\id GAL - Gaammo project 
\h ጋላቲያ 
\toc1 ጳዉሎሲ ጋላቲያ ኣሳስ ፃፊዳ ኪታ 
\toc2 ጋላቲያ 
\toc3 ጋላ 
\mt2 ጳዉሎሲ 
\mt1 ጋላቲያ ኣሳስ 
\mt2 ፃፊዳ ኪታ 
\imt1 ጊዶ ቆፋ 
\ip ዬሱሲ ኣሺዛዴ ጊዲዳይሳ ዮቲዛ ሚሺራቾ ቃላይ ኡባሶን ኣይዛቤታስ ሳባኬቲን ኣሳይ ኣማኒ ኣማኒ ዳሪሺን “ኣማኒዛዴ ጊዳናስ ካሴ ሙሴ ዎጋ ፖሊ ናጋናስ ኮሺዜዬ? ኮሼኔ?” ጊዛ ኦይሾይ ዴንዲዴስ። ቄሪ ኢሲያ ጌቴቲዛሶን ኦሮሜ ካዎይ ሃሪዛሶን ጋላቲያን ዲዛ ኣማኒዛ ኣሳ ጋርሳን “ኣሲ ፆሳ ኣቻን ፂሎ ጊዳናስ ዬሱሳን ኣማኖ ፃላላ ጊዶንታ ሙሴ ባጋራ ኢሜቲዳ ዎጋዛ ፖሎ ኮሼስ” ጊዲ ጳዉሎሳራ ኤቄቲዛይቲ ዴቴስ። 
\ip ጳዉሎሲ ቃስ ጋላቲያ ኪታ ፃፊዳይ ሃይሳ ሃ ቲሚርቴዛን ባሌቲዳ ኣሳቲ ቱማ ቲሚርቴኮኔ ቱማ ኣማኖኮ ዛራናሳ። ጳዉሎሲ ዬሱስ ኪርስቶሳ ሃዋሬ ጊዲዳይሳ ቆንጪሴꬃን ዶሜስ። ኢዛ ሃዋሬቴꬅስ ፄይጊዳይ ፆሳ ኣቲን ኢዚ ኣሳ ፄይሳን ኪቴቶንታይሳኔ ቃስ ኢዚ ኪቴቲዳይ ኣይሁዳ ኣሳኮ ጊዶንታ ኣይዛቤታስ ጊዲዳይሳ ዉርሲ ቢርሽ ዮቴስ። ዉርሴꬃ ሼምፖታ ጋርሳን ኣማኖ ዱሲ ዬሱሳ ኣማኖን ቤቲዛ ሲቆፔ ጊዲዳይሳ ሎዔꬂ ዮቴስ። 
\is1 ሃ ማፃፋይ ኦይኪዳ ኩሜꬃ ቆፋ 
\io1 ጌሎሶ 1፡1-10 
\io1 ጳዉሎሳስ ኢሜቲዳ ሃዋሬቴꬅስ ማታ 1፡11-2፡21 
\io1 ፆሳ ኪያቴꬃ ሚሺራቾ ቃላ 3፡7-4፡31 
\io1 ኣማኒዝይታ ጎቃቴꬂኔ ኣማኖ 5፡1-6፡10 
\io1 ኩሻ ቆፋ 6፡11-18 
\c 1  
\p  
\v 1 ኣሲ ኪቲዳዴ ጊዶንታ ዬሱስ ኪርስቶሳ ሃይቆፔ ዴንꬂዳ ኢዛ ኣዋ ፆሳፌ ኪቴቲዳ ጳዉሎሳፔ።  
\v 2 ታናራ ዲዛ ኢሻታ ኡባፌ ጋላቲያን ዲዛ ዎሳ ኬꬃታስ።  
\v 3 ኑ ኣዋ ፆሳፌ ጎዳ ዬሱስ ኪርስቶሳፔ ፆሳ ኪያቴꬂኔ ሳሮይ ኢንቴስ ጊዶ።  
\v 4 ኑ ኣዋ ፆሳ ሼኔ ጊዲን ኢታ ኣላሜዛፔ ኑና ኣሻናስ ባና ኣꬂ ኢሚዳይሳስ፥  
\v 5 ሜርፔ ሜርና ጋካናስ ኢዛስ ቦንቾይ ጊዶ። 
\s1 ሚሺራቾ ቃላይ ሜፂ ኢሲኖ 
\p  
\v 6 ኢንቴ ኪርስቶሳ ኪያቴꬃን ፄይጊዳይሳ ኣጋጊዲ ሃራ ዱማ ሻኮ ሚሺራቾ ቃላኮ ሲሚዳይሲ ታና ዳሮ ማላሊሴስ።  
\v 7 ታ ሄሳ ጊዳ ጋሶይ ኢንቴና ባሌꬂዛይቲኔ ኪርስቶሳ ሚሺራቾ ቃላ ሚርቂዛ ኢሲ ኢሲ ኣሳቲ ዲዛ ጊሻሳ፤ ቱማ ጊኮ ሚሺራቾ ቃላይ ኢሲኖ ፃላ።  
\v 8 ጊዶ ኣቲን ኑና ጊዲን ዎይኮ ሳሎ ኪታንቻ ጊዲንካ ኑ ኢንቴስ ሳባኪዳ ሚሺራቾ ቃላፔ ሃራ ዱማ ሚሺራቾ ቃላ ሳባኪኮ ሄሳዴይ ሜርናስ ቃንጌቲዳዴ ጊዶ።  
\v 9 ታ ካሴ ጊዳ ማላካ ሃዒካ ዛራዳካ ካሴ ኢንቴ ኤኮ ሚሺራቾ ቃላፔ ሃራ ዱማ ሚሺራቾ ቃላ ሳባኪኮ ኢዛዴይ ሜርናስ ቃንጌቲዳዴ ጊዶ ጋይስ። 
\p  
\v 10 ሃዒ ታ ኣሲ ታና ኤሮሾ! ሃሹ ጋና ማላ ኮያዚናዬ? ፆሲ ሃሹ ጋና ማላ ኮያዚና? ዎይኮ ኣስ ኡፋይሳና ኮያዚና? ታ ኣስ ኡፋይሳና ኮዪዛኮ ኪርስቶሳ ኦሳንቻ ጊዲኬ። 
\s1 ፆሲ ጳዉሎሳ ፄይጊዴስ 
\p  
