\id EST - GOOFA FULL BIBLE
\ide UTF-8
\h አስትር ማፃፋ
\toc1 አስትር ማፃፋ
\toc3 አስት
\toc2 አስትሮ
\mt አስትር ማፃፋ
\imt ጋ ቆፋ
\ip አስትር ማፃፋን ፃፈትዳ ታርከት ፖለትዳይ፥ ፋርሰ ካዎይ፥ ሱሳ ካታማን ባ ካዎ ጋን ደእሽና። ሄ ማፃፋይ ናምኡ ግታ ቆፋታ ኦይክስ፤
\ipi 1. ባ ፃላተንነ ባ አሳስ ደእያ ግታ ምሻን፥ ሞርከት ኤንታ ይሳና ሀንያ ዎደ ባ አሳ አሽዳ፥ አስትሮ ጌተትያ አይሁደ ማጫሰ ታርከ ኦዴስ።
\ipi 2. አይሁደት ቦንችያ፥ ፑርማ ጌተትያ ባለይ ቦንቸትያ ጋሱዋ ቆንጭሴስ።
\ip አስትር ማፃፋን ዳሮ ቆንጭድ ኤረትዳ እቻሹ አሳት ደኦሶና። ኤንትካ፥ (1) ፋርሰ ካዋ አርፀክስሳ፤ (2) እያ ሹማ ሃማ፤ (3) ጎዳትዉ አስፂኖ፤ (4) አይሁደ ማጫስዉ አስትሮ፤ (5) አስትር አዋ እሻ ማርድክዮሳ።
\ip ሀ ማፃፋን ፆሳ ሱን ፄገቶና እፅኮካ፥ እያ ኦሶይ፥ ማሮተይ፥ እያ ኬሀተይነ ሲቆይ ቆንጭዳ ማፃፋ።
\iot ማፃፋ አይፈ ቆፋታ
\io1 አስትራ ካዎ ማቾ ግዳሱ (\ior 1:1—2:23\ior*)
\io1 ሃም አይሁደ ይሳናዉ ቆፕስ (\ior 3:1-15\ior*)
\io1 ማርድክዮስ አስትሮ ማደ ኦይችስ (\ior 4:1-17\ior*)
\io1 ማርድክዮስ ደምዳ ቦንቹዋ (\ior 5:1—6:14\ior*)
\io1 ሃማ ቦላ ሀይቆ ፕርዳ (\ior 7:1-10\ior*)
\io1 አይሁደት ባንታ ሞርከታ ይሱዋ (\ior 8:1—9:19\ior*)
\io1 ፑርማ ባኣለ ቦንቹዋ (\ior 9:20-32\ior*)
\io1 አርፀክስሳነ ማርድክዮሳ ሹማተ (\ior 10:1-3\ior*)
\c 1
\s1 ካዋ ግብራ
\p
\v 1 ካዎይ አርፀክስስ ህንደ ቢታፈ ቶጰ ቢታ ጋካናዉ ደእያ፥ ፄታነ ላታማነ ላፑን ቢታ አይስያ ዎደ ሀንዳባ። 
\v 2 ካዎይ ባ አራታን ኡትድ አይስያ ዋና ካታማይ ሱሳ ጌተቴስ።
\p
\v 3 እ ካዎትዳ ሄን ላይን፥ ባፐ ጋርሳራ ዳይናታስነ ቢታ አይሰይሳታስ ግታ ግብራ ጊግስስ። ሄ ግብራ በሳን ሜዶናነ ፋርሰ ቶራ ሞጮናት፥ ቢታ ሃረይሳትነ አይሰይሳት በንትዶሶና። 
\v 4 ካዎይ እስ ፄታነ ሆስፑን ታሙ ጋላስ ኩመ ባ ካዎተ ዱረተነ ባ ያሽያ ቦንቹዋ ኡባ ኤንታ በስስ።
\p
\v 5 ሄ ጋላሳታፐ ጉየ፥ ካዎይ ቃስ ሀራ ላፑን ጋላስ ጋምእያ ግብራ፥ ሱሳ ካታማን፥ ዱረፐ ማንቆ ጋካናዉ ደእያ አሳ ኡባስ ጊግስስ። ሄ ግብራይ ካዎ ጋይ ደእያ አታክልተ በሳን ጊግስ። 
\v 6 ሄ በሳን ደእያ ዳባባይ፥ ሊኖፐ ኦሰትዳ ቦነ ካሎሰ ገሸታን አሌቅስ። ገሸት ኦቻ ቴራ ዳንያ አልኦ ሊኖ ክረን አን፥ እብነባራደ ጌተትያ ሹቻፈ ኦሰትዳ ቱቅያ ቦላ ደእያ ብራ ምግዶታን ካቀትድ ኡትዶሶና። ቃስ ዎርቃፈነ ብራፐ ኦሰትዳ አርሳት፥ ዱማ ዱማ ማል ደእያ አልኦ ሹቻታፐ ኦሰትዳ ባሱዋን ማራን የገትዶሶና። 
\v 7 እሶይ እሱዋፈ ዱማ ግድዳ ዎርቃ ቡርጩኮን ዎይነ ኡሽ አሳ ኡባስ እመትስ። ካዎይ ዳሮ ኬሀ ግድዳ ግሾ፥ ዎይነ ኡሻስ ዛው ባዋ። 
\v 8 እስ እስ አስ ባ ኮይዳ መላ ኡዬስ፤ ሄሳ ካዎይ ኮይሮትድ ባ አይለታስ ኦድስ።
\p
\v 9 ሄ ዎደ ካውያ አስፂና ማጫሳ ኡባስ ግብራ ካዎ ጋን ጊግሳሱ።
\p
\v 10 ግብራይ ዶመትዳ ላፑን ጋላስ፥ ካዎይ አርፀክስስ ዎይነ ኡሻ አልድ ኡፋይትዳ ዎደ፥ ባ አይለታ መሁማና፥ ብዝታ፥ ሀርቦና፥ ብግታ፥ አባግታ፥ ዛታራነ ካርካሳ ጌተትያ ላፑን ሹፋታ ፄግድ፥ 
\v 11 “ካውዉ አስፂኖ ካዎተ ካላቻ ዎድ ሃ ኤክድ ዪተ” ያግድ ኪትስ። እያ ዳሮ ማላ ሎኦ ግድያ ግሾ፥ ሀላቃትነ አሳ ኡባይ እዮ በአና መላ ካዎይ ኮይስ። 
\v 12 ሽን ካዋ ኪታ እዉ ኦድን፥ ካውያ አስፂና ካዋ ስን ዮና እፃሱ። ሄስ ካዋ ዳሮ ሀንቀስ።
\p
\v 13 ሄ ቢታ ህግያነ ደኦ ዎጋ ኤርያ አሳ ዞረ ኦይሾይ ካዋ ማታን ሜዘትዳባ ግድያ ግሾ፥ ዎድያባ ሻክድ ኤርያ ጭንጫ አሳታራ ኦደትስ። 
\v 14 ካዎይ ግታ ማት ደእያ ላፑን ፋርሰነ ሜዶና ሹማታ፥ አርቀስዮሳ፥ ሸታራ፥ አድማታ፥ ታርሸሻ፥ ማሬሳ፥ ማርሳናነ መሙካና ፄግስስ። 
\v 15 ካዎይ ኤንታ፥ “ታኒ፥ ካዎይ አርፀክስስ፥ ታ ሹፋታ ኪትን፥ ካውያ አስፂና ታ ኪታ ፖሎና እፃሱ። ሄሳ ግሾ፥ ህገይ ኦድያ ማራን እዮ ዋታናዉ በሲ?” ያግድ ኦይችስ።
\p
