\id AMO - GOOFA FULL BIBLE
\ide UTF-8
\h አሞፀ
\toc1 አሞፀ ማፃፋ
\toc2 አሞፀ
\toc3 አሞ
\mt አሞፀ ማፃፋ
\imt ጋ ቆፋ
\ip አሞፀይ ክ.የ.ስ. 760 ሄራን፥ ሆሰፐ ጉራ ስን ደንድድ፥ ፑደሀ ባጋ ካዎተ፥ እስራኤለ ቦላ ትንብተ ኦድዳ ናበ። እ ፄገታናፐ ስን መሄ ሄምያ አስ። እ ዱገሀ ካዎተን የለትኮካ፥ ጎዳይ እ ቤተለ ካታማ ብድ እስራኤለን ትንብተ ኦዳና መላ እያ ኪትስ። አሞፀይ፥ አራመይ፥ ፍልስፄመይ፥ ፅሮስ፥ ኤዶመይ፥ አሞነይ፥ ሞአበይነ ይሁድ ፕርደታናይሳ ኦድስ። ግዶሽን፥ አሞፀይ እስራኤለን ደእያ ዱረ አሳይ ማዶይ ባይና ማንቆታ ቆህያ ግሾ፥ እስራኤለይ ሴረታናዉ ደኤይሳ ባ አዱሳ ኪታን ቆንጭስስ።
\ip እስራኤለን፥ ቤተለ ጌሻ በሳን ኦያ ካህነት አሞፀይ ባንታ ቢታን ትንብተ ኦዶና መላ እያ ሞትዶሶና፤ ድጋናዉ ኮይዶሶና (7:10-17)። አሞፀ ኪታታ ግዶን ቆንጭድ በንትያ ኪታይ፥ “ሱረ ፕርድ ፑልቶ ሃዳ፥ ፅሎተ መሎና ሻፋ ሃዳ ጎጎ” ግድ እስራኤለ አሳ ናግስያ ኪታ።
\ip ጎዳይ እስራኤለ አሳ አላጋ ካዎተታ ግዶን ላላናይሳ ጉጅድ ኦድስ። ሽን ፆሳይ ባ ደርያ ዛሪድ ኤሀናዉነ ጋሽትሳናዉ ኡፋይሳ ቃላ እምዳይሳ ጉጅድ ኦዴስ።
\iot ማፃፋ አይፈ ቆፋታ
\io1 ካዎተታ ቦላ ኦደትዳ ፕርዳ (\ior 1:1—3:2\ior*)
\io1 እስራኤለይነ ሳማረይ ፕርደታና (\ior 3:3—6:14\ior*)
\io1 እስራኤለ ፕርዳ ማልያ እቻሹ ቆንጨታ (\ior 7:1—9:10\ior*)
\io1 እስራኤለስ ስንን ደእያ ኡፋይሳ (\ior 9:11-15\ior*)
\c 1
\p
\v 1 ኦዝያን ይሁዳ ቢታን፥ እዮኣሳ ናአይ እዮርባም እስራኤለ ቢታን ካዎትዳ ላይን ታቆሀ ቢታን መሄ ሄመይሳታፐ እሶይ፥ አሞፀይ፥ ቢት ቃፃናፐ ናምኡ ላይፈ ስን እስራኤለባ ኦድዳ ትንብተይ ሀይሳ፦
\p
\v 2 እ፥
\q1 “ጎዳይ ፅዮነ ዙማ ቦላ ጉዴስ፤
\q2 የሩሳላመ ካታማን ደቼስ።
\q1 መሄ ሄምያ በሳት መሎሶና፤
\q2 ቃርመሎሳ ዙማ ቦላ ደእያ እርፃይ ሹሌስ” ያግስ።
\s1 እስራኤለ ሾሮ ካዎተት ፕርደታና
\s2 ሶረ
\p
\v 3 ጎዳይ፥ “ዳማስቆ አሳይ ዛር ዛር ኦዳ ናጋራ ግሾ፥ ታኒ ኤንታ ሴሮና አግከ። ኤንቲ ጋላዳ ቢታ አሳ ብራታ አች ደእያ ጋረን ጎንዶርስድ የዶሶና። 
\v 4 ሄሳ ግሾ፥ ታኒ ካዋ ሀዛኤላ ኬን ታማ የዳና፤ ሄ ታማይ ካዋ በን-ሀዳዳ ሚፃታ ማና። 
\v 5 ታኒ ዳማስቆ ካታማ ፐንግያ መንና፤ አዌና ዛንጋራን ደእያ አሳ የደናነ ካዎታ ፃምኣ ኦይክዳይሳታ ቤት-ኤደናፐ ይሳና፤ ሶረ አሳይ ደኤትድ፥ ቂራ ባና” ያጌስ።
\s2 ፍልስፄመ
\p
\v 6 ጎዳይ፥ “ጋዛ ካታማ አሳይ ዛር ዛር ኦዳ ናጋራ ግሾ፥ ታ ኤንታ ሴሮና አግከ። ኤንቲ ቢታን ደእያ አሳ ኡባ ድእድ፥ ኤዶመ ቢታ አሳስ ባይዝዶሶና። 
\v 7 ሄሳ ግሾ፥ ታኒ ጋዛ ካታማ ድርሳን ታማ የዳና፤ ሄ ታማይ ካታማ ሚፃታ ማና። 
\v 8 አሽዶዳን ደእያ አሳ ታኒ የደናነ ካዎታ ፃምኣ ኦይክዳይሳታ አስቃሎናፐ ይሳና። ኤቅሮና ካታማን ደእያ አሳ ሴራና፤ ፍልስፄመ አሳፐ አትዳይሳት ሀይቃና። ታኒ ኡባ ሃርያ ጎዳይ ሄሳ ኦዳይስ” ያጌስ።
\s2 ፅሮሳ
\p
\v 9 ጎዳይ፥ “ፅሮሳ ካታማ አሳይ ዛር ዛር ኦዳ ናጋራ ግሾ፥ ታኒ ኤንታ ሴሮና አግከ። ኤንቲ ጫቅዳ እሻተ ጫቁዋ መንድ፥ ደኤትዳ አሳ ኡባ ኤዶመ አሳስ ባይዝዶሶና። 
\v 10 ሄሳ ግሾ፥ ታኒ ፅሮሳ ካታማ ድርሳን ታማ የዳና፤ ሄ ታማይ ካታማ ሚፃታ ማና” ያጌስ።
\s2 ኤዶመ
\p
