\id GAL - Gamo Full Bible final version
\ide UTF-8
\h Galatiya Asaas
\toc1 Phawuloosi Galatiya Asaas Xaafida Kiita
\toc2 Galatiya Asaas
\toc3 Gala
\mt2 Phawuloosi
\mt1 Galatiya Asaas
\mt2 Xaafida Kiita
\imt1 Giddo Qofa
\ip Yesusi ashshizaade gididayssa yootiza Mishiraachcho qaalay ubbason Ayzaabetas sabbakettiin asay ammani ammani darshin, «Ammanizaade gidanaas kase Muse wogaa poli naaganaas koshshizeyee? Koshshennee?» giza oyshay dendides; qeeri Iisiya geetettizason Oroome kawoy haarizason Galatiyan diza ammaniza asaa garsan, «Asi Xoossa achchan xillo gidanaas Yesusan ammano xalla gidontta Muse baggara imettida wogaza polo koshshees» giidi Phawuloosara eqettizayti deettes.
\ip Phawuloosi qasse Galatiya kiitaa xaafiday hayssa ha timirtezan balettida asati tuma timirtekkonne tuma ammanookko zaaranaassa; Phawuloosi Yesus Kirstoosa Hawaare gididayssa qoncciseththan doommees; iza Hawaareteththas xeygiday Xoossa attiin izi asa xeyssan kiitettonttayssanne qasse izi kiitettiday Ayhuda asaakko gidontta Ayzaabetas gididayssa ubbaa birshi yootees. Wurseththa shempota garsan ammano duussi Yesusa ammanon beettiza siiqoppe gididayssa lo7eththi yootees.
\iot Ha Maxaafay Oykkida Kumeththa Qofa
\io1 Geloso \ior 1:1-10 \ior*
\io1 Phawuloosas imettida Hawaareteththa maata \ior 1:11—2:21 \ior*
\io1 Xoossa kiyateththa Mishiraachcho qaala \ior 3:7—4:31 \ior*
\io1 Ammanizayta goqateththinne ammano \ior 5:1—6:10 \ior*
\io1 Kuushsha qofa \ior 6:11-18 \ior*
\c 1
\p
\v 1 Asi kiittidaade gidontta Yesus Kirstoosa hayqoppe denththida iza Aawaa Xoossaafe kiitettida Phawuloosappe, 
\v 2 tanara diza ishata ubbaafe Galatiyan diza Woosa Keeththatas, 
\v 3 nu Aawaa Xoossaafe Godaa Yesus Kirstoosappe Xoossa kiyateththinne saroy inttes gido. 
\v 4 Nu Aawaa Xoossaa shene gidiin iita alamezappe nuna ashshanaas bana aaththi immidayssas, 
\v 5 merippe mernaa gakkanaas izas bonchchoy gido.
\s1 Mishiraachcho Qaalay Mexi Issino
\p
\v 6 Intte Kirstoosa kiyateththan xeygidayssa aggaagidi hara dumma shaako Mishiraachcho qaalaakko simmidayssi tana daro malalisees. 
\v 7 Ta hessa gida gaasoykka inttena baleththizaytinne Kirstoosa Mishiraachcho qaalaa mirqqiza issi issi asati diza gishshassa; tumappe giikko Mishiraachcho qaalay issino xalla. 
\v 8 Gido attiin nuna gidiin woykko salo kiitanchcha gidiinkka nu inttes sabbakida Mishiraachcho qaalaappe hara dumma Mishiraachcho qaala sabbakikko hessaadey mernaas qanggettidaade gido. 
\v 9 Ta kase gida malakka ha7ikka zaaradakka kase intte ekkida Mishiraachcho qaalaappe hara dumma Mishiraachcho qaalaa sabbakikko izaadey mernaas qanggettidaade gido gays.
\p
\v 10 Ha7i tani asi tana eroshsho! Hashshu gaana mala koyazinayee? Xoossi hashshu gaana mala koyazinaa? Woykko as ufayssana koyazinaa? Ta as ufayssana koyzaakko Kirstoosa oosanchcha gidikke.
\s1 Xoossan Phawuloosa Xeygeteth
\p
\v 11 Ta ishatoo! Ta inttes sabbakida Mishiraachcho qaalay asa ooso gidonttayssa intte erana mala koyays. 
