\id 2CH - GOOFA FULL BIBLE
\ide UTF-8
\h 2 ታርከ ማፃፋ
\toc1 2 ታርከ ማፃፋ
\toc3 2 ታር
\toc2 2 ታርከ
\mt 2 ታርከ ማፃፋ
\imt ጋ ቆፋ
\ip 2 ታርከ ማፃፋይ ፃፈትዳይ፥ ጫሞ ግድዳ ካሰ ኤንታ ዱሳ ቆንጭሳናዉ ግዶናሽን፥ ባንታ ቢታን ዎፑ ግድ ዳናዉ ኤንታው ደእያ ኮሻ በሳናሳ። ሄሳዳካ ዳሮ ኦገራ ቆሄትድ ደእያ ድኦፐ ስምዳ፥ እስራኤለ አሳ አማኑዋ ደንናነ ፆሲ ኤንታዉ ገልዳ ኡፋይሳ ቃላ በሳናሳ።
\ip 2 ታርከ ማፃፋይ ናምኡ ክፍለን ሻከቴስ።
\ipi 1. ሸምፖ 1-9 ጋካናዉ ደእያ ክፍለይ ካዎ ሶሎሞነ ካዎተ ዎድያ ኦዴስ። ሄ ዎደይ እስራኤለ ቢታን ሳሮይ፥ ዎልቅ፥ ድችነ ቦንቾይ ደእያ ዎደ። ሄ ዎደይ ፆሲ ጎይነትያ ቱማ ጎይኖ በሳይ ዎይኮ ፆሳ ኬይ ኬፀትዳ ዎደነ አንጀትዳ ዎደ (ሸም 2-7)።
\ipi 2. ሸምፖ 10-36 ጋካናዉ ደእያ ክፍለይ ካዎይ ሶሎሞነይ ሀይቅዳፐ ጉየ ይሁዳን ካዎትዳ ካዎታነ ካዎተይ ሻከትዳይሳ ኦዴስ። ይሁዳ ካዎተይ አያና ደኦን ዳቡርዳነ ፆነትዳ ዎደ ባንታ ደኡዋን ምንድ ደእዳ ካዎትነ ኤንቲ ቢታ ቦላ ኤህዳ ላመይ ሀ ክፍልያን ቆንጭድ በንቴስ። ሄ ካዎታፐ ጉት፥ ካዋ አሳ (ሸም 14-15)፤ ካዋ እዮሳፈፃ (ሸም 17፥ 19-20)፤ ካዋ እዮኣሳ (ሸም 24)፤ ካዋ ህዝቅያሳ (ሸም 29-32)፤ ካዋ እዮስያሳ (ሸም 34-35)።
\ip 2 ታርከ ማፃፋይ ሎኦ ካዎታ ታርከ ፃላላ ግዶናሽን፥ ይሁዳ አሳ ድኦስ ጋዳ ኢታ ካዎታካ በሴስ። ሄ ኢታ ካዎታ ጋሶን ክ.የ.ስ. 586 ላይን የሩሳላመይ ይስ፤ ፆሳ ኬይካ ላለትስ።
\iot ማፃፋ አይፈ ቆፋታ
\io1 ሶሎሞነ ጭንጫተነ ዱረርተ (\ior 1:1-17\ior*)
\io1 ፆሳ ኬ ኬፀተነ አንጀተ (\ior 2:1—7:22\ior*)
\io1 ሶሎሞነ ዎድያነ እያ ሀይቁዋ (\ior 8:1—9:31\ior*)
\io1 ፑደሀ ባጋ ኮቻታ ማካላተ (\ior 10:1-19\ior*)
\io1 ይሁዳ ካዎታ (\ior 11:1—28:27\ior*)
\io1 ካዋ ህዝቅያሳነ አሶረ ኦላ (\ior 29:1—32:33\ior*)
\io1 ካዋ ምናሰነ አሞነ ካዋ (\ior 33:1-25\ior*)
\io1 ህገ ማፃፋይ በንትስ (\ior 34:1—35:27\ior*)
\io1 ዉርሰ ይሁዳ ካዎታ (\ior 36:1-16\ior*)
\io1 የሩሳላመ ላለተነ አይሁደታ ስሙዋ (\ior 36:17-23\ior*)
\c 1
\s1 ሶሎሞነይ ጭንጫተስ ዎስስ
\r (1 ካዎ 3:1-15)
\p
\v 1 ጎዳይ እያ ፆሳይ እያራ ደእያ ግሾነ እያ ዳሮ ግታይዳ ግሾ ዳዊታ ናአይ ካዎይ ሶሎሞነይ ባ ካዎተ ምንስ።
\p
\v 2 ሶሎሞነይ እስራኤለ ኡባ፥ ሻላቃታ፥ ማቶ ሀላቃታ፥ ዳናታ፥ እስራኤለ አሳ ካለያ ኡባነ ሶ አሳ ሀላቃታ ፄግድ ሺሽስ። 
\v 3 ሄሳፈ ጉየ፥ ሶሎሞነይነ ሺቅዳ አሳ ኡባይ ጋባኦናን ደእያ ቃ ጎይኖ በሳ ብዶሶና። ጎዳ አይለይ ሙሰይ መላ ቢታን ኦዳ ዱንካነይ ያን ደኤስ። 
\v 4 ካሰ ዳዊቲ ታቦትያስ የሩሳላመን ዱንካነ ቶክድ፥ ቅርያት-ይኣርመፐ እ ጊግስድ ዎዳ በሳ ኤህስ። 
\v 5 ሁራ ናኣ ኡረ ናአይ ባፃልኤል ናሰ ብራታፐ ኦዳ ያርሾ በሳይ፥ ጋባኦናን ጎዳ ዱንካንያ ስንን ደኤስ። ሶሎሞነይነ ሺቅዳ አሳይ ጎዳስ ያን ጎይንዶሶና። 
\v 6 ሶሎሞነይ ዱንካንያ ስንን ደእያ ናሰ ብራታፐ ኦሰትዳ ያርሾ በሳኮ፥ ጎዳ ስን ብድ፥ እስ ሙኩሉ ፁሳ ያርሾ ያርሽስ።
\p
\v 7 ሄ ጋላስ ቃማ ፆሳይ ሶሎሞነስ ቆንጭድ፥ “ታ ነዉ አይ እማና መላ ኮያይ?” ያግስ።
\p
\v 8 ሶሎሞነይ፥ “ነ ታ አዋ ዳዊታ ግታ ሲቆን ዶሳዳሳ፤ ታና እያ በሳን ካዎዳሳ። 
\v 9 አቤት ጎዳዉ፥ ፆሳዉ፥ ነ ታ አዋ ዳዊታስ ካሰ ግዳ ቃላይ ፖለቶ። ነ ታና ሳአን ደእያ ባናዳ ዳርዳ አሳ ቦላ ካዎዳ ግሾ፥ 
\v 10 ታ ሀ አሳ ካለና መላ ታዉ ጭንጫተነ አኬካ እማ። ሄስ ሀኖና እፅኮ፥ ሀ ግታ አሳ ኦን አይሳናዉ ዳንዳኢ?” ያግስ።
\p
\v 11 ፆሳይ ሶሎሞነኮ፥ “ነ ዱረተ ዎይኮ ሻሎ ደማናዉ ዎይኮ ቦንቸታናዉ ዎይኮ ነ ሞርከት ሀይቃና መላ ዎይኮ ነ ላይይ አዱቃና መላ ኦይቾናሽን ታ ነና ካዎዳ ታ አሳ አይሳናዉ ጭንጫተነ አኬካ ኦይችዳ ግሾ፥ 
\v 12 ነዉ ጭንጫተነ አኬካ እማና። ቃስ ኔፐ ካሰ ደእዳ ካዎታስ ዎይኮ ኔፐ ጉየ ደንዳና ካዎታስ ባይና ዱረተ፥ ሻሎነ ቦንቾ ነዉ እማና” ያግስ።
\p
\v 13 ሶሎሞነይ ዱንካነይ ጋባኦናን ደእያ፥ ቃ ጎይኖ በሳፈ ስሚድ፥ የሩሳላመ ብድ እስራኤለ ቦላ ካዎትስ።
\p
\v 14 ሶሎሞነይ ፓራ ጋረታነ ፓራታ ሺሽስ። እያዉ እስ ሙኩሉነ ኦይዱ ፄቱ ፓራ ጋረትነ ታማነ ናምኡ ሙኩሉ ፓራት ደኦሶና። እ ኤንታ ፓራ ጋረታ ካታማታንነ ባራ የሩሳላመን ዎስ። 
\v 15 ካዎይ ዎርቃይነ ብራይ የሩሳላመን ሹቻዳ ዶረታናዳ፥ ጋን ቦቢ ድጭያ መላ ዝጋ ም ዳራና መላ ኦስ። 
\v 16 ሶሎሞነ ፓራት ግብፀፈነ ቃወ ቢታፈ ይዶሶና። ካዋ ዛልአንቾት ኤንታ ቃወፐ ሚሸን ሻምድ ኤሆሶና። 
\v 17 ኤንቲ እስ እስ ፓራ ጋርያ ኡሱፑን ፄቱ ብራ ሳንትመን፥ እስ እስ ፓራ እስ ፄታነ እሻታሙ ብራ ሳንትመን ግብፀፈ ሻምድ፥ ህተታ ካዎታ ኡባስነ ሶረ ካዎታስ ባይዞሶና።
\c 2
\s1 ፆሳ ኬ ኬፃናዉ ጊገተ
\r (1 ካዎ 5:1-18)
\p
\v 1 ሶሎሞነይ ጎዳ ሱንስ ኬነ ባዉ ጋ ኬፃናዉ ሀልችስ። 
\v 2 ሶሎሞነይ ቶሆስ ላፑን ታሙ ሙኩሉ አሳነ ገዘ ቢታን ሹቹ ቆአናዉ ሆስፑን ታሙ ሙኩሉ አሳ ዶርስ። ቃስ ኤንታ ዎችያ ሄ ሙኩሉነ ኡሱፑን ፄቱ አሳታ ኤንታ ቦላ ሹምስ።
\p
\v 3 ሶሎሞነይ ፅሮሳ ካዋ ክራማስ ኪታ ኪትድ፥ “ታ አዋይ ዳዊቲ ባ ጋ ኬፃና መላ ኔኒ ዝጋ የድዳይሳዳ ታዉካ የዳ። 
\v 4 ሄኮ፥ ሀእ ታ ጎዳ፥ ታ ፆሳ ሱንስ ኬ ኬፃናዉ ሀናይስ። ታ ያን ሳዎ ቶንኩ ግያ እፃነ ጩይሳናዉ፥ ኡባ ዎደ ጎዳ ስንን ኡይ ዎናዉነ ዎንታነ ኦማርስ፥ ሳምባታ ጋላሳን፥ አጌን ፄርያ ዎደነ ጎዳ ኑ ፆሳ ባኣለ ጋላሳታን ፁሳ ያርሾ ያርሻናዉ፥ ፆሳ ኬ ዱማያና። እስራኤለ አሳይ መርናዉ ኦና መላ ኪተትዳ ኦሶት ሀይሳታ።
\p
\v 5 “ኑ ፆሳይ ሀራ ፆሳታ ኡባፈ ግታ ግድያ ግሾ፥ ታ ኬፃናዉ ሀንያ ፆሳ ኬይ ግታ። 
\v 6 ሽን እያዉ ኬ ኬፃናዉ ዳንዳኤይ ኦኔ? ሳሎፐ ቃ ሳሎይ እያዉ ግደና! ያትን፥ ታ እያ ስንን እፃነ ጩይሳናዉነ ታ እያዉ ኬ ኬፃናዉ ኦኔ?
\p
\v 7 “ህዛ አሌቆ ኦሶ፥ ዎርቃ፥ ብራ፥ ናሰነ ብራታ ሴርስያ ኦሱዋነ ዞኦ ማኡዋ፥ ኦቻ ቴራ ዳንያ ማኡዋነ ካሎሰ ማኡዋ ጊግስያ ኤራተ ደእያ አሰ ታዉ የዳ። ታ አዋይ ዳዊቲ ይሁዳንነ የሩሳላመን ደእያ ኩሸ ሂላንቾታ ዶር ዎስ፤ እ ኤንታራ እስፈ ኦና። 
\v 8 ልባኖሰን ደእያ ነ አሳት ም ዋት ቃንፅያኮ ኤረይሳ ታ ኤራይስ። ሄሳ ግሾ፥ ኔኒ ታዉ ልባኖሰፐ ዝጋ፥ ፂዳነ ፃይ ም የዳ። ታ አሳት ነ አሳታራ ግድድ፥ 
\v 9 ዳሮ ም ጊግሳና። ታኒ ኬፅያ ፆሳ ኬይ ግታነ ማላልስያባ። 
\v 10 ም ቃንፅያ ነ አይለታ ታኒ ላታሙ ሙኩሉ ኩንታለ ግስተነ ላታሙ ሙኩሉ ኩንታለ ባንጋ፥ ኦይዱ ፄቱ ሙኩሉ ልትሮ ዎይነነ ኦይዱ ፄቱ ሙኩሉ ልትሮ ሻማሆ ዛይተ እማና” ያግስ።
\p
\v 11 ፅሮሳ ካዎይ ክራም ሶሎሞነኮ ዳብዳበ የድሸ፥
\b
\pi “ጎዳይ ባ አሳ ዶስያ ግሾ፥ እ ነና ኤንታ ቦላ ካዎስ።”
\p
\v 12 ክራም ጉጅድ፥ “ፆሳ ኬነ ባዉ ጋ ኬፃና መላ ጭንጫ፥ አኬካነ ሂላ ናኣ ካዋ ዳዊታስ እምዳ፥ ሳሎ ሳኣ መዳ ጎዳይ፥ እስራኤለ ፆሳይ ጋላተቶ።
\p
\v 13 “ታኒ ክራም-አብ ጌተትያ ሂላንቾነ አኬካ አድያ ነዉ የዳስ። 
\v 14 እያ አይያ ዳነ ኮቸ፤ እያ አዋይ ፅሮሳ ቢታ አሳ። እ ዎርቃ፥ ብራ፥ ናሰ ብራታ፥ ብራታ፥ ሹቹነ ም ኦያ አስ፤ ኦቻ ቴራ ዳንያ ማኦ፥ ካሎሰ ማኦ፥ ዞኦ ማኦነ ሊኖ ማኦ ጊግስያ ኦሶ ኤሬስ። እ ዱማ ዱማ አሌቆታ ከስድ፥ ኦደይሳዳ ኡባ ኦናዉ ዳንዳኤስ። እ ኩሸ ሂላን ሎህዳ ነ አሳራነ ካሰ ነ አዋ፥ ዳዊታስ ኦዳ አሳራ እያ ኦስሳ። 
\v 15 ህዛ ነ ታ ጎዳይ እማና ግዳ ግስትያነ ባንጋ፥ ዛይትያነ ዎይንያ የዳ። 
\v 16 ኔኒ ልባኖሰፐ ኮይዳ ም ኑ ቃንፅድ ቃችድ፥ አባ ቦላራ ቶከትድ፥ ኔኮ ዮጰ ባናዳ ኦና። ያፐ ኔኒ የሩሳላመ ጋካናዉ ኤፍሳና” ያግስ።
\p
\v 17 እያ አዋይ ዳዊቲ ካሰ ታይብዳይሳዳ፥ ሶሎሞነይ እስራኤለ ቢታን ደእያ ካረ ቢታ አሳ ኡባ ታይብስ። ኤንቲ ፄታነ እሻታማነ ሄ ሙኩሉነ ኡሱፑን ፄታ ግድዶሶና። 
\v 18 ሶሎሞነይ ሄ አሳፐ ላፑን ታሙ ሙኩሉ አሳ ቶሆስ፥ ሆስፑን ታሙ ሙኩሉ አሳ ገዘ ቢታን ሹቻ ቆአናዉ ዶርስ፤ ኤንታ ዎቻናው ሄ ሙኩሉነ ኡሱፑን ፄቱ አሳ ሹምስ።
\c 3
\s1 ሶሎሞነይ ፆሳ ኬ ኬፁዋ
\p
\v 1 ሶሎሞነ አዋይ ዳዊቲ ፆሳ ኬይ ኬፀታና በሳ ሞረ ደርያን የሩሳላመን ጊግስስ። ሄ በሳይ ጎዳይ ዳዊታስ ቆንጭዳ ያቡሰ አድያ ኦርና ዉዱማ። 
\v 2 ሶሎሞነይ ባ ካዎትዳ ኦይዳን ላይን፥ ናምአን አጌናን ፆሳ ኬ ኬፃናዉ ዶምስ።
\p
\v 3 ሶሎሞነይ ፆሳ ኬ ኬፃናዉ ባስዳ ባሱዋ አዱሳተይ ኡሱፑን ታሙ ዋ፤ ጎምፓይ ላታሙ ዋ። 
\v 4 ፆሳ ኬ ገልያ በሳን ደእያ ባራንዳ ጎምፓይ ፆሳ ኬ ጎምፓዳ ላታሙ ዋ፤ አዱሳተይ ላታሙ ዋ። 
\v 5 ፐንገ ጎዳ ፂዳ ፃላላን ልጭድ ካምስ፤ ጌሻ ዎርቃን ትይስ፤ ዛምባ ምስለነ ሳንላታ ምስለን አሌቅስስ። 
\v 6 ፆሳ ኬ አልኦ ሹቻን አሌቅስስ፤ እ አሌቅስዳ ዎርቃይ ፓርዋይማ ቢታፈ ይዳ ዎርቃ። 
\v 7 ጎዳታ፥ ቱቀታ፥ ጎባነታነ ፐንገታ ዎርቃን ትይስ፤ ጎዳ ቦላ ክሩበ ምስለ መስ።
\p
\v 8 ሶሎሞነይ ኡባፈ ጌሻ በሳ ኬፅስ። ሄ በሳ አዱሳተ ፆሳ ኬ ጎምፓዳ ላታሙ ዋ፤ ጎምፓይ ላታሙ ዋ። ሄ በሳ ጎዳ ላታሙ ሙኩሉ ክሎ ግራመ ሙሩቶ ዎርቃን ትይስ። 
\v 9 ኤንቲ ጎኤትዳ ምስማረይ እቻሹ ፄታነ ላፑን ታሙ ግራመ ዎርቃፈ መትስ። ፖቀን ደእያ ክፍለታካ ዎርቃን ትይስ።
\p
\v 10 ሶሎሞነይ ኡባፈ ጌሻ በሳን ናምኡ ክሩበ ምስለታ ጊግስድ ዎርቃን ትይስ። 
\v 11 ሄ ክሩበታ ቀፈይ ምጨትድ፥ ላታሙ ዋ፤ ኮይሮ ክሩብያ ኮይሮ ቀፈይ እቻሹ ዋ ግድድ፥ ፆሳ ኬ ጎዳ ቦቼስ፤ ናምአን ቀፈይ እቻሹ ዋ ግድድ፥ ሀራ ክሩብያ ቀፍያ ቦቼስ። 
\v 12 ናምአን ክሩብያ ኮይሮ ቀፈይ እቻሹ ዋ ግድድ፥ ፆሳ ኬ ጎዳ ቦቼስ፤ ናምአን ቀፈይ እቻሹ ዋ ግድድ፥ ኮይሮ ክሩብያ ቀፍያ ቦቼስ። 
\v 13 ሀ ናምኡ ክሩበታ ቀፈይ ምጨትድ፥ ላታሙ ዋ ግድስ፤ ኤንቲ ባንታ ሶምኡዋ ጌሻ በሳኮ ዛሪድ፥ ባንታ ቶሆን ኤቅዶሶና።
\p
\v 14 ሶሎሞነይ ካሎሰ ማኡዋ፥ ኦቻ ቴራ ዳንያ ማኡዋፐነ፥ ዞኦ ማኡዋፐ ሊኖፐ ዳደትዳ ማኡዋፐ ማጋራጆ ኦድ፥ እያ ቦላ ክሩበታ ምስለ መስ።
\p
\v 15 ሶሎሞነይ ፆሳ ኬ ስንን እሱዋ እሱዋ አዱሳተይ ሀስታማነ እቻሹ ዋ ግድዳ ናምኡ ቱሳታ ኦስስድ፥ ኤንታ ሁጰን እቻሹ ዋ ጉምቦታ ዎስ። 
\v 16 ቃስ ሳንላታ ግተዳ መስድ፥ ቱሳታ ሁጰን ዎስ፤ ፄቱ ኦሮማነ ቴራ ምስለታ መስድ፥ ሳንላታ ቦላ ዎስ። 
\v 17 ቱሳታፐ እሱዋ ፆሳ ኬ ስንን ኡሻቻ ባጋራ፥ ናምአንዋ ቃስ ሀድርሳ ባጋራ ኤስስ። ኡሻቻ ባጋራ ደእያ ቱሳ ያክና ሱንድ፥ ሀድርሳ ባጋራ ደእያ ቱሳ ቦኤዛ ሱንስ።
\c 4
\s1 ፆሳ ኬ ሚሸታ
\r (1 ካዎ 7:23-51)
\p
\v 1 ሄሳፈ ጉየ፥ ሶሎሞነይ አዱሳተ ላታሙ ዋ፥ ጎምፓይ ላታሙ ዋ፥ ቃተይ ታሙ ዋ ግድያ ያርሾ በሳ ናሰ ብራታፐ ኦስስስ።
\p
\v 2 ቃስ ናሰ ብራታ ሴርስድ፥ ዶናይ ያ ጋፃፐ ሀ ጋፃ ጋካናዉ ታሙ ዋ፥ አዱሳተይ እቻሹ ዋነ ዩሾይ ሀስታሙ ዋ ግድያ አባ ሳነ መስስ። 
\v 3 አባ ሳነ ዶናን ካረ ባጋራ ዩይ አድ፥ እያራ ኦይከትድ መትዳ ምስለት ደኦሶና፤ ሄ ምስለት ናምኡ ማራን ደእያ ቦራታ ምስለታ።
\p
\v 4 ሄ አባ ሳነ ናሰ ብራታፐ መትዳ ታማነ ናምኡ ቦራታ ምስለታስ ዞኩዋን ኡትስ። ቦራታፐ ሄት ፑደሀ ባጋ፥ ሄት ዉሎሀ ባጋ፥ ሄት ዱገሀ ባጋ፥ ሄት ቃስ ዶሎሀ ባጋ ስሚድ ፄልያባ ዳኖሶና። አባ ሳነ ኤንታ ቦላ ኡትስ፤ ኤንታስ ጉየ ባጋይ ግዶኮ ስም ኡትስ። 
\v 5 አባ ሳነይ እስ ታካ መላ ኦርደ፤ እያ ዶናይ ዋንጫ ዶና መላ፤ ሱፈ ጪሽ ዳኔስ። ሄ አባ ሳነይ ኡሱፑን ታሙ ሙኩሉ ልትሮ ግድያ ሃ ኦይከይሳ።
\p
\v 6 ሶሎሞነይ ሜጨትያ ታሙ ከረታ፤ ኦስስድ፥ እቻሻ ኡሻቻ ጋርሳ ባጋራ፥ እቻሻ ሀድርሳ ባጋራ ዎስ። ኤንታን ፁሳ ያርሾ አሾይ ሜጨቴስ፤ ሽን አባ ሳነ ሃን ካህነት ሜጨቶሶና።
\p
\v 7 ሄሳፈ ጉየ፥ ሶሎሞነይ ኤንታዉ እመትዳ ሀልቹዋዳ ፆምፐ ዎያ ታሙ ኮጫታ ዎርቃፈ ኦድ፥ እቻሻ ኡሻቻ ባጋራ፥ እቻሻ ሀድርሳ ባጋራ ፆሳ ኬን ዎስ። 
\v 8 ታሙ ፃርጴዛታ ኦድ፥ እቻሻ ኡሻቻ ባጋራ፥ እቻሻ ሀድርሳ ባጋራ ፆሳ ኬ ግዶን ዎስ። ቃስ ፄቱ ድስተታ ዎርቃፈ ኦስ። 
\v 9 ሶሎሞነይ ካህነታስ ግዶ ዳባባ፥ ካረ ባጋ ግታ ዳባባ ጊግስስ፤ ዳባባስ ፐንገታ ጊግስድ፥ ፐንገታ ናሰ ብራታን ላንፅስ። 
\v 10 አባ ሳንያ ፆሳ ኬፈ ጋርሳን ዶሎሀ ባጋን ዎስ።
\p
\v 11 ክራም ከረታ፥ አካፋታነ ፃሮታ መስ፤ ክራም ካዋ ሶሎሞነስ ፆሳ ኬን ኦሶ ኦድ ፖልስ። 
\v 12 እ ኦዳ ኦሶትካ ናምኡ ቱሳታ፥ ቱሳታ ሁጰን ዎያ ሳነ መላ ናምኡ ጉምቦታ፥ ቱሳታ ቦላ ደእያ ናምኡ ጉምቦታ አሌቅስያ ናምኡ ግተ ዳንያ ሳንላታ፥ 
\v 13 እስ እስ ቱቅያ ቦላ ናምኡ ማራን ናሰ ብራታፐ ኦሰትዳ እስ እስ ፄቱ ኦሮማነ ቴራ ምስለታ፥ ኩመ ኦይዱ ፄቱ ኦሮማነ ቴራ ምስለታ፥ 
\v 14 ኦይደታነ ኦይደታ ቦላ ኡትያ ሜቻ ታሙ ከረታ፥ 
\v 15 አባ ሳነይነ እያፐ ጋርሳን ደእያ ታማነ ናምኡ ቦራ ምስለታ፥ 
\v 16 ከረታ፥ አካፋታ፥ ቃጰታነ ሀራ ሚሸታ ኡባ።
\p ክራም-አብ ካዋ ሶሎሞነስ ፆሳ ኬ ኦሱዋስ መዳ ሀ ሚሸታ ኡባ ጌሻ ናሰ ብራታፐ መስ። 
\v 17 ካዎይ ሶሎሞነይ ሱኮታፐነ ፃሬዳፐ ግዶን፥ ዮርዳኖሰ ደንባን ደእያ ናሰ ብራታ ሼሽያ በሳን ሀ ኡባ ኦስስስ። 
\v 18 ናሰፐ መትዳ ሀ ሚሸ ኡባይ ዳሮ ግድዳ ግሾ፥ አይ መላ ዴፅያኮ ልከይ ኤረትቤና።
\p
\v 19 ሶሎሞነይ ፆሳ ኬን ደእያ ሚሸታ ኡባ ዎርቃፈ ኦስስስ። ሄስካ ዎርቃፈ ኦሰትዳ ያርሾ በሳ፥ ጎዳ ስንን ዎያ ኡይይ ኡትያ ፃርጴዛ፥ 
\v 20 ዎጋ መላ ኡባፈ ጌሻ በሳ ስንን ፖአና መላ ፆምፐ ዎያ ዎርቃ ኮጫ፥ ዎርቃ ፆምፐታ፥ 
\v 21 ዋላህ ባይና ዎርቃፈ ኦሰትዳ ጪሻ ምስለታ፥ ፆምፐታነ ቃጰታ፥ 
\v 22 ፆምፐ ቶይስያባታ፥ ፃሮታ፥ እፃነ ጩይስያባታነ ታማ ኤክያ ቃጰታ። ሀ ሚሸት ኡባይ ጌሻ ዎርቃፈ ኦሰትዶሶና። ፆሳ ኬስ ካረ ባጋ ፐንገታነ ኡባፈ ጌሻ በሳ ገልያ ፐንገታ ዎርቃን ትይስ።
\c 5
\p
\v 1 ሶሎሞነይ ፆሳ ኬ ኦሶ ኡባ ፖልዳፐ ጉየ እያ አዋይ ዳዊቲ ጎዳስ ዱማይድ ዎዳ ብራ፥ ዎርቃነ ሀራ ሚሸታ ኡባ ኤህድ፥ ፆሳ ኬ ቡቁራ ምንጅያ በሳን ዎስ።
\s1 ታቦተይ ፆሳ ኬ ገልስ
\r (1 ካዎ 8:1-9)
\p
\v 2 ሄሳፈ ጉየ፥ ካዎይ ሶሎሞነይ ጎዳ ቃላ ጫቆ ታቦትያ ዳዊታ ካታማ ግድዳ ፅዮነፐ ኤሀና መላ እስራኤለ ጭማታ፥ እስራኤለ ኮቻታነ ሶ አሳ ሀላቃታ የሩሳላመ ሺሽስ። 
\v 3 እስራኤለ አሳ ኡባይ ላፑን አጌናን፥ ሻቃራ ባለይ ቦንቸትያ ዎደ ካዋኮ ሺቅዶሶና። 
\v 4 እስራኤለ ጭማት ኡባይ ጋክን፥ ሌወት ታቦትያ ደንዶሶና። 
\v 5 ሌወትነ ካህነት ታቦትያ፥ ዱንካንያነ እያ ግዶን ደእያ ጌሻ ሚሸታ ኡባ ቶክድ ኤህዶሶና። 
\v 6 ካዎይ ሶሎሞነይነ እያራ ደእያ እስራኤለ ማባራ ኡባይ ታቦትያ ስንን ሺቅድ፥ ታይባናዉ ዳንዳኤቶና ዳሮ ዶርሰነ መሄ ያርሽዶሶና።
\p
\v 7 ካህነት ጫቆ ታቦተይ ፆሳ ኬ ኡባፈ ጌሻ በሳ ኤህድ፥ ክሩበታ ምስለታ ቀፈታፐ ጋርሳራ ዎዶሶና። 
\v 8 ምጨትድ ኡትዳ ክሩበታ ቀፈት ታቦትያነ ታቦትያ ቶክያ ካሶታ ካምዶሶና። 
\v 9 ካሶት ዳሮ አዱሰ ግድያ ግሾ፥ ኤንታ ፄራይ ኡባፈ ጌሻ በሳ ስንን ደእያ ጌሻ በሳን ኤቅዳ አስ በአናዉ ዳንዳኤስ፤ ሽን ጌሻ በሳፈ ካረራ በንተና። ኤንቲ ሀች ጋካናዉ ሄ በሳን ደኦሶና። 
\v 10 እስራኤለ አሳይ ግብፀ ቢታፈ ከይዳ ዎደ ጎዳይ ኤንታራ ጫቅዳ ኮሬባ ዙማን ሙሰይ ዎዳ ናምኡ ሎቸ ሹቻታፐ አትሽን፥ ታቦትያ ግዶን ሀራባይ ባዋ።
\p
\v 11 ሄ በሳን ደእያ ካህነት ኡባይ ባንታ ኦያ በሳን በሳን ሻከቶና ደእሸ ባንታና ጎዳስ ዱማይዶሶና። 
\v 12 ማዝሙረ ዛማርያ ሌወት ኡባይ፥ አሳፍ፥ ሄማንነ ኤዶታፐ፥ ኤንታ ናይትነ ኤንታ ዳቦት ሊኖ ጌተትያ ማኦ ማእዶሶና። ሄ ማኡዋ ማእድ፥ ዳላ፥ ዲነ ማስንቆ ኦይክድ፥ ያርሾ በሳፈ ዶሎሀ ባጋራ ኤቅዶሶና። 
\v 13 ፄታነ ላታሙ ካህነት ሞይዘ ፑናናዉ ኤንታራ ኤቅዶሶና። ኤንቲ ኡባይ ሞይዘ ፑንሸ፥ ዳላ ቃሸ፥ ዲ ዲፅሸነ ሀራ ሚሸታ ካእሸ፥
\q1 “ጎዳይ ኬሀ!
