\id 1TI  
\h 1 DIMITHIWU 
\toc2 DIMITHIWU NAMBA 1 DHÄRUK 
\toc1 1 DIMITHIWU DHÄRUK 
\mt2 1 DIMITHIWU DHÄRUK  
\toc3 1TI  
\c 1  
\p
\v 1 Marrkapmirri Dimithi, dhuwalanydja ŋarra yukurra Bolyu wukirri dhäruk nhuŋu, ŋunhi ŋarranydja bo'puyŋu Djesu-Christku, yurru Godthu ŋayipi ŋarranha nherraranydja dhiyakuyi djämawunydja, ŋuriŋiyi ŋunhi ŋayi ŋilimurruŋgu Walŋakunharamirri, ga Djesu-Christthu, ŋunhi ŋilimurru yukurra nhanŋu gatjpu'yun dhukarr-nhäma, liŋgu galki ŋayi yurru bunana, bala märramana ŋilimurrunha nhanukiyingalana wäŋalili.  
\v 2 Ŋarra yukurra wukirrinydja dhuwala nhuŋu Dimithi ŋunhi nhenydja marrkapmirrina gäthu'mirriŋu ŋarraku, liŋgu nhenydja ŋunhi märr-nherraṉmina Garraywala balakurru ŋarrakala djämakurru.  
\p Ŋarra yukurra bukumirriyama nhuŋu yulŋunydja, märr yurru Godthu Bäpayu ga Garrayyu Djesu-Christthu gäma yukurra nhuna galkikuma yana nhanukalay ŋayi märr-ŋamathinyarayu ga mel-wuyunarayuna, märr yurru nhenydja nhina yukurra ŋayaŋu-yal'yunara waŋgany-manapanmirri Djesu-Christkala.   
\s1 Dharraykuma yukurra ŋunhinha ḻakarama bothinyaramirrinha ḻakaranhamirrinha  
\p
\v 3 Dimithi, liŋgu muka ŋarra nhuŋu ḻakaraŋalanydja ŋäthili, yurruna ŋarra ŋunhi gonha'yurrunanydja, bala marrtjinana Matjataniyalili ŋarra ḻakaraŋalanydja nhuŋu, nhe yurru nhina yukurra ŋunhili liŋgu Yipatjatj yana wäŋaŋura. Ŋarra djälnydja nhuŋu nhe yurru nhina yana ŋunhiliyi, ga ḻakaraŋa ŋuripa yolŋu'-yulŋuwa biyaka raypirri'yurra marrtjiya walalanha, ŋunhi walala yukurra marŋgikuma ḻakarama wiripuna ga wiripuna dhäwu' mayali'miriwnha.  
\v 4 Ḻakaraŋa ŋuripa yolŋu'-yulŋuwanydja, märr yurru walala yaka ḻayḻayyun ga warrkuḻuma yukurra walu ŋula nhäŋuranydja dhäwu'ŋura dhäparkŋuranydja, liŋgu bitjanna liŋgu walala yukurra waŋanharamirrinydja be ŋäthiliŋuwuynha walalaŋguway märi'munhana, ga djamarrkuḻi'nha walalaŋgu, bitjanna walala yukurra beŋuruna liŋguna ḻakarama yäkuna marrtji, yana liŋgu-u-u ga yumurrku'wala walalaŋgalaŋuwala wapthun. Ŋuriŋiyinydjayi dhäwu'yu yurru yakana ŋula yolŋunha guŋga'yun, yana baḏuwaḏuyunna yukurra yurru ḻiyana yolŋu'-yulŋuwu. Yakana yurru ŋula yol marŋgiyirri Godkalaŋunydja romgu, bala märr-yuwalkthirrinydja Godkala ŋuriŋiyinydjayi dhäwu'yu.  
\v 5 Ḻakaraŋa ga waŋiya ŋunhi yolŋu'-yulŋunha, walala yurru ḏadawyunna ŋuliŋuruyi nhäŋiniŋ'ŋurunydja romŋuru ḻakaranharaŋuru, märr yurru Gunhu'yunydja walalanha ŋayaŋunydja ḏarrtjalkkumana dhikana, ga yakana biyapulnydja yurru walalaŋgalaynydja walala ŋunha ŋayaŋuyunydja, yätj ḻakarama walalanha, liŋgu yuwalkkumana wal'ŋu walala yurru ŋayaŋu-yuwalkthirri yukurra Garraywunydja, bala walala yurru märr-ŋamathinyaramirrina yukurra walalaŋguway walala bala-lili'yunmirrina.   
\p
\v 6 Yurru wiripu-guḻkuny'tja ŋapa-wilyurruna warray, yarryurruna dhiyaku dhunupawunydja romgu, bala bitjanna liŋguna walala ŋuli yukurra waŋanharamirrina dhika nhaltjanmirrina mayali'miriwŋurana yana dhäwu'ŋura nhäŋura malaŋuŋura.  
\v 7 Walalanydja ḏukṯuk marŋgikunharawu muka be, walala yurru yukurra marŋgikuma Godku ŋunhi rom yolŋu'-yulŋuwu, yurru walalawuynydja ŋunhi yaka warray marŋgi Godkalaŋunydja nhäku malaŋuwu. Waŋa warray walala ŋuli dhäruk wuṉḏaŋarrnydja, yurru yaka walala yukurra dharaŋan ŋunha djinawa'wuynydja wal'ŋu, nhä mayali' yukurra Godthu ḻakarama.   
\p
\v 8 Yo, Godthu wekaŋala nhanŋuway ŋayi romdja nhanukala Mawtjitjkala, ga romdja ŋunhiyi ŋamakurru' yana, ŋunhi ŋayi yurru ŋula yolthu ŋayathama yukurra ŋunhiyi dhunupanydja wal'ŋu.  
\v 9 Liŋgu yaka ŋayi Godthu nherrara rom ŋunhiyi ŋula yolku yolŋuwu ŋunhi ŋayi rom-dhunupanydja; Godthu nherrara ŋunhiyinydjayi rom dhunupakunharawu ŋuriki yolŋuwu ŋunhi ŋayi dhuwurr-djarrpi' nhina yukurra. Liŋgu wiripunydja yolŋu ga raypirri'-waḏatjmirrina yana, rom-bakmaranhamirrina ŋayi, yakana ŋayi yukurra dhäruk-märrama ŋula yolnha yolŋunha, yana ŋayi djäma yukurra nhanukalaynha ŋayi djälkurru. Djämanydja ŋayi yukurra dhuwurr-mäypana rom, liŋgu ŋayi märr-ŋamathirri yukurra dhiyakuywu yana munatha'wuywu nhäku malaŋuwu. Yakana ŋayi guyaŋirrinydja ŋuli Gunhu'nha Godnha, yana ŋayi ritjan'-ḏumurruna yolŋu, ga bumana ŋayi ŋuli yolŋunha murrkay'kumana, ga wiripunydja ŋayi ŋuli nhaŋuway yana galkiwuy ŋäṉḏi'mirriŋunha ga bäpa'mirriŋunha buma murrkay'kuma.  
\v 10 Wiripu-guḻku'yunydja yolŋu'-yulŋuyu ŋuli djäma marramba'na, djarrapi'kunharamirrina märranhamirri, bitjan ḏarramu maṉḏa yana ŋuli märranhamirri, wo dhäyka maṉḏa wiripunydja. Birrka'mirrina nhä malanha djarrpi'na dhikana walala ŋuli djäma bitjandhina. Wiripunydja walala ŋuli manaŋirri ŋula nhä, ga wiripunydja walala ŋuli yolŋunha djaw'yun walalaŋgalaynha walala djälyu. Wiripunydja walala ŋuli bothirri ḻakarama, ga djarrpi'kumana ḻakarama dhäwu'na, mayali'-wilkthun yana wiripuŋunha yolŋunha. Bitjanna liŋgu walala ŋuli djäma djarrpi'kumana yanana walalaŋgalaynha guyaŋinyarayu djarrpi'yuna.  
\v 11 Yurru Godthunydja wekaŋala romnha ŋunhi balanyarawuyi yolŋuwu, raypirri'yunna yukurra bitjanna yätjŋuruna walalanha, liŋgu walala yaka ḏukṯuk ŋuriki ŋamakurru'wu wal'ŋu dhäwu'wu ŋunhi yukurra ḻakarama Godku märr-ŋamathinyaranydja dhika wal'ŋu, ga nhä malanha ḻatju'mirri dhika nhanŋuway, ŋurikiyi ŋunhi ŋayi wekaŋala ŋarrakala dharraylili.   
\s1 Bolyu buku-wurrpanna yukurra ŋunhi ŋayi nhaltjarra God nhanŋu mel-wuyurruna  
\p
\v 12-13 Yo, ŋarranydja yukurra dhuwala wirrkina buku-wekama Djesu-Christnha ŋilimurruŋguway Garraynha, liŋgu ŋayipi ŋarranha djuy'yurruna dhiyakuyi ŋamakurru'wunydja wal'ŋu dhäwu'wu ḻakaranharawu, ga bitjarrayi liŋgu ŋayi wekaŋala ŋarrakala ganydjarrnydja dhiyakuyi djämawunydja. Ŋarra yukurra buku-wurrpan ŋanya, ŋunhi ŋarranhanydja ŋayi märr-yuwalkthina, bala yana ŋayi djarr'yurrunana ŋarranha, bäyyi ŋarra ŋäthilinydja ŋunhinydja ŋuli nyinyaŋdhuna yukurranha nhänha ŋanya Djesunha. Ŋarra ŋuli bunha ŋayaŋu-yätjkunhana dhikana nhanŋuway yolŋu'-yulŋunha, ga waŋanha ŋanya yätjkunhana, yurru ŋayinydja ŋarraku mel-wuyurruna warray dhika, liŋgu ŋarra yukurrana djäma bitjarrayinydja dhuŋathinana yanana; yaka ŋarra marŋgi yana Djesu-Christku ŋulinyaramirriyunydjayi, ga yakana ŋarra märr-yuwalkthinanydja nhanukala Garraywala.  
