\id 1CO - GOOFA FULL BIBLE
\ide UTF-8
\h 1 ቆሮንቶሳ ኪታ
\toc1 1 ቆሮንቶሳ ኪታ
\toc3 1 ቆሮ
\toc2 1 ቆሮንቶሳ
\mt1 ጳዉሎስ ቆሮንቶሳ አሳስ
\mt2 ፃፍዳ ኮይሮ ኪታ
\imt ጋ ቆፋ
\ip ጳዉሎስ ቆሮንቶሳ አሳስ ፃፍዳ ኮይሮ ኪታይ ፃፈትዳይ፥ ጳዉሎስ ቆሮንቶሳን ኤስዳ ዎሳ ኬን አማንያ አሳ ደኦንነ አማኖ ቦላ ደንድዳ መቱዋስ ዛሮ እማናሳ። ሄ ዎደ ቆሮንቶሳ ካታማይ፥ ዱማ ዱማ አሳይ ደእያ ግርከ ካታማነ አካያ ቢታስ ዋና ካታማ። ቆሮንቶሳ ካታማይ ዛልኤን ኤረትዳ፥ ዎጋን ምንዳ፥ ዱማ ዱማ ኢታ ደኦን ዳልግዳነ ሀይማኖተ ዳሮተን ኤረትዳ ቢታ።
\ip ሀ ኪታን፥ ሀዋረይ ምንድ ኦደይ፥ ቆሮንቶሳ ዎሳ ኬን መትዳ ሻሄተባ፥ ዱማ ዱማ ኢታ ደኦባ፥ ላይማተባ፥ ኤኮ ገሎባ፥ ጌሻ አያና እሞታታባነ ሀይቆፐ ደንዶባ። የሱስ ክርስቶሳ ዎንገል ሀ ኦይሻታ ዋትድ ዛርያኮ ሀዋረይ ምንድ ኦዴስ።
\ip ጳዉሎስ፥ ሸምፖ ታማነ ሄን፥ ሲቆይ አማኖፐ፥ ኡፋይሳፈነ ዱማ ዱማ ጌሻ አያና እሞታታፐ ኦዴስ። አማንያ አሳይ እሶይ እሱዋ ሲቅያባ ግድኮ፥ ዎሳ ኬን መትያ መቶት ቃንን ስሜስ። ሲቆይ ይኮ፥ ፓላም፥ ሻከተ፥ እፆይነ ሄሳ ሄሳ መላባት ዳሬስ።
\iot ማፃፋ አይፈ ቆፋታ
\io1 ገሎ ቆፋ (\ior 1:1-9\ior*)
\io1 አማንያ አሳ ግዶን መትዳ ሻከተ (\ior 1:9—4:21\ior*)
\io1 ላይማተነ እሶይ እሱዋራ ስጋ ደኦ (\ior 5:1—7:40\ior*)
\io1 ኤቃ አግድ ፆሰ ቦንቾ (\ior 8:1—11:1\ior*)
\io1 ዎሳ ኬነ ጎይኖ ዎጋ (\ior 11:2—14:40\ior*)
\io1 ክርስቶስ ሀይቆ ፆንድ ደንድስ (\ior 15:1-58\ior*)
\io1 መቶተትዳ አሳስ እመትያ እሞታ (\ior 16:1-4\ior*)
\io1 ኦገ ቡሳ ሀልቾነ ሳሮ (\ior 16:5-24\ior*)
\c 1
\p
\v 1 ፆሳ ሸንያን የሱስ ክርስቶሳ ሀዋረ ግዳናዉ ፄገትዳ ጳዉሎስነ፥ ኑ እሻ ሶስተኔስ፥ 
\v 2 ቆሮንቶሳን ደእያ ፆሳ ዎሳ ኬስ፥ የሱስ ክርስቶሳን ጌይዳይሳታስነ ጌሽ ግዳና መላ ፄገትዳይሳታስ፤ ቃስ ኤንታዉነ ኑስ ጎዳ ግድያ ኑ ጎዳ የሱስ ክርስቶሳ ሱን ኡባ በሳን ፄግያ ኡባስ።\x - \xo 1:2 \xo*\xt ሀዋ 18:1.\xt*\x*
\p
\v 3 ፆሳይ፥ ኑ አዋይነ ጎዳይ የሱስ ክርስቶሲ ህንተዉ አ ኬሀተነ ሳሮተ እሞ።
\s1 ጳዉሎስ ፆሰ ጋላቴስ
\p
\v 4 ፆሳይ ክርስቶስ የሱሳ ባጋራ ህንተዉ እምዳ አ ኬሀተ ግሾ፥ ታኒ ኡባ ዎደ ፆሳ ጋላታይስ። 
\v 5 እያን ኦዳንነ ኤራተ ኡባን ህንተ ዱረትደታ። 
\v 6 ታኒ ክርስቶሳባ ማርካትዳይስ ቱማ ግደይሳ ሄስ ቆንጭሴስ። 
\v 7 ሄሳ ግሾ፥ ህንተ ኑ ጎዳ የሱስ ክርስቶሳ ዩሳ ናግሸ ደእሽን፥ አይ አያና እሞይካ ህንተዉ ፓጨና። 
\v 8 ኑ ጎዳ የሱስ ክርስቶሲ ስምያ ዎደ ህንተ ቦረቶናይሳታ ግዳና መላ ዉርሰ ጋካናዉ እ ህንተና ምንና። 
\v 9 ባ ናአ፥ ኑ ጎዳ፥ የሱስ ክርስቶሳራ እስፈተ ዳና መላ ህንተና ፄግዳ ፆሳይ አማነትዳይሳ።
\s1 ዎሳ ኬን ደእያ ሻከተ
\p
\v 10 ታ እሻቶ፥ ህንተ ግዶን ሻከተ ዶና መላነ ህንተ እስ ዎዛናንነ እስ ቆፋን እሶ ግድድ ዳና መላ፥ ኑ ጎዳ የሱስ ክርስቶሳ ሱንን ህንተና ዎሳይስ። 
\v 11 ታ እሻቶ፥ ቀሎኤ ሶ አሳይ ህንተ ግዶን ኦሽ ደኤይሳ ታዉ ኦድዶሶና። 
\v 12 ታ ህንተዉ ኦደይስ ሀይሳ፦ ህንተፈ እሶት እሶት፥ “ታኒ ጳዉሎሳሳ፤ ታኒ አጵሎሳሳ፤ ታኒ ጰፅሮሳሳ፤ ታኒ ክርስቶሳሳ” ያጌታ።\x - \xo 1:12 \xo*\xt ሀዋ 18:24.\xt*\x* 
\v 13 ክርስቶስ ሻከትደዬ? ህንተ ግሾ፥ ማስቃልያ ቦላ ካቀትዳይ ጳዉሎሰዬ? ዎይኮ ህንተ ጳዉሎሳ ሱንን ፃማቀትደትዬ?
\p
\v 14 ታኒ ቃርስጶስነ ጋዮስ አትሽን፥ ህንተፈ ኦናካ ፃማቃቦና ግሾ፥ ፆሰ ጋላታይስ።\x - \xo 1:14 \xo*\xt ሀዋ 18:8፤ ሀዋ 19:29፤ ሮመ 16:23.\xt*\x* 
\v 15 ሄሳ ግሾ፥ ኦንካ ህንተና ታ ሱንን ፃማቀትደታ ጋናዉ ዳንዳኤና። 
\v 16 [ቃስ እስፅፋኖሰ ሶ አሳካ ታ ፃማቅዳይሳ አኬካይስ፥ ሽን ሀራ ኦና ፃማቅዳኮ ሀሳይከ።] 
\v 17 ክርስቶስ ታና ኪትዳይ ዎንገላ ኦዳና መላሳፈ አትሽን፥ ፃማቃና መላ ግደና። ክርስቶስ ማስቃለይ ሀዳ ግዶና መላ ታኒ አሳ ጭንጫተ ቃላን ኦድከ።
\s1 ክርስቶስ ፆሳ ዎልቃነ ጭንጫተ
\p
\v 18 ክርስቶሳ ማስቃላ ቃላይ የይሳታስ ኤያተ፥ ሽን ኑስ አተይሳታስ ፆሳ ዎልቃ። 
\v 19 ጌሻ ማፃፋን፥
\q1 “ታኒ ጭንጫታ ጭንጫተ ይሳና፤
\q2 አኬካንቾታ አኬካ ባለና”
\m ያጌስ።\x - \xo 1:19 \xo*\xt እሳ 29:14.\xt*\x*
\p
\v 20 ያትን፥ ጭንጭ አዉን ደኢ? ህገ አስታማረይ አዉኔ? ዎይኮ ሀ ሳአ ኤራንቾይ አዉን ደኢ? ፆሳይ ሀ ሳኣ ጭንጫተ ኤያተ ኦቤኔ?\x - \xo 1:20 \xo*\xt እዮ 12:17፤ እሳ 19:12፤ 33:18፤ 44:25.\xt*\x*
\p
\v 21 ሀ ሳኣ አሳይ ባንታ ጭንጫተን ፆሳ ኤሮና መላ ባ ጭንጫተን ድግድ፥ ኤያተን ታይበትያ፥ ኑኒ ኦድያ ቃላን አማነይሳታ አሻናዉ ፆሳ ሸነ ግድስ። 
\v 22 አይሁደት ማላታ በአናዉ ኮዮሶና፤ ቃስ ግርከት ጭንጫተ ኮዮሶና። 
\v 23 ሽን ኑኒ ማስቃለ ቦላ ካቀትዳ ክርስቶሳ ሳባኮስ። ሄስ አይሁደታስ በ፤ ቃስ ግርከታስ ኤያተ ግድስ። 
\v 24 ሽን ፆሳይ ፄግዳይሳታስ፥ አይሁደ ግድን፥ ግርከ ግድን ክርስቶስ ፆሳ ዎልቃነ እያ ጭንጫተ። 
\v 25 ፆሳ ኤያተ አሳ ጭንጫተፈ አስ፤ ቃስ ፆሳ ዳቡራይ አሳ ምኖተፈ ምኔስ።
\p
\v 26 ህዛ፥ ታ እሻቶ፥ ፆሳይ ህንተና ፄግያ ዎደ ህንተ አይ መላ አሴኮ ቆፕተ። አሳ ቆፋን፥ ህንተ ግዶፈ ዳሮት ጭንጫ፥ ዎልቃማነ ቃ ኮቸ ግደከታ። 
\v 27 ሽን ፆሳይ ጭንጫታ ዬላያናዉ አላመን ደእያ ኤያታ ዶርስ፤ ቃስ ምኖታ ዬላያናዉ አላመን ደእያ ዳቡራንቾታ ዶርስ። 
\v 28 ሀ አላምያን ግታ ጌተትዳባ ይሳናዉ፥ ፆሲ፥ ሀ ሳኣ ካዉሻባ፥ ካትዳባነ ፓናባ ዶርስ። 
\v 29 ፆሳ ስንን ኦንካ ጬቀቶና መላ ሄሳ ኦስ። 
\v 30 ሽን፥ ህንተዉ ክርስቶስ የሱሳራ እስፈተ ዳና መላ ፆሳይ ሄሳ ኦስ። እ፥ ኑስ ፆሳፈ ጭንጫተ፥ ፅሎተ፥ ጌሻተነ አቶተ ግድስ። 
\v 31 ሄሳ ግሾ፥ ጌሻ ማፃፋን፥ “ጬቀትያ ኦንካ ጎዳን ጬቆ” ያጌስ።\x - \xo 1:31 \xo*\xt ኤርም 9:24.\xt*\x*
\c 2
\p
\v 1 ታ እሻቶ፥ ታኒ ኮይሮ ፆሳ ቃላ ህንተዉ ኦዳሸ ይዳ ዎደ፥ ዶና ብላተንነ ጭንጫተን ያቢከ። 
\v 2 ታኒ ህንተራ ደእያ ዎደ ማስቃልያ ቦላ ካቀትዳ የሱስ ክርስቶሳፐ አትሽን፥ ሀራባ ኤራናዉ ኮይከ ጋዳ ታ ቆፋ ቃቻስ። 
\v 3 ታ ህንተራ ደእያ ዎደ ዳቡራን፥ ያሻንነ ዳሮ ኮኮርሳን ደአስ።\x - \xo 2:3 \xo*\xt ሀዋ 18:9.\xt*\x* 
\v 4 ታ ኪታይነ ታ ትምርተይ ዶና ብላተንነ ጭንጫተን ግዶናሽን፥ ጌሻ አያና ዎልቃ ቆንጭሰና። 
\v 5 ሄስካ፥ ህንተ አማኖይ ፆሳ ዎልቃናፐ አትሽን፥ አሳ ጭንጫተን ዘምፖና መላሳ።
\s1 ፆሳ ጭንጫተ
\p
\v 6 አያና ደኦን ድጭዳይሳታስ ኑኒ ጭንጫተ ቃላን ኦዶስ። ሽን ሄ ጭንጫተይ፥ ሀ ሳአ ጭንጫተ ዎይኮ ያናዉ ደእያ ሀ ሳአ ሃረይሳታ ጭንጫተ ግደና። 
\v 7 ሽን ኑኒ ኦድያ ጭንጨተይ፥ ዳሮ ዎደፐ ስን ፆሳይ ኑ ቦንቹዋስ ጊግስዳይሳነ ጌምድ ደእያ ፁራ ጭንጫተ። 
\v 8 ሀ ሳኣ ሃረይሳታፐ ኦንካ ሀ ጭንጫተ ኤርቦኮና። ኤንቲ ኤርዳባ ግድያኮ፥ ቦንቾ ጎዳ ማስቃልያ ቦላ ካቆኮና። 
\v 9 ሽን ጌሻ ማፃፋን፥
\q1 “አይፈይ በእቦናባ፥
\q2 ሀይ ስእቦናባ፥
\q2 ዎዛን ቆፕቦናባ፥
\q2 ፆሳይ ባና ዶሰይሳታስ ጊግስስ” ያጌስ።\x - \xo 2:9 \xo*\xt እሳ 64:4.\xt*\x*
\m
\v 10 ፆሳይ ባ ፁራ ባ አያና ባጋራ ኑስ ቆንጭስስ። ጌሻ አያናይ ሀር አቶሽን፥ ጌምዳ ፆሳ ፁራ ኡባ ፕልጌስ። 
\v 11 አሳን ደእያ አሳ አያናፐ አትሽን፥ አሳባ ኦንካ ኤረና። ሄሳዳካ፥ ፆሳባ፥ ፆሳ አያናፐ አትሽን፥ ኦንካ ኤረና። 
\v 12 ፆሳይ ኑስ ጮ እምዳባ ኑ ኤራና መላ ፆሳ አያና ኤክዳፐ አትሽን፥ ሀ ሳአ አያና ኤክቦኮ።
\p
\v 13 ኑኒ አያናባ፥ አያና አሳታስ አሳ ጭንጫተን ግዶናሽን፥ ፆሳ አያናይ እምያ ጭንጫተን ታማርሶስ። 
\v 14 ጌሻ አያን ባይና አስ ፆሳ አያና እሞታታ ኤከና። ሄስ እያዉ ኤያተ፤ ኡባይ ጌሻ አያናን ፕልገትያ ግሾ፥ እ ኤራናዉ ዳንዳኤና። 
\v 15 ጌሻ አያን ደእያ አስ ኡባባ ፕልጌስ፥ ሽን እያ ኦንካ ፕልገና። 
\v 16 ጌሻ ማፃፋን፥
\q1 “ጎዳ ዎዛና ኤረይ ኦኔ?
