\id 2KI - GOOFA FULL BIBLE
\ide UTF-8
\h 2 ካዎታ ማፃፋ
\toc1 2 ካዎታ ማፃፋ
\toc3 2 ካዎ
\toc2 2 ካዎታ
\mt 2 ካዎታ ማፃፋ
\imt ጋ ቆፋ
\ip ናምአን ካዎታ ማፃፋይ፥ 1 ካዎታ ማፃፋፔነ ሳሜላ ማፃፋፔ ካልድ ፃፈትዳ ማፃፋ። ሀ ማፃፋን ኤልሳነ ኤልያሳ ታርከይ ዳሮ ቆንጭድ ፃፈትስ። ሀ ማፃፋይ፥ ይሁዳ ታርከ ዳርስድ ኦድኮካ፥ እስራኤለይ ኩመ ያና ጋካናዉ ይሁዳነ እስራኤለ ካዎታ ታርከ አ አ ደንድ ኦዴስ።
\ip 2 ካዎታ ማፃፋ ናምኡ ዋና ዋና ክፍለታን ሻክድ በአናዉ ዳንዳኤቴስ።
\ipi 1. ክርስቶስ የለታናፐ ስን 900 ላይ ባጋፈ ዶምድ፥ ክርስቶስ የለተናፐ ስን 722 ላይን ፑደሀ ባጋ ካዎተይ ኩንዳና ጋካናዉ ደእያ ናምኡ ካዎተታ ታርከ (ሸም 1-17)።
\ipi 2. እስራኤለ ካዎተ ኩንደፔ ብድ፥ ክርስቶስ የለታናፔ ስን 586 ላይን ካዎይ ናቡካዳናፆሬይ የሩሳላመ ካታማ ኦይክድ ይስዳ ዎደ ጋካናዉ ደእያ ይሁዳ ካዎተ ታርከ (ሸም 18-25)።
\ip ሀ ዮ ኡባይ እስራኤለ ቦላ ይዳ ጋሶይ፥ ይሁዲነ እስራኤለ አሳይ ሄሳዳካ ኤንታ ካዎት ፆሳስ አማነተ አግዳ ግሾሳ። የሩሳላመ ካታማይ ላለትዳይነ ይሁዳ አሳፐ ዳሮ ባጋይ ባንታ ቢታፈ በትዳይ ሄሳ ጋሶና።
\imq “ጎዳይ ሀንቀትዳ ግሾ፥ የሩሳላመ አሳ ቦላነ ይሁዳ አሳ ቦላ ሀይስ ሀንስ፤ ዉርሰን እ፥ ኤንታ ባ ስንፈ ድግስ።”
\ip 2 ካዎታ ማፃፋ ዳሮ ኤረትዳ ናበይ፥ ኤልያሳ በሳን ደንድዳ ኤልሳ።
\iot ማፃፋ አይፈ ቆፋታ
\io1 ኤልያስ እስራኤለ ካዋ አካዛ ቦርስ (\ior 1:1-18\ior*)
\io1 ናብያ ኤልሳ (\ior 2:1—8:15\ior*)
\io1 ይሁዳነ እስራኤለ ካዎታ (\ior 8:16—16:20\ior*)
\io1 እስራኤለ ካዋ ሆሰነ ፑደሀ ካዎተ ኩንደ (\ior 17:1-41\ior*)
\io1 ይሁዳ ካዋ ህዝቅያሳነ አሶረ ኦይከተ (\ior 18:1—20:21\ior*)
\io1 ኢታ ግድዳ ይሁዳ ካዎ ምናሰነ አሞፀ (\ior 21:1-26\ior*)
\io1 እዮስያሳ አይሱዋነ ህገ ማፃፋ (\ior 22:1—23:30\ior*)
\io1 ዉርሰ ይሁዳ ካዎታ (\ior 23:31—24:20\ior*)
\io1 ባብሎነ ድኡዋነ የሩሳላመ ኩንደ (\ior 25:1-30\ior*)
\c 1
\s1 ኤልያሳነ ካዋ አካዝያሳ
\p
\v 1 አካብ ሀይቅዳፐ ጉየ፥ ሞአበ አሳይ እስራኤለ ቦላ ደንድዶሶና።
\p
\v 2 ሄ ዎደ ካዎይ አካዝያስ ሳማረ ካታማ ቦላ ደእያ ፖቅያ ባራንዳፈ ኩንድድ ደሸትስ። ሄሳ ግሾ አሳታኮ፥ “ብድ፥ ታኒ ሀ ሀርግያፈ ፓፃነኮ ፓፆናኮ ኤቅሮና ፆሳ ብኤል-ዘቡላ አነ ኦይችተ” ያግድ ኪትስ።
\p
\v 3 ሽን ጎዳ ኪታንቾይ ተስባ አድያ ኤልያሳ ሀይሳዳ ያግስ፤ “ፑደ ባዳ፥ ሳማረ ካዎይ ኪትዳ አሳታራ ጋሄታዳ፥ ‘ህንተ ኤቅሮና ፆሳ ብኤል-ዘቡላ ኦይቻናዉ ብዳይ፥ እስራኤለን ፆሲ ይነዬ?’ 
\v 4 ጎዳይ ሀይሳዳ ያጌስ፤ ‘ካዋዉ፥ ኔኒ ሀይቃናፐ አትሽን፥ ሀ ዝንእዳ ሂፃፐ ደንዳካ’ ያጌስ” ያጋ። ሄሳ ግሾ፥ ኤልያስ ብድ ኤንታዉ ኦድስ።
\p
\v 5 ኪተትዳ አሳት ካዋኮ ጉየ ስምን፥ “አይስ ስምደቲ?” ያግድ ኤንታ ኦይችስ።
\p
\v 6 ኤንቲ፥ “እስ አደይ ኑራ ጋሄታናዉ ይድ፥ ህንተና ኪትዳ ካዋኮ ስሚድ፥ ሀይሳዳ ያግድ ኦድተ። ጎዳይ ኔኮ፥ ‘ኤቅሮና ፆሳ ብኤል-ዘቡላ ኦይቻናዉ ኔኒ አሰ ኪተይ፥ እስራኤለን ፆሲ ይነዬ? ሄሳ ግሾ፥ ኔኒ ሀይቃናፐ አትሽን፥ ሀ ዝንእዳ ሂፃፐ ደንዳካ’ ያጌስ” ያግዶሶና።
\p
\v 7 ካዎይ፥ “ህንተራ ጋሄታናዉ ይድ፥ ሀይሳ ህንተዉ ኦድዳ አደይ አይ መላ አሴ?” ያግድ ኦይችስ።
\p
\v 8 ኤንቲ፥ “እክሰፐ ኦሰትዳ ማኦ ማእድ፥ ባ ፄሳን ዳፎ ዳንጬስ” ያግድ ዛርዶሶና።
\p ካዎይ፥ “ሄስ ተስባ አድያ ኤልያሳ” ያግስ።
\p
\v 9 ሄሳፈ ጉየ፥ ካዎይ እስ ቶራ ሞጮና እሻታሙ ዎታዳረታራ ኪትስ። ቶራ ሞጭናይ ደረ ሁጰን ኡትዳ ኤልያሳኮ ከይድ፥ “ፆሳ አሶ፥ ካዎይ ነና፥ ዱገ ዎዳ ሃያ” ያጌስ።
\p
\v 10 ሽን ኤልያስ ቶራ ሞጮናኮ፥ “ታኒ ፆሳ አስ ግድኮ፥ ታም ሳሎፐ ዎድ፥ ነናነ ነ ዎታዳረታ ሞ” ያግድ ዛርስ። ታም ሳሎፐ ዎድ፥ እያነ እያ ዎታዳረታ ምስ።
\p
\v 11 ካዎይ ሀራ ቶራ ሞጮና እሻታሙ ዎታዳረታራ ኤልያሳኮ ኪትስ። ቶራ ሞጮናይ ኤልያሳኮ፥ “ፆሳ አሶ፥ ካዎይ ነና ዱገ ዎዳ ሃያ” ያጌስ።
\p
\v 12 ኤልያስ፥ “ታኒ ፆሳ አስ ግድኮ፥ ታም ሳሎፐ ዎድ፥ ነናነ ነ ዎታዳረታ ሞ” ያግስ። ፆሳ ታም ሳሎፐ ዎድ፥ እያነ እያ ዎታዳረታ ምስ።
\p
\v 13 ካዎይ ሄን ሀራ ቶራ ሞጮና እሻታሙ ዎታዳረታራ ኤልያሳኮ ኪትስ። ቶራ ሞጮናይ ኤልያሳኮ ብድ፥ እያ ስንን ጉልባትድ፥ “ፆሳ አሶ፥ ሀያና ታውነ ታራ ደእያ አሳስ ቃታ፤ ኑ ሸምፑዋ ሀይቆፐ አሻ። 
\v 14 ሄኮ፥ ታም ሳሎፐ ዎድ፥ ካሰ ናምኡ ቶራ ሞጮናታነ ኤንታ ዎታዳረታ ምስ። ሽን ሀእ ታዉ ቃታ!” ያግድ ዎስስ።
\p
\v 15 ጎዳ ኪታንቾይ ኤልያሳኮ፥ “ያዮፋ! እያራ ዱገ ዎ” ያግስ።
\p ኤልያስ ደንድድ፥ እያራ ካዋኮ ዱገ ብስ። 
\v 16 “ጎዳይ ሀይሳዳ ያጌስ፤ ‘እስራኤለን ፆሲ ይነ፥ ኔኒ ኤቅሮና ፆሳ ብኤል-ዘቡላ ኦይቻናዉ አሰ ኪትዳይ? ኔኒ ሀይሳ ኦዳ ግሾ፥ ሀይቃና! ነ ዝንእዳ ሂፃፐ ደንዳካ’ ” ያጌስ።
\p
\v 17 ኤልያስ ኦድዳ ፆሳ ቃላዳ አካዝያስ ሀይቅስ፤ አካዝያሳስ አደ ናእ ባይና ግሾ፥ እያ እሻይ እዮራም እያ በሳን ካዎትስ። ሄስ ሀንዳይ እዮሳፈፃ ናአይ እዮራም ይሁዳን ካዎትዳ ናምአን ላይና። 
\v 18 አካዝያስ ኦዳ ሀራባ ኡባይ እስራኤለ ካዎታ ታርከ ማፃፋን ፃፈትድ ደኤስ።
\c 2
\s1 ኤልያስ ሳሎ ኤከትስ
\p
\v 1 ጎዳይ ኤልያሳ ጎተን ሳሎ ኤፋናዉ ሀንያ ዎደ፥ ኤልያስነ ኤልስ ጋልጋላፐ ደንድድ ብዶሶና። 
\v 2 ኤልያስ ኤልሳኮ፥ “ጎዳይ ታና ቤተለ ኪትዳ ግሾ፥ ሀያና ኔኒ ሀይሳን ጋምኣሻ” ያግስ።
\p ሽን ኤልስ፥ “ጎዳይ ኤርያ መላ፥ ነ ሸምፖይ ኤሮ! ታኒ ኔፐ ሻከትከ” ያግስ። ኤንቲ ዱገ ቤተለ ዎዶሶና።
\p
\v 3 ቤተለን ደእያ ናበታ ጩጋይ ኤልሳኮ ከይድ፥ “ጎዳይ ሀች ነ ጎዳ ኔፐ ሻክድ ኤፋና ሀነይሳ ኤራይ?” ያግድ ኦይችዶሶና።
\p ኤልስ፥ “ኤ ኤራይስ፤ ሽን ህንተ ስእ ጊተ” ያግድ ዛርስ።
\p
\v 4 ኤልያስ ኤልሳኮ፥ “ጎዳይ ታና እያርኮ ኪትዳ ግሾ፥ ሀያና ኔኒ ሀይሳን ጋምኣሻ” ያግስ።
\p ሽን ኤልስ፥ “ጎዳይ ኤርያ መላ፥ ነ ሸምፖይ ኤሮ! ታኒ ኔፐ ሻከትከ” ያግድ ዛርስ። ሄሳ ግሾ፥ ኤንቲ እያርኮ ብዶሶና።
\p
\v 5 እያርኮን ደእያ ናበታ ጩጋይ ኤልሳኮ ከይድ፥ “ጎዳይ ሀች ነ ጎዳ ኔፐ ሻክድ ኤፋና ሀነይሳ ኤራይ?” ያግድ ኦይችዶሶና።
\p እ፥ “ኤ ኤራይስ፤ ሽን ህንተ ስእ ጊተ” ያግድ ዛርስ።
\p
\v 6 ኤልያስ ኤልሳኮ፥ “ጎዳይ ታና ዮርዳኖሰ ሻፋ ኪትዳ ግሾ፥ ሀያና ኔኒ ሀይሳን ጋምኣሻ” ያግስ።
\p ኤልስ፥ “ጎዳይ ኤርያ መላ፥ ነ ሸምፖይ ኤሮ! ታኒ ኔፐ ሻከትከ” ያግስ። ኤንቲ ናምአይ እስፈ ብዶሶና።
\p
\v 7 ናበታፐ እሻታሙ አሳት ኤንታ ካልድ፥ ዮርዳኖሰ ሻፋ ጋካናዉ ብዶሶና። ኤልያስነ ኤልስ ሻፋ ዶናን ኤቅዳሽን፥ ናበት ኤንታፈ ጉ ሃክድ ኤቅዶሶና። 
\v 8 ሄ ዎደ ኤልያስ ባ አፍላ ኤክድ ፃፅድ፥ እያራ ሃ ሾጭን፥ ሃይ ያነ ሃነ ሻከትን መላ ቢታራ ፕንዶሶና። 
\v 9 ኤልያስ ኤልሳኮ፥ “ታኒ ኔፐ ኤከታናፐ ስን፥ ነዉ አይ ኦና መላ ኮያይ?” ያግስ።
\p ኤልስ፥ “ነ አያናይ ታ ቦላ ናምኡ ኩሸ ግዳና መላ፥ ታኒ ነና ዎሳይስ” ያግድ ዛርስ።
\p
\v 10 ኤልያስ፥ “ኔኒ ዋይስያ ኦይሾ ኦይቻዳሳ። ሽን ታኒ ኔፐ ኤከትያ ዎደ ኔኒ ታና ፄልያባ ግድኮ፥ ሄስ ነዉ ሀናና። ነ በኦና እፅኮ ሀነና” ያግስ።
\p
\v 11 ኤንቲ እስፈ ኦደትሸ ሄመትሽን፥ ታማ ፓራትነ ታማ ጋረት ኤንታ ናምኣፈ ግዶን ገልድ፥ ሻክስ። ኤልያስ ጎተን ሳሎ ከይስ። 
\v 12 ኤልስ ሄሳ በእድ፥ “ታ አዋዉ፥ ታ አዋዉ! እስራኤለ ፓራቶነ ፓራ ጋረቶ!” ያግድ ዋስስ። ሄሳፈ ስምን፥ እ ኤልያሳ ዛሪድ በእቤና።
\p ኤልስ አዛንድ፥ ባ ማኡዋ ናምአ ከስድ፥ ዳክስ። 
\v 13 ኤልያሳፐ ዎዳ ማኡዋ ደንድ፥ ጉየ ስሚድ፥ ዮርዳኖሰ ሻፋ ዶናን ኤቅስ። 
\v 14 ኤልያሳፐ ዎዳ ማኡዋ ኤክድ፥ እያራ ሃ ሾጭድ፥ “ጎዳይ ኤልያሳ ፆሳይ አዉን ደኢ?” ያግስ። ኤልስ ሃ ሾጭዳ ዎደ፥ ሃይ ያነ ሃነ ሻከትን፥ ሻፋ ፕንስ።
\p
\v 15 እያርኮ ይዳ ናበታ ጩጋይ ኤልሳ በእዳ ዎደ፥ “ኤልያሳ አያናይ ኤልሳ ቦላ ሸምፕስ” ያግዶሶና። ኤንቲ እያራ ጋሄታናዉ ይድ፥ እያ ስንን ጉፋንዶሶና። 
\v 16 ኤንቲ፥ “ኑኒ ነ አይለት እሻታሙ ምኖ አሳት ሀይሳን ደኦስ። ሀያና ኑኒ ነ ጎዳ ኮያናዉ ባና። ኦን ኤር፥ ጎዳ አያናይ እያ ኤክድ፥ እስ ዙማ ሁጰን ዎይኮ ዛንጋራ ግዶን የጎና አገና” ያግዶሶና።
\p ኤልስ፥ “አካይ፥ ቦፕተ” ያግስ። 
\v 17 ሽን አካይ ጉሳይ እያ ዬላያና ጋካናዉ፥ ኤንቲ እያ ዎስድ አጎና እፅን፥ “ቢተ” ያግስ። ኤንቲ እሻታማይ ብድ ሄ ጋላስ ኩመ ኮይድ፥ እያ ደምቦኮና። 
\v 18 ኤልስ እያርኮን ደእሽን፥ ኤንቲ እያኮ ስሚድ ይዶሶና። እ፥ “ታኒ ህንተና ‘ቦፕተ’ ያጋብክና?” ያግስ።
\p
\v 19 ሄሳፈ ጉየ፥ እያርኮን ደእያ አሳት ኤልሳ፥ “ኔኒ ኑ ጎዳይ በኤይሳዳ ሀ ካታማይ ዱሳስ ሎኦ። ሽን ሃይ ኢታ፤ ቃስ ቢታይካ አይፈና” ያግዶሶና።
\p
\v 20 እ፥ “አነ ኦራ ከረን ማፅነ የግድ፥ ኤክ ዪተ” ያግድ ኪትን፥ እያዉ ኤህዶሶና። 
\v 21 ኤልስ ፑልቱዋኮ ብድ፥ ማፅንያ እያን የግድ፥ “ጎዳይ፥ ‘ታኒ ሀ ሃ ፓስ፤ ህዛፐ ሀ ሃይ ሀይቆስ ጋሶ ግደና፤ ቢታይካ አይፋና’ ያጌስ” ያግስ። 
\v 22 ኤልስ ኦድዳይሳዳ ሀች ጋካናዉ፥ ሄ ሃይ ፅሎ ግድስ።
\p
\v 23 ኤልስ ያፐ ደንድድ፥ ፑደ ቤተለ ከይስ። እ ኦገ ቦላ ደእሽን፥ ያላጋ አደ ናይት ካታማፐ ከይድ፥ “ላ ሀ ቦአዉ፥ ከያ! ላ ሀ ቦአዉ፥ ከያ” ያግድ እያ ቀልቅስዶሶና።
\p
\v 24 ኤልስ ጉየ ስም ፄልድ፥ ኤንታ ጎዳ ሱንን ባድስ። ያትን፥ ናምኡ ማጫ ባባንት ከይድ፥ ናይታፐ ኦይታማነ ናምኡ ያላጋታ ፑዘረድ ዎዶሶና።\fig ባባን |alt="Bear" src="LB00048B.tif" size="col" ref="2:24"\fig* 
\v 25 ኤልስ ያፐ ደንድድ፥ ቃርመሎሳ ዙማ ቦላ ከይስ፤ ያፐ ቃስ ሳማረ ስምስ።
\c 3
\s1 ሞአበይ እስራኤለ ቦላ ደንድስ
\p
\v 1 ይሁዳ ካዎይ እዮሳፈፅ ካዎትዳ ታማነ ሆስፑን ላይን፥ አካባ ናአይ እዮራም ሳማረን እስራኤለ ቦላ ካዎትስ፤ እ ታማነ ናምኡ ላይ ካዎትስ። 
\v 2 እ፥ ጎዳ ስንን ኢታባ ኦስ። ሽን ባ አዋነ ባ አየ ኤልዛቤል መላ ኢታ ግደና፤ እያ አዋይ ኦዳ ባኣለ ኤቃ ድግስ። 
\v 3 ናባፃ ናአይ እዮርባም እስራኤለ አሳ ኦስስዳ ናጋራን ኦይከትስ፤ እያፐ ሃክቤና።
\p
\v 4 ሞአበ ካዎይ ሞስ ዶርሰ ሄምያ አስ። እ እስራኤለ ካዋስ 100,000 አንቃራ ዶርሳታነ 100,000 ኡርገ ዶርሳታ እክስያ ላይን ላይን ጊሬስ። 
\v 5 ሽን እስራኤለ ካዎይ አካብ ሀይቅዳፐ ጉየ፥ ሞአበ ካዎይ ሞስ እስራኤለ ቦላ ማካልስ።
\p
\v 6 ሄ ዎደ ካዎይ እዮራም ሳማረ ከይድ፥ እስራኤለ ኡባ ሺሽስ። 
\v 7 ይሁዳ ካዋ እዮሳፈፅ ኪታ የድድ፥ “ሞአበ ካዎይ ታ ቦላ ማካልስ፤ ሞአበራ ኦለታናዉ ኔኒ ታራ ባኔ?” ያግስ።
\p እዮሳፈፅ፥ “ኤ ባና፤ ታኒ ነና፤ ታ አሳይ ነ አሰ፤ ታ ፓራይ ነ ፓራ ያግድ” ዛርስ። 
\v 8 እዮሳፈፅ፥ “ኑኒ አዉራ ብድ ኤንታ ኦላኔ?” ያግድ ኦይችስ።
\p ካዋ እዮራም፥ “ኤዶመ መላ ቢታ ኦግያራ ካን ብድ ኦላና” ያግድ ዛርስ።
\p
\v 9 ሄሳ ግሾ፥ እስራኤለ ካዎይ፥ ይሁዳ ካዎይነ ኤዶመ ካዎይ ኦላስ ከይዶሶና። ኤንቲ ላፑን ጋላሳ ኦገ ዩይድ ብዳፐ ጉየ፥ ኦላንቾታስነ ኤንታ መህያስ አይብ ሃ አትቤና። 
\v 10 ሄ ዎደ እስራኤለ ካዎይ፥ “ጎዳይ ኑና ሀ ሄ ካዎታ እስፈ ሞአበ ካዋስ አድ እማናዉ ፄግዳ ግሾ ኑና አየ!” ያግስ። 
\v 11 ሽን እዮሳፈፅ፥ “ኑኒ እያ ባጋራ ጎዳ ኦይቻናዉ ሀይሳን ናበይ ባዌ?” ያግድ ኦይችስ።
\p እስራኤለ ካዋ ቶራ ሞጮናታፐ እሶይ፥ “ኤልያሳ ኩሸን ሃ ቆልያ ሳፋፃ ናአይ ኤልስ ሀይሳን ደኤስ” ያግድ ዛርስ። 
\v 12 እዮሳፈፅ፥ “ኤ፥ እ ቱማ ናበ” ያግስ። እስራኤለ ካዎይ፥ እዮሳፈፅ፥ ኤዶመ ካዎይነ ኤልሳኮ ብዶሶና።
\p
\v 13 ኤልስ እስራኤለ ካዋኮ፥ “ታናነ ነና ጋይ አይቤ? ባዳ ነ አዋይነ ነ አይያ ኦይችዳ ናበታ ኦይቻ” ያግስ።
\p እስራኤለ ካዎይ ዛሪድ፥ “አካይ፥ ሀ ሄ ካዎታ እስፈ ሞአበ ካዋስ አድ እማናዉ ኑና ፄግዳይ ጎዳባይ!” ያግስ።
\p
\v 14 ኤልስ፥ “ታኒ እያዉ ኦያ ደኦ ጎዳይ ኤሮ! ይሁዳ ካዋ እዮሳፈፃ ግሾ ጎናኮ ታኒ ነና አይፈንካ ፄልከሽን። 
\v 15 አነ ሀእ ታዉ ዲ ዲፅያ አስ ኤህተ” ያግስ።
\p ዲፀይስ ዲፅሽን፥ ጎዳ ዎልቃይ እያ ቦላ ዎስ። 
\v 16 ኤልስ፥ “ሀ መላ ዛንጋራ ኡባን ኦላ ቦክተ። 
\v 17 ጎዳይ፥ ‘ጫርኮ ዎይኮ እራ በኤከታ፥ ሽን ሀ ቦክዳ ዛንጋራን ሃ ኩማና፤ ህንተ፥ ህንተ መሄይነ ህንተ ጫና መሄይ ኡያና’ ያጌስ። 
\v 18 ሀይስ ፆሳ ስንን ላፋባ፤ ቃስ እ ሞአበ ህንተዉ አድ እማና። 
\v 19 ግምበትዳ ካታማታነ ግታ ካታማታ ኡባ ህንተ ፆናና። ሎኦ ምታ ኡባ ቃንፃና፤ ሃ ፑልቶታ ኡባ ህንተ ባራና፤ አራዳ ሾቃታ ኡባ ኢስድ ሹች ኩምዳ ቢታ ኦና” ያግስ።
\p
\v 20 ዎንተ ጋላስ ዎንታ ያርሾ ያርሽያ ዎደይ ጋክን፥ ኤዶመ ባጋራ ሃ ጎግድ፥ ቢታን ኤልስ።
\p
\v 21 ሞአበ አሳይ፥ ሄ ካዎት ኤንታ ኦላናዉ ይዳይሳ ስእድ፥ ናአተ፥ ጭም፥ ኦላ ሚሸ ቶካናዉ ዳንዳእያ አሳ ኡባይ ፄገትድ፥ ባንታ ቢታ ዛዋ ናግዶሶና። 
\v 22 ኤንቲ ጉራ ደንድያ ዎደ ሃ ቦላ ዎዳ ፃልቀይ ዞእድ፥ ኤንታዉ ሱ ዳንድ በንትስ። 
\v 23 ኤንቲ፥ “ሀይሳ ሱ በእተ! ካዎት ባንታ ግዶን እሶይ እሱዋራ ኦለትድ፥ ሀይቅ ዉርዶሶና። ሞአበ ብድ፥ አነ ኤንታ ሚፃ ቆጭሮስ” ያግዶሶና።
\p
\v 24 ሞአበ አሳይ እስራኤለ ሚፃ ብን፥ እስራኤለት ደንድድ፥ ኤንታ ሾጭዶሶና። ሾጭድ ኤንታ ቢታ ኦይክድ፥ ሞአበ አሳ ዎዶሶና። 
\v 25 ካታማታ ኦልድ ይስዶስና። አሳ ኡባይ ሁጰን ሁጰን እስ እስ ሹቹ ኤክድ፥ አራዳ ሾቃት ኡባይ ካመታና ጋካናዉ፥ ኤንታ ቦላ ሆልዶሶና። ፑልቶ ኡባ ባርድ፥ ሎኦ ም ኡባ ቃንፅዶሶና። ቅር-ሄሬሰራ ካታማ ግምብያ ፃላል አትስ፤ ሽን ያምባርሻን ኦልያ አሳት ሄ ካታማ ሾጭዶሶና።
\p
\v 26 ሞአበ ካዎይ ኦላይ ባ ቦላ ጎብዳይሳ በእዳ ዎደ ማሻ ዳንጭዳ ላፑን ፄቱ አሳታ ኤክስ። ኦላ ግዱዋ ዳክድ፥ ኤዶመ ካዋኮ ፕናናዉ ደንድስ፤ ሽን እያዉ ሀኖና እፅስ። 
\v 27 ሄሳፈ ጉየ፥ ባ በሳን ካዎታናዉ ደእያ ባ ባይራ ናኣ ኤክድ፥ ካታማ ግምብያ ቦላ ታማን ፁግድ ያርሽስ። ሞአበት እስራኤለታ ቦላ ሀንቆ ሱልዶሶና። እስራኤለት ሄ ካታማ አግድ፥ ባንታ ቢታ ስምዶሶና።
\c 4
\s1 አምኤ ዛይተ
\p
\v 1 ናበታፐ እሱዋ ማችያ ኤልሳኮ ባዳ፥ “ነ አይለይ፥ ታ አዝናይ ሀይቅስ። እ ጎዳ ያይያ አስ ግደይሳ ኔኒ ኤራሳ። ሽን ሀእ እያ አጮ አዋይ ታ ናይታ ናምአ ባዉ አይለ ኦናዉ ኮዬስ” ያጋዳ እያዉ ኦዳሱ።
\p
\v 2 ኤልስ፥ “ያትን ታኒ ነዉ አይ ኦ? ነ ሶን አይበ ደኤይ? አነ ታዉ ኦዳ” ያግስ።
\p ማጫስያ፥ “ታዉ፥ ነ አይሌስ ጉ ፃሮን ደእያ ዛይተፐ አትሽን፥ ሀራባይ አይብካ ባዋ” ያጋሱ።
\p
\v 3 ኤልስ፥ “ባዳ ነ ሾሮታ ኡባፈ ካይሳ ኦቶታ ጋርፃ። ጋርፃሸ ጉ ጋርፆፋ። 
\v 4 ሄሳፈ ጉየ፥ ሶ ገላዳ፥ ነ ቦላነ ነ ናይታ ቦላ ካርያ ጎርዳ። ኦቶ ኡባን ዛይተ ትጋ፤ ዛይተይ ኩምዳ ኦቶታ እስ ባጋ አ” ያግስ።
\p
\v 5 ማጫስያ ባዳ፥ ካርያ ባ ቦላነ ባ ናይታ ቦላ ጎርዳሱ። ኤንቲ እዉ ኦቶታ ሺሽን፥ እያ ዛይትያ ትገ ኦይካሱ። 
\v 6 ኦቶ ኡባይ ኩምዳ ዎደ፥ ማጫስያ ባ ናኣኮ፥ “አነ ታዉ ሀራ ኦቶ ኤካዳ ያ” ያጋሱ።
\p ሽን ናአይ ዛሪድ፥ “ሀር እስ ኦቶይካ ዴና” ያግስ። ሄሳፈ ጉየ፥ ዛይተይ ጎገይሳ አጋግስ።
\p
\v 7 ማጫስያ ስማ ባዳ ኤልሳስ ኦዳሱ። እ፥ “ባዳ ዛይትያ ባይዛዳ፥ ነ አጩዋ ቃንፃ። አትዳይሳ ኔንነ ነ ናይት ጎኤትድ ዳናዉ ዳንዳኤታ” ያግስ።
\p
\v 8 እስ ጋላስ ኤልስ እስ ዱረ ማጫስያ ደእያ ሱኔማ ካታማ ብን፥ ማጫስያ ሾባዳ፥ እያ ካ ሙዛሱ። ሄ ጋላሳፐ ዶምን፥ እ ያራ አያ ዎደ ኡባን ካ ማናዉ እ ሶ ገሌስ። 
\v 9 እያ ባ አዝናኮ፥ “ሄኮ፥ ኡባ ዎደ ኑ ማታራ አያ አደይ ፆሳ አስ ግደይሳ ታኒ ኤራይስ። 
\v 10 አነ እስ ጉ ክፍለ ፖቅያ ቦላ እያዉ ኬፆስ፤ እያ ግዶን አርስ፥ ኦይደ፥ ፃርጴዛነ ፆምፐ ዎስ። እ ኑኮ ይዳ ዎደ ኡባን ያ ገላናዉ ዳንዳኤስ” ያጋሱ።
\p
\v 11 እስ ጋላስ ኤልስ ሱናማ ካታማ ይድ፥ ባ ክፍልያ ፑደ ከይድ ያን ሸምፕስ። 