\v 11 ታ ኢሻቶ! ታ ኢንቴስ ሳባኪዳ ሚሺራቾ ቃላይ ኣሳ ኦሶ ጊዶንታይሳ ኢንቴ ኤራና ማላ ኮያይስ።  
\v 12 ሃይሳ ሃ ሚሺራቾ ቃላዛ ዬሱስ ኪርስቶሲ ታስ ቆንጪሲዴስ ኣቲን ታ ኦናፔካ ኤካቤኬ፤ ዎይኮ ኦኒካ ታና ታማርሲቤና። 
\p  
\v 13 ታኒ ካሴ ኣይሁዳታ ኣማኖን ዋና ዲዛኮኔ ፆሳ ዎሳ ኬꬄ ታ ኣይ ማላ ጎዲዳኮኔ ቃሴ ሙሌ ꬋይሳናስ ታ ኣይ ማላ ዳፌቲዳኮኔ ኢንቴ ሲዪዴታ። \x * \xo 1:13 \xt ሃዋ 8፡3፤ 22፡4-5፤ 26፡9-11\x* 
\v 14 ካሴ ታ ዲዛ ዎዴን ዲዛ ዳሮ ኣይሁዳ ኣሳታ ዳሮታፔ ኣማኖን ኣꬋይስ። ካሴ ኑ ኣዋታ ዎጋ ናጋናስ ዳሮ ዳፌታይሲሺን። \x * \xo 1:14 \xt ሃዋ 22፡3\x* 
\p  
\v 15 ጊዶ ኣቲን ካሴ ኮይሮ ታኒ ታ ኣዪ ኡሎን ዲሺን ባሲ ዶሪዲ ባ ኪያቴꬃን ታና ፄይጊዳ ፆሳይ  
\v 16 ኣይዛቤታ ጊዶን ኢዛ ናዛ ጊሽ ታ ሳባካና ማላ ባ ናዛ ታናን ቆንጪሳናስ ዶሲዳ ጊሽ ታ ኦና ኣሳራካ ዞሬታቤኬ።  
\v 17 ታፔ ካሴ ሃዋሬ ጊዲዳይታኮ ዬሩሳላሜ ባቤኬ ሺን ኣማኒዳ ማላ ሄራካ ኣራቤ ቢታ ባዲስ፤ ሄፔካ ዳማስቆ ሲማዲስ።  
\v 18 ሄፔካ ሄꬑ ላይꬃፌ ጉዬ ጴፅሮሳራ ጋጋናስ ዬሩሳላሜ ባዲስ። ኢዛራ ጋጋዳ ታማኔ ኢቻሹ ጋላስ ጋካናስ ሄን ጋምዓዲስ። \x * \xo 1:18 \xt ሃዋ 9፡26-30\x* 
\v 19 ጊዶ ኣቲን ጎዳ ኢሻ ያቆቤፔ ኣቲን ሃዋሬታፔ ኦናካ ቤያቤኬ። 
\p  
\v 20 ሃይሳ ታ ኢንቴስ ፃፊዛይሳን ታ ዎርዶ ሃሳዮንታይሳ ፆሳ ሲንꬃን ዮታይስ።  
\v 21 ሄሳፌ ጉዬ ጌዴ ሶሪያኔ ኪልቂያ ጌቴቲዛ ዴሬ ባዲስ።  
\v 22 ዩሁዳ ዴሬን ዲዛ ኪርስቶሳን ኣማኒዛ ኣሳይ ታና ቤይቤና።  
\v 23 ጊዶ ኣቲን “ቤኒ ኑና ኣማኖ ጊሽ ጎዲ ꬋይሳና ኮዪዛ ኣዴዚ ሃዒ ሄ ኣማኖ ዛሪ ሳባኬስ” ጊዛ ዎሬ ፃላ ሲዪዳ።  
\v 24 ሄ ኣሳይ ታ ጋሶን ፆሴ ጋላቲዴስ። 
\c 2  
\s1 ጳዉሎሳ ሃዋሬቲ ሞኪ ኤኪዳ 
\p  
\v 1 ታማኔ ኦይዱ ላይꬃፌ ጉዬ ቃሴካ ዬሩሳላሜ ባዲስ፤ ሄ ዎዴ ባርናባሳራ ዳይስ፤ ቲቶሳካ ታናራ ኤካ ባዲስ። \x * \xo 2:1 \xt ሃዋ 11፡30፤ 15፡2\x* 
\v 2 ታስ ቆንጪዳ ጊሽ ሄ ባዲስ። ኣይዛቤታ ጊዶን ታ ሳባኪዛ ሚሺራቾ ቃላካ ኢስታስ ዮታዲስ። ጊዶ ኣቲን ታ ካሴ ሜላ ዎፂዳኮ ጋዳኔ ቃሴካ ሲንꬃፌ ጮ ሜላ ዎፆንታ ማላ ሂርጋዳ ዋናቲዛይታስ ዱማ ኤሪሳዲስ።  
\v 3 ሃራይ ኣቶሺን ታናራ ዲዛ ቲቶሲ ኢዚ ጊሪኬ ኣስ ሺን ኢዚ ቃፃሬታና ማላ ዎልቃꬂቤቴና።  
\v 4 ሃይሲ ሃ ዮዖዚ ዴንዲዳይ ኢሲ ኢሲ ዎርዶ ኣማኒዛይቲ ኑኒ ዬሱስ ኪርስቶሳን ዴሚዳ ጌሻቴꬃ ዩዪ ዩዪ ፓጪ ቤያናሲኔ ኑና ኣይሌቴꬃን ዛሪ ጌልꬃናስ ሎዳራ ኑኮ ሳሊ ጌሊዳ ጊሻሳ።  
\v 5 ሃይታ ሄ ኣሳታስ ኑኒ ኢሲቶካ ሃሬቲቤኮ። ሄሲካ ኢንቴ ሚሺራቾ ቃላ ቱማቴꬃን ኤቂ ዳና ማላ ጊዲኮ። 
\p  
