\id 2CO - GOOFA FULL BIBLE
\ide UTF-8
\h 2 ቆሮንቶሳ ኪታ
\toc1 2 ቆሮንቶሳ ኪታ
\toc3 2 ቆሮ
\toc2 2 ቆሮንቶሳ
\mt1 ጳዉሎስ ቆሮንቶሳ አሳስ
\mt2 ፃፍዳ ናምአን ኪታ
\imt ጋ ቆፋ
\ip ጳዉሎስ ቆሮንቶሳ አሳስ ፃፍዳ ናምአን ኪታይ ፃፈትዳይ፥ እያዉ ቆሮንቶሳ ዎሳ ኬራ ደእያ ጋሄተይ መቶ ግዶ ገልድ ደእያ ዎደና። እስ እስ ዎሳ ኬ አሳት ጳዉሎሳ ዳሮ ቦርኮካ፥ እ ስጋ መናዉ ኮየይሳ ኤንታ በስስ። ኤንታ ቦላ ጎዳትሸነ ዎልቃ በስሸ ኤንታኮ ባናዉ ኮይቤና (\xt 1:23\xt*)። ኤንቲ ጳዉሎሳ ኪታ ስእድ እሶይ እሱዋስ አቶ ጋና መላነ ዎል ምንና መላ ኤንታ ዞሬስ (\xt 2:5-11\xt*)።
\ip ጳዉሎስ ባ ኪታን፥ ቆሮንቶሳ ዎሳ ኬራ እያዉ ደእያ ጋሄተ ቆንጭስድ፥ ዎሳ ኬን መትዳ ኢታባስነ እፁዋስ አይስ ምኖ ዛሮ እምዳኮ ኦዴስ። እያራ ጋድ እያ ሴራይ ኤንታ ናጋራፐ ዛሪድ ስጋኮ ኤህዳ ግሾ፥ እ ኡፋይትዳ ኡፋይሳ ኤንታዉ ቆንጭሴስ። ካልድካ፥ ይሁዳን ደእያ አማንያ አሳ ማዳናዉ ባንታዉ ደእያባፐ ጮ እማና መላ ሀሳይሴስ።
\ip ዉርሰ ሸምፖታን ቃስ፥ ቆሮንቶሳ ዎሳ ኬን ደእያ እስ እስ አሳት ባንታና፥ “ቱማ ሀዋረ” ኦድ ኤክድ፥ ጳዉሎሳ “ዎርዶ ሀዋረ” ኦድ እያ ሞትያ ግሾ፥ ባ ሀዋረተ ማታ ቦላ ደንድዳ ሞቱዋስ ዛሮ እሜስ።
\iot ማፃፋ አይፈ ቆፋታ
\io1 ገሎ ቆፋ (\ior 1:1-11\ior*)
\io1 ጳዉሎሳነ ቆሮንቶሳ ዎሳ ኬ (\ior 1:12—2:17\ior*)
\io1 ክርስቶሳ ሲቆይ ህንተና ካለ (\ior 3:1—7:16\ior*)
\io1 ይሁዳን መቶተትዳ አሳስ እመትያ እሞታ (\ior 8:1—9:15\ior*)
\io1 ጳዉሎስ ቱማ ሀዋረ (\ior 10:1—13:10\ior*)
\io1 ኩሻ ቆፋ (\ior 13:11-14\ior*)
\c 1
\p
\v 1 ፆሳ ሸነን የሱስ ክርስቶሳ ሀዋረ ግድዳ ጳዉሎስነ፥ ኑ እሻ ፅሞትዮስ፥
\p ቆሮንቶሳን ደእያ ፆሳ ዎሳ ኬስነ አካያ ቢታን ደእያ ፆሳ አሳ ኡባስ ፃፍዳ ኪታ።\x - \xo 1:1 \xo*\xt ሀዋ 18:1.\xt*\x*
\p
\v 2 ፆሳ ኑ አዋፐነ ጎዳ የሱስ ክርስቶሳፐ፥ አ ኬሀተይነ ሳሮተይ ህንተዉ ግዶ።
\s1 ጳዉሎስ ፆሰ ጋላቴስ
\p
\v 3 ማሮተ አዋስ፥ ኡባ ዎደ ኑና ምንያ ፆሳስ፥ ኑ ጎዳ የሱስ ክርስቶሳ አዋስ ጋላት ግዶ። 
\v 4 ፆሳይ ኑስ እምዳ ምንዋን፥ መቶን ደኤይሳታ ኑ ምንና መላ ፆሳይ ኑና ኑ መቶ ኡባን ምንስ። 
\v 5 ኑኒ ክርስቶሳ ዳሮ ዋይያ ሻከትዳይሳዳ ቃስ ኑኒ እያ ዳሮ ምንዋን ምናና። 
\v 6 ኑኒ ዋየትኮ ሄስ ህንተና ምንናሳነ ህንተና አሻናሳ። ቃስ ኑኒ ምነትኮ ኑኒ ገንጭዳ ዋይያ መላ ህንተካ ገንጭድ፥ ፆሳይ ህንተዉ እምያ ምንዋን ምናና። 
\v 7 ህንተ ኑ ኤክዳ መቱዋ መላ ኤክድ፥ ኑ ምንዋን ሻከታናይሳ ኑ ኤርያ ግሾ ኑ ኡፋይሳይ ህንተናን ምኖ።
\p
\v 8 ኑ እሻቶ፥ ኢሰ ቢታን ኑና ጋክዳ መቱዋ ህንተ ኤራና መላ ኮዮስ። ሄ ኑና ጋክዳ መቶይ ኑ ዎልቃፈ ዳርን፥ ሀይቆና አቶኮ ግድ ኡፋይስ ቃንፅዳሽን። 
\v 9 ኑኒ ኑ ቦላ ሀይቆ ፕርድ ፕርደትዳ መላ ቆፕዳ። ሽን ኑኒ ኑ ሁጰን ግዶናሽን፥ ሀይቅዳይሳታ ደንያ ፆሳን አማነታና መላ ሄስ ሀንስ። 
\v 10 ፆሳይ ሄሳ መላ ኢታ ሀይቆፐ ኑና አሽስ፤ ሀእካ አሻና፤ ስንፈካ እ ኑና አሻና ግድ እያን ኡፋይስ ዎስ። 
\v 11 ዎሳን ኑና ማድተ። ዳሮ ዎሳ ጋሶን ፆሳ ማዱዋ ኑ ደምያ ዎደ ዳሮ አሳይ ኑ ግሾ ፆሳ ጋላቶሶና።
\s1 ጳዉሎስ ባ ሀልቹዋ ላምስ
\p
\v 12 ኑኒ ኑ ጌሻ ካሀን ጬቀቶስ። ኑኒ ሀ አላምያን ደእዳ ደኡዋን ኡባራካ ህንተራ ኑ ደእዳ ደኡዋን ቱማተንነ ሱረተን ህንተራ ደእዳ። ሄስካ፥ ሀ አላምያ ጭንጫተን ግዶናሽን፥ ፆሳ አ ኬሀተና። 
\v 13 ኑ ህንተዉ ፃፍዳ ዳብዳበይ ህንተ ናባባናዉነ አኬካናዉ ዳንዳእያባፐ አትሽን፥ ሀራ ግደና። ህንተ እያ አኬካናዉ ዳንዳኤይሳ ታ አማናይስ። 
\v 14 ሀእ ህንተ ኑና ሀንዳ ኬና ኤሬታ፥ ሽን ስንፈ ኩመ ኤራናይሳ ታ አማነታይስ። ኑ ጎዳ የሱሲ ስምያ ዎደ ኑኒ ህንተናን ጬቀትዳይሳዳ ህንተካ ኑናን ጬቀታና።
\p
\v 15 ሄሳ ታኒ ሎይ ኤርዳ ግሾ፥ ህንተ ናምአን ጎኤታና መላ ካሰታዳ ህንተኮ ባናዉ ቆፋ ቃቻስ። 
\v 16 ታኒ ማቀዶነ ባሸነ ያፐ ስማሸ ህንተና በአና። ታኒ ያፐ ይሁዳ ብያ ዎደ ህንተ ታና ታ ኦግያን ማዳና ጋዳ ቆፓስ።\x - \xo 1:16 \xo*\xt ሀዋ 19:21.\xt*\x* 
\v 17 ታኒ ሄሳ ጋሸ አይ ኦናዉ በሲያኮ ኤሮና አስ ዳንያና? ዎይኮ ታኒ ታ ቆፋ ቃችያ ዎደ አሳ ቆፋዳ፥ እስ ቶሆ “ኤ” ቃስ እስ ቶሆ “አካይ” ግያ አሳ መለዬ?