\q2 እያ ዞራናዉ ዳንዳኤይ ኦኔ?”
\m ጌተትድ ፃፈትዳይሳ መላ። ሽን ኑስ ክርስቶሳ ዎዛን ደኤስ።\x - \xo 2:16 \xo*\xt እሳ 40:13.\xt*\x*
\c 3
\s1 ዎሳ ኬን ደእያ ሻከተ
\p
\v 1 ታ እሻቶ፥ ህንተ ክርስቶሳን ቡሮ ዮጋነ አማኖና አሳ ደእያ ግሾ፥ ታኒ አያናባ ህንተዉ ኦዳናዉ ዳንዳአብከ። 
\v 2 ህንተ ምኖ ካ ማናዉ ዳንዳእቦና ግሾ፥ ታኒ ህንተና ማ ፓሀስ፤ ሀእካ ዳንዳእቤከታ።\x - \xo 3:2 \xo*\xt እብራ 5:12-13.\xt*\x* 
\v 3 ሀእካ ህንተ አማኖና አሳዳ ደኤታ። ህንተ ግዶን ደእያ ቃናተይነ ኦሽ ህንተ አማኖና አሳዳ ደኤይሳ ኤርሰኔ? ህንተ አማኖና አሳዳ ሀኔታ። 
\v 4 ህንተፈ እሶይ፥ “ታኒ ጳዉሎሳሳ” ሀራይ ቃስ፥ “ታኒ አጵሎሳሳ” ጊኮ፥ አማኖና አሳ መላ ግደከቲ?\x - \xo 3:4 \xo*\xt 2 ቆሮ 1:12.\xt*\x*
\p
\v 5 ያትን፥ አጵሎስ ኦኔ? ጳዉሎስ ኦኔ? ኑኒ ህንተና አማንዳ ፆሳ ኦሳንቾታ። ፆሳይ እሱዋስ እሱዋስ እምዳ እሞታ መላ ኦያ ኦሳንቾታ ግዶኮናዬ? 
\v 6 ታኒ ቶካስ፤ አጵሎስ ሃ ኡሽስ፥ ሽን ድቸይ ፆሰ።\x - \xo 3:6 \xo*\xt ሀዋ 18:4-11፥ 24-28.\xt*\x* 
\v 7 ሄሳ ግሾ፥ ድችያ ፆሳፈ አትሽን፥ ቶከይካ ሃ ኡሸይካ አይኮካ ግደና። 
\v 8 ቶከይነ ሃ ኡሸይ ዎል መላ፥ ሽን እሶይ እሶይ ባ ኦሱዋ መላ ፆሳይ እምያ ዎይቱዋ ኤካና። 
\v 9 ኑኒ እስፈ ፆሳስ ኦያ እያ ኦሳንቾታ ግድያ ግሾ፥ ህንተ ፆሳ ሾቃ፤ ፆሳ ኬ። 
\v 10 ፆሳይ ታዉ እምዳ አ ኬሀተ መላ ሂላንቾ አናፀዳ ባሶ የጋስ። ሀራ አስ እያ ቦላ ኬፄስ። ሽን እያ ቦላ ኬፅያ ኦንካ ዋትድ ኬፅያኮ፥ ባዉ ናገቶ። 
\v 11 እስ ቶሆ የገትዳ ባሶፐ ሀራ ባሶ የጋናዉ ኦንካ ዳንዳኤና። ሄ ባሶይካ የሱስ ክርስቶሳ። 
\v 12 ሽን ሀ ባሱዋ ቦላ ኦንካ ዎርቃን ዎይኮ ብራን ግድን፥ አልኦ ሹቻን ዎይኮ ምን ግድን፥ ማታን ዎይኮ ማቃን ኬፅኮ፥ 
\v 13 እስ እስ አስ ሄ ባሱዋ ቦላ አይብን ኬፅዳኮ ፕርዳ ጋላስ ታማን ፓጨትድ ቆንጫና። 
\v 14 ኦንካ ሄ ባሱዋ ቦላ ኬፅዳ ኬይ ታማን ፁገቶና አትኮ፥ ባ ዎይቱዋ ኤካና። 
\v 15 ሽን ኦደ ኦሶይካ ታማን ፁገትኮ፥ ሄ ኡራስ ዎይቶይ ባዋ። ግዶሽን፥ እ ባ ሁጰን ታማፐ ከስ ኤክዳ አሳዳ አታና።
\p
\v 16 ህንተ ፆሳ ኬ ግደይሳነ ፆሳ አያን ህንተናን ደኤይሳ ኤረከቲ? 
\v 17 ኦንካ ፆሳ ኬ ላልኮ፥ ፆሲ እያ ላላና። ፆሳ ኬ ጌሽ፤ ሄ ኬይካ ህንተና።
\p
\v 18 ኦንካ ባና ጭሞፎ። ሀ ሳኣ ጭንጫተን ባና ጭንጫ ኦድ ኤክያ ኦንካ ፆሳ ስንን ጭንጫ ግዳናዉ ኤያ ግዶ። 
\v 19 ሀ ሳአ ጭንጫተይ ፆሳ ስንን ኤያተ። ጌሻ ማፃፋን፥
\q1 “ፆሳይ ጭንጫታ ኤንታ ገነ ቆፋን ኦይኬስ” ያጌስ።\x - \xo 3:19 \xo*\xt እዮ 5:13.\xt*\x*
\q1
\v 20 ቃስ፥ “ጭንጫታ ቆፋይ ማዶናባ ግደይሳ ጎዳይ ኤሬስ” ያጌስ።\x - \xo 3:20 \xo*\xt ማዝ 94:11.\xt*\x*
\p
\v 21 ሄሳ ግሾ፥ ኡባይ ህንተባ ግድያ ግሾ፥ ኦንካ አሳን ጬቀቶፎ። 
\v 22 ጳዉሎስ፥ አጵሎስነ ጰፅሮስ፥ ሀ አላመይ፥ ደኦይ፥ ሀይቆይ፥ ሀእ ደኤይ፥ ስንፈ ያናይስ፥ ኡባይ ህንተሳ። 
\v 23 ህንተ ክርስቶሳሳ፤ ክርስቶስ ፆሳሳ።
\c 4
\s1 ክርስቶሳ ሀዋረታ
\p
\v 1 አሳይ ኑና ክርስቶሳ አይለዳነ ፆሳ ፁራ ቆንጭሳናዉ ሀዳር እመትዳ አሳዳ ኦድ ቆፖ። 
\v 2 ሀዳራ ኤክዳ አሳት ባንታ ጎዳስ አማነትዳይሳታ ግዳናዉ በሴስ። 
\v 3 ሽን ህንተ ዎይኮ ሀር ታና ፕርድኮ፥ ታዉ አይኮካ ግደና። ሀር አቶሽን፥ ታካ ታ ቦላ ፕርድከ። 
\v 4 ታ ካሀይ ጌሽ፥ ሽን ሄስ ታኒ ፖሎ ፅሎ ግደይሳ በሰና። ታ ቦላ ፕርዳናይ ጎዳ ፃላላ። 
\v 5 ሄሳ ግሾ፥ ዎደይ ጋኮና፥ ጎዳይ ዮና ኦደ ቦላካ ፕርዶፍተ። እ ማን ጌምዳባ ፖኦን ከሰና፤ አሳ ዎዛናን ቆሰትዳ ቆፋ ቆንጭሳና። ሄ ዎደ፥ እሶይ እሶይ ፆሳፈ ጋላታ ኤካና።
\p
\v 6 ታ እሻቶ፥ ህንተ ግሾ፥ ታናነ አጵሎሳ፥ ህንተዉ ሌምሶ ኦዳ ኦዳስ። ሄሳ ታ ኦዳይ፥ “ፃፈትዳይሳፈ አፋ” ግያ ዞርያ ህንተ ኑፐ ታማራና መላሳ። ሄሳ ግሾ፥ ኦንካ እሱዋ ሳብድ ሀንኩዋ ካናዉ በሰና። 
\v 7 ነ ሀራታፐ አይብን አይ? ኔኒ ኤካቦናባይ አይብ ደኢ? ኔኒ ኤክዳባ ሀራ አሳፐ ኤክዳ ግድኮ፥ ያትን፥ ኤክቦና አሳዳ አይስ ጬቀታይ?
\p
\v 8 ሀእ ህንተ ካልደታ። ሀእ ህንተ ዱረትደታ። ኑኒ ባይና ህንተ ፃላላ ካዎትደታ። ህንተ ቱማ ካዎትዳባ ግድያኮ፥ ኑካ ህንተራ ካዎታናሽን። 
\v 9 ታዉ፥ ፆሳይ ኑና ሀዋረታ፥ ሀይቆስ ፕርደትዳ አሳዳ፥ አሳ ኡባፈ ኑና ጉየ አዳ ዳኔስ። ኑኒ ሀ አላምያስ፥ ኪታንቾታስነ አሳስ ካሳባ ግድዳ።
\p
\v 10 ኑኒ ክርስቶሳ ግሾ ኤያ ግድዳ፥ ሽን ህንተ ክርስቶሳን ጭንጫታ ግድደታ። ኑኒ ዳቡራንቾ፥ ሽን ህንተ ምኖ ግድደታ። ህንተ ቦንቸትደታ፥ ሽን ኑኒ ቶሸትዳ። 
\v 11 ሀእ ጋካናዉ ኑ ኮሻቶስ፥ ሳሞቶስ፥ ካሎቶስ፥ ዋቶስ፤ ዳና ሶ ይድ ቶይላቶስ። 
\v 12 ኑኒ ኑ ኩሸን ኦድ አቆስ። ኑና አስ ባድያ ዎደ አንጆስ፤ ኑና ጎድያ ዎደ ዳንዳኦስ።\x - \xo 4:12 \xo*\xt ሀዋ 18:3.\xt*\x* 
\v 13 ኑ ቦላ ኢታባ ኦደትያ ዎደ ሎኦ ቃላ ዛሮስ። ኑ ሀእ ጋካናዉ ሀ አላምያ ፕቶነ ዎራ የገትያ ቡረ ግድዳ።
\p
\v 14 ታኒ ሄሳ ፃፍዳይ፥ ታ ዶስያ ናይታዳ፥ ህንተና ዞራናዉ ፃፋስፐ አትሽን፥ ዬላያናዉ ግደና። 
\v 15 ክርስቶሳን ህንተና ድችያ ታይቦፐ ቦላ ግድዳ ካለይሳት ደእኮካ፥ ህንተዉ ዳሮ አዋት ዶኮና። ታ ህንተና ክርስቶስ የሱሳ ዎንገላን የላስ። 
\v 16 ህዛ፥ ህንተ ታና ሌምሶ ኦድ ካላና መላ ህንተና ዎሳይስ።\x - \xo 4:16 \xo*\xt 2 ቆሮ 11:1፤ ፍልጵ 3:17.\xt*\x* 
\v 17 ሄሳ ግሾ፥ አማነትዳ፥ ታ ዶስያ፥ ጎዳን ታ ናአ፥ ፅሞትዮሳ ህንተኮ ኪታይስ። እ ዱማ ዱማ በሳን ደእያ ዎሳ ኬን ታኒ ታማርስዳ፥ ክርስቶሳ የሱሳን ደእያ፥ ታ ኦግያ ህንተና ሀሳይሳና።
\p
\v 18 ታኒ ህንተኮ ዮናባ ዳንን፥ ኦቶርትያ እስ እስ አሳት ደኦሶና። 
\v 19 ሽን ጎዳይ ጊኮ፥ ማታ ዎደ ታኒ ህንተኮ ባና። ሄ ዎደ ኦቶራንቾታ ሃሳያ ፃላላ ግዶናሽን፥ ኤንታ ዎልቃካ ኤራና። 
\v 20 ፆሳ ካዎተይ ኦዳ ግዶናሽን፥ ዎልቃ። 
\v 21 ታኒ ህንተኮ ፃምአራ ቦየ ዎይኮ ሲቆራነ አሽከ አያናራ ቦ? አዉሳ ዶረቲ?
\c 5
\s1 አሳ ግዶን ደእያ ዬላያ ኦሶ
\p
\v 1 ህንተ ግዶን ላይማተ ደኤይስ ዝግረቴስ። ሄሳ መላ ላይማተ ሀር አቶሽን፥ አማኖና አሳይካ ኦኮና። ህንተ ግዶን ባ አዋ ማቸራ ቱንዳ አስ ደኤስ።\x - \xo 5:1 \xo*\xt ዛረ 22:30.\xt*\x* 
\v 2 ህንተ ሄሳን ቂሮታናዉነ ዬላታናዉ በሰነ፥ ሽን ኦቶርትደታ። ሄሳ መላ ቦርሶባ ኦዳ ኡራ ህንተ ግዶፈ ከሳናዉ በሰኔ?