\v 6 ዋና ሚሳቲዛ ኣሳቲ ታስ ኣይኮካ ሚሳቴቴና፤ ፆሲ ኣሳ ኣይፌሶ ቤዪዲ ማዶ ኦꬂ ኤሬና። ሄይቲ ሄ ኣሳቲ ታ ኪቲዛ ዮዖታስ ታስ ኣይኮካ ጉጂቤቴና። \x * \xo 2:6 \xt ዛሬ 10፡17\x* 
\v 7 ጊዶ ኣቲን ጴፅሮሲ ቃፃሬቲዳይታስ ሚሺራቾ ቃላ ሳባካናስ ሃዳራ ኤኪዳይሳ ማላ ታካ ቃፃሬቶንታይታስ ሚሺራቾ ቃላ ሳባካናስ ሃዳራ ኤኪዳይሳ ኢስቲ ኤሪዳ።  
\v 8 ጴፅሮሲ ኣይሁዳታስ ሃዋሬ ጊዲ ኦꬃና ማላ ኦꬂዳ ፆሳይ ታካ ኣይዛቤታስ ሃዋሬ ጊዳ ኦꬃና ማላ ታስ ኦꬂዴስ።  
\v 9 ዋናቲ ያቆቤይ፥ ጴፅሮሲኔ ዮሃንሲካ ታስ ኢሜቲዳ ፆሳ ኢሞታ ኣኬኪዲ ታሲኔ ባርናባሳስ ባ ኡሻቻ ኩሼ ኢሚዳ፤ ሄሳፌ ጉዬ ኑኒ ኣይዛቤታስ ኢስቲ ቃስ ኣይሁዳታስ ቃላ ዮታናስ ቃላ ኤሮ ጊ ኤኪዳ።  
\v 10 ኢስቲ ኑስ ሃዳራ ጊዳይ ማንቆታስ ቆፋ ኑ ኣጎንታ ማላ። ታ ኣሞይካ ሄሳ ኦꬃናሳ። 
\s1 ጳዉሎሲ ጴፅሮሳ ቆጲዴስ 
\p  
\v 11 ጴፅሮሲ ኣንፆኪያ ዪዳ ዎዴ ኤሬቲዳ ባላ ኦꬂዳ ጊሽ ታ ኢዛ ቆንጬን ቆጳዲስ።  
\v 12 ኢሲ ኢሲ ኣሳቲ ያቆቤ ኣቻፌ ያናፔ ካሴ ጴፅሮሲ ኣይዛቤታራ ኢሲፌ ካꬅ ሚዛይሳ ኣጊዲ ኣሳቲ ዪዳፔ ጉዬ ቃፃሬቲዳ ኣሳታስ ባቢዲ ኣይዛቤታፔ ሻኬቲዳ ጉዬ ጉዬ ጉሲ ኦይኪዴስ።  
\v 13 ባርናባሲካ ኢስታꬆ ቆꬌፔ ቆሞን ሃኖን ኤኬታና ጋካናስ ሃራ ኣይሁዳ ባጋፌ ኣማኒዳ ኣሳይካ ኢዛራ ኢሲፌቲዴስ።  
\v 14 ኢስታ ኦሶይ ሚሺራቾ ቃላ ቱማን ጊዶንታይሳ ታ ኤራዳ ኩሜꬃ ኣሳ ኣቻን ጴፅሮሳ “ኔ ኣይሁዳ ኣስ ሺን ኣይዛቤታ ዎጋን ኣቲን ኣይሁዳታ ዎጋን ዳቤዪካ፤ ሂስቲን ኣይዛቤቲ ኣይሁዳታ ዎጋ ካላና ማላ ኣዛስ ዎልቃꬃይ?” ጋዲስ። 
\p  
\v 15 “ኑኒ ኑ ዬሌቴꬃን ኣይሁዳታፔ ኣቲን ኣይዛቤታ ማላ ናጋራንቻ ጊዶኮ።  
\v 16 ኣሲ ዬሱስ ኪርስቶሳን ኣማኖን ፂላና ኣቲን ዎጋ ናጎን ፂሎንታይሳ ኑ ኤሮስ። ሄሳ ጊሽ ዎጋ ናጎን ጊዶንታ ኪርስቶሳ ኣማኖን ኑ ፂላና ማላ ኑካ ቃሴ ዬሱስ ኪርስቶሳ ኣማኒዶስ። ዎጋ ናጎን ኦኒካ ፂሌና። \x * \xo 2:16 \xt ማዛ 143፡2፤ ኦሮ 3፡20፥22\x* 
\p  
\v 17 ኑ ኪርስቶሳን ፂላና ኮይኮ ኑ ናጋራንቻታ ጊዲዳይሲ ቆንጪ ኤሬቲዴስ። ሂስቲን ኪርስቶሲ ናጋራይ ዳሪ ዳሪ ባና ማላ ኮዪዜ? ኮዬና።  
\v 18 ታኒ ላሊዳይሳ ዛራዳ ታርካ ታ ኩሼራ ኬፂኮ ታካ ዎጋ ሞሪዳዴ ጊዲዳይሳ ኣማኔታይስ።  
\v 19 ታኒ ፆሳስ ዳና ማላ ዎጋ ባጋራ ሄ ዎጋስ ሃይቃዲስ።  
\v 20 ታኒ ኪርስቶሳራ ካቄታዲስ፤ ሃይሳፌ ጉዬ ታኒ ታስ ዲኬ፤ ጊዶ ኣቲን ኪርስቶሲ ታ ጊዶን ዴስ። ሃዒካ ታ ኣሾን ዲዛ ዱሳይ ታና ዶሲዲ ባና ታ ጊሽ ኣꬂ ኢሚዳ ፆሳ ና ቦላ ዲዛ ኣማኖን ዲዛ ዱሳ።  
\v 21 ታኒ ፆሳ ኪያቴꬅ ካዉሺኬ። ፂሎቴꬂ ዎጋ ናጎን ቤቲዛ ሚሽ ጊዲኮ ኪርስቶሲ ሜላ ሃዳ ሃይቂዴስ ጉሳካ!” 
\c 3  
\s1 ኣማኖን ዱስ ዎይኮ ዎጋ ናጎ 
\p  
\v 1 ኢንቴኖ ዩሺ ቆፖንታ ጋላቲያ ኣሳቶ! ኢንቴስ ባሌቶንታ ማላ ኢዛ ካቄቴꬃ ታ ኢንቴ ሲንꬃን ሚሲሌ ማላ ጊጊሳ ቤሳዲስኮ ሺን ኢንቴና ኦኔ ቢቲዳይ?  
