\id TIT - Gaammo project 
\h ቲቶሳ 
\toc1 ጳዉሎሲ ቲቶሳስ ፃፊዳ ኪታ 
\toc2 ቲቶሳ 
\toc3 ቲቶ 
\mt2 ጳዉሎሲ 
\mt1 ቲቶሳስ 
\mt2 ፃፊዳ ኪታ 
\imt1 ጊዶ ቆፋ 
\ip ቲቶሲ ኣይዛቤቴꬃፔ ሲሚ ኣማኖን ጌሊዳ ጳዉሎሳ፥ ሚሺራቾ ቃላ ኦሶን ማታን ማዲዛ ኢዛስ ኣዳ ኤሬቲዳ ላጌ። ጳዉሎሲ ሃይሳ ሃ ኪታዛ ፃፊዳይ ባፔ ላይꬃን ዮጊዛኔ ኢዛራ ማቲዛ ሃይሳ ባናራ ኢሲፌ ኦꬂዛ ቲቶሳስ ጊዲሺን ቲቶሲ ሄ ዎዴ ዎሳ ኬꬃ ፄሊሼ ቃርፄሴ ጌቴቲዛሶን ዴስ። ሃ ኪታይ ሎዔꬂ ሚንꬂዛይ ሄꬑ ኣይፌ ዮዖታ ቦላ። 
\ip ኮይሮይ፥ ዎሳ ኬꬃ ጪማቲ ሃራፔካ ቃርፄሴ ኣሳስ ኢታ ኦሶ ጊሽ ኢስታስ ኣይ ማላ ሎዖ ኦሶይ ቤሲዛኮኔ ቲቶሲ ኢስታ ታማርሳና ማላ ቲቶሳ ቆፊሴስ። ናምዓንꬆ ቃስ ዎሳ ኬꬃ ጊዶን ዲዛ ዱማ ዱማ ቡዱኔን ሄሲካ ጪሚዳ ማጫሳታኔ ኣቱማ ኣሳ፥ ሄሳꬆካ ናቴꬃ ናይታኔ ኣሳስ ኦꬂ ኣቂዛይታ ኢዚ ታማርሳና ቤሲዛይሳ ታማርሳና ማላ ቲቶሳ ዞሬስ። ዉርሴꬃን ቃስ ኣማኖን ዱሳ ጊሽ ሃራፔካ ኣሳይ ሳሮኒኔ ሲቆቴꬃን ዴዓና ማላ፥ ሄሳꬆካ ዎሳ ኬꬃ ጊዶፌ ኢሶይ ኢሳ ኢፆኔ ኦሽ ባ ጋርሳን ሻኬቴꬅ ኣጋና ማላ ቲቶሳስ ዞሬ ኢሚዲ ኦꬃና ኦጌ ቤሲዴስ። 
\is1 ሃ ማፃፋይ ኦይኪዳ ኩሜꬃ ቆፋ 
\io1 ጌሎሶ 1፡1-4 
\io1 ዎሳ ኬꬃ ካሌꬂዛይታ 1፡5-16 
\io1 ዎሳ ኬꬃን ዲዛ ዱማ ዱማ ኣሳታስ ኢሜቲዳ ኦꬆ 2፡1-15 
\io1 ዞሬኔ ናጌታና ማላ ቆፊሶ 3፡1-11 
\io1 ኩሻ ቆፋ 3፡12-15 
\c 1  
\s1 ዎሳ ኬꬃ ካሌꬂዛይታኔ ዎርዶ ኣስታማሬታ 
\p  
\v 1 ፆሳስ ዶሬቲዳይታ ኣማኖኒኔ ቱሙ ኣያናን ካሌꬂዛ ቱማ ኤራቴꬃን ዲቻና ማላ ፆሳ ኣይሌኔ ዬሱስ ኪርስቶሳ ሃዋሬ ጊዲዳ ጳዉሎሳፔ።  