\q2 እያ ሲቆይ መርናሳ”
\m ያግድ ጎዳ ሳቦሶና።
\p
\v 14 ጎዳ ቦንቾይ ፆሳ ኬ ኩምዳ ግሾ፥ ሻራ ጋሶን ካህነት ባንታ ኦሱዋ ኦናዉ ዳንዳእቦኮና።
\c 6
\s1 ሶሎሞነ ሃሳያ
\r (1 ካዎ 8:12-21)
\p
\v 1 ሶሎሞነይ፥ “አቤት ጎዳዉ፥ ‘ታ ማ ሻራን ዳና’ ያጋዳሳ። 
\v 2 ሽን ታኒ ኔኒ ያን መርናዉ ዳና ሎኦ ኬ ነዉ ኬፃስ” ያግስ።
\p
\v 3 እስራኤለ ሺቆይ ያን ኤቅዳሽን፥ ካዎይ ኤንታኮ ስሚድ፥ ኤንታ ሀይሳዳ ያግድ አንጅስ፤ 
\v 4 “ጎዳይ እስራኤለ ፆሳይ ጋላተቶ! ታ አዋ ዳዊታስ ባ ዶናን ኦድዳ ኡፋይሳ ቃላ ባ ኩሸን ፖልስ። ሄ እ ኦድዳ ኡፋይሳይ፥ 
\v 5 ‘ታኒ ታ አሳ እስራኤለ ግብፀፈ ከሳዳ ኤህዳ ዎደፐ ዶምን፥ ታ ሱንይ እያን ፄገታና መላ ታዉ ኬ ኬፃናዉ እስራኤለ ኮቻታ ግዶን አይ ካታማካ ዶራብከ፤ ዎይኮ እ ታ አሳ እስራኤለ ካለና መላ ኦናካ ዶራብከ። 
\v 6 ሽን ሀእ ታ ሱንይ የሩሳላመን ፄገታና መላ ታኒ የሩሳላመ ዶራስ፤ ቃስ ታ አሳ እስራኤለ ካለና መላ ዳዊታ ዶራስ።’
\p
\v 7 “ታ አዋይ ዳዊቲ ጎዳ እስራኤለ ፆሳ ሱንስ ኬ ኬፃናዉ ባ ዎዛናን ቆፕስ። 
\v 8 ሽን ጎዳይ ታ አዋ ዳዊታኮ፥ ‘ኔኒ ታ ሱንስ ኬ ኬፃናዉ ነ ዎዛናን ቆፕዳ ግሾ ሎኦ ኦዳሳ። 
\v 9 ግዶሽን፥ ታዉ ኬ ኬፃናይ ነና ግዳካ፤ ታ ሱንስ ኬ ኬፃናይ ነ ጉልባታፐ ከያና ነ ናኣ።’
\p
\v 10 “ጎዳይ ባ ግዳ ኡፋይሳ ቃላ ፖልስ። ጎዳይ ካሰ እምዳ ኡፋይሳዳ ታኒ ታ አዋ ዳዊታ በሳን ካዎታዳ እስራኤለ ካዎተ አራታን ኡታስ። ቃስ ጎዳ እስራኤለ ፆሳ ሱንስ ኬ ኬፃስ። 
\v 11 ጎዳይ እስራኤለራ ጫቅዳ ጫቆይ ፃፈትዳ ሎቸ ሹቻት ደእያ ታቦትያ እያ ግዶን ዎስ” ያግስ።
\s1 ሶሎሞነ ዎሳ
\r (1 ካዎ 8:22-53)
\p
\v 12-13 ሶሎሞነይ አዱሳተይ እቻሹ ዋ፥ ጎምፓይ እቻሹ ዋነ ቃተይ ሄ ዋ ግድዳ ማድራከ ናሰ ብራታፐ ኦድ ዳባባ ግዶን ዎስ። ሶሎሞነይ ጎዳ ያርሾ በሳ ስንን፥ እስራኤለ ማባራይ ደእያ በሳን ኤቅድ፥ ባ ኩሽያ ምጭድ እስራኤለ ሺቁዋ ስንን ጉልባትስ። 
\v 14 እ ሀይሳዳ ያግድ ዎስስ፦
\p “አቤት ጎዳዉ፥ እስራኤለ ፆሳዉ፥ ሳሎን ዎይኮ ሳአን ነ መላ ፆሲ ባዋ። ኔኒ ነ ኡፋይሳ ቃላ ናጋሳ፤ ባንታ ኩመ ዎዛናፐ ነ ስንን ሄመትዳ ነ አይለታ መርና ሲቁዋን ዶሳዳሳ። 
\v 15 ነ አይልያ፥ ታ አዋ ዳዊታስ ኔኒ ኦና ጋዳ ኦድዳ ቃላ ናጋዳሳ። ኔኒ ካሰ ነ ዶናን ኦድዳይሳ ነ ኩሸን ሀች ፖላዳሳ። 
\v 16 አቤት ጎዳዉ፥ እስራኤለ ፆሳዉ ኔኒ ነ አይልያ፥ ታ አዋ ዳዊታስ፥ ‘ኔኒ ታ ስንን ሄመትዳይሳዳ ነ ናይትካ ታ ህግያን ሄመታናዉ ባንታ ኦግያ ናግኮ፥ እስራኤለ አራታን ኡትያ አሰ ያካ’ ያግዳ ቃላ ፖላ። 
\v 17 አቤት ጎዳዉ፥ እስራኤለ ፆሳዉ፥ ኔኒ ነ አይልያ ዳዊታስ ኦድዳ ነ ኡፋይሳ ቃላይ ፖለቶ።
\p
\v 18 “ሽን ፆሲ ቱማ፥ አሳራ ሳአን ደእዬ? ሄኮ፥ ሳሎይ፥ ኡባፈ ቃ ሳሎይ ነና ኦይካናዉ ዳንዳኤና። ያትን፥ ሀ ታ ኬፅዳ ኬይ ነዉ አይ መላ ጉፃንደሻ! 
\v 19 ግዶሽን፥ አቤት ጎዳዉ፥ ታ ፆሳዉ፥ ታ ዎሳ፥ ነ አይልያ ዎሳነ ፄሳ ስአ። ታኒ ነ አይለይ ነ ስንን ዎስያ ዎሳነ ዋሱዋ ስአ። 
\v 20 ኔኒ፥ ‘ታ ሱንይ ሄ በሳን ፄገታና’ ግዳ ሀ ፆሳ ኬኮ፥ ነ አይፈይ ቃማ ጋላስ ፄሎ። ታኒ ነ አይለይ ሀ ኬኮ ስማዳ ዎስያ ዎሳ ስአ። 
\v 21 ታኒ ነ አይለይነ ነ አሳይ እስራኤለይ ሀ ነ ኬኮ ስሚድ ዎስያ ዎሳ ስአ። ነ ደእያ በሳን ሳሎን ስአዳ ኑስ አቶ ያጋ።
\p
\v 22 “እስ አስ ባ ሾሩዋ ቆህድ አካይ ግን፥ እያ ጫቀናዉ ሀ ነ ኬ ኤህን፥ እያ ግዶን ደእያ ያርሾ በሳ ስንን እ ጫቅኮ፥ 
\v 23 ኔኒ ሳሎን ስአዳ ኦ። ነ አይለታ ግዶን ፕርዳ። ቆህዳ ኡራ ቦላ ፕርዳዳ፥ እ ኦዳባ እያ ቦላ ዛራ፤ ፅሉዋ ፆንሳዳ እያዉ እያ ፅሎተዳ ዛራ።
\p
\v 24 “ነ አሳይ እስራኤለይ ነ ቦላ ናጋራ ኦድ፥ ሞርከን ፆነትድ፥ ኔኮ ስሚድ፥ ነ ሱን ፄግድ፥ ሀ ኬን ነና ዎስኮ፥ 
\v 25 ነ ሳሎን ስአ። ነ አሳ እስራኤለ ናጋራ አቶ ያጋ፤ ነ ካሰ ኤንታዉነ ኤንታ ማይዛታስ እምዳ ቢታ ኤንታ ዛራ።
\p
\v 26 “ነ አሳይ ነ ቦላ ናጋራ ኦን፥ ሳሎይ ጎርደትኮ፥ እር ቡኮና እፅን፥ ኤንቲ ሀ በሳ ስሚድ፥ ዎስኮ ነ ኤንታ ኡንኤዳ ግሾ፥ ነ ሱን ፄግድ፥ ባንታ ናጋራፐ ስምኮ፥ 
\v 27 ነ ሳሎን ስአ። ነ አይለታ ናጋራ፥ ነ አሳ እስራኤለ ናጋራ አቶ ያጋ። ኤንቲ ሄመታናዉ በሲያ ሎኦ ኦግያ ኤንታ ታማርሳ፤ ኔኒ ነ አሳስ እምዳ ቢታን እራ ቡክሳ።
\p
\v 28 “ቢታ ቦላ ኮሽ ዎይኮ ቦሽ ዎይኮ ሌገይ ዎይኮ ቦለይ ዎይኮ ጎንዶይ ይስን ዎይኮ ሞርከይ ኤንታ ካታማታ ተቅን ዎይኮ ዮይ ዎይኮ ሀርገይ ይን፥ 
\v 29 ነ አሳ እስራኤለፐ ኦንካ ዎይኮ ነ አሳ ኡባይ ነና ዎስኮ፥ አይ አስካ ባ ዎዛናን ኡንኤትያባነ አዛንያባ ኤርድ፥ ሀ ፆሳ ኬኮ ስሚድ፥ ባ ኩሽያ ምጭኮ፥ 
\v 30 ነ ደእያ በሳን ሳሎን ስአ። ኤንታ ናጋራ አቶ ያጋ፤ ኤንታዉ ኦ። ኔኒ አሳ ዎዛና ኤረይሳዳ አሳ ኡባስ እያ ኦሱዋዳ ኦሱዋዳ እማ። አሳ ኡባ ዎዛና ኤረይ ነ ፃላላ። 
\v 31 ሄስካ ነ ኑ ማይዛታስ እምዳ ቢታን ባንታ ደኦ ላይ ኡባን ነዉ ያያና መላነ ነ ኦግያን ሄመታና መላሳ።
\p
\v 32 “እስራኤለ ግዶና ሀራ ቢታ አስ ነ ግታ ሱን ግሾነ ኔኒ ነ አሳስ ኦዳ ማላልስያ ኦሶታ ግሾ ሃሆ ቢታፈ ይድ፥ ሀ ፆሳ ኬኮ ስሚድ ዎስኮ፥ 
\v 33 ነ ደእያ በሳን ሳሎን ስአ። ሀራ ቢታ አሳይ ኦይችያባ ኡባ ኦ። ሀ አላምያን ደእያ አሳ ኡባይ ነ ሱን ኤራናዳነ ነ አሰ ግድዳ እስራኤለዳ ነዉ ያያናዳ ታ ኬፅዳ ሀ ኬይ ነ ጎይነትያ በሲ ግደይሳ ኤንቲ ኤራናዳ ሀራ ቢታ አሳይ ነና ዎስያባ ኡባ ኦ።
\p
\v 34 “ኤንቲ ባንታ ሞርከታ ኦላና መላ ነ ኪትያ ዎደ ነ ዶርዳ ሀ ካታማኮነ ታ ነ ሱን ግሾ ኬፅዳ ሀ ኬኮ ስሚድ ነና ዎስኮ፥ 
\v 35 ኤንታ ዎሳነ ኤንታ ኦይሻ ሳሎን ስአ፤ ኤንታ ኦይሻ ዛራ።
\p
\v 36 “ናጋራ ኦና አስ ባይና ግሾ ነ አሰ ግድዳ እስራኤለይ ናጋራ ኦድ ነና ቆህኮ ኔኒ ሸነታዳ ሞርከታስ አ እምን ሞርከት ኤንታ ድእድ ሃሆ ዎይኮ ማታ ቢታ ኤንታ ኤፍን፥ 
\v 37 ኤንቲ ሄ ድኤትዳ ቢታን ደእሸ ባንታ ዎዛናን ናጋራፐ ስምኮ፥ ‘ኑኒ ናጋራ ኦዳ፤ ኑኒ ቆህዳ፤ ኑኒ ኢታባ ሀንዳ’ ያግድ ነና ዎስኮ፥ 
\v 38 ባንታና ድእድ ኤፍዳ ሞርከታ ቢታን ደእሸ ኤንቲ ባንታ ኩመ ዎዛናንነ ኩመ ቆፋን ኔኮ ስምኮ፥ ኔኒ ኤንታ ማይዛታስ እምዳ ቢታኮ፥ ኔኒ ዶርዳ ካታማኮነ ታኒ ነ ሱን ግሾ ኬፅዳ ኬኮ ስሚድ ነና ዎስኮ፥ 
\v 39 ኤንታ ዎሳነ ኦይሻ ነ ደእያ በሳን ሳሎን ስአ፤ ኤንታዉ ፕርዳ፤ ኤንታ ናጋራ አቶ” ያጋ።
\p
\v 40 “አቤት ታ ፆሳዉ፥ ሀ በሳን ዎስያ ዎሳ ነ አይፈይ ፄሎ፤ ነ ሀይይ ስኦ።
\q1
\v 41 “አቤት ጎዳዉ፥ ፆሳዉ፥ ደንዳ፤
\q2 ዎልቃማ ነ ታቦትያራ ነ ሸምፖ በሳ ገላ።
\q1 አቤት ጎዳዉ፥ ፆሳዉ፥ ነ ካህነት አቶተ ኤኮ፤
\q2 ነ ጌሻ አሳት ነ ኬሀተን ኡፋይቶ።
\q1
\v 42 አቤት ጎዳዉ፥ ፆሳዉ፥ ኔኒ ትይዳ ካዋ አጎፋ፤
\q2 ነ አይልያ ዳዊታስ
\q2 ነ ጫቅዳ መርና ሲቁዋ ቆፓ”\x - \xo 6:42 \xo*\xt ማዝ 132:8-10.\xt*\x* ያግስ።
\c 7
\s1 ፆሳ ኬ አንጅሱዋ
\r (1 ካዎ 8:62-66)
\p
\v 1 ሶሎሞነይ ዎሳ ፖልዳ ዎደ ሳሎፐ ታም ዎድ ፁሳ ያርሹዋነ ሀራ ያርሹዋ ምስ። ጎዳ ቦንቾይ ፆሳ ኬ ኩምስ። 
\v 2 ጎዳ ቦንቾይ ፆሳ ኬ ኩምዳ ግሾ ካህነት ፆሳ ኬ ገላናዉ ዳንዳእቦኮና። 
\v 3 እስራኤለ አሳ ኡባይ ታም ሳሎፐ ዎሽንነ ጎዳ ቦንቾይ ፆሳ ኬ ኩምሽን በእዳ ዎደ ባንታ ሶምኡዋ ሳአ ጋድ ጎይንዶሶና።
\q1 “ጎዳይ ኬሀ!
\q2 እያ ሲቆይ መርናሳ”
\m ያግድ ጎዳ ጋላትዶሶና።
\p
\v 4 ካዎይነ አሳ ኡባይ ጎዳ ስንን ያርሾ ያርሽዶሶና። 
\v 5 ካዎይ ሶሎሞነይ ላታማነ ናምኡ ሙኩሉ ኮርማታነ ፄታነ ላታሙ ሙኩሉ ዶርሳታ ያርሽስ። ሄሳዳ ኦድ፥ ካዎይነ አሳ ኡባይ ፆሳ ኬ ጎዳስ ዱማይዶሶና። 
\v 6 ካህነት ባንታዉ ጊግዳ በሳን ኤቅን፥ ሌወት ካዎይ ዳዊቲ ጎዳ ሳባናዉ ካሰ ኦዳ ማዝሙረ የፅያ ሚሸታ ኦይክድ ኤንታ ስንን ኤቅድ፥ “እያ ሲቆይ መርናሳ” ያግድ የፅሸ ጎዳ ጋላትዶሶና። ካህነት ሌወታ ስንን ኤቅድ ሞይዘ ፑንን እስራኤለ አሳ ኡባይ ኤቅስ።
\p
\v 7 ሶሎሞነይ ፆሳ ኬ ስንን ደእያ ግዶ ዳባባ ዱማይስ። ሄ በሳን ፁሳ ያርሾነ እስፈተ ያርሹዋፈ ሞዋ ያርሽስ። እ ሄሳ ኦዳይ፥ ጎዳ ስንን ደእያ ናሰ ብራታፐ ኦሰትዳ ያርሾ በሳይ፥ ፁሳ ያርሹዋ፥ ካ ያርሹዋነ እስፈተ ያርሹዋፈ ሞዋ ያርሻናዉ ጉፅዳ ግሾሳ።
\p
\v 8 ሄ ዎደ ሶሎሞነይነ እስራኤለ አሳ ኡባይ ላፑን ጋላስ ባኣለ ቦንችዶሶና። እስራኤለ አሳይ ሀማታፐ ብድ ግብፀ ሻፋ ጋካናዉ ደእያ ዳሮ አሳይ ሄ በሳን ሺቅዶሶና። 
\v 9 አሳይ ያርሾ በሳ አንጅስያ ባኣለ ላፑን ጋላስ ቃስ ሻቃራ ባኣለ ሀራ ላፑን ጋላስ ቦንችዶሶና። ሆስፑን ጋላስ ዉርሰ ሺቆ ሺቅዶሶና። 
\v 10 ሶሎሞነይ ላፑን አጌናን፥ ላታማነ ሄን ጋላሳን አሳ ሞይዝስ። አሳይ፥ ጎዳይ ዳዊታስ፥ ሶሎሞነስነ ባ አሳ እስራኤለስ ኦዳ ኬሀተን ኡፋይትሸ ባ ሶ ሶ ብዶሶና።
\s1 ፆሳይ ሶሎሞነስ ቆንጭስ
\p
\v 11 ሶሎሞነይ ፆሳ ኬነ ካዎ ጋ ኬፅድ ዉርስስ። ሶሎሞነይ ፆሳ ኬንነ ባ ጋን ኦናዉ ባ ዎዛናን ቆፕዳባ ኡባ ፖልስ። 
\v 12 ጎዳይ ሶሎሞነስ ቃማ ቆንጭድ፥ “ታኒ ነ ዎሳ ስአስ፤ ታኒ ሀ ፆሳ ኬ ያርሾ በሲ ግዳና መላ ዶራስ። 
\v 13 እር ቡኮና መላ ታ ሳሉዋ ጎርድያ ዎደ ዎይኮ ካ ማና መላ ቦለ ኪትያ ዎደ ዎይኮ ታ አሳ ቦላ ጋዶ የድያ ዎደ 
\v 14 ታ ሱንን ፄገትዳ ታ አሳይ ባንታ አሳተ ካዉሽድ ዎስኮ፥ ታና ኮይኮ፥ ባንታ ኢታ ኦግያፐ ስምኮ፥ ታ ሳሎን ኤንታ ዎሳ ስአና፤ ኤንታ ናጋራ አቶ ጋና፤ ኤንታ ቢታ ፓና። 
\v 15 ሀእ ሀ በሳን ዎሰትያ ዎሳ ታ አይፈይ ፄላና፤ ታ ሀይይ ስአና። 
\v 16 ሀእ ታ ሱንይ መርናዉ እያን ዳና መላ ሀ ኬ ዶራስነ ጌሻስ። ታ አይፈይነ ታ ዎዛናይ ኡባ ዎደ ሀ ኬን ዳና።
\p
\v 17 “ነ አዋይ ዳዊቲ ኦዳይሳዳ ኔኒ ታ ስንን ሄመትኮ፥ ታ ኪታ ኡባ ኦኮ፥ ታ ዎጋነ ታ ህግያ ናግኮ፥ 
\v 18 ታኒ ነ አዋ ዳዊታራ፥ ‘ነ ኮቻፈ እስራኤለ ቦላ ካዎ ግድያ አስ ያካ’ ያጋዳ ጫቅዳይሳዳ ነ አራታ ምንዳ ኤሳና።
\p
\v 19 “ሽን ህንተ ታና አግድ ታ ህንተዉ እምዳ ዎጋነ ህግያ አግኮ፥ ሀራ ፆሳታ ጎይንኮነ ኤንታዉ ኦኮ፥ 
\v 20 ታኒ ካሰ ህንተዉ እምዳ ቢታፈ ህንተና ቆላና፤ ታ ሱንስ ዱማይዳ ሀ ኬካ አጋጋና። ታ ሀ ኬ ካዎተ ኡባ ግዶን ሚቻስነ ቀልቅሰስ ኦና። 
\v 21 ሀ ፆሳ ኬይ ዳሮ ማላልስያባ ግድኮካ፥ እያ ማታራ አያ ኡባይ ማላለትድ፥ ‘ጎዳይ ሀ ቢታነ ሀ ፆሳ ኬ አይስ ሀይሳዳ ኦዴ?’ ” ያጋና። 
\v 22 አሳይ ዛሪድ፥ “ሀይሳ ኡባ ኤንታ ቦላ ኤህዳይ፥ ኤንታና ግብፀፈ ከስዳ ኤንታ ማይዛታ ፆሳ አግድ ሀራ ፆሳታ ካልዳ ግሾነ ኤንታ ጎይንዳ ግሾሳ” ያጋና።
\c 8
\s1 ሶሎሞነይ ኦዳ ሀራ ኦሶታ
\r (1 ካዎ 9:10-28)
\p
\v 1 ሶሎሞነይ ፆሳ ኬነ ባዉ ጋ ኬፅዳ ላታማን ላይ ዉርሰን፥ 
\v 2 ካዎይ ክራም እምዳ ካታማታ ሶሎሞነይ ዛር ኬፅድ እስራኤለ አሳ ሄ ካታማታን ዎስ።
\p
\v 3 ሶሎሞነይ ሀማታነ ሱባ ጌተትያ ቢታ ብድ ኦይክስ። 
\v 4 ያትድ መላ ቢታን ደእያ ታድሞራ ካታማነ ሻሎ ምንጅያ ካታማታ ሀማታ ቢታን ኬፅስ። 
\v 5 ሄሳዳካ፥ ሶሎሞነይ ቆሞ ቤት-ሆሮናነ ጋርሳ ቤት-ሆሮና ጌተትያ ካታማታ ዛሪድ ኬፅስ። ሄ ካታማት ድርስ፥ ፐንገይነ ኮበይ ደእያ ድረትድ ኡትዳ ካታማታ። 
\v 6 ባላታ ካታማ፥ ቡቁራ ምንጅያ ካታማታ ኡባ፥ ባ ፓራታነ ፓራ ጋረታ ዎያ ካታማታ ኡባነ እ ኬፃናዉ አሞትዳ ኡባ የሩሳላመን፥ ልባኖሰንነ ባ ሃርያ ቢታ ኡባን ኬፅስ።
\p
\v 7 እስራኤለ ግዶናሽን ሀራ ቢታ አሳታፐ አትዳ ህተታ፥ አሞረታ፥ ፓርዘታ፥ ህወታነ ያቡሰታ፥ 
\v 8 እስራኤለ አሳይ ዉርስድ ይሶና አግዳ አሳ ዎልቃ ኦሶ ኦና መላ ሶሎሞነይ ዶርስ፤ ሀች ጋካናዉ ኤንቲ ኦሶና። 
\v 9 ሽን ሶሎሞነይ እስራኤለ አሳፐ ኦናካ አይለ ኦድ ኦስስቤና። ኤንቲ እያ ኦላንቾታ፥ ቶራ ሞጮናታ፥ ፓራ ጋረ ላገይሳታ ሀላቃታነ ፓራ አሳታ ግድድ ኦዶሶና። 
\v 10 ኤንታ ግዶፈ ናምኡ ፄታነ እሻታሙ አሳት ካዋ ሶሎሞነ ኦሱዋ አዋተን ኦስሶሶና።
\p
\v 11 ሶሎሞነይ፥ “ጎዳ ታቦተይ ገልዳ በሳይ ጌሽ ግድያ ግሾ፥ ታ ማችያ፥ ፋሮና ናእያ፥ እስራኤለ ካዋ ዳዊታ ጋን ዳናዉ በሱኩ” ያግድ፥ ግብፀ ካዋ ናእዉ ዳዊታ ካታማፐ ደንድ እዉ ኬፀትዳ ኬን ዎስ።
\p
\v 12 ሶሎሞነይ ሄ ዎደ ፆሳ ኬ ስንን ጎዳስ ኬፅዳ ያርሾ በሳን ፁሳ ያርሾ ጎዳስ ያርሽስ። 
\v 13 ሙሰ ህገይ ኪተይሳዳ ጋላስ ጋላስ ፁሳ ያርሾ ያርሼስ። ሶሎሞነይ ሳምባታ ጋላሳን፥ አጌና ፄሮንነ ላይን ሄ ቶሆ ቦንቸትያ ባለታን፥ ሄስካ ኡይ ባለን፥ ሳምንታ ባለንነ ሻቃራ ባለን ጎዳስ ያርሾ ያርሼስ።
\p
\v 14 እያ አዋይ ዳዊቲ ካሰ ኪትዳይሳዳ ካህነታ ኤንታ ኦሶን ኦሶን ሻክድ ሹምስ፤ ጋላስ ጋላስ ማዝሙረን ሳባና መላነ ካህነታ ማዳና መላ ሌወታ ሻክድ ሹምስ። ፆሳ አስ ግድዳ ዳዊቲ ኪትዳይሳዳ ፐንገ ናግያ አሳታ እስ እስ ፐንግያ ናጋና መላ ሹምስ። 
\v 15 ሄሳዳካ፥ ካሰ ዳዊቲ ቡቁራ ምንጅያ በሳነ ሀራ አላለታባ ካህነታነ ሌወታ ኪትዳይሳዳ እሶይካ አቶና ኡባይ ፖለትስ።
\p
\v 16 ሶሎሞነይ ቆፕዳ ኦሶ ኡባይ ኦሰትድ ዉርስ፤ ፆሳ ኬይ ባሰትዳ ዎድያፐ ዶምድ ፖለታና ጋካናዉ ኦሶ ኡባይ ሎኦ ኦሰትስ።
\p
\v 17 ሄ ዎደ ካዎይ ሶሎሞነይ ኤዶመ ቢታን ዞኦ አባ ዶናን ደእያ ኤፅዮን-ጋብራነ ኤሎታ ብስ። 
\v 18 ካዎይ ክራም ማርካበታነ ማርካብያ ላጎን ሎህዳ አሳታ ሶሎሞነስ የድስ። ኤንቲ ሶሎሞነ አሳታራ እስፈ ኦፍራ ቢታ ብድ ያፐ 15,000 ክሎ ግራመ ዎርቃ ካዋ ሶሎሞነስ ኤህዶሶና።
\c 9
\s1 ሳባ ካውዉ
\r (1 ካዎ 10:1-13)
\p
\v 1 ሳባ ካውያ ሶሎሞነ ዎርያ ስአዳ፥ ሰመንከን እያ ፓጫናዉ ሳዎ፥ ዳሮ ዎርቃነ አልኦ ሹቹ ጫነትዳ ዳሮ ግማለራ፥ ዳሮ አዣባን የሩሳላመ ባሱ። ባ ዎዛናን ደእያባ ኡባ ሶሎሞነስ ኦዳሱ። 
\v 2 ሶሎሞነይ እያ ኦይችዳባ ኡባስ ዛሮ እሚስ፤ እ እዉ ብርሾና እያፐ ጌምድ አትዳባይ አይብካ ባዋ። 
\v 3 ሳባ ካውያ ሶሎሞነ ጭንጫተ፥ እ ኬፅዳ ጋዋ፥ 
\v 4 እያ ጋይታን ሺቅያ ካ፥ እያ ሞርናት ኡትያ ኡተ፥ እያ ኦሳንቾት ኦያ ኦሱዋነ ማእያ ማኡዋ፥ እያ ኡሻ ትግያ አሳት ማእያ ማኡዋነ ጎዳ ኬን እ ያርሽያ ፁሳ ያርሹዋ በእዳ ዎደ እ ዎዛናይ ዳሮ ማላለትስ።
\p
\v 5 እያ ካዋኮ፥ “ነባነ ነ ጭንጫተ ታኒ ታ ቢታን ደአሸ ስእዳይስ ቱማ። 
\v 6 ሽን ታ ያዳ ታ አይፈን በአና ጋካናዉ ኤንቲ ታዉ ኦድዳባ አማናብከ። ነ ጭንጫተ ግታተስ ባጋካ ታዉ ኦድቦኮና፤ ታ ስእዳይሳፈ ነ ዳሮ ግታታሳ። 
\v 7 ኡባ ዎደ ነ ስንን ኤቅድ ነ ጭንጫተ ስእያ ነ አሳትነ ነ ሞርናት አይ መላ አንጀትዶና! 
\v 8 ነናን ኡፋይትድ፥ ነና ባ ካዎተ አራታን ኡትስዳ ጎዳይ ነ ፆሳይ ጋላተቶ! ነ ፆሳይ እስራኤለ ሲቅዳ ግሾነ መርናዉ ምን ኤሳናዉ ኮይዳ ግሾ ኔኒ ሱረ ፕርዳነ ፅሎተ ኦና መላ እ ነና ኤንታ ቦላ ካዎ ኦስ” ያጋሱ።
\p
\v 9 ካውያ ኦይዱ ሙኩሉ ክሎ ግራመ ዎርቃ፥ ዳሮ ሳዎነ አልኦ ሹቹ ካዋ ሶሎሞነስ እማሱ፤ ሳባ ካውያ ካዋ ሶሎሞነስ እምዳ ሽቱዋ መላ ሽቶይ ባዋ።
\p
\v 10 ቃስ ኦፍራፐ ዎርቃ ኤህዳ ክራማነ ሶሎሞነ አሳት ያፐ ሰንዳለ ምነ አልኦ ሹቹ ኤህዶሶና። 
\v 11 ካዎይ ሳንዳለ ም ፆሳ ኬስነ ካዎ ጋስ ደ መናዉ፥ ሄሳዳካ ዛማረታስ ማስንቆነ ዲ ኦናዉ ጎኤትስ። ሄሳ መላ የ ሚሸት ሃይሳፈ ካሴ ይሁዳ ቢታን በንትቤና።
\p
\v 12 ካዎይ ሶሎሞነይ ሳባ ካውያ ኮይዳባነ ኦይችዳባ ኡባ እዉ እሚስ። እያ፥ እያዉ ኤህዳይሳፈ አድ እዉ እሚስ። ሄሳፈ ጉየ፥ ሳባ ካውያ ባ አዣባራ ደንዳዳ ባ ቢታ ስማሱ።
\s1 ሶሎሞነ አቁዋ
\r (1 ካዎ 10:14-25)
\p
\v 13 ሶሎሞነይ ላይን ላይን ኤክያ ዎርቃይ ላታማነ ሄ ሙኩሉ ክሎ ግራመ። 
\v 14 ሄስካ ዛልአንቾታፐ ኤክያ ቃራፃ፥ አራበ ቢታ ካዎታፐነ እስራኤለ ቢታን ሃረይሳታፐ ኤክያ ዎርቃነ ብራ ጉጆናሽና። 
\v 15 ካዎይ ሶሎሞነይ እስ እስ ጎንዳለይ ላፑን ክሎ ግራመ ግድያ ናምኡ ፄቱ ዎጋ ጎንዳለታ ዎርቃፈ ኦስስስ። 
\v 16 እሶይ እሶይ ሄ ክሎ ግራመ ግድያ ሄ ፄቱ ጉ ጎንዳለታ ዎርቃፈ ኦስስስ። ካዎይ ሄ ጎንዳለታ “ልባኖሰ ዎራ” ጌተትያ ካዎ ጋን ዎስ።
\p
\v 17 ካዎይ ዳንጋርሳ ዛለፐ እስ ግታ አራታ ኦስስድ ዋላህ ባይና ዎርቃን ላንፅስ። 
\v 18 አራታይ ደእያ በሳ ከያናዉ የያ ኡሱፑን ደት ደኦሶና። አራታራ ኦይከትድ ኡትዳ ዎርቃፈ ኦሰትዳ ቶሆ የያ በሲ ደኤስ። አራታስ ናምኡ ባጋራ ኩሸ ሸምፕስያ ዘምፖት ደኦሶና፤ ሄ ዘምፖታ ማታራ ያ ባጋንነ ሀ ባጋን ኤቅዳ እስ እስ ጋሞ ምስለይ ደኤስ። 
\v 19 ሄ አራታይ ደእያ በሳ ከይያ ኡሱፑን ደታ ቦላ ያ ባጋራነ ሀ ባጋራ ኤቅዳ ታማነ ናምኡ ጋሞ ምስለት ደኦሶና። ሄሳ መላ አራት ሀራ ካዎተን አዉንካ ኦሰትቤና።
\p
\v 20 ካዎይ ሶሎሞነይ ኡሹ ኡያ ሚሸ ኡባይ ዎርቃፈ ኦሰትስ፤ “ልባኖሰ ዎራ” ጌተትያ ካዎ ጋን ደእያ ሚሸ ኡባይ ዋላህ ባይና ዎርቃፈ ኦሰትስ። ሶሎሞነ ዎደ ብር ዳርዳ ግሾ ታይቦን ገለና። 
\v 21 ካዋስ ክራማ አሳት ላግያ ዛልኤ ማርካበታ ደኦሶና። ሄ ማርካበት ዎርቃነ ብራ፥ ዳንጋርሳ ዛለ፥ ቃረታነ ገለሾታ ጫንድ ሄ ላይፈ እስ ቶሆ ኤሆሶና።
\p
\v 22 ካዎይ ሶሎሞነይ ዱረተንነ ጭንጫተን ሳአን ደእያ ካዎታ ኡባፈ አስ። 
\v 23 ሳአን ደእያ ካዎት ኡባይ ፆሳይ እያ ዎዛናን ዎዳ ጭንጫተ ስአናዉ ኮዮሶና። 
\v 24 ላይን ላይን እያኮ ያ ኡባይ እያዉ ዎርቃነ ብራ፥ ማኦታ፥ ኦላ ሚሸ፥ ሽቶ፥ ፓራነ ባቁሎታ እሞታ ኤሆሶና።
\p
\v 25 ሶሎሞነ ፓራታስነ ጋረታስ ኦይዱ ሙኩሉ ዛዳሎት ደኤስ፤ ታማነ ናምኡ ሙኩሉ ፓራ አሳት ደኦሶና። ሶሎሞነይ ሄሳታ ዱማ ዱማ ካታማታንነ የሩሳላመን ዎስ። 
\v 26 ሶሎሞነይ ኤፍራፂሳ ሻፋፐ ዶምድ፥ ፍልስፄመ ቢታነ ግብፀ ዛዋ ጋካናዉ ደእያ ካዎታ ኡባ ሃርስ። 
\v 27 ካዎይ የሩሳላመን ብር ሹቻዳ ኬለታናዳ ዝጋ ም ይሁዳ ዙማታ ፃጶን ድጭያ ቦባዳ ዳራና መላ ኦስ። 
\v 28 ሶሎሞነይ ፓራታ ግብፀፈነ ሀራ ቢታ ኡባፈ ኤህሴስ።
\s1 ሶሎሞነ ሀይቁዋ
\r (1 ካዎ 11:41-43)
\p
\v 29 ኮይሮፐ ዉርሰ ጋካናዉ ሶሎሞነ ታርከይ ናብያ ናታና ታርከ ማፃፋን፥ ሴሎ አድያ ናብያ አክያ ማፃፋንነ ናባፃ ናኣ እዮርባማ ዎደ ጋካናዉ ደእያ ናብያ እዶ ቆንጨ ማፃፋን ፃፈትስ ግደኔ? 