\v 2 ኢንቴ ፂሎ ኣያና ኤኪዳይ ዎጋ ናጎኔዬ? ሳባኬቲዳ ቃላ ኣማኖኔ? ታ ሃኖ ኢሲኒዮ ኢንቴፌ ኤራና ኮያይስ።  
\v 3 ኢንቴ ሄሳ ማላ ቆፒ ኤሮንታ ኣሴ? ፆሳ ኣያናን ኦይኪዳይሳ ዛሪዲ ኣሾ ሃኖን ፖላናስ ዋዬቴቲ?  
\v 4 ቱሙ ኢንቴ ሃኖ ጋካናስ ዳቡሪዳ ዳቡርሳይ ጮ ሜላ? ጮ ሜላ ጊዲኮ ሃዳ ዳቡሪዴታ።  
\v 5 ፆሲ ኢንቴስ ኣያና ኢሚዳይኔ ኢንቴ ኣቻን ማላታ ኦꬂዳይ ኢንቴ ዎጋ ናጊዳ ጊሼዬ? ዎይኮ ኢንቴ ሲዪዳ ቃላን ኣማኒዳ ጊሼ? 
\p  
\v 6 ኣኔ ኢንቴ ኣብራሃሜ ጊሽ ቆፒቴ፤ ጌሻ ማፃፋን “ኢዚ ፆሴ ኣማኒን ኣማኖይ ኢዛስ ፂሎቴꬃን ቆዴቲዴስ” ጌቴቲ ፃፌቲዴስ። \x * \xo 3:6 \xt ሜꬌ 15፡6፤ ኦሮ 4፡3\x* 
\v 7 ሄሳ ጊሽ ኣማኒዛይቲ ኣብራሃሜ ናይታ ጊዲዳይሳ ዎዝናን ዎꬂቴ። \x * \xo 3:7 \xt ኦሮ 4፡16\x* 
\v 8 ኣይዛቤይ ኣማኖን ኣታናይሳ ኤሪዲ ፆሲ ካሴ ጌሻ ማፃፋን “ዴሬይ ዉሪ ኔ ባጋራ ኣንጄታና” ጊዲ ሚሺራቾ ቃላ ኣብራሃሜስ ዮቲ ዎꬂዴስ። \x * \xo 3:8 \xt ሜꬌ 12፡3\x* 
\v 9 ሄሳ ጊሽ ኣማኒዛይቲ ዉሪ ኣማኒዛ ኣብራሃሜራ ኢሲፌ ኣንጄቲዳይታ። 
\p  
\v 10 “ዎጋ ናጎን ኣማኔቲዛይቲ ዉሪካ ቃንጌꬃ ጋርሳን ዴቴስ። ዎጋ ማፃፋታን ፃፌቲዳይሳ ዉርሲ ኦꬆንታዴይ ኢዚ ቃንጌቲዳዴ” ጌቴቲ ፃፌቲዴስ።  
\v 11 “ፂሎ ኣሲ ኣማኖን ዴዔስ” ጊዛ ጊሽ ኦኒካ ፆሳ ሲንꬃን ዎጋን ኣቶንታይሲ ጌሻ። \x * \xo 3:11 \xt ኢብ 2፡4\x* 
\v 12 ዎጋይ ኣማኖን ፃጲቤና። ጊዶ ኣቲን “ዎጋታ ዉርሲ ናጊዛዴይ ሄ ኢዚ ናጊዳይሳን ዴዖን ዳና” ጌቴቲዴስ። \x * \xo 3:12 \xt ሌዌ 18፡5\x* 
\p  
\v 13 “ሚꬃ ቦላ ካቄቲዛ ኣሲ ቃንጌቲዳዴ” ጌቴቲ ፃፌቲዳ ጊሽ ኪርስቶሲ ኑ ጊሽ ቃንጌቲዳዴ ጊዲዲ ኑና ዎጋ ቃንጌꬃፌ ዎዚዴስ። \x * \xo 3:13 \xt ዛሬ 21፡23\x* 
\v 14 ኣብራሃሜስ ኢሜቲዳ ኣንጆይ ዬሱስ ኪርስቶሳ ባጋራ ዴሬስ ጋካና ማላ ኑና ዎዚዴስ። ሄሲካ ኑኒ ኣማኖን ፂሎ ኣያና ኤካና ማላ ሃኒዴስ። 
\s1 ዎጋኔ ሂዶታ ዮቲዳ ቃላ 
\p  
\v 15 ታ ኢሻቶ! ኣኔ ታ ኢንቴስ ኣሲ ባ ዱሳን ሃኒዛ ሚሽ ሌሚሶ ኢማይስ። ሃራይ ኣቶ ሺን ኣሲ ኢሲቶ ጫቂዳ ቃላ ኢሲቶ ጫቂዳፔ ጉዬ ኦኒካ ሻራናስ ዎይኮ ሃራ ኢዛ ቦላ ጉጃና ዳንዳዮንታይሳ ማላ ሃይሲካ ሄሳ ማላ።  
\v 16 ፆሲ ኣብራሃሜስ ዮቲዳ ቃላይ ኣብራሃሜሲኔ ኢዛ ዜሬꬃሳ። ጌሻ ማፃፋይ ዳሮ ኣሳስ ዮቲዛ ማላ “ኢዛ ዜሬꬃታስ” ጌና፤ ጊዶ ኣቲን ኢሲ ኣሳስ ዮቴቲዛ ማላ “ኔ ዜሬꬃስ” ጌስ። ሄሲካ ኪርስቶሳ። 
\p  
\v 17 ታ ጊዛይካ ሃይሳ፤ ኦይዱ ፄታኔ ሄꬑ ታሙ ላይꬃፌ ጉዬን ኢሜቲዳ ዎጋይ ካሴቲዲ ፆሲ ሚንꬂዳ ጫቆዛ ላሊዲ ቡሮ ሃናና ሂዶታ ቃላ ሻሬና። \x * \xo 3:17 \xt ኬሳ 12፡40\x* 