\p
\v 3 ታኒ አሾን ህንተራ ዶና እፅኮካ አያናን ታ ህንተራ ደአይስ። ታኒ ህንተራ ደእያ አሳዳ ሀናዳ ሄሳ መላ ኦሱዋ ኦዳ ኡራ ቦላ ፕርዳስ። 
\v 4 ኑ ጎዳ የሱስ ክርስቶሳ ሱንን ህንተ ሺቅያ ዎደ ታኒ አያናን ህንተራ ዳና። ሄሳን ጎዳ የሱስ ክርስቶሳ ዎልቃይ ህንተራ ግዳና። 
\v 5 ሄ ኡራ ናጋራ አሾይ\f + \fr 5:5 \fr*\fq ናጋራ አሾይ፦ \fq*\ft ናጋራ መይ ዎይኮ ናጋራ አሳተይ።\ft*\f* ይድ፥ እያ አያናይ ጎዳ የሱሳ ፕርዳ ጋላሳን አታና መላ እ፥ ፃላሄስ አድ እመቶ።
\p
\v 6 ህንተ ጬቆይ ሎኦ ግደና። ጉ እርሾይ ሙኑቃ ኡባ ደንይሳ ኤረከትዬ?\x - \xo 5:6 \xo*\xt ጋላ 5:9.\xt*\x* 
\v 7 ህንተ ሀእ እርሾይ ባይና ሙኑቃ ግዳና መላ፥ ህንተፈ ናጋራ እርሾ ከስተ። ኑስ ፓስካ ዶርሰ ግድዳ ክርስቶስ ያርሸትስ።\x - \xo 5:7 \xo*\xt ከሳ 12:5.\xt*\x* 
\v 8 ሄስ ግሾ፥ ገነይነ ኢታተ ደእያ እርሾራ ግዶናሽን፥ ቱማተነ ጌሻተ ደእያ ኡይራ ኑ ባልያ ቦንቾስ።\x - \xo 5:8 \xo*\xt ከሳ 13:7፤ ዛረ 16:3.\xt*\x*
\p
\v 9 ታ ካሰ ፃፍዳ ዳብዳብያን ህንተ ላይማትያ አሳራ ጋሄቶና መላ ህንተዉ ኦዳስ። 
\v 10 ሄሳ ጉሳይ ሀ አላምያን ደእያ ላይማተይሳታራ ዎይኮ ኡዘታራ ዎይኮ ካይሶታራ ዎይኮ ኤቃ ጎይነይሳታራ ፖሎ ጋሄቶፍተ ጉሱ ግደና። ሄሳ ግድኮ፥ ሀ አላምያፐ ህንተ ከያናዉ በሴስ ሽን አትስ። 
\v 11 ሽን አማናይስ ያግሸ ላይማተይሳታራ ዎይኮ ኡዘታራ ዎይኮ ኤቃ ጎይነይሳታራ ዎይኮ ጫየይሳታራ ዎይኮ ማተይሳታራ ዎይኮ ካይሶታራ ጋሄቶፍተ ጋዳ ህንተዉ ኦዳይስ። ሄሳ መላ አሳራ ሀር አቶሽን፥ ካካ ሞፕተ።
\p
\v 12 ዎሳ ኬፈ ካረራ ደኤይሳታ ቦላ ፕርዳናዉ ታና አይበ ጋይ? ዎሳ ኬን ደኤይሳታ ቦላ ህንተ ፕርደከትዬ? 
\v 13 ሽን ካረራ ደኤይሳታ ቦላ ፆሳይ ፕርዳና። ሄ ኢታባ ኦያ ኡራ ህንተ ግዶፈ ከስተ።\x - \xo 5:13 \xo*\xt ዛረ 13:5፤ 17:7.\xt*\x*
\c 6
\s1 አሳ ግዶን ደእያ ሞቶ
\p
\v 1 ህንተ ግዶፈ እሶይ እሱዋራ ሞቶይ ደእኮ፥ ሄሳ አማንያ አሳ ስንን ፕርደታናይሳ አግድ፥ አማኖና አሳ ስንን ፕርደታናዉ ዋንድ ቢ? 
\v 2 አማንያ አሳይ አላመ ቦላ ፕርዳናይሳ ህንተ ኤረከቲ? ያትን፥ ህንተ አላመ ቦላ ፕርድያባ ግድኮ፥ ሀይሳ መላ ጉባ ፕርዳናዉ ዋንድ ዳንዳኤከቲ? 
\v 3 ኑኒ ኪታንቾታ ቦላ ፕርዳናይሳ ኤረከቲ? ያትን፥ ሀ ሳአ ዱሳባ ቦላ ፕርዳናይስ ህንተና ዋንድ ፆኒ? 
\v 4 ያትን፥ ሄሳ መላ መቶይ ህንተ ግዶን መትኮ፥ ዎሳ ኬ አይፈን ካትዳ አሳ ስንን ፕርደታናዉ ዋትድ ኤፌቲ? 
\v 5 ታኒ ህንተና ዬላያናዉ ሄሳ ጋይስ። ህንተ ግዶን ካጨትዳ እሻታ ስገናዉ ዳንዳእያ አኬካ አስ ባዌ? 
\v 6 ያትን፥ እስ አማንያ እሻይ ሀንኮ አማንያ እሻ ፕርዳ ኬን አማኖና አሳ ስንን ሞታናዉ በሲ?
\p
\v 7 ህዛ፥ ህንተ እሶይ እሱዋ ሞትያባ ግድኮ ሄስ ህንተ ኩንደ በሴስ። ሄሳፈ ህንተ ቆሄትኮ ኬሄኔ? ህንተ ጭመትኮ ሎኤኔ? 
\v 8 ሽን ህንተ ዎል ግዶን አማነይሳት፥ እሶይ እሱዋ ቆሄታነ ጭሜታ።
\p
\v 9 ጌላት ፆሳ ካዎተ ላቶናይሳ ህንተ ኤረከቲ? ህንተና ጭሞፍተ፤ ላይማተይሳት ዎይኮ ኤቃ ጎይነይሳት ዎይኮ ላመይሳት ዎይኮ አደራ አደራ ጋሄተይሳት፥ 
\v 10 ዎይኮ ካይሶት ዎይኮ ኡዘት ዎይኮ ማተይሳት ዎይኮ ጫየይሳት ዎይኮ ቦንቀይሳት ፆሳ ካዎተ ላቶኮና። 
\v 11 ህንተፈ እስ እስ አሳት ካሰ ሄሳ መላ። ሽን ሀእ፥ ህንተ ጎዳ የሱስ ክርስቶሳ ሱንንነ ፆሳ አያናን ሜጨትደታ፤ ጌይደታ፤ ፅልደታ።
\s1 ህንተ አሳተን ፆሰ ቦንችተ
\p
\v 12 ህንተ፥ “ኑ ኮይዳባ ኦናዉ ዳንዳኦስ” ያጌታ። ሽን ኡባይ ማደና። “ታኒ ኮይዳባ ኡባ ኦናዉ ዳንዳአይስ” ያጌታ። ሽን አይብካ ታና ሃረና። 
\v 13 ህንተ፥ “ካ ኡሎሳ፤ ኡሎይካ ካሳ” ያጌታ። ሽን ፆሲ ኡሎካ ካካ ይሳናይሳ ታ ህንተዉ ኦዳይስ። ኑ አሳተይ ጎዳሳፈ አትሽን፥ ላይማተስ ግደና። ጎዳይካ ኑ አሳተሳ። 
\v 14 ፆሳይ ጎዳ ሀይቆፐ ደንዳይሳዳ፥ ኑናካ ሀይቆፐ ባ ዎልቃን ደንና።
\p
\v 15 ህንተ አሳተይ ክርስቶሳ አሳተፈ እስ ባጋ ግደይሳ ኤረከቲ? ያትን፥ ታኒ ክርስቶሳ አሳተፈ እስ ባጋ ኤፋዳ ላይማተ አሳተ ግዳና መላ ኦ? ሀነና! 
\v 16 ላይማትያ አደይ፥ እ ጋሄትያ ማጫሴራ እስ አሳተ ግደይሳ ኤረከቲ? ጌሻ ማፃፋን፥ “ኤንቲ ናምአይ እስ አሳተ ግዳና” ጌተትድ ፃፈትስ።\x - \xo 6:16 \xo*\xt መ 2:24.\xt*\x* 
\v 17 ሽን ጎዳራ እስፍያ አስ እያራ አያናን እስኖ ግዴስ።
\p
\v 18 ላይማተፈ ሃክተ። እስ አስ ኦያ ሀራ ናጋር እያ አሳተፈ ካረራ ኦሰቴስ፥ ሽን ላይማትያ አስ ባ አሳተ ቦላ ናጋራ ኦስ። 
\v 19 ህንተ አሳተይ፥ ፆሳይ ህንተዉ እምዳ ህንተናን ደእያ ጌሻ አያና ኬ ግደይሳ ኤረከቲ? ህንተ ህንተባ ግደከታ።\x - \xo 6:19 \xo*\xt 2 ቆሮ 3:16፤ 2 ቆሮ 6:16.\xt*\x* 
\v 20 ፆሳይ ህንተና ጋተን ሻምስ። ሄሳ ግሾ፥ ህንተ አሳተን ፆሰ ቦንችተ።
\c 7
\s1 ኤኮ ገሎባ
\p
\v 1 ህንተ ታዉ ፃፍዳ ዳብዳብያስ ዛሮይ ሀይሳ። እስ አስ ማጫስ ቦቾና አግኮ ሎኦ። 
\v 2 ሽን ላይማተፈ አታናዉ እስ እስ አደይ ማቾ ኤኮ፤ ቃስ እስ እስ ማጫሳስ አዝን ደኦ።
\p
\v 3 አዝናይ ባ ማቼስ፥ ቃስ ማችያ ባ አዝናስ በሲያባ ኩን። 
\v 4 ማቼስ ባ አሳተ ቦላ ማት ባዋ፥ ሽን ማት እ አዝናሳ። ሄሳዳካ፥ አዝናስ ባ አሳተ ቦላ ማት ባዋ፥ ሽን ማት ማቸሳ። 
\v 5 ህንተ ዎሳን ጉ ዎደ ጋምአናዉ ዞረተን ግዶና እፅኮ፥ እሶይ እሱዋ ድጎፍተ። ሄሳ ጋሶን ህንተናተ ሃራናዉ ፆነትን፥ ፃላሄይ ህንተና ፓጮና መላ እስፈ ደእተ። 
\v 6 ሽን ታኒ ህንተና ዞራናዉ ሀይሳ ጋይስፐ አትሽን፥ ኪታ ግደና። 
\v 7 አስ ኡባይ ታዳ ማቾ ኤኮና ደእያኮ ዶሳይስ፥ ሽን ፆሲ እሱዋስ እሱዋስ እምዳ ዱማ እሞት ደኤስ። እሱዋስ ሀይሳ መላ ሀንኩዋስ ሄሳ መላ እሞት ደኤስ።
\p
\v 8 ማቾ ኤክቦናይሳታስነ አዝና ገልቦናይሳታስ ቃስ አምኤታስ ታኒ ኦደይ፥ ታዳ ደእተ ጋዳ ዞራይስ። 
\v 9 ሽን አሞን ፁገተይሳፈ ኤከይስነ ገለይስ ሎኦ ግድያ ግሾ፥ ኤንቲ ባንታና ሃራናዉ ዳንዳኦና እፅኮ፥ ኤኮነ ገሎ።
\p
\v 10 ታኒ ኤክዳይሳታነ ገልዳይሳታ ሀይሳዳ ጋዳ ዞራይስ፤ ታና ግድከ ጎዳይ ኪቴስ፤ ማችያ ባ አዝናፐ ሻከቶፎ።\x - \xo 7:10 \xo*\xt ማቶ 5:32፤ 19:9፤ ማር 10:11-12፤ ሉቃ 16:18.\xt*\x* 
\v 11 ሽን ሻከትኮ ሀራ አዝና ገሎና ባርካ ደኦ ዎይኮ ባ አዝናራ ስገቶ። አዝን ባ ማችዉ ብሎፎ።
\p
\v 12 ሽን ሀራታስ ጎዳ ግዶናሽን፥ ታኒ ሀይሳዳ ጋይስ። አማኖና ማቻ ደእያ አማንያ አዝን ደእኮ፥ እያ ማችያ እያራ እስፈ ዳናዉ ኮይኮ እዮ ብሎፎ። 
\v 13 ቃስ አማኖና አዝን ደእያ አማንያ ማቻ ደእኮ፥ እ አዝናይ ኢራ እስፈ ዳናዉ ኮይኮ እያፐ ብለቶፎ። 
\v 14 አማኖና አዝን ባ አማንያ ማቸ ባጋራ ፅሌስ፤ ቃስ አማኖና ማችያ ባ አማንያ አዝና ባጋራ ፅላዉሱ። ሄስ ባይነኮ፥ ህንተ ናይት ቱና ግዶሶና፥ ሽን ሀእ ኤንቲ ጌሽ። 
\v 15 ሽን አማኖና አዝናይ ዎይኮ ማችያ ብላናዉ ኮይኮ ብሎ። አማንያ ማችያ ዎይኮ አዝናይ ሄሳ መላባን ቃሸቶኮና። ፆሲ ኑና ሳሮተን ዳና መላ ፄግስ። 
\v 16 ነኖ፥ አማንያ ማቸተ፥ ኔኒ አማኖና ነ አዝና አሻነኮ አይ ኤራይ? ዎይኮ አማንያ አዝናዉ፥ ኔኒ አማኖና ነ ማችዉ አሻነኮ አይ ኤራይ?
