊታ አራታን ኡትያ ካዎታ፥ ካህነታ፥ ናበታነ የሩሳላመን ደእያ አሳ ኡባ፥ ኤንቲ ማታና ጋካናዉ ዎይነ ኡሻን ኩንና። 
\v 14 ታኒ ኤንታ፥ እሱዋ እሱዋራ፥ አዋ ናኣራ ዶምኤና። ታ ኤንታ ይሳና፤ ታ ኤንታዉ ኬህከ፥ ቃትከ፤ ኤንታ ማርከ’ ” ያጌስ ጎዳይ።
\s1 ኦቶሮይ ኤህያ መቶ
\p
\v 15 ሀይሳ ኦደይ ጎዳ ግድያ ግሾ ህንተ ኦቶሩዋ አግድ ስእተ፤ አኬክተ።
\p
\v 16 እ ማ ኤሀናፐ ስን፥ ህንተ ቶሆይ ምያ ደርያን በታናፐ ስን፥ ጎዳ ህንተ ፆሳ ቦንችተ። ህንተ፥ “ፖኦይ ያና” ግድ ናገታ፤ ሽን እ ሳካና ማን ላማና።
\p
\v 17 ሽን ህንተ ስኦና እፅኮ፥ ህንተ ኦቶሩዋ ግሾ ታ ጌማን ዬካይስ። ጎዳ ዉደይ ድኤትድ ብዳ ግሾ፥ ታ ዬካይስ፤ ታ አይፈይ አፉ ጉሴስ።
\p
\v 18 ጎዳይ ታኮ፥ “ካዋስነ ካዋ አየስ፥ ሀይሳዳ ያጋዳ ኦዳ፦ ህንተ ቦንቾ ካላቻይ ህንተ ሁጵያፐ ኩንድዳ ግሾ፥ ህንተ ካዎተ አራታፐ ዱገ ዎተ። 
\v 19 ነገበ ቢታን ደእያ ካታማት ኡባይ ጎርደትዶሶና። ኤንታ ዶያናዉ እስ አስካ ያን ባዋ። ይሁዳ አሳይ ኩመ ድኤትድ ብዶሶና” ያግስ።
\p
\v 20 ጎዳይ፥ “አነ ቁ ጋዳ፥ ፑደሀ ባጋፈ የይሳታ ፄላ። ነዉ እመትዳ ዉደይ፥ ነ ጬቀትዳ ዶርሳት አዉን ደኦና? 
\v 21 ኔኒ፥ ነዉ ላገ ግዳና መላ ኮይዳይሳት ነና ፆንድ ሃርያ ዎደ ዎይጋይ? የሎስ ከይዳ ማጫሳዳ እቀ ነና ኦይከኔ? 
\v 22 የሩሳላመ፥ ኔኒ ነ ዎዛናን፥ ‘ሀ ኡባይ ታና አይስ ጋክዴ?’ ጊኮ፥ ነ ማኦይ ቃረትዳይነ ነ ቦንቀትዳይ ነ ናጋራይ ዳርዳ ግሾሳ። 
\v 23 ቶጰይ ባ ማላ ዎይኮ ማሄይ ባ ጋዛተ ላማናዉ ዳንዳኢ? ሄሳዳካ፥ ኢታ ኦሶን ሜዘትዳ ህንተ፥ ሎኦ ኦሶ ኦናዉ ዳንዳኤከታ” ያግስ።
\p
\v 24 “ታ ህንተና ባዞ ጫርኮይ ኤፍያ ሱላዳ ላላና። 
\v 25 ህንተ ታና ዶግዳ ግሾነ ዎርዶ ፆሳታን አማነትዳ ግሾ ህንተ ሳማይነ ታ ህንተዉ እምያ ግሾይ ሀይሳ። 
\v 26 ህንተ ካሎይ በንታና መላ ታ ህንተ ማኡዋ ቃራ የጋና። 
\v 27 ነ ቦርሶ ኦሱዋ፥ ኮርማ ፓራዳ ዚታስ ጫገይሳ፥ ዬል ባይና ላይማተ፥ ዙማ ቦላነ ደንባን ነ ኦያ እፀትዳ ኦሱዋ ታ በአስ። የሩሳላመ፥ ነና አየ! ነ አዉደ ጋካናዉ ጌዮና ዳኔ?” ያጌስ ጎዳይ።
\c 14
\s1 ኮሻ፥ ማሸነ ቦሻ
\p
\v 1 ኮሻባ ጎዳይ ኤርምያሳስ ኦድዳ ቃላይ ሀይሳ፦ 
\v 2 “ይሁዳ ቢታይ ካዮቴስ፤ እያ ካታማት ላባንዶሶና። ያን ደእያ አሳት ቢታን ኡትድ ዬኮሶና፤ የሩሳላመፐ ግታ ዋሶይ ስኤትስ። 
\v 3 ዱረ አሳት ሃ ትካናዉ ባንታ አይለታ ኪቶሶና። ኤንቲ ሃ ኦላኮ ቦሶና፤ ሽን ሃ ደሞኮና፤ ባንታ ኦቱዋ መላ ቶክ ኤክድ ስሞሶና። ሀንያባ ይድ ዬላትሸ፥ ባንታ ሁጵያ ጉሉንቶሶና። 
\v 4 እር ቡኮና ግሾ ቢታይ መልድ ዛእስ። ጎሻንቾት ዬላትድ፥ ባንታ ሁጵያ ጉሉንትዶሶና። 
\v 5 ማት ባይና ግሾ ዎሽኤይ ባ የልዳ ጋሎ ማርዉ ደንባን የጋዳ ባዉሱ። 
\v 6 ባዞ ሀረት አይብካ ባይና ቃ ዙማታ ቦላ ኤቅድ፥ ዎርካናዳ ላፈቶሶና። ኤንታዉ ምያባይ ይን፥ ኤንታ አይፈይ ፄላናዉ ዳቡርስ” ያግስ።
\p
\v 7 አሳይ ሀይሳዳ ያግድ ዎስስ፦ “አቤት ጎዳዉ፥ ኑ ናጋራይ ኑ ቦላ ማርካትኮካ፥ ነ ሱን ግሾ፥ ኑስ እስባ ኦ። ኑ ነና አግድ ዳሮ ዎደ ጉየ ስምዳ፤ ነ ቦላ ናጋራ ኦዳ። 
\v 8 አቤት እስራኤለ ኡፋይሳዉ፥ መቶ ዎደ አሸይሶ፥ ነ እማዳ፥ እስ ቃማ አቃናዉ ገልዳ ኦገ አሳዳ አይስ ሀናይ? 
\v 9 ነ ዳጋምዳ አሳዳ፥ አሻናዉ ዳንዳኦና አሳዳ አይስ ሀናይ? አቤት ጎዳዉ፥ ነ ኑ ግዶን ደኣሳ! ኑኒ ነ ሱንን ፄገትዳ፤ ኑና አጎፋ!” ያግስ።
\p
\v 10 ሀ አሳታባ ጎዳይ ሀይሳዳ ያጌስ፦ “ኤንቲ ቶይላተ ዳሮ ዶሶሶና፤ ባንታ ቶሁዋ ተቆኮና። ሄሳ ግሾ፥ ጎዳይ ኤንታን ኡፋይተና። እ ኤንታ ኢታ ኦሱዋ ሀሳይድ፥ ኤንታ ናጋራ ግሾ ኤንታ ሴራና” ያጌስ።
\p
\v 11 ሄሳፈ ጉየ፥ ጎዳይ ታኮ፥ “ሀ አሳ ሳሮተስ ዎሶፋ። 
\v 12 ኤንቲ ፆምኮካ፥ ታ ኤንታ ዋሱዋ ስእከ። ፁሳ ያርሾነ ካ ያርሹዋ ኤንቲ ያርሽኮካ፥ ታ ኤክከ። ታኒ ኤንታ ኦላን፥ ኮሻንነ ጋዶን ይሳና” ያግስ።
\p
\v 13 ታኒ ዛራዳ፥ “አቤት ኡባ ሃርያ ጎዳዉ፥ ናበት ‘ህንተ ኦላ በኤከታ ዎይኮ ኮሽ ጋከና። ጎዳይ ሀ ቢታን ፖሎ ሳሮተ እማና’ ያጎሶና” ያጋስ።
\p
\v 14 ጎዳይ ዛሪድ፥ “ናበት ታ ሱንን ዎርዶ ኦዶሶና፤ ታ ኤንታ ኪታብከ ዎይኮ ኤንታዉ ኦዳብከ። ኤንቲ ህንተዉ ኦደይ ዎርዶ ቆንጨ፥ ፓና ካዮነ ባንታዉ መ ከስዳ ዎርዶ ሃሳዮሶና። 
\v 15 ሄሳ ግሾ፥ ጎዳ ሱንን ኦድያ ናበታ ታ ኪታብከ። ሽን ኤንቲ፥ ‘ኦል ዎይኮ ኮሽ ሀ ቢታ ቦቸና’ ያጎሶና። ሄ ናበት ባንታዉ ኦላንነ ኮሻን ያና! 
\v 16 ቃስ ትንብተይ ኦደትዳ አሳይ ኮሻነ ኦላ ጋሶን ሀይቃና፤ ኤንታ አሀይ የሩሳላመ ኦግያ ቦላ ሆለታና። ኤንታ ዎይኮ ኤንታ ማቸታ፥ ኤንታ አደ ናይታነ ዎይኮ ኤንታ ማጫ ናይታ ሞግያ አስ ያና። ኤንታዉ በሲያ ዋይያ ኤንታ ቦላ ትጋና” ያግስ።
\p
\v 17 ታ አዛኑዋባ ታ አሳስ ኦዳና መላ ጎዳይ ታና ኪትስ። “ታ አሳይ ደሸትድ፥ ዳሮ ማዱንፅዳ ግሾ፥ ታ አይፈይ ቃማነ ጋላስ ቃንፆና አፉፃና። 
\v 18 ታ ደምባ ከይኮ፥ ማሻን ሀይቅዳይሳታ በአይስ። ካታማ ገልኮ፥ ኮሻን ቆሄትዳይሳታ በአይስ። ናበትነ ካህነት ባንታ ኦሱዋ ኦሶና፤ ሽን አይ ኦያኮ ኤሮኮና” ያጋስ።
\p
\v 19 አቤት ጎዳዉ፥ ነ ይሁዳ አጋዲ? ፅዮነ አሳ እፃዲ? ኑ ፓፆናዳ ኦዳ አይስ ደቻዲ? ኑ “ሳሮ ግዳና” ግድ ናግዳ፤ ሽን አይብካ ሎኦባይ በንትቤና። ኑ “ፓፃና ዎደይ ያና” ግድ ናግዳ፤ ሽን ዳጋማ ፃላል ጋክስ።
\p
\v 20 አቤት ጎዳዉ፥ ኑ ኢታተ ኤርዳ፤ ኑ አዋታ ባላ አኬክዳ፤ ኑኒ ናጋራ ኦዳ። 
\v 21 ነ ሱን ግሾ ጋዳ ኑና ካፓ፤ ነ ቦንቾ አራታ ካዉሾፋ። ነ ኑራ ጫቅዳ ጫቁዋ ሀሳያ፤ ነ ጫቁዋ መንፋ። 
\v 22 ካዎተታ ኤቃታፐ እሶይ እራ ቡክሳናዉ ዳንዳኢ? ሳሎይ ባ ሸነን ፑሳናዉ ዳንዳኢ? ዳንዳኤና! አቤት ጎዳዉ፥ ኑ ፆሳዉ፥ ሄሳ ዳንዳኤይ ነና! ሀይሳ ኡባ ኦይ ነና ግድያ ግሾ ነናን ኡፋይስ ኦስ።
\c 15
\p
\v 1 ሄሳፈ ጉየ፥ ጎዳይ ታኮ ሀይሳዳ ያግስ፦ “ሀር አቶሽን ሙሰይነ ሳሜል ታ ስንን ኤቅድ ዎስያኮካ ታ ዎዛናይ ሀ አሳኮ ስመና። ኤንታ ታ ስንፈ ድጋ፤ ኤንቲ ቦ። 
\v 2 ኤንቲ ነና፥ ‘ኑ አዉ ባኔ?’ ግድ ኦይችኮ፥ ጎዳይ ሀይሳዳ ያጌስ ጋዳ ኤንታዉ ኦዳ፦ ‘ሀይቆስ ፕርደትዳይሳት ሀይቆስ፤ ማሻስ ፕርደትዳይሳት ማሻስ፤ ኮሻስ ፕርደትዳይሳት ኮሻስ፤ ድኤታናዉ ፕርደትዳይሳት ድኤታናዉ ቦ’ ያግስ።
\p
\v 3 “ታኒ ኦይዱ ቆሞ ጋዶታ ኤንታ ቦላ ኤሀና ያጌስ ጎዳይ። ሄስካ፥ ኤንታ ዎናዉ ማሻ፥ ኤንታ አሀ ጎቻናዉ ካናታ፥ ኤንታ አሾ ምድ ይሳናዉ ሳሎ ካፎታነ ሳአ ዶአታ ኤሀና። 
\v 4 ህዝቅያሳ ናአይ፥ ይሁዳ ካዎይ ምናሰይ የሩሳላመን ኦዳ ኢታ ኦሱዋ ግሾ፥ ታ ኤንታ ሳኣ ካዎተ ኡባስ ዳጋማ ኦና።
\p
\v 5 “የሩሳላመ አሳዉ፥ ህንተዉ ኦነ ቃታናይ? ህንተዉ አዛናናይ ኦኔ? ህንተ ዋንደቲ? ግድ ህንተና ኦይቻናይ ኦኔ?” ያጌስ ጎዳይ።
\p
\v 6 “ህንተ ታና አግደታ፤ ህንተ ጉየ ስምደታ። ሄሳ ግሾ፥ ታኒ ህንተ ቦላ ታ ኩሽያ ደንዳ ህንተና ይሳስ፤ ህዛፐ ታ ህንተዉ ቃትከ። 
\v 7 ኤንቲ ባንታ ኢታ ኦግያፐ ስሞና እፅዳ ግሾ ኤንታ ካታማታ ፐንግያን ፕ ኤካዳ ሀርቃስ። ታ ኤንታ ናይታ ዎ ዉርሳስ፤ ታ አሳ ይሳስ። 
\v 8 ኤንታ አምኤታ ታይቦይ አባ ጋፃን ደእያ ሻፍያፐ ዳርስ። ታኒ ሴታ ጋላስ ናአተታ አየታ ቦላ ዮ ኤሀና። ቆፖና ደእሽን፥ ኤንታ ቦላ ዳጋማነ ኮኮርስ ኤሀና። 
\v 9 ላፑን ናይት ሀይቅዳ አይያ ሸምፓናዉ ፆነታዳ ዳቡራሱ። እዉ ጋላስ ቃምስ፤ እያ ካዉያሱነ ዬላታሱ። ፓፃ አትዳይሳታ ኤንታ ሞርከታ ስንን ማሻን ዉርሳና” ያጌስ ጎዳይ።
\p
\v 10 ታ አየ፥ ታና አይስ የላዲ? ታና አየ! ታ ቢታ ኡባን ደእያ አሳራ ካጭያነ ባፀትያ አስ ግዳስ። ታ ኦደስካ ታልአብከ፤ ኦደፈካ ታልአዳ ኤካብከ፤ ሽን አሳ ኡባይ ታና ባዴስ።
\p
\v 11 ጎዳይ ታኮ፥ “ቱማ ታ ነና ሎኦ ኦሶስ አሻዳ ኤካና። ቱማ ነ ሞርከት መቱዋ ዎደነ ዋየ ዎደ ነና ዎሳና መላ ኦና። 
\v 12 አስ ብራታ፥ ፑደሀ ባጋፈ ያ ብራታ ዎይኮ ናሰ ብራታ መንናዉ ዳንዳኢ? 
\v 13 ቢታ ኡባን ህንተ ኦዳ ናጋራ ግሾ፥ ህንተ ሻሉዋነ ዱረተ ህንተ ሞርከታስ አዳ እማና። 
\v 14 ህንተና ኤሮና ቢታን ህንተ ሞርከት ህንተና አይለ ኦና። ታ ሀንቆይ ምያ ታማ ግድድ መርናዉ ኤፃና” ያግስ።
\p
\v 15 አቤት ጎዳዉ፥ ነ ኤራሳ። ታና ሀሳያ፤ ታና ማዳ፤ ታና የደይሳታ ቦላ ታ ሃሉዋ ከያ። ነ ዳንዳአን ታና ዎራ የጎፋ። ታ ነ ግሾ ጫየተይሳ ቆፓ። 
\v 16 አቤት ጎዳዉ፥ ኡባፈ ዎልቃማ ፆሳዉ፥ ታ ነ ሱንን ፄገትዳ ግሾ፥ ነ ቃላይ ታኮ ይን ማስ። ማ ስምን ታና ፓሽክስስ፤ ታ ዎዛና ኡፋይስስ። 
\v 17 ቀልቅሰይሳታ ጩጋን ኡታብከ፤ ኤንታራ ኡፋይታብከ። ኔኒ ነ ኩሽያ ታ ቦላ ዎዳ ግሾነ ታ ቦላ ይሎትዳ ግሾ ታ ታርካ ዱማ ኡታስ። 
\v 18 ታ ሀርገይ ፓፆናይ፥ ታ ማዱንይ መሎናይ አይብሴ? ነ ታዉ ኤቅያ ሻፋዳ፥ መልያ ፑልቶዳ ሀናዬ?
\p
\v 19 ሄሳ ግሾ፥ ጎዳይ ሀይሳዳ ያጌስ፦ “ነ ታኮ ስምኮ፥ ታ ዛራዳ ነና ኤካና፤ ነ ታዉ ኦና። ሀዳ ኦዳ አጋዳ፥ ቦንቾ ቃላ ፃላላ ኦደትኮ፥ ነ ታ ዶና ግዳና። ኤንቲ ኔኮ ስማና፤ ሽን ነ ኤንታኮ ስማካ። 
\v 20 ታ ነና ሀ አሳስ ናሰ ብራታን ግምበትዳ ግምበ ኦና። ኤንቲ ኔራ ኦለታና፤ ሽን ነና ፆኖኮና፤ ታ ነና አሻና። 
\v 21 ኢታታ ኩሸፐ ታ ነና አሻና፤ ቃይ ባይና ዎዛና ምኖ አሳፐ ታ ነና ዎዛና” ያጌስ ጎዳይ።
\c 16
\s1 ዮ ጋላስ ጋክስ
\p
\v 1 ጎዳ ቃላይ፥ ሀይሳዳ ያግሸ ታኮ ይስ፦ 
\v 2 “ኔኒ ማቾ ኤኮፋ፤ ማጫ ናአነ አደ ናአ ሀ በሳን የሎፓ። 
\v 3 ሀ በሳን የለትያ ማጫ ናይታባነ አደ ናይታባ፥ ኤንታ የልያ አየታነ አዋታባ ጎዳይ ሀይሳዳ ያጌስ። 
\v 4 ኤንቲ ኢታ ሀርገን ሀይቃና፤ ኤንታዉ ዬክያ ዎይኮ ኤንታ ሞግያ አስ በንተና። ኤንታ አሀይ ቢታ ቦላ ፕቶ መላ የገታና፤ ኤንቲ ማሻንነ ኮሻን ዉራና፤ ኤንታ አሾይ ሳሎ ካፎታስነ ሳአ ዶአታስ ካ ግዳና” ያግስ።
\p
\v 5 “ዬሆ ኬ ገሎፓ፤ ዬካናዉ ዎይኮ ቃታናዉ ቦፓ። ታኒ ሀ አሳ ቦላፈ ታ ሳሮተ፥ ታ ሲቁዋነ ታ ማሮተ ድጋስ። 
\v 6 ግትነ ጉ ሀ ቢታን ሀይቃና፤ ኤንቲ ሞገቶኮና። ኦንካ ኤንታዉ ዬከና፤ ኦንካ ባና ጋረና ዎይኮ ሁጰ ሜደትድ ካዮተና። 
\v 7 ዬክያ አሳስ ሾቹ ኤፍድ፥ ኤንታራ እስፈ ምድ ኡይድ፥ ካዩዋ ባለያ አስ እሶይካ ዴና። ሀር አቶሽን፥ አይያ ዎይኮ አው ሀይቅዳ አሳካ ምንያ አስ ባዋ።”
\p
\v 8 “ኤንታራ ማናዉነ ኡያናዉ ግብር ደእያ ኬ ገሎፓ። 
\v 9 ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦ ‘ታኒ ኡፋይስነ እልልስ፥ ያጋኖ የ ሀ በሳፈ ድጋና። ሄሳ አሳይ ባንታ ላይንነ ባንታ አይፍያን በአና።’ ”
\p
\v 10 “ነ ሀ ቃላ ኡባ አሳስ ኦድያ ዎደ፥ ኤንቲ፥ ‘ጎዳይ አይስ ሀይሳ መላ ኢታባ ኑ ቦላ አዋጅዴ? ኑ አይ ባልዶ? ጎዳ፥ ኑ ፆሳ ቦላ ኑ አይ ናጋራ ኦዶ?’ ” ያጋና። 
\v 11 ሄ ዎደ ነ ኤንታኮ፤ “ህንተ አዋት ታና አግዳ ግሾሳ፥ ኤንቲ ሀራ ፆሳታ ካልዳ ግሾሳ፥ ኤንታዉ ኦዳነ ጎይንዳ ግሾሳ፥ ታና አግድ ታ ህግያ ናጎና እፅዳ ግሾሳ። 
\v 12 ህንተ፥ ህንተ አዋታፐ አድ ኢታ ኦዳ ግሾሳ። ህንተ እሶይ እሶይ ኤሮ ጎና ህንተ ኢታ ዎዛና ካልደታ፤ ታዉ ኪተቶና እፅደታ። 
\v 13 ሄሳ ግሾ፥ ታ ህንተና ሀ ቢታፈ ደንዳ፥ ህንተ ዎይኮ ህንተ አዋት ኤሮና ቢታ ሆላና። ያን ህንተ ሀራ ፆሳታ ጋላስነ ቃማ ሀጋዛና፤ ታኒ ህንተዉ ቃትከ” ያጌስ ጎዳይ።
\p
\v 14 አሳይ፥ “እስራኤለ አሳ ግብፀ ቢታፈ ከስዳ ጎዳይ ኤርያ መላ” ያግድ ጫቆና ዎደይ ያና። 
\v 15 ሄሳ አግድ፥ “ ‘እስራኤለ አሳ ፑደሀ ባጋ ቢታፈነ ኤንታ ላልዳ ቢታ ኡባፈ ዛሪድ ኤህዳ ጎዳይ ኤርያ መላ’ ያግድ ጫቃና። ታኒ ኤንታ ካሰ ኤንታ አዋታስ እምዳ ቢታ ዛራዳ ኤሀና” ያጌስ ጎዳይ።
\p
\v 16 “ታ ሞሎ ኦይክያ ዳሮ አሳ ኪታና፤ ኤንቲ ኤንታ ኦይካና። ሄሳፈ ጉየ፥ ዳሮ ሻንካትያ አሳ ኪታና፤ ደረፐ፥ ዙማፐነ ሹቻ ቆጶፐ ኤንታ ሻንካትድ ከሳና። 
\v 17 ታ አይፈይ ኤንታ ኦግያ ቦላ ደኤስ፤ ኤንቲ ታፐ ቆሰትቦኮና፤ ኤንታ ናጋራይ ታ ስንፈ ጌምቤና። 
\v 18 ታ ኤንታ ኢታተነ ኤንታ ናጋራ ግሾ ኤንታዉ ናምኡ ኩሸ ዛራና። ኤንቲ አሀ ዳንያ ባንታ እፀትዳ ኤቃታን ታ ቢታ ቱንስዶሶና፤ ሻትያ ባንታ ምስለታን ታ ላታ ኩንዶሶና” ያጌስ ጎዳይ።
\p
\v 19 አቤት ጎዳዉ፥ ታ ዎልቃዉ፥ ታ ሚፃዉ፥ መቶ ጋላስ ታ ባቃታዳ አትያ በሳዉ፥ ካዎተት ሳኣ ጋፃፐ ኔኮ ይድ፥ “ኑ አዋት ፓናነ ማዶና ዎርዶ ፆሳታ ፃላላ ላትዶሶና። 
\v 20 አሳይ ባንታዉ ፆሳታ መናዉ ዳንዳኦና? ኤ፥ ኤንቲ መያኮካ ቱማ ፆሳታ ግዶኮና!” ያጋና።
\p
\v 21 “ሄሳ ግሾ፥ ታ ኤንታ ታማርሳና፤ ታ ዎልቃነ ታ ግታተ ኤንታ ኤርሳና። ሄ ዎደ ኤንቲ ታ ሱንይ ጎዳ ግደይሳ ኤራና” ያጌስ ጎዳይ።
\c 17
\p
\v 1 “ይሁዳ ናጋራይ ብራታ ቢረን ፃፈትስ፤ ኤንታ ዎዛና ቦላነ ያርሾ በሳን ደእያ ካጭያ ቦላ አልማዘ ጌተትያ ሹቻ ፄራን ፃፈትስ። 
\v 2 ኤንታ ናይት እርፃ ም ጋርሳን፥ ዙማታ ቦላነ ደረታ ቦላ ጊግስዳ ያርሾ በሳን አሼራ ጌተትያ ፆሴስ ኤስዳ ምስልያ ጎይኖሶና። 
\v 3 ህንተ ቢታ ቦላ ኦዳ ናጋራ አጩዋ ቃንፅሳናዉ ህንተ ሻሉዋነ ህንተ ሚሽያ ህንተ ሞርከታስ እማና። 
\v 4 ህንተ መርናዉ ኤፅያ ታ ሸንያ ደንዳ ግሾ፥ ህንተና ላትስዳ ቢታፈ ሾዳና፤ ህንተ ኤሮና ቢታን ህንተ ሞርከታስ አይለ ኦና” ያጌስ ጎዳይ።
\p
\v 5 ጎዳይ ሀይሳዳ ያጌስ፦ “አሳን አማነተይ፥ አሾ ማእዳ አሳን ጬቀተይነ ባ ዎዛና ፆሳፈ ሃሰይ ባደትዳይሳ ግዶ። 
\v 6 ሄሳ መላ አስ ባዞን ደእያ ቱሸ መላ፤ ሎኦባይ ያ ዎደ እ በኤና። እ ባዞን፥ መላ በሳን፥ አስ ዶና ማፅነ ቢታን ዳና።
\p
\v 7 “ጎዳን አማነትያ አስ፥ እያ ጬቆይ ጎዳ ግድዳ አስ አንጀትዳይሳ። 
\v 8 እ ሃ ማታን ቶከትድ፥ ባ ፃጱዋ ጎግያ ሃን የድዳ ም መላ። እ አዋ ሱላስ ያየና። ሄ ም ሀይይ ጭልኦሽን ደኤስ። እር ቡኮና ላይን ህርገና፤ ኡባ ዎደ አይፈ አገና።
\p
\v 9 “አሳ ዎዛን ኡባፈ አድ ጭሜስነ ኢታ፤ እያ ጋ ቆፋ ኦን ኤራናዉ ዳንዳኢ? 
\v 10 ታኒ ጎዳይ፥ አሳ ኡባስ እያ ኦግያዳነ እያ ኦሱዋዳ እማናዉ፥ አሳ ዎዛና ፕልጋይስ፤ እያ ካሃ ፓጫይስ” ያጌስ ጎዳይ።
\p
\v 11 በሶና ኦገን ሻሎ ሺሽያ አስ ባባ ግዶና ጱጱለ ቆፅያ ኩራቾ መላ። ባ ላይ ባጋ ዛዋን አግድ ባና፤ ዉርሰን እያ ኤያተይ ቆንጫና።
\p
\v 12 ኑ ፆሳ ኬይ ኮይሮፐ ዶምድ፥ ቦንቾ ካዎተ አራታዳ ቃ ደርያ ቦላ ደኤስ። 
\v 13 አቤት ጎዳዉ፥ እስራኤለ ኡፋይሳዉ፥ ነና አግዳ ኡባይ ዬላታና። ደኦ ፑልቶ ሃ፥ ነና ጎዳ ኤንቲ አግዳ ግሾ ባናን ፃፈትዳ ሱንዳ ያና።
\p
\v 14 አቤት ጎዳዉ፥ ነ ታ ጋላታ ግድያ ግሾ፥ ታና ፓ፤ ታ ፓፃና፤ ታና አሻ፤ ታ አታና።
\p
\v 15 አሳይ ታኮ፥ “ ‘ጎዳይ ታዉ ኦድስ’ ያጋዳ ነ ኦድዳ ቃላይ አዉን ደኢ? እ አይስ ፖለተኔ?” ያጎሶና።
\p
\v 16 ታኒ ሄንንቾ ግዳዳ ነና ሀጋዞ አጋብከ፤ ኤንቲ መቶታና ጋላሳ ታ አሞታብከ። ታ ዶናፐ ከይዳ ቃላ ነ ኤራሳ። 
\v 17 ታና ዳጋንፋ፤ መቶ ጋላስ ታኒ ባቃታዳ አትያ በሳይ ነና። 
\v 18 ታና የደይሳት ዬላቶ፤ ሽን ታና ዬላዮፓ። ኤንታ ዳጋን፤ ሽን ታና ዳጋንፋ። ኤንታ ቦላ መቶ ኤሀ፤ ኤንታ ናምኡ ኩሸ ሴራ።
\s1 ሳምባታ ቦንችተ
\p
\v 19 ጎዳይ ታኮ፥ “ኮይሮ ባዳ ይሁዳ ካዎት ካታማ ገልያነ ከይያ፥ አሳይ ገልያ ፐንግያንነ ሀራ የሩሳላመ ፐንገታ ኡባን ኤቃ። 
\v 20 አሳኮ ሀይሳዳ ያጋ፦ ‘ህንተኖ ይሁዳ ካዎቶ፥ ህንተኖ ይሁዳ አሳዉ፥ ህንተኖ የሩሳላመ አሳዉ፥ ሀ ፐንገታራ ገልያ አሳዉ፥ ኡባይ ጎዳ ቃላ ስእተ። 
\v 21 ሳምባታ ጋላስ ቶሆ ቶክድ የሩሳላመ ፐንግያራ ገሎና መላ ናገትተ። 
\v 22 ሳምባታ ጋላስ ህንተ ኬፈ ቶሆ ቶክድ ከሶፍተ፥ ዎይኮ አይብ ኦሶካ ኦፕተ። ካሰ ህንተ አዋታ ታ ኪትዳይሳዳ ሳምባታ ጋላስ ቦንችተ። 
\v 23 ግዶሽን፥ ኤንቲ ስእቦኮና፤ ባንታ ሀይ ታኮ ዛርቦኮና። ኤንቲ ታና ስኦናነ ታፐ ታማሮና እፅዶሶና። 
\v 24 ሽን ህንተ ታዉ ኪተትኮ፥ ሳምባታ ጋላሳን ቶሆ ቶክድ፥ ሀ ካታማ ፐንገታራ ገሎና አግኮ፥ ሳምባታ ጋላስ አይኮካ ኦና ዱማይድ ቦንችኮ፥ 
\v 25 ዳዊታ አራታን ኡትያ ካዎት ባንታ ሞርናታራ ፓራታነ ፓራ ጋረታ ቶግድ፥ ሀ ፐንገታራ ገላና። ኤንቲ ይሁዳ አሳራነ የሩሳላመ ካታማን ደእያ አሳራ ገላና፤ ሀ ካታማይ መርናዉ አስ ደእያ ካታማ ግዳና። 
\v 26 አሳይ ፁሳ ያርሾ፥ ሀራ ያርሾ፥ ካ ያርሾ፥ እፃነነ ጋላታ ያርሾ ኤክድ፥ ይሁዳ ካታማታፐ፥ የሩሳላመ ዩሹዋን ደእያ ጉታታፐ፥ ብንያመ ቢታፈ፥ ጋፐ፥ ደረይ ዳርያ ቢታፈነ፥ ነገባፐ ጎዳ ፆሳ ኬ ያና። 
\v 27 ሽን ህንተ ሳምባታ ጋላሳ ዱማይድ ቦንቾና አግድ፥ ሳምባታ ጋላሳን ቶሆ ቶክድ፥ የሩሳላመ ፐንገታራ ገልድ፥ ታ ህግያ መንኮ፥ ታ ሄ ፐንገታን ታማ ኦይና። የሩሳላመ ካዎ ኬታ ማና፤ ሄ ታማይ ቶኤና’ ” ያጌስ ጎዳ-ይ።
\c 18
\s1 ኤርምያስ ኦቶ መያ ኬን
\p
\v 1 ጎዳፐ ኤርምያሳኮ ይዳ ቃላይ ሀይሳ፦ 
\v 2 “ደንዳዳ ኡርቃ መያ አድያ ሶ ባ። ያን ታ ነና ታ ቃላ ስሳና” ያግስ። 
\v 3 ታኒ ዱገ ኡርቃ መያ አድያ ሶ ባዳ፥ እ ባ ገርቱዋ ቦላ ኡርቃ መሽን በአስ። 
\v 4 እ መሽን፥ ሄ ሚሸይ እያ ኩሸን ኢትስ። እ ሄ ኡርቃ ዛሪድ ሙኑቅድ፥ ባና ሎእያ ሀራ ሚሸ ከስድ መስ።
\p
\v 5 ሄ ዎደ ጎዳ ቃላይ፥ ሀይሳዳ ያግሸ ታኮ ይስ፦ 
\v 6 “እስራኤለ አሳዉ፥ ኡርቃ መያ አደይ ኦይሳዳ ታ ህንተና ኦናዉ ዳንዳእክና? እስራኤለ አሳዉ፥ ኡርቃይ ባና መይሳ ኩሸን ደኤይሳዳ፥ ህንተካ ታ ኩሸን ደኤታ። 
\v 7 እስ ካዎተ ዎይኮ እስ ደረይ ሾደታና መላ፥ ላለታና መላነ ያና መላ ታ ኦድዳ ዎደ፥ 
\v 8 ሄ ካዎተይ ባ ኢታተፈ ስምኮ፥ ታ ኤንታ ቦላ ኤሀና ግዳ ኢታባ ኤሆና አጋጋና። 
\v 9 ቃስ ሀራ ዎደ እስ ደርያ ዎይኮ ካዎተ፥ ‘ታ ህንተና ኬፃናነ ቶካና’ ጋዳ ኦድዳ ዎደ፥ 
\v 10 ሄ ካዎተይ ታ ኦደይሳ ስኦና እፅድ፥ ታ ስንን ኢታባ ኦኮ፥ ታ ኦና ግዳ ሎኦባ ኦና አጋጋና።
\p
\v 11 “ሄሳ ግሾ፥ ይሁዳ አሳስነ የሩሳላመን ደእያ አሳስ ሀይሳዳ ያጋ። ታኒ ህንተዉ ዮ ጊግሳይስነ ኢታባ ሀልቻይስ። ህንተ ኡባይ ህንተ ኢታ ኦግያፐ ስምተ፤ ህንተ ኦግያነ ህንተ ኦሱዋ ላምተ። 
\v 12 ሽን ኤንቲ፥ ‘ሀይስ አይኮካ ማደና! ኑኒ ኑ ቆፋዳ ሀናና፤ ኑ እሶይ እሶይ ኑ ኢታ ዎዛና ካላና’ ያጋና” ያግስ።
\p
\v 13 ሄሳ ግሾ፥ “ጎዳይ፥ ‘ሀይሳ መላባ ስእ ኤሬቲ?’ ያግድ ካዎተታ ኦይችተ። ጌላኦ ግድዳ እስራኤለይ ዳሮ ሻትያባ ኦሱ። 
\v 14 ልባኖሰ ዙማ ቦላ ደእያ ሻቻይ፥ ዛላ ቦላፈ ይድ ኤሪ? ሄ ዙማፐ ጎግያ እርፃ ሃ መል ኤሪ? 
