\id TIT  
\h DÄTITJKU 
\toc2 DÄTITJKU DHÄRUK 
\toc1 DÄTITJKU DHÄRUK DJUY'YUNARA BOLWUŊU 
\mt2 DÄTITJKU DHÄRUK  
\mt1 DJUY'YUNARA BOLWUŊU  
\toc3 TIT  
\c 1  
\p
\v 1 Marrkapmirri Dätitj, ŋarra Bolyu wukirri yukurra nhuŋu, ŋunhi ŋarranydja dhuwala Godku djämamirri, ga bo'puyŋunydja ŋarra Djesu-Christku. Ŋayi ŋarranha djarr'yurrunanydja, bala djuy'yurrunana ḻakaranharawu dhiyakuyi dhäwu'wuna, märr yurru ŋunhinydja walala ŋunhi ŋayi Godthu djarr'yurruna walalanha, walala yurru märr-yuwalkthirri Djesuwala, ga yuwalkkuma yana marŋgithirrinydja Godku, bala walala yurru nhinanydja yukurra Godkala yana yuwalkŋura romŋuranydja.  
\v 2 Ŋarranydja yukurra ŋuli djäma Godku, märr yurru yolŋunydja walala nhina yukurra ŋayaŋu-gatjpu'yun yana ŋurikina ḏaykun'ku ŋunhi walala yurru nhina yukurra ŋunhala Godkalana wäŋaŋura gupaḏal'nha. Yo, Godtja dhuwala yaka bothinyaramirri yolŋu, yakana ŋayi ŋuli ḻakarama bothirrinydja. Ŋäthilinydja ŋunhinydja ŋurruŋuranydja Godthu dhawu'-nherrara, ŋayi waŋananydja bitjarra, “Ŋarrakunydja yurru yolŋu walala nhina yukurra walŋana yana, bitjan liŋgu yurru.”  
\v 3 Bala ŋunhinydja walu ŋunhi ŋayi ŋäthili nherrara bunanana, ga ŋulinyaramirriyunydjayi ŋayi maḻŋ'maranhaminana ŋunhi yuwalknha wal'ŋu walŋa, djiwarr'wuynha ŋunhina wal'ŋu; ŋayi warraŋulkuŋalana yolŋu'-yulŋuwala ŋuliwitjan nhanukalay dhärukkurrunydja, ŋunhi ŋayi wekaŋalanydja ŋunhi dhäruktja ŋarrakalana dharraylilinydja. Bala ŋarranydja ḻakaramana ŋuli marrtji birrka'mirrililina wäŋalilinydja, liŋgu dhuwalayinydja djäma Godthu wekaŋala ŋarrakala, ŋunhi ŋayinydja Garray walŋakunharamirri ŋilimurruŋgu.   
\p
\v 4 Ŋarra yukurra wukirrinydja dhuwala nhuŋu Dätitj, liŋgu nhenydja bitjan marrkapmirrina ŋarraku gäthu'mirriŋu, liŋgu nhenydja ŋunhi märr-nherraṉmina Djesu-Christkala balakurru ŋarrakala djämakurru. ŋarra yukurra bukumirriyama nhuŋu yulŋunydja, märr yurru Godthu Bäpayu ga ŋilimurruŋgala Walŋakunharamirriyu Garrayyu Djesu-Christthu gäma yukurra nhuna galkikuma yana nhanukalay ŋayi märr-ŋamathinyarayu, märr yurru nhe nhina yukurra ŋayaŋu-yal'yunara yana.   
