\id GAL - ጎፋ 
\h ጋላቲያ 
\toc1 ጳዉሎሲ ጋላቲያ ኣሳስ ፃፊዳ ኪታ 
\toc2 ጋላቲያ 
\toc3 ጋላ 
\mt1 ጳዉሎሲ ጋላቲያ ኣሳስ 
\mt2 ፃፊዳ ኪታ 
\imt1 ጋ ቆፋ 
\ip ዬሱሲ ኣሼይሳ ጊዴይሳ ኦዲያ ዎንጌላ ቃላይ ዱማ ዱማ ቤሳን ሳባኬቲን፥ ኣይሁዴ ጊዶና ኣሳይ ኣማኒ ኣማኒ ቢያ ዎዴ «ኪሪስታኔ ጊዳናው ሙሴ ሂጌ ፖላናው ኮሺዬ ኮሼኔ?» ያጊያ ኦይሾይ ኢሲፌ ዴንዲስ። ሄ ዎዴ ጳዉሎሲ፥ «ኪሪስታኔ ጊዳናው ሙሴ ሂጌ ፖላናው ኮሼና፤ ዬሱሳን ኦራ ዴዖ ዴማናው ኮሺያ ዋናይ ኣማኖ። ኣሳይ ፆሳ ሲንን ፂላናው ዳንዳዔይ ኣማኖ ፃላላን» ያጊዲ ታማርሲስ። ሺን ጉ ኢሲያን፥ ጋላቲያ ኣዉራጃን ዴዒያ ዎሳ ኬን ዴዒያ ኣሳ ጊዶን፥ «ኣሲ ፆሳ ሲንን ፂላናው ዬሱሳ ኣማኖ ፃላላ ጊዶናሺን ሙሴ ሂጊያካ ፖላናው ኮሼስ» ያጊዲ ጳዉሎሳ ቲሚርቲያ ጳልቂያ ኣሳቲ ዴዖሶና። 
\ip ጳዉሎሲ ጋላቲያ ማፃፋ ፃፊዳይ፥ ሄ ባላ ቲሚርቲያን ጪሜቲዳ ኣሳ ቱማ ኣማኑዋኮኔ ኣማኖ ዴዑዋኮ ዛራናሳ። ጳዉሎሲ ዬሱሳ ሃዋሬ ጊዴይሳ ቲላይዲ ኦዶ ኦይኪስ። ኢያ ሃዋሬ ኦዲ ፄጊዳይ ኣሴ ጊዶናሺን ፆሳ ጊዴይሳኔ ኢ ኪቴቲዳይ ኣይሁዴ ጊዶና ኣሳስ ጊዴይሳ ቆንጪሲዲ ኦዲስ። ኢያራ ኦይሴዲ ኣሳይ ፂላናው ዳንዳዔይ ኣማኖ ፃላላና ጊዴይሳ ኦዴስ። ዉርሴ ሼምፖታን ኣማኖ ዴዖይ ዬሱሳ ኣማኖን ቤንቲያ ሲቆፔ ፑልቴይሳ ጊዴይሳ ኦዴስ። 
\iot ጋላቲያ ኪታ ኣይፌ ቆፋታ 
\io1 ጌሎ ቆፋ 1፡1-10 
\io1 ጳዉሎሳ ሃዋሬቴ ማታ 1፡11-2፡21 
\io1 ፆሳ ኣ ኬሃቴ ዎንጌላ 3፡1-4፡31 
\io1 ላዓቴኔ ኣማኖን ዱሱ 5፡1-6፡10 
\io1 ኩሻ ቆፋ 6፡11-18 
\ie  
\c 1  
\p  
\v 1 ኣሳፔ ዎይኮ ኣሳ ባጋራ ጊዶናሺን ዬሱስ ኪሪስቶሳፔኔ ኢያ ሃይቆፔ ዴንዳ ፆሳ ኣዋፔ ሃዋሬ ጊዳና ሜላ ኪቴቲዳ ታ ጳዉሎሲ፥  
\v 2 ታራ ዴዒያ ኣማኒያ ኢሻቲ ኡባይ፥ ጋላቲያን ዴዒያ ዎሳ ኬታስ ኪቲዳ ኪታ። 
\p  
\v 3 ፆሳይ ኑ ኣዋይኔ ኑ ጎዳ ዬሱስ ኪሪስቶሲ ሂንቴው ኣ ኬሃቴኔ ሳሮቴ ኢሞ። 
\p  
\v 4 ሃ ኢታ ዎዲያፔ ኑና ኣሻናው፥ ኑ ፆሳ፥ ኑ ኣዋ ሼኔን ኪሪስቶሲ ኑ ናጋራ ጊሾ ባና ኣ ኢሚስ።  
\v 5 ፆሳስ ሜሪናፔ ሜሪና ጋካናው ቦንቾይ ጊዶ። ኣሚንዒ። 
\s1 ቱማ ዎንጌላይ ኢሲኖ 
\p  
\v 6 ኪሪስቶሳ ኣ ኬሃቴን ሂንቴና ፄጊዳ ፆሳ ኣጊዲ፥ ሃራ ዎንጌላኮ፥ ሂንቴ ኤሌሲዲ፥ ዋኒዲ ሲሚዳኮ ታና ማላሊሴስ።  
\v 7 ሂንቴና ባሌናዉኔ ኪሪስቶሳ ዎንጌላ ዎቢሳንው ኮያ ጉ ኣሳቲ ዴዖሶናፔ ኣቲን ቱማ ዎንጌላይ ኢሲኖ።  
\v 8 ሺን ኑና ጊዲን ዎይኮ ሳሎ ኪታንቾ ጊዲን ኑኒ ሂንቴው ኮይሮ ኦዲዳ ዎንጌላፔ ዱማቲያ ሃራ ዎንጌላ ሂንቴው ኦዲያባ ጊዲኮ፥ ኢ ቃንጌቲዳባ ጊዶ።  
\v 9 ሃይሳፌ ሲን ኑኒ ጊዳይሳዳ ሃዒካ ዛራዳ ጋይስ። ሂንቴ ኤኪዳ ዎንጌላፔ ዱማቲያ ዎንጌላ ኦኒካ ሂንቴው ኦዲኮ ሄ ኡራይ ቃንጌቲዳባ ጊዶ። 
\p  
\v 10 ያቲን፥ ታና ኣሲ ናሻና ሜላ ኮያይናዬ? ዎይኮ ፆሲ ናሻና ሜላ ኮያይና? ዎይኮ ታ ኣሴ ኡፋይሳናው ኮያይና? ታ ኣሴ ኡፋይሳናው ኮያባ ጊዲኮ፥ ኪሪስቶሳ ኣይሌ ጊዲኬ። 