\v 15 ሽን ታ አሳይ ታና ዶግዶሶና፤ ፓና ፆሳታስ እፃነ ጩይስዶሶና። ባንታ ኦግያፐ፥ ባንታ በን ኦግያፐ፥ ጋፃ ከይድ በትዶሶና። 
\v 16 ኤንቲ ባንታ ቢታ ባይሳነ ካትዳባ ከስዶሶና። ያራ አያ ኦንካ ማላለትድ ባ ሁጵያ ቃስ። 
\v 17 ባን ዶሎሀ ባጋ ጫርኩዋን ላለተይሳ መላ፥ ታኒ ታ አሳ ሞርከታ ስንን ላላና። ኤንታ መቱዋ ጋላስ ታ ኤንታዉ ዞኮ ዛራናፐ አትሽን፥ ታ ሶምኡዋ ኤንታ በስከ” ያጌስ ጎዳይ።
\p
\v 18 አሳይ፥ “ካህነታ ማታን ህገይ፥ ጭንጫታ ማታን ዞረይ፥ ናበታ ማታን ቃል ዮና ግሾ አነ ኤርምያሳ ቦላ ማቀቶስ። ኑ እንፃርሳን ኦይኮስ፤ እ ኦድያ ቃላ ስኦና እፃና” ያግዶሶና።
\p
\v 19 አቤት ጎዳዉ፥ ታና ስአ፤ ታ ሞርከት ታ ቦላ ግያባ ሀይዛ። 
\v 20 ሎኦ ኦዳ አሳስ ዛሮይ ኢተዬ? ሽን ኤንቲ ታዉ ኦላ ቦኮሶና። ነ ሀንቆይ ኤንታፈ ስማና መላ ታ ኤንታ ግሾ ጋናተይሳ በአ። 
\v 21 ሄሳ ግሾ፥ ኤንታ ናይታ ኮሻስ አዳ እማ፤ ኤንታ ማሻስ አዳ እማ። ኤንታ ማቸት ናእ ባይናይሳታነ አምኦ ግዶ። ኤንታ አደት ዎያ ሀርገን ጋሄቶና፤ ኤንታ ናአተት ኦላን ዉሮ። 
\v 22 ኤንቲ ታና ኦይካናዉ ኦላ ቦክዳ ግሾነ ታ ቶሁዋስ ፅሄ ዎዳ ግሾ፥ ቆፖና ቦንቀይሳታ ኤንታ ቦላ የዳ፤ ኤንታ ኬን ዋሶይ ከዮ። 
\v 23 ሽን አቤት ጎዳዉ፥ ኤንቲ ታና ዎናዉ ማቀተይሳ ነ ኤራሳ። ነ ኤንታ ኢታተ አቶ ጎፓ ዎይኮ ኤንታ ናጋራ ነ ስንፈ ቁቾፋ። ኤንቲ ነ ስንን ፆነትድ ኩንዶ፤ ነ ሸነትያ ዎደ ኤንታ ሀይሳዳ ኦ።
\c 19
\s1 መቅዳ ፁጋ ሌምሶ
\p
\v 1 ጎዳይ ታኮ፥ “ባዳ ኦቶ መይሳፈ ፁጋ ሻማ። ኔራ ጉ ቢታ ጭማታነ ጉ ካህነ ጭማታ ኤካዳ፥ 
\v 2 ኩንአ መኦ ፐንግያ ማታራ አዳ፥ ህኖማ ዛንጋራ ባ፤ ያን ታ ነዉ ኦድያ ቃላ አዋጃ። 
\v 3 ‘ህንተኖ፥ ይሁዳ ካዎቶ፥ ህንተኖ የሩሳላመ ካታማ አሳዉ፥ ጎዳ ቃላ ስእተ!’ ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦ ‘ስእያ ኡባ ሀይስ ኢትያ ፓላባ ሀ ቢታ ቦላ ታ ኤሀና።’ 
\v 4 ሀ አሳይ ታና አግድ፥ ኤንቲ ዎይኮ ኤንታ አዋት ዎይኮ ይሁዳ ካዎት ኤሮና ሀራ ፆሳታስ እፃነ ጩይስድ ሀ በሳ ቱንስዶሶና። ኤንቲ ፅሎ አሳ ሱ ሀ በሳን ጉስዶሶና። 
\v 5 ታ ኤንታ ኪቶናባ ዎይኮ ኤንታዉ ኦዶናባ ዎይኮ ታ ቆፖናባ ኦዶሶና፤ ባንታ አደ ናይታ ናጋራስ ታማን ፁሳ ያርሾ ኦድ ያርሻናዉ፥ ቃ ጎይኖ በሳታ ግምብዶሶና። 
\v 6 ሄሳ ግሾ፥ ሀ በሳይ ቶፈታ ዎይኮ ህኖማ ዛንጋራ ጌተተይስ አትድ፥ ሹሀ ዛንጋራ ያገትድ ፄገታና ጋላሳይ ያና። 
\v 7 ይሁዳነ የሩሳላመ አሳ ሀልቹዋ ታ ሀ በሳን ላላና። ኤንቲ ባንታ ሞርከታ ማሻንነ ባንታና ዎናዉ ኮይያ አሳ ኩሸን ሀይቃናዳ ኦና። ኤንታ አሀ ሳሎ ካፎታስነ ሳአ ዶአታስ ካ ኦዳ እማና። 
\v 8 ታኒ ሀ ካታማ ባይሳነ ሚቻስ ከሳና። ያራ አያ ኡባይ እያ ዩዋን ማላለትድ፥ ‘ፖራ’ ያጋና። 
\v 9 ኤንቲ ባንታ ማጫ ናይታነ አደ ናይታ አሹዋ ማናዳ ኦና። ኤንታ ዎናዉ ኮይያ ሞርከት ኤንታ ተቅድ ዋይስያ ዎደ ኡንኤትድ ኤንቲ እሶይ እሱዋ አሹዋ ማና” ያግስ።
\p
\v 10 “ሄሳፈ ጉየ፥ ኔራ ብዳ አሳ ስንን ፁጋ መን። 
\v 11 ኤንታኮ ሀይሳዳ ያጋ፦ ፁጋይ መቅዳይሳዳነ ዛሪድ ኮላናዉ ዳንዳኤቶናይሳዳ ታ ሀ ካዎተነ ሀ ካታማ መንረና። አስ አሀ ሞግያ በሲ ባይና ግሾ ቶፈታን ሞገታና። 
\v 12 ሀ በሳንነ እያን ደእያ አሳ ቦላ ሀይሳ ኦና። ሀ ካታማ ቶፈታዳ ኦና። 
\v 13 የሩሳላመ አሳ ኬትነ ይሁዳ ካዎታ ኬት፥ ኬ ቦላ ደምባይድ ኦዳ በሳን ሳሎ ፆልንቶታስ እፃነ ጩይስዳነ ሀራ ፆሳታስ ኡሻ ያርሾ ጉስዳ ኬት ኡባይ ቶፈታዳ ቱና ግዳና” ያጌስ ኡባፈ ዎልቃማ ጎዳይ።
\p
\v 14 “ሄሳፈ ጉየ፥ ኤርምያስ ጎዳይ ትንብተ ኦዳና መላ ኪትዳ ቶፈታፐ ስሚድ፥ ፆሳ ኬ ግዶን ደእያ ዳባባን ኤቅድ አሳ ኡባኮ ሀይሳዳ ያግስ፦ 
\v 15 ኤንቲ ሞርግያ ጋቢስድ፥ ታ ኦድያባ ስኦና እፅዳ ግሾ ሀ ካታማ ቦላነ እያ ሄራን ደእያ ጉታታ ቦላ ኤሀና ግዳ ኢታባ ኡባ ኤሀና ሀናይስ” ያጌስ ኡባፈ ዎልቃማ ጎዳይ።
\c 20
\s1 ኤርምያሳነ ጳስኮራ
\p
\v 1 ሄ ዎደ ጎዳ ኬነ ሀላቃ ግድያ፥ እመራ ናኣ ካህንያ ጳስኮር ኤርምያስ ትንብተ ኦድሽን ስእስ። 
\v 2 ጳስኮር ናብያ ኤርምያሳ ደሽስድ፥ ቆሞ ብንያመ ፐንግያን ፆሳ ኬ ገልያ ፐንገን ጎንገ ሉሆን ቃሽስስ። 
\v 3 ዎንተ ጋላስ ጳስኮር ኤርምያሳ ቃሾፐ ብርሽን፥ ኤርምያስ እያዉ ሀይሳዳ ያግስ፦ “ሀችፈ ዶምን፥ ጎዳይ ነ ሱን ጳስኮር ያገና፤ እ ነ ሱን ‘ያን ሀን ዳጋማ’ ያጋና። 
\v 4 ጎዳይ ሀይሳዳ ያጌስ፦ ‘ታኒ ነና፥ ነዉነ ነ ላገታ ኡባስ ዳጋማ ኦና። ኤንቲ ኔኒ ፄልሽን፥ ባንታ ሞርከታ ማሻን ዉራና። ታኒ ይሁዳ አሳ ኡባ ባብሎነ ካዋ ኩሸን አዳ እማና። እ ኤንታ ድእድ፥ ባብሎነ ኤፍድ፥ ያን ማሻን ዎና። 
\v 5 ሄሳዳካ፥ ሀ ካታማ ሻሉዋነ ዱረተ ኡባ፥ ኦይክ የዳባ ኡባ፥ ሃርዳባ ኡባነ ይሁዳ ካዎታ ሚሽያ ኡባ ታኒ ኤንታ ሞርከታስ አዳ እማና፤ ኤንቲ ኤንታ ቦንቅድ ባብሎነ ኤፋና። 
\v 6 ቃስ ኔኒ ጳስኮር፥ ነ ሶን ደእያ አሳ ኡባይ ድኤትድ፥ ባብሎነ ባና። ኔኒ ዎርዶ ትንብተ ኦድዳ ነ ላገታ ኡባራካ ያን ሀይቃናነ ያን ሞገታና’ ያጌስ” ያግስ።
\s1 ኤርምያሳ ሞቱዋ
\p
\v 7 አቤት ጎዳዉ፥ ኔኒ ታና ጭማዳሳ፤ ታንካ ጭመታስ። ኔኒ ታፐ ምናዳ፥ ታና ፆናዳሳ። ጋላሳ ኩመ ታኒ አሳ ሚቻስ አታስ፤ ኡባይ ታና ቀልቅስስ። 
\v 8 ታኒ ሃሳያ ዎደ ኡባን፥ “ማካላባይነ ዮይ ጋክስ” ጋዳ ዋሳይስ። ጎዳ ቃላይ ታዉ ጋላስ ጋላስ ቦረነ ቀልቅሰ ኤህስ። 
\v 9 ታኒ፥ “ታኒ ጎዳባ ደንዳ ኦድከ” ዎይኮ፥ “እያ ሱንን ናምአን ኦድከ” ጊኮ፥ ጎዳ ቃላይ ታ መቀ ግዶን ቁምኤትድ፥ ኤፅያ ታማ መላ ግድድ፥ ታ ዎዛናን ምቼስ። ታኒ ግዶን ኦይካዳ አሾና ጋዳ ዳቡራስ፤ ሽን ተቃናዉ ዳንዳአብከ። 
\v 10 ታኒ ዳሮ ካልካሻ ስአስ፤ “ያን ሀን ዳጋም ደኤስ! አነ እያ ሞትተ! ኑኒካ እያ ሞቶስ” ያጎሶና። ታዉ ማታ ላገት ኡባይ ታ ኩንደ ናግድ፥ “ኦን ኤር፥ ኑኒ እያ ኦይካና መላነ ኑ ሃሉዋ ከያና መላ፥ እ ጭማናዉ ዳንዳኤስ” ያጎሶና።
\p
\v 11 ሽን ጎዳይ ያሽስያ ቶራ ቃራዳን ታራ ደኤስ። ሄሳ ግሾ፥ ታና የደይሳት በታና፤ ኤንቲ ታና ፆኖኮና። ኤንታዉ ጊጎና ግሾ፥ ኤንቲ ግታ ዬላ ዬላታና። ኤንታ ካዉሻይ ኩም ዶገተና። 
\v 12 አቤት ኡባፈ ዎልቃማ ጎዳዉ፥ ፅሎታ ፓጨይሶ፥ ዎዛናነ ካሀ በኤይሶ፥ ኔኒ ታ ሞርከታ ቦላ ነ ሃሉዋ ከያዳ ታና በሳ። አይስ ጊኮ፥ ታኒ ታ ሞቱዋ ነዉ አስ።
\p
\v 13 ጎዳስ የፅተ! ጎዳ ጋላትተ! አይስ ጊኮ፥ እ ማንቆታ ኢታታ ኩሸፐ አሼስ።
\p
\v 14 ታኒ የለትዳ ጋላሳይ ባደትዳይሳ ግዶ! ታ አይያ ታና የልዳ ጋላሳይ አንጀቶፎ! 
\v 15 ታ አዋስ፥ “ነዉ ምሽራቾ፤ ነዉ አደ ናእ የለትስ!” ያግ ኦድድ፥ ዳሮ ኡፋይስዳ ኡራይካ ባደትዳባ ግዶ! 
\v 16 ሄ አደይ ጎዳይ ቃቶና አድ የግድ ይስዳ ካታማታዳ ሀኖ። ሄ አደይ ዎንታ ዋሱዋ፥ ጋላስ ሴታን፥ “ኦላይ ጋክስ!” ግያ ኦዳ ስኦ። 
\v 17 አይስ ጊኮ፥ ታ አይያ ታዉ ዱፎ ግዳና መላነ እ ኡሎይካ ታና መርናዉ ኦይክ ኡታና መላ፥ ታና ኡሎን ዎቤና። 
\v 18 ታኒ መቶነ አዛኖ በአናዉነ ላይ ኡባ ዬላታሸ ዉርሳናዉ፥ አይስ ታ አየ ኡሎፐ ከያድና?
\c 21
\s1 ካዋ ሰደቅያሳስ እመትዳ ዛሮ
\p
\v 1 ካዎይ ሰደቅያስ ማልክያ ናኣ ጳስኮራነ ማእሰያ ናኣ ካህንያ ሶፎንያሳ ኪትዳ ዎደ፥ ጎዳ ቃላይ ኤርምያሳኮ ሀይሳዳ ያግድ ይስ፦ 
\v 2 ኤንቲ፥ “ባብሎነ ካዎይ ናቡካዳናፆር ባ ኦላንቾታራ ሀ ካታማ ተቅዳ ግሾ ኑስ ጎዳ ኦይቻ። ኦን ኤር፥ ጎዳይ በንይሳዳ ማላልስያ ኦሱዋ ኑ ግሾ ኦድ፥ እያ ጉየ ዛሮና አገና” ያግዶሶና። 
\v 3 ኤርምያስ ኤንታዉ ዛሪድ፥ “ብድ ሰደቅያሳኮ ያግተ፦ 
\v 4 ‘ኔኒ ባብሎነ ካዉዋራነ ግምብያፈ ካረራ ነ ካታማ ተቅዳ እያ ኦላንቾታራ ኦለትያነ ነ ኩሸን ደእያ ኦላ ሚሽያ ታ ነ ቦላ ዛራና፤ ኤንታ ኡባ ሀ ካታማ ግዶ ገልሳና። 
\v 5 ታኒ፥ ታ ሁጰን ሴራስ ምጨትዳ ኩሸን፥ ዎልቃማ ቀስያን፥ ይሎን፥ ሀንቆንነ ዎልቃማ ጋዶን ነና ኦላና። 
\v 6 ታ ሀ ካታማን ደእያ አሳነ መህያ ሾጫና፤ ኤንቲ ኢታ ጋዶን ዉራና። 
\v 7 ሄሳፈ ጉየ፥ ይሁዳ ካዋ ሰደቅያሳ፥ እያ ሞርናታ፥ ጋዶፐ፥ ማሻፈነ ኮሻፐ አትዳ፥ ሀ ካታማ አሳ ኡባ፥ ባብሎነ ካዋ ናቡካዳናፆራስነ ኤንታ ዎናዉ ኮይያ ሞርከታስ አዳ እማና። እ ኤንታ ቃራ ማሻን ጎይራና። እ ኤንታዉ ቃተና፤ ሳለትድ አገና፤ ማረና’ ” ያጌስ ጎዳይ እስራኤለ ፆሳይ።
\p
\v 8 ጎዳይ ኤርምያሳኮ፥ “ጉጃዳ አሳኮ ሀይሳዳ ያጋ፦ ታ ህንተ ስንን ደኦ ኦግያነ ሀይቆ ኦግያ ዎስ። 
\v 9 ሀ ካታማን ጋምእያ ኦንካ ማሻን ዎይኮ ኮሻን ዎይኮ ጋዶን ሀይቃና። ሽን ካታማፐ ከይድ ካታማ ተቅድ ኦይክዳ ባብሎነታስ ባ ኩሽያ እምያ ኦንካ ፓፃ አታና፤ ሄ ኡራይ ባ ሸምፑዋ አሻና። 
\v 10 ታኒ ሀ ካታማ ቦላ ሎኦባ ግዶናሽን ኢታባ ኦናዉ ደንዳስ። ታ እያ ባብሎነ ካዋስ አዳ እማና፤ እ ሀ ካታማ ታማን ፁጋና” ያጌስ ጎዳይ።
\p
\v 11 ይሁዳ ካዋ ኬ አሳስ ሀይሳዳ ያጋ፦ ጎዳ ቃላ ስእተ! 
\v 12 ህንተኖ፥ ዳዊታ ኮቻቶ፥ ጎዳይ ህንተኮ ሀይሳዳ ያጌስ፤ “ዎንታ ዎንታ ሱረ ፕርድተ፤ ቦንቀትዳይሳታ ኡንኤያ አሳ ኩሸፐ አሽተ። ሄሳ ህንተ ኦና እፅኮ፥ ህንተ ኢታ ኦሱዋ ጋሶን ታ ሀንቆይ ታማዳ ኤፃና፤ ኦንካ እያ ቶይሰና” ያጌስ ጎዳይ።
\p
\v 13 ነኖ፥ የሩሳላመ፥ ደንባን ደእያ ዛላዳ፥ ዛንጋራፐ ቁ ጋዳ በንታሳ፤ ሽን ታ ነና ኦላና። ኔኒ፥ “ኦንካ ታ ቦላ ፃለና ዎይኮ ታ ደእያ በሳ ገለና” ያጋሳ።
\p
\v 14 ሽን፥ “ታኒ ጎዳይ ነና ነ ኦሱዋዳ ሴራና። ታኒ ነ ካዎ ኬን ታማ ኦይና፤ ነ ዩሹዋን ደእያ ኡባ ምድ ይሳና” ያጌስ ጎዳይ።
\c 22
\s1 ኢታ ካዎታ ቦላ ፆሳ ፕርዳ
\p
\v 1 ጎዳይ ሀይሳዳ ያጌስ፤ “ዱገ ይሁዳ ካዋ ጋ ባዳ፥ ያን ሀ ቃላ ኦዳ። 
\v 2 ‘ነኖ ይሁዳ ካዋዉ፥ ዳዊታ አራታን ኡትዳይሶ፥ ኔኒ፥ ነ ሞርናትነ ሀ ፐንግያራ ገልያ ነ አሳይ ጎዳ ቃላ ስእተ! 
\v 3 ሱረ ፕርዳ ፕርድተ፤ ፅሎ ኦተ። ቦንቀትዳይሳ ኡንኤያ አሳ ኩሸፐ አሽተ። በተ አሳስ፥ ይኦታስነ አምኤታስ ገነ ኦፕተ ዎይኮ ሱጎፕተ። ፅሎ አሳ ሱ ሀ በሳን ጉሶፍተ። 
\v 4 ሀ ኪታታ ህንተ ናግኮ፥ ዳዊታ አራታን ኡትያ ካዎት ፓራነ ፓራ ጋረ ቶግድ፥ ባንታ ሞርናታራነ ባንታ አሳራ ሀ ካዎ ጋ ፐንግያራ ገላና። 
\v 5 ሽን ህንተ ኪተቶና እፅኮ፥ ሀ ካዎ ጋይ ባይሳ ግዳና ያጋዳ ታ ጎዳይ ታ ሁጰን ጫቃስ’ ” ያጌስ ጎዳይ።
\p
\v 6 ጎዳይ ይሁዳ ካዎ ጋዋባ ሀይሳዳ ያጌስ፦ “ኔኒ ታዉ ጋላዳ ቢታነ ልባኖሰ ዙማ መላ ግድኮካ፥ ታ ነና መላ ቢታነ አስ ዶና ካታማ ኦና። 
\v 7 ታኒ ነና ላልያ አሳ ኦላ ሚሸ ኦይዳ ኪታና፤ ኤንቲ ነ ዝጋ ቱቀታ ቃንፀረድ፥ ታማን የጋና።
\p
\v 8 “ዱማ ዱማ ካዎተታፐ አሳይ ሄ ካታማ ማታራ አሸ፥ ‘ጎዳይ አይስ ሀ ግታ ካታማ ሀይሳዳ ኦዴ?’ ያግድ እሶይ እሱዋ ኦይቻና። 
\v 9 ኤንቲ ዛሪድ፥ ‘ጎዳ ባንታ ፆሳራ ጫቅዳ ጫቁዋ መንድ፥ ሀራ ፆሳታ ጎይንዳ ግሾነ ኦዳ ግሾሳ’ ” ያጋና።
\p
\v 10 ሀይቅዳ ካዋ እዮስያሳስ ዬኮፍተ ዎይኮ ካዮቶፍተ። ሄሳ አግድ፥ ድኤትድ ብዳ ሳሎማስ\f + \fr 22:10 \fr*\ft ሳሎማስ ሀራ ሱንይ እዮአካዛ። እዮአካዝ ካዎተ ሱን ግድሽን፥ ሳሎም ሶ ሱን ዎይኮ ቡዞ ሱን።\ft*\f*ሴለትድ ዬክተ። እ ጉየ ስመና፤ ባ የለትዳ ቢታ ዛሪድ በኤና።
\p
\v 11 ባ አዋ በሳን ይሁዳን ካዎትድ ደእሸ፥ ሀ በሳፈ ብዳ እዮስያሳ ናአ ሳሎማባ ጎዳይ ሀይሳዳ ያጌስ። “እ ጉየ ስመና። 
\v 12 እ ድኤትድ ብዳ ቢታን ሀይቃና፤ ስሚድ ሀ ቢታ በኤና” ያጌስ ጎዳይ።
\p
\v 13 ባ ኬ ገነን ኬፀይሳ፥ ጌላ ኦገን ፖቀ ቦላ ፖቀ ጉጀይሳ፥ ባ አሳስ አይኮካ እሞናነ ጋቴ ቃንፆና ኦስሰይሳ አየ! 
\v 14 ሄ ኡራይ፥ “ታኒ ታዉ ግታ ፖቀይ ደእያ ዳልጋ ኬ ኬፃና” ያግድ፥ ባ ኬስ ዳልጋ ማስኮተታ ከስድ፥ ዝጋ ምን አሌቅስድ፥ ዞኦ ቃላመ ትዬስ።
\p
\v 15 ነ ዳሮ ዝጋን ኬፅዳይስ ነና ሎኦ ካዎ ከሴስ ጋዳ ቆፓይ? ነ አዋ እዮስያሳስ ምያባይነ ኡያባይ ይዴ? እ ሱረ ፕርዳ ፕርድስ፤ ፅሎ ኦስ። ሄሳ ግሾ፥ እያዉ ኡባባይ እንጀትስ። 
\v 16 እ ማንቆታስነ መቶታንቾታስ ሱረ ፕርድያ ግሾ፥ ኡባባይ እያዉ እንጀትስ። ጎዳ ኤሬስ ጉሳይ ሀይሳ። 
\v 17 ሽን ነ አይፈይነ ነ ዎዛናይ ሸምፕዳይ፥ ጭሞን ጎአ ደሞ፥ ፅሎ ሱ ጉሶ፥ ገነነ ኡንኤ ቦላና።
\p
\v 18 ሄሳ ግሾ፥ ጎዳይ እዮስያሳ ናኣ፥ ይሁዳ ካዋ እዮአቄማባ ሀይሳዳ ያጌስ፦ “እ ሀይቅያ ዎደ ኤንቲ እያዉ፥ ‘ዎ፥ ታ እሻዉ፥ ዎ ታ እሻዉ’ ያግድ ዬኮኮና። ቃስ፥ ‘ዎ፥ ታ ጎዳዉ፥ ዎ፥ ታ ካዋዉ’ ያግድ ዘሌሎኮና። 
\v 19 እያ ሞጎይካ ሀረ ሞጎ መላ ግዳና። እያ አሀይ ጎሸትድ፥ የሩሳላመ ፐንገታፐ ያ ባጋን የገታና” ያጌስ ጎዳይ።
\p
\v 20 ጎዳይ የሩሳላመባ ሀይሳዳ ያጌስ፦ “ኦላስ ኔራ ዙፐተይሳት ኡባይ ፆነትዳ ግሾ፥ ፑደ ልባኖሰ ባዳ፥ ያን ዋሳ። ባሳነ ቢታን ዋሶ ሱልሳ፤ አባሪማ ዙማን ዋሳ። 
\v 21 ነ ሳሮ ደእያ ዎደ ታ ነዉ ኦዳስ፤ ሽን ነ ታና ስኦና እፃዳሳ። ነ ናአተፈ ዶምን ነ ሀኖይ ሀይሳ፤ ነ ታዉ ኪተቶና እፃዳሳ። 
\v 22 ነ ሄንንቾታ ኡባ ጫርኮይ ኤፋና፤ ኦላስ ኔራ ዙፐተይሳት ድኤትድ ባና። ሄ ዎደ ነ ኢታተ ኡባ ግሾ ዬላታናነ ካዉያና። 
\v 23 ህንተኖ፥ ልባኖሰ ዝጋን ኬፀትዳ ኬን ደኤይሳቶ፥ እቀ ኦይክዳ ማጫሳዳ ኡንእ ህንተ ቦላ ፑቱ ጊኮ ህንተ ዋናኔ?” ያጌስ።
\p
\v 24 ጎዳይ ሀይሳዳ ያጌስ፦ “ታ ደኦይ ኤሮ! ኔኒ እዮአቄማ ናአይ፥ ይሁዳ ካዎይ ዮአክን፥ ታ ኡሻቻ ኩሸን ደእያ ታ ማታሜ ዎያ ምግዶ ግድያኮካ ታ ነና ከሳ የጋና። 
\v 25 ነና ዎናዉ ኮየይሳታስ፥ ነ ያይያ ባብሎነ ካዋ ናቡካዳናፆራስነ እያ ኦላንቾታስ ታ ነና አዳ እማና። 
\v 26 ታ ነናነ ነ አይዉ ህንተ የለቶና ሀራ ቢታ ሆላና፤ ህንተ ናምአይካ ያን ሀይቃና። 
\v 27 ህንተ ስማናዉ ላሞትያ ቢታ ፖሎ ስመከታ” ያጌስ።
\p
\v 28 ሀ አደይ ዮአክን፥ ካትዳነ መቅዳ ፁጌ? እ፥ ኦንካ ኮዮና ሚሼ? እነ እያ ናይት አይስ ጎደትድ፥ ኤሮና ቢታን የገትድ አትዶና? 
\v 29 ቢተ፥ ቢተ፥ ቢተ፥ ጎዳ ቃላ ስአ! 
\v 30 “እያ ኮቻፈ እሱዋስካ እንጀቶና ግሾነ ዳዊታ አራታን ኡትያ ዎይኮ ይሁዳን ካዎትያ አስ እሶይካ ባይና ግሾ፥ ሀ አድያ፥ ናእ ባይና አስ፥ ባ ላይ ኡባን ደኦይ እንጀቶና አስ” ጋዳ ፃፋ ያጌስ ጎዳይ።
\c 23
\s1 ፅሎ አጫ
\p
\v 1 “ታ ሄን በሳን ደእያ ዶርሳታ ይስያነ ላልያ ሄንንቾታ አየ!” ያጌስ ጎዳይ።
\p
\v 2 ጎዳይ፥ እስራኤለ ፆሳይ፥ ባ አሳ ሄምያ ሄንንቾታ ሀይሳዳ ያጌስ፦ “ህንተ ታ ዶርሳታ ላልዳ ግሾ፥ ጎድዳ ግሾ፥ ናግቦና ግሾነ ህንተ ኦዳ ህንተ ኢታ ኦሱዋ ግሾ ታ ህንተና ሴራና። 
\v 3 ታ ዉድያፐ አትዳይሳታ ታ ካሰ ላልዳ ቢታ ኡባፈ ታ ሁጰን ሺሻና። ኤንታ ጉየ ኤንታ ሄን በሳ ዛራና፤ ኤንቲ ያን የለትድ ዳራና። 
\v 4 ኤንታ ሎይድ ሄምያ ሄንንቾታ ኤንታዉ ሹማና። ኤንቲ ዛሪድ ያዮኮና፤ ዳጋሞኮና፤ ኤንታፈ እሶይካ የና” ያጌስ ጎዳይ።
\p
\v 5 “ዳዊታ ኮቻፈ ፅሎ አጫ ደንና ዎደይ ያና። እ ካዎተ ጭንጫተን አይሳና፤ ቢታ ቦላ ሱረነ ፅሎ ኦና። 
\v 6 እያ ካዎተ ዎድያን ይሁድ አታና፤ እስራኤለይ ሳሮ ዳና። እያ ሱንይ፥ ‘ፆሳይ ኑ ፅሎተ’ ጌተታና” ያጌስ ጎዳይ።
\p
\v 7 ሄሳ ግሾ፥ “አሳይ፥ ‘እስራኤላ አሳ ግብፀ ቢታፈ ከስዳ ጎዳይ ኤርያ መላ’ ያግድ ጫቃናይሳ አግድ፥ 
\v 8 ‘እስራኤላ ኮቻ ፑደሀ ባጋ ቢታፈነ ኤንታ ላልዳ ቢታ ኡባፈ ኤህዳ ጎዳይ ኤርያ መላ’ ያግድ ጫቃና ዎደይ ያና። ሄሳፈ ጉየ፥ ኤንቲ ባንታ ቡዞ ቢታን ዳና” ያጌስ ጎዳይ።
\s1 ዎርዶ ናበታ
\p
\v 9 ናበታባ ታ ቆፕያ ዎደ ታ ዎዛናይ ዳቡሬስ፤ ታ መቀት ኮኮሮሶና። ጎዳ ግሾነ እያ ጌሻ ቃላ ግሾ ዎይነይ ፆንን ማትዳ አስ ግዳስ። 
\v 10 ቢታይ ላይማተን ኩምስ። ቃንገ ግሾ፥ ቢታይ ዬኬስ፤ ባዞ ሄን በሳት መልዶሶና። ናበት ኢታ ኦገን ሄመቶሶና፤ ባንታ ማታ ልከ ግዶና ኦገን ጎኤቶሶና።
\p
\v 11 “ናበትነ ካህነት ቱንዶሶና፤ ሀር አቶሽን ታ ኬን ኤንቲ ኦያ ኢታ ታ በአስ” ያጌስ ጎዳይ።
\p
\v 12 “ሄሳ ግሾ፥ ኤንታ ኦገይ ሀልፃና፤ ኤንቲ ማን የገታና፥ በትድ ኩንዳና። ኤንቲ ሴረትያ ዎደ ኤንታ ቦላ ጋዶ ኤሀና” ያጌስ ጎዳይ።
\p
\v 13 “ሳማረ ናበታ ግዶን ኢታባ በአስ። ኤንቲ ባኣለ ሱንን ትንብተ ኦዶሶና፤ ታ አሳ እስራኤለ ባለሶና። 
\v 14 ቃስ የሩሳላመ ናበታ ግዶንካ ሀይስ ዴፅያባ በአስ። ኤንቲ ላይማቶሶና፤ ዎርዶትድ ደኦሶና። ኦንካ ባ ኢታ ኦሱዋፐ ስሞና መላ ኤንቲ ኢታ ኦይሳታ ምንሶና። ኤንቲ ኡባይ ታዉ ሶዶማ መላ፤ የሩሳላመ አሳይ ጋሞራ መላ” ያጌስ ጎዳይ።
\p
\v 15 ሄሳ ግሾ፥ ኡባፈ ዎልቃማ ጎዳይ ናበታባ ሀይሳዳ ያጌስ፦ “የሩሳላመ ናበታ ዶናፐ ቱናባይ ከይድ፥ ቢታ ኡባን ላለትዳ ግሾ፥ ታ ኤንታ ጫምያ ካ ሙዛና፤ ኤንታ ዎያ ሃ ኡሻና” ያጌስ።
\p
\v 16 “ናበት ኦድያባ ስኦፕተ፤ ኤንቲ ሀኖና ኡፋይሳን ኩንሶና። ጎዳይ ኦዶናሽን ኤንቲ ባንታፈ መ ከስድ ቆንጨ ኦዶሶና። 
\v 17 ታና ካይሳታኮ፥ ‘ህንተ ሳሮ ዳና’ ያጎሶና፤ ቃስ ባንታ ዎዛና ኢታተ ካለይሳታኮ፥ ‘ህንተና ኢታባይ ጋከና’ ያጎሶና” ያጌስ ኡባፈ ዎልቃማ ጎዳይ።
\p
\v 18 “ሽን በአናዉ ዎይኮ እያ ቃላ ስአናዉ ጎዳይ ዞርያ በሳን ኤንታፈ ኦነ ኤቅዳይ? እያ ቃላ ስእዳይ ኦኔ? 
\v 19 ጎዳ ጎተይ ሀንቆን ደንዳና፤ ዎልቃማ ሆበይ ኢታታ ሁጵያ ሾጫና። 
\v 20 ባ ዎዛና ቆፋ ፖሎና ደእሸ፥ ጎዳ ሀንቆይ ስመና። ዉርሰ ዎድያን ሀይሳ ህንተ አኬካና። 
\v 21 ታ ሀ ናበታ ኪታብከ፤ ሽን ኤንቲ ባንታ ኪታ ኤክድ ዎፆሶና። ታ ኤንታዉ ኦዳብከ፤ ሽን ኤንቲ ትንብተ ኦዶሶና። 
\v 22 ኤንቲ ታ ዞርያ በሳን ኤቅዳባ ግድያኮ፥ ታ ቃላ፥ ታ አሳስ ኦዳናሽን። ኤንቲ ኢታ ኦግያፐነ ኤንታ ኢታ ኦሱዋፐ ዛራናሽን” ያጌስ ጎዳይ።
\p
\v 23 “ታ ማታ ፃላላ ፆሴ? ሃሆ ፆሲ ግድክና? 
\v 24 ታ በኦናዳ፥ አስ ጌማ በሳን ባና ቆሳናዉ ዳንዳኢ? ሳሎንነ ሳአን ኩምዳይ ታና ግድክና?” ያጌስ ጎዳይ።
\p
\v 25 “ታ ሱንን ዎርዶ ትንብተ ኦደይሳት ግያባ ስአስ። ኤንቲ፥ ‘ታ አሙሆ በአስ፤ ታ አሙሆ በአስ’ ያጎሶና። 
\v 26 ሀ ናበት ባንታዉ መድ ከስድ ኦድያ ዎርዶ ትንብተይ ኤንታ ዎዛናን አዉደ ጋካናዉ ጋምአኔ? 
\v 27 ኤንታ አዋት ባኣለ ኤቃ ጎይንድ ታ ሱን ዶግዳይሳዳ፥ ኤንቲ እሶይ እሱዋስ ኦድያ አሙሁዋን፥ ታ አሳይ ታ ሱን ዶጋና መላ ኦናዉ ቆፖሶና። 
\v 28 አሙሆ አሙህያ ናበይ ባ አሙሁዋ ኦዶ፤ ሽን ታ ቃላ ስእያ ናበይ ታ ቃላ አማነትድ ኦዶ። ዳልነ ግስተይ አዉን ጋሄቲ? 
