\id 2TI - Gamo Full Bible final version
\ide UTF-8
\h 2Ximtoosas
\toc1 Phawuloosi Ximtoosas Xaafida Nam7anththo Kiita
\toc2 2Ximtoosas
\toc3 2Xim
\mt2 Phawuloosi
\mt1 Ximtoosas
\mt2 Xaafida Nam7anththo Kiita
\imt1 Giddo Qofa
\ip Phawuloosi Ximtoosas xaafida ha nam7anththo kiitay Phawuloosi baas daro maado gidi bana maaddiza ooso lagge gidida naateththa naa Ximtoosas yeddida zore qaala oykkides; Phawuloosi Ximtoosa izi daro dandayan minnana mala zorides; Ximtoosi Phawuloosappe ekkida mino zore qaalay Yesus Kirstoosa gishshas ammanettidi markkattana mala Mishiraachcho qaalaa, kase gal7a caaqo garsan diza timirtezakka minththi oykkana malanne izas aykko waayey darikkoka tamaarsoninne Mishiraachcho qaalaa sabbako aggontta minnana malassa.
\ip Ximtoosas imettida mino yo7oy coo mela eeyateththan asay palamettiza yo7oppe izi haakkana malassa; hessa mala yo7oy siyizayta moorees attiin izi immiza hara go7ay deenna.
\ip Hayssa ubbaan Ximtoosi yuushshi qoppanaas bessizay Phawuloosi ammanon waani de7idaakko, izi ay mala genccidaakko iza siiqoza, iza minoteththaanne iza bolla gakkida waayeza leemiso izi kaallana malassa. Phawuloosi hayssa ha kiitaa xaafiday ba layththa wurseththan hayqo pirday iza bolla pirdetti uttiin izi hayqo naagiza wodekko. (2Xim 4:6-8)
\iot Ha Maxaafay Oykkida Kumeththa Qofa
\io1 Geloso \ior 1:1-2 \ior*
\io1 Ximtoosas imettida zore \ior 1:3—2:13 \ior*
\io1 Asay kaddiza wode minni eqo \ior 2:14—4:5 \ior*
\io1 He wode diza hanotanne heyta gishshas imettida zoreta \ior 4:6-18 \ior*
\io1 Kuushsha qofa \ior 4:19-22 \ior*
\c 1
\p
\v 1 Yesus Kirstoosara issifeteththan diza de7o hidota qaala gishshas yootana mala Xoossa shenen Yesus Kirstoosa Hawaare gidida Phawuloosappe, 
\v 2 dosettida ta naa Ximtoosas kiyateththi, maaroteththinne saroteththi Xoossaa Aawappe Godaa Yesus Kirstoosappe nees gido.\x - \xo 1:2 \xo*\xt Hawa 16:1\xt*\x*
\s1 Ximtoosas Imettida Zore
\p
\v 3 Pacey baynda gallassinne qamma ne gishshas woosan qofsashe kase Aawati ooththida mala geeshsha wozinara ta goynniza Xoossaa ta galatays. 
\v 4 Kase ne afunththaa qoppa ekkada ta nena beyada ufayettana laamotays. 
\v 5 Qoodheppe qommon gidontta ne ammanoza ta qoppays; he ammanoykka koyro ne aayey aayin Loydininne qasseka ne aayeyin Ewonqen dees; ha7i qasse ne bolla dizayssaka ta eradis.\x - \xo 1:5 \xo*\xt Hawa 16:1\xt*\x* 
\v 6 Hessa gishshas tani ta kushe ne bolla woththiin ne ekkidayssa ne bolla diza Xoossa imotaa ne denththeththana mala ta nena qofsays. 
\v 7 Xoossi nuus nuni nu hu7e haaranaas Xoossa wolqqa eranaassinne siiqettana Ayana immides attiin babo ayana immibeenna.
\p
\v 8 Hessa gishshas Godaa gishshas markkattanaas woykko Godaa gishshas qashettida tanan yeellatoppa; gido attiin Xoossa wolqqara mishiraachcho qaalaa gishshas ne tanara meto ekka. 
\v 9 Nu aykkoka ooththida gishshas gidontta dishin ba qofaa malanne ba kiyateththaa mala nuna ashshidessinne nuna baas dummasidi xeygides. He iza kiyateththi mernaa wodeppe kase Yesus Kirstoosa baggara nuus imettides. 
\v 10 Ha7i qasse izi hayqo ubbaa dhayssidi mishiraachcho qaalaa baggara nuna poo7on kessida nu dhale Yesus Kirstoosa yuussaan qonccides.
