\id JAS - Gamo project 
\h ያቆቤ 
\toc1 ያቆቢ ፃፊዳ ኪታ 
\toc2 ያቆቤ 
\toc3 ያቆ 
\mt1 ያቆቢ 
\mt2 ፃፊዳ ኪታ 
\imt1 ጊዶ ቆፋ 
\ip ሃይሲ ያቆቤ ኪታዚ ኣሲ ሃች ሃች ዳና ዱሳ ጊሽ ዮቲዛዝ ጊዲሺን ኢዚ ፃፌቲዳይ ዱማ ዱማ ዴሬን ላሌቲ ዲዛ ታማኔ ናምዑ ኢስራዔሌ ዛርኬታሳ፤ ሄሳ ፃፊዳዴይ ኑኒ ኑ ኤራቴꬅ ኦሶን ፔይሻና ኦጌ ጊሽ ኣማኒዛ ኣሳ ሞኮ ጊሺኔ ኣማሌ ሎዔꬃና ኦጌ ቤሲዛ ዮዖታ ቆንጪሲዛ ሃሳያታ ሌሚሶራ ቤሴስ። ማንቆቴꬃ ጊሽ፥ ፓጬ ጊሽ፥ ሎዖ ኣማሌ ጊሽ፥ ቃንጌቴꬃ ጊሽ፥ ኣማኖ ጊሺኔ ሎዖ ኦሶ ጊሽ ኢንፃርሳ ኢታቴꬃ ጊሺኔ ሎዔቴꬃ ጊሽ፥ ኣꬎ ኤራቴꬃ ጊሽ ኢሶይ ኢሳራ ኦሻ ጊሽ፥ ኦቶሬቴꬃ ጊሺኔ ኣሺኬቴꬃ ጊሽ፥ ሃራ ኣሳ ቦላ ፒርዳ ጊሽ፥ ጬቄቴꬃ ጊሽ፥ ዳንዳያ ጊሺኔ ዎሳ ጊሽ፥ ኣማኒዛይቲ ኦꬃናስ ቤሲዛ ሚሻታ ሁዔን ሁዔን ፃፊዴስ። 
\ip ሃ ኪታዚ ኣማኖይ ኣማኖ ዴዓን ኦꬄታና ቤሲዛ ኦጌታ ሎዔꬂ ቆንጪሴስ። 
\is1 ሃ ማፃፋይ ኦይኪዳ ኩሜꬃ ቆፋ 
\ip ጌሎሶ 1፡1 
\ip ኣማኖኔ ኣꬎ ኤራቴꬅ 1፡2-8 
\ip ማንቆቴꬂኔ ዱሬቴꬅ 1፡9-11 
\ip ፓጬ 1፡12-18 
\ip ፆሳ ቃላ ሲይዲ ኦሶን ፔይሾ 1፡19-27 
\ip ኦጌይ ባይንዳ ማዶ ማዶንታ ማላ ኢሜቲዳ ቆፊሶ 2፡1-13 
\ip ኣማኖኔ ኦሶ 2፡14-26 
\ip ኣማኒዛዴኔ ኢዛ ሃሳያ 3፡1-18 
\ip ኣማኒዛዴኔ ሃይሳ ሃ ኣላሜዛ 4፡1-5፡6 
\ip ዱማ ዱማ ሃኖታ ጊሽ ኢሜቲዳ ዞሬ 5፡7-20 
\c 1  
\p  
\v 1 ፆሳ ኦሳንቻኔ ዬሱስ ኪርስቶሳ ኦሳንቻ ጊዲዳ ያቆቤፔ ቢታ ቦላ ላሌቲዳ ታማኔ ናምዑ ኮቻታስ ሳሮቴꬂ ኢንቴስ ጊዶ። \x * \xo 1:1 \xt ማቶ 13፡55፤ ማር 6፡3፤ ሃዋ 15፡13፤ ጋላ 1፡19\x* 
\s1 ሜቶኔ ፓጬ 
\p  
\v 2 ታ ኢሻቶ! ኢንቴ ቦላ ዱማ ዱማ ዋዬይ ጋኪኮ ሄሳ ዉርሲ ኡፋይሳን ቆዲቴ።  
\v 3 ጋሶይካ ኢንቴ ኣማኖ ፓጬቴꬂ ኢንቴስ ዳንዳያ ኢሚዛይሳ ኢንቴ ኤሬታ።  