\v 29 ታ ቃላይ ታማ መላ ግደኔ? ዛላ መንረያ ናርቃ መላ ግደኔ?” ያጌስ ጎዳይ።
\p
\v 30 “ሄሳ ግሾ፥ ታ ቃላ እሶይ እሱዋፈ ካይሶትድ ታፐ ኤክዳ ዳንስድ ትንብተ ኦድያ ናበታ ታ እፃይስ። 
\v 31 ሄሳዳካ፥ ባንታ ዎዛና ቆፋ ኦድሸ፥ ‘ጎዳይ ያጌስ’ ግያ ናበታካ ታኒ እፃይስ። 
\v 32 ዎርዶ አሙህሸ ትንብተ ኦድያ ናበታ ቦላ ታ ደንዳና። ኤንቲ ባንታ አሙሁዋን ካትድ ትንብተ ኦድያ ናበታ ታኒ እፃይስ። ታ ኤንታ ኪቶናሽን ዎይኮ ሹሞናሽን ዎርዶ ትንብተ ኦዶሶና፤ ታ አሳ ባለሶና። ኤንቲ ሀ አሳ አይኮካ ማዶኮና” ያጌስ ጎዳይ።
\s1 ጎዳ ኪታ
\p
\v 33 “ጎዳይ ታኮ፥ ‘ሀ አሳይ ዎይኮ ናበይ ዎይኮ ካህነይ፥ ጎዳ ኪታይ አይቤ?’ ግድ ኦይችኮ፥ ነ ኤንታኮ፥ ‘ጎዳይ፥ ታ ህንተና ሆላና’ ያጌስ” ጋዳ ኦዳ።
\p
\v 34 “ናበይ ዎይኮ ካህነይ ዎይኮ አሳይ፥ ‘ሀይስ ጎዳ ኪታ’ ያግድ ኦድኮ፥ ታ ሄ አድያነ እያ ሶ አሳ ሴራና። 
\v 35 ሄሳ አግድ እሶይ እሶይ፥ ‘ጎዳይ ዎይግዴ? ዎይኮ ጎዳይ አይ ኦድዴ?’ ያግድ ባ ላገታነ ባ ዳቦታ ኦይቻናዉ በሴስ። 
\v 36 ህዛፐ ኦንካ፥ ‘ጎዳ ኪታ’ ያግድ ዛሪድ ኦደታናዉ በሰና። ሄሳ ግሾ፥ እያ ዶናፐ ከይያ ቃላይ እያዉ ኪታ ግድያ ግሾ፥ ደኦ ፆሳ፥ ኡባፈ ዎልቃማ ጎዳ፥ ኑ ፆሳ ቃላ ህንተ ምርቄታ። 
\v 37 ኔኒ ናበታኮ፥ ‘ጎዳይ ህንተና ዎይግዴ?’ ዎይኮ ‘አይ ኦድዴ?’ ያጋዳ ኦይቻናዉ በሴስ። 
\v 38 ሽን ህንተ፥ ‘ሀይስ ጎዳ ኪታ’ ጊኮ፥ ጎዳይ ሀይሳዳ ያጌስ፦ ታኒ ህንተና፥ ‘ሀይስ ጎዳ ኪታ ጎፕተ’ ያግንካ ህንተ፥ ‘ሀይስ ጎዳ ኪታ’ ግደታ። 
\v 39 ሄሳ ግሾ፥ ታ ህንተና ዶጋና፤ ህንተናነ ህንተ አዋታስ እምዳ ካታማ ኩመ ታ ስንፈ ድጋና። 
\v 40 ታ ህንተ ቦላ መርና ካዉሻነ ዶገቶና ዬላ ኤሀና” ያጌስ ጎዳይ።
\c 24
\s1 ባላሰ አይፈይ ደእያ ናምኡ ዳቾታ
\p
\v 1 ካዎይ ናቡካዳናፆር፥ እዮአቄማ ናኣ፥ ይሁዳ ካዋ እኮንያና፥ ይሁዳ ሀላቃታራ፥ ኩሸ ሂላታራነ ብራታ ቆፀይሳታራ የሩሳላመፐ ባብሎነ ድእድ ኤፍዳፐ ጉየ፥ ጎዳይ ታና ቆንጨ በስስ። ጎዳይ ታና፥ ፆሳ ኬስ ስን ባጋራ ባላሰይ ደእያ ናምኡ ኬሸታ በስስ። 
\v 2 እስ ኬሽያን ኮይሮ ቴርዳ ዳንያ ሎኦ ባላሰይ ደኤስ፤ ሀንኮ ኬሽያን ቃስ ማናዉ ጊጎና ኢታ ባላሰይ ደኤስ። 
\v 3 ጎዳይ ታኮ፥ “ኤርምያሳ፥ ነ በኤይ አይቤ?” ያግድ ኦይችስ።
\p ታኒ፥ “ባላሰ በአይስ፤ ሎኦ ቴራይ ዳሮ ሎኦ፤ ኢታ ቴራይ ቃስ ማናዉ ጊጎና ዳሮ ኢታ” ያጋስ።
\p
\v 4 ሄሳፈ ጉየ፥ ጎዳ ቃላይ ታኮ ይስ፦ 
\v 5 ጎዳይ እስራኤለ ፆሳይ ሀይሳዳ ያጌስ፦ “ይሁዳ ቢታፈ ድኦን ባብሎነ ቢታ የድዳ አሳታ፥ ሀ ሎኦ ባላሰ ቴራዳ ሎኦ ጋና። 
\v 6 ታኒ ሎኦ አይፈን ኤንታ ፄላና፤ ቃስ ኤንታ ዛራዳ ሀ ቢታ ኤሀና። ታ ኤንታ ኬፃናፐ አትሽን፥ ላልከ፤ ኤንታ ቶካናፐ አትሽን፥ ሾድከ። 
\v 7 ታኒ ጎዳ ግድዳይሳ ኤንቲ ኤራና መላ ኤንታዉ ዎዛና እማና። ኤንቲ ባንታ ኩመ ዎዛናፐ ታኮ ስማናዉ ደእያ ግሾ፥ ኤንቲ ታ አሰ ግዳና፤ ታ ኤንታ ፆሰ ግዳና” ያጌስ።
\p
\v 8 ግዶሽን፥ “ይሁዳ ካዋ ሰደቅያሳ፥ እያ ሞርናታ፥ ሀ ቢታን ግድን የሩሳላመን አትዳ አሳነ ግብፀ ቢታን ደኤይሳታ ማናዉ ጊጎና ዳሮ ኢታ ባላሰ ቴራዳ ኢታ ጋና። 
\v 9 ታኒ ኤንታ ጎዳዳ የድያ ቢታ ኡባን፥ ሀ ሳአ ካዎተት ኤንታ በእድ ዳጋማና። ታኒ ኤንታ እፀትዳይሳታ፥ ጫየትዳይሳታ፥ ቦረትዳይሳታ፥ ሌምሰተይሳታ፥ ቀልቅሰተይሳታ፥ ባደትዳይሳታ ኦና። 
\v 10 ታ ኤንታዉነ ኤንታ ማይዛታስ እምዳ ቢታፈ ኤንቲ ፖሎ ያና ጋካናዉ ማሻ፥ ኮሻነ ቦሻ ኤንታ ቦላ የዳና” ያጌስ ጎዳይ።
\c 25
\s1 ላፑን ታሙ ላይ አይለተ
\p
\v 1 እዮስያሳ ናአይ፥ ይሁዳ ካዎይ እዮአቄም ካዎትዳ ኦይዳን ላይን፥ ባብሎነ ካዎይ ናቡካዳናፆር ካዎትዳ ኮይሮ ላይን፥ ይሁዳ አሳባይ ኤርምያሳኮ ይዳ ቃላይ ሀይሳ። 
\v 2 ናበይ ኤርምያስ ይሁዳ ኡባስነ የሩሳላመን ደእያ ኡባስ ሀይሳዳ ያግስ፦ 
\v 3 አሞፀ ናአይ፥ ይሁዳ ካዎይ፥ እዮስያስ ካዎትዳ ታማነ ሄን ላይፈ ዶምድ፥ ሀች ጋካናዉ፥ ላታማነ ሄ ላይ ጎዳ ቃላይ ታኮ ይስ። ታ ህንተዉ ዛራ ዛራ ኦዳስ፤ ሽን ህንተ ስኦና እፅደታ።
\p
\v 4 ጎዳይ ባ አይለታ፥ ናበታ ኡባ ዛር ዛር ህንተኮ ኪትስ፤ ሽን ህንተ ስኦና እፅደታ። 
\v 5 ኤንቲ፥ “ህንተ ኡባይ ህንተ ኢታ ኦግያፐነ ህንተ ኢታ ኦሱዋፐ ስምተ። ጎዳይ ህንተዉነ ህንተ ማይዛታስ መርናዉ እምዳ ቢታን ህንተ ዳና። 
\v 6 ሀራ ፆሳታ ጎይናናዉነ ኤንታዉ ኦናዉ ካሎፍተ። ቃስ ህንተ፥ ህንተ ኩሸን ኦዳ ኤቃታን ጎዳ ሀንቁዋ ደንፍተ። ሄስ ሀንኮ ጎዳይ ህንተና ቆሄና” ያግዶሶና።
\p
\v 7 “ህንተ ታ ኦድዳይሳ ስኦና እፅድ፥ ህንተ ኩሸይ ኦዳባን ታና ይሎይደታ። ህንተ፥ ህንተና ቆህያባ ኦደታ” ያጌስ ጎዳይ።
\p
\v 8 “ሄሳ ግሾ፥ ኡባፈ ዎልቃማ ጎዳይ ሀይሳዳ ያጌስ፦ ህንተ ታ ቃላስ ኪተቶና እፅዳ ግሾ፥ 
\v 9 ፑደሀ ባጋ አሳ ኡባነ ታ አይልያ ባብሎነ ካዋ ናቡካዳናፆራ ፄጋና። ኤንታ ሀ ቢታ ቦላ፥ ሀ ቢታን ደእያ አሳ ቦላነ ሄራን ደእያ ካዎተታ ኡባ ቦላ ኤሀና። ታ ሀ ቢታ ኩመ ይሳና፤ ቃስ በእዳ ኡባይ ሻትያባነ ቀልቅስያባ ኦና” ያጌስ ጎዳይ። 
\v 10 ኤንታ ግዶፈ እልልስነ ኡፋይሳ ቃላ፥ ያጋኖ ግርስ፥ ዎፃ ግርስነ ፆምፐ ፖኦ ይሳና። 
\v 11 ሀ ቢታይ ኩመ ላለትዳነ ባይሳ ቢታ ግዳና፤ ካዎተት ባብሎነ ካዋስ ላፑን ታሙ ላይ ሃረታና።
\p
\v 12 “ላፑን ታሙ ላይይ ፖለትዳፐ ጉየ፥ ታኒ ባብሎነ ካዋነ እያ አሳ ኤንታ ናጋራ ግሾ ሴራና፤ ኤንታ ቢታ መርናዉ ባይሳ ኦና። 
\v 13 ታ ሀ ቢታ ቦላ ኦድዳ ኡባ፥ ኤርምያስ ካዎተታ ኡባ ቦላ ኦድዳ ትንብትያነ ሀ ማፃፋን ፃፈትዳ ኡባ ሀ ቢታ ቦላ ኤሀና። 
\v 14 ዳሮ ካዎተትነ ግታ ካዎት ባብሎነ አሳ ሃራና። ታ ኤንታዉ፥ ኤንታ ሀኑዋዳነ ኤንታ ኩሸ ኦሱዋዳ ዛራና” ያጌስ ጎዳይ።
\s1 ፆሳ ሀንቆ ፁአ
\p
\v 15 “ታ ሀንቁዋን ኩምዳ ዎይነ ዋንጫ ታ ኩሸፐ ኤካ። ኤፋዳ ታ ነና ኪትያ ካዎተታ ኡባ ኡሻ። 
\v 16 ኤንቲ ኡይድ፥ ታኒ ኤንታ ግዶ የድያ ማሻ ጋሶን ጋንድጋራናነ ጎያና” ያጌስ ጎዳይ እስራኤለ ፆሳይ።
\p
\v 17 ታኒ ጎዳ ኩሸፐ ዋንጫ ኤካዳ፥ እ ታና ኪትዳ ካዎተታ ኡባ ኡሻስ። 
\v 18 ሀች ሀንዳይሳዳ ኤንታ ኡባ ዮነ ዳጋማ፥ ጫሸነ ባደ ኦና መላ የሩሳላመነ ይሁዳ ካታማታ፥ እያ ካዎታነ እያ ሞርናታ ኡባ ኡሻስ። 
\v 19 ግብፀ ካዋ፥ እያ አይለታ፥ እያ ሞርናታ፥ እያ ቢታ አሳ ኡባነ 
\v 20 ያን ደእያ አላጋ አሳ ኡባ ኡሻስ። ኦፃ ካዎታ ኡባ ኡሻስ። ፍልስፄመን ደእያ አስቃሎና፥ ጋዛ፥ ኤቅሮናነ አሽዶዳፐ አትዳ ካዎታ ኡባ ኡሻስ። 
\v 21 ኤዶመ፥ ሞአበነ አሞነ ኡሻስ። 
\v 22 ፅሮሳ ካዎታ ኡባ፥ ስዶና ካዎታ ኡባነ መደትራነ አባፈ ሄፍንን፥ ሃሆን ደእያ ካዎታ ኡሻስ። 
\v 23 ደዳና፥ ተማና፥ ቡዛነ ባንታ ሁጵያ ጋፃ ሜድያ አሳ ኡባ ኡሻስ። 
\v 24 አራበ ካዎታ ኡባነ መላ ቢታን ደእያ ዋላካ አሳ ካዎታ ኡባ ኡሻስ። 
\v 25 ዝምራ፥ ኤላማነ ሜዶና ካዎታ ኡባ ኡሻስ። 
\v 26 ፑደሀ ቢታ ካዎታ ኡባ፥ ሃሆንነ ማታን ደእያ ካዎታ ኡባ ካላዳ ካላዳ ሳኣ ቦላ ደእያ ካዎተታ ኡባ ኡሻስ። ኤንታፈ ጉየ ባብሎነ ካዎይ ኡያና።
\p
\v 27 ጎዳይ ታኮ፥ “ሄሳ ግሾ፥ ‘ኡባፈ ዎልቃማ ጎዳይ፥ እስራኤለ ፆሳይ ህንተኮ ሀይሳዳ ያጌስ’ ያጋ። ‘ኡይተነ ማትተ፤ ጮይተነ ኩንድተ። ታኒ ህንተ ግዶ የድያ ማሻ ጋሶን ዛሪድ ደንዶፍተ’ ያግስ። 
\v 28 ሽን ኤንቲ ነ ኩሸፐ ዋንጫ ኤኮናነ ኡዮና እፅኮ፥ ኤንታኮ ሀይሳዳ ያጋ። ‘ኡባፈ ዎልቃማ ጎዳይ ህንተኮ ሀይሳዳ ያጌስ፦ ህንተ ኡያናዉ በሴስ። 
\v 29 ታ ሱንን ፄገትዳ ካታማ ቦላ ኢታባ ኦናዉ ዶማይስ። ያትን ህንተ ሴረቶና አታናዉ ዳንዳኤቲ? ታ ሳአን ደእያ ኡባ ቦላ ማሻ ፄግዳ ግሾ ህንተ ሴረቶና አተከታ’ ” ያጌስ ኡባፈ ዎልቃማ ጎዳይ።
\p
\v 30 “ሄሳ ግሾ፥ ኤርምያሳ፥ ሀ ቃላ ኡባይ ኤንታ ቦላ ፖለታናይሳ ኤንታዉ ኦዳ። ጎዳይ ቃን ጉማና፤ ጎዳይ ባ ጌሻ በሳፈ ባ ጉን ስሳና። እ ባ ቢታ ቦላ ፃጋና፤ ዎይነ ጉምኤይሳት ዋሰይሳዳ ሳአን ደእያ ኡባ ቦላ ዋሳና። 
\v 31 ጎዳስ ካዎተታራ ሞቶይ ደእያ ግሾ እያ ዋሶይ ሳአ ጋፃ ጋክድ ስኤቴስ። ጎዳይ አሳ ኡባራ ፕርደታና፤ እ ኢታታ ማሻስ አድ እማና” ያጌስ ጎዳይ።
\p
\v 32 “ኢታባይ ካዎተፈ ካዎተ ላለትስ፤ ሳኣ ጋፃፐ ጎተይ ደንድስ” ያጌስ ኡባፈ ዎልቃማ ጎዳይ።
\p
\v 33 ሄ ዎደ ጎዳይ ዎዳይሳታ አሀይ፥ ቢታ ቦላ ሀ ጋፃፐ ያ ጋፃ ጋካናዉ ላለታና። ኤንታዉ ዬከተና፥ ኤንታ አሀይ ሺቀና ዎይኮ ሞገተና፤ ኤንቲ ቢታን ፕቶ መላ ግዳና።
\p
\v 34 ህንተኖ፥ ሄንንቾቶ፥ ዬክተነ ዋስተ። ህንተኖ፥ ዉድያ ካለይሳቶ፥ ብዶን ጎንዶረትተ። ህንተ ሹከትያ ዎደይ ጋክስ፤ ህንተ ኩንዳናነ ሎኦ ኡርቃ ሚሻዳ መቀረታና። 
\v 35 ሄንንቾት ባቃትድ አትያ በሲ ባዋ፤ ዉድያ ካለይሳት ከስ ኤክያ በሲ ባዋ። 
\v 36 ጎዳይ ኤንታ ሄን ጋድያ ይስያ ግሾ፥ ሄንንቾት ዋስያ ዋሱዋነ ዉድያ ካለይሳት ዬክያ ዬሁዋ ስእተ። 
\v 37 ጎዳ ሱልያ ሸንያ ጋሶን ሳሮ ቢታይ ባይሳታና። 
\v 38 ጋሞይ ባ ደእያ ዎራፐ ከየይሳዳ ጎዳይ ባ ደእያ በሳፈ ከያና። ኤንታ ቢታይ ኡንኤይሳታ ማሻንነ ጎዳ ሱልያ ሀንቁዋን ባይሳ ግዳና።
\c 26
\s1 ኤርምያስ ሀይቆፐ አትስ
\p
\v 1 እዮስያሳ ናአይ ይሁዳ ካዎይ እዮአቄም ካዎትዳ ዎደ ጎዳ ቃላይ ይስ። 
\v 2 ጎዳይ፥ “ፆሳ ኬ ዳባባን ኤቃ። ፆሳ ኬን ጎይናናዉ ይሁዳ ካታማታፐ ያ ኡባስ፥ ታ ነና ኪትዳ ቃላፐ እሱዋካ አሾና ኦዳ። 
\v 3 ኤንቲ ስእድ፥ ባንታ ኢታ ኦግያፐ ስማነኮ ኦን ኤር። ሄሳ ግድኮ፥ ታኒ ኤንታ ኢታተ ግሾ ይሳናዉ ቆፕዳይሳ አጋጋና።”
\p
\v 4 ኤንታኮ ሀይሳዳ ያጋ፦ “ህንተ ታና ስኦና እፅኮነ ታ ህንተዉ እምዳ ህግያ ኪተቶና እፅኮ፥ 
\v 5 ህንተ ስኦና እፅኮካ ታ ዛራ ዛራዳ ህንተኮ ኪትዳ፥ ታ አይለታ ናበታ ቃላ ስኦናን እፅኮ፥ 
\v 6 ታ ሀ ፆሳ ኬ ሴሎዳ ኦና። ሀ ካታማ ሳአን ደእያ ካዎተታ ኡባስ ባደ ኦና” ያግስ።
\p
\v 7 ኤርምያስ ፆሳ ኬን ሀ ቃላ ኦድሽን፥ ካህነት፥ ናበትነ አሳ ኡባይ ስእዶሶና። 
\v 8 ኤርምያስ፥ ጎዳይ፥ ኦዳ ግድ እምዳ ኪታ ኦድድ ኦንግዳ ዎደ ካህነት፥ ናበትነ አሳ ኡባይ እያ ኦይክድ፥ “ነ ሀይቃናዉ በሳሳ” ያግዶሶና። 
\v 9 ኔኒ፥ “ ‘ሀ ፆሳ ኬይ ሴሎዳ ሀናና፤ ቃስ ሀ ካታማይ ያና፤ ባይሳ ግዳና’ ያጋዳ፥ ጎዳ ሱንን አይስ ትንብተ ኦዳዲ?” ያግድ፥ ፆሳ ኬን ሺቅዳ አሳ ኡባይ ኤርምያሳ ተቅዶሶና።
\p
\v 10 ይሁዳ ሀላቃት ሄሳ ስእዳ ዎደ፥ ካዎ ጋፐ ከይድ፥ ፆሳ ኬ ይዶሶና። ፆሳ ኬን ኦራ ፐንገ ጌተትያ ፐንግያን ኡትዶሶና። 
\v 11 ካህነትነ ናበት ሀላቃታኮነ አሳ ኡባኮ ሀይሳዳ ያግዶሶና፦ “ህንተ፥ ህንተ ሀይን ስእዳይሳዳ፥ ሀ አደይ ሀ ካታማ ቦላ ትንብተ ኦድዳ ግሾ፥ እ ሀይቃናዉ በሴስ!” ያግዶሶና።
\p
\v 12 ኤርምያስ ሀላቃታኮነ አሳ ኡባኮ ሀይሳዳ ያግስ፦ “ሀ ህንተ ስእዳ ቃላ ኡባይ ሀ ፆሳ ኬ ቦላነ ሀ ካታማ ቦላ ሀናና ጋዳ ታ ኦዳና መላ ጎዳይ ታና ኪትስ። 
\v 13 ህዛ ህንተ ኦግያነ ህንተ ኦሱዋ ላምተ፤ ጎዳ ህንተ ፆሳ ቃላስ ኪተትተ። ሄሳ ህንተ ኦኮ፥ ጎዳይ ህንተ ቦላ ኤሀና ግዳ ኢታባ አጋጋና። 
\v 14 ታና ግድኮ፥ ታ ህንተ ኩሸን ደአይስ። ህንተዉ ሎኦነ ሱረ ዳንዳባ ታ ቦላ ኦተ። 
\v 15 ታኒ ሀ ቃላ ኡባ ህንተዉ ኦዳና መላ ጎዳይ ቱማ ታና ኪትዳ ግሾ፥ ህንተ ታና ዎኮ፥ ህንተ ህንተ ቦላ፥ ሀ ካታማ ቦላነ እያን ደእያ አሳ ቦላ ፅሎ ሱ አጮ ኤሀናይሳ ኤርተ” ያግስ።
\p
\v 16 ሀላቃትነ አሳ ኡባይ፥ ካህነትነ ናበት፥ “እ፥ ጎዳ፥ ኑ ፆሳ ሱንን ኑስ ኦድዳ ግሾ፥ ሀ አደይ ሀይቃናዉ በሰና” ያግዶሶና።
\p
\v 17 ቢታ ጭማታፐ እሶት እሶት ደንድ ኤቅድ፥ ሺቅዳ አሳኮ ሀይሳዳ ያግዶሶና፦ 
\v 18 “ህዝቅያስ ይሁዳን ካዎትዳ ላይን ሞረሴታ አደይ ምክያስ ካሰ ይሁዳ አሳስ ሀይሳዳ ያግድ፥ ትንብተ ኦድስ፦ ‘ፅዮነይ ሾቃዳ ጎየታና። የሩሳላመ ካታማይ ላለትድ፥ ላለ ዶረ ግዳና። ፆሳ ኬይ ኬፀትዳ ደረይ ዎራ ግዳና’ ያጌስ ኡባፈ ዎልቃማ ጎዳይ” ያግስ። 
\v 19 ያትን፥ “ይሁዳ ካዎይ ህዝቅያስነ ይሁዳ አሳ ኡባይ እያ ዎዶና? አካይ፥ ህዝቅያስ ጎዳስ ያይድ፥ ጎዳ ማሮተ ኦይችቤኔ? ጎዳይ ኤንታ ቦላ ኤሀና ግዳ ኢታባ አግቤኔ? ሽን ኑኒ ኑ ቦላ ኢታባ ኤሀና ሀኖስ” ያግዶሶና።
\s1 እዮአቄም ኦርዮና ዎስስ
\p
\v 20 ቅርያት-ይኣርማ ጌተትያ በሳን፥ ሻማያ ናኣ፥ ኦርዮና ጌተትያ እስ አደይ ደኤስ። እካ ኤርምያስ ኦድዳይሳዳ፥ ሀ ካታማ ቦላነ ሀ ቢታ ቦላ ጎዳ ሱንን ካሰ ትንብተ ኦድስ። 
\v 21 ካዎይ እዮአቄም፥ እያ ኦላንቾት፥ እያ ሞርናት፥ ኦርዮን ኦድዳይሳ ስእዳ ዎደ ካዎይ እያ ዎናዉ ኮይስ። ኦርዮን ሄሳ ስእዳ ዎደ ያይድ፥ ግብፀ ባቃትስ። 
\v 22 ግዶሽን፥ ካዎይ እዮአቄም አክቦራ ናኣ ኤልናታናነ ሀራ አሳታ ግብፀ ኪትስ። 
\v 23 ኤንቲ ኦርዮና ግብፀፈ ከስድ፥ ካዋ እዮአቄመኮ ኤፍን፥ እያ ማሻን ዎስድ ደረይ ሞገትያ ዱፎን ሞግዶሶና።
\p
\v 24 ሽን ሳፋና ናአይ፥ አክቃም ኤርምያሳ ማድዳ ግሾ አሳይ እያ ዎናዉ አድ እምቦኮና።
\c 27
\s1 ይሁድ ናቡካዳናፆራ ኩሸን ኩንድስ
\p
\v 1 እዮስያሳ ናአይ ሰደቅያስ፥ ይሁዳን ካዎቶ ዶምዳ ዎደ ሀ ቃላይ ጎዳፐ ኤርምያሳኮ ይስ። 
\v 2 “ዳፎ ጎነ ዎዶሮራ ደእያ ቃምባራ መዳ ነ ጋናን ዎ። 
\v 3 ይሁዳ ካዋ ሰደቅያሳኮ የሩሳላመ ኪተትዳ አሳ ባጋራ፥ ኤዶመ፥ ሞአበ፥ አሞነ፥ ፅሮሳነ ስዶና ኪታ። 
\v 4 ኤንቲ ባንታ ጎዳታስ ኦዳና መላ ኤንታ ኪታ። ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦ 
\v 5 ‘ታ ግታ ዎልቃንነ ታ ምጨትዳ ኩሸን ሳኣ፥ ሳአን ደእያ አሳ፥ መሄነ ዶአታ መስ፤ ታኒ እያ፥ ታ ኮይያ ኦደስካ እማይስ። 
\v 6 ሀእ ታ ቢታ ኡባ ታ አይልያስ፥ ባብሎነ ካዋ ናቡካዳናፆራስ እማስ። ቃስ ታ ባዞ ዶአትካ እያዉ ሃረታና መላ ኦስ። 
\v 7 እያ ቢታይ ሀራታስ ሃረትያ ዎደይ ጋካናዉ ካዎተት ኡባይ እያዉ፥ እያ ናኣስነ እያ ናኣ ናኣስ ሃረታና። ሄሳፈ ጉየ፥ ዳሮ ካዎተትነ ግታ ካዎት እያ ሃራና።’
\p
\v 8 “ሽን አይ ቢት ዎይኮ አይ ካዎተ ባብሎነ ካዋ ናቡካዳናፆራስ ኪተቶና እፅኮነ እያ ቃምባራን ገሎና እፅኮ፥ ሄ ካዎተይ እያ ኩሸን ያና ጋካናዉ ማሻን፥ ኮሻንነ ቦሻን ሴራና። 
\v 9 ሄሳ ግሾ፥ ‘ባብሎነ ካዋስ ሃረተከታ’ ግያ ህንተ ናበታ፥ ህንተዉ ካየይሳታ፥ ህንተ አሙሆ ብለይሳታ፥ ህንተ ማሮታነ ሞይትለ ፄገይሳታ ስኦፕተ። 
\v 10 ኤንቲ ህንተዉ ዎርዶ ኦዶሶና፤ ህንተና ህንተ ቢታፈ ሾዳና፤ ህንተና ጎዳዳ ከሳና፤ ህንተካ ያና። 
\v 11 ሽን አይ ካዎተካ ባብሎነ ካዋ ቃምባራን ገልድ፥ እያዉ ሃረትኮ፥ ታ ሄ ካዎተ እያ ቢታን አሻና፤ ኤንቲ ሄ ቢታ ጎያና፤ ያን ዳና” ያጌስ ጎዳይ።
\p
\v 12 ታኒ፥ ይሁዳ ካዋ ሰደቅያሳስካ ሀ ቃላ ኦዳስ፤ “ባብሎነ ካዋ ቃምባራን ገላዳ እያዉነ እያ አሳስ ሃረትኮ፥ ነ ደኦን ዳና። 
\v 13 ጎዳይ ባብሎነ ካዋስ ሃረቶና እፅያ ካዎተስ ኦድዳይሳዳ ማሻን፥ ኮሻንነ ቦሻን ነነ ነ አሳይ አይስ ሀይቄቲ? 
\v 14 ኤንቲ ኦደይ ዎርዶ ግድያ ግሾ፥ ‘ህንተ ባብሎነ ካዋስ ሃረተከታ’ ያግድ ኦድያ ናበታ ስኦፕተ። 
\v 15 ታ ኤንታ ኪታብከ፤ ሽን ኤንቲ ታ ሱንን ዎርዶ ትንብተ ኦዶሶና። ሄሳ ግሾ፥ ታ ህንተና ጎዳዳ ከሳና፤ ህንተነ ህንተ ናበት ያና” ያጌስ ጎዳይ።
\p
\v 16 ሄሳፈ ጉየ፥ ታ ካህነታስነ አሳ ኡባስ ሀይሳዳ ያጋዳ ኦዳስ፦ “ፆሳ ኬ ሚሸይ ባብሎነፐ ማታራ ስሚድ ያና” ያግድ ዎርዶ ኦድያ ናበታ ስኦፕተ። 
\v 17 ኤንቲ ግያባ ስኦና አግድ፥ ባብሎነ ካዋስ ሃረትተ፤ ህንተ ደኦን ዳና። ሀ ካታማይ አይስ ላለትዳ በሲ ግዳኔ? 
\v 18 ኤንቲ ቱማ ናበ ግድኮነ ጎዳ ቃላይ ኤንታን ደእኮ፥ ፆሳ ኬን፥ ይሁዳ ካዎ ጋንነ የሩሳላመን አትዳ ሚሸይ ባብሎነ ቦናዳ ኡባፈ ዎልቃማ ጎዳ ፆሳ ዎሶ።
\p
\v 19 “ኡባፈ ዎልቃማ ጎዳይ፥ ፆሳ ኬ ካረን ኤቅዳ ናምኡ ናሰ ብራታ ቱሳታባ፥ ግታ ከረታባ፥ ጫና ጋረታባነ ሀራ ሚሸታባ ሀይሳዳ ያጌስ፦ 
\v 20 ባብሎነ ካዎይ ናቡካዳናፆር እዮአቄማ ናኣ፥ ይሁዳ ካዋ እኮንያናነ ይሁዳንነ የሩሳላመን ደእያ ግታ አሳ ኡባ ድእድ ኤፍዳ ዎደ፥ 
\v 21 ኡባፈ ዎልቃማ ጎዳይ፥ እስራኤለ ፆሳይ፥ ፆሳ ኬን፥ ይሁዳ ካዎ ጋንነ የሩሳላመን አትዳ ሚሸታባ ሀይሳዳ ያጌስ፤ 
\v 22 ኤንቲ ባብሎነ ቢታ ጋዘታና፤ ታ ኤንታ ግሾ ያና ዎደይ ጋካናዉ፥ ኤንቲ ያን ዳና። ሄ ዎደ ታ ኤንታ ጉየ ዛራዳ ኤንታ በሳን ዎና” ያጌስ ጎዳይ።
\c 28
\s1 ዎርዶ ናብያ ሀናና
\p
\v 1 ሄ ላይ፥ ይሁዳ ካዎይ ሰደቅያስ ካዎቶ ዶምዳ ኦይዳን ላይን፥ እቻሻን አጌናን ጋባኦና አደይ፥ አዙራ ናአይ ናበይ ሀናን፥ ፆሳ ኬን ካህነታነ አሳ ኡባ ስንን ታኮ ሀይሳዳ ያግስ፦ 
\v 2 “ኡባፈ ዎልቃማ ጎዳይ፥ እስራኤለ ፆሳይ፥ ‘ባብሎነ ካዋ ቃምባራ መንና። 
\v 3 ባብሎነ ካዎይ፥ ናቡካዳናፆር፥ ባብሎነ ኤፍዳ ፆሳ ኬ ሚሸ ኡባ ታ ናምኡ ላይ ግዶን ዛራዳ ሀ በሳ ኤሀና። 
\v 4 እዮአቄማ ናኣ፥ ይሁዳ ካዋ ዮአክና፥ ይሁዳፐ ድኤትድ ባብሎነ ብዳ አሳ ኡባ ዛራዳ ሀ በሳ ኤሀና። ታኒ ባብሎነ ካዋ ቃምባራ መንና’ ” ያጌስ ጎዳይ።
\p
\v 5 ፆሳ ኬ ግዶን ኤቅዳ ካህነታነ አሳ ኡባ ስንን ናበይ ኤርምያስ፥ ናብያ ሀናናኮ ሀይሳዳ ያግስ። 
\v 6 “አምንእ! ጎዳይ ነ ግዳይሳዳ ኦ። ፆሳ ኬ ሚሸታነ ድኤትድ ብዳ አሳ ኡባ ባብሎነፐ ዛሪድ፥ ነ ኦድያ ቃላ ጎዳይ ፖሎ! 
\v 7 ግዶሽን፥ ታ ነዉነ ነ አሳስ ኦደይሳ ስአ። 
\v 8 ኔፐነ ታፐ ካሰ ደእዳ ናበት፥ ኦላባ፥ ዮባነ ጋዶባ ግታ ካዎተታ ቦላ ትንብተ ኦድዶሶና። 
\v 9 ሽን፥ ሳሮባ ኦድያ ናበይ፥ ቱማ ፆሲ ኪትዳ ናበ ግደይስ ኤረተይ፥ እ ኦድያ ትንብተይ ፖለትያ ዎደና” ያግስ።
\p
\v 10 ሄሳፈ ጉየ፥ ናበይ ሀናን፥ ናብያ ኤርምያሳ ጋናፈ ቃምባራ ኤክድ መንስ። 
\v 11 ሀናን አሳ ኡባ ስንን፥ “ታኒ ናምኡ ላይ ግዶን ባብሎነ ካዋ ናቡካዳናፆራ ቃምባራ ካዎተታ ኡባ ጋናፈ ደንዳ ሀይሳዳ መንና” ያጌስ ጎዳይ። ሄሳፈ ጉየ፥ ኤርምያስ ደንድድ፥ ባ ኦግያ ብስ።
\p
\v 12 ናበይ ሀናን፥ ናብያ ኤርምያሳ ጋናፈ መንዳ ጉ ዎደፐ ጉየ፥ ጎዳ ቃላይ ናብያ ኤርምያሳኮ ሀይሳዳ ያግሸ ይስ። 
\v 13 ባዳ ሀናናስ ኦዳ፤ “ኔኒ ም ቃምባራ መንዳሳ፤ ሽን ኔኒ እያ ግሾ ብራታ ቃምባራ መና። 
\v 14 ባብሎነ ካዋ ናቡካዳናፆራስ ሃረታና መላ ታኒ ሀ ካዎተታ ኡባ ጋናን ብራታ ቃምባራ ዎና፤ ኤንትካ እያዉ ሃረታና። ታኒ ሀር አቶሽን፥ ባዞ ዶአትካ እያዉ ሃረታና መላ ኦና” ያጌስ ኡባፈ ዎልቃማ ጎዳይ፥ እስራኤለ ፆሳይ።
\p
\v 15 ሄሳፈ ጉየ፥ ናበይ ኤርምያስ፥ ናብያ ሀናናኮ ሀይሳዳ ያግስ፦ “ሀናንያ፥ ስአ! ጎዳይ ነና ኪትቤና፤ ሽን ኔኒ ሀ አሳይ ዎርዶባን አማነታና መላ ኦዳሳ። 
\v 16 ሄሳ ግሾ፥ ጎዳይ፥ ‘ታ ነና ሳአ ቦላፈ ድጋና። ኔኒ ሀ አሳይ ታ ቦላ ማካላና መላ ኦዳ ግሾ ነ ሀ ላይ ሀይቃና’ ” ያግስ።
\p
\v 17 ሄ ላይ ላፑን አጌናን ናበይ ሀናን ሀይቅስ።
\c 29
\s1 ኤርምያሳ ዳብዳብያ
\p
\v 1 ናብያ ኤርምያስ ድኤትዳ አሳ ግዶን ደእያ አትዳ ጭማታስ፥ ካህነታስ፥ ናበታስነ ናቡካዳናፆር የሩሳላመፐ ድእድ፥ ባብሎነ ኤፍዳ ኡባስ የሩሳላመፐ የድዳ ዳብዳበይ ሀይሳፈ ካልድ ፃፈትዳይሳ። 
\v 2 ሀይስ ሀንዳይ፥ ካዎይ እኮንያን፥ እያ አይያ ካውያ፥ እያ ሞርናት፥ ይሁዳነ የሩሳላመ ሀላቃት፥ ኩሸ ሂላንቾትነ ብራታ ቆፀይሳት የሩሳላመፐ ድኤትድ ብድ ስምና። 
\v 3 ኤርምያስ ይሁዳ ካዎይ ሰደቅያስ ባብሎነ ካዋ ናቡካዳናፆራኮ ኪተትዳ ሳፋና ናኣ ኤልኣሳነ ካልቄ ናኣ ጋማራ ቦላ ሄ ዳብዳብያ የድስ።
\p ዳብዳበይ ሀይሳዳ ያጌስ፦ 
\v 4 “ኡባፈ ዎልቃማ ጎዳይ፥ እስራኤለ ፆሳይ፥ የሩሳላመፐ ባብሎነ ድኤትዳ አሳ ኡባስ ሀይሳዳ ያጌስ፦ 
\v 5 ኬ ኬፅድ ያን ደእተ። ካ ዘርድ አይፍያ ሚተ። 
\v 6 ማቾ ኤክድ ማጫ ናአነ አደ ናአ የልተ። ህንተ አደ ናይታስ ማቾ ኦይችድ እምተ፤ ህንተ ማጫ ናይታ አዝናስ እምተ። ኤንቲ ማጫ አደ የሎ፤ ያን ታይቦን ዳርተ፤ ጉፆፍተ። 
\v 7 ህንተ ድኤትድ ብዳ ካታማስ ሳሮይ ዳና መላ ኮይተ። ሄ ካታማስ ጎዳ ዎስተ። እያዉ ሳሮይ ደእኮ፥ ህንተዉካ ሳሮይ ዳና። 
\v 8 ህንተ ግዶን ደእያ ህንተ ናበትነ ማሮት ኦድያባን ጭመቶፍተ፤ ኤንቲ አሙህያ አሙሁዋ ስኦፕተ። 
\v 9 ኤንቲ ታ ሱንን ዎርዶ ትንብተ ኦዶሶና፤ ታ ኤንታ ኪታብከ” ያጌስ ኡባፈ ዎልቃማ ጎዳይ፥ እስራኤለ ፆሳይ።
\p
\v 10 “ህንተ ባብሎነን ጋምእያ ላፑን ታሙ ላይይ ፖለትያ ዎደ ታ ህንተ ግሾ ያዳ፥ ህንተና፥ ህንተ ቢታ ዛራዳ ኤሀና ጋዳ ገልዳ ቃላ ፖላና። 
\v 11 ታኒ ህንተዉ ቆፕያ ቆፋ ኤራይስ። ሄ ቆፋይ፥ ዉርሰይ ሎኦነ ኡፋይስ ደእያ፥ ህንተና ጎእያ ቆፋፐ አትሽን፥ ቆህያ ቆፋ ግደና። 
\v 12 ሄሳፈ ጉየ፥ ህንተ ታና ፄጋና፤ ታኮ ያናነ ታና ዎሳና፤ ታካ ህንተና ስአና። 
\v 13 ህንተ ታና ኮያና፤ ህንተ ታና ህንተ ኩመ ዎዛናን ኮይዳ ዎደ ደማና። 
\v 14 ታ ህንተዉ በንታና፤ ታ ህንተና ድኤተፈ ዛራና። ታኒ ህንተና ላልዳ ካዎተታፐነ ዱማ ዱማ በሳፈ ሺሻና። ታ ህንተና ድኦን ደንዳ ህንተ ቢታ ጉየ ዛራዳ ኤሀና” ያጌስ ጎዳይ።
\p
\v 15 ህንተ፥ “ጎዳይ ናበ ኑስ ባብሎነን ደንስ” ያግደታ። 
\v 16 ግዶሽን፥ ዳዊታ አራታን ኡትያ ካዋባነ ህንተ መላ ድኤትድ ቦና አትዳ አሳባነ ህንተ ዳቦታባ ጎዳይ ሀይሳዳ ያጌስ። 
\v 17 “ታ ኤንታ ቦላ ማሸ፥ ኮሻነ ጋዶ የዳና። ታ ኤንታና ሜተታናዉ ዳንዳኤቶና ኢትዳ ባላሰ ም አይፈዳ ኦና። 
\v 18 ታኒ ኤንታ ማሻን፥ ኮሻንነ ጋዶን የደዳ፥ ኤንታ ሳአን ደእያ ካዎተ ኡባስ ዳጋማ ኦና። ቃስ ታ ኤንታ ከሳዳ የድዳ ቢታ ኡባን ባደስ፥ ዳጋማስ፥ ቦረስነ ጫሻስ ኦና። 
\v 19 ታ አይለታ ናበታ ባጋራ ዛራ ዛራዳ ኪትዳ ታ ቃላ ኤንቲ ስኦና እፅዶሶና። ህንተ ድኤትድ ብዳይሳትካ ስኦና እፅደታ። 
\v 20 ህንተኖ፥ የሩሳላመፐ ባብሎነ ድኤትድ ብዳ አሳዉ፥ ህንተ ኡባይ ጎዳ ቃላ ስእተ” ያጌስ ኡባፈ ዎልቃማ ጎዳይ።
\p
\v 21 ታ ሱንን ዎርዶ ትንብተ ኦድያ፥ ቆላያ ናኣ አካባባነ ማሰያ ናኣ ሰደቅያሳባ ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ። “ታ ኤንታ ባብሎነ ካዋ ናቡካዳናፆራስ አዳ እማና። ህንተ ፄልሽን፥ እ ኤንታ ዎና። 
\v 22 ሄሳፈ ጉየ፥ ይሁዳፐ ድኤትድ፥ ባብሎነ ብዳ አሳይ እስ አስ ባዳናዉ ኮይኮ፥ ‘ባብሎነ ካዎይ ታማን ፁግዳ ሰደቅያሳዳነ አካባዳ ጎዳይ ነና ኦ’ ያጋና። 
\v 23 ኤንቲ እስራኤለን ኢታ ናጋራ ኦዶሶና። ኤንቲ ባንታ ሾሮታ ማቸታራ ላይማትዶሶና፤ ታ ኤንታ ኪቶና ዎርዶ ትንብተ ታ ሱንን ኦድዶሶና። ሄሳ ኤረይ ታና፤ ሄሳስ ታኒ ማርካ” ያጌስ ጎዳይ።
\s1 ሻማያስ ፃፈትዳ ዳብዳበ
\p
\v 24 ናሄላመ አድያ ሻማያስ ሀይሳዳ ያጋዳ ኦዳ፦ 
\v 25 “ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦ ‘ኔኒ ነ ሱንን የሩሳላመን ደእያ አሳስ፥ ማእሰያ ናኣ ካህንያ ሶፎንያሳስነ ሀራ ካህነታስ ዳብዳበ የዳዳሳ።’ ነ ሶፎንያሳስ ሀይሳዳ ያጋዳሳ፦ 
\v 26 ‘ፆሳ ኬን ሀላቃ ግዳና መላ ጎዳይ ነና ዮዳሄ በሳን ካህነ ኦድ ሹምስ። ባና ናበ ግድ ትንብተ ኦድያ ጎያ ኦናካ እያ ቶሁዋ ዱን፥ እያ ቆያ ሳንላታን ኔኒ ቃቻናዉ በሴስ። 
\v 27 ያትን ባና ናበ ግያ አናቶታ አድያ ኤርምያሳ አይስ ሄሳዳ ኦብኪ? 
\v 28 ኤርምያስ፥ ድኤተ ላይይ ዳሮ ግድያ ግሾ ባብሎነን ኬ ኬፅድ ደእተ፤ ካ ዘርድ አይፍያ ሚተ’ ” ያግድ ኑና ኪትስ።
\p
\v 29 ካህነይ ሶፎንያስ ናብያ ኤርምያሳስ ዳብዳብያ ናባብስ። 
\v 30 ጎዳ ቃላይ ኤርምያሳኮ ሀይሳዳ ያግድ ይስ፤ 
\v 31 “ሀ ኪታ ድኦን ደእያ አሳ ኡባስ ኪታ፤ ናሄላማ አድያ ሳማየባ ጎዳይ ሀይሳዳ ያጌስ፤ ታኒ ኪቶና ሻማየይ ዎርዶ ትንብተ ኦድድ ህንተ ዎርዶን አማንታና መላ ኦስ። 
\v 32 ታ ናሄላማ አድያ ሻማያነ እያ ሶ አሳ ሴራና። እ ታ ቦላ ማካላባ ኦድዳ ግሾ ሀ አሳ ግዶን እያዉ እስ አስካ ደኦን አተና። ታኒ ታ አሳስ ኦና ኬሀተ እ በኤና” ያጌስ ጎዳይ።
\c 30
\s1 እስራኤለ አሳ ስሙዋ
\p
\v 1 ጎዳፐ ኤርምያሳኮ ይዳ ቃላይ ሀይሳ። 
\v 2 “ኤርምያሳ፥ ታ ነዉ ኦድዳ ቃላ ኡባ ፃ ማፃፋን ፃፋ። 
\v 3 ታኒ ታ አሳ እስራኤለነ ይሁዳ ድኦፐ ጉየ ዛርያ ዎደይ ማታትስ። ኤንታ ማይዛታስ እምዳ ቢታ ኤንታ ዛራና፤ ኤንቲ እያ ላታና” ያጌስ ጎዳይ እስራኤለ ፆሳይ።
\p
\v 4 ጎዳይ እስራኤለባነ ይሁዳባ ኦድዳ ቃላይ ሀይሳ። 
\v 5 “ታ ያሻነ ዳጋማ ዋሶ ስአስ፤ ዳጋማ ዋሶፐ አትሽን፥ ሳሮ ዋሶ ግደና። 
\v 6 አነ ኦይችተ፤ በእተ፤ አደይ ናአ የላናዉ ዳንዳኢ? ያትን፥ አደ ኡባይ እቀ ኦይክዳ ማጫሳዳ፥ ባ ኩሸን ባ ኡሉዋ ኦይክዳሽን ታ በኤይስ አይቤ? አሳ ኡባ ሶምኦይ አይስ ካሬፅዴ? 