\v 11 ጎዳይ፥ “ኤዶመ አሳይ ዛር ዛር ኦዳ ናጋራ ግሾ፥ ታኒ ኤንታ ሴሮና አግከ። ኤንቲ ባንታ እሻ እስራኤለ ማሻን የደዶሶና፤ ኤንቲ ኤንታዉ ቃትቦኮና፤ ኤንታ ይሎይ መርናዉ እርፀና። 
\v 12 ሄሳ ግሾ፥ ታኒ ተማና ካታማ ቦላ ታማ የድን፥ ሄ ታማይ ቦሶራ ካታማ ሚፃታ ማና” ያጌስ።
\s2 አሞነ
\p
\v 13 ጎዳይ፥ “አሞነ አሳይ ዛር ዛር ኦዳ ናጋራ ግሾ፥ ታኒ ኤንታ ሴሮና አግከ። ኤንቲ ባንታ ዛዋ አሳናዉ ጋላዳ ቢታን ደእያ ቃንትዳ ማጫሳታ ኡሉዋ ዳክዶሶና። 
\v 14 ሄሳ ግሾ፥ ታኒ ራባ ካታማ ድርሳን ታማ የዳና፤ ሄ ታማይ ካታማ ሚፃታ ማና። ሄሳፈ ጉየ፥ ኦላ ጋላስ ዋሶይ ዳራና፤ ኦላንቾት ጎተዳ ዎልቃማና። 
\v 15 ኤንታ ካዎይነ እያራ ኦያ ሀላቃት ኡባይ ደኤትድ ባና” ያጌስ።
\c 2
\s2 ሞአበ
\p
\v 1 ጎዳይ፥ “ሞአበ አሳይ ዛር ዛር ኦዳ ናጋራ ግሾ፥ ታኒ ኤንታ ሴሮና አግከ። ኤንቲ ኤዶመ ካዋ መቀይ ብዶ ግዳና ጋካናዉ ፁግዶሶና። 
\v 2 ሄሳ ግሾ፥ ታኒ ሞአበ ቢታን ታማ የዳና፤ ሄ ታማይ ቅርዮታ ካታማ ሚፃታ ማና። ኦላንቾታ ዋሱዋን፥ ሞይዘ ፑኑዋንነ ኦላ ግርሳን ሞአበ አሳይ ዉራና። 
\v 3 ታኒ ሞአበ ሃረይሳነ እያ ሞርናታ ኡባ ይሳና” ያጌስ።
\s2 ይሁዳ
\p
\v 4 ጎዳይ፥ “ይሁዳ አሳይ ዛር ዛር ኦዳ ናጋራ ግሾ፥ ታኒ ኤንታ ሴሮና አግከ። ኤንቲ ጎዳ ህግያ እፅዶሶና፤ እያ ኪታ ናግቦኮና። ኤንታ አዋት ካልዳ ዎርዶ ፆሳት ኤንታና ባለዶሶና። 
\v 5 ሄሳ ግሾ፥ ታኒ ይሁዳ ቦላ ታማ የዳና፤ ሄ ታማይ የሩሳላመ ሚፃታ ማና” ያጌስ።
\s2 እስራኤለ
\p
\v 6 ጎዳይ፥ “እስራኤለ አሳይ ዛር ዛር ኦዳ ናጋራ ግሾ፥ ታኒ ኤንታ ሴሮና አግከ። ኤንቲ ፅሉዋ ሚሸስ፥ ማንቁዋ ጫማስ ባይዞሶና። 
\v 7 ማንቆታ ቢታ ባናን የግድ፥ ኤንታ ሁጵያ የኦሶና፤ ኡንኤትዳይሳታ ፕርዳ ድጎሶና። አዋራነ ናኣራ እስ ማጫስ ላገድ ታ ጌሻ ሱን ቱንሶሶና። 
\v 8 ኤንቲ አሳፐ አጮስ ኦይክዳ ማኡዋ ያርሽያ በሳታን ኡባ ማታን ሂፅድ፥ ዝንኦሶና፤ ቃስ አሳፐ አጮስ ኤክዳ ዎይነ ኡሻ ባንታ ፆሳታ ኬን ኡዮሶና።
\p
\v 9 “ግዶሽን፥ ህንተ ግሾ ጋዳ ዝጋዳ አዱቅዳ፥ ዎላዳ ምንዳ አሞረ አሳታ ህንተ ስንፈ ይስዳይ ታና። ታኒ ኤንታዉ ቦላ አይፍያ፥ ጋርሳ ፃጱዋ ኡባ ይሳስ። 
\v 10 ታኒ ህንተና ግብፀ ቢታፈ ከሳዳ፥ ባዞን ኦይታሙ ላይ ካለስ፤ አሞረታ ቢታ ህንተዉ ላታ ኦዳ እማስ። 
\v 11 ህንተ አደ ናይታ ግዶፈ ናበታ፥ ህንተ ናአተታ ግዶፈ ናዝራወታ ደንስ። እስራኤለ አሳዉ፥ ሄስ ቱማ ግደኔ? ታኒ ጎዳይ ሄሳ ኦዳስ። 
\v 12 ሽን ህንተ ናዝራወታ ጫቆ መንስድ፥ ዎይነ ኡሻ ኡሽደታ፤ ናበታ ትንብተ ኦዶና መላ ድግደታ።
\p
\v 13 “ሄሳ ግሾ፥ ካ ዳርስድ ጫንዳ ጋረይ መኤይሳዳ ታኒ ህንተና መንና። 
\v 14 ጎባ ዎፀይስ ከስ ኤከና፤ ምኑዋስ ዎልቅ እፃና፤ ኦላንቾይ ባ ሸምፑዋ አሸና። 
\v 15 ዶንገን ዱከይስ ኤቃናዉ ዳንዳኤና፤ ጎባ ዎፅያ ኦላንቾይ ከስ ኤከና፤ ፓራዋይ ባ ሸምፑዋ አሸና። 
\v 16 ሄ ጋላስ ሀር አቶሽን ኦላንቾታ ግዶን ዳሮ ፃላ ጌተተይሳት ፅረ ካሎ ባቃታና” ያጌስ ጎዳይ።
\c 3
\s1 እስራኤለ ቦላ ፄገትዳ ማርካታ
\p
\v 1 ግብፀ ቢታፈ ህንተና ከስዳ፥ እስራኤለ አሳዉ፥ ጎዳይ ህንተዉ ኦደይሳ ስእተ። 
\v 2 ጎዳይ፥ “ሳአን ደእያ አሳ ኡባፈ ታኒ ህንተ ፃላላ ዶራስ። ሄሳ ግሾ፥ ህንተ ኦዳ ናጋራ ኡባስ ታኒ ህንተና ሴራና” ያጌስ።
\p
\v 3 ናምኡ አሳት ዎላ ባና ግድ ቆፋ ቃቾና ደእሸ እስፈ ሄመቶና?