\v 4 ኢንቴ ዳንዳያን ሚኒ ኤቃናይሲ ኢንቴስ ኢሲ ሚሺካ ፓጮንታ ኩሜꬃ ኣሲኔ ዎሶይ ባይንዳይታ ጊዳና ማላ ኦꬆ።  
\v 5 ኢንቴ ጊዶፌ ኦናስካ ኤራቴꬂ ፓጪኮ ኦናካ ሌቆንታ ባ ኪያቴꬃራ ኡባስ ኢሚዛ ፆሳ ዎሶ፤ ኢዛዴስካ ኢሜታና።  
\v 6 ጊዶ ኣቲን ሲꬌይ ባይንዳ ኣማኖን ዎሶ። ጋሶይካ ሲꬊዛዴይ ኣባ ቃꬂዛ ዳምባላ ጫርኮ ማላ።  
\v 7 ሄሳዴይ ጎዳፔ ኣይኮካ ዴማና ጊዲ ቆፖፎ።  
\v 8 ሄሳዴይ ናምዑ ቆፋን ኦይኬቲዲ ባ ቢዛ ኦጌ ቦላ ያኔ ሃኔ ጊዛ ኣሳ ማላ። 
\p  
\v 9 ካሴ ዚቃ ዱሳን ዲዛዴ ፆሲ ꬎቁ ሂስታና ጊሽ ኡፋዬቶ።  
\v 10 ኣሳ ዱሬቴꬅ ማታ ጪሻ ማላ ቆካና ጊሽ ዱሳን ꬎቁ ጊዳዴይ ፆሲ ኢዛ ዚቂ ሂስቲኮ ኡፋዬቶ።  
\v 11 ኣዋ ኣርሼይ ፁጊዲ ማታ ሹሊሴስ፤ ማታ ጪሻይካ ሹሌስ፤ ኢዛ ሎዔቴꬂካ ꬋዬስ፤ ሄሳꬆካ ዱሬይ ሃች ሃች ዳቡርሳን ዲሺን ኢዛ ዱሬቴꬂ ꬋዬስ። 
\p  
\v 12 ፓጬን ሚኒ ኤቂዳዴይ ኢዚ ኣንጄቲዳዴ። ጋሶይካ ኢዚ ፓጬራ ኤቄቲሺን ፆሲ ባና ዶሲዛይታስ ኢሚዳ ሂዶታ ዴዖ ኣክሊሌ ኢዚ ኤካና።  
\v 13 ኦኒካ ፓጬቲዛ ጊዲኮ ታና ፆሲ ፓጬስ ጎፖ፤ ጋሶይካ ፆሲ ኣሴ ኢታን ፓጬና፤ ኢዚ ኦናካ ፓጪ ኤሬና።  
\v 14 ጊዶ ኣቲን ኢሲ ኢሲ ኣሲ ፓጬቲዛይ ባርካ ባ ኢታ ኣሞ ካሊሼኔ ባሌቲሼ ፓጬቴስ።  
\v 15 ኣሞይ ቃንꬃቲዲ ናጋራ ዬሌስ፤ ናጋራይካ ዲጪዳፔ ጉዬ ሃይቆ ዬሌስ። 
\p  
\v 16 ታ ሲቆ ኢሻቶ! ኢንቴ ባሌቶፍቴ።  
\v 17 ሎዖ ኢሞቴꬂኔ ኩሜꬃ ኣንጆይ ዉሪ ቦላ ሳሎ ፖዖታ ኣዋፔ ዎꬌቴስ። ኢዛ ኣቻን ሄኔ ሃ ዩዪዛ ኤሾይካ ዴና።  
\v 18 ኑ ኢዛ ሜꬌቴꬃስ ኮይሮ ባይራታ ጊዳና ማላ ባ ሼኔኒኔ ባ ቱማ ቃላን ኑና ዬሊዴስ። 
\s1 ሲዪዳይሳ ኦሶ 
\p  
\v 19 ዶሴቲዳ ታ ኢሻቶ! ሃይሳ ዩሺ ቆፒቴ፤ ኣሲ ዉሪካ ሲያናስ ኤሶቶ፤ ሃሳያሲኔ ሃንቆስ ኤሶቶፖ።  
\v 20 ኣሳ ሃንቆይ ፆሳ ፂሎቴꬅ ኦꬄና።  
\v 21 ሄሳ ጊሽ ቱናቴꬂኔ ዳልጊዳ ኢታቴꬅ ኢንቴፌ ኬሲ ዬጊዲ ኢንቴ ሼምፖ ኣሻናስ ዳንዳዪዛ ኢንቴ ጊዶን ቶኬቲዳ ቃላ ኣሽኬቴꬃራ ኤኪቴ። 