\v 7 ሄ ጋላሳይ አይ መላ ኡንኤያ ጋላሴ? ሄሳ መላ ጋላስ ባዋ። ሄ ጋላሳይ ያይቆባ ዘረስ ኡንአ ዎደ ግዳና። ግዶሽን ኤንቲ ሄ ኡባፈ አታና” ያጌስ ጎዳይ።
\p
\v 8 ኡባፈ ዎልቃማ ጎዳይ ሀይሳዳ ያጌስ፦ “ሄ ጋላሳን ታ ኤንታ ጋናፈ ቃምባራ መንና፤ ኤንቲ ቃሸትዳ ሳንላታ ዱና። ሄሳፈ ጉየ፥ አላጋ ቢታ አሳይ ኤንታ አይለየና። 
\v 9 ሽን ኤንቲ ጎዳስ፥ ባንታ ፆሳስ፥ ኦና፤ ታ ኤንታዉ ደንያ ካዋ ዳዊታስ ሃረታና።
\p
\v 10 “ሄሳ ግሾ፥ ታ አይለቶ፥ ያይቆባ ኮቻቶ፥ ያዮፍተ። ህንተኖ፥ እስራኤለቶ፥ ዳጋሞፕተ። ህንተ ሃሆ በሳን ደእሽን፥ ታ ህንተና አሻና፤ ህንተ ኮቻታ ኤንቲ ድኤትዳ ቢታፈ ዛራና። ያይቆባ ዛረት ስሚድ፥ ሳሮ ዳና፤ ኤንታ ኦንካ ያሽሰና። 
\v 11 ታ ህንተና አሻናዉ ህንተራ ደአይስ። ህንተና ላልዳ ካዎተታ ኡባ ይሳና፤ ሽን ህንተና ይስከ። ታ ህንተና ፅሎ ፕርዳን ሴራና፤ ሽን ሴሮና ህንተና ጮ የድከ” ያጌስ ጎዳይ።
\p
\v 12 “ህንተ መቆይ ኮለተና፤ ህንተ ማዱንይ ፓፀና። 
\v 13 ህንተዉ ሞተተይ ባዋ፤ ህንተ ማዱንስ ለይ ዴና፤ ህንተዉ ፓፆይ ባዋ። 
\v 14 ህንተ ዶሰይሳት ህንተና ዶግዶሶና፤ ኤንቲ ህንተባ ዉዳ ጎኮና። ህንተ ባላይነ ህንተ ናጋራይ ዳሮ ግድያ ግሾ፥ ታ ህንተና ሞርከዳ ሾጫስ፤ ቃይ ባይና ሴራስ። 
\v 15 ፓፆይ በንቶና ህንተ ሀርግያስነ ህንተ ማዱንስ አይስ ዋሰቲ? ህንተ ባላይነ ህንተ ናጋራይ ዳርዳ ግሾ ታ ሀይሳ ህንተ ቦላ ኦስ።
\p
\v 16 “ሽን ህንተና ጋሽድ ምዳ ኡባይ ሜተታና፤ ህንተ ሞርከት ኡባይ ድኤታና። ህንተና ቦንቅዳይሳት ቦንቀታና፤ ህንተባ ኤክዳይሳት ኤከታና። 
\v 17 ኤንቲ፥ ‘ኦንካ ኮዮናነ ቦረትዳ ፅዮነ’ ግዶሶና፤ ሽን ታ ህንተዉ ኬሀና፤ ህንተ ማዱን ፓና” ያጌስ ጎዳይ።
\p
\v 18 “ያይቆባ ኮቻታ ድኤትዳ በሳፈ ጉየ ዛራዳ፥ ኬፃና፤ ኤንቲ ደእያ በሳስካ ቃታና። የሩሳላመ ካታማይ ካሰ ባ ላለትዳ በሳን፥ ካዎ ጋይ ካሰ ባ በሳን ስሚድ ኬፀታና። 
\v 19 ያን ደእያ አሳ ኡባይ ጋላታ ማዝሙረነ ኡፋይሳ የ የፃና። ታ ኤንታ ታይቡዋ ዳርሳናፐ አትሽን፥ ጉፀና። ታኒ ኤንታ ቦንቸትዳ ደረ ኦና፤ ኤንቲ ካዉዮኮና። 
\v 20 ኤንታ ናይት በን ዱሳዳ ዳና፤ ኤንታ ማባራይ ታ ስንን ምንድ ዳና። ኤንታ ኡንኤያ ኡባ ታ ሴራና። 
\v 21 ኤንታ ካለናይ ኤንታ ግዶፈ ከያና፤ ኤንታ ሃራናይ ኤንታ ግዶፈ ደንዳና። ታኒ እያ ታዉ ማታ ኤሀና፤ እ ታኮ ሺቃና። ታኒ እያ ሺሾና ደእሽን፥ ምንድ ታኮ ሺቃናዉ ዳንዳኤይ ኦኔ?” ያጌስ ጎዳይ። 
\v 22 ሄሳ ግሾ፥ ህንተ ታ አሰ ግዳና፤ ታካ ህንተ ፆሰ ግዳና።
\p
\v 23 ሄኮ፥ ጎዳ ሀንቆይ ጎተዳ ደንዴስ፤ ሽረት ሽረት ዎሸ ኢታታ ሁጰን ዎና። 
\v 24 ጎዳይ ባ ዎዛና ቆፋ ዉርስድ ፖላና ጋካናዉ ኤፅያ እያ ሀንቆይ ጉየ ስመና። ሄሳ ስንፈ ያና ዎደታን ህንተ አኬካና።
\c 31
\s1 እስራኤለ አሳ ስሙዋ
\p
\v 1 “ሄ ዎደ ታኒ እስራኤለ ዘረ ኡባስ ፆሰ ግዳና፤ ኤንትካ ታ አሰ ግዳና” ያጌስ ጎዳይ።
\p
\v 2 “ማሻፈ አትዳ አሳይ መላ ቢታን ታ ስንን ሳባ ደማና። ታኒ እስራኤለ አሳስ ሸምፖ እማናዉ ያና። 
\v 3 ታኒ ኤንታዉ ሃሆ በሳፈ ቆንጫስ፤ ታኒ ህንተና መርና ሲቁዋን ዶሳስ፤ ታ ቃያን ህንተና ታኮ ሺሻስ። 
\v 4 ጌላኦ እስራኤለ፥ ታ ህንተና ዛራዳ ኬፃና፤ ህንተካ ኬፀታና። ኔኒ ካራቡዋ ዛራ ኦይካዳ፥ ኡፋይተይሳታራ ኔኒ የፃናነ ዱራና። 
\v 5 ሳማረ ዙማ ቦላ ዎይነ ቶካና፤ ቶክዳይሳት እያ አይፍያን ኡፋይታና። 
\v 6 ኤፍሬማ ገዘ ቢታን ናገይሳት፥ ‘ሃ ዪተ፤ ጎዳኮ፥ ኑ ፆሳኮ፥ ፑደ ፅዮነ ቦስ’ ያግድ ፄግያ ዎደይ ያና” ያጌስ ጎዳይ።
\p
\v 7 “ያይቆባ አሳስ ኡፋይሳን የፅተ፤ ካዎተታ ኡባፈ አያ እስራኤለስ እልልተ። ‘እስራኤለ አሳፐ አትዳይሳታ አሻ’ ያግድ ጋላታ ማዝሙረ የፅተ። 
\v 8 ታኒ ኤንታ ፑደሀ ባጋ ቢታፈ ኤሀና፤ ሳኣ ጋፃፐ ታ ኤንታ ሺሻና። ቆቀት፥ ዎበት፥ ዎደ ማጫሳትነ እቀ ኦይክዳ ማጫሳት ኤንታራ እስፈ ያና፤ ዳሮ አሳይ ባንታ ቢታ ስማና። 
\v 9 ታ ኤንታ ዛራዳ ኤህያ ዎደ ኤንቲ ኡፋይሳፈ ደንዶይሳን ዬክሸነ ዎስሸ ያና። ታኒ ኤንታ ሻፋ ላንቅያራ፥ ኤንቲ በቶና ጊግዳ ኦግያራ ካለና። ታኒ እስራኤለስ አዋ፤ ኤፍሬም ታዉ ባይራ ናአ።
\p
\v 10 “ህንተኖ፥ ካዎተቶ፥ ጎዳ ቃላ ስእድ፥ ሃሆ በሳን፥ ዩሾይ አባን ተቀትዳ ቢታታን፥ ‘እስራኤለ ላልዳይስ እ ኤንታ ሺሻና፤ ሄንንቾይ ባ ዉድያ ሄመይሳዳ እ ኤንታ ሄማና’ ያግድ አዋጅተ። 
\v 11 ጎዳይ ያይቆባ ኮቻታ ዎዛና፤ እ ኤንታ፥ ኤንታፈ ምነይሳታ ኩሸፐ አሽስ። 
\v 12 ኤንቲ ይድ ፅዮነ ዙማ ቦላ ኡፋይሳን የፃና፤ ኤንቲ፥ ጎዳይ እምያ ኬሀተን፥ ካን፥ ዎይነን፥ ዛይተን፥ ዶርሳንነ መሄን ኡፋይታና። ኤንቲ ሃ ሎይድ ኡሽዳ አታክልተ በሳ መላ ግዳና፤ ኤንቲ ዛሪድ አዛኖኮና። 
\v 13 ሄ ዎደ ጌላኦት ኡፋይሳን ዱራና፤ ፓንትነ ጭማት ኡፋይታና። ታ ኤንታ ዬሁዋ ኡፋይሳን ላማና፤ ታ ኤንታ ምንና፤ ኤንታ አዛኑዋ ግሾ ኤንታ ኡፋይሳና። 
\v 14 ታኒ ካህነታስ ዳሮ ካ እማና፤ ታ አሳይ ታ ኬሀተ ካላና” ያጌስ ጎዳይ።
\p
\v 15 “ዬሆይነ ዘለልስ ራማ ካታማን ስኤትስ፤ ራሄላ ባ ናይታስ ዬካሱ፤ ኤንቲ ባይና ግሾ ዬሆ ምን እፃሱ” ያጌስ ጎዳይ።
\p
\v 16 “ዬሁዋ አግድ፥ ህንተ አፉ ቁችተ። ህንተ ኦዳ ኦሱዋስ ዎይቶ ህንተ ኤካና፤ ሞርከ ቢታፈ ህንተ ናይት ስማና። 
\v 17 ህንተ ናይት ባንታ ቢታ ስማናዉ ደእያ ግሾ፥ ህንተዉ ኡፋይስ ደኤስ” ያጌስ ጎዳይ።
\p
\v 18 “ኤፍሬማ ኮቻታ ዙዙን ታ ስአስ። ኤንቲ፥ ‘ኔኒ ኑና ዋትቦና ዎፋኖዳ ዋዳሳ፤ ኑካ ኬድዳ። ኔኒ ጎዳ፥ ኑ ፆሳ ግድያ ግሾ ኑና ዛራ፤ ኑኒ ኔኮ ስማና። 
\v 19 ኑ ካሰ ኔፐ ሃክድ ብዳ፤ ሽን ሀእ ኑ ናጋራ ፓፅዳ። ነ ኑና ሴርን፥ ዬላትድ ኑ ትራ ባቅዳ። ኑኒ ኑ ናአተ ላይ ናጋራ ግሾ፥ ካዉይዳነ ዬላትዳ’ ያግዶሶና።
\p
\v 20 “ኤፍሬም ታዉ ቱማ አልኦነ ታ ዶስያ ናአ ግደኔ? ታኒ እያ ሱን ደንያ ዎደ ኡባን እያ ሀሳያይስ። ሄሳ ግሾ፥ ታ ዎዛናይ እያ ላሞቴስ፤ ታ እያዉ ዳሮ ቃታይስ” ያጌስ ጎዳይ።
\p
\v 21 “ህንተ ኦግያን ማላታ ዎተ፤ ማላታ ም ኤስተ፤ ህንተ ብዳ ኦግያ አኬክተ። ጌላኦ እስራኤለ፥ ስማ፤ ነ ካታማታ ገላ። 
\v 22 ህንተኖ፥ አማኖይ ባይና እስራኤለቶ፥ አዉደ ጋካናዉ ቶይላተቲ? ጎዳይ ሳአ ቦላ ኦራባ ኦና፤ ሄስካ ማጫስ አደ ዩሾን ኤቃና” ያጌስ ጎዳይ።
\p
\v 23 ኡባፈ ዎልቃማ ጎዳይ፥ እስራኤለ ፆሳይ፥ ሀይሳዳ ያጌስ፦ “ታኒ እስራኤለ አሳ ድኤተፈ ዛራዳ ኤህያ ዎደ ይሁዳ ቢታንነ እያ ካታማታን ኤንቲ፥ ‘ነኖ ፅሎተ አቅያ በሳዉ፥ ጌሻ ደርያዉ፥ ጎዳይ ነና አንጆ’ ያግድ ዛሪድ ኦደታና። 
\v 24 ይሁዳንነ ይሁዳን ደእያ ካታማታን አሳይ ዳና፤ ጎሻንቾትነ ሄንንቾት ባንታ ዉድያራ ያን ዳና። 
\v 25 ታኒ ዳቡራንቾታ ጋሽትሳና፤ ቃስ ኮሻትድ ግልቅዳይሳታ ካልሳና” ያጌስ ጎዳይ።
\p
\v 26 ሄ ዎደ ባርካዳ ታ ዩሹዋ ፄላስ፤ ታ ስኮይ ታዉ ማልኦ ስኮ ግድስ።
\p
\v 27 “ታኒ እስራኤለንነ ይሁዳን አሰነ መሄ ኩንያ ዎደይ ያና። 
\v 28 ኤንታ ሾዳናዉ፥ ላላናዉ፥ ሽራ የጋናዉ፥ ይሳናዉነ ጋዶ ኤሀናዉ ደንድዳይሳዳ ኤንታ ዛራዳ ግምባናዉነ ቶካናዉ ደንዳና” ያጌስ ጎዳይ።
\p
\v 29 “ሄ ዎደ አሳይ፥ ‘አዋት ቃዉኤ ዎይነ አይፈ ምን፥ ናይታ አቻይ ዶጭስ’ ያግድ ሃሳያ ሌምሶይ አታና። 
\v 30 ሽን እሶይ እሶይ ባ ናጋራን ሀይቃና፤ ቃዉኤ ዎይነ አይፈ ምያ ኦደስካ እያ አቻይ ዶጫና” ያጌስ ጎዳይ።
\p
\v 31 “ታኒ እስራኤለራነ ይሁዳራ ኦራ ጫቆ ጫቃና ዎደይ ያና። 
\v 32 ሄ ጫቆይ ታ ኤንታ ግብፀፈ ከሳናዉ ኤንታ ኩሽያ ኦይክዳ ዎደ ኤንታ ማይዛታራ ጫቅዳ ጫቁዋ መላ ግደና። ታ ኤንታዉ አዝና መላ ግዳ ኡትንካ ኤንቲ ታ ጫቁዋ መንዶሶና” ያጌስ ጎዳይ።
\p
\v 33 “ሽን ታኒ ሄ ዎድያፐ ጉየ እስራኤለራ ጫቃና ጫቆይ ሀይሳ፦ ታኒ ታ ህግያ ኤንታ ጉግያን ዎና፤ ኤንታ ዎዛናን ፃፋና። ታኒ ኤንታ ፆሰ ግዳና፤ ኤንትካ ታ አሰ ግዳና። 
\v 34 ህዛፐ ጉየ፥ አስ ባ ላግያ ዎይኮ ባ እሻ፥ ‘ጎዳ ኤራ’ ያግድ ታማርሰና። ጉፈ ግታ ጋካናዉ ኡባይ ታና ኤራና። ታኒ ኤንታ ናቁዋ አቶ ጋና፤ ኤንታ ናጋራ ዛራዳ ቆፕከ” ያጌስ ጎዳይ።
\p
\v 35 ጋላስ ፖአና መላ አዋ ዎዳይ፥ ቃማ ፖአና መላ አጌናነ ፆልንቶ ኪትዳይ፥ አባ ቃድ፥ ቤታይ ጉማናዳ ኦይ፥ እያ ሱንይ ኡባፈ ዎልቃማ ጎዳ ጌተተይስ ሀይሳዳ ያጌስ። 
\v 36 “ሀ ኤቅድ ደእያ መተ ህገይ ታ ስንፈ ሻረትኮ፥ ሄ ዎደ እስራኤለ ኮቻይ ታ ደረ ግደይስ መርናዉ አታና” ያጌስ ጎዳይ።
\p
\v 37 “ቦላ ሳሎታ ዋናዉ ዎይኮ ጋርሳ ሳኣ ባሶይ ኤረታናዉ ዳንዳእኮ፥ ሄ ዎደ ታ እስራኤለ ዘረ ኡባ፥ ኤንቲ ኦዳ ናጋራ ግሾ ታ ስንፈ ድጋና” ያጌስ ጎዳይ።
\p
\v 38 “ሀናንኤላ ሻኮ ግምብያፈ ዶምድ፥ ማዛነ ፐንግያ ጋካናዉ የሩሳላመ ካታማይ ታ ካታማ ግድድ፥ ኬፀትያ ዎደይ ያና። 
\v 39 ሄ ካታማ ዛዋይ ዉሎሀ ባጋፈ ብድ ጋረባ ዙማነ ጎአ ዩሹዋ ጋካናዉ ዳልጋና። 
\v 40 አሀ ሞግያነ ብዶ የግያ ዛንጋራይነ ቀድሮና ዛንጋራፐ ቆሞራ ዶሎሀ ባጋራ ብድ፥ ፓራ ፐንገ ማዛንያ ጋካናዉ ደእያ ቢታ ኡባይ ጎዳስ ዱማትድ፥ ጌሽ ግዳና። ህዛፐ ጉየ፥ ካታማይ መርናዉ ሾደተና፤ ላለተና” ያጌስ ጎዳይ።
\c 32
\s1 ኤርምያስ ጋደ ሻምስ
\p
\v 1 ይሁዳ ካዎይ ሰደቅያስ ካዎትዳ ታማን ላይን፥ ባብሎነ ካዎይ ናቡካዳናፆር ካዎትዳ ታማነ ሆስፑን ላይን ጎዳፐ ሀ ቃላይ ኤርምያሳኮ ይስ። 
\v 2 ሄ ዎደ ባብሎነ ካዋ ኦላንቾት የሩሳላመ ተቅዶሶና፤ ናበይ ኤርምያስ ይሁዳ ካዎ ጋን ደእያ፥ ናገይሳታ ዳባባን እያ ቦላ ጎርደትን ደኤስ።
\p
\v 3 ይሁዳ ካዎይ ሰደቅያስ እያ ሀይሳዳ ያግድ ቃችድ ዎስ፦ “ነ አይስ ሀይሳዳ ያጋዳ ትንብተ ኦዳይ? ‘ጎዳይ ሀ ካታማ ባብሎነ ካዋ ኩሸን አድ እማና፤ እ እያ ኦይካና’ ያጋዳ አይስ ኦዳይ። 
\v 4 ይሁዳ ካዎይ ሰደቅያስ ባብሎነ አድ እመታና፤ እ ባብሎነ ካዋ ኩሸን ገላና። እያ ስንን ኤቅድ፥ እያራ ኦደታና፤ እ ባ አይፈን እያ በአና። 
\v 5 ናቡካዳናፆር ሰደቅያሳ ባብሎነ ኤፋና፤ ታ እያባ በአና ጋካናዉ እ ያን ዳና። ኔኒ ባብሎነታራ ኦለታናዉ ቆፕኮ፥ ሄስ ነዉ ሀነና” ያጌስ ጎዳይ።
\p
\v 6 ኤርምያስ፥ “ጎዳ ቃላይ ሄ ዎደ ታኮ ሀይሳዳ ያግድ ይስ” ያግስ።
\p
\v 7 “ነ አዋ እሻ ሳሉማ ናአይ፥ ሀናምኤል ኔኮ ይድ፥ ‘ዎዛናዉ ማት ደእያ ማታ ዳቦይ ነና ግድያ ግሾ አናቶታ ካታማን ደእያ ታ ጋድያ ሻማ’ ያጋና። 
\v 8 ጎዳይ ግዳይሳዳ፥ ታ አዋ እሻ ናአይ ሀናምኤል ታኮ ናገይሳታ ዳባባ ይድ፥ ‘ዎዛናዉ ማት ደእያ ማታ ዳቦይ ነና ግድያ ግሾ፥ ብንያመ ቢታን አናቶታን ደእያ ታ ጋድያ ሻማ’ ያግን፥ ታኒ ሄሳ ኦድዳይ ጎዳ ግደይሳ ኤራስ።
\p
\v 9 “አናቶታ ካታማን ደእያ ጋድያ ታ አዋ እሻ ናኣ ሀናምኤላፐ ሻማስ። እያ ጋትያ ምዛነን ልክን፥ ታማነ ላፑን ብራ ሳንትመ ግድስ። 
\v 10 ሻማ ፕርማ ማርካት ደእያ በሳን ፓራማስ፤ ጎርዳስ፤ ማታመ እያ ቦላ ዎስ፤ ሚሽያ ምዛነን ልካዳ እያዉ እማስ። 
\v 11 ሄሳፈ ጉየ፥ ታኒ ዛልእያ ሀኖታ ቆንጭስያ አሻገትድ አታመትዳ ሻማ ፕርማነ አታመትቦና ሻማ ፕርማ ኤካስ። 
\v 12 ታ አዋ እሻ ናአይ ሀናምኤል፥ ሻማ ፕርማ ፓራምዳ ማርካትነ ናገይሳታ ዳባባን ኡትዳ አይሁደት ኡባይ በእሽን፥ ሄ ሻማ ፕርማ ማህሰያ ናኣ፥ ኔራ ናኣ ባሮካስ እማስ። 
\v 13 ኤንታ ስንን ታ ባሮካ ሀይሳዳ ያጋዳ ኪታስ፦ 
\v 14 ‘ኡባፈ ዎልቃማ ጎዳይ፥ እስራኤለ ፆሳይ፥ ሀይሳዳ ያጌስ፦ ዳሮ ዎደ ጋምአና መላ ሀ አሻገትድ አታመትዳ ፕርማነ አታመትቦና ፕርማ ኤፋዳ ኦቶን ዎ።’ 
\v 15 ኡባፈ ዎልቃማ ጎዳይ፥ እስራኤለ ፆሳይ፥ ሀይሳዳ ያጌስ፦ ሀ ቢታን አሳይ ዛሪድ ኬ፥ ጋደነ ዎይነ ቶክያ በሲ ሻማና” ያጌስ ጎዳይ።
\p
\v 16 ታኒ ኔራ ናኣ ባሮካስ ሻማ ፕርማ ዋርቃትያ እምዳፐ ጉየ፥ ሀይሳዳ ያጋዳ ዎሳስ። 
\v 17 “አቤት ኡባ ሃርያ ጎዳዉ፥ ነ ሳሎታነ ሳኣ ነ ግታ ዎልቃንነ ነ ምጨትዳ ኩሸን መዳሳ። ነዉ ዳንዳኤቶናባይ ባዋ። 
\v 18 ኔኒ ነ ሲቁዋ ሙኩሉ አሳስ በሳሳ፤ ሽን አዋታ ናጋራ ኤንታ ናይታ ቦላ ዛራሳ። አቤት ግታነ ዎልቃማ ፆሳዉ፥ ነ ሱንይ ኡባፈ ዎልቃማ ጎዳ ጌተቴስ። 
\v 19 ነ ሀልቾይ ግታ፤ ነ ኦያ ኦሶይ ዎልቃማ። አሳ ኦገ ኡባ ነ በኣሳ፤ አሳ ኡባስ እያ ኦግያዳነ እያ ኦሱዋዳ ዛራሳ።
\p
\v 20 “ነ ግብፀን ማላታነ ማላታ ኦዳሳ፤ ሀች ጋካናዉ ሀ ማላታ እስራኤለ አሳ ግዶንነ ሀራ ካዎተታ ኡባ ግዶን ኦሶ አጋባካ። ሄሳፈ ደንዶይሳን ነ ሱንይ ኡባ በሳን ኤረትስ። 
\v 21 ኔኒ ነ አሳ እስራኤለ ግብፀፈ ማላታንነ ማላታን፥ ነ ምኖ ቀስያን፥ ነ ምጨትዳ ኩሽያንነ ግታ ዳጋማን ከሳዳሳ። 
\v 22 ኤንታ ማይዛታስ ነ እማናዉ ጫቅዳ ቢታ፥ ማነ ኤስ ጎግያ ቢታ ኤንታዉ እማዳሳ። 
\v 23 ኤንቲ ሄ ቢታ ገልድ ላትዶሶና። ሽን ኤንቲ ነዉ ኪተትቦኮና፤ ነ ህግያ ናግቦኮና፤ ኤንቲ ኦና መላ ነ ኪትዳ ኡባ ኦቦኮና። ሄሳ ግሾ፥ ነ ኤንታ ቦላ ሀ ጋዱዋ ኡባ ኤሀዳሳ።
\p
\v 24 “ባብሎነ አሳይ ካታማ ኦይካናዉ ግምብያ ዩሹዋን ቢታ ዶርድ ተቅዶሶና። ኦላፐ፥ ኮሻፐነ ቦሻፐ ደንዶይሳን ካታማይ ኤንታ ኦልያ ባብሎነ ኩሸን አድ እመትስ። ነ ሀእ በኤይሳዳ ነ ግዳባ ኡባይ ፖለትስ። 
\v 25 አቤት ኡባ ሃርያ ጎዳዉ፥ ካታማይ ባብሎነ አሳስ እመታናዉ ሀንያ ዎደካ ነ ታና፥ ‘ማርካ ፄጋዳ፥ ሚሸን ጋድያ ሻማ’ ጋዳሳ” ያጋዳ ዎሳስ።
\p
\v 26 ሄሳፈ ጉየ፥ ጎዳ ቃላይ ኤርምያሳኮ ሀይሳዳ ያግድ ይስ፦ 
\v 27 “ታኒ ጎዳ፥ አሳ ኡባ ፆሳ። ታዉ ዳንዳኤቶናባይ ደኢ?” ያግስ። 
\v 28 ታኒ ሀ ካታማ ባብሎነ አሳስነ ባብሎነ ካዋ ናቡካዳናፆራስ አዳ እማና፤ ኤንቲ እያ ኦይካና። 
\v 29 ሀ ካታማ ተቅዳ ባብሎነ አሳይ ይድ፥ ካታማ ታማን ፁጋና፤ ፖቅያ ቦላ ባኣለ ኤቃስ እፃነ ጩይስሸነ ሀራ ፆሳታስ ኡሻ ያርሾ ጉስሸ ታና ሀንቀዳ አሳይ ደእያ ኬትካ ፁገታና። 
\v 30 “እስራኤለይነ ይሁድ ባንታ ናአተፈ ዶምድ፥ ታ ስንን ኢታባፐ አትሽን፥ ሎኦባ፥ ኦቦኮና፤ ኤንቲ ባንታ ኩሸን ኦዳ ኦሱዋን ታና ሀንቀዶሶና። 
\v 31 ሀ ካታማይ ኬፀትዳ ዎደፐ ሀች ጋካናዉ፥ ሀ ካታማ አሳይ ታና ዳሮ ሀንቀዳ ግሾ ሀ ካታማ ታ ስንፈ ይሳና። 
\v 32 እስራኤለይነ ይሁድ፥ ኤንታ ካዎትነ ሀላቃት፥ ኤንታ ካህነትነ ናበት ኦዳ ኢታ ኦሶ ኡባን ታና ይሎይዶሶና። 
\v 33 ኤንቲ ባንታ ሶምኡዋ ግዶናሽን፥ ባንታ ዞኩዋ ታዉ ዛርዶሶና። ታ ኤንታ ዛራ ዛራዳ ታማርስንካ፥ ኤንቲ ስእቦኮና ዎይኮ ሴራ ኤክቦኮና። 
\v 34 ኤንቲ እፀትዳ ባንታ ኤቃታ ታ ሱንይ ፄገትዳ ኬን ኤስድ ቱንስዶሶና። 
\v 35 ኤንቲ ባንታ አደ ናይታነ ማጫ ናይታ ሞሎካ ኤቃስ ያርሻናዉ ህኖማ ዛንጋራን ባኣለ ኤቃስ ያርሾ ቃ በሳታ ጊግስዶሶና። ኤንቲ ሄሳ ኦና መላ ታ ኪታብከ፤ ይሁዳ አሳይ ናጋራ ኦና መላ ሄሳ ኤንቲ ኦና ጋዳ ታ ናጋብከ” ያግስ።
\p
\v 36 “ኔኒ፥ ‘ሀ ካታማይ ኦላን፥ ኮሻንነ ቦሻን ባብሎነ ካዋ ኩሸን አድ እመታና’ ያግዳ ሀ ካታማባ ጎዳይ እስራኤለ ፆሳይ ሀይሳዳ ያጌስ። 
\v 37 ታ ሱልያ ሀንቁዋንነ ግታ ሸንያን ኤንታ ላልዳ ቢታ ኡባፈ ሺሻዳ ሀ በሳ ዛራ ኤሀዳ፥ ኤንቲ ሳሮተን ዳና መላ ኦና። 
\v 38 ኤንቲ ታ አሰ ግዳና፤ ታ ኤንታ ፆሰ ግዳና። 
\v 39 ኤንቲ ታዉ መርናዉ ያያና መላ፥ ታ ኤንታዉ እስ ዎዛናነ እስ ኦገ እማና፤ ሄስ ኤንታዉነ ኤንታፈ ጉየ ኤንታ ናይታስ ሎኦ ግዳና። 
\v 40 ታኒ ኤንታራ መርናዉ ጫቃና፤ ሄ ጫቁዋን ታ ኤንታዉ ሎኦባ ኦሶ አግከ። ኤንቲ ታና አግድ ጉየ ስሞና መላ ኤንቲ ታዉ ያያና መላ ኦና። 
\v 41 ታ ኤንታዉ ሎኦባ ኦይስ ታና ኡፋይሴስ፤ ታ ኩመ ዎዛናፐነ ታ ኩመ ሸምፑዋፈ ቱማ ሀ ቢታን ኤንታ ቶካና” ያጌስ ጎዳይ።
\p
\v 42 “ታ ሀ አሳ ቦላ ኢታ ቦሻ ኡባ ኤህዳይሳዳ ታ ኤንታዉ እማና ግዳ ሎኦባ ኡባ እማና። 
\v 43 ህንተ፥ ‘ሀ ቢታይ አሳይነ መሄይ ባይና ባይሳ ቢታ ግዳና፤ እ ባብሎነታስ እመትስ’ ያግዳ ቢታን አሳይ ዛሪድ ጋደ ሻማና። 
\v 44 ታ ኤንታ ዛራዳ ኤህያ ግሾ፥ አሳይ ጋደ ሻማና፤ ማርካ ስንን ዛልእያ ሀኖታ ቆንጭስያ ፕርማ ፓራምድ፥ ማታመ ዎና። ሀይስ ኡባይ ብንያመ ቢታን፥ የሩሳላመ ዩሹዋን ደእያ ሄራታን፥ ይሁዳ ካታማታን፥ ደረይ ዳርያ ካታማታን፥ ጋ ካታማታንነ ነገበ መላ ቢታን ደእያ ካታማታ ኡባን ሀናና” ያጌስ ጎዳይ።
\c 33
\s1 ስሞ ኡፋይሳ ቃላ
\p
\v 1 ኤርምያስ ቡሮ ናገይሳታ ዳባባን ቃሸትድ ደእሽን፥ ጎዳ ቃላይ ዛሪድ እያኮ ይስ። 
\v 2 ሳኣ መዳ ጎዳይ፥ ጊግስድ እያ በሳን ዎዳ ጎዳይ፥ እያ ሱንይ ጎዳ ጌተተይስ ሀይሳዳ ያጌስ፦ 
\v 3 “ታና ፄጋ፤ ታ ነዉ ኮያና፤ ነ ኤሮና ግታባነ ዎልቃማባ ታ ነዉ ቆንጭሳና።” 
\v 4 ጎዳይ፥ እስራኤለ ፆሳይ፥ ባብሎነ ኦላ፥ ቢታ ዶረነ፥ ድኤተ ተቃና መላ ድርሳ ግምብያ ምንናዉ ላልዳ ሀ ካታማ ኬታባነ ይሁዳ ካዎታ ጋታባ ሀይሳዳ ያጌስ። 
\v 5 ኤንታ ኢታተ ጋሶን፥ ታ ሀ ካታማ ቦላፈ ታ ሶምኡዋ ደንዳ ግሾ፥ ህንተራ ኦለታናዉ ታኒ ታ ሀንቁዋን ሾጫና አሳ አሀን ሀ በሳን ኩንናዉ ባብሎነት ገላና።
\p
\v 6 ግዶሽን፥ “ታ ሀ ካታማነ እያን ደእያ አሳ ዛራዳ ፓና፤ ኤንታ ፓያተ ዛራና፤ ሳሮነ ዎፓ ዱሱ ኤንታዉ እማና። 
\v 7 ታኒ ይሁዳ አሳነ እስራኤለ አሳ ድኦፐ ዛራና፤ ኤንቲ ካሰ ደእዳይሳዳ ኦዳ ኤንታ ግምባና። 
\v 8 ኤንቲ ታና ኦዳ ናጋራ ኡባፈ ታ ኤንታ ጌሻና፤ ኤንቲ ናቁዋነ ኤንታ ማካላ ኡባ አቶ ጋና። 
\v 9 የሩሳላመ ካታማይ ታዉ ኡፋይስ፥ ቦንቾነ ጋላታ ሳአን ደእያ ካዎተታ ኡባ ስንን ኤሀና። ታኒ የሩሳላመ አሳስ ኦያ ሎኦባነ ካታማስ ኤህያ ዱረተነ ሳሮተ ስእድ፥ ካዎተት ኡባይ ያሻን ኮኮራና” ያጌስ ጎዳይ።
\p
\v 10 “ህንተ፥ ‘አስነ መሄይ ባይና ባይሳ’ ግዳ ሀ በሳን፥ አስነ መሄይ ባይና ይሁዳ ካታማታንነ የሩሳላመ ኦገታን ኡፋይስነ እልልሳ ግርስ ስኤታና። 