\v 16 ኤንታፈ እሶይ፥ መሙካን ካዋ ስንንነ ሀላቃታ ስንን ሀይሳዳ ያግስ፤ “ካውያ አስፂና ካዋ ፃላላ ግዶናሽን፥ እያ ሀላቃታ ኡባነ እያ ካዎተ ግዶን ደእያ አሳ ኡባ ናቃሱ። 
\v 17 ሀ ካዎተ ግዶን ደእያ ማጫስ ኡባይ ካውያ አስፂና ኦዳይሳ ስእድ፥ ባንታ አዝናታ ካ ዶማና። ኤንቲ፥ ‘ካዎይ አርፀክስስ ባኮ ያና መላ ፄግስን፥ ካውያ አስፂና እፃበከዬ?’ ያጋና። 
\v 18 ሄሳ ፃላላ ግዶናሽን፥ ፋርሰነ ሜዶና ሀላቃታ ማጫሳይ ሄሳ ስእዳ ዎደ፥ ሀች አው ዉላና ጋካናዉ ባንታ አዝናታ ሄሳዳ ግድ ካና። ሄሳ ጋሶን ማቸታ ግዶንነ አዝናታ ግዶን ኦሽ ከያና። 
\v 19 ሄሳ ግሾ ካዋዉ፥ ኔኒ ዶስኮ፥ ካውያ አስፂና ናምአን ነ ስን አና መላ ተቅያ አዋጆ ከሳ። ሄ አዋጆይ ናምአን ላመቶና መላ ፋርሰነ ሜዶና ህግያ ግዶን ፃፈቶ። ሄሳፈ ጉየ፥ ካዎተ ቦንቹዋ ኢፐ ኤካዳ ሀራ ሎኦ ማጫሳስ እማ። 
\v 20 ሀ ኔኒ አዳ አዋጆይ ሀ ግታ ካዎተ ኡባን ኦደትያ ዎደ እስ እስ ማጫስ ዱረ ግድን ማንቆ ግድን፥ ሻኮና ባ አዝና ቦንቻና” ያግስ።
\p
\v 21 ካዎይነ እያ ሀላቃት ሀ ዞርያን ኡፋይትዶሶና። ሄሳ ግሾ፥ መሙካን ግዳይሳዳ ካዎይ ኦስ። 
\v 22 እ ባ ካዎተ ግዶን ደእያ ዱማ ዱማ ቢታታስ ኤንታ ፕዳለንነ ኤንታ ዶናን ፃፍድ፥ ዳብዳበ የድስ። ሄ አዋጆይ፥ እስ እስ አዝን ባ ኬ ኬ አይስያ ሀላቃ ግደይሳ ኦዴስ።
\c 2
\s1 አስትራ ካዎ ማቾ ግዳሱ
\p
\v 1 ሄሳፈ ጉየ፥ ካዋ አርፀክስሳ ሀንቆይ ዶችን፥ ካውያ አስፂና ኦዳባነ እ ቦላ ከይዳ አዋጁዋባ ቆፕስ። 
\v 2 ሄ ዎደ ካዋ ማታን ሀጋዝያ ናአተታ አደት ሀይሳዳ ያግዶሶና፤ “ማላ ሎኦ ጌላኦታ ኮይድ፥ ካዋስ ኤሀና መላ፥ 
\v 3 ነ ካዎተ ግዶን ደእያ ቢታ ኡባን ሀላቃታ ሹማ። ኤንቲ ማላ ሎኦ ጌላኦ ዶርድ፥ ሱሳ ካታማ ኤህድ፥ ማጫሳስ ጊግዳ ኬን ዎ። ያን ሄ ማጫሳ ኬስ ካፖ ግድዳ ካዎ ሹፋ ሄጋያ ኩሸን ኤንቲ ደእሽን፥ ኤንታ ማላ ሎይያባ ኡባይ ኤንታዉ እመቶ። 
\v 4 ሄሳፈ ጉየ፥ ኡባፈ አዳ ካዋ ኡፋይስያ ጌላእያ አስፂን በሳን ካዎ ማቾ ግዶ” ያግዶሶና። ሀ ዞረይ ካዋ ኡፋይስዳ ግሾ፥ ካዎይ ሄሳዳ ኦስ።
\p
\v 5 ያን ሱሳ ካታማን እስ ማርድክዮሳ ጌተትያ አይሁደ አስ ደኤስ። እ ያእራ ናአ፤ ያእር ሳመአ ናአ፤ ሳመእ ብንያመ ኮቸ ግድዳ ቂሳ ናአ። 
\v 6 ባብሎነ ካዎይ ናቡካዳናፆር ይሁዳ ካዋ ዮአክናነ ሀራ አይሁደ አሳ ኦላን ድእድ ኤፍዳ ዎደ ማርድክዮስ ኤንታራ ብስ። 
\v 7 እ ባ አዋ እሻ ናእዉ፥ እብራወ ዶናን ሀዳሶ ጌተትያ አስትሮ ባራ ዎድ ድቼስ። አስትራ መንነ ጌሳን ዳሮ ማላ ሎኦ። እ አዋይነ አይያ ሀይቅዳፐ ጉየ፥ ማርድክዮስ እዮ ኤፍድ፥ ባ ናአ ኦድ ድችስ።
\p
\v 8 ካዎይ ከስዳ አዋጁዋነ ኪታ ማራን፥ ሱሳ ካታማ ይዳ ዶረትዳ ዳሮ ጌላኦታፐ እስንያ አስትሮ። እያ ያዳ፥ ማጫሳስ ጊግዳ ኬ ካፖ ግድዳ ሄጋ አዋተ ጋርሳን ደአሱ። 
\v 9 ሄግ አስትሮ በእዳ ዎደ እን ዳሮ ኡፋይትስ፤ እዮ ዱማ ፄልስ። ኤለስድ ማናዉ ዱማ ካነ ቦላ ትየትያባ እዉ እሚስ። ቃስ እዮ ማታን ሀጋዛና መላ ካዎ ጋፐ ዶረትዳ ላፑን ናአተ፥ ማጫሳታ ጊግዳ ኬን፥ ክፍለ ኡባፈ አድ ሎእያ ክፍለን እዮነ ኤንታና ዎስ።
\p
\v 10 ማርድክዮስ እዉ ኮይሮትድ ኦድዳይሳዳ፥ አስትራ አይሁደ አስ ግደይሳ ኦደስካ ኦዳቡኩ። 
\v 11 ቃስ ማርድክዮስ አስትራ ዋና ደእያኮነ እዉ ሀንያባ በአናዉ፥ ማጫሳ ኬ ስንራ ጋላስ ጋላስ ገደነ ሃ ሄመቴስ።
\p
\v 12 ጌላኦት ካዋኮ ገላናፐ ኮይሮትድ፥ እስ ላይ ኩመ ባንታ ማላ ሎይሸ ጋምኦሶና። ሄስካ፥ ኮይሮ ኡሱፑን አጌና ካርበ ዛይተን ጎርፐትሸ ጋምእድ፥ ናምአን ኡሱፑን አጌና ቃስ፥ ሎኦ ሳውያ ሽቶን ጎርፐቶሶና። 
\v 13 ሄሳፈ ጉየ፥ እስ ጌላእያ ካዋኮ ገልያ ዎደይ ጋክያ ዎደ፥ ባ ኮይዳ ማኡዋ ማአ ሎአዳ፥ ማጫሳ ኬፈ ከያዳ፥ ካዎይ ደእያ በሳ ገላዉሱ። 
\v 14 ቃማ ገላዳ፥ ካዉዋራ አቅዳፐ ጉየ፥ ዎንታ ጉራ ከይኮ፥ ማጫሳት ደእያ ሀራ ኬ እዮ ኤፎሶና። ሄ ኬስ ካፖ ግድዳ ካዎ ሹፋይ ሻሻጋዝ እዮ ናጌስ። ካዎይ ዶስድ እ ሱን ፄግድ፥ “ኤበልቶ ኤህተ” ጎና እፅኮ፥ እያ ናምአን ካዋኮ ገላናዉ ዳንዳኡኩ።
\p