\v 12 Hayssa ha Mishiraachcho qaalaza Yesus Kirstoosi taas qonccisides attiin ta oonappeka ekkabeekke; woykko oonikka tana tamaarsibeenna.
\p
\v 13 Tani kase Ayhudata ammanon waana dizaakkonne Xoossa Woosa Keeth ta ay mala gooddidaakko qasse mulera dhayssanaas ta ay mala dafettidaakko intte siyideta.\x - \xo 1:13 \xo*\xt Hawa 8:3; 22:4-5; 26:9-11\xt*\x* 
\v 14 Kase ta diza woden diza daro Ayhuda asata darotappe ammanon aadhdhays; kase nu aawata wogaa naaganaas daro dafettayssishin.\x - \xo 1:14 \xo*\xt Hawa 22:3\xt*\x*
\p
\v 15 Gido attiin kase koyro tani ta aayi ulon dishin baas dooridi ba kiyateththan tana xeygida Xoossay, 
\v 16 Ayzaabeta giddon iza naaza gishshas ta sabbakana mala ba naaza tanan qonccisanaas dosida gishshas tani oonarakka zorettabeekke. 
\v 17 Taappe kase Hawaare gididaytakko Yerusalaame babeekke shin ammanida mala heerakka Arabe biitta badis; heeppeka Damasqo simmadis. 
\v 18 Heeppeka heedzdzu layththafe guye Phexroosara gaagganaas Yerusalaame badis; izara gaaggada tammanne ichchashu gallas gakkanaas heen gam7adis.\x - \xo 1:18 \xo*\xt Hawa 9:26-30\xt*\x* 
\v 19 Gido attiin Godaa ishaa Yaaqoobeppe attiin Hawaaretappe oonakka beyabeekke.
\p
\v 20 Hayssa ta inttes xaafizayssan ta wordo haasayonttayssa Xoossa sinththan yootays. 
\v 21 Hessafe guye Sooriyanne Kilqiya geetettiza dere badis. 
\v 22 Yuhuda deren diza Kirstoosan ammaniza asay tana beyibeenna. 
\v 23 Gido attiin, «Beni nuna ammano gishshas gooddi dhayssana koyza addezi ha7i he ammanoza zaari sabbakees» giza wore xalla siyida. 
\v 24 He asay ta gaason Xoos galatides.
\c 2
\s1 Phawuloosa Hawaareti Mokki Ekkida
\p
\v 1 Tammanne oyddu layththafe guye qasseka Yerusalaame badis; he wode Barnabaasara days; Titoosakka tanara ekka badis.\x - \xo 2:1 \xo*\xt Hawa 11:30; 15:2\xt*\x* 
\v 2 Taas qonccida gishshas hee badis; Ayzaabeta giddon ta sabbakiza Mishiraachcho qaalaakka isttas yootadis; gido attiin ta kase mela woxxidaakko gaadanne qasseka sinththafe coo mela woxxontta mala hirgada waannatizaytas dumma erisadis. 
\v 3 Haray attoshin tanara diza Titoosi izi Girike as shin izi qaxxarettana mala wolqqaththibeettenna. 
\v 4 Hayssi ha yo7ozi dendiday issi issi wordo ammanizayti nuni Yesus Kirstoosan demmida geeshshateththaa yuuyi yuuyi paacci beyanaassinne nuna aylleteththan zaari gelththanaas loddara nuukko salli gelida gishshassa. 
\v 5 Heyta he asatas nuni issitokka haarettibeekko; hessika intte Mishiraachcho qaalaa tumateththan eqqi daana mala giidikko.
\p
\v 6 Waanna misatiza asati taas aykkoka misatettenna; Xoossi asa ayfeso be7idi maado ooththi erenna; heyti he asati ta kiittiza yo7otas taas aykkoka gujjibeettenna.\x - \xo 2:6 \xo*\xt Zaare 10:17\xt*\x* 
\v 7 Gido attiin Phexroosi qaxxarettidaytas Mishiraachcho qaalaa sabbakanaas hadara ekkidayssa mala tanikka qaxxarettonttaytas Mishiraachcho qaalaa sabbakanaas hadara ekkidayssa istti erida. 
\v 8 Phexroosi Ayhudatas Hawaare gidi ooththana mala ooththida Xoossay tanikka Ayzaabetas Hawaare gida ooththana mala taas ooththides. 
