\id DAN - GOOFA FULL BIBLE
\ide UTF-8
\h ዳነላ ማፃፋ
\toc1 ዳነላ ማፃፋ
\toc3 ዳነ
\toc2 ዳነላ
\mt ዳነላ ማፃፋ
\imt ጋ ቆፋ
\ip ዳነላ ጌተትያ ሱን ብርሸይ ፆሳይ ታዉ ዳይና ዎይኮ ታዉ ፕርደይሳ ጉሱ። ዳነል ባብሎነ ቢታን ኤረታናዉ ጋሶ ግድዳይ፥ እያ ሎኦ ካንዱዋ፥ ትንብተ እሞታ፥ ፆሳይ እያ ደኡዋን ኦዳ ኦሱዋ፥ ባ እመትዳ ማታን ኤህዳ ላምያነ ድቻ (\xt 2:46-49፤ 6:1-3\xt*)።
\ip ዳነል፥ ክ.የ.ስ. 605 ላይን ድኤትድ ባብሎነ ብዳ ኮይሮ አሳራ ደኤስ (\xt 1:1-2\xt*)። ዳነል ካዋ ናቡካዳናፆራ ካዎ ጋን ኦና መላ ዶረትዳ ናአተታፐ እሱዋ። ዳነል ኢታ ካዎተታ ዎደ ኡባን ባ ፆሳስ አማነትድ ደእስ። ዳነላ ማፃፋን ኤረትዳ ታርከት፥ ላፅያ እቶነ ታማ፥ ጋሞ ኦላነ ጎዳ ቦላ ፃፈትዳ ፁፍያ። ዳነል አሙሆ በኦንነ አሙሆ ብለን ኤረትዳ አስ።
\ip ዳነላ ማፃፋይ ፃፈትዳ ዋና ጋሶት ናምአ። ሄሳትካ:-
\ipi 1. አይሁደ ግዶና ደርያን ድኤትድ አይለ ግድድ አላጋ ቢታን ዱስ፣ እስራኤለ አሳስ ዉርሰ ቃዳ ግዶናይሳ አኬክስድ፥ ኤንታ ዛሪድ ምንናሳ።
\ipi 2. ታርከ ግዶን ሀንዳ ትንብተ ቆንጨን፥ ፆሲ ካዎተታ ኡባ ቦላ ጎዳ ግደይሳነ እያ ካዎተይ ፆነይሳ ፆሳ ደርያ አኬክሳናሳ።
\ip ዳነላ ማፃፋይ ናምኡ ግታ ክፍለታን ሻከቴስ።
\ipi 1. ዳነል ደእዳ ዎደ ሀንዳ ታርከታ ኦድያ ክፍልያ (ሸም 1-6)። ሄ ዎደ ደንድዳ ካዎተታነ ፆሳይ ዳነላነ እያ ላገታ ዋትድ አሽዳኮ ኦዴስ።
\ipi 2. ዳነል በእዳ ዱማ ዱማ ቆንጨታ ኦድያ ክፍልያ (ሸም 7-12)። ሀ ክፍልያን ካዎተታ ደንዶይነ ኩንደይ ዱማ ዱማ ማላታንነ ሌምሶታን ቆንጭስ።
\iot ማፃፋ አይፈ ቆፋታ
\io1 ዳነልነ እያ ላገት ካዎ ጋን (\ior 1:1-21\ior*)
\io1 ፆሲ ካዎተታ ኡባ ቦላ ጎዳ (\ior 2:1—6:28\ior*)
\io2 ናቡካዳናፆራ አሙሁዋ (\ior 2:1-49\ior*)
\io2 ዎርቃ ምስለነ ላፅያ እቶነ ታማ (\ior 3:1-30\ior*)
\io2 ናቡካዳናፆራ ጎየ (\ior 4:1-37\ior*)
\io2 ብልፃሶራነ ጎዳ ቦላ ፁፍያ (\ior 5:1-31\ior*)
\io2 ዳነል ጋሞፈ አትስ (\ior 6:1-28\ior*)
\io1 ዳነል በእዳ ቆንጨታ (\ior 7:1—12:13\ior*)
\io2 ኦይዱ ዶአታ ቆንጨ (\ior 7:1—8:27\ior*)
\io2 ዳነል ባ አሳስ ዎስዳ ዎሳ (\ior 9:1-27\ior*)
\io2 ፀግሮሳ ሻፋ ማታን በእዳ ቆንጨ (\ior 10:1—12:13\ior*)
\c 1
\s1 ዳነልነ እያ ላገት ባብሎነን
\p
\v 1 ይሁዳ ካዎይ እዮአቄም ካዎትዳ ሄን ላይን ባብሎነ ካዎይ ናቡካዳናፆር የሩሳላመ ካታማ ቦላ ደንድ ካታማ ተቅስ።\x - \xo 1:1 \xo*\xt 2 ካዎ 24:1፤ 2 ታር 36:5-7.\xt*\x* 
\v 2 ጎዳይ ይሁዳ ካዋ እዮአከመነ ፆሳ ኬን ደእያ ሚሸታፐ ባጋ፥ እያ ኩሸን አድ እሚስ። እ ሄ ሚሸታ ሳናኦራ ቢታን ደእያ ባ ኤቃ ፆሳታ ኬ ኤፍድ፥ ሚሸ ምንጅያ ኬን ዎስ።\x - \xo 1:2 \xo*\xt 2 ካዎ 20:17፤ 24:10-16፤ 2 ታር 36:10፤ እሳ 39:7-8.\xt*\x*
\p
\v 3 ካዎይ፥ አስፋናዛ ጌተትያ ባ ኦሳንቾታ ሀላቃ ሀይሳዳ ያግድ ኪትስ፦ “እስራኤለ አሳ ግዶፈ ካዎ ኮቸ ግድዳይሳታነ ግታ አሳታ ኮቸ ግድዳይሳታ ዶራ። 
\v 4 ዶረታና ናአተት፥ ቦረይ ባይናይሳታ፥ ማላ ሎኦታ፥ ትምርተ ኤለስድ ኤካናዉ ዳንዳኤይሳታ፥ አኬካንቾታ፥ ኤራተ ኩምዳይሳታነ ካዎ ጋን ኦናዉ ዳንዳኤይሳታ ግዳናዉ በሴስ። ኤንታ ባብሎነ ዶናነ ፃፎ ታማርሳ” ያግስ። 
\v 5 ኤንቲ ማና ካነ ኡያና ዎይነ ኡሻ ካዋ ካፈነ ኡሻፈ ጋላስ ጋላስ እማና መላ ካዎይ ኪትስ። ሄ ላይ ሎህዳፐ ጉየ ካዋ ስን ሺቅድ ኦሶ ዶማና መላ ቆፋ ኩይስ።
\p
\v 6 ዶረትዳይሳታ ግዶፈ ይሁዳ ኮቸ ግድዳ ዳነላ፥ አናና፥ ምሳኤላነ አዛራ ጌተተይሳት ደኦሶና። 
\v 7 ካዋ ኦሳንቾታ ሀላቃይ ኤንታ ሱን ላምድ፥ ዳነላ ብልፃሶራ፥ አናና ስድራቃ፥ ምሳኤላ ምሳቃ፥ አዛራ አብዳናጎ ግድ ሱንስ።
\p
\v 8 ዳነል ካዋ ካ ምድነ ዎይነ ኡሻ ኡይድ፥ ባና ቱንሶና መላ ባ ዎዛናን ቆፋ ቃችድ፥ ሄ ቆፋ ኤካናዳ፥ ካዋ ኦሳንቾታ ሀላቃ ዎስስ። 
\v 9 ፆሳይ፥ ኦሳንቾታ ሀላቃ ስንን ዳነላስ ሳባነ ቃ እሚስ። 
\v 10 ግዶሽን፥ ኦሳንቾታ ሀላቃይ ዳነላኮ፥ “ህንተዉ ሀ ካነ ኡሻ ኪትዳ ታ ጎዳ፥ ካዋ ያያይስ። ህንተ ላገ ግድዳ ናአተታ ሶምኡዋፈ ህንተ ሶምኦይ ግልቅድ በንትኮ፥ ህንተ ጋሶን ካዎይ ታና ዎና” ያግስ።
\p
\v 11 ኦሳንቾታ ሀላቃይ ሹምን ዳነላ፥ አናና፥ ምሳኤላነ አዛራ ናግያ አድያኮ፥ ዳነል ሀይሳዳ ያግስ፦ 
\v 12 “ማናዉ ኑስ አታክልተ፥ ኡያናዉ ሃ ፃላላ እማዳ፥ ኑና ነ አይለታ ታሙ ጋላስ ፓጫ። 
\v 13 ያታዳ፥ ኑ ሶምኡዋነ ካዎ ካ ምያ ናአተታ ሶምኡዋ ፄላዳ፥ ኑና ነ አይለታ ነዉ በንትዳይሳዳ ኦ” ያግስ።
\p
\v 14 እ፥ ሄሳ ኤክድ ታሙ ጋላስ ኤንታ ፓጭስ። 
\v 15 ታሙ ጋላሳፐ ጉየ፥ ካዋ ካ ምዳ ናአተታ ኡባፈ ኤንታ ሶምኦይ ጪይን፥ ሞድ በንትዶሶና። 
\v 16 እ፥ ኤንታዉ ጊግዳ ካነ ዎይነ ኡሻ ድግድ አታክልተ እሚስ።
\p
\v 17 ሀ ኦይዱ ናአተታስ ፆሳይ ኤራነ ኡባ ቆሞ ፁፈነ ትምርተ ኤክያ አኬካ እሚስ። ዳነል ቆንጨነ አሙሆ ብርሸ ኤሬስ።
\p
\v 18 ካዎይ፥ ናአተት ባኮ ገላናዳ ኪትዳ ዎደይ ጋክን፥ ኦሳንቾታ ሀላቃይ ኤንታ ናቡካዳናፆራ ስን ኤህስ። 
\v 19 ካዎይ፥ ኤንታ ኦድስያ ዎደ ዳነላ፥ አናና፥ ምሳኤላነ አዛራ መላ አስ ኤንታ ግዶን በንትቤና። ያትን፥ ኤንቲ ካዋስ ኦናዉ ገልዶሶና። 
\v 20 ካዎይ ኤንታ ኦይችዳ አይ ጭንጫተነ አኬካ ኦይሻን፥ እያ ካዎተን ደእያ ማሮታፐነ ብታንቾታፐ ኤንቲ ታሙ ኩሸ አድ በንትዶሶና። 
\v 21 ዳነል፥ ካዎይ ቅሮስ ካዎትዳ ኮይሮ ላይ ጋካናዉ ጋምእስ።
\c 2
\s1 ናቡካዳናፆራ አሙሁዋ
\p
\v 1 ናቡካዳናፆር ካዎትዳ ናምአን ላይን አሙሆ አሙህስ። ሄ አሙሆይ እያ ዳጋንን፥ ስኮይ እያ ኤኮና እፅስ። 
\v 2 ሄሳ ግሾ፥ እ አሙህዳ አሙሁዋ እያዉ ኦዳና መላ ማሮት፥ ብታንቾት፥ ሙሩነይሳትነ ፆልንቶ ታይበይሳት ያና መላ ካዎይ ኪትስ። ኤንቲ ይድ እያ ስንን ኤቅዶሶና። 
\v 3 ካዎይ ኤንታኮ፥ “ታና ዳጋንያ አሙሆ አሙሀስ፤ ሄ አሙሆይ አይበኮ ኤራናዉ ኮያይስ” ያግስ።
\p
\v 4 ፆልንቶ ታይበይሳት ሶረ ዶናን፥ “ካዋዉ፥ መርናዉ ካዎታ! ነ አሙሁዋ ኑስ ነ አይለታስ ኦዳ፤ ኑ ነዉ እያ ብርሸ ኦዳና” ያግዶሶና።
\p
\v 5 ካዎይ ኤንታኮ፥ “ህንተ ሀ አሙሁዋነ እያ ብርሸ ታና ኤርሶና እፅኮ፥ ታ ህንተና ቃንፃና፤ ህንተ ኬይ ቡረ የግያ በሲ ግዳናይሳ ታ ህንተዉ ምንዳ ኦዳይስ። 
\v 6 ሽን ህንተ አሙሁዋነ እያ ብርሸ ታዉ ኦድኮ፥ እሞታ፥ ዎይቶነ ዳሮ ቦንቾ ታፐ ደማና። ሄሳ ግሾ፥ አነ አሙሁዋነ እያ ብርሸ ታና ኤርስተ” ያግስ።
\p
\v 7 ኤንቲ ዛሪድ፥ “ካዎይ አሙሁዋ ኑስ ባ አይለታስ ኦዶ፤ ኑ እያ ብርሸ ኤርሳና” ያግዶሶና።
\p
\v 8 ካዎይ ዛሪድ፥ “ታ ምኖ ቆፋ ህንተ ኤርያ ግሾ ዎደ አዱሳናዉ ህንተ ኮየይሳ ታ ኤራይስ። 
\v 9 ህንተ አሙሁዋ ታዉ ኦዶና እፅኮ፥ እስ ፕርድ ህንተና ናጌስ። ሀኖታይ ላመታና ግድ ህንተ ኡፋይስ ኦያ ግሾ ታዉ ዎርዶነ ገነ ቃላ ኦዳናዉ ማቀትደታ። ሄሳ ግሾ፥ አሙሁዋ ታዉ ኦድተ። ያትኮ፥ ህንተ እያ ብርሸ ኤርሳናዉ ዳንዳኤይሳ ታ ኤራና” ያግስ።
\p
\v 10 ፆልንቶ ታይበይሳት ዛሪድ፥ “ካዎይ ኦይችያ ኦይሻ ዛራናዉ ዳንዳእያ እስ አስካ ቢታን ባዋ። አይ ግታነ ዎልቃማ ካዎይ ማሮታ፥ ብታንቾታነ ፆልንቶ ታይበይሳታ ሄሳ መላባ ኦይችድ ኤረና። 
\v 11 ካዎይ ኦይችዳ ኦይሾይ ዴፆ፤ አሳ ግዶን ዶና ፆሳታፐ አትሽን፥ ሄሳ ካዋስ ቆንጭሳናዉ ዳንዳኤይ ባዋ” ያግዶሶና።
\p
\v 12 ካዎይ ዳሮ ይሎትድ፥ ባብሎነን ደእያ ጭንጫታ ኡባ ዎናዳ ኪትስ። 
\v 13 ጭንጫታ ዎናዉ አዋጆይ ከይስ፤ ዳነላነ እያ ላገታ ዎናዉ አስ ኪተትስ።