\p
\v 17 እስ እስ አስ ጎዳይ እያዉ እምዳ እሞታዳነ ፆሳይ እያ ፄግዳይሳዳ ደኦ። ዎሳ ኬ ኡባን ታኒ ታማርስያ ዎጋይ ሀይሳ። 
\v 18 ኦንካ ቃፃረትድ ፄገትዳባ ግድኮ፥ ቃፃረቶናዳ ሀኖፖ። ቃፃረቶና ፄገትዳ ኦንካ ደእኮ፥ ቃፃረታናዉ ኮዮፖ። 
\v 19 ፆሳ ኪታ ፖላናዉ በሴስፐ አትሽን፥ ቃፃረትን ቃፃረቶና አግን አይኮካ ማደና።
\p
\v 20 እስ እስ አስ ፆሳይ ባና ፄግያ ዎደ ደኤይሳዳ ደኦ። 
\v 21 ፆሳይ ነና ፄግያ ዎደ ኔኒ አይሌ? አይኮይ ባዋ ሄሳስ ኡንኤቶፋ። ሽን ኔኒ አይለተፈ ላአ ከያናዉ ዳንዳእኮ ላአ ከያ። 
\v 22 አይለ ግድድ ደእሸ ጎዳን ፄገትዳ አስ ጎዳን አይለተፈ ላአ ከይስ። ሄሳዳካ፥ አይለ ግዶና ደእሸ፥ ጎዳን ፄገትዳ አስ ክርስቶሳ አይለ። 
\v 23 ፆሳይ ህንተና ጋተን ሻምዳ ግሾ አሳ አይለ ግዶፕተ። 
\v 24 ታ እሻቶ፥ ህንተ እሶይ እሶይ ፄገትያ ዎደ ደእያ ደኡዋን ፆሳራ እስፈ ደእተ።
\s1 አምኤታባነ ሶይዝቦናይሳታባ
\p
\v 25 ጌላኦታባ ጎዳይ ታና ኪትዳባይ ባዋ። ሽን ጎዳይ ታዉ እምዳ ማሮተ መላ ታኒ ህንተና ዞራይስ። 
\v 26 ህዛ፥ ሀእ መቱዋ ግሾ፥ ኤኮና ዎይኮ ገሎና ዱስ ታዉ ሎኦ ዳኔስ። 
\v 27 ነ ማቾ ኤክዳባ ግድኮ፥ ሻከታናዉ ኮዮፓ። ኔኒ ማቾ ኤካቦናባ ግድኮ፥ ኤካናዉ ኮዮፓ። 
\v 28 ሽን ነ ማቾ ኤክኮ ናጋር ባዋ። ሄሳዳ ጌላእያ አዝና ገልኮ ናጋር ባዋ። ሽን ኤክያ ገልያ አሳስ ሀ ሳአን ዳሮ መቶይ ደእያ ግሾ ህንተ ሄሳፈ አታና መላ ታኒ ኮያይስ።
\p
\v 29 ታ እሻቶ፥ ታ ገይ ሄሳ፤ ዎደይ ዉርስ። ህዛፐ ጉየ ማቻ ደኤይ ማቾ ኤኮናዳ ደኦ። 
\v 30 ዬከይሳት ዬኮናዳ፥ ኡፋይተይሳት ኡፋይቶናዳ፥ ሻመይሳት አይኮይካ ባይናዳ ባንታና ታይቦ። 
\v 31 ሀ ሳኣ ሻሎን ማደተይሳት ማደትቦናዳ ሀኖ። ሀ አላምያ ማላይ አና።
\p
\v 32 ህንተ ህርግ ባይና ዳና መላ ታ ዶሳይስ። ማቾ ኤክቦናይስ ጎዳ ኡፋይሳናዉ ኮያ ግሾ፥ ጎዳባ ቆፔስ። 
\v 33 ሽን ማቾ ኤክዳይስ ባ ማችዉ ኡፋይሳናዉ ኮያ ግሾ፥ ሀ ሳአባ ቆፔስ። 
\v 34 እያ ቆፋይ ናምአን ሻከቴስ። አዝና ገላቦና ጌላእያ ባ አሳተንነ ባ ሸምፑዋን ጌያዳ ጎዳ ኡፋይሳናዉ ኮያ ግሾ፥ ጎዳባ ቆፓዉሱ። ሽን አዝና ገልዳራ ባ አዝና ኡፋይሳናዉ ኮያ ግሾ፥ ሳአባ ቆፓዉሱ። 
\v 35 ታኒ ሄሳ ህንተዉ ኦደይ፥ ህንተ ማደታና መላሳፈ አትሽን፥ ህንተና ኡንኤናዉ ግደና። ሽን ህንተ ቆፋይ ሻከቶና ማራን ደእድ ጎዳ ኡፋይስያባ ህንተ ኦና መላ ታኒ ኦዳይስ።
\p
\v 36 ኦንካ ባ ኦይችዳ ጌላኤስ ገሎ ዎደይ አስ ግድ እዮ አጋናዉ ቆፕኮ፥ ሄስ ቃስ እዉ ሎኦ ግዶናይስ እያዉ ስኤትኮ፥ ባ ኮይዳይሳ ኦ፤ ኤንቲ ኤከቶ፥ ገለቶ፤ ሄሳን ናጋር ባዋ። 
\v 37 ሽን እስ አስ ኡንኤያባይ ይን፥ ባ ዎዛናን ምንድ፥ ባና ሃርድ፥ ባ ኦይችዳ ጌላእዉ ኤከናዉ አጋናዉ ኮይኮ ሎይስ። 
\v 38 ሄሳ ግሾ፥ ጌላእዉ ኤክያ ኡራይ ሎይስ፤ ቃስ ኤኮና ኡራይ ዳሮ ሎይስ።
\p
\v 39 ማችያ ባ አዝናይ ፓፃ ደእያ ዎደ ኡባን እያራ ቃሸታሱ። ሽን እ አዝናይ ሀይቅኮ፥ ባ ዶስዳ አዝና ገላናዉ ዳንዳአዉሱ። ግዶሽን፥ እያ ገልያ አደይ አማንያ አስ ግዳናዉ በሴስ። 
\v 40 ታ ቆፋን ግድኮ፥ እያ ገሎና ደእኮ ኡፋይሳን ዳና። ቃስ ታዉ፥ ታ ቦላ ፆሳ አያን ደእያ ዳኔስ።
\c 8
\s1 ኤቃስ ያርሸትዳ ካባ
\p
\v 1 ኤቃስ ያርሸትያ ካባ ግድኮ ኑ ኡባይ ኤሮስ። ኤራተ ኦቶርሴስ፥ ሽን ሲቆይ ድቼስ። 
\v 2 ኦንካ ባና ኤራይስ ግድ ቆፕኮ፥ እ ቡሮ ኤራናዉ በሰይሳ ኤርቤና። 
\v 3 ሽን ኦንካ ፆሰ ሲቅኮ፥ እ ፆሳ ማታን ኤረትዳይሳ።
\p
\v 4 ሄሳ ግሾ፥ ኤቃስ ያርሸትዳ ካ ሙሳባ ግድኮ፥ ሀ አላምያን ጎድ እስ ፆሳፈ አትሽን፥ ሀር ባይና ግሾ፥ ኤቅ ፓናባ ግደይሳ ኑኒ ኤሮስ። 
\v 5 ፆሰ ግዶናሽን፥ ሳሎንነ ሳአን ፆሰ ጌተትድ ፄገትያ ዳሮ ፆሳትነ ጎዳት ደእኮካ፥ 
\v 6 ኡባባ መዳ፥ ኑ እያባ ግድዳ፥ እስ ፆሲ፥ አው፥ ኑስ ደኤስ\x - \xo 8:6 \xo*\xt ዛረ 6:4፤ 10:13.\xt*\x*። ኡባይ እያ ባጋራ መትዳ፥ ኑካ እያ ባጋራ ደኦ ደምዳ እስ ጎዳይ፥ የሱስ ክርስቶሲ ኑስ ደኤስ።
\p
\v 7 ሽን ሀ ኤረይ ኡባ ማታን ዴና። እስ እስ አሳይ ኤቃ ጎይኖራ ሜዘትዳ ግሾ፥ ካ ምያ ዎደ ኤቃስ ያርሸትዳባ ኦድ ኤኮሶና። ሄ ዎደ ኤንታ ካሀይ ዳቡራ ግድያ ግሾ ቱኔስ። 
\v 8 ሽን ካ ኑና ፆሳራ ዳቦየና። ኑ ሞና አግድ አይኮካ ቆሄቶኮ፤ ቃስ ምድ ዱማ ጎኤቶኮ።
\p
\v 9 ሽን ህንተ ኮይዳባ ማናዉ ማት ህንተዉ ደእኮካ ሄስ አማኖን ምኖና አሳታ ቦና መላ ናገትተ። 
\v 10 ኔኒ ነና ኤራንቾ ጋዳ ኤቃስ ያርሸትዳ ካ ማናዉ ኤቃ ኬን ኡትዳሽን፥ አማኖን ምኖና አስ ነና በእኮ፥ ሄስ ኤቃስ ያርሸትዳ ካ እ ማና መላ ደንነዬ? 
\v 11 ህዛ፥ ነ ኤራተ ጋሶን ክርስቶስ እያ ግሾ ሀይቅዳ፥ አማኖን ምኖና ነ እሻይ ይስ። 
\v 12 ሄሳዳ ኦድ፥ አማኖን ምኖና ህንተ እሻታ ቆህሸነ ኤንታ ካሀ ማዱንፅስሸ ክርስቶሳ ቆሄታ። 
\v 13 ሄሳ ግሾ፥ ካ ታ እሻ ብያባ ግድኮ፥ እ በቶና መላ ኡባራካ አሾ ሚከ።
\c 9
\s1 ሀዋረታ ማታ
\p
\v 1 ታኒ የዳ ደእያ አስ ግድክና? ታ ሀዋረ ግድክና? ታኒ ኑ ጎዳ የሱስ ክርስቶሳ በአብክና? ህንተ ጎዳን ታ ዳቡራ አይፈ ግደከቲ? 
\v 2 ህንተ ጎዳባ ግድያ ግሾ፥ ታ ሀራታስ ሀዋረ ግዶና እፅኮካ፥ ህንተዉ ሀዋረ ግደይሳስ ህንተ ማርካ።
\p
\v 3 ታና ሀዋረ ግደና ገይሳታስ ታኒ እምያ ዛሮይ ሀይሳ። 
\v 4 ኑ ህንተፈ ማናዉነ ኡያናዉ ቱማ ኑስ ማት ባዌ? 
\v 5 ሀንኮ ሀዋረታዳ፥ ጎዳ እሻታዳነ ጰፅሮሳዳ፥ አማንያ ኑ ማቸታ ኤክድ ሄመታናዉ ኑስ ማት ባዌ? 
\v 6 ዎይኮ ኦድ አቃናዉ በሰይ ታራነ ባርናባሳ ፃላሌ? 
\v 7 ባ ሚሸን ዎታዳረታ ኦይ ኦኔ? ዎይኮ ዎይነ ቶክድ፥ እያፐ አይፈ ሞናይ ኦኔ? ዎይኮ ዉደ ሄምሸ፥ ሄ ዉድያፐ ማ ኡዮናይ ኦኔ?
\p
\v 8 ታኒ ሄሳ አሳ ቆፋ ጋይናዬ? ሙሰ ህገይ ሄሳ ጌነዬ? 
\v 9 ሙሰ ህግያን፥ “ዉዱማን ካ የያ ቦራ ዶና ቃቾፋ” ጌተትድ ፃፈትስ። ያትን ፆሳይ ሄሳ ቦራስ ቆፕድ ኦድዴ?\x - \xo 9:9 \xo*\xt ዛረ 25:4፤ 1 ፅሞ 5:18.\xt*\x* 
\v 10 ፆሳይ ሄሳ ግዳይ ኑስ ቆፕድ ግደኔ? ኤ፥ ኑ ግሾሳ። ቢታ ጎየይስነ ካ ጌሸይስ ባና ጋከይሳ ኤካና ግድ ኡፋይሳን ኦናዉ በሴስ ጌተትድ ቱማ ኑ ግሾ ፃፈትስ። 
\v 11 ኑኒ ህንተ ግዶን አያና ዘረ ዘርዳ ግድኮ፥ አሾስ ኮሽያባ ኑ ህንተፈ ኤክኮ፥ ሄስ ግታባዬ?\x - \xo 9:11 \xo*\xt ሮመ 15:27.\xt*\x* 
\v 12 ሀራት ሄሳ ህንተፈ ኤካናዉ ኤንታዉ ማት ደእኮ፥ ኑስ ኤንታፈ አያ ማት ዴኔ?
\p ሽን ኑኒ ክርስቶሳ ዎንገላስ በ ግዶና መላ፥ ኡባባ ገንጮስፐ አትሽን፥ ሄ ማታን ጎኤትቦኮ። 
\v 13 ፆሳ ኬን ኦያ አሳት ባንታ ካ ፆሳ ኬፈ ኤከይሳ ኤረከቲ? ቃስ ያርሾ በሳን ኦያ አሳት ያርሹዋፈ ኤከይሳ ኤረከቲ?\x - \xo 9:13 \xo*\xt ዛረ 25:4፤ 1 ፅሞ 5:18.\xt*\x* 
\v 14 ሄሳዳካ፥ ዎንገላ ማርካተይሳት ዱሳስ ኮሽያባ ዎንገላፐ ኤካና መላ ጎዳይ ኪትስ።\x - \xo 9:14 \xo*\xt ማቶ 10:10፤ ሉቃ 10:7.\xt*\x*
\p
\v 15 ሽን ታኒ ሀ ማታ ኡባን አይኮካ ጎኤታብከ። ታኒ ሄሳ ፃፍዳይ ታ ማታ ቦንችሳናዉ ኮያዳ ግደና። ኦንካ ታ ጬቁዋ ሀዳ ኦናፐ ሀይቆይ ታዉ ሎኦ። 
\v 16 ታኒ ዎንገላ ኦደይ ኪተትዳ ግሾሳፈ አትሽን፥ ታና ጬቅስያባ ግደና። ዎንገላ ኦዶና እፅኮ፥ ታና አየ!። 
\v 17 ታኒ ዎንገላ ዶሳዳ ኦድኮ፥ ታዉ ዎይቶይ ደኤስ። ሽን ታኒ ዎንገላ ዶሶና ኦድያባ ግድኮ፥ ሄሳ ፆሲ ታዉ ሀዳራ እሚስ። 
\v 18 ያትን፥ ታ ዎይቶይ አይቤ? ታኒ ዎንገላ ኦድያ ዎደ ታ ማታን ጎኤቶና፥ ዎንገላ ጋተይ ባይና ኦደይስ ታዉ ዎይቶ።
\p
\v 19 ታኒ ኦደስካ አይለ ግድከ፥ ሽን ዳሮታ ማዳናዉ ኡባስ አይለ ግዳስ። 
\v 20 ታኒ አይሁደታ ማዳናዉ ኤንታራ ኤንታ ግዳስ። ታ ሁጰን ህገፈ ጋርሳን ደእከ፥ ሽን ህገፈ ጋርሳን ደኤይሳታ ማዳናዉ ህገፈ ጋርሳን ደእያ አስ ግዳስ። 