\s1 Bolyu ḻakaraŋala Dätitjkala nhäyinyara ŋunhi yolŋu elders ga nhä ŋayi yurru djäma  
\p
\v 5 Yo, gonha'yurrunanydja ŋarra ŋunhi nhuna ŋunhiwala runu'lili Guritalilinydja, märr nhenydja yurru dhawar'maramana marrtji bitjanna djämana malanha, ŋunhi ŋarra ŋurru-yirr'yurruna ŋunhiliyi. Nhe yurru marrtji yukurra birrka'mirrilili wäŋalili ga wäŋalili, djarr'yun marrtji yolŋu'-yulŋunha ŋunhi walala yurru djäkamirri walala Godkalaŋumirriwu yolŋu'-yulŋuwu birrka'mirriŋura wäŋaŋura. Yo, nhena yurru nherraṉdja ŋunhiyi eldersnha dhiyakuyi djämawunydja, yurru guyaŋiya ŋunhinydja ŋunhi ŋarra nhokala ḻakaraŋala ŋäthili.  
\v 6 Elderstja yurru ŋunhi balanyara gam' yolŋu. Nhina ŋayi yurru ŋamathama ŋula nhämiriw, dhuwurr-yätjmiriw yana, ga ŋunhi ŋayi yurru märrama miyalknhanydja, ga ŋunhina liŋgu waŋganynha yulŋunydja ŋayi yurru ḏälkumanydja, ga djamarrkuḻiny'tja nhanŋu yurru märr-yuwalkthinyamirri walala yana, yaka balanyara gam', ŋayi yurru waṉḏirri winya'yun wakinŋukunharamirri ŋanyapinyay ŋayi.  
\v 7 Yo, ŋurruŋunydja dhuwala Garraywu miṯtji yurru nhina ŋamathama yana wal'ŋu, ŋula nhämiriw yana, liŋgu ŋayi djäkamirri ŋurikinydja ŋunhi walala nhanŋuwaynha yana Godkuna yolŋu'-yulŋu. Yaka ŋayi yurru yukurra guyaŋinyaramirri ŋanyapinyay ŋayi bathala ḻakaranharamirri, ga yaka ŋayi waḏutja yurru maḏakarritjthirri, ga yaka ŋayi yolŋu ŋänitji-ḻukanharamirri ga bunharamirri ŋayi yolŋu, ŋayi yurru marrtji buma. Ga wiripunydja, yaka ŋayi wanaŋa-ḏumurru ŋula nhäku märranharawu yukurranharawu.  
\v 8 Ga ŋurruŋunydja yurru yolŋu yana wal'ŋu ŋunhiyina, balanyara bitjan ŋayi yurru djäka ŋuriki mulkuruwu yolŋu'-yulŋuwu nhanukalayi wäŋaŋura, ga bitjandhiyi ŋayi yurru ŋayaŋu-wuyunaramirri, ga guŋga'yunaramirri bukmakku. Ŋayi yurru guyaŋirri märr-yunupa yana, ga djäma rom-dhunupayama. Yakana ŋayi yurru malthun djälwu nhanukalayŋuwunydja ŋayi, yana ŋayi yurru nhina ganaŋ'thunna wal'ŋu yätjŋuru, liŋgu ŋayinydja ŋunhi nhanŋuwaynha yana Godkuna yolŋu.  
\v 9 ŋayi yurru yukurra ŋayathama baṯ bitjan ŋunhi yuwalk dhäruk yana, ŋunhi ŋayi ŋanapurruŋguŋu märraŋala, märr ŋayi yurru ŋula yolnha marŋgikuma yukurra dhärukthu walŋakunharamirriyu ŋuriŋi. Ga ŋunhi yurru ŋayi ŋula yolthu ḻakarama yukurra wiripunydja dhäwu', ga ŋayinydja yurru ŋuriŋiyinydja djäkamirriyunydja yolŋuyu yana dhunupakumana ḻakaramana nhanŋu, märr yurru ŋayi bilyunna, bala yana ŋapana-wekama nhanukalaŋuŋuru ŋayi djarrpi'ŋurunydja dhärukŋuru.   