\v 12 ባ አይልያ ግያዛኮ፥ “ባዳ ማጫስዉ ፄጋ” ያግን፥ ግያዝ ፄግን፥ እያ ያዳ ኤልሳ ስንን ኤቃሱ። 
\v 13 ኤልስ ግያዛኮ፥ “ሀ ማጫስያ ሀ ኡባ ኑስ ኦሱ። ኑኒ ነዉ አይ ኦኖ? ኑኒ ብድ፥ ካዋ ዎይኮ ቶራ ሞጮና ኦድሳናባይ አይብ ደእያኮ እዮ ኦይቻ” ያግስ።
\p ማጫስያ፥ “ታኒ ሀይሳን ታ አሳ ግዶን ደአይስ” ያጋሱ።
\p
\v 14 ኤልስ ግያዛ፥ “ያትን፥ ታኒ እዉ አይ ኦ?” ያግድ ኦይችስ።
\p ግያዝ፥ “እዉ ናእ ባዋ፤ እ አዝናይ ጭምስ” ያግስ።
\p
\v 15 ኤልስ፥ “ማጫስዉ ፄጋ” ያግስ። ግያዝ እዮ ፄግስ፤ እያ ያዳ፥ ፐንገን ኤቃሱ። 
\v 16 ኤልስ፥ “ዎንቶ ላይ ሀኖደ ኔኒ አደ ናአ እድማና” ያግስ።
\p ማጫስያ፥ “አካይ፥ ታ ጎዳዉ፥ ኔኒ ፆሳ አስ ግድክ፥ ታዉ ዎርዶቶፓ” ያጋሱ።
\p
\v 17 ሽን ማጫስያ ቃንታሱ፤ ኤልስ እዉ ኦድዳይሳዳ፥ ካልያ ላይ አደ ናአ የላሱ።
\p
\v 18 ናአይ ድጭስ፤ እስ ጋላስ ካ ጫክያ አሳታራ ደእያ ባ አዋኮ ብስ። 
\v 19 ባ አዋኮ፥ “ዎ ታና ሁጰይ ዎስ! ዎ ታና ሁጰይ ዎስ!” ያግስ።
\p እያ አዋይ እስ አይልያ፥ “ቶካዳ አየኮ ኤፋ” ያግድ ኪትስ።
\p
\v 20 አይለይ ናኣ ኤክድ፥ አየኮ ኤፍስ። ሴታ ጋላስ ግዳና ጋካናዉ፥ ናአይ ባ አየ ክኦን ኡትስ፤ ሄሳፈ ጉየ፥ ናአይ ሀይቅ አግስ። 
\v 21 ማጫስያ ናኣ ፑደ ኤፋዳ፥ ፆሳ አድያ አርሳን ዝንእሳሱ። ያታዳ እያ ቦላ ካረ ጎርዳዳ ባሱ።
\p
\v 22 ባ አዝና ፄጋዳ፥ “ታኒ ፆሳ አድያኮ ኤለ ባዳ ያና መላ፥ አይለታፐ እሱዋነ ሀረታፐ እሱዋ ታዉ የዳ” ያጋሱ።
\p
\v 23 እ፥ “ሀች አጌና ፄሮ ጋላስ ዎይኮ ሳምባታ ግደና፤ ነና እያኮ ኤፈይ አይቤ?” ያግስ።
\p እያ ዛራዳ፥ “አይብካ ባዋ” ያጋሱ። 
\v 24 እያ ሀረ ጫናዳ፥ ባ አይልያ፥ “ሀርያ ላጋ! ታኒ ነዉ ኦዳና ጋካናዉ፥ ለፕ ኦዳ ላጎፋ” ያጋሱ። 
\v 25 ማጫስያ ያፐ ደንዳዳ፥ ቃርመሎሳ ዙማን ደእያ ፆሳ አድያኮ ባሱ።
\p ኤልስ ማጫስው ሃሆን በእድ፥ ባ አይልያ ግያዛ፥ “በአ፥ ሱናማን ደእያ ማጫስያ ያዉሱ። 
\v 26 እዮ ሞካናዉ ዎፃ ባዳ፥ ‘ኔኒ ሳሮ? ነ አዝናይ ሳሮ? ነ ናአይ ሳሮ?’ ያጋዳ ኦይቻ” ያግስ።
\p ማጫስያ፥ “ኑኒ ኡባይካ ሳሮ” ያጋሱ።
\p
\v 27 ማጫስያ ዙማ ቦላ ደእያ ፆሳ አድያኮ ጋክዳ ዎደ፥ ሆካዳ እያ ቶሁዋ ኦይካሱ።
\p ግያዝ ማጫስዉ ድጋናዉ ሺቅስ፤ ሽን ፆሳ አደይ፥ “አጋ! እያ ግታ መቶን ደአዉሱ፤ ሽን ጎዳይ ታፐ ሄሳ ገንስ። እ መቱዋ ታዉ ኦድቤና” ያግስ።
\p
\v 28 ማጫስያ፥ “ታ ጎዳዉ፥ ኔኒ ታዉ ናአ እማና መላ ታኒ ነና ኦይቻድና? ታኒ ነና፥ ‘ታና ጮ ጭሞፋ ያጋብክና?’ ” ያጋሱ።
\p
\v 29 ኤልስ ግያዛኮ፥ “ነ አዱሳ ማኡዋ ነ ሳቅያን ስርቃ፤ ታ ፃምአ ኤካዳ ኤለሳ። ኦገን ኦደራካ ጋሄትኮ፥ ሳሮፋ፤ ኦንካ ነና ሳሮትኮ፥ ዛራዳ ሳሮ ጎፓ። ታ ፃምአ ናኣ ሶምኡዋ ቦላ ዎ” ያግስ።
\p
\v 30 ሽን ናኣ አይያ፥ “ደኦ ጎዳይ ኤርያ መላ፥ ነ ሸምፖይ ኤሮ! ታኒ ነና የጋዳ ቢከ” ያጋሱ። ኤልስ ደንድድ፥ እዮ ካልስ። 
\v 31 ግያዝ ኤንታፈ ስንትድ ብድ፥ ፃምአ ናኣ ሶምኡዋ ቦላ ዎስ። ሽን ግርስ ዎይኮ ሸምፖይ ባዋ። ያትን ግያዝ ኤልሳራ ጋሄታናዉ ስም ይድ፥ “ናአይ ባርክቤና” ያግድ ኦድስ።
\p
\v 32 ኤልስ ሶ ገልድ፥ ሄኮ፥ ናኣ አሀይ እያ አርሳን ዝንእዳይሳ በእስ። 
\v 33 ባ ቦላነ ናኣ ቦላነ ካርያ ጎርድድ፥ ጎዳ ዎስስ። 
\v 34 ናኣ አሀ ቦላ ከይድ፥ ባ ዶና እያ ዶናን፥ ባ አይፍያ እያ አይፍያን፥ ባ ኩሸታ እያ ኩሸታራ ጋድ ዝንእስ፤ ናኣ አሳተይ ሆእስ። 
\v 35 ኤልስ ደንድድ፥ ሶ ግዶን ያ ሃ ስመረትስ። ናምአን ስሚድ፥ ናኣ ቦላ ዝንእስ፤ ናአይ ላፑን ቶሆ ሀሽዳፐ ጉየ ፄልስ።
\p
\v 36 ኤልስ ግያዛ ፄግድ፥ “ሱናማ ማጫስዉ ፄጋ” ያግስ። ግያዝ እዮ ፄግን፥ እያ ይዳ ዎደ፥ ኤልስ፥ “ነ ናኣ ኤካ” ያግስ። 
\v 37 ማጫስያ ኤልሳ ቶሁዋ ቦላ ኩንዳዳ፥ ሳአን ጉፋናሱ፤ ባ ናኣ ኤካዳ ካረ ከያሱ።
\p
\v 38 ኤልስ ጋልጋላ ስሚድ ይዳ ዎደ፥ ቢታን ኮሽ ደኤስ። ናበታ ጩጋይ እያ ስንን ኡትድ ደእሽን፥ እ ባ አይልያ፥ “ዎጋ ኦቶ ታማ ቦላ ዎዳ፥ ናበታስ ዎፀ ካ” ያግስ። 
\v 39 ኤንታፈ እሶይ ቦንጮ ማፅድ ኤሀናዉ ዎራ ብድ፥ ኤጨረ ሌሄ ዳንያባ ደምስ። ቶካናዉ ዳንዳኤይሳ ኬና ዳሮ ኤጨረ ሌሄ ኤክድ ይስ፤ እ አይበኮ ኤሮና አንጭድ፥ ኦቱዋን የግስ። 
\v 40 አሳይ ማና መላ ዎፅያ ከስዶሶና፤ ኤንቲ ዎፅያ ቱሽ ባሪ በእድ፥ “ናብያዉ፥ ሀ ኦቱዋን ዎያባይ ደኤስ” ያግድ ዋስዶሶና። አሳይ ማናዉ ዳንዳእቦኮና።
\p
\v 41 ኤልስ፥ “አነ ታዉ ለ ኤክድ ዪተ” ያግስ። ሄ ልያ ኦቱዋን ቆልድ፥ “አሳይ ማናዳ ዎፅያ ትግተ” ያግስ። ሄሳፈ ጉየ፥ ኦቱዋን ኢታባይ በንትቤና።
\p
\v 42 ኮይሮ ጋክዳ ካፈ ኡከትዳ ላታሙ ባንጋ ዳቡዋ፥ ትያ ካራ እስፈ ባ ኦጎሩዋን የግድ፥ ፆሳ አድያስ ኤህያ እስ አደይ ባኣል-ሻልሻፔ ይስ። ኤልስ ባ አይልያ፥ “ማና መላ አሳስ አ” ያግስ።
\p
\v 43 እያ አይለይ፥ “ታኒ ፄቱ አሳ ስን ሀይሳ ዋታዳ አ?” ያግድ ኦይችስ።
\p ሽን ኤልስ፥ “ማና መላ አሳስ አ፤ ጎዳይ ‘ኤንቲ ምድ ካልን፥ ቲፈይ አታና’ ” ያግስ። 
\v 44 ሄሳ ግሾ፥ አይለይ ኤንታ ስን አን፥ ኤንቲ ምዶሶና፤ ጎዳይ ግዳይሳዳ ቲፈይ አትስ።
\c 5
\s1 ንእማን ጎጋ ሀርገፈ ፓፁዋ
\p
\v 1 አራመ ካዋስ ምኖ ቶራ ሞጮና ግድዳ ንእማን፥ ባ ጎዳን ዳሮ ዶሰትዳነ ቦንቸትዳ አስ። እያ ባጋራ ጎዳይ አራመ ኦላንቾታስ ፆኖ እሚስ። ንእማኔይ ቶራ ቃራ፤ ሽን ጎጋ ሀርገይ እያ ቦላ ደኤስ።
\p
\v 2 እስ ዎደ አራመ ቢታፈ ፓኖት እስራኤለ ቢታ ብድ፥ እስ ማጫ ናአ እስራኤለፐ ድእዶሶና። ሄ ናእያ ንእማነ ማቼስ አይለ ግዳሱ። 
\v 3 ሄ ናእያ ባ ጎዳተኮ፥ “ታ ጎዳይ ሳማረን ደእያ ናብያኮ ብዳ ግድያኮ፥ እ ፓፃናሽን” ያጋሱ።
\p
\v 4 ንእማን ባ ጎዳኮ ብድ፥ እስራኤለፐ ይዳ ናእያ ግዳይሳ እያዉ ኦድስ። 
\v 5 አራመ ካዎይ ንእማነኮ፥ “ባ፥ ታኒ እስራኤለ ካዋስ ዳብዳበ ፃፋና” ያግስ። ንእማን 3,000 ብራ ሳንትመ፥ 6,000 ዎርቃ ሳንትመ ታሙ ኩመ ማኦ ኤክድ ብስ። 
\v 6 እ፥ ኤክድ ብዳ ዳብዳበይ፥ “ሀ ጎጋ ሀርግያፈ ኔኒ ታ አይልያ፥ ንእማነ ፓና መላ ሀ ዳብዳብያራ ታኒ እያ ኔኮ የዳስ” ያግስ።
\p
\v 7 እስራኤለ ካዎይ ዳብዳብያ ናባብዳ ዎደ፥ ባ ማኡዋ ዳክድ፥ “ታኒ እያ ዎናዉነ ፓናዉ ፆሰዬ? ታኒ እስ አስ እያ ጎጋ ሀርገፈ ፓና መላ ሀ አደይ ታኮ አይስ ኪትዴ? እ ታራ ኦየታናዉ ጋሶ ኮየይሳ በእተ” ያግስ።
\p
\v 8 ፆሳ አስ ግድዳ ኤልስ እስራኤለ ካዎይ ባ ማኡዋ ዳክዳይሳ ስእዳ ዎደ አሰ ኪትድ፥ “ነ ማኡዋ አይስ ዳካዲ? እያ ሃ ታኮ የዳ፤ እስራኤለን ናበይ ደኤይሳ ታኒ እያ ኤርሳና” ያግስ።
\p
\v 9 ንእማን ባ ፓራታነ ፓራ ጋረታራ ብድ፥ ኤልሳ ካረን ኤቅስ። 
\v 10 ኤልስ፥ “ባዳ ዮርዳኖሰ ሻፋን ላፑን ቶሆ ሜጨታ፤ ነ ሀርግያፈ ኔኒ ፓፃናነ ጌያና” ያግድ ኦዳና መላ ባ አይልያ እያኮ ኪትስ።
\p
\v 11 ሽን ንእማን ሀንቀትድ፥ “እ ታኮ ይድ፥ ጎዳ ባ ፆሳ ሱን ፄግድ፥ ባ ኩሽያ ታ ማዱን ቦላ ዎድ፥ ታና ሀ ጎጋ ሀርግያፈ ፓስ ጋዳ ቆፓስ። 
\v 12 ዳማስቆ ሻፋት፥ አባንነ ፋርፋር እስራኤለን ደእያ ሻፋታፐ አኮናዬ? ያትን ታኒ ኤንታን ሜጨታዳ ጌይክና?” ያግድ ሀንቀትድ፥ ጉየ ስምስ።
\p
\v 13 እያ አይለት እያኮ ሺቅድ፥ “ኑ ጎዳዉ፥ ናበይ ግታባ ኦና መላ ነዉ ኦድዳኮ፥ ኔኒ ኦክዬ? እ ነና፥ ‘ባዳ ሜጨታዳ ጌይያ’ ግዳይስ አይስ ዴፅዴ?” ያግዶሶና። 
\v 14 እ ዱገ ዎድ፥ ፆሳ አደይ እያዉ ኦድዳይሳዳ ዮርዳኖሰ ሻፋን ላፑን ቶሆ ሙከትድ ሜጨትስ። እያ አሳተይ ናአ አሳተዳ ሀንስ፤ ፓፅድ ጌይስ።
\p
\v 15 ሄሳፈ ጉየ፥ ንእማንነ እያራ ይዳ አሳ ኡባይ ኤልሳኮ ጉየ ብዶሶና። ንእማን እያ ስንን ኤቅድ፥ “ሄኮ፥ እስራኤለ ፆሳፈ አትሽን፥ ሀራ ፆሲ ባይናይሳ ታኒ ሀእ ኤራስ። ሀያና ሀእ ታኒ፥ ነ አይለይ እምያ እሞታ ኤካ” ያግስ።
\p
\v 16 ኤልስ፥ “ታኒ እያዉ ኦያ ጎዳይ ኤርያ መላ፥ ታኒ ኔፐ አይባካ ኤክከ” ያግስ። ኤልስ እሞታ ኤካናዳ ንእማን ዎስን እፅስ።
\p
\v 17 ንእማን፥ “ኔኒ ኤኮና እፅኮ፥ ታዉ ናምኡ ባቁሎ ጫና ቢታ እማና መላ ታኒ ነና ዎሳይስ። ታኒ ነ አይለይ ሀችፈ ዶማዳ ፁሳ ያርሾ ነ ፆሳ ያርሻናፐ አትሽን፥ ሀራ ፆሳታስ ያርሽከ። 
\v 18 ሽን ጎዳይ ታዉ ነ አይልያስ እስባ አቶ ጎ። ታ ካዎይ እርሞና ኤቃ ጎይናናዉ ገልያ ዎደ፥ ታንካ እያ አጃባዳ ገላዳ ጎይናናዉ ኮሼስ። ጎዳይ ታዉ ነ አይልያስ ሄሳ አቶ ጎ” ያግስ።
\p
\v 19 ኤልስ፥ “ሳሮ ጋካ!” ያግስ። ንእማን ደንድድ ብስ።
\p እ ጉ ሃክድ ብሽን፥ 
\v 20 ፆሳ አስ ግድዳ ኤልሳ አይለይ ግያዝ፥ “ታ ጎዳይ፥ ኤልስ ሶረ ንእማን ኤህዳባፐ አይባካ ኤኮና ጮ የድስ። ጎዳይ ኤርያ መላ፥ ታኒ እያ ጌዶ ዎፃ ባዳ፥ እያፐ እስባ ኤካና” ያግድ ቆፕስ። 
\v 21 ሄሳ ግሾ፥ ግያዝ ንእማነ ካልስ። ባ ጌዶ ዎፅያ ንእማነ በእድ፥ እያራ ጋሄታናዉ ፓራ ጋርያፐ ዎድ፥ “አይበ፥ ሳሮ ግደኔ?” ያግድ ኦይችስ።
\p
\v 22 ግያዝ፥ “አይኮይ ባዋ፤ ሳሮ! ሽን ታና ታ ጎዳይ፥ ‘ደረይ ዳርያ ኤፍሬማ ቢታፈ ናበታ ባጋ ግድዳ ናምኡ ፓንት ታኮ ይዶሶና። ሀያና ኤንታዉ ሄ ሙኩሉ ብራ ሳንትመነ ናምኡ ኩመ ማኦ እማ’ ያግድ ኪትስ” ያግስ።
\p
\v 23 ንእማን፥ “ህዛ ሀያና ኡሱፑን ሙኩሉ ብራ ሳንትመ ኤካ” ያግስ። ንእማን ግያዛ ሾቢድ፥ ብራ ናምኡ ካርፂታን የግድ፥ ናምኡ ኩመ ማኦነ ናምኡ አይለታ ቶስድ፥ ግያዛፐ ስን የድስ። 
\v 24 ግያዝ ደእያ ዙማ ኤንቲ ጋክዳ ዎደ፥ ብራነ ማኡዋ ኤንታፈ ኤክድ፥ ሶ ገልስስ። ያትድ ኤንታ ሞይዝን፥ ኤንቲ ብዶሶና።
\p
\v 25 ሄሳፈ ጉየ፥ ሶ ገልድ፥ ባ ጎዳ ኤልሳ ስንን ኤቅስ። ኤልስ፥ “አዉ ባዲ?” ያግድ ኦይችስ።
\p ግያዝ፥ “ታኒ ነ አይለይ አዉካ ባብከ” ያግድ ዛርስ።
\p
\v 26 ሽን ኤልስ፥ “አደይ ኔራ ጋሄታናዉ ፓራ ጋርያፐ ዎያ ዎደ፥ ታ አያናይ ኔራ ደኤስ ግደኔ? ሀ ዎደይ፥ ሚሸነ ማኦ፥ ዎይኮ ሻማሆነ ዎይነ ጋደ፥ ዎይኮ ዶርሳ ዉደነ ሚዛ ዉደ፥ ዎይኮ አደነ ማጫ አይለ ኤክያ ዎዴ? 
\v 27 ሄሳ ግሾ፥ ንእማነ ኦይክዳ ጎጋ ሀርገይ ነናነ ነ ኮቻ ኡባ መርናዉ ኦይካና” ያግስ። ግያዝ ኤልሳ ስንፈ ከይድ ብሽን፥ ሄ ሀርገይ እያ ኦይክን፥ እያ ጎጋይ ሻቻዳ ቦፅስ።
\c 6
\s1 ሃን ዎዳ ቤፀ አይፈ
\p
\v 1 ናበታ ጩጋይ፥ ኤልሳኮ፥ “ሄኮ፥ ኑኒ ደእያ በሳይ ኑስ ዳሮ ፁምስ። 
\v 2 ኑኒ ኡባይ ም ቃንፃናዉ ዮርዳኖሰ ሻፋ ቦስ። ያን ኑስ ዱሳ በሲ ኬፆስ” ያግዶሶና። ኤልስ፥ “ቢተ” ያግስ።
\p
\v 3 ናበታፐ እሶይ፥ “ሀያና ኔንካ ኑራ ነ አይለታራ የርኪ?” ያግስ። ኤልስ፥ “ኤሮ ባና” ያግድ ዛርስ፤ 
\v 4 ኤንታራ እስፈ ብስ። ኤንቲ ዮርዳኖሰ ጋክዳ ዎደ ም ቃንፆ ዶምዶሶና። 
\v 5 ሽን ኤንታፈ እሶይ ም ቃንፅሽን፥ ቤፅያ አይፈይ ከስ ኤክድ፥ ሃን ዎስ። ሄ አደይ፥ “ታ ጎዳዉ፥ ታኒ ጋርፃ ኤክዳ ቤፀ፤ ታኒ ህዛ ዋኖ!” ያግድ ዋስስ።
\p
\v 6 ኤልስ፥ “አዉን ገልዴ?” ያግድ ኦይችስ፤ አደይ ገልዳ በሳ በስስ። ኤልስ ፃምአ ቃንፅድ፥ ሃን ሆልስ፤ ቤፅያ አይፈይ ሃ ቦላ ቶከትስ። 
\v 7 ኤልስ አድያ፥ “ከሳዳ ኤካ” ያግስ። አደይ ባ ኩሽያ የድድ ኤክስ።
\s1 አራመ ኦላንቾታ
\p
\v 8 አራመ ካዎይ እስራኤለታራ ኦለትሸ ደኤስ። እ ባ ቶራ ሞጮናታራ፥ “ታኒ ዱማ ዱማ በሳን ሚፃ መና” ያግስ።
\p
\v 9 ኤልስ፥ “አራመ አሳይ ሄ በሳን ቆሰትዳ ግሾ፥ ሄ በሳራ ያ ቦፓ” ያግድ እስራኤለ ካዋስ ኪታ የድስ። 
\v 10 ሄሳ ግሾ፥ እስራኤለ ካዎይ ፆሳ አስ ማልዳ በሳ አሰ ኪትድ፥ ያን ደእያ አሳይ ናገታና መላ ኦድስ። ካዎይ ናገታና መላ ኤልስ ዎደን ዎደን ኦዴስ።
\p
\v 11 ሀ ሀኖታይ አራመ ካዋ ዳሮ ሀንቀን፥ ባ ቶራ ሞጮናታ ፄግድ፥ “ኑ ግዶን እስራኤለ ካዋ ባጋ ግድድ ደኤይ ኦነኮ አነ ታዉ ኦድተ” ያግድ ኦይችስ።
\p
\v 12 እያ ቶራ ሞጮናታፐ እሶይ፥ “ታ ጎዳዉ፥ ካዋዉ፥ ኑ ግዶን ሄሳ ኦያ ኦንካ ባዋ። ሽን ኔኒ ነ ቆልአን ኦደትያባ ኡባ እስራኤለን ደእያ ናበይ ኤልስ እስራኤለ ካዋስ ኦዴስ” ያግስ።
\p
\v 13 ካዎይ፥ “ታኒ አሰ ኪታዳ እያ ድአና መላ ብድ አዉን ደእያኮ ኮይተ” ያግስ። ኤንቲ፥ “ሄኮ፥ እ፥ ዶታነን ደኤስ” ያግድ ኦድዶሶና።
\p
\v 14 ካዎይ ዳሮ ኦላንቾታ ፓራታራነ ፓራ ጋረታራ ያ የድስ። እ የድዳ አሳት ቃማ ይድ፥ ካታማ ተቅዶሶና። 
\v 15 ኤልሳ አይለይ ዎንተ ጋላስ ጉራ ደንድድ፥ ካረ ከይያ ዎደ፥ ኦላንቾት ፓራታራነ ፓራ ጋረታራ ካታማ ተቅዶሶና። ሄ አይለይ፥ “ሄኮ፥ ኑኒ ይዳ! ታ ጎዳዉ፥ ኑ ዋንኖ?” ያግድ ኦይችስ።
\p
\v 16 ኤልስ፥ “ያዮፋ! ኑራ ደኤይሳት ኤንታራ ደኤይሳታፐ አሶና” ያግድ ዛርስ።
\p
\v 17 ሄሳፈ ጉየ፥ ኤልስ፥ “አቤት ጎዳዉ፥ እ በአና መላ እያ አይፍያ ዶያ” ያግድ ዎስስ። ጎዳይ ኤልሳ አይልያ አይፍያ ዶይን፥ ሄኮ፥ ኤልሳ ዩሾ ኡባን ደእያ ታማ ፓራትነ ፓራ ጋረት ዙማ ማእስ።
\p
\v 18 ሶረት እያ ተቅዳ ዎደ ኤልስ፥ “ሀ አሳታ አይፍያ ቆቅሳርክ” ያግድ ጎዳ ዎስስ። ኤልስ ዎስዳይሳዳ ጎዳይ ኤንታ አይፍያ ቆቅስስ። 
\v 19 ሄሳፈ ጉየ፥ ኤልስ፥ “ኦገይ ሀይሳራ ዴና፤ ካታማይ ሀይሳ ግደና። ህንተ ኮይያ ኡራ ታ ህንተና በሳና፤ ታና ካልተ” ያግድ፥ ኤንታ ካለድ፥ ሳማረ ካታማ ኤፍስ።
\p
\v 20 ኤንቲ ሳማረ ካታማ ገልዳ ዎደ ኤልስ፥ “አቤት ጎዳዉ፥ ሀ አሳት ፄላና መላ ኤንታ አይፍያ ዶያ” ያግስ። ጎዳይ ኤንታ አይፍያ ዶይን፥ ሄኮ፥ ኤንቲ ሳማረ ግዶን ደኤይሳ በእዶሶና። 
\v 21 እስራኤለ ካዎይ ኤንታ በእዳ ዎደ፥ “ታ አዋዉ፥ ታኒ ኤንታ ዎ? ታኒ ኤንታ ዎ?” ያግድ ኦይችስ።
\p
\v 22 ኤልስ፥ “አካይ፥ ዎፓ! ሀር አቶሽን፥ ኔኒ ነ ማሻንነ ነ ዶንግያን ድእዳይሳታካ ዎናዉ በሰና። ኤንቲ ምድ ኡይድ ባንታ ጎዳኮ ባና መላ ካ ኤንታ ሙዛ” ያግስ። 
\v 23 ሄሳ ግሾ፥ እስራኤለ ካዎይ ኤንታዉ ግብራ ጊግስን፥ ኤንቲ ምዳፐነ ኡይዳፐ ጉየ፥ ኤንታ የድን፥ ባንታ ጎዳኮ ስምዶሶና። ሄ ዎደፐ ዶምን፥ አራመት እስራኤለታ ቦላ ደንደይሳ አጋግዶሶና።
\p
\v 24 ሄሳፈ ጉየ፥ አራመ ካዎይ ዎልደ-አዳር ባ ኦላንቾታ ኡባ ሺሽድ፥ ሳማረ ካታማ ተቅስ። 
\v 25 ሄሳ ጋሶን ሳማረ ካታማን ግታ ኮሽ ገልን፥ እስ ሀረ ሁጰይ ሆስፑን ታሙ ብራ ሳንትመን፥ ናምኡ ፄቱ ግራመ ግድያ ሆለ ሽእ እቻሹ ብራ ሳንትመን ባይዘትስ።
\p
\v 26 እስራኤለ ካዎይ ካታማ ድርሳ ግምብያ ቦላራ አሽን፥ እስ ማጫስያ፥ “ታ ጎዳዉ፥ ካዋዉ፥ ታና ማዳርክ” ያጋዳ ዋሳሱ።
\p
\v 27 ካዎይ፥ “ነና ጎዳይ ማዶና እፅኮ፥ ታኒ ነዉ ማዶ አዉፐ ኤሀኔ? ካ ቡክያ ዉዱማፈየ፥ ዎይነ አይፍያ ጉምእያ በሳፌ?” ያግስ። 
\v 28 ካዎይ፥ “ነ መቶይ አይቤ?” ያግድ ኦይችስ።
\p ማጫስያ ዛራዳ፥ “ሀ ማጫስያ፥ ‘ሀች ማናዉ ነ ናአ ኤካዳ ያ፤ ቃስ ዎንቶ ታ ናኣ ማና’ ያጋሱ። 
\v 29 ያትን፥ ታ ናኣ ካድ ምዳ፤ ዎንተ ጋላስ ታኒ፥ ‘ኑኒ ማናዉ ነ ናኣ ኤካዳ ያ’ ያጋስ። ሽን እያ ባ ናኣ ቆሳሱ” ያጋሱ።
\p
\v 30 ካዎይ ማጫስያ ኦድዳይሳ ስእድ፥ ባ ማኡዋ ዳክስ። እ ግምብያ ቦላራ አሽን፥ አሳይ ጋርሳ ባጋራ እ ማእዳ ካዮ ማኡዋ በእዶሶና። 
\v 31 ካዎይ፥ “ሳፋፃ ናኣ ኤልሳ ጉገይ እያ ቦላ ሀች ፔእኮ፥ ፆሲ ታና ፕርዶ!” ያግስ።
\p
\v 32 ሄ ዎደ ኤልስ ባ ሶን ኡትስ፤ ጭማትካ እያራ እስፈ ደኦሶና። ካዎይ ባፐ ስን አሰ ኪትስ፤ ሽን ሄ አደይ ጋካናፐ ስን፥ ኤልስ ጭማታኮ፥ “ሀ ሸምፖ ዎይስ ታ ቆያ ሙጭሳናዉ አሰ ኪትዳይሳ ህንተ በኤቲ? ሄ ኪተትዳይስ ይዳ ዎደ እብ ጎርድድ ገልሶፍተ፤ እያ ጎዳይካ እያ ካልድ ይሸ ደኤስ” ያግስ። 
\v 33 እ ጭማታራ ኦደትሽን፥ ሄኮ፥ ኪተትዳይስ ጋክ ዎስ፤ እ፥ “ሀ መቶይ ጎዳፐ ይስ። ያትን፥ ታኒ ጎዳ አይስ ናግያና?” ያግስ።
\c 7
\p
\v 1 ኤልስ፥ “ጎዳ ቃላ ስአ! ጎዳይ ሀይሳዳ ያጌስ። ዎንቶ ሀኖደ ሄ ክሎ ግራመ ግስተ ለይ ዎይኮ ኡሱፑን ክሎ ግራመ ባንግ ሳማረ ካታማ ፐንገን እስ ብራ ሳንትመን ባይዘታና” ያግስ። 
\v 2 ካዋስ ማታትያ ሀላቃይ ፆሳ አድያኮ፥ “ጎዳይ ሳሎ ማስኮተታ ዶያኮካ ሄስ ሀነና” ያግስ። ሽን ኤልስ ዛሪድ፥ “ኔኒ ሄሳ ነ አይፍያን በአና፤ ሽን እያፐ ማካ” ያግስ።
\p
\v 3 ካታማ ገልያ ፐንግያን ግታ ጎጋ ሀርገይ ኦይክዳ ኦይዱ አሳት ደኦሶና። ኤንቲ እሶይ እሱዋኮ፥ “ኑኒ ሀይቃና ጋካናዉ፥ ሀይሳን አይስ ጋምአኔ? 
