\id JON - Gofa Full Bible Latin Version Final
\ide UTF-8
\h Yoonasa maxaafa
\toc1 Yoonasa maxaafa
\toc3 Yoona
\toc2 Yoonasa
\mt1 Yoonasa Maxaafa
\imt Gaatha Qofa
\ip Yoonasa Maxaafay, hara nabe maxaafatape dumma maxaafa. Ha maxaafay, Yoonasi Xoossa kiita ixas gidaysanne guyepe kiitetida taarike odeesipe attishin, sinthara yaanaba odenna.
\ip Yoonasi Isra7eeles mata morke gidida Asoore waanna katama Nanawe kiita ekidi bana mela Xoossi kiittis. Shin Yoonasi he deriyas markatidi simmin, Xoossay he katama maaranaysa eriya gisho, baanaw koybeenna. Hanoshin, dumma duma hanotatape guye, wolqan yaa bis. Yoonasi kiitetidi simmin Nanawe asay banta nagara paaxidi Godaako simmidosona. Goday enta maaris.
\ip Ha maxaafan, wursetha shempuwan Xoossay Yoonasa tamaarsanaw naagetonaba oothidi tamaarsidaysa bessees. Wursethan, Godaas ba medhetetha bolla gita maati de7eysa, I maariya Xoossi gideysanne hari attoshin, ba asaa morketaka maariya Xoossi gideysa qoncisees.
\iot Maxaafa Ayfe Qofata
\io1 Yoonasi Xoossafe baqatanaw dendis \ior (1:1-7)\ior*
\io1 Yoonasa woosa \ior (2:1-10)\ior*
\io1 Nanawe asay Xoossako simuwa \ior (3:1-10)\ior*
\io1 Xoossa maarotanne Yoonasa yiluwa \ior (4:1-11)\ior*
\ie
\c 1
\s1 Yoonasi Xoossafe Baqatuwa
\p
\v 1 Godaa qaalay Amaate na7aa, Yoonasas haysada yaagidi qoncis. 
\v 2 “He katama asa iitatethay ta sinthe gakida gisho, dendada hini wolqaama katama Nanawe bada sabbaka” yaagis. 
\v 3 Shin Yoonasi Godaa sinthafe betidi Tarsesa biitta baanaw keyis. I, Yoophe katama wodhidi Tarsesa biya markabe demmis. Godaa sinthafe betanaw koyidi Tarsesa baanaw koshshiya miishe ciggidi markabiyan gelis. 
\v 4 Shin Goday abba bolla wolqaama carkuwa denthis. Abban wolqaama hobbey wolqaamida gisho markabiya meqanaw gakasu. 
\v 5 Yaatin markabiya oosanchoti yayyidosona. Issoy issoy ba xoossaako ba xoossaako waassis. Qassi markabey kawuyana mela giddon de7iya caana denthidi abban yeggidosona. Shin Yoonasi markabiyas giddo gelidi wolqaama dhisko dhiskis. 
\v 6 Markabiya laaggeysi iyako shiiqidi, “Haysa mela saaten waana dhiskay? Denda ne xoossa woossa! Ooni eri I nuus qadhetidi nuna ashshanekonne” yaagis.
\s1 Yoonasi Abban Yegetis
\p
\v 7 Markabiya oosanchoti issoy issuwako, “Haa yiite, ha iitabay nuna oodde gaason gakidaako eranaw saama yeggana” yaagidosona. Saama yeggin, saamay Yoonasa bolla wodhis. 
\v 8 Enti Yoonasako, “Ha iitabay oodde gaason nu bolla gakidaako ane nuus oda. Ne oosoy aybee? Awupe yadii? Ne biittay awee? Neeni oodde baggee?” yaagidi oychidosona. 
\v 9 Yoonasi zaaridi, “Taani Ibraawe asi; abbanne biitta medhida Godaa, salo Xoossa goyinniya asi” yaagis. 
