\id JAS - Gamo Full Bible final version
\ide UTF-8
\h Yaaqoobe Kiita
\toc1 Yaaqoobey Xaafida Kiita
\toc2 Yaaqoobe Kiita
\toc3 Yaaqo
\mt1 Yaaqoobey
\mt2 Xaafida Kiita
\imt1 Giddo Qofa
\ip Hayssi Yaaqoobe kiitazi asi hach hach daana duussa gishshas yootizaaz gidishin izi xaafettiday dumma dumma deren laaletti diza tammanne nam7u Isra7eele zarkketassa; hessa xaafidaadey nuni nu erateth ooson peyshshana oge gishshas ammaniza asa moko gishshassinne amale lo7eththana oge bessiza yo7ota qonccisiza haasayata leemisora bessees. Manqoteththa gishshas, paace gishshas, lo7o amale gishshas, qanggeteththa gishshas, ammano gishshassinne lo7o ooso gishshas inxarsa iitateththaa gishshassinne lo7eteththa gishshas, aadho erateththa gishshas issoy issaara ooshsha gishshas, otoreteththa gishshassinne ashketeththa gishshas, hara asa bolla pirda gishshas, ceeqeteththa gishshas, dandaya gishshassinne woosa gishshas, ammanizayti ooththanaas bessiza miishshata hu7en hu7en xaafides.
\ip Ha kiitazi ammanoy ammano duussan oosettana bessiza ogeta lo7eththi qonccisees.
\iot Ha Maxaafay Oykkida Kumeththa Qofa
\io1 Geloso \ior 1:1 \ior*
\io1 Ammanonne aadho erateth \ior 1:2-8 \ior*
\io1 Manqoteththinne dureteth \ior 1:9-11 \ior*
\io1 Paace \ior 1:12-18 \ior*
\io1 Xoossa qaala siyidi ooson peysho \ior 1:19-27 \ior*
\io1 Ogey baynda maado maaddontta mala imettida qofso \ior 2:1-13 \ior*
\io1 Ammanonne ooso \ior 2:14-26 \ior*
\io1 Ammanizaadenne iza haasaya \ior 3:1-18 \ior*
\io1 Ammanizaadenne hayssa ha alameza \ior 4:1—5:6 \ior*
\io1 Dumma dumma hanota gishshas imettida zore \ior 5:7-20 \ior*
\c 1
\p
\v 1 Xoossa oosanchchanne Yesus Kirstoosa oosanchcha gidida Yaaqoobeppe biitta bolla laalettida tammanne nam7u kochchatas saroteththi inttes gido.\x - \xo 1:1 \xo*\xt Mato 13:55; Mar 6:3; Hawa 15:13; Gala 1:19\xt*\x*
\s1 Metonne Paace
\p
\v 2 Ta ishatoo! Intte bolla dumma dumma waayey gakkiko hessa wursi ufayssan qoodite. 
\v 3 Gaasoykka intte ammano paaceteththi inttes dandaya immizayssa intte ereeta. 
\v 4 Intte dandayan minni eqqanayssi inttes issi miishshika paccontta kumeththa asinne wosoy bayndayta gidana mala ooththo. 
\v 5 Intte giddofe oonaska erateththi pacciko oonakka leqqontta ba kiyateththaara ubbaas immiza Xoossaa woosso; izaadeska imettana. 
\v 6 Gido attiin sidhey baynda ammanon woosso; gaasoykka sidhizaadey abba qaaththiza dambala carko mala. 
\v 7 Hessaadey Godaappe aykkoka demmana giidi qoppofo. 
\v 8 Hessaadey nam7u qofan oykettidi ba biza oge bolla yaanne haa giza asa mala.
\p
\v 9 Kase ziqqa duussan dizaade Xoossi dhoqqu histtana gishshas ufayetto. 
\v 10 Asa dureteththi maata ciishsha mala qokkana gishshas duussan dhoqqu gidaadey Xoossi iza ziqqi histtiko ufayetto. 
\v 11 Arshey xuuggidi maata shullisees; maata ciishshayka shullees; iza lo7eteththika dhayees; hessaththoka durey hach hach daabursan dishin iza dureteththi dhayees.
\p
\v 12 Paacen minni eqqidaadey izi anjjettidaade; gaasoykka izi paacera eqettishin Xoossi bana dosizaytas immida hidota de7o akilile izi ekkana. 
\v 13 Oonikka paacettizaa gidikko tana Xoossi paaccees gooppo; gaasoykka Xoossi ase iitan paaccenna; izi oonakka paacci erenna. 