\v 2 ኢዛ ኣማኖይኔ ኤራቴꬃይ ካሴፔ ኦይኪዲ ዎርዶቶንታ ጎዳይ ዳሮ ዎዴፔ ካሴ ባ ኢሚዳ ሜርና ዴዖ ሂዶታ ማላ።  
\v 3 ኢዚ ካሴ ጊዳ ዎዴይ ጋኪዳ ማላ ኑና ኣሺዳ ፆሳ ኣዛዞን ታስ ሳባካናስ ኢሜቲዳ ሃራ ባጋራ ፆሲ ባ ቃላ ቆንጪሲዴስ። 
\p  
\v 4 ኑስ ኮꬄ ጊዲዳ ኣማኖ ኢሲፌቴꬃን ኣማኖን ታስ ቱሙ ና ጊዲዳ ቲቶሳስ “ፆሳ ኣዋፔኔ ኑና ኣሺዳ ዬሱስ ኪርስቶሳፔ ኪያቴꬂኔ ሳሮቴꬅ ኔስ ጊዶ” ጊዴስ። \x * \xo 1:4 \xt 2ቆሮ 8፡23፤ ጋላ 2፡3፤ 2ፂም 4፡10\x* 
\s1 ቃርፄሴን ቲቶሳ ኦሶ 
\p  
\v 5 ታ ኔና ቃርፄሴን ኣጊዳይ ቡሮፔ ጊጋና ቤሲዛ ዳሮ ሚሺ ዲዛይሳ ጊሽ ኔ ጊጊሳናሲኔ ታ ኔና ኣዛዚዳ ማላ ካታማይ ዲዛሶን ዎሳ ኬꬃ ጪማታ ኔ ዶራናሳ።  
\v 6 ጪማቴꬃን ዶሬታናይቲ ኢስታ ቦላ ቦሮይ ባይንዳይታ፥ ኢሲ ማቺ ኣዚናታ፥ ናይቲ ኣማኒዛይታኔ ዋይሶንታይታ ዎይኮ ኣዛዜቲዛ ናይታ ኣዋታ ጊዴቶ።  
\v 7 ዎሳ ኬꬃ ጪማይ ፆሳስ ኦꬃና ሃዳራ ኤኪዳዴ ጊዲዳ ማላ ኢዛ ቦላ ዎሶይ ባይንዳዴ ጊዳናስ ቤሴስ። ሄሲካ ጬቄቲዛዴ፥ ጉꬃ ሚሻን ዪሎቲዛዴኔ ማꬆቲዛዴ፥ ኡሻንቻኔ ኢዛስ ቤሶንታ ኦጌራ ጎዓ ጊዲዳዝ ጎዲ ኤኪ ቢዛዴ ጊዳናስ ቤሴና።  
\v 8 ሄሳፌ ቦላራ ኢዚ ኢማꬅ ሞኪዛዴ፥ ሎዖ ኦሶ ዶሲዛዴ፥ ባርካ ባና ሃሪዛዴ፥ ሱሬ ኣስ፥ ፂሎኔ ኤራይስ ናጌቲዛዴ ጊዳናስ ቤሴስ።  
\v 9 ሃራ ኣሳታ ሎዖ ቲሚርቴን ሚንꬄꬂዛዴኔ ሄ ሎዖ ቲሚርቴዛ ኢፂዛይታ ሃንቃናስ ባ ታማሪዳ ማላ ቃላን ሚኒዛዴ ጊዳናስ ቤሴስ። 
\p  
\v 10 ዋይሲዛይቲኔ ዱናን ፃላላ ባሌꬂዛይቲ ዳሮቲ ዴቴስ፤ ሃራፔካ ሄይቲ ቃፃሬቲዳ ኣይሁዳ ኣሳታፔ ኣማኒዳ ኣሳታ ባጋታ።  
\v 11 ሄይታንታ ጮዑ ሂስቴꬅ ቤሴስ። ጋሶይካ ኢስቲ ቤሶንታ ኦጌራ ባሲ ጎዓ ዴማናስ ቤሶንታ ቲሚርቴ ታማርሶን ኬꬃ ኣሳ ዉርሲ ሞሮን ዴቴስ።  