\v 14 Yurru ŋayinydja ŋilimurruŋgu Garraynydja dhuwala buluna gal'ŋu mel-wuyunaramirrina, bala yana ŋayi ŋarranha marrtjina guryunmaraŋalana dhika nhanukalay ŋayi märryu-ḏapmaranharamirriyuna. Bala ŋayi ŋarranha yuṯakuŋalana, bala dhaŋaŋguŋalanydja ŋarraku ŋayaŋunydja nhanukiyingalana ŋayi walŋayu, märr yurru ŋarra yuwalkkuma wal'ŋu märr-yuwalkthirrinydja nhanukala, märr-ŋamathirri manapan wiripuŋuwuna yolŋuwu, liŋgu nhinanydja ŋarra yukurra dhuwala dhambay-manapanna Djesu-Christkalana yana.   
\p
\v 15 Yo, dhuwalanydja dhäwu' yuwalknha; ŋalinydja yurru märramana yana warrpam'thunna dhuwalanydja dhäruk gam', “Djesu-Christtja marrtjina lili dhipala munatha'lilinydja walŋakunharawu dhuwurr-yätjmirriwu yolŋu'-yulŋuwu.” Ga ŋarranydja dhuwala dhuwurr-yätjthi yana yolŋu; wirrki wal'ŋu yana ŋarra dhuwurr-yätjtja ŋurikalanydja walalaŋgala wiripu-guḻku'walanydja.  
\v 16 Yurru ŋayinydja Djesu-Christtja ŋarraku mel-wuyurruna warray, bala walŋakuŋalana ŋarranha ŋayi, märr yurru ŋarrakalaynydja, yolŋuyu walalay nhämana Garraynha yurru, ŋunhi ŋayinydja mel-wuyunaramirri warray ga buku-warrwarrmiriw warray. Liŋgu wirrki ŋarra ŋuli yukurranha ŋaramurryinyanydja Christku, yurru yakana ŋayi waḏutjanydja yana ŋarranha dhä-ḏir'yurruna ŋurikiyi, bulnha yana ŋayi dhika galkurruna ŋarraku märr-yuwalkthinyarawunydja, märr yurru ŋunha wiripu-guḻkuny'tja marŋgiyirrina Godku, ŋunhi ŋayinydja mirithirri wal'ŋu yana mel-wuyunaramirrinydja ŋurikinydja yolŋu'-yulŋuwu ŋunhi walala yurru märr-nherraṉmirri gal'ŋu Djesu-Christkala, bala märramanydja yurru yuwalkkumana wal'ŋu walŋanydja, märr yurru walalanydja nhinana-wala yana, Godkalana galkina.   
\p
\v 17 Gul' ŋilimurru buku-ŋal'yunna Godkala ŋunhi ŋayi yukurra nhina ŋunha walŋa-ḏikṯik yana-wala, bäyŋuna ŋayi yurru rakunydhirri. Yo, yaka warray ŋali yukurra nhämanydja ŋanya dhiyaŋunydja gay' ŋitjalaŋgala maŋutjiyunydja, liŋgu ŋayi yaka dhiyakuy munatha'wuy, liŋgu nhinanydja ŋayi yukurra ŋunha djiwarr'ŋurana buŋgawana gal'ŋu bukmakkuna nhäku malaŋuwu. Gul' ŋilimurru wokthunna nhanŋu, liŋgu nhanŋunydja ḻatju' dhika wal'ŋu nhä malanha yurru dhärra yukurra bitjanna liŋgu, gupaḏalnha-wala. Ŋe, yuwalk muka.   
\p
\v 18 Dimithi, ŋarraku gäthu, ŋarranydja dhuwala nhuŋu yukurra dhäruknha wekama, yurru ḻakaramanydja ŋarra yukurra ŋunhiyi liŋgu ŋupanayŋu dhäruktja ŋunhi ŋayi nhaltjarra Godthu wekaŋala nhuŋu ŋäthili, ŋuliwitjarra dhäwu'-gänharamirriwala yolŋuwala dhärukkurru. Dhiyaŋuyinydjayi dhärukthu yurru nhuma gäma marrtji ḻatju'kumana, bala ganydjarrmirriyamana, märr yurru nhe yukurra dhärra wuṉḏaŋarrnha yana, ga marrtjina yana mukthunna-wala, bumana marrtji ŋunhi yätjnhanydja wal'ŋu dhiyaŋuyi dhärukkthuna Godkala.  
\v 19 Dhiyaŋuyinydjayi dhärukthu nhe yurru wuṉḏaŋarrkumana yana märr-yuwalkthirrinydja Godku, bala djämana yana ŋamakurru', märr yurru nhokala ŋayaŋuyunydja yakana nhuna yätj-lakarama. Wiripu-guḻku'yunydja yolŋuyu walalay ŋäkula walalaŋguway ŋayaŋu waŋanhara, ŋunhi ŋayi walalanha raypirri'yurruna yätjŋuru, yurru yakana walala mäkiri'-witjurrunanydja; mukthurruna yana walala djäma yukurrana walalaŋgalaynha djälkurru, bala walalaŋgu ŋunhi märr-yuwalkthinyaranydja liŋguna winya'yurrunana, bitjarrana bitjan ŋuli mitjiya marrtji guḻwuḻyun dhä-ŋal'yunara guṉḏawuy.  
\v 20 Yo, dhuwalayinydja yolŋu maṉḏa Yaminiyanydja ga Yaliktjandanydja balanyarayi maṉḏa, maṉḏanydja ḏaḏawyurruna märr-yuwalkthinyaraŋuru, bala dhä-ŋal'yurrunana yätjlilina. Bala ŋarranydja bitjarrana maṉḏanha yana wekaŋalana goŋlili ŋurikalana yätjkalana mokuywalana Satangalana, märr yurru maṉḏa ŋetjnha marŋgiyirrina, ga yakana biyapulnydja ŋula wakalkuma Godnhanydja yäku, yätjkumanydja waŋa.   
\c 2  
\s1 Ḻakarama yukurra nhaltjan yurru Godkunydja miṯtji buku-ŋal'yun dhika  
\p
\v 1 Dimithi, dhuwala ŋurruŋunydja dhäruk ŋarra yurru ḻakarama mirithirri dharrpal. Ḻakaraŋa ŋuripa yolŋu'-yulŋuwanydja, walala yurru bukumirriyama yukurra ŋäŋ'thun ŋanya Godnha ŋula nhäku; walala yurru wirrki yana wal'ŋu bukumirriyamanydja yukurra bukmakku yolŋu'-yulŋuwu, märr-ŋamathinyarayu yana, märr yurru ŋayi Godthunydja wiripu-guḻku'nhanydja walŋakuma. Ga bitjandhi nhuma yurru yukurra buku-wurrpandhi Godnha.  
\v 2 Nhuma yurru bukumirriyamanydja yukurra buŋgawawu walalaŋgu yolŋu'-yulŋuwu, ga birrka'mirriwu ŋuriki ŋunhi walala ŋurru'-ŋurruŋu wal'ŋu, märr yurru ŋilimurru nhina yukurra walaŋguma dhika wal'ŋu yana, ŋula nhämiriw marimiriw wäŋa yurru yukurra djingaryun, märr yurru ŋilimurru märryu-ŋupan yukurra Godnhanydja ga nhina märr-dhunupa wal'ŋu yana.   
\p
\v 3 Yo, manymaknha ŋunhinydja ŋunhi ŋuli yolŋu'-yulŋu yukurra nhina waŋgany-manapanmirri yänanydja, marimiriwyamanydja, ga bitjandhiyi ŋayi Godtja ŋayaŋu-djulŋithirriyi ŋuli ŋuriŋiyi, liŋgu ŋayina ŋilimurruŋgunydja Walŋakunharamirri.  
\v 4 Wirrki ŋayi yana ḏukṯuk bukmakkunydja yolŋu'-yulŋuwu walŋakunharawu, märr yurru walala nhina mukthun yana-wala marŋgiyirri marrtji, bala maḻŋ'maramana marŋgithirrina yuwalkŋuwunydja ŋurikiyi.  
\v 5 Liŋgu waŋgany yana ŋunhiyi yuwalktja God, ga bitjandhi waŋgany yana yolŋunydja ŋunhi ŋayi yurru yukurra yolŋu'-yulŋunha gäma galkikumanydja Godkala, Djesu-Christthu ŋayipi yana, ŋunhiyi ŋunhi ŋayi nhinana yukurrana dhiyala yolŋu yana ŋayi rumbal wal'ŋu.  
\v 6 Bala ŋayi wekanhamina nhanŋuway walŋana, ga burakinanydja ŋayi ŋilimurruŋgalana dharapulŋura bukmakkala, ga ŋuriŋi nhanukalaynydja gulaŋ-waṉḏinyarayu ŋayi ŋilimurrunhanydja märraŋalana ŋuliŋuruyinydja goŋŋura ŋurikala yätjkalanydja wal'ŋu. Ŋuliwitjandhinydja Godthu milkuŋalana ŋilimurruŋgala ŋunhi ŋayinydja yuwalk yana ḏukṯukthina ŋayi yurru walŋakumanydja bukmaknha yana yolŋunha walalanha.  
\v 7 Ga dhiyakuyinayi Godthu djarr'yurruna ŋarranhanydja, bala djuy'yurrunanydja ŋayi ŋarranha, märr yurru ŋarra ḻakaramana ŋuruku wiripu-guḻku'wunydja ŋunhi yolŋu'-yulŋuwu bukmakku yana. Yuwalk yana ŋarra yukurra dhuwala ḻakaramanydja, yaka bothirri. Ŋayi djuy'yurruna ŋarranha ŋunha mulku'-mulkuruwalanydja, märr yurru walala märr-yuwalkthirri, bala märramana Godkunydja ŋunhi yuwalktja wal'ŋu gatjaḻ'.   
