\id 2PE - Gofa Full Bible Latin Version Final
\ide UTF-8
\h 2 Phexroosa Kiita
\toc1 2 Phexroosa Kiita
\toc3 2 Phex
\toc2 2 Phexroosa
\mt1 Phexroosi Xaafida
\mt2 Nam7antho Kiita
\imt Gaatha Qofa
\ip Hawaariya Phexroosi xaafida nam7antho kiitay, dumma dumma bessan de7iya beni ammaniya asaasa. Ha kiitay xaafetida gaasoy, wordo astamaareta iita oosuwanne enta timirtiya gaason medhetida yeella de7uwa ammaniya asay ixana melasa. He medhetida metota digganaw oge gidanay, Yesuusa banta ayfen be7ida asatinne I tamaarsiya wode banta haythan si7ida asati tamaarsida timirtiya baggara Xoossabanne Godaa Yesuus Kiristoosaba ammanthiya era oykethi. Xaafey minthidi odiday, “Kiristoosi nam7antho yeenna” giya wordo timirtiyaba. He qofa minthidi odishe, “Kiristoosi simmidi yoonna gam7iday, asi ubbay ba nagarape simmana melape attishin, oonika dhayana mela koyonna gishosa” yaagees.
\iot Maxaafa Ayfe qofata
\io1 Sarothonne woosa \ior (1:1-2)\ior*
\io1 Ammaniya asay daana duussa \ior (1:3-15)\ior*
\io1 Kiristoosa bonchuwa \ior (1:16-21)\ior*
\io1 Wordo astamaaretanne nabeta \ior (2:1-22)\ior*
\io1 Kiristoosa nam7antho yuussay tuma \ior (3:1-18)\ior*
\ie
\c 1
\p
\v 1 Yesuus Kiristoosa hawaareynne iya aylley, taani, Simooni Phexroosi, nu Xoossaanne nuna ashshiya Yesuus Kiristoosa xillotethaa baggara nuysa mela al7o ammano ekidaysatas ha dabdaabiya xaafas.
\p
\v 2 Xoossaanne nu Godaa Yesuusa eron aadho keehatethaynne saroy hintew kumo.
\s1 Xoossaa Xeessaanne Dooruwa
\p
\v 3 Ba bonchoninne lo77otethan nuna xeegida iya eron de7osinne Xoossaa daanidi daanaw koshshiyaba ubbaa Xoossay ba wolqan nuus immis. 
\v 4 Hinte iita amo gaason medhetiya ha alamiyan de7iya dhayope kessi ekanaadanne Xoossaa xoossatethan shaaketanaada, ha imotata baggara daro al7onne gita ufaysaa nuus immis. 
\v 5 Hessa gisho, minnidi, hinte ammanuwa bolla lo77otethi, lo77otetha bolla eratethi, 
\v 6 eratetha bolla bana haaro, bana haaro bolla genca, genca bolla Xoossaa daano, 
\v 7 Xoossaa daano bolla ishatetha keehatethi, ishatetha keehatetha bolla siiqo gujite. 
\v 8 Haysati hintew daridi de7iyaba gidiko, Godaa Yesuus Kiristoosa eron maaddiya asinne ayfera de7iya asi oothana. 
\v 9 Shin hessati bayna oonika matan de7iyaba xalaala be7iya qooqe. I ba kase nagaraape geeyidaysa dogis.
\p
\v 10 Hessa gisho, ta ishato, hinte xeessanne hinte dooruwa minthanaw kaseysafe aathidi minnite. Hinte hessata oothiyaba gidiko, dhubeteketa. 
\v 11 Hessan nu Godaanne nuna ashshiya Yesuus Kiristoosa merinaa kawotethaa geliya kumetha maatay hintew imetana.
\p
\v 12 Hessa gisho, hinte haysata eriyabaanne he oykida tuman minnidi de7iyaba gidikoka, taani haysata ubba wode hintena hassayiso aggike. 
\v 13 Taani shempora de7ida wode ubban hintena hassayisanaysi koshshiyaba gada qopayis. 
\v 14 Nu Godaa Yesuus Kiristoosi taw qoncisadaysada taani ha hayqiya asatethaa gam7onna qaara yeggada baanaysa erayis. 
\v 15 Taani hintefe shaaketikoka hinte haysata ubba wode akeekana mela taw danda7etiyaba ubbaa oothana.
\p
\v 16 Nuuni Godaa Kiristoosa wolqaanne iya yuussaba hintew odey, iya gita bonchuwa be7idipe attishin, medhi kessida hayse gidenna. 
\v 17 Daro wolqaama bonchuwafe, “Taani ufaytiya, ta dosiya na7ay haysa” giya qaalay yida wode, Xoossaa Aawape bonchonne galata ekis.\x - \xo 1:17 \xo*\xt Maato 17:1-5; Mar 9:2-7; Luqa 9:28-35.\xt*\x* 
\v 18 Nuuni geeshsha zumaa bolla iyara de7iya wode he qaalay salope yishin si7ida.
