\id MIC - Gamo Full Bible final version
\ide UTF-8
\h Mikiyaasa Tinbite
\toc1 Mikiyaasa Tinbite
\toc2 Mikiyaasa Tinbite
\toc3 Miki
\mt1 Mikiyaasa Tinbite
\imt1 Giddo Qofa
\ip Mikiyaasi Isayaasay diza wode diza nabe gidishin izas yeletay dugeha bagga Yuhudan kawoteththa garsan diza issi dere garsan diza kataman dees; Amoxey pudeha bagga kawoteththa bolla metoy gakkanayssa yootoyssaththo Mikiyaasikka he hanoti Yuhuda kawoteththa bolla gakkanayssa kaseti yootides. Derezi ooththiza iita hanoti pirda pace gishshas Xoossi ba pirda ehanayssa qofsides; gido attiin Mikiyaasa tinbite qaalay sinththafe hidotay dizayssa bessiza malatatakka gaththi oykkides. Harappeka lo7eththi xeellanaas bessiza kifileti Xoossa godateththa garsan kumeththa alamen saroteththi daanayssa (4:1-40), Dawite zereththafe gita kawoy yiikko derezas saroteththi imettanayssa (5:2-40) Hessaththoka kase Isra7eele nabeti yootida qaalay ubbayka issi xiqisen qashettida mala qoncciseettes; hinna he xiqiseyakka, «Izi nuuppe koyzayssa nu ooththana mala, kiyateththi kumida siiqo nu bessana malanne nuni nu godaara kumeththa ashketeththan daana malassa.» [6:8]
\iot Ha Maxaafay Oykkida Kumeththa Qofa
\io1 GODAY ba asaa qaxxayees \ior 1:1—2:11 \ior*
\io1 Sinththara diza hidota \ior 2:12-13 \ior*
\io1 Xoossi dere kaaleththiza iitatanne wordo nabeta qaxxayana \ior 3:1-12 \ior*
\io1 Ooraththa Isra7eelen Xoossa keeth ooraththa \ior 4:1—5:15 \ior*
\io1 Isra7eeley ooththida qoho qoncceth \ior 6:1—7:7 \ior*
\io1 Derezi Xoossako simo \ior 7:8-20 \ior*
\c 1
\p
\v 1 Yuhuda kawo Iyo7aatame, Akaazenne Hizqiyaasa wode Moreshete as gidida Mikiyaasakko Samaariya gishshassinne Yerusalaame gishshas yida Xoossa qaalay hayssa,\x - \xo 1:1 \xo*\xt 2Kawo 15:32—16:20; 18:1—20:21; 2Taari 27:1-7; 28:1—32:33\xt*\x*
\b
\q1
\v 2 Intteno deretoo;
\q2 intte wurikka siyite!
\q2 Ha biitta bolla dizayti wurikka
\q2 haa ezgi siyite;
\q2 salo GODAY ba geeshsha keeththaan
\q2 uttidi intte iita oosoza
\q2 intte bolla markkattees.
\s1 Samaariya Bollanne Yerusalaame Bolla Yida Pirda
\q1
\v 3 Hekko Xoossi ba dizasoppe yaana;
\q2 yiidikka biitta bollan
\q2 dhoqqasohon
\q2 dhoqqasohon hemettana.
\q1
\v 4 Muqaadday tama be7idi
\q2 seeriza malanne
\q2 haaththi aafora
\q2 duge goggiza mala
\q2 he wode zumati
\q2 iza toho garsan seerana;
\q2 shoobbatikka phalqetti
\q2 wodhdhana.
\p
\v 5 Hessi wuri hananay Yaaqoobey ooththida mooro gishshassinne Isra7eele nayta nagara gishshassa; Isra7eele asay iita ooththanaas gaaso gididay oonee? Izis waanna katamayo Samaariya gidekkee? Yuhuda asay eeqa goynnidi nagara ooththana mala gaththiday oonee? Yerusalaame gidekkee? 
