\id HOS - GOOFA FULL BIBLE
\ide UTF-8
\h ሆሰ ማፃፋ
\toc1 ሆሰ ማፃፋ
\toc3 ሆሰ
\toc2 ሆሰ
\mt ሆሰ ማፃፋ
\imt ጋ ቆፋ
\ip ፑደሀ ካዎተ ዉርሰ ላይን፥ ሆሰይ፥ ናብያ አሞፀፐ ካልድ ናበ ግድስ። ሀኖታት መቶ ግድ ደእያ ዎደ ፑደሀ ባጋ እስራኤለ ካዎተ ቦላ ሆሰይ ትንብተ ኦድስ።
\ip ሀ ማፃፋን፥ ኮይሮ ሄ ሸምፖታን፥ ሆሰይ ባ ሶ አሳራ ሌምሶ ግድድ እስራኤለ ሳባክስ። ጎዳይ፥ እስራኤለይ አማነቶና ቢታ ግደይሳ ቆንጭሳናዉ ኮይድ፥ ሆሰይ ላይማ ማጫስ ማቾ ኦድ ኤካና መላ ኦድስ። ባ የልዳ ናይታ ዎይግድ ሱንነኮ እያዉ ኦድስ። ናይታ ሱንይ እስራኤለይ ዎንቶ ዋናዳ ፕርደታነኮ ማሌስ። ሄ ናይታ ሱን ብርሸይ፥ እዝራኤለ፥ (ፆሳይ ላላና)፤ ሎሩሃማ (ማሮተ ደሞናሮ)፤ ሎኣማ (ታ አሰ ግደና) ጉሱ።
\ip ሸምፖ 4—14 ጋካናዉ ደእያ ክፍለይ፥ ሆሰ ማችያ አማነቶና ማቾ ግደይሳዳ፥ እስራኤለይ ፆሳስ አማነቶና እፅዳይሳ ሆሰ ትንብተይ በሰስ። ጎመራ ሆሰ አጋዳ ሀራ ባ ላገታኮ ብዳይሳዳ (ሸም 1)፥ እስራኤለይ ፆሰ አጋዳ ብዳይሳ (ሸም 2) በሴስ። ግዶሽን፥ ሆሰይ ባ አማነቶና ማችዉ ዶሳና መላ ጎዳይ ኪትስ። ሄስካ፥ ፆሳይ ባ መርና ሲቁዋን እስራኤለ ዶስዳይሳስ ሌምሶ። ጎዳይ እስራኤለስ አማነትኮካ፥ እስራኤለይ ዎደፐ ዎደን ጎዳስ አማነታቡኩ። ኤንቲ ባንታ ካዎተ አሻናዉ ጎዳን ዘምፓናይሳ አግድ፥ ባንታ ኦላንቾታንነ አላጋ ቢታታ ቦላ ዘምፕዶሶና። ሄሳ ፃላላ ግዶናሽን፥ “ኑስ ካ እመይነ መሄይ የለታና መላ ኦይ ኑ ኤቃ ፆሳታ” ግድ ኤንታን አማነትዶሶና፤ ኤንታ ጎይንዶሶና።
\ip ሀ ማፃፋን ጎዳይ እስራኤለነ ይሁዳ መቶን የግድ፥ ኤንቲ መንዳ ጫቁዋ ግሾ ኦይሸታና መላ ኦስ። ሽን ኤንቲ ሄ ኡባ ሀንንካ ጎዳይ ኤንታ ዶሴስ። ኤንቲ ባንታ ናጋራፐ ስሚድ እያዉ አማነትኮ፥ እ ኤንታ ዛሪድ ኤካናዉነ አንጃናዉ ቃላ ገልስ። ጎዳይ፥ “ታ ሀንቆይ ኤንታፈ ስምዳ ግሾ፥ ታኒ ኤንታ፥ ኤንታ ኢታ ሀኑዋፐ ፓዳ፥ ኤንታ ቱማ ዶሳና” (14:4) ያግስ።
\iot ማፃፋ አይፈ ቆፋታ
\io1 ሆሰይ ላይማ ማቾ ኤኮይ እስራኤለ ሌምሶ (\ior 1:1—3:5\ior*)
\io1 አማነቶና እስራኤለ ቦላ ኦደትዳ ትንብተ (\ior 4:1—10:15\ior*)
\io1 ባ አሳስ ደእያ ጎዳ ሲቁዋ (\ior 11:1-11\ior*)
\io1 እስራኤለ ዛራ ዛራ ናጋራ ኦሱ (\ior 11:12—13:16\ior*)
\io1 ስንን ደእያ ማሮታነ አንጁዋ (\ior 14:1-9\ior*)
\c 1
\p
\v 1 ኦዝያን፥ እዮአታም፥ አካዝነ ህዝቅያስ ካል ካል ይሁዳን ካዎትዳ ዎደ ቃስ ዮኣሳ ናአይ እዮርባም እስራኤለን ካዎትዳ ዎደ ብኤራ ናኣ ሆሰኮ ይዳ ጎዳ ቃላይ ሀይሳ።
\s1 ሆሰ ማችዉነ እያ ናይታ
\p
\v 2 ጎዳይ ኮይሮ ሆሰ ባጋራ ኦድዳ ዎደ “ታ አሳይ ታፐ ሃክድ ኢታ ላይማተ ኦዳ ግሾ፥ ኔኒ ባዳ፥ ላይማ ማጫስ ኤካዳ ላይማ ናይታ ኢፐ የላ” ያግስ።
\p
\v 3 ሄሳ ግሾ፥ ሆሰይ ብድ፥ ድብላይማ ናእዉ ጎመሮ ኤክን፥ እያ ቃንታዳ አደ ናአ የላሱ። 
\v 4 ያትን፥ ጎዳይ ሆሰኮ ነ ናአ ሱን፥ “እዝራኤለ” (ላላና ዎይኮ ዘራና) ያጋዳ ሱን። አይስ ጊኮ፥ እዝራኤለን ጉክዳ ሱ ግሾ ታኒ እዩ ኮቻ ቃን ዎደን ፕርዳና፤ እስራኤለ ካዎተካ ይሳና። 
\v 5 ሄ ጋላስ ታኒ እዝራኤላ ዛንጋራን እስራኤለ ኦላንቾታ መንረና።
\p
\v 6 ጎመራ ናምአን ቃንታዳ፥ ማጫ ናአ የላሱ። ያትን፥ ጎዳይ ሆሰኮ፥ “እ ሱን ሎሩሃማ (ማሮተ ደሞናሮ) ያጋዳ ሱን። አይስ ጊኮ፥ ህዛፐ ጉየ ታኒ እስራኤለ አሳስ ቃትከ፤ ኤንታዉ አቶ ጊከ። 
\v 7 ሽን ታኒ ይሁዳ አሳስ ቃታና፤ ታኒ ኤንታ ዶንገን ዎይኮ ማሻን ዎይኮ ኦላን ዎይኮ ፓራታን ዎይኮ ፓራ አሳታን ግዶናሽን፥ ታኒ ጎዳይ፥ ኤንታ ፆሳይ፥ ታ ዎልቃን ኤንታ አሻና” ያግስ።