\p  
\v 22 ቃላይ ጊዛይሳ ኦꬂቴ ኣቲን ሜላ ሲሲ ፃላላ ሲዪዛዴንታ ጊዲዲ ኢንቴርካ ኢንቴና ባሌꬆፍቴ።  
\v 23 ቃላ ሲዪሼ ሲዪዳ ቃላይ ጊዛይሳ ኦꬆንታዴይ ባ ኣይፌሶ ማስቶቴራ ፄሊዛ ኣሳ ማላ።  
\v 24 ባና ፄሊ ቤዪዲ ቤስ፤ ኢዚ ኣይ ሚሳቲዛኮኔ ሄራካ ባሌቲቼስ።  
\v 25 ጊዶ ኣቲን ባና ጌሺዛ ሎዖ ዎጋ ፄሊ ቤዪዲ ኢዛን ሚኒዛዴይ ባ ሲዪዳይሳ ኦꬂዛዴይኔ ባሎንታዴይ ኢዚ ባ ኦሶን ኣንጄቲዳዴ ጊዳና። 
\p  
\v 26 ባ ዱና ናጎንታ ባርካ ባ ዎዝና ባሌꬂሼ ታ ኣማናይስ ጊዛዴይ ባርካ ባና ባሌꬄስ። ኢዛ ኣማኖይካ ሜላ ሃዳ ኣማኖ።  
\v 27 ፆሳ ኣዋ ሲንꬃን ኢታቴꬂ ባይንዳ ሎዖ ኣማኖይ፤ “ኣያኔ ኣዋይ ሃይቂዳ ናይታ፥ ኢስታ ኣዚናቲ ሃይቂዳ ማጫሳታ ሜቶቴቲሺን ማዶኔ ሃይሳ ኣላሜዛ ቱናቴꬃፌ ባና ናጎ። 
\c 2  
\s1 ኦጌይ ባይንዳ ማዶ ኮሼና 
\p  
\v 1 ታ ኢሻቶ! ኢንቴ ቦንቼቲዳ ጎዳ ዬሱስ ኪርስቶሳ ኣማኒዛይታ ጊዲዳ ማላ ኣሴ ቤሶንታ ኦጌራ ማዶፍቴ።  
\v 2-3 ዎርቃ ዪች ቢራꬌን ኣꬂዲ ሎዖ ማይዖ ማይዒዳ ኣሲ ኢንቴ ሺቂዛሶ ዪኮ ሄሳꬆካ ቂታ ማይዖ ማይዒዳዴይ ሄ ሺቂዛሶ ዪኮ ቃሴካ ሃራ ቂታ ማይዖ ማይዒዳ ማንቆ ኣሲ ጌሊኮ ሎዖ ማይዒዳይሳ ዱማ ቦንቾ ቦንቺዲ “ኔስ ቤሲዛ ሎዖ ኡቲዛሶ ሄሳ ቤያ” ጊዲ ሃንኮ ማንቆዛ ቃሴ “ኔ ሄን ሄሳን ኤቃ፤ ዎይኮ ሃ ያ፥ ታ ጋርሳን ዉጌን ኡታ” ኢንቴ ጊኮ፥  
\v 4 ኢንቴ ኢንቴ ጊዶን ቤሶንታ ማዶ ኦꬄታ ጊዴኬቲ? ቃሴካ ኢንቴ ኢታ ቆፋን ኦይኬቲዳ ኢታ ፒርዳ ፒርዲዛይታ ጊዴኬቲ? 
\p  
\v 5 ታ ሲቆ ኢሻቶ! ኣኔ ሲዪቴ፤ ኢስቲ ኣማኖን ዱሬታ ጊዳና ማላ ፆሲ ባና ዶሲዛይታስ ሂዶታ ኢስታስ ኢሚዳ ካዎቴꬃ ኢስቲ ላታና ማላ ሃይሳ ሃ ኣላሜዛን ዲዛ ማንቆታ ዶሪቤኔ?  
\v 6 ኢንቴ ቃሴ ማንቆታ ካዉሼታ። ኢንቴና ዋይሲዛይ ዱሬታ ጊዴቴኔ? ኢንቴና ፒርዳሶ ጎቺዛይ ኢስታ ጊዴቴኔ?  
\v 7 ኢንቴናን ፄይጌቲዳ ቦንቾ ፆሳ ሱንꬃ ዚጊርዛይቲ ኢስታ ጊዴቴኔ? 