\p
\v 18 ሽን ፆሳይ አማነተይሳ ግድያ ግሾ፥ ኑ ህንተዉ ኦድያ ቃላይ “ኤ” ዎይኮ “አካይ” ገይሳ ግደና። 
\v 19 ታኒ፥ ስላሰይነ ፅሞትዮስ ህንተዉ ማርካትዳ ፆሳ ናአይ፥ የሱስ ክርስቶሲ ኡባ ዎደ “ኤፐ” አትሽን፥ “ኤ” ነ “አካይ” ግደና።\x - \xo 1:19 \xo*\xt ሀዋ 18:5.\xt*\x* 
\v 20 ፆሳይ እማና ግዳ ኡባይ ክርስቶሳ ባጋራ “ኤ” ግዴስ። ኑኒ ክርስቶሳ ባጋራ ፆሳ ቦንቾስ፥ “አምንእ” ገይ ሄሳ ግሾሳ። 
\v 21 ኑነ ህንተ ክርስቶሳን ምንድ ኤቃና መላ ኦዳይነ ባ ኦሱዋስ ዶርዳይ ፆሳ። 
\v 22 ኑኒ እያባ ግደይሳ ኤርሳናዉ ባ ማታምያ ኑ ቦላ ዎስ፤ ቃስ ባ ጌሻ አያና ኦይ ኦድ ኑ ዎዛናን ዎስ።
\p
\v 23 ታኒ ቆሮንቶሳ ቦና አግዳይ ህንተ አዛኖና አታና መላሳ፤ ሄስ ዎርዶ ግድኮ ፆሳይ ታ ሸምፑዋ ታፐ ኤኮ። 
\v 24 ህንተ፥ ህንተ አማኑዋን ምንድ ደእያ ግሾ፥ ኑ ህንተና ኡፋይሳናዉ ህንተራ እስፈ ኦይሳታፐ አትሽን፥ ህንተና ዎልቃን አማንይሳታ ግዶኮ።
\b
\c 2
\p
\v 1 ታኒ ናምአን ህንተኮ ቢከ ጋዳ ቆፋ ቃችዳይ ህንተና አዛንና አጋናሳ። 
\v 2 ታኒ ህንተና አዛንኮካ ታ አዛንዳ ህንተፈ ሀር ታና ኡፋይሳናዉ ደኤይ ኦኔ? 
\v 3 ታኒ ህንተዉ ሄ ዳብዳብያ ፃፍዳይ፥ ታ ህንተና በአናዉ ብያ ዎደ ታና ኡፋይሳናዉ በሲያ አሳን ታ አዛናናዉ ኮዮና ግሾሳ። ታ ኡፋይትያ ዎደ ህንተ ኡባይካ ኡፋይታናይሳ ታ አማናይስ። 
\v 4 ታኒ ዳሮ ዋየንነ ኡንአን ቃስ ዳሮ አፉን ፃፍዳይ፥ ህንተና አዛንናሳ ግዶናሽን፥ ታኒ ህንተና ኡባ አይ መላ ዶስያኮ ህንተና ኤርሳና መላሳ።
\s1 ቆህዳ አስ አቶ ጉሱ
\p
\v 5 አሰ አዛንዳ ኦንካ ደእኮ ታ እያ ናቁዋ ዳርሳናዉ ኮይከፈ አትሽን፥ ታና ግዶናሽን፥ ህንተፈ ዳሮታ አዛንስ። 
\v 6 ህንተፈ ዳርያ አሳይ ሄ ኡራ ሴርዳ ሴራይ እያዉ ግዳና። 
\v 7 ሄሳ ግሾ፥ ሄ ኡራይ ዳሮ አዛንድ፥ ኡፋይስ ቃንፆና መላ ህንተ እያ ማራናዉነ ምንናዉ በሴስ። 
\v 8 ህንተ እያ ሲቀይሳ ዛር እያዉ ቆንጭሳና መላ ታ ህንተና ዎሳይስ። 
\v 9 ታ ሄ ዳብዳብያ ህንተዉ ፃፍዳይ፥ ህንተ ፓጨትድ፥ ኡባባን ታዉ ኪተተይሳ ኤራናዉ ኮይዳ ግሾሳ። 
\v 10 ህንተ ማርያ ኡራ ታካ ማራና። ታኒ ማራናባይ አይብ ደእኮካ፥ ክርስቶሳ ስንን ህንተ ግሾ ጋዳ ማራስ። 
\v 11 ታኒ ሄሳ ኦዳይ ፃላህያ ጭሞ ኦሱዋ ኑ ኤርያ ግሾ፥ ፃላሄን ጭመቶና አታና መላሳ።
\s1 ክርስቶሳን ደእያ ፆኖ
\p
\v 12 ታኒ ክርስቶሳ ዎንገላ ሳባካናዉ ፅሮኣዳ ብዳ ዎደ፥ ጎዳይ ያን ታዉ ኦሶ ኦገ ጊግስድ ዎስ።\x - \xo 2:12 \xo*\xt ሀዋ 20:1.\xt*\x* 
\v 13 ሽን ታኒ ታ እሻ ትቶ ያን ደማቦና ግሾ ታ ዎዛናይ ሸምፕቤና። ሄሳ ግሾ፥ ያን ደእያ አሳ ሳሮዳ እያ ኮያናዉ ማቀዶነ ባስ።
\p
\v 14 ሽን ክርስቶሳ ባጋራ ኡባ ዎደ ኑና ፆኖን ካለያነ ሽቶ መላ ሳውያ ክርስቶሳባ ኑ ኤርያ ትምርትያ ኡባ በሲ ጋና መላ ኦያ ፆሳ ጋላት ጋኮ። 
\v 15 ኑኒ አትያ አሳ ግዶንነ ይያ አሳ ግዶን ክርስቶሳ ባጋራ ፆሳስ እመትዳ ሳውያ ሽቶ መላ። 
\v 16 ያ አሳስ ሀይቆኮ ኤፍያ ሀይቆ ፔኖ፤ ቃስ አትያ አሳስ ደኦኮ ኤፍያ ደኦ ሳዎ፤ ያትን፥ ሄሳ መላ ኦሶስ ግዳናይ ኦኔ? 
\v 17 ኑኒ ፆሳ ቃላ ዎ ደማናዉ ኮይድ ዋላክድ ዛልእያ ዳሮ አሳ መላ ግዶኮ። ሽን ፆሳይ ኪትዳ ሱረ አሳታ መላ ክርስቶሳን ደእድ ፆሳ ስንን ቃላ ኦዶስ።
\c 3
\p
\v 1 ኑኒ ዛሪድ ኑና ሳቢኖዬ? ዎይኮ ሀራ አሳዳ፥ ሳባ ዳብዳብያ ህንተዉ የዳናዉ ዎይኮ ህንተፈ ኤካናዉ ኑና ኮሽዬ? 
\v 2 አስ ኡባይ ህንተና ኤራና መላነ ናባባና መላ ህንተ ኑ ዎዛናን ፃፈትድ ደእያ ኑ ዳብዳበ። 
\v 3 ህንተ ቃላመን ግዶናሽን፥ ደኦ ፆሳ አያናን፥ ሹቻ ቦላ ግዶናሽን፥ አሳ ዎዛናን ፃፈትዳይሳታነ ኑናን ሀጋዘትዳ ክርስቶሳ ዳብዳበ ግደይሳ በስደታ።\x - \xo 3:3 \xo*\xt ከሳ 24:12፤ ኤርም 31:33፤ ህዝ 11:19፤ 36:26.\xt*\x*
\p
\v 4 ኑ ሄሳ ግዳይ፥ ክርስቶሳ ባጋራ ፆሳን አማኖይ ኑስ ደእያ ግሾሳ። 
\v 5 ኑ ሄሳ ኦናዉ ዳንዳእዳይ ፆሳ ዎልቃናፐ አትሽን፥ ኑኒ ኑ ዎልቃን አይኮካ ኦናዉ ዳንዳኦኮ። 
\v 6 ኑ ኦራ ጫቁዋ ኦሳንቾታ ግዳና መላ ፆሳይ ኑና ዳንዳእስስ። ሄ ኦራ ጫቆይ ጌሻ አያናን በንትዳይሳፈ አትሽን፥ ፃፈትዳ ህገን ግደና። ህገይ ዎስ፥ ሽን ጌሻ አያናይ ደኦ እሜስ።\x - \xo 3:6 \xo*\xt ኤርም 31:31.\xt*\x*
\p
\v 7 ሹቻ ቦላ ፃፈትዳ ህገይ እመትያ ዎደ ፆሳ ቦንቾይ ቆንጭስ። ሙሰ ሶምኡዋን ደእያ ቦንቾይ ይሸ ብያባ ግድኮካ፥ እስራኤለ አሳይ እያ ሶምኡዋ ትሽ ኦድ ፄላናዉ ዳንዳእቦኮና። ህዛ፥ ሀይቆ ኤህያ ህገይ ሄሳ መላ ቦንቾን ቆንጭኮ፥\x - \xo 3:7 \xo*\xt ከሳ 34:29.\xt*\x* 
\v 8 ያትን፥ ጌሻ አያናን ኦሰትያ ኦሱዋ ቦንቾይ ዋንድ አኔ? 
\v 9 አሳ ቦላ ፕርዳ ኤህያ ህገይ ቦንቾ ግድኮ ያትን፥ አሰ ፅልስያ ኦራ ኦገይ ዋንድ አድ ቦንቸተኔ? 
\v 10 ካሰ ቦንቾ ግድዳይሳ ሀእ አያ ቦንቾይ ደኤይሳራ ጋ በእያ ዎደ ቦንቾይ ባይናባ ግድስ። 
\v 11 ጉ ዎደስ ቆንጭድ ጉየፐ ይዳይስ ሀይሳዳ ቦንቸትኮ፥ መርናዉ ደኤይስ ዋንድ አድ ቦንቸተኔ?