\p
\v 4 ጋሞይ ዎ ደሞና ዎራን ጮ ጉድዬ? ዎይኮ ዎዳላ ጋሞይ አይኮ የደድ ኦይኮና ኡት ደንድድ ሳርቡቅዬ?
\p
\v 5 ካፎይ ፅሄይ ባይና ጮ ደንባን ኦይከትዬ? ዎይኮ ፅሄይ አይኮይ ቦቾና ጮ ፕርዬ?
\p
\v 6 ካታማ ግዶን ኦላ ሞይዘይ ፑነትያ ዎደ አሳይ ያሻን ኮኮረነዬ? ዎይኮ ጎዳይ ኪቶና ደእሽን ዮይ እስ ካታማ ቦላ ዪዬ?
\p
\v 7 ቱማ ኡባ ሃርያ ጎዳይ ባ ፁራ ናበታስ፥ ባ ኦሳንቾታስ ካሰትድ ቆንጭሶና ደእሸ አይኮካ ኦና።
\p
\v 8 ጋሞይ ጉድን ያዮናይ ኦኔ? ኡባ ሃርያ ጎዳይ ኦድን፥ ትንብተ ኦዶናይ ኦኔ?
\p
\v 9 አሽዶዳንነ ግብፀን ደእያ ሚፃ ኡባስ ሀይሳዳ ያግድ አዋጅተ፦ “ሳማርያ ደረታ ቦላ ሺቅድ፥ ያን ደእያ ኢታተነ ሱገ በእተ” ያግተ።
\p
\v 10 “ሀ አሳይ ሎኦባ ኦ ኤሮኮና፤ ኢታተንነ ቦንቅድ ኤህዳ ሚሸን ባንታ ኬ ኩንሶና” ያጌስ ጎዳይ። 
\v 11 ሄሳ ግሾ፥ “ሞርከይ ህንተ ቢታ ተቃና፤ ህንተ ባሱዋ ላላና፤ ህንተ ኬ ቦንቃና” ያጌስ ኡባ ሃርያ ጎዳይ።
\p
\v 12 “ሄንንቾይ ጋሞ ዶናፐ ናምኡ ሹቁለ ዎይኮ ዱፃ ሀይ የግስ ኤከይሳዳ፥ ሳማረ ቢታን እንጀ ዱሱ ደእያ እስራኤለ አሳፐ ጉት አታና” ያጌስ ጎዳይ።
\p
\v 13 “ሀይሳ ስእድ ያይቆባ ኮቻታ ቦላ ሀይሳዳ ያግድ ማርካትተ። 
\v 14 ታኒ እስራኤለ አሳ ኤንታ ናጋራ ግሾ ሴርያ ዎደ፥ ቤተለ ካታማን ደእያ ያርሾ በሳታ ላላና፤ ያርሾ በሳን ደእያ ካጨት መእድ፥ ሳአን ዎና። 
\v 15 ኤንቲ ባልጎነ ቦነ ደእያ ኬታ ኡባ ታኒ ይሳና። ኤንቲ ዳንጋርሳ ዛለን አሌቅስድ፥ ኬፅዳ ኬ ላላና፤ ቃስ ግታ ግታ ኬት ኡባይ ያና” ያጌስ ጎዳይ፥ ኡባፈ ዎልቃማ ፆሳይ።
\c 4
\s1 እስራኤለይ ፆሳኮ ስምቤና
\p
\v 1 ህንተኖ፥ ባሳነ ሚዛታዳ ሞዳ ሳማረ ማጫሳቶ፥ ሀይሳ ስእተ! ህንተ ማንቆታ ኡንኤታ፤ መቶታንቾታ ዋየታ። ህንተ አዝናታኮ፥ “ኑስ ኡሽ እምተ” ያጌታ። 
\v 2 ኡባ ሃርያ ጎዳይ ሀይሳዳ ያግድ፥ ባ ጌሻተን ጫቅስ፥ “ህንተ ማንፃቆን ኦይከትድ ጎሸታና ጋላስነ ህንተፈ አትዳ ጉት ማንፃቆን ኦይከትድ ብያ ሞሎዳ ሀናና ጋላስ ያና። 
\v 3 ህንተ ኡባይ ድርሳ ፆኤራ ጎሸትድ፥ ከይድ፥ አርሞነ ሆለታና” ያግስ ።
\q1
\v 4 “ህንተኖ፥ እስራኤለ አሳዉ፥
\q2 ቤተለ ብድ ናጋራ ኦተ፤
\q2 ጋልጋላ ብድ ናጋራ ጉጅድ ኦተ።
\q1 ዎንታ ዎንታ ህንተ ያርሹዋ ያርሽተ፤
\q2 ሄን ጋላስ ጋላስ ህንተ አስራታ ኤህተ። 
\v 5 ህንተ ኦናዉ ዶሰይ ሄሳ ግድያ ግሾ፥
\q1 እርሾ የግድ ኡክዳ ኦይ ፁግድ፥ ጋላታ ያርሹዋ ያርሽተ።
\q2 ህንተ ህንተ ዶሳን እምያ እሙዋ ግሾ፥ ኦቶርትድ አዋጅተ” ያጌስ ኡባ ሃርያ ጎዳይ።
\p
\v 6 “ህንተ ካታማ ኡባን ታኒ ኮሻ የዳዳ፥ ሀር አቶሽን ህንተ አቻን ጋያባ ይሳስ፤ ሽን ህንተ ሄሳን ታኮ ስምበከታ። 
\v 7 ካ ጫክያ ዎደይ ጋካናዉ ቡሮ ሄ አጌን ደእሽን፥ ታኒ ህንተዉ እራ ተቃስ። ታኒ እስ ካታማን እራ ቡክሳዳ ሀራ ካታማን ቡኮናዳ ድጋስ፤ እስ ጎሻን ቡክስ፤ ሀራ ጎሻይ ቃስ እራ ይድ መልስ። 
