\id 1TH - ጎፋ 
\h 1 ቴሴሎንቄ 
\toc1 ጳዉሎሲ ቴሴሎንቄ ኣሳስ ፃፊዳ ኮይሮ ኪታ 
\toc2 1 ቴሴሎንቄ 
\toc3 1ቴሴ 
\mt1 ጳዉሎሲ ቴሴሎንቄ ኣሳስ 
\mt2 ፃፊዳ ኮይሮ ኪታ 
\imt1 ጋ ቆፋ 
\ip ቴሴሎንቄይ፥ ሮሜ ቢታን ዴዒያ ማቄዶኒያ ኣዉራጃስ ዋና ካታማ። ጳዉሎሲ ፊልጲሲዩሳ ዬዲዲ ቢዳፔ ጉዬ ቴሴሎንቄን ዎሳ ኬ ኤሲስ። ጊዶሺን፥ ኣይሁዴታ ኣማኑዋ ኤካናው ጊጌቲዲ ኡቲዳ ኣይሁዴ ጊዶና ኣሳይ፥ ጳዉሎሲ ታማርሲያ፥ ኪሪስቲና ኣማኖ ቲሚርቲያን ፆኔቲዳ ጊሾ ኣይሁዴቲ ቃናቲዲ፥ ጳዉሎሳ ቲሚርቲያ ጳልቂዶሶና። ሄሳ ጊሾ፥ ጳዉሎሲ ጋምዖናሺን ቴሴሎንቄ ዬዲዲ፥ ቤሪያ ቢስ (1፡9-10)። ጉዬፔ ኢ ቴሴሎንቄ ጋኪዳ ዎዴ ኢያ ማዲያ ፂሞቲዮሲ ቴሴሎንቄ ዎሳ ኬን ዴዒያ ሃኖታ ኢያው ጌሺዲ ኦዲስ። 
\ip ጳዉሎሲ ኮይሮ ኪታ ቴሴሎንቄ ኣሳስ ፃፊዳይ፥ ኣማኒያ ኣሳ ዞራናሳኔ ሚንናሳ። ኢ ኤንታ ኣማኑዋኔ ኤንታ ሲቁዋ ሎዖ ማርካቴ ሲዒዳ ዎዴ ፆሳ ጋላቴስ። ካሴ ኢ ኤንታ ጊዶን ዴዒዳ ዎዴ ኣይ ሜላ ዱሱ ዴዒዳኮ ኤንታ ሃሳይሴስ። ሄሳፌ ኪሪስቶሳ ናምዓን ዩሳባ ኦይሼቲዳ ኦይሻስ ዛሮ ኢሜስ። ሄ ኦይሻታፔ ጉቲ፥ «ኪሪስቶሲ ናምዓን ያናፔ ሲን ሃይቂዳ ኣማኒያ ኣሲ ኪሪስቶሳ ዩሳይ ኢሚያ ሜሪና ዴዖ ኤካናው ዳንዳዒ? ኪሪስቶሲ ናምዓን ያናይ ኣዉዴ?» ጌቴቴይሳታ። ጳዉሎሲ ሄ ኢንጄ ዎዲያ ጎዔቲዲ፥ «ኪሪስቶሳ ናምዓን ዩሳ ኡፋይሳን ናጊሼ ኢ ያና ጋካናው ዎፑ ጊዲ ሂንቴ ኦሶ ኦቴ» ያጊዲ ዞሬስ። 
\iot 1 ቴሴሎንቄ ኪታ ኣይፌ ቆፋታ 
\io1 ጌሎ ቆፋ 1፡1 
\io1 ጳዉሎሳ ኡፋይሳኔ ጋላታ 1፡2-3፡13 
\io1 ኣማኒያ ኣሳ ዴዖ ካሌሱዋ 4፡1-12 
