\id 1TH - Gofa Full Bible Latin Version Final
\ide UTF-8
\h 1 Teselonqe Kiita
\toc1 1 Teselonqe Kiita
\toc3 1 Tese
\toc2 1 Teselonqe
\mt1 Phawuloosi Teselonqe Asaas
\mt2 Xaafida Koyro Kiita
\imt Gaatha Qofa
\ip Teselonqey, Roome kawotethan de7iya Maqedoone biittas waanna katama. Phawuloosi Teselonqen woosa keetha Filphisiyuusa yeddidi bidaape guye essis. Gidoshin, Ayhudeta ammano kaallanaw giigetidi uttida Ayhude gidonna asay, Phawuloosi tamaarsiya ammano timirtiyan xoonetida gisho, Ayhudeti qanaatidi, Phawuloosa timirtiya phalqidosona. Hessa gisho, Phawuloosi gam7onashin Teselonqe yeddidi, Beeriya bis (\xt 1:9-10\xt*). Guyepe, I Teselonqe gakida wode iya maaddiya Ximotiyoosi, Teselonqe woosa keethan de7iya hanotata iyaw geeshshidi odis.
\ip Phawuloosi koyro kiita Teselonqe asaas xaafiday, ammaniya asaa zoranaasanne minthethanaasa. I enta ammanuwabanne enta siiquwaba lo77o markatethi si7ida wode Xoosse galatis. Kase I enta giddon de7ida wode ay mela duussu de7idaako enta hassaysees. Hessafe guye, Kiristoosa nam7antho yuussaba oyshetida oyshaas zaaro immees. He oyshatape guuthati, “Kiristoosi nam7antho yaanape sinthe hayqida ammaniya asi, Kiristoosa yuussay immiya merina de7o ekanaw danda7ii? Kiristoosi nam7antho yaanay awudee?” geeteteyisata. Phawuloosi he inje wodiya go7etidi, “Kiristoosa nam7antho yuussaa ufaysan naagishe I yaana gakanaw wopu gidi hinte ooso oothite” yaagidi zorees.
\iot Maxaafa Ayfe Qofata
\io1 Gelo qofa \ior (1:1-3)\ior*
\io1 Teselonqe asaa ammanonne leemiso duussa \ior (1:4—3:13)\ior*
\io1 Xoosse ufaysiya de7o \ior (4:1-12)\ior*
\io1 Kiristoosa nam7antho yuussaba \ior (4:13—5:11)\ior*
\io1 Wursetha zorenne sarotho \ior (5:12-28)\ior*
\ie
\c 1
\p
\v 1 Phawuloosi Sillaaseynne Ximotiyoosi Teselonqe woosa keethan de7iya, Xoossaa Aawabanne Godaa Yesuus Kiristoosaba gidida asaas xaafida kiita.\x - \xo 1:1 \xo*\xt Hawa 17:1.\xt*\x*
\p Aadho keehatethaynne saroy hintew gido.
\s1 Teselonqe Asaa De7onne Ammano
\p
\v 2 Nuuni Xoossaa woossiya wode ubban hintena qopishe hinte gisho ubba wode Xoossaa galatoos. 
\v 3 Xoossaa nu Aawa sinthan ammanon hinte oothida oosuwa, siiqon hinte daaburida daaburanne Yesuus Kiristoosan de7iya ufaysaa ekanaw hinte minnidi eqida equwa ubba wode nuuni qopoos.
\p
\v 4 Nu ishato, Xoossay hintena doseysanne ba ase oothidi hintena dooridaysa nuuni eroos. 
\v 5 Ayis giiko, nuuni Wongela doona xalaalan gidonashin, wolqan, Geeshsha Ayyaananinne Wongela tumaa ammanon hintew ehida. Nuuni hintera gam7ida wode ubban hinte gisho waanidi de7idaako hinte ereeta. 
\v 6 Hinte daro meto ekikoka Geeshsha Ayyaanay immiya ufaysan kiitaa ekideta; nunanne Godaa daanideta.\x - \xo 1:6 \xo*\xt Hawa 17:5-9.\xt*\x* 
\v 7 Hessa gisho, Maqedoonenne Akaya biittan de7iya ammaniya ubbaas leemiso gidideta. 
\v 8 Godaa qaalay hintefe keyidi, Maqedooneninne Akaya xalaalan gidonashin, Xoossaa hinte ammaneysi ubbason si7etis. Hiza, nuuni gaanabay aykoyka baawa. 
\v 9 Nuuni hinteko bida wode hinte nuna mokida mokuwanne hinte, hinte eeqa aggidi tumaanne de7o Xoossaa haggaazanaw hinte simmidaysa enti banta huuphen odoosona. 