\p  
\v 8 ማፃፋን “ኔ ላጌ ኔ ሁዔ ማላ ሲቃ” ጌቴቲ ፃፌቲዳ ካዎ ዎጋ ኢንቴ ፖሊኮ ሎዖ ኦꬄታ።  
\v 9 ኢንቴ ቤሶንታ ማዶ ማዲኮ ናጋራ ኦꬄታ። ዎጋ ሲንꬃንካ ኢንቴ ዎጋ ዬꬊዳዴ ጊዲ ቆዴታና።  
\v 10 ጋሶይካ ዎጋ ዉርሲ ፖሊዛዴይ ቃሴካ ዎጋፔ ኢሲኔዪን ꬉጴቲዛ ኣሲ ዉርሲካ ሞሪዳዴ ማላ ቆዴቴስ።  
\v 11 “ላይማቶፓ” ጊዳዴይ ኢዚካ ዛሪዲ “ዎꬎፓ” ጊዴስ። ኔ ላይማቶንታ ኣጊኮካ ኔ ኣሳ ዎꬊኮ ዎጋፔ ኣꬊዳዴ ጊዳሳ። \x * \xo 2:11 \xt ኬሳ 20፡13-14፤ ዛሬ 5፡17-18\x* 
\v 12 ኢንቴ ሃሳያ ሃሳዪሼ ዎይኮ ኢሲ ሚሽ ኦꬂሼ ኢንቴና ፂሊሲዛ ኣሳ ማላ ጊዲቴ።  
\v 13 ጋሶይካ ማሮንታይ ዉሪካ ማሮይ ባይንዳ ፒርዴታና። ማሮይ ፒርዳ ፆኔስ። 
\s1 ኣማኖኔ ኦሶ 
\p  
\v 14 ታ ኢሻቶ! ኢሲ ኣሲ ታስ ኣማኖይ ዴስ ጊኮ ቃሴ ኦሶን ቤሶንታዴ ጊዲኮ ኢዛ ኣይ ማዳኔ? ሄሳ ማላ ኣማኖይ ኢዛ ኣሻኔ?  
\v 15-16 ኣኔ ቆፒቴ፥ ኢሲ ኢሻይ ዎይኮ ኢሲ ሚቺያ ማይዖይ ዎይኮ ሚዛይሲ ባይንዳ ኣጊኮ ኢንቴፌ ኢሳዴይ “ኢንቴ ሳሮን ቢቴ! ኢንቴና ሜጎፎ! ካሊቴ!” ጊኮ ኢስታ ኣሾስ ኮሺዛይሳ ኢሞንታ ኣጊኮ ኣይ ማዳኔ?  
\v 17 ሄሳꬆካ ኦሶይ ባይንዳ ኣማኖይካ ባስ ሃይቂዳይሳ። 
\p  
\v 18 ጊዶ ኣቲን ኢሳዴይ “ታስ ኦሶይ ዴስ ኔስ ኣማኖይ ዴስ። ኔኒ ኔ ኣማኖ ኦሶፔ ሻካዳ ታና ቤሳ፤ ታ ቃሴ ታ ኣማኖ ኦሶን ኔና ቤሳና” ጊኮ፥  
\v 19 ኔ “ኢሲ ፆሲ ዲዛይሳ ኣማናሳ” ሄሲካ ሎዖ፤ ዳይዳንꬃቲካ ሄሳ ማላ ኣማኔቴሲኔ ኬሂ ኮኮሬቴስ።  
\v 20 ኔኖ ኤያዞ! ኦሶይ ባይንዳ ኣማኖስ ጎዓይ ባይንዳይሳ ኤራናስ ማርካ ኮያይ?  
\v 21 ኑ ኣዋ ኣብራሃሜይ ባ ና ዪሳቃ ያርሺዛሶዛ ቦላ ሺሺዳ ዎዴ ኦሶን ፂሊቤኔ? \x * \xo 2:21 \xt ሜꬌ 22፡1-14\x* 
\v 22 ሄሳን ኣማኖዛ ኦሶራ ጋꬂ ኦꬂዛይሳ ኔ ቤያሳ፤ ኣማኖይካ ኦሶን ፖሌቲዴስ።  
\v 23 “ኣብራሃሜይ ፆሴ ኣማኒዴስ፤ ሄ ኣማኖይ ኢዛስ ፂሎቴꬃን ቆዴቲዴስ” ጊዛ ማፃፋ ቃላይ ፖሌቲዴስ፤ ኢዚካ ፆሲ ዶሲዳዴ ጌቴቲዴስ። \x * \xo 2:23 \xt ሜꬌ 15፡6፤ 2ታር 20፡7፤ ኢሳ 41፡8\x* 
\v 24 ሄሳ ጊሽ ኣሲ ኣማኖን ፃላላ ጊዶንታ ኦሶንካ ፂሊዛይሳ ኢንቴ ቤዬታ። \x * \xo 2:24 \xt ኢያ 2፡1-21\x* 
\p  
\v 25 ሄሳꬆካ ላይማን ዲዛ ኤራዓባ ኪቴቲ ቢዳ ኣሳታ ሞካ ኤካዳ ሃራ ኦጌራ ሞዪዛ ዬዲዳ ጊሽ ባ ኦሶን ፂላቤይኬ?  