\io1 ኪሪስቶሳ ናምዓን ዩሳባ 4፡13-5፡11 
\io1 ዉርሴ ዞሬ 5፡12-22 
\io1 ኩሻ ቆፋ 5፡23-28 
\ie  
\c 1  
\p  
\v 1 ጳዉሎሲ ሲላሴይኔ ፂሞቲዮሲ ቴሴሎንቄ ዎሳ ኬን ዴዒያ፥ ፆሳ ኣዋባኔ ጎዳ ዬሱስ ኪሪስቶሳባ ጊዲዳ ኣሳስ ፃፊዳ ኪታ።\x - \xo 1:1 \xt ሃ.ኦ 17፡1\x* 
\p ኣ ኬሃቴይኔ ሳሮይ ሂንቴው ጊዶ። 
\s1 ቴሴሎንቄ ኣሳ ዴዑዋኔ ኣማኑዋ 
\p  
\v 2 ኑኒ ፆሳ ዎሲያ ዎዴ ኡባን ሂንቴና ቆፒሼ ሂንቴ ጊሾ ኡባ ዎዴ ፆሳ ጋላቶስ።  
\v 3 ፆሳ ኑ ኣዋ ሲንን ኣማኖን ሂንቴ ኦዳ ኦሱዋ፥ ሲቆን ሂንቴ ዳቡሪዳ ዳቡራኔ ዬሱስ ኪሪስቶሳን ዴዒያ ኡፋይሳ ኤካናው ሂንቴ ሚኒዲ ኤቂዳ ኤቁዋ ኡባ ዎዴ ቆፖስ። 
\p  
\v 4 ኑ ኢሻቶ፥ ፆሳይ ሂንቴና ዶሴይሳኔ ባ ኣሴ ኦዲ ሂንቴና ዶሪዳይሳ ኤሮስ።  
\v 5 ኣይስ ጊኮ፥ ኑኒ ዎንጌላ ዶና ፃላላን ጊዶናሺን ዎልቃን፥ ጌሻ ኣያናኒኔ ዎንጌላ ቱማ ኣማኖን ሂንቴው ኤሂዳ። ኑኒ ሂንቴራ ጋምዒዳ ዎዴ ኡባን ሂንቴ ጊሾ ዋኒዲ ዴዒዳኮ ሂንቴ ኤሬታ።  
\v 6 ሂንቴ ዳሮ ሜቶ ኤኪኮካ ጌሻ ኣያናይ ኢሚያ ኡፋይሳን ኪታ ኤኪዴታ፤ ኑናኔ ጎዳ ዳኒዴታ።\x - \xo 1:6 \xt ሃ.ኦ 17፡5-9\x* 
\v 7 ሄሳ ጊሾ፥ ማቄዶኒያኔ ኣካያ ቢታን ዴዒያ ኣማኒያ ኡባስ ሌሚሶ ጊዲዴታ።  
\v 8 ጎዳ ቃላይ ሂንቴፌ ኬዪዲ፥ ማቄዶኒያኒኔ ኣካያ ፃላላን ጊዶናሺን ፆሳ ሂንቴ ኣማኔይሲ ኡባሶን ሲዔቲስ። ሂዛ፥ ኑኒ ጋናባይ ኣይኮይካ ባዋ።  
\v 9 ኑኒ ሂንቴኮ ቢዳ ዎዴ ሂንቴ ኑና ሞኪዳ ሞኩዋኔ ሂንቴ፥ ሂንቴ ኤቃ ኣጊዲ ቱማኔ ዴዖ ፆሳ ሃጋዛናው ሂንቴ ሲሚዳይሳ ኤንቲ ባንታ ሁዔን ኦዶሶና።  