\v 14 Gido attiin issi issi asi paacettizay barkka ba iita amo kaallishenne balettishe paacettees. 
\v 15 Amoy qanththatidi nagara yelees; nagaraykka diccidaappe guye hayqo yelees.
\p
\v 16 Ta siiqo ishatoo! Intte balettofte. 
\v 17 Lo7o imoteththinne kumeththa anjjoy wuri bolla salo poo7ota Aawappe wodhdheettes; iza achchan yaanne haa yuuyiza eeshoykka deenna. 
\v 18 Nu iza medheteththaas koyro bayrata gidana mala ba sheneninne ba tuma qaalaan nuna yelides.
\s1 Siyidayssa Ooso
\p
\v 19 Dosettida ta ishatoo! Hayssa yuushshi qopite; asi wurikka siyanaas eesoto; haasayassinne hanqos eesotoppo. 
\v 20 Asa hanqoy Xoossa xilloteth ooththenna. 
\v 21 Hessa gishshas tunateththinne dalgida iitateththi inttefe kessi yeggidi intte shemppo ashshanaas dandayza intte giddon tokettida qaalaa ashketeththara ekkite.
\p
\v 22 Qaalay gizayssa ooththite attiin mela sis xalla siyizaadentta gididi intterkka inttena baleththofte. 
\v 23 Qaalaa siyishe siyida qaalay gizayssa ooththonttaadey ba ayfeso mastootera xeelliza asa mala. 
\v 24 Bana xeelli be7idi bees; izi ay misatizaakko heerakka balettichchees. 
\v 25 Gido attiin bana geeshshiza lo7o wogaa xeelli be7idi izan minnizaadey ba siyidayssa ooththizaadeynne balonttaadey izi ba ooson anjjettidaade gidana.
\p
\v 26 Ba doona naagontta barkka ba wozina baleththishe ta ammanays gizaadey barkka bana baleththees; iza ammanoykka hada ammano. 
\v 27 Xoossaa Aawaa sinththan iitateththi baynda lo7o ammanoy aayanne aaway hayqqida nayta, istta azinati hayqqida maccassata metotettishin maadonne hayssa alameza tunateththaafe bana naago.
\c 2
\s1 Ogey Baynda Maado Koshshenna
\p
\v 1 Ta ishatoo! Intte bonchchettida Godaa Yesus Kirstoosa ammanizayta gidida mala ase bessontta ogera maaddofte. 
\v 2-3 Worqqa yiich biradhdhen aaththidi lo7o may7o may7ida asi intte shiiqizaso yiikko hessaththoka qita may7o may7idaadey he shiiqizasoza yiikko qasseka hara qita may7o may7ida manqo asi gelikko lo7o may7idayssa dumma bonchcho bonchchidi, «Nees bessiza lo7o uttizaso hessa beya» giidi hankko manqoza qasse, «Ne heen hessan eqqa; woykko haa ya; ta garsan wugen utta» intte giikko, 
\v 4 intte intte giddon bessontta maado ooththeeta gidekketii? Qasseka intte iita qofan oykettida iita pirda pirdizayta gidekketii?
\p
\v 5 Ta siiqo ishatoo! Ane siyite; istti ammanon dureta gidana mala Xoossi bana dosizaytas hidota isttas immida kawoteththaa istti laattana mala hayssa ha alamezan diza manqota dooribeennee? 
\v 6 Intte qasse manqota kawushsheeta; inttena waayisizay dureta gidettennee? Inttena pirdaso goochchizay istta gidettennee? 
\v 7 Inttenan xeygettida bonchcho Xoossaa sunth zigirzayti istta gidettennee?
\p
\v 8 Geeshsha Maxaafan, «Ne lagge ne hu7e mala siiqa» geetetti xaafettida kawo wogaa intte polikko lo7o ooththeeta. 
\v 9 Intte bessontta maado maaddiko nagara ooththeeta; wogaa sinththankka intte woga yedhdhidaade gidi qoodettana. 
\v 10 Gaasoykka wogaa ubbaa polizaadey qasseka wogappe issineyn dhuphettiza asi ubbaaka mooridaade mala qoodettees. 
\v 11 «Laymatoppa» gidaadey izikka zaaridi, «Wodhoppa» gides. Ne laymatontta aggikokka neni as wodhikko wogappe aadhdhidaade gidaasa.\x - \xo 2:11 \xo*\xt Kessa 20:13-14; Zaare 5:17-18\xt*\x* 
\v 12 Intte haasaya haasayshe woykko issi miish ooththishe inttena xillisiza asa mala gidite. 