\p
\v 10 Yo, djarr'yundja nhe yurru yolŋunhanydja balanyaranhayi, ŋunhi ŋayi yurru yuwalk wal'ŋu nhina yukurra Godkala yana romŋura, liŋgu guḻku' mirithirri yurru yolŋuyu walalay yakanydja yukurra ŋäma Godku yuwalkŋu dhäwu'. Walala yurru ḻakarama mayali'miriwnha, yakana yuwalk dhäwu', ga guḻku'nhana walala yurru mayali'-wilkthundja yukurra. Guḻku'yuna ŋuli Djuwsthu dhäwu' ḻakarama djarrpiny'tja bitjandhiyi.  
\v 11 Ga ŋunhiyinydja walala ŋunhi walala ŋurru'-ŋurruŋu Godkalaŋumirriwu yolŋu'-yulŋuwu, walala yurru dhäruk mukmarama ŋunhinhayi walalanha ŋunhi walala yurru yukurra ḻakarama bothinyaramirri dhäwu', liŋgu ŋuriŋinydjayi walalay ŋuli yukurra yolŋu'-yulŋunhana galkinyamarama, gatjpaḻ'marama ŋuliŋuru yuwalkŋuŋuruna, bala gurruṯu'mirrinydja yukurra malthunna walalaŋgalaŋuwuna bothinyarayŋuwuna romgu. Yo, walala yukurra marŋgikuma djarrpi'kumana yana märranharawu rrupiyawu ŋula nhäkuna walalaŋgalaŋuwuna walala.   
\p
\v 12 Waŋganydhunydja walala miṯtjiyu Guritapuyŋuyunydja yolŋuyu waŋana ḻakaraŋala bitjarrana walalanha, “Ŋanapurru Guritapuynydja yolŋu'-yulŋu bothinyaramirrina walala. Ŋanapurru ŋuli bitjan liŋgu djäma yätj dhika wal'ŋu yana, bunharamirri ŋuli yukurra bitjanna bitjan ŋuli ŋunhi maḏakarritj wäyin malanha. Ga ḏuŋḏuŋmirrina ŋanapurru; yana ŋanapurru yukurra nhinana ga ḻukana maranhuyirrina.”  
\v 13 Yuwalk yana ŋayi yukurra ŋunhiyi yolŋu ḻakaranhamirri bitjanmirrinydja. Dhiyakuyina märrwu nhuma yurru yukurra waŋa wirrkinydja walalanha dhika raypirri'yun, märr yurru walala marŋgithirri wal'ŋu yuwalkŋuwu, bala märr-yuwalkthirrina ŋurikiyi walŋa-wekanharamirriwunydja dhäwu'wu,  
\v 14 ga yakana biyapulnydja ŋayathama baṯ bitjan yurru ŋunhi ŋäthiliŋunydja dhäwu' malanha, ŋunhi ŋuli yukurra Djuwsthu ḻakarama. Yakana ŋunhiyinydjayi ŋamakurru' ŋunhi walala ŋuli wirrki märrama romnha ŋunhiyi yolŋuwuŋu nherraṉara, ŋurikiŋi ḏarramuwurruŋguŋu ŋunhi walala ŋuyulkthina, bala djalkthurrunana Godku yuwalkŋunydja ŋunhi dhäruk.  
\v 15 Walalanydja ŋuli ŋunhi romnha nherraṉ balanyara warray gam', “Yaka ḻukiya dhuwalanydja ga dhuwalanydja ŋatha,” bitjan. Yaka mäkiri'-witjurra walalaŋgu dhärukku, liŋgu bukmak ŋunhi nhänydja malanha ŋamakurru' yana ḻukanharawunydja nhuŋu, ŋunhi nhuŋu ŋayaŋu ḏarrtjalktja. Ga ŋunhi ŋuli yolŋuwu ŋayaŋu yätjtja wal'ŋu, yakanydja ḏarrtjalk, ga yakanydja ŋayi märr-yuwalkthirri yukurra Djesu-Christku, bala yakayi yurru yana ŋathayunydja ŋayaŋu ŋanya ḏarrtjalkkuma, liŋgu ŋayaŋu nhanŋu ŋunhi yätjthinana wal'ŋu wirrkina, ga ŋunhi ŋayi ŋuli djäma yätjkumanydja, bala ŋayaŋunydja nhanŋu yurru goŋmirriyirrina dhikana wal'ŋu, yanapi djäma ŋayi yukirri ŋunhiyinydja ŋamakurru'na. Ga yakana ŋayi goranydja yukurra nhanukalay yätjthunydja.  