\p
\v 14 ካዋ ናገይሳታ ሀላቃይ አርዮክ፥ ባብሎነን ደእያ ጭንጫታ ዎናዉ ከይያ ዎደ ዳነል እያ ጭንጫተንነ ሂላን ኦድስስ። 
\v 15 እ ካዋ ናገይሳታ ሀላቃ አርዮካ፥ “ካዎይ ሀይሳ መላ ኢታ አዋጆ አይስ ከስዴ?” ግድ ኦይችስ። አርዮክ ሀኖታ ዳነላስ ኦድስ። 
\v 16 ዳነል ካዋኮ ገልድ፥ አሙሁዋ ብርሸ ኤርሳናዉ ባዉ ዎደይ እመታና መላ ዎስስ።
\p
\v 17 ሄሳፈ ጉየ ዳነል ባ ሶ ስሚድ፥ ባ ሄ ላገታስ፥ አናንያስ፥ ምሳኤላስነ አዛርያስ ሀኖታ ኦድስ። 
\v 18 ኤንቲ ባብሎነን ደእያ ሀንኮ ጭንጫታራ እስፈ ሀይቆናዳ፥ ሳሎ ፆሳይ ማሮታ ኦድ፥ ሀ ፁራ ኤንታዉ ቆንጭሳናዳ ዎሳና መላ ኤንታዉ ኦድስ።
\p
\v 19 ሄ ቃማ ፁራይ ዳነላስ ቆንጭስ። ዳነል ሳሎ ፆሳ ሀይሳዳ ያግድ ጋላትስ፤
\q1
\v 20 “ጭንጫተነ ዎልቅ ፆሳሳ ግድያ ግሾ፥
\q2 እያ ሱንይ መርናፐ መርና ጋካናዉ ጋላተቶ።
\q1
\v 21 እ ዎደታነ አጌናታ ላሜስ፤
\q2 ካዎታ አራታን ኡትሴስ፤ አራታፐ ድጌስ።
\q1 ጭንጫታስ ጭንጫተ እሜስ፤
\q2 አኬካንቾታስ ኤራ እሜስ።
\q1
\v 22 እ ፁራነ ጌምዳባ ቆንጭሴስ፤
\q2 እ ማን ደእያባ ኤሬስ፤
\q2 ፖኦይ እያራ ደኤስ።
\q1
\v 23 ታ ማይዛታ ፆሳዉ፥
\q2 ታ ነና ጋላታይስ፤ ሳባይስ።
\q1 ነ ታዉ ጭንጫተነ ዎልቃ እማዳሳ፤
\q2 ኑኒ ነና ኦይችዳባ ታና ኤርሳዳሳ፤
\q2 ካዋ አሙሁዋ ኑና ኤርሳዳሳ”
\m ያግስ።
\s1 ዳነል አሙሆ ብርሽስ
\p
\v 24 ሄሳፈ ጉየ፥ ዳነል ባብሎነን ደእያ ጭንጫታ ዎሳናዉ ካዉዋፐ ኪታ ኤክዳ፥ አርዮካኮ ብድ፥ “ጭንጫታ ዎፓ፤ ታና ካዋኮ ገልሳ፤ ታኒ እያ አሙሁዋ ብርሸ እያ ኤርሳና” ያግስ።
\p
\v 25 አርዮክ ኤለስድ ዳነላ ካዋኮ ገልስድ፥ ካዋኮ፥ “ይሁዳፐ ድኤትድ ይዳ አሳፐ ካዋ አሙሁዋ ብርሸ ኤርሳናዉ ዳንዳእያ አሰ ደማስ” ያግስ።
\p
\v 26 ካዎይ ብልፃሶራ ጌተትያ ዳነላ፥ “ታ አሙህዳ አሙሁዋነ እያ ብርሸ ታና ኤርሳናዉ ዳንዳአይ?” ግድ ኦይችስ።
\p
\v 27 ዳነል ሀይሳዳ ያግድ ዛርስ፦ “ካዋዉ፥ ነ ኦይችዳ ፁራ ቆንጭሳናዉ ዳንዳእያ ጭንጫ አስ፥ ማሮይ፥ ብታንቾይነ፥ ሙሩንያ አስ ባዋ። 
\v 28 ሽን ፁራ ቆንጭስያ እስ ፆሲ ሳሎን ደኤስ። ዉርሰ ዎደታን ሀናናባ እ፥ ነና በስስ። ነ አርሳን ዝንአዳ፥ ነ በእዳ አሙሆይነ ቆንጨይ ሀይሳ።
\p
\v 29 “ካዋዉ፥ ነ አርሳን ዝንአዳ፥ ስንፈ ያናባ ቆፓዳሳ። ሄ ዎደ ፁራ ቆንጭስያ ፆሳይ ስንፈ ሀናናባ ነና በስስ። 
\v 30 ሀ ፁራይ ታዉ ቆንጭዳይ፥ ታ ሀራ አሳፐ ጭንጫ ግድዳ ግሾ ግደና። ሽን ኔኒ ካዎይ፥ አሙሁዋ ብርሸ ኤራናዳነ ነ ሁጰን ስመረትያ ቆፋ አኬካና መላሳ።
\p
\v 31 “ካዋዉ፥ ነ ዳሮ ግታ፥ ጶልያነ ፄላናዉ ያሽያ ምስለይ ነ ስንን ኤቅዳይሳ በአዳሳ። 
\v 32 ሄ ምስልያ ሁጰይ፥ ዋላህ ባይና ዎርቃፈ፥ እያ ትራይነ ኩሸት ብራፐ፥ ኡሎይነ ዎድረት ናሰ ብራታፐ፥ 
\v 33 ሱይለይ ብራታፐነ ቶሆ ያቻ ባጋይ ብራታፐ ባጋይ ቢታፈ መትስ። 
\v 34 ኔኒ ምስልያ ፄልያ ዎደ፥ እስ ሹች አሳ ኩሸይ ቦቾና ቆለትድ፥ ብራታፐነ ቢታፈ መትዳ ምስልያ ቶሆ ያቻ ቦላ ዎድ ጋጭስ። 
\v 35 ሄ ዎደ ብራት፥ ኡርቅ፥ ናሰ ብራታይ፥ ብርነ ዎርቀይ ኡባይ ጋጨትድ፥ ቦነን ዉዱማን ደእያ ሱላ መላ ግድን፥ አይኮይካ አቶናሽን ጫርኮይ ፕትድ ኤፍስ። ሽን ምስልያ ቦላ ዎዳ ሹቻይ ዙማ ግድድ ሳኣ ኩምስ።
\p
\v 36 “አሙሆይ ሀይሳ፤ ሀእ ብርሸ ኑኒ ነዉ ኦዳና። 
\v 37 ካዋዉ፥ ኔኒ ካዎታ ካዎ። ሳሎ ፆሳይ ነዉ ካዎተነ ዎልቃ፥ ምኖተነ ቦንቾ እሚስ። 
\v 38 ኔኒ ቢታ ኡባ ሃራናዳ ኦስ፤ አሰ፥ ዶአነ ሳሎ ካፎ ነ ኩሸን ዎስ። ሄሳ ግሾ፥ ዎርቃ ሁጰይ ነና።
\p
\v 39 “ኔፐ ጉየ፥ ምኖተን ነና ጋኮና ሀራ ካዎተ ደንዳና። ካልድ፥ ቢታ ኡባ ሃርያ፥ ናሰ ብራታ ግድያ፥ ሄን ካዎተ ደንዳና። 
\v 40 ዉርሰን ኡባ ጋጭድ ሊቅስያ ብራታዳ ምንዳ ኦይዳን ካዎተ ደንዳና። ብራት ኡባ ጋጭድ ሊቅሰይሳዳ እ፥ ባፐ ካሰ ደንድዳ ካዎተታ ጋጭድ ሊቅሳና።
\p
\v 41 “ቶሆትነ ቶሆ ብራት ባጋይ ብራታፐ፥ ባጋይ ቢታፈ መትዳይሳ ነ በእዳይሳዳ፥ ሄ ካዎተይ ሻከትዳ ካዎተ ግዳና። ብራት ቢታራ ዋላከትን፥ ኔኒ በእዳይሳዳ ባጋይ ብራታዳ ምኖ ግዳና። 
\v 42 ቶሆ ብራት ባጋይ ብራታ፥ ባጋይ ቢታ ግድዳይሳዳ፥ ሀ ካዎተስ ባጋይ ምኖ፥ ባጋይ ሹጎ ግዳና። 
\v 43 ብራት ቢታራ ዋላከትን ኔኒ በእዳይሳዳ ሄ ናምኡ ባጋ አሳይ ገሎንነ ኤኮን ዋላከታና። ሽን ብራት ቢታራ ዋላከታናዉ ዳንዳኦናይሳዳ ኤንቲ እስኖ ግድድ ጋምአናዉ ዳንዳኦኮና።
\p
\v 44 “ሄ ካዎታ ላይን፥ ሳሎ ፆሳይ ኩንዶና፥ ሀራ አሳስ አድ እመቶና ካዎተ ኤሳና። ሄ ኤቅዳ ካዎተይ፥ ሄ ካዎተታ ኡባ ጋጭድ ይሳና፤ ሽን እ መርናዉ ኤቅድ ዳና። 
\v 45 አሳ ኩሸይ ቦቾና ዙማፐ ቆለትድ፥ ዎድ፥ ብራታፐ፥ ናሰ ብራታፐ፥ ቢታፈ፥ ብራፐነ ቢታፈ መትዳ ምስልያ ጋጭዳ ሹቻ ብርሸይ ሄ ካዎተ።
\p “ግታ ፆሳይ ስንፈ ሀናናባ ካዋ በስስ። አሙሆይ ቱማ፤ ብርሸይካ አማነትዳይሳ” ያግድ ዛርስ።
\p
\v 46 ሄሳፈ ጉየ፥ ካዎይ ናቡካዳናፆር ዳነላ ቦንችድ፥ ጉፋንስ፤ አሳይ እያ ስንን ያርሾ ያርሻና መላነ እፃነ ጩይሳና መላ ኪትስ። 
\v 47 ካዎይ ዳነላ፥ “ቱማ ነ ፆሳይ ፆሳታ ፆሰ፥ ካዎታ ጎዳነ ፁራ ቆንጭስያ ፆሰ። ኔኒ ሀ ፁራ ቆንጭሳናዉ ዳንዳእዳይ ሄሳ ግሾሳ” ያግስ።
\p
\v 48 ሄሳፈ ጉየ፥ ካዎይ ዳነላ አድ ቦንችስ፤ ዳሮነ አልኦ እሞታታ እያዉ እሚስ። ባብሎነ ቢታ ሃርያ አሰ ኦስ፤ ባብሎነን ደእያ ጭንጫታ ኡባ ቦላ ሀላቃ ኦድ ሹምስ። 
\v 49 ዳነል ኦይሻን፥ ካዎይ ስድራቃ፥ ምሳቃነ አብዳናጎ ባብሎነ ቢታ አይሰይሳታ ኦድ ሹምስ፤ ሽን ዳነል ካዎ ኬን ጋምእስ።
\c 3
\s1 ዎርቃ ምስለነ እቶነ ታማ
\p
\v 1 ካዎይ ናቡካዳናፆር አዱሳተይ ኡሱፑን ታሙ ዋ፥ ጎምፓይ ኡሱፑን ዋ ግድያ ምስለ ዎርቃፈ መድ፥ ባብሎነ ቢታን ዱራ ደምባን ኤስስ። 
\v 2 ሄ ምስልያ አንጅሳናዉ ያና መላ፥ ካዎ ሞርናታ፥ ሹማታ፥ ቢታ አይሰይሳታ፥ ካዋ ዞረይሳታ፥ ሚሸ ኬን ኦይሳታ፥ ፕርዳ ዳይናታ፥ ህገ ኤራንቾታነ አዉራጃ ሹማታ ፄግስ። 
\v 3 ሄ ዎደ ካዎ ሞርናት፥ ሹማት፥ ቢታ አይሰይሳት፥ ካዋ ዞረይሳት፥ ሚሸ ኬን ኦይሳት፥ ፕርዳ ዳይናት፥ ህገ ኤራንቾትነ አዉራጃ ሹማት ሺቅድ፥ ካዎይ ናቡካዳናፆር ኤስዳ ምስልያ ስንን ኤቅዶሶና። 
\v 4 ሄ ዎደ አዋጅያ አደይ ባ ቃላ ቁ ኦድ፥ ሀይሳዳ ያግስ፦ “ህንተኖ፥ አሳዉ፥ ካዎተቶ፥ ዱማ ዱማ ዶና ኦደተይሳቶ፥ 
\v 5 ኡባይ ሞይዘ፥ ሱሱልኤ፥ ማስንቆ፥ ዲ፥ ዛየነ ሀራ የ ሚሸ ግርስ ስእያ ዎደ፥ ካዎይ ናቡካዳናፆር ኤስዳ ዎርቃ ምስልያስ ጉፋንድ ጎይንተ። 
\v 6 ምስልያ ስንን ጉፋንድ ጎይኖና ኦንካ፥ ሄ ሳትያን ኤፅያ እቶነ ታማን ሆለታና” ያግስ።
\p
\v 7 ሄሳ ግሾ፥ አሳይ፥ ካዎተትነ ዱማ ዱማ ዶና ኦደትያ ኡባይ ሞይዘ፥ ሱሱልኤ፥ ማስንቆ፥ ዲ፥ ዛየነ ሀራ የ ሚሸ ግርስ ስእዳ ዎደ ቢታን ጉፋንድ፥ ካዎይ ናቡካዳናፆር ኤስዳ ዎርቃ ምስልያስ ጎይንዶሶና።
\p
\v 8 ሄ ዎደ ባብሎነ አሳታፐ እሶት እሶት አይሁደታ ሞትዶሶና። 
\v 9 ኤንቲ ካዋ ናቡካዳናፆራኮ ሀይሳዳ ያግዶሶና፤ “ካዋዉ፥ መርናዉ ካዎታ። 
\v 10 ካዋዉ፥ ነ ሞይዘ፥ ሱሱልኤ፥ ማስንቆ፥ ዲ፥ ዛየነ ሀራ የ ሚሸ ግርስ ስእያ ኦንካ ጉፋንድ፥ ዎርቃ ምስልያስ ጎይናና መላ፥ 
\v 11 ቢታን ጉፋንድ ጎይኖና አስ ደእኮ፥ እቶነ ታማን ሆለታና መላ አዋጆ ከሳዳሳ። 
\v 12 ሽን ካዋዉ፥ ኔኒ ባብሎነ ቢታን ሹምዳ አይሁደት፥ ስድራቅ፥ ምሳቅነ አብዳናጎይ ነ ኪታ እፅዶሶና። ነ ፆሳታስ ኦኮና፤ ቃስ ነ ኤስዳ ዎርቃ ምስልያካ ጎይኖኮና” ያግዶሶና። 
\v 13 ናቡካዳናፆር ሄሳ ስእዳ ዎደ፥ ይሎ ኤፅድ፥ ስድራቃ፥ ምሳቃነ አብዳናጎ ኤሀና መላ ኪትስ፤ ኤንታ ካዋ ስን ኤህዶሶና። 
\v 14 ናቡካዳናፆር ኤንታ ሀይሳዳ ያግስ፦ “ስድራቃ፥ ምሳቃ፥ አብዳናጎ፥ ህንተ ታ ፆሳታስ ኦቦናይስነ ታ ኤስዳ ዎርቃ ምስልያ ጎይንቦናይስ ቱሜ? 