\p
\v 8 Yo, dhiyakuyinayi ŋarranydja djäl nhuma yurru ḏarramuwurrunydja yukurra bukumirriyama ŋäŋ'thundja Godnha birrka'mirriŋura wäŋaŋura. Yaka yana yukirriya ŋarrtjunmiya ga maŋutji-ḏi'yunmiya bala-lili'yunmiya, yana nhuma dhärriya yukirriya Godkalanydja ḏarrtjalk yana ŋula nhämiriw wal'ŋu ŋayaŋunydja, ga ŋarambiyany'tja nhuma yurru garrwarthiya Godkala, buku-ŋal'yurra biyakana Godku.  
\v 9 Ga nhumanydja dhäykawurrunydja yurru dhaṯthunmiya ŋamathaŋa wal'ŋu yana. Yaka dhaṯthunmiya girri'yu ŋuriŋinydja rumbal-milkunharamirriyunydja, be nhäyunydja rrupiya-guḻku'mirriyunydja ga ŋutjaŋ-bakmaranhamirriyunydja girri'yu, ga yaka yana marwattja nhuŋuway buta'kuŋa ŋula nhäyunydja girri'yu.  
\v 10 Ga ŋunhi yurru nhuma dhäykawurruyunydja djäma ŋamakurru' yana, ga guŋga'yun yurru yukurra wiripuŋunhanydja yolŋunha, ŋuriŋiyinydjayi nhumanydja yurru yuwalkkumana buta'yirri.  
\v 11-12 Mäkiri'-witjurra biyaka Godkalaŋunydja dhärukku ga marŋgithiya. Yaka guyaŋinyamiya nhunapinyay nhe be djambatj-ḻakaranhamiyanydja, yanapi nhe marŋgi bukmakkuna. Yaka ŋarra ḏukṯuk nhuma yurru dhäykawurrunydja ŋunha ŋurrulili wapmaranhamiya ḏarramuwurruŋgalanydja. Dhäykayunydja yurru yaka marŋgikuma ḏarramuwurrunhanydja; nhina ŋayi yurru yukurra mukthun yana marŋgiyirri.  
\v 13 Liŋgu Godthunydja ŋunhi ŋamaŋamayurruna Yadamnha ŋäthilinydja, ga ŋuliŋuruyi ḏarramuwalanydja ŋayi djäma miyalknhana Yepnhana.  
\v 14 Yaka ŋayi Yadamnhanydja ŋunhi mayali'-wilkthurruna ŋuriŋiyi bäpiyunydja, yurru ŋunhiyi miyalk mayali'-wilkthunaranydja ŋurikiŋi bäpiwuŋunydja, bala ŋayi gärrinana yätjlilina romlili.  
\v 15 Yurru Godthunydja ŋanya yurru miyalknha walŋakuma warray, ŋuliwitjanna ŋunhi ŋayi yurru miyalkthu yothu'nha gurrukama. Ga ŋunhi yurru miyalkthu mukthundja-wala märr-nherraṉmirri Garraywalanydja, ga märr-ŋamathirri wiripuŋuwu yolŋuwu, ga yarrkthun yurru ŋulaŋuru yätjŋuru, bala ŋayi yurru ŋunhi dhäykanydja nhina yukurra walŋana Godkalana yana nyeyaḻŋura.   
\c 3  
\s1 Ḻakarama yukurra ŋurruŋunha yolŋunha Godkalaŋuwu miṯtjiwu, nhäyinyara ŋayi ŋunhi yolŋu  
\p
\v 1 Yo, dhuwalanydja yuwalknha wal'ŋu dhäruk ŋunhi ŋuli yolŋu'-yulŋuyu yukurranha ḻakaranha, balanyara gam', “Ŋunhi ŋuli yolŋu ḏukṯukthirri ŋayi yurru ŋurruŋulili wapthun Godkalaŋumirriwu miṯtjiwu, ŋunhiyinydja manymak warray, yaka yätj; manymaknha yolŋuwu ŋunhiyinydja ŋayi yurru djäka yukurra yolŋu'-yulŋuwu bitjan ŋuthanmarama Godkalaŋuwu romgu.”  
\v 2 Yurru ŋunhiyinydja yolŋu ŋunhi ŋayi ŋurruŋu Godkalaŋumirriwu yolŋu'-yulŋuwu, ŋayinydja yurru balanyara yolŋunydja gam': Ŋayi yurru nhina yukurra ŋamathama dhika wal'ŋu, märr yurru yakana ŋula yolthu maḻŋ'marama nhanukala yätjtja ŋula nhä. Ŋayi yurru nhina yukurra waŋganygalaŋumirri yana miyalkkalaŋumirrinydja, nhanŋuway miyalk ŋunhi, ga yaka yurru ŋayi malthun yukurra ŋuriki nhanukiyingalaŋunydja ŋayi djälwu; ŋayi yurru yana gulmaranhamirri ŋanyapinyay ŋayi yätjŋurunydja malaŋuŋuru. Guyaŋirri ŋayi yurru dhunupakuma yana, ga yaka yurru ŋayi djäma ŋula nhä wakalliliyamanydja. Ŋayi yurru gumurr-ŋamathirri märramanydja yolŋunha mulkurunhanydja ŋunhi nhanukiyingalay ŋayi wäŋalili, bäyyi ŋunhi yakanydja nhanŋu gurruṯu'mirri galkiwuy. Ga bitjandhi bili ŋayi yurru warraŋulkuma yana maḻŋ'marama ḻakaramanydja Godku dhäruktja, marŋgikumanydja marrtji yolŋu'-yulŋunha.  
\v 3 Ŋunhiyi ŋurruŋunydja yolŋu yurru yakana leŋunydja yukurra ŋänitji'yunydja, ga yakana ŋayi yurru ŋula mari djäma buma yukurra, ga ŋarrtjun wiripuŋunha yolŋunha maḏakarritjthunydja dhärukthu yakana; yana ŋayi yurru mundhurrthirri dhika wal'ŋu gäma marrtji yolŋu'-yulŋunha wurrkurrum' yana bala, yakana ŋayi yurru waḏutja maḏakarritjthirri. Yakana ŋayi yurru djäl-ḏumurru rrupiyawu ga girri'wu ŋula nhäku.  
\v 4 Bitjan liŋgu ŋayi yurru yukurra djäka nhanukiyingalaŋuwu ŋayi galkiwuywu gurruṯu'mirriwu, märr nhanŋuway yurru wäŋa djingaryun ḻatju' dhika wurrkurrum' marimiriw nhämiriw, liŋgu ŋuriŋi yumurrku'yunydja nhanukala yukurra dhäruk märrama ŋanyana, märr-ŋal'yunna nhanukala.  
\v 5 Ŋuli nhanŋu yurru ŋurikiyi wäŋa yukurra djingaryun marimirrinydja dhirrkthirrktja, liŋgu ŋunhiyi ḏarramu yaka ŋayi marŋgi nhaltjan ŋayi yurru marŋgikuma yukurra nhanukalaŋu ŋayi galkiwuywu, märr yurru walala nhina waŋganyŋura yana marimiriw nhämiriw, yakana ŋayi yurru ŋunhiyi yolŋu djäka yukurra Godkalaŋumirriwunydja yolŋu'-yulŋuwu ŋamathama, märr yurru walalanydja yukurra nhina ŋamathama wal'ŋu dhika waŋganyŋura.   
\p
\v 6 Ŋunhi ŋayi yurru yolŋu marrtji Garraywalanydja gali'lili wapthun, yakana ŋayi yurru waḏutjanydja yana ŋurruŋuyirri, ŋäthilinydja ŋayi yurru ŋuthan marrtji Godkala romŋura, ŋayipi ŋathili yurru, märr yurru ŋayi yaka ŋayipiyirri bathala ḻakaranhamirri. Ŋuli ŋayi yurru garrwarkunharamirrinydja ŋanyapinyay ŋayi, ŋayinydja yurru Godthunydja ŋanya murr'maramana yana, bitjarra ŋayi ŋäthili murr'maraŋala ŋunhiyi Mokuynha wal'ŋu.   
\p
\v 7 Yo, Godkunydja yurru yolŋu ŋurruŋu nhina manymakkumana dhika wal'ŋu, ḏarrtjalk yana ŋula nhämiriw, märr yurru yakana ŋula yolthu maḻŋ'marama nhanukala yätjtja ŋula nhä, märr yurru yakana ŋanya ŋuriŋi yätjthunydja mokuyyunydja gaṯmarama ŋula nhäyu romdhu, bala galkinyamaramana.   
\s1 Ḻakarama yukurra guŋga'yunaramirrinha yolŋunha, nhäyinyara ŋayi ŋunhi yolŋu yurru  
\p
\v 8 Ga bitjandhi liŋgu yolŋu, ŋunhi ŋayi ŋuli wapthun Garraywala djämalili, ŋunhi dharraymirri ŋayi Godkalaŋuwu miṯtjiwu, ŋunhiyinydja yolŋu yurru nhina yukurra ŋamathamana wal'ŋu yanana. Yakana ŋayi yurru djäma ŋula nhä wakalkuma yana be djambatjthu dhärukthu waŋa; yuwalkkuma yana ŋayi yurru guŋga'yundja yolŋu'-yulŋunhanydja, ga yakana ŋayi yurru waŋanharamirri ga wiḏiyal gäma yolŋunha, gupa-waŋa ŋula nhaltjan. Yakana ŋayi djäl-ḏumurru ŋänitjiwu ŋula nhäkunydja ḻukanharawu, ga yakana ŋayi wanaŋa-ḏumurru rrupiyawu wo girri'wu ŋula nhäku.  
\v 9 Ŋayi yurru Godkala ŋuriŋiyi djämamirriyu yolŋuyu ŋayathama baṯ bitjan Godku yuwalktja wal'ŋu dhäwu' ŋunhi ŋilimurru yukurra märr-yuwalkthirri, ŋunhiyi bili dhäwu' ŋunhi ŋayi Godthu warraŋulkuŋala ŋilimurruŋgala maḻŋ'maraŋala. Yuwalknha wal'ŋu ŋayi yurru marrtjina-wala yana yulŋunydja nhanukalaynha dhukarrkurrunydja.   
