\id 2TH - Gaammo project 
\h 2 Tasolonqe 
\toc1 Phawuloosi Tasolonqe Asas Xaafida Nam7antho Kiita 
\toc2 2 Tasolonqe 
\toc3 2Taso 
\mt2 Phawuloosi 
\mt1 Tasolonqe Asas 
\mt2 Xaafida Nam7antho Kiita 
\imt1 Giddo qofa 
\ip Kirstoosi nam7antho yaanayssa gish oyshoynne ooshi dendida gish Tasolonqe Woossa Keeththa garsan metoy dari dari bides. Phawuloosi Tasolonqe asas xaafida nam7antho kiitay “Goda yuussa gallassi matides” giza ammano qaala tishshi histi yootides. Phawuloosi xaafishe Kirstoosi yaanappe kasetidi “Makala as” geetettizadey Kirstoosara eqettizadey baleththon hayssa alameza bolla iitatethinne makalay dari dari baana guussan ista ammano giigissanas dafettes. 
\ip Nababizayti waayeynne metoy ista bolla darikkokka isti ba ammanon minni eqqana mala Phawuloossinne harati izara issife ooththizayti ooththiza mala istika ba duussas koshshizayssa demmanas minni ooththana malanne lo7o ooso ooththanas azallonta mala ista lo7ethi zorees. 
\is1 Ha maxaafay oykkida kumeththa qofa 
\io1 Geloso 1:1-2 
\io1 Galatanne hadara imo 1:3-12 
\io1 Kirstoosi nam7antho yaanayssa gish imettida timirte 2:1-17 
\io1 Ammanon duussa gish imettida zore 3:1-15 
\io1 Kuushsha qofa 3:16-18 
\c 1  
\p  
\v 1 Phawuloosappe, Silwaanooseppenne Ximtoosappe; nu Aawa Xoossaninne Goda Yesus Kirstoosan gidida Tasolonqen ammaniza asas. \x *- \xo 1:1 \xt Hawa 17:1\x* 
\v 2 Xoossa Aawappenne Goda Yesus Kirstoosappe kiyatethinne saroteth intes gido. 
\s1 Galatanne woossa 
\p  
\v 3 Ta ishato! Inte ammanoy wodeppe woden dicci dicci biza gishshinne inte siiqoyka kaseppe gujeti gujeti biza gish nu inte gish Xoossa lo7ethi galatanas bessees.  
\v 4 Hessa gish inte bolla gakkida goodeteththaninne meto ubban inte minnida gish nuni nu baggara inte dandaya gishshinne inte ammano gish ammaniza asa ubba achchan ceeqqettos. 
\p  
\v 5 Hessi wurikka Xoossa pirday suure gididayssa besses. Hessa geedon waaye beyiza inte Xoossa Kawoteththas bessizayta gidi bettideta.  
\v 6 Xoossi xillo gidida gish intena waaysizayta izi waayssana.  
\v 7 Waaye ekkida intessinne nuus shempo immana. Hessika Goda Yesus Kirstoosi wolqama salo Xoossa kiitanchatara salo bolla qonciza wode hanana.  
\v 8 He wode Xoosse eronta asatanne Goda Yesus Kirstoosa Mishiraachcho qaalas azazettonta asata bolla izi ba halo laco taman kessana. \f + \fr 1:8 \fq laco taman \ft gizayssi issi issi qaala birsheththatan xaafetibenna.\f* 
\v 9 Istika Goda sinthafenne iza boncho wolqa achchafe kichchidi mernas dhayon qaxayettana. \x * \xo 1:9 \xt Isa 2:10\x* 
\v 10 Isti qaxayettanay izi geeshshata achchan bonchettanassinne ammanizayti wuri izan malalettana mala izi yiza gallassan hanana. Inteka he ammaniza asara daana; gaasoyka nu intes markattidayssa inte ammanida gishassa. 
\p  
\v 11 Nu hessa qoppishe nu Xoossi intena ba xeeyssas gidizayta histi qoodana mala inte lo7o ooththanas amottiza amozanne ammanon inte ooththida oosoza wursi izi intes ba wolqan polana mala nu intes ubba wode woossos.  
\v 12 Qasseka nu Goda Xoossanne nu Goda Yesus Kirstoosa kiyatetha mala Yesus Kirstoosa sunthi inte achchan bonchettana malanne inteka izan bonchettana mala nu intes woossos. 
\c 2  
\s1 Makala as 
\p  
\v 1 Ta ishato! Goda Yesus Kirstoosa yuussa gishshinne nu izakko baana buussa gish nu intena qofisoos. \x * \xo 2:1 \xt 1Taso 4:15-17\x* 
\v 2 Ayanay qoncisides woykko qaalay gees giidi woykko nuuppe intes kiitettida kiita mala “Goda yuussa gallas gakkides” giidi inte qofan yark yarkofitenne daggammofte.  
\v 3 Oonikka ay hanonka intena baleththofo. Daro asay ammano kadanappe sinthe dhayanas bessiza issi makala asi qonconta dishin he gallassay gakkenna.  
\v 4 Izikka Xoosse geetetti gooynettiza eeqa xoossata ubbafe bollara bana dhoqu dhoqu histizadenne Xoossara eqettizade. Izikka Xoossa Keeththan uttidi bana “Tani Xoossa” giidi awajja awajjisana. \x * \xo 2:4 \xt Hizi 28:2\x* 
\p  
\v 5 Ta intenara diza wode hayta ha yo7ota intes ta yootidayssi intes qofetizeshaa?  