\v 15 ሀእ ሞይዘ፥ ሱሱልኤ፥ ማስንቆ፥ ዲ፥ ዛየነ ሀራ የ ሚሸ ግርስ ስእያ ዎደ ታ ኤስዳ ምስልያስ ጉፋንድ ጎይንኮ ሎኦ። ሽን ህንተ ጎይኖና እፅኮ፥ ኤለስድ ኤፅያ እቶነ ታማን ሆለታና። አይ ፆስካ ህንተና ታ ኩሸፐ አሸና” ያግስ።
\p
\v 16 ስድራቅ፥ ምሳቅነ አብዳናጎይ ዛሪድ፥ “ካዋዉ፥ ናቡካዳናፆራ፥ ሀይሳስ ኑ ነዉ ዛሮ እማናዉ በሰና። 
\v 17 ካዋዉ፥ ኑ ኤፅያ እቶነ ታማን ሆለትያኮካ፥ ኑ እያዉ ኦያ ፆሳይ ታማፐ ኑና አሻናዉ ዳንዳኤስ። ቃስ ካዋዉ፥ እ ኑና ነ ኩሸፐ አሻና። 
\v 18 ሽን ካዋዉ፥ እ ኑና አሾና እፅኮካ፥ ኑኒ ነ ፆሳታስ ኦናይሳነ ነ ኤስዳ ዎርቃ ምስልያ ጎይናናይሳ ኤራ” ያግዶሶና።
\p
\v 19 ሄ ዎደ ናቡካዳናፆር ስድራቃ፥ ምሳቃነ አብዳናጎ ቦላ ይሎ ኤፅን፥ እያ ሶምኦይ ላመትስ። ታማይ ካሰ ኤፀይሳፈ ላፑን ኩሸ አድ ኤፃና መላ ኪትስ። 
\v 20 ስድራቃ፥ ምሳቃነ አብዳናጎ ቃችድ፥ ኤፅያ እቶነ ታማን ሆላና መላ፥ ባ ኦላንቾታ ግዶፈ ምኖ አሳታ ኪትስ። 
\v 21 ኤንቲ ባንታ አፍላራ፥ ሱርያራ፥ ሁጰ ፃራነ ሀራ ማኦ ኡባራ ደእሽን፥ ኤፅያ እቶነ ታማን ሆልዶሶና። 
\v 22 ካዋ ኪታይ ዳሮ ኤሶ ግድዳ ግሾነ እቶነ ታማይ ካሰፐ አድ ኤፅያ ግሾ፥ ስድራቃ፥ ምሳቃነ፥ አብዳናጎ ታማን ሆልዳ፥ ምኖ አሳታ ታማ ላጮይ ዎስ። 
\v 23 ሀ ሄ ቃሸትዳ አሳት፥ ስድራቅ፥ ምሳቅነ አብዳናጎይ፥ ኤፅያ እቶነ ታማን ዎዶሶና።
\p
\v 24 ሄሳፈ ጉየ፥ ካዎይ ናቡካዳናፆር ማላለትድ፥ ኤሶን ደንድ ኤቅድ፥ “ኑ ቃችድ ኤፅያ እቶነ ታማን የግዳ አሳት ሄ ግዶኮናዬ?” ያግድ ባና ዞረይሳታ ኦይችስ።
\p ኤንቲ፥ “ካዋዉ፥ ኤ፥ ቱማ ሄ” ያግድ ዛርዶሶና።
\p
\v 25 ካዎይ ዛሪድ፥ “ቃሾፐ ብርሸትድ፥ ታማ ግዶን ያነ ሃነ ሄመትያ፥ ታማይ አይኮካ ቦቾና ኦይዱ አሳታ በአይስ፤ ኦይዳንይ ፆሳታ ናአ ዳኔስ” ያግስ።
\p
\v 26 ናቡካዳናፆር ኤፅያ እቶነ ታማ ማታ ሺቅድ፥ ባ ቃላ ቁ ኦድ፥ “ኡባፈ ቃ ፆሳ ኦሳንቾቶ፥ ስድራቃ፥ ምሳቃ፥ አብዳናጎ፥ ከይድ ሃ ዪተ!” ያግድ ፄግስ። ስድራቅ፥ ምሳቅነ አብዳናጎይ ታማ ግዶፈ ከይዶሶና። 
\v 27 ካዉዋፐ ጋርሳራ ቢታ አይሰይሳት፥ ሞርናት፥ ሹማትነ ካዋ ዞረይሳት ኤንታኮ ሺቅዶሶና። ታማይ ኤንታ አሳተ ቦችቦናይሳ፥ ኤንታ ሁጰ ብናናፐ እሶይካ ፁገትቦናይሳ፥ ኤንታ ማኦይካ ሜተትቦናይሳነ ታማ ፔኖይ ኤንታ ቦላ ባይናይሳ በእዶሶና።
\p
\v 28 ሄሳፈ ጉየ፥ ናቡካዳናፆር ሀይሳዳ ያግስ፦ “ስድራቃ፥ ምሳቃነ አብዳናጎ ፆሳይ ጋላተቶ። እ፥ ባ ኪታንቹዋ ኪትድ፥ ባናን አማነትዳ፥ ባ አይለታ አሽስ። ኤንቲ ካዋ ኪታ እፅድ፥ ባንታ ፆሳፈ አትሽን፥ ሀራ ፆሰ ጎይናናፐ ሀይቃናዉ ዶስዶሶና። 
\v 29 ሄሳ ግሾ፥ ሀራ አይ ፆስካ ሀይሳዳ ኦድ አሰ አሾና ግሾ፥ ስድራቃ፥ ምሳቃነ አብዳናጎ ፆሳ ቶችድ ኦደትያ አይ አስካ፥ ዎይኮ አይ ካዎተካ፥ ዎይኮ ዱማ ዱማ ዶናን ኦደትያ አይ ኮቻይካ ቃንፀታና መላ ኤንታ ኬይካ ላለትድ፥ ፕቶ ዶረ ግዳና መላ ታኒ ኪታስ” ያግስ።
\p
\v 30 ካዎይ ስድራቃ፥ ምሳቃነ አብዳናጎ ባብሎነ ቢታን ቁ ቁ ኦድ ሹምስ።
\c 4
\s1 ናቡካዳናፆራ ናምአን አሙሁዋ
\p
\v 1 ካዎይ ናቡካዳናፆር፥
\pi አሳስ፥ ካዎተታስ፥ ዱማ ዱማ ዶናን ኦደትያ ኮቻታስ ሀይሳዳ ያግድ ዳብዳበ ፃፍስ፦
\pi ሳሮይ ህንተዉ ግዶ፥
\pi
\v 2 ኡባፈ ቃ ፆሳይ ታዉ ኦዳ፥ ማላልስባነ ኦራባ ታ ህንተዉ ኦዳናዉ ኮያይስ።
\q1
\v 3 እያ ማላታይ አይባ ግተ!
\q2 እ ኦያ ኦራባይ አይባ ምኖ!
\q1 እያ ካዎተይ መርና ካዎተ፤
\q2 እ የለታፐ የለታ ጋካናዉ ሃሬስ።
\p
\v 4 ታኒ፥ ናቡካዳናፆር ታ ኬን እንጀትን፥ ታ ካዎ ጋን ሚኮትን ደአይስ። 
\v 5 እስ ጋላስ ታኒ ያሽያ አሙሆ በአስ። ታኒ ታ አርሳን ዝንአዳ፥ በእዳ አሙሆይነ ቆንጨይ ታና ዳጋንስ። 
\v 6 ሄሳ ግሾ፥ አሙሁዋ ብርሸ ታና ኤርሳና መላ ባብሎነን ደእያ ጭንጫታ ኡባ ታኮ ኤሀና መላ ኪታስ። 
\v 7 ሄ ዎደ ማሮት፥ ሙራንቾት፥ ፆልንቶ ታይበይሳትነ ብታንቾት ታኮ ይን፥ ታ አሙሁዋ ኤንታዉ ኦዳስ፤ ሽን ኤንቲ ብርሸ ታና ኤርሳናዉ ዳንዳእቦኮና። 
\v 8 ዉርሰን ታ ፆሳ ሱንን ብልፃሶራ ጌተትድ ፄገትያ፥ ጌሻ ፆሳታ አያን እያን ደእያ፥ ዳነል ታኮ ገልን፥ እያዉ ታ አሙሁዋ ኦዳስ።
\p
\v 9 ጭንጫታ ሀላቃ ግድዳ ብልፃሶራ፥ ጌሻ ፆሳታ አያን ነናን ደኤይሳነ አይባ ፁርካ ኔፐ ጌሞናይሳ ታኒ ኤራይስ። ታኒ በእዳ አሙሆይ ሀይሳ፤ አነ ታዉ እያ ብርሸ ኦዳ። 
\v 10 ታኒ ታ አርሳን ዝንአዳ፥ ቢታስ ግድ ዛዋን እስ ግታ ም ኤቅዳይሳ ቆንጨን በአስ። 
\v 11 ሄ ምይ ድጭድ ግታትስነ ምንስ። እያ ፄራይ ሳሎ ጋኬስ፤ ሳኣ ጋፃፐ ጋፃ ጋካናዉ በንቴስ። 
\v 12 ሄ ም ሀይይ ፄላናዉ ሎኤስ፤ እያ አይፈይካ ዳሮ፤ እያ ቦላ ኡባስ ሜተትያባይ ደኤስ። ሳአ ዶአት እያ ኩያን ሸምፖሶና፤ ሳሎ ካፎት እያ ታሽያ ቦላ ኬፅድ ደኦሶና። ደኦራ ደእያ ኡባይ እያፐ ሜስ።
\p
\v 13 “ታኒ ታ አርሳን ዝንአዳ፥ ጌሻ ኪታንቾይ ሳሎፐ ዎሽን ቆንጨን በአስ። 
\v 14 እካ ባ ቃላ ቁ ኦድ፥ ሀይሳዳ ያግስ፦ ‘ሀ ም ቃንፅተ፤ እያ ታሽያ ካርተ፤ እያ ሀይ ዱተ፤ እያ አይፍያ ላልተ። እያ ጋርሳን ደእያ ዶአትነ እያ ታሽያን ኡትያ ካፎት ኡባይ ባቃቶ። 
\v 15 ሽን ዱሩማነ እያ ፃጱዋ ብራታንነ ናሰ ብራታ ሳንላታን ቃችድ፥ ቢታን፥ ማታ ግዶን አጋግተ። ሳሎ አካን ላኮ፤ ባዞን ማታ ግዶን ዶአራ ደኦ። 
\v 16 እያ ካሀይ አሳፐ ዶአይሳን ላመቶ፤ ሄሳዳ ሀንድ ላፑን ላይ ደኦ። 
\v 17 ኡባፈ ቃ ፆሳይ አሳ ናይታ ካዎተ ኡባ ሃረይሳ፥ ካዎተ ኮይያ አሳስ እመይሳነ ሀር አቶሽን ቦረትዳይሳ ሹመይሳ ደኦን ደእያ አስ ኡባይ ኤራና መላ፥ ሄሳ ኪታንቾት አዋጅዶሶና፤ ጌሻት ፕርዳ ኤህዶሶና’ ” ያግስ።
\p
\v 18 “ታኒ፥ ካዎይ ናቡካዳናፆር በእዳ አሙሆይ ሀይሳ፦ ሀእ፥ ብልፃሶራ፥ ታዉ እያ ብርሸ ኦዳ። ታ ካዎተን ደእያ ጭንጫታፐ እሶይካ ታና ብርሸ ኤርሳናዉ ዳንዳእቤና። ሽን ጌሻ ፆሳታ አያን ነናን ደእያ ግሾ፥ ኔኒ ዳንዳኣሳ” ያጋስ።
\s1 ዳነል አሙሆ ብርሸ
\pi
\v 19 ሄ ዎደ ብልፃሶራ ጌተትያ ዳነል ዳጋምድ፥ ሀንያባ ይስ። እ ዳጋምዳ ግሾ ጉ ዎደ ስእ ግድ ጋምእስ። ያትን፥ ካዎይ፥ “ብልፃሶራ፥ ሀ አሙሆይነ እያ ብርሸይ ነና ዳጋንፎ” ያግስ።
\pi ብልፃሶር ዛሪድ፥ “ታ ጎዳዉ፥ ሀ አሙሆይ ነና እፀይሳታስ፥ እያ ብርሸይ ነ ሞርከታስ ግዶ። 
\v 20 ነ አሙሆን በእዳ ምይ፥ ድጭድ ምንዳይ፥ ዳይድ ሳሎ ጋክዳይ፥ ሳአ ጋፃፐ ጋፃ ጋካናዉ በንትዳይ፥ 
\v 21 ሀይይ ፄላናዉ ሎኤይ፥ አይፈይ ዳርዳይ፥ እያ ቦላ ኡባስ ምያባይ ደኤይ፥ ዶአት እያ ኩያን ሸምፕዳይነ ሳሎ ካፎት እያ ታሽያን ኬፅድ ደኤይ፥ 
\v 22 ካዋዉ፥ ሄ ምይ ነና። ኔኒ ግታታዳሳ፤ ምናዳሳ፤ ነ ግታተይ ድጭድ፥ ሳሎ ጋክስ፤ ነ ማታይ ሳኣ ጋፃፐ ጋፃ ጋክስ።”
\pi
\v 23 “ካዋዉ፥ ጌሻ ኪታንቾይ ሳሎፐ ዎድ፥ ‘ሀ ም ቃንፅድ ይስተ፤ ሽን እያ ዱሩማነ እያ ፃጱዋ ብራታንነ ናሰ ብራታ ሳንላታን ቃችድ፥ ቢታን፥ ማታ ግዶን አጋግተ። እ ሳሎ አካን ላኮ፤ ላፑን ላይ ጋካናዉ ዎራን ዶአዳ ደኦ’ ” ግያ ዎደ በአዳሳ።
\pi
\v 24 “ካዋዉ፥ ብርሸይ ሀይሳ፦ ሀይስ ኡባፈ ቃ ፆሳይ ታ ጎዳ፥ ካዋ ቦላ ፖላናዉ ኪትዳ ፕርዳ። 
\v 25 ኔኒ አሳ ግዶፈ ጎደታዳ ዶአታራ እስፈ ዳና። ኔኒ ቦራዳ ማታ ማናነ ሳሎ አካን ላካና። ቃስ ኡባፈ ቃ ፆሳይ፥ አሳ ናይታ ካዎተ ኡባ ሃረይሳነ ካዎተ ባ ኮይዳ አሳስ እመይሳ ነ ኤራና ጋካናዉ፥ ላፑን ላይ ነ ቦላራ አና። 
\v 26 ዱሩማይ ፃጶራ ቢታን አታናዳ ኪተትዳይስ፥ ሳሎ ፆሳይ ቢታ ኡባ ሃረይሳ ኔኒ ኤርያ ዎደ፥ ነ ካዎተይ ነዉ ስማናይሳ በሴስ። 
\v 27 ካዋዉ፥ ታ ዞርያ ኤካ። ናጋራ ኦሶ አጋዳ ሱረባ ኦ፤ ኡንኤትዳይሳታ ናቆ አጋዳ ኤንታዉ ቃታ። ኦን ኤር ኔኒ ሳሮ ዳና ዎደይ አዱቆና አገና” ያግስ።
\s1 አሙሆይ ፖለትስ
\p
\v 28 ሀ ኡባይ ካዋ ናቡካዳናፆራ ቦላ ጋክስ። 
\v 29 ታማነ ናምኡ አጌናፐ ጉየ፥ ካዎይ ባብሎነን ደእያ ካዎ ጋ ቦላ ደእያ በሳን ስመረቴስ። 
\v 30 ካዎይ፥ “ታኒ፥ ታ ግታ ዎልቃን፥ ታ ግታ ቦንቹዋስ ካዎይ ዳና መላ ታ ኬፅዳ ዎልቃማ ባብሎነ ካታማይ ሀይሳ ግደኔ?” ያግስ።