\v 4 ኑኒ ካታማ ገልኮ፥ ኮሽ ደእያ ግሾ፥ ኑኒ ያን ሀይቃና። ቃስ ሀይሳን ጋምእኮካ ሀይቃና። ሄሳ ግሾ፥ አራመታ ሚፃ አነ ቦስ። ኤንቲ ኑና አሽኮ አታና፤ ኤንቲ ዎኮ ሀይቃና” ያግዶሶና። 
\v 5 ሳእ ምያ ዎደ ደንድድ፥ አራመታ ሚፃ ብዶሶና። ኤንቲ ብድ ሚፃ ጋክያ ዎደ፥ ሄኮ፥ እስ አስካ ያን ባዋ። 
\v 6 ሄስ ሀንዳይ፥ ጎዳይ ፓራ ጋረታ፥ ፓራታነ ዳሮ ኦላንቾታ ቃላ አራመ አሳ ስስስ። ያትን ኤንቲ እሶይ እሱዋኮ፥ “ሄኮ፥ እስራኤለ ካዎይ ኑና ኦልሳናዉ፥ ህተነ ግብፀ ካዎታ ኡነይድ ኤህስ” ያግዶሶና። 
\v 7 ሄሳ ግሾ፥ ኤንቲ ደንድድ፥ ባንታ ሚፃ፥ ባንታ ዱንካንያ፥ ባንታ ፓራታነ ባንታ ሀረታ ኩመ የግ አግድ፥ ሳእ ማ ደእሽን፥ ባንታ ሸምፑዋ አሻናዉ ባቃትዶሶና።
\p
\v 8 ሄ ግታ ጎጋ ሀርገይ ኦይክዳ አሳት አራመታ ሚፃ ጋክድ፥ ኤንታ ዱንካነታፐ እሱዋ ገልድ፥ ምዶሶናነ ኡይዶሶና፤ ብራ፥ ዎርቃነ ማኦ ኤክድ ቆትዶሶና። ናምአን ስሚድ፥ ሀራ ዱንካንያ፥ ገልድ እያፐ ኤክዳይሳ ቆትዶሶና።
\p
\v 9 ሄሳፈ ጉየ፥ ኤንቲ እሶይ እሱዋ፥ “ኑኒ ሎኦባ ኦቦኮ። ሀች ምሽራቾ ጋላስ፤ ሽን ኑኒ ስእ ግዳ። ሳእ ዎንታና ጋካናዉ፥ ስእ ግድ ኡትኮ፥ ኑኒ ሴረታና። አነ፥ ሀእ ብድ፥ ካዎ ጋን ደእያ አሳስ ኦዳና” ያግዶሶና። 
\v 10 ሄሳ ግሾ፥ ኤንቲ ብድ፥ ካታማ ፐንግያ ናገይሳታ ፄግድ፥ “ኑኒ አራመ ሚፃ ብዳ፤ ሽን፥ ሄኮ፥ እስ አስ ዎይኮ አሳ ግርስ ሄ በሳን ባዋ። ቃሸትዳ ፓራታ ፃላልነ ሀረት ደኦሶና፤ ቃስ ኤንቲ አግድ ብዳ ዱንካነት ደኦሶና” ያግዶሶና። 
\v 11 ፐንግያ ናገይሳት ፄግድ፥ ካዎ ጋን ደእያ አሳስ ኦድዶሶና። 
\v 12 ካዎይ ቃማ ደንድድ፥ “አራመት ኑና ኦዳባ ታኒ ህንተዉ ኦዳና። ኑኒ ኮሻትዳይሳ ኤንቲ ኤሮሶና። ሄሳ ግሾ፥ ባንታ ሄራፐ ከይድ፥ ጋፃርያን ቆሰትድ፥ ኤንቲ ካታማፐ ካረ ከይን፥ ኑኒ ኤንታ ፓፃ ኦይክድ፥ ካታማ ገላና ያግድ ቆፕዶሶና” ያግድ ባ ሹማታስ ኦድስ።
\p
\v 13 ካዋ ሀላቃታፐ እሶይ፥ “ሀ ካታማን አትዳ አሳይ ካሰ ሀይቅዳ አሳ መላ ሀይቆፐ አተና። ሄሳ ግሾ፥ ሀንዳባ ኤራናዉ አነ አሳ ዶሮስ። አትዳ እቻሹ ፓራታራ አነ ኤንታ ሶረታ ሚፃ የዶስ” ያግስ። 
\v 14 ጉ አሳታነ ናምኡ ፓራ ጋረታ ዶርዶሶና። ካዎይ ኤንታ ሶረ ኦላንቾታ ጌዶ የድድ፥ “ብድ ሀንያባ በእተ” ያግድ ኪትስ። 
\v 15 አሳት ኤንታ ጌዶ ካልድ፥ ዮርዳኖሰ ሻፋ ጋካናዉ ብዶሶና። አራመ አሳት ባቃትሸ የግዳ ማኦይነ ኦላ ሚሸይ ኦግያን ኩምስ። ኪተትዳ አሳት ጉየ ስሚድ፥ ካዋስ ኦድዶሶና።
\p
\v 16 አሳይ ብድ፥ አራመታ ሚፃ ቦንቅዶሶና። ጎዳይ ግዳይሳዳ ሄ ክሎ ግራመ ግስተ ለይ ዎይኮ ኡሱፑን ክሎ ግራመ ባንግ እስ ብራ ሳንትመን ባይዘትስ። 
\v 17 ካዎይ ባዉ ማትያ ሀላቃ ፐንገ ናገይሳታ ሀላቃ ኦድ ሹምስ፤ ሽን አሳይ እያ ፐንገን የስ። ካዎይ ኤልሳኮ ብዳ ዎደ፥ ኤልስ ሀ ሀላቃ ቦላ ኦድዳይሳዳ አደይ ሀይቅስ። 
\v 18 ፆሳ አስ ግድዳ ኤልስ ካሰ ካዋስ፥ “ዎንቶ ሀኖደ ሄ ክሎ ግራመ ግስተ ለይ ዎይኮ ኡሱፑን ክሎ ግራመ ባንግ ሳማረ ካታማን እስ ብራ ሳንትመን ባይዘታና” ያግስ።
\p
\v 19 ሄ ዎደ ሀላቃይ ኤልሳኮ፥ “ጎዳይ ሳሎ ማስኮተታ ዶያኮካ ሄስ ሀነና” ያግስ። ኤልስ፥ “ሄኮ፥ ኔኒ ሄሳ ነ አይፈን በአና፤ ሽን እያፐ ማካ” ያግድ ዛርስ። 
\v 20 ኤልስ ኦድዳይሳዳ፥ ሄ አደይ፥ አሳይ ፐንገን የን ሀይቅስ።
\c 8
\s1 ሱናማ ማጫስዉ
\p
\v 1 ኤልስ፥ ሀይቅዳ እ ናኣ ፓዳ ማጫስዉ፥ “ነ ሶ አሳ ኤካዳ ሀይሳፈ ባዳ ኔኒ ዳንዳእያ በሳን አዉንካ ደአ። ጎዳይ ላፑን ላይ ኮሻ ሀ ቢታ ቦላ የድስ” ያግስ። 
\v 2 ማጫስያ ኤልስ ኦድዳይሳዳ ባ ሶ አሳራ ባዳ፥ ፍልስፄመ ቢታን ላፑን ላይ ደአሱ። 
\v 3 ላፑን ላይ ዉርሰን ማጫስያ ፍልስፄመ ቢታፈ ስማሱ። ባ ኬነ ባ ጋድያ ኦይቻናዉ ካዋኮ ባሱ።
\p
\v 4 ሄ ዎደ ካዎይ ፆሳ አስ ግድዳ ኤልሳ አይልያ ግያዛራ ኦደትሸ፥ “ኤልስ ኦዳ ግታ ኦሶ ኡባ አነ ታዉ ኦዳ” ያግስ። 
\v 5 ኤልስ ሀይቅዳ ናኣ ዋትድ ፓዳኮ፥ ግያዝ ካዋስ ኦድሽን፥ ሄኮ፥ ኤልስ እ ናኣ ፓዳ ማጫስያ ባ ኬነ ባ ጋድያ ኦይቻናዉ ያሱ። ግያዝ፥ “ታ ጎዳዉ፥ ካዋዉ፥ ማጫስያ ሀናሹ፤ ኤልስ ሀይቆፐ ፓዳ እ ናአይካ ሀይስሽ” ያግስ። 
\v 6 ካዎይ ማጫስዉ ኦይችን፥ እያዉ ኦዳሱ። ሄሳ ግሾ፥ ካዎይ ሀላቃ ፄግድ፥ “ሀ ማጫሴባ ግድዳ ኡባነ እያ አጋ ብዳ ዎድያፐ ሀች ጋካናዉ እ ጋደን ሞክዳ ኡባ እዉ ዛራ” ያግድ ኪትስ።
\p
\v 7 ኤልስ ዳማስቆ ካታማ ብድ ጋክያ ዎደ፥ ሶረ ካዎይ ዎልደ-አዳር ሳከቴስ። እ፥ “ፆሳ አስ ሀይሳ ይስ” ግያ ዎረ ስእስ።
\p
\v 8 ካዎይ አዛሄላኮ፥ “እምያባ ኤካዳ ፆሳ አድያራ ጋሄታናዉ ባዳ፥ ‘ታኒ ሀ ሀርግያፈ ፓፃኔ?’ ያጋዳ ጎዳ ኦይቻ” ያግስ።
\p
\v 9 ሄሳ ግሾ፥ አዛሄል ዳማስቆን ደእያ ዱማ ዱማ ቆሞ ሙሩታፐ ኦይታሙ ግማለን ጫንድ፥ ኤልሳራ ጋሄታናዉ ብስ። ኤልሳ ስንን ኤቅድ፥ “ነ ናአይ አራመ ካዎይ ዎልደ-አዳር፥ ‘ታኒ ሀ ሀርግያፈ ፓፃኔ?’ ያግድ፥ ነና ኦይቻናዳ ታና ኔኮ ኪትስ” ያግስ።
\p
\v 10 ኤልስ አዛሄላኮ፥ “ኔኒ ባዳ እያኮ፥ ‘ቱማ ኔኒ ፓፃና’ ያጋ። ሽን እ ቱማ ሀይቃናይሳ ታና ጎዳይ በስስ” ያግስ። 
\v 11 አዛሄል ዬላታና ጋካናዉ፥ ኤልስ እያ ትሽ ኦድ ፄልድ ዬክስ።
\p
\v 12 ያትን፥ አዛሄል፥ “ታ ጎዳይ አይስ ዬኪ?” ያግድ ኦይችስ።
\p ኤልስ፥ “ኔኒ እስራኤለ አሳ ቦላ ኦና ኢታባ ታኒ ኤርያ ግሾ ዬካይስ። ኤንታ ሚፃ ኔኒ ታማን ፁጋና፤ ኤንታ ፓንታ ኔኒ ማሻን ዎና። ቃስ ኤንታ ዮጋ ናይታካ ኔኒ ሹቻን መንረና፤ ኤንታ ቃን ማጫሳታ ኡሉዋ ኔኒ ዳካና” ያግድ ዛርስ።
\p
\v 13 አዛሄል ዛሪድ፥ “ታኒ ነ አይለይ፥ ፓና ካናይ፥ ሀይሳ መላ ግታባ ዋታዳ ኦናዉ ዳንዳእያና?” ያግስ። ኤልስ ዛሪድ፥ “ኔኒ አራመ ቢታን ካዎታናይሳ ታና ጎዳይ በስስ” ያግስ።
\p
\v 14 ሄሳፈ ጉየ፥ አዛሄል ኤልሳፈ ሻከትድ፥ ባ ጎዳኮ ስምስ። ዎልደ-አዳር፥ “ኤልስ ነና ዎይግዴ?” ያግድ ኦይችስ። አዛሄል፥ “ኔኒ ቱማ ፓፃና” ያግስ።
\p
\v 15 ሽን ዎንተ ጋላስ አዛሄል ቡሉኮ ኤክድ፥ ሃን ሙክድ፥ ካዋ እያራ ቱጭን፥ ካዎይ ሀይቅስ። አዛሄል እያ በሳን ባዉ ካዎትስ።
\s1 ይሁዳ ካዋ እዮራማ
\r (2 ታር 21:1-20)
\p
\v 16 አካባ ናአይ፥ እስራኤለ ካዎይ እዮራም ካዎትዳ እቻሻን ላይን፥ ይሁዳ ካዋ እዮሳፈፃ ናአይ እዮራም ይሁዳን ካዎትስ። 
\v 17 እዮራም ካዎትያ ዎደ እያዉ ላይይ ሀስታማነ ናምአ፤ እ የሩሳላመን ሆስፑን ላይ ካዎትስ። 
\v 18 እዮራም አካባ ናእዉ ማቾ ኤክዳ ግሾ፥ አካባ ሶ አሳይ ሄመትዳይሳዳ ካሰ እስራኤለ ካዎታ ኦግያን ሄመትስ፤ ጎዳ ስንን ኢታባ ኦስ። 
\v 19 ግዶሽን፥ ባ አይልያ ዳዊታ ግሾ፥ ጎዳይ ይሁዳ ይሳናዉ ኮይቤና፤ ዳዊታ ኮቻይ መርናዉ ካዎታናዉ ደኤይሳ ጎዳይ ኡፋይሳ ቃላ እሚስ።
\p
\v 20 እዮራም ካዎትዳ ዎደ፥ ኤዶመ አሳይ ይሁዳ ካዋ ቦላ ማካልድ፥ ባንታዉ ካዎ ካዎይዶሶና። 
\v 21 ሄሳ ግሾ፥ እዮራም ባ ፓራ ጋረታ ኡባራ ፃእራ ጌተትያ በሳ ብስ። ኤዶመ አሳት እያነ እያ ፓራ ጋረታ ሀላቃታ ተቅዶሶና፤ ሽን እዮራም ቃማ ደንድድ፥ ከስ ኤክድ ብስ። እያ ኦላንቾት ባቃትድ፥ ጉየ ሶ ስምዶሶና። 
\v 22 ሄ ዎደፐ ዶምድ ሀች ጋካናዉ፥ ኤዶመ አሳይ ይሁዳ አሳስ ሃረትቦኮና። ልብና አሳይ ቃስ ሄ ዎደ ማካልስ።
\p
\v 23 እዮራም ሀንዳ ሀራባይነ እ ኦዳባ ኡባይ ይሁዳ ካዎታ ታርከ ማፃፋን ፃፈትስ። 
\v 24 እዮራም ሀይቅድ፥ ባ ማይዛታን ጋሄትስ። ባ ማይዛ ዳዊታ ካታማን ሞገትስ፤ እያ በሳን እያ ናአይ አካዝያስ ካዎትስ።
\s1 ይሁዳ ካዋ አካዝያሳ
\r (2 ታር 22:1-6)
\p
\v 25 አካባ ናአይ፥ እስራኤለ ካዎይ እዮራም ካዎትዳ ታማነ ናምአን ላይን፥ ይሁዳ ካዋ፥ እዮራማ ናአይ አካዝያስ ይሁዳን ካዎትስ። 
\v 26 አካዝያስ ካዎትዳ ዎደ፥ እያዉ ላይ ላታማነ ናምአ፤ እ የሩሳላመን እስ ላይ ካዎትስ። እያ አየ ሱንይ ጎቶሎ፤ እያ እስራኤለ ካዋ ኦምራ ናኣ ናእዉ። 
\v 27 እ ኤንታዉ ቦሎ ግድዳ ግሾ፥ አካባ ሶ አሳ ኦግያን ሄመትስ፤ አካባ ሶ አሳይ ኦዳይሳዳ፥ እ ጎዳ ስንን ኢታባ ኦስ።
\p
\v 28 አካዝያስ አራመ ካዋ አዛሄላራ ጋላዳን ደእያ ራሞታ ካታማን ኦለታናዉ ብድ፥ አካባ ናኣ እዮራማራ እስፈ ብን፥ አራመ አሳት እዮራማ ጫድዶሶና። 
\v 29 እዮራም አራመ ካዋ አዛሄላራ ኦለትያ ዎደ፥ አራመ አሳት ጫድዳ ጫቻፈ ፓፃናዉ እዝራኤለ ስምስ። እዮራማ ናአይ፥ ይሁዳ ካዎይ አካዝያስ፥ ጫደትዳ አካባ ናኣ እዮራማ ኦይቻናዉ ዱገ እዝራኤለ ብስ።
\c 9
\s1 እዩ ትየተ
\p
\v 1 ናበይ ኤልስ ናበታ ጩጋፐ እስ አስ ፄግድ፥ “ነ ማኡዋ ማአዳ፥ ፃሮ ዛይትያ ነ ኩሸን ኦይካዳ፥ ጋላዳን ደእያ ራሞታ ባ። 
\v 2 ያ ጋካዳ፥ እዮሳፈፃ ናኣ፥ ናምሳ ናኣ ናኣ እዩ ኮያ። እያ ደማዳ፥ እያ ላገታፐ እያ ሻካዳ ቆልአ ገልሳ። 
\v 3 ሄሳፈ ጉየ፥ ፃሮ ዛይትያ ኤካዳ፥ እያ ሁጵያን ትጋዳ፥ ‘ነና እስራኤለ ቦላ ካዎ ኦ ትያና መላ ጎዳይ ታና ኪትስ’ ያጋ። ያታዳ ፐንግያ ዶያዳ፥ ኤለሳዳ ባቃታ” ያግስ።
\p
\v 4 ሄሳ ግሾ፥ ፓን ናበይ ጋላዳን ደእያ ራሞታ ብስ። 
\v 5 እ ያ ጋክዳ ዎደ ቶራ ሞጮናይ እስፈ ዞረትሽን ደምድ፥ “ጎዳዉ፥ ታኒ ነዉ ኦድያባይ ደኤስ” ያግስ።
\p እዩይ፥ “ኑ ግዶፈ ኦደስ ኦዳኔ?” ያግድ ኦይችስ።
\p ናበይ፥ “ጎዳዉ፥ ነዉ ኦዳና” ያግድ ዛርስ። 
\v 6 እዩይ ደንድድ ሶ ገልን፥ ናበይ እያ ሁጰን ዛይተ ትግድ፥ “ጎዳይ እስራኤለ ፆሳይ፥ ነና ሀይሳዳ ያጌስ፥ ‘ኔኒ ጎዳ ደርያ፥ እስራኤለ ቦላ ካዎታና መላ ታኒ ነና ትያስ። 
\v 7 ኔኒ ነ ጎዳ አካባ ኮቻ ይሳና። ታኒ ኤልዛቤላ ጉስዳ ናበታ፥ ታ አይለታ ሱነ ታ ሀራ አይለታ ሱ ሃሉዋ ከሳና። 
\v 8 አካባ ኮቻ ኡባይ ያና፤ ታኒ እስራኤለን አካባ ኮቻፈ አይለ ግድን፥ ዎማኖ ግድን፥ አደ ኡባ ይሳና። 
\v 9 አካባ ኮቻ ናባፃ ናኣ እዮርባማ ኮቻዳነ አክያ ናኣ ባኦሳ ኮቻዳ ኦና። 
\v 10 ኤልዛቤሎ፥ እዝራኤላ ጎሻን ካናት ማና፤ ኦንካ እዮ ሞገና’ ” ያግስ። ሄሳ ኦድዳፐ ጉየ፥ ፐንግያ ዶይድ ባቃትስ።
\p
\v 11 እዩይ ባ ላገ ግድዳ ቶራ ሞጮናታኮ ብዳ ዎደ፥ ኤንቲ፥ “ሳእ ሳሮ? ሀ ጎሻይ ኔኮ አይስ ይዴ?” ያግድ ኦይችስ።
\p እዩይ፥ “ሀ አድያባነ እያ ኦዳ ህንተ ኤሬታ” ያግስ።
\p
\v 12 ኤንቲ፥ “ሀይስ ዎርዶ። አነ ኔኒ ኑስ ኦዳ” ያግዶሶና።
\p እዩይ፥ “ኔኒ እስራኤለ ቦላ ካዎ ግዳና መላ ታኒ ነና ትያናዳ ጎዳይ ታና ኪትስ” ያግስ።
\p
\v 13 ሄ ዎደ ኤንቲ ባንታ ማኡዋ ቃርድ፥ እዩይ የድ ከይያ ደን ሂፅድ፥ ሞይዘ ፑንዶሶና። ባንታ ቃላ ቁ ኦድ፥ “እዩይ ካዎትስ” ያግዶሶና።
\s1 ካዋ እዮራማ ሀይቁዋ
\p
\v 14 እዮሳፈፃ ናአይ፥ ናምሳ ናኣ ናአይ እዩይ፥ እዮራማ ቦላ ማቀትስ። ሄስ ሀንያ ዎደ፥ እስራኤለ አሳ ኡባይ አራመ ካዋ አዛሄላ ጋላዳን ደእያ ራሞታን ናጋናዉ ብዶሶና። 
\v 15 ሽን ኤንታፈ ካዎይ እዮራም ሶረ ካዋ አዛሄላራ ኦለትዳ ዎደ፥ አራመ ቢታ አሳይ እያ ጫድዳ ጫቻስ እዝራኤለ ይስ።
\p እዩይ ሀላቃታ፥ “ህንተ ቆፋይ ሄሳ ግድኮ፥ ሀ ካታማፐ እስ አስካ ከይድ፥ እዝራኤለ ካታማን ሀ ኦዳ ኦዶናዳ ተቅተ” ያግስ። 
\v 16 ሄሳፈ ጉየ፥ እዩይ ፓራ ጋርያን ከይድ፥ እዝራኤለ ብስ። እዮራም ፓፅቦናይስ ያን ሸምፔስ። ቃስ ይሁዳ ካዎይ አካዝያስ እያ ኦይቻናዉ ያ ዱገ ብስ።
\p
\v 17 እዝራኤላ ግምብያ ቦላ ኤቅድ ዎቸይሳ ፄግድ፥ “እስ ጩጋ የይሳ ታዉ በንቴስ” ያግስ።
\p እዮራም፥ “ኤንታራ ጋሄታናዳ እስ ፓራ የዳ። ፓራዋይ ብድ፥ ‘ሳእ ሳሮ?’ ያጎ” ያግስ።
\p
\v 18 ፓራዋይ እዩራ ጋሄታናዉ ብድ፥ “ካዎይ ነና፥ ‘ሳአይ ሳሮ?’ ያጌስ” ያግስ።
\p እዩይ፥ “ሳሮባን ነና ጋያባይ ባዋ። ታ ጉየ አዳ ታና ካላ” ያግድ ዛርስ።
\p ዎቸይስ ካዋ፥ “ኪተትዳይስ ኤንታኮ፥ ጋክስ፤ ሽን ጉየ ስምቤና” ያግድ ኦድስ።
\p
\v 19 ሄሳ ግሾ፥ ካዎይ ናምአን ፓራዋ ኤንታኮ ኪትስ። እ ኤንታኮ ይድ፥ “ካዎይ ህንተና፥ ‘ሳእ ሳሮ?’ ያጌስ” ያግስ።
\p እዩይ፥ “ነዉ ሳሮራ አይ ጋሄተ ደኢ? ታ ጉየ አዳ ታና ካላ” ያግስ።
\p
\v 20 ዎቸይስ፥ “ናምአን ፓራዋይ ኤንታኮ ጋክስ፤ ሽን ጉየ ስሚድ ይቤና። ቃስ ጋርያ ላጎይ ናምሳ ናኣ ናኣ እዩ ላጉዋ መላ፤ እ ጎያ አሳዳ ላጌስ” ያግድ ኦድስ።
\p
\v 21 ካዎይ እዮራም፥ “ታዉ ፓራ ጋረ ጊግስተ” ያግድ ኪትስ። ኤንቲ ፓራ ጋረ ጊግስዶሶና፤ እስራኤለ ካዎይ እዮራም ይሁዳ ካዎይ አካዝያስ ባንታ ጋርያን ጋርያን ኡትድ፥ እዩራ ጋሄታናዉ ብድ፥ እዝራኤለ ናቡተ ጋደን እያ ደምዶሶና። 
\v 22 እዮራም እዩ በእዳ ዎደ፥ “እዩ፥ ሳእ ሳሮ?” ያግድ ኦይችስ።
\p እዩይ፥ “ነ አየ ኤልዛቤል ላይማተይነ ብታይ ደእሽን፥ ሳሮይ አዉን ደኢ?” ያግድ ዛርስ።
\p
\v 23 እዮራም ባ ፓራ ጋርያ ጉየ ዛሪድ ባቃትድ፥ አካዝያሳ ፄግድ፥ “አካዝያሳ፥ ሀይስ ማካላ” ያግስ። 
\v 24 እዩይ፥ ባ ዶንግያ ባ ኩመ ዎልቃን ዳፍድ፥ እዮራማ ናምኡ ካትሶታፐ ግዶን ዱክስ። ዶንገ ቶራይ እያ ዎዛናራ ካንድ ከይን፥ ባ ጋርያ ግዶን ኩንድስ። 
\v 25 እዩይ ቶራ ሞጮና ብድቃራኮ፥ “እዮራማ ደንዳ፥ ናቡተ ጋደን ኦላ። ኔራ ታራ እስፈ እዮራማ አዋ አካባ ካልድ ቶግድ ብሽን፥ ጎዳይ እያ ቦላ ትንብተ ኦድዳይስ አኬካ። 
\v 26 ሄ ዎደ ጎዳይ፥ ‘ናቡተ ሱነ እያ አደ ናይታ ሱ ታኒ ዝነ በአስ፤ ሄሳ አጩዋ ታኒ ነና ቱማ ሀ ጋደን ቃንፅሳና’ ያግስ። ሀእ ስሚድ ጎዳይ ግዳይሳዳ፥ እዮራማ ደንዳ፥ ሀ ጋደን ሆላ” ያግስ።
\p
\v 27 ይሁዳ ካዎይ አካዝያስ ሄሳ በእዳ ዎደ፥ ቤት-ሀጋና ባቃትስ። እዩይ እያ ካልድ የደድ፥ “እያካ ዎተ” ያግስ። ኤንቲ እያ ካልድ፥ ይብላማ ማታን ደእያ ጉራ ፑደን እያ ጋርያ ቦላ ጫድዶሶና። እ ማግዶ ባቃትድ፥ ያን ሀይቅስ። 
\v 28 እያ አይለት ጋርያን እያ ኤክድ፥ የሩሳላመ ኤፍዶሶና፤ እያ ማይዛታ ማታን ዳዊታ ካታማን ሞግዶሶና።
\p
\v 29 አካባ ናአይ እዮራም ካዎትዳ ታማነ እስን ላይን አካዝያስ ይሁዳን ካዎትስ።
\s1 ኤልዛቤል ሀይቁዋ
\p
\v 30 ሄሳፈ ጉየ፥ እዩይ እዝራኤላ ብስ። ኤልዛቤላ ሄሳ ስእዳ ዎደ፥ ባ አይፍያ ትያዳ፥ ባ ሁጵያ ፕፃዳ፥ ማስኮትያራ ዱገ ኦግያ ፄላሱ። 
\v 31 እዩይ ፐንገራ ገልሽን፥ “ላ ነ ጎዳ ዎዳ ዘምራ ሀይሳ ሳሮ ያዲ?” ያጋሱ።
\p
\v 32 እዩይ ፑደ ማስኮትያኮ ፄልድ፥ “ታ ባጋ ግዳናይ ኦኔ? ኦኔ?” ያግስ። ናምኡ ዎይኮ ሄ ሹፋት እያ ፄልዶሶና። 
\v 33 እዩይ፥ “እዮ ዱገ ሆልተ” ያግስ። ኤንቲ እዮ ዱገ ሆልዶሶና። እ ሱይ ጎዳ ቦላነ ፓራታ ቦላ ርጨትስ፤ ፓራት ባንታ ቶሁዋን እዮ የዶሶና።
\p
\v 34 እዩይ ካዋ ኬ ገልድ፥ ምስነ ኡይስ። እ፥ “ሀ ባደትዳ ማጫስዉ ኤፍድ ሞግተ፤ አይ ግድኮካ እያ ካዎ ናአ” ያግስ። 
\v 35 ሽን ኤንቲ እዮ ሞጋናዉ ብድ፥ እ ጉግያፈ፥ ቶሆታፐነ ኩሸታፐ አትሽን፥ ሀራባ ደምቦኮና።
\p
\v 36 ኤንቲ ስሚድ፥ እያዉ ኦድዶሶና፤ እ፥ “ጎዳይ ባ አይልያ ትስባ ኤልያሳ ባጋራ፥ ‘እዝራኤለ ጋደን ኤልዛቤል አሹዋ ካናት ማና። 
\v 37 አትዳይስ እዝራኤላን ፕቶ መላ የገታና። ሄሳ ግሾ ኦንካ፥ “ሀና ኤልዛቤሎ” ጋናዉ ዳንዳኤና’ ያግድ ኦድዳ ቃላይ ሀይሳ” ያግስ።
\c 10
\s1 አካባ ኮቻ ኡባይ ሀይቅስ
\p
\v 1 አካባስ ሳማረ ካታማን ላፑን ታሙ አደ ናይት ደኦሶና። እዩይ ሳማረ ካታማ ሀላቃታስ፥ ጭማታስነ አካባ ኮቻታ ድቸይሳታስ ሀይሳዳ ያግድ ዳብዳበ ፃፍስ። 
\v 2 “ህዛ ህንተ ጎዳ ኮቻት፥ ፓራት፥ ፓራ ጋረት፥ ዩሾይ ግምበትዳ ካታማትነ ኦላ ሚሸት ህንተዉ ደእያ ግሾ፥ ሀ ዳብዳበይ ህንተና ጋክዳ መላ፥ 
\v 3 ህንተ ጎዳ ናይታፐ ሎኦ ግድዳይሳ ዶርድ፥ እያ አዋ አራታን ኡትስተ፤ ህንተ ጎዳ ኬስ ኦለትተ” ያግስ።
\p
\v 4 ሽን ኤንቲ ዳሮ ያይድ፥ “ሄኮ፥ ናምኡ ካዎት እያ ስንን ኤቃናዉ ዳንዳእቦኮና፥ ሽን ኑኒ ዋንድ ኤቃኔ?” ያግዶሶና። 
\v 5 ሄሳ ግሾ፥ ካዎ ጋ አዋተን አይሰይስ፥ ካታማ ሀላቃይ፥ ጭማትነ አካባ ኮቻታ ድቸይሳት፥ እዩኮ ሀይሳዳ ያግድ ኪትዶሶና፤ “ኑኒ ነ አይለታ፤ ኔኒ ግያባ ኡባ ኑኒ ኦና። ኑ ቦላ ኦናካ ካዎዮኮ። ነና ሎእዳባ አይባካ ኦ” ያግድ ኪትዶሶና።
\p
\v 6 እዩይ ኤንታዉ ናምአን ዳብዳበ ፃፍሸ፥ “ህንተ ታ ባጋ ግድድ፥ ታዉ ኪተታናዉ ጊግዳባ ግድኮ፥ ህንተ ጎዳ ናይታ ቆያ ሙጭተ፤ ኤንታ ጉግያ ኤክድ፥ ዎንቶ ሀኖደ እዝራኤለ ዪተ” ያግስ። ላፑን ታሙ ካዋ ኮቻት ባንታና ድችያ፥ ካታማን ኤረትዳ አሳታራ ደኦሶና። 
\v 7 ሄ ካዋ ኮቻታ ድችያ አሳታኮ ዳብዳበይ ጋክዳ ዎደ፥ ላፑን ታሙ ካዋ ኮቻታ ዎዶሶና። ኤንታ ቆያ ሙጭድ፥ ኤንታ ጉግያ ኬሸን ኤክድ፥ እዝራኤላን ደእያ እዩስ የድዶሶና።
\p
\v 8 ኪተትዳ አሳይ፥ “ኤንቲ ካዋ ኮቻታ ጉግያ ኤክድ ይዶሶና” ያግድ እዩስ ኦድዶሶና።
\p እዩይ፥ “ዎንቶ ዎንታ ጋካናዉ፥ ካታማ ገልያ ፐንግያን ኤንታ ናምኡ በሳን ዶርድ ዎተ” ያግድ ኪትስ።
\p
\v 9 ዎንተ ጋላስ ዎንታ እዩይ ካረ ከይድ፥ አሳ ኡባ ስንን ኤቅድ፥ “ህንተ ፅሎ፤ ሄኮ፥ ታ ጎዳ ቦላ ማቀታዳ ዎዳይ ታና። ሽን ሀይሳታ ኡባ ዎዳይ ኦኔ? 