\v 18 ላታይ ዎጋን ሃኒዛኮ ሂዶታ ቃላን ጌላናስ ኮሼና ሺን፤ ፆሲ ባ ኪያቴꬃ ቃላን ኣብራሃሜስ ኢሚዴስ። \x * \xo 3:18 \xt ኦሮ 4፡14\x* 
\v 19 ሂስቲን ዎጋይ ኣዛስ ኢሜቲዴ? ዎጋይ ኢሜቲዳይ ኣሳይ ዎጋ ዬꬊ ኣꬊዛ ጊሽ ሄ ኡፋይሳይ ቤሲዛ ዜሬꬃይ ያና ጋካናሳ፤ ዎጋይ ዪዳይካ ኪታንቻታ ባጋራ ጋና ጊዲዛ ኢሳዴ ባጋራ ዪዴስ።  
\v 20 ጊዲኮካ ጋናዚ ኢሳ ባጋ ፃላ ፄሊዛዴ ጊዴና። ፆሲ ጊዲኮ ኢሳ ፃላ። 
\p  
\v 21 ሂስቲን ዎጋይ ሲንꬃፌ ፆሲ ዎꬃና ቃላ ዲጊዛዜ? ሙሌካ ዲጌና። ዎጋይ ኢሜቲዳይ ኣሲ ኢዛን ዴዖ ዴማናስ ጊዲዳኮ ቱሙካ ፂሎቴꬂ ዎጋ ባጋራ ቤታናኮሺን።  
\v 22 ቃሴ ጌሻ ማፃፋይ ሃይሲ ኣላሜይ ዉሪካ ናጋራን ቃሼቲዳይሳ ኣዋጄስ። ሄሲካ ኣሲ ዉሪካ ዬሱስ ኪርስቶሳ ኣማኖን ቤቲዛ ሂዶታይ ኣማኒዛይታስ ኡባስ ኢሜታናሳ። 
\p  
\v 23 ሃይሲ ኣማኖይ ያናፔ ካሴ ኑኒ ዎጋን ቃሼቲዲ ጎርዳን ዶስ።  
\v 24 ሄሳ ጊሽ ኑ ኣማኖን ፂላና ማላ ዎጋይ ኑና ኪርስቶሳኮ ጋꬃናስ ናጊዛዴ ማላ ጊዲዲ ኑና ናጊዴስ።  
\v 25 ሃዒ ቃሴ ሄ ኣማኖይ ዪዳ ጊሽ ሃይሳፌ ጉዬ ኑኒ ዎጋ ጋርሳን ዶኮ። 
\s1 ፆሳ ናይታ 
\p  
\v 26 ኢንቴ ዉሪካ ዬሱስ ኪርስቶሳ ኣማኖን ፆሳ ናይታ።  
\v 27 ኢንቴ ኪርስቶሳራ ኢሲኖ ጊዳናስ ፃማቄቲዳይቲ ዉሪካ ኪርስቶሳ ማይዖ ማላ ማይዒዴታ።  
\v 28 ኢንቴ ዉሪካ ዬሱስ ኪርስቶሳን ኢሲኖ ኣቲን ኣይሁዳኔ ጊሪኬ፥ ኣይሌኔ ጎቃ፥ ማጫኔ ኣዴ ጊዛ ዱማቴꬂ ዴና። ኢንቴ ዉሪካ ዬሱስ ኪርስቶሳን ኢሲኖ።  
\v 29 ኢንቴ ኪርስቶሳይታ ጊዲኮ ኢንቴ ኣብራሃሜ ዜሬꬃታ፤ ካሴ ኢሜቲዳ ሂዶታ ቃላ ማላ ኢንቴ ላታናይታ። \x * \xo 3:29 \xt ኦሮ 4፡13\x* 
\c 4  
\p  
\v 1 ታ ጊዛይ ዬሌቲዳ ናይ ላታይ ኢዛስ ጊዲኮካ ኢዚ ቢዲ ላታና ጋካናስ ኣይሌፌ ዱማ ጊዴና።  
\v 2 ኢዛ ኣዋይ ጊዳ ዎዴይ ጋካናስ ኢዚ ባና ዲቺዛይታ፥ ታማርሲዛይታ ኩሼን ጋምዔስ።  
\v 3 ኑካ ካሴ ኣያና ዮዖስ ጉꬃ ና ማላ ዲዛ ዎዴ ሃይሳ ሃ ኣላሜዛ ዎጋ ጋርሳን ሃሬቲ ዴዒዶስ።  
\v 4 ጊዶ ኣቲን ካሴ ባ ቆፒ ዎꬂዳ ዎዴይ ጋኪን ፆሳይ ማጫሳፔ ዬሌቲዲ ዎጋ ናጊዳ ባ ናዛ ኑስ ዬዲዴስ።  
\v 5 ሄሲካ ኑኒ ኢዛ ናይታ ጊዳና ማላኔ ዎጋ ጋርሳን ዲዛይታ ዎዛና ማላ ሃኒዴስ። \x * \xo 4:5 \xt ኦሮ 8፡15-17\x* 
\p  
\v 6 ኢንቴ ኢዛ ናይታ ጊዲዳ ጊሽ ፆሳ “ኣቦ” ጊዲ ፄይጊዛ ባ ናዛ ኣያና ኑ ዎዝናን ዬዲዴስ።  
\v 7 ሄሳ ጊሽ ሃይሳፌ ጉዬ ኔ ናፔ ኣቲን ኣይሌ ጊዳካ። ኔኒ ና ጊዲዳ ጊሽ ፆሲ ኔና ባይሳ ላቲዛዴ ሂስቲዴስ። 
\s1 ጋላቲያ ኣሳስ ጳዉሎሳ ቆፋ 
\p  
\v 8 ኢንቴ ፆሴ ኤራናፔ ካሴ ፆሴ ጊዶንታ ኤቃታስ ኣይሌታ።  
\v 9 ሃዒ ጊዲኮ ፆሴ ኤሪዴታ፤ ቃሴካ ፆሳን ኤሬቲዴታ። ሂስቲን ቃሴካ ጉዬ ሲሚዲ ጌዴ ጎዓይ ባይንዳ ጮ ዳቡሪሲዛ ቲሚርቴኮ ዋኒዲ ሲሚዴቲ? ሲሚዲ ቃሴካ ኣይሌቴꬃ ቃምባራን ዋፄታና ኮዬቲ?  
