\id 2TH - Gofa Full Bible Latin Version Final
\ide UTF-8
\h 2 Taselonqe Kiita
\toc1 2 Taselonqe Kiita
\toc3 2 Tase
\toc2 2 Taselonqe
\mt1 Phawuloosi Teselonqe Asaas
\mt2 Xaafida Nam7antho Kiita
\imt Gaatha Qofa
\ip Kiristoosa nam7antho yuussaa bolla dendida oyshoy palama medhida gisho, Teselonqe woosa keethan metoy dari dari bis. Phawuloosi Teselonqe asaas xaafida nam7antho kiitay, “Godaa yuussaa gallasay matis” giya ammano timirtiya bolla minthidi odees. Phawuloosi odishe, Kiristoosi yaanape sinthe, “Geella ura” geetetiya “Kiristoosa ixeysi kaalethin, ha alamiya bolla iitatethinne geellatethi darishe baana” yaagidi enta ammanuwa suurisees.
\ip Hawaarey, metoynne waayey darikoka, enti banta ammanuwan minnanaada, banta duussas koshshiyaba demmanaw minnidi oothana melanne lo77o ooso oothanaw guye goonna mela enta minthidi zorees.
\iot Maxaafa Ayfe qofata
\io1 Gelo qofa \ior (1:1-2)\ior*
\io1 Godaa yuussanne suure pirda \ior (1:3-12)\ior*
\io1 Goday yaana \ior (2:1-12)\ior*
\io1 Ammanetada de7a \ior (2:13-17)\ior*
\io1 Woossite; minnidi oothite \ior (3:1-15)\ior*
\io1 Sarothonne anjo \ior (3:16-18)\ior*
\ie
\c 1
\p
\v 1 Phawuloosi, Sillaaseynne Ximotiyoosi Teselonqe woosa keethan de7iya, Xoossaa Aawabanne Godaa Yesuus Kiristoosaba gidida asaas xaafetida kiita.\x - \xo 1:1 \xo*\xt Hawa 17:1.\xt*\x*
\p
\v 2 Xoossaa nu Aawapenne Godaa Yesuus Kiristoosape aadho keehatethaynne sarotethay hintew gido.
\s1 Kiristoosi Simmiya Wode
\p
\v 3 Nu ishato, hinte ammanoynne hinte issoy issuwanne harata siiqiya siiqoy daro dicciya gisho, nuuni hessas Xoossaa ubba wode galatanaw bessees. 
\v 4 Hintena gakida goodaninne waaye ubban gencaninne ammanon minnidi eqida gisho, nuuni nu huuphen Xoossaa woosa keethatan hintebaa markatishe hintenan ceeqetoos.
\p
\v 5 Hinte iya gisho gidi meto ekiya Xoossaa kawotethaas besseyisata gididi taybetana mela Xoossaa xillo pirdaas haysi malla. 
\v 6 Xoossay tuma pirdaa pirdana. Xoossay hintena waayseysata bolla waaye ehana. 
\v 7 Goday Yesuusi ba wolqaama kiitanchotara, tama lacora salope yaa wode waayetiya hintenanne nuna shempisana. 
\v 8 Qassi Xoossay bana eronnaysatanne nu Godaa Yesuus Kiristoosa Wongelas kiitetonayisata pirdana. 
\v 9 Enti Godaa sinthafenne iya bonchuwa wolqaafe shaaketidi merinaa dhayuwan pirdetana.\x - \xo 1:9 \xo*\xt Isa 2:10.\xt*\x* 
\v 10 He gallas, I ba geeshsha asaaninne bana ammaniya ubban bonchetanawunne sabetanaw yaa wode nu hintew odida kiitaa hinte ammanida gisho, hinte iya boncheyisata giddoninne sabbeyisata giddon daana.
\p
\v 11 Nuuni hintew ubba wode Xoossaa woossey hessasa. Nu Xoossay hintena xeegida de7uwas besseyisata gididi taybetana mela nuuni woossoos. Hinte lo77oba oothanaw amotiya amuwanne hinte ammano oosuwa I ba wolqan polo. 
\v 12 Hessan nu Xoossaanne nu Godaa Yesuus Kiristoosa aadho keehatethan, Godaa Yesuusa sunthaa hinte bonchana; hintenaka I bonchana.
\c 2
\s1 Geella Ura
\p
\v 1 Nu ishato, nu Godaa Yesuus Kiristoosa yuussabaanne nu iyara gahetanaw shiiqanabas nu hintena woossoos.\x - \xo 2:1 \xo*\xt Isa 2:10.\xt*\x* 
\v 2 Tinbiten woyko hara asape si7ida qaalan woyko nuupe ekida kiittada oothidi, “Godaa gallasay gakis” gidi hinte wozanay dagammofonne waabaqopo. 
\v 3 Hintena oonika ay ogenka balethofo. Kasetidi geellatethay qonconnanne dhayoy bessiya geella uray yoonna de7ishin, Godaa gallasay gakenna. 
\v 4 Asi goyinniyabanne xoossayaba ubbaa I ixananne bana dhoqu oothana. Hari attoshin, Xoossa keethi geli uttidi, “Taani Xoosse” gaana.\x - \xo 2:4 \xo*\xt Daane 11:36; Hiz 28:2.\xt*\x*
\p
\v 5 Taani hintera de7ashe hintew odidaysa akeekeketii? 
