\id JOL - Gofa Full Bible Latin Version Final
\ide UTF-8
\h Iyyu7eela Maxaafa
\toc1 Iyyu7eela Maxaafa
\toc3 Iyyu
\toc2 Iyyu7eela
\mt1 Iyyu7eela Maxaafa
\imt Gaatha Qofa
\ip Nabiya Iyyu7eela qoncethay Xoossaa seerape iyako simobaanne maarotethi demmidi, Xoossan ooraxoba odees. Nabey Iyyu7eeli daro booley shaari salo kammida mela kumidi yeysanne biitta ubba midi dhayseysa be7is. Iyyu7eeli tuma olanchoti yidi Isra7eele kawotetha olidi dhaysanaysa be7is. Gidoshin, asay Xoossako simmiko, I enta maaranawunne zaaridi anjanaw qaala gelis.
\ip Biittay xuugetida gisho kahineti azzanoosona; hari attoshin biittay ba huuphen yeekees. Godaa pirda gallasi matidaysa Iyyu7eeli be7is. Shin, ha7ika asay banta iita ogiyape Godaako simmiko, Goday enta zaaridi anjanaysa Iyyu7eeli odis.
\ip Iyyu7eeli hanana gidi odidabaape qoncidi bentey ufaysa qaala. Xoossay ba adde nayta bollanne ba macca nayta bolla, yalagata bollanne cimata bolla, ba asa ubbaa bolla ba ayyaana gussanaw qaala gelis (2:28-32). Ha ufaysa qaalay Hawaareta Ooso maxaafan, Phanxeqosxe gallas, tuma gididaysa Phexroosi odis (2:16-21).
\iot Maxaafa Ayfe Qofata
\io1 Boole gado \ior (1:1—2:17)\ior*
\io1 Xoossay ba asaa zaaridi anjana \ior (2:18-27)\ior*
\io1 Xoossay kawotethata pirdana \ior (2:28—3:15)\ior*
\io1 Xoossay ba asaa zaaridi anjana \ior (3:16-21)\ior*
\ie
\c 1
\s1 Boole Gado
\p
\v 1 Batu7eela na7aa Iyyu7eelako Goday kiitida qaalay haysa. 
\v 2 Hinteno cimato, haysa si7ite! Yihuda biittan de7iya asa ubbay si7ite! Haysa melabay hinte wode woyko hinte aawata wode hani erii?
\q1
\v 3 Haysa hinte naytas odite;
\q2 hinte nayti banta naytas odo;
\q2 enta nayti kaalliya yeletas odo.
\q1
\v 4 Gondofe attida kathaa booley mis;
\q2 boolepe attida kathaa guddoy mis;
\q2 guddofe attida kathaa xaqoy mis.
\q1
\v 5 Mal7iya woyney hintefe attida gisho,
\q2 hinteno, mathoteysato barkite yeekite!
\q2 Hinteno, woyne uyiya ubbati zeleelite!
\q1
\v 6 Tayboy bayna booley ta biitta oykis;
\q2 Enta achay gaammo acha mela;
\q2 enta gacoy macca gaammo gaco mela.
\q1
\v 7 Enti ta woyniya dhaysidosona;
\q2 ta balasiya mitha dhoggidosona.
\q1 Enti poqidi mida gisho,
\q2 woyniyanne balasiya tasheti puxu gis.
\q1
\v 8 Geela7iya, ba giigida azinay hayqin,
\q2 kayo ma7o ma7ada yeekeysada hinteka yeekite!
\q1
\v 9 Katha yarshoynne ushsha yarshoy
\q2 Godaa keethan dhayida gisho,
\q2 Godaa keethan oothiya kahineti yeekosona.
\q1
\v 10 Goshshay mela attis; biittay yeekees;
\q2 kathay dhayis; woyneynne zaytey melis.
\q1
\v 11 Gaden de7iya gisteynne bangi dhayida gisho,
\q2 hinteno goshshanchoto, kayotite;
\q2 hinteno woyne tokeysato, zeleelite!
\q1
\v 12 Woyney melis; balasey shullis;
\q2 oromaaney, temirey, apiley,
\q2 gaden de7iya hara mithi ubbay melis;
\q2 hessa gisho, asape ufaysi haakis.
\s1 Maarotako Xeessi
\q1
\v 13 Hinteno kahineto, kayo ma7o ma7idi yeekite;
\q2 hinteno yarsho bessa sinthan ootheysato, zeleelite.
\q1 Hinteno ta Xoossaa sinthan ootheysato,
\q2 xoossa keethi gelidi, kayo ma7o ma7idi aqite.