\v 11 የነ ያጋኖ ግርስ፥ ኡፋይሳ ግርስ፥ ሄሳዳካ፥ ፆሳ ኬ ጋላታ ያርሾ ኤህድ፥
\q1 “እ ኬሀ ግድያ ግሾ፥
\q2 እያ ማሮተይ መርናሳ ግድያ ግሾ፥
\q2 ኡባፈ ዎልቃማ ጎዳ ጋላትተ።
\q2 ያግድ የፅሸ ፆሳ ኬ
\q2 ጋላታ ያርሾ ኤክድ ያ አሳ ግርሳይ ስኤታና።
\m ታኒ ኤንታ ድኦፐ ዛራና፤ ኤንቲ ካሰ ደእዳይሳዳ ኦዳ ዎና” ያጌስ ጎዳይ።
\p
\v 12 “ሀ አሳይነ መሄይ ባይና ባይሳ ቢታንነ እያን ደእያ ካታማታን ሄንንቾት ባንታ ዶርሳ ዉድያ ሄምያ ጋደይ ዳና። 
\v 13 ገዘ ካታማታን፥ ጋ ካታማታን፥ ነገበ መላ ቢታን ደእያ ካታማታን፥ ብንያመ ቢታን፥ የሩሳላመ ዩሹዋን ደእያ በሳታንነ ይሁዳ ካታማታን ሄንንቾት ባንታ ዶርሳታ ዛሪድ ታይባና” ያጌስ ኡባፈ ዎልቃማ ጎዳይ።
\p
\v 14 “ታኒ እስራኤለ አሳስነ ይሁዳ አሳስ ገልዳ ቃላ ፖልያ ዎደይ ያና። 
\v 15 ሄ ዎደ ታኒ ዳዊታ ኮቻፈ እስ ፅሎ አጫ ደንና፤ እ ሱረ ፕርዳ ፕርዳና፤ ፅሎ ኦና። 
\v 16 ሄ ዎደ ይሁዳ አሳይ አታና፤ የሩሳላመ አሳይ ዎፑ ግድ ደአና። ሀ ካታማይ፥ ‘ጎዳይ ኑ ፅሎተ’ ጌተትድ ፄገታና። 
\v 17 ዳዊታ ኮቻፈ እስራኤለ አራታን ኡትያ አስ የና። 
\v 18 ሄሳዳካ፥ ፁሳ ያርሾ፥ ካ ያርሾነ ሀራ ያርሾ ያርሻናዉ ሌወ ኮቻፈ ካህነ ግድያ አስ መርናዉ ታ ስንፈ የና” ያጌስ ጎዳይ።
\p
\v 19 “ጎዳ ቃላይ ኤርምያሳኮ ሀይሳዳ ያግድ ይስ። 
\v 20 ጋላሳስነ ቃማስ ታ ዎዳ ዎጋ መንድ፥ ጋላስነ ቃም ባንታ ዎድያን ስመረቶና መላ ኦድ ታ ጫቁዋ ላማናዉ ህንተ ዳንዳእኮ፥ 
\v 21 እያ ኮቻፈ አራታን ኡትያ አስ ዮናዳ፥ ታ አይልያ ዳዊታራ ጫቅዳ ጫቁዋ ላማና፤ ታዉ ኦያ፥ ሌወ ኮቸ ግድዳ ካህነታራ ጫቅዳ ጫቁዋ ላማና። 
\v 22 ታኒ ታ አይልያ ዳዊታ ኮቻነ ታ ስንን ኦያ ሌወ ኮቻ ታይባናዉ ዳንዳኤቶና ሳሎ ፆልንቶታዳነ ማካናዉ ዳንዳኤቶና አባ ሻፍያዳ ዳርሳና” ያጌስ ጎዳይ።
\p
\v 23 ጎዳ ቃላይ ቃስካ ኤርምያሳኮ ሀይሳዳ ያግድ ይስ። 
\v 24 “ሀ አሳይ፥ ‘ጎዳይ ባ ዶርዳ ናምኡ ካዎተታ፥ እስራኤለነ ይሁዳ አጋግስ’ ያግድ ኦደተይሳ ነ አኬካብኪ? ኤንቲ ታ አሳ ካድ፥ ባና ዳንዳእዳ ካዎተ ግዶኮና ግድ ቆፖሶና። 
\v 25 ታኒ ጋላሳራነ ቃማራ ጫቅዳ ጫቁዋነ ሳሎነ ሳአ ህግያ ምንቦናባ ግድኮ፥ 
\v 26 ያይቆባ ዘረነ ታ አይልያ ዳዊታ ኮቻ አጋጋና። እያ ናይታፐ አብራሃመ፥ ይሳቃነ ያይቆባ ኮቻታ ቦላ ካዎናዉ ዳዊታ ኮቻ ዶርከ። ታኒ ታ አሳ ማራና፤ ኤንታ ሻሉዋ ዛራና” ያጌስ ጎዳይ።
\c 34
\s1 ሰደቅያሳስ ኦደትዳ ትንብተ
\p
\v 1 ባብሎነ ካዎይ ናቡካዳናፆር፥ እያ ኦላንቾት ኡባይነ እ ሃርያ ካዎተታን ደእያ አሳ ኡባይ፥ የሩሳላመነ የሩሳላመ ዩሹዋን ደእያ ካታማታ ኡባ ኦልያ ዎደ፥ ሀ ቃላይ ጎዳፐ ኤርምያሳኮ ይስ፦ 
\v 2 ጎዳይ እስራኤለ ፆሳይ ሀይሳዳ ያግስ፤ “ባዳ ይሁዳ ካዋ ሰደቅያሳኮ ሀይሳዳ ያጋ፦ ‘ታኒ ሀ ካታማ ባብሎነ ካዋ ኩሸን አዳ እማና፤ እ ካታማ ታማን ፁጋና። 
\v 3 ኔኒ እያ ኩሸፐ ከሳ ኤካካ፤ ኔኒ ኦይከታና፤ እያዉ አዳ እመታና። ኔኒ ነ አይፈን ባብሎነ ካዋ በአና፤ እካ ኔራ ኦደታና። ኔኒ ባብሎነ ቢታ ባና’ ያጌስ ጎዳይ።
\p
\v 4 “ግዶሽን፥ ይሁዳ ካዋዉ ሰደቅያሳ፥ ጎዳይ ግያባ ስአ። ኔኒ ኦላን ሀይቃካ። 
\v 5 ነ ሳሮ ሀይቃና። ኔፐ ካሰ ደእዳ ካዎታ ቦንቹዋስ፥ ነ ማይዛታስ እፃነ ጩይስዳይሳዳ፥ አሳይ ነ ቦንቹዋስ እፃነ ጩይሳና። ዎ ኑ ካዋዉ፥ ያግድ ነዉ ዬካና። ታኒ ጎዳይ ሀይሳ ኦዳይስ” ያጌስ።
\p
\v 6 ሄሳፈ ጉየ፥ ናበይ ኤርምያስ ሀ ትንብትያ ይሁዳ ካዋ ሰደቅያሳስ የሩሳላመን ኦድስ። 
\v 7 ሄ ዎደ ባብሎነ ኦላንቾት የሩሳላመ ካታማነ ይሁዳን አትዳ ላክሶነ አዜቃ ካታማታ ኦልዶሶና። ይሁዳን አትዳ ግምበትዳ ካታማት ኤንታ ፃላላ።
\s1 አይለተፈ ላአ ከስ
\p
\v 8 ካዎይ ሰደቅያስ አይለታ ላአ ከስያ አዋጁዋ አዋጃናዉ የሩሳላመን ደእያ አሳ ኡባራ ጫቅዳፐ ጉየ፥ ጎዳ ቃላይ ኤርምያሳኮ ሀይሳዳ ያግድ ይስ፦ 
\v 9 ሄ አዋጆይ፥ እስ እስ እብራወ አስ አደነ ማጫ አይለ አይለተፈ ላአ ከሶ። ኦንካ አይሁደ አስ ግድዳ ባ እሻ አይለ ኦፎ። 
\v 10 ሄሳ ግሾ፥ አሳይነ ሀላቃት ኡባይ ጫቅዳ ጫቁዋን ባንታ አደነ ማጫ አይለታ አይለተፈ ላአ ከሳናዉነ ዛሪድ አይለተን ሃሮና አጋናዉ ጊግድ ኤንታ አይለተፈ ላአ ከስዶሶና። 
\v 11 ሽን ኤንቲ ባንታ ቆፋ ላምድ፥ አይለተፈ ላአ ከስዳ ባንታ አደነ ማጫ አይለታ ዛሪድ ሃርዶሶና።
\p
\v 12 ሄሳፈ ጉየ፥ ጎዳ ቃላይ ኤርምያሳኮ ያግስ። 
\v 13 ጎዳይ፥ እስራኤለ ፆሳይ ሀይሳዳ ያጌስ፦ “ታኒ ህንተ ማይዛታ ግብፀፈ፥ አይለተ ቢታፈ ከስዳ ዎደ ኤንታራ ሀይሳዳ ያጋዳ ጫቃስ። 
\v 14 ሄ ጫቁዋ ማራን፥ ‘እብራወ አይለይ ደእያ አሰ ኡባይ፥ አይለታ ኡሱፑን ላይ ኦስስድ፥ ላፑን ላይን አይለተፈ ከስድ የድተ’ ያጋዳ ኪታስ። ሽን ህንተ ማይዛት ታ ኦድያባ ስኦና እፅዶሶና፤ ታዉ ኪተትቦኮና። 
\v 15 ህንተካ ማታ ዎደፐ ካሰ ህንተ ናጋራፐ ስሚድ፥ አይለታ ላአ ከሳናዉ አዋጅደታ፤ ታ ስንን ሱረባ ኦደታ። ቃስ ሄሳ ኦናዉ ታ ስንን፥ ታ ሱንይ ፄገትያ ታ ኬን ጫቅደታ። 
\v 16 ሽን ህንተ፥ ህንተ ቆፋ ላምድ፥ ታ ሱን ቱንስደታ። ኤንቲ ኮይዳ በሳ ባና መላ ላአ ከስዳ አደነ ማጫ አይለታ ዛሪድ ሃርደታ።”
\p
\v 17 ሄሳ ግሾ፥ ጎዳይ፥ “ህንተ ታዉ ኪተቶና እፅድ፥ ህንተ እሻ ዎይኮ ህንተ ሾሩዋ አይለተፈ ላአ ከስያ አዋጁዋ አዋጅበከታ። ህንተ ቦላ ኦል፥ ቦሽነ ኮሽ ከያና መላ ታ አዋጃይስ። ታ ህንተና ሳአ ቦላ ደእያ ካዎተታስ ዳጋማ ኦና። 
\v 18 ታ ጫቁዋ መንዳ አሳ፥ ታ ስንን ጫቁዋ ናጎና እፅዳ አሳ፥ ሹክድ፥ ናምኡ በሳን ሻክድ፥ እያ ግዶራ አዳ ማራ መላ ታ ኤንታ ኦና። 
\v 19 ሄ አሳይ ይሁዳ ሀላቃታ፥ የሩሳላመ ሀላቃታ፥ ቢታ አይሰይሳታ፥ ካህነታነ ናምኡ በሳን ሻክዳ ማራ አሹዋ ግዶራ አዳ አሳ ኡባ። 
\v 20 ታ ኤንታ፥ ኤንታ ሞርከታ ኩሸንነ ኤንታ ዎናዉ ኮይያ አሳ ኩሸን አዳ እማና፤ ኤንታ አሀይ ሳሎ ካፎታስነ ሳአ ዶአታስ ካ ግዳና።
\p
\v 21 “ታኒ ይሁዳ ካዋ ሰደቅያሳነ እያ ሀላቃታ፥ ኤንታ ሞርከታ ኩሸን፥ ኤንታ ዎናዉ ኮየይሳታ ኩሸንነ ህንተና ኦለይሳ አግዳ ባብሎነ ኦላንቾታ ኩሸን አዳ እማና። 
\v 22 ታኒ ባብሎነ ኦላንቾታ ኪትን፤ ኤንቲ ሀ ካታማ ስማና። ኤንቲ ሀ ካታማ ኦላና፥ ድአናነ ታማን ፁጋና። ይሁዳን ደእያ ካታማታ አስ ዶና ባይሳ በሲ ኦና” ያጌስ ጎዳይ።
\c 35
\s1 ራካባ ያራታ
\p
\v 1 እዮስያሳ ናኣ ይሁዳ ካዋ እዮአቄማ ላይን፥ ጎዳ ቃላይ ኤርምያሳኮ ሀይሳዳ ያግድ ይስ። 
\v 2 “ራካባ ያራ ግድዳ አሳኮ ባዳ፥ ኤንታራ ኦደታዳ፥ ፆሳ ኬ ክፍለታፐ እሱዋ ግዶ ገልሳዳ ዎይነ ኡሻ ኤንታዉ እማ” ያግስ። 
\v 3 ታኒ ባዳ፥ ካባሳ ናኣ ናኣ፥ ኤርምያሳ ናኣ ያእዛና፥ እያ እሻታነ እያ አደ ናይታ ኡባ፥ ራካባ ያራ ኡባ ኤካዳ፥ 
\v 4 ፆሳ ኬ ኤሀስ። ኤንታ፥ ይግዳላ ናኣ፥ ፆሳ አስ ግድዳ ሀናና ናይታ ክፍለ ገልሳስ። ሄ ክፍለይ፥ ፐንግያ ናግያ ሳሉማ ናኣ ማእሰያ ክፍልያፐ ቦላ ባጋራ፥ ሀላቃታ ክፍልያ ማታን ደኤስ። 
\v 5 ሄሳፈ ጉየ፥ ታኒ ራካባ ያራታ ስንን ዎይነ ኡሻይ ኩምዳ ፁጋታነ ፁአታ ዎዳ፥ “ዎይነ ኡሻ ኡይተ” ያጋስ።
\p
\v 6 ሽን ኤንቲ ዛሪድ፥ “ኑ ዎይነ ኡሹ ኡዮኮ፤ ኑ ማይዛይ ራካባ ናአይ ዮናዳብ ኑኮ፥ ‘ህንተነ ህንተ ናይት ዎይነ ኡሹ መርናዉ ኡዮፕተ። 
\v 7 ኬ ኬፆፍተ፤ ጎሸ ጎዮፕተ፤ ዎይነ ቶኮፍተ። ዱንካነ ግዶን ደእተ፤ ህንተ አዱሳ ላይ ሀ ቢታን ዳና’ ያግስ። 
\v 8 ኑ ማይዛይ ራካባ ናአይ ዮናዳብ ኑና ኪትዳ ኡባ ኪተትዳ። ኑኒ ዎይኮ ኑ ማቸት ዎይኮ ኑ አደ ናይት ዎይኮ ኑ ማጫ ናይት ኑ ደኦ ላይ ኡባን ዎይነ ኡሹ ኡይቦኮ። 
\v 9 ዱሳ ኬ ኬፅቦኮ፤ ዎይነ ጋደ ዎይኮ ጎሽ ኑስ ባዋ። 
\v 10 ኑ ዱንካነን ደእዳ፤ ኑ ማይዛይ ዮናዳብ ኪትዳ ኡባ ኪተትዳ። 
\v 11 ሽን ባብሎነ ካዎይ ናቡካዳናፆር ኑ ቢታ ቦላ ደንድዳ ዎደ፥ ‘ባብሎነነ ሶረ ኦላንቾታፐ አታናዉ፥ የሩሳላመ ቦስ’ ያግዳ። ሀእ ኑ የሩሳላመን ደኤይ ሄሳሳ” ያግዶሶና።
\p
\v 12 ሄሳፈ ጉየ፥ ጎዳይ ኤርምያሳኮ ያግስ። 
\v 13 ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ። “ይሁዳ አሳኮነ የሩሳላመ አሳኮ ባዳ ሀይሳዳ ያጋ፤ ‘ታ ቃላ ናጋናዉ ሀይሳፈ ታማረከት።’ 
\v 14 ራካባ ናአይ ዮናዳብ ባ አደ ናይታ ዎይነ ኡሹ ኡዮናዳ ኪትዳ ኪታ ናግዶሶና። ኤንቲ ባንታ ማይዛ ኪታ ናግድ ሀች ጋካናዉ ዎይነ ኡሹ ኡዮኮና። ታኒ ህንተዉ ኡባ ዎደ ኦዳይስ፤ ሽን ህንተ ታና ስእቤከታ። 
\v 15 ታኒ ዛራዳ ዛራዳ ናበታ፥ ታ አይለታ ህንተኮ የዳስ፤ ኤንቲ፥ ‘ህንተ ኡባይ ህንተ ኢታ ኦግያፐ ስምተ፤ ህንተ ኦሱዋ ሎይተ፤ ሀራ ፆሳታ ጎይኖፍተ፤ ኤንታዉ ኦፕተ። ሄ ዎደ፥ ታ ህንተዉነ ህንተ ማይዛታስ እምዳ ቢታን ህንተ ዳና’ ያግዶሶና። ሽን ህንተ ታና ስአናዉ ህንተ ሀይ ታኮ ዛርቤከታ። 
\v 16 ራካባ ናኣ ዮናዳበ ኮቻት ኤንታ ማይዛይ ኤንታ ኪትዳ ኪታ ኦዶሶና፤ ሽን ሀ አሳይ ታዉ ኪተትቤና ያጋ” ያጌስ ጎዳይ።
\p
\v 17 “ሄሳ ግሾ፥ ጎዳይ፥ ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ። ‘ስእተ፥ ታ ይሁዳ አሳ ቦላነ የሩሳላመን ደኤይሳታ ቦላ ኤሀና ግዳ ኢታባ ኤሀና። ታ ኤንታዉ ኦድን፥ ስኦና እፅዶሶና፤ ታ ኤንታ ፄግን ኮዮና እፅዶሶና’ ” ያጌስ።
\p
\v 18 ሄሳፈ ጉየ፥ ኤርምያስ ራካባ ያራታኮ፥ “ኡባፈ ዎልቃማ ጎዳይ፥ እስራኤለ ፆሳይ ህንተና ሀይሳዳ ያጌስ፦ ‘ህንተ፥ ህንተ ማይዛ ዮናዳባስ ኪተትዳ ግሾ፥ እያ ዎጋ ካልዳ ግሾነ እ ኪትዳ ኡባ ኦዳ ግሾ፥ 
\v 19 ራካባ ናአይ ዮናዳብ፥ ታዉ ኦያ አደ አስ አዉደካ የና’ ” ያጌስ።
\c 36
\s1 እዮአቄም ፃ ማፃፋ ፁግስ
\p
\v 1 እዮስያሳ ናአይ ይሁዳ ካዎይ እዮአቄም ካዎትዳ ኦይዳን ላይን፥ ጎዳይ ኤርምያሳኮ ሀይሳዳ ያግስ፦ 
\v 2 “እስ ፃ ማፃፋ ኤካዳ፥ እዮስያሳ ዎደ ታኒ ነዉ ኦዶ ዶምዳ ኮይሮ ጋላሳፐ ዶማዳ፥ ሀች ጋካናዉ እስራኤለ ቦላ፥ ይሁዳ ቦላነ ሀራ ካዎተታ ቦላ ታኒ ኦድዳ ቃላ ኡባ ፃፋ። 
\v 3 ታ ይሁዳ አሳ ቦላ ኤሀና ጋዳ ሀልችዳ ቦሻ ኡባ ስእድ፥ ኦን ኤር፥ ኤንቲ ባንታ ኢታ ኦሱዋፐ ስማና፤ ታ ኤንታ ናቁዋነ ኤንታ ናጋራ አቶ ጋና” ያግስ።
\p
\v 4 ሄሳ ግሾ፥ ኤርምያስ ኔራ ናኣ ባሮካ ፄግድ፥ ጎዳይ እያዉ ኦድዳባ ኡባ ባሮካስ ኦድን፥ እ ፃ ማፃፋን ፃፍስ። 
\v 5 ሄሳፈ ጉየ፥ ኤርምያስ ባሮካኮ፥ “ታኒ ቃሾ ኬን ደእያ ግሾ፥ ፆሳ ኬ ገላናዉ ዳንዳእከ። 
\v 6 ሄሳ ግሾ፥ ነ ፆማ ጋላስ ፆሳ ኬ ባዳ፥ ታ ኦድን፥ ነ ፃ ማፃፋን ፃፍዳ ጎዳ ቃላ ኤንታዉ ናባባ፤ ባንታ ካታማታፐ ይዳ ይሁዳ አሳ ኡባስ ናባባ። 
\v 7 ሀ አሳ ቦላ ጎዳይ አዋጅዳ ሀንቆይ ግታ ግድያ ግሾ፥ ኦን ኤር፥ ኤንቲ ባንታ ኢታ ኦሱዋፐ ስሚድ፥ ጎዳ ዎሳና” ያግስ። 
\v 8 ኔራ ናአይ ባሮክ ናበይ ኤርምያስ ኪትዳይሳዳ ፆሳ ኬን ጎዳ ቃላ ኡባ ናባብስ።
\p
\v 9 እዮስያሳ ናአይ ይሁዳ ካዎይ እዮአቄም ካዎትዳ እቻሻን ላይን፥ ኡዱፉን አጌናን፥ የሩሳላመን ደእያ አሳስነ ይሁዳ ካታማታፐ ይዳ አሳ ኡባይ ጎዳ ስንን ፆማና መላ አዋጅዶሶና። 
\v 10 ባሮክ ፆሳ ኬን፥ ቆሞ ባጋ ዳባባን፥ ኦራ ፐንገ ጌተትያ በሳን፥ ፃፍያ ሳፋና ናኣ፥ ጋማራ ክፍልያን ኤቅድ፥ ኤርምያሳ ቃላይ ፃፈትዳ ፃ ማፃፋ አሳ ኡባስ ናባብስ።
\p
\v 11 ሳፋና ናኣ ናአይ፥ ጋማራ ናአይ ምካይ ማፃፋፐ ጎዳ ቃላ ባሮክ ናባብሽን ስእዳ ዎደ፥ 
\v 12 ካዎ ጋን ፃፈይ ኡትያ ክፍልያ ብስ። እ ብያ ዎደ፥ ፃፈይ ኤልሻም፥ ሻማያ ናአይ ዳል፥ አክቦራ ናአይ ኤልናታን፥ ሳፋና ናአይ ጋማራ፥ ሀናንያ ናአይ ፅድቀነ ሀራ ሀላቃት ያን ኡትዶሶና። 
\v 13 ባሮክ አሳስ ማፃፋፐ ናባብሽን ስእዳ ቃላ ኡባ ምካይ ኤንታኮ ኦድስ። 
\v 14 ሀላቃት ናታና ናኣ ይሁዳ ባሮካኮ ኪትድ፥ “አሳስ ኔኒ ናባብዳ ማፃፋ ኤካዳ ሃ ያ” ያግዶሶና። (ናታን ሳላማ ናአ፤ ሳላም ኩሳ ናአ።) ባሮክ ማፃፋ ኤክድ፥ ኤንታኮ ይስ። 
\v 15 ኤንትካ እያ፥ “አነ ኡታዳ፥ ኑስ ማፃፋ ናባባ” ያግዶሶና።
\p ያግን ባሮክ ማፃፋ ናባብስ። 
\v 16 እ ናባብዳ ቃላ ኡባ ስእድ ያይዶሶና፥ እሶይ እሱዋ ፄልድ፥ ባሮካ፥ “ሀ ቃላ ኡባ ኑኒ ካዋስ ኦዳናዉ ኮሼስ” ያግዶሶና። 
\v 17 ቃስካ ዛሪድ፥ “ኔኒ ሀ ቃላ ኡባ ዋታዳ ፃፍዳኮ ኑስ ኦዳ። ሀይሳ ነዉ ኤርምያስ ኦድን ፃፋዲ?” ያግዶሶና።
\p
\v 18 ባሮክ፥ “ኤ፥ ሀ ቃላ ኡባ ኤርምያስ ባ ዶናፐ ታዉ ኦድስ፤ ታኒ ቃላመን ሀ ፃ ማፃፋን ፃፋስ” ያግስ።
\p
\v 19 ኤንቲ ባሮካ፥ “ኔንነ ኤርምያስ ብድ ቆሰትተ፤ ህንተ ደእያ በሳ ኦንካ ኤሮፖ” ያግዶሶና።
\p
\v 20 ሀላቃት ማፃፋ ፃፍያ ኤልሻማ ክፍለን ዎዳፐ ጉየ፥ ካዎይ ደእያ ዳባባ ብድ፥ ሀንዳባ ኡባ ካዋስ ኦድዶሶና። 
\v 21 ሄ ማፃፋ ኤሀና መላ፥ ካዎይ ይሁዳ ኪትስ፤ ፃ ማፃፋ ኤልሻማ ክፍለፐ ኤህድ፥ ካዋስነ እያ ዩሹዋን ኤቅዳ ሀላቃታስ ናባብስ። 
\v 22 ኡዱፉን አጌናን ሳእ ባልጎ ግድያ ግሾ፥ ካዎይ ባልጉዋ አያ ኬን ኡትስ። ሄ ዎደ ካዋ ስንን ደእያ ጮጭያን ታም ኤፄስ። 
\v 23 ይሁድ ሄ ዎይኮ ኦይዱ በሳታ ናባብዳፐ ጉየ፥ ካዎይ ሄ በሳታ ፃ ማፃፋፐ ማሻን ቃንፅ ቃንፅድ፥ ታማን የግስ፤ ሄሳዳ ኦድ፥ ማፃፋ ኩመ ፁግስ። 
\v 24 ሀ ቃላ ስእድ ካዎይነ እያራ ኦያ ሞርናት ኡባይ አይነ ባብቦኮና፤ ዎይኮ ካዮትድ፥ ባንታ ማኡዋ ፔቦኮና። 
\v 25 ሀር አቶሽን ኤልናታን፥ ዳላይነ ጋማር ካዎይ ሄ ማፃፋ ፁጎና መላ ዎስንካ፥ ኤንታ ዎሳ ስኦና እፅስ። 
\v 26 ካዋ ናአ ይራህማኤላ፥ አዝርኤላ ናኣ ሳራያነ አብድኤላ ናኣ ሰለማ፥ ፃፍያ ባሮካነ ናብያ ኤርምያሳ ኦይካና መላ ካዎይ ኪትስ። ሽን ጎዳይ ኤንታ ቆትስ።
\s1 ኤርምያስ ዛሪድ ፃፍዳ ፃ ማፃፋ
\p
\v 27 ኤርምያስ ኦድን፥ ባሮክ ፃፍዳ ማፃፋ ካዎይ ፁግድ ስምን፥ ጎዳ ቃላይ ኤርምያሳኮ ሀይሳዳ ያግሸ ይስ፦ 
\v 28 “ሀራ ፃ ማፃፋ ኤካዳ፥ ይሁዳ ካዎይ እዮአቄም ፁግዳ ፃ ማፃፋን ደእያ ቃላ ኡባ ዛራዳ ፃፋ። 
\v 29 ቃስ ይሁዳ ካዋ እዮአቄማ ሀይሳዳ ያጋ፦ ጎዳይ ሀይሳዳ ያጌስ፤ ኔኒ፥ ‘ባብሎነ ካዎይ ይድ፥ ሀ ቢታ ይሳና፤ ቃስ ያን ደእያ አሳነ መህያ ዉርሳና’ ጋዳ አይስ ፃፋዲ?” ያጋዳ ማፃፋ ፁጋዳሳ።
\p
\v 30 “ሄሳ ግሾ፥ ጎዳይ ይሁዳ ካዋ እዮአቄማ ሀይሳዳ ያጌስ፦ ዳዊታ አራታን ኡትያ ኮቻይ ነዉ ኩም ዴና። ነ አሀይ ጮ ሆለትድ፥ ጋላስ አዋ ሱሎስ፥ ቃማ ሜጎን ሾጨታና። 
\v 31 ህንተ ናጋራ ግሾ ነና፥ ነ፥ ኮቻነ ኔራ ኦያ ሞርናታ ኡባ ሴራና። ኤንቲ ታኒ ኦድዳባ ስኦና እፅዳ ግሾ፥ ታ ግዳ ኢታባ ኡባይ ህንተ ቦላ፥ ይሁዳንነ የሩሳላመን ደእያ አሳ ኡባ ቦላ ኤሀና” ያጌስ።
\p
\v 32 ሄሳፈ ጉየ፥ ኤርምያስ ሀራ ፃ ማፃፋ ኤክድ፥ ኔራ ናኣ ፃፍያ ባሮካስ እሚስ። ባሮክ ይሁዳ ካዎይ እዮአቄም ታማን ፁግዳ ፃ ማፃፋ ቃላ ኡባ ኤርምያስ እያዉ ዶናን ኦድን ፃፍስ። ቃስ ኤርምያስ ሄሳ ዳንያ ሀራ ቃላካ ጉጅን፥ ኡባካ ባሮክ ፃፍስ።
\c 37
\s1 ኤርምያስ ቃሾ ኬን
\p
\v 1 ባብሎነ ካዎይ ናቡካዳናፆር እዮአቄማ ናኣ እኮንያና በሳን እዮስያሳ ናኣ ሰደቅያሳ ይሁዳ ቢታን ካዎስ። 
\v 2 ሰደቅያስ፥ እያራ ኦያ ሀላቃትነ ቢታን ደእያ አሳ ኡባይ፥ ጎዳይ ናብያ ኤርምያሳ ባጋራ ኦድዳ ቃላስ ኪተትቦኮና። 
\v 3 ሽን ካዎይ ሰደቅያስ ሰለማ ናኣ ዮካላነ ማእሰያ ናኣ ካህንያ ሶፎንያሳ፥ “ሀያና፥ ኑ ግሾ ጎዳ ኑ ፆሳ ዎሳ” ያግድ ኤርምያሳኮ ኪትስ።
\p
\v 4 ሄ ዎደ ኤርምያስ ቃሾ ኬ ገልቦና ግሾ፥ አሳ ግዶን ስመረቴስ። 
\v 5 ግብፀ ካዋ ኦላንቾት፥ ግብፀፈ ከይዳይሳ የሩሳላመ ተቅዳ ባብሎነ ኦላንቾት ስእዳ ዎደ የሩሳላመ የድድ ከይዶሶና።
\p
\v 6 ሄሳፈ ጉየ፥ ጎዳ ቃላይ ናብያ ኤርምያሳኮ ይስ። 
\v 7 “ጎዳይ እስራኤለ ፆሳይ ሀይሳዳ ያጌስ፦ ታና ኦይቻና መላ ህንተና ታኮ ኪትዳ ይሁዳ ካዋስ ሀይሳዳ ያግተ፤ ‘ህንተና ማዳናዉ ይዳ ግብፀ ካዋ ኦላንቾት ባንታ ቢታ ስሚድ ባና። 
\v 8 ቃስ ባብሎነ ኦላንቾት ስሚድ ያና፤ ሀ ካታማ ኦልድ ኦይካና፤ ታማን እያ ፁጋና’ ያግተ።
\p
\v 9 “ባብሎነ ኦላንቾት ስሚድ ዩሳይ አቶና ግሾ ‘ባብሎነ ኦላንቾት ዮኮና’ ግድ ህንተና ህንተዉ ጭሞፍተ። 
\v 10 ህንተ ባብሎነ ኦላንቾታ ኩመ ፆንያኮካ፥ ማዱንፅድ፥ ዱንካነን ዝንእዳይሳት ደንድድ፥ ሀ ካታማ ታማን ፁጋና” ያጌስ ጎዳይ።
\p
\v 11 ግብፀ ካዋ ኦላንቾት ማትዳ ግሾ፥ ባብሎነ ኦላንቾት የሩሳላመ አግድ ባንታ ደእያ በሳ ጉየ ስምዶሶና። 
\v 12 ሄ ዎደ ኤርምያስ ባ ግሾ ቢታ ኤካናዉ ብንያመ ቢታ ባናዉ የሩሳላመፐ ደንድስ። 
\v 13 ግዶሽን፥ እ ብድ፥ ብንያመ ፐንገ ጋክያ ዎደ ፐንግያ ናገይሳታፐ እሶይ፥ ሀናንያ ናአይ፥ ሳሌማ ናአ ዬራ፥ “ነ ኑና ካዳዳ ባብሎነ ባሳ ግድኪ?” ያግድ ኦይክስ።
\p
\v 14 ኤርምያስ ዛሪድ፥ “ነ ገይሳ መላ ታ ባብሎነ ብያ አስ ግድከ” ያግስ። ሽን ዬረይ እ ገይሳ ስኦና እፅድ ኤርምያሳ ኦይክድ ሀላቃታኮ ኤፍስ። 
\v 15 ሀላቃት ዳሮ ሀንቀትድ፥ ኤርምያሳ ዋ፥ ኤንቲ ቃሾ ኬ ኦዳ፥ ፃፍያ ዮናታና ኬን እያ ቃችዶሶና። 
\v 16 ኤርምያስ ያን ቢታ ጋርሳን ደእያ ክፍልያን ዳሮ ዎደ ጋምእስ።
\p
\v 17 ሄሳፈ ጉየ፥ ካዎይ ሰደቅያስ አሰ ኪትድ፥ ኤርምያሳ ባ ካዎ ጋ ፄግስድ፥ ዱማ ቆሳን እያ፥ “ጎዳይ ነዉ ኦድዳባይ ደኢ?” ያግድ ኦይችስ።
\p ኤርምያስ ዛሪድ፥ “ኤ ደኤስ፤ ኔኒ ባብሎነ ካዋ ኩሸን አዳ እመታና” ያግስ 
\v 18 ቃስካ ኤርምያስ ካዋ ሰደቅያሳ ሀይሳዳ ያግድ ኦይችስ፦ “ታና ህንተ ቃሾ ኬን የጋናዉ ታ ነ ቦላ፥ ነዉ ኦያ ሀላቃታ ቦላ ዎይኮ ሀ አሳ ቦላ አይ ባላ ኦድና? 
\v 19 ያትን፥ ‘ባብሎነ ካዎይ ይድ ህንተናነ ህንተ ቢታ ኦለና’ ያግድ ነዉ ትንብተ ኦድዳ ነ ናበት ሀእ አዉን ደኦና? 