\v 10 ጎዳይ አካባ ኮቻታ ቦላ ኦድዳ ቃላፐ እሶይካ ሳአን ዎናይሳ ህንተ ኤርተ። ጎዳይ ባ አይልያ ኤልያሳ ባጋራ ኦድዳባ ፖልስ” ያግስ። 
\v 11 ሄሳ ግሾ፥ እዩይ እዝራኤላን አትዳ አካባ ኮቻታ፥ እያ ግታ አሳታ፥ እያ ላገታነ እያ ካህነታ ኡባ፥ እሶይካ አቶና ዎስ።\x - \xo 10:11 \xo*\xt ሆሰ 1:4.\xt*\x*
\p
\v 12 ሄሳፈ ጉየ፥ እዩይ ደንድድ፥ ሳማረ ብድ ሄንንቾታ ሞ ጋክድ፥ 
\v 13 ይሁዳ ካዋ አካዝያሳ ዳቦታራ ጋሄትድ፥ “ህንተ ኦኔ?” ያግድ ኦይችስ።
\p ኤንቲ፥ “ኑኒ አካዝያሳ ዳቦታ፤ ካዋ ኮቻታነ ካወ ኤልዛቤል ናይታ ሳሮናዉ ቦስ” ያግዶሶና።
\p
\v 14 እዩይ ባ አሳታ፥ “ኤንታ ፓፃ ኦይክተ” ያግድ ኪትን፥ ኤንታ ፓፃ ኦይክድ፥ ሄንንቾታ ሞን ደእያ ሃ ኦላ ማታን ኤንታ ኦይታማነ ናምአታ ዎዶሶና፤ እ ኤንታፈ እሱዋካ አሽቤና።
\p
\v 15 እዩይ ሄ በሳፈ ደንድድ፥ ራካባ ናኣ እዮናዳባራ ጋሄትድ፥ እያ ሳሮድ፥ “ታ ቆፋይነ ነ ቆፋይ እስኖ። ኔኒ ታ ባጋ ግዳኔ?” ያግስ።
\p እዮናዳብ፥ “ኤ ግዳና” ያግድ ዛርስ።
\p እ “አነ ታ ኩሽያ ኦይካ” ያግስ። እያ ኩሽያ ኦይክን ፑደ ጋርያ ቦላ ከስስ። 
\v 16 “ታራ የ፤ ታኒ ጎዳስ ዋናዳ ምሸትያኮ በአ” ያግስ፤ እያ ባ ጋርያ ቦላ ኡትስስ። 
\v 17 እዩይ ሳማረ ይዳ ዎደ፥ አካባ ኮቻፈ አትዳ ኡባ ዎስ፤ ጎዳይ ኤልያሳስ ኦድዳ ቃላዳ ኤንታ ይስስ።
\s1 ባኣለ ናበታ ሀይቁዋ
\p
\v 18 ሄሳፈ ጉየ፥ እዩይ አሳ ኡባ እስፈ ሺሽድ፥ “አካብ ባኣለ ኤቃ ጉራ ጎይንስ፤ ሽን ታኒ እያፐ ዳሮ ጎይናና። 
\v 19 ሀእ ባኣለ ናበታ፥ እያ ጎይነይሳታ፥ እያ ካህነታ ኡባ ፄግድ ሺሽተ። ኤንታፈ እስ አስካ ፓጮናዳ ናግተ። ታኒ ባኣለ ኤቃስ ዳሮ ያርሾ ያርሻና ሀናይስ። ሄ በሳ ዮና አስ ፓፃ አተና” ያግስ። ሽን እዩይ ባኣለ ኤቃ ጎይነይሳታ ጭምድ ይሳናዉ ሄሳ ኦስ።
\p
\v 20 እዩይ፥ “ባኣለ ኤቃ ጎይናና ጋላሳ አዋጅተ” ያግን፥ ኤንቲ አዋጅዶሶና። 
\v 21 ሄሳፈ ጉየ፥ እዩይ እስራኤለ ቢታ ኡባ ኪትን፥ ባኣለ ኤቃ ጎይነይሳታፐ እስ አስካ አቶና ኡባይ ይዶሶና። ኡባይ ባኣለ ኤቃ ኬ ጋፃፐ ጋፃ ጋካናዉ ቅልፅ ግድ ኩምስ።
\p
\v 22 እዩይ፥ ማኦ ኬ ናግያ አድያኮ፥ “ባኣለ ጎይነይሳታ ኡባስ ማኦ ከሳ” ያግስ። አደይ ኤንታዉ ማኦ ኤህስ።
\p
\v 23 ሄሳፈ ጉየ፥ “እዩይነ ራካባ ናአይ እዮናዳብ ባኣለ ኤቃ ኬ ገልዶሶና። እዩይ፥ ባኣለ ኤቃ ጎይነይሳታፐ አትሽን፥ ጎዳ አይለታፐ እስ አስካ ህንተ ግዶን ዶናዳ ፄልተ” ያግስ። 
\v 24 ሄሳፈ ጉየ፥ ኤንቲ ፁሳ ያርሾታነ ሀራ ያርሾታ ያርሻናዉ ግዶ ገልዶሶና።
\p እዩይ ባኣለ ኤቃ ኬፈ ካረራ ሆስፑን ታሙ አሳታ ጊግስድ ዎስ። ኤንታኮ፥ “ህንተፈ እስ አደይ ታኒ ህንተ ኩሸን እምያ አሳፐ እሱዋ የድኮ፥ እያ ሸምፖይ ሄ አድያ ሸምፑዋ በሳን ገላና” ያግስ።
\p
\v 25 እዩይ ፁሳ ያርሹዋ ፖልዳፐ ጉየ፥ ናገይሳታነ ሀላቃታ፥ “ግዶ ገልድ፥ ኤንታ ዎተ። ኤንታፈ እስ አስካ ከስ ኤኮና መላ” ያግድ ኪትን፥ ኤንታ ማሻን ዉርስዶሶና። ኤንታ አሀ ካረ ጎችድ ከስዶሶና፤ ባኣለ ኤቃ ኬ ቆልአ ገልዶሶና። 
\v 26 ባኣለ ኤቃ ኬፈ ኤቃ ቱሳታ ከስድ ፁግዶሶና። 
\v 27 ባኣለ ኤቃ ሹቻታ ትንቸረዶሶና፤ ባኣለ ኤቃ ኬካ ላልዶሶና። ሄ በሳ ሼሻ ኬ ከስዶሶና፤ ሀች ጋካናዉ ሄ በሳይ ሼሻ ኬ ግድድ አትስ።
\p
\v 28 ሄሳዳ ኦድ፥ እዩይ ባኣለ ኤቃ እስራኤለፐ ይስስ። 
\v 29 ግዶሽን፥ ናባፃ ናአይ እዮርባም እስራኤለ አሳ ኦስስዳ ናጋራ ኦሶ አግቤና። ቤተለንነ ዳነን እዮርባም ኤስዳ ዎርቃ ማራ ምስለታ ጎይንስ።\x - \xo 10:29 \xo*\xt 1 ካዎ 12:28-30.\xt*\x*
\p
\v 30 ጎዳይ እዩኮ፥ “ኔኒ ታ ስንን ሱረባ ኦዳ ግሾነ ታ ቆፋን ደእያባ ኡባ ኔኒ አካባ ኮቻታ ቦላ ፖልዳ ግሾ፥ ነ ኮቻት ኦይዳን የለታ ጋካናዉ፥ እስራኤለ አራታን ኡታና” ያግስ። 
\v 31 እዩይ ጎዳ እስራኤለ ፆሳ ህግያ ባ ኩመ ዎዛናፐ ምንድ ናግቤና፤ ቃስ እስራኤለ አሳ ናጋራ ኦስስዳ እዮርባማ ናጋራፐ ሃክቤና።
\s1 እዩ ሀይቁዋ
\p
\v 32 ሄ ዎደ ጎዳይ እስራኤለ ቢታፈ ባጋ ሻኮ ዶምስ። አራመ ካዎይ አዛሄል እስራኤለ ቢታፈ ዳሮ በሳታ ፆንድ ኦይክስ። 
\v 33 ዮርዳኖሰ ሻፋፐ ዶሎሀ ባጋራ ደእያ ጋላዳነ ባሳነ ቢታ ኡባ ኦይክስ። ሄ ቢታይ አርኖና ሻፋ ማታን ደእያ አሮኤራ ካታማፐ ዶምድ፥ ሮቤላ ቢታ፥ ጋደ ቢታነ ምናሰ ቢታ ጋኬስ።
\p
\v 34 እዩይ ሀንዳ ሀራባይ፥ ኦዳባ ኡባይነ እያ ምኖተይ ኡባይ እስራኤለ ካዎታ ታርከ ማፃፋን ፃፈትስ። 
\v 35 ሄሳፈ ጉየ፥ እዩይ ሀይቅድ፥ ባ ማይዛታን ጋሄትስ፤ እ ሳማረን ሞገትስ። እያ በሳን እያ ናአይ እዮአካዝ ካዎትስ። 
\v 36 እዩይ ሳማረን ኡትድ እስራኤለ ቦላ ላታማነ ሆስፑን ላይ ካዎትስ።
\c 11
\s1 ይሁዳ ካውዉ ጎቶሎ
\r (2 ታር 22:10—23:15)
\p
\v 1 አካዝያሳ አይያ ጎቶላ ባ ናአይ ሀይቅዳይሳ በእዳ ዎደ፥ ደንዳዳ ካዋ ኮቻ ኡባ ይሳሱ። 
\v 2 ሽን ካዋ እዮራማ ናእያ፥ አካዝያሳ ምችያ ዮሳቤታ፥ ሀይቃናዉ ደእያ ካዋ ናይታ ግዶፈ አካዝያሳ ናኣ እዮኣሳ ካይሳዳ ኤካሱ። እያነ እያ ድችያሮ ኤፋዳ ኬን ቆሳዳ፥ ጎቶላ ዎናዳ አሻሱ። 
\v 3 ጎቶላ ቢታ ሃርያ ዎደ ኡባን፥ ናአይ ዮሳቤት ማታን፥ ፆሳ ኬን ኡሱፑን ላይ ቆሰትድ ደእስ።
\p
\v 4 ላፑን ላይን ዮዳሄይ ካዋ ናገይሳታነ ካዎ ጋ ናገይሳታ ሀላቃታስ ኪትድ፥ ባኮ ፆሳ ኬ ኤህስ። ኤንታራ ጫቅድ፥ ኤንታ ፆሳ ኬን ጫቅስስ፤ ኤንታ ካዋ ናኣ እዮኣሳ በስስ። 
\v 5 እ ኤንታ፥ “ህንተ ኦናባይ ሀይሳ፤ ሳምባታን ናጋናዉ ገልያ ማራይ ጋክዳ ህንተ ሄ ጩጋፐ እስ ጩጋ ካዋ ኬ ናጎ። 
\v 6 እስ ጩጋይ ሱራ ፐንግያ ናጎ፤ እስ ጩጋ ናገይሳታፐ ጉየ ባጋራ ደእያ ፐንግያ ናጎ። 
\v 7 ሳምባታ ጋላስ ናጎፐ ከይያ ሀንኮ ናምኡ ጩጋይ ኩመ ካዋ ቦላ መቶይ ጋኮና መላ ፆሳ ኬ ናጎ። 
\v 8 ኦላ ሚሸ ኦይክድ፥ ካዋ ግዶን ዎድ፥ ካዎይ ከይያ ዎደነ ገልያ ዎደ ኡባን እያራ እስፈ ደኦ። ህንተኮ ሺቅያ ኦናካ ዎተ” ያግስ።
\p
\v 9 ሄ ሀላቃት፥ ካህነይ ዮዳሄ ኪትዳባ ኡባ ኦዶሶና። ኤንቲ ኡባይ ሳምባታ ጋላሳን ናጎ ማራይ ጋክዳይሳታነ ናጉዋ ማራ ፖልዳይሳታ ኤክድ፥ ካህንያ ዮዳሄኮ ይዶሶና። 
\v 10 ካህነይ ፆሳ ኬን ደእያ፥ በን ካዋ ዳዊታ ጎንዳለታነ ቶራታ ኡባ ሀላቃታስ እሚስ። 
\v 11 ናገይሳት እሶይ እሶይ ኦላ ሚሸታ ባንታ ኩሸን ኦይክድ፥ ፆሳ ኬፈ ሀድርሳ ባጋፈ ዶምድ፥ ኡሻቻ ባጋ ጋካናዉ፥ ያርሾ በሳ ማታንነ ፆሳ ኬ ማታን ካዋ ዩሹዋን ኤቅዶሶና። 
\v 12 ዮዳሄይ ካዋ ናኣ ካረ ከስድ፥ እያ ሁጰን ካላቻ ዎስ። ህገ ማፃፋ እያዉ እምድ፥ ትይድ፥ እያ ካዎስ። አሳይ ኩሸ ባቅድ፥ ባ ቃላ ቁ ኦድ፥ “ካዎይ ብራታ ቱሱ ግዶ!” ያግስ።
\p
\v 13 ካውያ ጎቶላ ናገይሳታ ዎጫማነ አሳ ዎጫማ ስእዳ ዎደ፥ አሳኮ ፆሳ ኬ ባሱ። 
\v 14 ካዎይ ካሰ ካዎት ሀነይሳዳ ቱሳ ማታን ኤቅድይሳ በአሱ። ሀላቃትነ ሞይዘ ፑነይሳት ካዋ ማታን ደኦሶና። ሄ ቢታ አሳ ኡባይ ኡፋይትድ፥ ሞይዘ ፑንን፥ ጎቶላ ባ ማኡዋ ዳካዳ፥ “ሄኮ፥ ሀይስ ማካላ! ሀይስ ማካላ!” ያጋዳ ዋሳሱ።\x - \xo 11:14 \xo*\xt 2 ካዎ 23:3.\xt*\x*
\p
\v 15 ካህነይ ዮዳሄይ ቶራ ሞጮናታኮ፥ “ጎቶሎ ፆሳ ኬን ዎፕተ! ኢፐ ያራነ ሃራ ሳልፕዳ ሳልፐታ ግዶን ዎተ፤ እዮ አሻናዉ ቆፕያ አስ ደእኮ ዎተ!” ያግስ። 
\v 16 ኤንቲ እዮ ኦይክድ፥ ካዎ ጋ ኤፍድ፥ ፓራ ፐንግያን እዮ ዎዶሶና።
\p
\v 17 አሳይ ጎዳ አስ ግዳና መላ፥ ካዎይ ዮዳሄይነ አሳይ ጎዳራ ጫቃና መላ ኦስ። ቃስ ካዋፐነ አሳፐ ግዱዋን ጫቅስስ። 
\v 18 ሄ ዎደ ይሁዳ አሳ ኡባይ ባኣለ ኤቃ ኬ ብድ፥ ሄ ኬ ላልስ፤ ያርሾ በሳታነ እያ ምስለታ ትንቸረስ። ባኣለ ኤቃ ካህንያ ማታና ያርሾ በሳታ ስንን ዎዶሶና።
\p ሄሳፈ ጉየ፥ ካህንያ ዮዳሄይ ፆሳ ኬን ናገይሳታ ዎስ። 
\v 19 ባራ ቶራ ሞጮናታ፥ ካዋ ናገይሳታ፥ ካዎ ጋ ናገይሳታነ ይሁዳ አሳ ኡባ ኤክን፥ ኤንቲ ካዋ ፆሳ ኬፈ ዱገ ኤህስ። ናገይሳታ ፐንግያ ባጋራ ካዎ ኬ እስፈ ገልድ፥ ካዎይ ባ አራታን ኡትስ። 
\v 20 ይሁዳ አሳ ኡባይ ኡፋይትዶሶና፤ ጎቶላ ካዎ ጋን ማሻን ሀይቅዳፐ ጉየ ካታማይ ዎፑ ግስ።
\p
\v 21 እዮኣስ ካዎትያ ዎደ ላፑን ላይ ናአ።
\c 12
\s1 ይሁዳ ካዋ እዮኣሳ
\r (2 ታር 24:1-16)
\p
\v 1 እዩይ፥ እስራኤለ ቢታን ካዎትዳ ላፑን ላይን፥ እዮኣስ ይሁዳን ካዎትስ፤ እ የሩሳላመን ኦይታሙ ላይ ካዎትስ። እያ አየ ሱንይ ሳቦ፤ እያ በርሳበ ማጫስ። 
\v 2 ካህነይ ዮዳሄይ፥ እያ ታማርስዳነ ዞርዳ ግሾ፥ እ ደእዳ ላይ ኡባን እዮኣስ ጎዳ ስንን ሱረባ ኦስ። 
\v 3 አሳይ ሄ በሳን ያርሾነ እፃነ ጩይሰ አግቦና ግሾ፥ ቃ ጎይኖ በሳታ ይስቤና።
\p
\v 4 እዮኣስ ካህነታ ፄግድ፥ “ፆሳ ኬ ያ ጌሻ ሚሸ ኡባ ሺሽተ። ሄስካ ሁጰ ታይቡዋ ዎደ እመትያ ሚሽያነ አሳይ ባ ሸነን ፆሳ ኬ ኤህያ ሚሽያ።\x - \xo 12:4 \xo*\xt ከሳ 30:11-16.\xt*\x* 
\v 5 ካህነት ኡባይ ሄ ሚሽያ ኤህያ አሳፐ ባንታ ግሹዋ ግሹዋ ኤክድ፥ ፆሳ ኬ ግዶን ኢትዳ ኡባ ሎይና” ያግስ።
\p
\v 6 ሽን ካዎይ እዮኣስ ካዎትዳ ላታማነ ሄን ላይ ጋካናዉ፥ ካህነት ፆሳ ኬ ኦራቦኮና። 
\v 7 ካዎይ እዮኣስ ካህንያ ዮዳሄነ ሀራ ካህነታ ፄግድ፥ “ፆሳ ኬ ግዶን ኢትዳ በሳታ አይስ ኦራከቲ? ሚሸ ፆሳ ኬ ኦራናዉ እምተፐ አትሽን፥ ህንተዉ እመትያ ሚሽያ ህንተ ኩሸን ኦይኮፍተ” ያግስ።
\p
\v 8 ካህነት፥ “አሳፐ ሀራ ሚሸ ኤኮኮ፤ ፆሳ ኬ ግዶን ኢትዳ በሳ ኦራና” ያግድ ዛርዶሶና።
\p
\v 9 ያትን፥ ካህንያ ዮዳሄይ እስ ሳፅነ ኤክድ፥ እያ ካማ ሉክድ፥ ያርሾ በሳ ማታን ፆሳ ኬ ገልያ ፐንግያ ኡሻቻ ባጋራ ዎስ። ፐንግያ ናግያ ካህነት ፆሳ ኬ ይዳ ሚሽያ ኡባ ሳፅንያን የጎሶና። 
\v 10 ኤንቲ ሳፅንያን ዳሮ ሚሸይ ዳጋየትዳይሳ በእዳ ዎደ ኡባን፥ ካዎ ፃፈይነ ካህነ ሀላቃይ ይድ፥ ሚሽያ ታይብድ፥ ካርፂታን ቆሎሶና።
\p
\v 11 ታይበትዳ ሚሽያ ሳላእዳፐ ጉየ፥ ፆሳ ኬ ኦሱዋ ፄላና መላ ሱንትዳ አሳስ እሞሶና። ኤንቲ ሚሽያ ኤክድ፥ ፆሳ ኬን አናፀታስነ ግምበይሳት እሞሶና። 
\v 12 ሚሽያ ሹቹ ማሰይሳታስነ ቆኤይሳታስ ቃንፃናዉ፥ ፆሳ ኬ ኦራናዉ፥ ሳንቃ፥ ሹቹነ ኮሽያ ሀራባታ ሻማናዉ ጎኤቶሶና። 
\v 13 ፆሳ ኬ ይዳ ሚሽያፐ ፆሳ ኬ ብራ ቡርጩኮታ፥ ቃጰታ፥ ከረታነ ሞይዘታ ዎይኮ ዎርቃነ ብራ ሚሸታ ኦናዉ ከስቦኮና። 
\v 14 ሄ ሚሸ ኡባይ ፆሳ ኬ ኦራያ አሳስ ቃንፀትስ። 
\v 15 ፆሳ ኬ ኦሱዋ ፄላናዉ ሱንትዳ አሳት አማነትዳ አስ ግድዳ ግሾ፥ “ሚሽያን አይ አይ ኦደቲ?” ያግድ ኦይችዳ አስ ኦንካ ባዋ።\x - \xo 12:15 \xo*\xt 2 ካዎ 22:7.\xt*\x* 
\v 16 ናቆ ያርሾነ ናጋራ ያርሾስ ቃንፀትያ ሚሸይ ካህነታስ ገለስፐ አትሽን፥ ፆሳ ኬ ኦራያ ሚሸ ሳፅንያን ገለና።\x - \xo 12:16 \xo*\xt ሌወ 7:7.\xt*\x*
\p
\v 17 ሄ ዎደ አራመ ካዎይ አዛሄል ብድ፥ ጋተ ካታማ ኦልድ ኦይክስ። ካልድ የሩሳላመ ኦላናዉ ስምስ። 
\v 18 ሽን ይሁዳ ካዎይ እዮኣስ እያፐ ካሰ ካዎትዳ ይሁዳ ካዎት እዮሳፈፅ፥ እዮራምነ አካዝያስ ጎዳስ ዱማይዳ ሚሸታ፥ ባ እሞታ፥ ፆሳ ኬ እሞታነ ካዎ ጋ ሻሎ ምንጅያ በሳን ደእያ ዎርቃ ኡባ ኤክስ። አራመ ካዋስ አዛሄላስ የድን፥ አዛሄል የሩሳላመ ኦላናዉ ደንዶይሳ አጋግስ።
\p
\v 19 ካዎይ እዮኣስ ሀንዳ ሀራባይነ እ ኦዳባ ኡባይ ይሁዳ ካዎታ ታርከ ማፃፋን ፃፈትስ። 
\v 20 ሄሳፈ ጉየ፥ እያ ሞርናት እያ ቦላ ማቀትድ፥ ሲላ ኤፍያ ኦግያን ሚሎ ጌተትያ ኬን ዎዶሶና። 
\v 21 እያ ዎዳ ኦሳንቾት ስምአታ ናኣ ዮዛካራነ ሾሜራ ናኣ ዮዛባታ። እዮኣስ ዳዊቲ ካታማን ባ ማይዛታ ዱፎን ሞገትስ፤ እያ በሳን እያ ናአይ አማስያስ ካዎትስ።
\c 13
\s1 እስራኤለ ካዋ እዮአካዛ
\p
\v 1 አካዝያሳ ናአይ፥ ይሁዳ ካዎይ እዮኣስ ካዎትዳ ላታማነ ሄን ላይን፥ እዩ ናአይ እዮአካዝ እስራኤለ ቦላ ካዎትስ፤ እ ሳማረን ኡትድ ታማነ ላፑን ላይ ካዎትስ። 
\v 2 እ፥ እስራኤለ አሳ ባለዳ እዮርባማ ሶ አሳ ናጋራ ካልድ፥ ጎዳ ስንን ኢታባ ኦስ፤ እ ሄ ናጋራ ኦሶ አግቤና። 
\v 3 ሄሳ ግሾ፥ ጎዳ ሀንቆይ እስራኤለ ቦላ ሱልስ፤ ጎዳይ ኤንታ ዳሮ ዎደ አራመ ካዋ አዛሄላ፥ ሄሳዳካ እያ ናኣ ዎልደ-አዳራ ኩሸን አድ እሚስ።
\p
\v 4 ሄሳፈ ጉየ፥ እዮአካዝ ጎዳ ዎስስ። ጎዳይ እያ ዎሳ ስእስ፤ ሶረ ካዎይ እስራኤለ አይ መላ ኢታ መቶን ኡንኤዳኮ ጎዳይ በእስ። 
\v 5 እስራኤለ አሳ አሽያ አስ እምን፥ ኤንታ አራመ ኩሸፐ ከስ ኤክዶሶና። እስራኤለ አሳይ ካሰይሳዳ ባንታ ሶን ሳሮን ደእዶሶና። 
\v 6 ሄስ ሀንንካ እስራኤለ አሳ ባለዳ እዮርባማ ሶ አሳ ናጋራፐ ስምቦኮና፤ ኤንቲ ሄ ናጋራ ኦሶ አግቦኮና። ቃስ አሼራ ጌተትያ ፆሰ ኤቃ ምስለይ ሳማረን ኤቅድ ደኤስ። 
\v 7 እዮአካዛስ እሻታሙ ፓራ አሳታ፥ ታሙ ጋረታ፥ 10,000 ቶሆ ኦላንቾታ፥ ሀራ ኦላንቾታ ፃላል አትዶሶና። አራመ ካዎይ ኤንታ ይስስ፤ እ ኤንታ ዉዱማን ደእያ ሱላዳ ኦስ።
\p
\v 8 እዮአካዝ ሀንዳ ሀራባይ፥ እ ኦዳባ ኡባይነ እያ ምኖተይ እስራኤለ ካዎታ ታርከ ማፃፋን ፃፈትስ። 
\v 9 እዮአካዝ ሀይቅድ፥ ባ ማይዛታ ጋክስ፤ እያ በሳን እያ ናአይ ዮኣስ ካዎትስ።
\s1 እስራኤለ ካዋ ዮኣሳ
\p
\v 10 ይሁዳ ካዎይ እዮኣስ ካዎትዳ ሀስታማነ ላፑን ላይን፥ እዮአካዛ ናአይ ዮኣስ ሳማረን እስራኤለ ቦላ ካዎትስ፤ እ ታማነ ኡሱፑን ላይ ካዎትስ። 
\v 11 ዮኣስ ጎዳ ስንን ኢታባ ኦስ። እስራኤለ አሳ ባለዳ ናባፃ ናኣ እዮርባማ ናጋራፐ እሱዋካ አሾና ኦስ፤ እ ሄ ናጋራ ኦሶ አግቤና።
\p
\v 12 ዮኣስ ሀንዳ ሀራባይ፥ እ ኦዳባ ኡባይነ ይሁዳ ካዋ አማስያሳራ ኦለትዳ ኦላይ እስራኤለ ካዎታ ታርከ ማፃፋን ፃፈትስ። 
\v 13 ዮኣስ ሀይቅድ፥ ባ ማይዛታ ጋክስ፤ ሳማረን እስራኤለ ካዎታራ ሞገትስ። እያ በሳን እያ ናአይ እዮርባም ካዎትስ።
\s1 ኤልሳ ሀይቁዋ
\p
\v 14 ኤልስ ሀይቆስ ጋያ ሀርገ ሀርገትስ፤ እስራኤለ ካዎይ ዮኣስ እያ በአናዉ ብድ፥ “ታ አዋዉ፤ ታ አዋዉ፥ ኔኒ እስራኤለ አሳስ ዎልቃነ ጎንዳለ!”\x - \xo 13:14 \xo*\xt 2 ካዎ 2:12.\xt*\x* ያግድ ዬክስ።
\p
\v 15 ኤልስ፥ “ዶንገነ ዶንገ ቶራ ኤካዳ ያ” ያግን፥ ዮኣስ ኤህስ።
\p
\v 16 ኤልስ ካዋኮ፥ “ዶንግያ ጊግሳ ኦይካ” ያግስ፤ እ ዶንግያ ጊግስድ ኦይክዳሽን፥ ኤልስ ባ ኩሽያ ካዋ ኩሽያ ቦላ ዎስ።
\p
\v 17 ኤልስ፥ “ዶሎሀ ባጋ ማስኮትያ ዶያ” ያግስ። እ ዶይን፥ ኤልስ፥ “ዶንገ ቶራን ዱካ” ያግስ። እ ዱክን ኤልስ፥ “ሀይስ ጎዳ ዶንገ! ሀይስ አራመ አሳ ፆንያ ዶንገ! ኔኒ አራመ አሳ አፌቃን ፆናና ጋካናዉ ኦላና” ያግስ።
\p
\v 18 ሄሳፈ ጉየ፥ ኤልስ ካዋኮ፥ “ዶንገ ቶራታ ኤካ” ያግስ። እ ኤክን፥ ኤልስ፥ “ቢታ ጫዳ” ያግስ። እ ሄ ቶሆ ቢታ ጫድድ አጋግስ። 
\v 19 ፆሳ አደይ፥ ካዋ ቦላ ሀንቀትድ፥ “እቻሹ ቶሆ ዎይኮ ኡሱፑን ቶሆ ቢታ ጫድዳባ ግድያኮ፥ ኔኒ አራመ አሳ ፆናዳ ኩመ ይሳናሽን! ኔኒ ሀእ ኤንታ ሄ ቶሆ ፃላላ ፆናና” ያግስ።
\p
\v 20 ኤልስ ሀይቅድ ሞገትስ። ሞአበ ፓኖት እስራኤለ ቢታ ቦላ ላይን ላይን ደንዶሶና። 
\v 21 እስ ጋላስ ጉ እስራኤለ አሳት እስ ኡራ አሀ ሞግሸ፥ ሄኮ፥ ሞአበ ፓኖታ በእዶሶና። ኡራ አሀ ኤልሳ ዱፉዋ ግዶ ሆልድ ባቃትዶሶና። አሀይ ኤልሳ መቀ ቦላ ዎድ፥ ፓፅድ ደንድ ኤቅስ።
\p
\v 22 እዮአካዝ ካዎትዳ ላይ ኡባን ሶረ ካዎይ አዛሄል እስራኤለ ኡንኤስ። 
\v 23 ሽን ጎዳይ አብራሃመራ፥ ይሳቃራነ ያይቆባራ ጫቅዳ ጫቁዋ ግሾ፥ ኤንታዉ ኬህስ፥ ቃትስ፥ ቆፕስ። ሀች ጋካናዉ እ ኤንታ ይስቤና ዎይኮ ባ ስንፈ ድግቤና።
