\id HEB - GOOFA FULL BIBLE
\ide UTF-8
\h እብራወ ኪታ
\toc1 እብራወ ኪታ
\toc3 እብራ
\toc2 እብራወ
\mt1 እብራወ አሳስ
\mt2 ፃፈትዳ ኪታ
\imt ጋ ቆፋ
\ip ሀ ኪታይ ፃፈትዳይ፥ ዎልቃማ መቶይ ጋክን፥ ባንታ አማኑዋ አጋናዉ ማትዳ አማንያ አሳሳ። ሀ ማፃፋ ፃፈይ፥ የሱስ ክርስቶሲ ዉርሰነ ቱማ ፆሳ ቆንጨ ግደይሳ እብራወ አሳስ በሴስ። አማንያ አሳይ ባንታ አማኑዋን ምናና መላ ኤንታ ምንስ። እ ሄሳን ሄ አይፈ ቆፋታ ቆንጭስድ በሴስ።
\ipi 1. የሱሲ ባ ኤክዳ መቱዋን አዋስ ቱማ ኪተትዳ መርና ፆሳ ናአ። እ ፆሳ ናአ ግድዳ ግሾ፥ ጋልአ ጫቁዋ ዎደ ደእያ ናበታፐ፥ ኪታንቾታፐነ ሙሰፐ ቦላ።
\ipi 2. የሱሲ ጋልአ ጫቁዋ ካህነታፐ ዳሮ አያ መርና ካህነ ግደይሳ ፆሳይ ባ ሁጰን ማርካትስ።
\ipi 3. የሱሳ ባጋራ አማንያ አስ ናጋራፐ፥ ያሻፈነ ሀይቆፐ አቴስ። የሱሲ ካህነ ሀላቃ ግደይሳዳ፥ ካሰ እብራወታ አማኖ ዎጋንነ መሄ ያርሾን ኩያዳ በንትያ አቶተ ኦሱዋ ሀእ ቱማ ኦስ።
\ip ፃፈይ እስራኤለ አሳ ታርከን ዳሮ ኤረትዳ አሳ አማኖ ሌምሶ ኦ ኤክድ (ሸም 11) ሀ ማፃፋ ናባብያ አሳይ ባንታ አማኑዋን ምናና መላ አኬክሴስ። ሄሳዳካ፥ ሸምፖ 12 ናባብያ አሳይ ባንታ አይፍያ የሱሳ ቦላ ዎድ፥ ባንታ አማኑዋን ምናና መላነ አይ መቶይነ ዋየይ ጋክኮካ፥ ገንጫና መላ ዞሬስ። ዉርሰን ዞረንነ አኬክሶ ቃላን ባ ኪታ ኩዬስ።
\iot ማፃፋ አይፈ ቆፋታ
\io1 ፆሳይ ክርስቶሳ ባጋራ ቆንጭስ (\ior 1:1-4\ior*)
\io1 ክርስቶስ ኪታንቾታፐ ቦላ (\ior 1:4—2:18\ior*)
\io1 ክርስቶስ ሙሰፐነ እያሱፐ ቦላ (\ior 3:1—4:13\ior*)
\io1 ክርስቶሳ ካህነተይ ቦላ (\ior 4:14—7:28\ior*)
\io1 ክርስቶሳ ጫቆይ ቦላ (\ior 8:1—9:22\ior*)
\io1 ክርስቶሳ ያርሾይ ቦላ (\ior 9:23—10:39\ior*)
\io1 አማኖ ባይራተ (\ior 11:1—12:29\ior*)
\io1 ፆሰ ኡፋይስያ ደኦ (\ior 13:1-19\ior*)
\io1 አኬክሶነ ዞረ (\ior 13:20-25\ior*)
\c 1
\s1 ናአይ ኪታንቾታፐ ቦላ
\p
\v 1 ካሰ ፆሳይ፥ ኑ አዋታስ ናበታ ባጋራ ዱማ ዱማ ኦገን ዳሮ ዎደ ኦድስ። 
\v 2 ሽን ሀ ዉርሰ ዎድያን ኡባ እያ ላትስዳ ቃስ አላመ እያ ባጋራ መዳ ባ ናኣ ባጋራ ኑስ ኦድስ። 
\v 3 ናአይ ፆሳ ቦንቹዋ ጶለነ ኩመ ፆሳ ፆሳተ ኤክድ፥ ባ ዎልቃማ ቃላን ሀ አላምያ ካትስድ ኦይክስ። አሳ ኤንታ ናጋራፐ ጌሽዳፐ ጉየ ኡባፈ ቦላ ፆሳ ኡሻቻ ባጋን ሳሉዋን ኡትስ።
\p
\v 4 እያዉ እመትዳ ሱንይ ኪታንቾታ ሱንፈ ቦላ ግደይሳዳ እ ኤንታፈ ቦላ። 
\v 5 ህዛ፥ ፆሳይ ኪታንቾታፐ ኦደኮ፥
\q1 “ኔኒ ታ ናአ፤
\q2 ታ ሀች ነዉ አዋ ግዳስ” ግዴ?
\m ዎይኮ ቃስ ኦደኮ፥
\q1 “ታኒ እያዉ አዋ ግዳና፤
\q2 እካ ታዉ ናአ ግዳና” ግዴ?\x - \xo 1:5 \xo*\xt ማዝ 2:7፤ 2 ሳሜ 7:14፤ 1 ታር 17:13.\xt*\x*
\m
\v 6 ቃስ ፆሳይ ባ ባይራ ናኣ ሀ አላምያ ኪትሸ፥
\q1 “ፆሳ ኪታንቾት ኡባይ እያዉ ጎይኖ”
\m ያግስ።\x - \xo 1:6 \xo*\xt ዛረ 32:43.\xt*\x* 
\v 7 ፆሳይ ኪታንቾታባ ኦድሸ፥
\q1 “ፆሳይ ባ ኪታንቾታ ጫርኮ፥
\q2 ባ አይለታ ታማ ላጮ ኦስ”
\m ያጌስ።\x - \xo 1:7 \xo*\xt ማዝ 104:4.\xt*\x* 
\v 8 ሽን ባ ናአባ ኦድሸ፥
\q1 “ፆሳዉ፥ ነ አራታይ መርናዉ ደኤስ።
\q2 ነ ካዎተ ነ ፅሎተን አይሳሳ።\x - \xo 1:8 \xo*\xt ማዝ 45:6-7.\xt*\x*
\q1
\v 9 ኔኒ ፅሎተ ዶሳዳሳ፤ ኢታ እፃዳሳ።
\q2 ፆሳይ፥ ነ ጎዳይ፥ ነና ነ ላገታፐ አድ ዶርስ፥
\q2 ኡፋይሳ ዛይተ\f + \fr 1:9 \fr*\fq ኡፋይሳ ዛይተ፦ \fq*\ft እ ካዎትያ ዎደ አሳይ ኡፋይሳን እልልድ እያ ካዎይሳ በሴስ።\ft*\f* ነና ትይስ”
\m ያጌስ። 
\v 10 ፆሳይ ዛሪድ፥
\q1 “ጎዳዉ፥ ኮይሮ ኔኒ ሳአ መዳሳ፤
\q2 ሳሎት ነ ኩሸ ኦሶ።\x - \xo 1:10 \xo*\xt ማዝ 102:25-27.\xt*\x*
\q1
\v 11 ሄሳት ኡባይ ያና፤
\q2 ሽን ኔኒ ዳና።
\q2 ኤንቲ ኡባይ አፍላዳ ዉራና።
\q1
\v 12 ኔኒ ኤንታ ሳሌናዳ ፃፃና፤
\q2 ቃስ ኤንቲ አፍላዳ ላመታና።
\q1 ሽን ኔኒ ኡባ ዎደ ነና፤
\q2 ነ ላይይካ ዉረና”
\m ያጌስ። 
\v 13 ሽን ፆሳይ ኪታንቾታፐ ኦደኮ፥
\q1 “ታኒ ነ ሞርከታ ነ ቶሆይ
\q2 የያሶ ኦና ጋካናዉ፥
\q2 ሀይሳን ታፐ ኡሻቻ ባጋን ኡታ” ግዴ?\x - \xo 1:13 \xo*\xt ማዝ 110:1.\xt*\x*
\m
\v 14 ኪታንቾት ኡባይ አቶተ ደማናዉ ደእያ አሳታ ማዳናዉ ፆሳይ ኪትዳ አያናታ ግዶኮናዬ?
\c 2
\s1 ግታ አንጆ
\p
\v 1 ሄሳ ግሾ፥ ኑኒ ስእዳ ቱማፐ ሀራሶ ኤከቶና መላ ሄ ስእዳይሳ ምንድ ናጋናዉ በሴስ። 
\v 2 ህዛ፥ ኪታንቾታ ባጋራ ኦደትዳ ቃላይ ቱማ ግድኮ፥ እያ ናቆይነ ኪተቶና እፆይ ፕርዳ ኤህያባ ግድኮ፥ 
\v 3 ያትን፥ ኑኒ ሀይሳ መላ ግታ አቶተ እፃስ ጊኮ፥ ዋንድ አታኔ? ኮይሮ ጎዳይ ባ ሁጰን ሄ አቶተ ኦድስ፤ ቃስ እያፐ ስእዳይሳት ኑስ ጌሽድ ማርካትዶሶና። 
\v 4 ቃስ ፆሳይ ማላታታን፥ ኦራባታን፥ ዱማ ዱማ ማላታንነ ባ ሸንያዳ እምዳ ጌሻ አያና እሞታታን ማርካተ ምንስ።
\s1 የሱሲ አሰ ግድስ
\p
\v 5 ፆሳይ ሀ ኑኒ ኦድያ ስንፈ ያና አላምያ፥ ኪታንቾታስ ሃርስቤና። 
\v 6 ጌሻ ማፃፋይ እስ በሳን ሀይሳዳ ያጌስ፦
\q1 “ኔኒ አሳስ ቆፓናዉ አስ አይቤ?