\v 30 ሶሎሞነይ እስራኤለ ቦላ የሩሳላመን ኦይታሙ ላይ ካዎትስ። 
\v 31 ሄሳፈ ጉየ፥ ሶሎሞነይ ሀይቅድ ባ ማይዛታን ጋሄትስ፤ ባ አዋ ዳዊታ ካታማን ሞገትስ። እያ ናአይ ሮብኣም እያ በሳን ካዎትስ።
\c 10
\s1 እስራኤለት ኦሮብኣማ ቦላ ማካልዶሶና
\r (1 ካዎ 12:1-20)
\p
\v 1 እስራኤለ አሳ ኡባይ ኦሮብኣማ ካዎያናዉ ሴከማ ብዳ ግሾ እካ ያ ብስ። 
\v 2 ናባፃ ናአይ እዮርባም ካዋ ሶሎሞነፐ ባቃትድ ግብፀን ደኤይስ፥ ሄሳ ስእዳ ዎደ ግብፀፈ ይስ። 
\v 3 እስራኤለ አሳ ኡባይ እዮርባማስ ኪትድ ፄግስን፥ እነ ሺቅዳ እስራኤለ አሳ ኡባይ ሮብኣማኮ ብድ፥ 
\v 4 “ነ አዋይ ኑና ዴፆ ቃምባራ ቶስስ፤ ሽን ሀእ እ ኑና ኦስስያ ዎልቃማ ኦሱዋነ ዴፆ ቃምባራ ኑስ ካዉሽሳ፤ ያትኮ፥ ኑ ነዉ ሃረታና” ያግዶሶና።
\p
\v 5 ሮብኣም፥ “ሄን ጋላስ ስሚድ፥ ታኮ ዪተ” ያግስ። አሳይ ስሚድ ብዶሶና።
\p
\v 6 ሄሳፈ ጉየ፥ ካዎይ ሮብኣም እያ አዋይ ሶሎሞነይ ፓፃ ደእያ ዎደ ሶሎሞነ ዞርዳ ጭማታ፥ “ሀ አሳስ ዎይጋዳ ዛራ ጌቲ?” ያግድ ኤንታና ዞረ ኦይችስ።
\p
\v 7 ጭማት ሮብኣማኮ፥ “ነ ሀ አሳስ ኬህኮ፥ ኤንታ ኡፋይስኮነ ኤንታዉ ሎኦ ቃላ ዛርኮ ኤንቲ ኡባ ዎደ ነዉ ሃረታና” ያግዶሶና።
\p
\v 8 ሽን ሮብኣም ጭማት ዞርዳ ዞርያ አግድ እያራ ድጭድ፥ እያራ ኦያ ያላጋታ ዞረ ኦይችስ። 
\v 9 እ ኤንታኮ፥ “ህንተ ታና ዞርያባይ አይቤ? ‘ነ አዋይ ኑና ቶስዳ ዴፆ ቃምባራ ኑስ ካዉሽሳ’ ግያ ሀ አሳስ ዎይጋዳ ዛሮ?” ያግድ ኦይችስ።
\p
\v 10 እያ ላገት ዛሪድ፥ “ ‘ነ አዋይ ኑና ዴፆ ቃምባራ ቶስስ፤ ሽን ነ ኑስ ካዉሻርክ’ ግያ አሳስ፥ ‘ታ ግልአ ብራይ ታ አዋ ፄሳፈ ኦርደ። 
\v 11 ታ አዋይ ህንተና ዴፆ ቃምባራ ቶስስ፤ ሽን ታ እያፐ አዳ ዴፀና። ታ አዋይ ህንተና ልሶን ዋስ፤ ሽን ታ ህንተና ኮርነዳ ዱክያ ልሶን ዋና’ ያጋዳ ዛራ” ያግዶሶና።
\p
\v 12 ካዎይ፥ “ሄ ጋላሳፐ ጉየ ስሚድ ታኮ ዪተ” ግዳይሳዳ እዮርባምነ አሳይ ስሚድ ይዶሶና። 
\v 13 ካዎይ ሮብኣም ጭማት ዞርዳ ዞርያ አግድ ኤንታዉ ኢታ ዛሮ ዛርስ። 
\v 14 እያ ላገት ዞርዳ ዞርያ ካልድ፥ “ታ አዋይ ህንተና ቃምባራ ቶስስ፤ ሽን ታኒ እያፐ አዳ ዴፀና። ታ አዋይ ህንተና ልሶን ዋስ፤ ሽን ታኒ ህንተና ኮርነዳ ዱክያ ልሶን ዋና” ያግድ ዛርስ። 
\v 15 ጎዳይ ሴሎ አድያ ናብያ አክያ ባጋራ ናባፃ ናኣ እዮርባማስ ኦድዳ ቃላይ ፖለታና መላ ፆሳፈ ሀንዳ ግሾ ካዎይ አሳይ ገይሳ ስኦና እፅስ።
\p
\v 16 እስራኤለ አሳ ኡባይ ካዎይ ኤንቲ ገይሳ ስኦና እፅዳይሳ በእድ ካዋኮ፥ “ዳዊታፐ ኑና ጋክያባይ አይቤ? እሰየ ናኣፐ ኑኒ ላታናባይ ባዋ! እስራኤለ አሳዉ፥ ህንተ ሶ ሶ ቢተ! ዳዊታ፥ ኔኒ ነ ኬ ናጋ!” ያግዶሶና። ሄሳ ግሾ፥ እስራኤለ አሳይ ባንታ ሶ ሶ ብዶሶና። 
\v 17 ሽን ሮብኣም ይሁዳ ቢታን ደእያ እስራኤለ አሳ ቦላ ካዎትስ።
\p
\v 18 ካዎይ ሮብኣም ባ ኦሳንቾታ ሀላቃ አዶራማ እስራኤለ አሳኮ ኪትስ፤ ኤንቲ እያ ሹቻን ጫድድ ዎዶሶና። ሄ ዎደ ካዎይ ሮብኣም ባ ፓራ ጋረን ኡትድ የሩሳላመ ባቃትስ። 
\v 19 ሄ ዎደፐ ዶምድ ሀች ጋካናዉ ታሙ እስራኤለ ዛረት ዳዊታ ኮቻፈ ካዎትዳ ካዎታ ቦላ ማካልዶሶና።
\c 11
\p
\v 1 ሮብኣም የሩሳላመ ካታማ ጋክዳ ዎደ እስራኤለ ቢታ አሳራ ኦለትድ ካዎተ ባዉ ዛራና መላ ይሁዳፐነ ብንያመ ኮቻፈ ዶረትዳ 180,000 ኦላንቾታ ሺሽስ። 
\v 2 ሽን ጎዳ ቃላይ ፆሳ አስ ግድዳ ሻማያኮ ይስ። 
\v 3 “ሶሎሞነ ናኣ፥ ይሁዳ ካዋ ሮብኣማ፥ ይሁዳንነ ብንያመን ደእያ እስራኤለ አሳ ኡባ ሀይሳዳ ያጋ፤ 
\v 4 ‘ህንተ እሻ ግድዳ እስራኤለታራ ኦለታናዉ ቦፕተ። ሄሳ ታኒ ኦዳ ግሾ ህንተ ኡባይ ህንተ ሶ ሶ ስምተ’ ያጌስ” ያጋ። ኤንቲ ጎዳ ቃላ ስእድ እዮርባማ ኦላናዉ በይሳ አግድ ስምዶሶና።
\s1 ሮብኣማ ሚፃታ
\p
\v 5 ሮብኣም የሩሳላመን ኡትድ ሀይሳፈ ካልድ ፃፈትዳ ይሁዳነ ብንያመ ካታማታን ሚፃታ ኬፅስ። 
\v 6 ሄ ካታማት ቤተለመ፥ ኤፃማ፥ ተቁሄ፥ 
\v 7 ቤት-ፁራ፥ ሶኮ፥ አዱላማ፥ 
\v 8 ጌተ፥ ማሬሳ፥ ዚፋ፥ 
\v 9 አዶራይማ፥ ላክሶ፥ አዜቃ፥ 
\v 10 ፆርአ፥ ኤሎናነ ከብሮና። 
\v 11 ሮብኣም ካታማታ ምንድ ኤንታዉ ሀላቃታ ሹምስ፤ ካ፥ ዛይተነ ዎይነ ኡሻ ያን ዎስ። 
\v 12 ሄ ኬፀትዳ ካታማታ ኡባን ጎንዳለነ ቶራ ዎስ፤ ያትድ ኤንታ ዳሮ ምንስ። ሄሳዳ ኦድ ይሁዳነ ብንያመ ሃርስ።
\p
\v 13 እስራኤለ ኡባን ደእያ ካህነትነ ሌወት ኡባይ ባንታ ደእያ በሳፈ ሮብኣማኮ ይዶሶና። 
\v 14 ሌወት ባንታ ሄን ቢታነ ባንታ ሻሉዋ አግድ ይሁዳነ የሩሳላመ ይዶሶና። ኤንቲ ካህነ ግድድ ጎዳስ ኦና መላ እዮርባምነ እያ ናይት ድግዶሶና። 
\v 15 እዮርባም ቃ ጎይኖ በሳንነ እ ኤስዳ ዴሸነ ማራ ምስለታስ ኦያ ሀራ ካህነታ ሹምስ። 
\v 16 እስራኤለ ፆሳ ባንታ ዎዛናፐ ጎይናናዉ ኮይዳይሳት ጎዳስ ባንታ አዋታ ፆሳስ ያርሾ ያርሻናዉ ኩመ እስራኤለፐ ሌወታ ካልድ የሩሳላመ ይዶሶና። 
\v 17 ኤንታ ዩሳይ ይሁዳ ካዎተ ምንስ፤ ኤንቲ ሄ ላይ ኩመ ሶሎሞነ ናኣ ሮብኣማ ማድዶሶና። ኤንቲ ካዋ ዳዊታ ኦግያነ ካዋ ሶሎሞነ ኦግያ ካልድ፥ ሄ ላይ ሳሮ ደእዶሶና።
\s1 ሮብኣማ ሶ አሳ
\p
\v 18 ሮብኣም ማህላቶ ጌተትያ ማቾ ኤክስ። ማህላት አዋይ ዳዊታ ናኣ ያርሞታ፤ እ አይያ እሰየ ናኣ ኤልያባ ናእዉ አብካሎ። 
\v 19 ማህላታ ኦሮብኣመስ የኡሳ፥ ሳማረነ ዛሃማ ጌተትያ አደ ናይታ የላሱ። 
\v 20 ሄሳፈ ጉየ፥ አበሰሎመ ናእዉ ማእኮ ኤክስ፤ ማእካ አብያ፥ አታያ፥ ዚዛነ ሳሎምታ ጌተትያ አደ ናይታ የላሱ። 
\v 21 ሮብኣም ባ ማቸታፐ ባ ላገታፐ አድ አበሰሎመ ናእዉ ማእኮ ዶስስ። እያዉ ታማነ ሆስፑን ማቸትነ ኡሱፑን ታሙ ላገት ደኦሶና። እ ላታማነ ሆስፑን አደ ናይታነ ኡሱፑን ታሙ ማጫ ናይታ የልስ። 
\v 22 ሮብኣም ማእክ ናኣ አብያ ባ በሳን ካዎያናዉ ቆፕዳ ግሾ እያ እሻታ ቦላ እያ ሀላቃ ኦድ ሹምስ። 
\v 23 ሮብኣም ጭንጭድ ባ አደ ናይታ ይሁዳን፥ ብንያመ ቢታንነ ግምበትዳ ካታማታን ሻክ ሻክ ሹምስ፤ ኤንታዉ ዳሮ ካነ ዳሮ ማቾ ደምስ።
\c 12
\s1 ሽሻቅ የሩሳላመ ቦላ ደንድስ
\r (1 ካዎ 14:25-28)
\p
\v 1 ሮብኣማ ካዎተይ ምንድ ኤቅዳ ዎደ እነ እስራኤለ አሳ ኡባይ ጎዳ ህግያ አጋግዶሶና። 
\v 2 ኤንቲ ጎዳስ አማነቶና እፅዳ ግሾ ሮብኣም ካዎትዳ እቻሻን ላይን ግብፀ ካዎይ ሽሻቅ የሩሳላመ ቦላ ደንድስ። 
\v 3 እያዉ እስ ሙኩሉነ ናምኡ ፄቱ ፓራ ጋረት፥ ኡሱፑን ታሙ ሙኩሉ ፓራ አሳትነ ታይቦይ ባይና ሊበ፥ ሱካነ ቶጰ ኦላንቾት ደኦሶና። 
\v 4 ካዎይ ሽሻቅ ግምበትዳ ይሁዳ ካታማታ ኦይክድ የሩሳላመ ጋካናዉ ይስ።
\p
\v 5 ሄሳፈ ጉየ፥ ናበይ ሻማየይ ሮብኣማነ ሽሻቃ ያይድ የሩሳላመን ሺቅድ ደእያ ይሁዳ ሀላቃታኮ ይድ፥ “ጎዳይ፥ ‘ህንተ ታና አግዳ ግሾ፥ ታ ህንተና ሽሻቃ ኩሸን የጋስ’ ” ያግስ።
\p
\v 6 እስራኤለ ሀላቃትነ ካዎይ ሮብኣም፥ ባንታና ካዉሽድ፥ “ጎዳይ ፅሎ” ያግዶሶና።
\p
\v 7 ኤንቲ ባንታና ካዉሽዳይሳ ጎዳይ በእዳ ዎደ ሻማያኮ ሀይሳዳ ያግስ፤ “ኤንቲ ባንታና ካዉሽዳ ግሾ ታ ኤንታ ይስከ፤ ታ ኤንታ አሻና። ታ ሀንቆይ ሽሻቃ ባጋራ የሩሳላመ ቦላ ጉከና። 
\v 8 ግዶሽን፥ ታዉ ሃረተይሳንነ ሀራ ካዎታስ ሃረተይሳን ደእያ ዱማተ ኤንቲ ኤራና መላ ሽሻቃስ ሃረታና” ያግስ።
\p
\v 9 ግብፀ ካዎይ ሽሻቅ የሩሳላመ ኦልድ፥ ፆሳ ኬንነ ካዎ ጋን ደእያ ሻሎ ኡባ ኤክስ። ሶሎሞነይ ዎርቃፈ ኦስስዳ ጎንዳለታ ቦንቅስ። 
\v 10 እ ኤፍዳ ዎርቃ ጎንዳለታ ግሾ ካዎይ ሮብኣም ናሰ ብራታፐ ሀራ ጎንዳለታ ኦስስድ ካዎ ጋ ፐንገ ናገይሳታ ሀላቃታ ኩሸን ዎስ። 
\v 11 ካዎይ ፆሳ ኬ ገልያ ዎደ ኡባን ፐንግያ ናገይሳት ሄ ጎንዳለታ ኦይክድ እያ ካሎሶና። ካዎይ ስምኮ ኤንቲ ዛሪድ ናገይሳታ ኬን ዎሶና። 
\v 12 ሮብኣም ባና ካዉሽዳ ግሾ እ ዮና መላ ጎዳ ሀንቆይ እያፐ ስምስ። ይሁዳ ቢታ ኡባን ቃስ ሳእ እንጀትስ።
\p
\v 13 ካዎይ ሮብኣም ባና ምንድ የሩሳላመን ካዎትስ፤ ሮብኣም ካዎትዳ ዎደ እያዉ ላይ ኦይታማነ እስኖ። ጎዳይ ባ ሱንይ ያን ፄገታና መላ እስራኤለ ቢታ ኡባን ዶርዳ፥ የሩሳላመን ታማነ ላፑን ላይ ካዎትስ። ሮብኣማ አይያ አሞነ ማጫስ ናእሞ። 
\v 14 ሮብኣም ጎዳ ዎዛናፐ ጎይናናዉ ኮይቦና ግሾ ኢታባ ኦስ።
\p
\v 15 ሮብኣም ባ ካዎተ ዎድያን ኦዳባይ ኮይሮፐ ዉርሰ ጋካናዉነ እያ የለታ ማራይ፥ ናብያ ሻማያ ታርከ ማፃፋንነ ቆንጨ በእያ እዶ ታርከ ማፃፋን ፃፈትስ ግደኔ? ሮብኣም ነ እዮርባም ኡባ ዎደ ኦለትሸ ደእዶሶና። 
\v 16 ሮብኣም ሀይቅድ ባ ማይዛታ ጋክስ፤ እ ዳዊታ ካታማን ሞገትስ። እያ በሳን እያ ናአይ አብይ ካዎትስ።
\c 13
\s1 ይሁዳ ካዋ አብያ
\r (1 ካዎ 15:1-8)
\p
\v 1 ካዎይ እዮርባም ካዎትዳ ታማነ ሆስፑን ላይን አብይ ይሁዳን ካዎትስ። 
\v 2 አብይ የሩሳላመን ሄ ላይ ካዎትስ። እያ አየ ሱንይ ምካዮ፤ እያ ግብአ አድያ ኡርኤላ ናአ።
\p አብይነ እዮርባም ኦለትሸ ደእዶሶና። 
\v 3 አብይ ዶረትዳ ኦይዱ ፄቱ ሙኩሉ ምኖ ኦላንቾታ ኤክድ ኦላስ ከይስ። እዮርባም ዶረትዳ ሆስፑን ፄቱ ሙኩሉ ምኖ ኦላንቾታ ኤክድ አብያራ ኦለታናዉ ከይስ።
\p
\v 4 ሄሳፈ ጉየ፥ አብይ ደረይ ዳርያ ኤፍሬማ ቢታን ደእያ ፃማራይማ ደርያ ሁጰን ኤቅድ፥ ሀይሳዳ ያግስ፤ “ነኖ፥ እዮርባማ፥ ህንተኖ፥ እስራኤለ አሳዉ፥ ኡባይ ታ ግያባ ስእተ! 
\v 5 ጎዳይ እስራኤለ ፆሳይ ዳዊታነ እያ ኮቻይ እስራኤለ ቦላ መርናዉ ካዎታና መላ ዳዊታራ ማፅነን ጫቅዳይሳ ኤረከትዬ? 
\v 6 ግዶሽን፥ ዳዊታ ናኣ ሶሎሞነ አይለይ፥ ናባፃ ናአይ እዮርባም ደንድድ ባ ጎዳ ቦላ ማካልስ። 
\v 7 ሮብኣም ዮጋ፥ ኤር ባይናይሳነ ኤንታራ ኤቀታናዉ ዳንዳኦና ዎደ ፓና ላፋ አሳት እዮርባማኮ ሺቅድ ሶሎሞነ ናኣ ሮብኣማ ቦላ ደንድዶሶና።
\p
\v 8 “ጎዳይ ዳዊታ ኮቻስ እምዳ ካዎተራ ህንተ ኤቀታናዉ ቆፔታ። ህንተ ሄሳ ቆፕዳይ ህንተ ዳሮ ግድያ ግሾነ ፆሳታ ግዳና መላ እዮርባም ዎርቃፈ መዳ ማራት ህንተራ ደእያ ግሾሳ። 
\v 9 ጎዳስ ኦያ አሮና ኮቸ ግድዳ ኦያ ካህነታነ ሌወታ ህንተ የደደታ። ሀራ ቢታ አሳይ ኦይሳዳ ህንተዉ ሀራ ካህነታ ሹምደታ። ባና ዱማያናዉ እስ ዎፋኖነ ላፑን ማራዘ ኤክድ ያ ኦናካ ዎርዶ ፆሳታስ ካህነ ኦድ ሹማታ።
\p
\v 10 “ግዶሽን፥ ኑስ ጎዳይ ኑ ፆሳ፤ ኑኒ እያ አግቦኮ። ካህነ ግድድ ኦያ አሮና ኮቻት ኑስ ደኦሶና፤ ሌወት ኤንታ ማዶሶና። 
\v 11 ኤንቲ ኡባ ጋላስ ዎንታነ ኦማርስ ጎዳስ ፁሳ ያርሾ ያርሾሶናነ ሳውያ እፃነ ጩይሶሶና። ጎዳ ስንን ዎያ ኡይ ጌሻ ፃርጴዛ ቦላ ዎሶና። ኦማርስ ኦማርስ ፆምፐ ዎያ ኮጫ ቦላ ታማ ኦይሶና። ኑኒ ጎዳ ኑ ፆሳ ኪታ ናጎስ፤ ሽን ህንተ እያ አግደታ። 
\v 12 ፆሳይ ኑራ ደኤስ፤ እ ኑና ካለስ። ኦላ ሞይዘ ፑንያ እያ ካህነት ኑራ ደኦሶና፤ ኑኒ ህንተራ ኦላ ዶማናዉ ሞይዘ ፑናና። እስራኤለ አሳዉ፥ ጎዳራ ህንተ አዋታ ፆሳራ ኦለቶፍተ! ህንተ እያ ፆናናዉ ዳንዳኤከታ” ያግስ።
\p
\v 13 ሄ ዎደ እዮርባም ባ ኦላንቾታፐ እስ ጩጋ ኤንታፈ ጉየራ ዙግድ ናጋና መላ የድስ። አትዳ እስራኤለ ኦላንቾት ይሁዳ ኦላንቾታ ስንን ደእያ ዎደ ዙግድ ናግያ ኦላንቾት ኤንታፈ ጉየራ ደኦሶና። 
\v 14 ይሁዳ ኦላንቾት ጉየ ስሚድ ፄልያ ዎደ ኤንታ ኦላናዉ ይዳይሳት ጉየራነ ስንራ ደኤይሳ በእዳ ዎደ ጎዳኮ ዋስዶሶና፤ ካህነት ሞይዘ ፑንዶሶና። 
\v 15 ይሁዳ ኦላንቾት ኦላ ዋሶ ዋስዳ ዎደ ጎዳይ እዮርባማነ እስራኤለ አሳ ኡባ አብያ ስንንነ ይሁዳ ስንን ፆንስ። 
\v 16 እስራኤለ ኦላንቾት ይሁዳ ኦላንቾታ ስንፈ ባቃትን ፆሳይ ኤንታ ይሁዳ ኦላንቾታ ኩሸን አድ እሚስ። 
\v 17 አብይነ እያ ኦላንቾት ኤንታ ዲፍ ኦድ ዉርስዶሶና። ሄ ኦላን 500,000 ዶረትዳ እስራኤለ ኦላንቾት ሀይቅዶሶና። 
\v 18 እስራኤለ አሳይ ሄ ዎደ ፆነትዶሶና፤ ይሁዳ አሳይ ጎዳን ባንታ አዋታ ፆሳን አማነትዳ ግሾ ኤንታ ፆንዶሶና።
\p
\v 19 አብይ እዮርባማ የደድ እያፐ ቤተለ፥ ይሻናነ ኤፍሮና ኤንታ ጉታታራ ኦይክስ። 
\v 20 አብይ ደእዳ ላይን እዮርባም ስሚድ ምንቤና። ጎዳይ እዮርባማ ሾጭን ሀይቅስ።
\p
\v 21 ግዶሽን፥ አብይ ምን ምን ብስ። አብይ ታማነ ኦይዱ ማቾ ኤክድ ላታማነ ናምኡ አደ ናይታነ ታማነ ኡሱፑን ማጫ ናይታ የልስ። 
\v 22 አትዳ አብይ ታርከይ፥ እ ኦዳባይነ እ ኦድዳባይ ናብያ እዶ ታርከ ማፃፋን ፃፈትስ።
\c 14
\s1 ይሁዳ ካዋ አሳ
\p
\v 1 አብይ ሀይቅድ ባ ማይዛታ ጋክስ፤ እ ዳዊታ ካታማን ሞገትስ። እያ በሳን እያ ናአይ አስ ካዎትስ። እ ካዎትዳ ዎደ ቢታይ ታሙ ላይ ዎፑ ግድ ደእስ።
\p
\v 2 አስ ጎዳ ባ ፆሳ ስንን ሎኦባነ ሱረባ ኦስ። 
\v 3 አስ አላጋ ፆሳታስ ያርሽያ በሳታነ ቃ ጎይኖ በሳታ ይስስ። ጎይናናዉ ሹቻፈ ኦሰትዳ ቱሳታ መንረስ። አሼራ ጌተትያ ፆሳ ምስለታ ቃንፀረድ የግስ። 
\v 4 ይሁዳ አሳይ ጎዳ ባንታ አዋታ ፆሳ ኮያና መላ፥ እያ ህግያነ እያ ዎጋ ናጋና መላ አስ ኪትስ። 
\v 5 ቃ ጎይኖ በሳታነ እፃነ ጩይስያ በሳታ ይሁዳ ካታማታፐ ይስዳ ግሾ እያ ካዎተ ላይን ቢታይ ዎፑ ግድ ደእስ። 
\v 6 ካዎይ አስ ይሁዳ ካታማታስ ሚፃታ ኬፅስ። ጎዳይ እያ ሸምፕስዳ ግሾ ቢታይ ሸምፕስ፤ እያ ላይን እያራ ኦንካ ኦለትቤና።
\p
\v 7 አስ ይሁዳ አሳኮ፥ “አነ ኑኒ ሀ ካታማታ ኤሶስ፤ ኤንታ ዩሾን ሚፃታ ኬፆስ፤ አዱሳ ሻኮ፥ ፐንገታነ ጎርደታ ጊግሶስ። ኑኒ ጎዳ ኑ ፆሳ ኮይዳ ግሾ ቢታይ ሀእካ ኑባ። ኑኒ እያ ኮይዳ፤ እ ኑስ ኡባ ባጋራ ሸምፖ እሚስ” ያግስ። ሄሳ ግሾ፥ ኤንቲ ካታማታ ኬፅድ ፖልዶሶና።
\p
\v 8 አሳስ ይሁዳ ኮቻፈ ዎጋ ጎንዳለታነ ቶራታ ዳንጭዳ ሄ ፄቱ ሙኩሉ ኦላንቾት ደኦሶና። ብንያመ ኮቻፈ ጉ ጎንዳለታ ዳንጭዳነ ዶንገን ዱከይሳት ናምኡ ፄታነ ሆስፑን ታሙ ሙኩሉ ኦላንቾት ደኦሶና። ሄሳት ኡባይ ምኖ ኦላንቾታ።
\p
\v 9 ዛራሀ ጌተትያ እስ ቶጰ አደይ እስ ምሎነ ኦላንቾታነ ሄ ፄቱ ፓራ ጋረታ ኤክድ ይሁዳ ኦላናዉ ይድ ማርሳ ጋክስ። 
\v 10 አስ እያራ ኦለታናዉ ከይድ ባ ኦላንቾታ ማርሳ ማታን ደእያ ፃፋታ ዛንጋራን ሳልፕስስ። 
\v 11 አስ ጎዳ ባ ፆሳ ሀይሳዳ ያግድ ዎስስ፤ “አቤት ጎዳዉ፥ ዎልቅ ባይና ኦላንቾታ ዎልቃማ ኦላንቾታፐ አሸይ ነ መል ባዋ። አቤት ጎዳዉ፥ ኑ ፆሳዉ፥ ኑኒ ነናን አማነትድ፥ ሀ ዎልቃማ ኦላንቾታራ ኦለታናዉ ነ ሱንን ይዳ ግሾ ነ ኑና ማዳ። አቤት ጎዳዉ፥ ነ ኑ ፆሳ፤ ነና አስ ፆነና” ያግስ።
\p
\v 12 ጎዳይ ቶጰ ኦላንቾታ አሳ ስንንነ ይሁዳ ኦላንቾታ ስንን ሾጭን ቶጰ ኦላንቾት ባቃትዶሶና። 
\v 13 አስነ እያራ ደእያ አሳይ ኤንታ ገራራ ጋካናዉ የደዶሶና። ቶጰ ኦላንቾታፐ ዳሮይ ሀይቅዳ ግሾ ኤንቲ ስሚድ ምናናዉነ ኦለታናዉ ዳንዳእቦኮና። ሄሳዳ ሀንድ፥ ቶጰ ኦላንቾት ጎዳንነ እያ ኦላንቾታን ፆነትዶሶና። ካዋ አሳ ኦላንቾት ዳሮ ድኦ ድእዶሶና። 
\v 14 ሄ ሄራን ደእያ አሳይ ጎዳይ ኦዳባ በእድ ዳሮ ዳጋምስ። አሳ ኦላንቾት ገራራ ዩሹዋን ደእያ ካታማታ ኡባ ቦንቅድ ይስዶሶና። 
\v 15 ቃስ መሄ ሞታ ኦልድ፥ ዳሮ ዶርሳነ ግማለታ ድእድ፥ የሩሳላመ ስምዶሶና።
\c 15
\s1 ካዎይ አስ ኤህዳ ላመ
\p
\v 1 ኦዴዳ ናኣ አዛርያሳ ቦላ ፆሳ አያናይ ዎስ። 
\v 2 ካዋ አሳራ ጋሄታናዉ አዛርያስ ብድ፥ “አሳ፥ ይሁዳ አሳዉነ ብንያመ አሳዉ ስእተ! ህንተ ጎዳራ ግድኮ እካ ህንተራ ግዳና። ህንተ እያ ኮይኮ እ ህንተዉ በንታና፤ ሽን ህንተ እያ አግኮ እ ህንተና አጋና። 
\v 3 እስራኤለ አሳይ ቱማ ፆሲ ባይና፥ ታማርስያ ካህነይነ ህገይ ባይና ዳሮ ዎደ ደእዶሶና። 
\v 4 ሽን ባንታና መቶይ ጋክዳ ዎደ ኤንቲ ጎዳኮ፥ እስራኤለ ፆሳኮ ስሚድ እያ ኮይን እ ኤንታዉ በንትስ። 