\v 13 Gaasoykka maaronttay wurikka maaroy baynda pirdettana; maaroy pirda Xoonees.
\s1 Ammanonne Ooso
\p
\v 14 Ta ishatoo! Issi asi taas ammanoy dees giikko qasse ooson bessonttaade gidikko iza ay maaddanee? Hessa mala ammanoy iza ashshanee? 
\v 15-16 Ane qopite; issi ishay woykko issi michchiya may7oy woykko mizayssi baynda aggiko inttefe issaadey, «Intte saron biite! Inttena meeggofo! Kallite!» giikko istta ashos koshshizayssa immontta aggiko ay maaddanee? 
\v 17 Hessaththoka oosoy baynda ammanoykka baas hayqqidayssa.
\p
\v 18 Gido attiin issaadey, «Taas oosoy dees; nees ammanoy dees; neni ne ammano oosoppe shaakkada tana bessa; ta qasse ta ammano ooson nena bessana» giikko 
\v 19 ne, «Issi Xoossi dizayssa ammanaasa» hessika lo7o; daydanththatikka hessa mala ammaneettessinne keehi kokkoreettes. 
\v 20 Nenoo eeyazoo! Oosoy baynda ammanos go7ay bayndayssa eranaas markka koyay? 
\v 21 Nu aawaa Abrahaamey ba naa Yisaaqa yarshizasoza bolla shiishshida wode ooson xillibeennee?\x - \xo 2:21 \xo*\xt Medhe 22:1-14\xt*\x* 
\v 22 Hessan ba ammanoza oosora gaththi ooththizayssa ne beyaasa; ammanoykka ooson polettides. 
\v 23 «Abrahaamey Xoos ammanides; he ammanoy izas xilloteththan qoodettides» giza maxaafaa qaalay polettides; izikka Xoossi dosidaade geetettides.\x - \xo 2:23 \xo*\xt Medhe 15:6; 2Taari 20:7; Isa 41:8\xt*\x* 
\v 24 Hessa gishshas asi ammanon xalla gidontta oosonkka xillizayssa intte beyeeta.
\p
\v 25 Hessaththoka layman diza Era7aaba kiitetti bida asata mokka ekkada hara ogera moyza yeddida gishshas ba ooson xillabeekkee?\x - \xo 2:25 \xo*\xt Iya 2:1\xt*\x* 
\v 26 Shemppofe shaakettida ashoy hayqeth gidida mala oosoppeka shaakettida ammanoy hayqeththa.
\c 3
\s1 Ba Doona Naago
\p
\v 1 Ta ishatoo! Inttefe daroti astamaareta gidoppetto; gaasoykka nu astamaare gididayti aadheththa pirda ekkanayssa intte ereeta. 
\v 2 Nu wurikka daro miishshan dhuphettoos. Haasayan dhuphettonttaadey diikko izi ba asateth lo7eththi naaganaas dandayza kumeththa asa. 
\v 3 Nuni parata azazanaas bixala barsidi nu koyida mala istta azazoos. 
\v 4 Woykko ane markabeta xeellite; istti ay gitatanne carkon sugetti bizayta gidikkoka markabe laaggizaadey qeeri laafa laaggiza miishshara ba koyzaso efees. 
\v 5 Hessaththoka asateththa garsan inxarsi guuth gida uttada gita wolqqama otoro otorettawus; qeeri tamay gita wora wostti xuuggi dhayssizaakko ane yuushshi qopite. 
\v 6 Inxarsika ba baggara tama mala; qasse nu asateththaa giddon diza iita alame. Asateththaa wursa tunisawussinne asateththaa bolla tama gujjawus; baaska gaanname taman xuugettana.
\p
\v 7 Mehe, do7a, kafota, biitta bolla gooshettizaytanne abba giddon diza medheteththata ubbaa asi haarana dandayees; isttika haarettida. 
\v 8 Gido attiin inxars haaranaas dandaydaadey oonikka deenna; wodhiza marzey izin kumidaaronne iza shempa ekkontta iita miishsha. 
\v 9 Nuni nu inxarsayra Godaanne Aawaa anjjoos; izinkka Xoossa leemison medhettida asa nayta zaaridi qanggoos.\x - \xo 3:9,10 \xo*\xt Medhe 1:26\xt*\x* 
\v 10 Anjjoynne qanggeththi issi doonara kezees. Ta ishatoo! Hessi hessaththo hananaas bessenna. 
\v 11 Issi pultto ollafe mal7o haaththinne camo haaththi pultti erizee? 