\q2 ዎይኮ ኔኒ እያ ናጋናዉ እ አይቤ?\x - \xo 2:6 \xo*\xt ማዝ 8:4-6.\xt*\x*
\q1
\v 7 ነ እያ ኪታንቾታፐ ጉ ዎደስ ጉዳሳ፤
\q2 እያ ሁጰን ቦንቾነ ሳባ ካላቻ ዎዳሳ።
\q1
\v 8 ቃስ ኡባባ እያ ቶሁዋፐ ጋርሳን ዎዳሳ”
\m ያጌስ። ፆሳይ ኡባባ እያዉ ሃርስያ ዎደ እያዉ ሃረትቦናባይ አይብካ ባዋ። ሽን ሀእ ኡባባይ እያዉ ሃረትሽን ኑኒ በእቦኮ። 
\v 9 ሽን ኑኒ ኪታንቾታፐ ጉራ ጉፅዳ የሱሳ በኦስ። ፆሳ አ ኬሀተ ጋሶን የሱሲ አሳ ኡባስ ሀይቅስ። እ ዋየ ሀይቆ ሀይቅዳ ግሾ፥ ቦንቾነ ሳባ ካላቻ እያ ሁጰን ዎስ። 
\v 10 ኡባባይ እያዉነ እያ ጋሶን መትዳ ፆሳይ፥ ዳሮ ናይታ ባራ ቦንችሳናዉ ኤንታ አቶተ ሁጵያ፥ የሱሳ ዋየን ፖሎ ኦናዉ እያዉ በሴስ።
\p
\v 11 የሱሲነ ሄ እ ጌሽዳ አሳ ኡባይ እስ አዋ ናይታ። የሱሲ ኤንታ፥ “ታ እሻታ” ግድ ፄጋናዉ ዬላቶናይ ሄሳሳ። 
\v 12 የሱሲ፥
\q1 “ታኒ ነ ሱን ታ እሻታስ አዋጃና፤
\q2 ደርያ ሺቁዋን ነና ጋላታና”
\m ያጌስ።\x - \xo 2:12 \xo*\xt ማዝ 22:22.\xt*\x* 
\v 13 ቃስ እ፥ “ታኒ ታ አማኑዋ እያ ቦላ ዎና” ቃስካ፥ “ፆሳይ ታዉ እምዳ ናይታራ ታ ሀይሳን ደአይስ” ያጌስ።\x - \xo 2:13 \xo*\xt እሳ 8:17-18.\xt*\x*
\p
\v 14 ናይት አሾይነ ሱ ደኤይሳታ ግድያ ግሾ፥ የሱሲካ ኤንታዳ አሰ ግድስ። እ ሄሳ ኦዳይ፥ ሀይቆ ቦላ ዎልቅ ደእያ ፃላህያ ባ ሀይቁዋን ይሳናሳ። 
\v 15 ቃስ ባንታ ደኦ ላይ ኡባን ሀይቆ ያሻን አይለትድ ደኤይሳታ አይለተፈ ዎዛናሳ።
\p
\v 16 ቱማ የሱሲ ይዳይ አብራሃመ ኮቸ ማዳናሳፈ አትሽን፥ ኪታንቾታ ማዳናሳ ግደና።\x - \xo 2:16 \xo*\xt እሳ 41:8-9.\xt*\x* 
\v 17 አሳ ናጋራይ አቶ ጌተታና መላ ፆሳ ስንን ማርያነ አማነትዳ ካህነ ሀላቃ ግድስ። ሄሳ ግሾ፥ እ ኡባባን ባ እሻታ ዳናናዉ በሴስ። 
\v 18 እ ባ ሁጰን ፓጨን ዋየትዳ ግሾ ፓጨተይሳታ ማዳናዉ ዳንዳኤስ።
\c 3
\s1 የሱሲ ሙሰፐ ቦላ
\p
\v 1 ሄሳ ግሾ፥ ፆሳይ ፄግዳ ጌሻ እሻቶ፥ ኑ አማኖን ጎዳ ግድ ፄግያ ሀዋርያነ ካህነ ሀላቃ የሱሳ በእተ። 
\v 2 ሙሰይ ፆሳ ኬ ኡባን አማነትዳይሳዳ የሱሲካ ባና ዶርዳ ፆሳስ አማነትዳይሳ። 
\v 3 ኬ ኬፀይስ ኬፈ አድ ቦንቸተይሳዳ የሱሲ ሙሰፐ አያ ቦንቾ ኤካናዉ በሴስ። 
\v 4 እስ እስ ኬ ኬፅዳ አስ ደኤስ፥ ሽን ኡባ ጊግስዳይ ፆሳ። 
\v 5 ሙሰይ ፆሳ ኬ ኡባን አማነትዳ አይለ ግድድ፥ ፆሳይ ስንፈ ጋናባስ ማርካ ግድስ። 
\v 6 ሽን ክርስቶስ ፆሳ ኬን ናአዳ አማነትዳይሳ። ኑኒ ኤካና ግድ ናግያ ኡፋይሳ ምንድ ናግኮ ፆሳ ኬ ግዶስ።
\s1 ፆሳ አሳስ ደእያ ሸምፖ
\p
\v 7 ሄሳ ግሾ፥ ጌሻ አያናይ ገይሳዳ፥
\q1 “ሀች ህንተ ፆሳይ ገይሳ ስእያ ዎደ፥
\q2
\v 8 መላ ቢታን ፓጭያ ጋላስ፥
\q2 ህንተ አዋት ማካልዳይሳዳ፥
\q2 ህንተ ዎዛና ምንፍተ።
\q1
\v 9 ህንተ አዋት ታና ፓጭዶሶና፤
\q2 ኦይታሙ ላይ ታ ኦሱዋ በእዶሶና።
\q1
\v 10 ሄሳ ግሾ፥ ታ ሄ የለተ ሀንቀታዳ፥
\q2 ‘ኤንቲ ኡባ ዎደ ባንታ ዎዛናን ባሎሶና፤
\q2 ታ ኦግያ ኤርቦኮና’ ያጋስ።
\q1
\v 11 ሄሳ ግሾ፥ ታኒ ታ ሀንቁዋን ጫቃዳ፥
\q2 ‘ታ ሸምፖ በሳ ኡባካ ገሎኮና’ ያጋስ”\x - \xo 3:11 \xo*\xt ማዝ 95:7-11.\xt*\x*
\m ያጌስ።
\p
\v 12 ታ እሻቶ፥ ህንተፈ ኦደንካ፥ ደኦ ፆሳፈ ህንተና ሻክያ ኢታነ አማኖና ዎዛን ዶና መላ ናገትተ። 
\v 13 ህንተፈ ኦናካ ናጋር ባለን፥ ባ ዎዛና ምንና መላ “ሀች” ያገትድ ፄገትሽን ጋላስ ጋላስ እሶይ እሱዋራ ዞረትተ። 
\v 14 ኑ ኮይሮ አማኑዋ ኑኒ ዉርሰ ጋካናዉ ምንድ ናግኮ፥ ክርስቶሳራ እስፈ ላታና። 
\v 15 ጌሻ ማፃፋን፥
\q1 “ሀች ፆሳይ ገይሳ ህንተ ስእያ ዎደ፥
\q2 ሄ ዎደ ኤንቲ ማካላተን ሀንዳይሳዳ፥
\q2 ህንተ ዎዛና ምንፍተ”
\m ያግስ።\x - \xo 3:15 \xo*\xt ማዝ 95:7-8.\xt*\x*
\p
\v 16 ፆሳይ ግያባ ስእድ ማካልዳይ ኦኔ? ሙሰይ ግብፀፈ ካለ ከስዳ ኡባ ግዶኮናዬ?\x - \xo 3:16 \xo*\xt ታይቦ 14:1-35.\xt*\x* 
\v 17 ፆሳይ ኦይታሙ ላይ ኦና ሀንቀትዴ? ናጋራ ኦዳይሳታነ ኤንታ አሀይ መላ ቢታን ዎ አትዳ አሳታ ግዶኮናዬ? 
\v 18 ቃስ ፆሳይ፥ “ታ ሸምፖ በሳ ገለከታ” ያግድ ጫቅዳይ፥ እያዉ ኪተቶና እፅዳ አሳፐ አትሽን፥ ኦደሴ? 
\v 19 ህዛ፥ ኤንቲ ሄ ሸምፖ በሳ ገሎና አትዳይ አማንቦና ግሾ፥ ግደይሳ ኑ በኦስ።
\b
\c 4
\p
\v 1 ህዛ፥ ፆሳይ ኑና ባ ሸምፖ በሳ ገልሳና ግዳ ቃላይ ቡሮ ስንፈ ደእያ ግሾ፥ ህንተፈ ኦንካ ሄ ሸምፖ በሳ ገሎና አቶና መላ ናገቶስ። 
\v 2 ኤንታዉ ዎንገላይ ሳባከትዳይሳዳ፥ ኑስካ ሳባከትስ። ሽን ኤንቲ ስእዳባ አማንድ ኤክቦና ግሾ ኤንታ ጎእቤና። 
\v 3 ግዶሽን፥ አላመይ መቶሳፐ ዶምድ ፆሳ ኦሶይ ፖለትዳይሳ ግድኮካ፥ ፆሳይ፥
\q1 “ታኒ ታ ሀንቁዋን ጫቃዳ፥
\q2 ታ ሸምፖ በሳ ኡባካ ገሎኮና”
\m ግዳይሳዳ፥ ኑኒ አማንዳይሳት እያ ሸምፖ በሳ ገላና።\x - \xo 4:3 \xo*\xt ማዝ 95:11.\xt*\x* 
\v 4 ላፑን ጋላሳባ እስ በሳን፥ “ፆሳይ ላፑን ጋላሳን ባ ኦሶ ኡባፈ ሸምፕስ” ያግስ።\x - \xo 4:4 \xo*\xt መ 2:2.\xt*\x* 
\v 5 ቃስካ ሄ በሳን፥ “ኤንቲ ታ ሸምፖ በሳ ኡባራካ ገሎኮና” ያግስ።\x - \xo 4:5 \xo*\xt ማዝ 95:11.\xt*\x* 
\v 6 ኮይሮ ዎንገላ ስእዳይሳት ኪተቶና እፅድ ሸምፖ በሳ ገልቦኮና። ያንያ ግሾ፥ ሀእካ ሄ ሸምፖ በሳ ገላና እስ እስ አሳት ደኦሶና። 
\v 7 ሄሳ ግሾ፥ ፆሳይ፥ “ሀች” ግድ ፄግሸ እስ ጋላስ ኑስ ቃንፅስ። ዳሮ ዎደፐ ጉየ ፆሳይ ዳዊታ ባጋራ፥
\q1 “ፆሳይ ግያባ ሀች ህንተ ስእያ ዎደ፥
\q2 ህንተ ዎዛና ምንፍተ”
\m ያግድ ኦድስ።\x - \xo 4:7 \xo*\xt ማዝ 95:7-8.\xt*\x* 
\v 8 እያሱይ ኤንታዉ ሸምፑዋ እምዳባ ግድያኮ፥ ፆሳይ ሀራ ጋላሳባ ጉየፐ ኦደናሽን።\x - \xo 4:8 \xo*\xt ዛረ 31:7፤ እያ 22:4.\xt*\x* 
\v 9 ህዛ፥ ፆሳ አሳስ ሳምባታ ሸምፖይ ናገትድ ደኤስ። 
\v 10 ፆሳ ሸምፖ በሳ ገልያ ኦንካ፥ ፆሳይ ባ ኦሱዋፐ ሸምፕዳይሳዳ እካ ባ ኦሱዋፐ ሸምፓና።\x - \xo 4:10 \xo*\xt መ 2:2.\xt*\x* 
\v 11 ሄሳ ግሾ፥ ኦንካ ሄ አሳ ኪተተ እፁዋ ካልድ፥ ኩንዶናዳ ፆሳ ሸምፖ በሳ ገላናዉ ምኖስ።
\p
\v 12 ፆሳ ቃላይ ደኦነ ኦይሳ። ናምኡ ባጋራ ቃራትዳ ማሻፈካ አድ ኦጮ። እ ሸምፖ፥ አያና፥ ፃጶነ ኮልዘ ጋካናዉ ካንድ ጫዴስ። ቃስ አሳ ዎዛናን ደእያ ጌምዳ ቆፋነ አሙዋ ሻክድ ፕርዴስ። 
\v 13 ፆሳ ስንፈ ቆሰትያባይ አይባ መተካ ባዋ። እያ አይፈ ስንን ኡባባይ ቆንጨነ ካሎ ደኤስ። ኑኒ ዛሮ እማናዉ በሰይ እያ ስንና።
\s1 የሱሲ ግታ ካህነ ሀላቃ
\p
\v 14 ህዛ፥ ሳሎ ከይዳ ግታ ካህነ ሀላቃይ፥ ፆሳ ናአይ የሱሲ፥ ኑስ ደእያ ግሾ፥ ኑ አማኑዋ ምንድ ናጎስ። 
\v 15 ኑ ካህነ ሀላቃይ ኑ ዳቡርያ ዎደ ኑስ ቃታናዉ ዳንዳኤይሳ። እ ኑዳ ኡባባን ፓጨትስፐ አትሽን፥ ናጋራ ኦቤና። 