\v 10 ዱማ ጋላሳታ፥ ኣጊናታ፥ ዎዴታኔ ላይꬃታ ኢንቴ ቦንቼታ።  
\v 11 ታ ኢንቴናራ ዳቡሪዳይሲ ጮ ሜላ ጊዳንዴ ጋዳ ባባይስ። 
\p  
\v 12 ታ ኢሻቶ! ታ ኢንቴና ሚሳቲዳ ማላ ኢንቴካ ታና ሚሳታና ማላ ታ ኢንቴና ዎሳይስ። ኢንቴ ታና ኣይኮካ ቆሂቤይኬታ።  
\v 13 ኢንቴ ኤሪዛ ማላ ታ ኢንቴስ ኮይሮ ሚሺራቾ ቃላ ሳባኪዳይ ሳኮ ጋሶና።  
\v 14 ታ ሳኮይ ኢንቴስ ሜቶ ጊዲንካ ታና ሳሌቲቤይኬታ ዎይኮ ታና ሃራሴቲቤይኬታ፤ ጊዶ ኣቲን ኢንቴ ታና ፆሳ ኪታንቻ ማላኔ ሄሳፌካ ቦላራ ዬሱስ ኪርስቶሳ ማላ ሞኪ ኤኪዴታ። 
\p  
\v 15 ሂስቲን ሃዒ ሄ ኢንቴ ኡፋይሳይ ኣዋ ቢዴ? ኢንቴስ ሃኒዛዝ ጊዲዳኮ ኢንቴ ኢንቴ ኣይፌ ታስ ኬሲ ኢማናስ ጉዬ ጎንታይሳ ታ ኢንቴስ ማርካታይስ።  
\v 16 ታኒ ቱማ ኢንቴስ ኬሳ ዮቲዳ ጊሽ ኢንቴስ ሞርኬ ጊዳዲናሻ? 
\p  
\v 17 ሄይቲ ኣሳቲ ኢንቴና ባኮ ኤካናስ ዳቡሬቴስ ኣቲን ሎዖስ ዳቡሬቴና። ኢስቲ ኮዪዛይ ኢንቴና ኑፔ ሻኪዲ ባ ኣስ ሂስታናሳኮ!  
\v 18 ሎዖስ ሚንዳቴꬂ ሎዖ፤ ሄሲካ ሃናናስ ቤሲዛይ ኡባ ዎዴ ጊዲኮፌ ኣቲን ታ ኢንቴናራ ዲዛ ዎዴ ፃላ ጊዶፖ።  
\v 19 ታ ናይቶ ኪርስቶሲ ኢንቴ ዎዝናን ፃፌቲን ታ ቤያና ጋካናስ ኢንቴ ጊሽ ታ ሚፃታይስ።  
\v 20 ታ ኢንቴ ጊሽ ቆፋን ሜቶታዲስ። ታ ዳንዳዪዛኮ ሃዒ ኢንቴ ጊዶን ቤታዳ ኢንቴና ሎዔꬃ ታማርሲዛኮ ኣይ ማላ ዶሳዚና! 
\s1 ኣጋሮኔ ሳራ ሌሚሴቴꬅ 
\p  
\v 21 ኢንቴኖ! ዎጋ ጋርሳን ኣቃና ኮዪዛይቶ ኣኔ ታስ ዮቲቴ፤ ዎጋይ ኣይ ጊዛኮኔ ሲይቤይኬቲ?  
\v 22 ኣብራሃሜስ ኢሶይ ኣይሌፌ ኢሶይ ቃስ ጎቃይፌ ዬሌቲዳ ናምዑ ናይቲ ዲዛይሲ ጌሻ ማፃፋን ፃፌቲዴስ።  
\v 23 ኣዪሌፌ ዬሌቲዳ ናዚ ኣሾ ዎጋ ማላ ዬሌቲዴስ። ሃንኮ ጎቃይፔ ዬሌቲዳይሲ ኡፋይሳ ቃላ ማላ ዬሌቲዴስ። 
\p  
\v 24 ሃይቲ ናምዑ ማጫሳቲ ናምዑ ጫቆታ ቤሲዛይታ ጊዲዳ ጊሽ ሃይሲ ሌሚሶስ ኢሜቲዴስ። ኮይሮ ጫቆያ ሲና ዙማ ቦላ ጊዳሼ ኣይሌቴꬃስ ጊዲዛ ናይታ ዬሊዛሮ፤ ኢዛካ ኣጋሮ።  
\v 25 ሄሳ ጊሽ ኣጋራ ኣራቤ ቢታን ዲዛ ሲና ዙማ ጊሽ ጊዳዳ ሃዒ ዲዛ ዬሩሳላሜ ካታማዮ ሚሳታዉስ፤ ኢዛ ባ ናይታራ ኣይሌቴꬃን ዳዉስ።  
\v 26 ፑዴ ቦላ ሳሎን ዲዛ ዬሩሳላሜይ ጊዲኮ ጎቃ ጊዳዳ ዳዉስ፤ ኢዛካ ኑ ኣዮ።  
\v 27 “ኔኒ ዬሎንታ ማካራዬ ኡፋዬታ! ሃኔ ሚፃታ ኤሮንታሬ! ‘ኢሊሊ’ ጋ ዋሳ፤ ኣዚናይ ዲዛሪፔ ኣዚናይ ባይንዳሪ ናይቲ ዳሪዳ” ጌቴቲ ጌሻ ማፃፋን ፃፌቲዴስ። \x * \xo 4:27 \xt ኢሳ 54፡1\x* 
\p  
\v 28 ሄሳ ጊሽ ታ ኢሻቶ! ኢንቴካ ዪሳቃ ማላ ኡፋይሳ ቃላ ናይታኮ።  
\v 29 ኣሾ ሼኔ ማላ ዬሌቲዳይሲ ኣያና ዎልቃን ዬሌቲዳይሳ ጎዲዴስ፤ ሃዒካ ጎዴꬆን ዴስ። \x * \xo 4:29 \xt ሜꬌ 21፡9\x* 
\v 30 ጊዶ ኣቲን ጌሻ ማፃፋይ ቃሴ ኣይ ጊዜ? “ኣይሌዮ ኢዚ ናዛራ ዲጋ፤ ኣይሌ ናይ ጎቃይ ናራ ላቴና” ጌስ። \x * \xo 4:30 \xt ሜꬌ 21፡10\x* 
