\id LAM - Gamo Full Bible final version
\ide UTF-8
\h Ermaasa zilas
\toc1 Ermaasa zilas
\toc2 Ermaasa zilas
\toc3 Er Zila
\mt1 Ermaasa Zilas
\imt1 Giddo Qofa
\ip Ermaasa zilasi Kirstoosi yelettanaappe kase 586 layththan Yerusalaamey laalettida gishshassinne derey goodettida gishshas ichchashu zilassa ginxota shiishshi oykkides; ha maxaafan dariza baggay yeeho gishshassinne kayoteththa gishshas yootizaa gidikkoka asi Xoossan ammanettana gishshassinne hidota qanxxontta daana mala tamaarsiza ginxo kifileykka izan dees; hayti zilasati ayhuda asay Kirstoosi yelettanaappe kase 586 layththan deraa bolla gakkida bashshaa yuushshi qoppana mala layththan layththan xoomaninne kayoteththan Xoossa goyno wogata istti poliza gallassatan go7etteettes.
\iot Ha Maxaafay Oykkida Kumeththa Qofa
\io1 Koyro zilas: Yerusalaame waayenne kayoteth \ior 1:1-22 \ior*
\io1 Nam7anththo zilas: Xoossi Yerusalaame bolla yeggida qixaate \ior 2:1-12 \ior*
\io1 Heedzdzanththo zilas: Sinththafe yaana hidota \ior 3:1-66 \ior*
\io1 Oydanththo zilas: Yerusalaame dhayo \ior 4:1-22 \ior*
\io1 Ichchashanththo zilas: Maaroteth demmanaas woosa \ior 5:1-22 \ior*
\c 1
\s1 Yerusalaame Waayenne Kayo
\q1
\v 1 Kase izin daro kawoteththay
\q2 diza katamaya
\q2 waanada oletta attadee!
\q2 Dereta giddon kase gita gididaara
\q2 waanada am7i mala gidadee!
\q2 Awuraajjata garsan
\q2 godatto gididaara
\q2 ha7i waanada aylle gidadee!
\q1
\v 2 Iza giddoththi
\q2 camo yeeho yeekkawus;
\q2 izis afunththayka
\q2 shagalara goggees;
\q2 izi laggetappe izo
\q2 minththeththizay
\q2 oonikka deenna;
\q2 ubbatikka izo kaddida;
\q2 zaaridikka izis morkke gidida.
\q1
\v 3 Yuhuday daro waayettidaappenne
\q2 tooshettidaappe guye di7ettadus;
\q2 iza kawoteththata
\q2 giddon uttadus;
\q2 izis shempizasoykka dhaydes;
\q2 iza meto garsan dishin
\q2 gooddizayti ubbay izo demmida.
\q1
\v 4 Oonikka izi ba7aaleta
\q2 bonchchanaas
\q2 yontta gishshas
\q2 Xiyoone ogeti yeekkeettes;
\q2 izi pengetara gelizaynne
\q2 kezizay deenna;
\q2 izi qeeseti ceeceettes;
\q2 geela7otikka muuzotteettes;
\q2 izakka gita meto
\q2 garsan tuggatawus.
\q1
\v 5 Izi nagaray daro gidida gaason
\q2 GODAY izi bolla meto yeggides;
\q2 izi morkketi izo haarida;
\q2 izi naytikka morkketan di7ettida;
\q2 izi morkketas duussi lo7ides.
\q1
\v 6 Xiyoone macca nayppe
\q2 izi puulateththinne teemay
\q2 shaaketti kichchides;
\q2 izi daannati maata
\q2 mizasoy dhayda
\q2 genessa mala gidida;
\q2 istti bana gooddizaytappe
\q2 wolqqay wuriin baqatida.
\q1
\v 7 Yerusalaamey metotida wodeninne
\q2 waayettida gallassatan
\q2 kase izis diza aqota
\q2 yuushsha qoppawus;
\q2 iza morkke kushen
\q2 kundida wode
\q2 izo maaddizay
\q2 oonikka baynda wode,
\q2 izi morkketi izi kundeththaa
\q2 be7idi izi bolla miiccida.
\q1
\v 8 Yerusalaamey daro deexo
\q2 nagara ooththadus;
\q2 kadheska attadus;
\q2 iza kallo dishin be7ida gishshas
\q2 kase izo bonchchidayti ubbay
\q2 izo kadhida;
\q2 izakka ba baggara yeellatada
\q2 biitta xeellashe guye simmadus.