\v 16 ህዛ፥ ማሮተ ኤካናዉነ ማደ ኮሽያ ዎደ አ ኬሀተ ደማናዉ አ ኬሀተይ ደእያሱዋ ፆሳ አራታኮ ያዮና ሺቆስ።
\b
\c 5
\p
\v 1 እስ እስ ካህነ ሀላቅ አሳ ግዶፈ ዶረትድ፥ ፆሳራ ጋያባን አሳ ግሾ እሞታነ ናጋራ ያርሾ ያርሻናዉ ሹመቴስ። 
\v 2 እ ባ ሁጰን ዳቡራንቾ ግድያ ግሾ፥ ኤሮናይሳታስነ ባለይሳታስ ቃታናዉ ዳንዳኤስ። 
\v 3 እ ባ ናጋራ ግሾነ አሳ ኡባ ናጋራ ግሾ ያርሾ ያርሻናዉ በሰይ ሄሳሳ።\x - \xo 5:3 \xo*\xt ሌወ 9:7.\xt*\x*
\p
\v 4 ኦንካ ሀ ቦንቹዋ ባዉ ኤካናዉ ዳንዳኤና፥ ሽን አሮን ካህነ ሀላቃ ግዳናዉ ፄግዳይሳዳ ፆሳን ፄገታናዉ በሴስ።\x - \xo 5:4 \xo*\xt ከሳ 28:1.\xt*\x* 
\v 5 ሄሳዳካ፥ ክርስቶስ ካህነ ሀላቃ ግድያ ቦንቹዋ ባዉ ኤክቤና። ሽን ፆሳይ እያ፥
\q1 “ኔኒ ታ ናአ፤
\q2 ሀች ታ ነዉ አዋ ግዳስ”
\m ያጌስ።\x - \xo 5:5 \xo*\xt ማዝ 2:7.\xt*\x* 
\v 6 ቃስ ሀራሶን፥
\q1 “ማልከፃደቅ ካህነ ግድዳይሳዳ፥
\q2 ኔኒ መርናዉ ካህነ ግዳና”
\m ያጌስ።\x - \xo 5:6 \xo*\xt ማዝ 110:4.\xt*\x*
\p
\v 7 የሱሲ አሰ ግድድ ሀ አላምያን ደእያ ዎደ ባና ሀይቆፐ አሻናዉ ዳንዳእያ ፆሳ ዳሮ ዬሆንነ አፉን ዎስስ። እ፥ እያ ቦንችድ ኪተትዳ ግሾ ፆሳይ እያ ዎሳ ስእስ።\x - \xo 5:7 \xo*\xt ማቶ 26:36-46፤ ማር 14:32-42፤ ሉቃ 22:39-46.\xt*\x* 
\v 8 የሱሲ ፆሳ ናአ ግድኮካ ባ ዋየትዳ ዋያን ኪተተ ታማርስ። 
\v 9 ሄሳንካ፥ የሱሲ ባ ኦሱዋ ፖልዳፐ ጉየ ባዉ ኪተትያ ኡባይ መርና አቶተ ደማና መላ ጋሶ ግድስ። 
\v 10 ፆሳይ ማልከፃደቃ ሹምዳይሳዳ ካህነ ሀላቃ ኦድ እያ ሹምስ።
\s1 ህንተ አማኑዋን ዳቡሮፕተ
\p
\v 11 ሀ ኑ ኦዳ ቦላ ጉጅ ኦዳናባይ ዳሮባይ ደኤስ፥ ሽን ህንተ አኬካይ ጉ ግድያ ግሾ ህንተዉ ኦድ ገልሳናዉ ዋይሴስ። 
\v 12 ህንተ ሀኖደ አስታማረ ግዳናዉ በሴስ፥ ሽን ፆሳ ቃላ ኮይሮ ትምርትያ ህንተና ዛር ታማርስያ ሀራ አስ ኮሼስ። ህንተ ምኖ ካ ማናዉ ዳንዳኦና ግሾ ማ ኮሼስ።\x - \xo 5:12 \xo*\xt 2 ቆሮ 3:2.\xt*\x* 
\v 13 ማ ፓሄትያ ኦንካ ዮጋ ናአ ግድያ ግሾ፥ ሎኦነ ኢታ ሻክ ኤረና። 
\v 14 ሽን ምኖ ካ ሎኦነ ኢታ ሻክ ኤርያ ካሃማ አሳሳ።
\b
\c 6
\p
\v 1 ህዛ፥ ክርስቶሳባ ታማርስያ ኮይሮ ትምርትያ አግድ ክርስቶሳን ካሃማተኮ ቦስ። ሀይቆ ኦሶፐ ስሞባነ ፆሳ አማኖባ ኮይሮ ትምርትያኮ ጉየ ስሞኮ። 
\v 2 ሄሳዳካ፥ ፅንቃተታባ፥\f + \fr 6:2 \fr*\fq ፅንቃተታባ፦ \fq*\ft ሀ በሳን ፅንቃተታባ ጌተትዳይ ዱማ ዱማ ጌሾ ዎጋታባ ኦዳናሳ።\ft*\f* ኩሸ ዎሶባ፥ ሀይቆፐ ደንዶባነ መርና ፕርዳባ ዛር ታማሮኮ። 
\v 3 ፆሳይ ጊኮ ኑ ሄሳ ኦና።
\p
\v 4 እስ ቶሆ ፖኦይ ፖእዳይሳታ፥ ሳሎ እሞታ ኤክዳይሳታ፥ ጌሻ አያናን ሻከትዳይሳታ፥ 
\v 5 ሎኦ ፆሳ ቃላነ ስንፈ ያና አላምያ ዎልቃ በእዳይሳታ፥ 
\v 6 ጉየፐ ካድዳይሳታ ናጋራፐ ናምአን ዛራናዉ ዳንዳኤተና። አይስ ጊኮ፥ ኤንቲ ባንታ ዩዋስ ፆሳ ናኣ ዛር ካቅያ መላ ማስቃልያ ቦላ እያ ካቆሶናነ አሳ ስንን ካዉሾሶና።
\p
\v 7 ኡባ ዎደ እ ቦላ ቡክያ እራ ኡያዳ፥ ጎይዳ ኡራ ማድያ ካ እምያ ቢትያ ፆሳን አንጀትዳሮ። 
\v 8 ሽን አጉንነ ክንቾተ ዶልያ ቢትያ አይብባካ ማዱኩ፤ እዉ ባደይ ማታትስ፤ ዉርሰን ፁገታና።\x - \xo 6:8 \xo*\xt መ 3:17-18.\xt*\x*
\p
\v 9 ኑ ሲቆ እሻቶ፥ ኑኒ ሀይሳዳ ኦድያባ ግድኮካ፥ ህንተና አቶተኮ ካለያ ሎኦባይ ህንተዉ ደኤይሳ ኤሮስ። 
\v 10 ፆሳይ ሱረ ፕርደይሳ። ፆሳይ፥ ህንተ ኦዳ ኦሱዋነ ካሰ ግድን ሀእካ አማነይሳታ ማድድ፥ እያዉ ደእያ ሲቁዋ በስዳይሳ ዶገና። 
\v 11 ህንተ ኡባይ ኡፋይሳን ናገይሳ ደማና ጋካናዉ ሀ ምኖተ ዉርሰ ጋካናዉ በሳና መላ ኑ አሞቶስ። 
\v 12 ህንተ አማኖንነ ዳንዳአን ናግያ ኡፋይሳ ላትያ አሳ ዳናና መላፐ አትሽን፥ አዛላ ግዳና መላ ኮዮኮ።
\s1 ፆሳ ኡፋይሳ ቃላይ ስሰና
\p
\v 13 ፆሳይ አብራሃመስ እማና ግድ ጫቅዳ ዎደ ባፐ አያ ሀር ግት ባይና ግሾ ባ ሁጰን ጫቅስ። 
\v 14 እያኮ፥ “ታኒ ነና አንጃና፤ ነ ዘረካ ዳርሳና” ያግስ።\x - \xo 6:14 \xo*\xt መ 22:16-17.\xt*\x* 
\v 15 አብራሃመይ ዳንዳአን ናግድ ፆሳይ እማና ግዳ ኡፋይሳ ኤክስ።
\p
\v 16 አስ ጫቅሸ ባፐ ግታትያ ኡራን ጫቄስ፤ ሄ ጫቆይ ጌተትዳባ ምንድ፥ ፓላማ ኡባ ተቄስ። 
\v 17 ሄሳ ግሾ፥ ፆሳይ ባ ላመቶና ቆፋ ኡፋይሳ ቃላ ላተይሳታስ ቆንጭሳናዉ ኮይዳ ግሾ ጫቆን ምንስ። 
\v 18 ፆሳይ ዎርዶተና። እያ ኡፋይሳ ቃላይነ ጫቆይ፥ ናምአይካ ላመቶኮና። ሀ ናምኡባታን ኑ ስንን ደእያ ኡፋይሳ ኦይካናዉ ዳንዳአና መላ ገሸ ደማናዉ እያኮ ባቃትዳ ኑኒ፥ ዎልቃማ ምን ደማና።
\p
\v 19 ሀ ኡፋይሳይ ኑ ሸምፑዋ፥ ማርካበይ ቃፆናዳ ምን ኦይክያ ብራታ መላ። ሄ ኡፋይሳይ ማጋራጁዋፈ ጉየ ባጋን ደእያ ጌሻ በሳ ገልስ።\x - \xo 6:19 \xo*\xt ሌወ 16:2.\xt*\x* 
\v 20 የሱሲ ማልከፃደቃ ሹማተዳ መርናዉ ካህነ ሀላቃ ግድድ፥ ኑ ግሾ ኑፐ ስንትድ ሄ በሳ ገልስ።\x - \xo 6:20 \xo*\xt ማዝ 110:4.\xt*\x*
\c 7
\s1 ካህንያ ማልከፃደቃ
\p
\v 1 ማልከፃደቀይ፥ ሳሌማ ካዎይ፥ ኡባፈ ቦላ ፆሳ ካህነ። ሄ ማልከፃደቅ አብራሃመይ ካዎታ ኦል ፆንድ ስምሽን እያራ ጋሄትድ እያ አንጅስ።\x - \xo 7:1 \xo*\xt መ 14:17-20.\xt*\x* 
\v 2 አብራሃመይ ባ ድእዳባ ኡባፈ እያዉ አስራታ ከስድ እሚስ። ማልከፃደቃ ሱንይ ኮይሮ “ፅሎተ ካዋ”፥ ናምአን፥ “ሳሌማ ካዎ” ብርሸይካ “ሳሮተ ካዋ” ጉሱ። 
\v 3 ማልከፃደቃስ አይያ ዎይኮ አዉ ዎይኮ ኮቻ ፓይዶይ ባዋ። እያ የለተስ ዶመ ዎይኮ እያ ደኡዋስ ዉርሰ ባዋ፥ ሽን ፆሳ ናአ ዳንድ መርናዉ ካህነ ግድስ።
\p
\v 4 ማልከፃደቅ አይ መላ ግቴኮ በእተ። ኑ አዋታ ማይዛይ፥ አብራሃመይ፥ ባ ደእዳባፐ እያዉ አስራታ እሚስ። 
\v 5 ካህነ ግድያ ሌወ ኮቻይ እስራኤለ አሳፐ፥ ሄስካ አብራሃመ ኮቸ ግድዳ ባንታ እሻታፐ አስራታ ኤካና መላ ህገይ ኪቴስ።\x - \xo 7:5 \xo*\xt ታይቦ 18:21.\xt*\x* 
\v 6 ማልከፃደቅ ሌወ ኮቸ ግዶና እፅኮካ አብራሃመፐ አስራታ ኤክስ፤ ኡፋይሳ ቃል ደእያ አብራሃመ አንጅስ። 
\v 7 ጉይ ግታን አንጀተይስ ፓላንና።
\p
\v 8 እስ ባጋራ፥ አስራታ ኤከይሳት ሀይቅያ አሳታ፥ ሽን ሀራ ባጋራ አስራታ ኤከይስ ደኦን ደኤስ ያግድ ኦደትዳይሳ። 
\v 9 ህዛ፥ አስራታ ኤክያ ሌወይ፥ አብራሃመ ባጋራ አስራታ እሚስ ጋናዉ ዳንዳኤቴስ። 
\v 10 አይስ ጊኮ፥ ማልከፃደቅ አብራሃመራ ጋሄትያ ዎደ ሌወይ የለትቦናባ ግድኮካ፥ ባ ማይዛ አብራሃመ ጉልባታን ደኤስ።
\p
\v 11 እስራኤለ አሳስ ህገይ ሌወ ካህነተ ባጋራ እመትስ። ሀ ሌወ ካህነተይ ፖሎ ግድዳባ ግድያኮ አሮናይሳ መላ ግዶናሽን፥ ማልከፃደቃ መላ ሀራ ካህነ ሹማናዉ አይስ ኮሽዴ? 
