\id 2TI  
\h 2 DIMITHIWU 
\toc2 DIMITHIWU NAMBA 2NA DHÄRUK 
\toc1 2 DIMITHIWU DHÄRUK DJUY'YUNARA BOLWUŊU 
\mt2 2 DIMITHIWU DHÄRUK  
\mt1 DJUY'YUNARA BOLWUŊU  
\toc3 2TI  
\c 1  
\p
\v 1 Marrkapmirri Dimithi, dhuwalanydja ŋarra yukurra Bolyu wukirri dhäruk nhuŋu, ŋunhi ŋarranydja bo'puyŋu Djesu-Christku, yurru Godthu ŋayipi ŋarranha nherraranydja dhiyakuyi djämawunydja, liŋgu ŋayipi ḏukṯukthina. Ŋayi djuy'yurruna ŋarranhanydja ḻakaranharawu Djesuwalaŋuwuy, liŋgu ŋayi dhawu'mirriyaŋala ŋunhi ŋayinydja yurru walŋakuma yolŋu'-yulŋunha ŋuliwitjan Djesu-Christkalaŋukurru.  
\v 2 Ŋarra yukurra wukirrinydja dhuwala djorrany'tja nhuŋu Dimithi, liŋgu nhenydja marrkapmirrina gäthu'mirriŋu ŋarraku. Ŋarra yukurra bukumirriyama nhuŋu yulŋunydja, märr yurru Godthu Bäpayu ga Garrayyu Djesu-Christthu gäma yukurra nhuna galkikuma yana nhanukalay ŋayi märr-ŋamathinyarayu ga mel-wuyunarayu, märr yurru nhenydja nhina yukurra ŋayaŋu-yal'yunara waŋgany-manapanmirri Djesu-Christkala.   
\s1 Bolyu marrparaŋ'kuŋala marrtjina ŋanya Dimithinha  
\p
\v 3 Ŋarra mirithirri buku-wurrpandja yukurra Godnha. Ŋarra ŋuli buku-ŋal'yundja nhanŋu ŋuruŋu wal'ŋu ŋayaŋuyunydja ḏarrtjalkthu yana, bitjan yana liŋgu bitjarra ŋarrakala märi'muyu yukurrana djäma nhanŋu ŋäthili. Bitjan liŋgu ŋarra ŋuli buku-wurrpan Godnha, ŋunhi ŋarra guyaŋirrinydja ŋuli yukurra nhuna, bukumirriyamanydja yukurra nhuŋu munha-ŋupan ga walu-ŋupan.  
\v 4 Ŋarra ŋuli guyaŋirrinydja nhuna, nhaltjan nhe yukurra ŋäthi ŋunhi, ŋulinyaramirriyu ŋunhi ŋarra nhuna ganan. Wirrki yana ŋarra ḏukṯuktja nhänharawunydja nhuŋu, märr yurru ŋarra wirrki yana ŋayaŋu-djulŋithirrinydja wal'ŋu.  
\v 5 Ŋarra yukurra guyaŋirrinydja nhuna ŋunhi nhenydja yukurra yuwalkkuma yana märr-yuwalkthirri Djesu-Christnha. Ŋäthilinydja nhokala märi'muyu märr-yuwalkthina Lawatjthu, ga ŋuliŋuruyinydja nhokala ŋäṉḏi'mirriŋuyuna Yunitjthuna märr-yuwalkthina, ga ŋarra marŋgi nhuŋunydja ŋunhi nhenydja bitjandhiyi liŋgu märr-yuwalkthirriyi yukurra.  
\v 6 Dhiyakuyinayi nhuna ŋarra yukurra biyapul guyaŋinyamirriyamanydja, bitjandja gam': Djämanydja wirrki yana wal'ŋu, liŋgu Godthunydja bitjarra ŋäthilimirriyaŋalana wekaŋala nhanŋuwaynydja ŋayi ganydjarr nhokalanydja, ŋulinyaramirriyunydja ŋunhi ŋarra bukumirriyaŋala goŋ-ŋal'yurruna manapara nhokala. Biyaka dhä-yurrkuŋana ŋunhiyi gurthana, märr ŋayi yurru nhära bitjanna liŋgu, ga yakana yurru rirriwuḻthirrinydja, ŋunhiyi nhanukuŋu wekanharanydja.  
\v 7 Ŋunhi ŋuli nhe rum'rumdhundja barrarirrinydja ŋula nhäku, ŋunhiyinydjayi yaka ŋulaŋuru Godkuŋu wekanhara, lingu Godthunydja ŋuli wekama nhanŋuway warray wal'ŋu Garrkuḻuk Birrimbirr ŋilimurruŋgala ŋayaŋulilinydja, märr yurru ŋilimurru djämanydja ganydjarrmirriyuna ga märr-ŋamathinyarayuna. Ŋe. Ga ŋuriŋiyinydja nhanukalanydja Walŋayunydja Birrimbirryu ŋilimurru yurru ḏaḏawmaranhamirrina ŋilimurrunhay ŋilimurru ŋula nhäŋuru yätjŋuruna.   
\p
\v 8 Dhiyakuyina nhe yurru yakanydja rum'rumdhun. Ḻakaraŋa ŋanya Garraynha yana birrka'mirriŋura, barrarimiriwnha yana. Ga yakana goriya ŋarrakalanydja, ŋunhi ŋarra yukurra dhuwala gulŋiyirri ḻoluŋura, liŋgu ŋarra nhanŋuway dhuwala Garraywu Djesuwu yana. Ŋunhi nhe yurru ḻakarama dhäwuny'tja birrŋ'marama Djesunhanydja, walala ŋuli yolŋu'-yulŋuyunydja nhuna ŋayaŋu-yätjkuma dhika nhaltjanna, yurru nhenydja märraŋa yana ŋunhiyi ŋayaŋu-yätjthinyaramirrinydja rom ŋuriŋi yana Godkala ganydjarryu.  
\v 9 Liŋgu muka ŋayi Godthunydja ŋilimurrunha walŋakuŋala, bala ganaŋ'maraŋalanydja ŋayi bitjarra nhanŋuwayliliyaŋalana ŋilimurrunha, yurru yaka ŋayi ŋilimurrunha walŋakuŋala bili ŋilimurru ŋamakurru'mirrinydja be. Ŋäthilinydja benydja, yurruna ŋayi dhuwalanydja wäŋa maḻŋ'thurruna, Godthu ŋayipi djarr'yurrunanydja nhanukalay ŋayi guyaŋinyarayu, ŋayi yurru ŋayaŋu-wuyun ŋilimurruŋgu, bala ŋayi walŋakuŋalana ŋilimurrunha ŋuliwitjarra Djesu-Christkalaŋukurrunydja.  