\p
\v 10 Yakana yurru birrka'mirrinydja wapthun, ŋäthilinydja ŋanya yurru nhäma yukurra gatjarr'yun, ga bäy yurru ŋayi ga rom-dhunupayirri nhumalaŋgala maŋutjiŋura, yurruna ŋanya nhuma yurru nherraṉdja ŋunhimala djämalilinydja.  
\v 11 Ga dhäykanydja nhanŋu ŋurikiyi yurru nhina yukurra ŋamathama dhika wal'ŋu, ga guyaŋirri ŋayi yurru ḻatju'kuma, yaka djarrpi'kumanydja, ga yaka yurru ŋayi djäma ŋula nhä wakalliliyamanydja. Yaka ŋayi yurru wiḏiyal gäma yukurra yätjtja dhäwu', ŋula yolnha gupa-waŋanydja, ga yaka ŋayi yurru yukurra malthun nhanukalayŋuwu djälwu yana. Ŋayi yurru ŋunhiyi miyalktja märr-yuwalkthinyaramirri yolŋunydja, märr yurru wiripu-gulku'yu yolŋuyu dharaŋan muka ŋanya, ŋunhi ŋayi yurru yukurra djäma ŋamathamanydja wal'ŋu nhä malanha.  
\v 12 Ga ŋunhinydja ŋayi yurru yukurra nhinanydja ŋunhiyi ḏarramu waŋganygalaŋumirri miyalkkalaŋumirrinydja, ŋurikalaŋumirri liŋgu, nhanŋuway miyalk ŋunhi. Ga bitjandhi liŋgu ŋayi yurru nhanŋuway yumurrku'nhanydja marŋgikuma marrtji ḻatju'kuma yana, bala ḏaḏawmarama yätjŋuru, märr yurru nhanŋu wäŋanydja ḻatju' dhika yana wapurarr, ga yumurrku' nhanŋu yurru nhina yukurra märr-ŋamathinyaramirri dhika wal'ŋu waŋganyŋura.   
\p
\v 13 Yo, ŋunhi ŋayi yurru yolŋuyu djäma ḻatju'kumanydja dhikanydja Godku, yolŋuyunydja ŋanya yurru wiripuŋuyunydja ḻatju'-ḻakaramana nhäma, märr yurru ŋayi yukurra ḻakarama dharuktja Godku ŋula nhämiriwnha goramiriwnha, rum'rumdhunamiriwnha yana, liŋgu wirrkina ŋayi yurru ŋunhiyi yolŋu märr-yuwalkthirri yukurra Djesu-Christkala.   
\s1 Godkunydja rom biyapul wal'ŋu garrwar ga dharrpal  
\p
\v 14-15 Dimithi ŋarranydja yukurra dhuwala gatjpu'yunna yulŋunydja, galki ŋarra boŋgama marrtji dhipali, withiyurruna nhuna, yurru mak ŋarranha yurru gulmarama ŋula nhäyu gandarrŋuranydja. Yurru ŋarra wukirrina yukurra dhuwala yulŋunydja dhäruktja nhuŋu djorra'lilina, märr yurru nhe marŋgiyirri, nhaltjan yurru Godku ŋunhi yolŋu walala miṯtji nhina yukurra ŋamathama. Liŋgu Godkunydja miṯtji yolŋunydja walala dhuwala balanyara bitjan rumbalnydja nhanŋuna Godkuna, ŋunhi ŋayinydja dhuwala walŋa-ḏikṯik yana. Yo, ŋilimurrunydja dhuwala Godkunydja yolŋu walala ŋuli garrwarkuma ŋal'marama Godkunydja yuwalk rom, märr yurru ŋayi marrtjina-wala yana, bitjanna liŋguna yurru.   
\p
\v 16 Yo, yuwalk dhuwala yulŋunydja. Godkunydja rom biyapul wal'ŋu garrwar ga dharrpal, yakana yurru yolŋuyu maḻŋ'maramanydja marrtji ŋuriŋi nhanukalay ŋayi be djambatjthunydja guyaŋinyarayu, yurru ŋayi Godthunydja liŋguna ŋunhi maḻŋ'maraŋalana ŋuliwitjarra Djesu-Christkalaŋukurruna. Wiripunydja ŋilimurru ŋuli ḻakarama ŋanya Christnha manikaykurru bitjan.  
\q1 Christtja ŋunhi maḻŋ'maranhaminana ŋanyapinyay ŋayi rumbalnha wal'ŋu yolŋuna ŋayi,  
\q2 ga Godkala ŋuriŋi Garrkuḻukthunydja Birrimbirryu ŋanya ḻakaraŋala dhuwurr-dhunupa ŋayinydja, Godku nhanŋuway Gäthu'mirriŋu.  
\q1 Ŋunha djiwarr'wuyyunydja yolŋu'-yulŋuyu ŋanya nhäŋala ṉirryurrunana yukurrana, ŋunhi ŋayi burakina dharpaŋura,  
\q2 ga dhiyalanydja munatha'ŋuranydja yolŋu'-yulŋuyu ḻakaraŋala yäkunydja ŋanya birrŋ'maraŋalana bäpurru'wala ga bäpurru'wala.  
\q1 Birrka'mirriyuna bäpurru'yunydja ŋäkula, bala märr-yuwalkthinana nhanukala, bala ŋayi ŋanya roŋiyinyamaraŋalana balayi yulŋunydja djiwarr'liliyi, nhanukiyingalay ŋayi ḻatju'lilina wäŋalili.   
\c 4  
\s1 Ḻakarama yukurra bothinyaramirrinha ŋunhi marŋgikunharamirrinha.  
\p
\v 1 Yo, Godkalanydja Garrkuḻukthunydja Birrimbirryu ŋuli yukurra warraŋulkumana wal'ŋu ḻakarama ŋilimurruŋgu bitjanna gam': Ŋuriŋi waluyu dhä-yawar'yunarayunydja yurru wiripunydja yolŋu'-yulŋu gulyunna märr-yuwalkthinyaraŋurunydja, yakana yurru walala biyapul märr-yuwalkthirri ŋunhiyinydja yuwalkŋunhanydja wal'ŋu dhäwu'nha, yana walala yurru mäkiri'-witjundja ŋurikina yätjkuna birrimbirrwu mayali'-wilkthunaramirriwuna, ga malthundja walala yurru rirrakaywu mokuywalaŋuwuna dhäwu'-gänharamirriwu walalaŋgu, ŋunhi walala ŋuli marŋgikuma yolŋu'-yulŋunha, bothinyaramirriyu.  
\v 2 Bala ŋuriŋiyinydja yolŋu'-yulŋuyu, nha yay'-wulanharamirriyunydja walalay ḻakarama ŋuli be nhäna bothinyaramirrina dhäwu', liŋgu ŋayaŋu walalaŋgu ŋunhi bitjan rakunynha; yakana walala yurru ŋäma ga dhäkay-ŋäma Godkunydja biyapul.  
\v 3 Bala walala ŋuli ḻakaramanydja yolŋu'-yulŋuwu bitjanna gam', “Nhuma yurru ḏarramu ga dhäyka yakana märranharamirri; nhuma yurru nhina yukurra gänana wal'ŋu yana ḻuni'na maṉḏa.” Ga wiripunydja walala ŋuli waŋa bitjan, “Yaka ḻukiya ŋunhi nhänydja ŋula ŋatha,” bitjan walala ŋuli waŋa. Yurru bukmak ŋunhi ŋathanydja malanha ŋayi Godthu djäma bukmakku yana ḻukanharawu, ga ŋunhi ŋuli ŋali märr-yuwalkthirrinydja yukurra Godkala, ga marŋgiyirri yuwalkkunydja, ŋalinydja yurru buku-wekama muka Godnha ŋurikiyi ŋathawunydja malaŋuwu, bala yana ḻuka muka ŋatha ŋunhi birrka'mirri nhä malanha.  
\v 4 Liŋgu bukmak nhä malanha Godthunydja djäma manymak warrpam' yaka ŋali yurru yukurra yätj-ḻakarama nyamir'yun, bala gali'lilina gurrunhan; märramanydja ŋali yurru ŋunhiyi bukmaktja, bala buku-wurrpanna yurru Godnhanydja manapan.  
\v 5 Liŋgu ŋuriŋiyi Godkalanydja dhärukthu ga bukumirriyanharayu bitjanna ŋali yurru gurrunhan ŋunhiyi ŋatha Godkuna, märr ŋuliwitjandhinydja ŋathakurru Godthunydja yurru ŋilimurrunha marrtji ganydjarr-wekamana.   
\s1 Ḻakarama yukurra yolŋunha, nhaltjan yurru ŋayi manymak djämamirri Djesu-Christku  
\p
\v 6 Yo Dimithi, nhe yurru buku-ḻayyunmaraŋa ŋunhiyi Garraywalaŋumirrinhanydja yolŋu'-yulŋunha ŋurikiyi nhäkunydja malaŋuwu, märr balakurruyinydja nhenydja yurru yuwalknha wal'ŋu yanana djämamirri Djesu-Christkuna, ŋunhi nhenydja ŋuli bitjan liŋgu marrtji bala ŋuthanmaranhamirri nhunapinyaynydja nhe dhiyaŋu dhärukthunydja, ŋunhi ŋilimurru yukurra märr-yuwalkthirri dhiyakuyi. Mukthurra-yana-wala marrtjiya yukirriya dhiyaŋuyi ŋamakurru'yunydja dhärukthu ŋunhi nhe liŋguna märraŋalana ga malthurrunana.  
\v 7 Yarrkthurra yana ŋuliŋuruyi nhäŋiniŋ'ŋurunydja dhäparkŋurunydja dhäwu'ŋuru malaŋuŋuru, yakana nhe yurru marŋgiyirri Godkalaŋuwunydja ŋuriŋiyinydjayi. Biyaka liŋgu yukirriya wuṉḏaŋarrkunhamiyanydja, märr yurru nhe yukurra yuwalkkuma yana nhina Godkalanydja romŋura.  