\q1
\v 9 Izi tunateththi
\q2 izi may7o bolla beettides;
\q2 sinththafe izi bolla hananayssa
\q2 iza qoppabeekku;
\q2 izi kundeththi
\q2 daganththizaaz gidides;
\q2 iza, «Ta Godaa Xoossoo!
\q2 Ta metotiza metoza be7a;
\q2 ta morkketi tana xoonida»
\q2 ga woossiinkka
\q2 izo minththeththizay
\q2 oonikka beettibeenna.
\q1
\v 10 Izi aqota ubbaa bolla
\q2 morkkey ba kushe yeddides;
\q2 Xoossa asaa shiiqon
\q2 gelontta mala neni diggidayti
\q2 eeqa xoossatas
\q2 goynniza ayzaabeti
\q2 gede izi Xoossa Keeththan
\q2 gelishin be7adus.
\q1
\v 11 Izi asay miza kath demmanaas
\q2 koshshan daaburees;
\q2 shemppora paxa daanaas
\q2 baas diza
\q2 aqota maana kaththara
\q2 laammeettes;
\q2 Yerusalaame asay, «Abeet GODAWU!
\q2 Nuni kawuyidos;
\q2 nuna xeellada nuus qoppa.
\b
\q1
\v 12 «Godaa Xoossi
\q2 ba wolqqama hanqoza
\q2 nu bolla yeddida wode
\q2 nu bolla gakkida meto mala
\q2 metoy gakkida asi dizaa gidikko
\q2 intteno ogera aadhdhi biza
\q2 ubbato ane be7ite!
\q2 Ha metoy inttes
\q2 kawushsha misatizee?
\b
\q1
\v 13 «Izi bolla dhoqqasohoppe
\q2 tama yeddides;
\q2 he tamazikka nuus
\q2 meqeththan gelides;
\q2 nu tohota qachchanaas
\q2 gite yeggides;
\q2 histtidi nuna
\q2 guye zaari kundisides;
\q2 kumeththa gallas
\q2 nuna daaburssides;
\q2 coo melakka toylasides.
\b
\q1
\v 14 «Ta nagara shiishshi qachchidi
\q2 ta morgen woththides;
\q2 ta wolqqaka wursides;
\q2 tani eqettanaas
\q2 dandayontta morkketas
\q2 GODAY tana aaththi immides.
\b
\q1
\v 15 «Nu garsan diza olanchchata
\q2 ubbatara Xoossi eqettides;
\q2 nu giddofe yelagata dhayssanaas
\q2 olanchchata nu bolla yeddides.
\q2 Woyne miththa ayfe
\q2 ushshu kessanaas
\q2 yedhdhiza mala
\q2 GODAY boshettontta
\q2 geela7o misatiza
\q2 Yuhuda asaa yedhides.
\b
\q1
\v 16 «Morkkey nu bolla goobides;
\q2 nu naytikka barkka attida;
\q2 nuna zori minththeththizayti
\q2 nuuppe haakkida;
\q2 hessa gishshas ta yeekkayssinne
\q2 afunththa gussays.
\q1
\v 17 Xiyoona ba kushe miccadus;
\q2 izo minththeththizaadey deenna;
\q2 Yaaqoobe zaretas shooroti
\q2 izas morkke gidana mala
\q2 Xoossi azazo kessides;
\q2 Yerusalaameykka istta giddon
\q2 tuna miishsha mala qoodettadus.
\b
\q1
\v 18 «Xoossi xillo;
\q2 tani gidikko
\q2 iza azazo bolla makkalladis;
\q2 intte wurikka siyite;
\q2 ta metozakka xeellite;
\q2 macca naytinne
\q2 naateththa attuma nayti
\q2 taappe di7etti bida.
\q1
\v 19 Tani ta dosizayta xeygadis;
\q2 istti gidikko tana kaddida;
\q2 ta qeesetinne cimati
\q2 ba shemppo ashshanaas
\q2 kath koyishe
\q2 katamay giddon wurida.
\b
\q1
\v 20 «Abeet GODAWU!
\q2 Ta waayeza be7a!
\q2 ta giddo asateththay metotides;
\q2 ta keeha makkalladis;
\q2 ta wozinaykka meqqides;
\q2 Karen gidiin soon
\q2 deraa hayqoy wursees.