\v 8 ሄሳ ግሾ፥ ናምኡ ዎይኮ ሄ ካታማ አሳይ ሃ ኡያናዉ እስ ካታማ ብዶሶና፤ ሽን አልቦኮና። ሄሳንካ ህንተ ታኮ ስምበከታ” ያጌስ ጎዳይ።
\p
\v 9 “ታኒ ህንተ ካ ቦላ ሀርገ የዳስ፤ ህንተ አታክልትያ፥ ህንተ ዎይንያ ህንተ ባላስያነ ህንተ ሻማሆ ኡባ ቦለይ ምስ፤ ሽን ህንተ ሄሳንካ ታኮ ስምበከታ” ያጌስ ጎዳይ።
\p
\v 10 “ታኒ ግብፀ አሳ ቦላ ጋዶ የድዳይሳዳ፥ ህንተ ቦላ ጋዶ የዳስ። ህንተ ፓን ናይታ ማሻን ዎስ፤ ህንተ ፓራት ድኤታና መላ ኦስ። ህንተ ሞ አሀ ፅንቆን ኡላስ፤ ሽን ህንተ ሄሳንካ ታኮ ስምበከታ” ያጌስ ጎዳይ።
\p
\v 11 “ሶዶመነ ጋሞራ ካታማታ ይስዳይሳዳ ህንተፈ ዳሮታ ይሳስ፤ ህንተ ታማፐ አትዳ ዱንቻ መላ፤ ሽን ሄሳንካ ህንተ ታኮ ስምበከታ” ያጌስ ጎዳይ።
\p
\v 12 ሄሳ ግሾ፥ “እስራኤለ አሳዉ፥ ታኒ ህንተና ሀይሳዳ ኦዳ ሴራና። ታኒ ህንተና ሀይሳዳ ኦዳ ሴራና ሀንያ ግሾ፥ እስራኤለ አሳዉ፥ ህንተ ፆሳራ ጋሄታናዉ ጊግተ” ያጌስ ጎዳይ።
\q1
\v 13 ደረታ ጊግስዳይ፥ ጫርኮ መዳይ፥
\q2 ባ ዎዛና ቆፋ አሳስ ቆንጭሰይ፥
\q2 ጋላሳ ፖኡዋ ማን ላመይ፥
\q2 ቢታ ቃ በሳታ ቦላ ሄመተይ፥
\q2 እያ ሱንይ ጎዳ፥ ኡባፈ ዎልቃማ ፆሳ።
\c 5
\s1 እስራኤለይ ስማና መላ ኦይሸትስ
\p
\v 1 እስራኤለ አሳዉ፥ ታኒ ህንተዉ ዘሌልያ ዘለልሳ ስእተ!
\q1
\v 2 “ጌላእያ፥ እስራኤለይ ኩንዳሱ፤
\q2 ዛራዳ ደንዱኩ።
\q1 እያ ሳአን የገታሱ፤
\q2 እዮ ደንያ ኦንካ ባዋ” ያጋስ።
\p
\v 3 “እስራኤለ ካታማፐ ሙኩሉ ኦላንቾታ ኦላስ የድኮ፥ ፄቱ ኦላንቾታ ፃላል አታና፤ ካታማፐ ፄቱ ኦላንቾታ ኦላስ የድኮ፥ ታሙ ኦላንቾታ ፃላል አታና” ያጌስ ኡባ ሃርያ ጎዳይ።
\p
\v 4 “ታና ኮይተ፤ ህንተ ደኦን ዳና። 
\v 5 ሽን ጋልጋል ድኤታና፤ ቤተለይ ያና ግሾ፥ ቤተለ ኮዮፕተ፤ ጋልጋላ ገሎፕተ። በርሳበ ፕኖፍተ” ያጌስ ጎዳይ።
\p
\v 6 ጎዳ ኮይተ፤ ህንተ ደኦን ዳና። ሄሳ እፅኮ፥ እ ዮሰፋ ኮቻ ታማዳ ፁጋና፤ ቤተለን ደእያ አሳ ታም ማና። ሄ ታማ ቶይሳና አስ ባዋ።
\p
\v 7 ህንተኖ፥ ሱረ ፕርዳ ምርቀይሳቶ፥ ፅሎተ ሳአን የገይሳቶ፥ ስእተ።
\q1
\v 8 ፕልያድሳ ጌተትያ ላፑን ፆልንቶታ ኦዳይ፥
\q2 ኦርዮና ጌተትያ ፆልንቶ ኮጫታ መዳይ፥
\q2 ማ ፖኦን፥ ጋላሳ ቃማን ላመይ፥
\q2 አባን ደእያ ሃታ ሳሎ ፑደ ፄግድ፥
\q2 ሳአ ምጨ ቦላ ዱገ ትገይ፥ እያ ሱንይ ጎዳ። 
\v 9 እ ሚፃታ ላላናዉ ዎልቃማታ ቦላ ጋዶ ኤሄስ።
\p
\v 10 ህንተና ፕርዳ ዳባባን ሴረይሳ እፄታ፤ ቱማ ኦደይሳ ካታ። 
\v 11 ህንተ ማንቆታ የድ፥ ኤንታ ካ ቦንቄታ። ያትድ ሹቻ ኬታ ግምብደታ፤ ሽን ህንተ እያን ደኤከታ። ሎኦ ዎይነ ቶክደታ፤ ሽን ህንተ ሄ ዎይነ ኡሻ ኡየከታ። 
\v 12 ህንተ ናቆይ አይ መላ ዳሮኮ፥ ህንተ ናጋራይ አይ መላ ግቴኮ ታኒ ኤራይስ። ህንተ ፅሎታ ናቀታ፤ ዎፈ ኤኬታ፤ ቃስ ዳባባን ማንቆታ ፕርዳ ናቀታ። 