\q1 Katha yarshoynne ushsha yarshoy,
\q2 Xoossa keethan yarshiyabay baawa.
\q1
\v 14 Xooma awaajite;
\q2 geeshsha shiiqo xeegite.
\q1 Cimatanne biittan de7iya asa ubbaa
\q2 Godaa hinte Xoossaa keethan shiishite;
\q2 yan Godaako waassite.
\q1
\v 15 Godaa gallasay matis;
\q2 he gallasaa ayye!
\q1 He gallasay Ubbaa Danda7iya Xoossaa
\q2 hanqo gallas gididi yees.
\q1
\v 16 Nu sinthafe kathi,
\q2 nu Xoossaa keethaafe,
\q2 ufaysinne ililsi dhayis gidennee?
\q1
\v 17 Zeretida zerethay biitta giddon buuqis;
\q2 kathay dhayida gisho eley kallotis;
\q2 shaaley laaletis.
\q1
\v 18 Heemmiya bessi bayna gisho,
\q2 mehey waassees.
\q2 Hari attoshin dorsa wudeyka
\q2 maata dhayidi un7etees.
\q1
\v 19 Abeeti Godaw, bazzuwa tami mida gisho,
\q2 xaragi denban de7iya maata xuuggida gisho,
\q2 wora mithaa tama lacoy dhaysida gisho,
\q2 taani neeko waassayis.
\q1
\v 20 Goggiya haathi melida gisho,
\q2 tami bazzon de7iya maata midigida gisho,
\q2 bazzo do7atika neeko waassoosona.
\c 2
\s1 Booley Olanchoda Yaana
\q1
\v 1 Xiyoonen moyze punnite;
\q2 ta geeshsha zumaa bolla waassite.
\q1 Biittan de7iya asi ubbay kokoro;
\q2 Godaa gallasay yees; karen de7ees.
\q1
\v 2 He gallasay dhumanne caagana gallas;
\q2 shaaranne sakana dhuma gallas!
\q1 Zumaa bolla xalqey caareysada
\q2 daronne wolqaama booley biitta ma7ana.
\q1 Hessa melabay kase hanibeenna,
\q2 sinthafeka hessa melabay hanenna.
\q1
\v 3 Entafe sinthara miya tami bees;
\q2 entafe guyera lacoy xuuggees.
\q1 Enta sinthay Gannate mela;
\q2 shin enta guyey booddila bazzo mela;
\q2 entafe aybika kessi ekenna.
\q1
\v 4 Enta medhoy para medho mela;
\q2 enti ola parada adarsoosona.
\q1
\v 5 Pari goochiya gaareda giiroosona;
\q2 deriya huuphera gupoosona.
\q1 Buuriya miya tama lacoda xuuggoosona;
\q2 ola baanaw keyida wolqaama olancho daanosona.
\q1
\v 6 Enta sinthan asi kokorees;
\q2 yashshan asa som7oy kareexees.
\q1
\v 7 Enti olanchoda woxoosona;
\q2 toora asada dirsaa bollara gupoosona.
\q1 Enti ubbay maaran boosona;
\q2 banta salpiyafe gaxa keyokona.
\q1
\v 8 Issoy issuwara sugetokona;
\q2 ubbay qinxi gidi sinthe boosona.
\q1 Enti bantara eqeteyisata menthidi boosona;
\q2 enta teqiyabay baawa.
\q1
\v 9 Enti katamaa oykoosona;
\q2 dirsa gimbiya bollara woxoosona.
\q1 Enti keetha bolla keyoosona;
\q2 kaysoda maskootera geloosona.
\q1
\v 10 Enta sinthan biitti qaaxees;
\q2 saloti kokoroosona.
\q1 Awinne ageeni dhumees;
\q2 xoolintoti banta poo7uwa diggoosona.
\q1
\v 11 Goday ba olanchota sinthan guummees;
\q2 iyaw kiitetiya olanchoti taybope bolla.
\q1 Godaa gallasay gitanne daro yashshees;
\q2 He gallasa danda7anay oonee?
\s1 Hinte Wozana Pheedhite
\q1
\v 12 “Ha7ika xooman, yeehoninne azzanon
\q2 hinte polo wozanaape taako simmite.”
\q1
\v 13 Hinte wozanaape attishin,
\q2 hinte ma7uwa peedhopite.
\q1 Godaa, hinte Xoossaako, simmite;
\q2 I, qadheynne maaroti kumidaysa;
\q1 I, hanqanaw ellesonaysanne siiqoy daridaysa;
\q2 I, hintena seeranaw ellesenna.