\p
\v 8 ጎመራ ሎሩሃሞ ን ዱዳፐ ጉየ ቃንታዳ ሀራ አደ ናአ የላሱ። 
\v 9 ያትን፥ ጎዳይ ሆሰኮ፥ “እያ ሱን ሎኣማ (ታ አሰ ግደና) ያጋዳ ሱን። አይስ ጊኮ፥ ህንተ ታ አሰ ግደከታ፤ ታካ ህንተ ፆሰ ግድከ።
\p
\v 10 “ግዶሽን፥ እስራኤለ አሳይ ማካናዉነ ታይባናዉ ዳንዳኤቶና አባ ሻፍያ መላ ግዳና። ኤንቲ፥ ‘ህንተ ታ አሰ ግደከታ’ ጌተትድ ፄገትዳ በሳን ህንተ ‘ደኦ ፆሳ ናይታ’ ጌተታና። 
\v 11 ይሁዳ አሳይነ እስራኤለ አሳይ እስፈ ሺቅድ ባንታዉ እስ ሀላቃ ዶርድ ድኤትዳ ቢታፈ ስማናነ እንጀትድ ዳና። ሄ ጋላሳይ እዝራኤለስ ግታ ጋላስ ግዳና።
\c 2
\p
\v 1 “ህንተ እሻታ፥ ‘ታ አሰ’ ቃስ ህንተ ምቸታ፥ ‘ማሮተ ደምዳይሳታ’ ያግድ ፄግተ።
\s1 እስራኤለ ሴረተነ ስሞ
\p
\v 2 “ህንተ አይዉ ሀንቀትተ፤ እዮ ካጭተ። አይስ ጊኮ፥ እያ ታ ማቾ ግዱኩ፤ ታካ እ አዝና ግድከ። እያ ባ ሶምኡዋፈ ላይማተ ማላ ድጎ፤ ላይማተ ኦሱዋ ባ ንታ ግዶፈ ድጎ። 
\v 3 ሄስ ሀኖና እፅኮ እያ የለትዳ ጋላሳዳ፥ ታኒ እዮ ፅረ ካሎ አሻና። ቃስ እዮ መልዳ መላ ቢታ ኦና፤ ታኒ እዮ ሳሞን ዎና። 
\v 4 ኤንቲ ላይመፐ የለትዳ ናይታ ግድዳ ግሾ፥ ታኒ እ ናይታስ ቃትከ። 
\v 5 ኤንታ አይያ ላይማታሱ፤ ካዉሻባ ሀናዳ ኤንታ ቃንታሱ። እያ፥ ‘ታኒ ታ ካነ ታ ሃ፥ ታ ሱፍያነ ታ ሊኑዋ፥ ታ ዛይትያነ ታ ኡሻ ታዉ እምያ ታ ላገታ ካላዳ ባና’ ያጋሱ። 
\v 6 ሄሳ ግሾ፥ ታኒ እ ኦግያ አጉንን ጎርዳና፤ እያ ባ ኦግያ ደሞና መላ ታኒ እ ዩሹዋ ግምበን ድራና። 
\v 7 እያ ባ ላገታ ጌዶ ዎፃና፥ ሽን ጋኩኩ፤ ኤንታ ኮያና፥ ሽን ደሙኩ። ሄሳፈ ጉየ፥ ‘ሀእ ዱሳፈ ታዉ በንይስ ሎኦ ግድያ ግሾ፥ ስማዳ ታ ኮይሮ አዝናኮ ባና’ ያጋና። 
\v 8 ካ፥ ዎይነ ኡሻነ ዛይትያ እዉ እምዳይነ ኤንቲ ባኣለ ኤቃስ ያርሽያ ብራነ ዎርቃ እዉ ዳርስዳይ ታና ግደይሳ እያ ኤሮና እፃሱ። 
\v 9 ሄሳ ግሾ፥ ካፅያ ዎደ ታ ካ፥ ቴርያ ዎደ ታ ዎይንያ ኢፐ ዛራዳ ኤካና። እያ ባ ካሉዋ ካምያ ሱፍያነ ሊኑዋ ኢፐ ቃራ ኤካና። 
\v 10 እ ላገታ ስንን ታኒ እ ካሉዋ ቃራና፤ ታ ኩሽያፐ እዮ ኦንካ አሸና። 
\v 11 ታኒ እ ኡፋይሳ ባለታ ኡባ፥ አጌና ፄሮ ጋላሳታ፥ እ ሳምባታ ጋላሳታ፥ ላይን ላይን ቦንቸትያ ባለታ አሻና። 
\v 12 እያ፥ ‘ታ ላገት ታዉ እምዳ ጭጋ’ ግያ ዎይንያነ ባላሰ ም ታ ይሳና፤ ታኒ ሄ በሳ ዎራ ኦና፤ ባዞ ዶአት እያ ማና። 
\v 13 እያ ታና ዶጋዳ ባ ላገታ ካላዳ፥ ሳጋዮታንነ አሌቆታን አሌቀታዳ፥ ባኣለ ኤቃስ እፃነ ጩይስዳ ጋላሳታ ግሾ ታኒ እዮ ሴራና፤ ያጌስ ጎዳይ።
\p
\v 14 “ሄሳ ግሾ፥ ታኒ እዮ ጭማዳ መላ ቢታ ኤሀዳ፥ እዉ ሲቆ ቃላን ኦዳና። 
\v 15 ያን ታኒ እ ዎይነ ጋደ እዉ ዛራዳ እማና፤ አኮራ ዛንጋራ (መቶ ዛንጋራ) እዉ ኡፋይሳ ፐንገ ኦና። ግብፀ ቢታፈ ከይዳ ዎድያዳ ባ ጌላኦተ ላይን ደእያ ሀኖታን ኡፋይሳን የፃና” ያጌስ።
\p
\v 16 ሄ ጋላስ እያ ታና፥ “ታ አዝናዉ” ያጋዳ ፄጋና፤ ካሰይሳዳ፥ “ታ ጎዳዉ” ያጋዳ ፄጉኩ። 
\v 17 አይስ ጊኮ፥ ታኒ እ ዶናፐ “ባኣለ” ኤቃታ ሱን ድጋና፤ ህዛፐ ጉየ ታኒ እዮ “ባኣለ” ሱን ፄግስከ። 
\v 18 ሄ ዎደ ታኒ ታ አሳ ግሾ ሳኣ ዶአታራ፥ ሳሎ ካፎታራነ ቢታራ ጎሸትያ መተታራ ጫቃና። ታኒ ቢታፈ ዶንገ፥ ማሸነ ኦላ ይሳና። ኤንቲ ቢታ ቦላ ሳሮ ዳና።
\p
\v 19 ታኒ ነና መርናዉ ታዉ ማቾ ኦና፤ ፅሎተን፥ ሱረ ፕርዳን፥ መርና ሲቁዋንነ ማሮተን ታዉ ጊግሳና። 
\v 20 ታኒ አማነታዳ ነና ታዉ ጊግሳና፤ ነካ ጎዳ ኤራና።
\p