\v 10 ቃሲ ፆሳ ናዓይ፥ ዬሱሲ፥ ፆሳይ ሃይቆፔ ዴንዳይሲ፥ ሲንፌ ያና ፆሳ ሃንቁዋፌ ኑና ኣሻናይሲ፥ ሳሎፔ ያናይሳ ሂንቴ ናጌይሳ ኤንቲ ማርካቶሶና። 
\c 2  
\s1 ጳዉሎሲ ቴሴሎንቄን ኦዳ ኦሱዋ 
\p  
\v 1 ታ ኢሻቶ፥ ኑኒ ሂንቴኮ ቢዳይ ሜላ ጊዶናይሳ ሂንቴ፥ ሂንቴ ሁዔን ኤሬታ።  
\v 2 ሺን ኑኒ ሂንቴኮ ቴሴሎንቄ ያናፔ ሲን ፊልጲሲዩሳ ካታማን ዋዬቲዳይሳኔ ጫዬቲዳይሳ ሂንቴ ኤሬታ። ዳሮ ኢፆይ ዴዒኮካ ሂንቴው ኢያ ዎንጌላ ኦዳና ሜላ ፆሳይ ኑስ ሚኖቴ ኢሚስ።\x - \xo 2:2 \xt ሃ.ኦ 16፡19-24፤ 17፡1-9\x* 
\v 3 ኑኒ ሂንቴና ዞሪዳይ ባሌሶን ዎይኮ ጪሞን ዎይኮ ጌኔን ጊዴና። 
\p  
\v 4 ሺን ፆሳይ ኑናን ኣማኔቲዲ ባ ዎንጌላ ኦዳና ሜላ ኑስ ሃዳራ ኢሚዳ ጊሾ ኦዶስ። ኑ ሄሳ ኦይ ኑ ዎዛና ቤዒያ ፆሳ ኡፋይሳናሳፌ ኣቲን ኣሴ ኡፋይሳናሳ ጊዴና።  
\v 5 ኑ ሚሼ ያሪዲ ዎርዶ ሂንቴና ሳቢሼ ሂንቴኮ ዮናይሳ ሎይዲ ኤሬታ፤ ፆሳይ ኑስ ማርካ።  
\v 6 ኑኒ ሂንቴፌ ጊዲን ዎይኮ ሃራ ኣሳ ኦዴፌካ ቦንቾ ኮዪቦኮ።  
\v 7 ኑኒ ኪሪስቶሳ ሃዋሬ ጊዴይሳዳ ኑስ ኮሺያባ ኢሚቴ ጊዲ ኤካናው ዳንዳዖስ፥ ሺን ኣያ ባ ናይታ ዲቼይሳ ሜላ ሂንቴ ጊዶን ኣሽኬ ጊዲዳ።  
\v 8 ኑ ሂንቴና ዶሲዳ ጊሾ ፆሳ ዎንጌላ ሂንቴው ሻኮ ፃላላ ጊዶናሺን ኑ ዴዑዋካ ሂንቴው ኢማናው ጊጊዳ። ሂንቴ ኑስ ዳሮ ኣልዖ።  
\v 9 ኑ ኢሻቶ፥ ኑ ኦሱዋኔ ኑ ዳቡራ ኤሬታ። ሂንቴው ፆሳ ዎንጌላ ኦዲሼ፥ ሂንቴና ዋይሶና ሜላ ቃማኔ ጋላስ ኦዳ። 
\p  
\v 10 ኑ ዴዖይ ሂንቴ ኣማኔይሳታ ማታኒኔ ፆሳ ሲንን ጌሺ፥ ፂሎኔ ቦሬቶናይሳ ጊዴይሳስ ሂንቴ ማርካ።  