\v 8 Manymak warray ŋunhi nhe yurru rumbalnydja ḏaltha'-wuṉḏaŋarrkunhamirrinydja nhunapinyay nhe, märr yurru nhe yukurra waṉḏirri ḏälnha wal'ŋu yana rumbal, yurru ŋunhiyinydja biyapul warray ŋamakurru' ŋunhi nhe yukurra yurru birrimbirrnydja ŋunhi nhuŋuway ḏaltha'-wuṉḏaŋarrkunharamirri ŋuriŋiyi djämayu Godkalanydja, liŋgu ŋuriŋiyina liŋgu nhe yurru nhina yukurra ŋamathamanydja wal'ŋu dhiyala munatha'ŋura, ga ŋunhala djiwarr'ŋura yalala.  
\v 9 Dhuwalayinydja dhäruk yuwalk yana wal'ŋu, nhe yurru märramana yana warrpam'thunna dhuwalayi.  
\v 10 Liŋgu bukmaktja ŋilimurru dhuwala ḏukṯukthirri yukurra, ŋilimurru yurru nhina yukurra ḻatju'kuma dhäŋuru ŋuliŋurunydja ŋunhi ŋilimurru yurru rakunydhirri, ga dhiyakuyina ŋali ŋuli gukuma ŋunhi yätjnhanydja birrimbirrnha, bala djäma yukurra yurru wuṉḏaŋarrthirrinydja, liŋgu ŋalinydja märr-nherraṉmina ŋurikala walŋa-ḏikṯikkala warray Godkala, ŋunhi ŋayinydja Walŋakunharamirri Garray bukmakku yolŋuwu. Yuwalktja ŋayi yurru ŋilimurrunhanydja walŋakuma, ŋunhi ŋilimurru märr-nherraṉmirri ŋuli yukurra nhanukala Godkala.   
\p
\v 11 Yo, ḻakaraŋanydja biyaka warraŋulkuŋa wal'ŋu yana ŋuripa yolŋu'-yulŋuwanydja dhärukthu wuṉḏaŋarryu, märr yurru walala märrama dhäruktja ŋunhiyi, bala marŋgithirrina.  
\v 12 Nhenydja dhuwala märr-yuṯa yana ḏarramunydja, yurru yaka nhiniya biyakanydja bitjan ŋuli yothu' ŋunhi, märr yurru yaka walala nhuna yawirriny'-ḻakarama, bala mäkiri'-yarryunna nhuŋu dhärukku. Nhiniyanydja yukirriya ŋamathaŋa wal'ŋu yana, ga waŋiya walaŋguŋa wal'ŋu. Yuwalkkuŋa yana märryu-ḏapmaraŋanydja wiripuŋunha yolŋunha, ga märr-yuwalkthiya Godnhanydja bukmakthiyana ŋayaŋuyunydja nhokalay nhe. Nhiniya ḏarrtjalk yana ŋula nhämiriw, märr yurru ŋuriŋinydja Garraywalaŋumirriyunydja yolŋu'-yulŋuyu nhäma nhokala, bala marŋgiyirrina marrtji nhaltjanarawu nhinanharawu ŋamathanharawu, märr yurru walalanydja malthundhi munguyun nhunanydja.  
\v 13 Ga ŋunhi nhuma yurru Garraywalaŋumirri yolŋu walala waŋgany-manapanmirri waŋganylilinydja, bala maŋutji-ḻaw'maraŋa Godkunydja dhäruk wiripu-guḻku'walanydja yolŋu'-yulŋuwala, ga waŋiya marrtjiya ḻakaraŋanydja warraŋulkuŋa Godku dhäruktja. Biyaka liŋgu marŋgikuŋa marrtjiya walalanha. Gatjuy djämanydja biyakayina, yana liŋgu ga buna ŋarra yurru.  
\v 14 Nhe märraŋala liŋguna Godkuŋu ŋunhi wekanhara mundhurr ŋurikiyi djämawunydja ŋulinyaramirriyu ŋunhi walala ŋaḻapaḻmirri yukurrana ŋarambiya ŋal'yurruna nhokala, bukumirriyanharayu manapan, ŋunhi walalaŋgalanydja dhärukkurru ŋayi Godkala Birrimbirryunydja ḻakaraŋalana yukurrana nhuna, nhaltjan yurru ŋayi Godthu djäma nhokalaŋukurru. Yaka yana bäy-ḻakaraŋa ŋunhiyi mundhurrnha, bala gonha'yurrana.  
\v 15 Biyakayi liŋgu djämanydja yukirriya ŋunhiyi malanha, märr yurru ŋuruŋu wiripu-guḻku'yunydja yolŋu'-yulŋuyu nhäma nhuna, ŋunhi nhenydja marrtji gurarrthirrina bala yana Godkalanydja romŋura.  
\v 16 Biyaka liŋgu gatjarr'yunmiyanydja nhunapinyay nhe dhä-wirrka'yunmiya biyaka, “Yuwalk ŋarra yukurra dhuwala nhina Godkalanydja romŋura? Marŋgikumanydja ŋarra yukurra Godku dhäruktja warraŋulkuma wal'ŋu dhunupa?” biyaka nhe yurru gatjarr'yunmiyanydja. Biyakayina djämana-wala mukthurrana yana ŋuriŋiyi liŋgu romdhu, märr balakurruyinydja nhe yurru walŋakunharamirri nhunapinyay nhe ga ŋunhinha walalanha ŋunhi walala yurru nhuna ŋäma yukurra.   
\c 5  
\s1 Godkalaŋumirrinydja miṯtji yurru yukurra djäka muka dhuway-rakunymirriwunydja yolŋumiriwwunydja ŋuriki  
\p
\v 1 Yo Dimithi, ŋuli yurru ŋayi worruŋuyunydja ḏarramuyu djäma ŋula nhä yätj, yaka waŋiya ḏälyunydja dhärukthu ŋanya ŋula nhaltjarra. Waŋiya dhunupa nhanŋu, märr yurru ŋayi dhunupayirri, yurru gurrum'thurra yulŋunydja waŋiyanydja ŋanya, biyakana liŋgu bitjan nhe ŋuli waŋa nhokiyingalayŋuwala bäpa'mirriŋuwala. Ga biyakayi ŋunha yuḏayuḏanhanydja ḏarramuwurrunha raypirri'yurra waŋiya, biyaka yana liŋgu bitjan nhe ŋuli waŋa nhokalayŋuwu gutha'mirriŋuwu dhunupakunharawu biyakayi.  
\v 2 Ga waŋiya ŋamathaŋa ŋunhi worruŋunhanydja dhäykanha, biyaka bitjan ŋayinydja nhuŋuwaynha ŋäṉḏi'mirriŋu, ga waŋiya ŋunhi yuḏayuḏanhanydja dhäykawurrunha biyaka bitjan walalanydja nhuŋu yapa'mirriŋuna walala.   
\p
\v 3-5 Wiripunydja dhäyka ŋayi dhuway-rakunymirri yukurra nhina, ga nhumanydja yurru Garraywalaŋumirriyu walalay guŋga'yurra ŋunhiwalayi ŋanya, ŋunhi ŋayi yukurra nhina gäna, djäkamiriwŋura ŋula nhämiriwŋura. Yurru walala nhanŋuwaynha ŋunhiyi galkiwuynha gurruṯu'mirri yurru djäkanydja yukurra ŋurikiyi dhuway-rakunymirriwu miyalkku, ŋuli ŋayi ŋayathama yukurra yumurrku'nha ŋula nhä'mirriŋunha gutharra'mirriŋunha. Liŋgu Godkalanydja romdhu yukurra ḻakarama, ŋilimurrunydja yurru wekamayi buku-ruŋinyamarama ŋilimurruŋgalaŋuwu ŋäṉḏi'mirriŋuwu ga märi'mirriŋuwu. Ga ŋayi Godthunydja yukurra galŋa-djulŋithirrina nhäma, ŋunhi ŋali yurru marŋgiyirrinydja dhiyakuyi romgu, bala dhäruk märramanydja. Wiripunydja ŋuli ŋunhi dhuway-rakunymirri dhäyka nhina yukurra gänana, liŋgu ŋayi yumurrku'miriw yana, bäyŋu nhanŋu galkiwuy gurruṯu'mirri, yurru ŋuliŋuruyi ŋunhi dhuway'mirriŋu nhanŋu rakunydhina, ŋayi ŋuli märr-nherraṉmirri Godkala, ŋunhi ŋayi yurru nhanŋu djäka yukurra. Bala walu-ŋupan ga munhamandhirri dhäykanydja ŋunhiyi yukurra yurru bukumirriyamana birrka'mirriwu yolŋu'-yulŋuwu, ŋäŋ'thunna yukurra Godnha, märr yurru ŋayi wiripu-guḻku'nha walŋakuma. Bala nhumanydja Garraywunydja yolŋu'-yulŋu yurru märr-ŋal'yundhi ŋurikalayi miyalkkala, ga ŋäthilimirriyaŋa nhanŋu ŋula nhä malanha wekaŋa marrtjiya, märr yurru ŋayi yakana dhäparktja nhina ŋula nhäŋuranydja.  
\v 6 Ga wiripuyunydja ŋuriŋinydja dhuway-rakunymirriyu ŋuli yukurra guyaŋinyamirri ŋanyapinyaynha ŋayi yana, bala ŋayi yukurra baḏuwaḏuyunna rrupiyanydja warrkulumana ŋula nhänydja, ga ḻayḻayyun ŋula nhäŋurana romŋura. Ŋayinydja ŋunhiyinydja dhäyka balanyarana bitjan nhanŋu ŋayaŋunydja rakunynha, gonha warray ŋayi rumbal walŋanydja, yurru birrimbirrnydja nhanŋu liŋguna rakunynha Godkalanydja maŋutjiŋura.  