\s1 ጳዉሎሳ ፄጌቴ 
\p  
\v 11 ታ ኢሻቶ፥ ታ ሂንቴው ኦዲዳ ዎንጌላይ ኣሳፔ ጊዶናይሳ ሂንቴ ኤራና ሜላ ታ ኮያይስ።  
\v 12 ታው ሃ ዎንጌላ ዬሱሲ ኪሪስቶሲ ቆንጪሲሲፔ ኣቲን ኣሳፔ ኤካቢኬ ዎይኮ ኣሲ ታና ታማርሲቤና። 
\p  
\v 13 ታ ካሴ ኣይሁዴ ኣማኖን ዴዒያ ዎዴ ዋና ዴዒዳኮ፥ ሂንቴ ሲዒዴታ። ታ ዎሳ ኬ ቃይ ባይና ጎዳናዉኔ ይሳናው ባፄታስ።\x - \xo 1:13 \xt ሃ.ኦ 8፡3፤ 22፡4-5፤ 26፡9-11\x* 
\v 14 ኣይሁዴ ኣማኖ ናጎን፥ ታ ዎዴን ዴዒያ ኣይሁዴ ኢሻታፔ ኣይስ። ኑ ኣዋታ ዎጋስካ ኣዳ ሚሼታይስ።\x - \xo 1:14 \xt ሃ.ኦ 22፡3\x* 
\p  
\v 15 ሺን ታ ቡሮ ታ ኣዬ ኡሎን ዴዒሺን ፆሳይ ታና ዶሪስ፤ ባ ኣ ኬሃቴን ታና ፄጊስ።\x - \xo 1:15 \xt ሃ.ኦ 9፡3-6፤ 22፡6-10፤ 26፡13-18\x* 
\v 16 ኣይሁዴ ጊዶና ኣሳስ ዎንጌላ ኦዳና ሜላ ፆሳይ ባ ናዓ ታው ቆንጪሲዳ ዎዴ ታ ኦዴራካ ዞሬታቢኬ።  
\v 17 ዎይኮ ታፔ ሲን ሃዋሬ ጊዲዳይሳታራ ጋሄታናው ዬሩሳላሜ ባቢኬ። ሺን ታ ካሴታዳ ኣራቤ ቢታ ባስ፤ ሄሳፌ ሲማዳ ዳማስቆ ካታማ ያስ።  
\v 18 ሄ ላይፌ ጉዬ፥ ጴፂሮሳራ ጋሄታናው ዬሩሳላሜ ባዳ ኢያራ ታማኔ ኢቻሹ ጋላስ ኡታስ።\x - \xo 1:18 \xt ሃ.ኦ 9፡26-30\x* 
\v 19 ሺን ጎዳ ኢሻ ያይቆባፔ ኣቲን ሃንኮ ሃዋሬታ ቤዓቢኬ። 
\p  
\v 20 ታ ሂንቴው ፃፊይዳይሲ ዎርዶ ጊዶናይሳ ፆሳ ሲንን ሂንቴው ቆንጪሳይስ። 
\p  
\v 21 ሄሳፌ ጉዬ፥ ታኒ ሶሪያ ቢታኔ ኪልቂያ ቢታ ባስ።  
\v 22 ዪሁዳን ዴዒያ ዎሳ ኬ ኣሳይ ታና ቤዒዲ ኤሪቦኮና።  
\v 23 ሺን ኤንቲ፥ «ካሴ ኑና ጎዲያ ኡራይ፥ ሃዒ ሄ ኢ ይሳናው ኮያ ኣማኑዋባ ሳባኬስ» ያጌይሳ ሲዒዶሶና።  
\v 24 ሲዒዳ ኡባይ ታ ጋሶን ፆሳ ጋላቲዶሶና። 
\c 2  
\s1 ሃዋሬቲ ጳዉሎሳ ኤኪዶሶና 
\p  
\v 1 ታማኔ ኦይዱ ላይፌ ጉዬ፥ ባርናባሳራ ዛራዳ ዬሩሳላሜ ባስ። ሄ ዎዴ ቲቶ ታራ ኤካዳ ባስ።\x - \xo 2:1 \xt ሃ.ኦ 11፡30፤ 15፡2\x* 
\v 2 ፆሳይ ታው ቆንጪሲዳ ቆንጬን ያ ባዳ ኣይሁዴ ጊዶና ኣሳ ጊዶን ታ ሳባኪያ ዎንጌላ ኤንታው ቆንጪሳስ። ካሴ ታ ዎፂዳ ዎይኔ ሃዒካ ታ ዎፂያ ዎይ ሃዳ ጊዶና ሜላ ጋዳ ካሌይሳታ ዱማ ሺሻዳ ኤንታው ኦዳስ።  
\v 3 ሃሪ ኣቶሺን፥ ታራ ዴዒያ ቲቶይ ጊሪኬ ኣሲ ጊዲኮካ፥ ቃፃሬቶ ጊዲ ኡንዔቦኮና።  
\v 4 ጊዶሺን፥ ኣማኒያ ኢሻታ ዳኒዲ ኑ ጊዶ ጌሊዳ ኢሶቲ ኢሶቲ ኢ ቃፃሬታና ሜላ ኮዪዶሶና። ሄ ኣሳቲ ኪሪስቶስ ዬሱሳን ኑስ ዴዒያ ላዓቴ ዎቺዲ ቤዓናው ጌማን ኑ ጊዶ ጌሊዲ ዛሪዲ ኑና ኣይሌ ኦናው ኮዮሶና።  
\v 5 ሺን ቱማ ዎንጌላይ ሂንቴናን ሚኒዲ ዳና ሜላ ኑኒ ሃሪ ኣቶሺን፥ ጉ ዎዴስካ ኤንታው ኩሼ ኢሚቦኮ። 
\p  
\v 6 ሺን ሃላቃ ዳኒያ ኣሳታ ኦናቴይ ታው ኣይኮካ ጊዴና። ፆሳይ ኣሳ ሶምዖ ቤዒዲ ፒርዴና። ሃ ኣሳቲ ታ ማርካቲያ ዎንጌላ ቦላ ጉጂዳባይ ባዋ።\x - \xo 2:6 \xt ዛሬ 10፡17\x* 