\v 12 ኢስታ ናቤታፔ ኢሳዴይ ኢስታ ጊሽ ሃሳዪሼ “ቃርፄሴ ኣሳይ ኡባ ዎዴ ዎርዳንቻታ፥ ኢታ ዶዓታ፥ ጋንጃማታኔ ኣዛላታ” ጊዴስ።  
\v 13 ሄ ማርካቴꬃይ ቱማ፤ ሄሳ ጊሽ ኔ ኢስታ ሎዔꬃ ሃንቄታ። ጋሶይካ ኢስታስ ቱሙ ኣማኖይ ዳና ማላኔ፥  
\v 14 ኣይሁዳታ ሃይሲዔ ዎይኮ ቱሙ ዮዖፔ ሃኪዳ ኣሳታ ኣዛዞ ኢስቲ ሲዮንታ ማላሳ።  
\v 15 ጌሻታስ ሚሺ ዉሪካ ጌሻ ሺን ቱናታሲኔ ኣሞንታይታስ ጊዲኮ ዉሪካ ቱና። ሃራፔካ ኢስታ ቆፋይ ዉሪካ ቱኒዴስ።  
\v 16 ኢስቲ ባና ኑ ፆሴ ኤሮስ ጌቴስ ሺን ባ ሃኖቴꬃን ጊዲኮ ካዴቴስ። ኢስቲ ሹኒዛይታ፥ ኣዛዜቶንታይታኔ ሎዖ ኦሶስ ቤሶንታይታ። 
\c 2  
\s1 ቱሙ ቲሚርቴ 
\p  
\v 1 ኔ ጊዲኮ ኣሳ ቱሙ ጊዲዳዝ ታማርሳ።  
\v 2 ጪማ ኣሳይ ዎዝናማ፥ ቦንቼቲዳይታ፥ ባና ባርካ ሃሪዛይታ፤ ኣማኖኒኔ ሲቆን ዳንዳያንካ ሎዖ ጊዳና ማላ ኢስታ ዞራ።  
\v 3 ሄሳꬆካ ጪማ ማጫሳቲ ባ ዲዛ ዱሳን ቦንቾራ ዲዛይታኔ ሎዖ ሃኖቴꬅ ኣሳ ታማርሲዛይታ ጊዴቶ ኣቲን ኣሳ ሱንꬅ ኢሲዛይታ ዎይኮ ዎይኔ ጫጄ ኡሻ ሱኬን ዋፄቲዳይታ ጊዶንታ ማላ ኢስታ ታማርሳ።  
\v 4 ሄሳꬆ ኦꬂኮ ናቴꬃ ማጫሳቲ ባ ኣዚናታኔ ባ ናይታ ዶሳና ማላ ታማርሳናስ ዳንዳዬቴስ።  
\v 5 ፆሳ ቃላይ ኦና ኣቻንካ ጫዬቶንታ ማላ ኢስቲ ባርካ ባና ሃሪዛይታኔ ጌሻታ፥ ኬꬃ ጊዶን ኢስታ ኦሶይ ኦይኪዳይታኔ ኣሳስ ኪያታ፥ ባ ኣዚናታስ ኣዛዜቲዛይታ ጊዳና ማላ ጪማ ማጫሳቲ ኢስታ ታማርሴቶ። 
\p  
\v 6 ሄሳꬆካ ያላጋ ኣቱማሳይ ባርካ ባና ሃራና ማላ ኔ ኢስታ ዞራ።  
\v 7 ኣይ ሃኖንካ ኔ ኣሳስ ሎዖ ሌሚሶ ጊዳ። ኔ ኣሳ ታማርሲዛ ቲሚርቴዛ ኔካ ዎዝናፔ ታማርሲዛዴኔ ናጊዛዴ ጊዳ።  