\v 6 Hessa gishshas tani Samaariya keeth laallettidasonne woyne miththi tokettizaso kessana; iza keexettida yochcha shuchcha ta duge shoobban olananne izi xapho shodda dhayssana. 
\v 7 Izi eeqati wurikka meqerettana; izi eeqa keeththan diza laymatizaytas imettidaazi wuri taman xuugettana; izi misletakka ubbaa ta dhayssana; iza baas imettidayssa layman shiishshida mala ha7ikka izis dizaazi layman ekkizaaz gidana.
\s1 Yeehonne Ceece
\p
\v 8 Hessa geedon tani yeekkays, wuu! Wuy gays; ta caammay baynda mela tohoninne mela kallo bays; worakana mala waassays; gutto mala waassays. 
\v 9 Izi madunththay paxonttaaz gidana; izippe aadhdhi Yuhudassara gidana; ta derey geliza penge Yerusalaame gakkides. 
\v 10 Geete deren haasayopite; yeeho mulekka yeekkofte; Beeti-Li7ofaaran gudulla bolla genderettite. 
\v 11 Intteno Shafiren dizaytoo may7oy baynda kallo Yeellatishe aadhdhite; Xa7inan dizayti heeppe kezettenna; Beeti-Ezeeley ceece bolla dawus; intteska gakki shempanaaso gidanaas dandayukku. 
\v 12 Metoppe shempanaas koshshan Maroten dizayti meton waayetteettes; hessika Yerusalaame penge gakkanaas iita metoy Xoossa achchafe yida gishshassa. 
\v 13 Intteno Laakishen dizaytoo parata gaarera gaththi oyseththite. Xiyoone macca naytas koyro nagaray inttenakko. Isra7eeles qohoy intte achchafe beettides. 
\v 14 Hessa gishshas intte Moreshet-Gates imota immana; Akiziibe katamay Isra7eele kawota baleththiza katama gidana. 
\v 15 Inttenoo Mareeshan dizaytoo! Ta inttena xoonizaade intte bolla ehana; Isra7eeles bonchcho gididaazi Adulaame ha yaana. 
\v 16 Intte isttan ufayettiza intte nayti inttefe di7etti baana gishshas intte hu7e bulusite.
\c 2
\s1 Asa Qofanne Xoossa Qofa
\p
\v 1 Iita ooththanaas qoppizaytassinne hiixan dishe gene ooththanaas yo7o tukkizaytas aayye ana! Omars qoppoyssa maalado wonttara poleettessinne hessa ooththanaaskka wolqqara deettes. 
\v 2 Asa gade amottida mala oykkeettes; asa keeththika amottidi ekkeettes; ba lagge keeththinne biitta baleththon ekkeettes. 
\v 3 Hessa gishshas Xoossi, «Hekko ta hessa mala dere bolla dhayssizaaz ekka yaana qoppadis; intte qasse hessafe kessi ekkana dandayekketa; intte bolla metoy yiza gishshas hessafe guye intte otoreteththan simeretteketa. 
\v 4 He wode derey intte bolla miicci kaa7ana; inttena qidhishe,
\q1 « ‹Nu mulera dhaydos;
\q2 ta dabbo gadey haras gishettides;
\q2 taappe bonqqi ekkidi
\q2 nu biitta nuna Xoonidaytas
\q2 gishides› gi zilalana» gides.
\b
\q1
\v 5 Hessa gishshas
\q2 Xoossa duulata giddon
\q2 gade saama yeggi gishanaadey
\q2 oonikka deenna.
\s1 Wordo Nabeta
\p
\v 6 Istta nabeti, «Tinbite nu bolla yootoppa; heytantta gishshas tinbite nuus yootoppa; nu bolla kawushshateththi gakkenna» gaana. 
\v 7 «Yaaqoobe soo asatoo hessaththo geetettanaas bessizee? Xoossa ayanay aggi aadhdherennee? Heytantta malakka ooththizee?» gi oychchana; «Suure oge hemettizaytas ta qaalay lo7o ooththi erennee? 