\p
\v 12 ኑስ ሀይሳ መላ ኡፋይሳይ ደእያ ግሾ፥ ዬላቶና ኦደቶስ። 
\v 13 ኑኒ፥ እስራኤለ አሳይ ይሸ ብያ ቦንቹዋ ዉርሰ በኦና መላ ባ ሶምኡዋ ካምዳ ሙሰ መላ ግዶኮ።\x - \xo 3:13 \xo*\xt ከሳ 34:33.\xt*\x* 
\v 14 ሽን ኤንታ ዎዛናይ ዶጭስ። ሀች ጋካናዉ ኤንቲ ጋልአ ጫቁዋ ናባብያ ዎደ ኤንታ ዎዛናይ ሄ ካማን ካመትድ ደኤስ። ሄ ካማይ ክርስቶሳ ፃላላን ቃረቴስ። 
\v 15 ሽን ሀች ጋካናዉካ ኤንቲ ሙሰ ማፃፋ ናባብያ ዎደ ኡባን ሄ ካማይ ኤንታ ዎዛና ካሜስ። 
\v 16 ሽን ኦንካ ጎዳኮ ስምያ ዎደ አዉደካ ሄ ካማይ ቃረቴስ።\x - \xo 3:16 \xo*\xt ከሳ 34:34.\xt*\x* 
\v 17 ጎዳይ አያና፤ ጎዳ አያናይ ደእያ በሳን ላአተ ደኤስ። 
\v 18 ኑኒ ኡባይ ካመትቦና ሶምኦን ጎዳ ቦንቹዋ በአና።\f + \fr 3:18 \fr*\fq በአና፦ \fq*\ft ማስቶተዳ ዛሪድ ጶልሳና ጌተትድ ብርሸታናዉ ዳንዳኤስ።\ft*\f* ኑኒ አያና ግድዳ ጎዳ ማላ ዳናናዉ ቦንቾፈ ቦንቾን ላመታና።
\c 4
\s1 መቃ ሚሸን ደእያ ቡቁራ
\p
\v 1 ህዛ፥ ፆሳይ ባ ማሮተን ሀ ኦሱዋ ኑስ እምዳ ግሾ፥ ኑኒ ኡፋይስ ቃንፆኮ። 
\v 2 ኑኒ ዬላያ ጌማ ኦሶ ኡባ አግዳ፤ ገነ ኦሶ ኦኮ፤ ፆሳ ቃላ ዎርዶራ ዋላኮኮ። ቱማ ቆንጨን ሃሳይሸ፥ አሳ ኡባ ካሀይ ኑና ኤካና መላ ፆሳ ስንን ኑና ሺሾስ።
\p
\v 3 ኑ ኦድያ ዎንገላይ ጌምዳባ ግድኮካ፥ ጌምዳይ ዮ ኦገን ደእያ አሳሳ። 
\v 4 ሀ አላምያ ሃርያ ፆሳይ አማኖና አሳ ዎዛና ጎዝስ። ኤንቲ ፆሳ መላ ግድዳ ክርስቶሳ ቦንቾ ዎንገላ ፖኡዋ በኦና መላ ድግስ። 
\v 5 ኑኒ፥ የሱስ ክርስቶሲ ጎዳ ግደይሳነ ኑ እያ ግሾ ህንተ ኦሳንቾ ግደይሳ ኦዶስፐ አትሽን፥ ኑባ ኦዶኮ። 
\v 6 “ማን ፖኦይ ፖኦ” ግዳ ፆሳይ፥ ክርስቶሳ ሶምኡዋን ፖእያ ፆሳ ቦንቹዋ ኤራ ፖኡዋ እማናዉ ባ ፖኡዋ ኑ ዎዛናን ፖእስስ።\x - \xo 4:6 \xo*\xt መ 1:3.\xt*\x*
\p
\v 7 ሽን ኡባፈ አያ ዎልቃይ ኑባ ግዶናሽን፥ ፆሳባ ግደይሳ በሳናዉ ሀ ቦንቾ ሻሎይ መቃ ሚሸ\f + \fr 4:7 \fr*\fqa መቃ ምሸ፦ \fqa*\ft ሀ በሳን መቃ ሚሸ ጌተትዳይ ቢታፈ ኦሰትዳ ሚሸታ በሳናሳ፥ ሄሳትካ፥ ኦቶ፥ ሻተ፥ በሸ፥ ፁጋ፥ ፃሮነ ኤንታና ዳነይሳታ\ft*\f* ግድዳ ኑ አሳተን ደኤስ።
\p
\v 8 ኑ ኡባ ባጋራካ ዋየትዳ፥ ሽን መቀረትቦኮ። ኑስ ሀድርስ ግድስ፥ ሽን ኡፋይስ ቃንፅቦኮ። 
\v 9 ኑ፥ ሞርከታን ጎደትዳ፥ ሽን ላገ ይቦኮ። ኑ ሞርከታን ሾጨትድ ኩንድዳ፥ ሽን ይቦኮ። 
\v 10 የሱሳ ደኦይ ኑ አሳተን ቆንጫና መላ እያ ሀይቁዋ ኡባ ዎደ ኑ አሳተን ቶክድ ዩዮስ። 
\v 11 የሱሳ ደኦይ ሀይቅያ ኑ አሳተን ቆንጫና መላ ፓፃ ደእያ ኑኒ እያ ግሾ፥ ኡባ ዎደ ሀይቆስ አድ እመቶስ። 
\v 12 ህዛ፥ ሀይቆይ ኑናን ኦያ ዎደ ደኦይ ህንተናን ኦስ።
\p
\v 13 ጌሻ ማፃፋን፥ “ታ አማናስ፤ ሄሳ ግሾ ኦዳስ”\x - \xo 4:13 \xo*\xt ማዝ 116:10.\xt*\x* ያገትስ። ሄሳ መላ አማኖይ ኑስ ደእያ ግሾ ሃሳዮስ። 
\v 14 ጎዳ የሱሳ ሀይቆፐ ደንዳ ፆሳይ፥ ኑናካ የሱሳራ ሀይቆፐ ደንናይሳነ ህንተራ እስፈ ባ ስን ሺሻናይሳ ኤሮስ። 
\v 15 ሄስ ኡባይ ሀንዳይ ህንተ ግሾሳ። ፆሳ አ ኬሀተይ ዳሮ አሳ ጋክያ ዎደ አሳይ ፆሳ ቦንቹዋስ ዳሮ ጋላታ እማና።
\p
\v 16 ሄሳ ግሾ፥ ኑኒ ኡፋይስ ቃንፆኮ። ኑ በንትያ አሳተይ ዳቡርሸ ብያባ ግድኮካ፥ ኑ አያና አሳተይ ጋላስ ጋላስ ኦራፄስ። 
\v 17 ሀእስ ኑኒ ዋየትያ ሀ ካዉሻ ዋየይ፥ ኡባፈ ኬህ ግታትያ መርና ቦንቹዋ ኑስ እምሳና። 
\v 18 ኑኒ በንትያባ ግዶናሽን፥ በንቶናባ ፄሎስ። በንትያባይ ሀእሳ፥ ሽን በንቶናባይ መርናሳ።
\b
\c 5
\p
\v 1 ሀእ ኑ ደእያ ዱንካነ ዳንያ ሀ ሳአ አሳተይ ላለትኮካ፥ አስ ኬፅቦና፥ ፆሳይ ኬፅዳ መርና ኬይ ኑስ ሳሎን ደኤይሳ ኤሮስ። 
\v 2 ሳሎ አሳተ ማአናዉ አሞትሸ ሀእ ሀ ሳአን ደእሸ ኦሎስ። 
\v 3 ኑኒ ሄሳ ማእያ ዎደ ካሎቶኮ። 
\v 4 ዱንካነ ዳንያ ሀ ሳአ አሳተን ኑ ደእሸ ዴፀትድ ኦሎስ። ሀይቅያ ኑ አሳተይ ደኦን ላመታና መላ ሳሎ አሳተ ማአናዉ ኮዮስፐ አትሽን፥ አሹዋፐ ሻከታናዉ ኮይድ ግደና። 
\v 5 ኑና ሀይሳስ ጊግስዳይ ፆሳ። ቃስ ስንፈ ያናባስ ኦይ ኦድ ባ አያና ኑስ እሚስ።
\p
\v 6 ሄሳ ግሾ፥ ኑኒ ሀ ሳአ አሳተን ደእያ ዎደ ኡባን ጎዳፐ ሃክድ ደኤይሳ ኤርኮካ ኡባ ዎደ አማነትድ ደኦስ። 
\v 7 ኑኒ ደኤይ አማኖናፐ አትሽን፥ በእያባን ግደና። 
\v 8 ኑ ሀ ሳአ አሳተፈ ሻከትድ፥ ኑ ሶ ብድ ጎዳራ እስፈ ዳናዉ አሞትያ ግሾ፥ አማነትድ ደኦስ። 
\v 9 ሄሳ ግሾ፥ ኑ ሀ አሳተን ደእን ዎይኮ ሀ አሳተፈ ሻከትን፥ ኑ አሞይ እያ ኡፋይሳናይሳ። 
\v 10 ኑኒ እሶይ እሶይ ሀ ሳአን ደእሸ ሎኦ ግድን ዎይኮ ኢታ ግድን፥ ኦዳ ኦሱዋስ በሲያ ፕርዳ ኤካናዉ ክርስቶሳ ፕርዳ አራታ ስንን ሺቃና።\x - \xo 5:10 \xo*\xt ሮመ 14:10.\xt*\x*
\s1 አሰ ፆሳራ ስገ
\p
\v 11 ህዛ፥ ጎዳስ ያሺ አይ ጉሰኮ ኑኒ ኤርያ ግሾ፥ አሳይ ኑ ኦደይሳ ኤካና መላ ዞሮስ። ፆሳይ፥ ኑኒ ኦነኮ ኑና ኤሬስ፤ ቃስ ህንተካ ህንተ ካሀን ኑ ኦነኮ ኤሬታ ያጋዳ ቆፓይስ። 
\v 12 ዎዛናን ግዶናሽን፥ ማላን ጬቀትያ አሳ ዶና ኦይናዉ ህንተ ኑናን ጬቀታና መላ ህንተዉ ጋሶ ግዳናዉ ኮዮስፐ አትሽን፥ ኑ ኑና ዛሪድ ናሻናዉ ኮዮኮ። 