\v 12 Ta ishatoo! Balase geetettiza miththi wogara ayfe woykko woyne miththi balase miththa ayfe ayfanaas dandayzee? Hessaththoka cammiza haaththafe mal7iza haaththi beettana dandayenna.
\s1 Nam7u Qommo Erateth
\p
\v 13 Intte garsafe akeekara diza era asi oonee? Eray dizaa gidikko ane ba ooso ashketeththaninne aadho erateththara ba lo7o duussan besso. 
\v 14 Qasse camonne qanaatey, inttena xalla dosiza hanoy intte wozinan dizaa gidikko otoreteththi inttes siyettofo; tumaakka kaddofte. 
\v 15 Hinni mala erateththaya saloppe gidikku; hinna qasse biittafe, ashoppenne Xala7eppeko! 
\v 16 Qanaateynne barkka bana siiqoy dizason waasoynne iita oosoy wuri dees.
\p
\v 17 Saloppe gidida erateththaya gidikko koyro geeshsha; guyeppeka saroteth dosizaaro, dandayzaaro, ero gizaaro, maaroteththinne lo7o ayfey kumidaaro; qasse wordo maaddonttaaronne ulon geney bayndaaro. 
\v 18 Saroteth dosiza asati saroteth zeridi xilloteththa ayfe maxeettes.
\c 4
\s1 Inttenateththaa Xoossas Haarisite
\p
\v 1 Intte giddon diza olaynne ooshshi awappe yidee? Intte wozinan diza amoteththaafe dendida ola gidennee? 
\v 2 Intte amotteeta shin demmeketa; intte as wodheetanne keehi amotteeta shin demmana dandayekketa; intte intte garsan ooyettiza gishshassanne olettiza gishshas qasse woossontta gishshas inttes imettenna. 
\v 3 Intte intte asho ufayssanaas iita qofan woossiza gishshas woossidayssa intte ekkeketa. 
\v 4 Intteno laymatizaytoo! Alamera siiqeteththi Xoossara morkketeth gididayssa erekketii? Hessa gishshas hayssa alamezara siiqeteth koyzay wurikka Xoossas morkke. 
\v 5 Woykko Geeshsha Maxaafa giddon, «Nunan izi ayssida Ayanay nu izayta gidana mala daro amottees» gizayssi inttes coo mela gidaa misatizee? 
\v 6 Gido attiin izi ba kiyateth nuus gujji immees; Maxaafaykka, «Xoossi otoranchchatara eqettees; ashketas gidikko ba kiyateth immees» giday hessassa.\x - \xo 4:6 \xo*\xt Leemi 3:34\xt*\x*
\p
\v 7 Hessa gishshas inttena Xoossas haarisite; Daabulosara eqettite; izi inttefe baqatana. 
\v 8 Xoossako shiiqite; izikka intteko shiiqana; intteno nagaranchchatoo! Intte intte kushe geeshshite; intteno nam7u qofan qaaxxizaytoo! Intte intte wozina geeshshite. 
\v 9 Darssi qopite; muuzottite; yeekkite; intte miichchay yeehon, ufayssay qasse muuzoteththan simmo. 
\v 10 Godaa sinththan intte inttena kawushshite; izi inttena dhoqqu dhoqqu histtana.
\p
\v 11 Ta ishatoo! Intte intte garsan issoy issaa mootopite; ba ishaa mootizaadeynne ba ishaa bolla pirdizaadey wogaa bolla iita haasayeessinne wogaa bolla pirdees; histtiko neni wogaa bolla pirdizaade attiin wogaa naagizaade gidakka. 
\v 12 Woga woththidaadeynne pirdizaadey issaade xalla; izikka dhayssanaassinne ashshanaas dandayzaade; gido attiin ne lagge bolla pirdizaadey ne oonee?
\s1 Ceeqettanaas Bessenna
\p
\v 13 «Intte hach woykko wonto hanno ha katamayo woykko hinno he katamayo nu baana; histtidi heen izin issi layth uttananne zal7i wodhisana» gizaytoo! Ane haa siyite. 
\v 14 Wonto hananayssa intte erekketa; intte shemppoy iza aazee? Intte guuththa wode ayfen beettidi dhayza haaththa pentta mala. 
\v 15 Hessa gaanaappe, «Godaa shene gidikkonne nu paxa diikko hessaka hayssaka ooththana» gaanaas inttes bessees. 
\v 16 Ha7i gidikko intte otoreteththan ceeqetteeta; hessa mala otoreteththi wurikka iita. 
\v 17 Hessa gishshas lo7o gidizayssa ooththanaas bessizayssa erishe ooththonttaades nagara gidana.