\v 9 Waannati Yaaqoobey, Phexroosinne Yohannisikka taas imettida Xoossa imotaa akeekidi taassinne Barnabaasas ba ushachcha kushe immida; hessafe guye nuni Ayzaabetas istti qasse Ayhudatas qaala yootanaas qaalaa ero gi ekkida. 
\v 10 Istti nuus hadara giday manqotas qofa nu aggontta mala; ta amoykka hessa ooththanaassa.
\s1 Phawuloosi Phexroosa Qopheth
\p
\v 11 Phexroosi Anxokiya yida wode erettida bala ooththida gishshas ta iza qonccen qophadis. 
\v 12 Issi issi asati Yaaqoobe achchafe yaanaappe kase Phexroosi Ayzaabetara issife kath mizayssa aggidi asati yidaappe guye qaxxarettida asatas babbidi Ayzaabetappe shaaketti guye guye guus oykkides. 
\v 13 Barnabaasikka isttaththo qoodheppe qommon hanon ekettana gakkanaas hara Ayhuda baggafe ammanida asaykka izara issifettides. 
\v 14 Istta oosoy Mishiraachcho qaalaa tuman gidonttayssa ta erada kumeththa asaa achchan Phexroosa, «Ne Ayhuda as shin Ayzaabeta wogan attiin Ayhudata wogan dabeekka; histtiin Ayzaabeti Ayhudata woga kaallana mala aazas wolqqaththay?» gadis.
\p
\v 15 «Nuni nu yeleteththan Ayhudatappe attiin Ayzaabeta mala nagaranchcha gidokko. 
\v 16 Asi Yesus Kirstoosan ammanon xillana attiin woga naagon xillonttayssa nu eroos; hessa gishshas woga naagon gidontta Kirstoosa ammanon nu xillana mala nunikka qasse Yesus Kirstoosa ammanidos; woga naagon oonikka xillenna.\x - \xo 2:16 \xo*\xt Maza 143:2; Oro 3:20,22\xt*\x*
\p
\v 17 «Nu Kirstoosan xillana koykko nuni nagaranchchata gididayssi qoncci erettides; histtiin Kirstoosi nagaray dari dari baana mala koyzee? Koyenna. 
\v 18 Tani laallidayssa zaarada tarkka ta kushera keexxiko tanikka woga mooridaade gididayssa ammanettays. 
\v 19 Tani Xoossas daana mala wogaa baggara he wogaas hayqqadis. 
\v 20 Tani Kirstoosara kaqettadis; hayssafe guye tani taas diikke; gido attiin Kirstoosi ta giddon dees; ha7ikka ta ashon diza duussay tana dosidi bana ta gishshas aaththi immida Xoossa Naa bolla diza ammanon diza duussa. 
\v 21 Tani Xoossa kiyateth kawushshike; xilloteththi woga naagon beettiza miish gidikko Kirstoosi hada hayqqides guussakaa!»
\c 3
\s1 Ammanon Duus Woykko Woga Naago
\p
\v 1 Intteno yuushshi qoppontta Galatiya asatoo! Inttes balettontta mala iza kaqeteththaa ta intte sinththan misle mala giigsa bessadisko shin inttena oonee bitiday? 
\v 2 Intte Xillo Ayana ekkiday woga naagoneyee? Sabbakettida qaala ammanonee? Ta hanno issiniyo inttefe erana koyays. 
\v 3 Intte hessa mala qoppi erontta asee? Xoossa Ayanan oykkidayssa zaaridi asho hanon polanaas waayetteetii? 
\v 4 Tumu intte hanno gakkanaas daaburda daabursay coo melaa? Coo mela gidikko hada daaburdeta. 
\v 5 Xoossi inttes Ayana immidaynne intte achchan malaata ooththiday intte woga naagida gishshasseyee? Woykko intte siyida qaalaan ammanida gishshasseyee?
\p
\v 6 Ane intte Abrahaame gishshas qopite; geeshsha Maxaafan, «Izi Xoos ammaniin ammanoy izas xilloteththan qoodettides» geetetti xaafettides.\x - \xo 3:6 \xo*\xt Medhe 15:6; Oro 4:3\xt*\x* 
\v 7 Hessa gishshas ammanizayti Abrahaame nayta gididayssa wozinan woththite.\x - \xo 3:7 \xo*\xt Oro 4:16\xt*\x* 
\v 8 Ayzaabey ammanon attanayssa eridi Xoossi kase Geeshsha Maxaafan, «Derey wuri ne baggara anjjettana» giidi Mishiraachcho qaalaa Abrahaames yooti woththides.\x - \xo 3:8 \xo*\xt Medhe 12:3\xt*\x* 
\v 9 Hessa gishshas ammanizayti wuri ammaniza Abrahaamera issife anjjettidayta.