\v 13 ሄሳ ግሾ፥ ዎደይ ኢታ ግድያ ግሾ፥ ሄሳ መላ ዎደን ጭንጫ አስ ስእ ጌስ።
\p
\v 14 ሎኦ ዶስተ፤ ኢታ እፅተ፤ ህንተ ደኦን ዳና። ሄሳ ኦኮ፥ ህንተ ገይሳዳ፥ ጎዳይ፥ ኡባፈ ዎልቃማ ፆሳይ ህንተራ ግዳና። 
\v 15 ኢታባ እፅተ፤ ሎኦባ ዶስተ። ፕርዳ በሳን ሱረ ፕርዳ ፕርድተ። ኦን ኤር ጎዳይ፥ ኡባፈ ዎልቃማ ፆሳይ ዮሰፋ ኮቻፈ አትዳ ጉታስ ቃቶና አገና።
\p
\v 16 ሄሳ ግሾ፥ ጎዳይ፥ ኡባፈ ዎልቃማ ፆሳይ፥ “ዳባባ ኡባን ዋሶይ ስኤታና፤ ኦገ ኡባን ዘለልስ ዳራና። ጎሻንቾት ዬሆ፥ ዘሌልድ ዬክያ አሳይ ዘለልሳስ ፄገታና። 
\v 17 ታኒ ህንተና ሴራናዉ ህንተ ግዶራ አያ ግሾ፥ ዎይነ ጋደ ኡባን ዬሆይ ዳና” ያጌስ።
\s1 ጎዳ ጋላሳ
\p
\v 18 ህንተኖ፥ ጎዳ ጋላሳይ ያና መላ አሞተይሳቶ፥ ህንተና አየ! ጎዳ ጋላሳ አይስ አሞቴቲ? ሄ ጋላሳይ ፖኦ ግዶናሽን ማ ግዳና። 
\v 19 ሄ ጋላሳይ አስ ጋሞፈ ባቃትድ አትያ ዎደ ማሄይ ጋከይሳ መላ ቃስ ባ ሶ ገልድ፥ ባ ኩሽያ ጎዳ ቦላ ዘምፕስያ ዎደ ሾሽ ዱክያ አሳ መላ ግዳና። 
\v 20 ጎዳ ጋላሳይ ማ ግዳናፐ አትሽን፥ ፖኦ ግደና፤ ሄ ጋላሳይ ሳካና ማ ግዳናፐ አትሽን፥ ፖኦይ ባይና ጋላስ ግዳና።
\p
\v 21 “ታኒ ህንተ ቦንችያ ባለታ እፃይስነ ሻተታይስ፤ ህንተ ጌሻ ሺቆት ታና ኡፋይሶኮና። 
\v 22 ህንተ ታዉ ፁሳ ያርሾነ ካ ያርሾ ሺሽያ ዎደ ታኒ ኤክከ። ቃስ ህንተ ታዉ እስፈተ ያርሾስ ኤህያ ዶረትዳ ሞ መሄታ በእከ። 
\v 23 ህንተ ማዝሙረ ጫንጨ ታ ማታፐ ሃስተ፤ ህንተ ዲፅያ ዲ ስእከ። 
\v 24 ሽን ሱረ ፕርድ ፑልቶ ሃዳ፥ ፅሎተ መሎና ሻፋ ሃዳ ጎጎ።
\p
\v 25 “ህንተኖ፥ እስራኤለ አሳዉ፥ ታኒ ህንተና መላ ቢታን ኦይታሙ ላይ ካለያ ዎደ፥ ታዉ ያርሾ ሺሽደቲ? ዎይኮ እሞታ እምደቲ? 
\v 26 ሄ ዎደ ህንተ፥ ህንተ ኩሸን መዳ፥ ‘ካዋ ሳኩታ’ ጌተትያ ኤቃነ ‘ከዋና’ ጌተትያ ፆልንቶ ኤቃ ፆሳታ ቶክደታ። 
\v 27 ሄሳ ግሾ፥ ታኒ ህንተና ድእሳዳ ዳማስቆ ካታማፐ አዳ ሃሆ በሲ የዳና” ያጌስ እያ ሱንይ፥ ኡባፈ ዎልቃማ ፆሳ ጌተትያ ጎዳይ።
\c 6
\s1 እስራኤለ አየ!
\p
\v 1 ህንተኖ፥ አሳይ ማዶ ኦይችያ ቦንቸትዳ እስራኤለ ሀላቃቶ፥ ህንተኖ፥ ፅዮነን እንጀን ደኤይሳቶ፥ ሳማረ ካታማን ህርግ ባይና ኡትዳይሳቶ፥ ህንተና አየ! 
\v 2 አነ ካልነ ካታማ ብድ በእተ። ያፐ ግታ ሀማታ ካታማነ ፍልስፄመ ካታማ ጌተ ዎተ። ኤንቲ ህንተ ናምኡ ካዎተታፐ አና? ኤንታ ቢታይ ህንተ ቢታፈ ዳልጊ? 
\v 3 ህንተ፥ “ኢታ ጋላስ ኤለ ዬና” ግድ፥ ኢታ ኦሶ ኦይሳቶ፥ 
\v 4 ዛለፐ ኦሰትዳ አርሳን ዝንኤይሳቶ፥ እንጀን ኡትዳይሳቶ፥ ዶርሳ ዉድያፐ አንቃራታነ ሚዛ ዎድያፐ ጋታርመንዋ መይሳቶ፥ 
\v 5 ዳዊቲዳ የ ሚሸ ህንተዉ ጊግስድ፥ ዱማ ዱማ የ የፀይሳቶ፥ 
\v 6 ዎይነይ ኡሻ ከረራ ጋነይሳቶ፥ አልኦ ሽቶን ትየተይሳቶ፥ ዮሰፋ ኮቻታ ዩዋን አዛኖናይሳቶ፥ ህንተና አየ! 