\v 10 I entaw koyrottidi odidaysada I Godaa sinthafe beteysa eridosona. Hessa gisho, enti yayyidi, “La ayba palaba oothadi” yaagidosona. 
\v 11 Abbaa hobbey kaseysafe haa darida gisho asati Yoonasa, “Nuus abbay si77i gaana mela nena nuuni waatino?” yaagidi oychidosona. 
\v 12 Ika, “Ha wolqaama hobbey hinte bolla dendiday ta gaason gideysa taani erayis. Hessa gisho, tana ekidi abban yeggite. Yaatiko abbay hintew si77i gaana” yaagis. 
\v 13 Shin markabiya oosanchoti markabiya gaxa kessanaw gita pidhidosona. Shin abba hobbey haa darida gisho gaxa kessanaw danda7ibookona. 
\v 14 Hessa gisho, enti Godaako, “Abeeti Godaw, haa ura shempuwa gisho, neeni nuna dhaysonadanne ha geeshsha suutha acuwa neeni nuupe achonada nuuni nena minthidi woossoos” yaagidi Godaa woossidosona. 
\v 15 Hessafe guye, Yoonasa denthidi, abban yeggidosona. Abbaa hobbayka si77i gis. 
\v 16 Yaatin asati Godaas daro yayyidi yarsho yarshidosona; iyaw qangidosona. 
\v 17 Yoonasa mittana mela issi gita molo Goday giigisis. Yoonasi he moluwa ulon heedzu gallasinne heedzu qamma gam7is.
\c 2
\s1 Yoonasa Woosa
\p
\v 1 Yoonasi moluwa ulon de7ishe, ba Godaa Xoossaa haysada yaagidi woossis.
\q1
\v 2 “Taani ta waayan de7ashe nena xeegas;
\q2 neka taw si7adasa.
\q1 Taani Si7oole ciimmuwa giddon de7ashe,
\q2 maado koyada neeko waassas
\q2 Neka ta waasuwa si7adasa.
\q1
\v 3 Neeni tana abba ciimmuwan duge yeggadasa.
\q2 Haathi ta yuushuwa teqis;
\q2 wolqaama zuley ta bollara aadhis.
\q1
\v 4 ‘Taani ne sinthafe wora holetas,
\q2 Shin ne Geeshsha Keetha zaarada be7ana’ gada qopas.
\q1
\v 5 Haathi taw qoodhe gakis,
\q2 Abbaa ciimmoy tana mittis.
\q2 Abban de7iya maatay ta huuphen xaaxetis.
\q1
\v 6 Taani haatha garsan de7iya dereta baasuwa gakada mitettas,
\q2 biitta wulay merinaw ta bolla gordetis,
\q2 Shin ta Godaw Xoossaw, neeni ta shempiw iita ollafe kessadasa.
\q1
\v 7 Ta shempiya doccida wode,
\q2 Godaw ta nena qopas;
\q2 ta woosay neeko ne Geeshsha keethaa gakis.
\q1
\v 8 Hada gidida eeqa xoossata bolla zempeysati,
\q2 new de7iya banta ammanetetha aggoosona.
\q1
\v 9 Shin taani galata mazmure new yarshana.
\q2 Ta qangidabaaka new gathana.
\q2 Ayis giiko, atotethay Xoossafe” yaagis.
\p
\v 10 Hessafe guye, Goday moluwa kiittis. Moloy Yoonasa mela biitta bolla cooyis.
\c 3
\s1 Yoonasi Nanawe Buussaa
\p
\v 1 Godaa qaalay nam7antho Yoonasako haysada yaagidi yis. 
\v 2 “Dendada gita katamaa Nanawe ba; ta new odiya qaala entaw awaaja” yaagis.
\p
\v 3 Yoonasi Godaas kiitetidi Nanawe bis. Nanawey daro gita katama. Ha gaxape hini gaxa gakanaw heedzu qamma hemethees. 