\v 10 Yo, dhiyaŋunydja-wala nhanŋu ŋunhiyi mel-wuyunaranydja liŋguna maḻŋ'thurrunana, liŋgu Djesu-Christnha ŋilimurruŋgu Walŋakunharamirrina bunana, bala bakmaraŋalana ŋayi bitjarra biḏiwiṯitjkuŋalana ŋunhi rakunydhinyaramirrinydja rom, bala ŋilimurrunydja yurru nhina yukurra ŋunhalayina Godkalana, rumbalnha wal'ŋu yana, bitjanna liŋguna yurru. Dhuwalayi ŋayi Godthu maḻŋ'maraŋalanydja warraŋulkuŋalanydja ŋilimurruŋgu ŋuliwitjarra Djesu-Christkalaŋukurruna.   
\p
\v 11-12 Yo, Godthunydja ŋunhi djarr'yurruna nherrara ŋarranhanydja ḻakaranharawu dhäwu'wunydja dhiyakuyinayi. Ŋarranydja dhuwala bo'puyŋu nhanŋu, bala ŋarra yurru marŋgikumanydja dhuwalayina yuwalknha dhäwu', bäyyi ŋunhi walala yurru ŋarranha djäma ŋula nhaltjan yätjkumanydja. Yakana ŋarra yurru goranydja ŋuriŋiyi dhäwu'yunydja, liŋgu ŋarranydja marŋgi Djesu-Christku; ŋarra märr-nherraṉminanydja ŋarrakuway ŋarra nhanukalana liŋguna, ga yuwalk yana ŋayi yurru yukurra gunganhamirriyamanydja djäkanydja ŋurikiyi dhäwu'wu ŋunhi ŋayi wekaŋala ŋarrakala dharraylili. Yo, ŋunhiyinydja dhäwu' yurru yukurra dhärrana yanana, yana liŋgu ga ŋulinyaramirriyu waluyu ŋunhi ŋayi yurru marrtji lili, bala bunana.  
\v 13 Liŋgu muka ŋarra ŋunhi ḻakaraŋalanydja nhuŋu ŋunhiyi dhäwuny'tja, ga nhenydja yurru ŋayathama ŋunhiyi liŋgu waŋgany yana yuwalknha wal'ŋu dhäwu' ŋunhi nhe ŋäkula ŋarrakuŋu. Märr-nherraṉmiyanydja Garraywala yana, ga märr-ŋamathiya nhanŋuway, ga wiripu-guḻku'wu yolŋu'-yulŋuwu, liŋgu nhenydja nhanŋuway yana Djesu-Christku.  
\v 14 Godthu wekaŋala yuwalkŋunydja wal'ŋu dhäwu' nhokalana dharraylili ŋunhi, ga nhenydja yurru dharraynha yulŋunydja ŋuriki yuwalkkunydja, ŋuriŋiyinydja Birrimbirryu Garrkuḻukthunydja ganydjarryu ŋunhi ŋayinydja dhuwalina nhina yukurra nhokalana.   
\p
\v 15 Liŋgu muka nhe ŋäkulanydja ŋarranha, ŋunhi ŋuriŋi yolŋu'-yulŋuyu bukmakthu yana dhiyala Yaytjanydja makarrŋura gonha'yurruna ŋarranha. Ŋuriŋi märrma'yunydja Bitjilayu ga Yimatjiniyunydja, maṉḏanydja gonha'yurrunana ŋarranha, ḏiltjina ŋarraku wekaŋala, bitjarra liŋgu bitjarra ŋunhi wiripu-guḻku'yu.  
\v 16 Yurru ŋuriŋi Nitjipurayunydja ŋayinydja yaka ŋarranha gonha'yurruna. Ŋarra bukumirriyama yukurra yulŋunydja, ŋunhi ŋayi yurru Garrayyu ŋanya gäma ḻatju'kuma, ga nhanŋu ŋunhi gurruṯu'mirriŋunha walalanha, liŋgu bitjan warray liŋgu ŋayinydja ŋuli ŋarranha goŋmirriyama, ŋayaŋu-djulŋikuma dhika wal'ŋu, marrparaŋ'kuma bitjan ŋarranha. Ga bäy warray ŋunhi ŋarra dhiyala ḻoḻuŋuranydja gärri yukurra, ga yakana ŋayi ŋuli gora ŋarrakalanydja.  
\v 17 Ŋunhi ŋayi bunananydja dhiyala Rawumdja, dhunupa yana ŋayi ḻarruŋalana yukurrana ŋarraku, yana liŋgu ga maḻŋ'maraŋala ŋayi ŋarranha.  
\v 18 Ŋarranydja ḏukṯuk ŋayi yurru Garraynydja mel-wuyun nhanŋu, ŋulinyaramirriyunydja ŋunhi ŋayi yurru Garrayyu mala-yarr'yun marrtji yolŋu'-yulŋunha. Ga nhenydja marŋgi muka bitjandhi liŋgu nhanŋu, nhaltjana ŋayi ŋuli guŋga'yuna yukurranha ŋarranha ŋunhala Yipatjatj wäŋaŋura.   
\c 2  
\s1 Djäma yana Djesu-Christkala gali'ŋura ganydjarryu  
\p
\v 1 Yo, ŋuriŋi wiripuwurruyunydja gonha'yurrunana ŋarranha, yurru nhenydja Dimithi balanyara warray bitjan nhe ŋarraku gäthu'mirriŋu. Dhärriya yana wuṉḏaŋarrthiya Godkala ganydjarryu, liŋgu ŋayi yurru Garrayyu Djesuyu ŋayipi nhuna guŋga'yundja.  
\v 2 Liŋgu muka nhe ŋäkulanydja ŋarranha ŋunhi ŋarra yukurrana ḻakaraŋala birrŋ'maraŋala dhäwu' ŋunhiyi yuwalkŋunha, ga nhenydja yurru ḻakaraŋa dhuwala yana liŋgu ŋupanayŋu dhäwu', wekaŋa wiripu-guḻku'walanydja dharraylili, ŋurikalanydja walalaŋgala yolŋu'-yulŋuwala ŋunhi walala märr-yuwalkthinyaramirri walala, märr yurru walala marŋgithirriyi, bala ḻakaramana yana dhunupana wiripu-guḻku' walanydja.   
\p
\v 3 Yo, nhenydja dhuwala balanyara bitjan yolŋu ŋunhi ŋayi ŋuli marrtji marilili, yurru nhenydja ŋuli yukurra buma Djesuwala warray gali'ŋura, ŋayina ŋunhi nhuŋu ŋurruŋu buŋgawanydja. Ŋunhi nhe yurru burakirrinydja ŋunhili mariŋuranydja, yaka ḏaḏawyurranydja, yana märraŋa ŋunhiyi ŋayaŋu-yätjthinyaramirrinydja, ga yaka waṉḏiyanydja nhanukala.  