\v 13 ኑ ጎሽ ግድኮ ፆሳ ቦንቾሳ፤ ዎዛናማ ግድኮ ህንተሳ። 
\v 14 እሶይ ኡባስ ሀይቅዳይሳነ ኡባይ ቃስ እያራ ሀይቅዳይሳ ኑ ኤርያ ግሾ፥ ክርስቶሳ ሲቆይ ኑና ሃሬስ። 
\v 15 ደኦን ደኤይሳት ህዛፐ ጉየ ባንታዉ ግዶናሽን፥ ኤንታዉ ሀይቅዳይሳስነ ሀይቆፐ ደንድዳይሳስ ዳና መላ ክርስቶስ አሳ ኡባ ግሾ ሀይቅስ።
\p
\v 16 ህዛፐ ጉየ፥ ኑኒ ኦናካ አሳ ቆፋን ፕርዶኮ። ሀይሳፈ ካሰ ኑኒ ክርስቶሳካ አሳ ቆፋን በእዳባ ግድኮካ፥ ህዛፐ ሄሳዳ ቤኦኮ። 
\v 17 ሄሳ ግሾ፥ ኦንካ ክርስቶሳን ደእኮ ኦራ መተ፤ ጋልአ መተይ አስ፤ ኡባይካ ኦራ ግድስ። 
\v 18 ሄሳ ኡባ ፆሳይ ኦስ። እ ክርስቶሳ ባጋራ ኑና ባራ ስገስ። ቃስ ሀራታ ባራ ስገና መላ ኑስ ስገ ኦሶ እሚስ። 
\v 19 ፆሳይ ክርስቶሳ ባጋራ አሳ ኡባ ባራ ስገስ። ኤንታ ናጋራ ታይብቤና፤ ቃስ አሳ ባራ ስገያ ቃላ ኑስ እሚስ።
\p
\v 20 ፆሳይ አሳ ኑ ባጋራ ፄግያ ግሾ፥ ኑ ክርስቶሳን ኪተትድ አሳ ፆሳራ ስገትተ ግድ ክርስቶሳ ግሾ፥ ዎሶስ። 
\v 21 ኑኒ ፆሳ ፅሎተ ክርስቶሳ ባጋራ ኤካና መላ፥ ናጋራ ኤሮና ክርስቶሳ ኑ ግሾ፥ ናጋራንቾ አሳዳ ኦስ።\f + \fr 5:21 \fr*\fq ናጋራንቾ አሳዳ፦ \fq*\ft ናጋራ ያርሾ ኦስ።\ft*\f*
\b
\c 6
\p
\v 1 ኑኒ ፆሳራ እስፈ ኦያ አስ ግደይሳዳ፥ ህንተ ኤክዳ አ ኬሀተ ሀዳ ኦና መላ ኑ ህንተና ዎሶስ። 
\v 2 ፆሳይ፥
\q1 “ታ ነና ስአና ዎደን ስአስ፤
\q2 አቶተ ጋላሳን ነና ማዳስ” ያጌስ። ሄኮ፥ ታ ስእያ ዎደይ ሀእ፤ አቶተ ጋላሳይ ሀች።\x - \xo 6:2 \xo*\xt እሳ 49:8.\xt*\x*
\p
\v 3 ኦንካ ኑ ኦሱዋ ቦራና መላነ ኑናን በታና መላ ኮዮኮ። 
\v 4 ግዶሽን፥ ኑ ቱማ ፆሳ ኦሳንቾታ ግደይሳ ኑ ኦያ ኡባባን በስዳ። ዳሮ ገንጫን፥ ዋየን፥ መቶን፥ ኡንአን፥ 
\v 5 ጋራፈተን፥ ቃሾን፥ እፆን ኩምዳ ዎጫማን፥ ዳቡራን፥ ስኮ ዮን፥ ፆማን፥\x - \xo 6:5 \xo*\xt ሀዋ 16:23.\xt*\x* 
\v 6 ጌሻተን፥ ኤራተን፥ ዳንዳአን፥ ኬሀተን፥ ጌሻ አያናን፥ ቱማ ሲቆን፥ 
\v 7 ቱማ ኦዳንነ ፆሳ ዎልቃን ኑኒ እያ ኦሳንቾታ ግደይሳ በስዳ። ቃስ ፅሎተይ ኑስ ቶራነ ጎንዳለ። 
\v 8 ኑኒ ቦንቸትዳነ ቶሸትዳ፤ ጫየትዳነ ጋላተትዳ። ቱማ ሃሳዮስ፥ ሽን አሳይ ኑና ዎርዳንቾ ግዶሶና። 
\v 9 ኑ አሳን ኤረትዳ አስ፥ ሽን ኤረቶና አሳ መላ ግድዳ። ሀይቅዶሶና ያገትዳ፥ ሽን ፓፃ ደኦስ፤ ሾጨትዳ፥ ሽን ሀይቅቦኮ። 
\v 10 ኑኒ አዛንኮካ ኡባ ዎደ ኡፋይቶስ። ኑ ማንቆ ዳኖስ፥ ሽን ዳሮ አሳ ዱረዮስ። ቃስ አይኮይካ ባይና አስ ዳኖስ፥ ሽን ኡባይ ኑባ።
\p
\v 11 ቆሮንቶሳ አሳቶ፥ ኑ ህንተዉ ቆንጨን ኦድዳ፤ ኑ ኡሉዋ ህንተና በስዳ። 
\v 12 ህንተ ኑና ህንተ ሲቁዋ በሶና ድግደታፐ አትሽን፥ ኑኒ ኑ ሲቁዋ ህንተና ድግቦኮ። 
\v 13 አዉ ባ ናይታስ ኦደይሳዳ ታ ህንተዉ ኦዳይስ፤ ኑ ህንተና ኑ ኡሉዋ በስዳይሳዳ፥ ህንተካ ህንተ ኡሉዋ ኑና በስተ።
\s1 አማኖና አሳራ ደእያ ጋሄተ
\p
\v 14 አማኖና አሳራ በሶና ኦገን ዋፀቶፍተ። ፅሎተስነ ናጋራስ አይብ ጋሄተ ደኢ? ፖኦስነ ማስ አይብ እስፈተ ደኢ? 
\v 15 ክርስቶሳነ ፃላሄ እስፈ ጋያባይ አይቤ? ቃስ አማነይስነ አማኖናይስ እስፈ ኮፅያባይ አይቤ? 
\v 16 ፆሳ ኬስ ኤቃታራ አይብ እስፈተ ደኢ? ፆሳይ፥
\q1 “ታኒ ኤንታ ግዶን ደአና፥
\q2 ኤንታ ግዶን ሄመታና።
\q1 ታኒ ኤንታ ፆሳ ግዳና፤
\q2 ኤንትካ ታ አሰ ግዳና”
\m ግዳይሳዳ፥ ኑኒ ደኦ ፆሳ ኬ።\x - \xo 6:16 \xo*\xt ሌወ 26:12፤ ህዝ 37:27፤ 2 ቆሮ 3:16.\xt*\x* 
\v 17 ሄሳዳካ፥ ጎዳይ፥
\q1 “ኤንታ ግዶፈ ሻከትድ ከይተ፤
\q2 ቱና ግድዳባ ቦቾፍተ፤
\q2 ታ ህንተና ኤካና።\x - \xo 6:17 \xo*\xt እሳ 52:11.\xt*\x*
\q1
\v 18 ታ ህንተዉ አዋ ግዳና፤
\q2 ህንተ ታዉ አደ ናይታነ ማጫ ናይታ ግዳና፤
\q2 ያጌስ ኡባፈ ዎልቃማ ጎዳይ” ያግስ።\x - \xo 6:18 \xo*\xt 2 ሳሜ 7:14፤ 1 ታር 17:13፤ እሳ 43:6፤ ኤርም 31:9.\xt*\x*
\b
\c 7
\p
\v 1 ህዛ፥ ታ ሲቆቶ፥ ሀ ኡፋይሳይ ኑስ ደእያ ግሾ፥ ኑ አሹዋነ ኑ ሸምፑዋ ቱንስያባ ኡባፈ ኑና ጌሾስ። ፆሳስ ያይድ ኑ ጌሻተ ፖሎ ኦስ።
\s1 ጳዉሎሳ ኡፋይሳ
\p
\v 2 ህንተ ኡሉዋ ኑና በስተ። ኑኒ ኦናካ ናቅቦኮ፤ ኦናካ ቆህቦኮ፤ ኦናካ ጭምቦኮ። 
\v 3 ታኒ ሄሳ ህንተ ቦላ ፕርዳናዉ ጊከ። ሀይሳፈ ካሰ ታ ህንተዉ ኦድዳይሳዳ፥ ህንተ ኑ ዎዛናን ደኤታ፤ ኑ ፓፃ ደእንካ ሀይቅንካ ህንተፈ ሻከቶኮ። 
\v 4 ታ ኦድያባ ህንተፈ ቆትከ፤ ታ ህንተናን ጬቀታይስ፤ ኑ ዋየ ኡባን ምነታይስ፤ ቃስ ግታ ኡፋይስ ኡፋይታይስ።
\p
\v 5 ኑኒ ማቀዶነ ብዳ ዎደ፥ ኡባ ባጋራ ዋየትዳፐ አትሽን ሸምፕቦኮ። ካረራ ሞርከታን፥ ኑ ጋን ያሻን ኡንኤትዳ።\x - \xo 7:5 \xo*\xt 2 ታር 2:13.\xt*\x* 
\v 6 ሽን አዛንዳይሳታ ምንያ ፆሳይ፥ ትቶ ዩሳን ኑና ምንስ። 
\v 7 ኑና ምንዳይ ትቶ ዩሳ ፃላላ ግዶናሽን፥ ህንተካ እያ ምንዳይሳ። ህንተ ታና ላሞተይሳ፥ ታዉ አዛነይሳነ ታዉ ቆፐይሳ ታ ስእዳ ዎደ ታና ዳሮ ኡፋይስስ።
\p
\v 8 ታ ዳብዳበይ ህንተና አዛንኮካ አይስ ፃፋድናሻ ጋዳ ቂሮትከ። ታ ቂሮትዳይ ታ ፃፍዳ ዳብዳበይ ህንተና ጉ ዎደስ አዛንዳ ግሾሳ። 