\b
\q1
\v 21 «Derey ta zilalizayssa siyides;
\q2 gido attiin oonikka tana
\q2 minththeththizaadey
\q2 beettibeenna;
\q2 ta morkketi ubbayka
\q2 ta metotoyssa siyida;
\q2 neni ooththoyssaka eridi
\q2 istti ufayettida;
\q2 ne istta bolla ehana ga
\q2 qachchida gallassaya yu;
\q2 isttika ta mala zilaletto.
\b
\q1
\v 22 «Istta iitateththi
\q2 ne sinththan beetto;
\q2 ta nagara gaason
\q2 ne ta bolla ooththoyssaththo
\q2 istta bollaka ooththa;
\q2 ta ceecada zilaliza
\q2 zilasay darides;
\q2 ta wozinaykka daaburdes»
\q2 gishe waasseettes.
\c 2
\s1 Xoossi Yerusalaame Bolla Ehida Hanqo
\p
\v 1 GODAY Xiyoone macca nayo ba hanqon wostti kawushshidee!
\q1 Isra7eele bonchcho
\q2 saloppe duge sa7an yeggides;
\q2 izi ba hanqo gallas ba
\q2 toho shempisizaso
\q2 gididaaro zaari
\q2 qoppanaas koyibeenna.
\q1
\v 2 Yaaqoobe duussaso ubbaa Xoossi
\q2 qadhetay baynda dhayssides;
\q2 Yuhuda dere miixata
\q2 izi ba hanqon laallides;
\q2 izi kawoteththanne
\q2 dere ayssizayta
\q2 kawushshidi duge
\q2 biittan yeggides.
\q1
\v 3 Izi ba gita hanqon
\q2 Isra7eele wolqqa liiqisides;
\q2 morkkey iza olanaas yiza wode
\q2 ba maado kushe
\q2 isttafe denththides;
\q2 ba yuushon diza ubbaa
\q2 miza tama laco mala
\q2 iza hanqoy Yaaqoobe bolla
\q2 eexxi kezides.
\q1
\v 4 Izi morkke mala
\q2 wondafe dafi oykkides;
\q2 iza ushachcha kushey
\q2 yiishshaa yeddanaas giigsides;
\q2 bana lo7izayta ubbaa
\q2 morkke mala shukkides;
\q2 Xiyoone dunkaaneta bollaka
\q2 ba hanqo tama mala qolides.
\q1
\v 5 Xoossi morkke mala gididi
\q2 Isra7eele dippi histtides;
\q2 kawoteththa keeththaaka
\q2 dhayssides;
\q2 izi miixaakka laallides;
\q2 Yuhuda asaa bolla
\q2 kayonne zilas darssides.
\q1
\v 6 Izi ba keeththa kaththa giddon diza
\q2 gaabba shoddiza mala
\q2 shoddi olides;
\q2 Xoossi Xiyoono
\q2 iza layththan layththan
\q2 bonchchiza ba7aaletanne
\q2 sambatata diggides;
\q2 izi ba mino hanqon
\q2 kawozanne qeeseza
\q2 kawushshides.
\q1
\v 7 GODAY yarsho
\q2 yarshizasohoza kadhides;
\q2 ba keeththaaka aggides;
\q2 ba kawoteththa keeththa gimbeta
\q2 morkkes aaththi immides;
\q2 ba7aale gallassatan
\q2 ooththizayssaththo
\q2 istti GODAA Keeththan
\q2 keehi waassida.
\q1
\v 8 GODAY Xiyoone katama gimbe
\q2 laallanaas qanxxi dendides;
\q2 mixe wodoroza piddisides;
\q2 izi istta dhayssontta aggenna;
\q2 miixatinne gimbetti laalettida;
\q2 isttika issife dhayda.
\q1
\v 9 Izi pengeti duge biittan gelida;
\q2 kare gordiza birata kolatati
\q2 meqeretti wodhdhida;
\q2 izi kawozinne daannati
\q2 ayzaabetan di7etti bida;
\q2 hayssafe guye kase isttas diza
\q2 wogay ooththenna;
\q2 izi nabetaska hayssafe guye
\q2 GODAAPPE ajjuutay qonccenna.
\q1
\v 10 Xiyoone dere cimati
\q2 biitta bolla co7u gi uttida;
\q2 istti ba hu7en gudulla laallida;
\q2 maaqaka may7ida;
\q2 Yerusalaame geela7oti
\q2 duge biitta xeellida.
\q1
\v 11 Ta derey wurides;
\q2 naateththa naytinne qeeri nayti
\q2 katama giddon labbani kundida.