\v 12 ህዛ፥ ካህነት ላመትያ ዎደ ህገይካ ቃስ ላመታናዉ በሴስ። 
\v 13 ሀ ኑ እያባ ኦድያ ኡራይ ሀራ ኮቸ፤ እያ ሼሻፐ ኦንካ ያርሾ በሳን ካህነተን ኦቤና። 
\v 14 ኑ ጎዳይ ይሁዳ ሼሻፐ ይዳይስ ኤረትዳይሳ። ግዶሽን፥ ሙሰይ ካህነተባ ኦድሸ ይሁዳ ኮቻባ አይባካ ኦድቤና።
\p
\v 15 ማልከፃደቃ መላ ሀራ ካህነይ ይዳባ ግድያኮ ሀ ኑ ኦድያባይ አድ ቆንጫና። 
\v 16 እ ካህነ ግድዳይ ዮና ደኦ ዎልቃናፐ አትሽን፥ እያ ማይዛ ህገንነ ዎጋን ግደና። 
\v 17 ጌሻ ማፃፋይ፥
\q1 “ማልከፃደቃ ካህነተ መላ፥
\q2 ኔኒ መርናዉ ካህነ”
\m ያግድ ማርካቴስ።\x - \xo 7:17 \xo*\xt ማዝ 110:4.\xt*\x* 
\v 18 ኮይሮ ህገይ ዳቡራንቾነ ማዶናባ ግድያ ግሾ ሻረትስ። 
\v 19 ሙሰ ህገይ አይብንካ ፖሎ ኦናዉ ዳንዳእቤና። ሽን ኑኒ እያ ባጋራ ፆሳኮ ሺቅያ ኡባፈ አያ ኡፋይሳ ቃላይ ኑስ እመትስ።
\p
\v 20 ክርስቶስ ካህነ ግድያ ዎደ ፆሳይ ጫቅስ፥ ሽን ሀራት ካህነ ግድዳ ዎደ ሄሳ መላ ጫቆይ ባዋ። 
\v 21 ሽን የሱሲ ጫቆን ካህነ ግድስ። ፆሳይ ያግድ ጫቅስ፤
\q1 “ጎዳይ ጫቅስ፤ እ ባ ቆፋ ላመና፤
\q2 ‘ኔኒ መርና ካህነ’ ”
\m ያግስ።\x - \xo 7:21 \xo*\xt ማዝ 110:4.\xt*\x* 
\v 22 ሀ ጫቁዋ ጋሶን የሱሲ ኑስ ኡባፈ አያ ቃላ ጫቁዋስ ዋሰ ግድስ።
\p
\v 23 ካህነተን ኦና መላ ሀይቆይ ኤንታ ድግዳ ግሾ ኮይሮ ካህነታ ታይቦይ ዳሮ። 
\v 24 ሽን የሱሲ መርናዉ ደእያ ግሾ እያ ካህነተ ሀሪ ላተና። 
\v 25 ሄሳ ግሾ፥ እ ኡባ ዎደ ኤንታ ግሾ ጋናታናዉ መርናዉ ደእያ ግሾ ፆሳኮ እያ ባጋራ የይሳታ ፖሎ አሻናዉ ዳንዳኤስ።
\p
\v 26 ህዛ፥ ኑስ ኮሽያባ እምያ፥ ጌሻይ፥ ቦረይነ ቱን ባይናይስ፥ ናጋራንቾታፐ ሻከትዳይስነ ሳሉዋፐ አድ ቅዳ ካህነ ሀላቃይ ኑስ ኮሼስ። 
\v 27 እ ሀንኮ ካህነ ሀላቃታ መላ ኮይሮ ባ ናጋራ ግሾ፥ ካልድ አሳ ናጋራ ግሾ ጋላስ ጋላስ ያርሾ ያርሻናዉ ኮሸና። እ ባና ያርሽዳ ዎደ ዛረና ኦገን እስ ቶሆ ባና ያርሽስ።\x - \xo 7:27 \xo*\xt ሌወ 9:7.\xt*\x* 
\v 28 ሙሰ ህገይ ዳቡራንቾ አሳ ካህነ ሀላቃ ኦድ ሹሜስ። ሽን ህግያፈ ጉየ ይዳ ጫቆ ቃላይ መርናዉ ፖሎ ግድዳ ፆሳ ናኣ ሹምስ።
\c 8
\s1 የሱሲ ኑ ካህነ ሀላቃ
\p
\v 1 ኑኒ ሃሳያ ግታባይ ሄሳ። ሳሉዋን ኡባፈ ቦላ ፆሳ አራታፐ ኡሻቻ ባጋን ኡትዳ ሀይሳ መላ ካህነ ሀላቃይ ኑስ ደኤስ።\x - \xo 8:1 \xo*\xt ማዝ 110:1.\xt*\x* 
\v 2 እ አሳን ግዶናሽን፥ ጎዳን ኤቅዳ ቱማ ዱንካንያን ፆሳ ኬን ኦስ።
\p
\v 3 ካህነ ሀላቃ ኡባይ እሞነ ያርሾ ያርሻናዉ ሹመቴስ። ሄሳ ግሾ፥ ሀ ካህነይ ያርሻናዉ እስባይ ዳናዉ ኮሼስ። 
\v 4 ህገይ ኪተይሳዳ ያርሽያ ካህነት ደእያ ግሾ፥ ክርስቶስ ሳአን ደእያባ ግድያኮ እ ካህነ ግደና። 
\v 5 ኤንቲ ካህነተን ኦያ ዱንካነይ ሳሎን ደኤይሳስ ሌምሶነ ኩያ። ሙሰይ ዱንካንያ ኤስያ ዎደ ፆሳይ እያኮ፥ “ታኒ ነና ዙማ ቦላ በስዳ ሌምሱዋ ካላዳ ኦ” ያግስ።\x - \xo 8:5 \xo*\xt ታይቦ 18:21.\xt*\x* 
\v 6 ሽን የሱሲ ግዶ ግድድ ስገያ ጫቆይ፥ ኮይሮ ጫቁዋፐ አይሳዳ እ ኤክዳ ኦሶይ ኤንታይሳፈ አስ። ሄስ ኤቅዳይ አያ ጫቆ ቃላና።
\p
\v 7 ኮይሮ ጫቁዋን ባል ባይናባ ግድያኮ ናምአን ጫቆ ኮሸና። 
\v 8 ሽን ጎዳይ ኤንታ ቦርድ፥ ሀይሳዳ ያግስ፦
\q1 “ታኒ እስራኤለ አሳራነ ይሁዳ አሳራ
\q2 ኦራ ጫቆ ጫቅያ ዎደይ ያና።\x - \xo 8:8 \xo*\xt ኤርም 31:31-34.\xt*\x*
\q1
\v 9 ሄ ጫቆይ ታ ኤንታ አዋታ ግብፀ ቢታፈ ኩሽያ ኦይካዳ፥
\q2 ጎቻ ከስዳ ዎደ ኤንታራ ጫቅዳ ጫቁዋ መላ ግደና።
\q1 ኤንቲ ታ ጫቁዋን አማነትቦና ግሾ፥
\q2 ታኒ ኤንታ የጋ አጋስ ያጌስ ጎዳይ።
\q1
\v 10 ሽን ህዛፐ ጉየ እስራኤለ አሳራ
\q2 ታ ጫቃና ጫቆይ ሀይሳ ያጌስ ጎዳይ።
\q1 ታኒ ታ ህግያ ኤንታ ጉግያን ዎና፤
\q2 ኤንታ ዎዛናን ፃፋና።
\q1 ታኒ ኤንታ ፆሳ ግዳና፤
\q2 ኤንትካ ታ አሰ ግዳና።
\q1
\v 11 ኤንታፈ ኦንካ ባ ሾሩዋ ዎይኮ ባ እሻ፥
\q2 ‘ጎዳ ኤራ’ ያግድ ታማርሰና።
\q1 ኤንቲ ጉፈ ግታ ጋካናዉ
\q2 ኡባይ ታና ኤራና።
\q1
\v 12 ታኒ ኤንታ ናቁዋ አቶ ጋና፤
\q2 ኤንታ ናጋራ ዛራ ቆፕከ” ያጌስ።
\p
\v 13 ፆሳይ ሀ ጫቁዋ “ኦራ” ግድ ፄግሸ ኮይሮይሳ ጋልእስስ። ህዛ፥ ጋልአይነ ጬጋይ ይያ ዎደይ ጋክስ።
\c 9
\s1 ሳአ ፆሳ ኬን ደእያ ጎይኖ
\p
\v 1 ኮይሮ ጫቁዋስ ፆሳ ጎይንያ ዎጋይነ ሳአ ፆሳ ኬይ ደኤስ። 
\v 2 ዱንካነይ ኤቅስ። እያን ፆምፐ ዎያ ኮጫይ፥ ፃርጴዛይነ ጎዳ ስንን ዎያ ኡይይ ደኤስ፤ ሄ በሳይ ጌሻ በሳ ጌተቴስ።\x - \xo 9:2 \xo*\xt ከሳ 26:1-30፤ 25:31-40.\xt*\x* 
\v 3 ናምአን ማጋራጁዋፈ ጉየ ባጋራ ደእያ በሳይ ኡባፈ ጌሻ በሳ ጌተቴስ።\x - \xo 9:3 \xo*\xt ከሳ 26:31-33.\xt*\x* 
\v 4 እያ ግዶን እፃነ ጩይስያ ዎርቃ ሳፅነይነ ዎርቃን ሜሸትዳ ጫቆ ታቦተይ ደኤስ። ሄ ጫቆ ታቦትያን ማናይ ደእያ ዎርቃ ፃሮይ፥ አጭዳ አሮና ፃምአይነ ሙሰ ህገይ ፃፈትዳ ናምኡ ሎቸ ሹቻት ደኦሶና።\x - \xo 9:4 \xo*\xt ከሳ 30:1-6፤ 25:10-16፤ 16:33፤ ታይቦ 17:8-10፤ ከሳ 25:16፤ ዛረ 10:3-5.\xt*\x* 
\v 5 ሄ ታቦትያፐ ቦላ ባጋራ አቶተ ካማ ባንታ ቀፍያን ገንያ ቦንቾ ክሩበት ደኦሶና። ሽን ሀእ ሄ ኡባ ቆንጭስድ ኦዳናዉ ዳንዳኦኮ።\x - \xo 9:5 \xo*\xt ከሳ 25:18-22.\xt*\x*
\p
\v 6 ሀ ኡባይ ሀይሳዳ ጊግዳፐ ጉየ፥ ካህነት ኡባ ዎደ ባንታ ኦሱዋ ኦናዉ ዱንካንያስ ኮይሮ ክፍልያ ገሎሶና።\x - \xo 9:6 \xo*\xt ታይቦ 18:2-6.\xt*\x* 
\v 7 ሽን ካህነ ሀላቃ ፃላል ዱንካንያስ ናምአን ክፍልያ ላይፈ እስ ቶሆ ገሌስ። እ ያ ገልሸ ባ ናጋራ ግሾነ አሳይ ኤሮና ኦዳ ናጋራ ግሾ ሱ ያርሾ ኤኮና ገለና።\x - \xo 9:7 \xo*\xt ሌወ 16:2-34.\xt*\x* 
\v 8 ኮይሮ ዱንካነይ ኤቅድ ደእሽን፥ ኡባፈ ጌሻ በሳ ኤፍያ ኦገይ ቡሮ ዶየትቦናይሳ ጌሻ አያናይ ሄሳን ኤርሴስ።
\p
\v 9 ሄስ ሀ ዎድያስ ሌምሶ፤ ፆሳስ እመትያ እሞይነ ያርሾይ ጎይንያ ኡራ ካሀ ጌሻናዉ ዳንዳኦናይሳ ሀይስ በሴስ። 
\v 10 ሄሳት ሙሳባ፥ ኡሻባነ ዱማ ዱማ ሜቻ ዎጋታ ኦደይሳታ። ኤንቲ ኦራ ዎጋይ ያና ጋካናዉ ኦሰትያ ካረ ባጋ ዎጋታ።
\p
\v 11 ሽን ክርስቶስ ሀእ ኑ ደምዳ ሎኦባታስ ካህነ ሀላቃ ግድድ ይስ። እ ገልዳ ዱንካነይ ግታነ ፖሎ ግድዳይሳ። ሄ ዱንካነይ አሳ ኩሸን ኦሰትቤና ቃስ ሀ አላምያባ ግደና። 
\v 12 ክርስቶስ ኡባፈ ጌሻ በሳ ገልያ ዎደ ዴሻ ሱነ ማር ሱ ኤክድ ገልቤና። ሽን መርና አቶተ እማናዉ ባ ሱ ኤክድ ዛረና ኦገን እስ ቶሆ ገልስ። 
\v 13 ዴሻ ሱይነ ኮርማ ሱይ፥ ፁገትዳ ኡሳ ብዶይ፥ ቱንዳ አሳ ቦላ ርጨትድ ኤንታና ጌሽያባ ግድኮ፥\x - \xo 9:13 \xo*\xt ሌወ 16:15-16፤ ታይቦ 19:9፥ 17-19.\xt*\x* 
\v 14 መርና ጌሻ አያና ባጋራ ቦረይ ባይና ያርሾ ኦድ፥ ፆሳስ ባና እምዳ ክርስቶሳ ሱይ፥ ደኦ ፆሳ ጎይናና መላ ሀይቆ ካለያ ኦሱዋፐ ኑ ካሀ ዋት አድ ጌሸኔ?