\v 7 ሺን ጴፂሮሲ፥ ኣይሁዴታስ ዎንጌላ ኦዳና ሜላ ፆሳይ ኢያው ሃዳራ ኢሚዳይሳዳ ታዉካ ኣይሁዴ ጊዶና ኣሳስ ዎንጌላ ኦዲያ ሃዳራ ኢሚዳይሳ ኤንቲ ጉዬፔ ቤዒዶሶና።  
\v 8 ሂዛ፥ ጴፂሮሲ ኣይሁዴታ ሃዋሬ ጊዳና ሜላ ኦዳ ፆሳይ፥ ታካ ኣይሁዴ ጊዶና ኣሳስ ሃዋሬ ጊዳና ሜላ ኦስ።  
\v 9 ቃሲ ቱሱ ዳኒዲ ቤንቲያ ያይቆቢ፥ ጴፂሮሲኔ ዮሃኒሲ፥ ታው ኢሜቲዳ ኣ ኬሃቴ ቤዒዳ ዎዴ ኑራ ኢሲፊዳይሳ ቆንጪሳናው ታ ኩሺያኔ ባርናባሳ ኩሺያ ኦይኪዶሶና። ኑኒ ኣይሁዴ ጊዶና ኣሳኮ፥ ቃሲ ኤንቲ ኣይሁዴ ኣሳኮ ባናው ጊጊዶሶና።  
\v 10 ኤንቲ ኑና ሚንዲ ሃዳራ ጊዳይ፥ ኑኒ ማንቆታስ ቆፓናይሳ። ካሴካ ታ ሄሳ ኦናው ኣሞቴይስ። 
\s1 ጳዉሎሲ ጴፂሮሳ ቲሚርቲያ ጳልቂስ 
\p  
\v 11 ጴፂሮሲ ኣንፆኪያ ካታማ ዪዳ ዎዴ ኢ ባሊዳ ጊሾ ታኒ ኢያ ሶምዖን «ኔኒ ባላዳሳ» ጋስ።  
\v 12 ያይቆቢ ኪቲዳ ጉ ኣሳይ ያናፔ ሲን ኢ ኣይሁዴ ጊዶና ኣሳራ ሜስ፥ ሺን ኤንቲ ዪዳፔ ጉዬ፥ «ኣይሁዴ ጊዶና ኣሳፔ ኣማኒዳይሳቲ ቃፃሬታናው ቤሴስ» ጊያ ኣሳስ ያዪዲ ኤንታፌ ሻኬቲስ።  
\v 13 ቃሲ ሃንኮ ኣማኒዳ ኣይሁዴቲ ጴፂሮሳ ሃኑዋ ካሊዶሶና። ሃሪ ኣቶሺን፥ ባርናባሲካ ኢያ ቆፋን ጎሼቲስ። 
\p  
\v 14 ሺን ኤንቲ ዎንጌላ ቱማቴን ሱሬ ሃሙቶናይሳ ቤዓዳ፥ ጴፂሮሳ ኣሳ ኡባ ሲንን፥ «ኔኒ ኣይሁዴ ጊዳሼ፥ ኣይሁዴ ዎጋ ጊዶናሺን ኣይሁዴ ጊዶና ኣሳዳ ዴዓሳ፤ ያቲን፥ ዋናዳ ኣይሁዴ ጊዶናይሳታ፥ ‹ኣይሁዴ ዎጋን ዴዒቴ ጋዳ ዎልቃታይ?› » ያጋስ። 
\p  
\v 15 ኑኒ ዬሌታን ኣይሁዴ፥ ሺን ናጋራንቾ ጊዲዳ ኣይሁዴ ጊዶና ኣሳ ሜላ ጊዶኮ።  
\v 16 ሺን ኣሲ ዬሱስ ኪሪስቶሳ ኣማኒዲ ፂሌሲፔ ኣቲን ሂጌ ናጊዲ ፂሎናይሳ ኤሮስ። ኦኒካ ሂጌ ናጊዲ ፂሎና ጊሾ ኑካ ሂጌ ናጊዲ ጊዶናሺን ኪሪስቶሳን ኣማኒዲ ፂላና ሜላ ኪሪስቶስ ዬሱሳ ኣማኒዳ።\x - \xo 2:16 \xt ማዝ 143፡2፤ ሮሜ 3፡20፣ 22\x* 
\p  
\v 17 ኑ ኣይሁዴቲካ ኪሪስቶሳ ባጋራ ፂላናው ኮሼስ። ሄሳ ጊዲኮ ኑካ ሃራ ኣሳዳ ናጋራንቾ ጊዴይሳ ቤዖስ። ያቲን፥ ኑ ናጋራ ኦና ሜላ ዴንይ ኪሪስቶሳ ጉሴዬ? ኡባካ ጊዴና!  
\v 18 ሂዛ፥ ታ ላሊዳይሳ ዛራዳ ኬፂያባ ጊዲኮ ታኒ ታ ሁዔን ሂጌ ሜንይሳ ጊዴይሳ ቆንጪሳይስ።  
\v 19 ታኒ ፆሳስ ዳና ሜላ ሂጌ ባጋራ ሂጌስ ሃይቃስ።  
\v 20 ታኒ ኪሪስቶሳራ ማስቃሊያ ቦላ ካቄታስ። ታኒ ሂዛፔ ታው ዴዒኬ፥ ሺን ኪሪስቶሲ ታናን ዴዔስ። ታ ሃዒ ዴዒያ ዴዑዋ፥ ታና ዶሲዲ ታ ጊሾ ባና ኣ ኢሚዳ ፆሳ ናዓ ኣማናዳ ዴዓይስ።  
\v 21 ታኒ ፆሳ ኣ ኬሃቴ ሃዳ ኦኬ። ፂሎቴ ኣሳስ ሂጌ ባጋራ ቤንቲያባ ጊዲያኮ፥ ኪሪስቶሲ ጮ ሃይቂስ ጉሱ። 
\c 3  
\s1 ፂሎቴ ኣማኖና 
\p  
\v 1 ሂንቴኖ፥ ኣኬኪ ባይና ጋላቲያ ኣሳው፥ ሂንቴ ኣይፊያ ሲንን ኪሪስቶሲ ማስቃሌ ቦላ ካቄቲዳ ሚሲሌዳ ቆንጪዲ ቤንቴስ። ያቲን፥ ቱማስ ሂንቴ ኪቴቶና ሜላ ሂንቴና ቢቲዳይ ኦኔ?  