\v 7 ሄሳ ግሾ፥ ኮይሮ ድኤታናይ ህንተና፤ ሄ ዎደ ህንተ እንጀ ዱሳይ አታና።
\p
\v 8 ጎዳይ፥ ኡባፈ ዎልቃማ ፆሳይ ሀይሳዳ ያግድ፥ ባናን ጫቅስ፦ “ታኒ ያይቆባ ኦቶሩዋ እፃስ፤ ኤንታ ሚፃካ ሻተታስ፤ ታኒ ካታማነ ካታማን ደእያ ኡባ ኤንታ ሞርከታስ አዳ እማና” ያጌስ።
\p
\v 9 እስ ኬን ታሙ አስ አትኮ፥ ኤንትካ ሀይቃና። 
\v 10 ሀይቅዳይሳታ ዳቦታፐ እሶይ አሀ ሞጋናዉ ሶፐ ከስ ኤፍሸ፥ ሄ ኬን ቆሰትዳ ኡራኮ፥ “ኔራ አትዳ ሀራ አስ ደኢ?” ያግድ ኦይቻና። እ ዛሪድ፥ “ባዋ” ያጋና። ኦይቸይስ ዛሪድ፥ “ሀይዛ፥ ሀይዛ! ጎዳ ሱን ኑኒ ፄጋናዉ ኮሸና” ያጋና።
\p
\v 11 ጎዳ ኪታን፥ ግታ ኬት ላለታና፤ ላፋ ኬት መቀረታና። 
\v 12 ፓራት ዛላ ቦላ ጋላባናዉ ዳንዳኦና? ዎይኮ ጎሻንቾይ ቦር ዋፅድ፥ አባ ጎያናዉ ዳንዳኢ? ሽን ህንተ ሱረ ፕርዳ ጪየ፥ ፅሎተ ጫሞ ኦደታ። 
\v 13 ህንተ ሎዶባራ ካታማ ፆንዳ ግሾ ኡፋይተታ፤ ህንተ፥ “ኑኒ ቃርናይማ ካታማ ኑ ምኖተን ኦይክዳ” ግድ ጬቀተታ።
\p
\v 14 “ህንተኖ፥ እስራኤለ አሳዉ፥ ታኒ ህንተ ቦላ ሀራ ካዎተ ደንና፤ ኤንቲ ህንተና ሀማታ ፕኑዋፐ ዶምድ፥ አራባ ዛንጋራ ጋካናዉ ኡንኤና” ያጌስ ጎዳይ፥ ኡባፈ ዎልቃማ ፆሳይ።
\c 7
\s1 ቦለ፥ ታማነ የገ ዎዶሮ
\p
\v 1 ኡባ ሃርያ ጎዳይ ታና ቆንጨ በስስ። ሄ ቆንጨን ታኒ ካዋ ጋክያ ካይ ጫከትዳፐ ጉየ፥ ናምአን ጫርዳ ዶላ ቦላ ፆሳይ ቦለ ዉደ መሽን በአስ። 
\v 2 ኤንቲ እርፃባ ኡባ ምድ ዉርስዳ ዎደ ታኒ፥ “አቤት፥ ኡባ ሃርያ ጎዳዉ፥ ሀያና ነ ደርያ ማራርክ! ያይቆባ ዛረት ዋንድ አታናዉ ዳንዳኦና? ኤንቲ ኡባ ጉ!” ያጋስ።
\p
\v 3 ሄሳ ግሾ፥ ጎዳይ ኤንታዉ ቃትድ፥ “ሀ ኔኒ በእዳባይ ፖለተና” ያግስ።
\p
\v 4 ኡባ ሃርያ ጎዳይ ታና ሀራ ቆንጨ በስስ። ኡባ ሃርያ ጎዳይ ባ አሳ ፕርዳናዉ ታማ ፄግስ፤ ሄ ታማይ ግታ ጪሞ አባ ም ድግድ፥ ቢታ ማናዉ ዶምስ። 
\v 5 ታኒ፥ “አቤት፥ ኡባ ሃርያ ጎዳዉ፥ ሀያና ሀ ታማ ቶይሳርክ! ያይቆባ ዛረት ዋንድ አታናዉ ዳንዳኦና? ኤንቲ ኡባ ጉ!” ያጋስ።
\p
\v 6 ሄሳ ግሾ፥ ጎዳይ ቃትድ፥ “ሀይስ ፖለተና” ያጌስ ኡባ ሃርያ ጎዳይ።
\p
\v 7 ቃስ ፆሳይ ታና ሀራ ቆንጨ በስስ። ታኒ ሄ ቆንጨን በእያ ዎደ፥ ጎዳይ ቱምበ ኦይክድ፥ ቱምበን ልከትድ ግምበትዳ ግምብያ ማታን ኤቅስ። 
\v 8 ጎዳይ ታኮ፥ “አሞፀ፥ ኔኒ አይ ፄላይ?” ያግድ ኦይችስ።
\p ታኒ፥ “ቱምበ ፄላይስ” ያጋስ።
\p ጎዳይ ታኮ፥ “ሄኮ፥ ታኒ ታ አሰ ግድዳ እስራኤለ ግዶን ቱምበ የጋይስ፤ ታኒ ኤንታ ሴሮና አግከ። 
\v 9 ይሳቃ ኮቻት ጎይንያ ቃ በሳት ላለታና፤ እስራኤለ ጌሻ በሳት ያና፤ እዮርባማ ካዎተ ቦላ ታኒ ማሻራ ደንዳና” ያግስ።
\s1 አሞፀነ አማስያሳ
\p
\v 10 ቤተለ ካታማን ካህነ ግድድ ደእያ አማስያስ እስራኤለ ካዋ እዮርባማኮ ሀይሳዳ ያግድ ኪትስ፦ “አሞፀይ እስራኤለ አሳ ግዶን ደእሸ፥ ነ ቦላ ማቀቴስ፤ እ ባ ኦዳን ቢታ ይሴስ። 