\v 11 ኑኒ ሂንቴው ሁዔን ሁዔን ዬሊዳይሳቲ ባንታ ናይታስ ሃኔይሳዳ ሃኒዳይሳ ኤሬታ።  
\v 12 ኑ ሂንቴና ዞሪዳ፥ ሚንዳ። ቃሲ ባ ካዎቴኔ ባ ቦንቹዋ ሻካናው ሂንቴና ፄጊያ ፆሳ ኡፋይሲያ ዴዖ ሂንቴ ዳና ሜላ ሂንቴው ሚንዲ ኦዲዳ። 
\p  
\v 13 ሂንቴው ኑኒ ፆሳ ቃላ ኦዲዳ ዎዴ ኣሳ ቃላዳ ጊዶናሺን ፆሳ ቃላዳ ሲዒዲ ኤኪዳ ጊሾ ኑኒ ኡባ ዎዴ ፆሳ ጋላቶስ። ኢ ቱማ ፆሳ ቃላ፤ ፆሳ ቃላይ ኣማኒያ ሂንቴናን ኦስ። 
\p  
\v 14 ታ ኢሻቶ፥ ሂንቴ ዪሁዳ ቢታን ዴዒያ ዎሳ ኬታኔ ያን ኪሪስቶስ ዬሱሳ ካሊያ ኣሳታዳ ሃኒዴታ። ኤንታ ኣይሁዴቲ ዋይሲዳይሳዳ ሂንቴናካ ሂንቴ ቢታ ኣሳይ ዋይሲዶሶና።\x - \xo 2:14 \xt ሃ.ኦ 17፡5\x* 
\v 15 ሄ ኣይሁዴቲ ጎዳ ዬሱሳኔ ናቤታ ዎዶሶና፤ ቃሲ ኑና ጎዲዶሶና። ኤንቲ ፆሳ ኡፋይሶናይሳታኔ ኣሴ ኡባ ኢፄይሳታ።\x - \xo 2:15 \xt ሃ.ኦ 9፡23፣ 29፤ 13፡45፣ 50፤ 14፡2፣ 5፣ 19፤ 17፡5፣ 13፤ 18፡12\x* 
\v 16 ኤንቲ ሃሪ ኣቶሺን፥ ኣይሁዴ ጊዶና ኣሳይ ኣታና ሜላ ኑኒ ኤንታው ቃላ ኦዴይሳ ዲጎሶና። ሄሳዳ ሃኒዲ ኤንታ ናጋራ ፁዓይ ኩማና ጋካናው ኡባ ዎዴ ናጋራ ኦሶና። ዉርሴን፥ ፆሳ ሃንቆይ ኤንታ ቦላ ዎስ። 
\s1 ጳዉሎሲ ቴሴሎንቄ ኣሳ ዛሪ ቤዓናው ኣሞቲስ 
\p  
\v 17 ሺን ኑ ኢሻቶ፥ ኑኒ ኑ ቆፋን ጊዶናሺን ኣሾን ሂንቴፌ ሻኬቲዲ ጉ ዎዴ ጋምዒዳይሳን ሂንቴና ዳሮ ላሞቲዲ ቤዓናው ኮዪዳ።  
\v 18 ኑ ሲሚ ሂንቴኮ ባናው ኮዪዳ። ታኒ ታ ሁዔን ሂንቴኮ ባናው ኮያስ፥ ሺን ፃላሄይ ኑና ዲጊስ።  
\v 19 ሂዛ፥ ኑ ጎዳ ዬሱስ ኪሪስቶሲ ያ ዎዴ ኑ ኡፋይሳይ ዎይኮ ኑ ጬቄቲያ ኑ ካላቻይ ኦኔ? ሂንቴና ጊዴኬቲዬ?  