\v 15 ሄስ ሀንሽን፥ ካዋኮ ገልያ ታር አስትሮ ጋክስ። አስትራ ማርድክዮሳ አዋ እሻ አብካላ ናእዉ፤ ማርድክዮስ ባ ናአ ኦድ ድችዳሮ። እያ ማጫሳስ ጊግዳ ኬስ ካፖ ግድዳ ካዎ ሹፋ ሄጋይ ዞርዳይሳዳ ማኦ ማአሱ። እዮ በእዳ ኡባይ እ ማላ ናሽስ። 
\v 16 አርፀክስስ ካዎትዳ ላፑን ላይን፥ ተቤታ ጌተትያ ታማን አጌናን አስትራ ካዎይ ደእያ በሳ ገላሱ።
\p
\v 17 እያ ገልዳ ዎደ፥ ካዎይ ሀራ ማጫሳ ኡባፈ አድ፥ እዮ ዶስስ፤ ቃስ ሀራ ጌላኦታ ኡባፈ እን ኡፋይትስ። ሄሳ ግሾ፥ ካዎተ ካላቻ እ ሁጰን ዎድ፥ እዮ አስፂን በሳን ካዎ ማቾ ኦስ። 
\v 18 ሄሳፈ ጉየ፥ ካዎይ አስትር ቦንቹዋስ ግታ ግብራ ጊግስድ፥ ሀላቃታነ ቢታ አይሰይሳታ ፄግስ። ቃስ ባ ካዎተ ግዶን ኡፋይሳ ባለይ ቦንቸታና መላ አዋጅስ። ቢታ ኡባስ እስ ላይ ጊራ ማርስ። እሞታካ ባ ኬሀተ መላ ሁጰን ሁጰን እሚስ።
\s1 ማርድክዮስ ማቁዋ ላልስ
\p
\v 19 ጌላኦት ናምአን ሺቅድ ደእሽን፥ ማርድክዮስ ካዋ ዳባባን ኡትያ አሳፐ እሱዋ ግድስ። 
\v 20 ማርድክዮስ፥ “ኔኒ አይሁደ ግደይሳ ኦደስካ ኦዶፓ” ግዳ ግሾ፥ አስትራ ሀእ ጋካናዉ ኦደስካ ኦዳቡኩ። ካሰ ናአተን ኪተተይሳዳ፥ ሀእካ እያዉ ኪተታዉሱ።
\p
\v 21 ማርድክዮስ ካዎ ኬን ኦሸ ደእያ ዎደ፥ ካዎይ ደእያ ክፍለታ ገልያ ፐንግያ ናግያ ካዎ ሹፋታፐ ናምአት፥ ጋባትነ ታር ካዋ አርፀክስሳ እፅድ፥ ዎናዉ ማቀትዶሶና። 
\v 22 ኤንታ ማቁዋ ማርድክዮስ ስእድ፥ ካወ አስትርስ ኦድን፥ እያካ ማርድክዮሳ ሱንን ካዋስ ኦዳሱ። 
\v 23 ካዎይ ሀንዳባ ፕልግድ ፄልያ ዎደ፥ ኦዳይ ቱማ ግድድ በንትን፥ ሄ ናምኡ አሳታ ካቅድ ዎስ። ሀ ሀኖታይ ካዋ አርፀክስሳ ታርከ ፃፍያ ማፃፋን ፃፈትስ።
\c 3
\s1 ሃም አይሁደታ ይሳናዉ ማቅስ
\p
\v 1 ሄሳፈ ጉየ፥ ካዎይ አርፀክስስ ሃማ ጌተትያ ባራ ኦይሳ ሹማተ ቅስድ፥ ባ ሀላቃታ ሀላቃ ኦድ ሹምስ። ሃማ አዋይ ሀማዳት አጋጋ ኮቸ። 
\v 2 ካዎይ ኪትድ ዎዳ ግሾ፥ ካዎ ጋ ፐንገን ኦያ ሀላቃት ኡባይ ሃም አያ ዎደ ጉልባትድ እያ ቦንቾሶና። ግዶሽን፥ ማርድክዮስ ሃማስ ጉልባቶናነ እያ ቦንቾና እፅስ። 
\v 3 ሄ ዎደ ካዎ ጋ ፐንገን ኦያ ሀላቃት ማርድክዮሳ፥ “አይስ ካዋ ኪታ ፖሎና እፃይ?” ያግድ፥ 
\v 4 ጋላስ ጋላስ እያዉ ኦዶሶና። ሽን እ ኤንቲ ኦደይሳ ስአናዉ ኮይቤና። ኡባ ቃስ፥ “ታኒ አይሁደ አስ ግድያ ግሾ፥ ሃማስ ጉልባታናዉነ እያ ቦንቻናዉ ዳንዳእከ” ያግስ።
\p ሄሳፈ ጉየ፥ “ማርድክዮስ ኦድያ ጋሱዋ ስእድ፥ ሃም ዋናንዴሻ!” ያግድ እያዉ ኦድዶሶና። 
\v 5 ማርድክዮስ ባዉ ጉልባቶናይሳነ ባና ቦንቾናይሳ ሃም ኤርዳ ዎደ ሀንቆ ኤፅስ። 
\v 6 ሄሳ ቦላ ቃስ፥ ማርድክዮስ አይሁደ አስ ግደይሳ ኤርድ፥ እያ ፃላላ ዎይ ላፋባ ግድ ቆፕዳ ግሾ፥ አርፀክስሳ ካዎተን ደእያ አይሁደ ኮቻ ኡባ ይሳናዉ ቆፕስ።
\p
\v 7 አርፀክስስ ካዎትዳ ታማነ ናምአን ላይን፥ ንሳነ ጌተትያ ኮይሮ አጌናን፥ አይሁደታ ዎያ አጌናነ ጋላሳ ኤራናዉ፥ ፑርማ ጌተትያ ሳማ እያ ስንን የጋና መላ ሃም ኪትስ። ሄ ሳማይ ዎዳ ማራን፥ አዳረ ጌተትያ ታማነ ናምአን አጌናን፥ ታማነ ሄን ጋላስ አይሁደት ዉርያ ጋላስ ግደይስ ቃሸትስ።
\p
\v 8 ሄሳፈ ጉየ፥ ሃም ካዋ አርፀክስሳኮ ሀይሳዳ ያግስ፤ “ነ ካዎተ ግዶን ኡባ በሳን ላለትድ ደእያ እስ ኮቻይ ደኤስ። ኤንታ ደኦ ማራይ ሀራ አሳይሳፈ ዱማ፤ ሄሳ ፃላላ ግዶናሽን፥ ኤንቲ ካዎ ህግያስ ሃረቶኮና። ሄሳ ግሾ፥ ኔኒ ኤንታ ደኦ ጋዳ ስእ ጊኮ፥ ሄስ ሎኦ ግደና። 
\v 9 ሄሳ ግሾ ካዋዉ፥ ሀ ቆፋይ ነና ኡፋይስኮ፥ ሀ አሳታ ዎድ ይሳና መላ አዋጆ ከሳ። ሄሳ ነ ኦኮ፥ ታኒ ሄ ፄታነ ኦይታሙ ሙኩሉ ክሎ ግራመ ብራ ካዎ ቡቁራ ምንጅያ ኬ ገልሳናዳ፥ ነ ካዎተ አይሰይሳታስ እማና” ያግስ።
\p
\v 10 ካዎይ ባ ማታ ኤርሳናዉ አዋጁዋ ቦላ ዎያ ምግዶ ማታመ ባ ብራያፈ ከስድ፥ አይሁደታ ሞርከ ግድዳ፥ አጋጋ ኮቻስ፥ ሀማዳታ ናኣ ሃማስ እሚስ። 
\v 11 ካዎይ ሃማ፥ “ኔኒ እማና ግዳ ብራይ ነ ማታን ደኦ፤ ሽን ሀ አሳታ ቦላ ነ ዶስዳባ ኦ” ያግስ።
\p
\v 12 ሄሳ ግሾ፥ ኮይሮ አጌናን፥ ታማነ ሄን ጋላሳን፥ ሃም ካዋ ፃፈታ ኡባ ፄግድ፥ ሄ አዋጆይ ቢታ ኡባን ደእያ አሳስ ዱማ ዱማ ዶናንነ ዱማ ዱማ ፕዳለን ፃፈትድ፥ ካዎፐ ጋርሳራ ቢታ ሃረይሳታስ፥ አዉራጃ ሃረይሳታስነ ደረ ሀላቃታ ኡባስ ኪተታናዳ ኪትስ። አዋጆይ ካዋ አርፀክስሳ ሱንን ፃፈትድ፥ ምግዶ ማታመይ እያ ቦላ ዎሰትን፥ 