\q2 Hessa gishshas ta ayfey
\q2 afunththan baljumides;
\q2 taas maracey kokkorides;
\q2 ta wozinaykka seerides;
\q1
\v 12 Olason madunxi kundida
\q2 asata mala
\q2 katamay giddon istti daaburda;
\q2 istti bantta aayeta,
\q2 «Kaththinne haaththi
\q2 nuus awan dizee?»
\q2 gi oychchishe istti qese bolla
\q2 borkotidi shemppo kezida.
\b
\q1
\v 13 «Hanne Yerusalaame!
\q2 Ta ne gishshas
\q2 ay gaanaas dandayazinaa?
\q2 Ta nena aazara ginasa xeelloo?
\q2 Hanne dosettida
\q2 Xiyoone geela7oyee!
\q2 Ta nena wostta minththeththanaas
\q2 dandayazinaa?
\q2 ne madunththay
\q2 abbafeka cimmatees;
\q2 nena paththanaas
\q2 dandayzay oonee?
\q1
\v 14 Ne nabeta ajjuutay
\q2 wordonne coo hada;
\q2 ne nagara qonccisidi
\q2 nena di7eteththafe ashshettenna;
\q2 istti nees yootiza tinbitey
\q2 baleththizaazinne
\q2 ogeppe kare kessizaaza.
\m
\v 15 Ne achchara aadhdhi biza ubbay
\q2 ne bolla ba kushe baqqi kaa7ana;
\q2 biitta ubbaan
\q2 aadho lo7o geetettiza
\q2 katamayanne
\q2 dere ubbay ufayettiza
\q2 katamaya hanii?» gaana;
\q2 qidhishekka ba hu7e qaaththana.
\b
\q1
\v 16 Ne morkketi ubbay issife
\q2 bantta doona keehi doyda;
\q2 bantta ach saxxishe qidhida;
\q2 «Nuni izo mittidos!
\q2 nuni amottidaara hanno;
\q2 shemppora paxa diidi
\q2 gakki ayfen be7idos» gida.
\b
\q1
\v 17 Xoossi ba qoppidayssa ooththides;
\q2 daro wodeppe kase yootida
\q2 qaala polides;
\q2 izi nena qadhetay
\q2 baynda laallides;
\q2 ne waayettishin
\q2 morkkey ufayettana mala
\q2 ne morkketa
\q2 dhoqqu dhoqqu histtides.
\q1
\v 18 Yerusalaame gimbe
\q2 giddon diza asawu!
\q2 Xoossaako waassite;
\q2 intte afunththi omarsinne
\q2 gallas di7o mala goggo;
\q2 intteka shempofte;
\q2 intte ayfesikka shemppo immofte.
\q1
\v 19 Qammaa kumeth dendidi waassite;
\q2 Godaa sinththan intte wozina
\q2 haaththa mala gussite;
\q2 oge doonan koshatti kundida
\q2 ne nayta
\q2 shemppo gishshas ne kushe
\q2 pude izakko denththada woossa.
\q1
\v 20 Abeet GODAWU!
\q2 Hayssa ne be7a!
\q2 Neni hayssaththo kase oona bolla
\q2 ooththa erizaakko ane akeeka;
\q2 aaya yela dichchida naa
\q2 zaara maanaas bessizee?
\q2 Qeeseynne nabey
\q2 Xoossa Keeththan
\q2 hayqqanaas bessizee?
\q1
\v 21 Yelagatinne cimati hayqqidi
\q2 ogen kundi attida;
\q2 yelaga maccassatinne
\q2 attumati mashshan hayqqida;
\q2 ne hanqettida gallas
\q2 istta wodhadasa;
\q2 qadhetay bayndaka shukkadasa.
\q1
\v 22 Ba7aale gallas diggisas
\q2 xeygiza mala
\q2 ta morkketa ta bolla xeygadasa;
\q2 ne hanqo gallas
\q2 oonikka kessi ekkibeenna;
\q2 woykko shemppora paxa
\q2 attiday deenna;
\q2 ta yela dichchidayta
\q2 morkkey taappe dhayssides.
\c 3
\s1 Maareteththan Beettiza Hidota
\q1
\v 1 Godaa hanqo guufen waaye be7ida
\q2 asi tana.
\q1
\v 2 Izi tana ba sinththafe
\q2 kessi yeddides;
\q2 poo7oy baynda gede dhuman
\q2 tana gelththides.
\q1
\v 3 Izi kumeththa gallas
\q2 zaari zaaridi tana shocides.
\q1
\v 4 Izi ta asateththaaka ceegissides;
\q2 ta meqeththatakka
\q2 menththereththides.
