\id HAB - GOOFA FULL BIBLE
\ide UTF-8
\h እንባቆመ ማፃፋ
\toc1 እንባቆመ ማፃፋ
\toc3 እንባ
\toc2 እንባቆመ
\mt እንባቆመ ማፃፋ
\imt ጋ ቆፋ
\ip ሀ ማፃፋን፥ ኮይሮ ናምኡ ሸምፖታን፥ እንባቆመይ ጎዳራ ፓላምያ ፓላማ በኦስ። እንባቆመይ፥ ይሁዳን ደእያ ናጋራነ ኤቃ ጎይኑዋ በእድ፥ “ፆሳይ ጌላ ግድዳ ባ ደርያ በእሸ አይስ ፕርዶና አግድ አ?” ያግድ ኦይችን፥ ፆሳይ፥ ማታ ዎደ ይሁዳ ፕርዳናዉ ባብሎነ ሚሸ ኦድ ጎኤታናዉ ደኤይሳ እንባቆመስ ኦድስ። ካልድ እንባቆመይ፥ “ፆሲ ይሁዳ ፕርዳናዉ ዋትድ ናጋራንቾነ ዎዛና ምኖ ግድዳ ባብሎነ ሚሸ ኦድ ጎኤቲ?” ያግድ ኦይችስ። ፆሲ ዛርሸ፥ ባብሎነትካ ማታ ዎደ ፕርደቶና አቶናይሳ እንባቆመስ ኦድስ።
\ip እንባቆመይ ማፃፋን ዉርሰ ሸምፖይ እንባቆመይ፥ ጎዳ፥ እያ ዎልቃስነ እያ ቦንቹዋስ ጋላትሸ ዎስያ ዎሳ ኦይክስ። እንባቆመይ፥ ኤርምያስነ ህዝቄል ደእዳ ዎደን ዶና አገና።
\iot ማፃፋ አይፈ ቆፋታ
\io1 እንባቆመ ኦይሻነ ጎዳ ዛሩዋ (\ior 1:1—2:20\ior*)
\io1 እንባቆመ ዎሳ (\ior 3:1-19\ior*)
\c 1
\s1 እንባቆመ ኮይሮ ሞቱዋ
\p
\v 1 ናብያ እንባቆመስ ጎዳይ ቆንጭስዳ ቃላይ ሀይሳ። 
\v 2 እንባቆመይ፥ “አቤት ጎዳዉ፥ ታና ማዳና መላ ታኒ ነና ፄግያ ዎደ አዉደ ጋካናዉ ስኦና እፃይ? ታኒ ኡንኤታዳ ኔኮ ዋስያ ዎደ አዉደ ጋካናዉ አሾና እፃይ? 
\v 3 ኔኒ ሀ ኢታተ ኡባ ታና አይስ በሳይ? ኔኒ ባላ በአሸ አይስ ስእ ጋይ? ዮይነ ጌላተ ታ ስንና፤ ፓላምነ ኦሽ ቢታ ኡባን ዳርስ። 
\v 4 ሄሳ ግሾ፥ ህገይ ዶልእስ፤ ሱረ ፕርድ ካንና። ናጋራንቾት ፅሎ አሳታ ተቅድ ኦይክዳ ግሾ፥ ፕርድ ጌላትስ” ያግስ።
\s1 ጎዳ ዛሩዋ
\p
\v 5 ጎዳይ ዛሪድ፥ “ህንተ ዩሹዋን ደእያ ካዎተታ ፄልድ ማላለትተ። ህንተዉ አስ ኦድን ህንተ አማኖና ኦሱዋ ታኒ ህንተ ዎድያን ኦና። 
\v 6 ታኒ ቃይ ባይናይሳታነ ድርግያ ባብሎነ አሳ ደንና። ኤንቲ ባንታባ ግዶና ቢታ ኦልድ ኦይካናዉ ቢታ ኡባን ዩዮሶና። 
\v 7 ኤንቲ ያሽሶሶናነ ዳጋንሶና፤ ባንታና ቦንችስያ ህገ ከሶሶና። 
\v 8 ኤንታ ፓራት ማሄፐ አድ ኤለሶሶና፤ ኮሻትዳ ኦማርሳ ሱመፐ አድ ዎዛና ምኖ። ኤንታ ፓራ አሳት ሃሆፐ ዮሶና፤ ኤንቲ አርጋን እስባ ኦይካናዉ ዎያዳ ፓሎሶና። 
\v 9 ኤንታ ኦላንቾት ኡባይ ኢታ ኦሶ ኦናዉ ባዞ ጫርኮዳ ጫርክሸ ዮሶና። አሳ ድእድ ሻፈዳ ሺሾሶና። 
\v 10 ኤንቲ ካዎታ ቦላ ቀልቅሶሶና፤ ሃረይሳታ ኤንቲ ቶቾሶና። ኤንቲ ሹቻ ድርሳን ድረትዳ ካታማታ ኡባ ቦላ ሚጮሶና። ሄ ድርሳታ ድአናዉ ኤንታ ዩሹዋን ቢታ ሺሾሶና። 