\v 13 ኪተትዳይሳት እያ ካዎተ ኡባ ጋናዳ ኪተትዶሶና። ሄ አዋጆይ፥ “አዳረ ጌተትያ ታማነ ናምአን አጌናን ታማነ ሄን ጋላሳን፥ አይሁደ ኡባ፥ ያላጋ፥ ጭማ፥ ማጫ፥ አድያነ፥ ናይታ አሾና እስ ጋላስ ዉርስድ ዎድ፤ ኤንታ ሻሉዋካ ቦንቅተ” ያጌስ። 
\v 14 ሄሳ ግሾ፥ ሄ ቃሸትዳ ጋላሳይ ጋክያ ዎደ አስ ኡባይ ጊገታናዳ፥ ሄ አዋጆይ ቢታ ኡባ ኪተትስነ አሳ ኡባስ አዋጀትስ።
\p
\v 15 ካዎይ ኪትዳይሳት ቢታ ኡባ ኪታ ጋዶሶና። ቃስ ሱሳ ካታማንካ ኦደትስ። ያትን፥ ሱሳ ካታማ አሳ ኡባይ ዳጋምስ። ሽን ካዉዋራነ ሃማራ እስፈ ኡትድ፥ ዎይነ ኡሻ ኡዮሶና።
\c 4
\s1 ማርድክዮስ አስትሮ ማደ ኦይችስ
\p
\v 1 ማርድክዮስ ሀ ሀንዳባ ኡባ ስእዳ ዎደ፥ አዛንድ ባ ማኡዋ ፔድ፥ ካዮ ማኦ ማእድ፥ ባ ሁጰን ብዶ ቆልስ። ባ ቃላ ቁ ኦድ፥ ይባታ ዬሆ ዬክሸ፥ ካታማ ግዶን ዩይስ። 
\v 2 ካዮ ማኦ ማእድ ካዎ ኬ ገላናዉ ኦንካ ዳንዳኦና ግሾ፥ እ ካዎ ኬ ገልያ ፐንግያ ጋካናዉ ብስ። 
\v 3 ካዋ አዋጆይ ስኤትዳ ቢታ ኡባን አይሁደታ ግዶን ግታ ካዮይ፥ ፆም፥ ዬሆይነ ዘለልስ ዶመትስ። ኤንታፈ ዳሮት ቃስ ካዮ ማኦ ማእድ፥ ካዮታናዉ ብዶ ቦላ ኡትዶሶና።
\p
\v 4 አስትር ዳንግርፀትነ እዮ ናግያ ሹፋት ይድ፥ ማርድክዮሳባ እዉ ኦድዳ ዎደ እያ ዳሮ አዛናሱ። ማርድክዮስ ካዮ ማኡዋ ቃርድ፥ ሀራ ማኦ ማአና መላ እያዉ ማኦ የዳሱ፤ ሽን እ ኤኮና እፅስ። 
\v 5 ሄሳፈ ጉየ አስትራ፥ ካዎይ እዉ ኪተታና መላ ዎዳ ሀታካ ጌተትያ ሹፋ ፄጋዳ፥ ማርድክዮሳ መቶይ አይበኮ ቃስ እ አይስ ካዮትያኮ ኤራና መላ እያኮ ኪታሱ። 
\v 6 ሀታክ ካዎ ኬ ገልያ ፐንግያ ማታን ካታማ ዳባባን ደእያ ማርድክዮሳኮ ብስ። 
\v 7 ማርድክዮስ፥ ባ ቦላ ጋክዳባ ኡባ ቆንጭስድ፥ እያዉ ኦድስ። ቃስ አይሁደታ ኩመ ዉርሳናዉ ሃም ካዎ ቡቁራ ምንጅያ ኬስ እማናዉ ቆፕዳ ሚሽያ ልክያራ ኡባ አሾና ጌሽድ ኦድስ። 
\v 8 ሄሳ ፃላላ ግዶናሽን፥ አይሁደታ ዉርሳናዉ ሱሳ ካታማን ከይዳ አዋጆይ ፃፈትዳ ዎርቃትያ አስትርስ እማና መላነ ሀንያባ ኡባ እዉ ኦዳና መላ ኦድስ። ቃስ አስትራ ካዋኮ ገላዳ፥ ባ አሳይ ዉሮናዳ ጋናታና መላ ሀታካስ ኦድስ።
\p
\v 9 ሀታክ ይድ፥ ማርድክዮስ ግዳባ ኡባ አስትርስ ኦድስ። 
\v 10 አስትራ፥ ሀታካ ዛራዳ፥ ማርድክዮሳኮ ሀይሳዳ ያጋዳ ኪታሱ። 
\v 11 “ማጫ ግድን፥ አደ ግድን፥ ኦንካ ፄገቶና ደእሸ፥ ካዉዋራ ጋሄታናዉ ካዎ ጋስ ግዶ ዳባባ ገልኮ፥ ሀይቆ። ሽን እ ፄገቶና ካዋኮ ገልያ ዎደ ካዎይ ባ ዎርቃ ፃምኣ ፄራ እያኮ ዛሪድ በስኮ፥ ሄ ኡራ ፃላል ፓፃ አቴስ። ሀ ህግያ ካዋ ዞረይሳታፐ ብድ፥ ጮ አሳ ጋካናዉ ደእያ አስ ኡባይ ኤሬስ። ሽን ታኒ ሀስታሙ ጋላስ ግዶሳፐ ካዋኮ ገላናዉ ፄገታ ኤርከ” ያጋሱ።
\p
\v 12 ማርድክዮስ አስትራ ኪትዳ ኪታ ስእዳፐ ጉየ፥ 
\v 13 ሀይሳዳ ያግድ ኢኮ ኪትስ፤ “ታኒ ካዎ ጋን ደእያ ግሾ፥ ሀራ አይሁደታፐ አትሽን፥ ታና ቦችያባይ ባዋ ጋዳ ቆፖፋ! 
\v 14 ኔኒ ሀይሳ መላ ዎደን ስእ ጊኮ፥ አይሁደታስ ማዶይ ሀራሶፐ ያና። ኤንቲ ቱማ አታና፤ ሽን ኔንነ ነ አዋ ኬ አሳይ ሀይቃና። ኔኒ ካዎ ማቾ ግዳዳ ይዳይ ሀይሳ መላ ዎደሰኮ ኦን ኤሪ?” ያግስ።
\p
\v 15 አስትራ ማርድክዮሳኮ ሀይሳዳ ያጋዳ ዛራዳ ኪታሱ፤ 
\v 16 “ባዳ ሱሳ ካታማን ደእያ አይሁደታ ኡባ ሺሻ፤ ፆምድ ታዉ ዎስተ። ሄ ጋላስነ ሄ ቃም ዉራና ጋካናዉ፥ ካ ሞፕተ፤ ሃ ኡዮፕተ። ታኒ ታና ሀጋዝያ ማጫታራ ሄሳዳ ፆማና። ሄሳፈ ጉየ፥ ህግያን ድገትዳባ ግድኮካ፥ ካዎይ ደእያ በሳ ታኒ ገላና። ታኒ ሀይቅኮካ ሀይቃና” ያጋሱ።
\p
\v 17 ማርድክዮስ ብድ፥ አስትራ እያ ኪትዳይሳዳ ኡባ ኦስ።
\c 5
\s1 አስትራ ካዋ ኦይቻሱ
\p
\v 1 ፆማይ ዶመትን ሄን ጋላስ አስትራ ካዎተ ማኦ ማአዳ፥ ካዎ ጋን ግዶ ዳባባ ገላዳ ኤቃሱ። ካዎይ ካዎ ኬ ገልያ ፐንግያን ደእያ ባ አራታን ኡትስ። 
\v 2 አስትራ ገላዳ፥ ግዶ ዳባባን ኤቅዳሮ ካዎይ በእድ እን ኡፋይትዳ ግሾ፥ ባ ዎርቃ ፃምኣ ኢኮ ምጭስ። እያ ሺቃዳ ፃምኣ ፄራ ቦቻሱ። 