\v 21 “ሄ ዎደ ታኒ ዛሮ እማና፤ ታኒ ሳሎታስ ዛሮ እማና፥ ሳሎት ሳኣስ ዛሮ እማና። 
\v 22 ሳአይ ካስ፥ ዎይነ ኡሻስነ ዛይትያስ ዛሮ እማና፤ ኤንቲ እዝራኤለስ (ፆሳይ ቶካና) ዛሮ እማና። 
\v 23 ታኒ እዮ ታ ግሾ ጋዳ ቢታ ቦላ ቶካና፤ ካሰ ታኒ፥ ‘ማርከ’ ግዳይሳታ ማራና፤ ‘ታ አሰ ግደከታ’፤ ግዳይሳታ፥ ‘ታ አሰ’ ጋና። ኤንትካ ታና፥ ‘ኔኒ ኑ ፆሳ’ ያጋና” ያጌስ ጎዳይ።
\c 3
\s1 ሆሰይ ባ ማቸራ ስገተ
\p
\v 1 ጎዳይ ታና፥ “እስራኤለ አሳይ ሀራ ፆሳታኮ ስሚድ፥ ዛብበ ኡይ ያርሻናዉ ኮይኮካ፥ ጎዳይ ኤንታ ዶሰይሳዳ እዮ ዶሳ። እያ ሀራ ላገያባነ ላይማትያባ ግድኮካ ኔኒ እዮ ዶሳ” ያግስ።
\p
\v 2 ያግን፥ ታኒ እዮ ታማነ እቻሹ ብራ ሳንትመንነ ፄታነ እሻታሙ ክሎ ግራመ ባንጋን ሻማስ። 
\v 3 ታኒ እዮ፥ “ኔኒ ላይማቶናነ ሀራ አደራ ዶና ታራ ዳሮ ዎደ ዳናዉ ኮሼስ። ታንካ ኔራ ዳና” ያጋስ።
\p
\v 4 እስራኤለ አሳይ ካዎይ ዎይኮ ሀላቅ ባይና፥ ያርሾይ ዎይኮ ኤቃ ቱስ ባይና፥ ኤፉደ ማኦይ ዎይኮ ኤቃ ምስለይ ባይና ዳሮ ዎደ ዳና። 
\v 5 ሄሳፈ ጉየ፥ እስራኤለ አሳይ ጎዳ ባንታ ፆሳኮነ ባንታ ካዋ ዳዊታኮ ስማና። ዉርሰ ዎድያን ኤንቲ ኮኮርሸ፥ ጎዳኮነ እያ አንጁዋኮ ያና።
\c 4
\s1 ጎዳይ እስራኤለ ሞቴስ
\p
\v 1 ሀ ቢታን ደእያ አሳ ኡባ፥ ጎዳይ ሞትያባይ ደእያ ግሾ፥ እስራኤለ አሳቶ፥ ጎዳ ቃላ ስእተ። ሄስካ፥ ቢታ ቦላ አማነተ፥ ሲቆይነ ፆሳ ኤሮይ ባዋ። 
\v 2 ሀ ቢታ ቦላ ደኤይ ባደ፥ ዎርዶ፥ ሸምፖ ዎ፥ ካይሶቶነ ላይማ ፃላላ። ኤንቲ ዎጋ ኡባ መንሶና፤ ሱ ጉሶሶና። 
\v 3 ሄሳ ጋሶን ቢታ ኡባይ ዬካና፤ ቢታን ደእያ ኡባይ ዳቡራና። ሳአ ዶአት፥ ሳሎ ካፎትነ አባ ሞሎት ሀይቃና።
\p
\v 4 ህንተኖ፥ ካህነቶ፥ ታኒ ህንተና ሞትያባይ ደእያ ግሾ፥ ኦንካ ሀራ አሳራ ፓላመቶፎ፤ ዎይኮ ሀራ አስ ሞቶፖ። 
\v 5 ህንተ ጋላስነ ቃማ በቴታ፤ ናበትካ ህንተራ በቶሶና። ሄሳ ግሾ፥ ታኒ ህንተ አይዉ ይሳና። 
\v 6 ታ አሳስ ኤራተ ባይና ግሾ ይዶሶና። ህንተ ኤራተ እፅዳ ግሾ፥ ታካ ህንተ ታዉ ካህነ ግዶና መላ እፃስ። ህንተ ፆሳ ህግያ ዶግዳ ግሾ፥ ታካ ህንተ ናይታ ዶጋና።
\p
\v 7 ካህነታ ታይቦይ ዳር ዳር ብያ ዎደ ታና ጉጅ ጉጅ ናቅዶሶና፤ ታኒ ኤንታ ቦንቹዋ ቃራዳ ዬላያና። 
\v 8 ታ አሳ ናጋራይ ኤንታዉ ካ ግድዳ ግሾ ኤንቲ ታ አሳይ ባላባ ኦና መላ ኮዮሶና። 
\v 9 ካህነት ደርያፐ ዱማትቦኮና። ታኒ ኤንታ ሀኖታ ግሾ፥ ኤንታ ሴራና፤ ኤንታ ኦሱዋዳ ኤንታዉ ዛራና። 
\v 10 ኤንቲ ጎዳ አግዳ ግሾ ማና፥ ሽን ካሎኮና፤ ላይማታና፥ ሽን ናአ የሎኮና። 
\v 11 ላይማተ፥ ጋምእዳ ዎይነ ኡሽነ ማልአንቶ ዎይነ ኡሽ ታ አሳ ዎዛና ይስስ። 
\v 12 ኤንቲ ምፈ ኦሰትዳ ኤቃ ምስለ ዞረ ኦይቾሶና፤ ኤንታ ፃምአይ ኤንታ ኦይሻ ዛሬስ። ላይማተ አያናይ ኤንታ ባለስ፤ ኤንቲ ባንታ ፆሳፈ ሃክድ ላይማትዶሶና። 
\v 13 ደረታ ሁጰን ያርሾ ያርሾሶና፤ ሎኦ ኩያይ ደእያ ዎላ ጋርሳን፥ ፂዳ ጋርሳን እፃነ ጩይሶሶና።
\p ሄሳ ግሾ፥ ህንተ ማጫ ናይት ላይማቶሶና፤ ህንተ ናይታ ማቸት ላሞሶና። 
\v 14 ህንተ ማጫ ናይት ላይማትያ ዎደነ ህንተ ናይታ ማቸት ላምያ ዎደ ታኒ ሴርከ። አይስ ጊኮ፥ አደት ባንታ ሁጰን ላይማተይሳታራ ላገቶሶና፤ ኤንታራ ያርሾሶና። ሄሳ ግሾ፥ አኬክ ባይና ደረይ ያና።
\p
\v 15 “እስራኤለ አሳቶ፥ ህንተ ላይማትኮካ፥ ይሁዳ አሳይ ህንተይሳዳ ባላ ግዶፖ። ጋልጋላ ቦፕተ፤ ቤት-አዌና (ኢታተ ኬ) ከዮፕተ፤ ‘ደኦ ፆሳይ ኤርያ መላ’ ግድ ጫቆፍተ። 
\v 16 እስራኤለ አሳይ ጌላ ኡሳዳ ጌላትስ። ያትን፥ ጎዳይ ኤንታና ዳልጋ ደንባን ዶርሳ ማራዳ ዋትድ ሄማኔ? 