\v 2 ታ ኢሲባ ኤራናው ኮያይስ፤ ሂንቴ ጌሻ ኣያና ኤኪዳይ ሂጌ ናጊዲዬ ዎይኮ ሂንቴ ሲዒዳ ዎንጌላ ኣማኒዲ ኤኪዴቲ?  
\v 3 ሂንቴ ሄሳ ሜላ ኤዬ? ሂንቴ ፆሳ ኣያናን ዶሚዲ፥ ሃዒ ዎልቃን ፖላናው ኮዬቲ?  
\v 4 ሂንቴ ዎንጌላ ጋሶን ዳሮ ዋዬቲዳይ ሜሌ? ሄ ዋዬ ኡባይ ጮ ጊዲዴ?  
\v 5 ፆሳይ ሂንቴው ጌሻ ኣያና ኢሜይኔ ሂንቴ ጊዶን ማላታታ ኦይ፥ ሂንቴ ሂጌ ናጊዳ ጊሾዬ ዎይኮ ዎንጌላ ሲዒዲ ኣማኒዳ ጊሾ? 
\p  
\v 6 ኣኔ ኣብራሃሜ ቤዒቴ፥ «ኢ ፆሳ ኣማኒስ፤ ፆሳይ ኢያው ሄሳ ፂሎቴ ኦዲ ኤኪስ»\x - \xo 3:6 \xt ሜ 15፡6፤ ሮሜ 4፡3\x* ጌቴቲዲ ፃፌቲስ።  
\v 7 ሂዛ፥ ኣማኔይሳቲ ኣብራሃሜ ናይታ ጊዴይሳ ኤሪቴ።\x - \xo 3:7 \xt ሮሜ 4፡16\x* 
\v 8 ፆሳይ ኣይሁዴ ጊዶና ኣሳ ኣማኖን ፂሊሳናይሳ ጌሻ ማፃፋይ ቤዒዲ፥ «ካዎቴ ኡባይ ኔናን ኣንጄታና» ያጊዲ፥ ዎንጌላ ኣብራሃሜስ ካሴቲዲ ኦዲስ።\x - \xo 3:8 \xt ሜ 12፡3\x* 
\v 9 ሄሳ ጊሾ፥ ኣማኒያ ኡባይ ኣማኒዳ ኣብራሃሜራ ኢሲፌ ኣንጄቲዶሶና። 
\p  
\v 10 ሂጌ ናጊዲ ፂላና ጊያ ኦኒካ ቃንጌቲዳይሳ። ኣይስ ጊኮ፥ ጌሻ ማፃፋን፥ «ሂጌ ማፃፋን ፃፌቲዳ ኡባ ናጎና ኦኒካ ቃንጌቲዳይሳ ጊዶ» ጌቴቲዲ ፃፌቲስ።\x - \xo 3:10 \xt ዛሬ 27፡26\x* 
\v 11 «ፂሎይ ኣማኖን ዳና» ጌቴቲዲ ፃፌቲዳ ጊሾ ኦኒካ ፆሳ ሲንን ሂጌ ናጊዲ ፂሎናይሲ ኤሬቲዳባ።\x - \xo 3:11 \xt ኢብ 2፡4\x* 
\v 12 ሂጌይ ኣማኖን ዜምፔና። ሺን፥ «ሂጊያ ናጊያ ኦኒካ ሂጊያን ዴዖን ዳና» ያጌስ።\x - \xo 3:12 \xt ሌዌ 18፡5\x* 
\p  
\v 13 «ሚ ቦላ ካቄቲዲ ሃይቂያ ኦኒካ ቃንጌቲዳይሳ» ጌቴቲ ፃፌቲዳ ጊሾ ኪሪስቶሲ ኑ ጊሾ ቃንጌቲዳይሳ ጊዲዲ፥ ኑና ሂጌ ቃንጌፌ ዎዚስ።\x - \xo 3:13 \xt ዛሬ 21፡23\x* 
\v 14 ፆሳይ ኣብራሃሜስ ኢሚዳ ኣንጆይ፥ ዬሱስ ኪሪስቶሳ ባጋራ ኣይሁዴ ጊዶና ኣሳ ጋካና ሜላኔ ፆሳይ ኢማና ጊዳ ጌሻ ኣያና ኑኒ ኣማኖን ኤካና ሜላ ሄሳ ኦስ። 
\s1 ሂጌኔ ኡፋይሳ ቃላ 
\p  
\v 15 ታ ኢሻቶ፥ ታ ሂንቴው ኣሳ ዴዖን ሜዜ ጊዲዲ ዴዒያባ ሌሚሶ ኦዳ ኦዳይስ። ኣሲ ጫቂዳ ጫቆይ ሚኒዳፔ ጉዬ፥ ኦኒካ ሄ ጫቁዋ ሻራናው ዎይኮ ኢያ ቦላ ሃራ ጉጃናው ዳንዳዔና።  
\v 16 ፆሳይ ሄ ኬኬ ቃላ ኣብራሃሜሲኔ ኢያ ዜሬስ ኢሚስ። ጌሻ ማፃፋይ፥ ዳሮ ኣሳስ ኦዲያዳ፥ «ኔ ዜሬታስ» ጌና። ሺን ኢሲ ኣሳስ ኦዲያዳ፥ «ኔ ዜሬስ» ያጌስ፤ ኢካ ኪሪስቶሳ።\x - \xo 3:16 \xt ሜ 12፡7\x* 
\p  
\v 17 ታኒ ጌይ ሃይሳ፤ ኦይዱ ፄታኔ ሃስታሙ ላይፌ ጉዬ ኢሜቲዳ ሂጌይ፥ ኮይሮ ፆሳይ ሚንዳ ጫቁዋ ሻሪዲ ኡፋይሳ ቃላ ይሳናው ዳንዳዔና።\x - \xo 3:17 \xt ኬሳ 12፡40\x* 
\v 18 ፆሳይ ኢሚያ ላታይ ሂጌን ኤኬቲያባ ጊዲያኮ ፆሳይ ኢሚዳ ኡፋይሳ ባጋራ ጊዴይሲ ኣቴስ። ሺን ፆሳይ ባ ኣ ኬሃቴን ላታ ኣብራሃሜስ ኡፋይሳ ቃላ ባጋራ ኢሚስ።\x - \xo 3:18 \xt ሮሜ 4፡14\x* 