\p
\v 24 አራመ ካዎይ አዛሄል ሀይቅን፥ እያ በሳን እያ ናአይ ዎልደ-አዳር ካዎትስ። 
\v 25 አዛሄል እያ አዋ እዮአካዝ ኦላን ኦይክዳ ካታማታ፥ እዮአካዛ ናአይ ዮኣስ አዛሄላ ናኣ ዎልደ-አዳራፐ ኤክስ። ዮኣስ እያ ሄ ቶሆ ፆንድ፥ እስራኤለ ካታማታ ዛርስ።
\c 14
\s1 ይሁዳ ካዋ አማስያሳ
\r (2 ታር 25:1-24)
\p
\v 1 እዮአካዛ ናአይ፥ እስራኤለ ካዎይ ዮኣስ ካዎትዳ ናምአን ላይን፥ ይሁዳ ካዋ እዮኣሳ ናአይ አማስያስ ካዎትስ። 
\v 2 እ ካዎትያ ዎደ ላይ እያዉ ላታማነ እቻሻ፤ እ የሩሳላመን ላታማነ ኡዱፉን ላይ ካዎትስ። እያ አየ ሱንይ ዮዳኖ፤ እያ የሩሳላመ ማጫስ። 
\v 3 አማስያስ ጎዳ ስንን ሱረባ ኦስ፤ ሽን እያ ማይዛይ ዳዊቲ ኦዳይሳዳ ግዶናሽን፥ ባ አዋ እዮኣሳ ኦግያ ካልስ። 
\v 4 አሳይ ቃ ጎይኖ በሳታ ይስቤና፤ አሳይ ሄ በሳን ያርሾ ያርሸይሳነ እፃነ ጩይሰይሳ አግቦኮና።
\p
\v 5 አማስያስ ካዎተ ምንድ ኦይክዳፐ ጉየ፥ ካሰ ካዋ፥ ባ አዋ እዮኣሳ ዎዳ ሹማታ ዎስ። 
\v 6 ሙሰ ህገ ማፃፋን ፃፈትዳይሳዳ፥ ጎዳይ፥ “ናይት ኦዳ ናጋራ ግሾ፥ አዋታ ዎናዉ በሰና፤ ቃስ አዋት ኦዳ ናጋራ ግሾ፥ ናይታ ዎናዉ በሰና። አስ ኡባይ ባ ኦዳ ናጋራን ናጋራን ሀይቃናዉ በሴስ”\x - \xo 14:6 \xo*\xt ዛረ 24:16.\xt*\x* ያግድ ኪትዳይሳዳ ባ አዋ ዎዳ አሳ ናይታ ዎቤና። 
\v 7 አማስያስ ማፅነ ዛንጋራን ታሙ ሙኩሉ ኤዶመ አሳ ዎድ፥ ሴላ ካታማ ኦላን ኦይክድ፥ ሄ በሳ ዮቅትኤላ ግድ ሱንስ፤ ሀች ጋካናዉ ሄ ሱንን ፄገቴስ።
\p
\v 8 ሄሳፈ ጉየ፥ አማስያስ እዩ ናኣ ናኣ፥ እዮአካዛ ናኣ፥ ዮኣሳኮ፥ “ሃያ፤ አነ ናምአይ ኦላ ጋሄቶስ” ያግድ አሰ ኪትድ ማንድስ። 
\v 9 ሽን እስራኤለ ካዎይ ዮኣስ፥ ይሁዳ ካዋ አማስያሳኮ፥ “ልባኖሰን ደእያ ክንቾተይ፥ ልባኖሰን ደእያ ዝጋኮ፥ ‘ነ ናእዉ ታ ናኣስ እማ’ ያግስ። ሽን ልባኖሰን ደእያ እስ ዶአይ ያራ ካንድ፥ ሄ ክንቾትያ የስ። 
\v 10 ኤ፥ ኔኒ ቱማ ኤዶመ ቢታ ፆናዳሳ፤ ሀእ ኦቶርታዳሳ። ኔኒ ነ ፆኑዋን ኡፋይታዳ፥ ነ ሶን ዎፑ ጋዳ ኡታ። ነ ቦላነ ነ ቢታ ይሁዳ ቦላ መቶነ ዮ ኤህያባ አይስ ደንይ?” ያግድ ዛርስ።
\p
\v 11 ሽን አማስያስ እያ ስእቤና። እስራኤለ ካዎይ ዮኣስ ኦላስ ከይን፥ እነ ይሁዳ ካዎይ አማስያስ ይሁዳን ደእያ ቤት-ሳሜሳ ካታማን ኦላ ጋሄትዶሶና። 
\v 12 እስራኤለይ ይሁዳ ፆንን፥ ይሁዳ አሳ ኡባይ ባቃትድ፥ ባንታ ሶ ባንታ ሶ ብዶሶና። 
\v 13 እስራኤለ ካዎይ ዮኣስ አካዝያሳ ናኣ ናኣ፥ እዮኣሳ ናኣ፥ ይሁዳ ካዋ አማስያሳ ቤት-ሳሜሳ ካታማን ድእስ። የሩሳላመ ድርሳ ግምብያ፥ ኤፍሬማ ፐንግያፈ ብድ፥ ማዛነ ፐንግያ ጋካናዉ ደእያ ኦይዱ ፄቱ ዋ ግድያ በሳ ላልስ። 
\v 14 ፆሳ ኬንነ ካዎ ጋን ሻሎ ምንጅያ ኬን ደእያ ዎርቃ፥ ብራነ ሚሸ ኡባ ኤክስ፤ ቃስ ኦይ ግድድ ድኤትዳ አሳካ ኤክድ፥ ሳማረ ስምስ።
\p
\v 15 ዮኣስ ሀንዳ ሀራባይ፥ እ ኦዳባይ፥ እያ ምኖተይነ ይሁዳ ካዋ አማስያሳራ ኦለትዳባይ እስራኤለ ካዎታ ታርከ ማፃፋን ፃፈትስ። 
\v 16 ዮኣስ ሀይቅድ፥ ባ ማይዛታ ጋክስ፤ ሳማረን እስራኤለ ካዎታራ ሞገትስ። እያ በሳን እያ ናአይ እዮርባም ካዎትስ።
\p
\v 17 እዮአካዛ ናአይ፥ እስራኤለ ካዎይ ዮኣስ ሀይቅዳፐ ጉየ፥ ዮኣሳ ናአይ፥ ይሁዳ ካዎይ አማስያስ ታማነ እቻሹ ላይ ደእስ። 
\v 18 አማስያስ ሀንዳ ሀራባይ ይሁዳ ካዎታ ታርከ ማፃፋን ፃፈትስ።
\p
\v 19 አማስያሳ ዎናዉ አሳይ የሩሳላመን ማቀትስ፤ ያትን እ ላክሶ ካታማ ባቃትስ። ሽን ኤንቲ እያ ጌዶ ላክሶ ካታማ አሰ ኪትን፥ እያ ያን ዎዶሶና። 
\v 20 ዎድ እያ አሀ ፓራን ጫን ኤህድ፥ ዳዊታ ካታማን የሩሳላመን እያ ማይዛታራ ሞግዶሶና። 
\v 21 ሄሳፈ ጉየ፥ ይሁዳ አሳ ኡባይ ታማነ ኡሱፑን ላይ ናኣ አዛርያሳ እያ አዋ አማስያሳ በሳን ካዎዶሶና። 
\v 22 እያ አዋይ አማስያስ ሀይቅዳፐ ጉየ፥ አዛርያስ ኤላታ ካታማ ዛር ኬፅድ፥ ይሁዳን ጋስ።
\s1 እስራኤለ ካዋ ናምአን እዮርባማ
\p
\v 23 እዮኣሳ ናአይ፥ ይሁዳ ካዎይ አማስያስ ካዎትዳ ታማነ እቻሻን ላይን፥ እስራኤለ ካዋ ዮኣሳ ናአይ እዮርባም ሳማረን ካዎትስ፤ እ ኦይታማነ እስ ላይ ካዎትስ። 
\v 24 ናምአን እዮርባም ጎዳ ስንን ኢታባ ኦስ፤ እስራኤለ አሳ ናጋራ ኦስስዳ ናባፃ ናኣ እዮርባም ኦግያፐ ሃክቤና። 
\v 25 ጋት-ሄፈራ አድያ አማተ ናኣ ናብያ፥ ባ አይልያ ዮናሳ ባጋራ ጎዳይ እስራኤለ ፆሳይ ባ ቃላን ኦድዳይሳዳ፥ ሀማታ ፕኑዋ ጌተትያ በሳፈ ዶምድ፥ ማፅነ አባ ጋካናዉ ደእያ እስራኤለ ዛዋ ዮኣሳ ናአይ እዮርባም ፆንድ ዛርስ።\x - \xo 14:25 \xo*\xt ዮና 1:1.\xt*\x* 
\v 26 እስራኤለን አሳ ኡባይ አይለ ግድን፥ ዎማኖ ግድን፥ አይ መላ ኡንኤትዳኮ፥ ጎዳይ በእስ፤ ኤንታ ማድያ ኦንካ ባዋ። 
\v 27 ጎዳይ እስራኤለ አሳ ሱን ሳሎፐ ጋርሳን ቁቻና ግቤና። ሄሳ ግሾ፥ ጎዳይ ኤንታ ዮኣሳ ናኣ እዮርባማ ባጋራ አሽስ።
\p
\v 28 እዮርባም ሀንዳ ሀራባይ፥ እ ኦዳባ ኡባይ፥ ኦለትዳባይነ ይሁዳ ባጋ ግድዳ ዳማስቆነ ሀማታ ካታማታ እስራኤለስ ዛርዳባይ እስራኤለ ካዎታ ታርከ ማፃፋን ፃፈትስ። 
\v 29 እዮርባም ሀይቅድ፥ ባ ማይዛታ፥ እስራኤለ ካዎታ ጋክስ፤ እያ በሳን እያ ናአይ ዛካርያስ ካዎትስ።
\c 15
\s1 ይሁዳ ካዋ አዛርያሳ
\r (2 ታር 26:1-23)
\p
\v 1 እስራኤለ ካዎይ እዮርባም ካዎትዳ ላታማነ ላፑን ላይን፥ ይሁዳ ካዋ አማስያሳ ናአይ አዛርያስ ካዎትስ። 
\v 2 እ ካዎትዳ ዎደ፥ እያዉ ላይ ታማነ ኡሱፑና፤ እ የሩሳላመን እሻታማነ ናምኡ ላይ ካዎትስ። እያ አየ ሱንይ ይኮሎ፤ እያ የሩሳላመ ማጫስ። 
\v 3 እያ አዋይ አማስያስ ኦዳይሳዳ፥ እካ ጎዳ ስንን ሱረባ ኦስ። 
\v 4 ግዶሽን፥ ሄ በሳን ያርሾ ያርሸይሳነ እፃነ ጩይሰይሳ አሳይ አግቦና ግሾ፥ ቃ ጎይኖ በሳታ ይስቤና፤ 
\v 5 ጎዳይ አዛርያሳ ጉ ጎጋ ሀርገን ኦይስ፤ ሀይቃና ጋካናዉ ሄ ሀርገይ እያ የድቦና ግሾ፥ ዱማ ኬን ባርካ ደእስ። ሄ ዎደ ካዋ ናአይ እዮአታም ካዎ ጋን ደእድ፥ ቢታ ሃርስ።
\p
\v 6 አዛርያስ ሀንዳ ሀራባይነ እ ኦዳባ ኡባይ ይሁዳ ካዎታ ታርከ ማፃፋን ፃፈትስ። 
\v 7 አዛርያስ ሀይቅድ፥ ባ ማይዛታ ጋክስ፤ ዳዊታ ካታማን ባ ማይዛታራ ሞገትስ። እያ በሳን እያ ናአይ እዮአታም ካዎትስ።\x - \xo 15:7 \xo*\xt እሳ 6:1.\xt*\x*
\s1 እስራኤለ ካዋ ዛካርያሳ
\p
\v 8 ይሁዳ ካዎይ አዛርያስ ካዎትዳ ሀስታማነ ሆስፑን ላይን፥ እዮርባማ ናአይ ዛካርያስ እስራኤለ ቦላ ሳማረን ካዎትስ፤ እ ኡሱፑን አጌና ካዎትስ። 
\v 9 እያ ማይዛት ኦዳይሳዳ፥ እካ ጎዳ ስንን ኢታባ ኦስ፤ ናባፃ ናአይ እዮርባም እስራኤለ አሳ ኦስስዳ ናጋራ ኦሶ አግቤና። 
\v 10 እያቤሳ ናአይ ሳሎም ዛካርያሳ ቦላ ማቀትድ፥ ይብላማ ጌተትያ በሳን ዎድ እያ በሳን ባዉ ካዎትስ።
\p
\v 11 ዛካርያስ ሀንዳ ሀራባይነ እ ኦዳባ ኡባይ እስራኤለ ካዎታ ታርከ ማፃፋን ፃፈትስ። 
\v 12 ሄሳዳ ሀንድ፥ ጎዳይ እዩስ፥ “ነ ኮቻይ ኦይዳን የለታ ጋካናዉ፥ እስራኤለ ካዎተ አራታን ኡታና” ያግድ ኦድዳ ቃላይ ፖለትስ።\x - \xo 15:12 \xo*\xt 2 ካዎ 10:30.\xt*\x*
\s1 እስራኤለ ካዋ ሳሎማ
\p
\v 13 ይሁዳ ካዎይ ኦዝያን ካዎትዳ ሀስታማነ ኡዱፉን ላይን፥ ያበሳ ናአይ ሳሉም ካዎትስ፤ እ ሳማረን እስ አጌና ካዎትስ። 
\v 14 ጋደ ናአይ ምናሄም ትርሳ ካታማፐ ሳማረ ብስ። ሳማረን ደእያ ያበሳ ናኣ ሳሉማ ዎድ እያ በሳን ባዉ ካዎትስ።
\p
\v 15 ሳሉም ሀንዳ ሀራባይነ እ ማቀትዳ ማቆይ እስራኤለ ካዎታ ታርከ ማፃፋን ፃፈትስ። 
\v 16 ሄ ዎደ ምናሄም ትርሳፈ ደንድድ፥ ትፍሳነ፥ ያን ደእያ አሳነ ካታማ ሄራን ደእያ ቢታታ ኡባ ኦልስ። ኤንቲ ባንታ ካታማ ድርሳ ፐንግያ እያዉ ዶዮና እፅዳ ግሾ፥ ትፍሳ ኦልድ ይስስ፤ ቃስ ያን ደእያ ቃን ማጫሳ ኡባ ኡሉዋ ዳክስ።
\s1 እስራኤለ ካዋ ምናሄማ
\p
\v 17 ይሁዳ ካዎይ አዛርያስ ካዎትዳ ሀስታማነ ኡዱፉን ላይን፥ ጋደ ናአይ ምናሄም እስራኤለ ቦላ ካዎትስ፤ እ ሳማረን ታሙ ላይ ካዎትስ። 
\v 18 እ ጎዳ ስንን ኢታባ ኦስ፤ ናባፃ ናአይ እዮርባም እስራኤለ አሳ ኦስስዳ ናጋራፐ ሃክቤና።
\p
\v 19 ሄሳፈ ጉየ፥ አሶረ ካዎይ ተልገልተልፈልሶር እስራኤለ ቦላ ደንድስ። ካዎተን ባና ምንና መላነ ማዳና መላ፥ ምናሄም ተልገልተልፈልሶራስ 34,000 ክሎ ግራመ ብራ ሳንትመ እሚስ። 
\v 20 ምናሄም ሄ ሚሽያ እስራኤለ አሳ ዎልቃን ከስስ፤ አሶረ ካዋስ እማናዉ ዱረ አስ ኡባይ እሶይ እሶይ እሻታሙ ብራ ሳንትመ ከስዶሶና። ሄሳዳ ኦን፥ አሶረ ካዎይ እስራኤለ ቢታ አግድ፥ ባ ቢታ ስምስ።
\p
\v 21 ምናሄም ሀንዳ ሀራባይነ እ ኦዳባ ኡባይ እስራኤለ ካዎታ ታርከ ማፃፋን ፃፈትስ። 
\v 22 ምናሄም ሀይቅድ፥ ባ ማይዛታን ጋሄትስ፤ እያ በሳን እያ ናአይ ፓቅስያስ ካዎትስ።
\s1 እስራኤለ ካዋ ፋቅስያሳ
\p
\v 23 ይሁዳ ካዎይ አዛርያስ ካዎትዳ እሻታማን ላይን፥ ምናሄማ ናአይ ፓቅስያስ እስራኤለ ቦላ ሳማረን ካዎትስ፤ እ ናምኡ ላይ ካዎትስ። 
\v 24 ፓቅስያስ ጎዳ ስንን ኢታባ ኦስ፤ ናባፃ ናአይ እዮርባም እስራኤለ አሳ ኦስስዳ ናጋራ ኦሶ አግቤና። 
\v 25 እያ ቶራ ሞጮናታፐ እሶይ፥ ራማላ ናአይ ፓቁሄይ እያ ቦላ ማቀትድ ደንድስ። ጋላዳ አሳፐ እሻታሙ አደታ ባራ ኤክድ፥ ሳማረን ካዎ ጋን ደእያ ሚፃ ገልስ። ፓቁሄይ፥ ፓቅስያሳ፥ አርጎባነ አርያ እስፈ ዎድ እያ በሳን ባዉ ካዎትስ።
\p
\v 26 ፓቅስያስ ሀንዳ ሀራባይነ ኦዳባ ኡባይ እስራኤለ ካዎታ ታርከ ማፃፋን ፃፈትስ።
\s1 እስራኤለ ካዋ ፋቁሄ
\p
\v 27 ይሁዳ ካዎይ አዛርያስ ካዎትዳ እሻታማነ ናምአን ላይን፥ ራማላ ናአይ ፓቁሄይ እስራኤለ ቦላ ሳማረን ካዎትስ፤ እ ላታሙ ላይ ካዎትስ። 
\v 28 ፓቁሄይ ጎዳ ስንን ኢታባ ኦስ፤ ናባፃ ናአይ እዮርባም እስራኤለ አሳ ኦስስዳ ናጋራፐ ሃክቤና።
\p
\v 29 እስራኤለ ካዋ ፓቁሄ ዎድያን አሶረ ካዎይ ተልገልተልፈልሶር ይድ፥ እዮና፥ አቤል-ቤት-ማእካ፥ ያኖሀ፥ ቃደሳነ ሀፆራ ኦልድ ኦይክስ፤ ቃስ ጋላዳ፥ ጋልላነ ንፍታለመ ቢታ ኡባ ኦልድ፥ አሳ ድእድ አሶረ ቢታ ኤፍስ።
\p
\v 30 አዛርያሳ ናአይ እዮአታም ካዎትዳ ላታማን ላይን፥ ኤላ ናአይ ሆሰይ ራማላ ናኣ ፓቁሄ ቦላ ማቀትድ ዎድ፥ እያ በሳን ባዉ ካዎትስ።
\p
\v 31 ፓቁሄይ ሀንዳ ሀራባይነ ኦዳባ ኡባይ እስራኤለ ካዎታ ታርከ ማፃፋን ፃፈትስ።
\s1 ይሁዳ ካዋ እዮአታማ
\r (2 ታር 27:1-9)
\p
\v 32 ራማላ ናአይ፥ እስራኤለ ካዎይ ፓቁሄይ ካዎትዳ ናምአን ላይን፥ ይሁዳ ካዋ አዛርያስ ናአይ እዮአታም ካዎትስ። 
\v 33 እዮአታም ካዎትያ ዎደ እያዉ ላይ ላታማነ እቻሻ፤ እ የሩሳላመን ታማነ ኡሱፑን ላይ ካዎትስ። እያ አየ ሱንይ ያሩሾ፤ ያሩሻ ሳዶቃ ናእዉ። 
\v 34 ባ አዋይ አዛርያስ ኦዳይሳዳ፥ እዮአታም ጎዳ ስንን ሱረባ ኦስ። 
\v 35 ግዶሽን፥ ሄ በሳን ያርሾነ እፃነ ጩይሰ አግቦና ግሾ፥ አሳይ ቃ ጎይኖ በሳታ ይስቤና። እዮአታም ፆሳ ኬ ገልያ ቆሞ ባጋ ፐንግያ ዛሪድ ኬፅስ።
\p
\v 36 እዮአታም ሀንዳ ሀራባይነ ኦዳባ ኡባይ ይሁዳ ካዎታ ታርከ ማፃፋን ፃፈትስ። 
\v 37 ሄ ዎደ ጎዳይ አራመ ካዋ ራአሶናነ ራማላ ናኣ፥ እስራኤለ ካዋ ፓቁሄ ይሁዳ ቢታ ኦላና መላ ደንስ። 
\v 38 እዮአታም ሀይቅድ፥ ባ አዋ ዳዊታ ካታማን ባ ማይዛታራ ሞገትስ፤ እያ በሳን እያ ናአይ አካዝ ካዎትስ።
\c 16
\s1 ይሁዳ ካዋ አካዛ
\r (2 ታር 28:1-27)
\p
\v 1 ራማላ ናአይ ፓቁሄይ ካዎትዳ ታማነ ላፑን ላይን፥ እዮአታማ ናአይ አካዝ ይሁዳን ካዎትስ። 
\v 2 እ ካዎትያ ዎደ ላይ እያዉ ላታማ፤ የሩሳላመን ታማነ ኡሱፑን ላይ ካዎትስ። እያ ማይዛይ ዳዊቲ ሱረባ ኦዳይሳዳ፥ ጎዳ ባ ፆሳ ስንን ሱረባ ኦቤና። 
\v 3 እ ካሰ ደእዳ እስራኤለ ካዎታ ኦግያን ሄመትስ። ቃስ ጎዳይ እስራኤለ አሳ ስንፈ ጎድድ ከስዳ አሳታ ዎጋ፥ እፀትዳ ኦግያ ካልድ፥ ባ አደ ናኣ ታማራ አድ ያርሽስ።\x - \xo 16:3 \xo*\xt ዛረ 12:31፤ 18:10.\xt*\x* 
\v 4 አካዝ ቃ ጎይኖ በሳታን፥ ዙማታ ቦላነ ዳሻ ምታ ኡባ ጋርሳን ያርሾ ያርሽስ፤ እፃነ ጩይስስ።
\p
\v 5 ሄሳፈ ጉየ፥ አራመ ካዎይ ራአሶንነ ራማላ ናአይ፥ እስራኤለ ካዎይ ፓቁሄይ የሩሳላመ ኦላናዉ ይድ ተቅዶሶና፤ ሽን አካዛ ፆናናዉ ዳንዳእቦኮና።\x - \xo 16:5 \xo*\xt እሳ 7:1.\xt*\x* 
\v 6 ሄ ዎደ አራመ ካዎይ ራአሶን ኤላታ ካታማ ዛር ኤክድ፥ ይሁዳ አሳ ጎድድ ከስስ። ያትን ኤዶመ አሳት ኤላታ ካታማ ይድ፥ ሀች ጋካናዉ ያን ደኦሶና።
\p
\v 7 ሄሳ ግሾ፥ አካዝ አሶረ ካዋ ተልገልተልፈልሶራኮ ኪታ የድድ፥ “ታኒ ነ ናአነ ነ አይለ። ሀያና ሃያ፤ ታና ኦልያ አራመ ካዋ ኩሸፐነ እስራኤለ ካዋ ኩሸፐ አሻ” ያግስ። 
\v 8 ቃስ አካዝ ፆሳ ኬነ ካዎ ጋን ሻሎ ምንጅያ በሳን ደእያ ብራነ ዎርቃ ኤክድ፥ አሶረ ካዋስ እሞታ ኦድ የድስ። 
\v 9 አካዛ ኦይሻ ኤክድ፥ አሶረ ካዎይ ዳማስቆ ካታማ ኦል ኦይክድ፥ አሳ ድእድ፥ ቂራ ኤፍስ፤ ካዋ ራአሶናካ ዎስ።
\p
\v 10 ካዎይ አካዝ አሶረ ካዋ ተልገልተልፈልሶራራ ጋሄታናዉ ዳማስቆ ብስ። ዳማስቆን ደእያ ያርሾ በሳ በእድ፥ እያ ዳንያ ያርሾ በሲ ኬፃና መላ፥ ሄ ያርሾ በሳ ምስልያነ ኬፅያ ሀኖታ ካህንያ ኡራያ ኪትስ። 
\v 11 ካዎይ አካዝ ዳማስቆፈ ስሚድ ያናስ፥ ካህነይ ኡራይ እያ ዳንያ ያርሾ በሲ ጊግስስ።
\p
\v 12 ካዎይ ዳማስቆፈ ስምዳ ዎደ፥ ያርሾ በሳይ ኦሰትድ ፖለትዳይሳ በእድ፥ ያርሾ በሳኮ ሺቅድ፥ 
\v 13 ፁሳ ያርሾነ ካ ያርሾ ያርሽስ። ቃስ ኡሻ ያርሹዋ ጉስስ፤ እስፈተ ያርሾ ሱካ ያርሾ በሳ ቦላ ርጭስ። 
\v 14 ናሰ ብራታፐ ኦሰትድ፥ ጎዳስ ዱማትድ ኡትዳ ያርሾ በሳይ፥ ኦራ ያርሾ በሳፈነ ፆሳ ኬፈ ግዶን ደኤስ። አካዝ ሄ ጋልአ ያርሾ በሳ ደንድ፥ ባ ኦስስዳ ኦራ ያርሾ በሳፈ ፑደሀ ባጋን ዎስ።\x - \xo 16:14 \xo*\xt ከሳ 27:1-2፤ 2 ታር 4:1.\xt*\x*
\p
\v 15 ካዎይ አካዝ ካህንያ ኡራያ ሀይሳዳ ያግድ ኪትስ፤ “ሀ ግታ ያርሾ በሳን ዎንታ ፁሳ ያርሾ፥ ኦማርስ ሺሽያ ካ ያርሾ፥ ካዎይ ሺሽያ ፁሳ ያርሾነ ካ ያርሾ፥ አሳ ኡባይ ሺሽያ ፁሳ ያርሾ፥ ካ ያርሹዋነ ኡሻ ያርሹዋ ያርሾ በሳን ሺሻ። ናሰፐ ኦሰትዳ ሀንኮ ያርሾ በሳ ታኒ ታዉ ኦይችያ በሲ ኦና” ያግስ። 
\v 16 ኡራይ ካዎይ አካዝ ኪትዳይሳዳ ኦስ።
\p
\v 17 ካዎይ አካዝ ፆሳ ኬ ግዶን ጎኤትያ፥ ናሰ ብራታፐ ኦሰትዳ ጋረታ ሎቸ ብራታ ቃንፅድ፥ ምየፐ ድግድ ሜጨትያ ከረታ ጋረታ ቦላፈ ደንስ። ቃስ ግታ ከረታ፥ እያ ዘምፕስዳ ናሰ ብራታ ቦራ ምስለታ ቦላፈ ደንድ፥ ሹቻ ባሱዋ ቦላ ዎስ።\x - \xo 16:17 \xo*\xt 1 ካዎ 7:23-39፤ 2 ታር 4:2-6.\xt*\x* 
\v 18 አሶረ ካዋ ግሾ፥ አካዝ ሳምባታ ጋላስ ፆሳ ኬ ግዶን ካዋ አራታይ ምጨትያ ቁ ግዳ በሳነ ካዎይ ፆሳ ኬ ገልያ ካረ ኦግያ ጎርድድ፥ ዩይ አድ ገላና መላ ኦስ።
\p
\v 19 ካዎይ አካዝ ሀንዳ ሀራባይነ እ ኦዳባ ኡባይ ይሁዳ ካዎታ ታርከ ማፃፋን ፃፈትስ። 
\v 20 አካዝ ሀይቅድ፥ ባ ማይዛታን ጋሄትስ፤ ዳዊታ ካታማን ባ ማይዛታራ ሞገትስ፤ እያ በሳን እያ ናአይ ህዝቅያስ ካዎትስ።\x - \xo 16:20 \xo*\xt እሳ 14:28.\xt*\x*
\c 17
\s1 እስራኤለ ካዋ ሆሰ
\p
\v 1 ይሁዳ ካዎይ አካዝ ካዎትዳ ታማነ ናምአን ላይን፥ ኤላ ናአይ ሆሰይ እስራኤለ ቦላ ሳማረን ካዎትስ፤ እ ኡዱፉን ላይ ካዎትስ። 
\v 2 እ፥ ጎዳ ስንን ኢታባ ኦስ፤ ግድኮካ፥ እያፐ ካሰ ደእዳ እስራኤለ ካዎት ኦዳይሳ መላ ኢታባ ኦቤና።