\v 21 ፆሳ ህግያፈ ካረ ከዮና፥ ክርስቶሳ ህግያስ ኪተታሸ፥ ህገይ ባይናይሳታ ማዳናዉ ህገይ ባይና አሳዳ ሀናስ። 
\v 22 ታኒ ዳቡራንቾታ ማዳናዉ ዳቡራንቾ ግዳስ። ታኒ እሶታ እሶታ ማዳናዉ ኡባራ ኡባባ ሀናስ። 
\v 23 ታኒ ዎንገላ አንጁዋ ሻከታናዉ፥ ዎንገላ ግሾ፥ ሀ ኡባ ሀናስ።
\p
\v 24 ዎን ጋደትያ ኡባይ ዎፄስ፥ ሽን እሱዋ ፃላል ዎይቶ ኤከይሳ ኤረከቲ? ሄሳዳ ህንተካ ዎይቶ ኤካናዉ ዎፅተ። 
\v 25 ጋደትያ አሳ ኡባይ ኡባባን ባንታና ሃሬስ። ኤንቲ ሄሳ ዳቡረይ ይያ ዎይቶ ኤካናሳ። ሽን ኑኒ ዳቡረይ መርና ዎይቶ ኤካናሳ። 
\v 26 ሄሳ ግሾ፥ ታኒ ቆፍ ባይና አሳዳ ዎፅከ። ጫርኮ ይምፕያ አሳዳ ጮ ኩሸ የድከ። 
\v 27 ሽን ታኒ ሀራታስ ዎንገላ ኦድዳፐ ጉየ፥ ታኒ ታ ሁጰን የገትዳ አስ ግዶና መላ ታ አሳተ ዎልቃን ሃራዳ ታዉ ኪተታና መላ ኦይስ።
\c 10
\s1 ኤቃ ጎይኖፍተ
\p
\v 1 ታ እሻቶ፥ ታኒ ህንተ ሀይሳ አኬካና መላ ኮያይስ። ኑ ማይዛት ኡባይ ሻራፐ ጋርሳራ ሄመትዶሶና፤ ኡባይ አባ ፕንዶሶና።\x - \xo 10:1 \xo*\xt ከሳ 13:21-22፤ 14:22-29.\xt*\x* 
\v 2 ኤንቲ ሙሰራ እስፋናዉ ሻራንነ አባን ፃማቀትዶሶና። 
\v 3 ኤንቲ ኡባይ እስ አያና ካ ምዶሶና።\x - \xo 10:3 \xo*\xt ከሳ 16:35.\xt*\x* 
\v 4 ቃስ ኡባይ እስ አያና ኡሻ ኡይዶሶና። ኤንቲ ባንታና ካልያ አያና ዛላፈ ፑልትዳ ኡሻ ኡይዶሶና፤ ሄ ዛላይካ ክርስቶሳ።\x - \xo 10:4 \xo*\xt ከሳ 17:6፤ ታይቦ 20:11.\xt*\x* 
\v 5 ሽን ፆሳይ ኤንታፈ ዳሮታን ኡፋይትቦና ግሾ፥ ኤንታ አሀይ መላ ቢታን ዎድ አትስ።\x - \xo 10:5 \xo*\xt ታይቦ 14:29-30.\xt*\x*
\p
\v 6 ኤንቲ ኢታባ አሞትዳይሳዳ፥ ኑካ ኢታባ አሞቶና መላ ሄ ኡባይ ኑስ ሌምሶ ግድስ።\x - \xo 10:6 \xo*\xt ታይቦ 11:4.\xt*\x* 
\v 7 ጌሻ ማፃፋን፥ “አሳይ ማናዉነ ኡያናዉ ኡትዶሶና፤ ቃስ የፃናዉ ደንድዶሶና” ጌተትዳይሳዳ ኤንታፈ እሶት እሶት ኤቃ ጎይንዳይሳ መላ ህንተ ኤቃ ጎይኖፍተ።\x - \xo 10:7 \xo*\xt ከሳ 32:6.\xt*\x* 
\v 8 ኤንታፈ እሶት እሶት ላይማትዳይሳዳ ኑ ላይማታናዉ በሰና። ሄሳ ጋሶን ኤንታፈ እስ ጋላስ ላታማነ ሄ ሙኩላይ ሀይቅስ።\x - \xo 10:8 \xo*\xt ታይቦ 25:1-18.\xt*\x* 
\v 9 ኤንታፈ እሶት እሶት ጎዳ ፓጭድ ሾሻን ዱከትድ ሀይቅዳይሳዳ ኑ ጎዳ ፓጫናዉ በሰና።\x - \xo 10:9 \xo*\xt ታይቦ 21:5-6.\xt*\x* 
\v 10 ኤንታፈ እሶት እሶት ዙዙምድ ሀይቆ ኤህያ ኪታንቹዋን ይዳይሳዳ ህንተካ ዙዙሞፍተ።\x - \xo 10:10 \xo*\xt ታይቦ 16:41-49.\xt*\x*
\p
\v 11 ሀ ኤንታ ቦላ ጋክዳ ኡባይ ኑ ናገታና መላ ኑስ ሌምሶ ግድስ። ቃስ ዎደ ዉርሰ ቦላ ደእያ ኑስ ትምርተ ግዳና መላ ሀ ኡባይ ፃፈትስ።
\p
\v 12 ሄሳ ግሾ፥ ታ ኤቃስ ግያ ኦንካ ኩንዶና መላ ባና ናጎ። 
\v 13 አሰ ኡባ ጋክያ ፓጨፐ አትሽን፥ ዱማ ፓጨይ ህንተና ጋክቤና። ህንተ ዎልቃይ ዳንዳኤይሳፈ አያ ፓጨን ህንተ ፓጨቶና መላ አድ እሞና ፆሳይ አማነትዳይሳ። ህንተና ፓጨይ ጋክያ ዎደ ሄ ፓጭያ እ ህንተና ዳንዳእሳና። ቃስ ሄ ፓጭያፐ ህንተ ከያና ኦግያ እ ጊግሳና።
\p
\v 14 ህዛ፥ ታ አልኦ እሻቶ፥ ኤቃ ጎይኖፈ ሃክተ። 
\v 15 ህንተ ዎዛናማ አስ ግድዳ ግሾ ታ ሀይሳ ኦዳይስ። ታኒ ገይስ ቱማ ግደይሳ ህንተ ህንተ ሁጰን ፕርድተ። 
\v 16 ኑኒ ፆሳ ጋላትድ ሻከትያ አንጆ ፁአይ ክርስቶሳ ሱራ እስፈተ ደኤይሳ ግደነዬ? ቃስ ኑኒ ባያ ኡይይ ክርስቶሳ አሹዋራ እስፈተ ደኤይሳ ግደነዬ?\x - \xo 10:16 \xo*\xt ማቶ 26:26-28፤ ማር 14:22-24፤ ሉቃ 22:19-20.\xt*\x* 
\v 17 ኑኒ ዳሮ ግድኮካ ኡይይ እስኖ፥ ኑ ሄ እስ ኡይ ሻከትያ ግሾ እስ አሳተ።
\p
\v 18 አነ እስራኤለ አሳይ ኦዳይሳ አኬክተ። ያርሸትዳ ያርሹዋ መይሳት ያርሾ በሳራ እስፈተ ባወዬ?\x - \xo 10:18 \xo*\xt ሌወ 7:6.\xt*\x* 
\v 19 ታኒ አይ ጋናዉ ኮያዳ ጋይና? ኤቃስ ያርሸትዳ ካይ ዎይኮ ኤቃይ ፓያባ ጉሰዬ? 
\v 20 ግደና፥ ኤንቲ ያርሸይ ፆሳስ ግዶናሽን፥ ቱና አያናታሳ። ሄሳ ግሾ፥ ህንተዉ ቱና አያናታራ እስፈተ ዳና መላ ኮይከ።\x - \xo 10:20 \xo*\xt ዛረ 32:17.\xt*\x* 
\v 21 ህንተ ጎዳ ፁአፐ ኡይሸ፥ ቃስ ቱና አያናታ ፁአፐ ኡያናዉ ዳንዳኤከታ። ጎዳ ጋይታፐ ምሸ ቃስ ቱና አያናታ ጋይታፐ ማናዉ ዳንዳኤከታ። 
\v 22 ኑኒ ሄሳ ኦድ ጎዳ ይሎይኖ? ኑኒ እያፐ አያ ምኖዬ?\x - \xo 10:22 \xo*\xt ዛረ 32:21.\xt*\x*
\p
\v 23 ህንተ፥ “ኡባባ ኦና መላ ድግያባይ ባዋ” ጌታ፥ ሽን ኡባይ ማደና። ህንተ፥ “ኡባባ ኦና መላ ድግያባይ ባዋ” ጌታ፥ ሽን ኡባይ ድቸና።\x - \xo 10:23 \xo*\xt 2 ቆሮ 6:12.\xt*\x* 
\v 24 እስ እስ አስ፥ ሀራ አስ ማድያባ ቆፓናዉ በሴስፐ አትሽን፥ ባና ማድያባ ፃላላ ቆፖፎ።
\p
\v 25 ህንተ ካሀ ስን ገልስያ ኦይሻ ደንና ግያን ባይዘትያ አሹዋ ጮ ሚተ። 
\v 26 አይስ ጊኮ፥ ሳእነ ሳአን ደእያ ኡባይ ጎዳባ።\x - \xo 10:26 \xo*\xt ማዝ 24:1.\xt*\x*
\p
\v 27 እስ አማኖና አስ ህንተና እማታናዉ ኮይድ ፄግኮ ባናዉ ኮይኮ ቢተ። ህንተ ካሀን መትያ ኦይሻን ስና ህንተ ስን አያባ ኡባ ሚተ። 
\v 28 ሽን እስ አስ፥ “ሀይስ ኤቃስ ያርሸትዳባ” ጊኮ፥ ሄ ህንተዉ ኦድዳ አድያ ግሾነ ካሀ ግሾ ሄ ካ ሞፕተ። 
\v 29 ታኒ፥ ካሀ ግሾ ገይ፥ ሄ ህንተዉ ኦድዳ ኡራ ካሀ ጉሱፈ አትሽን፥ ህንተ ካሀ ግደና።
\p ሀራ አሳ ካሀ ግሾ ጋዳ ታኒ ታ ላአተ ቦላ አይስ ፕርዶ? 
\v 30 ታኒ ምያ ካ ፆሳ ጋላታዳ ሚኮ ባልዳዳ አይስ ቦረትያና?
\p
\v 31 ህዛ፥ ህንተ አይ ሚኮ አይ ኡይኮ፥ ዎይኮ አይ ኦኮካ ኡባባ ፆሳ ቦንቾስ ኦተ። 
\v 32 አይሁደታ ግድን ግርከታ ግድን ዎይኮ ፆሳ ዎሳ ኬ ግድን ኦደስካ በ ግዶፕተ። 
\v 33 ታኒ ኡባ ዎደ ዳሮታ አሻናዉ ኤንቲ ማደትያ ኦገ ኮያይስፐ አትሽን ታና ማድያ ኦገ ኮይከ።
\b
\c 11
\p
\v 1 ታኒ ክርስቶሳ ሌምሱዋ ካለይሳዳ፥ ህንተካ ታና ካልተ።\x - \xo 11:1 \xo*\xt 2 ቆሮ 4:16፤ ፍልጵ 3:17.\xt*\x*
\s1 ጎይኖ ማራ
\p
\v 2 ህንተ ኡባባን ታና ቆፕያ ግሾነ ታኒ ታማርስዳ ትምርትያ ምንድ ናግዳ ግሾ ታኒ ህንተና ጋላታይስ። 
\v 3 ሽን ክርስቶስ አደ ኡባስ ሁጰ፥ አደይ ማጫሳስ ሁጰ፥ ቃስ ፆሲ ክርስቶሳስ ሁጰ ግደይሳ ህንተ ኤራና መላ ኮያይስ። 
\v 4 ባ ሁጵያ ጉሉንትድ ፆሰ ዎስያ ዎይኮ ትንብተ ኦድያ አደይ ኡባይ ሁጰ ግድዳ ክርስቶሳ ቶቼስ። 
\v 5 ባ ሁጵያ ቃጮና ፆሰ ዎስያ ዎይኮ ትንብተ ኦድያ ማጫስያ ሁጰ ግድዳ ባ አዝና ቶቻዉሱ። ባ ሁጵያ ቃጮና ማጫስያ ባ ሁጵያ ሜደትዳ ማጫሳ መላ።
\p
\v 6 ማጫስ ባ ሁጰ ካሞና እፅኮ፥ ባ ሁጵያ ቃንፀቶ። ሽን እዉ ሁጰ ቃንፆይ ዎይኮ ሜዶይ ቦርሶ ግድኮ፥ ባ ሁጵያ ቃጮ። 
\v 7 አደይ ፆሳ ሌምሶነ ፆሳ ቦንቾ ግድያ ግሾ፥ ባ ሁጵያ ካማናዉ በሰና፥ ሽን ማጫስ አደስ ቦንቾ።\x - \xo 11:7 \xo*\xt መ 1:26-27.\xt*\x* 
\v 8 ማጫስ አደፈ መታሱፐ አትሽን፥ አደይ ማጫሳፐ መትቤና።\x - \xo 11:8 \xo*\xt መ 2:18-23.\xt*\x* 
\v 9 ማጫስ አደስ መትስፐ አትሽን፥ አደይ ማጫሳስ መትቤና። 
\v 10 ሀይሳ ግሾነ ኪታንቾታ ግሾ ማጫስ ባዉ ማት ደኤይሳ በሲያ ማላ ባ ሁጰን ቃጫናዉ በሴስ።
\p
\v 11 ሽን ጎዳ ቆፋን ማጫስ አደይ ባይና ዴና፤ አደይካ ማጫስ ባይና ዴና። 
\v 12 ማጫስ አደፈ መትዳይሳዳ አደይካ ማጫሳፐ የለትስ። ሽን ኡባይካ ፆሳፈ መትስ።
\p
\v 13 አነ ህንተ ፕርድተ፤ ማጫስ ባ ሁጰ ካሞና ፆሳ ዎሳናዉ በሲ? 
\v 14 አደይ ባ ሁጵያ ድችኮ እያዉ ቦርሶ ግደይሳ ሀር አቶሽን መተ ህንተና ታማርሰኔ? 