\v 10 Qassi Xoossaa Na7ay, Yesuusi, Xoossay hayqope denthidaysi, sinthafe yaana Xoossaa hanquwafe nuna ashshanaysi, salope yaanaysa hinte naageysa enti markatoosona.
\c 2
\s1 Phawuloosi Teselonqen Oothida ooso
\p
\v 1 Ta ishato, nuuni hinteko biday mela gidonnaysa hinte, hinte huuphen ereeta. 
\v 2 Shin nuuni hinteko Teselonqe yaanape sinthe Filphisiyuusa kataman waayetidaysanne cayetidaysa hinte ereeta. Daro ixoy de7ikoka hintew iya Wongela odana mela Xoossay nuus minotethi immis.\x - \xo 2:2 \xo*\xt Hawa 16:19-24; 17:1-9.\xt*\x* 
\v 3 Nuuni hintena zoriday balethon woyko cimon woyko genen gidenna.
\p
\v 4 Shin Xoossay nunan ammanetidi ba Wongela odana mela nuus hadara immida gisho odoos. Nu hessa oothey nu wozanaa be7iya Xoossaa ufaysanaasafe attishin, ase ufaysanaasa gidenna. 
\v 5 Nu miishe yaaridi wordo hintena sabbishe hinteko yoonnaysa loythidi ereeta; Xoossay nuus marka. 
\v 6 Nuuni hintefe gidin woyko hara asa oodefeka boncho koyibooko. 
\v 7 Nuuni Kiristoosa hawaare gideysada nuus koshshiyaba immite gidi ekanaw danda7oos, shin aayiya ba nayta dicheysa mela hinte giddon ashke gidida. 
\v 8 Nu hintena dosida gisho Xoossaa Wongela hintew shaako xalaala gidonashin, nu de7uwaka hintew immanaw giigida. Hinte nuus daro al7o. 
\v 9 Nu ishato, nu oosuwanne nu daabura ereeta. Hintew Xoossaa Wongela odishe, hintena waaysonna mela qammanne gallas oothida.
\p
\v 10 Nu de7oy hinte ammaneyisata mataninne Xoossaa sinthan geeshshi, xillonne boretonaysa gideysas hinte marka. 
\v 11 Nuuni hintew huuphen huuphen yelidaysati banta naytas haneysada hanidaysa ereeta. 
\v 12 Nu hintena zorida, minthethida. Qassi ba kawotethaanne ba bonchuwa shaakanaw hintena xeegiya Xoossaa ufaysiya de7o hinte daana mela hintew minthidi odida.
\p
\v 13 Hintew nuuni Xoossaa qaala odida wode asa qaalada gidonashin, Xoossaa qaalada si7idi ekida gisho nuuni ubba wode Xoossaa galatoos. I tuma Xoossaa qaala; Xoossaa qaalay ammaniya hintenan oothees.
\p
\v 14 Ta ishato, hinte Yihuda biittan de7iya woosa keethatanne yan Kiristoos Yesuusa kaalliya asatada hanideta. Enta Ayhudeti waaysidaysada hintenaka hinte biitta asay waaysidosona.\x - \xo 2:14 \xo*\xt Hawa 17:5.\xt*\x* 
\v 15 He Ayhudeti Godaa Yesuusanne nabeta wodhidosona; qassi nuna goodidosona. Enti Xoossaa ufaysonaysatanne ase ubbaa ixeyisata.\x - \xo 2:15 \xo*\xt Hawa 9:23, 29; 13:45, 50; 14:2, 5, 19; 17:5, 13; 18:12.\xt*\x* 
\v 16 Enti hari attoshin, Ayhude gidonna asay attana mela nuuni entaw qaala odeysa diggoosona. Hessada hanidi enta nagaraa xuu7ay kumana gakanaw ubba wode nagara oothosona. Wursethan, Xoossaa hanqoy enta bolla wodhees.
\s1 Teselonqe Asaa Be7anaw Amotees
\p
\v 17 Shin nu ishato, nuuni nu qofan gidonashin, ashon hintefe shaaketidi guutha wode gam7idaysan hintena daro laamotidi be7anaw koyida. 
\v 18 Nu simmi hinteko baanaw koyida. Taani ta huuphen hinteko baanaw koyas, shin Xalahey nuna diggis. 
\v 19 Hiza, nu Godaa Yesuus Kiristoosi yaa wode, nu ufaysay woyko nu ceeqetiya nu kallachay oonee? Hintena gideketiyee? 
\v 20 Tuma hinte nu bonchonne nu ufaysi.