\v 9 ሀእ ታኒ ኡፋይትዳይ፥ ታ ህንተና አዛንዳ ግሾ ግዶናሽን፥ ህንተ አዛኖይ ህንተና ህንተ ናጋራፐ ዛርዳ ግሾሳ። ፆሳይ ባ ሸንያዳ ህንተና አዛንስፐ አትሽን ኑ ህንተና አይብንካ ቆህቦኮ። 
\v 10 ፆሳይ ኮያ አዛኖይ፥ አቶተኮ ጋያ ናጋራፐ ስሞ ኤሄስ፤ እያን ቂሮያባይ ባዋ። ሽን ሀ ሳአ አዛኖይ ሀይቆ ኤሄስ። 
\v 11 ህንተ አዛኖይ ህንተናን አይፍስዳ አይፍያ በእተ። ሄ አዛኖይ ህንተና አይ መላ ደንዳኮ፥ አይ መላ ዛሮ እማናዳ ጊግስዳኮ፥ ሄ ኡራ ቦላ አይ መላ ሀንቀዳኮ፥ አይ መላ ታዉ ያያና መላ ኦዳኮ፥ አይ መላ አሞይዳኮ፥ ሄ ኡራ ሴራናዉ አይ መላ ጊግዳኮ በእተ። ሀ ኡባባን ህንተ ጌሽ ግደይሳ ማርካይደታ።
\p
\v 12 ሄሳ ግሾ፥ ታኒ ሀ ዳብዳብያ ህንተዉ ፃፍዳይ፥ ናቅዳ ኡራ ዎይኮ ናቀትዳ ኡራ ግሾ ግደና። ሽን ህንተ ኑስ አይ መላ ቆፕያኮ ፆሳ ስንን ህንተ፥ ህንተና በአና መላ ፃፋስ። 
\v 13 ኑኒ ኡፋይትዳይ ሄሳ ግሾሳ። ኑ ኡፋይሳፈ አድ ኑና ዳሮ ኡፋይስዳይ፥ ህንተ ትቶ ኡፋይስዳይሳነ እያ ዎዛና ሸምፕስዳይሳ። 
\v 14 ታኒ ህንተና ናሻዳ እያዉ ኦድን፥ ህንተ ታና ዬላይበከታ። ሽን ኑኒ ኡባ ዎደ ህንተዉ ቱማ ኦድዳ፤ ሄሳዳካ ኑኒ ትቶ ስንን ህንተና ናሽዳይስ ቱማ ግድስ። 
\v 15 ህንተ እያዉ ያሻን ኮኮርድ፥ እያ ሞክዳይሳ ቃስ እያዉ አይ መላ ኪተትዳኮ፥ እ ቆፕያ ዎደ ህንተዉ ደእያ ሲቆይ ምንሸ ብስ። 
\v 16 ታኒ ኡባባን ህንተናን አማነትያ ግሾ ኡፋይታይስ።
\c 8
\s1 ኡፋይሳን እሞባ
\p
\v 1 ኑ እሻቶ፥ ፆሳይ ማቀዶንያን ደእያ ዎሳ ኬታስ እምዳ አ ኬሀተባ ህንተ ኤራና መላ ኑ ኮዮስ።\x - \xo 8:1 \xo*\xt ሮመ 15:26.\xt*\x* 
\v 2 ኤንቲ ግታ መቶን ፓጨትዶሶና፥ ሽን ኤንታ ኡፋይሳይ ዎልቃማ። ኤንታ ማንቆተስ ዛው ባዋ፥ ሽን ባንታ እሙዋን ዳሮ ኬህዶሶና። 
\v 3 ኤንቲ ባንታ ዎልቃ መላነ ባንታ ዎልቃፈ አይሳ ዶስድ እምዳይሳስ ታ ማርካ። 
\v 4 ኤንቲ ፆሳ አሰ ማድያ ሎኦ ኦሶ ኑራ ኦናዉ ኮይድ ኑና ዳሮ ዎስዶሶና። 
\v 5 ኤንቲ ኑኒ ቆፕዳይሳፈ አድ ኦዶሶና። ፆሳ ሸንያዳ፥ ኮይሮትድ ባንታና ጎዳስ እምዶሶና፤ ካልድ፥ ባንታና ኑስ አድ እምዶሶና።
\p
\v 6 ሀ ሎኦ ኦሱዋ ዶምዳ ትቶይ፥ ጉጅድ ኦናዳነ ህንተና ማድድ፥ ሄ ኦሱዋ ፖልሳናዳ እያ ዎስዳ። 
\v 7 ሽን ህንተ ኡባባን፥ አማኖን፥ ኦዳን፥ ኤራተን፥ ግታ አሞን፥ ኑና ዶሶንነ ኡባባን ዱረትዳይሳዳ ሀ ሎኦ ኦሱዋንካ ህንተ ኬሀ ግዳና መላ ኑ ኮዮስ።
\p
\v 8 ታኒ ሄሳ ኪታናዉ ጊከ። ሽን ሀራታ ግታ አሙዋ ህንተ ሲቁዋራ ጋ በአዳ፥ ህንተ አይ ኬና ቱሜኮ ኤራናዉ ጋይስ። 
\v 9 ህንተ፥ ኑ ጎዳ የሱስ ክርስቶሳ አ ኬሀተ ኤሬታ። ክርስቶስ ዱረ ግድ ኡትድ፥ ህንተ እያ ማንቆተን ዱረታናዳ ህንተ ግሾ ማንቅስ።
\p
\v 10 ታኒ ሀ ኦዳን ህንተና ማድያ ዞረ ዞራናዉ ኮያይስ። ህንተ ዝላይ እማናዉ ፃላላ ግዶናሽን፥ ሄሳ ኦናዉ አሞትሸካ ህንተ ኮይሮ። 
\v 11 ህንተ ኦናዉ ዶምዳ ኦሱዋ ሀእ ፖልተ። ህንተ ህንተዉ ደኤይሳ ኬና እምኮ፥ ሄስ ህንተ እማናዉ ዳሮ አሞተይሳ ቆንጭሴስ። 
\v 12 እስ አስ እማናዉ አሞትኮ፥ እያ እሞይ ፆሳ ስንን ኤከተይ፥ እ ባዉ ደእዳይሳ ኬና እምናፐ አትሽን፥ ባይናባፐ እማናዉ ኡንኤትን ግደና።
\p
\v 13 ታኒ ሄሳ ገይ፥ ህንተ ኡባይ እስ ግና ግዳና መላሳፈ አትሽን፥ ሀራት ዋያፐ ሸምፕን፥ ህንተ ዋየታና መላሳ ግደና። 
\v 14 ዎደ ኤንታ ፓላሀይ ህንተ ፓጫ ኩንና መላ፥ ሀእ ህንተ ፓላሀይ ኤንታ ፓጫ ኩን። ሄሳን ህንተ ግና ግዳና። 
\v 15 ጌሻ ማፃፋን፥ “ዳሮ ሺሽዳይሳስ ፓላህቤና፤ ጉ ሺሽዳይሳስ ፓጭቤና” ጌተትድ ፃፈትዳይሳ መላ።\x - \xo 8:15 \xo*\xt ከሳ 16:18.\xt*\x*
\s1 ትቶነ እያ ላገታ
\p
\v 16 ኑኒ ህንተዉ ቆፐይሳዳ ትቶይካ ህንተዉ ቆፓና መላ ኦዳ ፆሳይ ጋላተቶ። 
\v 17 ትቶይ ህንተኮ ብዳይ፥ ኑኒ እያ ደንዳ ግሾ ፃላላ ግዶናሽን፥ እ ባ ሸነን ባናዉ አሞትዳ ግሾሳ። 
\v 18 ዎንገላ ማርካተን ዎሳ ኬ ኡባን ዳሮ ኤረትዳ እሻ፥ ኑኒ ትቶራ እስፈ ኪቶስ። 
\v 19 ሄሳ ቦላ ኑኒ ሀ ኬሀ እሞታ ኤፍያ ዎደ ኑራ ባና መላ፥ ሀ ሎኦ ኦሱዋን ጎዳ ቦንቻናዉነ ሀራታ ማዳናዉ ደእያ አሙዋ በሳናዉ እ ዎሳ ኬታን ዶረትስ።
\p
\v 20 ሀ እመትዳ ኬሀ እሙዋ፥ ኑኒ ኦሶ ቦላ ፔሽያ ዎደ ቦረቶና መላ ናገቶስ። 
\v 21 ኑኒ ጎዳ ስንን ፃላላ ግዶናሽን፥ አሳ ስንንካ ሎኦ ግድዳባ ኦስ።\x - \xo 8:21 \xo*\xt ሌም 3:4.\xt*\x*
\p
\v 22 ቃስ ዳሮ ዎደ ፓጨን ምንድ አዳ ኑ እሻ፥ ኤንታራ ህንተኮ ኪትዳ። እ ህንተናን ዳሮ አማነትያ ግሾ፥ ሀእ ህንተና ማዳናዉ ዳሮ አሞቴስ። 
\v 23 ትቶባ ኤራናዉ ኮይኮ፥ ህንተና ማዳናዉ ታራ ኦያ ታ ኦሶ ላገ። ሀንኮ እሻታባ ግድኮ ዎሳ ኬት ኪትዳይሳታ፤ ቃስ አሳይ ኤንታ ዱሳ በእድ ክርስቶሳ ቦንቾሶና። 
\v 24 ሄሳ ግሾ፥ ዎሳ ኬት ህንተ ሲቁዋነ ኑ ህንተና ናሽያ ናሾይ ቱማ ግደይሳ ቆንጭሳናዉ ህንተ ሲቁዋ ሀ አሳታ በስተ።
\c 9
\s1 አማንያ አሳስ ሺቅዳ ሚሸ
\p
\v 1 አማንያ አሳስ ከስያ ሚሽያባ ታ ህንተዉ ፃፋናዉ ኮሸና። 
\v 2 ህንተ ማዳናዉ ኬህ አሞተይሳ ታ ኤራይስ። ህንተ አካያ አሳይ፥ ዝላይፈ ዶምድ ማዳናዉ ጊገትዳይሳ ታኒ ማቀዶነ አሳስ ዶና ኩንዳ ኦዳስ። ህንተ ግታ አሞይካ ኤንታፈ ዳሮታ ደንስ። 
\v 3 ሀ ኦሱዋን ህንተናን ኑ ጬቀትያ ጬቆይ ሀዳ ግዶና መላ ኮይሮ ህንተባ ታ ኦድዳይሳዳ ህንተ ጊገትድ ናጋና መላ ሀ እሻታ ህንተኮ ኪታስ። 