\v 15 ሽን ማጫስ ባ ሁጰ ድችኮ እዉ ቦንቾ ግደኔ? ማጫሳስ ሁጰይ እመትዳይ እያ ባና ካማና መላሳ። 
\v 16 ሽን ሀይሳ ቦላ ፓላማናዉ ኮያ አስ ደእኮ፥ ኑስ ግድን ዎይኮ ፆሳ ዎሳ ኬታስ ግድን ሀይሳፈ ሀራ ዎግ ባዋ።
\s1 ጎዳ ካሆ ኤኮ ማራ
\r (ማቶ 26:26-29፤ ማር 14:22-25፤ ሉቃ 22:14-20)
\p
\v 17 ህንተ እስፈ ሺቀይ ጎአስ ግዶናሽን ቆሆስ ግድያ ግሾ፥ ሀእ ታኒ እምያ ኪታን ህንተና ናሽከ። 
\v 18 ታኒ ኮይሮ ስእዳይ፥ ዎሳ ኬን ሺቅያ ዎደ ህንተ ግዶን ሻከተ ደኤይሳ። ሀ ታ ስእዳይስ ቱማ ግደይሳ አማናይስ። 
\v 19 ህንተ ግዶፈ ቱም ደኤይሳት ኦናንተኮ ኤረታና መላ ህንተ ግዶን ሻሆይ ዳናይስ አተና። 
\v 20 ህንተ እስፈ ሺቅያ ዎደ ህንተ ሺቀይ ጎዳ ካሁዋ ማናሳ ግደና። 
\v 21 ህንተ ካ ምያ ዎደ እሶይ እሱዋ ናጎና ባይሳ ባይሳ ምያ ግሾ፥ እሶይ ኮሻቴስ ሀንኮይ ቃስ ማቴስ። 
\v 22 ቱማ ህንተ ማናዉነ ኡያናዉ ህንተዉ ኬ ባዌ? ዎይኮ ፆሳ ዎሳ ኬ ካቲ? አይኮይ ባይና ማንቆታ ዬላየቲ? ታ ህንተና ዎይጎ? ሀይሳስ ታ ህንተና ናሾዬ? ናሽከ።
\p
\v 23 ታኒ ህንተዉ እምዳ ትምርትያ ጎዳፐ ኤካስ። ጎዳይ የሱሲ አድ እመትያ ቃማ ኡይ ኤክድ፥ 
\v 24 ፆሳ ጋላትስ። ኡይ ባድ “ሄእተ፤ ሚተ። ሀይስ ህንተዉ እመትያ ታ አሹዋ። ሀይሳ ምሸ ታና ሀሳይተ” ያግስ። 
\v 25 ሄሳዳካ፥ ካሁዋ ምድ ስምን፥ ፁኣ ኤክድ፥ “ሀይስ ፁአይ ታ ሱን ኤቅያ ኦራ ጫቁዋ። ህንተ እያፐ ኡያ ዎደ ኡባን ታና ሀሳይተ” ያግስ።\x - \xo 11:25 \xo*\xt ከሳ 24:6-8፤ ኤርም 31:31-34.\xt*\x* 
\v 26 ህንተ ሀ ኡይ ምያ ዎደነ ሀ ፁአ ኡያ ዎደ ኡባን ጎዳይ ያና ጋካናዉ እያ ሀይቁዋ ኦዴታ።
\p
\v 27 ሄሳ ግሾ፥ በሶና ኦገን ጎዳ ኡይ ምያ ዎይኮ ጎዳ ፁአ ኡያ ኦንካ እያ አሹዋነ ሱ ቶችዳ ግሾ ባ ናጋራን ኦይሸቴስ። 
\v 28 ሽን አስ ባና ፓጮ። ያትድ ኡይ ሞ፤ ፁአፐ ኡዮ። 
\v 29 ጎዳ አሹዋባ ሻክድ ኤሮና፥ ኡይ መይነ ፁአፐ ኡየይ፥ ባ ቦላ ፕርዳ ሜስነ ኡዬስ። 
\v 30 ሄሳ ግሾ፥ ህንተ ግዶፈ ዳሮት ዳቡርዶሶና፤ ሀርግዶሶና፤ ቃስ ኡንደና አሳት ሀይቅዶሶና። 
\v 31 ሽን ኑኒ ኑና ፓጭድ በእዳባ ግድያኮ፥ ኑ ቦላ ፕርደታናሽን። 
\v 32 አላመይ ፕርደትያ ዎደ ኑኒ አላምያራ ፕርደቶና መላ ሀእ ጎዳይ ኑና ሴሬስ።
\p
\v 33 ሄሳ ግሾ፥ ታ እሻቶ፥ ጎዳ ካሁዋ ኤካናዉ ህንተ ሺቅያ ዎደ እሶይ እሱዋ ናግድ ኤክተ። 
\v 34 ህንተ ሺቆይ ፕርዳስ ግዶና መላ ኮሻትዳ ኦንካ ደእኮ፥ ባ ሶን ሞ።
\p አትዳባ ታኒ ያ ባዳ ህንተዉ ኦዳና።
\c 12
\s1 ጌሻ አያና እሞታታ
\p
\v 1 ታ እሻቶ፥ ጌሻ አያና እሞታታባ ህንተ ኤራና መላ ታ ኮያስ። 
\v 2 ህንተ ፆሳ አማኖና ዎደ ዶን ባይና ኤቃታን ጎሸትድ፥ ህንተ ኤሮና ሶ ብዳይሳ ኤሬታ። 
\v 3 ፆሳ አያናይ ካለያ አስ ኦንካ፥ “የሱሲ ባደቶ” ያገና። ቃስ ጌሻ አያናይ ካለና ደእሽን፥ ኦንካ፥ “የሱሲ ጎዳ” ጋናዉ ዳንዳኦናይሳ ህንተ ኤራና መላ ኮያይስ።
\p
\v 4 ዱማ ዱማ አያና እሞታት ደኦሶና፥ ሽን እሞታታ እምያ አያናይ እሱዋ።\x - \xo 12:4 \xo*\xt ሮመ 12:6-8.\xt*\x* 
\v 5 ኑ ጎዳስ ኦያ ዱማ ዱማ ኦሶት ደኦሶና፥ ሽን ጎዳይ እሱዋ። 
\v 6 ኑ ጎዳስ ኦያ ዱማ ዱማ ኦገት ደኦሶና፥ ሽን ሄ ኦገታን ኦያ አሳ ኡባን ኦያ ፆሳይ እሱዋ። 
\v 7 ሽን እሱዋስ እሱዋስ እመትዳ እሞታታን ሀራታ ማዳና መላ ጌሻ አያናይ ቆንጬስ።
\p
\v 8 ጌሻ አያናይ እሱዋስ ጭንጫተ ኩምዳ ቃላ እሜስ፤ ቃስ እሱዋስ ኤራተ ኩምዳ ቃላ እሜስ። 
\v 9 ሄ ጌሻ አያናይ እሱዋስ አማኖ፥ ሀንኩዋስ ቃስ ፓያ ዎልቃ እሜስ። 
\v 10 ጌሻ አያናይ እሱዋስ ማላታ ኦያ ዎልቃ፥ እሱዋስ ትንብተ ኦድያ ዎልቃ እሜስ። እሱዋስ አያናፐ አያና ሻክ ኤርያ ዎልቃ፥ እሱዋስ ዱማ ዱማ ዶናን ኦድያ ዎልቃ፥ ቃስ እሱዋስ ዱማ ዱማ ዶናን ኦደትዳይሳ ብርሽያ ዎልቃ እሜስ። 
\v 11 ሽን ሀ ኡባ ኦይ ሄ እስ ጌሻ አያና። እ ኮይያ መላ እስ እስ አሳስ ዱማ ዱማ እሞታ እሜስ።
\s1 አሳተነ ብልተታ
\p
\v 12 እስ አሳተን ዳሮ ብልተት ደኦሶና፥ ሽን ሄ ዱማ ዱማ ብልተት እስ አሳተ ግዶሶና። ሄሳዳካ፥ ክርስቶስ ዱማ ዱማ ብልተት ደእያ አሳተ መላ።\x - \xo 12:12 \xo*\xt ሮመ 12:4-5.\xt*\x* 
\v 13 ኑኒ አይሁደ ግድን ግርከ ግድን አይለ ግድን ዎማኖ ግድን፥ ኡባይ እስ አሳተ ግዳናዉ ጌሻ አያናን ፃማቀትዳ። ቃስ ኑ ኡባይ እስ ጌሻ አያና ኤክዳ።
\p
\v 14 ኑ አሳተን ዱማ ዱማ ብልተት ደኦሶናፐ አትሽን፥ እስ ብልተ ግደና። 
\v 15 ቶሆይ፥ “ታኒ ኩሸ ግዶና ግሾ ብልተ ግድከ” ጊኮ፥ እ ሄሳ ግዳ ግሾ ብልተተይ አትዬ? 
\v 16 ሀይ፥ “ታኒ አይፈ ግዶና ግሾ ብልተ ግድከ” ጊኮ፥ እ ሄሳ ግዳ ግሾ አሳተፈ እስ ብልተ ግደይስ አትዬ? 
\v 17 አሳተ ኡባይ አይፈ ፃላላ ግድዳኮ፥ ኑ አይብን ስአኔ? ቃስ አሳተ ኡባይ ሀይ ፃላላ ግድዳኮ ኑ አይብን ስንጋኔ?
\p
\v 18 ሽን ፆሳይ ባ ኮይዳይሳዳ፥ አሳተ ግዶን ዱማ ዱማ ብልተታ ዎስ። 
\v 19 ኡባይ እስ ብልተ ግድዳኮ አሳተ ዋንድ ዳኔ? 
\v 20 ሽን ብልተት ዳሮ ግድኮካ፥ አሳተይ እሱዋ።
\p
\v 21 አይፈይ ኩሸኮ፥ “ነ ታዉ ኮሻካ” ጋናዉ ዳንዳኤና። ዎይኮ ሁጰይ ቶሆኮ፥ “ነ ታዉ ኮሻካ” ጋናዉ ዳንዳኤና። 
\v 22 ሽን ዳቡራ ዳንያ አሳተ ብልተት ኑስ አድ ኮሾሶና። 
\v 23 ቦንቾ ኮሸና ግድ ኑ ቆፕያ ኑ ብልተታፐ ባጋታ ዳሮ ቦንቾስ። ቃስ ኑ ቦርሰትያ ኑ አሳተ ብልተታ አድ ቦንችድ ናጎስ። 
\v 24 ኑ በእን ቦርሶና አሳተ ብልተታስ ቦንቾ ኮሸና። ሽን ፆሳይ ኑ አሳተ ብልተታ ዎልራ ጋሰድ ቦርስያ ብልተታስ አያ ቦንቾ እሚስ። 
\v 25 አሳተ ብልተት እሶይ እሱዋራ ሻኮ መና ዎልስ ቆፓና መላ ኦድ መስ። 
\v 26 አሳተ ብልተታፐ እሶይ ሳከትኮ ብልተት ኡባይ እያራ ሳከቶሶና። አሳተ ብልተታፐ እሶይ ቦንቸትኮ ብልተት ኡባይ እያራ ኡፋይቶሶና።
\p
\v 27 ህንተ ኡባይ ክርስቶሳ አሳተ፤ ቃስ ህንተ እሶይ እሶይ እያ ብልተታ። 
\v 28 ዎሳ ኬን ፆሳይ፥ ኮይሮ ሀዋረታ፥ ናምአን ናበታ፥ ሄን አስታማረታ፥ ካልድ ማላታ ኦይሳታ፥ ፓይሳታ፥ ሀራታ ማደይሳታ፥ ዎሳ ኬ አይሰይሳታነ፥ ዱማ ዱማ ዶናን ኦደተይሳታ ዎስ።\x - \xo 12:28 \xo*\xt ኤፈ 4:11.\xt*\x*
\m
\v 29 ኡባይ ሀዋሬ? ኡባይ ናቤ? ኡባይ አስታማሬ? ኡባይ ማላታ ኦ? 
\v 30 ኡባይ ፓዬ? ኡባይ ዱማ ዱማ ዶናን ኦዴቲ? ኡባይ ዱማ ዱማ ዶናን ኦደቶይሳ ብርሺ? 
\v 31 ሽን ኡባፈ አያ እሞታ ምንድ ኮይተ።
\p ቃስ ኡባፈ አያ ኦግያ ታ ህንተና በሳና።
\c 13
\s1 ቱማ ሲቆ
\p
\v 1 ታኒ አሳ ቃላነ ኪታንቾ ቃላ ኦደታናዉ ዳንዳእኮካ፥ ታዉ ሲቆይ ይኮ፥ ጮ ጊርያ ዳላ መላ። 
\v 2 ትንብተ ኦድያ እሞት ታዉ ደእኮካ፥ ፁራ ኡባ ኤርኮካ፥ ኤራተ ኡባይ ደእኮካ፥ ቃስ ደርያ ደንድ ሀራሶ ኤፍያ አማኖይ ታዉ ደእኮካ፥ ሲቆይ ይኮ፥ ታ አይኮካ ግድከ።\x - \xo 13:2 \xo*\xt ማቶ 17:20፤ 21:21፤ ማር 11:23.\xt*\x* 
\v 3 ታዉ ደእያባ ኡባ ማንቆታስ እምኮካ፥ ሀር አቶሽን፥ ታና ታማስ አ እምኮካ፥ ሲቆይ ይኮ ታና አይኮካ ማደና።
\p
\v 4 ሲቆይ ዳንዳአንቾ። ሲቆይ ኬሀ። ሲቆይ ቃናተና። ሲቆይ ጬቀተና። ሲቆይ ኦቶረና። 
\v 5 ሲቆይ በሶናባ ኦና። ሲቆይ ኡዘተና። ሲቆይ ይሎተና። ሲቆይ ባ ቆሆ ፓይደና። 
\v 6 ሲቆይ ቱማን ኡፋይተስፐ አትሽን፥ ዎርዶን ኡፋይተና። 
\v 7 ሲቆይ ኡባ ዳንዳኤስ፤ ኡባ አማኔስ፤ ሎኦባይ ሀናና ግድ፥ ኡፋይሳን ናጌስ፤ ኡባ ገንጬስ።
\p
\v 8 ሲቆይ ዉርሰ ጋካናዉ የና። ሽን ትንብተይ አታና፤ ዱማ ዱማ ዶናን ኦደተይስ አታና፤ ኤራተካ አና። 
\v 9 ኑ ኤራተፈ ጉ ኤሮስ፤ ትንብተፐ ባጋ ኦዶስ። 
\v 10 ሽን ፖሎ ግድዳይስ ያ ዎደ ፖሎ ግዶናይስ አታና።
\p
\v 11 ታኒ ናአ ደእያ ዎደ ናአዳ ሃሳይስ፤ ናአዳ ቆፓይስ፤ ናአዳ አኬካይስ። ታ ካሃምዳ ዎደ ናአተ ሀኑዋ አጋስ። 
\v 12 ሀእ ፖኦይ ባይና ሶን ማስቶተን በኤይሳዳ በኦስ፥ ሽን ሄ ዎደ ኑ ቆንጨን በአና። ሀእ ኑ ኤራተፈ ጉ ኤሮስ፥ ሽን ሄ ዎደ ፆሳይ ኑና ኤረይሳዳ ፖሎ ኤራና።
\p
\v 13 ህዛ፥ አማኖይ፥ ኡፋይስነ ሲቆይ፥ ሀ ሄት ኤቅድ ዳና። ሽን ሀይሳታፐ አይ ሲቆ።
\c 14
\s1 ትንብተነ ዱማ ዱማ ዶና
\p
\v 1 ሲቆ ካልተ። አያና እሞታታ ምንድ ኮይተ፤ ኡባፈ አድ፥ ትንብተ እሞታ ምንድ ኮይተ። 
\v 2 ዱማ ዱማ ዶናን ኦደትያ አስ ፆሳስ ኦዴስፐ አትሽን፥ አሳስ ኦደና። ሽን አሳስ ቆንጭቦና ፁራ አያና ዎልቃን ኦደትያ ግሾ፥ ኦንካ እ ኦደተይሳ አኬከና። 
\v 3 ሽን ትንብተ ኦደይሳት አሰ ድቻናዉ፥ ምንናዉነ ምንናዉ አሳስ ኦዴስ። 
\v 4 ዱማ ዱማ ዶናን ኦድያ አስ ባና ድቼስ። ሽን ትንብተ ኦድያ አስ ዎሳ ኬ ድቼስ።
\p
\v 5 ህንተ ኡባይ ዱማ ዱማ ዶናን ኦደትያኮ ታ ዶሳይስ፥ ሽን ትንብተ ኦዳናይሳ አዳ ዶሳይስ። ዱማ ዱማ ዶናን ኦደተይሳ ዎሳ ኬ ድቻናዉ ብርሽያ አስ ይኮ፥ ዱማ ዱማ ዶና ኦደተይሳፈ ትንብተ ኦደይስ አስ።
\p
\v 6 ሽን ታ እሻቶ፥ ታኒ ህንተኮ ባዳ፥ ቆንጨን ዎይኮ ኤራተን ዎይኮ ትንብተ ኦዶን ዎይኮ ትምርተን ግዶናሽን፥ ዱማ ዱማ ዶናን ኦደትኮ ህንተና አይ ማዳኔ? 