\p  
\v 19 ያቲን፥ ሂጌይ ኣይስ ኢሜቲዴ? ሂጌይ ኢሜቲዳይ፥ ኣብራሃሜስ ኡፋይሳ ቃሊ ኢሜቲዳ ዜሬይ ያና ጋካናው ኢታ ኦሶይ ኣይቤኮ ኤሪሳናሳ። ሂጌይ ኪታንቾታ ባጋራ ኢሜቲዲ፥ ጊዶ ጊዲዲ ሲጌያ ኢሲ ኣሳ ባጋራ ኦሶ ቦላ ፔዒስ።  
\v 20 ጊዶ ጊዲዲ ሲጌያ ኡራይ ኢሲ ኣሳ ፃላላስ ጊዴና፥ ሺን ፆሳይ ኢሲኖ። 
\p  
\v 21 ያቲን፥ ሂጌይ ፆሳ ኡፋይሳ ቃላራ ኤቄቲዬ? ኣካይ፥ ጊዴና! ሂጌይ ኢሜቲዳይ ኣሳስ ዴዖ ኢማናው ጊዲያኮ፥ ፂሎቴ ሂጌ ባጋራ ቤንታናሺን።  
\v 22 ሺን ዬሱስ ኪሪስቶሳ ኣማኒን ቤንቲያ ኡፋይሳ ቃላይ ኣማኔይሳታስ ኢሜታና ሜላ ኩሜ ኣላሜይ ናጋራስ ሃሬቲዲ ዴዔይሳ ጌሻ ማፃፋይ ኦዴስ። 
\p  
\v 23 ሺን ኣማኖይ ያናፔ ካሴ ሂጌይ ኑና ቃቺ ዎስ። ሄ ኣማኖይ ቆንጫና ጋካናው ሂጌይ ኑ ቦላ ጎርዲ ዎስ።  
\v 24 ሄሳ ጊሾ፥ ኑኒ ኣማኖን ፂላና ሜላ ኪሪስቶሲ ያና ጋካናው ሂጌይ ናዓ ናጊያ ኣሳ ሜላ ኑና ናጌይሳ ጊዲስ።  
\v 25 ሺን ሃዒ ኣማኖይ ዪዳ ጊሾ ሂጌይ ሂዛፔ ጉዬ ናዓ ናጊያ ኣሳ ሜላ ኑና ናጌይሲ ኣቲስ። 
\p  
\v 26 ሂንቴ ኡባይ ዬሱስ ኪሪስቶሳ ኣማኒዲ ፆሳ ናይታ ጊዲዴታ።  
\v 27 ኪሪስቶሳራ ኢሲኖ ጊዳናው ፃማቄቲዳ ኡባይ ኪሪስቶሳ ማዖዳ ማዒዴታ።  
\v 28 ሂንቴ ኡባይ ኪሪስቶሳን ኢሲኖ ጊዲያ ጊሾ ኣይሁዴ ኣሳ ጊዶኒኔ ጊሪኬ ኣሳ ጊዶን፥ ኣይሌ ጊዶኒኔ ዎማኖ ጊዶን፥ ኣዴ ጊዶኒኔ ማጫሳ ጊዶን ዱማቴ ባዋ።  
\v 29 ሂዛ፥ ሂንቴ ኪሪስቶሳባ ጊዲኮ ሂንቴ ኣብራሃሜ ዛሬ። ፆሳ ኡፋይሳ ቃላዳ ሂንቴ ላቴይሳታ።\x - \xo 3:29 \xt ሮሜ 4፡13\x* 
\b  
\c 4  
\p  
\v 1 ታ ጌይሲ ሃይሳ። ላቴይ ናዓ ጊዲ ዴዒሼ፥ ሻሎ ኡባይ ኢያባ ጊዲኮካ፥ ኢ ኣይሌፌ ኣይኮካ ዱማቴና።  
\v 2 ሺን ኢያ ኣዋይ ጊዳ ዎዴይ ጋካናው ኢ ሃዳራ ኤኪዳይሳታ ኩሼኒኔ ናጌይሳታ ኩሼን ዴዔስ።  
\v 3 ሄሳዳካ፥ ኑኒ ናዓቴን ዴዒያ ዎዴ ኣላሚያ ዎጋስ ኣይሌቲዲ ዴዒዳ።  
\v 4 ሺን ዎዴይ ጋኪዳ ዎዴ ፆሳይ ሂጌፌ ጋርሳን፥ ማጫሳፔ ዬሌቲዳ ባ ናዓ ኪቲስ።  
\v 5 ኢ ሄሳ ኦዳይ፥ ሂጌስ ሃሬቲዲ ዴዔይሳታ ዎዛናዉኔ ኑና ባ ናይታ ኦናሳ።\x - \xo 4:5 \xt ሮሜ 8፡15-17\x* 
\p  
\v 6 ኑ ፆሳ ናይታ ጊዲያ ጊሾ «ኣባ፥ ኣዋው» ጊዲ ፄጊያ ባ ናዓ ኣያና ኑ ዎዛና ጊዶ ኪቲስ።  
\v 7 ሄሳ ጊሾ፥ ሂዛፔ ኔኒ ፆሳ ናዓፔ ኣቲን ኣይሌ ጊዳካ። ኔኒ ኢያ ናዓ ጊዲኮ፥ ፆሳ ላቴይሳ ጊዳዳሳ። 
\s1 ጳዉሎሲ ጋላቲያ ኣሳስ ቆፒስ 
\p  
\v 8 ሂንቴ ካሴ ፆሳ ኤሮና ዎዴ ፆሴ ጊዶናይሳታስ ኣይሌ ጊዲዲ ሃሬቲዴታ።  
\v 9 ሺን ሃዒ ሂንቴ ፆሳ ኤሪዴታ፤ ኡባራካ ፆሳን ኤሬቲዴታ። ያቲን ፓናኔ ጎዖና ኣላሜ ዎጋታኮ ጉዬ ዋኒዲ ሲሜቲ? ዎ ኤቂዲ፥ ዋኒዲ ኤንታው ኣይሌ ጊዳናው ኮዬቲ?  