\q1
\v 5 Izi tana metoninne
\q2 iita tugga giddo yeggides.
\q1
\v 6 Hayqqidi gam7ida asa mala
\q2 tani dhuman
\q2 daana mala ooththides.
\q1
\v 7 Ta kezontta mala
\q2 ta yuushoza dirdes;
\q2 mino sansalatan
\q2 tana qachchides.
\q1
\v 8 Tani maado koyada
\q2 waassa xeygiinkka
\q2 izi ta waasaa
\q2 siyanaas koyibeenna.
\q1
\v 9 Ta ogeza masettida
\q2 shuchchan gordides;
\q2 ta aadhdha biza
\q2 ogezakka geellasides.
\q1
\v 10 Izi taas zamadi uttida
\q2 zardo mala gidides;
\q2 qasseka qotetti naagiza
\q2 gaammo mala gidides.
\q1
\v 11 Tana ta biza ogeppe
\q2 goochchi kessidi
\q2 duusereththi yeggides;
\q2 tana asi bayndason olaagides.
\q1
\v 12 Izi ba wondafe
\q2 dafi oykkides;
\q2 tana caddanaas
\q2 ba yiish giigsi woththides.
\q1
\v 13 Izi yiishshaa yeddidi
\q2 taas wozina ayfen caddides.
\q1
\v 14 Tani ta dere asaas
\q2 qidhe miish gidadis;
\q2 gallas kumeth ta bolla
\q2 qidhe mazamure yexxeettes.
\q1
\v 15 Izi ta de7oza camon kunththides;
\q2 izi tana ciye ushshu kalssides.
\q1
\v 16 Izi ta ach shuchchan menththides;
\q2 izi tana gudullan yedhettides.
\q1
\v 17 Ta shemppoys saroteththi dhaydes;
\q2 ufayssi izi aazakkonne
\q2 ta baladis.
\q1
\v 18 Hessa gishshas,
\q2 «Ta bonchchoy
\q2 taappe shaakettides;
\q2 tani Xoossafe naagiza hidota
\q2 ubbay dhaydes» gadis.
\b
\q1
\v 19 Ta waayenne ta toylateththaa
\q2 ta qoppishin ta de7oy
\q2 tana cammides.
\q1
\v 20 Ubbaa wodekka ta hayssa qoppishin
\q2 ta wozinay ceecees.
\q1
\v 21 Gidikkoka tani
\q2 hayssa qoppiza wode
\q2 taas sinththafe hidotay dees.
\q1
\v 22 Hessika nuni dhayontta aggiday
\q2 GODAA siiqoy
\q2 daro gidida gaasonna;
\q2 iza qadhetaykka mernaas
\q2 wurontta gishshassa.
\q1
\v 23 Istti maalado maalado ooraththa;
\q2 Ne ammaneteththayka daro.
\q1
\v 24 Taas qaaday GODAA;
\q2 hessa gishshas ta izan xalla
\q2 hidota ooththays.
\q1
\v 25 GODAY bana hidota
\q2 ooththizaytassinne
\q2 iza koyzaytas lo7o.
\q1
\v 26 GODAY as ashshiza ashoza
\q2 izaadey co7u gi naagikko lo7o.
\q1
\v 27 Asi yelagateththa woden
\q2 qambara tookkiko lo7o.
\b
\q1
\v 28 GODAY iza toossida gishshas
\q2 izi barkka co7u gi utto.
\q1
\v 29 Sinththafe izas hidotay daana
\q2 dandayza gishshas
\q2 bana ziqqi histti haariso.
\q1
\v 30 Baqqana koyidaades
\q2 izi ba shagala besso;
\q2 kawushshateththika ekko.
\q1
\v 31 GODAY ase mernaaskka
\q2 yeggi aggenna.
\q1
\v 32 Izi asa bolla meto ehikkoka
\q2 ba mernaa siiqon
\q2 simmi qadhettees;
\q1
\v 33 Izi odidi asa bolla meto
\q2 woykko waaye ehi erenna.
\q1
\v 34 Deraan diza qasho asay
\q2 ubbay genen yedhettishin,
\q1
\v 35 Ubbaafe Dhoqqa Xoossay beyishin
\q2 asas asateththa
\q2 maatay digettiza wode,
\q2
\v 36 qasseka tuma pirday
\q2 geellattiza wode
\q2 GODAY hessa mala
\q2 hanota demmennee?