\v 5 ሄ ዎደ ቢታን ደእያ አሳ ኡባይ ዳጋማን ደእያ ግሾ ሳሮተን ከይድ ገልያ ኦንካ ባዋ። 
\v 6 ፆሳይ ኤንታ ዱማ ዱማ መቶን የግዳ ግሾ ደረይ ደርያ፥ ካታማይ ካታማ ኡንኤስ። 
\v 7 ግዶሽን፥ ህንተ፥ ህንተ ኦሱዋስ ዎይቶይ ደእያ ግሾ ምንተ፤ ጉየ ጎፕተ!” ያግስ።
\p
\v 8 ካዎይ አስ ሀ ቃላነ ኦዴዳ ናአይ ናበይ አዛርያስ ኦድዳ ቃላ ስእዳ ዎደ ምንስ። አስ ይሁዳነ ብንያመ ቢታ ኡባፈነ እ ኦይክዳ ደረይ ዳርያ ኤፍሬማ ቢታን ደእያ እፀትዳ ኤቃ ምስለታ ይስስ። ፆሳ ኬ ስንን ደእያ ጎዳ ያርሾ በሳ ኦራስ።
\p
\v 9 እያ ጎዳይ ፆሳይ እያራ ደኤይሳ በእዳ ግሾ ዳሮ አሳይ እስራኤለፐ እያኮ ይዶሶና። ይሁዳ አሳነ ብንያመ አሳ ኡባ፥ ኤንታራ ደእያ ኤፍሬማ ኮቻታ፥ ምናሰ ኮቻታነ ስሞና ኮቻታ አስ ሺሽስ። 
\v 10 አስ ካዎትዳ ታማነ እቻሻን ላይን፥ ሄን አጌናን አሳይ የሩሳላመን ሺቅዶሶና። 
\v 11 ሄ ጋላስ ኤንቲ ድእድ ኤህዳባፐ ላፑን ፄቱ ኮርማታነ ላፑን ሙኩሉ ዶርሳታ ጎዳስ ያርሽዶሶና። 
\v 12 ጎዳ ባንታ አዋታ ፆሳ ባንታ ኩመ ዎዛናንነ ባንታ ኩመ ሸምፑዋን ኮያናዉ ጫቅዶሶና። 
\v 13 ጎዳ እስራኤለ ፆሳ ኮዮና አስ፥ ናአ ግድን ጭም፥ አደ ግድን ማጭ ሀይቆ። 
\v 14 ሄሳ ግታ ዋሶን፥ እልልሳን፥ ሞይዘንነ ዛየን ባንታ ጎዳስ ጫቅዶሶና። 
\v 15 ይሁዳ አሳ ኡባይ ባንታ ኩመ ዎዛናን ሀ ጫቁዋ ጫቅዳ ግሾ ኡፋይትዶሶና። ጎዳ ኤንቲ ምንድ ኮይን እ ኤንታዉ በንትስ። ጎዳይ ኤንታዉ ኡባ ባጋራ ዎፓ እሚስ።
\p
\v 16 ቃስ፥ ካዎይ አስ ባ አዋ አይያ ማእካ አሼራ ጌተትያ ማጫ ፆሴ ኤቃ ምስለ ኦዳ ግሾ ካዋ አይዉ ጌተትያ ቦንቹዋፈ እዮ ድግስ። አስ ሄ ኤቃ ምስልያ ቃንፀረድ ቀድሮና ዛንጋራን ፁግስ። 
\v 17 ቃ ጎይኖ በሳታ እስራኤለ ቢታፈ ይሶና እፅኮካ አስ ባ ደእዳ ላይ ኡባን ጎዳስ አማነትዳ አስ ግድድ ደእስ። 
\v 18 እነ እያ አዋይ ጎዳስ ዱማይዳ ብራ፥ ዎርቃነ ሀራ ሚሸታ ኤህድ ፆሳ ኬን ዎስ። 
\v 19 አስ ካዎትዳ ሀስታማነ እቻሻን ላይ ጋካናዉ ኦል ባዋ።
\c 16
\s1 ካዋ አሳ ዉርሰ ላይታ
\r (1 ካዎ 15:16-22)
\p
\v 1 አስ ካዎትዳ ሀስታማነ ኡሱፑን ላይን እስራኤለ ካዎይ ባኦስ ይሁዳ ቦላ ደንድስ። ይሁዳ ካዋ አሳኮ ኦንካ ገሎና መላነ ከዮና መላ ተቃናዉ ራማን ሚፃ ኬፅስ። 
\v 2 ካዎይ አስ ፆሳ ኬንነ ባ ካዎ ጋን ደእያ ቡቁራ ምንጅያ ኬፈ ዎርቃነ ብራ ኤክድ ዳማስቆን ደእያ ሶረ ካዋ ዎልደ-አዳራስ ሀይሳዳ ያግድ የድስ። 
\v 3 “ካሰ ታ አዋራነ ነ አዋራ ጫቅዳይሳዳ ታራነ ኔራ ጫቆስ። ሄኮ፥ ታ ነዉ ብራነ ዎርቃ የዳስ። እስራኤለ ካዎይ ባኦስ ባ ኦላንቾታ ታ ቢታፈ ከሳና መላ ነ ካሰ እያራ ጫቅዳ ጫቁዋ ላላ” ያግስ።
\p
\v 4 ካዎይ ዎልደ-አዳር፥ አስ ግዳይሳ ኤክድ ባ ቶራ ሞጮናታ እስራኤለ ኦላና መላ የድስ። ኤንቲ እዮና፥ ዳነነ አቤል-ማይማ ጌተትያ ካታማታነ ንፍታለመ ቢታን ደእያ ቡቁራ ምንጅያ ካታማታ ኡባ ፆንዶሶና። 
\v 5 ባኦስ ሄሳ ስእድ ራማን ኦያ ሚፃ አጋግስ።
\p
\v 6 ካዎይ አስ ይሁዳ አሳ ኡባ ሺሽስ፤ አሳይ ባኦስ ካሰ ያን ጎኤትያ ሹቻነ ም ራማፐ ኤክድ ግብአነ ምፅጳ ካታማታን ሚፃ ኬፅስ።
\p
\v 7 ሄ ዎደ ቆንጨ በእያ አናን ይሁዳ ካዋ አሳኮ ይድ፥ “ኔኒ ሶረ ካዋን አማነታዳ፥ ጎዳን ነ ፆሳን፥ አማነታቦና ግሾ ሶረ ካዋ ኦላንቾት ነ ኩሸፐ ከስ ኤክዶሶና። 
\v 8 ቶጰነ ሊበ አሳት ዳሮ ፓራ ጋረትነ ፓራት ደእያ ዳሮ ኦላንቾታ ግዶኮናዬ? ሽን ኔኒ ጎዳን አማነትዳ ግሾ ጎዳይ ኤንታ ነ ኩሸን አድ እሚስ። 
\v 9 ባ ኩመ ዎዛናን ጎዳን አማነትያ አስ ምንናዉ ጎዳ አይፈይ ሳኣ ኡባ ፄሌስ። ኔኒ ኤያተ ኦሶ ኦዳ ግሾ ህዛፐ ኦል ኔፐ ሻከተና” ያግስ።
\p
\v 10 አስ ቆንጨ በእያ ኡራ ቦላ ዳሮ ሀንቀትዳ ግሾ እያ ሳንላታን ቃችድ ቃሾ ኬን የግስ። አስ ሄ ዎደ እስ እስ አሳታ ዳሮ ኡንኤስ።
\p
\v 11 ሄኮ፥ አስ ኦዳባይ ኮይሮፐ ዉርሰ ጋካናዉ ይሁዳ ካዎታነ እስራኤለ ካዎታ ታርከ ማፃፋን ፃፈትስ። 
\v 12 አስ ካዎትዳ ሀስታማነ ኡዱፉን ላይን ቶሆ ሳከትስ፤ ሳሆይ ዳርኮካ፥ እ አክመታ ኮይስፐ አትሽን፥ ጎዳ ኮይቤና። 
\v 13 አስ ካዎትዳ ኦይታማነ እስን ላይን ሀይቅድ ባ ማይዛታ ጋክስ። 
\v 14 ኤንቲ እያ ዳዊታ ካታማን ዛላ ዎጭድ ከስዳ ዱፎን ሞግዶሶና። እያ አሀ ዱማ ዱማ ሽቶን ትየትዳ አርሳ ቦላ ዎዶሶና። ኤንቲ እያ ቦንቹዋስ ዳሮ ም ዶር ኤድ ዬክዶሶና።
\c 17
\s1 ይሁዳ ካዋ እዮሳፈፃ
\p
\v 1 አሳ ናአይ እዮሳፈፅ ባ አዋ በሳን ካዎትስ፤ እዮሳፈፅ እስራኤለ ኦላናዉ ባና ጊግስስ። 
\v 2 ሚፅ ኦሰትዳ ይሁዳ ካታማታን ኦላንቾታ ዎስ፤ ይሁዳ ቢታንነ እያ አዋይ አስ ኦልድ ኦይክዳ ኤፍሬማ ቢታን ኦላንቾታ ዎስ።
\p
\v 3 እዮሳፈፅ፥ እያ አዋይ ዳዊቲ ኮይሮ ሄመትዳ ኦግያን ሄመትዳ ግሾነ ባኣለ ኤቃ ጎይኖና እፅዳ ግሾ ጎዳይ እያ አንጅስ። 
\v 4 እዮሳፈፅ ባ አዋ ኦገን ሄመትድ ጎዳ ኪታ ፖልስ። እስራኤለ ካዎት ኦዳ ኢታ ኦሶታ ኦቤና። 
\v 5 ጎዳይ እያ ይሁዳ ካዎተን ምንድ ኤስስ። ይሁዳ አሳ ኡባይ እያዉ እሞታ ኤህዶሶና፤ እ ዳሮ ዱረትስነ ቦንቸትስ። 
\v 6 እዮሳፈፅ ጎዳስ ኩመ ዎዛናን ኦያ አስ። ቃ ጎይኖ በሳታነ አሼራ ጌተትያ ፆሰ ኤቃ ምስለታ ይሁዳ ቢታፈ ይስስ።
\p
\v 7 እዮሳፈፅ ካዎትዳ ሄን ላይን ይሁዳ ካታማታን ታማርሳና መላ ባ ሞርናታ በንሃላ፥ አብድዩ፥ ዛካርያሳ፥ ናትናኤላነ ምክያሳ የድስ። 
\v 8 ኤንታራ ጉ ሌወታ ሻማያ፥ ናታና፥ ዛባዳ፥ አሳሄላ፥ ሳምራሞታ፥ ዮናታና፥ አዶንያሳ፥ ፆባነ ፆባዶና የድስ፤ ቃስ ኤንታራ ካህነታ ኤልሳማናነ እዮራማ የድስ። 
\v 9 ኤንቲ ጎዳ ህገ ማፃፋ ኤክድ ይሁዳ ቢታን ደእያ ካታማታ ኡባ ብድ ያን አሳ ታማርስዶሶና።
\p
\v 10 ይሁዳ ዩሾን ደእያ ካዎተታ ኡባ ጎዳይ ያሽስን፥ ኤንቲ እዮሳፈፃራ ኦለትቦኮና። 
\v 11 ፍልስፄመፐ ጉ አሳት እዮሳፈፃስ እሞታነ ብራ ጊራ ኤህዶሶና፤ አራባት እያዉ ላፑን ሙኩሉነ ላፑን ፄቱ ዶርሳ ኡርገታነ ላፑን ሙኩሉነ ላፑን ፄቱ ኮለታ ኤህዶሶና። 
\v 12 እዮሳፈፅ ምን ምን ብስ። ይሁዳን ሚፃታነ ሻሎ ምንጅያ ካታማታ ኬፅስ። 
\v 13 ይሁዳ ካታማታን ዳሮባ ምንጅስ።
\p የሩሳላመን እያዉ ምኖ ኦላንቾት ደኦሶና። 
\v 14 ኤንቲ ባንታ አዋታ ሶ አሳን አሳን ሀይሳፈ ካልድ ፃፈትዶሶና። ይሁዳ ኮቻፈ ሻላቃይ አድና፤ እያራ ሄ ፄቱ ሙኩሉ ምኖ ኦላንቾት ደኦሶና።
\p
\v 15 አድና ካልድ ደእያ ሀላቃይ ዮሃና፤ እያራ ናምኡ ፄታነ ሆስፑን ታሙ ሙኩሉ ምኖ ኦላንቾት ደኦሶና።
\p
\v 16 ጎዳስ ባ ሸነን ባና ዱማይዳ ዝክራ ናአይ አማሳይ እያ ካልድ ደእያ ሄን ሀላቃ፤ እያራ ናምኡ ፄቱ ሙኩሉ ምኖ ኦላንቾት ደኦሶና።
\p
\v 17 ብንያመ ኮቻፈ ሀላቃይ ምኖ ኦላንቹዋ ኤልያዳ፤ እያራ ዶንገነ ጎንዳለ ኦይክያ ናምኡ ፄቱ ሙኩሉ ኦላንቾት ደኦሶና።
\p
\v 18 ኤልያዳ ካልድ ደእያ ሀላቃይ ዮዛባታ፤ እያራ ኦላ ባናዉ ዳንጭዳ እስ ፄታነ ሆስፑን ታሙ ሙኩሉ ኦላንቾት ደኦሶና።
\p
\v 19 ሀይሳቲ ካዋስ የሩሳላመን ኦዳይሳታ፤ ሀይሳቲ ይሁዳን ግምበትዳ ካታማታን ደእያ ካዎይ ዎዳ ኦላንቾታፐ ሀራ።
\c 18
\s1 ምክያስ አካባስ ኦድዳ ትንብተ
\r (1 ካዎ 22:1-28)
\p
\v 1 እዮሳፈፅ ዳሮ ዱረተነ ቦንቾ ደምዳፐ ጉየ አካባራ ቦሎትስ። 
\v 2 ጉ ላይፈ ጉየ እዮሳፈፅ አካባ በአናዉ ሳማረ ብስ። አካብ እያዉነ እያራ ደእያ አሳስ ዳሮ ዶርስነ ቦሩ ሹክስ። ያትድ እዮሳፈፃ ጋላዳን ደእያ ራሞታ ኦላናዉ ባራ ባና መላ ማቅስ። 
\v 3 እስራኤለ ካዎይ አካብ ይሁዳ ካዋ እዮሳፈፃኮ፥ “ጋላዳን ደእያ ራሞታ ኦላናዉ ታራ ባኔ?” ያግድ ኦይችስ።
\p እዮሳፈፅ፥ “ኤ፥ ታ ኔራ ባና፤ ታ ኦላንቾት ነ ኦላንቾታ፤ ኑ ኔራ ባና” ያግስ። 
\v 4 እዮሳፈፅ እስራኤለ ካዋኮ፥ “ግዶሽን፥ ነ ኮይሮታዳ ጎዳ ኦይቻ” ያግስ።
\p
\v 5 እስራኤለ ካዎይ ኦይዱ ፄቱ ናበታ ሺሽድ፥ “ታ ጋላዳን ደእያ ራሞታ ኦላናዉ ቦየ ቦፖ?” ያግድ ኦይችስ።
\p ኤንቲ፥ “ባ፤ ፆሳይ ነ ኩሸን አድ እማና” ያግዶሶና።
\p
\v 6 ሽን እዮሳፈፅ፥ “ኑ ጎዳ ኦይቻናዉ ዳንዳእያ ሀራ ናበይ ሀይሳን ባዌ?” ያግስ።
\p
\v 7 እስራኤለ ካዎይ እዮሳፈፃኮ፥ “ኑ እያ ባጋራ ጎዳ ኦይቻናዉ ዳንዳእያ ሀራ ናበይ ይምላ ናአይ ምክያስ ደኤስ። ሽን እ ኡባ ዎደ ታዉ ኢታባ ኦዴስፐ አትሽን፥ ሎኦባ ኦድ ኤሮና ግሾ ታ እያ ዶስከ” ያግስ።
\p እዮሳፈፅ፥ “ካዎይ ሀይሳዳ ጋናዉ በሰና” ያግስ።
\p
\v 8 እስራኤለ ካዎይ ባ ሞርናታፐ እሱዋ ፄግድ፥ “ይምላ ናኣ ምክያሳ ኤለ ኤካዳ ያ” ያግስ።
\p
\v 9 እስራኤለ ካዎይነ ይሁዳ ካዎይ እዮሳፈፅ ካዎ ማኦ ማእድ፥ ሳማረ ካታማ ገልያ ፐንገን ባንታ አራታን ኡትን ናበት ኡባይ ኤንታ ስንን ትንብተ ኦዶሶና። 
\v 10 ኤንታፈ እሶይ፥ ክንአና ናአይ ሰደቅያስ ብራታፐ ካጨታ ጊግስድ አካባኮ፥ “ጎዳይ፥ ‘ሶረት ያና ጋካናዉ ነ ኤንታ ሀ ካጨታን ቃይጫና’ ያጌስ” ያግስ።
\p
\v 11 ሀራ ናበት ኡባይ፥ “ጎዳይ ራሞታ ነ ኩሸን አድ እማና ግሾ ባ፤ ኦላዳ ፆና” ያግዶሶና።
\p
\v 12 ምክያሳ ፄጋናዉ ኪተትድ ብዳ ኡራይ፥ “ሄኮ፥ ሀራ ናበት ኡባይ እስ ዶና ግድድ ካዎይ ፆናናይሳ ኦድዶሶና። ነ ኦዳይካ ኤንታ ኦዳ መላ ግዶ፤ ሎኦባ ኦዳ” ያግስ።
\p
\v 13 ሽን ምክያስ፥ “ደኦ ጎዳይ ኤርያ መላ፥ ፆሳይ ታዉ ቆንጭስዳባ ኦዳና” ያግስ።
\p
\v 14 ምክያስ ካዋኮ ይዳ ዎደ ካዎይ፥ “ምክያሳ ኑኒ ጋላዳን ደእያ ራሞታ ኦላናዉ ቢኖየ ቦፕኖ?” ያግድ ኦይችስ።
\p ምክያስ ካዋኮ፥ “ኤንቲ ነ ኩሸን አድ እመታና ግሾ ባዳ ኦላ” ያግስ።
\p
\v 15 ካዎይ፥ “ጎዳ ሱንን ቱማ ኦዳ፤ ሀራባ ታዉ ኦዶና መላ ታኒ ነና አፑን ቶሆ ጫቅሶ” ያግስ።
\p
\v 16 ምክያስ፥ “ታ እስራኤለ ኦላንቾት ኡባይ ሄንንቾይ ባይና ዶርሳዳ ደርያ ቦላ ላለትዳይሳ በአስ። ጎዳይ፥ ‘ሀይሳታ ካለያ አስ ባዋ፤ ኤንቲ ኡባይ ባንታ ሶ ሶ ሳሮ ቦ’ ያጌስ” ያግስ።
\p
\v 17 እስራኤለ ካዎይ እዮሳፈፃኮ፥ “እ ታዉ ኢታፐ አትሽን፥ ሎኦ ኦድ ኤረና ጋዳ ታኒ ነዉ ኦዳብክና?” ያግስ።
\p
\v 18 ምክያስ ጉጅድ ሀይሳዳ ያግስ፤ “ሀእ፥ ጎዳይ ግያባ ስአ! ጎዳይ ባ አራታን ኡትን ሳሎ ኦላንቾት እያ ኡሻቻ ባጋንነ እያ ሀድርሳ ባጋን ኤቅዳይሳታ በአስ። 
\v 19 ጎዳይ፥ ‘እስራኤለ ካዎይ አካብ ጋላዳን ደእያ ራሞታ ብድ ያን ሀይቃናዳ እያ ባለናይ ኦኔ?’ ” ያግስ።
\p እሶይ፥ “ሀይሳዳ ግያ ዎደ ሀንኮይ ሄሳዳ” ግስ።
\p
\v 20 ዉርሰን እስ አያን ከይድ ጎዳ ስንን ኤቅድ፥ “ታኒ እያ ባለና” ያግስ።
\p ጎዳይ፥ “ዋታዳ ባለኔ?” ያግስ።
\p
\v 21 አያናይ፥ “ታ ባዳ፥ እያ ናበታ ኡባ ዶናን ዎርዶ አያና ግዳና” ያግስ።
\p ጎዳይ፥ “ኤ፥ ነ እያ ባለና፤ ነዉ ሀናና፤ ባዳ ባለ” ያግስ።
\p
\v 22 ምክያስ፥ “ሄኮ፥ ጎዳይ ነና ይሳናዉ ቆፕዳ ግሾ ነ ናበታ ዶናን ዎርዶ አያና ዎስ” ያግስ።
\p
\v 23 ክንአና ናአይ ሰደቅያስ ሺቅድ፥ ምክያሳ ባቅድ፥ “ጎዳ አያናይ ታና አግድ ነዉ ኦዳናዉ አዉራ አዴ?” ያግስ።
\p
\v 24 ምክያስ፥ “ሄኮ፥ ነ ቆሰታናዉ ቆልአ ገልያ ዎደ ሄሳ ደማና” ያግስ።
\p
\v 25 እስራኤለ ካዎይ ባ ኦላንቾታፐ እሱዋ ፄግድ፥ “ምክያሳ ኦይካ ኤፋዳ ካታማ ሃርያ አሞነስነ ታ ናኣ እዮኣሳስ እማ። 
\v 26 ካዎይ ኤንታኮ፥ ‘ሀ አድያ ቃሾ ኬን የግተ፤ ታ ሳሮ ስማና ጋካናዉ ጉ ኡይፈነ ሃፈ አትሽን፥ ሀራባ አይባካ እያዉ እሞፕተ’ ” ያግድ ኪትስ።
\p
\v 27 ምክያስ፥ “ቱማ፥ ነ ሳሮ ስማናባ ግድኮ፥ ጎዳይ ታዉ ኦድቤና። ቃስ፥ አሳዉ፥ ታ ኦድያባ አኬክተ” ያግስ።
\s1 አካባ ሀይቁዋ
\r (1 ካዎ 22:29-35)
\p
\v 28 ሄሳፈ ጉየ፥ እስራኤለ ካዎይነ ይሁዳ ካዎይ እዮሳፈፅ ጋላዳን ደእያ ራሞታ ብዶሶና። 
\v 29 እስራኤለ ካዎይ እዮሳፈፃኮ፥ “ታኒ ታ ማኡዋ ላማዳ ሀራ አስ ዳናዳ ኦላ ገላና፤ ሽን ኔኒ ነ ካዎ ማኡዋ ማአ” ያግስ። እስራኤለ ካዎይ ባ ማኡዋ ላምድ ሀራ አስ ዳንድ ኦላ ገልስ።
\p
\v 30 ሶረ ካዎይ ባ ፓራ ጋረታ ኪትያ አሳታኮ፥ “ግታ ግድን ጉ፥ ሀራ ኦደራካ ኦለቶፍተ፤ እስራኤለ ካዋ ፃላላ ኮይድ ዎተ” ያግድ ኪትስ።
\p
\v 31 ፓራ ጋረታ ኪተይሳት እዮሳፈፃ በእዳ ዎደ፥ “ሀይስ እስራኤለ ካዋ” ያግድ እያራ ኦለታናዉ ስምዶሶና። እዮሳፈፅ ዋስን ጎዳይ እያ ማድድ ኤንታ ኩሸፐ አሽስ። 
\v 32 ፓራ ጋረታ ኪተይሳት እ እስራኤለ ካዋ ግዶናይሳ በእድ እያ ጎደይሳ አጋግዶሶና።
\p
\v 33 እስ ኡራይ ጮ ባ ዶንግያ ዱክያ ዎደ እስራኤለ ካዋ ኦላ ማኦይ ጋሄትያ ሀሽያን ጫድስ። ካዎይ ባ ጋርያ ላግያ አድያኮ፥ “ጋርያ ጉየ ዛራዳ ታና ኦላ ግዶፈ ከሳ፤ ታኒ ኢታ ጫቸ ጫደታስ” ያግስ። 
\v 34 ኦላይ ጎብያ ዎደ እስራኤለ ካዎይ አካብ ባ ፓራ ጋርያ ግዶን ዘምፕድ፥ ኦማርስ ጋካናዉ ሶረታ ስንን ጋምእስ። አው ዉልያ ዎደ እ ሀይቅስ።
\c 19
\p
\v 1 ሄሳፈ ጉየ፥ ካዎይ እዮሳፈፅ የሩሳላመን ደእያ ባ ጋ ሳሮ ስምስ። 
\v 2 ቆንጨ በእያ፥ አናና ናአይ እዩይ ካዋ እዮሳፈፃራ ጋሄታናዉ ከይድ፥ “ኔኒ ኢታታ ማዳናዉ ዎይኮ ጎዳ እፀይሳታ ዶሳናው በሲ? ሄሳ ግሾ፥ ጎዳ ሀንቆይ ነ ቦላ ይስ። 
\v 3 ግዶሽን፥ አሼራ ኤቃ ምስለታ ቢታፈ ድግዳ ግሾነ ፆሳ ኮያናዉ ነ ዎዛና ጊግስዳ ግሾ ኔኒ ሎኦባ ኦዳሳ” ያግስ።
\s1 እዮሳፈፅ ዳይናታ ሹምስ
\p
\v 4 እዮሳፈፅ የሩሳላመን ደእስ። በርሳበፐ ዶምድ ደረይ ዳርያ ኤፍሬማ ቢታ ጋካናዉ አሳ ግዶን ዩይድ፥ ጎዳኮ፥ ኤንታ አዋታ ፆሳኮ ኤንታ ዛርስ። 
\v 5 ይሁዳ ቢታን ደእያ ግምበትዳ ካታማታ ኡባን ዳይናታ ሹምስ። 
\v 6 ኤንታኮ፥ “ህንተ ፕርደይ አሳሳ ግዶናሽን፥ ህንተ ፕርድያ ዎደ ጎዳይ ህንተራ ደእያ ግሾ ህንተ ፕርድያ ዎደ ናገትተ። 
\v 7 ሀእካ ጎዳስ ያይተ፤ ጎዳ ኑ ፆሳ ማታን ናቆይ፥ ሶምኦ ፄልድ ማደይነ ዎፈ ኤኮይ ባይና ግሾ አኬክድ ፕርድተ” ያግስ።
\p
\v 8 ቃስ፥ ጎዳ ህግያ ፖልሳና መላነ አሳ ግዶን ደንድያ ሞቱዋ ፕርዳና መላ ሌወታፐ፥ ካህነታፐነ እስራኤለ አሳ ሶ ሀላቃታፐ ጉ አሳታ እዮሳፈፅ የሩሳላመን ሹምስ። 
\v 9 እዮሳፈፅ ኤንታ ሀይሳዳ ያግድ ኪትስ፤ “ጎዳስ ያሻን፥ አማነተንነ ኩመ ዎዛናን ኦተ። 
\v 10 ባንታ ካታማን ደእያ ህንተ እሻት ሸምፖ ዎን፥ ህገ ዎይኮ ኪታ ዎይኮ አዋጆ መንን ህንተኮ ዪኮ፥ ኤንቲ ጎዳ ስንን ባላ ግዶናዳ፥ እያ ሀንቆይ ህንተ ቦላነ ህንተ እሻታ ቦላ ዮናዳ ኤንታ ሴርተ። ህንተ ኤንታ ሴርኮ ህንተ ህንተ ሁጰን ባላ ግደከታ። 
\v 11 ጎዳባ ግድዳ ኡባን ካህነታ ሀላቃ አማረ፤ ካዎባ ግድዳ ኡባን ይሁዳ ኮቻስ ሀላቃ ግድዳ እስማኤላ ናኣ ዛባዳ ሹማስ። ሌወት ህንተ ቦላ ሀላቃ ግዳና። ህንተ ምንድ ኦተ፤ ሱረባ ኦይሳራ ጎዳይ ግዶ” ያግስ።
\c 20
\s1 ሞአበነ አሞነ ፆነተ
\p
\v 1 ሄሳፈ ጉየ፥ ሞአበትነ አሞነት ማኡናት እዮሳፈፃ ቦላ ደንድዶሶና። 
\v 2 ጉ አሳት እዮሳፈፃኮ ይድ፥ “ማፅነ አባፈ ሄፍንን ደእያ ኤዶመፐ ዳሮ ኦላንቾት ነና ኦላናዉ ይዶሶና። ኤንቲ ሀሳሶን-ታማራን ደኦሶና” ያግድ ኦድዶሶና። (ሀሳሶን-ታማር ኤንጋዳስ ሀራ ሱን።)
\p
\v 3 እዮሳፈፅ ያይዳ ግሾ ጎዳ ኦይቻናዉ ቆፋ ቃችስ፤ ይሁዳ ቢታ ኡባን ፆማ አዋጅስ። 
\v 4 ይሁዳ አሳ ኡባይ ጎዳፐ ማዶ ኮያናዉ ሺቅዶሶና፤ ኤንቲ ጎዳፐ ማዶ ኮያናዉ ይሁዳ ካታማ ኡባፈ ይዶሶና።
\p
\v 5 እዮሳፈፅ፥ ይሁዳነ የሩሳላመ ሺቁዋ ግዶን፥ ፆሳ ኬን ደእያ ኦራ ዳባባ ስንን ኤቅስ። 
\v 6 ባ ቃላ ቁ ኦድ፥ “አቤት ጎዳዉ፥ ኑ አዋታ ፆሳዉ፥ ሳሎን ደእያ ፆሳይ ነና ግድኪ? ሳአን ደእያ ካዎተታ ኡባ ሃረይ ነና። ግታተነ ዎልቅ ነ ኩሸን ደእያ ግሾ ኔራ ኤቀታናዉ ዳንዳኤይ ባዋ። 
\v 7 አቤት ኑ ፆሳዉ፥ ካሰ ሀ ቢታን ደእያ አሳ፥ እስራኤለ ስንፈ የደዳ ነ ላግያ አብራሃመ ዘረስ መርናዉ እምዳይ ነና ግድኪ? 