\p
\v 15 ሄሳ ግሾ፥ ፄገትዳይሳት ፆሳይ እምዳ መርና ላታ ኤካና መላ ክርስቶስ ኦራ ጫቁዋስ ግዶ ግድድ ስገይሳ ግድስ። ሄስ ሀንዳይ አሳይ ኮይሮ ጫቁዋፐ ጋርሳን ደእያ ዎደ ኦዳ ናጋራፐ ኤንታና ዎዛናዉ እ ሀይቅዳይሳና።
\p
\v 16 ህዛ፥ ኬከይ ደእኮ፥ ሄ ኬክዳ ኡራ ሀይቆይ ኤረታናዉ ኮሼስ። 
\v 17 ኬክዳ ኡራይ ሀይቅኮ እያ ኬከይ ምኔስ። ኬክዳ ኡራይ ሀይቆና አትኮ እያ ኬከይ ኦና።
\p
\v 18 ሀር አቶሽን፥ ኮይሮ ጫቆይካ ሱ ባይና ምንቤና። 
\v 19 ሙሰይ ህገ ኪታ ኡባ አሳስ ኦድዳፐ ጉየ ማራ ሱነ ዴሻ ሱ ሃራ ዋላክድ፥ ዞኦ ዶርሳ እክሰነ ህሶጰ ውርጮ ኤክድ፥ ማፃፋ ቦላነ አሳ ቦላ ዉርፅስ።\x - \xo 9:19 \xo*\xt ከሳ 24:6-8.\xt*\x* 
\v 20 ሙሰይ አሳኮ፥ “ህንተ ናጋና መላ ፆሳይ ኪትዳ ሱ ጫቆይ ሀይሳ” ያግስ። 
\v 21 ሄሳዳካ፥ ዱንካንያ ቦላነ ኦያ ሚሸ ኡባ ቦላ ሱ ዉርፅስ።\x - \xo 9:21 \xo*\xt ሌወ 8:15.\xt*\x* 
\v 22 ቱማካ ህገይ ገይሳዳ ጉባታፐ አትሽን፥ ኡባባይ ሱን ጌዬስ። ሱ ጉኮናሽን አቶተ ባዋ።\x - \xo 9:22 \xo*\xt ሌወ 17:11.\xt*\x*
\s1 የሱሲ ፖሎ ያርሸትስ
\p
\v 23 ሳሉዋባስ ሌምሶ ግድዳይሳት ኡባይ መሄ ያርሾን ጌያናዉ ኮሼስ። ሽን ሳሎባት ባንታ ሁጰን ሄሳፈ አያ ያርሹዋን ጌያናዉ ኮሼስ።
\p
\v 24 ክርስቶስ ቱማ ፆሳ ኬስ ሌምሶ ግድዳ፥ አሳ ኩሸን ኦሰትዳ ኡባፈ ጌሻ በሳ ገልቤና። ሽን እ ሀእ ኑ ግሾ፥ ፆሳ ስንን በንታናዉ ሳሉዋ ገልስ። 
\v 25 ካህነ ሀላቃይ ላይን ላይን ባ ሱ ግዶናይሳ ኤክድ፥ ኡባፈ ጌሻ በሳ ገሌስ። ሽን ክርስቶስ ዳሮ ቶሆ ባና ያርሻናዉ ሳሎ ገልቤና። 
\v 26 ሄሳዳ ሀንዳባ ግድያኮ፥ ክርስቶስ አላመይ መቶሳፐ ዶምድ ዳሮ ቶሆ ዋየታናዉ ኮሼስ። ሽን ሀእ ዎድያ ዉርሰን ናጋራ ድጋናዉ ባና ያርሽድ ዛረና ኦገን እስ ቶሆ በንትስ።
\p
\v 27 አስ ኡባይ እስ ቶሆ ሀይቃናዉ ሄሳፈ ጉየ ፕርደታናዉ በሴስ። 
\v 28 ሄሳዳካ፥ ክርስቶስ ዳሮ አሳ ናጋራ ድጋናዉ እስ ቶሆ ያርሸትስ። ሽን እ ናጋራ ቶካናዉ ግዶናሽን፥ ባና ናገይሳታ አሻናዉ ናምአን ቆንጫና።\x - \xo 9:28 \xo*\xt እሳ 53:12.\xt*\x*
\b
\c 10
\p
\v 1 ሙሰ ህገይ ያናዉ ደእያ ሎኦባታስ ኩያፐ አትሽን፥ ባ ሁጰን ዋና ግደና። ሄሳ ግሾ፥ ላይን ላይን ፓጨይ ባይና ያርሸትያ ያርሾይ ጎይናናዉ ሺቅያ አሳ ፖሎ ኦናዉ ዳንዳኤና። 
\v 2 ህገይ ኤንታ ፖሎ ኦናዉ ዳንዳእዳባ ግድያኮ ኤንቲ ያርሾ ያርሸይሳ አጋናሽን። ቃስ ጎይናናዉ ሺቅያ አሳይ ባንታ ናጋራፐ ጌያና፤ ኤንታ ካሀይካ ኤንታና ባላ ግድ ሞተና። 
\v 3 ሽን ሄ ያርሾት ላይን ላይን ናጋራ ቆፍሶሶና። 
\v 4 አይስ ጊኮ፥ ኮርማ ሱነ ዴሻ ሱ ናጋራ ድጋናዉ ዳንዳኤና።
\p
\v 5 ሄሳ ግሾ፥ ክርስቶስ ሀ አላምያ ይዳ ዎደ ሀይሳዳ ያግስ:\x - \xo 10:5 \xo*\xt ማዝ 40:6-8.\xt*\x*
\q1 “ኔኒ ያርሾነ እሞ ኮያባካ፤
\q2 ሽን ታዉ አሾ ጊግሳዳሳ።
\q1
\v 6 ኔኒ ፁሳ ያርሾንነ
\q2 ናጋራ ያርሾን ኡፋይታባካ።
\q1
\v 7 ሄ ዎደ፥ ‘ታ ግሾ ማፃፋን ፃፈትዳይሳዳ፥
\q2 ጎዳዉ፥ ታኒ ነ ሸንያ ኦናዉ ያስ’ ያጋስ”
\m ያግስ። 
\v 8 ያርሾይ ያርሸታና መላ ህገይ ኪትያባ ግድኮካ፥ ክርስቶስ ኮይሮ፥ “ኔኒ ያርሾነ እሞ፥ ፁሳ ያርሾነ ናጋራ ያርሾ ኮያባካ፤ ኤንታን ኡፋይታባካ” ያግስ። 
\v 9 ካልድካ እ፥ “ጎዳዉ፥ ሄኮ ታኒ ነ ሸንያ ኦናዉ ያስ” ያግስ። ሄሳ ግሾ፥ ክርስቶስ ናምአንዋ ኤሳናዉ ኮይሮይሳ ሻርስ። 
\v 10 የሱስ ክርስቶሲ ፆሳ ሸንያ ኦድ፥ ዛረና ኦገን እስ ቶሆ ባ አሹዋ ያርሽዳ ግሾ ኑኒ ጌይዳ።
\p
\v 11 ካህነ ኡባይ፥ ናጋራ ድጋናዉ ዳንዳኦና ሄ ያርሾታ ጋላስ ጋላስ ያርሽሸ ኤቅድ ባ ኦሱዋ ኦስ።\x - \xo 10:11 \xo*\xt ከሳ 29:38.\xt*\x* 
\v 12 ሽን ክርስቶስ ኡባ ዎደስ ግድያ እስ ናጋራ ያርሹዋ ያርሽድ፥ ፆሳፈ ኡሻቻ ባጋን ኡትስ።\x - \xo 10:12 \xo*\xt ማዝ 110:1.\xt*\x* 
\v 13 ሄ ዎድያፐ ዶምድ እያ ሞርከት እያ ቶሆይ የያባ ኦና ጋካናዉ ናጌስ። 
\v 14 እ ዛረና ኦገን እስ ቶሆ ባና ያርሽዳ ያርሹዋን ጌሻታ መርናዉ ፖሎ ኦስ።
\p
\v 15 ቃስ ጌሻ አያናይ ኑስ ሀይሳ ማርካቴስ። ኮይሮ ሀይሳዳ ያግስ፦
\q1
\v 16 “ሄ ጋላሳታፐ ጉየ፥
\q2 ታኒ ኤንታራ ጫቅያ ጫቆይ ሀይሳ፦
\q1 ታኒ ታ ህግያ ኤንታ ቆፋን ዎና፤
\q2 ኤንታ ዎዛናን ፃፋና”
\m ያጌስ።\x - \xo 10:16 \xo*\xt ኤርም 31:33.\xt*\x* 
\v 17 ካልድካ፥
\q1 “ታኒ ኤንታ ናጋራነ
\q2 ኤንታ ኢታ ኦሱዋ ዛራ ቆፕከ”
\m ያጌስ።\x - \xo 10:17 \xo*\xt ኤርም 31:34.\xt*\x* 
\v 18 ህዛ፥ ናጋር አቶ ጌተትዳፐ ጉየ ናጋራስ ያርሸትያ ያርሾ ኮሸና።
\s1 አነ ፆሳኮ ሺቆስ
\p
\v 19 ህዛ፥ ታ እሻቶ፥ ኑኒ የሱሳ ሱ ባጋራ ኡባፈ ጌሻ በሳ ገላናዉ ኑስ ምኖተ ደኤስ። 
\v 20 ኑ ገላናይ ክርስቶስ ባ ማጋራጁዋ፥ ሄስካ ባ አሹዋ ባጋራ ኑስ ዶይዳ ኦራነ ደኦ ግድዳ ኦግያና። 
\v 21 ኑስ ፆሳ ኬ ቦላ ሹመትዳ ግታ ካህነ ሀላቃይ ደኤስ። 
\v 22 ኑኒ ኢታ ካሀፐ ጌያናዉ ኑ ዎዛና ዉርፀትድ፥ ኑ አሳተ ፅሎ ሃን ሜጨትድ፥ ሱረ ዎዛናንነ ፖሎ አማኖን ፆሳኮ ሺቆስ።\x - \xo 10:22 \xo*\xt ሌወ 8:30፤ ህዝ 36:25.\xt*\x*
\p
\v 23 ኑስ ኡፋይሳ ቃላ እምዳ ፆሳይ አማነትዳይሳ ግድያ ግሾ ኑ ማርካትያ ኡፋይሳ ኡሻች ሀድርስ ጎና ምንድ ኦይኮስ። 
\v 24 እሶይ እሱዋ ሲቆስነ ሎኦ ኦሶስ ዋት ደንነኮ አነ ቆፖስ። 