\v 16 Ŋayi ŋuli waŋa bitjan, “Ŋarra marŋgi Godkunydja,” yurru ŋuriŋi yätjthunydja nhanukalay milkuma yukurra ḻakarama ŋunhi ŋayinydja yakana yuwalk yolŋu nhanŋu Godku. Godtja ŋuli ŋuyulkthirri nyinyaŋdhun ŋuriki yätjkunydja ŋunhi ŋayi yukurra djäma, liŋgu yakana ŋayi dhäruk märrama ŋuli yukurra Godnhanydja, ga yaka ŋayi ḏukṯuk djämawu ŋamakurru'wunydja.   
\c 2  
\s1 Marŋgikuŋanydja yuwalk wal'ŋu dhäruktja  
\p
\v 1 Yo, walala ŋuli marŋgikumanydja djarrpi'kumana yana, yurru nhenydja marŋgikuŋa ḻakaraŋa Godku dhäruk yuwalkkuŋa wal'ŋu ga dhunupa.   
\p
\v 2 Yo, ḻakaraŋa worru'-wurruŋuwanydja ḏarramuwurrumbala biyaka gam', “Yaka nhuma yurru yukurra leŋu ŋänitji'yunydja. Nhiniya wurrkurrum'thiya, ḻatju'kuŋa biyaka guyaŋiya, dhunupa wal'ŋu, ga ḏaḏaw'yurrana nhokalaynydja nhe djälŋuru. Yuwalkkuŋana biyaka wal'ŋu Garraynhanydja märr-yuwalkthiya ga märryu-ḏapmaraŋa ŋanya wirrki yana, ga biyakayi bili märr-ŋamathiyayi wiripuŋuwunydja yolŋuwu, ga dhärriyanydja yukirriya wuṉḏaŋarrnha yana, biyakana liŋgu ŋula nhäkunydja malaŋuwu ŋunhi.”   
\p
\v 3 Ga biyakayi bili ḻakaraŋa dhäykawurrumbala worru'-wurruŋuwanydja biyaka gam', “Nhuma dhäykawurrunydja, nhiniya ŋamathaŋa, liŋgu nhenydja nhanŋuway Gunhu'wu yana yolŋu. Yaka wiḏiyal-ḏumurruthiya, ga yaka ḻukiya ŋänitjinydja, märr nhe yurru yakana ŋulthu'yun ŋurikiyi biyapulnydja. Ḻakaraŋa ŋamakurru' wal'ŋu rom,  
\v 4 marŋgikuŋanydja ŋunhi yuṯanhanydja dhäykawurrunha, märr yurru walala märr-ŋamathirri walalaŋgalaŋuwu dhuway'mirriŋuwu ga djamarrkuḻi'wu, djäka walalaŋgu yana dhika wal'ŋu.”  
\v 5 Yo, yuṯanydja dhäyka yurru nhina ŋamakurru' yana wal'ŋu dhika, ga maŋutji-ḏarrtjalk yana; yaka yana ŋayi yurru djäma nhanukalay ŋayi djälyu. Ga djäma ŋayi yurru wäŋa nhanŋuway ŋayi ŋamathama, ga guŋga'yun wiripuŋunhanydja yolŋunha. Ga bitjandhi ŋayi yurru dhäkayunydja dhäruk märramayi nhanŋuway ŋayi dhuway'mirriŋunha, märr yurru yaka nhanukala ŋuruŋunydja walalay wiripuŋuyunydja yolŋuyu yätj ḻakarama rom Garraywunydja.   