\q1
\v 37 Xoossi azazontta dishin
\q2 ba gidaaz polanaas
\q2 dandayzay oonee?
\q1
\v 38 Iita gidiin woykko lo7o gidiin
\q2 ba gidaaz polizay
\q2 Ubbaafe Dhoqqa Xoossaa gidennee?
\q1
\v 39 Histtiin shemppora
\q2 paxa diza asi ba nagaran
\q2 qaxxayettishe aazas zuuzumizee?
\q1
\v 40 Hessa aggidi nuni
\q2 nu oge ane pilggi xeelloos;
\q2 GODAAKKOKA simmoos.
\q1
\v 41 Ane nuni nu wozinanne
\q2 nu kushe salon diza
\q2 Xoossako pude denththidi,
\q1
\v 42 «Nu GODAWU! Nuni makkallidos;
\q2 nagarakka ooththidos;
\q2 hessa gishshas neni
\q2 nuna maarabeekka.
\q1
\v 43 Neni hanqon kumada
\q2 nuna gooddadasa;
\q2 ne nuna
\q2 qadhetay baynda wodhadasa.
\q1
\v 44 Woosay neekko aadhdhi
\q2 bontta mala
\q2 nena shaaran kammadasa.
\q1
\v 45 Ne nuna ayzaabeta giddon
\q2 orcconne buura kessadasa.
\q1
\v 46 Nu morkketi ubbay
\q2 ba doona nu bolla doyda.
\q1
\v 47 Nuni bashshaninne
\q2 laaleteththan metoninne
\q2 shiron kumdos» goos.
\q1
\v 48 Ta derey wurida gishshas
\q2 ta ayfeppe afunththi
\q2 di7o mala goggides.
\q1
\v 49 Shempontta ubba wode
\q2 ta ayfeppe afunththi gukkees.
\q1
\v 50 Hessi hananay Xoossi saloppe
\q2 duge xeellana gakkanaassa.
\q1
\v 51 Tani diza kataman diza
\q2 ubbaa maccassata bolla
\q2 gakkida metoza
\q2 tani ta ayfen be7ida gishshas
\q2 ta wozinay ceecides.
\q1
\v 52 Gaasoykka baynda
\q2 taas morkke gididayti
\q2 kafo mala tana shankkatida.
\q1
\v 53 Istti tani shemppora
\q2 paxa dishin duge ollan yeggida;
\q2 shuchchika ta bolla olida.
\q1
\v 54 Haaththi kumidi
\q2 taas hu7e bollara goggides;
\q2 tani dhayadis gaada qoppadis.
\q1
\v 55 Ta GODAWU!
\q2 Tani ciimma olla giddon dashe
\q2 ne sunththa xeygadis.
\q1
\v 56 Ta waaso ne siyana mala
\q2 ta nena woossiin siyadasa.
\q1
\v 57 Ta nena xeygida wode
\q2 ne taakko shiiqada,
\q2 «Yayyofa» gadasa.
\q1
\v 58 Godoo! Ne taas mootettada
\q2 tana ashshadasa.
\q1
\v 59 GODAWU! Ne ta bolla
\q2 gakkida qohoza beyadasa;
\q2 ne taas pirda.
\q1
\v 60 Ta morkketi ta bolla
\q2 halo kessanaas qoppidayssanne
\q2 istti ta bolla
\q2 zuppetidayssa ne beyadasa.
\q1
\v 61 Ta GODAWU!
\q2 Istti tana cayida cashshanne
\q2 ta bolla maqettida maqqoza
\q2 ne siyadasa.
\q1
\v 62 Gallas kumeth ta morkketi
\q2 ta bolla saasuketteettessinne
\q2 zuuzumeettes.
\q1
\v 63 Ne istta xeella!
\q2 Istti eqqidi gidiin uttidi
\q2 ba yeththan tana caddeettes.
\q1
\v 64 Ta GODAWU! Ne isttas
\q2 istta ooso mala imma.
\q1
\v 65 Istta wozina dammisa;
\q2 Ne qanggeththi istta gakko.
\q1
\v 66 Abeet GODAWU!
\q2 Ne istta ne hanqon goodda;
\q2 salo garsafe dhayssa.
\c 4
\s1 Yerusalaame Bolla Gakkida Qixaate
\q1
\v 1 Worqqay waani tasides;
\q2 Walakay baynda muuruta worqqay
\q2 waani laamettidee!
\q2 Xoossa keeththi
\q2 keexettida bonchcho shuchchati
\q2 oge doonan laalettida.