\v 31 ሄሳ ጊሽ ታ ኢሻቶ! ኑኒ ጎቃይ ናይታ ኣቲን ኣይሌ ናይታ ጊዶኮ። 
\c 5  
\p  
\v 1 ኑና ኪርስቶሲ ጌሺዳይ ኑኒ ጌሻቴꬃን ዳናሳ። ሄሳ ጊሽ ሚኒ ኤቂቴ፤ ናምዓንꬆ ኣይሌቴꬃ ቃምባራን ጌሎፒቴ።  
\v 2 ታ ኢንቴስ ጊዛይሳ ዎዝናን ዎꬂቴ፤ ኢንቴ ቃፃሬታና ኮይኮ ኪርስቶሲ ኢንቴና ኣይኔ ጎዔና ጋዳ ታ ጳዉሎሲ ኢንቴስ ዮታይስ።  
\v 3 ቃፃሬታና ኮዪዛይቲ ዉሪ ዎጋ ዉርሲ ፖላናይሲ ዶሳ ጊዶንታይሳ ታ ኢንቴስ ኢሳስ ኢሳስ ቆንጬን ዮታይስ።  
\v 4 ኢንቴኖ! ዎጋ ናጎን ፂላና ዋይቲዛይቶ፤ ኢንቴ ኪርስቶሳፔ ሻኬቲዴታ፤ ኢዛ ኪያቴꬃፌካ ሃኪዴታ።  
\v 5 ኑ ቃስ ኡፋይሳ ናጌቲዛ ፂሎቴꬃ ፆሳ ኣያና ባጋራ ኣማኖን ላሞቴꬃን ናጎን ዶስ።  
\v 6 ኣሲ ዬሱስ ኪርስቶሳን ዲኮ ቃፃሬቲን ዎይኮ ቃፃሬቶንታ ኣጊን ኣይኔ ጎዔና፤ ጎዓይ ዲዛይ ሲቆን ቆንጪዛ ኣማኖን ፃላ። 
\p  
\v 7 ካሴ ሎዖ ዎꬅ ዎፄታ ሺን፤ ሃዒ ኢንቴስ ꬉጴ ጊዲዲ ቱማስ ኢንቴ ኣዛዜቶንታ ማላ ኢንቴና ዲጊዳይ ኦኔ?  
\v 8 ሄሳ ማላ ባሌꬆይ ኢንቴና ፄይጊዳ ፆሳፌ ጊዴና።  
\v 9 “ጉꬃ ኢርሾይ ሊፄ ዉርሲ ዴንꬄስ” ጌቴቲዛ ማላ። \x * \xo 5:9 \xt 1ቆሮ 5፡6\x* 
\v 10 ኢንቴስ ሃራ ቆፋይ ዴና ጋዳ ታኒ ጎዳን ኣማኔታይስ፤ ኢንቴስ ቲኪ ጊዛዝ ኦꬂዛይ ኦና ጊዲኮኔ ኢዚ ባ ፒርዳ ኤካና። 
\p  
\v 11 ታ ኢሻቶ! ሃኖ ጋካናስ ታ ሳባኪዛይሲ ኣሲ ኣታናስ ቃፃሬታና ቤሴስ ጊዛዝ ጊዲዳኮ ሂስቲን ሃኖ ጋካናስ ኣዛስ ታና ጎዲዞ? ሄሳ ማላ ጊዲዳኮ ኪርስቶሳ ማስቃሌይ ኣሳስ ꬉጴ ጊዴናኮሺን።  
\v 12 ኢንቴስ ቲኪ ጊዛዝ ኦꬂዛ ኣሳቲ ጮ ዎጋራ ቃፃሬቴꬅ ኣጊዲ ሙሌራ ቃንፂ ዬጌቶ።  
\v 13 ታ ኢሻቶ! ኢንቴ ጌሻቴꬃስ ፄይጌቲዴታ፤ ኢንቴ ኢንቴ ጌሻቴꬃ ዛሪዲ ኢንቴስ ኣሾ ኣሞ ፖላናስ ጎዔቶፍቴ። ሄሳፌ ኢንቴ ኢንቴ ጋርሳን ሲቆን ኢሶይ ኢሳ ማዲቴ።  
\v 14 ዎጋይ ዉሪ ሺቄቲዲ ኢሲ ቃላን ቃሼቴስ፤ ሄሲካ “ኔኒ ኣሴ ኔ ማላ ዶሳ!” ጊዛይሳ። \x * \xo 5:14 \xt ሌዌ 19፡18\x* 
\v 15 ጊዶ ኣቲን ኢንቴ ኢሶይ ኢሳራ ሳፄቲዛይታ ጊዲኮ ኢንቴ ኢንቴ ጋርሳን ዉሮንታ ማላ ናጌቲቴ። 
\s1 ኣያናን ሲሜሬቴꬅ 
\p  
\v 16 ሄሳ ጊሽ ታ ኢንቴና ኣያናን ሲሜሬቲቴ፤ ቃሴካ ኣሾ ኣሞካ ፖሎፒቴ ጋይስ።  
\v 17 ኣሾይ ኣያናይ ኮዮንታዝ ኣሞቴስ። ኣያናይካ ኣሾይ ኮዮንታዝ ኣሞቴስ፤ ሃይቲ ኢሶይ ኢሳራ ባ ጋርሳን ኢፄቲዛ ጊሽ ኢንቴ ኢንቴ ኮይዳ ማላ ኦꬄኬታ። \x * \xo 5:17 \xt ኦሮ 7፡15-23\x* 
\v 18 ኢንቴ ኣያናን ዲዛይታ ጊዲኮ ዎጋስ ሃሬቲዛይታ ጊዴኬታ። 
\p  
\v 19 ኣሾ ኦሶይ ቆንጬን ኤሬቴስ፤ ሄሲካ ላይማቴꬅ፥ ቱናቴꬅ፥ ላይማ ካስ፥  
\v 20 ኤቃስ ጎይኖ፥ ቢታ፥ ኢፄቴꬅ፥ ኦሽ፥ ቃናቴቴꬅ፥ ሃንቆ፥ ባና ፃላ ዶሶ፥ ሻኬቴꬅ፥ ዙፔቴꬅ፥  