\v 11 እ፥ ‘እዮርባም ማሻን ሀይቃና፤ እስራኤለ አሳይ ባንታ ቢታፈ ድኤትድ ባና’ ያጌስ” ያግስ።
\p
\v 12 አማስያስ አሞፀኮ፥ “ነኖ ትንብተ ኦደይሶ፥ ባ፤ ይሁዳ ቢታ ባዳ፥ ያን ኦዳ አቃ፤ ያን ትንብተ ኦዳ። 
\v 13 ሽን ቤተለይ ካዎይ ጎይንያ በስነ ካዎተ ኬ ግድያ ግሾ፥ ናምአን ሀ በሳን ትንብተ ኦዶፓ” ያግስ።
\p
\v 14 አሞፀይ ዛሪድ፥ “ታኒ መህያ ሄምያነ ቦባ አይፈ ማፅያ አሰፐ አትሽን፥ ናበ ዎይኮ ናበ ናአ ግድከ። 
\v 15 ሽን ጎዳይ ታና ዶርሳ ዉደ ሄምያ በሳፈ ኤክድ፥ ‘ባዳ ታ አሳ እስራኤለስ ትንብተ ኦዳ’ ያግስ። 
\v 16 ሀእ ህዛ ጎዳይ ግያባ ስአ! ኔኒ፥ ‘እስራኤለ ቦላ ትንብተ ኦዶፓ፤ ይሳቃ ኮቻታ ሳባኮፓ’ ያጋዳሳ። 
\v 17 ሄሳ ግሾ፥ ጎዳይ፥ ‘ነ ማችያ ካታማ ግዶን ላይማ ግዳና፤ ነ አደ ናይትነ ነ ማጫ ናይት ማሻን ሀይቃና። ነ ቢታይ ዎዶሮን ሻከታና፤ ቃስ ኔኒ ነ ሁጰን አላጋ ቢታን ሀይቃና። ስይ ባይና እስራኤለ አሳይ ባንታ ቢታፈ ድኤትድ ባና’ ያጌስ” ያግስ።
\c 8
\s1 ቴራ አይፈይ ኩምዳ ዳቾ
\p
\v 1 ኡባ ሃርያ ጎዳይ ታና ሀራ ቆንጨ በስስ፤ ሄስካ፥ ቴራ አይፈይ ኩምዳ ዳቾ በስስ። 
\v 2 እ ታኮ፥ “አሞፀ፥ ኔኒ አይ በአይ?” ያግድ ኦይችስ።
\p ታኒ፥ “ቴራ አይፈይ ኩምዳ ዳቾ በአይስ” ያጋስ።
\p ጎዳይ ታኮ፥ “ታ አሳ እስራኤለ ዉርሰይ ጋክስ፤ ህዛፐ ጉየ ታኒ ኤንታ ሴሮና አግከ” ያግስ።
\p
\v 3 ኡባ ሃርያ ጎዳይ፥ “ሄ ጋላስ ካዎ ኬን የፅያ የይ ዬሆን ላመታና፤ አሳ አህ ዱማ ዱማ በሳን ዎና፤ ዬሆይ ዋሶይ ባይና ስእ ግድ የገታና” ያጌስ።
\p
\v 4 ህንተኖ፥ መቶታንቾታ ኡንኤይሳቶ፥ ቢታን ደእያ ማንቆታ ይሳናዉ ኮየይሳቶ፥ ሀይሳ ስእተ! 
\v 5 ህንተ፥ “ኑኒ ካ ባይዛናዉ አጌና ፄሮ ባለይ አዉደ አነ! ቃስ ኑኒ ኑ ዛልእያ ዶማናዉ ሳምባት አዉደ አነ! ኑኒ ካ ጉባን ማክድ፥ ዳሮ ሚሸን ባይዛና። ቃስ ዎርዶ ምዛነን አሳ ጭማና። 
\v 6 ማንቁዋ ብራን፥ መቶታንቹዋ ዋ ጫማን ሻማና፤ ቃስ ሀርቆ ግስተ ሙሩቶ ግስተ ጋተን ባይዛና” ያጌታ።
\p
\v 7 ያይቆብ እያ ሱንን ጬቀትያ ጎዳይ፥ ፆሳይ፥ ሀይሳዳ ያግድ ባ ሁጰን ጫቅስ፦ “ታኒ ኤንቲ ኦዳ ኢታ ኦሶ ኡባ ዶግከ። 
\v 8 ሄሳ ጋሶን ቢታይ ያርኬስ፤ አሳ ኡባይ ዬኬስ። ናይለ ሻፋይ ክፅድ ከየይሳዳነ ዎይሳዳ ቢታ ኡባይ ቃፃናነ ስም ዎና” ያግስ።
\p
\v 9 ኡባ ሃርያ ጎዳይ፥ “ሄ ጋላስ ታኒ አዋ ሴታ ጋላስ ዉልሳና፤ ጋላሳ ቃምሳና። 
\v 10 ታኒ ህንተ ኡፋይሳ ባልያ አዛኖን፥ ህንተ የ ዬሆን ላማና። ፐፅ እስ ናእ ሀይቅን ዬክያ አሳዳ፥ ህንተ ህንተ ሁጵያ ሜደትድ ካዮ ማኦ ማአናዳ፥ ህንተና ኦና። ሄ ጋላሳ ዉርሰይ ዳሮ ጫሞ ግዳና” ያጌስ።
\p
\v 11 ኡባ ሃርያ ጎዳይ፥ “ሄኮ፥ ታኒ ቢታ ኡባ ቦላ ኮሻ የድያ ዎደይ ያና። ሄ ኮሻይ ካ ዎይኮ ሃ ኮሻ ግዶናሽን፥ ስአናዉ ጎዳ ቃላ ዮ ኮሻ ግዳና። 
\v 12 አሳይ ዶሎሀፐ ዉሎሀ ጋካናዉ፥ ፑደሀፐ ዱገሀ ጋካናዉ ዎፀረታና። ኤንቲ ጎዳ ቃላ ኮያናዉ ያነ ሃነ ዎፃና፥ ሽን ደሞኮና። 