\v 20 ቱማ ሂንቴ ኑ ቦንቾኔ ኑ ኡፋይሲ። 
\b  
\c 3  
\p  
\v 1 ሄሳ ጊሾ፥ ኑስ ጌንጫናው ዳንዳዔቶና ኢፂን፥ ኣቴና ካታማን ኑርካ ኣታናው ቆፋ ቃቺዳ።\x - \xo 3:1 \xt ሃ.ኦ 17፡15\x* 
\v 2 ሂንቴና ዞራናዳኔ ኣማኖን ሂንቴና ሚንናዳ ኑራ ኢሲፌ ፆሳስ ኦይሳኔ ኪሪስቶሳ ዎንጌላ ኦዲያ ኑ ኢሻ ፂሞቲዮሳ ሂንቴኮ ኪቲዳ።  
\v 3 ሂንቴና ጋኪዳ ጎዳን ሂንቴፌ ኦኒካ ጉዬ ሲሞፎ። ሄ ጎዳይ ኑስ ፆሳ ሼኔ ጊዴይሳ ሂንቴ፥ ሂንቴ ሁዔን ኤሬታ።  
\v 4 ኑ ሂንቴራ ዴዒያ ዎዴ ጎዲ ጋካናይሳ ሂንቴው ኮይሮቲዲ ኦዲዳ። ሂንቴ ኤሬይሳ ሜላ ሄሳዳ ሃኒስ።  
\v 5 ሄሳ ጊሾ፥ ታው ጌንጫናው ዳንዳዔቶና ኢፂን፥ «ኦኒ ኤሪ ፃላሄይ ኤንታ ፓጪዲ ኑ ዳቡራ ሜላ ኣሾና ኣጌና» ጋዳ ሂንቴ ኣማኑዋባ ኤራናው ፂሞቲዮሳ ሂንቴኮ ኪታስ። 
\p  
\v 6 ሃዒ ፂሞቲዮሲ ሂንቴ ማታፔ ዪዲ፥ ሂንቴ ኣማኑዋባኔ ሂንቴ ሲቁዋባ ሎዖ ዎሬ ኦዲስ። ቃሲ ሂንቴ ኡባ ዎዴ ኑስ ሎዖ ቆፔይሳኔ ኑኒ ሂንቴና ቤዓናው ላሞቴይሳዳ ሂንቴካ ኑና ቤዓናው ላሞቴይሳ ኢ ኑስ ኦዲስ።\x - \xo 3:6 \xt ሃ.ኦ 18፡5\x* 
\v 7 ታ ኢሻቶ፥ ኑና ጋኪያ ዋያኒኔ ኑ ሜቶ ኡባን ሂንቴ ኣማኑዋ ጊሾ ሂንቴናን ሚኔቲዳ።  
\v 8 ሂንቴ ጎዳን ሚኒዲ ዴዒኮ ኑካ ዴዖን ዴዖስ።  
\v 9 ሂዛ፥ ኑኒ ሂንቴ ጋሶን ዴሚዳ ኡፋይሳስ ፆሳ ዋቲ ጋላቲኖ?  
\v 10 ኑኒ ሂንቴና ቤዓናዉኔ ሂንቴ ኣማኑዋን ፓጪዳባ ኩንናው ቃማኔ ጋላስ ኑ ኩሜ ዎዛናን ፆሳ ዎሶስ። 
\p  
\v 11 ፆሳይ ኑ ኣዋይ ባ ሁዔኒኔ ኑ ጎዳይ ዬሱስ ኪሪስቶሲ ኑ ሂንቴኮ ባና ኦጊያ ጊጊሶ።  
\v 12 ኑ ሂንቴና ዳሮ ዶሴይሳዳ ጎዳይ ሂንቴ ኢሶይ ኢሱዋ ሲቂያ ሲቆኔ ኣሴ ኡባ ሲቂያ ሲቆ ሂንቴው ዳርሶኔ ጉጆ።  