\v 25 እሶት እሶት ሜዘ ኦድ ሺቀይሳ አግዳይሳዳ ኑኒ እስፈ ሺቀይሳ አጎኮ። ሽን ጎዳ ጋላሳይ ማታትዳይሳ ህንተ በእያ ግሾ ሄሳ ካሰይሳፈ አድ ኦተ።
\p
\v 26 ኑኒ ቱማ ኤራተ ኤክዳፐ ጉየ ኤርሸ ናጋራ ኦኮ፥ ህዛፐ ኑ ናጋራ ግሾ ያርሸታና ያርሾይ ባዋ። 
\v 27 ሽን ህዛ አትዳይ ያሽያ ፕርዳነ ፆሳ ሞርከታ ፁጋናዉ ጊግዳ ዎልቃማ ታማ።\x - \xo 10:27 \xo*\xt እሳ 26:11.\xt*\x* 
\v 28 ሙሰ ህግያ ኪተቶና እፅዳ ኦንካ ናምኡ ዎይኮ ሄ አስ እያ ቦላ ማርካትኮ ቃይ ባይናሽን ሀይቄስ።\x - \xo 10:28 \xo*\xt ዛረ 17:6፤ 19:15.\xt*\x* 
\v 29 ያትን፥ ፆሳ ናኣ ካዳ ኡራይ፥ ባና ጌሽዳ ፆሳ ጫቆ ሱ ቱናባዳ ቆፕዳ ኡራይ፥ ቃስ አ ኬሀተ አያና ጫይዳ ኡራይ፥ አይ መላ ኢታ ፕርዳ ኤካናዉ በሲያኮ አነ ቆፕተ።
\p
\v 30 ህዛ፥ “ሀሎ ከሶይ ታባ፥ ታ ኩሸ ዛራና” ግዳይሳ ኑ ኤሮስ። ቃስካ፥ “ጎዳይ ባ አሳ ፕርዳና” ያግስ። 
\v 31 ደኦ ፆሳ ኩሸን ኩንደ ዳሮ ያሼስ።
\p
\v 32 ህንተዉ ፆሳ ፖኦይ ፖእዳፐ ጉየ ህንተ ዳሮ ዋየን፥ ግታ ባፀን ገንጭዳ በን ዎድያ ቆፕተ። 
\v 33 እስ እስ ቶሆ ህንተ አሳ ስንን ጫየትደታ፤ ጎደትደታ፤ እስ እስ ቶሆ ሄሳ መላ ዋየይ ጋክዳ አሳራ እስፈ ዋይደታ። 
\v 34 ቃሾን ደእያ አሳስካ ቃትደታ። ህንተዉ ሎኦነ ዮና ሻሎይ ሳሎን ደኤይሳ ህንተ ኤርዳ ግሾ ህንተ ሻሎይ ቦንቀትያ ዎደ ኡፋይሳን ዳንዳእደታ።
\p
\v 35 ሄሳ ግሾ፥ ግታ ዎይቶይ ደእያ ህንተ ምኖተ የጎፍተ። 
\v 36 ፆሳ ሸንያ ፖልድ፥ እ ህንተዉ እማና ግዳ ኡፋይሳ ኤካና ጋካናዉ ገንጫናዉ ኮሼስ። 
\v 37 ህዛ፥ ጌሻ ማፃፋን፥
\q1 “እ፥ ያና ግዳይስ ያና፤ ጋምኤና።\x - \xo 10:37 \xo*\xt እብራ 2:3-4.\xt*\x*
\q1
\v 38 ሽን ታ ፅሎይ፥ ታናን አማነትድ ዳና፤
\q2 ኦንካ ጉየ ስምኮ ታና ኡፋይሰና”
\m ያጌስ። 
\v 39 ኑኒ አማንድ አትያ አሳ ባጋፈ አትሽን፥ ጉየ ስሚድ ይያ አሳ ባጋ ግዶኮ።
\c 11
\s1 አማኖ
\p
\v 1 አማኖ ጉሳይ፥ ደማና ግድ ኡፋይሳን አማነትድ ናግያባነ ኑ በኦናባ በእያዳ ኦድ ኤክያባ። 
\v 2 በን አዋት አማኖን ፆሳፈ ማርካተ ኤክዶሶና።
\p
\v 3 አላመይ ፆሳ ቃላን መትዳይሳ ኑ አማኖን ኤሮስ። ቃስ በንትያባይ በንቶናባፐ መትስ።\x - \xo 11:3 \xo*\xt መ 1:1፤ ማዝ 33:6፥ 9፤ ዮሀ 1:3.\xt*\x*
\p
\v 4 አበል ቃየላፐ አያ ያርሾ ፆሳስ ያርሽዳይ አማኖና። ፆሳይ አበላ እሙዋ ኡፋይትድ ኤክዳ ዎደ እ ፅሎ ግድዳይሳ ማርካትስ። አበል ሀር አቶሽን፥ ሀይቅድካ ባ አማኑዋን ሀእ ጋካናዉ ኦዴስ።\x - \xo 11:4 \xo*\xt መ 4:3-10.\xt*\x*
\p
\v 5 ሄኖከይ ሀይቆና ሳሎ ብዳይ አማኖና። ፆሳይ እያ ኤክዳ ግሾ ኦንካ እያ በአናዉ ዳንዳእቤና። ሄኖከይ ሳሎ ኤከታናፐ ስን እ ፆሳ ኡፋይስዳ አስ ግደይስ ኦደትስ።\x - \xo 11:5 \xo*\xt መ 5:21-24.\xt*\x* 
\v 6 አማኖይ ባይና ኦንካ ፆሳ ኡፋይሳናዉ ዳንዳኤና። ፆሳኮ ያ ኦንካ ፆሳይ ደኤይሳነ ባና ኮየይሳታስ ዎይቶ እመይሳ አማናናዉ ኮሼስ።
\p
\v 7 ኖሄይ ቡሮ በንቶናባስ ፆሲ እያዉ ኦድዳ ዎደ ፆሳስ ያይድ፥ ባናነ ባ ሶ አሳ አሻናዉ አማኖን ማርካበ ኬፅስ። ያትድ ባ አማኑዋን አላመ ፕርድድ፥ አማኖን በንትያ ፅሎተ ፆሳፈ ኤክስ።\x - \xo 11:7 \xo*\xt መ 6:13-22.\xt*\x*
\p
\v 8 አብራሃመይ ላታ ኦድ ኤካና ቢታ ባና መላ ፆሳይ እያ ፄግዳ ዎደ ሀር አቶሽን፥ እ አዉ ብያኮ ኤሮና እፅኮካ ኪተትዳይ አማኖና።\x - \xo 11:8 \xo*\xt መ 12:1-5.\xt*\x* 
\v 9 አብራሃመይ ፆሳይ እያዉ እማና ግዳ ቢታን በተ አሳዳ ደእዳይ አማኖና። ፆሳይ ሄ እማና ግዳይሳ እያራ እስፈ ላታናው ደእያ ይሳቃራነ ያይቆባራ ዎላ ዱንካነን ደእስ።\x - \xo 11:9 \xo*\xt መ 35:27.\xt*\x* 
\v 10 እ፥ ፆሳይ ቆፕድ ኬፅዳ ፃላ ባሶይ ደእያ ካታማ ናጌስ።
\p
\v 11 ሳራ ባ ሁጰን ጭምዳባ ግድኮካ ኡፋይስ እምዳ ፆሳይ አማነትዳይሳ ግደይሳ ኤርዳ ግሾ ቃንታናዉ ዎልቃ ደምዳይ አማኖና።\x - \xo 11:11 \xo*\xt መ 18:11-14፤ 21:2.\xt*\x* 
\v 12 ሄሳ ግሾ፥ ሀይቅዳ አስ ዳንያ እስ አድያፈ ሳሎ ፆልንቶ መላነ አባ ጋፃን ደእያ ታይቦይ ባይና ሻፈ መላ ዘረይ የለትዶሶና።\x - \xo 11:12 \xo*\xt መ 15:5፤ 22:17፤ 32:12.\xt*\x*
\p
\v 13 ሄ አሳ ኡባይ ባንታዉ ጌተትዳ ኡፋይሳ ቃላ ኤኮና አማኖን ሀይቅዶሶና። ሽን ሃሆራ ሄሳ በእድ፥ ደምዳዳ ኦድ፥ ኡፋይሳን ኤክዶሶና። ቃስ ኤንቲ ሳአን እማነ በተ አስ ግደይሳ ኤርዶሶና።\x - \xo 11:13 \xo*\xt መ 23:4፤ 1 ታር 29:15፤ ማዝ 39:12.\xt*\x* 
\v 14 ሄሳዳ ግያ አሳይ ባንታ ቢታ ናገይሳ ቆንጨን በሴስ። 
\v 15 ኤንቲ ሄ አግድ ከይዳ ቢታ ጉየ ቆፕዳባ ግድያኮ ጉየ ስማናዉ ዳንዳኦሶና። 
\v 16 ሽን ሀእ አድ ሎእያ ሳሎ ቢታ ላሞቶሶና። ሄሳ ግሾ፥ ፆሳይ ኤንታዉ ካታማ ጊግስዳ ግሾ፥ “ኤንታ ፆሳ” ጌተትድ ፄገታናዉ ዬላተና።
\p
\v 17 አብራሃመይ ፓጨትዳ ዎደ ይሳቃ ያርሽዳይ አማኖና። ሄ ኡፋይሳ ቃላ ኤክዳ አብራሃመይ ባ እስ ናኣ ያርሻናዉ ጊግስ።\x - \xo 11:17 \xo*\xt መ 22:1-14.\xt*\x* 
\v 18 ፆሳይ አብራሃመኮ፥ “ነ ዘረይ ይሳቃ ባጋራ ፄገታና” ያግድ ኦድስ።\x - \xo 11:18 \xo*\xt መ 21:12.\xt*\x* 