\v 4 Yaka ḻayḻayyurranydja yukirriya dhiyaŋu ŋunhi munatha'wuyyunydja nhäyu malaŋuyu romdhu. Biyaka djäma yana wirrki wal'ŋu ŋuriki nhokalaŋuwu ŋurruŋuwunydja, muḻkurrnydja-nherrala nhanŋuway yana dhärukŋuranydja, märr yurru ŋayinydja nhuna buku-wurrpanna ŋurikiyi.  
\v 5 Yo, ŋunhi ŋuli yolŋu waṉḏirri bata'yunarawunydja, ŋayi yurru ŋuriŋi yolŋuyunydja ŋayathama yana ŋunhiyi romdja ŋurikiyi waṉḏinyarawunydja. Ŋuli ŋayi yurru yakanydja waṉḏirri yukurra ŋuriŋiyi romdhunydja, ŋayinydja yurru yakana märrama ŋula nhänydja ŋurikiyi. Mukthurra-yana-wala marrtjiya Godkala romgurru ganydjarryu yana, märr nhenydja yurru märramana yana.  
\v 6 Ga ŋunhi yurru yolŋuyu ŋatha-ŋuthanmaranharamirriyu djäma yukurra wirrki wal'ŋu nhä malanha, ŋuriŋiyina yolŋuyu yurru ŋäthilinydja märrama borum ŋuliŋuruyi ŋunhi ŋayi ŋuli ŋuthanmarama yukurra. Yo, djämanydja wirrki yana Garraywunydja, bala nhenydja yurru märramana yana ŋamakurru' nhanukuŋunydja.  
\v 7 Guyaŋiya wirrki yana ŋunhiyi malanha yulŋunydja, ŋunhi ŋarra ḻakaraŋala bitjarrayi, liŋgu Garrayyunydja ŋayipi yurru marŋgi wekama nhuna, märr nhenydja yurru yuwalkkumana wal'ŋu marŋgithirri.   
\p
\v 8 Guyaŋiya bala roŋiyiya Djesu-Christnha, ŋunhi ŋayi Godthu ŋanya gaŋgathinyamirriyaŋala beŋuru rakunyŋuru. Ŋarranydja ŋuli yukurra ŋurikalaŋuwuyyina birrŋ'marama dhäwu', ŋunhi ŋayi dhawal-wuyaŋina ŋulaŋuru yarrataŋuru Giŋ-Daypitkala.  
\v 9 Ga dhiyaŋuyi dhäwu'yunydja birrŋ'maranharayu ŋarranydja dhuwalana yukurra nhina ḻoḻuŋurana, garrpiṉara djimuku'yuna malaŋuyu, yanapi ŋarra ŋula nhäna dhuwurr-yätjnha yolŋu. Yurru Godkunydja dhäruk yaka warray garrpiṉara ŋula nhäkuŋu.  
\v 10 Dhiyakuyinayi märrwu ŋarranydja yukurra dhärra mukthunna yana wuṉḏaŋarrnha gali'ŋura Djesuwalana, ŋarra ŋuli märramana yana nhä malanha yätjtja ŋunhi walala ŋuli djäma ŋarraku, märr yurru ŋunhi wiripu-guḻkuny'tja ŋunhi walalanha Godthu ŋayipi djarr'yurruna, walala yurru märr-yuwalkthirrina Djesu-Christkala, bala walŋathirrina yurru, bala yurru nhinanydja walala ŋunhalana nhanukalana ḻatju'ŋurana dhikana wal'ŋu wäŋaŋura, gupaḏalnha-wala yurru.   
\q1
\v 11 Yo, dhuwalanydja dhäruk ŋarra yurru ḻakarama yuwalk yana, balanyara gam',  
\q1 “Ŋunhi ŋali yurru ḏaḏawyun yätjŋurunydja djämaŋuru,  
\q2 bitjandja bitjan ŋali maṉḏa liŋguna rakunydhinyarana manapa Garraywala Djesuwala,  
\q2 bala ŋalinydja yurru bitjandhi liŋgu walŋayi nhina yukurra manapa nhanukalanydja.   
\q1
\v 12 Ŋunhi ŋali yurru dhärra yukurra wuṉḏaŋarrnha yana ŋuliwitjan ŋayaŋu-ŋonuŋdhinyaramirrikurrunydja,  
\q2 bala ŋalinydja yurru nhina ŋunhalanydja, bitjan ŋurru'-ŋurruŋu yolŋu'-yulŋu ŋunhi nhanukalana dhambay.  
\q1 Ŋuli ŋali yurru ŋuyulkthirrinydja nhaŋu bitjandja, ‘Yaka ŋarra nhanŋu marŋgi,’ bitjandja,  
\q2 ŋayinydja bitjandhi liŋgu waŋa yurru ŋitjalaŋgunydja, ‘Yaka yana ŋarranydja marŋgi nhuŋu.’   
\q1
\v 13 Bäyyi ŋunhi ŋali yurru yakanydja märr-yuwalkthirri nhanŋu,  
\q2 yurru ŋayipinydja Garraynydja yurru yukurra yuwalk yana,  
\q1 liŋgu yakana ŋayi yurru djambi yukurra ga ŋula wiripuyirri,  
\q1 Ŋayi yurru djämana yana nhä ŋayi dhawu'-nherrara ŋunhiyi.”   
\s1 Balanyarayina yurru djämamirri wal'ŋu yolŋu Godkunydja  
\p
\v 14 Yo, waŋiya guyaŋinyamirriyaŋa yolŋu'-yulŋunhanydja ŋurikiynydja malaŋuwuy. Ḻakaraŋanydja walalambala yäkuyunydja Garraywala, märr yurru walala yaka ŋarrtjunmirri, dhä-ḏalthinyamirri waŋanhamirri, liŋgu ŋuriŋiyinydja ŋarrtjunminyarayunydja romdhu ŋuli yakana guŋga'yun ŋula yolnha yolŋunha, yana ŋayi yurru ŋuriŋiyinydja baḏuwaḏuyunna yolŋu'-yulŋunha, ŋunhinhana ŋunhi walala yurru ŋäma Godku yolŋu'-yulŋunha ŋarrtjunminyara.  
\v 15 Ga nhenydja Dimithi, wirrki yana djäma nhinanharawu ŋamathinyarawuna, märr yurru ŋayi Godthunydja ḻatju'-ḻakarama muka nhuna. Nhenydja dhuwali Godku nhanŋuway djämamirri, yurru biyaka warraŋulkuŋa ḻakaraŋanydja walalambala Godku yuwalkŋunydja wal'ŋu dhäruk, ga dhunupakuŋa yana, märr yurru nhe yakana goranydja ŋunhi ŋayi yurru Godthunydja nhäma marrtji djämawuynydja nhokuŋu.   