\v 8 ኤንቲ ሀ ቢታን ደእዶሶና፤ ያን ነ ሱንስ ኬ ኬፅድ፥ 
\v 9 ‘ኑ ቦላ ኢታ መቶይ ዎይኮ ኦል ዎይኮ ጋዶይ ዎይኮ ኮሽ ጋክኮ፥ ነ ሱንይ ደእያ ነ ኬ ስንንነ ነ ስንን ኤቅድ፥ ኑ መቱዋን ኔኮ ዋሳና። ነ ኑ ዋሱዋ ስአዳ ኑና አሻና’ ያግዶሶና።
\p
\v 10 “ሄኮ፥ ሀእካ፥ እስራኤለ አሳይ ግብፀፈ ከይዳ ዎደ፥ ኤንታ ቢታ ኦሎና መላ ኦዳ ኤንታ ይሶና መላ ድግዳ አሞነት፥ ሞአበትነ ሳይረት ሀ ቢታን ደኦሶና። 
\v 11 ኑ ኦዶባስ ኤንቲ ኑስ ዛርዳባ በአ። ነ ኑስ እምዳ ላታ ቢታፈ ኤንቲ ኑና የደናዉ ይዶሶና። 
\v 12 አቤት ኑ ፆሳዉ፥ ነ ኤንታ ፕርድኪ? ኑና ኦላናዉ ይዳ ሀ ዳሮ ኦላንቾታራ ኦለታናዉ ኑስ ዎልቅ ባዋ። ኑኒ ኦናባ ኤሮኮ፤ ሽን ኑ አይፈት ነና ፄሎሶና” ያግስ።
\p
\v 13 ይሁዳ አሳ ኡባይ ባንታ ናይታራነ ባንታ ማቸታራ ሺቅድ ጎዳ ስንን ኤቅዶሶና።
\p
\v 14 ሄ ዎደ ዛካርያሳ ናአይ ያሀዝኤል ሺቁዋ ግዶን ኤቅዳሽን ጎዳ አያናይ እያ ቦላ ዎስ። ዛካርያስ ባናያ ናአ፤ ባናይ ይኤላ ናአ፤ ይኤል ማታና ናአ፤ ማታን ሌወ ኮቸነ አሳፋ ያራ። 
\v 15 ጎዳ አያናይ ያሀዝኤላ ቦላ ዎን፥ “ካዋዉ እዮሳፈፃ፥ ይሁዳንነ የሩሳላመን ደእያ አሳዉ፥ ኡባይ ስእተ! ጎዳይ ህንተና ያጌስ። ‘ሀ ዳሮ ኦላንቾታ ጋሶን ያዮፍተነ ዳጋሞፕተ። ኦላይ ህንተባ ግዶናሽን ፆሳባ። 
\v 16 ዎንቶ ኤንታ ቦላ ከይድ ፂፃ ጌተትያ በሳ ፑደ ከይሽን ይሩኤላ መላ ቢታን ደእያ ዛንጋራ ዉርሰን ህንተ ኤንታ ደማና። 
\v 17 ሀ ኦላ ኦለተይ ህንተና ግደከታ። ይሁዳነ የሩሳላመ አሳዉ፥ ህንተ በሳ በሳ ኦይክድ ምንድ ኤቅተ። ጎዳይ ህንተና አሽያ አሹዋ በእተ። ያዮፍተ፤ ዳጋሞፍተ፤ ዎንቶ ኤንታ ቦላ ከይተ፤ ጎዳይ ህንተራ ግዳና’ ” ያግስ።
\p
\v 18 እዮሳፈፅ ሶምኦ ሳአ ጋድ ጎይንስ፤ ይሁዳ አሳ ኡባይ የሩሳላመን ደእያ አሳ ኡባይ ጎዳ ስንን ኩንድድ ጎይንዶሶና። 
\v 19 ቃሃታነ ቆረ ኮቻፈ ጉ ሌወት ኤቅድ ባንታ ቃላ ቁ ኦድ፥ ጎዳ እስራኤለ ፆሳ ጋላትዶሶና።
\p
\v 20 ኤንቲ ዎንታ ጉራ ደንድድ ተቁሄ መላ ቢታ ብዶሶና። ኤንቲ ከይዳ ዎደ እዮሳፈፅ ደንድ፥ “ይሁዳንነ የሩሳላመን ደእያ አሳዉ ታኒ ገይሳ ስእተ። ጎዳን፥ ህንተ ፆሳን አማነትተ፤ ህንተ ምናና፤ ናበታ አማንተ ኡባይ ህንተዉ እንጀታና” ያግስ። 
\v 21 እዮሳፈፅ አሳራ ዞረትዳፐ ጉየ፥
\q1 “ጎዳ ጋላትተ፥
\q2 እያ ሲቆይ መርናሳ” ያግድ የፅሸነ እያ ጌሻ ቦንቹዋ ሳቢሸ ኦላንቾታ ስንራ ብያ አሳታ ሹምስ።
\p
\v 22 ኤንቲ ማዝሙረ የነ ጋላታ ዶምዳ ዎደ ይሁዳ ኦላናዉ ይዳ አሞነታ ቦላ፥ ሞአበታ ቦላነ ሳይረታ ቦላ ጎዳይ ዳጋማ የድስ። 
\v 23 አሞነትነ ሞአበት ሳይረታ ቦላ ደንድድ፥ ኤንታ ኩመ ይስዶሶና። ኤንቲ ሳይረታ ይስዳፐ ጉየ ባንታ ግዶን እሶይ እሱዋ ይስዶሶና። 
\v 24 ይሁዳ አሳይ መላ ቢታን ደእያ ኦላንቾታ በአናዉ ይዳ ዎደ ባንታ ሞርከት ደእያ በሳ በእዶሶና። ኤንታ አሀይ ቢታን ዝንእዳይሳ ደምዶሶና፤ ኤንታፈ እስ አስካ ከስ ኤክቤና።
\p
\v 25 ሄሳፈ ጉየ፥ እዮሳፈፅነ እያ አሳይ ድኦ ኤካናዉ ብድ ሽንቀ፥ ኦላ ሚሸ፥ ማኦታነ ሀራ አልኦ ሚሸታ ደምዶሶና። ሽን ድኦ ኡባ ኤፋናዉ ዳንዳእቦኮና፤ ድእዳባይ ዳሮ ግድዳ ግሾ ሺሻናዉ ሄ ጋላስ ኤክስ። 
\v 26 ኤንቲ ኦይዳን ጋላሳን ባራካ ዛንጋራን ሺቅድ ጎዳ ጋላትዶሶና። ሄሳ ግሾ ሄ በሳ “አንጆ ዛንጋራ” ያግድ ሱንዶሶና።
\p
\v 27 ሄሳፈ ጉየ፥ ይሁዳ አሳይነ የሩሳላመ አሳ ኡባይ እዮሳፈፅ ካለን፥ ኡፋይሳን የሩሳላመ ስምዶሶና። 
\v 28 ኤንቲ የሩሳላመ ጋክድ ዲራ፥ ማስንቆራነ ዛየራ ፆሳ ኬ ገልዶሶና።
\p
\v 29 እስራኤለ ሞርከታ ጎዳይ ኦልዳይሳ ቢታን ደእያ ካዎተት ኡባይ ስእዳ ዎደ ያይዶሶና። 
\v 30 ያትድ ፆሳይ እዮሳፈፃስ ኡባ ባጋራ ሸምፖ እምዳ ግሾ እያ ካዎተይ ሳሮተ ደምስ።
\s1 እዮሳፈፃ ዉርሰ
\r (1 ካዎ 22:41-50)
\p
\v 31 እዮሳፈፅ ይሁዳን ካዎትያ ዎደ እያ ላይ ሀስታማነ እቻሻ፤ እ የሩሳላመን ላታማነ እቻሹ ላይ ካዎትስ። እያ አይያ ሽልሀ ናእዉ አዙቦ። 
\v 32 እዮሳፈፅ ባ አዋ አሳ ኦግያን ሄመትስ፤ እ ሄ ኦግያፐ ሀድርስ ኡሻች ግቤና፤ ጎዳ ስንን ሱረባ ኦስ። 
\v 33 ግዶሽን፥ ቃ ጎይኖ በሳታ ይስቤና፤ አሳይ ቡሮ ባ ኩመ ዎዛናን ባንታ አዋታ ፆሳኮ ስምቤና።
\p
\v 34 እዮሳፈፅ ኦዳባይ ኮይሮፐ ዉርሰ ጋካናዉ እስራኤለ ካዎታ ታርከ ማፃፋን፥ ሀናና ናኣ እዩ ታርከ ማፃፋን ፃፈትስ።
\p
\v 35 እስ ዎደ ይሁዳ ካዎይ እዮሳፈፅ ኢታባ ኦዳ እስራኤለ ካዋ አካዝያሳራ እስፈተ ኦስ። 
\v 36 ናምአይ ዛልኤ ማርካበ መናዉ ዞረትዶሶና፤ ኤፅዮን-ጋብራን ማርካበታ መዶሶና። 
\v 37 ግዶሽን ማሬሳ አደይ ዶዳ ናአይ አላዛር፥ “ኔኒ አካዝያሳራ እስፈተ መዳ ግሾ ነ ኦዳባ ጎዳይ ይሳና” ያግድ እዮሳፈፃ ቦላ ትንብተ ኦድስ። ሄሳ ግሾ፥ ማርካበት መቅዶሶና፤ ኤንቲ ዛልኤ ኦሱዋ ኦናዉ ዳንዳእቦኮና።
\c 21
\p
\v 1 ሄሳፈ ጉየ፥ እዮሳፈፅ ሀይቅድ ባ ማይዛታራ ጋሄትስ። ዳዊታ ካታማን ባ ማይዛታ ዱፎን ሞገትስ። እያ በሳን እያ ናአይ እዮራም ካዎትስ።
\s1 ይሁዳ ካዋ እዮራማ
\r (2 ካዎ 8:17-24)
\p
\v 2 እዮራማ እሻት አዛርያሳ፥ ይኤላ፥ ዛካርያሳ፥ አ ዛርያሳ፥ ምካኤላነ ሳፋፃ፤ ሀይሳቲ ይሁዳ ካዋ እዮሳፈፃ ናይታ። 
\v 3 ኤንታ አዋይ እዮሳፈፅ ኤንታዉ ዳሮ ብራ፥ ዎርቃ፥ አልኦ ሚሸነ ግምበትዳ ካታማታ እሚስ። ሽን እዮራም እያዉ ባይራ ናአ ግድያ ግሾ ካዎተ እያዉ እሚስ። 
\v 4 እዮራም ባ አዋ ካዎተ ኤክድ ምንዳ ዎደ ባ እሻታ ኡባነ እስ እስ እስራኤለ ሀላቃታ ማሻን ዎስ።
\p
\v 5 እዮራም ካዎትያ ዎደ እያዉ ላይ ሀስታማነ ናምአ፤ የሩሳላመን ሆስፑን ላይ ካዎትስ። 
\v 6 እዮራም አካባ ናእዉ ኤክዳ ግሾ አካባ ሶ አሳይ ሄመትዳይሳዳ ካሰ እስራኤለ ካዎታ ኦግያን ሄመትስ፤ ጎዳ ስንን ኢታባ ኦስ። 
\v 7 ግዶሽን፥ ጎዳይ ካሰ ዳዊታራ ጫቅዳ ጫቁዋ ግሾ ዳዊታ ኮቻ ይሳናዉ ኮይቤና። ዳዊታ ኮቻይ መርናዉ ካዎታና መላ ጎዳይ እያዉ ጫቅስ።
\p
\v 8 እዮራማ ካዎተ ላይን፥ ኤዶመ አሳይ ይሁዳ ካዋ ቦላ ማካልድ ባንታዉ ካዎ ካዎዶሶና። 
\v 9 ሄሳ ግሾ፥ እዮራም ቶራ ሞጮናታነ ፓራ ጋረታ ኤክድ ኤዶመ ኦላናዉ ብስ። ኤዶመ አሳይ እያነ እያ ፓራ ጋረታ ሀላቃታ ኦልዶሶና። ሽን እዮራምነ እያ አሳይ ቃማ ደንድድ ባቃትዶሶና። 
\v 10 ሄ ዎደፐ ዶምድ ሀች ጋካናዉ ኤዶመ አሳይ ይሁዳ አሳስ ሃረትቦኮና። እዮራም ጎዳ፥ ባ አዋታ ፆሳ አግዳ ግሾ ልብና አሳይ ሄ ዎደ ይሁዳ ካዋ ቦላ ማካልዶሶና።
\p
\v 11 እዮራም ይሁዳ ገዘ ቢታን ቃ ጎይኖ በሳታ ጊግስስ፤ የሩሳላመን አሳ ላይማታና መላ ኦስ፤ ይሁዳ አሳካ ባለስ። 
\v 12 ናበይ ኤልያስ እዮራማስ ዳብዳበ ሀይሳዳ ያግድ ፃፍስ፤ “ጎዳይ፥ ነ አዋ ዳዊታ ፆሳይ፥ ‘ኔኒ ነ አዋ እዮሳፈፃ ዎይኮ ይሁዳ ካዋ አሳ ኦግያን ሄመታናይሳ አጋዳ፥ 
\v 13 እስራኤለ ካዎታ ኦግያን ሄመታዳሳ። አካባ ሶ አሳይ ኦዳይሳዳ ይሁዳንነ የሩሳላመን ደእያ አሳይ ኤቃ ጎይናና መላ ኦዳሳ። ቃስ ኔፐ ሎእያ፥ ነ አዋ ሶ አሳ፥ ነ እሻታ ዎዳሳ። 
\v 14 ሄሳ ግሾ፥ ጎዳይ ነ አሳ፥ ነ ናይታ፥ ነ ማቸታነ ነዉ ደእያ ኡባ ዎልቃማ ጋዶን ሾጫና። 
\v 15 ነና ማራጨ ሀርገይ ኦይክን፥ ማራጨይ ካረ ከያና ጋካናዉ ነ ኢታ ሳከታና።’ ”
\p
\v 16 ጎዳይ ፍልስፄመታነ ቶጰ ማታን ደእያ አራበታ እዮራማ ኦላና መላ ደንስ። 
\v 17 ኤንቲ ይሁዳ ቦላ ደንድድ ካዎ ጋን ደእያ ሚሸ ኡባ፥ ካዋ አደ ናይታነ እያ ማቸታ ድእዶሶና። ቃስ፥ እያ ናይታ ኡባፈ ካሎ ግድዳ አካዝያሳፐ\f + \fr 21:17 \fr*\fq አካዝያሳ፦ \fq*\ft እያ እብራወ ሱንይ እዮኣሳ ጌተቴስ።\ft*\f* አትሽን፥ ሀራ እስ ናእካ አትቤና።
\p
\v 18 ሄሳፈ ጉየ፥ ጎዳይ ፓፃናዉ ዳንዳኦና ማራጨ ሀርገን እዮራማ ሾጭስ። 
\v 19 ናምኡ ላይ ግዶን ሀርገይ እያ ቦላ ጎብስ፤ እያ ማራጨይ ካረ ከይስ፤ እ ኢታ ሳከትድ ሀይቅስ። እያ ሞግያ ዎደ አሳይ ካሰ ማይዛታስ ኦዳይሳዳ እያ ቦንቾስ ም ዶርድ ታማ ኤቦኮና።
\p
\v 20 እዮራም ካዎትያ ዎደ እያዉ ላይ ሀስታማነ ናምአ፤ እ የሩሳላመን ሆስፑን ላይ ካዎትስ። እ ሀይቅያ ዎደ ኦንካ አዛንቤና። እዮራም ዳዊታ ካታማን ሞገትስፐ አትሽን፥ ካዎታ ዱፎን ሞገትቤና።
\c 22
\s1 ይሁዳ ካዋ አካዝያሳ
\r (1 ካዎ 8:25-29፤ 9:21-28)
\p
\v 1 አራበታራ ይዳ ፓንጋት፥ እዮራማ ባይራ ናይታ ኡባ ዎዳ ግሾ የሩሳላመ አሳይ እዮራማ ናኣ፥ ኡባፈ ካሉዋ፥ አካዝያሳ እያ በሳን ካዎዶሶና። ሄሳ ግሾ፥ እዮራማ ናአይ አካዝያስ ኤንታ ቦላ ካዎ ግድስ። 
\v 2 አካዝያስ ካዎትያ ዎደ እያዉ ላይ ላታማነ ናምአ።\f + \fr 22:2\fr*\fq ላታማነ ናምአ፦ \fq*\ft እያዉ ላይ ላታማነ ናምአ ዎይኮ ኦይታማነ ናምአ (2 ካዎ 8:26 ፄላ)።\ft*\f* እ የሩሳላመን እስ ላይ ካዎትስ፤ እያ አይያ ጎቶላ፥ ዛንብራ ናኣ ናአ።
\p
\v 3 አካዝያስ ኢታተን ባናዳ እያ አይያ ዞርዳ ግሾ እ አካባ ሶ አሳ ኦግያን ሄመትስ። 
\v 4 እያ አዋይ ሀይቅዳፐ ጉየ አካባ ሶ አሳይ እያ ዞርያ ግሾ ያና ጋካናዉ አካባ ሶ አሳዳ እካ ጎዳ ስንን ኢታባ ኦስ። 
\v 5 አካዝያስ አካባ ሶ አሳ ዞርያ ካልድ፥ አካባ ናኣ፥ እስራኤለ ካዋ እዮራማራ እስፈ ሶረ ካዋ አዛሄላ ኦላናዉ ጋላዳን ደእያ ራሞታ ብስ። ያን ሶረ አሳት እዮራማ ጫድዶሶና። 
\v 6 እዮራም፥ ሶረ ካዋ አዛሄላራ ኦለትዳ ኦላን ጫደትዳ ግሾ ፓፃናዉ እዝራኤለ ብስ። እዮራማ ናአይ፥ ይሁዳ ካዎይ፥ አካዝያስ፥ ጫደትዳ አካባ ናኣ እዮራማ፥ ኦይቻናዉ እዝራኤለ ብስ።
\p
\v 7 አካዝያስ እዮራማ ኦይቻናዉ ብዳ ቡሳ፥ ፆሳይ አካዝያሳስ ሀይቆ ጋሶ ኦስ። አካዝያስ እዮራማ ሶ ጋክዳ ዎደ አካባ ኮቻ ይሳና መላ ጎዳይ ዶርዳ፥ ናምሳ ናኣ እዩ፥ ሞካናዉ ናምአይ ከይዶሶና። 
\v 8 እዩይ አካባ ኮቻ ቦላ ፕርዳ ፖልያ ዎደ ይሁዳ ሀላቃታነ አካዝያሳ ማድያ እያ ዳቦታ ናይታ ደምድ ዎስ። 
\v 9 እዩይ አካዝያሳ ኮይሽን ሳማረን ቆሰትድ ደእያ በሳፈ እዩ አሳት ደምድ እያኮ ኤህድ ዎዶሶና። “ባ ኩመ ዎዛናን ጎዳ ኮይዳ እዮሳፈፃ ናአ” ያግድ ሞግዶሶና።
\p ሄሳ ግሾ፥ አካዝያሳ ሶ አሳፐ ካዎታናዉ ዳንዳእያ አስ ኦንካ አትቤና።
\s1 ጎቶሎነ እዮኣሳ
\r (2 ካዎ 11:1-3)
\p
\v 10 አካዝያሳ አይያ ጎቶላ ባ ናአይ ሀይቅዳይሳ ስእዳ ዎደ ደንዳዳ ይሁዳ ካዋ ኮቸ ኡባ ይሳሱ። 
\v 11 ሽን ካዋ እዮራማ ናእያ ዮሳቤታ ሀይቃናዉ ደእያ ካዎ ናይታ ግዶፈ አካዝያሳ ናኣ እዮኣሳ ካይሳዳ ኤካሱ። እያነ እያ ድችያሮ ቆልአን ቆሳሱ። ሄሳዳ ኦዳ ጎቶላ ዎናዳ ካዋ እዮራማ ናእያ አካዝያሳ ምችያ ካህንያ ዮዳሄ ማችያ ዮሳቤታ እያ ቆሳሱ። 
\v 12 ጎቶላ ሃርያ ዎደ ኡባን ናአይ ኤንታ ማታን ፆሳ ኬን ኡሱፑን ላይ ቆሰትድ ደእስ።
\c 23
\p
\v 1 ላፑን ላይን ዮዳሄይ ምንድ ማቶ ሀላቃታ ይሮሃማ ናኣ አዛርያሳ፥ ይሆና ናኣ ይስማኤላ፥ ኦቤዳ ናኣ አዛርያሳ፥ አዳያ ናኣ ማእሰያነ ዝክራ ናኣ ኤልሳፋፃ ሺሽድ ኤንታራ ጫቅስ። 
\v 2 ኤንቲ ይሁዳ ኡባ ብድ ያን ደእያ ሌወታነ እስራኤለ ያራታ ሀላቃታ ኡባ ኤክድ የሩሳላመ ይዶሶና።
\p
\v 3 ሄ ሺቅዳ አሳ ኡባይ ፆሳ ኬን ካዉዋራ ጫቅዶሶና። ዮዳሄይ፥ “ካዋ ናኣ ሀይሳ በእተ! ጎዳይ ካሰ ዳዊታ ኮቻስ ቃላ ገልዳይሳዳ እ ካዎቶ። 
\v 4 ህንተ ኦናዉ በሲያባይ ሀይሳ፤ ሳምባታ ጋላስ ፆሳ ኬ ገልያ ካህነታፐነ ሌወታፐ ስኮይ ፐንግያ ናግተ። 
\v 5 ቃስ ስኮይ ካዎ ጋ ናግተ፤ ስኮይ ቃስ ባሶ ፐንግያ ናግተ። አሳ ኡባይ ፆሳ ኬ ዳባባን ሺቆ። 
\v 6 ኦያ ካህነታፐነ ሌወታፐ አትሽን፥ ኦንካ ፆሳ ኬ ገሎፖ። ኤንቲ ጌሽ ግድያ ግሾ ገሎና፤ ሽን ሀራ አሳ ኡባይ ጎዳ ኪታ ናግሸ ፆሳ ኬፈ ካረራ ደኦ።
\p
\v 7 “ሌወት ኦላ ሚሸ ባንታ ኩሸን ኩሸን ኦይክድ ካዋ ግዶይድ እ ከይያ ዎደነ ገልያ ዎደ እያራ ግዶ። ፆሳ ኬ ገልያ ኦንካ ሀይቆ” ያግስ።
\p
\v 8 ሌወትነ ይሁዳ አሳ ኡባይ ካህነይ ዮዳሄይ ኪትዳ ኡባ ኦዶሶና። ካህነይ ዮዳሄይ ኦሶፐ ከያናዉ በሲያ ሌወታ ከስድ የድቦና ግሾ፥ እሶይ እሶይ ሳምባታ ጋላስ ኦሶ ገለይሳታነ ኦሶፐ ከይያ ባ አሳ ኤክስ። 
\v 9 ካህነይ ዮዳሄይ ፆሳ ኬን ደእያ፥ ካዋ ዳዊታ ቶራ፥ ግታነ ጉ ጎንዳለታ ቶራ ሞጮናታስ እሚስ። 
\v 10 ካህነይ ዮዳሄይ አሳ ኡባይ ኦላ ሚሸ ባ ኩሸን ኩሸን ኦይክድ ፆሳ ኬ ዱገሀፐ ፑደሀ ጋካናዉ ያርሾ በሳ ማታንነ ፆሳ ኬ ማታን ካዋ ዩሾን ኤቃናዳ ኦስ። 
\v 11 ዮዳሄ ካዋ ናኣ እዮኣሳ ካረ ከስድ፥ እያ ሁጰን ካላቻ ዎስ፤ ካዎታ ህገ ማፃፋ እያዉ እምድ ካዎይስ። ዮዳሄይነ እያ ናይት እዮኣሳ ትይድ፥ “ካዎይ ብራታ ቱሱ ግዶ” ያግዶሶና።
\p
\v 12 አሳይ የፅሸነ ካዋ ሳቢሸ ኡፋይተይሳ ጎቶላ ስእዳ ዎደ አሳኮ ፆሳ ኬ ባሱ። 
\v 13 ካዎይ ፐንገን ቱሳ ማታን ኤቅዳይሳ በአሱ። ሀላቃትነ ዛየ ፑነይሳት ካዋ ማታን ደኦሶና፤ ይሁዳ አሳ ኡባይ ኡፋይትሸ ዛየ ፑኖሶና፤ ማዝሙረ የፀይሳት ስን አድ ባንታ የ ሚሸን ጋላቶሶና። ጎቶላ ባ ማኡዋ ፔዳ፥ “ሀይስ ጌላተ! ሀይስ ጌላተ!” ያጋዳ ዋሳሱ።
\p
\v 14 ካህነይ ዮዳሄይ ቶራ ሞጮናታኮ፥ “ጎቶላ ፆሳ ኬን ዎፕተ፤ እዮ ሳልፕያ ግዶራ አድ ካረ ከስተ፤ እዮ አሻናዉ ኮይያ አስ ደእኮ ዎተ!” ያግስ። 
\v 15 ሄሳ ግሾ፥ ኤንቲ እዮ ኦይክድ ካዎ ጋ ኤፍድ ፓራ ፐንገን እዮ ዎዶሶና።
\p
\v 16 ካህነይ ዮዳሄይ ባ ሁጰን፥ አሳ ኡባይነ ካዎይ፥ ጎዳ አስ ግዳናዉ ጫቅዶሶና። 
\v 17 ሄ ዎደ አሳ ኡባይ ባኣለ ኤቃ ኬ ብድ፥ ኬ ላልድ፤ ያርሾ በሳታነ ምስለታ ትንቸረዶሶና። ማታና ጌተትያ ባኣላ ካህንያ ያርሾ በሳታ ስንን ዎዶሶና።
\p
\v 18 ዮዳሄይ ካህነታነ ሌወታ ፆሳ ኬ ኦሱዋስ ሀላቃ ኦድ ሹምስ። ኤንታ ኦሶይ ሙሰ ህግያን ፃፈትዳይሳዳነ ካዎይ ዳዊቲ ኦድዳይሳዳ ያርሾ ያርሻናይሳ። ቃስ ካዎይ ዳዊቲ ኦድዳይሳዳ ማዝሙረ የፅሸ ቦንቻናይሳ። 
\v 19 ህግያን ፃፈትዳይሳዳ ቱና አስ ገሎና መላ ዮዳሄይ ፆሳ ኬ ፐንገን ናገይሳታ ዎስ።
\p
\v 20 ዮዳሄይ ቶራ ሞጮናታ፥ ግታ አሳታ፥ ደርያ ሃረይሳታነ ሄ ቢታ አሳ ኡባ ኤክድ ካዋ ፆሳ ኬፈ ዱገ ኤህስ። ቆሞ ባጋ ፐንገራ ካዎ ጋ ገልድ ካዋ አራታ ቦላ ኡትስዶሶና። 
\v 21 ይሁዳ አሳ ኡባይ ኡፋይትስ። ጎቶላ ማሻን ሀይቅዳፐ ጉየ ካታማይ ዎፑ ግስ።
\c 24
\s1 ይሁዳ ካዋ እዮኣሳ
\r (1 ካዎ 12:1-16)
\p
\v 1 እዮኣስ ካዎትያ ዎደ እያዉ ላይ ላፑና፤ እ የሩሳላመን ኦይታሙ ላይ ካዎትስ። እያ አየ ሱንይ ሳቦ፤ እያ በርሳበ ማጫስ። 
\v 2 ካህነይ ዮዳሄይ ደእዳ ላይ ኡባን እዮኣስ ጎዳ ስንን ሱረባ ኦስ። 
\v 3 ዮዳሄይ ካዋ እዮኣሳስ ናምኡ ማቾ እምን ኤንቲ እያዉ አደ ናይታነ ማጫ ናይታ የልዶሶና።
\p
\v 4 ጉ ዎደፐ ጉየ እዮኣስ ፆሳ ኬ ኦራናዉ ቆፕስ። 
\v 5 እዮኣስ ካህነታነ ሌወታ ሺሽድ፥ “ይሁዳ ብድ ህንተ ፆሳ ኬ ላይን ላይን ኦራናዉ እስራኤለ ኡባፈ ሚሸ ሺሽተ፤ ሄሳ ሀእ ኤለስድ ኦተ” ያግስ። ሽን ሌወት ኤለስድ ኦቦኮና። 
\v 6 ሄሳ ግሾ፥ ካዎይ ካህነ ሀላቃ ዮዳሄ ፄግድ፥ “ጎዳ አይለይ ሙሰይነ የሩሳላመ አሳይ ፆሳ ዱንካንያ ኦሱዋስ ከሳና መላ ኪትዳ ጊራ የሩሳላመፐነ ይሁዳፐ ሺሻና መላ ሌወታ አይስ ኪታብኪ?” ያግስ። 
\v 7 ሄ ዎደ ኢታ ማጫሰ ጎቶላ ናይት ፆሳ ኬ መንዶሶና። ኤንቲ ጎዳ ኬን ደእያ ጌሻ ሚሸ ኡባ ኤክድ ባኣለ ጎይናናዉ ጎኤትዶሶና።
\p
\v 8 ካዎይ ሌወታ ኪትን፥ ኤንቲ ሳፅነ ጊግስድ፥ ፆሳ ኬ ፐንግያፈ ካረ ባጋራ ዎሶና። 
\v 9 ፆሳ አይለይ ሙሰይ መላ ቢታን ደእሸ፥ እስራኤለ አሳፐ ሺሻና መላ ኪትዳ ጊራ ጎዳስ ኤሀና መላ ይሁዳንነ የሩሳላመን ሌወት አዋጅዶሶና። 
\v 10 ሀላቃትነ አሳ ኡባይ ኡፋይትድ ሳፅነይ ኩማና ጋካናዉ ጊራ የግዶሶና። 
\v 11 ሳፅነይ ሌወታ ባጋራ ካዎ ሞርናታኮ ጋክን ሳፅንያ ግዶን ዳሮ ሚሸይ ዳጋየትዳይሳ በእዳ ዎደ ኡባን ካዎ ፃፈይነ ካህነ ሀላቃይ ይድ ሳፅንያፐ ሚሸ ከስድ ሳፅንያ በሳን ዛር ዎሶና። ኤንቲ ኡባ ዎደ ሄሳ ኦድ ዳሮ ሚሸ ዳጋይዶሶና።
\p
\v 12 ሄ ሚሽያ ካዎይነ ዮዳሄይ ፆሳ ኬ ኦሱዋ ኦና መላ ሹመትዳ አሳታስ እሞሶና። ኤንቲ ፆሳ ኬ ኦራናዉ ሹቹ ማሰይሳታ፥ አናፀታ፥ ብራታነ ናሰ ብራታ ኦሳንቾታ ቃፃርዶሶና። 
\v 13 ኦሳንቾት ፆሳ ኬ ምን ኦድ ካሰይሳዳ ኦራዶሶና። 
\v 14 ፆሳ ኬ ኦራ ኦሶይ ዉርዳ ዎደ ፓላህዳ ዎርቃነ ብራ ካዋኮነ ዮዳሄኮ ኤህዶሶና። ኤንቲ ሄ ዎርቃነ ብራ ፆሳ ኬ ጋ ኦሱዋስ ጎኤትያ ሚሸታ፥ ፁሳ ያርሾስ ሀንያ ሳነታነ ሀራ ዱማ ዱማ ሚሸታ ኦዶሶና።
\p ዮዳሄይ ደእዳ ላይን ኡባን ፆሳ ኬን ፁሳ ያርሾይ ያርሸቴስ።
\p
\v 15 ዮዳሄይ ዳሮ ጭምድ ሀይቅስ፤ እ ሀይቅያ ዎደ እያዉ ላይ ፄታነ ሀስታማ። 
\v 16 ዮዳሄይ እስራኤለን ፆሳስነ ፆሳ ኬስ ሎኦባ ኦዳ ግሾ ዳዊታ ካታማን ካዎታ ዱፎን እያ ሞግዶሶና።
\s1 እዮኣሳ ኢታተ
\p
\v 17 ዮዳሄይ ሀይቅዳፐ ጉየ ይሁዳ ሀላቃት ይድ ካዋ ስንን ጉፋንዶሶና፤ ካዎይ ኤንታ ኦይሻ ስእስ። 
\v 18 ኤንቲ ጎዳ ባንታ ማይዛታ ፆሳ ኬ አግድ፥ አሼር ምስለታነ ኤቃታ ጎይንዶሶና። ኤንቲ ቆሁዋ ግሾ ይሁዳ ቦላነ የሩሳላመ ቦላ ጎዳ ሀንቆይ ዎስ። 
\v 19 ኤንታ ዛራና መላ ጎዳይ ናበታ ኤንታኮ ኪትስ። ናበት ኤንታዉ ማርካትዶሶና፤ ሽን ኤንቲ ስኦና እፅዶሶና።
\p
\v 20 ሄሳፈ ጉየ፥ ካህንያ ዮዳሄ ናኣ ዛካርያሳ ቦላ ፆሳ አያናይ ዎን ዛካርያስ አሳ ስንን ኤቅድ፥ “ፆሳይ፥ ‘ህንተ ጎዳ ኪታ አይስ መንቲ? ሄስ ህንተዉ ኢታ። ህንተ ጎዳ አግዳ ግሾ እካ ህንተና አግስ’ ” ያጌስ። 
\v 21 ኤንቲ እያ ቦላ ማቀትዶሶና። ካዎይ ኤንታ ኪትን፥ ፆሳ ኬ ዳባባን፥ እያ ሹቻን ጫድድ ዎዶሶና። 
\v 22 ካዎይ እዮኣስ ዛካርያሳ አዋይ ዮዳሄይ እያዉ ኦዳ ኬሀተ ሀሳዮና አግድ እያ ናኣ ዛካርያሳ ዎስስ። ዛካርያስ ሀይቅሸ፥ “ጎዳይ ሀይሳ በኦ፤ እ ሀሎ ከዮ” ያግስ።
\p
\v 23 ላይ ላመን፥ ሶረ ኦላንቾት እዮኣሳ ኦላናዉ ይዶሶና። ይሁዳነ የሩሳላመ ኦልድ ሀላቃታ ኡባ ዎድ፥ ድኡዋ ኤክድ ዳማስቆን ደእያ ባንታ ካዋስ የድዶሶና። 
\v 24 ሶረ ኦላንቾት ታይቦን ጉ፤ ሽን ይሁዳ አሳይ ጎዳ ባንታ አዋታ ፆሳ አግዳ ግሾ፥ ጎዳይ ዳሮ ግድዳ ኤንታ ኦላንቾታ ሶረ ኦላንቾታ ኩሸን አድ እሚስ። ኤንቲ ሀይሳዳ ኦድ እዮኣሳ ቦላ ፕርድዶሶና።
\p
\v 25 ሶረ ኦላንቾት እያፐ ሻከትያ ዎደ እዮኣስ ዳሮ ማዱንፅድ ደኤስ። ካህንያ ዮዳሄ ናኣ ሱ ግሾ እያ ሹማት እያ ቦላ ማቀትድ፥ እ ባ ሂፃን ዝንእዳሽን ዎዶሶና። እ ሀይቅን ዳዊታ ካታማን ሞግዶሶና፤ ሽን ካዎታ ዱፎን እያ ሞግቦኮና። 
\v 26 እዮኣሳ ቦላ ማቀትዳይሳት አሞነ ማጫሰ ስማት ናኣ ዛባዳነ ሞአበ ማጫሰ ስማርት ናኣ ዮዛባታ። 
\v 27 ሄኮ፥ እዮኣሳ አደ ናይታ ታርከይ፥ እያዉ ኦደትዳ ትንብተይነ እ ፆሳ ኬ ኦራዳባይ ካዎታ ታርከ ማፃፋን ፃፈትድ ደኤስ። እዮኣስ ሀይቅን እያ በሳን እያ ናአይ አማስያስ ካዎትስ።
\c 25
\s1 ይሁዳ ካዋ አማስያሳ
\r (2 ካዎ 14:2-6)
\p
\v 1 አማስያስ ካዎትያ ዎደ እያዉ ላይ ላታማነ እቻሻ፤ እ የሩሳላመን ላታማነ ኡዱፉን ላይ ካዎትስ። እያ አየ ሱንይ ዮኣዶ፤ እያ የሩሳላመ ማጫስ። 
\v 2 አማስያስ ጎዳ ስንን ሱረባ ኦስ፤ ግዶሽን፥ ኩመ ዎዛናፐ ግደና። 
\v 3 አማስያስ ካዎተ ምንዳፐ ጉየ ባ አዋ ዎዳ አሳታ ዎስ። 
\v 4 ግዶሽን፥ ኤንታ ናይታ ዎቤና። ኤንታ ናይታ ዎና አግዳ ጋሶይ፥ ጎዳይ፥ ሙሰ ህገ ማፃፋን ኪትዳይሳዳ፥ “ናይት ኦዳ ናጋራ ግሾ አዋታ ዎናዉ በሰና፤ አዋት ኦዳ ናጋራ ግሾ ናይታ ዎናዉ በሰና። አስ ኡባይ ባ ኦዳ ናጋራን ናጋራን ሀይቃናዉ በሴስ” ያግዳ ግሾሳ።
\p
\v 5 አማስያስ ይሁዳ አሳ ሺሽድ ባንታ አዋታ ኬን ኬን ሻላቃታነ ማቶ ሀላቃታ ሹምስ። እ ላታሙ ላይነ እያፐ ቦላ ግድዳ ይሁዳ ኮቻታነ ብንያመ ኮቻታ ኡባ ታይብድ ጎንዳለነ ቶራ ኦይክድ ኦላስ ጊግዳ ሄ ፄቱ ሙኩሉ ዶረትዳ አሳታ ደምስ። 
\v 6 እስራኤለፐ እስ ፄቱ ሙኩሉ ምኖ አሳታ ሄ ሙኩሉነ ኦይዱ ፄቱ ክሎ ግራመ ብራን አማስያስ ሻምስ። 
\v 7 ሽን እስ ፆሳ አስ እያኮ ይድ፥ “ካዋዉ፥ ጎዳይ እስራኤለራነ ኤፍሬማራ ዶና ግሾ፥ እስራኤለ ኦላንቾት ኔራ ቦፖ። 
\v 8 ኤንቲ ታና ምንና ጋዳ ነ ቆፕኮ፥ ፆኖይነ ፆነተ ፆሳባ ግድያ ግሾ ፆሳይ ነና ነ ሞርከታ ስንን ካዉሻና። ግዶሽን፥ ነ ፃላላ ባ፤ ምናዳ ኦለታ” ያግስ።
\p
\v 9 አማስያስ ፆሳ አድያኮ፥ “ታኒ እስራኤለ ኦላንቾታስ ቃንፅዳ ብራይ ኡባይ ዋናኔ?” ያግስ።
\p ፆሳ አደይ፥ “ጎዳይ ነዉ ሄሳፈ አድ እማናዉ ዳንዳኤስ” ያግስ። 
\v 10 ሄሳ ግሾ፥ አማስያስ ኤፍሬማፐ ይዳ ኦላንቾት ባንታ ሶ ሶ ባና መላ ኦስ። ኤንቲ ይሁዳ አሳ ቦላ ዳሮ ሀንቀትሸ ባንታ ሶ ሶ ስምዶሶና።
\p
\v 11 ሄሳፈ ጉየ፥ አማስያስ ባና ምንድ፥ ባ ኦላንቾታ ካለድ፥ ማፅነ ዛንጋራ ብን እያ ኦላንቾት ሳይረፐ ታሙ ሙኩሉ አሳ ዎዶሶና። 
\v 12 ሀራ ታሙ ሙኩሉ ኦላንቾታ ፓፃ ድእድ፥ ኤንታ አፎ ዶና ኤፍድ፥ አፉዋን ዱገ ሆልን፥ ጋርሳን ደእያ ሹቻን አሳ ኡባይ መቀረትድ ዉርዶሶና። 
\v 13 ሽን ሄ ዎደ አማስያስ ባራ ኦላስ ቦና መላ ጉየ ዛርዳ እስራኤለ ኦላንቾት ሳማረፐ ቤት-ሆሮና ጋካናዉ ደእያ ይሁዳ ካታማታ ኦልዶሶና። ኤንቲ ይሁዳ አሳፐ ሄ ሙኩሉ ዎድ ዳሮ ድኦ ኤክዶሶና።
\p
\v 14 አማስያስ ኤዶመታ ዎድ ስምያ ዎደ ኤንታ ኤቃታ ኤክድ ይስ። ኤንታ ፆሰ ኦ ኤስድ ኤንታ ጎይንስ፤ እፃነ ጩይስስ። 
\v 15 ጎዳ ሀንቆይ አማስያሳ ቦላ ኤፅን፥ ጎዳይ አማስያሳኮ ናበ ኪትስ። ሄ ናበይ ብድ፥ “ባንታ አሳ ነ ኩሸፐ አሻናዉ ዳንዳእቦና ፆሳታ አይስ ዞረ ኦይቻዲ?” ያግስ።
\p
\v 16 ናበይ ቡሮ ኦዳ ቦላ ደእሽን ካዎይ፥ “ነና ካዎ ዞርያ አስ ኦዳይ ኦኔ? ስእ ጋ! ነ አይስ ሀይቃናዉ ኮያይ?” ያግስ።
\p ናበይ ኦዳ ኤስድ፥ “ነ ሀይሳ ኦዳ ግሾነ ታ ዞርያ ስኦና እፅዳ ግሾ ፆሳይ ነና ይሳናዉ ቆፕዳይሳ ሀእ ኤራስ” ያግስ።
\p
\v 17 ሄሳፈ ጉየ፥ ይሁዳ ካዎይ አማስያስ ባና ዞርያ አሳታራ ዞረትድ፥ እስራኤለ ካዋ እዩ ናኣ ናኣ፥ እዮአካዛ ናኣ፥ እዮኣሳኮ አሰ ኪትድ፥ “ሃያ፤ አነ ናምአይ ኦላ ጋሄቶስ” ያግድ ማንድስ።
\p
\v 18 እስራኤለ ካዎይ እዮኣስ ይሁዳ ካዋ አማስያሳኮ ሀይሳዳ ያግስ፤ “ልባኖሰን ደእያ ክንቾተይ ልባኖሰን ደእያ ዝጋኮ ኪታ የድድ፥ ‘ነ ናእዉ ታ ናኣስ እማ’ ያግስ። ሽን ልባኖሰን ደእያ እስ ዶእ ያራ አሸ ክንቾትያ የስ። 
\v 19 ‘ታኒ ኤዶመ ፆናስ’ ጋዳ ነ ዎዛናን ኦቶሮን ኩማዳሳ። ሽን ሀእ ነ ሶን ዎፑ ጋዳ ኡታ፤ ነ ቦላነ ይሁዳ ቦላ መቶነ ዮ ኤሀናዉ አይስ ደንይ?” ያግድ ዛርስ።
\p
\v 20 ሽን አማስያስ ስኦና እፅስ። ኤንቲ ኤዶመ ፆሳታ ጎይንዳ ግሾ ፆሳይ ኤንታ፥ ኤንታ ሞርከታ ኩሸን አድ እማናዉ ኮይስ። 
\v 21 ሄሳ ግሾ፥ እስራኤለ ካዎይ እዮኣስ ኦላናዉ ከይን እነ ይሁዳ ካዎይ አማስያስ ይሁዳን ደእያ ቤት-ሳሜሳን ኦላ ጋሄትዶሶና። 
\v 22 ይሁዳ አሳይ ፆነትዶሶና፤ ይሁዳ አሳ ኡባይ ባቃትድ ባንታ ሶ ሶ ብዶሶና። 
\v 23 ካዎይ እዮኣስ አካዝያሳ ናኣ ናኣ፥ እዮኣሳ ናኣ፥ ይሁዳ ካዋ አማስያሳ ቤት-ሳሜሳን ድእድ፥ የሩሳላመ ኤህስ። ኤፍሬማ ድርሳ ፐንግያፈ ብድ ማዛነ ፐንግያ ጋካናዉ ደእያ ኦይዱ ፄቱ ዋ ግድያ የሩሳላመ ድርሳ ግምብያ ላልስ። 
\v 24 ፆሳ ኬን ደእያ ዎርቃነ ብራ ኡባ፥ ኦቤድ-ኤዶመይ ናግያ ሚሽያነ ካዎ ጋን ደእያ ሚሽያ ኡባ ኤክስ፤ ቃስ ኦይ ኦድ ኦይክዳ አሳታ ኤክድ ሳማረ ስምስ።
\p
\v 25 እዮአካዛ ናአይ፥ እስራኤለ ካዎይ እዮኣስ ሀይቅዳፐ ጉየ እዮኣሳ ናአይ፥ ይሁዳ ካዎይ አማስያስ ታማነ እቻሹ ላይ ደእስ። 
\v 26 አማስያስ ኦዳባ ኡባይ ኮይሮፐ ዉርሰ ጋካናዉ ይሁዳ ካዎታነ እስራኤለ ካዎታ ታርከ ማፃፋን ፃፈትድ ደኤስ ግደኔ? 