\v 4 ማቀዶነ አሳይ ታራ ብድ፥ ህንተ ጊገቶና ደእሽን፥ ደምኮ፥ ኑ ህንተናን ዬላታና፤ ቃስ ህንተ ኑፐ አ ዬላታና። 
\v 5 ሄሳ ግሾ፥ ሀ እሻት ታፐ ስንትድ ህንተኮ ብድ፥ ህንተ እማና ግዳ እሙዋ ካሰትድ ጊግሳና መላ ታ ኤንታና ኪታስ። ታኒ ጋክያ ዎደ ሄ እሞይ ጊግድ ኡቴስ። ሄ ዎደ ሄ ኬሀተ እሞይ ዎልቃን ግዶናሽን፥ ዶሳን ግደይሳ ኤርሴስ።
\p
\v 6 ሀይሳ አኬክተ፤ ጉ ዘርዳይ ጉ ጫካና፤ ዳሮ ዘርዳይ ዳሮ ጫካና። 
\v 7 ፆሳይ ኡፋይሳን እምያ ኡራ ዶስያ ግሾ፥ ዎልቃን ዎይኮ ዶስ ባይና ግዶናሽን፥ እስ እስ አስ ባ ዎዛናን ቆፕዳይሳዳ ዶሳን እማናዉ በሴስ። 
\v 8 ኡባ ዎደ ኡባባን ኮሽያባ ኡባ ደምድ ሎኦ ኦሶ ኡባ ኦናዉ ዳንዳአና መላ ፆሳይ ህንተዉ ባ አንጁዋ ዳርሳና። 
\v 9 ጌሻ ማፃፋን፥
\q1 “እ ባ ሻሉዋ ማንቆታስ ላልስ፤
\q2 እያ ፅሎተይ መርናዉ ደአና”
\m ያጌስ።\x - \xo 9:9 \xo*\xt ማዝ 112:9.\xt*\x*
\p
\v 10 ዘረይሳስ ዘረ፥ ማናዉ ካ እምያ ጎዳይ፥ ህንተ ዘርያ ዘረ ዳርስድ እማና። ህንተ ፅሎተ አይፍያካ ዳርሳና።\x - \xo 9:10 \xo*\xt እሳ 55:10.\xt*\x*
\p
\v 11 ዳሮ አሳይ ህንተ እምያ እሙዋ ኑፐ ኤክድ፥ ፆሳ ጋላታናዳ፥ ህንተ ኡባ ዎደ ዳርስድ እመይሳታ ግዳና መላ ፆሳይ ህንተና ኡባ ባጋራ ዱረያና። 
\v 12 ሀ ህንተ እምያ እሞይ አማንያ አሳ ፓጫ ኩን ፃላላ ግዶናሽን፥ አሳይ ፆሳ ጋላታናዉ ጋሶ ግዴስ። 
\v 13 ሀ ህንተ ኦሶይ ህንተ አማኑዋ ኤርስድ ክርስቶሳ ዎንገላ ህንተ አማንድነ እያዉ ኪተትድ ህንተዉ ደእያባ ኤንታራነ ሀራታራ ሻከትዳ ግሾ ኡባይ ፆሳ ቦንቻና። 
\v 14 ፆሳይ ህንተዉ እምዳ አ ኬሀተ ግሾ ኤንቲ ህንተዉ ፆሳ ዎስሸ ህንተና በአናዉ ላሞቶሶና። 
\v 15 ዛው ባይና ፆሳ እሙዋስ ፆሳይ ጋላተቶ።
\c 10
\s1 ጳዉሎስ ሞትያ አሳስ ዛርዳ ዛሩዋ
\p
\v 1 ታኒ ህንተራ ደእያ ዎደ፥ “ሹጎ”፥ ቃስ ህንተፈ ሃክያ ዎደ “ኑ ቦላ ምኔስ” ያገትዳ፥ ጳዉሎስ፥ ኬሀነ አሽከ ግድዳ ክርስቶሳ ሱንን ህንተና ዎሳይስ። 
\v 2 ታኒ ህንተኮ ብያ ዎደ ኑ አሾ ቆፋራ ስመረትያ አስ ኦድ ቆፕያ አሳ ቦላ ምኖ ቃላን ኦደታናዉ ቆፋ ቃቻስ። ህንተ ቦላ ሄሳዳ ኦደታና መላ ህንተ ታና ኦናዳ ህንተና ዎሳይስ። 
\v 3 ኑኒ ሀ ሳአን ደእኮካ ሀ ሳኣ አሳዳ ኦለቶኮ። 
\v 4 ኑ ኦላ ሚሸይ ሀ ሳአባ ግደና። ሽን ሚፃ ላላናዉ ዎልቃራ ደእያ ፆሳ ቶራ። ቱማራ ኤቀትያ ፓላማነ፥ 
\v 5 ፆሳ ኤራተ ቦላ ኦቶሮን ደንድያ ፓላማነ ሀዳ ቆፋ ኡባ ላሎስ። አሳ ቆፋ ኡባ ድእድ ክርስቶሳስ ኪተታና መላ ኦስ። 
\v 6 ህንተ ኪተተይ ፖሎ ግድያ ዎደ ኑኒ ኪተተ እፆ ኡባ ሴራናዉ ጊገታና።
\p
\v 7 ህንተ አይፈይ በእዳ መላ ፕርደታ። ኦንካ ባና ክርስቶሳባ ግድ ቆፕያባ ግድኮ፥ ኑካ ክርስቶሳባ ግደይሳ ኤሮ። 
\v 8 ጎዳይ ታዉ እምዳ ማታን ጬቀትኮካ ሄሳን ዬላትከ። ሄ ማታይ ታዉ እመትዳይ ህንተና ድቻናሳፈ አትሽን፥ ቆሀናሳ ግደና። 
\v 9 ታኒ ታ ዳብዳብያን ህንተና ያሽሳናዉ ኮያዳ ፃፍዳባ ዳኖፖ። 
\v 10 እስ እስ አሳይ፥ “ጳዉሎሳ ዳብዳበይ ዴፆነ ዎልቃማ፥ ሽን እያ ሶምኦን በእያ ዎደ እ ዳቡራንቾ፤ እያ ኦዳይካ ፓና” ያጎሶና። 
\v 11 ሄ አሳት ኑ ሃሆን ደእሸ ፃፍያ ዳብዳብያንነ ማታን ህንተራ ደእሸ ኦያ ኦሱዋ ግዶን ዱማተ ባይናይሳ አኬኮ።
\p
\v 12 ኑኒ ባንታና ናሽያ አሳታራ ኑና ግናያናዉ ዎይኮ ጋደያናዉ ኮዮኮ። ሽን ኤንቲ ባንታና ባንታራ ግናይድ ዎይኮ ጋደይድ በእሸ ኤያ።
\p
\v 13 ሽን ኑኒ ፆሳይ ኑስ እምዳ ሳን ጬቀቶስፐ አትሽን፥ ዛዋ ፕንድ ጬቀቶኮ፤ ሄ ዛዋይ ህንተኮካ ጋኬስ። 
\v 14 ኑኒ በሰይሳፈ አድ ጬቀቶኮ፥ ሽን ክርስቶሳ ዎንገላ ህንተኮ ጋዳይሳን ጬቀቶስ። 
\v 15 ኑኒ ፆሳይ ኤስዳ ዛዋፐ ፕንድ፥ ሀራት ኦዳ ኦሶን ጬቀቶኮ። ግዶሽን፥ ህንተ አማኖይ ድጫና መላ ፆሳይ እምዳ ዛዋን ህንተ ግዶን ኑ ኦያ ኦሶይ ዳልጋና ግድ ቆፖስ። 
\v 16 ኑኒ ሀራ አስ ባ ዛዋን ኦዳ ኦሶን ገልድ ጬቀቶኮ፥ ሽን ህንተፈ ፕንድ ሀራታስ ዎንገላ ማርካታናዉ ዳንዳኦስ። 
\v 17 ሽን፥ ጌሻ ማፃፋን፥ “ጬቅያ ኡባይ ጎዳ ሎኦተን ጬቆ” ያግድ ፃፈትስ።\x - \xo 10:17 \xo*\xt ኤርም 9:24.\xt*\x* 
\v 18 ጎዳይ ናሽያ ኡራፐ አትሽን፥ ባና ባዉ ናሽያ ኡራይ ናሸተና።
\c 11
\s1 ጳዉሎሳነ ዎርዶ ሀዋረታ
\p
\v 1 ታ ጉ ኤያተ ህንተ ሀእካ ዳንዳአና ጋዳ ቆፓይስ፤ ሀያና ዳንዳእተ። 
\v 2 ፆሳይ ህንተዉ ቆፕዳይሳዳ፥ ታካ ህንተዉ ቆፓይስ። ታኒ ህንተና ጌሻ ጌላእዳ እስ አድያ፥ ክርስቶሳስ እማናዉ ኦይቻ ዎስ።
\p
\v 3 ሽን ሾሻይ ባ ገንያን ሄዋኖ ባለዳይሳዳ ኦን ኤር ህንተ ዎዛናይ ኢትድ ክርስቶሳስ ደእያ ህንተ ሱረተነ ጌሻተ አጋንደት ጋዳ ህርጋይስ።\x - \xo 11:3 \xo*\xt መ 3:1-5.\xt*\x* 
\v 4 እስ አስ ይድ፥ ኑኒ ህንተዉ ማርካትዳ የሱሳፐ ሀራ የሱሳ ህንተዉ ማርካትኮ፥ ዎይኮ ህንተ ኤክዳ አያናፐነ ዎንገላፐ ሀራ አያናነ ዎንገላ ህንተዉ ኦድኮ፥ ስእ ግድ ኤኬታ።
\p
\v 5 ሽን ታኒ የሱሲ ኪትዳ “ግታ ሀዋረታ” ገተትድ ፀገተይሳታፐ ጉፃይስ ጋዳ ቆፕከ። 
\v 6 ታኒ ኦዳ ኤሮና አስ ግድኮካ፥ ኤራተ ታዉ ደኤስ። ሄሳ ታ ህንተዉ ዳሮ ኦገን ቆንጭሳስ።
\p
\v 7 ታኒ ሚሸ ኦይቾና ፆሳ ዎንገላ ህንተዉ ጮ ኦድዳይስነ ህንተና ቁ ኦዳ ታና ቶችዳይስ ታዉ ናጋራ ግዲ? 