\p
\v 19 Nuus hessafe aadhiya ammanetida tinbite qaali de7ees. Sa7i wontana gakanawunne bakali hinte wozanan dolana gakanaw, dhuman poo7iya poo7o asi naageysada, hinte he qaala naagiko lo77o ootheeta. 
\v 20 Ubbaafe kasetidi haysa erite. Geeshsha Maxaafan xaafetida tinbite qaala oonika ba dosidaada birshanaw danda7enna. 
\v 21 Tinbite ubbaa, Xoossay kiitida asati Geeshsha Ayyaanay kaalethin, odidosonape attishin, asa shenen odibookona.
\c 2
\s1 Wordo Astamaareta
\p
\v 1 Shin wordo nabeti kase asaa giddon de7eysa mela ha77ika wordo astamaareti hinte giddon dendana. Enti bantana wozida, Godaa kaddidi, dhaysiya wordo timirtiya ehana. Hessan enti banta bolla ellesidi dhayo ehoosona. 
\v 2 Daro asay yeellayiya enta iita ogiya kaallana; enta gaason tuma ogey cayetana. 
\v 3 Wordo astamaareti miishe yaaridi bantaw medhi kessida haysen hintena bonqana. Benipe doomidi enta pirday giigidi uttis; enta dhayoyka entana naagidi uttis.
\p
\v 4 Nagara oothida kiitanchotas Xoossay qadhetonna, pirda gallas gakanaw gaanname dhuma ollan enta qachi yeggis. 
\v 5 Hessadaka, Xoossay xillotethabaa odiya Nohenne hara laapun asata ashshidi, Xoossaa goyinnona asay de7iya beni alamiya qadhetonna dhayo haathan dhaysis.\x - \xo 2:5 \xo*\xt Medhe 6:1—7:24.\xt*\x* 
\v 6 Geellatas leemiso gidana mela Xoossay Soodomenne Gamoora katamata bido oothidi xuuggidi dhaysis.\x - \xo 2:6 \xo*\xt Medhe 19:24.\xt*\x* 
\v 7 Higges kiitetonna laymatiya asata giddon waayetishe de7ida xillo Looxe Xoossay ashshis.\x - \xo 2:7 \xo*\xt Medhe 19:1-16.\xt*\x* 
\v 8 He xillo addey enta giddon de7ishe, enti oothiya iita oosuwa gallas gallas be7ida wodenne si7ida wode iya lo77o wozanay un7etees. 
\v 9 Hessa gidiko, Goday, bana goyinniya asata paacepe waati ashshaneko, qassi nagaranchota pirda gallasaas gakanaw waatidi seerishe naagisaneeko erees. 
\v 10 Ubbaafe aathidi tuna amon asho qofa kaalleysatanne maata aawata kadheyisata, pirda gallas gakanaw Goday naagisis.
\p He asati ganje minonne otorancho gidiya gisho, salo medhetethata cayishe yayyokonna. 
\v 11 Shin kiitanchoti wordo astamaaretape wolqaninne minotethan daro aadhosonashin Godaa sinthan salo medhetethata cayokona. 
\v 12 Shin he asati banta eronnaban gelidi cayoosona. Enti oyketanawunne hayqanaw yeletida, wozani bayna do7a mela hanoosona; entika wora do7ada coo dhayana.
\p
\v 13 Enti gathida metuwada zaari metootana. Seeta gallas yexishe gupeysa ufaysiyabaa gidi qopoosona. Enti kawushatanne tunata gidi de7ishe hintera shaaketiya siiqo imatuwan ufaytoosona. 
\v 14 Laymatiya maccasi xeellidi aggonna ayfey entaw de7ees; qassi nagara ootheysa aggokona. Ammanon minniboonna asaa cimmoosona. Entaw ubba wode amotiya wozani de7ees; enti baadetidaysata. 
\v 15 Enti suure oge aggidi, makalla miishe siiqidi balida, Bi7oora na7aa Balaama ogiya kaallidosona.\x - \xo 2:15 \xo*\xt Taybo 22:4-35.\xt*\x* 
\v 16 I ba nagara gaason hanqetis; dooni bayna harey asada haasayidi nabiya gooshshatethaa teqis.
\p
\v 17 He asati melida pultota melanne carkoy tookidi efiya shaara mela; enta naagey sakana dhumaa. 
\v 18 Enti hadanne otoro oda odetishe balan de7iya asaa giddofe kessi ekidi buroo minniboonna asata laymatetha asho amon cimmidi balethoosona. 
\v 19 Enti bantaw dhayo aylletethan de7ishe haratako, “Hinte aylletethafe keyana” yaagosona. Ayis giiko, asi ba xoonetidaba ubbaas aylle. 