\v 8 ኑ ጊሽ ኢታ ሃሳዪዛ ኣሳይ ሃሳያናስ ኢታ ዴሞንታ ኣጊዲ ዬላታና ማላ ኔ ሃሳዪዛ ሃሳያ ጊዶን ቦርሶ ዮዖይ ዶፖ።  
\v 9 ኣይሌቲ ኣዛንካ ባ ጎዳታስ ሃሬታና ማላኔ ኡፋይሳና ማላ፤ ቃሴካ ኣዉቴ ዛሮንታ ማላ ታማርሳ።  
\v 10 ሃኒዛዛን ኡባን ኑና ኣሺዳ ፆሳ ቲሚርቴይ ዶሴታና ማላ ኢስቲ ሎዖ ማርካቴꬅ ቤሳና ማላ ባ ጎዳታ ሚሽ ካይሶቶፔቶ። 
\p  
\v 11 ኣሳስ ኢዛፔ ማሮይ ቤቲዛ ፆሳ ኪያቴꬂ ኣሳ ኡባስ ቆንጪዴስ።  
\v 12 ሄ ኪያቴꬃይካ ኑኒ ናጋራን ዱሲኔ ሃ ኣላሜ ኣሞቴꬃ ካዲዲ ሃይሳ ሃ ዎዴዛን ኑርካ ኑና ሃሪዲኔ ፂሎቴꬃን ቱሙ ኣያና ዱስ ዳናይሳ ኑና ታማርሴስ።  
\v 13 ሄሲካ ኑስ ኣንጄቲዳ ሂዶታ ጊዲዳ ዎጋ ፆሳኔ ኑና ኣሺዳ ዬሱስ ኪርስቶሳ ቦንቾይ ቆንጫናይሳ ናጋናሳ።  
\v 14 ኢዚካ ኑና ኢታቴꬃፌ ዎዛናሲኔ ሎዖ ኦꬃናስ ሚኒዛ ባ ዴሬ ኤራይስ ዶራናስ ባና ኑስ ኣꬂ ኢሚዴስ። \x * \xo 2:14 \xt ማዛ 130፡8፤ ኬሳ 19፡5፤ ዛሬ 4፡20፤ 7፡6፤ 14፡2፤ 1ጴፅ 2፡9\x* 
\p  
\v 15 ሄሳ ጊሽ ኔ ታማርሳናይቲ ሄይታንታ። ሄሳካ ኔ ኩሜꬃ ጎዳቴꬃራ ዞራኔ ሃንቃ፤ ኔና ኦኒካ ሌቆፎ። 
\c 3  
\s1 ሎዖ ኦሶ 
\p  
\v 1 ኣሳይ ዴሬ ኣይሲዛይታስ ሃሬታና ማላኔ ሎዖ ጊዲዳ ሚሽ ዉርሲ ኦꬃናስ ጊጋ ጊዳና ማላ ኣሳ ቆፊሳ።  
\v 2 ቃሴካ ኦኒካ ኣሳ ቦላ ኢታ ሃሳዮንታ ማላኔ ሎዖ ኣሳ ጊዳና ማላ ኣሳ ኡባስ ኩሜꬃ ዎዝናፔ ባ ኣሽኬቴꬅ ቤሳና ማላ ኡባ ቆፊሳ።  
\v 3 ኑካ ካሴ ቆፋይ ባይንዳይታ፥ ኣዛዜቶንታይታ፥ ባሌቲዛይታ፥ ዱማ ዱማ ኣሞኒኔ ሎዖ ዱሳስ ኣይሌቴꬃን ሃሬቲዛይታ። ኣሳራኔ ኑርካ ኑ ጋርሳንካ ኦዬቲሼ ኢታቴꬃኒኔ ሚቃይኔቴꬃን ዶስ።  