\v 8 ታኒ ህንተዉ ኦናዉ ሀራ ዎሳ ኬታፐ ሚሸ ቦንቃ ኤካስ። 
\v 9 ታ ህንተራ ደእያ ዎደ ታና መትንካ ህንተፈ እስ አስካ ዋይሳብከ። ማቀዶነፐ ይዳ አማነይሳት ታና ኮሽያባ ኡባን ማድዶሶና። ሀች ጋካናዉ ታ ህንተዉ ቶሆ ግዳብከ ስንስካ ቶሆ ግድከ።\x - \xo 11:9 \xo*\xt ፍልጵ 4:15-18.\xt*\x* 
\v 10 ክርስቶሳ ቱማተይ ታናን ደእሽን፥ ታ ጬቁዋ አካያ ቢታን ታና ኦንካ ድገና። 
\v 11 ታ ሀይሳ አይስ ጋይና? ህንተና ዶሶና ግሾዬ? ታኒ ህንተና ዶሰይሳ ፆሳይ ኤሬስ።
\p
\v 12 “ኑካ ህንተ መላ ኦስ” ያግድ ጬቅያ ሀንኮ ሀዋረታ ጬቁዋ ጋሱዋ ይሳናዉ ሀእ ታ ኦይሳ ስንስካ ኦና። 
\v 13 ሀይሳ መላ አሳት ክርስቶሳ ሀዋረ ዳናናዉ ባንታና ላምያ ዎርዳንቾ ሀዋረታነ ጭምያ ኦሳንቾታ። 
\v 14 ሄስ ማላልስያባ ግደና፤ አይስ ጊኮ፥ ፃላሄይ ፖኦ ኪታንቾ ዳናናዉ ባና ላሜስ። 
\v 15 ሄሳ ግሾ፥ ፃላሄ ኦሳንቾት ፅሎተ ኦሳንቾታ ዳናናዉ ባንታና ላምኮ ሄስ ግታባ ግደና። ኤንቲ ዉርሰን ባንታ ኦሱዋዳ ኤካና።
\s1 ጳዉሎሳ ጋክዳ መቶ
\p
\v 16 ኦንካ ታና ኤያ ግድ ቆፖና መላ ዛራዳካ ኦዳይስ። ታ ህንተዉ ኤያ ዳንኮካ ታ ጉራ ጬቀታና መላ ታና ኤያ ኦድ ኤክተ። 
\v 17 ታኒ ሀይሳዳ ጬቀታዳ ኦደተይ፥ ጎዳይ ኮየይሳዳ ግዶናሽን፥ ኤያተን ኦዳይስ። 
\v 18 ዳሮ አሳይ ሀ ሳአባን ጬቀትያ ግሾ፥ ታካ ጬቀታና። 
\v 19 ህንተ ዎዛናማ ግድያ ግሾ፥ ኤያ አሳባ ኡፋይሳን ዳንዳኤታ። 
\v 20 ኦንካ ህንተና አይለይኮ ዎይኮ ህንተና ቦንቅኮ ዎይኮ ባዉ ማደታናዉ ህንተኮ ሺቅኮ ዎይኮ ህንተ ቦላ ኦቶርትኮ ዎይኮ ህንተና ባቅኮ ህንተ ዳንዳኤታ። 
\v 21 ኑኒ ሄሳ ኦናዉ ዳሮ ዳቡራንቾ ግደይሳ ዬላታሸ ታ ኦዳይስ።
\p ሽን ኦንካ ምንድ ጬቀትኮ፥ ታካ ጬቀታናዉ ምናይስ። ታኒ ሄሳ ኤያ አሳዳ ኦደታይስ። 
\v 22 ኤንቲ እብራዌ? ታካ እብራወ። ኤንቲ እስራኤሌ? ታካ እስራኤለ። ኤንቲ አብራሃመ ሼሼ? ታካ አብራሃመ ሼሽ። 
\v 23 ኤንቲ ክርስቶሳ ኦሳንቾ? ታኒ ጎሻ አሳዳ ኦዳይስ፥ ኤንታፈ አያ ክርስቶሳ ኦሳንቾ። ታኒ ኦሶን ዳሮ ዳቡራስ፤ ዳሮ ዎደ ቃሸታስ፤ ጋራፈታስ፤ ዳሮ ዎደ ሀይቆፐ አታስ።\x - \xo 11:23 \xo*\xt ሀዋ 16:23.\xt*\x* 
\v 24 አይሁደት ታና ሀስታማነ ኡዱፉና እቻሹ ቶሆ ጋራፍዶሶና።\x - \xo 11:24 \xo*\xt ዛረ 25:3.\xt*\x* 
\v 25 ሄ ቶሆ ፃምአን ሾጨታስ፤ እስ ቶሆ ሹቻን ጫደታስ፤ ማርካበይ ሄ ቶሆ መእስ፤ አባ ግዶን እስ ቃማ ኩመ አቃዳ ፔአስ።\x - \xo 11:25 \xo*\xt ሀዋ 16:22፤ 14:19.\xt*\x* 
\v 26 ታኒ ዳሮ ኦግያ ዳቡራን ሄመታስ። ክፃ ሃፈነ ፓንጋፈ አታስ። አይሁደትነ አይሁደ ግዶና አሳይ ታ ቦላ መቶ ጋዶሶና። ካታማይ፥ ባዞይ፥ አባይ፥ ታና ያሽስ፤ አማንያ ዳንያ አሳት ታና ዋይስዶሶና።\x - \xo 11:26 \xo*\xt ሀዋ 9:23፤ 14:15.\xt*\x* 
\v 27 ታኒ ኦሶን ዳቡራስነ ጫዋታስ፥ ዳሮ ቶሆ ስኮ ያስ፥ ኮሻታስ፥ ሳሞታስ፥ ዳሮ ቶሆ ፆማስ፥ ሜገታስ፥ ካሎታስ።
\p
\v 28 ሀራባ ኡባ ታይቦና ኡባ ዎደ ታና ቆፍሰይ ዎሳ ኬታባ። 
\v 29 እስ አስ ዳቡርያ ዎደ እያራ ታ ዳቡራብክና? እስ አስ ናጋራን በትያ ዎደ ታ አዉደ ቂሮቶና አጋድና?