\b
\q1
\v 2 Kase bonchchettida
\q2 worqqa misatiza
\q2 Xiyoone nayti ha7i waanidi
\q2 kushen urqqafe tilidi medhdhida
\q2 mana miishsha mala gididoo!
\q1
\v 3 Worakanati ba marata dichchanaas
\q2 ba dhanth dhanththeettes;
\q2 ta derey gidikko
\q2 bazzon diza
\q2 yanchcha kafota mala
\q2 menxe iitides.
\q1
\v 4 Daro saamettida gishshas
\q2 guuththa nayta inxarsi
\q2 pude gonggiraththara oykettides;
\q2 nayti kath woossida shin
\q2 oonikka isttas immibeenna.
\b
\q1
\v 5 Kase lo7o kath mizayti
\q2 ha7i metotidi
\q2 oge bolla toylattida;
\q2 kase lo7o may7o may7idi
\q2 ishalon diccidayti
\q2 ha7i bidinththan ichchida.
\q1
\v 6 Ta dereza bolla gakkida qixaatey
\q2 oona kusheykka
\q2 bochchontta dishin
\q2 eeson aadhdha wodhdhida
\q2 Sodoome katama
\q2 asaa gakkida qixaatezappeka
\q2 keehi iita.\x - \xo 4:6 \xo*\xt Medhe 19:24\xt*\x*
\q1
\v 7 Istta kaaleththizayti
\q2 shachchafe aadhdhida geeshsha;
\q2 maaththafe aadhdhi booththa;
\q2 istta bollay zo7o inqqufe
\q2 aadhdhida aarissa;
\q2 qasse isttas medhaykka
\q2 simpere geetettiza
\q2 shuchcha mala.
\b
\q1
\v 8 Ha7i gidikko istta medhay
\q2 shaalapeka aadhdhi karettides;
\q2 oonikka istta ogen be7idi erenna;
\q2 istti meqeth xalla attida;
\q2 mela miththa mala gidida.
\b
\q1
\v 9 Koshan hayqqidaytappe
\q2 mashshan hayqqidayti lo7o;
\q1
\v 10 Ta asaa bolla gakkida hanqo gaason
\q2 naytas mishettiza aayeti
\q2 ba yelida nayta
\q2 ba kushera doysi mida.\x - \xo 4:10 \xo*\xt Zaare 28:57; Hizi 5:10\xt*\x*
\q1
\v 11 Xoossi ba wolqqama
\q2 hanqoza qonccisides;
\q2 Xiyoono dippi histti
\q2 dhayssiza tama oyseththides.
\q1
\v 12 Biitta bolla diza kawotappe
\q2 woykko alame bolla diza
\q2 asaappe oonikka istta morkketi
\q2 woykko worajjizayti
\q2 Yerusalaame pengeta
\q2 menththi gelana giidi
\q2 oonikka qoppibeenna.
\b
\q1
\v 13 Hayssi haniday nabetinne
\q2 qeeseti ooththida
\q2 nagara gaasonna;
\q2 qasse istti xillota suuth
\q2 gussida gishshassa.
\b
\q1
\v 14 Qooqe asa mala
\q2 istti oge bolla gadigadana;
\q2 istti suuththan tunida gishshas
\q2 istta may7o bochchanaas
\q2 xalizaadey deenna.
\q1
\v 15 Hessa gishshas asay istta bolla,
\q2 «Kichchite! Intte tuna! Haakkite!
\q2 Nuna bochchofte!» gi waassana.
\b
\q2 Hessa gaason istti baqatidi
\q2 kawoteththaa giddon toylattishe
\q2 asay isttas, «Intte nunara
\q2 hayssan daanaas
\q2 dandayekketa» gida.
\q1
\v 16 Istta laalliday Xoossa;
\q2 hayssafe guye izi isttas qoppenna;
\q2 istta qeesetas
\q2 bonchchoy imettenna;
\q2 cimataska puulay deenna.
\b
\q1
\v 17 Nu ayfey maado demmanaas
\q2 xeellishe coo mela daaburdes;
\q2 nuna ashshanaas
\q2 dandayontta deretappe
\q2 maado demmanaas
\q2 laamotan naagidos.
\b
\q1
\v 18 Asay nu geedon eqqiza gishshas
\q2 nu ogera hemettanaas
\q2 dandaybeekko;
\q2 nuus wurseththi matides;
\q2 nu layththi wurides;
\q2 nu dhayza wodey gakkides.