\v 21 ቃናቴቴꬅ፥ ማꬆቴꬅ፥ ኣላሜ ዬꬅ ዬፄꬂኔ ሄይታንታ ሚሳቲዛይታ። ታኒ ኢንቴስ ካሴ ዮቲዳ ማላ ሃዒካ ኢንቴ ናጌታና ማላ ቆፊሳይስ። ሄሳ ማላ ዱስ ዲዛይቲ ዉሪካ ፆሳ ካዎቴꬅ ላቴቴና። 
\p  
\v 22 ኣያና ኣይፌይ ጊዲኮ ሲቆ፥ ኡፋይስ፥ ሳሮቴꬅ፥ ዳንዳያ፥ ኪያቴꬅ፥ ሎዔቴꬅ፥ ኣማኔቴꬅ፥  
\v 23 ኣሽኬቴꬅ፥ ባርካ ባና ሃሮ፤ ሃይታንታ ማላ ዲጊዛ ዎጋይ ባዋ።  
\v 24 ዬሱስ ኪርስቶሳስ ጊዲዳይቲ ኣሾ ኢዛ ኢታ ቆፋራኔ ኢዛ ኢታ ኣሞቴꬃራ ኢሲፌ ካቂዳ።  
\v 25 ኑ ኣያናን ዳና ኮይኮ ኣኔ ኣያናን ሲሜሬቶስ።  
\v 26 ኑኒ ኢሶይ ኢሳ ኢታስ ዴንꬄꬂሼኔ ቃናቴቲሼ ጮ ሜላ ጬቄቲዛይሳ ኣኔ ኣጎስ። 
\c 6  
\s1 ኣስ ኡባስ ሎዖ ኦሶ 
\p  
\v 1 ታ ኢሻቶ! ኢሲ ኣሲ ናጋራ ኦꬂ ቤቲኮ ኢንቴ ቃስ ኣያናን ሎዖ ዲዛይቲ ኢዛ ኣሺኬቴꬃራ ዛራናስ ቤሴስ፤ ጊዶ ኣቲን ኔካ ኢዛዴ ማላ ፓጬቶንታ ማላ ኔ ሁዔስ ናጌታ።  
\v 2 ኢንቴ ኢሶይ ኢሳ ዴፆ ቶሆ ቶኪቴ፤ ሄሳ ማላ ኦሶን ኪርስቶሳ ዎጋ ፖሌታ።  
\v 3 ኢሳዴይ ኣይኔ ሃኖንታ ዲሼ ባና ጊታሲዛ ሚሳቲኮ ሄሳዴይ ባርካ ባና ባሌꬄስ።  
\v 4 ኢሲ ኢሲ ኣሲ ባ ኦሶ ባርካ ፓጪ ፄሎ። ሄሳፌ ጉዬ ሃራ ኣሳራ ባና ጊናሶንታ ዲሼ ኢዚ ባና ጬቂሲዛዚ ዴማና።  
\v 5 ኢሲ ኢሲ ኣሲ ባርካ ባ ቶሆ ቶካናስ ቤሴስ። 
\p  
\v 6 ቃላ ታማሪዛይ ኦኒካ ባ ታማሪዳ ሎዖ ሚሻ ባ ኣስታማሬዛራ ጊሼቶ። 
\p  
\v 7 ባሌቶፍቴ ፆሲ ቂሊጫ ኤሬና። ኣሲ ባ ዜሪዳሮ ኢዞ ዛሪ ማፃና።  
\v 8 ባ ኣሾ ኣሞ ኩንꬃናስ ዜሪዛዴይ ኣሾፔ ꬋይሲ ማፃና። ኣያና ኡፋይሳናስ ዜሪዳዴይ ጊዲኮ ኣያናፔ ሜርና ዴዖ ማፃና።  
\v 9 ኣኔ ኑ ሎዖ ኦሶ ኦꬃናስ ኣዛሎኮ፤ ኑ ኡፋይሲ ቃንፆንታ ኣጊኮ ዎዴይ ጋኪሺን ጋኪዳ ካꬅ ኑ ማፃና።  
\v 10 ሄሳ ጊሽ ኑስ ዳንዳዬቲኮ ኣሳ ኡባስ ሃራፔካ ኣማኒዛ ኣሳስ ኣኔ ሎዖ ኦꬆስ። 
\s1 ዉርሴꬃ ዞሬኔ ሳሮካ 
\p  
\v 11 ታኒ ታ ኩሼራ ኢንቴስ ኣይ ማላ ጊታ ፒዳሌን ፃፊዳኮኔ ኣኔ ፄሊቴ።  
\v 12 ጮ ካሬ ባጋራ ቤታና ኮዪዛ ኣሳቲ ኢንቴ ቃፃሬታና ማላ ዎልቃꬃና ኮዬቴስ። ኢስቲ ሄሳ ኦꬂዛይ ኪርስቶሳ ማስቃሌ ጊሽ ጊዲ ጎዴቶንታ ማላሳ።  
\v 13 ኢስቲ ኢንቴ ቃፃሬታና ማላ ኮዪዛይ ኢንቴ ኣሾን ጬቄታናስ ኮዪዛ ጊሽ ኣቲን ቃፃሬቲዳይቲ ዎጋ ናጊዛይታ ጊዴቴና።  
\v 14 ቃሴ ኣላሜይ ታስ፤ ታካ ኣላሜስ፤ ካቄቲዳ ጎዳ ዬሱስ ኪርስቶሳ ማስቃሌንፔ ኣቲን ሃራን ጬቆይ ታፔ ሃኮ።  
\v 15 ቃፃሬቲን ዎይኮ ቃፃሬቶንታ ኣጊን ኢዛስ ጎዓይ ባዋ። ጎዓይ ኦራꬃ ሜꬌቴꬅ ጊዴꬃ።  
\v 16 ሃይሳ ሃ ኣዛዞዛ ካሊዛ ኡባታሲኔ ፆሳ ዴሬ ጊዲዳ ኢስራዔሌ ኣሳታስ ሳሮቴꬂኔ ማሮቴꬅ ጊዶ። 
\p  
\v 17 ታኒ ዬሱሳ ማላታ ታ ኣሳቴꬃን ቶካዲስ፤ ሄሳ ጊሽ ሃዒ ታና ኦኒካ ዋይሴና። 
\p  
\v 18 ታ ኢሻቶ! ጎዳ ዬሱስ ኪርስቶሳ ኣꬎ ኪያቴꬂ ኢንቴናራ ጊዶ! ኣሚን።