\v 6 Izi ba woden qoncana gakkanaas ha7i izi qonconta mala aazi diggizakkonne inte ereeta. 
\p  
\v 7 Makalancha xuuray haray attoshin Ha7ikka ooso bolla dees. Gido attin hayssi hananay izi ha7i ooththonta mala iza diggizaddey iza ogeppe kichchana gakkanaas xalla.  
\v 8 Hessafeka kaallidi Goda Yesusi ba duuna peenoninne ba boncho yuussan dhayssana; makalanchay qoncana. \x * \xo 2:8 \xt Isa 11:4\x* 
\v 9 He makalancha yuussi Xala7e wolqan hessikka as baleththiza malatataninne malalisiza miishatan hanana. \x * \xo 2:9 \xt Mato 24:24\x* 
\v 10 Hessathoka ekkidi attonta mala tuma ixidi dhayiza asata baleththanas dumma dumma iita oosoy yaana.  
\v 11 Hessa geedon isti wordo yo7o ammanana mala Xoossi ista bolla bala ooso kiittana.  
\v 12 Hessi hananay tuma ammanonta ixidinne wordo yo7on ufayetizayti wuri pirdettanasa. 
\s1 Minni eqqite 
\p  
\v 13 Godan dosettida ta ishato! Nu gidikko ubba wode inte gish Xoosse galatanas nuus besses. Gaasoyka Xoossi intena koyroppe oykkidi inte Xillo Ayanan dummatidaytanne tumu ammanidi inte attana mala intena doorides.  
\v 14 Nu Goda Yesus Kirstoosi boncho gishettizayta inte gidana mala nu yootida mishiraachcho qaala baggara intena xeygides.  
\v 15 Hessa gish ta ishato! Inte minni eqqite, nu nu duunan gidin woykko kiitan woykko nu intes aaththi yeddida timirteza lo7ethi oykkite. 
\p  
\v 16 Izi nu Goda Yesus Kirstoosi qasse nuna siiqidaynne ba kiyatethan merna minthethonne lo7o hidota izi nuus immida nu Aawa Xoossay,  
\v 17 izi inte wozna lo7o oosoninne qaalan mintho. 
\c 3  
\s1 Woossa gish shiiqida oysho 
\p  
\v 1 Wursethan ta ishato! Qasseka Goda qaalay inte achchan hanoyssathoka eleeli ubbaso gakkana malanne bonchettana mala nuus woossite.  
\v 2 Qasseka asi wuri ammanizayssa gidonta gish makalanchatappenne iita asatappe nu attana mala nuus woossite.  
\v 3 Goday gidikko ammanettidayssa. Izikka intena minthana; Xala7epaka intena naagana.  
\v 4 Nu intena azazidayssa inte ha7i ooththideta shin sinthafekka inte ooththanayssa nuni Godan ammanettos.  
\v 5 Goday inte wozna Xoossa siiqokkonne Kirstoosa dandayakko kaaletho. 
\s1 Ooso ooththana mala imettida zore 
\p  
\v 6 Ta ishato! Ooso ooththonta asappenne inte nuuppe ekkida timirteza mala doonta ammanizaytappe inte haakkana mala Goda Yesus Kirstoosa sunthan intena nu azazoos.  
\v 7 Inte nu leemiso wosti kallanakkonne inte inte baggara ereeta. Nu intenara diza wode ooso ooththonta coo de7ibekko.  
\v 8 Qasseka oona soppekka kath coo mela mibeekko. Gido attin intefe oonasika nu tooho gidonta mala qammanne gallas daaburan ooththi midos.  
\v 9 Nu hessa ooththiday inte nuna kaallana mala intes lo7o leemiso gidana giidippe attin nuus koshshizayssa intefe ekkana nuna diggiza wogay diin gidenna.  
\v 10 Nu intenara diza wode “Ooso ooththanas dosonta asi kath mooppo” giza azazo intes immidos.  
\v 11 Inte giddon issi issi asati ooso ooththontayssa nu siyidos. Heytanti ooso ooththonta mela asa yo7on geliza asata.  
\v 12 Heyta mala asati ba ooso co7u gi ooththana malanne ba kath maana mala Goda Yesus Kirstoosa sunthan nu ista azazoossinne zoroos.  
\v 13 Inte gidikko ta ishato! Lo7o ooso ooththanappe mulekka azaallofte.  
\v 14 Hayssa nu kiittida qaalas azazettontay oonikka diikko hessa misatizade lo7ethi kaallitenne izi ba ooson yeelatana mala izara gaggofte.  
\v 15 Gido attin iza inte isha mala hanqite attin morke mala xeellofte. 
\s1 Wursetha saroka 
\p  
\v 16 Sarotetha Goday izi ba baggara yo7o ubban intes saroteth immo. Goday intenara ubbara gido.  
\v 17 Hayssa saroka ta ta kushera intes xaafiday tana Phawuloosa. Ta kiitas dumma malatay hayssa; izikka hayssa tani ta kushen xaafoyssa.  
\v 18 Nu Goda Yesus Kirstoosa aadhdho kiyatethi intenara ubbara gido.