\p
\v 6 Ga biyakayi ḻakaraŋa yuṯawanydja ḏarramuwa ŋunhiyi liŋgu ŋupanayŋu yana dhäruk; ŋayi yukurra yurru nhina märr-yunupa wal'ŋu yana, yaka ŋayi yurru djäma nhanukalay ŋayi djälyu.   
\p
\v 7 Ga nhepi wiripunydja nhiniya ŋamathaŋa, ga djäma biyaka liŋgu rom dhunupa yana ga ŋamakurru, märr walala yurru ŋuruŋu wiripu-guḻku'yunydja nhäma nhokalanydja märr-yunupawuy nhinanhara, bala yurru walalanydja bitjandhiyi bili dhuḏakthun, märr-yunupayirriyi yana nhina yurru yukurra. Yuwalkkuŋa yana marŋgikuŋa walalanha wal'ŋu romgunydja Garraywalaŋuwu.  
\v 8 Waŋiya dhunupa yana ga ḏarrtjalk dhäruk, märr yurru ŋunhinydja yolŋu ŋunhi ŋayi yaka ḏukṯuk ŋitjalaŋgalaŋuwu romgu, ŋayinydja yurru gorana nhanŋuway ŋayi, liŋgu yakana yana yurru maḻŋ'marama waŋgany ŋula nhä yätj nhokalanydja, bala yätj ḻakarama ŋilimurrunhanydja Garraywalaŋumirrinhanydja yolŋunha walalanha yakana.   
\p
\v 9 Ga biyakayi ḻakaraŋa nhe yurru djämamirriwanydja yolŋuwa, ŋuripanydja ŋunhi ŋayi bäyimbuy buŋgawa'mirriŋuwuŋu, biyaka gam', “Djäma yana ŋamathaŋa nhokalaŋuwu buŋgawa'mirriŋuwu, ga dhäruk märraŋa ŋanya, märr ŋayinydja yurru nhuna ḻatju'-ḻakarama muka. Yaka buku-ruŋiyanydja waŋiya nhokalaŋuwu buŋgawa'mirriŋuwunydja,  
\v 10 ga yaka djaw'yurra ŋula nhänydja nhanŋu. Djäma ŋamathaŋa yana yuwalkkuŋa, märr yurru walala wiripuwurruyunydja nhäma muka nhokala manymak ga ḻatju' rom, Gunhu'wunydja wal'ŋu, ŋurikinydja ŋunhi ŋayi Walŋakunharamirri ŋilimurruŋgu.”   
\p
\v 11 Yo, biyakayina marŋgikuŋanydja ŋunhiyi walalanha yolŋu'-yulŋunhanydja, liŋgu Gunhuny'tja ḏukṯuk bukmakku warray yolŋuwu walalaŋgu walŋakunharawu; dhiyakuna ŋayaŋuwu ŋayinydja liŋguna maḻŋ'thurruna warraŋulthinana wal'ŋu nhanŋu ḻatjuny'tja rom,  
\v 12 ga dhiyaŋuyi romdhu yukurra ŋuli marŋgikumana ḻakarama ŋilimurruŋgu, ŋilimurru yurru yaka'yunna yana yätjkunydja. Ŋilimurru yurru yaka malthun yukurra yolŋu'-yulŋuwu, ŋurikinydja ŋunhi walala yaka marŋgi Gunhu'wu, ga yaka ŋilimurru yurru djäl-ḏumurruyirri yukurra dhiyakuywu munatha'wuywunydja nhäku malaŋuwu ga romgu. Ŋilimurru yurru yaka malthun yukurra ŋilimurruŋgalayŋuwunydja djälwu ŋuriki, yana ŋilimurru yurru malthun yukurra Gunhu'walaŋuwu djälwu, ga nhina yana nhanukalay romŋura.  
\v 13 Liŋgu dhuwalanydja ŋilimurru yukurra nhina dhiyaŋunydja-wala galkunna yana, ŋayaŋu-gatjpu'yunna yukurra Djesu-Christku, ŋilimurruŋgalaŋuwu Waŋarrwuna wal'ŋu ga Walŋakunharamirriwuna ŋurikina ŋunhi, ŋunhi ŋayi yurru maḻŋ'thun dhiyala, nhanukalay ŋayi ḻatju'yuna dhikana wal'ŋu yurru.   