\v 8 Wurseththan intte ta dereta bolla morkke gidi dendideta; isttas ola qofay baynda dishin saroteththara aadhdhizayta bollafe seelo may7o intte qaari ekkideta. 
\v 9 Istti dosiza istta keeththafe ta asa macca nayta kessi efideta; ta bonchchoka istta naytappe mernaas ekkideta. 
\v 10 Dendidi hessafe kichchite; hessi inttes shempposo gidenna; gaasoykka tunidessinne daro moorettides. 
\v 11 Baleththiza wordo asi yiidi, ‹Daro woyne ushshu gishshassinne maththosiza ushsha gishshas giidi tinbite inttes yootana› giikko hayssa derezas dosettida nabe gidana.
\s1 As Ashshanaas Imettida Hidota
\p
\v 12 «Yaaqoobe! Tumappe ta inttena issiso shiishshana; Isra7eeletappe attidayta ta issi bolla ehana; yire giddon diza mehe malanne demban heemettiza mehe mala tani inttena issi bolla shiishshana; intte derey wuri as xalla gidana. 
\v 13 Menththizay isttafe kaseti kezi baana; isttika pengeza menththidi kezi baana; istta kawoy Xoossay isttafe sinththe aadhdhi kaaleththana» gida.
\c 3
\s1 Iita oge Kaaleththizaytanne Wordo Nabeta Bolla Xoossa Hanqo
\p
\v 1 Qasseka, «Intteno Yaaqoobe kaaleththizaytanne Isra7eele keeththa asaa haarizaytoo siyite;
\q2 intte tumu pirda eranaas
\q2 inttes bessennee?
\q1
\v 2 Intte lo7o ixxideta;
\q2 iita qasse dosideta;
\q2 ta asaa galba shooqideta;
\q2 istta ashokka
\q2 meqeththafe shaakkideta.
\q1
\v 3 Ta asaa asho mideta;
\q2 galbaaka shooqideta;
\q2 istta meqeththika
\q2 menththereththideta;
\q2 asho caaciza bashen
\q2 caaciza malanne
\q2 distten doyssiza asho mala
\q2 qanxxereththideta» ta gadis.
\q1
\v 4 Isttika pude Xoossako
\q2 waassana shin
\q2 Xoossi istta waaso siyenna;
\q2 iitateththaa gishshas he wode
\q2 Xoossay ba ayfeso
\q2 isttafe haraso zaarana.
\p
\v 5 Xoossi, «Ta dere baleththiza nabeti
\q2 asi istta mizikko,
\q2 ‹Saroteththi dees› geettes.
\q2 Muzontta aggiko qasse,
\q2 ‹Olay yees›
\q2 gi awajjanaas dendeteettes.
\q1
\v 6 Hessa gishshas istta bolla
\q2 qammay beettontta,
\q2 dhumay erontta gakki
\q2 wodhdhana;
\q2 nabeta bolla arshey gelananne
\q2 gallassay isttas qammana.
\q1
\v 7 Buro marotizayti kawuyana;
\q2 tinbite yootizayti yeellatana;
\q2 wurikka ba ayfeso kammana;
\q2 gaasoykka isttas zaaroy
\q2 Xoossa achchafe baynda
\q2 gishshassa» gides.
\b
\q1
\v 8 Ta qasse Yaaqoobes
\q2 iza qohoza,
\q2 Isra7eelesikka
\q2 iza nagara yootanaas
\q2 wolqqan, Xoossa ayanan,
\q2 tuma pirdaninne
\q2 minoteththan kumadis.
\q1
\v 9 Intteno Yaaqoobe soo asa
\q2 kaaleththizaytoo!
\q2 Intteno Isra7eele dere haarizaytoo!
\q2 Tumu pirda kadhizaytoo!
\q2 Tumu gididaaz
\q2 ubbaa mirqqizaytoo!