\v 3 ካዎይ ኢኮ፥ “ካወ አስትረ፥ ኔኒ ታኮ አይስ ያዲ? ቃስ ኔኒ ታና ኦይችያባይ አይቤ? ሀር አቶሽን ታ ካዎተፈ ባጋ ግድኮካ፥ ታ ነዉ እማና” ያግስ።
\p
\v 4 አስትራ ዛራዳ፥ “ካዋዉ፥ ነና ኡፋይስያባ ግድኮ፥ ታኒ ነዉ ጊግስዳ ግብራ ማናዉ ኔራ ሃማራ ናምአይ ሀች ኦማርስ ያኮ ዶሳይስ” ያጋሱ።
\p
\v 5 ሄሳፈ ጉየ ካዎይ፥ “ኑኒ አስትራ ጊግስዳ ግብራስ ባናዉ ሃማ ኤለስድ ኤህተ” ያግስ። ሄሳ ግሾ ናምአይ ሄ በሳ ብዶሶና። 
\v 6 ኤንቲ እስፈ ዎይነ ኡሻ ኡይሽን፥ ካዎይ ናምአን አስትሮ፥ “ኔኒ ታና ዎስያባይ አይቤ? ታኒ ነዉ እማና። ቃስ ኔኒ ታና ኦይችያባይ አይቤ? ሀር አቶሽን ታ ካዎተፈ ባጋ ግድኮካ፥ ታ ነ ኦይሻ ፖላና” ያግስ።
\p
\v 7 አስትራ ዛራዳ ታ ኦይቸይነ ታ ዎሰይ ሀይሳ፤ 
\v 8 “ካዋዉ፥ ኔኒ ታናን ኡፋይትያባ ግድኮ፥ ቃስ ታኒ ዎስያባ እማናዉነ ታ ኦይሻ ፖላናዉ ኔኒ ዶስያባ ግድኮ፥ ዎንቶ ታ ጊግስያ ሀራ ግብራስ ኔራ ሃማራ ያና መላ ኦይቻይስ። ታኒ አይ ኮያኮ ሄ ዎደ ነዉ ቆንጭሳና” ያጋሱ።
\s1 ሃም ማርድክዮሳ ዎሳናዉ ማቅስ
\p
\v 9 ሃም ግብራ በሳፈ ከይድ ብያ ዎደ፥ ዳሮ ኡፋይትዳ ግሾ፥ ባ ዎዛናን ኡፋይስ ኖጩ ግሸ ብስ። ሽን እ ካዎ ኬ ገልያ ፐንግያ ማታራ አድ ብያ ዎደ ያን ኡትዳ ማርድክዮሳ በእስ። እያዉ ደንድቦናይሳነ ያይድ ኮኮርቦናይሳ በእድ ሃም ይሎ ኤፅስ። 
\v 10 ግዶሽን፥ ባ ይሉዋ ዳንዳእድ ብድ ባ ሶ ጋክስ።
\p ሄሳፈ ጉየ፥ ባ ላገታነ ባ ማችዉ ዞሳራ ፄግስድ፥ 
\v 11 ሃም ባ ዱረተ ልክያ፥ ባ አደ ናይታ ታይቡዋ፥ ካዎይ ባና ቦንችዳ ቦንቹዋነ ሀራ ሀላቃታፐነ ካዎ ሞርናታፐ አያ ሹማተ እምድ፥ ዋትድ እያ ቦንችዳኮ ናሸትስ። 
\v 12 ጉጅድካ ሃም፥ “ሀር አቶሽን ካውያ አስትራካ ባ ጊግስዳ ግብራስ ካዉዋራ ባና መላ ታፐ አትሽን፥ ሀራ ኦናካ ፄጋቡኩ። ቃስ ዎንቶካ ካዉዋራ ባና መላ ታና ፄጋሱ። 
\v 13 ሽን አይሁደ ግድዳ ማርድክዮስ ካዎ ኬ ገልያ ፐንገን ኡትዳይሳ በእያ ዎደ ሀ ኡባይካ ታና ኡፋይሰና” ያግስ።
\p
\v 14 ሄ ዎደ እያ ማችያ ዞሳራነ እያ ላገት ኡባይ ሀይሳዳ ያግዶሶና፤ “ኔኒ እሻታሙ ዋ ም ኤስሳዳ ዎንቶ ጉራ ማርድክዮስ ካቀታና መላ ካዋ ኦይቻ። ሄሳፈ ጉየ፥ ኡፋይታሸ ግብራ ማናዉ ባ” ያግዶሶና። ሃማ ሀ ቆፋይ ኡፋይስዳ ግሾ፥ ኤንቲ ግዳይሳዳ ካቃ ም ጊግስስ።
\c 6
\s1 ማርድክዮስ ቦንቸትስ
\p
\v 1 ሄ ዎደ ቃማ ካዋ ስኮይ ኤኮና እፅስ። ሄሳ ግሾ፥ ካዎይ ካዎ ታርከ ፃፍያ ማፃፋ ኤህድ፥ ካሰ ሀንዳ ታርከታ እያዉ ናባባና መላ ኪትስ። 
\v 2 ናባበትዳ ታርከታፐ እሶይ ማርድክዮስ ኦዳባ። ሄስካ፥ ካዎይ ደእያ ክፍልያ ናግያ፥ ጋባታነ ታራ ጌተትያ ናምኡ ሹፋት ካዋ ዎናዉ ማቅዳ ማቁዋ ማርድክዮስ ቆንጭስስ። 
\v 3 ካዎይ፥ “ያትን፥ እ ሄሳ ኦዳ ግሾ እያዉ እመትዳ ሹማተይ ዎይኮ ዎይቶይ አይቤ?” ያግስ።
\p ካዋ አይለት ዛሪድ፥ “እያዉ አይኮይ ኦሰትቤና” ያግዶሶና።
\p
\v 4 ካዎይ ዛሪድ፥ “ካረ ዳባባን ደኤይ ኦኔ?” ያግስ። ሄ ዎደ ባ ጊግስዳ ምን ማርድክዮሳ ካቃናዉ፥ ካዋ ኦይቻናዉ፥ ሃም ካረ ዳባባ ገልሸ ደኤስ።
\p
\v 5 ካዋ አይለት፥ “ሃም ካረ ዳባባን ኤቅስ” ያግዶሶና።
\p ካዎይ ዛሪድ፥ “ሃ ገላ ጊተ” ያግስ።
\p
\v 6 ሃም ገልዳፐ ጉየ ካዎይ፥ “ካዎይ ቦንቻናዉ ዶስያ አሳስ አይ ኦናዉ ኮሺ?” ያግድ ኦይችስ።
\p ሃም፥ “ካዎይ ታፐ ሀራ ኦና ቦንቻናዉ ዶሲ?” ያግድ ባ ዎዛናን ቆፕስ። 
\v 7 ሄሳ ግሾ፥ ሃም ካዋስ ያግድ ዛርስ፤ “ካዎይ ቦንቻናዉ ዶስያ አሳስ፥ 
\v 8 ካዎይ ባ ካዎተ ማኡዋ ኤህሶ፤ ባ ቶግያ ፓራ ሁጰን ጉቸ ዎ። 
\v 9 ሄሳፈ ጉየ፥ ካዎይ ባ ሞርናታፐ እስ ዳሮ ቦንቸትዳይሳ ፄግስድ፥ ካዎተ ማኦ እያ ማይዛናዳነ ካዋ ፓራ ቦላ እያ ኡትስድ፥ ካታማ ዳባባ ከሳናዳ ኪቶ። ያትኮ ሄ ዳሮ ቦንቸትዳ ሞርናይ እያ ስንን ሄመትሸ፥ ‘ካዎይ ቦንቻናዉ ዶስያ ኡራስ ሀይሳዳ ኦስ’ ያግድ አዋጆ” ያግስ።
\p
\v 10 ካዎይ ዛሪድ፥ ሃማ ሀይሳዳ ያግድ ኪትስ፤ “ህዛ ኤለሳ ደንዳዳ ካዎተ ማኡዋነ ታ ፓራ ኤካዳ፥ ነ ግዳይሳዳ አይሁደ ግድዳ ማርድክዮሳስ ኦ። እ ካዎ ኬ ገልያ ፐንገን ደኤስ። ነ ግዳይሳፈ እስባካ አሾፋ” ያግስ።
\p