\p
\v 10 «Woga naagon ammanettizayti wurikka qanggeththa garsan deettes; woga maxaafatan xaafettidayssa ubbaa ooththonttaadey izi qanggettidaade» geetetti xaafettides. 
\v 11 «Xillo asi ammanon de7ees» giza gishshas oonikka Xoossa sinththan wogan attonttayssi geeshsha.\x - \xo 3:11 \xo*\xt Ib 2:4\xt*\x* 
\v 12 Wogay ammanon xaphibeenna; gido attiin, «Wogata wursi naagizaadey izi naagidayssan de7on daana» geetettides.\x - \xo 3:12 \xo*\xt Lewe 18:5\xt*\x*
\p
\v 13 «Miththa bolla kaqettiza asi qanggettidaade» geetetti xaafettida gishshas Kirstoosi nu gishshas qanggettidaade gididi nuna woga qanggeththafe wozzides.\x - \xo 3:13 \xo*\xt Zaare 21:23\xt*\x* 
\v 14 Abrahaames imettida anjjoy Yesus Kirstoosa baggara deres gakkana mala nuna wozzides; hessika nuni ammanon Xillo Ayana ekkana mala hanides.
\s1 Woganne Hidota Qaala
\p
\v 15 Ta ishatoo! Ane ta inttes asi ba duussan haniza miish leemiso immays; haray attoshin asi issito caaqqida qaala issito caaqqidaappe guye oonikka shaaranaas woykko hara iza bolla gujjana dandayonttayssa mala hayssika hessa mala. 
\v 16 Xoossi Abrahaames yootida qaalay Abrahaamessinne iza zereththassa; Geeshsha Maxaafay daro asas yootiza mala, «Iza zereththatas» geenna; gido attiin issi asas yootettiza mala, «Ne zereththas» gees; hessika Kirstoosa.
\p
\v 17 Ta gizaykka hayssa; 430 layththafe guyen imettida wogay kasetidi Xoossi minththida caaqoza laallidi buro hanana hidota qaalaa shaarenna.\x - \xo 3:17 \xo*\xt Kessa 12:40\xt*\x* 
\v 18 Laatay wogan hanizaakko hidota qaalan gelanaas koshshennashin; Xoossi ba kiyateththa qaalan Abrahaames immides.\x - \xo 3:18 \xo*\xt Oro 4:14\xt*\x* 
\v 19 Histtiin wogay aazas imettidee? Wogay imettiday asay woga yedhdhi aadhdhiza gishshas he ufayssay bessiza zereththay yaana gakkanaassa; wogay yidaykka kiitanchchata baggara gaanna gidiza issaade baggara yides. 
\v 20 Gidikkoka gaannazi issaa bagga xalla xeellizaade gidenna; Xoossi gidikko issaa xalla.
\p
\v 21 Histtiin wogay sinththafe Xoossi woththana qaalaa diggizaazee? Mulekka diggenna; wogay imettiday asi izan de7o demmanaas gididaakko tumukka xilloteththi woga baggara beettanakkoshin. 
\v 22 Qasse Geeshsha Maxaafay hayssi alamey wurikka nagaran qashettidayssa awajjees; hessika asi wurikka Yesus Kirstoosa ammanon beettiza hidotay ammanizaytas ubbaas imettanaassa.
\p
\v 23 Hayssi ammanoy yaanaappe kase nuni wogan qashettidi gordan doos. 
\v 24 Hessa gishshas nu ammanon xillana mala wogay nuna Kirstoosakko gaththanaas naagizaade mala gididi naagides. 
\v 25 Ha7i qasse he ammanoy yida gishshas hayssafe guye nuni woga garsan dookko.
\s1 Xoossa Nayta
\p
\v 26 Intte wurikka Yesus Kirstoosa ammanon Xoossa nayta. 
\v 27 Intte Kirstoosara issino gidanaas xammaqettidayti wurikka Kirstoosa may7o mala may7ideta. 