\v 7 ዱማ ዱማ የ ሚሸታስ እስ ቆሞ ግርስ ደእኮ፥ ሱሱልኤ ግርስነ ዲ ግርስ ዋትድ ሻክ ኤራኔ? 
\v 8 ቃስ ሞይዘ ፑኖይ ጌይድ ኤረቶና እፅኮ ኦላስ ጊገተይ ኦኔ? 
\v 9 ሄሳዳካ፥ ዱማ ዱማ ዶናን ህንተ ኦደተይስ ቆንጨ ግዶና እፅኮ ህንተ ኦደይሳ ኦን ኤራኔ? ሄስ ጫርኮስ ኦድያ መላ።
\p
\v 10 ሀ አላምያን ዳሮ ዶናት ደኦሶና፤ ሄ ኡባስ ብርሸ ደኤስ። 
\v 11 ሽን እስ አስ ኦደትያ ዶና ታኒ ኤሮና እፅኮ እ ታዉ እማ ግዴስ፤ ታካ እያዉ እማ ግዳይስ። 
\v 12 ሄሳዳካ፥ ጌሻ አያና እሞታ ህንተ ኤካናዉ ምንድ ኮይኮ፥ ዎሳ ኬ ድቻናዉ ኡባፈ አያ እሞታ ኮይተ።
\p
\v 13 ዱማ ዱማ ዶናን ኦደትያ አስ ባ ኦዳ ብርሻናዉ ብርሸ እሞታይ እመታና መላ ፆሳ ዎሶ። 
\v 14 ታኒ ዱማ ዱማ ዶናን ፆሳ ዎስኮ፥ ታ አያናይ ዎሴስ፥ ሽን ታ ዎዛናይ አይኮካ ጎኤተና። 
\v 15 ያትን፥ ታ አይ ኦናዉ ኮሺ? ታኒ ታ አያናን ዎሳይስ፤ ታ ዎዛናንካ ዎሳይስ። ታኒ ታ አያናን የፃይስ፤ ታ ዎዛናንካ የፃይስ። 
\v 16 ሄሳ ግዶና እፅኮ ኔኒ ነ አያናን ፆሳ ጋላትያ ዎደ ሄ በሳን ኔኒ ገይሳ ኤሮና አስ ነ ጋላተይሳ ዎይግድ፥ “አምንእ” ጋኔ? 
\v 17 ኔኒ ፆሳ ጋላተይስ ሎኦ፥ ሽን ሀራ አስ ማደና።
\p
\v 18 ታ ህንተ ኡባፈ አዳ ዱማ ዱማ ዶናን ኦደትያ ግሾ ፆሳ ጋላታይስ። 
\v 19 ሽን ታኒ ዎሳ ኬን ሀራታ ታማርሳናዉ ዱማ ዱማ ዶናን ታሙ ሙኩሉ ቃላ ኦደታናፐ እቻሹ ቃላ ኤረትያ ዶናን ኦደታናዉ ዶሳይስ።
\p
\v 20 ታ እሻቶ፥ ህንተ ቆፋን ናይታዳ ሀኖፕተ። ህንተ ኢታባስ ናይታዳ ሀንተፐ አትሽን፥ ህንተ ቆፋን ካሃማታ ግድተ። 
\v 21 ጎዳይ፥ ጌሻ ማፃፋን፥
\q1 “ታኒ ሀ አሳስ፥
\q2 ዱማ ዱማ ዶናን ኦደትያ አሳንነ
\q2 እማ እንፃርሳን ኦደትያ አሳን ኦዳና።
\q1 ሽን ሄስ ሀንንካ ታና ስኦኮና” ያጌስ።\x - \xo 14:21 \xo*\xt እሳ 28:11-12.\xt*\x*
\p
\v 22 ህዛ፥ ዱማ ዱማ ዶናን ሃሳዮይ፥ አማኖና አሳስ ማላ ግዴስፐ አትሽን፥ አማንያ አሳሳ ግደና። ትንብተይ አማንያ አሳስ ማላ ግዴስፐ አትሽን፥ አማኖና አሳሳ ግደና።
\p
\v 23 ዎሳ ኬ አሳይ እስፈ ሺቅያ ዎደ፥ ኡባይ ዱማ ዱማ ዶናን ኦደትኮ ኤሮና ዎይኮ አማኖና አሳይ ህንተ ሺቁዋ ይድ፥ “ሀይሳቲ ጎዮሶና” ጎኮናዬ? 
\v 24 ሽን ኤሮና ዎይኮ አማኖና አሳይ ዎሳ ኬ ያ ዎደ አሳይ ትንብተ ኦድሽን፥ ስእኮ ባ ናጋራ አኬካና፤ ቃስ እ ስእዳ ቃላን ፕርደታና። 
\v 25 ኤንቲ እያ ዎዛናን ጌምዳ ቆፋ ቆንጭሳና። ሄሳዳካ፥ “ቱማ ፆሳይ ህንተ ግዶን ደኤስ” ያግድ ማርካትድ፥ ጉፋንድ ፆሳስ ጎይናና።
\s1 ጎይኖ ማራ
\p
\v 26 ታ እሻቶ፥ ኑ ዎይግኖ? ህንተ እስፈ ሺቅያ ዎደ እሱዋስ ማዝሙረይ ደኤስ፤ እሱዋስ ታማርሶ እሞት ደኤስ፤ እሱዋስ ቆንጨ ደኤስ፤ እሱዋስ ዱማ ዱማ ዶናን ሃሳዮይ ደኤስ፤ እሱዋስ ብርሸ እሞት ደኤስ። ሄ ኡባይ ዎሳ ኬ ድችያባ ግዳናዉ በሴስ። 
\v 27 ዱማ ዱማ ዶናን ኦደትያ አሳት ደእኮ፥ ናምአ ዎይኮ ዳርኮ ሄ ግድድ ማራን ማራን ኦደታናዉ በሴስ። ኤንቲ ኦደተይሳ ሀራ አስ ብርሾ። 
\v 28 ሽን ብርሽያ አስ ይኮ፥ ዱማ ዱማ ዶናን ኦደተይስ ዎሳ ኬን ስእ ጎ። ባዉነ ባ ፆሳስ ኦዶ።
\p
\v 29 ትንብተ ኦደይሳት ናምአ ዎይኮ ሄ ግድድ ኦዶ። ቃስ ሀራት ኤንቲ ግያባ ፕርዶና። 
\v 30 ሄ ሺቁዋን ደእያ ሀራ አሳስ እስባይ ቆንጭኮ ካሰ ኦደተይስ ስእ ጎ። 
\v 31 ኡባይ ታማራና መላነ ኡባይ ምናና መላ ማራን ማራን ትንብተ ኦዳናዉ ዳንዳኤታ። 
\v 32 ናበታ አያናይ ናበታስ ኪተቴስ። 
\v 33 ጌሻታ ዎሳ ኬ ኡባይ ሜዘትዳይሳዳ ፆሳይ ሳሮተ ፆሳፈ አትሽን፥ ቡቀ መያ ፆሲ ግደና።
\p
\v 34 ማጫስ ዎሳ ኬን ስእ ጎ። ሙሰ ህገይ ገይሳዳ ኤንቲ ሃረቶፈ አትሽን፥ ዎሳ ኬን ኦዳናዉ ኤንታዉ ማት ባዋ። 
\v 35 ማጫስ ዎሳ ኬን ሃሳዮይ ቦርሶ ግድያ ግሾ እስባ ኤራናዉ ኮይኮ ሶን ባንታ አዝናታ ኦይቾና።
\p
\v 36 ፆሳ ቃላ ኮይሮ ህንተ ኤህደቲ? ዎይኮ ፆሳ ቃላይ ህንተ ፃላላኮ ይዴ? 
\v 37 ኦንካ ባና ናበ ዎይኮ ባና ፆሳ አስ ግድ ቆፕኮ፥ ታኒ ህንተዉ ፃፈይስ ጎዳ ኪታ ግደይሳ አኬኮ። 
\v 38 ሽን ኦንካ አኬኮና እፅኮ እካ አኬከቶፎ።
\p
\v 39 ሄሳ ግሾ፥ ታ እሻቶ፥ ትንብተ ኦዳናዉ ምንድ አሞትተ፤ ቃስ ዱማ ዱማ ዶናን ኦደተይሳካ ድጎፍተ። 
\v 40 ሽን ኡባይካ ዎጋንነ ማራን ግዶ።
\c 15
\s1 ክርስቶስ ሀይቆፐ ደንዱዋ
\p
\v 1 ታ እሻቶ፥ ታ ህንተዉ ማርካትዳ ዎንገላ ህንተ ኤክዳይሳነ ህንተ አማኖይ እያን ኤቅዳይሳ ህንተ አኬካና መላ ታኒ ኮያይስ። 
\v 2 ታ ታማርስዳ ዎንገላ ምንድ ኦይክኮ ህንተ እያን አታና። ሄስ ሀኖና እፅኮ ህንተ አማኖይ ሀዳ ግዳና።
\p
\v 3 ታኒ ኤክዳ ኡባፈ አያ ኪታ ካሰታዳ ህንተዉ እማስ። ሄስካ፥ ጌሻ ማፃፋይ ገይሳዳ፥ ክርስቶስ ኑ ናጋራ ግሾ ሀይቅስ።\x - \xo 15:3 \xo*\xt እሳ 53:5-12.\xt*\x* 
\v 4 ሞገትስ፤ ጌሻ ማፃፋይ ገይሳዳ፥ ሄን ጋላሳን ሀይቆፐ ደንድስ።\x - \xo 15:4 \xo*\xt ማዝ 16:8-10፤ ማቶ 12:40፤ ሀዋ 2:24-32.\xt*\x* 
\v 5 ጰፅሮሳስ ቆንጭስ። ሄሳፈ ጉየ፥ ታማነ ናምኡ ሀዋረታስ ቆንጭስ።\x - \xo 15:5 \xo*\xt ማቶ 28:16-17፤ ማር 16:14፤ ሉቃ 24:34፥ 36፤ ዮሀ 20:19.\xt*\x* 
\v 6 ሄሳፈ ጉየ፥ እቻሹ ፄታፐ ዳርያ አሳስ እስቶሆ ቆንጭስ። ኤንታፈ ዳርያ ባጋይ ሀእ ጋካናዉ ፓፃ ደኦሶና፥ ሽን ጉት ሀይቅዶሶና። 
\v 7 ሄሳፈ ጉየ፥ ያይቆባስ ቆንጭስ፤ ጉየፐ ባ ሀዋረታ ኡባስ ቆንጭስ።
\p
\v 8 ቃስ ዉርሰን አዉጫያ መላ ግድዳ ታዉ ቆንጭስ።\x - \xo 15:8 \xo*\xt ሀዋ 9:3-6.\xt*\x* 
\v 9 ታኒ የሱሳ ሀዋረታ ኡባፈ ላፋ። ታኒ ፆሳ ዎሳ ኬ ጎድዳ ግሾ የሱሳ ሀዋረ ጌተታዳ ፄገታናዉ በሶናይሳ።\x - \xo 15:9 \xo*\xt ሀዋ 8:3.\xt*\x* 
\v 10 ሽን ፆሳ አ ኬሀተን ታ ሀእ ግድዳይሳ ግዳስ፤ እ ታዉ እምዳ አ ኬሀተይ መላ አትቤና። ታኒ ሀንኮ ሀዋረታፐ አዳ ዳቡራስ። ሽን ታራ ደእያ ፆሳ አ ኬሀተይ ኦስፐ አትሽን፥ ታና ግድከ። 
\v 11 ህዛ፥ ታና ግድን ኤንቲ፥ ኑ ኡባይ ታማርሰይ ሄሳ፤ ህንተካ ሄ ኪታ አማንደታ።
\s1 ሀይቅዳ አስ ሀይቆፐ ደንዶ
\p
\v 12 ክርስቶስ ሀይቆፐ ደንድዳይሳ ኑ ሳባክያ ዎደ ህንተፈ እሶት እሶት ያትን፥ ዎይግድ፥ “ሀይቆፐ ደንዶይ ባዋ” ያጎና? 
\v 13 ሀይቆፐ ደንዶይ ባይናባ ግድኮ ክርስቶስ ሀይቆፐ ደንድቤና ጉሱ። 
\v 14 ክርስቶስ ሀይቆፐ ደንድቦናባ ግድኮ ኑ ትምርተይ ቃስ ህንተ አማኖይካ ሀዳ። 
\v 15 ሀይቆፐ ደንዶይ ባይናሽን፥ ኑኒ ፆሳይ፥ “ክርስቶሳ ሀይቆፐ ደንስ” ያግድ ሳባክሸ ፆሳ ዎርዳንቾ ማርካታ ግድዳ ጉሱ። 
\v 16 ሀይቅዳ አሳይ ሀይቆፐ ደንድቦናባ ግድኮ ህዛ፥ ክርስቶስ ሀይቆፐ ደንድቤና። 
\v 17 ክርስቶስ ሀይቆፐ ደንዶናባ ግድኮ፥ ህንተ አማኖይ ሀዳ፤ ቃስ ህንተ ሀእ ጋካናዉ ህንተ ናጋራን ደኤታ። 
\v 18 ህዛ፥ ክርስቶሳ አማንድ ሀይቅዳይሳትካ ይዶሶና ጉሱ። 
\v 19 ኑኒ ሀ አላምያ ደኡዋ ፃላላስ ክርስቶሳን ኡፋይስ ኦዳባ ግድኮ፥ ሀ ሳአን ደእያ አሳ ኡባፈ ኑባይ አዳ ይባታ።
\p
\v 20 ሽን ክርስቶስ ሀይቅዳይሳታስ ሀይቆፐ ደንዶን ባይራ ግድድ ቱማ ደንድስ። 
\v 21 ሀይቆይ እስ አሳ ባጋራ ሀ አላምያ ይዳይሳዳ ሀይቆፐ ደንዶይ እስ አሳ ባጋራ ይስ። 
\v 22 አዳመ ባጋራ አሳ ኡባይ ሀይቅዳይሳዳ ክርስቶሳ ባጋራ አሳ ኡባይ ደኦን ዳና። 
\v 23 ሽን እሶይ እሶይ ባ ማራን ማራን ደንዳና። ክርስቶስ ኡባፈ ካሰትድ ደንድስ፤ ሄሳፈ ጉየ፥ ክርስቶሳይሳት እ ያ ዎደ ደንዳና።
\p
\v 24 ሄሳፈ ጉየ፥ ክርስቶስ ሀላቃተ፥ ማታነ ዎልቃ ኡባ ይስድ፥ ካዎተ ፆሳ አዋስ እምያ ዎደ ዎድያ ዉርሰይ ያና። 
\v 25 ፆሳይ እያ ሞርከታ ኡባ እያ ቶሁዋፐ ጋርሳን ዎና ጋካናዉ ክርስቶስ ሃራናዉ በሴስ።\x - \xo 15:25 \xo*\xt ማዝ 110:1.\xt*\x* 
\v 26 ዉርሰን እ ይሳናዉ ደእያ ሞርከይ ሀይቆ። 
\v 27 ጌሻ ማፃፋን፥ “ፆሳይ ኡባባ እያ ማታፐ ጋርሳን ሃርስስ” ጌተትድ ፃፈትስ። ሽን ኡባ እያ ማታፐ ጋርሳን ሃርስስ ገይስ፥ ኡባባ እያ ማታፐ ጋርሳን ሃርስዳ ፆሳ ጉጀና።\x - \xo 15:27 \xo*\xt ማዝ 8:6.\xt*\x* 
\v 28 ኡባባይ ክርስቶሳ ማታፐ ጋርሳን ሃረትዳፐ ጉየ ክርስቶስ ቃስ ባ ሁጰን ኡባባ ባዉ ሃርስዳ ፆሳስ ሃረታና። ሄ ዎደ ፆሳይ ባ ፃላላ ኡባ ሃራና።
\p
\v 29 ሀይቅዳይሳት ደንዶናባ ግድኮ ኤንታ ግሾ ፃማቀትያ አሳስ አይባ ዎይ ደኢ? ሀይቅዳይሳት ደንዶናባ ግድኮ ያትን፥ አይስ፥ አሳይ ሀይቅዳይሳታ ግሾ ፃማቀቶና?