\p
\v 3 አሶረ ካዎይ ሳልምናሶር ይድ፥ እያራ ኦላ ጋሄትን፥ ሆሰይ ፆነትድ፥ እያዉ ጊርስ። 
\v 4 ሽን ጉ ላይፈ ጉየ፥ ካዎይ ሆሰይ፥ ግብፀ ካዋ ሰጎራስ ኪታ የድድ፥ ባና ማዳና መላ ኦይችስ። ካሰይሳዳ አሶረ ካዋስ ጊራ እመይሳ አጋግስ። ካዎይ ሳልምናሶር ሄሳ ስእዳ ዎደ እያ ኦይድ፥ ቃሾ ኬ ገልስስ።
\p
\v 5 አሶረ ካዎይ እስራኤለ ቢታ ኡባ ቦላ ደንድድ፥ ሄ ላይ ጋካናዉ ሳማረ ካታማ ተቅስ። 
\v 6 ሆሰይ ካዎትዳ ኡዱፉን ላይን አሶረ ካዎይ ሳማረ ካታማ ኦይክስ፤ እስራኤለ አሳ ኤክድ፥ አሶረ ቢታ ኤፍስ። ኤንታፈ ባጋ አላሀንነ አቦራን፥ ባጋ ቃስ ጎዛና ሻፋ ማታን፥ አትዳይሳታ ሜዶና ካታማታን ዎስ።
\s1 ኤቃ ጎይኖ ጋሶን ድኤተ
\p
\v 7 ሀይስ ኡባይ ሀንዳይ፥ እስራኤለ አሳይ ጎዳ ባንታ ፆሳ ቦላ፥ ኤንታ ግብፀፈ፥ ግብፀ ካዋ ኩሸፐ ከስዳይሳ ቦላ ናጋራ ኦዳ ግሾሳ። ቃስ ኤንቲ ሀራ ፆሳታስ ጎይንድ፥ 
\v 8 ጎዳይ ኤንታ ስንፈ ጎድድ ከስዳ ሀራ ካዎተታ ዎጋ ካልዳ ግሾሳ። ሄሳ ቦላ ቃስ እስራኤለ ካዎት ዶምዳ ኢታ ዎጋ ካልዳ ግሾሳ። 
\v 9 እስራኤለ አሳይ ጎዳ ባንታ ፆሳ ቦላ ጌማን ኢታባ ኦዶሶና፤ ጉ ሞፈ ብድ፥ ግታ ካታማ ጋካናዉ ደእያ በሳ ኡባን ባንታዉ ቃ ጎይኖ በሳታ መዶሶና። 
\v 10 ቃስ ኤንቲ ኤቃ ሹቻታነ አሼራ ጌተትያ ፆሰ ምስለታ ዙማ ሁጰ ኡባንነ ዳሻ ም ኡባ ጋርሳን ኤስዶሶና። 
\v 11 ጎዳይ በን ኤንታ ስንፈ ጎድድ ከስዳ አላጋ አሳይ ኦዳይሳዳ፥ ቃ በሳ ኡባን እፃነ ጩይስዶሶና። ኤንቲ ኢታባ ኦድ ጎዳ ሀንቀዶሶና። 
\v 12 ጎዳይ ኤንታ፥ “ጎይኖፍተ” ያግዳ ኤቃ ጎይንዶሶና። 
\v 13 ጎዳይ እስራኤለ አሳነ ይሁዳ አሳ ባ ናበታ ባጋራነ ቆንጨ በእያ ኡባ ባጋራ፥ “ህንተ ኢታ ኦግያፐ ስምተ፤ ታኒ ናበታ፥ ታ አይለታ ባጋራ፥ ህንተ አዋት ኪተታናዳ እምዳ ህግያን ፃፈትዳ ዎጋነ አዋጁዋ ናግተ” ያግስ። 
\v 14 ሽን ኤንቲ ስኦና እፅዶሶና። ጎዳ ባንታ ፆሳ አማነትቦና ባንታ አዋታዳ ሞርገ ምንዶሶና። 
\v 15 ኤንቲ እያ ዎጋ፥ እ ኤንታ አዋታራ ጫቅዳ ጫቁዋነ እያ ናግሱዋ ካዶሶና። ኤንቲ ላፋ ኤቃታ ጎይንድ፥ ባንታ ሁጰንካ ላፋ ግድዶሶና።
\p ጎዳይ ኤንታ፥ “ህንተ ዩሹዋን ደእያ አላጋ አሳይ ኦይሳዳ ኦፍተ” ያግዳ ኪታ እፅድ፥ ኤንታ ደኡዋ ዎጋ ካልዶሶና። 
\v 16 ጎዳ ባንታ ፆሳ ኪታ ኡባ አጋግዶሶና። ማር ዳንያ፥ ናምኡ ጎይኖ ምስለታነ አሼራ ጌተትያ ኤቃ ምስልያ መዶሶና። ሳሎን ደእያ ፆልንቶ ኡባ ጎይንዶሶናነ ባኣለ ኤቃ ሀጋዝዶሶና። 
\v 17 ኤንቲ ባንታ አደ ናይታነ ማጫ ናይታ ታማ ግዶራ አዶሶና። ማሮታነ ሞይትለ ፄገይሳታ ዞረ ኦይችዶሶና። ሄሳ መላ ኢታባ ኦናዉ ባንታና ባይዝድ፥ ጎዳ ሀንቀዶሶና። 
\v 18 ሄሳ ግሾ፥ ጎዳይ እስራኤለ ቦላ ሀንቀትድ ኤንታ ባ ስንፈ ድግን፥ ይሁዳ ኮቻ ፃላል አትስ።
\p
\v 19 ቃስ ይሁዳ አሳይካ፥ ጎዳ ባንታ ፆሳ ኪታ ናግቦኮና፤ ኤንቲ እስራኤለ አሳ ዎጋ ካልዶሶና። 
\v 20 ሄሳ ጋሶን፥ ጎዳይ እስራኤለ ኮቻታ ኡባ አጋግስ። እ ኤንታ ኡንኤድ፥ ባ ስንፈ ድጋና ጋካናዉ፥ ቦንቅያ አሳ ኩሸን የግስ።
\p
\v 21 ጎዳይ እስራኤለ አሳ ዳዊታ ኮቻ ካዎተፈ በን ሻክዳ ዎደ፥ እስራኤለ አሳይ ናባፃ ናኣ እዮርባማ ባንታዉ ካዎዶሶና። ሄሳፈ ጉየ፥ እስራኤለ አሳይ ጎዳ ካሎናዳ እዮርባም ድግስ፤ እ ኤንታ ግታ ናጋራ ኦስስስ። 
\v 22 እስራኤለ አሳይ እዮርባም ኦዳ ናጋራ ኡባ ኦዶሶና፤ እያፐ ስምቦኮና። 
\v 23 ጎዳይ ናበታ፥ ባ አይለታ ኡባ ባጋራ ካሰ ኦድዳይሳዳ ኤንታ ባ ስንፈ ድግስ። እስራኤለ አሳይ ባንታ የለትዳ ቢታፈ ድኤትድ፥ አሶረ ቢታ ብድ፥ ሀች ጋካናዉ ያን ደእዶሶና።
\s1 አሶረት እስራኤለ ቢታን
\p
\v 24 አሶረ ካዎይ ባብሎነ ቢታን ደእያ ኩታ፥ አዋና፥ ሀማታነ ሳፋርዋይማ ካታማታን ደእያ አሳ ኤህድ፥ እስራኤለ አሳ በሳን፥ ሳማረ ካታማታን ዎስ። ኤንቲ ሄ ካታማታ ኦይክድ፥ ያን ደእዶሶና።
\p
\v 25 ኤንቲ ኮይሮ ያን ዱሱ ዶምዳ ዎደ፥ ጎዳ ጎይንቦኮና። ሄሳ ጋሶን፥ ጎዳይ ኤንታ ግዶ ጋሞታ የድን፥ ጋሞት ኤንታ ግዶፈ ባጋታ መንረድ ዎዶሶና። 
\v 26 ያትን፥ አሶረ ካዋስ፥ “ኔኒ ኤሀዳ ሳማረ ካታማታን ዎዳ አሳይ፥ ሀ ቢታ ፆሳ ዎጋ ኤሮኮና። ሄኮ፥ ያትን፥ ኤንታ መንረ ዎያ ጋሞታ ኤንታ ቦላ የድስ” ያግድ ኦድዶሶና።
\p
\v 27 አሶረ ካዎይ፥ “ህንተ ሳማረፐ ድእድ ኤህዳ ካህነታፐ እሱዋ ዛሪድ፥ ያ የድተ። እ ያ ብድ፥ ሄ ቢታ ፆሳ ዎጋ ኤንታ ታማርሶ” ያግድ ኪትስ። 
\v 28 ሄሳ ግሾ፥ ሳማረፐ ድእድ ኤህዳ ካህነታፐ እሶይ ቤተለን ዳናዉ ይድ፥ ጎዳ ጎይኖ ዎጋ ኤንታ ታማርስስ።
\p
\v 29 ግዶሽን፥ ሳማረን ኡትዳ አሳይ ባንታዉ ጎይንያ ኤቃ ምስለታ ባ ደእያ በሳን በሳን መዶሶና። ኤንቲ ደእያ ካታማታን፥ ካሰ ባንታዉ ኬፅዳ ቃ ጎይኖ በሳታን ኤፍድ ዎዶሶና። 
\v 30 ሄሳዳ ኦድ፥ ባብሎነ አሳይ ሱኮት-ባኖባ ጌተትያ ኤቃ ምስለታ መዶሶና። ኩታ አሳይ አርጋላ ጌተትያ ኤቃ ምስለታ መዶሶና። ሀማታ አሳይ እስማታ ጌተትያ ኤቃ ምስለታ መዶሶና። 
\v 31 አዋዋ አሳይ አልባዛራነ ታርታቃ ጌተትያ ኤቃ ምስለታ መዶሶና። ሳፋርዋይማ አሳይ ቃስ አድራመለክነ አናመለካ ጌተትያ ባንታ ፆሳታስ ባንታ ናይታ ታማን ፁግድ ያርሽዶሶና። 
\v 32 ኤንቲ ጎዳ ጎይንዶሶና፤ ሽን ባንታ ግዶፈ ዱማ ዱማ አሳ ዶርድ፥ ቃ ጎይኖ በሳታን ካህነ ኦድ ሹምዶሶና። 
\v 33 ኤንቲ ጎዳ ጎይንዶሶና፤ ግድኮካ፥ ባንታ ይዳ ቢታ ቢታ አሳ ሜዝያ ካልድ፥ ባንታ ፆሳታካ ጎይንዶሶና። 
\v 34 ኤንቲ ሀች ጋካናዉ ካሰ ሜዘትዳይሳዳ ኦሶና።\x - \xo 17:34 \xo*\xt መ 32:28፤ 35:10.\xt*\x*
\p ኤንቲ ቱማ ጎዳ ጎይኖኮና ዎይኮ ጎዳይ እስራኤለ ግድ ሱንዳ ያይቆባ ዘረስ እምዳ አዋጁዋነ ዎጋ፥ ህግያነ ኪታ ናጎኮና። 
\v 35 ጎዳይ እስራኤለ አሳራ በን ጫቅዳ ዎደ፥ ኤንታ ሀይሳዳ ያግድ ኪትስ፤ “ሀራ ፆሳታ ጎይኖፍተ፤ ኤንታዉ ጉልባቶፕተ፤ ኤንታዉ ኦፍተ ዎይኮ ኤንታዉ ያርሾፍተ።\x - \xo 17:35 \xo*\xt ከሳ 20:5፤ ዛረ 5:9.\xt*\x* 
\v 36 ሽን ግብፀፈ ህንተና ባ ግታ ዎልቃንነ ባ ምጨትዳ ኩሸን ከስዳ ጎዳስ ኦተ፤ እያዉ ጉልባትተ፤ እያዉ ያርሾ ያርሽተ።\x - \xo 17:36 \xo*\xt ዛረ 6:13.\xt*\x* 
\v 37 ጎዳይ ህንተዉ ፃፍዳ አዋጁዋነ ዎጋ፥ ህግያነ ኪታ ኡባ ዎደ ናግተ፤ ሀራ ፆሳታ ጎይኖፍተ። 
\v 38 ታኒ ህንተራ ጫቅዳ ጫቁዋ ዶጎፕተ፤ ሀራ ፆሳታ ጎይኖፍተ። 
\v 39 ሄሳ አግድ፥ ጎዳ ህንተ ፆሳ ጎይንተ። ህንተ ሞርከታ ኡባፈ ህንተና አሻናይ ታና” ያግድ ኪትስ። 
\v 40 ሽን ኤንቲ እያዉ ኤሮ ጎና እፅድ፥ ካሰ ባንታ ሜዝያ ካልዶሶና። 
\v 41 ሄ አሳት ጎዳ ጎይንሸካ፥ እስ ባጋራ ባንታ ኤቃ ምስለታ ጎይኖሶና። ሀች ጋካናዉ ኤንታ ኮቻይ ኤንታ አዋት ጎይነይሳዳ ጎይንሸ ደኦሶና።
\c 18
\s1 ይሁዳ ካዋ ህዝቅያሳ
\r (2 ታር 29:1-2፤ 31:1)
\p
\v 1 ኤላ ናአይ ሆሰይ እስራኤለን ካዎትዳ ሄን ላይን፥ ይሁዳ ካዋ አካዛ ናአይ ህዝቅያስ ይሁዳን ካዎትስ። 
\v 2 እ ካዎትያ ዎደ ላይ እያዉ ላታማነ እቻሻ፤ የሩሳላመን ላታማነ ኡዱፉን ላይ ካዎትስ። እያ አየ ሱንይ አብያ ጌተቴስ፤ እያ ዛካርያሳ ናእዉ። 
\v 3 እያ ማይዛይ ዳዊቲ ኦዳይሳዳ፥ ህዝቅያስ ጎዳ ስንን ሱረባ ኦስ። 
\v 4 አሳይ ቃ ጎይኖ በሳታ ድግስ። ኤቃ ቱሳታ መንረስ። አሼራ ጌተትያ ፆሰ ምስልያ ቃንፅ የግስ። ቃስ ሙሰይ ናሰ ብራታፐ መዳ፥ ናሁሽታና ጌተትያ ሾሻ ምስልያ መንረስ። ሄ ዎደይ ጋካናዉ እስራኤለ አሳይ እያዉ እፃነ ጩይስሸ ጋምእስ።
\p
\v 5 ህዝቅያስ ጎዳ እስራኤለ ፆሳ አማንስ፤ ይሁዳ ካዎታ ኡባ ግዶን እያ መላ ካዎይ እያፐ ካሰ ግድን፥ እያፐ ጉየ ግድን በንትቤና። 
\v 6 እ ጎዳራ ኦይከትስ፤ ጎዳ ካሎ አግቤና፤ ጎዳይ ሙሰ ኪትዳ ኪታታ ናግስ። 
\v 7 ጎዳይ እያራ ግድስ፤ እ ኦያባ ኡባይ እያዉ እንጀትስ። እ አሶረ ካዋ ቦላ ማካልድ፥ እያዉ ሃረቶና እፅስ። 
\v 8 እ፥ ፍልስፄመ አሳ ኦልድ ጉ ሞታፐ ብድ፥ ግታ ካታማ ጋካናዉ፥ ጋዛነ እያ ዩሾን ደእያ ቢታት አቶና ኤንቲ ደእያ በሳታ ኡባ ፆንስ።
\p
\v 9 ካዎይ ህዝቅያስ ካዎትዳ ኦይዳን ላይን፥ ኤላ ናአይ እስራኤለ ካዎይ፥ ሆሰይ ካዎትዳ ላፑን ላይን፥ አሶረ ካዎይ ሳልምናሶር እስራኤለ ቦላ ደንድድ፥ ሳማረ ካታማ ተቅስ። 
\v 10 ሄን ላይ ሳማረ ካታማ ፆንስ። ያትን፥ ህዝቅያስ ካዎትዳ ኡሱፑን ላይን፥ እስራኤለ ካዎይ ሆሰይ ካዎትዳ ኡዱፉን ላይን፥ ሳማረ ካታማይ ፆነትስ። 
\v 11 አሶረ ካዎይ እስራኤለ አሳ አሶረ ቢታ ኤፍድ፥ ኤንታፈ ባጋ አላሀንነ አቦራ ካታማታን፥ ባጋ አጎዛ ሻፋ ማታን ባጋ ቃስ ሜዶና ካታማታን ዎስ። 
\v 12 ሄስካ ኤንቲ ጎዳስ ባንታ ፆሳስ ኪተቶና እፅድ፥ ጎዳ ጫቁዋ፥ ጎዳ አይለይ፥ ሙሰይ ኪትዳ ኪታ ኡባ መንዳ ግሾሳ። ኤንቲ እያ ኪታ ስአናዉነ ኪተታናዉ ኮይቦኮና።
\s1 አሶረ ማንደ
\r (2 ታር 32:1-19፤ እሳ 36:1-22)
\p
\v 13 ካዎይ ህዝቅያስ ካዎትዳ ታማነ ኦይዳን ላይን፥ አሶረ ካዎይ ሳናክሬም ግምበትዳ ይሁዳ ካታማታ ኡባ ኦልድ ኦይክስ። 
\v 14 ያትን፥ ይሁዳ ካዎይ ህዝቅያስ ላክሶ ካታማን ደእያ አሶረ ካዋ ሳናክሬማስ ኪታ የድድ፥ “ታኒ ባላስ፤ ሀያና ታ ቢታ የዳዳ ከያ። ኔኒ ታና ኦይችዳባ አይባካ ታ ነዉ እማና” ያግስ።
\p አሶረ ካዎይ፥ ይሁዳ ካዋ ህዝቅያሳኮ፥ “ኔኒ 10,000 ክሎ ግራመ ብራነ 1,000 ክሎ ግራመ ዎርቃ ታዉ የዳ” ያግስ። 
\v 15 ህዝቅያስ ፆሳ ኬን፥ ካዎ ጋን ሻሎ ምንጅያ በሳን ደእያ ብራ ኡባ እያዉ የድስ። 
\v 16 ሄ ዎደ ይሁዳ ካዎይ ህዝቅያስ፥ ፆሳ ኬ ፐንግያ ሳንቃታ ትይዳ ዎርቃነ እ ባ ሁጰን ፐንገ ቱቀታ ትይዳ ዎርቃ ቃርድ፥ አሶረ ካዋስ የድስ።
\p
\v 17 አሶረ ካዎይ፥ ታርታና፥ ራፌሳነ ራስፋቅሳ ጌተትያ ሄ ቶራ ሞጮናታ፥ ዳሮ ኦላንቾታራ ላክሶ ካታማፐ ካዋ ህዝቅያሳኮ የሩሳላመ የድስ። ኤንቲ ብድ፥ የሩሳላመ ጋክድ፥ ማኦ ሜጭያ አድያ ጋደ ኤፍያ ኦግያፐ ቆሞ ባጋራ ደእያ፥ ዳጋትዳ ሃይ ጎግያ ዛራ ላንቀን ኤቅዶሶና። 
\v 18 ኤንቲ ካዋ ፄግን፥ ካዎ ጋ አዋተን አይስያ ካልቀ ናአይ ኤልያቄም፥ ዋና ፃፈይ ሳምናስነ አሳፋ ናአይ ታርከ ፃፈይ ዮኣስ እያኮ ካረ ከይዶሶና።
\p
\v 19 አሶረታ ሀላቃይ፥ “ህዝቅያሳስ ሀይሳዳ ያግድ ኦድተ። አሶረ ካዎይ፥ ዎልቃማይ ነና ሀይሳዳ ያጌስ፤ ‘ኔኒ አይብን አማነታዲ? 
\v 20 ኦላ ኦለታናዉ ነዉ ጭንጫተነ ዎልቅ ደኤስ ያጋሳ። ሽን ኔኒ አይብን አማነታዳ ታ ቦላ ሀይሳ ማካላዲ? 
\v 21 ሄኮ፥ ኔኒ ግብፀ ካዎይ ማዳና ጋዳ ቆፕያባ ግድኮ፥ መቅዳ ማይረ ፃምአን ካትያ አሳ መላ። ፃምአይ መቅን፥ ፕንጮይ ኩሸ ጫደስነ ማዱንፅሴስ። ግብፀ ካዎይ ባናን አማነትያ አሳ ኡባስ ሄሳ መላ’ ” ያግስ።
\p
\v 22 ሽን ኔኒ፥ “ኑኒ ጎዳን ኑ ፆሳን አማነቶስ” ያግኮ፥ ህዝቅያስ፥ ይሁዳ አሳነ የሩሳላመ አሳ፥ “ህንተ የሩሳላመን ደእያ ያርሾ በሳን ጎይናናዉ ኮሼስ” ግድ፥ ቃ ጎይኖ በሳታነ ያርሾ በሳታ ድግዳይ እያ ግደኔ?
\p
\v 23 ሀእ ሃያ፤ ታ ጎዳ አሶረ ካዉዋራ ማንደታ። ኔኒ ቶጋናዉ ዳንዳእያ፥ ግድያ አስ ደምኮ፥ ናምኡ ሙኩሉ ፓራታ ታኒ ነዉ እማና። 
\v 24 ኔኒ፥ “ግብፀት ፓራ አሳታነ ፓራ ጋረታ ታዉ የዳና” ጋዳ አማንኮ፥ ታ ጎዳ ቶራ ሞጮናታፐ እስ ጉካ ዛራናዉ ዳንዳአካ። 
\v 25 ሄሳ ቦላ ቃስ፥ ታኒ ሀእ ቱማ ጎዳ ኪት ባይና ሀ ቢታ ይሳናዉ ኮያድና? ጎዳይ ባ ሁጰን ታና፥ “ሄ ቢታ ባዳ፥ ኦላዳ ይሳ” ያግስ።
\p
\v 26 ሄሳፈ ጉየ፥ ካልቀ ናአይ ኤልያቄም፥ ሳምናስነ ዮኣስ አሶረታ ቶራ ሞጮናኮ ሀይሳዳ ያግዶሶና፤ “ኑኒ ብርሸ ኤርያ ግሾ፥ ሀያና ኑስ ነ አይለታስ አራምከ ዶናን ኦዳ። ድርሳ ግምብያ ሁጰ ሶን ደእያ አሳይ ስኦና መላ፥ እብራወ ዶናን ኦዶፓ” ያግዶሶና። 
\v 27 ሽን ቶራ ሞጮናይ ዛሪድ፥ “ሀ ቃላ ታኒ ህንተዉነ ህንተ ጎዳ ፃላላስ ኦዳናዉ ታ ጎዳይ ታና ኪትደዬ? ህንተራ እስፈ ባንታ ሽአ ማናዉነ ባንታ ሼሻ ኡያናዉ ደእያ፥ ሀ ድርሳ ግምብያ ቦላ ኡትዳ አሳ ኡባሳ ግደነዬ?” ያግስ።
\p
\v 28 አሶረ ቶራ ሞጮናይ ደንድ ኤቅድ፥ ባ ቃላ ቁ ኦድ፥ እብራወ ዶናን ሀይሳዳ ያግስ፤ “አሶረ ካዎይ ዎልቃማይ ህንተና ግያባ ስእተ! 
\v 29 ካዎይ ህንተኮ ሀይሳዳ ያጌስ፤ ‘ህዝቅያስ ህንተና ጭሞፎ፤ እ ህንተና ታ ኩሸፐ ከስ ኤካናዉ ዳንዳኤና። 
\v 30 ጎዳይ ቱማ ኑና አሻና፤ ሀ ካታማይካ አሶረ ካዋ ኩሸን ገለና’ ያግድ ህንተ ጎዳን አማነታና መላ ኦፎ” ያጌስ።
\p
\v 31 ህንተ ህዝቅያስ ኦድያባ ስኦፕተ። አሶረ ካዎይ፥ “ታራ ስገትተ፤ ሃ ታኮ ከይተ። ህንተ ኡባይ ህንተ ዎይንያፐነ ህንተ ባላስያፐ ማና፤ ህንተ ቦክዳ ኦላፈ ሃ ኡያና። 
\v 32 ታኒ ያዳ፥ ህንተና ህንተ ቢታ ዳንያ ቢታ ኤፋና። ሄ ቢታይ ካነ ዎይነይ፥ ኡይነ ዎይነ ጋደይ ኩምዳ ቢታ፤ ሻማሆ ዛይተይነ ኤስ ኩምዳ ቢታ። ህንተ ታዉ ኪተትኮ፥ ደኦን ዳና፤ ሀይቀከታ። ህዝቅያስ፥ ‘ጎዳይ ኑና አሻና’ ያግድ ህንተና ጭመይሳ ስኦፕተ። 
\v 33 ሀራ ካዎተታ ፆሳታፐ ባ ቢታ አሶረ ካዋ ኩሸፐ አሽዳ ፆሲ ደኢ? 
\v 34 ሀማታ ፆሳትነ አርፋዳ ፆሳት አዉን ደኦና? ሳፋርዋይማ፥ ሄናነ እዋ ፆሳት አዉን ደኦና? ኤንቲ ሳማረ ታ ኩሸፐ ከስ ኤክዶና? 
\v 35 ሀ ቢታታ ፆሳታ ኡባ ግዶን፥ ባ ቢታ ታ ኩሸፐ አይ ፆሲ አሽዳሽን፥ ጎዳይ የሩሳላመ ታ ኩሸፐ አሻኔ?” ያግስ።
\p
\v 36 ካዎይ ካሰ፥ “ኤንታዉ አይኮካ ዛሮፕተ” ያግድ ኦድዳ ግሾ፥ አሳይ እስ ቃላካ ዛሮና ስእ ግዶሶና። 
\v 37 ካልቀ ናአይ ካዎ ጋ አዋተን አይስያ ኤልያቄም፥ ዋና ፃፈይ ሳምናስነ ታርከ ፃፈይ አሳፋ ናአይ ዮኣስ ባንታ ማኡዋ ዳክድ፥ ህዝቅያሳኮ ብድ፥ አሶረታ ቶራ ሞጮናይ ግዳባ ኡባ እያዉ ኦድዶሶና።
\c 19
\s1 ህዝቅያስ እሳያሳ ዞረ ኦይችስ
\r (እሳ 37:1-7)
\p
\v 1 ካዎይ ህዝቅያስ ሄሳ ስእዳ ዎደ፥ ባ ማኡዋ ዳክድ፥ ካዮ ማኦ ማእድ፥ ፆሳ ኬ ገልስ። 
\v 2 ካዎ ጋ አዋተን አይስያ ኤልያቄም፥ ዋና ፃፈይ ሳምናስነ ጭማ ካህነት ካዮ ማኦ ማእድ፥ አሞፀ ናኣ ናብያ እሳያሳኮ ባና መላ ኪትስ። 
\v 3 ኤንቲ እሳያሳኮ ብድ፥ “ህዝቅያስ ሀይሳዳ ያጌስ፤ ‘ሀች ጋላሳይ መቶ ጋላስ፥ ሴራ ጋላስነ ዬላ ጋላስ። ሄስካ ናእ የለታናዉ ዎደይ ጋክን፥ ባናካዳ የላናዉ ዎልቅ ይዳ ማጫሳ መላ። 
\v 4 ደኦ ፆሳ ጫያና መላ፥ እያ ጎዳይ፥ አሶረ ካዎይ፥ ኪትዳ ቶራ ሞጮና ቃላ ኡባ፥ ጎዳይ ነ ፆሳይ ስኦና አገና። ቃስ ጎዳይ፥ ነ ፆሳይ ሄ ስእዳ ቃላ ጋሶን እያ ሴሮና አገና። ሄሳ ግሾ፥ ኑ አሳ ግዶፈ ፓላህድ አትዳይሳታስ ዎሳ’ ” ያግዶሶና።
\p
\v 5 ካዋ ህዝቅያሳ አይለት እሳያሳኮ ብዳ ዎደ፥ 
\v 6 እሳያስ ኤንታ ሀይሳዳ ያግስ፤ “ህንተ ጎዳስ ሀይሳዳ ያግድ ኦድተ፤ ‘አሶረ ካዋ አይለት ታና ጫይሽን፥ ኔኒ ስእዳ ጫሻ ቃላስ ያዮፋ። 
\v 7 ሄኮ፥ ታኒ እያ ግዶ እስ አያና የዳና፤ እ ሄ ዎርያ ስእድ ባ ቢታ ስማና። እ ባ ቢታ ብድ፥ ያን ማሻን ሀይቃናዳ ኦና’ ” ያግስ።
\p
\v 8 አሶረ ካዎይ ላክሶ ካታማፐ ደንድድ ብዳይሳ አሶረታ ቶራ ሞጮናይ ስእድ፥ ጉየ ስሚድ ካዎይ ልብና ካታማን ኦለተይሳ ደምስ።
\p
\v 9 ካዎይ ሳናክሬም፥ “ሄኮ፥ ቶጰ ካዎይ ትርሃቅ ነና ኦላናዉ ይስ” ግያ ዎርያ ስእድ፥ ህዝቅያሳስ ሀይሳዳ ያግድ ኪትስ። 
\v 10 “ይሁዳ ካዋዉ ህዝቅያሳ፥ ኔኒ አማነትያ ፆሳይ፥ ‘የሩሳላመይ አሶረ ካዋ ኩሸን ገለና’ ያግድ ጭሞፎ። 
\v 11 አሶረ ካዎት ቢታ ኡባ ይስድ፥ ኦዳባ ኔኒ ስአዳሳ። ያትን፥ ኔኒ አታና ዳኒ? 
\v 12 በን ታ ማይዛት ይስዳ ቢታ ፆሳት፥ ሄሳትካ፥ ጎዛና፥ ካራነነ ራፌሳ ቢታ ፆሳትነ ታላሳራን ደእያ ኤደነ ፆሳት ሄ ቢታ ዮፐ አሽዶና? 