\v 11 ሄሳፈ ጉየ፥ ኤንቲ ኡባ ጫርኮ መላ ፕትድ ኤፋና። ሄ ጌላታስ ኤንታ ዎልቃይ ኤንታ ፆሳ” ያግስ።
\s1 እንባቆመ ናምአን ሞቱዋ
\p
\v 12 አቤት ጎዳዉ፥ ታ ፆሳዉ፥ ታ ጌሻዉ፥ ኔኒ መርና ፆሳ ግድኪ? ኔኒ ኑ ዛላ ግድያ ግሾ ኑኒ ሀይቆኮ። አቤት ጎዳዉ፥ ባብሎነ አሳይ ኑና ፕርዳና መላ ኤንታ ደንዳ ዎልቃ ኤንታዉ እማዳሳ። 
\v 13 ነ አይፈት ዳሮ ጌሽ ግድያ ግሾ፥ ኢታባ ፄላናዉ ዶሶኮና፤ ኔኒ ኢታባይ ኦሰትያ ዎደ በአሸ ስእ ጋካ። ያትን፥ ሀ ኢታታ አይስ ስእ ጋዳ ፄላይ? ናጋራንቾት ባንታፈ አድ ፅልያ አሳታ ምትያ ዎደ አይስ ስእ ጋይ? 
\v 14 ኔኒ አሰ አባ ሞሎዳነ ካለይ ባይና ኡሎራ ጎሸትያ መተታ መዳሳ። 
\v 15 ባብሎነ አሳይ አሳ ኡባ ቃጰን ቆርድ ከሳና፤ ኤንታ ባንታ ግትያን ኦይካና፤ ኤንታ ባንታ ዳቹዋን ቡርድ ሺሻና፤ ሄሳ ኦድ ኤንቲ ኡፋይታናነ ሀሹ ጋና። 
\v 16 ሄሳ ግሾ፥ ኤንቲ ባንታ ግትያስ ያርሻና፤ ባንታ ዳቹዋስ እፃነ ጩይሳና። ኤንቲ ሻሎ ደመይነ እንጀትን ደኤይ ሄ ግተታና። 
\v 17 ያትን፥ ኤንቲ ባንታ ግትያ ቃይ ባይና የግሸነ ምሽ ካዎተታ ይስሸ ዋንድ ዳኔ?
\c 2
\p
\v 1 ታኒ ዎችያ ግምብያ ቦላ ኤቃዳ ናጋና። ሄ በሳን ኤቃዳ ጎዳይ ታዉ ኦድያባነ ታ ሞቱዋስ እምያ ዛሩዋ ስአናዉ ናጋሻና።
\s1 ጎዳ ዛሩዋ
\p
\v 2 ጎዳይ ዛሪድ፥ “ዎፅያ አደይ ናባባና መላ ሎቸ ሹቻ ቦላ ታኒ ነዉ ቆንጭስያ ቃላ ኦርድሳዳ ፃፋ። 
\v 3 ቆንጨይ ባ ዎድያ ናጌስ፤ ቆንጨይ ፖለትያ ዎደይ ኤለ ጋካና፤ ዎርዶ ግደና። ጋምእኮካ ናጋ፤ እ ቱማ ሀናና፤ ጋምኤና።” 
\v 4 ሄኮ፥ እያ ዎዛናይ ኦቶርትስ፤ እያ ቆፋይ ሱረ ግደና፤ ሽን ፅሎይ ባ አማኑዋን ደኦን ዳና። 
\v 5 ዱረተ አሰ ጭሜስ፤ ጬቀትያ ኡራስ ሸምፖይ ባዋ። እ ዱፎዳ ያራምባ ግድያ ግሾነ ሀይቆዳ ካል ኤሮና ግሾ፥ ካዎተታ ኡባ ባዉ ሺሼስ፤ አሳ ኡባ ባዉ ድኤስ።
\p
\v 6 ድኤትዳ አሳይ ስሚድ ኤንታ ቦርሸነ ቀልቅስሸ ሀይሳዳ ያጋና፦ “ባባ ግዶና ሚሸ ሺሽድ ዶረይሳነ ቦንቅድ ዱረትዳይሳታ አየ! ሀይስ ሀይሳዳ ሀንድ፥ አዉደ ጋካናዉ ዳኔ?” ያጋና። 
\v 7 ኔኒ ኤንታፈ ቦንቅዳ አሳት ነ አኬኮና ነ ቦላ ደንድድ ነና ኮኮርሳና። ሄሳፈ ጉየ፥ ኤንቲ ነ ሻሉዋ ኡባ ቦንቃና። 
\v 8 ኔኒ ዳሮ አሳ ሻሉዋ ቦንቅዳ ግሾ፥ ኤንታፈ አትዳይሳት ነ ሻሉዋ ቦንቃና። ነ ዳሮ አሳ ሱ ጉሳዳሳ፤ ሳኣ ቦላ፥ ካታማታ ቦላነ ያን ደእያ አሳ ኡባ ቦላ ኢታ ኦሶ ኦዳሳ። 
\v 9 መቶይ ነና ጋኮና መላ ነ ኬ ቃ በሳን ኬፃናዉ ጌላተን ሚሸ ሺሽዳይሶ ነና አየ! 