\p
\v 30 ያትን፥ ኑኒ አይስ ኡባ ዎደ ኑናተ መቶስ አድ እሞና? 
\v 31 ታ እሻቶ፥ ታ ጋላስ ጋላስ ሀይቆስ አዳ እመታይስ። ሄስካ፥ ጎዳ ክርስቶስ የሱሳን ደእያ ደኡዋ እስፈተን ህንተናን ጬቅያ ግሾሳ። 
\v 32 አሳ ቆፋ ግድኮ፥ ታኒ ኤፈሶናን ዶአራ ቡተትዳይስ ታና አይ ማዲ? ሀይቅዳይሳት ሀይቆፐ ደንዶናባ ግድኮ፥ “ዎንቶ ኑ ሀይቅያ ግሾ ሀች ማና ኡያና” ግያ አሳ መላ ግዶስ።\x - \xo 15:32 \xo*\xt እሳ 22:13.\xt*\x*
\p
\v 33 ጭመቶፍተ! ኢታ ላገተ ሎኦ አማለ ኢሴስ። 
\v 34 ህንተ አኬካኮ ስምተ። ናጋራ ኦፍተ። ህንተፈ እስ እስ አሳይ ፆሳ ኤሮኮና። ታኒ ህንተና ዬላያናዉ ሄሳ ጋይስ።
\s1 ደንዶ አሳተ
\p
\v 35 እስ አስ፥ “ሀይቅዳ አሳይ ዋንድ ደንዳኔ? ኤንቲ አይ መላ አሳተራ ያኔ?” ያጎና አገና። 
\v 36 ነኖ ኤያዉ፥ ኔኒ ቢታን ዘርያ ዘረይ ሀይቆና ዶለና። 
\v 37 ኔኒ ዘረይ ግስተ ግድን ዎይኮ ሀራ ካ ቆሞ አይፈ ፃላላ ዘራሳፐ አትሽን፥ ዶልዳ ዶላ ግደና። 
\v 38 ሽን ፆሳይ ዘረስ ባ ዶስዳ መላ መተ እሜስ። ዱማ ዱማ ዘረስ ዱማ ዱማ አሳተ እሜስ። 
\v 39 መተ ኡባ አሾይ እሶ ግደና። ሽን አሳ አሾይ እሱዋ፤ መሄ አሾይ ዱማ፤ ካፎታ አሾይ ዱማ፤ ቃስ ሞሎ አሾይ ዱማ።
\p
\v 40 ሳሎ አሳተ ደኤስ፤ ቃስ ሳአ አሳተ ደኤስ። ሽን ሳሎ አሳተ ቦንቾይ ዱማ፤ ቃስ ሳአ አሳተ ቦንቾይ ዱማ። 
\v 41 አዋ ቦንቾይ ዱማ፤ አጌና ቦንቾይ ዱማ፤ ፆልንቶታ ቦንቾይ ዱማ፤ እስ ፆልንቶይ ሀንኮ ፆልንቱዋፈ ቦንቾን ዱማቴስ።
\p
\v 42 ሀይቅዳይሳት ሀይቆፐ ደንድያ ዎደ ሄሳዳ ሀናና። ሀይቅያ አሳተይ ዘረቴስ፤ ሀይቆና አሳተ ግድድ ደንዴስ። 
\v 43 ቶሸን ዘረትድ፥ ቦንቾን ደንዳና፤ ዳቡራን ዘረትድ፥ ዎልቃን ደንዳና። 
\v 44 መተ አሳተይ ዘረትድ፥ አያና አሳተ ግድድ ደንዳና። መታ አሳተ ደእኮ፥ አያና አሳተ\f + \fr 15:44 \fr*\fq አያና አሳተ፦ \fq*\ft ጌሻ አያናይ ሃርዳ ዎይኮ ጌሻ አያናይ ደኦ እምዳ አሳተ ጉሱ።\ft*\f* ደኤስ።
\p
\v 45 ሄሳዳካ፥ ጌሻ ማፃፋን፥ “ኮይሮ አደይ፥ አዳመይ፥ ፓፃ ደእያ አሰ ግድድ መትስ”\x - \xo 15:45 \xo*\xt መ 2:7.\xt*\x* ያጌስ። ሽን ዉርሰ አዳመይ፥ ክርስቶስ፥ ደኦ እምያ አያና ግድስ። 
\v 46 ሽን መታ አስ ኮይሮ ይን፥ ጉየፐ አያና አስ ይስፐ አትሽን፥ አያና አስ ኮይሮ ይቤና። 
\v 47 ኮይሮ አዳመይ ቢታፈ መትዳ ቢታ አስ፤ ናምአን አዳመይ ሳሎፐ ይዳ ሳሎ አስ። 
\v 48 ቢታፈ መትዳይሳት ቢታፈ መትዳይሳ ዳኖሶና። ሳሎይሳት ሳሎፐ ይዳይሳ ዳኖሶና። 
\v 49 ኑኒ ቢታፈ መትዳ አድያ ዳነይሳ መላ ሳሎፐ ይዳ አድያ ዳናና።
\p
\v 50 ታ እሻቶ፥ ታ ገይስ ሄሳ፤ ሀእ ኑ ማእዳ አሳተይ ፆሳ ካዎተ ላታናዉ ዳንዳኤና። ዎቅያ አሳተይ ዎቆና አሳተ ላተና።
\p
\v 51 ታ ህንተዉ እስ ፁራ ኦዳና። ኑ ኡባይ ሀይቆኮ፥ ሽን ዉርሰን ኡባይ ላመታና። 
\v 52 ሞይዘይ ፑነትያ ዎደ፥ አይፈይ ቅጵ ፄላናዉ ሀሳዮና ላመታና። ሀይቅዳ አሳይ ዎቆና አስ ግድድ ደንዳና፤ ኑካ ላመታና።\x - \xo 15:52 \xo*\xt 1 ተሰ 4:15-17.\xt*\x* 
\v 53 ሀይስ ዎቀይስ ዎቆናይሳ፥ ሀይስ ሀይቀይስ ሀይቆናይሳ ማአናዉ በሴስ።
\p
\v 54 ሀይስ ዎቀይስ ዎቆናይሳ፥ ቃስ ሀይስ ሀይቀይስ ሀይቆናይሳ ማእያ ዎደ፥ ጌሻ ማፃፋን፥ “ሀይቆይ ፆኖን ምተትስ”\x - \xo 15:54 \xo*\xt እሳ 25:8.\xt*\x* ግያ ቃላይ ፖለታና። 
\v 55 ሄሳዳካ፥
\q1 “ሀይቆ፥ ነ ፆኖይ አዉን ደኢ?
\q2 ሀይቆ፥ ነ ቆህያ ዎልቃይ አዉን ደኢ?”\x - \xo 15:55 \xo*\xt ሆሰ 13:14.\xt*\x*
\m ግዳ ቃላይ ፖለታና። 
\v 56 ሀይቆይ ዱክያ ዎልቃይ ናጋራ፤ ቃስ ናጋራ ዎልቃይ ህገ። 
\v 57 ሽን ኑ ጎዳ የሱስ ክርስቶሳ ባጋራ ኑስ ፆኖ እምያ ፆሳ ጋላት ጋኮ።
\p
\v 58 ሄሳ ግሾ፥ ታ ሲቆ እሻቶ፥ ቃፆና ምንድ ኤቅተ። ጎዳ ኦሱዋን ህንተ ዳቡረይስ ጮ ግዶናይሳ ኤርድ ኡባ ዎደ ጎዳ ኦሱዋ አዛሎና ኦተ።
\c 16
\s1 አማንያ አሳስ ሺቅዳ እሞታ
\p
\v 1 አማንያ አሳስ ሚሸ ሺሾባ ጋላትያ ዎሳ ኬታስ ታኒ ኪትዳይሳዳ ህንተካ ኦተ።\x - \xo 16:1 \xo*\xt ሮመ 15:25-26.\xt*\x* 
\v 2 ሚሽያ ሺሾይ ታ ህንተኮ ብያ ዎደ ግዶና መላ እሶይ እሶይ ሳምንታፈ ኮይሮ ጋላስ፥ ዎጋ ዎደ፥ ዎጋ ዎደ፥ ባ ደመይሳፈ ከስድ ባ ሶን ዳጋዮ። 
\v 3 ታኒ ያ ብዳ ዎደ ሚሽያ የሩሳላመ ጋና መላ ህንተ ዶርያ አሳስ ዳብዳበ እማዳ ኤንታ የሩሳላመ ኪታና። 
\v 4 ኤንታራ ታ ቡሳይ ኮሽያባ ግድኮ ኤንቲ ታራ ባናዉ ዳንዳኦሶና።
\s1 ጳዉሎሳ ሀልቾ
\p
\v 5 ታኒ ማቀዶነራ አናዉ ቆፕዳ ግሾ፥ ያ ባዳ ህንተኮ ያና።\x - \xo 16:5 \xo*\xt ሀዋ 19:21.\xt*\x* 
\v 6 ታ ብያ በሳ አዉ ግድኮካ፥ ታ ቡሳን ህንተ ታና ማዳና መላ ህንተ ማታን ጉ ዎደ ጋምኦና አግከ። ባልጎ አጌናታ ህንተ ማታን አና ዋያ አጋና። 
\v 7 ታኒ ኦገራ አሸ ህንተና በአናዉ ኮይከ። ጎዳይ ጊኮ፥ ህንተ ማታን ጉ ዎደ ታካናዉ ቆፓይስ።
\p
\v 8 ሽን ታኒ ጳንፀቆስፀ ባለይ ጋካናዉ ኤፈሶናን ጋምአና። 
\v 9 ታዉ ኦሶይ ኩምዳ ዳልጋ ፐንገይ ዶየትስ፥ ሽን ዳሮ ኤቀትያ ሞርከት ደኦሶና።\x - \xo 16:9 \xo*\xt ሌወ 23:15-21፤ ዛረ 16:9-11፤ ሀዋ 19:8-10.\xt*\x*
\p
\v 10 እ ታ መላ ጎዳ ኦሶ ኦያ አስ ግድያ ግሾ፥ ፅሞትዮስ ህንተኮ ቢኮ፥ ህንተ ማታን እ ህርጎና ዳና መላ ኦተ።\x - \xo 16:10 \xo*\xt 2 ቆሮ 4:17.\xt*\x* 
\v 11 ኦንካ እያ ካፖ። እ ታኮ ሳሮ ስማና መላ እያ ማድድ ሞይዝተ። ታኒ እ ሀንኮ አማነይሳታራ ስማናይሳ ናጋይስ።
\p
\v 12 ኑ እሻ አጵሎስ ሀንኮ አማነይሳታራ ህንተኮ ባና መላ ታ እያ ምን ዎሳስ። ሀእ ህንተኮ ባናዉ ኮይቤና፥ ሽን እያዉ እንጀትያ ዎደ ህንተኮ ባና።
\s1 ዞረነ ሳሮ
\p
\v 13 ባርክተ፤ አማኖን ኤቅተ፤ ፃልተ፤ ምንተ። 
\v 14 ኦሶ ኡባ ሲቆን ኦተ።
\p
\v 15 ታ እሻቶ፥ እስፅፋኖሰይነ እያ ሶ አሳይ አካያን ኤንቲ ኮይሮ አማንዳይሳታ ግደይሳነ አማነይሳታ ማዳናዉ ባንታና አድ እምዳይሳ ህንተ ኤሬታ።\x - \xo 16:15 \xo*\xt 2 ቆሮ 1:16.\xt*\x* 
\v 16 ህንተካ ኤንታ መላ አሳስነ፥ ኤንታራ ኦሶን ዳቡርያ ኡባስ ኪተታና መላ ታ ህንተና ዎሳይስ።
\p
\v 17 እስፅፋኖሰይ፥ ፈርዶናፅስነ አካይቆስ ታኮ ይዳይስ ታና ኡፋይስስ። ህንተ ባይና በሳን ኤንቲ ህንተና ግድድ ታ ፓጫ ኩንዶሶና። 
\v 18 ኤንቲ ህንተና ኡፋይስዳይሳዳ ታናካ ኡፋይስዶሶና። ሄሳ መላ አሳታ ዶጎፕተ።
\p
\v 19 ኢሰ ዎሳ ኬ አሳይ ህንተና ሳሮ ጎሶና። አቅልነ ጵርስቅላ ባንታ ሶን ሺቅያ ዎሳ ኬ አሳራ እስፈ ህንተና ጎዳ ሱንን ዎዛናፐ ሳሮሶና።\x - \xo 16:19 \xo*\xt ሀዋ 18:2.\xt*\x* 
\v 20 አማንያ እሻት ኡባይ ህንተና ሳሮ ያጎሶና።
\p ጌሻ ዬረተ ዬረትሸ እሶይ እሱዋ ሳሮተ። 
\v 21 ታኒ፥ ጳዉሎስ፥ ሀ ሳሮዋ ታ ኩሸን ፃፋስ።
\p
\v 22 ጎዳ ዶሶና አስ ደእኮ፥ ባደትዳይሳ ግዶ። ኑ ጎዳዉ፥ ሃያ!
\p
\v 23 ጎዳ የሱስ ክርስቶሳ አ ኬሀተይ ህንተራ ግዶ።
\p
\v 24 ታ ሲቆይ ክርስቶስ የሱሳን ደእያ ህንተ ኡባራ ግዶ። አምንእ።