\v 11 ሄሳ ግሾ፥ ሃም ማርድክዮሳ ካዎተ ማኦ ማይዝድ፥ ካዋ ፓራ ቦላ ኡትስስ። ቃስ ካታማ ዳባባን እያፐ ስንራ ሄመትሸ፥ “ካዎይ ቦንቻናዉ ዶስያ ኡራስ ሀይሳዳ ኦስ” ያግድ አዋጅስ።
\p
\v 12 ሄሳፈ ጉየ፥ ማርድክዮስ ካዎ ኬ ፐንገ ጉየ ስሚድ ብስ። ሽን ሃም ዳሮ አዛንዳ ግሾ፥ ጉሉንትድ፥ ኤለስሸ ባ ሶ ብስ። 
\v 13 ባና ጋክዳባ ኡባ ባ ማቸ ዞሳርስነ ባ ላገታስ ኦድስ። ኤንቲ እያኮ፥ “እያ ስንን ኔኒ ካዉያናዉ ዶምዳ ሀ አደይ፥ ማርድክዮስ፥ አይሁደ አስ ግድኮ፥ ነ እያራ ኤቀታዳ፥ እያ ፆናናዉ ዳንዳአካ፤ ቱማ እ ነና ይሳና” ያግዶሶና።
\p
\v 14 ኤንቲ ቡሮ ሄሳ ኦደትሽን፥ ካዋ ሹፋት ጋክድ፥ ሃማ አስትራ ጊግስዳ ግብራስ ኤለስድ ኤፍዶሶና።
\c 7
\s1 ሃም ካቀትስ
\p
\v 1 ካዎይነ ሃም አስትር ግብራ ማናዉ ብዶሶና። 
\v 2 ሄ ናምአን ጋላስ ግብራስ ብድ፥ ኤንቲ ዎይነ ኡሻ ኡይሽን፥ ካዎይ፥ “ካወ አስትረ፥ ኔኒ ዎስያባይ አይቤ? ታኒ ነዉ እማና። ኔኒ ታና ኦይችያባይ አይቤ? ሀር አቶሽን ታ ካዎተፈ ባጋ ግድኮካ፥ ታኒ ነ ኦይሻ ፖላና” ያግድ ኦይችስ።
\p
\v 3 ካውያ አስትራ ዛራዳ፥ “ካዋዉ፥ ኔኒ ታናን ኡፋይትዳባ ግድኮ፥ ቃስ ታ ኦይሻካ ፖላናዉ ዶስያባ ግድኮ፥ ታ ዎሳይነ ታ ኦይሻይ ታነ ታ አሳይ ሀይቆና አታና መላሳ። 
\v 4 ታነ ታ አሳይ እሶይካ አቶና ኡባይ ሀይቆስ ባይዘትዳ። ኑኒ ባይዘትዳይ ማጫ አይለነ አደ አይለ ግድድ ደአናሳ ግድያኮ፥ ታኒ ስእ ጋና። ሄሳ መላ መቶይ ካዋ ዋይሳናዉ በሲያባ ግደና” ያጋሱ።
\p
\v 5 ካዎይ አርፀክስስ ዛሪድ፥ “ሄሳ ኦናዉ ፃልታምዳይ ኦኔ? እ ሄ አደይ አዉን ደኢ?” ያግድ ካውዉ አስትሮ ኦይችስ።
\p
\v 6 አስትራ፥ “ኑ ሞርከይ፥ ኑና ይሳናዉ ኮየይ፥ ሀ ኢታ አድያ ሃማ” ያጋሱ።
\p ሄ ዎደ ሃም ካዋ ስንንነ ካወ ስንን ዳሮ ዳጋምስ። 
\v 7 ካዎይ ዳሮ ሀንቀትድ፥ ባ ኡትዳ በሳፈ ደንድ፥ ካዎ ጋ አታክልተ በሳ ብስ። ሽን ሃም ካዎይ እያ ቦላ ኢታባ ኤሀናዉ ቆፕዳይሳ ኤርዳ ግሾ፥ አስትራ እያ ሀይቆፐ አሻና መላ ዎሳናዉ ጉየ አትስ።
\p
\v 8 ካዎይ አታክልተ በሳፈ ስሚድ ገልያ ዎደ፥ ሃም ካዊዉ አስትሮ ማሮታ ዎሳናዉ፥ እያ ኡትዳ አርሳ ቦላ ጉፋንዳይሳ በእስ። ካዎይ ይሎ ኤፅድ፥ ባ ቃላ ቁ ኦድ፥ “ላ ሀ አደይ ሀይሳን ካዎ ኬን፥ ታ ስንን፥ ካውዉ ካዉሻናዉ ኮይዬ?” ያግስ።
\p ካዎይ ቡሮ ሄሳ ሃሳይሽን፥ ካዎ ሹፋት ይድ፥ ሃማ ሶምኡዋ ጎዝዶሶና። 
\v 9 ኤንታፈ እሶይ፥ ሀርቦና ጌተትያ ሹፋይ፥ “ካዋዉ፥ ሃም ነና ሀይቆፐ አሽዳ ማርድክዮሳ ካቃናዉ ኤስዳ እሻታሙ ዋ ም እያ ሶን ደኤስ” ያግስ።
\p ካዎይ ዛሪድ፥ “ሃማ ኤፍድ፥ ሄ ምን ካቅተ” ያግድ ኪትስ።
\p
\v 10 ሄሳ ግሾ፥ ማርድክዮሳ ካቃና ግድ ጊግስዳ ምን ሃም ካቀትስ። ሄሳፈ ጉየ፥ ካዋ ሀንቆይ ዶችስ።
\c 8
\s1 አይሁደታ ግሾ ከይዳ አዋጆ
\p
\v 1 አይሁደታ ሞርከይ ሃም ካቀትዳ ጋላስ ካዎይ አርፀክስስ ሃማ ሻሉዋ ኡባ ካወ አስትርስ እሚስ። ቃስ ማርድክዮስ እዉ ማታ ዳቦ ግደይሳ አስትራ ካዋስ ኦዳሱ። ሄሳ ግሾ፥ ሄ ዎደፐ ዶምድ፥ ማርድክዮስ ካዋኮ ገላናዉ ዳንዳእስ። 
\v 2 ካዎይ ሃማፐ ጉየ ኤክዳ ባ ምግዶ ማታምያ ከስድ፥ ማርድክዮሳስ እሚስ። አስትራ ማርድክዮሳ ሃማ ሻሉዋ ቦላ አዋያዳ ሹማሱ።
\p
\v 3 ሄሳፈ ጉየ፥ አስትራ ዬካሸ፥ ካዋ ቶሆ ቦላ ኩንዳዳ፥ አጋጋ ኮቸ ግድዳ ሃም አይሁደታ ቦላ ቱክዳ ኢታ ማቆይ ኦሶን ፔኦና መላ ካዋ ዎሳሱ። 
\v 4 ያትን፥ ካዎይ ባ ዎርቃ ፃምኣ እዉ ምጭን፥ እያ ደንዳ ኤቃዳ፥ 
\v 5 “ካዋዉ፥ ኔኒ ታናን ኡፋይትዳባ ግድኮ፥ ቃስ ታ ኦይሻካ ፖላናዉ ኔኒ ዶስዳባ ግድኮ፥ ነ ካዎተ ግዶን ደእያ አይሁደ ኡባ ኩመ ዎና መላ፥ አጋጋ ኮቸ ግድዳ ሀማዳታ ናአይ ሃም ከስዳ አዋጁዋ ሻርያ ሀራ አዋጆ ከሳናዳ ዎሳይስ። 
\v 6 ሀ ኡባ ዮይ ታ አሳ ቦላነ ታ ዳቦታ ቦላ ጋክያ ዎደ ታኒ ስእ ጋዳ ዋና ፄሎ?” ያጋሱ።
\p
\v 7 ሄሳፈ ጉየ፥ ካዎይ አርፀክስስ፥ ካውዉ አስትሮነ አይሁደ ግድዳ ማርድክዮሳ ሀይሳዳ ያግስ፤ “ሃም አይሁደታ ዎናዉ አዋጆ ከስዳ ግሾ፥ ታኒ ምን እያ ካቅስዳይሳነ እያ ሻሉዋ ኡባ ካወ አስትርስ እምዳይሳ ህንተ ኤሬታ። 
\v 8 ግዶሽን፥ ካዎ ጋ ማታመ ዎን፥ ካዋ ሱንን ከይዳ አዋጆይ ላመታናዉ ዳንዳኤና። ሄሳ ግሾ፥ ህንተ ህንተ ባጋራ አይሁደታ ማዳናዉ ኮይዳባ ፃፍተ። ሄሳ ታ ሱንን ፃፍድ፥ ካዎ ማታምያ እያ ቦላ ዎተ” ያግስ።