\v 13 ኑ ጎዳይ ዬሱስ ኪሪስቶሲ ባ ጌሻታራ ያ ዎዴ ፆሳ፥ ኑ ኣዋ ሲንን ሂንቴ ዎዛናይ ጌሺኔ ቦሬይ ባይናይሳ ኦዲ ኢ ሂንቴና ሚንና። 
\c 4  
\s1 ፆሳ ኡፋይሲያ ዴዖ 
\p  
\v 1 ዉርሴን፥ ታ ኢሻቶ፥ ፆሳ ኡፋይሳናው ሂንቴ ዋኒዲ ዳናው ቤሲያኮ ኑፔ ታማሪዴታ። ሄሲ ሂንቴ ኮይሮፔ ዴዒዳ ዴዑዋ፥ ሺን ሃዒ ሂንቴ ካሴይሳፌ ኣዲ ኦናዳ ጎዳ ዬሱሳ ሱንን ሂንቴና ዎሶሲኔ ዞሮስ።  
\v 2 ኑኒ ጎዳ ዬሱሳ ማታን ሂንቴና ኪቲዳ ኪታይ ኣዉሴኮ ኤሬታ። 
\p  
\v 3 ፆሳይ፥ ሂንቴ ጌሺ ጊዳና ሜላኔ ላይማቶና ሜላ ኮዬስ።  
\v 4 ሂንቴ ኢሶይ ኢሶይ፥ ሂንቴ ማቼታራ ጌሻቴኒኔ ቦንቾን ዳናው ቤሴስ።  
\v 5 ፆሳ ኤሮናኔ ኣማኖና ኣሳዳ ላይማቴ ኣሞን ፁጌቶፊቴ።  
\v 6 ኑ ካሴ ሂንቴው ኦዲዳይሳዳኔ ሚን ዞሪዳይሳዳ ጎዳይ ሄሳ ሜላባ ኦያ ኡባ ፒርዲያ ጊሾ ኦኒካ ሃይሳታን ባ ኣማኒያ ኢሻ ናቃናዉኔ ጪማናው ቤሴና።  
\v 7 ፆሳይ ኑኒ ጌሽቴን ዳና ሜላፔ ኣቲን ቱናቴን ዳና ሜላ ፄጊቤና።  
\v 8 ሄሳ ጊሾ፥ ሃ ቲሚርቲያ ኢፂያ ኦኒካ ሂንቴው ጌሻ ኣያና ኢሚያ ፆሳ ኢፄስፔ ኣቲን ኣሴ ጊዴና። 
\p  
\v 9 ሂንቴ ኢሶይ ኢሱዋ ዋቲ ሲቃኔኮ ፆሳይ ሂንቴና ታማርሲዳ ጊሾ ሃዒ ሲቆባ ኑ ህንቴው ፃፋናው ኮሼና።  
\v 10 ቃሲ ማቄዶኒያ ቢታን ዴዒያ ኣማኒያ ኢሻታ ኡባ ቱማ ሂንቴ ዶሴታ። ሺን ኑ ኢሻቶ፥ ሃዒካ ሂንቴ ኤንታ ኣ ዶሳና ሜላ ሂንቴና ዎሶስ። 
\p  
\v 11 ኑኒ ካሴ ሂንቴው ኦዲዳይሳዳ ዎፑ ጊዳ ዴዑዋ ዴዒቴ። ሂንቴ፥ ሂንቴ ኦሶ ኦዲ ሂንቴው ዱሳስ ኮሺያባ ዴሚቴ።  
\v 12 ሄሳዳ ሃኒኮ፥ ኣማኖናይሳታ ማታን ሂንቴ ቦንቼታና፤ ቃሲ ሂንቴና ኮሺያባስ ኦናካ ኣዳሼኬታ። 
\s1 ጎዳ ዩሳባ 
\p  
\v 13 ኑ ኢሻቶ፥ ኣማኒዲ ሃይቂዳ ኣሳቲ ሃናናባ ሂንቴ ኤራና ሜላ ኮዮስ። ሂንቴ ኤንታ ጊሾ ኡፋይሲ ባይና ኣሳዳ ካዮቶፊቴ።  