\b
\c 3
\p
\v 1 Hessa gisho, nuus gencanaw danda7etonna ixin, Ateena kataman nurka attanaw qofa qachida.\x - \xo 3:1 \xo*\xt Hawa 17:15.\xt*\x* 
\v 2 Hintena zoranaadanne ammanon hintena minthethanaada nuura issife Xoossas ootheysanne Kiristoosa Wongela odiya nu ishaa Ximotiyoosa hinteko kiitida. 
\v 3 Hintena gakida goodan hintefe oonika guye simmofo. He gooday nuus Xoossa shene gideysa hinte, hinte huuphen ereeta. 
\v 4 Nu hintera de7iya wode goodi gakanaysa hintew koyrottidi odida. Hinte ereysa mela hessada hanis. 
\v 5 Hessa gisho, taw gencanaw danda7etonna ixin, “Ooni eri Xalahey enta paacidi nu daabura mela ashshona aggenna” gada hinte ammanuwaba eranaw Ximotiyoosa hinteko kiittas.
\p
\v 6 Ha77i Ximotiyoosi hinte matape yidi, hinte ammanuwabanne hinte siiquwaba lo77o wore nuus odis. Qassi hinte ubba wode nuus lo77o qopeysanne nuuni hintena be7anaw laamoteysada hinteka nuna be7anaw laamoteysa I nuus odis.\x - \xo 3:6 \xo*\xt Hawa 18:5.\xt*\x* 
\v 7 Ta ishato, nuna gakiya waayaninne nu meto ubban hinte ammanuwa gisho hintenan minetida. 
\v 8 Hinte Godan minnidi de7iko nuka de7on de7oos. 
\v 9 Hiza, nuuni hinte gaason demmida ufaysas Xoossaa waati galatino? 
\v 10 Nuuni hintena be7anawunne hinte ammanuwan pacidaba kunthanaw qammanne gallas nu kumetha wozanan Xoossaa woossoos.
\p
\v 11 Xoossay nu aaway ba huupheninne nu Goday Yesuus Kiristoosi nu hinteko baana ogiya giigiso. 
\v 12 Nu hintena daro doseysada Goday hinte issoy issuwa siiqiya siiqonne ase ubbaa siiqiya siiqo hintew darsonne gujo. 
\v 13 Nu Goday Yesuus Kiristoosi ba geeshshatara yaa wode Xoossaa, nu aawa sinthan hinte wozanay geeshshinne borey baynaysa oothidi I hintena minthethana.
\c 4
\s1 Xoosse Ufaysiya De7o
\p
\v 1 Wursethan, ta ishato, Xoossaa ufaysanaw hinte waanidi daanaw bessiyako nuupe tamaarideta. Hessi hinte koyrope de7ida de7uwa, shin ha77i hinte kaseysafe aathidi oothanaada Godaa Yesuusa sunthan hintena woossosinne zoroos. 
\v 2 Nuuni Godaa Yesuusa maatan hintena kiitida kiitay awuseko ereeta.
\p
\v 3 Xoossay, hinte geeshshi gidana melanne laymatonna mela koyees. 
\v 4 Hinte issoy issoy, hinte machetara geeshshatethaninne bonchon daanaw bessees. 
\v 5 Xoossaa eronnanne ammanonna asada laymatetha amon xuugetofite. 
\v 6 Nu kase hintew odidaysadanne minthi zoridaysada Goday hessa melaba oothiya ubbaa pirdiya gisho, oonika haysatan ba ammaniya ishaa naaqanawunne cimmanaw bessenna. 
\v 7 Xoossay nuna geeshshatethan daana mela xeegisipe attishin, tunatethan daana mela xeegibeenna. 
\v 8 Hessa gisho, ha timirtiya ixiya oonika hintew Geeshsha Ayyaana immiya Xoossaa ixeesipe attishin, ase gidenna.
\p
\v 9 Hinte issoy issuwa waati siiqaneko Xoossay hintena tamaarsida gisho, ha77i siiqoba nu hintew xaafanaw koshshenna. 
\v 10 Qassi Maqedoone biittan de7iya ammaniya ishata ubbaa tuma hinte doseeta. Shin nu ishato, ha77ika hinte enta aathidi dosana mela hintena woossoos.
\p
\v 11 Nuuni kase hintew odidaysada wopu gida de7uwa de7ite. Hinte, hinte ooso oothidi hintew duussas koshshiyaba demmite. 
\v 12 Hessada haniko, ammanonayisata matan hinte bonchetana; qassi hintena koshshiyabas oonaka aaddasheketa.
\s1 Goday Yaana
\p
\v 13 Nu ishato, ammanidi hayqida asati hananaba hinte erana mela nu koyoos. Hinte enta gisho ufaysi bayna asada kayotofite. 