\v 17 ኤፍሬም ኤቃታራ ጋሄትስ፤ ኤንታ አጋግተ። 
\v 18 ኤንቲ ዳሮ ዎይነ ኡሻ ኡይ ስሚድ፥ ላይማተ አጎኮና፤ ኤንታ ሀላቃትካ ዬላያባ ዳሮ ዶሶሶና። 
\v 19 ኤንታ ጫርኮይ ኤፋና፤ ባንታ ኤቃስ ያርሽዳ ያርሾታ ጋሶን ኤንቲ ዬላታና።”
\c 5
\s1 ጎዳ ፕርዳይ እስራኤለ ቦላ
\p
\v 1 “ህንተኖ ካህነቶ፥ ሀይሳ ስእተ! ህንተኖ እስራኤለ አሳቶ፥ አኬክተ! ካዎ ኬ አሳቶ፥ ሎይ ስእተ! ሀ ፕርዳይ ህንተ ቦላ ፕርደትስ። ህንተ ምፅጳስ ፅሄ ግድደታ፤ ታቦረ ዙማ ቦላ ምጨትዳ ግተዳ ግድደታ። 
\v 2 ጌላት ዎ አግቦኮና፤ ሄሳ ግሾ፥ ታ ኤንታ ኡባ ሴራና። 
\v 3 ታኒ ኤፍሬማ ኤራይስ፤ እስራኤለይ ታፐ ጌምቤና። ኤፍሬማ፥ ኔኒ ሀእ ላይማ ግዳዳሳ፤ እስራኤለይ ቱንስ።”
\p
\v 4 “እስራኤለ አሳይ ባንታ ፆሳኮ ስሞና መላ ኤንታ ኢታ ኦሶይ ኤንታ ተቅስ። ላይማተ አያን ኤንታ ዎዛናን ደእያ ግሾ ኤንቲ ጎዳ ኤሮኮና። 
\v 5 እስራኤለ አሳ ኦቶሮይ ኤንታ ቦላ ማርካቴስ። እስራኤለ አሳይነ ኤፍሬማ አሳይ ባንታ ናጋራ ጋሶን በቶሶና፤ ይሁዳ አሳይካ ኤንታራ በቴስ። 
\v 6 ኤንቲ ጎዳስ ያርሻናዉ ባንታ ዶርሳ ዉድያነ መሄ ዉድያ ላግ ኤክድ እያ ኮያናዉ ባና፤ ሽን እ ኤንታፈ ሻከትዳ ግሾ እያ ደሞኮና። 
\v 7 ኤንቲ ላይማተን ናይታ የልዳ ግሾ ጎዳስ አማነትቦኮና። ሄሳ ግሾ፥ እስ አጌናን ኤንትነ ኤንታ ቢታይ ያና። 
\v 8 ግብአ ካታማን ሞይዘ፥ ራማ ካታማን ዛየ ፑንተ። ብንያመ አሳዉ፥ ‘ጉየ ስሚድ በእተ’ ያግድ ቤት-አዌናን ዋስተ። 
\v 9 ሴረትያ ዎደ ኤፍሬም ባይሳ ግዳና። እስራኤለ ኮቻ ግዶን ቱማ ሀናናባ ታኒ አዋጃና።
\p
\v 10 “ጎዳይ፥ ‘ይሁዳ ሀላቃት ዛዋ ሱግያ አሳ መላ ግድዶሶና፤ ታኒ ታ ሀንቁዋ ኤንታ ቦላ ድኦ ሃዳ ጉሳና። 
\v 11 ኤፍሬማ አሳይ ኤርድ ኤቃ ጎይንዳ ግሾ፥ ሱረ ፕርዳን ኡንኤትዶሶና፤ ትንቸትዶሶና። 
\v 12 ሄሳ ግሾ፥ ታኒ ኤፍሬማ አሳስ ብሌ፥ ይሁዳ አሳስ ፆ ግዳና።
\p
\v 13 “ ‘ኤፍሬም ባ ሀርግያ፥ ይሁድ ባ ማዱን በእዳ ዎደ ኤፍሬም አሶረ ቢታ ብስ፤ ሄ ግታ ካዋ ማዶ ኦይችስ። ሽን እ ኤንታ ሀርግያ ላናዉ ዎይኮ ኤንታ ማዱን ፓናዉ ዳንዳእቤና። 
\v 14 ሄሳ ግሾ፥ ታኒ ኤፍሬማስ ጋሞዳ ሀናና፤ ይሁዳስ ዎዳላ ጋሞዳ ሀናና። ታኒ ኤንታ መንረዳ ኤካ ባና፤ ኦንካ ኤንታ ታ ኩሸፐ አሸና። 
\v 15 ኤንቲ ባንታ ባላ አኬካና ጋካናዉነ ታና ኮያና ጋካናዉ ታኒ ጉየ ታ በሳ ስማና። ኤንቲ ባንታ ዋያን ታና ምንድ ኮያና’ ” ያጌስ።
\c 6
\s1 እስራኤለይ ስምቤና
\p
\v 1 እስራኤለ አሳይ፥ “ሃይተ! አነ ጎዳኮ ስሞስ። እ ኑና መንረስ፥ ሽን እ ኑና ኮላና፤ እ ኑና ማዱንፅስስ፥ ሽን እ ኑ ማዱን ቃቻና። 
\v 2 ናምኡ ጋላሳፐ ጉየ እ ኑና ፓና፤ ሄን ጋላሳን ኑ እያ ስንን ዳና መላ ኑና ደንና። 
\v 3 አነ ጎዳ ኤሮስ፤ እያ ኤራናዉ ምንድ ካሎስ። ፃልቀይ ዶለይሳዳ እ ቆንጫና፤ ቶርቸ እር የይሳዳ እ ኑኮ ያና” ያግዶሶና።
\p
\v 4 ጎዳይ፥ “ታ ህንተና ኤፍሬማ አሳ ዋቶ? ታ ህንተና ይሁዳ አሳ ዋቶ? ህንተ ሲቆይ ዎንታ ፃሳ መላ፤ ኤለስድ ይያ አካ መላ። 
\v 5 ሄሳ ግሾ፥ ታኒ ናበታ ባጋራ ህንተና ቃንፀረስ፤ ታ ዶናፐ ከይዳ ቃላን ህንተና ዎስ። ታ ፕርዳይ ህንተ ቦላ ፖኦዳ ዋጋግ ጋና። 
\v 6 ታ ያርሾ ግዶናሽን ማሮታ ኮያይስ፤ ፁሳ ያርሾ ግዶናሽን ፆሳ ኤሮ ኮያይስ።
\p
\v 7 “ሽን ኤንቲ አዳመዳ፥ ጫቆ መንዶሶና፤ ያን ታዉ አማነቶና እፅዶሶና። 
\v 8 ጋላዳ ካታማይ ሱ ጉክያ ኢታ ኦሶ ኦያ አሳይ ኩምዳ ካታማ። 
\v 9 ፓንጋት አሰ ዎናዉ ቆሰትድ ናገይሳዳ ካህነታ ጩጋይ ሄሳዳ ናጎሶና። ሴከማ ካታማ ኤፍያ ኦግያን ናግድ አሰ ዎኦሶና፤ ኤንቲ ዬላያ ዎራን ኦሶ ኦሶና። 
\v 10 ታኒ እስራኤለ አሳ ግዶን ዳጋንያባ በአስ። ኤፍሬማ ግዶን ላይማተ ደኤስ፤ እስራኤለይ ቱንስ።
\p
\v 11 “ይሁዳ፥ ታኒ ታ አሳ ድኡዋ ዛርያ ዎደ ነዉ ቃስ ጫካ ዎደ ጊግሳስ።
\c 7
\p
\v 1 “ታኒ እስራኤለ ፓናዉ ኮይያ ዎደ ኤፍሬማ ናጋራይነ ሳማረ አሳ ኢታ ኦሶይ ቆንጭስ። ኤንቲ ኡባ ዎደ ጭሞሶና፤ ካይሶት መንድ ገሎሶና፤ ፓንጋት ከይድ ቦንቆሶና። 
\v 2 ሽን ታኒ ኤንታ ኢታ ኦሶ ኡባ ኤረይሳ አኬኮኮና። ኤንታ ኢታ ኦሶይ ኤንታ ናቅ ኦይክስ፤ ሄ ኢታ ኦሶይ ኡባ ዎደ ታ ስንን ደኤስ።
\p
\v 3 “ኤንቲ ካዋ ባንታ ኢታተን፥ ሀላቃታ ባንታ ዎርዱዋን ኡፋይሶሶና። 
\v 4 ኤንቲ ኡባይ ላሞሶና፤ ሙኑቃይ ደንዳና ጋካናዉ ዳቦ ኡከይስ ታማ ሺሾ ኮሾናይሳዳ ኤንቲ ቴልዳ ጮጨ መላ። 