\p
\v 14 Yo, galkina dhuwala yulŋunydja nhanŋu Djesuwunydja, ŋayi yurru roŋiyirrina lili, ŋunhiyinydja ŋunhi ŋayi wekanhamina ŋanyapinyay ŋayi walŋa, bala burakina ŋilimurruŋgalanydja dharapulŋura ŋayina, ga ŋuliwitjarrayina ŋayi ŋunhi dhawaṯmaraŋala märraŋalana ŋilimurrunhanydja ŋuliŋuruyi romŋuru yätjŋurunydja. Bala ŋayi ḏarrtjalkkuŋalana yulŋunydja ŋilimurrunha, märr yurru ŋilimurrunydja nhina yukurra gänana yana, ganaŋ'maranharana ŋunhi nhanŋuwayliliyanharanydja yolŋu walala, märr yurru ŋilimurru djäl-ḏumurruyirrinydja ḏukṯukthirri djämawu ŋamakurru'wuna wal'ŋu yana, märr-yunupawuna romgu.   
\p
\v 15 Yo, marŋgikuŋanydja dhiyaŋuyi dhärukthunydja ŋunhayi yolŋu'-yulŋunhanydja, biyaka guŋga'yurra marrparaŋ'kuŋa walalanha, märr yurru walala djäma ŋamathama. Ga biyakayi raypirri'yurra ḏaḏawmaraŋa walalanha, ŋula yolnha yolŋunha, ŋunhi ŋayi yukurra djäma yätj. Waŋiya dhärukthu ganydjarrmirriyu, ga yaka ŋula goriyanydja; yakana walala yurru nhäma nhuna yutjuwaḻa' ḻakaramanydja, yanapi nhokuŋunydja dhäwu' ŋunhi ŋula nhäŋiniŋ'nha.   
\c 3  
\s1 Ḻakarama yukurra nhaltjan yurru ŋayi Garraywu yolŋu nhina  
\p
\v 1 Yo, ḻakaraŋa ŋuripanydja yolŋu'-yulŋuwa, walala yurru dhäruk märrama walalaŋguway walala ŋurru'-ŋurruŋunha, ŋunhinhanydja walalanha ŋunhi Godthu walalanha nherrara dhiyakuyi djämawu. Ga bitjandhiyi walala yurru bitjan liŋgu girri'-ŋamathirri guŋga'yunarawu wiripu-guḻku'wu yolŋuwu.  
\v 2 Ḻakaraŋa walalaŋgala, walala yurru yaka ḻakaranhamirri ŋula yätjpuy wiripu-guḻku'-walaŋuwuynydja, ga yaka walala yurru yukurra ŋarrtjunmirri walalanhawuy walala. Bitjan liŋgu walala yurru märr-ŋamathinyaramirri ga ŋayaŋu-wuyunaramirri bukmakku yana.  
\v 3 Biyakayi liŋgu marŋgikuŋanydja walalanha, liŋgu ŋäthilinydja ŋilimurrunydja ŋuli yukurranha nhinanha bitjana bitjan bamba'-bambay; yaka ŋilimurru ŋuli marŋgithinya Godku, ga yakana ŋilimurru ŋuli dhäruk ŋanya märranha. Ŋilimurru ŋuli guyaŋinya yanapi ŋilimurru ŋuli nhinanha yukurranha ŋamakurru'ŋura yuwalkŋura wal'ŋu romŋura be, yurru bäyŋu warray, yana ŋilimurru ŋunhi nhinananydja yukurrana garrpiṉara warray ŋuriŋi ŋilimurruŋgalay warray djälyu ga ŋayaŋuyu. Bitjanana liŋguna ŋilimurru ŋuli guyaŋinyanydja yukurranha djarrpi'na ga yätjnha. Wiripunydja ŋilimurru ŋuli yukurranha maŋutji-ḏi'yunana wiripu-guḻku'nhanydja yolŋunha walalanha. Wiripunydja yolŋu'-yulŋu ŋilimurruŋgu ŋuli ŋuyulkthinya, ga ŋilimurru ŋuli ŋuyulkthinya walalaŋgu wiripu-guḻku'wu.  