\q1
\v 14 Goday hinte Xoossay,
\q2 ba hanquwafe simmidi,
\q2 hintena anjaneko ooni erii?
\q1 He wode Godaas hinte Xoossaas,
\q2 katha yarshonne ushsha yarsho yarshana.
\q1
\v 15 Xiyoonen moyze punnite;
\q2 xooma awaajite;
\q2 geeshsha shiiquwa shiiqite!
\q1
\v 16 Asaa shiishidi, hinte shiiquwa geeshshite;
\q2 cimata issife shiishite;
\q2 guutha naytanne dhammeyisata ashshofite.
\q1 Meddan de7eysati
\q2 banta quruxuwape keyo.
\q1
\v 17 Godaas oothiya kahineti Xoossaa keethaa
\q2 barandaafenne yarsho bessaafe giddon eqidi yeeko.
\q1 Enti haysada yaagidi woosso;
\q2 “Abeeti Godaw, ne asaas qadheta;
\q2 kawotethati, ‘Enta Xoossay awunee? yaagana mela oothada,
\q2 ne asaa boresinne miichas yeggofa’ ” yaago.
\s1 Godaa Qadhiya
\q1
\v 18 Goday ba biittas de7iya mishan
\q2 ba asaas qadhetis.
\q1
\v 19 Goday zaaridi ba asa haysada yaagana;
\q2 “Heko, taani hintew kathaa, woyniyanne zaytiya,
\q2 kalsana gakanaw yeddana;
\q2 hizape guye kawotethata giddon hintena bores aggike.”
\q1
\v 20 “Pudeha baggara yida booliya,
\q2 taani yedethada hintefe haassana.
\q1 Baysanne mela biitta enta gooddana;
\q2 sintha baggara de7eyisata Maxine Abba,
\q2 guye baggara de7eyisata Medetiraane Abbaa, yedethana.
\q1 Yan enti hayqidi xinqana.
\q2 tuma Goday wolqaamaba hintew oothis” yaagana.
\p
\v 21 Biittaw, hiza yayyofa;
\q2 Goday gitaba oothida gisho,
\q2 ufaytanne hashshu ga!
\q1
\v 22 Hinteno sa7aa meheto, yayyofite;
\q2 bazzon de7iya maatay aacis.
\q1 Mithay ayfis;
\q2 balaseynne woyne ayfey burkukis.
\q1
\v 23 Hinteno Xiyoone asato, ufaytite;
\q2 Godan hinte Xoossan, hashshu giite!
\q1 I, balgo ira hintew darsidi immis;
\q2 kaseysada silanne torche ira gidisidi immis.
\q1
\v 24 Kathaa bukiya wudumman kathi kumana;
\q2 woyniyanne zaytiya gum7iya ollay kumidi palahana.
\q1
\v 25 Kase taani hinte giddo yeddida,
\q2 wolqaama gondoy, booley, guddotinne xaqoti midaysa,
\q2 ta hintew zaarana.
\q1
\v 26 Hinte min kalsidi palahiya kathi daana;
\q2 malaalsiyaba hintew oothida Godaa;
\q2 hinte Xoossa sunthu galatana;
\q2 ta asay zaaridi yeellatenna.
\q1
\v 27 He wode taani Isra7eele giddon de7eysa,
\q2 taani Goday hinte Xoossaa gideysanne
\q2 taape hara xoossi baynaysa hinte erana;
\q2 ta asay zaaridi yeellatenna.
\s1 Godaa Gallasa
\p
\v 28 Hizape guye haysada hanana;
\q2 taani asa ubbaa bolla ta Ayyaana gussana.
\q1 Hinte adde naytinne macca nayti tinbite odana;
\q2 hinte cimati amuho amuhana;
\q2 hinte na7atethati qoncethi be7ana.
\q1
\v 29 He gallasatan ta adde aylleta bollanne
\q2 ta macca aylleta bolla ta Ayyaana gussana.
\q1
\v 30 Taani saloninne sa7an malaalsiyaba oothana,
\q2 tamanne salo dendiya cuyaa bessaana.
\q1
\v 31 Gitanne yashshiya Godaa gallasay yaanape kase,
\q2 awi dhumana; ageeni suuthu daanana.
\q1
\v 32 He wode haysada hanana;
\q2 Godaa sunthaa xeegiya ubbay attana.
\q1 Goday gidaysada Xiyoone zumaaninne
\q2 Yerusalaamen attidaysati daana.