\v 27 አማስያስ ጎዳ ካሎ አግዳፐ ጉየ ኤንቲ እያ ቦላ የሩሳላመን ማቀትዶሶና። እ ላክሶ ባቃትስ። ሽን ኤንቲ እያ ጌዶ አሰ ኪትን ኤንቲ እያ ያን ዎዶሶና። 
\v 28 እያ አሀ ፓራን ጫን ኤህድ፥ ዳዊታ ካታማን እያ ማይዛታራ ሞግዶሶና።
\c 26
\s1 ይሁዳ ካዋ ኦዝያና
\r (2 ካዎ 14:21-22፤ 15:1-7)
\p
\v 1 ሄሳፈ ጉየ፥ ይሁዳ አሳ ኡባይ ታማነ ኡሱፑን ላይ ግድዳ ኦዝያና እያ አዋ አማስያሳ በሳን ካዎዶሶና። 
\v 2 እያ አዋይ አማስያስ ሀይቅዳፐ ጉየ እ ኤሎታ ካታማ ዛር ኬፅስ።
\p
\v 3 ኦዝያን ካዎትያ ዎደ እያዉ ላይ ታማነ ኡሱፑና፤ እ የሩሳላመን እሻታማነ ናምኡ ላይ ካዎትስ። እያ አየ ሱንይ ይኮሎ፤ እያ የሩሳላመ ማጫስ። 
\v 4 እያ አዋይ አማስያስ ኦዳይሳዳ እካ ጎዳ ስንን ሱረባ ኦስ። 
\v 5 ፆሳስ ያሽ ታማርስዳ ዛካርያሳ ዎደ እ ፆሳስ አማነትድ ኦስ። ጎዳ እ ኮይዳ ዎደ ኡባን ፆሳይ እያ አንጅስ።
\p
\v 6 ኦዝያን ፍልስፄመታራ ኦለታናዉ ከይድ ጋተ ካታማነ እያ ሄራ፥ ያብና ካታማነ እያ ሄራነ አሽዶዳ ካታማነ እያ ሄራ ላልስ። ያትድ አሽዶዳ ካታማ ማታንነ ፍልስፄመ ግዶን ካታማታ ኬፅስ። 
\v 7 ፆሳይ ኦዝያናስ ፍልስፄመታ፥ ጉርባላን ደእያ አራበታነ ማኡነታ ቦላ ፆኖ እሚስ። 
\v 8 አሞነት ኦዝያናስ ጊርዶሶና። ኦዝያን ዳሮ ምንዳ ግሾ እያ ሱንይ ግብፀ ዛዋ ጋካናዉ ከይስ።
\p
\v 9 ኦዝያን ማዛነ ፐንግያ ማታን፥ ዛንጋራ ፐንግያ ማታንነ ድርሳ ማዛንያ ማታን አዱሳ ግምበ ሻኮታ ኤስድ፥ የሩሳላመ ባሱዋ ምንስ። 
\v 10 እያዉ ዙማ ፃጶንነ ደንባን ዳሮ መሄይ ደእያ ግሾ ሄ በሳታን አዱሳ ግምበ ሻኮታ ግምብድ ዳሮ ሃ ኦላታ ቦክስ። እ ጎሸ ዶስያ ግሾ ደረ ቦላነ አራዳ ቢታን እያዉ ዳሮ ጎሻንቾትነ ዎይነይ ቶከይሳት ደኦሶና።
\p
\v 11 ኦዝያናስ ኦላስ ጊግዳ ዳሮ ኦላንቾት ደኦሶና። ኦላንቾታ ፃፈይ ይኤልነ ሀላቃይ ማእሰይ ኦላንቾታ ሱን ማዝጋበን ፃፍዶሶና። ኤንታ ሀላቃይ ሀናና። 
\v 12 ባንታ አዋታ ሶ አሳ ቦላ ሀላቃትያ ምኖ አሳት ናምኡ ሙኩሉነ ኡሱፑን ፄታ። 
\v 13 ካዋ ሞርከታራ ኦለትድ፥ ባንታ ኩመ ዎልቃን ካዋ ማዳናዉ ከይያ ሄ ፄታነ ላፑን ሙኩሉነ እቻሹ ፄቱ ኦላንቾት ኤንታ ጋርሳን ደኦሶና። 
\v 14 ኦዝያን ኦላንቾታ ኡባስ ጎንዳለ፥ ቶራ፥ ብራታ ባርኔፃ፥ ትራን ማእያ ፁሩረ፥ ዶንገነ ያምባርሻ ሹቹ ጊግስስ። 
\v 15 ኦዝያን የሩሳላመን ደእያ ሂላንቾት ዎችያ አዱሳ ግምበ ሻኮታነ ካታማ ድርሳ ግምበ ማዛነታ ቦላ ዶንገ ዱክያ ሚሸታነ ግታ ግታ ሹቻታ ፕፅርድ ሆልያ ሚሸታ ኦስስስ። ፆሳይ እያ ማድን እ ዳሮ ምንስ፤ እያ ሱንይ ኡባ በሳን ከይስ።
\p
\v 16 ሽን ኦዝያን ምንዳ ዎደ ኦቶርትስ፤ ኦቶሮይ እያ ኩንደስ ጋስ። ኦዝያን ጎዳ ባ ፆሳ አማነቶና እፅድ እፃነ ጩይስያ በሳን እፃነ ጩይሳናዉ ፆሳ ኬ ገልስ። 
\v 17 ካህነይ አዛርያስነ ምኖ ግድዳ ሆስፑን ታሙ ጎዳ ካህነት እያ ካልድ ገልዶሶና። 
\v 18 ካህነት እያኮ፥ “ኦዝያና፥ ኔኒ ጎዳስ እፃነ ጩይሳናዉ በሳካ። እፃነ ጩይሳናዉ በሰይ፥ ጌይድ ደእያ አሮና ኮቸ ግድዳ ካህነት ፃላላ። ሀ ጌሻ በሳፈ ከያ! ኔኒ ጎዳ ፆሳ ቦላ ናጋራ ኦዳሳ፤ ኔኒ እያፐ ቦንቾ ደማካ” ያግዶሶና።
\p
\v 19 ግዶሽን፥ እፃነ ጩይሳናዉ ባ ኩሸን እፃነ ጩይስያ ሚሸ ኦይክድ ደእሸ ሀንቀትስ። ኦዝያን ካህነታ ሀንቀትሸ ፆሳ ኬን እፃነ ጩይስያ በሳ ማታን ካህነታ ስንን ኤቅዳሽን፥ እያ ሶምኦን ባሮ ሀርገይ በንትስ። 
\v 20 ካህነ ሀላቃይ አዛርያስነ ሀራ ካህነት ኡባይ እያ ፄልያ ዎደ እያ ሶምኦን ባሮ ሀርገይ በንትዳይሳ በእድ፥ ኤለስድ እያ ፆሳ ኬፈ ከስዶሶና። እካ ጎዳይ እያ ሴርዳይሳ ኤርዳ ግሾ ኤለስድ ያፐ ከይድ ብስ። 
\v 21 ካዎይ ኦዝያን ሀይቃና ጋካናዉ ሄ ሀርግያራ ደእስ፤ ፆሳ ኬ ገሎና መላ ድገትስ። ሄ ሀርግያ ጋሶን ዱማ ኬን ባርካ ደእስ። ሄ ዎደ እያ ናአይ እዮአታም፥ ካዎ ጋ አዋተን ኦይክድ ቢታ ሃሬስ።
\p
\v 22 ካዎይ ኦዝያን ኦዳ ሀራባ ኡባ ኮይሮፐ ዉርሰ ጋካናዉ አሞፀ ናአይ፥ ናበይ እሳያስ ፃፍስ። 
\v 23 ኦዝያን ሀይቅድ ባ ማይዛታ ጋክስ። አሳይ እያ፥ “ባሮ ሀርገን ኦይከትዳይሳ” ያግድ፥ ካዎታ ዱፉዋ ማታን ሞግዶሶና። እ ሀይቅን እያ በሳን እያ ናአይ እዮአታም ካዎትስ።
\c 27
\s1 ይሁዳ ካዋ እዮአታማ
\r (2 ካዎ 15:32-38)
\p
\v 1 እዮአታም ካዎትያ ዎደ እያዉ ላይ ላታማነ እቻሻ፤ እ የሩሳላመን ታማነ ኡሱፑን ላይ ካዎትስ። እያ አየ ሱንይ ያሩሾ፤ እያ ሳዶቃ ናአ። 
\v 2 እያ አዋይ ኦዝያን ኦዳይሳዳ እዮአታም ጎዳ ስንን ሱረባ ኦስ። እያ አዋይ ፆሳ ኬ ገልዳይሳዳ እ ገልበና፤ ግዶሽን፥ አሳይ ናጋራ ኦሶ አግቤና።
\p
\v 3 እዮአታም ፆሳ ኬ ገልያ ቆሞ ፐንግያ ዛሪድ ኦስ፤ የሩሳላመ ኦፌላ ደርያ ቦላ ዳሮ ኦሶ ኦስ። 
\v 4 ደረይ ዳርያ ይሁዳ ቢታን ካታማታ ኬፅስ፤ ዎር ዳርያ ዙማ ቦላ ሚፃነ አዱሳ ግምበ ሻኮታ ግምብስ።
\p
\v 5 እዮአታም አሞነ ካዉዋራ ኦለትድ ፆንስ። አሞነት ሄ ላይ ሄ ሙኩሉነ ኦይዱ ፄቱ ክሎ ግራመ ብራ፥ ታሙ ሙኩሉ ኩንታለ ግድያ ግስተነ ታሙ ሙኩሉ ኩንታለ ግድያ ባንጋ እያዉ ጊርዶሶና። አሞነት ናምአን ላይነ ሄን ላይ ሄሳዳ እያዉ ጊርዶሶና። 
\v 6 እዮአታም ጎዳ ባ ፆሳ ስንን ሱረ ሄመትዳ ግሾ ዳሮ ምንስ።
\p
\v 7 እዮአታማ ዎደ ኦሰትዳ ኦሶት፥ እ ኦለትዳ ኦላይነ እ ኦዳባ ኡባይ እስራኤለ ካዎታነ ይሁዳ ካዎታ ታርከ ማፃፋን ፃፈትስ። 
\v 8 እዮአታም ካዎትያ ዎደ እያዉ ላይ ላታማነ እቻሻ፤ እ የሩሳላመን ታማነ ኡሱፑን ላይ ካዎትስ። 
\v 9 እዮአታም ሀይቅድ ባ ማይዛታ ጋክስ። ኤንቲ እያ ዳዊታ ካታማን ሞግዶሶና። እያ በሳን እያ ናአይ አካዝ ካዎትስ።
\c 28
\s1 ይሁዳ ካዋ አካዛ
\r (2 ካዎ 16:1-5)
\p
\v 1 አካዝ ካዎትያ ዎደ እያዉ ላይ ላታማ፤ እ የሩሳላመን ታማነ ኡሱፑን ላይ ካዎትስ። አካዝ ባ ማይዛይ ዳዊቲ ሱረባ ኦዳይሳዳ ጎዳ ስንን ሱረባ ኦቤና፤ 
\v 2 እ ካሰ ደእዳ እስራኤለ ካዎታ ኦግያን ሄመትስ። ጉጅድ፥ ባኣለ ኤቃ ጎይናናዉ ምስለታ መስ። 
\v 3 ህኖማ ዛንጋራን እፃነ ጩይስስ፤ ጎዳይ እስራኤለ አሳ ስንፈ ጎድድ ከስዳ አሳ፥ እፀትዳ ኦግያ ካልድ ባ አደ ናይታ ታማን ፁግድ ኤቃስ ያርሽስ። 
\v 4 አካዝ ቃ ጎይኖ በሳታን፥ ደረ ሁጰነ ም ኩያ ጋርሳን ያርሾ ያርሽስነ እፃነ ጩይስስ።
\p
\v 5 ሄሳ ግሾ፥ ጎዳይ እያ ፆሳይ እያ ሶረ ካዋ ኩሸን አድ እሚስ። ኤንቲ እያ ፆንድ፥ እያ አሳፐ ዳሮታ ድእድ፥ ዳማስቆ ኤፍዶሶና። ቃስ፥ ጎዳይ እያ እስራኤለ ካዋ ኩሸን አድ እምን፥ ካዎይ ኢታ ሾች ሾጭስ። 
\v 6 ይሁዳ አሳይ ጎዳ፥ ባንታ ማይዛታ ፆሳ አግዳ ግሾ ራማላ ናአይ ፓቁሄይ ይሁዳ ኦላንቾታፐ እስ ፄታነ ላታሙ ሙኩሉ ምኖ አሳታ እስ ጋላስ ዎስ። 
\v 7 ኤፍሬማ ኮቸ ግድዳ ምኖ ኦላንቾይ ዝክር፥ ካዋ ናኣ ማእሰያ፥ ካዎ ጋ ሹማ አዝርቃማነ ካዋ ካልድ ደእያ ኤልቃና ዎስ። 
\v 8 እስራኤለ አሳይ ባንታ ዳቦታፐ ናምኡ ፄቱ ሙኩሉ ማጫሳ፥ አደ ናይታነ ማጫ ናይታ ድእዶሶና፤ ኤንቲ ዳሮ ድኡዋ ኤክድ ሳማረ ብዶሶና።
\p
\v 9 ጎዳ ናበይ ኦዴዳ ጌተትያ አደይ ሳማረን ደኤስ። ኦዴድ ሳማረ ብያ ኦላንቾታራ ጋሄታናዉ ከይድ፥ “ጎዳይ፥ ህንተ አዋታ ፆሳይ ይሁዳ ሀንቀትዳ ግሾ ህንተ ኩሸን አድ እሚስ። ሽን ህንተ ኤንታ ሳሎ ጋክዳ ሀንቆን ዎደታ። 
\v 10 ሄስ ግዶና እፅን ይሁዳነ የሩሳላመ ማጫነ አድያ ህንተ አይለ ኦናዉ ቆፔታ። ያትን፥ ህንተ ኤንታዳ ሀንድ ጎዳ፥ ህንተ ፆሳ ቦላ ናጋራ ኦደታ ግደከቲ? 
\v 11 ሀእ ታ ህንተዉ ኦደይሳ ስእተ። ጎዳ ሀንቆይ ህንተ ቦላ ዎዳ ግሾ ህንተ ድእድ፥ ቃችዳ ህንተ ዳቦታ የድተ” ያግስ።
\p
\v 12 ሄሳፈ ጉየ፥ ኤፍሬማ ኮቻ ሀላቃታፐ ዮሃናና ናአይ አዛርያስ፥ ማሽልሞታ ናአይ ባራክ፥ ሳሎማ ናአይ ይዝቃነ ሀድላያ ናአይ አማስ ኦላፐ ስምዳይሳታ ቦላ ደንድዶሶና። 
\v 13 ኤንቲ “ሄ ድኤትዳ አሳታ ኑኮ ኤሆፕተ! ካሰ ኑኒ ጎዳ ቦላ ኦዳ ናጋራነ ናቁዋ ቦላ ሀራ ጉጄታ። ኮይሮካ ኑ ናጋራይ ዳሮ ግድያ ግሾ እስራኤለ ቦላ ጎዳ ሀንቆይ ዎስ” ያግዶሶና።
\p
\v 14 ሄሳ ግሾ፥ ኦላንቾት ድኤትዳ አሳታነ ሚሽያ ሀላቃታ ስንንነ ደሪያ ስንን እምዶሶና። 
\v 15 ሱንይ ሀይሳፈ ቆሞን ፃፈትዳ አሳት ደንድ ኤቅድ፥ ድኤትዳ አሳ ኤክዶሶና። ኤንታ ግዶን ካሎ ደኤይሳታስ ድኡዋፐ ማኦነ ጫማ እምዶሶና። ኤንታ ሙዝዶሶናነ ኡሽዶሶና፤ ኤንታ ማዱን ቦላ ዛይተ ትይዶሶና። ዳቡርዳይሳታ ሀረ ቶግስድ ኤንታ እሻታኮ ዛምብ ደእያ እያርኮ ካታማ ኤፍዶሶና። ሄሳፈ ጉየ፥ ኤንቲ ሳማረ ስምዶሶና።
\p
\v 16 ሄ ዎደ ካዎይ አካዝ አሶረ ካዎይ ባና ማዳና መላ ኪታ የድስ። 
\v 17 ኤዶመ አሳት ናምአን ይሁዳ ቦላ ደንድድ፥ ዳሮ አሳ ድእድ ኤፍዶሶና። 
\v 18 ፍልስፄመት ዙማ ፃጶንነ ይሁዳ ጋን፥ ነገበ መላ ቢታን ደእያ ካታማታ ኦልድ ቤት-ሳሜሳ፥ ኤሎና፥ ጋደሮታ፥ ሶኮ፥ ትምና፥ ግምዞነ ኤንታ ሄራን ደእያ ጉታታ ኦይክድ ያን ደእዶሶና። 
\v 19 ይሁዳ ካዎይ አካዝ ይሁዳ አሳ ናጋራ ኦስስዳ ግሾነ ጎዳስ አማነትቦና ግሾ ጎዳይ ይሁዳ ካዉሽስ። 
\v 20 አሶረ ካዎይ ተልገልተልፈልሶር አካዛኮ ይድ እያ መቶ በስስፐ አትሽን፥ ማድቤና። 
\v 21 አካዝ ፆሳ ኬፈ፥ ካዎ ጋፐነ ሀላቃታፐ ዳሮባ ኤክድ፥ አሶረ ካዋስ እሚስ። ሽን ሄስ እያ አይኮካ ማድቤና።
\p
\v 22 ካዎይ አካዝ ኡንኤትዳ ዎደ ጎዳስ አማነቶና እፅድ መቶ ቦላ መቶ ጉጅስ። 
\v 23 ባና ፆንዳ ዳማስቆ ፆሳታስ ያርሽሸ፥ “ሶረ ካዎታ ፆሳት ኤንታ ማድዳ ግሾ ታናካ ኤንቲ ማዳና መላ ታኒ ኤንታዉ ያርሻና” ያግስ። ሽን ሄ ፆሳት እያዉነ እስራኤለ አሳ ኡባስ ዮ ኤህዶሶና። 
\v 24 አካዝ ፆሳ ኬ ሚሸታ ኡባ ሺሽድ ትንቸረስ። ፆሳ ኬ ፐንገታ ጎርድስ። የሩሳላመን ዱማ ዱማ በሳን ባዉ ያርሾ በሲ ኬፅስ። 
\v 25 አካዝ ሀራ ፆሳታስ እፃነ ጩይሳናዉ ይሁዳን ደእያ ካታማታ ኡባን ቃ ጎይኖ በሳታ መስ። ያትድ ጎዳ፥ ባ አዋታ ፆሳ ሀንቀስ።
\p
\v 26 ሄኮ፥ አካዛ ዎደን ኦሰትዳ ሀራ ኦሶት ኮይሮፐ ዉርሰ ጋካናዉ ይሁዳ ካዎታነ እስራኤለ ካዎታ ታርከ ማፃፋን ፃፈትስ። 
\v 27 አካዝ ሀይቅድ፥ ባ ማይዛታ ጋክስ። የሩሳላመ ካታማን እያ ሞግዶሶና፤ ሽን እያ እስራኤለ ካዎታ ዱፉዋን ሞግቦኮና። እያ በሳን እያ ናአይ ህዝቅያስ ካዎትስ።
\c 29
\s1 ይሁዳ ካዋ ህዝቅያሳ
\r (2 ካዎ 18:1-3)
\p
\v 1 ህዝቅያስ ካዎትያ ዎደ እያዉ ላይ ላታማነ እቻሻ፤ እ የሩሳላመን ላታማነ ኡዱፉን ላይ ካዎትስ። እያ አየ ሱንይ አቡ፤ እያ ዛካርያሳ ናአ። 
\v 2 እያ ማይዛይ ዳዊቲ ኦዳይሳዳ ህዝቅያስ ጎዳ ስንን ሱረባ ኦስ።
\p
\v 3 ህዝቅያስ ባ ካዎትዳ ኮይሮ ላይን፥ ኮይሮ አጌናን፥ ፆሳ ኬ ፐንገታ ዶይድ ኦራስ። 
\v 4 ካህነታነ ሌወታ ፆሳ ኬ ዶሎሀ ባጋራ ደእያ ዳባባን ሺሽስ። 
\v 5 ኤንታኮ፥ “ሌወቶ፥ ታ ኦደይሳ ስእተ! ህንተናተ ጌሽተ፤ ጎዳ ህንተ አዋታ ፆሳ ኬ ጌሽተ፤ ፆሳ ኬ ቱንስያባ ኡባ ድግተ። 
\v 6 ኑ አዋት አማነትቦኮና፤ ጎዳ፥ ኑ ፆሳ ስንን ኢታባ ኦዶሶና። ኤንቲ ጎዳ አግድ፥ ጎዳይ ደእያ በሳፈ ባንታ ሶምኦ ሀራ ሶ ዛሪድ፥ እያዉ ባንታ ዞኩዋ ዛርዶሶና። 
\v 7 ቃስ፥ ኤንቲ ፆሳ ኬ ፐንገታ ጎርድዶሶና፤ ፆምፐታ ቶይስዶሶና። ፆሳ ኬን እስራኤለ ፆሳስ እፃነ ጩይስቦኮና ዎይኮ ፁሳ ያርሾ ያርሽቦኮና። 
\v 8 ሄሳ ግሾ፥ ጎዳ ሀንቆይ ይሁዳ ቦላነ የሩሳላመ ቦላ ዎስ። ህንተ፥ ህንተ አይፈን በኤይሳዳ ጎዳይ ኤንታ ቦላ ያሽ፥ ዳጋማነ ህርጋ የድስ። 
\v 9 ሄሳ ጋሶን፥ ኑ አዋት ማሻን ሀይቅዶሶና፤ ኑ ናይትነ ኑ ማቸት ድኤትዶሶና። 
\v 10 ጎዳ ሀንቆይ ኑ ቦላፈ ክቻና መላ ታኒ ጎዳራ፥ እስራኤለ ፆሳራ ጫቃናዉ ታ ዎዛናን ቆፓስ። 
\v 11 ታ ናይቶ፥ ህንተ ጎዳ ስንን ኤቃና መላ፥ እያዉ ኦና መላ፥ እያ ኦሳንቾ ግዳና መላነ እፃነ ጩይሳና መላ ጎዳይ ህንተና ዶርዳ ግሾ ቀል ጎፕተ” ያግስ።
\p
\v 12 ሄ በሳን ደእያ ሌወት ሀይሳፈ ካልድ ፃፈትዳይሳታ።
\p ቃሃታ ያራፐ አማሳያ ናኣ ማሃታነ አዛርያሳ ናኣ እዩኤላ።
\p ማራራ ያራፐ አብዳ ናኣ ቂሳነ ይሀልኤላ ናኣ አዛርያሳ።
\p ገድሶና ያራፐ ዚማ ናኣ እዮአክናነ ዮኣሀ ናኣ ኤደና።
\p
\v 13 ኤልፃፋና ያራፐ ሽምራነ ኡዝኤላ።
\p አሳፋ ያራፐ ዛካርያሳነ ማታና።
\p
\v 14 አማና ያራፐ ይኤላነ ሳመአ።
\p ኤዶታመ ያራፐ ሻማያነ ኡዝኤላ።
\p
\v 15 ኤንቲ ባንታ ዳቦታ ሺሽድ ባንታና ጌሽዳፐ ጉየ ካዎይ ኤንታ ኪትዳይሳዳ ጎዳ ህግያዳ ፆሳ ኬ ጌሾ ዶምዶሶና። 
\v 16 ሄሳ ግሾ፥ ካህነት ጎዳ ኬ ጌሻናዉ ገልዶሶና፤ ፆሳ ኬ ግዶን ደእያ ቱናባ ኡባ ከስድ፥ ፆሳ ኬ ዳባባ ኤህዶሶና። ያትን ሌወት ኤክድ ቀድሮና ዛንጋራን ሆልዶሶና። 
\v 17 ኤንቲ ኮይሮ አጌናን፥ ኮይሮ ጋላስ ፆሳ ኬ ጌሾ ዶምዶሶና፤ ሄ አጌናን ሆስፑን ጋላስ ባራንዳ ጋክዶሶና። ሀራ ሆስፑን ጋላስ ፆሳ ኬ ጎይኖስ ጊግስዶሶና። ኮይሮ አጌናን ታማነ ኡሱፑን ጋላስ ኤንቲ ኦሱዋ ፖልዶሶና።
\p
\v 18 ሌወት ካዋ ህዝቅያሳኮ ገልድ፥ “ኑኒ ፆሳ ኬ፥ ፁሳ ያርሾ በሳነ ያርሾ በሳን ጎኤትያ ሚሸ ኡባ፥ ጎዳ ስንን ዎያ ኡይ ፃርጴዛነ ሄ ፃርጴዛን ደእያ ሚሸታ ኡባ ጌሽዳ። 
\v 19 ካዎይ አካዝ ካዎትድ ደእያ ዎደ ፆሳስ አማነቶና እፅድ ኤፍዳ ሚሸ ኡባ ኑ ዛሪድ ጌሽዳ። ሄኮ፥ ኑ ጌሽዳ ሚሸ ኡባይ ጎዳ ያርሾ በሳ ስንን ደኤስ” ያግዶሶና።
\p
\v 20 ካዎይ ህዝቅያስ ዎንተ ጋላስ ዎንታ ጉራ ደንድድ ካታማ ሀላቃታ ሺሽድ፥ ኤንታራ እስፈ ፆሳ ኬ ብስ። 
\v 21 ኤንቲ ካዎተ ግሾ፥ ፆሳ ኬ ግሾነ ይሁዳ አሳ ግሾ፥ ላፑን ኮርማታ፥ ላፑን ማራዘታ፥ ላፑን ዶርሳ ኡርገታነ ላፑን ኮለታ ናጋራ ያርሾስ ኤህዶሶና። አሮና ኮቸ ግድያ ካህነት፥ ጎዳ ያርሾ በሳን ሀይሳታ ያርሻና መላ ካዎይ ኪትስ። 
\v 22 ካህነት ኮርማታ ሹክድ ሱ ያርሾ በሳ ቦላ ርጭዶሶና። ማራዘታ ሹክድ ሱ ያርሾ በሳ ቦላ ርጭዶሶና። ዶርሳ ኡርገታ ሹክድ ሱ ያርሾ በሳ ቦላ ርጭዶሶና። 
\v 23 ናጋራ ያርሾስ ሀንያ ኮለታ ካዋ ስንነ አሳ ስን ኤህዶሶና፤ ኤንቲ ኡባይ ባንታ ኩሽያ ዴሻታ ቦላ ዎዶሶና። 
\v 24 ካዎይ ፁሳ ያርሾነ ናጋራ ያርሾ ያርሻና መላ ኤንታ ኪትዳ ግሾ ካህነት ዴሻታ ሹክድ እስራኤለ አሳ ኡባ ናጋራይ አቶ ጌተታና መላ ኤንታ ሱ ያርሾ በሳን ያርሽዶሶና።
\p
\v 25 ጎዳይ ካዋስ ቆንጨ በእያ ጋደነ ናብያ ናታና ባጋራ ካዋ ዳዊቲ ኪትዳ ኪታ ህዝቅያስ ካልድ፥ ሌወታ፥ ዳላ፥ ዲነ ማስንቆ ኦይድ ፆሳ ኬን ኤስስ። 
\v 26 ሌወት ዳዊቲ ጎኤትያ የ ሚሸታ ኦይክን፥ ካህነት ዛየ ኦይክድ ኤቅዶሶና። 
\v 27 ኤንቲ ፁሳ ያርሾ ያርሻና መላ ህዝቅያስ ኪትስ። ፁሳ ያርሾይ ያርሸትያ ዎደ ዛየይነ እስራኤለ ካዋ ዳዊታ የ ሚሸታን ጎዳስ የ ዶመቴስ። 
\v 28 ፁሳ ያርሾይ ፖለታና ጋካናዉ ሺቆ ኡባይ ጎዳ ጎይኔስ፤ የፀይሳት የፆሶና፤ ዛየ ፑነይሳት ፑኖሶና። 
\v 29 ካህነት ያርሹዋ ፖልዳ ዎደ ካዎይነ እያራ ደእያ አሳ ኡባይ ጉልባትድ ጎይንዶሶና። 
\v 30 ካዎይ ዳዊቲነ ቆንጨ በእያ አሳፍ ፃፍዳ ጋላታ ማዝሙረ ጎዳስ የፃና መላ ካዎይ ህዝቅያስነ ሀላቃት ሌወታ ኪትዶሶና፤ ኤንቲ ኡባይ ኡፋይሳን ጋላትሸ ጉልባትድ ጎይንዶሶና።
\p
\v 31 ሄሳፈ ጉየ፥ ህዝቅያስ፥ “ሀእ ህንተ ህንተና ጎዳስ ዱማይደታ። ያርሾነ ጋላታ ያርሾ ፆሳ ኬ ኤህተ” ያግስ። ሺቅዳ አሳይ ያርሾነ ጋላታ ያርሾ ኤህዶሶና፤ ዎዛን ዶስዳ አሳይ ፁሳ ያርሾ ኤህዶሶና። 
\v 32 ሄ ሺቅዳ አሳይ ኤህዳ ፁሳ ያርሾ ታይቦይ ላፑን ታሙ ኮርማታ፥ ፄቱ ማራዘታነ ናምኡ ፄቱ ዶርሳ ኡርገታ፤ ሄ ኡባይ ጎዳስ ፁሳ ያርሾ። 
\v 33 እስፈተ ያርሾስ ኡሱፑን ፄቱ ኮርማታነ ሄ ሙኩሉ ዶርሳት ሺቅዶሶና። 
\v 34 ግዶሽን፥ ፁሳ ያርሾ ኡባ ሹክድ፥ ጋልባ ቃራናዉ ደእያ ካህነት ታይቦን ጉ ግድያ ግሾ ኦሶይ ዉራና ጋካናዉነ ሀራ ካህነት ባንታና ጌሻና ጋካናዉ ኤንታ ዳቦ ግድዳ ሌወት ማድዶሶና። ባንታና ጌሾን ሌወት ካህነታፐ አድ አማነቶሶና። 
\v 35 ፁሳ ያርሾራ ሺቅያ እስፈተ ያርሹዋ፥ ሞዋነ ኡሻ ያርሹዋ ጉጅያ ዎደ ፁሳ ያርሾይ ዳሮ።
\p ሄሳዳ ሀንድ ፆሳ ኬ ኦሶይ ዛሪድ ዶምስ። 
\v 36 ህዝቅያስነ አሳ ኡባይ ኦሱዋ ኤለስድ ፖላና መላ ፆሳይ ኤንታ ማድዳ ግሾ ዳሮ ኡፋይትዶሶና።
\c 30
\s1 ፓስካ ባኣለ ቦንቾ
\p
\v 1 ህዝቅያስ ጎዳ እስራኤለ ፆሳ ፓስካ ባኣለ ቦንቻናዉ የሩሳላመን ደእያ ፆሳ ኬ እስራኤለ አሳይነ ይሁዳ አሳይ ያና መላ ኪትስ። ቃስ፥ ኤፍሬማ አሳስነ ምናሰ አሳስ ዳብዳበ ፃፍስ። 
\v 2 ካዎይ፥ ሀላቃትነ የሩሳላመን ሺቅዳ አሳ ኡባይ ፓስካ ባኣለ ናምአን አጌናን ቦንቻናዉ ቆፋ ቃችዶሶና። 
\v 3 ግድያ ካህነት ባንታና ጌሽቦና ግሾነ ዳሮ አሳይ የሩሳላመን ሺቅቦና ግሾ አሳይ ፓስካ እያ ዎደን ቦንቻናዉ ዳንዳእቦኮና። 
\v 4 ሄ ቆፋይ ካዋነ ሺቅዳ አሳ ኡፋይስስ። 
\v 5 ሄሳ ግሾ፥ ጎዳ እስራኤለ ፆሳ ፓስካ የሩሳላመን ቦንቻናዉ በርሳበፐ ዶምድ ዳነ ጋካናዉ ደእያ እስራኤለ አሳ ኡባይ ያና መላ አዋጃናዉ ቆፋ ቃችዶሶና። ሀ ፓስካ ባልያ ካሰ ህግያን ፃፈትዳይሳዳ ዳሮ አስ ቦንችቤና።
\p
\v 6 ካዎይ ኪታን፥ ኪተትዳይሳት፥ ካዋነ ሹማታ ዳብዳብያ ኤክድ እስራኤለነ ይሁዳ ኡባ ብዶሶና።
\p ዳብዳበይ ሀይሳዳ ያጌስ፤ “እስራኤለ አሳዉ፥ አሶረ ካዋ ኩሸፐ አትዳ ህንተኮ ስማና መላ ህንተካ ጎዳኮ፥ አብራሃመ፥ ይሳቃነ እስራኤለ ፆሳኮ ስምተ! 