\v 26 ሼምፖፌ ሻኬቲዳ ኣሾይ ሃይቄꬅ ጊዲዳ ማላ ኦሶፔካ ሻኬቲዳ ኣማኖይ ሃይቄꬃ። 
\c 3  
\s1 ባ ዱና ናጎ 
\p  
\v 1 ታ ኢሻቶ! ኢንቴፌ ዳሮቲ ኣስታማሬታ ጊዶፔቶ፤ ጋሶይካ ኑ ኣስታማሬ ጊዲዳይቲ ኣꬌꬃ ፒርዳ ኤካናይሳ ኢንቴ ኤሬታ።  
\v 2 ኑ ዉሪካ ዳሮ ሚሻን ꬉጴቶስ። ሃሳያን ꬉጴቶንታዴይ ዲኮ ኢዚ ባ ኣሳቴꬅ ሎዔꬂ ናጋናስ ዳንዳዪዛ ኩሜꬃ ኣሳ።  
\v 3 ኑኒ ፓራታ ኣዛዛናስ ቢፃላ ባርሲዲ ኑ ኮይዳ ማላ ኢስታ ኣዛዞስ።  
\v 4 ዎይኮ ኣኔ ማርካቤታ ፄሊቴ። ኢስቲ ኣይ ጊታታኔ ጫርኮን ሱጌቲ ቢዛይታ ጊዲኮካ ማርካቤ ላጊዛዴይ ቄሪ ላፋ ላጊዛ ሚሻራ ባ ኮዪዛሶ ኤፌስ።  
\v 5 ሄሳꬆካ ኣሳቴꬃ ጋርሳን ኢንፃርሲ ጉꬅ ጊዳ ኡታዳ ጊታ ዎልቃማ ኦቶሮ ኦቶሬታዉስ፤ ቄሪ ታማይ ጊታ ዎራ ዎስቲ ፁጊ ꬋይሲዛኮኔ ኣኔ ዩሺ ቆፒቴ።  
\v 6 ኢንፃራሲካ ባ ባጋራ ታማ ማላ፤ ኑ ኣሳቴꬃ ጊዶን ዲዛ ኢታ ኣላሜ። ኣሳቴꬃ ዉርሳ ቱኒሳዉሲኔ ኣሳቴꬃ ቦላ ታማ ጉጃዉስ፤ ባስካ ጋናሜ ታማን ፁጌታና። 
\p  
\v 7 ሜሄይ፥ ዶዓይ፥ ካፎቲ ሃይሳꬆካ ቢታ ቦላ ጎሼቲዛይታኔ ኣባ ጊዶን ዲዛ ሜꬌቴꬃታ ዉርሲ ኣሲ ሃራና ዳንዳዬስ፤ ኢስቲካ ሃሬቲዳ።  
\v 8 ጊዶ ኣቲን ኢንፃርስ ሃራናስ ዳንዳዪዳዴይ ኦኒካ ዴና። ዎꬊዛ ማርꬔይ ኢዚን ኩሚዳሮኔ ኢዛ ሼምፓ ኤኮንታ ኢታ ሚሻ።  
\v 9 ኑኒ ኑ ኢንፃርሳይራ ጎዳኔ ኣዋ ኣንጆስ። ኢዚንካ ፆሳ ሌሚሶን ሜꬌቲዳ ኣሳ ናይታ ዛሪዲ ቃንጎስ። \x * \xo 3:9 \xt ሜꬌ 1፡26\x* 
\v 10 ኣንጆይኔ ቃንጌꬂ ኢሲ ዱናራ ኬዜስ። ታ ኢሻቶ! ሄሲ ሄሳꬆ ሃናናስ ቤሴና።  
\v 11 ኢሲ ፑልቶ ኦላፌ ማልዖ ሃꬂኔ ጫሞ ሃꬂ ፑልቲ ኤሪዜ?  
\v 12 ታ ኢሻቶ! ባላሴ ጌቴቲዛ ሚꬂ ዎጋራ ኣይፌ ዎይኮ ዎይኔ ሚꬂ ባላሴ ሚꬃ ኣይፌ ኣይፋናስ ዳንዳዪዜ? ሄሳꬆካ ጫሚዛ ሃꬃፌ ማልዒዛ ሃꬂ ቤታና ዳንዳዬና። 
\s1 ናምዑ ቆሞ ኤራቴꬅ 
\p  
\v 13 ኢንቴ ጋራሳፌ ኣኬካራ ዲዛ ኤራ ኣሲ ኦኔ? ኤራይ ዲዛ ጊዲኮ ኣኔ ባ ኦሶ ኣሽኬቴꬃኒኔ ኣꬎ ኤራቴꬃራ ባ ሎዖ ዱሳን ቤሶ።  
\v 14 ቃሴ ጫሞኔ ቃናቴይ፥ ኢንቴና ፃላላ ዶሲዛ ሃኖይ ኢንቴ ዎዝናን ዲዛ ጊዲኮ ኦቶሬቴꬅ ኢንቴስ ሲዬቶፎ። ቱማካ ካዶፊቴ።  
\v 15 ሂኒ ማላ ኤራቴꬃያ ሳሎፔ ጊዲኩ። ሂና ቃሴ ቢታፌ፥ ኣሾፔኔ ፃላዔፔኮ!  