\p
\v 30 ታ ጬቀታናዉ ኮሽያባ ግድኮ ታኒ ዳቡራንቾ ግደይሳ ኤርስያባን ጬቀታና። 
\v 31 መርናዉ ቦንቸትዳ ፆሳይ፥ ኑ ጎዳ የሱስ ክርስቶሳ አዋይ፥ ታ ዎርዶቶናይሳ ኤሬስ። 
\v 32 ዳማስቆ ካታማን ካዋ አርስፆሳፐ ጋርሳራ ሃረይስ ታና ኦይናዉ ኮይድ ዳማስቆ ካታማ ፐንግያ ናግስስ።\x - \xo 11:32 \xo*\xt ሀዋ 9:23-25.\xt*\x* 
\v 33 ሽን አሳይ ታና ዳቾን የግድ፥ ካታማ ድርሳ ማስኮትያራ ዎስን ታኒ እያ ኩሽያፐ አታስ።
\c 12
\s1 ጳዉሎስ በእዳ ቆንጨ
\p
\v 1 ጬቀተስ ጎእ ባይናይሳ ኤራይስ። ሽን ጬቀታናዉ ኮሽኮ፥ ጎዳፐ ኤክዳ ቆንጨን ጬቃና። 
\v 2 ታማነ ኦይዱ ላይፈ ካሰ፥ ክርስቶሳ አማንያ እስ ኡራይ ሄን ሳሉዋ ብዳይሳ ታ ኤራይስ። ሄ ኡራይ አሾን ዎይኮ አሾፐ ካረራ ብዳኮ ታ ኤርከ፤ ፆሳይ ኤሬስ። 
\v 3 ሄ ኡራይ ሄን ሳሉዋ ኤከትዳይሳ ኤራይስ። ሽን እ አሾን ዎይኮ አሾፐ ካረራ ኤከትዳኮ ታ ኤርከ፤ ፆሳይ ኤሬስ። 
\v 4 ሄ ኡራይ ጋናተ ኤከትድ አስ ቆንጭሳናዉነ አስ ኦዳናዉ ዳንዳኦናባ ስእስ። 
\v 5 ታኒ ሄ አድያባን ጬቀታና፥ ሽን ታኒ ታ ዳቡራፐ አትሽን፥ ታናን ጬቀትያባይ ባዋ። 
\v 6 ታኒ ቱማ ኦደትያ ግሾ፥ ጬቀታናዉ ኮይኮካ ኤያ ግድከ። ሽን አስ ታ ኦይሳ በኤይሳፈነ ስኤይሳፈ አድ ቆፖና መላ ጋዳ ጬቀተ አጋይስ።
\p
\v 7 ታዉ ቆንጭዳ ግታ ቆንጨን ታ ኦቶርቶና መላ ታና ዋይሳናዉ ታ አሹዋን ጫድያ ፃላህያ ኪታንቾይ ታዉ እመትስ። 
\v 8 ሀ ዋይስያባ ታፐ ድጋና መላ ታኒ ጎዳ ሄ ቶሆ ዎሳስ። 
\v 9 ሽን ጎዳይ፥ “ታ ዎልቃይ ነ ዳቡራን ቆንጭያ ግሾ ታ አ ኬሀተይ ነዉ ግዳና” ያግስ። ክርስቶሳ ዎልቃይ ታናን ቆንጫና መላ ታ ዳቡራን ኡፋይታሸ ጬቀታይስ። 
\v 10 ታኒ ክርስቶሳ ግሾ፥ ዳቡርያ ዎደ ጫየትያ ዎደ ዋየትያ ዎደ ጎደትያ ዎደ መቶትያ ዎደ ታ ዳቡራን ኡፋይታይስ። አይስ ጊኮ፥ ታ ዳቡርያ ዎደ፥ ሄ ዎደ ምናይስ።
\s1 ጳዉሎስ ቆሮንቶሳ አሳስ ቆፔስ
\p
\v 11 ታኒ ኤያ አሳዳ ጬቀታስ። ሄሳዳ ታ ጬቀታና መላ ኦዳይ ህንተና። ታ፥ ታ ሁጰን ኤረቶና አስ ግድኮካ፥ “ግታ ሀዋረታ” ጌተተይሳታፐ ጉፅከ። ሄሳ ታዉ ማርካታናዉ በሰይ ህንተናሽን። 
\v 12 ታ ህንተ ግዶን ደአሸ ዳንዳአን ኦዳ ማላታትነ ማላት ታ ቱማ ሀዋረ ግደይሳ በሶሶና። 
\v 13 ታ ህንተዉ ቶሆ ግዶናይሳፈ አትሽን፥ ሀራ ዎሳ ኬታፐ ህንተ አይብን ጉፅደቲ? ሄስ ባላ ግድኮ ታና ማርተ።
\p
\v 14 ታኒ ህንተኮ ባናዉ ጊገትሽን ሀይስ ታዉ ሄን። ታ ህንተናፐ አትሽን፥ ህንተዉ ደእያባ ኮዮና ግሾ ህንተና ዋይሳናዉ ኮይከ። የልዳይሳት ባንታ ናይታስ ሻሎ ምንጆሶናፐ አትሽን፥ ናይት ባንታና የልዳይሳታስ ሻሎ ምንጆኮና። 
\v 15 ታ ህንተ ግሾ፥ ታዉ ደእያባነ ታና አ እምንካ ታና ኡፋይሴስ። ያትን፥ ታኒ ህንተና ሄሳዳ ኬሀ ሲቅያ ዎደ ህንተ ታና ጉራ ሲቀቲ?
\p
\v 16 ግድኮካ፥ ታ ህንተዉ ቶሆ ግድከ፤ ዋይሳብከ፤ ሽን ህንተና ጭሞንነ ገነን ኦይክዳባ ህንተዉ ዳኖና አገና። 
\v 17 ሀር አቶሽን፥ ታ ህንተኮ ኪትዳ አሳታፐ ህንተና ጭምዳ አስ ደኢ? 
\v 18 ትቶይ ህንተኮ ባና መላ ታኒ ዎሳስ፤ ቃስ አማንያ እሻካ እያራ የዳስ። ያትን፥ ትቶይ ህንተና ጭምዴ? ኑኒ ኑ ኦሱዋ እስ አያናን ኦቦኮ? ቃስ ኑ ሀኖይካ እስኖ ግደኔ?
\p
\v 19 ኑ ኡባ ዎደ ህንተ ስንን ኑና ፅልሳናዉ ሞተትያባ ህንተዉ ዳኒ? ኑ ክርስቶሳን ደእድ ፆሳ ስንን ሀእ ጋካናዉ ኦዶስ። ኑ ሲቆ እሻቶ፥ ኑ ሀ ኡባ ኦይ ህንተና ድቻናሳ። 
\v 20 ታ ህንተኮ ብያ ዎደ ኦን ኤር ህንተ ታ ኮየይሳዳ ሀኖና፥ ቃስ ታካ ህንተ ኮየይሳዳ ሀኖና ጋሄቶና አጎኮ ጋዳ ያያይስ። ቃስ ኦን ኤር ህንተ ግዶን ፓላም፥ ቃናተይ፥ ሀንቆይ፥ ዪቀይ፥ ዝግርስ፥ አሳ ሱን ኢሶይ፥ ኦቶሮይነ ካች ዶና አገና ጋዳ ያያይስ። 
\v 21 ታኒ ናምአን ህንተኮ ብያ ዎደ ፆሳይ ህንተ ስንን ታና ካዉሻና ጋዳ ያያይስ። ካሰ ናጋራ ኦድ ሄ ባንታ ኦዳ ቱናተፈ፥ ላይማተፈነ ዬላይያ ኦሱዋፐ ስምቦና አሳታ በአዳ አዛኖና አግከ ጋዳ ያያይስ።
\c 13
\s1 ዞረነ ሳሮ
\p
\v 1 ታ ህንተኮ ብሽን ሀይስ ሄን። አይ ሞቶይካ ናምኡ ዎይኮ ሄ ማርካን ምኔስ።\x - \xo 13:1 \xo*\xt ዛረ 17:6፤ 19:15.\xt*\x* 
\v 2 ታኒ ናምአን ህንተራ ጋሄትዳ ዎደ ህንተ ግዶን ካሰ ናጋራ ኦዳ ኡራነ ሀራታ ኡባ ሴሮና አግከ ጋዳ ኦዳ ዎስ። ሀእ ታ ሃካዳ ደእኮካ ስማዳ ህንተኮ ብያ ዎደ ኦደስካ ቃትከ።
\p
\v 3 ታናን ደእድ ኦደይ ክርስቶሳ ግደይሳ ህንተ ኤራናዉ ኮዬታ። እ ህንተራ ሃሳያ ዎደ ዎልቃማፐ አትሽን፥ ህንተ ግዶን ዳቡራንቾ ግደና። 
\v 4 ክርስቶስ ማስቃለ ቦላ ዳቡራን ካቀትስ፥ ሽን ፆሳ ዎልቃን ደኦን ደኤስ። እ ዳቡራንቾ ግድዳይሳዳ፥ ኑካ ዳቡራንቾ። ሽን ህንተና ሀጋዛናዉ ፆሳ ዎልቃን እያራ ደኦን ዳና።
\p
\v 5 አማኖን ምንድ ደእያኮ ህንተና ህንተዉ ፓጭድ በእተ። ፓጨን ህንተ ኩንዶና አትኮ፥ ክርስቶስ ህንተናን ደኤይሳ ህንተ ኤሬታ። ሽን ክርስቶስ ህንተናን ዶና እፅኮ ህንተ ኩንዴታ። 
\v 6 ኑኒ ፓጨን ኩንዶናይሳ ህንተ ኤሬታ ጋዳ አማናይስ።
\p
\v 7 ህንተ ኢታባ ኦና መላ ኑኒ ፆሳ ዎሶስ። ኑኒ ምኖ ግደይሳ አሳይ በአና መላ ግዶናሽን፥ ኑኒ ምኖ ግዶና እፅኮካ፥ ህንተ ሎኦ ኦና መላ ኑኒ ዎሶስ። 
\v 8 ኑኒ ቱማስ ኦስፐ አትሽን፥ ቱማራ ኤቀትያባ አይባካ ኦኮ። 
\v 9 ኑ ዳቡርያ ዎደ ህንተ ቃስ ምንያ ዎደ ኑና ኡፋይሴስ። ህንተ ቦረይ ባይናይሳታ ግዳና መላ ኑ ህንተዉ ፆሳ ዎሶስ።
\p
\v 10 ታኒ ህንተፈ ሃካዳ ደአሸ ፃፍዳይ ሄሳ ግሾሳ። ታኒ ህንተኮ ብያ ዎደ ጎዳይ ታዉ እምዳ ማታን ዘምፓዳ ህንተ ቦላ ጎዳታናዉ ኮይከ። ጎዳይ ታዉ ማታ እምዳይ፥ ህንተና ማዳናሳፈ አትሽን፥ ቆሀናሳ ግደና።
\p
\v 11 ዉርሰን ታ እሻቶ፥ ሳሮ ደእተ። ቦረይ ባይና ደእተ፤ ታ ዞርያ ስእተ። እስ ዎዛናን ግድድ ደእተ፤ ሳሮተን ደእተ። ሲቆነ ሳሮ እምያ ፆሳይ ህንተራ ግዶ።
\p
\v 12 ጌሻ ዬረተ ዬረትሸ፥ እሶይ እሱዋ ሳሮተ። 
\v 13 ፆሳ አሳ ኡባይ ህንተና ሳሮ ሳሮ ያጎሶና።
\p
\v 14 ጎዳ የሱስ ክርስቶሳ አ ኬሀተይ፥ ፆሳ ሲቆይ፥ ጌሻ አያና እስፈተይ ህንተ ኡባራ ግዶ።