\v 10 ዱማ ጊዲዳ ጋላሳታ፥ ኣጌናታ፥ ዎዴታኔ ላይታ ሂንቴ ሎይ ቦንቼታ።  
\v 11 ታና ሂንቴባይ ያሼስ፤ ታ ሂንቴው ጮ ዳቡራዲናሻ? 
\p  
\v 12 ታ ኢሻቶ፥ ታ ሂንቴዳ ሃኒዳ ጊሾ ሂንቴካ ታዳ ሃኒቴ ጋዳ ሂንቴና ዎሳይስ። ሂንቴ ታና ኣይቢንካ ቆሂቤኬታ።  
\v 13 ታኒ ኮይሮ ሃርጌታሼ ሂንቴው ዎንጌላ ኦዲዳይሳ ሂንቴ ኤሬታ።  
\v 14 ታ ሃርጌይ ሂንቴው ፓጬ ጊዲኮካ፥ ታና ሳሌቲቤኬታ፤ ኢፂቤኬታ። ሺን ታና ፆሳ ኪታንቾ ዎይኮ ኪሪስቶስ ዬሱሳ ሞኬይሳዳ ሞኪዴታ። 
\p  
\v 15 ያቲን፥ ሄ ሂንቴው ዴዒያ ኡፋይሳይ ኡባይ ኣው ቢዴ? ሂንቴው ዳንዳዔቲዳኮ፥ ሂንቴ ታው፥ ሂንቴ ኣይፊያ ኬሲዲ ኢሚያኮ ኢፆናይሳ ታ ማርካታይስ።  
\v 16 ያቲን፥ ታ ሂንቴው ቱማ ኦዲዳ ጊሾ ሂንቴው ሞርኬ ጊዳዲናዬ? 
\p  
\v 17 ሄ ኣሳቲ ሂንቴና ባንታኮ ዛራናው ኮዮሶና፥ ሺን ኤንታ ቆፋይ ሎዖሳ ጊዴና። ኤንታ ቆፋይ ሂንቴና ሻካናሳኔ ሂንቴ ኤንታው ቆፓና ሜላ ኦናሳ።  
\v 18 ሎዖባ ኦናው ኣሞቲኮ ሎዖ፥ ሺን ሄሲ ታ ሂንቴራ ዴዒያ ዎዴ ፃላላ ጊዶናሺን ኡባ ዎዴ ጊዶ። 
\p  
\v 19 ታ ሲቆ ናይቶ፥ ኪሪስቶሲ ሂንቴናን ሚሲሌታና ጋካናው ዬሎስ ማጫሲ ሚፆቴይሳዳ ታ ሂንቴ ጊሾ ሚፆታይስ።  
\v 20 ሂንቴባይ ታው ሃዲርሲ ጊዲን ታ ኡንዔታስ፤ ሃዒ ሂንቴ ጊዶን ታ ቤንታዳ ሼኔታዳ ኦዲያኮ ኣይ ሜላ ዶሳይናሺን። 
\s1 ኣጋሮኔ ሳሮ 
\p  
\v 21 ሙሴ ሂጌን ሃሬቲዲ ዳናው ኮዬይሳቶ፥ ኣኔ ታው ኦዲቴ፤ ሂጌይ ኣይ ጊያኮ ኤሬኬቲ?  
\v 22 ጌሻ ማፃፋይ፥ «ኣብራሃሜስ ኣይሌፌኔ ጎዳቴፌ ዬሌቲዳ ናምዑ ናይቲ ዴዖሶና» ያጌስ።\x - \xo 4:22 \xt ሜ 16፡15፤ 21፡2\x* 
\v 23 ኣይሌ ናዓይ ኣሲ ናዓ ዬሊያ ማራን ዬሌቲስ፥ ሺን ጎዳቴ ናዓይ ፆሳ ኡፋይሳ ቃላን ዬሌቲስ። 
\p  
\v 24 ሃ ማጫሳቲ ናምዑ ጫቆታስ ሌሚሶ ጊዲዲ ኤኬቶሶና። ኤንታፌ ኢሲኒያ፥ ሲና ዴሪያፔ ዪዳራ፥ ባ ናይታ ኣይሌቴስ ዬላሱ፤ ኢያካ ኣጋሮ።  
\v 25 ኣጋራ ኣራቤ ቢታን ዴዒያ ሲና ዴሪያን ሌሚሴታዳ ሃዒ ዴዒያ ዬሩሳላሜ ዳናዉሱ። ኣይስ ጊኮ፥ ኢያ ባ ናይታራ ኣይሌቴን ዴዓዉሱ።  
\v 26 ሺን ሳሎን ዴዒያ ዬሩሳላሜይ ኣይሌቴን ዴዑኩ፤ ኢያ ኑ ኡባስ ኣዮ።  
\v 27 ጌሻ ማፃፋይ፥ 
\q1 «ናቴ፥ ዬሎና ማይንቴ ኡፋይታ፤ 
\q2 ናቴ ሚፆታ ኤሮናሬ ኢሊላ። 
\q1 ኣዚናራ ዴዒያ ማጫሴፔ፥ 
\q2 ኣዚኒ ባይና ማጫሴስ ናይቲ ዳሮ» ያጌስ።\x - \xo 4:27 \xt ኢሳ 54፡1\x* 
\p  
\v 28 ታ ኢሻቶ፥ ሂንቴ ዪሳቃዳ ፆሳ ኡፋይሳ ቃላን ዬሌቲዳ ናይታ።  
\v 29 ሺን ሄ ዎዴ ኣሳ ማራዳ ዬሌቲዳይሲ፥ ኣያና ዎልቃን ዬሌቲዳይሳ ጎዲስ። ሃቺካ ሄሳ ሜላ።\x - \xo 4:29 \xt ሜ 21፡9\x* 