\p
\v 16 Yo, barrku-ḏakthurra yulŋunydja yolŋu'-yulŋuwu ŋurikinydja ŋunhi walala yurru waŋanharamirri marrtji ḻakaranharamirri mayali'miriw ŋunhi dhäwu', liŋgu ŋuriŋiyinydja dhärukthu walala ŋuli Godnha bitjan yutjuwaḻa'kumana. Yakana ŋurikalayinydja galkithiya walalaŋgala, liŋgu balanyarayuyinydja dhärukthu yurru yolŋu'-yulŋunha gäma yarrk-yarrkmaramana barrkukumana Godkalanydja.  
\v 17 Liŋgu ŋunhi dhäruktja walalaŋguŋu waŋanharanydja balanyarana bitjan yätj ŋunhi djetji rumbalŋura yolŋuwala, ŋunhi ŋayi ŋuli ŋuthan, bala birrŋ'thunna bawala'mirrikurruna rumbalkurrunydja, bala rakunygumana yurru ŋuriŋiyinydja yätjthunydja. Ga märrma' ŋunhi yolŋu maṉḏa yäku Yaminiyanydja ga Bilitanydja balanyarayi yolŋu maṉḏa, liŋgu djarrpi'kuma yana maṉḏa ŋuli marŋgikuma yolŋu'-yulŋunhanydja.  
\v 18 Maṉḏanydja ŋunhi baḏatjurruna ŋunhiyi yuwalkŋunydja, bala maṉḏa ŋuli ḻakarama djarrpi'kumana, yanapi walalanydja ŋunhi rakunymirrinydja yolŋu'-yulŋu liŋguna gaŋgathinya ŋulaŋuru moluŋurunydja. Bitjanna maṉḏa ŋuli ḻakaramanydja yolŋu'-yulŋuwanydja djarrpi'kumana, bala walala yukurra galkinyamaramana wiripu-gulku'nhana märr-yuwalkthinyaramirrinha yolŋu'-yulŋunha ŋunhi, liŋgu walalaŋgala ŋuli muḻkurrŋura guḻku'yirri ŋuriŋiyi dhärukthu.  
\v 19 Yurru Godkunydja mala yolŋu'-yulŋu yurru dhärra yukurra ḏäl warray yana, yakana yurru galkirri, liŋgu Godkunydja ŋunhiyi ŋurruk yolŋu walala balanyara bitjan ḻuku dhärranharawu ŋunhi buṉbuwuy, ŋunhi Godkuŋuna nhanukuŋuwaynha nherraṉara. Godthu ŋayipi yiŋarra'yurrunanydja nhanŋuwaynydja ŋayi yolŋu'-yulŋunha, waŋga'-waŋganynha yana. Yo, Garraynydja ŋunhi marŋgi ŋurikinydja walalaŋgu ŋunhi walala nhanŋuway wal'ŋu yolŋu'-yulŋu, ga ŋunhiyinydja yolŋu ŋunhi ŋayi ŋuli ḻakaranhamirri bitjandja, “Ŋarranydja dhuwala nhanŋuway warray Garraywu warray,” bitjandja, ŋayinydja yurru ŋuriŋiyi gananna ŋunhi djarrpiny'tja gatjaḻ, ga yana ŋayi yurru ḏukṯukthirrinydja ŋamakurru'wuna nhinanharawu yana.   
\p
\v 20 Yo, ŋunha ḻukunydjawala yolŋuwala wäŋaŋura guḻku' mirithirri banikin' malanha, wiripu ga wiripu; wiripunydja banikin' malanha djämawuy mirithirri ḻatju'wuy wal'ŋu dhika, mel-wiḏi' ŋunhi, ga wiripunydja banikin' malanha djämawuy ŋula nhäwuy, dharpawuy ga dhoḻuwuy. Yo, wiripunydja ŋunhiyi banikin djämawu dharrpalwu yana, ga wiripunydja ŋula nhäku yana djämawu. Ga balanyarayi liŋgu ŋupanayŋuyi yana yolŋu'-yulŋunydja barrku'-barrkuwatj, wiripuwu ga wiripuwu djämawunydja yana.  
\v 21 Ga ŋunhi yurru ŋayi yol yolŋu ḏarrtjalkkunharamirrinydja ŋanyapinyay ŋayi, djalkthundja marrtji yurru nhä malanha yätjtja ga bothinyaramirrinydja, bala ŋayinydja yurru ŋunhiyinydja yolŋu nhinana-yana-wala ganaŋ'thunarana nhanŋuwaynha ŋurikiyina yolŋu-waṯaŋuwuna, mel-wiḏi'na nhanŋuwaynha, bala ŋuliwitjan nhanukalaŋukurrunydja ŋayi yurru Garrayyunydja djämana yana ŋamakurru'na dhikana wal'ŋu, liŋgu bitjan liŋgu ŋayi yurru nhina yukurra girri'-ŋamathirri djämawunydja yana Godkalaŋuwu.   
\p
\v 22 Yo, nhenydja mukthurra yana yurru yarrkthurra, ŋapana-wekaŋa ŋurukuyinydja nhäku malaŋuwu ŋunhi yukurra nhuma yuḏayuḏa yolŋu walala djäl-ḏumurruyirri ŋurikiyi nhäku malaŋuwu. Waṉḏiya ŋuliŋuruyinydja yana, ga nhepinydja yurru djäl-ḏumurruyirri ŋamakurru'wu yana dhunupawu wal'ŋu. Ga märr-yuwalkthiyana yana nhiniyanydja, ga yuwalkkuŋa yana märr-ŋamathiya wiripu-guḻku'wunydja, ga nhiniya waŋganyŋura ŋurikala walalaŋgala ŋunhi walala yukurra yuwalkkuma buku-ŋal'yun Garraywu ḏarrtjalkthu yana ŋayaŋuyunydja. Dhiyakuyi malaŋuwu nhenydja yurru wirrki ḏukṯukthirri.  
\v 23 Yaka ḻayḻayyurra ga waŋanhamiya yukirriya ŋurikalanydja walalaŋgala ŋunhi walala ŋuli yukurra waŋanharamirri be nhä dhäruk djambatj dhika wal'ŋu, dhäpark ŋunhiyi, yolŋuwuŋu yana guyaŋinyarawuy. Ŋunhiyinydja yolŋu walala yakana yana marŋgithina yukurrana yuwalkku, bala walala ŋuli waŋanharamirrinydja ŋurikina liŋgu dhä-ḏal'yunmirrinydja nhäŋiniŋ'kuna, ŋarrtjunmirrina yukurra bala-lili'yunmirri.  