\v 7-8 Yo, nhenydja yurru gurrunhan romnha Godkalaŋumirriwunydja yolŋu'-yulŋuwu, märr yurru yakana ŋula yolthu maḻŋ'marama walalaŋgala yätjtja; ḻakaraŋa walalaŋgala biyaka gam': Nhuma yurru waŋga'-waŋgany djäkanydja marrtji nhumalaŋgalaŋuwu nhuma gurruṯu'mirriwu, wekaŋa marrtjiya nhä malanha walalaŋgu. Ŋunhi nhe yurru yakanydja bitjandhi djäka marrtji nhokalaŋuwu ŋunhi galkiwuywunydja, ŋunhinydja nhe yakana yuwalk märr-yuwalkthinyaramirri yolŋu Garraywunydja, liŋgu ŋunhiyinydjayi nhuŋuwaynydja gatjaḻ yätjnha wal'ŋu yanana ŋurikalanydja walalaŋgala ŋunhi walala yaka yukurra märr-yuwalkthirri Garraywala.   
\p
\v 9-10 Dimithi, wukirrina nhe yurru yäkunydja marrtjiya ŋunhiyinha malaŋunha dhuway-rakunymirrinhanydja yolŋu'-yulŋunha, ŋunhi walala nhina yukurra gurruṯu'miriwnha yana. Ga ŋuli yurru ŋayi miyalk yuṯanydja wal'ŋu märr, ŋunhi ŋayi yakanydja djuḻkmaraŋala walu dhuŋgarra 60-nydja, yaka ŋunhiyinydjayi wukirri yäku dhipali djorra'lili. Yo, wiripunydja dhuway-rakunymirri dhäyka ŋuli nhinanha yukurranha waŋganygalana yanana, ŋurikalana liŋgu dhuway'mirriŋuwala, ga wiripu-guḻku'yunydja ŋuriŋinydja ḻakarama ŋuli yukurra ŋanya ḻatju'na. Ŋayi yukurrana ŋuthanmaraŋalanydja nhanŋuway yumurrku'nha ŋamathaŋala yana, ga gumurr-ŋamathina ŋayi ŋuruku mulku'-mulkuruwunydja nhanukiyingala ŋayi wäŋalilinydja. Gurrum' yana dhika ŋayi ŋuli djäkanydja yukurranha ŋuriki Garraywalaŋumirriwunydja yolŋu'-yulŋuwu, yaka ŋula be yindikunharaminya ŋanyapinyay ŋayi. Ga bitjarrayina ŋayi yukurrana marrparaŋ'kuŋalanydja ŋunhinydja yolŋunha ŋunhi ŋayi galŋa-yätjthirri yukurra ŋuli nhina, ga guŋga'yun ŋunhinhanydja ŋunhi ŋayi yukurra ŋonuŋ ŋuli gurrukama. Bitjan liŋgu ŋayi yukurra djämanydja ŋamakurru' yana, guŋga'yun marrtji yolŋu'-yulŋunha wiripu-guḻku'nha. Nhe yurru yäkunydja nherraṉ djorra'lilinydja balanyarayina liŋguna dhuway-rakunymirrinhana dhäykawurrunha, märr yurru nhuma Godkunydja miṯtji djäkana yukurra walalaŋgu.  
\v 11 Ga ŋuli ŋayi dhuwaymiriw yuṯanydja yolŋu, yaka ŋunhiyinydja gurrunharra yäku ŋunhi djorra'lili' ŋayi ŋuli bäynha malthurru nhanukiyingalaŋuwuna djälwu, bala gonha'yurruna Christnhanydja, liŋgu ŋayi djäl wiripuŋuwu dhuway'mirriŋuwu märranharawu.  
\v 12 Liŋgu ŋunhiyinydja yaka ŋamakurru', ŋunhi ŋayi yurru ŋäthili dhawu'-nherraṉ Garraywala, ŋayi yurru ŋunhi nhina yukurra nhanŋuwaynha yana Garraywuna waŋganyguna, ga dhäŋuru ŋuliŋurunydja dhawu'-nherraṉminyara-ŋurunydja ŋayi yurru ḻiyanydja djambina, bala märramana yurru wiripuŋunha ḏarramunha. Dhuwalayinydja yakana manymak.  
\v 13 Wiripunydja ŋuli dhuway-rakunymirri yolŋu nhina yukurra djämamiriwnha bitjanna, bala marrtjina ŋayi ŋuli yana wäŋalili ga wäŋalili, gäma marrtji ŋula nhäna dhäwu' wiripuna ga wiripuna bala, yana ŋayi ŋuli djarrma-wamana, ga marina djäma ŋuriŋiyi dhäwu'yunydja.  
\v 14 Manymak warray ŋunhi yutawunydja miyalkku, ŋayi yurru märrama wiripuŋunha dhuway'mirriŋunha dhäŋuru ŋuliŋuru ŋunhi nhanŋu dhuway'mirriŋu rakunynha, märr yurru ŋayi yothunha gurrukama biyapul, ga ḻayḻayyun marrtji djäka djamarrkuḻi'wu nhanukalayŋuwu ga wäŋawu, märr yurru yakana ŋula yolthu maḻŋ'marama yätjtja nhanukala, bala waŋa yätj-ḻakaramana bukmaknhanydja Garraywalaŋumirrinha yolŋu'-yulŋunha.  
\v 15 Liŋgu wiripu-guḻkuny'tja yuḏayuḏa dhuway-rakunymirri walala liŋguna yukurrana ŋanydjaḻa'yurruna Garraywalaŋuŋurunydja, bala walala yukurra malthundja yätjkuna ŋurikina mokuywalaŋuwuna gatjaḻwu, Ŋäṉukkalana romlili wapthurruna.   
\p
\v 16 Yo, ŋuli yurru nhe ŋula yol Garraywalaŋumirri yolŋu galkiwuynydja gurruṯu'mirri ŋuriki dhuway-rakunymirriwu yolŋuwu, nhenydja yurru djäkana yukurra ŋurikiyinydja miyalkku, ŋayi yurru ŋunhiyinydja nhina yukurra nhokalana djäkaŋura, märr yurru Godkunydja yolŋu'-yulŋu miṯtji djäka yukurra ŋuriki liŋgu dhuway-rakunymirriwu walalaŋgu ŋunhi walala yukurra nhina gäna gurruṯu'miriwŋura.   
\s1 Ḻakarama yukurra marŋgikuma nhaltjan yurru walala Garraywala miṯtjiyu nhäma yukurra ŋurruŋumirrinha wal'ŋu yolŋu'-yulŋunha Garraywu  
\p
\v 17 Yo, nhuma yurru ŋurikalanydja märr-ŋal'yurra Garraywalaŋumirriwalanydja djäkamirriwala walalaŋgala, ŋunhi walala ŋuli djäka ŋamathama wiripuŋuwu yolŋu'-yulŋuwu, ga yakana meṉguŋa ŋunhinhanydja yolŋunha ŋunhi ŋayi ŋuli mirithirri wal'ŋu wirrki djäma, ḻakarama warraŋulkuma wal'ŋu dhika Godku ŋunhi dhäruk, ga marŋgikuma ḻakarama yukurra gatjaḻ Godkalaŋuwu yolŋu'-yulŋuwu. Wirrki yana nhuma yurru märr-ŋal'yurra ŋurikalayinydja walalaŋgala, ga wekaŋa walalaŋgu nhäyinyara ŋamakurru'.  
\v 18 Liŋgu ŋunha djorra'yunydja yukurra ḻakarama bitjan gam', “Ŋunhi ŋuli buliki'yu djäma marrtji muŋdhu'-muŋdhun ŋatha malanha, barrkuwatjkuma marrtji ŋuliŋuru dhukun'ŋurunydja, yaka ŋanya dhänydja ḏapmaraŋa; yana ŋanya gonha'yurra, märr ŋayi yurru ḻuka marrtji ŋatha ŋuliŋuruyi.” Ga bitjandhiyi yukurra djorra'yunydja gam' ḻakarama, “Ŋunhi yurru yolŋuyu djäma yukurra guŋga'yun nhuna, nhenydja yurru nhanŋuna wekama bala buku-ruŋinyamarama ŋurikiy djämawuy.”   
\p
\v 19 Ga ŋuli ŋayi yurru waŋganydhu ŋula yolŋuyu ḻakarama dhäwu' yätjkuma Garraywu djämamirrinha yolŋunha, ŋunhi ŋayi be djäma yätjkuŋala, yaka yana dhunupa märr-yuwalkthiyanydja. Ŋäthilinydja ŋathili malŋ'maraŋa dhäwu' nhä ŋunhi yuwalk, ga ŋunhi yurru märrma' ŋula nhä ḻurrkun' yolŋu marŋgi ŋurikiyi, ga ḻakarama walala yurru ŋunhi liŋgu ŋupanayŋu dhäwu', bala nhenydja yurru märr-yuwalkthiyana.  
\v 20 Ŋuli ŋayi ŋuriŋiyi yolŋuyu yuwalk djäma yätjkuŋala, ga nhenydja yurru raypirri'yurra ŋanya waŋiya ḏälyu dhärukthu bukmakkala ŋurikala yolŋuwala walalaŋgala maŋutjimara, märr yurru walala wiripu-guṯku'yunydja ŋuriŋinydja nhämana, bala nhina yurru rom-wiyaṉiyirrina ŋurikiyi.  
\v 21 Dimithi, dhuwalanydja ŋarra yukurra ḻakarama nhuŋu mirithirrina wal'ŋu dharrpalnha, gumurrŋura Godkalana yana, ga Djesu-Christkalana, ga bukmakkalana Godkalaŋumirriwala djiwarr'wuywala walalaŋgala. Mulkiyanydja baṯ biyaka yana dhuwalayi dhäruktja ŋunhi ŋarra ḻakarama yukurra nhuŋu. Nhe yurru nhämanydja bukmaknha yolŋunha walalanha rrambaŋikuma yana. Yaka djarr'yurra nhuŋuway galkiwuynha ŋurikala wiripuwala yolŋuwala. Yaka dhuwaliyi dhunupa nhuŋu, ŋunhi nhe yurru wiripu-guḻku'nha guŋga'yun, bala meṉgumana nhä malanha buku-dhumukthirrina yätjtja walalaŋgu yana, ga wiripu-guḻku'nhanydja nhe yurru yakana guŋga'yun ŋula, ga ŋunhi ŋayi yurru djäma ŋula yätjtja, nhenydja yurru dhunupana murr'maramana ŋanya ŋunhi yolŋunha. Dhuwaliyinydja yätjnha yanana rom, yakana ŋamakurru'; yakana nhe yurru djarr'yun nhuŋuway galkiwuynha bitjandhiyinydja.  