\q1
\v 19 Nuna gooddizayti salora paalliza
\q2 gollefe aadhdhi eesoteettes;
\q2 istti nuna zuma bollara gooddida;
\q2 bazzon nuna zuggi naagida.
\b
\q1
\v 20 Nuni iza kuwa garsan
\q2 utti de7ana gi qoppidayssa,
\q2 Xoossi tiydayssa,
\q2 nuus de7o shemppoka gididayssa
\q2 bantta woximaden oykkida.
\q1
\v 21 Intteno Uuxe biittan diza
\q2 Eedoome asatoo!
\q2 Ufays nococu giite!
\q2 Gido attiin qaaday
\q2 inttenakka gakkana;
\q2 intte maththottananne
\q2 kallo attana.
\b
\q1
\v 22 Intteno Xiyoone asatoo!
\q2 Intte mooro gaason qaxxayettoyssi
\q2 inttes gidana;
\q2 hayssafe guye inttena
\q2 di7ettida biittan gam7isenna;
\q2 gido attiin Eedoome asatoo!
\q2 Izi inttena intte
\q2 nagara gishshas qaxxayana;
\q2 izi intte moorozakka
\q2 qoncce kessana.
\c 5
\s1 Maarettanaas Woossida Woosa
\p
\v 1 Abeet GODAWU!
\q1 Nu bolla gakkidayssa ne qoppa;
\q2 nu kawushshateththaka xeella.
\q1
\v 2 Nu biitta allagati laattida;
\q2 nu keeththaaka
\q2 baas duussaso ooththida.
\q1
\v 3 Nuni yi7o gididos;
\q2 nu aayeti am7eta gidida.
\q1
\v 4 Nuni nu haaththa
\q2 miishshan shammi uyidos;
\q2 nuni nu miththaaka
\q2 shammi ekkidos.
\q1
\v 5 Nuna gooddizayti
\q2 nuus geedon eqqida;
\q2 keehippe daaburdos;
\q2 shempoka digettidos.
\q1
\v 6 Nuni kath kallanaas giidi
\q2 Asoore asatassinne
\q2 Gibxes kushe immidos.
\q1
\v 7 Nu aawati nagara ooththida;
\q2 nuni istta qixaate ekkidos.
\q1
\v 8 Aylleti nuna haarida;
\q2 istta kusheppe nuna kessi
\q2 ekkanay oonikka deenna.
\q1
\v 9 Bazzon diza ola gaason
\q2 nuni nu shemppo
\q2 aaththi immidi kath demmidos.
\q1
\v 10 Kosha daroppe
\q2 dendidayssan hargidos;
\q2 nu medhaykka
\q2 shaala mala gidides.
\q1
\v 11 Maccassata Xiyoonen tunisida;
\q2 geela7otakka Yuhuda katamatan
\q2 wolqqan oykki kawushshida.
\q1
\v 12 Daannata istti kaqqida;
\q2 cimatakka bonchchibeettenna.
\q1
\v 13 Yelaga attuma nayti
\q2 woxan gaaccana mala
\q2 wolqqaththida;
\q2 panththati deexo mith
\q2 tookkidi gadigadida.
\q1
\v 14 Cimati pirdanaas
\q2 uttiza dubbusha aggida;
\q2 panththatikka
\q2 bantta mazamure aggida.
\q1
\v 15 Ufayssi nu wozinappe dhaydes;
\q2 nu durissika
\q2 yeehon laamettides.
\q1
\v 16 Kallachchay nu hu7eppe kundides;
\q2 nu nagara ooththida gishshas
\q2 aayye ana!
\q1
\v 17 Hessa gaason
\q2 nu wozinay daaburdes;
\q2 nu ayfeykka baljumides.
\q1
\v 18 Xiyoone biittay bula gidida gishshas
\q2 worakanati guppizasoho gidides.
\q1
\v 19 Abeet GODAWU!
\q2 Neni mernaas haaraasa;
\q2 ne kawoteththay yeletappe
\q2 yeleta gakkanaas daana.
\q1
\v 20 Ne nuna ays ubba wode
\q2 co7u gay?
\q2 qasse ays
\q2 hayssa gakkanaas aggaagadii?
\q1
\v 21 GODAWU! Neni nuna neekko zaara;
\q2 nunikka neekko simmana!
\q2 beni nu bonchchoza zaarada
\q2 nuna ooraththa!
\q1
\v 22 Ne hessaththo ooththontta aggiko
\q2 nuna mulera aggadii?
\q2 ne hanqozaska zaway baawee?