\v 10 ዳሮ አሳ ገናዳ ይስዳ ግሾ፥ ነ ሶ አሳ ካዉሻዳሳ፤ ኔኒ ነ ቦላ ዮ ኤሀዳሳ። 
\v 11 ሀር አቶሽን ነ ኬ ግምበ ሹቻይ ነ ቦላ ዋሳና፤ ኬ ቱቀት ዋሱዋ ኮሹማና። 
\v 12 ካታማ ኢታተን ባስድ አሳ ሱን ኬፀይሳቶ ህንተና አየ! 
\v 13 አሳይ ኦያባ ኡባይ ታማ ካሆ ግዳና መላ፥ ካዎተት ዳቡርዳ ኡባይ ሀዳ ግዳና መላ ኦዳይ ኡባፈ ዎልቃማ ጎዳ ግደኔ? 
\v 14 አብ ሃን ኩመይሳዳ ሳእ ጎዳ ቦንቹዋ ኤራተን ኩማና።
\p
\v 15 “ባ ሾሮይ ካሎትን በአና ግድ፥ ማይያ ኡሽ ኡሽያ ኡራ አየ! 
\v 16 ኔኒ ቦንቾ አጋዳ ካዉሸ ማአና። ሀእ ማይ ነ ታራ፤ ነ ኡያዳ ካሎታ። ጎዳ ኡሻቻ ኩሽያን ደእያ ፁአይ ነዉ እመታና፤ ነ ቦንቾይ ዬላን ላመታና። 
\v 17 ነ ልባኖሰ ይስዳይሳዳ ነካ ያና። ነ ዶአታ ዉርሳዳሳ፥ ሀእ ኤንቲ ነና ያሽሳና። ነ ዳሮ አሳ ሱ ጉሳዳሳ፤ ሳአ ቦላ፥ ካታማታ ቦላነ እያን ደእያ አሳ ቦላ ኢታ ኦሶ ኦዳሳ።
\p
\v 18 “እ ባዉ ኤቅ አይ ማዲ? እያ አሳ ኩሸን ጊግስ ግደኔ? ዎርዶፈ አትሽን፥ እያን ሀራባይ በንተና። ያትን፥ እያ መዳ ኡራይ ሀ አይኮካ ኦደቶና ኤቃን አማነተይስ እያ አይ ማዳኔ? 
\v 19 ምፈ ጊግዳይሳ ‘ባርካ’ ገይሶ፥ ቃስ ሸምፖይ ባይና ሹቻ ‘ደንዳ’ ገይሶ ነና አየ! እ ዎና ነዉ አይ ቆንጭሳናዉ ዳንዳኢ? ሄኮ፥ ዎርቃንነ ብራን ሜሸትስ፤ እያዉ ሸምፖይ ባዋ።
\p
\v 20 “ሽን ጎዳይ ባ ጌሻ ኬና። ሄሳ ግሾ፥ ሳአን ደእያ አሳ ኡባይ እያ ስንን ስእ ጎ” ያግስ።
\c 3
\s1 እንባቆመ ዎሳ
\p
\v 1 ማዝሙረን ሽቅዳ ናብያ እንባቆመ ዎሳይ ሀይሳ፦
\q1
\v 2 አቤት ጎዳዉ፥ ኔኒ ካሰ ኦዳባ ታኒ ስአዳ ያያስ።
\q2 ጎዳዉ፥ ኑ ዎድያንካ ሄ ኦሶታ ዛራዳ ኦ፤
\q2 ኤንቲ ኑ ዎድያንካ ኤረቶ።
\q2 ነ ሀንቀትያ ዎደ ነ ማሮታ ቆፓ።
\q1
\v 3 ፆሳይ ተማና ቢታፈ ዬስ፤
\q2 ጌሻይ ፓራና ደርያፐ ዎስ።
\q1 እያ ቦንቾይ ሳሉዋ ካምስ፤
\q2 እያ ጋላታይ ሳኣ ኩምስ።
\q1
\v 4 እያ ፖኦይ ጶልያ አዋ መላ፤
\q2 እያ ዎልቃይ ቆሰትድ ኡትዳ እያ ኩሽያፐ
\q2 ፆልቅያ ፖኦይ ከዬስ።
\q1
\v 5 ጋዶይ እያ ስንን ቤስ፤
\q2 ታማ ላጮይ እያ ቶሁዋፐ ከዬስ።
\q1
\v 6 እ ኤቅን ቢታይ ቃፅስ፤
\q2 እ ፄልን ካዎተት ኮኮርዶሶና።
\q1 መርና ደረት ዎድዶሶና፤
\q2 እ ኤንታ ቦላ ሄመትያ በንፐ ደእያ ዙማት ላለትዶሶና።
\q1
\v 7 ታኒ ቶጰ አሳ ዱንካነይ መቶትሽን በአስ፤
\q2 ምድያመ ቢታ አሳይ ኮኮርሽን በአስ።
\q1
\v 8 አቤት ጎዳዉ፥ ኔኒ አይስ ሀንቀታዲ?