\v 4 Yoonasi katama gelidi issi gallasa oge hemetidi, “Nanawey oytamu\f + \fr 3:4: \fr*\ft Ibraawetho doonan xaafetidaysan oytamu giya wode hara kase birshethati heedza goosona.\ft*\f* gallasape guye dhayana” yaagidi awaajis.
\p
\v 5 Nanawe asay Xoossaa ammanidosona. Xooma awaajidosona; guuthafe gita gakanaw asi ubbay kayo ma7o ma7idosona.
\s1 Nanawe Asay Godaako Simuwa
\p
\v 6 Nanawe kawoy he oda si7ida wode ba kawotetha araatape wodhidi, kawotetha ma7uwa qaaridi kayo ma7o ma7idi bido bolla uttis. 
\v 7 Nanawe deriyas haysada yaagidi awaajisis: “kawapenne iya moorinatape keyida kiittada hachife doomidi hinteranne hinte mehetara, aybibaaka moonna mela uyonna mela. 
\v 8 Asinne mehe ubbay kayo ma7o ma77o. Issi issi asi minthidi Xoossaako waasso. Ba iita ogiyape simmo, ba iita oosuwaka aggo. 
\v 9 Xoossay nuus qadhetidi, nuuni dhayona mela ba wolqaama hanquwafe simmaneko ooni eri!” yaagis.
\p
\v 10 Enti banta iita ogiyape simmidaysa Xoossay be7ida wode entaw qadhetidi enta bolla ehana gida iitaba aggaagis.
\c 4
\s1 Yoonasa Yilonne Godaa Maarota
\p
\v 1 Shin hessi Yoonasa daro ufaysibeenna. Hessa gisho, I yilotis. 
\v 2 Godaako, “Abeeti Godaw taani koyro ta biittan de7ashe gidaysi haysa gidennee? Taani ne sinthafe betada Tarsesa baanaw ellesiday haysasa. Neeni qadheynne maaroti kumida Xoossi gideysa, hanqos ellesonaysanne wuronna siiqon kumidaysa, qassi ehana gida iitabaka qadhetada aggiya Xoossi gideysa taani kaseka erayis. 
\v 3 Ha7i Abeeti Godaw, hayyana tana wodha; de7ope taw hayqoy lo77o” yaagidi woossis.
\p
\v 4 Goday iyako, “Neeni haysatho shenetanaw bessii?” yaagis.
\p
\v 5 Hessafe guye, Yoonasi katamaape gaxa keyidi doloha baggan uttis. Hessan baw shaqara shaqaridi I kuyan uttidi katama bolla gakanaw de7iyaba ba7anaw naagees. 
\v 6 Awa suulape Yoonasa ashshana mela Goday issi gose dolisis. He gose haythay Yoonasa huuphe bolla baggara kuya gidana mela oothis. Yoonasi he gose gaason daro ufaytis. 
\v 7 Shin wontetha gallas wonta guura Xoossay guxune giigisis. He guxuniya gosey melana gakanaw masu. 
\v 8 Away keyiya wode Xoossay doloha baggafe misha carko yeddis. Yoonasi labbanana gakanaw away Yoonasa huuphiya xuuggis. Yaatin I, “De7ope taw hayqoy lo77o” yaagidi hayqos woossis.
\p
\v 9 Xoossay Yoonasako, “Neeni ha gose gisho yilotanaw bessii?” yaagis.
\p Yoonasi, “Ee bessees; ubbaraka hayqana gakanaw yilotanaw taw bessees” yaagis.
\p
\v 10 Yaatin Xoossay Yoonasako, “Zine dolada hachi melida gosees, ne daaburonaaris, ne dichonaris haysa mela qadhetadasa. 
\v 11 Shin ushachinne haddirsi shaakidi eronna xeetanne laatamu mukulu asinne daro mehey de7iya ha gita katamaa Nanawes taani qadhetanaw bessennee?” yaagis.