\v 20 ታ ጎዳዉ፥ ካዋዉ፥ ስአ፤ ታ ኦይችያ እስባ ነ ፖላና መላ ነና ዎሳይስ። ታ ሄ በሳን ሀይቆና መላ እያ ኬይ ቃሾ ኬ ግድዳ ፃፍያ ዮናታና ሶ ታና ጉየ ዛሮፓ” ያግስ።
\p
\v 21 ካዎይ ሰደቅያስ ናገይሳታ ዳባባን ኤርምያሳ ዳና መላ ኪትስ። ያን እ ደእሽን ካታማፐ ዳቦይ ያና ጋካናዉ ጋላስ ጋላስ እስ እስ ዳቦ ኡክያ በሳፈ ኤህድ እያዉ እሞሶና። ሄሳ ግሾ፥ ኤርምያሳ ካዋ ዛባን ጋምእስ።
\c 38
\s1 ኤርምያስ ሃ ኦላን የገትስ
\p
\v 1 ማታና ናአይ ሳፋፅ፥ ጳስኮራ ናአይ ጎዶልያ፥ ሰለማ ናአይ ዮካልነ ማልካያ ናአይ ጳስኮር ኤርምያስ አሳ ኡባስ ኦድዳ ቃላ ስእዶሶና። 
\v 2 ኤርምያስ፥ “ሀ ካታማን አትያ ኦንካ ኦላን፥ ኮሻንነ ቦሻን ሀይቃና። ሽን ባብሎነታስ ባ ኩሸ እምያ ኦንካ ሀይቀና፤ አታና፤ ደኦን ዳና። 
\v 3 የሩሳላመ ካታማይ ባብሎነ ካዋ ኦላንቾታ ኩሸን አድ እመታና፤ ኤንትካ እያ ፖሎ ድአና” ያጌስ ጎዳይ።
\p
\v 4 ሄሳፈ ጉየ፥ ሀላቃት ካዋኮ ብድ፥ “ሀ አደይ ሀይቃናዉ ኮሼስ፤ ሀይሳ መላ ኦዳ ኦድድ፥ ሀ ካታማን ደእያ ኦላንቾትነ አሳ ኡባይ ሹጋና መላ ኦስ። እ አሰ ቆህያባ አሞቴስፐ አትሽን፥ ሳሮባ አሞተና” ያግዶሶና።
\p
\v 5 ካዎይ ሰደቅያስ ዛሪድ፥ “ህንተ እያ ቦላ ኦና ግዳባ ታ ህንተና ድጋናዉ ዳንዳእከ” ያግስ። 
\v 6 ኤንቲ ኤርምያሳ ካዎ ጋ ዳባባን ደእያ፥ ካዋ ናኣ ማልካያ ሃ ኦላን፥ ዎዶሮን ዱገ የግዶሶና። ሄ ዎደ ሄ ኦላን ስልሞፐ አትሽን፥ ሃ ባዋ፤ ኤርምያስ ሄ ስልሙዋ ግዶ ገልስ።
\p
\v 7 ሽን ቶጰ አሰ ግድዳ፥ ካዎ ሞርናይ፥ አበመለከ ጌተትያ አደይ ኤርምያስ ኦላን የገትዳይሳ ስእስ። ሄ ዎደ ካዎይ ብንያመ ፐንገ ፕርዳ ኦይደን ኡትስ። 
\v 8 ኤበድ-መለክ ካዋኮ ብድ፥ ሀይሳዳ ያግስ፤ 
\v 9 “ታ ጎዳዉ ካዋዉ፥ ሀ አሳት ግታ ኢታባ ኦዶሶና፤ ኤንቲ ናብያ ኤርምያሳ ሃ ኦላን የግዶሶና። ቃስ ካታማን ቁም ባይና ግሾ እ ያን ኮሻን ሀይቃና” ያግስ።
\p
\v 10 ካዎይ ዛሪድ፥ ቶጰ አደይ ኤበድ-መለካኮ፥ “ሀስታሙ አስ ኔራ ኤካ ባዳ፥ ኤርምያስ ሀይቆና ደእሽን ሃ ኦላፈ ከስተ” ያግስ።
\p
\v 11 ኤበድ-መለክ አሰ ኤክድ፥ ብድ ካዎ ጋን ሻሎ ምንጅያ ኬፈ ጋርሳ ባጋራ ደእያ ክፍልያ ገልድ፥ ጋልአ ማኦነ ጩርቃ ኤክስ። ሄ ጩርቃ ዎዶሩዋ ፄራን ቃችድ፥ ኤርምያሳስ ዱገ ኦላ ግዶ የድስ። 
\v 12 ቶጰ አደይ ኤበድ-መለክ ኤርምያሳ ፄግድ፥ “ሀ ጩርቃ ማኡዋ ዎዶሩዋፐ ጋርሳራ ነ ሾጵያን ዎ” ያግስ። ኤርምያስ እ ግዳይሳዳ ኦስ። 
\v 13 ኤንቲ ዎዶሩዋራ ጎችድ፥ ኤርምያሳ ኦላፈ ከስድ፥ ናገይሳታ ኬ ገልስድ ጎርድዶሶና።
\s1 ሰደቅያስ ኤርምያሳ ዛሪድ ኦይችስ
\p
\v 14 ሄሳፈ ጉየ፥ ካዎይ ሰደቅያስ ኤርምያሳ ኪትድ ኤህስድ፥ ፆሳ ኬ ገልያ ሄን ፐንግያ ማታን፥ “ታ ነና እስባ ኦይቻና፤ ነ ታፐ ቆሶፓ” ያግስ።
\p
\v 15 ኤርምያስ ዛሪድ፥ “ታ ኦድኮ፥ ነ ታና ዎኪ? ታ ዞርን ነ ስአካ” ያግስ።
\p
\v 16 ካዎይ ሰደቅያስ፥ “ደኦ ፆሳይ ኤርያ መላ፥ ታ ነና ዎከ፤ ነና ዎናዉ ኮየይሳታስ አዳ እምከ” ያግድ ቆሳን ኤርምያሳስ ጫቅስ።
\p
\v 17 ኤርምያስ ዛሪድ፥ “ጎዳይ፥ ኡባፈ ዎልቃማ ፆሳይ፥ እስራኤለ ፆሳይ ሀይሳዳ ያጌስ፦ ‘ባብሎነ ካዋ ሀላቃታስ ነ ኩሸ እምኮ፥ ነ ፓፃ አታና፤ ሀ ካታማይ ታማን ፁገተና፤ ነነ ነ ኬ አሳይ ደኦን ዳና። 
\v 18 ሽን ነ ኤንታዉ ኩሸ እሞና እፅኮ፥ ሀ ካታማይ ባብሎነታስ አድ እመታና፤ ኤንቲ እያ ፁጋና፤ ነ ኤንታፈ ከሳ ኤካካ’ ” ያግስ።
\p
\v 19 ካዎይ ሰደቅያስ፥ “ታ ያየይ ሀ ቢታ ካድድ፥ ባብሎነ ብዳ አይሁደታሳ። ባብሎነት ታና ኤንታ ኩሸን አድ እምን፥ አይሁደት ታና ካአና” ያግድ ዛርስ።
\p
\v 20 ኤርምያስ፥ “አይኮይ ባዋ! ኤንቲ ነና ኤንታዉ አድ እሞኮና። ታ ኦድያ ጎዳ ቃላስ ሀያና ኪተታ። ሄስ ነዉ ሎኦ ግዳና፤ ነ ፓፃ አታና። 
\v 21 ሽን ነ ኩሸ እሞና እፅኮ፥ ጎዳይ ታና በስዳ ቆንጨ ደኤስ። 
\v 22 ሄስካ፥ ይሁዳ ካዎ ጋን አትዳ ማጫሳት ኡባይ ድኤትድ፥ ባብሎነ ሀላቃታኮ ባና። ኤንቲ ኔኮ፥ ‘ነ ማታ ላገት ነና ባለዶሶና፤ ኤንቲ ነና ፆንዶሶና። ሽን ሀእ ነ ቶሆይ ስልሞ ግዶ ገልን፥ ሄ ላገት ነና የግድ ብዶሶና’ ያጋና። 
\v 23 ነ ማቸትነ ነ ናይት ኡባይ ባብሎነ ድኤትድ ባና። ነ ኤንታ ኩሸፐ ከሳ ኤካካ። ባብሎነ ካዎይ ነና ኦይካና። ሀ ካታማይ ታማን ፁገታና” ያግስ።
\p
\v 24 ሰደቅያስ ዛሪድ፥ “ሀይሳ ነ ታዉ ኦድዳይሳ አሳስ ኦዶና እፅኮ ነ ሀይቃካ። 
\v 25 ሀላቃት ታ ኔራ ኦደትዳይሳ ስእድ፥ ‘ኔራ ካዋራ አይ ኦደትዳኮ ኑስ ኦዳ። ነ ኑስ ቆቶና እፅኮ፥ ኑ ነና ዎኮ’ ያግድ ኦይቻና። 
\v 26 ኔኒ፥ ‘ታ ያን ሀይቆና መላ ታና ዛራዳ ቃሾ ኬ ግድዳ ዮናታና ሶ የዶና መላ ካዋ ዎሳስ’ ” ጋዳ ዛራ ያጋ።
\p
\v 27 ሄሳፈ ጉየ፥ ሀላቃት ኡባይ ኤርምያሳኮ ይድ፥ ሄ ኦይሻ ኦይችዶሶና። ካዎይ እያ ኪትዳይሳዳ ኤንታዉ ኦድስ፤ ኤርምያሳራ ካዋራ ሃሳይሽን ስእዳ አስ ባይና ግሾ ኤንቲ ስእ ግዶሶና። 
\v 28 የሩሳላመይ ኦይከታና ዎደይ ጋካናዉ፥ ኤርምያስ ናገይሳታ ዳባባን ጎርደትድ ጋምእስ።
\c 39
\s1 የሩሳላመ ኩንደ
\r (2 ካዎ 25:1-12፤ ኤርም 52:4-16)
\p
\v 1 ሰደቅያስ ይሁዳን ካዎትዳ ኡዱፉን ላይን፥ ታማን አጌናን፥ ባብሎነ ካዎይ ናቡካዳናፆርነ እያ ኦላንቾት ኡባይ ይድ፥ የሩሳላመ ተቅዶሶና። 
\v 2 ሰደቅያስ ካዎትዳ ታማነ እስን ላይን፥ ኦይዳን አጌናን፥ ኡዱፉን ጋላሳን ባብሎነ ኦላንቾት ካታማ ግምብያ መንዶሶና። 
\v 3 ሄ ዎደ ባብሎነ ካዋ ሀላቃት፥ ኤርጋል-ሳራስራ፥ ሳምጋር-ናቦ፥ ሳርሳክማነ ኤርጋል-ሳራስራ ጌተተይሳት ሀራ ዳሮ ሀላቃታራ እስፈ ይድ ግዶ ፐንገ ጌተትያ በሳን ኡትዶሶና።
\p
\v 4 ይሁዳ ካዎይ ሰደቅያስነ እያ ኦላንቾት ኡባይ ባብሎነ ኦላንቾታ በእዳ ዎደ ባቃትዶሶና። ቃማ ካታማፐ ከይድ፥ ካዋ አታክልተ በሳ ኤፍያ ኦግያራ፥ ናምኡ ድርሳ ግምበታ እስፈ ጋያ ፐንግያራ ከይድ ዮርዳኖሰ ዛንጋራኮ ስሚድ ብዶሶና። 
\v 5 ግዶሽን፥ ባብሎነ ኦላንቾት ኤንታ የደድ፥ እያርኮ ደምባ ጋሸ፥ ሰደቅያሳ ኦይክዶሶና። ሀማታ ቢታን፥ እርብላ ካታማን ደእያ ካዋ ናቡካዳናፆራኮ ኤፍዶሶና። ካዎይ ናቡካዳናፆር ያን ሰደቅያሳ ቦላ ፕርድስ። 
\v 6 ባብሎነ ካዎይ፥ ሰደቅያሳ አደ ናይታ እያ ስንን፥ እርብላ ካታማን ዎስ፤ ቃስ ይሁዳ ሀላቃታ ኡባ ዎስ። 
\v 7 ሰደቅያሳ አይፈታ ዎጭ ከስድ፥ እያ ባብሎነ ቢታ ኤፋናዉ ሳንላታን ቃችስ።
\p
\v 8 ባብሎነ ኦላንቾት ካዎ ጋነ አሳይ ደእያ ኬ ኡባ ታማን ፁግዶሶና፤ የሩሳላመ ግምብያካ ላልዶሶና። 
\v 9 ካዋ ናገይሳታ ሀላቃይ ናቡዛርዳን ካታማን አትዳ አሳነ ካድድ እያኮ ይዳ አሳ ኡባ ድእድ ባብሎነ ቢታ ኤፍስ። 
\v 10 ካዋ ናገይሳታ ሀላቃይ ናቡዛርዳን አይኮካ ባይና ጉ ማንቆታ ይሁዳን አግድ፥ ኤንታዉ ዎይነ ጋደነ ጎሻ ጋደ እሚስ።
\s1 ኤርምያስ ብለትስ
\p
\v 11 ናቡካዳናፆር፥ ካዋ ናገይሳታ ሀላቃ ናቡዛርዳና ሀይሳዳ ያግድ ኪትስ፦ 
\v 12 “ባዳ ኤርምያሳ ኮያ ደማዳ፥ እያዉ ኮሽያባ ኡባ ኦ፤ እያ ቦላ ሀራ ኢታባ አይኮካ ኦፋ” ያግስ። 
\v 13 ሄሳ ግሾ፥ ናቡዛርዳን፥ ናቡሻዝባና፥ ኤርጋል-ሳራስራነ ባብሎነ ካዋ ሀላቃታ ኡባ ኪትድ፥ 
\v 14 ኤርምያሳ ቃሸትድ ደእያ፥ ናገይሳታ ዳባባፐ ከስዶሶና። ባ ሶ ኤፍድ ዎና መላ ሳፋና ናኣ፥ አክቃማ ናኣ ጎዶልያስ ሀዳራ እምዶሶና። ሄሳ ጋሶን፥ ኤርምያስ ባ ቢታ አሳራ እስፈ ደእስ።
\p
\v 15 ኤርምያስ ናገይሳታ ዳባባን ቃሸትድ ደእሽን፥ ጎዳ ቃላይ እያኮ ሀይሳዳ ያግድ ይስ። 
\v 16 “ባዳ፥ ቶጰ አድያ ኤበመለካኮ ሀይሳዳ ያጋ፦ ‘ኡባፈ ዎልቃማ ጎዳይ፥ እስራኤለ ፆሳይ፥ ሀይሳዳ ያጌስ፦ ህዛፐ ጉየ ታ ኦድዳይሳዳ ሀ ካታማ ቦላ ሎኦባ ግዶናሽን፥ ዮ ኤሀና። ሄስ ኡባይ ሀንያ ዎደ ነ ሀ ካታማን ኡታዳ፥ ነ አይፈን በአና። 
\v 17 ግዶሽን፥ ሄ ጋላስ ታ ነና አሻና፤ ነ ያይያ፥ ነ ሞርከታ ኩሸን አዳ እምከ። 
\v 18 ታ ነና ፖሎ አሻና፤ ነ ኦላን ሀይቃካ፤ ነ ታናን አማነትዳ ግሾ፥ ሀይቆፐ አታና’ ” ያጌስ ጎዳይ።
\c 40
\s1 ኤርምያስ ላአተን ደእስ
\p
\v 1 ካዋ ናገይሳታ ሀላቃይ ናቡዛርዳን ኤርምያሳ ራማን ብርሽድ ስምን፥ ጎዳ ቃላይ ኤርምያሳኮ ይስ። ናቡዛርዳን የሩሳላመፐነ ይሁዳፐ ድእድ፥ ባብሎነ ኤፋናዉ ቃችዳ አሳ ግዶን ኤርምያስ ሳንላታን ቃሸትድ ደኤስ።
\p
\v 2 ካዋ ናገይሳታ ሀላቃይ ኤርምያሳ ዱማ ከስድ፥ ሀይሳዳ ያግስ፦ “ጎዳይ ነ ፆሳይ፥ ዮ ሀ ቢታ ቦላ ኤሀናይሳ ኦድስ። 
\v 3 እ ኤሀና ግዳይሳዳ ሀእ ኦስ፤ ጎዳ ቦላ ህንተ ናጋራ ኦዳ ግሾነ እያዉ ኪተቶና እፅዳ ግሾ ሀይስ ኡባይ ሀንስ። 
\v 4 ሄኮ፥ ሀእ ታ ነ ኩሸን ደእያ ሳንላታ ብርሻዳ ነና የዳስ። ታራ ባብሎነ ባና ጊኮ የ፤ ታ ነዉ ኮሽያባ ኡባ ኩንና። ባብሎነ ባናዉ ኮዮና እፅኮ አታናዉ ዳንዳኣሳ። ቢታ ኡባይ ነ ስንን ደኤስ፤ ነና ሎእዳ በሲ አዉካ ባ” ያግስ።
\p
\v 5 ኤርምያስ እያ ማታፐ ቦና ደእሽን፥ ናቡዛርዳን ጉጅድ ያግስ፤ “ሳፋና ናኣ፥ አክቃማ ናኣ ጎዶልያኮ ባ። ባብሎነ ካዎይ ናቡካዳናፆር እያ ይሁዳ ካታማታ ሃርያ አስ ኦድ ሹምስ። ሄሳ ግሾ፥ እያራ እስፈ ያን አሳራ ደአ፤ ዎይኮ ነና ሎእዳ በሲ አዉካ ባ” ያግስ። ካዋ ናገይሳታ ሀላቃይ እያዉ ሽንቀነ ሀራ እሞታ እምድ የድስ። 
\v 6 ኤርምያስ ምፅጳን ደእያ አክቃማ ናኣ ጎዶልያኮ ብስ። እ ያን አትዳ አሳራ እስፈ ደእስ።
\s1 ጎዶልያ ሀይቁዋ
\r (2 ካዎ 25:22-24)
\p
\v 7 ይሁዳ ቶራ ሞጮናታፐነ ኦላንቾታፐ ጉት ባብሎነ ካዋስ ኩሸ እምቦኮና። ኤንቲ ባብሎነ ካዎይ፥ አክቃማ ናአ ጎዶልያ ቢታ ሃረይሳ ኦድ ሹምዳይሳነ ባብሎነ ድኤትድ ቦና ይሁዳን አትዳ ማንቆታስ ሀላቃ ኦዳይሳ ስእዶሶና። 
\v 8 ናታና ናአይ እስማኤል፥ ቃረያ ናይት ዮሃንነ ዮናታን፥ ታንሁመታ ናአይ ሳራይ፥ ናፆፋ አድያ ዮፋ ናይትነ ማእካ አድያ ናአይ ያዛን ባንታ ኦላንቾታ ኡባራ ጎዶልያኮ ምፅጳ ይዶሶና። 
\v 9 ሳፋና ናአይ፥ አክቃማ ናአይ ጎዶልያ ኤንታዉ ሀይሳዳ ያግድ ጫቅስ፦ “ባብሎነታስ ኩሸ እማናዉ ያዮፍተ፤ ሄ ቢታን ደእተ። ባብሎነ ካዋስ ሃረትተ፤ ኡባባይ ህንተዉ እንጀ ግዳና። 
\v 10 ታ ምፅጳን ኡታዳ፥ ባብሎነ ቢታፈ ህንተራ ጋሄታናዉ ያ ኡባራ ህንተ ዶና ግዳዳ ኦደታና። ሽን ህንተ ደእያ በሳን ዎይነ፥ ሻማሆ ዛይተነ ሀራ ካ አይፈ ኡባ ሺሽድ ዳጋይተ” ያግስ።
\p
\v 11 ሞአበን፥ አሞነን፥ ኤዶመንነ ሀራ ቢታታን ደእያ አይሁደ ኡባይ ባብሎነ ካዎይ፥ ጉ ይሁዳ አሳት ይሁዳን አታና መላ ኦዳይሳነ ሳፋና ናአ አክቃማ ናአ ጎዶልያ ኤንታ ቦላ ሹምዳይሳ ስእዶሶና። 
\v 12 ኤንቲ ላለትድ ደእያ ባንታ ቢታፈ ይሁዳ ስሚድ፥ ጎዶልያ ደእያ በሳ ምፅጳ ይዶሶና። ያን ኤንቲ ዳሮ ዎይነነ ሀራ ካ አይፈ ሺሽድ ዳጋይዶሶና።
\p
\v 13 ሄሳፈ ጉየ፥ ቃራያ ናአይ ዮሃንነ ኩሸ እምቦና ቶራ ሞጮናት ኡባይ ጎዶልያኮ ምፅጳ ይድ፥ 
\v 14 “አሞነ ካዎይ ባአልስ ነና ዎና መላ ናታና ናኣ እስማኤላ የድዳይሳ ኤራይ?” ያግዶሶና። ሽን አክቃማ ናአይ ጎዶልያ ኤንታ ኦዳ አማኖና እፅስ።
\p
\v 15 ቃራያ ናአይ ዮሃን ምፅጳን ደእያ ጎዶልያኮ ይድ፥ “ኦንካ ኤሮና ደእሽን ባዳ፥ ናታንያ ናኣ እስማኤላ ታ ዎና። እ ነና ዎኮ፥ ነ ማታን ሺቅዳ አይሁደ ኡባይ ላለታና፤ ቃስ ይሁዳን አትዳ አሳ ኡባይ ዉራና” ያግስ።
\p
\v 16 ሽን አክቃማ ናአይ ጎዶልያ ዛሪድ፥ “እስማኤላባ ነ ኦድያ ኡባይ ዎርዶ ግድያ ግሾ ሄሳ መላባ ኦፋ” ያግስ።
\c 41
\p
\v 1 ላፑን አጌናን ካዎ ኮቸ ግድድ፥ ካዋ ሞርናታፐ እሶይ፥ ኤልሳማ ናአይ፥ ናታና ናአይ እስማኤል ታሙ አሳራ እስፈ አክቃማ ናኣ ጎዶልያራ ጋሄታናዉ ምፅጳ ብስ። ኡባይ ኡትድ ካ ምሽን፥ 
\v 2 ናታና ናአይ እስማኤልነ እያራ ደእያ ታሙ አሳት ባንታ ማሻ ማሻ ከስድ፥ ባብሎነ ካዎይ ይሁዳ ቦላ ሹምዳ አክቃማ ናኣ ጎዶልያ ዎዶሶና። 
\v 3 እስማኤል ቃስ ምፅጳን ጎዶልያራ ደእያ አይሁደታነ ባብሎነ ኦላንቾታ ኡባ ዎስ።
\p
\v 4 ጎዶልያ ሀይቅዳ ዎንተ ጋላስ፥ ኦንካ እያ ሀይቁዋ ኤሮና ደእሽን፥ 
\v 5 ሴከማፐ፥ ሴሎፐነ ሳማረፐ ሆስፑን ታሙ አሳት አዛንድ፥ ባንታ ቡቻ ሜድድ፥ ባንታ ማኡዋ ዳክድ፥ ባንታ ሶምኡዋ ጋርሸ ይዶሶና። ኤንቲ ፆሳ ኬስ እምያ ካነ እፃነ ኤህዶሶና። 
\v 6 እስማኤል ዬክሸ ምፅጳፈ ከይድ፥ ኤንታራ ጋሄታናዉ ብስ። ኤንታ ጋሄትዳ ዎደ፥ “አክቃማ ናኣ ጎዶልያኮ ሃ ይድ እያ በእተ” ያግስ። 
\v 7 ኤንቲ ካታማ ገልዳ ዎደ እስማኤልነ እያራ ደእያ አሳት ኤንታ ዎድ ሃ ኦላን የግዶሶና።
\p
\v 8 ሽን ሄ ሆስፑን ታሙ አሳታፐ ታማት እስማኤላ ሀይሳዳ ያግድ ዎስዶሶና፦ “ኑና ዎፓ! ኑ ጎሻን ኑ ቆስዳ ዳሮ ግስተይ፥ ባንግ፥ ሻማሆ ዛይተይነ ኤስ ደኤስ” ያግዶሶና። እ ኤንታ ዎና የድ አግስ። 
\v 9 እስማኤል አሳ ዎድ የግዳ ኦላይ፥ እስራኤለ ኦላናዉ ባኦስ ይዳ ዎደ ካዎይ አስ ቦክስዳ ግታ ግምበትዳ ሃ ኦላ። ናታንያ ናአይ እስማኤል ሄ ኦላ አሀን ኩንስ። 
\v 10 እስማኤል ካዋ ማጫ ናይታነ ምፅጳን አትዳ አሳ ኡባ ድእስ። ሄሳት ካዋ ናገይሳታ ሀላቃይ ናቡዛርዳን አክቃማ ናኣ ጎዶልያ አዋተ ጋርሳን ምፅጳን ዎዳይሳታ። እ ኤንታ ድእድ፥ ባራ ኤክድ፥ አሞነ ቢታ ባናዉ ደንድስ።
\p
\v 11 ቃራያ ናአይ ዮሃንነ እያራ ደእያ ቶራ ሞጮናት እስማኤል ኦዳ ኢታባ ኡባ ስእዶሶና። 
\v 12 ባንታ አሳ ኤክድ፥ እያራ ኦለታናዉ ብዶሶና፤ እስማኤላ ጋባኦናን ደእያ ግታ ኤለ ሃ ማታን ኦይክዶሶና። 
\v 13 እስማኤል ድእድ ኤፍያ አሳ ኡባይ ቃራያ ናኣ ዮሃናናነ እያራ ደእያ ቶራ ሞጮናታ በእዳ ዎደ ዳሮ ኡፋይትዶሶና። 
\v 14 ሄ ድኤትዳይሳት ኡባይ ጉየ ስሚድ፥ ቃራያ ናኣ ዮሃናናን ጋሄትዶሶና። 
\v 15 ሽን እስማኤልነ ሀራ ሆስፑን አሳት ዮሃናናፐ ከስ ኤክድ፥ አሞነ ቢታ ባቃትዶሶና።
\p
\v 16 እስማኤል አክቃማ ናኣ ጎዶልያ ዎድ፥ ምፅጳፈ ድእድ ኤህዳ ኦላንቾት፥ ማጫሳት፥ ናይትነ ሹፋት ኡባይ ቃራያ ናኣ ዮሃናራነ ሀራ ቶራ ሞጮናታራ ደንድድ ብዶሶና። 
\v 17 ኤንቲ ያፐ ደንድድ፥ ግብፀ ባናዉ፥ ቤተለመ ማታን ደእያ ገሮት-ካማሀማ ጌተትያ በሳን ሸምፕዶሶና። 
\v 18 ኤንቲ ግብፀ ብዳይ ባብሎነ ካዎይ ሹምዳ አክቃማ ናኣ ጎዶልያ እስማኤል ዎዳ ግሾ፥ ባብሎነታስ ያይድ፥ ባብሎነፐ ባቃትድ፥ ግብፀ ባናዉ ደንድዶሶና።
\c 42
\p
\v 1 ቶራ ሞጮናት ኡባይ፥ ቃራያ ናአይ ዮሃን፥ ሆሻያ ናአይ አዛርያስ አሳ ኡባይ፥ ጉፈ ግታ ጋካናዉ፥ 
\v 2 ናብያ ኤርምያሳኮ ይድ፥ “ኑ ነና ኦይችያባ ኑስ ኦርክ። አትዳ ኑ ግሾ ጎዳ ነ ፆሳ ዎሳርክ። ኑ ካሰ ዳሮ፤ ሽን ሀእ ነ በኤይሳዳ ጉ አሳ ፃላል አትዳ። 
\v 3 ኑ ብያ ኦግያነ ኑ ኦናባ እ ኑና በሳና መላ ጎዳ ነ ፆሳ ኑ ግሾ ዎሳ” ያግዶሶና።
\p
\v 4 ናበይ ኤርምያስ ዛሪድ፥ “ሎኦ፤ ህንተ ኦይሻዳ፥ ጎዳ ህንተ ፆሳ ታ ዎሳና፤ ህንተፈ አይኮካ ቆሶና እ ኦድያባ ኡባ ህንተዉ ኦዳና” ያግስ።
\p
\v 5 ኤንቲ ዛሪድ፥ ኤርምያሳኮ፥ “ጎዳይ ነ ፆሳይ ነ ባጋራ ኑና ኪትያባ ኡባ ኑ ፖሎና እፅኮ፥ ጎዳይ ባ ሁጰን ኑ ቦላ ቱማነ አማነትዳ ማርካ ግዶ። 
\v 6 ኑ ዶስያባ ግድን፥ እፅያባ ግድን፥ ኑ ነና እያኮ ኪትያ ጎዳይ፥ ኑ ፆሳይ ኪትያባ ኑ ኦና። ኑ እያዉ ኪተትኮ፥ ኑስ ኡባባይ እንጀ ግዳና” ያግዶሶና።
\p
\v 7 ታሙ ጋላሳፐ ጉየ፥ ጎዳ ቃላይ ኤርምያሳኮ ይስ። 
\v 8 ቃራያ ናኣ ዮሃና፥ እያራ ደእያ ቶራ ሞጮናታነ አሳ ኡባ፥ ጉፈ ግታ ጋካናዉ ፄግድ፥ 
\v 9 ህንተ ዎሳ ታ እያኮ ሺሻና መላ ህንተ ታና ኪትዳ ጎዳይ እስራኤለ ፆሳይ ሀይሳዳ ያጌስ። 
\v 10 “ ‘ታ ካሰ ህንተ ቦላ ኤህዳ ኢታባይ ታና አዛንዳ ግሾ፥ ህንተ ሀ ቢታን ኡትኮ፥ ታ ህንተና ኬፃናፐ አትሽን፥ ላልከ፤ ቶካናፐ አትሽን፥ ሾድከ። 
\v 11 ህንተ ሀእ ያይያ ባብሎነ ካዋስ አይኮካ ያዮፍተ። ህንተና እያ ኩሸፐ አሻናዉ ታ ህንተራ ደእያ ግሾ ያዮፍተ። 
\v 12 ታ ህንተዉ ቃታና፤ ያታዳ እ ህንተዉ ቃትድ፥ ህንተና ህንተ ቢታ ዛራና መላ ኦና’ ያጌስ ጎዳይ።
\p
\v 13 “ግዶሽን፥ ህንተ ጎዳስ፥ ህንተ ፆሳስ ኪተቶና እፅድ፥ ሀ ቢታን ኡቶኮ ጊኮ፥ 
\v 14 ቃስ ህንተ፥ ‘ኦላ ዎረነ ኦላስ ፑንያ ሞይዘ ስኦናነ ኮሽ ባይና ግብፀ ብድ፥ ያን ዳና’ ጊኮ፥ 
\v 15 ህንተኖ፥ ይሁዳን አትዳ አሳዉ፥ ጎዳይ ግያባ ስእተ። ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፦ ‘ህንተ ግብፀ ብድ፥ ያን ዳናዉ ቆፋ ቃችኮ፥ 
\v 16 ህንተ ያይዳ ኦላይ ግብፀን ህንተና ኦይካና፤ ህንተ ህርግዳ ኮሻይ ህንተና ካልድ ባና፤ ህንተ ያን ግብፀን ሀይቃና። 
\v 17 ግብፀ ብድ ዳናዉ ቆፋ ቃችዳ አሳ ኡባይ ኦላን ዎይኮ ኮሻን ዎይኮ ቦሻን ሀይቃና። ታ ኤንታ ቦላ ኤህያ ኢታፐ እሶይካ ከስ ኤከና ዎይኮ አተና’ ያጌስ።
\p
\v 18 “ኡባፈ ዎልቃማ ጎዳይ፥ እስራኤለ ፆሳይ፥ ‘የሩሳላመን ደኤይሳታ ቦላ ታ ሀንቆይነ ታ ይሎይ ጉክዳይሳዳ፥ ህንተ ግብፀ ገልያ ዎደ ህንተ ቦላ ታ ሀንቆይ ሄሳዳ ጉካና። ህንተ ዳጋማስ፥ ጫሻስ፥ ባደስነ ሚቻስ አታና፤ ሀ በሳ ዛሪድ በኤከታ’ ያጌስ።
\p
\v 19 “ይሁዳን አትዳይሳቶ፥ ጎዳይ ህንተኮ፥ ‘ግብፀ ቦፕተ!’ ያግስ። ታ ሀች ህንተኮ፥ ‘ናገትተ’ ገይሳ ስእተ። 
\v 20 ህንተ ታኮ፥ ‘ኑ ግሾ ጎዳ ኑ ፆሳ ዎሳ፤ እ ነዉ ኦድያባ ኡባ ኑስ ኦዳ፤ ኑ ኦና’ ያግድ፥ ታና ጎዳኮ፥ ህንተ ፆሳኮ፥ ኪትደታ፤ ሄሳን ግታ ባላ ባልደታ። 
\v 21 ታ እ ግዳባ ኡባ ሀች ህንተዉ ኦዳስ። ሽን ጎዳይ ህንተ ፆሳይ ታ ባጋራ ህንተዉ ኪትዳ ቃላስ ኪተቶና እፅደታ። 
\v 22 ህዛ፥ ሀይሳ ስእተ፤ ህንተ ብድ ዳናዉ ኮይያ ቢታን ህንተ ኦላን፥ ኮሻንነ ቦሻን ሀይቅድ ዉራና” ያግስ።
\c 43
\s1 ኤርምያስ ግብፀ ብስ
\p
\v 1 ጎዳይ ኤንታ ፆሳይ ኪትዳ ቃላ ኡባ ኤርምያስ ኤንታዉ ኦድድ ዉርስዳፐ ጉየ፥ 
\v 2 ሆሻያ ናአይ አዛርያስ፥ ቃራያ ናአይ ዮሃንነ ኦቶራንቾ አሳ ኡባይ ኤርምያሳኮ፥ “ነ ዎርዶ ኦዳሳ! ጎዳይ ኑ ፆሳይ ኑ ግብፀ ብድ ኡቶና መላ ድጋናዉ ነና ኑኮ ኪትቤና። 
\v 3 ሽን ባብሎነ አሳይ ኑና ዎናዳ ዎይኮ ድእድ ባንታ ቢታ ኤፋናዳ ነ ኑና ኤንታ ኩሸን አዳ እማና መላ ነና ኑ ቦላ ደንዳይ ኔራ ናኣ ባሮካ” ያግዶሶና።
\p
\v 4 ቃራያ ናአይ ዮሃን፥ ቶራ ሞጮናት ኡባይነ አሳ ኡባይ ይሁዳ ቢታን ዳና መላ ጎዳይ ኤንታ ኪትዳ ኪታ ፖሎና እፅዶሶና። 
\v 5 ቃራያ ናአይ ዮሃንነ ቶራ ሞጮናት ኡባይ ባንታ ላለትዳ ካዎተታ ኡባፈ ይሁዳን ዳናዉ ስምዳ ይሁዳ አሳ ባንታራ ኤክድ ግብፀ ብዶሶና። 
\v 6 ካዋ ናገይሳታ ሀላቃይ ናቡዛርዳን ሳፋና ናኣ፥ አክቃማ ናኣ ጎዶልያራ ዳና መላ አሽዳ አደታ፥ ማጫሳ፥ ናይታነ ካዋ ማጫ ናይታ ኡባ ኤፍዶሶና። ቃስ ናብያ ኤርምያሳነ ኔራ ናኣ ባሮካ ኤፍዶሶና። 
\v 7 ኤንቲ ጎዳ ኪታ እፅድ፥ ግብፀ ቢታ ገልድ፥ ፃፍናሳ ካታማ ጋካናዉ ብዶሶና።
\p
\v 8 ፃፍናሳን ጎዳ ቃላይ ኤርምያሳኮ ሀይሳዳ ያግድ ይስ። 
\v 9 “ግታ ሹቻታ ኤካዳ፥ ይሁዳ አሳይ በእሽን፥ ፃፍናሳን ደእያ ግብፀ ካዋ ጋ ገልያ በሳን ስን ባጋራ ደእያ ባሱዋን ሞጋ። 
\v 10 ኤንታኮ፥ ‘ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ፤ ታ ኪታዳ፥ ታ አይልያ ባብሎነ ካዋ ናቡካዳናፆራ ኤህሳና። ሀ ሞገትዳ ሹቻታ ቦላ እያ ካዎተ አራታ ዎና። እ ባ ካዎተ ዱንካንያ እያ ቦላ ኤሳና። 
\v 11 እ ይድ ግብፀ ቢታ ኦላና። ሀይቆስ በሰይሳት ሀይቃና፤ ድኤታናዉ በሰይሳት ድኤታና፤ ማሻን ሀይቃናዉ በሰይሳት ማሻን ሀይቃና። 
\v 12 ግብፀን ደእያ ኤቃ ፆሳታ ኬ ታማ ኦይና፤ ኤቃታ ፁጋና ዎይኮ ድአና። ሄንንቾይ ባ እትያ ማኤይሳዳ፥ ግብፀ ቢታ ማአና። ያትድ፥ ያፐ ሳሮ ባና። 
\v 13 እ፥ ግብፀ ቢታን ሄልዮታ ካታማን ደእያ ሀዉልትያ መንረና፤ ግብፀ ፆሳታ ኬ ታማን ፁጋና’ ” ያግስ።
\c 44
\s1 ኤቃ ጎይኖይ ካለዳ መቶ
\p
\v 1 ግብፀን ምግዶላ፥ ፃፍናሳ፥ መምፕሳነ ጳትሮሳ ቢታን ደእያ አይሁደታስ ጎዳ ቃላይ ኤርምያሳኮ ሀይሳዳ ያግድ ይስ። 
\v 2 “ኡባፈ ዎልቃማ ጎዳይ፥ እስራኤለ ፆሳይ፥ የሩሳላመ ቦላነ ይሁዳ ካታማ ኡባ ቦላ ታ ኤህዳ ዮ ኡባ ህንተ፥ ህንተ አይፈን በእደታ። ኤንቲ ሀች ጋካናዉ ላለትድ አትዶሶና፤ ኦንካ ያን ዴና። 
\v 3 ሄስ ሀንዳይ፥ ኤንቲ ኢታ ኦሶ ኦድ፥ ታና ሀንቀዳ ግሾሳ። ኤንቲ ዎይኮ ህንተ ዎይኮ ህንተ ማይዛት ኤሮና ሀራ ፆሳታስ እፃነ ጩይስድ ኤንታዉ ጎይንዶሶና። 
\v 4 ‘ታ እፅያ ሀይሳ መላ ኢታባ ኦፕተ’ ያግድ ኦዳና መላ ዛራ ዛራ ታ አይለታ፥ ናበታ ኪታስ። 
\v 5 ግዶሽን፥ ኤንቲ ስኦና ዎይኮ አኬኮና እፅዶሶና። ሀራ ፆሳታስ እፃነ ጩይስያ ኢታ ኦሱዋ አጎና እፅዶሶና። 
\v 6 ሄሳ ጋሶን ታ ሱልያ ሀንቆይነ ይሎይ ይሁዳ ካታማታ ቦላነ የሩሳላመ ኦገታን ኤፅስ። ኤንቲ ሀች ህንተ በኤይሳዳ ላለትዶሶና፤ ባይሳ ግድዶሶና።
\p
\v 7 “ሀእካ ጎዳይ፥ ኡባፈ ዎልቃማ ፆሳይ፥ እስራኤለ ፆሳይ፥ ሀይሳዳ ያጌስ፤ ህንተ ኮቻይ አቶና መላ፥ ማጫሳ፥ አደታ፥ ናይታነ ዮጋ ናይታ ይሁዳ ቢታፈ ይሳናዳ ኢታባ ህንተ፥ ህንተ ቦላ አይስ ኦቲ? 
\v 8 ህንተ ዳናዉ ይዳ ግብፀ ቢታን ሀራ ፆሳታስ እፃነ ጩይስድ ታና አይስ ሀንቀቲ? ሳአን ደእያ ካዎተታ ኡባ ግዶን ባደስነ ቦረስ አትድ፥ ህንተና ይሳናዉ አይስ ኮዬቲ? 
\v 9 ካሰ ህንተ አዋት፥ ይሁዳ ካዎትነ ኤንታ ማቸት፥ ህንተነ ህንተ ማቸት ይሁዳ ካታማታንነ የሩሳላመ ኦገታን ኦዳ ኢታ ኡባ ዶግደትዬ? 
\v 10 ህንተ ሀች ጋካናዉ ህንተናተ ካዉሽበከታ፤ ታና ቦንችቤከታ። ታ ህንተዉነ ህንተ ማይዛታስ እምዳ ህግያነ ዎጋ ካልበከታ።
\p
\v 11 “ሄሳ ግሾ፥ ኡባፈ ዎልቃማ ጎዳይ፥ እስራኤለ ፆሳይ፥ ሀይሳዳ ያጌስ፤ ታ ህንተና፥ ይሁዳ ዘርታ ኡባ ይሳናዉ ቆፋ ቃቻስ። 
\v 12 ይሁዳን አትዳ አሳ ግዶፈ፥ ግብፀ ብድ፥ ያን ዳናዉ ቆፋ ቃችዳይሳታ ታ ይሳና። ኤንቲ ኡባይ ግብፀን ዉራና፤ ኦላንነ ኮሻን ሀይቃና። ግታፐ ጉ ጋካናዉ ደእያ ኡባይ ኦላንነ ኮሻን ያና። ኤንቲ ዳጋማስ፥ ጫሻስ፥ ባደስነ ሚቻስ አታና። 
\v 13 ታ የሩሳላመ፥ ኦላን፥ ኮሻንነ ቦሻን ሴርዳይሳዳ ግብፀ ቢታን ደኤይሳታ ሴራና። 
\v 14 አትዳ ይሁዳ አሳፐ ግብፀ ብድ ደኤይሳት ግብፀታ ኩሽያፐ ፖሎ ከስ ኤኮኮና። ኤንቲ ስሚድ ዳና ግድ አሞትያ ይሁዳ ቢታ አይ አስካ ስመና። ጉ አሳፐ አትሽን፥ ኦንካ ስሚድ ዬና” ያግስ።
\p
\v 15 ኤንታ ማቸት ሀራ ፆሳታስ እፃነ ጩይሰ ኤርያ አደይ ኡባይ፥ ያን ደእያ ማጫሳ ኡባይነ ግታ ማባራ ግድድ፥ ግብፀንነ ጳትሮሳን ደእያ አሳ ኡባይ ኤርምያሳኮ ሀይሳዳ ያግዶሶና። 
\v 16 “ኔኒ ጎዳ ሱንን ኑስ ኦድያባ ኡባ ኑ ስኦኮ። 
\v 17 ኑ ኦና ግድ ቆፕዳባ ኡባ ኦና። ኑኒ፥ ኑ ማይዛት፥ ኑ ካዎትነ ኑ ሀላቃት ይሁዳ ካታማታንነ የሩሳላመ ኦገታን ካሰ ኦዳይሳዳ ሳሎ ካውዉ ጌተትያርስ ኑ ፆሴስ እፃነ ጩይሳና፤ ኡሻ ያርሹዋ እዉ ጉሳና። ኑ ካሰ ሄሳ ኦያ ዎደ፥ ኑስ ዳሮ ካ ደኤስ፤ ሄ ዎደ ኑስ ሳእ ኬሀ፤ ኑና አይብካ መትቤና። 
\v 18 ሽን ሳሎ ካዌስ እፃነ ጩይሰይሳነ ኡሻ ያርሾ ጉሰይሳ አግዳፐ ጉየ፥ ኑስ ኡባባይ ፓጭስ፤ ኑ ኦላንነ ኮሻን ዉርዳ” ያግዶሶና።
\p
\v 19 ማጫሳት ጉጅድ፥ “ኑ ሳሎ ካዌስ ማላን ኡይ ኡክያ ዎደ፥ እፃነ ጩይስያ ዎደነ ኡሻ ያርሾ እዉ ጉስያ ዎደ ኑ አዝናት ኤሮና ደእሽን፥ ኑ ኦዳባይ አይብካ ባዋ” ያግዶሶና።
\p
\v 20 ሀይሳዳ ያግድ ዛርዳ አሳ ኡባስ፥ ማጫሳስነ አደታስ፥ ኤርምያስ ሀይሳዳ ያግስ፤ 
\v 21 “ህንተነ ህንተ ማይዛት፥ ህንተ ካዎትነ ህንተ ሀላቃት፥ ቢታን ደእያ አሳ ኡባይ፥ ይሁዳ ካታማታንነ የሩሳላመ ኦገታን እፃነ ጩይስዳይሳ ጎዳይ ኤረና ዎይኮ ዶግስ ግድ ቆፔቲ? 
\v 22 ህንተ ኦያ ኢታነ ሻትያ ኦሱዋ ጎዳይ ስእ ጋናዉ ዳንዳእቦና ግሾ፥ ህንተ ቢታ ሀች ህንተ በኤይሳዳ ላለትዳ፥ ባይሳነ ባደትዳ ቢታ ኦስ። 
\v 23 ሀ ዮ ኡባይ ህንተና ጋክዳይ፥ ህንተ ሀራ ፆሳታስ እፃነ ጩይስዳ ግሾሳ፥ ጎዳ ቦላ ናጋራ ኦዳ ግሾሳ፥ ጎዳ ቃላ ስኦና እፅዳ ግሾሳነ እያ ህግያ፥ እያ ዎጋነ አዋጁዋስ ኪተቶና እፅዳ ግሾሳ” ያግስ።
\p
\v 24 ሄሳፈ ጉየ፥ ኤርምያስ አሳ ኡባስነ ማጫሳስ ሀይሳዳ ያግስ፤ “ህንተኖ፥ ይሁዳፐ ይድ፥ ግብፀ ቢታን ደእያ አሳዉ፥ ጎዳይ ግያባ ስእተ። 
\v 25 ኡባፈ ዎልቃማ ጎዳይ፥ እስራኤለ ፆሳይ፥ ሀይሳዳ ያጌስ፤ ህንተነ ህንተ ማቸት፥ ‘ኑኒ ሳሎ ካዌስ እፃነ ጩይሳና፤ ኡሻ ያርሹዋ እዉ ጉሳና’ ግድ ጫቅዳ ጫቁዋ ፖልድ፥ ኦሶን በስደታ። ህዛ፥ ጉየ ጎፕተ፤ ህንተ ጫቁዋ ፖልተ።
\p
\v 26 “ግዶሽን፥ ህንተኖ፥ ግብፀ ቢታን ደእያ ይሁዳ አሳዉ፥ ጎዳይ ግያባ ስእተ! ጎዳይ ሀይሳዳ ያጌስ፤ ‘ህዛፐ ጉየ ግብፀ ቢታን ደእያ ይሁዳ አሳፐ እሶይካ ታ ሱንን፥ “ኡባ ሃርያ ጎዳይ ኤሮ” ’ ግድ ጫቆና መላ ታ ግታ ሱንን ጫቃስ። 
\v 27 ታ ኤንታ ቦላ ሎኦባ ግዶናሽን፥ ኢታባ ኤሀናዉ ምናይስ። ግብፀን ደእያ ይሁዳ አሳይ ዉራና ጋካናዉ ኦላንነ ኮሻን ሀይቃና። 
\v 28 ኦላፐ አትዳ ጉ አሳት ግብፀፈ ይሁዳ ስማና። ሄ ዎደ ግብፀን ደእያ ይሁዳ አሳይ፥ ታ ቃላፐነ ኤንታ ቃላፐ አዉስ ቱሜኮ ኤራና። 
\v 29 ታ ህንተና ሀ በሳን ሴርያ ዎደ፥ ‘ታ ህንተ ቦላ ኢታባ ኤሀና’ ግዳይስ ቱማ ግደይሳስ ታ ህንተዉ ማላታ እማና። 
\v 30 ታ ይሁዳ ካዋ ሰደቅያሳ እያዉ ሞርከ ግድድ፥ እያ ዎናዉ ኮይያ ባብሎነ ካዋ ናቡካዳናፆራስ አዳ እምዳይሳዳ ግብፀ ካዋ ሆፍራ እያ ዎናዉ ኮይያ እያ ሞርከታስ አዳ እማና” ያጌስ ጎዳይ።
\c 45
\s1 ባሮካስ ኦደትዳ ትንብተ
\p
\v 1 እዮስያሳ ናአይ እዮአቄም ይሁዳን ካዎትዳ ኦይዳን ላይን፥ ኔራ ናአይ ባሮክ ሀ ቃላታ ኤርምያስ ኦድን፥ ስእድ፥ ማፃፋን ፃፍስ። ሄ ዎደ ኤርምያስ እያዉ ኦድዳ ቃላይ ሀይሳ፦ 
\v 2 “ባሮካ፥ ጎዳይ፥ እስራኤለ ፆሳይ ኔኮ ሀይሳዳ ያጌስ፦ 
\v 3 ኔኒ፥ ‘ጎዳይ ታ ሳኩዋ ቦላ አዛኖ ጉጅዳ ግሾ ታኖሾ! ታኒ ኡንአን ዳቡራዳ ሸምፖ ያስ’ ” ያጋዳሳ።
\p
\v 4 ባሮካ፥ ጎዳይ ኔኮ ሀይሳዳ ያጌስ፦ “ታ ኬፅዳይሳ ታ ላላና፤ ታ ቶክዳይሳ ታ ሾዳና። ታ ሀይሳ ቢታ ኡባን ኦና። 
\v 5 ያትን፥ ነ ነዉ ግታባ ኮያዬ? ሄሳ ኮዮፓ። አሳ ኡባ ቦላ ታ ዮ ኤሀና። ሽን ነ ብዳ በሳ ኡባን ታ ነ ሸምፑዋ አሻና” ያጌስ ጎዳይ።
\c 46
\s1 ግብፀስ ኦደትዳ ትንብተ
\p
\v 1 ካዎተታባ ጎዳይ ኤርምያሳስ ኦድዳ ቃላይ ሀይሳ። 
\v 2 እዮኣሳ ናአይ እዮአቄም ይሁዳን ካዎትዳ ኦይዳን ላይን፥ ኤፍራፂሳ ሻፋ ማታን፥ ካርካምሻ ጌተትያ በሳን፥ ባብሎነ ካዎይ ናቡካዳናፆር ፆንዳ ግብፀ ካዋ ናኮ ኦላንቾታባ ጎዳይ ሀይሳዳ ያጌስ።
\q1
\v 3 ህንተ ቶራነ ጎንዳለ ጊግስተ፤
\q2 ኦላስ ከይተ።
\q1
\v 4 ህንተ ፓራታ ብፃልድ ቶግተ፤
\q2 ህንተ ሁጵያን ብራታ ባርኔፃ ዎተ።
\q1 ህንተ በሳ በሳ ኦይክተ፤
\q2 ህንተ ቶራ ሌፍተ፤
\q2 ህንተ ኦላ ማኡዋ ማእተ።
\q1
\v 5 “ሽን ሀይስ ታ በኤይ አይቤ?