\q2 ሻፋት ነና ሀንቀዶና?
\q2 ዎይኮ ነ ሀንቆይ አባ ቦሌ?
\q1 አካይ፥ ኔኒ ነ ፓራታነ ነ ፓራ ጋረታ ቶግዳይ
\q2 ነ አሳስ ፆኖ እማናሳ ግደኔ?
\q1
\v 9 ኔኒ ነ ዶንግያ ዋፃዳሳ፤
\q2 ዱካናዉ ጊግሳዳሳ፤
\q2 ቢታ ጳልቃዳ ሃ ከሳዳሳ። \qs ሳላሀ \qs*
\q1
\v 10 ደረት ነና በእድ ያሻን ኮኮርዶሶና፤
\q2 ክፃ ሃይ አስ።
\q1 ጪሞ ሃት ዋስዶሶና፤
\q2 ባንታ ዙልያ ቁ ቁ ኦሶና።
\q1
\v 11 ነ ዶንግያ ዱካን፥ ነ ቶራ ጶለን፥
\q2 አውነ አጌን ባንታ ደእያ በሳን ኤቅዶሶና።
\q1
\v 12 ኔኒ ሀንቁዋን ቢታ ኡባ ዩያዳሳ፤
\q2 ካዎተታ ነ ሀንቁዋን የዳሳ።
\q1
\v 13 ነ አሳነ ነ ትይዳይሳ አሻናዉ ከያዳሳ፤
\q2 ኢታታ ሀላቃ ሾጫዳሳ፤
\q2 እያ ማኡዋ ቃራዳ ካሎ አሻዳሳ። \qs ሳላሀ \qs*
\q1
\v 14 ኑና ላላናዉ ጎተዳ ይዳ ኑ ሞርክያ፥
\q2 መቶታንቾታ ምታናዉ ጌማን ቆሰትዳይሳ፥
\q2 እያ ቶራን እያ ጫዳዳሳ።
\q1
\v 15 ኔኒ ነ ፓራታራ አባ ቦላ ሄመታዳሳ፤
\q2 ዳሮ ሃ የዳሳ።
\q1
\v 16 ታኒ ሄሳ ኡባ ስእን ታ ዎዛናይ ዳጋምስ፤
\q2 ታ መተርሻይ ኮኮርስ።
\q1 ታ መቀይ ዳጋምስ፤
\q2 ታ ቶሆይ ጉንድስ።
\q1 ኑ ሞርከታ ጎዳይ ሴራና ጋካናዉ፥
\q2 ታኒ መቱዋ ጋላሳ ዳንዳአን ናጋና።
\q1
\v 17 ባላሰ ምይ አይፎና እፅኮካ፥
\q2 ዎይንያ ቦላ አይፈይ በንቶና እፅኮካ፥
\q2 ሻማሆይ አይፎና እፅኮካ፥
\q2 ጎሻን ካ ካፅናኮካ፥
\q2 ግርበን ዶርስ ይኮካ፥
\q2 ዛዳሎን መሄይ ይኮካ፥
\q2
\v 18 ታኒ ጎዳን ኡፋይታና፤
\q2 ታና አሽያ ፆሳን ኡፋይሳን ኩማና።
\q1
\v 19 ታ ዎልቃይ ኡባ ሃርያ ጎዳ፤
\q2 እ ታ ቶሁዋ ጋራ ቶሆዳ ምንስ፤
\q2 እ ታና ቃ በሳን ሄመስ።