\v 24 Yurru nhenydja dhuwala Garraywu warray, nhanŋuway warray djämamirri yolŋu. Yakana nhuŋu dhunupa nhe yurru ŋarrtjun waŋa yukurra yolŋuwala birrka'mirriwalanydja. Waŋiya biyaka gurrum'thurra yal'yunarayu dhärukthu. Marŋgikuŋa walalanha yolŋu'-yulŋunhanydja ŋamathaŋa yana, ga yakana waḏutjanydja maḏakarritjthiya ŋurikinydja walalaŋgu yolŋu'-yulŋuwu ŋunhi walala marrtji bulnha bala marŋgithirri, ga ŋurikinydja yolŋu'-yulŋuwu ŋunhi walala ŋuli ŋayaŋu-yätjkuma nhuna.  
\v 25 Gurrum'thurra yana waŋiyanydja dhunupakuŋanydja ŋunhinhanydja walalanha ŋunhi walala nhina yukurra wiripuŋura gali'ŋura, märr yurru ŋayi Godthunydja walalanha bilmarama muka, märr walala yurru gananna ŋunhi walalaŋguway djarrpi'kunharanydja guyaŋinyarawuy, bala marŋgithirri ŋurikina yuwalkkuna wal'ŋu dhäwu'wu.  
\v 26 Yo, yätjthunydja ŋunhi mokuyyunydja bitjarrana walalanha gaṯmaraŋalana, mayali'-wilkthurrunana ŋayi, märr yurru walala djäma nhanukalayŋuwuna djälwu, mokuywalaŋuwuna Satangalaŋuwuna. Ga ŋunhi walala yurru guyaŋirri dhunupa wal'ŋu yana, bala ŋuriŋiyinydjayi yuwalkŋuyunydja dhärukthu walalanha yurru yana dhawaṯmaramayi ŋuliŋuruna ŋunhi yätjŋuru ŋunhi walalanha yukurra gaṯmarama.   
\c 3  
\s1 Ŋunhinydja dhä-yawar'yunarayunydja yurru waluyu yolŋu walala wirrkina wal'ŋu dhikana yätjthirri  
\p
\v 1 Yo, guyaŋiya ga marŋgithiya dhiyakunydja gam': Ŋuriŋi dhä-yawar'yunarayunydja waluyu ŋilimurru yurru Garraywalaŋumirrinydja marrtji yukurra ŋayaŋu-wutthunaramirrikurruna wal'ŋu,  
\v 2 liŋgu ŋulinyaramirriyunydjayi yolŋu walala yurru yukurra yana märr-ŋamathinyaramirri walalaŋguwaynha walala, goŋmirriyanharamirrina ŋanyapinyay ŋayi, ga bitjandhiyi walala yurru wanaŋa-ḏumurru rrupiyawunydja. Walala yurru dharrpal-ḻakaranhamirri be walalanhawuy walala, bala yana buŋgawayirrina wiripu-guḻku'wunydja yolŋu'-yulŋuwu. Ga wiripunydja walala yurru waŋa yätjkuma wiripu-guḻku'nha, ga yakana ŋunhiyinydja walala yurru dhäruk märrama walalaŋguway ŋäṉḏi'mirriŋunha ga bäpa'mirriŋunha walalanha, bala walalanydja yurru ḻäy-ruŋinyamiriwnha yolŋu walala, ga yakana yana yurru walala guyaŋirri Godnhanydja, ga nhanŋu rom malanha.  
\v 3 Yolŋu'-yulŋu yurru balanyarana wiripunydja bitjan wäyin, yakana walala yurru märr-ŋamathirri walalaŋgalaŋuwu yumurrku'wunydja, märr-ŋamathinyamiriwnha balanyarayinydja yolŋu'-yulŋu, yana walala yurru yukurra ŋuyulkthirrina bawala'mirriwuna, ga yakana walala yurru mel-wuyun ŋula yolku yolŋuwu. Yo, ŋulinyaramirriyunydjayi walala yurru yukurra ḻakarama bothirrina wiripunhanydja yolŋunha, gupa-waŋana yurru, ga bitjanna liŋguna walala yurru bunharamirrina, ḻarrany'tjunmirrina dhikana yulŋunydja yukurra, bala walala yurru ŋuyulkthirrina ŋula nhäku ŋamakurru'wunydja.  
\v 4 Yo, ŋulinyaramirriyunydjayi yolŋu'-yulŋuyu yurru wekama wiripu-guḻku'nhanydja goŋlili ŋunhana miriŋuwalana walalaŋgala. Walala yurru djäma muḻkurrmiriwyuna dhumukthuna yana, nhaltjan walala yurru guyaŋirri, liŋgu walala yurru guyaŋinyamirri ḻiya-waŋarrthirrina be. Walala yukurra märr-ŋal'yun yurru ŋula nhäkuna, birrka'mirriwuna nhäkuna malaŋuwu ŋunhi walalanha yurru be goŋmirriyama wal'ŋu, wirrkina ŋurr'yunmarama, yurru yakana walala yurru märr-ŋal'yun Godkunydja.  
\v 5 Yo, yolŋu'-yulŋunydja yurru bitjan ḻakaranharamirri be walala buku-ŋal'yunaramirri nhanŋu Godku, yanapi walala nhanŋuna be yolŋu'-yulŋu, yurru djämanydja walala ŋuli yätj warray, yanapi ŋayi Godthunydja yukirri bäyŋu ŋayathaŋu ganydjarr guŋga'yunarawu walalaŋgunydja, märr yurru walala nhina ŋamathama. Biyaka barrku-ḏakthurra yulŋunydja balanyarawalayinydja yolŋu'-yulŋuwala, yaka walalaŋgala nhiniya galki.  
\v 6 Liŋgu balanyarayinydja yolŋu'-yulŋu wiripunydja yurru yana ḻunduthirri ḻuḻatjku dhäykawu, ŋayaŋu-yalŋgi'wuna ŋurikina, märr ŋayi yurru gulŋiyirrina nhanukala wäŋalili, bala ŋayi yurru mayali'-wilkthundja, bitjan gaṯmaramana yurru ŋunhiyi dhäykanhanydja ŋunhi ŋayi ŋayaŋu-ŋonuŋ birrka'mirriyuna dhikana yätjthu malaŋuyu. Yo, ŋuriŋiyinydja miyalkthu märr-yapalana yana yurru märrama ŋanya dhäruktja, liŋgu wirrki ŋayi ḏukṯukthirri yukurra wiripuwu ga wiripuwu romgu malthunarawu.  