\v 19 ፆሳይ ሀይቆፐ ደንናዉ ዳንዳኤይሳ አብራሃመይ አማንዳ ግሾ፥ ይሳቃ ሀይቆፐ ፓፅ ደንድዳዳ ኦድ ዛር ኤክስ።
\p
\v 20 ይሳቅ ዎደፐ ሀናናባ ኤርድ ያይቆባነ ኤሳዌ አንጅዳይ አማኖና።\x - \xo 11:20 \xo*\xt መ 27:27-29፥ 39-40.\xt*\x*
\p
\v 21 ያይቆብ ሀይቃና ሀንሸ፥ እስ እስ ዮሰፋ ናይታ አንጅዳይነ ጉፈ ቦላ ካትድ ጎይንዳይ አማኖና።\x - \xo 11:21 \xo*\xt መ 47:3፤ 48:1-20.\xt*\x*
\p
\v 22 ዮሰፍ ሀይቃናዉ ማትዳ ዎደ እስራኤለ አሳይ ግብፀፈ ከያናይሳ ኦድዳይነ ባ መቀ ኦናባ ኤንታ ኪትዳይ አማኖና።\x - \xo 11:22 \xo*\xt መ 50:24-25፤ ከሳ 13:19.\xt*\x*
\p
\v 23 ሙሰይ የለትዳፐ ጉየ እያ አያነ እያ አዋይ ማላ ሎኦ ናአ ግድዳይሳ በእድ ሄ አጌና ቆትዳይ አማኖና፤ ኤንቲ ካዋ አዋጁዋ ባብቦኮና።\x - \xo 11:23 \xo*\xt ከሳ 1:22፤ 2:2.\xt*\x*
\p
\v 24 ሙሰይ ድጭዳፐ ጉየ ግብፀ ካዋ ናኤ ናአ ጌተታናይሳ እፅዳይ አማኖና።\x - \xo 11:24 \xo*\xt ከሳ 2:10-12.\xt*\x* 
\v 25 ሙሰይ ናጋራን ጉ ዎደስ ኡፋይታናፐ፥ ፆሳ አሳራ ዋየ ኤካናይሳ ዶርስ። 
\v 26 እ ዎደፐ ደማና ዎይቱዋ ትሽ ኦድ ፄልዳ ግሾ፥ ግብፀ ሻሉዋፐ አድ ክርስቶሳ ግሾ ቦረታናይስ ዳሮ አያ ዱረተ ግድዳይሳ ኤርስ።
\p
\v 27 ሙሰይ ካዋ ሀንቁዋ ያዮና፥ ግብፀፈ ከይዳይ አማኖና። በንቶና ፆሳ በእዳ አሳዳ ሀንድ ባ ቆፋን ገንጭስ። 
\v 28 ሀይቆ ኤህያ ኪታንቾይ እስራኤለ አሳ ባይራ ናይታ ዎና መላ ሙሰይ ፓስካነ ሱ ዉርፀ ዎጋ ኦዳይ አማኖና።\x - \xo 11:28 \xo*\xt ከሳ 12:21-30.\xt*\x*
\p
\v 29 እስራኤለ አሳይ መላ ቢታራ ሄመትያዳ ሄመትድ፥ ዞኦ አባ ፕንዳይ አማኖና። ሽን ግብፀ አሳይ ገላናዉ ፓጭድ በእያ ዎደ ሃይ ኤንታ ምትስ።\x - \xo 11:29 \xo*\xt ከሳ 14:21-31.\xt*\x*
\p
\v 30 እስራኤለ አሳይ እያርኮ ካታማ ሹቻ ድርሳ ላፑን ጋላስ ዩይድ፥ ኩንድስዳይ አማኖና።\x - \xo 11:30 \xo*\xt እያ 6:12-21.\xt*\x* 
\v 31 ላይምያ ራኣባ ቢታ ዎቸይሳታ ሞክዳ ግሾ፥ ኪተቶና አሳራ ሀይቆና አትዳይ አማኖና።\x - \xo 11:31 \xo*\xt እያ 2:1-21፤ 6:22-25.\xt*\x*
\p
\v 32 ህዛ፥ ሀራ ታ አይ ጎ? ገድዮናባ፥ ባራቃባ፥ ሳምሶናባ፥ ዮፍታሄባ፥ ዳዊታባ፥ ሳሜላባ፥ ቃስ ናበታባ ኦዳናዉ ታዉ ዎደይ ግደና።\x - \xo 11:32 \xo*\xt አይሰ 6:11—8:32፤ 4:6—5:31፤ 13:2-16፤ 11:1-12፤ 1 ሳሜ 16:1፤ 1 ካዎ 2:11፤ 1 ሳሜ 1:1-25.\xt*\x* 
\v 33 ኤንቲ አማኖን ካዎተታ ፆንዶሶና፤ ፅሎተን አይስዶሶና፤ ፆሳይ እማና ግዳ ኡፋይሳ ኤክዶሶና፤ ጋሞታ ዶና ጎርድዶሶና፤\x - \xo 11:33 \xo*\xt ዳነ 6:1-27.\xt*\x* 
\v 34 ታማ ዎልቃ ቶይስዶሶና፤ ሞርከታ ማሻፈ አትዶሶና፤ ባንታ ዳቡራን ምንዶሶና፤ ኦላን ዎልቃማ ግድዶሶና፤ አላጋ ቶራ ጎድዶሶና።\x - \xo 11:34 \xo*\xt ዳነ 3:1-30.\xt*\x* 
\v 35 ማጫሳት ባንታ ሀይቅዳይሳታ ሀይቆፐ ፓፅን ኤክዶሶና።
\p ቃስ ሀራት አያ ሀይቆፐ ደንዱዋ ኤካናዉ ኮይድ ቃሾፐ ብለታናይሳ እፅዶሶና።\x - \xo 11:35 \xo*\xt 1 ካዎ 17:17-24፤ 2 ካዎ 4:25-37.\xt*\x* 
\v 36 ሀራት አሳን ቦረትድ ልሶን ጋራፈትዶሶና፤ ሀራት ሳንላታን ቃሸትድ ቃሾ ኬን የገትዶሶና።\x - \xo 11:36 \xo*\xt 1 ካዎ 22:26-27፤ 2 ታር 18:25-26፤ ኤርም 20:2፤ 37:15፤ 38:6.\xt*\x* 
\v 37 ኤንቲ ሹቻን ጫደትዶሶና፤ ማጋዘን ናምአ ከይድ ጳልቀትዶሶና፤ ፓጨትዶሶና፤ ማሻን ሀይቅዶሶና፤ ኤንታዉ ኡባባይ ይን መቶትዶሶና። ዶርሳ እተነ ዴሻ እተ ማእድ ዩይዶሶና።\x - \xo 11:37 \xo*\xt 2 ታር 24:21.\xt*\x* 
\v 38 ኤንታዉ ሀ አላመይ ጊጎና እፅን መላ ቢታን፥ ደረ ቦላ፥ ጎንጎሎንነ ኦላ ግዶን ዩይዶሶና።
\p
\v 39 ፆሳይ ኤንታ አማኑዋባ ማርካትኮካ፥ ሄ ኡባይ ጌተትዳ ኡፋይሳ ቃላ ኤክቦኮና። 
\v 40 ፆሳይ ኑስ ሎኦባ ቆፕ ዎዳ ግሾ ኤንቲ ኑኒ ባይና ፖሎ ግዶኮና።
\c 12
\s1 ፆሳይ ኑስ አዋ
\p
\v 1 ህዛ፥ ሻራዳ ኑ ዩሹዋን ዳርዳ ሀይሳ መላ ማርካት ኑ ማታን ደእያ ግሾ ኑና ብያ ኡባነ ኦይክድ ሃርያ ናጋራ ድግድ፥ ኑ ስንን ደእያ ጋደ ዎ ገንጫን ዎፆስ። 
\v 2 ኑ አማኑዋስ ኦገ ዶይዳይሳነ ኑ ዉርሰ ፖሉዋኮ ኑና ጋያ የሱሳ ቦላ ኑ አይፍያ ዎስ። የሱሲ ዎደፐ ደእያ ኡፋይሳ ግሾ ማስቃልያ ዋይያ ዳንዳእድ፥ ዬላ ሀይቁዋ ካድ፥ ፆሳፈ ኡሻቻ ባጋን ኡትስ።
\p
\v 3 ህዛ፥ ህንተ ዶጭድ ኡፋይስ ቃንፆና መላ ናጋራንቾታ እፁዋ ዳንዳእዳ የሱሳ ቆፕተ። 
\v 4 ናጋራራ ደእያ ባፅያን ቡሮ ሱ ጉሳና ጋካናዉ ኤቀትበከታ። 
\v 5 ፆሳይ ባ ቃላን፥ ባ ናይታዳ ህንተና ዞርዳይሳ ዶግደታ።\x - \xo 12:5 \xo*\xt እዮ 5:17፤ ሌም 3:11-12.\xt*\x*
\q1 “ታ ናአዉ፥ ፆሳ ሴራ ለቆፋ፤
\q2 እ ነና ሴርያ ዎደ ኡፋይስ ቃንፆፋ።
\q1
\v 6 ጎዳይ ባ ዶስያ ኡራ ሴሬስ፤
\q2 ቃስ ባ ናአዳ ኤክያ ኡባ ጋራፈስ” ያጌስ።
\p
\v 7 ፆሳይ ህንተና ባ ናይታዳ ሴርያ ዎደ ገንጭተ፤ አዋይ ሴሮና ናእ ኦኔ? 
\v 8 ፆሳይ ባ ናይታ ኡባ ሴሬስ፤ ህንተ ሴረቶና እፅኮ ቱማ እያ ናይታ ግዶናሽን ባላኮ ናይታ። 
\v 9 ቃስ ኑና የልዳ ኑ አዋት ኑና ሴሮሶና፤ ኑካ ኤንታና ቦንቾስ። ያትን፥ ኑኒ ኑ አያና አዋስ ዋንድ አድ ሃረቶኮ? 