\v 14 ኑኒ፥ ዬሱሲ ሃይቂዳይሳኔ ቃሲ ሃይቆፔ ዴንዲዳይሳ ኣማኖስ። ሄሳዳካ፥ ፆሳይ ዬሱሳ ኣማኒዲ ሃይቂዳይሳታ ኢያራ ዎላ ኤሃናይሳ ኣማኖስ። 
\p  
\v 15 ጎዳይ ኑስ ኦዲዳይሳዳ ጎዳይ ያ ጋላስ ኢያራ ጋሄታናው ኑኒ ፓፃ ዴዔይሳቲ፥ ሃይቂዳይሳታፔ ሲንቶኮ።\x - \xo 4:15 \xt 1ቆሮ 15፡51-52\x* 
\v 16 ጎዳይ ዎልቃማ ኪታራ፥ ኪታንቾታ ሃላቃ ጊርሳራ፥ ፆሳ ሞይዜ ፑኖራ፥ ሳሎፔ ዎና። ኪሪስቶሳ ኣማኒዲ ሃይቂዳይሳቲ ኮይሮቲዲ ሃይቆፔ ዴንዳና።  
\v 17 ሄሳፌ ጉዬ፥ ሄ ዎዴ ኑኒ ፓፃ ዴዔይሳቲ፥ ጎዳራ ሻራን ጋሄታናው ኤንታራ ኢሲፌ ሳሎ ኤኬታና። ሄሳፌ ጉዬ፥ ኑኒ ጎዳራ ኢሲፌ ሜሪናው ዳና።  
\v 18 ሄሳ ጊሾ፥ ሃ ቃላን ኢሶይ ኢሱዋ ሚንቴ። 
\c 5  
\s1 ጎዳ ዩሳ ጊጊዲ ናጊቴ 
\p  
\v 1 ታ ኢሻቶ፥ ሃ ሃኖቲ ሃናና ዎዲያኔ ኣጌና ሂንቴው ፃፋናው ኮሼና።  
\v 2 ጎዳ ጋላሳይ ካይሶይ ቃማ ዬይሳዳ ያናይሳ ሂንቴ ሎይ ኤሬታ።\x - \xo 5:2 \xt ማቶ 24፡43፤ ሉቃ 12፡39፤ 2ጴፂ 3፡10\x* 
\v 3 ኣሳይ፥ «ሳዒ ሳሮ፥ ኣይኮይካ ሃኔና» ያጊሺን፥ ማጫስ ኢቄ ኦይኬይሳዳ ዮይ ኤንቲ ቆፖና ኤንታ ቦላ ያና። ኤንቲ ኣይ ኦጌንካ ኬሲ ኤኮኮና። 
\p  
\v 4 ሺን ኑ ኢሻቶ፥ ሄ ጋላሳይ ሂንቴው ካይሶይ ዬይሳዳ ያናው ሂንቴ ማን ዴዔኬታ።  
\v 5 ሂንቴ ኡባይ ፖዖ ኣሲኔ ጋላሳን ዴዒያ ኣሲ፤ ኑኒ ቃማ ኣሲ ዎይኮ ማ ኣሲ ጊዶኮ።  
\v 6 ሄሳ ጊሾ፥ ኑኒ ሃራቲ ስኬይሳዳ ስካናው ቤሴና፤ ኑኒ ባርካንዉኔ ጊጊዲ ዳናው ቤሴስ።  
\v 7 ስኬይሳቲ ቃማ ስኮሶና፤ ማቴይሳቲ ቃማ ማቶሶና።  
\v 8 ሺን ኑኒ ጋላሳ ኣሲ ጊዲያ ጊሾ ጊጊዲ ዳናው ቤሴስ። ኣማኖኔ ሲቆ ፁሩሬዳ ቲራን ማዒዲ፥ ኣቶቴ ኡፋይሳ ሁዔን ዎያ ኦላ ቢራታ ባርኔፃዳ ዎዲ ዳናው ቤሴስ።\x - \xo 5:8 \xt ኢሳ 59፡17፤ ኤፌ 6፡13-17\x* 