\q2 ኤንቲ ያይድ ጉየ ስምዶሶና።
\q1 ዎልቃማት ፆነትዶሶና፤
\q2 ጉየ ፄሎና ባቃትዶሶና፤
\q2 ኤንታ ዩሾ ኡባን ዳጋም ደኤስ”
\m ያጌስ ጎዳይ።
\q1
\v 6 ኤሶተይስ ከስ ኤከና፤
\q2 ምኖይካ አታናዉ ዳንዳኤና።
\q1 ፑደሀ ባጋን ኤፍራፂሳ ሻፋ ማታን፥
\q2 ኡባይ በትድ ኩንድዶሶና።
\q1
\v 7 ሀይስ ናይለ ሻፋ ክፃዳ ደንደይ፥
\q2 ድኦ ሃዳ ጎገይ ኦኔ?
\q1
\v 8 ግብፀይ ናይለ ሻፋዳ ደንዴስ፤
\q2 ድኦ ሃዳ ጉፔስ።
\q1 ግብፀይ፥ “ታኒ ክፃዳ፥ ቢታን ኤላና፤
\q2 ካታማታነ እያን ደእያ አሳ ኡባ ይሳና” ያጌስ።
\q1
\v 9 ፓራቶ፥ ጉፕድ ከይተ፤
\q2 ፓራ ጋረቶ ዎፅተ።
\q1 ጎንዳለ ኦይክዳ ቶጰነ ፑፃ አሳዉ፥
\q2 ዶንገን ዱክያ ሉዳ አሳዉ፥
\q2 ምኖ ኦላንቾቶ፥ ደንድድ ኦለትተ።
\q1
\v 10 ሄ ጋላሳይ ጎዳ ኡባፈ ዎልቃማ ጎዳ ጋላስ፥
\q2 ጎዳይ ባ ሞርከታ ቦላ ሀሎ ከይያ ጋላስ።
\q1 እያ ማሻይ ካላና ጋካናዉ ኤንታ ማና፤
\q2 አላና ጋካናዉ ኤንታ ሱ ኡያና።
\q1 ጎዳይ፥ ኡባፈ ዎልቃማ ፆሳይ፥
\q2 ፑደሀ ባጋን ኤፍራፂሳ ሻፋ ማታን፥
\q2 ኤንታ ያርሾ ኦድ ኤካና።
\q1
\v 11 ጌላኤ፥ ግብፀ ማጫ ናተ፥
\q2 ጋላዳ ቢታ ባዳ ትየትያ ለ ኤሀ።
\q1 ግዶሽን፥ ነ ጮ ለ ዳርሳሳፐ አትሽን፥
\q2 ነዉ ፓፆይ ባዋ።
\q1
\v 12 ካዎተት ነ ዬላ ስእዶሶና፤
\q2 ነ ዬሆይ ቢታ ኡባ ኩማና።
\q1 ነ ኦላንቾት እሶይ እሱዋን በትድ፥
\q2 ኡባይ እስፈ ኩንድዶሶና።
\p
\v 13 ባብሎነ ካዎይ ናቡካዳናፆር ግብፀ ኦላናዉ ያናይሳ፥ ጎዳይ ናብያ ኤርምያሳስ ኦድዳ ቃላይ ሀይሳ፦
\q1
\v 14 ሀይሳ ግብፀን ኦዳ፤
\q2 ምግዶላን፥ መምፕሳንነ ፃፍናሳን አዋጃ።
\q1 ህንተ በሳን በሳን ኤቅተ፤ ጊገትተ፤
\q2 ህንተ ዩሹዋን ደእያ ኡባ ማሽ ማና።
\q1
\v 15 ህንተ ምኖ ኦላንቾት አይስ ኩንድዴ?
\q2 ጎዳይ ኤንታ ሱግዳ ግሾ ግደኔ?
\q1
\v 16 ኦላንቾት በትድ ኩንድዶሶና፤
\q2 እሶይ እሱዋ፥ “ደንድድ የተ፤
\q2 ሞርከ ማሻፈ አታናዉ፥
\q2 ኑ አሳኮ፥ ኑ ቢታ ስሞስ” ያጎሶና።
\q1
\v 17 ኤንቲ ያን ግብፀ ካዋኮ፥
\q2 “ባ ቃዳ ጎኤቶና ጮ ዉርስያ ኦዳንቾ” ግድ ሱንና።
\q1
\v 18 “ኡባፈ ዎልቃማ ጎዳ” ጌተትያ
\q2 ካዎይ ሀይሳዳ ያጌስ፦
\q1 “ታኒ፥ ታ ሸምፑዋን ጫቃይስ፤
\q2 ደረታ ግዶን ታቦረ ደረይ፥
\q2 አባ ማታን ደእያ ቃርመሎሳ ደረይ፥
\q2 አዱቀይሳዳ አዱቅያ ሞርከይ ህንተ ቦላ ያና።
\q1
\v 19 ህንተኖ፥ ግብፀን ደኤይሳቶ፥
\q2 ድኤትድ ባናዉ ጊግተ።
\q1 መምፕሳ ካታማይ ላለትድ፥
\q2 ኦንካ ደኦና መላ ቢታ ግዳና።
\q1
\v 20 ግብፀይ ሎኦ ኡሳ መላ፤
\q2 ሽን ፑደሀ ባጋ ቢታፈ ያ
\q2 ቦፅያን እያ ሳፀታና።
\q1
\v 21 ሚሸይ ጭገትን ኦያ ኦላንቾት
\q2 ሞዳ ዎፋኖ መላ።
\q1 ኤንታ ዮ ጋላሳይ ማትዳ ግሾ፥
\q2 ኤንቲ ሴረትያ ዎደይ ጋክዳ ግሾ፥
\q2 ኤንቲ እስፈ ጉየ ስሚድ ባቃትዶሶና፤
\q2 ኤንቲ ባንታ በሳን ኤቅቦኮና።
\q1
\v 22 ሞርከይ ዎልቃን ሱግድ ያ ዎደ፥
\q2 ግብፀ አሳይ ባቃትያ ሾሻዳ ኮልፃና።
\q1 ሞርከት ም ቃንፅያ አሳዳ፥
\q2 ካልታ ኤክድ እያ ቦላ ያና።
\q1
\v 23 አሳይ ስፅዳ ዎራ ቄፅድ ይሰይሳዳ፥
\q2 ግብፀ አሳ ቃንፅድ ዉርሳና
\q1 ሞርከታ ታይቦይ ቦለፐ ዳሮ፤
\q2 ኤንታ ታይባናዉ ዳንዳኤተና።
\q1
\v 24 ግብፀ ማጫ ናእያ ካዉያና፤
\q2 ፑደሀ ባጋ አሳስ አዳ እመታና።”
\p
\v 25 ኡባፈ ዎልቃማ ጎዳይ፥ እስራኤለ ፆሳይ ሀይሳዳ ያጌስ። “ታኒ ተብሳ ፆሳ አሞነ፥ ካዋ ፓሮና፥ ግብፀ ቢታነ ግብፀ ፆሳታ፥ ግብፀ ካዎታነ ካዋ ፓሮና ቦላ ዘምፕያ ኡባ ሴራና። 
\v 26 ኤንታ ሸምፑዋ ኮይያ ባብሎነ ካዋ ናቡካዳናፆራ ኩሸንነ እያ ኦላንቾታ ኩሸን አዳ እማና። ሄሳፈ ጉየ፥ ግብፀ ቢታይ ካሰይሳዳ አስ ደእያ ቢታ ግዳና” ያጌስ ጎዳይ።
\p
\v 27 “ታ አይልያዉ፥ ያይቆባ ያዮፋ፤
\q2 እስራኤለ፥ ዳጋሞፋ።
\q1 ነና ሃሆ በሳፈ፥
\q2 ነ ኮቻይ ድኤትድ ብዳ ቢታፈ አሻና።
\q1 ያይቆብ ስሚድ፥ ሳሮን ዎፑ ግድ ዳና፤
\q2 ኤንታ ያሽስያባይ ዴና።
\q1
\v 28 ታ አይልያዉ፥ ያይቆባ፥
\q2 ታ ኔራ ደእያ ግሾ፥ ያዮፋ።
\q1 ታ ነና ላልዳ ካዎተታ ኡባ ይሳና፤
\q2 ሽን ነና ይስከ።
\q1 ታ ነና ፅሎ ፕርዳን ሴራና፤
\q2 ሽን ሴር ባይና ነና ጮ አግከ” ያጌስ ጎዳይ።
\c 47
\s1 ፍልስፄመስ ኦደትዳ ትንብተ
\p
\v 1 ግብፀ ካዎይ ጋዛ ኦልድ ኦይካናፐ ካሰ፥ ፍልስፄመባ ጎዳፐ ናብያ ኤርምያሳኮ ይዳ ቃላይ ሀይሳ፦ 
\v 2 ጎዳይ ሀይሳዳ ያጌስ፤
\q1 “ሄኮ፥ ፑደሀ ባጋፈ ሃ ቃና፤
\q2 ድኦይ ገልዳ ክፃ ሃዳ ጎጋና።
\q1 ቢታነ ቢታን ደእያባ ኡባ፥
\q2 ካታማታነ ኤንታ ግዶን ደእያ አሳ ኡባ ሙካና።
\q1 አሳይ ዋሳና፤
\q2 ቢታን ደእያ ኡባይ ዬካና።
\q1
\v 3 ፓራታ ግርሳ፥
\q2 ፓራ ጋረታ ኮሽንቻ፥
\q2 ጋረታ ጎንዶርሳ ግርሳ ስአና።
\q1 አዋታ ኩሸይ አርጋጭዳ ግሾ፥
\q2 ባንታ ናይታ ማዳናዉ ጉየ ስሞኮና።
\q1
\v 4 ፍልስፄመ አሳ ይሳናዉ፥
\q2 ፅሮሳነ ስዶና ማዳናዉ አትያ
\q2 አሳ ይሳናዉ ዎደይ ጋክስ።
\q1 ጎዳይ ፍልስፄመፐ አትዳይሳታ፥
\q2 ሃን ተቀትዳ ደእያ ካፍቶራፐ ይዳ ኮቻታ ይሳና።
\q1
\v 5 ጋዝ ካዮታዳ ባ ሁጵያ ሜዳሱ፤
\q2 አስቃሎን ባ ኩሽያ ዶና ቦላ ዎሱ።
\q1 ህንተኖ፥ አባ ጋፃን አትዳይሳቶ፥
\q2 አዉደ ጋካናዉ ህንተ አሳተ ጋረቲ?
\q1
\v 6 ህንተ፥ ‘ጎዳ ማሻዉ፥ ኔኒ ስእ ጎና እፀይ አዉደሴ?
\q2 ነ በሳ ስማዳ ገላ፤
\q2 ስእ ጋዳ ኡታ’ ያጌታ።
\q1
\v 7 ሽን ጎዳይ እያ ኪትን፥ እ ዋንድ ስእ ጋኔ?
\q2 አስቃሎናነ አባ ጋፃን ደእያ ቢታ
\q2 ኦላና መላ ኪታስ” ያግስ።
\c 48
\s1 ሞአበስ ኦደትዳ ትንብተ
\q1
\v 1 ሞአበ ኡባፈ ዎልቃማ ጎዳይ፥
\q2 እስራኤለ ፆሳይ ሀይሳዳ ያጌስ፤
\q1 “እ ያና ግሾ፥ ናቦ ካታማ አየ!
\q2 ቅራታይማ ካታማይ ዬላታናነ፤ ኦይከታና፤
\q2 ኤንታ ሚፃይ ካዉያና፤ መቀረታና።
\q1
\v 2 ህዛፐ ሞአበ ጬቆይ ያና፤
\q2 ሀሰቦና ካታማ አሳይ ሞአበ ቦላ፥
\q2 ‘ሃይተ፥ ሀ ቢታ ይሳና’
\m ያግድ ኢታባ ማቀትስ።
\q1 ነኖ፥ ማድማና ካታመ፥
\q2 ማሽ ነና የደና ግሾ ስእ ጋ።
\q1
\v 3 ሆሮናይማ አሳይ፥ ‘ዮይነ ኩንደ፥
\q2 ጋክስ’ ግድ ዋስያ ዋሱዋ ስእተ!
\q1
\v 4 ሞአበይ መቀረታና፤
\q2 እያ ናይት ዬክያ ዬሁዋ ስእተ!
\q1
\v 5 ኤንቲ ዬክሸ፥ ሉህታ ፑደ ከያና፤
\q2 ሆሮናይማፐ ዱገ ዎሸ፥
\q2 ዮ ዋሱዋ ስአና።
\q1
\v 6 እሶይ እሶይ፥ ‘ባቃትተ፤ ህንተ ሸምፕዉ አሽተ፤
\q2 መላ ቢታን ደእያ አሮኤራዳ ዱማትተ፥
\q2 ህንተ ሸምፑዋ አሽተ’ ያጋና።
\q1
\v 7 ኔኒ ነ ዎልቃንነ ነ ዱረተን ጬቀትዳ ግሾ፥
\q2 ነካ ድኤታና።
\q1 ካሞሽካ ባ ካህነታራነ ሀላቃታራ፥
\q2 ድኤትድ ባና።
\q1
\v 8 ጎዳይ ኦድዳይሳዳ፥
\q2 ካታማ ኡባ ይሰይስ ያና።
\q1 እስ ካታምካ አተና፤
\q2 ዛንጋራይነ ደምባ ኡባይ ያና።
\q1
\v 9 ሞአበይ ፓልድ አታና መላ
\q2 ቀፈ እምተ።
\q1 እ ካታማይ ያና
\q2 ላትያ አስካ ደመና።
\q1
\v 10 ጎዳ ኦሱዋ ቀል ግድ ኦያ
\q2 ኡራይ ባደትዳይሳ ግዶ።
\q1 ሱ ጉሶና መላ ባ ማሻ ተቅያ
\q2 ኡራይ ባደትዳይሳ ግዶ!
\p
\v 11 “ሞአበይ ያላጋተፈ ዶምድ፥ እንጀን ደእዳ አሳ መላ፤ እ ሀራ ቢታ ድኤትቤና። ሞአበይ ኦቶፐ ኦቶን ትገቶናነ ቃፆና፥ ማልኦይ ላመቶናነ ሳዎይ አጎና፥ ኡትድ ደእዳ ዎይነ ኡሻ መላ። 
\v 12 ታኒ ኦቱዋ ጉፓንይሳታ ኪትያ ዎደይ ያና። ኤንቲ እያ ጉሳና፤ ኦቱዋፐ ፂዞ ይሳና፤ ኦቱዋ መንረና። 
\v 13 እስራኤለ አሳይ ባ አማነትዳ፥ ቤተለን ደእያ ኤቃን ካዉይዳይሳዳ ሞአበይ ባ ፆሳ ካሞሻን ካዉያና።
\p
\v 14 “ህንተ፥ ‘ኑ ዎልቃማ አስነ ምኖ ኦላንቾ’ ግድ አይስ ጬቀተቲ? 
\v 15 ሄኮ፥ ሞአበይነ ያን ደእያ ካታማት ይዶሶና። እያ ያላጋ አደ ናይት ሹከታናዉ ዱገ ብዶሶና” ያጌስ፥ ካዎይ፥ ኡባፈ ዎልቃማ ጎዳይ። 
\v 16 ሞአበ ዮይ ማታትስ፤ እያ ላለተ ዎደይ ኤለስድ ጋክስ።
\p
\v 17 እያ ዩሹዋን ደእያ አሳይ፥ እያ ግታተ ኤርያ ኡባይ፥ “ምኖ ግድዳ ካዎተ ፃምአይ ዋንድ መቅዴ?” ቦንቸትዳ ፃምአይ ዋንድ ትንቸትዴ? ያግድ ዘሌልተ።
\p
\v 18 “ህንተኖ፥ ድቦና ካታማን ደኤይሳቶ፥ ህንተ ቦንቾ በሳፈ ዎድ፥ መላ ቢታን ኡትተ። ሞአበ ይሰይስ ህንተ ቦላ ያና፤ ህንተ ሚፃ ኡባ ላላና። 
\v 19 አሮኤራ ካታማን ደኤይሳቶ፥ ኦገ ዶናን ኤቅድ ፄልተ፤ ከስ ኤክድ ባቃትያ አደታነ ማጫሳ፥ ‘አይበ ከይዳይ?’ ያግድ ኦይችተ። 
\v 20 ኤንቲ፥ ‘ሞአበይ ኩንድዳ ግሾ ካዉይስ፤ እያዉ ዬክተነ ዘሌልተ። ሞአበ ይዳይሳ ግሾ አርኖና ሻፋ ማታን አዋጅተ’ ” ያግድ ዛራና።
\p
\v 21 “ገዘን ደእያ ሆሎና፥ ያሳ፥ መፋታ፥ 
\v 22 ድቦና፥ ናቦ፥ ቤት-ድብላታይማ፥ 
\v 23 ቅራታይማ፥ ቤት-ጋሙላ፥ ቤት-ማኦና፥ 
\v 24 ቅርዮታነ፥ ባሶራ ካታማታ ቦላነ ማታንነ ሃሆን ደእያ ሞአበ ካታማታ ቦላ ፕርድ ይስ። 
\v 25 ሞአበ ካጨይ ቃንፀትስ፤ እያ ቀሰይ መቅስ።”
\p
\v 26 ጎዳ ቦላ ኦቶርትዳ ግሾ፥ ሞአበ ኡሽድ ማይተ። ባ ጮሻ ቦላ ጎንዶረቶ፤ አሳ ኡባይ እያ ቦላ ቀልቅሶ። 
\v 27 ካሰ ነ እስራኤለ ቦላ ቀልቅሳብኪ? እያባ ሃሳያ ዎደ ካዳ ሁጰ ቃዳይ እስራኤለይ ካይሶታራ ኦይከትዳ ግሾዬ? 
\v 28 ህንተኖ፥ ሞአበን ደኤይሳቶ፥ ካታማፐ ከይድ፥ ሹቻ ሆምኦን ደእተ። አፎ ዶናን ባዉ ኬ ኬፅያ ሆለ መላ ግድተ። 
\v 29 ሞአበይ ዳሮ ኦቶርትስ፤ ሞአበይ አይ መላ ባ ጋና ጋቢስዳኮ፥ ጬቀትያኮ፥ ኦቶርትያኮ፥ አይ መላ ባና ቁ ኦያኮ፥ ታ ስአስ። 
\v 30 ታ ኤንታ ጬቁዋ ኤራይስ፤ ሽን አይኮካ ማደና፤ ኤንታ ኦቶሮይ አይኮካ ኦና። 
\v 31 ሄሳ ግሾ፥ ታ ሞአበስ ዋሳስ፤ ቅር-ሄሬሳ አሳስ ካዮታዳ ዬካይስ።
\p
\v 32 ህንተኖ፥ ሰባማ አሳዉ፥ ያእዜራ አሳስ ዬከይሳፈ አዳ ህንተዉ ዬካይስ። ህንተ ታሸይ ዳይድ፥ ማፅነ አባ ፕንድ፥ ያእዜራ ጋክዳ ዎይነ መላ፤ ሽን ህንተ ዎይነ አይፍያነ ዉርጩዋ ቦንቀይሳት ይድ ይስዶሶና። 
\v 33 ኡፋይስነ ሎኦባይ አይፍያ ሞአበ ቢታፈ ኤከትስ። ዎይነ ጉምእያ በሳፈ ዎይነይ ጎጎናዳ ተቃስ። ኦንካ እልልሸ ዎይነ ጉምኤና። ስኤትያ ግርስ ደእኮካ ኡፋይሳ ግርስ ግደና።
\p
\v 34 ኤንቲ ሀሰቦናንነ ኤልያላን ዋስያ ዋሶይ ያሃፃ ጋካናዉ ስኤቴስ። ዞኣራፐ ብድ ሆሮናይማነ ኤግላት-ሻልሻ ጋካናዉ ስኤቴስ። ሀር አቶሽን፥ ንምርማ ሃይ መልስ።
\p
\v 35 ታኒ ሞአበፐ ቃ በሳታን ጎይነሳታነ ባንታ ፆሳታስ እፃነ ጩይሰይሳታ ይሳና።
\p
\v 36 “ኤንቲ ካሰ ደምዳ ዱረተይ ሀእ ይዳ ግሾ፥ ታ ዎዛናይ ሞአበስነ ቅር-ሄሬሳ አሳስ ሱሱልኤዳ ዬካስ። 
\v 37 ኤንቲ ባንታ ሁጵያነ ባንታ ቡቻ ሜድዶሶና፤ ባንታ ኩሽያ ቃንፅድ ማዱንፅስዶሶና፤ ባንታ ፄሳን ካዮ ማኦ ዳንጭዶሶና። 
\v 38 ታኒ ሞአበ ኦንካ ኮዮና ኦቶዳ መንዳ ግሾ፥ ሞአበታ ኬ ቦላንነ ዳባባን ዬሆፐ አትሽን፥ ሀራባይ ባዋ” ያጌስ ጎዳይ።
\p
\v 39 ሞአበይ አይብ መቆ መቅደ! እያ አሳይ አይብ ዋሶ ዋስ! ሞአበ ዋን ዬላትድ፥ ባ ዞኩዋ ዛርዴ? ሄሳ ግሾ፥ ሞአበይ ባ ዩሹዋን ደእያ ኡባስ ሚቻስነ ዳጋማስ አትስ።
\p
\v 40 አርጋን ባ ቀፍያ ምጭድ የይሳዳ ሞርከይ ሞአበ ቦላ ያና። 
\v 41 እያ ካታማት ኦይከታና፤ እያ ሚፃት ኤከታና። ሄ ጋላስ ሞአበ ምኖ ኦላንቾታ ዎዛናይ እቀ ኦይክዳ ማጫሳ ዎዛና መላ ኡንኤታና። 
\v 42 ሞአበ ታ ቦላ ማካልዳ ግሾ ያና፤ ህዛፐ ጉየ ካዎተ ግድድ ዴና። 
\v 43 ሞአበ አሳዉ፥ ያሽ፥ ኦልነ ፅሄይ ህንተና ናጌስ። 
\v 44 ዳጋንያባፐ ባቃትያ ኦንካ ኦላን ኩንዳና፤ ኦላፈ ከይያ ኦንካ ፅሄን ኦይከታና። ታኒ ሞአበ ሴርያ ዎደ ሄሳ ኦና።
\p
\v 45 “ባቃትድ ብዳይሳት ዎልቃ ይድ፥ ሀሰቦና ካታማ ኩያን ኤቅዶሶና። ሀሰቦና ካታማፐ ታም፥ ካዎይ ስሆነይ ደእዳ ኬፈ ላጮይ ከይድ፥ ሞአበ ቢታነ ያን ደእያ ማካላንቾ አሳ ምስ። 
\v 46 ሞአበ አሳዉ፥ ህንተና አየ! ካሞሻ ጌተትያ ኤቃ ፆሳ ጎይነይሳት ይዶሶና፤ ኤንታ አደ ናይትነ ማጫ ናይት ድኤትድ ብዶሶና። 
\v 47 ግዶሽን፥ ዉርሰን ታኒ ሞአበ ዛራዳ ኦራና” ያጌስ ጎዳይ።
\p ሞአበ ቦላ ኦደትዳ ፕርዳይ ሀይሳን ዉርስ።
\c 49
\s1 አሞነስ ኦደትዳ ትንብተ
\p
\v 1 አሞነባ ጎዳይ ሀይሳዳ ያጌስ፤ “እስራኤለስ አደ ናእ ባዌ? እያ ላተይ ባዌ? ያትን፥ ሞሎካ ጌተትያ ኤቃ ፆሳ ጎይንያ አሳት ጋደ ቢታ አይስ ኦይክዶና? ኤንታ ካታማን አይስ ኡትዶና? 
\v 2 አሞነ ቢታን ራባ ካታማ ቦላ ኦላ ዋሶይ ስኤታና መላ ታ ኦና ዎደይ ያና። ሄ ካታማይ ላለትድ ባይሳ ግዳና። እያ ዩሹዋን ደእያ ጉታት ታማን ፁገታና። እስራኤለይ ባና ባ ቢታፈ ጎድዳይሳታ ጎዳና” ያጌስ ጎዳይ።
\p
\v 3 “ሀሰቦና አሳዉ፥ ጋየ ካታማይ ላለትዳ ግሾ ዘሌልተ። ራባ አሳዉ፥ ዬክተ፤ ካዮ ማኦ ማእድ ካዮትተ፤ ካታማ ግምብያ ግዶን ዎፀረትተ። ህንተ ፆሳይ ሞሎክ ባ ካህነታራነ ባ ሀላቃታራ ድኤትስ። 
\v 4 አማኖይ ባይና አሳዉ፥ ‘ኑና ኦላናይ ኦኔ?’ ያግድ ህንተ ዱረተንነ ህንተ አራዳ ዛንጋራታን አይስ ጬቀተቲ? 
\v 5 ታ ነ ዩሹዋን ደኤይሳት ነና ዳጋንና መላ ኦና” ያጌስ ጎዳይ፥ ኡባፈ ዎልቃማ ፆሳይ። ህንተ ኡባይ ከይድ ባቃታና ግሾ ባቃትድ ብዳይሳታ ሺሽያ አስ ያና።
\p
\v 6 “ግዶሽን፥ ዉርሰን ታ አሞነ አሳ ዛራዳ ኦራና” ያጌስ ጎዳይ።
\s1 ኤዶመስ ኦደትዳ ትንብተ
\p
\v 7 ኤዶመባ ኡባፈ ዎልቃማ ጎዳይ ሀይሳዳ ያጌስ፤ “ተማና አሳስ ደእያ ጭንጫተይ አዉ ብዴ? ዞረይሳታፐ ዞረይ ይዴ? ኤንታ ጭንጫተይ ኤንታፈ ኤከትዴ? 
\v 8 ታኒ ኤሳዌ ኮቻ ሴርያ ዎደ እያ ቦላ ዮ ኤሀና ግሾ፥ ዳዳነን ደኤይሳቶ፥ ባቃትድ አፎን ቆሰትተ። 
\v 9 ዎይነ ማፀይሳት ፖሽለ አሾኮና? ካይሶት ቃማ ገልኮ፥ ባንታዉ ኮያባ ፃላላ ኤኮኮና? 
\v 10 ሽን ታ ኤሳዋ ኮቻ ቃራዳ ካሎ አሻና፤ ኤንቲ ቆሰታናዉ ዳንዳኦና መላ፥ ኤንቲ ቆሰትያ በሳ ቃራዳ ቆንጨ በሲ ኦና። ኤሳዌ ሼሻይ፥ እያ ዳቦትነ እያ ሾሮት ኡባይ ያና፤ ኤንታፈ እሶይካ አተና። 
\v 11 ህንተ ግዶን ደእያ ይኦ ናይታ አጋግተ፤ ኤንታ ታ ድቻና። ህንተ አምኤትካ ታናን አማነቶ” ያጌስ።
\p
\v 12 ጎዳይ ሀይሳዳ ያጌስ፤ “ህዛ ሴራ ኤካናዉ በሶና አሳስ ሴረተ አቶናባ ግድኮ፥ ህንተ ዋንድ ሴረቶና አታኔ? ቱማ ህንተካ ሴራ ፁአፐ ኡዬታፐ አትሽን፥ ጮ አተከታ። 
\v 13 ባሶራ ካታማይ ባይሳ ግድድ አታና፤ እያ በእዳ አሳ ኡባስ ዳጋማስ፥ ቀልቅሰስነ ባደስ አታና። እያ ዩሹዋን ደእያ ጉታ ኡባይ መርናዉ ላለትድ አታና። ሀይሳ ታኒ ታ ሱንን ጫቃይስ” ያጌስ ጎዳይ።
\p
\v 14 ታኒ ጎዳፐ ይዳ እስ ኪታ ስአስ። ካዎተታ ግዶ ኪተትዳይስ፥ “ኤዶመ ተቃናዉ ሺቅተ፤ እያራ ኦለታናዉ ደንድተ” ያግስ።
\p
\v 15 “ህዛ፥ ታ ነና ካዎተታ ግዶን ጉና፤ አሳ ግዶን ካትዳ አስ ኦና። 
\v 16 ሹቻ ቆጶንነ ደረ ቦላ ደኤይሶ፥ ነ ዳጋንይነ ነ ኦቶሮይ ነና ጭምስ። ነ ኬ አርጋንዳ ቃን ኬፅኮካ፥ ታ ነና ያፐ ዱገ ዎሳና” ያጌስ ጎዳይ።
\p
\v 17 “ኤዶመይ አሰ ዳጋንያ ቢታ ግዳና። ያራ አያ አሳ ኡባይ እያ ዩዋ በእድ፥ ዳጋማና፤ ማላለታና። 
\v 18 ሶዶመይነ ጋሞር ባንታ ዩሹዋን ደእያ ካታማታራ ይያ ዎደ ሀንዳይሳዳ ኦንካ ያን ዴና፤ አስ ያን ኡተና” ያጌስ ጎዳይ።
\p
\v 19 “ዮርዳኖሰ ሻፋ ላንቀን ደእያ ዎራፐ ዶርሳት ሄመትያ ሎኦ ቆሮይ ደእያ በሳ፥ ቆፖና ከይያ ጋሞዳ፥ ታ ኤዶመ አሳታ ቆፖና ኤንታ ቢታፈ የደና። ታ ዶርዳ አስ እያ ቦላ ሹማና። ታ መል ኦኔ? ታ ኦና ግዳባ ተቃናዉ ዳንዳኤይ ኦኔ? ታራ ኤቀታናዉ ዳንዳእያ ሄንንቾይ ኦኔ?
\p
\v 20 “ታ ኤዶመ ቦላነ ተማና ካታማ ቦላ ኦናዉ ሀልችዳባነ ቆፕዳባ ስእተ። ኤንታ ናይታ ዎልቃን ጎችድ ኤፋና፤ ሄሳ ጋሶን ኤንታ ሶ አሳይ ዳጋማና። 
\v 21 ኤዶመ ኩንደ ግርሳይ ቢታ ቃና፤ ኤዶመታ ዋሶይ ዞኦ አባ ጋካናዉ ስኤታና። 
\v 22 አርጋን ባ ቀፍያ ምጭድ ዱገ ፓልድ የይሳዳ፥ ሞርከይ ባሶራ ቦላ ያና። ሄ ዎደ ኤዶመ ኦላንቾት እቀ ኦይክዳ ማጫሳዳ ህርጋና” ያጌስ።
\s1 ዳማስቆስ ኦደትዳ ትንብተ
\p
\v 23 ዳማስቆባ ጎዳይ ሀይሳዳ ያጌስ፤ “ኢታ ኦዳ ስእዳ ግሾ፥ ሀማታነ አርፋዳ ካታማታን ደእያ አሳይ ዬላትስ፤ ያይስ። ዙለይ ሾጭዳ አባዳ ኤንታ ዎዛናይ ሸምፖ ደማናዉ ዳንዳእቤና። 
\v 24 ዳማስቆይ ዳቡርስ፤ ኤንቲ ዳጋማን ኮኮርድ ባቃትዶሶና፤ ማጫስ እቀ ኦይከይሳዳ መቶይነ ኡንእ ኤንታ ኦይክስ። 
\v 25 ኡፋይስ ኩምዳ ኤረትዳ ካታማይ ዋንድ ባይሳ ግድዴ? 
\v 26 ሄ ዎደ ሄ ካታማን ደእያ ያላጋ አደት ካታማ ግዶ ኦገታን ሀይቃና፤ ኦላንቾት ኡባይ ዉራና። 
\v 27 ታኒ ዳማስቆ ካታማ ድርሳ ግምብያን ታማ የዳና፤ ሄ ታማይ ዎልደ-አዳራ ሚፃ ማና” ያጌስ ኡባፈ ዎልቃማ ጎዳይ።
\s1 ቀዳረስነ ሀፆራስ ኦደትዳ ትንብተ
\p
\v 28 ባብሎነ ካዎይ ናቡካዳናፆር ኦልድ ፆንዳ ቀዳረነ ሀፆራ ካዎተታባ ጎዳይ ሀይሳዳ ያጌስ፤ “ደንድድ፥ ቀዳረ አሳ ኦልተ፤ ዶሎሀ ባጋራ ደእያ አሳ ዉርስተ። 
\v 29 ኤንታ ዱንካነታነ ኤንታ ዉደታ ኤክተ። ኤንታ ገሸታ፥ ኤንታ ሻሉዋነ ኤንታ ግማለታ ኤክተ። ያትድ ኤንታዉ፥ ‘ህንተ ዩሹዋን ዳጋም ደኤስ’ ያግድ ኦድተ። 
\v 30 ሀፆራን ደኤይሳቶ፥ ባብሎነ ካዎይ ናቡካዳናፆር ህንተ ቦላ ኢታባ ኦናዉ ማቀትድ ኡትዳ ግሾ፥ ባቃትተ፤ አፎን ቆሰትተ” ያጌስ ጎዳይ።
\p
\v 31 “ደንዳዳ፤ ህርግ ባይና ሳሮ ደእያ ካዎተታ ኦላ። ኤንታ ካታማ ግምብያስ እብ ዎይኮ ኮበይ ባዋ፤ ኤንቲ ባንታርካ ደኦሶና።
\p
\v 32 “ኤንታ ግማለት ቦንቀታና፤ ኤንታ ዉደይ ድኤታና። ባንታ ሁጵያ ጋፃ ሜደይሳታ ጫርኮን ላላና፤ ታ ኡባ በሳራ ኤንታ ቦላ ዮ ኤሀና። 
\v 33 ሀፆር መርናዉ ዎርካናት ደእያ መላ ቢታ ግዳና። ኦንካ ያን ዴና፤ አስ ያን ኡተና” ያጌስ ጎዳይ።
\s1 ኤላማስ ኦደትዳ ትንብተ
\p
\v 34 ይሁዳ ካዎይ ሰደቅያስ ኮይሮ ካዎትዳ ዎደ፥ ኤላማባ ጎዳፐ ኤርምያሳኮ ይዳ ቃላይ ሀይሳ፤ 
\v 35 ኡባፈ ዎልቃማ ጎዳይ ሀይሳዳ ያጌስ፤ “ኤላማስ ዎልቃ ግድዳ ዶንገ ዱክያ አሳታ ታ ዎና። 
\v 36 ኡባ በሳራ ታ ኤላማ ቦላ ጫርኮ ኤሀና፤ ኤንታ ሄ ጫርኩዋን ላላና። ሄሳ ግሾ፥ ኤላማ አሳይ ላለትድ ጋኮና ቢት ዴና። 
\v 37 ኤንታ ሞርከታ ስንንነ ኤንታ ዎናዉ ኮየይሳታ ስንን ታ ኤላማ ዳጋንና። ታ ግታ ሀንቁዋን ኤንታ ቦላ ዮ ኤሀና። ታ ኤንታ ይሳና ጋካናዉ ማሻን የደና። 
\v 38 ታኒ ኤላማ ካዋነ ኤንታ ሀላቃታ ይሳዳ ታ አራታ ያን ዎና። 
\v 39 ግዶሽን፥ ዉርሰ ዎደ ታኒ ኤላማ ዛራዳ ኦራና” ያጌስ ጎዳይ።
\c 50
\s1 ባብሎነስ ኦደትዳ ትንብተ
\p
\v 1 ባብሎነነ ባብሎነ አሳባ ናብያ ኤርምያሳ ባጋራ ጎዳይ ኦድዳ ቃላይ ሀይሳ፦ 
\v 2 “ካዎተታ ግዶን ኦድተነ አዋጅተ። ባንድራ ቁ ኦ ኦይክድ፥ አይኮካ ቆሶና፥ ሀይሳዳ ያግድ ኦድተ። ‘ባብሎነይ ኩንድስ! ቤል ጌተትያ ኤቃይ ዬላትስ፤ ማርዱካ ጌተትያ ኤቃይ ካዉይስ። እያ ምስለት ዬላትዶሶና፤ እያ ኤቃት ካዉይዶሶና። 
\v 3 ፑደሀ ባጋፈ እስ ካዎተ ይድ፥ ባብሎነ ቢታ ይሳና። አሳይነ መሄይ ባቃታና፤ ኦንካ ያን ዴና’ ” ያግስ።
\p
\v 4 “ሄ ዎደነ ሄ ጋላስ እስራኤለይነ ይሁድ እስፈ ዬክሸ ይድ ጎዳ ባንታ ፆሳ ኮያና። 
\v 5 ኤንቲ ፅዮነ ኤፍያ ኦግያ ኦይቻና፤ ባንታ ሶምኡዋ ያ ዛራና። ኤንቲ፥ ፖሎ ዶገቶና መርና ጫቁዋን ጎዳራ” ኦይከታና።
\p
\v 6 “ታ አሳይ ይዳ ዶርሳ መላ፤ ኤንታ ሄንንቾት ኤንታ ባለድ፥ ዙማ ቦላ ጉየ የድዶሶና። እስ ዙማፐ ሀራ ዙማ ቦላ ቶይላትድ ባንታ ግርብያ ዶግዶሶና። 
\v 7 ደምዳ ኡባይ ኤንታ ሻንካትስ። ኤንታ ሞርከት፥ ‘ኑ አይኮካ ባልቦኮ፤ ሀ መቶይ ኤንታ ጋክዳይ፥ ኤንቲ ጎዳ፥ ባንታ ሸምፖ በሳ፥ ባንታ ማይዛታ ኡፋይሳ ቦላ ናጋራ ኦዳ ግሾሳ።’
\p
\v 8 “እስራኤለ አሳዉ፥ ባብሎነፐ ባቃትተ፤ ባብሎነ ቢታፈ ከይተ፤ ዉደ ካለያ ኮለ ዴሻ መላ ግድተ። 
\v 9 ታኒ ፑደሀ ባጋፈ ግታ ካዎተታ ጩጋ ደንዳ፥ ባብሎነ ቦላ ኤሀና ሀናይስ። ኤንቲ እያ ኦልድ ኦይካና፤ ኤንታ ዶንገይ ዱክድ፥ ባሎና ኦላንቾ መላ። 
\v 10 ባብሎነይ ቦንቀታና፤ እያ ቦንቅያ ኡባይ ካላና” ያጌስ ጎዳይ።
\p
\v 11 ባብሎነ አሳዉ፥ ታ አሳ ቦንቀይሳቶ፥ ህንተ ኡፋይትድ ሀሹ ግደታ። ቆሮን ካልዳ ኡሳዳ ፔኑቅደታ፤ ኮርማ ፓራዳ ጫግደታ። 
\v 12 ሽን ሀእ ህንተ ግታ ካታማይ ዬላታናነ ካዉያና። ካዎተታ ግዶን ባብሎነይ ኡባፈ ላፋ ግዳና፤ ሃ ባይና መላ ቢታ ግዳና። 
\v 13 ጎዳ ሀንቁዋ ጋሶን፥ ባብሎነይ ያና፤ ላለታና። እያ ማታራ አያ ኡባይ እያ ቦላ ጋክዳ ቦሻ በእድ፥ ዳጋማናነ ማላለታና።
\p
\v 14 “ዶንገ ዱከይሳቶ፥ ባብሎነ ኦላናዉ እያ ዩሹዋን ሳልፕተ፤ እ ጎዳ ቦላ ናጋራ ኦዳ ግሾ ህንተ ዶንግያን እያ ዱክተ። 
\v 15 ኡባ ባጋራ ባብሎነ ቦላ ኦላ ዋሶ ዋስተ፤ ባብሎነይ ኩሸ እሚስ፤ እያ ግምበት ኩንድዶሶና፤ እያ ግምበ ድርሳይ ላለትስ። ጎዳይ እያ ቦላ ሀሎ ከይሸ ደእያ ግሾ፥ ህንተ እያ ቦላ ሀሎ ከይተ። እ ሀራታ ቦላ ኦዳባ ህንተካ እያ ቦላ ኦተ። 
\v 16 ዘረ ዘረይሳነ ጫካ ዎደ ባጫራ ከየይሳ ባብሎነፐ ይስተ። ይሰይሳታ ማሻ ያይዳ ግሾ፥ ሄ ቢታን ደእያ አሳ ኡባይ ባ ያራኮ ያራኮ ስሚድ ባ ቢታ ቢታ ባቃታና።
\p
\v 17 “እስራኤለይ ጋሞይ የደድ ላልዳ ዶርሳ መላ። ኮይሮ አሶረ ካዎይ እያ አሹዋ ምስ፤ ዉርሰን ባብሎነ ካዎይ ናቡካዳናፆር እያ መቀ ግስ።”
\p
\v 18 ሄሳ ግሾ፥ ኡባፈ ዎልቃማ ጎዳይ፥ እስራኤለ ፆሳይ፥ “አሶረ ካዋ ታ ሴርዳይሳዳ ባብሎነ ካዋነ እያ ቢታ ሴራና። 
\v 19 ሽን እስራኤለ፥ እያ ሄን በሳ ዛራና፤ ቃርመሎሳነ ባሳነ ደረታን እ ሄመታና። እ ኤፍሬማነ ጋላዳ ገዘ ቢታን ካልድ ማና። 
\v 20 ሄ ዎደ፥ ሀይቆፐ ታ አሽዳ እስራኤለ አሳ ናጋራ ታ አቶ ጋና ግሾ፥ አሳይ እስራኤለን ናጋራ ኮያና፥ ሽን ደሞኮና። ይሁዳን ናጋራ ኮያና፥ ሽን በንተና” ያጌስ ጎዳይ።
\p
\v 21 “ምራታይማ ቢታንነ ፕቆዳን ደእያ አሳ ቦላ ደንድድ ኤንታ ኦልተ፤ ዎተ፤ ኤንታ ፖሎ ይስተ። ታ ህንተና ኪትያ ኡባ ኦተ” ያጌስ ጎዳይ። 
\v 22 ቢታ ቦላ ኦላ ዋሶይ ስኤቴስ፤ ግታ ዮይ ጋክስ። 
\v 23 ቢታ ኡባ ሊቅስያ ናርቃይ ዋንድ መቅደ! ዋንድ ሊቅደ! ካዎተታ ኡባ ግዶን ባብሎነይ ዋንድ ዳጋንያባ ግድደ! 