\v 7 Yo, balanyaranydja dhäyka ŋuli mäkiri'-witjunna yana birrka'mirriwuna ŋula yolku, yurru yakana ŋayi yurru yana marŋgithirri yuwalkŋuwunydja wal'ŋu romgu.   
\p
\v 8 Ŋäthilinydja baman'tja ŋuriŋi märrma'yu ḏarramuyu maṉḏathu Djanatjthu ga Djambiritjthu ŋayaŋu-ḏaḏawmaraŋala Mawtjitjnhanydja, ga bitjandhi liŋgu ŋuriŋi bothinyaramirriyunydja yolŋu'-yulŋuyu ŋayaŋu-ḏaḏawmaramana ŋuli yukurra ŋunhi yuwalkŋunydja wal'ŋu dhäwu', liŋgu muḻkurrnydja walalaŋgu guyaŋinyaranydja djarrpi'thinana, ga walalaŋgu märr-yuwalkthinyaranydja wakalnha yana, yakana yuwalk.  
\v 9 Yakana yurru walalaŋgu yolŋu walala malthun weyindja, liŋgu bukmakthunna yurru ŋunhi nhäma dharaŋandja ŋunhi walalanydja muḻkurr-dhumukmirrina, ḻawaḻawa'mirrina yolŋu walala.   
\p
\v 10 Yurru nhenydja marŋgi warray ŋuriki yuwalkŋuwunydja dhäwu'wu, ŋarra nhuna marŋgikuŋalanydja, ga liŋguna nhe nhäŋalana nhaltjan ŋarra yukurra nhina ŋamakurru' yana. Nhe marŋgi muka ŋarrakunydja, nhäku ŋarra yukurra ŋuli nhina bitjandhiyi, ga wiripunydja nhe marŋgi ŋunhi ŋarra yuwalkkuma yukurra märr-yuwalkthirri Godkala, märr-nherraṉmirri manapan. Nhenydja nhäŋala muka ŋarranha ŋunhi ŋarra marrtjina marŋgikuŋalanydja bala bulnha dhika wal'ŋu yolŋu'-yulŋunhanydja, ga djäma ŋarra marrtjina gurrum'thurruna, wurrkurrum' dhika, bala nhe dharaŋarana ŋarranha ŋunhi ŋarra wirrki yana märr-ŋamathirrinydja yukurra yolŋu'-yulŋuwu. Ga ŋunhi ŋarra ŋuli galŋa-yätjtthinyanydja burakinya, bala ŋarranydja ŋuli mukthunana-wala yana marrtjinya Godkalana romgurru bala.  
\v 11 Yo, marŋgi muka nhe yulŋunydja, nhaltjarra ŋarrakala maḻŋ'thurruna ŋunhalayi wäŋaŋura Yandiyuktja ga Goniyam ga Litjaranydja. Ŋuriŋi yolŋuyu walalay ŋarranha yukurrana bumara dhika ŋayaŋu-yätjkuŋalana, ŋarra bini burakinya murrkay'nha walalaŋguŋu, yurru yaka ŋarranydja ŋuriŋiyi märr-ḏaḏawyurruna. Liŋgu ŋayinydja Garrayyunydja ŋarranha walŋakuŋala warray, märraŋala warray ŋuliŋuruyi nhäŋurunydja malaŋuŋuru.   
\s1 Godkalanydja dhärukthu ŋilimurrunha yurru gäma marrtji gungama dhika yurru  
\p
\v 12 Ŋuli yurru ŋula yol yolŋu balaŋu ḏukṯukthirri nhinanharawu ŋamathanharawunydja, dhambay Djesu-Christkalanydja yana, ŋayinydja yurru ŋunhiyinydja yolŋu ŋayaŋu-yätjthirrina ŋurikiŋi dhuwurr-yätjmirriwuŋuna yolŋu'-yulŋuwuŋu.  
\v 13 Liŋgu ŋunhi dhuwurr-yätjmirrinydja yolŋu'-yulŋu ga bothinyaramirrina walala, walalanydja yukurra bitjanna liŋguna marrtji yätjthirrina, wirrkina dhika yurru yätjthirri-wala. Bitjanna liŋguna walala yurru yukurra mayali'-wilkthunna wiripu-guḻku'nhanydja, ga walalanhanydja yurru bitjandhi liŋgu mayali'-wilkthundhi wiripu-guḻku'yunydja.  
\v 14 Yurru nhepinydja yana mukthurrana-wala marrtjiya, ŋayathaŋana yana baṯ biyakana ŋunhiyi liŋgu ŋupanayŋu yuwalk dhäwu', ŋunhi nhe yukurrana marŋgithina ŋäthili. Ŋurikinydja nhe marŋgi yolŋu'-yulŋuwu ŋunhi nhuna walala marŋgi wekaŋala.  
\v 15 Yo, beŋuru liŋgu ŋunhi nhe yutjuwaḻa, muka yothu yana, nhe marrtjina marŋgithinanydja bala Godkalaŋuwu dhärukku wukirriwuywunydja, ŋuriki liŋgu dhärukku ŋunhi yurru ŋayi marŋgi wekama nhuna, märr nhe yurru walŋathirrina, liŋgu Godthunydja yurru walŋakuma nhuna, ŋunhi nhe yurru märr-yuwalkthirrinydja Djesu-Christnha.  
\v 16 Bukmak ŋunhi Godku dhäruktja wukirriwuynydja ŋunhi dhiyalami djorra'ŋura ŋorra marrtji maḻŋ'maranharanydja Godkuŋuna yana nhanukuŋuwaynha, bukmaknha yana; ŋayipi muka ŋunhi Godkala Walŋayu yana wekaŋalanydja dhuwalayi dhäruktja yolŋu'-yulŋuwalanydja, bala walala wukirrina marrtjina dhipalayi djorra'lilina. Dhiyakuyina märrwu dhiyaŋuyi dhärukthunydja yurru marrtji marŋgikumanydja ŋilimurrunha bala yuwalkkumana, ga bitjandhiyi ŋayi yurru raypirri'yundja ŋilimurrunha ŋulaŋuru yätjŋurunydja, ga bitjandhi liŋgu dhiyaŋu dhärukthu ŋilimurrunha yurru marrtji dhunupayamanydja, bala gäma roŋiyinmarama Godkalana. Yo, dhiyaŋuyi djorra'yunydja yukurra ḻakarama nhaltjan ŋilimurru yurru nhina yukurra ŋayaŋu-dhunupa wal'ŋu,  
\v 17 märr yurru ŋayi Godkunydja ŋunhi yolŋu nhina yukurra yurru ŋamakurru'na yanana, girri'-ŋamathirrina, märr yurru ŋayi djäma ŋamakurru'na yanana nhänydja malanha.   