\v 7 ህንተ ካሰ በእዳይሳዳ ኤንታ ቦረስ አድ እማና ጋካናዉ ባንታ ጎዳስ፥ ባንታ አዋታ ፆሳስ አማነትቦና ህንተ አዋታዳነ ህንተ እሻታዳ ሀኖፕተ። 
\v 8 ህንተ ጎዳስ ኪተትተ፤ ካሰ ህንተ አዋታዳ ስእሸ እፃስ ጎፕተ! ህንተናተ ፆሳስ እምተ። ጎዳይ መርናዉ ጌሽዳ ፆሳ ኬ ዪተ። ጎዳ ሀንቆይ ህንተፈ ስማና መላ ጎዳ ህንተ ፆሳ ጎይንተ። 
\v 9 ህንተ ጎዳኮ ስምኮ ህንተ እሻትነ ህንተ ናይት ባንታና ድእዳይሳታ ስንን ማሮታ ደምድ ሀ ቢታ ስማና። ጎዳይ ህንተ ፆሳይ ቃተይሳነ ማረይሳ ግድያ ግሾ ህንተ እያኮ ስምኮ ባ ሶምኡዋ ህንተፈ ቆሰና” ያግስ።
\p
\v 10 ኪተትዳይሳት ኤፍሬማነ ምናሰ ቢታ ካንድ ዛብሎና ቢታ ጋካናዉ ካታማፐ ካታማ ብዶሶና። ሽን ሄ ካታማታን ደእያ አሳይ ኤንታ ካድ ኤንታ ቦላ ሚጭዶሶና። 
\v 11 ግዶሽን፥ አሴራፐ፥ ምናሰፐነ ዛብሎና ጉ አሳት ባንታና ካዉሽድ የሩሳላመ ይዶሶና። 
\v 12 ካዎይነ ካዋ ሹማት ጎዳ ቃላ ማራን ኪትዳይሳ ፖላናዉ እስ ዎዛናን ግዳና መላ ፆሳ ኩሸይ ይሁዳ ቦላ ደኤስ።
\p
\v 13 ናምአን አጌናን ኡይ ባኣለ ቦንቻናዉ ዳሮ አስ የሩሳላመን ሺቅስ። 
\v 14 ኤንቲ ደንድድ፥ የሩሳላመን ደእያ ያርሾ በሳታ ላልድ፥ እፃነ ጩይስያ ሚሸ ኡባ ድግድ፥ ቀድሮና ዛንጋራን የግዶሶና። 
\v 15 ናምአን አጌናን፥ ታማነ ኦይዳን ጋላሳን ፓስካ ዶርሳ ሹክዶሶና። ባንታና ጌሽቦና ካህነትነ ሌወት ዬላትድ፥ ባንታና ጌሽዶሶና፤ ፁሳ ያርሾ ፆሳ ኬ ኤህዶሶና። 
\v 16 ፆሳ አስ ግድዳ ሙሰ ዎጋዳ ፆሳ ኬ ግዶን ባንታ በሳን በሳን ኤቅዶሶና፤ ካህነት ሌወታ ኩሸፐ ኤክዳ ሱ ርጭዶሶና።
\p
\v 17 አሳ ግዶፈ ዳሮት ባንታና ጌሽቦና ግሾነ ዶርሳታ ሹኮና መላ ድገትዳ ግሾ ሌወት ኤንታዉ ፓስካ ዶርሳታ ሹክዶሶና። 
\v 18 ኤፍሬማፐ፥ ምናሰፐ፥ ይሳኮራፐነ ዛብሎና ኮቻፈ ዳሮ አሳይ ህገይ ኪተይሳዳ ባንታና ጌሽቦናባ ግድኮካ ፓስካ ባኣለ ግብራ ምዶሶና። ግዶሽን፥ ካዎይ ህዝቅያስ፥ “አቤት ኬሀ ጎዳዉ፥ 
\v 19 ህገይ ኪተይሳዳ ሀይሳቲ ባንታና ጌሾናባ ግድኮካ ኤንቲ ነና ጎዳ፥ ባንታ አዋታ ፆሳ ኮያናዉ ባንታ ዎዛና ጊግስዳ ግሾ ነ ኤንታዉ አቶ ያጋ” ያግድ ዎስስ። 
\v 20 ጎዳይ ህዝቅያሳ ዎሳ ስእድ ኤንታዉ አቶ ግስ።
\p
\v 21 የሩሳላመን ሺቅዳ እስራኤለ አሳይ ላፑን ጋላስ ኩመ ኡይ ባልያ ግታ ኡፋይሳን ቦንችዶሶና። ሌወትነ ካህነት የ ሚሸን የፅሸ ጋላስ ጋላስ ጎዳ ጋላቶሶና። 
\v 22 ህዝቅያስ ጎዳ ጎይኖ ዎጋ ካለሶን ኤረትዳ ሌወታ ምንስ።
\p አሳ ኡባይ እስፈተ ያርሾ ያርሽሸ፥ ጎዳ ባንታ አዋታ ፆሳ ጋላትሸ፥ ምሸነ ኡይሸ ባኣለ ላፑን ጋላስ ቦንችዶሶና። 
\v 23 ሺቆይ ሀራ ላፑን ጋላስ ጉጅድ ባኣለ ቦንቻናዉ ዞረ ቃችድ ላፑን ጋላስ ኡፋይትድ ቦንችዶሶና። 
\v 24 ይሁዳ ካዎይ ህዝቅያስ ያርሾ ያርሻናዉ እስ ሙኩሉ ኮርማታ፥ ላፑን ሙኩሉ ዶርሳታነ ዴሻታ አሳስ እሚስ፤ ቃስ ሀላቃት እስ ሙኩሉ ኮርማታነ ታሙ ሙኩሉ ዶርሳታ አሳስ እምዶሶና፤ ዳሮ ካህነት ባንታና ጌሽዶሶና። 
\v 25 ይሁዳ አሳይ፥ ካህነት፥ ሌወት፥ እስራኤለፐ ይዳ አሳይ፥ ባኣለ ቦንቻናዉ ይዳ በተ አሳይነ ይሁዳ ቢታን ደእዳ አሳ ኡባይ ኡፋይትዶሶና። 
\v 26 ዳዊታ ናኣ፥ እስራኤለ ካዋ ሶሎሞነ ዎድያፐ ዶምን ሀች ጋካናዉ የሩሳላመን ሄሳ መላ ባለይ ቦንቸትድ ኤሮና ግሾ የሩሳላመን አሳይ ዳሮ ኡፋይትዶሶና። 
\v 27 ካህነትነ ሌወት ደንድድ፥ ጎዳይ አሳ አንጃና መላ ዎስን ፆሳይ ሳሎን፥ ባ ደእያ ጌሻ በሳን ኤንታ ዎሳ ስእስ።
\c 31
\s1 ህዝቅያስ ጎይኖ ዎጋ ኦራስ
\p
\v 1 ባለይ ፖለትዳ ዎደ ሄ በሳን ደእያ እስራኤለ ኡባይ ይሁዳ ካታማታ ብድ ኤቃ ሹቻታ ትንቸረዶሶና፤ አሼራ ኤቃ ምስለታ ቃንፀረዶሶና። ይሁዳን፥ ብንያመን ኤፍሬማንነ ምናሰ ቢታን ደእያ ቃ ጎይኖ በሳታነ ያርሾ በሳታ ላልዶሶና። ኤንቲ ሄ ኡባ ይስዳፐ ጉየ እስራኤለ አሳ ኡባይ ባንታ ካታማነ ባንታ ሶ ሶ ስምዶሶና።
\p
\v 2 ህዝቅያስ ካህነታነ ሌወታ ኤንታ ኦሶ ማራን ጩጋን ጩጋን ሻክድ ኤስስ። ኤንቲ ፁሳ ያርሾነ እስፈተ ያርሾ ጎዳስ ያርሻና መላነ ፆሳ ኬ ፐንገን ጎዳ ጋላታናነ ሳባና መላ ኦስ። 
\v 3 ጎዳ ህግያን ፃፈትዳይሳዳ ዎንታነ ኦማርስ ፁሳ ያርሾነ ሳምባታን፥ አጌና ፄሮንነ ሀራ ባኣለ ጋላሳታን ሺቅያ ያርሹዋስ ኮሽያ መሄታ ካዎይ ባፐ እሜስ።
\p
\v 4 ጎዳ ህግያን ፃፈትዳይሳዳ ካህነትነ ሌወት ባንታ ኩመ ዎድያ ጎዳ ኦሶስ ፔሻና መላ ኤንታዉ በሲያባ እማና መላ የሩሳላመ አሳ ካዎይ ኪትስ። 
\v 5 እስራኤለ አሳይ ካዋ ኪታ ስእዳ ዎደ ካፈ፥ ዎይነ ኡሻፈ፥ ዛይትያፐ፥ ኤሳፈነ ጋደን ካፅዳባፐ ባይራ ጎዳስ እምዶሶና፤ ባንታዉ ደእያባ ኡባፈ አስራታ ከስዶሶና። 
\v 6 ይሁዳ ካታማታን ደእያ እስራኤለ አሳይነ ይሁዳ አሳይ ባንታ መሄታፐ፥ ዶርሳታፐ አስራታ እምዶሶና፤ ጎዳ፥ ባንታ ፆሳስ፥ ዱማይድ ዎዳባ ኤህድ ዶርዶሶና። 
\v 7 ኤንቲ ሄን አጌናን ኤሆ ዶምድ ላፑን አጌናን ፖልዶሶና። 
\v 8 ህዝቅያስነ ሀላቃት ዶረትዳይሳ ይድ በእዳ ዎደ ኤንቲ ጎዳነ ጎዳ አስ ግድዳ እስራኤለ አንጅዶሶና።
\p
\v 9 ህዝቅያስ ዶረትዳ እሞታባ ካህነታነ ሌወታ ኦይችስ።
\p
\v 10 ሳዶቃ ያራ ግድዳ ካህነ ሀላቃይ አዛርያስ፥ “ባንታ እሙዋ ፆሳ ኬ ኤሆ ዶምን ኑ ምድ ካልዳ። ጎዳይ ባ አሳ አንጅዳ ግሾ ዳሮ ፓላህስ” ያግስ።
\p
\v 11 ህዝቅያስ ፆሳ ኬን ምንጃ ክፍለታ ጊግሳና መላ ኪትን አሳይ ጊግስዶሶና። 
\v 12 አስራታ፥ ባይራባነ ዱማትዳ እሞታታ አማነተን ክፍለታ ገልስዶሶና። ሌወ ግድዳ ኮናነይ ምንጃ ኬ ቦላ ዋና ግድድ ሹመትስ። እያ እሻይ ሳመእ እያዉ ናምአን ግድድ ሹመትስ። 
\v 13 ካዎይ ህዝቅያስነ ካህነ ሀላቃይ አዛርያስ ሹምን ኮናነፐነ ሳመአፐ ጋርሳራ ኦያ ሌወት፥ ይኤላ፥ አዛዛ፥ ናሃታ፥ አሳሄላ፥ ያርሞታ፥ ዮዛባታ፥ ኤልኤላ፥ ይስማካ፥ ማሃታነ ባናያ። 
\v 14 ዶሎሀ ባጋ ፐንግያ ናገይሳታ ሀላቃይ ሌወይ፥ ይምና ናአይ፥ ቆረይ፥ አሳይ ዶሳን ፆሳስ ኤህዳ እሙዋ ኤካናዉነ ግሻናዉ ሹመትስ። 
\v 15 ካህነት ደእያ ካታማታን ግታፐ ጉ ጋካናዉ ደእያ ባንታ እሻታስ አማነትድ፥ ኤንታ ኦሱዋዳ ኦሱዋዳ ሻክድ እማና መላ ኤደን፥ ምንያምን፥ እያሱይ፥ ሻማኤይ፥ አማረይነ ሳካን ቆረፐ ጋርሳራ ሹመትዶሶና። 
\v 16 ባንታ ጩጋን ጩጋን ባንታ ኦሱዋ ጋላስ ጋላስ ፆሳ ኬን ኦይሳታስ ላይ፥ ሄነ እያፐ ቦላ ግድዳ አደ ኡባስ ኤንታ ግሹዋ ሻክድ እምዶሶና። 
\v 17 ባንታ አዋታ ሶ አሳን አሳን ታይበትዳ ካህነታስነ ላይ፥ ላታማነ እያፐ ቦላ ግድዳ ሌወታስ ባንታ ኦሱዋዳ ኦሱዋዳ ባንታ ጩጋን ጩጋን ደኤይሳታስ ግሽዶሶና። 
\v 18 ኤንቲ አማነትድ ባንታና ጌሽዳ ግሾ ኤንቲ ባንታ የለታ ማራን ታይበትያ ዎደ ባንታ ናይታራነ ማቸታራ እስፈ ፃፈትዶሶና። 
\v 19 ባንታ ካታማታ ዩሾን ደእያ ሄን ጋደታን ዎይኮ ሀራ ካታማታን ደእያ ካህነ ግድዳ አሮና ሼሻስ፥ ኤንታ ግዶን ደእያ አደ ኡባስነ ሌወታ የለታ ማዝጋበን ፃፈትዳይሳታስ ካ ግሻናዉ ሹመትዶሶና።
\p
\v 20 ካዎይ ህዝቅያስ ጎዳ ባ ፆሳ ስንን ሎኦ፥ ሱረነ ቱማ ግድዳባ ይሁዳ ቢታ ኡባን ኦስ። 
\v 21 ህዝቅያስ ፆሳ ኬስ ኦዳ ኦሶ ኡባን፥ ፆሳ ህግያነ ዎጋ ናግድ ፆሳ ባ ኩመ ዎዛናን ኮይዳ ግሾ እያዉ ኡባይ እንጀትስ።
\c 32
\s1 ሳናክሬም የሩሳላመ ቦላ ደንድስ
\r (2 ካዎ 18:13-17፤ 19:14-19፥ 35-37፤ እሳ 36:1-22፤ 37:8-38)
\p
\v 1 ካዎይ ህዝቅያስ አማነተን ጎዳስ ኦዳፐ ጉየ አሶረ ካዎይ ሳናክሬም ይሁዳ ቢታ ቦላ ደንድስ፤ ፆንድ ባዉ ኤካናዉ ቆፕድ ግምበትዳ ካታማታ ተቅስ።
\p
\v 2 ሳናክሬም የሩሳላመ ኦላናዉ ይዳይሳ ህዝቅያስ በእዳ ዎደ፥ 
\v 3 ካታማፐ ካረራ ጎግያ ፑልቶ ሃታ ተቃናዉ ባ ሹማታነ ቶራ ሞጮናታ ዞረ ኦይችስ፤ ኤንቲ እያ ማድዶሶና። 
\v 4 ዳሮ አሳይ ሺቅድ፥ “አሶረ ካዎት ይድ አይስ ሃ ደማኔ?” ያግድ ፑልቶታነ ጎግያ ሃታ ተቅዶሶና።
\p
\v 5 ሄሳፈ ጉየ፥ ህዝቅያስ ምን ኦድ፥ ላለትዳ ድርሳ ግምበ ኡባ ዛሪድ ግምብስ፤ እያ ቦላ አዱሳ ሻኮ ሻክስ። ሄ ድርሳ ግምብያፈ ካረ ባጋራ ሀራ ድርሳ ግምበ ግምብስ። ዳዊታ ካታማን ደእያ ሚሎ ጌተትያ በሳ ምንስ፤ ዳሮ ኦላ ሚሸነ ጎንዳለ ጊግስስ።
\p
\v 6 ኦላ ሀላቃታ አሳ ቦላ ሹምስ፤ ኤንታ ኡባ ካታማ ፐንግያ ማታን ደእያ ዳባባን ሺሽድ፥ 
\v 7 “ምንተ፤ ገንጭተ፤ ኑራ ደኤይስ ኤንታራ ደኤይሳፈ አያ ግሾ አሶረ ካዋነ እያ ኦላንቾታ በእድ ያዮፍተ፥ ዳጋሞፕተ። 
\v 8 እያራ አሳ ዎልቅ ደኤስ፤ ሽን ኑራ ጎዳይ ኑ ፆሳይ ኑና ማዳናዉነ ኑስ ኦለታናዉ ደኤስ” ያግድ ኤንታ ምንስ። ይሁዳ ካዎይ ህዝቅያስ ኦዳን አሳይ ምነትስ።
\p
\v 9 ሄሳፈ ጉየ፥ አሶረ ካዎይ ሳናክሬም ባ ኦላንቾታራ ላክሶ ካታማ ተቅድ ደእሽን፥ ይሁዳ ካዋ ህዝቅያሳኮነ የሩሳላመን ደእያ ይሁዳ አሳ ኡባኮ ባ ሹማታ ኪትስ። 
\v 10 አሶረ ካዎይ ሳናክሬም፥ “ተቀትዳ የሩሳላመ ካታማን ህንተ ኦናን አማነትድ ኡትደቲ? 
\v 11 ህዝቅያስ፥ ‘ጎዳይ፥ ኑ ፆሳይ ኑና፥ አሶረ ካዋ ኩሸፐ አሻና’ ያግድ ጭምድ ህንተና ኮሻንነ ሳሞን ዎናዉ ሀኔስ። 
\v 12 ቃ ጎይኖ በሳታነ ያርሾ በሳታ ድግድ፥ ይሁዳነ የሩሳላመ አሳ፥ ‘እስ ያርሾ በሳ ስንን ጎይንተ፤ ያርሹዋ እያ ቦላ ፁግተ’ ያገይ ህዝቅያሳ ግደኔ?
\p
\v 13 “ታነ ታ አዋት ሀራ ካዎተታ ቦላ ኦዳባ ህንተ ኤረከቲ? ኤንታ ፆሳት ባንታ ቢታ ታ ኩሸፐ አሻናዉ ዳንዳእዶና? 
\v 14 ታ አዋት ይስዳ ሀ ካዎተታ ፆሳታ ኡባ ግዶን ባ አሳ ታ ኩሸፐ አሻናዉ ዳንዳእዳይ ኦኔ? ያትን፥ ህንተ ፆሳይ ህንተና ታ ኩሸፐ ዋት አሻናዉ ዳንዳኢ? 