\p
\v 31 እ፥ ባ ኦዳ ዉርሶና ደእሽን፥ ሳሎፐ ሀይሳዳ ግያ ቃል ይድ፥ “ካዋ ናቡካዳናፆራ፥ ነ ቦላ ፕርደትዳ ፕርዳይ ሀይሳ፦ ነ ካዎተይ ኔፐ ኤከትስ። 
\v 32 ኔኒ አሳ ግዶፈ ጎደታዳ፥ ባዞ ዶአታራ ዳና፤ ነ ቦራዳ ማታ ማና። ኡባፈ ቃ ፆሳይ አሳ ናይታ ካዎተ ኡባ ሃረይሳነ እ ባ ኮይዳ አሳስ ካዎተ እመይሳ ኔኒ ኤራና ጋካናዉ ላፑን ላይ ነ ቦላራ አና” ያግስ።
\p
\v 33 ናቡካዳናፆራ ቦላ ጌተትዳባይ ኤለስድ ፖለትስ። አሳ ግዶፈ ጎደትድ፥ ቦራዳ ማታ ምስ። እያ አሳተይ ሳሎ አካን ላክስ። እያ ብናናይ አንኮ ባለዳ፥ እያ ፁጉንይካ ካፎ ፁጉንዳ ድጭስ።
\p
\v 34 “ሄ ላፑን ላይይ ዉርዳፐ ጉየ፥ ታኒ ናቡካዳናፆር ቁ ጋዳ ሳሎ ፄላስ። ታ ካሀይ ስምን፥ ኡባፈ ቃ ፆሳ ጋላታስ፤ መርና ፆሳ ቦንቻስ፤ ሳባስ።
\q1 “እ መርናፐ መርናዉ ሃሬስ፤
\q2 እያ ካዎተይ የለተፈ የለተ ጋካናሳ።
\q1
\v 35 ሳአን ደእያ አሳ ኡባይ
\q2 እያ ስንን ላፋባ።
\q1 ሳሎ መተታ ቦላነ
\q2 ሳአን አሳ ቦላ እ ዶስዳባ ኦስ።
\q1 እያ ኩሽያ ተቃናዉ ዳንዳኤይ ባዋ፥
\q2 እያ፥ ‘አይ ኦይ?’ ያግድ ኦይቸይ ዴና።
\p
\v 36 ታ ካሀይ ስምን፥ ታ ካዎተ ቦንቾይነ ታ ቴማይ ታዉ ስምስ። ካሰ ታና ዞረይሳትነ ታ ሞርናት ታና ኮይዶሶና። ታኒ ታ አራታን ምናስ፤ ታዉ ካሰይሳፈ አያ ግታተ ጉዠትስ። 
\v 37 ህዛ፥ ታኒ ናቡካዳናፆር ሳሎ ካዋ ጋላታይስ፤ እያ ቁ ቁ ኦይስ፤ እያ ቦንቻይስ። እ ኦያባ ኡባይ ልከ፤ እያ ኦገ ኡባይ ሱረ፤ እ ኦቶሮን ሄመተይሳታ ካዉሻናዉ ዳንዳኤስ” ያግስ።
\c 5
\s1 ካዋ ብልፃሶራ ግብራ
\p
\v 1 እስ ጋላስ ካዎይ ብልፃሶር ሙኩሉ ግድያ ባ ሹማታስ ግብራ ጊግስድ፥ ኤንታራ እስፈ ዎይነ ኡሻ ኡይስ። 
\v 2 ብልፃሶር ዎይነ ኡሻ ኡይድ ማትዳ ዎደ፥ እያ አዋይ ናቡካዳናፆር የሩሳላመን ደእያ ፆሳ ኬፈ ኤህዳ ዎርቃፈነ ብራፐ ኦሰትዳ ኡሻ ሚሸታ ኤሀና መላ ኪትስ። እ ሄሳ ኦዳይ እ፥ እያ ሹማታስ፥ እያ ማቸትነ እያ ላገት ኡሻ ሄ ሚሸታን ኡያናዉ ኮይዳ ግሾሳ። 
\v 3 ኤንቲ የሩሳላመን ደእያ ፆሳ ኬፈ ኤህዳ ዎርቃፈ ኦሰትዳ ኡሻ ሚሸታ ካዋስ ኤህዶሶና። ያትን ካዎይ፥ እያ ሹማት፥ እያ ማቸትነ እያ ላገት ሄ ሚሸታን ትገትዳ ዎይነ ኡሻ ኡይዶሶና። 
\v 4 ኤንቲ ሄ ዎይነ ኡሻ ኡይሸ፥ ዎርቃፈ ብራፐ፥ ናሰ ብራታፐ፥ ብራታፐ፥ ምፈነ ሹቻፈ ኦሰትዳ ፆሳታ ጋላትዶሶና።
\p
\v 5 ሄ ዎደ ቆፖና ደእሽን፥ አሳ ኩሸ ብራት ከይድ፥ ፆምፐ ዎያ ኮጫ ስንን፥ ሜሸትዳ ካዎ ጋ ጎዳ ቦላ ፃፍዶሶና። ሄ ኩሸይ ፃፍያ ዎደ ካዎይ በእስ። 
\v 6 ሄ ዎደ እያ ሶምኦይ ላመትድ፥ ብዶ ግድስ፤ ያሻን እያ ጋደይ ኮኮርስ፤ እያ ጉልባታይ እፅስ።
\p
\v 7 ካዎይ ባ ቃላ ቁ ኦድ፥ ሙራንቾታ፥ ማሮታነ ፆልንቶ ፓይደይሳታ ኤሀና መላ ኪትስ። እ፥ ባብሎነ ጭንጫታኮ ሀይሳዳ ያግስ፦ “ሀ ፁፍያ ናባብድ፥ እያ ብርሸ ታዉ ኦድያ ኦንካ፥ ኦቻ ቴራ ዳንያ ማኡዋ ማአና፤\f + \fr 5:7 \fr*\fq ኦቻ ቴራ ዳንያ ማኡዋ ማአና፦ \fq*\ft ሀ ማኦይ ዳሮ አልኦነ በን ዎደ ካዎት ማእያ ማኦ።\ft*\f* እያ ቆን ዎርቃ አና፤ እ፥ ታ ካዎተ ሃርያ ሄን አስ ግዳና” ያግስ።
\p
\v 8 ባብሎነ ጭንጫት ኡባይ እያ ስን ይዶስና፤ ሽን ኤንታፈ ኦንካ ሄ ፁፍያ ናባባናዉ ዎይኮ እያ ብርሸ ኦዳናዉ ዳንዳእቤና። 
\v 9 ካዎይ ብልፃሶር ካሰይሳፈ አድ ዳጋምን፥ እያ ሶምኦይ ካሰይሳፈ አድ ብዶ ግድስ። እያ ሹማት ሀንያባ ይዶሶና።
\p
\v 10 እያ አይያ፥ ካዋነ እያ ሹማታ ፓላማ ስአዳ፥ ኤንቲ ግብራ ምያ ኬ ገላዳ፥ ሀይሳዳ ያጋሱ፦ “ካዋዉ፥ መርናዉ ካዎታ! ሀ ቆፋን ዳሮ ዳጋሞፋ፤ ነ ሶምኦይ ላመቶፎ። 
\v 11 ጌሻ ፆሳታ አያን እያ ቦላ ደእያ፥ እስ አስ ነ ካዎተ ግዶን ደኤስ። እያዉ ኤራተ፥ አኬክነ ጭንጫተ ደኤስ። ካሰ ነ አዋይ፥ ካዎይ ናቡካዳናፆር እያ፥ ማሮታ፥ ሙራንቾታ፥ ብታንቾታነ ፆልንቶ ፓይደይሳታ ሀላቃ ኦድ ሹምስ። 
\v 12 እ፥ ሎኦ አያን፥ ኤርነ አኬክ ደእያ አሰ። እ አሙሆ ብርሻናዉ፥ ቃንእሸ ኦዳናዉነ ፁራ ቆንጭሳናዉ ዳንዳኤስ። ካዎይ ብልፃሶራ ግድ ሱንዳ ዳነላ ፄጋ። እ ነዉ ፁፍያ ብርሸ ኦዳና” ያጋሱ።
\p
\v 13 ሄ ዎደ ዳነላ ካዋኮ ኤህን፥ ካዎይ እያኮ ሀይሳዳ ያግስ፦ “ዳነል ነኔ? ታ አዋይ፥ ካዎይ ይሁዳፐ ድእድ ኤህዳይሳታፐ እሶይ ነኔ? 
\v 14 ፆሳታ አያን ነናን ደኤይሳ፥ ኤር፥ አኬክነ ጭንጫተ ነዉ ደኤይሳ ታ ስአስ። 
\v 15 ሀ ፁፍያ ናባባናዉነ እያ ብርሸ ታዉ ኦዳናዉ ሙራንቾትነ ጭንጫት ይዶሶና፤ ሽን ኤንቲ ታዉ ብርሸ ኦዳናዉ ዳንዳእቦኮና። 
\v 16 ኔኒ ብርሸ ኦዳናዉነ ዴፆ ኦይሻ ኡባ ዛራናዉ ዳንዳኤይሳ ታ ስአስ። ህዛ ነ ሀ ፁፍያ ናባባናዉነ እያ ብርሸ ታዉ ኦዳናዉ ዳንዳእኮ፥ ኦቻ ቴራ ዳንያ ማኡዋ ማይዛና፤ ነ ቆን ዎርቃ አና፤ ኔኒ፥ ካዎተ ሃርያ ሄን አሰ ግዳና።”
\p
\v 17 ዳነል ካዋስ ዛሪድ፥ “ነ እሞይ ነዉ ግዶ፤ ነ ዎይቱዋ ሀራ አሳስ እማ። ግዶሽን፥ ታኒ ፁፍያ ካዋስ ናባባና፤ ብርሸካ ኦዳና።”
\p
\v 18 “ካዋዉ፥ ኡባፈ ቃ ፆሳይ ነ አዋ ናቡካዳናፆራስ ካዎተ፥ ግታተ፥ ቦንቾነ ቴማ እሚስ። 
\v 19 እያ ግታተ ጋሶን ደረይ፥ ካዎተትነ ዱማ ዱማ ዶናን ኦደትያ ኮቻት እያዉ ያሻን ኮኮርዶሶና። እ ዎናዉ ኮየይሳ ዎስ፤ አሻናዉ ኮየይሳ አሼስ፤ ሹማናዉ ኮየይሳ ሹሜስ፤ ካዉሻናዉ ኮየይሳ ካዉሼስ። 
\v 20 ሽን እ ኦቶርትዳ ዎደነ እያ ዎዛናይ ሙምዳ ዎደ፥ ባ አራታፐ ዎስ፤ እያ ቦንቾይካ ቃረትስ። 
\v 21 አሳ ግዶፈ ጎደትስ፤ እያ ካሀይ ላመትን ዶአ ግድስ። ቦራዳ ማታ ምሸ ደምባ ሀረታራ እስፈ ደእስ። እያ አሳተይ ሳሎ አካን ላክስ። ሄስ ሀንዳይ፥ ኡባፈ ቃ ፆሳይ አሳ ናይታ ካዎተ ኡባ ሃረይሳነ ባ ኮይዳይሳስ እመይሳ እ ኤራና መላሳ።
\p
\v 22 “ሽን ብልፃሶራ፥ ኔኒ እያ ናአይ፥ ሀ ኡባ ኤራሸ ነ ነናተ ካዉሻባካ። 
\v 23 ቃስ ሳሎ ጎዳ ቦላ ኦቶርታዳ፥ ነናተ ቁ ቁ ኦዳሳ። እያ ኬፈ ቦንቀትድ ይዳ ዎርቃ ሚሸታን ኔኒ፥ ነ ሹማት፥ ነ ማቸትነ ነ ላገት፥ ዎይነ ኡሻ ኡይደታ። ቃስ ፄላናዉ፥ ስአናዉነ ኤራናዉ ዳንዳኦና ብራፐ፥ ዎርቃፈ፥ ናሰ ብራታፐ፥ ብራታፐ፥ ምፈነ ሹቻፈ ኦሰትዳ ፆሳታ ጋላትደታ። ነ ደኡዋነ ነ ኦግያ ባ ኩሸን ኦይክዳ ፆሳ ቦንቻባካ። 
\v 24 ሄሳ ግሾ፥ ኩሸ ብራት እያፐ ኪተትን፥ ሀ ፁፈይ ፃፈትስ።
\p
\v 25 “ፁፈይ፥
\li1 ‘ማነ፥ ማነ፥ ተቀል፥ ፓረስ’ ያጌስ።
\p
\v 26 “አራምከ ዶናን እያ ብርሸይ ሀይሳ።
\li1 ማነ፦ (ታይበትስ) ‘ፆሳይ ነ ካዎታ ላይ ታይብድ ዉራናዳ ኦስ’ ጉሱ።
\li1
\v 27 ተቀል፦ (ማዛነትስ) ‘ምዛነን ማዛነታዳ፥ ካዉያዳ በንታዳሳ’ ጉሱ።
\li1
\v 28 ፓረስ፦ (ሻከትስ) ‘ነ ካዎተይ ሻከትድ ሜዶናስነ ፋርሰስ እመትስ’ ” ጉሱ።
\p
\v 29 ሄ ዎደ፥ ብልፃሶራ ኪታን፥ ኦቻ ቴራ ዳንያ ማኡዋ ዳነላ ማይዝዶሶና፤ እያ ቆን ዎርቃ አዶሶና፤ ቃስ ካዎተ ሃርያ ሄን አስ ግዳና መላ አዋጅዶሶና።
\p
\v 30 ሄ ዎደ ቃማ ሞርከት ገልድ፥ ባብሎነ ካዋ ብልፃሶራ ዎዶሶና። 
\v 31 እያ ካዎተ፥ ላይ ኡሱፑን ታማነ ናምአ ግድዳ ሜዶና አደይ ዳርዮስ ኤክስ።
\c 6
\s1 ዳነል ጋሞ ኦላን
\p
\v 1 ካዎይ ዳርዮስ ባ ካዎተ ኡባ ግዶን ባፐ ጋርሳራ ቢታ ሃርያ ፄታነ ላታሙ አሳታ ሹማናዉ ቆፕስ። 
\v 2 ካዋስ አይብካ ፓጮና መላ ሹማታ አዋተን ፄላና መላ ሄ አሳታ ሀላቃ ኦድ ዶርስ፤ ዶረትዳይሳታፐ እሶይ ዳነላ። 
\v 3 ዳነል ኦሶ ኦናዉ ባዉ ደእያ ዱማ ኤራን ሀራ ሀላቃታፐነ ሹማታፐ አድ በንትስ። ሄሳ ግሾ፥ ካዎይ እያ ባ ኩመ ካዎተ ቦላ ሹማናዉ ቆፕስ።
\p
\v 4 ቢታ ሹማትነ ሀላቃት ዳነላ ሞታናዉ፥ እ አይስያ አይሱዋ ቦላ ባላ ደማናዉ ኮይዶሶና። ሽን እ፥ ባና ናግያነ አማነትዳ አስ ግድያ ግሾ፥ እያ ሞታናዉ እያ ቦላ አይ ባላካ ደምቦኮና። 
\v 5 ዉርሰን ኤንቲ፥ “እያ ፆሳ ህግያ ባጋራ ግዶና እፅኮ፥ ሀራ ባጋራ ዳነላ ሞትያባ ደሞኮ” ያግዶሶና።
\p
\v 6 ሄሳፈ ጉየ፥ ቢታ ሹማትነ ሀላቃት እስፈ ካዋኮ ብድ፥ ሀይሳዳ ያግዶሶና፦ “ካዋዉ ዳርዮሳ፥ መርናዉ ካዎታ! 