\c 4  
\s1 Mukthurra yana-wala ḻakaraŋanydja Godkunydja dhäruknha  
\p
\v 1 Dimithi, dhuwalanydja ŋarra nhuŋu yukurra nherraṉdja romnha, yurru yuwalktja dhuwala dhäruk ŋulaŋuru Godkuŋu warray ga Djesu-Christkuŋu, ŋurikiŋi ŋunhi ŋayinydja mala-yarr'yunaramirri yolŋu'-yulŋuwu. Yuwalk yana ŋayi yurru roŋiyirrinydja lili galkina dhika, bala ŋayi yurru mala-yarr'yun bukmaknha yana yolŋu'-yulŋunha, ŋunhinhanydja walalanha ŋunhi walala yukurra nhina walŋamirri ŋulinyaramirriyu, ga ŋunhinha walalanha ŋunhi walala marrtjina murrmurryurruna raku'-rakunydhina ŋäthili, bala yana ŋayipinydja yurru nhinana yukurra ŋurruŋuna wal'ŋu bukmakku nhäku malaŋuwu.  
\v 2 Dhiyakuyina märrwu ŋarra nhuŋu yukurra ḻakaramanydja dhuwala bitjan gam': Ḻakaraŋanydja birrŋ'maraŋanydja Godku dhäruktja bukmakkala yana birrka'mirriwala. Ḻakaraŋa ŋuripanydja walalambala ŋunhi walala yurru ḏukṯukthirri ŋänharawu, ga ŋuripa walalambala ŋunhi walala yaka ḏukṯuk ŋänharawu; ḻakaraŋa bukmakpa yana bukmakkuŋa. Ŋunhi yukurra yurru yolŋu'-yulŋuyu djäma yätjkuma, ḻakaraŋa walalambala Godku dhäruk, raypirri'yurra walalanha biyaka, märr yurru walala gananna ŋunhiyi walalaŋguwaynydja gatjaḻ. Biyaka ḻakaraŋa yolŋu'-yulŋuwanydja nhaltjan walala yurru nhina ŋamathama wal'ŋu, yurru marŋgikuŋana marrtjiya walalanha bala yulŋunydja bulnhana, gurrum'thurrana yana bala.  
\v 3 Biyaka liŋgu marrtjiya bala marŋgikuŋa yana walalanha, liŋgu ŋunhi walunydja yurru bunana dhuwala, ŋunhi yurru yolŋu walala yaka mäkiri'-witjun ŋuriki yuwalkku dhärukku, yakana walala yurru ḏukṯukthirri nhinanharawu ŋamathanharawunydja bitjanarawuyinydja. Bala walala yurru yukurra maḻŋ'marama walalaŋguwaynha walala marŋgikunhamirrinha walalanha, ŋunhinhana walalanha ŋunhi walala yurru ḻakarama yukurra ŋunhina liŋguna dhäruk ŋunhi walala ḏukṯukthirri yukurra ŋänharawu, märr yurru walala mukthun yana malthun walalaŋguway walala djälwu.  
\v 4 Dhiyakuyinayi märrwu walala yurru ŋunhi yakanydja mäkiri'-witjun ŋuriki yuwalkkunydja, walala yurru yana dhaḻ'yunmirrina walalaŋguway walala mäkiri'na, bala ŋanydjaḻa'yunna. Bala walala yurru yukurra gurrum'thundja ga wirrkinydja be mäkiri'-witjun ŋurikina dhäwu'wu malaŋuwu, ŋunhi walala ŋuli be nhäna ḻakaramanydja dhäparknha ŋunhi mayali'miriwnha.  
\v 5 Yurru nhepinydja yurru biyaka liŋgu yana marrtjiya ga guyaŋiya dhunupa yana wal'ŋu, ga dhärriya ŋunhilimi liŋgu waŋganyŋura yana yuwalkŋuŋura wal'ŋu. Ŋuli nhuna yurru yolŋu'-yulŋuyu ŋayaŋu-yätjkumanydja buma, bala nhenydja märraŋa yana walalaŋguŋu, bala mukthurrana-wala yana marrtjiya Godkalana ganydjarryu. Biyaka liŋgu bala yana ḻakaraŋa marrtjiya bukmakkala yolŋu'-yulŋuwalanydja Godku ŋunhi ŋamakurru' wal'ŋu dhäwu', Djesunha yana. Gatjuy marrtjiyana-wala, djämana yana Godkunydja ŋamathaŋana, ga dhawar'maraŋanydja bukmak yana ŋunhiyi djäma ŋunhi ŋayi Godthu nhuŋu wekaŋala.   
\p
\v 6 Liŋgu ŋarrakunydja dhuwala walu galkina dhawar'yunna yurru; galkina ŋarra yurru dhuwala rakunydhirrina, bala gananna dhuwala munathany'tja wäŋanha.  
\v 7 Liŋguna ŋarra djämanydja wirrkina dhika wal'ŋu yana Godkunydja, ganydjarryuna yana, bitjarrana bitjan yolŋu ŋuli waṉḏirri bata'yunarawu ganydjarryu ga worr'yu, yana liŋgu ga buku ŋayi yurru mulka. Ga dhuwalanydja ŋarra liŋguna djuḻkmaraŋalana bukmaknhana ŋunhiyinydja ŋunhi walala yukurrana gulmaraŋala ŋarranha. Liŋguna ŋarra dhawar'maraŋalana bukmak nhänydja malanha ŋunhi ŋayi Godthu wekaŋala ŋarrakala djämawu. Ga djäkanydja ŋarra ŋamathaŋala wal'ŋu dhika ŋurikiyi dhäwu'wunydja, ŋunhi ŋayi wekaŋala ŋarrakala dharraylili, bala ŋarra ḻakaraŋalanydja yukurrana dhunupa yana wal'ŋu warraŋulkuŋala.  
\v 8 Ga ŋunhala dhä-yawar'yunaraŋuranydja Garrayyu yurru ŋarrakunydja wekama nhä malanha ŋamakurru' warray ŋunhi ŋayi yukurra ŋayathama ŋarraku, bala ŋarra yurru nhina yukurra ŋayaŋu-dhunupana yana, ŋunhala nhanukalanydja wäŋaŋura. Yo, ŋuriŋi dhä-yawar'yunaramirriyunydja waluyu ŋayi yurru Garrayyunydja mala-yarr'yun marrtji dhunupa yana, bala ŋayi yurru wekama ŋarrakunydja ŋamakurru'na dhika wal'ŋu. Yurru yaka yana ŋunhi ŋarrakuwaynydja, bukmakku yana yolŋu'-yulŋuwu ŋunhi walala ŋuli yuwalkkuma dhika wal'ŋu märr-ŋamathirri Djesuwu, bala märr-nhämana walala ŋuli yukurra, gatjpu'yunna yulŋunydja nhanŋu roŋiyinyarawuna.   