\v 22 Ga yaka yana nhe yurru waḏutja wapmaraŋa ŋula yolnha yolŋunha Garraywalanydja djämalili; bulnha ŋathili galkurra, yurruna nhuma yurru muḻkurrlilinydja goŋ-ŋal'yurra nhanukala bukumirriyanharakurrunydja. Ŋuli ŋayi yurru ŋuriŋiyinydja yolŋuyu djäma ŋula nhä yätj, dhäŋuru ŋuliŋuruyinydja ŋunhi nhe ŋanya nherrara bitjarrayinydja, ŋunhiyinydja bitjan nhenydja djäma yätj, rrambaŋina nhuma maṉḏa. Nhenydja yurru nhina ḏarrtjalk yana wal'ŋu dhika nhämiriw, ganaŋ'thun yana yätjŋurunydja malaŋuŋuru.  
\v 23 (Yurru yaka nhe wurkthurra gapunydja waŋganydja, wiripunydja nhe yurru ḻukiya weyika borum ŋänitji, yurru mitjpili yana yutjuwaḻa, liŋgu ŋunhiyinydja bitjan mirritjin nhokalaŋuwu gulungu dhiyaki, liŋgu wiripunydja nhe ŋuli rirrikthun dhuwaliyi gulun nhe.)   
\p
\v 24 Yo, wiripunydja ŋuli yolŋuyu djäma yätj baṉarra'ŋurana warraŋulnha, bala guḻku'yunydja ŋuli yolŋuyu nhämana, bala marŋgiyirrina, bala yurru ŋuriŋi dhä-wirrka'yunaramirriyu yolŋuyu ḻakarama ŋanya yätjnha. Ga wiripu-guḻku'walanydja ŋunhanydja ŋayaŋuŋura yukurra yätj ŋorra djuḻuḻ'yunara; yakana ŋuli yolŋu'-yulŋuyunydja nhäma ŋunhiyi yätj waḏutjanydja, yurru yalalanydja ŋayi yurru ŋunhiyi maḻŋ'thu-maḻŋ'thun marrtji warraŋulthirrina bukmakkuna nhänharawu.  
\v 25 Ga balanyara liŋgu ŋupanayŋuyi, bukmakthunydja ŋuli nhämana yana ŋunhi ŋayi ŋuli ŋula yolthu baṉarra'ŋuranydja djäma nhä ŋamakurru', ga ŋunhi ŋayi ŋuli yolŋuyu djäma ŋamathama gayulnydja wal'ŋu, yakana yurru ŋunhiyinydjayi ŋorra djuḻuḻ'yun weyindja. Ga märrwu ŋurikiyinydja ŋarra yukurra ḻakarama bitjan, “Yaka yana waḏutjanydja wapmaraŋa yolŋunha Garraywalanydja djämalili.”   
\c 6  
\s1 Ḻakarama yukurra marŋgikuma nhaltjan yurru ŋayi djämamirriyu nhäma yukurra nhanŋuway buŋgawamirriŋunha  
\p
\v 1 Ga ŋayi yolŋu ŋunhinydja ŋunhi ŋayi djämamirri ŋurikina buŋgawamirriŋuwuna nhanukalayŋuwu, ŋayi yurru ŋunhiyinydja djämamirri yolŋu märr-ŋal'yunna nhanukalayŋuwala ŋurruŋuwalana buŋgawawalana, bala dhäruk märramana yurru, märr yurru yakana ŋula yolthu yolŋuyu yätjkuma waŋa Godnhanydja yäkunha, bala yätj-ḻakaramana dhuwalayi dhäwuny'tja, ŋunhi ŋilimurru ŋuli ḻakarama marŋgikuma yukurra.  
\v 2 Ŋuli ŋayi ŋunhiyi buŋgawa Godkunydja yolŋu, maṉḏanydja ŋunhiyi bitjan gutha'manydjina yulŋunydja, ŋayi ga djämamirri yolŋu nhanŋu, yurru yakana ŋayi ŋuriŋiyi djämamirriyunydja yolŋuyu nhanukala ŋanya yurru märr-yuḻkthundja; ŋayi yurru yana djämanydja ḻatju'kuma wal'ŋu dhika nhanŋu, liŋgu ŋayi yukurra yuwalktja ŋunhiyi guŋga'yun märr-yuwalkthinyamirrinha yolŋunha, ŋunhi wal'ŋu nhanŋuway marrkapmirrinha wäwa'mirriŋunha.  
\p Dhuwalayi Dimithi nhe yurru ḻakarama yolŋu'-yulŋuwalanydja marŋgikumanydja. Ḻakaraŋanydja wirrki wal'ŋu yana ḏälyu dhärukthu, märr yurru walala dhuwalayi dhäruktja märrama yana.   
\s1 Ḻakarama yukurra ŋunhinha yolŋunha märr-yuḏakthunaramirrinha ḻakaranhamirrinha, ga yuwalkŋunha wal'ŋu ḻukunydjanha  
\p
\v 3 Yakana yana galkithiya ḻunduthiya ŋula yolkalanydja ŋunhi ŋayi ŋuli marŋgikuma ḻakarama wiripuyama, liŋgu yakana ŋayi ḏukṯuk walŋamirriwunydja ŋurikinydja dhärukku ŋilimurruŋgalayŋuwu Garraywu Djesu-Christkunydja, ga yaka ŋayi ŋuli ŋaḏupthun ŋurikiyi dhawu'wu, ŋunhi ŋuli ŋuriŋiyi yolŋunha gäma galkikuma Godkala wal'ŋu.  
\v 4 Ŋayinydja ŋunhiyinydja yolŋu ŋuli yana ŋanyapinyay ŋayi yindikunharamirrina, yanapi ŋayi marŋgina wal'ŋu bukmakku, yurru yakana ŋayi yana marŋgi yuwalkunydja wal'ŋu, liŋgu guyaŋirri ŋayi yukurra djarrpi'kumana yana. Bitjanna liŋguna ŋayi ŋuli waŋana marrtji dhä-ḏälthirrina, dhawuluŋguḻ'-dharrana yana, liŋgu waŋa ŋayi ŋuli yukurra dhäruktja waŋganynha. Yakana ŋunhiyinydja ŋamakurru', liŋgu ŋuliŋuruyinydjayi yurru dhawaṯthun mirithirrina guḻku'na yätjtja malanha, balanyarana gam': Yolŋu'-yulŋu yurru maŋutji-ḏi'yunmirrina yukurra, bala barrku-barrkuwatjthirrina guḻk-guḻkthunmirrina, bala walala yurru gupa-waŋana walalanhawuy walala, yakana walala djäl walalaŋguway walala bala-lili'yunmirri.  
\v 5 Bitjanna liŋguna walala yukurra yurru ŋarrtjunmirrina wal'ŋu yana, liŋgu muḻkurrnydja guyaŋinyarawuynydja walalaŋguŋu dhäparknha ga djarrpi'na, liŋgu walala ŋapana-wekaŋala ŋuriki yuwalkŋuwunydja romgu wal'ŋu. Walala ŋuli märr-yuḏakthunmirrina yana ŋunhiyinydja, yanapi walala Garraywuna yolŋu, liŋgu walala ŋuli guyaŋirri yanapi walala yurru ḻukunydjayirri, ga märrama ŋula nhä ŋamakurru' ŋuriŋinydjayi romdhu.   
\p
\v 6 Ga yuwalkkumanydja yurru yolŋu ḻukunydjayirri, ŋunhina ŋunhi ŋayi yurru yuwalkkuma nhina yukurra Godkala romŋura, ga märr-ḏaw'yun ŋayi ŋuli ŋuriŋina liŋguna, liŋgu märramanydja ŋayi yurru yukurra ŋunhinha dhawar'yunamiriwnha nhä malanha yana.  
\v 7 Yaka yana ḏukṯuk-ḏumurruyiya yukirriya dhiyakuywu munatha'wuywunydja nhäku malaŋuwu, liŋgu ŋilimurru dhawal-wuyaŋinanydja dhiyala wäŋaŋuranydja goŋ-dhäpark yana ŋula nhämiriw, ga ŋunhi ŋali yurru rakunydhirrinydja, bala gonha'yundja dhuwala munatha' wäŋa, yakana yurru ŋali gäma galki ŋula nhänydja malanha.  
\v 8 Yo, ŋunhi ganany'tja ŋitjalaŋgu ŋatha ḻukanharawu, ga girri' dhaṯthunminyarawu, ŋuriŋina liŋgu ŋali yurru ḏaw'yun märrnydja yana.  
\v 9 Liŋgu ŋunhinydja yolŋu ŋunhi ŋayi rärru-ḏumurrunydja ḻukunydjayinyarawu, ŋayinydja yurru yolŋunha ŋunhiyinydja gaṯmaramana ŋuriŋi munatha'wuyyuna nhäyu malaŋuyu, liŋgu bitjanna liŋguna ŋayi yukurra ŋoy-ŋapu'yundja birrka'mirriwuna nhäku malaŋuwu, ga ŋuriŋiyinydja romdhu ŋanya gur'yunna yukurra birrka'mirriwuna nhäku malaŋuwu yätjku. Ŋunhiyinydja rom bawa'mirrina yana, liŋgu ŋunhiyinydja yolŋunha yurru yana walŋa-winya'yun-maramana ŋuriŋiyinydja ŋayaŋu-ŋapu'yunarayunydja romdhu, ŋunhi ŋuli yukurra ŋanya wuyupmaramana ŋamakurru'ŋurunydja ga mäwaya'ŋurunydja, bala walŋanydja nhanŋu yurru baḏawaḏu-yunna ŋuriŋiyi nhanukalay djälyu.  