\v 7 ኑኒ ነ ካዎተ ኦሶ ኦያ ሀላቃት፥ ሹማት፥ አይሰይሳት፥ ዞረይሳትነ ቢታ ሃረይሳት ኡባይ ዞረትዳ እስ ዞረይ ደኤስ። ሄስካ ሀስታሙ ጋላስ ጋካናዉ፥ አይ አስካ ካዋ ዎሳናፐ አትሽን፥ ሀራ አይ አስ ዎይኮ አይ ፆሰ ዎሶናዳ፥ ኔኒ አዋጆ ከሳና መላሳ። ሄ አዋጁዋ ኤኮናይ ጋሞ ኦላን የገታና መላ ኔኒ ኪታ። 
\v 8 ህዛ ካዋዉ፥ ሀ አዋጆይ ሻረቶና ሜዶናነ ፋርሰ ህገዳ ምኖነ ላመቶናይሳ ግዳና መላ ፓራማ” ያግዶሶና። 
\v 9 ሄሳ ግሾ፥ ካዎይ ዳርዮስ አዋጁዋ ፃፍድ ፓራምስ።
\p
\v 10 ዳነል አዋጆይ ፓራመትድ ከይዳይሳ ኤርዳ ዎደ ባ ሶ ብስ፤ ፖቀ ቦላ ደእያ ክፍልያ ገልስ። ሄ ክፍልያ ማስኮተይ የሩሳላመ ባጋ ስሚድ ዶየትድ ደእሽን፥ ካሰ ዎሰይሳዳ ጉልባትድ፥ ባ ፆሳ ጋላትሸ፥ እስ ጋላሳን ሄ ቶሆ ዎሴስ።
\p
\v 11 ሄ አሳት እስፈ ብድ፥ ዳነል ባ ፆሳ ዎስሽንነ ባ ጎዳ ማዶ ኦይችሽን ደምዶሶና። 
\v 12 ኤንቲ ካዋኮ ብድ፥ “ካዋዉ፥ ሀስታሙ ጋላሳታ ግዶን ነ አትሽን፥ ሀራ አይ አሰ ዎይኮ አይ ፆሰ ዎስያ ኦንካ ጋሞ ኦላን የገታና መላ አዋጆ ከሳብኪ?” ያግዶሶና።
\p ካዎይ ዛሪድ፥ “ኤ አዋጃይ ከይስ፤ ሻረቶና ሜዶናነ ፋርሰ ህገዳ ምንዳይሳ” ያግስ።
\p
\v 13 ኤንቲ፥ “ካዋዉ፥ ሄኮ ይሁዳፐ ድኤትድ፥ ይዳ አሳፐ እሶይ፥ ዳነል፥ ነዉ ግድን ነ ፓራማዳ ከስዳ ነ አዋጁዋካ ኪተተና። እ ሀእ ጋካናዉ ጋላሳን ሄ ቶሆ ባ ፆሳ ዎሴስ” ያግዶሶና።
\p
\v 14 ካዎይ ሄሳ ስእዳ ዎደ ዳሮ አዛንስ፤ ዳነላ አሻናዉ ቆፕድ፥ አው ዉላና ጋካናዉ እያ አሻና ኦገ ኡባ ኮይስ። 
\v 15 ሄ ዎደ አሳት እስፈ ካዋኮ ብድ፥ “ካዋዉ፥ ሜዶናነ ፋርሰ ህግያዳ፥ ካዎይ አዋጅዳ አዋጆይ ዎይኮ ኪታይ ላመቶናይሳ ኤራ” ያግዶሶና።
\p
\v 16 ካዋ ኪታን፥ ዳነላ ኤህድ፥ ጋሞ ኦላን የግዶሶና። ካዎይ ዳነላኮ፥ “ነ ኡባ ዎደ ጎይንያ ፆሳይ ነና አሾ” ያግስ። 
\v 17 ኤንቲ ሹቹ ኤህድ፥ ኦላ ዶና ጎርድዶሶና። ኦንካ ዳነላ ቦላ ኦሰትዳባይ ላመቶና መላ፥ ካዎይ ባ ማታመነ ባ ሞርናታ ማታመ ሹቻ ቦላ ዎስ። 
\v 18 ካዎይ ባ ጋ ስሚድ፥ ካ ሞናነ ኡፋይስያባ ባኮ ሺሾና፥ ስኮ ይድ አቅስ።
\p
\v 19 ካዎይ ዎንታ ጉራ ደንድድ፥ ኤለስድ ጋሞ ኦላኮ ብስ። 
\v 20 እ አዛንሸ ያ ጋክድ፥ “ደኦ ፆሳ አይልያዉ፥ ዳነላ፥ ኔኒ ኡባ ዎደ ጎይንያ ነ ፆሳይ፥ ነና ጋሞታፐ አሻናዉ ዳንዳእዴ?” ያግድ ፄግስ።
\p
\v 21 ዳነል ዛሪድ፥ “ካዋዉ፥ መርናዉ ካዎታ! 
\v 22 ታ ፆሳይ ባ ኪታንቹዋ ኪትድ፥ ጋሞታ ዶና ጎርድስ፤ ኤንቲ ታና ቦችቦኮና። ታኒ እያ ስንን ፅሎ፤ ቃስ ካዋዉ፥ ነ ስንንካ ባላ ኦብከ” ያግስ።
\p
\v 23 ካዎይ ዳሮ ኡፋይትድ፥ ዳነላ ኦላፈ ከሳና መላ ኪትስ። ዳነል ኦላፈ ከይስ፤ እ ባ ፆሳን አማነትዳ ግሾ፥ እያ አሳተ ቦላ ቆሆይ በንትቤና። 
\v 24 ካዎይ ዳነላ ሞትዳ አሳታ ኤሀና መላ ኪትስ። ኤንቲ ኦይከትድ፥ ባንታ ማቸታራነ ባንታ ናይታራ ይድ፥ ኡባይ ጋሞ ኦላን የገትዶሶና። ኤንቲ ኦላ ዉርሰ ጋኮና ደእሽን፥ ጋሞት ጉፕ ኤክድ፥ ኤንታ መቀ መንረ አግዶሶና።
\p
\v 25 ካዎይ ዳርዮስ አሳስ፥ ካዎተታስነ ዱማ ዱማ ዶናን ኦደትያ ኮቻታስ ሀይሳዳ ያግድ ፃፍስ፦
\p “ሳሮይ ህንተዉ ግዶ!
\p
\v 26 “ታ ካዎተን ደእያ አሳ ኡባይ ዳነላ ፆሳ ያያና መላነ ኮኮራና መላ ታኒ አዋጆ ከሳስ።
\q1 “እ መርናዉ ደእያ ደኦ ፆሳ፤
\q2 እያ ካዎተይ ፖሎ የና፤
\q2 እያ ካዎተስ ዛው ባዋ።
\q1
\v 27 እ፥ አሼስ፤ መቶፐ ከስድ ኤኬስ፤
\q2 ሳሎንነ ሳአን ማላታነ ማላታታ ኦስ፤
\q2 እ፥ ዳነላ ጋሞታ ዶናፐ አሽስ” ያግስ።
\p
\v 28 ዳነል ዳርዮሳ ካዎተ ዎደነ ፋርሰ ካዋ ቅሮሳ ካዎተ ዎደ ኡባን እንጀትን ደእስ።
\c 7
\s1 ኦይዱ ዶአታ ቆንጨ
\p
\v 1 ባብሎነ ካዎይ ብልፃሶር ካዎትዳ ኮይሮ ላይን፥ ዳነል ባ አርሳን ዝንእድ፥ አሙሆነ ቆንጨ በእስ። ባ አሙሁዋን በእዳ አይፈ ቆፋታ ፃፍስ።
\p
\v 2 ዳነል ሀይሳዳ ያግስ፦ “ሳሎፐ ይዳ ኦይዱ ጫርኮት ግታ አባ ቡቅሽን ታ ቃማ ቆንጨን በአስ። 
\v 3 እሶይ እሱዋፈ ዱማ ግድዳ ኦይዱ ግታ ዶአት አባፈ ከይዶሶና።\x - \xo 7:3 \xo*\xt ቆን 13:1፤ 17:8.\xt*\x*
\p
\v 4 “ኮይሮ ዶአይ ጋሞ ዳኔስ፤ እያዉ አርጋን ቀፈይ ደኤስ። ታ በእሽን፥ እያ ቀፈይ ሾደትን፥ ሳአፐ ደንድድ፥ አሳዳ ናምኡ ቶሆን ኤቃናዳ ኦሰትስ፤ እያዉ አሳ ዎዛን እመትስ።
\p
\v 5 “ናምአን ዶአይ እስ ባጋ ቁ ግድ ኤቅዳ ባባን ጌተትያ ዶአ ዳኔስ። ሄ ዶአይ ሄ ጋይለ መቀ ባ ዶናን ባርድ፥ ባ አቻን ሳፅድ ኦይክስ። እካ፥ ‘ደንዳ፤ ካላና ጋካናዉ አሾ ማ’ ጌተትስ።
\p
\v 6 “ሄሳፈ ካላዳ፥ ማሄ ዳንያ ሀራ ዶአ በአስ። እያ ዞኮን ካፎ ቀፈ ዳንያ ኦይዱ ቀፈት ደኦሶና። እያዉ ኦይዱ ሁጰት ደኦሶና፤ እያዉ ሃሮ ማት እመትስ።
\p
\v 7 “ሄሳፈ ጉየ፥ ቃማ ቆንጨን ያሽያ፥ ዳጋንያነ ዳሮ ምኖ ግድዳ ኦይዳን ዶአ በአስ። እያዉ ግታ ብራታ አች ደኤስ። እ ባናን ጋሄትያ ኡባ ኤንታን መንረድ ሜስ፤ አትዳይሳታ ባ ቶሁዋን የረስ። ካሰ ታ በእዳ ዶአታ ኡባፈ እ ዱማቴስ፤ እያዉ ታሙ ካጨይ ደኤስ።\x - \xo 7:7 \xo*\xt ቆን 12:3፤ 13:1.\xt*\x* 
\v 8 ታኒ ሄ ካጨታባ ቆፕሽን፥ ኤንታ ግዶፈ ሀራ እስ ጉ ካጨይ ከይሽን በአስ። ሄ ካጨይ ሀንኮ ካጨታፐ ሄታ ቆልድ ሆልስ። ሄ ቃጭያስ አሳ አይፈ ዳንያ አይፈይነ ኦቶሮን ኦደትያ እንፃርስ ደኤስ።\x - \xo 7:8 \xo*\xt ቆን 13:5-6.\xt*\x*
\p
\v 9 “ታኒ ሄሳ በእሽን፥ አራታት ኡተስ ጊግዶሶና። መርናዉ ደኤይስ ባ አራታን ኡትስ፤ እያ ማኦይ ሻቻዳ፥ እያ ሁጰ ብናናይ ሙቃዳዳ ቦ። እያ አራታይነ አራታ ገርቶይ ታማዳ ሎጬስ።\x - \xo 7:9 \xo*\xt ቆን 20:4፤ 1:14.\xt*\x* 
\v 10 እያ አራታ ግዶፈ ታማ ሻፍ ፑልትድ፥ ከዬስ። ሙኩሉ ቶሆ ሙኩላን ታይበተይሳት እያዉ ኦሶና፤ ታሙ ሙኩሉ ቶሆ ታሙ ሙኩላን ታይበተይሳት እያ ስንን ኤቆሶና። ፕርድ ዶመትስ፤ ማፃፋት ዶየትዶሶና።\x - \xo 7:10 \xo*\xt ቆን 5:11፤ 20:12.\xt*\x*
\p
\v 11 “ካጨይ ኦደትያ ኦቶሮ ቃላ ታኒ ስእዳ ግሾ፥ እያ ጫዳ ፄላስ። ታኒ በእሽን ዶአይ ሀይቅድ፥ ኤፅያ ታማን የገትድ፥ ይስ። 
\v 12 ሀንኮ ሄ ዶአታ ማታይ ኤከትስ፤ ሽን ኤንቲ ጉ ዎደ ደኦን ዳና መላ ኤንታዉ እመትስ።
\p
\v 13 “ታኒ፥ ቃማ ቆንጨን፥ አሳ ናአ ዳነይስ ሳሎፐ ሻራራ ይሽን በአስ። መርናዉ ደኤይሳኮ ሺቅን፥ እያ ስን አዶሶና።\x - \xo 7:13 \xo*\xt ማቶ 24:30፤ 26:64፤ ማር 13:26፤ 14:62፤ ሉቃ 21:27፤ ቆን 1:7፥ 13፤ 14:14.\xt*\x* 
\v 14 እያዉ ማት፥ ቦንቾይነ ካዎተ እመትስ፤ ደረይ፥ ካዎተትነ ዱማ ዱማ ዶናን ኦደትያ ኡባይ ሃረትዶሶና። እያ ማታይ መርናዉ ሻረቶና ማታ፤ እያ ካዎተስ ዛው ባዋ።
\s1 ቆንጨ ብርሸ
\p
\v 15 “ታኒ፥ ዳነል፥ ታ በእዳባን ዳጋማስ፤ ቆንጨይ ታና ህርግስስ። 
\v 16 ታኒ ያን ኤቅዳይሳታፐ እሱዋኮ ሺቃዳ፥ ሀ ኡባስ ቱማ ብርሸይ አይበኮ ኦይቻስ። እ ታዉ እያ ብርሸ ኡባ ሀይሳዳ ያግድ ኦድስ፦ 
\v 17 ‘ሀ ኦይዱ ግታ ዶአት ሳአን ስንፈ ደንዳና ኦይዱ ካዎተታ። 
\v 18 ሽን ኡባፈ ቃ ፆሳ ጌሻት እያ ካዎተ ኤክድ፥ መርናዉ ባንታባ ኦና፤ መርናዉ ካዎተ ኤንቲ ላታና’ ያግስ።
\p
\v 19 “ሄሳፈ ጉየ፥ ታኒ ሀራ ዶአታ ኡባፈ ዱማ ግድዳ ያሽያ ኦይዳን ዶኣስ ደእያ ቱማ ብርሸ ኤራናዉ ኮያስ። ሄ ዶኣስ ብራታ አችነ ናሰ ብራታ ፁጉን ደኤስ፤ እ ባናን ጋሄትያ ኡባ መንረድ ሜስ፤ አትዳይሳ ባ ቶሁዋን የረስ። 
\v 20 ሄ ዶኣ ሁጰን ደእያ ታሙ ካጨታባነ ጉየፐ ከይድ፥ ኤንታፈ ሄታ ቆልድ የግዳ ጉ ካጭያባ ኤራናዉ ኮያስ። ሄ ጉ ቃጭያስ አይፈይነ ኦቶሮ ቃላ ኦደትያ እንፃርስ ደኤስ። ሄ ካጨይ ሀንኮታፐ አድ ያሼስ። 
\v 21 ታኒ በእያ ዎደ ሄ ካጨይ ጌሻታራ ኦለትድ፥ ኤንታ ፆንስ። 
\v 22 ሄስ ሀንዳይ፥ መርናዉ ደኤይስ ያና ጋካናዉነ ኡባፈ ቃ ፆሳ ጌሻታስ ፕርዳና ጋካናሳ፤ ኤንቲ ካዎተ ላትያ ዎደይ ጋክስ።\x - \xo 7:22 \xo*\xt ቆን 20:4.\xt*\x*
\p