\v 16 ቃናቴይኔ ባርካ ባና ሲቆይ ዲዛሶን ዋሶይኔ ኢታ ኦሶይ ዉሪ ዴስ። 
\p  
\v 17 ሳሎፔ ጊዲዳ ኤራቴꬃያ ጊዲኮ ኮይሮ ጌሻ፥ ጉዬፔካ ሳሮቴꬅ ዶሲዛሮ፥ ዳንዳዪዛሮ፥ ኤሮ ጊዛሮ፥ ማሮቴꬂኔ ሎዖ ኣይፌይ ኩሚዳሮ፤ ቃሴ ዎርዶ ማዶንታሮኔ ኡሎን ጌኔይ ባይንዳሮ።  
\v 18 ሳሮቴꬅ ዶሲዛ ኣሳቲ ሳሮቴꬃን ዜሪዲ ፂሎቴꬃ ኣይፌ ማፄቴስ። 
\c 4  
\s1 ኢንቴናቴꬃ ፆሳስ ሃሪሲቴ 
\p  
\v 1 ኢንቴ ጊዶን ዲዛ ኦላይኔ ኦሻይ ኣዋፔ ዪዴ? ኢንቴ ዎዝናን ዲዛ ኣሞቴꬃፌ ዴንዲዳ ኦላ ጊዴኔ?  
\v 2 ኢንቴ ኣሞቴታ ሺን ዴሜኬታ። ኢንቴ ኣስ ዎꬌታኔ ኬሂ ኣሞቴታ ሺን ዴማና ዳንዳዬኬታ። ኢንቴ ኢንቴ ጋርሳን ኦዬቲዛ ጊሻኔ ኦሌቲዛ ጊሽ ቃሴ ዎሶንታ ጊሽ ኢንቴስ ኢሜቴና።  
\v 3 ኢንቴ ኢንቴ ኣሾ ኡፋይሳናስ ኢታ ቆፋን ዎሲዛ ጊሽ ዎሲዳይሳ ኢንቴ ኤኬኬታ።  
\v 4 ኢንቴኖ ላይማቲዛይቶ! ኣላሜራ ሲቄቴꬂ ፆሳራ ሞርኬቴꬅ ጊዲዳይሳ ኤሬኬቲ? ሄሳ ጊሽ ሃይሳ ኣላሜዛራ ሲቄቴꬂ ኮዪዛይ ዉሪካ ፆሳስ ሞርኬ።  
\v 5 ዎይኮ ጌሻ ማፃፋ ጊዶን “ኑናን ኢዚ ኣይሲዳ ኣያናይ ኑ ኢዛይታ ጊዳና ማላ ዳሮ ኣሞቴስ” ጊዛይሲ ኢንቴስ ጮ ሜላ ጊዳ ሚሳቲዜ?  
\v 6 ጊዶ ኣቲን ኢዚ ባ ኪያቴꬅ ኑስ ጉጂ ኢሜስ። ማፃፋይካ “ፆሲ ኦቶራንቻታራ ኤቄቴስ፥ ኣሽኬታስ ቃሴ ባ ኪያቴꬅ ኢሜስ” ጊዳይ ሄሳሳ። \x * \xo 4:6 \xt ሌም 3፡34\x* 
\p  
\v 7 ሄሳ ጊሽ ኢንቴና ፆሳስ ሃሪሲቴ። ዳቡሎሳራ ኤቄቲቴ፥ ኢዚ ኢንቴፌ ባቃታና።  
\v 8 ፆሳኮ ሺቂቴ፤ ኢዚካ ኢንቴኮ ሺቃና። ኢንቴኖ ናጋራንቻቶ! ኢንቴ ኢንቴ ኩሼ ጌሺቴ፥ ኢንቴ ናምዑ ቆፋን ቃፂዛይቶ! ኢንቴ ኢንቴ ዎዝና ጌሺቴ።  
\v 9 ዳርሲ ቆፒቴ፤ ሙዞቲቴ፤ ዬኪቴ፤ ኢንቴ ሚቻይ ዬሆን፤ ኡፋይሳይ ቃሴ ሙዞቴꬃን ሲሞ።  
\v 10 ጎዳ ሲንꬃን ኢንቴ ኢንቴና ካዉሺቴ፤ ቃሴ ኢዚ ኢንቴና ꬎቁ ꬎቁ ሂስታና። 
\p  
\v 11 ታ ኢሻቶ! ኢንቴ ኢንቴ ጋርሳን ኢሶይ ኢሳ ሞቶፒቴ፤ ባ ኢሻ ሞቲዛዴይኔ ባ ኢሻ ቦላ ፒርዲዛዴይ ዎጋ ቦላ ኢታ ሃሳዬሲኔ ዎጋ ቦላ ፒርዴስ። ሂስቲኮ ኔ ዎጋ ቦላ ፒርዲዛዴ ኣቲን ዎጋ ናጊዛዴ ጊዳካ።  
\v 12 ዎጋ ዎꬂዳዴይኔ ፒርዲዛዴይ ኢሳዴ ፃላላ። ኢዚካ ꬋይሳናሲኔ ኣሻናስ ዳንዳዪዛዴ። ጊዶ ኣቲን ኔኒ ኔ ላጌ ቦላ ፒርዲዛዴይ ኦኔ? 