\v 4 Yurru Godtja mukthurruna yana märr-ŋamathina yukurrana ŋilimurruŋgunydja, ŋayinydja ŋunhi Walŋakunharamirri ŋilimurruŋgu, bala ŋayi ŋilimurruŋgala maḻŋ'maraŋalana warraŋulkuŋalana nhanŋuway ŋayi mel-wuyunaramirrina rom,  
\v 5 bala yana walŋakuŋalana ŋilimurrunha. Yurru yakana ŋayi ŋunhi ŋilimurrunha walŋakuŋala ŋuriŋi ŋilimurruŋgalaynydja be ŋamakurru'yu dhuwurryu; Godthu ŋayipi ŋilimurrunha walŋakuŋalanydja yänana, liŋgu ŋayinydja mel-wuyunaramirri ŋilimurruŋgu. Ŋayi ŋilimurrunha ŋayaŋu-ḏarrtjalkkuŋalanydja, bala ŋayaŋunydja ŋilimurrunha walŋakuŋala yuṯakuŋala ŋuriŋi nhanukalay ŋayi Garrkuḻukthuna Birrimbirryu.  
\v 6 Yo, Godthunydja rarryurrunana nhanŋuwaynydja ŋayi Garrkuḻuknhanydja ŋunhinydja Birrimbirrnha ŋilimurruŋgalanydja, ŋuliwitjanna Djesu-Chrsitkalana ŋilimurruŋgalaŋuwala Walŋakunharamirriwalana,  
\v 7 märr yurru ŋayi Godthu yakana yukurra yätj-ḻakaramanydja ŋilimurrunha, bala dhä-ḏir'yundja yurru. Nhanukalanydja märr-ŋamathinyarayu ŋilimurrunydja yukurra nhina gurruṯu'mirrina yana walala nhanŋu, waŋganyŋurana yana Godkalana. Ga dhiyaŋunydja-wala ŋilimurrunydja nhanŋu yumurrku'na, bitjan gäthu'mirriŋuna walala nhanŋu, bala ŋilimurru yukurra dhuwala dhukarr-nhämana yulŋunydja ŋurikina waluwu ŋunhi ŋilimurru yurru yukurra nhina ŋunhala nhanukalanydja, gupaḏalnha-wala yurru.   
\p
\v 8 Yuwalk dhuwalayi yulŋunydja. Yo Dätitj, ḻakaraŋanydja dhuwalayi dhäruktja yolŋu'-yulŋuwanydja, biyaka warraŋulkuŋa wal'ŋu yana, märr yurru ŋunhinydja walala ŋunhi walala yukurra märr-yuwalkthirri Godnha, walala yurru yukurra ḻayḻayyun yana djäma ŋula nhä ŋamakurru'. Ŋuriŋiyinydjayi dhärukthu yurru guŋga'yunna yolŋu'-yulŋunha.  
\v 9 Yurru nhenydja barrku-ḏakthurra ŋurikinydja yolŋu'-yulŋuwu ŋunhi walala ŋuli ḻayḻayyun waŋanharamirrina yukurra yurru yana mayali'miriwnha dhäruk. Walalanydja ŋuli nhina marrtji walu ŋupan waŋanharamirri weyinnha, gurruṯu'wuynha ŋuli dhuḏakthun yarraṯaŋuru ŋulaŋuruna märi'muwalana, ga wiripunydja walala ŋuli dhä-ḏälthinyamirri waŋanharamirri ŋurikiy ŋäthiliŋuwuy rombuy yana. Ŋunhiyinydjayi bawa'mirrina yana. Yakana yurru ŋula yolnha walŋakuma balanyarayunydjayi dhärukthu. Yaka nhenydja yukirriya warrkuḻuŋa walu nhuŋuwaynydja nhe biyakayi.  