\v 9 ፆሳይ ኑና ኑ ጎዳ ዬሱስ ኪሪስቶሳ ባጋራ ኩሜ ኣቶቴ ኤካና ሜላ ዶሪስፔ ኣቲን ሃንቆስ ዶሪቤና።  
\v 10 ኑኒ ፓፃ ዴዒን ዎይኮ ሃይቂን፥ ኪሪስቶሲ ያ ዎዴ ኢያራ ኢሲፌ ዳና ሜላ ኪሪስቶሲ ኑ ጊሾ ሃይቂስ።  
\v 11 ሄሳ ጊሾ፥ ሂንቴ ካሴ ኦይሳዳ፥ ኢሶይ ኢሱዋ ሚንቴኔ ዲቺቴ። 
\s1 ዉርሴ ዞሬኔ ሳሮታ 
\p  
\v 12 ኑ ኢሻቶ፥ ሂንቴ ጊዶን ኦይሳታ፥ ሂንቴና ካሌና ሜላኔ ዞራና ሜላ ጎዳይ ዶሪዳይሳታ ቦንቻና ሜላ ሂንቴና ዎሶስ።  
\v 13 ኤንቲ ኦያ ኦሱዋ ጊሾ ኤንታ ዳሮ ቦንቺቴኔ ሲቂቴ። ኢሶይ ኢሱዋራ ሳሮቴን ዴዒቴ። 
\p  
\v 14 ኑ ኢሻቶ፥ ኑኒ ሂንቴና ዞሮስ። ቦዛታ ሃንቂቴ፤ ባቤይሳታ ሚንቴ፤ ዳቡራንቾታ ማዲቴ፤ ኣሴ ኡባ ዳንዳዒቴ።  
\v 15 ኦኒካ ኢታ ጊሾ ኢታ ዛሮና ሜላ ናጌቲቴ። ሂንቴ ዎሊሲኔ ኣሳ ኡባስ ሎዖባ ኦናው ሚኒቴ። 
\p  
\v 16 ኡባ ዎዴ ኡፋይቲቴ።  
\v 17 ኡባ ዎዴ ፆሳ ዎሲቴ።  
\v 18 ኡባባን ጋላቲቴ። ኪሪስቶስ ዬሱሳ ባጋራ ፆሳይ ሂንቴፌ ኮዬይ ሄሳ። 
\p  
\v 19 ጌሻ ኣያና ኦሱዋ ቶይሶፒቴ።  
\v 20 ቲንቢቴ ቃላ ካፒቴ።  
\v 21 ኡባባ ፓጪቴ፤ ሎዖባ ኤኪቴ።  
\v 22 ኢታ ኦሶ ኡባፌ ሃኪቴ። 
\p  
\v 23 ሳሮ ኢሚያ ፆሳይ ባ ሁዔን ሂንቴና ፖሎ ጌሾ። ኑ ጎዳይ ዬሱስ ኪሪስቶሲ ያና ጋላሳስ፥ ፆሳይ ሂንቴ ኣያና፥ ሂንቴ ሼምፑዋኔ ሂንቴ ኩሜ ኣሳቴ ቦሬይ ባይና ናጎ።  
\v 24 ሂንቴና ፄጌይሲ ኣማኔቲዳይሳ ጊዲያ ጊሾ ሄሳ ኢ ፖላና። 
\p  
\v 25 ኑ ኢሻቶ፥ ኑስ ፆሳ ዎሲቴ። 
\p  
\v 26 ኣማኒያ ኣሳ ኡባ ጌሻ ዬሬቴን ሳሮቴ። 
\p  
\v 27 ሂንቴ ሃ ኪታ ኣማኒያ ኣሳ ኡባስ ናባባናዳ ጎዳ ሱንን ሂንቴና ዎሳይስ። 
\p  
\v 28 ኑ ጎዳ ዬሱስ ኪሪስቶሳ ኣ ኬሃቴይ ሂንቴራ ኢሲፌ ጊዶ። ኣሚንዒ።