\p
\v 11 Tanikka hayssa ha mishiraachcho qaalaa yootizaade, kiitettidaadenne astamaare gidada shuumettadis.\x - \xo 1:11 \xo*\xt 1Xim 2:7\xt*\x* 
\v 12 Tani meto be7izaykka hessa gishshassa; gidikkoka ta oona ammanizaakko tani ta ammanizaade shaakka eriza gishshas izan yeellatikke. Ta izas immida hadaraa he gallassiya gakkanaas izi naaganaas dandayzayssa ta shaakka eradis.
\p
\v 13 Ne taappe siyida timirteza Yesus Kirstoosara issifeteththan diza ammanoninne siiqon leemiso histta oykka. 
\v 14 Nees imettida lo7o hadaraa nunan diza Xillo Ayanan naaga. 
\v 15 Iisiya awuraajja giddon dizayti wurikka tana aggidayssa ne eraasa; Filgoosinne Hermogeneesi tana aggida asaara deettes. 
\v 16 Henesifoore soo asaa Goday maaro; ays giikko izi tana daro wode minththeththidessinne tani sansalatan qashetta dishin tana be7idi yeellatibeenna. 
\v 17 Harappeka izi Oroome yida wode tana koyi koyidi demmides. 
\v 18 Wurseththa pirda gallas Goday iza pirdafe ashsho; izi tana Efesoonen ay mala maaddidaakko ne lo7eththa eraasa.
\c 2
\p
\v 1 Hessa gishshas ta naazoo neni Godaa Yesus Kirstoosa kiyateththan minna. 
\v 2 Daro markkatta sinththan ne taappe siyidayssa harata tamaarsanaas dandayzaytassinne ammanettida asatas hadara imma.
\p
\v 3 Yesus Kirstoosas ammanettida lo7o wottadara mala tanara meto ekka. 
\v 4 Wottadarateththan ooththizaadey ba halaqaa ufayssanaas dafettees attiin hara bana qaxeththiza ooson geli erenna. 
\v 5 Hessaththoka gaadde woxxizaadey woththa woga naagontta woxxiko xoono akilile ekkenna. 
\v 6 Gooba goshshanchchay ba goyi kessida kaththa xeera mizaade gidanaas bessees. 
\v 7 Ta nees gizayssa ne wozinan woththa siyikko Goday nees yo7o ubbaan akeeka immana.
\p
\v 8 Hayqoppe dendida Dawite zereth gidida Yesus Kirstoosa qoppa; ta yootiza mishiraachcho qaalaykka hessa. 
\v 9 Hessa gaason iita ooththida asa mala qashettana gakkanaas waaye beyays; gido attiin Xoossa qaalay qashettenna. 
\v 10 Hessa gishshas Kirstoosa baggara diza atoteththinne mernaa bonchcho demmana doorettidayta gishshas gaada wursaka dandayadis.
\q1
\v 11 «Nu izara issife hayqqiko
\q2 nu izara de7on daana.
\q1
\v 12 Dandayan minniko
\q2 nu izara kawotana.
\q2 Nu iza kaddiko
\q2 izikka nuna kaddana.\x - \xo 2:12 \xo*\xt Mato 10:33; Luqa 12:9\xt*\x*
\q1
\v 13 Nu izas ammanettonttayta gidikko
\q2 izi mernaas
\q2 ammanettida mala daana.
\q2 Izi barkka bana
\q2 kaddana dandayenna»
\m geetettida qaalay ammanettidayssa.
\s1 Mino Oosanchcha
\p
\v 14 Hayta ha yo7ota gishshas asaa qofso aggofa; asay ba giddon issoy issaara qaalaa gaason palamettontta mala Xoossa sunththan zora; hessa mala yo7oy siyizayta moorees. 
\v 15 Tumu Xoossaa qaala yootizaade, yeellachchontta oosanchchanne asi ne gishshas lo7o markkattizaade gidada nenateththaa wursa Xoossa sinth shiishshanaas minna. 
\v 16 Coo mela doona lallabeteththafe haakka; hessa mala yo7on waaxettida asati Xoossafe haakki haakki beettes. 
\v 17 Istta timirtey sakkidi paxontta gede gujji gujji daaketti biza madunththa mala; Hemenewoosinne Qasse Filxoosa geetettizayti hessa mala timirte tamaarzayta giddon deettes. 
\v 18 Heyti tumateththafe haakkidi coo mela waayeettes; isttika, «Hayqoppe denththi hayssafe kase hani aadhdhides» giidi issi issi asaa ammano shiri yeggeettes.
\p
\v 19 Gido attiin, «Goday baas gidizayta erees.» Qasseka, «Godaa sunth xeygizay wuri iitappe haakko» giza maatamey iza bolla diza laamettontta Xoossaa yochchay laamettibeenna.