\q2 Ane siyite.
\q1
\v 10 Xiyoone, asa suuth gussoninne
\q2 Yerusalaame iitateththan
\q2 kunththizayto!
\q2 Ane siyite.
\q1
\v 11 Kaaleththizayti matta7es pirdeettes;
\q2 qeeseti miishsha gishshas
\q2 tamaarseettes;
\q2 Nabetikka miishshe
\q2 mida gishshas yooteettes.
\q1 Hessa ubbaa ooththidikka,
\q2 «Xoossi nu giddon dees gidennee?
\q2 Ay iitaykka nu bolla gakkenna» gishe
\q2 Xoossan ceeqeteettes.
\q1
\v 12 Hessa gishshas intte geedon
\q2 Xiyooney goshsha biitta mala
\q2 goyettana;
\q1 Yerusalaameykka qolettida
\q2 keeththa doore gidana;
\q2 Xoossa Keeththay diza zumaykka
\q2 sharafa maatay iza bolla
\q2 diccida zuma gidana.\x - \xo 3:12 \xo*\xt Er 26:18\xt*\x*
\c 4
\s1 Xoossa Zuma
\p
\v 1 Wurseththa wode
\q1 Xoossa keeththi
\q2 iza bolla diza zumay
\q2 hara zuma ubbaafe
\q2 aadhdhi beettana;
\q2 hara zumatappe bollara
\q2 dhoqqu gaana;
\q2 dereykka izakko goochchana.
\q1
\v 2 Daro kawoteththati izakko yiidi,
\q2 «Xoossa zumaakko haa yiite;
\q2 Yaaqoobe Godaakko ane boos;
\q2 nu iza ogera baana mala
\q2 nuna izi ba oge
\q2 tamaarsana» gida;
\q2 wogay Xiyooneppe,
\q2 Xoossa qaalay
\q2 qasse Yerusalaameppe yaana.
\q1
\v 3 Izi daro asa giddon pirdana;
\q2 haahoninne matan diza
\q2 wolqqama katama giddon diza
\q2 oosh essana;
\q2 istti ba giththa
\q2 mashsha maarasha,
\q2 ba toorakka baaca histti qoxxana;
\q2 issi kawoy hara kawo bolla
\q2 mashsha denththenna;
\q2 hessafe guye istti
\q2 ola timirte tamaarettenna.\x - \xo 4:3 \xo*\xt Iyu 3:10\xt*\x*
\q1
\v 4 Issi asi ba woyne miththa garsankka
\q2 ba balase miththa garsan uttana;
\q2 istta babisiza miishshi deenna;
\q2 Ubbaafe wolqqama
\q2 GODAA doonay
\q2 hayssa yootides.
\p
\v 5 Hankko derey ba eeqa sunththan bees; nuni qasse mernaappe mernaa gakkanaas nu GODAA sunththan baana.
\s1 Buroppe Hanana Xoossa Qofa
\p
\v 6 GODAY, «Tani he gallas gundidayta shiishshana; bete bidaytanne muuzottana mala ta aaththa immidayta ubbaa issiso shiishshana. 
\v 7 Gundatappe attidaytanne qohettidayta ta istta mino dere kessana; he gallassayfe doommidi mernaa gakkanaas GODAY Xiyoone zuman istta bolla kawotana. 
\v 8 Haysso nenan uttidi mehe heemmiza dhoqqa zumazoo! Xiyoone macca nayta naagana giiga uttida zumazoo! Beni ne haariza derey nees simmana; ne kawoteththay Yerusalaame macca nays gidana. 
\v 9 Histtiin ne ha7i aazas waassay? Nees kawoy bayee? Neni miixay oykkida maccassay mala un7ettiday nena zorizay dhaynee? 
\v 10 Hanne Xiyoone macca nayee! Miixattiza maccassay mala ne metotana; ha7i qasse ne katamappe gede kezada coo demban de7ana bessiza gishshas Baabiloone baana; ne hee baada heen ne morkketa kusheppe attana; GODAY nena heen ne morkketappe ashshana. 