\v 13 ሀማታ ካዎይ፥ አርፋዳ ካዎይ፥ ሳፋርዋይማ ካዎይ፥ ሄና ካዎይነ እዋ ካዎይ አዉን ደኦና?” ያግድ ኪትስ።
\p
\v 14 ህዝቅያስ ዳብዳብያ ኪተትዳ አሳፐ ኤክድ ናባብስ። ዳብዳብያ ፆሳ ኬ ኤፍድ፥ ጎዳ ስንን ምጭስ። 
\v 15 ያትድ፥ ጎዳ ሀይሳዳ ያግድ ዎስስ፤ “አቤት ጎዳዉ፥ ክሩበታፐ ግዶን ኡትያ እስራኤለ ፆሳዉ፥ ሳኣ ካዎተታ ኡባ ቦላ ነ ፃላል ፆሰ፤ ሳሉዋነ ሳኣ ኔኒ መዳሳ።\x - \xo 19:15 \xo*\xt ከሳ 25:2.\xt*\x* 
\v 16 አቤት ጎዳዉ፥ ነ ሀይ ሃ ዛራዳ ስአ። አቤት ጎዳዉ፥ ነ አይፍያ ዶያዳ ፄላ። ነና፥ ደኦ ፆሳ ጫያናዉ ሳናክሬም የድዳ ቃላ ስአ። 
\v 17 አቤት ጎዳዉ፥ አሶረ ቢታ ካዎት ካዎተታነ ኤንታ ቢታ ይሰይስ ቱማ። 
\v 18 ኤንታ ፆሳታ ታማን ፁግድ ይስዶሶና፤ ኤንታ ፆሳት ካሰካ አሳ ኩሸይ ማስድ ከስዳ ምነ ሹቹ ግድያ ግሾ፥ ቱማ ፆሳታ ግዶኮና፤ ሄሳ ግሾ፥ ኤንቲ ኤንታ ይስዶሶና። 
\v 19 አቤት ጎዳዉ፥ ነ ፃላል ፆሰ ግደይሳ ሳኣ ካዎተት ኡባይ ኤራና መላ፥ ሀእ ዛራዳ፥ ጎዳዉ፥ ኑ ፆሳዉ፥ ኔኒ ኑና እያ ኩሸፐ አሻ” ያግድ ዎስስ።
\s1 እሳያስ ካዋስ የድዳ ኪታ
\r (እሳ 37:21-38)
\p
\v 20 ሄሳፈ ጉየ፥ አሞፀ ናአይ እሳያስ ህዝቅያሳኮ ሀይሳዳ ያግድ ኪትስ፤ “ጎዳይ እስራኤለ ፆሳይ ሀይሳዳ ያጌስ። ኔኒ አሶረ ካዋ ሳናክሬማ ጋሶን ታና ዎስዳ ዎሳ ስአስ።”
\p
\v 21 ጎዳይ ሳናክሬማባ ሀይሳዳ ያጌስ።
\q1 “ፅዮነ ጌላእያ ነና ካዉሱ፤
\q2 ነና ቦራዉሱ፤
\q2 የሩሳላመ ማጫ ናእያ
\q2 ባ ሁጵያ ቃዳ ነና ቀልቅሳዉሱ።
\q1
\v 22 ኔኒ ጫይዳይነ
\q2 ቶችዳይ ኦኔ?
\q1 ኔኒ ነ ቃላ ኦደ ቦላ ቁ ኦዲ?
\q2 ኦቶሮን ቁ ጋዳ ኦና ፄላዲ?
\q1 ሄሳ ኔኒ ኦዳይ ታ ቦላ፥
\q2 እስራኤለ ጌሻ ቦላ ግደነ!
\q1
\v 23 ኔኒ ኪትዳ አሳ ባጋራ ጎዳ ጫያዳሳ።
\q1 ቃስ ሀይሳዳ ያጋዳሳ፤
\q2 ታኒ ታዉ ደእያ ዳሮ ፓራ ጋረታን
\q2 ቃ ደረታ ሁጰ፥
\q2 ልባኖሰ ዙማ ሁጵያ ከያስ።
\q1 ከያዳ ኡባፈ አዱቅያ ዝጋታነ
\q2 ኡባፈ ሎእያ ፂዳታ ቃንፃስ።
\q1 ታኒ እያዉ ዉርሰ ጋፃነ
\q2 ስክዳ ዎራ ጋካስ።
\q1
\v 24 ታኒ አላጋ ቢታታን ሃ ኦላ
\q2 ቦካዳ፥ ሃ ያፐ ኡያስ።
\q1 ግብፀ ቢታን ጎግያ ሃ ኡባ
\q2 ታኒ ታ ቶሁዋን የዳ መልሳስ” ያጋዳሳ።
\b
\q1
\v 25 “ዳሮ ዎደፐ ካሰ ኔኒ
\q2 ግምበትዳ ካታማታ ላላዳ፥
\q2 ላለ ዶረ ከሳና መላ፥
\q2 ታኒ ቆፋ ቃችዳይሳ ኔኒ ስአብኪ?
\q1 ታኒ ሀእ ፖልያ ሀልቾታ
\q2 በን ሀልቻ ዎስ።
\q1
\v 26 ሄሳ ግሾ፥ ኤንታ አሳስ ዎልቅ እፅን፥
\q2 ኤንቲ ካዉይዶሶናነ ዬላትዶሶና።
\q1 ኤንቲ ጋደ ማታ መላ፤
\q2 ጎሻን ሞክዳ ጫርሻ መላ።
\q1 ኤንቲ ኬ ሁጰን ዶልያ ሻራፋ መላ
\q2 ካፆና ደእሽን፥
\q2 ሌገይ ምዳ ካዳ ሀንዶሶና።
\q1
\v 27 ሽን ኔኒ ኡትያ በሳ፥
\q2 ከይያነ ገልያ በሳ፥
\q2 ታ ቦላ ኔኒ ሸነትዳ ሸንያ ታኒ ኤራይስ።
\q1
\v 28 ኔኒ ታ ቦላ ይሎትዳ ግሾነ
\q2 ነ ኦቶሩዋካ ታኒ ስእዳ ግሾ፥
\q2 ታኒ ነ ሲያን ዳፎ አና፤
\q2 ነ ዶናን ብፃላ ባርሳና።
\q1 ያታዳ ነ ይዳ ኦግያራ
\q2 ታኒ ነና ጉየ ዛራና” ያግስ።
\p
\v 29 እሳያስ ካዋ ህዝቅያሳኮ ሀይሳዳ ያግስ፤ “ሀይስ ፖለታናይሳስ ማላታይ ሀይሳ፤ ሀ ላይ ህንተ አሰቦ ካፅዳ ካ ማና፤ ላይ ቃስ ሀ ላይ ካፅዳ አሰቦ ማና። ሽን ካልያ ላይ ህንተ፥ ህንተዉ ዘርተነ ጫክተ፤ ዎይነ ቶክተነ እያ ሚተ። 
\v 30 ይሁዳ አሳፐ አትዳይሳት ፃጶ የድድ፥ አይፈ አይፍያ ም መላ ግዳና። 
\v 31 አትዳይሳት የሩሳላመፐ ከያና፥ ፓላህዳይሳት ፅዮነፐ ያና። ኡባፈ ዎልቃማ ጎዳ ምሻይ ሄሳ ኦና።
\p
\v 32 “ሄሳ ግሾ፥ አሶረ ካዉዋባ ጎዳይ ሀይሳዳ ያጌስ፤ ‘አሶረ ካዎይ ሀ ካታማ ገለና፤ ዎይኮ ሀይሳን ባ ዶንገ ዱከና። እ ባ ጎንዳልያ ኦይክድ፥ ሀ ካታማ ስን አና፤ ዎይኮ ካታማ ዩሹዋ ቢታ ዶረን ተቀተና። 
\v 33 አሶረ ካዎይ ባ ይዳ ኦግያራ ጉየ ስማና፤ እ ሀ ካታማ ገለና። ታኒ ጎዳይ ሀይሳ ኦዳስ።’ 
\v 34 ታኒ ታ ቦንቹዋ ግሾነ ታ አይልያ ዳዊታ ግሾ፥ ሀ ካታማ ተቃዳ አሻና” ያግስ።
\p
\v 35 ሄ ቃማ ጎዳ ኪታንቾይ ከይድ፥ አሶረ አሳይ ዱንካንዳ በሳን እስ ፄታነ ሆስፑን ታማነ እቻሹ ሙኩሉ አደታ ዎስ። ያትን አሳይ ዎንታ ደንድድ በእያ ዎደ፥ ሄኮ፥ አህ ሄራን ኩምስ። 
\v 36 አሶረ ካዎይ ሳናክሬም ደንድድ፥ ጉየ ስም ብድ፥ ናናወ ካታማን ኡትስ። 
\v 37 እስ ጋላስ ሳናክሬም ባ ፆሳ ናሳራካ ኤቃ ኬን ጎይንሽን፥ እያ ናይት አድራመለክነ ሳርሳር ማሻን እያ ዎድ፥ አራራተ ቢታ ባቃትዶሶና። እያ ናአይ አስራዶን እያ በሳን ካዎትስ።
\c 20
\s1 ካዋ ህዝቅያሳ ፓፁዋ
\r (2 ታር 32:24-26፤ እሳ 38:1-8፥ 21-22)
\p
\v 1 ሄ ዎደ ካዎይ ህዝቅያስ ሀርግድ፥ ሀይቃናዉ ማትስ። አሞፀ ናአይ ናበይ እሳያስ እያኮ ብድ፥ “ጎዳይ፥ ‘ኔኒ ነ ሀርግያፈ ፓፃካ፤ ነ ሀይቃና፤ ሄሳ ግሾ፥ ነ ኬ ጊግሳ’ ” ያግስ።
\p
\v 2 ህዝቅያስ ጎዳኮ ስሚድ፥ ፆሳ ዎስስ። 
\v 3 “አቤት ጎዳዉ፥ ታኒ ነ ስንን ቱማተን፥ ኩመ ዎዛናን ሄመትዳይሳነ ነና ኡፋይስያባ ኦዳይሳ ኔኒ ቆፓና መላ ታኒ ነና ዎሳይስ” ያግድ፥ ዳሮ ጫመትድ፥ ዬክድ ዎስስ።
\p
\v 4 እሳያስ ካዋ ስንፈ ከይድ፥ ካዎ ጋ ዳባባ ካንድ ቦና ደእሽን፥ ጎዳ ቃላይ ሀይሳዳ ያግሸ እያኮ ይስ። 
\v 5 “ጉየ ስማዳ ባዳ ታ አሳ ካለያ ህዝቅያሳስ ሀይሳዳ ያጋዳ ኦዳ። ጎዳይ፥ ነ ማይዛ ዳዊታ ፆሳይ ሀይሳዳ ያጌስ፤ ‘ታኒ ነ ዎሳ ስአስ፤ ነ አፉ በአስ። ሄኮ፥ ታኒ ነና ፓና፤ ሄ ጋላሳፐ ጉየ፥ ኔኒ ፆሳ ኬ ባና። 
\v 6 ነ ላይ ቦላ ታኒ ነዉ ታማነ እቻሹ ላይ ጉጃና። ታኒ ነናነ ሀ ካታማ አሶረ ካዋ ኩሸፐ አሻና። ታኒ ታ ቦንቹዋ ግሾነ ታ አይልያ ዳዊታ ግሾ፥ ሀ ካታማስ ኦለታዳ አሻና’ ያጌስ” ያግስ። 
\v 7 እሳያስ፥ “ባላሰ ቴራ ዳፅድ፥ እያ ክፃ ቦላ ዎተ፤ እ ፓፃና” ያግስ።
\p
\v 8 ህዝቅያስ እሳያሳ፥ “ጎዳይ ታና ፓናይሳነ ታኒ ሄን ጋላስ ፆሳ ኬ ባናይሳስ ማላታይ አይቤ?” ያግድ ኦይችስ።
\p
\v 9 እሳያስ፥ “ጎዳይ ባ ግዳ ቃላ ፖላናዉ ነዉ ማላታ እማና። ህዛ ኔኒ ሀይሳታፐ አዉሳ ዶራይ? ኩያይ ታሙ ደ ስን ባና መላ ኮያዬ? ታሙ ደታ ጉየ ባና መላ ኮያይ?” ያግድ ኦይችስ።
\p
\v 10 ህዝቅያስ፥ “ኩያይ ስን ባናይስ መተና፤ ኩያይ ጉየ ስማናዳ ኦ” ያግስ። 
\v 11 ናበይ እሳያስ ጎዳ ዎስን፥ ጎዳይ ካዎይ አካዝ ግምብስዳ ደ ቦላ ሸምፕዳ ኩያይ ታሙ ደ ጉየ ዛርስ።
\s1 ባብሎነፐ ኪተትዳ አሳታ
\r (እሳ 39:1-8)
\p
\v 12 ሄ ዎደ ባልዳና ናአይ፥ ባብሎነ ካዎይ፥ ማሮዳክ ባልዳን ህዝቅያስ ሀርግዳይሳ ስእዳ ግሾ፥ ዳብዳበነ እሞታ ህዝቅያሳስ የድስ። 
\v 13 ህዝቅያስ ኪተትድ ይዳ አሳታ ሞክስ። ባ ሻሎ ምንጅያ ኬን ደእያ ብራ፥ ዎርቃ፥ ሳዉዋ፥ አልኦ ዛይትያ፥ ባ ኦላ ሚሽያነ ባ ሻሎ ምንጅያ ኬን ደእያባ ኡባ ኤንታ በስስ። ባ ሶን ዎይኮ ባ ጋን ደእያባ ኡባፈ ህዝቅያስ ኤንታ በሶና አግዳባይ አይብካ ባዋ።
\p
\v 14 ናበይ እሳያስ ካዋ ህዝቅያሳኮ ብድ፥ “ሀ አሳት ዎይግዶና? ኤንቲ አዉፐ ይዶና?” ያግድ ኦይችስ።
\p ህዝቅያስ፥ “ኤንቲ ታኮ ሃሆ ቢታፈ፥ ባብሎነፐ ይዶሶና” ያግስ።
\p
\v 15 እሳያስ፥ “ኤንቲ ነ ሶን አይ አይ በእዶና?” ያግስ።
\p ህዝቅያስ፥ “ኤንቲ ታ ጋን ደእያ ኡባ በእዶሶና፤ ታ ሻሎ ምንጅያ ኬን ደእያባፐ ታኒ ኤንታ በሳቦናባይ ባዋ” ያግስ።
\p
\v 16 እሳያስ ህዝቅያሳኮ፥ “ጎዳይ ግያባ ስአ። 
\v 17 ‘ሄኮ፥ ነ ጋን ደእያባ ኡባይነ ነ ማይዛት ሀች ጋካናዉ ሺሽዳባ ኡባይ ድኤትድ፥ ባብሎነ ቢታ ባና ጋላስ ያና፤ እያፐ አይብካ አተና። 
\v 18 ቃስ ነዉ የለታና፥ ነ አሾነ ነ ሱ ግድዳ ነ አደ ናይት ድኤትድ ብድ፥ ባብሎነ ካዎ ጋን ሹፋ ግድድ ኦና’ ” ያግስ።
\p
\v 19 ህዝቅያስ ዛሪድ፥ “ኔኒ ኦድዳ ጎዳ ቃላይ ሎኦ” ያግስ። ህዝቅያስ፥ “ታኒ ደእዳ ላይን ሳሮይነ ዎፓተ ዳና ግደነ” ያግድ ቆፕስ።
\s1 ህዝቅያሳ ሀይቁዋ
\r (2 ታር 32:32-33)
\p
\v 20 ህዝቅያስ ሀንዳ ሀራባይ፥ እያ ምኖተይነ ሃ ዜርድ፥ ቢታ ግዶራ ሃ ካታማ ገልስዳባይ ይሁዳ ካዎታ ታርከ ማፃፋን ፃፈትስ። 
\v 21 ህዝቅያስ ሀይቅድ፥ ባ ማይዛታን ጋሄትስ፤ እያ በሳን እያ ናአይ ምናሰይ ካዎትስ።
\c 21
\s1 ይሁዳ ካዋ ምናሰ
\r (2 ታር 33:1-20)
\p
\v 1 ምናሰይ ካዎትያ ዎደ እያዉ ላይ ታማነ ናምአ፤ እ የሩሳላመን እሻታማነ እቻሹ ላይ ካዎትስ፤ እያ አየ ሱንይ ሄፍሴቦ።
\p
\v 2 ጎዳይ እስራኤለ አሳ ስንፈ ጎድድ ከስዳ አሳታ ደኡዋ ዎጋ ካልድ፥ ምናሰይ ጎዳ ስንን ኢታባ ኦስ። 
\v 3 እያ አዋይ ህዝቅያስ ላልዳ፥ ቃ ጎይኖ በሳታ እ ዛረድ ኬፅስ፤ እስራኤለ ካዎይ አካብ ኦዳይሳዳ፥ ባኣለ ፆሳስ ያርሾ በሳታነ አሼራ ፆሰ ምስለታ መስ። ቃስ ሳሎ ፆልንቶታ ኡባ ጎይንስ፤ ኤንታና ሀጋዝስ። 
\v 4 ጎዳይ፥ “ታኒ ታ ሱን የሩሳላመን ፄግሳና” ያግድ ኦድዳ ፆሳ ኬን ሀራ ፆሳታስ ያርሾ በሳታ ጊግስስ። 
\v 5 ፆሳ ኬን ደእያ ናምኡ ዳባባታን ሳሎ ፆልንቶታ ኡባስ ያርሾ በሳታ ጊግስስ። 
\v 6 ባ ናኣ ታማ ግዶራ አስ። እ ባ ሁጰን ብታንቾነ ሙሩንያ አስ ግድድ፥ ማሮታነ ሞይትለታ ዞረ ኦይችስ። ጎዳ ስንን ዳሮ ኢታባ ኦድ፥ እያ ሀንቀስ።
\p
\v 7 ማሰትድ ከይዳ አሼራ ፆሰ ምስልያ ኤህድ፥ ፆሳ ኬ ግዶን ኤስስ። ሄ ፆሳ ኬይ፥ ጎዳይ ዳዊታነ እያ ናኣ ሶሎሞነ፥ “እስራኤለ ዛረ ኡባ ግዶፈ ታኒ ዶርዳ ሀ ፆሳ ኬን የሩሳላመን ታኒ ታ ሱን መርናዉ ፄግሳና። 
\v 8 እስራኤለ አሳ ታኒ ኪትዳ ኪታ ኡባነ ታ አይለይ ሙሰይ ኤንታዉ እምዳ ህግያ ኡባ ናግድ ኦኮ፥ ታኒ ኤንታ ማይዛታስ እምዳ ቢታፈ ኤንታ ደንዳ ይስከ” ያግዳ ፆሳ ኬ። 
\v 9 ሽን አሳይ ስኦናን እፅስ፤ ጎዳይ እስራኤለ አሳ ስንፈ ይስዳ ሀራ ካዎተታፐ አድ ኢታ ኦና መላ ምናሰይ ኤንታ ባለስ።
\p
\v 10 ጎዳይ ባ አይለ ግድዳ ናበታ ባጋራ ሀይሳዳ ያግስ፤ 
\v 11 “ይሁዳ ካዎይ ምናሰይ ሀ ቱና ኦሱዋ ኦስ፤ ባፐ ካሰ ደእዳ አሞረ አሳ ኡባ ናጋራፐ አያ ኢታ ናጋራ ኦስ። ይሁዳ አሳ ባ መዳ ኤቃ ምስልያ ጎይንስድ፥ ናጋራ ኦስስስ። 
\v 12 ጎዳይ፥ እስራኤለ ፆሳይ ሀይሳዳ ያጌስ፤ ‘ሄኮ፥ ስእያ አሳ ኡባ ሀይስ ኢትያ ዮ የሩሳላመ ቦላነ ይሁዳ ቦላ ኤሀና ሀናይስ። 
\v 13 ሳማረ ቦላ የግዳ ዋ ዎዶሩዋ፥ የሩሳላመ ቦላ የጋና፤ አካባ ሶ አሳ ቦላ የድዳ ቱምብያ፥ የሩሳላመ ቦላ የዳና። እስ አስ ከረ ሜጭድ ጉፋንድ መልሰይሳዳ፥ ታኒ የሩሳላመ ቁቻዳ ጉፋንና። 
\v 14 ታ አሳፐ አትዳይሳታ ታኒ የጋ አጋና፤ ታኒ ኤንታ ኤንታ ሞርከታ ኩሸን አዳ እማና። ኤንታ ሞርከት ኡባይ ኤንታ ኦይካናነ ቦንቃና። 
\v 15 ኤንታ ማይዛት ግብፀፈ ከዮሶፐ ሀች ጋካናዉ፥ ኤንቲ ታ ስንን ኢታባ ኦዳ ግሾነ ታና ሀንቀዳ ግሾ፥ ታኒ ሀይሳ ኦና’ ” ያግስ።
\p
\v 16 ምናሰይ ይሁዳ አሳ፥ ጎዳ ስንን ናጋራ ኦስስዳይሳ ቦላ ጉጅድ፥ ፅሎ አሳ ዎስ፤ የሩሳላመ ጋፃፐ ጋፃ ጋካናዉ፥ ሱን ኩንስ።
\p
\v 17 ምናሰይ ሀንዳ ሀራባይ፥ እ ኦዳባይ፥ እ ኦዳ ናጋራይ ይሁዳ ካዎታ ታርከ ማፃፋን ፃፈትስ። 
\v 18 ምናሰይ ሀይቅድ፥ ባ ማይዛታን ጋሄትስ፤ ባ ጋዋ ማታን ደእያ ኦዛ ጋደን ሞገትስ፤ እያ በሳን እያ ናአይ አሞን ካዎትስ።
\s1 ይሁዳ ካዋ አሞነ
\r (2 ታር 33:21-25)
\p
\v 19 አሞን ካዎትያ ዎደ፥ እያዉ ላይ ላታማነ ናምአ፤ እ የሩሳላመን ናምኡ ላይ ካዎትስ። እያ አየ ሱንይ ማሱላሞ፤ እያ ዮፅባ አድያ ሀሩሰ ናአ። 
\v 20 እያ አዋይ፥ ምናሰይ ኦዳይሳዳ፥ አሞነይካ ጎዳ ስንን ኢታባ ኦስ። 
\v 21 እ ባ አዋይ ሄመትዳ ኦግያን ሄመትስ፤ ባ አዋይ ኦዳ ኤቃታስ እካ ኦስ፤ ኤንታ ጎይንስ። 
\v 22 ጎዳ፥ ባ ማይዛታ ፆሳ አግስ፤ ጎዳ ኦግያን እ ሄመትቤና።
\p
\v 23 አሞነ ሹማት እያ ቦላ ማቀትድ፥ ካዎ ጋን እያ ዎዶሶና። 
\v 24 ሄሳፈ ጉየ፥ ይሁዳ አሳይ ካዋ አሞነ ቦላ ማቀትዳ ኡባታ ዎዶሶና። አሞነ በሳን እያ ናኣ እዮስያሳ ካዎዶሶና።
\p
\v 25 አሞን ሀንዳ ሀራባይነ እ ኦዳባ ኡባይ ይሁዳ ካዎታ ታርከ ማፃፋን ፃፈትስ። 
\v 26 አሞን ኦዛ ጋደን ባ ዱፉዋን ሞገትስ፤ እያ በሳን እያ ናአይ እዮስያስ ካዎትስ።
\c 22
\s1 ይሁዳ ካዋ እዮስያሳ
\r (2 ታር 34:1-2)
\p
\v 1 እዮስያስ ካዎትያ ዎደ፥ እያዉ ላይ ሆስፑና፤ እ የሩሳላመን ሀስታማነ እስ ላይ ካዎትስ። እያ አየ ሱንይ ይድዳ፤ እያ ባፁሮታ አድያ አዳያ ናአ።\x - \xo 22:1 \xo*\xt ኤርም 3:6.\xt*\x* 
\v 2 እዮስያስ ጎዳ ስንን ሱረባ ኦስ፤ ኡሻች ሀድርስ ጎና ባ ማይዛ ዳዊታ ኦግያን ሄመትስ።
\s1 ህገ ማፃፋይ በንትስ
\r (2 ታር 34:8-28)
\p
\v 3 ካዎይ እዮስያስ ባ ካዎትዳ ታማነ ሆስፑን ላይን፥ ማሱላማ ናኣ ናኣ፥ ኤዛላሳ ናኣ፥ ዋና ፃፍያ ሳፋና፥ ፆሳ ኬን ሀይሳዳ ያግድ ኪትስ። 
\v 4 “አሳይ ፆሳ ኬ ኤህን፥ ፆሳ ኬ ፐንግያ ናገይሳት አሳፐ ሺሽዳ ሚሽያ ታይባናዳ፥ ካህነ ሀላቃ ካልቀኮ ባ። 
\v 5 ካህነ ሀላቃይ ሚሽያ ፆሳ ኬ ኦራናዉ ሀላቃታስ እማና መላ ኦዳ። ኤንትካ ፆሳ ኬ ኦራያ ኦሳንቾታስ፥ 
\v 6 አናፀታስ፥ ግምበይሳትስነ ሹቹ ማሰይሳታስ ቃንፆ። ቃስ ፆሳ ኬ ኦራናዉ፥ ምነ ቆኤትዳ ሹቹ ሻመይሳታስ ቃንፆ። 
\v 7 ኦሱዋ አዋተን ፄለይሳት አማንያ አስ ግድያ ግሾ፥ ኤንታ ኩሸን ገልዳ ሚሽያን አይ አይ ኦዳኮ፥ ኤንታ ኦይቻናዉ ኮሸና”\x - \xo 22:7 \xo*\xt 2 ካዎ 12:15.\xt*\x* ያግስ።
\p
\v 8 ሄሳፈ ጉየ፥ ካህነ ሀላቃይ ካልቀይ ዋና ፃፍያ ሳፋናኮ፥ “ህገ ማፃፋ ፆሳ ኬን ደማስ” ያግስ። ማፃፋ ሳፋናስ እምን ሳፋን ኤክድ ናባብስ።
\p
\v 9 ዋና ፃፈይ ሳፋን ካዋኮ ብድ፥ “ፆሳ ኬን ደእያ ሚሽያ ነ ሹማት ኤክድ፥ ፆሳ ኬ ኦራናዉ ሀላቃታስ እምዶሶና” ያግስ። 
\v 10 ካልድ፥ ዋና ፃፈይ ሳፋን፥ “ካህነይ ካልቀይ ታዉ እምዳ ማፃፋ ሀይሳ በአ” ያግድ ካዋ ስንን ማፃፋ ናባብስ።
\p
\v 11 ናባብን ካዎይ ህገ ማፃፋን ደእያ ቃላ ስእዳ ዎደ፥ አዛንድ ባ ማኡዋ ዳክስ። 
\v 12 ካዎይ፥ ካህንያ ካልቀ፥ ሳፋና ናኣ አክቃማ፥ ምክያሳ ናኣ አክቦራ፥ ዋና ፃፍያ ሳፋናነ ካዋ ኦሳንቹዋ አሳያ ሀይሳዳ ያግድ ኪትስ። 
\v 13 “ብድ፥ ታ ግሾ፥ ሀ አሳ ግሾነ ይሁዳ ኡባ ግሾ፥ ሀ በንትዳ ማፃፋ ቃላባ አነ ጎዳ ኦይችተ። ኑኒ ፃፈትዳ ኡባባ ኦናዉ፥ ኑ ማይዛት ሀ ማፃፋ ቃላስ ኪተትቦና ግሾ፥ ኑ ቦላ ሱልዳ ጎዳ ሀንቆይ ዳሮ” ያግስ።
\p
\v 14 ያግን ካህነይ ካልቅያስ፥ አክቃም፥ አክቦር፥ ሳፋንነ አሳይ ማጫ ናብዉ ህልዳና ኦይቻናዉ ብዶሶና። ህልዳና ሀርሃሳ ናኣ ትቅዋ ናአ፥ ፆሳ ኬ ማኡዋ ናግያ ሳሌማ ማቾ። እያ የሩሳላመን ናምአን ጉታን ደአውሱ። ሄ ብዳ አሳት ኢራ ኦደትዶሶና።
\p
\v 15 ህልዳና፥ “ጎዳይ እስራኤለ ፆሳይ ሀይሳዳ ያጌስ፤ ህንተና ታኮ ኪትዳ አድያስ ኦድተ። 
\v 16 ጎዳይ ሀይሳዳ ያጌስ፤ ‘ይሁዳ ካዎይ ናባብዳ ማፃፋን ፃፈትዳ ኢታ ቃላ ኡባ ታኒ ሀ በሳኒኔ ኢያን ደእያ አሳ ቦላ ኤሀና ሀናይስ። 
\v 17 ኤንቲ ታና አግድ፥ ሀራ ፆሳታስ እፃነ ጩይስዶሶና፤ ኤንቲ ባንታ ኩሸን ኦዳባ ኡባን ታና ሀንቀዶሶና። ሄሳ ግሾ፥ ታ ሀንቆይ ሀ በሳ ቦላ ኤፅስ፤ ቶአናዉ ዳንዳኤና’ ያጌስ። 
\v 18 ጎዳ ኦይቻናዉ ህንተና ኪትዳ ካዋኮ ሀይሳዳ ያግተ፤ ‘ጎዳይ እስራኤለ ፆሳይ ኔኒ ስእዳ ቃላባ ሀይሳዳ ያጌስ። 
\v 19 ታኒ ሀ በሳኒኔ ኢያን ደእያ አሳ ባደስነ ዮስ አዳ እማና ግዳ ቃላ ስእዳ ዎደ፥ ነ ዎዛናይ ሹግን፥ ታ ስንን ነና ካዉሽዳ ግሾነ ነ ማኡዋ ዳካዳ፥ ታ ስንን ዬክዳ ግሾ፥ ታኒ ነ ዎሳ ስአስ። 
\v 20 ሄሳ ግሾ፥ ታኒ ነና ሳሮን ነ ማይዛታን ጋና፤ ኔኒ ሳሮ ሞገታና። ታኒ ሀ በሳኒኔ ኢያን ደእያ አሳ ቦላ ኤሀና ኢታባ ነ አይፈይ በኤና’ ያጌስ” ያጋሱ። ኤንቲ ብድ፥ ሀ ኦደትዳባ ካዋስ ኦድዶሶና።
\c 23
\s1 እዮስያስ ኤቃ ጎይኖ ይስስ
\r (2 ታር 34:3-7፥ 29-33)
\p
\v 1 ካዎይ እዮስያስ ይሁዳ ጭማታነ የሩሳላመ ጭማታ ኡባ ሺሽስ። 
\v 2 ካዎይ ፑደ ፆሳ ኬ ከይስ፤ ይሁዳ አሳይ፥ የሩሳላመን ደእያ አሳይ፥ ካህነትነ ናበት፥ ጉፈ ግታ ጋካናዉ ኡባይ እያራ እስፈ ፑደ ፆሳ ኬ ከይዶሶና። ፆሳ ኬፈ በንትዳ ጫቆ ቃላ ማፃፋ ኡባ ካዎይ ኤንታዉ ናባብስ። 
\v 3 ካዎይ ቱሳ ማታን ኤቅድ፥ ኤንቲ ጎዳ ኦግያን ሄመታናነ፥ እያ ህግያ፥ እያ ዎጋነ እያ ኪታ ኩመ ዎዛናንነ ኩመ ቆፋን ናጋናዉ፥ ቃስ ሀ ማፃፋን ፃፈትዳ ጫቁዋ ኦናዉ ጎዳ ስንን ጫቅስ። አሳ ኡባይካ እያራ ጫቅዶሶና።