\p
\v 9 ንሳነ ጌተትያ ሄን አጌናን፥ ላታማነ ሄን ጋላሳን፥ ማርድክዮስ ካዋ ፃፈታ ኡባ ፄግድ፥ ህንደፈ ብድ ቶጰ ጋካናዉ ደእያ ፄታነ ላታማነ ላፑን ቢታታን ካዎፐ ጋርሳራ ሃረይሳታስ፥ አዉራጃ አይሰይሳታስነ ቢታ ሀላቃታስ የድያ አዋጆ ፃፍስስ። አዋጆይ ዱማ ዱማ ዶናንነ ዱማ ዱማ ፕዳለን ፃፈትስ፤ ቃስ አይሁደታስካ ኤንታ ዶናንነ ኤንታ ፕዳለን ፃፈትስ። 
\v 10 ማርድክዮስ ሄ አዋጁዋ ኡባ ካዋ አርፀክስሳ ሱንን ፃፍስድ፥ ካዎ ማታመ ዎድ፥ ካዎ ጋፃታን ከትዳ፥ ኤሶትያ ፓራታ ቶግያ አሳታ ቦላ ቢታ ኡባ የድስ።
\p
\v 11 ካዎይ ከስዳ አዋጆይ፥ ካታማታን ደእያ አይሁደት እስፈ ሺቃናዉነ ባንታ ቦላ ያባ ኦለትድ ዛራናዉ ዳንዳአና መላ ማታ እሜስ። ቃስ ኦላ ሚሽያ ኦይክድ፥ አይ ቢታፈካ፥ ኤንታ ኦላናዉ የይሳታ፥ ኤንታ ናይታራነ ኤንታ ማቸታራ ኡባ እሱዋካ አሾና ዎናዉነ ኤንታ ሻሉዋ ቦንቅድ ኤካናዉ ማታ እሜስ። 
\v 12 አይሁደት ካዋ አርፀክስሳ ካዎተን ሄሳ ኦናዉ ቃችዳ ጋላሳይ፥ አዳረ ጌተትያ ታማነ ናምአን አጌናን፥ ታማነ ሄን ጋላሳና። 
\v 13 ካዋ አዋጁዋ ቢታታ ኡባን ደእያ አሳይ ኤራናዳ፥ ህገ ግድድ አዋጀትስ። ሄስካ አይሁደት ባንታ ሞርከታ ቦላ ሀሎ ከያናዉ ባንታና ጊግሳናዉ ዳንዳእሴስ። 
\v 14 ኪተተይሳት ካዎ ኬ ፓራታ ቶግድ፥ ካዋ ኪታ ጋናዉ ኤለስድ ብዶሶና። ቃስ ሱሳ ካታማን ሀ አዋጆይ አሳ ኡባስ ኦደትስ።
\p
\v 15 ማርድክዮስ ካሎሰነ ቦ ካዎተ ማኦ ማእድ፥ ኦቻ ቴራ ዳንያነ ሊኖፐ ኦሰትዳ ካባ ቦላራ ማእስ፤ ቃስ ግታ ዎርቃ ካላቻ ዎድ፥ ካዋ ስንፈ ከይስ። ሱሳ ካታማይ እልልሳንነ ኡፋይሳን ኖጩ ግስ። 
\v 16 ሄስ አይሁደታስ ግታ ኡፋይስ፥ እልልስነ ቦንቾ ዎደ ግድስ። 
\v 17 ሄሳ ግሾ፥ ካዋ አዋጆይ ናባበትዳ ቢታንነ ካታማ ኡባን ደእያ አይሁደት ግታ ባኣለ ከስድ፥ ኡፋይትሸነ ግብራ ምሸ ፔእዶሶና። ሄሳ ጋሶን አይሁደታስ ያይድ፥ ያን ደእያ ሀራ ዛረ አሳፐ ዳሮት አይሁደ ግድዶሶና።
\c 9
\s1 አይሁደታ ፆኑዋ
\p
\v 1 አዳረ ጌተትያ ታማነ ናምአን አጌናን ታማነ ሄን ጋላሳይ ጋክስ። ሄ ጋላስ፥ ካዎይ ኮይሮ ከስዳ አዋጁዋ ማራን ሞርከት አይሁደታ ፆናና ግዳ ቆፕዳ ጋላሳ። ሽን ኦዳይ ሽረት ዎን፥ አይሁደት ባንታ ሞርከታ ፆንዶሶና። 
\v 2 ካዋ አርፀክስሳ ካዎተን ደእያ አይሁደት ኡባይ ባንታና ቆሀናዉ ኮይያ ኡባ ይሳናዉ ባንታ ካታማን ካታማን እስፈ ሺቅዶሶና። ሀራ ዛረ ግድዳ አሳይ ኤንታዉ ያይዳ ግሾ፥ ኤንታራ አይ አስካ ኤቀታናዉ ዳንዳእቤና። 
\v 3 ኤንቲ ማርድክዮሳስ ያይዳ ግሾ፥ ካዎፐ ጋርሳራ ቢታ ሃረይሳት፥ አዉራጃ አይሰይሳትነ ቢታ ሀላቃት ኡባይ አይሁደታ ማድዶሶና። 
\v 4 ማርድክዮስ ካዎ ጋን ግታ ማት እመትዳነ ዎልቃን ጉጅ ጉጅ ብያ አስ ግደይስ ሄ ካዎተን ደእያ ቢታ ኡባን ኤረትስ።
\p
\v 5 ሄ ጋላስ አይሁደት ባንታ ሞርከታ ኡባ ማሻን ጎይርድ ዉርስዶሶና፤ ባንታና እፅያ ኡባ ቦላ ኮይዳባ ኦዶሶና። 
\v 6 ዋና ካታማ ግድዳ ሱሳ ፃላላን እቻሹ ፄቱ አሳ ዎዶሶና። 
\v 7 ኤንቲ ፓርሻንዳታ፥ ዳልፎና፥ አስፓታ፥ 
\v 8 ፖራታ፥ አዳላ፥ አርዳታ፥ 
\v 9 ፓርማሽታ፥ አርሳያ፥ አርዳያነ ዋይዛታ ዎዶሶና። 
\v 10 ኤንቲ አይሁደታ ሞርከ ግድዳ ሃማ ናይታ። ሽን ኤንቲ ኤንታ ሻሉዋ ቦንቅቦኮና።
\p
\v 11 አይሁደት ሱሳ ካታማን ዎዳ አሳ ታይቦይ አፑነኮ ሄ ጋላስ ካዋስ ኦደትስ። 
\v 12 ያትን፥ ካዎይ ካውዉ አስትሮ፥ “አይሁደት ዋና ካታማ ግድዳ ሱሳ ፃላላን እቻሹ ፄቱ አሳነ ታሙ ሃማ ናይታ ዎዶሶና። ሄስ ሄሳ ግድኮ፥ ካዋ ቢታታን ኤንቲ ዎዳይ አፑና ግዳንደሻ! ቃስ ሀእ ኔኒ ዎስያባይ አይቤ? ታኒ ነዉ እማና። ኔኒ ታና ኦይችያባይ ሀራባይ አይቤ? ታኒ ነዉ ፖላና” ያግስ።
\p
\v 13 አስትራ ዛራዳ፥ “ካዋ ሀ ቆፋይ ኡፋይስኮ፥ ሱሳ ካታማን ደእያ አይሁደት ሀች ኦዳይሳዳ ዎንቶካ ኦ። ቃስ ታሙ ሃማ ናይታ አሃ ም ቦላ ካቃናዳ ኪታ” ያጋሱ።
\p
\v 14 ካዎይ ሄሳ ኦና መላ ኪትስ። አዋጆይ ሱሳ ካታማን ናምአን አዋጀትን፥ ታሙ ሃማ ናይታ አሀይ ኮጫ ቦላ ካቀትስ። 