\v 28 Intte wurikka Yesus Kirstoosan issino attiin Ayhudanne Girike, Ayllenne goqa, maccanne adde giza dummateththi deenna; intte wurikka Yesus Kirstoosan issino. 
\v 29 Intte Kirstoosayta gidikko intte Abrahaame zereththata; kase imettida hidota qaalaa mala intte laattanayta.\x - \xo 3:29 \xo*\xt Oro 4:13\xt*\x*
\c 4
\p
\v 1 Ta gizay yelettida nay laatay izas gidikkoka izi biidi laattana gakkanaas ayllefe dumma gidenna. 
\v 2 Iza aaway gida wodey gakkanaas izi bana dichchizayta, tamaarsizayta kushen gam7ees. 
\v 3 Nunikka kase Ayana yo7os guuththa naa mala diza wode hayssa ha alameza wogaa garsan haaretti de7idos. 
\v 4 Gido attiin kase ba qoppi woththida wodey gakkiin Xoossay maccassafe yelettidi wogaa naagida ba naaza nuus yeddides. 
\v 5 Hessika nuni iza nayta gidana malanne woga garsan dizayta wozzana mala hanides.\x - \xo 4:5-7 \xo*\xt Oro 8:15-17\xt*\x*
\p
\v 6 Intte iza nayta gidida gishshas Xoossaa, «Aabboo» giidi xeygiza ba naaza Ayana nu wozinan yeddides. 
\v 7 Hessa gishshas hayssafe guye ne naappe attiin aylle gidakka; neni naa gidida gishshas Xoossi nena bayssa laattizaade histtides.
\s1 Galatiya Asaas Phawuloosa Qofa
\p
\v 8 Intte Xoos eranaappe kase Xoos gidontta eeqatas aylleta. 
\v 9 Ha7i gidikko Xoos erideta; qasseka Xoossan erettideta; histtiin qasseka guye simmidi gede go7ay baynda coo daabursiza timirteko waani simmidetii? Simmidi qasseka aylleteththa qambaran waaxettana koyeetii? 
\v 10 Dumma gallassata, aginata, wodetanne layththata intte bonchcheeta. 
\v 11 Ta inttenara daaburdayssi coo mela gidandee gaada babbays.
\p
\v 12 Ta ishatoo! Ta inttena misatida mala intteka tana misatana mala ta inttena woossays; intte tana aykkoka qohibeekketa. 
\v 13 Intte eriza mala ta inttes koyro Mishiraachcho qaala sabbakiday sako gaasonna. 
\v 14 Ta sakoy inttes meto gidiinkka tana salettibeekketa woykko tana harasettibeekketa; gido attiin intte tana Xoossa kiitanchcha malanne hessafekka bollara Yesus Kirstoosa mala mokki ekkideta.
\p
\v 15 Histtiin ha7i he intte ufayssay awa bidee? Inttes hanizaaz gididaakko intte intte ayfe taas kessi immanaas guye gonttayssa ta inttes markkattays. 
\v 16 Tani tumaa inttes kessa yootida gishshas inttes morkke gidadinaasha?
\p
\v 17 Heyti asati inttena baakko ekkanaas daabureettes attiin lo7os daaburettenna; istti koyzay inttena nuuppe shaakkidi ba as histtanaassa. 
\v 18 Lo7os mindateththi lo7o; hessika hananaas bessizay ubba wode gidikkofe attiin ta inttenara diza wode xalla gidoppo. 
\v 19 Ta naytoo! Kirstoosi intte wozinan xaafettiin ta beyana gakkanaas intte gishshas ta miixattays. 
\v 20 Ta intte gishshas qofan metotadis; ta dandayzaakko ha7i intte giddon beettada inttena lo7eththa tamaarsizaakko ay mala dosazinaa!
\s1 Agaaronne Saara
\p
\v 21 Intteno Woga garsan aqana koyzayto ane taas yootite; wogay ay gizaakko siyibeekketii? 
\v 22 Abrahaames issoy aylleyfe issoy qasse goqayppe yelettida nam7u nayti dizayssi Geeshsha Maxaafan xaafettides. 
\v 23 Aylleyfe yelettida naazi asho wogaa mala yelettides; hankko goqayppe yelettidayssi ufayssa qaalaa mala yelettides.
\p
\v 24 Hayti nam7u maccassati nam7u caaqota bessizayta gidida gishshas hayssi leemisos imettides; koyro caaqoya Siina zumaa bolla gidashe aylleteththas gidiza nayta yelizaaro; izakka Aggaaro. 