\p
\v 4 ካዎይ ካህነ ሀላቃ ካልቀ፥ እያፐ ጋርሳራ ደእያ ካህነታነ ፐንገ ናገይሳታ ባኣለ፥ አሼራነ ሳሎ ፆልንቶታ ጎይናናዉ ጊግስዳ ሚሸታ ኡባ ፆሳ ኬፈ ከሳናዳ ኪትስ። ካዎይ ሄሳታ የሩሳላመፐ ጋፃ ከስድ፥ ቀድሮና ዛንጋራን ፁግድ፥ ብዱዋ ቤተለ ኤፍስ።
\p
\v 5 ይሁዳ ካታማታንነ የሩሳላመ ዩሹዋን ደእያ ቃ ጎይኖ በሳ ኡባን እፃነ ጩይሳናዉ ይሁዳ ካዎት ሱንዳ ኤቃታ ካህነታ ኡባ ኦሶፐ ከስስ። ባኣለስ፥ አዋስ፥ አጌናስ፥ ፆልንቶታስነ ሳሎን ደእያ ሀራ መተታስ እፃነ ጩይሰይሳታ ኡባ ድግስ።
\p
\v 6 አሼራ ፆሰ ምስልያ ፆሳ ኬፈ ከስድ፥ የሩሳላመ ካታማፐ ጋፃ ኤፍድ፥ ቀድሮና ዛንጋራ ኤፍድ፥ ያን ፁግስ። ፁገትዳይስ ጋጭድ፥ ለ ከስስ፤ ባና ደርያ ዱፎ ቦላ ላልስ።
\p
\v 7 ፆሳ ኬ ግዶን ጎይኖ ዎጋ ኦድ፥ አደይ አደራ ላይማትያ ኬታ ላልስ፤ ሄ ኬታን ማጫሳት አሼራ ኤቄስ ገሸ ሱቆሶና።
\p
\v 8 እዮስያስ ካህነታ ኡባ ይሁዳ ካታማታፐ ኤህድ፥ ካሰ ካህነት እፃነ ጩይስያ ቃ ጎይኖ በሳታ፥ ግብአፐ ብድ በርሳበ ጋካናዉ ደኤይሳታ ቱንስስ። ካታማ ሃርያ እያሱ ፐንግያፈ ሀድርሳ ባጋራ ደእያ ቃ ጎይኖ በሳካ ላልስ። 
\v 9 ቃ ጎይኖ በሳ ካህነት የሩሳላመን ጎዳ ያርሾ በሳ ፑደ ዮኮና፤ ሽን ኤንቲ ሀራ ካህነታራ እስፈ እርሾይ ገልቦና ዳቦ ሞሶና።
\p
\v 10 ካዎይ እዮስያስ ሄኖማ ዛንጋራን ደእያ ቶፈታ ያርሾ በሳ ቱንስስ። ሞሎካ ፆሳስ እስ አስካ ባ አደ ናኣ ዎይካ ማጫ ናአ ታማ ግዶራ አና መላ ድግስ።\x - \xo 23:10 \xo*\xt ሌወ 18:1፤ ኤርም 7:31፤ 19:1-6፤ 32:35.\xt*\x*
\p
\v 11 ይሁዳ ካዎት ፆሳ ኬ ገልያ ፐንግያን አዋስ ዱማይድ ዎዳ ፓራታ ድግስ። አዋ ፓራት ናታን-መለካ ሀላቃ ክፍልያ ማታን ደእያ ዳባባን ደኦሶና። ሄሳፈ ጉየ፥ አዋስ ዱማይድ ዎዳ ፓራ ጋረታ እዮስያስ ታማን ፁግስ።
\p
\v 12 አካዛ ኬ ፖቅያ ቦላ ይሁዳ ካዎት ጊግስዳ ያርሾ በሳታን ምናሰይ ፆሳ ኬን ደእያ ናምኡ ዳባባታ ግዶን ጊግስዳ ያርሾ በሳታ ካዎይ እዮስያስ ላልስ። ኤንታ ሄ በሳፈ ድግድ ትንቸረድ፥ ቀድሮና ዛንጋራን ሆልስ።\x - \xo 23:12 \xo*\xt 2 ካዎ 21:5፤ 2 ታር 33:5.\xt*\x*
\p
\v 13 ካዎይ የሩሳላመ ካታማፐ ዶሎሀ ባጋራ፥ ቱናተ ዙማፐ ዱገሀ ባጋን ደእያ ቃ ጎይኖ በሳታ ቱንስስ። ሄ ቃ በሳት እስራኤለ ካዎይ ሶሎሞነይ፥ ቱና ፆሳታ፥ ስዶና ፆሰ አስታሮቶ፥ ሞአበ ፆሳ ካሞሻነ አሞነ ፆሳ ሞሎካ ጎይናናዉ ጊግስዳ ቃ በሳታ። 
\v 14 ካዎይ እዮስያስ ጎይኖ ሹቻ ቱሳታካ መንረድ፥ አሼራ ፆሰ ምስለታካ ቃንፀረስ። ኤንቲ ኤቅዳ በሳን ሀይቅዳ አሳ መቀ ኩንስ።
\p
\v 15 እስራኤለ አሳ፥ ናጋራ ኦስስዳ ናባፃ ናአይ እዮርባም ቤተለን ቃ በሳን ጊግስዳ ያርሾ በሳ ካዎይ እዮስያስ ላልስ። ላልድ ሄ ያርሾ በሳ ሹቻታካ መንረድ፥ ለ ከስስ፤ አሼር ምስልያካ ፁግስ። 
\v 16 ሄሳፈ ጉየ፥ እዮስያስ ዩሹዋ ፄልድ፥ ዙማ ላንቀን ደእያ ዱፎታ በእስ፤ መቀታ ዱፎታፐ ከስድ፥ ያርሾ በሳ ቦላ ዎድ፥ ታማን ፁግስ። ያትድ ያርሾ በሳ ቱንስስ። ሄስ ሀንዳይ ፆሳ አስ ካሰ አዋጅዳ ጎዳ ቃላ ማራና። 
\v 17 ሄሳፈ ጉየ ካዎይ፥ “ሀ በንተይስ ኦደ ዱፎ?” ያግድ ኦይችስ።
\p ቤተለ አሳይ፥ “ይሁዳፐ ይድ፥ ቤተለ ያርሾ በሳ ቦላ ሀእ ኔኒ ኦዳባይ ፖለታናይሳ ካሰትድ ኦድዳ ናብያ ዱፎ” ያግዶሶና።\x - \xo 23:17 \xo*\xt 1 ካዎ 13:30-32.\xt*\x*
\p
\v 18 ካዎይ፥ “ደኦ ጊተ፤ ኦንካ እያ መቀ ሀይሳፈ ቃፎ” ያግስ። ሄሳ ግሾ፥ ሳማረፐ ይዳ ናበት አድያ መቀራ እስፈ እያ መቀ ቦቾና አጋግዶሶና።
\p
\v 19 እስራኤለ ካዎት ሳማረ ካታማታን ኦስስድ፥ ጎዳ ሀንቀዳ፥ ቃ ጎይኖ በሳታ እዮስያስ ድግስ፤ ቤተለን ኦዳይሳዳ፥ ኤንታ ቦላካ ኦስ። 
\v 20 እ ጎይኖ ቃ በሳን ኦያ ካህነታ ኡባ ያርሾ በሳ ቦላ ዎስ፤ ቃስ ሄ ያርሾ በሳ ቦላ አሳ መቀ ፁግስ። ሄሳ ኡባ ኦድ፥ የሩሳላመ ስምስ።
\s1 እዮስያስ ፓስካ ባኣለ ቦንችስ
\r (2 ታር 35:1-19)
\p
\v 21 ካዎይ አሳ ኡባ፥ “ሀ ጫቆ ማፃፋን ፃፈትዳይሳዳ ጎዳስ፥ ህንተ ፆሳስ ፓስካ ባኣለ ቦንችተ” ያግድ ኪትስ። 
\v 22 እስራኤለ ሃርያ ዳይናታ ዎደፐ ዶምድ፥ እስራኤለ ካዎታ ዎደነ ይሁዳ ካዎታ ዎደ ኡባን ሀይሳ መላ ፓስካ ባኣለ ኩመ ቦንቸት ኤረና። 
\v 23 ሽን ካዎይ እዮስያስ ካዎትዳ ታማነ ሆስፑን ላይን የሩሳላመ ካታማን ጎዳ ቦንቻናዉ ፓስካ ባለይ ቦንቸትስ።
\p
\v 24 ካህነ ሀላቃይ ካልቅያስ ፆሳ ኬን በንትዳ ማፃፋን ፃፈትዳ ህግያ ቃላ ምንናዳ፥ ቱና አያና ፄገይሳታነ ማሮታ፥ ሶ ግዶ ኤቃ ምስለታ፥ ኤቃ ሚሸታነ ይሁዳ ቢታንነ የሩሳላመ ካታማን በንትዳ ሀራ እፀትዳባታ ኡባ እዮስያስ ይስስ። 
\v 25 ሙሰ ህግያዳ ባ ኩመ ዎዛናን፥ ባ ኩመ ሸምፑዋንነ፥ ባ ኩመ ዎልቃን ጎዳኮ ስምዳ እዮስያሳ መላ ካዎይ፥ እያፐ ካሰ ግድን፥ እያፐ ጉየ ደንድቤና።
\p
\v 26 ምናሰይ ጎዳ ሀንቀናዉ ኦዳ ኢታ ኦሶ ኡባ ግሾ፥ ጎዳይ ይሁዳ ቦላ ሀንቀትዳ ባ ሸንያፐ ስምቤና። 
\v 27 ጎዳይ፥ “ታኒ እስራኤለ ታ ስንፈ ድግዳይሳዳ፥ ይሁዳካ ታ ስንፈ ድጋና፤ ታኒ ዶርዳ ካታማ፥ የሩሳላመነ ‘ታ ሱንይ ሀይሳን ዳና’ ግዳ ሀ ኬ ድጋና” ያግስ።
\s1 እዮስያሳ ካዎተ ዉርሰ
\r (2 ታር 35:20—36:1)
\p
\v 28 እዮስያስ ሀንዳ ሀራባይነ እ ኦዳባይ ኡባይ ይሁዳ ካዎታ ታርከ ማፃፋን ፃፈትስ። 
\v 29 እዮስያሳ ዎደ ግብፀ ካዎይ ናኮይ፥ አሶረ ካዋ ኦላን ማዳናዉ ኤፍራፂሳ ሻፋ ብስ። ካዎይ እዮስያስ እያራ ኦለታናዉ ባ ኦላንቾታ ኤክድ ከይስ። ሽን ካዎይ ናኮይ እያራ ማግዶን ጋሄትድ፥ እያ ዎስ። 
\v 30 አይለት እያ አሀ ፓራ ጋረ ቦላ ዎድ፥ ማግዶፐ የሩሳላመ ኤህድ፥ እያ ቡዞ ዱፉዋን ሞግዶሶና። ሄ ቢታ አሳይ እዮስያሳ ናኣ እዮአካዛ ዶርድ፥ እያ አዋ በሳን እያ ትይድ ካዎዶሶና።
\s1 ይሁዳ ካዋ እዮአካዛ
\r (2 ታር 36:2-4)
\p
\v 31 እዮአካዝ ካዎትያ ዎደ፥ ላይ እያዉ ላታማነ ሄ፤ እ የሩሳላመን ሄ አጌና ካዎትስ። እያ አየ ሱንይ ሀሙፃሎ፤ እያ ልብና ካታማ ደእያ ኤርምያሳ ናአ። 
\v 32 እያ ማይዛት ኦዳይሳዳ፥ እዮአካዝ ጎዳ ስንን ኢታባ ኦስ። 
\v 33 እዮአካዝ የሩሳላመን ካዎተናዳ ግብፀ ካዎይ ናኮይ ሀማታ ቢታን እርብላን እያ ቃችድ ሄ ሙኩሉነ ኦይዱ ፄቱ ክሎ ግራመ ዴፅያ ብራነ ሀስታማነ ኦይዱ ክሎ ግራመ ዴፅያ ዎርቃ ይሁዳ አሳ ጊርስስ። 
\v 34 ካዎይ ናኮይ እዮስያሳ ናኣ ኤልያቄመ እያ አዋ በሳን ካዎስ፤ እያ ሱን እዮአቄማ ያግድ ላምስ። ሽን እዮአካዛ ግብፀ ኤፍን፥ እ ያን ሀይቅስ።\x - \xo 23:34 \xo*\xt ኤርም 22:11-12.\xt*\x*
\s1 ይሁዳ ካዋ እዮአቄማ
\r (2 ታር 36:5-8)
\p
\v 35 እዮአቄም፥ ካዎይ ናኮይ ኦይችዳ ብራነ ዎርቃ ጊራ እያዉ እሚስ። ሄ ጊራ ቃንፃናዉ እዮአቄም ሄ ቢታ አሳይ ደምያ ኬና ብራፐነ ዎርቃፈ ጊራ ሺሽስ።
\p
\v 36 እዮአቄም ካዎትያ ዎደ ላይ እያዉ ላታማነ እቻሻ፤ እ የሩሳላመን ታማነ እስ ላይ ካዎትስ። እያ አየ ሱንይ ዛብዶ፤ እያ ሩማ ካታማን ደእያ ፓዳያ ናአ።\x - \xo 23:36 \xo*\xt ኤርም 22:18-19፤ 26:1-6፤ 35:1-19.\xt*\x* 
\v 37 እዮአቄም ባ ማይዛት ኦዳይሳዳ፥ ጎዳ ስንን ኢታባ ኦስ።
\c 24
\p
\v 1 እዮአቄማ ዎደ ባብሎነ ካዎይ ናቡካዳናፆር ይሁዳ ቦላ ደንድስ። እዮአቄም እያዉ ሄ ላይ ሃረትዳፐ ጉየ፥ ናቡካዳናፆራ ቦላ ማካልስ።\x - \xo 24:1 \xo*\xt ኤርም 25:1-38፤ ዳነ 1:1-2.\xt*\x* 
\v 2 ጎዳይ ካልዳወታ ፓኖታ፥ ሶረ ፓኖታ፥ ሞአበ ፓኖታነ አሞነ ፓኖታ እዮአቄማ ቦላ የድስ፤ ባ አይለታ ናበታ ባጋራ ጎዳይ ካሰ ኦድዳይሳዳ፥ ይሁዳ ቢታ ይሳናዳ ሀይሳታ የድስ። 
\v 3 ካዎይ ምናሰይ ኦዳ ናጋራ ጋሶን ጎዳይ ይሁዳ አሳ ባ ስንፈ ድጋናዉ ሀ ዩዋ የድስ። 
\v 4 እ ፅሎ አሳ ሱ ጉስድ፥ የሩሳላመን ኩንዳ ግሾ፥ ጎዳይ ምናሰስ ሄ ናጋራ አቶ ጋናዉ ኮይቤና።
\p
\v 5 እዮአቄም ሀንዳ ሀራባይነ እ ኦዳባ ኡባይ ይሁዳ ካዎታ ታርከ ማፃፋን ፃፈትስ። 
\v 6 እዮአቄም ሀይቅድ፥ ባ ማይዛታ ጋክስ፤ እያ በሳን እያ ናአይ ዮአክን ካዎትስ። 
\v 7 ግብፀ ካዎይ ናምአን ባ ቢታፈ ደንድድ፥ ኦላስ ይቤና፤ ግብፀ ሻፋፐ ዶምድ፥ ብድ ኤፍራፂሳ ሻፋ ጋካናዉ፥ ግብፀ ካዎይ ሃርዳ ቢታ ኡባ ባብሎነ ካዎይ ኤክስ።
\s1 ይሁዳ ካዋ ዮአክና
\r (2 ታር 36:9-10)
\p
\v 8 ዮአክን ካዎትያ ዎደ ላይ እያዉ ታማነ ሆስፑና፤ ዮአክን፥ የሩሳላመን ሄ አጌና ካዎትስ። እያ አየ ሱንይ ናስታ፤ እያ የሩሳላመ አድያ ኤልናታና ናአ። 
\v 9 ዮአክን ባ አዋይ ኦዳይሳዳ፥ ጎዳ ስንን ኢታባ ኦስ።
\p
\v 10 ሄ ዎደ ባብሎነ ካዋ ናቡካዳናፆራ ኦላንቾት የሩሳላመ ይድ፥ ካታማ ተቅዶሶና። 
\v 11 ባብሎነ ካዎይ ናቡካዳናፆር ሄ ካታማ ይስ። 
\v 12 ይሁዳ ካዎይ እዮአክና፥ እያ አይያ፥ እያ አይለት፥ እያ ሀላቃትነ ካዎ ጋ ሹማት ኡባይ ባብሎነ ካዋስ ኩሸ እምዶሶና።\x - \xo 24:12 \xo*\xt ኤርም 22:24-30፤ 24:1-10፤ 29:1-2.\xt*\x*
\p ዮአክን ካዎትዳ ሆስፑን ላይን፥ ባብሎነ ካዎይ ዮአክና ቃችስ። 
\v 13 ፆሳ ኬነ ካዎ ጋን ደእያ ሻሉዋ ኡባ ሄ በሳፈ ደንድ ኤፍስ። ጎዳይ ካሰ ኦድዳይሳዳ ካዎይ ሶሎሞነይ ፆሳ ኬን ጊግስዳ ዎርቃ ሚሸታ ኡባ ባብሎነ ካዎይ ቃንፀረስ። 
\v 14 ናቡካዳናፆር የሩሳላመ አሳ፥ ሀላቃታ ኡባ፥ ኦላንቾታ ኡባ፥ ኩሸ ሂላንቾታነ ብራታ ቆፀይሳታ ኡባ፥ 10,000 አሳ የሩሳላመፐ ድእድ ኤፍን፥ ቢታን ማንቆ አሳ ፃላል አትስ።
\p
\v 15 ናቡካዳናፆር እዮአክና ድእድ፥ እያ አይዉ፥ እያ ማቸታ፥ እያ ሞርናትነ ቢታን ደእያ ግታ አሳ ኡባ ባብሎነ ኤፍስ።\x - \xo 24:15 \xo*\xt ህዝ 17:12.\xt*\x* 
\v 16 ሄ አሳፐ 7,000 አሳት ኦላንቾታ፤ 1,000 አሳት ዱማ ዱማ ኩሸ ሂላንቾታ፤ ኤንቲ ኡባይ ምኖነ ኦላ ኦለታናዉ ዳንዳኤይሳታ። 
\v 17 ሄሳፈ ጉየ፥ ባብሎነ ካዎይ ዮአክና በሳን እያ አዋ እሻ ማታና ካዎስ፤ እያ ሱን ሰደቅያሳ ያግድ ላምስ።\x - \xo 24:17 \xo*\xt ኤርም 37:1፤ ህዝ 17:13.\xt*\x*
\s1 ይሁዳ ካዋ ሰደቅያሳ
\r (2 ታር 36:11-12፤ ኤርም 52:1-3)
\p
\v 18 ሰደቅያስ ካዎትያ ዎደ፥ ላይ እያዉ ላታማነ እስኖ፤ እ ታማነ እስ ላይ የሩሳላመን ካዎትስ። እያ አየ ሱንይ አምፃሎ፤ እያ ልባና ካታማን ደእያ ኤርምያሳ ናአ።\x - \xo 24:18 \xo*\xt ኤርም 27:1-22፤ 28:1-17.\xt*\x* 
\v 19 እዮአቄም ኦዳይሳዳ፥ ሰደቅያስ ጎዳ ስንን ኢታባ ኦስ። 
\v 20 ጎዳይ ሀንቀትዳ ግሾ፥ የሩሳላመ አሳ ቦላነ ይሁዳ አሳ ቦላ ሀይስ ሀንስ፤ ዉርሰን ኤንታ እ ባ ስንፈ ድግስ።
\p ሰደቅያስ ባብሎነ ካዋ ቦላ ማካልስ።\x - \xo 24:20 \xo*\xt ህዝ 17:15.\xt*\x*
\c 25
\p
\v 1 ሰደቅያስ ካዎትዳ ኡዱፉን ላይ፥ ታማን አጌናን፥ ታማን ጋላስ፥ ባብሎነ ካዎይ ናቡካዳናፆር ባ ኦላንቾታ ኡባ ኤክድ፥ የሩሳላመ ተቅስ፤ እያ ዩሹዋን ቢታ ዶርድ ተቅስ።\x - \xo 25:1 \xo*\xt ኤርም 21:1-10፤ 34:1-5፤ ህዝ 24:2.\xt*\x* 
\v 2 ሰደቅያስ ካዎትዳ ታማነ እስን ላይ ጋካናዉ፥ ካታማይ ተቀትድ ጋምእስ።
\p
\v 3 ሄሳ ጋሶን ቢታን ኮሽ ሱልን፥ ሄ ላይ ኦይዳን አጌናን፥ ኡዱፉን ጋላሳን አሳስ ምያባይ ይስ። 
\v 4 ካታማ ዩሾ ግምበይ እስ ባጋራ መቅን፥ ካልዳወት ዩይ አድ ናግኮካ፥ ይሁዳ ካዋ ኦላንቾት ኩመ ቃማ ካዎ ጋደ ኤፍያ ኦግያ ኦይክድ፥ ናምኡ ድርሳ ግምበት ጋሄትያ ፐንግያራ ከይድ ባቃትዶሶና። ኤንቲ ዮርዳኖሰ ድልባኮ ስሚድ ባቃትዶሶና።\x - \xo 25:4 \xo*\xt ህዝ 33:21.\xt*\x* 
\v 5 ሽን ባብሎነ ኦላንቾት ካዋ የደድ፥ እያርኮ ደምባ ጋሸ ኦይክዶሶና። እያ ኦላንቾት ኡባይ እያፐ ሻከትድ ላለትዶሶና። 
\v 6 ሄሳፈ ጉየ፥ ኤንቲ እያ ራብላ ካታማን ደእያ ናቡካዳናፆራኮ ኤፍዶሶና። ባብሎነ ካዎይ ሰደቅያሳ ቦላ ፕርድስ። 
\v 7 ሰደቅያሳ ናይታ፥ ሰደቅያስ ፄልሽን ዎዶሶና። እያ አይፈታ ዎጭ ከስድ፥ ሳንላታን ቃችድ፥ ባብሎነ ቢታ ኤፍዶሶና።\x - \xo 25:7 \xo*\xt ህዝ 12:13.\xt*\x*
\s1 ፆሳ ኬ ላለተ
\r (ኤርም 52:12-33)
\p
\v 8 ናቡካዳናፆር ባብሎነን ካዎትዳ ታማነ ኡዱፉን ላይን፥ እቻሻን አጌናን፥ ላፑን ጋላሳን፥ ካዋ ሞርናታፐ እሶይ፥ ካዋ ናገይሳታ ሀላቃይ ናቡዛርዳን የሩሳላመ ገልስ። 
\v 9 ፆሳ ኬ፥ ካዎ ጋነ የሩሳላመን ደእያ ኬ ኡባ፥ ግታ ኬ ጌተትያ ኡባ ፁግስ። 
\v 10 ባብሎነ ኦላንቾት ኡባይ ካዋ ናገይሳታ ሀላቃ ኪታን የሩሳላመ ካታማ ዩሹዋን ደእያ ድርሳ ግምብያ ኡባ ላልዶሶና። 
\v 11 ናቡዛርዳን ካታማንነ ይሁዳን አትዳ አሳታ፥ ካድድ ባብሎነ ኦላንቾታን ጋሄትዳ አሳታ ኡባ ኦይክድ፥ ድእድ ኤፍስ። 
\v 12 ሽን ናቡዛርዳን ዉርሰ ማንቆታፐ ጉታ ዎይነ ቶካናዳነ ጋደ ጎያናዳ ይሁዳን አሽስ።
\p
\v 13 ባብሎነ አሳት ፆሳ ኬን ደእያ ናሰ ብራታፐ መዳ ቱሳታ፥ ጫና ጋረታነ ግታ ከረታ መንረዶሶና፤ ናሰ ብራታ ኡባ ባብሎነ ኤፍዶሶና።\x - \xo 25:13 \xo*\xt 1 ካዎ 7:15-26፤ 2 ታር 3:15-17.\xt*\x* 
\v 14 ከረታ፥ አካፋታ፥ ፆምፐ ፄራ ፕትያባታ፥ ጭልፓታነ ያርሾ ዎደ ጎኤትያ ናሰ ብራታ ሚሸታ ኡባ ኤፍዶሶና።\x - \xo 25:14 \xo*\xt 1 ካዎ 7:45፤ 2 ታር 4:16.\xt*\x* 
\v 15 ካዋ ናገይሳታ ሀላቃይ ናቡዛርዳን ዎርቃፈ ኦሰትዳ ሚሸታ ዎርቃ፥ ብራፐ ኦሰትዳ ሚሸታ ብራ ኦ ኤክድ፥ እፃነ ጩይስያ ሻተታነ ፃሮታ ኡባ ኤፍስ። 
\v 16 ካዎይ ሶሎሞነይ ፆሳ ኬ ኦሶስ ጊግስዳ ናምኡ ቱሳታ፥ ግታ ከረታነ ጫና ጋረታ፥ ናሰ ብራታ ምዛነን ልካናዉ ዳንዳኤትቤና። 
\v 17 ናምኡ ቱሳት እስ መላ ግድድ፥ እሱዋ እሱዋ ጌሳይ ታማነ ሆስፑን ዋ፤ ቃስ እስ እስ ቱሳ ሁጰን ደእያ ጉምቦት ሄ ዋ አዱሰ። ሄ ጉምቦታ ዩሾይ ናሰ ብራታ ግተንነ ኦሮማነ ቴራ ምስለን አሌቀትስ።
\s1 ይሁዳ አሳ ድኤተ
\r (ኤርም 52:24-27)
\p
\v 18 ካዋ ናገይሳታ ሀላቃይ ናቡዛርዳን፥ ካህነ ሀላቃ ሳራያ፥ እያ ካልያ ካህንያ ሶፎንያሳነ ፐንገ ናግያ ሀራ ሄ አሳታ ኦይክስ። 
\v 19 ሄ ዎደይ ጋካናዉ፥ ካታማን ደእያ አሳፐ ይሁዳ ቶራ ሞጮና፥ ካዋ ዞረይሳታፐ እቻሹ አሳታ፥ ቶራ ሞጮናታ ፃፍያ፥ ኦላንቾታ ዶርያ ሀራ ኡሱፑን ታሙ አሳታ ኤፍስ። 
\v 20 ሀላቃይ ናቡዛርዳን ኤንታ ኡባ፥ ባብሎነ ካዋኮ ራብላ ካታማ ኤፍስ። 
\v 21 ባብሎነ ካዎይ ኤንታ ኡባ ሀማታ ቢታን ራብላ ካታማን ዎስ። ሄሳዳ ሀንድ፥ ይሁዳ አሳይ ባንታ ቢታፈ ድኤትድ ብዶሶና።
\p
\v 22 ካዎይ ናቡካዳናፆር ሳፋና ናኣ ናኣ፥ አክቃማ ናኣ ጎዶልያ ይሁዳን አትዳ አሳ ቦላ ሹምስ። 
\v 23 ኩሸ እምቦና ይሁዳ ቶራ ሞጮናትነ ኦላንቾት ሄሳ ስእዳ ዎደ፥ ምፅጳን ደእያ ጎዶልያራ ጋሄትዶሶና። ሄ ሀላቃት ናታና ናኣ እስማኤላ፥ ቃረያ ናኣ ዮሃና፥ ናፆፋ አድያ ታንሁመታ ናኣ ሳራያነ ማካታ አድያ ያዛና ናኣ። 
\v 24 ጎዶልያ ኤንታዉነ ኤንታ ኦላንቾታስ “ሀይሳታስነ ኤንታ ሀላቃታስ ያዮፍተ። ሀ ቢታን ደእተ፤ ባብሎነ ካዋስ ሃረትተ፤ ሄሳ ህንተ ኦኮ ኡባባይ ህንተዉ እንጀታና” ያግድ ኤንታዉ ጫቅስ።
\p
\v 25 ሽን ላፑን አጌናን፥ ካዎ ኮች ግድዳ ኤልሳማ ናኣ ናታና ናአይ እስማኤል ታሙ አሳራ ምፅጳ ብድ፥ ጎዶልያ፥ ይሁዳ አሳነ እያራ ደእያ ባብሎነ አሳ ኡባ ዎስ። 
\v 26 ሄሳፈ ጉየ፥ ባብሎነ አሳስ ያይድ፥ ይሁዳ አሳይ፥ ጉ ግት አቶናሽን፥ ቶራ ሞጮናት ኡባይ ግብፀ ቢታ ባቃትዶሶና።
\s1 ዮአክን ቃሾፐ ብለተ
\r (ኤርም 52:31-34)
\p
\v 27 ዮአክን ድኤትድ ብዳ ሀስታማነ ላፑን ላይን፥ ታማነ ናምአን አጌናን፥ ላታማነ ላፑን ጋላሳን፥ ዮር-ማሮዳክ\f + \fr 25:27 \fr*\fq ዮር-ማሮዳካ፦ \fq*\ft ሀራ ሱንይ አመል-ማሮዳካ ጌተቴስ።\ft*\f* ካዎትዳ ላይ፥ ይሁዳ ካዋ ዮአክና ማርድ ቃሾፐ ብልስ። 
\v 28 ዮር-ማሮዳክ፥ ዮአክናራ ሎኦ ቃላ ኦደትድ፥ ባብሎነን ድኦን ደእያ ሀራ ካዎታ ኡባፈ አድ፥ እያ ቦንችስ። 
\v 29 ሄሳ ግሾ፥ ዮአክን ቃሾ ኬን ማእዳ ማኡዋ ላምድ፥ አትዳ ባ ደኦ ላይ ኡባን ካዎ ጋይታፐ ምስ። 
\v 30 ጋላስ ጋላስ እያዉ ኮሽያባ ኡባ ባብሎነ ካዎይ እሚስ።