\v 30 ሺን ጌሻ ማፃፋይ ዎይጊ? «ኣይሌ ናዓይ ጎዳቴ ናዓራ ኢሲፌ ላቶና ጊሾ ኣይሊው ኢ ናዓራ ዎላ ኬሳ ዬዳ» ያጌስ።\x - \xo 4:30 \xt ሜ 21፡10\x* 
\v 31 ሄሳ ጊሾ፥ ታ ኢሻቶ፥ ኑኒ ጎዳቴ ናይታፔ ኣቲን ኣይሌ ናይታ ጊዶኮ። 
\c 5  
\s1 ኪሪስቶሳን ዴዒያ ላዓቴ 
\p  
\v 1 ኑኒ ላዓቴን ዳና ሜላ ኪሪስቶሲ ኑና ኣይሌቴፌ ኬሲስ። ሂዛ፥ ሚኒዲ ኤቂቴ፤ ዛሪዲ ኣይሌቴ ቃምባራን ጌሎፒቴ። 
\p  
\v 2 ታ፥ ጳዉሎሲ፥ ጌይሳ ሲዒቴ። ሂንቴ ቃፃሬታናው ኮይኮ፥ ኪሪስቶሲ ሂንቴና ኣይኮካ ማዴና።  
\v 3 ቃፃሬቲያ ኦኒካ ሂጌይ ኪቲያ ኡባ ፖላናው ቤሴይሳ ጉጃዳ ታ ኦዳይስ።  
\v 4 ሂጌ ናጊዲ ፂላናው ኮዬይሳቶ፥ ኪሪስቶሳፔ ሻኬቲዴታ፤ ፆሳ ኣ ኬሃቴፌ ኩንዲዴታ።  
\v 5 ሺን ኑኒ ፆሳ ኣያና ባጋራ ኣማኖን ፂላናው ኡፋይሳን ናጎስ።  
\v 6 ሂዛ፥ ኪሪስቶስ ዬሱሳን ዴዒኮ፥ ሲቆን ቆንጪያ ኣማኖፔ ኣቲን ቃፃሬቲን፥ ቃፃሬቶና ኣጊን ኑና ኣይኮካ ማዴና። 
\p  
\v 7 ካሴ ሂንቴ ሎዖ ዎፄታ፥ ሺን ሃዒ ቱማስ ኪቴቶና ሜላ ሂንቴና ዲጊዳይ ኦኔ?  
\v 8 ሃይሳ ሜላ ኢታ ጪሞይ ሂንቴና ፄጊዳ ፆሳፌ ዪቤና።  
\v 9 ሄሲካ፥ «ጉ ኢርሾይ ሙኑቃ ኡባ ዴንስ።»\x - \xo 5:9 \xt 1ቆሮ 5፡6\x* ጌቴቲዲ ፃፌቲዳይሳ ሜላ።  
\v 10 ሂንቴው ሃራ ቆፊ ባይናይሳስ ታ ጎዳን ኣማኔታይስ። ሺን ሂንቴና ቡቂያ ኦኒካ ፆሳፌ ባ ፒርዳ ኤካና። 
\p  
\v 11 ታ ኢሻቶ፥ ታ ሃዒ ጋካናው ቃፃሮ ሳባኪያባ ጊዲኮ፥ ያቲን ታና ኣይስ ጎዶና? ሄሲ ቱማ ጊዲያኮ ኪሪስቶሳ ማስቃሊያባ ታማርሶይ ኣሳስ ቤ ጊዴናሺን።  
\v 12 ሂንቴና ቡቄይሳቲ ቃፃሬቴ ፃላላ ጊዶናሺን ባንታና ቃራቲያኮካ ታ ዶሳይስ። 
\p  
\v 13 ታ ኢሻቶ፥ ሂንቴ ላዓ ዳናው ፄጌቲዴታ። ጊዶሺን፥ ሂንቴ ላዓቴይ ኣሾ ኣሞ ፖላናው ሂንቴው ጋሶ ጊዶፖ፤ ሄሳፌ ኣዲ ኢሶይ ኢሱዋ ሲቆን ማዲቴ።  
\v 14 ሂጌ ኡባይ፥ «ኣሴ ኔዳ ዶሳ» ያጊያ ኢሲ ቃላን ቃሼቲስ።\x - \xo 5:14 \xt ሌዌ 19፡18\x* 
\v 15 ሺን ሂንቴ ኢሶይ ኢሱዋራ ሳፄቲያባኔ ሜቴቲያባ ጊዲኮ፥ ሂንቴ ዎሊ ዉርሶና ሜላ ናጌቲቴ። 
\s1 ኣያና ዴዖኔ ኣሾ ዴዖ 
\p  
\v 16 ሂዛ፥ ታ ሂንቴው ኦዳይስ፤ ኣያናን ዴዒቴ፤ ሂንቴ ኣሾ ኣሙዋ ፖሎፒቴ።  
\v 17 ኣሾ ኣሞይ ኣያና ኣሙዋራ ሞርኬ፤ ቃሲ ኣያና ኣሞይካ ኣሾ ኣሙዋራ ሞርኬ። ኤንቲ ኢሶይ ኢሱዋራ ኢፄቲያ ጊሾ ሂንቴ ዶሲያባ ኦናው ዳንዳዔኬታ።\x - \xo 5:17 \xt ሮሜ 7፡15-23\x* 
\v 18 ሺን ኣያናይ ሂንቴና ካሌያባ ጊዲኮ ሂጌይ ሂንቴና ሃሬና። 
\p  
\v 19 ኣሾ ኦሶቲ ኤሬቲዳይሳታ፤ ኤንቲካ፥ ላይማቴ፥ ቱናቴ፥ ቃይፄ፥  
\v 20 ኤቃ ጎይኖ፥ ቢታ፥ ሞርኬቴ፥ ካቺ፥ ቃናቴ፥ ሃንቆ፥ ባና ዶሶ፥ ሻኬቴ፥ ኢታ ቶቤ  