\v 10 ህዛ፥ ኑ አዋት ባንታዉ ሎኦ ዳንዳ መላ ጉ ዎደስ ኑና ሴርዶሶና። ሽን ፆሳይ ኑ ጎአስ፥ ኑ እያ ጌሻተን ሻከታና መላ ሴሬስ። 
\v 11 ኑኒ ሴረትያ ዎደ ይሎዬስፐ አትሽን፥ ኡፋይሰና። ሽን ጉየፐ ሴረተ ሜዘትዳ አሳስ ሴራይ፥ ሳሮይ ኩምዳ ፅሎተ አይፈ አይፍሴስ።
\s1 ዞረነ ናግሶ
\p
\v 12 ህዛ፥ ህንተ አርጋጭዳ ቀስያነ ህንተ ዳቡርዳ ጉልባታ ምንተ።\x - \xo 12:12 \xo*\xt እሳ 35:3.\xt*\x* 
\v 13 ዎበይ ፓፃና መላፐ አትሽን፥ አድ መቆና መላ ህንተ ቶሁዋስ ሱረ ኦገ ጊግስተ።\x - \xo 12:13 \xo*\xt ሌም 4:26.\xt*\x*
\p
\v 14 አሳ ኡባራ ሳሮ ዳናዉነ ጌሻተን ዳናዉ ምንተ፤ ጌሻተ ባይና ኦንካ ጎዳ በአናዉ ዳንዳኤና። 
\v 15 ህንተፈ ኦደስካ ፆሳ አ ኬሀተይ ፓጮናዳ፥ ቃስ ጫሞ አይፈ አይፍድ ዳሮ አሳ ቱንስያነ ይስያ ዘረዳ ግዶና መላ ናገትተ።\x - \xo 12:15 \xo*\xt ዛረ 29:18.\xt*\x* 
\v 16 ህንተ ግዶን ላይማትያ አስ ዎይኮ እስ ቶሆ ምያ ካስ ባ ባይራተ ቶችድ ባይዝዳ ኤሳዌ መላ አስ ዶና መላ ናገትተ።\x - \xo 12:16 \xo*\xt መ 25:29-34.\xt*\x* 
\v 17 ጉየፐ ኤሳዌይ ሄ አንጁዋ ኤካናዉ ኮይዳ ዎደ ድገትዳይሳ ኤሬታ። እ ሄ አንጁዋ አፉን ምንድ ኮይኮካ፥ ደማናዉ ዳንዳእቤና፤ እ ናጋራፐ ስማናዉ ቃዳ ደምቤና።\x - \xo 12:17 \xo*\xt መ 27:30-40.\xt*\x*
\p
\v 18 ህንተ ኩሸን ቦሸትያ ሲና ደርያኮ፥ ኤፅያ ታማኮ፥ ማኮ፥ ጫጋናኮ፥ ጎትያኮ፥\x - \xo 12:18 \xo*\xt ከሳ 4:11-12፤ 19:16-22፤ 20:18-21.\xt*\x* 
\v 19 ሞይዘ ፑኑኮ ዎይኮ ቃላይ ስኤትያ በሳኮ ይቤከታ። ሄ ቃላ ስእዳ አሳይ ሀራ ጉዣ ቃላ ስኦና መላ ዎስዶሶና። 
\v 20 አይስ ጊኮ፥ “ሀር አቶሽን፥ ዶእ ሄ ዙማ ቦችኮ፥ ሹቻን ጫደትድ ሀይቆ” ያግዳ ኪታ ኤንቲ ቶካናዉ ዳንዳእቦኮና።\x - \xo 12:20 \xo*\xt ከሳ 19:12-13.\xt*\x* 
\v 21 ሄ ሀንያባይ ዳሮ ዳጋንያባ ግድዳ ግሾ ሙሰይካ፥ “ታኒ ያሻን ኮኮራስ” ያግስ።\x - \xo 12:21 \xo*\xt ዛረ 9:19.\xt*\x*
\p
\v 22 ሽን ህንተ ፅዮነ ዙማኮ፥ ደኦ ፆሳይ ደእያ የሩሳላመ ካታማኮ፥ እስፈ ሺቅድ ኡፋይትያ ዳሮ ሙኩሉ ኪታንቾታኮ ሳሉዋ ይደታ። 
\v 23 ኤንታ ሱንይ ሳሎን ፃፈትዳ ዎሳ ኬ ባይራ ናይታኮ፥ አሳ ኡባ ዳይና ግድዳ ፆሳኮ፥ ፖሎ ግድዳ ፅሎ አሳ አያናታኮ ይደታ። 
\v 24 ኦራ ጫቁዋስ ግዶ ግድድ ስገያ የሱሳኮ፥ አበላ ሱፈ አያባ ኦድያ ዉርፀትዳ ሱኮ ይደታ።\x - \xo 12:24 \xo*\xt መ 4:10.\xt*\x*
\p
\v 25 ህንተዉ ኦድያ ኡራ ቃላ እፃስ ጎና መላ ናገትተ። ካሰይሳት ሳአን ግድድ ኦድዳ ኪታ ስኦና እፅድ፥ ከስ ኤክቦናባ ግድኮ፥ ያትን፥ ሳሎን ግድድ ኦድያ ቃላ ኑኒ እፃስ ጊኮ ዋንድ ከስ ኤካኔ?\x - \xo 12:25 \xo*\xt ከሳ 20:22.\xt*\x* 
\v 26 ሄ ዎደ እያ ቃላይ ሳአ ቃስ። ሽን ሀእ ታኒ፥ “ሳአ ፃላላ ግዶናሽን፥ እስ ቶሆ ዛራዳ ሳሉዋካ ቃና” ያግስ።\x - \xo 12:26 \xo*\xt ሀገ 2:6.\xt*\x* 
\v 27 “እስ ቶሆ ዛራዳ” ግያ ቃላይ ቃፆናባይ ምንድ ዳናይሳ፥ ቃስ ቃፅያ መትዳባት ያናይሳ በሴስ።
\p
\v 28 ኑኒ ቃፃናዉ ዳንዳኦና ካዎተ ኤክያ ግሾ ፆሳ ጋላቶስ፤ ፆሳ ኡፋይስያ ኦገን ቦንቾንነ ያሻተን እያ ጎይኖስ። 
\v 29 ህዛ፥ ኑ ፆሳይ ቱማ ፁግያ ታማ።\x - \xo 12:29 \xo*\xt ዛረ 4:24.\xt*\x*
\c 13
\s1 ዉርሰ ዞረ
\p
\v 1 አማንያ አሳዳ እሶይ እሱዋራ ፖሎ ሲቀትተ። 
\v 2 እማ ሞከይሳ ዶጎፕተ። እስ እስ አሳት ሄሳዳ ኦሸ ኤሮና ኪታንቾታ ሞክዶሶና።\x - \xo 13:2 \xo*\xt መ 18:1-8፤ 19:1-3.\xt*\x* 
\v 3 ቃሾን ደኤይሳታ ህንተካ ኤንታራ እስፈ ቃሾን ደእያዳ ኦድ ኤንታና ቆፕተ። ዋየ ኤክያ አሳራ እስፈ ህንተካ ዋየ ኤክያዳ ኦድ ኤንታና ቆፕተ።
\p
\v 4 ኤኮይነ ገሎይ አሳ ኡባ ማታን ቦንቸትዳባ ግዶ። ቃስ ፆሳይ ላይማተይሳታነ ላመይሳታ ፕርዳናዉ ደእያ ግሾ አዝናይነ ማችያ እሶይ እሱዋስ አማነታናዉ በሴስ።
\p
\v 5 ሚሸ ሲቆፐ ህንተና ናግተ፤ ህንተዉ ደእያባን አልተ። ፆሳይ፥ “ታኒ ነና ኡባራካ የግከ ዎይኮ አግከ” ያግስ።\x - \xo 13:5 \xo*\xt ዛረ 31:6፥ 8፤ እያ 1:5.\xt*\x* 
\v 6 ሄሳ ግሾ፥ ኑኒ አማነትድ፥
\q1 “ጎዳይ ታና ማደይሳ፤
\q2 ታ ያይከ፤ አስ ታና አይ ኦኔ?”
\m ያጎስ።\x - \xo 13:6 \xo*\xt ማዝ 118:6.\xt*\x*
\p
\v 7 ፆሳ ቃላ ኮይሮ ህንተዉ ኦድዳ ህንተና ካለይሳታ ቆፕተ። ኤንቲ ዋንድ ደእዳኮ ኤንታ ዱሳ በእድ ኤንታ አማኑዋ ካልተ።
\p
\v 8 የሱስ ክርስቶሲ ዝነካ ሀችካ መርናዉካ ላመተና። 
\v 9 ዱማ ዱማ ኦራ ትምርተን ሀራሶ ብድ ዮፕተ፤ ቦፕተ። ኑ ዎዛናይ ፆሳ አ ኬሀተን ምናናዉ በሴስፐ አትሽን፥ ምን ጎኦና ካን ዎጋ ፖሎን ግዶፖ።
\p
\v 10 ሽን ዱንካንያ ግዶን ኦያ ካህነት ሄ ያርሾ ካፈ ማናዉ ኤንታዉ ማት ባይና ያርሾ በሳይ ኑስ ደኤስ። 
\v 11 ካህነ ሀላቃይ ናጋራ ያርሾስ መሄ ሱ ኤክድ ያርሻናዉ ኡባፈ ጌሻ በሳ ገሌስ። ሽን ሄ መህያ አሹዋ ድርሳፈ ካረን ፁጌስ።\x - \xo 13:11 \xo*\xt ሌወ 16:27.\xt*\x* 
\v 12 ሄሳዳካ፥ የሱሲ ደርያ ናጋራፐ ባ ሱን ጌሻናዉ ካታማ ፐንግያፈ ካረን ዋየትስ። 
\v 13 ህዛ፥ ኑኒ ቦርያ ቶክድ ድርሳፈ ካረ እያኮ ከዮስ። 
\v 14 ህዛ፥ ኑስ ሀይሳን መርናዉ ደእያ ካታም ባዋ፥ ሽን ኑኒ ያና ካታማ ናጎስ።
\p
\v 15 ህዛ፥ የሱሳ ባጋራ ኡባ ዎደ እያ ሱንስ ማርካትያ መተርሻ ጋላታ ያርሾ ፆሳስ እሞስ። 
\v 16 ሎኦባ ኦሶነ ህንተዉ ደእያባፐ መቶትዳ አሳስ እሞ ዶጎፕተ። ህዛ፥ ሄሳ መላ ያርሾይ ፆሳ ኡፋይሴስ።
\p
\v 17 ህንተና ካለይሳታስ ኪተትተ፤ ኤንቲ ግያባ ኦተ። ኤንቲ ባንታ ኦያባስ ፆሳ ስንን ኦይሸታናዉ ደእያ ግሾ፥ ህንተና ሄሞሶና። ህንተ ኤንታዉ ኪተትኮ፥ ባንታ ኦሱዋ ኡፋይትድ ኦና፤ ሄስ ሀኖና እፅኮ፥ ኤንቲ አዛንሸ ኦና፤ ሄስ ህንተና አይብባካ ማደና።
\p
\v 18 ኑስ ፆሳ ዎስተ። ኑ ካሀይ ጌሽ፤ ኑ ኡባ ዎደ ሎኦባ ኦናዉ ኮዮስ። 
\v 19 ታኒ ህንተኮ ኤለሳዳ ያና መላ ህንተ ታዉ ምንድ ፆሳ ዎሳና መላ ታ ህንተና ሀዳራ ጋይስ።
\p
\v 20 ሳሮተ ፆሳይ፥ ዶርሳ ሄምያ ኑ ጎዳ የሱሳ፥ ባ መርና ጫቆ ሱን ሀይቆፐ ደንዳይስ፥ 
\v 21 እያ ሸንያ ኦና መላ ሎኦባ ኡባን እ ህንተና ዳንጭሶ። እያ ኡፋይስያባ የሱስ ክርስቶሳ ባጋራ ኑናን ፆሳይ ኦ። የሱስ ክርስቶሳ ባጋራ ፆሳስ መርናፐ መርና ጋካናዉ ቦንቾይ ግዶ። አምንእ።
\p
\v 22 ታ እሻቶ፥ ታ ሀ ዳብዳብያ ህንተዉ ቃንን ፃፍዳ ግሾ፥ ህንተ ታ ዞርያ ሳለቶና ኤካና መላ ታ ህንተና ዎሳይስ።
\p
\v 23 ኑ እሻይ፥ ፅሞትዮስ ቃሾፐ ብለትዳይሳ ኤርተ። እ ኤለስድ ታኮ ዪኮ ታ እያራ ህንተና ባዳ በአና።
\p
\v 24 ህንተና ካለይሳታነ አማንያ ኡባ ሳሮ ጊተ። ፃለፐ ይዳ አማንያ አሳይ ህንተና ሳሮ ያጎሶና።
\p
\v 25 ፆሳ አ ኬሀተይ ህንተ ኡባራ ግዶ። አምንእ።