\v 5 ባንታ ካዋ ቦንቾ ባኣለ ጋላሳን ሀላቃት ዎይነ ኡሻን ማትዶሶና። እካ ቀልቅሰይሳታስ ባ ኩሽያ እሚስ። 
\v 6 ኤንታ ዎዛናይ ታማ ጮጨ መላ፤ ኤንቲ ሺቅድ ኢታባ ማቀትዶሶና። ኤንታ ሀንቆይ ቃማ ኩመ ጩይሸ አቄስ፤ ሳእ ዎንትያ ዎደ ታማ ላጮዳ ኤፄስ። 
\v 7 ኤንቲ ኡባይ ቴልዳ ጮጨ መላ ባንታ ሀላቃታ ሞሶና። ኤንታ ካዎት ኡባይ ኩንድዶሶና፤ ኤንታፈ ኦንካ ታና ፄገይ ባዋ።
\p
\v 8 “ኤፍሬማ አሳይ ሀራ ካዎተ አሳራ ዋላከትስ፤ ኤፍሬማ አሳይ ሽረትቦና ኡይ መላ ግድስ። 
\v 9 አላጋት እያ ዎልቃ ምዶሶና፥ ሽን እ ሄሳ ኤርቤና፤ እያ ሁጰይ ፑሉምስ፥ ሽን እ ሄሳ አኬክበና። 
\v 10 እስራኤለ አሳ ኦቶሮይ ኤንታ ቦላ ማርካቴስ። ሄስ ኡባይ ሀንንካ ኤንቲ ጎዳኮ፥ ባንታ ፆሳኮ፥ ስምቦኮና ዎይኮ እያ ኮይቦኮና።
\p
\v 11 “ኤፍሬማ አሳይ ሆለዳ ኤያነ ጮ ጭመተይሳታ። ኤንቲ ማዶ ደማናዉ እስ ቶሆ ግብፀ፤ እስ ቶሆ አሶረ ስሞሶና። 
\v 12 ኤንቲ ብያ ዎደ ታኒ ኤንታ ቦላ ግተ የጋና፤ ታኒ ኤንታ ካፎ ኦይክያዳ ኦይካና። ኤንታ ኢታ ኦሱዋ ግሾ ታኒ ኤንታ ሴራና።
\p
\v 13 “ኤንታ አየ! ኤንቲ ታፐ ሃክዶሶና። ኤንታዉ ዮ ግዶ! ኤንቲ ታ ቦላ ማካልዶሶና። ታኒ ኤንታ ዎዛናዉ ኮያስ፥ ሽን ኤንቲ ታ ቦላ ዎርዶ ሃሳዮሶና። 
\v 14 ባንታ ሂፃን ዝንእድ ዘሌሎሶና፥ ሽን ባንታ ዎዛናፐ ዎሶኮና። ካስነ ዎይነ ኡሻስ ባንታ አሳተ ጋሮሶና፥ ሽን ኤንቲ ታፐ ሃክዶሶና።
\p
\v 15 “ኤንታ ሎህስዳይነ ምንዳይ ታና፥ ሽን ታዉ ኢታባ ማቀቶሶና። 
\v 16 ኤንቲ ሀዳባኮ ስምዶሶና። ኤንቲ አማንና ዶንገ ግድዶሶና። ኤንታ ሀላቃት ኢታባ ኦደትዳ ግሾ ማሻን ዉራና፤ ሄስካ ኤንታዉ ግብፀን ሚቻስ ግዳና።
\c 8
\s1 እስራኤለይ ጫርኮ ቡጨስ
\p
\v 1 “ሞይዘ ፑና! ኤንቲ ታ ጫቁዋነ ታ ህግያ መንዳ ግሾ፥ ጎዳ አሳ ቦላ ሞርከይ አንኮዳ አለስ። 
\v 2 እስራኤለ አሳይ፥ ‘አቤት ኑ ፆሳዉ፥ ኑኒ ነና ኤሮስ’ ያግድ ታኮ ዋሶሶና። 
\v 3 ሽን እስራኤለ አሳይ ሎኦባ እፅዳ ግሾ፥ ሞርከይ ኤንታ የደና። 
\v 4 ኤንቲ ታና ኦይቾና ባንታዉ ካዎታ ካዎዶሶና፤ ታ ኤሮና ደእሽን ባንታዉ ሀላቃታ ዶርዶሶና። ያናዉ ማችድ ኤቃ ምስለታ ባንታ ብራፐነ ዎርቃፈ መዶሶና። 
\v 5 ሳማረ አሳዉ፥ ህንተ ማር ዳንስድ መዳ ኤቃ ታ እፃስ፤ ታ ሀንቆይ ህንተ ቦላ ኤፅስ። ኤንቲ ቱንዳ መላ አዉደ ጋካናዉ ዳኔ? 
\v 6 ሀ ማራ ኤቃ ምስለይ ኩሸ ሂላን መትስፐ አትሽን፥ እ ፆሰ ግደና። ሳማረ ኤቃ ምስለይ መቀረታና።
\p
\v 7 “ኤንቲ ጫርኮ ዘርድ ጎተ ቡጮሶና። ኤቆን ደእያ ኤንታ ካስ አይፈይ በንተና፤ ለይካ ባዋ፤ አይፈይ ደእኮካ አላጋት ማና። 
\v 8 እስራኤለ አሳይ ሀእ አላጋ አሳ ግዶን ምተትዶሶና፤ ኤንቲ ፓና አስ ግድዶሶና። 
\v 9 ኤንቲ ባዞ ሀረይ ባርካ ቶይላተይሳ መላ ቶይላትሸ አሶረ ብዶሶና። ኤፍሬማ አሳይ ባንታ ሚሽያን ላገ ሻምዶሶና። 
\v 10 ባንታና ማዳና መላ ሚሸን ሻምኮካ ታ ኤንታ ሺሻና። ካረ ቢታ ካዎትነ ሀላቃት ኤንታና ኡንኤን ኤንቲ ጮ ያና።
\p
\v 11 “ኤፍሬማ አሳይ ናጋራ ያርሾ ያርሽያ ዳሮ በሳታ ኬፅስ፥ ሽን ሄ ያርሾ በሳት ናጋራ ኦያ በሲ ግድዶሶና። 
\v 12 ታኒ ኤንታዉ ታ ህግያን ዳሮባ ፃፋስ፥ ሽን ኤንቲ ሄ ህግያ አላጋባዳ ፄልዶሶና። 
\v 13 ኤንቲ ያርሻናዉ ዶሶሶና፤ ያርሾ አሹዋ ሞሶና፥ ሽን ጎዳይ ኤንታ ያርሹዋ ኤክቤና። እ ሀእ ኤንታ ናጋራ ሀሳያና፤ ኤንታ ናጋራ ግሾ ኤንታ ሴራና፤ ኤንቲ ግብፀ ቢታ ስማና። 
\v 14 እስራኤለ አሳይ ባና መዳይሳ ዶግድ፥ ካዎ ጋታ ኬፅስ። ይሁዳ አሳይ ግምበትዳ ዳሮ ካታማታ ኬፅስ። ሽን ታኒ ሄ ካታማታን ታማ የድን፥ ኤንታ ሚፃ ማና” ያጌስ።
\c 9
\s1 እስራኤለይ ሴረታና
\p
\v 1 እስራኤለ አሳቶ፥ ኡፋይቶፍተ! ሀራ ካዎታዳ ፖጩ ጎፕተ! ህንተ ህንተ ፆሳፈ ሃክድ ላይማትደታ፤ ካ ጌሽያ ዉዱማን ላይማተስ እምያ ጋትያ ዶስደታ። 
\v 2 ሄሳ ግሾ፥ ህንተ ዉዱማፈ ካ፥ ጉምእያ በሳፈ ዎይነ ኡሻ ደመከታ፤ ዎይነይ ህንተዉ አይፈና። 
\v 3 ኤንቲ ጎዳ ቢታን ጋምኦኮና። ኤፍሬም ግብፀ ቢታ ስማና፤ አሶረ ቢታን ቱና ካ ማና።
\p
\v 4 ኤንቲ ጎዳስ ዎይነ ኡሻ ያርሾ ጉሶኮና፤ ኤንታ ያርሾይ እያ ኡፋይሰና። ሄ ያርሾይ ኤንታዉ ሾቻ መላ ግዳና፤ ሄሳ ምያ ኡባይ ቱናና። ሄ ካይ ኤንታ ኮሻ ፃላላ ዛራናሳፈ አትሽን፥ ጎዳራ ደእያ እስፈተስ ማደና። 
\v 5 ጎዳ ህንተ ቦንቻና መላ እ ህንተዉ እምዳ ባኣለ ጋላሳታን ህንተ አይ ኦኔ? 