\v 23 “እ ብርሸ ታዉ ሀይሳዳ ያግድ ኦድስ፤ ‘ኦይዳን ዶአይ ሀ ሳአን ስንፈ ደንዳና ኦይዳን ካዎተ። ሄ ካዎተይ ሀራ ካዎተ ኡባፈ ዱማ፤ እ፥ ቢታ ኡባ ማና፥ የናነ መንረና። 
\v 24 ታሙ ካጨት ሀ ካዎተፈ ደንዳና ታሙ ካዎታ። ሄሳፈ ጉየ፥ ካሰ ታሙ ካዎታፐ ዱማ ግድዳ ሀራ ካዎይ ደንዳና። እ፥ ኤንታፈ ሄ ካዎታ ፆንድ ሃራና።\x - \xo 7:24 \xo*\xt ቆን 17:12.\xt*\x* 
\v 25 እ፥ ኡባፈ ቃ ፆሳ ቦላ ኦቶሮን ኦደታና፤ ኡባፈ ቃ ፆሳ ጌሻታ ኡንኤና። ቃስ ዎደታነ ህግያ ላማናዉ አሞታና። ዎደይ፥ ዎደትነ ዎደ ባጋይ ጋካናዉ፥ ጌሻት እያ ማታፐ ጋርሳን ሃረታና። 
\v 26 ሽን ፕርድ ዶመታና፤ እያ ማታይ ኩመ ኤከታና፤ እ መርናዉ ያና። 
\v 27 ሳሎፐ ጋርሳን ደእያ ካዎተታ ማታይ፥ ዎልቃይነ ግታተይ፥ ኡባፈ ቃ ፆሳ ጌሻታስ እመታና። እያ ካዎተይ መርናዉ ዳና፤ ቢታ ሃረይሳት እያዉ ኪተታና፤ እያ ጎይናና’ ” ያግስ።\x - \xo 7:27 \xo*\xt ቆን 20:4፤ 22:5.\xt*\x*
\p
\v 28 ታ ቆንጨባይ ሀይሳን ዉርስ። ታኒ፥ ዳነል፥ ታ ቆፋን ዳሮ ዳጋማስ፤ ታ ሶምኦይ ብዶ ግድስ። ሽን ኡባባ ታኒ ታ ዎዛናን ዎስ።
\c 8
\s1 ዳነል በእዳ ዶርሰነ ዴሸ
\p
\v 1 ብልፃሶር ካዎትዳ ሄን ላይን፥ ታኒ፥ ዳነል፥ ካሰ በእዳ ቆንጨፈ ሀራ ቆንጨ በአስ። 
\v 2 ሄ ቆንጨን፥ ኤላማ ቢታን፥ ሱሳ ካታማን፥ ኡባላ ሻፋ ማታን ኤቃዳ ታና ደማስ። 
\v 3 ሄ ሻፋ ማታን ናምኡ አዱሳ ካጨት ደእያ ዶርስ ኤቅስ። ናምኡ ካጨታፐ እሶይ ጉየፐ ዶልስ፤ ሽን ኮይሮ ዶልዳይሳፈ አዱሰ። 
\v 4 ሄ ዶርሳይ ባ ካጭያን ቃይጫናዉ፥ ዉሎሀ፥ ፑደሀነ ዱገሀ ባጋ ኮልሽን በአስ። እያራ ኤቀታናዉነ እያ ዎልቃፈ ከስ ኤካናዉ አይ መሄይካ ዳንዳእቤና። እ፥ ባ ኮይዳባ ኦስ፤ ያትድ ግታ ግድስ።
\p
\v 5 ታኒ ሀ ቆንጨባ ቆፕሽን፥ እስ ዴሽ ዉሎሀ ባጋፈ ከይድ፥ ቢታ ካንድ፥ ቶሆይ ሳአ የና ይስ። እያ ናምኡ አይፈታፐ ግዶን እስ ግታ ካጨይ ደኤስ። 
\v 6 እ፥ ዳሮ ይሎራ፥ ሻፋ ማታን ታኒ በእዳ ናምኡ ካጨራ ደእያ ዶርሳኮ ይስ። 
\v 7 እ፥ ዳሮ ይሎትድ፥ ታ በእሽን፥ ዶርሳ ካጨት ናምአይ መቃና ጋካናዉ፥ ኢታ ዶምኤ ዶምእስ። ዶርሳይ እያራ ኤቀታናዉ ዎልቅ ይስ፤ ዴሻይ እያ ሳአን የግድ የድ ኤቅስ። ዴሻ ዎልቃፈ ሄ ዶርሳ አሽያባይ ባዋ። 
\v 8 ሄ ዴሻይ ዳሮ ዎልቃምስ፤ ሽን እያ ዎልቃይ ዳርሸ ብን፥ እያ ግታ ካጨይ መቅስ። እያ በሳን ኦይዱ ግታ ካጨት ቢታ ኦይዱ ባጋ ስሚድ ድጭዶሶና።
\p
\v 9 ሀ ኦይዱ ካጨታፐ እሱዋ ቦላ ሀራ ጉ ካጨይ ዶልድ፥ ዱገሀ፥ ዶሎሀነ እስራኤለ ቢታኮ ስሚድ ዎልቃራ ድጭስ። 
\v 10 እ፥ ብድ ሳሎን ደእያ ኦላንቾታ ጋካናዉ ድጭድ፥ ሳሎ ፆልንቶታፐ ጉታ ሳአን የግድ ኤንታ የስ።\x - \xo 8:10 \xo*\xt ቆን 12:4.\xt*\x* 
\v 11 ሳሎ ቶራ ሞጮና ግድዳ ፆሳራ ባና ልክሳና ጋካናዉ ቁ ቁ ግስ። እያዉ ጋላስ ጋላስ ያርሸትያ ያርሹዋ ድግስ፤ እያ ኬካ ቱንስስ። 
\v 12 ናጋራ ጋሶን ኦላንቾትነ ጋላስ ጋላስ ያርሸትያ ያርሾይ ሄ ካጭያስ እመትስ። ቱም ሳአን ሆለትስ፤ ሄ ካጨይ ኦያባ ኡባይ እያዉ እንጀትስ።
\p
\v 13 ሄሳፈ ጉየ፥ እስ ጌሻ ኪታንቾይ፥ ሀራ ጌሻ ኪታንቹዋራ ኦደትሽን ታኒ ስአስ። እሶይ እሱዋ፥ “ጋላስ ጋላስ ያርሸትያ ያርሹዋባ፥ ዮ ኤህያ ማካላተባ፥ ሳሎ ኦላንቾትነ ፆሳ ኬይ የትሸ ዳናባ ኦድያ፥ ቆንጨይ አዉደ ፖለታኔ?” ያግድ ኦይችስ።
\p
\v 14 እ ዛሪድ፥ “ናምኡ ሙኩሉነ ሄ ፄቱ ዎንታነ ኦማርስ ጋካናዉ ጋምአና፤ ሄሳፈ ጉየ፥ ፆሳ ኬይ ጌያና” ያግድ ኦድሽን ስአስ።
\s1 ቆንጨ ብርሸ
\p
\v 15 ታኒ፥ ዳነል፥ ሀ ቆንጨ በአሸነ እያ ብርሸ ኤራናዉ ቆፓሸ ደእሽን፥ እስ አሰ ዳንያባይ ታ ስንን ኤቅዳይሳ በአስ። 
\v 16 ኡባላ ሻፋፐ፥ “ጋብሬላ፥ ሀ አድያስ ሀ ቆንጨ ብርሸ ኦዳ” ግያ ግርስ ስአስ።
\p
\v 17 እ፥ ይድ ታ ማታን ኤቅዳ ዎደ፥ ታኒ ዳጋማዳ፥ ሳአን ኩንዳስ። እ ታኮ፥ “አሳ ናአዉ፥ ሀ ቆንጨይ ዉርሰ ዎድያባ ኦደይሳ አኬካ” ያግስ።
\p
\v 18 እ ታራ ኦደትያ ዎደ፥ ታኒ ሳአን ታ ሶምኡዋራ ጉፋናዳ፥ ታና ባላ አጋስ። እ ታና ሳኣፐ ደንድ፥ ታ ቶሁዋን ኤስስ። 
\v 19 እ ታኮ፥ “ሀ ቆንጨይ ዉርሰ ዎድያባ በሲያ ግሾ፥ ጎዳ ሀንቆ ጋላሳን ሀናናዉ ደእያባ ታ ነዉ ኦዳና። 
\v 20 ኔኒ በእዳ ናምኡ ካጨራ ደእያ ዶርሳይ፥ ሜዶናነ ፋርሰ ካዎታ ሌምሶ። 
\v 21 ዴሻይ ግርከ ካዋ ሌምሶ፤ እያ ናምኡ አይፍያፐ ግዶን ደእያ ግታ ካጨይ ግርከ ካዋ። 
\v 22 ካጨ መቅን እያ በሳን ዶልዳ ኦይዱ ካጨት እያ ካዎተፈ ሻከትድ ከያና ኦይዱ ካዎተታ ሌምሶ። ሽን ኤንታ ዎልቃይ ኮይሮ ካዋ ዎልቃ ጋከና።
\p
\v 23 “ኤንታ ካዎተ ዉርሰን፥ ኤንታ ናጋራይ ዛዋ ጋክያ ዎደ፥ ኢታነ ጭምያ ካዎይ ደንዳና። 
\v 24 እ ዳሮ ምኖ ግዳና፤ ሽን ባ ዎልቃን ግደና። እ ዳጋንያ ዮ ይሳና፤ እ ኦያባ ኡባይ እያዉ እንጀታና። እ ምኖ አሳታነ ጌሻ አሳታ ይሳና። 
\v 25 እ ጭምያ ግሾ እያዉ እንጀታና፤ እ ባና ኡባፈ ቁ ቁ ኦና። ኤንቲ ሳእ ሳሮ ግድ ደእሽን፥ ኤንታፈ ዳሮታ ዎና። እ ሀላቃታ ሀላቃራ ኤቀታና፥ ሽን እ፥ አስ ቦቾና ባዉ ያና።
\p
\v 26 “ነዉ ኦደትዳ ናምኡ ሙኩሉነ ሄ ፄቱ ዎንታነ ኦማርሳ ቆንጨይ ቱማ። ሽን ሀ ቆንጨይ ዳሮ ዎደፐ ጉየ ፖለታናዉ ደእያ ግሾ፥ ማታመ እያ ቦላ ዎዳ ጎርዳዳ ናጋ” ያግስ።
\p
\v 27 ታኒ ዳነል፥ ዳሮ ዳቡርዳ ግሾ፥ ሳከታዳ ዳሮ ጋላስ ዝንአስ። ሄሳፈ ጉየ ደንዳዳ፥ ካዋ ኦሶስ ባስ። ሀ ቆንጨን ታኒ ዳሮ ዳጋማስ፤ አኬካናዉ ዳንዳአብከ።
\c 9
\s1 ዳነላ ዎሳ
\p
\v 1 ሜዶና አስ ግድዳ አርፀክስሳ ናአይ፥ ዳርዮስ ባብሎነን ካዎትስ። 
\v 2 እ ካዎትዳ ኮይሮ ላይን፥ ታኒ ዳነል፥ ጌሻ ማፃፋታ ናባባሸ፥ ናበይ ኤርምያስ ኦድዳይሳዳ፥ የሩሳላመይ ላፑን ታሙ ላይ ላለትድ ጋምአናዉ ደኤይሳ አኬካስ።\x - \xo 9:2 \xo*\xt ኤርም 25:11፤ 29:10.\xt*\x* 
\v 3 ሄሳ ግሾ፥ ካዮ ማኦ ማአዳ፥ ብዶ ታ ሁጰን ቆላዳ፥ ፆማሸነ ዎሳሸ ታ ጎዳ ፆሳኮ ታ ሶምኡዋ ዛራስ።
\p
\v 4 ታ ናጋራ ፓፃሸ፥ ጎዳ፥ ታ ፆሳ ሀይሳዳ ያጋዳ ዎሳስ፦ “አቤት ጎዳዉ፥ ዎልቃማነ ያሽያ ፆሳዉ፥ ነና ዶሰይሳታስነ ነዉ ኪተተይሳታስ ነ መርና ሲቁዋነ ጫቁዋ ናገይሶ፥ 
\v 5 ኑ ናጋራ ኦዳ ባልዳ። ኑ ኢታባ ሀንዳ፤ ማካልዳ፤ ነ ኪታፐነ ነ ህግያፈ ካረ ከይዳ። 
\v 6 ኑ ካዎታስ፥ ኑ ሀላቃታስ፥ ኑ አዋታስነ ቢታን ደእያ አሳ ኡባስ ነ ሱንን ትንብተ ኦድዳ ነ ናበታ ስኦና እፅዳ።
\p
\v 7 “አቤት ጎዳዉ፥ ነ ፅሎ፤ ሽን ኑኒ ሀች ዬላ ማእዳ። ይሁዳንነ የሩሳላመን ደእያ አሳ ኡባይ ነዉ አማነቶና እፅን፥ ነ ሃሆ ቢታንነ ማታ ቢታን ላልዳ እስራኤለ አሳ ኡባይ ዬላትዳ። 
\v 8 አቤት ጎዳዉ፥ ኑኒ፥ ኑ ካዎት፥ ኑ ሀላቃትነ ኑ አዋት ነና ናቅዳ ግሾ ዬላ ማእዳ። 
\v 9 ሽን ኑ እያ ቦላ ማካልኮካ፥ ጎዳይ ኑ ፆሳይ ማርያነ አቶ ግያ ፆሲ። 
\v 10 ኑኒ ኑ ጎዳ፥ ኑ ፆሳ፥ ኪተትቦኮ፤ ቃስ ባ ናበታ ባጋራ እምዳ እያ ህግያ ናግቦኮ። 
\v 11 እስራኤለ አሳ ኡባይ ነ ህግያ መንድ፥ ካረ ከይዶሶና፤ ነዉ ኪተትቦኮና።
\p “ኑ ነ ቦላ ናጋራ ኦዳ ግሾ፥ ፆሳ አይልያ ሙሰ ህገ ማፃፋን ፃፈትዳ ባደይነ ፕርዳይ ኑ ቦላ ጋክስ። 
\v 12 ቃስ ኑ ቦላነ ኑና ካለይሳታ ቦላ ግታ መቶ ኤሀናዉ ነ ኦድዳ ቃላ ኑ ቦላ ፖላዳሳ። የሩሳላመ ቦላ ጋክዳ መቱዋ መል ሳሎፐ ጋርሳን ሀራ ቢታ ቦላ ጋክቤና። 
\v 13 ሙሰ ህግያን ፃፈትዳይሳዳ፥ ሀ ዮ ኡባይ ኑ ቦላ ጋክስ። ኑኒ ኑ ናጋራፐ ስምቦኮ፤ ነ ቱማ ስእቦኮ፤ ነና፥ ጎዳ፥ ኑ ፆሳ ማሮታ ኦይችቦኮ። 
\v 14 ጎዳይ ሀ ዩዋ ኑ ቦላ ኤሀናዉ ጉየ ግቤና። ጎዳይ፥ ኑ ፆሳይ ባ ኦያባ ኡባን ፅሎ፥ ሽን ኑ እያዉ ኪተቶና እፅዳ።
\p
\v 15 “አቤት ጎዳዉ፥ ኑ ፆሳዉ፥ ካሰ ነ አሳ፥ ነ ምኖ ኩሽያን ግብፀፈ ከሳዳ፥ ሀች ጋካናዉ ነ ሱን ፄግሳዳሳ፤ ኑኒ ናጋራ ኦዳ፤ ባልዳ። 
\v 16 አቤት ጎዳዉ፥ ኔኒ ካሰ ነ ፅሎ ኦሶ ኡባ ኦዳይሳዳ፥ ሀእ ነ ሀንቁዋነ ነ ጋዱዋ ነ ካታማፐ፥ የሩሳላመፐ፥ ነ ጌሻ ዙማፐ ደን። ኑኒ ኦዳ ናጋራይነ ኑ አዋት ኦዳ ባላይ የሩሳላመነ ነ አሳ ኑ ዩሹዋን ደእያ ኡባ ስንን ካዉሽስ።
\p