\v 11 Ha7i qasse daro hankko dere asay ne bolla shiiqides; Isttika, ‹Hanna tunidaaz gidu! nu ayfey Xiyoono qidhen xeello› gaana. 
\v 12 Gido attiin istti Xoossa qofa erettenna; bukettanaas balen shiiqiza mirqqe kaththa mala bana shiishshizaade qofa istti erettenna. 
\v 13 Hanne Xiyoone nayee dendada kaththaa bukka; ta nees birata kacenne xarqimala xugunth immana; nekka hankko dereza izan liiqisana» gides. Istti genen shiishshidayssa Xoossas, istta haarokka ubbaa biitta ubbaa haariza Godaas ne shiishshandasa.
\c 5
\s1 Beeteliheemeppe Haarizaadey Yaanayssas Imettida Hidota Qaala
\p
\v 1 Hanne neni ola asata katamaye, ne ola asaa ziirsa. Nuna oykkanaas yuuyi aadhdhida; Isra7eele haarizayssas shagalan guufera shocana. 
\v 2 Hanne ne qasse Beeteliheeme Efraata, Yuhuda zarkketappe neni guuth gidikkoka izas kessay kase beni wodeppe gidida Isra7eele haarizaadey ne giddofe taas kezana.\x - \xo 5:2 \xo*\xt Mato 2:6; Yoha 7:42\xt*\x* 
\v 3 Hessa gishshas yelizaara miixattada yelana gakkanaas Isra7eeley yegetta attana; hankko attida ishatikka simmidi Isra7eele asara walakettana. 
\v 4 GODAA wolqqan GODAA ba Xoossa sunththa gitateththan minni eqqananne ba mehe izi heemmana; he wode iza wolqqateththay biitta gaxa gakkana gishshas asay giiga duus daana. 
\v 5 Isttas saroteththi iza gidana.
\p GODAY Isra7eele Asaa Ashshananne Istta Morkketa Dhayssana Asoore asay nu biitta worajjishin nu miixataka\f + \fr 5:5 \fr*\ft Nu miixata gizayssa kase wode birsheththati nu biitta geettes.\ft*\f* menththi gelishin laappun heemmizayta hessafekka osppun halaqata nu iza bolla denththana. 
\v 6 Asoore derey mashshan Namuruude derey koohoppe shodettida giththa mashshan haarettana; Asoore asay nu biitta worajjishininne nu dhas bochchishin izi nuna ashshana. 
\v 7 Yaaqoobe zereththafe attidayti daro dere giddon Xoossa achchafe wodhdhiza ira mala maata bolla loddara puusishe biitta kaaleththiza puuse ira mala asappe aykkoka koyontta asa gidana. 
\v 8 Wora do7ata giddon diza gaammoy, ba tohora icci menththereththishe biza mala, menththereththoyssaka izappe oonikka woththi ekkanaas dandayonttayssa mala; Daro dorsa giddon diza wodalla gaammo mala; Yaaqoobe zereththafe attidayti hankko dereta giddoninne daro asa giddon hessa mala gidana. 
\v 9 Ne kushey ne morkketa xoonidi dhoqqu dhoqqu gaana; ne morkketi wurikka dhayana. 
\v 10 He wode Xoossi, «Ta intte giddofe intte parata dhayssana; para-gaaretakka mulera dhayssana. 
\v 11 Intte biittan diza katamatakka dhayssana; intte miixataka ubbaa laallana. 
\v 12 Intte marotizayssaka dhayssana; hessafe guye marotekketa. 
\v 13 Masetti kezida intte eeqa misletanne intte eeqasohotakka ta intte giddofe dhayssana; hayssafe guye intte intte kushen ooththidaytas goynneketa. 
\v 14 Asheero geetettiza eeqiza misleyo ta intte giddofe shoddana; ta intte katamaakka dhayssana. 