\p
\v 20 Issi gita keeththan worqqafenne birappe xalla gidontta miththafenne urqqafe oosettidayti dizayssaththo heytanttafekka baggayti bonchcho oosos, baggayti qasse hiraysso oosos eketteettes. 
\v 21 Hessa gishshas oonikka hayta ta gida iita yo7otappe bana geeshshiko; hessaadey bonchcho oosos gidizaadenne anjjettidaade; Godaa go7izaadenne lo7o oosos giigettidaade gidana.
\p
\v 22 Panththateththa iita amoteththafe baqata; geeshsha wozinara Godaa xeygiza asatara xilloteth, ammano, siiqonne saroteth kaalla.
\p
\v 23 Go7aynne hidotay baynda eeyata palamappe haakka; gaasoykka hessantta malay oosh kaaleththizayssa ne eraasa. 
\v 24 Godaa oosanchchay asara ooyettanaas bessenna; hessafe bollara asa ubbaa achchan kiya, as tamaarsanaas dandayzaadenne mino as gidanaas bessees. 
\v 25 Izi banara eqettiza asata ashketeththara oykkizaade gidanaas bessees; oonee erizay istti tumaa erana mala Xoossi isttas maarettanaas wode immana dandayees. 
\v 26 Hessika istti yuushshi qoppi simmidi iza shene kunththana mala istta di7i efida Xala7e narxafe istti kessi ekkana.
\c 3
\s1 Wurseththa Woden Yaana Metota
\p
\v 1 Gido attiin wode wurseththan as metiza wodey yaanayssa ne era. 
\v 2 Asay bana dosizaade gidana; miish siiqizayta, banan ceeqettizayta, otoranchchata, cashshanchchata, bana yelidaytas azazettonttayta, galatonttaytanne geeshshateththi bayndayta, 
\v 3 siiqoy bayndayta, atto gi maaronttayta, asa sunth moorizayta, barkka bana haaronttayta, menxe iitata, lo7o miish dosonttayta, 
\v 4 kaddizayta, naagettonttayta, coo mela otoreteththan kumidayta, Xoossafe aaththidi lo7o deeth dosizayta gidana. 
\v 5 Ammaniza as misatana shin ammanos diza wolqqaa kaddana; heyta malatappe ne haakka.
\p
\v 6 Heytantti issi issi keeththe kalxi gelidi daro deexo nagaraninne dumma dumma iita amoteththa gars gelidi yaanne haa qaaxxiza ammanon laafa maccassata qaxi oykkeettes. 
\v 7 Heyta mala maccassati ubba wode tamaareettes shin tumaa erettenna. 
\v 8 Iyaneessinne Iyanbaraasi Muse bolla dendida mala haytikka istta qofay moorettiin baas ammanoppe kundida gishshas tumateth ixxeettes.\x - \xo 3:8 \xo*\xt Kessa 7:11\xt*\x* 
\v 9 Gido attiin istta qofay kumenna; gaasoykka Iyaneesanne Iyanbaraasa eeyateththi asaas qonccida malakka hayta hanoykka ubbaas qonccana.
\s1 Phawuloosi Ximtoosas Immida Hadara
\p
\v 10 Ne gidikko ta timirteza, ta duussaa, ta waanna qofaa, ta ammanoza, ta dandayaa, ta siiqozanne ta minoteththaa ubbaa eraasa. 
\v 11 Ta goodeteththaanne ta waayeza Anxokiyan, Iqoniyooninne Listtirankka ta bolla gakkidayssa ubbaa tani dandayan ekkidayssa ne eraasa; gidikkoka Goday hessa ubbaafe tana ashshides.\x - \xo 3:11 \xo*\xt Hawa 13:14-52; 14:1-20\xt*\x* 
\v 12 Tumappe Yesus Kirstoosa geeshsha wozinappe ammani daana gizayti wurikka goodettizayta gidana. 
\v 13 Iita gidida baleththiza asati baas balettidi asaa baleththishe iitateththaa bolla iitateth gujji gujji baana.
\p
\v 14 Ne gidikko kase ne tamaarada erida ogen minna; hessa oonappe tamaardaakko ne eraasa. 
\v 15 Ne guuththa naateththafe ha7i gakkanaas Yesus Kirstoosa ammanon atoteththi beettiza timirte immiza Geeshsha Maxaafata lo7eththa eradasa. 
\v 16 Geeshsha Maxaafati wurikka Xoossa Ayanay kaaleththiin xaafettidayta; isttika as tamaarsanaas, hanqanaas, suurisanaas qasseka xilloteththa ogen kaaleththanaas go7eettes. 
\v 17 Hessika Xoossa asi lo7o ooso ubbaas bessizaade gidana malassa.