\v 10 Ŋunhi yurru yolŋuyu guḻk-guḻkthun Godkunydja miṯtji yolŋu'-yulŋunha, barrku'-barrkuwatjkuma ŋuriŋiyi dhärukthunydja nhanukalay, bala nhenydja waŋiya ŋunhinhayi yolŋunha, biyaka raypirri'yurrana ŋanya. Ŋuli ŋayi yurru yakanydja mäkiri'-witjun, bala nhenydja biyapul waŋiya ŋanya. Ga ŋuli ŋayi yurru yakanydja ŋäma nhuna, nhenydja yurru gonha'yurruna ŋanya, yakana biyapulnydja ŋanya galkikuŋa.  
\v 11 Liŋgu balanyarayinydja yolŋu ḻiya nhanŋu djarrpi'na; bitjanna liŋgu ŋayi ŋuli guyaŋirrinydja djarrpi'kumana. Nhenydja ŋuli nhäma ŋunhi ŋayi ŋuli djäma yukurra nhä malanha yätj, bala dharaŋanna ŋunhi ŋayinydja ŋunhiyinydjayi ŋayaŋu-djarrpi'na, yakana ŋamakurru'.   
\s1 Dhawar'yunarayŋuna dhuwalanydja dhäruk  
\p
\v 12 Yo, yalalanydja ŋarra yurru djuy'yun nhokala dhuwalanhana maṉḏanha Yätamanhana ga Ditjikanhana. Ŋunhi maṉḏa yurru bunanydja dhiyaliyi, ga dhunupana yana nhenydja yurru gonha'yunna, bala marrtjiyana lili ŋarrakalana ŋunhawala Nikapulalilina. Ŋarranydja yurru ŋunhalayi nhina yukurra ŋulinyaramirriyu ŋulwitjthunydja.  
\v 13 Ŋarra ḏukṯuk nhuŋunydja, nhe yurru guŋga'yun ŋunhinha maṉḏanha Djenanha ŋunhi rom-marŋginha yolŋunha, ga Bulatjnha. Guŋga'yurra maṉḏanha yulŋunydja, wekaŋa ŋula nhä ŋurukunydja-wala marrtjinyarawunydja.  
\v 14 Marŋgikuŋanydja ŋitjalaŋguway ŋunhiyi gurruṯu'mirrinhanydja walalanha ŋamathaŋa yana, märr yurru walala yukurra ḻayḻayyun ŋunhilina liŋguna djäma ŋamakurru'na, ga guŋga'yun maranhu-wekamana ŋunhinhanydja walalanha yolŋu'-yulŋunha ŋunhi walala yukurra nhina ŋuli goŋmiriwŋura, ŋurruwuyk wal'ŋu yuwalk. Yo, yaka ŋunhi ŋamakurru' walalaŋgu, walala yurru ḻayḻayyun ŋula nhäŋuranydja yana, ga yakanydja guŋga'yun ŋula yolnha.   
\p
\v 15 Ŋunhinydja wiripu-guḻkuny'tja yolŋu'-yulŋu ŋunhi walala yukurra djäma dhiyala ŋarrakala, walala djuy'yurruna märr-ŋamathinyaranydja ŋarrakala nhuŋu. Wekaŋa ŋanapurruŋguŋunydja märr-ŋamathinyara ŋurikiyi ŋilimurruŋgalayŋuwu marrkapmirriwunydja walalaŋgu, ŋunhi walala ŋilimurruŋgu gurruṯu'mirri walala, liŋgu waŋganygu ŋilimurru yukurra märr-yuwalkthirrinydja Djesuwu.  
\p Godthu yurru gäma yukurra nhumalanha bukmakkala yana nhanukalay ŋayi märr-ŋamathinyarayu. Ga liŋguna.