\v 15 Taas azazettontta dereta wolqqama hanqon ta halo kessana» gees.
\c 6
\s1 Xoossay Isra7eele Nayta Mootiza Mooto
\p
\v 1 Xoossi gizayssa siyite; «Dendite! Intte meto zumatas yootite; zumatikka intte gizayssa siyetto. 
\v 2 Zumatoo! Xoossa mooto siyite; Intteno biitta mino xaphotoo siyite; Xoossas asara palamay dees; izi Isra7eele naytara pirdeettes. 
\v 3 Ta derezoo! Ta nena wosttadinaa? Ta nees aazan tooho gidadinaa? Ane taas zaaro imma. 
\v 4 Ta nena Gibxeppe kessadis; aylleteththa biittafekka wozzadis; nena kaaleththana mala Muse, Aaroonenne Maaramo nees yeddadis.\x - \xo 6:4 \xo*\xt Kessa 12:50-51; 15:20\xt*\x* 
\v 5 Ta derezoo! Mo7aabe kawoy Balaaqey iza zoriin Bi7oore naa Balaamey izas zaaroyssa ane yuushshi qopite; Xoossa xilloteththa ooso intte shaakki erana mala, Shiiximeppe Gelgela gakkanaas intte hemettoyssa ane qopite» gides. 
\v 6 Ta ay ekkada Xoossa sinththe shiiqoo? De7o Xoossas wostta goynnoo? Xuugettiza yarsho issi layththa marara gaththa ekka baada iza sinth shiiqooshaa? 
\v 7 Issi shii dharshotanne 10,000 goggiza zaytey Xoossa ufayssandeeshaa? Ta iza qohoyssa gishshas ta bayra naaza immizaakko ta shemppo nagara gishshas ta uloppe wodhdhida yelo izas immooshaa? 
\v 8 Asa nawu! Izi nena lo7o miish bessides Xoossi neeppe koyzay aazee? Lo7o ooththana mala maaroteth ne dosana malanne Xoossa sinththan neni ashketeththara baana mala gidennee?
\s1 Isra7eele Nayta Qohonne Xoossa Hanqo
\p
\v 9 Xoossas baboy aadhdhida erateththa; Siyite! Xoossi katamayo hizgi xeygees, «Iza hanqo guufeza qopite; hessaka giigsiday oonakko wozinan woththite.» 
\v 10 Iitateththa keeththatoo! Intte genen shiishshida intte miish wordo maka miishshan makki intte shiishshida shuunniza miishshaa ta doganee? 
\v 11 baleththiza maka miish oykkidaade, wordo maka miishsha karaxiiten xunttidaade xillisanaas taas bessizee? 
\v 12 Izi deren dure asati as qohizaadentta; izin diza asay wordanchcha xalla; istta inxarsay baleththiza inxarsa. 
\v 13 Hessa gishshas ta nena dhayssana dendadis; ne nagara geedon ta nena laallana. 
\v 14 Ne maanashin kallaka; ne qanththay coo mela daana; Ne shiishshanashin aykkoka nees shiiqenna; Ne shiishshidayssa tani mashshasinne tooras aaththa immana. 
\v 15 Ne zerana shin maxakka; wogara miththa zayte ne gum7ana shin he zayteza tiyetta; woyne miththa ayfe xunqqa shiishshanashin woyne ushshu ne uyakka. 
\v 16 Kawo Omire wogaanne kawo Akaabe keeththa wogaa ne ubbaa shiishsha oykkadasa; nekka istta haysi7e kaalladasa. Hessa gishshas nena dhayssas, ne derezakka tani qidhes aaththa immana; derey ne bolla qidhi kaa7ana.\x - \xo 6:16 \xo*\xt 1Kawo 16:23-34; 21:25-26\xt*\x*
\c 7
\s1 Isra7eele Asa Waaye
\p
\v 1 Tana aayye ana! Woyne miththa giddofe maxishin attida miththa ayfe bone qoriza asa mala gidadis; meetettiza woyne miththa ayfey deenna; nu izas amottiza eleli gakkiza balase miththa ayfeykka beettibeenna. 