\s1 ጬቄታናስ ቤሴና 
\p  
\v 13 “ኢንቴ ሃቺ ዎይኮ ዎንቶ ሃኖ ሃ ካታማዮ ዎይኮ ሂኖ ሄ ካታማዮ ኑ ባና፤ ቢዲ ሄን ኢዚን ኢሲ ላይꬅ ኡታናኔ ዛልዒ ዎꬊሳና” ጊዛይቶ! ኣኔ ሃ ሲዪቴ።  
\v 14 ዎንቶ ሃናናይሳ ኢንቴ ኤሬኬታ። ኢንቴ ሼምፖይ ኢዛ ኣዜ? ኢንቴ ጉꬃ ዎዴ ኣይፌን ቤቲዲ ꬋዪዛ ሃꬃ ፔንታ ማላ።  
\v 15 ሃይሳ ጋናፔ “ጎዳ ሼኔ ጊዲኮኔ ኑ ፓፃ ዲኮ ሄሳካ ሃይሳካ ኦꬃና” ጋናስ ኢንቴስ ቤሴስ።  
\v 16 ሃዒ ጊዲኮ ኢንቴ ኦቶሬቴꬃን ጬቄቴታ። ሄሳ ማላ ኦቶሬቴꬂ ዉሪካ ኢታ።  
\v 17 ሄሳ ጊሽ ሎዖ ጊዲዛይሳ ኦꬃናስ ቤሲዛይሳ ኤሪሼ ኦꬆንታዴስ ናጋራ ጊዳና። 
\c 5  
\s1 ዱሬታስ ኢሜቲዳ ዞሬ 
\p  
\v 1 ሂስቲኮ ኢንቴኖ ዱሬ ኣሳቶ! ኣኔ ሲዪቴ። ቡሮ ኢንቴ ቦላ ጋካና ሜቶዛ ጊሽ ዬኪቴ፤ ዉ ዉይ! ጊ ዋሲቴ።  
\v 2 ኢንቴ ሃሮይ ቡቂዴስ፥ ኢንቴ ማይዖካ ቢላይ ሚዴስ።  
\v 3 ኢንቴ ዎርቃይኔ ኢንቴ ቢራይ ሺይዴስ። ሄ ሺይዳይሲካ ኢንቴ ቦላ ማርካቴሲኔ ኢንቴ ኣሾ ታማ ማላ ፁጌስ። ኢንቴ ዎዴ ዉርሴꬃስ ሚሼ ሺሺዴታ።  
\v 4 ኢንቴ ኢንቴ ዎዝናን ዎꬂቴ፤ ኢንቴ ካꬅ ማፂሼ ፔይዳይታስ ኢስታ ዎልቃ ዋጋ ኢንቴ ቃንፆንታ ኣጊዳ ጊሽ ኢንቴ ቦላ ዋሲሼ ኢንቴ ኣቻን ዴቴስ። ካꬅ ማፂዛይታ ዋሶይ ኡባ ዳንዳዪዛ ጎዳ ሃይꬃን ጋኪዴስ። \x * \xo 5:4 \xt ዛሬ 24፡14-15\x* 
\v 5 ኢንቴ ቢታ ቦላ ኢሻሎኔ ኣልዔቴꬃን ዴዒዴታ፥ ኢንቴ ዎዝና ሹካስ ꬊኪዳ ሜሄ ማላ ሞꬊሲዴታ።  
\v 6 ኢንቴ ኢንቴናራ ኤቄቶንታ ፂሎ ኣሳታ ቦላ ዎርዶ ዎꬂዲ ዎꬊዴታ። 
\s1 ሜቶ ዳንዳዮ 
\p  
\v 7 ሄሳ ጊሽ ታ ኢሻቶ! ጎዳይ ሃ ያና ጋካናስ ዳንዳዪቴ። ጎሼ ጎዪዛዴይ ቢታይ ሎዖ ካꬂ ካፃና ጋካናስ ዋኒ ዳንዳዪዛኮኔ ኮይሮ ኢራኔ ዉርሴꬃ ኢራ ኢዚ ዎስቲ ናጊዛኮ ኣኔ ኣኬኪቴ።  
\v 8 ኢንቴካ ሄሳꬆ ዳንዳዪቴ። ኢንቴ ዎዝና ሚንꬂቴ። ጋሶይካ ጎዳ ዩሳ ጋላሲ ማቲዴስ። 
\p  
\v 9 ታ ኢሻቶ! ኢንቴ ኢንቴ ጊዶን ዚግሬቶፊቴ፤ ኢንቴ ዚግሬቲኮ ኢንቴ ቦላ ፒርዴታና። ፒርዳናዴይ ሄኮ ኢንቴ ፔንጌ ቦላ ኤቂዴስ።  