\c 5
\s1 Duretas Imettida Zore
\p
\v 1 Histtiko intteno dure asatoo! Ane siyite. Buro intte bolla gakkana metoza gishshas yeekkite; «Wu! Wuy» gi waassite. 
\v 2 Intte haaroy buuqqides; intte may7oka bilay mides. 
\v 3 Intte worqqaynne intte biray shiydes; he shiydayssika intte bolla markkatteessinne intte asho tama mala xuuggees; wode wurseththas miishshe intte shiishshideta. 
\v 4 Intte intte wozinan woththite; intte kath maxishe peydaytas istta wolqqa waagaa intte qanxxontta aggida gishshas intte bolla waassishe intte achchan deettes. Kath maxizayta waasoy ubba dandayza Godaa hayththan gakkides.\x - \xo 5:4 \xo*\xt Zaare 24:14-15\xt*\x* 
\v 5 Intte biitta bolla ishaloninne al7eteththan de7ideta; intte wozina shukas dhiikkida mehe mala modhdhisideta. 
\v 6 Intte inttenara eqettontta xillo asata bolla wordo woththidi wodhideta.
\s1 Meto Dandayo
\p
\v 7 Hessa gishshas ta ishatoo! Goday haa yaana gakkanaas dandayte; goshshe goyizaadey biittay lo7o kaththi kaxxana gakkanaas waani dandayzaakko koyro iranne wurseththa ira izi wostti naagizaakko ane akeekite. 
\v 8 Intteka hessaththo dandayte; intte wozina minththite; gaasoykka Godaa yuussa gallassi matides.
\p
\v 9 Ta ishatoo! Intte intte giddon zigirettofte; intte zigirettiko intte bolla pirdettana; pirdanaadey hekko intte penge bolla eqqides. 
\v 10 Ta ishatoo! Godaa sunththan inttes yootida nabeta waayeteththinne istta dandayaa inttes leemiso histti xeellite. 
\v 11 Dandayan genccida asata nu istta, «Istti anjjettidayta» gi qoodizayssa intte ereeta. Iyoobi waani dandaydaakko intte iza gishshas siyideta. Goday iza wurseththan ay ooththidaakko intte beyideta; Goday asas keehi mishettizaadenne maarizaade.\x - \xo 5:11 \xo*\xt Iyo 1:21-22; 2:10; Maza 103:8\xt*\x*
\p
\v 12 Harappeka ta ishatoo! Salon gidiin woykko sa7an gidiin woykko ay miishshankka caaqqofte; «Ee» gaanaas bessiza miish gidikko, «Ee» giite. «Akkay» gaanaas gidikko, «Akkay» giite; hessafe hara giikko intte bolla pirdettana.\x - \xo 5:12 \xo*\xt Mato 5:34-37\xt*\x*
\s1 Ammano Woosa
\p
\v 13 Intte garsan metotiza asi dizee? Dizaa gidikko izi woosso. Ufayettizaadey dizee? Dizaa gidikko ufayssa mazamure yexxo. 
\v 14 Intte giddon sakettiza asi dizee? Diikko Woosa Keeththa cimata xeygo; isttika Godaa sunththan zayte iza bolla tiydi izas woossetto.\x - \xo 5:14 \xo*\xt Mar 6:13\xt*\x* 
\v 15 Ammanon woossida woosay hargidaade paththana; Godaykka iza denththana; izi nagara ooththidaade gidikkoka Xoossi iza maarana. 
\v 16 Hessa gishshas intteka intte garsan issoy issaara intte nagara paaxettite; paxana mala issoy issaas woossite; xillo asa woosay wolqqara dees; wolqqama oosokka ooththees. 
\v 17 Eelaasi nu malakka asa; izi iray bukkontta mala minththi woossiin biitta bolla heedzdzu layththinne bagga gakkanaas iray bukkibeenna.\x - \xo 5:17 \xo*\xt 1Kawo 17:1; 18:1\xt*\x* 
\v 18 Qasseka zaari woossiin iray saloppe biitta bolla bukkides; biittayka kath immides.\x - \xo 5:18 \xo*\xt 1Kawo 18:42-45\xt*\x*
\p
\v 19-20 Ta ishatoo! Inttefe issaadey tumappe balettiin hara asi iza zaarikko hessa wozinan woththite; nagaranchcha izi balettida ogeppe zaaridaadey hessaade shemppo hayqoppe ashsheessinne izaade nagara darozakka kammees.\x - \xo 5:20 \xo*\xt Leemi 10:12; 1Phex 4:8\xt*\x*