\v 15 ህዛ ህዝቅያስ ህንተና ባለፎ ዎይኮ ሄሳዳ ጭሞፎ። ህንተ ህዝቅያሳ አማኖፕተ። እያ አሳ ታ ኩሸፐ ዎይኮ ታ አዋታ ኩሸፐ አሻናዉ ዳንዳእዳ ሀራ ቢታ ፆሳት ዎይኮ ካዎተታ ፆሳት ባዋ። ያትን፥ ሄስ ህንተ ፆሳይ ህንተና ታ ኩሸፐ አሻናዉ ዋንድ ዳንዳኢ?” ያግዶሶና።
\p
\v 16 ሳናክሬማ ሹማት ጎዳ ፆሳ ቦላነ እያ አይልያ ህዝቅያሳ ቦላ ሀራ ዳሮባ ሃሳይዶሶና። 
\v 17 ሳናክሬም ጎዳ እስራኤለ ፆሳ ጫይድ፥ “ሳአ ቦላ ደእያ ካዎተታ ፆሳት ባንታ አሳ ታ ኩሸፐ አሾናይሳዳ ህዝቅያሳ ፆሳይካ ባ አሳ ታ ኩሸፐ አሻናዉ ዳንዳኤና” ያግድ ዳብዳበ ፃፍስ። 
\v 18 ሳናክሬማ ሹማት ካታማ ኦይካናዉ ኮይድ፥ ድርሳ ግምበ ቦላ ኡትዳ የሩሳላመ አሳ ያሽሳናዉነ ዳጋንናዉ ባንታ ቃላ ቁ ኦድ፥ እብራወ ዶናን ኤንታ ቦላ ዋስዶሶና። 
\v 19 አሳ ኩሸን ኦሰትዳ፥ ሀ ሳአን ደእያ ሀራ ካዎተታ ፆሳታ ቦላ ኦደትዳይሳዳ የሩሳላመ ፆሳ ቦላካ ኦደትዶሶና።
\p
\v 20 ካዎይ ህዝቅያስነ አሞፀ ናአይ፥ ናበይ እሳያስ ሄሳ ግሾ ዎሳን ሳሎ ፆሳኮ ፑደ ዋስዶሶና። 
\v 21 ፆሳይ ባ ኪታንቹዋ ኪትድ አሶረ ኦላንቾታነ ቶራ ሞጮናታ ይስስ። ሄሳ ግሾ፥ አሶረ ካዎይ ካዉይድ፥ ባ ቢታ ስምስ፤ እ ባ ፆሳ ኬ ገልዳ ዎደ እያ ናይት እያ ሄ በሳን ማሻን ዎዶሶና።
\p
\v 22 ሄሳዳ ኦድ፥ ጎዳይ ህዝቅያሳነ የሩሳላመ አሳ አሶረ ካዋ ሳናክሬማ ኩሸፐነ ሀራ ሞርከታ ኩሸፐ አሽስ፤ ኤንታ ሾሮ ቢታታ ኡባፈ ኤንታ ሸምፕስስ። 
\v 23 ዳሮ አሳይ ጎዳስ እሞታ፥ ይሁዳ ካዋ ህዝቅያሳስ አልኦ ሚሸ ኤህዶሶና። ሄ ዎደፐ ዶምድ ካዎተ ኡባይ ህዝቅያሳ ዳሮ ቦንችዶሶና።
\s1 ህዝቅያሳ ኦቶሩዋነ እያ ሀይቁዋ
\r (2 ካዎ 20:1-3፥ 12-19፤ እሳ 38:1-3፤ 39:1-8)
\p
\v 24 ሄ ዎደ ህዝቅያስ ሀርግድ፥ ሀይቃናዉ ማትድ ጎዳ ዎስስ። ጎዳይ ዎሰትድ እያ ፓናዉ ማላ እሚስ። 
\v 25 ሽን ህዝቅያስ ኦቶርትዳ ግሾ ጎዳይ እያዉ ኬህዳ ኬሀስ በሲያ ዛሮ እምቤና። ሄሳ ጋሶን፥ እያ ቦላ፥ ይሁዳ ቦላነ የሩሳላመ ቦላ ጎዳ ሀንቆይ ይስ። 
\v 26 ግዶሽን፥ ዉርሰን ህዝቅያስ ባ ኦቶሩዋ አግድ የሩሳላመ አሳታራ ባናተ ካዉሽስ። ህዝቅያስ ካዎ ግድድ ደእያ ዎደ ጎዳ ሀንቆይ ኤንታ ቦላ ይቤና።
\p
\v 27 ህዝቅያሳስ ዳሮ ዱረተነ ቦንቾይ ደኤስ። ህዝቅያስ ባ ብራ፥ ዎርቃ፥ አልኦ ሹቻ፥ ሳዎ፥ ጎንዳለነ ሀራ አልኦ ሚሸ ኡባ ምንጅያ ኬ ኬፅስ። 
\v 28 ካ፥ ዎይነ ኡሻነ ዛይተ ዎያ ኬ ኬፅስ። መሄ ዳራነ ዶርስነ ዴሽ ኤቅያ ግርበ ኦስ። 
\v 29 ፆሳይ እያዉ ዳሮ አቆ እምዳ ግሾ ባዉ ካታማታ ኬፅስ፤ ዳሮ ዶርሰነ መሄ ሺሽስ። 
\v 30 ቆሞ ባጋን ደእያ ግዮነ ፑልቶ ሃ ዜርድ፥ ሃይ ዉሎሀ ባጋን ደእያ ዳዊታ ካታማኮ ዱገ ጎጋና መላ ኦዳይ ህዝቅያሳ። ህዝቅያስ ኦዳባ ኡባን እንጀትዳ አስ። 
\v 31 ሽን ይሁዳ ቢታን ሀንዳ ማላልስያ ኦሶታባ ኦይቻናዉ ባብሎነፐ ኪተትዳ አሳት ህዝቅያሳኮ ይዳ ዎደ ጎዳይ እያ ፓጫናዉነ እያ ዎዛናን ደእያባ ኤራናዉ እያ የድ በስስ።
\p
\v 32 ህዝቅያስ ኦዳ ሀራባይነ እያ ኬሀተይ አሞፀ ናኣ፥ ናብያ እሳያሳ ቆንጨ ማፃፋንነ ይሁዳነ እስራኤለ ካዎታ ታርከ ማፃፋን ፃፈትስ። 
\v 33 ህዝቅያስ ሀይቅድ፥ ባ ማይዛታን ጋሄትን ቆሞ ባጋራ ደእያ ዳዊታ ኮቻታ ዱፎን እያ ሞግዶሶና። እ ሀይቅን፥ ይሁዳ አሳይነ የሩሳላመ አሳይ እያ ቦንችዶሶና። እያ በሳን እያ ናአይ ምናሰይ ካዎትስ።
\c 33
\s1 ይሁዳ ካዋ ምናሰ
\r (2 ካዎ 21:1-9)
\p
\v 1 ምናሰይ ካዎትያ ዎደ እያዉ ላይ ታማነ ናምአ፤ እ የሩሳላመን እሻታማነ እቻሹ ላይ ካዎትስ። 
\v 2 ጎዳይ እስራኤለ አሳ ስንፈ ጎድድ ከስዳ አሳ፥ እፀትዳ ኦግያ ካልድ ጎዳ ስንን ኢታባ ኦስ። 
\v 3 ምናሰይ ባ አዋይ ህዝቅያስ ላልዳ፥ ቃ ጎይኖ በሳታ ዛሪድ ኬፅስ። ባኣለ ያርሾ በሳታነ አሼራ ጌተትያ ኤቃ ምስለታ መስ፤ ሳሎ ፆልንቶታ ጎይንስ፤ ኤንታዉ ጉፋንስ። 
\v 4 ጎዳይ፥ “ታ ሱንይ መርናዉ የሩሳላመን ዳና” ያግድ ዎዳ ፆሳ ኬን ምናሰይ ሀራ ፆሳታስ ያርሾ በሲ ጊግስስ። 
\v 5 ፆሳ ኬን ደእያ ናምኡ ዳባባታን ሳሎ ፆልንቶት ጎይነትያ ያርሾ በሲ ጊግስስ። 
\v 6 ህኖማ ዛንጋራን ባ አደ ናይታ ታማን ፁግድ ያርሽስ። እ ብታነ ሙሩኖ ኦስ፤ ማሮስ፤ ሞይትለነ ቱና አያና ዞረ ኦይችስ። ጎዳ ስንን ዳሮ ኢታባ ኦድ ፆሳ ይሎይስ።
\p
\v 7 ባ ኦዳ ኤቃ ምስልያ ኤፍድ ፆሳ ኬን ኤስስ። ሄ ፆሳ ኬይ፥ ፆሳይ ዳዊታስነ እያ ናኣ ሶሎሞነስ፥ “እስራኤለ ዛረ ኡባ ግዶፈ ታኒ ዶርዳ ፆሳ ኬንነ የሩሳላመን ታ ሱን መርናዉ ፄግሳና። 
\v 8 ሙሰ ባጋራ ታ እስራኤለ አሳ ኪትዳ ኪታ፥ ህግያነ ዎጋ ኡባ ኤንቲ ናግኮ፥ ታኒ ኤንታ ማይዛታስ እምዳ ቢታፈ ኤንታ ሾድከ” ያግስ። 
\v 9 ሽን ምናሰይ ይሁዳ አሳነ የሩሳላመ አሳ ባለድ፥ ጎዳይ እስራኤለ አሳ ስንፈ ይስዳ ሀራ ካዎተታፐ አያ ኢታ ኦና መላ ኦስ።
\p
\v 10 ጎዳይ ምናሰስነ እያ አሳስ ኦድስ፤ ሽን ኤንቲ እያ ስኦና እፅዶሶና። 
\v 11 ሄሳ ግሾ፥ ጎዳይ አሶረ ኦላንቾታ ኤንታ ቦላ ደንስ። ኤንቲ ምናሰ ስን ዳፎ አድ ኦይክዶሶና፤ ናሰ ብራታ ሳንላታን ቃችድ፥ ባብሎነ ኤፍዶሶና። 
\v 12 ምናሰይ ኡንኤትዳ ዎደ ጎዳ ባ ፆሳ ማዶ ዎስስ፤ ባ አዋታ ፆሳ ስንን ባናተ ዳሮ ካዉሽስ። 
\v 13 ፆሳይ ምናሰ ዎሳ ስእስ፤ የሩሳላመ ስሚድ ዛሪድ ካዎታና መላ ኦስ። ጎዳይ ቱማ ፆሲ ግደይሳ ምናሰይ ሄሳን ኤርስ።
\p
\v 14 ሄሳፈ ጉየ፥ ምናሰይ ግዮነ ፑልቱዋ ማታን ደእያ በሳፈ ዶምድ ኦፌላ ደርያራ ካንድ ሞሎ ፐንገ ጋካናዉ ካረ ባጋራ ሀራ ድርሳ ግምበ ግምብስ። ሄ ግምበይ ዳዊታ ካታማፐ ዶሎሀ ባጋራ ደእያ ዛንጋራን ደኤስ። ይሁዳ ካታማታ ኡባን ቶራ ሞጮናታ ዎስ።
\p
\v 15 አላጋ ፆሳታነ ኤቃ ምስለታ ፆሳ ኬፈ ድግስ፤ ፆሳ ኬይ ደእያ ዙማ ቦላነ የሩሳላመን ደእያ ያርሾ በሳታ ላልድ ሄ ካታማፐ ካረ ከስድ የግስ። 
\v 16 ምናሰይ ጎዳ ያርሾ በሲ ኦራድ እስፈተ ያርሾነ ጋላታ ያርሾ ያን ያርሽስ። ይሁዳ አሳይ ጎዳ እስራኤለ ፆሳ ጎይናና መላ ኪትስ። 
\v 17 አሳይ ቃ ጎይኖ በሳታን ያርሾ ያርሸይሳ አጎና እፅኮካ፥ ኤንቲ ያርሸይ ጎዳ ባንታ ፆሳ ፃላላሳ።
\p
\v 18 ምናሰ ኦዳ ሀራባይ፥ ባ ፆሳ ዎስዳ ዎሳይነ ጎዳ እስራኤለ ፆሳ ሱንን ናበት እያዉ ኦድዳ ቃላይ እስራኤለ ካዎታ ታርከ ማፃፋን ፃፈትስ። 
\v 19 ሄኮ፥ ምናሰ ዎሳይነ ፆሳይ እያዉ ዛርዳ ዛሮይ፥ እ ኦዳ ናጋራይነ ምናሰይ ባና ካዉሻናፐ ስን ኦዳ ቃ ጎይኖ በሳታባይ፥ አሼር ኤቃ ምስለታባይነ ኤቃታባ ኡባይ ናበታ ታርከ ማፃፋን ፃፈትስ። 
\v 20 ምናሰይ ሀይቅድ ባ ማይዛታ ጋክስ፤ እያ ካዎ ጋን ሞግዶሶና። እያ በሳን እያ ናአይ አሞፀይ ካዎትስ።
\s1 ይሁዳ ካዋ አሞፀ
\r (2 ካዎ 21:19-26)
\p
\v 21 አሞፀይ ካዎትያ ዎደ እያዉ ላይ ላታማነ ናምአ፤ እ የሩሳላመን ናምኡ ላይ ካዎትስ። 
\v 22 እያ አዋይ ምናሰይ ኦዳይሳዳ እካ ጎዳ ስንን ኢታባ ኦስ። እያ አዋይ ምናሰይ ጎይንዳ ኤቃታ ጎይንስ፤ ኤንታዉ ያርሽስ። 
\v 23 ሽን እያ አዋይ ምናሰይ ባናተ ካዉሽዳይሳዳ እ ባናተ ጎዳ ስንን ካዉሽቤና፤ አሞፀይ ጉጅ ጉጅ ናጋራ ኦስ።
\p
\v 24 አሞፀ ሹማት እያ ቦላ ማቀትድ፥ ካዎ ጋን እያ ዎዶሶና። 
\v 25 ይሁዳ አሳይ ካዋ አሞፀ ቦላ ማቀትዳ ኡባ ዎድ፥ አሞፀ በሳን እያ ናኣ እዮስያሳ ካዎዶሶና።
\c 34
\s1 ይሁዳ ካዋ እዮስያሳ
\r (2 ካዎ 22:1-2)
\p
\v 1 እዮስያስ ካዎትያ ዎደ እያዉ ላይ ሆስፑና፤ እ የሩሳላመን ሀስታማነ እስ ላይ ካዎትስ። 
\v 2 እዮስያስ ጎዳ ስንን ሱረባ ኦስ፤ ኡሻች ሀድርስ ጎና ባ ማይዛ ዳዊታ ኦገን ሄመትስ።
\p
\v 3 እ ካዎትዳ ሆስፑን ላይን ቡሮ ዮጋ ደእሸ ባ ማይዛ ዳዊታ ፆሳ ኮይስ። እ ካዎትዳ ታማነ ናምአን ላይን ይሁዳንነ የሩሳላመን ደእያ ቃ ጎይኖ በሳታ፥ አሼራ ኤቃ ምስለታ፥ ማስድ ጊግስዳ ኤቃታነ ሴርስድ ኦዳ ምስለታ ይስስ። 
\v 4 እያ ኪታን፥ ባኣለ ያርሾ በሳታ ላልዶሶና፤ ኤንታፈ ቦላራ ደእያ እፃነ ጩይስያ ሚሸታ ትንችዶሶና። አሼራ ኤቃ ምስለታ፥ ማስድ ጊግስዳ ኤቃታነ ሴርስድ ኦዳ ምስለታ ጋጭድ ለ ከስዶሶና፤ ሄ ልያ ኤንታ ጎይንያ አሳታ ዱፎን ላልዶሶና። 
\v 5 እዮስያስ ኤንታ ካህነታ መቀ ሄ ያርሾ በሳታ ቦላ ፁግስ፤ ያትድ፥ ይሁዳነ የሩሳላመ ጌሽስ።
\p
\v 6 ምናሰ፥ ኤፍሬማነ ስሞና ቢታፈ ብድ ንፍታለመ ቢታ ጋካናዉ ደእያ ካታማታነ ላለትዳ በሳታ ኡባ ሄሳዳ ኦድ ጌሽስ። 
\v 7 እዮስያስ ያርሾ በሳታ ላልስ፤ አሼራ ኤቃ ምስለታነ ሀራ ኤቃ ምስለታ ትንቸረስ፤ እስራኤለን ደእያ እፃነ ጩይስያ በሳታ ቃንፀረስ። ሄሳፈ ጉየ፥ እዮስያስ የሩሳላመ ስምስ።
\p
\v 8 እዮስያስ ካዎትዳ ታማነ ሆስፑን ላይን ቢታነ ፆሳ ኬ ጌሽዳፐ ጉየ፥ ፆሳ ኬ ኦራና መላ አፃላ ናኣ ሳፋና፥ የሩሳላመ ካታማ ሃርያ ማእሰያነ እዮአካዛ ናኣ ዋና ፃፍያ እዮአክና ኪትስ።
\p
\v 9 ኤንቲ ካህነ ሀላቃ ካልቅያሳኮ ብዶሶና። ፐንገ ናግያ ሌወት ምናሰፐ፥ ኤፍሬማፐ፥ አትዳ እስራኤለ አሳ ኡባፈ ይሁዳፐ፥ ብንያመፐነ የሩሳላመን ደእያ አሳፐ ካሰ ሺሽድ ፆሳ ኬ ኤህዳ ሚሽያ ካልቀስ እምዶሶና። 
\v 10 ኤንቲ ፆሳ ኬ ኦራያ ሀላቃታስ እምን ኤንቲ ፆሳ ኬ ኦራናዳነ ዛሪድ ኬፃና መላ ኦሳንቾታስ እምዶሶና። 
\v 11 ይሁዳ ካዎት ላልዳ ፆሳ ኬ ሎይናዉ ምነ ማሰትዳ ሹቹ ሻማና መላ አናፀታስነ ግምበይሳታስ ሚሸ እምዶሶና።
\p
\v 12 አሳይ አማነትድ ኦሱዋ ፖልዶሶና። ኤንታ ቦላ ሹመትዳ ኦይዱ ሌወት፥ ማራራ ያራፐ ያሃታነ አብድዩ፥ ቃሃታ ያራፐ ማሱላማነ ዛካርያሳ። የ ሚሸ ካእ ኤርያ ሌወት ኡባይ፥ 
\v 13 ዎልቃ ኦሶ ኦያ አሳታ ቦላነ ዱማ ዱማ ኦሶ ኦይሳታ ቦላ ሹመትዶሶና። ቃስ ሀራ ሌወት ፃፈ፥ ሀላቃነ ፐንገ ናገይሳታ ግድዶሶና።
\s1 ህገ ማፃፋይ በንትስ
\p
\v 14 ኤንቲ ፆሳ ኬ ይዳ ሚሽያ ከስያ ዎደ ካህነይ ካልቀይ ጎዳይ ሙሰ ባጋራ እምዳ ህገ ማፃፋ ደምስ። 
\v 15 ካልቀይ ዋና ፃፍያ ሳፋናኮ፥ “ታኒ ፆሳ ኬፈ ህገ ማፃፋ ደማስ” ያግስ። ሄ ማፃፋ ሳፋናስ እሚስ።
\p
\v 16 ሳፋን ማፃፋ ካዋኮ ኤፍድ፥ “ነ ሹማት ነ ኪታ ኡባ ኦዶሶና። 
\v 17 ፆሳ ኬን ደእያ ሚሽያ ኤክድ፥ ኦሱዋ ካልያ ሀላቃታስነ ኦያ አሳስ እምዶሶና” ያግስ። 
\v 18 ዋና ፃፈይ ሳፋን ካዋኮ፥ “ካህነይ ካልቀይ ታዉ ማፃፋ እሚስ” ያግድ ማፃፋ ካዋ ስንን ናባብስ።
\p
\v 19 ካዎይ ህገ ቃላ ስእዳ ዎደ አዛንድ ባ ማኡዋ ፔስ። 
\v 20 ካዎይ፥ ካልቀ፥ ሳፋና ናኣ አክቃማ፥ ምክያሳ ናኣ አብዶና፥ ዋና ፃፍያ ሳፋናነ ካዎ ሹማ አሳያ ሀይሳዳ ያግድ ኪትስ፤ 
\v 21 “ብድ ታ ግሾነ እስራኤለንነ ይሁዳን አትዳ አሳታ ግሾ ሀ በንትዳ ማፃፋን ፃፈትዳባ ጎዳ ኦይችተ። ሀ ማፃፋን ፃፈትዳ ኡባ ኦናዉ ኑ ማይዛት ጎዳ ቃላ ናግቦና ግሾ ጎዳይ ኑ ቦላ ባ ሀንቁዋ ጉስስ” ያግስ።
\p
\v 22 ካልቀይነ ካዎይ ኪትዳ አሳት ፆሳ ኬን ማኦ ናግያ ሀስራ ናአ፥ ትቁዋ ናአ፥ ሰለማ ማቾ ግድዳ ሁልዳ ጌተትያ ናበኮ ብድ እዮ ኦይችዶሶና። እያ የሩሳላመን ናምአን ካታማን ደአዉሱ።
\p
\v 23 ሁልዳ ኤንታኮ፥ “ጎዳይ እስራኤለ ፆሳይ፥ ‘ህንተና ታኮ ኪትዳ ኡራስ ሀይሳዳ ያግድ ኦድተ’ ያጋሱ። 
\v 24 ጎዳይ ሀይሳዳ ያጌስ፤ ‘ይሁዳ ካዋ ስንን ናባበትዳ ማፃፋን ፃፈትዳ ኢታ ባደ ኡባ ሀ በሳን ደእያ አሳ ቦላ ኤሀና ሀናይስ። 
\v 25 ኤንቲ ታና አግድ ሀራ ፆሳታስ እፃነ ጩይስዶሶና፤ ኤንቲ ባንታ ኩሸን ኦዳባን ታና ሀንቀዶሶና። ሄሳ ግሾ፥ ታ ሀንቆይ ሀ በሳን ትገታና፤ ተቀተና።’ 
\v 26 ጎዳ ኦይቻናዉ ህንተና ኪትዳ ይሁዳ ካዋኮ፥ ‘ጎዳይ እስራኤለ ፆሳይ ኔኒ ስእዳ ቃላባ ሀይሳዳ ያጌስ፤ 
\v 27 ሀ በሳንነ ሀ በሳን ደእያ አሳ ቦላ ፆሳይ ኦደትዳባ ኔኒ ስእዳ ዎደ ነ ዎዛናይ ቦሸትን፥ ታ ስንን ነናተ ካዉሽዳ ግሾነ ነ ማኡዋ ፔዳ ታ ስንን ዬክዳ ግሾ ታኒ ነ ዎሳ ስአስ። 
\v 28 ሄኮ፥ ታ ነና ነ ማይዛታ ጋና፤ ነ ሳሮ ሞገታና። ታ ሀ በሳንነ ሀ በሳን ደእያ አሳ ቦላ ኤሀና ኢታባ ነ አይፈይ በኤና’ ያግተ” ያጋሱ።
\p ኤንቲ ብድ ሀ ቃላ ካዋስ ኦድዶሶና።
\p
\v 29 ሄሳፈ ጉየ፥ ካዎይ እዮስያስ ይሁዳ ጭማታነ የሩሳላመ ጭማታ ኡባ ሺሽስ። 
\v 30 ካዎይ ፆሳ ኬ ከይስ፤ ይሁዳ አሳይ፥ የሩሳላመ አሳይ፥ ካህነትነ ሌወት፥ ጉፈ ግታ ጋካናዉ ኡባይ እያራ እስፈ ከይዶሶና። ፆሳ ኬን በንትዳ ጫቆ ማፃፋ ቃላ ኡባ ካዎይ ኤንታዉ ናባብስ። 
\v 31 ካዎይ ባ በሳን ኤቅድ፥ ጎዳ ኦገን ሄመታናዉነ እያ ህግያ፥ እያ ዎጋነ እያ ኪታ ባ ኩመ ዎዛናንነ ባ ኩመ ሸምፑዋን ናጋናዉ፥ ቃስ ሀ ማፃፋን ፃፈትዳ ጫቁዋ ኦናዉ ጎዳ ስንን ጫቅስ። 
\v 32 የሩሳላመንነ ብንያመን ደእያ አሳ ኡባይ ኤቅድ ጫቃና መላ ኦስ፤ የሩሳላመን ደእያ አሳይ ፆሳ፥ ባንታ ማይዛታ ፆሳ ጫቆይ ገይሳዳ ኦዶሶና።
\p
\v 33 እዮስያስ እስራኤለ ዛዋን ደእያ እፀትዳባ ኡባ ድግስ። እስራኤለን ደእያ ኡባይ ጎዳ፥ ባንታ ፆሳ ጎይናና መላ ኦስ። እዮስያስ ደእዳ ላይ ኡባን ኤንቲ ጎዳ፥ ባንታ ማይዛታ ፆሳ ካሎ አግቦኮና።
\c 35
\s1 እዮስያስ ፓስካ ባኣለ ቦንችስ
\r (2 ካዎ 23:21-23)
\p
\v 1 እዮስያስ የሩሳላመን ጎዳ ፓስካ ባኣለ ቦንችስ። ኮይሮ አጌናን ታማነ ኦይዳን ጋላስ ፓስካ ዶርሳ ሹክዶሶና። 
\v 2 እዮስያስ ካህነታ ኦሶን ሹምድ፥ ኤንታ ፆሳ ኬ ኦሶን ምንስ። 
\v 3 ባንታና ጎዳስ ዱማይዳ፥ እስራኤለ ኡባ ታማርስያ ሌወታ ሀይሳዳ ያግስ፤ “ጌሻ ታቦትያ ዳዊታ ናአይ፥ እስራኤለ ካዎይ ሶሎሞነይ ኬፅዳ ፆሳ ኬን ዎተ። ህዛፐ ጉየ ታቦትያ ህንተ ሀሸን ቶካናዉ ኮሸና። ሀእ ጎዳስ፥ ህንተ ፆሳስነ፥ እያ አሳ እስራኤለስ ኦተ። 
\v 4 እስራኤለ ካዎይ ዳዊቲነ እያ ናአይ ሶሎሞነይ ፃፍዳይሳዳ ህንተ ጩጋን ጩጋንነ ህንተ ሶ አሳን አሳን ህንተና ጊግስተ። 
\v 5 ሌወት ህንተ ዳቦታ፥ እስራኤለ ኮቻታ ማዳናዉ ህንተ ያራን ያራን ፆሳ ኬን ኤቅተ። 
\v 6 ጎዳይ ሙሰ ባጋራ ኦድዳ ቃላ እስራኤለ አሳይ፥ ህንተ ዳቦት ናጋና መላ ግግስተ፤ ህንተካ ህንተናተ ጌሽተ ፓስካ ዶርሳ ሹክተ” ያግስ።
\p
\v 7 እዮስያስ ሄ በሳን ደእያ አሳስ፥ ፓስካ ያርሾ ግዳና መላ 30,000 ዶርሰነ ዴሸ እሚስ፤ ቃስ 3,000 ኮርማታ እሚስ። ሄ ኡባ ካዎይ ባ ሻሉዋፐ እሚስ። 
\v 8 ካዎ ሹማት ባንታ ሸነን አሳስ፥ ካህነታስነ ሌወታስ ያርሾ መሄ እምዶሶና። ፆሳ ኬ ሀላቃት ካልቀይ፥ ዛካርያስነ ይኤል ፓስካ ያርሾስ ግድያ ናምኡ ሙኩሉነ ኡሱፑን ፄቱ ማራዘታ፥ ሄ ፄቱ ኮርማታ እምዶሶና። 
\v 9 ሌወታ ሀላቃት ኮናነይነ እያ እሻት፥ ሻማየይነ ናትናኤል፥ ቃስ ሀሻብ፥ ይኤልነ ዮዛባት ፓስካ ያርሾስ ሀንያ እቻሹ ሙኩሉ ማራዘታነ ኮለታ፥ እቻሹ ፄቱ ኮርማታ እምዶሶና።
\p
\v 10 ፓስካ ባልያስ ኡባባይ ጊግስ፤ ካዋ ኪታን፥ ካህነት ባንታ በሳን በሳን፥ ሌወት ባንታ ጩጋን ጩጋን ኤቅዶሶና። 
\v 11 ፓስካ ዶርሳት ሹከትዶሶና፤ ሌወት ጋልባ ቃርዶሶና፤ ካህነት ሱ ያርሾ በሳ ቦላ ርጮሶና። 
\v 12 ሙሰ ማፃፋን ፃፈትዳይሳዳ አሳይ ጎዳስ ያርሻና መላ ፁሳ ያርሾስ ጊግዳ ዶርሳታ አሹዋ ሌወት ባንታ ሶ አሳን አሳን ሻከትድ ኡትዳ እስራኤለ ያራታስ እምዶሶና፤ ኮርማታካ ሄሳዳ ኦዶሶና። 
\v 13 ሌወት ዎጋይ ኪተይሳዳ ሹከትዳ ፓስካ ዶርሳ አሹዋ ታማን ጫጭዶሶና፤ ጌሻ ያርሾታ ፃሮን፥ ኦቶንነ ድስተን ዶይስድ፥ እስራኤለ አሳ ኡባስ ኤሶን ሻክድ ሻክድ እምዶሶና።
\p
\v 14 ሄሳፈ ጉየ፥ ሌወት ባንታዉነ አሮና ኮቸ ግድዳ ካህነታስ ፓስካ ያርሾ ጊግስዶሶና። ሄሳ ኤንቲ ኦዳይ፥ ካህነት ፁሳ ያርሾነ ሞዋ ያርሽሸ ቃማ ጋካናዉ ኦያ ግሾሳ። 
\v 15 ዳዊቲ፥ አሳፍ፥ ሄማንነ ካዋ ናበይ ኤድታም ካሰ ኪትዳይሳዳ አሳፋ ያራት፥ ማዝሙረ የፀይሳት ባንታ በሳን ደኦሶና። ፐንገ ናገይሳት ባንታ በሳን ደኦሶና። ኤንታ ዳቦት፥ ሌወት ኤንታዉ ጊግስዳ ግሾ ኤንቲ ባንታ ኦሱዋ አግቦኮና።
\p
\v 16 ጎዳስ ኦያ ኦሶ ኡባይ፥ ፓስካ ባኣለ ቦንቾይነ ፁሳ ያርሾይ፥ ካዎይ እዮስያስ ኪትዳይሳዳ ሀንድ ሄ ጋላስ ጊግስ። 
\v 17 ያን ሺቅዳ እስራኤለ አሳይ ሄ ጋላስ ፓስካ ባልያ ቦንችዶሶና፤ ኤንቲ ኡይ ባኣለ ላፑን ጋላስ ቦንችዶሶና። 
\v 18 ናብያ ሳሜላ ዎድያፐ ዶምን፥ ሄሳ መላ ፓስካ ባለይ እስራኤለን ቦንቸትቤና። እዮስያስ፥ ካህነት፥ ሌወት፥ ይሁዳ አሳይ፥ እስራኤለ አሳይነ የሩሳላመ አሳይ ቦንችዳይሳዳ ፓስካ ባኣለ ካሰ እስራኤለ ካዎታፐ ቦንችዳ እሶይካ ባዋ። 
\v 19 ፓስካ ባለይ እዮስያስ ካዎትዳ ታማነ ሆስፑን ላይን ቦንቸትስ።
\s1 እዮስያሳ ዉርሰ
\r (2 ካዎ 23:28-30)
\p
\v 20 እዮስያስ ፆሳ ኬ ጊግስዳፐ ጉየ ግብፀ ካዎይ ናኮይ ኤፍራፂሳ ሻፋ ማታን ደእያ ካርካምሻን ኦለታናዉ ብስ። እዮስያስ እያ ተቃናዉ ከይስ። 
\v 21 ሽን ናኮይ እዮስያሳኮ አሰ ኪትድ፥ “ይሁዳ ካዋዉ፥ ታናነ ነና ካችያባይ አይቤ? ታኒ ይዳይ ታ ሞርከታ ኦላናሳፈ አትሽን፥ ነና ኦላናሳ ግደና። ታ ሞርከታ ታኒ ኤሶን ኦላናዳ ፆሳይ ታና ኪትስ። ፆሳይ ነና ይሶናዳ ታራ ደእያ ፆሳራ ኤቀተይሳ አጋ” ያግስ።
\p
\v 22 ግዶሽን፥ እዮስያስ ጎዳይ ናኮ ባጋራ ኦድዳይሳ ስኦናነ ጉየ ስሞና እፅስ። ባ ካዎ ማኡዋ ላምድ ማግዶ ደንባን ኦለታናዉ ብስ።
\p
\v 23 ዶንገን ዱከይሳት ካዋ እዮስያሳ ጫድን፥ ካዎይ ባ አይለታኮ፥ “ታኒ ኢታ ጫደትዳ ግሾ ታና ኦላ ግዶፈ ከስተ” ያግስ። 
\v 24 እዮስያሳ ፓራ ጋርያፐ ዎስድ፥ እያ ፓራ ጋርያን ዎድ፥ እያ የሩሳላመ ኤህዶሶና። እ ያን ሀይቅድ ባ ማይዛታ ዱፎን ሞገትስ። ይሁዳ አሳይነ የሩሳላመ አሳ ኡባይ እያዉ ዬክዶሶና።
\p
\v 25 ናበይ ኤርምያስ እዮስያሳስ ዘለልስ ከስድ ፃፍስ። ዘሌልድ ዬክያ ማጫሳይነ አደ ኡባይ ሀች ጋካናዉ እዮስያሳስ ቆፖሶና። ሄ ዘለልሳይ እስራኤለ ዬሆ ዘለልሳ ማፃፋን ፃፈትስ።
\p
\v 26 እዮስያስ ኦዳ ሀራባይ፥ ጎዳ ህገን ማፃፋን ፃፈትዳይሳ መላ እ ኦዳ ሎኦ ኦሶይነ 
\v 27 ኮይሮፐ ዉርሰ ጋካናዉ እ ኦዳ ኡባይ፥ ሄኮ፥ እስራኤለ ካዎታነ ይሁዳ ካዎታ ታርከ ማፃፋን ፃፈትስ።
\c 36
\s1 ይሁዳ ካዋ እዮአካዛ
\r (2 ካዎ 23:30-35)
\p
\v 1 ሄ ቢታ አሳይ እዮስያሳ ናኣ እዮአካዛ ዶርድ እያ አዋ በሳን የሩሳላመን ካዎዶሶና። 
\v 2 እዮአካዝ ካዎትያ ዎደ እያዉ ላይ ላታማነ ሄ፤ እ የሩሳላመን ሄ አጌና ካዎትስ። 
\v 3 ግብፀ ካዎይ እዮአካዛ ካዎተፈ ዎስ፤ ሄ ሙኩሉነ ኦይዱ ፄቱ ክሎ ግራመ ብራነ ሀስታማነ ኦይዱ ክሎ ግራመ ዎርቃ ይሁዳ አሳይ ጊራና መላ ኦስ። 
\v 4 ግብፀ ካዎይ፥ ናኮይ፥ እዮአካዛ እሻ ኤልያቄመ ይሁዳ ቦላነ የሩሳላመ ቦላ ካዎድ እያ ሱን እዮአቄማ ያግድ ላምስ። ያትድ እዮአቄማ እሻ እዮአካዛ ግብፀ ኤፍስ።
\s1 ይሁዳ ካዋ እዮአቄማ
\r (2 ካዎ 23:36—24:7)
\p
\v 5 እዮአቄም ካዎትያ ዎደ እያዉ ላይ ላታማነ እቻሻ፤ እ የሩሳላመን ታማነ እስ ላይ ካዎትስ። ባ ጎዳ ፆሳ ስንን ኢታባ ኦስ። 
\v 6 ባብሎነ ካዎይ ናቡካዳናፆር እያ ኦልድ፥ ባብሎነ ኤፋናዉ ናሰ ብራታ ሳንላታን ቃችስ። 
\v 7 ቃስ ናቡካዳናፆር ፆሳ ኬ ሚሽያ ኤክድ ባብሎነ ኤፍድ፥ ባ ካዎ ጋን ዎስ።
\p
\v 8 እዮአቄም ኦዳ ሀራባይ፥ ኦዳ ቱናባይነ ኦዳ ኢታባ ኡባይ፥ ሄኮ፥ እስራኤለ ካዎታነ ይሁዳ ካዎታ ታርከ ማፃፋን ፃፈትስ። እ ሀይቅን፥ እያ በሳን እያ ናአይ ዮአክን ካዎትስ።
\s1 ይሁዳ ካዋ ዮአክና
\r (2 ካዎ 24:8-17)
\p
\v 9 ዮአክን ካዎትያ ዎደ እያዉ ላይ ሆስፑና፤ እ የሩሳላመን ሄ አጌናነ ታሙ ጋላስ ካዎትስ። እ ጎዳ ስንን ኢታባ ኦስ። 
\v 10 ላይ ላመን፥ ካዎይ ናቡካዳናፆር አሰ ኪትድ፥ ዮአክናነ ፆሳ ኬን ደእያ አልኦ ሚሸታ እያራ እስፈ ባብሎነ ኤህስ። ያትድ እያ አዋ እሻ ሰደቅያሳ ይሁዳነ የሩሳላመ ቦላ ካዎስ።
\s1 ይሁዳ ካዋ ሰደቅያሳ
\r (2 ካዎ 24:18-20፤ ኤርም 52:1-3)
\p
\v 11 ሰደቅያስ ካዎትያ ዎደ እያዉ ላይ ላታማነ እስኖ፤ እ የሩሳላመን ታማነ እስ ላይ ካዎትስ። 
\v 12 ባ ጎዳ ፆሳ ስንን ኢታባ ኦስ፤ ቃስ ጎዳ ቃላ ኦድያ ናብያ ኤርምያሳ ስንን ባና ካዉሽቤና።
\p
\v 13 ሰደቅያስ፥ አማነታና መላ ባና ፆሳ ሱንን ጫቅስዳ ናቡካዳናፆራ ቦላ ማካልስ። ጎዳ፥ እስራኤለ ፆሳኮ ስሞና እፅስ፤ ባ ዎዛና ፆሳ ቦላ ምንስ። 
\v 14 ቃስ፥ ይሁዳ አሳይነ ኤንታ ካለያ ካህነት፥ አማነቶና እፅዶሶና። ኤንቲ ሀራ ካዎተት ኦያ እፀትዳ ኦሶታ ካልድ፥ ጎዳይ የሩሳላመን ጌሽዳ ፆሳ ኬ ቱንስዶሶና።
\s1 የሩሳላመ ኩንደ
\r (2 ካዎ 25:1-21፤ ኤርም 52:3-11)
\p
\v 15 ጎዳይ፥ ኤንታ ማይዛታ ፆሳይ ባ አሳስነ ባ ኬስ ቃትያ ግሾ፥ ባ ናበታ ኤንታዉ ዛር ዛር ኪትስ። 
\v 16 ሽን ጎዳ ሀንቆይ ኤንታ ቦላ ዎና ጋካናዉነ ኤንቲ ከስ ኤክያሶ ያና ጋካናዉ ፆሳ ኪታንቾታ ቀልቅስዶሶና፤ እያ ቃላ ካዶሶና፤ ናበታ ቦላ ሚጭዶሶና። 
\v 17 ሄሳ ግሾ፥ ጎዳይ ካልዳወታ ካዋ ኤንታ ቦላ ደንን፥ እ ኤንታ ያላጋ አደታ ፆሳ ኬን ማሻን ዎስ። እ ያላጋ አደታስ ዎይኮ ጌላኦታስ ዎይኮ ጭማታስ ዎይኮ ጬጋታስ ቃቶና ዉርስስ። ፆሳይ ኤንታ ኡባ ናቡካዳናፆራ ኩሸን አድ እሚስ። 
\v 18 ባብሎነ ካዎይ ፆሳ ኬን ደእያ ሚሸታ ኡባ፥ ግታነ ጉ፥ ፆሳ ኬን ደእያ ቡቁራ፥ ካዎ ቡቁራነ እያ ሞርናታ ቡቁራ ኡባ ኤክድ ባብሎነ ኤፍስ። 
\v 19 ኤንቲ ፆሳ ኬ ታማን ፁግድ፥ የሩሳላመ ግምበ ድርሳ ላልዶሶና። ካዎ ጋዋ ታማን ፁግድ፥ ያን ደእያ አልኦ ሚሸ ኡባ ይስዶሶና።
\p
\v 20 ማሻፈ አትዳይሳታ ካዎይ ድእድ ባብሎነ ኤፍስ። ፋርሰ ካዎተይ ደንዳና ጋካናዉ ኤንቲ እያዉነ እያ ናይታስ አይለ ግድዶሶና። 
\v 21 ጎዳይ ናብያ ኤርምያሳ ባጋራ ኦድዳ ቃላይ ፖለትስ። ዉርሰን ቢታይ ላፑን ታሙ ላይ አስ ባይና በሲ ግድድ ሸምፕስ። ቢታይ ሳምባታ ሸምፖ ደምስ።
\p
\v 22 ፋርሰ ካዎይ ቅሮስ ካዎትዳ ኮይሮ ላይን ናብያ ኤርምያሳ ባጋራ ጎዳይ ኦድዳይሳ ፖልስ። ፋርሰ ካዎይ ቅሮስ ባ ካዎተን ኡባን ሀይሳዳ ያግድ አዋጃና መላነ ፃፍድ ዎና መላ ጎዳይ እያ አያና ደንስ። 
\v 23 ፋርሰ ካዎይ ቅሮስ፥ “ጎዳይ፥ ሳሎ ፆሳይ ሀ ሳኣ ካዎተታ ኡባ ታዉ እሚስ። ቃስ ይሁዳን ደእያ የሩሳላመን ታ እያዉ ፆሳ ኬ ኬፃና መላ ታና ሹምስ። ፆሳ አስ ግድዳ ኦንካ ያ ቦ። ጎዳይ እያ ፆሳይ እያራ ግዶ” ያግስ።