\s1 Dhawar'yunaramirrina dhuwalanydja dhäruk  
\p
\v 9 Buku-djulŋi Dimithi marrkapmirri, go marrtjiyana lili ŋarrakala waḏutjana,  
\v 10 liŋgu Dematjthunydja ŋarranha gonha'yurrunana liŋguna. Märr-ŋamathina ŋayi dhiyakuywu munatha'wuywu nhäku malaŋuwu, ŋurikiyi warray ŋayinydja yukurrana märr-nhäŋala, bala ŋayi gonha'yurrunana ŋarranha, bala marrtjina ŋunhana-wala Dhatjalunikalilina. Ga ŋayinydja Guritjindja marrtjina ŋunha Galatjiyalili, ga Dätitjtja marrtjina ŋunha Dalmatjalili.  
\v 11 Ga waŋganynha dhuwala Loknha yolŋunydja dhuwala ŋarrakalanydja. Märraŋa garr'yurranydja Mäknha, bala gäŋana ŋanya lili ŋarrakala, liŋgu ŋayina yurru ŋarranha guŋga'yundja.  
\v 12 Yo, djuy'yurrunanydja ŋarra Ditjikanha ŋunha Yipatjatjlilinydja.  
\v 13 Ŋunhi ŋarra gonha'yurruna Dhurawatjtja wäŋa ga ŋunhayina ŋarra gonha'yurruna ŋarrakuway guyŋarrwuynydja girri', ŋunhayina Gäpatjkalana yolŋuwala djäkalili. Märraŋana lili ŋunhiyi guyŋarrwuynydja ŋarraku, bala gäŋana lili, ga biyapul ŋarra ḏukṯuk nhe yurru gäma ŋunhi djorra' malanha, yurru yuwalktja ŋarra ḏukṯuk wal'ŋu ŋuriki djorra'wu ŋunhi wukirriwuy barrwaṉ'lili wäyinlili ŋurikiyi.   
\p
\v 14 Ŋunhinydja Yaliktjandayunydja yolŋuyu djäma yätjkuŋalana dhikana ŋarranha, ŋuriŋinydja ŋunhi ŋayi ŋuli yukurra djäma garwarrwarr nhä malanha. Garrayyunydja yurru dhä-ḏir'yunna yanana ŋanya, bala wekama nhanŋu buku-ruŋinyamarama ŋurikiyina ŋunhi nhaltjarra ŋayi djäma yätjkuŋala.  
\v 15 Dharray yulŋunydja nhuŋuway nhe, liŋgu ŋayi wirrki yana ŋilimurruŋgu dhäruktja ḏaḏawmaraŋala.   
\p
\v 16 Ŋunhi ŋäthilinydja ŋarra yukurrana dhärrana ŋurikala ŋaḻapaḻmirriwala walalaŋgala dhä-wirrka'yunarawunydja, bala ŋarra nhinananydja yukurrana gänana ŋarrapina, liŋgu bukmakthunydja ŋarranha gonha'yurrunana, yakana ŋula waŋgany dhuḏi'yurruna ga nhinana ŋarrakala. Ŋarranydja ḏukṯuk ŋayi yurru Godthu bäy-ḻakarama walalaŋgu ŋurikiyi.  
\v 17 Yurru yaka ŋarra gänanydja ŋarrapinydja ŋunhiyi, ŋayinydja Garraynydja ŋunhili ŋarrakala; ŋayi ŋarranha ganydjarr-wekaŋalanydja, märr ŋuriŋinydjayi nhanukala ganydjarryu ŋarra ḻakaraŋalana bukmaknha yana warrpam'thurrunana dhäwuny'tja, ŋurikinydja yolŋu'-yulŋuwu ŋunhi walala waŋgany-manapanmina ḻuŋ'thurruna ŋunhimalayi, birrka'mirri bäpurruny'tja. Yo, walalanydja yukurrana ŋunhi ŋaḻapaḻmirrinydja ŋayan'-dharrana ŋarraku bunharawuna, bitjarrana bitjan ŋuli wäyin maḏakarritj dhärra ḻirra-nyikthirri yolŋuwuna ḻäwunharawu. Yurru ŋayinydja Garrayyunydja ŋarranha walŋakuŋala warray, djaw'yurruna ŋuliŋuruyi mariŋuru bathalaŋurunydja.  
\v 18 Ga ŋayinydja yurru Garrayyunydja ŋarranha walŋakuma djaw'yun dhipuŋuru bukmakŋuru nhäŋuru malaŋuru yätjŋurunydja, bala ŋayi yurru ŋarranha gäma ŋunhana nhanukalay djiwarr'lilina wal'ŋu wäŋalili, ŋunha ŋayi yukurra nhina ŋurruŋuna wal'ŋu yana-wala. Go ŋilimurru wokthunna-wala nhanŋu ḻatju'wunydja dhikanydja wal'ŋu romgu, gupaḏalkumana yana yurru. Yo yuwalk.   
\p
\v 19 Biyaka wekaŋa ŋarraku märr-ŋamathinyaranydja Burutjawunydja ga Guwilawunydja, ga biyakayi wekaŋa märr-ŋamathinyara Nitjipurawunydja ga nhanukalaŋuwu gurruṯu'mirriwu walalaŋgu.  
\v 20 Ŋayi Rathatjtja ŋunhayi bäyma Gorin wäŋaŋura, yaka ŋayi malthurruna ŋarrakunydja dhipala, ga Dopamatjnhanydja ŋarra gonha'yurruna ŋunhayi Militalili, liŋgu ŋayi rirrikthurruna yukurrana.  
\v 21 Go buku-djulŋu marrtjiya lili waḏutja, yurruna yurru wäŋa dhuwala ŋulwitjmirriyirrinydja.  
\p Ŋayinydja Yupuluyunydja djuy'yurrunayi märr-ŋamathinyara nhumalaŋgu, ga biyapul wiripu-guḻku'yu Butundhu, ga Läniyayu, ga Guludiyayu. Ga wiripu-guḻku'yu Garraywalaŋumirriyu yolŋuyu walalay bukmakthu yana yänguŋalanydja märr-ŋamathinyaranydja nhumalaŋgu.   
\p
\v 22 Ŋarranydja yukurra bukumirriyama nhuŋu yulŋunydja Dimithi, märr yurru nhe wuṉḏaŋarryirri ŋunha ŋayaŋuyu wal'ŋu, ŋuriŋi Garraywala ganydjarryu. Godthu yurru gämanydja yukurra nhuna nhanukalay ŋayi märr-ŋamathinyarayunydja. Ga liŋguna.