\c 3
\s1 Hara Kawotethati Pirdetana
\q1
\v 1 “He gallasaninne he wodiyan
\q2 taani Yihudanne Yerusalaame asaa
\q2 di7etethaafe zaarada anjana.
\q1
\v 2 Taani kawotethatan de7iya asaa shiishada,
\q2 Yoosafexa zangaara wodhisana.
\q1 Ta asaa Isra7eele bolla enti oothida iita oosuwa gisho,
\q2 taani enta yan pirdana.
\q1 Enti kawotethata giddon ta asaa laallidosona;
\q2 ta biitta bantaw shaaki ekidosona.
\q1
\v 3 Ta asaa bolla saama yeggidosona;
\q2 laymatiya maccas demmanaw, adde nayta immidosona;
\q2 woyne ushshas macca nayta bayzidosona.
\p
\v 4 “Hinteno, Xiroosa, Sidoonanne Filisxeeme biitta asato, hinte ta bolla ay oothanaw qopidetii? Ta bolla halo keyanaw koyeetii? Hinte hessa koyiko, taani ellesada hinte oosuwa hinte bolla zaarana. 
\v 5 Ta bira, ta worqanne ta al7o miishiya ubbaa ekidi hinte eeqa keethaa gelsideta. 
\v 6 Yihudanne Yerusalaame asaa enta biittafe haassi efidi, Girike asaas bayzideta. 
\v 7 Heko, hinte bayzida bessaafe taani ha77i enta kessada hinte oothidaba ubbaa hinte huuphen zaarana. 
\v 8 Taani hinte adde naytanne hinte macca nayta Yihuda asaas aatha immana. Enti haaho biittan de7iya Saaba asaas enta bayzana. Taani Goday haysa odas.
\q1
\v 9 “Haysada yaagidi kawotethata giddon awaajite;
\q2 Olas giigite; mino asata denthethite,
\q2 olanchoti shiiqidi olas keyo.
\q1
\v 10 Hinte marasha mashshe,
\q2 hinte baaca toora oothidi qoxite!
\q2 Daaburanchoy, ‘Taani mino!’ yaago.
\q1
\v 11 Hinteno, yuushuwan de7iya kawotethato,
\q2 elle keyite; haa shiiqite” yaagite.
\q1 Abeeti Godaw, ne olanchota duge yedda!
\q1
\v 12 “Kawotethati dendidi,
\q2 Yoosafexa zangaara yo;
\q1 Isra7eele yuushuwan de7iya kawotethata,
\q2 ubbaa bolla pirdanaw taani yan uttana.
\q1
\v 13 Enta iitatethay daro;
\q2 caka wodey gakida kathada enta cakite.
\q1 Woyne ayfey ollan kumin yedheysada,
\q2 enta yedhite.
\q1
\v 14 Pirda zangaaran Goday pirdiya gallasay gakis;
\q2 hessa gisho, taybon daro asay he zangaaran shiiqis.
\q1
\v 15 He gallas awinne ageeni dhumana;
\q2 xoolintoti banta poo7uwa diggana.
\q1
\v 16 Goday Xiyoonen gididi dechana;
\q2 Yerusalaamen ba qaala sissana;
\q2 saloynne sa7i kokorana.
\q1 Shin Goday ba asaas,
\q2 Isra7eeles baqatidi attiya bessi gidana.”
\s1 Xoossa Derey Anjetana
\q1
\v 17 “He wode hinte, taani ta geeshsha zumaa bolla,
\q2 Xiyoonen de7iya Godaa hinte Xoossaa gideysa erana.
\q1 Yerusalaame katamay geeshshi gidana;
\q2 allagati zaaridi Yerusalaame olokona.
\q1
\v 18 He gallas dereti mal7anto woyne ushshan xokana;
\q2 zumati maathi goggana.
\q1 Yihuda biittan de7iya shaafa ubban
\q2 haathi pultana.
\q1 Godaa keethan pultoy dhuuqana;
\q2 Seexima zangaara ushshana.
\p
\v 19 “Gibxey baysa gidana;
\q2 Edoomey booddila bazzo gidana.
\q1 Enti Yihuda asaa bolla iitabaa oothidosona;
\q2 xillo asaa suuthaa gussidosona.
\q1
\v 20 Shin Yihudinne Yerusalaamey merinaw,
\q2 yeleta ubbaas de7iya bessi gidana.
\q1
\v 21 Taani halo keyonna aggida enta suuthaa
\q2 haluwa buroo keyana” yaagees Goday.