\v 25 Hessa gishshas Aggaara Arabe biittan diza Siina zumaa gishshas gidada ha7i diza Yerusalaame katamayo misatawus; iza ba naytara aylleteththan dawus. 
\v 26 Pude bolla salon diza Yerusalaamey gidikko goqa gidada dawus; izakka nu aayo. 
\v 27 «Neni yelontta maynneye ufayetta! Hanne miixatta eronttaaree! ‹Ilili› ga waassa; azinay dizaarippe azinay bayndaari nayti darida» geetetti Geeshsha Maxaafan xaafettides.\x - \xo 4:27 \xo*\xt Isa 54:1\xt*\x*
\p
\v 28 Hessa gishshas ta ishatoo! Intteka Yisaaqa mala ufayssa qaalaa naytakko. 
\v 29 Asho shene mala yelettidayssi Ayana wolqqan yelettidayssa gooddides; ha7ikka goodeththon dees.\x - \xo 4:29 \xo*\xt Medhe 21:9\xt*\x* 
\v 30 Gido attiin Geeshsha Maxaafay qasse ay gizee? «Aylleyo izi naazara digga; aylley nay goqay naara laattenna» gees.\x - \xo 4:30 \xo*\xt Medhe 21:10\xt*\x* 
\v 31 Hessa gishshas ta ishatoo! Nuni goqay nayta attiin aylley nayta gidokko.
\c 5
\p
\v 1 Nuna Kirstoosi geeshshiday nuni geeshshateththan daanaassa; hessa gishshas minni eqqite; nam7anththo aylleteththa qambaran gelopite. 
\v 2 Ta inttes gizayssa wozinan woththite; intte qaxxarettana koykko Kirstoosi inttena aykkoka go7enna gaada ta Phawuloosi inttes yootays. 
\v 3 Qaxxarettana koyzayti wuri wogaa ubbaa polanayssi dosa gidonttayssa ta inttes issaas issaas qonccen yootays. 
\v 4 Intteno Woga naagon xillana waayettizaytoo! Intte Kirstoosappe shaakettideta; iza kiyateththafekka haakkideta. 
\v 5 Nu qasse ufayssan naagettiza xilloteththaa Xoossa Ayana baggara ammanon laamoteththan naagon doos. 
\v 6 Asi Yesus Kirstoosan diikko qaxxarettiin woykko qaxxarettontta aggiin aykkoka go7enna; go7ay dizay siiqon qoncciza ammano xalla.
\p
\v 7 Kase lo7o woth woxxeeta shin; ha7i inttes dhuphe gididi tumaas intte azazettontta mala inttena diggiday oonee? 
\v 8 Hessa mala baleththoy inttena xeygida Xoossaafe gidenna. 
\v 9 «Guuththa irshoy liixe ubbaa denththees» geetettiza mala.\x - \xo 5:9 \xo*\xt 1Qoro 5:6\xt*\x* 
\v 10 Inttes hara qofay deenna gaada tani Godaan ammanettays; inttes tikki gizaaz ooththizay oona gidikko izi ba pirda ekkana.
\p
\v 11 Ta ishatoo! Hanno gakkanaas ta sabbakizayssi asi attanaas qaxxarettana bessees gizaaz gididaakko histtiin hanno gakkanaas aazas tana gooddizoo? Hessa mala gididaakko Kirstoosa masqaley asas dhuphe gidennakoshin. 
\v 12 Inttes tikki gizaaz ooththiza asati coo wogara qaxxareteth aggidi mulera qanxxi yegetto. 
\v 13 Ta ishatoo! Intte geeshshateththas xeygettideta; intte intte geeshshateththaa zaaridi inttes asho amo polanaas go7ettofte; hessafe intte intte garsan siiqon issoy issaa maaddite. 
\v 14 Wogay wuri shiiqettidi issi qaalan qashettees; hessika, «Neni ase ne mala dosa!» gizayssa.\x - \xo 5:14 \xo*\xt Lewe 19:18\xt*\x* 
\v 15 Gido attiin intte issoy issaara saxettizayta gidikko intte intte garsan wurontta mala naagettite.
\s1 Ayanan Simereteth
\p
\v 16 Hessa gishshas ta inttena Ayanan simerettite; qasseka asho amokka polopite gays. 