\v 10 ታ ኢሻቶ! ጎዳ ሱንꬃን ኢንቴስ ዮቲዳ ናቤታ ዋዬቴꬂኔ ኢስታ ዳንዳያ ኢንቴስ ሌሚሶ ሂስቲ ፄሊቴ።  
\v 11 ዳንዳያን ጌንጪዳ ኣሳታ ኑ ኢስታ “ኢስቲ ኣንጄቲዳይታ” ጊ ቆዲዛይሳ ኢንቴ ኤሬታ። ኢዮቤይ ዋኒ ዳንዳዪዳኮኔ ኢንቴ ኢዛ ጊሽ ሲዪዴታ። ጎዳይ ኢዛ ዉርሴꬃን ኣይ ኦꬂዳኮኔ ኢንቴ ቤይዴታ። ጎዳይ ኣሳስ ኬሂ ሚሼቲዛዴኔ ማሪዛዴ። \x * \xo 5:11 \xt ኢዮ 1፡21-22፤ 2፡10፤ ማዛ 103፡8\x* 
\p  
\v 12 ሃራፔካ ታ ኢሻቶ! ሳሎን ጊዲን ዎይኮ ሳዓን ጊዲን ዎይኮ ኣይ ሚሻንካ ጫቆፍቴ፤ “ኤ” ጋናስ ቤሲዛ ሚሽ ጊዲኮ “ኤ” ጊቴ። “ኣካይ” ጋናስ ጊዲኮ “ኣካይ” ጊቴ ሄሳፌ ሃራ ጊኮ ኢንቴ ቦላ ፒርዴታና። \x * \xo 5:12 \xt ማቶ 5፡34-37\x* 
\s1 ኣማኖ ዎሳ 
\p  
\v 13 ኢንቴ ጋርሳን ሜቶቲዛ ኣሲ ዲዜ? ዲዛ ጊዲኮ ኢዚ ዎሶ። ኡፋዬቲዛዴይ ዲዜ? ዲዛ ጊዲኮ ኡፋይሳ ዬꬅ ዬፆ።  
\v 14 ኢንቴ ጊዶን ሳኬቲዛ ኣሲ ዲዜ? ዲኮ ዎሳ ኬꬃ ጪማታ ፄይጎ። ኢስቲካ ጎዳ ሱንꬃን ዛይቴ ኢዛ ቦላ ቲይዲ ኢዛስ ዎሴቶ። \x * \xo 5:14 \xt ማር 6፡13\x* 
\v 15 ኣማኖን ዎሲዳ ዎሳይ ሃርጊዳዴ ፓꬃና። ጎዳይካ ኢዛ ዴንꬃና። ኢዚ ናጋራ ኦꬂዳዴ ጊዲኮካ ፆሲ ኢዛ ማራና።  
\v 16 ሄሳ ጊሽ ኢንቴካ ኢንቴ ጋርሳን ኢሶይ ኢሳራ ኢንቴ ናጋራ ፓፄቲቴ፤ ፓፃና ማላ ኢሶይ ኢሳስ ዎሲቴ። ፂሎ ኣሳ ዎሳይ ዎልቃራ ዴስ፤ ዎልቃማ ኦሶካ ኦꬄስ።  
\v 17 ኤላሲ ኑ ማላካ ኣሳ። ኢዚ ኢራይ ቡኮንታ ማላ ሚንꬂ ዎሲን ቢታ ቦላ ሄꬑ ላይꬂኔ ባጋ ጋካናስ ኢራይ ቡኪቤና። \x * \xo 5:17 \xt 1ካዎ 17፡1፤ 18፡1\x* 
\v 18 ቃሴካ ዛሪ ዎሲን ኢራይ ሳሎፔ ቢታ ቦላ ቡኪዴስ። ቢታይካ ካꬅ ኢሚዴስ። \x * \xo 5:18 \xt 1ካዎ 18፡42-45\x* 
\p  
\v 19-20 ታ ኢሻቶ! ኢንቴፌ ኢሳዴይ ቱማፔ ባሌቲን ሃራ ኣሲ ኢዛ ዛሪኮ ሄሳ ዎዝናን ዎꬂቴ። ናጋራንቻ ኢዚ ባሌቲዳ ኦጌፔ ኢዛ ዛሪዳዴይ ሄሳዴ ሼምፖ ሃይቆፔ ኣሼሲኔ ኢዛዴ ናጋራ ዳሮዛካ ካሜስ። \x * \xo 5:19-20 \xt ሌም 10፡12፤ 1ጴፅ 4፡8\x*