\v 6 ኤንቲ ዮፐ ከስ ኤክኮካ ግብፀይ ኤንታ ሺሻና፤ መምፕሳ ካታማይ ኤንታ ሞጋና። ኤንቲ ሺሽዳ ብራ ሚሸ ኡባ ሻራፍ ምታና፤ ኤንቲ ደእያ በሳን ቡሎይ ዶላና።
\p
\v 7 ሴራ ጋላስ ይስ፤ ፕርዳ ዎደይ ጋክስ። እስራኤለ አሳይ ሄሳ ኤሮ! ህንተ ናጋራ ግሾነ ሞርከተ ግሾ ናበይ ኤያ መላ ፆሳ አስ ጌተትዳይስ ጎሻ መላ ታይበትስ። 
\v 8 ናበይ ፆሳራ ግድድ፥ ኤፍሬማ ናጌስ፤ ሽን እያ ኦግያን ፅሄይ የገትስ፤ ፆሳ ኬን እያ ሞርከተ ናጌስ። 
\v 9 ግብአ ካታማን ሀንዳይሳዳ ኤንቲ ቱንዶሶና። ፆሳይ ኤንታ ናቁዋ ሀሳያና፤ ናጋራ ግሾ ኤንታ ሴራና።
\p
\v 10 ጎዳይ፥ “ታኒ መላ ቢታን ዎይነ አይፈ ደምዳይሳዳ እስራኤለ አሳ ደማስ። ታኒ ባላሰ ምን ኮይሮ አይፈ በእዳይሳዳ ህንተ አዋታ በአስ። ሽን ኤንቲ ብኤል-ፋጎራ ጌተትያ በሳ ይድ፥ ዬላይያ ኤቃስ ባንታና ዱማይዶሶና፤ ኤንቲ ሄ ዶስዳ ኤቃዳ ቱንዶሶና። 
\v 11 ኤፍሬማ ቦንቾይ ካፎዳ ፓል ያና፤ ህዛፐ ጉየ የሎይ ባዋ፤ ቃንቶይ ባዋ፤ አተ ባዋ። 
\v 12 ኤንቲ ናአ የልድ ድችያባ ግድኮካ ታ ኤንታ ዎ ዉርሳና። ታኒ ኤንታፈ ሃክዳ ዎደ ኤንታና አየ! 
\v 13 ኤፍሬም ሎኦ በሳን ቶከትዳ ዛምባ ም መላ ሀንን በአስ፥ ሽን ባ ናይታ ሹካስ አ እሚስ” ያግስ።
\p
\v 14 አቤት ጎዳዉ፥ ኤንታዉ እማ! ነ ኤንታዉ አይ እማኔ? ነ ኤንታዉ ቦሸትያ ኡሎነ መልዳ ን እማ።
\p
\v 15 ጎዳይ፥ “ኤንታ ኢታተ ግሾ ታኒ ጋልጋላን እፆ ዶማስ። ኤንታ ናጋራ ግሾ ታኒ ኤንታ ታ ኬፈ ጎዳና፤ ህዛፐ ጉየ ታ ኤንታ ዶስከ፤ ኤንታ ሀላቃት ኡባይ ጌላታ። 
\v 16 ኤፍሬም ደሸትን፥ እያ ፃጶይ መልስ፤ አይፈይካ ባዋ። ኤንቲ ናአ የልኮካ ታኒ ኤንቲ ዶስያ ናይታ ዎና” ያግስ።
\p
\v 17 ኤንቲ እያዉ ኪተቶና እፅዳ ግሾ ታ ፆሳይ ኤንታ ፕፅር ሆላና፤ ኤንቲ ካዎተታ ግዶን ቶይላትሸ ዳና።
\c 10
\p
\v 1 እስራኤለ አሳይ ዳሮ አይፈ አይፍያ ዳይዳ ዎይነ መላ፤ ኤንታ አይፈይ ዳርዳ መላ ኤቃ ያርሾ በሳታ ዳርስ ኬፅዶሶና። ኤንታ ቢታይ ዱረትዳ ኬና ጎይንያ ኤቃ ቱሳታ አሌቅስድ መዶሶና። 
\v 2 ኤንታ ዎዛናይ ጫከትስ፤ ሀእ ኤንቲ ባንታ ናጋራ ቶካና። ጎዳይ ኤንታ ያርሾ በሳታ ላላና፤ ኤንታ ኤቃ ቱሳታ ይሳና።
\p
\v 3 ሄ ዎደ አሳይ፥ “ኑኒ ጎዳስ ያይቦና ግሾ፥ ኑስ ካዎይ ባዋ። ሽን ካዎይ ደእያኮካ ኑስ አይ ኦኔ?” ያጋና። 
\v 4 ኤንቲ ሀኖና ኡፋይሳ ቃላ ገሎሶና፤ ዎርዶን ጫቆሶና፤ ሄሳ ግሾ፥ ዎያ ሀርመይ ጋደን ዶለይሳዳ ኤንታ ቦላ ፕርድ ዶላና። 
\v 5 ሳማረ ካታማን ደእያ አሳይ ቤት-አዌናን ደእያ ማራ ምስልያስ ያሻን ኮኮሮሶና። እያ ቦንቾይ እያፐ ቃረትዳ ግሾ እያዉ ዬካና፤ ሄ ኤቃ ምስልያ ካህነት ዋሳና። 
\v 6 ሄ ኤቃ ምስለይ አሶረ ቶከትድ፥ ብድ፥ ግታ ካዋስ እሞታ ግድድ እመታና። ኤፍሬም ዬላታና፤ እስራኤለይ ኤቃ ምስልያ ግሾ ካዉያና።
\p
\v 7 ሳማረ ካዎይ ሃ ጎፖንቶ ግድድ ያና። 
\v 8 እስራኤለ አሳይ አዌና ካታማን ኤቃስ ጎይንሸ፥ ናጋራ ኦያ ቃ በሳት ላለታና። ኤንታ ያርሾ በሳን አጉንነ ጎምኦረይ ዶላና። ሄ ዎደ ኤንቲ ደረታኮ፥ “ኑና ቆስተ!” ዙማታኮ፥ “ኑና ገንተ” ያጋና።
\p
\v 9 ጎዳይ፥ “እስራኤለ አሳዉ፥ ግብአን ህንተ ናጋራ ኦሶ ዶምዳ ዎድያፐ፥ ሀች ጋካናዉ ናጋራ ኦሶ አግበከታ። ሄሳ ግሾ፥ ኢታ ኦይሳታ ግብአን ኦል ዉርስቤኔ? 