\v 17 “ህዛ ኑ ፆሳዉ፥ ታኒ ነ አይለይ ዎስያ ዎሳነ ማጋኑዋ ስአ። ጎዳዉ፥ ነ ሱን ግሾ ጋዳ፥ ሀ ላለትዳ ነ ኬ፥ ነ ኬሀ አይፍያን ፄላ። 
\v 18 አቤት ታ ፆሳዉ፥ ነ ሀይ ኑኮ ዛራ፤ ነ አይፍያ ዶያዳ፥ ነ ሱንይ ፄገትዳ ካታማ ዩዋ በአ። ኑኒ፥ ነና ዎሰይ፥ ኑ ፅሎተ ግሾ ግዶናሽን፥ ነ ግታ ማሮተ ግሾሳ። 
\v 19 አቤት ጎዳዉ፥ ስአ! አቤት ጎዳዉ፥ አቶ ጋዳ! አቤት ጎዳዉ፥ ነ ኦሱዋ ቆንጭሳ! ነ ካታማይነ ነ አሳይ ነ ሱንን ፄገትዳ ግሾ፥ አቤት ታ ፆሳዉ፥ ነ ሱን ግሾ ጋምኦፋ።”
\s1 ጋብሬለይ ስንፈ ሀናናባ ኦድስ
\p
\v 20 ታኒ ዎሳሸ፥ ታ ናጋራነ ታ አሳ እስራኤለ ናጋራ ፓፃሸነ ታ ፆሳ ጌሻ ዙማባ፥ የሩሳላመባ ጎዳ፥ ታ ፆሳስ ኦዳሸ ጋምአስ። 
\v 21 ታኒ ዎሳ ቦላ ደእሽን፥ ካሰ ቆንጨን ታ በእዳ ጋብሬለይ፥ ታኮ ኤሶን ፕራሸ፥ ኦማርሳ ያርሾ ያርሽያ ዎደ ፑቱ ግስ።\x - \xo 9:21 \xo*\xt ሉቃ 1:19፥ 26.\xt*\x* 
\v 22 እ ሀይሳዳ ያግድ፥ ታዉ ኦድስ፦ “ዳነላ፥ ታ ነዉ ኤራነ አኬካ እማናዉ ሀእ ያስ። 
\v 23 ኔኒ ቡሮ ዎሳ ዶምዳ ዎደ ነ ዎሳ ዛሮይ እመትስ፤ ታ ሄሳ ነዉ ኦዳናዉ ያስ። ፆሳይ ነና ዳሮ ዶሴስ። ሄሳ ግሾ፥ ታ ኦደይሳ ቆፓ፤ ቆንጨ አኬካ።
\p
\v 24 “ፆሳይ ነ አሳስነ ነ ጌሻ ካታማስ ቃችዳ ዎደይ፥ ላፑን ቶሆ ላፑን ታሙ ላይ። ሄ ዎደ ናቆይ ዉራና፤ ናጋራ ኦሶይ አታና፤ ቆሆይ አቶ ጌተታና፤ መርና ፅሎተ ካዎታና፤ ቆንጨነ ትንብተይ ፖለታና\f + \fr 9:24 \fr*\fq ቆንጨነ ትንብተይ ፖለታና፦ \fq*\ft እብራወ ዶናን ቆንጨይነ ትንብተይ ቱማ ግደይስ አታመታና ጌስ።\ft*\f* ኡባፈ ጌሻ በሳይ ትየታና።
\p
\v 25 “ሀይሳ ኤራ፤ አኬካ። የሩሳላመ ኦራናዉነ ኬፃናዉ ኪት ከይዳ ጋላሳፐ ብድ ትየትዳ ሀላቃይ ያና ጋካናዉ፥ ላፑን ቶሆ ላፑናነ ኡሱፑን ታማነ ናምኡ ቶሆ ላፑን ላይ አና። ሄ ዎደ የሩሳላመ ካታማይ ኦራፃና፤ ኦገትነ ዩሾ ግምበት ኦሰታና፤ ሽን ግምበትያ ዎደይ፥ መቶ ዎደ ግዳና። 
\v 26 ኡሱፑን ታማነ ናምኡ ቶሆ ላፑን ላይፈ ጉየ ትየትዳይስ ሀይቃና፤ እያዉ አይኮይካ አትቤና። ያና ሀላቃ ኦላንቾት ካታማነ ፆሳ ኬ ላላና። ሄ ካታማ ዉርሰይ ድኦዳ አኬኮና ያና። ሄ ዎደፐ ብድ ዉርሰ ጋካናዉ ኦልነ ዮይ አዋጀትስ። 
\v 27 ላፑን ላይ ግዶን፥ ሄ ሀላቃይ አሳራ ምኖ ጫቆ ጫቀታና። ሄ ላፑን ላይታ ባጋ ዛዋን ያርሾነ እሞታ ድጋና። አዋጀትዳ ፕርዳይ፥ እያ ቦላ ትገታና ጋካናዉ፥ እ ዮ ኤህያ ቱናተ ፆሳ ኬን ኤሳና”\x - \xo 9:27 \xo*\xt ዳነ 11:31፤ 12:11፤ ማቶ 24:15፤ ማር 13:14.\xt*\x* ያግስ።
\c 10
\s1 ዳነል አሙሆን በእዳ አድያ
\p
\v 1 ፋርሰ ካዎይ ቅሮስ ካዎትዳ ሄን ላይን፥ ብልፃሶራ ጌተትያ ዳነል ሀራ ቆንጨ በእስ። ሄ ቆንጨይ ቱማ፤ ቆንጭዳባይ ዎልቃማ ኦላባ። ሄ ቆንጨ ኤራና መላ አኬክ እያዉ እመትስ።
\p
\v 2 ሄ ዎደ ታኒ፥ ዳነል፥ ሄ ሳምንታ ዬካስ። 
\v 3 ሄ ሳምንታይ ዉራና ጋካናዉ ካ ማብከ፤ አሾይ ዎይኮ ዎይነ ኡሽ ታ ዶናኮ ሺቅበና፤ ታ ሁጵያ ትየታብከ 
\v 4 ኮይሮ አጌናን ላታማነ ኦይዳን ጋላሳን፥ ግታ ፀግሮሳ ሻፋ ማታን ኤቃስ። 
\v 5 ታኒ ፄልያ ዎደ ሊኖ ማኦ ማእዳ እስ አድያ በአስ። እ ባ ፄሳን አፌዛ ዎርቃፈ ኦሰትዳ ዳንጮ ዳንጭስ። 
\v 6 እያ አሳተይ ጶልያ አልኦ ሹቹ ዳኔስ፤ እያ ሶምኦይ ዎልአን መላ ዎልአሜስ፤ እያ አይፈይ ታማ ላጮ ዳኔስ፤ እያ ኩሸይነ እያ ቶሆይ ቁሸትዳ ናሰ ብራታዳ ፖኤስ፤ እያ ቃላይ ዳሮ አሳ ግርሳዳ ኮሽሜስ።
\p
\v 7 ሀ ቆንጨ ታኒ፥ ዳነል ታርካ በአስ። ታራ ደእያ አሳይ በእቦኮና፤ ኤንቲ ዳሮ ዳጋምዳ ግሾ ባቃትድ ቆሰትዶሶና። 
\v 8 ታኒ ሀ ግታ ቆንጨ በአሸ፥ ታርካ አታስ። ታዉ ዎልቅ እፅን ዳቡራስ፤ ታ ሶምኦይ ቡላትስ። 
\v 9 ታኒ እያ ኮሽንቻ ስእዳ ዎደ ሳአን ታ ሶምኡዋራ ጉፋናዳ፥ ታና ባላ አጋስ።
\p
\v 10 ሄሳፈ ጉየ፥ እስ ኩሸይ ታና ቦችስ፤ ታኒ ኮኮራሽን፥ ታ ኩሽያንነ ታ ጉልባታን ታና ደንድ ኤስስ። 
\v 11 እ ታኮ፥ “ዳሮ ዶሰትዳ ዳነላ፥ ታኒ ነዉ ኦድያ ቃላ ሎይዳ አኬካ፤ ደንዳ ኤቃ። ታኒ ኪተታዳ ኔኮ ያስ” ያግስ። እ ታኮ ሀይሳዳ ግን፥ ታኒ ኮኮራሸ ደንዳ ኤቃስ።
\p
\v 12 ቃስካ፥ “ዳነላ፥ ያዮፋ! ኔኒ አኬካ ደማናዉ ቆፓዳ፥ ነ ፆሳ ስንን ነናተ ካዉሽዳ ኮይሮ ጋላሳፐ ዶምድ፥ ነ ዎሳይ ስኤትስ፤ ታ ነዉ ዛሮ ኤካዳ ያስ። 
\v 13 ሽን ፋርሰ ካዎተ ሀላቃ ግድዳ አያናይ ላታማነ እስ ጋላስ ታና ተቅስ። ታኒ፥ ታርካ ፋርሰ ካዎተ ሀላቃራ ያን አትዳ ግሾ፥ ኪታንቾታ ሀላቃታፐ እሶይ፥ ምካኤል፥ ታና ማዳናዉ ይስ።\x - \xo 10:13 \xo*\xt ቆን 1:13-15.\xt*\x* 
\v 14 ሀ ቆንጨይ ስንፈ ሀናናባ በሲያ ግሾ፥ ታኒ ኔኮ ይዳይ፥ ዉርሰ ጋላሳን ነ አሳ ቦላ ሀናናዉ ደእያባ ነዉ ቆንጭሳናሳ” ያግስ።
\p
\v 15 እ ሄሳ ታዉ ኦድያ ዎደ፥ ታኒ ሳአን ጉፋናዳ፥ ጋናባ ያስ። 
\v 16 ሄሳፈ ጉየ፥ አሰ ዳንያ እሶይ ታ መተርሻ ቦችስ፤ ታ ዶናይ ዶየትን፥ ኦደተ ዶማስ። ታ ስንን ኤቅዳይሳኮ፥ “ታ ጎዳዉ፥ ሀ ቆንጨይ ታና ዳሮ ዳጋንዳ ግሾ ዳሮ ዳቡራስ። 
\v 17 ታኒ ነ አይለይ፥ ኔራ፥ ታ ጎዳራ ዋናዳ ኦደታናዉ ዳንዳአይና? ታ ዎልቃይ ዉርስ፤ ሸምፓናዉካ ታዉ እፀትስ” ያጋስ።
\p
\v 18 ሄ አሰ ዳንያ እሶይ ናምአን ታና ቦችድ፥ ታዉ ዎልቃ እሚስ። 
\v 19 እ ታኮ፥ “ዳሮ ዶሰትዳ አድያዉ ያዮፋ! ሳሮይ ነዉ ግዶ። ምና፤ ፃላ” ያግስ።
\p እ ሄሳ ግድ ታና ምንን፥ ታኒ ምናዳ፥ “ታ ጎዳዉ፥ ኔኒ ታና ምንዳ ግሾ ታዉ ኦዳ” ያጋስ።
\p
\v 20 እ ዛሪድ፥ “ታኒ ኔኮ አይስ ይዳኮ ነ ኤራይ? ሀእ ታ ስማዳ ፋርሰ ሀላቃ ግድዳ አያናራ ኦለታናዉ ባና፤ ታኒ ቢኮ ግርከ ሀላቃ ግድዳ አያናይ ያና። 
\v 21 ሽን ቱማ ማፃፋን ፃፈትዳባ ታኒ ነዉ ኦዳና። ታኒ ኤንታራ ኦለትያ ዎደ፥ ህንተ ሀላቃ ምካኤላፐ አትሽን፥ ታና ማድያ ሀር ባዋ።”
\c 11
\p
\v 1 “ሜዶና አስ ግድዳ ዳርዮስ፥ ካዎትዳ ኮይሮ ላይን፥ ታኒ እያ ማዳናዉነ ምንናዉ እያ ምየን ኤቃስ።”
\s1 ፑደሀነ ዱገሀ ካዎታ
\p
\v 2 “ህዛ ታ ነዉ ቱማ ኦዳይስ። ሀራ ሄ ካዎት ፋርሰ ቢታን ካዎታና፤ ኤንታፈ ጉየ ካዎትያ ኦይዳን ካዎይ፥ ሀንኮታፐ አዳ ዱረ ግዳና። እ ባ ዱረተ ጋሶን ዎልቃ ደምያ ዎደ፥ አሳ ኡባይ ግርከ ካዎተራ ኦለታና መላ ደንና።
\p
\v 3 “ሄሳፈ ጉየ፥ ዎልቃን ሃርያ ምኖ ካዎይ ደንድድ፥ ባ ኮይዳባ ኡባ ኦና። 
\v 4 እ ዎልቃን ምንዳ ዎደ እያ ካዎተይ ላለትድ፥ ኦይዱ በሳን ሻከታና። እያ ኮቻት እያ ካዎተ ላቶኮና፤ ካዎተይ እ ካሰ አይሰይሳዳ ዎልቃማ ግደና፤ እያ ካዎተይ እያፐ ኤከትድ፥ ሀራታስ እመታና።
\p
\v 5 “ዱገሀ ቢታ ካዎይ ምኖ ግዳና፤ ሽን እያ ሹማታፐ እሶይ እያፐ ዳሮ ምንድ፥ ሄ ግታ ካዎተ ሃራና። 
\v 6 ጉ ላይፈ ጉየ፥ ዱገሀ ቢታ ካዎይነ ፑደሀ ቢታ ካዎይ ባንታ ግዶን ዳቦተ ጫቆ ጫቀታና። ዱገሀ ቢታ ካዋ ናእያ ፑደሀ ቢታ ካዋ ገላና፤ ሽን እ ዎልቃይ ምነና፤ ቃስ እካ እያ ዎልቃይካ ዳሮ ዎደ ጋምኤና። ሄ ዎደ፥ ኢራ እስፈ፥ እዮ ማደይሳት፥ እ ናአይነ እ አዝናይ፥ ኡባይ አድ እመታና።
\p
\v 7 “ጉ ዉደፐ ጉየ፥ እ ዳቦታፐ እሶይ ዱገሀ ቢታን ካዎታና። ፑደሀ ቢታ ካዋ ቦላ ደንዳና፤ እያ ሚፃ መን ገልድ እያ ፆናና። 
\v 8 ቃስ ኤንታ ፆሳታ፥ ምስለታነ ብራፐነ ዎርቃፈ ኦሰትዳ ሚሸታ ኤክድ፥ ግብፀ ኤፋና። ጉ ዎደስ ፑደሀ ቢታ ካዋ ኦላናዉ ደንደና። 
\v 9 ፑደሀ ቢታ ካዎይ ዱገሀ ቢታ ካዋ ቦላ ደንዳና፤ ሽን ባ ይዳ ኦግያራ ጉየ ስማና።
\p
\v 10 “ፑደሀ ቢታ ካዋ አደ ናይት ኦላስ ጊግድ፥ ዳሮ ኦላንቾታ ሺሻና። ኤንታራ ጋሄትያባ ኡባ ሜጭድ ኤፍያ ዎልቃማ ድኦዳ ካንድ አና፤ ዛር ኦልድ ዱገሀ ካዋ ሚፃ ጋካናዉ ባና። 
\v 11 ሄ ዎደ ዱገሀ ቢታ ካዎይ ዳሮ ሀንቀትድ፥ ፑደሀ ቢታ ካዋ ኦላናዉ ደንዳና። ፑደሀ ቢታ ካዎይ ሺሽዳ ዳሮ ኦላንቾታራ ኦለትድ፥ ኤንታ ፆናና። 
\v 12 ዳሮ ኦላንቾታ ድእዳፐ ጉየ፥ ኦቶሮን ፑነታና። ዳሮ ሙኩሉ አሳ ዎና፤ ሽን እያ ፆኖይ እያራ ጋምኤና።
\p
\v 13 “ፑደሀ ቢታ ካዎይ ካሰይሳፈ አያ ሀራ ኦላንቾታ ጊግሳና። ጉ ላይ ጋምእዳፐ ጉየ፥ ኩመ ኦላ ሚሸ ኦይክዳ፥ ኦላንቾታ ኤክድ ኦላስ ከያና። 