\v 2 Xoossas babbiza asi biitta bollafe dhaydes; suure asi issaadeyka baawa; asi wurikka suuth gussanaas zuggees; issi issi asi ba isha yarden oykkees. 
\v 3 Iza kushey iita ooththanaas tamaardes; dere heemmizaadey kushe genththo koyees; pirdiza daannayka matta7e ekkees; wolqqamati bana koshshidaazi ooththeettes; wurikka issi bolla duulateettes. 
\v 4 Istta garsafe lo7o geetettidaadey agunththa mala keehi lo7o geetettizaadey qasse kindichcho mala inttena naagizaytas wodey gakkides; Xoossa pirda gallassay gakkides; asay shirotana wodey gakkides; 
\v 5 ne lagge ammanoppa; ne laggenkka ammanettofa; ne ki7on nenara aqizaariska ne yootizaaz akeekada yoota. 
\v 6 Attuma nay ba aawa kadhana; macca naykka ba aayi bolla, naa machchaka ba bollotey bolla dendana; asas morkkey soo asa gidana.\x - \xo 7:6 \xo*\xt Mato 10:35-36; Luqa 12:53\xt*\x* 
\v 7 Tani gidikko Xoossa hidota ooththays; tana ashshida ta Xoossaa naagays; ta GODAYKKA taas siyana.
\s1 Xoossafe Yida Maarota
\p
\v 8 Ta morkkezoo! Ta bolla gakkidaazi nena ufayssofo; kundikokka ta dendana; Ta dhuman uttikokka Xoossay taas poo7o gidana. 
\v 9 Ta iza qohida gishshas izi ta gishshas eqqana gakkanaassinne taas pirdana gakkanaas Xoossay hanqettikokka ta dandayana; izi tana poo7on kessana; tanikka iza xilloteth beyana. 
\v 10 Ta morkkezakka hessa beyandus; iza yeellatana. Tana, «GODAA ne Xoossay awan dizee?» gidaari kundeth ta ayfeti beyana; oge urqqa mala iza yedhettana. 
\v 11 Intte intte katama gimbe gimbiza wodeynne intte dhasika aassiza gallassi yaana. 
\v 12 He gallas asay Asooreppe Gibxe katamata, Gibxeppe Efiraaxise shaafa gakkanaas, abbafe abbaako, zumaappe zumaakko gakkanaas intteko yaana. 
\v 13 Istta ooso geedonne izin diza asaa gaason biittaya aykkoy bayndaaz gidana.
\s1 Galatanne Woosa
\p
\v 14 Wora giddoninne cilila maata giddon barkka dizayti ne mehe gidida ne dereta neni ne guufera heemma; beni wode mala istti Baasaaneninne Gala7aaden heemettetto. 
\v 15 Ne kase Gibxeppe kezida wodeza mala tani ta malata istta bessana. 
\v 16 Ayzaabeti hessa beyananne yeellatana; isttaskka wolqqay dhayana; istti ba doona ba kushen tuccana; istta hayththika tullana. 
\v 17 Biitta bollara tiran gooshettiza medheteththata mala, shooshsha mala istti biitta laaccana; ba diza gongolo giddofe kokkorishe kezana; babbishe GODAA nu Xoossako simmana; isttika inttes babbana. 
\v 18 Dhayshe attida zereththaa nagara atto gi maariza ne mala Xoossi oonee? Neni mernaas hanqettaka; maaro gelizayssan ne ufayettaasa. 
\v 19 Simmadakka nuus ne qadhettaasa; nu nagarakka ne toho garsan yedhdhaasa; nu qohozakka ubbaa gede cima abba giddo yeggaasa. 
\v 20 Beni wodeppe oykkada kase nu aawatas caaqo qaala ne gelida mala Yaaqoobes ammaneteth Abrahaames maaroteth ooththaasa.