\v 10 Yo, ŋunhi ŋuli yolŋu wirrki wal'ŋu ḏukṯukthirri rrupiyawunydja, ŋunhiyi ŋoy-ŋapu'yunaramirrinydja ŋuli ŋorra yukurra ŋunha ŋayaŋuŋurana nhanukala, balanyarana bitjan ŋaraka maŋutji ŋatha, bala ŋuliŋuruyi yurru dhawaṯthundja birrka'mirrina nhänydja malanha yätjtja. Wiripu-guḻkuny'tja liŋguna ŋapana-wekaŋala, winya'yurrunana Godkalanydja liŋgu ŋuriŋiyina ŋoy-ŋapu'yunarayu yukurranharayu rrupiyayuna; yakana ŋayi yukurra märr-yuwalkthirri Garraywalanydja biyapul, bala ŋayaŋunydja ŋanya yukurra bitjanna liŋguna dharpumana warwuyuna ga ŋula nhäyuna galŋa-yätjthinyaramirriyuna.   
\s1 Ḻakarama yukurra Dimithiwala nhaltjan ŋayi yurru nhina yukurra ŋamathama  
\p
\v 11 Yurru nhenydja dhuwala nhanŋuway warray Godku yolŋu, bala yarrkthurrana yana ŋuliŋuruyinydja romŋuru; yaka nhenydja biyakayi ŋoy-ŋapu'yurra ŋula nhäku rrupiyawu ga munatha'wuywu nhäku malaŋuwu. Nhenydja yurru ŋoy-ŋapu'yurra yukirriya dhiyakuna malaŋuwu gam': Nhe yurru djäma ŋamathama wal'ŋu, ga nhina Godkala romŋura yana. Nhe yurru märr-yuwalkthirri Garraywala märr-nherraṉmirri manapan, ga yuwalkkuma yana wal'ŋu dhika nhe yurru märryu-ḏapmaramanydja wiripu-guḻku'nhanydja yolŋu'-yulŋunha. Mukthunna yana-wala nhe yurru marrtji yukurra marimirrikurrunydja ŋula nhämirrikurru, ga yaka yurru nhe gandarrŋura ḏaḏawyun, ga guŋga'yun nhe yurru marrtji bala wiripu-guḻku'nhanydja yolŋu'-yulŋunha gurrum'thurra wal'ŋu. Balanyarawuyinydja malaŋuwu nhenydja yurru wirrkina ḏukṯukthirri yukurra.  
\v 12 Yuwalkkuŋa yana wirrki wal'ŋu märr-yuwalkthiyanydja Godkala, ga wirrki yana mulkiyanydja baṯ biyaka nhanŋu romdja, biyaka bitjan ŋuli yolŋu ŋunhi waṉḏirri bata'yunarawu wirrki wal'ŋu yana, märr yurru ŋayi märramana ŋunhalanydja bala ŋula nhä. Yurru nhenydja waṉḏiya yukirriya wirrki warray ŋula Godkala warray dhukarrkurru, märr yurru nhe nhinana yukurra walŋana ŋunhala Godkalanydja wäŋaŋura. Liŋgu bitjarrayi muka ŋunhi ŋayi Godthu dhäwu'-nherraranydja nhuŋu ŋäthilinydja wal'ŋu, ŋulinyaramirriyunydja ŋunhi ŋayi wäthurruna nhuŋu malthunarawuna nhanŋuway, ga guḻku'yuna yolŋuyunydja walalay nhäŋalana nhuna ŋunhimalayi ŋunhi nhe waŋana yoraŋala Garraywu, bala märr-nherraṉminana Garraywala.  
\v 13 Dimithi, dhuwalanydja ŋarra yukurra waŋa nhuna mirithirri dharrpalyu dhärukthu; waŋanydja ŋarra yukurra ḻakaramanydja yäkuyu Godkala yana, ŋurikalayi ŋunhi bukmak nhä malanha nhina yukurra walŋana nhanukalaynydja yana walŋayu, ga yäkuyu ŋarra yukurra waŋa Djesu-Christkala, ŋurikala ŋunhi ŋayina waŋana yoraŋala Godkalaŋuwunydja dhukarrwu gumurrŋura ŋurikala wal'ŋu buŋgawawala yäkuwala Bun'tja-Baylatkala.  
\v 14 Dhuwalana ŋunhiyi dharrpalnydja wal'ŋu dhäruk gam': Godkunydja rom dhuwala ḏarrtjalk warray, garrkuḻuk warray, ga nhenydja yurru nhiniya ŋamathaŋa yana ŋula nhämiriw ŋunhilimi liŋgu romŋura, märr yurru yakana ŋula yolthu maḻŋ'marama nhokala yätjtja ŋula nhä, yana liŋgu-u-u ga Garray Djesu-Christ yurru ŋayipi maḻŋ'thun.  
\v 15 Liŋgu yuwalk muka yana ŋayi yurru dhika marrtjinydja ŋunhi, liŋgu Godthu yurru djuy'yun ŋanya lili ŋuriŋi liŋgu waluyu ŋunhi Godthu ŋayipi nherrara, ŋuriŋiyi ŋunha ŋayi yukurra nhina ŋayipi yana waŋgany ŋurruŋu wal'ŋu waŋarr God. Ŋayinydja ŋunhi waŋgany buŋgawanydja wal'ŋu ŋayipi buŋgawamirriwunydja, ga Garray wal'ŋu ŋayipi walalaŋgu Garraymirriwu.  
\v 16 Ŋayipi ŋunhi waŋgany walŋa-ḏikṯiktja waŋarr, ga nhinanydja ŋayi yukurra djarraṯawun'mirriŋura, djeŋarra' dhika wal'ŋu biyapul; yakana yurru ŋayi yolŋu galkithirri ŋunhimalayinydja djarraṯawun'lili gänanydja ŋayipinydja. Yakana ŋula yolthu waŋganydhu yolŋuyu nhäŋala Godnhanydja ŋäthili, ga yakana ŋuli dhiyaŋunydja-wala ŋula yolthu nhäma ŋanya. Gul' ŋilimurru märr-ŋal'yunna nhanŋuway yana, liŋgu ŋayipi muka ŋunhi wäŋa-waṯaŋunydja ŋilimurruŋgu. Bukmak nhänydja malanha warrpam' nhanukala goŋŋura, ga nhinanydja ŋayi yukurra biyapulnha wal'ŋu ganydjarr-ḏumurruna, ga bitjanna liŋgu yurru. Gul' ŋilimurru wokthunna nhanŋu. Yo yo.   
\p
\v 17 Dimithi, ḻakaraŋa ŋuripa ŋunhi ḻukunydjamirriwanydja yolŋu'-yulŋuwa, ŋuripanydja walalambala ŋunhi walala yukurra ŋayathama guḻku' nhä malanha munatha'wuy ŋunhi, waŋiya raypirri'yurra walalanha biyaka, “Yaka ŋurr'yurranydja nhuŋuway nhe, yanapi nhe garrwar wal'ŋu biyapul wiripu-guḻku'walanydja, ga yaka guyaŋiya biyakanydja yanapi nhe yurru ŋamathama nhina yukurra ŋuriŋiyi nhäyu malaŋuyu ŋunhi yurru dhulwirmirriyirri, bala winya'yunna yana buḻwaŋ'thunna yurru. Liŋgu ŋayipina waŋganydhuna Godthu ŋuli wekama nhä ŋunhi yuwalktja wal'ŋu ŋamakurru', ga wekamanydja ŋayi yurru rarr'yundja marrtji märryu-dhapinyayu, nyinyaŋdhunamiriw bitjan, märr yurru ŋali nhina yukurra ŋayaŋu-djulŋithirri dhika wal'ŋu yana.”  
\v 18 Ga ḻakaraŋa ŋuripayi ḻukunydjamirriwanydja yolŋu'-yulŋuwa, walala yurru djäma ŋamakurru' yana wal'ŋu, ga wekama walala yurru yana marrtji märryu-dhapinyayu, rarr'yun marrtji yurru wiripu-gulku'wunydja, bawala'mirriwu yana bitjan, märr yurru walalanydja nhina yukurra yuwalknha wal'ŋu yana ḻukunydjamirrina Godkalanydja maŋutjiŋura.  
\v 19 Yo, ŋunhi ŋali yurru wekama yänanydja märryu-dhapinyayunydja wiripuŋuwunydja yolŋuwu, ŋunhiyinydja bitjan ŋali yukurra bukulili ŋal'-ŋalmaramana ŋunhana ŋunhi djiwarr'lilina, märr yurru yalalanydja ŋali nhina yukurra ŋamathamana wal'ŋu ŋunhalanydja. Ḻakaraŋa walalambala biyakayi, märr ŋunhalanydja walala yurru ŋayathamana yuwalkŋuna wal'ŋu walŋa, bala nhina ŋamathamana gupaḏalnha-wala yurru.   
\p
\v 20 Marrkapmirri Dimithi, mulkiya baṯ biyaka yulŋunydja dhuwalayi dhäruktja Garraywu ŋunhi Godthu ŋunha wekaŋala nhokala dharraylili, bala yarrkthurrana yana ŋuliŋurunydja be nhäŋiniŋ'ŋurunydja ŋula nhäŋurunydja dhäwu'ŋuru, ŋunhi walala ŋuli be djambatjthu walalay ḻakarama. Yaka yana ḻayḻayyurra ŋurikala mayali'miriwŋuranydja dhärukŋura.  
\v 21 Wiripunydja yolŋu'-yulŋu liŋguna märr-yuwalkthinana ŋurikiyi be djambatjkunydja dhärukku, bala ŋuriŋiyinydjayi dhärukthu walalanha gatjpaḻ'maraŋalana yuwalkŋuŋurunydja dhukarrŋuru; liŋguna walala winya'-winyayurrunana Garraywalanydja ŋunhi, liŋgu yakana biyapulnydja walala ŋuli märr-yuwalkthirri Garraynha.  
\p Godthu yurru gämanydja yukurra nhuna nhanukalay ŋayi märr-ŋamathinyarayunydja. Ga liŋguna dhuwala dhawar'yurruna.