\v 14 ሄ ዎደ ዳሮ አሳይ ዱገሀ ቢታ ካዋ ቦላ ደንዳና። ቆንጨይ ፖለታና መላ ነ አሳፐ እስ እስ ማካላንቾት ደንዳና፥ ሽን ኤንቲ ፆኖኮና። 
\v 15 ፑደሀ ቢታ ካዎይ ዱገሀ ቢታ ይድ፥ ዩሾይ ግምበትዳ እስ ካታማ ኦልድ ኦይካና። ዱገሀ ቢታ ካዋ ኦላንቾት ዎልቃ ያና፤ ሀር አቶሽን፥ ኤንታፈ ምኖ ኦላንቾትካ ኤንታራ ኤቀታናዉ ዳንዳኦኮና። 
\v 16 እያራ ኤቀታናዉ ዳንዳኤይ ባይና ግሾ ፑደሀ ቢታ ካዎይ ባ ኮይዳባ ኡባ ኦና። እ ዶረትዳ ቢታን ምን ኤቅድ፥ እያ ይስያ ዎልቃ ደማና። 
\v 17 እ ባ ካዎተን ደእያ ዎልቃ ኡባ ኤክድ ያናዉ ሀልቻና፤ ዱገሀ ቢታ ካዉዋራ ዳቦተ ጫቆ መና። ሄ ካዎተ ይሳናዉ ሀልችድ፥ ባ ናእዉ እያዉ እማና፥ ሽን እያ ሀልቾይ ፖለተና። 
\v 18 ባ ሶምኡዋ ዩሾይ አባን ተቀትዳ ቢታታኮ ዛሪድ፥ ኤንታፈ ዳሮታ ኦልድ ባዉ ኤካና። ሽን እስ ቶራ ሞጮናይ እያ ፆንድ እያ ኦቶሩዋ ጊሻና፤ እያ ኦቶሮ ኦዳ እያ ቦላ ዛራና። 
\v 19 ፑደሀ ቢታ ካዎይ ባ ቢታ፥ ባ ሚፃኮ ስማና። ሽን እ በትድ ኩንዳና፤ እያ ናምአን ኦንካ በኤና።
\p
\v 20 “እያ በሳን ካዎትያ ሀራ ካዎይ ባ ካዎተ ቦንቹዋ ናጋናዉ ጊራ ጊርስያ አሰ ካዎተ ግዶ ኪታና። ግዶሽን፥ ጉ ዎደፐ ጉየ፥ ቆንጨን ዎይኮ ኦላን ግዶናሽን፥ እ ጮ ሀይቅድ ያና።
\p
\v 21 “እያ በሳን እስ ካትዳ አስ ደንዳና፤ ሽን ኤንቲ እያዉ ካዎተ ቦንቾ እሞኮና። አሳይ ሳእ ሳሮ ግድ ኡትዳሽን፥ ጭምድ ካዎተ ኦይካና። 
\v 22 ዳሮ ኦላንቾት እያ ስንፈ ፕተትድ ያና፤ ጫቆ ሀላቃይካ ሀይቃና። 
\v 23 እያራ ጫቁዋ ጫቅ ስሚድ፥ ባ ኦያባ ጭሞን ኦና፤ ጉ አሳታ ፃላላራ እ ምናና። 
\v 24 አሳይ ሳእ ሳሮ ግድ ኡትዳሽን፥ ሄ ቢታን እ፥ ዳሮ ዱረ ግድዳ እስ ባጋ ኦይካና። ካሰ እያ አዋይ ዎይኮ እያ ማይዛይ ኦቦናባ ኦና፤ እ ድእድ ሺሽዳ ዱረተነ አቁዋ ባና ካለይሳታስ ግሻና። እ ሚፃታ ላላናዉ ሀልቻና፤ ሽን ሄስ ሀናናይ ጉ ዎደሳ። 
\v 25 ባ ዎልቃ ምንድ፥ ዳሮ ኦላንቾታራ ዱገሀ ቢታ ካዋ ቦላ ደንዳና። ዱገሀ ቢታ ካዎይ ዳሮነ ዎልቃማ ኦላንቾታራ ኦላስ ደንድድ፥ እያራ ኦለታና። ሽን እያ ቦላ ኤንቲ ማቅዳ ማቁዋ ጋሶን፥ እ ኤንታራ ኤቀታናዉ ዳንዳኤና። 
\v 26 ካዉዋራ እስ ጋይታን መይሳት እያ ይሳና፤ እያ ኦላንቾት ፕተታና፤ ዳሮት ኦላን ሀይቃና። 
\v 27 ሀ ናምኡ ካዎት ባንታ ዎዛናን ኢታ ቆፋ ኦይክድ፥ እስፈ እስ ጋይታ ቦላ ኡታና፤ እሶይ እሱዋ ጭማናዉ ዎርዶ ኦደታና። ሽን ቃመትዳ ዎደይ ቡሮ ጋክቦና ግሾ ኤንቲ ኦና ግድ ቆፕያባይ ኤንታዉ እንጀተና። 
\v 28 ፑደሀ ቢታ ካዎይ ዳሮ ዱረተራ ባ ቢታ ስማና። ሽን እ ባ ዎዛናን ጌሻ ጫቁዋ እፃና። ጌሻ ጫቁዋ ቆሀናዉ እያ ቦላ እስባ ኦድ፥ ባ ቢታ ስማና።
\p
\v 29 “ቃመትዳ ዎደይ ጋክን፥ እ ዛሪድ ዱገሀ ቢታ ቦላ ደንዳና፥ ሽን እያዉ ካሰይሳዳ እንጀተና። 
\v 30 ክፅማፐ ያ ኦላ ማርካበት እያ ዳጋንና። ጉየ ስሚድ፥ ጌሻ ጫቁዋ ቦላ ሀንቀታና። ቃስ ያፐ ስሚድ፥ ጌሻ ጫቁዋ አግዳይሳታራ ዳቦታና።
\p
\v 31 “እያ ኦላንቾት ፆሳ ኬነ እያ ዩሹዋ ቱንሳና፤ ጋላስ ጋላስ ያርሸትያ ያርሹዋ ድጋና። ያትድ፥ ዮ ቱናተ ያን ኤሳና።\x - \xo 11:31 \xo*\xt ዳነ 9:27፤ 12:11፤ ማቶ 24:15፤ ማር 13:14.\xt*\x* 
\v 32 እ ጫቆ ቃላ መንይሳታ፥ ጭሞ ቃላን ባ ባጋ ዛራና፤ ሽን ባንታ ፆሳ ኤርያ አሳይ ምናናነ እያራ ኤቀታና።
\p
\v 33 “አሳ ግዶን ደእያ ጭንጫት ዳሮ አሳ ታማርሳና። ሽን ጉ ዎደን ሄ አሳት ማሻን ሀይቃና፥ ታማን ፁገታና፥ ድኤታና ዎይኮ ቦንቀታና። 
\v 34 ሄ መቱዋ ግዶን ደእሸ፥ ኤንቲ ጉ ማዶ ደማና፤ ዳሮ አሳይ ኤንታ ባጋ ዳንድ፥ ኤንታኮ ስማና፤ ሽን ቱማ ዎዛናፐ ግደና። 
\v 35 ጭንጫታፐ እሶት እሶት በታና። ቃመትዳ ዎደይ ቡሮ ጋክቦና ግሾ፥ ኤንቲ ሄሳዳ ሀንድ፥ ዉርሰ ዎደይ ጋካናዉ፥ ፓጨትድ ከያና፥ ጌያናነ ቦረይ ባይናይሳታ ግዳና።”
\s1 ባና ቁ ኦያ ካዋ
\p
\v 36 “ካዎይ ባና ሎእዳባ ኦና፤ ባና ፆሳታ ኡባፈ ቁ ኦድ ግታያና፤ ፆሳታ ፆሳ ቦላ ካሰ ስኤትድ ኤሮና ኢታ ቃላ ኦደታና። ሀናናዉ ደእያባይ ሀናናዉ በሲያ ግሾ፥ ፆሳ ሀንቆይ ፖለታና ጋካናዉ እ ኦያባ ኡባይ እያዉ እንጀታና።\x - \xo 11:36 \xo*\xt 2 ታሰ 2:3-4፤ ቆን 13:5-6.\xt*\x* 
\v 37 እ፥ ባ ማይዛታ ፆሳታ ዎይኮ ማጫሳይ ዶስያ ፆሳታ ካና። እ ባና ኡባፈ አድ ቁ ኦያ ግሾ፥ ሀራ ፆሳታ ኤከና። 
\v 38 እ ኤንታ ቦንቾ አግድ ሚፃታ ፆሳ ቦንቻና፤ እያ ማይዛት ኤሮና ፆሰ፥ ዎርቃ፥ ብራ፥ አልኦ ሹችነ ሎኦ እሞታ እምድ ቦንቻና። 
\v 39 እማ ፆሳን ማደትድ፥ እ ምኖ ሚፃታ ቦላ ደንዳና። ቃስ እያ ማታ ኤርያ አሳ ዳሮ ቦንቻና። እ ኤንታ፥ አሳ ቦላ ሹማና፤ ቢታ ዎይቶ ኦድ ኤንታዉ ሻክ ሻክ እማና።
\p
\v 40 “ዉርሰ ዎደይ ጋክን፥ ዱገሀ ቢታ ካዎይ ደንድድ፥ ፑደሀ ቢታ ካዋ ኦላና። ሽን ፑደሀ ቢታ ካዎይ ፓራ ጋረታ፥ ፓራ አሳታነ ዳሮ ማርካበታ ኤክድ፥ እያ ቦላ ጎተዳ ያና። ዳሮ ቢታ ኦይክድ፥ ድኦዳ ሜጭድ ኤፋና። 
\v 41 እ ጌሻ ቢታ ቦላ ደንዳና፤ ዳሮ ቢታት እያ ኩሸን ኩንዳና። ሽን ኤዶመይ፥ ሞአበይነ አሞነፐ ዳርያ ባጋይ እያ ኩሸፐ አታና። 
\v 42 እ ዳሮ ቢታታ ቦላ ደንድያ ዎደ፥ ግብፀይካ እያፐ ከስ ኤከና። 
\v 43 ግብፀ ዎርቃ፥ ብራነ ዱረተ ኡባ፥ ባ ኩሸን አና። ሊበነ ቶጰ አሳይ እያዉ ሃረታና። 
\v 44 ሽን ዶሎሀ ባጋፈነ ፑደሀ ባጋፈ ያ ኦዳይ፥ እያ ዳጋንና። ሀንቆ ኤፅ ከይድ፥ ዳሮታ ዎናነ ይሳና። 
\v 45 እ ባ ካዎታ ዱንካንያ አባፈነ ሎኦ ጌሻ ዙማፐ ግዶን ቶካና። ሽን እ፥ ዉርሰን ባዉ ያና፤ እያ ማድያ ኦንካ በንተና።”
\c 12
\s1 ዎደ ዉርሰ
\p
\v 1 “ሄ ዎደ ነ አሳ ናግያ ግታ ሀላቃይ፥ ምካኤል ደንዳና። ካዎተ መትዳ ዎድያፐ ዶምድ፥ ሀን ኤሮና መቶ ዎደይ ያና። ግዶሽን፥ ኤንታ ሱንይ ፆሳ ማፃፋን ፃፈትዳ ነ አሳ ኡባይ ሄ ዎደ አታና።\x - \xo 12:1 \xo*\xt ማቶ 24:21፤ ማር 13:19፤ ቆን 7:14፤ 12:7.\xt*\x* 
\v 2 ሀይቅዳ አሳፐ ዳሮት ደንዳና። ኤንታፈ ባጋት መርና ደኦስ፥ ባጋት ቃስ ዬላስነ መርና ካዉሻስ ደንዳና።\x - \xo 12:2 \xo*\xt እሳ 26:19፤ ማቶ 25:46፤ ዮሀ 5:29.\xt*\x* 
\v 3 ጭንጫት ሳሎ ፖኦዳ ቃስ ዳሮታ ፅሎተ ኦገ ካለይሳት መርናዉ ፆልንቶዳ ፖአና። 
\v 4 ሽን ነኖ ዳነላ፥ ነ ዉርሰ ዎደይ ጋካናዉ፥ ሀ ማፃፋ ጎርዳዳ፥ ማታመ ዎ። ዳሮት ኤራተ ደማናዉ ያነ ሃነ ዎፀረታና” ያግስ።\x - \xo 12:4 \xo*\xt ቆን 22:10.\xt*\x*
\p
\v 5 ታኒ፥ ዳነል፥ ናምኡ አሳታ፥ እሶይ ሻፋፐ ሀፍን፥ እሶይ ሻፋፐ ሄፍንን ኤቅዳይሳታ በአስ። 
\v 6 ኤንታፈ እሶይ ሊኖ ማእድ፥ ሻፋፐ ቦላ ባጋራ ኤቅዳ ኪታንቹዋ፥ “ሀ ማላታት ፖለታናዉ አይ መላ ዎደ ጋምአኔ?” ያግድ ኦይችስ።
\p
\v 7 ሊኖ ማእድ፥ ሻፋፐ ቆሞ ባጋራ ኤቅዳ ኪታንቾይ፥ ባ ኡሻቻ ኩሽያነ ባ ሀድርሳ ኩሽያ ሳሎ ደንድ፥ መርናዉ ደኤይሳ ሱንን ሀይሳዳ ያግድ ጫቅስ፦ “ሀይስ፥ ዎደይ፥ ዎደትነ ዎደ ባጋይ ጋካናዉ ጋምአና፤ ጌሻ አሳታ ዎልቃይ ዉርያ ዎደ ሀ ኡባይ ፖለታና”\x - \xo 12:7 \xo*\xt ቆን 10:5፤ 12:14.\xt*\x* ያግስ።
\p
\v 8 ሀ ኡባ ታኒ ስአስ፥ ሽን ታዉ ገልቤና። ያትን፥ ታኒ፥ “ታ ጎዳዉ፥ ሀ ኡባስ ዉርሰይ አይ ግዳንዴ?” ጋዳ ኦይቻስ።
\p
\v 9 እ ዛሪድ፥ “ዳነላ፥ ሀ ቃላይ ዉርሰ ዎደይ ጋካናዉ ጎርደትዳነ አታመትዳ ግሾ ኔኒ ባ፤ 
\v 10 ዳሮት ፓጨትድ ከያና፥ ጌያናነ ቦረይ ባይናይሳታ ግዳና፤ ሽን ኢታት፥ ኢታባ ኦና። ኢታታፐ እስ አስካ አኬከና፤ ሽን ጭንጫት አኬካና።\x - \xo 12:10 \xo*\xt ቆን 22:11.\xt*\x*
\p
\v 11 “ጋላስ ጋላስ ያርሸትያ ያርሾይ ድገትዳፐነ ዮ ቱናተይ ሄ በሳን ኤቅዳፐ ስምን፥ 1,290 ጋላስ።\x - \xo 12:11 \xo*\xt ዳነ 9:27፤ 11:31፤ ማቶ 24:15፤ ማር 13:14.\xt*\x* 
\v 12 ገንጭድ 1,335 ጋላስ ጋካናዉ ናግያ አስ አንጀትዳይሳ።
\p
\v 13 “ኔኒ ዉርሰ ጋካናዉ ባ። ነ ሸምፓና፤ ዉርሰን ነና ጋክያ ላታ ኤካናዉ ደንዳና” ያግስ።