\v 10 ታኒ ዶስዳ ዎደ ሄ ጌላታ ሴራና። ኤንቲ ኦዳ ዳሮ ናጋራ ግሾ ታኒ ኤንታ ሴርያ ዎደ ካዎተት ኤንታ ቦላ ደንዳና። 
\v 11 ኤፍሬም ካ የናዉ ዶስያ ዋ ከስዳ ዎፋኖ መላ። ሽን ታኒ እያ ሎእያ ሞርግያን ቃምባራ ዎዳ ዋፃና። ይሁዳ አሳይ ዎርፃፋና፤ ያይቆባ አሳይ ሽረቻና። 
\v 12 ጎዳይ ይድ ፅሎተ ህንተ ቦላ ቡክሳና ጋካናዉ እያ ኮይተ። ህንተ ፅሎተ ዘርያባ ግድኮ መርና ሲቆ ጫካና። ሄሳ ግሾ፥ ኦ ቢታ ዎርፃፍተ። 
\v 13 ሽን ህንተ፥ ህንተ ኦግያንነ ህንተ ዳሮ ኦላንቾታን አማነትዳ ግሾ፥ ኢታተ ዘርድ ናጋራ ጫክደታ፤ ህንተ ዎርዱዋ አይፍያ ምደታ። 
\v 14 ህንተ ቦላ ዎልቃማ ኦል ደንዳና፤ በን ካዎይ ሳልማን ቤት-አርበላ ካታማ ኦልድ ላልዳይሳዳነ አየታነ ናይታ ይስዳይሳዳ ቃስ ህንተ ሚፃታ ይሳና። 
\v 15 ቤተለ ካታማን ደኤይሳቶ፥ ህንተ ናጋራይ ዳሮ ግድያ ግሾ ሄሳ መላባይ ህንተና ጋካና። ሄ ጋላስ ሳእ ዎንትያ ዎደ እስራኤለ ካዎይ ሀይቃና።
\c 11
\s1 ጎዳይ እስራኤለ ዶሴስ
\p
\v 1 “እስራኤለይ ናአ ደእያ ዎደ እያ ዶስዳይ ታና፤ ታ ናኣ ግብፀፈ ፄጋስ። 
\v 2 ታኒ ኤንታ ዳርሳዳ ፄግን፥ ኤንቲ ታፐ ዳሮ ሃክድ ብዶሶና። ባኣለ ኤቃታስ ያርሾ ያርሽዶሶና፤ ኤቃ ምስለታስ እፃነ ጩይስዶሶና። 
\v 3 ኤፍሬማ አሳ ኩሽያ ኦይካዳ ሄመ ታማርስዳይ ታና፥ ሽን ኤንታ ፓዳይ ታና ግደይሳ ኤሮኮና። 
\v 4 ታኒ ኤንታ ቃንነ ሲቆ ዎዶሮን ጎቻስ፤ ኤንታ ሞርገፈ ቃምባራ ደንዳ ሆካዳ ኤንታ ሙዛስ። 
\v 5 ኤንቲ ታኮ ስሞና እፅድ ግብፀ ቢታ ስማና፤ አሶረ ቢታ ካዎይ ኤንታ ቦላ ካዎታና። 
\v 6 ኤንታ ካታማን ማሽ ደንዳና፤ ኤንታ ካታማታ ፐንገታ መንረና፤ ኤንታ ዞረታይ ላለታና። 
\v 7 ታ አሳይ ታፐ ሃካናዉ ኮይስ። ኤንቲ ፆሳኮ ዋስኮካ፥ እ ኤንታና ቦንቸና። 
\v 8 ኤፍሬም፥ ታኒ ነና ዋታዳ አጎ? እስራኤለ፥ ታኒ ነና ዋታዳ አ እሞ? ታኒ ነና ዋታዳ አዳማ ካታማዳ ኦ? ታኒ ነና ዋታዳ ፃቦይማ ካታማዳ ኦ? ታኒ ነና ዳሮ ዶስያ ግሾ ታ ዎዛናይ ሄሳ ኤሮ ጌና። 
\v 9 ታኒ ህንተ ግዶን ደእያ ጌሻ ፆሳፈ አትሽን፥ አሰ ግድከ። ሄሳ ግሾ፥ ታኒ ታ ሱልያ ሀንቁዋ ህንተ ቦላ ኤህከ፤ ናምአን ኤፍሬማ ይስከ፤ ታ ሀንቁዋራ ህንተኮ ዪከ። 
\v 10 ኤንቲ ጎዳ ካላና፤ እካ ጋሞዳ ጉዳና። እ ጉድያ ዎደ እያ ናይት ዉሎሀ ባጋፈ ኮኮርሸ ያና። 
\v 11 ግብፀፈ ካፎዳ፥ አሶረፐ ሆለዳ ፓልሸ ያና። ታኒ ኤንታ፥ ኤንታ ኬን ኬን ዎና። ታኒ ጎዳይ ሄሳ ኦዳስ” ያግስ።
\s1 እስራኤለ ናጋራ
\p
\v 12 ኤፍሬማ አሳይ ዎርዶን፥ እስራኤለ አሳይ ጭሞን ታና ተቅዶሶና። ይሁዳ አሳይ አማንያ ጌሻ ፆሳ ቦላ ፃልታምስ።
\c 12
\p
\v 1 ኤፍሬማ አሳይ ዎንታፈ ኦማርስ ጋካናዉ ዶሎሀ ጫርኮ ኦይኬስ ዎይኮ የደስ። ኤንቲ ዎርዶነ ጌላተ ዳርሶሶና፤ አሶረ ቢታራ ጫቅዶሶና፤ ሻማሆ ዛይተ ግብፀ ቢታ የዶሶና።
\p
\v 2 ጎዳስ ይሁዳ አሳራ ሞቶይ ደኤስ፤ እ ያይቆባ ናይታ ኤንታ ኦግያዳ ሴራና፤ ኤንታ ኦሱዋዳ ኤንታዉ ዛራና። 
\v 3 ያይቆብ ባ አየ ኡሎን ደእሸ ባ እሻ ግንድያ ኦይክስ። ድጭ ጋክድ ፆሳራ ቡተትስ፤ 
\v 4 ኪታንቾራ ባፀትድ ፆንስ። ባና ኬሀ አይፈን ፄላና መላ ባ እሻ ዬክድ ዎስስ። ያይቆብ ፆሳ ቤተለን ደምን ፆሳይ ያን እያራ ሃሳይስ። 
\v 5 እ ጎዳ፥ ኡባፈ ዎልቃማ ፆሳ። እያ ኤረትዳ ሱንይ ጎዳ ጌተቴስ። 
\v 6 ሄሳ ግሾ፥ ህንተ ፆሳኮ ስምተ፤ ሲቆነ ሱረ ፕርዳ ምን ኦይክተ፤ ህንተ ፆሳይ ኦና ጋካናዉ ናግተ። 
\v 7 ዛልአንቾይ ዎርዶ ምዛነን ዛልኤስ፤ እ አሳ ጭማናዉ ዶሴስ። 
\v 8 ኤፍሬም፥ “ታኒ ዳሮ ዱረ፤ ታኒ ታዉ አቆ ደማስ። ታ አቆ ኡባን ታናን ኤንቲ ባላ ዎይኮ ናጋራ ደሞኮና። 
\v 9 ሽን ታኒ ህንተና ግብፀ ቢታፈ ከሳዳ ኤህዳ ጎዳ፥ ህንተ ፆሳ፤ ሻቃራ ባኣለ ጋላስ ህንተ ዱንካነን ደእዳይሳዳ ታ ህንተና ዛራ ዱንካነን ዎና። 
\v 10 ታኒ ናበታስ ኦዳስ፤ ዳሮ ቆንጨ ኤንታዉ እማስ፤ ኤንታ ባጋራ ዳሮ ሌምሶታ ኦዳስ” ያግስ።
\p
\v 11 ጋላድ ኢታ ናጋራንቾ፤ ጋላዳ አሳት ፓናይሳታ። ኤንቲ ጋልጋላን ኮርማታ ያርሻና። ኤንታ ያርሾ በሳይ ጎሻን ደእያ ኬላ ሹቻዳ ላለታና።