\v 13 ሄ ጋላስ የገልሳ ጌላኦትነ ዎልቃማ ፓንት ሳሞን ፕቅ ጋና። 
\v 14 ሳማረ ኤቃታራ ጫቅዳይሳት፥ ‘ዳና ፆሳይ ኤሮ!’ ያገይሳት፥ ‘በርሳበ ፆሳይ ኤሮ’ ያገይሳት ኩንዳና። ኤንቲ ዛር ደንዶኮና” ያጌስ።
\c 9
\s1 እስራኤለይ ፕርደታና
\p
\v 1 ታኒ ጎዳይ ያርሾ በሳ ማታን ኤቅዳሽን በአስ። እ ታኮ፥ “ባሶይ ቃፃና ጋካናዉ ፆሳ ኬ ጉምቡዋ ሾጫዳ አሳ ኡባ ሁጰን መንረ። ሄሳፈ አትዳ አሳ ታኒ ማሻን ዎና። ባቃትያ አስ ከስ ኤከና፤ ከስ ኤክዳ አስካ ፓፃ አተና። 
\v 2 ኤንቲ ቢታ ቦክድ፥ ስኦለን ዎኮካ፥ ታኒ ኤንታና ያፐ ከሳና። ሳሉዋ ከይኮካ፥ ታኒ ኤንታ ያፐ ዎሳና። 
\v 3 ኤንቲ ቃርመሎሳ ዙማ ሁጰን ቆሰትኮካ፥ ታኒ ኤንታ ኮያዳ ያፐ ከሳና። አባ ጪሞን ገልድ፥ ታ ስንፈ ጌምኮካ፥ ታኒ ዳወ ኪትን፥ እ ኤንታ ዱካና። 
\v 4 ኤንቲ ባንታ ሞርከታን ድኤትድ፥ ቢኮካ፥ ያን ኤንቲ ማሻን ሀይቃናዳ ኪታና፤ ታኒ ኤንታ ኢታ አይፈን ፄላና፤ ኤንታ ሎኦ አይፈን ፄልከ” ያግስ።
\p
\v 5 ጎዳይ፥ ኡባፈ ዎልቃማ ፆሳይ፥ ሳኣ ቦችን ሳእ ትልኤስ፤ ቃስ ሳአን ደእያ ኡባይ ዬኬስ። ናይለ ሻፋይ ክፅድ ከየይሳዳነ ዎይሳዳ ቢታ ኡባይ ቃፃናነ ስም ዎና። 
\v 6 ባ ኬ ሳሎን ኬፅዳይ፥ እያ ባሱዋ ሳአን ኤስዳይ፥ አባ ሃ ፄግድ፥ ቢታ ቦላ ዱገ ቡክሰይ፤ እያ ሱንይ ጎዳ።
\p
\v 7 ጎዳይ፥ “እስራኤለ አሳዉ፥ ህንተ ታዉ ቶጰ አሳ መላ ግደከትዬ? ታኒ ህንተና ግብፀ ቢታፈ ከስዳይሳዳ፥ ፍልስፄመ አሳ ካፍቶራፐ፥ ቃስ ሶረ አሳ ቂራፐ ከሳብክና?” ያጌስ።
\p
\v 8 ጎዳይ፥ “ሄኮ፥ ኡባ ሃርያ ጎዳ አይፈይ ናጋራንቾ ካዎተ ቦላ ደኤስ። ታኒ እያ ቢታ ቦላፈ ይሳና፤ ሽን ታኒ ያይቆባ ኮቻ ኡባ ይስከ። 
\v 9 ታኒ ካ ዛርዛረን ሀርቀተይሳዳ እስራኤለ አሳይ ካዎተታ ኡባ ግዶን ላለታና መላ ኪታና። ሽን ኤንታ ግዶን አማነትዳይሳታፐ እሶይካ ሳአን ዎድ የና። 
\v 10 ‘ኑና አይባ ኢትካ ጋከና ዎይኮ ደመና’ ግያ ታ አሳ ግዶን ደእያ ናጋራንቾት ኡባይ ማሻን ዉራና” ያጌስ።
\s1 እስራኤለይ ዛሪድ ደንዳና
\p
\v 11 “ሄ ጋላስ ታኒ ኩንድዳ ዳዊታ ካዎተ ደንና። ድርሳ ግምበታ ዛራ ኤሳና፤ ላለትዳ በሳታ ኦራና፤ ታኒ እያ ካሰይሳዳ ኦዳ ኬፃና። 
\v 12 ሄስካ ኤዶመፐ አትዳይሳታነ ታ ሱንን ፄገትዳ ካዎተታ ኡባ ላታና” ያጌስ ሄሳ ኦያ ጎዳይ።
\p
\v 13 “ካ ጫከይሳት ጫክ ዉርሶና ደእሽን፥ ጎየይሳት ጋክያ ዎደይ፥ ዎይነ ጉምኤይሳት ጉምእድ ዉርሶና ደእሽን፥ ዎይነ ቶከይሳት ጋክያ ዎደይ ያና። ሄ ዎደ ደረት ማልኦ ዎይነ ኡሽ ፑልታና፤ ዙማት ዎይነ ኡሻን ምተታና። 
\v 14 ድኤትድ ብዳ ታ አሳ እስራኤለ ዛራና፤ ኤንቲ ላለትዳ ካታማታ ዛር ኬፅድ ዳና። ዎይነ ቶክድ እያፐ ዎይነ ኡሻ ኡያና፤ አታክልተ ቶክድ ኤንታ አይፍያ ማና። 
\v 15 ታኒ ታ አሳ፥ እስራኤለ ኤንታ ቢታን ቶካና፤ ኤንቲ ታኒ ኤንታዉ እምዳ ቢታፈ ዛሪድ ሾደቶኮና” ያጌስ ሄሳ ኦያ ጎዳይ።