\v 6 I ba gallasan yaanape attishin, ha77i yaanaysa aybi iya teqiyako hinte ereeta.
\p
\v 7 Asaas qonciboonna geellatetha xuura wolqay ha77ika oothees, shin ha77i iya teqeysi de7ees. Iya teqeysi ogepe kichana gakanaw I qoncenna. 
\v 8 Hessafe guye, geella uray qoncana, shin Godaa Yesuusi ba doonape keyiya shempuwan, ba boncho yuussan iya wodhana.\x - \xo 2:8 \xo*\xt Isa 11:4.\xt*\x* 
\v 9 Geella uray, Xalahe wolqan yidi wordo malaatatanne malaalsiyabata oothana.\x - \xo 2:9 \xo*\xt Maato 24:24.\xt*\x* 
\v 10 Hessadaka, dhayos de7iya asata dumma dumma cimmiya iita ooson balethana. Enti dhayiday ashshiya tumaa dosidi ekonna ixida gishosa. 
\v 11 Hessa gisho, enti wordo gidiyaba ammanana mela Xoossay wolqaama baleso enta bolla yeddana. 
\v 12 Hessika, tumaa ammanonna asati, nagara ooson ufayteysati ubbay pirdetana melasa.
\s1 Ammanthiya Asi Gida
\p
\v 13 Goday dosiya nu ishato, nuuni Xoossaa hinte gisho, ubba wode galatanaw bessees. Hinte attana mela Xoossay Geeshsha Ayyaana wolqan hintena geeshshidaysanne hinteka tumaa ammanidaysan I hintena bayrada dooris. 
\v 14 Xoossay, nu hintew odida Wongela baggara hintena xeegiday, hinte nu Godaa Yesuus Kiristoosara issife bonchetanaasa. 
\v 15 Hiza, nu ishato, minnidi eqite. Nuuni hintena nu doonan gidin woyko dabdaabiyan gidin tamaarsida timirtiya oykite.
\p
\v 16-17 Xoossay nu aaway nuna dosees. I nuus keeha; I merinaa minthethonne lo77o ufaysaa nuus immis. Hinte ubba wode lo77oba oothanawunne odetanaw minthethana melanne maaddana mela nu Godaa Yesuus Kiristoosanne Xoossaa nu aawa woossoos.
\c 3
\s1 Nuus Woossite
\p
\v 1 Wursethan nu ishato, Godaa qaalay hinte giddon ellesidi dalganaadanne bonchetanaada nuus woossite. 
\v 2 Hessadaka, asi ubbay qaala si7idi ammanonna gisho, Xoossay geellatapenne iita asatape nuna ashshana mela nuus woossite.
\p
\v 3 Shin Goday ammanetidaysa; I hintena minthethananne Xalahepe naagana. 
\v 4 Nuuni hintena kiitteysa ha77ika sinthafeka hinte oothanaysas Godan nuuni ammanetoos.
\p
\v 5 Goday hinte wozanaa Xoossa siiquwakonne Kiristoosa danda7aako kaaletho.
\s1 Boozopite
\p
\v 6 Nu ishato, hinte nuupe ekida kiitaa kaallonaysatapenne ooso billiya azalla ammaniya asatape hinte shaaketanaada Godaa Yesuus Kiristoosa sunthan hintena kiittoos. 
\v 7 Nuuda hanidi daanaw besseysa hinte, hinte huuphen ereeta. Nuuni hintera de7iya wode ooso billibooko. 
\v 8 Nuuni oodefeka kathi mela mibooko. Nuus danda7etida mela qammanne gallas oothi daaburidi de7idape attishin, oodeska tooho gidibooko. 
\v 9 Nuuni hessa oothiday, hintew leemiso gidanaasafe attishin, hintefe maade oychanaw nuus maati dhayina gidenna. 
\v 10 Nu hintera de7iya wodeka, “Oothanaw koyonna asi oonika moopo” yaagidi kiitida.
\p
\v 11 Nuuni hessa giday, hinte giddon issi issi azallati de7eysa si7ida gishosa. He asati gelsonnaban gelidi harata ooso bilisoosonape attishin, aykoka oothokona. 
\v 12 Nuuni hessa mela asati maara de7o daanadanne bantana koshshiyaba oothidi demmanaada Godaa Yesuus Kiristoosa sunthan enta kiittoosinne zoroos.
\p
\v 13 Shin nu ishato, lo77o ooso oothanaw azallofite. 
\v 14 Ha77i nuuni ha dabdaabiyan kiitida kiittas kiitetonna asi oonika de7iko he uraa erite. I yeellatana mela iyape shaaketite. 
\v 15 Shin iya ishada seeritepe attishin, morkeda xeellofite.
\s1 Sarotho
\p
\v 16 Saro immiya Goday, ba huuphen hintew ubba wodenne ubba baggara saro immo. Goday hinte ubbaara gido.
\p
\v 17 Taani Phawuloosi, ha kiitaa ta kushen xaafas. Ta kiita ubbaas mallay haysa; taani hessada xaafayis.
\p
\v 18 Nu Godaa Yesuus Kiristoosa aadho keehatethay hinte ubbaara gido.