\v 14 Nuuni, Yesuusi hayqidaysanne qassi hayqope dendidaysa ammanoos. Hessadaka, Xoossay Yesuusa ammanidi hayqidaysata iyara wolla ehanaysa ammanoos.
\p
\v 15 Goday nuus odidaysada Goday yaa gallas iyara gahetanaw nuuni paxa de7eysati, hayqidaysatape sinthatoko. 
\v 16 Goday wolqaama kiitara, kiitanchota halaqa girsara, Xoossaa moyze punora, salope wodhana. Kiristoosa ammanidi hayqidaysati koyrottidi hayqope dendana. 
\v 17 Hessafe guye, he wode nuuni paxa de7eysati, Godaara shaaran gahetanaw entara issife salo eketana. Hessafe guye, nuuni Godaara issife merinaw daana. 
\v 18 Hessa gisho, ha qaalan issoy issuwa minthethite.
\c 5
\p
\v 1 Ta ishato, ha hanoti hanana wodiyanne ageena hintew xaafanaw koshshenna. 
\v 2 Godaa Gallasay kaysoy qamma yeysada yaanaysa hinte loythi ereeta.\x - \xo 5:2 \xo*\xt Maato 24:43; Luqa 12:39; 2 Phex 3:10.\xt*\x* 
\v 3 Asay, “Sa7i saro, aykoyka hanenna” yaagishin, maccas iqethi oykeysada dhayoy enti qoponna enta bolla yaana. Enti ay ogenka kessi ekokona.
\p
\v 4 Shin nu ishato, he gallasay hintew kaysoy yeysada yaanaw hinte dhuman de7eketa. 
\v 5 Hinte ubbay poo7o asinne gallasan de7iya asi; nuuni qamma asi woyko dhuma asi gidoko. 
\v 6 Hessa gisho, nuuni harati dhiskeysada dhiskanaw bessenna; nuuni barkanawunne giigidi daanaw bessees. 
\v 7 Dhiskeysati qamma dhiskoosona; mathoteysati qamma mathotosona. 
\v 8 Shin nuuni gallasa asi gidiya gisho giigidi daanaw bessees. Ammanonne siiqo xurureda tiran ma7idi, atotetha ufaysaa huuphen wothiya ola birata barneexada wothidi daanaw bessees.\x - \xo 5:8 \xo*\xt Isa 59:17; Efe 6:13-17.\xt*\x* 
\v 9 Xoossay nuna nu Godaa Yesuus Kiristoosa baggara kumetha atotethi ekana mela doorisipe attishin, hanqos dooribeenna. 
\v 10 Nuuni paxa de7in woyko hayqin, Kiristoosi yaa wode iyara issife daana mela Kiristoosi nu gisho hayqis. 
\v 11 Hessa gisho, hinte kase ootheysada, issoy issuwa minthethitenne dichite.
\s1 Zorenne Sarotho
\p
\v 12 Nu ishato, hinte giddon ootheyisata, hintena kaalethana melanne zorana mela Goday dooridaysata bonchana mela hintena woossoos. 
\v 13 Enti oothiya oosuwa gisho, enta daro bonchitenne siiqite. Issoy issuwara sarotethan de7ite.
\p
\v 14 Nu ishato, nuuni hintena zoroos. Boozata hanqite; babeyisata minthethite; daaburanchota maaddite; ase ubbaa danda7ite. 
\v 15 Oonika iita gisho iita zaaronna mela naagetite. Hinte wolisinne asa ubbaas lo77oba oothanaw minnite.
\p
\v 16 Ubba wode ufaytite. 
\v 17 Ubba wode Xoossaa woossite. 
\v 18 Ubbaban galatite. Kiristoos Yesuusa baggara Xoossay hintefe koyey hessa.
\p
\v 19 Geeshsha Ayyaana oosuwa toysopite. 
\v 20 Tinbite qaala kadhopite. 
\v 21 Ubbabaa paacite; lo77oba ekite. 
\v 22 Iita ooso ubbaafe haakite.
\p
\v 23 Saro immiya Xoossay ba huuphen hintena polo geeshsho. Nu Goday Yesuus Kiristoosi yaana gallasaas, Xoossay hinte ayyaana, hinte shempuwanne hinte kumetha asatethaa borey bayna naago. 
\v 24 Hintena xeegeysi ammanetidaysa gidiya gisho, hessa I polana.
\p
\v 25 Nu ishato, nuus Xoossaa woossite.
\p
\v 26 Ammaniya asa ubbaa geeshsha yeeretethan sarothite.
\p
\v 27 Hinte ha kiitaa ammaniya asa ubbaas nabbabanaada Godaa sunthan hintena woossayis.
\p
\v 28 Nu Godaa Yesuus Kiristoosa aadho keehatethay hintera issife gido. Amin7i.