\v 24 ነኖ፥ ባብሎነ፥ ታ ነና ኦይካናዉ ፅሄ ዎስ፤ ኔኒ ኤሮናሽን ገላዳ ኦይከታዳሳ። ኔኒ ጎዳራ ኤቀትዳ ግሾ ኦይከታዳሳ። 
\v 25 ታኒ ታ ኦላ ሚሽያ ዎያ ኬ ዶያዳ፥ ታ ይሉዋን ኦላ ሚሽያ ያፐ ከሳስ። ሄሳ ኦዳይ፥ ጎዳይ፥ ኡባፈ ዎልቃማ ጎዳይ ባብሎነ ቢታን ኦያ ኦሶይ ደእያ ግሾሳ። 
\v 26 ያራ ሃራ እያ ቦላ ደንድተ፤ ካይ ደእያ እያ ሻልያ ዶይተ፤ ድኡዋ ካዳ ዶርተ፤ አይብባካ አሾና ዉርስድ ይስተ። 
\v 27 ቦሩ ሹከይሳዳ ኤንታ ኦላንቾታ ዎተ። ባብሎነ አሳይ ሴረትያ ዎደይ ጋክዳ ግሾ ኤንታ አየ!
\p
\v 28 “ድኤትዳ አሳይ ባብሎነፐ ከስ ኤክድ፥ የሩሳላመ ባቃታና። ባብሎነ አሳይ ፆሳ ኬ ቦላ ኦዳባስ ጎዳይ፥ ኤንታ ፆሳይ ሀሎ ከያናይሳ ኤንቲ ፅዮነን ኦዳና። 
\v 29 ባብሎነ ኦላናዉ ዶንገ ዱክያ ኡባ ፄግተ፤ እሶይካ ከስ ኤኮናዳ እያ ዩሹዋ ተቆ። ጎዳ ቦላ፥ እስራኤለ ጌሻ ቦላ፥ እ ኦቶርትዳ ግሾ፥ እያ ኦሱዋዳ እያዉ ዛርተ። እ ሀራታ ቦላ ኦዳይሳዳ እያ ቦላ ኦተ። 
\v 30 ሄሳ ግሾ፥ እያ ያላጋ አደት ካታማ ግዶ ኦግያን ሀይቃና፤ ሄ ጋላስ እያ ኦላንቾት ኡባይ ያና” ያጌስ ጎዳይ።
\p
\v 31 ጎዳይ፥ ኡባፈ ዎልቃማ ጎዳይ፥ “ኔኒ ሴረትያ ዎደይ ጋክዳ ግሾ፥ ነኖ፥ ኦቶራንቹዋዉ፥ ታ ነ ቦላ ደንዳስ። 
\v 32 ኦቶራንቾይ በትድ ኩንዳና፤ እያ ደንያ አስ ዴና። ታ እያ ካታማታ ታማን ኦይና፤ ሄ ታማይ ዩሹዋን ደእያ ኡባ ይሳና” ያጌስ።
\p
\v 33 ኡባፈ ዎልቃማ ጎዳይ ሀይሳዳ ያጌስ፦ “እስራኤለ አሳይነ ይሁዳ አሳይ ኡንኤትዶሶና። ኤንታ ድእድ ኤፍዳይሳት ኤንታ ምንድ ኦይክዶሶና፤ ኤንታ የደናዉ ኮይቦኮና። 
\v 34 ሽን ኤንታ ዎዘይስ ምኖ፤ እያ ሱንይ ኡባፈ ዎልቃማ ጎዳ። እ፥ ኤንታ ቢታስ ሸምፖ እማናዉ ኤንታ ግሾ ሞተቴስ። ሽን ባብሎነ ቢታን ደኤይሳታ ቦላ ዳጋማ የዳና። 
\v 35 ባብሎነይ፥ ባብሎነን ደኤይሳት፥ እያ ሀላቃትነ እያ ጭንጫት ማሻን ሀይቃና” ያጌስ ጎዳይ።
\p
\v 36 “እያ ኤያ ዎርዶ ናበት ማሻን ሀይቆና። ዳጋምያ እያ ዎልቃማ ኦላንቾት ማሻን ሀይቃና። 
\v 37 እያ ፓራታ ቦላ፥ እያ ፓራ ጋረታ ቦላነ ማጫሳ መላ ግድዳ እያ አላጋ ኦላንቾታ ቦላ ማሽ ዮ። እያ ሻሉዋ ምንጅያ ኬ ቦላ ማሽ ዮ፤ እያ ቡቁራ ኡባይ ቦንቀታና። 
\v 38 ባብሎነን ኤቅ ኩምዳ ግሾነ ዳጋማን ኮኮርያ ኤቃት ደእያ ግሾ፥ እያ ሃይ መሎ፤ እያ ቦላ ኮሽ ዮ።
\p
\v 39 “ሄሳ ግሾ፥ ባብሎነይ ባዞ ዶአትነ ዎርካናት ደእያ በሲ ግዳና፤ ቃስ ያንቾት ያን ዳና። ያን መርናዉ አስ ዴና፤ የለታፐ የለታ ጋካናዉ አስ ደእያ በሲ ግደና። 
\v 40 ፆሳይ በን ሶዶመነ ጋሞራ ኤንታ ዩሹዋን ደእያ ካታማታራ ይስዳይሳዳ ባብሎነን ኦንካ ዴና፤ አስ ያን ኡተና” ያጌስ ጎዳይ።
\p
\v 41 “ሄኮ፥ አሳይ ፑደሀ ባጋፈ ያና፤ ምኖ ካዎተትነ ዳሮ ካዎት ሳኣ ጋፃፐ ያናዉ ደንድዶሶና። 
\v 42 ኤንቲ ባንታ ዶንግያነ ቶራ ኦይክዶሶና፤ ኤንቲ ዎዛና ምኖነ የድ ማሮና አስ። ኤንቲ ባንታ ፓራ ቶግድ ብያ ዎደ፥ ቤታይ ሾጭያ አባ ጉንዳ ሀኔስ። ነኖ፥ ባብሎነ፥ ኤንቲ ኡባይ ኦላስ ጊግዳ አስ ግድድ ነ ቦላ ሳልፕዶሶና።
\p
\v 43 “ባብሎነ ካዎይ ሄሳ ስእያ ዎደ እያ ኩሸይ ዳቡርድ ስልስ፤ እቀ ኦይክዳ ማጫሳዳ ኡንኤትስ።
\p
\v 44 “ዮርዳኖሰ ሻፋ ላንቀን ደእያ ዎራፐ፥ ሎኦ ቆሮይ ደእያ በሳፈ ቆፖና ከይያ ጋሞዳ፥ ታ ያዳ፥ ባብሎነ አሳ ኤንታ ቢታፈ የደና። ሄሳፈ ጉየ፥ ታ ዶርዳ አስ እያ ቦላ ሹማና፤ ያትን ታ መል ኦኔ? ታ ኦና ግዳባ ተቃናይ ኦኔ? አይ ሄንንቾይ ታራ ኤቀታናዉ ዳንዳኢ? 
\v 45 ሄሳ ግሾ፥ ጎዳይ ባብሎነ ቦላነ ባብሎነ ቢታ ቦላ ሀልችዳባነ ቆፕዳባ ስእተ። ኤንታ ናይታ ዎልቃን ጎችድ ኤፋና፤ ሄሳ ጋሶን ኤንታ ሶ አሳ ኡባይ ዳጋማና። 
\v 46 ባብሎነ ኩንደ ግርሳይ ቢታ ቃና፤ ባብሎነ ዋሶይ ካዎተታ ኡባን ስኤታና” ያጌስ።
\c 51
\p
\v 1 ባብሎነ አሳነ ባብሎነ ቢታ ይስያ ጫርኮ ኪታና። 
\v 2 ታኒ ባብሎነ ቦላ ጫርኮዳ ፑንያ አላጋታ ኪታና። እያ ዩዋ ጋላስ ኤንቲ ኡባ በሳራ እያ ኡንኤና። 
\v 3 እያ ኦላንቾት ዶንግያ ዱካና ጋካናዉ ዎይኮ ባንታ ኦላ ሚሽያ ዳንጫና ጋካናዉ ናጎፕተ። እያ ያላጋ አደታስ ምሸቶፕተ፤ እያ ኦላንቾታ ፖሎ ይስተ። 
\v 4 ኤንቲ ባብሎነ ቢታን ሹከታና፤ እ ዳባባን ጫደትድ ኩንዳና። 
\v 5 ኤንቲ ቢታ ናጋራን ኩንኮካ፥ ፆሳይ፥ ኡባፈ ዎልቃማ ጎዳይ፥ እስራኤለ ጌሻይ፥ እስራኤለነ ይሁዳ አምእዳ የግድ አግቤና። 
\v 6 ባብሎነፐ ባቃትተ፤ እሶይ እሶይ ባ ሸምፑዋ አሾ። እ ኦዳ ናጋራ ጋሶን ህንተ ዉሮፕተ። ሀ ዎደይ ታኒ ጎዳይ ሀሎ ከይያ ዎደ። 
\v 7 ባብሎነይ ሳአን ደእያ አሳ ኡባይ ኡይድ ማትያ፥ ዎይነ ኡሽ ትገትያ፥ ታ ኩሸን ደእያ ዎርቃ ዋንጫ መላ። ካዎተት ኡባይ ሄ ዎይነ ኡሻ ኡይድ ጎይዶሶና። 
\v 8 ባብሎነይ ቆፖና ኩንድድ መቅስ። ሄሳ ግሾ፥ እያዉ ዬክተ፤ እ ፓፃነኮ ኦን ኤር እያ ማዱንስ ለ እምተ። 
\v 9 ባብሎነን ደእያ አላጋ አሳይ፥ “ኑ ባብሎነ ፓናዉ ኮይዳ፤ ሽን ፓፃናዉ ዳንዳእቤና። እያ ፕርዳይ ሃክድ ሳሎ ጋክዳ ግሾነ ሻራ ጋካናዉ ቁ ግዳ ግሾ እያ አግድ ኑ ቢታ ስሞስ” ያግዶሶና።
\p
\v 10 እስራኤለ አሳይ፥ “ጎዳይ ኑስ ፕርድዳ ግሾ፥ ፅዮነ ብድ፥ ጎዳይ ኑ ፆሳይ ኦዳባ ኦዳና” ያጋና።
\p
\v 11 “ጎዳይ ባብሎነ ይሳናዉ ቆፋ ቃችዳ ግሾ፥ ሜዶና ካዎታ ደንስ። እ ባ ኬ ግሾ ሀሎ ከያናዉ ቆፕስ። ሜዶና ሀላቃት፥ ‘ዶንገ ቶራ ሌፍተ፤ ጎንዳለ ኦይክተ። 
\v 12 ባብሎነ ቦላ ኦላ ባንድራ ደንተ፤ ምንድ ናግተ። ዎቸይሳታ ኤንታ በሳን በሳን ዎተ፤ ዙግድ ጫድያ ኦላንቾታ ጊግስተ’ ” ያግዶሶና። ጎዳይ ባብሎነ አሳ ቦላ ቆፕዳባነ ባ ግዳባ ኦና።
\p
\v 13 ባብሎነ፥ ኔኒ ዳሮ ሻፋትነ ዱረተ ኩምዳ ቢታ፥ ሽን ነ ዉርሰይ ጋክስ፤ ኔኒ በሶና ኦገን ሺሽያ ጎአይ አትስ። 
\v 14 ኡባፈ ዎልቃማ ጎዳይ፥ “ቦለይ ቢታ ኩመይሳዳ ታኒ አሳ ነ ቢታን ኩንና፤ ኤንቲ ነና ፆንዳ ኡፋይሳን ባንታ ቃላ ቁ ኦድ ነ ቦላ ጋይራና” ያግድ ባ ሱንን ጫቅስ።
\q1
\v 15 ጎዳይ ባ ዎልቃን ሳኣ መስ፤
\q2 ባ ጭንጫተን ቢታ ባስስ፤
\q2 ሳሎታ ባ አኬካን ምጭስ።
\q1
\v 16 እ ኪትያ ዎደ፥
\q2 ሳሎን ደእያ ሃት ጉሞሶና።
\q1 ሻራታ ሳኣ ጋፃፐ ኤሄስ፤
\q2 እር ቡክያ ዎደ ዎልአን ዎልአሜስ፤
\q2 ባ ምንጃ በሳፈ ጫርኩዋ ከሴስ።
\q1
\v 17 አስ ኡባይ ኤያነ አኬክ ባይናይሳ፤
\q2 ኤንታ ምስለት ዎርዶነ
\q2 ሸምፖይ ባይናይሳታ ግድያ ግሾ፥
\q2 ዎርቃ ሼሽድ ኤቃ መይሳት ዬላትዶሶና።
\q1
\v 18 ሄ ምስለት ፓናይሳታነ ከትዳይሳታ፤
\q2 ኤንታ ቦላ ፆሳይ ፕርድያ ዎደ ኤንቲ ያና።
\q1
\v 19 ሽን ያይቆባ ፆሳይ ኤንታ መላ ግደና፤
\q2 ኡባባ መዳይ እያ።
\q1 እ ባዉ ዶርዳ ኮቻይ እስራኤለ አሳ፤
\q2 እያ ሱንይ ኡባፈ ዎልቃማ ጎዳ።
\s1 ጎዳ ናርቃ
\q1
\v 20 “ባብሎነ፥ ነ ታ ናርቃነ ታ ኦላ ሚሸ፤
\q2 ነና ጎኤታዳ ታኒ ቢታታ መንረስ፤
\q2 ካዎተታ ይሳስ።
\q1
\v 21 ነና ጎኤታዳ ፓራታነ ፓራ ቶገይሳታ፤
\q2 ፓራ ጋረታነ ኤንታ ላገይሳታ መንረስ።
\q1
\v 22 ነና ጎኤታዳ ማጫነ አደ፥
\q2 ጭማነ ናይታ ፓንነ ጌላኦ መንረስ።
\q1
\v 23 ሄንንቹዋነ እያ ዉድያ፥
\q2 ጎየይሳነ እያ ዋ ቦራታ፥
\q2 ደርያ ሃረይሳታነ ሀላቃታ
\q2 ነና ጎኤታዳ መንረስ” ያጌስ ጎዳይ።
\p
\v 24 “ባብሎነይነ ባብሎነ አሳይ ፅዮነ ቦላ ኦዳ ኢታ ኦሱዋ ግሾ ህንተ ፄልሽን ታ ሀሎ ከያና” ያጌስ ጎዳይ።
\p
\v 25 “ነኖ፥ ባብሎነ፥ ነ ቢታ ይስያ ዙማ መላ፤ ሽን ታ ጎዳይ ነና እፃስ። ታኒ ታ ኩሽያ የዳዳ፥ ነና ዙማ ቦላፈ ዱገ ጎንዶርሳና፤ ኔኒ ፁገትዳ ዙማ ግዳዳ አታና። 
\v 26 ኔፐ ባሶን የግያ ዎይኮ ግምቤስ ኤከትያ ሹች ዴና፤ ነ መርናዉ ባይሳ ግዳና” ያጌስ ጎዳይ።
\p
\v 27 “ባብሎነ ቦላ ኦላ ባንድራ ደንተ፤ አሳ ግዶን ሞይዘ ፑንተ። እያ ኦላናዉ አሳ ኡባ ጊግስተ፤ አራራተ፥ ምናነ አስካናዛ ካዎተታ ፄግተ። ኦላ ሀላቃታ ሹምተ፤ ቦለ መላ ዳሮ ፓራታ ኤህተ። 
\v 28 ባብሎነ ኦላናዉ ካዎተታ ኡባ ጊግስተ፤ ሜዶና ካዎታ፥ ኤንታ ሀላቃታ፥ ደርያ ሃረይሳታነ ኤንቲ ሃርያ ቢታ አሳ ኡባ ደንተ።
\p
\v 29 “ባብሎነይ ኦንካ ዶና ባይሳ ኦናዉ ጎዳይ ሀልችዳ ሀልቹዋ ፖልያ ግሾ፥ ቢታ ኡባይ ኮኮረስነ ፖርቃቴስ። 
\v 30 ባብሎነ ኦላንቾት ኦላ አግድ፥ ባንታ ሚፃን ኡትዶሶና። ኤንታ ዎልቃይ ላፍን፥ ማጫሳ መላ ግድዶሶና። ኤንታ ኬት ፁገትዶሶና፤ ካታማ ፐንግያ ኮበ ምት መቅዶሶና። 
\v 31 ሀ ጋፃፐ ህን ጋፃ ጋካናዉ፥ ካታማይ ሞርከን ኦይከትዳይሳ ባብሎነ ካዋስ ኦዳናዉ፥ ዎፀይስ ዎፀይሳ ካልድ፥ ኪተትዳይስ ኪተትዳይሳ ካልድ ቦሶና። 
\v 32 ሻፋራ ፕንያ በሳት ኦይከትዳይሳ፥ ሃ ጋፃን ደእያ ዎራይ ፁገትዳይሳነ ኦላንቾት ዳጋምዳይሳ ኤንቲ ካዋስ ኦዳናዉ ዎፆሶና” ያጌስ ጎዳይ።
\p
\v 33 “ባብሎነ ቢታይ ካ ቡክያ ዉዱማ ግዳና፤ ጉ ዎደፐ ጉየ እ ጫከትያ ዎደይ ያና” ያጌስ ኡባፈ ዎልቃማ ጎዳይ፥ እስራኤለ ፆሳይ።
\s1 ጎዳይ እስራኤለ ማዳና
\p
\v 34 ባብሎነ ካዎይ ናቡካዳናፆር ኑና ዉርስድ ምስ፤ ኑ ካታማ ካይሳ ኦቶ ከስስ። ዳወይ ምተይሳዳ እያ ምትስ፤ ማልኦባ ምድ ኩንይሳዳ እ ኑ ሻሉዋን ባ ጋንጅያ ኩንስ፤ አትዳይሳ ሙጭድ ጩትስ። 
\v 35 ፅዮነይ፥ “ባብሎነይ ኑ ቦላ ኦዳ ኢታባ ኡባይ እያ ቦላ ስሞ” ያጎሶና። የሩሳላመይ፥ “ኑ ሱ አጮይ ባብሎነ አሳ ኦይኮ” ያጎሶና።
\p
\v 36 ሄሳ ግሾ፥ ጎዳይ የሩሳላመ አሳ ሀይሳዳ ያጌስ፦ “ታ ነ ግሾ ሞተታና፤ ነ ሃሉዋ ታ ከያና። ታኒ ባብሎነ ሃነ ፑልቶታ መልሳና። 
\v 37 ባብሎነይ ላለ ዶረነ ዎርካናት ጉፕያ በሲ ግዳና። እያ በእያ ኡባይ ዳጋማናነ ቀልቅሳና፤ ያን እስ አስካ ዴና። 
\v 38 ባብሎነ አሳ ኡባይ ጋሞዳ ጉዶሶና፤ ጋሞ ማራዳ ዳሮሶና። 
\v 39 ኤንታ አሳተይ ሆእያ ዎደ፥ ታ ኤንታዉ ኡሻ ግብራ ጊግሳና። ኤንቲ ማታና ጋካናዉ ታ ኤንታ ኡሻና፤ ኤንቲ ዛሪድ ደንዶና መላ መርናዉ ስካና” ያጌስ ጎዳይ። 
\v 40 ሹካናዉ ኤፍያ ኡርገዳ፥ ማራዘዳነ ኮለዳ ታኒ ኤንታ ሹካ በሲ ኤፋና።
\p
\v 41 “አሳ ኡባይ ሳቢያ ባብሎነይ ዋንድ ኦይከትደ! ባብሎነይ ካዎተታ ግዶን ዋንድ ዳጋንያባ ግድደ! 
\v 42 ባብሎነ ሞርከት አባ ቤታይ ደንደይሳዳ ደንድድ ካታማን ኤልዶሶና። 
\v 43 እያ ካታማት ላለትድ፥ ዳጋንያባ ግድዶሶና፤ ሃ ባይና መላ ቢታ ዳንዶሶና፤ አስ ዶና በስነ ኦንካ ካንድ አና በሲ ግድዶሶና። 
\v 44 ቤላ ጌተትያ ባብሎነ ኤቃ ታ ሴራና፤ እ ምትዳባ እያ ኡሉዋፐ ከሳና። ህዛፐ ጉየ፥ ካዎተት እያኮ ጎገይሳ አጋና፤ ባብሎነ ግምበይ ኩንዳና።
\p
\v 45 “ታ አሳዉ፥ እያ ግዶፈ ከይተ! ህንተ፥ ጎዳ ሀንቆ ሱሉዋፐ ህንተና አሽተ! 
\v 46 ቢታን ኦደትያ ኦዳ ስእያ ዎደ ኡፋይስ ቃንፆፍተነ ያዮፍተ። ላይን ላይን ኦድ ካልድ ካልድ ያና። ሄ ዎደ ካዎይ ካዋ ቦላ ደንድያ ማካላ ኦድ ቢታን ስኤታና።”
\p
\v 47 “ሄሳ ግሾ፥ ታኒ ባብሎነ ኤቃ ምስለታ ሴርያ ጋላስ ያና። ቢታ ኡባይ ዬላታና፤ ሀይቅዳይሳት ኡባይ ካታማ ግዶን ኩንዳና። 
\v 48 ፑደሀ ባጋፈ ያና ይሰይሳታ ኩሸን ባብሎነይ ገልያ ዎደ ሳሎንነ ሳአን ደእያ ኡባባይ እልላና። 
\v 49 ባብሎነይ፥ እስራኤለ አሳነ ሳአን ደእያ አሳ ኡባ ዎዳይሳዳ ባብሎነ አሳይ ሀይቃናዉ ኮሼስ። 
\v 50 ታ አሳዉ፥ ኦላፐ ከስ ኤክዳይሳቶ፥ ቢተ፤ ሀይሳን ኤቆፍተ። ህንተ ደእያ ሃሆ ቢታን ታና ጎዳ ሀሳይተ፤ የሩሳላመ ቆፕተ።”
\p
\v 51 ህንተ፥ “ኑኒ ጫየትዳ ግሾ ካዉይዳ፤ አላጋት ፆሳ ኬን ደእያ ጌሻ በሳታ ገልዳ ግሾ፥ ኑ ዬላ ማእዳ” ያግደታ።
\p
\v 52 ሽን “ታኒ ጎዳይ ባብሎነ ኤቃታ ሴርያ ዎደይ ያና። ማዱንፅዳይሳት ቢታ ኡባን ኦላና። 
\v 53 ባብሎነይ ሳሎ ፑደ ከይድ፥ ያን ሚፃ መናዉ ዳንዳእያኮካ፥ ያ ጋካናዉ ከይድ፥ እያ ያን ይስያ አስ ታኒ ኪታና” ያጌስ ጎዳይ።
\q1
\v 54 “ባብሎነን ዋሶይ፥
\q2 ባብሎነ ቢታን ግታ ዮ ግርስ ስኤታና።
\q1
\v 55 ጎዳይ ባብሎነ ይሳና፤
\q2 እያ ዎልቃማ ግርሳ ስእ ኦና።
\q1 አባ ቤታዳ ጉምያ ሞርከት
\q2 ኦልሸ ጬቀታና።
\q1
\v 56 ይሰይሳት ባብሎነ ቦላ ያና፤
\q2 እያ ኦላንቾት ኦይከታና፤
\q2 ኤንታ ዶንገይ መቃና።
\q1 ታኒ ጎዳይ ሀሎ ከይያ ፆሰ ግድያ ግሾ፥
\q2 ኤንታ ኦሱዋዳ ኤንታዉ ዛራና።
\q1
\v 57 እያ ሀላቃታ፥ እያ ጭንጫ አሳታ፥ እያ ደርያ ሃረይሳታ፥
\q2 እያ ቶራ ሞጮናታነ እያ ኦላንቾታ ማያና።
\q2 ኤንቲ ዛሪድ ደንዶና መላ መርናዉ ስካና”
\q1 ታኒ ካዎይ፥
\q2 ኡባፈ ዎልቃማ ጎዳ ጌተተይስ
\q2 ሀይሳ ኦዳይስ።
\q1
\v 58 “ግታ ባብሎነ ግምበይ ኩንዳና፤
\q2 እያ አዱሳ ፐንገት ታማን ፁገታና።
\q1 አሳይ ኦዳባ ኡባይ ሀዳ፤
\q2 ካዎተት ዳቡርያባይ ታማሳ” ያጌስ ኡባፈ ዎልቃማ ጎዳይ።
\p
\v 59 ማሰያ ናኣ፥ ኔራ ናአይ ሳራይ ካዋ ሰደቅያሳ ሹማ። ሰደቅያስ ይሁዳን ካዎትዳ ኦይዳን ላይን፥ ሳራይ እያራ ባብሎነ ብያ ዎደ ኤርምያስ ሳራያ ቦላ ኪታ የድስ። 
\v 60 ባብሎነ ቦላ ጋካናዉ ደእያ ኢታባ ኡባነ ባብሎነ ፄልያ ሀራባ ኡባ ኤርምያስ ማፃፋን ፃፍስ። 
\v 61 ሳራያኮ፥ “ኔኒ ባብሎነ ጋክዳ ዎደ ነ ቃላ ቁ ኦዳ አሳስ ሀ ማፃፋ ናባባ። 
\v 62 ቃስ ሀይሳዳ ያጋዳ ዎሳ፦ ‘አቤት ጎዳዉ፥ ኔኒ ሀ በሳ ይሳና፤ ሀ በሳን ሸምፖራ ደእያ መተ፥ አስነ መሄይ ዴና፤ ሀ በሳይ መርናዉ መላ ቢታ ግዳና’ ያጋ። 
\v 63 ሀ ማፃፋ ናባባ ዉርስዳፐ ጉየ፥ ማፃፋ ሹቻራ ጋ ቃቻዳ፥ ኤፍራፂሳ ሻፋን ሆላ። 
\v 64 ታኒ ጎዳይ እያ ቦላ ኤህያ ዩዋ ጋሶን፥ ባብሎነይ ዛሪድ ደንዶና መላ ሀይሳዳ ሙከታና” ያጋ።
\p ኤርምያስ ኦድዳ ቃላይ ሀይሳን ዉርስ።
\c 52
\s1 የሩሳላመ ኩንደ
\r (2 ካዎ 24:18—25:7፤ ኤርም 39:1-10)
\p
\v 1 ሰደቅያስ ካዎትያ ዎደ፥ እያዉ ላይ ላታማነ እስኖ፤ እ የሩሳላመን ታማነ እስ ላይ ካዎትስ። እያ አየ ሱንይ አምፃሎ፤ እያ ልብና ካታማን ደእያ ኤርምያሳ ናአ። 
\v 2 እዮአቄም ኦዳይሳዳ ሰደቅያስ ጎዳ ስንን ኢታባ ኦስ። 
\v 3 ጎዳይ የሩሳላመ ቦላነ ይሁዳ ቦላ ሀንቀትዳ ግሾ ኤንታ ባ ስንፈ ድግስ።
\p ሰደቅያስ ባብሎነ ካዋ ቦላ ማካልስ። 
\v 4 ሰደቅያስ ካዎትዳ ኡዱፉን ላይን፥ ታማን አጌናን፥ ታማን ጋላሳን ባብሎነ ካዎይ ናቡካዳናፆር ባ ኦላንቾታ ኡባ ኤክድ፥ የሩሳላመ ተቅስ። ኤንቲ እያ ዩሹዋን ቢታ ዶርዶሶና። 
\v 5 ሰደቅያስ ካዎትዳ ታማነ እስን ላይ ጋካናዉ፥ የሩሳላመይ ተቀትድ ጋምእስ።
\p
\v 6 ሄ ላይ ኦይዳን አጌናን፥ ኡዱፉን ጋላሳን፥ ኮሽ ሱልን፥ አሳይ ምያባ ይስ። 
\v 7 ካታማ ግምበይ እስ ባጋራ መቅስ። ባብሎነ አሳይ ካታማ ዩሹዋ ናግኮካ፥ ይሁዳ ካዋ ኦላንቾት ኡባይ ቃማ ካዎ አታክልተ በሳ ኤፍያ ኦግያ ኦይክድ፥ ናምኡ ድርሳ ግምበታ እስፈ ጋያ ፐንግያራ ከይድ ባቃትዶሶና። ኤንቲ ዮርዳኖሰ ዛንጋራኮ ስሚድ ብዶሶና። 
\v 8 ሽን ባብሎነ ኦላንቾት ካዋ ሰደቅያሳ የደድ፥ እያርኮ ደምባ ጋሸ ኦይክዶሶና። እያ ኦላንቾት ኡባይ እያ ካድድ ላለትዶሶና። 
\v 9 ሄሳፈ ጉየ፥ እያ ሀማታ ቢታን፥ እርብላ ካታማን ደእያ ባብሎነ ካዋኮ ኤፍዶሶና። ያን ናቡካዳናፆር ሰደቅያሳ ቦላ ፕርድስ። 
\v 10 ሰደቅያሳ አደ ናይታ ሰደቅያስ ፄልሽን፥ ባብሎነ ካዎይ ዎስ። ይሁዳ ሀላቃታ ኡባ ያን እርብላ ካታማን ዎዶሶና። 
\v 11 ሰደቅያሳ አይፈታ ዎጭድ፥ ሳንላታን ቃችድ፥ ባብሎነ ኤፍዶሶና። እ ሀይቃና ጋካናዉ፥ ያን ቃሾ ኬን እያ ዎዶሶና።
\p
\v 12 ናቡካዳናፆር ባብሎነን ካዎትዳ ታማነ ኡዱፉን ላይን፥ እቻሻን አጌናን፥ ታማን ጋላሳን፥ ካዋ ሞርናይ፥ ካዋ ናገይሳታ ሀላቃይ ናቡዛርዳን የሩሳላመ ገልስ። 
\v 13 ፆሳ ኬ፥ ካዎ ጋነ የሩሳላመን ደእያ ኬታ ኡባ ታማን ፁግስ፤ ቃስ ግታ ኬታ ኡባ ፁግስ። 
\v 14 ባብሎነ ኦላንቾት ኡባይ ካዋ ናገይሳታ ሀላቃ ኪታን፥ የሩሳላመ ካታማ ዩሹዋን ደእያ ድርሳ ግምብያ ኡባ ላልዶሶና። 
\v 15 ናቡዛርዳን ጉ ማንቆታ፥ ካታማን አትዳ አሳታ፥ ካድድ ባብሎነ ኦላንቾታን ገልዳ አሳታነ ኩሸ ሂላንቾታ ድእድ ባብሎነ ኤፍስ። 
\v 16 ሽን ናቡዛርዳን ማንቆታፐ ጉ አሳ ዎይነ ቶካናዳነ ጋደ ጎያናዳ ይሁዳን አግስ።
\p
\v 17 ባብሎነት ፆሳ ኬ ካረን ኤቅዳ ናሰ ብራታ ቱቀታ፥ ጫና ጋረታነ ግታ ከረታ መንረድ፥ ናሰ ብራታ ኡባ ባብሎነ ኤፍዶሶና። 
\v 18 ከረታ፥ አካፋታ፥ ፆምፐ ሻሉዋ ፄራ ፕትያባታ፥ ፃሮታ፥ እፃነ ሳነታነ ያርሾ ዎደ ጎኤትያ ናሰ ብራታ ሚሸታ ኡባ ኤፍዶሶና። 
\v 19 ካዋ ናገይሳታ ሀላቃይ ናቡዛርዳን ዎርቃፈነ ብራፐ ኦሰትዳ ድስተታ፥ ታማ ኤክያ ሚሸታ፥ ፃሮታ፥ ላፋ ከረታ፥ ፆምፐ ዎያ ኮጫታ፥ እፃነ ሳነታነ ኡሻ ያርሾስ ጎኤትያ ኦቶታ ኤፍስ። 
\v 20 ካዎይ ሶሎሞነይ ፆሳ ኬን ኦሰትያባስ መዳ ናምኡ ቱሳት፥ ግታ ከረታ፥ ታማነ ናምኡ ኮርማታ ምስለትነ ጫና ጋረት መትዳ ናሰ ብራታት ምዛነን ልካናዉ ዳንዳኤተና። 
\v 21 ናምኡ ቱሳት እስ መላ ግድድ፥ እሶይ እሶይ ታማነ ሆስፑን ዋ አዱሰ። ኤንታ ኡባይ ታማነ ናምኡ ዋ። ኤንታዉ ግዶይ ካይስ ግድድ፥ ብራታይ ኦይዱ ብራ ኬና ኦርደ። 
\v 22 ናምኡ ቱሳታ ሁጵያን ናሰፐ ኦሰትዳ ጉምቦት ደኦሶና። እስ ጉምቡዋ ጌሳይ እቻሹ ዋ ግድድ፥ ዩሾይ ግተ ምስለንነ ኦሮማነ ምስለን አሌቀትድ ኡትስ። ናምአን ጉምቦይካ እያ መላ። 
\v 23 ጉምቦታስ ምየን ምየን ደእያ ኦሮማነታ ምስለት ኡዱፉን ታማነ ኡሱፑና፤ ዩሹዋን ደእያ ግተ ምስለታፐ ቦላ ባጋራ ደእያ ኦሮማነ ምስለት እስ ፄታ።
\s1 ይሁዳ አሳይ ባብሎነ ድኤትስ
\r (2 ካዎ 25:18-21፥ 27-30)
\p
\v 24 ካዋ ናገይሳታ ሀላቃይ ናቡዛርዳን ካህነ ሀላቃ ሳራያ፥ እያ ካልያ ካህንያ ሶፎንያሳነ ፐንገ ናግያ ሄ አሳታ ኦይክስ። 
\v 25 ካታማን ደእያ አሳፐ ቶራ ሞጮና፥ ካዋ ዞረይሳታፐ ላፑን አሳታ ኤፍስ። ቶራ ሞጮና፥ ፃፍያ፥ አሳ ኦላንቾታ ዶርያ ሀላቃነ ሀራ ኡሱፑን ታሙ አሳታ ኤፍስ። 
\v 26 ናቡዛርዳን ኤንታ ኡባ ኤክድ፥ ባብሎነ ካዋኮ፥ እርብላ ካታማ ኤፍስ። 
\v 27 ሀማታ ቢታን፥ እርብላ ካታማን፥ ባብሎነ ካዎይ ኤንታ ኡባ ዎስስ። ሄሳዳ ሀንድ፥ ይሁዳ አሳይ ባንታ ቢታፈ ድኤትድ ብዶሶና።
\p
\v 28 ናቡካዳናፆር ካዎትዳ ላፑን ላይን፥ ሄ ሙኩሉነ ላታማነ ሄ አሳይ ይሁዳፐ ድኤትስ። 
\v 29 ታማነ ሆስፑን ላይን ሆስፑን ፄታነ ሀስታማነ ናምኡ አሳይ የሩሳላመፐ ድኤትስ። 
\v 30 ናቡካዳናፆር ካዎትዳ ላታማነ ሄን ላይን ካዋ ናገይሳታ ሀላቃይ ናቡዛርዳን ላፑን ፄታነ ኦይታማነ እቻሹ አሳ ድእስ። ድኤትዳ አሳ ታይቦይ ኦይዱ ሙኩሉነ ኡሱፑን ፄታ።
\s1 ዮአክና ብለተ
\p
\v 31 ዮአክን ድኤትዳ ሀስታማነ ላፑን ላይን፥ ታማነ ናምአን አጌናን፥ ላታማነ እቻሻን ጋላሳን፥ ዮር-ማሮዳክ ካዎትዳ ላይ ይሁዳ ካዋ ዮአክና ቦንችድ፥ ቃሾፐ ብርሽስ። 
\v 32 ዮር-ማሮዳክ ዮአክናራ ማልኦ ቃላ ኦደትድ፥ ባብሎነን ድኦን ደእያ ሀራ ካዎታ ኡባፈ አድ እያ ቦንችስ። 
\v 33 ሄሳ ግሾ፥ ዮአክን ቃሾ ኬን ማእያ ማኡዋ ላምድ፥ ባ ደኦ ላይ ኡባን ካዎ ጋይታፐ ምሸ ደእስ። 
\v 34 ዮአክን ሀይቃና ጋካናዉ፥ ጋላስ ጋላስ እያዉ ኮሽያባ ኡባ ባብሎነ ካዎይ እሚስ።