\v 15 አዳረ ጌተትያ አጌናን ታማነ ኦይዳን ጋላሳን፥ ሱሳ ካታማን ደእያ አይሁደት እስፈ ሺቅድ፥ ሀራ ሄ ፄቱ አሳ ዎዶሶና፤ ሽን ሀእካ ኤንታ ሻሉዋ ቦንቅቦኮና።
\p
\v 16 ሄ ዎደ ሱሳ ካታማፐ ጋፃራ ደእያ ካዋ ቢታታን ደእያ አይሁደት እስፈ ሺቅድ፥ ባንታ ሞርከታ ኡባ ኦልዶሶና። ኤንቲ ላፑን ታማነ እቻሹ ሙኩሉ አሳ ዎዳፐ ጉየ ባንታ ሞርከታፐ ሸምፕዶሶና። ሽን ኤንታ ሻሉዋ ቦንቅቦኮና። 
\v 17 ሀይስ ኡባይ ሀንዳይ አዳረ ጌተትያ አጌናን ታማነ ሄን ጋላሳና። ታማነ ኦይዳን ጋላሳን ኤንቲ ሸምፕዶሶና፤ ግብራ ምሸ፥ ኡይሸነ ኡፋይትሸ ፔእያ ጋላስ ኦዶሶና።
\s1 ፑርማ ባኣለ
\p
\v 18 ሽን ሱሳ ካታማን ደእያ አይሁደት ታማነ ሄንነ ታማነ ኦይዳን ጋላሳን ዎሸ ፔእድ፥ ታማነ እቻሻን ጋላሳን ሸምፕዶሶና። ኤንቲ ሄ ጋላሳ ምሸ፥ ኡይሸነ ኡፋይትሸ ፔእያ ጋላስ ኦዶሶና።
\p
\v 19 ሄሳ ግሾ፥ ጉ ካታማታን ደእያ አይሁደት ሀች ጋካናዉ አዳረ ጌተትያ አጌናን ታማነ ኦይዳን ጋላሳ ባኣለ ጋላስ ኦድ ቦንቾሶና። ሄ ጋላሳን ሞሶናነ ኡዮሶና፤ ቃስ እሶይ እሱዋስ እሞታ እሞሶና። 
\v 20 ማርድክዮስ ሀ ሀንዳ ታርከ ኡባ ፃፍድ፥ ካዋ አርፀክስሳ ቢታ ኡባን፥ ሃሆንነ ማታን ደእያ አይሁደ ኡባስ የድስ። 
\v 21 ሄ ዳብዳብያን ማርድክዮስ አዳረ አጌናን ታማነ ኦይዳንነ ታማነ እቻሻን ጋላሳታ፥ አይሁደት ላይን ላይን ባኣለ ጋላስ ኦድ ቦንቻና መላ ኤንታዉ ኦድስ። 
\v 22 ሄ ጋላሳት አይሁደት ባንታ ሞርከታፐ ሸምፖ ደምዳ ጋላሳታ። ቃስ ሄ አጌናይ ኤንታ አዛኖይነ ዬሆይ ኡፋይሳንነ ግብራ ሙሳን ላመትዳ አጌና። ሄሳ ግሾ፥ ኤንቲ ሙሳንነ ኡሻን ኡፋይትሸ፥ እሶይ እሱዋስነ ማንቆታስ ካ እሞታ እምሸ ቦንቻና መላ ኤንታዉ ኦድስ።
\p
\v 23 አይሁደት ማርድክዮስ እምዳ ኪታ ኤክድ፥ ኤንቲ ቦንቻናዉ ዶምዳ ባልያ፥ ላይን ላይን አጎና ቦንቻናዉ ማእዶሶና። 
\v 24 አጋጋ ኮቻይ፥ ሀማዳታ ናአይ ሃም፥ አይሁደታ ኡባ ሞርከይ፥ ኤንታ ይሳናዉ ካሰ ማቀትድ ኤንታ ዎያ አጌናነ ጋላሳ ኤራናዉ ፑርማ ጌተትያ ሳማ የግስስ። 
\v 25 ሽን አስትራ ካዋኮ ገልዳፐ ጉየ፥ ሃም አይሁደታ ቦላ ማቅዳ ኢታ ማቆይ ኡባይ ጉየ ስሚድ፥ እያ ቦላ ፖለታናዳ ካዎይ ፁፈን ኪትስ። ያትን፥ ሃምነ እያ ታሙ ናይት አሀይ ምን ካቀትስ 
\v 26 ሄሳ ግሾ፥ ሀ ናምኡ ጋላሳት ፑርማ ባኣለ ጌተቶሶና። ሀ ዳብዳብያን ኤንታዉ ፃፈትዳባ ኡባ ጋሶን፥ ኤንቲ ባንታ አይፈን በእዳባ ጋሶንነ ኤንታ ቦላ ጋክዳባ ጋሶን 
\v 27 አይሁደት ባንታዉ፥ ባንታ ኮቻታስነ አይሁደ ግዳናዉ ኮይያ ኡባስ፥ ሀ ባልያ ዎጋ ኦድ ቦንችዶሶና። ሄስካ ላይን ላይን አጎና ሀ ናምኡ ጋላሳታ ቦንቻና መላሳ። 
\v 28 ሄ ጋላሳት የለታ ኡባን፥ ካታማታ ኡባን፥ አይሁደታ ኬ ኡባንነ ቢታ ኡባን ቦንቸታና መላ ቃሸትስ። ሄስካ፥ አይሁደት አዉደ ግድኮካ፥ ሀ ፑርማ ጋላሳታ ቦንቻናዉነ ሄ ጋላሳታን ሀንዳባይ ኤንታ ኮቻን ዶገቶና መላ ቆፓናዉ በሴስ።
\p
\v 29 ሄሳፈ ጉየ፥ አብካላ ናእያ፥ ካውያ አስትራነ አይሁደ አደይ ማርድክዮስ፥ ፑርማ ባልያባ ካሰ ፃፍዳ ዳብዳብያ ምንናዉ ሀይሳ ናምአን ዳብዳብያ ኩመ ማታን ፃፍዶሶና። 
\v 30 ሄ ዳብዳበት አርፀክስሳ ካዎተን፥ ፄታነ ላታማነ ላፑን ቢታን ደእያ አይሁደታ ኡባስ ሳሮይነ ዎፓተ ግዶ ግያ ሳሮታራ ፃፈትድ ኪተትዶሶና። 
\v 31 ቃስ ኤንቲ ካሰ ፆማናዉነ ካዮታናዉ ዎጋ ከስዳይሳዳ፥ ሀእ ኤንታ ግድን፥ ስንፈ ያና ኤንታ ኮቻታ ግድን፥ ሀ ፑርማ ጋላሳታ ላይን ላይን ዎጋ ኦድ ቦንቻና መላ ሄ ዳብዳበት ቆንጭሶሶና። ሄስ አይሁደ አደይ ማርድክዮስነ ካውያ አስትራ እስፈ ዞረትድ ከስዳ ኪታ። 
\v 32 ካወ አስትር ኪታይ ፑርማ ባኣለ ዎጋ ምንስ፤ እካ ማፃፋን ፃፈትስ።
\c 10
\s1 ማርድክዮሳ ግታተ
\p
\v 1 ካዎይ አርፀክስስ ባ ካዎተን ጋፃፐ ጋፃ ጋካናዉ ደእያ አሳ ኡባይ ጊራ ቃንፃና መላ ዎልቃን ኪትስ። 
\v 2 እ ኦዳ ግታነ ማላልስያ ኦሶት ኡባይ፥ ማርድክዮሳካ ቁ ኦድ ዋት ቦንችዳኮ ቆንጭስያ ታርከይ ሜዶናነ ፋርሰ ካዎተ ታርከ ማፃፋን ፃፈትስ። 
\v 3 ማታን ግድኮ፥ ማርድክዮስ ካዋ አርፀክስሳፐ ናምአን። እ አይሁደታንካ ዳሮ ቦንቸትዳነ ዶሰትዳ አስ። እ ባ አሰ ግድዳ አይሁደት፥ ሳሮተንነ ህርግ ባይና ዳና መላ ዳሮ ዳቡርዳ አስ።