\v 17 Ashoy Ayanay koyonttaaz amottees; Ayanaykka ashoy koyonttaaz amottees; hayti issoy issaara ba garsan ixettiza gishshas intte intte koyida mala ooththeketa.\x - \xo 5:17 \xo*\xt Oro 7:15-23\xt*\x* 
\v 18 Intte Ayanan dizayta gidikko wogas haarettizayta gidekketa.
\p
\v 19 Asho oosoy qonccen erettees; hessika laymateth, tunateth, layma kaas, 
\v 20 Eeqas goyno, bita, ixeteth, oosh, qanaateteth, hanqo, bana xalla doso, shaaketeth, zuppeteth, 
\v 21 miqqayneteth, maththoteth, alame mazamure yexeththinne heytantta misatizayta. Tani inttes kase yootida mala ha7ikka intte naagettana mala qofsays; hessa mala duus dizayti wurikka Xoossa kawoteth laattettenna.
\p
\v 22 Ayana ayfey gidikko siiqo, ufays, saroteth, dandaya, kiyateth, lo7eteth, ammaneteth, 
\v 23 ashketeth, barkka bana haaro; haytantta mala diggiza wogay baa. 
\v 24 Yesus Kirstoosas gididayti asho iza iita qofaaranne iza iita amoteththaara issife kaqqida. 
\v 25 Nu Ayanan daana koykko ane Ayanan simerettoos. 
\v 26 Nuni issoy issaa iitas denththeththishenne qanaatettishe coo mela ceeqettizayssa ane aggoos.
\c 6
\s1 As Ubbaas Lo7o Ooso
\p
\v 1 Ta ishatoo! Issi asi nagara ooththi beettiko intte qasse Ayanan lo7o dizayti iza ashketeththara zaaranaas bessees; gido attiin nekka izaade mala paacettontta mala ne hu7es naagetta. 
\v 2 Intte issoy issaa deexo tooho tookkite; hessa mala ooson Kirstoosa wogaa poleeta. 
\v 3 Issaadey aykkoka hanontta dishe bana gitasizaa misatikko hessaadey barkka bana baleththees. 
\v 4 Issi issi asi ba ooso barkka paacci xeello; hessafe guye hara asara bana ginasontta dishe izi bana ceeqisizaaz demmana. 
\v 5 Issi issi asi barkka ba tooho tookkanaas bessees.
\p
\v 6 Qaala tamaarzay oonikka ba tamaarda lo7o miishshaa ba astamaarezara gishetto.
\p
\v 7 Balettofte; Xoossi qilcca erenna; asi ba zeridaaro izo zaari maxana. 
\v 8 Ba asho amo kunththanaas zerizaadey ashoppe dhayo maxana; Ayana ufayssanaas zeridaadey gidikko ayanappe mernaa de7o maxana. 
\v 9 Ane nu lo7o ooso ooththanaas azalloko; nu ufays qanxxontta aggiko wodey gakkishin gakkida kath nu maxana. 
\v 10 Hessa gishshas nuus dandayettiko asa ubbaas harappeka ammaniza asaas ane lo7o ooththoos.
\s1 Wurseththa Zorenne Saroka
\p
\v 11 Tani ta kushera inttes ay mala gita pidalen xaafidaakko ane xeellite. 
\v 12 Coo kare baggara beettana koyza asati intte qaxxarettana mala wolqqaththana koyeettes; istti hessa ooththizay Kirstoosa masqale gishshas giidi goodettontta malassa. 
\v 13 Istti intte qaxxarettana mala koyzay intte ashon ceeqettanaas koyza gishshas attiin qaxxarettidayti wogaa naagizayta gidettenna. 
\v 14 Qasse alamey taas, tanikka alames kaqettida Godaa Yesus Kirstoosa masqalenppe attiin haran ceeqoy taappe haakko. 
\v 15 Qaxxarettiin woykko qaxxarettontta aggiin izas go7ay baa; go7ay ooraththa medheteth gideththa. 
\v 16 Hayssa ha azazoza kaalliza ubbatassinne Xoossa dere gidida Isra7eele asatas saroteththinne maareteththi gido.
\p
\v 17 Tani Yesusa malaata ta asateththan tookkadis; hessa gishshas ha7i tana oonikka waayisenna.
\p
\v 18 Ta ishatoo! Godaa Yesus Kirstoosa aadho kiyateththi inttenara gido! Amiin.