\c 4
\p
\v 1 Xoossa sinththaninne hessaththoka paxa dizayta bollanne hayqqidayta bolla pirdanaas diza Yesus Kirstoosa sinththan iza qoncceththaanne iza kawoteththaa qofara hayssa nees hadara gays. 
\v 2 Qaalaa sabbaka; nees giigiin woykko giigontta aggiin neni ne baggara giigetta utta; daro dandayara tamaarson asaa suurisa; hanqanne zora. 
\v 3 Gaasoykka asay wuri suure gidida timirte ekkontta ixxana wodey yaana; hessafe bollara asay ba amora gaaggizayssa istta hayththi siyana koyzayssa xalla isttas yootana mala bana tamaarsana daro astamaareta ba ach shiishshana. 
\v 4 Tumaa siyanaappe ba hayth haraso zaaridi haysi7e bagga simmana. 
\v 5 Neni gidikko haniza yo7o ubbaan loddu ga; meto dandaya; mishiraachcho qaalaa yooto nees ooso histta; ne oosozakka pola.
\p
\v 6 Ta qasse yarshettanaas mata uttadis; hayssa ha alamezappe shaaketta buussa wodey taas gakkides. 
\v 7 Lo7o baaxe ta baaxetadis; ta woxxana woth wursadis; ammanokka naagadis. 
\v 8 Sinththafe taas akililey giigi uttides; hessika xilloteththa; hessaka tumu pirdiza Goday he gallas taas immana; hessika taas xalla gidontta iza yuussaa laamotizaytas ubbaasikka immana.
\s1 Phawuloosi Azazida Wurseththa Azazo
\p
\v 9 Taakko elela yaanaas nees dandayettida mala ooththa. 
\v 10 Deemaasi hayssa alameza siiqidi tana yeggi aggidi Tasolonqe bides. Qarqisi Galatiya bides; Titoosi gede Dalmaaxiya bides.\x - \xo 4:10 \xo*\xt Qola 4:14; Pilm 24; 2Qoro 8:23; Gala 2:3; Tito 1:4\xt*\x* 
\v 11 Luqaasi xalla tanara dees; Marqoosi tana ooson maaddiza gishshas iza nenara ekka ya.\x - \xo 4:11\xo*\xt Qola 4:14; Pilm 24; Hawa 12:12,25; 13:13; 15:37-39; Qola 4:10; Pilm 24\xt*\x* 
\v 12 Tiqiqoosa Efesoone yeddadis.\x - \xo 4:12 \xo*\xt Hawa 20:4; Efe 6:21-22; Qola 4:7-8\xt*\x* 
\v 13 Ne haa yashe ta Xiro7aadan Karpuse achchan woththida ta Maaqanne maxaafata harappeka galban xaafettida maxaafata taas ekka ya.\x - \xo 4:13 \xo*\xt Hawa 20:6\xt*\x*
\p
\v 14 Xarqimala qoxxiza Iskindiroosi ta bolla daro qoho gaththides shin Goday izas iza ooso mala immana.\x - \xo 4:14 \xo*\xt 1Xim 1:20; Maza 62:12; Oro 2:6\xt*\x* 
\v 15 Izi nu yootiza qaalaa keehi ixxides; nekka izappe naagetta.
\p
\v 16 Tana mootiza yo7ozas koyro tana ashshana markka ta shiishshiin oonikka tana maaddana yibeenna; gido attiin wurikka tana yeggidi bida. Hessaka istta bolla Xoossi qoho histti qoodoppo. 
\v 17 Gido attiin qaalaa kiitay ta baggara kumeth yootettana malanne dere asay wuri siyana mala Goday ta achchan eqqidi tana minththides; Gaammo doonappeka tana ashshides. 
\v 18 Goday iita yo7o ubbaafe tana ashshana; gede ba salo kawoteththas tana sarora gaththana; izas mernaappe mernaa gakkanaas bonchchoy gido. Amiin.
\s1 Wurseththa Saroka
\p
\v 19 Phirsiqillas, Aqilas, Henesifoore soo asaasikka ta sarokaa gaththa.\x - \xo 4:19 \xo*\xt Hawa 18:2; 2Xim 1:16-17\xt*\x* 
\v 20 Erisxoosi Qorontoosen attides; Xirofomoosi sakettida gishshas iza ta Miliixen aggadis.\x - \xo 4:20 \xo*\xt Hawa 19:22; Oro 16:23; Hawa 20:4; 21:29\xt*\x* 
\v 21 Balgoy gakkanaappe sinththetada taakko haa gakkanaas nees dandayettida mala ooththa. Ewuguloosi, Phudeesi, qasseka Linoosi, Qilawudiyaynne ammanizayti wurikka nena saro saro gida. 
\v 22 Goday nenara gido; Godaa kiyateththi inttenara gido.