\v 4-5 ጊዶ ኣቲን ኑና ኣሺዳ ፆሳ ኪያቴꬂኔ ኢዛ ሲቆይ ቆንጪዳ ዎዴ ኑ ኦꬂዳ ፂሎቴꬃን ጊዶንታ ዲሺን ኢዛ ማሮቴꬃ ዳሮን ኣቲዶስ፥ ኢዚ ኑና ኣሺዳይ ናምዓንꬆ ዬሌቴꬅ ጊዲዳ ሜቻኒኔ ፂሎ ኣያናን ኦራፄቴꬃና።  
\v 6 ሄሳካ ፂሎ ኣያናይ ኑ ቦላ ኑ ጎዳ ፆሲ ኑና ኣሺዳ ዬሱስ ኪርስቶሳ ባጋራ ዳርሲ ጉሲዴስ።  
\v 7 ሄሲካ ኑ ኢዛ ኪያቴꬃን ፂሊዲ ሜርና ዴዖ ሂዶታ ኦይኪዲ ላቲዛይታ ጊዳናሳ።  
\v 8 ሄሲካ ኣማኔቲዳ ቃላ። ፆሳ ኣማኒዛይቲ ሎዖ ኦሶስ ባና ኣꬂ ኢማና ማላ ሃይሳ ዉርሳ ኔ ሎዔꬃ ዮታና ማላ ታ ኮያይስ። ሄሲካ ሎዖኔ ኣይ ኣሲካ ኮዪዛዛ።  
\v 9 ቃሴካ ጮ ሃዳ ፓላማፔኔ ኣሳይ ባ ቆሞ ቆዲዛዛፔ፥ ማርሼፌኔ ዎጋ ጊሽ ዴንዲዛ ኦሻፌ ኔ ሃካ። ሄይታንቲ ጎዖይ ባይንዳ ፓꬆንታ ዮዖ።  
\v 10 ኣሳ ጊዶን ሻኮቴꬅ ሜꬊዛ ኣስ ኢሲቶ ናምዑቶ ኔ ዞሪን ኤኮንታ ኢፂኮ ኢዛዴራ ኔስ ኢሲፌቴꬂ ዶፖ።  
\v 11 ሄሳ ማላ ኣሲ ባሌቲዳ ናጋራንቻ ኣሳ፤ ኢዛዴይ ባርካ ባ ቦላ ፒርዲዳይሳ ኔ ኤራ። 
\s1 ዉርሴꬃ ዞሬ 
\p  
\v 12 ኣርፂሞኔ ዎይኮ ቲቂቆሳ ታ ኔኮ ኪቲኮ ኔ ታኮ ኒቆጶሊዮኔ ያናስ ኔስ ዳንዳዬቲዛዚ ዉርሳ ኦꬃ። ታኒ ሃላይꬃ ባልጎ ሄን ኣꬃና ጋዳ ቃቻዲስ። \x * \xo 3:12 \xt ሃዋ 20፡4፤ ኤፌ 6፡21-22፤ ቆላ 4፡7-8፤ 2ፂም 4፡12\x* 
\v 13 ዎጋ ኤሪዛ ዜማሲኔ ኣጲሎሲ ቢሺን ኢስታስ ኮሺዛዝ ዉርሳ ኩንꬃ ማዳ። \x * \xo 3:13 \xt ሃዋ 18፡24፤ 1ቆሮ 16፡12\x* 
\v 14 ኑ ባጋታስ ሃቺስ ሃቺስ ኢስታ ኮሺዛዝ ኢስቲ ዴማና ማላኔ ኢስታ ዴꬃይ ጎዓይ ባይንዳዚ ጊዶንታ ማላ ኢስቲ ሎዖ ኦሶ ኦꬂ ሚናና ማላ ታማራናስ ኮሼስ። 
\p  
\v 15 ታናራ ዲዛይቲ ኢንቴና ሳሮ ጌቴስ። ኣማኖ ጌዶን ኑና ሲቂዛይታ ዉርሲ ሳሮ ጊቴ። ፆሳ ኪያቴꬂ ኢንቴናራ ጊዶ።