\v 20 Enti ashshiya nu Godaa Yesuus Kiristoosa eridi ha alamiya tunatethaafe kessi ekidaape guye, zaari qaxetidi xoonetiko kase de7iya de7uwape guyeysi entaw iita gidana. 
\v 21 Enti xillotetha ogiya eri simmidi aggeysafe koyrottidi geeshsha kiitta eronnaako entaw lo77oshin. 
\v 22 “Kani ba cooshshaako guye simmees” qassi, “Meecetida gudunthoy guye simmidi urqan gondoretees” giya leemisoy tuma gideysi enta bolla oothees.\x - \xo 2:22 \xo*\xt Leemi 26:11.\xt*\x*
\c 3
\s1 Goday Yaana
\p
\v 1 Ta siiqo ishato, haysi ta hintew xaafida dabdaabey nam7antho. Taani ha nam7u dabdaabetaka hintew xaafiday, hinte suure qofaa qopanaada hintena denthethanaasa. 
\v 2 Qassi geeshsha nabeti beni odida qaalanne nuna ashshiya Goday, hawaareta baggara kiitida kiitta hinte hassayana mela koyayis. 
\v 3 Ubbaafe kasetidi, wode wursethan banta amuwa kaallidi ase toocheysati, toochishe yaanaysa erite.\x - \xo 3:3 \xo*\xt Yihu 18.\xt*\x* 
\v 4 Enti, “Ta yaana gidaysi awun de7ii? Nu aawati hayqidosona, shin ubbabay sa7i medhetoosape doomidi de7eysada de7ees” yaagosona. 
\v 5 Daro wodepe kase saloy Xoossaa qaalan medhetidaysa; qassi sa7i haathafenne haathan medhetidaysa erishe kaddoosona.\x - \xo 3:5 \xo*\xt Medhe 1:6-9.\xt*\x* 
\v 6 He wode de7iya sa7ay haathan mitetidi dhayis.\x - \xo 3:6 \xo*\xt Medhe 7:11.\xt*\x* 
\v 7 Shin ha77i de7iya saloynne sa7i, geellati pirdetiya gallasaynne dhayiya gallasay gakanaw he qaalan tamas naagetidi de7oosona.
\p
\v 8 Shin ta siiqo ishato, ha issiba dogopite. Godaa matan issi gallasi mukulu laytha mela gideysanne mukulu laythi issi gallasa mela gideysa dogopite.\x - \xo 3:8 \xo*\xt Maz 90:4.\xt*\x* 
\v 9 Issoti issoti gam7is gidi qopeysada, Goday ba ufaysa qaala gisho gam7enna. Shin oonika dhayonna mela koyidi, ubbay banta nagaraape simmana mela hinte gisho gidi gencees.
\p
\v 10 Shin Godaa gallasay kaysoda yaana. He gallasan saloti wolqaama guunthan dhayana; salo medhetethati taman xuugetana; sa7inne iya bolla de7iya ubbay dhayana.\x - \xo 3:10 \xo*\xt Maato 24:43; Luqa 12:39; 1 Tese 5:2; Qon 16:15.\xt*\x* 
\v 11 Hiza, ubbabay hessada hanida dhayiyaba gidiko hinte ay mela asi gidanaw bessii? Hinte geeshshinne Xoossaa daaniya de7o daanaw bessees. 
\v 12 Hinte sinthara yaa Xoossaa gallasaa naagishe hintew danda7etiyaba ubbaa oothidi he gallasaa eesoyite. He gallas salotinne iyan de7iyabay taman xuugetana; wolqaama suulan til7ana. 
\v 13 Shin nuuni xillotethi haariya ooratha salonne ooratha sa7a Xoossaa ufaysa qaalada naagoos.\x - \xo 3:13 \xo*\xt Isa 65:17; 66:22; Qon 21:1.\xt*\x*
\p
\v 14 Hessa gisho, ta siiqo ishato, nu he gallasaa naagiya gisho pokoynne borey baynayisata gididi, Godaara saron daanaw minnite. 
\v 15 Asi ubbay attana mela koyidi Goday danda7eysa dogopite. Qassi nu siiqo ishay, Phawuloosi, Xoossay iyaw immida cincatethan hessada hintew xaafis. 
\v 16 I ba dabdaabeta ubban hessataba xaafis. Iya dabdaabeta giddon akeekanaw waaysiya qofati de7oosona. Tamaariboonnanne minniboonna asati hara Xoossaa qaala mirqeysada ha kiitataka dhayanaw machidi mirqoosona.
\p
\v 17 Hessa gisho, ta siiqo ishato, hinte hessa eriya gisho makallata balan cimetidi, dhayonna melanne minnidi de7iya bessaafe kundonna mela naagetite. 
\v 18 Shin hinte nuna ashshiya nu Godaa, Yesuus Kiristoosa aadho keehatethaaninne eratethan diccite. Iyaw ha77ika merinawuka bonchoy gido. Amin7i.