\v 21 ጌኔ፥ ማ፥ ዬኔ ሄሳ ሄሳ ሜላታ። ካሴ ታ ሂንቴው ኦዲዳይሳዳ ሃዒካ ታ ሂንቴው ኦዳይስ። ሃይሳ ሜላባታ ኦይሳቲ ፆሳ ካዎቴ ላቶኮና። 
\p  
\v 22 ሺን ኣያና ኣይፌይ፥ ሲቆ፥ ኡፋይሲ፥ ሳሮቴ፥ ዳንዳዓ፥ ኬሃቴ፥ ሎዖቴ፥ ኣማኖ፥  
\v 23 ኣሽኬቴ፥ ባና ሃሮ። ሃይሳ ሜላባታ ኢፂያ ሂጌይ ባዋ። 
\p  
\v 24 ኪሪስቶስ ዬሱሳባ ጊዲዳይሳቲ ባንታ ኣሹዋ ኢያ ኢታ ቆፋራኔ ኢያ ኣሙዋራ ኢሲፌ ማስቃሊያ ቦላ ካቂዶሶና።  
\v 25 ኑ ኣያናን ዴዒያባ ጊዲኮ፥ ኑና ኣያናይ ካሌ።  
\v 26 ኣኔ ኢሶይ ኢሱዋ ዪሎዪሼኔ ቃናቲሼ ጮ ጬቄቴይሳ ኣጎስ። 
\c 6  
\s1 ኢሶይ ኢሱዋ ማዲቴ 
\p  
\v 1 ታ ኢሻቶ፥ ኢሲ ኣሲ ናጋራን ኩንዲኮ፥ ኣያናን ዴዒያ ሂንቴ ሄ ኡራ ኣሽኬቴን ሱሪሲቴ። ሺን ኔኒ ሄሳ ሜላባን ፓጬቶና ሜላ ኔና ናጋ።  
\v 2 ኢሶይ ኢሱዋ ዴፆ ቶሁዋ ቶኪቴ። ያቲኮ ኪሪስቶሳ ሂጊያ ፖሌታ።  
\v 3 ኢሲ ኣሲ ኣይኮይካ ባዋሺን፥ ባና ሃራታፔ ሎዖ ጊዲ ቆፒኮ፥ ኢ ባና ጪሜስ።  
\v 4 ሺን ኢሲ ኢሲ ኣሲ ባ ኦሱዋ ፓጮ። ሄሳፌ ጉዬ፥ ሃራታራ ባና ጋዴዬይሳ ኣጊዲ ባው ጬቄቲያባ ዴሜስ።  
\v 5 ኢሲ ኢሲ ኣሲ ባ ቶሁዋ ባው ቶካናው ቤሴስ። 
\p  
\v 6 ፆሳ ቃላ ታማሪያ ኦኒካ ሎዖባ ኡባ ባ ኣስታማሪያራ ሻኬቴስ። 
\p  
\v 7 ሂንቴ፥ ሂንቴና ጪሞፊቴ። ኣሲ ባ ዜሪዳባ ዛሪዲ ጫኪያ ጊሾ ፆሳ ቦላ ቄልቂሶፒቴ።  
\v 8 ባ ኣሾ ኣሙዋ ኩንናው ዜሪያ ኦኒካ፥ ባ ኣሾ ኣሙዋፔ ሃይቆ ቡጫና። ሺን ኣያና ኡፋይሳናው ዜሪያ ኦኒካ ኣያናፔ ሜሪና ዴዖ ጫካና።  
\v 9 ኣኔ ሎዖ ኦሶ ኦናው ኣዛሌይሳ ኣጎስ። ኑኒ ኣዛሎና ኢፂኮ ዎዴይ ጋኪያ ዎዴ ኑ ዜሪዳይሳ ጫካና።  
\v 10 ኑ ኢንጄ ዎዴ ዴሚኮ፥ ኣሳ ኡባስ፥ ኣዲካ ኣማኒያ ኣሳስ ሎዖባ ኦስ። 
\s1 ዉርሴ ዞሬኔ ሳሮታ 
\p  
\v 11 ታኒ ታ ኩሼን፥ ኣይ ሜላ ጊታ ፒዳሌን ሂንቴው ፃፊዳኮ ቤዒቴ።  
\v 12 ኣሳ ሲንን ሎዖ ጊዲዲ ቤንታናው ኮያ ኣሳቲ ሂንቴ ቃፃሬታና ሜላ ኮዮሶና። ሺን ሄሳ ኤንቲ ኦይ፥ ኪሪስቶሳ ማስቃሊያ ጊሾ ኤንታና ጎዲ ጋኮና ሜላሳ።  
\v 13 ኤንቲ ሂንቴ ቃፃሬቴን ጬቄታናው ኮዪዲ ሂንቴና ቃፃሬቶ ጎሶናፔ ኣቲን ቃፃሬቲዳይሳቲካ ባንታ ሁዔን ሂጊያ ናጎኮና። 
\p  
\v 14 ሺን ኣላሜይ ታው ካቄቲዳይሳፌኔ ታኒካ ኣላሚያስ ካቄቲዳ፥ ጎዳ ዬሱስ ኪሪስቶሳ ማስቃሊያፔ ኣቲን ሃራ ጬቄቴ ታፔ ሃኮ።  
\v 15 ሂዛ፥ ቃፃሬቲን ቃፃሬቶና ኣጊን ኣይኮካ ማዴና። ማዴይ ኦራ ሜቴ ጊዶ።  
\v 16 ሃ ዎጋ ካሊያ ኡባሲኔ ፆሳ ዴሬ ጊዲዳ ኢስራዔሌስ ሳሮቴይኔ ማሮቴይ ጊዶ። 
\p  
\v 17 ታኒ ዬሱሳስ ማዱንፂዳ ቤታ ታ ኣሳቴን ቶኪዳ ጊሾ ሂዛፔ ታና ኦኒካ ዋይሶፖ። 
\p  
\v 18 ታ ኢሻቶ፥ ኑ ጎዳ ዬሱስ ኪሪስቶሳ ኣ ኬሃቴይ ሂንቴራ ጊዶ። ኣሚንዒ።