\p
\v 12 ያይቆብ ሶረ ቢታ ባቃትስ፤ እስራኤለይ ማቾ ኤካናዉ ኡነ ኦስ። ኮይታ እማናዉ ያን ዶርሰ ሄምስ። 
\v 13 ጎዳይ እስራኤለ አሳ ናበታ ባጋራ ግብፀ ቢታፈ ከስድ ሄ ናበታ ባጋራ ኤንታ ናግስ። 
\v 14 ሽን ኤፍሬም ጎዳ ዳሮ ሀንቀስ፤ እ ሱ ጉስዳ ግሾ እያ ጎዳይ አቻና፤ እያ ጫሻ እያዉ ዛራና።
\c 13
\s1 ፆሳ ሀንቆይ እስራኤለ ቦላ
\p
\v 1 ኤፍሬም ኦደትዳ ዎደ ስእዳ ኡባይ ያሻን ኮኮርስ፤ እስራኤለ ቢታን ኤንቲ ቦንቸትዳ አስ። ሽን ባኣለ ኤቃ ጎይንዶሶና፤ ሄ ናጋራ ጋሶን ሀይቅዶሶና። 
\v 2 ሀእካ ናጋራ ቦላ ናጋራ ኦሶና፤ ባንታ ብራ ሼሽድ ባንታዉ ኤቃ መዶሶና፤ ሂላን ኦሰትዳ ምስለታ ጊግስዶሶና፤ ኡባይካ ኩሸ ሂላን መትዶሶና። አሳይ ኤንታባ ኦድሸ፥ “ያርሽያ አሳይ ማራ ኤቃ ምስለታ ዬርተ” ያጎሶና። 
\v 3 ሄሳ ግሾ፥ ኤንቲ ዎንታ ሻራ መላ ዎይኮ ዎንታ ፃሳ መላ ዎይኮ ጫርኮይ ዉዱማፈ ደንድ ኤፍያ ፑኖ መላ ዎይኮ ማስኮተራ ከያ ጩያ መላ ግዳና።
\p
\v 4 ጎዳይ “ታኒ ህንተና ግብፀ ቢታፈ ከሳዳ ኤህዳ ጎዳ፥ ህንተ ፆሳ። ህንተ ታፐ አትሽን፥ ሀራ ፆሲ ኤረከታ፤ አሸይ ታፐ ሀር ባዋ። 
\v 5 ባዞን፥ መላ ቢታን ታኒ ህንተና ናጋስ። 
\v 6 ታኒ ህንተና ሙዝን፥ ምድ ካልድ ኦቶርትደታ፤ ሄሳፈ ጉየ ታና ዶግደታ። 
\v 7 ሄሳ ግሾ፥ ታኒ ህንተ ቦላ ጋሞ ግዳና፤ ማሄ መላ ኦገ ዶናን ዙጋና። 
\v 8 ማር ኤከትዳ ማሄ መላ ታኒ ህንተራ ጋሄታዳ ታ ህንተና ፑዛና። ታኒ ህንተና ጋሞዳ መንረና፤ ባዞ ዶአዳ ህንተና ፖሻና።
\p
\v 9 “እስራኤለ አሳቶ፥ ህንተ ታ ቦላ፥ ህንተና ማደይሳ ቦላ ደንድዳ ግሾ ታ ህንተና ይሳና። 
\v 10 ህንተ ታና፥ ‘ኑስ ካዎነ ሀላቃ እማ’ ያግድ ኦይችደታ። ህንተና አሽያ ህንተ ካዎይ አኔ? ካታማታን ደእያ ህንተ ሀላቃት አዉን ደኦና? 
\v 11 ታኒ ታ ሀንቁዋን ህንተዉ ካዎ እማስ፤ ታ ይሉዋን እያ ደንስ። 
\v 12 ኤፍሬማ ባላይነ ናጋራይ ፃፈትድ ኡትስ። 
\v 13 እቀ ኦይክዳ ማጫስ ኡንኤተይሳ መላ ኡንእ እያ ቦላ ያና። ሽን እ ኤር ባይና ናአ፤ የለትያ ዎደይ ጋክን፥ ባ አየ ኡሎፐ ዎና እፅያ ናአ መላ። 
\v 14 ታኒ ኤንታ ዱፎፐ አሻና፤ ሀይቆ ዎልቃፈ ዎዛና። ሀይቆ፥ ነ ጋዶይ አዉኔ? ስኦለ፥ ነ ይሶይ አዉኔ? ታኒ ታ አሳስ ቃትከ። 
\v 15 ኤፍሬም ባ እሻታ ግዶን ምንኮካ፥ ጎዳይ የድዳ ዶሎሀ ባጋ ጫርኮይ ባዞፈ ጫርክሸ ያና፤ እያ ፑልቶይ ኤቃና፤ እያ ሃይ መላና። እ ምንጅዳ አልኦ ሚሸ ኡባይ ቦንቀታና። 
\v 16 ሳማረ አሳይ ባንታ ፆሳ ቦላ ጌላትዳ ግሾ፥ ሴራ ኤካናዉ በሴስ። ኤንቲ ማሻን ቡሰታና፤ ኤንታ ናይት ትንቸታና፤ ኤንታ ቃንትዳ ማጫሳታ ኡሎይ ዳከታና” ያጌስ።
\c 14
\s1 ጎዳኮ ስሞይ ኤህያ አንጆ
\p
\v 1 እስራኤለ አሳዉ፥ ህንተ ናጋራ ጋሶን በትድ ኩንድዳ ግሾ ሀእ ጎዳ፥ ህንተ ፆሳኮ ስምተ። 
\v 2 ጎዳኮ ስሚድ፥ ሀይሳዳ ያግድ ዎስተ፤ “ኑ ናጋራ ኡባፈ ኑና ማራ፤ ኑኒ ኑ መተርሻ አይፈ ግድዳ ጋላታ ነዉ ሺሻና መላ ነ ኑና ነ ኬሀተን ሺሻ ኤካ። 
\v 3 አሶረይ ኑና አሸና፤ ኑ ኦላ ፓራታንካ አማነቶኮ። ኑኒ ኑ ኩሸን መዳ ኤቃ ምስለታ ኡባ፥ ‘ኑ ፆሳታ’ ጎኮ። አዋይ ባይናይሳታስ ቃተይ ነና” ያግተ።
\p
\v 4 ጎዳይ፥ “ታ ሀንቆይ ኤንታፈ ስምዳ ግሾ፥ ታኒ ኤንታ ማካላ ሀኑዋፐ ኤንታ ፓዳ፥ ኤንታ ዎዛናፐ ሲቃና። 
\v 5 ታኒ እስራኤለ አሳስ አካ ግዳና፤ ኤንቲ ጪሻዳ ጭይድ፥ ልባኖሰ ዝጋ መላ ፃጶ የዳና። 
\v 6 ኤንታ ዶላይ ጭልአና፤ ኤንቲ ሻማሆዳ ሎአና። ኤንታ ሳዎይ ልባኖሰ ዝጋዳ ቶንኩ ጋና። 
\v 7 አሳይ ስሚድ ታ ኩያ ጋርሳን ሸምፓና፤ ኤንቲ ዶላዳ ጭልአና፤ ኤንቲ ዎይነዳ ጪያና፤ ልባኖሰ ዎይነ ኡሻዳ ኤረትያባ ግዳና። 
\v 8 ኤፍሬማ አሳዉ፥ ህዛፐ ጉየ ኤቃ ምስለራ ታዉ አይ ጋሄተ ደኢ? ህንተ ዎሳ ስኤይነ ህንተና ናገይ ታና። ታኒ ጭልኦ ዝጋ መላ፤ ህንተ አይፈ አይፋና መላ ኦይ ታና” ያጌስ።
\p
\v 9 ጭንጫተ ደእያ ኦንካ ሀይሳ አኬኮ፤ ዎዛን ደእያ ኦንካ ሄሳ ኤሮ። ጎዳ ኦገይ ሱረ፤ ፅሎት ሄ ኦግያራ ሄመቶሶና፤ ሽን ናጋራንቾት እያን በቶሶና።